Moore

Zã

Gomdã rɩka yĩnga

1 Hal sɩngr wẽndẽ, gomdã dag n beeme, la gomdã dag n bee ne Wẽnnaam, la gomdã yaa Wẽnnaam. 2 Bãmb dag n bee ne Wẽnnaam hal sɩngr wẽndẽ. 3 B naana bũmb fãa ne bãmba, la bũmb ka be sẽn naane, tɩ ka yɩ ne bãmb ye. 4 Vɩɩm dag n bee bãmb pʋgẽ, la vɩɩmã dag n yaa vẽenem ninsaalbã yĩnga. 5 Vẽenemã yãga lik pʋgẽ, la likã ka reeg-a ye. 6 Dao a yembr la Wẽnnaam tʋm t'a wa. A yʋʋr la a Zã. 7 Dao kãng waame n ya kaset kɩta, n na n kɩs vẽenemã kaseto, tɩ neba fãa tõe n tẽ yẽ yĩnga. 8 Dag n ka yẽ la vẽenemã ye, la a waame n na n kɩs vẽenemã kaseto. 9 Vẽen-kãng yaa sɩd vẽenem, n wa dũni pʋgẽ n vẽnegd ned fãa. 10 Gomdã dag n bee dũni pʋgẽ. B naana dũni wã ne bãmba, la dũni ka bãng bãmb ye. 11 Bãmb waa b meng nebẽ, la b nebã ka reeg bãmb ye. 12 La b kõo neb nins fãa sẽn deeg bãmba, la neb nins sẽn tẽed bãmb yʋʋrã noor tɩ b lebg Wẽnnaam kamba. 13 Ka kamb b sẽn dog ne zɩɩm, wall ne yĩng ratem, wall ne ninsaal datem ye, yaa Wẽnnaam sẽn doge. 14 B kɩtame tɩ gomdã rɩk yĩng n zĩnd tõnd sʋka. Tõnd gesa bãmb ziiri, Bi-ribl sẽn ka to ziir a sẽn deeg a ba wã nengẽ, la b pida ne bark la sɩda. 15 A Zã kɩsa bãmb kaset n yeele: Yaa soab ning mam sẽn gom a yell n yeel tɩ ned ning sẽn pʋgend maam n watẽ wã yɩɩda maam, bala, b renga maam n beẽ wã. 16 La tõnd fãa paama bãmb yalẽ wã, n deegd bãmb barkã n paasd wakat fãa. 17 Bala, b tũnuga a Moyiis n kõ tõogã, la barkã ne sɩdã tũnuga a Zezi Kirist n wa. 18 Ned baa a yen nan ka yã Wẽnnaam ye. Wẽnnaam sẽn ya Bi-ribl yend sẽn ka to, n be ba a Wẽnnaam nengẽ kɩtame tɩ nebã bãng bãmba.

A Zãmbatiis kaseto

19 Ad kaset ning a Zã sẽn kɩs wakat ning Zuif-rãmbã sẽn tʋm maan-kʋʋdb ne Levit-rãmb tɩ b yi Zeruzalɛm n wa n sok yẽnda a sẽn yaa a soabã. 20 Yẽ vẽnegame n togs n ka kɩɩs ye. A vẽnegame n togs tɩ yẽ ka Kiristã ye. 21 B leb n sok-a lame tɩ rẽ wã, yẽ yaa ãnna? Yẽ yaa a Eli? T'a leok tɩ yẽ ka a Eli ye. La b sok-a lame tɩ la yaa yẽ la Wẽnnaam no-rɛɛsã? T'a leok tɩ ayo. 22 La b leb n yeelame yaa: Foo la ãnna, tɩ tõnd tõe n tɩ leok neb nins sẽn tʋm-b tõndã? Fo mengã yetame tɩ fo yaa ãnna? 23 A Zã yeelame yaa: "Mam yaa soab ning sẽn kelemd we-rasempʋɩɩgẽ n yetẽ tɩ b rems Zu-soabã sor tɩ yɩ tɩrgã koɛɛga," wa Wẽnnaam no-rɛɛs a Ezayi sẽn yeelã. 24 B sẽn dag n tʋm b rãmbã yaa Fariisẽ-dãmba. 25 B sok-a lame yaa: Bõe yĩng tɩ fo lisd neba, fo sã n ka Kirist bɩ a Eli bɩ Wẽnnaam no-rɛɛsã? 26 A Zã leokame n yeele: Maam, mam lisda yãmb koomẽ. La yãmb sʋkã, ned a yen n be be yãmb sẽn ka mi ye. 27 Soab kãng pʋgenda maam, la mam ka zems tɩ lood bãmb neooda loets ye. 28 Gom-kãens goma Betani, Zʋrdẽ rʋʋnde, zĩig ning a Zã sẽn dag n lisd nebã. 29 Vẽkembeoogo, a Zã yãa a Zezi sẽn wat yẽ nengẽ, n yeele: Ad Wẽnnaam pe-bilã, sẽn yiisd-a dũni yel-wẽnã. 30 Yaa bãmb yell la mam dag n gom ne yãmb n yeel tɩ dao n pʋgend maam, la b yɩɩda maam, bala, b renga maam n beẽ wã. 31 La mam dag n ka mi bãmb ye, la mam waa n lisda nebã koomẽ tɩ bãmb tõe n vẽneg b meng ne Israyɛll nebã. 32 A Zã leb n kɩsa kaset n yeele: Mam yãa Sɩɩg-sõng sẽn yi arzãn n sig wa wall n pa bãmb zugu. 33 La mam dag n ka mi bãmb ye. La sẽn tʋm-a maam tɩ m wa n lis nebã koomẽ wã yeela maam tɩ mam sẽn na n yã ned ning tɩ Sɩɩg-sõng sig n pa a soab zugã, bɩ m bãng tɩ yaa yẽnda n lisd nebã Sɩɩg-sõng pʋgẽ wã. 34 Maam, mam yãame, la mam kɩsa kaset tɩ yaa bãmb la Wẽnnaam Bi-riblã.

Pipi karen-biisi

35 Vẽkembeoogo, a Zã ra leb n bee be ne a karen-biis a yiibu. 36 A dag n geta a Zezi sẽn loogd n yeele: Ad Wẽnnaam pe-bilã. 37 Karen-biis a yiibã wʋma gom-kãense, la b pʋgla a Zezi. 38 A Zezi wẽnegame n mik tɩ b pʋgda bãmba, la b sok-b lame tɩ b baooda bõe? B leoka a Zezi n yeele: Rabbi, sẽn dat n yeel tɩ karen-saamba, yãmb yir yaa yɛ? 39 A Zezi yeela bãmb yaa: Wa-y tɩ y na yã. B kẽngame n tɩ yã zĩig ning a Zezi sẽn be wã, la b paa ne bãmb da-kãnga. Dag n yaa zaabr wakat a naas sẽne. 40 Neb a yiibã sẽn wʋm a Zã goam n pʋgl a Zezi wã, a yembr bãmb sʋk la a Ãndre, a Sɩmo Pɩyɛɛr ba-biiga. 41 A Ãndre reng n yãnda a meng ba-biig a Sɩmo n yeel-a: Tõnd yãa Mesi, sẽn dat n togs tɩ "Kiristã." 42 A talla a Sɩmo n wa a Zezi nengẽ. A Zezi ges-a lame n yeele: Foo la a Sɩmo, a Zonaas bi-ribla. B na n boonda foom t'a Sefas, sẽn dat n yeel tɩ Pɩyɛɛr (wall kugri).

A Zezi boola a Filip ne a Natanayɛl

43 Vẽkembeoogo, a Zezi yãka yam n na n kẽng Galile. Bãmb yãnda a Filip n yeel-a t'a tũ bãmba. 44 A Filip dag n yaa Betsayida sẽn yaa a Ãndre ne a Pɩyɛɛr tẽngã neda. 45 A Filip yãnda a Natanayɛl n yeel-a yaa: Dao ning a Moyiis tõogã ne Wẽnnaam no-rɛɛsdbã sẽn gom a yellã, tõnd yãa-a lame. Yaa Nazarɛt dao a Zezi, a Zozɛf bi-riblã. 46 A Natanayɛl soka yẽ yaa: Dẽ yĩnga, bõn-sõng tõe n yii Nazarɛt sɩda? 47 A Filip yeel-a lame t'a wa n gese. A Zezi yãa a Natanayɛl sẽn wat bãmb nengẽ, n gom a yell n yeele: Ad Israyɛll ned sɩda, zãmb sẽn ka be a pʋgẽ ye. 48 A Natanayɛl soka bãmb yaa: Yãmb bãnga maam yɛɛne? A Zezi leok-a lame n yeele: Sẽn deng a Filip sẽn na n bool foomã, fo sẽn dag n be kankangã tẽngrã, mam yãa foom. 49 Dẽ, a Natanayɛl yeelame yaa: Karen-saamba, yãmb la Wẽnnaam Bi-riblã! Yãmb la Israyɛll Rĩmã! 50 A Zezi leok-a lame n yeele: Mam sẽn yeel tɩ mam yãa foom kankangã tẽngrã yĩnga, fo tẽedame. La fo na n yãa bõn-kãsems sẽn yɩɩd a woto. 51 Sɩd-sɩda, mam yeta yãmb tɩ yãmb na n yãa arzãn sẽn pake, la Wẽnnaam malegs sẽn dʋʋd la b sigd ninsaal Bi-riblã zugẽ.

