JOHN

1

1 -Ta 'kmʋ a -teea a, -mɛ wlu nɩ' sese, wlu nɩɛ 'de Kea 'ʋn -wɛe wlu nɩ Kea. 2 Wlu ke Kea 'kpaa tɛin" sese. 3 Kea cɛɛn 'de wlu 'ʋn -wɛe ɛ po dɩ -wee' "klein 'kmʋ. Dɛ "o dɛ -ɛ -nɩa 'kmʋ -wɛe wlu sea nʋ, -mɛ se nɩ-. 4 'De ɛ 'ʋn mɔ 'kmʋnɩa' -cɛɛn'- 'wlʋ. Ɛɛ' 'kmʋ tu mɛ -nɩ nyʋ -wee' 'a -sɔn'. 5 -Sɔn' -nɩa 'mʋa- ɛ -sɩn' 'de kwie 'ʋn, 'kaa kwie se -sɔn' i "fian-. 6 Kea dboɛ nyɔ due', ɔɔ' 'nynɩ -nɩ San. 7 Ɔ ji' -wɛe ɔ 'e -sɔn' 'ɔ -tɩ' 'tmʋ, 'de nyʋ -wee' 'je ɛɛ' -tɩ' tɔ' 'ʋn 'je 'bo ɔɔ' wlui". 8 Ɔmɔ se -sɔn' nɩ-, 'kaa ɔ ji' -wɛe ɔ 'je -sɔn' 'ɔ -tɩ' 'tmʋ. 9 Ɛɛ' -sɔn' tu mɛ -nɩ -sɔn' -cɛɛn'- -ɛ ji 'kmʋ 'de -ɛ -sɩn' 'de nyʋ -wee' "klein "kpei. 10 Sesi mɔ -nɩ Kea 'a wlu -ɔ -nɩ 'kmʋ sese, ɔmɔ Kea cɛɛn 'ʋn -wɛe ɛ nʋ 'kmʋ 'kaa 'kmʋ "kpei nyʋ se ɔɔ' -tɩ' 'wɔɔn-. 11 Ɔ jiɛ 'e ɔɔ' -cɛ" 'kpa 'a 'blʋa- "kpei, 'kaa ɔɔ' 'cɛ-wi" se ɔ sɩn 'sɔɔn kpʋʋn-. 12 'Kaa nyʋ klein" -kpʋʋn ɔ sɩn 'sɔɔn -wɛe -ʋʋ -je ɔɔ' -tɩ' tɔ' 'ʋn, ɔ nʋɛ' 'sʋ -wi" -mʋ 'bɛɛ' ʋʋ 'je Kea 'a "nynuu- 'kpa. 13 Ʋʋ 'jea Kea 'a "nynuu- 'kpa a, ɛ se 'e nyiɔ 'ɔ nymɔ ke, ɔɔ' tɔ' 'ʋn 'wlʋ, ɛ 'wlʋɛ 'e Kea 'ʋn. 14 Kea 'a wlu -nɛ mɛ -srɛɛn nyiɔ 'ʋn. Ɔ "tiɛ 'de -a "klu. Ɔmɔ "diwan ke tɔ' -tɩ "ji 'ʋn. -A -jraa' ɔɔ' "ikmaa' 'mɛ, ka "jujɔ due' koun -gbai' 'blea ɔ "bo 'a "ikmaa' -wee' "klein. 15 San -nɩa ɔɔ' -tɩ' 'a -ta 'jei ɔmɔ -na : "Ju -ɔɔ -tɩ' 'ɩn 'tmʋa 'de ɛ -wɛe 'ɩn 'na : ɔɔ muɛ jia' 'de 'ʋn 'de ɛ, ɔ nɩɛ dɛwɔn ɔ je 'ʋn -sii, dɛ-nʋɛ' ɔ ke 'kmʋ 'kpaa 'bo 'ʋn "juɔi. 16 Dɩ -wee' "klein pooɛ 'de ɔ 'ʋn kɩɩn, ɛmɛ -tɩ ɔ "jii -aʋn "diwan 'a "kwli -wee' wɔn. 17 Tɔ' -o, Kea jaa Moisɩ kɛ' 'kwa -wɛe ɛ "nyɩ -aʋn, 'kaa ɛ cɛɛn 'de Sesi 'ʋn -wɛe ɛ "nyɩ -aʋn 'saa 'ʋn ke tɔ' -tɩ. 18 Nyɔ "o nyɔ se Kea "jriɛ 'jee due', 'kaa "Ju jɔ due' -nɩa 'o "Bo -pʋn" ɛ mɔ -sɛ 'kwla 'de -a -pee. 19 Ka San nʋa Sesi 'a -tɩ' 'tmʋ sʋn 'ka ka : Suifʋ-wi" 'a "jru kpɔ' i -teʋn -nɩa Selisalɛm dboɛ 'sraa -saʋn jrʋ' ke Kea -gbu sʋn opoʋn ke 'de San o -wɛe -ʋʋ mu ɔ i-teea', ʋʋ 'na : -Mɔ 'ee, -ɩn -nɩɛ nyɔɔ -o ɛ ? 20 San wa 'wɔn i ɔ je wlu-, ɔ se dɛ jrɛ' -sie"-, ɔ 'na : 'Ɩn se Klisɩ nɩ-. 21 'De ʋʋ -tee' ɔ i ke'wlɛ ʋʋ 'na : Nyɔ -ɩn -nɩ 'ja a- ? -Ɩn -nɩɛ Eli -o ? San 'na : "Ɩɩn-, 'ɩn se ɔ nɩ-. 'De ʋʋ 'na : -Ɩn -nɩɛ Kea 'a wlu 'kwajaai -nɔ -oo ? San 'na : "Ɩɩn-, 'ɩn se ɔ nɩ-. 22 'Sʋ ʋʋ 'na : 'De -mɛ -ma 'nynɩ wɛ- 'ja a- ? -Aa -teeɛ' -mii -wɛe nyʋ -dboa' -aʋn -a -je ʋʋpʋ "kuan kpa. Dɛ -ma -daa' -ma -cɛ" -gbo' ɛ- ? 23 'Bomɔ San wluu-, ɔ 'na : 'Ɩn nɩɛ "ju -nɩa 'e -pɩɩɔn" blʋa "kpei 'a wee po wlu -o, ɔ 'naa : Ao nmae Tʋ"bo 'a -je ! Ka Kea 'a wlu 'kwajaai Esai 'tmʋ ɛ 'de ɔɔ' 'sbɛ 'di ɛ, 'kamɔ 'mɔ nɩ-. 24 'De nyʋ ʋʋ dboa 'e San o 'mʋa- "klu ɛ, Fariseɛn-wi" -nɩ 'e mu, 25 ʋʋ -tee' ɔ i ka, ʋʋ 'na : -Ɩn sea Klisɩ nɩ-, -ɩn sea Eli nɩ-, -ɩn sea Kea 'a wlu 'kwajaai nɩ 'ee, -mɛ dɛɛ -tɩ -ma po nyʋ "ni "jru ɛ- ? 26 'Sʋ San 'na : "ni mɛ 'ma po nyʋ "jru, 'kaa 'de aopʋ "klu ɛ, "ju due' -nɩ 'e 'mɔ 'de ao se juo-, 27 'kaa 'ɩn se ɔɔ' "kwlai 'a "dbi "ikain ka nɩ-. 28 Dɩ -nɩ -wee' nʋʋɛ' 'bo Betani 'de Sudɛn juuɔ 'de, -ta San a pooa nyʋ "ni "jru ɛ. 29 Ɛɛ' -sɔn' jrɛ' -sɩan', Sesi jiɛ 'de San o. 'sʋ ɔ 'na : Kea 'a blaa ju -ɛɛ -kɔa' nyʋ -wee' 'a dɛsaʋn, ɛ ka ! 30 Ɔmɔ -nɩ "ju -ɔɔ -tɩ' 'ɩn 'tmʋa -wɛe 'ɩn 'na "ju -ɔɔ jia 'bo 'ʋn 'de ɔ 'bɛi" ɔ je 'ʋn -sii, dɛ-nʋɛ' ɔ nɩɛ 'kmʋ sese 'bo 'ʋn "juɔi. 31 'Ɩn se ɔ juo- -ke 'de-, 'kaa 'ma poɛ nyʋ "ni "jru -wɛe Israɛ-kɔʋn 'je ɔɔ' -tɩ' juo-. 32 San wlu' ke'wlɛ ɔ 'na : -Ta Kea 'a -Suu 'wlʋa 'e jaʋn 'di, -wɛe ɛ "sia i 'bo ɔ "jru ɛ, 'ɩn 'je ɛɛ' -ta 'mɛ. Ka -gbɛɛ' nɩa, 'kamɔ ɛ nɩ-. 33 'De -mɛ 'mɔ sɩ ɔ juo ke -wee' 'de-, 'kaa Kea -dboa' 'ʋn nyʋ "ni "jru poa', ɛmɛ -wlu 'ʋn -pee ka, ɛ 'na : -Ma muɛ 'ma -Suu i 'jea', ɛ 'je i "si 'bo "ju due' "kpei. Ɔɔ' "ju tu mɔ -ɔɔ mu 'ma -Suu nyʋ "jru poa. 34 -wɛe 'ɩn 'je ɛɛ' -ta, 'de ka ɔ nɩa Kea 'a "Ju, 'ɩn 'je kan' -wɛe 'ɩn 'tmʋ ɛ 'de ao -pee. 35 Ɛɛ' -sɔn' jrɛ' -sɩan', -ta San nɩa 'bo ɔ nɩ- ke'wlɛ, ɔ ke ɔɔ' klai" nynuu 'sɔɔn ke. 36 Ɔ 'jea Sesi ɔɔ -sia' 'sʋ ɔ 'na : Kea 'a 'blaa ju -nao. 37 San 'a klai" nynuu 'sɔɔn -nʋ 'wɔan wlu ɔ 'tmʋa -nɛ 'sʋ, ʋʋ bla 'o Sesi 'de. 38 Sesi -gbʋan de 'sʋ ka ʋʋa ji ɔ kɩn ɔ 'je kan' 'mɛ, 'de ɔ -tee' ʋʋpʋ i, ɔ 'na : Dɛ aoa -pɔn i ɛ- ? Ʋʋ 'na : Rabbi, (ɛ 'de mɛ -nɩ nyʋ dɛtɔɔi) -ta ka -ɩn -koo ɛ- ? 39 'Sʋ ɔ wlu' 'de ʋʋ -pee ɔ 'na : Ao ji 'je ! Ʋʋ mu' -cɛɛn'-, ʋʋ je -ta ɔ kooa 'je. 'Bomɔ ʋʋ ke ɔ nɩ 'de 'wɩ -nɩa 'mʋa- 'di. 'De -ta ɛɛ nʋʋa kan' -mɛ -kwie" jrʋ -teɛ -gbao. 40 Nyʋ 'sɔɔn -wɔan San 'a wlu -wɛe -ʋʋ bla 'o Sesi 'de ɛ, ʋʋa' due' 'a 'nynɩ -nɩ Ancre, ɔ nɩɛ Simɔ Piɛi 'a de'di -o. 41 Ɔmɔ -saa "i -ɔ -jɛɛ ɔɔ' de'di Simɔ 'de ɔ 'na : -A -jee' Mesi "jriɛ- -wɛ- ! (Ɛ 'de mɛ -nɩ Klisɩ, Nyʋ'pʋʋi Kea -tea' 'o ɛ.) 42 -Wɛe ɔ kpa Simɔ 'de Sesi o. Sesi -gbʋan Simɔ ja 'sʋ ɔ 'na : -Ɩn -nɩɛ Sonasɩ 'a "ju Simɔ -o, 'bode ɛ, -ma 'nynɩ -nɩ Sefasɩ (ɛ 'de mɛ -nɩ Piɛi, "sou). 43 Ɛɛ' -sɔn' jrɛ' -sɩan' Sesi -nɩɛi" ɔ 'je 'e Galile mu 'sʋ ɔ ke Filipʋ -gbʋʋn', ɔ wlu ɔ -pee ɔ 'na : -Ɩn bla 'bo 'ʋn 'de. 44 Filipʋ -mɔ 'wlʋɛ 'o Besaida 'bo Ancre ke Piɛi o -kwlɔ. 45 Filipʋ ke Natanaɛ 'jea 'sʋ ɔ wlu ɔ -pee ɔ 'na : Natanaɛ, "ju -ɔɔ -tɩ' Moisɩ 'crɩa 'de kɛ'ɛ 'sbɛ 'di, -wɛe -ɔɔ -tɩ' Kea 'a wlu 'kwajaaʋn 'tmʋa -a -jeɔ' -wɛ-. Ɛ Soseʋ 'a "ju Sesi -ɔ -wlʋa Nasarɛtɩ -o. 46 'Bomɔ Natanaɛ wluu ɔ 'na : Dɛ 'dɔe 'beeɛ' ɛ 'je 'o Nasarɛtɩ -mɔ 'wlʋʋ ? Filipʋ 'na : -Mɔ ji 'je 'sʋ. 47 Sesi 'jea Natanaɛ ɔɔ jia 'de ɔ o 'sʋ, ɔ wlu' 'de ɔɔ' -tɩ' 'ʋn, ɔ 'na : Israɛ i 'a -cɛ" 'kpa -mɔ ka, sɩ -tɩ se 'de ɔ 'ʋn nɩ-. 48 'De Natanaɛ -tee' ɔ i, ɔ 'na : -Ta -ɩn juo 'ʋn ɛ- ? Sesi 'na : -Ta -ɩn -nɩɩa 'bo fikɩtu -sɔn 'bo 'ɩn 'jee -ʋn, -mɛ Filipʋ se -ʋn 'daa- ji ke. 49 'Sʋ Natanaɛ 'na : Nyʋ dɛtɔɔi, -ɩn -nɩɛ Kea 'a "Ju -wɛe -ɩn -nɩ Israɛ 'a 'beɔ. 50 'De Sesi wlu ɔ -pee ɔ 'na : Dɛ 'ɩn 'na 'ɩn 'je -ʋn -wɛ- 'bo fikɩtu -sɔn, ɛmɛ -tɩ -ɩn -je 'ma -tɩ' tɔ' 'ʋn ? -Ma muɛ dɩ klae" klae" "jriɛ- 'jeea', ɛ 'je -jɩ -mɩ -sii. 51 -Wɛe ɔ wlu ke'wlɛ ɔ 'na : 'Ma 'tmʋʋɛ aopʋ tɔ' -tɩ, aoa muɛ jaʋn 'jea' ɛ 'je wɔn kain-, 'de Kea 'a "soa-wi" 'je -ja -blu' nʋ 'bo nyiɔ 'ɔ "Ju "jru kpɔ'.

2

1 Ɛ nʋɛ 'wɩ taan 'sʋ, ba "blitii -kɔ -tuu" ɛ 'bo Kana 'de Galile. Sesi de nɩ 'o 'ɛ. 2 Ʋʋ 'da Sesi ke ɔɔ' klai" nynuu -kɔ' -sɔn -ke. 3 Nmɔ -kwɛa 'sʋ, Sesi de wlu' 'de ɔ -pee ʋ 'na : Ʋʋ se nmɔ 'ble 'bode -o. 4 'Sʋ Sesi 'na : "Ju 'nynɔ, aa' tɔ' ke 'ma tɔ' se due' nɩ-. 'Ma -nɛ nɔ" se 'o nyni ke. 5 'Sʋ ʋ wlu' 'de nyʋdiidɛ "jrii -gbleʋn' -pee, ʋ 'na : Dɛ "klein ɔɔ mua ao -pee 'tmʋa' a, ao nʋ ɛ. 6 -Ta ɛɛ nʋa kan' -mɛ "soijae -mɛɛo"- -nɩ 'o, Suifʋ-wi" a po "ni 'di -wɛe ʋʋa -sa -flɛn" kui ka ʋʋa nʋa 'de ʋʋpʋ "bli see ɛ. Ɩa' jae tu ɛ, "ni -sʋɩ 'a kwla -mɛ" na a "ji jrɩ' -wɛe kmɛ' 'due kwla 'sɔɔn -ɔ -ji" jrɩ'. 7 'Sʋ Sesi wlu' 'de nyʋdiidɛ "jrii -gbleʋn' -pee ɔ 'na : Ao "jii- jae -nɩ "ni ! -Wɛe ʋʋ po ɩ "ni 'di 'sʋ ɩ "ji. 8 'Sʋ Sesi 'na : Ao "pliɛn la, ao 'je "ju -ɔ -tea' diidɛ "jru o i kpa. ʋʋ "pliɛn 'sʋ ʋʋ kpɛ'. 9 Diidɩ "jruo -tei -nɔ -tɩan' "ni -ɛ -snɛɛa nmɔ 'ʋn -nɛ wɔn 'sʋ -ta ɛɛ' nmɔ tu 'wlʋa ɔ se 'o juo-, 'kaa diidɛ -gbleʋn -cria' "ni ɛ, -wi" -mʋ juo 'o 'ɛ 'pepe. 'Sʋ ɔ 'da 'nynɔjei 'mɛ, 10 -wɛe ɔ wlu ɔ -pee ɔ 'na : Nyɔɔ 'nyɩɛ nyʋ nmɔ 'dɔe ke kpɩɩn-, -wɛe -jɛ -sea wɔn nmɔ ɔ 'bɔɔ de, -mɛ nyʋ -wee' "jii la. 'Kaa -mɔ -teɛ' nmɔ 'dɔe i mamaʋ 'sʋ ti je ka nɩ-. 11 Ka Sesi nʋa ɔɔ' "i-saa' jrii' nʋ sʋn, 'bo Kana 'de Galile 'kamɔ -nao. Ɔɔ' "ikmaa' 'pɛɛn- "kpae' 'bomu -wɛe ɔɔ' klai" nynuu 'je ɔɔ' -tɩ' tɔ' 'ʋn. 12 'Bo -mɛ 'de ɛ, Sesi ke ɔ de o, ɔɔ' "dei -wi" o, ɔɔ' klai" nynuu muɛ Kapɛnaʋm. 'Kaa ʋʋ se 'o 'wɩ -tuu" nʋ. 13 Suifʋ-wi" 'a kʋɔnkwla' 'wlʋ -kɔ nyʋ a 'daa- Pakɩ "kʋʋan i 'sʋ, Sesi muɛ Selisalɛm. 14 Ɔ paa 'e Kea -gbu klaa" 'di 'sʋ, ɔ jɛɛ 'e bli' pleʋn o, 'blae pleʋn o, "pai pleʋn o, ɛ ke 'wɛi fai" poʋn ke, -mɛ ʋʋ -teɛ i 'de ʋʋpʋ 'a klukpa 'de. 15 'Sʋ ɔ "duɛ "dbu 'ʋn 'de ɔ nʋɛ klaejɔ 'ʋn -wɛe ɔɔ nʋ ʋʋpʋ i, ɛ ke ʋʋa' bli' ke 'blae ke. Ɔ -gba' 'wɛi fai" pooʋn 'a 'wɛi mɩɩ" ja, ɔ -gba' ʋʋa' klukpɩ -wee' ja. 16 -Wɛe ɔ wlu 'e "pai pleʋn -pee ɔ 'na : Ao -sa dɩ -nɩ -ta. Ao 'bo 'ʋn "Bo 'a -gbu" 'dɔɔpo-gbu 'ʋn nʋɛ. 17 'Sʋ wlu -crɩɩa' 'de Kea 'a 'sbɛ 'di ɔɔ' klai" nynuu po ɛ -kwlʋ o. Ɛɛ' wlu tu 'naa : 'Oo Kea, ɛɛ' -gbu" 'a 'tʋn a 'dba 'ʋn 'ɛ. 18 Suifʋ-wi" 'a "jru kpɔ i -teʋn "dua wlu 'ʋn 'sʋ ʋʋ 'na : jrii' wɛ- -ɩn nʋ kaan -a -jee' "jriɛ 'sʋ -ma nʋ dɩ -nɩ ɛ- ? 19 'De Sesi 'na : Ao -gba' Kea -gbu klaa" -nɛ "jɛi-, 'ma muɛ poa' 'de 'wɩ taan 'di. 20 'Sʋ Suifʋ-wi" wlu ɔ -pee ʋʋ 'na : -Ja" ! Kea -gbu klaa" -nɛ nyʋ poa 'de -sɩn 'a kwla -nyiiɛ 'jɔ -mɛɛo"- 'di ɛ, ɛmɛ -mɔ -na -ɩn -je po 'de 'wɩ taan -gbai' 'dii ? 21 'Kaa Kea -gbu -jɛ Sesi a "sia 'nynɩ ɛ, ɛmɛ -nɩ ɔɔ' nyiɔjɔ. 22 Ɛmɛ -tɩ -ta Sesi sɔan "kunyɩɔ' 'sʋ ɔɔ' klai" nynuu po ɛɛ' wlu tu 'a -tɩ' -kwlʋ o. 'Sʋ dɩ "klein -crɩɩa' ke wlu Sesi 'tmʋa 'de ɛ ʋʋ 'je ɩ tɔ' 'ʋn. 23 -Ta Sesi nɩɩa 'o Selisalɛm, Pakɩ 'a -kɔ' nɔ" ɔ, nyʋ -tuu"-tuu -je jrii' -wi" ɔ nʋa -wɛe -ʋʋ -je ɔɔ' -tɩ' tɔ' 'ʋn. 24 'Kaa Sesi se ʋʋpʋ -kwlɩ" -te', dɛ-nʋɛ' ɔ juo ʋʋ -wee' "klein 'mɛ. 25 Dɩ "klein -nɩa 'e nyiɔ pɛe o ɛ, ɔ juo ɩ -wee' 'mɛ. Ɛmɛ -tɩ nyɔ se ɛ 'bɛɛ- ɔ 'je nyiɔ 'ɔ -po' bla 'de ɔ -pee.

3

1 'Kaa "ju due' -nɩ 'e Fariseɛn-wi" "klu, ɔɔ' 'nynɩ -nɩ Nikodɛmʋ, ɔ nɩɛ Suifʋ-wi" 'a "jru kpɔ' i -tei 'a due' -o. 2 Ɔmɔ -ji' 'de Sesi o "maʋ', -wɛe -ɔ -wlu ɔ -pee ka -ɔ 'na : Nyʋ dɛtɔɔi, ka -ɩn -wlʋa 'e Kea o -wɛe -ɩn -je -a dɛ tɔɔ ɛ, -a -je kan' 'mɛ, dɛ-nʋɛ' jrii' -wi" -ma nʋa nyɔ jrɔ' se ɛ 'bɛɛ- ɔ 'jɩ nʋ -bo Kea se ɔ o sie ɛ. 3 Sesi wlu ɔ -pee, ɔ 'na : 'Ma 'tmʋʋɛ -ʋn tɔ' -tɩ 'a tɔ' -tɩ, nyɔ -sea' 'wlʋa' dee 'wlʋ ɛ, ɔ se ɛ 'bɛɛ- ɔ 'je Kea 'a 'bɩɔ dɛ 'je. 4 'Sʋ Nikodɛmʋ -tee' ɔ i, ɔ 'na : Ka nyɔ -kpa -kea" -mɔ 'je 'wlʋa' dee 'wlʋsʋn nʋ ɛ- ? Ɔ 'je 'de ɔ de 'di de mu -o -wɛe ɔ 'e 'wlʋ ke'wlɛɛ ? 5 Sesi 'na : tɔ' -tɩ 'ma 'tmʋʋ -ʋn, -bo nyɔ se 'wlʋ 'de "ni ke -suu 'ʋn ɔ se 'bɛɛ- ɔ 'je 'e Kea 'a Tʋ"bo -kwlɔ 'di pa. 6 Dɛ -wlʋa 'e nyiɔ 'ʋn -mɛ nɩɛ nyiɔ -o, -wɛe dɛ -wlʋa 'e Kea 'a -Suu 'ʋn -mɛ nɩɛ Kea 'a dɛ -o. 7 -Bo 'ɩn 'na ao 'je 'wlʋa' dee 'wlʋ ɛ, tai' 'bo -ʋn -maa"-. 8 -Ma -jee', -ta poɔ' nɩai" 'bo ɛɛ muu, 'de -ma -wɔn ɛɛ' -si' wlu 'mɛ, 'kaa -ta ɛɛ 'wlʋa, -ta ɛɛ mua, -ɩn se 'o juo-. 'Kamɔ ɛ nɩ -ke 'de nyɔ -ɔ -wlʋa 'de Kea 'a -Suu 'ʋn 'a -tɩ' 'ʋn. 9 'Sʋ Nikodɛmʋ 'na : Ka -mɛ 'ɛ dɛ tu 'je nʋʋɛ 'emu ɛ- ? 10 'De Sesi 'na : -Mɔ -nɩa Israɛ-nyʋ 'a dɛtɔɔi klaa" a, -ɩn se dɩ -nɩ -mɩ juoo- ? 11 'Ma 'tmʋʋɛ -ʋn tɔ' -tɩ, dɛ -a -juua, ɛmɛ -aa -tmʋ 'de dɛ "o dɛ -a -jea a ɛmɛ -ɛɛ -po' -aa bla, 'kaa -po' -aa bla a aoa' -tuɛ" doin". 12 -Bo 'ma sea 'blʋa- "kpei dɩ 'a -tɩ' 'tmʋ, -wɛe aoa' 'je -mɩ tɔ' 'ʋn 'ee, -mɛ -bo 'ma sea jaʋn 'di dɩ 'a -tɩ' 'tmʋ 'ee, ka ao 'je ɩa' tɔ' 'ʋn 'jesʋn nʋ ɛ- ? 13 Nyɔ "o nyɔ jrɔ' se 'e jaʋn 'di mu due', -bo ɛ se nyiɔ 'ɔ "Ju -ɔ -wlʋa 'e jaʋn 'di nɩ ɛ. 14 'De ka Moisɩ crooa -tiɛn-sɛn tu "i 'de -pɩɩɔn" blʋa "kpei ɛ, 'kamɔ nyiɔ 'ɔ "Ju 'je 'o tu -kwlɩ" kɔɔɛ -ke, -wɛe ʋʋ 'je ɔ inynaa-. 15 'De nyɔ "o nyɔ -je ɔɔ' -tɩ' tɔ' 'ʋn ɛ, ɔ 'e 'kmʋnɩa' -sea' "ti -ta 'ble 'je. 16 Dɛ-nʋɛ' Kea 'a nyiɔ 'ɔ -tɩ' kmaa' -siɛ' sʋn' i. Ɛmɛ -tɩ ɛ -tu" -wɛe ɛ to 'e ɛɛ' "Ju jɔ due' koʋn -gbai' 'de nyɔ "o nyɔ -jea ɔɔ' -tɩ' tɔ' 'ʋn je -tuɔn blu 'kaa ɔɔ muɛ 'kmʋnɩa' -sea' -kwɛ- -ta 'ble 'jea. 17 Kea mɛ 'de ɛ, ɛ se ɛɛ' "Ju 'nɔ 'kmʋ "kpei dbo 'de ɔ 'e nyiɔ 'pee kpʋʋn-, 'kaa ɛ dboɔ' -wɛe nyiɔ 'je 'pʋʋa' 'je 'de ɔ 'ʋn. 18 Nyɔ -jea ɔɔ' -tɩ' tɔ' 'ʋn ɛ, 'pee se ɔ kpʋn i, 'kaa nyɔ -sea' ɔɔ' -tɩ' tɔ' 'ʋn 'je ɛ, 'pee kpʋn -mɔ 'mɛ sese, dɛ-nʋɛ' ɔ se Kea 'a "Ju jɔ due' koʋn -gbai' 'a -tɩ' tɔ' 'ʋn 'je. 19 'De ɛɛ' 'pee tu mɛ -nɩ : -Sɔn' -jia' 'nɔ 'kmʋ "kpei ɛ, nyiɔpʋ se ɛ "inɩ-, 'kaa kwie mɛ ʋʋa -pɔn, dɛ-nʋɛ' ʋʋa' nʋʋdɩ nyniɛ "jrii. 20 Nyɔ "o nyɔ -ɔɔ nʋʋkplɩn nynia "jrii ɛ, ɔ 'nyɛ -sɔn' 'ʋn 'ɛ, -sɔn'ɔ faʋn a nʋɔ', dɛ-nʋɛ' ɔɔ plee ɔɔ' kplɩn 'a "kpae' 'pɛɛan' 'mɛ 'de -sɔn' 'ʋn. 21 'Kaa nyɔ -ɔɔ nʋa tɔi" dɩ ɛ, ɔmɔ -ɔɔ ji 'e -sɔn' 'ʋn -wɛe ka ɔɔ 'jea Kea wɔn ɛ, nyʋ a 'je ɛ i 'pepe 'de ɔɔ' nʋʋdɩ 'ʋn. 22 'Bo -mɛ 'de ɛ, Sesi ke ɔɔ' klai" nynuu muɛ 'e Suideblʋa "kpei. 'Bomɔ ɔ ke ʋʋ nʋ 'wɩ pla-, -wɛe ɔɔ po nyʋ "ni "jru. 23 San foo" 'sʋ a poɛ nyʋ "ni "jru -ke 'bo Enon, ɛ ke Salimʋ "kʋʋan- i. 'Bomɔ "ni -tuu" nɩ-, -wɛe nyiɔpʋ a mu 'de ɔ o, 'de ɔɔ po ʋʋ "ni "jru. 24 -Mɛ San se -kaso 'di mu ke. 25 'Sʋ San 'a klai" nynuu 'a jrʋ' ke Suifʋi due' -teɛ ba o -tooa' -pʋn" 'de dɩ nyʋ 'jea 'a nʋ -wɛe ʋʋ 'jea 'e Kea "jri 'dei nmɔɔ 'ɔ -tɩ' 'ʋn. 26 Ʋʋ jiɛ 'e San o, 'de ʋʋ 'na : -Aa dɛtɔɔi, "ju -ɔ -ke -ɩn -nɩa 'e Sudɛn -gbuu 'de 'deɛ, -wɛe -ɔɔ -tɩ' -ɩn -tmʋa 'de -a -pee ɛ, -ɩn -gbʋn 'nɔ, ɔmɔ -ɔɔ poa nyʋ "ni "jru 'nɩa- -ke, nyʋ -tuu"-tuu a muɔ o ! 27 'De San wlu ka ɔ 'na : Nyɔ "o nyɔ se ɛ 'bɛɛ- ɔ 'e dɛ 'ble -bo Kea 'a -cɛ" 'kpa se ɔ "nyɩ ɛ. 28 -Ta 'ɩn wluua -wɛe 'ɩn 'na 'ɩn se Klisɩ nɩ ɛ aoa' -cɛ" 'kpa 'je ɛɛ' -ta 'mɛ. 'kaa 'ɩn 'na 'ɩn nɩɛ ɔɔ' "juɔi nai -o. 29 Nyɔ -blea 'nynɔ ɛ, ɔmɔ -nɩ 'nynɔjei. 'Kaa 'nynɔjei 'a "dɛi -mɔ nɩɛ 'bo ɔ -pʋn" -wɛe ɔɔ po ɔɔ' wlu doin" o, -wɛe dɩ ɔɔ 'tmʋ, ɩ 'ble ɔɔ' 'mʋa-. Ɛmɛ -tɩ 'ma -nɛ 'mʋa- 'ma nʋa nɩ 'pepe. 30 Ɔmɔ 'ɔ 'nynɩ 'je "jɛi mu -o, -wɛe 'ma -nɛ 'nynɩ 'e -sɔn ji. 31 Nyɔ -ɔ -wlʋa 'e jaʋn 'di, ɔ nɩɛ 'o nyʋ -wee' "klein "jru kpɔ', 'de nyɔ -ɔ -nɩa 'nɔ 'blʋa- "kpei ɛ, -mɔ nɩɛ 'blʋa 'a nyɔ -o, -wɛe ɔɔ 'tmʋ 'bluadidɩ 'a 'sʋ 'a -tɩ', 'de nyɔ -wlʋa 'e jaʋn 'di, -mɔ nɩɛ 'o dɩ -wee' "klein "jru kpɔ'. 32 Dɩ ɔ 'jea 'de ɔ 'wɔan, ɩmɩ ɔɔ 'tmʋ, 'kaa nyɔ -ɔ -jea ɔɔ' -tɩ' 'wɔɔn-, ɔ se nɩ-. 33 Nyɔ -jɔ -wɔɔan' ɔɔ' -tɩ' ɛ, -mɔ 'na Kea nɩɛ tɔ' -o. 34 Nyɔ Kea dboa, ɔɔ 'tmʋɛ Kea 'a wlu, dɛ-nʋɛ' Kea -kwɛ- ɛɛ' -Suu "kpei- ɛ je ɔ "nyɩ, ɛ se ɛ dbaa-. 35 "Bo kma "ju 'a -tɩ', ɛmɛ -tɩ ɛ -te' ɔ dɩ -wee' kwa. 36 Nyɔ -jea Kea 'a "ju 'a -tɩ' tɔ' 'ʋn ɛ, ɔ 'jeɛ 'kmʋnɩa' -sea' -kwɛ -ta 'ble ɛ, 'kaa nyɔ -sea' Kea 'a "ju 'a -tɩ' tɔ' 'ʋn 'je ɛ, ɔ se 'kmʋnɩa' 'je i, -mɛ Kea 'a 'cɛn -nɩ ɔ "kpei.

