2 Peter


1

1 Simoni Petelo, mwĩtumi, numutumua wa kĩYesu Kilisito, namuandĩkĩla inie naalĩ muligilie uusuĩĩli umuĩ nindiishie, nawa ngele nkakũ, mukulukuuluu ya kĩNzua wĩĩtu nuMugũni Yesu Kilisito. 2 uUkende nawongeeligue kumiani nĩmatiliga kukumulĩnga uNzua nũYesu Shekulu wĩĩtu. 3 iNgũlũ zaakue, ĩza kĩNzua, zakupĩĩle intu tũlũ naijĩpĩĩle uupanga nukukumutekela uNzua, kunzĩla ya kumulĩnga uyo naalukuĩtile kuukulu waakue nuuuza waakue umuene. 4 Kangĩ kuizi wakupĩĩle ĩmalago namakulu nkankanaa, nama ngele nkakũ, koona kuaya mutũle akamantani a upanga wa kĩNzua muene, mugũnue nuoononeki naukoolĩ muna unkũmbigyulu kunsooko ya nsula nambĩĩ. 5 Kunsooko yoĩ-yooĩĩ mwĩkakie muusuĩĩli waani mupeegue uuuza, nuuuza nduo umupeele uulĩngi, 6 nuulĩngi umupeele kukĩtema uniinie, nukukĩtema yumupeele uugigimĩlia, nuugigimĩlia umupeele kukumukulia uNzua, 7 nukukumukulia uNzua wĩloogua wa kĩnũna, nuwĩloogua wa kĩnũna uuloogua weene. 8 Kuitĩ impola zaasio nazikoolĩ mumiani nukukijula ndee, zukumutenda inie mulekitũla akata, sunga sika antu naagila kankali kukumulĩnga ũShekulu wĩĩtu Yesu Kilisito. 9 Kuitĩ wensi namugila izi ingĩ mupokũ nasikusũũmile kwiona kĩĩsa, wĩĩaguaa ya kĩna alĩ moogigue ĩmĩlandu yaakue nya kalĩ. 10 Luulo gua, anũna aane, ĩkamatĩkiĩ kwikamĩnkĩĩlia uwĩĩtua waani nuusaagulua waani; kuitĩ kanga mutende iio, sika mukĩkũmpia kainiino. 11 Kuitĩ yaasio mukipeegua kwiingĩla nangũlũ muutemi wa kalĩ nakalĩ wa kĩShekulu nuMugũni wĩĩtu Yesu Kilisito. 12 Luulo gua, sika nikileka kukumujukia ĩzaasio intondo tũlũ, kanga ĩmuzimanile nakĩĩ nukwikamĩnkĩĩligua mutai namutĩte. 13 Nineene moonie iiza, ityũngo pĩna nkoolĩ mumuĩlĩ uu, kukumutenula nukukumwijukia; 14 Kuitĩ manile kĩna kwilega mumuĩlĩ waane ipolokile kuukaaũ, kĩna ũShekulu wĩĩtu Yesu Kilisito alundagĩlĩĩle. 15 Ĩpa nĩkakĩkamatĩkia koona pĩna nasaama muna nsĩĩ, musũũme kukijuka matũngo mensi impola izi. 16 Kuitĩ sika alĩ kutiatile inshimu naalĩ ntungue kuusugũ pĩna alĩ kumuĩĩlĩĩle inie impola za ngũlũ za kĩShekulu wĩĩtu Yesu Kilisito nukwiiiza kumuakue, ĩpa alĩ kuuoonie ishie namiiso mĩĩtu uukulu waakue. 17 Kuitĩ alĩ mupeegue nuNzua Tata lukũmo nuukulu pĩna alĩ muleetelue ululi nalupũnile muukulu naukĩlĩkĩlĩĩle, “Uyu wayu Muana waane muloogua, nanumuloeeligue ninduyo.” 18 Nululi luasio ishie alĩ kulũgyũũlie kwipũna kwigyulu pĩna alĩ kwĩensi ninduyo munkoko nanzelu. 19 Kangĩ kutĩĩte ulukaani ulwa unakĩdagu nalukamũ nangũlũ. Mukitenda iiza kanga mulukendegeele zĩ ntala imĩlĩka mukiiti sunga pĩna ikiyeeleela, nĩnsonda nya daau ĩkakigyelela munkolo zaani. 20 Ulu ninduulu mulĩnge tangua, ya kĩna ukutilĩ uunakĩdagu muwandĩkua, nausũũmile kwilondoosigua kukĩuntu udũũ. 21 Kuitĩ ukutilĩ kaunakĩdagu naupũnile kuulooa wa kĩuntu, ĩpa antu alĩ akutambula zazi ĩza kĩNzua pĩna alĩ atongeelue nuMuau Muelu.



