1 Petro

1 Petro 1

1 Petro, ma jaote Yesu Kristo, Ne joma Nyasaye oyiero ma gin welo e piny Peter, kendo mokere kuonde duto mag Ponto, gi Galatia. 2 Moseyier, chon kaluwore gi dwaro mar Nyasaye Wuoro, kuom tich mar pwoth mar Roho, winjo chik mar Yesu Kristo gi lwok kuom chwer mar rembe: Ng'wono kod kuwe obednu mogundho.

Pak Ni Nyasaye Kuom Geno Mangrina

3 Pak ni Nyasachwa ma en Wuon Ruodhwa Yesu Kristo! Kuom kechne maduong', osenyuolwa manyien mi wayudo geno mangima kuom chier mane Yesu Kristo ochiergo oa kuom joma otho, 4 kendo e mwandu mosiko ma okanonu e polo maok nyal lal bende ok nyal kethore kata lolore. 5 Jogo morit kuom yie gi teko mar N)asaye nyaka chop warruok mosei-ki mondo oel e chieng' giko. 6 Umor mathoth kuom wachni, kata obedo ni sani pod uneno sand mopogore opogore kuom kinde matin. 7 Magi osetimorenu mondo yie maru man gi nengo moloyo dhahabu ma kethore kata obedo ni ipuodhe e mach mondo ong'e ka un-gi yie maradier mondo mi okel pak gi duong' kod luor chieng' ma Yesu Kristo ofwenyore. 8 Kata obedo ni pok unene to pod uhere ahera; kendo kata obedo ni ok unene kata sani to pod uyie ayiea kuome kendo upong' gi mor maduong' mokadho wacho. 9 Nikech koro uyudo thorro mar yie maru, ma en warruok mar chunjeu. 10 Kuom wach warruokni jonabi mane owuoyo kuom wach ng'wono mane biro bironu ne jonono matut kendo manyo matek. 11 Ka gidwaro mondo ging'e kinde kod gigo manotimore mane Roho mar Kristo mane nikuomgi ne nyiso kanokoro kuom masiche mane Kristo biro yudo kod duong' mane biro luwo masichego. 12 Nofweny nigi ni tich mane gitiyo ne ok giti nigin giwegi, tone gitiyo mana neun kane giwuoyo kuom gik ma koro oseny-isu gi joma oseyalonu Wach Maber kuom teko mar Roho Maler moa e polo. Koda ka Malaike bende gombo mondo onee.

Beduru Maler

13 Emomiyo ikuru pachu ni tich. Ritreuru, kendo keturu genou duto kuom ng'wono mibiro miu ka Yesu Kristo ofwenyore. 14 Kaka nyithindo mawinjo wach, kik ulu kit gombo maricho mane uluwo chon kane pod udak e kia. 15 To mana kaka Jal moluongou ler, beduru maler e gimoro amora mutimo. 16 nikech ondiki ni, "Beduru maler nikech aler." 17 Kaka uluongo nying Wuoro ma ng'ado bura ne tich ng'ato ka ng'ato machalre ka ok odew wang' ng'ato, dagu-ru ngimau kaka welo e piny-ka, kod luor mowinjore. 18 Nikech ung'eyo ni ne ok owaru gi gik ma kethore, kaka fedha kata dhahabu, mondo uwe kit ngimau manono mane kwereu machon oweyonu mondo ulu, 19 to gi remo ma nengone tek mar Kristo, ma en Nyarombo maonge mbala kata songa. 20 Ne oyiere kapok ochwe piny, to ne ofwenynwago e ndalo gi mogik nikech un. 21 Nikech En, koro uyie kuom Nyasaye, mane ochiere oa kuom joma otho mi omiye duong' mondo yie maru kod geno maru obed kuom Nyasaye. 22 Kaka koro usepwodhuru uwegi kuom luwo adiera, mondo eka uher joweteu, koro herreuru ng'ato gi ng'ato gi hera matut, kendo timuru kamano gi chunyu duto. 23 Nikech osenyuolu nyuol manyien, ok gi kodhi ma top, to gi kodhi ma ok tow, gi wach Nyasaye mangima kendo mochwere. 24 Nikech Ndiko wacho ni, "Dhano duto chalo gi lum kendo duong' ma gin-go chalo mana gi mafua mar bungu. Lum ner kendo mafua two mi lwar piny, 25 to wach Ruoth osiko nyaka chieng'". To mae e Wach Maber mane oyalnu.

1 Petro 2

1 Emomiyo weuru timbe maricho duto kod wuondruok duto, kod ndogruok, gi nyiego kod kuoth eyo moro amora. 2 Mana kaka nyithindo mayom, beduru gi siso gi chak mayom mar chuny mondo kumadhe to omi udongi e yor warruok, 3 nikech koro usebilo Ruoth mi uyudo ni ober.

