2 Timothy
2 Timotheo1 An Paulo jaote mar Kristo Yesu kuom dwaro mar Nyasaye, kaluwore gi singo mar ngima man kuom Kristo Yesu, 2 ni Timotheo nyathina mahero, Ng'wono gi kech kod kuwe moa kuom Nyasaye Wuoro kod Kristo Yesu Ruodhwa. Jip Mondo Obed Jadiera 3 Agoyo erokamano ni Nyasaye ma atiyone gi chuny maler maonge bura, mana kaka kwerena bende notiyone, ka apari odiechieng' gotieno e lemona mapile. 4 An ka aparo kaka pi wang'i ne chwer to agombo neni ahinya mondo abed gi mor mogundho. 5 Oseparna kuom yieni maratiro, mane okuongo ne ni ei Lois dani gi Yunis minu. Ang'eyo kendo aonge kiawa ni in bende yieno ni e iyi bende. 6 Mano emomiyo ajiwi mondo ichier mich main-go mane Nyasaye omiyi chieng' mane aketo lweta kuomi. 7 Nikech Nyasaye ne ok omiyowa chuny mar bedo ngoche to nomiyowa chuny mar bedo gi teko, gi hera kod ritruok. 8 Kuom mano kik wiyi kuodi kuom timo nend Ruodhwa kata nenda an ng'ate motue. Kar timo kamano to yie mondo osandi koda nikech Wach Maber, kuom teko mar Nyasaye, 9 ma nowarowa kendo noluongowa mondo wadag e ngima maler. Mani ok nikech wasetimone gimoro maber to nikech dwarone owuon kendo kuom ng'wonone. Ne omiyowa ng'wononi kuom Kristo Yesu kane piny pok obetie, 10 to sani koro ose-fwenynwago kuom biro mar Jawarwa, Kristo Yesu. En ema osetieko tho mi okelo ngima kod ngima mak rum e ler kuom wach maber. 11 Ne oyiera mondo abed jalendo kendo jaote gi japuonj mar Wach Maberni. 12 Mano emomiyo isanda kama. To wiya ok kuodi, nikech ang'eyo Jal ma aseyie kuome, kendo ang'eyo chutho ni onyalo rito ngimana gi chunya ma asechiwone nyaka ndalo nogono. 13 Mano mane i winjo kuoma, ritgi kaka ranyisi mar puonj maber, kod yie gi hera manie Kristo Yesu. 14 Rit mwandu maber mosemiyi, kirite gi teko mar Roho Maler modak e iwa. 15 Ing'eyo ni ji duto ma noa e piny Asia oseweya, koda ka Fugelo gi Hermogene. 16 Mad Nyasaye kech jood Onesiforo nikech nosiko kokonyo chunya kendo wiye ne ok okuot kod nyoroche-ga. 17 To ne omanya matek nyaka onwang'a kane obiro Rumi ka. 18 Alamo mondo Ruoth okeche e odiechieng'no mar Ruoth. Ing'eyo maber kaka nokonya e yore mang'eny e Efeso kuno. 1 To in, Wuoda, bed motegno kuom ng'wono manie Kristo Yesu. 2 Gigo mane iwinjo ka apuonjo e nyim joneno mathoth keti e lwet joma inyalo geno, manyalo puonjo jomamoko bende. 3 Bed modhil e chandruok kaachiel kodwa kaka jalweny maber mar Kristo Yesu. 4 Onge jalweny ma duodore gi weche mag dala nimar odwaro mondo obed malong'o kowinjo jatende ma chike. 5 Kamano bende e kaka jang'wech mapiem e ng'wech ok nyal yudo mich mar jaloch ka ok oringo ka-luwore gi chike moketi. 6 Japur matiyo matek bende ema owinjore okuong obil nyak mar cham. 7 Par matut kuom gima awacho. Ruoth biro miyi rieko mar winjo tiend weche duto. 8 Par Yesu Kristo mane ochier oa kuom joma otho kendo mane oa e anyuo-la mar Daudi. Ma e wach Maber mayalo, 9 momiyo isanda kendo momiyo orida gi nyororo ka gima an jamahundu. To wach Nyasaye ok otwe gi nyororo. 10 Omiyo adhil kuom duto nikech adwaro ni joma Nyasaye oyiero bende oyudie warruok miyudo kuom Kristo Yesu, kendo makelo duong' mochwere. 