Hebrews

1

1 Kyiyeri kya kacha Ruwa naleṙeṙa na waku waṙu kafong'ui na kundu kufong'ui, iiṙia ko weonguo shisuku; 2 mafurumionyi ga mfiri-i naleṙeṙa na soe kyiiṙi kya Mono-kye alemmbika nawe mokyioṟa o shindo shoose, lyingyi-se kui oe nalegumba wuyana. 3 Oe nekyeloṟa chandu Ruwa awoṙe mng'ano, fana ya mrima okye, echiṙuo shindo shoose kui iwawaso lya wuiṙimi wokye, amwende ihooṟio lya ngyuunyamaṟi tsa wandu, naleṙamia ura lo kulyoe lo ulya ang'anyi kuta woose. 4 Ruwa nalesambuṟa Mono-kye nawe ang'anyi kuta malaika, chandu rina lyilya Ruwa alemwenenga lying'anyi kuta lya malaika. 5 Cha kyipfa nalewia malaika uha kyiyeri kyoose, “Iyoe nyi mono-ko, inyi inu ngakufee?” Na lyingyi-se, “Inyi ngyechiwa awu kokye, na oe nechiwa mana koko?” 6 Na lyingyi-se, kyiyeri aende Mono-kye o kuwooka na wuyanenyi nagamba, “Malaika woose wa Ruwa wampfirie ndi.” 7 Na ko mbonyi tsa malaika nagamba, “Ekyegaluo malaika wakye iwa cha shiwiṟi, na waṟundi wakye iwa cha moṙo mlang'a.” 8 Kyaindi ko mbonyi tsa Mana nagamba, “Kyitima kyapfo kya wuchilyi, hoi Ruwa, nyi kya mlungana na mlungana. Na upoi lo Wumangyi wopfo nyi upoi lo wusumganyi. 9 Nukundi wusumganyi nosuo shituṟu koikyo Ruwa, Ruwa opfo, nakushumbuo, kakuenenga kyiṟumi kying'anyi kuta woṙoo.” 10 Na lyingyi-se, “Iyoe, Mndumii, ipfo mawookyionyi nulewika ngyuurende tsa uruka, na ruwewu nyi iṟunda lya mawoko gapfo. 11 Isho shechinyamaṟika, Indi iyoe nochikaa mlungana. Na shoose shechikuo cha nguwo. 12 Na cha nguwo nochishilema-lema, natso tsechiilachika. Kyaindi iyoe nyi ulya ulya na mfiri yapfo yechisia-pfo.” 13 Ngyesa kuwoṙe malaika alemmbia kyiyeri kyoose “Uṙamie kuwoko koko ko kulyoe, mṟasa kyiyeri ngyechiwika washituwa wapfo wuchilyinyi wopfo?” 14 Ngyesa malaika nyi wakyi? Chi walya wekyeṙumo iṟundia walya wekyeoṟa wukyiṟo-pfoe?

2

1 Koikyo kyiluwaṟi iosha nawi shilya luleicho lulacheṙeko. 2 Cha kyipfa kokooya kyindo kyilya kyilegambo nyi malaika kyilawelolomie, na orio mndu alemina kyindo-kyo naleanduyo chandu kyiwaṟi, 3 ngyesa soe, loiṙima kuṙa ikyia ianduyo lukomina ulogo-lu lung'anyi kuṙi lo wukyiṟo? Ulogo lulegambo kuwooka nyi Mndumii, naaho lukomanyika koṙu na ko walya waleicho. 4 Ruwa na oe echiṟingyishia hamwi nawo kui ṟigo na shiṟiyisho na pfinya tsa mbaṟe tsifoi, na kui igawa shisumbo sha Mumuyo Mweele, chandu alekunda oe amonyi. 5 Kyipfa Ruwa alewika malaika wachilyie uruka lulya luicha na luionguo mbonyi tsalo-pfo, indi mndu umwi naleṟingyishia kuṙi handu halyiwe echigamba, 6 “Mndu nyi kyikyi tane omkumbuo? Ang'u mana o mndu mṟasa umwambuye? 7 Nulemgumba kawa mtutu kuta malaika, numwenengyie kyiṟumi na mng'ano, nummbikyie wuye ya maṟunda goose. 8 Na imgaluo mchilyi o shindo shoose.” Cha kyipfa kyiiṙi kya iwika shindo shoose wuchilyinyi wokye uletsugaṟa kyindo ulalekyiwika wuchilyinyi wokye-pfo. Kyaindi wulalu lulandewone shindo shoose shechiwiko wuchilyinyi wokye-pfo; 9 indi lowona ulya alegumbo kawa mtutu kuta malaika, Yesu, kyipfa kya mawawio ga upfu, amwenengye kyiṟumi na mng'ano, kundu kui isaṟia lya Ruwa napfe kyipfa kya orio mndu. 10 Cha kyipfa kyiwemmbaṟi oe, ulya kyipfa kyakye na kui oe shindo shoose shilegumbo, kundu naenengye wandu wafoi wekyemwosha wuiṙimi wo iwona kyiṟumi kyakye, iafutsia msongoru ang'anyi o wukyiṟo wowo kui njia ya ilya wukyiwa. 11 Kyipfa ulya ekyeilyisha na walya wekyeilyisho woose wawukyie ko mndu umwi. Kyipfa kya ikyo ekyerigo nyi sonu iwalaga wana wa wamae-pfo. 12 Nekyegamba, “Ngyechionguo mbonyi tsapfo ko wana wa wama wako, siṟinyi ngyechikuṟumisha.” 13 Na lyingyi-se, “Ngyechiwa ngyikumsurie oe.” Na lyingyi-se, “Inyi ngyikyeri iha na wana-wa ngyileenengo nyi Ruwa.” 14 Kyasia, cha kyipfa wana-wa nyi wandu wawoṙe mmbiu na samu, maa oe nalewewa wuṙo, kundu kui njia ya upfu nanyamaṟe ulya awewoṙe pfinya tsa upfu, Mokyiriinzi, 15 na kui iwuta kuṙo nalekyie walya wawei watumo kyipfa kya iowuo upfu moo yawo yoose. 16 Kyipfa nyi loi kye ekyetarama malaika-pfo indi nekyetarama walya wa kyishari kya Abrahamu. 17 Koikyo kyiwemmbaṟi ifananyisho na wana wa wamae shindonyi shoose, naiṙime iwa mkohanyi ang'anyi awoṙe isaṟia, ekyeafutsia kyilya ateṟia iṟundenyi lya Ruwa, nahooṟie wandu wakye ngyuunyamaṟi tsawo. 18 Na cha kyipfa oe amonyi nalelyiso wukyiwa kyiyeri aleyesho, neiṙima itarama walya wekyeyesho.