Kidi Mangima Kod Joma Oyier

4 Kaka ubiro ire, Kidi mangima mane ji odagi to ma Nyasaye oseyiero man-gi ohala kuome. 5 Un bende kaka kite mangima, igerou e ot mar chuny mondo ubed jodolo maler machiwo misango mag chuny ma Nyasaye oyiego kuom Yesu Kristo. 6 Kaka e Ndiko owacho, ni, "Neuru, achungo kidi e Zayun, en kidi moyier kendo ma nengone tek moriwo kor ot, to ng'at moyie kuome ok none wichkuot." 7 Kidini nigi nengo matek mana ni un joma oyie. To kuom joma ok oyie to, "Kidi mane jogedo odagi koro ose-doko kidi moriwo kor ot" 8 kendo, "En kidi machwanyo ji kendo en lwanda mamiyo gipodho." Gichwanyore nikech gitamore winjo wach, mabende mano ema ne oiknegi. 9 Un to un oganda moyier. Un jodolo ma joka Ruoth kendo un oganda maler mar Nyasaye mane oyiero mondo ohul tijege miwuoro, kane oluongou mi ua e mudho kendo udonjo e lerne miwuoro. 10 Chon ne ok un ji, to koro unjo Nyasaye, chon ne pok okechu, to koro osekechu. 11 Joherana, ajiwou, kaka jowuoth kendo kaka welo e pinyni, mondo uwe gombo maricho mag ringruok makedo gi chunyu. 12 Daguru ngima mabeyo e kind jopiny makia Nyasaye mondo kata ka gihangou ni un joketho to gine mana tim-beu mabeyo mi gimi Nyasaye duong' chieng' ma enolimwae.

Winjo Joloch Kod Ruodhi

13 Ng'ato ka ng'ato kuomu nyaka winji joloch duto moketi mondo orit ji, nikech Ruoth ema dwaro ni utim kamano, kata en ker man-gi teko e wi ji duto, 14 kata en jatelo ma ker oketo mondo okum joketho to opwo joma timo maber. 15 Nikech en dwaro Nyasaye mondo utam weche manono mag joma ofuwo gi timbeu mabeyo mutimo. 16 Daguru ka joma ni thuolo, to kik ukonyru gi thuolo ma un-go kaka rageng' mar timo richo, daguru kaka jotich Nyasaye. 17 Chiwuru luor mowinjore ni ji duto. Heruru jowete duto mowar. Luoruru N)asaye. Miuru ker mar piny luor. 18 Wasumbini winjuru ruodhiu gi luor duto. Kik uluor mana ruodhi mabeyo kendo maok kwiny kodu, to luoruru koda mago makwiny kodu. 19 Nikech en gima ber ka dhano oyie ting'o rem mar chandruok moyudo kayiem nikech ong'eyo ni Nyasaye nilode. 20 Ere kaka ng'ato diyud pak ka oyudo goch mikumego nikech ojaketho? To ka isandi nikech tim maber mitimo, kendo ka inano e bwo sand ma kamano, to Nyasaye pwoyi. 21 Mano e kit ngima mane oluongu nikech Kristo nosandi nikech un, mi ne oweyonu ranyisi mondo un bende uluw ndache. 22 Ne ok otimo richo kata achiel, kendo onge ng'ama no winjo miriambo manowuok e dhoge. 23 Kane oyanye to ne ok oduoko jomane yanye gi ayany, kane osandore to ne ok okuong'o joma ne sande. Kar timo kamano to noketo genone kuom jal ma jang'ad bura ma kare. 24 En owuon not-ing'o richowa e ringre kane otho e yath mondo eka wan wadok joma otho ne richo, to wabed mangima ni timbe makare; gi adhondene ema osechangu. 25 Ne uchalo mana rombe moruenyo, to koro oseduogu e yo mondo ulu Jakwath kendo Jarit mar chunjeu.