4

1 Fariseɛn-wi" 'wɔn ɛ ka Sesi a 'da nyʋ -tuu"-tuu -wɛe ɔɔ' klai" nynuu a 'kpa "kpei 'de ɔɔ po nyʋ "ni "jru ɛ -sii San. 2 'De tɔ' -tɩ 'ʋn ɛ, Sesi 'a -cɛ" 'kpa 'a po nyʋ "ni "jru -bo ɛ se ɔɔ' klai" nynuu nɩɛ. 3 Sesi 'wɔan dɛ ʋʋa 'tmʋa -nɛ 'sʋ, ɔ 'wlʋ 'e Suide 'mɛ -wɛe ɔ mu 'e Galile de. 4 -Bo ɔ 'je 'emu ɛ, ɔ 'je Samadiblʋa 'ʋn -tie" cɛn -o se. 5 'Sʋ ɔ nyniɛ 'o Samadi 'a -kwlɔ due' nyʋ a 'daa- Sikaa -pʋn". Ɛɛ' -kwlɔ tu ke -kle' Sakɔbʋ "nyɩa ɔɔ' "ju Sosɛʋ tɛin" "kʋʋan- i. 6 'Bomɔ Sakɔbʋ 'a "nibie nɩ-. Sesi na ɔ sea 'sʋ ɛ, ɔ -teɛ i 'bo "nibie wɔin", -mɛ 'jrʋ -teɛ -gbao. 7 'Sʋ Samadi 'nynɔ due' -jia' "niɔ- mʋ Sesi wlu -pee ɔ 'na : A "nyɩ 'ʋn "ni 'ɩn 'je 'na. 8 -Ta ɛɛ nɩa kan' -mɛ ɔɔ' klai" nynuu muɛ diidɛ -tɩan' 'de -kwlɔ. 9 'Sʋ Samadi 'nynɔ -nʋ wlu' 'de Sesi -pee, ʋ 'na : Ɛ dɛ-, -mɔ -nɩa Suifʋi ɛ, -mɔ -ɔɔ -dbaa' 'mɔ -nɩa Samari 'nynɔ "ni ? 'De see ɛ, Suifʋ-wi" ke Samadi kɔʋn 'nyɩɩɛ 'ʋn 'ɛ, ʋʋa' poo wɔn o. 10 'Bomɔ Sesi 'na : bo a juo dɛ Kea a "nyɩa nyʋ foo" 'ʋn 'de ɛ, 'de "ju -jɔ -ɔɔ -dbaa' aʋn "ni -bo a juo -mɔ -ke 'de ɛ, -mɛ ɔmɔ a 'je -ɔ "ni 'dbaa 'de-, -wɛe -ɔ -je aʋn "ni -ɛ sea ma -ta 'ble "nyɩ. 11 'Nynɔkpao' -nʋ 'na : "Bo, -mɔ -sea' "ni -cri' -dɛ 'ble, 'de "nibie tɛan 'di 'ee, -ta -mɔ -je 'kmʋ nɩ ni -mɛ -sa -wɛe -ɩn -je ɛ 'mɔ "nyɩ ɛ- ? 12 -Mɔ -bɛ"i -ɩn -je -a 'mɩa Sakɔbʋ -nyɩ" -a "nibie -nɛ -sii ? Ɔɔ' -cɛ" 'kpa ke ɔɔ' "nynuu- ke ɔɔ' nɔ" dɩ 'na ɛɛ' "ni tu 'mɛ. 13 'Sʋ Sesi 'na : Nyɔ "o nyɔ -na "ni -jɛ -mɛ ɛ, "ni 'natʋn a mu ɔ nʋa' ke'wlɛ. 14 'Kaa nyɔ -na "ni 'ma mu ɔ "nyɩa', "ni 'natʋn se ɔ nʋi 'bode. 'De "ni 'ma mu ɔ "nyɩa' ɛɛ muɛ 'kmʋnɩ ni 'a "jru nɩa' 'de ɔ 'ʋn 'bomɔ 'kmʋ -sea' -kwɛ -ta 'ble 'je 'wlʋ -wɛe ɛ 'je i -si'. 15 'Sʋ 'nynɔkpao' -nʋ 'na : Tʋ"bo -ɩn -nyɩ" 'ʋn ɛɛ' "ni tu 'de "ni 'natʋn je 'ʋn nʋ -wɛe 'ɩn je "ni -cria' ji -ta 'bode. 16 'Sʋ Sesi 'na : A mu a 'da aa' kʋan -mɛ a ji de -ta. 17 "Ju nynɔkpao' -nʋ -sɛ "kpei ʋ 'na : 'Ɩn se kʋan 'ble. Sesi 'na : A -sa tɔ' a je wlu ka : 'Ɩn se kʋan 'ble, 18 dɛ-nʋɛ' a 'ble kʋan -wi" -mm" -wɛ- 'de-, 'de -jɔ a nɩa 'e 'kwa kaan -mɔ se aa' kʋan nɩ -ke. 'De -mɛ 'ʋn ɛ, a 'tmʋɛ tɔ' -tɩ. 19 'Sʋ ʋ 'na : Tʋ"bo, dɛ 'ma 'jea i 'de -ɩn 'ʋn ɛ, ɛmɛ -nɩ -ɩn -nɩɛ Kea 'a wlu 'kwajaai -o. 20 -A "bo -wi" -gbɛɛ Kea "juɔi 'bo crʋ -nɛ "kpei, 'de aopʋ mɔ ɛ, ao 'na -ta nyʋ 'jea Kea "juɔi -gbɛɛ' 'bo -nɩ Selisalɛm. 21 'De Sesi 'na : 'Nynɔkpao', a -gbʋn 'nɔ, nɔ" jrɛ' -ɛɛ mu nynia' -wɛe ao se Kea -nɩa "Bo "juɔi -gbɛɛ i 'bo Selisalɛm ke crʋ -nɛ "kpei. 22 Aomɔ se dɛ aoa -gbɛɛa' juo-, 'kaa -apʋ mɔ ɛ, dɛ -aa -gbɛɛ' a -a -juuɛ', dɛ-nʋɛ' 'pʋʋa' cɛɛn 'e -a o Suifʋ 'ʋn. 23 'Mɔ -tmʋʋ' aʋn, nɔ" jrɛ' -ɛɛ mu nynia', 'de ɛ nyni' -wɛ- mɔ. 'Bomɔ -gbɛɛʋn -cɔʋn' 'je "Bo -gbɛɛ' -ta "o -ta 'de -Suu ke tɔ' -tɩ 'ʋn. Dɛ-nʋɛ' -gbɛɛʋn "Bo a -pɔn a i ʋʋ -nao. 24 Kea nɩɛ -Suu -o, ɛmɛ -tɩ nyʋ -a -gbɛɛ' ɛ "juɔi ɛ, ʋʋ 'je ɛ "juɔi -gbɛɛ' -o 'de ɛɛ' -Suu ke tɔ' -tɩ 'ʋn. 25 'Sʋ 'nynɔkpao' -nʋ 'na : 'Ɩn 'je kan' 'mɛ, Mesi, nyʋ a 'daa- Klisɩ ɛ, ɔɔ muɛ jia'. -Bo ɔ ji -wɛe ɔ 'je dɩ -wee' "klein wɔ -sa 'de -a -pee. 26 'Sʋ Sesi 'na : Ɛ nɩ 'mɔ -ɔ -nɩa aʋn -pee wlua -ta. 27 Ʋʋ siɛ wlua' Sesi 'a klai" nynuu je de ji, 'sʋ dɛ ɔ ke 'nynɔkpao' -nʋ a wlua ɛɛ' tai' "maa ʋʋpʋ 'mɛ, 'kaa ʋʋa' due' se nʋ : Dɛ -ma -tee' ʋ i ɛ- ? 'De dɛɛ-tɩ ʋ ke -ma -tmʋ ɛ- ? 28 'Nynɔkpao' -nʋ siɛ ʋa' "nijae 'mʋa-, 'sʋ ʋ muɛ nyʋ 'tmʋa' 'de -kwlɔ. 29 Ʋ 'na : Ao ji "ju -nɔ 'je, dɩ "klein 'ɩn nʋa ɩmɩ ɔ "si 'nynɩ, ɔ se Klisɩ nɩ -taa mɔɔ ? 30 Ʋʋ 'wɔan wlu -nɛ 'sʋ ʋʋ -wee' -kwɛ 'e -kwlɔ i -wɛe ʋʋ mu Sesi "jriɛ 'jeea. 31 -Ta ɛɛ nʋʋa kan' 'sʋ klai" nynuu a crɛɛ Sesi "kpei dɛdi -tɩ, ʋʋ 'na : -Aa dɛtɔɔi, -ɩn di dɛ ke 'de ! 32 'Sʋ ɔ wlu' 'de ʋʋpʋ -pee ɔ 'na : 'Ɩn 'bleɛ diidɛ jrɛ', ao se juo-. 33 'Sʋ klai" nynuu a -teeɛ' ba i due 'due, ʋʋ 'na : Nyɔ jrɔ' -jɔ diidɛ -aee' ? 34 'Sʋ Sesi -sɛ "kpei ɔ 'na : 'Ma diidɛ mɛ -nɩ "ju -ɔ dboa 'ʋn 'a -kwlʋtɩ nʋa', ke dbo ɔ "nyɩa 'ʋn 'a "i -kɔa' -ke. 35 Aoa wlu' kaan ao 'na 'cʋɩ -nyiiɛ' -sie 'o -wɛe nyʋ 'e ko cɛn, 'kaa 'mɔ 'na ao kpa "jri "jɛi, ao -gbʋʋn' -kle' "kpei, ko -fluu" -wɛe ɩ -teɛ cɛn-tɩ. 36 Nyɔ -ɔɔ cɛan ko ɛ, -mɔ 'je ɔɔ' -kei" 'mɛ see, -wɛe ɔɔ 'kɩɩn- ɩa' 'jɔ "jrui 'de 'kmʋnɩa' -sea' -kwɛ -ta 'ble 'a -tɩ' 'ʋn. -Bo ɛ nɩ kan' -mɛ nyɔ -poa' ko ke nyɔ cɛan ko ke ʋʋ -wee' a muɛ 'mʋa- nʋa' -tadue. 37 'De ɛɛ' -tɩ' 'ʋn ɛ, dɛ nyʋ a 'tmʋa nɩɛ tɔ' -o, nyʋ 'na : Nyɔ due' po ko -wɛe deejrɔ' 'je ɛ cɛn. 38 -Kle' -ɛɛ dbo ao sea nʋ ɛ, ɛmɛ -ɛ 'di 'ɩn dbo ao ko cɛan'. Nyʋ jrʋ' -nʋ' ɛɛ' dbo -wɛe aopʋ mɔ paa 'bo ʋʋpʋ 'a dbo "kpei. 39 'De 'nynɔkpao' -nʋ 'na : ɔ 'tmʋ dɩ "klein 'ɩn nʋa 'mɛ 'de 'ʋn -pee, ɛmɛ -nʋɛ' -wɛe Samadi kɔʋn -tuu"-tuu 'je Sesi 'a -tɩ' tɔ' 'ʋn 'bo ɛɛ' -kwlɔ -tu 'di. 40 Ɛmɛ -tɩ -ta Samaditɛn nyʋ jia 'de ɔ o ʋʋ bae ɔ i 'de ɔ ke ʋʋ 'je i -te. 'Sʋ ɔ nʋɛ 'wɩ 'sɔɔn 'mʋa-. 41 Nyʋ -tuu"-tuu -je ɔɔ' -tɩ' tɔ' 'ʋn ke'wlɛ, dɛ-nʋɛ' ʋʋ 'wɔn ɔɔ' -cɛ" 'kpa 'a wlu. 42 -Wɛe ʋʋ wlu' 'e 'nynɔkpao' -pee, ʋʋ 'na : Kaan ka -a -je ɔɔ' -tɩ' tɔ' 'ʋn 'ɛ, ɛ se dɛ a 'tmʋa 'de -a -pee -mɛɛ' 'sʋ 'a -tɩ' nɩ-, 'kaa -aa' -cɛ" 'kpa 'wɔn ɔɔ' wlu 'mɛ, ɛmɛ -tɩ -a -je kan' -cɛɛn'- ka ɔ nɩa 'blʋa -wee' "klein 'a 'pʋʋi ɛ. 43 'Wɩ 'sɔɔn -nɩ -sia' 'sʋ Sesi 'wlʋ 'mʋa- 'mɛ, -wɛe ɔ mu 'e Galile, 44 dɛ-nʋɛ' ɔɔ' -cɛ" 'kpa 'tmʋʋɛ' : Nyɔ 'ɔ -te' Kea 'a wlu 'kwajaai 'a ni' 'de ɔɔ' -cɛ" 'ɛ 'blʋa- 'di see. 45 -Ta ɔ nynia 'de Galile ɛ, ʋʋ kpʋʋn ɔ sɩn 'sɔɔn ka -cɔɔn' ka, dɛ-nʋɛ' ʋʋ 'wlʋɛ Pakɩ 'a -kɔ' -sɔn 'de Selisalɛm -ke, 'bomɔ ʋʋ 'jee- dɩ "klein ɔ nʋa 'o -kɔ' -sɔn "jriɛ-. 46 'Sʋ ɔ muɛ Kana de -ta ɔ nʋʋa "ni nmɔ 'ʋn 'de ɛ, 'bomɔ "jrujei klaa" due' nɩ- ɔɔ nʋ 'beɔ 'ɔ dbo. Ɔmɔ -ɔɔ "ju 'a dɛ ɛ pooa 'bo Kapɛnaʋm. 47 Ka Sesi 'wlʋa 'e Suide ɔ jia 'e Galile ɔ 'wɔɩn 'sʋ ɛ, ɔ muɛ 'de ɔ o, -wɛe ɔ bae ɔ i 'de ɔ 'je Kapɛnaʋm mu, ɔ 'je ɔɔ' "ju -ɔɔ jia 'mɛa' 'pʋʋ-. 48 'Sʋ Sesi 'na : -Bo ao se jrii' ke dɩ klae" "jriɛ- 'jee- ɛ, -mɛ aoa' 'je 'ma -tɩ' tɔ' 'ʋn. 49 "Jrujei -nɔ 'na : 'Ma 'blei, -ta 'ma "ju sea 'mɛɛ ke ɛ, -ɩn -nya" -a mu -too"-. 50 'De Sesi 'na : -Ɩn mu, -ma "ju 'pʋʋ. Dɛ Sesi 'tmʋa 'mʋa-, "ju -nɔ 'je ɛ tɔ' 'ʋn 'ɛ, 'sʋ ɔ muɛ -kwlɔ. 51 -Ta ɔɔ mua de ɛ, 'bomɔ ɔɔ' dbonʋʋn -a 'jɔɔ "i ke ɔ -gbʋʋn', -wɛe ʋʋ wlu ɔ -pee ka, ʋʋ 'na : -Ma "ju 'pʋʋ. 52 Ɔ -teeɛ' ʋʋpʋ i, ɔ 'na : Blaa nɔ" ɔ nɩ nma" ka a- ? 'Sʋ ʋʋ 'na : -Saan' 'a -kwie" jrʋ -gbao o mɛ ɔɔ' 'wɛ- 'bɔ. 53 'Sʋ ka ɛ nɩa 'e nɔ" -nɩa 'mʋa- 'di mɛ Sesi 'na : -Ɩn mu, -ma "ju 'pʋʋ, 'sʋ "ju -saan" "bo po ɛ -tɩ' -kwlʋ o, 'sʋ ɔ ke ɔɔ' -gbu" -sɔn nyʋ -wee' 'jeɛ Sesi 'a -tɩ' tɔ' 'ʋn. 54 -Ta Sesi 'wlʋa Suide -wɛe ɔ mua 'e Galile ɛ, jrii' ɔ nʋa ɩa' kpɛ 'sɔɔn -nɛ -nao.

5

1 'Bo -mɛ 'de ɛ, Suifʋ-wi" a -tuɛ" -kɔ' jrɛ' ɛmɛ Sesi mu 'ʋn 'bo Selisalɛm. 2 'De Selisalɛm blaa blo' 'dei -wɛe ɛɛ' blo' 'ble wɔn -tuu". Ɛɛ' wɔn due' 'a 'nynɩ -nɩ 'blae 'a -gbɛin" -je. -Pue" wlo' due' -nɩ 'o, ɛɛ' 'nynɩ -nɩ Betɛsida 'de Suifʋwlu 'di. 'Bomɔ ʋʋ poo faa -mm". 3 Ɩmɩ 'Wɛnʋʋn 'pɛn -sɔn i blibli. "dɔʋn o, nyʋ -ʋʋa -kpaa' -gbɔʋn" "kpei o, klɔɔʋn ke. ʋʋ -wee' a fuɛ "ni 'a i-suua', 4 dɛ-nʋɛ' Tʋ"bo 'a "soai due' -a ji kpɛ due 'due 'de -ɔɔ -suua' "ni i, -wɛe -bo 'wɛ-nʋi -jɔ -saa "i -ɔ -kpa 'o "niɔ- 'sʋ ɛ, ka "o ka mɔ'ɔ 'wɛ- 'je ɛ nɩ ɛ, ɛ 'bɔɔ. 5 'Bomɔ "Ju due' -nɩ -ɔ nʋ 'o 'wɛ blʋɔ -sɩn 'a kwla taan 'jɔ -mɛ" na. 6 Ka 'wɛ- -kwle ɔ -pʋn" -wɛe ɔ 'pɛan i Sesi 'jea kan' 'sʋ ɔ -tee' ɔ i, ɔ 'na : -Ɩn -nɩɛi" 'mɛ -ɩn -je 'pʋʋ ? 7 'Sʋ 'wɛ- nʋi -nɔ 'na : Tʋ"bo nyɔ -bo "ni -suua' i -wɛe ɔ 'je 'ʋn 'bo "niɔ- po ɛ, 'ɩn se ɔ 'ble. Nɔ" -tɩ 'ɩn 'jea 'ʋnsɔn -mɛ nyɔ jrɔ' "siɛ i 'bo 'ʋn "juɔi sese. 8 'Sʋ Sesi 'na : -Ɩn sɔn 'ʋn, -ɩn -duo" -ma srɛ' 'ʋn, -ɩn -je na-. 9 'Bo ɛ "sri "ju -nɔ je 'pʋ. Ɔ "dua ɔɔ' srɛ' 'ʋn 'sʋ ɔ -teɛ naa' -pʋn". Dɛ -nʋʋa 'mʋa- ɛ nɩ 'bo -kwlewɩ "kpei -o, 10 ɛmɛ -tɩ Suifʋ-wi" wlu 'de "ju -nɔ -pee ʋʋ 'na : -Kwlewɩ -nɩ -sɩan, -ɩn se ɛ 'bɛɛ- -ɩn -je -ma srɛ' 'ble. 11 'Sʋ ɔ 'na : "Ju -pʋʋa' 'ʋn mɔ -na -ɩn -duo" -ma srɛ' 'ʋn, -ɩn -je na-. 12 'De ʋʋ 'na : "Ju -na -ɩn -duo" -ma srɛ' 'ʋn -ɩn -je na -mɔ 'ɔ 'nynɩ wɛ- ? 13 'Kaa "ju -a 'wɛ- 'bɔa se nyɔ ɛ nɩa juo-, dɛ-nʋɛ' Sesi "maa' 'de nyʋ "klu. 14 Ɛ 'wlʋa 'o mu ɛ, Sesi jɛɛ "ju -ɔ -pʋa -nɔ 'mɛ 'de Kea -gbu klaa" 'di, -wɛe ɔ wlu ɔ -pee ɔ 'na : -Ɩn -pʋʋ' -wɛ- la, 'kaa -ɩn -bɔ dɛsaʋn nʋ-tɩ 'bode, -wɛe -jɛ -ɛɛ mua -ʋn "jrii nʋʋa' de'bɔɔ- nɔ" je -je "kpei -tie" cɛn. 15 'Sʋ "ju -nɔ mu', -wɛe ka Sesi 'pʋʋ- ɔ, ɔ 'tmʋ ɛ 'de Suifʋ-wi" -pee. 16 Ɛmɛ -tɩ Suifʋ-wi" a -pɔn Sesi 'a -kɔ i, dɛ-nʋɛ', ɔ 'pʋʋɛ nyɔ 'bo -kwlewɩ "kpei. 17 'Kaa Sesi wlu' 'de ʋʋ -pee ɔ 'na : 'Ɩn "Bo a nʋɛ dbo 'wɩ "o 'wɩ -wee' 'di 'de 'ma nʋɛ dbo -ke. 18 'De wlu -nɩa 'mʋa- "kpei ɛ, Suifʋ-wi" 'a "jru kpɔ' i -teʋn 'a -pɔn Sesi 'a 'dbaa' -kɔ i ke'wlɛ, dɛ-nʋɛ' ɛ se ɔɔ' 'je -kwlewɩ wɔɔn' 'sʋ nɩ-, 'kaa ɔɔ 'daa- Kea ɔ "Bo 'a -cɛ" 'kpa -wɛe ɔɔ poo ɔɔ' -cɛ" Kea "i ? 19 'Bomɔ Sesi "duo wlu 'ʋn ke'wlɛ ɔ 'na : 'Ma 'tmʋʋɛ aopʋ tɔ' -tɩ 'a tɔ' -tɩ, "Ju se ɛ 'bɛɛ- ɔ 'je 'e ɔɔ' -cɛ" 'kpa 'ʋn 'wlʋ -wɛe ɔ 'e dɛ jrɛ' nʋ, dɩ ɔ "Bo nʋa ɔ 'jea ɩmɩ ɔɔ nʋ. 'De dɩ "klein "Bo a nʋa, ɩmɩ "Ju a nʋ -ke, 20 dɛ-nʋɛ' "Bo kma "Ju 'a -tɩ' -wɛe ɛɛ tɔɔ ɔ dɩ "klein ɛɛ' -cɛ" 'kpa a nʋa. Ɛɛ mu ɔ dɩ klae" klae" tɔɔa' ke'wlɛ ɔ 'jɩ nʋ, -wɛe ɩ 'je ao tai' "maa. 21 Ka "Bo a -sa' 'mɛʋn -klu' -wɛe ɛɛ "nyɩa ʋʋpʋ 'kmʋnɩa' a, 'kamɔ "Ju a "nyɩ nyʋ ɔ nɩai" 'kmʋnɩa' -ke. 22 "Bo 'a 'je nyɔ "o nyɔ 'ɔ 'pee, dɛ-nʋɛ' ɛ -teɛ' "Ju 'pee -wee' "klein kwa, 23 -wɛe nyʋ -wee' "klein 'je "ju 'a ni' -te', ka ʋʋa -tea' 'Bo 'a ni' ɛ. Nyɔ -sea' "Ju 'a ni' -te' ɛ, -mɛ ɔ se "Bo -dboɔ' 'ɔ ni' -te' -ke. 24 'Ma 'tmʋʋɛ aopʋ tɔ' -tɩ 'a tɔ' -tɩ, nyɔ -poa' 'ma wlu doin" o, -wɛe -ɔ -jea "ju -dboa' 'ʋn 'a -tɩ' tɔ' 'ʋn ɛ, -mɛ ɔ 'jeɛ 'kmʋnɩa' -sea' -kwɛ -ta 'ble ɛ, -mɛ 'pee se ɔ kpʋn i, 'kaa ɔ cɛɛn 'e 'mɛa' 'ʋn, -wɛe ɔ -taan' 'e 'kmʋnɩa' 'ʋn. 25 'Ma 'tmʋʋ aopʋ tɔ' -tɩ 'a tɔ' -tɩ, nɔ" jrɛ' -ɛɛ mu nynia', 'de ɛ nyni' -wɛ- mɔ, -wɛe 'mɛʋn 'je Kea 'a "ju 'a wlu 'wɔn, -wɛe nyʋ -ʋʋa mu ɛ 'wɔan' ʋʋ 'je 'kmʋ nɩ-, 26 Ka 'kmʋnɩa' nɩa 'e "Bo 'ʋn ɛ, 'kamɔ ɛ nɩ 'e "ju 'ʋn -ke. 27 Ɛ -teɛ' "Ju nyʋ 'a 'pee kwa, dɛ-nʋɛ' ɔ nɩɛ nyiɔ 'ɔ "Ju -o. 28 -Mɛ 'ɛ Tai' 'bo aopʋ "maa, nɔ" jrɛ' -ɛɛ mu nynia' -wɛe 'mɛʋn -nɩa 'e -gbaɩn' 'di 'je ɔɔ' wlu 'wɔn 'de ʋʋ 'je 'e -gbaɩn' 'di 'wlʋ. 29 Nyʋ -nʋa dɛ 'dɔe ɛ, -wi" -mʋ a muɛ 'ʋnsɔan' -wɛe ʋʋ 'je 'kmʋnɩa' 'je, 'kaa nyʋ -nʋa dɛsaʋn ɛ, -wi" -mʋ a muɛ 'ʋnsɔan' -wɛe ʋʋ 'je 'e 'pee 'ʋn mu. 30 Sesi 'na : 'Ma -cɛ" 'kpa se ɛ 'bɛɛ- 'ɩn 'je dɛ jrɛ' nʋ, ka Kea 'tmʋ ɛ 'de 'ʋn -pee ɛ, 'kamɔ 'ma 'je nyʋ 'a 'pee. 'De 'ma nyʋ 'a 'pee 'jesʋn -srɛi", dɛ-nʋɛ' 'maa -pɔn 'ma -cɛ" 'ɛ -kwlʋtɩ nʋa' i, 'kaa "ju -dboa' 'ʋn mɔ -ɔɔ -kwlʋtɩ 'ma -pɔn i. 31 -Bo 'ma 'sʋ a sea 'ma -cɛ" 'ɛ "kpei -tɩ 'tmʋ ɛ, -mɛ dɩ 'ma 'tmʋa, se tɔ' -tɩ nɩ-. 32 'Kaa nyɔ jrɔ' mɔ -ɔɔ -tmʋ 'ma "kpei -tɩ 'de 'ɩn 'je kan' 'mɛ, dɛ ɔ 'tmʋa ɛ nɩɛ tɔ' -o. 33 Ao dboɛ nyʋ 'e San o, -wɛe ɔ 'tmʋʋ- ʋʋpʋ tɔ' -tɩ 'a -tɩ'. 34 'Mɔ ɛ, ɛ se nyiɔ mɔ -je 'ma "kpei -tɩ 'tmʋ nɩ, 'kaa 'ma 'da kan' mɛ -wɛe ao 'je 'pʋ. 35 Ka -tau a wan -wɛe ɛɛ 'jea i ɛ, 'kamɔ San nɩ-, 'de aoa' -cɛ" 'kpa mɔ 'wɔɔn- 'mʋa- nʋ-tɩ 'mɛ 'de ɔɔ' -sɔn' 'ʋn, 'de nɔ" jrɛ' 'di. 36 'De 'mɔ ɛ, 'ma -nɩ "kpei -tɩ -ɩa -tmʋʋa', 'bɛi" ɩ je San 'a -nɩ -sii, dɛ-nʋɛ' dɩ "Bo "nyɩa 'ʋn 'ɩn 'jea nʋ -wɛe 'ma nʋa, ɩ toɛ' ka "Bo dboa 'ʋn ɛ. 37 'De "Bo -dboa' 'ʋn ɛ, ɛmɛ -tmʋ 'ma "kpei -tɩ -ke. Aomɔ se ɛɛ' wlu 'wɔn due', ao se ɛɛ' "jua- 'je due'. 38 Aoa' -te' ɛɛ' wlu i 'de aopʋ 'ʋn, dɛ-nʋɛ' "ju -jɔ ɛ dboa, ao se ɔɔ' -tɩ' tɔ' 'ʋn 'je. 39 Aoa "jrɛɛ- dɩ -ɩ -crɩɩa' 'de Kea 'a 'sbɛ 'di 'mɛ, dɛ-nʋɛ' ao 'na 'demɔ ao 'je 'kmʋnɩa' -sea' "ti -ta 'ble 'jee-. 'De dɩ -crɩɩa' 'mʋa- mɩ -tmʋ 'ma -tɩ'. 40 'De -mɛ 'kamɔ ao 'na ao se 'nɔ 'ʋn o jii, ao se 'kmʋnɩa' -cɛɛn' 'jei. 41 'Ɩn se nyiɔpʋ 'a 'ma -tɩ' o poa' i -pɔn. 42 'Kaa 'ɩn juoɛ' 'pepe, Kea 'a -tɩ' kmaa' se 'de aopʋ 'ʋn nɩ-. 43 'Ɩn ji' 'de 'ʋn "Bo 'a 'nynɩ 'ʋn -wɛe ao 'na ao se 'ʋn sɩn 'sɔɔn kpʋʋɛn i, 'kaa -bo nyɔ jrɔ' -te ɔɔ' -cɛ" 'ɛ 'nynɩ "jru ɔ ji 'sʋ ɛ, aoa kpʋʋn ɔ -mɔ sɩn 'sɔɔn. 44 Ka ao 'je dɛ tɔ' 'ʋn 'je sʋn nʋ mɔ 'de ɛ- ? Aopʋ -ɔɔ -pɔan dɛwɔn nɩa' i 'de ba 'nynɩ i -wɛe -ɔɔ' -pɔan -jɛ -wlʋa 'e Kea 'a 'sʋ o i ɛ. 45 'Kaa ao 'bo tɔ' inaa ka 'mɔ -je aopʋ -tɩ' "bli kpa 'bo 'ɩn "Bo "juɔi, ɛ Moisɩ ao tba tɔ' "i ɛ, ɔmɔ -je aopʋ -tɩ' "bli kpa. 46 -Bo ao 'je Moisɩ 'a -tɩ' tɔ' 'ʋn 'de ɛ, -mɛ ao 'bɛɛ- ao 'je 'ma -tɩ' tɔ' 'ʋn 'je -ke, dɛ-nʋɛ' ɔ 'crɩ 'ma -pʋn" -tɩ 'mɛ. 47 'Kaa dɛ ɔ 'crɩa ao sea -mɛ tɔ' 'ʋn 'je 'ee, ka ao 'je 'ma wlu tɔ' 'ʋn 'jesʋn nʋ ɛ- ?

