1 Thesalonika

1 Thesalonika 1

1 Paulo, Sila gi Timotheo, Ne kanisa mar jo-Thesalonika, mantie kuom Nyasaye Wuoro kod Ruoth Yesu Kristo: Ng'wono gi kuwe obednu.

Paulo Opako Yie Mar Jo-Thesalonika

2 Pile waduokone Nyasaye erokamano nikech un duto, kwaluongo nyingu e lemo magwa. 3 E nyim Nyasachwa kendo Wuonwa, wasiko kwaparo yie ma un-go mosemiyo utimo timbe mabeyo gi herau momiyo utiyo ne Nyasaye matek, kod geno ma un-go kuom Ruoth Yesu Kristo, momiyo uchung'motegno kutimo kinda. 4 Nimar wang'eyo, owetewa ma Nyasaye ohero, ni oseyierou, 5 nikech Injili marwa ne ok obironu gi wach miwacho gi dhok fende, to nobironu gi teko kendo gi Roho Maler, kod yie motegno. Ung'eyo kaka ne wachalo ka wadak e dieru, ne wadak kamano nikech un. 6 Ne uluwo kitwa kod kit Ruoth; kendo kata obedo ni ne usandoru malit, to nurwako wach mane oyalnu gi mor ma Roho Maler kelo. 7 Omiyo nudoko ranyisi maber ne joma oyie duto man Makedonia gi Akaya. 8 Wach Ruoth nolandore koa kuomu mochopo ok mana Makedonia gi Akaya kende: Sani koro yie ma un-go kuom Nyasaye oselandore mong'ere kuonde duto. Omiyo wan koro onge gima wanya-lo wacho kuome, 9 nikech gin giwegi giwuoyo kuom kit rwak mane urwakowa-go. Ginyiso ji kaka nulokoru ubedo jo Nyasaye, kuweyo nyiseche manono, mondo uti ne Nyasaye mangima kendo madiera; 10 kendo mondo urit biro mar Wuode koa e polo. Wuodeno mane ochiero oa kuom joma otho en Yesu, Jal ma resowa e mirimb Nyasaye mabiro.

1 Thesalonika 2

Tij Paulo Ei Thesalonika

1 Un uwegi ung'eyo, owetewa, ni limbe mane walimougo ne ok obedo kayiem nono. 2 Mana kaka ung'eyo, noyudo osesandwa kendo oyanywa e dala mar Filipi to kata kamano Nyasaye nomiyowa chir mar nyisou wachne maber e dier lweny gi akweda mager. 3 Chutho, ok wahomb ji gi weche mag miriambo kata gi weche mowuok e paro mochido. Bende ok wan gi paro maling'ling' mar wito ji. 4 To wawuoyo kaka joma Nyasaye owuon ema opwodho kendo oyiego kaka jorit Injili. Ok watem mondo wabed malong'o ne dhano, to wadwaro ni wabed malong'o mana ne Nyasaye-ma nono chunjewa. 5 Ung'eyo maber ni kane wayalonu to ne ok wakonyore gi weche malombou mondo wawuondgo wang'u, kendo Nyasaye en janeno marwa ni ne ok wapando gombo maling'ling' e chunywa mondo wamau gigeu! 6 Ne ok wadwar pak moa kuom dhano, bed ni gin un kata joma nadi. Kaka joote mag Kristo, ne wanyalo miyou ting' mapek, 7 to kar timo mano to ne wadoko mamuol e dieru mana kaka min nyithindo rito nyithinde mapod tindo. 8 Ne waherou gi hera matut momiyo ne wamor, ok mana mar pogo kodu Injili mar Nyasaye kende, to koda ka ngimawa bende, nikech ne wagenou gi genruok maduong'. 9 Adier unyalo paro, jowetewa, kaka ne wanyagore kendo watiyo matek, ne watiyo odiechieng' gotieno mondo kik wami ng'ato ang'ata ting' mapek e kinde mane wadak ka wayalonu Injili mar Nyasaye. 10 Un uwegi un joneno, kaachiel gi Nyasaye bende, kaka ne wadak e dieru ka ngimawa ler kendo nikare, kendo ka waonge ketho e kindu un joma oyie. 11 Ung'eyo kaka ne wakonyo ng'ato ka ng'ato kuomu mana kaka wuoro konyo nyithinde owuon, 12 kwajiwou kendo wahoyou kendo wasiemou mondo kit ngimau mapile obed malong'o ne Nyasaye moseluongou e lochne kod duong' mare. 13 Bende waduokone Nyasaye erokamano kinde duto nikech kane wakelonu Wach Nyasaye, to nuwinje murwake, ok ka wach dhano, to nurwake ka Wach Nyasaye adier mana kaka en. Wachno koro chopo tich Nyasaye e ngimau, un joma oyie. 14 Nimar en adier, jowetena, nine ukawo kit kanise Nyasaye man Judea manie Kristo Yesu. Kaka jou uwegi nosandou e kaka kanise man Judea bende jo-Yahudi wetegi nosando, 15 jo-Yahudigo ema nonego Ruoth Yesu kod jonabi maggi, kendo gin ema ne giriembowa oko. Ok gilong'o ne Nyasaye kendo giger gi ji duto, 16 ka gitemo gi tekregi duto mondo gigeng'wa wuoyo ne Ogendini mondo oyud warruok. Kuom tim ma gitimoni, gimedo mana biwo richogi mondo opong'. Mirimb Nyasaye koro osejukogi!

