JOHN

Johannes 1

Ohapu yomwenyo

1 Ohapu oya li ko, manga uuyuni inaau shitwa. Ohapu oya li Kalunga nOhapu oya li Kalunga. 2 Okuza ketamekolela Ohapu oya li puKalunga. 3 Kalunga okwe mu shititha iinima ayihe, nokaku na nando oshinima shimwe shomeshito inaashi shitwa kee po. 4 Ohapu oya li yi na omwenyo, nomwenyo ogwa ningi uuyelele waantu. 5 Uuyelele mbuka owa minikile momilema, nomilema inadhi u dhima po. 6 Okwa li ku na omulumentu a tumwa kuKalunga, edhina lye Johannes. 7 Oye okwe ya, a hokololele aantu uuyelele, opo ayehe yi itaalithwe kuye. 8 Haye mwene a li uuyelele, ihe okwe ya, a hokolole uuyelele. 9 Uuyelele mbuka washili otau ya muuyuni, u minikile omuntu kehe. 10 Ohapu okwa li muuyuni, naKalunga okwe mu shititha uuyuni, ihe uuyuni inau mu dhimbulula. 11 Oye okwe ya kumboka yaandjawo, naamboka yaandjawo inaye mu taamba. 12 Ihe ayehe mboka ye mu taamba noye mu itaale, okwe ya pe oonkondo, ya ninge aana yaKalunga. 13 Oyo inaa valwa pamukalo gwopanshitwe, nokutya kaye shi oluvalo lwomuntu, ihe oya valwa muKalunga. 14 Ohapu nokwa ningi omuntu nokwa kala mokati ketu. Otse otwa tala eadhimo lye, eadhimo lyomuvalwa awike gwaHe. Oye okwa li u udha esilohenda noshili. 15 Johannes okwe mu hokolola nokwi igidha a ti: “Nguka oye naanaa ngoka nde mu popile nda ti: ‘Ngoka te ya konima yandje, okwa li ndje komeho, oshoka okwa li ko, manga ngame nda li ndaa ko.’ ” 16 Nomowindji wesilohenda lye tseni atuheni otwa pewa mo esilohenda lya gwedhele kesilohenda. 17 Oshoka ompango Kalunga okwe yi gandja ya pitile muMoses, ihe esilohenda noshili oye etwa kuJesus Kristus. 18 Kaku na omuntu a mono Kalunga nando olumwe, ihe Kalunga Omuvalwa awike ngoka e li puHe, oye e mu holola.

Ehokololo lyaJohannes Omushashi

19 Ndika olyo ehokololo lyaJohannes, Aajuda yomuJerusalem sho ya tumu kuye aayambi nAalevi oku mu pula: “Ongoye lye?” 20 Johannes ina tinda okuyamukula, ihe okwa hempulula sha yela a ti: “Hangame Kristus.” 21 Oyo noye mu pula: “Ongoye lye ano? Ongoye Elia?” Oye okwa ti: “Aawe, hangame!” “Ongoye omuhunganeki?” Oye okwa yamukula. “Aawe.” 22 Oyo noya ti kuye: “Ongoye lye ano, opo tu fale eyamukulo kumboka ye tu tumu. Ngoye oto itile ngiini?” 23 Johannes okwa yamukula noohapu dhomuhunganeki Jesaja a ti: “Ongame ewi lyanakwiigidha mombuga tali ti: ‘Yelekanithileni Omuwa ondjila.’ ” 24 Aatumwa mboka oya li yomaafarisayi. 25 Oyo noya pula Johannes ya ti: “Omolwashike ano to shasha, ngele hangoye Kristus nenge Elia nenge omuhunganeki?” 26 Johannes okwe ya yamukula a ti: “Ngame otandi mu shasha nomeya, ihe mokati keni omwa thikama ngoka ne kaamu mu shi. 27 Ngoka te ya konima yandje, oye tuu ngoka inaandi gwana okudhitula omiya dhoongaku dhe.” 28 Iinima mbika oya ningilwa muBetania handiyaka yomulonga gwaJordan, nkoka Johannes a li ta shasha aantu.

Onzigona yaKalunga

29 Esiku lya landula Johannes okwa mono Jesus te ya kuye nokwa ti: “Tala, Onzigona yaKalunga, tayi kutha po oondjo dhuuyuni! 30 Ngoka oye naanaa ngoka nde mu popile nda ti: ‘Omulumentu te ya konima yandje, oye omunene, oshoka okwa li ko, manga ngame nda li ndaa ko.’ 31 Ngame onda li kaandi mu shi, ihe onde ya okushasha nomeya, opo a tseyithilwe Aaisraeli.” 32 Johannes okwe mu hokolola a ti: “Onda mono Ombepo ya kuluka megulu ya fa onguti noye mu lambele. 33 Ngame nonda li kaandi mu shi, ihe Kalunga, ngoka a tumu ndje okushasha nomeya, okwa lombwele ndje a ti: ‘Ngoka to mu mono ta lambelwa kOmbepo notayi kala kombanda ye, oye ngoka ta shasha nOmbepo Ondjapuki.’ 34 Ngame onde shi mono notandi mu hokololele nokutya oye Omuna gwaKalunga.”

Aalongwa yaJesus yotango

35 Esiku lya landula Johannes okwa li ko ishewe a thikama nayaali yomaalongwa ye. 36 Johannes sho a mono Jesus te ende po, okwa ti: “Tala, Onzigona yaKalunga.” 37 Aalongwa ye yaali oye mu uvu, sho ta popi ngaaka noya landula Jesus. 38 Nena Jesus okwa punguluka nokwe ya mono, sho taye mu landula, nokwa pula: “Otamu kongo shike?” Oyo oye mu yamukula: “Owa kala peni, Rabbi?” (Oshitya shika otashi ti “Muhongi.”) 39 Jesus okwa ti kuyo: “Ileni, mu tale!” Oyo sho ya yi naye, oya mono mpoka a kala noya kala puye oshihupe shesiku ndyoka. Otundi oya li ontine yokomatango. 40 Gumwe gwomaalongwa mbeyaka yaali mboka ya li yu uvu Johannes sho a popi noya landula Jesus, oAndreas, omumwayina gwaSimon. 41 Andreas okwa tsakaneke tangotango omumwayina Simon nokwe mu lombwele a ti: “Tse otwa mono Omugwayekwa” (Oshitya shika otashi ti “Kristus.”) 42 Ye okwa fala Simon kuJesus. Jesus okwe mu tala nokwa ti: “Ongoye Simon yaJohannes; oto ki ithanwa Kefas,” (kokutya Petrus ndyoka tali ti “emanya”.)

Jesus ti ithana Filippus naNatanael

43 Esiku lya landula Jesus okwa li a hala okuya kuGalilea. Okwa tsakaneke Filippus nokwa ti kuye: “Landula ndje.” 44 Filippus okwa li Omubetsaida, oshilando moka Andreas naPetrus ya kala mo. 45 Filippus okwa tsakaneke Natanael nokwa ti kuye: “Tse otwa mono omulumentu ngoka a nyolwa kuMoses membo lyompango nokaahunganeki. Oye Jesus, omuna gwaJosef Omunasareti.” 46 Natanael okwe mu pula a ti: “MuNasaret otamu vulu tuu okuza uuwanawa washa?” Filippus okwe mu lombwele. “Ila, u tale!” 47 Jesus okwa mono Natanael te ya kuye nokwe mu popi a ti: “Tala, Omwiisraeli gwashili, ngoka kee na nando iifundja!” 48 Natanael okwe mu pula a ti: “Owa tseya ndje ngiini?” Jesus okwa ti: “Onde ku mono, sho wa li momukwiyu, manga Filippus inee ku ithana.” 49 Natanael okwe mu yamukula a ti: “Muhongi, ongoye Omuna gwaKalunga! Ongoye Omukwaniilwa gwAaisraeli!” 50 Jesus okwe mu yamukula a ti: “Ngoye ndishi owi itaale owala, sho nde ku lombwele kutya onde ku mono, sho wa li momukwiyu? Oto ka mona iinima iinene yi vule mbika.” 51 Jesus okwa ti kuyo: “Ngame otandi mu lombwele oshili: Otamu ka mona egulu lye eguluka, naayengeli yaKalunga taa londo notaa kulukile kOmuna gwOmuntu.”

Johannes 2

Ohango yomuKana

1 Sho pwa piti omasiku gatatu, okwa li ku na ohango muKana, oshilando shomuGalilea. Yina yaJesus oko a li. 2 Jesus naalongwa ye oya li wo ya hiywa kohango. 3 Omaviinu agehe sho ga pu po, yina yaJesus okwa ti kuye: “Kaye na omaviinu.” 4 Jesus okwa ti kuye: “Ino kala u na oshimpwiyu nangame, meme. Ethimbo lyandje inali thika natango.” 5 Yina yaJesus okwa lombwele aayakuli a ti: “Shaa shoka te mu lombwele, shi ningeni.” 6 Pamukalo gwokuyoga kwAajuda okwa li ku na iiyuma ihamano yomamanya popepi. Oshuma kehe oshi thike pomayemele gahetatu nenge omulongo nagaali. 7 Jesus okwa lombwele aayakuli a ti: “Tekeleni iiyuma omeya, yu udhe.” Oyo noye yi tekele yu udhilila sigo okomilungu. 8 Ye okwa ti kuyo: “Ngashingeyi ga pimpii mo ihe, mu ga faalele omuyakuli omukuluntu gwaayenda.” Oyo noye ge mu faalele. 9 Omuyakuli omukuluntu sho a makele omeya ngoka ga shituka omaviinu, okwa li kee shi mpoka ga zi. Aayakuli mboka ya teke omeya, oyo ayeke ya li ye shi shi. Omuyakuli omukuluntu okwi ithana ihe ombushiki 10 nokwa ti kuye: “Omuntu kehe oha gandja tango omaviinu ngoka omatoye, opo ihe ngele aantu ya kolwa, ote ya pe ngoka omawinayi. Ihe ngoye sigo oompaka owa holeke omaviinu omatoye.” 11 Oshikumithalonga shika shotango Jesus okwe shi ningile muKana, oshilando shomuGalilea. Okwa holola eadhimo lye, aalongwa ye noye mu itaale. 12 Konima yoshiningwanima shika Jesus mwene nayina naamwayina aalumentu naalongwa ye oya yi kuKapernaum noya kala ko omasiku gamwe.

Jesus to opaleke otempeli

13 Opaasa yAajuda sho ya li popepi, Jesus okwa yi kuJerusalem. 14 Okwa adha aantu motempeli taa landitha oongombe, oonzi noonguti, naapingakanithi yiimaliwa ya kuutumba piitaafula yawo. 15 Okwa tungu ongola yepando nokwe ya tidha mo ayehe motempeli pamwe noongombe noonzi dhawo. Okwa tilehi iimaliwa, niitaafula yawo okwe yi undulile pevi. 16 Aalandithi yoonguti okwe ya lombwele a ti: “Kuthii mo iinima mbika ayihe! Ongulu yaTate inamu yi ninga oshilandelo.” 17 Aalongwa ye oya dhimbulukwa kutya enyolo otali ti: “Uulaadhi omolwongulu yoye, Kalunga, otau li ndje.” 18 Aajuda oya pula Jesus ya ti: “Oshikumithalonga oshini po to longo, u tu ulukile kutya ou na epitikilo okulonga ngeyi?” 19 Jesus okwe ya yamukula a ti: “Kumunii po otempeli ndjika, ngame notandi yi tungulula momasiku gatatu.” 20 Nena Aajuda oye mu lombwele: “Otempeli ndjika oya tungwa oomvula omilongo ne nahamano, ongoye noto yi tungulula momasiku gatatu?” 21 Ihe otempeli ndjoka Jesus a popi, oyo olutu lwe. 22 Ano Jesus sho a yumudhwa kuusi, aalongwa ye oya dhimbulukwa oohapu ndhoka a li a popi. Oyo noyi itaale enyolo noohapu ndhoka Jesus e dhi ya lombwele.

Jesus okwa tseya aantu ayehe

23 Jesus sho a li muJerusalem pethimbo lyoshituthi shOpaasa, aantu oyendji oya mono iikumithalonga mbyoka a longo noye mu itaale. 24 Ihe ye ini iholola kuyo, oshoka ye mwene okwa li e ya shi ayehe. 25 Ye ina pumbwa omuntu e mu hokololele sha kombinga yomuntu, oshoka okwa tseya ye mwene shoka shi li momuntu.

Johannes 3

Jesus naNikodemus

1 Gumwe gwomaafarisayi, edhina lye Nikodemus, oshilyo shomongundu yaapangeli Aajuda, 2 okwe ya kuJesus uusiku nokwa ti kuye: “Muhongi, otu shi shi, ongoye omulongi ngoka a tumwa kuKalunga, oshoka kaku na nando ogumwe ta vulu okulonga iikumithalonga mbyoka to longo, okuninga Kalunga e li pamwe naye.” 3 Jesus okwe mu yamukula nokwa ti: “Ngame otandi ku lombwele oshili: Omuntu ngele ita valululwa, ita vulu okumona Oshilongo shaKalunga.” 4 Nikodemus okwa ti kuye: “Omuntu ngele omukuluntu, ota vulu ngiini okuvalwa ishewe? Ita vulu ndishi okushuna moshivalelo shayina, a valwe olutiyali?” 5 Jesus okwe mu yamukula: “Ngame otandi ku lombwele oshili: Kape na omuntu ta vulu okuya mOshilongo shaKalunga, ngele ina valululwa momeya nomOmbepo. 6 Shoka sha valwa panyama, osho onyama, naashoka sha valwa pambepo, osho Ombepo. 7 Ino kumwa, sho nde ku lombwele kutya omu na okuvalululwa. 8 Ano ombepo ohayi pepe shaa mpoka ya hala. Oto uvu oshihomo shayo, ihe ku shi mpoka tayi zi naankoka yu uka. Osho naanaa shi li kukehe ngoka a valwa pambepo.” 9 Nikodemus okwe mu pula a ti: “Shika otashi vulika ngiini?” 10 Jesus okwa yamukula a ti: “Ngoye omulongi gwAaisraeli, ihe nani shika ku shi shi? 11 Otandi ku lombwele oshili. Tse otatu popi shoka tu shi shi notatu hokolola shoka twa mona, ihe ne inamu hala okutaamba ehokololo lyetu. 12 Ngele tandi mu lombwele iinima yokombanda yevi, ihe itamu itaale, otamu vulu ngiini okwiitaala, ngele tandi mu hokololele iinima yomegulu? 13 Kape na nando ogumwe a yile megulu kakele kOmuna gwOmuntu, ngoka a zi megulu.” 14 “Ngashika naanaa Moses a li a yelutha eyoka pombanda mombuga, osho wo Omuna gwOmuntu e na oku ka yeluthwa pombanda, 15 opo kehe ngoka te mu itaale, a kale e na omwenyo gwaaluhe. 16 Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe. 17 Oshoka Kalunga ina tuma Omwana muuyuni, a pangule uuyuni, aawe, okwe mu tumu, opo uuyuni u hupithwe kuye.” 18 “Ngoka i itaala Omwana, ita pangulwa; ngoka ini itaala, okwa pangulwa nale, oshoka ini itaala Omuvalwa awike gwaKalunga. 19 Ihe epangulo oli li mpoka kutya uuyelele owe ya muuyuni, ihe aantu oye hole omilema shi vulithe pokuhola uuyelele, oshoka iilonga yawo iiwinayi. 20 Kehe ngoka ha longo uuwinayi, oku tonde uuyelele noite ya puuyelele, oshoka ina hala, iilonga ye iiwinayi yi holoke. 21 Ihe ngoka ta longo iilonga yu uka, ote ya puuyelele, opo uuyelele u holole kutya iilonga ye oya longwa omolwokuvulika kuKalunga.”

Jesus naJohannes Omushashi

22 Konima yaambika Jesus naalongwa ye oya yi kuJudea. Ye okwa kala ko omasiku gamwe pamwe nayo ta shasha aantu. 23 Johannes okwa li ta shasha puAinon, popepi naSalim, oshoka kokuma nkoka okwa li ku na omeya ogendji. Aantu oyendji oye ya kuJohannes, oye nokwe ya shasha, 24 oshoka Johannes okwa li ine edhililwa natango mondholongo. 25 Yamwe yomaalongwa yaJohannes oya tameke okuludhika nOmujuda gumwe kombinga yeyogo lyopaShijuda. 26 Yo oye ya kuJohannes noya ti kuye: “Muhongi, tala ko, omulumentu ngoka a li pamwe nangoye handiyaka yomulonga gwaJordan naangoka we mu hokolola, ota shasha, naantu ayehe otaa yi kuye.” 27 Johannes okwa yamukula a ti: “Kape na omuntu ta vulu okwiikuthila nando osha, okuninga Kalunga te shi mu pe. 28 One yene oonzapo dhandje, sho nda tile, ngame kandi shi Kristus, ihe onda tumwa oku mu tetekela. 29 Ngoka e na omufuko, oye ombushiki. Ihe kuume kombushiki ota thikama e ta pulakene nota nyanyukilwa ewi lyombushiki. Osho wo nenyanyu ndika lyandje olya gwanenena. 30 Oye e na okunenepala, ihe ngame ondi na okushonopala.”

Ngoka a za megulu

31 “Oongoka a za pombanda, oye omunene e vule ayehe. Ngoka gwopavi, ogwopavi nota popi iinima yopavi. Ngoka a za megulu, oye omunene e vule ayehe. 32 Oye ta hokolola shoka a mono nokwa uvu, ihe kape na nando ogumwe ta taamba ehokololo lye. 33 Oongoka ta taamba ehokololo lye, ota koleke nokutya Kalunga oye Kalunga kashili. 34 Ngoka a tumwa kuKalunga, oye ta popi oohapu dhaKalunga; oshoka Kalunga ite mu pe Ombepo ta yeleke, ihe ote mu pe sha gwana. 35 He oku hole Omwana nokwe mu pa iinima ayihe miikaha ye. 36 Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona omwenyo, ihe ondjahi yaKalunga otayi kala kombanda ye.”