3

1 Koikyo wana wa wama mui wandu wa Ruwa, muleiṙikyia ndago ya ruwewu, kusaṟenyi mnu mbonyi tsa msu na Mkohanyi ang'anyi kuta woose o shilya lokyeṟingyishia. Yesu, 2 awekyeafutsia shilya ateṟia ko ulya alemsambuṟa naṟunde iṟunda lyakye, chandu Mose na oe awekyeri, kyiyeri alesongoya wandu wa Ruwa. 3 Kyipfa Yesu natalo kye nawaṟi kyiṟumi ngoseṟa kuta Mose, chandu ulya ekyewika numba awoṙe woguru kuta numba-yo. 4 Kyipfa orio numba ingyiwikye nyi mndu; indi ulya aleachikyia shindo shoose nyi Ruwa. 5 Na Mose loi naleafutsia shilya aleteṟia kyiyeri alesongoya wandu woose wa Ruwa cha mṟundi, nawe wuṟingyishi wo shindo shechigambo numa ya iho, 6 indi Kristo, cha mana ekyechilyia numba ya Ruwa; ulya numba yakye ikyeri nyi soe, kokooya loengyeṟa iwaṙa wuṟango na wukari na ikushela lya iweṙelyia lyaṙu mṟasa mafurumionyi. 7 Koikyo, chandu Mumuyo Mweele agamba, “Inu, kokooya moicho ṟui lyakye. 8 Maa mulaumiṟe mrima yanyu, chandu waku wanyu walelega Ruwa, kyiyeri kya iyesho kulya nukyenyi ngyuumu suwaa ilawoṙe maa mṟinga, 9 Kyiyeri-kyo waku wanyu walengyiyesha, wakawona mawuto gako maka makumi gaana. 10 Koikyo rika-lyi lyilengyipfulutsa nyashi, ngagamba, mfiri yoose nyi wandu wawoṙe mrima iṙekyie; walemanya mbonyi tsako-pfo. 11 Chandu ngyilelya nyamu kui nyashi, ‘Wechiiṙa na handu hako heonyonyia-pfo.’ ” 12 Ambuyenyi, wana wa wama, maa umwi onyu alawaṙe mrima mmbicho ulawoṙe iiṙikyia; kui ikuletsana na Ruwa ai na moo. 13 Kyaindi mututumane orio mfiri; kundu maa umwi onyu alawaṙe mrima muumu kui wulembi wo wunyamaṟi. 14 Cha kyipfa lowa wandu wekyekaa handu hamwi na Kristo, kokooya lokuwaṙa tapu na kyilya luleloṟa kyiyeri lulewooka iiṙikyia Yesu mṟasa mafurumionyi. 15 Iho-ndu kyekyegambo, “Inu kokooya moicho ṟui lyakye Maa mulaumiṟe mrima yanyu, cha kyiyeri kyilya kyelega Ruwa.” 16 Kyipfa nyi wakyi walengyipfulutsa nyashi, kyiyeri waleicho? Chi walya walewuka Misiri wechisongoyo nyi Mose-pfoe? 17 Lyingyi-se nyi wakyi walepfulutsa Ruwa nyashi maka makumi gaana? Chi walya waleṙeko, walya mnying'a yawo ileoloka nukyenyi ngyuumu suwaa ilawoṙe maa mṟinga? 18 Lyingyi-se nyi wakyi Ruwa alewalyiia nyamu kye wechiiṙa na handu hakye heonyonyia, sile walya walemlega? 19 Kyasia, lowona kye waleiṙima iiṙa na kulya urukyenyi-pfo kyipfa walelega iiṙikyia Ruwa.

4

1 Kyasia, kokooya kuwoṙe kyaasa kya iiṙa na handu ha Ruwa heonyonyia, luowuoe, maa umwi oṙu alechewono kye nawuṟa kyaasa-kyo. 2 Kyipfa nyi loi, maa soe taa luleongoyo mbonyi ngyicha chawo. Kyaindi mbonyi-tso wandu waleicho tsilewatarama kyindo-pfo kyipfa tsileṙuana na iiṙikyia lya mrimenyi ko walya waleicho-pfo. 3 Kyipfa soe luiṙikyie luiṙa na handu ho heonyonyia; chandu alegamba, “Chandu ngyilelya nyamu kui nyashi, wechiiṙa na handu hako heonyonyia-pfo.” Maa chandu maṟunda galya galemarisika wookyia kyiyeri ngyuurende tsa wuyana tsilewiko. 4 Cha kyipfa handu halyiwe nagambie kuṙi ko mbonyi tsa mfiri o mfungaaṙe, “Mfiri o mfungaaṙe naleonyonya, kaṙa maṟunda gakye goose.” 5 Na iho naho taa, “Wechiiṙa na handu hako heonyonyia-pfo.” 6 Kyasia kyipfa ṙeṙo-lyi lyatsugaa ho kye kuwoṙe wandu wechiiṙa na handu-ho heonyonyia, na walya waleongoyo mbonyi-tso kyiyeri kya kacha, walelemo iiṙa na handu ho heonyonyia kyipfa kya wunyamaṟi wowo, 7 nawika-se mfiri mlyiwe, echigamba, kyiiṙi kya Dawidi numa ya kyiyeri kyileshi kuṙi, “Inu; chandu kyikyigambe wookyia kacha, ‘Inu kokooya moicho ṟui lyakye, Maa mulaumiṟe mrima yanyu.’ ” 8 Kyipfa kokooya Yosua alewaenenga sia, awechiionguo-se mfiri ungyi kyiyeri kya numa-pfo. 9 Kyasia, hatsugae sia ya mfiri o onyonya ko wandu wa Ruwa. 10 Kyipfa oe aleiṙa na halya-ndu heonyonyia naonyonya amonyi iṟundenyi lyakye, chandu Ruwa aleonyonya iṟundenyi lyakye. 11 Kyasia, lupfuṟukane iiṙa na kyiiṙi kya sia-yo, kundu kye mndu oose alacheoloka cha wandu-wo walaleindia Ruwa. 12 Kyipfa Ṙeṙo lya Ruwa lyiwoṙe moo, lyingyi-se lyiwoṙe pfinya; lyingyi-se lyilyiohi kuta ushu loose lo mmbega kuwi; lyingyi-se lyekyekoṟa mṟasa lyikaiṙima iletsana mrima na ngoo, na shiwungo na mafuṙa gakyeri ipfo shiwungonyi; lyingyi-se lyilyianguhu imanya makusaṟo na kyilya mrima ukundi. 13 Maa kuwoṙe kyindo kyikyeri na moo kyilakyishukuoe mbele ya Ṙeṙo-lyo-pfo, kyaindi shindo shoose shikyeri kyiṟanguoe na shishishukuoe mesonyi gakye ulya awoṙe shindo shaṙu. 14 Kyasia, kokooya luwoṙe Mkohanyi ang'anyi kuta woose aleiṙa na ruwewu, Yesu Mono-Ruwa, luoshe mnu shilya lokyeṟingyishia. 15 Cha kyipfa luwoṙe mkohanyi alechiiṙima iṙuana na soe shindonyi shaṙu sha wufofo-pfo; kyaindi oe naleyesho kyimwi na soe shindonyi shoose, indi alewuta kya wunyamaṟi-pfo. 16 Kyasia, lutikyire kyitimenyi kya isaṟia kulawoṙe wuowu, kundu luenengo isaṟia, na iwona isaṟia lyelutarama kyiyeri lulawoṙe shindo shilushikyie.

5

1 Kyipfa orio Mkohanyi ang'anyi kuta woose amsambuṟe iwuka ko wandu nammbikye kyipfa kya wandu mbonyinyi tsa Ruwa, kundu nawute shienengo kyipfa kya ngyuunyamaṟi. 2 Echiiṙima iṙuana kui wuhoo na walya walaichi na walya waiṙeka, cha kyipfa oe amonyi nawoṙe mbaṟe ya wufofo; 3 na kyipfa kya ikyo kyimmbaṟi, cha kyipfa kya wandu, wuṙo kyipfa kya mrima okye amonyi, iwuta shienengo kyipfa kya ngyuunyamaṟi. 4 Na kuwoṙe mndu eiṙima ikuenenga amonyi kyiṟumi-kyi-pfo, sile ulya ekyelago nyi Ruwa, cha Aron. 5 Na wuṙo Kristo na oe alekuṙosa mrimenyi kokye na iṙuo kyiṟumi kya iwa Mkohanyi ang'anyi kuta woose-pfo, kyaindi nyi Ruwa alemmbia, “Iyoe nyi Mono-ko inu ngawa Awu opfo.” 6 Chandu agambie handu hengyi, “Nochiwa mkohanyi mlungana cha Melyikyisedekyi.” 7 Yesu, mfiri-yo awei na moo, naleeṟeṟia Ruwa, echifiiṟa na itonyitsa mcheṟeṟe, Ruwa echiiṙima imkyiṟa na immbuta upfunyi, kaaṙanyio chandu awekyeri mndu aowuye na ikunda Ruwa; 8 na, maa chandu akyeri Mana, nalekulosha iindia kui wukyiwa alelya. 9 Na oe amṟingyishio kye naafutsio, kawa ulya ekyekyiṟa wandu mlungana ko wandu woose wekyemwindia. 10 Numa ya iho namsende na Ruwa iwa Mkohanyi ang'anyi kuta woose cha Melyikyisedekyi. 11 Ulya luwoṙe shindo shifoi sheonguo kyipfa kyakye; na nyi kyindo kyuumu ishionguo cha kyipfa mowa wandu waṙoko iaṙanyia. 12 Cha kyipfa, kokooya kyimmbaṟi iwa walosha, (kyipfa kyiyeri kying'anyi kyamwiṙa), muwaṟi ilosho na mndu malosho ga kuwooka ga mbonyi tsa Ruwa. Na nyoe kyipfa mukyeri cha wana wanangu muwewaṟi maruwa maa chi kyelya kyikari-pfo. 13 Cha kyipfa orio mndu ekyenyo maruwa aichi mnu mbonyi tsa wusumganyi-pfo, cha kyipfa nyi mana mnangu. 14 Kyaindi kyelya kyikari nyi ko wandu wapfulukyie kyiiṙikyia, walya wekyeiṙima imanya kyicha na kyiwicho.

