JOHN

Yohane 1

Rito ri hundzukile munhu

1 Eku sunguleni ka swilo hinkwaswo, Rito a ri ri kona, Rito a ri ri na Xikwembu, kutani rito a ri ri Xikwembu. 2 Yena Rito a a ri Xikwembu ni le ku sunguleni. 3 Swilo hinkwaswo swi tumbuluxiwile hi yena, kutani a ku na xilo na xin'we lexi tumbulukeke loko ku nga ri hi yena. Hinkwaswo leswi nga tumbuluka, 4 swi kumile vutomi eka yena, kutani vutomi bya yena a byi ri ku vonakala eka vanhu. 5 Ku vonakala ka ha vangama emunyameni, naswona munyama a wu kotanga ku ku hlula, ni siku ni rin'we. 6 Ku humelele munhu, la rhumiweke hi Xikwembu; vito ra yena a a ri Yohane. 7 Ú tile ku va mbhoni, ku ta veka vumbhoni ehenhla ka ta ku vonakala leswaku hinkwavo va ta pfumela hikwalaho ka yena. 8 A a nga ri yena ku vonakala, kambe ú tile ku ta veka vumbhoni ehenhla ka ta ku vonakala. 9 Ku vonakala ka xiviri loku voningaka munhu un'wana ni un'wana, a ku ri endleleni ku ta emisaveni. 10 A a ri emisaveni, kutani misava yi tumbuluxiwile hi yena; kambe misava a yi n'wi tivanga. 11 Ú tile ekaya ka yena, kambe varikwavo a va n'wi amukelanga. 12 Hambiswiritano, hinkwavo lava nga n'wi amukela, lava nga pfumela eka vito ra yena, ú va nyikile matimba ya ku hundzuka vana va Xikwembu, 13 lava tswariweke, ku nga ri hi ndlela ya ntumbuluko, ku nga ri hi ku navela ka miri, ku nga ri hi ku rhandza ka wanuna, kambe ku ri hi Xikwembu. 14 Rito ri hundzukile munhu la nga aka exikarhi ka hina; kutani hi hlalele ku kwetsima ka yena loku nga tala tintswalo ni ntiyiso, ku nga ku kwetsima loku fanelaka n'wana loyi a nga yexe eka tata wa yena. 15 Yohane ú vekile vumbhoni ehenhla ka ta yena, kutani ú huwelele a ku: “Hi yena loyi ndzi vuleke ta yena loko ndzi te: ‘La taka endzhaku ka mina, wa ndzi tula hi vukulu, hikuva ú vile kona mina ndzi nga si va kona.’ ” 16 Hikwalaho ka ntalo wa rifuwo ra yena, hi kumile hinkwerhu nyiko ya tintswalo hi ku khandzakanya, 17 hikuva Nawu wu nyikiwile hi Muxe, kambe tintswalo ni ntiyiso swi tile ha Yesu Kriste. 18 A ku na munhu la tshamaka a vona Xikwembu ni siku ni rin'we. Loyi a nga swakwe, loyi a nga Xikwembu, loyi a nge xifuveni xa Tatana, hi yena loyi a nga endla leswaku Tatana a tiviwa.

Ta vumbhoni bya Yohane Mukhuvuri

19 Hi byona vumbhoni lebyi Yohane a byi vuleke, siku Vayuda va le Yerusalema va rhumeke vaprista ni Valevhi ku ya n'wi vutisa, va ku: “Hi wena mani ke?” 20 A nga fihlanga, ú hlamurile a tiyisa swinene, a ku: “Mina, a hi mina Mesiya.” 21 Kutani va n'wi vutisa, va ku: “Loko swi ri tano, hi wena mani ke? Hi wena Eliya xana?” A ku: “A ndzi yena.” Va ku: “Hi wena Muprofeta xana?” A hlamula, a ku: “E-e!” 22 Kutani va ku ka yena: “Hi wena mani xana? Hi lava ku tlhela na nhlamulo eka lava va hi rhumeke. Xana wena ke, u tivitana mani?” 23 A ku: “Mina ndzi rito ra munhu la huwelelaka emananga a ku: ‘Lulamisani ndlela ya Hosi’, hilaha muprofeta Esaya a vuleke hakona.” 24 Van'wana va lava va rhumiweke a va ri Vafarisi. 25 Kutani va vutisa Yohane, va ku: “Leswi u nga riki Mesiya, u nga riki Eliya, u nga riki yena Muprofeta wa kona, hikwalaho ka yini u khuvula xana?” 26 Yohane a va hlamula, a ku: “Mina ndzi khuvula hi mati; exikarhi ka n'wina, ku yimile un'wana loyi mi nga n'wi tiviki; 27 hi yena loyi a taka endzhaku ka mina, loyi swi nga ndzi faneriki ku ntshunxa ngoti ya tintanghu ta yena.” 28 Timhaka teto ti humelele eBetaniya, entsungeni wa Yordani, laha Yohane a a khuvulela kona.

Xinyimpfana xa Xikwembu

29 Siku leri tlhandlamaka, Yohane a vona Yesu a ri karhi a ta a n'wi kongomile, kutani a ku: “Vonani! Hi lexi Xinyimpfana xa Xikwembu lexi susaka swidyoho swa misava! 30 Hi yena loyi ndzi vuleke ta yena, loko ndzi te: ‘Endzhaku ka mina ku ta wanuna la ndzi tlulaka hi vukulu, hikuva ú vile kona mina ndzi nga si va kona.’ 31 Mina a ndzi nga n'wi tivi, kambe ndzi tile ndzi ri la khuvulaka hi mati, leswaku a ta humeseriwa erivaleni eka Vaisraele.” 32 Yohane ú vekile vumbhoni a ku: “Ndzi vonile Moya wu xika hi le tilweni wu fana ni tuva, wu ta tshama ehenhla ka yena. 33 Mina a ndzi nga n'wi tivi, kambe Xikwembu lexi ndzi rhumeke ku khuvula hi mati, xi ndzi byerile, xi ku: ‘Loyi u nga ta vona Moya wu xikela ka yena, wu tshama ehenhla ka yena, hi yena loyi a khuvulaka hi Moya lowo Kwetsima.’ 34 Mina Yohane ndzi swi vonile, kutani ndzi vekile vumbhoni ndzi ku, loyi hi yena N'wana wa Xikwembu.”

Ta vadyondzisiwa lavo rhanga

35 Siku leri tlhandlamaka, Yohane a tlhela a va kona kwalaho, a ri ni vadyondzisiwa va yena vambirhi. 36 A vona Yesu a ri karhi a hundza, kutani a ku: “Vonani! Hi lexi Xinyimpfana xa Xikwembu!” 37 Vadyondzisiwa va yena lavambirhi va twa leswi a swi vulaka, kutani va landza Yesu. 38 Loko Yesu a hundzuluka, a va vona va ri karhi va n'wi landza, kutani a va vutisa a ku: “Mi lava yini xana?” Va ku ka yena: “U tshama kwihi, Rabi” (hileswaku Mudyondzisi)? 39 A ku ka vona: “Tanani, mi ta vona.” Hiloko va ya, va ya vona laha a tshamaka kona; kutani va xwa na yena siku rero; nkarhi a wu lava ku va wa 4 nindzhenga. 40 Andriya makwa Simoni Petro, a a ri un'wana wa lavambirhi lava tweke ku vulavula ka Yohane, va landza Yesu. 41 Ú rhangile a kuma Simoni makwavo wa yena, kutani a ku ka yena: “Hi kumile Mesiya” (hileswaku Kriste, Mutotiwa). 42 A n'wi yisa eka Yesu. Loko Yesu a n'wi langutile, a ku: “U Simoni, n'wana Yohane; u ta thyiwa Kefasi” (hileswaku Petro, Ribye).

Ta ku vitaniwa ka Filipi na Nataniele

43 Siku leri tlhandlamaka, Yesu a a lava ku ya eGaleliya, kutani a kuma Filipi. A ku ka yena: “Ndzi landze!” 44 Filipi a a ri munhu wa le Betsayida, muti wa va Andriya na Petro. 45 Filipi a kuma Nataniele, a ku ka yena: “Hi kumile loyi Muxe a tsaleke timhaka ta yena eNawini; na vona vaprofeta va ti tsarile: I Yesu wa Nazareta n'wana Yosefa.” 46 Nataniele a ku ka yena: “Xana eNazareta ku nga huma xilo lexinene xana?” Filipi a ku ka yena: “Tana, u ta vona.” 47 Yesu a vona Nataniele a ri karhi a ta a n'wi kongomile, kutani a vulavula hi yena, a ku: “Vonani Muisraele wa xiviri, loyi ku nga riki na ku kanganyisa eka yena.” 48 Nataniele a ku ka yena: “U ndzi tivisa ku yini?” Yesu a n'wi hlamula, a ku: “Filipi a nga si ku vitana, ndzi ku vonile u ri ehansi ka nkuwa.” 49 Nataniele a n'wi hlamula, a ku: “Rabi, u N'wana wa Xikwembu, u Hosi ya Israele.” 50 Yesu a hlamula, a ku ka yena: “Xana u pfumela hileswi ndzi nga te, ndzi ku vonile u ri ehansi ka nkuwa, xana? U ta vona leswikulu ku tlula sweswo.” 51 A engeta a ku ka yena: “Ndzi tiyisisile ndzi ri ka n'wina: Mi ta vona tilo ri pfulekile, ni tintsumi ta Xikwembu ti ri karhi ti tlhandlukela ehenhla ni ku xikela eka N'wana-wa-Munhu.”

Yohane 2

Ta nkhuvo wa vukati le Kana

1 Loko ku hundzile masiku mambirhi, ku va ni nkhuvo wa vukati emutini wa Kana eGaleliya. Mana wa Yesu na yena a a ri kona. 2 Yesu ni vadyondzisiwa va yena, a va rhambiwile na vona enkhubyeni. 3 Kuteloko vhinyo yi herile, mana wa Yesu a ku ka yena: “A va ha ri na vhinyo.” 4 Yesu a ku ka yena: “We manana, hikwalaho ka yini u nghenelela etimhakeni ta mina ke? Nkarhi wa mina a wu si fika.” 5 Mana wa yena a ku ka malandza: “Endlani hinkwaswo leswi a nga ta mi byela swona.” 6 Hi mhaka ya leswi Vayuda va toloveleke ku hlamba va tibasisa va nga si dya, tinkho ta maribye ta 6 a ti tikirhetiwile kwalaho, yin'wana ni yin'wana yi ri leyi tatiwaka hi makhuwana ya mune kumbe ntlhanu. 7 Yesu a ku ka malandza: “Tatani tinkho leti hi mati.” Va ti tata hi mati ti khapa. 8 A ku ka vona: “Kelelani sweswi, mi yisa eka mufambisi wa nkhuvo.” Kutani va yisa. 9 Mufambisi wa nkhuvo a nantswa mati lama hundzukeke vhinyo; kambe a a nga tivi laha yi humaka kona, a swi tiviwa ntsena hi malandza lawa a ma kelerile mati. Kutani a vitana muteki, a ku ka yena: 10 “Vanhu hinkwavo va toloverile ku humesa vhinyo leyo nandziha eku sunguleni, kutani loko ku nwiwile swinene, va humesa leyo ka yi nga nandzihi ngopfu; kambe wena u hlayisile vhinyo leyo nandziha ku fikela sweswi!” 11 Mahlori lawa, hi wona layo sungula lawa Yesu a nga ma endla, loko a ri emutini wa Kana eGaleliya, a komba ku twala ka yena; kutani vadyondzisiwa va yena va pfumela eka yena. 12 Endzhaku ka swona a rhelela a ya eKapernawume, a ri ni mana wa yena ni vamakwavo ni vadyondzisiwa va yena; kutani va xwa kona masiku ma nga ri mangani.

Ta ku basisiwa ka Tempele

13 Nkhuvo wa Paseka ya Vayuda a wu ri kusuhi, kutani Yesu a tlhandlukela eYerusalema. 14 ETempeleni, a kuma vanhu lava xavisaka tihomu ni tinyimpfu ni matuva, ni lava ncincaka timali va tshamile. 15 Kuteloko a endlile nkharisa wa tingoti, a va hlongola va huma hinkwavo eTempeleni, ni tinyimpfu ni tihomu; a hangalasa ni mali ya lava bindzulaka, a wisetela ni matafula ya vona. 16 Kutani a byela lava xavisaka matuva, a ku: “Susani swilo leswi la; mi nga teki yindlu ya Tata wa mina, mi yi endla ya ku bindzulela eka yona.” 17 Kutani vadyondzisiwa va yena va tsundzuka leswi tsariweke eMatsalweni, loko va te: “Ku hisekela yindlu ya wena, we Xikwembu, swa ndzi dya.” 18 Kutani Vayuda va n'wi vutisa va ku: “U nga hi komba xikombiso xihi xa leswaku u na matimba yo endla leswi xana?” 19 Yesu a va hlamula, a ku: “Hindzimuxani Tempele leyi, kutani mina ndzi ta yi pfuxa hi masiku manharhu.” 20 Hiloko Vayuda va ku: “Tempele leyi yi tekile malembe ya 46 , ku aka yona, kutani wena, xana u ri u ta yi pfuxa hi masiku manharhu xana?” 21 Kambe Yesu a a vula Tempele ya miri wa yena. 22 Hikokwalaho loko a pfukile eku feni, vadyondzisiwa va yena va tsundzukile leswaku mhaka leyi ú tshama a yi vula; kutani va pfumela Matsalwa ni rito leri Yesu a ri vuleke.

Yesu ú tiva vanhu hinkwavo

23 Loko a ri eYerusalema, enkhubyeni wa Paseka, vanhu lavo tala va pfumela eka yena, hi ku vona mahlori lawa a ma endlaka. 24 Kambe Yesu a nga kokiwanga mbilu hi vona, hikuva a a tiva vanhu hinkwavo swinene; 25 naswona a swi nga kali swi fanela leswaku a byeriwa ta munhu hi munhu un'wana, hikuva a a tiva leswi nge mbilwini ya munhu.

Yohane 3

Ta Yesu na Nikodema

1 A ku ri ni un'wana wa Vafarisi loyi a va ku i Nikodema; a a ri un'wana wa tindhuna ta Vayuda. 2 Siku rin'wana, ú tile eka Yesu ni vusiku, a fika a ku: “Mufundhisi, ha swi tiva leswaku u mudyondzisi la humaka eka Xikwembu, hikuva a ku na munhu la nga endlaka mahlori lawa u ma endlaka, loko Xikwembu xi nga ri na yena.” 3 Yesu a n'wi hlamula, a ku: “Ndzi tiyisisile ndzi ri ka wena, a ku na munhu la nga vonaka Mfumo wa Xikwembu, loko a nga tlhelanga a tswariwa ra vumbirhi.” 4 Nikodema a ku ka yena: “Loko munhu a dyuharile, swi nga endlekisa ku yini ku tlhela a tswariwa xana? Xana a nga swi kota ku vuyela endzeni ka mana wa yena, a tlhela a tswariwa ra vumbirhi xana?” 5 Yesu a hlamula, a ku: “Ndzi tiyisisile ndzi ri ka wena, loko munhu a nga tswariwi hi mati ni Moya, a nga ka a nga ngheni eMfun'weni wa Xikwembu. 6 Nyama yi tswala swa nyama; kambe Moya wu tswala swa moya. 7 U nga hlamali loko ndzi te ka wena, swa fanela leswaku mi tlhela mi tswariwa ra vumbirhi. 8 Moya wu hungela lomu wu rhandzaka kona, kutani u twa mpfumawulo wa wona, kambe a wu tivi lomu wu humaka kona, ni lomu wu yaka kona. Swi tano ni ka hinkwavo lava tswariweke hi Moya wa Xikwembu.” 9 Nikodema a n'wi hlamula, a ku: “Swilo leswi swi nga endlekisa ku yini xana?” 10 Yesu a n'wi hlamula, a ku: “U mudyondzisi la tivekaka wa Israele, kambe xana timhaka leti a wu ti tivi xana? 11 Ndzi tiyisisile ndzi ri ka wena, hi vulavula hi leswi hi swi tivaka, naswona hi veka vumbhoni bya leswi hi swi voneke; kambe a mi amukeri vumbhoni bya hina. 12 Leswi mi nga pfumeriki loko ndzi mi byela hi swa laha misaveni, xana mi ta pfumerisa ku yini loko ndzi mi byela hi swa le matilweni xana? 13 A ku na munhu loyi a tshamaka a tlhandlukela ematilweni, loko a nga ri loyi a xikeke hi le matilweni, yena N'wana-wa-Munhu. 14 Ku fana na leswi Muxe a tshamaka a hayeka nyoka emananga, N'wana-wa-Munhu na yena ú ta fanela ku hayekiwa hi mukhuva wolowo, 15 ku endlela leswaku un'wana ni un'wana la pfumelaka eka yena, a kuma vutomi lebyi nga heriki.” 16 Hikuva Xikwembu xi rhandzile misava swonghasi, xi ko xi nyika N'wana wa xona la nga un'we, leswaku un'wana ni un'wana la pfumelaka ka yena, a nga lovi, kambe a va ni vutomi lebyi nga heriki. 17 Xikwembu a xi rhumanga N'wana wa xona emisaveni ku ta avanyisa misava, kambe a ku ri ku endlela leswaku misava yi ta ponisiwa ha yena. 18 Loyi a pfumelaka eka N'wana, a nga avanyisiwi; kambe la nga pfumeriki ú avanyisiwile ni sweswi, hikuva a nga pfumelanga eka N'wana wa Xikwembu loyi a nga un'we eka xona. 19 Ku avanyisiwa ku ta hi mhaka leyi: Hileswaku ku vonakala ku tile emisaveni, kambe vanhu va rhandzile munyama ku tlula ku vonakala, hikuva mintirho ya vona a yi ri leyo biha. 20 Un'wana ni un'wana la endlaka leswo biha, ú venga ku vonakala, kutani a nga ti eku vonakaleni, hi ku chava leswaku mintirho ya yena yi nga ta humela erivaleni. 21 Kambe loyi a hanyaka entiyisweni, wa ta eku vonakaleni, leswaku mintirho ya yena yi ta vonaka yi ri leyi endliweke hi ku yingisa Xikwembu.

Ta Yesu na Yohane Mukhuvuri

22 Endzhaku ka sweswo, Yesu a ya ni vadyondzisiwa va yena etikweni ra Yudiya, kutani a xwa kona masikunyana a ri na vona, a khuvula vanhu. 23 Yohane na yena a a khuvula le Enoni, kusuhi na Salime, hikuva a ku ri ni mati layo tala kona; vanhu a va ya ka yena, va ya khuvuriwa. 24 Enkarhini wolowo Yohane a a nga si pfaleriwa ekhotsweni. 25 Kutani ku humelela ku kanetana exikarhi ka vadyondzisiwa va Yohane ni Muyuda un'wana, emhakeni ya swa ku basisiwa. 26 Hiloko va ta eka Yohane, va ku ka yena: “Vona Mufundhisi, munhu loyi a wu ri na yena entsungeni wa Yordani, loyi u nga vula vumbhoni ehenhla ka yena, wa karhi wa khuvula na yena, kutani hinkwavo va khitikana va ya eka yena.” 27 Yohane a hlamula, a ku: “Munhu a nga ka a nga kumi xa nchumu, loko a nga nyikiwanga xona hi Tilo. 28 N'wina hi n'wexe mi timbhoni ta mina leswaku ndzi te: ‘A hi mina Mesiya, kambe ndzi rhumiwile ku n'wi bulela ndlela.’ 29 N'winyi wa mutekiwa, i muteki; nxangwana ya muteki leyi yimaka yi yingisa muteki loyi, yi tsaka swinene loko yi twa rito ra yena; hikokwalaho sweswi ku tsaka ka mina ku hetisekile. 30 Yena ú fanele ku ya a kula, mina ndzi ya ndzi tsongahala.”

Loyi a humaka etilweni

31 Loyi a humaka ehenhla, ú le henhla ka hinkwavo; loyi a humaka emisaveni, i wa misava, kutani ú vulavula hi swa misava; loyi a humaka etilweni, ú le henhla ka hinkwavo. 32 Yena ú vula vumbhoni bya leswi a swi voneke ni ku swi twa, kambe a ku na loyi a amukelaka vumbhoni bya yena. 33 Munhu la amukelaka vumbhoni bya yena, ú tiyisa leswaku Xikwembu xa tshembeka. 34 Loyi a rhumiweke hi Xikwembu, ú vula marito ya Xikwembu, hikuva Xikwembu a xi pimi loko xi nyika Moya wa xona. 35 Tatana ú rhandza N'wana, kutani ú vekile swilo hinkwaswo emavokweni ya yena. 36 Loyi a pfumelaka eka N'wana, ú ni vutomi lebyi nga heriki; loyi a nga yingisiki N'wana, a nga ka a nga kumi vutomi, kambe vukari bya Xikwembu byi tshame henhla ka yena.

