2 Corinthians


1

1 Inyi Paulo, ngyikyeri msu o Kristo Yesu chandu Ruwa akundi, na Timoteo mono-wama oṙu; ngaṟeia paruo-i ko siṟi ya Ruwa ikyeri Korinto, hamwi na wandu wa Ruwa woose wakyeri urukyenyi loose lo Akaya. 2 Isaṟia lyikae konyu na ufoṟo, shiwukyie ko Ruwa Awu oṙu na ko Mndumii Yesu Kristo. 3 Ruwa naṟumisho, Awu o Mndumii oṙu Yesu Kristo, Awu o isaṟia, Ruwa o iwiyiṟia moo lyoose; 4 ekyeluwiyiṟia moo ngyuukyiwenyi tsaṙu tsoose kundu na soe luiṙime iwawiyiṟia moo walya wakyeri ngyuukyiwenyi tsa mbaṟe tsoose, kui iwiyiṟio moo-lyo, lokyewiyiṟio moo nyi Ruwa. 5 Kyipfa chandu matuuro ga Kristo gaiengyeṟika koṙu, na wuṙo iwiyiṟio moo lyaṙu lyiengyeṟika kui rina lya Kristo. 6 Kyaindi kokooya soe lukyeri wukyiwenyi wung'anyi, nyi kyipfa kya iwiyiṟio moo lyanyu na wukyiṟo wonyu; ang'u kokooya lowiyiṟio moo, nyi kyipfa kya nyoe iluwiyiṟia moo; lyekyeṟunda iṟunda lyayo kui ikarishia matuuro galya galya lokyetuuro soe. 7 Na ikusuria lyaṙu kyipfa kyanyu lyilolomie-pfo, lochimanya kye chandu muwekyeri wandu walewetuuro nyi matuuro galya, na wuṙo mulewewutio iwiyiṟio moo lyilya. 8 Kyipfa, wana wa wama, lukundi muṙe mulamanya mbonyi tsa wukyiwa wulya wung'anyi wulelukooya kulya Asia-pfo. Kye lulelemio mnu kuta chandu luwechiiṙima, mṟasa lukopfiiyo nyi mṙoe kye luwechiiṙima-se ikaa na moo-pfo. 9 Yee, soe luwenyi luwewoṙe ianduyo lya upfu mrimenyi koṙu, kundu lulachekusuria kya mrima yaṙu, indi lukusurie Ruwa, moṟutsa wapfu. 10 Alelukyiṟa soe upfunyi lung'anyi kuṙo; lyingyi-se nelukyiṟa. Ulya lulekusuria kye neengyeṟa ilukyiṟa. 11 Na nyoe mukotaramana na soe kyipfa kyaṙu kyiiṙi kya iterewa, kundu kyipfa kya kyisumbo kyilya luenengo soe kui itarama wandu wafoi, wandu wafoi waane kyipfa kyaṙu. 12 Cha kyipfa ikushela lyaṙu nyi ilyi, iṟingyishia lya kyilya mrima yaṙu iwonyi kye kyikyicha, kye kui wuele na ngoo ngyiilyi iwukyie ko Ruwa; chi kui wuṟango wo mmbiu-pfo, indi kui isaṟia lya Ruwa; lulewaṙa mchumie wuyanenyi, na ngoseṟa konyu nyoe. 13 Kyipfa luimuṟeia nyoe kyindo, sile kyilya muisoma, na ikyiṟingyishia-pfo; na inyi ngyikusurie kye mochiṟingyishia isho mṟasa mafurumionyi. 14 Na wuṙo chandu muleṟingyishia mbonyi tsaṙu kyitutu, kye soe nyi kyimaṙuma kya ikushela lyanyu, chandu nyoe mukyeri koṙu, mfiri ulya Mndumii oṙu Yesu echicha lya kawi. 15 Na inyi ngiwoṙe ikusuria-lyo ngiwekundi ishika konyu iho kuwooka, kundu muwone kyisumbo kya kawi; 16 na iiṙa konyu ngyiyende mṟasa Makyedonia. Na lyingyi-se iwuka Makyedonia ngyiwuye na konyu muṙuo ṟio lya kyaro kyako kya iyenda Uyuda. 17 Kyasia, kyiyeri ngyilekunda iwuta isho, ngyesa ngyileilacha kyilya ngyiweteṟie? Ang'u isho ngyikundi iwuta ngyikundi ishiwuta kui mbaṟe ya mmbiu kye shiwe kuṙi koko, igamba “Yee, yee,” na chi “Ote, ote-pfo?” 18 Kyaindi chandu Ruwa ai msimiri, ṙeṙo lyaṙu konyu chi “Yee” na “Ote-pfo.” 19 Kyipfa Mana o Ruwa, Kristo Yesu, ulya mbonyi tsakye muleongoyo nyi soe, kyimwi na igamba, “Inyi na Silyiwano na Timoteo,” awekyeri “Yee” na “Ote-pfo;” indi kyilaṙuṙanyi na ikyo oe nyi “Yee” ya Ruwa. 20 Kyipfa shaasa shoose sha Ruwa shikyeri kokye nyi “Yee.” Lyingyi-se kyipfa kya ikyo kokye oe nyi “Amen;” Ruwa naiṙime iṟumisho kui soe. 21 Kyasia ulya ekyelukarisha hamwi na nyoe kui Kristo, na ilushia mafuṙa, nyi Ruwa, 22 na oe nyi oe aleluwika kyiṟingyishio kyiwoṙe mfano okye kyaluenenga Mumuyo mrimenyi yaṙu. 23 Kyaindi inyi ngyilaga Ruwa nawe mṟingyishi o mrima oko, kye, kui iwawonia wukyiwa ngyilandeshikye Korinto-pfo. 24 Chi kye luichilyia iiṙikyia lyanyu-pfo; indi lukyeri watarami wa sia yanyu; kyipfa kui iiṙikyia lyanyu mugoṟokyi.



