Galatians


1

1 Inyi Paulo, ngaṟeia paruo-i, ngyikyeri msu (chi msu o wandu maa amṙume nyi mndu-pfo, indi amṙume nyi Yesu Kristo, na Ruwa Awu alemṟutsa iwuka ko wapfu), 2 na woose waiṙikyie Yesu wakyeri hamwi na inyi loiṟikyiṟa siṟi tsoose tsa Galatia. 3 Isaṟia lyikae konyu, na ufoṟo, shiwukyie ko Ruwa Awu, na ko Mndumii oṙu Yesu Kristo. 4 Ulya alereka mrima okye kyipfa kya ngyuunyamaṟi tsaṙu, kundu nalukyiṟe mawicho ga kunu wuyanenyi lukyeri wulalu, chandu Ruwa, Awu oṙu, alekunda. 5 Kyiṟumi kyikae na oe, mlungana na mlungana. Amen. 6 Ngyimṟiyie kyipfa muiṙa iwinyi kuṙo ulya alemulaga isaṟienyi lya Kristo, na igalukyia malosho ga mbaṟe ingyi gaigambo kye nyi ndumi ngyicha. 7 Kuwoṙe ndumi ngyicha ingyi-pfo; kyaindi kuwoṙe wandu waipfuṟukana wakundi iilacha Ndumi Ngyicha ya Yesu Kristo. 8 Kyaindi kokooya soe ang'u malaika o ruwewu amulosha shindo shingyi shilakyeri shilya lumuongoya, nawusio kyiseso. 9 Chandu lulesonguo igamba, na wulalu ngyigamba-se, mndu oose kamuongoya ndumi ngyicha ingyi ilakyeri iya muleambilyia koṙu, mndu-cho nawusio kyiseso. 10 Kyipfa wulalu ngyesa ngyikundi ikundo nyi wandu? Ote! Kyindo ngyikundi nyi ikundo nyi Ruwa. Kyipfa kokooya ngyiwekundi mṟasa wulalu ichihiṟa wandu, ngyiwechiwa mṟundi o Kristo-pfo. 11 Cha kyipfa, wana wa wama wako, Ndumi-yo Ngyicha ngyilemuongoya, ngyimmbia kye ilewuka ko wandu-pfo. 12 Cha kyipfa ngyileiambilyia ko wandu, maa ilosho nyi mndu-pfo, indi kui ishukuyo nyi Yesu Kristo. 13 Kyipfa muleicho mbonyi tsa mkaṟo yako wookyia mawookyionyi kyiyeri ngyiwekyeindia Ruwa chandu Wayuda wekyemwindia; kye ngyilelyisa Siṟi ya Mndumii wukyiwa wuelewetsie, ngyetambagana iinyamaṟa. 14 Na inyi wandunyi wa rika lyako inyi ngyiwekyeri mbele kuta wengyi kyipfuṟukanionyi kyeindia Ruwa chandu Wayuda wekyemwindia, ngatambagana mnu iosha shilya ngyileambilyia ko waku wako. 15 Kyaindi Ruwa alengyisaanga wookyia wosinyi ko wama oko, kangyilaga kui isaṟia lyakye; 16 kyiyeri alewona nyi necha iṟingyishia Mono-kye mrimenyi koko, kundu ngyiongoye walya walaiṙikyie Yesu mbonyi tsakye; maa ngyileyenda ko mndu oose immbesa kyindo-pfo. 17 Maa ngyilekunda iyenda Yerusalemu ko walya walengyisongoya iwa wasu-pfo; indi ngyileyenda uruka lo Waarabu na numa ya iho ngawuya-se na Dameskyi. 18 Numa ya iho; hamwiṙe maka iṟaṟu, ngaṙo iyenda Yerusalemu kundu ngyiwonane na Kyefa, ngakaa kokye mfiri ikumi na itanu. 19 Kyaindi ngyilewona msu ungyi sile Yakobo, mono-wama o Mndumii-pfo. 20 Na isho ngyimuṟeia nyoe, ambuyenyi, mbele ya Ruwa, ngyiṙeṙa wongo-pfo. 21 Numa ya iho ngyileyenda ngyuura tsa Shamu na Kyilyikyia. 22 Kyaindi ngyilewono kyaam kyako nyi siṟi tsa Uyuda tsiwekyeri kyiiṙi kya Kristo-pfo; 23 indi waleicho tupu kye icho mfiri ya ipfo numa awekyewalyisa wukyiwa, wulalu naionguo mbonyi tsa iiṙikyia alelyinyamaṟa ilyi kacha. 24 Wakaṟumisha Ruwa kyipfa kyako.