Yohane 4

Ta Yesu ni wansati wa Musamariya

1 Vafarisi a va twile mahungu ya vanhu lava nge: “Yesu ú tlula Yohane hi ku kuma vadyondzisiwa ni ku khuvula.” 2 (Hambileswi a a nga ri yena Yesu hi xiviri loyi a a khuvula, kambe a ku khuvula vadyondzisiwa va yena.) 3 Loko Yesu a twile sweswo, a suka eYudiya, a tlhelela eGaleliya. 4 A a fanele ku tsemakanya hi le tikweni ra Samariya. 5 Kutani a fika emutini lowu a va ku i Sikari, kwale Samariya, kusuhi ni nsimu leyi Yakobo a a nyikile Yosefa, n'wana wa yena. 6 Xihlovo xa Yakobo a xi ri kona kwalaho. Leswi Yesu a a karhele hi ku famba, a ya wisa eka xona. A wu lava ku va nkarhi wa nhlekanhi. 7 Kutani ku ta fika wansati wa Musamariya a ta eku keni ka mati. Yesu a ku ka yena: “Ndzi nyike mati ndzi nwa.” 8 Vadyondzisiwa va yena vona a va yile emutini ku ya xava swakudya. 9 Wansati wa Musamariya a ku ka yena: “Leswi wena u nga Muyuda, u komberisa ku yini mati eka mina ndzi nga wansati wa Musamariya xana?” (Mhaka hileswaku Vayuda ni Vasamariya a va nga fambelani.) 10 Yesu a n'wi hlamula, a ku: “Loko onge u tivile leswi Xikwembu xi nyikaka swona, ni loyi a vulavulaka na wena a ku: ‘Ndzi nyike mati ndzi nwa’, a wu ta va u komberile eka yena, kutani a a ta va a ku nyikile mati lama hanyaka.” 11 Wansati a ku ka yena: “Hosi, a wu na xikelelo, ni xihlovo xi entile; mati lama hanyaka, u nga ma kuma kwihi xana? 12 Xana u lonkulu eka Yakobo tata wa hina, la hi nyikeke xihlovo lexi, lexi na yena a nga nwa ka xona, yena ni vana va yena ni swifuwo swa yena ke?” 13 Yesu a n'wi hlamula, a ku: “Un'wana ni un'wana la nwaka mati lawa, ú ta tlhela a twa torha. 14 Kambe un'wana ni un'wana la nwaka mati lawa ndzi nga ta n'wi nyika wona, a nga ka a nga ha tlheli a twa torha ni siku ni rin'we; kambe mati lawa ndzi nga ta n'wi nyika wona, ma ta va eka yena xihlovo xa mati lama pfelelaka, ku yisa evutomini lebyi nga heriki.” 15 Wansati a ku ka yena: “Hosi, ndzi nyike mati wolawo, ndzi ta ka ndzi nga ha twi torha, ndzi nga ha tlheli ndzi ta eku keni kwala.” 16 Yesu a ku ka yena: “Famba, u ya vitana nuna wa wena, mi ta haleno.” 17 Wansati a n'wi hlamula, a ku: “A ndzi na nuna.” Yesu a ku ka yena: “Wa vurisa loko u ku, a wu na nuna, 18 hikuva u vile ni vanuna va ntlhanu, kutani loyi u nga na yena sweswi, a hi nuna wa wena; kwalaho u tiyisile.” 19 Wansati a ku ka yena: “Hosi, ndza swi vona leswaku u muprofeta. 20 Vatata wa hina va gandzerile entshaveni leyi; kutani n'wina mi ri: ‘Ndhawu leyi vanhu va fanelaka ku gandzelela eka yona, hi le Yerusalema.’ ” 21 Yesu a ku ka yena: “Twana mina manana: Nkarhi wa ta, lowu mi nga ta ka mi nga ha gandzeri Tatana mi ri entshaveni leyi, hambi ku ri eYerusalema. 22 N'wina mi gandzela lexi mi nga xi tiviki; hina hi gandzela lexi hi xi tivaka; hikuva ku ponisiwa ku huma eka Vayuda. 23 Kambe nkarhi wa ta, ni sweswi wu tile, lowu vagandzeri va xiviri va nga ta gandzela Tatana hi moya ni ntiyiso, hikuva Tatana ú lava vagandzeri lavo tano. 24 Xikwembu i moya; kutani lava xi gandzelaka, va fanele ku xi gandzela hi moya ni ntiyiso.” 25 Wansati a ku ka yena: “Ndza swi tiva leswaku Mesiya, loyi a vuriwaka Kriste, wa ta; siku a taka, ú ta hi tivisa swilo hinkwaswo.” 26 Yesu a ku ka yena: “Ndzi yena, mina ndzi vulavulaka na wena.” 27 Enkarhinyana wolowo vadyondzisiwa va Yesu va ta fika, kutani va hlamala hileswi a vulavulaka ni wansati; hambiswiritano, a ku vanga na un'we la nga te: “U lava yini?” kumbe: “U vulavulela yini na yena ke?” 28 Kutani wansati a siya khuwana ra yena, a ya emutini, a ya byela vanhu, a ku: 29 “Tanani, mi ta vona munhu loyi a nga ndzi byela hinkwaswo leswi ndzi tshamaka ndzi swi endla; xana a nga ka a nga vi yena Mesiya ke?” 30 Kutani va huma emutini va ta eka Yesu. 31 Enkarhini wolowo vadyondzisiwa va yena va n'wi khongotela, va ku: “Mufundhisi, wa nga dya!” 32 A ku ka vona: “Swakudya ndzi na swona, leswi n'wina mi nga swi tiviki.” 33 Vadyondzisiwa va vutisana va ku: “Xana ku nga va ni munhu un'wana la n'wi tiseleke swakudya xana?” 34 Yesu a ku ka vona: “Swakudya swa mina i ku endla ku rhandza ka Loyi a ndzi rhumeke, ni ku heta ntirho wa yena swinene. 35 Xana a mi tolovelanga ku vula leswaku: ‘Ka ha sele tin'hweti ta mune, kutani ku ta ta ntshovelo’ xana? Vonani, mina ndzi ri, tlakusani mahlo mi languta masimu: Ma vupfele ku tshoveriwa. Nisweswi, 36 la tshovelaka ú kuma hakelo, kutani ú hlengeleta mavele, a ma hlengeletela ku kuma vutomi lebyi nga heriki, leswaku loyi a byalaka ni loyi a tshovelaka va kota ku tsaka swin'we. 37 Hi mukhuva wolowo xivuriso lexi nge: ‘Un'wana wa byala, un'wana wa tshovela’, xi tiyile. 38 Mina ndzi mi rhumile ku tshovela lexi mi nga tikarhatelangiki xona; van'wana va tikarhatile va tirha, kasi n'wina mi lo ta hi ku tshovela swa nyuku wa vona.” 39 Vasamariya lavo tala va muti wolowo va pfumela eka Yesu hikwalaho ka leswi vuriweke hi wansati, loko a te: “Ú ndzi byerile hinkwaswo leswi ndzi swi endleke.” 40 Hikokwalaho loko Vasamariya va fikile eka Yesu, va n'wi rhamba leswaku a ya xwa le ka vona; kutani a ya xwa masiku mambirhi kona. 41 Kutani ku engeteleka lavo tala lava pfumeleke hikwalaho ka ku dyondzisa ka yena; 42 hiloko va ku ka wansati: “A ma ha ri wona mahungu ya wena lama endlaka leswaku hi pfumela; hikuva na hina hi n'wi twile, kutani ha swi tiva leswaku loyi i Muponisi wa misava hakunene.”

Ta Yesu loko a hanyisa n'wana wa ndhuna

43 Endzhaku ka masiku lawa mambirhi, Yesu a suka, a ya eGaleliya. 44 Yena Yesu hi xiviri xa yena a a tiyisile loko a te: “Muprofeta a nga kombiwi xichavo etikweni ra rikwavo.” 45 Hambiswiritano loko a fika le Galeliya, Vagaleliya va n'wi amukela, hikuva na vona a va yile enkhubyeni le Yerusalema, kutani a va vonile hinkwaswo leswi a swi endleke enkhubyeni wolowo. 46 Kutani Yesu a vuyela kambe eKana wa Galeliya, laha a tshamaka a hundzula mati ma endla vhinyo kona. A ku ri ni ndhuna le Kapernawume, leyi a yi vabyeriwa hi n'wana wa yona wa jaha. 47 Loko munhu loyi a twile leswaku Yesu ú tile eGaleliya a huma eYudiya, a ta ka yena, a ta n'wi kombela leswaku a rhelela a ya hanyisa n'wana wa yena, loyi a a ri kusuhi ni ku fa. 48 Kutani Yesu a ku ka yena: “Loko mi nga voni mahlori ni swihlamariso, a mi swi koti ku pfumela.” 49 Ndhuna yi ku ka yena: “Hosi, wa nga rhelela, jahanyana ra mina ri nga si fa.” 50 Yesu a ku ka yena: “Famba, n'wana wa wena ú ta hanya.” Munhu loyi a kholwa leswi Yesu a n'wi byeleke swona, kutani a famba. 51 Loko a ha rhelela ku ya kaya, malandza ya yena ma n'wi hlanganisa, ma n'wi tivisa, ma ku: “Jaha ra wena ri hanyile.” 52 A va vutisa nkarhi lowu n'wana a nga sungula ku antswa ha wona, kutani va ku ka yena: “Tolo, hi nkarhi wa 1 nindzhenga, ku hisa ka miri wa yena ku yimile.” 53 Tata wa yena a tsundzuka leswaku hi wona nkarhi lowu Yesu a nga te ka yena: “N'wana wa wena ú ta hanya.” Kutani yena hi xiviri xa yena ni va ndyangu wa yena hinkwavo, va pfumela. 54 Lawa i mahlori ya vumbirhi lawa Yesu a ma endleke loko a fika eGaleliya a huma eYudiya.

Yohane 5

Ta Yesu loko a hanyisa muvabyi eBetesda

1 Endzhaku ka sweswo, nkhuvo wa Vayuda wu va kona, kutani Yesu a tlhandlukela eYerusalema. 2 Le Yerusalema, hi tlhelo ra Nyangwa-ya-Tinyimpfu, ku ni vuhlambelo lebyi hi Xiheveru va nge i Betesda, byi rhendzeriwe hi tinxaxa ta ntlhanu ta timhandze letikulu. 3 Vanhu lavo tala ngopfu lava vabyaka, kukota lavo-fe-mahlo, ni swilema, ni lava omeke swirho, a va tolovele ku tshama kona va yimela ku pfindluka ka mati, 4 hikuva, hi minkarhi yin'wana, ntsumi ya Hosi a yi xikela evuhlambelweni, yi ta pfindlusa mati; kutani la rhangeke a nghena loko mati ma ha ku pfindlusiwa, a a hanyisiwa, hambi a ri ni vuvabyi byihi na byihi. 5 Kona kwalaho, a ku ri ni munhu loyi a a ri ni malembe ya 38 a ri karhi a vabya. 6 Loko Yesu a n'wi vona a etlele kwalaho, ni loko a tivile leswaku ú vabyile nkarhi lowo leha, a ku ka yena: “Xana wa swi lava ku hanyisiwa xana?” 7 Muvabyi a n'wi hlamula, a ku: “Hosi, a ndzi na munhu loyi a ndzi petaka evuhlambelweni, loko mati ma ha ku pfindluka; kutani loko ndzi ku ndzi ya kona, un'wana a ndzi rhangela, a nghena.” 8 Yesu a ku ka yena: “Pfuka, u teka sangu ra wena, u famba.” 9 Hi nomu lo, munhu loyi a hanyisiwa, kutani a teka sangu ra yena, a famba. Siku ra kona a ri ri ra Savata. 10 Hikokwalaho Vayuda va ku eka loyi a hanyisiweke: “Namuntlha i siku ra Savata, kutani u tlula Nawu loko u rhwala sangu ra wena.” 11 A va hlamula, a ku: “Loyi a nga ndzi hanyisa, hi yena la nga te ka mina: ‘Teka sangu ra wena, u famba!’ ” 12 Va n'wi vutisa, va ku: “I mani munhu wa kona loyi a nga te ka wena, ri teke u famba, xana?” 13 Loyi a hanyisiweke a nga tivanga leswaku i mani, hikuva Yesu a a sukile hikwalaho ka ntshungu lowu a wu ri kona. 14 Endzhaku ka sweswo Yesu a ya n'wi kuma eTempeleni, kutani a ku ka yena: “Vona, u hanyisiwile. Loko u nga lavi ku weriwa hi khombo lerikulu leri tlulaka lero rhanga, tshika ku dyoha.” 15 Kutani munhu yoloye a ya byela Vayuda leswaku loyi a n'wi hanyiseke i Yesu. 16 Hikwalaho ka swona, Vayuda va sungula ku xanisa Yesu, hikuva a a endlile swilo leswi hi siku ra Savata. 17 Kambe Yesu a va byela, a ku: “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.” 18 Hikwalaho ka sweswo, Vayuda va hundzisa hi ku navela ku n'wi dlaya, hikuva a a nga tlulanga nawu wa Savata ntsena, kambe a a vurile leswaku Xikwembu i tata wa yena wa xiviri, kutani a tiendla la ringanaka ni Xikwembu.

Ta vuhosi bya N'wana

19 Kutani Yesu a ku ka vona: “Ndzi tiyisisile ndzi ri ka n'wina, N'wana a nga ka a nga tisunguleli a endla xilo hi yexe; ú endla ntsena lexi a xi voneke xi endliwa hi Tata wa yena; hinkwaswo leswi Tatana a swi endlaka, na yena N'wana wa swi endla. 20 Hikuva Tatana ú rhandza N'wana; wa n'wi komba hinkwaswo leswi a swi endlaka, kutani ú ta n'wi komba ni mintirho leyikulu leyi tlulaka ni leyi, ku endlela leswaku n'wina mi ta hlamala. 21 Kukotisa leswi Tatana a pfuxaka vafi, a engeta a va nyika vutomi, swi tano na yena N'wana, ú nyika vutomi eka lava a rhandzaka ku va nyika byona. 22 Naswona Tatana a nga avanyisi munhu ni un'we, kambe ú nyikile N'wana ntirho hinkwawo wo avanyisa, 23 leswaku hinkwavo va va ni xichavo eka N'wana, kukotisa leswi va nga ni xichavo eka Tatana. Un'wana ni un'wana la nga riki na xichavo eka N'wana, a nga na xichavo ni ka Tatana la n'wi rhumeke. 24 “Ndzi tiyisisile ndzi ri ka n'wina, la yingisaka rito ra mina, a va a pfumela eka Loyi a ndzi rhumeke, ú ni vutomi lebyi nga heriki; kutani a nga ka a nga avanyisiwi, kambe ú humile eku feni a ya nghena evutomini. 25 Ndzi tiyisisile ndzi ri ka n'wina: Nkarhi wa ta, nisweswi wu tile, lowu vafi va nga ta twa rito ra N'wana wa Xikwembu, kutani lava va ri twaka va ta hanya. 26 Tanihi leswi Tatana hi xiviri xa yena a nga xihlovo xa vutomi, hi mukhuva wolowo ú nyikile N'wana ku va xihlovo xa vutomi na yena. 27 Naswona, ú n'wi nyikile matimba ya ku avanyisa, hikuva i N'wana-wa-Munhu. 28 Mi nga hlamaleni hi mhaka leyi, hikuva nkarhi wa ta lowu hinkwavo lava nge masirheni va nga ta twa rito ra yena, 29 kutani va ta huma. Lava endleke leswinene va ta pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.”

Ta vumbhoni ehenhla ka Yesu

30 “Ndzi nga ka ndzi nga tisunguleli ndzi endla xilo hi ndzexe; ndzi avanyisa hilaha ndzi byeriwaka hakona; hikokwalaho, ku avanyisa ka mina ku lulamile, hikuva a ndzi lavi ku endla ku rhandza ka mina, kambe ku rhandza ka Loyi a ndzi rhumeke. 31 “Loko ndzi tivekela vumbhoni, vumbhoni bya mina a byi na ntiyiso. 32 Ú kona un'wana la vekaka vumbhoni ehenhla ka mina, kutani ndzi tiva leswaku vumbhoni lebyi a byi vekaka ehenhla ka mina byi ni ntiyiso. 33 Mi rhumerile vanhu eka Yohane, kutani ú vekile vumbhoni ehenhla ka ntiyiso. 34 A ndzi tiseketeli hi vumbhoni byo huma ka munhu, kambe ndzi vula timhaka leti leswaku mi ta ponisiwa. 35 Yohane a a ri rivoni leri pfurhaka ni ku vangama; kutani n'wina mi swi nkhensile, mi tsakela hi nkarhinyana ku vonakala ka yena. 36 Kambe vumbhoni lebyi ndzi nga na byona byi tlula bya Yohane, hikuva mintirho leyi Tatana a ndzi nyikeke leswaku ndzi yi hetisisa, yi nga yona mintirho leyi ndzi yi endlaka, hi yona leyi vekaka vumbhoni ehenhla ka mina, bya leswaku ndzi rhumiwile hi Tatana. 37 Naswona, Tatana la ndzi rhumeke, na yena hi xiviri xa yena ú vekile vumbhoni ehenhla ka mina. A mi si twa rito ra yena ni siku ni rin'we, ni nghohe ya yena a mi si yi vona. 38 Rito ra yena a ri akanga eka n'wina, hikuva a mi pfumeri eka loyi Tatana a n'wi rhumeke. 39 Mi lavisisa Matsalwa, hikuva mi anakanya leswaku, eka wona, mi ta kuma vutomi lebyi nga heriki; kasi hi wona lama vekaka vumbhoni ehenhla ka mina. 40 Kutani a mi swi lavi ku ta eka mina leswaku mi ta kuma vutomi. 41 “A ndzi tiseketeli hi ku dzunisiwa loku humaka eka vanhu; 42 kambe ndza mi tiva n'wina, a mi na rirhandzu eka Xikwembu. 43 Mina ndzi tile hi vito ra Tata wa mina, kambe a mi ndzi amukeri; kasi loko un'wana a nga ta hi vito ra yena n'wini, mi ta n'wi amukela. 44 Mi nga pfumerisa ku yini ke, kasi mi tsakela ku dzunisana, mi nga lavi ku dzunisiwa loku humaka eka Xikwembu, lexi nga xin'we ntsena! 45 Mi nga anakanyi leswaku mina ndzi ta mi mangalela emahlweni ka Tatana; loyi a mi mangalelaka i Muxe, yena loyi mi nga veka ku tshemba ka n'wina eka yena. 46 Loko a mi pfumerile Muxe, na mina a mi ta ndzi pfumela; hikuva a ti ri ta mina leti a nga tsala tona. 47 Loko mi nga pfumeri matsalwa ya yena, mi nga pfumerisa ku yini marito ya mina xana?”

Yohane 6

Ta ku phameriwa ka vanhu va 5000

1 Endzhaku ka sweswo Yesu a suka a pela lwandle ra Galeliya, ri nga lwandle ra Tiberiyo. 2 A ku ri ni ntshungu lowukulu lowu a wu famba na yena, hikuva a wu vona mahlori lawa a ma endleke hi ku horisa vavabyi. 3 Kutani Yesu a tlhandlukela entshaveni, a ya tshama hansi ni vadyondzisiwa va yena. 4 Nkhuvo wa Paseka ya Vayuda a wu ri kusuhi. 5 Kuteloko Yesu a tlakusile mahlo ya yena, ni loko a vonile leswaku ku ni ntshungu lowukulu lowu taka eka yena, a ku ka Filipi: “Xana hi nga xava kwihi swinkwa leswaku vanhu lava va kota ku dya ke?” 6 (A a vula sweswo ku ri ku n'wi ringa, hikuva yena n'winyi a a tiva leswi a nga ta swi endla.) 7 Filipi a n'wi hlamula, a ku: “Swinkwa swa tidenari ta 200 swi nga ka swi nga va ringani hambiloko un'wana ni un'wana a nga kuma xiphemu lexitsongo ntsena.” 8 Un'wana wa vadyondzisiwa va yena, Andriya makwa Simoni Petro, a ku ka yena: 9 “Ku ni mufana kwala, la nga ni swinkwa swa ntlhanu swa maxalana, ni tinhlampfinyana timbirhi; kambe swi nga ringana mani eka vanhu vo tarisa leswi xana?” 10 Yesu a ku: “Tshamisisani vanhu ehansi.” Byanyi a byi tele ngopfu endhawini yoleyo. Kutani vanhu va tshama hansi; loko va hlayiwa, vavanuna a va lava ku ringana 5 000 . 11 Kutani Yesu a teka swinkwa; kuteloko a nkhensile, a avela vanhu lava a va tshamile; a teka ni tinhlampfi, a endlisa sweswo, hinkwavo va dya va xurha. 12 Loko va xurhile, a ku ka vadyondzisiwa va yena: “Hlengeletani mahlanhla lama saleke, leswaku ku nga cukumetiwi nchumu.” 13 Va ma hlengeleta, kutani mahlanhla ya swinkwa swa ntlhanu swa maxalana, lama siyiweke hi lava dyeke, ma tata swirhundzu swa 12 . 14 Vanhu lava voneke mahlori lama endliweke hi Yesu, va ku: “Hakunene, loyi hi yena Muprofeta la faneleke ku ta emisaveni.” 15 Kambe Yesu, hi ku tiva leswaku va lava ku ta va ta n'wi vutla leswaku va n'wi endla Hosi, a tlhelela entshaveni a ri yexe.