Johannes 4

Jesus nomukiintu Omusamaria

1 Aafarisayi oyu uvu kutya Jesus okwa likola nokwa shasha aalongwa oyendji ye vule mboka yaJohannes. 2 Nonando Jesus mwene ina shasha nando omuntu gumwe, ihe aalongwa ye oyo ya shasha. 3 Jesus sho u uvu shoka tashi tiwa kaantu, okwa thigi po Judea nokwa shuna kuGalilea. 4 Mondjila ye yokuya nkoka okwa li e na okupitila muSamaria. 5 Oye nokwe ya koshilando shomuSamaria, edhina lyasho Sikar, shi li popepi nepya ndyoka Jakob a pele omwana Josef. 6 Popepi nepya ndyoka opwa li pu na oluthithiya lwaJakob. Jesus okwa li a vulithwa kondjila nokwa kuutumba pomuthima. Otundi oya li lwopomulongo nambali yomutenya. 7 Omukiintu Omusamaria okwe ya komuthima okuteka omeya. Jesus okwa ti kuye: “Pe ndje wo, ndi nwe mo.” 8 Aalongwa ye oya adhika ya ya koshilando, ya ka landa iikulya. 9 Omukiintu Omusamaria okwa yamukula: “Ngoye Omujuda, ihe ngame omukiintu Omusamaria. Oto vulu tuu okwiindila ndje, ndi ku pe, u nwe?” Oshoka Aajuda nAasamaria ihaa endathana. 10 Jesus okwa yamukula a ti: “Ando owa li wa tseya shoka Kalunga ha gandja naanguka olye te ku indile omeya, ando ngoye owe mu indile, e ku pe omeya omanamwenyo.” 11 Omukiintu okwa ti kuye: “Omuwa, ngoye ku na nando oshitekitho nomuthima omule. Omeya omanamwenyo oto ga adha peni? 12 Ngoye omunene nani u vule tatekulu Jakob, ngoka e tu pa omuthima nguno nokwa li ha nu mo ye mwene pamwe noyana niimuna ye?” 13 Jesus okwe mu yamukula a ti: “Kehe ngoka ta nu omeya ngaka, ota ka sa enota natango. 14 Ihe shaa ngoka ta nu omeya ngoka tandi ge mu pe, oye ita ka sa we enota sigo aluhe. Oshoka omeya ngoka tandi ge mu pe, otaga ka ninga muye oluthithiya lwomeya taga fuluka sigo omomwenyo gwaaluhe.” 15 Omukiintu okwa ti kuye: “Omuwa, pe ndje wo omeya ngoka, opo ndaa se we enota, ngame kaandi ye we nkuka komuthima okuteka.” 16 Jesus okwe mu lombwele: “Inda, u ki ithane omulumentu gwoye, ngoye u ye naye nkuka.” 17 Omukiintu okwe mu yamukula a ti: “Kandi na omulumentu.” Jesus okwa ti kuye: “Owa popi dhoshili kutya ku na omulumentu. 18 Oshoka ngoye owa li u na aalumentu yatano, naangoka u na ngashingeyi, ke shi omulumentu gwoye. Moshinima shoka owa popi dhoshili.” 19 Omukiintu okwa ti kuye: “Omuwa, ondi ku wete kutya ngoye omuhunganeki. 20 Ootatekulu Aasamaria oya li haa galikana Kalunga kondundu ndjika, ihe ne Aajuda ohamu ti kutya Jerusalem olyo ehala moka tu na okugalikanena.” 21 Jesus okwa ti kuye: “Nekulu, itaala ndje. Ethimbo otali ya, uuna ndoka itaamu ka galikana Tate kondundu ndjika nenge muJerusalem. 22 Ne Aasamaria omu shi tuu ngoka hamu mu galikana? Tse Aajuda otu shi ngoka hatu mu galikana, oshoka ehupitho otali zi mAajuda. 23 Ihe ethimbo otali ya noli li po ngashingeyi, uuna aagalikani yashili taa ka galikana Tate mOmbepo nomoshili. Oshoka aagalikani ya tya ngaaka oyo naanaa mboka Tate e ya hala. 24 Kalunga oye Ombepo, onkee naamboka taye mu galikana, oye na okugalikana mOmbepo nomoshili.” 25 Omukiintu okwa ti kuye: “Ondi shi shi kutya Kristus, nokutya Omugwayekwa ote ke ya. Nge te ya, ote ke tu lombwela iinima ayihe.” 26 Jesus okwa ti kuye: “Ongame naanaa nguka te popi nangoye.” 27 Pethimbo olyo tuu ndyoka aalongwa ye oye ya. Oya kumwa, sho ya mono Jesus ta popi nomukiintu ngoka. Ihe kapwa li nando ogumwe e mu pula: “Owa hala shike?” nenge: “Omolwashike to popi naye?” 28 Omukiintu okwa thigi po ihe oshuma she nokwa yi koshilando. Okwa lombwele aantu: 29 “Ileni, mu tale omulumentu ngoka a lombwele ndje ayihe nde yi ninga. Pamwe oye Kristus?” 30 Oyo oya zi mo moshilando noye ya kuJesus. 31 Aalongwa oya kala taa lombwele Jesus taa ti: “Muhongi, lya.” 32 Ihe Ye okwa yamukula a ti: “Ngame ondi na iikulya mbyoka kaamu yi shi.” 33 Aalongwa ye oya pulathana ihe: “Pamwe ope na ngoka e mu etele iikulya?” 34 Jesus okwa ti kuyo: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje. 35 “Ne ohamu ti: ‘Oku na natango oomwedhi ne, eteyo li thike.’ Ngame otandi mu lombwele: Yelutheni omeho geni, mu tale kutya omapya oga thika okuteywa. 36 Ngashingeyi nokuli omuteyi ota taamba ondjambi ye niilya ote yi pungulile momwenyo gwaaluhe, opo omukuni a nyanyukwe pamwe nomuteyi. 37 Oshoka moshinima shika ohapu oya tsa kutya: ‘Omukuni okwi ili nomuteyi okwi ili.’ 38 Ngame onde mu tumu okuteya mpoka inaamu longa po. Yalwe oyo ya longo, ne nomwe ya okulya iiyimati yiilonga yawo.” 39 Oyendji yomAasamaria yomoshilando shoka oyi itaale Jesus omolwoohapu dhomukiintu, ngoka a ti: “Oye okwa lombwele ndje iinima ayihe mbyoka nde yi ninga.” 40 Aasamaria sho ye ya kuye, oye mu indile, a menekele puyo. Ye okwa menekele puyo omasiku gaali. 41 Aantu oyendji ye vule mboka yotango oyi itaale Jesus omolwoohapu dhe mwene. 42 Yo noya lombwele omukiintu: “Tse otwi itaala, hamolwoohapu dhoye, ihe omolwashoka twe mu uvu tse yene notu shi shi, oye lela omuhupithi guuyuni.”

Jesus ta aludha omuna gwelenga

43 Omasiku ngoka gaali sho ga piti po, Jesus okwa zi ko nkoka nokwa yi kuGalilea. 44 Oshoka Jesus mwene okwa ti: “Omuhunganeki iha simanekwa moshilongo shaandjawo.” 45 Ano Jesus sho a thiki kuGalilea, Aagalilea oye mu taamba, oshoka nayo wo oya li moshituthi shOpaasa muJerusalem noya mono ashihe shoka a ningi pethimbo lyoshituthi. 46 Jesus okwe ya ishewe muKana, oshilando shomuGalilea, moka a li a shitukitha omeya ga ninge omaviinu. MuKapernaum omwa li mu na elenga lyontumba lyomukwaniilwa li na omwana omumati ta alukwa. 47 Sho lya kundana kutya Jesus okwa zi ko kuJudea e ya kuGalilea, olya yi kuye oku mu indila, e ye kuKapernaum, a aludhe omwana, oshoka okwa li e li pokusa. 48 Jesus okwe mu lombwele a ti: “Ngele itamu mono iikumithalonga niilongankondo, itamu itaale.” 49 Elenga olya ti kuye: “Omuwa, ila, manga omumwandje inaa sa!” 50 Jesus okwa ti kuye: “Inda, omumwoye oku na omwenyo.” Omulumentu okwi itaale oohapu dhaJesus e dhi mu lombwele nokwa yi. 51 Mondjila ye yokushuna kegumbo aamati ye oye mu tsakaneke noye mu lombwele kutya omwana oku na omwenyo. 52 Okwe ya pula ethimbo, uuna a tameke okukala nawa. Yo oya ti kuye: “Ohela potundi yotango yomutenya olwiidhi olwe mu etha po.” 53 He okwa dhimbulukwa kutya opotundi naanaa ndjoka Jesus e mu lombwele a ti: “Omumwoye oku na omwenyo.” Oye nokwi itaale pamwe negumbo lye alihe. 54 Oshikumithalonga shika osho oshitiyali shoka Jesus a ningi, sho a zi kuJudea e te ya kuGalilea.

Johannes 5

Omuvu gwomuBetesda ta aludhwa

1 Konima yaambika okwa li ku na oshituthi shAajuda. Jesus okwa yi kuJerusalem. 2 Ano muJerusalem posheelo shoonzi opwa li pu na edhiya hali ithanwa Betesda mOshihebeli noli na oondunda ntano. 3 Moondunda ndhoka omwa li mwa lala ongundu onene yaavu: aaposi, iilema niitiningili. Aavu mbaka oya li ya tegelela, omeya ga nyenganyengithwe. 4 Oshoka pomathimbo nomathimbo omuyengeli gwOmuwa oha kulukile medhiya e ta nyenganyengitha omeya. Omuvu ngoka ta thiki tango medhiya, omeya sho ga nyenganyengithwa, ota aluka kuuvu kehe kwa li e u na. 5 Okwa li ku na omulumentu gumwe a li a ala oomvula omilongo ndatu nahetatu. 6 Jesus sho e mu mono a lala, okwa li e shi shi kutya omulumentu ngoka okwa ala ethimbo ele. Jesus okwa ti kuye: “Owa hala okwaaluka?” 7 Omuvu okwa yamukula: “Omuwa, kandi na ngoka ta fala ndje medhiya, uuna omeya taga nyenganyengithwa. Olwindji manga tandi kambadhala okuya mo, mukwetu gulwe ta tetekele ndje okuthika mo.” 8 Jesus okwa ti kuye: “Thikama, kutha ontala yoye, ngu u ende.” 9 Mbalambala omulumentu okwa aluka. Ye okwa kutha po ontala ye nokwa yi. Oshinima shika osha ningwa mesiku lyEsabati. 10 Onkee Aajuda oya lombwele omulumentu ngoka a aludhwa ya ti: “Nena esiku lyEsabati, nompango itayi ku pitikile, u humbate ontala yoye.” 11 Ye okwe ya yamukula: “Omulumentu ngoka a aludha ndje, oye a lombwele ndje: ‘Kutha ontala yoye, ngu u ye.’ ” 12 Oyo oye mu pula: “Omulumentu olye ngono e ku lombwele kutya: ‘Kutha ontala yoye, ngu u ye?’ ” 13 Ihe omwaaludhwa okwa li inee mu tseya oye olye, oshoka Jesus okwa adhika a ya nale nomolwashoka wo opwa li pu na aantu oyendji. 14 Konima yethimbo Jesus okwe mu mono motempeli nokwa ti kuye: “Tala, ngashingeyi owa aluka. Ino yona we, opo waa adhike kuuwinayi u vule mbuka.” 15 Omulumentu okwa yi nokwa hokololele Aajuda kutya oJesus e mu aludha. 16 Omolwoshinima shika Aajuda oya tameke okutidhagana Jesus, oshoka okwa aludha omuntu mEsabati. 17 Jesus okwa ti kuyo: “Tate ota longo aluhe, nangame wo ondi na okulonga.” 18 Omolwoohapu ndhika Aajuda oya tokola oku mu dhipaga, oshoka oye ina yona ashike Esabati, ihe okwa ti wo kutya Kalunga Oye He. Osho ngeyi okwi iningi e thike puKalunga.

Oonkondo dhOmwana

19 Jesus okwa ti kuyo: “Ngame otandi mu lombwele oshili: Omwana ita vulu okuninga nando osha muye mwene. Ota longo owala shoka e wete He ta ningi. Shoka He ta longo, osho wo Omwana ta ningi. 20 Oshoka He oku hole Omwana note mu ulukile iinima ayihe mbyoka ye mwene ta longo. Ye note ke mu ulukila iilonga iinene yi vule mbika, opo mu kumwe. 21 Oshoka ngashika naanaa He ta yumudha aasi nota gandja omwenyo, osho wo Omwana ta gandja omwenyo kumboka a hala. 22 He ita pangula nando ogumwe, ihe epangulo alihe okwe li gandja kOmwana, 23 aantu ayehe opo ya simaneke Omwana, ngashika naanaa taa simaneke He. Oongoka itaa simaneke Omwana, ita vulu wo okusimaneka He, ngoka e mu tuma. 24 “Ngame otandi mu lombwele oshili: ngoka tu uvu oohapu dhandje noti itaale ngoka a tuma ndje, oku na omwenyo gwaaluhe. Ita pangulwa we, ihe okwa za mo nale meso nokwe ya momwenyo. 25 Ngame otandi mu lombwele oshili: Ethimbo otali ke ya nolye ya nale nokuli, uuna oonakusa taa ka uva ewi lyOmuna gwaKalunga. Ayehe mboka taye li uvu, otaa ka kala ye na omwenyo. 26 Oshoka ngashika naanaa He e li po oluthithiya lwomwenyo muye mwene, osho wo okwa pe Omwana oonkondo, a kale oluthithiya lwomwenyo muye mwene. 27 Okwa pe Omwana oonkondo dhokupangula, oshoka Omwana oye Omuna gwOmuntu. 28 Inamu kuminwa oshinima shika; oshoka ethimbo otali ya, uuna oonakusa ayehe mboka ye li moombila, taa ka uva ewi lye. 29 Yo notaa ka za mo moombila dhawo: mboka ya longo uuwanawa, otaa ka yumudhwa e taa kala ye na omwenyo, naamboka ya longo uuwinayi, otaa ka yumudhwa e taa ka pangulwa.”

Aahokololi yaJesus

30 “Ngame itandi vulu okuninga nando osha mungame mwene. Otandi pangula owala ngaashi Kalunga a lombwele ndje, nepangulo lyandje oli li mondjila. Oshoka itandi landula ehalo lyandje mwene, ihe olyaanguka a tuma ndje.” 31 “Ngele otandi ihokolola mwene, nena ehokololo lyandje kali shi okwiinekelwa. 32 Ihe oku na gulwe ngoka ta hokolola ndje. Ngame nondi shi shi kutya ehokololo ndyoka ta hokolola ndje, olyoshili. 33 Ne omwa tumine aatumwa yeni kuJohannes, nokwa hokolola oshili. 34 Ngame itandi taamba ehokololo lyomuntu, ihe otandi popi ngeyi, opo mu hupithwe. 35 Johannes okwa li olamba ya tema notayi minikile, ihe ne omwa li mwa hala okunyanyukilwa muuyelele we okathimbo okafupi kowala. 36 Ihe ngame ondi na ehokololo enene li vule ndiyaka lyaJohannes: iilonga mbyoka tandi yi longo, oombyoka nda pewa kuTate, oyo tayi hokolola ndje notayi ulike kutya Tate oye a tuma ndje. 37 Tate, ngoka a tuma ndje, oye mwene ta hokolola ndje. Ne inamu uva nando olumwe ewi lye, ne inamu mona ondjelo ye. 38 Oohapu dhe kadhi mo mune ongoshinima tashi kalelele, oshoka ne inamu itaala ngoka a tumwa kuye. 39 Ne otamu konakona mOmanyolo, oshoka otamu dhiladhila kutya mugo omo tamu mono omwenyo gwaaluhe. Omanyolo ngoka ogo naanaa taga hokolola ndje. 40 Ne inamu hala okuya kungame, opo mu kale mu na omwenyo. 41 “Ngame itandi kongo esimano lyaantu. 42 Ihe ngame ondi mu shi kutya kamu na ohole yokuhola Kalunga moomwenyo dheni. 43 Ngame onde ya medhina lyaTate, ne noinamu taamba ndje. Ngele taku zi gulwe i ili te ya molwe mwene, ne otamu mu taamba. 44 Otamu vulu ngiini okwiitaala, ne mboka hamu simanekathana, ihe esimano ndyoka tali zi kuKalunga awike, ihamu li kongo. 45 Inamu dhiladhila kutya ongame tandi ke mu lya ko kuTate. Moses oye te ke mu lya ko, Moses tuu ngoka mwe mu inekela. 46 Oshoka ando omwa li mwi itaala shili Moses, ando nangame wo omwi itaala ndje. Oshoka Moses okwa nyola ta hokolola ndje. 47 Ihe sho inaamu itaala shoka a nyola, otamu vulu ngiini okwiitaala oohapu dhandje?”

Johannes 6

Jesus ta kutitha aalumentu omayuvi gatano

1 Konima yaambika Jesus okwa yi handiyaka yefuta lyaGalilea kokutya lyaTiberias. 2 Ongundu onene yaantu oye mu landula, oya mono iikumithalonga mbyoka a longo, sho a aludha aavu. 3 Jesus okwa londo kondundu nokwa kuutumba nkoka pamwe naalongwa ye. 4 Ihe Opaasa, oshituthi shAajuda, osha li popepi. 5 Jesus sho a yelutha omeho ge koombinga noombinga, okwa mono ongundu onene yaantu taye ya kuye, nokwa ti kuFilippus: “Otatu ka landa peni iikulya ya gwana okupalutha aantu mboka ayehe?” 6 Shika okwe shi ti, a yeleke Filippus, oshoka ye mwene okwa li e shi shoka a hala okuninga. 7 Filippus okwe mu yamukula a ti: “Iikwiila yiimaliwa omathele gaali itayi ya gwanene, opo kehe gumwe a pewe nando okapambu okashona kowala.” 8 Gumwe gwomaalongwa ye, Andreas, omumwayina gwaSimon Petrus, okwa ti: 9 “Mpaka ope na okamati ke na iikwiila itano yiilya noohi mbali. Ihe mbika otayi kwatha shike aantu oyendji ye thike mpoka?” 10 Jesus okwe ya lombwele a ti: “Kuutumbikeni aantu.” Opwa li pu na omwiidhi ogwindji pehala ndyoka. Aantu ayehe oya kuutumba ihe. Ko okwa li ku na aalumentu ye thike pomayuvi gatano. 11 Jesus okwa kutha ihe iikwiila, a hambelele nokwe yi topolele aantu mboka ya kuutumba. Osho wo a ningi kombinga yoohi. Ayehe oya mono iikulya ya gwana. 12 Aantu ayehe sho ya kuta, Jesus okwa lombwele aalongwa ye a ti: “Gongeleni iipambu ayihe mbyoka ya hupu ko, opo pwaa hepe nando osha.” 13 Yo oye yi gongele ihe, noyu udha oontungwa omulongo nambali niipambu yiikwiila itano yiilya mbyoka ya hupu kumboka ya lya. 14 Aantu mboka ya mono oshikumithalonga shika Jesus a ningi, oya ti: “Nguka oye naanaa omuhunganeki ngoka a li e na okuya muuyuni.” 15 Jesus okwa li e shi shi kutya aantu oya hala okuya, ye mu kwate noye mu ninge omukwaniilwa koonkondo; onkee okwa shuna kondundu oye awike.

Jesus te ende kombanda yomeya

16 Ongulohi sho ye ya, aalongwa ye oya yi komunkulo gwefuta. 17 Oya yi mowato noya kambadhala okutaaguluka efuta, ya ye kuKapernaum. Okwa li kwa luudha nale nokuli, ihe Jesus okwa li inee ya natango kuyo. 18 Pethimbo tuu ndyoka ombepo onene oya tameke okupepa noya tukulutha efuta. 19 Sho ya dhugu oshikako shi thike pookilometa ntano nenge hamano, oya mono Jesus te ende kombanda yomeya u uka kowato, oyo noya haluka. 20 Ihe Jesus okwa ti kuyo: “Inamu tila, ongame!” 21 Oya li ya hala oku mu taamba mowato, ihe ohaluka yowala owato oya thiki kevi kehala nkoka taa yi.

Aantu taa kongo Jesus

22 Esiku lya landula aantu mboka natango ya li handiyaka yefuta, oya mono kutya owato yimwe ayike ya thigwa hwiyaka. Oya li wo ye shi shi kutya Jesus ina ya mowato pamwe naalongwa ye, ihe aalongwa oya yi oyo ayeke. 23 Ihe oowato oonkwawo dha zi kuTiberias, odhe ya komunkulo popepi nehala ndyoka aantu ya li ya lile po iikwiila, Omuwa sho a li a hambelele. 24 Aantu sho ya mono Jesus kee ko nkoka nosho wo aalongwa ye, oya yi moowato noya taagulukile kuKapernaum, ye ke mu konge.