2

1 Numa ya iho, hamwiṙe maka ikumi na ina, ngaṙo-se iyenda Yerusalemu ngyiṙuṙanyi na Barinaba na Tito. 2 Na inyi ngyileyenda kyipfa ngyileshukuyo ngawia wandu Ndumi Ngyicha iya ngyekyeongoya walya walakyeri Wayuda, kyaindi kui kyiṟika ko walya wawoṙe kyiṟumi, kyilacheewa kofia ngyiṙicha wulya, ang'u ngyileṙicha wulya. 3 Kyaindi Tito awekyeri hamwi na inyi, na oe nyi Mkyiṟikyi, aleitiko iṙino-pfo. 4 Indi kyipfa kya wandu walekuloṟa kye waiṙikyie Yesu na kunu waweiṙikyie-pfo, wandu walekulunga na soe kui kyiṟika kundu wamanye mbonyi tsaṙu soe lulawachilyie nyi kyindo kyiiṙi kya Kristo Yesu, kundu ilyi numa waluwikye wusingyenyi. 5 Kyaindi kyipfa kya iringa ulogo lo Ndumi Ngyicha luleiṙikyia waluchilyie maa ale-pfo, kundu wuloi wo Ndumi Ngyicha wukae na nyoe. 6 Kyaindi walya wawoṙe kyiṟumi na kye wawoṙe rina (ngyilesaṟa wawei kuṙa-pfo kyipfa koko shilyingananyi shoose; na Ruwa ekyeambuya kyaam kya mndu-pfo); ngagamba iwo wawoṙe kyiṟumi walengyiengyeṟia kyindo-pfo. 7 Indi kyilaṙuṙanyi na isho, kyiyeri walewona kye ngyimṙambikye Ndumi Ngyicha ya wandu walakyeri Wayuda, chandu Petiro aleṙambiko Ndumi Ngyicha ya Wayuda; 8 (kyipfa ulya aleenenga Petiro wuiṙimi wo iwa Msu o Wayuda nyi oe alengyienenga na inyi wuiṙimi wo iyenda ko walya walakyeri Wayuda.) 9 Lyingyi-se kyiyeri walemanya isaṟia lyilya ngyileenengo; Yakobo, na Kyefa, na Yohane, wawoṙe kyiṟumi kye nyi ngoe, waleiṙikyia iṟunda hamwi na inyi na Barinaba; kundu soe luyende ko walya walakyeri Wayuda, nawo wayende ko Wayuda. 10 Indi waleluwia luwute kyindo kyimwi, lutarame wakyiwa, na ikyo ngyilekyiṟunda kui wuragari. 11 Kyaindi kyiyeri Kyefa alecha na Antiokyia, ngyilegaluana na oe ushangu kui ushangu, kyipfa nawewaṟi ianduyo. 12 Cha kyipfa kyiyeri wandu waata wawukyie ko Yakobo walawendeche, naweilya handu hamwi na wandu walaiṙikyie Yesu; kyaindi kyiyeri wo walecha, kawuya na numa, kalekana nawo, kunu echiowuo Wayuda. 13 Na Wayuda-wo, wengyi wakaowuo hamwi na oe, mṟasa na Barinaba kawaṙa wukulembecheṟi chawo. 14 Kyaindi, kyiyeri ngyilewona kye mkaṟo yawo iṙuṙanyi necha na wuloi wo Ndumi Ngyicha-pfo, ngyilewia Kyefa mbele ya wandu woose, “Kokooya iyoe ukyeri Myuda nuosha miichiwie ya wandu walaiṙikyie Yesu, maa chi ya Wayuda-pfo, ny'kyilyi uitika wandu walaiṙikyie Yesu iosha miichiwie ya Wayuda?” 15 Soe lukyeri Wayuda kui ifeo, maa chi waṙeko wawukyie ko walya walakyeri Wayuda-pfo, 16 luichi kye mndu ekyetalyio wusumganyi kui mawuto ga mawawaso-pfo, indi kui iwaṙa iiṙikyia kyiiṙi kya Kristo Yesu. Soe luleiṙikyia Kristo Yesu kundu lutalyio wusumganyi kui iiṙikyia Kristo, maa chi kui mawuto ga mawawaso-pfo; kyipfa kui mawuto ga mawawaso kuwoṙe mndu echitalyio wusumganyi-pfo. 17 Kyaindi kokooya soe luwenyi, kui ipfula italyio wusumganyi kyiiṙi kya Kristo, lulewono kye luwanyamaṟi, ngyesa Kristo nawa mṟundi o wunyamaṟi? Ote! 18 Kyipfa ngawika-se shilya ngyilemshiunduo, ngaloṟa kye inyi ngyimonyi nyi mṙeko. 19 Kyipfa inyi ko mbonyi tsa mawawaso ngyipfiie kundu ngyiwaṙe moo kyipfa kya Ruwa. 20 Ngyilekapio msalabenyi hamwi na Kristo; kyaindi ngyiwoṙe moo; maa chi inyi-se-pfo, indi Kristo nai na moo mrimenyi koko. Na moo ngyiwoṙe wulalu mmbiunyi ngyiuwoṙe kyiiṙi kya iiṙikyia Mana o Ruwa, ulya alengyikunda kareka moo okye kyipfa kyako. 21 Ngyikundi iwiyitsa kuleshi ikunda lya Ruwa ko wandu-pfo; kyipfa kokooya wusumganyi wokyewono kui njia ya mawawaso, kyasia Kristo nalepfa wulya.



