1 John
1 Johana
Is Wach Mar Ngima 1 Wandikonu kuom Wach mar ngima, mane nitie nyaka aa chakruok, ma wasewinjo kendo waseneno gi wengewa, kendo waserange maber mi wamule gi lwetewa. 2 Ngimani nofwenyore mi ne wanene omiyo wawuoyo kuome, kendo wanyisou wach ngima mochwere mane nigi Wuoro kendo mane onyiswa. 3 Wahulonu gima waseneno kendo winjo, mondo un bende ubed e achiel kodwa e lalruok. To lalruok marwa nie kindwa gi Wuoro kod Wuode, Yesu Kristo. 4 Wandikonu wachni mondo morwa obed mogundho kendo moromo chuth. Wuotho E Ler 5 Puonj mane wayudo kuom Kristo kendo koro wanyisou ema: Nyasaye en ler, kendo mudho onge kuome chutho. 6 Omiyo ka wawacho ni wan e lalruok kode to pod wawuotho e mudho to wariambo kendo ok wawuothi e adiera. 7 To ka wawuotho e ler, kaka en bende enie ler to wan e lalruok ng'ato gi ng'ato, kendo remb Yesu Wuode pwodhowa e richo duto. 8 Ka wawacho ni waonge richo, to wawoundore kendwa, kendo adiera onge e iwa. 9 To ka wahulo richowa, en jaadiera kendo ng'ama kare kendo obiro weyonwa richowa mi opuodhwa kuom timbe duto maok odhi kare. 10 Ka wawacho ni pok watimo richo to wamiyo odoko ja miriambo kendo wachne onge gi thuolo e ngimawa. 1 Nyithinda mahero, andikonu wachni mondo kik utim richo. To kapo ng'ato otimo richo, to wan gi Jabura maloson-wa kendo kwayonwa Wuoro; Jali en Yesu Kristo, Ng'at Makare. 2 En e misango magolo richowa, to ok marwa kende, to nyaka richo mar piny ngima. 3 Ka wamako kendo watimo chike Nyasaye eka wabedo gi ratiro ni wang'-eye. 4 To ng'at mawacho ni "Ang'eye" to ok tim gima ochiko en jamiriambo kendo adiera onge e iye. 5 To ka ng'ato ang'ata momako kendo orito chik Nyasaye to hera mar Nyasaye nenore kuome ratiro. Yo mwanyalo bedogo gadiera ni wan ei Nyasaye ema: 6 Ng'at mawacho ni en ei Nyasaye nyaka kit ngimane mapile chai gi mar Yesu. 7 Joherana, chik ma andikonuni ok nyien. En chik onogono machon musebedogo nyaka chakruok. Chik machonno en e wach ma usewinjo. 8 To kata kamano, andikonu chik manyien kendo adierane nenore kuom Kristo kendo e ngimau, nikech mudho aa to ler maradier koro rieny. 9 Ng'ato ang'ata ma wacho ni wuotho e ler to osin gi owadgi pod osiko e mudho. 10 Ng'at mohero owadgi to odak e ler, kendo ng'ama kamano onge obadho kuome manyalo miyo ochwanyre. 11 Ng'at mosin gi owadgi to nie mudho, kendo mudho nogo ema owuothoe, kokia kuma odhiye, nikech mudho odino wang'e. 12 Andikonu un nyithinda mageno nikech osewenu richou, kuom nyinge. 13 Andikonu un wuone nikech ung'eyo Jalo mane nitie nyaka aa chakruok. Andikonu, joma tindo, nikech useloyo ng'ama rach. Andikonu un nyithindo mageno nikech ung'eyo Wuoro. 14 Andikonu un wuone, nikech ung'eyo Jalo mane nitie nyaka aa chakruok. Andikonu un yawuowi ma tindo, nikech utegno, kendo wach Nyasaye odak e iwu kendo useloyo ng'ama rach. Kik Uher Piny 15 Kik uher piny kata gimoro amora manie pinyni. Ka ng'ato ang'ata ohero piny, to hera mar Wuoro onge e iye. 16 Nimar gik moko duto manie piny, kaka gik maricho ma waneno kendo wagombo kod sunga ma ji sungorego kuom gik ma gin go, ok aa kuom Wuoro, to gia e piny. 17 Piny gi gombo duto mag piny nokadhi, to ng'at ma timo dwach Nyasaye nobed mangima nyaka chieng'. Siem Kuom Wasik Kristo 18 Nyithinda mageno, giko chiegni kendo kaka usewinjo ni jasik Kristo biro, koro wasik Kristo mathoth osefwenyore: Ma e kaka wang'eyo ni giko chiegni. 