6

1 Kyipfa kya ikyo, lukoṙa ionguo malosho ga kuwooka ga Kristo, lupfuṟukane lushikye masiionyi ga kyaro. Maa lulaṙeṙe-se mbonyi tsa malosho-go ga kuwooka, lulaiwuta-se shindo shilawoṙe kyiiṙa na iiṙikyia Ruwa, 2 na ga malosho ga ngyuupatiso, na iyekyia mawoko, na iṟutso wapfu, na ianduyo lya mlungana. 3 Na isho lochishiwuta Ruwa kaluenenga wuiṙimi wo iwuta kuṙo. 4 Cha kyipfa walya walemuenengo ngyeela, na isonja kyisumbo kya ruwewu, na iambilyia ṙombo lya Mumuyo Mweele, 5 na isonja mbonyi ngyicha tsa Ruwa, na pfinya tsa shiyeri shiicha, 6 wakaṙa iiṙikyia numa ya iho, kyechiiṙimika-se iwagaluo waṙumbuye wunyamaṟi-pfo; cha kyipfa wakapia Mono-Ruwa msalabenyi lya kawi kui mrima yawo, na imriisa sonu na pata. 7 Kyipfa uruka lokyenyo mvuo yekyekapa ho kyiyeri kui kyiyeri, na iṙosa maṟa gawoṙe kyiira ko walya galeṙemo kyipfa kyawo, wekyewona mboṟa tsiwukyie ko Ruwa; 8 indi uruka-lo lukoṙosa msha na makacha lokyelego na ikyiṟeseso nyi Ruwa na mafurumionyi galo nyi irumatso. 9 Kyaindi, wakunde, maa chandu lokyeonguo isho, mbonyinyi tsanyu luleiṙikyia mbonyi ngyicha ngoseṟa, na tsiwoṙe wukyiṟo. 10 Cha kyipfa Ruwa ammbicho mṟasa nawaṙime iṟunda lyanyu-pfo, na ikunda lyilya mulelyiṟingyishia kui rina lyakye, cha kyipfa muleṟundia wandu wa Ruwa, na mṟasa wulalu muwaṟundia. 11 Na soe lukundi orio umwi onyu naṟingyishie wuragari wulya wulya, mṟasa mafurumionyi; 12 kundu mulaṙokuoe, indi muwe wandu wekyeosha walya wekyeoṟa shiteṟio kui iiṙikyia na wusimiri. 13 Cha kyipfa Ruwa, kyiyeri aleenenga Abrahamu kyaasa kyipfa alawewoṙe ang'anyi kuta ulya alemlyiia nyamu, nalelya nyamu kui mrima okye, 14 echigamba, “Ny'kyaloi ngyechikuwikyia mboṟa, na ikupfumbutsa.” 15 Na kuṙo kui isimiria kawona kyaasa kyilya. 16 Kyipfa wandu wekyelya nyamu kui ulya akyeri ang'anyi kuta wo; na kowo matsitsionyi ga iwingana kui maṙeṙo nyi nyamu, iloṟa kye maṙeṙo-go nyi ga loi, 17 kyiiṙi kya mbonyi-tso Ruwa, akundi iloṟa ngoseṟa mnu walya wekyeoṟa kyaasa kyilya, chandu shilya akundi shilechiiṙima iilachika. 18 Shilya kyiiṙi kyasho Ruwa alechiiṙima iṙeṙa wongo, luwone iwiyiṟio moo lyilalolomie, soe lulalekyelyio iosha na isimiria shilya shilewiko mbele yaṙu. 19 Lushiwoṙe cha kyindo kyetirimisha mrima ulakupaaye-paye, kyindo kyiwoṙe wuringyi wung'anyi, kyiwoṙe pfinya, na ulya lokyewika ikusuria lyaṙu nyi Yesu, ulya ekyeiṙa nguwonyi yeshingyia ya hekalu lya ruwewu na halya-ndu ha kyiiṙi haele. 20 Handu Yesu aleiṙa naho kyipfa kyaṙu, msongoru oṙu, nawa Mkohanyi ang'anyi kuta woose mṟasa mlungana cha Melyikyisedekyi.