Paulo Gombo Limo Jo Thesalonika Kendo

17 Jowetewa, kane ochunowa ni nyaka wawere kodu kuom kinde machwok, (ne wapogore mana e ringruok to ok kuom chuny), gomb mane wagombougo matek osemiyo watemo gi yore duto mondo waneu wang' gi wang'. 18 Ne wasedwaro gaming'a mondo wabi walimu, to moloyo an Paulo ne atemo kendo atemo to Satan ne omona. 19 Koso uparo ni gin ng'a gini mwakwano kaka genowa gi morwa, kata kaka osimbo marwa ma wanasungrego e nyim Ruoth Yesu Kristo koduogo? Donge en un? 20 Chutho, un e duong'wa gi morwa!

1 Thesalonika 3

1 Emomiyo ka chunywa mane chan-dore ne onge kuwe ne waparo ni ber mondo wadong' kendwa Athen. 2 Ne waoro Timotheo, ma en owadwa kendo jatich Nyasaye kaachiel kodwa e tij lando Injili mar Kristo, mondo ojiw chunyu ubed motegno e yie maru, 3 kendo mondo kik sand mwayudo michunyu aa. Unge'yo maber ni kaka jo Kristo nyaka wayud sand. 4 Chutho, kane wan kodu to ne wasiko ka wanyisou ni ne nyaka sandwa, kendo mano e gima osetimorenwa, mana kaka ung'eyo. 5 Ma emomiyo kane koro ok anyal dhi nyime ka abet mos, ne aoro jaote mondo ang'e kaka yieu chai. Ne aluor ni dipo ka jatem osedonjore kodu mi omiyo tich mane watiyo matek e dieru obedo kayiem.

Ripod Timotheo Kuom Chai Jo Thesalonika

6 To koro Timotheo osebiro irwa koa iru, kendo osekelonwa weche mabeyo kuom yieu kod herau. Osenyisowa ni usiko uparowa gi paro mabeyo kendo ni un bende ugombo nenowa mana kaka wan bende wagombo nenou. 7 Kuom mano, jowetewa, yie ma un-go osejiwowa e dier achiedh nade duto kaachiel gi malit ma waneno. 8 Sani koro chunywa oduogo nikech uchung' motegno kuom Ruoth. 9 Ere kaka dwagone Nyasaye erokamano nikech un ma dirom gi mor mawan godo e nyim Nyasaye nikech un? 10 Odiechieng' gotieno walamo Nyasaye gi chunywa duto mondo olosnwa thuolo mar nenou kendo wang' gi wang', mondo wabi wapong'nu kuonde morem e yie maru. 11 Mad Nyasachwa kendo Wuonwa owuon, kod Ruodhwa Yesu, losnwa yo mwanyalo birogo iru. 12 Mad Ruoth mi herau omedre mi olandre e kindu ng'ato gi ng'ato, kendo ni ji duto, mana kaka hera mwaherougo bende otiak. 13 Mad omi chunyu obed motegno mondo ubed joma onge ketho kendo joma ler e nyim Nyasaye Wuonwa chieng' ma Ruoth Yesu biroe kaachiel gi joge maler duto.

1 Thesalonika 4

Ngima Mamiyo Nyasaye Mor

1 Mogik, jowetewa, ne wapuonjou kaka onego udagi malong'o ne Nyasaye, mana kaka ngimau chalo sani. To koro wakwayou kendo wajiwou kuom Ruoth Yesu mondo umed timo kamano moloyo. 2 Nikech ung'eyo puonj mane wamiyou kuom teko mar Ruoth Yesu. 3 En dwaro Nyasaye mondo ubed joma ler. Nyasaye dwaro ni ubed mabor gi richo mar chode, kendo 4 mondo ng'ato ka ng'ato nyaka puonj re rito ringre e yo maler kendo man-gi luor, 5 maok oyie mondo ringre oore gi gombo mathoth kaka jopiny makia Nyasaye timo. 6 Kuom wachni, ng'ato kik ochwany nyawadgi kata wuonde.Ruoth biro kumo joma timo timbe makamago mana kaka ne waseny-isou kendo siemou. 7 Nimar Nyasaye ne ok oluongowa mondo wadag e ngima mar dwanyruok, to ne oluongowa mondo wadag e ngima maler. 8 Omiyo ng'ato ang'ata motamore winjo puonj ni ok ota-more winjo dhano, to otamore winjo Nyasaye owuon mamiyou Rohone Maler. 9 To kuom hera ma jowete kuom Kristo onego oherrego to ok wane tiende ndikonue, nikech un uwegi Nyasaye osepuonjou mondo uherru ng'ato gi ng'ato. 10 Mana kaka kuom adier uhero jowete duto man e mieche Makedonia duto. Kata kamano wakwayou, jowetewa, mondo umed timo kamano moloyo kanyo. 11 Dwaro maduong' mar ngimau onego obed ni mondo udag e ngima mokuwe, ka urango mana tijeu kende, kendo kutiyo matek gi lwetu mana kaka ne wachikou, 12 mondo kit ngimau mapile oywa chuny joma pok oyie mi gimiu luor, kendo mondo kik uyiengru kuom ng'ato ang'ata e dwarou mapile.