6

1 'Bo -mɛ 'de ɛ, Sesi muɛ 'e "ni 'a 'fɔ jrɛ' o, ɛɛ' "ni tu nɩɛ 'e Tiberiadɩ 'de Galileblʋa "kpei. 2 'Sʋ nyʋ -tuu"-tuu bla 'o ɔ 'de, dɛ-nʋɛ' jrii' ɔɔ nʋa -wɛe ɔɔ 'bɔɔa nyʋ 'a 'wɛ- mɩ ʋʋa 'jei. 3 Sesi ke ɔɔ' klai" nynuu 'ja 'o crʋ due' "kpei, -wɛe ʋʋ -te i. 4 -Mɛ Pakɩ -nɩa Suifʋ-wi" 'a kʋɔnkwla' 'wlʋ -kɔ' klaa" "kʋʋan- i kɛkɛ-. 5 Sesi kpa "jriɛ "jɛi ɔ 'jea nyʋ -tuu"-tuu -ʋʋa jia 'de ɔ o 'sʋ ɔ wlu' 'de Filipʋ -pee ɔ 'na : Filipʋ, -ta -a -je diidɛ -tɩɩn -wɛe nyʋ -tia ka 'je di ɛ- ? 6 Ɔɔ 'da kan' 'mɛ -wɛe ɔ 'je Filipʋ i-tɩn', dɛ-nʋɛ' dɛ ɔ 'jea nʋ ɛ, ɔɔ' -cɛ" 'kpa juɛ'. 7 'De Filipʋ 'na : -Bo ɛ nɩ 'wɛi 'a -kwlʋ due' 'a -di'pɛn -tɩɩn -ɛ 'mɔ 'de ɛ, ɛ se ʋʋpʋ "wɔin 'bɛɛi -wɛe nyɔ due' 'a tie due' di -tɩ. 8 'Sʋ ɔɔ' klai" nynuu 'a due' Ancre -ɔ -nɩa Simɔ Piɛi 'a de'di wlu ɔ -pee, ɔ 'na : 9 "Ju-saan" due' -nɩ 'e -a "klu -ta, -ɔ -ble -di'pɛn kplɩ -mm" ke -smii' jɔ 'sɔɔn ke, 'kaa dɛ -mɛ nɩ 'ʋn 'de nyʋ -tia ka -wi" -mʋ 'a -tɩ' 'ʋn ɛ- ? 10 'Sʋ Sesi 'na : Ao 'tmʋʋ ʋʋpʋ ʋʋ 'je i -te. 'De 'bo 'a -ta -tu ɛ, sii" -tuu" -nɩ 'o. Ʋʋ -wee' beea o ɛ, ʋʋ 'bɛɛ- "nynunmai 'a "wlu -mm" 'mɛ. 11 'Bomɔ Sesi "duo -di'pɛn -nɩa 'mʋa- 'ʋn -wɛe ɔ po ɩa' Kea 'sɛ- 'de ɔ -gblɩ' nyʋ -tea i -wee' "klein "jrii, ɩ ke -smii' ke. Ʋʋ -wee' di' ʋʋa' -kwlʋ ka- 'sʋ ʋʋ je dbo. 12 -Ta ʋʋ -wee' dboa la, 'bomɔ Sesi wluu ɔɔ' klai" nynuu -pee ɔ 'na : Ao 'tɛn ɩa' tii -sia 'o ɛ, -wɛe ɩa' due' koʋn -gbai' je "ma. 13 Ʋʋ -kɔa' -di'pɛn kplɩ -mm" -nɩ 'a dia' a, ɩa' tii -ɩ -sia 'omu -wɛe klai" nynuu 'tɩan a, ɩ "jiɛ toe" 'a -puue 'jɔ 'sɔɔn. 14 Nyʋ "klein -jeea' jrii' Sesi nʋa 'mʋa- "jriɛ- ɛ, ʋʋ 'na : "Ju -nɔ nɩɛ Kea 'a wlu 'kwajaai -jea 'nɔ 'kmʋ "kpei ji -o -cɛɛn'-. 15 Ka ʋʋa jia Sesi klan" -klan klan" kpʋan' -wɛe ʋʋ 'je ɔ 'beɔ 'ʋn nʋ ɔ 'jea kan' 'sʋ ɔ 'wlʋ 'o ʋʋpʋ "klu 'mɛ wɔɔ-, -wɛe ɔɔ' 'sʋ mu 'e crʋ "kpei de. 16 -Ta kwie a kpʋan 'sʋ ɛ, ɔɔ' klai" nynuu "siɛ i -wɛe ʋʋ mu 'o "ni -kwlɩ". 17 Ʋʋ 'ja 'e -kwɛɛ" 'di 'sʋ ʋʋ -teɛ "ni cɛan' -pʋn" -wɛe ʋʋa mu 'e Kapɛnaʋm fɔ o. Kwie a kpʋn' -mɛ Sesi se ʋʋpʋ jɛɛ ke. 18 'Sʋ poɔ' klaa" -teɛ jia' -pʋn", "ni a 'fea srɩ' -gboe. 19 Dɛ ʋʋa' -kwɛɛ" na 'ʋn 'bo "ni "kpei ɛ 'bɛɛ- -je 'a -to -mm" ke -mɛɛo"- 'mɛ. 'Sʋ ʋʋa 'jeɛ Sesi i ɔɔ na' 'o "ni "kpei ɔɔ jiɛ 'de -kwɛɛ" o fɔ o, 'sʋ faʋn a nʋ ʋʋpʋ 'mɛ. 20 'Kaa Sesi 'na : 'Mɔ -o, faʋn 'bo aopʋ- nʋɛ ! 21 Ʋʋ nɩɛ "i ɔ 'je 'e -kwɛɛ" 'di 'ja, 'sʋ -kwɛɛ" kpʋɛn 'kpʋʋ -ta ʋʋa mua fɔ o. 22 Ka -kwɛɛ" due' -gbai' 'a 'sʋ nɩa 'o mu -wɛe Sesi ke ɔɔ' klai" nynuu sea 'e ɛ 'di 'ja -tadue, 'de ʋʋa' 'sʋ mua nyʋ -tuu"-tuu -sia 'e "ni 'de ɔ 'je kan' 'mɛ. 23 Ɛɛ' -sɔn' dee -sɩan' a, 'sʋ -kwɛɛ" jrɩ' 'wlʋɛ 'e Tiberiadɩ -wɛe -ɩ ji -ta Sesi pooa -di'pɛn kplɩ 'a Kea 'sɛ- 'de ʋʋ di ɛ. 24 Ka Sesi ke ɔɔ' klai" nynuu sea 'mʋa- nɩ ʋʋ 'jea kan' 'sʋ ɛ, ʋʋ -wee' 'ja 'e -kwɛɛ" -nɩ 'di -wɛe ʋʋ mu ɔ i -pɔan' 'de Kapɛnaʋm. 25 Ʋʋ jɛɛɔ' 'de "ni klaa" 'de 'sʋ ʋʋ 'na : Nyʋ dɛtɔɔi, blaa nɔ" -ɩn ji 'nɔ ɛ- ? 26 'Sʋ Sesi wlu' 'de ʋʋ -pee ɔ 'na : 'Ma 'tmʋʋ aopʋ- tɔ' -tɩ 'a tɔ' -tɩ, dɛɛ -tɩ aoa -pɔan' 'mi i ɛ, ɛmɛ -nɩ ao diɛ -di'pɛn ao je dbo, ao se 'mi i -pɔn' 'de jrii' 'ɩn nʋa ao 'jeea "jriɛ 'ɛ -tɩ' 'ʋn. 27 Diidɛ -jɛ -ɛɛ' -kwlea dooa -tɩ ɛ, ao 'bo -mɛ i -pɔɛn, 'kaa diidɛ -jɛɛ -kwlea 'ʋn 'de -ɛɛ -nyɩa" nyʋ 'kmʋnɩa' -sea' -kwɛ -ta 'ble ɛ, ɛmɛ ao 'je i -pɔn. nyiɔ 'ɔ "Ju mɔ -je aopʋ- ɛɛ' diidɛ tu "nyɩ, dɛ-nʋɛ' ɔmɔ "Bo Kea -tu" "i juo 'ɩn 28 'Sʋ ʋʋ -tee' ɔ i ʋʋ 'na : Ka -a -je nʋ -wɛe dɩ "klein Kea nɩa "i -a -je ɩa' 'sʋ nʋ ɛ- ? 29 -Wɛe Sesi 'na : Dbo Kea nɩa "i ao 'jea nʋ ɛ, ɛmɛ -nɩ ao 'je "ju ɛ dboa 'a -tɩ' tɔ' 'ʋn 'je. 30 'Sʋ ʋʋ 'na : Jrii' -jɛ wɛ- -ɩn -je nʋ -bo -a -je 'de -a -je -ma -tɩ' tɔ' 'ʋn 'je ɛ- ? 'De dbo -jɛ wɛ- -ma nʋ -gblein' ɛ- ? 31 -A "bo -wi" diɛ 'maanɩ- 'de -pɩɩɔn" blʋa "kpei ka ɛ 'crɩɩa 'de Kea 'a 'sbɛ 'di ɛ : Ɛ "nyɩɛ ʋʋpʋ jaʋn 'di diidɛ ʋʋ je di Ɛ "nyɩɛ ʋʋpʋ diidɛ -wlʋa 'e jaʋn 'di ʋʋ je di. 32 'Sʋ Sesi 'na : Tɔ' -tɩ 'a tɔ' -tɩ 'ma 'tmʋ 'de ao -pee, ɛ se Moisɩ mɔ -nyɩ" ao diidɛ -wlʋa 'e jaʋn 'di nɩ, 'kaa 'ɩn "Bo mɛ -ɛɛ -nyɩ" aopʋ- diidɛ -cɛɛn' -wlʋa 'e jaʋn 'di ɛ. 33 Dɛ-nʋɛ' ɛ, diidɛ -jɛ Kea "nyɩa nyʋ ɛ, ɛmɛ -nɩ "ju -jɔ -wlʋa 'e jaʋn 'di -wɛe -ɔɔ -nyɩa" nyʋ 'kmʋnɩa' a. 34 'Sʋ ʋʋ 'na : Tʋ"bo, -ɩn -nyɩ" -aʋn ɛɛ' diidɛ tu jeejee. 35 'Sʋ Sesi 'na : 'Mɔ -nɩ diidɛ -ɛɛ -nyɩa" nyʋ 'kmʋnɩa' a. Nyɔ -jia' 'nɔ 'mɔ o ɛ, 'mɩɩɛ- se -mɔ nʋ i 'bode, 'de nyɔ -jea 'ma -tɩ' tɔ' 'ʋn ɛ, "ni 'natʋn se ɔ nʋ i 'bode. 36 'Ɩn 'tmʋʋɛ 'de aopʋ- -pee sese, 'kaa ao 'na ao se 'ma -tɩ' tɔ' 'ʋn 'jei 'de -mɛ 'kamɔ ao 'jee 'ʋn "jriɛ- 'pepe. 37 Nyʋ "klein "Bo "nyɩa 'ʋn ɛ, ʋʋa muɛ 'nɔ 'ʋn o jia' se, 'de nyɔ -jia' 'nɔ 'mɔ 'o ɛ, 'ɩn se ɔ "kpae' poi, 38 dɛ-nʋɛ' 'ɩn 'wlʋɛ 'e jaʋn 'di, 'ɩn je ji -wɛe 'ɩn 'je "ju -dboa' 'ʋn 'a -kwlʋtɩ nʋ. 'Ɩn se 'ma -cɛ" 'ɛ -kwlʋtɩ nʋa' ji. 39 'De "ju -dboa' 'ʋn 'a -kwlʋ -tɩ mɛ -nɩ nyʋ "klein ɔ "nyɩa 'ʋn ɛ, 'ɩn 'bo ʋʋa' due' koʋn -gbai' "maa, 'kaa 'ɩn 'je ʋʋ -wee' "klein "kunyɩɔ' -sa 'de de 'bɔɔ- nɔ" 'di, 40 'Ɩn "Bo 'a -kwlʋtɩ ɛmɛ -nɩ nyɔ "o nyɔ -ɔ -jeea' "Ju "jriɛ- -wɛe -ɔ -jea ɔɔ' -tɩ' tɔ' 'ʋn ɛ, -mɛ -mɔ 'jeɛ 'kmʋnɩa' -sea' -kwɛ -ta 'ble. 'De 'ɩn 'je ɔ "kunyɩɔ' -sa de 'bɔɔ- nɔ" 'di. 41 'Sʋ Suifʋ-wi" a wluuɛ Sesi 'dei, dɛ-nʋɛ' ɔ 'na : 'Mɔ -nɩ diidɛ -wlʋa 'e jaʋn 'di ɛ. 42 'De ʋʋa wlu ka ʋʋ 'na : Soseʋ 'a "ju Sesi ko -taa ? -A -juo ɔ "bo ke ɔ de 'mɛ o, -mɛ kɛ nʋ -wɛe ɔ 'na ɔ 'wlʋɛ 'e jaʋn 'di ɔ je i "si ɛ- ? 43 'Sʋ Sesi 'na : Ao 'bo 'mii wluɛ. 44 Nyɔ se ɛ 'bɛɛ- ɔ 'je 'de 'ʋn o ji -bo "Bo -dboa' 'ʋn se ɔɔ' "jua- 'de 'ʋn o "biie- ɛ. 'De nyɔ -jia' 'de 'mɔ o ɛ, 'ma muɛ ɔ "kunyɩɔ' -saa' 'blʋa 'a -kwɛ- nɔ". 45 'De ɛɛ' -tɩ' 'ʋn ɛ, dɛ Kea 'a wlu 'kwajaaʋn 'crɩa 'de ʋʋa' 'sbɛ 'di, ɛ ka : 'De Kea 'ʋn mɔ nyʋ -wee' "klein 'je tɔ' -tɩ juo-. -Bo ɛ nɩ kan' a, -mɛ nyɔ "o nyɔ -ɔ -wɔan 'Bo 'a wlu -wɛe -ɔ -kpʋʋn ɛ sɩn 'sɔɔn ɛ, ɔɔ' nyɔ tu a muɛ 'de 'ʋn o jia' se. 46 Ɛ se -mɛ nyɔ jrɔ' mɔ -jee' "Bo "jriɛ- nɩ-, -bo ɛ se 'mɔ -ɔ -wlʋa 'e Kea o 'ma 'sʋ -jee' 'ɩn "Bo "jriɛ- nɩ ɛ. 47 Tɔ' -tɩ 'a tɔ' -tɩ 'ma 'tmʋ 'de ao -pee nyɔ -jea 'ma -tɩ' tɔ' 'ʋn -mɛ ɔ 'jeɛ 'kmʋnɩa' -sea' -kwɛ -ta 'ble ɛ. 48 'Mɔ -nɩ 'kmʋnɩ diidɛ. 49 Ao "bo -wi" diɛ 'maanɩ- 'de -pɩɩɔn" blʋa "kpei, 'kaa ʋʋ 'mɛɛ. 50 Diidɛ -wlʋa 'e jaʋn 'di, ɛ ka, nyɔ -diɛ -mɛ -mɔ se 'mɛi 'bode. 51 'Mɔ -nɩ 'kmʋnɩ diidɛ -wlʋa 'e jaʋn 'di ɛ. -Bo nyɔ di ɛɛ' diidɛ tu ɛ, ɔɔ muɛ 'kmʋnɩa' jeejee. 'De diidɛ 'ma mua toa' a, ɛmɛ -nɩ 'ma ku. 'Ma to 'e 'ma ku 'mɛ 'de nyʋ -wee' "klein 'a 'pʋ-tɩ 'ʋn. 52 'Bo wlu -nɩa 'mʋa- "kpei ɛ 'sʋ Suifʋ-wi" -teɛ 'ʋn -saa' -pʋn" ʋʋ 'na : Ka "ju -nɔ mɔ 'je 'e ɔɔ' ku 'e tosʋn nʋ -wɛe -a -je ɛ di ɛ- ? 53 'Sʋ Sesi pooɛ -tɩ' "i ɔ 'na : tɔ' -tɩ 'a tɔ' -tɩ 'ma 'tmʋʋ aopʋ, -bo ao se nyiɔ 'ɔ "ju 'a ku di -wɛe ao se ɔɔ' nmɔ 'na a, -mɛ 'kmʋnɩa' -sea' -kwɛ -ta 'ble se aopʋ- 'a dɛ nɩ-. 54 Nyɔ -dia' 'ma ku 'de nyɔ -na 'ma nmɔ -mɛ ɔ 'jeɛ 'kmʋnɩa' -sea' -kwɛ -ta 'ble ɛ, 'de 'ɩn 'je ɔ "kunyɩɔ' -sa de'bɔɔ- nɔ". 55 Dɛ-nʋɛ' 'ma ku nɩɛ diidɛ -cɛɛn' -o, 'de 'ma nmɔ nɩɛ 'naadɛ -cɛɛn' -o. 56 Nyɔ -dia' 'ma ku 'de -ɔ -na 'ma nymɔ -mɛ -mɔ "tiɛ 'de 'mɔ 'ʋn -wɛe 'mɔ "ti 'de ɔ 'ʋn. 57 Ka "Bo -nɩa 'kmʋ dboa 'ʋn -wɛe 'ɩn nɩa 'kmʋ 'de ɔ 'ʋn ɛ, 'kamɔ nyɔ -dia' 'ma ku a mu 'kmʋnɩa' 'de 'ʋn -ke. 58 'Ma ku mɛ -nɩ 'kmʋ nɩ diidɛ -wlʋa 'e jaʋn 'di, ɛ ke maanɩ ao "bo -wi" dia -wɛe ʋʋ 'mɛa se -kooɔ'-, 'kaa nyɔ -ɔ dia' 'ma ku, ɔɔ muɛ 'kmʋnɩa' jeejee. 59 Sesi 'tmʋ wlu "klein -nɩa 'mʋa- 'mɛ 'de Kea -gbu -nɩa 'o Kapɛnaʋm 'di. 60 Sesi 'a klai" nynuu 'wɔan wlu -nɛ 'sʋ, ʋʋa' -tuu" 'na : -Ɔ -bɛɛ' wlu -kmai" kan' -mɩ 'a doin" o poa' a- ? 61 Sesi 'jea kan' 'de ɔɔ' -cɛ" 'ʋn ka ɔɔ' klai" nynuu a "wuan 'bo ʋʋa' 'sʋ 'nynɩ 'sʋ ɔ 'na : Wlu 'ɩn 'tmʋa ɛmɛ -kpʋn ao -kwlʋʋ ? 62 'De -mɛ -bo aoa sea nyiɔ 'ɔ "Ju i 'je ɔɔ sea -ta ɔ nɩa tɛin" de mu 'e -mɛ ka ɔ 'je nʋ ɛ- ? 63 Kea 'a -Suu mɛ -ɛɛ -nyɩ" nyʋ 'kmʋnɩa', 'blʋku -mɛ se dɛ jrɛ' 'bɛɛ-. Wlu "klein 'ɩn 'tmʋa 'de ao -pee ɛ, ɩmɩ -ɩa ja Kea 'a -Suu, -ɛɛ -nyɩa" nyʋ 'kmʋnɩa'. 64 'Kaa nyʋ jrʋ' -nɩ 'de aopʋ- "klu -ta -ʋʋa' 'je dɛ tɔ' 'ʋn. Dɛɛ -tɩ ɔ 'da kan' a, ɛmɛ -nɩ ɛ -teea -wee' 'sʋ Sesi juo nyʋ -ʋʋ sea dɛ tɔ' 'ʋn 'jei ke "ju -jea ɔ 'e to 'mɛ. 65 Ɛmɛ -tɩ ɔ -tuɛ" "kpei ɔ 'na : 'Ɩn wlu 'de ao -pee 'de 'ɩn 'na nyɔ seɛ 'bɛɛ- ɔ 'je 'nɔ 'ʋn o ji -bo ɛ se 'de "Bo 'ʋn 'wlʋ ɛ. 66 Dɛ -tba' 'o ɛɛ' nɔ" tu 'di ɛ, ɔɔ' klai" nynuu 'a -tuu" 'wlʋ 'o ɔ 'de 'mɛ -wɛe ʋʋ ke ɔ 'bɔ na -tɩ. 67 'Sʋ Sesi wlu' 'de nyʋ 'a -puue 'jɔ 'sɔɔn ɔ -sa 'o -pee, ɔ 'na : Aopʋ- mɔ 'ee, ao se ɛ "i nɩ ao 'je mu -kee ? 68 'Bomɔ Simɔ Piɛi wlu ɔ -pee ɔ 'na : Tʋ"bo, nyɔ wɛ- -a -je 'e o mu ɛ- ? -Mɔ mɔ -ble wlu -ɩa -nyɩa" nyʋ 'kmʋnɩa' -sea' -kwɛ -ta 'ble 'dee. 69 Ɩmɩ -a -mɔ -je tɔ' 'ʋn, 'de ka -ɩn -nɩa "Ju Kea -teea kpɔ "i ɛ, -a -je kan' 'mɛ. 70 'Sʋ Sesi wlu' 'de ʋʋ -wee' -pee, ɔ 'na : Aopʋ- -nɩa -puue 'jɔ 'sɔɔn ɛ, 'mɔ -se' aopʋ 'e nyʋ "klu -saa ? 'De -mɛ 'kamɔ aoa' due' nɩ -suusaʋn 'a nyɔ. 71 -Mɛ Simɔ 'ɔ "ju Suida Isikario mɔ ɔɔ 'da, dɛ-nʋɛ' ɔmɔ -ɔɔ mu Sesi 'e toa', 'de -mɛ 'kamɔ ɔ nɩ klai" nynuu -nɩa -puue 'jɔ 'sɔɔn 'ɔ due'.

7

1 'Bo -mɛ 'de ɛ, Sesi a pleɛ Galileblʋa "kpei-, ɔ se ɛ "inɩ ɔ 'je Suide -te, dɛ-nʋɛ' Suifʋ-wi" 'a "jru kpɔ' i -teʋn a -pɔn ɔɔ' 'dba -kɔ i. 2 -Kɔ' Suifʋ-wi" a -tu" 'a -wɛe ʋʋa poa sɩaɩn'- "jɛi "kʋʋan- i. 3 'Sʋ Sesi 'a "dei-wi" wlu' 'de ɔ -pee, ʋʋ 'na : -Ɩn -wlʋ -ta, -ɩn mu 'e Suide, -wɛe nyʋ -nɩa 'nɩa 'je -ma nʋʋdɩ "jriɛ- 'jee- -ke. 4 Nyɔ "o nyɔ -nɩai" nyʋ 'jea juo ɛ, -mɔɔ' nʋʋdɩ 'a pa 'kwla. Ka -ma nʋa dɩ -jɩ -mɩ kaan 'ja a, -mɛ -ɩn -to -ma -cɛ" -wɛe nyʋ -wee' "klein 'je -ʋn 'je. 5 Sesi 'a "dei-wi" foo" 'sʋ se ɔɔ' -tɩ' tɔ' 'ʋn 'je -ke. 6 Sesi wlu' 'de ʋʋpʋ -pee, ɔ 'na : 'Ma -nɛ nɔ" se 'o nyni ke, 'kaa aomɔ ɛ, nɔ" -wee' "klein nmɔi" 'de aoa' -tɩ' 'ʋn. 7 'Blʋa 'dinyʋ se aopʋ 'ʋn 'nyɛ, 'kaa ʋʋ 'nyɛ 'mɔ 'ʋn 'ɛ, dɛ-nʋɛ' ka ʋʋa' nʋʋdɩ nynia "jrii ɛ, ɩmɩ 'ma 'tmʋ. 8 Aopʋ mɔ mu -kɔ' -sɔn, 'mɔ se ɛɛ' -kɔ' tu 'ʋn mui, dɛ-nʋɛ' 'ma -nɛ nɔ" se 'o nyni ke. 9 Ɔ 'tmʋa wlu -nɩ 'de ʋʋ -pee 'sʋ ɔ siɛ 'e Galile. 10 -Ta Sesi 'a "dei-wi" mua -kɔ' -sɔn ɛ, Sesi mu' -ke, 'kaa nyɔ jrɔ' se ɛ juuo, ɔ mu' wɔɔ-. 11 -Kɔ'ɔ 'wɩ o 'sʋ Suifʋ-wi" a -pɔn ɔ i, ʋʋa -teeɛ' nyʋ i, ʋʋ 'na : -Ta ɔ nɩ ɛ- ? 12 'De nyʋ "klu ɛ, -tuu"-tuu a jaa wlu ja -wɛe ʋʋa 'tmʋ ɔɔ' -tɩ'. Jrʋ' 'na : Ɔ nɩɛ nyɔ 'dɔe -o. Jrʋ' 'na : Ɔ se nyɔ 'dɔe nɩ-, ɔɔ -saa nyʋ 'a "jru -jei". 13 'Kaa nyɔ jrɔ' 'ɔ wa' wɔn' i, ɔɔ' 'tmʋ ɔɔ' -pʋn" -tɩ, dɛ-nʋɛ' ʋʋa plee ʋʋa' "jru kpɔ' i -teʋn 'mɛ. 14 -Ta ɛ nynia 'o -kɔ'ɔ -kwea' 'sʋ, Sesi muɛ 'e Kea -gbu klaa" 'di -wɛe ɔ -te nyʋ Kea 'a wlu tɔɔa' -pʋn". 15 'Sʋ tai' "maa Suifʋ-wi" 'mɛ, ʋʋ 'na : "Ju -nɔ -mɔ sea 'sbɛ jrɛ' 'cɩan 'ee, kɛ nʋ 'sʋ ɔ juo dɩ -tia ka -mɩ ɛ- ? 16 'Bomɔ Sesi wluu- ʋʋ -pee, ɔ 'na : Dɛ 'ma tɔɔa nyʋ -ta, ɛ se 'de 'ma -cɛ" 'ʋn 'wlʋ, 'kaa "ju -ɔ dboa 'ʋn ɛ, 'de ɔ 'ʋn 'demɔ ɛ 'wlʋ. 17 Nyɔ -nɩɛ "i -ɔ -jea Kea 'a -kwlʋtɩ nʋ ɛ, -bo 'ma nyʋ dɛtɔɔsʋn 'wlʋ 'e Kea 'ʋn o, -bo ɛ 'wlʋ 'e 'ma -cɛ" 'kpa 'ʋn o, ɔmɔ -je ɛ juo-. 18 Nyɔ -ɔɔ -tmʋa ɔɔ' 'blei 'a -tɩ' -mɔɔ' -pɔn ɔɔ' -cɛ" 'ɛ 'nynɩ 'wlʋa i. 'Kaa nyɔ -ɔɔ -pɔan ɔɔ' dboi 'a 'nynɩ 'wlʋa' i ɛ, -mɔ ɔ' 'tmʋɛ tɔ' -tɩ. 'Kɔɔa' dɛ-saan" ka se 'de -mɔ 'ʋn nɩ- 19 Moisɩ se aopʋ Kea 'a kɛ "nyɩɩ ? 'Kaa aoa' due' koʋn -gbai' ka 'a 'je kɛ' -nɛ wɔn. Dɛɛ-tɩ aoa -pɔn 'ma 'dbaa' i ɛ- ? 20 'Sʋ ʋʋ -wee' 'na : -Suusaʋn -nɩ 'de -ɩn 'ʋn, nyɔ -ɔɔ -pɔn -ma 'dba -kɔ i ɛ- ? 21 'De Sesi 'na : Dɛ 'ɛ kpɛ due' 'ɩn nʋa, ɛmɛ -maa" ao -wee' "klein tai'. 22 Moisɩ mɔ -bla' 'klɛn mu-tɩ 'a kɛ' -ɔ -nyɩ" aopʋ. 'De ɛ se 'e Moisɩ mɔ 'ʋn 'wlʋ, ɛ 'wlʋɛ 'e ao "bo -wi" 'ʋn sese. -Wɛe aoa kpa nyʋ 'klɛn 'bo -kwlewɩ "kpei. 23 -Bo nyʋ 'klɛn kpa 'bo -kwlewɩ "kpei -mɛ 'ɛ -saa Moisɩ 'a kɛ' 'ee ? -Mɛ dɛɛ-tɩ -bo 'mɔ 'pʋʋ- nyɔ 'bo -kwlewɩ "kpei -wɛe aoa 'kpa 'cɛn ɛ- ? 24 Ka aoa' "jriɛ- ɛ 'jea dɛ, ao 'bɔ ɛɛ' 'pee 'je -tɩ kan', 'kaa ao -srɛi" 'de aoa' nyʋ 'a 'pee 'jesʋn 'ʋn. 25 Nyʋ -nɩa 'o Selisalɛm ʋʋa' jrʋ' 'na : "Ju ʋʋa -pɔan i ʋʋ 'jea 'dba, ɔ ko -taa ? 26 Ao -gbʋn 'e, ɔɔ wlu' 'bo nyʋ -wee' "juɔi -o, 'kaa nyɔ -je ɔ dɛ -pee 'tmʋ, ɔ se nɩ-. -Aee' ka ɔ nɩa Nyʋ'pʋʋi ɛ, -aa klae"-wi" 'je ɛ tɔ' 'ʋn -wɛ- -cɛɛn'- ? 27 'De -mɛ 'kamɔ Nyʋ 'pʋʋi -ɔɔ mua jia' a, -ta ɔɔ mua 'wlʋa' -a se 'o juoi, 'kaa -jɔ -mɔ ɛ, -ta ɔ 'wlʋa -a -juo 'o 'ɛ. 28 -Ta ɛɛ nʋa kan' -mɛ Sesi nɩɛ nyʋ Kea 'a wlu tɔɔa' 'de Kea -gbu 'di. 'Sʋ ɔ kpa wlu "jɛi ɔ 'naa : Ao 'na ao juo 'ʋn 'ɛ, -wɛe -ta 'ɩn 'wlʋa ao juo 'o -mɔ ? 'De -mɛ 'kamɔ 'ɩn se ji 'de 'ma -cɛ" 'ɛ 'nynɩ 'ʋn, 'kaa "ju -jɔ -dboa' 'ʋn ɔɔ' 'nynɩ 'ʋn mɛ 'ɩn jii-. Ɔmɔ -nɩ tɔ' -tɩ 'a -cɛ" 'kpa, 'kaa ao se -mɔ juuo-. 29 'Mɔ juuɔ', dɛ-nʋɛ' 'bo ɔ -pʋn" mɔ 'ɩn 'wlʋ, 'de ɔmɔ -dbo' 'ʋn. 30 'Sʋ ʋʋa -pɔn ʋʋ 'je ɔ inynaa, 'kaa nyɔ jrɔ' se ɔ sʋn -pʋn" -te', dɛ-nʋɛ' ɔɔ' -nɛ nɔ" se 'o nyni ke. 31 'De -mɛ 'kamɔ nyʋ -tuu"-tuu nɩ 'e nyʋ "klu ʋʋ 'je ɔɔ' -tɩ' tɔ' 'ʋn -wɛe ʋʋa wlu ka, ʋʋ 'na : -Sɔntɩ Klisɩ -mɔ ɔ mua jia' 'ee, ɔɔ muɛ jrii' -tuu"-tuu nʋa' ɔ 'je "ju -jɔ mɔ -sii -taa ? 32 Dɛ nyʋ a "wuan 'ʋn 'de Sesi 'a -tɩ' 'ʋn 'de nyʋ "klu ɛ, ɛmɛ Fariseɛn-wi" 'wɔn, 'sʋ 'sraa -saʋn 'a klae"-wi" ke Fariseɛn-wi" dboɛ nyʋ -wɛe ʋʋ 'je ɔ inynaa-. 33 'Sʋ Sesi 'na : 'Ɩn ke ao nɩ -ta 'mɛ dɛ-saan" ke, -wɛe 'ɩn 'je 'e "ju -dboa' 'ʋn o de mu. 34 Aoa muɛ 'mi i -pɔan', 'kaa ao se 'ʋn 'jei, dɛ-nʋɛ' -ta 'ma mua ao se 'bo 'a mua' 'bɛɛ-. 35 'Sʋ Suifʋ-wi" a -teeɛ' ba i due 'due ʋʋ 'na : -Ta ɔ 'e paa -wɛe -a se ɔ 'jei ɛ- ? -Aee' ɔ 'je 'e Suifʋ-wi" -gbaa' Klɛkɩ-blʋa "kpei kɩn mu -wɛe ɔ 'je Glɛkɩ-wi" dɛ tɔɔ- ? 36 Wlu ɔ 'tmʋa -nɛ, -mɛ 'de 'deɛ -gblein' ɛ- ? Dɛ -nɩ aoa muɛ 'mi i -pɔan', 'kaa ao se 'ʋn 'jei, dɛ-nʋɛ' -ta 'ma mua nɩa' ao se 'bo 'a jia' 'bɛɛi ɛ-. 37 'Bo -kɔ'ɔ de 'bɔɔwɩ -kɔan -tɩ' "kpei ɛ, Sesi nyna i 'bo nyʋ -kwea -wɛe ɔ kpa wlu "jɛi, 'de ɔ 'na : -Bo "ni 'natʋn a sea nyɔ nʋ ɛ, -mɛ ɔ ji 'nɔ 'ʋn o -wɛe ɔ 'je 'na. 38 Nyɔ -jea 'ma -tɩ' tɔ' 'ʋn ɛ, 'kmʋ nɩ ni 'a "jru mɩ -ɛɛ mu 'de ɔ 'ʋn wlʋa' -wɛe -ɛ -je -gbuu -si'. 'Kamɔ ɛ 'crɩɩɛ 'de Kea 'a 'sbɛ 'di. 39 Kea 'a -Suu nyʋ -jea Sesi 'a -tɩ' tɔ' 'ʋn a mua 'jea' a, ɛmɛ -ɛɛ -tɩ' ɔɔ 'tmʋa 'o 'mʋa-. Ɛɛ' nɔ" tu 'di -mɛ nyʋ se Kea 'a -Suu 'ble ke, dɛ-nʋɛ' -mɛ Sesi se 'e Kea 'a kɛɛma'de 'ʋn mu ke. 40 Nyʋ jrʋ' -nɩa 'e nyʋ "klu 'wɔan ɔɔ' wlu -nɩ 'sʋ, ʋʋ 'na : "Ju -nɔ, ɔ nɩɛ Kea 'a wlu 'kwajaai -o -cɛɛn'-. 41 Jrʋ' 'na : Ɔ nɩɛ Nyʋ'pʋʋi -o. 'Kaa deejrʋ' 'na : Ao mɔ ɔ naa tɔ' i 'ee, 'de Galileblʋa "kpei mɔ Nyʋ'pʋʋi 'je 'wlʋʋ ? 42 Wlu -ɛ -crɩɩa' 'de Kea 'a 'sbɛ 'di ɛ se ka 'da 'dee- ? Ɛ se 'na 'de Dafidɩ 'a "ji 'di 'bo Bɛtelɛm Dafidɩ o -kwlɔ 'bomɔ Klisɩ 'je 'wlʋʋ- ? 43 'Sʋ 'de Sesi 'a -tɩ' 'ʋn ɛ, ʋʋa' 'sʋ -seea' 'ʋn 'ɛ. 44 Nyʋ jrʋ' -nɩa 'de ʋʋpʋ "klu -nɩɛi" ʋʋ 'e Sesi inynaa-, 'kaa nyɔ jrɔ' se ɔ sʋn -pʋn" -te'. 45 Ɛ nʋa kan' 'sʋ nyʋ Fariseɛn ke 'sraa -saʋn dboa -nʋ muɛ 'e ʋʋpʋ o de, -wɛe -wi" -mʋ 'na : Dɛɛ-tɩ ao se ɔ ja a- ? 46 'Sʋ dboun -nʋ 'na : Ka "ju -nɔ ɔ wlua -a se nyɔ jrɔ' 'je, ɔ se kan' wlu due'. 47 'Bomɔ Fariseɛn-wi" wluu ka, ʋʋ 'na : -Ɛ, ao mɔ "tai- aoa' -cɛi" -wɛ-, "ju -nɔ je ao 'srɛ ipoo -kee ? 48 'De -aa klae" ke Fariseɛn-wi" "klu ɛ, nyɔ due' koʋn -gbai' se ɔɔ' -tɩ' tɔ' 'ʋn 'je. 49 Nyʋ -ʋʋ sea Moisɩ 'a kɛ' juo, ʋʋ nɩɛ 'daɩn nyʋ -o ! 50 'Bomɔ ʋʋa' due', Nikodɛmʋ -ɔ mua 'e Sesi o "maʋ" wluu, ɔ 'na : 51 -Bo -a se nyiɔ 'ɔ wlu 'wɔn, 'de dɛ ɔ nʋa -bo -a se ɛ juo 'e -a -bɛɛ' -a -je ɔ 'pee kpʋʋn- ? 52 'Sʋ ʋʋ 'na : -Mɔ 'ee, -ɩn -nɩɛ Galile i -o -kee ? -Mɛ -ɩn -gbʋn 'e 'sbɩ 'di kea' ka Kea 'a wlu 'kwajaai due' koʋn -gbai' ka sea 'e Galileblʋa "kpei 'wlʋ due' -ma muɛ kan' 'jea' ! 53 Ʋʋ -kɔa' kan' 'daa' 'sʋ ʋʋ muɛ -gbɛin" woi due due'.