2

1 Ĩpa naigyelela anakĩdagu a ulongo pakatĩ ya antu, kĩna iio kunsiani naikitũla amania a ulongo naikiingĩlia kukĩmpisĩ-mpisĩ uumanigua wa kulimĩĩlia, ĩakumukaana sunga ũShekulu naalĩ waakomuĩle, ĩakĩleetela uoonooneki kuukaaũ. 2 Nĩnaiingĩ ikitiata uusambo waao, nukunsooko yao ĩnzĩla ya tai ikitukua. 3 Numukĩaya ĩkakĩligĩlia nsaĩlo kumiani kunkaani naalĩ ntungue, nuulamulua waao kwipũna ĩkalĩ sika utinilie, sunga uoononeki waao sika witindila. 4 Kuitĩ malĩĩ uNzua sika alĩ waalekile ĩamalaĩka naalĩ atimuĩle, ĩpa alĩ waagumĩĩle kuulungu, naatũngua nĩmatendele ma kiiti, alindĩĩlue muumo sunga uulamulua uuze; 5 kangĩ malĩĩ sika aluulekile uunkũmbigyulu wa kalĩ, ĩpa numukendegeela uNoe, umutanantia wa kulukuuluu, nĩantu naĩngĩ mupũngatĩ, paasio pĩna aluleetile uUkapĩli wa maazĩ muna unkũmbigyulu wa antu nasika alĩ amukulilie uNzua. 6 kangĩ malĩĩ aluzilamuĩle ikaa za Sodomũ nĩGomola zikaasigue, kukuzigalula nukukuzitenda zitũle maũ nwitenda izo zĩĩ kĩlingasĩĩlio kuantu nasika ĩkakumukulia uNzua pembele; 7 kangĩ numugũna uLoti, umunakulukuuluu, naaluoonie usungu kunsooko ya lugendo lwa oononeki lwa antu naabĩĩ; ( 8 kuitĩ uyo munakulukuulu, pĩna nwikyala pamuao kwiona nukwiiigia, nuagigua munkolo yaakue nya kulukuuluu lutondo kulutondo, kunsooko ya utendi waao naugila kilyagĩĩlio), 9 iio gua, ũShekulu umanile kukuagũna mumagemua ĩaasio naakumukulagiaa, nukukuaĩĩka naagila ĩkulukuuluu akaasigue sunga palutondo ulwa ulamulua, 10 naikulu nangũlũ ĩaasio naakutiataa ya kĩmuĩlĩ, naakugendela munsula za udobũ, nukwimela uusũũmi wa utemi. ĩAasio naagila kaooa kangĩ akakũ, sika akukĩkĩmaa pĩna akuatuka naatĩĩte uukulu. 11 Ĩpa sunga ĩamalaĩka naakĩlile muusũũmi ningũlũ, sika akupũnagiaa uusokia wa utukĩlani kumiao ntongela ya kĩShekulu. 