7

1 Cha kyipfa Melyikyisedekyi-cho, mangyi o Salemu, mkohanyi o Ruwa ai wuye ruwewu, nalekarisana na Abrahamu kyiyeri aweiwuya ikapa wamangyi-wo, kammbikyia mboṟa. 2 Ulya Abrahamu alemgawia kyifunjoe kya ikumi kya shindo shoose; (rina lyakye lya kuwooka nyi mangyi o wusumganyi, lyingyi-se nyi mangyi o Salemu, kyimwi na igamba, mangyi o ufoṟo. 3 Awoṙe awu-pfo, awoṙe wamae-pfo, awoṙe wafee-pfo, awoṙe kyiyeri alefeo, maa kyiyeri alepfa-pfo, indi namfananyishe na Mono-Ruwa). Icho nyi mkohanyi mṟasa mlungana. 4 Kyasia, ambuyenyi chandu mndu-cho aweng'anyi, ulya Abrahamu, mku oṙu ang'anyi, alemwenenga kyifunjoe kya ikumi kya shilya aleende shiṙenyi. 5 Na kyiiṙi kya wana wa Lewi nawo, walya wekyeenengo wukohanyi, wawoṙe wuchilyi wo iṙuo kyifunjoe kya ikumi iwuka ko wandu wawo, wana wa wamawo, chandu mawawaso gagambie, maa chandu wakyeri wa kyishari kya Abrahamu. 6 Indi oe, ulya kyishari kyakye kyilaletalo kye kyiwukyie kowo, nalewuta kyifunjoe kya ikumi iwuka ko Abrahamu, kammbikyia mboṟa ulya awoṙe kyaasa-kyo. 7 Maa kyeiṙima ilego nakamwi kye mtutu nekyewikyio mboṟa nyi ang'anyi-pfo. 8 Na makohanyi wekyepfa wekyewuta kyifunjoe kya ikumi; indi iha Melyikyisedekyi ekyeambilyia kyifunjoe kya ikumi ekyepfa-pfo. 9 Lyingyi-se kyeiṙima igambo kye, kui njia ya Abrahamu, maa Lewi ekyeambilyia kyifunjoe kya ikumi naleenengyia kyifunjoe kya ikumi; 10 cha kyipfa alekoafeo kyiyeri-kyo Melyikyisedekyi alekarisana na oe-pfo. 11 Kyasia, kokooya kulawewoṙe wufofo wukohanyinyi wo Lewi; (kyipfa wandu waleenengo mawawaso kyipfa kya wukohanyi-wo), kuwewoṙe-se kyimaṙuma kya kyikyi kuwaṙe mkohanyi ungyi, ai cha Melyikyisedekyi, maa aletalo cha ilyi nai cha Aron? 12 Kyipfa wukohanyi wulya wukoilachika, kyiwaṟi na mawawaso gailachikye. 13 Kyipfa oe mbonyi tsakye tsilegambo kuṙo, nyi-we o wandu wa mbaṟe ingyi, mbaṟe kulawoṙe mndu o mbaṟe-yo aleṟunda alyitaṟenyi. 14 Kyipfa kyikyeri na pata kye Mndumii oṙu nalewuka kyisharinyi kya Yuda, mbaṟe ya wandu walya Mose alaleonguo kyindo kyawo kyoose ko mbonyi tsa wukohanyi. 15 Lyingyi-se isho luiṙeṙa shikyeri na pata mnu ngoseṟa, kokooya nawoneka mkohanyi ungyi ai cha Melyikyisedekyi; 16 alakyeri mkohanyi ko mawawaso ga kyimndu, indi kui pfinya tsa moo tsilekyesia. 17 Kyipfa namṟingyishie kye, “Iyoe nyi mkohanyi mlungana cha Melyikyisedekyi.” 18 Kyipfa kuwoṙe iilachika lya iwawaso lyilya lyilesonguo, kyipfa kya wufafa wolyo, na iuṟa kyiira lyayo; 19 (cha kyipfa iwawaso lyilya lyileafutsia kyindo-pfo); na hamwi na isho kulewiko ikusuria lyilyicha ngoseṟa, ikusuria lyekyeluenenga itikyiria Ruwa. 20 Na kyipfa nyamu ilaleuṟika, 21 (kyipfa walya walesambuṟo makohanyi kulawoṙe nyamu; indi oe, hamwi na nyamu, kui ulya alemmbia, “Mndumii nalya nyamu maa echiilacha nyamu-yo-pfo, iyoe nyi mkohanyi mlungana.”) 22 Kyasia, iṙuana na wuloi-wu Yesu nawa mloṟi o mma ulya mcha ngoseṟa. 23 Lyingyi-se walya walesambuṟo makohanyi wafoi, kyipfa waleshingyio nyi upfu walakae ho; 24 indi oe, kyipfa ekyekaa mlungana, nawoṙe wukohanyi wulekyewuka ho. 25 Na oe, kyipfa kya ikyo, neiṙima ikyiṟa nakamwi walya wekyecha na ko Ruwa kui oe; kyipfa nakyeri na moo mfiri yoose kundu nawaterewie. 26 Kyipfa luwewaṟi soe luwaṙe mkohanyi ang'anyi mbaṟe-i akyeri mweele, alawoṙe wuwicho, alawoṙe tewe lyoose, amletsane na walya wekyeṙeko, Ruwa alemwiria wuye ruwewu. 27 Ulya alakundi kyindo orio mfiri, cha makohanyi walya wengyi wang'anyi, kuwooka iwuta kyiṙaso kyipfa kya ngyuunyamaṟi tsakye amonyi, numa ya iho kyipfa kya ngyuunyamaṟi tsa wandu-wo; kyipfa oe nalewuta kuṙo lyimwi, kyiyeri alereka moo okye. 28 Kyipfa uwawaso luwikyie wandu wawoṙe wufafa iwa makohanyi wang'anyi; indi mbonyi-tso tsa nyamu ilecha numa ya uwawaso tsilemsambuṟa iwa Mana aafutsie mlungana na mlungana.

8

1 Kyasia, kyiiṙi kya isho luionguo, kyindo kying'anyi kuta shoose nyi ikyi, luwoṙe Mkohanyi ang'anyi kuta woose mbaṟe-i, aṙamie kuwoko ko kulyoe ko kyitima kya wuchilyi kya Ruwa Mopfinya. 2 Mṟundi o handu haele, na o tengo lyilya lya loi, lyilya Mndumii alelyiwika, maa chi mndu-pfo. 3 Kyipfa orio Mkohanyi ang'anyi kuta woose nekyesambuṟo kundu nawute shiṙaso, kyiwaṟi ichu na oe nawaṙe kyindo kyeṙasa. 4 Kokooya awekyeri urukyenyi, awechiwa mkohanyi-pfo; kyipfa kuwoṙe wekyewuta shienengo chandu mawawaso gagambie. 5 Wekyeṟundia kyindo kyikyeri cha kyirinje kya ruwewu; chandu Mose alewio nyi Ruwa nawute, kyiyeri awekuṟeyeṟie iwika tengo lyilya; kyipfa nagamba, “Achikyia shindo shoose kui mfano ulya uleloṟo kulya fumvunyi.” 6 Kyaindi wulalu nawona iṟunda lyicha ngoseṟa, chandu akyeri mndu aṙuṙe ndago ya mma mcha, Ruwa nagambie kye wandu wakye wechiwona shindo shicha kuta isho. 7 Kyipfa kokooya mma ulya o kuwooka ulawewoṙe tewe, mrima ya wandu iwechipfulo nyi ulya o kawi-pfo. 8 Kyipfa kyiyeri ekyegamba kye wawoṙe tewe, nekyegamba, “Mfiri iicha, Ruwa nagamba, na inyi ngyechiwika Mma Mhya na wandu wa numba ya Isiraelyi na wandu wa numba ya Yuda. 9 Ochiwa mma cha ulya ngyilewika na waku wawo mfiri iya ngyilewateteṟa ngyiwawute urukyenyi lo Misiri-pfo. Cha kyipfa walalekaa mmenyi oko, ngyilekulyisa wukyiwa kyipfa kyawo-pfo. 10 Kyipfa ichu nyicho mma ngyechiwika na wandu wa Isiraelyi numa ya mfiri iya, Ruwa nagamba, ‘Ngyechiwika mawawaso gako makusaṟonyi gawo, na ngyechigaṟeia mrimenyi kowo. Na inyi ngyechiwa Ruwa kowo, nawo wechiwa wandu wako.’ 11 Nawo wechiloshana orio mndu na momṟasa okye-pfo, Maa orio mndu na mono-wamae, echigamba, ‘Manya Mndumii-pfo.’ Cha kyipfa woose wechingyimanya, wookyia mtutu owo mṟasa ang'anyi. 12 Cha kyipfa ngyechiwahooṟia mawicho gawo, na ngyuunyamaṟi tsawo ngyechitsikumbuo-se-pfo.” 13 Kui igamba, “Mma Mhya” nagaluo lyilya lya kuwooka iwa lyiku. Kyaindi kyindo kyawooka ikuo nyi iwuka ho kyii.