8

1 'Sʋ Sesi muɛ 'e olifɩ-crʋ "kpei. 2 -Sɔn' 'ɔ -nɛɛ -sɩan' -klae" pɛɛn 'sʋ, Sesi -cruuɛn 'de Kea -gbu klaa" 'di ke'wlɛ -wɛe nyʋ -wee' "klein a mu 'de ɔ o. 'Sʋ ɔ -teɛ i, -wɛe ɔɔ tɔɔ ʋʋpʋ dɛ. 3 'Sʋ 'nynɔkpao' due' ʋʋ kpʋʋn a jɛi" "kpei ɛ, ʋmʋ kɛ' wɔ-saʋn o, Fariseɛn-wi" 'ble too' -too too" 'sʋ ʋʋ ja 'o nyʋ -wee' "juɔi. 4 'De ʋʋ wlu 'e Sesi -pee, ʋʋ 'na : Nyʋ dɛtɔɔi, 'nynɔkpao' -nʋ, nyʋ kpʋʋn jɛi" "kpei. 5 Moisɩ 'a kɛ' 'na ʋʋa' 'nynʋkpae' tu ɛ, nyʋ tbaa ʋʋpʋ "soi i 'sʋ ʋʋ 'e 'mɛ. 'De -mɔ 'ee, ka -ma -da a- ? 6 Ʋʋa 'tmʋ ɛɛ' wlu tu 'mɛ -wɛe ʋʋ 'je ɔ wlu 'a "klɛ bʋ 'dei -te' 'de ʋʋ 'je ɔ -tɩ' "kpei bla. 'Kaa Sesi -criɛ" "jri i -wɛe ɔɔ nʋ -cɩɛ, ɔɔ 'crɩ 'o 'blʋɔ. 7 Ka ʋʋpʋ a -tee' ɔ i sɔu" sɔu", 'kamɔ ʋʋa -tee' ɔ i. 'Sʋ Sesi kpa "jru "jɛi, ɔ 'na : Nyɔ -nɩa 'de aopʋ "klu -wɛe -ɔ sea dɛsaʋn nʋ due' ɛ, -mɛ -mɔ -saa "i ɔ 'e "sou po. 8 'Sʋ ɔ -criɛ" "jrii ke'wlɛ -wɛe ɔɔ 'crɩ 'o 'blʋɔ. 9 -Ta ʋʋ 'wɔan wlu -nɩa 'mʋa- 'sʋ ʋʋa' pɛe a -cɛ' ʋʋpʋ "bli. 'Sʋ dɛ -tba' 'e ʋʋa' klae" o -wɛe -ɛ -jɩɩa ʋʋa' mɩɩ" ʋʋ -wee' a mu' due 'due, 'sʋ Sesi ke 'nynɔkpao' -nyna i 'bo ɔ "juɔi -nʋ 'a 'sʋ sie 'o. 10 'Sʋ Sesi kpa "jri "jɛi -wɛe ɔ wlu 'de ʋ -pee, ɔ 'na : 'Nynɔkpao', -ta nyʋ -ʋʋa -nɩɩa' aʋn -tɩ' "kpei -wee' mu ɛ- ? Nyɔ jrɔ' se aʋn 'pee kpʋʋn- ? 11 Ʋ 'na : Ɩɩn Tʋ"bo, nyɔ jrɔ' se 'ʋn 'pee kpʋʋn -o. 'Sʋ Sesi 'na : 'Mɔ se aʋn 'pee kpʋʋn i -ke. A mu, 'kaa a 'bo dɛsaʋn nʋɛ 'bode. 12 Sesi wluɛ ʋʋ -pee ke'wlɛ, ɔ 'na : 'Mɔ -nɩ 'kmʋ 'a -sɔn'. Nyɔ -bla' 'bo 'ʋn 'de ɛ, -mɛ ɔ se 'e kwie 'di naai 'bode, 'kaa ɔ nɩɛ 'e -sɔn' -ɛɛ -nyɩa" nyʋ 'kmʋnɩa' 'ʋn. 13 'Bo -mɛ "kpei 'sʋ Fariseɛn-wi" wlu' 'de ɔ -pee, ʋʋ 'na : -Tɩ' -ma -tmʋa ɩ se tɔ' -tɩ nɩ-, dɛ-nʋɛ' -ma poɛ -ma -cɛ" 'kpa -tɩ' o. 14 'Bomɔ Sesi 'na : -Bo 'ma sea 'ma -cɛ" -tɩ' o po mɔ 'de ɛ, dɛ 'ma 'tmʋa ɛ nɩɛ tɔ' -o, dɛ-nʋɛ' -ta 'ɩn 'wlʋa 'ɩn juo 'o 'ɛ, -ta 'ma mua 'ɩn juo 'o 'ɛ, 'kaa aopʋ- mɔ se -ta 'ɩn 'wlʋa ke, -ta 'ma mua juo-. 15 'De nyiɔtɔ' 'ʋn mɔ aoa 'jee nyʋ 'a 'pee, 'kaa 'maa 'je nyɔ "o nyɔ 'ɔ 'pee. 16 'De -bo 'ma sea nyʋ 'a 'pee 'je mɔ 'de ɛ, 'ma nyʋ 'a 'pee 'jesʋn nɩɛ tɔ', dɛ-nʋɛ' 'ɩn se due' nɩ, 'ɩn "Bo -dboa' 'ʋn ke 'ma -a -na'. 17 Ɛ 'crɩɩɛ mɔ 'de aoa' kɛ' 'di, ɛ 'na : -Bo nyʋ 'sɔɔn 'je dɛ 'ɛ -ta, -wɛe ʋʋ 'tmʋ dɛ due' ɛ, -mɛ dɛ ʋʋ 'tmʋa ɛ nɩɛ tɔ' -o. 18 'Ma poɛ 'ma -cɛ" 'kpa -tɩ' o -wɛe 'ɩn "Bo -dboa' 'ʋn -mɔ ɔ po 'ʋn -tɩ' o -ke. 19 'Sʋ ʋʋ -tee' ɔ i, ʋʋ 'na : -Ta -ɩn "Bo mɔ nɩ ɛ- ? 'Sʋ Sesi 'na : Ao se 'mɔ juo-, ao se 'ʋn "Bo juo-. -Bo ao juo 'ʋn 'de ɛ, -mɛ ao 'bɛɛ- ao 'je 'ʋn "Bo juo -ke 'de-. 20 -Ta Sesi a 'tmʋa wlu -nɩa 'mʋa- -mɛ ɔ nɩɛ nyʋ dɛ tɔɔa' 'de Kea -gbu klaa" 'di, -ta 'wɛi 'dipodɛ nɩa fɔ o ɛ. Nyɔ jrɔ' se ɔ sʋn -pʋn" -te', dɛ-nʋɛ' ɔɔ' kpʋn nɔ" se 'o nyni ke. 21 Sesi wlu' ke'wlɛ, ɔ 'na : 'Ma muɛ mua' -wɛe ao 'je 'mi i -pɔn, 'kaa aoa muɛ 'mɛa' 'de aoa' dɛsaʋn 'di, dɛ-nʋɛ' -ta 'ma mua ao se 'o 'a jia' 'bɛɛ- i. 22 'Bo ɛɛ' wlu tu "kpei 'sʋ Suifʋ-wi" 'na : Ɔ 'je ɔɔ' -cɛ" 'dba -ae, -aee' dɛɛ-tɩ ɔ 'na -ta 'ma mua ao se 'o 'a jia' 'bɛɛi ɛ- ? 23 'Sʋ Sesi 'na : Aomɔ 'wlʋɛ 'nɔ 'blʋa- "kpei, 'kaa 'mɔ 'wlʋɛ 'e jaʋn 'di, ao nɩɛ 'kmʋ -nɛ 'ɛ nyʋ -o, 'kaa 'mɔ se 'kmʋ -nɛ 'ɛ nyɔ nɩ-. 24 Ɛmɛ -tɩ 'ɩn 'na : Aoa muɛ 'mɛa' 'de aoa' dɩsaɩn 'di. Dɛ 'ɩn nɩa 'ʋn -bo ao se ɛ tɔ' 'ʋn 'je ɛ, aoa muɛ 'mɛa' 'de aoa' dɩsaɩn 'di. 25 'Sʋ ʋʋ -tee' ɔ i, ʋʋ 'na : Nyɔ -ɩn -nɩ mɔ 'de ɛ- ? Sesi 'na : Dɛ 'ɩn 'tmʋa ao -pee sese ɛmɛ 'ɩn nɩ 'ʋn. 26 'Ɩn 'bleɛ dɩ -tuu"-tuu 'ɩn 'je 'tmʋ 'de 'ɩn 'je -tɩ' -pʋn" tba 'de aopʋ- 'ʋn 'de-, 'kaa "ju -dboa' 'ʋn a 'tmʋɛ tɔ' -tɩ. Dɩ 'ɩn 'wɔan 'de ɔ 'wɔn ɛ, ɩa' 'sʋ 'ma 'tmʋ 'de 'blʋa 'dinyʋ -pee. 27 'Kaa ka ɔɔ 'tmʋa "Bo 'a -tɩ' 'de ʋʋ -pee ɛ, ʋʋ sɩ 'mii 'wɔn. 28 'Sʋ Sesi 'na : -Sɔntɩ aoa mua nyiɔ 'ɔ "Ju tu -kwlɩ" kɔa' a -wɛe ʋʋ 'jeɔ i nynaa a, 'bomɔ dɛ 'ɩn nɩa 'ʋn ao 'je ɛ juo-. 'Maa -sa 'o 'ma -cɛ" -kwlɩ" 'maa nʋ dɛ. Dɛ 'ɩn "Bo tɔɔa 'ʋn ɛmɛ 'ma nʋ. 29 "Ju -dboa' 'ʋn ke 'ma -a -na', ɔ se 'ma 'sʋ "i "tai-, dɛ-nʋɛ' ɔɔ' -kwlʋtɩ mɩ 'ma nʋ jeejee. 30 -Ta Sesi a wlua kan', 'sʋ nyʋ -tuu"-tuu -a -je ɔɔ' -tɩ' tɔ' 'ʋn. 31 'Sʋ Sesi wlu' 'de Suifʋ-wi" -jea ɔɔ' -tɩ' tɔ' 'ʋn -pee, ɔ 'na : Wlu 'ma tɔɔa aopʋ- -bo ao kpʋn ɛ i -sisi' ɛ, -mɛ ao nɩɛ 'ma klai" nynuu -cɔɔn' -o. 32 -Mɛ aoa muɛ tɔ' -tɩ jua', -wɛe tɔ' -tɩ 'je ao seie. 33 'Sʋ ʋʋ 'na : -A -mɔ -nɩɛ Ablaam 'a "nynuu- -o, -a se nyɔ jrɔ' 'ɔ kʋɔn nɩ due', dɛɛ -tɩ -ɩn -na aoa muɛ aoa' -cɛ" -pee -tea' a- ? 34 'De Sesi 'na : 'Ma 'tmʋʋɛ aopʋ- tɔ' -tɩ, nyɔ "o nyɔ -ɔɔ nʋa dɛsaʋn ɛ, -mɛ ɔ nɩɛ dɛsaʋn 'a kʋɔn -o. 35 'De kʋɔn -mɔ ɛ, -gbu" -ɛ 'di ɔɔ nʋʋa nyʋ "juɔi ɛ, ɔ se 'o "ikɔn-, 'kaa "ju mɔ -kɔn 'o "i, ɔ nɩɛ ɔ "bo 'a "ju jeejee. 36 'De -bo Kea 'a "Ju -mɔ seie aopʋ- ɛ, -mɛ ao -teɛ aoa' -cɛ" -pee -cɛɛn'- -cɛn -cɛɛn'-. 37 Ka ao 'wlʋa' 'e Ablaam 'a "ji 'di ɛ, 'ɩn juoɛ', 'kaa aoa -pɔn 'ma 'dbaa' i, dɛ-nʋɛ' 'ma wlu 'a pa 'de aopʋ 'ʋn. 38 Dɛ 'ɩn 'jea 'de 'ʋn "Bo o ɛ, ɛmɛ 'ma 'tmʋ, 'kaa aomɔ ɛ, dɛ ao "bo -tua" ao wɔn ɛ, ɛmɛ aoa nʋ. 39 'Sʋ ʋʋ 'na : -A "bo -nɩ Ablaam. 'Bomɔ Sesi 'na : -Bo ao nɩ Ablaam 'a "nynuu 'de ɛ, -mɛ ao 'beeɛ' ao 'je ɔɔ' kplɩn nʋ 'de-. 40 'Kaa kaan ka 'mɔ -ɔɔ -tmʋʋa aopʋ tɔ' -tɩ 'ɩn 'wɔan 'de Kea 'wɔn ɛ, aoa -pɔn 'ma 'dbaa' -kɔ i. Ablaam -mɔ se -mɛ nʋ o. 41 Aoa nʋɛ ao "bo 'a kplɩn. 'Sʋ ʋʋ 'na : -A se -pɔe' nynuu nɩ-, Kea due' koʋn -gbai' mɛ -nɩ -a "Bo. 42 'De Sesi 'na : -Bo Kea nɩ ao "Bo 'de ɛ, -mɛ ao 'beeɛ' ao 'je 'ma -tɩ' kma-, dɛ-nʋɛ' 'de Kea o 'demɔ 'ɩn 'wlʋ -wɛe 'ɩn ji 'nɔ 'blʋa- "kpei. 'Ɩn se ji 'de 'ma -cɛ" 'kpa 'a 'nynɩ 'ʋn, 'kaa ɛmɛ -dbo' 'ʋn. 43 Dɛɛ -tɩ aoa' 'wɔn 'ma wlu 'mii ɛ ? Ɛmɛ -nɩ ao se ɛ 'bɛɛ- ao 'je 'ma wlu doin" o po see. 44 Ao "bo -nɩ -siɔn', ɛmɛ -tɩ ao nɩɛi" ao 'je ao "bo 'a -kwlʋtɩ nʋ. -Siɔn' nɩɛ "ku 'dbai -o sese. Ɔɔ' nʋ tɔi" -tɩ 'nɔ 'kmʋ, dɛ-nʋɛ' tɔ' -tɩ se 'de ɔ 'ʋn nɩ-. -Bo ɔɔ sea sɩ 'tmʋ ɛ, -mɛ ɔɔ -sa' 'bo ɔɔ' -cɛ" -kwlɩ" ɔɔ jea 'tmʋ, ka ɔ jua ɛ 'mii see ɛ, dɛ-nʋɛ' ɔ nɩɛ sɩ 'tmʋ i, ɔmɔ -nɩ sɩ "bo. 45 'Kaa 'mɔ ɛ, 'ma 'tmʋɛ tɔ' -tɩ, ɛmɛ -tɩ aoa' 'je 'ma -tɩ' tɔ' 'ʋn. 46 Nyɔ wɛ- -je 'ma dɛsaʋn -cɩɛ "kpei -te' kaan- 'de ao "klu ɛ- ? 'De -bo 'ma sea tɔ' -tɩ 'tmʋ 'ee, -mɛ dɛɛ-tɩ aoa' 'je 'ma -tɩ' tɔ' 'ʋn ɛ- ? 47 Nyɔ -wlʋa 'e Kea 'ʋn -mɔ ɔ poɛ Kea 'a wlu doin" o, 'kaa aomɔ se 'e Kea 'ʋn 'wlʋ, ɛmɛ -tɩ aoa' po ɛɛ' wlu doin" o. 48 'Sʋ Suifʋ-wi" wlu ɔ -pee, ʋʋ 'na : -A -sa tɔ' -aa -jea -ʋn Samadikɔin 'daa-, -siɔn' 'ɔ -suu -nɩ 'de -ɩn 'ʋn -cɛɛn'- ! 49 'Sʋ Sesi wlu' ka, ɔ 'na : -Siɔn' 'ɔ -suu se 'de 'ʋn nɩ-, 'kaa 'ma 'bɛɛ- 'ʋn 'Bo 'a 'nynɩ "i, 'de aopʋ mɔ ɔ -flɛɛn' 'ʋn 'ɛ. 50 'Ɩn se 'ma -cɛ" 'ɛ 'nynɩ 'wlʋa i-pɔn, "ju due' -nɩ 'o -ɔɔ -pɔn 'ma 'nynɩ 'wlʋa' i, ɔmɔ -nɩ 'pee 'jei. 51 'Ma 'tmʋɛ tɔ' -tɩ 'a tɔ' -tɩ, nyɔ -ɔɔ -jea 'ma wlu wɔn ɛ, ɔ se 'mɛi 'nɔ 'kmʋ. 52 'Sʋ Suifʋ-wi" 'na : 'Aa ! "Bo, ka -siɔn' 'ɔ -suu nɩa 'de -ɩn 'ʋn ɛ, -a -je kan' -wɛ- la, Ablaam ke Kea 'a wlu 'kwajaaʋn -wee' 'mɛɛ, -wɛe -mɔ -naa' nyɔ -jea 'ma wlu wɔn ɛ, -mɔ se 'mɛi "pɩ. 53 Ablaam -nɩa -a "bo -mɔ 'mɛɛ, -maa naa tɔ' i -ɩn -bɛ"i -ɩn je ɔ -sii ? 'De Kea 'a wlu'kwajaʋn-wi" -mʋ -wee' 'mɛɛ -ke, dɛ -ma -daa' -ma -cɛ" ɛ- ? 54 'Sʋ Sesi 'na : -Bo 'ma sea 'ma -cɛi" 'bɛɛ' 'de ɛ, -mɛ 'ma 'nynɩ se dɛwɔn nɩ-, 'kaa 'ɩn "Bo aoa 'daa- aoa' Kea a, ɛmɛ -ɛɛ -bɛɛ' 'mi "i. 55 'Kaa ao se ɛ juo-, 'mɔ juuɛ' 'mɛ. -Bo 'ɩn 'na 'ɩn se ɛ juo ɛ, -mɛ ka ao nɩa sɩ 'tmʋʋn, 'kamɔ 'ma mu nɩa'. 'Kaa 'ɩn juuɛ' -wɛe 'ma 'je ɛɛ' wlu wɔn. 56 Ablaam -jɔ -nɩa aopʋ "bo ɛ, 'ma jia' 'bleɛ -mɔɔ' 'mʋa-, -sɔntɩ ɔ 'jee ɛ "jriɛ-, ɔ 'di nmɔ wɔn. 57 'Sʋ Suifʋ-wi" 'na : -Mɔ -sea' -sɩn 'a kwla -mm" 'ble ke ɛ, -mɔ -jee' Ablaam "jriɛ- ! 58 'De Sesi 'na : 'Ma 'tmʋ aopʋ tɔ' -tɩ 'a tɔ' -tɩ -ta Ablaam a 'wlʋʋa, -mɛ 'ɩn nɩ sese. 59 Ɔ 'tmʋa wlu -nɛ 'sʋ ʋʋ 'tɩɩɛn "sei kwa -wɛe ʋʋ 'je ɔ itbaa-. 'Sʋ ɔ "maa ʋʋpʋ "jrii wɔɔ-, -wɛe ɔ 'wlʋ 'e Kea -gbu klaa" 'di.

9

1 -Ta Sesi a -sia' 'sʋ ɛ, ɔ 'jeɛ "ju due' -ɔ 'wlʋʋ- "jri 'a waa' 'ʋn. 2 'Sʋ Sesi 'a klai" nynuu -tee' ɔ i, ʋʋ 'na : Nyʋ dɛtɔɔi, -ɔ nʋ dɛsaʋn -wɛe "ju -nɔ 'ɔ 'jei ɛ- ? Ɔɔ' -cɛ" 'kpa -aee' -ɩn" ɔ "bo ke de kee- ? 3 'Sʋ Sesi -sɛ "kpei ɔ 'na : Ɛ se ɔmɔ o, nyʋ -wlu ɔ -nʋ' dɛsaʋn ko-, 'kaa ɛ nɩ kan' 'mɛ -wɛe Kea 'a nʋʋ dɩ 'je "jri "kpae po 'de ɔ 'ʋn. 4 -Ta -sɔn' nɩɩa 'e ke ɛ, 'ɩn 'je "ju -ɔ dboa 'ʋn 'a dbo nʋ -o, dɛ-nʋɛ' kwie -ɛ 'ʋn nyɔ sea 'bɛɛ- ɔ 'jea dbo jrɛ' nʋʋ ɛ, ɛɛ kpʋn'. 5 -Ta 'ɩn nɩɩa 'nɔ 'blʋa- "kpei ke ɛ, 'ɩn nɩɛ 'kmʋ 'a -sɔn' -o. 6 Sesi -kɔa' dɛ -nɛ 'ɛ 'tmʋa' 'sʋ, ɔ poɛ tɔn 'o 'blʋɔ -wɛe ɔ crii ɛɛ' 'pɔɔ -cɩɛi", 'de ɔ cɛɛn "dɔi -nɔ 'pɔɔ "jri, 7 -wɛe ɔ wlu ɔ -pee, ɔ 'na : -Ɩn mu 'e "niɔ 'bo Siloe wɔn -wɛe -ɩn -je "jri i 'sran. (Siloe -nɛ, ɛ 'de mɛ -nɩ -tadboi.) "Dɔi mu 'e 'mɛ kan' -cɛɛn'-, -wɛe ɔ 'sran "jri i. -Ta ɔɔ jiia de -mɛ ɔɔ 'jeɛ i 'pepe. 8 'Sʋ nyʋ -ʋʋ -ke ɔ "kʋʋan i ke nyʋ -ʋʋ -juɔ -ta ɔɔ -srɔɔa nyʋ o tɛin" -ke, ʋʋ 'na : "Ju -ɔɔ -tea i -wɛe -ɔɔ -srɔa' nyʋ o 'de ɛ, ɔ ko -taa ? 9 Nyʋ jrʋ' 'na : Ɔmɔ -o. Jrʋ' 'na : "Ɩɩn- ɔ ko-, 'kaa ɔɔ' -kooɔ' i -o. 'Sʋ ɔmɔ 'ɔ -cɛ" 'kpa 'na : 'Mɔ -o. 10 'Sʋ ʋʋ -tee' ɔ i, ʋʋ 'na : Ka -ma "jri nʋ 'baisʋn ɛ- ? 11 Ɔ -sɛ "kpei ɔ 'na : "Ju nyʋ a 'daa- Sesi ɛ, ɔmɔ -cɛn' 'ʋn 'pɔɔ "jri -wɛe -ɔ -na -ɩn mu "jrii 'sran 'de Siloe wɔn. 'Demɔ 'ɩn mu kan' -cɛɛn'- -wɛe 'ɩn 'sran "jrii 'sʋ 'ma "jri 'bai-. 12 -Wɛe ʋʋ -tee' ɔ i, ʋʋ 'na : -Taka ɔɔ' "ju tu nɩ ɛ- ? 'Sʋ ɔ 'na : 'Ɩn se 'o juo-. 13 'Sʋ ʋʋ kpa "dɔi -ɔɔ "jri ɔ 'baia' -nɔ 'e Fariseɛn-wi" "juɔi. 14 'De 'wɩ -ɛ 'di Sesi nʋa 'pɔɔ -wɛe 'baia' "ju -nɔ 'ɔ "jri 'mʋa- ɛ nɩɛ -kwlewɩ -o. 15 'Sʋ Fariseɛn-wi" a -tee' ɔ i ke'wlɛ, 'de dɛ -nʋʋa ɔ "jrii -wɛe ka ɔ nʋa i 'jesʋn 'a -po' bla. 'Bomɔ ɔ poo ʋʋpʋ "kuan, ɔ 'na : Ɔ cɛn 'ʋn 'pɔɔ "jri -wɛe 'ɩn 'sran "jri i 'de 'ma 'je i 'pepe. 16 Fariseɛn jrʋ' 'na : "Ju -nʋa dɛ -nɛ ɛ, ɔ se 'e Kea 'ʋn 'wlʋ, dɛ-nʋɛ' ɔɔ' 'je -kwlewɩ 'a kɛ' wɔn. 'Kaa deejrʋ' 'na : Dɛsaʋn nʋi 'beeɛ' ɔ 'je jrii' -nɩa kan' nʋʋ ? 'Sʋ ʋʋ -seea' 'ʋn 'ɛ 'bo ʋʋa' 'sʋ 'nynɩ. 17 'Sʋ Fariseɛn-wi" -teeɛ' "dɔi -nɔ i ke'wlɛ, ʋʋ 'na : "Ju -baia' -ma "jri 'ee, ka -ma naa tɔ' i 'de ɔɔ' -tɩ' 'ʋn ɛ- ? 'Sʋ ɔ 'na : Ɔ nɩɛ Kea 'a wlu 'kwajaai due' -o. 18 Ka "ju -nɔ 'wlʋa 'sʋ ɔɔ' 'jea i ɛ, -wɛe ɔɔ 'jea i kaan ka a Suifʋ-wi" se ɛ "inɩ ʋʋ 'je ɛ tɔ' 'ʋn 'je. Ʋʋ nʋɛ' mamaʋ 'sʋ ʋʋ je ɔ "bo -wi" 'da. 19 -Wɛe ʋʋ -tee' ʋʋpʋ i, ʋʋ 'na : "Ju -nɔ ao 'na aoa' "ju -ɔ -wlʋʋa' "jri 'a waa 'ʋn -oo ? 'De kɛ nʋ kaan ka -wɛe ɔɔ 'je i ɛ- ? 20 'Sʋ ɔ "bo -wi" 'na : Ɩɩn -aa "ju -o, ɔ 'wlʋʋɛ "jri 'a waa 'ʋn -cɛɛn'-. 21 'Kaa ka -jɔ ɛ nʋa -wɛe ɔɔ 'jea i ke, 'de nyɔ -baia' ɔɔ' "jri ɛ -a se -mɩ juo-. Ao -tee' ɔɔ' -cɛ" 'kpa i, ka "junmɔu a 'bɛa -wɛe ɔɔ 'tmʋa ɔɔ' -cɛ" 'ɛ "kpei -tɩ ɛ, 'kamɔ ɔ 'bɛa 'o. 22 Dɛɛ-tɩ -wɛe ɔ "bo -wi" wlua dɛ -nɛ 'ʋn ɛ, ɛmɛ -nɩ faʋn -a nʋ ʋʋpʋ, dɛ-nʋɛ' Suifʋ-wi" 'bɛɛ- wlu 'ʋn 'ɛ sese, ʋʋ 'na nyɔ "o nyɔ -ɔɔ mua Sesi Nyʋ 'pʋi Klisɩ 'daa' a, ʋʋa muɔ 'de ʋʋa' Kea -gbu klaa" 'di -saa'. 23 Ɛmɛ -tɩ -wɛe ɔ "bo -wi" 'na : Ɔ -kwɛ-ɛ "junmɔu 'mɛ, ʋʋ -tee' ɔɔ' -cɛ" 'kpa i. 24 'Sʋ Fariseɛn-wi" 'da "ju -ɔɔ "jri 'baia' -nɔ 'mɛ ke'wlɛ, -mɛ ɔɔ' 'daa kpɛ 'sɔɔn -nɩ -nao -wɛe ʋʋ 'na : -Ɩn -tmʋ tɔ' -tɩ 'bo Kea "juɔi. -Apʋ mɔ juuɛ', "ju -nɔ nɩɛ dɛsaʋn nʋi -o. 25 'Sʋ ɔ 'na : -Bo ɔ nɩ dɛsaʋn nʋi ɛ, 'mɔ se -mɛ juo-. Dɛ due' koʋn -gbai' mɛ 'mɔ juo o, 'mɔ -dɔa" 'de ɛ, 'ma 'jeɛ i kaan ka. 26 -Wɛe ʋʋ -tee' ɔ i ka ʋʋ 'na : Dɛ ɔ nʋ -ʋn "jri i ɛ- ? Ka ɔ nʋ -ma "jri 'a 'baisʋn ɛ- ? 27 'Sʋ ɔ 'na : 'Ɩn 'tmʋɛ -wɛ- 'de ao -pee 'de- -wɛe ao 'na ao se ɛ doin" -tu" i, dɛɛ-tɩ aoa -tee' ɛ 'mi i ke'wlɛ ɛ- ? -Aee' ao nɩɛ "i ao 'je ɔɔ' klai" nynuu nɩɩ- ? 28 Wlu -nɛ seɔ 'wɔin -kwɛ 'sʋ ʋʋ -teɛ ɔɔ' -cree" 'a -pʋn" ʋʋ 'na : -Mɔ -nɩ "ju -nɔ 'ɔ klai "ju, -apʋ mɔ nɩɛ Moisɩ 'a klai" nynuu -o. 29 -A -je kan' 'mɛ, Kea wlu' 'de Moisɩ -pee, 'kaa -ta "ju -nɔ -mɔ 'wlʋa -a se 'o juo- mɔ "pɩ. 30 'Sʋ "ju -nɔ 'na : -Jɛ -maa" a nyʋ tai' -mɛ -nao, ɛmɛ -nɩ ao 'na -ta ɔ 'wlʋa ao se 'o juo-, 'de -mɛ 'kamɔ ɔ 'bai- 'ma "jri. 31 'Sʋ ɔ 'na : -A -je kan' 'mɛ Kea 'a kpʋn dɛsaʋnʋʋn 'a baewlu-, 'kaa nyɔ -ɔɔ -je ɛ wɔn -wɛe -ɔɔ nʋa ɛɛ' -kwlʋtɩ ɛ, ɔmɔ -ɔɔ baewlu ɛɛ kpʋn. 32 Nyɔ -wlʋa -ɔ sea i 'je due', nyɔ se ɔɔ' "jri 'bai ke -a se -mɛ 'wɔn kpɛ due'. 33 -Bo "ju -nɔ se 'e Kea 'ʋn 'wlʋ 'de ɛ, ɔ se ɛ 'bɛɛ- ɔ 'e jrii' jrɛ' nʋ. 34 'Sʋ ʋʋ 'na : -Mɔ -ɔɔ nyiɔjɔ -wee' 'wlʋa 'de dɛsaʋn 'di ɛ, -mɔ -ɔɔ tɔɔ -apʋ mɔ dɛ ! 'Sʋ ʋʋ nʋ ɔ i. 35 Ka ʋʋ nʋ ɔ i Sesi 'wɔɩn. Ɔ ke ɔ 'jeea 'de ɔ wlu ɔ -pee ɔ 'na : -Ɩn -je nyiɔ 'ɔ "Ju 'a -tɩ' tɔ' 'ʋn 'ɛɛ ? 36 'Sʋ ɔ 'na : Nyʋ dɛtɔɔi, nyɔ -o wɛ- ? -Ɩn -too ɔ 'ʋn, -wɛe 'ɩn 'e ɔɔ' -tɩ' tɔ' 'ʋn 'je. 37 'Bomɔ Sesi wluu ɔ -pee ka, ɔ 'na : Ɔɔ' "ju tu -ɩn -jee ɔ "jriɛ- -wɛ-, ɔmɔ -ɔ -ke -ma wlua 'o -ta. 38 'Sʋ ɔ 'na : 'Ɩn 'je ɛ tɔ' 'ʋn 'ɛ, 'ma 'blei ! -Wɛe ɔ "sii- 'kɔi- i 'bo Sesi "juɔi. 39 'Bomɔ Sesi 'na : 'Ɩn jiɛ 'pee 'je -tɩ 'de 'blʋa- -nɛ "kpei, -wɛe nyʋ -ʋʋa' 'jea i ʋʋ 'je i 'je, 'de nyʋ -ʋʋa -jea i ʋʋ 'je "dɔ. 40 Fariseɛn jrʋ' -nɩa 'omu 'wɔan wlu -nɩ 'sʋ ɛ, ʋʋ -tee' ɔ i, ʋʋ 'na : -Apʋ mɔ nɩɛ "dɔʋn -o -kee ? 41 Sesi 'na : -Bo ɛ nɩ aoa' "jri 'a 'sʋ mɩ -wa 'de ɛ, -mɛ ao se 'e dɛsaʋn 'di nɩi. 'Kaa aoa 'daa- aoa' -cɛ" i 'jeʋn, ɛmɛ -tɩ aoa' dɛsaʋn a mu ao "kpei nɩa' jeejee.

10

1 Sesi pooɛ -tɩ' "i ɔ 'na : 'Ma 'tmʋ aopʋ' tɔ' -tɩ, nyɔ -sea' 'o 'blae 'a -klɛe 'a pawɔn "i cɛɛn-, -wɛe -ɔ -jiia -klɛe "jru -tajrɔ ɔ, -mɛ -mɔ 'ɔ jei tu nɩɛ "jrii -o, ɔ nɩɛ "ku 'dbai. 2 'Kaa nyɔ -jɔ -cɛɛan 'bo -klɛe wɔn "i -wɛe -ɔ pa 'e 'blae o ɛ, ɔmɔ -nɩ 'blae 'a jei. 3 Ɔmɔ 'blae ifuoi a kain "wɔin -wɛe -ɔɔ pa 'e ɔɔ' 'blae o. 'De ɔɔ 'da ɔɔ' -nɩ 'a 'nynɩ due 'due -wɛe ɩa bla 'o ɔ 'de, dɛ-nʋɛ' ɩ juo ɔɔ' wlu 'mɛ -wɛe ɔɔ kpɩ 'e "kpae'. 4 -Bo ɔ po ɩ -wee' "klein "kpae' ɛ, -wɛe ɔɔ na 'bo ɩ "juɔi 'de ɔɔ' 'blae nɩ 'bo ɔ 'de, dɛ-nʋɛ' ɩ juo ɔɔ' wlu 'mɛ. 5 Ɩa' bla 'o nyɔ 'srʋ 'de, -bo ɩa se ɔ 'je -mɛ ɩa tɛɛn ɔ kɩn ɩa 'kpa 'kwla, dɛ-nʋɛ' ɩ se nyɔ 'srʋ 'a wlu juo-. 6 Sesi poo -tɩ' -nɩa 'mʋa- "i 'mɛ 'de ʋʋ -pee, 'kaa dɛ ɔ 'tmʋa, nyʋ -nɩa 'o ʋʋ se 'e ɛ 'dei 'wɔn. 7 Ɛmɛ -tɩ Sesi wluu ke'wlɛ, ɔ 'na : Tɔ' -tɩ 'a tɔ' -tɩ 'ma 'tmʋʋ aopʋ, 'mɔ -nɩ 'blae 'a -klɛe 'a -gbɛin" -je. 8 Nyʋ "klein 'mɔ sea ji ke -wɛe -ʋʋ jia tɛin" ɛ, ʋʋ nɩɛ "jriʋn ke "ku 'dbaʋn -o. 'Kaa 'blae se ʋʋpʋ 'a wlu doin" o po. 9 'Mɔ -nɩ -gbɛin" -je, nyɔ -ɔ -cɛɛan 'o 'mɔ "i ɛ, ɔɔ muɛ 'pʋʋa'. Ɔ 'bɛɛ- ɔ 'je "kpae' "si 'de ɔ 'je de ji 'de 'flɛʋn, ɔɔ muɛ diidɛ 'jea' ɔ 'je di. 10 "Jrii -mɔ ɔ jiɛ "jriia' ke "ku 'dbaa' ke dɩ dooa 'a 'sʋ 'a jia', 'kaa 'mɔ ji' -wɛe 'blae 'je 'kmʋnɩa' 'je 'de 'kmʋnɩa' 'je i siie-. 11 'Mɔ -nɩ 'blaejei -cɔɔn'-. 'Blaejei -cɔɔn'- -mɔ, ɔ to 'e ɔɔ' 'kmʋ 'mɛ 'de ɔɔ' 'blae 'a -tɩ' 'ʋn. 12 Nyɔ -ɔɔ -tea' 'blae 'dei -wɛe nyʋ 'jea -kei" -sa' a, -mɔ se 'blae 'a jei -cɔɔn' nɩ-. 'Blae se -mɔ 'ɔ dɛ nɩ-, ɛmɛ -tɩ -bo -ci' a sea 'blae kpʋan' ji, -bo ɔ 'je ɛ i 'sʋ ɛ, -tbu ! 'Sʋ ɔ 'kpa 'kwla, -wɛe -ci' a kpʋn ɩ 'de ɛɛ -gbɩ' ja. 13 Ɔ 'kpa 'kwla, dɛ-nʋɛ' ɔɔ nʋɛ 'wɛi 'a 'sʋ 'a dbo, ɔɔ' -tu" 'blae 'a -sɔɔn. 14 'Mɔ nɩ 'blaejei -cɔɔn'- -o, 'ɩn juo 'ma 'blae 'mɛ -wɛe 'ma 'blae juo 'ʋn. 15 Ka 'ɩn "Bo jua 'ʋn 'kamɔ 'ɩn juo 'ɩn "Bo, -wɛe 'ɩn to 'e 'ma 'kmʋ 'de 'ma 'blae 'a -tɩ' 'ʋn. 16 'Blae jrɩ' 'ɩn 'ble -ɩ se 'nɔ 'blae-gbʋn 'di pa ke, 'ɩn 'je -mɩ 'nɔ paa -o -ke, ɩ -wee' a muɛ 'ma wlu doin" o poa', -wɛe ɩ 'je 'blae 'a -gbʋn due' nɩ- 'de ɩa' jei 'je due' koʋn -gbai nɩ-. 17 'Ɩn "Bo kma 'ma -tɩ', dɛ-nʋɛ' 'ɩn to 'e 'ma 'kmʋ 'mɛ, -wɛe 'ɩn 'je ɛ 'ʋn "duo- ke'wlɛ. 18 Nyɔ jrɔ' se ɛ 'bɛɛ- ɔ 'je 'ʋn 'ma 'kmʋ 'kwa -sa. 'Ma -cɛ" 'kpa -toɛ 'e mu 'de 'ma -cɛ" 'ɛ -kwlʋtɩ 'ʋn. 'Ɩn 'beeɛ' 'ɩn 'je ɛ 'e to-, 'ɩn 'beeɛ' 'ɩn 'je ɛ 'e -cri', dɛ -ɛɛ wlu 'ɩn "Bo -tua" 'ʋn, -wɛe 'ɩn 'jea nʋ, ɛmɛ -nao. 19 Suifʋ-wi" 'bɔɔ- de ke'wlɛ ʋʋ je 'ʋn -seea' 'bo ɔɔ' wlu -nɩ "kpei. 20 Aoa' -tuu"-tuu 'na : -Siɔn 'ɔ -suu -nɩ 'de ɔ 'ʋn, sɩɩan -a nʋ ɔ, dɛɛ -tɩ aoa po ɔɔ' wlu doin" o -gblein' ɛ- ? 21 Deejrʋ' 'na : Nyɔ -siɔn 'ɔ -suu nɩa 'e 'ʋn ɛ, -mɔ 'ɔ wlu kan'. 'De -suusaʋn mɛ 'bɛɛ-, ɛ 'e "dɔʋn 'a "jri 'bai- ? 22 Ʋʋ nɩɛ "i -kwɛ- -kɔ -tua" 'bo Selisalɛm, dee' 'a ji nɔ". 23 'Sʋ Sesi a na i 'de Kea -gbu 'di -wɛe ɔɔ mu 'e ɛɛ' -gbu" wɔ ʋʋ -tuu" a Salomɔ 'ɔ 'nynɩ o fɔ o. 24 'Sʋ Suifʋ-wi" pooɔ 'o -kwea'-, -wɛe ʋʋ 'na : -Aa pleeɛ tɔ' i 'de -ma -tɩ' 'ʋn 'sʋʋ ? -Bo -ɩn -nɩ Klisɩ ɛ, -mɛ -ɩn -tmʋ ɛ 'pepe ke 'de -a -pee ! 25 'Bomɔ ɔ 'na : 'Ɩn 'tmʋʋɛ aopʋ' -wɛ- 'de-, 'kaa ao 'na ao se ɛ tɔ' 'ʋn 'jei. Dɩ "klein 'ma nʋa 'de 'ɩn 'Bo 'a 'nynɩ 'ʋn ɛ, ɩmɩ -ɩa -tmʋ 'ma "kpei -tɩ. 26 'Kaa ao 'na ao se ɛ tɔ' 'ʋn 'jei, dɛ-nʋɛ' ao se 'o 'ma 'blae 'a -tɔin" nɩ-. 27 'Ma 'blae a poɛ 'ma wlu doin" o, 'ɩn juo 'ma 'blae 'mɛ, dɛ-nʋɛ' ɩa na 'ʋn o, 28 'Ma "nyɩ ɩ 'kmʋnɩa' -ɛ sea -kwɛ -ta 'ble ɛ, ɩ se i sɔn i 'nɔ 'kmʋ 'de nyɔ -ɔ -jɩ 'de 'ʋn 'kwa "fla, -mɔ se nɩ-. 29 'Ɩn "Bo -ɛ -nyɩ" 'ʋn ɛ, ɛ 'bɛi" ɛ je dɩ -wee' -sii, 'de nyɔ "o nyɔ jrɔ' se ɛ 'bɛɛ- ɔ 'jɩ 'de 'ɩn "Bo 'kwa "fla. 30 'Ɩn ke 'ɩn "Bo nɩɛ dɛ due'. 31 Ɔ 'da kan' 'sʋ Suifʋ-wi" 'tɛn "soi ke'wlɛ ʋʋ 'je ɔ itbaa-. 32 -Wɛe Sesi wlu ka, ɔ 'na : Dɩ 'dɔe -ɩ -wlʋa 'de 'ɩn "Bo o ɛ, 'ɩn nʋɩ' ao jɩ 'je, ɩa' -jɛ -ɛɛ -tɩ' 'ʋn ao 'je 'ʋn "soi itbaa -gbo' ɛ- ? 33 'Sʋ ʋʋ 'na : Ɛ se 'de dɛ 'dɔe -ma nʋa 'a -tɩ' 'ʋn mɔ -a -na -a -je -ʋn "soi itbaa nɩ-, 'kaa -ma toɛ Kea wɔn o, -mɔ -ɔ -nɩa nyiɔ ɛ, -mɔ -ɔɔ nʋ ɔɔ' -cɛ" Kea 'ʋn. 34 'De Sesi 'na : Ɛ se 'crɩɩɛ ka 'de aoa' kɛ' 'di, 'ɩn 'na : Ao nɩɛ -kɩɩ' -oo ? 35 Dɛ kɛ' 'tmʋa, nyɔ jrɔ' se ɛ 'bɛɛ- ɔ 'je ɛ i-sa. 'De -bo kɛ' mɛ 'daa- nyʋ "klein Kea 'a wlu 'tmʋʋa -pee -kɩɩ' 'ee, -mɛ dɛ jrɛ' wɛ- aoa 'tmʋ ke'wlɛɛ ? 36 'Mɔ Kea -sa -pʋn" -wɛe ɛ dboa 'nɔ 'blʋa- "kpei ɛ, -bo 'mɔ 'na : 'ɩn nɩɛ Kea 'a "Ju -o ɛ ao 'na 'ma toɛ Kea wɔn o ? 37 -Bo 'maa nʋ dɩ 'ɩn "Bo "sia 'nynɩ ɛ, -mɛ ao 'bo 'ma -tɩ' tɔ' 'ʋn 'jeɛ. 38 'De -bo 'ma sea dɩ 'ɩn "Bo "sia 'nynɩ nʋ ɛ, -mɛ -bo aoa' 'je 'ma wlu tɔ' 'ʋn mɔ 'de ɛ, ao 'je ɛɛ' nʋʋdɩ -mɩ tɔ' 'ʋn dɛwɛ-jɛ. -Bo ao nʋ kan' a, -mɛ ka 'ɩn "Bo nɩa 'de 'ʋn -wɛe 'ɩn nɩa 'de 'ɩn "Bo 'ʋn ɛ, 'de ao 'je ɛ tɔ' 'ʋn 'je la. 39 Ɔ 'da kan' 'sʋ ʋʋa -pɔn ɔɔ' kpʋn -kɔ i ke'wlɛ, 'kaa ɔ wan ʋʋpʋ 'kwa. 40 Ɛ 'wlʋa 'o mu ɛ, Sesi cɛn Sudɛn -gbuu, ɔ muɛ 'e ɛ 'de. Ɛɛ' -ta San pooa nyʋ "ni "jru tɛin" 'de ɛ, -wɛe ɔ -te 'bo i. 41 'De nyʋ -tuu"-tuu a ji 'de ɔ o, -wɛe ʋʋa wlu ka, ʋʋ 'na : San se jrii' jrɛ' nʋ -mɔ, 'kaa dɩ "klein ɔ 'tmʋa 'de "ju -nɔ 'ɔ -tɩ' 'ʋn ɛ, ɩ nɩɛ tɔ' -o. 42 'Sʋ nyʋ -tuu"-tuu -je Sesi 'a -tɩ' tɔ' 'ʋn 'bo 'a -ta -tu.