3

1 Lanyoe Wagalatia mulawoṙe wuṟango, nyi wui alemloga, nyoe walya Yesu Kristo alemuloṟa na pata kye nalekapio msalabenyi? 2 Ngyikundi ikulosha kyindo kyimwi konyu. Ngyesa muleambilyia Mumuyo Mweele kui mawuto ga mawawaso ang'u kui iicho Ndumi Ngyicha na iiṙikyia Yesu? 3 Ngyesa mulewa matondo mbaṟe-i iyi? Mommbookye kui Mumuyo, mukundi iafutsia kui pfinya tsanyu muwenyi? 4 Ngyesa molya wukyiwa wung'anyi kuṙi wulya? Loi chi wulya-pfo. Kyilya kyilemmbutikyia kyiwaṟi imuenenga ikusaṟa chandu kyiweng'anyi. 5 Kyasia, ulya ekyemuenenga Mumuyo na iwuta shindo sha maṟiyisho kyiiṙi kyanyu, ngyesa nekyewuta kuṙo kui mawuto ga mawawaso, ang'u kui iicho Ndumi Ngyicha yekyeende iiṙikyia Yesu? 6 Chandu Abrahamu aleiṙikyia Ruwa katalyio wusumganyi. 7 Kyasia manyenyi-ng'u kye walya wawoṙe iiṙikyia, iwo nyiwo wana wa Abrahamu. 8 Na kyiṟeio kyiele, chandu kyilewona wookyia kacha kye Ruwa nechitalyia wusumganyi walya walaiṙikyie Yesu kui iiṙikyia, kyileongoya Abrahamu Mbonyi Ngyicha kyiyeri kya kacha igamba, “Kyiiṙi kyapfo iyoe walya walaiṙikyie Yesu wechiwona mboṟa.” 9 Kyasia iwo wakyeri wa iiṙikyia wekyewona mboṟa hamwi na Abrahamu awekyeri mndu awoṙe iiṙikyia. 10 Cha kyipfa woose wakyeri wa mawuto ga mawawaso, wakyeri kyisesonyi; kyipfa kyikyiṟeie, “Namsese ulya alekyeosha shindo shoose shikyeri kyitapunyi kya uwawaso.” 11 Nyi kyindo kyiichio na pata kye kuwoṙe mndu ekyetalyio wusumganyi mbele ya Ruwa kui mawawaso-pfo; cha kyipfa, “Mndu msumganyi nechiwaṙa moo kui iiṙikyia.” 12 Na uwawaso lulecha kui iiṙikyia-pfo, indi, “Ekyewuta isho nechiwaṙa moo kyiiṙi kya isho.” 13 Kristo naleluwuta kyisesonyi kya uwawaso, cha kyipfa naleseso kyipfa kyaṙu; kyipfa kyikyiṟeie, “Orio mndu amkapie msalabenyi namsese.” 14 Kundu kye mboṟa ya Abrahamu ikooye walya walaiṙikyie Yesu kyiiṙi kya Yesu Kristo, luiṙime iambilyia kyaasa kya Mumuyo kui njia ya iiṙikyia. 