2

1 Kyaindi mrimenyi koko ngyilekusuria kuṙi, ngyilache-se na konyu kui ikuinaṙia. 2 Kyipfa inyi ngamtewe mukokuinaṙia, kyasia nyi wui engyichihiṟa inyi sile nyi ulya inyi ngamwenenga ikuinaṙia? 3 Na inyi ngyilemṟeia kyindo-kyo ikyo, kundu kyiyeri ngyechicha ngyilacheenengo ikuinaṙia nyi walya kyiwengyiwaṟi ichihiyo kyipfa kyawo; ngyechimukusuria nyoe moose kye sia yako nyi yanyu moose taa. 4 Ngyilemuṟeia paruo kui mcheṟeṟe ifoi na mrima uwoṙe fowa na ikuinyṙia lying'anyi. Chi kye muwaṙe ikuinaṙia-pfo, indi muiṙime imanya ikunda lyako konyu chandu lying'anyi. 5 Kyaindi kokooya mndu atewe oṙoe iwaṙa ikuinaṙia, angyitewe inyi tikyi-pfo, indi kui ura lumwi (ngyilacheewa ṟio mnu ko mndu), namutewe nyoe moose iwaṙa ikuinaṙia. 6 Ianduyo lyilya mndu-cho aleenengo iwuka ko wandu wafoi lyimshikyie. 7 Maa kyilaṙuṙanyi na isho, nyi nanga mumhooṟie na immbiyiṟia moo, mndu cha icho alachemeṟo nyi ikuinaṙia lyakye lying'anyi mnu. 8 Koikyo ngyimuterewa mumṟingyishie ikunda lyanyu. 9 Kyipfa ngyileṟeia kyipfa kya ikyo taa, kundu ngyimanye na pata konyu kye muleindia shindo shoose. 10 Kyaindi kokooya mohooṟia mndu kyindo kyoose, na inyi ngyewemhooṟia; kyipfa maa inyi, kookoya ngahooṟia mndu kyindo kyoose, ngamhooṟia kyipfa kyanyu mbele ya Kristo. 11 Satana alaenengo ṙaawa lyelulemba; cha kyipfa lolemo imanya ngyeṟo tsakye-pfo. 12 Kyasia kyiyeri ngyileshika Tiroa kyipfa kya Ndumi Ngyicha ya Kristo, Mndumii kangyipfunguya moongo. 13 Ngyilewona sia mrimenyi koko-pfo, kyipfa ngyilewona mono-wama oko Tito-pfo, indi ngyilesamana nawo, ngafuma iyenda Makyedonia. 14 Kyaindi Ruwa naano, ekyeluenenga ichihiyo kyipfa kya wuwinzi kyiiṙi kya Kristo, na iloṟa mpfaamo mcha o ulogo lo Kristo handu hoose kui iṟunda lyaṙu. 15 Cha kyipfa soe nyi mafuṙa ga Kristo, gekyepfaama necha, mbele ya Ruwa, ko iwo waikyiṟo, na ko iwo waiṙeka. 16 Ko iwo wa kawi mpfaamo o upfu okyeende upfu; ko iwo wa kuwooka mpfaamo o moo okyeende moo. Na oe nyi wui echiiṙima shindo-sho? 17 Cha kyipfa soe chi kyimwi na wandu wafoi wekyekapa mbucha na ulogo lo Ruwa-pfo. Soe luonguo ulogo lo Ruwa kui wuwaṙami wo mrima cha wandu waleṙumo nyi Ruwa, luwalungye na Kristo.



3

1 Ngyesa luwooka-se ikushela luwenyi? Ang'u lukundi-se cha iwo wengyi, paruo tsiwoṙe kyiṟumi tsiche na konyu, ang'u iwuka konyu? 2 Nyoe nyi paruo yaṙu yeloṟa soe luwaṙume nyi siṟi, ingyiṟeie mrimenyi koṙu, imanyikyie na pata na isomo nyi wandu woose. 3 Muṟingyishio kye mowa paruo iwukyie ko Kristo lulemṙambika nyoe, ingyiṟeie chi kui wiino-pfo, indi na Mumuyo o Ruwa ai na moo; chi shibaunyi sha magoe-pfo; indi shibaunyi shikyeri nyi mrima ya nyama. 4 Na ikusuria-lyo lulyiwoṙe mbele ya Ruwa kui njia ya Kristo. 5 Chi kye soe lochiiṙima iwuta kyindo kyoose kui pfinya tsaṙu luwenyi-pfo, wuiṙimi woṙu woose wuwukyie ko Ruwa. 6 Na oe nyi oe alelutarama iwa waṟundi wa mma mhya; chi wa kyiṟeio-pfo, indi wa Mumuyo; cha kyipfa kyiṟeio kyekyewaaga, indi Mumuyo okyekyiṟa. 7 Kyasia, kokooya iṟunda lya upfu lyilekolyaṟeio na itaricho magoenyi, lyilecha mng'anonyi, mṟasa Waisiraelyi walaiṙime iitukuya kyaam kya Mose karii, kyipfa kya mng'ano o kyaam kyakye, nacho nyi-we mng'ano uweiilachika. 8 Ngyesa iṟunda lya Mumuyo lyechiengyeṟika iwa mng'anonyi-pfoe? 9 Cha kyipfa kokooya iṟunda lya ianduyo lyiwoṙe mng'ano, iṟunda lya wusumganyi lyiwoṙe mng'ano o ngoseṟa. 10 Kyipfa maa lyilya lyileng'anyiso lyiwewoṙe mng'ano kuṙi-pfo, kyipfa kya mng'ano uiengyeṟika mnu. 11 Cha kyipfa kokooya lyilya lyiweilachika lyiwewoṙe mng'ano, ngoseṟa mnu lyilya lyekyekaa ho mlungana lyiwoṙe mng'ano ung'anyi ngoseṟa. 12 Kyasia, kyipfa luwoṙe iweṙelyia lya mbaṟe-i luwika wuragari na wukari wung'anyi. 13 Na soe chi chandu Mose alewika kyindo wuye ya kyaam kyakye, kundu Waisiraelyi walaitukuye mnu mafurumionyi ga kyilya kyiweilachika-pfo; 14 indi makusaṟo gawo galewiko meema. Kyipfa maa mṟasa inu, kyiyeri Mma Mku okyesomo, kyindo-kyo kyeshikyia kyaam kyekyeweṙio ho. Kyimwi na igamba kye, kyileloṟo kye kyindo-kyo kyeshikyia kyewuto ho kyiiṙi kya Kristo-pfo. 15 Indi mṟasa inu, kyiyeri uwawaso lo Mose lokyesomo, kyindo-kyo kyekyeṙio mrimenyi kowo. 16 Indi kyiyeri kyoose wechigalukyia Mndumii, kyindo kyilya kyeshikyia kyaam kyewuto ho. 17 Kyasia “Mndumii” nyi oe Mumuyo; kyaindi handu akyeri Mumuyo o Mndumii, iho nyi ho-ndu hawoṙe ikaa kulawoṙe ichilyio nyi kyindo. 18 Kyaindi soe loose, kui kyaam kyilakyishikyie nyi kyindo, luloṟa mng'ano o Mndumii, cha mng'ano uwukyie kyiyewonyi, lokyeilacho luwe cha mfano-cho icho, iwuka mng'ano mṟasa mng'ano ung'anyi ngoseṟa cha mng'ano uwukyie ko Mndumii, akyeri Mumuyo.