11 Ma eri e wach madier ka wasetho kode, to wanabed mangima kode bende; 12 ka watimo kinda, to wana loch kode bende, ka wakwede, to nokwedwa en bende; 13 ka waonge gi yie to pod en mana jaadiera nikech ok onyal kwedore owuon. Jatich Ma Nyasaye Oyiego 14 Med paro nigi kisiemogi e nyim Nyasaye ni giwe dhawo kuom weche maonge ohala ma ketho mana chuny joma winjogi. 15 Tem matek kaka inyalo mondo, ichiwri ni Nyasaye kaka jal miyiego kaka jatich ma wiye ok kuodi, ma puonjo kare Wach mar adiera. 16 Pogri kod mbekni mag oyuma manono mag piny nikech jok moketo chunygi e gik makamago medo bedo mabor moloyo gi Nyasaye. 17 Puonj jogo biro landore ka adhola ma landore. Achiel kuomgi gin Humenayo gi Fileto, 18 ma osebayo yoo moweyo adiera. Giseweyo adiera ka gipuonjo ni chier osetimore, kendo giketho yie mar ji moko. 19 Kata kamano mise mongirore mar Nyasaye ochung' motegno kendo ondikie ndiko ma ok ruchre mawacho ni, "Ruoth ong'eyo joge", kendo ni, "Ng'ato ka ng'ato maluongo nying Ruoth nyaka pogre gi timbe maricho." 20 E ot maduong' ok nitie gige tedo molos gi dhahabu kata kende, to moko bende olosi gi bao kata lowo. Moko itiyogo tije mogen, to moko itiyogo tije atija. 21 Ka ng'ato opwodhore oa e puonj mochido to enobed kaka gir tich mitiyogo tije mogen. 22 Enodok ng'at maler ma Ruoth oyiego kaka jatichne makare kendo moikore tiyo tich moro amora maber. —Ring iwe gombo maricho mag jomatindo. Ket chunyi mar luwo ngima maler, gi yie, gi hera, kod kwe, ka achiel gi joma lamo Nyasaye gi chuny maler. 23 Pogri chuth gi mino wach mofuwo maonge rieko, king'eyo ni gikelo dhawo. 24 To jatich Ruoth ok owinjore bed jad-haw, to onego obed mang'won gi ji duto kendo onego obed japuonj molony mahore mos. 25 Joma dagi puonjne nyaka orie gi muolo, ka en gi geno ni Nyasaye nyalo miyogi thuolo mar lokruok mi ging'e adiera, 26 kendo kogeno ni pachgi nyalo yawore mi gitony gia e obadho mar Jachien moseketogi e twech mar timo dwarone.
Rem Luoro Nyasaye E Ndalo Giko 1 To ng'e malong'o ni kinde mag chandruok nobedie e ndalo giko. 2 Ji nobed koherore kendgi kendo kohero pesa. Ginibed josunga, jong'ayi, jomayanyo ji, joma ok winj jonywolgi, joma ok go erokamano, kendo joma ok ler, 3 jogi nobed joma onge hera maok we ni ji richogi, ma ketho nying ji; maok ritre, jomahundu, kendo joma ok ohero ber, 4 ginibed andhoke, joma mwomore, joma okuot gi sunga, joma ohero mor moloyo Nyasaye, 5 gi nenore ka joma olu-oro Nyasaye to ngimagi kwedo teko mare. Pogri chuth gi joma kamago. 6 Joma kamago ema thurore e miech ji kendo gihoyo mon ma pachgi yomyom mogangore gi kit richo mayoreyore kendo ma gombo maricho rundo pachgi koni gi koni, 7 mon makamagi oikore mar winjo puonj to kata kamano ok ginyal chopo e okang' mar rwako adiera. 8 Mana kaka Janes gi Jambres nokedo gi Musa e kaka jogi bende kedo gi adiera, joma pachgi osekethore kendo jogo ma osek-wedi kaluwore gi yie. 9 To ok ginidhi mabor nikech fupgi biro nenore ni ji duto mana kaka notimore ni jogo. Chik Ma Paulo Omiyo Timotheo 10 In, to kata kamano ing'eyo puonj na duto, gi kit ngimana, kod gik machano timo e ngimana; gi yie mara, gi kindana, kod herana, gi dhilna, 11 kod sand gi chandruok mara, gik moko duto mane otimorena Antiokia gi Ikonio kod Lustra, kaka ne adhil e sand mager! To Ruoth noresa kuom sandgo duto. 12 Chutho, ochunore ni ng'ato ang'ata madwaro dak e ngima maler moluoro Nyasaye ka en e achiel gi Kristo Yesu, nyaka ne sand, 13 kata kamano, joma richo kod joma keto korgi to biro medo bedo joma richo moloyo, ka gidhi nyime gi wuondo ji kendo ji bende wuondogi. 