Ta Yesu loko a famba henhla ka mati

16 Nimadyambu, vadyondzisiwa va yena va rhelela va ya elwandle, 17 kutani va nghena ebyatsweni, va ku va pela lwandle va ya eKapernawume; mpima-vayeni wu va fikela, Yesu a nga si vuya. 18 Naswona lwandle a ri sungula ku karhata, hikuva a ku hunga bubutsa lerikulu. 19 Loko va tlutile mpfhuka wo ringana 5 km kumbe 6 km, va vona Yesu a ri karhi a famba ehenhla ka mati, a ta kusuhi ni byatso; kutani va chava. 20 Kambe a ku ka vona: “Hi mina, mi nga chaveni.” 21 A va lava ku n'wi khandziyisa ebyatsweni, kambe hi nomu lo, byatso byi fika eribuweni laha a va ya kona.

Ta vanhu loko va lava Yesu

22 Loko ri xile, ntshungu lowu a wu sele entsungeni wa lwandle, wu kuma leswaku tolo a ku sele byatso byin'we ntsena kwalaho, ni leswaku Yesu a a nga nghenanga ebyatsweni lebyi vadyondzisiwa va yena va ngheneke ka byona, kambe vadyondzisiwa a va fambile va ri voxe. 23 Hambiswiritano, mabyatso man'wana lama humaka eTiberiyo ma tile ma ta fika kusuhi ni laha va nga dyela kona xinkwa, loko Hosi yi khongerile. 24 Kuteloko vanhu va vonile leswaku Yesu ni vadyondzisiwa va yena a va nga ha ri kona kwalaho, va nghena emabyatsweni walawo, va pelela eKapernawume, va ri karhi va lava Yesu. 25 Kuteloko va n'wi kumile entsungeni wa lwandle, va ku ka yena: “Mufundhisi, u tile rini la?” 26 Yesu a va hlamula, a ku: “Ndzi tiyisisile ndzi ri ka n'wina, ma ndzi lava, ku nga ri hileswi mi nga vona mahlori, kambe hileswi mi nga dya swinkwa mi xurha. 27 Mi nga tirheleni swakudya leswi bolaka, kambe tirhelani swakudya leswi nga boriki, swi nga leswi nyikaka vutomi lebyi nga heriki. Swakudya leswi, mi ta nyikiwa hi N'wana-wa-Munhu, hikuva hi yena loyi Xikwembu Tatana xi n'wi fungheke hi mfungho wa xona.”

Yesu i vuswa bya vutomi

28 Va ku ka yena: “Xana hi fanele ku endla yini ku tirha mintirho ya Xikwembu xana?” 29 Yesu a va hlamula, a ku: “Ntirho wa Xikwembu hi lowu: Hileswaku mi pfumela eka Loyi xi n'wi rhumeke.” 30 Kutani va ku ka yena: “Loko swi ri tano, xana u endla mahlori wahi hi ma vona, leswaku hi ta pfumela eka wena, xana? U endla ntirho wihi xana? 31 Vatata wa hina va dyile manna emananga, hilaha Matsalwa ma vuleke hakona loko ma te: ‘Ú va nyikile vuswa lebyi humaka etilweni, va dya.’ ” 32 Yesu a ku ka vona: “Ndzi tiyisisile ndzi ri ka n'wina, a a nga ri Muxe la mi nyikeke vuswa lebyi humaka etilweni, kambe Tata wa mina hi yena la mi nyikaka vuswa bya xiviri lebyi humaka etilweni. 33 Hikuva vuswa bya Xikwembu hi lebyi byi xikaka hi le tilweni, lebyi nyikaka misava evutomi.” 34 Va ku ka yena: “Hosi, hi nyike vuswa byebyo hi masiku hinkwawo.” 35 Yesu a ku ka vona: “Hi mina vuswa bya vutomi; loyi a taka eka mina, a nga ka a nga twi ndlala, ni loyi a pfumelaka eka mina a nga ka a nga twi torha ni siku ni rin'we. 36 Kambe ndzi mi byerile leswaku, hambileswi mi ndzi voneke, a mi pfumeli. 37 Hinkwavo lava Tatana a ndzi nyikaka vona, va ta ta ka mina; ni loyi a taka ka mina, ndzi nga ka ndzi nga n'wi cukumeteli handle. 38 Hikuva ndzi xikile hi le tilweni, ku nga ri ku ta endla ku rhandza ka mina, kambe ku endla ku rhandza ka Loyi a ndzi rhumeke. 39 Kutani ku rhandza ka Loyi a ndzi rhumeke, hileswaku ndzi nga lahlekeriwi hi lava a ndzi nyikeke vona, hambi a ri un'we ntsena, kambe ndzi va pfuxa hi siku ra makumu. 40 Tata wa mina ú lava leswaku un'wana ni un'wana la langutaka N'wana, a va a pfumela eka yena, a va ni vutomi lebyi nga heriki, kutani mina ndzi ta n'wi pfuxa hi siku ra makumu.” 41 Vayuda va n'unun'uta hikwalaho ka yena, hileswi a nga te: “Hi mina vuswa lebyi xikeke hi le tilweni.” 42 Kutani va ku: “Xana loyi a hi yena Yesu n'wana Yosefa, loyi hi tivaka tata wa yena ni mana wa yena ke? Kutani sweswi ú vurisa ku yini, loko a ku: ‘Ndzi xikile hi le tilweni?’ ” 43 Yesu a va hlamula, a ku: “Ku nga vi na ku n'unun'uta exikarhi ka n'wina. 44 A ku na munhu la nga taka ka mina, loko a nga kokeriwi ka mina hi Tatana la ndzi rhumeke, kutani mina ndzi ta n'wi pfuxa hi siku ra makumu. 45 Ku tsariwile etibukwini ta vaprofeta, va ku: ‘Hinkwavo va ta dyondzisiwa hi Xikwembu.’ Un'wana ni un'wana la tweke Tatana ni ku dyondza eka yena, wa ta eka mina. 46 A swi vuli leswaku ku ni munhu loyi a tshamaka a vona Tatana, e-e! Loyi a humaka eka Xikwembu, hi yena ntsena la voneke Tatana. 47 “Ndzi tiyisisile ndzi ri ka n'wina, loyi a pfumelaka, ú ni vutomi lebyi nga heriki. 48 Hi mina vuswa bya vutomi. 49 Vatata wa n'wina va dyile manna emananga, kambe va file. 50 Vuswa lebyi xikaka hi le tilweni hi byo byebyi, lebyi endlaka leswaku loko munhu a dya byona, a nga ka a nga fi. 51 Hi mina vuswa lebyi hanyaka lebyi xikeke hi le tilweni; loko munhu a dya vuswa bya kona, ú ta hanya hilaha ku nga heriki, kutani vuswa lebyi ndzi nga ta byi nyika vanhu, i nyama ya nga; ndza yi nyika leswaku misava yi va ni vutomi.” 52 Vayuda va kanetana hi xivona, va ku: “Xana munhu loyi a nga hi nyikisa ku yini nyama ya yena leswaku hi dya xana?” 53 Yesu a ku ka vona: “Ndzi tiyisisile ndzi ri ka n'wina, loko mi nga dyi nyama ya N'wana-wa-Munhu, ni loko mi nga nwi ngati ya yena, a mi na vutomi eka n'wina. 54 Loyi a dyaka nyama ya nga ni ku nwa ngati ya nga, ú ni vutomi lebyi nga heriki, kutani mina ndzi ta n'wi pfuxa hi siku ra makumu. 55 Hikuva nyama ya nga i swakudya swa xiviri, ni ngati ya nga i swakunwa swa xiviri. 56 Loyi a dyaka nyama ya nga ni ku nwa ngati ya nga, ú tshama eka mina, na mina ndzi tshama eka yena. 57 Kukotisa leswi Tatana la hanyaka a ndzi rhumeke, na leswi mina ndzi hanyaka hikwalaho ka Tatana, hi mukhuva wolowo na yena la ndzi dyaka ú ta hanya hikwalaho ka mina. 58 Lebyi hi byo vuswa lebyi xikeke hi le tilweni; a byi fani ni lebyi vatatana va byi dyeke, hikuva byona a byi va sivelanga ku fa; loyi a dyaka vuswa lebyi, ú ta hanya hilaha ku nga heriki.” 59 Yesu ú vurile timhaka leti loko a ri karhi a dyondzisa esinagogeni, le Kapernawume.

Ta marito ya vutomi lebyi nga heriki

60 Loko vadyondzisiwa va Yesu lavo tala va twile leswi, va ku: “Rito leri ra nonon'hwa; i mani la nga ri tiyelaka xana?” 61 Kambe Yesu ú swi tivile hi mbilu leswaku vadyondzisiwa va yena va n'unun'uta hikwalaho ka swona, kutani a ku ka vona: “Xana mhaka leyi ya mi khunguvanyisa xana? 62 Mi ta vula yini, siku mi vonaka N'wana-wa-Munhu a tlhandluka a ya laha a a ri kona ni khale xana? 63 Moya hi wona wu hanyisaka, nyama a yi pfuni nchumu. Marito lawa ndzi mi byelaka wona, i moya ni vutomi. 64 Hambiswiritano, van'wana exikarhi ka n'wina a va pfumeli.” (Hikuva Yesu ú swi tivile ni le ku sunguleni, leswaku i vamani lava nga ta ka va nga pfumeri, ni leswaku loyi a nga ta n'wi xenga i mani.) 65 Kutani a engeta a ku: “Hikokwalaho ndzi mi byeleke, ndzi ku, a ku na munhu loyi a nga taka eka mina, loko a nga nyikiwanga swona hi Tatana.” 66 Ku sukela enkarhini wolowo, vadyondzisiwa va yena lavo tala va tlhelela ndzhaku, va nga ha famba-fambi na yena. 67 Hiloko Yesu a ku ka lava khume na vambirhi: “Xana na n'wina mi lava ku famba xana?” 68 Simoni Petro a hlamula, a ku ka yena: “Hosi, hi nga ya ka mani xana? U ni marito ya vutomi lebyi nga heriki. 69 Kutani hina hi ni ku pfumela, ni ku swi tiva leswaku hi wena Muhlawuleki wa Xikwembu.” 70 Yesu a va hlamula, a ku: “Xana a hi mina ndzi nga mi hlawula, n'wina lava khume na vambirhi? Kasi un'wana wa n'wina i nala!” 71 A a vula Yudasi, n'wana Simoni Iskariyota, hikuva hi yena loyi a a tiyimisele ku n'wi xenga, hambileswi a a ri un'wana wa lava khume na vambirhi.

Yohane 7

Ta vamakwavo va Yesu lava nga pfumeriki

1 Endzhaku ka sweswo Yesu a famba-famba eGaleliya; a nga lavanga ku famba-famba eYudiya hikuva Vayuda a va lava ku n'wi dlaya. 2 Nkhuvo wa Vayuda wo endleriwa emintsongeni a wu ri kusuhi. 3 Kutani vamakwavo wa yena va ku ka yena: “Suka la, u ya eYudiya, leswaku vadyondzisiwa va wena na vona va ta vona mintirho leyi u yi endlaka. 4 Hikuva a ku na munhu la endlaka xo endla a ri exihundleni, loko a lava ku twakala ematlhelweni hinkwawo; loko mintirho leyi u yi endlaka yi ri yo yaleyi, tikombe eka misava hinkwayo.” 5 (Hikuva, na vona vamakwavo wa yena a va nga ri na ku pfumela eka yena.) 6 Hiloko Yesu a ku ka vona: “Nkarhi wa mina a wu si fika; kambe eka n'wina nkarhi wihi ni wihi wu lulamile. 7 Misava yi nga ka yi nga mi vengi, kambe mina ya ndzi venga, hikuva ndzi tiyisa vumbhoni bya leswaku mintirho ya yona yi bihile. 8 N'wina tlhandlukelani enkhubyeni, mina a ndzi yi enkhubyeni wolowo, hikuva nkarhi wa mina a wu si fika swinene.” 9 Loko a vurile sweswo, a tisalela eGaleliya.

Ta Yesu enkhubyeni wa le mitsongeni

10 Kambe loko vamakwavo wa yena va tlhandlukerile enkhubyeni, na yena a tlhandlukela kona, ku nga ri erivaleni, kambe exihundleni. 11 Vayuda a va n'wi lava enkhubyeni, va ku: “Ú kwihi munhu wa kona xana?” 12 A ku ri ni ku hleva-hleva ngopfu entshungwini, hi mhaka ya yena. Van'wana a va ku: “I munhu lonene!” Van'wana a va ku: “E-e, ú lahlekisa vanhu.” 13 Hambiswiritano, a ku vanga na munhu la vulavuleke hi yena erivaleni, hikwalaho ka ku chava Vayuda. 14 Loko nkhuvo wu ri exikarhi, Yesu a tlhandlukela eTempeleni a sungula ku dyondzisa. 15 Vayuda va hlamala, va ku: “Xana munhu loyi ú byi kuma kwihi vutivi, kasi a nga dyondzanga?” 16 Yesu a va hlamula a ku: “Dyondzo leyi ndzi yi dyondzisaka a hi ya mina, kambe i ya Loyi a ndzi rhumeke. 17 Loko munhu a navela ku endla ku rhandza ka Xikwembu, ú ta tiva loko dyondzo leyi yi huma eka Xikwembu, kumbe loko ndzi tivulavulela swa mina ntsena? 18 Loyi a vulavulaka swo huma emiehleketweni ya yena, ú tilavela ku dzunisiwa, kasi la lavaka ku dzunisa loyi a n'wi rhumeke, ú tshembekile, kutani ku hava ku homboloka eka yena. 19 Xana Muxe a nga mi nyikanga Nawu xana? Kambe hambiswiritano, ku hava na un'we wa n'wina la hlayisaka Nawu. Hikokwalaho ka yini mi lava ku ndzi dlaya ke?” 20 Ntshungu wu hlamula, wu ku: “U ni demona wena; xana i mani la lavaka ku ku dlaya xana?” 21 Yesu a va hlamula a ku: “Ndzi endlile ntirho wun'we, kutani hinkwenu ma ha hlamala hikwalaho ka wona. 22 Muxe ú mi nyikile ntolovelo wa ku yimba (a hi leswaku a wu huma eka Muxe, kambe a wu huma eka vakokwana), kutani ma yimbisa munhu hi siku ra Savata! 23 Loko mi yimbisa munhu hi siku ra Savata, mi endlela ku hlayisa Nawu wa Muxe; kutani xana mi ndzi karihela yini, leswi mina ndzi nga hanyisa munhu emirini wa yena hinkwawo hi siku ra Savata xana? 24 Mi nga yi hi nghohe loko mi avanyisa, kambe avanyisani hi ku lulama.”

Xana loyi hi yena Mesiya xana?

25 Vaaki van'wana va Yerusalema va ku: “Xana a hi yena loyi va n'wi lavaka leswaku va ta n'wi dlaya ke? 26 Vonani! Ú vulavula erivaleni, kambe a va n'wi kongomi; xana tihosi ti nga va ti swi kumile hakunene leswaku hi yena Mesiya xana? 27 Kasi loyi, ha n'wi tiva lomu a humaka kona, kambe loko a ri Mesiya, siku a humelelaka, ku hava munhu na un'we la nga ta tiva lomu a humaka kona.” 28 Loko Yesu a ri karhi a dyondzisa eTempeleni, a tlakusa rito, a ku: “Ma ndzi tiva, mi tiva ni lomu ndzi humaka kona; a ndzi lo titisa, kambe Loyi a ndzi rhumeke, yena i ntiyiso hi xiviri xa wona, kutani a mi n'wi tivi. 29 Mina ndza n'wi tiva, hikuva ndzi huma eka yena, naswona hi yena la ndzi rhumeke.” 30 Kutani va ringeta ku n'wi khoma; kambe a ku vanga na un'we la nga yisa voko eka yena, hikuva nkarhi wa yena a wu nga si fika. 31 Lavo tala exikarhi ka ntshungu va pfumela ka yena, va ku: “Loko Mesiya a ta, xana ú ta endla mahlori lama tlulaka lawa ya endliweke hi munhu loyi xana?”

Malandza ma rhumiwa ku ya khoma Yesu

32 Vafarisi va twa leswi ntshungu wu hlevetelaka swona ehenhla ka Yesu, kutani vaprista lavakulu ni Vafarisi va rhuma malandza ku ya n'wi khoma. 33 Kavaloko a ku ka vona: “Ndza ha ta va na n'wina nkarhinyana, kutani endzhaku ka swona ndzi ta ya eka Loyi a ndzi rhumeke. 34 Mi ta ndzi lava, kambe a mi nga ndzi kumi; ni laha ndzi nga ta va kona, mi nga ka mi nga ti.” 35 Hiloko Vayuda va vutisana, va ku: “Ú lava ku ya kwihi munhu loyi, lomu hi nga ta tsandzeka ku n'wi kuma kona xana? Xana ú lava ku ya eka Vayuda lava hangalakeke exikarhi ka vamatiko, ni ku dyondzisa vamatiko xana? 36 Xana ú vula yini, loko a ku: ‘Mi ta ndzi lava, kambe a mi nga ndzi kumi’, ni loko a ku: ‘Laha ndzi nga ta va kona, mi nga ka mi nga ti?’ ”

Ta milambu ya mati lama hanyaka

37 Hi siku ro hetelela ra nkhuvo, ri nga lerikulu, Yesu a suka a yima, kutani a tlakusa rito a ku: “Loko munhu a ri ni torha, a a te ka mina a ta nwa. 38 Hilaha Tsalwa ri vuleke hakona, ‘milambu ya mati lama hanyaka yi ta khuluka yi huma embilwini ya loyi a pfumelaka eka mina.’ ” 39 Hi ku vula sweswo, a a ringanisa Moya lowu lava pfumeleke eka yena va nga ta nyikiwa wona. Ku fikela nkarhi wolowo, Moya lowo Kwetsima a wu nga si nyikiwa, hikuva Yesu a a nga si tlakusiwa.

Ta ku hambana ka vanhu

40 Loko van'wana exikarhi ka ntshungu va twile marito lawa, va ku: “Loyi hi yena Muprofeta hakunene.” 41 Van'wana va ku: “Loyi, hi yena Mesiya.” Kambe van'wana va ku: “Xana Mesiya a nga huma eGaleliya ke? 42 Xana Tsalwa a ri vulanga leswaku Mesiya ú ta huma erixakeni ra Davhida, a velekiwa eBetlehema, emutini lowu Davhida a a tshama ka wona xana?” 43 Kutani ku pfuka ku hambana exikarhi ka ntshungu hikwalaho ka yena. 44 Van'wana va vona a va navela ku n'wi khoma, kambe a ku vanga na un'we la nga yisa voko eka yena.

Ta vakulukumba lava nga pfumeriki

45 Kavaloko malandza ma vuyela eka vaprista lavakulu ni ka Vafarisi; vona va ma vutisa, va ku: “Hikwalaho ka yini mi nga vuyanga na yena ke?” 46 Malandza ma hlamula, ma ku: “A ku si va na munhu ni siku ni rin'we la vulavulaka ku fana ni munhu loyi.” 47 Vafarisi va va hlamula, va ku: “Xana na n'wina mi xiseteriwile xana? 48 I mani eka vakulukumba ni le ka Vafarisi loyi a tshamaka a pfumela eka yena xana? 49 Kambe loko va ri vanhu va ntshungu wolowo, lava nga tiviki Nawu, va rhukaniwile.” 50 Un'wana wa vona, yena Nikodema loyi a nga tshama a ta ka Yesu, a ku ka vona: 51 “Xana Nawu wa hina wu nga avanyisa munhu, a nga si yingisiwa, ni leswi a swi endleke swi nga si tiviwa xana?” 52 Va n'wi hlamula, va ku: “Xana na wena u huma eGaleliya ke? Lavisisa swinene u ta vona leswaku ku hava muprofeta la humaka eGaleliya.”