9

1 Kyasia, maa mma o kuwooka uwewoṙe mawawaso ga mbonyi tsa iindia na iana Ruwa, na handu ha kyiwuyana heterewa Ruwa. 2 Kyipfa tengo lyileachikyio, lyilya lya ipfo kyanja, handu hawewoṙe handu heyekyia taa, na mesa, na mkate ngyiele; nyiho halelago “Haele.” 3 Na numa ya mkoṟoṟi o kawi o ishingyia handu, tengo lyilya lyekyelago “Haele ha haele,” 4 lyiwoṙe alyitaṟe ya sahapu, na sanduku ya mma ingyishikyie nyi sahapu ngyuura tsoose, sanduku iwewoṙe ikopo lya sahapu lyiwoṙe manna iya, na upoi lulya lo Aron lulekolooṟia maṟa, na shibau shilya sha mma; 5 na wuye yasho makyerubi ga kyiṟumi, gechiwikyia kyirinje halya-ndu Ruwa ekyehooṟia ngyuunyamaṟi. Kyasia luwoṙe ṙaawa wulalu lyeonguo mbonyi tsa shindo-shi kyimwi kyimwi-pfo. 6 Kyasia, shindo-shi shikamuachikyio kuṙo, makohanyi wekyeiṙa na ipfo tengonyi lya ipfo kyanja mfiri yoose, wechiwuta shindo sha iindia na iana Ruwa. 7 Kyaindi kyiiṙi kya tengo-lyo lya kawi Mkohanyi ang'anyi kuta woose nekyeiṙa napfo amonyi, lyimwi orio maka; aṙuṙe samu iwukyie kyindonyi kya kyiṙaso kyipfa kya wunyamaṟi wokye amonyi na wo wandu wengyi kyiyeri walalemanya kye kyilya waweiwuta nyi wunyamaṟi. 8 Mumuyo Mweele kaloṟa kyindo-kyi, kye njia ya iiṙa na halya-ndu haele ilekoyammanyika-pfo, kyiyeri-kyo tengo lya ipfo kyanja lyilalekolyammbuka ho. 9 Lyilya lyikyeri mfano o kyiyeri-kyi kyikyeri pfo wulalu; kyiyeri-kyo shienengo sheṙasa shiwuto, shilechiiṙima kui chandu mndu akuichuoe mrimenyi kokye iafutsia mndu aiindia na iterewa Ruwa. 10 Kyipfa nyi mawawaso ga mbaṟe ya mmbiu tupu, shelya na shindo shenyo na mbaṟe tsesamba kyimṟumoe, shilegambo kye shiṟundo mṟasa kyiyeri-kyo Ruwa echiilacha shindo shoose shiwe shihya. 11 Kyaindi Kristo kamcha, akyeri Mkohanyi ang'anyi kuta woose o mbonyi tsicha tsechicha, ko tengo lyilya lying'anyi ngoseṟa na lyiafutsie, lyilalyiachikyie nyi wandu, kyimwi na igamba lyilakyeri lya wuyana-wu, 12 maa chi kui samu ya mburu na magache-pfo, indi kui samu yakye ulya aleiṙa lyimwi tupu na handu Haele, na iluwuta wusingyenyi mlungana. 13 Cha kyipfa kokooya samu ya mburu na mapung'a na ifui lya igache lya umbe walya wafanyi kyimṟumoe walepusio yekyeilyisha mṟasa mmbiu ukowuka ukoe; 14 kyasia chi ngoseṟa samu ya Kristo, ulya kye kui Mumuyo o mlungana alereka moo ko Ruwa iwa kyienengo kyilawoṙe tewe, kyechisanja shilya mukusaṟie mrimenyi konyu na mṟumoe ilawoṙe kyiira, muiṙime iindia na iterewa Ruwa ai na moo? 15 Na kyipfa kya ikyo nyi ulya ekyeende Mma Mhya, Yesu ulya alepfa, na ipfa lyakye lyilewuta wandu maṙekonyi ga mma ulya o kuwooka, wandu walelago waambilyie kyaasa kya kyioṟa kya mlungana. 16 Kyipfa handu mma o kyioṟa ukyeri, hawaṟi hakae na upfu lo ulya alewika mma-cho. 17 Cha kyipfa mma o kyioṟa uwoṙe pfinya handu halewaṙa ipfa lya mndu; cha kyipfa lyiwoṙe pfinya maa ale kokooya ulya aleuwika ai na moo-pfo. 18 Koikyo maa mma ulya o kuwooka ulewooko kulawoṙe samu-pfo. 19 Kyipfa kyiyeri orio iwawaso lyilegambo nyi Mose ko wandu-wo woose, chandu mawawaso gawekundi, nalewuta samu ya magache na mburu, hamwi na mṟinga na kyiṙi kya hisopo kyikyipfungyie mamberi ga kyimaande ga moondo, kanyanyatsia kyitapu kyilya kya mawawaso, na wandu woose, 20 echigamba, “Iyi nyi samu yamlunga nyoe na mma ulya Ruwa alemmbia mumwindie.” 21 Na tengo lyilya nalyo na shindo shoose sha iindia na iterewa Ruwa aleshinyanyatsia samu wuṙo. 22 Na Uwawasonyi shindo shoose shilesanjo kui samu, na kulawoṙe ipusuo samu kuwoṙe iwuto wunyamaṟi-pfo. 23 Kyasia, kyiwewaṟi nakala tsa shindo shikyeri ruwewu tsisanjo chandu kyamugambo, kyaindi shindo sha ruwewu imonyi shisanjo kui shiṙaso shishicha kuta isho. 24 Cha kyipfa Kristo aleiṙa na handu haele haleachikyio nyi wandu-pfo, nyicho mfano o handu haele ha loi; indi naleiṙa na ruwewu ya loi nawono wulalu mbele ya Ruwa kyipfa kyaṙu. 25 Maa chi kye nakuwute kafoi, chandu Mkohanyi ang'anyi kuta woose ekyeiṙa na handu haele orio maka kui samu ilakyeri yakye-pfo. 26 Kokooya nyi wuṙo, kyiwemmbaṟi ilyiso wukyiwa kafoi wookyia wuyana wulagumbo. Kyaindi wulalu, lyimwi tupu, mafurumionyi ga shiyeri, nawoneka lya kuwooka na lya mafurumionyi, ihooṟia ngyuunyamaṟi kui kyiṙaso kya mrima okye. 27 Na chandu wandu wekyeṟeyeṟio ipfa lyimwi tupu, na numa ya ipfa ianduyo; 28 na wuṙo Kristo na oe, ammbuto iwa kyiṙaso lyimwi tupu na iṙuo ngyuunyamaṟi tsa wandu wafoi; nechicha-se lya kawi, kulawoṙe wunyamaṟi, ko walya waimmbeṙelyia nachewakyiṟa.