Zã 2

Yi-kãadem sẽn zĩnd Kana

1 Dasem a tãab rẽnda zugẽ, yi-kãadem n zĩnd Galile Kana. A Zezi ma ra bee be. 2 B boola a Zezi me ne b karen-biisã tɩ b wa yi-kãadmã. 3 La divẽ sẽn paooge, a Zezi ma yeela a Zezi tɩ nebã ka leb n tar divẽ ye. 4 A Zezi yeel-a lame yaa: Paga, bõe n be maam ne fo sʋka? Mam wakatã nan ka ta ye. 5 Bãmb ma wã yeela tʋmtʋmdbã tɩ b maan bũmb ning fãa a Zezi sẽn na n yeel-b tɩ b maane. 6 Sĩms a yoob sẽn pees ne kug n dag n be be, tɩ b ningd koom tɩ Zuif-rãmbã tar n waasd b mens wa sẽn zems bãmb miningu, la a yen fãa tõe deega ko-yʋy a naas bɩ a nu koom. 7 A Zezi yeel-b lame tɩ b pids sĩmsã ne koom, la b pids-b la pal-pale. 8 T'a Zezi yeel-b tɩ b toog moasã n tɩ kõ ned ning sẽn get-a rɩɩbã pʋɩɩb yellã. La b tallame n tɩ kɩs-a. 9 Sẽn get-a rɩɩbã pʋɩɩb yellã fʋrga koomã sẽn tedg n lebg divẽ wã. Yẽ dag n ka mi divẽ kãng sẽn yitẽ ye, la tʋmtʋmdb nins sẽn wi-b koomã rag n miime. 10 A boola pʋg-paalã sɩd n yeel-a: Ned fãa rengd n kõo nebã divẽ sõngã, tɩ nebã nens sã n wa n yuusdẽ, bɩ a yaool n kõ-b divẽ ning sẽn ka-a sõama zãngã. La foom, fo bĩnga divẽ sõngã hal tɩ ta moasã. 11 Bõn-bãnã a Zezi sẽn maanã sɩnga a woto Galile Kana. Bãmb wilga b ziiri, la bãmb karen-biisã tẽe bãmba. 12 Rẽ poore, bãmb kẽnga Kapɛrnawom ne b ma la b ma-bi-raopa, la b karen-biisã, tɩ b tɩ zĩnd be rasem bilf bala.

A Zezi riga koaasdb wẽnd-doogẽ wã

13 Zuif-rãmbã zʋʋg-n-basã kibs dag n kolgame, la a Zezi kẽnga Zeruzalɛm. 14 Bãmb tɩ yãame tɩ nag-koaasdba, la pe-koaasdba, la man-wall koaasdba, la ligd tɛkdb tara zĩis wẽnd-doogã zakẽ n koosd b koosem. 15 A Zezi dɩka wĩ n maan sãbsga, n dig bãmb fãa tɩ b yi wẽnd-doogã zakẽ, la b riga piisã ne niisã, la b sãeeg ligd tɛkdbã ligdi, la b leeb taabl-dãmbã, 16 la b yeel mol-wan koaasdbã yaa: Yiis-y yõwã kaane. Da maan-y mam ba wã roog tɩ yɩ leebg zĩig ye. 17 Bãmb karen-biisã tẽegame t'a gʋlsame tɩ: Yãmb roogã nonglem na n sooga maam zãnga. 18 Zuif-rãmbã goma ne a Zezi n yeele: Bõe bãnd la yãmb na n wilg tõndo, n wilg tɩ yãmb tara noor tɩ maan bõn-kãnga? 19 A Zezi leoka bãmb n yeele: Sãam-y wẽnd-do-kãngã, la rasem a tãab pʋgẽ, mam na lebs-a n me. 20 Dẽ, Zuif-rãmbã yeela bãmb yaa: Yɩɩ tɩlɛ tɩ b tʋm yʋʋm pis-naas la a yoob n yaool n me wẽnd-do-kãngã n sa, tɩ fo na n wa n lebs-a n me rasem a tãab pʋgẽ? 21 La a Zezi dag n gomda b yĩngã sẽn ya wẽnd-doogã yelle. 22 Bãmb sẽn wa n vʋʋg n bas kũumã, b karen-biisã tẽegame t'a Zezi dag n yeela a woto, la b tẽe Wẽnnaam gʋls-sõamyã ne gomd ning a Zezi sẽn dag n gomã.

A Zezi mii neba fãa

23 Bãmb sẽn dag n be Zeruzalɛm zʋʋg-n-basã kibsã wakatã, neb wʋsg tẽe bãmb yʋʋrã, b sẽn yã bãnã bãmb sẽn dag n maandã yĩnga, 24 la a Zezi yẽ ka bas yard ne-b ye, bala, bãmb dag n mi-b-la fãa, 25 la tɩ bãmb ka baood tɩ ned kɩs a to kaset ye, bala, bãmb mengã mii bũmb ning sẽn be ninsaal pʋgẽ.

Zã 3

A Zezi ne a Nikodɛm

1 Rao a yen n dag n be Fariisẽ-dãmba sʋka, n ya Zuif-rãmbã naaba, t'a yʋʋr boondẽ t'a Nikodɛm. 2 Yẽ waa a Zezi nengẽ ne yʋng n yeel-b yaa: Karen-saamba, tõnd miime tɩ yãmb yaa karen-saamb Wẽnnaam sẽn tʋme. Bala, ned ka tõe n maan bõn-bãn nins yãmb sẽn maandã, tɩ sã n ka Wẽnnaam n be ne-a ye. 3 A Zezi leok-a lame n yeele: Mam yeta foom sɩd-sɩd tɩ ned sã n ka paam tɩ b leb n dog-a, a ka tõe n yã Wẽnnaam soolmã ye. 4 A Nikodɛm yeela bãmba: Ned sẽn kʋʋl na n yɩɩ a wãn n leb n doge? A tõe n leb n kẽe a ma pʋgẽ yɛs n dog sɩda? 5 A Zezi leoka yẽnda n yeele: Mam yeta foom sɩd-sɩd tɩ ned sã n ka rog ne koom la ne Sɩɩg-sõngo, a ka tõe n kẽ Wẽnnaam soolmẽ wã ye. 6 Bũmb ning yĩng sẽn dog yaa yĩnga, la bũmb ning Sɩɩg-sõng sẽn dog yaa sɩɩga. 7 Da sak tɩ mam sẽn yeel tɩ fo tog n leb n dogame wã yɛɛs foom ye. 8 Sobg fugd n teesd a sẽn datẽ. Fo wʋmda a rãamdã, la fo ka mi a sẽn yitẽ, la a sẽn dabdẽ me ye. Yaa woto me ne ned ning Sɩɩg-sõng sẽn doge. 9 A Nikodɛm leb n gomame n yeele: Bõn-kãng tõe n yɩɩ a wãn n yɩ? 10 Fo yaa Israyɛll karen-saam-kãsenga, la fo ka mi rẽnda? 11 Mam yeta foom sɩd-sɩda, tɩ tõnd yeta d sẽn mi, la tõnd kɩta bũmb nins d sẽn yã kaseto, la yãmb ka tẽ tõnd kasetã ye. 12 Mam sã n gom ne yãmb dũni bũmb yɛl tɩ yãmb ka tẽeda, yãmb na n yɩɩ a wãn n tẽ, mam sã n gom ne yãmb saasẽ yɛl yelle? 13 Ned baa a yen ka dʋ saasẽ ye, sã n ka sẽn yi-a arzãn n wa wã: yaa Ninsaal Bi-riblã. 14 A wa a Moyiis sẽn zẽk waafã ne ra-yak we-rasempʋɩɩgẽ wã, na n yɩɩ tɩlɛ tɩ b zẽk Ninsaal Bi-riblã me, 15 tɩ ned ning fãa sẽn na tẽ bãmb na paam vɩɩm sẽn kõn sa. 16 Bala, Wẽnnaam nonga dũni wã hal wʋsgo, n kõ b Bi-ribl yen tãa wã, tɩ ned ning fãa sẽn na tẽ n bãmb kõn sãam ye, la a na paam vɩɩm sẽn kõn sa. 17 Sɩd me, Wẽnnaam ka tʋm b Bi-riblã dũni ka tɩ b kao nebã bʋʋd n sɩbg-b ye, la yaa tɩ nebã na paam fãagr bãmb maasem yĩnga. 18 B ka na n kao ned ning sẽn tẽedã bʋʋd n sɩbg-a ye. La ned ning sẽn ka tẽedã, a sɩbgr zoe n beeme, a sẽn ka tẽ Wẽnnaam Bi-ribl yen tãa wã yʋʋrã yĩnga. 19 Bũmb ning sẽn wat ne sɩbgrã la a woto: vẽenem waa dũni pʋgẽ, la ninsaalbã nonga likã n yɩɩd vẽenemã, b tʋʋmã sẽn ya wẽnsã yĩnga. 20 Bala, ned ning fãa sẽn maand wẽng kisa vẽenem, n ka wat vẽenemẽ wã ye, tɩ vẽenemã na n wa n wilg t'a tʋʋmã ka sõama ye. 21 La ned ning sẽn maand sɩd wata vẽenemẽ, tɩ nebã tõe n bãng t'a tʋʋmã tʋmda Wẽnnaam sakr pʋgẽ.

A Zezi ne a Zã

22 Rẽ poore, a Zezi kẽnga Zude soolmẽ ne b karen-biisã, n pa be rasem bilf ne bãmba, la b lisd neba. 23 A Zã me dag n bee Eno, zĩig sẽn pẽ ne Salim n lisd neba, bala, koom dag n bee be wʋsgo. Nebã dag n kẽnda be t'a lisd-ba. 24 Bala, b dag nan ka sui a Zã bi-bees doogẽ ye. 25 La a Zã karen-biis kẽer wẽe nokoeemd ne Zuif a yembr yɩlg-m-mengã poorẽ. 26 B kẽnga a Zã nengẽ n tɩ yeel-a: Karen-saamba, ned ning sẽn dag n be ne yãmb Zʋrdẽ rʋʋndã, tɩ yãmb kɩs a kasetã, ad a lisda neba, la nebã fãa dabda a nengẽ. 27 A Zã leokame n yeele: Ninsaal ka tõe n deeg bũmb baa fʋɩ, tɩ sã n ka sẽn yi arzãn n kõ-a ye. 28 Yãmb mens yaa kaset dãmb tɩ mam yeelame tɩ mam ka Kiristã ye, la tɩ yaa bãmb n tʋm maam tɩ m deng b taoore. 29 Yaa pag sɩd n so-a. La pʋg-sɩdã zoa bee ne-a n kelgd-a, la a sã n wʋm pʋg-sɩdã koɛɛga, a sũur yaa noogo. Sũ-no-kãng la mam dẽndã, la a pida moasã. 30 Bãmb tʋʋmd nebã sʋk tog n tara paoosg tɩ mam dẽndã tar boogre.