1 Petro 3

Mon Gi Chwo

1 Kamano bende un mon luoruru chwou, mondo kaponi moko kuomgi pok oyie wach to gilokre, ok nikech weche to nikech timbe mondegi, 2 kagineno bidhruok gi luor e ngimau. 3 Ber maru ok onego onenre mana kuom gik mulichogo dendu maoko: kaka wich mokadi gi ruako bangli mag dhahabu kod lewni mabeyo. 4 Chutho moloyo, ber maru onego obed mano maiye, e chunyu ber madier mar chuny mamuol kendo mokuwe ma en gima duong' moloyo e wang' Nyasaye. 5 Nikech kamano e kaka mon maler machon mane oketo genogi kuom Nyasaye ne loso bergi maiye. Ne giwinjo wach chwogi giwegi, 6 mana kaka Sara, mane winjo Ibrahim kendo luonge ni ruodhe. Un udoko nyige ka utimo gik mabeyo gi chir maok uluoro gimoro. 7 Un chwo bende nyaka udag gi mondu kuweyonigi korgi. Migiuru luor kaka chwech mang'aw kendo kaka jouteu muchamogo mich mar ngima momiu kuom ng'wono. Kutimo kamano to onge gima biro mono lemou chopo e nyim Nyasaye.

Neno Sand Kuom Timo Maber

8 Mogik, neuru ni un duto un gi chuny achiel. Beduru gi miwafu e kindu kuheroru kaka owete, kendo kukechoru, ng'ato gi ng'ato, kubedo joma muol. 9 Kik uchul richo kar richo, kata ayany kar ayany. To gi gweth, nikech mano ema omi noluongu, mondo uyud gweth un bende. 10 Nikech "Ng'ama diher ngima maber kendo neno ndalo maber nyaka geng' lewe kuom richo kendo dhoge, kuom wacho miriambo. 11 Nyaka olokre owe richone mi otim maber; nyaka omany kuwe kendo oluwe. 12 Nikech wenge Ruoth osiko kang'iyo joma timbegi beyo kendo ochiko ite mar winjo lamogi, to wang' Ruoth mon gi joma timo richo" 13 Ere ng'ama dihinyi ka iikori mar timo gima ber? 14 To kata ka ochuno ni nyaka ine sand kuom gima kare mitimo, to in ng'ama ogwedhi. Kik uluor gik ma giluoro, kendo kata bwok kik gibuogu. 15 To miuru Kristo duong' ei chunyu kaka Ruoth Maler. Beduru moikore kinde duto mar duoko ng'ato mopenjou gimomiyo un gi geno ma un-gono. To timuru kamano gi muolo kod luor. 16 Rituru chunyu maler maonge bura, mondo joma wuoyo kuomu marach kuom timbeu mabeyo kuom Kristo, ong'eng' kendo one wichkuot. 17 En gima ber ka en dwaro Nyasaye, mondo osand ng'ato kuom timo maber moloyo ka ng'ato yudo sand kuom timo richo. 18 Nikech Kristo notho ni richo dichiel mogik, Ng'at makare notho kar joma richo mondo okelu ir Nyasaye. Ne oneg ringre, to kata kamano nomiye bedo mangima e chuny. 19 Kuom chuny nogo bende ema notere moyalo ni chunje manie tuech, 20 mane otamore winjo Nyasaye chon gilala kane Nyasaye orito aming'a e kinde mane Noa hondhoe yie. E yieno ji manok kende maromo ji aboro, ema ne okwo kakalo e pi. 21 Pigni ochung' kar batiso makoro warou un bende, ok kuom golo chilo e del, to kuom keto ranyisi mar paro molokore odok kor Nyasaye. Owarou kuom chier mar Yesu Kristo, 22 moseidho e polo kendo koro obet a bat korachwich mar Nyasaye, ka malaike duto gi loch kod teko duto winjo chikne.

1 Petro 4

Dak Ni Nyasaye

1 Emomiyo, kaka Kristo noneno sand e ringruok, un bende nyaka umanru gi paro machal gi mare, nikech ng'at mane oneno sand e dende koro oseloyo richo. 2 Kuom mano,un koro ok udak e ngima maru mar pinyni mondo uchop gombo maricho mag dhano, to odak mar timo dwaro Nyasaye. 3 Nikech usekawo thuolo malach kinde mokalo kutimo gik ma jopiny ohero timo, kaka: dwanyruok, gombo, mer, tugo e thum, metho mar anjawo kod lamo nyiseche manono. 4 Jopiny tinde wuoro niok urip kodgi e timbe mag anjawo makamago omiyo koro giyanyou. 5 To ochunore ni ginihul wach man kuomgi giwegi ni Jal moikore mar ng'ado bura ni joma ngima gi joma otho. 6 Nikech mano emomiyo ne oyal Wach Maber koda ka ni joma koro osetho, mondo eka obi ong'adnegi bura, kaka nong'ad ni ji duto manie ringruok, to chunygi mondo obed mangima kaluwore gi dwaro Nyasaye. 7 Giko gik moko duto chiegni. Emomiyo beduru gi paro maler kendo ritreuru mondo ulam. 8 To moloyo mago duto, herreuru gi hera matut ng'ato gi ng'ato, nikech hera umo richo mang'eny. 9 Ruakuru joweteu maok ung'ur. 10 Ng'ato ka ng'ato mondo oti kod mich moro amora mosemiye mondo okonygo jomoko. Ka utiyo gi kinda kaka jorit mag ng'wono mopogore opogore ma Nyasaye omiyo kuom lonyo ji. 11 Ka ng'ato wuoyo to mondo owuo mana ka ng'ama hulo weche mowuok e dho Nyasaye owuon. Ka ng'ato tiyo ni ji, to onego otim kamano gi teko ma Nyasaye chiwo, mondo kuom gik moko duto ji opak Nyasaye kuom Yesu Kristo. Duong' gi teko mondo obed mare chieng' manyaka chieng'. Amin.