10

1 Kyasia uwawaso, kyipfa nyi kyirinje kya mecha gechicha, maa chi fana ya mecha-go-pfo, kui shiṙaso shilya shilya waleenengyia orio maka, shechiiṙima kyiyeri kyoose igaluo walya wekyecha iindia na iana Ruwa iwa wandu waafutsie-pfo. 2 Kokooya nyi wuṙo, ngyesa shiṙaso shechiṙa ienengyio; cha kyipfa waiindia na iana Ruwa wakamuilyisho lyimwi tupu, walawechikuwona-se wo wawenyi kye wawoṙe wunyamaṟi? 3 Kyaindi kyiiṙi kya shiṙaso-sho kuwoṙe ikumbuo lya wunyamaṟi orio maka. 4 Kyipfa kyeiṙimika samu ya mapung'a na mburu iwuta wunyamaṟi-pfo. 5 Koikyo ilyi echicha na wuyanenyi, nagamba, “Shiṙaso na shienengo ulekunda-pfo; kyaindi mmbiu nulengyiṟeyeṟia; 6 Shiṙaso shewuta alyitaṟenyi na shilya sheenengyia ngyuunyamaṟi ulechihiṟo nasho-pfo; 7 Nyi lyo-ndu ngyilegamba, ambuya, ngacha (ngyimṟeie kyitapunyi kya mawawaso) ngyiwute shilya ukundi, Ruwa.” 8 Iho mawookyionyi nalegamba, “Okyechihiṟo maa ikunda shiṙaso na shienengo shishienengyie alyitaṟenyi na shilya shewuta ngyuunyamaṟi-pfo” (shishienengyie chandu uwawaso lugambie). 9 Nyi lyo-ndu alegamba, “Ambuya, ngacha ngyiwute shilya ukundi.” Naienengyia kyiṙaso kya kuwooka, kundu nawikye ho kyiṙaso kya kawi. 10 Kyiiṙi kya shilya Ruwa akundi lowona iilyisho, kui iwuto mmbiu o Yesu Kristo lyimwi tupu. 11 Na orio mkohanyi nekyegoṟoka orio mfiri echiṟunda cha mkohanyi, na ienengyia shiṙaso shilya shilya kafong'ui; shiṙaso shilechiiṙima maa ale iwuta wunyamaṟi. 12 Kyaindi ichu, kyiyeri amwenengyie kyipfa kya wunyamaṟi kyiṙaso kyimwi kyechikaa mṟasa mlungana, naleṙamia kuwoko ko kulyoe ko Ruwa; 13 wookyia iho echiweṙelyia mṟasa nawingye washituwa wakye. 14 Kyipfa kui kyiṙaso kyakye kyimwi nalewagaluo wandu waafutsie mlungana walya waiilyisho maṙeko gawo. 15 Na Mumuyo Mweele na oe nailuṟingyishia; cha kyipfa numa ya igamba, 16 “Ichu nyi mma ngyechiwika nawo numa ya mfiri iya, Ruwa nagamba, ‘Ngyechiwika mawawaso gako mrimenyi kowo, na igaṟeia makusaṟonyi gawo.’ ” Nyi lyo-ndu ekyegamba, 17 “Ngyuunyamaṟi tsawo na mawuto gawo mawicho ngyechigakumbuo-se maa ale-pfo.” 18 Kyasia ihooṟio lya isho lyikacha, kuwoṙe kyiṙaso-se kyipfa kya iwuta ngyuunyamaṟi-pfo. 19 Kyasia, wana wa wama, kyipfa luwoṙe wukari wo iiṙa na handu Haele kui samu ya Yesu, 20 njia iya aleluwookyia ikyeri ngyihya, na ii na moo, njia iiṙie halya nguwonyi yeshingyia ikyeri nyi mmbiu okye; 21 na iwaṙa Mkohanyi ang'anyi kuta woose achilyie hekalu lya Ruwa lya ruwewu; 22 lutikyirie Ruwa luwoṙe mrima mmbaṙami; kui imwiṙikyia nakamwi, luwailyishe mrima luṙe makusaṟo mawicho; luwasanje mmbiu kui mṟinga mcha. 23 Lukuwaṙe tapu na ikusuria lyaṙu, lyilailachikye; kyipfa ulya aleteṟia nekyeafutsia shilya ateṟia. 24 Luambuye chandu lochitaramana na iwutiana shindo shicha na itutumana kui ikunda na iṟunda lyicha. 25 Maa lulaṙe isanzia handu hamwi, chandu kyikyeri kyiṙo kya wandu wengyi; indi luikyimbiane; na iengyeṟa iwuta kuṙo, kui chandu muwonyi kye mfiri ulya o Yesu ianduya ukyeri kufui. 26 Kyipfa kokooya lowuta wunyamaṟi lukomuambilyia wuṟango wo wuloi wulya, kuwoṙe-se kyimaṙuma kya kyiṙaso kyipfa kya ngyuunyamaṟi-pfo. 27 Indi kuwoṙe iweṙelyia ianduyo lyioweshie, na wulang'a wo moṙo ukuṟeyeṟie irumatsa walya wakyeri washituwa wa Ruwa. 28 Mndu alemina mawawaso ga Mose nekyewoogo kulawoṙe iwonio wukyiwa, kyiyeri waṟingyishi wawi ang'u waṟaaṟu wagamba kye nammbicho. 29 Muwonyi kuṙa? Kyiwemmbaṟi ngapo ing'anyi ngoseṟa mndu ulya alemina Mono-Ruwa, na igamba kye samu iya ya mma ilemuilyisha chi kyindo-pfo, na ilahia Mumuyo o isaṟia-pfoe? 30 Kyipfa lumwichi ulya alegamba, “Itaa kyiṟaache nyi iṟunda lyako, inyi ngyechitaa.” Na lyingyi-se, “Mndumii nechianduya wandu wakye.” 31 Nyi kyindo kyioweshie iolokyio nyi ngapo ya Ruwa ai na moo. 32 Kyaindi kumbuonyi mfiri ya mawookyionyi, iya kyiyeri mulewona ngyeela, mulekarishia iwingana lying'anyi lya fowa. 33 Shiyeri shingyi kulawoṙe iiṟikyiṟo mulekulunga na walya waweilahio na iwutio shindo shiwicho. 34 Kyipfa mulewonia wukyiwa walya wawewapfungye. Lyingyi-se mukoiṙikyia kui sia isoko masaa ganyu, muichi kye mrimenyi konyu kuwoṙe masaa gai mecha ngoseṟa, galekyesia. 35 Kyasia mulaṙe wukari maa wuṟango wonyu, cha kyipfa wuwoṙe wori wung'anyi. 36 Kyipfa muwaṟi iwaṙa wusimiri, kundu kye mukommbuta shilya Ruwa akundi muambilyie kyaasa kyilya. 37 “Cha kyipfa hatsugae kyiyeri kyifuhi mnu ulya aicha nechicha, maa echikyelyio-pfo. 38 Kyaindi msumganyi oko nechiwaṙa moo kui iiṙikyia. Na oe kaiya-iya mrima oko ochiwaṙa sia kyipfa kyakye-pfo.” 39 Kyaindi soe lukyeri kyiiṙi kya walya waiiya-iya na iṙeka-pfo, indi lukyeri kyiiṙi kya walya wawoṙe iiṙikyia na ikyiṟa mrima yaṙu.