Jesus oshikwiila shomwenyo

25 Aantu oya adha Jesus handiyaka yefuta noya ti kuye: “Muhongi, owe ya po uunake mpano?” 26 Jesus okwe ya yamukula a ti: “Ngame otandi mu lombwele oshili: Ne itamu kongo ndje molwaasho mwa mono iikumithalonga mbyoka nda longo, ihe omolwaashoka mwa li iikwiila mbiyaka nomwa kuta. 27 Inamu konga iikulya mbyoka tayi hulu po, ihe kongeni iikulya mbyoka tayi kalelele sigo omomwenyo gwaaluhe. Iikulya mbyoka oyo mbyoka Omuna gwOmuntu te ke yi mu pa, oshoka oye tuu ngoka He Kalunga e mu tula oshihako she.” 28 Oyo oya ti kuye: “Otu na okuninga shike, opo tu longe iilonga yaKalunga?” 29 Jesus okwe ya yamukula nokwa ti kuyo: “Iilonga mbyoka Kalunga a hala, mu longe, oyo mbika: Itaaleni ngoka a tumwa kuye.” 30 Oyo oya ti kuye: “Oshikumithalonga oshini po to shi longo, tu shi mone, tse tu ku itaale? Oto ningi shike? 31 Ootatekulu oya lile omanna mombuga, ngashika naanaa kwa nyolwa: ‘Oye okwe ya pe oshikwiila shomegulu, ya lye!’ ” 32 Jesus okwe ya lombwele a ti: “Ngame otandi mu lombwele oshili: Moses haye e mu pele oshikwiila shomegulu, ihe Tate oye te mu pe oshikwiila shashili tashi zi megulu. 33 Oshoka oshikwiila shoka Kalunga te shi gandja, osho Omwana, ngoka a kuluka megulu nota pe uuyuni omwenyo.” 34 Oyo oya ti kuye: “Omuwa, tu pa aluhe oshikwiila shoka.” 35 Jesus okwe ya lombwele a ti: “Ongame oshikwiila shomwenyo. Ngoka te ya kungame, ita ka sa we ondjala, naangoka ti itaale ndje, ita ka sa we enota. 36 Ngashingeyi otandi mu lombwele kutya nonando omwa mono ndje, natango tuu inamu itaala. 37 Aantu ayehe mboka Tate a pa ndje, otaa ya kungame. Ngame noitandi tidha po nando ogumwe ngoka te ya kungame, 38 oshoka ngame onda za megulu; inandi ya okugwanitha ehalo lyandje mwene, ihe olyaanguka a tuma ndje. 39 Ehalo lyaanguka a tuma ndje, olyo ndika kutya ndaa kanithe po nando ogumwe gwaayehe mboka Tate e ya pa ndje, ihe ndi ke ya yumudhe ayehe mesiku lyahugunina. 40 Oshoka ehalo lyaTate olyo ndika: Kehe ngoka ta mono Omwana note mu itaale, oku na omwenyo gwaaluhe; ngame otandi ke mu yumudha mesiku lyahugunina.” 41 Aajuda oya tameke okungungutula, Jesus sho a ti: “Ongame oshikwiila shoka sha kuluka megulu.” 42 Oyo noya ti: “Nguno ke shi nani Jesus, omuna gwaJosef? He nayina otu ya shi. Ongiini ano ngashingeyi, sho ta ti kutya okwa za megulu?” 43 Jesus okwe ya yamukula a ti: “Inamu ngungutula. 44 Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame; nangame otandi ke mu yumudha mesiku lyahugunina. 45 Aahunganeki oya nyola ya ti: ‘Aantu ayehe otaa ka kala ya longwa kuKalunga.’ Kehe ngoka tu uvu shoka Tate ta popi notashi mu longo, ote ya kungame. 46 Shika itashi ti kutya oku na ando omuntu a mono Tate, aawe, ihe Omwana ngoka a zi kuKalunga, oye awike a mono Tate. 47 Ngame otandi mu lombwele oshili: ngoka i itaala, oku na omwenyo gwaaluhe. 48 Ongame oshikwiila shomwenyo. 49 Oohokulu oya lile omanna mombuga, ihe oya sa. 50 Ihe oshikwiila shika sha kuluka megulu oshi li ngeyi kutya kehe ngoka te shi li, ita si. 51 Ongame oshikwiila shomwenyo shoka sha kuluka megulu. Kehe ngoka ta li oshikwiila shika, ota kala e na omwenyo sigo aluhe. Oshikwiila shoka tandi mu pe, osho onyama yandje, ndjoka tandi yi gandja, yi ninge omwenyo guuyuni.” 52 Shika oshe eta oontamanana oonene mokati kAajuda. Oyo oya pulathana ya ti: “Omulumentu nguno ota vulu ngiini oku tu pa onyama ye, tu yi lye?” 53 Jesus okwe ya yamukula a ti: “Ngame otandi mu lombwele oshili: Ngele itamu li onyama yOmuna gwOmuntu ne itamu nu ombinzi ye, itamu kala mu na omwenyo meni lyeni. 54 Ngoka ta li onyama yandje nota nu ombinzi yandje, oye oku na omwenyo gwaaluhe, nangame otandi ke mu yumudha mesiku lyahugunina. 55 Oshoka onyama yandje oyo okulya kwashili nombinzi yandje oyo okunwa kwashili. 56 Ngoka ta li onyama yandje nota nu ombinzi yandje, ota kala mungame, nangame otandi kala muye. 57 Ngashika naanaa Tate, ngoka a tuma ndje, e na omwenyo, osho nangame wo ndi na omwenyo omolwe. Onkee kehe ngoka ta li onyama yandje, ota ka kala e na omwenyo omolwandje. 58 Oshikwiila osho shika sha kuluka megulu. Sho inashi fa oshikwiila shoka sha lilwe koohokulu e taa si. Ngoka ta li oshikwiila shika, ota kala e na omwenyo sigo aluhe.” 59 Oohapu ndhika Jesus okwe dhi popi mosinagoga muKapernaum, sho a li ta longo aantu.

Oohapu dhomwenyo gwaaluhe

60 Oyendji yomaalongwa ye mboka yu uvu oohapu ndhika, oya ti: “Elongo ndika ekukutu unene, olye ta vulu oku li pulakena?” 61 Jesus sho e shi dhimbulula mwene kutya aalongwa ye otaa ngungutula molwoohapu ndhoka a popi, okwa ti kuyo: “Omwe etha eitaalo omolwoohapu ndhika? 62 Ongiini ano, ngele tamu ka mona Omuna gwOmuntu ta londo ta shuna nkoka a li shito? 63 Ombepo oyo tayi tula omwenyo, onyama kayi na shoka tayi kwatha. Oohapu ndhoka nde mu lombwele odho Ombepo nomwenyo. 64 Ihe natango tuu mokati keni omu na yamwe mboka inayi itaala.” Oshoka okuza petamekolela Jesus okwa kala e shi shi kutya oolye mboka inaaye mu itaala naangoka te ke mu gwaaleka kutya olye. 65 Oye kwa gwedha ko a ti: “Osho tuu shoka nde mu lombwele kutya kaku na nando omuntu ta vulu okuya kungame, okuninga Tate te shi mu pitikile.” 66 Okuza kesiku ndyoka oyendji yomaalongwa ye oya shuna monima yo inaa enda we pamwe naye. 67 Jesus okwa lombwele ihe aalongwa ye mboka omulongo nayaali a ti: “Ne inamu hala okuya?” 68 Simon Petrus okwe mu yamukula: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe. 69 Ngashingeyi tse otwi itaala notu shi shi kutya ngoye Omuyapuki ngoka wa za kuKalunga.” 70 Jesus okwe ya yamukula a ti: “Inandi mu hogolola mu li omulongo nayaali? Ihe nando ongaaka, gumwe oye omuhindadhi.” 71 Oshinima shika okwe shi popi omolwaJudas yaSimon Iskariot. Oshoka Judas nando okwa li gumwe gwaamboka omulongo nayaali, oye a li te ke mu gwaaleka.

Johannes 7

Jesus naamwayina aalumentu

1 Konima yaambika Jesus okwe ende muGalilea. Oye okwa li inaa hala okweenda muJudea, oshoka Aajuda yaankoka oya li ya hala oku mu dhipaga. 2 Oshituthi shAajuda, oshituthi shomatsali giihwali, osha li popepi. 3 Aamwayina yaJesus aalumentu oye mu lombwele ihe ya ti: “Za po mpaka, u ye kuJudea, aalongwa yoye opo ya mone iilonga mbyoka yi longo. 4 Oshoka kape na ando omuntu ta longo sha meholamo, ngele okwa hala a tseyike. Onkee ano i ihololela uuyuni.” 5 Oshoka naamwayina aalumentu wo oya li inaaye mu itaala. 6 Jesus okwa ti kuyo: “Ethimbo ndyoka lyo opalela ndje inali thika natango. Ihe ne omu na aluhe ethimbo ndyoka lye mu opalela. 7 Ne uuyuni itau mu tondo, ihe ngame ou tonde ndje, oshoka otandi u hololele kutya iilonga yawo iiwinayi. 8 Ne indeni mpeyaka koshituthi. Ngame itandi yi ko koshituthi shika, oshoka ethimbo lyandje inali thika natango.” 9 Oye okwe ya lombwele oohapu ndhika nokwa kala natango muGalilea.

Jesus koshituthi shomatsali giihwali

10 Hugunina aamwayina aalumentu sho ya yi koshituthi, Jesus naye wo okwa yi ko. Ye ina ya ko puuyelele, ihe okwa yi ko meholamo. 11 Aajuda oya kala taye mu kongo moshituthi noya pulathana ya ti: “Oye oku li peni?” 12 Mongundu yaantu omwa kala enongono olindji omolwe. Aantu yamwe oya ti: “Oye omulumentu omwaanawa.” Ihe yamwe oya ti: “Aawe, ota pukitha aantu.” 13 Ihe kakwa li nando omuntu ngoka e mu popi puuyelele, oshoka oya li ya tila Aajuda. 14 Metifa lyoshituthi Jesus okwa yi motempeli nokwa tameke okulonga aantu. 15 Aajuda oya kumwa noonkondo noya ti: “Omulumentu nguka okwa tseya ngiini Omanyolo, nando ina longwa?” 16 Jesus okwe ya yamukula a ti: “Elongo ndika tandi li longo, kali shi lyandje mwene, ihe olya za kuKalunga, ngoka a tuma ndje. 17 Kehe ngoka a hala okuvulika kehalo lyaKalunga, ota ka dhimbulula elongo ndika tandi longo, ngele olya zi kuKalunga, nenge ote popi ashike mungame mwene. 18 Omuntu ngoka ta popi muye mwene, ota kambadhala okwiikongela esimano. Ihe ngoka ta kongo esimano lyaanguka e mu tuma, oye omunashili ye ke na nando iifundja yasha meni lye. 19 Moses ine mu pa ompango? Ihe kape na nando ogumwe gwomune ta vulika kompango. Omolwashike mwa hala okudhipaga ndje?” 20 Aantu oye mu yamukula ya ti: “Shila ou niwe kompwidhuli. Olye a hala oku ku dhipaga?” 21 Jesus okwe ya yamukula a ti: “Oshilonga shimwe ashike nda longo, ne amuhe nomwa kumwa. 22 Molwaashoka Moses okwe mu pe oshipango, mu fukaleke aana yeni aamati, (nonando haMoses e shi gandja, ihe ooho oyo ye shi tameke), ne ohamu ya fukaleke nomEsabati. 23 “Ngele okufukaleka omuntu mEsabati itaku yono ompango yaMoses, omolwashike mwa geele ndje, sho nda aludha omuntu mEsabati? 24 Inamu pangula ngaashi tamu tala nomeho, ihe panguleni epangulo lyu uka.”

Nguka oye tuu Kristus?

25 Nena aantu yamwe yomuJerusalem oya ti: “Nguka haye nani ngoka aakuluntu yetu Aajuda ya hala oku mu dhipaga? 26 Tala, ota popi montaneho yawo, ihe kape na nando ngoka ta ti sha kuye. Nenge aakuluntu oya dhimbulula kutya omulumentu nguka oye Kristus? 27 Tse otwa tseya omulumentu nguka nkoka a za, ihe Kristus ngele te ya, kape na ngoka e shi nkoka ta zi.” 28 Jesus okwa popi mokule motempeli ta longo aantu e ta ti: “Omu shi ndje tuu nomu shi ko tuu nkoka nda za? Ngame inandi ya molwandje mwene. Ngoka a tumu ndje, oye omunashili. Ne nokamu mu shi. 29 Ngame ondi mu shi, oshoka onda zi kuye, noye a tuma ndje.” 30 Oyo oya li ya hala oku mu kwata, ihe molwaashoka ethimbo lye olya li inaali thika natango, kape na nando ogumwe e mu tula iikaha. 31 Ihe aantu oyendji yomongundu oye mu itaale noya ti: “Kristus nge te ya, ota ka longa tuu iikumithalonga iinene yi vule mbika tayi longwa komulumentu nguno?”

Aalangeli ya tumwa okukwata Jesus

32 Aafarisayi oyu uvu enongono lyongundu ndjoka yaantu taa popi iinima mbika kombinga yaJesus. Nena yo pamwe naayambi aakuluntu oya tumu aalangeli, ya ka kwate Jesus. 33 Jesus okwe ya lombwele: “Ngame ondi li pune okathimbo okafupi natango, opo ihe otandi yi kungoka a tuma ndje. 34 Ne otamu ka kala nokukonga ndje, ihe itamu ka mona ndje, oshoka nkoka tandi ka kala, kamu vulu okuya ko.” 35 Aajuda oya pulathana ya ti: “Omulumentu nguka ota yi peni ando, mpo itaatu mu mono we? Otayi kiilando yAagreka nkoka kwa kala Aajuda, a ka longe Aagreka? 36 Oye okwa hala okutya ngiini, sho a ti: Ne otamu kala nokukonga ndje ne itamu ka mona ndje; naankoka tandi yi, itamu vulu okuya ko.”

Omilonga dhomeya omanamwenyo

37 Esiku lyahugunina lyoshituthi olya li lya simana unene. Esiku olyo tuu ndyoka Jesus okwa thikama nokwiigidha a ti: “Kehe ngoka a sa enota, ne ye kungame, a nwe. 38 Ngaashi kwa nyolwa taku ti: ‘Kehe ngoka i itaala ndje, meni lye otamu ka tondoka omilonga dhomeya omanamwenyo.’ ” 39 Jesus okwa popi ta dhiladhila Ombepo ngoka ta ka pewa mboka ye mu itaala. Pethimbo ndyoka Ombepo okwa li inaa gandjwa natango, oshoka Jesus okwa li inaa adhimithwa natango.

Omaludhi mokati kaantu

40 Yamwe yomongundu sho yu uvu oohapu ndhika, oya ti: “Kapu na omalimbililo, omulumentu nguka oye omuhunganeki.” 41 Ooyakwawo oya ti: “Oye Kristus.” Ihe yamwe ishewe oya ti: “Kristus ita zi ndishi muGalilea? 42 Enyolo otali ti kutya Kristus ota zi moluvalo lwaDavid nota valelwa muBetlehem, moshilando moka David a li a kala.” 43 Osho ngeyi omaludhi oga tameke mokati kaantu omolwe. 44 Yamwe oya li ya hala okukwata Jesus, ihe kapwa li nando ogumwe e mu gumu.

Okwaayitaala kwaawiliki yAajuda

45 Aalangeli oya shuna kaayambi aakuluntu nokaafarisayi, mboka ye ya pula: “Omolwashike inaamu mu eta huka?” 46 Aalangeli oye ya yamukula: “Noshitonale inaku monika omuntu ta popi ngashika omulumentu ngwiyaka.” 47 Aafarisayi oye ya pula ya ti: “Nane wo omwa hongololwa? 48 Ope na tuu nando ogumwe gwomaakuluntu yetu nenge gwomaafarisayi e mu itaala? 49 Aantu mbaka inaa tseya ompango yaMoses, onkee oye li kohi yethingo lyaKalunga.” 50 Nikodemus, ngoka a yile nale kuJesus uusiku, okwa li gumwe gwawo. Okwa ti: 51 “Pampango yetu tse itatu vulu okupangula nando omuntu, manga inaa pulakenwa tango, opo ku monike shoka a ningi.” 52 Yo oye mu yamukula ya ti: “Nangoye wo owa za kuGalilea nani? Konakona Omanyolo, nena oto ka dhimbulula kutya muGalilea inamu za nando onale omuhunganeki.” 53 Nokonima kehe gumwe okwa yi kaandjawo.

Johannes 8

Omukiintu a kwatwa moluhondelo

1 Ihe Jesus okwa yi kOndundu yooholivi. 2 Ongula onene yesiku lya landula okwa yi ishewe motempeli. Aantu ayehe oye ya kuye, okwa kuutumba nokwa tameke oku ya longa. 3 Aalongimpango naafarisayi oye eta mo omukiintu a kwatwa moluhondelo noye mu kaleke omuthika montaneho yawo ayehe. 4 Oyo oya ti kuJesus: “Muhongi, omukiintu nguka okwa adhelelwa moluhondelo lwo lwene. 5 Mompango yetu Moses okwe tu pa oshipango kutya aantu ya tya ngaaka oye na okudhipagwa nomamanya. Ngoye oto ti ngiini?” 6 Shika oye shi popi taye mu makele, opo ya vule oku mu tamaneka. Jesus okwa petama nokwa nyola pevi nomunwe gwe. 7 Sho ya dhiginine oku mu pula, Jesus okwa petuka ihe e ta ti kuyo: “Ngoka gwomokati keni kee na oondjo, ne mu umbe tango nemanya.” 8 Ye okwa petama ishewe nokwa nyola pevi. 9 Oyo sho ye dhi uvu, oya yi gumwe nagumwe okutameka kaakuluntu. Jesus okwa thigala po oye awike nomukiintu ngoka a thikama koshipala she. 10 Jesus okwa petuka nokwa ti kuye: “Nekulu, mbeyaka yalwe oye li peni? Inapu thigala nando ogumwe, e ku pangule?” 11 Ye okwa ti: “Aawe, nando ogumwe, Omuwa.” Jesus okwe mu lombwele: “Nangame wo itandi ku pangula. Inda ano, ngoye ino yona we.”

Jesus oye uuyelele wuuyuni

12 Jesus okwe ya lombwele ishewe a ti “Ongame uuyelele wuuyuni. Kehe ngoka ta landula ndje, ite ende we momilema, ihe ota kala e na uuyelele mokukalamwenyo kwe.” 13 Aafarisayi oye mu lombwele ya ti: “Ngashingeyi oto ihokolola mwene. Ehokololo lyoye kali na oshilonga.” 14 Jesus okwe ya yamukula a ti: “Nonando otandi ihokolola mwene, shoka tandi popi, oshoshili. Oshoka ngame ondi shi ko nkoka nda za naankoka tandi yi. Ne kamu shi ko nkoka nda za naankoka tandi yi. 15 Ne otamu pangula pantu, ihe ngame ite pangula nando omuntu. 16 Nongele tandi pangula, epangulo lyandje olyu uka, oshoka ngame kandi li awike moshinima shika, ihe otu li naTate, ngoka a tuma ndje. 17 Nomompango yeni omwa nyolwa kutya ehokololo lyaantu yaali ngele olya tsa kumwe, nena shoka taya ti, oshoshili. 18 Ngame otandi ihokolola ngame mwene, naTate, ngoka a tuma ndje, ota hokolola ndje wo.” 19 Oyo oye mu pula: “Ho oku li peni?” Jesus okwe ya yamukula: “Ngame kamu shi ndje, naTate kamu mu shi. Ando omwa li mu shi ndje, ando naTate omu mu shi wo.” 20 Oohapu ndhika adhihe Jesus okwe dhi popi, sho a li ta longo aantu motempeli mondjugo ndjoka mwa li mu na iiketha yomayambo. Ihe kape na nando omuntu e mu kwata, oshoka ethimbo lye olya li inaali thika manga.