Kaset soab sẽn yit yĩngri

31 Sẽn yi-a yĩngr n wa wã yɩɩda nebã fãa. Sẽn yaa-a tẽng zug ka ned yaa tẽng bũmbu, la a gomda tẽng bũmb yɛla. Sẽn yi-a arzãnã yɩɩda nebã fãa. 32 Bãmb togsda bũmb nins b sẽn yã la b wʋme, la ned baa a yen tãa ka tẽed bãmb kasetã ye. 33 Ned sã n deeg bãmb kasetã, a soabã wilgdame tɩ Wẽnnaam yeta sɩda. 34 Soab ning Wẽnnaam sẽn tʋmã togsda Wẽnnaam goama, bala, Wẽnnaam kõta a soab bãmb Sɩɩgã tɩ seke. 35 Ba wã nonga Bi-riblã, n dɩk bũmba fãa n ning a nugẽ. 36 Ned ning sẽn tẽed-a Bi-riblã tara vɩɩm sẽn kõn sa. La ned ning sẽn kɩɩsd-a Bi-riblã kõn paam vɩ-kãng ye, la Wẽnnaam sũ-puugrã na n ta-a lame.

Zã 4

Samari paga

1 Zu-soabã bãngame tɩ Fariisẽ-dãmbã wʋmame tɩ bãmb paama karen-biis n yɩɩd a Zã, la b lisd-ba. 2 Baoosgo, a Zezi dag n ka lisd nebã b toor ye, dag n yaa b karen-biisã. 3 Dẽ, bãmb yii Zude n na n kẽng Galile. 4 Yaool n dag n yaa tɩlɛ tɩ bãmb pɩʋʋg Samari soolem. 5 Dẽ, bãmb taa Samari tẽng a yembr sẽn boond tɩ Sɩkaar, pʋʋg ning a Zakob sẽn dag n kõ a bi-ribl a Zozɛfã sɛɛgẽ. 6 A Zakob bulgã dag n bee be. Kẽndã yaams yĩnga, a Zezi zĩnda bulgã noore. Dẽ tɩ yaa wĩnto-sʋk sẽne. 7 Samari pag a yen n wa n na n yãk koom. A Zezi kos-a lame t'a kõ-b koom tɩ b yũ. 8 Bala, bãmb karen-biisã dag n kẽnga tẽngã pʋgẽ n na n tɩ ra rɩɩbo. 9 Samari pagã yeela bãmb yaa: Yɩta a wãn tɩ yãmb sẽn ya Zuifã kot maam, koom n na n yũ? Tɩ mam yaool n ya Samari paga. (Sɩd me, Zuif-rãmbã dag n ka tar lagem-n-taar ne Samari rãmbã ye.) 10 A Zezi leok-a lame n yeele: Fo sã n dag n miẽ bũmb nins Wẽnnaam sẽn kõtã, la f mi ned ning sẽn kot-a foom koomã n na n yũ wã, yaa foom n dag n na n kos-a, la a dag n na n kõo foom ko-bundga. 11 La pagã yeela bãmb yaa: M kẽem sõngo, yãmb ka tar baa fɩ n na n toog koomã bulgẽ wã ye, tɩ bulgã yaool n zulmẽ. Dẽ, yãmb na n yãa ko-bund-kãng yɛɛne? 12 Yãmb yɩɩda tõnd yaab a Zakob, sẽn kõ-a tõnd bulgã laa? Bãmb meng yũu a koom, tɩ b kom-dibli ne b rũm-bãgã me yũ. 13 A Zezi leok-a lame n yeele: Ko-yũud na n leb n yõka ned ning fãa sẽn yũud ko-kãngã. 14 La ko-yũud kõn leb n yõk ned ning fãa sẽn na n yũ koom ning mam sẽn na n kõ-a wã ye, la koom ning mam sẽn na n kõ-a wã na n lebga ko-bundg sẽn na n buli, hal tɩ ta vɩɩm sẽn kõn sa wã pʋgẽ. 15 Pagã yeela bãmba: M kẽem sõngo, kõ-y maam ko-kãnga, tɩ ko-yũud da leb n yõk maam, tɩ m leb n wat ka n yãkd koomã ye. 16 A Zezi yeel-a lame t'a kẽng n tɩ bool a sɩdã, la a lebg n wa be. 17 La pagã leokame t'a ka tar sɩd ye. A Zezi yeel-a lame yaa: Fo maana neere, fo sẽn yeel tɩ f ka tar sɩdã. 18 Bala, fo talla sɩdb a nu, la fo sẽn tar a soab moasã wã ka fo sɩd ye. Fo togsa sɩd yellã pʋgẽ. 19 Pagã yeela bãmb yaa: M kẽem sõngo, mam neeme tɩ yãmb yaa Wẽnnaam no-rɛɛsa. 20 Tõnd ba-rãmbã dag n pʋʋsda tãn-kãngã zugu. La yãmb zuif-rãmbã yetame tɩ zĩig ning b sẽn tog n pʋʋsã yaa Zeruzalɛm. 21 A Zezi yeel-a lame yaa: Paga, tẽ mam goamã! Wakat n wat tɩ ka tãn-kãngã zug wall Zeruzalɛm la yãmb na n pʋʋs y ba wã ye. 22 Yãmb pʋʋsda y sẽn ka mi. Tõnd pʋʋsda d sẽn mi, bala, Wẽnnaam tũnuga Zuif-rãmbã n na n fãag nebã. 23 La wakat watame - la yaa moasã - tɩ tõnd ba wã waoogdb sɩd-sɩdã na n waoog bãmb ne b sɩɩse la ne sɩda. Bala, yaa waoogdb a woto buud la tõnd ba wã baooda. 24 Wẽnnaam yaa Sɩɩga, la yaa tɩlɛ tɩ neb nins sẽn pʋʋsd bãmbã na pʋʋs ne b sɩɩse, la ne sɩda. 25 Pagã yeela bãmb yaa: Mam miime tɩ Mesi wã, soab ning b sẽn boond tɩ Kiristã na n waame. B sã n wa, b na n wilga tõnd bũmba fãa. 26 A Zezi yeela yẽnda: Maam, soab ning sẽn gomd ne fooma, yaa maam la bãmba. 27 Karen-biisã taa wakat kãnga, la a yɛɛsa bãmb tɩ yã a Zezi sẽn gomd ne paga, la bãmb ned baa a yen ka sok bãmb b sẽn kot pagã bũmb ninga, wall b sẽn gomd ne-a bũmb ning yell ye. 28 Dẽ, pagã basa a yʋʋrã be, n kẽng tẽngã pʋgẽ n tɩ yeel nebã yaa: 29 Wa-y n ges-y rao sẽn togs maam bũmb nins fãa mam sẽn maanã! Dẽ yĩnga, ka na n yɩ Kiristã? 30 Nebã yii tẽngã n kẽng a Zezi nengẽ. 31 Wakat kãnga, a Zezi karen-biisã dag n bõosda bãmb n yetẽ tɩ: Karen-saamba, dɩ-y-yã. 32 La a Zezi leoka bãmb yaa: Mam tara rɩɩb yãmb sẽn ka mi, n dɩtẽ. 33 Dẽ, karen-biisã goma ne taab n yeel tɩ daar ninga ned n tall rɩɩb n wa n kõ-ba. 34 A Zezi yeela bãmb yaa: Mam rɩɩba, yaa tɩ maan sẽn tʋm-a maamã raabo, la m baas tʋʋmd ning b sẽn kõ maam tɩ m maanã. 35 Yãmb ka mi n yetẽ tɩ keta kiis a naas tɩ tigsg wakat ta wɛ? Ad-y, mam yeta yãmb tɩ y zẽk y nens n ges pʋtã sẽn pelg n dat tigsgã. 36 Sẽn tigsd-a wã zoe n deegda a tʋʋm yaoodo, la a tigsda koodã wakat sẽn kõn sa yĩnga. Woto, sẽn bʋt-a wã ne sẽn tigsd-a wã naagda taab n kɩdme. 37 Yel-bũnd ning sẽn yet tɩ ned a yen n bʋt tɩ ned a to tigsã, yaa sɩda. 38 Mam tʋma yãmb tɩ y tʋg n tigs pʋʋg yãmb sẽn ka tʋmẽ ye. Neb a taab n tʋme, tɩ yãmb wa n kẽ n dɩt a yõodo. 39 Samari tẽn-kãng neb wʋsg tẽe a Zezi, pagã kaset yĩnga, a sẽn yeel t'a Zezi togsa yẽnda bũmb nins fãa yẽ sẽn maanã yĩnga. 40 La Samari nebã sẽn yã a Zezi, b kos-b lame tɩ b pa ne bãmba. La a Zezi paa be rasem a yiibu. 41 Neb nins sẽn tẽ a Zezi b goamã yĩngã sõor n yɩɩda, la b yeela pagã yaa: 42 Ka leb n ya fo goamã yĩng la tõnd sẽn tẽed a Zezi wã ye. Bala, tõnd mensã wʋma b goamã, la tõnd miime tɩ sɩd yaa bãmb la dũni fãagdã.