15 Wana wa wama wako, ngyiṙeṙa kyimndu. Maa chandu kyikyeri nyi kyaasa kya wandu, kyaasa kyikammbiko, kuwoṙe mokyiilacha ang'u ikyiengyeṟa-pfo. 16 Kyasia Abrahamu naleenengo shaasa hamwi na ulya alemfee. Aigamba, “Ko walya alefee” cha ilyi nyi wafoi-pfo, indi cha ilyi nyi umwi, “Ko ulya ochimfee,” kyimwi na igamba Kristo. 17 Kyindo ngyigamba nyi ikyi, kyaasa kyilewiko mawookyionyi nyi Ruwa, uwawaso lulecha maka magana gaana na makumi gaṟaaṟu numa ya kyaasa-kyo loiṙima iilacha kyaasa-kyo-pfo. 18 Cha kyipfa kyioṟa kyikawa nyi kui mawawaso, kyikyewa-se kyaasa-pfo; kyaindi Ruwa nalesaṟia Abrahamu kui njia ya kyaasa. 19 Kyasia uwawaso nyi kyikyi-ng'u? Uwawaso luleṙiko kyipfa kya maṙeko, mṟasa nache icho amwenengye kyaasa-kyo; kyaasa kyileendo nyi malaika kyiyeri Mose alewa mndu Ruwa alemṙuma ko wandu. 20 Kyasia ulya akyeri moṙumo chi moṙumo ko mndu umwi-pfo; indi Ruwa nyi umwi. 21 Kyasia, ngyesa uwawaso lokyewingana na shaasa sha Ruwa? Ote! Cha kyipfa kokooya mawawaso gekyeende moo galaleṙiko, loi wusumganyi wuwechiwono kui mawawaso. 22 Kyaindi kyiṟeio kyiele kyagamba kye wuyana woose wuwuchilyie nyi wunyamaṟi kundu iwo waiṙikyie waenengo kyaasa kui iiṙikyia waenengo kyaasa-kyo kui iiṙikyia Yesu Kristo. 23 Kyaindi kyiyeri iiṙikyia lyilya lyilawendeche luwewachilyie nyi mawawaso, lukowa cha wandu wakyeri kyipfungonyi, mṟasa kyiyeri kyeiṙikyia Yesu kyechicha, kyiyeri Ruwa echiloṟa. 24 Koikyo uwawaso lowa msongoru moluende na ko Kristo, kundu lutalyio wusumganyi kui iiṙikyia. 25 Kyaindi kokooya iiṙikyia lyilemcha, lukyeri-se wanda ya msongoru-pfo. 26 Cha kyipfa nyoe moose mowa wana wa Ruwa kui njia ya iiṙikyia Kristo Yesu. 27 Kyipfa nyoe moose muwapatise kyiiṙi kya Kristo muṟee Kristo. 28 Kuwoṙe-se Myuda maa Mkyiṟikyi-pfo. Kuwoṙe-se mtumo ang'u alakyeri mtumo-pfo. Kuwoṙe-se mndu msoṟo maa mndu mka-pfo. Kyipfa nyoe moose mowa kyindo kyimwi kyiiṙi kya Kristo Yesu. 29 Na kokooya nyoe nyi wandu wa Kristo, kyasia mowa wana wa Abrahamu, na weoṟa iṙuana na kyaasa.