12 Ĩpa ĩaasio ĩkĩna mĩtũgo nangila kamasala. naalĩ ndelue zĩ iyumbe udũũ za kuguĩlua nukwiulagua, naakĩtuka mumpola nasika azilĩngile, sunga muononeki waao ikioonoonua, 13 ĩiaanũnkula uualaalĩki wa uleki waao. Naasĩĩgile ya kĩna ulugaalo ĩmunsĩ ingĩ wĩloeelia. Ĩa ingĩ mabado ninshoni naatiatile uwĩsũgamĩĩlia waao wa kĩsuakĩĩa, pĩna ijĩpia uwĩsũgamĩĩlia palumuĩ niniinie. 14 ĩMiiso maao namijuile uusambo, antu nasika alekile kwitenda ĩmĩlandu. Naapuutia ĩaasio naatĩĩte inkolo za uneketũ. Naatĩĩte inkolo nazukumanaa mpola zensi za kĩaya; aana ijũmo, 15 naalĩ amĩlekile ĩnzĩla nangolokũ, naalimĩĩla, naamĩamba ĩnzĩla ya kĩBalamũ, muana wa kĩBeoli naalĩ muloe ĩkĩpeegua kya uleki. 16 Ĩpa alĩ musugulue kunsooko ya utimu waakue umuene; ndoguĩ nasika ĩsũũmile kwilikitia nĩtambula kululi lwa kĩuntu, nĩgilia uuputigua masala wa munakĩdagu nuasio. 17 Ĩa ingĩ njiĩlio nangila kamaazĩ; malũnde namakenkue nukĩlaũmbĩ; uwiilu wa kiiti ingĩ kĩuto naaĩĩkĩligue. 18 Naitambula ĩmakaani namakulu ĩma ulu nuwĩnansulĩkia, munsula za muĩlĩ za usambo naakuapuutia ĩaasio naandagiaa kukuatalama ĩo naikyalile muulimĩĩli. 19 Naapũnĩlia ĩmalago ma ukomolua nĩndĩo ĩeene asese a oononeki. Kuitĩ nazukumudulaa umuntu, uzo ukutũla musese wa zaasio. 20 Kuitĩ ĩaasio naalĩ atalamile uudobũ wa unkũmbigyulu kunzĩla ya kumumana ũShekulu nuMugũni wĩĩtu Yesu Kilisito, paapo kanga aguĩligue kangĩ nukwidulua, uwikyaalĩ waao wa mpelo witũla ubĩĩ kwikĩla uwaasio wa muandio. 21 Kuitĩ aza ijilitũla iiza nangũlũ kumiao kanga ĩsika alĩ amĩmanile ĩnzĩla ya kulukuuluu, kwikĩla kukumĩmana, pembele alĩleke ilyagĩĩlio nalielu naalĩ apeegue. 22 Ĩpa igyelela kumiao kwilika lya ung'enua wa tai, “ĩMbua yĩshookĩĩle ĩmalukiu maakue ĩnene, nĩngũlũma naalĩ nzogigue ĩshookĩĩle kwigala-gala mumalolo.”