11

1 Kyasia, iiṙikyia nyi iambilyia shindo shiweṙelyio kulawoṙe iiya-iya. Nyi iiṙikyia nakamwi shindo shilekyewono. 2 Kyipfa kui iiṙikyia waku waṙu waleṟingyishio. 3 Kui iiṙikyia luichi kye wuyana wulegumbo kui Ṙeṙo lya Ruwa, maa shindo shekyewono shilegumbo kui shindo shiwonio-pfo. 4 Kui iiṙikyia Abelyi naleenenga Ruwa kyiṙaso kyicha kuta kyilya kya Kaini. Koikyo naleṟingyishio kye namsumganyi; Ruwa kaṟingyishia shienengo shakye, na kyipfa kya iiṙikyia lyakye, Abelyi naiṙeṙa maa chandu alempfa. 5 Kui iiṙikyia Enokyi nalesamiṟo, kundu alapfe. Maa alewono-pfo, cha kyipfa Ruwa nalemsamiṟa, kyipfa alawendesamiṟo nalekoaṟingyishio kye nachihiṟa Ruwa. 6 Kyaindi kulawoṙe iiṙikyia kyeiṙimika imchihiṟa-pfo; cha kyipfa mndu ekyeyenda ko Ruwa kyiwaṟi naiṙikyie kye Ruwa nakyeri pfo, na kye nekyeenenga wori walya wekyempfula. 7 Kui iiṙikyia Noe amwikyimbio nyi Ruwa ko mbonyi tsa shindo shilandewonekye, kui chandu aleindia na iowuo Ruwa, naleachikyia safina, naiṙime ikyiṟa wandu wa kanyi kokye. Na kui kyilya alewuta naleloṟa wandu wa wuyana kye wawoṙe ṙeko, kawa mokyioṟa o wusumganyi wokyewono kui iiṙikyia. 8 Kui iiṙikyia Abrahamu naleiṙikyia kyiyeri alelago, nawukye nayende handu halya echihaenengo iwa kyioṟa; kafuma alaichi kundu aiyenda. 9 Kui iiṙikyia nalekaa wuyenunyi kulya urukyenyi lo kyaasa, cha urukyenyi lulai lokye, echikaa tengonyi hamwi na Isakyi na Yakobo, wai weoṟa hamwi na oe wa kyaasa kyilya kyilya. 10 Kyipfa Abrahamu naweiweṙelyia mṟi Ruwa aleukusaṟa na iuwika, mṟi ochikaa ho mlungana. 11 Kui iiṙikyia maa Sara amonyi naleambilyia wuiṙimi wo iira mana, ilyi kyiyeri kyakye kyilekokyamwiṙa; cha kyipfa naletala ulya aleteṟia kye nekyeafutsia kyilya ateṟia. 12 Na kyipfa kya ikyo wakafeo nyi mndu umwi, na oe nawei cha apfiie, wandu wafoi cha nyenyeri tsa ruwewu, na cha mlelya ukyeri mbai ya ipalyipalyi, uleiṙima italo. 13 Iwa woose wakapfiia iiṙikyienyi, walaambilyia shaasa shilya, indi wakashiwona wai kuleshi na ichihiyo kyipfa kyasho, na igamba kye wawekyeri wayenu, na wakyaro urukyenyi. 14 Cha kyipfa iwo wekyegamba mbonyi cha itso wailoṟa na pata kye waipfula uruka lowo wawenyi. 15 Na kokooya wawekumbuo uruka lulya walewuka, wawewona ṙaawa lyewuya. 16 Kyaindi wulalu wailanga uruka lucha ngoseṟa, uruka lo ruwewu. Koikyo Ruwa ekyerigo nyi sonu ilago Ruwa owo-pfo; kyipfa nalewawikyia mṟi. 17 Kui iiṙikyia Abrahamu kyiyeri aleyesho, nalewuta Isakyi nawe kyiṙaso; na oe aleambilyia shaasa-sho naweiwuta mono-kye, mana kyimuumwi. 18 Yee, ulya alewio, “Kui njia ya Isakyi kyishari kyapfo kyechilago,” 19 echiwona kye Ruwa neiṙima imṟutsa iwuka ko wapfu; Abrahamu kawona-se Isakyi iwuka upfunyi kui mfano. 20 Kui iiṙikyia Isakyi nalewikyia Yakobo na Esau mboṟa, maa ko mbonyi tsa shindo shechicha kyiyeri kya numa. 21 Kui iiṙikyia Yakobo, kyiyeri aweipfa, kawikyia mboṟa orio mana o Yosefu, kaana na iterewa Ruwa akuyekyie mṙoenyi o upoi lokye. 22 Kui iiṙikyia, Yosefu kyiyeri aleshika mafurumionyi gakye, naleonguo mbonyi tsa wana wa Isiraelyi iwuka Misiri, kagamba kyindo mmbiu okye ochiwutio. 23 Kui iiṙikyia, Mose kyiyeri alefeo, kaṟiko mori iṟaṟu na wafee wakye, cha kyipfa walewona kye nyi mana mcha, maa waleowuo iwawaso lya mangyi-pfo. 24 Kui iiṙikyia, kyiyeri Mose alewa mndu apfulukyie, nalelega ilago mana o mana o kyika o Farao. 25 Kawona nyi nanga ilyiso wukyiwa hamwi na wandu wa Ruwa kuta ipfula sia ya wunyamaṟi wo kyiyeri kyifuhi; 26 echiwona kye imino kyipfa kya Kristo kokye nyi wunjama wung'anyi kuta masaa ga Misiri; cha kyipfa naleweṙelyia wori-wo. 27 Kui iiṙikyia kawuka Misiri, alaowuoe nyashi ya mangyi, kyipfa nalekarishia cha mndu awonyi ulya alekyewono. 28 Kui iiṙikyia kaachikyia Pasaka, na kulya inyanyatsa samu, kundu ulya morumatsa wana wambele alawapaaye wo. 29 Kui iiṙikyia wakaiṙa ipalyipalyinyi lya Shamu, cha ilyi waiiṙa handu hagaṙutsu; kyiyeri Wamisiri waletambagana iwuta kuṙo wakaṙoo nyi mṟinga, wakapfa. 30 Kui iiṙikyia shiambasa sha Yeriko shileoloka, kyiyeri shileiṟiwio mfiri mfungaaṙe. 31 Kui iiṙikyia Rahabu, iṟai lyilya, alerumara hamwi na walya walenyamaṟa-pfo; cha kyipfa naleambilyia kui ufoṟo walya waleṙumo iowelyia mbonyi tsa uruka. 32 Na inyi ngyigambe kyi-se? Kyipfa kyiyeri kyiwengyishika ionguo mbonyi tsa Kyedion, Baraka, Samson, Yefuta, Dawidi, Samolyi na tsa weonguo shisuku-pfo. 33 Walya kui iiṙikyia walewinga ngyuuchilyi tsa wamangyi, walewuta sha wusumganyi, waleambilyia kyaasa, waleshinga maṙumbu ga simba, 34 walerumisha pfinya tsa moṙo, walekyia iwoogo nyi ngyuushu. Waleenengo pfinya numa ya iwa wafafa, walewaṙa wuragari shiṙenyi, walewinga wamesa wa wayenu. 35 Waka waleambilyia wapfu wawo waleṟutso. Kyaindi wengyi walekapo uwicho mṟasa iwoogo, wengyi wakagamba wakundi iwuto wusingyenyi-pfo, kundu wawone wuṟutsi wuwucha ngoseṟa. 36 Wengyi waleyesho kui imino na ikapo. Yee, kui shipfungo, na kui iwiko kyipfungonyi. 37 Walekapo na magoe, wakamanyo kui msemeno, waleyesho, walewoogo kui ushu; waletenga-tenga waṟee njonyi tsa moondo na tsa mburu. Waweuṟie shindo shifoi, wechilyiso wukyiwa, wechiwutio shindo shiwicho; 38 (wandu walya wuyana wulawewaṟi wakae pfo.) Wawetenga-tenga nguṙunyi na mafumvunyi na mbakonyi na mṟeshenyi ya urukyenyi. 39 Na wandu-wo woose wamṟingyishio kyipfa kya iiṙikyia lyawo, waleambilyia kyaasa-pfo; 40 cha kyipfa Ruwa naweisonguo iluṟeyeṟia soe kyindo kyicha, kundu soe lulakyeri ho walaiṙime iafutsio chandu Ruwa akundi wawe.