4

1 Kyaindi ngagamba kye mokyioṟa, kyiyeri kyoose ai mana, nakyeri cha mtumo, kyiyeri awuye ammbiie kyindo echioṟa. 2 Indi nakyeri wuchilyinyi wo walya wawawikye wamwambuye na imwenenga shilya akundi mṟasa kyiyeri awuye echigamba kye kuwoṙe-se kyimaṙuma kyewika wandu weambuya mokyioṟa-cho-pfo. 3 Na wuṙo na soe, kyiyeri luwekyeri wana watutu, lukowa watumo wa mumuyo ichilyie wuyana. 4 Na lyilya kyiyeri kyilya kyiwekyikunde kyileafukyia, Ruwa naleṙuma Mono-kye, ulya alefeo nyi mndu mka, nafeo wuchilyinyi wo mawawaso, 5 kundu nakyiṟe walya wawewachilyie nyi mawawaso, kundu soe luiṙime iambilyia iwa wana. 6 Na kyipfa nyoe mowa wana, Ruwa naleṙuma Mumuyo o Mono-kye mrimenyi konyu, ekyegamba, “Aba,” kyimwi na igamba Awu. 7 Kokooya nyi wuṙo, iyoe chi mtumo-se-pfo indi nukyeri mana; na kokooya nukyeri mana, kyasia nukyeri mokyioṟa ko Ruwa. 8 Kyaindi kyiyeri kyilya, kyipfa mulaweichi Ruwa, muleṟundia shindo shilakyeri waruwa. 9 Indi wulalu mommanye Ruwa, ang'u ngoseṟa Ruwa imumanya nyoe, nyi kyikyi kyitewe kyewiyilyia malosho ga mawookyionyi gamafofo, gai mti, galya mukundi igaṟundia-se? 10 Mokyekuwinisha na mfiri, na mori, na shiyeri, na maka. 11 Ngyikusaṟa mnu kyipfa kyanyu, kyilawe kofia ngyilekuwinisha wulya kyipfa kyanyu. 12 Wana wa wama wako, ngamterewa, muwe cha inyi, kyipfa inyi nyi cha nyoe. Mulengyilyiia mbaka kyindonyi kyoose-pfo. 13 Kyaindi muichi kye ngyilemuongoya Ndumi Ngyicha lya kuwooka kyipfa kya wufafa wo mmbiu. 14 Na kyiyesho kyilempaaya nyoe mmbiunyi oko mulekyimina maa ikyilega-pfo, indi mulengyiambilyia cha malaika o Ruwa, cha Kristo Yesu. 15 Kyasia, nyi kyikyi kyammbutikye kyeiṙima igaluo ishi shoose? Kyipfa ngyiṟingyishia kye, kokooya kyiwechiiṙimika, muwekuluo meso ganyu, mungyienengye inyi. 16 Ngyesa ngawa mokyituwa onyu kyipfa ngyimmbia shikyeri sha loi? 17 Iwo wawoṙe ilanga lying'anyi kyipfa kyanyu, kyaindi chi kui njia ngyicha-pfo, indi wakundi imshingyia nja, kundu kye nyoe muwalangye wo. 18 Na nyi kyindo kyicha iwaṙa wunyeng'i kyipfa kya kyindo kyicha mfiri yoose, maa chi kyiyeri ngyikyeri na nyoe tupu-pfo. 19 Mbuya tsako wakunde, walya kyipfa kyawo ngyiwoṙe iwawio lying'anyi mrimenyi mṟasa muwe cha Kristo; 20 ngyilangyie kui mrima oko oose ikaa halya-ndu mukyeri wulalu, kundu ngyiilachikye na iloṟa lyako chandu ngyimukundi. 21 Ngyiwienyi, nyoe mukundi ichilyio nyi mawawaso. Ngyesa mokyeicho kyindo mawawaso gagamba-pfoe? 22 Cha kyipfa kyikyiṟeie kye Abrahamu nawewoṙe wana wawi, umwi alefee na kyisinga, na umwi na mka o wolyi. 23 Kyaindi mana ulya o kyisinga nalefeo kui mmbiu, na ulya o mka o wolyi kui kyaasa. 24 Shindo-shi shekyeṙeṙo kui mfano; cha kyipfa iwa wawi nyi cha mma ya mbaṟe tsiwi; mma umwi iwuka fumvu lya Sinai, okyewaṙa wana kui wusinga, na mma-cho nyi Hajiri. 25 Kyipfa Hajiri nyi cha fumvu lya Sinai lyikyeri urukyenyi lo Waarabu, lyilyingananyi na Yerusalemu ya wulalu; cha kyipfa nekyeṟunda hamwi na wana. 26 Indi Yerusalemu ya wuye nyi mka ulya o wolyi, na oe nyi oe wama oṙu soe. 27 Cha kyipfa kyikyiṟeie, “Chihiyo, iyoe muumba, ulekyewaṙa wana; kuilengye na ṟui lying'anyi, ufiiṟe, iyoe ulawoṙe fowa cha ya mndu mka aienengo mana. Kyipfa wana wa ulya amṙe amonyi nyi wafoi kuta wa ulya awoṙe mii.” 28 Kyasia, wana wa wama wako, cha Isakyi, soe nyi wana wa kyaasa. 29 Kyaindi chandu kyiyeri kyilya ulya alefeo kui mmbiu alelyisa wukyiwa ulya alefeo kui Mumuyo, nyi wuṙo kyikyeri maa wulalu. 30 Kyaindi kyiṟeio kyiele kyagamba kuṙa? “Funa kyisinga na mono-kyo, cha kyipfa mana o kyisinga echioṟa maa ale hamwi na mana o mka o wolyi-pfo.” 31 Koikyo, wana wa wama wako, soe chi wana wa kyisinga-pfo indi nyi wana wa ulya ai mka o wolyi.