4

1 Kyipfa kya ikyo, cha kyipfa luwoṙe iṟunda-lyi, chandu lulewona isaṟia, luiloloma-pfo. 2 Kyaindi lulelega mbonyi tsa sonu tsikuṟiikyie, maa luichumia kui mtambo-pfo, maa isanza-sanza Ṙeṙo lya Ruwa na wongo, indi kui iṟingyishia loi lukuloṟa kye luwoṙe wusumganyi, kyilya mrima ya wandu iwonyi kye kyikyicha kyeluṟingyishia mbele ya Ruwa. 3 Kyaindi kookoya Ndumi-i Ngyicha luionguo ikuṟiikyie, yakuṟiika ko iwo waiṙeka; 4 wakyeri kye kyiiṙi kyawo ruwa o wuyana-wu naleshingyia makusaṟo ga iwo walaiṙikyie, walachekooyo nyi ngyeela ya Ndumi Ngyicha ya mng'ano okye Kristo akyeri fana ya Ruwa. 5 Cha kyipfa lukuongoya mbonyi luwenyi-pfo, indi Kristo Yesu kye nyi Mndumii; na soe luwenyi kye lukyeri waṟundi wanyu kyipfa kya Yesu. 6 Cha kyipfa Ruwa, icho alegamba, “Ngyeela yewaa iwuka meemenyi,” nyi oe alewaa mrimenyi koṙu, naluenengye ngyeela ya wuṟango wo mng'ano o Ruwa kyaamunyi kya Yesu Kristo. 7 Kyaindi luwoṙe wunjama-wu shindonyi sha teri, kundu pfinya ing'anyi ya wuiṙimi iwe ko Ruwa, maa chi iwuka koṙu-pfo. 8 Ngyuura tsoose luilya wukyiwa, indi luiwingo-pfo; lukapa kawi, indi luiloṟa lupfiiyo nyi mṙoe-pfo. 9 Lusuiṟo, indi luṙio kulawoṙe itaramo-pfo; luwiyitso wanda, indi luirumatso-pfo. 10 Mfiri yoose luṙuṙe mmbiunyi yaṙu iwoogo lya Yesu, kundu moo o Yesu uṟingyishio mmbiunyi yaṙu. 11 Kyipfa soe lukyeri na moo, mfiri yoose lokyewuto lupfe kyipfa kya Yesu, kundu moo o Yesu uṟingyishio mmbiunyi yaṙu yekyepfa. 12 Kyasia iho upfu lokyeṟunda, mrimenyi koṙu, indi moo mrimenyi konyu. 13 Kyaindi cha kyipfa luwoṙe Mumuyo ulya ulya o iiṙikyia; chandu kyileṟeio, “Ngyileiṙikyia, na kyipfa kya ikyo ngyileṙeṙa.” Soe na soe luiṙikyie, na kyipfa kya ikyo luṙeṙa. 14 Luichi kye ulya aleṟutsa Mndumii Yesu nechiluṟutsa na soe hamwi na Yesu, na iluende na mbele yakye hamwi na nyoe. 15 Cha kyipfa mbonyi tsoose nyi kyipfa kyanyu, kundu isaṟia-lyo lyikaengyeṟika mnu, ko iwo wakyeri wafoi kyiano kyiengyeṟikye, na Ruwa nang'anyiso. 16 Koikyo luiloloma-pfo; indi maa chandu kyanja mmbiu yaṙu iloṟa iuṟa pfinya; mrimenyi koṙu lukokohoka orio mfiri. 17 Kyipfa matuuro gaṙu gai maangu, gakyeri ga kyiyeri kyifuhi tikyi, gekyeluwutia mng'ano o mlungana uingyikyie mnu. 18 Lulaambuye shekyewono indi shilya shilekyewono. Shilya shekyewono shekyekaa kyiyeri kyifuhi, indi shilya shilekyewono shekyekaa mlungana.



5

1 Cha kyipfa luichi kye mmbiu yaṙu lukyeri nayo iha wuyanenyi ikamnyamaṟika, luwoṙe numba iwukyie ko Ruwa, numba ilangyiwikye kui mawoko, ikyeri ya mlungana ruwewu. 2 Kyipfa kyiiṙi kya numba-i luiwawio lochilanga mnu ienengo kanyi koṙu kuwukyie ruwewu; 3 kundu lukomṟiko mmbiu ungyi lochiwono lui-se kyiṟanguoe-pfo. 4 Cha kyipfa soe lukyeri kyiiṙi kya mmbiu-i luwawio, lochilemio; chi kye lukundi iwuta mmbiu-chu okyepfa-pfo, indi lulangyie iṟiko ulya ulekyepfa, kundu kyilya kyekyepfa kyimeṟo piu nyi moo. 5 Kyasia ulya aleluṟeyeṟia isho nyi Ruwa, na oe naleluenenga Mumuyo okye moluringa. 6 Kyasia mfiri yoose luwoṙe wukari; lyingyi-se luichi kye, kyiyeri lukyeri iha na mmbiu-chu, lukyeri kuleshi na Mndumii. 7 (Kyipfa lokyekaa kui iiṙikyia, chi kui iwona-pfo.) 8 Kyaindi luwoṙe mrima ngyikarishe; na soe luwonyi nyi nanga ilekana na mmbiu-i na ikaa hamwi na Mndumii. 9 Koikyo-se, kokooya lukyeri iha ang'u lukyeri iha-pfo, luipfuṟukana imchihiṟa oe. 10 Kyipfa kyalukooya soe loose iloṟo halya kyiṙinyi kya ianduyo kya Kristo, kundu orio mndu naambilyie wori wo shindo alewuta kyimmbiu, chandu alewuta, kye shicha ang'u shiwicho. 11 Kyasia lukomanya iowuo Ruwa, lukuruo wandu; indi loṟingyishio mbele ya Ruwa. Na inyi ngyikusurie kye luwaṟingyishie mrimenyi konyu taa. 12 Kyipfa luikushela luwenyi mbele yanyu-se-pfo, indi lumuenenga kyimaṙuma kya ikushela kyipfa kyaṙu, kundu muiṙime iwaṙa kyindo kyeloṟa mbele ya iwo waikushela ko shindo sha nja tikyi, maa chi shindo sha mrimenyi-pfo. 13 Kyipfa kokooya luwasuko nyi kyipfa kya Ruwa; ang'u kokooya lulawasuko, nyi kyipfa kyanyu. 14 Kyipfa ikunda lya Kristo lyiluchilyia kyipfa lowona kuṙi, kye umwi nalepfa kyipfa kya woose, kyasia walepfa woose. 15 Lyingyi-se nalepfa kyipfa kya woose, kundu wai na moo walawe-se na moo kyipfa kya mrima yawo wawenyi, indi kyipfa kyakye oe alepfa kaṟuka kyipfa kyawo. 16 Na kyawa soe wookyia wulalu luichi mndu oose kui mbaṟe ya mmbiu-pfo. Maa chandu soe lulemanya Kristo kui mbaṟe ya mmbiu, kyaindi wulalu lumwichi-se kuṙo-pfo. 17 Na kyawa kye, mndu kakaa kyiiṙi kya Kristo nawa mndu mhya; sha kacha shaiṙa, shoose shawa shihya. 18 Kyaindi shoose taa shiwukyie ko Ruwa alelusanza soe na oe kui Kristo. Na oe naleluenenga iṟunda lyesanza wandu na Ruwa. 19 Ulogo loṙu nyi kye Ruwa naisanza wandu woose na oe kui Kristo. Ruwa aletala ngyuunyamaṟi tsawo-pfo. Na naluenenga ulogo lo sanza washituwa. 20 Kyasia soe luiṙeṙa handu ha Kristo, cha ilyi Ruwa naiterewa kui maṙumbu gaṙu, lumuterewa nyoe kyipfa kya Kristo musanzo na Ruwa. 21 Oe alaichi wunyamaṟi nalemmbuta kyipfa kyaṙu, kundu soe luiṙime iwa wusumganyi wo Ruwa kui oe.