Ta wansati wa muoswi

53 Kutani va hangalaka, un'wana ni un'wana a ya ekaya ka yena.

Yohane 8

1 Loko a ri Yesu yena a ya eNtshaveni ya Mitlhwari. 2 Nimixo, a hubuta a vuyela eTempeleni; vanhu hinkwavo va ta eka yena, kutani a tshama hansi, a sungula ku va dyondzisa. 3 Vatsari ni Vafarisi va tisa wansati loyi a kumiweke a ri karhi a endla vuoswi. Va n'wi yimisa emahlweni ka vanhu hinkwavo, 4 kutani va ku ka Yesu: “Mudyondzisi, wansati loyi ú kumiwile a ri karhi a endla vuoswi. 5 Muxe ú hi lerisile eNawini ku khandla vavasati lavo tano hi maribye; xana wena, a ri yini ke?” 6 A va vula sweswo ku ri ku n'wi ringa, leswaku va ta kuma mhaka leyi va nga n'wi vekaka nandzu ha yona. Kambe Yesu a korhama, a tsala-tsala hansi hi ritiho. 7 Kutani loko va sindzisa hi ku n'wi vutisisa, a ololoka, a ku ka vona: “Loyi a nga riki na xidyoho, exikarhi ka n'wina, a a rhange a n'wi hoxa hi ribye.” 8 A tlhela a korhama, a tsala-tsala hansi. 9 Kuteloko va twile sweswo, va huma ha un'we un'we, ku sungula hi lavakulu; kutani Yesu a sala a ri yexe, wansati na yena a ri kwalaho. 10 Kutani Yesu a ololoka, a ku ka yena: “Manana, va kwihi ke? Xana a ku na un'we la ku avanyiseke xana?” 11 A ku: “Na un'we a nga kona, Hosi.” Yesu a ku ka yena: “Na mina a ndzi ku avanyisi; famba, kutani u nga ha tlheli u dyoha.”

Yesu i ku vonakala ka misava

12 Kutani Yesu a engeta a vulavula na vona, a ku: “Hi mina ku vonakala ka misava; loyi a ndzi landzelelaka a nga ka a nga fambi emunyameni ni siku ni rin'we, kambe ú ta va ni ku vonakala ka vutomi.” 13 Kavaloko Vafarisi va ku ka yena: “U tihumesela vumbhoni! Vumbhoni bya wena a byi tiyanga.” 14 Yesu a va hlamula, a ku: “Na loko ndzi tihumesela vumbhoni, vumbhoni bya mina byi tiyile, hikuva ndzi tiva lomu ndzi humaka kona, ni lomu ndzi yaka kona; kambe n'wina a mi tivi lomu ndzi humaka kona, ni lomu ndzi yaka kona a mi ku tivi. 15 N'wina, mi avanyisa hi mukhuva wa vanhu; mina a ndzi avanyisi munhu. 16 Kambe, na loko ndzi avanyisa, ku avanyisa ka mina hi lokunene; hikuva a ndzi ndzexe, kambe Tatana la ndzi rhumeke ú na mina. 17 Enawini wa n'wina, ku tsariwile leswaku vumbhoni bya vanhu vambirhi byi tiyile. 18 Hi mina la tihumeselaka vumbhoni, kutani na yena Tatana, loyi a ndzi rhumeke, ú humesa vumbhoni ehenhla ka mina.” 19 Va ku ka yena: “Tata wa wena ú kwihi?” Yesu a hlamula, a ku: “A mi ndzi tivi, hambi a ri Tata wa mina a mi n'wi tivi; loko onge mi ndzi tivile, ingi mi tivile na Tata wa mina.” 20 Yesu ú vurile marito lawa loko a ri karhi a dyondzisa eTempeleni, laha swibya swa nhlengo a swi vekiwa kona; kutani a ku vanga na un'we la n'wi khomeke, hikuva nkarhi wa yena a wu nga si fika.

Laha ndzi yaka kona, a mi nga yi!

21 Yesu a engeta a ku ka vona: “Ndza famba, kutani mi ta ndzi lava, kambe mi ta fela eku dyoheni ka n'wina. Laha ndzi yaka kona, mi nga ka mi nga yi.” 22 Kwalaho Vayuda va ku: “Xana ú ta tidlaya, leswi a nge: ‘Laha ndzi yaka kona, mi nga ka mi nga yi’ xana?” 23 A ku ka vona: “N'wina mi huma kwala hansi; mina ndzi huma le henhla; n'wina mi va misava leyi; mina a ndzi wa misava leyi. 24 Hi swo leswi ndzi mi byeleke swona, loko ndzi te: ‘Mi ta fela eswidyohweni swa n'wina.’ Hikuva loko mi nga pfumeri leswaku ‘Mina ndzi yena’, mi ta fela eswidyohweni swa n'wina.” 25 Kavaloko va ku ka yena: “Hi wena mani?” Yesu a ku ka vona: “Ndzi ni mhaka yihi ku tiya ndza ha vulavula na n'wina xana? 26 Ndzi ni leswo tala leswi ndzi nga swi vulaka ni ku swi avanyisa ehenhla ka n'wina; kambe Loyi a ndzi rhumeke i ntiyiso wa xiviri; kutani leswi ndzi swi tweke eka yena, ndzi swi tivisa misava.” 27 A va tivanga leswaku a a vulavula na vona hi swa Tatana. 28 Hikokwalaho, Yesu a ku ka vona: “Loko mi ta va mi tlakusile N'wana-wa-Munhu, hi kona mi nga ta tiva leswaku ‘Mina ndzi yena’. Naswona mi ta tiva leswaku a ndzi endli nchumu hi ku tirhandzela ka mina, kambe ndzi vula swilo leswi hilaha Tatana a ndzi dyondziseke hakona. 29 Loyi a ndzi rhumeke, ú na mina; a nga ndzi tshikanga ndzi ri ndzexe, hikuva masiku hinkwawo ndzi endla leswi swi n'wi tsakisaka.” 30 Loko a ri karhi a vula timhaka leti, lavo tala va pfumela eka yena.

Ntiyiso wu ta mi ntshunxa

31 Yesu a ku ka Vayuda lava pfumeleke ka yena: “Loko mi tiyisela eritweni ra mina, mi vadyondzisiwa va mina hakunene; 32 naswona mi ta tiva ntiyiso, kutani ntiyiso wu ta mi ntshunxa.” 33 Va n'wi hlamula va ku: “Hi vatukulu va Abrahama; a hi si va mahlonga ya munhu ni siku ni rin'we. Xana u nga vurisa ku yini u ku: ‘Mi ta va lava ntshunxiweke’ xana?” 34 Yesu a va hlamula, a ku: “Ndzi tiyisisile ndzi ri ka n'wina: Un'wana ni un'wana la endlaka xidyoho, i hlonga ra xidyoho. 35 Hlonga a ri tshameli makumu ekaya, kambe la tshamelaka makumu i n'wana wa laha kaya. 36 Hikokwalaho ke, loko N'wana a mi ntshunxa, mi ta va lava ntshunxekeke hakunene. 37 Ndza swi tiva leswaku mi vatukulu va Abrahama, kambe mi lava ku ndzi dlaya, hikuva rito ra mina ri hava ndhawu eka n'wina. 38 Mina ndzi vulavula hi leswi ndzi swi voneke eka Tatana, kambe n'wina mi endla leswi mi swi tweke swi huma eka tata wa n'wina.”

Diyavulosi i tata wa n'wina

39 Va n'wi hlamula, va ku: “Tata wa hina i Abrahama.” Yesu a ku ka vona: “Loko a mi ri vana va Abrahama, a mi ta tirha mintirho ya Abrahama. 40 Kambe sweswi mi lava ku ndzi dlaya, mina loyi ndzi nga mi byela ntiyiso lowu ndzi wu tweke eka Xikwembu! Abrahama a nga endlanga swona leswi. 41 N'wina mi endla mintirho ya tata wa n'wina.” Va ku ka yena: “Hina a hi vana vo tswariwa hi vuhunguki; hi ni tatana un'we ntsena, xi nga Xikwembu.” 42 Yesu a ku ka vona: “Loko Xikwembu a xi ri tata wa n'wina, a mi ta ndzi rhandza, hikuva mina sweswi ndzi nga kwala ndzi huma eka Xikwembu. A ndzi lo titisa, kambe ndzi rhumiwile hi xona. 43 Hikwalaho ka yini mi nga twisisi leswi ndzi swi vulaka xana? I mhaka ya leswi mi tsandzekaka ku yingisa rito ra mina. 44 N'wina mi huma eka tata wa n'wina, a nga Diyavulosi, kutani mi tsakela ku endla ku navela ka tata wa n'wina. A a ri mudlayi ni le ku sunguleni. A nga yimanga entiyisweni, hikuva ku hava ntiyiso eka yena. Loko a vulavula mavunwa, ú tikomba lexi a nga xona, hikuva i muhembi, ni tata wa mavunwa. 45 Kambe mina ndzi vulavula ntiyiso, kutani hi swo swi endlaka leswaku mi nga ndzi pfumeli. 46 I mani eka n'wina la nga kombaka xidyoho xa mina xana? Loko ndzi vulavula ntiyiso, hikwalaho ka yini mi nga ndzi pfumeli? 47 Loyi a humaka eka Xikwembu ú yingisa marito ya Xikwembu; kambe n'wina a mi yingisi, hikuva a mi humi eka Xikwembu.”

Ta Yesu na Abrahama

48 Vayuda va hlamula, va ku ka yena: “Xana ho hemba loko hi ku, u Musamariya, ni leswaku u ni demona ke?” 49 Yesu a hlamula, a ku: “Mina, a ndzi na demona, kambe ndzi xixima Tata wa mina, kutani n'wina a mi ndzi xiximi. 50 A ndzi tilaveli ku dzunisiwa; ú kona la lavaka ku ndzi dzunisa, naswona wa ndzi avanyisela. 51 Ndzi tiyisisile ndzi ri ka n'wina, munhu la hlayisaka rito ra mina, a nga ka a nga voni rifu ni siku ni rin'we.” 52 Vayuda va ku ka yena: “Sweswi ha swi tiva leswaku u ni demona; Abrahama ú file; swi tano na vaprofeta, va file; kutani wena u ku: ‘Loko munhu a hlayisa rito ra mina, a nga ka a nga khumbiwi hi rifu ni siku ni rin'we!’ 53 Xana u lonkulu ku tlula Abrahama tata wa hina loyi a nga fa xana? Vaprofeta na vona va file; xana u tivona u ri mani xana?” 54 Yesu a hlamula, a ku: “Loko ndzi tidzunisa, ku tidzunisa ka mina loku a ku pfuni nchumu. La ndzi dzunisaka i Tata wa mina, loyi mi nge: ‘I Xikwembu xa hina.’ 55 Kasi a mi n'wi tivi, kambe mina ndza n'wi tiva. Loko ndzi nga vula leswaku a ndzi n'wi tivi, ndzi ta va muhembi ku fana na n'wina. Kambe mina ndza n'wi tiva, kutani ndzi hlayisa rito ra yena. 56 Tata wa n'wina Abrahama ú tsakile ngopfu ku vona siku ra mina; ú ri vonile, a vuya a tsaka.” 57 Kwalaho Vayuda va ku ka yena: “A wu si fika ni le ka malembe ya 50 , kutani xana u ri, u vonile Abrahama xana?” 58 Yesu a ku ka vona: “Ndzi tiyisisile ndzi ri ka n'wina: Loko Abrahama a nga si va kona, mina a ndzi ri ‘Loyi ndzi nga yena’.” 59 Kutani va rhola maribye ku n'wi hoxetela, kambe Yesu a tumbela, kutani a huma eTempeleni.

Yohane 9

Ta ku horisiwa ka loyi a velekiweke a nga voni

1 Loko Yesu a ri karhi a hundzela emahlweni, a vona munhu loyi a velekiweke a file mahlo. 2 Kutani vadyondzisiwa va yena va n'wi vutisa, va ku: “Mufundhisi, i xidyoho xa mani lexi endleke leswaku munhu loyi a velekiwa a nga voni: I xa yena kumbe i xa vatswari va yena xana?” 3 Yesu a hlamula, a ku: “A ku dYohanga yena kumbe vatswari va yena, kambe ú velekiwile a file mahlo leswaku mintirho ya Xikwembu yi ta vonaka ha yena. 4 Hi fanele ku tirha mintirho ya Loyi a ndzi rhumeke, dyambu ri nga si pela; vusiku bya ta, lebyi munhu a nga ta ka a nga ha swi koti ku tirha. 5 Loko ndza ha ri laha misaveni, ndzi ku vonakala ka misava.” 6 Kuteloko a vurile sweswo, a tshwutela hansi, a pfuva ndzhope hi marha; a tota mahlo ya munhu yoloye hi ndzhope ya kona, 7 kutani a ku ka yena: “Famba u ya hlamba exidziveni xa Silowama (hileswaku ‘Xirhumiwa’).” Kutani a ya a ya hlamba, a vuya a ri karhi a vona. 8 Lava akelaneke na yena ni lava a va tala ku n'wi vona a ri mukomberi, va ku: “Xana a hi yena loyi a a tolovele ku tshama a ri karhi a kombela xana?” 9 Van'wana va ku: “Hi yena.” Van'wana va ku: “E-e, a hi yena, kambe wo fana na yena.” Yena hi yexe a ku: “Hi mina!” 10 Kutani va ku ka yena: “Mahlo ya wena ma horisiwile hi mukhuva wihi xana?” 11 Yena a hlamula, a ku: “Munhu loyi va nge i Yesu, ú pfuve ndzhope, a ndzi tota mahlo hi yona, kutani ú te ka mina: ‘Famba u ya hlamba le Silowama!’ Ndzi yile, ndzi ya hlamba, kutani ndzi kotile ku vona.” 12 Va ku ka yena: “Ú kwihi munhu wa kona?” A ku: “A ndzi swi tivi.”

Vafarisi va vutisisa la horisiweke mahlo

13 Va yisa munhu loyi a a file mahlo eka Vafarisi. 14 Siku leri Yesu a pfuveke ndzhope ha rona a horisa mahlo ya munhu loyi, a ri ri ra Savata. 15 Vafarisi va engeta va vutisisa munhu wa kona ku tiva hilaha a horisiweke hakona. A ku ka vona: “Ú ndzi totile mahlo hi ndzhope; ndzi yile ndzi ya hlamba, kutani sweswi ndzi kota ku vona.” 16 Vafarisi van'wana va ku: “La endleke swilo leswi a nga humi eka Xikwembu, hikuva a nga na mhaka ni siku ra Savata.” Van'wana va ku: “Xana munhu wa mudyohi a nga swi kotisa ku yini ku endla mahlori layo tano xana?” Kutani ku va ni ku hambana exikarhi ka vona. 17 Va tlhela va vutisa loyi a a file mahlo, va ku: “Wena u ri yini hi yena, leswi u nge, ú ku horisile mahlo?” Yena a ku: “I muprofeta!” 18 Vayuda a va nga pfumeli loko va byeriwa leswaku munhu loyi khale a a file mahlo, ni leswaku sweswi ú hundzukile la kotaka ku vona; kutani va vitana vatswari va yena, 19 va va vutisa, va ku: “Xana loyi i n'wana wa n'wina loyi mi nge, ú velekiwile a file mahlo xana? Sweswi ú swi kotisa ku yini ku vona xana?” 20 Vatswari va yena va hlamula va ku: “Ha swi tiva leswaku loyi i n'wana wa hina, ni leswaku ú velekiwile a file mahlo; 21 kambe lexi xi endlaka leswaku sweswi a kota ku vona, a hi xi tivi, ni loyi a n'wi horiseke mahlo, a hi n'wi tivi. N'wi vutiseni, ú kurile, ú ta tivulavulela.” 22 Vatswari va yena a va vurisa sweswo hi ku chava Vayuda, hikuva Vayuda a va twananile leswaku, loko munhu un'wana a nga tshuka a vula leswaku Yesu i Mesiya, ú ta hlongoriwa esinagogeni. 23 Hikokwalaho vatswari va yena va nga te: “Ú kurile, n'wi vutiseni.” 24 Va tlhela va vitana kambe munhu loyi a a file mahlo, va ku ka yena: “Hlambanya emahlweni ka Xikwembu! Hina ha swi tiva leswaku munhu loyi i mudyohi.” 25 Yena a ku: “Mina a ndzi swi tivi loko a ri mudyohi; ndzo tiva xilo xin'we ntsena, hileswaku a ndzi tsandzeka ku vona, kasi sweswi ndza vona.” 26 Va ku ka yena: “Ú endlile yini eka wena? Ú ku horisile mahlo hi mukhuva wihi ke?” 27 A va hlamula, a ku: “Ndzi mi byerile khale, kambe a mi swi twanga; hikwalaho ka yini mi lava ku tlhela mi twa mhaka leyi xana? Xana na n'wina mi lava ku va vadyondzisiwa va yena xana?” 28 Kutani va n'wi rhuketela va ku: “Hi wena u nga mudyondzisiwa wa yena; hina hi vadyondzisiwa va Muxe. 29 Ha swi tiva leswaku Xikwembu xi vulavurile na Muxe; kambe munhu loyi, a hi tivi lomu a humaka kona.” 30 La horisiweke a va hlamula, a ku: “Hi yo mhaka leyi hlamarisaka! A mi tivi lomu a humaka kona, kambe ú ndzi horisile mahlo! 31 Ha swi tiva leswaku Xikwembu a xi yingisi vadyohi; kambe loko munhu a chava Xikwembu, a endla ku rhandza ka xona, Xikwembu xa n'wi yingisa. 32 A hi si swi twa ni siku ni rin'we, leswaku munhu la velekiweke a nga voni, a nga va a horisiwe mahlo hi munhu un'wana. 33 Loko onge munhu luya a nga humanga eka Xikwembu, ingi a nga kotanga ku endla nchumu.” 34 Va n'wi hlamula va ku: “Wena u velekiweke ethyakeni ra swidyoho, u nga dyondzisa hina xana?” Kutani va n'wi hlongolela handle.

Ta ku fa mahlo ya moya

35 Yesu a twa leswaku va n'wi hlongorile, kutani loko a n'wi kumile, a ku ka yena: “Xana wa pfumela eka N'wana-wa-Munhu xana?” 36 A hlamula a ku: “I mani Hosi, leswaku ndzi ta kota ku pfumela ka yena?” 37 Yesu a ku ka yena: “U n'wi vonile, hi yena loyi a vulavulaka na wena.” 38 Wanuna a hlamula a ku: “Hosi, ndza pfumela!” kutani a nkhinsama emahlweni ka Yesu. 39 Yesu a ku: “Ndzi tile emisaveni leyi ku ta avanyisa vanhu, leswaku lava nga voniki va kota ku vona, ni leswaku lava vonaka va hundzuka lavo-fe-mahlo.” 40 Vafarisi van'wana lava a va ri na yena, va twa marito lawa, kutani va ku ka yena: “Xana na hina hi file mahlo xana?” 41 Yesu a ku ka vona: “Loko a mi file mahlo, a mi nga ta va na nandzu; kambe sweswi, leswi mi nge: ‘Ha vona’, nandzu wa ha ri na n'wina.

Yohane 10

Xifaniso xa tshanga ra tinyimpfu

1 “Ndzi tiyisisile ndzi ri ka n'wina: Loyi a nga ngheniki hi nyangwa etshangeni ra tinyimpfu, kambe a khandziya hi kun'wana, i khamba, tlhelo i xigevenga. 2 Kambe murisi wa tinyimpfu ú nghena hi nyangwa. 3 Mulanguteri wa nyangwa wa n'wi pfulela, kutani tinyimpfu ti twa rito ra yena; ú vitana tinyimpfu leti nga ta yena hi mavito ya tona, a ti humesela handle. 4 Loko a humesile leti nga ta yena hinkwato, a ti rhangela emahlweni, kutani tinyimpfu ta n'wi landzelela, hikuva ti tiva rito ra yena. 5 Ti nga ka ti nga landzi munhu loyi ti nga n'wi tiviki; ti ta n'wi balekela, hikuva a ti tivi rito ra vambe.” 6 Yesu ú va byerile xifaniso lexi, kambe vona a va twisisanga leswi a a va byela swona.

Yesu i murisi lonene

7 Yesu a engeta a ku ka vona: “Ndzi tiyisisile ndzi ri ka n'wina: Hi mina nyangwa ya tinyimpfu. 8 Hinkwavo lava teke ndzi nga si fika, i makhamba, tlhelo i swigevenga, kambe tinyimpfu a ti va yingisanga. 9 Hi mina nyangwa. Loko munhu a nghena ha mina, ú ta ponisiwa; ú ta nghena a huma, a kuma madyelo. 10 Muyivi ú tela ntsena ku yiva, ni ku tlhava, ni ku lovisa; mina ndzi tile leswaku tinyimpfu ti va ni vutomi, ti byi kuma hi ntalo. 11 “Hi mina murisi lonene. Murisi lonene ú nyiketa vutomi bya yena a fela tinyimpfu. 12 La tirhelaka mali, a nga riki murisi kumbe n'wini wa tinyimpfu, ú siya tinyimpfu a tsutsuma loko a vona xinkankanka xi ta; kutani xinkankanka xi ti vutla ni ku ti hangalasa. 13 Mhaka hileswaku i mutirheli wa mali ntsena, a nga vuli nchumu hi tinyimpfu. 14 Hi mina murisi lonene; ndzi tiva leti nga ta mina, ni leti nga ta mina ta ndzi tiva, 15 hilaha Tatana a ndzi tivaka hakona, ni hilaha na mina ndzi tivaka Tatana hakona; kutani ndzi nyiketa vutomi bya mina ndzi fela tinyimpfu. 16 Naswona ndzi ni tinyimpfu tin'wana leti nga riki ta tshanga leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun'we, ti va ni murisi un'we. 17 Tatana wa ndzi rhandza, hikuva ndzi nyiketa vutomi bya mina, leswaku ndzi ta tlhela ndzi byi kuma. 18 A ku na munhu la ndzi tekelaka byona, kambe ndza byi nyiketa hi ku rhandza ka mina; ndzi ni matimba ya ku byi nyiketa, ni matimba ya ku tlhela ndzi byi kuma. Hi swona leswi Tata wa mina a ndzi leriseke ku endla swona.” 19 Ku hambana ku tlhela ku va kona exikarhi ka Vayuda hikwalaho ka marito walawo. 20 Lavo tala exikarhi ka vona a va ku: “Ú ni demona, ú hlangane nhloko! Mi n'wi yingisela yini xana?” 21 Kambe van'wana a va ku: “Marito lawa a hi ya munhu la nga ni demona. Xana demona ri nga pfula mahlo ya lavo-fe-mahlo xana?”