A Zezi maaga rĩm tʋmtʋmd biiga

43 Dasem a yiib kãens zugẽ, a Zezi yii be n na n kẽng Galile, 44 bala, bãmb mengã dag n kɩsa kaset tɩ Wẽnnaam no-rɛɛs ka paamd waoogr a meng ba-yirẽ ye. 45 Bãmb sẽn ta Galile, Galile nebã reega bãmba, b sẽn dag n yã bũmb nins fãa bãmb sẽn maan Zeruzalɛm, kibsã wakatã yĩngã. Bala, bãmb me dag n kẽnga kibsã. 46 Dẽ, a Zezi leba Galile Kana, tẽng ning bãmb sẽn dag n tek koom tɩ lebg divẽ wã. Rĩma tʋmtʋmd kãseng a yembr n dag n be Kapɛrnawom, t'a bi-ribl ka keem ye. 47 A wʋmame t'a Zezi yii Zude n wa Galile, la a kẽnga bãmb nengẽ n tɩ bõos-b tɩ b wa n maag a biigã sẽn dag n kolg kũum. 48 A Zezi yeel-a lame yaa: Dẽ, yãmb sã n ka yãt bõn-bãn la bõn-yɛɛsdse, yãmb ka na n tẽ ye. 49 Rĩmã tʋmtʋmd kãsengã yeela a Zezi tɩ b wa tao-tao t'a bi-bilfã da wa ki ye. 50 A Zezi yeel-a lame t'a kẽng t'a biigã sãoogame. Daowã tẽe gomd ning a Zezi sẽn yeelã, la a loogame. 51 A sẽn be sorẽ n kuiisẽ, a tʋmtʋmdbã seg-a lame n yeel-a t'a biigã sãoogame. 52 Tʋmtʋmd-kãsengã soka bãmb n na n bãng wakat ning biigã sẽn sɩng n sãoogã. La b yeel-a lame tɩ yaa zaame wĩnto-sʋk sẽn loog lɛɛr a yembr la a yĩn-wɩngrã sig-yã. 53 Biigã baaba bãngame tɩ yaa wakat kãng bal la a Zezi yeel yẽnda t'a bi-riblã sãoogame wã. La yẽ ne a yirã rãmb fãa tẽe a Zezi. 54 A Zezi leb n maana bõn-bãn kãnga, a yiib soaba, b sẽn yi Zude n wa Galile wã poorẽ.

Zã 5

Koams paama maagr Betɛsda

1 Dẽ poore, Zuif-rãmbã kibs n zĩndi, la a Zezi kẽnga Zeruzalɛm. 2 Mik bãk n dag n be Zeruzalɛm, piisã dignoor sɛɛgẽ, tɩ b boond ne hebre goam tɩ Betɛsda, la zãn a nu n dag n be be. 3 Bãad-dãmb wʋsg n dag n gãe zãnã tẽngre: zoense, wobse, ki-boaga. B dag n bee be n gũud koomã rãmbgo. 4 Bala, malɛk n sigd bãkã pʋgẽ wakat wakat n dãmbd koomã. La koomã sã n dãmb n sa, ned ning sẽn yɩ-a pipi n lʋɩ koomẽ wã paamda maagre, baa bãagã sẽn ya bũmb ninga. 5 Dao a yen n dag n be be n ka keemẽ, la a bãagã taa yʋʋm pis-tã la a nii. 6 A Zezi yãa a sẽn gãe, la b sẽn mi t'a bee be hal daar zãrã, b sok-a lame yaa: Fo rat n paama laafɩ? 7 Bãadã leoka bãmb yaa: M kẽem sõngo, mam ka tar ned sẽn na n lob maam bãkẽ wã koomã lengr wakat ye. La mam sã n dabd be, ned n dengd maam n lʋɩ be. 8 A Zezi yeel-a lame yaa: Yik n dɩk f gãagã n kẽne. 9 Wakat kãng bala, daowã paama laafɩ. A rɩka a gãag n sɩng kẽna. 10 Badaar dag n yaa Zuif-rãmbã vʋʋsg daare. Dẽ, Zuif-rãmbã yeela rao ning sẽn paam-a maagrã tɩ daarã dag n yaa vʋʋsg daare, tɩ la a ka tar noor tɩ tʋk a gãagã ye. 11 La a leoka bãmb tɩ ned ning sẽn kõ-a yẽ laafɩ wã yeela yẽnda t'a rɩk a gãagã n kẽne. 12 Zuif-rãmbã soka daowã tɩ yaa ãnna soab n yeel yẽ t'a rɩk n kẽna? 13 La rao ning sẽn paam-a maagrã dag n ka mi sẽn ya ned ning ye, bala, a Zezi dag n kẽe nebã sẽn dag n be be wã sʋk n meneme. 14 Dẽ poore, a Zezi yãa rao wã wẽnd-doogẽ wã n yeel-a: Gese, fo paama laafɩ. Da leb n maan yel-wẽn ye, tɩ yell sẽn yɩɩd a woto da wa n paam foom ye. 15 Rao wã kẽngame n tɩ yeel Zuif-rãmbã tɩ yaa a Zezi la sẽn maag yẽ wã. 16 Rẽnda n kɩt tɩ Zuif-rãmbã dag n namsd a Zezi, b sẽn maand bõn-kãng vʋʋsg daarã yĩngã. 17 La a Zezi leoka bãmb n yeele: M baaba tʋmda hal tɩ ta moasã. Mam me tʋmdame. 18 Gom-kãng yĩnga, Zuif-rãmbã baooda a Zezi n yɩɩd pĩnd n dat n kʋ. Ka b sẽn kɩɩs bãmb vʋʋsg daar tõogã yĩng bal ye, la yaa b sẽn boond Wẽnnaam tɩ b meng ba, n wilgd tɩ bãmb ne Wẽnnaam yaa yembrã yĩnga.

Wẽnnaam Bi-riblã noore

19 Dẽ, a Zezi leoka bãmb n yeele: Mam yeta yãmb sɩd-sɩd tɩ Bi-riblã ka tõe n maan baa fɩ a toor ye, yaa bũmb nins a ba sẽn maand t'a yãtẽ wã bal la a maanda. Bũmb nins fãa ba wã sẽn maanda, Bi-riblã me maanda rẽ me. 20 Bala, ba wã nonga Bi-riblã, n wilgd-a bũmb nins fãa b sẽn maandã, la b na n le wilg-a-la tʋʋm sẽn ya kãsems n yɩɩd a woto, tɩ yãmb yɛɛse. 21 Sɩd me, a wa ba wã sẽn vʋʋgd kũum, n kɩtdẽ tɩ b leb n vɩ wã, woto me, Bi-riblã kɩtdame tɩ bãmb sẽn dat t'a soab vɩɩmdã vɩɩmde. 22 Sẽn paase, ba wã ka kaood ned baa a yembr bʋʋd ye, b basa bʋʋdã fãa ne Bi-riblã, 23 tɩ neba fãa na waoog-a wa b sẽn waoogd ba wã. Ned ning sẽn ka waoogd Bi-riblã ka waoogd ned ning sẽn tʋm-a wã me ye. 24 Mam yeta yãmb sɩd-sɩd tɩ ned ning fãa sẽn kelgd mam goama, la a tẽed sẽn tʋm-a maamã a tara vɩɩm sẽn kõn sa. B ka na n sɩbg-a ye. A yii kũumẽ n kẽ vɩɩmẽ. 25 Mam yeta yãmb sɩd-sɩd tɩ wakat watame - la yaa moasã bala - tɩ sẽn ki-bã na n wʋm Wẽnnaam Bi-riblã koɛɛga. La neb nins sẽn wʋm-bã na n vɩɩmdame. 26 Sɩd me, a wa vɩɩmã sẽn be ba wã nugẽ wã, ba wã kõo Bi-riblã pãn-tõog tɩ b tar vɩɩmã b nugẽ, 27 la b kõ-a-la noor tɩ kao bʋʋdo, bala, a yaa Ninsaal Bi-ribla. 28 Da sak-y tɩ rẽ yɛɛs yãmb ye, bala, wakat n wat tɩ neb nins fãa sẽn be yaadẽ na n wʋm bãmb koɛɛga. 29 Neb nins sẽn maan neerã na n yiime n paam vʋʋgr la vɩɩm. Neb nins sẽn maan wẽngã na n yiime n paam vʋʋgr la bʋʋdo. 30 Mam ka tõe n maan baa fɩ m toor ye. Mam bʋʋda bʋʋdã n zemsed m sẽn wʋmdã, la mam bʋʋdã yaa tɩrga, bala, mam ka baood tɩ maan m daab ye, la yaa sẽn tʋm-a maamã raabo. 31 Sã n yaa maam n kɩt m meng kaseto, mam kasetã ka sɩd ye. 32 Yaa ned a to n kɩt mam kaseto, la mam miime tɩ kaset ning a soab sẽn kɩt mam wɛɛngẽ wã yaa sɩda. 33 Yãmb tʋma koe-toagsedb a Zã nengẽ, la a Zã kɩsa sɩdã kaseto. 34 Ne maam, mam kasetã ka yit ninsaal nengẽ ye, la mam gomda a woto tɩ yãmb tõe n paam fãagre. 35 A Zã dag n yaa fɩtl sẽn wita, n yãgda, la yãmb tʋlgame n maan sũ-noog wakat bilf bal yẽ vẽenemẽ wã. 36 La maam, mam tara kaset sẽn yɩɩd a Zã rẽndã. Bala, tʋʋm nins m ba sẽn kɩt tɩ mam maandẽ wã, tʋʋm kãens meng mam sẽn maandã kɩta mam kaseto, n wilgdẽ tɩ m ba n tʋm maam. 37 La m ba sẽn tʋm maamã, bãmb meng kɩsa mam kaseto. Yãmb zɩ n wʋm b koɛɛga, wall y yãnd b neng ye, 38 la bãmb goamã ka be yãmb pʋgẽ, yãmb sẽn ka tẽed bãmb sẽn tʋm a soabã yĩnga. 39 Yãmb lɩkd n geta Wẽnnaam gʋls-sõamyã pʋse, yãmb sẽn tẽed tɩ yãmb na n paama vɩɩm sẽn kõn sɛ, b maasem yĩngã. Yaa gʋls-sõamy kãens n kɩt mam kaseto. 40 La yãmb yaool n ka rat n wa mam nengẽ n paam vɩɩmã ye. 41 Mam ka reegd ziir sẽn yit ninsaalb nengẽ ye... 42 La mam mii yãmba: Wẽnnaam nonglemã ka be yãmb pʋsẽ ye. 43 Mam waa m ba yʋʋr yĩnga, la yãmb ka reegd maam ye. Ned a to sã n wa ne a meng yʋʋre, yãmb deegda yẽnda. 44 Yãmb sẽn paamd pẽgr taab nengẽ, la y ka baood pẽgr sẽn yit Wẽnnaam b yen tãa nengẽ wã, yãmb tõee n yɩɩ wãn n tẽ? 45 Da tags-y tɩ mam na n yeela m ba tɩ yãmb ka maan neer ye. Sẽn na n yeel-a tɩ yãmb beegame wã, yaa a Moyiis, yãmb teegr sẽn be ne a soabã. 46 Bala, yãmb sã n dag n tẽedẽ a Moyiisi, yãmb dag n na tẽ maam, bala, a gʋlsame n gom mam yelle. 47 La yãmb sã n ka tẽed bũmb nins a sẽn gʋlsã, yãmb na n tẽe mam goama wãn-wãna?