6

1 Na soe lukoṟunda handu hamwi na oe lumuterewa maa mulaambilyie isaṟia lya Ruwa wulya. 2 (Cha kyipfa naigamba, “Kyiyeri kyiiṙikyie ngyilekuaṙanyia, mfiri o wukyiṟo ngyilekutarama.” Kyiyeri kyiiṙikyie nyi wulalu; mfiri o wukyiṟo nyi wulalu.) 3 Maa lulawe wandu wetewe wengyi ioloka kyindonyi kyoose, kundu ṙeko lyilawono iṟundenyi lyaṙu. 4 Indi orio kyindonyi luiwuta luwone kyiṟumi kyicha, cha waṟundi wa Ruwa; kui wusimiri wung'anyi, wukyiwenyi, fowenyi, matuuronyi. 5 Ngaponyi, shipfungonyi, wuṟiingyinyi, ilya wukyiwa, ilaa kyiṙombo, ikuretekyia. 6 Mkaṟonyi ngyicha, wuṟangonyi, isimiria, wupfererinyi, Mumuyonyi Mweele, ikundenyi lyilawoṙe wukulembecheṟi. 7 Ṙeṙonyi lya loi, pfinyenyi ya Ruwa; kui shisha sha wusumganyi sha kuwoko ko kulyoe na sha kuwoko ko kumoso. 8 Kui kyiṟumi na sonu; kui iṙeṙo uwicho na iṙeṙo necha; cha wandu wailemba, indi lukyeri wandu wa loi. 9 Cha walaichio, indi waichio mnu; cha waipfa, ate lukyeri na moo; cha waitoṟisho, indi walaiwoogo. 10 Cha wandu wawoṙo nyi fowa, indi mfiri yoose luwoṙe sia; cha wakyiwa indi lochiiritsa wafoi; cha walawoṙe kyindo, indi luwoṙe shido shoose. 11 Luilosha kulawoṙe wuowu konyu nyoe Wakorinto. Mrima yaṙu yaloṟa ikunda konyu. 12 Mrima yaṙu yamukunda nyoe, indi mrima yanyu mukoishinga. 13 Kyasia kundu mutae iṙuana na chandu muleambilyia (ngaṙeṙa na nyoe cha wana watutu) na mrima yanyu iweloṟe ikunda taa. 14 Maa mulasanzo hamwi na walaiṙikyie, chandu kyilai sungusinyi; kyipfa kuwoṙe umbuya o mbaṟe iha kyiiṙi kya wusumganyi na wunyamaṟi? Lyingyi-se hawoṙe isanza lya mbaṟe iha kyiiṙi kya ngyeela na meema? 15 Kuwoṙe iiṙikyiana lya mbaṟe iha kyiiṙi kya Kristo na ulya Mmbicho? Ang'u ulya aiṙikyie nawoṙe kyi hamwi na ulya alaiṙikyie? 16 Lyingyi-se hawoṙe iiṙikyiana lya mbaṟe iha kyiiṙi kya hekalu lya Ruwa na ifano? Cha kyipfa soe nyi hekalu lya Ruwa akyeri na moo; chandu Ruwa alegamba kye, “Ngyechikaa mrimenyi kowo na ichumia kyiiṙi kyawo na inyi ngyewa Ruwa owo, nawo wechiwa wandu wako.” 17 Koikyo, “Wukyenyi kyiiṙi kyawo, mukae kuleshi nawo, Mndumii nagamba, Maa mulapaaye kyindo kyifanyi, na inyi ngyemuambilyia. 18 Ngyewa Awu konyu, na nyoe mochiwa wana koko wa kyisoṟo na wa kyika, Mndumii Mopfinya nagamba.”



7

1 Kyasia-ng'u, wakunde wako, cha kyipfa luwoṙe shaasa-sho, lusanje mrima-i yaṙu ilekane na ukoe loose lo mmbiu na mrima, kunu lochiafutsia wuele kui iindia Ruwa. 2 Luenengyenyi ṙaawa mrimenyi. Lulelyiiya mndu oose mbaka-pfo, maa lulenyamaṟa mndu-pfo, maa lulandewutie mndu kyindo kundu luwone ho kyiira-pfo. 3 Ngyiṙeṙa kyindo-kyo kundu ngyimuanduye nyoe kye muwoṙe ṙeko-pfo; cha kyipfa ngamsonguo igamba kye, nyoe mukyeri mrimenyi koṙu maa kui ipfa handu hamwi, na ikaa na moo handu hamwi. 4 Ngyiwoṙe wukari wung'anyi konyu; ngyiwoṙo nyi ikushela lying'anyi kyipfa kyanyu. Ngyiichuo nyi iwiyiṟio moo, wukyiwenyi woṙu woose ngaichuo sia ya ngosera. 5 Cha kyipfa maa kyiyeri luleshika Makyedonia wukyiwa wulya mmbiu yaṙu iweilya wuleanguha-pfo, indi lulewona wukyiwa ngyuura tsoose. Nja kuwewoṙe shiṙa, na mrimenyi fowa. 6 Kyaindi Ruwa, ekyewiyiṟia wafofo moo, naleluwiyiṟia moo kui icha lya Tito. 7 Maa chi kui icha lyake tikyi-pfo, indi chandu alewiyiṟio moo nyi nyoe, echiluwia mbonyi tsa ilanga lyanyu, na ṟanyi yanyu, na wuragari wonyu kyipfa kyako, mṟasa ngaengyeṟa ichihiyo. 8 Cha kyipfa maa chandu paruo iya yako ilemuendie fowa ngyiwihiyo mrimenyi-pfo; maa kokooya ngyilewihiyo mrimenyi, ngyiwonyi kye paruo iya ilemuendie fowa, kyiyeri kyifuhi tikyi. 9 Wulalu ngyimchihiye, chi kyipfa kya nyoe iwona fowa-pfo, indi kyipfa kya ilyi mulewona fowa, mṟasa mukoṙumbuya wunyamaṟi. Kyipfa mulewona fowa kyipfa kya Ruwa, kundu mulaṙetse kyindo kyipfa kya kyindo lulewuta soe. 10 Iwona fowa lyikyeri kui mbaṟe ya Ruwa lyekyeende iṙumbuya wunyamaṟi wokyeende wukyiṟo wulawoṙe isumkyia indi fowa ya wuyana yekyeende upfu. 11 Wulalu moiṙima iwona kyindo kyekyeendo nyi iwona fowa chandu Ruwa akundi. Nyoe moiṙima wulalu iwa wandu wawoṙe ipfuṟukana, wawoṙe kyindo kyegamba. Mokyeṙumbuko nyi maṙima na iowuo; mokyepfuṟukana na iwona kye kya wusumganyi kyiṟundo. Nyoe moloṟa na pata kye muwoṙe ṙeko kyiiṙi kya ikyi ngyigamba-pfo. 12 Kyasia, maa chandu ngyilemuṟeia paruo, ngyileṟeia kyipfa kya ulya alenyamaṟa, maa chi kyipfa kya ulya alewutio kuṙo-pfo, indi ipfuṟukana lyanyu kyipfa kyaṙu lyiiṙime iṟingyishio konyu mbele ya Ruwa. 13 Koikyo lulewiyiṟio moo. Lyingyi-se kyiiṙi kya iwiyiṟio moo lyaṙu lulechihiyo mnu ngoseṟa kyipfa kya sia ya Tito; kyipfa nyoe moose mulechihiṟa mrima okye. 14 Cha kyipfa kokooya ngyilekushela mbele yakye kyindonyi kyoose kyipfa kyanyu, ngyilewona sonu-pfo; indi chandu lulemmbia mbonyi tsoose kui wuloi, na wuṙo ikushela lyaṙu mbele ya Tito lyiwei lya loi. 15 Na ikunda lyakye konyu lyekyeengyeṟika ngoseṟa, kyiyeri ekyekumbuo iindia lyanyu nyoe moose, chandu mulemwambilyia kui wuowu na iṙeṙema. 16 Ngachihiyo, kyipfa kyiiṙi kya orio kyindo ngyechiiṙima ikusuria konyu.