Ta Yesu loko a nyenyiwa hi Vayuda

22 Enkarhini wolowo, a ku ri ni nkhuvo wa ku hlawulekisa Tempele eYerusalema. A byi ri vuxika, 23 kutani Yesu a a famba-famba eTempeleni, erikupakupeni ra Solomoni. 24 Kavaloko Vayuda va n'wi rhendzela, va ku ka yena: “U ta hi kanakanisa ku fikela rini xana? Loko u ri yena Mesiya, hi byele xikan'we u nga rhendzeleki.” 25 Yesu a va hlamula, a ku: “Ndzi mi byerile, kambe a mi pfumeri. Mintirho leyi ndzi yi endlaka hi vito ra Tata wa mina, yi veka vumbhoni ehenhla ka mina. 26 Kambe a mi pfumeri, hikuva a mi tinyimpfu ta mina. 27 Tinyimpfu ta mina ti yingisa rito ra mina; ndza ti tiva, kutani ta ndzi landzelela. 28 Ndzi ti nyika vutomi lebyi nga heriki; ti nga ka ti nga lovi ni siku ni rin'we, naswona a ku na munhu la nga ta ti vutla evokweni ra mina. 29 Tata wa mina la ndzi nyikeke tona, ú nkulukumba ku tlula hinkwaswo; kutani a ku na munhu la kotaka ku vutla nchumu evokweni ra Tatana. 30 Mina na Tatana hi un'we.” 31 Vayuda va tlhela va teka maribye va lava ku n'wi khandla. 32 Yesu a ku ka vona: “Ndzi mi kombile mintirho leyo tala yo saseka, leyi humaka eka Tatana; xana, eka yona, hi wihi ntirho lowu mi ndzi khandlelaka wona xana?” 33 Vayuda va n'wi hlamula va ku: “A hi ku khandleli ntirho lowunene, kambe hileswi u sandzaka Xikwembu, ni leswi u tiendlaka Xikwembu, kasi wena u munhu ntsena.” 34 Yesu a va hlamula, a ku: “Xana a ku tsariwanga eNawini wa n'wina leswaku Xikwembu xi te: ‘Mi swikwembu’ xana? 35 Xi va vurile ‘swikwembu’, vona lava Rito ra Xikwembu ri fikeke eka vona; kutani Tsalwa ri nga ka ri nga herisiwi. 36 Kutani ke, hikwalaho ka yini mi ku: ‘U sandza Xikwembu’, hi mhaka ya leswi ndzi nga te: ‘Ndzi N'wana wa Xikwembu’ xana? Kasi hi mina loyi Tatana a nga n'wi hlawula ni ku n'wi rhuma emisaveni. 37 Loko ndzi nga endli mintirho ya Tata wa mina, mi nga ndzi pfumeli! 38 Kambe loko ndzi endla yona, hambi mi nga ndzi pfumeli, pfumelani yona mintirho, mi ta tiva ni ku twisisa leswaku Tatana ú le ka mina, na mina ndzi le ka Tatana.” 39 Hiloko va ringeta kambe ku n'wi khoma, kambe a chupuka emavokweni ya vona. 40 Kutani a tlhela a pela nambu wa Yordani, a ya laha Yohane a a khuvulela kona eku sunguleni, kutani a tshama kona. 41 Lavo tala va ta ka yena va ku: “Yohane a nga endlanga ni xikombiso ni xin'we, kambe hinkwaswo leswi Yohane a nga swi vula henhla ka munhu loyi, swi tiyile.” 42 Kutani lavo tala va pfumela ka yena exivandleni xexo.

Yohane 11

Ta ku fa ka Lazaro

1 Siku rin'wana, munhu loyi va nge i Lazaro wa Betaniya, a khomiwa hi vuvabyi, a ri emutini wa vamakwavo Mariya na Marta. 2 (Mariya, hi yena loyi a tshamaka a tota Hosi hi mafurha layo nun'hwela, a tlhela a n'wi sula milenge hi misisi ya yena; kutani Lazaro loyi a a vabya loyi, a a ri makwavo wa yena.) 3 Vamakwavo lava va xisati va rhumela rito eka Yesu, va ku ka yena: “Hosi, loyi u n'wi rhandzaka wa vabya.” 4 Loko Yesu a twa sweswo, a ku: “Vuvabyi lebyi a byi nga yisi eku feni, kambe i bya ku dzunisa Xikwembu, ni leswaku N'wana wa Xikwembu a dzunisiwa hikwalaho ka byona.” 5 Yesu a a rhandza Marta ni makwavo Mariya, a rhandza na Lazaro. 6 Loko a twile leswaku Lazaro wa vabya, a yimanyana masiku mambirhi laha a a ri kona. 7 Kutani endzhaku ka sweswo a ku ka vadyondzisiwa: “A hi tlheleleni eYudiya.” 8 Vadyondzisiwa va ku ka yena: “Mufundhisi, ku nga ri khale, Vayuda a va lava ku ku khandla hi maribye. Xana wa ha lava ku tlhelela kona ke?” 9 Yesu a hlamula a ku: “Xana siku rin'we a ri na tiawara ta 12 xana? Loko munhu a famba ninhlekanhi, a nga khuguriwi, hikuva ú vona ku vonakala ka misava leyi; 10 kambe loko munhu a famba nivusiku, wa khuguriwa, hikuva ku vonakala a ku kona eka yena.” 11 Loko a vurile sweswo, a engeta a ku ka vona: “Lazaro murhandziwa wa hina, ú etlele, kambe ndzi ya ku ya n'wi pfuxa.” 12 Vadyondzisiwa va ku ka yena: “Hosi, loko a etlele, ú ta hanya.” 13 Yesu a a vulavula hi ta ku fa ka Lazaro, kambe vona a va anakanya leswaku ú vulavula hi ta ku etlela vurhongo byinene. 14 Kutani Yesu a va byela erivaleni, a ku: “Lazaro ú file, 15 kutani, hikwalaho ka n'wina, ndzi tsakile hileswi a ndzi nga ri kona kwale, leswaku mi ta pfumela. Kambe a hi yeni eka yena!” 16 Tomasi loyi a vuriwaka “Hahla”, a ku ka vadyondzisiwa-kulobye: “A hi yeni na hina, leswaku hi ya fa na yena.”

Yesu i ku pfuka ni vutomi

17 Kutani loko Yesu a fika, a kuma leswaku Lazaro ú hetile mune wa masiku a ri sirheni. 18 Muti wa Betaniya a wu ri kusuhi na Yerusalema; mpfhuka wa kona a wu ri kwalomu ka 3 km. 19 Kutani Vayuda lavo tala a va tile ka Marta na Mariya ku ta va chavelela hikwalaho ka rifu ra makwavo wa vona. 20 Loko Marta a twa leswaku Yesu wa ta, a ya n'wi hlanganisa; Mariya yena a a tshamile ndlwini. 21 Kutani Marta a ku ka Yesu: “Hosi, loko onge u vile kona, ingi makwerhu a nga fanga. 22 Kambe nisweswi ndza swi tiva leswaku hinkwaswo leswi u swi kombelaka eka Xikwembu, xona xi ta ku nyika swona.” 23 Yesu a ku ka yena: “Makwenu ú ta tlhela a pfuka.” 24 Marta a ku ka yena: “Ndza swi tiva leswaku ú ta pfuka hi siku ra makumu, eku pfukeni ka vafi.” 25 Yesu a ku ka yena: “Hi mina ku pfuka ni vutomi; la pfumelaka ka mina, hambi a nga fa, ú ta hanya, 26 kutani un'wana ni un'wana la hanyaka, a va a pfumela ka mina, a nga ka a nga fi ni siku ni rin'we. Xana wa swi pfumela sweswo xana?” 27 A ku ka yena: “Ina Hosi, ndza pfumela leswaku hi wena Mesiya, N'wana wa Xikwembu, loyi a taka laha misaveni.”

Yesu a tlhaveka a rila

28 Loko Marta a vurile sweswo, a ya, a ya vitana Mariya makwavo, a n'wi byela hi ku hlevetela a ku: “Mudyondzisi ú kwala, wa ku vitana.” 29 Loko Mariya a twa sweswo, a pfuka hi ku hatlisa, a ya eka Yesu. 30 (Yesu a a nga si nghena emutini, kambe a a ha ri kwala Marta a nga n'wi hlanganisa kona.) 31 Vayuda lava a va ri ndlwini na Mariya va ri karhi va n'wi chavelela, loko va n'wi vona a suka a yima a huma hi ku hatlisa, va n'wi landza hi ku anakanya leswaku ú ya le sirheni ku ya rila kona. 32 Loko Mariya a fika laha Yesu a nga kona ni loko a n'wi vona, a nkhinsama emilengeni ya yena, a ku ka yena: “We Hosi, loko onge a wu vile kona, ingi makwerhu a nga fanga.” 33 Loko Yesu a n'wi vona a ri karhi a ba nkosi a rila, ni loko a vona Vayuda lava n'wi heleketaka na vona va ri karhi va ba nkosi va rila, a tlhaveka swinene emoyeni ni ku twa ku vaviseka lokukulu; 34 kutani a ku: “Mi n'wi vekile kwihi xana?” Va ku ka yena: “Hosi, tana u ta vona.” 35 Yesu a rila. 36 Kutani Vayuda va ku: “Vonani hilaha a a n'wi rhandza hakona!” 37 Van'wana va vona va ku: “Yena loyi a nga pfula mahlo ya lavo-fe-mahlo, hikwalaho ka yini a nga kotanga ku endla leswaku munhu loyi a nga fi xana?”

Ta Lazaro loko a pfuxiwa eku feni

38 Yesu a engeta a tlhaveka emoyeni, a ta kusuhi ni sirha. Sirha a ri ri bako, kutani bako ra kona a ri pfariwile hi ribye. 39 Yesu a ku: “Susani ribye!” Marta makwa wa mufi a ku ka yena: “Kambe Hosi, sweswi ku fanele ku va na ku nun'hwa, hikuva ku hundzile mune wa masiku a file.” 40 Yesu a ku ka yena: “Xana a ndzi ku byelanga leswaku loko u pfumela, u ta vona ku kwetsima ka Xikwembu xana?” 41 Kavaloko va susa ribye, kutani Yesu a languta henhla, a ku: “Tatana, ndza ku nkhensa, hikuva u ndzi yingisile. 42 Mina ndzi swi tivile leswaku masiku hinkwawo wa ndzi yingisa, kambe ndzi vurile swilo leswi hikwalaho ka ntshungu lowu yimeke kwala, wu ta kala wu pfumela leswaku hi wena la ndzi rhumeke.” 43 Kuteloko a vurile sweswo, a huwelela hi rito leri tlakukeke, a ku: “Lazaro, humela handle!” 44 Kutani mufi a huma, a tsondzeleriwile milenge ni mavoko hi malapi, mombo wa yena wu bohiwile hi duku. Yesu a ku ka vona: “N'wi ntshunxeni, leswaku a kota ku muka.”

Ta makungu ya ku dlaya Yesu

45 Lavo tala exikarhi ka Vayuda lava a va tile ka Mariya, loko va vonile leswi Yesu a swi endleke, va pfumela eka yena. 46 Kambe van'wana va vona va ya eka Vafarisi, va ya va byela leswi Yesu a swi endleke. 47 Kavaloko vaprista lavakulu ni Vafarisi va vitana Huvo ya Sanedri, va ku: “Hi ta endla yini xana, leswi munhu loyi a endlaka mahlori layo tala? 48 Loko hi n'wi tshikisa sweswo, hinkwavo va ta pfumela ka yena, kutani Varhoma va ta ta va ta lovisa ndhawu leyi ya hina, ni ku hi heta hi rixaka.” 49 Un'wana wa vona loyi va nge i Kayafasi, a a ri Muprista lonkulu lembe rero, kutani a ku ka vona: “A mi tivi nchumu n'wina; 50 xana a mi voni leswaku hi leswi pfunaka hina loko munhu un'we a fela van'wana, ku ri ni leswaku rixaka hinkwaro ri lova xana?” 51 Marito lawa a ma nga humi emiehleketweni ya yena; ú ma vurile hileswi a a ri Muprista lonkulu lembe rero, kutani a vhumbha leswaku Yesu ú ta fanela ku fela rixaka; 52 naswona ku nga ri ntsena ku fela rixaka, kambe ku ri ku hlengeleta vanhu va Xikwembu lava hangalakeke, a va endla van'we. 53 Kutani ku sukela siku rero, Vayuda va boha makungu ya ku dlaya Yesu. 54 Hikokwalaho Yesu a nga ha famba-fambanga erivaleni exikarhi ka Vayuda, kambe a suka kwalaho, a ya etikweni leri nge kusuhi ni mananga, emutini lowu vuriwaka Efrayimi, a ya tshama kona ni vadyondzisiwa va yena. 55 Nkhuvo wa Paseka ya Vayuda a wu ri kusuhi. Lavo tala lava humaka ematikweni, a va tlhandlukele eYerusalema, va ya tibasisa, nkhuvo wu nga si va kona. 56 A va lava Yesu, va vutisana va yimile eTempeleni, va ku: “Xana mi ehleketa yini? A a nga ti enkhubyeni! Xana ú ta ta xana?” 57 Vaprista lavakulu ni Vafarisi a va lerisile leswaku, loko un'wana a tiva laha a nga kona, a a va tivise, leswaku va ta kota ku n'wi khoma.

Yohane 12

Ta Yesu loko a totiwa mafurha le Betaniya

1 Loko ka ha sele masiku ya 6 nkhuvo wa Paseka wu nga si va kona, Yesu a ya eBetaniya. Kona a ku tshama Lazaro loyi Yesu a a n'wi pfuxile eku feni. 2 Va n'wi lunghisela swakudya kona. Marta a a phamela, kutani Lazaro a a ri un'wana wa lava tshameke eswakudyeni na Yesu. 3 Hiloko Mariya a teka xikhudza xa mafurha layo nun'hwela yo durha ngopfu lama endliweke hi murhi wa narda leyinene, a tota milenge ya Yesu, kutani a n'wi sula milenge hi misisi ya yena, yindlu hinkwayo yi tala hi ku nun'hwela ka mafurha ya kona. 4 Yudasi Iskariyota, un'wana wa vadyondzisiwa va Yesu, loyi a a ta n'wi xenga, a vilela a ku: 5 “Hikwalaho ka yini mafurha lawa ma nga xavisiwanga hi tidenari ta 300 , mali yi nyikiwa swisiwana, xana?” 6 A a vurisa sweswo, ku nga ri hileswi a a ri ni mhaka ni swisiwana, kambe hileswi a a ri khamba. A a ri mutameri wa nkwama wa mali, kutani a a tolovele ku pambula leswi cheriweke kona. 7 Kavaloko Yesu a ku: “N'wi tshikeni a hlayisa mafurha lawa, a ma hlayisela siku ra ku lahliwa ka mina. 8 Hikuva swisiwana, mi na swona masiku hinkwawo; kambe mina, a mi nga vi na mina masiku hinkwawo.”

Ta makungu ya ku dlaya Lazaro

9 Ntshungu lowukulu wa Vayuda wu twa leswaku Yesu ú kona kwalaho, kutani va ta, ku nga ri ku ta vona Yesu ntsena, kambe ku vona na yena Lazaro, loyi Yesu a n'wi pfuxeke eku feni. 10 Kavaloko vaprista lavakulu va boha makungu ya ku dlaya na yena Lazaro; 11 hikuva, hikwalaho ka yena, Vayuda lavo tala a va fularhela vaprista, va pfumela eka Yesu.

Ta Yesu loko a nghena eYerusalema

12 Siku leri tlhandlamaka, ntshungu lowukulu wa vanhu lava a va tile enkhubyeni, wu twa leswaku Yesu wa ta eYerusalema; 13 kutani va teka switluka swa mincindzu, va huma va ya n'wi hlanganisa va ri karhi va huwelela, va ku: “Hozana! A ku dzunisiwe la taka hi vito ra Hosi! A ku dzunisiwe yena Mufumi wa Israele!” 14 Yesu a kuma mbhongolo, kutani a yi gada, hilaha Matsalwa ma vuleke hakona, loko ma te: 15 “Mi nga chavi n'wina va le Siyoni! Mufumi wa n'wina hi loyi, wa ta, ú gadile n'wana wa mbhongolo.” 16 Vadyondzisiwa va yena a va twisisanga mhaka leyi eku sunguleni; kambe loko Yesu a tlakuriwile, hi kona va nga tsundzuka leswaku mhaka a yi tsariwile hikwalaho ka yena, ni leswaku vanhu a va endla sweswo va endlela yena. 17 Ntshungu lowu a wu ri na Yesu, loko a lerisa Lazaro ku huma esirheni a n'wi pfuxa eku feni, a wu veka vumbhoni bya timhaka leti. 18 Naswona vanhu lavo tala a va yile va ya hlanganisa Yesu, hikuva a va twile leswaku ú endlile mahlori walawo. 19 Kutani Vafarisi va byelana va ku: “Ma swi vona leswaku a ma ha pfuni nchumu; vonani, misava hinkwayo yi landza yena.”

Ta Vagriki lava lavaka ku vona Yesu

20 Exikarhi ka lava a va tlhandlukele enkhubyeni ku ya gandzela, a ku ri ni Vagriki va nga ri vangani. 21 Va ta eka Filipi, loyi wa Betsayida etikweni ra Galeliya, va ta ku: “Nkulukumba, hi lava ku vona Yesu.” 22 Filipi a ya byela Andriya, kutani Andriya na Filipi va ya byela Yesu. 23 Yesu a va hlamula, a ku: “Nkarhi wu fikile lowu N'wana-wa-Munhu a nga ta tlakuriwa ha wona. 24 Ndzi tiyisisile ndzi ri ka n'wina: Loko ndzhoho ya vele yi nga weli emisaveni yi fa, yi to tshama yi ri tano; kambe loko yi fa, yi ta chela ngopfu. 25 La rhandzaka vutomi bya yena ku tlula mina, ú ta lahlekeriwa ha byona, kambe loyi a byi nyiketaka emisaveni leyi, ú ta byi hlayisela vutomi lebyi nga heriki. 26 Loko munhu a ndzi tirhela, a a ndzi landze, kutani laha ndzi nga kona, na yena nandza wa mina ú ta va kona. Loko munhu a ndzi tirhela, Tatana ú ta n'wi komba mafundzha.

Yesu a vulavula hi ta rifu ra yena

27 “Sweswi moya wa mina wa karhateka; xana ndzi nga vula yini? Xana ndzi nga ku, Tatana, ndzi ponise eka nkarhi lowu, xana? E-e, kambe leswi, hi swo leswi ndzi nga tela swona, eka nkarhi lowu. 28 Tatana, dzunisa vito ra wena!” Kutani ku twakala rito, ri huma etilweni ri ku: “Ndzi ri dzunisile, ndzi ta engeta ndzi ri dzunisa.” 29 Ntshungu lowu a wu yimile kwalaho, wu swi twile, kutani wu ku: “Ri dzindzile!” Van'wana va ku: “Ntsumi yi vulavurile na yena.” 30 Yesu a engeta, a ku: “Rito leri a ri nga endleli mina loko ri twala, kambe ri endlela n'wina. 31 Misava leyi sweswi ya karhi ya avanyisiwa, kutani mufumi wa misava leyi ú ta hlongoriwa sweswi. 32 Kambe mina, loko ndzi ta va ndzi tlakuriwile ndzi suka emisaveni, ndzi ta kokela vanhu hinkwavo eka mina.” 33 A a vurisa sweswo hi ku ringanisa rifu leri a nga ta fa ha rona. 34 Ntshungu wu n'wi hlamula, wu ku: “Hi twile eNawini leswaku Mesiya ú ta hanya hilaha ku nga heriki; u nga vurisa ku yini wena, leswi u nge: ‘N'wana-wa-Munhu ú fanele ku tlakuriwa’ xana? I mani N'wana-wa-Munhu loyi xana?” 35 Yesu a ku ka vona: “Ku vonakala ka ha ta va kona nkarhinyana exikarhi ka n'wina; fambani loko ma ha ri ni ku vonakala, leswaku munyama wu ta ka wu nga mi kumi; kasi loyi a fambaka emunyameni a nga tivi laha a yaka kona. 36 Loko ma ha ri ni ku vonakala, pfumelani eka ku vonakala, leswaku mi hundzuka vanhu va ku vonakala.”