Zã 6

A Zezi kɩtame tɩ bur lebg wʋsgo

1 Rẽnda poore, a Zezi kẽnga Galile bɩ Tiberyaad ko-kãsengã rʋʋnde. 2 Neb kʋʋng wʋsg dag n pʋgda bãmba, b sẽn yãt bõn-bãn nins a Zezi sẽn maand n maagd bãad-dãmbã yĩnga. 3 A Zezi dʋʋ tãngã n zĩnd be ne b karen-biisã. 4 Zuif-rãmbã kibs sẽn boond tɩ zʋʋg-n-basã dag n kolgame. 5 A Zezi zẽka b nenga, la b yãa neb kʋʋng wʋsg sẽn wat bãmb nengẽ, la b yeela a Filip yaa: Tõnd na n daa bur yɛɛne tɩ nin-kãensã paam rɩɩbo? 6 A Zezi goma a woto n na n mak a Filip n gese. Bala, b meng rag n mii b sẽn na n maan bũmb ninga. 7 A Filip leoka bãmb n yeel tɩ deniye kobsi bur ka tõe n sek tɩ ned fãa paam gɩrg ye. 8 A Zezi karen-biig a yembre, a Sɩmo Pɩyɛɛr ba-biig a Ãndre yeela bãmb yaa: 9 Bi-ribl bil n be ka n tar orz bur a nu ne zĩm a yiibu. La rẽnda yaa bõe ne neb sõor a woto? 10 A Zezi yeelame yaa: Kɩt-y tɩ nebã zĩndi. Mood n dag n be zĩ-kãng wʋsgo. Dẽ, nebã zĩndame, la raopã sõor tata tus a nu. 11 A Zezi deega burã, n pʋʋs Wẽnnaam barka, n pʋɩ neb nins sẽn dag n be-b be wã. B maana a woto me ne zĩmã, tɩ ned fãa deeg a sẽn dat tɛka. 12 Nebã sẽn dɩ n tɩge, a Zezi yeela b karen-biisã tɩ b wʋk rɩ-zersã sẽn kellã, tɩ bũmb baa a yen da pa n sãam ye. 13 Dẽ, b wʋka orz bur a nu wã pedsã, nebã sẽn dɩ tɩ kellã, n pids pet piig la a yiibu. 14 Nin-kãens sẽn yã bõn-bãn nins a Zezi sẽn maanã, b yeelame yaa: Sɩd yaa bãmb la Wẽnnaam no-rɛɛs ning sẽn da tog n wa-a dũni pʋgẽ wã. 15 A Zezi sẽn mi tɩ nebã na n waa n yõka bãmb n tɩ maan b rĩmã yĩnga, b yii be n leb n dʋ tãngã zug b yembre.

A Zezi kẽnda koom zugu

16 Zaabr sẽn ta, a Zezi karen-biisã sigame n ta ko-kãsengã noore. 17 Bãmb kẽe koom-koglgẽ n na n kẽng Kapɛrnawom, ko-kãsengã rʋʋnd a to wã. Zĩigã ra zoe n sobga zãnga, la a Zezi dag n ka wa b nengẽ ye. 18 Sobg n dag n fugd ne pãng hal wʋsgo, la ko-pɛmã dag n zẽkdame. 19 Karen-biisã sẽn dugs koglgã n zãag sẽn zems kɩlo a nu bɩ a yoobe, b yãnda a Zezi sẽn kẽnd ko-kãsengã zug n kolgd koom-koglgã. La rabeem yõk-b lame. 20 La a Zezi yeel-b lame tɩ b ra maan dabeem tɩ yaa bãmba. 21 Karen-biisã dag n dat n dɩka a Zezi ne koom-koglgã, la tao-tao bala, koom-koglgã rʋʋga tẽnga. Bala, b taa b sẽn dag n dabdẽ wã. Koom-koglg sobg sẽn lengda (6.16)

Neb baoo a Zezi

22 Vẽkembeoogo, neb kʋʋngã sẽn dag n yals ko-kãsengã rʋʋndã tẽegame tɩ dag n yaa koom-koglg a yen tãa n dag n be be, la t'a Zezi dag n ka kẽ kogl-kãng ne b karen-biisã ye, la tɩ karen-biisã b yen-yen n looge. 23 La koom-kogend a taab yii Tiberyaad n wa n yals zĩig sẽn pẽ ne zĩig ning a Zezi sẽn ning burã bark n kõ neb kʋʋngã tɩ b wãbã. 24 La kʋʋngã sẽn yã t'a Zezi bɩ b karen-biisã ka be be wã, b mensã kẽe koom-kogendẽ wã n kẽng Kapɛrnawom n na n tɩ bao a Zezi.

Bur sẽn kõt vɩɩm

25 B yãnda a Zezi ko-kãsengã rʋʋnd a to wã, n sok-b yaa: Karen-saamba, yãmb waa ka rabʋre? 26 A Zezi leoka bãmb n yeele: Mam yeta yãmb sɩd-sɩd tɩ yãmb sẽn baood maamã, ka bõn-bãnã yãmb sẽn yã wã yĩng ye, la yaa yãmb sẽn wãb burã n tɩgã yĩnga. 27 Da tʋm-y dɩɩb sẽn sãamdã yĩng ye. Tʋm-y rɩɩb ning sẽn paad vɩɩm sẽn kõn sa wã yĩnga: Ninsaal Bi-riblã n na n kõ-a yãmba. Bala, yaa yẽnda la m ba a Wẽnnaam kõ noore. 28 Nebã soka a Zezi yaa: Bõe la tõnd na n maan n tʋm Wẽnnaam tʋʋmdã? 29 A Zezi leoka bãmb n yeele: Wẽnnaam tʋʋmde, yaa tɩ yãmb tẽ a soab ning bãmb sẽn tʋmã. 30 La b yeela a Zezi yaa: Bõe bõn-bãnd la yãmb maand tɩ tõnd na n yã n tẽ yãmba? Bõe tʋʋm la yãmb tʋmda? 31 Tõnd ba-rãmbã dɩɩ man we-rasempʋɩɩgã pʋgẽ wa b sẽn gʋls n yeel tɩ: "A Moyiis kõo bãmb bur sẽn yit arzãn tɩ b wãbe." 32 A Zezi yeela bãmb yaa: Mam yeta yãmb sɩd-sɩd tɩ ka a Moyiis n kõ yãmb bur sẽn yi arzãnã ye, la yaa m baaba n kõt yãmb bur sɩd-sɩd sẽn yi arzãnã. 33 Bala, Wẽnnaam burã, yaa soab ning sẽn yit-a arzãn n sigda, n kõt dũni neb vɩɩmã. 34 La nebã yeela a Zezi yaa: Zu-soaba, kõt-y tõnd bur kãng daar fãa. 35 A Zezi yeela bãmb yaa: Maam la bur sẽn kõt vɩɩmã. Kom kõn leb n yõk ned ning sẽn wat-a mam nengẽ ye, la ko-yũud kõn leb n yõk ned ning sẽn tẽed-a maamã abada. 36 La mam yeela yãmb tɩ yãmb yãa maam la y ka tẽed ye. 37 Neb nins fãa m ba sẽn kõt maamã na n waa mam nengẽ, la mam kõn dig ned baa a yen sẽn wat mam nengẽ ye. 38 Bala, mam sẽn yi arzãn n sigã, ka tɩ maan m sẽn dat ye, la yaa tɩ maan sẽn tʋm-a maamã raabo. 39 La sẽn tʋm-a maamã raab la woto: yaa tɩ m da bas ned baa a yen bãmb sẽn kõ maamã tɩ menem ye, la mam na n vʋʋg-a-la yaoolem daarã. 40 Sɩd me, ad m baaba raabo: yaa tɩ ned ning fãa sẽn yã Bi-riblã n tẽ bãmb na paam vɩɩm sẽn kõn sa. La mam na n vʋʋg-a-la yaoolem daarã. 41 Zuif-rãmbã dag n yẽgemda ne taab a Zezi poorẽ, bala, a Zezi yeelame tɩ bãmb la bur sẽn yi arzãn n sigã. 42 Nebã yeelame yaa: Ka yẽnda la a Zezi wɛɛ, a Zozɛf bi-riblã, tɩ tõnd mi a ba ne a ma wã laa? La yaa a wãn t'a yetẽ tɩ yẽ yii arzãn n sigi? 43 A Zezi leoka bãmb n yeele: Da yẽgem-y ne taab ye. 44 Ned baa a yen ka tõe n wa mam nengẽ, tɩ sã n ka m ba, sẽn tʋm-a maamã n tak a soab n wa-ne ye. La mam na n vʋʋg-a-la yaoolem daarã. 45 A Gʋlsa Wẽnnaam no-rɛɛsdbã sɛbẽ tɩ: "B fãa na n deega zãmsg Wẽnnaam nengẽ." Ned ning fãa sẽn wʋm m ba koɛɛg la a reeg bãmb zãmsgã wata mam nengẽ. 46 Ka rat n yeel tɩ ned n zoe n yã d baaba ye, sã n ka soab ning sẽn yi-a Wẽnnaam nengẽ wã. Soab kãng yẽ yãa d ba wã. 47 Mam yeta yãmb sɩd-sɩd tɩ ned ning sẽn tẽedã tara vɩɩm sẽn kõn sa. 48 Mam yaa bur sẽn kõt vɩɩm. 49 Yãmb yaab-rãmbã dɩɩ mann we-rasempʋɩɩgẽ wã, la b kiime. 50 Bur ning sẽn yit-a yĩngrã yell la woto: Ned ning sẽn dɩt-a kõn ki ye. 51 Maam, mam yaa bur-vɩɩg sẽn yi arzãn n sigi. Ned sã n dɩ bur kãngã, a na n vɩɩmda wakat sẽn kõn sa. La bur ning mam sẽn na n kõ dũni wã vɩɩm yĩngã, yaa mam yĩngã. 52 Gom-kãng poorẽ, Zuif-rãmbã wẽe nokoeemd ne taab wʋsg n yeele: Nin-kãngã na n yɩɩ wãn n kõ tõnd a yĩngã tɩ d wãbe? 53 A Zezi yeela bãmb yaa: Mam yeta yãmb sɩd-sɩd tɩ yãmb sã n ka wãb Ninsaal Bi-riblã nemdo,la yãmb sã n ka yũ a zɩɩmã, yãmb ka tar vɩɩm y pʋsẽ ye. 54 Ned ning sẽn wãbd mam nemd la a yũud mam zɩɩm tara vɩɩm sẽn kõn sa, la mam na n vʋʋg-a-la yaoolem daarã. 55 Bala, mam nemdã yaa rɩɩb sɩd-sɩda, la mam zɩɩmã yaa bõn-yũudl sɩd-sɩda. 56 Sẽn wãbd-a mam nemd la a yũud mam zɩɩmã paada mam pʋgẽ, tɩ mam paad yẽ pʋgẽ. 57 A wa m ba wã sẽn vɩ, n tʋm maam, tɩ mam vɩ d ba wã maasem yĩngã, woto me, ned ning sẽn dɩt maam na n vɩɩ mam maasem yĩnga. 58 Ada la bur sẽn yi arzãn n sigi. A ka wẽnd bur ning yãmb ba-rãmbã sẽn wãbã ye: Bãmb kiime. Sẽn dɩt-a bur kãngã wã na n vɩɩmda wakat sẽn kõn sa. 59 Yaa woto la a Zezi gom wakat ning b sẽn dag n zãmsd nebã Kapɛrnawom karen-doogẽ wã.