8

1 Lyingyi-se, wana wa wana waṙu, lummbia ulogo lo isaṟia lya Ruwa, siṟi tsa Makyedonia tsileenengo; 2 kyipfa kyiyeri waweiyesho kui wukyiwa wung'anyi, sia yawo na wufofo wowo wung'anyi mnu wuleengyeṟa wunjama wo ilekyia lyawo. 3 Kyipfa ngyimuṟingyishia kye, kui pfinya tsawo, na ngoseṟa ya pfinya tsawo, kulawoṙe iitiko nyi mndu walewuta shindo shawo; 4 wechiluterewa mnu ko mbonyi tsa isaṟia-lyi, na iṟunda-lyi lyeṟundia wandu wa Ruwa. 5 Lyingyi-se walewuta kuṙi chi chandu luwekusurie tikyi-pfo, indi kuwooka waleṙambika mrima yawo ko Mndumii; na koṙu taa, iṙuana na chandu Ruwa akundi. 6 Mṟasa lukoikyimbia Tito naafutsie isaṟia-lyi konyu chandu oe alekoalyiwooka. 7 Kyaindi chandu muwoṙe shindo shifoi, iiṙikyia, iṙeṙa, na wuṟango, na wuragari woose, na ikunda lyanyu koṙu soe; kyasia na wuṙo muambilyie wuingyi wo isaṟia-lyi taa. 8 Ngyiṙeṙa kundu ngyimutsindikye-pfo, indi kui wuragari wo wandu wengyi ngyimanye wusimiri wo ikunda lyanyu. 9 Kyipfa mommanya isaṟia lya Mndumii oṙu Yesu Kristo, maa chandu awekyeri mnjama, kyipfa kyanyu, nalewa mkyiwa kundu nyoe muiṙime iwa wanjama kui wufofo wokye. 10 Na inyi kyipfa kya ikyo, ngyigamba kuṙi, kyachia ko ura lonyu muwookye iwuta shilya mulewooka maka ulesia. Nyoe muwekyeri wa kuwooka iwuta kuṙo. 11 Kyaindi wulalu afutsienyi kyindo-kyo; kundu chandu muwelangyie itarama, pfuṟukanenyi kuṙo chandu mochiiṙima, muafutsie. 12 Kyipfa kokooya mndu awoṙe mrima o tarama, Ruwa nekyeambilyia kyilya echiiṙima iwuta, ekyerika kya ngoseṟa-pfo. 13 Kyipfa ngyigamba isho, kundu wengyi wachihiyo na nyoe muwone wukyiwa-pfo; 14 indi mbonyi tsiwe necha; kyiyeri-kyi kya wulalu wuingyi wonyu wutarame iuṟa lyawo, kundu na wuingyi wowo wumutarame nyoe kyiyeri nyoe mulawoṙe; kundu mbonyi tsiwe necha. 15 Chandu kyikyiṟeie, “Alesania shifoi, aleengyeṟikyio-pfo, maa ulya alesania shitutu aleuṟa kyindo-pfo.” 16 Kyaindi Ruwa naṟumisho, ulya mowika wuragari wulya wulya kyipfa kyanyu mrimenyi ko Tito. 17 Kyipfa naleambilyia loi iikyimbio lyilya ngoseṟa. Lyingyi-se echiwika wuragari, nalepfunga kyaro kya iyenda konyu kulawoṙe iitiko. 18 Na hamwi na oe lukoṙuma mono-wama ulya kyiṟumi kyakye Nduminyi Ngyicha kyileṙunganana siṟinyi koose. 19 Maa chi wuṙo tikyi-pfo, indi nalesambuṟo nyi siṟi na iyenda kyaro hamwi na soe mbonyinyi tsa isaṟia-lyi, lulyiṟundia, kundu Mndumii naṟumisho, ikuṟeyeṟa lyaṙu lyimanyikye. 20 Lochikuringa na kyindo-kyi, mndu alachewona ṙeko lyaṙu mbonyinyi tsa kyisumbo-kyi lukyiṟundia; 21 lukosonguo ikusaṟa gai mecha, chi mbele ya Mndumii tikyi-pfo, indi na mbele ya wandu. 22 Na soe hamwi nawo loṙuma mono-wama oṙu lulemmbona kyiyeri kyileshi kye nawoṙe wuragari, na wulalu nawoṙe wuragari ngoseṟa mnu kyipfa kya ikusuria lying'anyi awoṙe konyu. 23 Kyasia mndu kakunda mbonyi tsa Tito, oe nyi mongari oko, na mndu ngyekyeṟunda na oe kyipfa kyanyu; na mndu kakunda mbonyi tsa wana wa wama waṙu, wo nyi wandu wawaṙume nyi siṟi, na mng'ano o Kristo. 24 Kyasia waloṟenyi mbele ya siṟi wuloi wo ikunda lyanyu, na ikushela lyaṙu kyipfa kyanyu.