19 Chutho, jogi ne oa irwa to ne ok gin jowa. Nikech ka dine gin jowa to dine gisiko kodwa, nimar dhigino nyiso ayan-ga maler ni onge kata ng'ata achiel kuom-gi mane ng'atwa. 20 Unto Roho Maler owirou omiyo ung'eyo adiera. 21 Omiyo koro andikonu ok nikech ukia adiera, to nikech ung'eye, kendo nikech ung'eyo ni onge miriambo mawuok e adiera. 22 Ja miriambo to kara en ng'a? En ng'ama wacho ni Yesu ok en Kristo. Jalno e Jasik Kristo, nikech odagi Wuoro kaachiel gi Wuowi. 23 Ng'ama odagi Wuowi odagi Wuoro bende, to ng'ama orwake nigi Wuoro bende. 24 Kuom mano, neuru ni urito gima ne ukuongo winjo e chunyu. Ka usiko ukano gimane uwinjo mokwongo e chunyu, to ubiro siko e winjruok gi Wuowi kod Wuoro. 25 To ma e gima Kristo owuon nosingore ni nomiwa, ma en ngima mochwere. 26 Andikonu wechegi kuom jogo materno mondo owuondu. 27 To ne un, ma Roho Maler owirou kendo odak e iwu, ng'ato ok onego puonju. To kaka Roho museyudono puonjou kuom gik moko duto, kendo dak ma Roho odak godo e iwu en adiera maok miriambo mana kaka osepuonjouno, sikuru kuome. Nyithind Nyasaye 28 Omiyo koro nyithinda mageno, sikuru kuome mondo ka ofwenyore to wabed gi chir kendo maonge wichkuot e nyime ka obiro. 29 Ka ung'eyo ni Kristo en ng'ama kare to onego ung'e bende ni ng'ato ka ng'ato matimo gima kare en nyathi Nyasaye. 1 Mano kaka hera ma Wuoro oherowago duong' mondo oluongwa ni nyithind Nyasaye. Kendo mano e gima wan! Gimomiyo piny, ok ong'eyowa en nikech piny ne ok ong'eye. 2 Osiepena mageno koro wan nythind Nyasaye, to kaka wabiro bedo achien pok onyiswa. To wang'eyo ni ka Kristo nofwenyre, to wan-abed machal kode, nikech wananene kaka ochal. 3 Ng'ato ang'ata man- gi genoni pwodhore owuon mondo osik koler mana kaka en bende oler. 4 Ji matimo richo ketho chik; chutho, richo en ketho chik 5 To ung'eyo ni Kristo nofwenyore mondo ogol richowa. Ung'eyo bende ni richo onge kuome. 6 Ng'at man kuom Kristo ok sik katimo richo. Ng'at mosiko timo richo pok onene kendo okiaye. 7 Nyithinda mageno , kik uyie ng'ato owitu. Ng'at matimo gima kare en ng'ama kare, mana kaka En bende en Ng'ama kare. 8 Ng'at mosiko timo richo en ng'at Jachien, nikech Jachien osebedo ka timo richo nyaka a chakruok. Gimomiyo Wuod Nyasaye nobiro ne en ni mondo oketh tich Jachien. 9 Ng'ama Nyasaye onyuolo ok nyal dhi nyime katimo richo, nikech kit Nyasaye osiko kuome. Ok onyal timo richo nikech Nyasaye ema onyuole. 10 Kaka wanyalo ng'eyo pogruok manie kind nyithind Nyasaye gi nyithind Jachien e magi: Ng'at ma ok tim gima kare ok en nyathi Nyasaye, kata ng'ama ok ohero owadgi. Herreuru Ng'ato Gi Ng'ato 11 Wach mane uwinjo nyaka aa mokuongo ema: Nyaka waherre ng'ato gi ng'ato. 12 Kik wachal gi Kain mane en koth Ng'ama Rach, omiyo nonego owadgi ma hie. To nonego owadgi nang'o? Nikech timbene ne richo, to timbe owadgi ne kare. 13 Kuom mano, owetena kik ubwogi ka jopiny sin kodu. 14 Wang'eyo ni wasekalo waa e tho mi wadonjo e ngima, nikech wahero owetewa. Ng'ama ok ohero owadgi osiko e tho. 15 Ng'ama osin gi owadgi en janek, to ung'eyo ni janek onge gi ngima mochwere 16 Ma e kaka wang'eyo gima hera en; Kristo nochiwonwa ngimane. Wan bende onego wachiw ngimawa ni owetewa. 