2 Thesalonika

2 Thesalonika 1

1 Paulo, Sila, gi Timotheo Ne kanisa mar jo-Thesalonika, mantie kuom Nyasaye Wuonwa kod Ruoth Yesu Kristo. 2 Ng'wono gi kuwe moa kuom Nyasaye Wuoro kod Ruoth Yesu Kristo obed kodu.

Duoko Erokamano kod lemo

3 Nyaka waduokne Nyasaye erokamano kinde duto nikech un jowetewa kendo owinjore watim kamano nikech yie ma ungo medo bedo motegno, kendo hera muherorugo ng'ato gi ng'ato bende medore. 4 Kuom mano wasebedo ka wap-woyou e kind kanise Nyasaye, kawanyiso-gi kuom kindau kod yieu motegno momiyo udhil e dier sand kod tem duto muyudo. 5 Magi duto nyiso ni buch Nyasaye nikare, nikech bang' neno sand kod tem to e giko nokwanu kaka joma owinjore yudo gweth mar Pinyruoth. 6 Nyasaye en ng'ama kare omiyo obiro sando joma sandou mana kaka gin bende gisandou, 7 to un muyudo sand sani obiro miyou yueyo, kaachiel gi wan bende. Mano notimre chieng' ma Ruoth Yesu nofwenyre e mach makakni kolor oa e polo, kaachiel gi malaika mage maroteke. 8 Enokumjoma okia Nyasaye kendo maok orito puonj mar Injili mar Ruodhwa Yesu. 9 Giniyud kum ma en lal manyaka chieng', koriem-bogi oko mabor e nyim Ruoth kendo mabor gi tekone man gi duong' mar nyalone 10 e odiechieng'no ma noduogie mondo joge maler omiye duong' kendo joma oyie duto orange kawuoro. Ma oriwo nyaka un, nikech ne uyie gi wach mane wakelonu. 11 Ka un-gi gima chalo kama e pachu, to mano emomiyo walomonu pile, mondo omi Nyasach wa okwanu kaka joma owinjore gi gima oluongoue, kendo gi telone ochop dwaro mabeyo duto ma un-go kod tije duto mutimo nikech yie ma un-go. 12 Walemo kama mondo nying Ruodhwa Yesu Kristo oyud duong' e dieru, lendo mondo un bende uyud duong' kuome. Mano mondo otimrenu kuom ng'wono mar Nyasachwa gi Ruoth Yesu Kristo.

2 Thesalonika 2

Ng'at Mochayo Chik

1 Kuom wach biro mar Ruodhwa Yesu Kristo kendo kaka ibiro chokowa kanyakla kuome wakwayou, jowetewa, 2 ni kik uyie ng'ato ochand pachu kata obwogu gi wach mokor, kata milome, kata barua moro miwacho ni oa irwa, mawacho ni odiechieng' mar Ruoth ose-chopo. 3 Kik uwe ng'ato wuondu e yo moro amora, nikech odiechieng'no ok nobi nyaka ng'anyo maduong* chopi, kendo nyaka ng'at mochayo chik fwenyre, ma en jal mochanne tho e mach manyaka chieng'. 4 Obiro kwedo kendo miyore duong' moloyo gimomoro amora miluon-goni Nyasaye kata milamo mondo en owuon obedi ei hekalu mar Nyasaye kolando owuon ni en Nyasaye. 5 Donge unyalo paro ni ne anyisou gigi kane an kodu? 6 To koro ung'eyo gima pod omone fwenyore, mondo obi mana e kinde moketne. 7 Teko mopondo mar tij chayo chik koro osechako tich, to jal matame nodhi nyime katame nyaka kinde manogole oko. 8 Bang'e jal mochayo Chik nofwenyre, to Ruoth Yesu kobiro gi duong'ne duto miwuoro, nonege gi muya moa e dhoge kendo notiek tekone duto. 9 Jal mochayo Chikno nobi kaka gir tich mar Satan ka en gi teko duto mar timo honni gi ranyisi mag miriambo, 10 bende kokonyore gi kit wuond maricho duto mondo owitgo joma lal. Jogo lal nikech ne gitamore hero adiera mondo eka giyud warruok. 11 Kuom mano Nyasaye oronigi teko maduong' marundo pachgi mi giyie gi weche mag miriambo, 12 omiyo Ruoth nong'ad bura ni ji duto motamore yie adiera, ka gihero mana timo richo.