Kokuma nkoka tandi yi, itamu vulu okuya ko

21 Jesus okwe ya lombwele ishewe a ti. “Ngame otandi yi; ne otamu ka kala nokukonga ndje, ihe otamu ka sila moondjo dheni. Kokuma nkoka tandi yi, itamu vulu okuya ko.” 22 Aajuda oya ti: “Okwa hala ando okwiidhipaga, sho ta ti: ‘Kokuma nkoka tandi yi, itamu vulu okuya ko?’ ” 23 Jesus okwa yamukula a ti: “Ne omwa za huka kevi, ihe ngame onda za kombanda. Ne oyomuuyuni mbuka, ihe ngame kandi shi gwomuuyuni mbuka. 24 Onkee ano onde mu lombwele kutya otamu ka sila moondjo dheni. Oshoka ngele itamu itaale kutya ‘Ngame ongame tuu ngoka,’ otamu ka sila moondjo dheni.” 25 Oyo oye mu pula: “Ongoye lye ano?” Jesus okwa yamukula: “Osho tuu shoka nde mu lombwele okuza petameko. 26 Ngame ondi na iinima oyindji oku mu popya noku mu pangula. Ihe ngoka a tumu ndje, omunashili, naashoka tandi uvu kuye, osho tandi lombwele uuyuni.” 27 Yo oya li kaa uvite ko kutya ye ote ya lombwele He. 28 Onkee Jesus okwa ti kuyo: “Uuna tamu ka yelutha Omuna gwOmuntu pombanda, otamu ka dhimbulula kutya ‘Ngame ongame tuu ngoka’. Osho wo otamu ka dhimbulula kutya ngame itandi vulu okuninga sha ngame mwene, ihe otandi popi ashike shoka Tate a longa ndje. 29 Oongoka a tuma ndje, oku li pamwe nangame. Ye ine etha ndje, ndi kale awike, oshoka ngame otandi longo aluhe shoka she mu opalela.” 30 Aantu oyendji mboka yu uvu, Jesus sho ta popi iinima mbika, oye mu itaale.

Oshili otayi mu mangulula

31 Jesus okwa lombwele ihe Aajuda mboka ye mu itaala a ti: “Ngele tamu vulika koohapu dhandje, nena kapu na omalimbililo, one aalongwa yandje. 32 Ne otamu ka tseya ihe oshili, noshili otayi ke mu mangulula.” 33 Oyo oye mu yamukula: “Otse aana yaAbraham, katu na nando oompoka twa li aapika yomuntu. Oto dhiladhila shike, sho to ti: ‘Ne otamu ka mangululwa?’ ” 34 Jesus okwe ya yamukula: “Ngame otandi mu lombwele oshili: Kehe ngoka ta longo uulunde, oye omupika guulunde. 35 Omupika iha kala aluhe megumbo, ihe omuvalwa oha kala mo aluhe. 36 Omwana ngele te mu mangulula, nena kape na omalimbililo, otamu kala mwa manguluka. 37 Ondi shi shi kutya ne aana yaAbraham. Ihe onkene tuu omwa hala okudhipaga ndje ne inamu hala okutaamba elongo lyandje. 38 Ngame otandi popi shoka nde shi mono puTate, osho wo ne otamu longo shoka mwa lombwelwa kuho.” 39 Oyo oye mu yamukula noya ti: “Tate oAbraham.” Jesus okwa ti kuyo: “Ando okwa li Abraham oye ho, ando otamu longo iilonga mbyoka Abraham a longo. 40 Ashihe shoka ngame nda ningi, osho oku mu hokololela oshili ndjoka nda uvu kuKalunga, ihe ne omwa hala okudhipaga ndje. Abraham ina ninga nando osha sha tya ngaaka. 41 Ne otamu longo iilonga yaho.” Oyo oya ti kuye: “Tse inatu valwa moluhondelo, otu na tate gumwe awike, oKalunga.” 42 Jesus okwe ya lombwele a ti: “Ando okwa li Kalunga oye ho, ando omu hole ndje. Oshoka ngame onda za muKalunga nondi li mpaka ngashingeyi. Ngame inandi ya mungame mwene, ihe oye a tuma ndje. 43 Omolwashike kaamu uvite ko shoka tandi ti? Omolwashoka ne itamu vulu okupulakena oohapu dhandje. 44 Ne omu na ho omuhindadhi, nomwa hala okulandula uuhalu waho. Oye omudhipagi okuza ketameko ye ke na nando oompoka a li moshili, oshoka muye kamu na nando oshili. Ngele ta popi iifundja, ota popi shoka shomuukwatya we mwene, oshoka oye omufundja nahe yiifundja ayihe. 45 Ngame onde mu lombwele oshili, onkee inamu itaala ndje. 46 Olye gwomune ta vulu okuulika kutya ondi na oondjo. Ngele otandi popi oshili, omolwashike ano inaamu itaala ndje? 47 Ngoka a za muKalunga, ota pulakene oohapu dhaKalunga. Ne inamu za muKalunga, onkee inamu hala okupulakena oohapu dhe.”

Jesus naAbraham

48 Aajuda oya yamukula Jesus ya ti: “Ongoye Omusamaria nou niwe kompwidhuli?” 49 Jesus okwa yamukula: “Ngame kandi na ompwidhuli. Ngame otandi simaneke Tate, ihe ne omwa dhina ndje. 50 Ngame itandi kongo esimano lyandje mwene. Ope na gumwe ngoka te li kongele ndje noye ta pangula. 51 Ngame otandi mu lombwele oshili: Kehe ngoka ta vulika koohapu dhandje, ke na mpoka ta ka sa sigo aluhe.” 52 Aajuda oya ti kuye: “Ngashingeyi otu shi shi nawa kutya ou niwe kompwidhuli. Tate Abraham okwa sa, naahunganeki oya sa, ihe ngoye oto ti: ‘Kehe ngoka ta dhiginine oohapu dhandje, ke na mpoka ta ka sa sigo aluhe.’ 53 Ngoye omunene nani u vule tate Abraham ngoka a sa? Aahunganeki nayo wo oya sa nale. Ngoye oto iningi lye?” 54 Jesus okwa ti. “Ngame ando onda li tandi kongo esimano lyandje mwene, ando esimano lyandje kali na oshilonga. Tate, ngoka hamu ti, oye Kalunga keni, oye ota simaneke ndje. 55 Ne nokamu mu shi, ihe ngame ondi mu shi. Ando ondi tye kandi mu shi, nena ando ongame omufundja ngashika ne. Ihe ngame ondi mu shi nohandi dhiginine oohapu dhe. 56 Ho Abraham okwa nyanyukwa pombanda okumona esiku lyandje; okwe li mono nokwa nyanyukwa.” 57 Aajuda oya ti kuye: “Ngoye ino gwanitha natango oomvula omilongo ntano, ihe oto ti, owa mono Abraham?” 58 Jesus okwe ya yamukula: “Ngame otandi mu lombwele oshili: Abraham manga inaa valwa, ngame oko nda li nale.” 59 Aajuda oya toola omamanya, ye mu dhenge, ihe Jesus okwa holama nokwa zi mo motempeli.

Johannes 9

Jesus ta aludha omuvalwa omuposi

1 Jesus manga a li te ende, okwa mono omulumentu omuposi, nkene tuu a valwa. 2 Aalongwa ye oye mu pula ya ti: “Muhongi, olye a yono, omulumentu nguka opo a valwe omuposi? Aakuluntu ye nenge oye mwene?” 3 Jesus okwa yamukula. “Uuposi we kau na sha noondjo dhe nenge dhaakuluntu ye. Ye okwa ningi omuposi, opo oonkondo dhaKalunga dhi hololwe muye. 4 Tse otu na okukala tatu longo iilonga yaanguka a tumu ndje, manga tu na omutenya. Uusiku otau ya, uuna kaape na we ngoka ta vulu okulonga. 5 Manga ngame ndi li muuyuni, ongame uuyelele wuuyuni.” 6 Jesus sho a popi oohapu ndhika, okwa hiyile omayeye pevi nokwe ga pilulile mumwe nevi e ta gwayeke enono ndyoka komeho gomulumentu ngoka 7 nokwa ti kuye: “Inda, u ki iyoge moshipala medhiya lyaSiloa.” (Edhina ndika otali ti “Omutumwa.”) Omulumentu okwa yi e ti iyogo moshipala nokwa galuka ko omunameho. 8 Nena aashiinda naantu mboka ya li haye mu mono shito, sho ta hehela, oya ti: “Omulumentu nguka haye ngoka a li ha kuutumba ta hehela?” 9 Yamwe oya ti: “Oye ngoka.” Ihe ooyakwawo oya ti: “Aawe, haye, okwe mu fa ashike.” Omulumentu ye mwene okwa ti: “Ongame ngaa.” 10 Oyo oye mu pula ya ti: “Omeho goye oga tonatithwa ngiini?” 11 Oyo okwa yamukula a ti: “Omulumentu ngwiyaka haku tiwa Jesus, oye a pilula enono lyomayeye nokwe li gwayeke komeho gandje e ta lombwele ndje, ndi ki iyoge moshipala medhiya lyaSiloa. Ngame onda yi, naasho ndi iyogo, onda tonata.” 12 Oyo oya ti kuye: “Omulumentu ngoka oku li peni?” Oye okwa ti: “Kandi shi wo.”

Aafarisayi taa konakona ealudho

13 Nena oya fala omulumentu ngoka a li nale omuposi, kaafarisayi. 14 Esiku ndyoka Jesus a li a pilula enono lyomayeye nokwa tonatitha omeho ge, olya li Esabati. 15 Aafarisayi oya pula ishewe omulumentu, nkene a ningi omunameho. Oye okwe ya lombwele a ti: “Omwaaludhi gwandje okwa tula ndje enono pomeho, ngame ondi iyogo moshipala nonda mono ko.” 16 Yamwe yomaafarisayi oya ti: “Omulumentu ngoka a ningi oshinima shika, ina za kuKalunga, oshoka iha vulika kompango yEsabati.” Ooyakwawo oya ti: “Omulumentu nguka ngele omulunde, ota vulu ngiini okulonga iikumithalonga yi thike mpaka?” Opo nopwa holoka etopoko mokati kawo. 17 Aafarisayi oya pula natango omulumentu ngoka a li omuposi: “Ngoye oto tile ngiini omulumentu ngoka a tonatitha omeho goye?” Oye okwa yamukula a ti: “Oye omuhunganeki.” 18 Aajuda oya li inaa hala okwiitaala kutya omulumentu nguka okwa li omuposi, ihe ngashingeyi oku wete ko, sigo yi ithana aakuluntu yaangoka a tonatithwa 19 noye ya pula ya ti: “Nguno omuna gweni? Mwa ti, okwa valwa omuposi? Ongiini ano, sho e wete ko ngashingeyi?” 20 Aakuluntu ye oya yamukula ya ti: “Tse otu shi shi kutya ye omumwetu nokwa valwa omuposi. 21 Ihe katu shi wo kutya oshe ende ngiini, ngashingeyi sho e wete ko. Osho wo ngoka a tonatitha omeho ge, katu mu shi. Puleni omwaaludhwa. Ye okwa koka, na yamukule ye mwene.” 22 Aakuluntu ye oya popi ngeyi, oyo oya li ya tila Aajuda. Oshoka Aajuda oyu uvanene kutya kehe ngoka ta hempulula kutya Jesus oye Kristus, ota kondwa mo mosinagoga. 23 Onkee aakuluntu ye oya ti “Oye okwa koka, mu puleni.” 24 Aafarisayi oya ithana olutiyali omulumentu ngoka a li omuposi noya ti kuye. “Uvaneka koshipala shaKalunga kutya oto ka popya oshili! Tse otu shi shi kutya omulumentu ngwiyaka omulunde.” 25 Omwaaludhwa okwa yamukula a ti: “Ngame kandi shi wo, ngele ye omulunde. Shimwe ashike ndi shi shi, osho shika: Ngame onda li omuposi, ihe ngashingeyi ondi wete ko.” 26 Oyo oya ti kuye: “Okwe ku ningi ngiini ano? Omeho goye okwe ga tonatitha ngiini?” 27 Oye okwe ya yamukula: “Onde mu hokololole nale, ihe inamu pulakena. Omolwashike mwa hala oku shi uva natango? Nane wo omwa hala okuninga aalongwa ye?” 28 Aafarisayi oye mu nyana ya ti: “Ongoye awike omulongwa gwe, tse aalongwa yaMoses. 29 Tse otu shi shi kutya Kalunga okwa popile naMoses, ihe omulumentu ngoka katu shi nkoka a za.” 30 Omutonatithwa okwe ya yamukula a ti: “Oshikumitha osho shika kutya ne kamu shi nkoka a za, ihe oye tuu a tonatitha omeho gandje. 31 Tseni atuheni otu shi shi kutya Kalunga iha pulakene ewi lyaalunde, ihe oha pulakene aantu mboka haye mu tila nohaa gwanitha ehalo lye. 32 Okuza ketameko lyuuyuni inaku uvika nando ogumwe a tonatitha omeho gomuntu a valwa omuposi. 33 Omulumentu nguka ando okwa li inaa za kuKalunga, ando ke na shoka ta vulu okuninga.” 34 Oyo oye mu yamukula ya ti: “Ngoye owa valelwa nowa putukila muulunde, ihe owa hala oku tu longa?” Oyo noye mu umbu mo mosinagoga.

Uuposi wopambepo

35 Jesus oku uvu kutya oye mu umbu mo mosinagoga. Sho e mu mono, okwa ti kuye: “Ngoye owi itaala Omuna gwOmuntu?” 36 Omulumentu okwa yamukula a ti: “Tatekulu, lombwela ndje kutya oye olye, opo ndi vule oku mu itaala.” 37 Jesus okwa ti kuye: “Owe mu mona nale noye ngoka ta popi nangoye ngashingeyi.” 38 Oye okwa ti: “Omuwa, ondi itaala.” Oye okwa tsu oongolo koshipala shaJesus. 39 Jesus okwe mu lombwele a ti. “Ngame onde ya muuyuni mbuka okupangula, opo mboka ihaa mono ko, ya mone ko, naamboka haa mono ko, ya tsike.” 40 Yamwe yomaafarisayi mboka ya li pamwe naye, oyu uvu oohapu ndhika noya ti kuye: “Oto dhiladhila kutya natse wo aaposi?” 41 Jesus okwa ti kuyo: “Ando omwa li aaposi, ando kamu na oondjo, ihe sho tamu ti: ‘Tse otu wete ko,’ nena otashi ti, omu na oondjo.”

Johannes 10

Eyele lyoshigunda shoonzi

1 “Ngame otandi mu lombwele oshili: Kehe ngoka ta yi moshigunda shoonzi itaa pitile posheelo, ihe ota gwayele mo palwe, oye omufuthi nomuyugi. 2 Ihe ngoka ta yi mo ta pitile posheelo, oye omusita gwoonzi. 3 Omulangeli gwoposheelo ote mu egulula, noonzi otadhi uvu ewi lye, sho te dhi ithana komadhina e te dhi piitha mo. 4 Ngele a piitha mo oonzi dhe adhihe, ote dhi kwatele komeho, dho e tadhi mu landula, oshoka odhi shi ewi lye. 5 Ihe omukwiilongo itadhi mu landula, otadhi mu yi ontuku, oshoka ewi lye kadhi li shi.” 6 Eyele ndika Jesus okwe li ya lombwele, ihe yo oya li kaa uvite ko kutya okwa hala okutya shike.

Jesus oye omusita omwaanawa

7 Jesus okwe ya lombwele ishewe a ti: “Ngame otandi mu lombwele oshili: Ongame osheelo shoonzi. 8 Ayehe mboka ya tetekele ndje, oyo aafuthi naayugi, noonzi inadhi ya pulakena. 9 Ongame osheelo. Kehe ngoka ta yi mo ta pitile mungame, ota ka hupithwa. Ye ota kala nokuya mo nokupita mo e ta mono ko oshinapelo. 10 Omufuthi ohe endele owala okuyaka, okudhipaga nokuhanagula. Ngame onde ya, opo ya kale ye na omwenyo meudhililo alihe lya gwana. 11 “Ongame omusita ngo omwaanawa. Omusita omwaanawa ota gandjele oonzi omwenyo gwe. 12 Nakufutwa ngoka kee shi omusita noonzi kadhi shi dhe mwene, ota thigi po oonzi e ta fadhuka po, ngele ta mono embungu tali ya. Osho ngeyi embungu otali dhi umpile e tali dhi halakanitha po. 13 Nakufutwa a tya ngaaka ota yi ontuku, oshoka ye ota longele owala ondjambi, ye ke na ko nasha noonzi. 14 Ngame omusita ngo omwaanawa. 15 Ngaashi Tate e shi ndje, nangame ondi shi Tate, osho wo ngame oonzi dhandje ondi dhi shi nadho odhi shi ndje. Ngame ondi na ehalo okusa molwadho. 16 Oku na oonzi dhandje dhilwe ndhoka kaadhi mo moshigunda shika. Nadho wo ondi na oku dhi eta mo, notadhi ka uva ewi lyandje e tadhi ka ninga oshigunda shimwe nodhi na omusita gumwe. 17 “Tate oku hole ndje, oshoka ngame ondi na ehalo okugandja omwenyo gwandje, opo ndi ke gu taambulule ishewe. 18 Kaku na nando ogumwe ta kutha ndje omwenyo gwandje. Ongame mwene tandi gu gandja kehalo lyandje mwene. Ngame ondi na oonkondo oku gu gandja nondi na wo oonkondo oku gu taambulula. Shika osho shoka Tate a lombwele ndje, ndi ninge.” 19 Omaludhi oga tameke ishewe mokati kAajuda omolwoohapu ndhika. 20 Oyendji yomuyo oya ti: “Ye oku niwe kompwidhuli nota yi oonkwengu. Otamu mu pulakenene shike?” 21 Ooyakwawo oya ti: “Omunampwidhuli ita vulu okupopya oohapu dha tya ngeyi! Ompwidhuli otayi vulu tuu okutonatitha omeho gaaposi?”