17 Ka ng'ato jamoko to oneno owadgi kochando to ok okeche, ere kaka ng'ama kamano nyalo wacho ni en gi hera mar Nyasaye? 18 Nyithinda mageno kik wawach mana gi dhowa ni wahero j i, to waher ji gi tim kendo gi adiera. 19 Mano e yo mwa ng'eyogo ni wachung' e adiera, kendo mabiro miyo chunywa bed gi chir e nyim Nyasaye 20 saa moro amor a ma chunywa ng'adonwa bura. Nimar Nyasaye duong' moloyo chunywa, kendo ong'eyo gik moko duto. 21 Omiyo, osiepega mageno, ka chunywa ok ng'adnwa bura to wan gi chir e nyim Nyasaye. 22 To wayudo koa kuome, gimoro amora mwakwaye nikech wamako chikene kendo watimo gik mamore. 23 To ma e chikne: ni mondo wayie e nying Wuode Yesu Kristo kendo mondo waherre ng'ato gi ng'ato, mana kaka Kristo nochikowa. 24 Joma omako kendo orito chike Nyasaye ni kuome to en bende en kuomgi. To ma e kaka wang'eyo ni Nyasaye odak e iwa: Wang'eyo nikech Roho ma osemiyowa.
Pim Chunje 1 Osiepega mageno kik uyie roho duto, to temgiuru mondo ufweny ka bende gia kuom Nyasaye nikech jonabi mag miriambo mathoth osetuch e piny koni gi koni. 2 Ma e kaka unyalo ng'eyo Roho mar Nyasaye: Roho ma hulo ni Yesu Kristo nobiro e ringruok en roho moa kuom Nyasaye. 3 to roho moro amor a makwedo Yesu ok en roho mar Nyasaye. Chuny ma kama en mar Jasik Kristo ma usewinjo ni biro kendo makoro nie piny kata sani. 4 Ne un nyithinda mageno, unto un nyithind Nyasaye kendo useloyo jonabi mag miriambogo, nikech jal manie iu duong' moloyo jal manie piny. 5 Gin jopiny, omiyo giwuoyo kuom gipinyni kendo piny winjogi. 6 Wan to wan jo Nyasaye omiyo joma ongeyo Nyasaye winjowa, to ng'at ma ok ng'at Nyasaye ok winjwa. Mani e yo mwang'eyogo Roho mar adier gi roho mar miriambo. Hera Mar Nyasaye Kod Marwa 7 Osiepega mageno waherreuru ng'ato gi ng'ato nikech hera aa kuom Nyasaye. Ng'at mohero ji en nyathi Nyasaye kendo ong'eyo Nyasaye. 8 Ng'at ma ok ohero ji kia Nyasaye, nikech Nyasaye en hera. 9 Nyasaye nonyiso hera moherowago kama: Ne ooro Wuode ma miderma e piny mondo wabed mangima kuome. 10 Ma e gima hera en: ok ni wan ema ne wahero Nyasaye, to ni Nyasaye ema noherowa mi nooro Wuode kaka misan-go mar richowa. 11 Osiepega mageno, ka Nyasaye noherowa matut kamano to wan bende waherre ng'ato gi ng'ato. 12 Onge ng'ama oseneno Nyasaye, to ka waherore ng'ato gi ng'ato to Nyasaye odak e iwa, kendo herane ipuodho chuth e iwa. 13 Wange'eyo ni wadok ei Nyasaye kendo en bende en eiwa, nikech osemiy-owa Rohone. 14 Waseneno kendo wanyiso ji ni Wuoro oseoro Wuode mondo obed Jawar mar piny. 15 Ka ng'ato ang'ata ohulo ni Yesu en wuod Nyasaye, to Nyasaye odak e iye kendo en bende odak ei Nyasaye. 16 Omiyo koro wang'eyo kendo wageno kuom hera ma Nyasaye oherowa-go. Nyasaye en hera. Kendo ng'ato ang'ata mosiko e hera osiko kuom Nyasaye, kendo Nyasaye bende odak kuome. 17 E yo maka ma herawa nyaka nyisre chuth e ngi-mawa mondo chieng' ng'ado bura wabed gi chir nikech e ngima mar pinyni wachal kode. 18 Onge luoro e hera; hera maradier riembo luoro oko nikech luoro ema kelo kum. Jal man-gi luoro ok puodhre ei Hera. 19 Wahero nikech Nyasaye noherowa mokuongo. 20 Ka ng'ato wacho ni, "Ahero Nyasaye", to osin gi wadgi to en jamiri-ambo; nikech ng'ama ok ohero wadgi, moseneno gi wang'e, ok nyal hero Nyasaye mapok oneno. 21 Chik ma osemiyowa en ma: Ng'at mohero Nyasaye nyaka her wadgi bende.