11

1 "Ju due' -ɔɔ 'nynɩ -nɩa Lasa, ɔmɔ 'wɛ- kpʋn. Ɔɔ' "ju tu "tiɛ 'o Betani. 'Bo ɛɛ' -kwlɔ -tu 'di mɔ ɔɔ' de 'dinynʋkpae' Madi ke ʋa' jrɔ' Matɩ nɩ-. 2 Madi -nʋ ʋmʋ -wla Tʋ"bo 'a bɩ -dai'klɔ "jru -wɛe -ʋ -jaa ɩ ʋa' "mɩɩ- kui, ʋmʋ -ʋa de 'di nmɔu Lasa 'a dɛ ɛ pooa. 3 De'dinynʋkpae' -nʋ ʋʋ dboɛ nyɔ Sesi "i, -ʋʋ 'na : Tʋ"bo, ju -ɔɔ -tɩ' -ɩn -kma ɔɔ' dɛ -ɛɛ pooa. 4 Sesi 'wɔan dɛ -nɛ 'sʋ ɔ 'na : Ɛɛ' 'wɛ- tu se ɔ 'dbai, ɛ kpʋɔn' -wɛe ɛ 'je Kea 'a 'nynɩ "i 'bɛɛ-, 'de ɛ 'e Kea 'a "Ju -cian" "kpei -tu". 5 'De Sesi kma Matɩ ke ʋʋa' de'di nynɔkpao' ke ʋʋa' "dei Lasa 'a -tɩ'. 6 Ɔ 'wɔan Lasa 'a dɛ 'ɛ pooanynɩ ɛ, -ta ɔ nɩa, ɔ nʋɛ 'o 'wɩ 'sɔɔn dee-, 7 -wɛe ɔ wlu 'de ɔɔ' klai" nynuu -pee, ɔ 'na : -A mu 'e Suide de. 8 'Sʋ ɔɔ' klai" nynuu 'na : Nyʋ dɛtɔɔi, -ɩn -na dɛ- ? 'De Suide Suifʋ-wi" a -pɔan -ma "soi kpi "i 'dbaa' -kɔ i ɛ, ɛ sea 'ʋn -kwle ke ɛ, 'demɔ -ɩn -na -a mu de ke'wlɛɛ ? 9 'Bomɔ Sesi wluu 'de ʋʋ -pee ɔ 'na : Dɛ -ɛ -wlʋa 'e -sɔn'ɔ -sɩan' -wɛe -ɛ -jɛɛa kwie 'a kpʋan' a, ɛ se 'jrʋ 'a bɩ 'a -puue 'jɔ 'sɔɔn nɩ- ? -Bo -sɔn' -sɩn' -wɛe nyɔ 'e na a, ɔɔ' bɩɛ 'ɛ -tiie'-, dɛ-nʋɛ' ɔɔ 'jeɛ 'kmʋ 'a -sɔn' i. 10 'Kaa -bo kwie kpʋn -wɛe nyɔ 'e na a, ɔɔ' bɩɛ ɛ -tiie', dɛ-nʋɛ' ɔ se 'de -sɔn' 'ʋn nɩ-. 11 Sesi 'tmʋa wlu -nɩ 'de ʋʋ -pee 'sʋ, ɔ poɛ "kpei ɔ 'na : -Aa "dɛi Lasa a 'kpa "nyɩɔ', 'kaa 'ma mu' 'ɩn 'je ɔ "nyɩɔ' -sa. 12 'Sʋ ɔɔ' klai" nynuu 'na : Tʋ"bo, -bo ɔɔ sea 'mʋ ɛ, -mɛ ɔɔ muɛ 'pʋʋa'. 13 -Jaa'- -mɛ Lasa 'a 'mɛ -tɩ mɩ Sesi a 'tmʋa 'o, 'kaa "nyɩɔ' -cɛɛn' 'kpa-tɩ mɛ klai" nynuu a 'wɔn 'mii. 14 'Sʋ Sesi wa wɔn 'mi i, ɔ 'tmʋɛ 'pepe 'de ʋʋ -pee, ɔ 'na : Lasa 'mɛɛ. 15 'Kaa -Jɛ 'ɩn sea 'o nɩ -wɛe ɔ 'mɛa, ɛ 'bleɛ 'ma 'mʋa ɛɛ muɛ nʋa' -wɛe aoa' Kea -kwlɩ" -tea' 'je iku. 'Kaa -a mu 'de ɔ o. 16 'Sʋ Toma nyʋ a 'daa -gbaju wlu' 'de klai" nynuu -sia o -pee, ɔ 'na : Ao "nyɩ -a mu -ke, -wɛe -a -ke ɔ 'e 'mɛ -tadue. 17 -Ta Sesi a nynia 'o Betani -mɛ Lasa nʋɛ 'e -gbaɩn' 'di 'wɩ -nyiiɛ sese. 18 'De Betani se Selisalɛm o tɛɛn-, -je 'a -toe taan -nɩ 'o ɩ 'nynɩ, 19 ɛmɛ -tɩ Suifʋ -tuu" ji Matɩ ke Madi -tɩ' -kwlɩ' i -tu" 'a 'de ʋʋa' de'di 'a 'mɛ -tɩ 'ʋn. 20 Matɩ 'wɔan Sesi 'a jinynɩ 'sʋ ɛ, ʋ 'jɔɔ "i, -mɛ Madi -mʋ -teɛ i 'de -gbu" 'di. 21 'Sʋ Matɩ wlu' 'e Sesi -pee, ʋ 'na : Tʋ"bo, -bo -ɩn -nɩ -ta 'de ɛ, -mɛ 'ma de'di se 'mɛi 'de oo. 22 'De kaan ka mɔ 'de ɛ, 'ɩn juɛ' dɛ "klein -ma mua Kea i -teea' a, ɛɛ muɛ nʋa' see. 23 'Sʋ Sesi wluɛ 'de ʋ -pee ɔ 'na : Aa' de'di a muɛ 'kmʋ de jia'. 24 'Bomɔ Matɩ wluu ka ʋ 'na : 'Ɩn 'je kan' 'mɛ, -sɔntɩ 'mɛʋn -wee' a mua 'kmʋ de jia' a, ɔɔ muɛ 'ʋnsɔan' 'e. 25 'De Sesi 'na : 'Mɔ -nɩ "kunyɩɔ' sɔan', 'mɔ -nɩ 'kmʋnɩa', nyɔ -ɔ -jea 'ma -tɩ' tɔ' 'ʋn ɛ, -bo ɔ 'mɛ mɔ 'de ɛ, ɔɔ muɛ 'kmʋnɩa'. 26 'De ka nyɔ -nɩa 'kmʋ -wɛe -ɔ -jea 'ma -tɩ' tɔ' 'ʋn -mɔ sea 'mɛi 'bode, a 'je -mɛ tɔ' 'ʋn 'ɛɛ ? 27 'Sʋ ʋ 'na : Ɩɩn Tʋ"bo, ka -ɩn -nɩa Klisɩ, Kea 'a "Ju, 'de -ma 'nɔ 'blʋa- "kpei ji -tɩ 'tmʋʋa sese ɛ, 'ɩn 'jɩ tɔ' 'ʋn 'ɛ. 28 Matɩ -kɔa' kan' 'daa 'sʋ ʋ muɛ ʋa' "dei Madi 'daa' -wɛe ʋ paa ʋ "sɩan ʋ 'na : -Aa dɛtɔɔi ji' -wɛ-, ɔ 'na a mu. 29 Madi 'wɔan wlu -nɛ 'sʋ ʋ wan 'o 'blʋɔi -fai -wɛe ʋ mu 'e Sesi o. 30 -Ta ɛɛ nʋʋa kan' -mɛ Sesi se -kwlɔ i "si ke, -ta Matɩ 'jɔɔ "i -wɛe ʋ ke ɔ -gbʋʋan' 'bo ɔ nɩ-. 31 -Ta Suifʋ-wi" -a -tua" Madi -tɩ' -kwlɩ' i a kɔan 'e mu 'sʋ ɛ, ʋ "siɛ "kpae' -wii", 'sʋ ʋʋ bla 'bo ʋ 'de, ʋʋmʋ a naa tɔ' i, ʋʋ 'na -mɛ ʋa muɛ -fɩn" 'a 'de -gbaɩn' "kpei 'de-. 32 Madi nynia -ta Sesi nɩa -wɛe ʋ 'jee ɔ "jriɛ- 'sʋ, ʋ -gblee ɔ bɩ wɔ, 'de ʋ 'na : Tʋ"bo, -bo -ɩn -nɩ -ta 'de ɛ, -mɛ 'ma de'di se 'mɛi 'de oo -ba. 33 Sesi a kɔan 'e 'sʋ ʋa -fɩɩn", Suifʋ-wi" -ke ʋ jia ʋʋa -fɩɩn" -ke. 'Sʋ ɔ -ciian' kui', dɛ-nʋɛ' ɛ cɛn ɔ pɛe "i. 34 'De ɔ 'na : -Ta ao -tee ɔ i ɛ- ? 'Sʋ ʋʋ 'na : Tʋ"bo, -ɩn -ji" 'je. 35 'Sʋ Sesi -fɩɩn". 36 Suifʋ-wi" -jee ɔ "jriɛ 'na : Ao -gbʋn dɛ ɔ kma ɔɔ' -tɩ' ɛ. 37 'Sʋ nyʋ jrʋ' wlu' ka 'de ʋʋpʋ "klu, ʋʋ 'na : Ɔmɔ -baia' "dɔi 'a "jri ɛ, ɔ se ɛ 'bɛɛ- ɔ 'je ɛ nʋ -wɛe Lasa se 'mɛi 'de o ? 38 'Sʋ Sesi -ciian' ku' i ke'wlɛ, -wɛe ɔ mu 'e -gbaɩn' "kpei. -Jaa'- -mɛ ʋʋ -teɛ' Lasa i 'de 'soa 'a -kwlewɔn 'di -wɛe ʋʋ nʋ "soukpo ʋʋ kaan 'o mu. 39 Sesi 'na : Ao -sa 'o "soukpo -nɛ ! 'Sʋ "ju -ɔ -mɛa 'a de'di Matɩ 'na : Tʋ"bo, ɔ nʋɛ 'e -gbaɩn' 'di 'wɩ -nyiiɛ, ɔɔ' 'nʋ a ji' la o. 40 Sesi 'na : 'Ɩn se 'na -bo a -te' 'ʋn -kwlɩ" ɛ, aa muɛ Kea 'a 'nynɩ 'wlʋsʋn "jriɛ- 'jeeaa' ? 41 Ʋʋ -sa 'o "sou 'mɛ, -wɛe Sesi kpa "jri "jɛi, 'de ɔ 'na : 'Ɩn "Bo, 'ma poɛ ɛ 'sɛ- dɛ ɛ kpʋn a 'ma baewlu ɛ. 42 Ka ɛɛ kpʋn a 'ma bae wlu jeejee ɛ, 'ɩn 'je kan' 'mɛ, 'kaa 'ɩn 'da kan' 'mɛ 'de nyʋ -gbaea' 'ʋn 'dei -ta 'a -tɩ' 'ʋn, -wɛe ka ɛ dboa 'ʋn ʋʋ 'je ɛ tɔ' 'ʋn 'je. 43 Ɔ 'da kan' 'sʋ ɔ kpa wlu "jɛi kpleiin, ɔ 'na : Lasa, -ɩn -si" "kpae' ! 44 'Sʋ "ju -mɛa -nɔ sɔn 'ʋn 'ɛ. Ka ɔɔ' bɩ ke sɩn -piian' dɩfɔ i ɛ, 'kamɔ ʋʋ nʋ ɔɔ' "jru -ke, 'sʋ ɔ nyna i. 'De Sesi wlu, ɔ 'na : Ao -sɔ dɩfɔ kui, -wɛe ɔ 'je naa' 'bɛɛ- ! 45 Suifʋ -tuu" -jia' Madi -tɩ' -kwlɩ' i -tu" 'a a, ʋʋa' jrʋ' 'jeea dɛ Sesi nʋa "jriɛ- 'sʋ ʋʋ 'je ɔɔ' -tɩ' tɔ' 'ʋn 'ɛ. 46 'Kaa ʋʋa' jrʋ' mu' -wɛe ʋʋ po ɛɛ' "kuan Fariseɛn-wi". 47 'Sʋ Fariseɛn-wi" ke 'sraa -saʋn 'a klae" 'kɩɩɛn -gbajeʋn "jrui -wɛe ʋʋ 'na : Dɛ -a -je nʋ 'ja a- ? "Ju -nɔ, ɔɔ nʋɛ jrii' -tuu"-tuu. 48 -Bo -a -tai" ɔ "i -wɛe ɔ 'jɩ nya kpa 'ja a, -mɛ nyʋ -wee' "klein a muɛ ɔɔ' -tɩ' tɔ' 'ʋn 'jea', -mɛ Rɔmɛ-wi" -blea 'blʋa- -nɛ ʋʋa muɛ jia' -wɛe ʋʋ 'je -aa -kwlɔ mɔ o -aa 'blʋa- ma" i -sa. 49 'Bomɔ ʋʋa' due' Kaifʋ, -ɔ -nɩa 'sraa -sai klaa" 'de ɛɛ' -sʋn -tu 'di wluu-, ɔ 'na : Aoa' 'wɔn dɛ jrɛ' 'mii 'de ɔɔ' -kɔ 'di. 50 -Bo nyɔ due' koʋn -gbai 'mɛ 'bo nyʋ -tuu" 'a -kɔi" ɛ "paa' 'de aoa' -tɩ' 'ʋn, ɛ je 'blʋa- -wee' 'a isɔan' -sii. Aoa' 'wɔn -mɛ 'mii -ta kee ? 51 Dɛ ɔ 'tmʋa 'mʋa- ɛ se 'e ɔɔ' -cɛ" 'kpa 'ʋn 'wlʋ. 'Kaa ɔ nɩa Kea 'a 'sraa -sai klaa" 'de ɛɛ' -sʋn -tu 'di ɛ, ɛmɛ -tɩ ka Sesi 'jea 'mɛ 'de Suifʋ-wi" 'a -tɩ' 'ʋn ɛ, Kea jɔɔ ɛɛ' wlu tu 'kwa, -wɛe ɔɔ 'tmʋ ɛ. 52 'De ɛ se 'e Suifʋ-wi" 'a 'sʋ 'a -tɩ' 'ʋn nɩ-, 'kaa ɔ 'je 'mɛ -o -wɛe ɔ 'je Kea 'a "nynuu- -gbaa dɩ 'mii "jrui 'kɩɛn-, 'de ʋʋ 'je kooa due 'a -cɩɩ ma. 53 Dɛ -tba' 'o ɛɛ' 'wɩ tu 'di ɛ, Suifʋ 'a klae" 'bɛɛ- Sesi 'a 'mɛ -tɩ 'a wlu 'ʋn 'ɛ. 54 Ɛmɛ -tɩ 'de ɛɛ' nɔ" tu 'di ɛ, ka Sesi a nʋa -mu' -ji" 'de Suifʋ-wi" "klu 'de ɛ, ɔ 'bɔ -mɛ o 'kaa ɔ muɛ 'e 'blʋa- jrɛ' -ke -pɩɩɔn" blʋa "kʋan i 'di -wɛe ɔ ke ɔɔ' klai" nynuu -te i 'bo -kwlɔ due' -ɛɛ 'nynɩ nɩa Eflaim 'di. 55 'Sʋ Suifʋ-wi" 'a kʋɔnkwla' 'wlʋ-kɔ "kʋʋan- i. 'De ɛɛ' -tɩ' 'ʋn ɛ, nyʋ -tuu" a muɛ Selisalɛm -wɛe dɛ ʋʋa nʋa see 'de 'pepenɩ -tɩ 'ʋn ɛ, ʋʋ 'je ɛ nʋ. 56 'Sʋ ʋʋa -pɔn Sesi i 'de Kea -gbu klaa" 'di, -wɛe ʋʋa -tee' ba i due 'due ʋʋ 'na : Ka aoa naa tɔ' i ɛ- ? Ɔ se -kɔ' -sɔn jii -ae ? 57 'Sraa -saʋn 'a klae" ke Fariseɛn-wi" 'tmʋʋɛ nyʋ, ʋʋ 'na : -Ta ɔ nɩa nyɔ -ɔ -jea 'o ɛ, -mɛ ɔ ji -a 'tmʋʋ- -wɛe -a -je ɔ kpʋn.

12

1 Kʋɔnkwla' 'wlʋ-kɔ sia 'wɩ -mɛɛo" 'sʋ, Sesi muɛ Betani 'bo Lasa ɔ ja 'kmʋ de o -kwlɔ. 2 'Bomɔ ʋʋ pii ɔ -pee, -wɛe Matɩ a -gble' diidɛ. Lasa nɩɛ 'e nyʋ -ʋʋ -ke Sesi a diia -tadue "klu. 3 'Sʋ Madi "duɛ -dai'klɔ -sooɛ nyʋ a 'daa 'naa -ɛɛ sɔɔn kma 'a 'ʋn ? Ɛ ke dɛ jrɛ' se o beeɛ-. Ɛmɛ ʋ 'wla Sesi 'a bɩ "jru 'de ʋ jaa ɩ ʋa' "mɩɩ- kui. 'Sʋ -dai'klɔni 'a 'nʋ "jiɛ -gbu". 4 'Sʋ Sesi 'a klai" ju due' Suida Isikario, Simɔ 'ɔ "ju -ɔɔ mua Sesi 'e toa' ɔ wlu ka, ɔ 'na : 5 Dɛɛ -tɩ nyʋ se -dai'klɔni -nɛ ple ɛ se 'wɛi -tuu" 'je 'de nyʋ se ɛ nɩɩa" nyʋ "nyɩ ɛ- ? 6 Dɛ ɔɔ 'tmʋa 'mʋa-, ɛ se nɩɩa" nyʋ mʋ -ʋʋa -tɩ' "si ɔ "i nɩ-, kaa ɔ nɩɛ "jrii -o. -Ke ʋʋa' 'wɛi nɩa 'di ɛ, ɔmɔ -ɔɔ -teɛ' i 'kaa ɔɔ -sa 'e 'ɛ mɩ"mɩ". 7 'Bomɔ Sesi wluu- ɔ 'na : -Ɩn -wlʋ 'o "junynɔkpao' -nʋ o 'tɩɩn, dɛ ʋ 'jea 'ma "ku "jrii nʋ 'de ɛ, ɛmɛ ʋa nʋa 'o -ta. 8 Ao ke nɩɩa" nyʋ a muɛ i -tea' jeejee, 'kaa 'mɔ ke ao se i -tei jeejee. 9 Ka Sesi nɩa 'o Betani, Suifʋ-wi" 'wɔn ɛ 'sʋ, ʋʋa' -tuu"-tuu mu 'o 'ɛ. 'Kaa ɛ se Sesi 'a "jriɛ- 'jee-tɩ 'a 'sʋ mɛ ʋʋ mu nɩ-, ʋʋ mu' -wɛe ʋʋ 'e Lasa ɔ -sa "kunyɩɔ' 'je -ke. 10 'Sʋ 'sraa -saʋn klae" -wi" pooɛ -tɩ' -wɛe ʋʋ 'e Lasa 'dba -ke, 11 dɛ-nʋɛ' 'de ɔɔ' -tɩ' 'ʋn ɛ, Suifʋ -tuu"-tuu -ʋʋa -wlʋ 'e ʋʋpʋ "klu -wɛe -ʋʋa -je Sesi 'a -tɩ' tɔ' 'ʋn. 12 -Sɔn' jrɛ' -sɩan' 'sʋ ɛ, nyʋ -tuu"-tuu -ʋʋ jia -kɔ' -sɔn 'wɔn Sesi 'a 'bo Selisalɛm ji -tɩ 'mɛ. 13 'Sʋ ʋʋ cɛn -gbɛn' -wɛe ʋʋ 'jɔɔ "i 'de ʋʋa kpa wlu "jɛi ʋʋa nʋ : -Kai" 'matɛ oo ! "Ju -ɔɔ jia 'de Tʋ"bo 'a 'nynɩ 'ʋn ɛ, "diwan kpʋn ɔ oo ! Kea po Israɛ-kɔʋn 'a 'beɔ "diwan oo ! 14 Sesi 'jeɛ soofae' ju due' mɛ ɔ -te "kpei, ka wlu -crɩɩa' 'de Kea 'a 'sbɛ 'di 'da. 15 Ɛ 'na : Selisalɛm-kɔʋn, faʋn 'bo ao nʋɛ, ao -gbʋn 'nɔ, aoa' 'beɔ ɔ ji', ɔ -teɛ soofae' ju "kpei. 16 Dɩ -nɩa 'mʋa- ɔɔ' klai" nynuu sɩ 'mii 'wɔn "i-saa' nɔ". 'Kaa Sesi mu jaʋn 'di la kpɩɩn- -wɛe ka dɩ -crɩɩa' 'de ɔɔ' -tɩ' 'ʋn 'de- ɩ nynia 'o ɛ, 'de ʋʋ po ɩ -kwlʋ o. 17 -Ta Sesi 'daa- Lasa -wɛe ɔ 'wlʋa 'e -gbaɩn' 'di 'de ɔ jia 'kmʋ de ɛ, nyʋ "klein -jea ɛɛ' -ta a, ʋʋa 'tmʋ ɩ jeejee 'de nyʋ -pee. 18 Ɛmɛ -tɩ nyʋ -tuu"-tuu mu ɔ "i 'jaa', dɛ-nʋɛ' jrii' ɔ nʋa 'mʋa- ɛmɛ -ɛɛ 'nynɩ ʋʋpʋ 'wɔn. 19 'Sʋ Fariseɛn-wi" a wlu' 'bo ʋʋa' 'sʋ 'nynɩ, ʋʋ 'na : Aoa 'jee, nyʋ -wee' "klein bla 'o ɔ 'de -wɛ-. Ao se ɛ 'bɛɛ- ao 'je dɛ jrɛ' nʋ 'bode. 20 Nyʋ -ʋʋ -jia' -gbɛɛa' 'bo Selisalɛm -kɔ 'ɔ 'wɩ o ɛ, Klɛkɩ nyʋ jrʋ' -nɩ 'e ʋʋpʋ "klu. 21 Ʋʋ -kpa Filipʋ -wlʋa 'o Besaida 'de Galile -pʋn", ʋʋ 'na : "Bo, -aa -pɔn -a -ke Sesi 'e 'jee-. 22 Filipʋ mua 'sʋ -mɔ 'tmʋʋ ɛ Ancre, -wɛe ka ʋʋ nɩa 'sɔɔn ʋʋ muɛ Sesi -pee 'tmʋa'. 23 'Bomɔ Sesi "duo- wlu 'ʋn ɔ 'na : Nɔ" -ɛ 'di nyiɔ 'ɔ "Ju 'jea 'nynɩ 'wlʋʋ ɛ, ɛ nyni' -wɛ- la. 24 'Ma 'tmʋʋɛ aopʋ tɔ' -tɩ, kojɔ nyʋ poa 'e -klu' -bo ɛ se 'mɛ 'ja a, -mɛ ɛɛ muɛ due' sia' mamaʋ 'sʋ, 'kaa -bo ɛ 'mɛ 'de 'blʋ 'ʋn ɛ, ɛɛ' kpau a muɛ 'jɔ -tuu" croa'. 25 Nyɔ -ɔɔ -tʋʋan' ɔɔ' -cɛ" 'ɛ 'kmʋ "kpei- ɛ, ɛɛ muɔ kwa "maa', 'de nyɔ -bɔa ɔɔ' -cɛ" 'ɛ 'kmʋ 'de 'blʋa- -nɛ "kpei ɛ, ɔmɔ ɛɛ mu 'kwa sia', -wɛe -ɔ -je 'kmʋ -sea' "ti -ta 'ble 'je. 26 -Bo nyɔ -nɩɛi" ɔ 'je 'ʋn "juɔi nʋʋ ɛ, -mɛ ɔ bla 'bo 'ʋn 'de, -wɛe -ta 'ɩn nɩa, 'ma "juɔinʋʋi 'je 'o nɩ -ke. Nyɔ -ɔɔ nʋʋa 'ʋn "juɔi a muɛ dɛwɔn nɩa' 'de 'ɩn "Bo "jri 'de. 27 'Sʋ ɔ 'na : Kaan ka 'ma pɛe nyna soo. -Wɛe ka 'ɩn 'je 'da la ? 'ɩn nʋ 'ɩn "Bo, ɛ seie 'ʋn 'de 'kle -nɛ 'kwaa ? Ɛ 'bo kan' nɩɛ, dɛ-nʋɛ' 'ɩn ji' -wɛe 'ɩn 'je 'e 'kle 'je nɔ" -nɛ 'ʋn cɛɛn-. 28 Ɛmɛ -tɩ 'ɩn 'na 'ɩn "Bo, ɛ 'bɛɛ' ɛɛ' 'nynɩ "i. 'Sʋ wlu jrɛ' -wlʋ 'e jaʋn 'di -ɛ -na : 'Ɩn 'bɛɛ- ɛ "i 'mɛ sese, 'de 'ma muɛ ɩ "i 'bɛɛ- ke'wlɛ. 29 Nyʋ -nɩa 'o -wɛe -ʋʋ -wɔan wlu -nɛ, ʋʋ 'na : Ɛ -tɛn -plan". Jrʋ' 'na : "Ɩɩn-, ɛ Kea 'a "soai -wlu ɔ -pee. 30 'Bomɔ Sesi 'na : Ɛ se 'de 'ma -tɩ' 'ʋn mɔ wlu -nɛ wluu nɩ-, 'kaa 'de aoa' -tɩ' 'ʋn -o. 31 Kaan ka la 'kmʋ "kpeinyʋ 'a 'pee 'jeeɛ' -wɛ-. -Jɛ mɛ la ʋʋa' "jru kpɔ' i -tei -siɔn' ɔ jiɛ "kpae pooa'. 32 'De 'mɔ ɛ, -sɔntɩ nyʋ a mua 'ʋn tu -kwlɩ" koa' -wɛe ʋʋ 'je ɛ "jɛi kpa a, 'ma muɛ nyʋ -wee' "klein 'a "jua- 'de 'ʋn o "biia'. 33 -Bo ɔ 'tmʋ wlu -nɛ ɛ, -mɛ ka ɔɔ' 'mɛsʋn 'jea nɩ ɛ, ɛmɛ ɔɔ 'tmʋa 'o 'mʋa-. 34 'Bomɔ nyʋ -kwea de wluu ka, ʋʋ 'na : Dɛ -a -jea 'de -aa kɛ'ɛ 'sbɛ 'di ɛ, ɛmɛ -nɩ Klisɩ a muɛ 'kmʋnɩa' jeejee. -Mɛ dɛɛ-tɩ -ɩn -na, ʋʋa muɛ nyiɔ 'ɔ "Ju tu -kwlɩ" kɔa' -wɛe ʋʋ 'je ɛ "jɛi kpa a- ? -Ta -mɔ 'ɔ nyiɔ 'ɔ "ju tu nɩ 'ja a- ? 35 'Sʋ Sesi wlu' 'de ʋʋ -pee, ɔ 'na : 'kmʋ 'a -sɔn' nɩ 'de aopʋ "klu 'mɛ ke 'de 'wɩ pla 'di. -Ta -sɔn' nɩɩa 'e ke ɛ ao na 'de ɛ 'ʋn -wɛe "bɛɛ-kwie je aopʋ "jru -tiie'-. Nyɔ -ɔɔ na 'de kwie 'di ɛ, -ta ɔɔ mua ɔ se 'o juo-. 36 -Ta -sɔn' nɩɩa 'de aopʋ "klu ke ɛ, ao 'je ɛɛ' -tɩ' tɔ' 'ʋn, -wɛe ao 'je -sɔn'ɔ nyʋ 'kpa. Sesi -kɔa' wlu -nɩa 'mʋa- 'tmʋa' 'sʋ, ɔ 'wlʋ 'de ʋʋpʋ "klu 'mɛ -wɛe ɔ "maa ʋʋpʋ "jrii. 37 'Kamɔ ɔ nʋ jrii' -tuu"-tuu -nɩ 'bo Suifʋ-wi" "juɔi, 'kaa ʋʋ se ɔɔ' -tɩ' tɔ' 'ʋn 'je. 38 -Wɛe dɛ Kea 'a wlu 'kwajaai Esai 'tmʋa tɛin" 'de ɛ, ɛ 'je 'o nyni. Ɔ wlu' ka 'de-, ɔ 'naa : Tʋ"bo, -a -tmʋa -ma -tɩ' -tmʋ -tmʋ 'dee, -ɔ -je -aa wlu tɔ' 'ʋn ɛ- ? 'De nyɔ -je Tʋ"bo 'a "ikma sʋn i 'de ɛ 'di ɛ- ? 39 Ʋʋ se ɛ tɔ' 'ʋn 'jea 'bɛɛ-, ɛmɛ Esai 'jee nya i -wɛe ɔ wlu ka ke'wlɛ ɔ 'na : 40 Kea "sun ʋʋpʋ 'a "jri 'mɛ -bo ɛ nɩ kan' -wɛe ʋʋa' "jri 'je i 'je -tɩ 'bɔ, ʋʋa' pɛe 'je i 'wɔn -tɩ 'bɔ 'de ʋʋ je 'nɔ 'ʋn o "biie-, 'de 'ɩn je ʋʋpʋ 'a 'wɛ- 'bɔɔ-. 41 Wlu -nɩa 'mʋa- a, Esai 'jeeɛ Sesi 'a 'nynɩ 'wlʋsʋn nya, ɛmɛ -tɩ ɔɔ 'tmʋ ɩ. 42 'De -mɛ 'kamɔ Suifʋ-wi" 'a klae" jrʋ' 'je Sesi 'a -tɩ' tɔ' 'ʋn, 'kaa ʋʋ se "inyɩɩa 'de Fariseɛn-wi" je ʋʋpʋ inʋ 'de ʋʋa' "jrui 'kɩɩn-gbu 'di. 43 Ʋʋa' nyʋ tu ɛ, ʋʋ se Kea 'a nyʋ -tɩ' o poa' i-pɔn, nyiɔ 'ɔ -nɛ nyʋ -tɩ' o poa' mɛ ʋʋa -pɔn -gbɛin'. 44 'Bomɔ Sesi kpaa wlu "jɛi, ɔ 'na : Nyɔ -jea 'ma -tɩ' tɔ' 'ʋn ɛ, -mɛ ɛ se 'mɔ -ɔɔ -tɩ' ɔ 'je tɔ' 'ʋn nɩ-, -mɛ "ju -dboa' 'ʋn mɔ -ɔɔ -tɩ' ɔ 'je tɔ' 'ʋn. 45 'De nyɔ -jeea' 'ʋn "jriɛ-, -mɛ ɔ 'jee "ju -ɔ dboa 'ʋn "jriɛ- 'mɛ -ke. 46 'Mɔ jiɛ 'e 'blʋa- "kpei -ta, ka -sɔn' nɩa, -wɛe nyɔ "o nyɔ -jea 'ma -tɩ' tɔ' 'ʋn ɛ, ɔ 'bo 'e kwie 'di "ti ɛ. 47 -Bo nyɔ 'wɔn 'ma wlu -wɛe ɔ se ɛ wɔn 'je ɛ, -mɛ ɛ se 'mɔ -je ɔ 'pee kpʋʋn nɩ-, dɛ-nʋɛ' 'ɩn ji' -wɛe 'ɩn 'je nyʋ 'pʋʋ-, 'ɩn se ji -wɛe 'ɩn 'je nyʋ 'pee kpʋʋn-. 48 Nyɔ -saa 'ma wlu sʋn -sɔn, -wɛe -ɔ -na -ɔ se ɛ wɔn 'jei ɛ, -mɛ dɛ -jea ɔ 'pee kpʋʋn, ɛ -nao, -mɛ wlu 'ɩn 'tmʋa ɩmɩ -ɩa mu ɔ 'pee kpʋʋn 'a de'bɔɔwɩ o. 49 Dɛ-nʋɛ' 'ɩn se 'o 'ma -cɛ" -kwlɩ" 'wlʋ -wɛe 'ɩn se wlu-, 'kaa dɩ "klein 'ɩn 'tmʋa 'ɩn 'Bo 'a -cɛ" 'kpa -tuɩ" 'ʋn wɔn -wɛe 'ma tɔɔ ɩ nyʋ. 50 'De 'ɩn 'je kan' 'mɛ, wlu ɛɛ -tua" 'ʋn wɔn ɛ, ɩa poɛ 'kmʋ -sea' "ti -ta 'ble "jru "kpei-. Dɩ 'ma 'tmʋa 'ja a, 'ɩn "Bo mɔ -da kan' -wɛe 'ma 'tmʋ ɩ.