Ta Vayuda loko va tinonon'hwisa

Loko Yesu a vurile sweswo, a suka a ya tifihla kule na vona. 37 Hambileswi a endleke mahlori layo tala ngopfu emahlweni ka vona, a va pfumelanga eka yena, 38 swi ri leswaku rito leri muprofeta Esaya a tshamaka a ri vula ri hetiseka, leri nge: “We Hosi, i mani la kholweke leswi hi byeriweke swona xana? Xana ú kona loyi a voneke matimba ya Hosi emhakeni leyi, xana?” 39 A va kotanga ku pfumela, hikwalaho Esaya a engeta a ku: 40 “Ú phumisile mahlo ya vona, ni ku tlanyata miehleketo ya vona, leswaku va nga ha voni, ni ku twisisa va nga ha twisisi, ni leswaku va nga hundzuki, na mina ndzi nga va hanyisi.” 41 Esaya ú vurile leswi, hikuva ú vonile ku dzuneka ka Yesu, naswona, a a vulavula hi ta yena. 42 Hambiswiritano, lavo tala ni le xikarhi ka tindhuna a va pfumela ka yena; kambe, hikwalaho ka Vafarisi, a va nga swi vuli erivaleni hi ku chava ku hlongoriwa esinagogeni. 43 Hakunene va rhandzile ku dzunisiwa hi vanhu ku tlula ku dzunisiwa hi Xikwembu.

Rito ra Yesu ra avanyisa

44 Kutani Yesu a tlakusa rito, a ku: “Loyi a pfumelaka eka mina, a nga pfumeri eka mina ntsena kambe ú pfumela ni le ka Loyi a ndzi rhumeke; 45 naswona loyi a ndzi vonaka, ú vona Loyi a ndzi rhumeke. 46 Mina ndzi ku vonakala, kutani ndzi tile emisaveni leswaku un'wana ni un'wana la pfumelaka eka mina, a nga tshami emunyameni. 47 Un'wana ni un'wana la twaka marito ya mina, kambe a nga ma hlayisi, a ndzi n'wi avanyisi, hikuva a ndzi telanga ku ta avanyisa misava, kambe ku ponisa misava. 48 La ndzi fularhelaka, kutani a nga amukeli marito ya mina, ú ni loyi a n'wi avanyisaka; i marito lawa ndzi ma vulaka lawa ma nga ta n'wi avanyisa hi siku ra makumu. 49 Hikuva a ndzi vulavulanga swo huma emiehleketweni ya mina, kambe Loyi a ndzi rhumeke, yena Tatana hi xiviri xa yena, ú ndzi lerisile leswi ndzi faneleke ku swi tivisa ni ku swi vula. 50 Ndzi tiva leswaku ku lerisa ka yena i vutomi lebyi nga heriki, kutani leswi ndzi swi vulaka, ndzi swi vula hilaha Tatana a ndzi byeleke hakona.”

Yohane 13

Ta Yesu loko a hlambisa vadyondzisiwa emilenge

1 Nkhuvo wa Paseka a wu nga si fika, kambe Yesu a a tiva leswaku nkarhi wa yena wu fikile wa ku suka laha misaveni, a ya eka Tatana. A a rhandza vanhu va yena laha misaveni, kutani ú va rhandzile ngopfu ku yisa eku heteleleni. 2 Diyavulosi a ku ri khale a bohile makungu ya leswaku Yudasi, n'wana Simoni Iskariyota, ú ta xenga Yesu. Loko ku ri karhi ku laleriwa, 3 Yesu, hi ku tiva leswaku Tatana ú vekile swilo hinkwaswo emavokweni ya yena, ni leswaku ú humile eka Xikwembu, naswona a ya eka Xikwembu, 4 a suka a yima eku laleleni, a susa xifunengelo xa yena, a teka nceka, a tikhama ha wona. 5 Kutani a chela mati enkambaneni, a sungula ku hlambisa vadyondzisiwa emilenge, a yi sula hi nceka lowu a tikhameke ha wona. 6 A ta eka Simoni Petro; kutani Petro a ku ka yena: “Hosi, xana u lava ku ndzi hlambisa milenge wena xana?” 7 Yesu a n'wi hlamula, a ku: “Leswi ndzi swi endlaka a wu si swi tiva sweswi, kambe u ta swi twisisa endzhaku.” 8 Petro a ku ka yena: “U nga ka u nga ndzi hlambisi milenge ni siku ni rin'we!” Yesu a n'wi hlamula, a ku: “Loko ndzi nga ku hlambisi, a wu nchumu eka mina.” 9 Simoni Petro a ku ka yena: “Hosi, ku nga ri milenge ya mina ntsena, kambe na wona mavoko ni nhloko!” 10 Yesu a ku ka yena: “Loyi a hlambeke miri a nga ha faneli ku engeta a hlamba, loko yi nga ri milenge ntsena, hikuva hinkwawo miri wa yena wu basile; kutani n'wina, mi basile, kambe ku nga ri hinkwenu.” 11 (Yesu a a tiva loyi a a ri kusuhi ni ku n'wi xenga; hikwalaho a nga vula a ku: “A hi hinkwenu lava mi baseke.”) 12 Loko a hetile ku va hlambisa milenge, a teka xifunengelo xa yena a tlhela a tshama ehansi, a ku ka vona: “Xana ma twisisa leswi ndzi mi endleleke swona xana? 13 Mi ndzi vula ‘Mudyondzisi’ ni ‘Hosi’; ma vurisa, hikuva ndzi yena. 14 Kutani ke loko mina, Hosi ya n'wina ni Mudyondzisi wa n'wina, ndzi mi hlambisile milenge, na n'wina mi ta fanela ku hlambisana milenge, 15 hikuva ndzi mi vekele ntila, leswaku na n'wina mi endlisa leswi ndzi nga endlisa swona eka n'wina. 16 Ndzi tiyisisile ndzi ri ka n'wina: Nandza a hi nkulu eka n'wini wa yena, ni murhumiwa a hi nkulu eka loyi a n'wi rhumeke. 17 Loko mi tiva swilo leswi, mi tlhela mi swi endla, mi ta va mi katekile. 18 “A ndzi vulavuli ndzi katsa n'wina hinkwenu; ndzi tiva lava ndzi va hlawuleke; kambe Tsalwa ri fanele ku hetiseka, leri nge: ‘Loyi a dyaka vuswa bya mina, ú ndzi hundzukele, a ndzi khadlanya.’ 19 Ndzi pfa ndzi mi byela sweswi mhaka leyi, yi nga si humelela, leswaku siku yi humelelaka, mi ta pfumela leswaku ‘Mina ndzi yena’. 20 Ndzi tiyisisile ndzi ri ka n'wina: La amukelaka un'wana ni un'wana loyi ndzi n'wi rhumaka, ú amukela mina; ni loyi a ndzi amukelaka, ú amukela Loyi a ndzi rhumeke.”

Yesu a tivisa ta ku xengiwa ka yena

21 Loko Yesu a vurile timhaka teto, a karhateka emoyeni, kutani a boxa, a ku: “Ndzi tiyisisile, ndzi ri ka n'wina: Un'wana wa n'wina ú ta ndzi xenga.” 22 Vadyondzisiwa va langutana, va kanakana, hikuva a va nga tivi leswaku ú vula mani. 23 Un'wana wa vadyondzisiwa, loyi Yesu a a n'wi rhandza, a a tshamile hi tlhelo ra xinene ra Yesu. 24 Hiloko Simoni Petro a n'wi tshunyeta hi tihlo ku vutisa leswaku ú vula mani. 25 Mudyondzisiwa loyi a voyamela eka Yesu, a hlevetela a ku: “Hosi, i mani xana?” 26 Yesu a hlamula, a ku: “Hi loyi ndzi nga ta n'wi nyika vuswa loko ndzi phemile ndzi peta enkambaneni.” Kutani a peta xiphemu xa vuswa, a teka a xi nyika Yudasi n'wana Simoni Iskariyota. 27 Loko Yudasi a xi dyile, a ngheniwa hi Sathana. Hiloko Yesu a ku ka yena: “Lexi u xi endlaka, hatlisa u xi endla.” 28 A ku vanga na un'we wa lava tshameke eswakudyeni, la nga tiva leswaku Yesu a a vulela yini swilo leswi eka yena. 29 Van'wana a va anakanya leswaku, leswi Yudasi a a ri mutameri wa nkwama wa mali, Yesu a a n'wi byela ku ya xava swa nkhuvo leswi pfumalekaka, kumbe ku ya nyika xa nchumu eka swisiwana. 30 Hikokwalaho, loko Yudasi a tekile xiphemu xa vuswa, a hatlisa a huma, hikuva a byi ri vusiku.

Ta nawu lowuntshwa

31 Loko Yudasi a humile, Yesu a ku: “Sweswi N'wana-wa-Munhu ú dzunisiwile, na xona Xikwembu xi dzunisiwile eka yena. 32 Leswi xi dzunisiweke eka yena, na xona xi ta n'wi dzunisa emahlweni ka xona; xi ta hatla xi swi endla. 33 Vana vanga, ndza ha ta va na n'wina nkarhinyana; mi ta ndzi lava, kambe hilaha ndzi byeleke Vayuda hakona loko ndzi te: ‘Laha ndzi yaka kona mi nga ka mi nga ti’, na n'wina sweswi ndza mi byela mhaka leyi. 34 Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n'wina. 35 Hinkwavo va ta tiva leswaku mi vadyondzisiwa va mina, loko mi rhandzana.”

Yesu a tivisa ku landzula ka Petro

36 Simoni Petro a ku ka yena: “Hosi, xana u ya kwihi?” Yesu a n'wi hlamula, a ku: “Laha ndzi yaka kona, u nga ka u nga ndzi landzi sweswi; kambe endzhaku u ta ndzi landza.” 37 Petro a ku ka yena: “Hosi, xana ndzi nga tsandzeka ku ku landza sweswi hikwalaho ka yini ke? Ndzi nga nyiketa vutomi bya mina hikwalaho ka wena!” 38 Yesu a n'wi hlamula, a ku: “Xana u nga nyiketa vutomi bya wena hikwalaho ka mina xana? Ndzi tiyisisile ndzi ri ka wena: Nkuku wu nga si ringa, u ta va u ndzi landzurile kanharhu.”

Yohane 14

Yesu i ndlela yo ya eka Tatana

1 “Timbilu ta n'wina ti nga karhateki; pfumelani ka Xikwembu, ni le ka mina mi pfumela. 2 Tindhawu ti tele endlwini ya Tata wa mina; loko a swi nga ri tano, a ndzi ta va ndzi mi byerile; kutani ndzi ya mi lunghisela kona. 3 Loko ndzi yile ku ya mi lunghisela kona, ndzi ta vuya; kutani ndzi ta mi teka mi ta ka mina, leswaku laha ndzi nga kona, mi va kona na n'wina. 4 Kutani ndlela yo ya laha ndzi yaka kona ma yi tiva.” 5 Tomasi a ku ka yena: “Hosi, laha u yaka kona a hi ku tivi; ni ndlela ya kona hi nga yi tivisa ku yini xana?” 6 Yesu a ku ka yena: “Hi mina ndlela, ni ntiyiso, ni vutomi; a ku na munhu loyi a taka eka Tatana, loko ku nga ri ha mina. 7 Loko mi tiva mina, mi ta tiva ni Tata wa mina; ku sukela sweswi, ma n'wi tiva, naswona mi n'wi vonile.” 8 Filipi a ku ka yena: “Hosi, hi kombe Tatana, kutani swi ta va swi hi ringene.” 9 Yesu a ku ka yena: “I khale ndzi ri na n'wina, kasi ni sweswi a wu si ndzi tiva, Filipi? Loyi a ndzi voneke, ú vonile Tatana; hikokwalaho ka yini u ku: ‘Hi kombe Tatana’? 10 Xana a wu pfumeri leswaku ndzi le ka Tatana, ni leswaku Tatana ú le ka mina xana? Leswi ndzi mi byelaka swona a swi humi emiehleketweni ya mina. Tatana la nge ka mina, hi yena la tirhaka mintirho leyi ya yena. 11 Ndzi pfumeleni loko ndzi ku ndzi le ka Tatana, ni leswaku Tatana ú le ka mina; loko mi nga ndzi kholwi, pfumelani hikwalaho ka yona mintirho. 12 “Ndzi tiyisisile ndzi ri ka n'wina: La pfumelaka ka mina, na yena ú ta endla mintirho leyi ndzi yi endlaka; ú ta endla ni leyi tlulaka yoleyi, hikuva ndzi ya eka Tatana. 13 Xin'wana ni xin'wana lexi mi xi kombelaka hi vito ra mina, ndzi ta xi endla, leswaku Tatana a dzunisiwa eka N'wana. 14 Loko mi kombela ka mina xa nchumu hi vito ra mina, ndzi ta xi endla.”

Ta ku tshembisiwa Moya lowo Kwetsima

15 “Loko mi ndzi rhandza, mi ta hlayisa milawu ya mina. 16 Ndzi ta kombela Tatana, kutani yena ú ta mi nyika Muchaveleri un'wana, loyi a nga ta va na n'wina hilaha ku nga heriki, 17 a nga Moya wa ntiyiso. Misava yi nga ka yi nga n'wi amukeli, hikuva a yi n'wi voni, a yi n'wi tivi. N'wina ma n'wi tiva, hikuva ú tshama na n'wina, naswona ú le ndzeni ka n'wina. 18 “A ndzi nga mi siyi mi ri swisiwana; ndzi ta ta eka n'wina. 19 Endzhaku ka nkarhinyana, misava a yi nga ha ndzi voni, kambe n'wina mi ta ndzi vona. Leswi ndzi hanyaka, na n'wina mi ta hanya. 20 Hi siku ra kona, mi ta tiva leswaku ndzi le ka Tata wa mina, ni leswaku na n'wina mi le ka mina, kukotisa leswi na mina ndzi nga eka n'wina. 21 Loyi a amukeleke milawu ya mina, kutani a yi hlayisa, hi yena loyi a ndzi rhandzaka; kutani loyi a ndzi rhandzaka, ú ta rhandziwa hi Tata wa mina; na mina ndzi ta n'wi rhandza, ndzi va ndzi tipfuletela eka yena.” 22 Yudasi (a nga ri loyi wa Iskariyota) a ku: “Hi leswo yini, Hosi, loko u ku, u ta tipfuletela eka hina, ku nga ri eka misava ke?” 23 Yesu a n'wi hlamula, a ku: “Loko munhu a ndzi rhandza, ú ta hlayisa rito ra mina, kutani Tata wa mina ú ta n'wi rhandza, kutani hi ta ta eka yena, hi tshama na yena. 24 Loyi a nga ndzi rhandziki, a nga hlayisi marito ya mina; kutani rito leri mi ri twaka, a hi ra mina, kambe i ra Tatana la ndzi rhumeke. 25 “Ndzi mi tivisile swilo leswi ndza ha ri na n'wina. 26 Kambe Muyimeri, a nga Moya lowo Kwetsima lowu Tatana a nga ta wu rhuma hi vito ra mina, ú ta mi dyondzisa hinkwaswo, ni ku mi tsundzuxa hinkwaswo leswi ndzi mi byeleke swona. 27 “Ndzi mi siyela ku rhula, ndzi mi nyika ku rhula ka mina. A ndzi mi nyiki hilaha misava yi nyikaka hakona. Timbilu ta n'wina ti nga karhateki, ti nga khomiwi hi ku chava. 28 Mi ndzi twile loko ndzi te eka n'wina: ‘Ndza famba, kutani ndzi ta tlhela ndzi vuya ndzi va na n'wina.’ Loko onge mi ndzi rhandzile, ingi mi tsakile hi leswi ndzi yaka eka Tatana, hikuva Tatana i nkulukumba ku tlula mina. 29 Nasweswi, ndzi mi byerile swilo leswi, swi nga si humelela, leswaku loko swi humelela, mi ta kota ku pfumela. 30 A ndzi nga ha vulavuri swo tala na n'wina, hikuva mufumi wa misava leyi wa ta; kambe a nga na matimba ehenhla ka mina. 31 Hinkwaswo leswi, swi lava ku komba misava leswaku ndzi rhandza Tatana, ni leswaku ndzi tirha hilaha Tatana a ndzi leriseke hakona. Sukani mi yima, a hi fambeni hi suka la!

Yohane 15

Yesu i nsinya wa xiviri wa vhinya

1 “Hi mina nsinya wa xiviri wa vhinya; murimi i Tata wa mina. 2 Rhavi rin'wana ni rin'wana leri nge ka mina, leri nga vekiki mihandzu, wa ri susa; kambe rin'wana ni rin'wana leri vekaka, wa ri khutulela ri saseka, leswaku ri ta veka ku tlula ni khale. 3 Nisweswi n'wina mi sasekisiwile, hikwalaho ka rito leri ndzi mi byeleke rona. 4 Tshamani eka mina, kukotisa leswi na mina ndzi tshamaka eka n'wina. Tanihi leswi rhavi ri nga kotiki ku veka ha roxe loko ri nga namarheli nsinya, na n'wina mi nge swi koti loko mi nga ndzi namarheli. 5 Hi mina nsinya wa vhinya; n'wina mi marhavi. Loyi a tshamaka eka mina, kukota leswi na mina ndzi tshamaka eka yena, ú veka mihandzu yo tala; hikuva handle ka mina mi nga ka mi nga koti ku endla nchumu. 6 Un'wana ni un'wana la nga tshamiki eka mina, wa cukumetiwa ehandle tanihi rhavi leri omeke. Marhavi layo tano ma hlengeletiwa, kutani ma hoxiwa endzilweni ma tshwa. 7 Loko mi tshama eka mina, ni loko marito ya mina ma tshama eka n'wina, kombelani xin'wana ni xin'wana lexi mi xi rhandzaka, kutani mi ta endleriwa xona. 8 Tata wa mina ú dzunisiwa hi loko mi veka mihandzu leyo tala, ku kombisa leswaku mi vadyondzisiwa va mina va xiviri. 9 “Tanihi leswi Tatana a ndzi rhandzeke, na mina ndzi mi rhandzile; tshamani erirhandzwini ra mina. 10 Loko mi hlayisa milawu ya mina, mi ta tshama erirhandzwini ra mina, hilaha na mina ndzi hlayiseke milawu ya Tata wa mina, kutani ndzi tshama erirhandzwini ra yena. 11 “Ndzi mi byerile timhaka leti, leswaku ku tsaka ka mina ku va eka n'wina, ni leswaku ku tsaka ka n'wina ku va loku hetisekeke. 12 Nawu wa mina hi lowu: Hileswaku mi rhandzana, kukotisa leswi na mina ndzi mi rhandzeke. 13 A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye. 14 Mi vanakulorhi loko mi endla leswi ndzi mi lerisaka swona. 15 A ndza ha mi vuri malandza, hikuva nandza a nga tivi lexi n'wini wa yena a xi endlaka; kambe ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tata wa mina. 16 A hi n'wina mi ndzi hlawuleke; hi mina ndzi mi hlawuleke, kutani ndzi mi vekile leswaku mi ya, mi ya veka mihandzu, ni leswaku mihandzu ya n'wina yi va kona masiku hinkwawo; kutani xin'wana ni xin'wana lexi mi nga ta xi kombela eka Tatana hi vito ra mina, ú ta mi nyika xona. 17 Leswi ndzi mi lerisaka swona hileswaku mi rhandzana.

Ta ku vengiwa hi misava

18 “Loko misava yi mi venga, tivani leswaku yi rhangile yi venga mina, yi nga si mi venga. 19 Loko a mi ri va misava, misava a yi ta rhandza swa yona. Kambe leswi mi nga riki va misava, ni leswi ndzi mi hlawuleke eka yona, misava ya mi venga. 20 Tsundzukani leswi ndzi mi byeleke swona, loko ndzi te: ‘Nandza a hi nkulu eka n'wini wa yena.’ Loko va ndzi xanisile, na n'wina va ta mi xanisa; loko va hlayisile rito ra mina, ni ra n'wina va ta ri hlayisa. 21 Kambe va ta endla hinkwaswo leswi eka n'wina hikwalaho ka mina, hikuva a va tivi Loyi a ndzi rhumeke. 22 Loko a ndzi nga tanga ndzi ta vulavula na vona, ingi va nga ri na nandzu; kambe sweswi a va na lexi va nga tilandzulaka ha xona enandzwini wa vona. 23 Loyi a ndzi vengaka, ú venga na Tata wa mina. 24 Loko a ndzi nga endlanga, exikarhi ka vona, mintirho leyi yi nga si endliwaka hi munhu na un'we, a va nga ta va na nandzu; kambe va yi vonile mintirho ya mina, kutani va hi vengile, mina na Tata wa mina. 25 A swi ri leswaku rito leri nga tsariwa eNawini wa vona ri hetiseka, leri nge: ‘Va ndzi vengile ntsena ehandle ka mhaka.’ 26 “Siku ku nga ta fika Muyimeri, loyi ndzi nga ta mi rhumela yena a ta hi le ka Tatana, a nga Moya wa ntiyiso lowu humaka eka Tatana, ú ta humesa vumbhoni ehenhla ka mina; 27 na n'wina mi timbhoni ta mina, hikuva mi ve na mina ku sukela eku sunguleni.

