2 Peter

2 Petro

2 Petro 1

1 An Simon Petro, jatich kendo jaote mar Yesu Kristo, Andikonu un joma oseyudo yie ma nengone tek kaka marwa, kuom tim makare mar Nyasachwa kod Jawarwa Yesu Kristo. 2 Ng'wono kod kuwe mogundho obed kodu kumedo ng'eyo Nyasaye kod Yesu Ruodhwa.

Miyo Luong Mar Ng'ato Kod Yierone Bedo Adiera

3 Tekone maduong' osemiyowa gik moko duto ma wadwaro mar ngima, kendo luoro Nyasaye, kuom ng'eyowa mar Jal mane oluongowa kuom duong'ne owuon kod berne. 4 Kuom magi osemiyowa singruokge madongo kendo ma nengogi tek, mondo e kuom gigi unyalo kawo kit Nyasaye kendo mondo utony ua e kethruok ma gombo maricho mag pinyni Mo. 5 Kuom mano, temuru matek kaka unyalo mondo umed yieu gi ber, ber to meduru gi ng'eyo; 6 ng'eyo to meduru gi ritruok, to ritruok meduru gi kinda, kinda meduru gi luoro Nyasaye, 7 luoro Nyasaye meduru gi ng'wono mar owete; to ng'wono mar owete to meduru gi hera. 8 Nikech ka un-gi kit timbego mogundho, to gibiro geng'ou mondo kik ubed joma nono maok nyag olemo e ng'eyo ma ungo kuom Ruodhwa Yesu Kristo. 9 To ka ng'ato onge gi kidogi e ngimane to en ng'ama neno machiegni kendo ma muofu nimar wiye osewil ni ne osepuodhe oweyo richoge machon. 10 Emomiyo, jowetena, meduru bedo gi siso mar loso luongu kod yiero maru kare. Nikech ka utimo gigi to ok unupodhi, 11 kendo unuyud rwak maratipo ei Pinyruoth mochwere mar Ruodhwa kendo Jawarwa Yesu Kristo.

Koro Mar Ndiko

12 Omiyo pod abiro mana medo paronu wechegi, kata obedo ni ung'eyo kendo uguroru motegno e adiera ma koro un-go. 13 Aparo ni en gima ber mondo achiew pachu ka pod anie kiru mar ringruokni, 14 nikech ang'eyo ni achiegni weyo kiruni mana kaka Ruodhwa Yesu Kristo oseny-isa maler. 15 Kendo abiro temo matek mondo ane ni ka aseweyou to ubiro siko kuparo gigi. 16 Ne ok waluwo sigendini ma dhano oloso gi riekone kane wanyisou kuom teko kod biro mar Ruodhwa Yesu Kristo, to wawegi ne wan joneno mar duong'ne. 17 Nikech ne oyudo luor kod duong' kuom Nyasaye Wuoro kane duol obirone moa e Duong' Mamalo Moloyo, ni, "Ma e Wuoda mahero ma chunya morgo!" 18 Wan wawegi ne wawinjo duolni mane oa e poloni, kane wan kode ewi got maler. 19 Omiyo wan-gi weche jonabi ma osel-ernwa tiendgi. Ka uchiko itu ne wechegi to ubiro konyoru, nikech gichalo gi ler marieny ka aa e mudho, nyaka chop odiechieng'no yawre mi ler mar sulwe mokinyi meny chunjeu. 20 To moloyo mago duto, nyaka ung'e ni onge wach mokor mag Muma ma janabi nyalo loko tiendgi gi pache owuon. 21 Nikech weche mokor manie muma ne ok owuok e pach dhano, to Nyasaye ema nomiyo ji owuoyo, ka gin e bwo teko mar Roho Maler.