13

1 Kʋɔnkwla' 'wlʋ -kɔ ɔ "kʋʋan i 'sʋ, ka Sesi 'a 'nɔ 'blʋa- "kpei 'wlʋ nɔ" nynia -wɛe ɔ 'jea 'de ɔ "Bo o mu, ɔ 'je kan' 'mɛ. Nyʋ -nɩa ɔɔ' dbɛɛʋn 'nɔ 'blʋa- "kpei, ɔ kma ʋʋpʋ 'a -tɩ' 'mɛ mamaʋ 'sʋ ɔ je mu ɔ je nyni. 2 -Ta Sesi ke ɔɔ' klai" nynuu nɩɩa -kwie" dɛ dia' a, -mɛ -siɔn' po ɔɔ' ple tɔ' 'bo Simɔ 'ɔ "ju Suida Isikario -kwlɩ" -wɛ- sese. 3 Ka Sesi 'wlʋa 'e Kea 'ʋn 'de ɔɔ mua 'e Kea o de ɛ, 'de ka ɔ "Bo -te' ɔ dɩ -wee' "klein kwa a, ɔ juɩ'. 4 Ɔ sɔn 'ʋn 'ɛ 'sʋ ɔ -sa dɩ ɔ paa 'ʋn 'bo "kpei kui 'de ɔ "duo -pua" 'ʋn ɔ cɛn ɛ -sewei'. 5 -Wɛe ɔ po "ni dɛ 'di, 'sʋ ɔ -teɛ ɔɔ' klai" nynuu bɩ iwɔɔa' -pʋn", 'de ɔɔ cri ɩ -puua"- ɔ cɛan -sewei' kui. 6 'Kamɔ ɔ nʋ -wɛe ɔ jɛɛ Simɔ Piɛi, 'sʋ Piɛi 'na : "Ɩɩn- 'de, Tʋ"bo, -mɔ -mɔ' -je 'mɔ bɩ iwɔɔ- ? 7 'Sʋ Sesi wlu ɔ -pee ɔ 'na : Dɛ 'ma nʋa -ta -ɩn se ɛɛ' bʋ juoi kaan ke, 'kaa -ma muɛ 'dei i'wɔan' 'de nya. 8 'De Piɛi 'na : Ɛ se 'bɛɛ-, Tʋ"bo, -ɩn se 'ʋn bɩ iwɔɔi. 'De Sesi 'na : -Bo 'ɩn se -ʋn bɩ iwɔɔ 'ja a, -mɛ -ɩn se 'ʋn dɛ 'kwa 'jei. 9 'Sʋ Simɔ Piɛi 'na : "Aa Tʋ"bo, -bo ɛ nɩ kan' a, -mɛ ɛ 'bo 'ma bɩ 'a 'sʋ nɩɛ, 'kaa -ɩn -jre 'ʋn kwa -ɩn -wɔɔ 'ma "jru 'ʋn -ke. 10 'De Sesi 'na : Nyɔ -jrea 'bode ɛ, -mɔ se ɛ 'bɛɛ- ɔ 'e jre ke'wlɛ -wɛe ɔ 'je 'pepe nɩ- -bo ɛ se ɔɔ' bɩ 'a 'sʋ iwɔɔa' nɩɛ. 'De ao nɩɛ 'pepe -mɔ, 'kaa ɛ se ao -wee' "klein nɩ-. 11 Dɛɛ-tɩ ɔ 'da kan' a, ɛmɛ -nɩ ɔ juo "ju -ɔ -jea ɔ 'e to 'mɛ 'de ʋʋpʋ "klu, ɛmɛ -tɩ ɔ 'na ao -wee' "klein se 'pepe nɩ-. 12 Sesi -kɔa' ʋʋa' bɩ iwɔɔa' 'sʋ, ɔ paa ɔɔ' dɩ 'ʋn 'ɛ, -wɛe ɔ -te i 'de ɔ wlu ʋʋpʋ -pee ɔ 'na : Dɛ 'ɩn nʋa -ta ao 'wɔn 'e ɛ 'dei 'mɛɛ ? 13 Aoa 'daa- 'ʋn Nyʋ dɛtɔɔi ke Tʋ"bo ke, 'de ao -sa tɔ', dɛ-nʋɛ' ɩmɩ 'ɩn nɩ -cɛɛn'-. 14 'Mɔ -jɔ -nɩa Tʋ"bo -wɛe -ɔ -nɩa Nyʋ dɛtɔɔi ɛ, -bo 'mɔ wɔɔ aopʋ bɩ i ɛ, -mɛ ao 'je ba bɩ iwɔɔ -o due 'due -ke. 15 -Kɔ ao 'jea 'o 'de bla a, ɛmɛ 'ɩn tɔɔ aopʋ 'mʋa-, -wɛe ka 'ɩn nʋa a, 'de ao 'je kan' nʋ 'e ba -pee. 16 tɔ' -tɩ 'a tɔ' -tɩ 'ma 'tmʋʋ- aopʋ, nyɔ -ɔɔ nʋʋa nyʋ "juɔi ɛ, ɔ se "i 'bɛ ɔ se -jɔ ɔɔ nʋʋa "juɔi -sii, 'de nyɔ nyʋ dboa ɔ se "i 'bɛ ɔ se -jɔ -dbo' ɔ -sii. 17 Kaan ka la, dɩ ao 'jea nʋ ɛ, ao juɩ' -wɛ-. -Bo ka ɩ "sia 'nynɩ ao nʋ kan' a, -mɛ "diwan a muɛ aopʋ kpʋan'. 18 Ɛ se 'de ao -wee' "klein 'a -tɩ' 'ʋn mɔ 'ma 'tmʋʋ ɛɛ' wlu tu nɩ-. Nyʋ 'ɩn -sa 'o ɛ, 'ɩn juo ʋʋpʋ 'mɛ, 'kaa wlu -crɩɩa' 'de Kea 'a 'sbɛ 'di ɛ, ɛ 'je 'o nyni -o. Ɛɛ' wlu tu 'naa : Tʋ -ke 'ma di, "ju -ɔ -ke 'ma poa sʋn -ta -due ɛ, ɔmɔ -tba' 'ʋn bʋ -pʋn". 19 Ɛɛ' dɛ tu se 'o nyni 'sʋ 'ɩn je nɔ" nya sie 'ɩn je ɛ 'tmʋ 'de ao -pee, -wɛe -bo ɛ nyni 'o ɛ, 'de "ju 'ɩn "sia 'nynɩ, ka ɛ nɩa 'ma -cɛ" 'kpa a, 'de ao 'je ɛ tɔ' 'ʋn 'je. 20 Tɔ' -tɩ 'a tɔ' -tɩ 'ma 'tmʋʋ aopʋ, nyɔ 'ɩn dboa nyɔ -kpʋʋan ɔ sɩn 'sɔɔn ɔ, -mɛ ka nyɔ ɔ kpʋʋan 'mɔ sɩn 'sɔɔn ɔ, 'kamɔ ɛ nɩ-. 'De nyɔ -kpʋʋan 'ʋn sɩn 'sɔɔn ɔ, -mɛ ka nyɔ ɔ kpʋʋan "ju -dboa' 'ʋn sɩn 'sɔɔn, 'kamɔ ɛ nɩ -ke. 21 Sesi -kɔa' wlu -nɩ 'a 'tmʋa' 'sʋ, ɔ pɛe o "kaeɛ "jrii 'sʋ ɔ wa wɔn 'mii 'pepe ɔ 'na : Tɔ' -tɩ 'a tɔ' -tɩ 'ma 'tmʋʋ aopʋ, aoa' due' -a mu 'ʋn 'e toa'. 22 'Sʋ ɛ "maa ɔɔ' klai" nynuu tai', ʋʋa -gbʋɛn' ba ja due 'due, dɛ-nʋɛ' nyɔ Sesi a 'da 'de ʋʋpʋ "klu ʋʋ se ɔ juo-. 23 'De klai" ju due' -jɔ -nɩa Sesi 'a -tɩ' kmaklai" ju -mɔ 'pɛɔn jai. 24 'Sʋ Simɔ Piɛi 'wlɔɔ "jri ja -wɛe ɔ 'je Sesi i -tee' 'de nyɔ ɔɔ 'daa 'a -tɩ' 'ʋn. 25 -Wɛe klai" ju -tu 'pɛan Sesi jai -nɔ, -tee' ɔ i ɔ 'na : Tʋ"bo, ɛ nyɔ -o ɛ- ? 26 'Sʋ Sesi 'na : Nyɔ 'ma mua -di'pɛn tie 'e 'sma o tbaa' -wɛe 'ɩn 'je ɛ "nyɩ ɛ, -mɛ ɔmɔ -nao. Ɔ tbɛ 'de 'sma o 'sʋ ɔ "nyɩ ɛ Simɔ 'ɔ "ju Suida Isikario. 27 Suida 'a -nɛɛ kpʋn -di'pɛn tie 'sʋ Satan pa 'e ɔ 'ʋn 'ɛ. 'Sʋ Sesi wlu ɔ -pee ɔ 'na : Dɛ -ɩn -nɩai" -ɩn -jea nʋ ɛ, -ɩn nʋ ɛ -too"-. 28 Wlu Sesi 'tmʋa 'mʋa-, nyʋ "klein -ke ɔ nɩa dɛ dia' se 'e ɛ 'dei 'wɔn. 29 Dɛ Suida nɩa 'wɛi i -tei ɛ, ɛmɛ ʋʋa' jrʋ' a naa tɔ' i, ʋʋ 'na -mɛ Sesi a wlu ɔ -pee 'de ɔ 'je -kɔ' diidɛ -tɩan' mu. 'De -bo ʋʋmʋ a sea 'je ke'wlɛ ɛ, ʋʋ 'na : -Mɛ Sesi a 'tmʋʋ- Suida 'mɛ -wɛe ɔ 'je wɛenyʋ dɛ "nyɩ. 30 Suida -mɔ kpʋan -di'pɛn tie 'sʋ ɔ crɛɛ "kpei-, ɔ je "kpae' "si, -mɛ kwie kpʋn'. 31 Suida "sia "kpae' 'sʋ Sesi 'na : Kaan ka la nyiɔ 'ɔ "ju 'a 'nynɩ 'wlʋa' po "jri "kpae' -wɛ-, -wɛe Kea 'a 'nynɩ 'wlʋa' 'je "kpae' 'pɛɛn- 'de ɔ 'ʋn. 32 'De -bo Kea 'a 'nynɩ 'wlʋa' po "jri "kpae' 'de ɔ 'ʋn ɛ, Kea a mu ɔ kɛɛma' 'ʋn nʋa' 'de ɛɛ' -cɛ" 'kpa 'ʋn. 'De ɛ -te ɛɛ' nʋ-tɩ -wɛ. 33 'Ma "nynuu-, ao ke 'ma -a -teɛ i 'de nɔ" dɛwɛ- 'di ke. Aoa muɛ 'mi i -pɔan' 'de dɛ 'ɩn 'tmʋa 'de Suifʋ-wi" -pee 'de ɛ, ɛmɛ 'ma 'tmʋ la 'de ao -pee -ke. 'Ɩn 'naa, -ta 'ma mua ao se 'o 'a mua' 'bɛɛ i. 34 'Ma "nyɩ aopʋ kɛ' dee-, ao kma ba 'a -tɩ' due 'due, ka 'ɩn kma aopʋ 'a -tɩ' ɛ, 'kamɔ ao 'je ba 'a -tɩ' kma due 'due -ke. 35 -Bo aopʋ kma ba 'a -tɩ' due 'due ɛ, 'bomɔ ka ao nɩa 'ma klai" nynuu ɛ, nyʋ -wee' "klein 'je ɛ juo-. 36 'Sʋ Simɔ Piɛi -tee' ɔ i ɔ 'na : Tʋ"bo, -ta -ma mu ɛ- ? 'De Sesi 'na : -Ta 'ma mua a, -ɩn se 'o -mɔ 'ɔ jia' 'bɛɛ- kaan ka ke, 'kaa -ma muɛ 'bo 'ʋn 'de blaa' 'de nya. 37 'Sʋ Piɛi 'na : Tʋ"bo, dɛɛ-tɩ 'ɩn se ɛ 'bɛɛ- 'ɩn 'je -ʋn 'de bla kaan ka a- ? 'Ɩn -teɛ 'ma 'kmʋ 'e toa' 'a kein"ke 'de -ma -tɩ' 'ʋn. 38 'Sʋ Sesi 'na : -ɩn -teɛ' -ma 'kmʋ 'e toa' 'a kein"ke 'de 'ma -tɩ' 'ʋn -cɛɛn'- ? 'Kaa tɔ' -tɩ 'a tɔ' -tɩ 'ma 'tmʋ -ʋn, nɔ" -tɩ sʋn" 'jea -sro' -sɩan a, -ma muɛ wlua' kpɛ taan -ɩn -je nʋ, -ɩn se 'ʋn juo-.

14

1 Ao 'bo -sɔɔn -tu" ɛ 'de ao pɛe o, ao -te Kea -kwlɩ" 'de ao 'je 'mɔ -kwlɩ" -te' -ke. 2 -Teɩn -tuu"-tuu -nɩ 'e 'ɩn "Bo o -gbu" -sɔn. -Bo ɛ se kan' nɩ 'de ɛ, -mɛ 'ɩn 'tmʋ -wɛ- 'de ao -pee 'de, 'kaa 'ma muɛ aoa' -teɩn nmaea'. 3 'De -bo 'ɩn mu -wɛe 'ɩn -kɔ' aoa' -teɩn nmaea' a, -mɛ 'ma jiɛ de -wɛe 'ɩn 'je aopʋ 'ʋn "duo- 'de -ta 'ɩn nɩa -wɛe ao 'je 'o nɩ -ke. 4 -Ta 'ma mua ao juo 'o 'ɛ, ao juo 'bo 'a -je 'mɛ. 5 'Sʋ Toma 'na : Tʋ"bo, -ta -ma mua -a sea 'o juo 'ee, ka -a -je 'o 'a -jeblʋ 'a juosʋn nʋ ɛ- ? 6 -Wɛe Sesi wlu ɔ -pee ɔ 'na : 'Mɔ -nɩ -jeblʋ, 'mɔ -nɩ tɔ' -tɩ, 'mɔ -nɩ 'kmʋnɩa'. Nyɔ "o nyɔ -jea 'de 'ɩn "Bo o ji -wɛe -ɔ sea 'de 'ʋn o cɛɛn, -mɔ se nɩ-. 7 -Bo ao juuo 'ʋn 'de ɛ, -mɛ aoa muɛ 'ɩn "Bo juua' -ke, 'kaa dɛ -tba' -ta -sɩan a, ao juuɔ', 'de ao 'jee ɔ "jriɛ- -wɛ-. 8 'Sʋ Filipʋ 'na : Tʋ"bo, -ɩn -tɔɔ -aʋn -ɩn "Bo -wɛe -aa pɛe 'je i -te. 9 'De Sesi 'na : Filipʋ, 'nɔ ao ke 'ma -a -sa naa' 'de tɛan kan' 'sʋ ɛɛ, -ɩn se 'ʋn juuo kee ? Nyɔ -jea 'ʋn, -mɛ ɔ 'je 'ɩn "Bo 'mɛ, -mɛ dɛɛ-tɩ -ɩn -na -ɩn -tɔɔ -aʋn -ɩn "Bo ɛ- ? 10 Ka 'ɩn nɩa 'de "Bo 'ʋn -wɛe "Bo nɩa 'de 'ʋn ɛ, -ɩn se ɛ tɔ' 'ʋn 'jee ? Wlu "klein 'ma 'tmʋa ɩa' 'wlʋ 'o 'ma -cɛ" 'kpa -kwlɩ". 'Ɩn "Bo -tia" 'de 'ʋn ɛ, ɛmɛ -ɛɛ nʋ ɛɛ' -cɛ" 'ɛ nʋʋdɩ. 11 Ka 'ɩn nɩa 'de 'ɩn "Bo 'ʋn -wɛe 'ɩn "Bo nɩa 'de 'ʋn ɛ, ao 'je ɛ tɔ' 'ʋn 'de -bo ɛ se -mɛ nɩ ɛ ao 'je nʋʋ dɩ -nɩ -mɩ tɔ' 'ʋn dɛwɛ-jɛ. 12 Tɔ' -tɩ 'a tɔ' -tɩ 'ma 'tmʋ 'de ao -pee : Nyɔ -jea 'ma -tɩ' tɔ' 'ʋn ɛ, dɩ 'ma nʋa ɔɔ mu ɩ nʋa' -ke, ɔɔ muɛ ɩa' klae" -nɩ mɩ nʋa', ɛ 'je -jɩ 'mɔ nʋa -sii, dɛ-nʋɛ' 'ma muɛ 'e 'ɩn "Bo -pʋn". 13 'De dɛ "klein aoa mua i -teea' 'de 'ma 'nynɩ 'ʋn ɛ, 'ma mu ɛ nʋa', -wɛe 'ɩn "Bo 'a 'nynɩ 'je "i 'bɛ 'de "ju 'ʋn. 14 -Bo ao -tee' dɛ "o dɛ i 'de 'ma 'nynɩ 'ʋn ɛ, 'ma mu ɛ nʋa'. 15 -Bo ao kma 'ma -tɩ', -mɛ ao -te' 'ma kɛ' i 'de aopʋ 'ʋn. 16 -Wɛe 'mɔ 'je 'ɩn "Bo ibae 'de ɛ 'je aopʋ -tɩ' -kwlɩ' i -tu" i deejrɔ' ja -wɛe -mɔ ke aopʋ 'je i -te 'de 'wɩ -wee' 'di. 17 Ɔmɔ -nɩ Kea 'a -Suu -ɛɛ -tmʋa tɔ' -tɩ ɛ. 'Blʋa 'di nyʋ -sea' Kea 'a -tɩ' tɔ' 'ʋn 'je ɛ, ʋʋ se ɛ 'bɛɛ- ʋʋ 'e ɛɛ' -Suu -tu 'je, dɛ-nʋɛ' ʋʋa' juo ɛɛ' nʋʋdɩ "i, ʋʋ se ɛ juuo-. 'Kaa aopʋ mɔ ɛ, ao juuɛ', dɛ-nʋɛ' ɛ ke aopʋ "ti -wɛe ɛɛ mu 'de aopʋ 'ʋn nɩa'. 18 'Ɩn se aopʋ "kwie sie, 'ma muɛ aopʋ o jia'. 19 'De nɔ" pla 'di ɛ, 'blʋa 'di nyʋ se 'ʋn "jriɛ- 'jeei 'bode. 'Kaa aopʋ mɔ ɛ, aoa muɛ 'ʋn "jriɛ- 'jeea', dɛ-nʋɛ' 'ɩn nɩɛ 'kmʋ, 'de aoa muɛ 'kmʋnɩa' -ke. 20 'De ɛɛ' 'wɩ tu 'di ɛ, ka 'ɩn nɩa 'e "Bo 'ʋn -wɛe aomɔ nɩa 'de 'mɔ 'ʋn, 'de 'mɔ nɩa 'e aopʋ 'ʋn ɛ, aoa muɛ jua'. 21 Nyɔ -ɔ kpʋn a 'ma kɛ' i -wɛe -ɔɔ -je ɛ wɔn ɛ, -mɛ ɔmɔ -kma 'ma -tɩ'. 'De nyɔ -kma 'ma -tɩ' ɛ, 'ɩn "Bo a muɛ ɔɔ' -tɩ' kmaa', 'ma muɛ ɔɔ' -tɩ' kmaa' -wɛe 'ɩn 'je 'ma -cɛ" 'kwla -sa 'de ɔ -pee. 22 'Sʋ Suidɩ wlu ɔ -pee, ɛ se Suida Isikario -mɔ nɩ-, ɔ 'na : Tʋ"bo, dɛɛ-tɩ -ɩn -je -ma -cɛ" 'kwla -sa 'de -amɔ -pee, -wɛe -ɩn se -ma -cɛ" toi 'de 'blʋa 'dinyʋ -pee ɛ- ? 23 'Bomɔ Sesi wluu ɔ -pee ɔ 'na : -Bo nyɔ kma 'ma -tɩ' ɛ, ɔɔ muɛ 'ma wlu i -tea' 'de ɔ 'ʋn se -wɛe 'ɩn "Bo 'je ɔɔ' -tɩ' kma-, 'de 'ɩn ke 'ɩn "Bo ke -a -je 'de ɔ 'ʋn ji 'de -a ke ɔ 'je i -te. 24 Nyɔ -sea' 'ma -tɩ' kma -mɔ 'ɔ -te' 'ma wlu i 'de ɔ 'ʋn. 'De -mɛ 'kamɔ wlu aoa 'wɔan -ta, ɛ se 'e 'ma -cɛ" 'ʋn 'wlʋ, ɛ 'wlʋɛ 'e 'ɩn "Bo dboa 'ʋn 'ʋn. 25 -Ta ao ke 'ma -a -teea i ke ɛ, 'bomɔ 'ma 'tmʋʋ- ɩa' dɩ tu 'de ao -pee. 26 'Kaa aoa' -tɩ' -kwlɩ' i -tu" i -Suu -kwɛai 'ɩn "Bo a mua jaa' 'de 'ma 'nynɩ 'ʋn ɛ, ɛmɛ -ɛɛ mu ao dɩ -wee' tɔɔa', -wɛe ɛ 'je ao dɩ "klein 'ɩn 'tmʋa -kwlʋ o poo-. 27 'Ɩn siɛ aopʋ 'de pɛe 'a blua' 'ʋn 'ɩn "nyɩ aopʋ 'ma pɛe 'a blua'. Ka 'blʋa 'dinyʋ a "nyɩa nyʋ dɛ ɛ, 'ɩn se ao pɛe 'a blua' "nyɩ kan'. Ao 'bo -sɔɔn -tu" ɛ, aoa' bo pɛe i pleeɛ. 28 Dɛ 'ɩn 'tmʋa ao 'wɔn ɛ, 'ɩn 'na : 'Ma mu', 'kaa 'ma muɛ aopʋ o de jia'. -Bo ao kma 'ma -tɩ' 'de ɛ, -mɛ dɛ 'ma mua 'de 'ɩn "Bo o ɛ, ɛɛ' muɛ aoa' 'mʋa 'blea 'de-, dɛ-nʋɛ' 'ɩn "Bo 'bɛi" flifli ɛ je 'ʋn -sii. 29 'De kaan ka la, 'ɩn siɛ nɔ" nya 'ɩn je ao dɩ -nɩ 'tmʋʋ-, -wɛe -sɔntɩ ɩa mua 'o nynia' 'de ao 'jɩ tɔ' 'ʋn 'je. 30 'Ɩn ke ao se dɛ -tuu" 'tmʋi, dɛ-nʋɛ' "ju -nɩa 'e nyʋ -sea' Kea juo 'de ɛ, ɔɔ ji'. 'De ɔ ke 'ma- se dɛ i plaan-, 31 'kaa ka 'ɩn kma 'ɩn "Bo 'a -tɩ', -wɛe 'ma nʋa dɩ -wee' 'bo 'ɩn "Bo 'a wlu "i ɛ, 'blʋa 'dinyʋ 'jɩ juo -o. Ao sɔn 'ʋn, -a -wlʋ -ta.

15

1 'Mɔ -nɩ Fiinyɛ tu -cɛɛn'-, 'ɩn "Bo -nɩ ɛɛ' jei. 2 'Dao -tba' 'bo 'ʋn -pʋn" -wɛe -ɛɛ' croa a, -mɛ tujei a 'kpaeɛ. 'De 'dao -jɛ -ɛɛ croa ɔ nmɔ -mɛ 'kwa -wɛe ɛɛ' croa' 'je "kpei 'kpa. 3 Wlu 'ɩn 'tmʋa ao -pee 'de ɛɛ' -tɩ' 'ʋn ɛ, ao nɩɛ 'pepe 'bode. 4 Ao "ti 'de 'ɩn 'ʋn -wɛe 'ɩn 'je 'de aopʋ 'ʋn "ti. Ka -bo tudao se 'o ɛɛ' -gboo -pʋn" "si, -mɛ ɛ sea croa' 'bɛɛ-, 'kamɔ -bo ao ke 'ma -a se "i "sii- ɛ, -mɛ ao se ɛ 'bɛɛ- ao 'je dɛ 'jrɛ nʋ. 5 'Mɔ -nɩ Fiinyɛ tu -wɛe aomɔ nɩ ɛɛ' 'dae-. Nyɔ -tia" 'de 'mɔ 'ʋn -wɛe -ɔ 'ʋn 'mɔ "tia, -mɛ ɔɔ 'bleɛ 'jɔ -tuu". 'De -bo 'mɔ se 'e aopʋ 'ʋn nɩ ɛ, ao se ɛ 'bɛɛ- ao 'je dɛ jrɛ' nʋ. 6 -Bo nyɔ -ke 'ma -a se "i "sii- ɛ, -mɛ ka tudao -ɛɛ' croa 'jɔ nɩa, 'kamɔ ɔ nɩ-. Ɛɛ' tudao tu ɛ, tujei a -sɛ' 'o ɛɛ' -gboo -pʋn" 'mɛ -wɛe ɔɔ po ɛ i, -wɛe nyʋ a po tudae soɛ "jri 'de ɩa wan. 7 -Bo ao "ti 'de 'ʋn -wɛe 'ma wlu 'je 'e aopʋ 'ʋn "ti ɛ, -mɛ dɛ ao nɩai" ao -tee' ɛ i, aoa mu ɛ 'jea' see. 8 -Bo ao cro 'jɔ -tuu" ɛ ɛmɛ -ɛɛ muɛ nʋa' -wɛe 'ɩn "Bo 'a 'nynɩ 'je "i 'bɛ -wɛe aopʋ 'je 'ma klai" nynuu nɩ-. 9 Ka "Bo kma 'ma -tɩ' ɛ, 'kamɔ 'ɩn kma aopʋ 'a -tɩ' -ke. Ao -te' 'e 'ma nyʋ 'a -tɩ' kmaa' 'di i. 10 -Bo ao 'je 'ma wlu wɔn ɛ, -mɛ aoa muɛ 'e 'ma nyʋ 'a -tɩ' kmaa' 'ʋn "tia, ka 'ɩn 'jea 'ɩn "Bo 'a wlu wɔn -wɛe 'ɩn "tia 'de ɔɔ' nyʋ 'a -tɩ' kmaa' 'ʋn ɛ. 11 'Ɩn 'tmʋ ɩa' dɩ tu 'mɛ 'de ao -pee -wɛe 'ma 'mʋa- 'je 'e aopʋ 'ʋn nɩ-, 'de aoa' 'mʋa- 'je 'pepe nɩ-. 12 'Ma kɛ' ka : Ao kma ba 'a -tɩ' due 'due ka 'ɩn kma aopʋ 'a -tɩ' ɛ. 13 Nyʋ 'a -tɩ' kmaa' -jɛ -jea "i 'bɛ -ɛ -jea -ɩn -to 'e -ma 'kmʋ 'de -ma "dɛi-wi" 'a -tɩ' 'ʋn -sii, -mɛ se nɩ-. 14 Dɛ 'ɩn 'tmʋa 'de ao -pee -bo ao nʋ ɛ, -mɛ aopʋ nɩɛ 'ma "dɛi-wi" -o. 15 'Ɩn se aopʋ "juɔinʋʋn 'daa- 'bode, dɛ-nʋɛ' nyɔ -nɩa nyʋ "juɔinʋʋi ɛ, dɛ ɔɔ' 'blei a nʋa ɔ se ɛ juo-, 'kaa 'ma 'daa- aopʋ "dɛi-wi", dɛ-nʋɛ' dɩ "klein 'ɩn 'cɩan 'bo "Bo -pʋn" ɛ, 'ɩn -sɩ 'kwla 'de ao -pee. 16 Ɛ se aopʋ -sa 'ʋn 'bomu nɩ-, ɛ 'mɔ -kpa 'e nyʋ "klu sʋn -ɔ -cra aopʋ i -wɛe ao 'je mu, ao 'je 'jɔ cro 'de aoa' 'jɔ 'je sie 'kpa nʋ -wɛe dɩ aoa mua "Bo i -teea' 'de 'ma 'nynɩ 'ʋn ɛ, ɛ 'je ɩ aopʋ "nyɩ. 17 Dɛ -ɛɛ -cɩɛ 'ma cria 'de ao -pee -gblein', ɛmɛ -nɩ ao kma ba 'a -tɩ' due 'due. 18 Ao si ɛ -kwlʋ o -bo 'kmʋ "kpei nyʋ 'nyɛ aopʋ 'ʋn ɛ, -mɛ 'mɔ mɔ ʋʋ 'nyɛ 'ʋn tɛin". 19 -Bo ao nɩ 'blʋa "kpei nyʋ 'de ɛ, -mɛ 'kmʋ a muɛ aoa' -tɩ' kmaa' 'de-, ka ɛɛ' -cɛ" 'ɛ 'bleedɩ nɩa. 'Kaa dɛ ao sea ɛɛ' nyʋ nɩ-, -wɛe 'mɔ -sa aopʋ 'e 'kmʋ "kpei nyʋ "klu ɛ, ɛmɛ -tɩ ʋʋ 'nyɛ aopʋ 'ʋn. 20 Wlu 'ɩn 'tmʋʋa aopʋ ɛ, ao po ɛ -kwlʋ o, nyʋ "juɔinʋʋi se "i 'bɛ ɔ se ɔɔ' 'blei -sii. -Bo ʋʋ -tu" 'ʋn 'kle ɛ, ʋʋa muɛ aopʋ 'kle -tu" 'a -ke. -Bo ʋʋ -te' 'ma wlu i ɛ, -mɛ ʋʋa muɛ aoa' -nɛ wlu i -tea' -ke. 21 'Kaa ʋʋa muɛ aopʋ dɩ -nɩ -wee' "klein "jrii nʋa' 'de 'ma -tɩ' 'ʋn, dɛ-nʋɛ' ʋʋ se "ju -dboa' 'ʋn juo-. 22 -Bo 'ɩn se ji -wɛe 'ɩn se ʋʋ 'tmʋʋ 'de ɛ, -mɛ ʋʋ se dɛsaʋnʋʋn nɩi 'de-, 'kaa kaan ka ʋʋ se -too' -ta 'ble 'de ʋʋa' dɩsaɩn 'a -tɩ' 'ʋn 'bode. 23 Nyɔ -nyɛa 'mɔ 'ʋn ɛ, -mɛ ɔ 'nyɛ 'ɩn "Bo 'ʋn 'ɛ -ke. 24 Dɩ nyɔ jrɔ' sea nʋ due', -bo 'ɩn sɩ nʋ 'de ʋʋpʋ "klu 'de ɛ, -mɛ ʋʋa' dɩsaɩn se -srooɛ -i 'bo ʋʋ "jru 'de-, 'kaa kaan ka ʋʋ 'jee- 'ma nʋʋdɩ "jriɛ- 'mɛ 'pepe, -wɛe ʋʋ 'nyɛ 'mɔ ke 'ɩn "Bo 'ʋn. 25 'Kaa ɛɛ' dɛ tu nʋʋɛ' -wɛe wlu -crɩɩa' 'de ʋʋa' kɛ' 'di nyni 'o. Ɛɛ' wlu tu 'naa : Ʋʋ 'nyɛ 'ʋn 'ɛ foo" 'ʋn. 26 "Ju -jea aopʋ -tɩ' -kwlɩ' i -tu", ɔɔ muɛ jia', ɛmɛ -nɛ Kea 'a -Suu -ɛɛ -tmʋa tɔ' -tɩ, -ɛ -wlʋa 'de 'ɩn "Bo o ɛ. 'Ma muɛ ɛ aopʋ- -jei" pooa' 'de 'ɩn "Bo 'a 'nynɩ 'ʋn, -wɛe -bo ɛ ji ɛ, 'de ɛ 'je 'ma -pʋn" -tɩ 'tmʋ. 27 'De aopʋ mɔ ɛ, ao 'je 'ma -po' bla -o -ke, dɛ-nʋɛ' 'nɔ ao ke 'ma -a -sa naa' 'bo tɛn'.