3

1 Aloogua, ĩĩ yaĩ mbalua ya kabĩlĩ nanukumuandĩkĩĩla; muzaasio nazibĩlĩ nalaĩlia ĩmasĩĩgo maani namaaza kukumũjukia, 2 muzijuke inkaani naalĩ ntambulue ĩkalĩ nĩanakĩdagu naeelu, nilyagĩĩlio ĩlya kĩShekulu nuMugũni naalilyeetue nĩatumua aani. 3 Mumane tangua ulukaani ulu, ya kĩna pantondo za mpelo ijiliiiza nĩmapana maao, aao ĩakola kumela, naatiatile inshula zaao ĩeene, 4 ĩiũga, “Liĩlĩ mpĩĩ ilyago liasio ĩlya kuuza kumuakue? Kuitĩ kwipũna paapo iishekulu ĩĩtu pĩna agonĩĩle intu tũlũ ikyalile iio-iioo kwipũna iyuukĩ lya uutũndua.” 5 Ndĩo naĩitĩ naasiitile kwigomba ulukaani ulu, ya kĩna alĩ lĩkoolĩ gyulu kwipũna ĩkalĩ, nĩnsĩĩ gaa alĩ mumbue kwipũna mumaazĩ nukunzĩla ya maazĩ kulukaani lwa kĩNzua. 6 Kunzĩla ya maayo, uunkũmbigyulu wa ntondo zaasio naukapĩligua nĩmaazĩ, naoonoonua. 7 Ĩpa igyulu lya nzuauu nĩnsĩĩ mbĩĩkue kĩuto kumooto kulukaani lulo-luuloo, mbĩĩkue sunga kulutondo lwa ulamulua nulwa koonoonua kumuao ĩantu nasika akumukulagiaa uNzua. 8 Ĩpa aloogua, mulekiĩĩwa ulukaani ulu nalumuĩ, ya kĩna kwa kĩShekulu lutondo lumuĩ zĩ miaka gyana lya nzogũ, nĩmiaka gyana lya nzogũ zĩ lutondo lumuĩ. 9 ũShekulu sikutinilie kwitimĩĩlia ilyago liakue, kĩna naĩngĩ naakuũga watinia. Ĩpa ukugigimĩlagiaa kumuani, sika muloe tũlũ wensi walimĩĩle, ĩpa tũlũ ensi apikĩĩle uupeli. 10 Ĩpa ulutondo lwa kĩShekulu lukiiza zĩ mũii; palutondo luasio paapo igyulu likilega kumulugũzo mukulu niyaasio naalĩ iumbue kwipũna iyuukĩ ikitaulua nukwishonsua namooto, nĩnsĩĩ nĩmĩlĩmo nĩkoolĩ munsĩ yaakue ikijigĩligua. 11 Iio gua, kunsooko iintu tũlũ ĩkĩnekentuka itĩ, yumũjĩpĩĩle inie muĩ antu kĩ mulugendo naluelu nukukumukulia uNzua, 12 pĩna mwilaaĩĩla sunga luĩze ulutondo luasio ulwa kĩNzua, nukukulukangasĩĩlia. Ĩpaasio paapo igyulu likitaulua nukwishonsua, niiumbe iyuukĩ ikijigĩligua nukwinekentuka! 13 Ĩpa gua, kunsooko ilago liakue, kulaaĩlĩĩle igyulu nĩpia nĩnsĩĩ nampia, muna ĩkulukuuluu ikikyalaa. 14 Luulo gua aloogua, kunsooko mulaaĩlĩĩle ĩzaasio, ĩkamatĩkiĩ koona mwigyelele kĩna muagila kakĩlema sunga kibyado ntongela yaakue mumatiliga. 15 Inie muusĩĩgĩle uugigimĩlia wa kĩShekulu wĩĩtu kĩna ĩngi ugũnua. Iio-iioo umunũna wĩĩtu muloogua uPaulo naalumuandĩkile kumasala naalĩ mupeegue, 16 kĩna mumbalua zaakue tũlũ, nwipũnia inkaani za mpola izi. Mumbalua zaasio zikoolĩ impola nzia nkakũ kukuzilĩnga; nĩndĩo nasika amanigue, kangĩ nasika akamatĩkũ akuzipĩlulaa kĩna iio naakuupĩlulaa uwandĩkua nawĩngĩ kuoononeki waao ĩeene. 17 Luulo gua aloogua, na mwakondia kwimana izi, ĩsukukĩ mulekikenkeeligua nuulimĩĩli wa aasio naaleki, mugue nukwileka uukamũ waani. 18 Ĩpa mukule muukende nukukumumana ũShekulu nuMugũni wĩĩtu Yesu Kilisito. Ukulu wĩĩ kumuakue ĩpaino sunga kulutondo lwa kalĩ nakalĩ. Amini.



AMAZING GRACE BIBLE INSTITUTE