Jesus ina taambwa kAajuda

22 Ethimbo lyokudhana oshituthi sheyapulo lyotempeli muJerusalem olya thiki, nokwa li okufu. 23 Jesus okwa li te ende motempeli mOndunda yaSalomo. 24 Nena Aajuda oye mu gongalele noya ti: “Sigo uunake to tu kaleke nomalimbililo? Tu lombwela oshili yoyene, ngele ongoye Kristus.” 25 Jesus okwe ya yamukula: “Onde mu lombwela nale, ihe ne inamu hala okwiitaala ndje. Iilonga mbyoka tandi longo medhina lyaTate, oyo tayi hokolola ndje. 26 Ihe ne inamu hala okwiitaala, oshoka kamu shi oonzi dhandje. 27 Oonzi dhandje ohadhi uvu ewi lyandje; ngame ondi dhi shi, dho notadhi landula ndje. 28 Ngame otandi dhi pe omwenyo gwaaluhe; dho kadhi na mpoka tadhi ka yonuka po sigo aluhe nokape na ngoka te dhi yugu mo moshikaha shandje. 29 Tate, ngoka e dhi pa ndje, oye omunene e vule ayehe, onkee kape na ngoka ta vulu oku dhi yuga mo moshikaha she. 30 Tse naTate gumwe.” 31 Aajuda oya toola ishewe omamanya, ye mu dhipage. 32 Jesus okwe ya yamukula: “Ngame onda longo iilonga oyindji iiwanawa mbyoka Tate a pa ndje, ndi yi longe mokati keni. Omolwoshilonga shini po shomumbino mwa hala okudhipaga ndje nomamanya?” 33 Aajuda oye mu yamukula: “Tse inatu hala oku ku dhipaga omolwoshilonga shontumba oshiwanawa ando, ihe omolwashoka to sheke Kalunga. Ngoye omuntu gwowala, ihe owa hala okwiininga Kalunga.” 34 Jesus okwe ya yamukula: “Mompango yeni omwa nyolwa kutya Kalunga ota ti: ‘One ookalunga.’ 35 Tse otu shi shi kutya shoka tashi tiwa kenyolo ndika, oshoshili sigo aluhe: Aantu mboka Kalunga a pa oohapu dhe, okwe ya ithana ookalunga. 36 Otamu vulu ngiini ano okutya, otandi sheke Kalunga, sho tandi ti kutya ngame Omuna gwaKalunga, ngame ngoka Tate a hogolola nokwa tuma ndje muuyuni? 37 Ngame ngele itandi longo iilonga yaTate, inamu itaala ndje. 38 Ihe ngele otandi yi longo, peha lyokwiitaala ndje itaaleni iilonga yo yene, opo mu tseye ne mu uve ko lela kutya Tate oku li mungame nangame ondi li muTate.” 39 Oyo oya li ya hala ishewe oku mu kwata, ihe ye okwa zi mo miikaha yawo nokwa yi. 40 Jesus okwa shuna natango handiyaka yomulonga gwaJordan, kehala ndyoka Johannes a li ha shasha aantu, nokwa kala nkoka. 41 Aantu oyendji oye ya kuye. Oyo noya ti: “Johannes ina longa nando oshikumithalonga, ihe iinima ayihe mbyoka Johannes a popya kombinga yomulumentu nguka, oyoshili.” 42 Aantu oyendji yaankoka oye mu itaale.

Johannes 11

Eso lyaLasarus

1 Omulumentu gumwe gwomuBetania, edhina lye Lasarus, okwa li ta alukwa. MuBetania omo maandjawo yaMaria nomumwayina Marta. 2 Maria nguka oye ngoka a gwayekele oompadhi dhOmuwa nokwe dhi thetithile omafufu gokomutse gwe. Omumwayina nguka Lasarus okwa li ta alukwa. 3 Nena aamwayina mboka aakiintu oya tumine Jesus elaka ya ti: “Omuwa, kuume koye omuholike ota alukwa.” 4 Jesus sho e shi uvu, okwa ti: “Uuvu mboka itau ka fala Lasarus meso, ihe owokusimanekitha Kalunga, nOmuna gwaKalunga opo wo a simanekithwe kuwo.” 5 Jesus okwa li e hole Marta, Maria naLasarus. 6 Ye sho u uvu kutya Lasarus ota alukwa, okwa kala natango omasiku gaali pehala mpoka a adhika. 7 Konima yomasiku ngoka gaali Jesus okwa lombwele aalongwa ye a ti: “Tu shuneni natango kuJudea.” 8 Aalongwa oya ti kuye: “Muhongi, opwa piti okathimbo okashona kowala, sho Aajuda ya li taa kambadhala ya hala oku ku dhipaga. Ihe owa hala ishewe okushuna ko?” 9 Jesus okwa yamukula a ti: “Omutenya kagu na ootundi omulongo nambali? Ngoka te ende omutenya, ita punduka, oshoka oku wete uuyelele womuuyuni mbuka. 10 Ihe ngoka te ende uusiku, ota punduka, oshoka muye kamu na uuyelele.” 11 Jesus sho a popi oohapu ndhika, okwa ti kuyo: “Kuume ketu Lasarus okwa kotha, ihe ngame onda hala, ndi ye, ndi ke mu penduthe.” 12 Aalongwa oye mu yamukula: “Omuwa, ngele okwa kotha, ota ka aluka.” 13 Jesus okwa li ta popi okusa kwaLasarus, ihe yo oya li ye shi, ota popi okukotha kwoomposi. 14 Onkee Jesus okwe ya lombwele sha yela ta ti: “Lasarus okwa sa. 15 Ngame onda nyanyukwa molweni, sho inaandi adhika ko, opo mu itaale. Tu yeni ano kuye.” 16 Nena Tomas, ngoka ithanwa Mukwanambwiyu, okwa lombwele aalongwa ooyakwawo a ti: “Natu yeni atuheni nomuhongi, opo tu ka sileni pamwe naye.”

Jesus oye eyumuko nomwenyo

17 Jesus sho a thiki ko, okwa adha Lasarus a ninga nale omasiku gane mombila. 18 Okalando hoka Betania oka li popepi naJerusalem, ookilometa ndatu lwaampoka. 19 Oyendji yomAajuda oya adhika ye ya kuMarta naMaria oku ya hupulutha molweso lyomumwayina Lasarus. 20 Ano Marta sho u uvu kutya Jesus okwe ya, okwa yi e ke mu tsakaneke, ihe Maria okwa kala a kuutumba megumbo. 21 Marta okwa ti kuJesus: “Omuwa, ando owa li po, ando omumwameme ina sa. 22 Ihe ondi shi shi kutya natango Kalunga ote ke ku pa ashihe shoka to mu indile.” 23 Jesus okwe mu lombwele: “Omumwanyoko ota ka yumuka.” 24 Marta okwa ti kuye: “Ondi shi shi kutya ota ka yumuka mesiku lyahugunina.” 25 Jesus okwe mu lombwele: “Ongame eyumuko nomwenyo. Oongoka i itaala ndje, ota kala e na omwenyo, nando ona se. 26 Osho wo kehe ngoka e na omwenyo ye i itaala ndje, ita si we sigo aluhe. Owe shi itaala?” 27 Ye okwa yamukula: “Eeno, Omuwa, ondi itaala kutya ongoye Kristus, Omuna gwaKalunga, ngoka e na okuya muuyuni.”

Jesus ta lili

28 Marta sho a popi oohapu ndhika, okwa yi nokwi ithana omumwayina Maria, yi ikalela, e te mu lombwele: “Muhongi oku li mpaka e ku pumbwa.” 29 Maria sho e shi uvu, okwa thikama mbala e ta yi kuye. 30 Ihe Jesus okwa adhika inaa thika natango mokalando, okwa li natango kehala ndyoka Marta e mu tsakanekele. 31 Nena Aajuda mboka ya adhika ye li naMaria megumbo taye mu hupulutha, sho ye mu mono a thikama ta piti mo nokweendelela, oye mu landula. Oya li ye shi, ota yi kombila, a ka lile. 32 Maria sho a thiki kehala ndyoka kwa li Jesus, okwe mu mono nokwa tsu oongolo poompadhi dhe e ta ti kuye: “Omuwa, ando owa li po, ando omumwameme ina sa.” 33 Ano Jesus sho e mu mono ta lili, nosho wo Aajuda mboka ye ya pamwe naye, okwa hendwa komutima noku uvite uudhigu meni lye. 34 Oye okwa pula: “Omwe mu fumvike peni?” Oyo oye mu yamukula: “Omuwa, ila u tale.” 35 Opo Jesus okwa lili. 36 Nena Aajuda oya ti: “Tala, nkene kwa li e mu hole.” 37 Ihe yamwe yomuyo oya ti: “Oye Okwa tonatitha omeho gomuposi. Okwa li ando a nyengwa okukeelela, Lasarus kaa se?”

Lasarus ta ningwa omunamwenyo

38 Jesus okwa adhika ishewe kuudhigu momwenyo gwe e ta yi kombila, ndjoka ya li ekololo lya siikilwa nemanya. 39 Jesus okwe ya lombwele a ti: “Kuthii po emanya!” Marta, omumwayina gwomusi okwa ti kuye: “Omuwa, okwa nika nokuli, oshoka okwa ningi ngashingeyi omasiku gane a sa.” 40 Jesus okwa ti kuye: “Inandi ku lombwela kutya ngele owi itaala, oto ka mona eadhimo lyaKalunga?” 41 Oyo oya kutha po emanya. Nena Jesus okwa tala pombanda e ta ti: “Tate, otandi ku hambelele, ongoye sho ho uvu ndje. 42 Ondi shi shi kutya ngoye oho uvu ndje aluhe, ihe otandi popi oohapu ndhika omolwaantu mbaka ya kundukidha ndje, opo yi itaale kutya ongoye wa tuma ndje.” 43 Sho a popi oohapu ndhika, okwi igidha newi enene a ti: “Lasarus, za mo!” 44 Nena Lasarus, ngoka a li a sa, okwa zi mo. Oompadhi dhe nomaako ge oya li ya mangwa nomalapi, noshipala she osha mangwa nonasituke. Jesus okwe ya lombwele: “Mu mangululeni, ne mu mu ethe, a ye.”

Jesus ta kundathanwa

45 Oyendji yomAajuda mboka yi ile okuhupulutha Maria, oya mono shoka Jesus a ningi noye mu itaale. 46 Ihe yamwe yomuyo oya yi kaafarisayi noye ya hokololele shoka Jesus a ningi. 47 Nena aafarisayi naayambi aakuluntu oya hiya oshigongi shaatokoli e taa ti: “Otu na okuninga ngiini? Oshoka omulumentu nguka ota longo unene iikumithalonga oyindji. 48 Ngele otatu mu etha ngaaka, a tsikile nomukalo ngoka, aantu ayehe otaye ke mu itaala. Nena Aaroma otaa ke ya e taa hanagula po otempeli noshigwana shetu ashihe.” 49 Gumwe gwomuyo, edhina lye Kajafas, ngoka a li omuyambimukuluntu omumvo ngwiyaka, okwa ti: “Ne kamu na shoka mu shi. 50 Inamu tseya nani kutya okusa kwomuntu gumwe peha lyaantu ayehe okuhwepo ku vule okuyonukapo kwoshigwana ashihe?” 51 Sho shene, ina popya oshinima shika muye mwene, aawe, ihe molwaashoka a li omuyambimukuluntu omumvo ngwiyaka, okwa hunganeke ngaaka kutya Jesus ota ka sila oshigwana shAajuda, 52 nohamolwoshigwana shAajuda ashike, ihe opo wo a kongolole aana yaKalunga ayehe mboka ye li po ya halakana, ya ninge ongundu yimwe. 53 Okuza kesiku ndyoka aakuluntu yAajuda oyu uvanene, ya dhipage Jesus. 54 Onkee ano Jesus ine enda we puuyelele mokati kAajuda, ihe okwa yi komukunda gu li popepi nombuga, koshilando shi ithanwa Efraim, e ta kala nkoka pamwe naalongwa ye. 55 Ano Opaasa, oshituthi shAajuda, oya li popepi. Aantu oyendji yokomikunda dhokokule oye ya kuJerusalem manga Opaasa inaayi thika, opo yi iyoge. 56 Oyo oya kongo Jesus. Sho ya gongalele motempeli, oya pulathana ya ti: “Otamu dhiladhila ngiini? Oye ote ya tuu koshituthi?” 57 Ihe aayambi aakuluntu naafarisayi oya adhika ya gandja nale elaka kutya ngele oku na ngoka e shi Jesus mpoka e li, ne shi holole, opo ye mu kwate.

Johannes 12

Jesus a gwayekwa muBetania

1 Sho kwa li ku na omasiku gahamano, Opaasa yi thike, Jesus okwe ya kuBetania, nkoka kwa kala Lasarus, omulumentu ngoka Jesus a yumudha kuusi. 2 Oyo oye mu pakele po omwiha. Marta okwa yakula, ihe Lasarus okwa li gumwe gwaantu mboka ya kuutumba koshililo pamwe naJesus. 3 Nena Maria okwa kutha omugwayo gwonardilela gu na ondilo nokwe gu tile koompadhi dhaJesus e te dhi thetitha omafufu gokomutse gwe. Ezimba ewanawa lyomugwayo nolyu udhitha egumbo alihe. 4 Ihe Judas Iskariot, gumwe gwomaalongwa ye, oongoka a li te ke mu gwaaleka, okwa ti: 5 “Omolwashike omugwayo nguka inaagu landithwa po? Ando ogwa zi iimaliwa omathele gatatu e tayi pewa oohepele.” 6 Shika ine shi popya molwaasho ando a li e na oshimpwiyu noohepele, ihe omolwashoka okwa li omufuthi. Onkee sho kwa li ha humbata okampunda kiimaliwa, okwa li hi ikwatha ye mwene niimaliwa mbyoka. 7 Ihe Jesus okwa ti: “Mu etha, a pungulile shoka e na esiku lyefumviko lyandje. 8 Oohepele omu dhi na aluhe, ihe ngame itandi kala aluhe pune.”

Lasarus ta kundathanwa

9 Ongundu onene yAajuda oyu uvu kutya Jesus oku li muBetania noya yi ko. Inaa ya ko molwaJesus awike, ihe oya li wo ya hala okumona Lasarus, ngoka Jesus e mu yumudha kuusi. 10 Aayambi aakuluntu oyu uvanene okudhipaga wo Lasarus. 11 Oshoka omolwehokololo lye Aajuda oyendji oya gamuka ko kaawiliki yawo noyi itaale Jesus.

Jesus ta kayile ta yi kuJerusalem

12 Esiku lya landula ongundu onene yaamboka ye ya koshituthi shOpaasa, oyu uvu kutya Jesus ote ya kuJerusalem. 13 Nena oya kutha iitayi yomilunga e taa yi, ye ke mu tsakaneke. Oyo oyi igidha ya ti: “Hosianna; Kalunga ne mu laleke nuuyamba ngoka te ya medhina lyOmuwa. Kalunga na laleke nuuyamba omukwaniilwa gwaIsrael.” 14 Jesus okwa mono ihe okasino nokwe ka kayile, ngashika naanaa enyolo tali ti: 15 “Shilando shaSion, ino tila! Tala, omukwaniilwa gwoye te ya kungoye, a kayila ontana yokasino.” 16 Aalongwa ye oya li kaa uvite ko oshinima shika tango, ihe Jesus sho a yeluthilwa pombanda mesimano, oya dhimbulula kutya enyolo otali popi oshinima shika, naantu oye mu ningile iinima mbika ayihe. 17 Aantu mboka ya li pamwe naJesus, sho i ithana Lasarus, a ze mo mombila nokwe mu yumudha, oya hokolola shoka sha ningwa po. 18 Onkee ano ongundu yaantu oye mu tsakaneke, oshoka oyu uvu kutya okwa longo oshikumithalonga shika. 19 Aafarisayi oya lombwelathana: “Mu wete ko! Kamu na shoka tamu vulu we. Tala, uuyuni auhe otau mu landula.”

Aagreka yamwe taa kongo Jesus

20 Aagreka yamwe yomumboka haa yi kuJerusalem okugalikana pethimbo lyoshituthi, 21 oye ya kuFilippus ngoka a za kuBetsaida shomuGalilea, noye mu indile ya ti: “Tatekulu, tse otwa hala okumona Jesus.” 22 Filippus okwa yi e te shi lombwele Andreas. Andreas naFilippus oya yi e taye shi lombwele Jesus. 23 Jesus okwe ya yamukula a ti: “Ethimbo olye ya, Omuna gwOmuntu a pewe esimano enene. 24 Ngame otandi mu lombwele oshili: Omuma yoshilya ngele itayi gwile mevi e tayi sile mo, otayi kala yimwe ayike, ihe ngele tayi sile mo otayi vala oomuma odhindji. 25 Oongoka e hole omwenyo gwe, ote gu kanitha, ihe ngoka ta tondo omwenyo gwe muuyuni mbuka, ote gu hupithile momwenyo gwaaluhe. 26 Ngele ku na ngoka a hala okuyakula ndje, na landule ndje, naankoka ngame ndi li, oko nkoka omuntu gwandje ta ka kala. Oongoka ta yakula ndje, Tate ote ke mu simaneka.”

Jesus ta popi kombinga yeso lye

27 “Ngashingeyi omwenyo gwandje ogwa tukuluka. Ondi tye shike we? Tate, hupitha ndje mokathimbo nkaka. Ihe osho tuu shika she eta ndje mokathimbo nkaka komahepeko. 28 Tate, simanekitha edhina lyoye.” Nena megulu omwa zi ewi lya ti: “Onde li simanekitha notandi li simanekitha natango.” 29 Ongundu yaantu mboka ya li ya thikama mpoka, oyu uvu ewi noya ti: “Omvula ya ndunduma.” Ooyakwawo oya ti: “Omuyengeli a popi naye.” 30 Jesus okwe ya yamukula a ti: “Ewi ndika inali popya molwandje, ihe omolweni. 31 Uuyuni mbuka otau pangulwa ngashingeyi. Omupangeli guuyuni mbuka ota ka umbilwa pondje ngashingeyi. 32 Ihe uuna ngame tandi ka yeluthwa mo mevi, aantu ayehe otandi ke ya hilila kungame.” 33 Shika okwe shi popi, opo a holole kutya eso ndyoka e na okusa, olya tya ngiini. 34 Aantu oye mu yamukula: “Ompango yetu oye tu lombwela kutya Kristus ota kala e na omwenyo aluhe. Ngoye oto ti ngiini ano kutya Omuna gwOmuntu oku na okuyeluthwa? Omuna gwOmuntu ngoka olye?” 35 Jesus okwe ya lombwele a ti: “Oku na okathimbo okafupi natango uuyelele u li mokati keni. Kaleni tamu ende, manga mu na uuyelele, opo mwaa adhike komilema. Oshoka ngoka te ende momilema, ke shi ko nkoka ta yi. 36 Ano manga mu na uuyelele, itaaleni uuyelele, opo mu ninge aantu yuuyelele.”

Okwaayitaala kwAajuda

Jesus sho a popi oohapu ndhoka, okwa zi po e te ya holama. 37 Nonando ye okwa longo iikumithalonga mbyoka ayihe montaneho yawo, inaye mu itaala. 38 Opo shoka sha popiwa komuhunganeki Jesaja, shi tse, sho ta ti: “Omuwa, olye i itaale euvitho ndyoka twe li uvitha? Olye ngoka Omuwa e mu hololele oonkondo dhe?” 39 Onkee oya nyengwa okwiitaala, oshoka Jesaja okwa tile ishewe: 40 “Kalunga okwa tsikitha omeho gawo, okwa kukutike omitima dhawo, opo omeho gawo kaaga mone ko, oondunge dhawo dhaa uve ko, opo yaa itedhulule, ngaye ndaaye ya aludhe.” 41 Jesaja okwa popi oohapu ndhika, oshoka okwa mono eadhimo lyaJesus nokwe mu hokolola. 42 Onkene tuu oyendji yomaawiliki yAajuda oya itaale Jesus; ihe omolwaafarisayi inaye shi hempulula montaneho yaantu, opo kaaya kondwe mo mosinagoga. 43 Oshoka yo oya li ye hole okupandika kaantu komeho gokupandika kuKalunga.