9

1 Ko mbonyi tseṟundia wandu wa Ruwa kuwoṙe kyimaṙuma ngyimuṟeie-pfo. 2 Kyipfa ngyiichi ikuṟeyeṟa lyanyu; ikuṟeyeṟa ngyekyekushelyia kyipfa kyanyu ko wandu wa Makyedonia, kye Akaya iwekuṟeyeṟie maka oose; na wuragari wonyu wulekarisha wafoi. 3 Kyaindi ngyileṙuma wana wa wama-wo, kundu ikushela lyaṙu kyipfa kyanyu lyilailachikye kyiiṙi kya kyindo-kyi; muiṙime ikuṟeyeṟa chandu ngyilegamba, 4 kundu wandu wa Makyedonia wakacha hamwi na inyi, wakamukooya mulakuṟeyeṟie, soe lulacherigo nyi sonu (lulagambe nyoe), kyiiṙi kya mbaṟe-yo iyo ya ikusuria. 5 Kyasia ngyilewona kyangyikooya ngyitutume wana wa wama-wa wasonguoe ishika konyu, na iachikyia iwinyi kyisumbo kyanyu mulekyiteṟia wookyia kacha, kundu kyiwe kyamuṟeyeṟo, na kuṙi kyiwe cha kyienengo, maa chi cha kyindo kyekyeenengyio kui iitiko-pfo. 6 Kyaindi ngyigamba kyindo-kyi, “Mowaaya shaangu nesambuo shaangu; mowaaya kui ilekyia nesambuo kui ilekyia.” 7 Orio mndu nawute chandu akusurie mrimenyi kokye, chi kui ikuinaṙia, maa chi kui iitiko-pfo; kyipfa Ruwa nakundi ulya ekyeenengyia kui mrima mkyesi. 8 Na Ruwa neiṙima imuenenga orio mboṟa iingikyie, kundu nyoe mfiri yoose muiṙime iwaṙa orio kyindo mukundi, na muwoṙe orio kyindo mukundi muiṙime ienengyia kulawoṙe iehia. 9 Chandu kyikyiṟeie, “Oe nekyeenengyia kui ilekyia, kaenenga wakyiwa wusumganyi wokye wokaa mlungana.” 10 Na ulya ekyeenenga mbeu mndu mowaaya, na mkate uwe kyelya, nemuenenga mbeu tsewaaya na itsiengyeṟa, na oe nechiengyeṟa shilyimu sha wusumganyi wonyu. 11 Mochiiritso shindonyi shoose muiṙime iwaṙa ilekyia lyoose, lyekyeenenga Ruwa wandu wafoi waimmbia haika kyipfa kya shienengo shanyu wekyeambilyia iwuka koṙu. 12 Kyipfa iṟunda-lya iṟunda-lyi chi lyetarama wandu wa Ruwa shindo shilya wauṟie tikyi-pfo, indi lyekyeengyeṟika mnu iwaṙa kyiira kui iana lying'anyi Ruwa ekyeenengo. 13 Cha kyipfa mukoyesho kui iṟunda-lyo, waiṟumisha Ruwa kyipfa kya wuindi wonyu kui iṟingyishia Ndumi Ngyicha ya Kristo, na kyipfa kya ilekyia lyanyu mulewaambutsia wo na wandu woose. 14 Nawo wawenyi, wechiterewa kyipfa kyanyu, wamukundi mnu mrimenyi kowo kyipfa kya isaṟia lya Ruwa lyileingyikyi mnu konyu. 15 Ruwa naano kyipfa kya kyienengo kyakye, lulawoṙe maṙeṙo geonguo mbonyi tsakyo.



10

1 Kyasia, inyi Paulo ngyimonyi ngyimuterewa kui wuhoo na wuyendelyi wo Kristo, inyi ngyikyeri msimiri ngyikyeri hamwi na nyoe, indi ngyilakyeri ho ngyiwoṙe wuṟango na wukari konyu. 2 Yee, ngyiterewa kye ngyikyeri ho ngyilawaṙe wuṟango na wukari cha wulya ngyiwoṙe ko walya wekyelushitakyi kye soe lokyeosha shindo sha kyiwuyana. 3 Kyipfa maa chandu luosha shindo sha kyiwuyana, lokyekapana shiṙa kui mbaṟe ya kyiwuyana-pfo; 4 (kyipfa shisha sha shiṙa shaṙu chi sha kyiwuyana-pfo, indi shiwoṙe pfinya kyiiṙi kya Ruwa mṟasa iunduo moombo;) 5 lochinyamaṟa makusaṟo na orio kyindo kyekyeshingyia, kyekyeshingyia wuṟango wo Ruwa, na lochichilyia orio mndu naiṙime iindia Kristo. 6 Lyingyi-se lukowa lukuṟeyeṟie itaa kyiṟaache wuwicho woose, kyiyeri iiṙikyia lyanyu lyeafukyia. 7 Ambuyenyi shikyeri mbele ya meso ganyu. Mndu kawona oe amonyi kye nyi mndu o Kristo, nawekusaṟe kuṙi taa mrimenyi kokye, kye chandu oe akyeri mndu o Kristo, nyi wuṙo na soe. 8 Kyipfa maa ngakushela ngoseṟa kyitutu kyipfa kya wuchilyi woṙu (luleenengo nyi Ruwa, luiṙime imugoṟotsa maa chi imuolotsa-pfo), ngyerigo nyi sonu-pfo; 9 ngyilachewono cha ilyi kye ngyikundi imuowesha kui paruo tsako. 10 Kyipfa wekyegamba, paruo tsakye tsingyikari na tsioweshie; indi akyeri amonyi kyimmbiu namfofo, na maṙeṙo gakye chi kyindo-pfo. 11 Mndu o mbaṟe-yo iyo nakusaṟe kuṙi, kye kyindo kyilya lokyeṟeia paruonyi lulakyeri na nyoe nyikyo lochiwuta lukyeri na nyoe. 12 Cha kyipfa lochikaria ikutala hamwi na wandu waata wa iwo wekyekushela wawenyi, maa ikulyingatsana nawo-pfo. Wandu wekyekuloṟa kye wo nyi kyiyeṟo kyekuyeṟa, na wandu wekyekulyingatsana wo wenyi ko wenyi nyi matondo. 13 Kyaindi soe luikushela ngoseṟa ya chandu kyiwaṟi koṙu-pfo; indi chandu kyiwaṟi kyiyeṟo kyilya kyikyiwikye nyi Ruwa, nakyo nyi ishika mṟasa konyu. 14 Kyipfa luikulandaṟa luwenyi kuta chandu kyiwaṟi-pfo, cha ilyi lulaishika konyu nyoe; cha kyipfa lulesonguo ishika mṟasa konyu Nduminyi Ngyicha ya Kristo. 15 Maa luikushela kuta chandu kyiwaṟi, kyipfa kya iṟunda lya wandu wengyi-pfo; indi ikusuria lyaṙu nyi kye chandu iiṙikyia lyanyu lyiengyeṟika, iṟunda lyaṙu konyu lyeng'ana, 16 kundu luiṙime ionguo Ndumi Ngyicha ngyuurukyenyi tsingyi kuleshi na nyoe; kulawoṙe ikushelyia iṟunda lyiṟunde nyi wandu wengyi. 17 Kyaindi ulya mokushela, nakushele kyiiṙi kya Mndumii. 18 Kyipfa mndu moiṙikyio chi ulya ekyekushela-pfo, indi nyi ulya ekyeṟumisho nyi Mndumii.