Vɩɩm sẽn kõn sa goama

60 A Zezi karen-biisã sẽn wʋm bãmb goamã, wʋsg yeelame yaa: Zãms-kãngã deegr yaa toogo. Ãnna n tõe n sak-a? 61 A Zezi sẽn mi b yamẽ tɩ b karen-biisã yẽgemda gomdã poorẽ, b yeela bãmb yaa: Yõwã tuka yãmb sũur laa? 62 La yãmb sã n yã Ninsaal Bi-riblã t'a zẽkd n lebd a sẽn dag n beẽ wã, na n yɩɩ a wãna? 63 Yaa Sɩɩg-sõng n kõt vɩɩm. Yĩngã ka sõngd ne baa fɩ. Goam nins mam sẽn togs yãmbã wata ne Sɩɩg-sõng la vɩɩm. 64 La neb kẽer n be yãmb sʋkã n ka tẽed ye. Bala, hal sɩngr wẽndẽ bala, a Zezi dag n mii neb nins sẽn ka tẽed bãmba, la ned ning sẽn na n zãmb-a bãmb n yõk n kõ wã. 65 A Zezi gomame n paas n yeele: Dẽ n kɩt tɩ mam yeel yãmb tɩ ned baa a yen ka tõe n wa mam nengẽ, tɩ sã n ka m ba n kõ-a tõogr ye. 66 Sẽn sɩng ne wakat kãnga, bãmb karen-biis wʋsg leba poorẽ, n bas n ka leb n tũud a Zezi ye. 67 Dẽ, a Zezi yeela b karen-biis piig la a yiibã yaa: La yãmb yẽ, yãmb ka rat n loog laa? 68 A Sɩmo Pɩyɛɛr leoka bãmb n yeele: Zu-soaba, tõnd na n kẽnga ãnna soab nengẽ? Yãmb tara vɩɩm sẽn kõn sa wã goama. 69 La tõnd tẽeme, la tõnd bãngame tɩ yãmb yaa sõmblem soab sẽn yi Wẽnnaam nengẽ. 70 A Zezi leoka bãmb n yeele: Ka maam n tũus yãmb piig la a yiibã wɛ? La yãmb ned a ye n ya zĩna. 71 Bãmb dag n gomda a Sɩmo Iskaryo biig a Zudas yelle. Bala, yaa yẽnda, bãmb piig la a yiibã sʋk ned ning sẽn da na n zãmb-a bãmbã.

Zã 7

A Zezi ma-biis ka-tẽebo

1 Rẽ poore, a Zezi dag n saagda Galile, bala, b dag n ka rat n saag Zude ye. Tɩ bõe, Zuif-rãmbã dag n baooda bãmb n na n kʋ. 2 Rẽ tɩ zãnã kibsa, sẽn ya Zuif-rãmbã kibs dag n kolgame. 3 A Zezi ma-biisã yeela bãmb yaa: Yi ka n kẽng Zude tɩ f karen-biisã me paam n yã tʋʋm nins fo sẽn maandã. 4 Ned sã n dat tɩ nebã yã-a, a ka soosd n tʋmd a tʋʋmã ye. Fo sẽn maand bõn-kãensã, maan tɩ dũni neb bãng-fo. 5 Sɩda, a Zezi ma-biisã me dag n ka tẽed bãmb ye. 6 A Zezi yeela bãmb yaa: Ne maam, wakatã nan ka ta ye, la ne yãmba, wakat fãa zemsame. 7 Dũni wã ka tõe n kisg yãmb ye. B kisa maam, tɩ bõe, mam kɩta kaset tɩ b tʋʋmã yaa wẽnse. 8 Kẽng-y kibsã. Mam nan ka na n kẽng kibs kãngã ye, tɩ bõe, mam wakatã nan ka pid ye. 9 A Zezi sẽn gom ne bãmb woto n sa, a Zezi kell n paa Galile.

A Zezi kẽnga zãnã kibsa

10 A Zezi ma-bi-raopã sẽn kẽng kibsã, bãmb mengã me yaool n kẽngame. B soosame n kẽng tɩ nebã ka yã bãmb ye. 11 Zuif-rãmbã dag n baooda a Zezi kibsã wakat n sokdẽ tɩ b bee yɛ? 12 La vũn-vũn n dag n be kʋʋngã sʋk wʋsg bãmb poorẽ. Neb kẽer yetame tɩ bãmb yaa nin-sõngo, tɩ kẽer yetẽ tɩ ayo, bãmb kẽesda nebã moogo. 13 Ned baa a yen ka saagd n gom bãmb yellã vẽeneg ye, b sẽn zoet Zuif-rãmbã yĩnga. 14 Kibsã da zoe n taa pʋɩ-sʋka, t'a Zezi kẽng wẽnd-doogẽ wã, n sɩng n zãmsd nebã. 15 Linga Zuif-rãmbã, la b sokame yaa: Rao wã yɩɩ wãn n mi Wẽnnaam gʋls-sõamy wã n yaool n ka paam zãmsgo? 16 A Zezi leoka bãmb n yeele: Zãmsg ning mam sẽn zãmsd nebã ka yit mam nengẽ ye, a yita sẽn tʋm-a maamã nengẽ. 17 Ned ning fãa sẽn dat n tũ Wẽnnaam daabã na bãng zãms-kãng sã n yita bãmb nengẽ, wall mam goamã sã n yita mam meng nengẽ. 18 Ned ning goam sẽn yit a meng nengẽ baooda a meng waoogre. La ned ning sẽn baood sẽn tʋm-a yẽ wã waoogr yaa sɩd soaba, la ka-tɩrlem ka be yẽ pʋgẽ ye. 19 A Moyiis ka kõ yãmb tõogã sɩda? La yãmb ned baa a yen ka maand tõogã sẽn yetã ye. Yaa bõe tɩ yãmb baood n na n kʋ maam? 20 Neb kʋʋngã leokame tɩ zĩn n tar a Zezi, la tɩ ãnna n baood n na n kʋ bãmba? 21 A Zezi leoka bãmb n yeele: Mam tʋma tʋʋmd a yen, la a yɛɛsa yãmb fãa. 22 A Moyiis n yeel yãmb tɩ y kẽes kom-dibli wã bãongo (bãongã ka sɩng ne a Moyiis ye, yaa yaab-rãmbã n sɩng-a), la yãmb kẽesda kambã bãongo, baa ne vʋʋsg daare. 23 Yãmb sã n tõe n kẽes ned bãong vʋʋsg daare, n da kɩɩs a Moyiis tõogã, bõe tɩ yãmb sũyã yĩigd ne maam, mam sẽn kõ yĩn-tõr laafɩ vʋʋsg daarã yĩnga? 24 Da bʋ-y bʋʋdã tɩ zems ne nin sẽn yãtã ya, bʋ-y bʋ-tɩrga.

Dẽ yĩnga, a Zezi yaa Kiristã?

25 Zeruzalɛm neb kẽer yeelame yaa: Ka rao kãngã la b sẽn baood n na n kʋ wã wɛ? 26 Ad a sẽn yɛs nebã sʋk n gomd tɩ b ka yet-a tɩ bũmbu! Rẽ yĩnga, kãsem-dãmbã sɩd reegame tɩ yaa bãmb la Kiristã laa? 27 Tõnd yaool n mii rao kãngã sẽn yitẽ. La Kirist sã n wa, ned baa a yen ka na n bãng b sẽn yitẽ ye. 28 Dẽ, a Zezi zẽka b koɛɛg wakat ning b sẽn zãmsd nebã wẽnd-doogẽ wã n yeele: Yãmb mii maam, la y mii mam sẽn yitẽ. Baoosgo, mam ka wa m toor ye. La sẽn tʋm-a maamã yaa sɩd soaba, la yãmb ka mi-b ye. 29 Mam mii bãmba, bala, yaa bãmb yʋʋr yĩng la mam sẽn be ka wã, la yaa bãmb n tʋm maam. 30 Nebã da rat n yõka a Zezi, la ned baa a yen ka sɩɩs bãmb ye, bãmb wakatã sẽn dag n nan ka ta wã yĩnga. 31 Neb kʋʋngã sʋka, wʋsg tẽe a Zezi n yetẽ: Dẽ yĩnga, Kirist sã n wa, b na n maana bõn-bãn n yɩɩd dao kãngã sẽn maandã sɩda?