Yohane 16

Ta ntirho wa Moya lowo Kwetsima

1 “Ndzi mi byerile timhaka leti leswaku mi ta ka mi nga khunguvanyeki. 2 Va ta mi hlongola emasinagogeni; naswona, ku ta ta nkarhi lowu un'wana ni un'wana loyi a mi dlayaka a nga ta anakanya leswaku ú tirhela Xikwembu. 3 Va ta mi endla swilo leswi hikuva a va hi tivanga, hambi Tatana hambi mina. 4 Kambe ndzi mi byerile timhaka leti leswaku loko nkarhi wa ku humelela ka tona wu fika, mi ta tsundzuka leswaku ndzi vulavurile hi tona eka n'wina. “A ndzi mi byelanga swilo leswi eku sunguleni, hikuva a ndza ha ri na n'wina. 5 Kambe sweswi ndzi ya eka Loyi a ndzi rhumeke, kutani a ku na un'we wa n'wina loyi a ndzi vutisaka, a ku: ‘U ya kwihi xana?’ 6 Kambe hi mhaka ya leswi ndzi mi byeleke swilo leswi, timbilu ta n'wina ti tele hi gome. 7 Hambiswiritano, ndza mi byela ntiyiso: Swi ta va swinene eka n'wina loko ndzi famba. Hikuva loko ndzi nga fambi, Muyimeri a nga ka a nga ti eka n'wina; kambe loko ndzi famba, ndzi ta n'wi rhumela a ta eka n'wina. 8 Loko a ta, ú ta khorwisa misava hi ta ku dyoha, ni ku lulama, ni ku avanyisa: 9 Hi ta ku dyoha, hikuva a va pfumeri ka mina; 10 hi ta ku lulama, hikuva ndzi ya eka Tatana, kutani a mi nga ha ndzi voni; 11 hi ta ku avanyisa, hikuva mufumi wa misava leyi ú avanyisiwile. 12 “Ndza ha ri ni leswo tala leswi ndzi fanelaka ku mi byela swona, kambe swi nga mi tikela sweswi. 13 Kasi loko yoloyi a ta, a nga Moya wa ntiyiso, ú ta mi fambisa endleleni hinkwayo ya ntiyiso; hikuva a nga ka a nga vulavuri swo huma emiehleketweni ya yena; kambe xin'wana ni xin'wana lexi a xi twaka, ú ta xi vula; naswona ú ta mi tivisa leswi swi nga ta ta. 14 Ú ta ndzi dzunisa, hikuva leswi a mi tivisaka swona, ú ta va a swi kuma eka mina. 15 Hinkwaswo leswi Tatana a nga na swona, i swa mina; hikwalaho ndzi nga vula leswaku, leswi a mi tivisaka swona, ú ta va a swi kuma eka mina.

Ku vaviseka ku ta hundzuka ku tsaka

16 “Endzhaku ka nkarhinyana, a mi nga ha ndzi voni; kutani endzhaku ka nkarhinyana kambe, mi ta ndzi vona.” 17 Van'wana exikarhi ka vadyondzisiwa va yena va vutisana, va ku: “Xana ú vula yini, loko a ku ka hina: ‘Endzhaku ka nkarhinyana, a mi nga ndzi voni, kutani endzhaku ka nkarhinyana kambe, mi ta ndzi vona’ xana? Ni leswi a nge: ‘Hikuva ndzi ya eka Tatana’ ke?” 18 Va engeta va ku: “Xana ú vula yini, loko a ku: ‘Endzhaku ka nkarhinyana’, xana ke? A hi tivi leswaku ú vula yini!” 19 Yesu ú swi tivile leswaku va lava ku n'wi vutisa, kutani a ku ka vona: “Xana mi vutisana hi leto yini exikarhi ka n'wina? Xana hileswi ndzi nga te: ‘Endzhaku ka nkarhinyana, a mi nga ndzi voni, kutani endzhaku ka nkarhinyana kambe, mi ta ndzi vona’ ke? 20 Ndzi tiyisisile ndzi ri ka n'wina: Mi ta rila mi va mi kolola, kambe misava yona yi ta tsaka; mi ta twa ku vaviseka, kambe ku vaviseka ka n'wina ku ta hundzuka ku tsaka. 21 Loko wansati a veleka, ú twa ku vava lokukulu, hikuva nkarhi wa yena wu fikile; kambe loko a velekile n'wana, wa rivala maxangu ya yena hikwalaho ka ku tsaka, hileswi ku nga velekiwa munhu emisaveni. 22 Swi tano na n'wina: Mi twa ku vaviseka sweswi, kambe ndzi ta tlhela ndzi mi vona, kutani timbilu ta n'wina ti ta tsaka, kutani a ku na munhu la nga ta mi tekela ku tsaka ka n'wina. 23 “Hi siku ra kona, a mi nga ha ndzi vutisi nchumu. Ndzi tiyisisile ndzi ri ka n'wina: Xin'wana ni xin'wana lexi mi nga ta xi kombela eka Tatana hi vito ra mina, ú ta mi nyika xona. 24 Ku fikela sweswi, a mi si kombela nchumu hi vito ra mina; kombelani, mi ta nyikiwa, leswaku ku tsaka ka n'wina ku va loku hetisekeke.

Ta ku hlula misava

25 “Ndzi mi byerile timhaka leti hi ku vulavula hi swifaniso; kambe nkarhi wa ta, lowu ndzi nga ta ka ndzi nga ha vulavuri na n'wina hi mukhuva lowu; kambe ndzi ta mi byela swa Tatana erivaleni ndzi nga rhendzeleki. 26 Loko siku ra kona ri fika, mi ta kombela hi vito ra mina, kambe a ndzi vuli leswaku ndzi ta mi kombelela eka Tatana, 27 hikuva Tatana hi xiviri xa yena wa mi rhandza. Ú mi rhandza hikuva mi ndzi rhandzile, mi va mi pfumela leswaku ndzi huma eka Xikwembu. 28 Ndzi humile eka Tatana, kutani ndzi tile emisaveni; sweswi ndzi tlhela ndzi suka emisaveni, ndzi ya eka Tatana.” 29 Vadyondzisiwa va yena va ku ka yena: “Aha! Sweswi u vulavula erivaleni u nga rhendzeleki; a wa ha vulavuli hi swifaniso. 30 Sweswi ha twisisa leswaku u tiva swilo hinkwaswo, kutani a swi faneri leswaku munhu a ku vutisa nchumu; hikwalaho ka swona, ha pfumela leswaku u huma eka Xikwembu.” 31 Yesu a va hlamula, a ku: “Sweswi ma pfumela xana? 32 Vonani, nkarhi wa ta, ni sweswi wu fikile, lowu mi nga ta hangalaka ha wona, un'wana ni un'wana a tlhelela ekaya ka yena, mi ndzi siya ndzi ri ndzexe; hambiswiritano a ndzi ndzexe, hikuva Tatana ú na mina. 33 Ndzi mi byerile swilo leswi leswaku mi va ni ku rhula eka mina. La misaveni, mi ta va ni mahlomulo, kambe tiyani timbilu, ndzi hlurile misava.”

Yohane 17

Ta Yesu loko a khongelela vadyondzisiwa

1 Yesu ú vurile timhaka leti. Kutani a tlakusa mahlo, a languta etilweni, a ku: “Tatana, nkarhi wu fikile; dzunisa N'wana wa wena, leswaku N'wana a ku dzunisa. 2 Hakunene, u n'wi nyikile vuhosi ehenhla ka vanhu hinkwavo, leswaku hinkwavo lava u n'wi nyikeke vona, yena a va nyika vutomi lebyi nga heriki. 3 Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n'wi rhumeke. 4 “Ndzi ku dzunisile laha misaveni, hi ku heta ntirho lowu u ndzi nyikeke wona leswaku ndzi wu tirha. 5 Sweswi Tatana, ndzi dzunise emahlweni ka wena hi ku dzuneka loku a ndzi ri na kona eka wena, misava yi nga si va kona. 6 “Ndzi ku tivisile eka vanhu lava u ndzi nyikeke vona va ri lava hlawuriweke emisaveni; a va ri va wena; u ndzi nyikile vona, kutani va hlayisile rito ra wena. 7 Sweswi va swi tiva leswaku hinkwaswo leswi u ndzi nyikeke swona, swi huma eka wena, 8 hikuva ndzi va nyikile marito lawa u ndzi nyikeke wona; va ma amukerile, kutani va dyondzile hakunene leswaku ndzi huma eka wena, kutani va pfumerile leswaku ndzi rhumiwile hi wena. 9 Ndza va khongelela; a ndzi khongeleri misava, kambe ndzi khongelela lava u ndzi nyikeke vona, hikuva i va wena. 10 Hinkwaswo leswi nga swa mina, i swa wena; ni swa wena, i swa mina; kutani ndzi dzunisiwile hikwalaho ka swona. 11 A ndza ha ri emisaveni, kambe vona va laha misaveni, kutani ndzi ta kwaleyo ka wena. Tatana la kwetsimeke, va hlayise hi matimba ya vito ra wena, leri u ndzi nyikeke rona, leswaku va va un'we ku fana na hina. 12 Loko ndza ha ri na vona, a ndzi va hlayisa hi matimba ya vito ra wena leri u ndzi nyikeke rona; ndzi va biyelerile, kutani a ku vanga na un'we wa vona la loveke, loko a nga ri munhu wa ku lova, leswaku Matsalwa ma hetiseka. 13 Sweswi ndzi ta kwaleyo ka wena, kutani ndzi vula swilo leswi ndzi ri emisaveni, leswaku ku tsaka ka mina ku va loku hetisekeke eka vona. 14 Ndzi va nyikile rito ra wena, kutani misava yi va vengile, hikuva a hi va misava, tanihi leswi na mina ndzi nga riki wa misava. 15 A ndzi kombeli leswaku u va susa emisaveni, kambe hi leswaku u va lwela eka Lowo biha. 16 A hi va misava, tanihi leswi na mina ndzi nga riki wa misava. 17 Va hlawulekise entiyisweni; rito ra wena i ntiyiso. 18 Tanihi leswi u ndzi rhumeke emisaveni, na mina ndzi va rhumile emisaveni. 19 Kutani ndzi tihlawulekisa hikwalaho ka vona, leswaku na vona va hlawulekisiwa entiyisweni. 20 “A ndzi khongeleri vona ntsena, kambe ndzi khongelela ni lava va nga ta pfumela eka mina hi rito ra vona; 21 ndzi navela leswaku hinkwavo va va un'we, ku fana ni leswi wena Tatana u nga ka mina, na mina ndzi nga ka wena, leswaku na vona va va eka hina, kutani misava yi ta pfumela leswaku u ndzi rhumile. 22 Ndzi va nyikile ku dzuneka loku u ndzi nyikeke kona, leswaku va va un'we ku fana na hina hi nga un'we: 23 Mina eka vona, na wena eka mina, leswaku va endliwa lava hetisekeke, va kondza va va un'we, kutani misava yi ta tiva leswaku u ndzi rhumile, ni leswaku u va rhandzile ku fana ni leswi u ndzi rhandziseke xiswona. 24 Tatana, ndzi lava leswaku hinkwavo lava u ndzi nyikeke vona, va va na mina laha ndzi nga kona; va ta hamba va hlalela ku kwetsima ka mina loku u ndzi nyikeke kona, hikuva u ndzi rhandzile misava yi nga si tumbuluka. 25 Tatana la lulameke, misava a yi ku tivanga, kambe mina ndzi ku tivile, kutani vanhu lava va swi tivile leswaku ndzi rhumiwile hi wena. 26 Ndzi ku tivisile eka vona; ndza ha ta ku tivisa, leswaku rirhandzu leri u ndzi rhandzeke ha rona, ri va ka vona, na mina ndzi va ka vona.”

Yohane 18

Ta ku khomiwa ka Yesu

1 Loko Yesu a vurile marito lawa, a huma ni vadyondzisiwa va yena, a pelela entsungeni wa xinambyana xa Kedroni. A ku ri ni ntanga kwalaho, kutani a ya nghena kona ni vadyondzisiwa va yena. 2 Yudasi muxengi na yena a a tiva ndhawu leyi, hikuva Yesu a a tala ku hlengeletana ni vadyondzisiwa va yena kona. 3 Yudasi a teka ntlawa wa masocha, ni malandza lama rhumiweke hi vaprista lavakulu ni Vafarisi, va ta ni timboni, ni swisana, ni matlhari. 4 Yesu, hi ku tiva hinkwaswo leswi swi nga ta n'wi humelela, a huma a ya ka vona, a ku: “Mi lava mani xana?” 5 Va n'wi hlamula, va ku: “Yesu wa Nazareta.” Yesu a ku ka vona: “Hi mina loyi!” Yudasi muxengi, na yena a a yimile na vona kwalaho. 6 Loko Yesu a te ka vona: “Hi mina loyi!” va tlhetlha hi xindzhakwa-ndzhakwana, va wa. 7 Kutani a va vutisa kambe a ku: “Mi lava mani xana?” Va ku: “Yesu wa Nazareta.” 8 Yesu a hlamula a ku: “Ndzi mi byerile ndzi ku: ‘Hi mina loyi.’ Loko kunene mi lava mina, tshikani lava, va tifambela.” 9 (A swi ri leswaku rito leri a nga ri vula ri hetiseka, loko a te: “A ndzi tshikanga na un'we wa lava u ndzi nyikeke vona, a lova.”) 10 Simoni Petro loyi a a ri ni banga, a ri hlomula, a tsema hlonga ra Muprista lonkulu, a ri phatlula ndleve ya xinene. Vito ra hlonga leri a va ku i Malko. 11 Hiloko Yesu a ku ka Petro: “Tlherisela banga ra wena enkotlotweni wa rona; xana a ndzi nga nwi exinwelweni lexi Tatana a ndzi nyikeke xona xana?”

Ta Yesu ehubyeni ya Anasi

12 Ntlawa wa masocha ni ndhuna leyikulu ya wona ni malandza ya Vayuda, va khoma Yesu, va n'wi boha. 13 Kutani va rhanga hi ku n'wi yisa eka Anasi. N'wana wa xisati wa Anasi a a tekiwile hi Kayafasi, Muprista lonkulu wa lembe rero. 14 Hi yena Kayafasi loyi a nga tshama a tsundzuxa Vayuda leswaku a swi ta antswa loko munhu un'we a fela vanhu hinkwavo.

Ta Petro loko a landzula Yesu

15 Simoni Petro ni mudyondzisiwa un'wana va landza Yesu; mudyondzisiwa wa kona a a tiviwa hi Muprista lonkulu, kutani a nghena ehubyeni ya yindlu ya Muprista lonkulu na Yesu. 16 Kambe Petro a a yimile handle enyangweni. Hiloko mudyondzisiwa loyi un'wana la tiviwaka hi Muprista lonkulu, a huma a ya vulavula ni nandza wa xisati loyi a a ri mulanguteri wa nyangwa, kutani a nghenisa Petro. 17 Kutani nandza loyi wa xisati a ku ka Petro: “Xana a wu mudyondzisiwa wa munhu loyi ke?” A ku: “A ndzi yena.” 18 Mahlonga ni malandza a ma tshiverile ndzilo wa makala, hikuva a ku ri ni xirhami; kutani a va ri karhi va tinyawusa; na yena Petro a a yimile na vona, a tinyawusa.

Ta Anasi loko a vutisa Yesu

19 Anasi Muprista lonkulu a vutisa Yesu hi ta vadyondzisiwa va yena ni ta ku dyondzisa ka yena. 20 Yesu a n'wi hlamula, a ku: “Ndzi vulavurile erivaleni emahlweni ka vanhu hinkwavo. Ndzi dyondzisile minkarhi hinkwayo emasinagogeni ni le Tempeleni, laha Vayuda hinkwavo va hlengeletanaka kona, a ndzi vulanga nchumu exihundleni. 21 Hikwalaho ka yini u vutisa mina? Vutisa lava va tweke leswi ndzi nga va byela swona; vona va swi tiva leswi ndzi swi vuleke.” 22 Loko Yesu a vurile sweswo, un'wana wa malandza, loyi a a yimile kwalaho, a ba Yesu hi mpama, a ku: “Xana hi rona hlamulele ra wena eka Muprista lonkulu xana?” 23 Yesu a n'wi hlamula, a ku: “Loko ndzi vulavurile hi ku hoxa, komba ku hoxa koloku, kambe loko ndzi vulavurile hi nawu wa kona, u ndzi bela yini xana?” 24 Kutani Anasi a n'wi rhumela a bohiwile eka Kayafasi, Muprista lonkulu loyi un'wana.

Ta Petro loko a engeta a landzula Yesu

25 Simoni Petro a a yimile a ri karhi a tinyawusa. Va ku ka yena: “Xana na wena a wu un'wana wa vadyondzisiwa va yena ke?” Yena a kaneta, a ku: “A ndzi yena!” 26 Un'wana wa mahlonga ya Muprista lonkulu, xaka ra loyi Petro a n'wi tsemeke ndleve, a ku: “Xana a ndzi ku vonanga wena entangeni u ri na yena ke?” 27 Petro a engeta a kaneta; hi nomu lo, nkuku wu ringa.

Ta Yesu emahlweni ka Pilato

28 Kutani va suka na Yesu eka Kayafasi, va n'wi yisa endlwini ya vuhosi. A wa ha ri mpundzu swinene; vona hi voxe a va nghenanga ndlwini ya vuhosi, ku endlela leswaku va nga tinyamisi, va ta kota ku dya nkhuvo wa Paseka. 29 Hikokwalaho Pilato a huma, a ya ka vona, kutani a ku: “Xana mi hehla munhu loyi hi nandzu wihi ke?” 30 Va hlamula va ku ka yena: “Loko munhu loyi a nga dYohanga, a hi nga ta n'wi nyiketa eka wena.” 31 Pilato a ku ka vona: “N'wi tekeni n'wina, mi ya n'wi avanyisa hi nawu wa ka n'wina.” Vayuda va ku ka yena: “Nawu a wu hi pfumeleli ku dlaya munhu.” 32 (Leswi a ku ri ku hetisa rito leri Yesu a tshamaka a ri vula loko a fanisa rifu leri a nga ta fanela ku fa ha rona.) 33 Pilato a tlhela a nghena endlwini ya vuhosi, a vitana Yesu, a ku ka yena: “Xana hi wena hosi ya Vayuda ke?” 34 Yesu a hlamula, a ku: “Xana leswi u swi vulaka, swi huma eka wena, kumbe u lo byeriwa hi van'wana ke?” 35 Pilato a hlamula a ku: “Xana ndzi Muyuda mina ke? Vanhu va ka n'wina ni vaprista lavakulu hi vona va ku nyiketeke ka mina. U endle yini xana?” 36 Yesu a hlamula, a ku: “Mfumo wa mina a hi wa misava leyi; loko a wu ri wa misava leyi, malandza ya mina a ma ta lwa leswaku ndzi nga nyiketiwi eka Vayuda; kambe hilaha swi nga hakona, mfumo wa mina a hi wa laha hansi.” 37 Pilato a ku ka yena: “Hikokwalaho, u hosi, a hi swona ke?” Yesu a hlamula, a ku: “Ku vula wena leswaku ndzi hosi. Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso. Un'wana ni un'wana la nga wa ntiyiso, ú yingisa rito ra mina.” 38 Pilato a ku ka yena: “Ntiyiso i ncini?”

Ta Yesu loko a avanyiseriwa rifu

Loko a vurisile sweswo, a huma kambe a ya eka Vayuda, a ku ka vona: “A ndzi voni nandzu ni wun'we eka yena. 39 Kambe mi ni ntolovelo wa leswaku ndzi mi ntshunxela munhu un'we hi nkarhi wa Paseka; xana mi lava leswaku ndzi mi ntshunxela hosi ya Vayuda ke?” 40 Va hlamula hi ku huwelela, va ku: “Ku nga ri munhu loyi, kambe Barabasi!” (Kasi Barabasi a a ri xigevenga.)