2 Petro 2

Jopuonj Mag Miriambo Kod Kethruokgi

1 To jonabi mag miriambo bende ne nitie e kind ji kinde machon, mana kaka jopuonj mag miriambo bende biro bedo e dieru. Gibiro kelo akwala puonj mag miriambo maketho ji, kagikwedo nyaka Ruoth mane ochweyogi (to mano nomi gitiekre kendgi piyo piyo nono!) 2 Ji mathoth nolu kit ngimagi mobam makelo wichkuot, kendo ginimi ji nocha yo mar adiera. 3 Nikech wuochgi mar dwaro gik malang'jopuonj gi nopiag dhogi gi sigendini magiseloso miriambo malombo ji; mondo gimau mwandu. To kum margi mane oiknegi chakre chon oliero e wigi, kendo lethruokgi ok nindi. 4 Ka Nyasaye ne ok oweyo kata mana malaike mane otimo richo, to ne owitogi e gehena, koketogi e mudho mandiwa ka girito kumgi; %a nokumo koda ka piny machon, e kinde mane omiyo pi oyueyo joma ochayo Nyasaye, to Noa mane yalo mondo ji otim timbe makare kaachiel gi ji abiriyo mamoko, to ne oreso; 6 ka Nyasaye nong'ado bura ni Sodom gi Gomora mine owang'o joma odakie miergo molokore buru, kendo mi oketogi ranyisi mar gima biro timore ni joma ochayo Nyasaye; 7 ka Nyasaye noreso Lut, ng'at makare, mane chunye chandore malit nikech ngima mochido mar joma ne ochayo chik, 8 (nikech ne en ng'at makare, chunye ne chande malit kane oneno kendo owinjo timbe maricho ma tieng' mane odakgo timo pile ka pile); 9 ka en kamano, to kare Ruoth ong'eyo kaka dores joma oluore kuom tembe ma giyudo kendo ong'eyo kaka okano joma richo ni kum chieng' Bura, ka gidhi nyime kod kumgi. 10 Mani en adiera kuom jogo machopo dwaro mochido mag ringregi kendo mochayo loch. 11 Jogi wengegi tek kendo opong' gi achaya, kendo ok giluoro kata mana wuoyo marach kuom joloch mag polo, nma kata mana malaike man-gi teko gi duong' moloyogi ok nyal wuoyo marach kuom chwechgo e nyim Ruoth Nyasaye. 12 To jogi wuoyo marach ka gi yanyo nyaka gik maok giwinj tiendgi. Gichalo le maonge rieko, mager, maonge paro, mane ochwe mana mondo omaki onegi. Jogi biro lal nono mana ka le mag bungu. 13 Ibiro chulgi chandruok kar chandruok ma gisekelo. Giwinjo maber ka gichopo gombo duto mag ringregi ratiro e nyim ji. Ka gidwanyore kendo gichopo gombogi maricho e chokruogeu mag sawo to gichalo mbelni kod gik motop. 14 Wengegi ochiek ni terruok kendo richo mitnegi maok giwe. Giywayo mon may-omyom mondo gitimgo richo, kendo gilony e wuoro. Jogi okuong' adier! 15 Gisebaro giweyo yo matir mi girwenyo ka giluwo yor Balaam wuod Beor, mane ohero misach richo. 16 To pundane ne okwere kuom timne marachno, (kata obedo ni en le maok wuo kamano, to ne owuoyo gi dwond dhano mi ogeng'o neko janabino). 17 Jogi gin sokni ma pi ongee kendo gin ong'weng'o ma yamo tero. Okan nigi mudho mandiwa molil ti. 18 Nikech dhcgi golo weche manono mag sunga mopong' gi gombo maricho mag kit dhano mohero richo, mondo gimi joma tinde eka tony aa kuom joma olal tim richo. 19 Gisingo ni jogi thuolo to gin giwegi gin wasumbini mag richo makelo kethruok (nikech dhano en misumba gimoro amora moloyo ngimane). 20 Nikech ka ji osetony oweyo kethruok mar piny, kuom ng'eyo Ruodhwa kendo Jawarwa Yesu Kristo, eka bang'e gichako gidok e piny mi giga-jore kode kendo oloyogi, to achien gidoko maricho moloyo kaka ne gichalo mokuongo. 21 Dine obedo maber moloyo mondo kik ging'e yor ngima makare moloyo ng'eye eka bang'e achien giloko ng'egi ni chike mopwodhi mane omigi. 22 Gima osetimorenigi chopo adiera mar ngero mawacho ni, "Guok odok nang'o ng'okne moseng'ogo", kendo ni, "Nguruwe moselwoki ochako odok dwanyore e chuodho."