5

1 Kyiiṙi kya iwa wana wa mka o wolyi Kristo nalelugaluo wandu walakyeri wuchilyinyi wo kyindo kyoose. Koikyo maa mulalolome, maa ichilyio-se nyi wutumo. 2 Inyi Paulo ngammbia nyoe kye, mukoṙino, Kristo echiwaṙa kyiira konyu-pfo. 3 Lyingyi-se ngyiṟingyishia orio mndu ekyeṙino kye nyi iṟunda lyakye iafutsia uwawaso loose. 4 Muwasaangye nyi Kristo, nyoe mukundi italyio wusumganyi kui mawawaso, mooloka na iwuka isaṟienyi. 5 Kyipfa soe kui Mumuyo luiweṙelyia ikusuria lya wusumganyi kui njia ya iiṙikyia. 6 Kyipfa kyiiṙi kya Kristo Yesu iṙino, maa iṙa iṙino lyiwoṙe kyiira kyoose-pfo, indi iiṙikyia lyekyeṟunda kui ikunda. 7 Muweitambagana necha; nyi wui alemushingyia mulaindie wuloi? 8 Chi Ruwa alemushingyia-pfo, kyipfa nyi oe ekyemlaga muyende kokye. 9 Chachu kyitung'tu yekyetarang'isha itongye lyoose. 10 Kyiiṙi kya Mndumii ngyikusaṟie kye moiṙima iwaṙa makusaṟo ga mbaṟe ingyi-pfo. Kyaindi mndu oose aimuenenga wuowu nechianduyo. 11 Na inyi, wana wa wama wako, kokooya ngyionguo mbonyi tsa iṙino, ny'kyilyi ngyilyiso wukyiwa mṟasa wulalu? Kokooya ngyiweionguo kuṙo ilosha lyako kye Kristo nalepfa msalabenyi lyiwewa lya wulya. 12 Ngyiwechihiyo mnu kokooya iwo waimfoga-foga wawekuletsana na nyoe nakamwi. 13 Kyipfa nyoe, wana wa wama, mulelago muwe wandu mulawachilyie nyi kyindo. Kyaindi kulya iwa wandu walawachilyie nyi kyindo kulawe kyimaṙuma kyeosha lango tsa mmbiu, indi ṟundianenyi kui ikunda. 14 Kyipfa uwawaso loose lukyeri kyindonyi kyimwi tupu, nakyo nyi ikyi, “Ukunde momṟasa opfo chandu ukukundi kumonyi.” 15 Kyaindi mukowika cha mando ga saka, ambuyenyi mularumatsane. 16 Kyasia ngagamba, chilyionyi nyi Mumuyo Mweele; maa mulawute kyilya mrima yanyu ikundi tupu. 17 Cha kyipfa mmbiu okyelanga ochiwingana na Mumuyo, na Mumuyo iwingana na mmbiu; kyipfa ishi shekyeṙuana-pfo, na moiṙima iwuta shilya mukundi-pfo. 18 Kyaindi mukosongoyo nyi Mumuyo, mukyeri wuchilyinyi wo mawawaso-pfo. 19 Kyasia mawuto ga mmbiu gai na pata, nyigo iga: wuṟui, ukoe na lango tsa sonu, 20 iindia mafano, wusawi, isuana, iluyana, wunyeng'i, nyashi, wuṟiingyi, nduutsano, iṙeṙa wongo. 21 Wunanzi, ilya na ielewetsa, na shindo shifananyi na isho; kyiiṙi kya isho ngammbia kulawoṙe ikyelyio, chandu ngyilemummbia kye wandu wekyewuta shindo sha mbaṟe-yo wechioṟa Wumangyi wo Ruwa-pfo. 22 Kyaindi ndunda tsa Mumuyo nyi ikunda, sia, ufoṟo, ikarishia, kyiṙo kyicha, itarama wakyeri wukyiwenyi, iwuta kyilya mndu ateṟia, 23 wuhoo, iwaṙa meena. Kuwoṙe iwawaso lya mbonyi tsa shindo cha isho-pfo. 24 Na iwo wakyeri wa Kristo Yesu wekyechilyio-se nyi lango tsa mmbiu yawo-pfo. 25 Mumuyo naluenengyie moo, koikyo lumwenengye momu o iluchilyia. 26 Maa lulakushele wulya, lochisouana na iwoniana wunyeng'i.