11

1 Nanga muweṙuana na inyi wutondonyi woko kyitutu! Yee, muṙuane na inyi. 2 Kyipfa ngyimunyeng'ia, wunyeng'i wo Ruwa; kyipfa ngyilemukosia msoṟo umwi, kundu ngyiendie Kristo mana mkyega mcha. 3 Kyaindi ngyiowuo; chandu njoka iya ilelemba Eva kui ngyeṟo tsayo, ilachenyamaṟa makusaṟo ganyu, mukoṙa wunyotsu na wucha wonyu ko Kristo. 4 Kyipfa mndu oose kacha eonguo Yesu ungyi lulalemwonguo soe, ang'u mukoambilyia mumuyo ungyi alakyeri cha ulya muleambilyia, ang'u ndumi ngyicha ingyi ilakyeri cha iya muleambilyia, muwuta necha iṙuana na oe! 5 Kyipfa ngakusaṟa kye kuwoṙe kyindo wasu wang'anyi wawoṙe ngyilakyiwoṙe inyi-pfo. 6 Kyaindi maa kokooya inyi nyi mndu alaichi iṙeṙa, ikyo chi mbaṟe yako wuṟangonyi-pfo, indi ko orio kyindo luleṟingyishio konyu. 7 Ngyesa ngyilenyamaṟa kui iindia kundu nyoe mung'anyiso, kyipfa kya ilyi ngyilewaongoya Ndumi Ngyicha kulawoṙe wori? 8 Ngyilesoka siṟi tsingyi masaa gawo, ngawuta kowo kyindo kyako kyelyio kundu ngyimuṟundie nyoe. 9 Na inyi kyiyeri ngyiwekyeri hamwi na nyoe na ipfula kyindo kyengyitarama, ngyilewa ṟio ko mndu-pfo. Kyipfa wana wa wama walewuka Makyedonia walengyienenga orio kyindo ngyiwekundi; na inyi mbonyinyi tsoose ngyilekuringa ngyilacheewa ṟio konyu maa ale. Lyingyi-se ngyekuringa. 10 Chandu loi iya ya Kristo ikyeri mrimenyi koko, kuwoṙe mndu echiiṙima ingyiima ikushela mṟasenyi ya Akaya-pfo. 11 Kyitewe ny' kyi? Ngyesa nyi kyipfa nygilamukundi nyoe? Ruwa naichi. 12 Kyaindi kyindo ngyiwuta ngyekyiwuta, kundu ngyiwingane na iwo waipfula ṙaawa walawone, kundu kyindo-kyo waikushelyia wawono wakyeri cha soe. 13 Kyipfa wandu wa mbaṟe-yo-iyo nyi wasu wa wongo, wekyeṟunda kui ngyeṟo, wekyekuloṟa cha ilyi nyi wasu wa Kristo. 14 Maa chi kyindo kyeṟiyio-pfo. Kyipfa Satana oe amonyi nekyekuloṟa cha ilyi nyi malaika o ngyeela. 15 Kyasia chi kyindo kying'anyi waṟundi wakye ikuloṟa cha ilyi nyi waṟundi wa wusumganyi wakyeri kye ifurumia lyawo lyechiwa kyimwi na maṟunda gawo-pfo. 16 Ngyigamba-se, mndu alakusaṟe kye inyi ngyimtondo. Kyaindi maa mukokusaṟa kyako kuṙo, mungyiambilyie cha tondo; kundu na inyi ngyiiṙime ikushela kyitutu. 17 Kyindo ngyiṙeṙa kyiwukyie ko Mndumii-pfo, indi nyi cha kya wutondo, kui wukari-wu wo ikushela. 18 Cha kyipfa wafoi waikushela kui mbaṟe ya kyimndu na inyi ngyekushela. 19 Nyoe, kyipfa muwaṟango, mokyeṙuana na matondo kui sia. 20 Kyipfa mokyeṙuana na mndu echimmbika wutumonyi, na immbutia shindo shiwicho sha orio mbaṟe maa imukapa ipfo kyaam. 21 Ngyiṙeṙa kui mbaṟe ya wufofo cha ilyi luwewafofo. Kyaindi kokooya mndu awoṙe wuṟango na wukari kyindonyi kyoose (ngyiṙeṙa kyitondo), maa inyi ngyiwoṙe wuṟango na wukari. 22 Wo nyi Waebrania? Na inyi taa. Wo nyi Waisiraelyi? Na inyi taa. Wo nyi wa kyishari kya Abrahamu? Na inyi taa. 23 Wo nyi waṟundi wa Kristo? (Ngyiṙeṙa cha msuko), inyi nyi ngoseṟa. Wukyiwenyi nyi ngoseṟa mnu; shipfungonyi nyi ngoseṟa mnu; kyiiṙi kya ikapo nyi ngoseṟa na kuta; kyiiṙi kya ikyia upfu kyiyeri kyileshi. 24 Ko Wayuda kataanu ngyilekapo ka makumi gaṟaaṟu na kyenda. 25 Kaṟaaṟu ngyilekapo na upoi; lyimwi ngyilekapo magoe; kaṟaaṟu ngyilenyamaṟikyio nyi ngalawa; kyingoto puti na kyio taṟaṟa ngyikyeri mṟingyenyi. 26 Kui iyenda kyaro kafoi; ngataṟa tsa mfo; ngataṟa tsa wasokyi; ngataṟa iwuka ko Wayuda woṙia; ngataṟa iwuka ko wandu wa masanga gengyi; ngataṟa tsa mṟinyi; ngataṟa tsa nukyenyi ngyuumu suwa ilawoṙe maa mṟinga; ngataṟa tsa ipalyipalyinyi; ngataṟa tsa wambuya wa wongo. 27 Wukyiwenyi na matuuronyi; ilaa kyiṙombo kafoi; njaenyi na wuangarinyi; kyiiṙi kya ikuretekyia kafoi; mbehonyi na iṙio kyiṟanguoe. 28 Kulawoṙe ionguo shindo shingyi shifoi, orio mfiri ngyiwoṙe maṟunda ga iambuya siṟi tsoose. 29 Nyi wui akyeri mfofo, na inyi ngyilawe mfofo? Nyi wui aletewo na mndu inyamaṟa na inyi ngyilawihiyo? 30 Kyikangyikooya ikushela, ngyekushelyia wufofo woko. 31 Ruwa, Awu o Mndumii Yesu, awaṟi kyiṟumi mṟasa mlungana, naichi kye ngyiṙeṙa wongo-pfo. 32 Ipfo Dameskyi mchilyi o mangyi Areta naweiringa mṟi o Wadameskyi, kundu nangyiwaṙe; 33 na inyi ngasotso dirishenyi lya kyiambasa ngyikyeri kyikapunyi, ngakyiṟo iwuka mawokonyi gakye.