14 In to nyaka idhi nyime kimako gik misepuonjori kendo ming'eyo ni adier chuth, nikech ing'eyo kit ngima joma nopuonji, 15 bende nikech nyaka a e tinni isebedo king'eyo weche manie Muma Maler ma nyalo miyo ibed mariek e warruok kuom yie kuom Kristo Yesu. 16 Weche duto manie Muma oa kuom much N)asaye kendo konyo kuom puonjo ji, kendo kuom kwero gik maricho, kendo kuom rieyo ji, kendo kuom tiego ji mondo obed joma kare, 17 mondo ng'at Nyasaye obed molony chuth ni tich moro amora maber. 1 E nyim Nyasaye kendo e nyim Kristo Yesu mabiro ng'ado bura ni joma ngima gi joma otho, kendo nikech obiro duogo, gi Pinyruodhe, amiyi chik ni: 2 Yal Wach. Ikri mar timo mano kinde duto, kata piny rach kata piny ber, kuom rieyo ji, kuom kwero ji, kendo kuom jiwo ji gi kinda duto, kilero ni ji tiend weche adimba. 3 Nikech ndalo biro chopo ma ji ok nodwar chiko itgi ni puonj madier. Makmana giniluw puonj mamit mar dwachgi giwegi kendo ginichok to jopuonj mathoth mondo onyisgi gik ma itgi masakni gombo winjo. 4 Ginitamre winjo adiera ka gi chiko itgi ni sigendini manono. 5 In to nyaka ine ni iritori kinde duto; kidhil e chandruok kendo kitimo tiji kaka jaland wach. Tim tijegi duto monego itim kaka jatich Nyasaye. 6 An to sana osechopo michiwae kaka misango miolo oko, sana mar ae pinyni osechopo. 7 Asekedo lweny maber, aseringo mi atieko ng'wech, aserito yie 8 Sani koro okanna osimbo mar ngima makare, ma Ruoth, ma en jang'ad bura makare, biro sidhona e odiechieng'no. Ok an kenda ema nomiyago, to nomi ji duto mosebedo ka geno duoke. Weche Paulo Owuon 9 Tem matek mondo ibi ira piyo, 10 nikech Demas oseringo oweya kenda, nikech nohero piny masani, modhi Thesalonika. Kreske to osedhi Galatia, kendo Tito osedhi Dalmatia. nLuka kende ema nikoda ka. Many Mariko mondo ibi kode ira, nikech okonya e tija mar Wach Maber. 12 Tukiko to aseoro Efeso. 13 Ka ibiro to ikelna koda mane aweyo ir Karpo e dala mar Troa, kod kitepega, to moloyo mago molos gi pien. 14 Aleksanda ma jatheth muia noti-mona malit ndi. Ruoth owuon nochule kuom gik mosetimo. 15 In bende tang'ne, nikech okwedo puonjwa gi tekre duto. 16 Kane oyala mokuongo, onge ng'ama nodok jakora, to ji duto noweya. Mad Nyasaye kik ket richoni e wigi! 17 To Ruoth nochung' batha momiya teko, mi ne ayudo teko mar dhi nyime gi lando wach nyaka chop ogendini duto winje. Noresa bende e dho sibuor. 18 Omiyo ang'eyo ni Ruoth pod biro resa kuom gimoro amora marach mad-waro hinya nyaka chop atundi e Pinyruodhe mar polo. En ema mondo oyud duong' mosiko nyaka chieng'. Amin. Mos Mogik 19 Mosna Priskila gi Akula, kod jood Onesiforo. 20 Erasto nodong' Korintho to Trofimo to naweyo ka tuo Mileto. 21 Tem matek mondo ichop ira ku kapok ndalo ng'ich ochopo. Yubulo omosi. Pude gi Lino kod Klaudia, kaachiel gi jowete duto bende jomosi. 22 Mad Ruoth rit chunyi. Ng'wono mondo obed kodi.
|