Oohapu dhaJesus tadhi popi epangulo

44 Nena Jesus okwi igidha a ti: “Oongoka i itaala ndje, hangame awike i itaala, ihe okwi itaala wo naangoka a tuma ndje. 45 Oongoka a mono ndje, okwa mono naangoka a tuma ndje. 46 Ngame onde ya, ndi kale uuyelele wuuyuni, opo kehe ngoka ti itaale ndje, kaa kale we momilema. 47 Kehe ngoka tu uvu oohapu dhandje ye ite dhi dhiginine, hangame tandi ke mu pangula. Oshoka ngame inandi ya okupangula uuyuni, ihe oku u hupitha. 48 Oongoka itaa taamba ndje ye itaa taamba oohapu dhandje, oku na omupanguli gwe ngoka te mu pangula. Oohapu ndhoka nda popya, odho tadhi ka kala omupanguli gwe esiku lyahugunina. 49 Oshoka ngame inandi popya mungame mwene, ihe Tate, ngoka a tuma ndje, oye a pe ndje oshipango shoka ndi na oku shi tya noku shi popya. 50 Ngame ondi shi shi kutya oshipango she otashi gandja omwenyo gwaaluhe. Onkee ano shoka nda ti, osho shoka Tate a lombwele ndje, ndi tye.”

Johannes 13

Jesus ta yogo oompadhi dhaalongwa ye

1 Olya li esiku lya tetekela lyOpaasa. Jesus okwa li e shi kutya ethimbo lye olya thikana okuthiga po uuyuni mbuka, a ye kuHe. Oye ngaashi a kala e hole mboka ye ya li muuyuni, okwa li e ya hole sigo opehulilo. 2 Jesus naalongwa ye manga ya li puulalelo, omuhindadhi okwa adhika a tula nale etokolo muJudas yaSimon Iskariot a gwaaleke Jesus. 3 Jesus okwa li e shi shi kutya He okwe mu pa iinima ayihe miikaha ye. Oye okwa li wo e shi shi kutya ye okwa za kuKalunga nota yi kuKalunga. 4 Onkee okwa thikama poshililo, e ti ihula onguwo ye yokombanda nokwa kutha oshihanduke e te shi imanga mombunda. 5 Oye okwa tile ihe omeya moshiyaha shokwiiyogela e ta tameke okuyoga oompadhi dhaalongwa nokwe dhi pyaanitha oshihanduke shoka e shi imanga mombunda. 6 Okwe ya kuSimon Petrus. Nena Petrus okwa ti kuye: “Omuwa, ongoye to yogo oompadhi dhandje?” 7 Jesus okwe mu yamukula a ti: “Shoka tandi ningi, ku shi shi manga ngashingeyi, ihe oto ke shi tseya komeho.” 8 Petrus okwe mu lombwele: “Ku na mpoka noka yoga oompadhi dhandje sigo aluhe!” Jesus okwe mu yamukula: “Ngele itandi yogo oompadhi dhoye, nena ku shi we omulongwa gwandje.” 9 Simon Petrus okwa yamukula: “Omuwa, ino yoga ashike oompadhi dhandje, ihe yoga wo iikaha yandje nomutse.” 10 Jesus okwa ti: “Ngoka a yogwa okwa yela shekesheke ye ina pumbwa okwiiyoga ye mwene, kakele koompadhi dhe. Ne amuhe omwa yela, kakele kagumwe.” 11 Jesus okwa li a tseya nale ngoka te ke mu gwaaleka, onkee a ti: “Ne amuhe omwa yela, kakele kagumwe.” 12 Ano Jesus sho a mana okuyoga oompadhi dhawo, okwa zala onguwo ye yokombanda nokwa shuna ishewe pehala lye. Okwa ti kuyo: “Omu uvite ko tuu shoka nde mu ningile? 13 Ohamu ithana ndje Muhongi nOmuwa, noshu uka, sho hamu ningi ngaaka, oshoka ongame tuu ngoka. 14 Ngame Omuwa nomuhongi gweni sho nda yogo ngashingeyi oompadhi dheni, nane wo omu na okuyogathana koompadhi. 15 Oshoka ngame onde mu pe oshiholelwa, opo mu ninge naanaa ngashika nde mu ningile. 16 Ngame otandi mu lombwele oshili: Omuyakuli ke shi omunene e vule mwene gwe, nomutumwa ke shi omunene e vule omutumi gwe. 17 Ngashingeyi omu shi uvithe ko. One aanelago, ngele tamu shi ningi. 18 “Ngame itandi mu popi, ne amuhe, ihe ondi ya shi mboka nda hogolola. Ihe enyolo oli na okugwanithwa ndyoka tali ti: ‘Omulumentu ngoka ta li iikulya yandje, okwa pilukila ndje.’ 19 Shika otandi shi mu lombwele ngashingeyi, manga inaashi ningwa, opo mu itaale kutya Ongame ngoka, uuna tashi ka ningwa. 20 Ngame otandi mu lombwele oshili: Ngoka ta taamba kehe gumwe ngoka tandi mu tumu, oye ota taamba ndje, naangoka ta taamba ndje, ota taamba ngoka a tuma ndje.”

Jesus ta holola egwaaleko lye

21 Jesus sho a popi oohapu ndhoka, okwa tukuluka mombepo ye e ta ti: “Ngame otandi mu lombwele oshili: Gumwe gwomokati keni ota ka gwaaleka ndje.” 22 Aalongwa oya talathana ya limbililwa. 23 Gumwe gwomaalongwa ngoka Jesus a li e mu hole, okwa kuutumba ponto ye. 24 Simon Petrus okwe mu pepe nomeho nokwe mu pula kutya olye ngoka ta popi. 25 Omulongwa ngoka okwa hedha popepilela naJesus e te mu pula: “Omuwa, olye ngo?” 26 Jesus okwa yamukula: “Oye tuu ngoka tandi mu pe oshipambu shika tandi shi elele mo.” Oye okwe elele ihe oshipambu e te shi pe Judas yaSimon Iskariot. 27 Mbalambala Judas sho a li oshipambu shoka, Satana okwa yi mo muye. Nena Jesus okwe mu lombwele: “Shono to ningi, shi ninga nziya.” 28 Mwaamboka ya li koshililo kamwa li nando ogumwe ngoka u uvu ko shoka Jesus e mu lombwele. 29 Judas sho a li ha kala nokampunda kiimaliwa, yamwe yomaalongwa oya dhiladhila kutya ngiika Jesus okwe mu lombwele, a ye a ka lande shoka ya pumbwa omolwoshituthi, nenge pamwe okwe mu lombwele, a gandje sha koohepele. 30 Judas okwa taamba oshipambu shoshikwiila e ta yi mbala pondje; nokwa li uusiku.

Oshipango oshipe

31 Judas sho a yi pondje, Jesus okwa ti: “Ngashingeyi eadhimo lyOmuna gwOmuntu olya hololwa; ngashingeyi eadhimo lyaKalunga olya hololwa muye. 32 Ngele eadhimo lyaKalunga olya hololwa muye, nena Kalunga mwene ota ka holola eadhimo lyOmuna gwOmuntu note ke li holola mbala. 33 Aamwandje, itandi ka kala we nane ethimbo ele. Otamu ka konga ndje; ihe otandi mu lombwele ngashingeyi shoka nda lombwele Aajuda kutya kokuma nkoka tandi yi, itamu vulu okuya ko. 34 Oshipango oshipe otandi shi mu pe, mu holathane. Ngashi naanaa nangame nda kala ndi mu hole, osho nane wo omu na okuholathana. 35 Ngele omu holathane, nena aantu ayehe otaa ka dhimbulula kutya one aalongwa yandje.”

Jesus ta londodha aalongwa

36 Simon Petrus okwe mu pula: “Omuwa, oto yi peni?” Jesus okwe mu yamukula: “Ito vulu okulandula ndje ngashingeyi nkoka tandi yi, ihe komeho oto ka landula ndje.” 37 Petrus okwa ti kuye: “Omuwa, omolwashike itaandi vulu oku ku landula ngashingeyi: Ngame ondi ilongekidha okusa molwoye.” 38 Jesus okwa yamukula: “Owi ilongekidha tuu shili okusa molwandje? Ngame otandi ku lombwele oshili: Ekondombolo manga inaali iga, ngoye o idhimbike ndje lutatu.”

Johannes 14

Jesus oye ondjila yokuya kuHe

1 Jesus okwa lombwele aalongwa ye a ti: “Oomwenyo dheni inadhi kala dha ziyalala. Itaaleni Kalunga ne mu itaale ndje wo. 2 Megumbo lyaTate omu na omahala gokukala ogendji. Ando kasha li ngeyi, ando otandi mu lombwele kutya otandi ke mu longekidhila ehala. 3 Nongele nda yi e tandi mu longekidhile ehala, otandi ka galuka ishewe, ndi mu ile, opo mu ka kale wo nkoka ndi li. 4 Ondjila yaankoka tandi yi, omu yi shi.” 5 Tomas okwa ti kuye: “Omuwa, tse katu shi ko nkoka to yi. Ondjila otatu vulu ngiini oku yi tseya?” 6 Jesus okwe mu lombwele: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame. 7 Ngele omu shi ndje, otamu ka tseya wo naTate. Okuza ngashingeyi omu mu shi nomwe mu mona.” 8 Filippus okwa ti kuye: “Omuwa, tu ulukila Ho, shika osho shoka twe shi pumbwa.” 9 Jesus okwe mu lombwele: “Ngame onda kala nane amuhe ethimbo ele, ihe nani ku shi ndje, Filippus? Kehe ngoka a mono ndje, okwa mona wo Tate. Omolwashike ano to ti: ‘Tu ulikila Ho?’ 10 Ino itaala nani, Filippus, kutya ngame ondi li muTate naTate oku li mungame?” Jesus okwa ti ihe kaalongwa ye: “Oohapu ndhoka tandi mu lombwele, itandi dhi popi mungame mwene; ihe Tate, ngoka e li mungame, oye ta longo iilonga ye. 11 Itaaleni ndje kutya ngame ondi li muTate naTate oku li mungame. Ihe ngele inamu hala okwiitaala, itaaleni molwiilonga. 12 Ngame otandi mu lombwele oshili: Kehe ngoka i itaala ndje, ota ka longa wo iilonga mbyoka tandi longo. Eeno, oye ota ka longa nokuli iilonga iinene yi vule mbika, oshoka ngame otandi yi kuTate. 13 Nena shaa shoka tamu shi indile medhina lyandje, otandi shi ningi, Tate opo a simanekithwe mOmwana. 14 Ngele otamu indile ndje sha medhina lyandje, otandi shi ningi.”

Ombepo Ondjapuki tayi uvanekwa

15 “Ngele omu hole ndje, nena otamu vulika komalombwelo gandje. 16 Ngame otandi ki indila Tate, oye note ke mu pa Omupopili gulwe, Ombepo yoshili, a kale pamwe nane aluhe. 17 Uuyuni itau vulu oku mu taamba, oshoka owo kau mu wete nokau mu shi. Ihe ne omu mu shi, oshoka ota kala pamwe nane noku li mune. 18 “Ngame itandi mu thigi po one amuke, ihe otandi ke ya kune. 19 Ngele pwa piti okathimbo okafupi kowala, uuyuni itau mono ndje we, ihe ne otamu mono ndje. Molwaashoka ngame ondi na omwenyo, nane wo otamu ka kala mu na omwenyo. 20 Esiku ndyoka nge lya thiki, nena otamu ke shi tseya kutya ngame ondi li muTate nane omu li mungame, ngashi naanaa ngame ndi li mune. 21 “Kehe ngoka ta taamba omalombwelo gandje nota vulika kugo, oku hole ndje. Tate wo ota kala e hole ngoka e hole ndje, nangame otandi kala ndi mu hole notandi mu ihololele.” 22 Judas haangoka yaIskariot, okwa ti kuye: “Omuwa, omolwashike wa hala oku tu ihololela, ihe hauyuni?” 23 Jesus okwe mu yamukula ta ti: “Oongoka e hole ndje, ota vulika koohapu dhandje. Tate ota kala e mu hole, tse naTate notatu ya kuye e tatu kala muye. 24 Oongoka kee hole ndje, ita vulika koohapu dhandje. Ihe oohapu ndhika nde dhi mu lombwele, kadhi shi dhandje mwene, odha Tate, ngoka a tuma ndje. 25 “Iinima mbika onde yi mu lombwele, manga ndi li pune. 26 Ihe Omupopili Ombepo Ondjapuki, ngoka Tate ta ka tuma medhina lyandje, ote ke mu longa iinima ayihe, note ke mu dhimbulutha iinima ayihe mbyoka nde mu lombwela. 27 “Ombili otandi yi mu thigile. Ombili yandje mwene otandi yi mu pe. Ngame itandi yi mu pe, ngashi uuyuni hau gandja. Oomwenyo dheni inadhi ziyalala, ne inamu tila. 28 Ne omu uvu, sho nde mu lombwele kutya otandi yi, ihe otandi ka galukila kune. Ngele omu hole ndje, nena ando otamu nyanyukwa, sho tandi yi kuTate, oshoka Tate oye omunene e vule ndje. 29 Ngame otandi shi mu lombwele ngashingeyi, manga inaashi ningwa, opo mu itaale, ngele tashi ka ningwa. 30 Itandi vulu we okupopya nane olule, oshoka omupangeli gwuuyuni mbuka oku li pokuya. Ye ke na nando oonkondo dhasha dhi vule dhandje. 31 Ihe uuyuni ou na okutseya kutya ngame ondi hole Tate. Onkee otandi longo ayihe, ngashi a lombwele ndje. “Tikameni, tu zeni po mpaka.”

Johannes 15

Jesus omuviinu gwashili

1 “Ongame omuviinu gwashili. Tate oye omuneyana lyomiviinu. 2 Oye ota keke po oshitayi kehe shomungame shoka itaashi imi iiyimati, ihe kehe oshitayi shoka tashi imi, ote shi opaleke, shi ime iiyimati oyindji. 3 Ne omwa yelithwa nokuli koohapu ndhoka nde dhi mu lombwele. 4 Kaleni muukumwe nangame, nangame otandi kala muukumwe nane. Ne itamu vulu okwiima iiyimati, ngele itamu kala mungame, ngashi naanaa oshitayi itaashi vulu okwiima iiyimati, ngele kashi li momuviinu. 5 “Ongame omuviinu, ne iitayi. Oongoka ta kala mungame, ngame wo otandi kala muye. Oye noti imi iiyimati oyindji, oshoka mwaa na ndje kamu vulu okulonga nando osha. 6 Kehe ngoka ita kala mungame, ote ekelwahi e ta kukuta ngashi oshitayi. Iitayi ya tya ngaaka otayi gongelwa ondumba e tayi umbilwa momulilo moka tayi pile mo. 7 Ngele tamu kala mungame noohapu dhandje e tadhi kala mune, nena indileni shaa shoka mwa hala, ne notamu ke shi mona. 8 Osho ngeyi Tate ota simanekithwa, ne ngele tamu imi iiyimati oyindji; nopamukalo nguka ne otamu ningi aalongwa yandje. 9 Ngashi naanaa Tate e hole ndje, osho wo nangame ndi mu hole. Kaleni ano mohole yandje. 10 Ngele otamu vulika komalombwelo gandje, otamu kala mohole yandje naanaa, ngashi ngame he vulika komalombwelo gaTate nonda kala mohole ye.” 11 “Shika onde shi mu lombwele, opo enyanyu lyandje li kale mune, nenyanyu lyeni li kale lya gwanenena. 12 Oshipango shandje osho shika: Holathaneni, ngashi naanaa ngame ndi mu hole. 13 Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe molwawo. 14 One ookuume kandje, ngele tamu ningi shoka tandi mu lombwele. 15 Itandi mu ithana we aayakuli, oshoka omuyakuli ita tseya shoka mwene gwe te shi longo. Onkee ano ngame otandi mu ithana ookuume kandje, oshoka iinima ayihe mbyoka nde yi uva kuTate, onde yi mu lombwela. 16 Hane mwa hogolola ndje, ongame nde mu hogolola nonde mu tumu, mu ye ko, ne mu imike iiyimati oyindji, iiyimati mbyoka tayi kalelele. Nena shaa shoka tamu shi indile Tate medhina lyandje, ote shi mu pe. 17 Shoka tandi mu lombwele, osho shika: Holathaneni.”

Uutondwe wuuyuni

18 “Uuyuni ngele tau mu tondo, dhimbulukweni kutya ongame wa tondo tango. 19 Ando mwa li yomuuyuni, nena ando uuyuni ou hole aantu yawo. Ihe ngame onde mu yoolola mo muuyuni; omolwaasho uuyuni u na oku mu tonda. 20 Dhimbulukweni shoka nde mu lombwele: ‘Omuyakuli ke shi omunene e vule mwene gwe.’ Ngele aantu oya tidhagana ndje, nena otaa ke mu tidhagana wo. Ngele ya vulika koohapu dhandje, otaa ka vulika wo nokudheni. 21 Iinima mbika ayihe oyo otaye ke yi mu ningila molwashoka one aalongwa yandje, oshoka inaa tseya ngoka a tuma ndje. 22 Ando nda li inaandi ya noinaandi ya lombwela, ando kaye na oondjo. Ihe ngashingeyi oyo kaye na nando osha shokupopila oondjo dhawo. 23 Oongoka e tonde ndje, oku tonde wo naTate. 24 Ando onda li inaandi longa mokati kawo iilonga mbyoka inaayi longwa nando okomuntu, nena ando yo kaye na oondjo. Ihe ngashingeyi sho ya mono shoka nda longa, oye tu tonde atuhe naTate. 25 Shika oshi na okukala ngeyi, opo shoka sha nyolwa mompango yawo shi gwanithwe: ‘Oyo oya tondo ndje owala pwaa na nando etompelo.’ 26 “Ihe Omupopili, Ombepo yoshili, ngoka ta zi kuTate, ote ke ya. Ngame otandi ke mu tuma ta zi kuTate. Oye nota ka hokolola ndje. 27 Nane wo otamu ka hokolola ndje, oshoka omwa kala pamwe nangame okuza ketameko.

Johannes 16

1 “Iinima mbika onde yi mu lombwele, opo mwaa ethe eitaalo. 2 Oyo otaa ke mu konda mo moosinagoga dhawo. Ethimbo otali ke ya, uuna kehe gumwe ngoka te mu dhipaga, ta ka dhiladhila kutya moku ninga ngaaka ota longele Kalunga. 3 Iinima mbika otaa ke yi mu ningila, oshoka inaa tseya ndje nosho wo Tate kaye mu shi. 4 Ayihe mbika onde yi mu lombwele, opo ethimbo lyawo ngele lya thiki lyoku shi ninga, mu dhimbulukwe elondodho lyandje.”