12

1 Kyangyikooya ikushela, maa chandu kyilakyicha; kyaindi ngyegamba shindo Mndumii alengyiloṟa ngyikyeri cha mndu ailoṙo na ingyishukuya. 2 Ngyiichi mndu umwi kyiiṙi kya Kristo, hamsia cha maka ikumi na ina wulalu (kye nawekyeri kyiiṙi kya mmbiu ngyiichi-pfo; kye nawekyeri nja ya mmbiu ngyiichi-pfo; Ruwa naichi). Mndu-cho naleirio wuye mṟasa ngyinenyi ya kaṟaaṟu. 3 Na inyi ngyiichi mndu-cho, (kye nawekyeri kyiiṙi kya mmbiu ngiichi-pfo; kye nawekyeri nja ya mmbiu ngiichi-pfo; Ruwa naichi). 4 Kye naleiro mṟasa Paradiso, kaicho maṙeṙo galekyeiṙima iṙeṙo, galakyeri sungusinyi mndu igaṙeṙa. 5 Ko mbonyi tsa mndu cha icho ngyekushela; kyaindi kyipfa kyako ngyekushela-pfo, sile mbonyinyi tsa wufofo woko. 6 Kyipfa kokooya ngyiwekundi ikushela ngyiwechiwa tondo-pfo, kyipfa ngyegamba loi. Kyaindi ngyekushela-pfo, kundu mndu alachengyitalyia ngoseṟa ya isho awonyi koko ang'u ishiicho koko. 7 Na kyimaṙuma ngyilaiṙime ikushela na ielewetsa kyipfa kya shilya ngyileshukuyo, ngyileenengo kyindo kyewawiṟa mmbiu mbaṟe ya msha, kyindo kyikyeri cha mndu amṙume nyi Satana kundu nangyikape, ngyilachekushela na ielewetsa. 8 Kyipfa kya kyindo-kyo ngyileterewa Mndumii kaṟaaṟu kye kyingyiwukye. 9 Na oe kangyiwia, “Isaṟia lyako lyikushikyie; kyipfa wuiṙimi woko wokyeafukyia wufofonyi.” Kyasia ngyekushelyia wufofo woko kui sia ing'anyi, kundu wuiṙimi wo Kristo wukae na inyi. 10 Koikyo ngyichihiṟo nyi wufofo, shilahio, ngyuukyiwa tsa orio mbaṟe, kyipfa kya Kristo. Kyipfa kyiyeri ngyikyeri mfofo nyi lyo-ndu ngyiwoṙe pfinya. 11 Ngawa tondo, nyi nyoe mulengyitewe. Kyipfa kyiwekyiwaṟi nyoe mungyiṟumishe, kyipfa kuwoṙe kyindo wasu wang'anyi walengyiiṟa nakyo-pfo, maa chandu ngyilakyeri kyindo. 12 Nyi loi shiṟingyishio shekyeoshana na wasu shileṟundika konyu kui wusimiri woose, kui shiṟingyishio na maṟiyisho na ṟigo. 13 Kyipfa nyi kyikyi muleuṟa kuta siṟi tsingyi, sile nyi ilyi ngyilalewa ṟio konyu? Ngamuterewa mungyihooṟie wuwicho-wu. 14 Ambuyenyi kye nyi lya kaṟaaṟu inyi ngyikuṟeyeṟie icha na konyu, maa ngyechiwa ṟio konyu-pfo. Kyipfa ngyipfula masaa ganyu-pfo, indi ngyimupfula nyoe; kyipfa kyiwaṟi wana ikooma kyiseyesoe ko wafee-pfo, indi wafee ko wana. 15 Na inyi kui sia ing'anyi ngyikuṟeyeṟie iwuta kyoose ngyiwoṙe, maa ikuwuta inyi ngyimonyi kyipfa kya mrima yanyu. Ngyesa mongyikunda kyitutu kyipfa kya ilyi inyi ngyimukundi mnu-pfoe? 16 Kyaindi kyikuwiie kuṙo, inyi ngyilewa ṟio konyu-pfo; indi nyoe muigamba kye kui iwa mṟango ngyilewawaṙa kui ngyeṟo. 17 Ngyesa kuwoṙe mndu oose ngyilemṙuma konyu, ngammbia namtose kyindo? 18 Ngyileikyimbia Tito, ngaṙuma mono-wama ulya hamwi na oe. Ngyesa Tito nalemtosa kyindo? Ngyesa lulechumia kui Mumuyo ulya ulya na ndifonyi tsilya tsilya-pfoe? 19 Mokusaṟa kye maa wulalu luṙeṙa mbonyi tsekuringa konyu! Mbele ya Ruwa luiṙeṙa kyiiṙi kya Kristo. Na isho shoose, wakunde, nyi kyipfa kya imukarisha nyoe. 20 Kyipfa ngiowuo, ngyilachemukooya chandu ngyilakundi imukooya mukongyiwona konyu chandu mulawekusurie ingyiwona ngyilachekooya kofia nyi wuṟiingyi na wunyeng'i, na nyashi, na maluyano, na iiriana wongo, na iṙeṙana, na makushelo, na kyituṟu. 21 Na inyi ilyi ngyechicha-se, Ruwa oko alachengyienenga irigo nyi sonu konyu, na inyi ngyisuo kyipfa kya wafoi waleṙeko wookyia iho, walaṙumbuye wunyamaṟi wo ukoe, na wuṟui, na lango tsingyi tsa sonu.



13

1 Nyi kamba lya kaṟaaṟu inyi icha na konyu. Kui maṙumbu ga waṟingyishi wawi ang'u waṟaaṟu orio ṙeṙo lyechimanyika na pata. 2 Ngasonguo immbia, na chandu ngyiwekyeri ho lya kawi, na wuṙo maa wulalu ngyilakyeri ho, ngyimmbia na pata iwo walewuta sha wunyamaṟi wookyia kyiyeri-kyo, na wengyi woose, kye ngacha, ngyehooṟia-pfo. 3 Cha kyipfa muipfula chandu Kristo akyeri, icho aiṙeṙa mrimenyi koko, ulya alakyeri mfofo konyu, indi nawoṙe pfinya mrimenyi konyu. 4 Kyipfa nalewoogio msalabenyi, wufafenyi, kyaindi nai na moo kui pfinya tsa Ruwa. Kyipfa maa soe lukyeri wafafa kyiiṙi kyakye; indi lochikaa na moo hamwi na oe kui pfinya tsa Ruwa. 5 Kuruwe-ruwenyi muwenyi kye mukyeri iiṙikyienyi. Kuṟingyishienyi muwenyi. Ang'u muichi muwenyi kye Yesu Kristo nakyeri mrimenyi konyu? Sile molego. 6 Kyaindi ngyikusurie kye momanya kye soe lulelego-pfo. 7 Na soe luiterewa Ruwa, maa mulawute kyindo kyoose kyiwicho. Chi kundu soe lukuloṟe kye luwaiṙikyie-pfo, indi nyoe muwute kyilya kyikyicha, maa chandu soe lukyeri cha wandu walelego. 8 Kyipfa loiṙima iwuta kyindo kyoose kyilakyeri kya loi-pfo, indi kyipfa kya wuloi. 9 Kyipfa luchihiyo, kokooya soe lukyeri wafofo, na nyoe muwoṙe pfinya. Lyingyi-se loterewa muwe wandu waafutsie kyiiṙikyia. 10 Kyipfa kya ikyo, ngyiṟeia ishi ngyilakyeri ho, kundu ngyikyeri ho, ngyilaṟunde kui wuchilyi wulya ngyileenengo nyi Mndumii, kui ikarisha mrima maa chi iinyamaṟa-pfo. 11 Numa ya iho, wana wa wama, nakonyu. Muafutsie, muwiyiṟio moo. Kusurienyi kyimwi, mukae ufoṟonyi. Na Ruwa o ikunda na ufoṟo nechikaa hamwi na nyoe. 12 Iṟikyiṟanenyi chandu walya waiṙikyie Yesu wekyeiṟikyiṟana. 13 Wandu wa Ruwa woose wamuiṟikyiṟa. 14 Isaṟia lya Mndumii Yesu Kristo, na ikunda lya Ruwa, na isanza lya Mumuyo Mweele, lyikae na nyoe moose.



AMAZING GRACE BIBLE INSTITUTE