B tʋma gũudb a Zezi nengẽ

32 Fariisẽ-dãmbã wʋma neb kʋʋngã sẽn dag n gomd a Zezi yell vũn-vũnã. Dẽ, maan-kʋʋdbã kãsem-dãmba ne Fariisẽ-dãmbã tʋma gũudb tɩ b tɩ yõk a Zezi. 33 A Zezi yeel-b lame yaa: Mam ket n bee ne yãmb wakat bilf yĩng bala, la m na n leba sẽn tʋm-a maamã nengẽ. 34 Yãmb na n baoo maam, la y ka na n yã maam ye, la mam sẽn na n zĩnd zĩig ningã, yãmb ka tõe n wa be ye. 35 Zuif-rãmbã goma ne taab n yeele: A na n kẽe yɛ tɩ tõnd da yã-a? A na n kẽnga Zuif-rãmb nins sẽn sãeeg n be Gɛrk-rãmbã sʋka nengẽ n tɩ zãms Gɛrk-rãmbã bi? 36 A sẽn yeel tɩ tõnd na n baoo-a lame n ka yã, la tɩ tõnd ka tõe n wa zĩig ning a sẽn na n zĩndẽ wã, gom kãng võor yaa bõe?

Kʋɩls koom sẽn kõt vɩɩm

37 Kibsã yaoolem daare, daar ning sẽn ya-a kãseng n yɩɩdã, a Zezi yalsa yĩngr n zẽk b koɛɛg n yeele: Bɩ Ko-yũud sẽn tar ned ning wa mam nengẽ n yũ. 38 Kʋɩlse, b koom sẽn kõt vɩɩm na n yii ned ning sẽn tẽed maamã pʋgẽ, wa Wẽnnaam gʋls-sõamyã sẽn yetã. 39 A Zezi dag n goma Sɩɩg-sõngã neb nins sẽn tẽed bãmbã sẽn na n deegã yelle. Bala, b dag n nan ka kõ nebã Sɩɩg-sõngã ye, a Zezi sẽn dag n nan ka paam waoogrã yĩnga.

Welgr kẽe nebã sʋka

40 Nebã sẽn wʋm gom kãensã, neb n zĩnd kʋʋngã sʋk n yeel tɩ dao kãngã sɩd yaa Wẽnnaam no-rɛɛsa. 41 Kẽer da yetame tɩ dao-kãngã yaa Kiristã. La neb a taab yetame yaa: Dẽ yĩnga, sɩd yaa Galile la Kiristã tog n yi sɩda? 42 Wẽnnaam gʋls-sõamyã ka yeel tɩ "Kiristã na n yɩɩ a Daviid yagenga, n dog Betlehɛm sẽn yaa a Daviid tẽngã" sɩda? 43 Dẽ, welgr zĩnda nebã sʋk a Zezi poorẽ. 44 Neb kẽer bãmb sʋk dag n dat n yõka a Zezi, la ned baa a yembr ka sɩɩs bãmb ye.

Ned nan ka gom wa rao-kãngã ye

45 Gũudbã leba maan-kʋʋdbã kãsem-dãmbã ne Fariisẽ-dãmbã nengẽ, la b sok-b lame tɩ yaa bõe tɩ b ka tall a Zezi n wa? 46 Gũudbã leokame n yeele: Ned nan ka gom wa rao-kãngã ye. 47 Tɩ Fariisẽ-dãmbã le sok-ba: "A tõog n belga yãmb me n tõog laa? 48 Dẽ yĩnga, naab bɩ Fariisẽ baa a yen tãa beeme n tẽ bãmb sɩda? 49 La neb kʋʋngã sẽn ka mi tõogã, b yaa neba, kãab-wẽng sẽn be b zutu. 50 Bãmb ned a yembre, a Nikodɛm, sẽn dag n wa-a a Zezi nengẽ pĩndã yeel-b lame yaa: 51 Dẽ yĩnga, tõnd tõodã kaooda ned bʋʋd tɩ d ka reng n kelg-a, la d bãng bũmb ning a sẽn maanã sɩda? 52 B leoka yẽnda n yeele: Fo me yaa Galile ned laa? Vɛɛs sõama n gese, la f na yã tɩ Wẽnnaam no-rɛɛs ka yit Galile ye. 53 Rẽ poore, ned fãa kuila a yiri.

Zã 8

Pʋg-yoodre

1 A Zezi kẽnga oliiv tɩɩs tãngẽ wã. 2 La yibeoog bala, b leb n kẽnga wẽnd-doogẽ wã, la nebã fãa waa bãmb nengẽ. Bãmb zĩndame n zãmsd nebã. 3 Dẽ, tõog karen-saam-dãmbã ne Fariisẽ-dãmbã talla pag b sẽn yõk yoodem zug n wa ne-a 4 a Zezi taoore, n yals-a nebã fãa sʋk n yeel a Zezi yaa: Karen-saamba, b linga pʋg-kãngã t'a maand yoobo. 5 A Moyiis yeela tõnd a tõogã pʋgẽ tɩ d lob pagb a woto kuga. La yãmba, yãmb yetame tɩ bõe? 6 B goma a woto n na n bẽd a Zezi n paam n dõd-ba. La a Zezi zõondame n sɩng n gʋls tomã pʋgẽ ne b nug-bila. 7 La nebã sẽn dag n ket n pẽdgd bãmb ne b sokrã, b roogame n yeel-b yaa: Sẽn be-a yãmb sʋk n ka tar yel-wẽnde, bɩ a deng n lobg pagã kugri. 8 A Zezi leb n zõondame n gʋlsd tomẽ wã. 9 Tõog karen-saam-dãmbã ne Fariisẽ-dãmbã sẽn wʋm gom-kõngo, tɩ b sũyã kaset kao b bʋʋdo, b yii yembr yembre, sẽn sɩng ne kãsem hal tɩ ta yaoolem soaba. La a Zezi paa b yembr ne pagã sẽn dag n yɛs nebã sʋkã. 10 Dẽ, a Zezi roogame n yeel pagã yaa: Paga, sẽn dõt-b foomã bee yɛ? Baa a yen ka kao fo bʋʋd laa? 11 Pagã leokame tɩ: Zu-soaba, ned baa a yen. La a Zezi yeel-a lame yaa: Mam me ka kaood fo bʋʋd ye. Kẽnge, la f ra le saag n maan yel-wẽn ye.

A Zezi yaa dũni vẽenem

12 A Zezi leb n goma ne bãmb n yeele: Mam yaa dũni vẽenem. Ned ning sẽn tũud maam kõn kẽn lik pʋgẽ ye, la a na n paama vɩɩm vẽenem. 13 Dẽ, Fariisẽ-dãmbã yeela bãmb yaa: Fo kɩta f meng kaseto, fo kaset ka sɩd ye. 14 A Zezi leoka bãmb n yeele: Baa ne mam sẽn kɩt m meng kasetã, mam kasetã yaa sɩda. Bala, mam mii m sẽn yiẽ, la m sẽn dabdẽ. La yãmb ka mi mam sẽn yiẽ, wall m sẽn dabdẽ ye. 15 Yãmb bʋʋda wa ninsaalb sẽn data. La maam, mam ka bʋʋd ned baa a yen bʋʋd ye. 16 La mam sã n bʋʋdẽ me, mam bʋʋdã tũuda sɩda, bala mam ka m yembr ye. M ba, sẽn tʋm-a maamã bee ne maam. 17 B gʋlsa yãmb tõogã pʋgẽ tɩ neb a yiib kaset yaa sɩda. 18 Mam kɩta m meng kaseto, la m ba, sẽn tʋm-a maamã kɩta mam kaseto. 19 Dẽ, b yeela a Zezi yaa: F baaba bee yɛ? A Zezi leokame n yeele: Yãmb zɩ mam sẽn yaa a soaba, la y zɩ m ba sẽn yaa a soab me. Yãmb sã n da miiẽ-la maam, y dag n na bãng m baaba me. 20 A Zezi goma woto, wakat ning b sẽn dag n zãmsd nebã wẽnd-doogẽ wã, ligd lobrã koglg sɛɛgẽ, la ned baa a yen ka yõk bãmb ye, bãmb wakatã sẽn ket n nan ka ta wã yĩnga.

Yãmb ka tõe n kẽng mam sẽn dabdẽ wã ye

21 A Zezi leb n yeela bãmb yaa: Mam loogdame, la yãmb na n baoo maam, la yãmb na n kii y yel-wẽndã pʋgẽ. Yãmb ka tõe n wa mam sẽn kẽndẽ wã ye. 22 Zuif-rãmbã yeelame yaa: A sẽn yet tɩ tõnd ka tõe n wa zĩig ning a sẽn kẽndẽ wã, a na n kʋʋ a meng laa? 23 La a Zezi yeela bãmb yaa: Yãmb yaa tẽngr ka neba, la mam yaa yĩngr neda. Yãmb yaa dũni kãngã neba, la mam ka dũni kãngã ned ye. 24 Dẽnda n kɩt tɩ mam yeel yãmb tɩ y na n kii y yel-wẽnã pʋgẽ wã. Bala, yãmb sã n ka tẽed tɩ mam yaa m sẽn yaa a soabã, yãmb na n kii y yel-wẽnã pʋgẽ. 25 B soka a Zezi b sẽn ya a soaba. A Zezi leoka bãmb n yeele: Pipi, bõe yĩng tɩ m na n gom ne yãmba? 26 Mam tara bũmb wʋsg n na n gome, sẽn kẽed ne yãmb yelle, la m bʋ b bʋʋdo. La sẽn tʋm-a maamã yaa sɩd soaba, la mam togsda dũni wã bũmb ning m sẽn wʋm bãmb nengẽ. 27 Nebã ka wʋm tɩ yaa b ba a Wẽnnaam yell la a Zezi sẽn gomd ne bãmbã ye. 28 Dẽ, a Zezi yeel-b lame yaa: Yãmb sã n wa n zẽk Ninsaal Bi-riblã n sa, y na yaool n bãng tɩ mam yaa m sẽn ya a soaba, la tɩ mam ka maand baa fɩ m toor ye, la tɩ mam gomda wa m ba sẽn zãms maamã. 29 Sẽn tʋm-a maamã bee ne maam. B ka bas maam m yembr ye, tɩ bõe, wakat fãa, mam maanda sẽn noom bãmba.