Sand Kuom Bedo Ja Kristo

12 Osiepena mahero, kik ubuogi ka uyudo sand mawang'ou ka mach kuparo ni gimoro magalagala ema timorenu. 13 To beduru mamor nikech oriwu kod Kristo e sandne, mondo unudok moil chuth chieng' ma duong'ne nofwenyre. 14 Ka iyanyou nikech nying Kristo to un joma ogwedhi, nikech Roho mar duong' kendo mar Nyasaye ni kuomu. 15 Ka ng'ato kuomu neno sand to kik bed nikech ojanek kata ojakuo, kata jamahundu, kata jaketre e weche ji. 16 To ka ineno sand nikech in ja Kristo to kik wiyi kuodi, to gone Nyasaye erokamano nikech iluongi gi nyingno. 17 Nikech saa koro osechopo ming'adoe bura ni jood Nyasaye. To ka wan ema ochakore kodwa kamano to uparo ni joma ok luw Wach Maber mar Nyasaye to biro neno malit machal nadi? 18 To "Ka en gima tek mondo owar joma timbegi beyo, koro joma kia Nyasaye gi joricho to nobed machalo nadi?" 19 Kuom mano joma neno sand kaluwore gi dwaro Nyasaye onego ochiw chunygi e lwet Jachuech ma jaadiera kendo onego gidhi nyime gi timo timbe mabeyo.

1 Petro 5

Ni Jodongo Gi Jomatindo

1 Akwayo jodong kanisa man e dieru, kaka jaduong' wadu mane oneno gi wang'e kaka Kristo sandore, kendo kaka achiel kuom joma biro yudo duong' mabiro fwenyore achien: 2 Beduru jok-wath mag romb Nyasaye moseketo e lwetu mondo urit. Tiuru nigi kaka jorit, ok nikech ng'ato ochunou, to nikech chunyu ohero, kaka Nyasaye dwaro ni utim. Kik ubed jokwath nikech wuoch pesa omakou, to timuru kamano nikech tij konyo ji bernu. 3 Kik utimru ruodhi ewi joma oketi elwetu mondo uriti, to bed ne giuru ranyisi. 4 Eka ka Jakwath Maduong' nofwenyre to unuyudi osimbo mar duong' ma nosik ka rieny nyaka chieng'. 5 Un jomatindo bende winjuru joma dongo. Ruakreuru gi muolo e kindu ng'ato gi ng'ato, nikech Ndiko wacho ni, "Nyasaye osin gi josunga to ochiwo ng'wono ni joma muol." 6 Emomiyo belreuru e bwo bad Nyasaye maratego, mondo eka oting'u malo e kinde mowinjore. 7 Keturu dwachu duto kuome nikech oherou. 8 Bed kuritoru kendo motang'. Jasiku, ma en Jachien, bayo ka gi kacha mana ka sibuor maruto, komanyo ng'ama dongam. 9 Chunguru motegno e yie maru kendo tameuru, nikech ung'eyo ni joweteu moyie piny ngima bende neno chandruok machalre kodu. 10 Ka useneno chandruok kuom kinde moromo, Nyasach ng'wono duto, mane oluongou e duong'ne mochwere kuom Kristo, nomi ubed maler chuth, kogurou udoko motegno kendo mojing'; e misingi maok yiengni. 11 Teko obedne chieng' ma nyaka chieng'." Amin.

Mos Mogik

12 Andikonu barua machwokni ka Silfano, ma akwano kaka owadwa madier kuom Kristo, konya. Ajiwou kendo atimo neno ni ma e kaka ng'wono madier mar Nyasaye chalo, omiyo chunguru motegno kuom ng'wonono. 13 Kanisa man Babulon, ma Nyasaye oyiero kaachiel kodu, okowonu mos. Wuoda Mariko bende omosou. 14 Mosreuru ng'ato gi ng'ato gi yogruok mar hera. Kuwe mondo obednu un duto ma un kuom Kristo.