16

1 'Ɩn 'tmʋ ɩa' dɩ tu 'mɛ 'de ao -pee, -wɛe ao je 'ma -kwlɩ" -tea' o 'bɔ. 2 Ʋʋa' muɛ aopʋ i nʋa' 'de "jrui 'kɩɩn-gbi 'dii. Nɔ" jrɛ' -ɛɛ mu 'o nynia' -mɔ -wɛe -bo ʋʋa sea aopʋ 'dba a, ʋʋ 'je -mɛ Kea 'a -kwlʋtɩ nʋa' 'daa-. 3 'Kamɔ ʋʋa mu nʋa', dɛ-nʋɛ' ʋʋ se 'ɩn ke 'ɩn "Bo juo-. 4 'Ɩn 'tmʋ ɩa' wlu tu 'mɛ 'de ao -pee -wɛe -bo ɩa' nɔ" nyni ɛ, 'de ka 'ɩn sia nɔ" nya -wɛe 'ɩn -saa aopʋ fɛn' ɛ, ao 'je ɛ -kwlʋ o po. 'Ɩn se "i-saa' 'ɩn sɩ 'tmʋ, dɛ-nʋɛ' ɛmɛ -nɩ ao ke 'ma -a -teɛ i. 5 'Kaa kaan ka la 'ma muɛ 'o "ju -dboa' 'ʋn -pʋn", 'de aoa' due' koʋn -gbai' ka se 'mi i -tee' ɔ se 'na : -Ta -ma mu ɛ- ? 6 'Kaa dɛ 'ɩn 'tmʋa 'de ao -pee ɛ, -mɛ "kaeɛ aoa' pɛe "jrii. 7 'De -mɛ 'kamɔ dɛ 'ma 'tmʋa aopʋ nɩɛ tɔ' -tɩ, 'ma mua' "paa' 'de aoa' -tɩ' 'ʋn, ɛ je 'ma i -tea' -sii, dɛ-nʋɛ' -bo 'ɩn se mu 'ja a, -mɛ aoa' -tɩ' kwlɩ' i -tu" i se jii. 'Kaa -bo 'ɩn mu -wɛe 'ɩn 'je ɔ ao -jei" poo-. 8 'De -bo -tɩ' kwlɩ' i -tu" i ji ɛ, ɔɔ muɛ kmʋ -nɛ 'ɛ "jri -gbaia' 'de dɛsaʋn o, -tɩ' "i -klɛɛa' o, 'pee 'a -tɩ' 'ʋn. 9 Ɔɔ muɛ 'kmʋ -nɛ 'ɛ "jri -gbaia' 'de dɛsaʋn 'a -tɩ' 'ʋn ɛ, dɛ-nʋɛ' 'kmʋ "kpei nyʋ 'a 'je 'ma -tɩ' tɔ' 'ʋn. 10 Ɔɔ muɛ 'kmʋ -nɛ 'ɛ "jri -gbaia' 'de "i -klɛɛ -tɩ' 'ʋn ɛ, dɛ-nʋɛ' 'ma muɛ 'ɩn "Bo o, 'de ao se 'ʋn "jriɛ- 'jeei 'bode. 11 Ɔɔ muɛ 'kmʋ -nɛ 'ɛ "jri -gbaia' 'de 'pee 'a -tɩ' 'ʋn, dɛ-nʋɛ' 'blʋa -nɛ 'ɛ kɛɛma' 'a 'pee 'jeeɛ -wɛ. 12 'Ɩn 'bleɛ dɩ -tuu"-tuu ke'wlɛ 'ɩn 'je ao 'tmʋʋ-, 'kaa ao sɩ "wɔin 'bɛɛi kaan ka ke. 13 -Bo aoa' -tɩ' -kwlɩ' i -tu" i ji ɛ, -wɛe ɛ 'je aopʋ tɔ' -tɩ -wee' tɔɔ-, dɛ-nʋɛ' ɔmɔ -nɩ tɔ' -Suu. Dɩ ɛ 'wɔan 'de "Bo 'wɔn ɩmɩ -ɛɛ mu 'tmʋa', ɛ se -tɩ' 'bo ɛɛ' -cɛ" -kwlɩ" -sai 'sʋ ɛ sɩ 'tmʋi. -Wɛe dɩ -ɩa mua nʋʋa' 'de nya a, ɛ 'je -mɩ 'kwla -sa -ke 'de ao -pee. 14 Ɛɛ muɛ 'ma 'nynɩ "i 'bɛɛ-, dɛ-nʋɛ' dɩ -nɩa 'de 'ʋn ɛ, ɩmɩ ɛ 'je 'ʋn "duo- -wɛe ɛ 'je wɔ -sa 'de ao -pee. 15 Dɩ "klein 'ɩn "Bo 'blea ɩ nɩɛ 'ma dɛ -o -ke, ɛmɛ -tɩ 'ɩn 'na dɩ -nɩa 'de 'ʋn ɛ, ɩmɩ ɛ 'je 'ʋn "duo- -wɛe ɛ 'je wɔ -sa 'de ao -pee, 16 'Sʋ Sesi 'na : Ao se 'ʋn "jriɛ- "kpei poi 'de 'wɩ pla 'di, -wɛe -bo nɔ" jrɛ' -sii 'o 'de ao 'je 'ʋn "jriɛ- 'jee- ke'wlɛ. 17 'Bo wlu -nɩa 'mʋa- "kpei 'sʋ ɔɔ' klai" nynuu jrʋ' -teɛ wlua' -pʋn" 'bo ʋʋa' 'sʋ 'nynɩ, ʋʋ 'na : Dɛ ɔɔ 'tmʋa 'de -a -pee -ta 'ee, -mɛ 'de 'a 'nynɩ wɛ- ? -Jɛ -nɩ ao se 'ʋn "jriɛ- "kpei poi 'de 'wɩ pla 'di -wɛe -bo nɔ" jrɛ' -sii 'o 'de ao 'je 'ʋn "jriɛ- 'jee ɛ- ? 'De -jɛ -nɩ 'ma muɛ 'de 'ɩn "Bo o ɛ- ? 18 Nɔ" -ɛɛ -tɩ' ɔɔ 'tmʋa 'mʋa- -mɛ 'de 'a 'nynɩ wɛ- ? Dɛ ɔ nɩai" ɔ 'jea 'tmʋ, -a se ɛ juo-. 19 Ka ʋʋa -pɔan Sesi 'a i -tee' -kɔ i ɔ 'jea kan' 'sʋ, ɔ wlu 'de ʋʋ -pee ɔ 'na : Dɛ 'ɩn 'na ao se 'ʋn "jriɛ- "kpei poi 'de nɔ" jrɛ' 'di, -wɛe -bo nɔ" jrɛ' -si' 'de ao 'je 'ʋn "jriɛ- 'jee ɛ, ɛmɛ -ɛɛ ba aoa -tee' ii ? 20 Tɔ' -tɩ 'a tɔ' -tɩ 'ma 'tmʋʋ aopʋ, aoa muɛ -fɩn" 'a, aoa muɛ kpleea', 'kaa 'blʋa 'dinyʋ a muɛ 'mʋa- nʋa'. Aoa muɛ "jrii "kaea', 'kaa aoa' "jrii "kaea' a muɛ 'mʋa- 'ʋn -snɛɛa'. 21 -Bo 'nynɔkpao' a sea -gbaan ʋa "kaeɛ "jrii "kɩkɩ, dɛ-nʋɛ' ʋa' -nɛ 'kle 'je nɔ" mɛ -nyni' 'o. 'Kaa -bo ʋa' "ju 'wlʋ 'sʋ ʋ "mae ʋa' 'kle o -wɛe ʋ nɩ 'e 'mʋa- 'ʋn 'de nyiɔju -jia' 'kmʋ 'a -tɩ' 'ʋn. 22 Aomɔ -ke 'ja a, ao nɩɛ 'e "jrii "kaea' 'ʋn kaan, 'kaa ao ke 'ma muɛ 'jeea' -wɛe aoa' pɛe 'je 'e 'mʋa- 'ʋn nɩ- 'de nyɔ jrɔ' se ɛɛ' 'mʋa- tu 'de aopʋ 'ʋn -sai. 23 'De ɛɛ' nɔ" tu 'di ɛ, ao se 'mi i -tee' i 'bode 'de dɛ jrɛ'ɛ -tɩ' 'ʋn. tɔ' -tɩ 'a tɔ' -tɩ 'ma 'tmʋʋ aopʋ, dɛ "o dɛ aoa mua 'ɩn "Bo i -teea' 'de 'ma 'nynɩ 'ʋn ɛ, ɛɛ mu ɛ aopʋ "nyɩa'. 24 Dɛ "nana -nɩa 'de ɛ, ao se dɛ jrɛ' i -tee' ke 'de 'ma 'nynɩ 'ʋn. Ao -tee' dɛ i aoa mu ɛ 'jea', -wɛe aoa' 'mʋa- 'je 'pepe nɩ-. 25 'Kaa nɔ" jrɛ' -ɛɛ mu nynia' -wɛe 'ɩn se aopʋ -pee wlui 'de -tɩ' "ipooa' 'ʋn, 'ma muɛ wɔn' iwaa' 'ɩn 'je 'ɩn "Bo 'a -tɩ' 'tmʋ 'de ao -pee. 26 -Bo ɛɛ' nɔ" tu nyni 'o ɛ, aoa' -cɛ" 'kpa a muɛ dɛ i -teea' 'de 'ma 'nynɩ 'ʋn. 'Ɩn se 'na 'ma muɛ 'ɩn "Bo baea' 'de aoa' -tɩ' 'ʋn. 27 'ɩn "Bo 'a -cɛ" 'kpa -kma aoa' -tɩ', dɛ-nʋɛ' ao kma 'ma -tɩ' -wɛe ka 'ɩn 'wlʋa 'e Kea 'ʋn ao 'je ɛ tɔ' 'ʋn. 28 'Ɩn 'wlʋɛ 'de "Bo 'ʋn -wɛe 'ɩn ji 'nɔ 'kmʋ "kpei. Kaan ka a, 'ma 'wlʋ 'nɔ 'kmʋ "kpei 'mɛ la -wɛe 'ma mu 'o 'ɩn "Bo -pʋn" de. 29 'Sʋ ɔɔ' klai" nynuu 'na : kaan ka -ma wa wɔn' i -ma jea -a -tmʋʋ', ɛ se 'e -tɩ' "ipooa' 'ʋn nɩ-. 30 Ka -ɩn -jua dɩ -wee' "klein -wɛe dɩ nyɔ 'jea -mi i -tee' -ɩn -jua -mɩ -ke ɛ, -a -je kan' -wɛ- la. Ɛmɛ -tɩ ka -ɩn -wlʋa 'e Kea 'ʋn -a -je ɛ tɔ' 'ʋn. 31 'Sʋ Sesi 'na : Aopʋ 'je ɛ tɔ' 'ʋn -wɛ- laa ? 32 Ao -gbʋn 'nɔ, nɔ" jrɛ' -ɛɛ mu nynia', 'de ɛ nyni 'o -wɛ- mɔ'ɔ -cɛ", 'de ɛɛ' nɔ" tu 'di ɛ, aoa muɛ ja -gbaa', jrɔ' 'je ɔɔ' -nɛ ka 'kpaa', jrɔ' 'je ɔɔ' -nɛ ka 'kpaa', -wɛe ao 'je 'ma 'sʋ sie-, 'kaa 'ɩn se due' nɩ-, 'ɩn "Bo ke 'ma -a -na'. 33 'Ɩn 'tmʋ ɩa' dɩ tu 'mɛ 'de ao -pee -wɛe aoa' pɛe 'je blu 'de ao ke 'ma "i "siia 'ʋn. Aoa muɛ 'kle 'jea' 'de 'kmʋ "kpei, 'kaa ao kuu dɩ i, 'ɩn du 'kmʋ 'a tʋ 'mɛ.

17

1 Sesi -kɔa' wlua' kan' 'sʋ, ɔ kpa "jri "jɛi 'de ɔ -gbʋn 'e jaʋn-kwlʋ, 'de ɔ 'na : 'Ɩn "Bo, nɔ" nyni' -wɛ-, ɛ 'bɛɛ ɛɛ' "ju "i -wɛe ɛɛ' "ju 'je ɛ "i 'bɛɛ- -ke, 2 'De ɔ 'je nyʋ "klein ɛ -tea' ɔ kwa 'kmʋnɩa' -sea' -kwɛ -ta 'ble "nyɩ, dɛ-nʋɛ' ɛ -nyɩ" 'ʋn "ikmaa' 'bo nyʋ -wee' "jru kpɔ'. 3 'Kmʋnɩa' -sea' -kwɛ -ta ble -nɛ, ɛɛ' 'jea' mɛ -nɩ ɛmɛ Kea -cɛɛn'- ɛɛ' juua', ɛ ke Sesi Klisɩ ɛ dboa 'a juua' ke-. 4 'Ɩn 'bɛɛ- ɛɛ' 'nynɩ "i 'mɛ 'de 'blʋa- "kpei, dbo ɛ -nyɩa" 'ʋn 'ɩn -kɔ' ɛɛ' nʋa' -wɛ-. 5 Kaan la 'ja a, 'ɩn "Bo, 'ma tʋ"bodɛ 'ɩn nɩa 'ʋn 'bo ɛ -pʋn" 'de ɛ, -mɛ 'kmʋ sea nʋʋɛ ke ɛ, ɛ -nyɩɛ" 'ʋn. 6 Nyʋ ɛ -sa 'e 'blʋa 'dinyʋ "klu -wɛe ɛ -nyɩa" 'ʋn ɛ, 'ɩn tɔɔ ʋʋpʋ ɛɛ' 'nynɩ -wɛ-, ʋʋ nɩɛ ɛɛ' nyʋ -o 'de-, -wɛe ɛ -te' ʋʋpʋ 'ʋn kwa, 'de ʋʋ 'jeɛ ɛɛ' wlu wɔn. 7 Ka dɩ "klein ɛ -nyɩa" 'ʋn ɩ 'wlʋa 'de ɛ 'ʋn ɛ, ʋʋ 'je kan' -wɛ- la, 8 dɛ-nʋɛ' wlu ɛ -tua" 'ʋn ɛ, ɩmɩ 'ɩn 'tmʋʋ ʋʋpʋ, ʋʋ kpʋn ɩ sɩn 'sɔɔn. Ka 'ɩn 'wlʋa 'de ɛ 'ʋn ɛ, ʋʋ 'je kan' 'mɛ -cɛɛn'-, -wɛe ka ɛ -dboa' 'ʋn ʋʋ 'je ɛ tɔ' 'ʋn. 9 Ʋʋpʋ a baea' 'ma bae, 'ɩn se ɛ -bae 'de 'kmʋ "kpei nyʋ 'a -tɩ' 'ʋn, 'kaa nyʋ ɛ -tea' 'ʋn kwa ʋʋpʋ a baea' 'ma bae, dɛ-nʋɛ' ʋʋ nɩɛ ɛɛ' nyʋ -o. 10 'De dɛ "klein 'ɩn 'blea ɛ nɩɛ ɛɛ' dɛ -o, 'de dɛ "klein ɛ -blea ɛ nɩɛ 'ma dɛ -o -wɛe 'ma 'nynɩ 'bɛɛ "i 'de ʋʋpʋ 'ʋn. 11 'Mɔ se 'e 'blʋa- "kpei nɩ 'bode, 'kaa ʋʋmʋ siɛ 'nɔ 'blʋa- "kpei, 'de 'ma jiɛ 'de ɛ o. 'Ɩn "Bo -nɩa 'pepe nyʋ ɛ -nyɩa" 'ʋn, ɛ -tu" ʋa' -tɩ', -wɛe ʋʋ 'je due' nɩ ka ɛ -ke 'ma -a -nɩa 'due ɛ. 12 -Ta ʋʋ ke 'ma -a -nɩɩa 'de 'blʋa- "kpei 'de ɛ, 'ma -tuɛ" ʋʋpʋ 'a -tɩ' 'de ɛɛ' 'nynɩ 'ʋn. Nyʋ ɛ -tea' 'ʋn kwa ʋʋa' due' koʋn -gbai' ka se "ma, -bo ɛ se -jɔ -jea "ma see nɩ ɛ, -mɛ 'ɛ dɛ tu nʋʋɛ' -wɛe wlu -crɩɩa' ɛ je 'o nyni. 13 'Kaa kaan ka la, 'ma jiɛ 'de ɛ o, -wɛe 'ma 'tmʋ wlu -nɩ 'nɔ 'blʋa- "kpei 'de 'mʋa- -cɛɛn'- -nɩa 'de 'ɩn 'ʋn ɛ, ɛ 'je 'e ʋʋpʋ 'ʋn nɩ- -ke. 14 'Ɩn "nyɩ ʋʋpʋ ɛɛ' wlu 'mɛ -wɛe 'blʋa dinyʋ 'nyɛ ʋʋpʋ 'ʋn, dɛ-nʋɛ' ʋʋ se 'blʋa 'di nyʋ nɩ- ka 'mɔ sea 'blʋa 'dinyɔ nɩ -ke ɛ. 15 'Ɩn se ɛ -bae -wɛe ɛ -je ʋʋpʋ 'de 'blʋa- "kpei -sa, 'kaa 'ma bae ɛ -wɛe ɛ 'je ʋʋpʋ 'a -tɩ' -tu" 'de nyɔsaʋn 'a -tɩ' 'ʋn. 16 Ʋʋ se 'blʋa 'dinyʋ nɩ-, ka 'mɔ sea 'blʋa 'dinyɔ nɩ -ke ɛ. 17 Ɛ nʋ ɛɛ' wlu ɛ 'je ʋʋpʋ kpɔi" -tee, ɛɛ' wlu nɩɛ tɔ' -tɩ o. 18 Ka ɛ dboa 'ʋn 'de 'kmʋ "kpei ɛ, 'kamɔ 'ɩn dbo ʋʋpʋ 'de 'blʋa 'dinyʋ "klu -ke. 19 'Ɩn "nyɩ ɛ 'ma -cɛ" 'mɛ 'de ʋʋpʋ 'a -tɩ' 'ʋn, -wɛe ʋʋmʋ -ke ɛ, ʋʋ 'je ɛɛ' -tea' -te -cɛɛn'- -cɛn -cɛɛn'-. 20 'Ɩn se ɛ -bae 'de ʋʋpʋ 'a 'sʋ 'a -tɩ' 'ʋn, 'kaa nyʋ -ʋʋa mua 'ma -tɩ' tɔ' 'ʋn 'jea' 'de nya 'bo ʋʋa' wlu "i ɛ, 'ma bae 'ɛ -ke 'de -wi" -mʋ 'a -tɩ' 'ʋn, 21 -wɛe ʋʋ 'je due' nɩ- ka ɛmɛ -nɩa 'ɩn "Bo ɛ nɩa 'de 'mɔ 'ʋn 'de 'mɔ nɩa 'e ɛmɛ 'ʋn ɛ. 'De ʋʋmʋ 'je due' nɩ 'de -a 'ʋn, -wɛe ka ɛ dboa 'ʋn 'blʋa 'dinyʋ 'je ɛ tɔ' 'ʋn 'je. 22 Tʋ"bodɛ ɛ -nyɩa" 'ʋn ɛ, 'ɩn "nyɩ ɛ ʋʋpʋ 'mɛ, -wɛe ʋʋ 'je due' nɩ- ka ɛ ke 'ma -a -nɩa due' ɛ : 23 'Mɔ nɩ 'e ʋʋpʋ 'ʋn -wɛe ɛmɛ -nɩ 'e 'mɔ 'ʋn, 'de ʋʋpʋ 'je due' nɩ 'pepe, -wɛe 'blʋa 'dinyʋ 'je ɛ juo- ka ɛmɛ -dboa' 'ʋn ɛ, ɛ kma ʋʋa' -tɩ 'ka ɛ kma 'ma -tɩ' ɛ. 24 'Ɩn "Bo, 'ma -pɔn -ta 'ɩn nɩa, nyʋ ɛ nyɩa" 'ʋn 'je 'o nɩ -ke, -wɛe ʋʋ 'je 'ma tʋ"bodɛ "jriɛ- 'jee-, tʋ"bodɛ ɛ nyɩa" 'ʋn 'de 'ma -tɩ' kmaa' 'ʋn -mɛ 'kmʋ sea nʋʋɛ ke ɛ. 25 'Ɩn "Bo ɛ -srɛi", 'blʋa 'dinyʋ se ɛ juo-, 'kaa 'mɔ juo ɛ, 'de ka ɛ dboa 'ʋn ɛ, nyʋ -jʋ -nʋ -wi" -mʋ juɩ'. 26 'Ɩn tɔɔ ʋʋpʋ ɛɛ' 'nynɩ 'mɛ, 'de 'ɩn 'je ɛɛ' 'nynɩ ʋʋpʋ tɔɔ -o ke'wlɛ, -wɛe 'ma -tɩ' kmaa' -ɛ -nɩa 'de ɛ 'ʋn ɛ, ɛ 'je 'e ʋʋpʋ 'ʋn nɩ-, 'de 'mɔ 'je 'e ʋʋpʋ 'ʋn nɩ-.

18

1 Sesi -kɔa' wlua' kan' 'sʋ ɛ, ɔ ke ɔɔ' klai" nynuu muɛ 'e "niju -ɛɛ 'nynɩ nɩa Sedrɔn 'de. 'Bomɔ -kle' jrɛ' nɩ -wɛe ɔ ke ɔɔ' klai" nynuu paa 'bo ɛ 'di. 2 Suida -jɔɔ to ɔ 'e ɛ, -mɔ juo 'bo 'a -ta -tu 'mɛ see, dɛ-nʋɛ' Sesi ke ɔɔ' klai" nynuu -kwle "jrui 'kɩɩan' 'mɛ 'bomu. 3 Suida -nɔ kɔn 'e "soa-wi" o, 'sraa -saʋn 'a klae" ke Fariseɛn dboa 'mla -wɛe ʋʋ 'ble -tai ke -dam'ba ke poodɩ ke 'de ɔ ke ʋʋ mu 'o -kle' -nɛ 'di. 4 Sesi jua dɩ -ɩa ji ɔ "jrii nʋʋa' 'sʋ ɛ, ɔ 'jaa nyʋ -ʋʋa ji ɔ kpʋan' "i, 'de ɔ 'na : Nyɔ aoa -pɔn i ɛ- ? 5 Ʋʋ 'na : -Aa -pɔn Sesi -wlʋa Nasarɛtɩ i. 'Sʋ ɔ 'na : 'Ɩn ka. 'De Suida -ɔɔ to ɔ 'e ɛ, -mɔ ke ʋʋ -wee' nɩ 'mʋa- 'mɛ. 6 -Ta Sesi wluua 'de ʋʋ -pee -wɛe ɔ 'na 'ɩn ka 'sʋ, ʋʋ -saa kɩn -wɛe ʋʋ -wee' 'wla 'blae 'bo 'blʋɔ. 7 Sesi -teɛ' ʋʋpʋ i ke'wlɛ, ɔ 'na : Nyɔ aoa -pɔn' i ɛ- ? 'Sʋ ʋʋ 'na : Sesi -wlʋa Nasarɛtɩ ɛ, ɔmɔ -aa -pɔn i. 8 'De Sesi 'na : 'Ɩn wlu ao -pee 'mɛ 'teɔ sese 'ɩn 'naa : 'Ɩn ka. -Bo ɛ nɩ 'mɔ aoa -pɔn i ɛ, -mɛ ao "tai- 'ma 'cɛ -jʋ -mʋ "i, ʋʋ 'je mu. 9 Ɔ 'da kan' 'mɛ -wɛe wlu -crɩɩa' 'je 'o nyni, ɛɛ' wlu tu 'naa : Nyʋ ɛ "nyɩa 'ʋn 'ɩn se ʋʋa' due' "maa. 10 'Sʋ Simɔ Piɛi -sa -cnɛ kpla' ɔ poɛ' 'sʋ ɔ cɛn 'o 'sraa -sai klaa" 'a dbonʋi 'a dian o doun" 'mɛ. Ɔɔ' dbonʋi tu 'a 'nynɩ -nɩ Malɩkisɩ. 11 'Sʋ Sesi wlu' 'de Piɛi -pee, ɔ 'na : -Ɩn -tu" -ma -cnɛ 'e kpla 'di de. -Kaʋn"- "Bo tba 'ʋn wɔn 'ɩn seɛ 'na i 'dee- ? 12 'Sʋ "soa-wi" ke ʋʋa' klaa" ke nyʋ Suifʋ 'a klae" dboa kpʋn Sesi 'mɛ -wɛe ʋʋ sɔn. 13 'De ʋʋ kpɔ 'e Anɩ "juɔi ke tɛin", Kaifʋ -nɩa 'sraa -sai klaa" 'de ɛɛ' -sʋn -tu 'di, Anɩ nɩɛ ɔɔ' "bia- -o. 14 'De Kaifʋ mɔ -tu" Suifʋ-wi" 'a klae" 'snɩ ka 'de-, -ɔ -na : Ɛ "paa' -wɛe nyɔ due' koʋn -gbai' 'je nyʋ -wee' 'a 'mɛa' 'mɛ. 15 Simɔ Piɛi ke klai" ju jrɔ' bla Sesi bʋ -kɔ o i. Ɔɔ' klai" ju tu ɛ, 'sraa -sai klaa" juuɔ' see, 'sʋ ɔ ke Sesi pa 'o 'sraa -sai klaa" o -gbɛin". 16 'Kaa Piɛi siɛ 'e "kpae' 'bo -gbɛin" -jei". Klai" ju -jɔ 'sraa -sai klaa" juua -nɔ jiɛ de, 'de ɔ 'tmʋʋ 'nynɔkpao' -a fua -gbɛin" -je i ɛ, -wɛe ɔ paa Piɛi 'bo -gbɛin". 17 'Sʋ dbonʋnynɔkpao' -a fua -gbɛin" -je i -teeɛ' Piɛi i, ʋ 'na : -Mɔ -nɔ, -ɩn -nɩɛ "ju -nɔ 'ɔ klai" ju due' -o -kee ? 'Sʋ ɔ 'na : "Ɩɩn-, 'ɩn se ɔɔ' klai" ju nɩ- ! 18 -Gbɛin" ifuoʋn o, 'sraa -sai 'a dbonʋʋn -tba' nɛ -wɛe ʋʋa 'wooa, dɛ-nʋɛ' dee' -a ji. 'Sʋ Piɛi jiiɛ 'bo ʋʋpʋ "klu -wɛe ɔɔ 'wooa -ke. 19 'Sraa -sai klaa" Anɩ -teeɛ' Sesi i 'de ɔɔ' klai" nynuu ke ɔɔ' nyʋ dɛtɔɔsʋn 'a -tɩ' 'ʋn. 20 'Bomɔ Sesi wluu 'de ɔ -pee, ɔ 'na : Dɛ 'ɩn 'tmʋa, 'ɩn 'tmʋɛ 'bo nyʋ -kwea, 'ɩn tɔɔ nyʋ Kea 'a -tɩ' 'mɛ 'de "jrui 'kɩɩn-gbi ke Kea -gbu klaa" 'di, ɩmɩ -nɩ Suifʋ-wi" 'a "jrui 'kɩɩn-ta, 'ɩn se dɛ jrɛ' 'kwla -tu". 21 Dɛɛ-tɩ -ma -tee' 'mi i ɛ- ? Nyʋ -ʋʋ -wɔan 'ma wlu ɛ, -ɩn -tee' ʋʋpʋ i ka-, dɩ 'ɩn 'tmʋa 'de ʋʋ -pee ɛ, ʋʋ juɩ' 'pepe. 22 'Bo ɛɛ' wlu tu "kpei 'sʋ Kea -gbu ifuoi due' -nɩa 'o mu poɛ Sesi 'kpa doun", 'de ɔ 'na : 'Kamɔ -ma wlu 'sraa -sai klaa" -pee ? 23 'Sʋ Sesi wlu ɔ -pee, ɔ 'na : Dɛ 'ɩn 'tmʋa -ɛ -nyniia "jrii -ɩn -si" ɛɛ' 'nynɩ, 'de -bo dɛ 'ɩn 'tmʋa nmɔ "jrii 'ee, -mɛ dɛ -ɛɛ blaa' -ma bla 'ʋn ɛ- ? 24 Ɛ 'wlʋa 'o mu ɛ, 'kamɔ Sesi nɩ 'e "dbi 'di 'sʋ Anɩ kpɔ 'e 'sraa -sai klaa" Kaifʋ o. 25 'De nɔ" -nɩa 'mʋa- 'di -mɛ Simɔ Piɛi nɩɛ nɛ 'wooa' ke, 'sʋ ʋʋ -tee' ɔ i, ʋʋ 'na : -Mɔ -nɔ, -ɩn se "ju -nɔ 'ɔ klai" nynuu 'a due' nɩ -taa ? 'Kaa Piɛi 'na : 'Ɩn se ɔɔ' klai" ju 'a due' nɩ- 'de ! 26 'Sʋ 'sraa -sai klaa" 'a dbonʋi due', -ɔ -nɩa "ju Piɛi cɛan doun" "jru 'a de'di ɛ, ɔmɔ -wlu, ɔ -na : -Mɔ -nɔ, 'ɩn se -ʋn -ke ɔ 'je 'de -kle' 'di 'teɔɔ ? 27 'Kaa Piɛi -too' ɛ 'ʋn 'ɛ ke'wlɛ, ɔ 'na : 'Ɩn ko-. 'Bomɔ ɛ "si 'sʋ sʋn" -sro'. 28 -Wɛe ʋʋ -sa Sesi 'o Kaifʋ "juɔi 'de ʋʋ kpɔ 'e Pilatɩ o -gbɛin", -mɛ -sɔn' -sɩn', ʋʋa' -cɛ" 'kpa 'na ʋʋ se 'o -gbɛin" pai ʋʋ je mla' -pʋn" nɩ- -wɛe Pakɩ 'a diidɛ di -tɩ je ʋʋpʋ kpʋn. 29 Ɛmɛ -tɩ Pilatɩ "si 'e "kpae' 'de ʋʋpʋ o. 'De ɔ -tee' ʋʋpʋ i, ɔ 'na : -Aa 'wɔn 'e, dɛɛ-tɩ ao ke "ju -nɔ 'ble ɛ- ? 30 'Sʋ ʋʋ 'na : -Bo ɔ se dɛsaʋn nʋi nɩ 'de ɛ, -mɛ -a se ɔ 'bo -ʋn "juɔi ja i. 31 'De Pilatɩ 'na : -Mɛ aoa' -cɛ" 'kpa "duɔ 'ʋn -wɛe ka aoa' kɛ' "sia 'nynɩ ɛ, ao 'je ɔɔ' 'pee 'je kan' 'ja. 'Sʋ ʋʋa' klae" 'na : -A -mɔ se ɛ 'bɛɛ- -a -je nyɔ 'dba. 32 'Kamɔ ɛ nɩ-, -wɛe wlu Sesi 'tmʋa 'de ka ɔɔ' 'mɛsʋn 'jea nɩ 'a -tɩ' 'ʋn ɛ, -wɛe ɛ 'je 'o nyni. 33 'Sʋ Pilatɩ pa 'o -gbu" de, -wɛe ɔ 'da Sesi 'de ɔ -tee' ɔ i ɔ 'na : -Ɩn -nɩɛ Suifʋ-wi" 'a 'beɔ -oo ? 34 'Sʋ Sesi 'na : Ɛ 'bo -ma -cɛ" -kwlɩ" mɔ wlu -jɛ -mɛ 'wlʋ -wɛe -ɩn -tmʋ ɛɛ, -aee' nyʋ jrʋ' -tmʋ ɛ 'de -ʋn -pee 'de 'ma -tɩ' 'ʋn ? 35 'De Pilatɩ 'na : 'Mɔ nɩɛ Suifʋi -oo ? -Ma 'cɛ-wi" ke -ma 'sraa -saʋn 'a klae" -to 'e -ʋn 'de 'ʋn 'kwa. Ka -ɩn nʋ -gbo' ɛ- ? 36 'Sʋ Sesi 'na : 'Ma tʋ"bodɛ se 'e 'blʋa- "kpei nɩ -ta. -Bo 'ma tʋ"bodɛ nɩ 'e 'blʋa- "kpei 'de ɛ, -mɛ 'ma dbonʋʋn a muɛ 'ma tʋ -fɔan' 'de-, -wɛe Suifʋ-wi" 'a klae" se 'ʋn 'de toi, 'kaa 'ma tʋ"bodɛ se 'e 'blʋa- "kpei nɩ -ta. 37 'Bomɔ Pilatɩ wluu ɔ -pee, ɔ 'na : -Ɩn -nɩɛ 'beɔ -o 'jaa ? 'Sʋ Sesi 'na : -Ɩn -sa tɔ' -ɩn je kan' 'da, 'ɩn nɩɛ 'beɔ -o. 'Ɩn 'wlʋʋ -wɛe 'ɩn ji 'nɔ 'kmʋ "kpei 'de 'ɩn 'je tɔ' -tɩ 'tmʋ -wɛe nyɔ "o nyɔ -jea tɔ' -tɩ 'a "dia a, dɛ 'ma 'tmʋa ɔ 'je ɛ doin" o po. 38 'Sʋ Pilatɩ -tee' ɔ i, ɔ 'na : Dɛ -nɩ tɔ' -tɩ ɛ- ? Pilatɩ -kɔa' wlu -nɩ 'a 'tmʋa' 'sʋ ɛ, ɔ "siɛ 'e Suifʋ o "kpae' de, 'de ɔ 'na : -Ta 'ɩn 'jea tba -wɛe 'ɩn 'jea "ju -nɔ 'pee kpʋʋn 'ɩn se 'o 'je. 39 'Kaa ka ɛɛ nʋʋa see 'de aopʋ "klu, -wɛe -bo Pakɩ 'a -kɔ'ɔ 'wɩ o 'de 'ma "sia -kaso 'dii due' i ɛ, ao -nɩɛi" 'mɛɛ 'ɩn 'je Suifʋ-wi" 'a 'beɔ i "sii- ? 40 'Sʋ ʋʋ -wee' -saa -cruɛn", ʋʋ 'na : "Ɩɩn-, ɛ 'bo ɔmɔ nɩɛ, 'kaa Barabasɩ mɔ -ɩn -je i "sii-. 'De Barabasɩ nɩɛ "ku 'dbai -o.