6

1 Wana wa wama wako, mndu kaasha kyindonyi kyoose, nyoe mukyeri wa Mumuyo mmbiyiṟenyi kui ngoo ya wuhoo, ochikuringa mrima opfo ulacheyesho. 2 Taramanenyi na iosha iwawaso lya Kristo. 3 Kyipfa mndu kakuwona kye nyi kyindo, na oe chi kyindo-pfo, nakulemba mrimenyi kokye. 4 Kyaindi orio mndu naeneng'ene iṟunda lyakye amonyi, nyi lyo-ndu eiṙima iwaṙa kyimaṙuma kyekushela mrimenyi kokye tupu, maa chi ko oṙoe-pfo. 5 Kyipfa orio mndu nechikuṙika mlari okye amonyi. 6 Manalosho naongoye mlosha okye shindo shicha shoose. 7 Maa mulakulembe, Ruwa chi tondo-pfo; cha kyipfa kyilya mndu awaaya nyikyo echisambuo. 8 Kyipfa ulya awaaya kui mmbiu okye, mmbiunyi okye nechisambuo wunyamaṟi; indi ulya awaaya kui Mumuyo, Mumuyonyi nechisambuo moo o mlungana. 9 Lyingyi-se maa lulalemo iwuta shindo shicha; kyipfa lochisambuo ilyi kyiyeri kyechishika, lulandewine. 10 Koikyo iṙuana na chandu lowona ṙaawa luwutie wandu shindo shicha; ngoseṟa walya waiṙikyie Yesu. 11 Chandu inyi ngyimonyi ngyimuṟeia paruo wulalu, 12 woose wakundi iwono kye nyi wandu wecha ko mbonyi tsa mmbiu nyiwo waimuitika iṙino; kundu walalyiso wukyiwa nyi msalaba o Kristo tikyi. 13 Cha kyipfa maa walya wawaṙine wekyeosha kyilya mawawaso gakundi-pfo; indi wakundi nyoe muṙino, waiṙime ikushelyia mmbiu yanyu. 14 Kyaindi inyi, ote, ngyilakushelyie kyindo kyoose sile msalaba o Mndumii oṙu Yesu Kristo, ulya ulengyienenga inyi iṙa iosha mbonyi tsa wuyana. 15 Cha kyipfa iṙino ang'u iṙa iṙino chi kyindo-pfo, indi kyindo kying'anyi nyi iwa mndu mhya. 16 Na woose wechiwaṙa mkaṟo iṙuṙanyi na ikyo, ufoṟo lukae kowo na iwoniana wukyiwa, yee ko wandu woose wa Ruwa. 17 Wookyia wulalu mndu alangyilyise wukyiwa; cha kyipfa ngyiṙuṙe ngoru tsa Kristo mmbiunyi koko. 18 Wana wa wama wako, isaṟia lya Mndumii oṙu Yesu Kristo lyikae hamwi na mrima yanyu. Amen.



AMAZING GRACE BIBLE INSTITUTE