Yie Kuom Wuod Nyasaye 1 Ng'ato ang'ata moyie ni Yesu e Kristo en nyathi Nyasaye, kendo ng'ama ohero Wuoro hero nyathine bende. 2 Ma e kaka wang'eyo ni wahero nyithind Nyasaye: Ka wahero Nyasaye kendo wamako chikene. 3 Ma e kaka ihero Nyasaye: luor chikene. To chikene ok gin ting' mapek 4 nikech ng'at ma Nyasaye onyuolo loyo piny. Ma e locho ma waloyogo piny ma en yiewa. 5 En ng'a moloyo piny? Mana jalo moyie ni Yesu en Wuod Nyasaye 6 Yesu Kristo e Jal manobiro gi pi kod remo. Nobiro,ok gipi kende, to nobiro gi pi kod remo. Nenoni Roho Maler ema timo, nikech Roho en e adiera. 7 Nimar nitie joneno adek, ma gin: 8 Roho, pi kod remo, kendo jonenogi winjore kuom wachni. 9 Wayie gi nend dhano, to nend Nyasaye ema duong' moloyo nikech en neno ma Nyasaye owuon osewacho kuom Wuode. 10 Ng'at moyie kuom Wuod Nyasaye nigi nenoni e chunye, to ng'ama ok oyie kuom Nyasaye miye odoko jamiri-ambo, nikech odagi yie gima Nyasaye osewacho kaka janeno kuom Wuode. 11 To ma e neno nogo: Nyasaye osemiyowa ngima mochwere; kendo ngimani nikuom wuode. 12 Ng'at man gi Wuowi nigi ngima; to ng'at ma onge gi Wuod Nyasaye onge gi ngimani. Weche Mogik 13 Andikonu wechegi, un joma oyie kuom nying wuod Nyasaye, mondo ung'e ni un-gi ngima mochwere. 14 Ma e chir ma wan-go kawadhi e nyim Nyasaye ni ka wakwaye gimoro amora mowinjore gi dwache to owinjowa. 15 To ka wang'eyo ni owinjowa kwakwaye gimoro amora, to wang'eyo ni waseyudo gima wakwayono. 16 Ka ng'ato oneno wadgi katimo richo maok tere e tho, to owinjore olamne mondo Nyasaye omi jalno ngima. Awuoyo kuom joma richogi ok tergi e tho. To nitie richo matero ji e tho; ma ok awach ni olamie Nyasaye. 17 Ketho duto gin richo, to nitie richo maok ter ji e tho. 18 Wang'eyo ni ng'ama Nyasaye onyuolo ok sik katimo richo,nikech Wuod Nyasaye orite kendo Ng'ama Rach ok nyal mule. 19 Wang'eyo ni wan nyithind Nyasaye, kendo ni piny duto nie bwo loch mar Ng'ama Rach. 20 Wang'eyo bende ni Wuod Nyasaye osebiro kendo osemiyowa rieko mar winjo tiend wach, mondo wang'e Jalo ma jaadiera; Jal makoro wanie iye, ma en wuode Yesu Kristo. En e Nyasaye madier kendo ngima mochwere. 21 Nyithinda mageno tang'uru ni nyiseche madhano oloso.
|