Yohane 19

1 Kutani Pilato a teka Yesu, a n'wi nyiketa leswaku va n'wi ba. 2 Kutani masocha ma luka harhi ya mitwa, ma yi tlhandleka enhlokweni ya yena, ma n'wi ambexa nguvu yo vangama ya xivunguvungu; 3 a ma tshamela ku ta, ma ku ka yena: “Xewani, hosi ya Vayuda!” Kutani a ma n'wi ba hi timpama. 4 Pilato a engeta a huma, a ku ka Vayuda: “Vonani, ndzi mi humesela yena, mi ta tiva leswaku a ndzi kumi nandzu ni wun'we eka yena.” 5 Yesu a huma, a tlhandlekiwile harhi ya mitwa enhlokweni, a ambarile nguvu yo vangama ya xivunguvungu. Pilato a ku ka vona: “Vonani, hi yoloye munhu wa n'wina!” 6 Loko vaprista lavakulu ni malandza va n'wi vona, va huwelela, va ku: “N'wi vambe! N'wi vambe!” Pilato a ku ka vona: “N'wi tekeni, n'wina hi n'wexe, mi ya n'wi vamba; hikuva mina a ndzi kumi nandzu eka yena.” 7 Vayuda va n'wi hlamula, va ku: “Hi ni nawu, kutani hi nawu wa hina ú fanele ku fa, hikuva ú tiendlile N'wana wa Xikwembu.” 8 Loko Pilato a twa sweswo, a chava ngopfu, 9 a tlhelela endlwini ya vuhosi, a ku ka Yesu: “U huma kwihi?” Yesu a nga n'wi hlamuli. 10 Pilato a ku ka yena: “Xana wa ala ku vulavula na mina xana? A wu swi tivi xana leswaku ndzi ni matimba ya ku ku ntshunxa, ni matimba ya ku ku vamba ke?” 11 Yesu a hlamula, a ku: “A wu nga ta va ni matimba ehenhla ka mina ni kutsongo, loko a wu nga nyikiwanga hi Tilo. Hikokwalaho, loyi a nga ndzi nyiketa eka wena, ú ni nandzu lowukulu ngopfu.” 12 Loko a twa sweswo, Pilato a lava ndlela yo n'wi ntshunxa; kambe Vayuda va huwelela, va ku: “Loko u ntshunxa munhu loyi, a wu munghana wa hosi Khezari; un'wana ni un'wana la tiendlaka hosi, ú lwa na Khezari.” 13 Loko Pilato a twa marito walawo, a humesela Yesu ehandle, kutani a tshama exitshan'wini xa ku avanyisa, endhawini leyi va nge i “Xiandlala-hi-maribye” (hi ririmi ra Xiheveru i “Gavata”). 14 A ri ri siku leri rhangelaka Paseka, kutani a wu lava ku va nkarhi wa nhlekanhi. Kutani Pilato a ku ka Vayuda: “Vonani, hi leyi hosi ya n'wina!” 15 Vona va huwelela, va ku: “N'wi suse! N'wi suse! N'wi vambe!” Pilato a ku ka vona: “Xana ndzi ta vamba hosi ya n'wina ke?” Vaprista lavakulu va hlamula, va ku: “A hi na hosi loko a nga ri Khezari ntsena.” 16 Hiloko Pilato a va nyiketa Yesu, leswaku a vambiwa.

Ta ku vambiwa ka Yesu

Va teka Yesu, 17 kutani a huma a byarhile xihambano xa yena n'wini, a ya endhawini leyi a va ku i “Ndhawu ya Pala”, leyi hi Xiheveru va nge i “Gologota”. 18 Va n'wi vamba kwalaho, a ri ni van'wana vambirhi, un'wana hi tlhelo rin'wana, un'wana hi tlhelo lerin'wana, Yesu a ri xikarhi. 19 Pilato a tsala ni papila ra xitiviso, a ri nameka ehenhla ka xihambano. Leswi a swi tsariwile hi leswi: “Yesu wa Nazareta, hosi ya Vayuda.” 20 Vayuda lavo tala va hlaya xitiviso xexo, hikuva ndhawu leyi Yesu a nga vambiwela ka yona, a yi ri kusuhi ni muti; naswona, papila a ri tsariwile hi Xiheveru, ni Xilatini, ni Xigriki. 21 Hikokwalaho vaprista lavakulu va Vayuda va ku ka Pilato: “U nga tsali leswo: ‘Hosi ya Vayuda’, kambe tsala u ku: ‘Hi yena la nga te: Ndzi hosi ya Vayuda’.” 22 Pilato a hlamula, a ku: “Lexi ndzi nga tsala, ndzi tsarile!” 23 Loko masocha ma vambile Yesu, va teka tinguvu ta yena, va ti avanyisa hi swiputsa swa mune, va avelana swona; va teka ni nkhancu, kambe nkhancu wa kona a wu nga rhungiwanga, a wu lukiwile wu ri nguvu yin'we ku sukela ehenhla ku fikela ehansi. 24 Kutani va byelana, va ku: “Hi nga wu handzuleni, kambe a hi hoxeni vuhlolotwana, hi ta tiva leswaku wu ta va wa mani.” Leswi a ku ri ku hetisa Tsalwa leri nge: “Va avelene tinguvu ta mina, va kumile xiambalo xa mina hi ku hoxa vuhlolotwana.” Hi swo leswi masocha ma nga endla swona. 25 Enkarhini wolowo, mana wa Yesu, ni makwavo Mariya, nsati wa Klopasi, na Mariya wa Magadala, a va yimile kusuhi ni xihambano. 26 Yesu a vona mana wa yena, a vona ni mudyondzisiwa loyi a a n'wi rhandza a yimile kusuhi na yena, kutani a ku ka mana wa yena: “Manana, vona, n'wana wa wena hi loyi!” 27 Kutani a ku ka mudyondzisiwa: “Vona, mana wa wena hi loyi!” Ku sukela nkarhi wolowo, mudyondzisiwa loyi a n'wi amukela, a n'wi rhurhela ekaya ka yena.

Ta ku fa ka Yesu

28 Yesu, hi ku tiva leswaku swilo hinkwaswo swi hetisekile, a ku: “Ndzi ni torha”, ku ri ku hetisa Matsalwa. 29 Mbita leyi a yi tele hi ntsuvi a yi vekiwile kwalaho, kutani va peta xiponji xi tala hi ntsuvi, va xi tlhoma erihlangeni ra hisopa, va yisa enon'weni wa yena. 30 Loko Yesu a kumile ntsuvi lowu, a ku: “Swi hetisekile.” Kutani a korhamisa nhloko, a fa.

Tsheve ra Yesu ri tlhaviwa

31 A ri ri siku leri rhangelaka Savata. Hikokwalaho, Vayuda va kombela Pilato leswaku milenge ya lava vambiweke yi tshoviwa, ni leswaku mintsumbu yi hawuriwa; leswi a ku ri ku endlela leswaku yi nga sali exihambanweni hi Savata, hikuva siku ra kona ra Savata a ri ri lerikulu. 32 Kavaloko masocha ma ta, ma tshova milenge ya lowo rhanga wa lava a va vambiwile na Yesu, ni ya loyi un'wana. 33 Kutani va ta eka Yesu, kambe loko va vona leswaku ú file, a va n'wi tshovanga milenge. 34 Hambiswiritano, un'wana wa masocha a n'wi tlhava tsheve hi tlhari, kutani kan'we-kan'we ku huma ngati ni mati. 35 Loyi a swi voneke, ú vula vumbhoni leswaku na n'wina mi ta kota ku pfumela. Vumbhoni bya yena byi tiyile, kutani wa swi tiva leswaku ú vula ntiyiso. 36 Hakunene timhaka leti ti humelerile leswaku Tsalwa ri hetiseka, leri nge: “A ku na rhambu na rin'we ra yena leri nga ta tshoviwa.” 37 Nakambe Tsalwa rin'wana ri ri: “Va ta hlalela loyi va n'wi tlhaveke.”

Ta ku lahliwa ka Yesu

38 Endzhaku ka sweswo, Yosefa wa Arimatiya a kombela eka Pilato mpfumelelo wa ku ya hawula ntsumbu wa Yesu. Yosefa loyi a a ri mudyondzisiwa wa Yesu, kambe exihundleni, hi ku chava Vayuda. Kutani Pilato a n'wi pfumelela. Hiloko a ya hawula ntsumbu wa Yesu. 39 Nikodema, loyi a tshamaka a ta nivusiku eka Yesu, na yena a fika a tisa mafurha ya “mirha” lama pfanganyisiweke ni mhangani, lama lavaka ku ringana 30 kg, ku tika ka swona. 40 Kutani va teka ntsumbu wa Yesu, va wu phutsela hi minceka ni mirhi yo nun'hwela, hi mukhuva lowu Vayuda va lahlaka ha wona. 41 A ku ri ni ntanga endhawini leyi a nga vambiwa ka yona, kutani laha ntangeni a ku ri ni sirha lerintshwa, leri a ku nga si lahliwa munhu eka rona. 42 Va lata Yesu kona, hikokwalaho ka leswi Vayuda a va tilunghisela Savata, hikuva sirha a ro va kwala kusuhi.

Yohane 20

Ta ku pfuka ka Yesu eku feni

1 Nimpundzu wa siku ra Sonto, loko ka ha phumile, Mariya wa Magadala a ya esirheni, kutani a ya kuma leswaku ribye ri susiwile enon'weni wa sirha. 2 Kavaloko a tsutsuma, a ya ka Simoni Petro, ni ka mudyondzisiwa loyi un'wana loyi a a rhandziwa hi Yesu, kutani a ku ka vona: “Va susile Hosi esirheni, kutani a hi tivi lomu va nga n'wi lata kona.” 3 Hiloko Petro ni mudyondzisiwa loyi un'wana va suka va kongoma esirheni. 4 Va tsutsuma swin'we havambirhi; kambe mudyondzisiwa loyi un'wana a siya Petro hi ku tsutsuma, a rhanga a ya fika esirheni. 5 A korhama a hlometela, kutani a vona minceka yi ri ehansi; kambe a nga nghenanga. 6 Simoni Petro la n'wi saleke hi le ndzhaku, na yena a ta fika, kutani a nghena esirheni, a vona minceka yi ri ehansi; 7 kambe duku leri a ri tsondzerile nhloko ya Yesu a ri nga ri ni minceka leyi yin'wana, kambe a ri petsiwile, ri vekiwile hi tlhelo. 8 Endzhaku ka sweswo mudyondzisiwa loyi un'wana, la nga rhanga a fika esirheni, na yena a nghena a swi vona, kutani a pfumela. 9 (Hikuva a va nga si twisisa Tsalwa leri vulaka leswaku Yesu a a fanele ku pfuka eku feni.) 10 Kavaloko vadyondzisiwa va tlhelela emakaya.

Ta Yesu loko a tikomba eka Mariya wa Magadala

11 Mariya a a yimile kusuhi ni sirha ehandle, a rila. Loko a korhama ku hlometela esirheni a ri karhi a rila, 12 a vona tintsumi timbirhi leti ambaleke swo basa, ti tshamile, yin'wana hi le tinhlokweni, yin'wana hi le milengeni, laha ntsumbu wa Yesu a wu latiwile kona. 13 Ti ku ka yena: “Manana, u rilela yini?” A ku ka tona: “Va susile Hosi yanga, kutani a ndzi tivi laha va n'wi lateke kona.” 14 Loko a vurise sweswo, a hundzuluka, kutani a vona Yesu a yimile, kambe a nga swi tivanga leswaku i Yesu. 15 Yesu a ku ka yena: “Manana, u rilele yini? U lava mani xana?” Yena, hi ku ehleketa leswaku i mutirhi wa laha ntangeni, a ku ka yena: “Hosi yanga, loko u n'wi susile, ndzi byele laha u n'wi lateke kona, kutani ndzi ta ya, ndzi ya n'wi teka.” 16 Yesu a ku ka yena: “Mariya!” Yena a hundzuluka, a ku ka Yesu, hi ririmi ra Xiheveru: “Rabuni!” (hileswaku “Mudyondzisi”). 17 Yesu a ku ka yena: “U nga ndzi khumbi, hikuva a ndzi si tlhandlukela eka Tatana; kambe yana eka vamakwerhu, u ya va tivisa leswaku ndzi tlhandlukela eka Tata wa mina, a nga Tata wa n'wina, eka Xikwembu xa mina, xi nga Xikwembu xa n'wina.” 18 Mariya wa Magadala a ya byela vadyondzisiwa leswaku ú vonile Hosi, ni leswaku yi n'wi byerile timhaka teto.

Ta Yesu loko a tikomba eka vadyondzisiwa

19 Madyambu ya siku rero ra Sonto, tinyangwa ta laha vadyondzisiwa va hlengeletaneke kona a ti pfariwile, hikwalaho ka ku chava Vayuda. Yesu a fika, a yima exikarhi ka vona, kutani a ku ka vona: “Ku rhula a ku ve na n'wina!” 20 Loko a vurise sweswo, a va komba swandla swa yena ni tsheve ra yena. Vadyondzisiwa va tsaka ngopfu loko va vona Hosi. 21 Yesu a engeta a ku ka vona: “Ku rhula a ku ve na n'wina! Tanihi leswi Tatana a ndzi rhumeke, na mina ndza mi rhuma.” 22 Loko a vurise sweswo, a va huhutela, a ku: “Amukelani Moya lowo Kwetsima. 23 Loko mi rivalela vanhu swidyoho swa vona, va ta rivaleriwa hakunene; loko mi nga rivaleli vanhu swidyoho swa vona, a va nga rivaleriwi.”

Ta ku kanakana ka Tomasi

24 Tomasi, loyi va nge i “Hahla”, un'wana wa lava khume na vambirhi, a a nga ri na vona loko Yesu a tile. 25 Kutani vadyondzisiwa lava van'wana va ku ka yena: “Hi vonile Hosi.” Yena a ku ka vona: “Loko ndzi nga voni timbanga ta timhingu eswandleni swa yena, ni loko ndzi nga nghenisi ritiho ra mina etimbangeni ta timhingu, ndzi nghenisa ni xandla etsheveni ra yena, ndzi nga ka ndzi nga pfumeri.” 26 Loko ku hundzile masiku ya 8 , vadyondzisiwa va tlhela va va kona endlwini. Tomasi na yena a a ri na vona. Yesu a ta, tinyangwa ti pfariwile, a yima exikarhi ka vona, a ku: “Ku rhula a ku ve na n'wina!” 27 Kutani a ku ka Tomasi: “Tisa ritiho ra wena la, u languta ni, swandla swa mina; tshambuluta xandla xa wena, u xi nghenisa etsheveni ra mina; u nga ha kanakani, kambe pfumela!” 28 Tomasi a n'wi hlamula, a ku: “Hosi yanga ni Xikwembu xanga!” 29 Yesu a ku ka yena: “Xana u pfumela hi leswi u nga ndzi vona xana? Va katekile lava pfumelaka, hambiloko va nga vonanga.”

Xikongomelo xa buku leyi

30 Yesu ú endlile mahlori man'wana layo tala emahlweni ka vadyondzisiwa va yena, lama nga tsariwangiki ebukwini leyi. 31 Kambe timhaka leti ti tsaleriwile n'wina, mi ta ka mi pfumela leswaku Yesu i Mesiya, N'wana wa Xikwembu, ni leswaku, hi mhaka ya ku pfumela, mi va ni vutomi evitweni ra yena.

Yohane 21

Ta Yesu loko a tikomba eka vadyondzisiwa va 7

1 Endzhaku ka sweswo Yesu a tlhela a tikomba eka vadyondzisiwa va yena kusuhi ni lwandle ra Tiberiyasi; ú tikombile hi ndlela leyi: 2 Simoni Petro, na Tomasi loyi va nge i “Hahla”, na Nataniele wa Kana etikweni ra Galeliya, ni vana va Zebediya, ni vadyondzisiwa vambirhi van'wana va Yesu, a va ri swin'we. 3 Simoni Petro a ku ka vona: “Ndzi ya rhiya tinhlampfi.” Va ku ka yena: “Na hina hi famba na wena.” Kutani va suka, va ya nghena ebyatsweni bya vona, kambe a va phasanga nchumu vusiku byebyo. 4 Loko ri sungula ku xa, Yesu a a yimile eribuwini, kambe vadyondzisiwa a va tivanga leswaku i Yesu. 5 Kutani Yesu a ku ka vona: “Vana vanga, mi phasile xana?” Va n'wi hlamula, va ku: “E-e.” 6 A ku ka vona: “Hoxelani rikoka hi tlhelo ra xinene ra byatso, mi ta phasa.” Hiloko va ri hoxa, kutani va tsandzeka ni ku ri koka hikwalaho ka ku tala ka tinhlampfi. 7 Kutani mudyondzisiwa loyi Yesu a a n'wi rhandza a ku ka Petro: “I Hosi!” Loko Simoni a twile leswaku i Hosi, a ambala nguvu ya yena, hikuva a a yi hluvurile, kutani a bvun'wala elwandle. 8 Kambe vadyondzisiwa lava van'wana va ta hi byatso bya vona, va koka rikoka leri a ri tele hi tinhlampfi, hikuva a va nga ri kule ni ribuwu; mpfhuka wa kona a wu lava ku ringana 100 m. 9 Loko va humile va ta eribuwini, va vona ndzilo wa makala, ni tinhlampfi leti tlhandlekiweke ehenhla ka wona, ni xinkwa. 10 Yesu a ku ka vona: “Pambulani tinhlampfi tin'wana eka leti ma ha ku ti phasaka sweswi, mi tisa haleno.” 11 Simoni Petro a nghena ebyatsweni, a kokela rikoka eribuwini, ri tele hi tinhlampfi letikulu. A ti ri 153 . Kambe hambileswi a ti tele ngopfu, rikoka a ri handzukanga. 12 Yesu a ku ka vona: “Tanani, mi ta fihlula.” Kambe a ku vanga na mudyondzisiwa na un'we la nga tiyela ku n'wi vutisa a ku: “U mani?” hikuva va swi tivile leswaku hi yena Hosi. 13 Kutani Yesu a ta, a teka xinkwa a va nyika; a endlisa sweswo hi tinhlampfi. 14 Ku tikomba loku ka Yesu eka vadyondzisiwa va yena, a ku ri ka vunharhu, endzhaku ka loko a pfukile eku feni.

Risa tinyimpfu ta mina!

15 Kuteloko va fihlurile, Yesu a ku ka Simoni Petro: “Simoni, n'wana Yohane, xana wa ndzi rhandza ku tlula leswi hinkwaswo ke?” A ku ka yena: “Ina, Hosi, wa swi tiva leswaku ndza ku rhandza.” Yesu a ku ka yena: “Risa swinyimpfana swa mina.” 16 A engeta ra vumbirhi a ku ka yena: “Simoni, n'wana Yohane, xana wa ndzi rhandza xana?” A ku ka yena: “Ina, Hosi, wa swi tiva leswaku ndza ku rhandza.” Yesu a ku ka yena: “Hlayisa tinyimpfu ta mina.” 17 A engeta ra vunharhu a ku ka yena: “Simoni, n'wana Yohane, xana wa ndzi rhandza xana?” Petro a khomiwa hi gome, hi mhaka ya leswi a n'wi vutiseke ra vunharhu a ku: “Xana wa ndzi rhandza xana?” Kutani a ku ka yena: “Hosi, u tiva hinkwaswo, wa swi tiva leswaku ndza ku rhandza.” Yesu a ku ka Petro: “Risa tinyimpfu ta mina. 18 Ndzi tiyisisile ndzi ri ka wena: Enkarhini lowu a wa ha ri lontshwa, a wu tiboha hi wexe hi vamba ra wena, u ya lomu u lavaka ku ya kona; kambe loko u ta va u dyuharile, u ta tshambuluta mavoko ya wena, kutani un'wana ú ta ku boha, a ku yisa lomu u nga laviki ku ya kona.” 19 A a vurisa sweswo hi ku ringanisa rifu leri Petro a nga ta dzunisa Xikwembu ha rona. Loko Yesu a vurise sweswo, a ku ka yena: “Ndzi landze!”

Ta mudyondzisiwa la rhandziwaka

20 Petro a hundzuluka, kutani a vona mudyondzisiwa loyi a a rhandziwa hi Yesu a ri karhi a va landza. (A a ri loyi a tshamaka a voyamela eka Yesu, loko va ri eku dyeni, a hlevetela a ku: “Hosi, i mani loyi a nga ta ku xenga xana?”) 21 Loko Petro a n'wi vonile, a ku ka Yesu: “Hosi, swi ta ku yini hi loyi ke?” 22 Yesu a ku ka yena: “Loko ndzi lava leswaku a tshama ndzi kondza ndzi vuya, swi nga va yini eka wena ke? Wena, ndzi landze!” 23 Hikokwalaho rito rero a nga ri vula ri hangalaka exikarhi ka vamakwavo leswaku mudyondzisiwa loyi a nga ka a nga fi. Kasi Yesu a a nga n'wi byelanga leswaku a nga ka a nga fi; kambe a a te: “Loko ndzi lava leswaku a tshama ndzi kondza ndzi vuya, swi nga va yini eka wena ke?” 24 Mudyondzisi loyi, hi yena la vulaka vumbhoni bya timhaka leti, kutani ú ti tsarile. Ha swi tiva leswaku vumbhoni bya yena byi tiyile. 25 Ka ha ri ni timhaka tin'wana leto tala leti Yesu a nga ti endla; loko ti nga tsariwa ha yin'we-yin'we, a ndzi tshembi leswaku misava hinkwayo yona yi nga ringana tibuku leti a ti ta tsariwa.