12

1 Kyasia na soe taa, cha kyipfa luwaiṟiwie nyi waṟingyishi wafoi mbaṟe-i, luwikyie mbai orio ṟio lyilemeri, na wunyamaṟi wulya wokyeluwaṙa tapu. Lupfuṟukane kui wusimiri kulya iṟundenyi lyilyiṙambikye koṙu, 2 lochiambuya Yesu, ulya ekyewooka na iafutsia iiṙikyia lyaṙu. Ulya alekarishia mawawio ga halya msalabenyi. Kyipfa kya sia iya iweimmbeṙa, alekusaṟa maa ale kya sonu ya iwoogo msalabenyi-pfo. Na wulalu naṙamie kuwokonyi ko kulyoe ko kyiṙi kya mng'ano kya Ruwa. 3 Kusaṟenyi mnu mbonyi tsa ulya alekarishia iwingana lying'anyi mbaṟe-i lya walya wekyewuta sha wunyamaṟi. Koikyo maa mulaiṙikyie iloloma na ipfiiyo nyi mṙoe. 4 Mulandekapane shiṙa mṟasa samu ipusuke, mochiwingana na wunyamaṟi-pfo. 5 Lyingyi-se mulewaṙima shilya muleikyimbio, shekyeṙeṙa na nyoe cha iṙeṙa na wana, “Mono-ko, ulamine kyiyeri Ruwa akugalutsa mkaṟo yapfo, Maa ulaṙe iaṙanyia kyiyeri oe akuṟoṟoma. Kyipfa ulya Ruwa amkundi nekyemwilacha mkaṟo yakye. 6 Na nekyekapa orio mndu amwiṙikyie cha mana.” 7 Muwaṟi kyipfa kya iilacho mkaṟo, Ruwa nammbutie nyoe cha wana; kyipfa nyi mana uha awuye alekyemwilacha mkaṟo? 8 Kyasia kokooya mulawoṙe iilacho mkaṟo, kukyeri ṙombo lya woose, nyi lyo-ndu mochiwa wana wa nja, maa chi wana wa mka o wolyi-pfo. 9 Hamwi na isho luwewoṙe waawu waṙu wa iha wuyanenyi waleluilacha mkaṟo, na soe lukowaindia. 10 Kyasia chi nanga mnu ikaa wuchilyinyi wo Awu o mrima na iwaṙa moo? 11 Orio ngapo ikyeri kyindo kyekyeende sia-pfo, indi kya fowa; kyaindi kyiyeri kya numa yekyeendie walya wawatoṟishe nyi ngapo-yo ndunda tsa wusumganyi tsiwoṙe ufoṟo. 12 Koikyo goṟuonyi mawoko gailoloma na ndi tsiluoe tsiṙeṙema, 13 muachikyie maṙende ganyu njia tsigoṟotsu, kundu kyindo kyikyeri kyileeta kyilaṙetso, indi kyikyiṟo. 14 Pfulenyi kui wuragari iwaṙa ufoṟo na wandu woose, na wuele, wulya kulawoṙe mndu echiwona Mndumii alauwoṙe, 15 mochiambuya mnu mndu alauṟe isaṟia lya Ruwa. Na mndu oose alawe cha iṟa lyekyewawa, namulyise nyoe wukyiwa na ifanyiṟa mkaṟo ya wandu. 16 Kulawaṙe mndu mṟui maa alaowuye na iindia Ruwa, cha Esau, alekumba kyioṟa kyakye kya mana mmbele kyipfa kya kyelya. 17 Kyipfa muichi kye maa lyilya kyiyeri kya numa alekunda ioṟa mboṟa nalelego (kyipfa alewona ṙaawa lyeṙumbuya wunyamaṟi-pfo), maa chandu alepfula ṙaawa-lyo kui mcheṟeṟe. 18 Maa mulekooya fumvu lyeiṙima ipooyo-pfo, lyileaka moṙo, maa ipuchi lya njuu, na meema, na kyiwiṟi, 19 na ṟui lya iganda na ṟui lya maṙeṙo; galya walya waleicho waleterewa walawio kyindo kyoose kyingyi. 20 Kyipfa waleiṙima ikarishia kyindo kyilya walewio, “Maa indo lya saka lyikapaaya fumvu-lyo lyekapo na magoe.” 21 Na isho shilewono chandu shiwekyeri shindo sheowesha, mṟasa Mose kagamba, “Ngawoṙo nyi wuowu na iṙeṙema.” 22 Indi nyoe mukokooya fumvu lya Sion, na mṟi o Ruwa ai na moo, Yerusalemu ya ruwewu, kundu kuwoṙe shiku sha malaika, 23 kyisanzionyi na siṟi ya wandu wakyeri cha wana wambele wa Ruwa wawaṟeie ruwewu, na Ruwa moṙumbuo moondu o wandu woose, na mrima ya wandu wasumganyi wamarisie kyaro, 24 na Yesu alewika Mma Mhya, na samu yakye ilepusuka, yekyeonguo shindo shicha kuta iya ya Abelyi. 25 Ambuyenyi mulalege ulya ekyeonguo. Kyipfa kokooya walalekyia walya walelega ulya alewaikyimbia urukyenyi, ngoseṟa mnu lochikyia soe lukokushowa na ulya ekyeluikyimbia ai ruwewu-pfo. 26 Ulya ṟui lyakye lyileṙeṙemsha uruka kyiyeri kyilya; kyaindi wulalu nateṟia egamba, “Lyimwi-se ngyechiṙeṙemsha, chi uruka tikyi-pfo, indi na ruwewu taa.” 27 Kyaindi ṙeṙo lyilya, “Lyimwi-se,” lyaṟingyishia isamiṟo shilya sheiṙima iṙeṙemsho, cha shindo shilegumbo, kundu shindo shilechiiṙima iṙeṙemsho shikae. 28 Kyasia, cha kyipfa luiambilyia Wumangyi wulechiiṙima iṙeṙemsho, luwaṙe isaṟia, lyilya kyipfa kya ikyo luterewe Ruwa na imwindia kui njia yechimchihiṟa, hamwi na wupfereri na wuowu; 29 kyipfa Ruwa oṙu nyi moṙo okyerumatsa.

13

1 Ikundana cha wana wa mka lyikae ho. 2 Mulawaṙime iambilyia wayenu; kyipfa kui iwuta kuṙo wandu wengyi waleambilyia malaika kulawoṙe imanya. 3 Kumbuonyi walya wakyeri kyipfungonyi cha ilyi muwapfungye hamwi nawo; na iwo wailyiiyo mbaka, chandu na nyoe muilyiiyo mbaka. 4 Wandu woose wawone kye wolyi nyi kyindo kyicha, na mii ang'u mka alakuwinishe na wandu wengyi; cha kyipfa waṟui Ruwa nechiwaolotsia ngapo. 5 Mulawaṙe mkaṟo o kunda heleri; wenyi cha wandu walauṟie kyindo. 6 Cha kyipfa oe amonyi nagambie, “Ruwa nyi oe ekyengyitarama ngyechiowuo-pfo, mndu nechingyiwutia kyi?” 7 Kumbuonyi walya wawekyemusongoya, walemuongoya Ṙeṙo lya Ruwa; lyingyi-se, kui iambuya mnu mafurumionyi ga mkaṟo owo, oshenyi iiṙikyia lyawo. 8 Yesu Kristo nyi oe ulya, ukou na inu na mṟasa mlungana. 9 Maa mulaṟaisho nyi malosho ga mbaṟe tsingyi, na mayenu; kyipfa nyi kyicha mrima ukarisho kui isaṟia, maa chi kui shelya shilya walya waleyenda nasho walalewona kyiira-pfo. 10 Luwoṙe alyitaṟe walya wekyeṟundia tengo lyilya walawoṙe momu o ilya shindo shayo. 11 Kyipfa shindo shilya samu yasho ileendo nyi Mkohanyi ang'anyi kuta woose na handu haele kyipfa kya wunyamaṟi, kyaindi nyama tsa shindo-sho tsekyeṙasio nja ya handu wandu wekyekaa. 12 Kyipfa kya ikyo, Yesu na oe, kundu nailyishe wandu kui samu yakye amonyi, nalelyiso wukyiwa nja ya mṟi. 13 Kyasia lufume luyende kokye nja ya handu wandu wekyekaa, na imino hamwi na oe. 14 Kyipfa iha luwoṙe mṟi ochikaa ho mlungana-pfo, indi luipfula mṟi ulya uicha. 15 Kyasia, kui njia yakye oe, luenengye Ruwa kyiṙaso kya kyiṟumi mlungana, maṙeṙo gaṙu nyi kyienengo kyaṙu. 16 Kyaindi mulawaṙime iwuta shindo shicha na ikaa handu hamwi; kyipfa shienengo cha isho nyisho shekyechihiṟa Ruwa. 17 Indienyi walya wekyemusongoya, na iwapfereria; kyipfa wo wekyelaa kyiṙombo kyipfa kya mrima yanyu. Kyipfa wechiwia Ruwa mbonyi tsa wuṟundi wowo, kundu kye wawute kuṙo kui sia maa chi kui fowa-pfo; kyipfa kyiwechimuenenga nyoe kyiira-pfo. 18 Luterewienyi; kyipfa luiṙikyie kye luwoṙe makusaṟo mecha mrimenyi, lukundi iwaṙa mkaṟo mcha shindonyi shoose. 19 Na inyi ngyimuterewa ngoseṟa mnu iwuta isho kundu ngyiwiyiṟo na konyu iwinyi. 20 Kyasia, Ruwa o ufoṟo aleende-se iwuka ko wapfu Mlyisi Ang'anyi o moondo, kui samu ya mma o mlungana, oe Mndumii oṙu Yesu, 21 namuenengye nyoe iafutsia kyaro orio iṟundenyi lyicha, muiṙime iwuta shilya akundi; na oe echiwuta mrimenyi koṙu kyilya kyichihiṟie mbele yakye, kui Yesu Kristo; kyiṟumi kyikae na oe mlungana na mlungana. Amen. 22 Kyaindi ngyimuterewa, wana wa wama, muaṙanyie necha ulogo-lu lo iikyimbiana; kyipfa ngamuṟeia paruo-i kui maṙeṙo maangu. 23 Manyenyi kye mono-wama oṙu Timoteo ammbuto kyipfungonyi; ulya, kacha iwinyi, ngyechiwonana na nyoe hamwi na oe. 24 Iṟikyiṟenyi woose wekyemusongoya nyoe, na wandu wa Ruwa woose; iwo wakyeri wa Italyia wamuiṟikyiṟa. 25 Isaṟia lyikae na nyoe moose.

AMAZING GRACE BIBLE INSTITUTE