Oshilonga shOmbepo Ondjapuki

“Shika inandi shi mu lombwela petameko, oshoka onda li pune. 5 Ngashingeyi otandi yi kunguka a tuma ndje, ihe kape na nando ogumwe gwomune ta pula ndje kutya otandi yi peni? 6 Ano ngashingeyi sho nde shi mu lombwele, omu na oluhodhi olunene. 7 Onkee ano ngame otandi mu lombwele oshili: Okuya kwandje otaku mu kwatha, oshoka ngele itandi yi, nena Omupopili ite ya kune. Ihe ngele tandi yi, nena otandi ke mu tuma kune. 8 Ano Omupopili ngele te ya, otu ulukile aantu kutya oyo aalunde yo inaa tseya shoka shi li mondjila nepangulo lyaKalunga kutya otali ti shike. 9 Oye otu ulike uulunde waantu, oshoka inaa itaala ndje. 10 Oye ote ya ulukile shoka shi li mondjila, oshoka otandi yi kuTate, ne itamu mono ndje we. 11 Oye ote ya ulukile epangulo lyaKalunga, oshoka omupangeli guuyuni mbuka okwa pangulwa nale.” 12 “Ondi na natango odhindji oku mu lombwela, ihe ngashingeyi otamu nyengwa oku dhi uva ko. 13 Ihe Ombepo yoshili nge te ya, ote ke mu longa oshili ayihe. Oye ita popi muye mwene, ihe ote mu lombwele shoka a uvu note mu hololele iinima mbyoka tayi ke ya. 14 Oye ota simanekitha ndje, oshoka ota ka kutha mumbyoka ngame nda li ndi na oku popya, e te yi mu lombwele. 15 Iinima ayihe yaTate oyandje, onkee nda ti: Ombepo ota kutha shoka nde mu pe e te shi mu lombwele.”

Oluhodhi nenyanyu

16 “Ngele pwa piti okathimbo okafupi kowala, ne itamu ka mona ndje, ihe ngele pwa piti ishewe okathimbo okafupi, otamu ka mona ndje.” 17 Yamwe yomaalongwa ye oya pulathana ya ti: “Otashi ti ngiini ano, sho te tu lombwele ta ti: ‘Ngele pwa piti okathimbo okafupi, ne itamu ka mona ndje, ihe ngele pwa piti ishewe okathimbo okafupi, otamu ka mona ndje?’ Ye ta ti ishewe: ‘Shika otashi ningwa, oshoka otandi yi kuTate.’ 18 Okwa dhiladhila shike, sho ta popi okathimbo okafupi? Katu uvite ko kutya okwa hala okutya shike.” 19 Jesus okwa li e shi shi kutya oya hala oku mu pula, onkee okwa ti kuyo: “Otamu pulathana shike? Ngame onda ti: ‘Ngele pwa piti okathimbo okafupi, ne itamu ka mona ndje, nongele pwa piti ishewe okathimbo okafupi, otamu ka mona ndje.’ 20 Ngame otandi mu lombwele oshili: Ne otamu ka lila nokuyemata, ihe uuyuni otau ka nyanyukwa. Ne otamu ka kala mwa sa oluhodhi, ihe oluhodhi lweni otalu ka shituka enyanyu. 21 Omukiintu ngele oku li pokuvala okanona, oku na oluhodhi, oshoka ethimbo lye lyuuwehame olye ya. Ihe okanona ngele ka valwa, ye ota dhimbwa uuwehame we, oshoka okwa nyanyukwa, sho omuntu a valelwa muuyuni. 22 Osho naanaa nane mu li. Ngashingeyi omwa sa oluhodhi, ihe otandi ke mu mona natango, nomitima dheni otadhi ka kala dhu udha enyanyu; enyanyu ndyoka kape na ngoka ta vulu oku li mu kutha.” 23 “Esiku ndyoka ngele lya thiki, one itamu ka pula ndje nando osha. Ngame otandi mu lombwele oshili: Tate ote ke mu pa shaa shoka tamu indile medhina lyandje. 24 Sigo onena inamu indila nando osha medhina lyandje. Indileni, e tamu pewa, enyanyu lyeni opo li kale lyu udhilila pombanda.”

Jesus oye Omusindani

25 “Ngame onde mu lombwele iinima ayihe mbika momayele. Ethimbo otali ke ya, uuna itandi ka popya we omayele, ihe otandi ke mu lombwela oohapu dha fatuka kombinga yaTate. 26 Esiku ndyoka ngele lya thiki, ne otamu ka indila Tate medhina lyandje, ngame noitandi mu lombwele kutya otandi indile Tate molweni. 27 Oshoka Tate oku mu hole, molwaashoka ne omu hole ndje nomwi itaala kutya onda za kuKalunga. 28 Ngame onda za kuTate e tandi ya muuyuni, ihe ngashingeyi otandi thigi po ishewe uuyuni notandi yi kuTate.” 29 Nena aalongwa ye oya ti kuye: “Ngashingeyi oto popi oohapu dha fatuka; ito popi we nando omayele. 30 Ngashingeyi otu shi shi kutya owa tseya iinima ayihe, ngoye ino pumbwa nando omuntu te ku pula omapulo. Shika oshe tu itaalitha kutya ngoye owa za kuKalunga.” 31 Jesus okwe ya yamukula a ti: “Omwi itaala ngashingeyi? 32 Ethimbo otali ke ya noli li po nokuli, uuna ne amuhe tamu ka halakanithwa. Kehe gumwe oti iyukile kaandjawo, e tamu thigi ndje po awike. Ihe ngame kandi li awike, oshoka Tate oku li pamwe nangame. 33 Shika onde shi mu lombwele, opo mu kale mu na ombili tayi zi muukumwe weni nangame. Uuyuni otau ke mu hepeka. Ihe inamu tila, ngame onda sinda uuyuni!”

Johannes 17

Jesus ti igalikanene

1 Jesus sho a mana okupopya oohapu ndhika, okwa tala kegulu e ta ti: “Tate, ethimbo olye ya. Adhimitha omumwoye, omumwoye opo e ku adhimithe wo. 2 Oshoka ongoye we mu pa oonkondo okupangela aantu ayehe, opo a gandje omwenyo gwaaluhe kwaayehe mboka we ye mu pa. 3 Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe. 4 Ngame onde ku adhimitha kombanda yevi, onda tsakanitha oshilonga shoka wa pe ndje, ndi shi longe. 5 Tate, adhimitha ndje montaneho yoye ngashingeyi neadhimo olyo tuu ndyoka nda li ndi na pungoye, uuyuni manga inaau shitwa.”

Jesus ta galikanene aayapostoli

6 “Aantu mboka yomuuyuni we pa ndje, onde ya tseyithile edhina lyoye. Oyo oyoye, ngoye nowe ya pe ndje. Oyo oya vulika koohapu dhoye. 7 Ngashingeyi oye shi shi kutya ashihe shoka wa pa ndje, osha za kungoye. 8 Oshoka ngame onde ya pe oohapu ndhoka wa pe ndje, noye dhi taamba. Oyo oye shi shi kutya ngame onda za shili kungoye, noyi itaala kutya ongoye wa tuma ndje. 9 “Otandi ya galikanene. Itandi galikanene uuyuni, ihe oyo mboka we ya pa ndje, oshoka oyo oyoye. 10 Ashihe shoka ndi shi na, oshoye, naashihe shoka u shi na, oshandje, neadhimo lyandje olya hololwa muyo. 11 Ngashingeyi ngame otandi ya kungoye. Ngame kandi li we muuyuni, ihe yo oye li muuyuni. “Tate Omuyapuki, ya gamena koonkondo dhedhina lyoye, opo ya ninge omuntu gumwe naanaa, ngashi ngame nangoye tu li gumwe. 12 Manga ngame nda li pamwe nayo, onde ya gamene koonkondo dhedhina lyoye ndyoka we li pa ndje. Ngame onde ya gamene noinandi kanitha po nando ogumwe gwomuyo, kakele kaangoka a li e na oku ka kana, enyolo opo li gwanithwe. 13 “Ngashingeyi otandi ya kungoye, ihe manga ndi li natango muuyuni, otandi popi iinima mbika, opo ya kale ye na enyanyu lyandje momitima dhawo meudhililo alihe. 14 Ngame onde ya pe oohapu dhoye, onkee uuyuni otau ya tondo, oshoka yo kaye shi yomuuyuni, ngashi nangame ndaa shi gwomuuyuni. 15 Ngame itandi ku indile, u ya kuthe mo muuyuni, ihe otandi ku indile, u ya gamene kuMwiinayi. 16 Ngashi ngame ndaa shi gwomuuyuni, osho wo nayo kaye shi yomuuyuni. 17 Ya iyoololela, ya kale moshili, oohapu dhoye odho oshili. 18 Ngame onde ya tuma muuyuni, ngaashi ngoye wa tuma ndje muuyuni. 19 Ngame otandi igandja kungoye molwawo, opo nayo wo ya kale lela yoye.”

Jesus ta galikanene ooyitaali ayehe

20 “Hayo ayeke mbaka tandi galikanene, ihe naamboka wo taa ki itaala ndje molweuvitho lyawo. 21 Otandi ya galikanene, opo ayehe ya ninge omuntu gumwe. Tate, naa kale mutse, ongaashi ngoye u li mungame nangame ndi li mungoye. Naa ninge omuntu gumwe, opo uuyuni u itaale kutya ongoye wa tuma ndje. 22 Ngame onde ya pa eadhimo ndyoka we li pa ndje, opo ya ninge gumwe, ngashika ngoye nangame tu li gumwe. 23 Ngame ondi li muyo nangoye omungame, opo ya ninge lela gumwe, uuyuni opo u tseye kutya ongoye wa tuma ndje nou ya hole, ngashi u hole ndje. 24 “Tate, ongoye we ya pa ndje, onkee onda hala, ndi kale pamwe nayo nkoka ndi li, opo ya tale eadhimo lyandje, eadhimo ndyoka wa pa ndje, oshoka ngoye owa kala u hole ndje, nomanga uuyuni inaau shitwa. 25 Tate omuyuuki, uuyuni inau ku tseya, ihe ngame ondi ku shi, naamboka yandje oye shi shi kutya ongoye wa tuma ndje. 26 Ngame onde ya tseyithile edhina lyoye notandi ka tsikila oku shi ninga, opo ohole ndjoka u hole ndje nayo yi kale muyo, nangame ndi kale muyo.”

Johannes 18

Jesus ta kwatwa

1 Jesus sho a mana okugalikana, okwa piti mo pamwe naalongwa ye e taa taaguluka okalonga kaKidron. Kokuma nkoka okwa li ku na eyana lyomiti. Jesus naalongwa ye oya yi mulyo. 2 Judas, ngoka e mu gwaaleke, okwa li a tseya ehala ndyoka, oshoka Jesus naalongwa ye oya li haa kala ko olwindji. 3 Ano Judas okwa yi keyana ndyoka pamwe nongundu yaakwiita nayamwe yomaalangeli yotempeli ya tumwa kaayambi aakuluntu nokaafarisayi. Oyo oya li ye na iikondjitho noya humbata oonyeka noolamba. 4 Jesus sho a li a tseya ashihe shoka tashi ke mu adha, okwa zi mo meyana e ta yi kuyo nokwe ya pula a ti: “Otamu kongo lye?” 5 Oyo mu yamukula ya ti: “OJesus Omunasareti.” Jesus okwa ti kuyo: “Ongame nguka!” Judas, omugwaaleki gwe, okwa li a thikama mpoka pamwe nayo. 6 Ano Jesus sho e ya lombwele: “Ongame ngu,” oya shuna lwanima e taa ihata pevi. 7 Jesus okwe ya pula ishewe: “Otamu kongo lye?” Oyo oya ti: “OJesus Omunasareti.” 8 Jesus okwa ti kuyo: “Ngame onde mu lombwele kutya ongame nguka. Ngele ano ongame tamu kongo, nena etheni, aalumentu mbaka ya ye.” 9 Oye okwa popi ngeyi, opo oohapu ndhoka a popile dhi gwanithwe: “Inandi kanitha po nando omuntu gumwe gwaamboka wa pa ndje.” 10 Simon Petrus sho a li e na egongamwele, okwe li pweya mo e tu umpile omumati gwomuyambimukuluntu nokwa fegula ko okutsi kwe kwokolulyo. Edhina lyomumati ngoka oMalkus. 11 Jesus okwa ti kuPetrus: “Shuna mo egongamwele lyoye molumpangwa. Owa dhiladhila ando, ndi kale inaandi nwa oshitenga shomahepeko shoka nde shi pewa kuTate?”

Jesus koshipala shaAnnas

12 Ano ongundu yaakwiita pamwe nomuwiliki gwawo naalangeli yomAajuda oya kwata Jesus, e taye mu manga. 13 Oye mu fala tango kuAnnas, oshoka oye hemweno yaKajafas, ngoka a li omuyambimukuluntu omumvo ngwiyaka. 14 Kajafas nguka oye ngoka a tsile Aajuda omayele kutya oshihwepo, omuntu gumwe nge ta si peha lyaantu ayehe.

Petrus ti idhimbike Jesus

15 Simon Petrus nomulongwa mukwawo oya landula Jesus. Omulongwa ngoka mukwawo okwa li e shiwike nawa komuyambimukuluntu, onkee okwa yi pamwe naJesus molugumbo lwomeni lyegumbo lyomuyambimukuluntu. 16 Ihe Petrus okwa thikama pondje pomweelo. Omulongwa mukwawo, ngoka a li e shiwike komuyambimukuluntu, okwa piti mo e ta popitha omukadhona gwoposheelo nokwe eta Petrus meni. 17 Omukadhona ngoka okwa pula Petrus a ti: “Ngoye ku shi gumwe gwomaalongwa yomulumentu nguka?” Petrus okwa ti kuye: “Aawe, hangame.” 18 Okwa li ku na uutalala, onkee aayakuli naalangeli oya adhika ya tema omulilo noya thikama ye gu kondeka taa huhulukwa. Petrus okwa yi kuyo nokwa thikama e ta huhulukwa pamwe nayo.

Jesus koshipala shaKajafas

19 Omuyambimukuluntu okwa pula Jesus kombinga yaalongwa ye noyelongo lye. 20 Jesus okwe mu yamukula a ti. “Ngame ohandi popi aluhe montaneho yomuntu kehe. Onda longele aluhe moosinagoga nomotempeli, moka hamu gongala Aajuda ayehe. Ngame inandi popya nando osha meholamo. 21 Omolwashike to pula ndje? Pula aantu mboka yu uvu sho nda popi. Ya pula kutya onde ya lombwele shike, oye shi shi.” 22 Jesus sho a popi oohapu ndhika, omumati gumwe gwomaalangeli mboka ya li ya thikama mpoka, okwe mu dhenge olupi e ta ti: “Osho to yamukula omuyambimukuluntu ngawo?” 23 Jesus okwe mu yamukula: “Ngele onda popi sha sha puka, lombwela kehe gumwe e li mpaka kutya oshike. Ihe ngele shoka nda popi, oshi li mondjila, oto dhengele ndje shike?” 24 Annas okwe mu tumu a mangwa natango kuKajafas, omuyambimukuluntu.

Petrus ti idhimbike natango Jesus

25 Petrus okwa li a thikama natango pomulilo ta huhulukwa. Ano mboka ya li taa huhulukwa pamwe naye, oye mu pula ya ti: “Ngoye ku shi gumwe gwomaalongwa yomulumentu ngwiya?” Ihe Petrus okwi idhimbike natango a ti: “Aawe, hangame.” 26 Gumwe gwomaamati yomuyambi omukuluntu, omukwanezimo gwomulumentu ngoka Petrus a tetele okutsi, okwa ti: “Ou shi aniwa, inandi ku mona meyana pamwe naye?” 27 Natango Petrus okwi idhimbike, nopo tuu mpoka ekondombololo olyi igi.

Jesus koshipala shaPilatus

28 Aakwiita oya kutha mo Jesus maandjaKajafas e taye mu fala kaandjaPilatus. Osha ningwa ongula onene. Ihe Aajuda inaa ya mo maandjaPilatus, oshoka oya li ya hala okukala ya yogoka, opo ya wape okulya onzigona yOpaasa. 29 Nena Pilatus okwa piti mo, a yi kuyo e ta ti: “Omulumentu nguno otamu mu tamanekele shike?” 30 Oyo oye mu yamukula ya ti: “Omulumentu nguka ando okwa li kee shi omukolokoshi, ando inatu mu eta kungoye.” 31 Pilatus okwa ti kuyo: “Mu kuthii po e tamu ke mu pangula ne yene pampango yeni.” Aajuda oye mu yamukula ya ti: “Tse otwi indikwa okudhipaga omuntu.” 32 Shika osha ningwa, opo oohapu ndhoka dhi gwanithwe Jesus e dhi popi, sho a holola kutya eso ndyoka e na okusa, olya tya ngiini. 33 Pilatus okwa shuna megumbo nokwi ithana Jesus e te mu pula ta ti: “Ngoye omukwaniilwa gwAajuda?” 34 Jesus okwa yamukula a ti: “Epulo ndika olya zi mungoye mwene, nenge aantu yalwe ya hokolola ndje pungoye?” 35 Pilatus okwa yamukula: “Ou shi ngame Omujuda? Aantu yoshigwana shoye naayambi yawo aakuluntu oyo ye ku eta kungame. Owa ningi shike ano?” 36 Jesus okwa yamukula a ti: “Uukwaniilwa wandje kau shi womuuyuni mbuka. Ando uukwaniilwa wandje owa li womuuyuni mbuka, ando aantu yandje ya kondjele ndje ndaa gandjwe miikaha yAajuda. Ihe ngashingeyi, uukwaniilwa wandje kau shi waampaka.” 37 Pilatus okwe mu pula a ti: “Ngoye omukwaniilwa nani?” Jesus okwe mu yamukula a ti: “Ongoye to ti kutya ngame omukwaniilwa. Osho nda valelwa nonde ya muuyuni mbuka, opo ndi popye oshili. Kehe ngoka ha kala moshili, otu uvu ewi lyandje.” 38 Pilatus okwa ti kuye: “Oshili oshike?”

Jesus ta pangulilwa eso

Pilatus okwa shuna pondje kAajuda e ta ti kuyo: “Ngame kandi wete nando etompelo lyasha lyoku mu pangulitha. 39 Ihe omu na omukalo handi mu mangululile aluhe onkwatwa yimwe pethimbo lyoshituthi shOpaasa. Omwa hala, ndi mu mangululile omukwaniilwa gwAajuda?” 40 Oyo oyi igidha ishewe ya ti: “Aawe, haye ngoka! Tse otwa hala Barabbas!” Barabbas okwa li omukolokoshi.