Chung Motegno

13 To nyaka waduokne Nyasaye erokamano ndalo duto nikech un, jowetewa ma Ruoth ohero, nikech Nyasaye noyierou nyaka aa chakruok mondo owaru kendo mondo omi ngimau odok maler kuom teko mar Roho Maler kendo kuom yie muyiego kuom adiera. 14 Mano emomiyo noluongou kane urwako Wach Maber mane wayalonu mondo un bende uyud duong' mar Ruodhwa Yesu Kristo. 15 Kuom mano, jowetewa, chunguru motegno, kendo makuru matek puonj mane wapuonjou gi dhowa kata gi baru-pewa. 16 Mad Ruodhwa Yesu Kristo owuon kod Nyasaye Wuonwa, ma noherowa momiyowa jip mosiko kod geno maber, kuom ng'wonone, 17 ojiw chunyu kendo omiu teko mar timo kendo wacho weche mabeyo.

2 Thesalonika 3

Paulo Okwayo Lamo

1 Mogik, Jowetewa, lemnwauru mondo Wach mar Ruoth olandre piyopiyo kendo mondo ji omi wachno duong', mana kaka notimore e dieru. 2 Lemnwauru bende mondo Nyasaye oreswa e lwet joma timbegi mono kendo ma chunygi rach, nikech ji duto ok nigi yie, motegno. 3 To Ruoth en jaadiera, omiyo obiro miyou teko kendo obiro ritou e lwet Ng'ama Rach. 4 Wan gi chir kuom Ruoth ni utimo kendo ubiro medo timo gik mawachikou. 5 Mad Ruoth ta chunyu mi uchopi e hera mar Nyasaye kod kinda mar Kristo.

Siem Kuom Budho Abudha

6 E nying Ruoth Yesu Kristo, wachik-ou, jowetewa, mondo upogru gi jowete ma budho abudha kendo ok lu puonj mane uyudo kuomwa. 7 Nikech un uwegi ung'eyo ni onego ulu ranyisi mar kit ngimawa. Ne ok wabudh abudha kane wan kodu, 8 kendo kata chiemb ng'ato ne ok wachamo maok wachulo. To ne watiyo odiechieng' gotieno, kawatiyo gi lwetwa kendo wanyagore gi tich matek mondo kik wami ng'ato moro amora kuomu ting' mapek. 9 Ne watimo kamano ok nikech ne waonge gi ratiro mar yudo kony moa kuomu, to ne wad-waro mondo wadoknu ranyisi maber munyalo luwo. 10 Nikech kata e kinde mane wan kodu ne wamiyou chik ni, "Ka ng'ato budho abudha maok odwar tiyo to kik ochiem." 11 Wawinjo ni jomoko kuomu budho abudha. Ok giti, tije jowetegi ema gikeloe weche manono. 12 E nying Ruoth Yesu Kristo, wachiko kendo wasiemo joma kamago mondo gibed mos kendo giti matek mondo giyud yo ma gikonyorego. 13 To un, jowetena, kik uol gi timo maber. 14 Ka ng'ato ang'ata otamore luwo weche mawandikonu e baruwani to ng'iu-ru ng'atno maber. Kik uriwru kode, mondo eka wiye okuodi kuom timne mobam. 15 Kik ukawe kaka jasigu, to siemeuru asiema kaka owadu kuom Ruoth.

Mos Mogik

16 Koro mad Ruodh kuwe owuon miu kuwe kinde duto kendo e yore duto. Ruoth obed kodu uduto. 17 An Paulo awuon ema andikonu mosni gi lweta awuon, ma en kaka sei ma atiyogo e barupena duto. Kamano e kaka andiko. 18 Ng'wono mar Ruodhwa Yesu Kristo obed kodu uduto.