2 Petro 3

Odiechieng Ruoth

1 Osiepena mageno, maa koro en baru-pa mar ariyo ma asendikonu. Asendikonugi giduto kargi ariyo mondo aparnu kendo achiew pachu obed moyawore. 2 Adwaro ni mondo upar weche mane jonabi maler okoro chon kod chik mane omiu koa kuom Ruodhwa kendo Jawarwa kokadho kuom joote magu. 3 Mokuongo tik tik, nyaka ung'e ni e ndalo mogik jomoko ma charo ji nobi ka gicharou kendo ka giluwo gombogi maricho. 4 Ka gipenjou ni "Ruodhu mane onego oduogino to ere? Donge nyaka ne kwerewa tho gik moko osebedo mana machalre nyaka aa chakruok piny!" 5 To jogi wigi wil mar oyiem ni chon gilala wach Nyasaye nomiyo polo obedo kendo piny ne ochwe koa kuom pi kendo ei pi. 6 Kendo pi nogo bende ema Nyasaye nopong'ogo piny machon mokethego. 7 Kuom wach nogo ema omiyo polo gi piny masani nitie, kendo okan ni mach. Okan-gi nyaka chop odiechieng'no ma joma ochayo Nyasaye nong'adnigi bura mi notiekgi chuth. 8 To wiu kik wil gi gimoro achielni osiepena mageno: Ni kuom Ruoth odiechieng' achiel chaire gi higini alufu achiel, kendo higini alufu achiel chaire gi odiechieng' achiel. 9 Ruoth ok dhi mos kuom chopo singruokne, kaka jomoko paro. Un ema oweyonu thuolo mondo ulokru, nikech ok odwar ni ng'ato olal kata achiel, to odwaro mondo ji duto olokre owe richogi. 10 To odiechieng Ruoth nobi ka jakuo. E odiechieng'no polo noleny nono gi mor ma dino it, kendo gik mochue manie kor polo nowang' mi keth chuth, to piny gi gik moko duto manie iye nolal nono. 11 Ka gigi duto ibiro kethi kama, loro onego ubed joma chalo nadi? Onego udag ngima maler kendo moluoro Nyasaye, 12 ka urito odiechieng' mar Nyasaye, kendo ka utemo beru mondo ochop piyo. Odiechieng'no polo nowang' kendo nokethe kendo chuech mag polo noleny kawang'. 13 Wan to warito gik ma Nyasaye osesingonwa, ma gin polo manyien gi piny manyien, kama timbe makare lilo ema noyudre. 14 Emomiyo, osiepena mageno, ka pod urito odiechieng'no to temuru matek kaka unyalo mondo ubed joma ler maonge ketho e nyim Nyasaye, kendo beduru gi kuwe kode. 15 Beduru kung'eyo ni deko mar Ruodhwa oweyo mana thuolo mar yudo warruok, mana kaka Paulo owadwa mwageno be osendikonu gi rieko mane Nyasaye omiye. 16 Barupege duto ondiko machalre, kowuoyo e igi kuom wechegi. Barupege oting'o weche moko ma tiendgi tek ma joma kia gi jo hubagabaga gwenyo, mana kaka gig-wenyo Ndiko mamoko bende, to timgino biro kelo nigi chandruok. 17 Emomiyo, osiepena mageno, kaka koro useng'eyo wachni, ritreuru mondo kik ywau gi kethruok mag jomaricho mi uluar ua kama ber muchung'ie. 18 To dhi-uru nyime kudongo e ng'wono kod ng'eyo ma un-go kuom Ruodhwa kendo Jawarwa Yesu Kristo. En ema oyud duong' sani kendo nyaka chieng'! Amin.





AMAZING GRACE BIBLE INSTITUTE