Johannes 19

1 Nena Pilatus okwa kutha Jesus e te mu dhengitha noongola. 2 Aakwiita oya tungu oshishani shomakwega noye shi mu zaleke komutse. Oyo oye mu zaleke wo onguwo onene ontiligane. 3 Noye ya kuye e taa ti: “Kala u na omwenyo omule, omukwaniilwa gwAajuda!” Opo ihe oye mu dhenge nomalupi. 4 Pilatus okwa shuna natango pondje kAajuda e ta ti kuyo. “Taleni, otandi mu eta mpaka pondje pune, opo ndi mu ulukile kutya kandi wete nando etompelo lyasha lyoku mu pangulitha.” 5 Jesus okwa piti mo ihe a zalekwa oshishani shomakwega nonguwo ontiligane. Pilatus okwa ti kuyo: “Taleni, omuntu oye ngu.” 6 Nena aayambi aakuluntu naalangeli sho ye mu mono, oyi igidha ya ti: “Mu alela komushigakano!” Pilatus okwe ya lombwele a ti: “Mu kuthii po ne yene e tamu mu alele komushigakano, oshoka ngame kandi wete nando etompelo lyoku mu pangulitha.” 7 Aajuda oye mu yamukula ya ti: “Tse otu na ompango ndjoka tayi ti: Oku na okusa, oshoka okwi iningi Omuna gwaKalunga.” 8 Pilatus sho e ya uvu taa popi ngeyi, okwa tila noonkondo shi vulithe nale. 9 Oye okwa shuna megumbo lye nokwa pula Jesus a ti: “Owa za peni ano?” Ihe Jesus ine mu yamukula nando osha. 10 Pilatus okwa ti kuye: “Ito yamukula ndje? Dhimbulukwa kutya ondi na oonkondo oku ku mangulula nondi na oonkondo oku ku alelitha komushigakano.” 11 Jesus okwe mu yamukula a ti: “Ku na oonkondo dhokupangula ndje, ngele ino dhi pewa kuKalunga. Onkee omulumentu ngoka a gandja ndje kungoye, oku na oondjo e ku vule.” 12 Pilatus sho u uvu oohapu ndhoka, okwa li a hala noonkondo okumangulula Jesus. Ihe Aajuda oyi igidha ya ti: “Ngele oto mu mangulula, nena otashi ti kutya ku shi kuume komupangeli Omuroma. Oshoka kehe ngoka ti iningi omukwaniilwa, oye omukondjithi gwomupangeli Omuroma.” 13 Pilatus sho u uvu oohapu ndhoka, okwa fala Jesus pondje e ta kuutumba koshipundi shepangulo pehala hali ithanwa Olupale lwomamanya, mOshihebeli “Gabbata”. 14 Ethimbo olya li potundi ontimulongo nambali yomutenya yesiku ndyoka lya tetekela Opaasa. Pilatus okwa ti kAajuda: “Taleni, omukwaniilwa gweni oye nguka!” 15 Oyo oyi igidha mokule: “Mu dhipaga, mu dhipaga! Mu alela komushigakano!” Pilatus okwe ya pula a ti: “Omwa hala, ndi alele omukwaniilwa gweni komushigakano?” Aayambi aakuluntu oya yamukula ya ti: “Tse katu na omukwaniilwa a tya ngaaka, kakele komupangeli Omuroma.” 16 Nena Pilatus okwa gandja Jesus kuyo, opo a ka alelwe komushigakano.

Jesus ta alelwa komushigakano

Nena yo oya kutha Jesus. 17 Oye okwa piti mo a humbata omushigakano gwe ye mwene e te ya kehala lyi ithanwa “Golgata”, mOshihebeli otali ti “Oshala sholukwe”. 18 Oko nkoka ye mu alele komushigakano. Pamwe naye oya alele wo aalumentu yaali komishigakano dhawo, gumwe okolulyo nomukwawo okolumoho naJesus pokati kawo. 19 Pilatus okwa nyola enyolo e te li tula komushigakano gwaJesus. Olyo olya li lya nyolwa ngeyi: “Jesus Omunasareti, omukwaniilwa gwAajuda.” 20 Aajuda oyendji oya lesha enyolo ndika, oshoka ehala mpoka Jesus a alelwa komushigakano, olya li popepi noshilando. Enyolo olya li lya nyolwa mOshihebeli, mOshilatina nomOshigreka. 21 Aayambi aakuluntu Aajuda oya ti kuPilatus: “Ino nyola ‘Omukwaniilwa gwAajuda,’ ihe shila tya: ‘Omulumentu nguka okwa tile: Ongame omukwaniilwa gwAajuda.’ ” 22 Pilatus okwa yamukula a ti: “Shoka nda nyola, nda nyola nale.” 23 Ano aakwiita sho ya alele Jesus komushigakano, oya kutha oonguwo dhe e taa dhi topola miitopolwa ine, kehe omukwiita okwa pewa oshitopolwa shimwe. Oyo oya kutha onguwo yokohi, ya tungwa niikaha yaa na nando omihondjo. 24 Nena aakwiita oya lombwelathana ya ti: “Inatu yi kondeni, ihe tu yi umbileni oshihogololitho, opo tu mone kutya otayi ningi yalye.” Shika osha ningwa, opo enyolo li gwanithwe ndyoka tali ti: “Oyo oya topolelathana oonguwo dhandje, omuzalo gwandje oye gu umbile oshihogololitho.” Onkee aakwiita osho ya ningi. 25 Ihe popepi nomushigakano gwaJesus opwa li pwa thikama yina nomumwayina omukiintu, Maria, omukiintu gwaKleopas naMaria Magdalena. 26 Ano Jesus sho a mono yina nomulongwa ngoka a li e hole, ya thikama mpoka, okwa ti kuyina: “Meme, omumwoye oye ngo!” 27 Opo ihe okwa ti komulongwa: “Nyoko oye ngo!” Pethimbo olyo tuu ndyoka omulongwa okwa taamba Maria, a kale megumbo lye.

Jesus ta si

28 Jesus okwa li e shi shi kutya ngashingeyi iinima ayihe oya gwanithwa. Onkee, opo shoka sha nyolwa shi gwanithwe, okwa ti: “Onda sa enota.” 29 Okwa li ku na oshuma shu udha omaviinu omalulu. Oyo oya yaya oshisopi momaviinu omalulu e taye shi tula koshihenguti shoshisopi noye shi tsike komilungu dhaJesus. 30 Jesus okwa nu omaviinu omalulu e ta ti: “Ayihe ya gwanithwa!” Opo ihe okwa sizimike omutse gwe e ta si.

Jesus ta tsuwa molupati

31 Nena Aajuda oyi indile Pilatus, e ya pitikile okuteyagula oohongo dhaalumentu mboka ya alelwa, opo ya kuthwe ko komishigakano. Shika oye shi ningi molwashoka esiku ndyoka olya li Etitano, yo oya li inaaya hala, omidhimba dhi kale dhe endjelela komishigakano mEsabati, oshoka Esabati ndyoka olya li lya simana. 32 Aakwiita oya yi e taa teyagula oohongo dhomulumentu ngoka gwotango, opo ihe dhomukwawo omutiyali, aalumentu mboka ya li ya alelwa pamwe naJesus. 33 Ihe sho ye ya kuJesus, oya dhimbulula kutya okwa sa nale nokuli, onkee inaa teyagula nando oohongo dhe. 34 Opo ihe gumwe okwa tsu Jesus negonga molupati, omo nomwa zi ombinzi nomeya. 35 Ngoka a mono shika, sho tashi ningwa, oye e shi hokolola. Tse otu shi shi kutya shoka ta popi, oshoshili, naye mwene wo oku shi shi kutya ota popi oshili, opo nane wo mu itaale. 36 Shika osha ningwa, opo enyolo li gwanithwe ndyoka tali ti: “Kaku na nando esipa lye tali ka teyagulwa.” 37 Enyolo ekwawo ishewe otali ti: “Aantu otaa ka tala kunguka ye mu ulula.”

Jesus ta fumvikwa

38 Konima yaambika Josef, ngoka a za koshilando shaArimatia, okwa pula Pilatus, ngele otashi vulika, a pewe omudhimba gwaJesus. Josef okwa li omulongwa gwaJesus, ihe omeholamo, oshoka okwa tila Aajuda. Pilatus okwe mu zimine. Oye nokwa yi nagwo. 39 Nikodemus ngoka i ile kuJesus uusiku, okwe ya pamwe naJosef e na omugwayo gwomagadhi ga nika nawa, gu thike puudhigu wookilo omulongo nambali. 40 Aalumentu mbaka yaali oya kutha omudhimba gwaJesus e taye gu mangele momalapi omatokele mumwe niizimba. Nguka ogwo omukalo gwAajuda gwokulongekidhila omudhimba efumviko. 41 Pehala mpoka Jesus a alelwa komushigakano, opwa li pu na eyana. Meyana ndyoka omwa li mu na ombila ompe, moka inaamu fumvikwa nando omuntu. 42 Molwashoka olya li esiku lya tetekela Esabati lyAajuda nomolwashoka wo ombila oya li popepi, oya fumvike Jesus mombila ndjoka.

Johannes 20

Ombila yi li owala

1 Ongula onene yesiku lyotango lyoshiwike, manga kwa luudha natango, Maria Magdalena okwa yi kombila nokwa mono kutya emanya olya kandulwa po posheelo. 2 Oye okwa matuka e ta yi kuSimon Petrus nokomulongwa mukwawo ngoka Jesus kwa li e hole nokwe ya lombwele a ti: “Oyo oya kutha mo Omuwa mombila, natse katu shi wo mpoka ye mu tula!” 3 Nena Petrus nomulongwa mukwawo oya yi ihe kombila. 4 Ayehe yaali oya ningi shanamutango, ihe omulongwa ngoka mukwawo okwa thigi po Petrus e ta thiki tango kombila. 5 Oye okwa ontamene mo e ta mono omalapi omatokele, ihe ina ya mo. 6 Simon Petrus okwe ya wo e mu landula nokwa thikile u ukilila mombila. Oyo okwa mono mo omalapi omatokele ge li mo. 7 Nelapi ndyoka lya li lya manga omutse gwaJesus, lya gonywa li ikalela pehala lyalyo. 8 Nena nomulongwa mukwawo ngoka a thiki tango kombila, okwa yi wo mombila nokwa mono e ti itaale. 9 Oshoka natango tuu oya li kaa uvite ko enyolo ndyoka tali ti: “Oye okwa li e na okuyumudhwa kuusi.” 10 Nena aalongwa oya shuna kaandjawo.

Jesus ti ihololele Maria Magdalena

11 Maria okwa kala a thikama pombila pondje ta lili. Ano sho ta lili ngeyi, okwa ontamene mo mombila 12 nokwa mono mo aayengeli yaali ya zala oonguwo oontokele ya kuutumba mpoka pwa li pwa lala omudhimba gwaJesus, gumwe okomutse nomukwawo okomagulu. 13 Oyo oye mu pula: “Nekulu, omolwashike to lili?” Maria okwe ya yamukula a ti: “Aantu oya kutha mo Omuwa gwandje mombila, ngame inandi tseya mpoka ye mu tula.” 14 Sho a popi ngeyi, okwa punguluka e ta tala lwanima nokwa mono Jesus a thikama mpoka. Ihe okwa li kee shi shi kutya oye Jesus. 15 Nena Jesus okwe mu pula: “Nekulu, omolwashike to lili? Oto kongo lye?” Maria okwa dhiladhila kutya ngiika omwene gweyana nokwa ti kuye: “Tatekulu, ngele ongoye we mu kutha mo, lombwela ndje nkoka we mu tula, ndi ke mu tale ko.” 16 Jesus okwa ti kuye: “Maria!” Maria okwa pungulukile kuye e ta popi mOshihebeli ta ti: “Rabbi,” otashi ti Muhongi. 17 Jesus okwa ti kuye: “Ino guma ndje, oshoka inandi londa natango, ndi ye kuTate. Ihe inda kaamwameme e to ya lombwele kutya ngame otandi shuna kuTate, nokuKalunga kandje nokeni wo.” 18 Nena Maria Magdalena okwa yi nokwa lombwele aalongwa kutya okwa mono Omuwa, ngoka e mu lombwele oohapu ndhoka.

Jesus ti ihololele aalongwa

19 Ongulohi yesiku tuu ndyoka lyotango lyoshiwike omiyelo dhongulu moka aalongwa ya li ya gongala, odha li dha patwa, oshoka oya li ya tila Aajuda. Nena Jesus okwe ya nokwa thikama mokati kawo e ta ti kuyo: “Ombili nayi kale nane!” 20 Sho a popi ngeyi, okwe ya ulukile iikaha ye nolupati lwe. Aalongwa oya nyanyukwa noonkondo, sho ya mono Omuwa. 21 Jesus okwa ti ishewe kuyo: “Ombili nayi kale nane! Ngashi naanaa Tate a tumu ndje, osho wo nangame otandi mu tumu.” 22 Oye okwa popi ndhika nokwe ya fudhile e te ya lombwele ta ti: “Taambeni Ombepo Ondjapuki. 23 Mboka tamu ya dhimine po oondjo, oyo oya dhiminwa po, naamboka itaamu ya dhimine po, inaa dhiminwa po.”

Jesus naTomas

24 Gumwe gwomaalongwa, Tomas, ngoka i ithanwa Mukwanambwiyu, ina adhika mo mokati kawo, Jesus sho e yi ihololele. 25 Aalongwa ooyakwawo oye mu lombwele ya ti: “Tse otwa mono Omuwa.” Tomas okwa ti kuyo: “Ngele itandi mono iishaho yoomboha miikaha ye noitandi tsu omunwe gwandje moombululu moka mwa li oomboha, noshikaha shandje shi tse molupati lwe, itandi itaale.” 26 Omasiku gahetatu sho ga piti po, aalongwa oya adhika ishewe ya gongala mongulu, naTomas okwa li pamwe nayo. Omiyelo odha li dha patekeka, ihe Jesus okwe ya nokwa thikama mokati kawo e ta ti: “Ombili nayi kale nane!” 27 Opo ihe okwa lombwele Tomas a ti: “Ukitha omunwe gwoye nkuka, ngoye u tale iikaha yandje: Ganeka oshikaha shoye, u gume olupati lwandje. Za mo ihe momalimbililo, u itaale.” 28 Tomas okwe mu yamukula a ti: “Omuwa gwandje! Kalunga kandje!” 29 Jesus okwa ti kuye: “Owi itaale, sho wa mono ndje. Aanelago oomboka yi itaala, nando inaa mona ndje.”

Elalakano lyembo ndika

30 Jesus okwa longo iikumithalonga yilwe oyindji montaneho yaalongwa ye, mbyoka inaayi nyolelwa mo membo ndika. 31 Ihe mbika oya nyolwa, opo mu itaale kutya Jesus oye Kristus, Omuna gwaKalunga, nongele mwi itaala, otamu mono omwenyo molwe.

Johannes 21

Jesus ti ihololele aalongwa ye yaheyali

1 Konima yaambika Jesus okwi ihololele ishewe aalongwa ye pefuta lyaTiberias. Oye okwi iholola ngeyi. 2 Simon Petrus, Tomas, ngoka i ithanwa Mukwanambwiyu, Natanael gwomuKana shomuGalilea, aana yaSebedeus naalongwa ooyakwawo yaJesus yaali opo ya li ayehe. 3 Simon Petrus okwa ti kuyo: “Otandi yi, ndi ka yule oohi.” Oyo oye mu yamukula ya ti: “Natse wo otwa hala okuya nangoye.” Oyo oya thikama e taa yi mowato, ihe muusiku mbwiyaka auhe inaa kwata mo nando osha. 4 Ano ongula sho kwa shi, Jesus okwa thikama komunkulo, ihe aalongwa oya li inaaye mu dhimbulula. 5 Opo Jesus okwa ti kuyo: “Aamati yandje, inamu kwata mo nando osha?” Oyo oye mu yamukula ya ti: “Aawe!” 6 Jesus okwe ya lombwele: “Umbileni oshiyulitho sheni lwokolulyo lwowato, notamu ka mona sha.” Oyo oyu umbile mo oshiyulitho noya nyengwa oku shi hila mo, oshoka oya li ya yula oohi odhindji. 7 Omulongwa ngoka Jesus kwa li e hole, okwa lombwele Petrus a ti: “Omuwa oye ngo!” Simon Petrus sho u uvu kutya oye Omuwa, okwa zala ombaikitha ye, oshoka okwa li a zala oonguwo dhokohi adhike e ta nukile momeya. 8 Aalongwa ooyakwawo oye ya nowato komunkulo noya hili mo oshiyulitho, shoka shu udha oohi. Oyo kaya li unene kokule nevi, oya li poshikako shi thike poometa ethele. 9 Ano sho ya thiki komunkulo, oya mono eziko lyomulilo gwa teka ekala, nopeziko opwa li pu na oohi noshikwiila. 10 Nena Jesus okwe ya lombwele a ti: “Eteni oohi dhimwe nkuka, ndhoka mwe dhi kwata ngashingeyi.” 11 Simon Petrus okwa yi ihe mowato, e ta hilile oshiyulitho komunkulo. Sho osha li shu udha oohi oonene, ethele limwe nomilongo ntano nandatu. Ihe nando oohi odha li mo odhindji ngeyi, oshiyulitho inashi tomoka nando. 12 Jesus okwa ti kuyo: “Ileni, tu lyeni.” Kape na nando ogumwe gwomaalongwa ngoka a li e na omukumo oku mu pula kutya ongoye lye? Oshoka yo oya li ye shi shi kutya oye Omuwa. 13 Jesus okwe ya e ta kutha oshikwiila nokwe shi ya pe; noohi wo osho a ningi. 14 Nduka olutitatu, sho Jesus i ihololele aalongwa ye konima yeyumuko lye kuusi.

Jesus naPetrus

15 Ano sho ya mana okulya, Jesus okwa ti kuSimon Petrus: “Simon yaJohannes, ou hole ndje tuu u vule mbaka?” Oye okwe mu yamukula: “Eeno, Omuwa, ou shi shi kutya ondi ku hole.” Jesus okwa ti kuye: “Litha uunzigona wandje.” 16 Jesus okwa ti kuye olutiyali: “Simon yaJohannes, ou hole ndje?” Oye okwe mu yamukula: “Eeno, Omuwa, ou shi shi kutya ondi ku hole.” Jesus okwe mu lombwele: “Litha oonzi dhandje.” 17 Jesus okwa ti kuye olutitatu: “Simon yaJohannes, ou hole ndje?” Petrus okwa nika oluhodhi, Jesus sho e mu pula olutitatu: “Ou hole ndje?” e ta ti kuye: “Omuwa, owa tseya iinima ayihe; ou shi shi kutya ondi ku hole.” Jesus okwa ti kuye: “Litha oonzi dhandje. 18 Ngame otandi ku lombwele oshili: Sho wa li omunona, owa li ho imanga epaya mombunda, nowa yi shaa mpoka wa hala, ihe nge wa koko, nena oto yelutha omaako goye, gulwe note ku manga e te ku fala nkoka inoo hala okuya ko.” 19 Shika okwe shi popi, opo a holole kutya oneso lya tya ngiini Petrus e na oku ka simanekitha Kalunga. Nena Jesus okwa ti kuye: “Landula ndje.”

Jesus naJohannes

20 Petrus okwa punguluka e ta tala lwanima, nokwa mono omulongwa mukwawo, ngoka Jesus kwa li e hole. Oye tuu ngoka a li a kuutumba ponto yaJesus puulalelo nokwa pulile Jesus ta ti: “Omuwa, olye ngoka te ke ku gwaaleka?” 21 Petrus sho e mu mono, okwa ti kuJesus: “Omuwa, ongiini kombinga yomulumentu nguka.” 22 Jesus okwe mu yamukula: “Ngele onda hala, a kale e na omwenyo, sigo tandi ya, ou na shike nasho? Landula ndje ashike.” 23 Ehokololo olya taandele ihe mokati kaalongwa yaJesus kutya omulongwa ngoka ita si. Jesus ina tya kutya ita si, ihe okwa ti: “Ngame ngele onda hala, a kale e na omwenyo, sigo tandi ya, ou na shike nasho?” 24 Omulongwa ngoka oye tuu nguka ta hokolola iinima mbika, noye wo ngoka e yi nyola. Tse notu shi shi kutya shoka ta ti, osho oshili.

Ehulitho

25 Ano oku na iinima iikwawo oyindji Jesus e yi ninga. Ando ayihe oya nyolelwe shimwe nashimwe, ondi inekela, ando omambo ngoka itaga gwana mo muuyuni.