19

1 'Sʋ Pilatɩ 'tmʋʋɛ "soa-wi" -wɛe ʋʋ kpa Sesi klae 'ʋn -kpa -kpa. 2 "Soa-wi" dba "wifan-, 'de ʋʋ -tuɛ" Sesi "jru, -wɛe ʋʋ pɔɔ 'beɔ flae' -saan 'ʋn 'de ʋʋa wlɔɔ. 3 -Wɛe -bo ʋʋ 'kɩɩn- 'bo ɔ -pʋn", 'de ʋʋa -gblee' ɔ, ʋʋa nʋ : -A 'snɛ, Suifʋ 'a 'beɔ ! -Wɛe ʋʋa poɔ 'kpɩ doin" i. 4 -Wɛe Pilatɩ "si "kpae' 'de Suifʋ-wi" 'a klae" o de ke'wlɛ, 'de ɔ 'na : Ao -gbʋn 'nɔ, 'ma ji ɔ 'nɔ aopʋ o "kpae' jaa' -wɛe ao 'je ɛ juo ka 'ɩn sea dɛsaʋn jrɛ' 'je 'de ɔ 'ʋn ɛ. 5 'Sʋ "wifan nɩɛ 'o Sesi "jru, 'beɔ "bai -saan nɩɛ 'de ɔ 'ʋn, 'sʋ ɔ je "kpae' "si, -wɛe Pilatɩ wlu 'de ʋʋ -pee, ɔ 'na : "Ju aoa -pɔan, ɔ ka ! 6 -Ta 'sraa -saʋn klae" o, Kea -gbu 'dei -teʋn 'jeea Sesi "jriɛ- 'sʋ, ʋʋ -saa -cruɛn" ʋʋ 'na : -Ɩn koɔ 'bo tu -kwlɩ", -ɩn koɔ 'bo tu -kwlɩ" ! 'De Pilatɩ 'na : Aoa' -cɛ" 'kpa "duo ɔ 'ʋn ao 'jeɔ 'bo tu -kwlɩ" kɔ, dɛ-nʋɛ' 'mɔ se dɛsaʋn jrɛ' 'je 'de ɔ 'ʋn. 7 'Sʋ Suifʋ-wi" 'na : -A bleɛ kɛ', 'de -bo ɛ nɩ 'de -aa kɛ' 'di ɛ, -mɛ ɔ 'je 'mɛ -o, dɛ-nʋɛ' ɔɔ nʋɛ ɔɔ' -cɛ" Kea 'a "ju 'ʋn. 8 Pilatɩ 'wɔan wlu -nɛ 'sʋ ɔɔ' faʋn 'kpa "kpei. 9 'Sʋ ɔ ke Sesi pa 'o -gbu" 'di de, -wɛe ɔ -tee' ɔ i, ɔ 'na : -Ta -ɩn -wlʋ ɛ- ? 'Kaa Sesi se 'e wlu -sa. 10 'Sʋ Pilatɩ 'na : 'Mɔ -ɔɔ -tee' -mi i -wɛe -maa' wluu- ? -Ɩn se ɛ juo ka 'ɩn 'bɛɛa 'ɩn 'jea -mi i "sii- 'de 'ɩn 'bɛɛa 'ɩn 'jea -ʋn kɔ 'bo tu -kwlɩ" ɛ ? 11 'De Sesi 'na : -Ɩn se dɛ jrɛ' 'bɛɛ- 'bo 'mɔ "kpei -bo ɛ se -jɛ Kea "nyɩa -ʋn nɩ ɛ, ɛmɛ -tɩ "ju -tua" 'ʋn 'de -ʋn 'kwa a, ɔ nʋɛ dɛsaʋn klaa", ɔ je -ʋn -sii. 12 Ɛ 'wlʋa 'o mu ɛ, Pilatɩ a -pɔn Sesi 'a i "sii- -kɔ i, 'kaa Suifʋ-wi" a "wɔɔ-, ʋʋ 'na : -Bo -ɩn -sii" "ju -nɔ i 'ja a, -mɛ -ɩn se Sesaa 'a dbɛɛ i nɩ-, dɛ-nʋɛ' nyɔ "o nyɔ -ɔɔ nʋa ɔɔ' -cɛ" 'beɔ 'ʋn ɛ, -mɛ ɔ nɩɛ Sesaa 'a tʋnyɔ -o. 13 Pilatɩ 'wɔan wlu -nɩ 'sʋ ɔ poɛ Sesi "kpae', -wɛe ɔ jii 'bo ɔɔ' nyʋ 'a 'pee 'je 'ɩn 'de ɔ -te i 'bo "sou "kpei, ʋʋa 'daa 'bo 'a -ta -tu Gabata 'de Eble wlu 'di. 14 Ɛ nɩɛ kʋɔnkwla' 'wlʋ -kɔ'ɔ -kwie" -o -mɛ 'jrʋ a "kʋʋan- -gbao -tea' i. 'Sʋ Pilatɩ wlu' 'de Suifʋ-wi" -pee, ɔ 'na : 'Ɩn, aoa' 'beɔ -nao ! 15 'Kaa ʋʋ -teɛ "wɔɔa' -pʋn" ke'wlɛ, ʋʋ 'na : -Ɩn -dbɔ', -ɩn -dbɔ', -ɩn koɔ 'bo tu -kwlɩ" ! 'De Pilatɩ 'na : Aoa' 'beɔ mɔ 'ɩn 'je kɔ 'bo tu -kwlɩɩ" ? 'Sʋ 'sraa -saʋn 'a klae" -wi" 'na : -A se 'beɔ jrɔ' 'ble -bo ɛ se Sesaa nɩ ɛ. 16 'Sʋ Pilatɩ 'bɔɔ- Sesi ʋʋpʋ kwa, -wɛe ʋʋ 'je ɔ 'o tu -kwlɩ" kɔ 'sʋ ʋʋ "duɔ 'ʋn 'ɛ -wɛe ʋʋ kpɔ. 17 -Ta Sesi a 'wlʋa 'o -kwlɔ -mɛ ɔɔ' -cɛ" -ble ɔɔ' 'daɩntu, -wɛe ʋʋ kpɔ 'o -ta nyʋ a 'daa- "jru "kpa 'a -ta, ɛmɛ -nɩ Gogota 'de Eblewlu 'di. 18 'Bomɔ ʋʋ kɔɔ Sesi ke nyʋ 'sɔɔn jrʋ 'bo tu -kwlɩ", jrɔ' nɩ 'nɔ, jrɔ' nɩ 'nɔ, -wɛe Sesi nɩ 'o -kwea'-. 19 Pilatɩ 'crɩɛ wlu jrɛ' ɛmɛ ɔ -tu" 'o Sesi 'a 'daɩntu -kwlɩ". Wlu ɔ 'crɩa, ɛ ka : Sesi Suifʋ 'a 'beɔ -wlʋa Nasarɛtɩ ɛ. 20 Dɛ -crɩɩa' 'mʋa- Suifʋ -tuu" a nʋ ɛ 'dii, dɛ-nʋɛ' -ta ʋʋ kɔɔa Sesi ɛ, 'bo nɩɛ 'o -kwlɔ wɔin", 'de dɛ -crɩɩa' ɛ 'crɩɩɛ 'de Eblewlu ke Latɛnwlu ke Klɛkɩwlu 'di. 21 'Sʋ Suifʋ 'a klae" wluɛ Pilatɩ -pee, ʋʋ 'na : -Ɩn -bo Suifʋ-wi" 'a 'beɔ 'crɩɛ, 'kaa -ɩn -crɩ, "ju -nɔ 'na ɔ nɩɛ Suifʋ-wi" 'a 'beɔ -o. 22 'De Pilatɩ 'na : Dɛ 'mɔ 'crɩa, 'ɩn 'crɩɛ' 'bode. 23 "Soa-wi" -kɔa' Sesi 'a 'bo tu -kwlɩ" kɔɔa' 'sʋ, ʋʋ -seea' ɔɔ' 'ʋnpaadɩ 'ʋn 'ɛ kpɛ -nyiiɛ', -wɛe "soai due' 'ble ɔɔ' -nɛ, due' 'ble ɔɔ' -nɛ, 'de ʋʋ "duo- ɔɔ' "bai -tɔɔn -ɛ -wlʋa 'e "jɛi -ɛ tba i -wɛe -ɛ sea "pajri 'ble -nɛ 'ʋn, 24 'de ʋʋ 'na : -A -bo ɛ i'faeɛ, 'kaa -a -pooɛ soa' -wɛe nyɔ -je ɛ kpa 'de -a -je ɔ 'je. Ka ɛ nʋa -wɛe wlu -crɩɩa' see, ɛ jea 'o nyni, 'ka -nao. Ɛɛ' wlu tu 'naa : Ʋʋ -gble' 'ma 'ʋnpaadɩ 'ʋn 'ɛ, -wɛe ʋʋ poo 'ma "bai -tɔɔn soa'. Dɛ "soa-wi" nʋa ɛ -nao. 25 'Bo Sesi 'a 'daɩntu -pʋn" ɛ, 'bomɔ ɔ de ke ʋa' de'dinynɔkpao' nɩ-, 'bomɔ Klopa 'a 'nynɔ Madi nɩ-, 'bomɔ Madi -wlʋa Madala nɩ -ke. 26 Sesi 'jea ɔ de 'bo ɔɔ' -tɩ' -kma klai" ju -pʋn" 'sʋ ɛ, ɔ wlu ʋ -pee, ɔ 'na : "ju 'nynɔ, aa' "ju -nao. 27 'De ɔ wlu 'e klai" ju -nɔ -pee, ɔ 'na : -Ɩn de -nao. Dɛ -tba' 'o ɛ, klai" ju -nɔ "duo Madi 'ʋn 'mɛ 'de ɔ wɔin". 28 'Bo -mɛ 'de ɛ, ka dɩ -wee' "klein -jea ɔ "jrii nʋʋ ɩ nynia 'o la, Sesi 'je kan' 'mɛ 'sʋ ɔ 'na : "Ni 'natʋn -a nʋ 'ʋn. Ɔ 'da kan' 'mɛ -wɛe dɩ -crɩɩa' 'je 'o nyni. 29 'De jae due' -nɩ 'o -ɛ -ji" -koonmɔ, 'sʋ "soa-wi" bla ɛ dɛ o i -wɛe ʋʋ crooɛ tu "i 'de ʋʋ kpɛ 'o Sesi "wɔin. 30 Sesi -tɩɛn' wɔn, 'sʋ ɔ 'na : Dɩ -wee' kɔn "jru -wɛ-. Ɔ bla "jru -kwlɩ", 'sʋ ɔ 'mɛɛ. 31 'De 'wɩ -ɛ 'di Sesi 'mɛa -nɛ ɛ nɩɛ -kwlewɩ 'a -kwie" -o. 'De Suifʋ-wi" se ɛ "i nɩ "ku 'je 'o tu -kwlɩ" nɩ -kwlewɩ 'e nyni, dɛ-nʋɛ' -kwlewɩ -nɛ kɔn -tɩ'. Ɛmɛ -tɩ ʋʋ mu 'e Pilatɩ o -wɛe ʋʋ 'tmʋ ɔ 'de "soa-wi" 'je nyʋ -ʋʋ -kɔɔa 'bo tu -kwlɩ" 'a bɩ i-craa- 'a mu, -wɛe ʋʋ 'je ʋʋa' "ku 'bo tu -kwlɩ" -sa. 32 'Sʋ "soa-wi" jia ʋʋ -craa' nyʋ -ʋʋ -ke Sesi kɔɔa 'o tu -kwlɩ" 'a bɩ i. 33 -Ta ʋʋa jeea Sesi -mɔ ɛ, -mɛ ɔ 'mɛɛ sese, ɛmɛ -tɩ ʋʋ se ɔɔ' bɩ i-craa-. 34 'Kaa "soai due' nʋɛ "di -wɛe ɔ "fiie 'bo Sesi -gbɩn 'sʋ nymɔ ke "ni mɩ -a jii 'bomu. 35 "Ju -ɔ -jea dɩ -nɩ 'a -ta ɔmɔ -ɔɔ -tmʋ ɩ, dɩ ɔ 'tmʋa ɩ nɩɛ tɔ'. Ɔ 'je kan' 'mɛ dɩ ɔɔ 'tmʋa ɩ nɩɛ tɔ' -tɩ. -Wɛe ao 'jɩ tɔ' 'ʋn 'je -ke. 36 Ɩa' dɩ tu nʋʋɛ' -wɛe wlu -crɩɩa' 'de Kea 'a 'sbɛ 'di see ɛ, 'de ɛ je 'o nyni. Ɛɛ' wlu tu 'naa : Ɔɔ' 'kpa due' koʋn -gbai' ka se -crai. 37 -Wɛe ɛ 'crɩɩɛ ka 'de 'fɔ jrɛ' o 'wlɛ, ɛ 'naa : "Ju -ɔ -gbɩn o ʋʋ "fiia ʋʋa muɛ ɔ "jriɛ- 'jeea'. 38 -Mɛ 'wlʋa 'o -jei" ɛ, Sosɛʋ -wlʋa 'o Arimate -teeɛ' Pilatɩ Sesi 'a "ku i. Ɔɔ' Sosɛʋ -tu ɛ, ɔ nɩɛ Sesi 'a klai" ju -o see, 'kaa ɔ se ɛ 'tmʋ due', dɛ-nʋɛ' ɔɔ plee Suifʋ-wi" 'mɛ. 'Sʋ dɛ ɔ -teea' i Pilatɩ 'wɔɔn- 'ɛ, -wɛe ɔ mu 'de ɔ "duo- Sesi 'a "ku 'ʋn. 39 Nikodɛmʋ -ɔ mua 'e Sesi o "maʋ' 'de ɛ, -mɔ ji' -ke. Ɔ ja -dai'klɔni 'a kpɛ 'sɔɔn, mii- o, aloɛ o, ɩ 'beeɛ' ɩ 'je 'cilo 'a kwla taan nɩ-. 40 -Wɛe ka ʋʋ nɩa 'sɔɔn, ʋʋ "duo- Sesi 'a "ku 'ʋn 'de ʋʋ po ɔ -dai'klɔni kui. -Bo Suifʋ-wi" 'je nyɔ i -te' ɛ, 'kamɔ ʋʋa nʋ see. Ʋʋ -piian' ɔ tae' plu i. 41 -Ta ʋʋ kɔɔa Sesi 'bo tu -kwlɩ" ɛ, -kle' jrɛ' -nɩ 'o ɛ -pʋn". 'Bo -kle' -nɛ 'di -gbaɩn' dee due' -nɩ 'o -ɛ 'di nyɔ jrɔ' se i -teeɛ due'. 42 'Bomɔ ʋʋ -te' Sesi 'a "ku i, dɛ-nʋɛ' -gbaɩn' -nɛ -kʋʋan"- i, 'de -kwlewɩ 'a -kwie" -nɩ.

20

1 'Dɔɔ "i-saawɩ 'a -klae" pɛɛn 'sʋ Madi -wlʋa Madala -cruuɛn 'de -gbaɩn' "kpei, -mɛ -sɔn' kwie nɩɛ 'blʋɔi ke. -Ta ʋa mua, -mɛ "soukpo -nɩa 'o -gbaɩn' "wɔin 'wlʋ 'o 'ɛ. 2 'Sʋ ʋ kpa plea' 'de Simɔ Piɛi ke klai" ju jrɔ' -ɔɔ -tɩ' Sesi kma o, -wɛe ʋ 'tmʋ ʋʋpʋ, ʋ 'na : Ʋʋ -sa Tʋ"bo 'a "ku 'de -gbaɩn' 'di 'mɛ, -ta ʋʋ -tu" ɔ -a se 'o juo-. 3 Piɛi ke klai" ju jrɔ' -nɔ "siɛ "kpae' -wɛe ʋʋ mu 'e -gbaɩn' "kpei. 4 Ka ʋʋ nɩa 'sɔɔn ʋʋ -wee' a ple' -tadue. 'Kaa klai" ju -nɔ -mɔ ple' ɔ siɛ Piɛi bɩ' i, -wɛe ɔ nyni 'e -gbaɩn' "wɔin tɛin". 5 Ɔ bla "jri 'de ɔ -gbʋɛn 'di, -wɛe ɔ 'jee tae' fɔ plu -pɛan 'blʋɔi 'a 'sʋ "jriɛ-, 'kaa ɔ se 'e ɛ 'di pa. 6 Simɔ Piɛi -kɔan 'bo ɔ 'de ɛ, ɔmɔ -ji' -wɛe -ɔ pa 'e -gbaɩn' 'di. Ɔ 'jeeɛ tae' fɔ plu -pɛan 'blʋɔi "jriɛ-. 7 Tae' fɔ -piian' Sesi 'a "jrui ke tae' -nɩa ɔ kui se -tadue nɩ-, ɛ pooɛ ʋn -wɛe -ɛ -nɩ -ta -jrɔ. 8 'Sʋ klai" ju -jɔ -saa "i -ɔ nynia 'e -gbaɩn' "kpei tɛin" ɛ, -mɔ pa 'e -gbaɩn' 'di -ke, -wɛe ɔ 'jee dɩ -nɩa 'mʋa- "jriɛ- 'sʋ ka Sesi sɔan "kunyɩɔ' ɔ 'je ɛ tɔ' 'ʋn 'ɛ. 9 Dɛ-nʋɛ' -mɛ wlu -crɩɩa' -wɛe -ɛ -tmʋa Sesi 'a "kunyɩɔ' sɔn-tɩ ɛ, ɔɔ' klai" nynuu se 'e ɛ 'dei 'wɔn ke 'de-. 10 Sesi 'a klai" nynuu muɛ -ta ʋʋ 'wlʋa de. 11 'Kaa Madi -mʋ siɛ 'o -gbaɩn' -pʋn" 'nɔ "kpae' -wɛe ʋa -fɩn". -Ta ʋ nɩɩa -fɩn" 'a 'sʋ ʋ jiɛ ja -wɛe ʋ -soo' "jru 'de -gbaɩn' 'di. 12 'Sʋ ʋ 'jeeɛ Kea 'a "sʋɩ 'sɔɔn "jriɛ- -ʋʋ -paa dɩplu 'ʋn -ʋʋ -te i, -ta Sesi 'a "ku 'pɛan i 'de ɛ, due' nɩ 'e ɔɔ' "jru o, due' nɩ 'e ɔɔ' bɩ o. 13 'Sʋ ʋʋ 'na : 'Nynɔkpao', dɛɛ-tɩ aa -fɩn" ɛ- ? 'Sʋ ʋ 'na : Ʋʋ "duo- 'ma Tʋ"bo 'ʋn 'ɛ, -ta ʋʋ po ɔ 'ɩn se 'o 'je. 14 -Ta ʋ nɩɩa wlu -nɛ 'ɛ 'tmʋa' a, ʋ "biia i 'sʋ ʋ 'je Sesi 'mɛ, ɔ nyna i, 'kaa ka ɛ nɩa Sesi la ʋ seɛ juo-. 15 'Sʋ Sesi -teeɛ' ʋ i, ɔ 'na : 'Nynɔkpao', dɛɛ-tɩ aa -fɩn" ɛ- ? 'De nyɔ aa -pɔn i ɛ- ? -Bo ʋmʋ a sea 'je 'de ɛ, ʋmʋ 'na -mɛ -kle' -nɛ 'ɛ ifuoi -o 'de-, 'sʋ ʋ 'na : 'Ma -fɛin', -bo ɛ nɩ -mɔ -duo" ɔɔ' "ku 'ʋn ɛ, -mɛ -ta -ɩn po ɔ -ɩn -tɔɔ 'ʋn 'bomu -wɛe 'ɩn 'je ɔ 'ʋn "duo-. 16 'Sʋ Sesi 'na : Madi ! Ʋ "biia i 'sʋ ʋ wlu ɔ -pee 'de Eblewlu 'di, ʋ 'na : -Wee' ! Rabuni ! (Ɛ 'de mɛ -nɩ 'ma dɛtɔɔi). 17 'De Sesi 'na : A 'bo 'mi "iblaa ke, dɛ-nʋɛ' 'ɩn se 'de 'ʋn "Bo o de mu ke. 'Kaa a mu a 'je 'ma de'di -wi" 'tmʋʋ-, ka 'ɩn "Bo -ɔ -nɩa aoa' "Bo -ke ɛ, 'de ɔ o 'demɔ 'ma mu de, 'ma Kea -ɛ -nɩa aoa' Kea -ke ɛ, 'de ɛ o 'bo 'ma mu de. 18 'Sʋ Madi -wlʋa Madala mu' -wɛe ʋ 'tmʋʋ- klai" nynuu, ʋ 'na : 'Ɩn 'jee Tʋ"bo "jriɛ 'mɛ ! -Wɛe dɩ "klein ɔ 'tmʋa 'de ʋ -pee ɛ, ʋ po ɩa' "kuan. 19 'De 'dɔɔ "i-saawɩ -nɩa 'mʋa 'a -kwie" ka a, klai" nynuu nɩɛ 'e -gbu" due' 'di -wɛe ʋʋ kan 'o -gbɛin", dɛ-nʋɛ' ʋʋa pleeɛ Suifʋ-wi" 'a klae". 'Sʋ Sesi -taan' 'bo ʋʋpʋ 'a -kwea'-, 'de ɔ wlu ʋʋ -pee ɔ 'na : Ao 'je pɛe 'a blua' ! 20 'Sʋ ɔ toɛ ʋʋpʋ ɔɔ' kwa 'sɔɔn "i ɛ ke 'bo ɔ -gbɩn ke-. 'Sʋ dɛ klai" nynuu 'jeea Tʋ"bo "jriɛ- ɛɛ' 'mʋa- nʋ ʋʋpʋ 'mɛ. 21 -Wɛe Sesi wlu ʋʋ -pee ke'wlɛ ɔ 'na : Ao 'je pɛe 'a blua' ! Ka 'ɩn "Bo dboa 'ʋn ɛ, 'kamɔ 'ma dbo aopʋ -ke. 22 Wlu -nɩ -kwɛ-a 'de ɔ 'wɔn i 'sʋ ɔ poɛ ʋʋpʋ poɔ' -wɛe ɔ 'na : Ao 'je Kea 'a -Suu -kwɛai ɛ. 23 Nyʋ -ʋʋa dɩsaɩn ao 'wlʋa "kpei ɛ, -mɛ ʋʋa' dɩsaɩn a muɛ -kwɛa, 'de nyʋ -ʋʋa dɩsaɩn ao sea "kpei 'wlʋ ɛ, -mɛ ʋʋa' dɩsaɩn se -kwɛi. 24 'De -ta Sesi a jia, -mɛ Toma nyʋ a 'daa -gbaju ɛ, -wɛe -ɔ -nɩa klai" nynuu -nɩa -puue 'jɔ 'sɔɔn 'ɔ due' se 'e ʋʋpʋ "klu nɩ-. 25 Ɛmɛ -tɩ klai" nynuu po Toma "kʋan, ʋʋ 'na : -A -je Tʋ"bo 'mɛ ! 'Kaa Toma 'na : -Bo 'ɩn se 'pɔnte 'a -kɔ "jriɛ 'jee 'de ɔ 'kwa, -bo 'ɩn se 'o 'ma -cɩɛ tba, 'de -bo 'ɩn se 'o ɔ -gbɩn 'ma kwa -te' ɛ, -mɛ 'ɩn se ɛ tɔ' 'ʋn 'jei. 26 'Wɩ -mɛ" na -sia' 'sʋ Sesi 'a klai" nynuu 'kɩɩɛn "jrui 'de -gbu" 'di ke'wlɛ, -mɛ Toma nɩɛ 'e ʋʋpʋ "klu, 'Sʋ Sesi -taan' 'bo ʋʋpʋ 'a -kwea'-, 'de 'bo -gbɛin" kaan'. 'De ɔ 'na : Ao 'je pɛe 'a blua' ! 27 'Sʋ ɔ wlu' 'de Toma -pee ɔ 'na : Toma, -ɩn -kpaa' -ma -cɩɛ -ta, -ɩn -gbʋn 'ma kwa ja, -ɩn -kpaa' sʋn -ta -ɩn -teɛ 'bo 'ʋn -gbɩn. -Ɩn -bo pɛe "ikmuuɛ -ɩn -je dɛ tɔ' 'ʋn ! 28 'Sʋ Toma 'na : 'Ma Tʋ"bo, 'ma Kea ! 29 'De Sesi 'na : Dɛ -ɩn -jeea' 'ʋn "jriɛ-, ɛmɛ -tɩ -ɩn -je 'ma -tɩ' tɔ' 'ʋn ? Nyʋ -sea' 'ʋn "jriɛ- 'jee- 'sʋ -ʋʋ -jea 'ma -tɩ' tɔ' 'ʋn ɛ, ʋʋ nʋ 'mʋa-. 30 Sesi nʋɛ jrii' -tuu"-tuu jrɩ' ke'wlɛ 'bo ɔɔ' klai" nynuu "juɔi, -wɛe -ɩ se 'crɩɩɛ 'de 'sbɛ -nɛ 'di. 31 'Kaa dɩ -jɩ -mɩ 'crɩɩɛ -wɛe ka Sesi nɩa Klisɩ Kea 'a "Ju ɛ, ao 'je ɛ tɔ' 'ʋn 'je -wɛe ao 'je 'kmʋnɩa' -sea' -kwɛ -ta 'ble 'je 'de ɔɔ' 'nynɩ 'ʋn.

21

1 -Mɛ 'wlʋa 'o mu ɛ, Sesi to ɔɔ' -cɛ" 'mɛ ke'wlɛ 'de ɔɔ' klai" nynuu -pee 'bo Tiberiadɩ -ni -kwlɩ". 'De ka ɔ nʋa ɔɔ' -cɛ" tosʋn, 'ka ka : 2 Simɔ Piɛi ke, Toma ʋʋa 'daa- -gbaju ke, Natanaɛ -wlʋa Kana 'de Galile ke, Sebede 'a "nynuu- ke, klai" nynuu 'sɔɔn jrʋ' ke, ʋʋpʋ -nɩ -tadue. 3 'Sʋ Simɔ Piɛi wlu' 'de ʋʋ -pee ɔ 'na : 'Ma muɛ 'sai- poa'. 'De ʋʋ -wee' 'na : -A -ke -ma mu -ke. 'Sʋ ʋʋ mu', -wɛe ʋʋ 'ja 'e -kwɛɛ" 'di 'de ʋʋ -te 'sai- poa' -pʋn", 'kaa ʋʋ se dɛ jrɛ' -sa 'de ɛɛ' "maʋ'wɩ tu 'di. 4 -Ta -sɔɔn' -sɩɩan' 'sʋ ɛ, Sesi -taan' 'de 'kpʋʋ "kpei, 'kaa kɛ nɩa ɔmɔ ɛ, klai" nynuu se ɛ juo-. 5 'Sʋ Sesi 'da ʋʋpʋ 'mɛ ɔ 'na : "Nynuu-, ao 'je dɛ 'mɛɛ ? 'Sʋ ʋʋ 'na : "Ɩɩn-. 6 'De ɔ 'na : Ao po 'sai- 'bo -kwɛɛ" 'ɛ dianfɔ o kea', aoa muɛ dɛ 'jea'. Ʋʋ poa 'sai- kan' -cɛɛn'- 'sʋ, 'kaa ʋʋ se ɛɛ' -cria' 'bɛɛ- de'bɔɔ- nɔ" 'de -smii' 'a "i -tietɩ 'ʋn. 7 'Sʋ Sesi 'a -tɩ' -kma klai" ju wluɛ Piɛi -pee ɔ 'na : Ɛ Tʋ"bo -o ! Simɔ Piɛi 'wɔan ɛ Tʋ"bo -o 'sʋ ɔmɔ -cɛan' kui 'de ɛ, ɔ paa ɔɔ' dɩ 'ʋn 'ɛ, 'sʋ ɔ 'kpa "niɔ- -pluu-. 8 Klai" nynuu -jʋ -sia 'o -mʋ nɩɛ 'e -kwɛɛ" 'di -wɛe ʋʋa mu ɔ kɩn, ka ʋʋa mua, 'kamɔ ʋʋa -cri' 'sai- -smii' "jia 'di ɛ. Dɛ-nʋɛ' -ta ʋʋ pooa 'sai- ɛ, 'bo ke 'kpʋʋ 'nynɩ 'a tɛnsʋn 'beeɛ ɛ 'e dɩ" 'a kmɛ' 'sɔɔn nɩ-. 9 Ʋʋa 'wlʋa 'de -kwɛɛ" 'di ʋʋa "sia i ɛ, -mɛ ʋʋ jɛɛ nɛ -ɛ -tbaa' -wɛe -smii' nɩ 'o "jri, 'de -di'pɛn nɩ 'o. 10 -Wɛe Sesi wlu ʋʋ -pee ɔ 'na : Ao ja -smii' ao -sa 'a jrɩ'. 11 'Sʋ Simɔ Piɛi 'ja 'e -kwɛɛ" 'di de -wɛe ɔɔ -cri' 'sai- 'nɔ 'kpʋʋ "kpei. -Smii' klae" 'a kmɛ' 'due kwla -mm" 'jɔ taan (153) -nɩ 'e ɛ 'di. 'Kaa -smii' -jia" 'e 'sai- -nɛ 'di ɛ, ɩ se ɛɛ' 'jɔ cɛn. 12 'Sʋ Sesi wlu' 'de ʋʋ -pee ɔ 'na : Ao ji dɛ di ! Nyɔ -je ɔ i -tee' 'de klai" nynuu "klu ɔ -jea nʋ : -Ma 'nynɩ wɛ- ? Ɔ se nɩ-, dɛ-nʋɛ' ka ɛ nɩa Tʋ"bo ɛ, ʋʋ -wee' 'je kan' 'mɛ. 13 Sesi 'kɩɩan 'o 'sʋ ɔ "duo -di'pɛn 'ʋn 'ɛ, -wɛe ɔ "nyɩ ɛ ʋʋpʋ, 'de ɔ "nyɩ ʋʋpʋ -smii' -ke. 14 Sesi sɔan "kunyɩɔ' ɛ, ɔ ke ɔɔ' klai" nynuu 'a 'jeea 'a kpɛ taan -nɛ -nao. 15 Ʋʋ -kɔa' dɛ dia' 'sʋ, Sesi -tee' ɛ Simɔ Piɛi ɔ 'na : Sonasɩ 'a "ju Simɔ, -ɩn -kma 'ma -tɩ' 'mɛ -ta, ɛ je nyʋ -nʋ -sii ? 'Sʋ Piɛi 'na : Kɩɩn Tʋ"bo, ka 'ɩn kma -ma -tɩ', -ɩn -juɛ'. 'De Sesi 'na : -Ɩn -tu" 'ma 'blae nynu 'a -tɩ'. 16 Ɔ -tee' ɔ i kpɛ 'sɔɔn -nɛ ke'wlɛ, ɔ 'na : Sonasɩ 'a "ju Simɔ, -ɩn -kma 'ma -tɩ' 'mɛ -taa ? 'Sʋ ɔ 'na : Kɩɩn, Tʋ"bo, ka 'ɩn kma -ma -tɩ' ɛ, -ɩn -juɛ' 'pepe. 'De Sesi 'na : -Ɩn -tu" 'ma 'blae nynu 'a -tɩ'. 17 -Wɛe Sesi -sa wlu de kpɛ taan ke'wlɛ, ɔ -tee' ɔ i 'de ɔ 'na : Sonasɩ 'a "ju Simɔ, -ɩn kma 'ma -tɩ' 'mɛ -cɛɛn'- ? 'Sʋ dɛ Sesi -tee' ɔ i kpɛ taan -wɛe ɔ 'na -ɩn kma 'ma -tɩ' 'mɛ -cɛɛn'-, -ɛ kpʋn ɔ -kwlʋ 'sʋ ɛ "kaeɛ ɔ "jrii, 'de ɔ 'na : Tʋ"bo, -ɩn -juo dɩ -wee' "klein 'mɛ, ka 'ɩn kma 'ma -tɩ', -ɩn -juɛ'. 'De Sesi 'na : -Ɩn -tu" 'ma 'blae nynu 'a -tɩ'. 18 Tɔ' -tɩ 'a tɔ' -tɩ 'ma 'tmʋʋ- -ʋn, -ta -ɩn -nɩɩa -kooai" -saan" a, -mɛ -ma -cɛ" -ɛ paa -ma dɩ 'ʋn, -wɛe -ta -ɩn -nɩai" -ma mu 'o, 'kaa -sɔntɩ -ma mua -kea" 'kpaa' a, -ma muɛ sɩn sroa', -wɛe nyɔ jrɔ' 'je -ʋn dɛ 'ʋn paa- 'de -ta -ɩn sea "inɩ ɛ, ɔ 'je -ʋn 'bo kpa. 19 Ka Piɛi 'a 'mɛsʋn 'jea Kea 'a 'nynɩ "i 'bɛɛ- 'de nya a, ɛmɛ ɔ 'tmʋa 'o 'mʋa- 'de wlu -nɛ 'ʋn. Sesi -kɔa' ɩa' 'tmʋa' kan' 'sʋ ɔ 'na : -Ɩn bla 'bo 'ʋn 'de. 20 Piɛi "biia de 'sʋ ɔ 'je Sesi 'a -tɩ' kmaklai" ju 'mɛ, -mɛ ɔ jiɛ ʋʋpʋ kɩn ɔmɔ -pɛn Sesi jai dɛdi nɔ", -wɛe -ɔ -tee' ɔ i ka : Tʋ"bo, nyɔ wɛ- -je -ʋn 'de to ɛ- ? 21 Piɛi 'je ɔ i 'sʋ ɔ -tee' ɛ Sesi i ɔ 'na : 'De -jɔ -mɔ 'e ? Dɛ -je ɔ "jrii nʋʋɛ- ? 22 'Bomɔ Sesi wluu ɔ 'na : -Bo 'ɩn nɩɛ "i ɔ 'e 'kmʋ nɩ mamaʋ 'sʋ 'ɩn 'je de ji 'ee, -ma -tɩ' wɛ- -sie 'o -mɔ ɛ- ? -Mɔ bla 'bo 'ʋn 'de 'sʋ. 23 'Bo wlu -nɛ "kpei la, ʋʋ 'jrɛɛ- ɛɛ' kɛ' i 'de ɔɔ' "dɛi-wi" "klu, ʋʋ 'na klai "ju -nɔ se 'mɛi. 'De Sesi se kan' -mɔ 'da, 'kaa ɔ 'naa : -Bo 'ɩn nɩɛ "i ɔ 'e 'kmʋ nɩ- mamaʋ 'sʋ 'ɩn 'je de ji 'ee, -ma -tɩ' wɛ- -sie 'o -mɔ ɛ- ? 24 Klai" ju -nɔ, ɔmɔ -ɔɔ po dɩ -nɩ 'a "kuan -wɛe -ɔ -crɩ'. 'De -a -je kan' 'mɛ dɩ ɔ 'tmʋa ɩ nɩɛ tɔ' -tɩ -o -cɛɛn'-. 25 Sesi nʋɛ dɩ -tuu"-tuu jrɩ' ke'wlɛ. -Bo nyʋ 'crɩɩ -wee' dodo- 'de ɛ, 'ma naa tɔ' i, 'sbɩ nyʋ a mua 'crɩa' se 'nɔ 'kmʋ -nɛ "kpei 'bɛɛi.