Biro Mar Ruoth

13 Jowetewa, ok wadwar mondo ukia gima timore ne joma osetho, kata mondo ubed gi kuyo ka joma moko, maonge gi geno. 14 Wayie ni Yesu notho mochier oa kuom joma otho, omiyo wayie ni Nyasaye biro chiero jomoyie duto mosetho kaachiel kode. 15 Kaluwore gi wach Ruoth owuon, wanyisou ni wan ma Ruoth noyudwa ka pod wangima chieng' ma nobie, ok wanakwong dhi kapok okaw joma osetho. 16 Nikech Ruoth owuon nolor e piny koa e polo, mi nogol chik gi dwol maduong', ka malaika maduong' kok, kendo ka tung' mar Nyasaye luongo matek; eka joma nosetho ka ni kuom Kristo nochier mokuongo. 17 Bang' mano, wan ma pod wadong' kendo pod wangima noyudhwa kaachiel kodgi mi terwa malo e boche polo mondo warom gi Ruoth ei polo. Omiyo wanabed gi Ruoth nyaka chieng'. 18 Emomiyo jiwreuru gi wechegi e kindu ng'ato gi ng'ato.

1 Thesalonika 5

1 Koro owetena, onge tiende ndilonu kuom ndalo kata saa ma gigo notim-re, 2 nikech un uwegi ung'eyo malong'o ni chieng' Ruoth nopore mana kaka jakuo poyo ji gotieno. 3 E saa ma ji wachoe ni, "Piny okuwe kendo weche beyo," ema masira nopogie kadiemo wang', mana kaka muoch poyo dhako ma yach, kendo ok ginitony. 4 To un, jowetena, ok un e mudho ma dimi odiechieng'no pou apoya kaka jakuo poyo ji. 5 Un duto un yawuot ler, kendo un yawuot odiechieng'. Ok wan jo otieno kata jo mudho. 6 Kuom mano kik wachal gi ji mamoko ma nindo, to wanenuru kendo waritreuru. 7 Nikech joma nindo nindo gotieno, kendo joma mer bende mer gotieno. 8 To nikech wan jo odiechieng', waritreuru ka waruakore gi yie kod hera kaka law akor mar lweny; kendo gi geno mar warruok kaka ogut lweny. 9 Nikech Nyasaye ne ok oyierowa mondo wayud kum mar mirimbe mager, to noyierowa mondo wayud warruok mar Ruodhwa Yesu Kristo. 10 Nothonwa mondo kata ka wangima kata watho to wadag kode. 11 Omiyo jiwreuru ng'ato gi ng'ato kendo gerreuru, mana kaka utimono.

Weche Mogik

12 Koro wakwayou, jowetewa, mondo umi joma tiyo tich Ruoth matek e dieru luor, ma gin jotendu kendo jopuonju kuom Ruoth. 13 Migiuru duong' ahinya kendo hergiuru moloyo nikech tich ma gitimo. Daguru gi kuwe e kindu. 14 Bende wakwayou, jowetewa, mondo usiemjoma budho abudha, kendo mondo ujiw joma luor, kendo ukony joma yomyom. Horeuru mos gi ji duto. 15 Neuru ni onge ng'ama chulo rach kuom rach motimne, to temuru mondo kinde duto utim maber ne joweteu kendo ne ji mamoko bende. 16 Beduru mamor pile; 17 lemuru kinde duto; 18 gouru erokamano kata piny ber kata rach, nikech mano ema Nyasaye dwaro ni utim ei Kristo Yesu. 19 Kik utam Roho tiyo e dieru, 20 kendo kik ucha weche mokor. 21 Temuru gik moko duto, kumako matek weche mabeyo. 22 Pogreuru gi gimoro amora marach. 23 Mad Nyasaye owuon, ma en Wuon kuwe, pwodhou mi udok maler chuth e yore duto. Mad orit ngimau gi chunyu gi ringreu duto mi ubed maonge ketho moro amora chieng' ma Ruodhwa Yesu Kristo noduogie. 24 Jal moluongou biro chopo mano nikech en jaadiera. 25 Jowetewa, lemnwauru. 26 Mosuru jowete duto gi yogruok mar jomaler. 27 Achikou e nying Ruoth mondo une ni osom baruani ne jowete duto. 28 Ng'wono mar Ruodhwa Yesu Kristo obed kodu.