Burkĩmba, la yemse

30 A Zezi sẽn gom a woto wã, neb wʋsg tẽe bãmba. 31 Dẽ, a Zezi yeela Zuif-rãmb nins sẽn tẽ bãmbã yaa: Yãmb sã n sak mam goama neere, 32 yãmb sɩd yaa mam karen-biisi. Yãmb na bãng sɩdã, la sɩdã na kɩt tɩ yãmb lebg burkĩmba. 33 Nebã leoka a Zezi n yeele: Tõnd yaa a Abraham yagense, la tõnd zɩ n yɩ ned yems ye. Bõe tɩ yãmb yetẽ tɩ tõnd na n lebga burkĩmba? 34 A Zezi leoka bãmb n yeele: Mam yeta yãmb sɩd-sɩd tɩ ned ning fãa sẽn maand yel-wẽnd yaa yel-wẽn yamba. 35 La yamb ka paad yir wakat fãa ye. La yirã bi-ribl paada be wakat fãa. 36 Dẽ, Bi-riblã sã n yols yãmba, yãmb na n yɩɩ burkĩmb meng-menga. 37 Mam miime tɩ yãmb yaa a Abraham yagense. La yãmb yaool n dat n kʋʋ maam, yãmb sẽn ka reegd mam goamã yĩnga. 38 Mam togsda bũmb ning m sẽn yã m ba wã nengẽ wã. La yãmba, yãmb maanda bũmb ning y sẽn wʋm y ba wã nengẽ. 39 Nebã leoka a Zezi n yeel tɩ bãmb ba la a Abraham. A Zezi yeela bãmb yaa: Yãmb sã n yaa a Abraham kamba, bɩ y tʋm y ba a Abraham tʋʋmã. 40 La moasã, maam, soab ning sẽn togs yãmb sɩd m sẽn wʋm Wẽnnaam nengẽ wã, yãmb baooda maam n na n kʋ. A Abraham zɩ n maan bõn-kãngã buudu. 41 Yãmb tʋmda y ba tʋʋma. Bãmb yeela a Zezi yaa: Tõnd ka tãmpĩib ye. Tõnd ba yaa a yen tãa: Yaa Wẽnnaam. 42 A Zezi yeela bãmb yaa: Wẽnnaam sã n dag n yaẽ yãmb ba, yãmb dag n na n nongẽ-la maam, bala, mam yii Wẽnnaam pʋgẽ, la m yii Wẽnnaam nengẽ n wa. Mam ka wa m toor ye, la yaa bãmb n tʋm maam. 43 Bõe tɩ yãmb ka wʋmd mam goamã võore? Yaa tɩ yãmb ka tõe n kelg mam gomd ye. 44 Yãmb ba la Sʋtãanã, la yãmb dat n pidsa y ba wã raabo. A yɩɩ nin-kʋʋd hal sɩngr wẽndẽ tɩ ta moasã, la a ka pa sɩd pʋgẽ ye, sɩd sẽn ka be yẽ pʋgẽ wã yĩnga. A sã n yagd zĩrĩ, yaa a pʋga fãa la rẽnda, bala, a yaa zĩrĩ yagda, la zĩrĩ wã ba. 45 La mam sẽn togsd sɩdã, yãmb ka tẽed maam ye. 46 Ãnna yãmb sʋkã n na n wilg maam tɩ m maana yel-wẽnde? Mam sã n togsda sɩda, bõe tɩ yãmb ka tẽed maam? 47 Wẽnnaam biig kelgda Wẽnnaam goama. Yãmb ka kelgda, yãmb sẽn ka Wẽnnaam kambã yĩnga.

A Zezi ne a Abraham

48 Zuif-rãmbã leoka a Zezi n yeele: Tõnd ka tar bʋʋm tɩ yeel tɩ fo yaa Samari neda, la tɩ zĩn n tar foom sɩda? 49 A Zezi leokame n yeele: Zĩn ka tar maam ye. Mam waoogda m ba, la yãmb paoogda maam. 50 Mam yẽ ka baood m meng waoogr ye. Ned a yen tãa n baood waoogrã, la a bʋʋd bʋʋdã. 51 Mam yeta yãmb sɩd-sɩd tɩ ned sã n tall mam gomdã, a kõn tol n ki ye. 52 Zuif-rãmbã yeela bãmb yaa: Moasã wã yẽ, tõnd miime tɩ zĩn n tar foom. A Abraham kiime, Wẽnnaam no-rɛɛsdbã me kiime, tɩ fo yaool n yetẽ tɩ ned sã n tall fo goama a kõn tol n ki ye. 53 Dẽ yĩnga, fo yɩɩda tõnd ba a Abraham, sẽn ki-a wã laa? Wẽnnaam no-rɛɛsdbã me kiime. Fo tẽedame tɩ fo yaa ãnna? 54 A Zezi leokame n yeele: Mam sã n waoogd m menga, mam waoogrã ka fɩ. Yaa m ba, soab ning yãmb sẽn boond tɩ y Wẽnnaamã n waoogd maam. 55 La yãmb ka mi bãmb ye. Mam yẽ mii bãmba. Mam sã n yeel tɩ m ka mi bãmba, mam na n yɩɩ zĩrĩ yagd wa yãmba. La mam mii bãmba, n sakd bãmb noore. 56 Yãmb ba a Abraham dag n kɩdma ne sũ-noogo, a sẽn dag n tagsd t'a na n yãa mam daarã yĩnga. A yãa-a lame, n maan sũ-noogo. 57 Zuif-rãmbã yeela a Zezi yaa: Fo nan ka ta yʋʋm pis-nu, n yaool n yã a Abraham? 58 A Zezi yeela bãmb yaa: Mam yeta yãmb sɩd-sɩd tɩ sẽn deng a Abraham dogem, mam dag n beeme. 59 Gom-kãng poorẽ, Zuif-rãmbã wʋka kug n na n lob a Zezi, la a Zezi soondame, la b yii wẽnd-doogẽ wã.

Zã 9

A Zezi maaga ned sẽn dog ne zondo

1 A Zezi sẽn loogda, b yãa dao a yen sẽn dog ne zondo. 2 Bãmb karen-biisã soka bãmb yaa: Karen-saamba, yaa ãnna soab n maan yel-wẽnd tɩ rao wã rog ne zondo? Yaa yẽ meng bii, bɩ yaa a ba-rãmbã? 3 A Zezi leokame n yeele: "Ka tɩ yaa yẽnda bɩ a ba-rãmbã n maan yel-wẽnd ye, la yaa tɩ Wẽnnaam tʋʋmã na tũnug yẽnda n puki. 4 Tõnd tog n tʋma sẽn tʋm-a maamã tʋʋma, wĩndg sẽn ket n be. Yʋng n wat tɩ ned baa a yen ka tõe n tʋm ye. 5 Mam sẽn be dũni pʋgẽ wakate, maam la dũni wã vẽenem." 6 A Zezi sẽn gom woto n sa, b tʋbsa tẽnga, n kalem tãndã ne kolkoodã tɩ lebg begdo, n dɩk n bɛ zoangã nini 7 n yeel-a t'a kẽng Siloe bãkẽ wã n tɩ widg a nenga (Siloe dat n yeelame t'a soab b sẽn tʋme). Zoangã kẽnga be n tɩ widg a nengã, la a sẽn lebg n watẽ wã, a ra neeme. 8 A yags-rãmbã ne neb nins sẽn dag n yã t'a yaa bõasã yetame yaa: Ka rao ning sẽn dag n zĩ n bõosdẽ wã la woto? 9 Neb kẽer yetame tɩ yaa yẽnda, tɩ kẽer yetẽ tɩ ayo, tɩ yaa a wẽnego. La yẽ mengã ra yetame tɩ yaa yẽnda vã. 10 Dẽ, b sok-a lame t'a ninã maana a wãn n puki? 11 A leokame n yeele: Dao ning b sẽn boond t'a Zezi wã n bui tom n bɛ mam ninã, la b yeel maam tɩ m kẽng Siloe bãkẽ wã n tɩ widg m nenga. Mam kẽngame n tɩ widg m nenga, la m ninã pukame. 12 La nebã soka rao wã yaa: Rao-kãng bee yɛ? La a leokame t'a ka mi ye.

Fariisẽ-dãmbã sokda rao wã sẽn paam maagrã

13 Nebã talla ned ning sẽn dag n ya-a zoangã n kẽng Fariisẽ-dãmbã nengẽ. 14 Yaool n dag n yaa Zuif-rãmbã vʋʋsg daar la a Zezi bui tomã n puk rao wã ninã. 15 Fariisẽ-dãmbã me soka daowã a ninã sẽn maan to-to n puki. La a yeela bãmb tɩ sẽn maag-a yẽ wã bɛɛ yẽ ninã ne tãndo, tɩ yẽ tɩ widg a nenga, la yẽ neeme. 16 Fariisẽ-dãmbã sẽn wʋm woto, kẽer yeelame tɩ rao-kãngã ka yit Wẽnnaam nengẽ ye. Bala, a ka sakd vʋʋsg daar tõodã ye. Neb a taab yeelame tɩ yel-wẽn maand tõe n yɩɩ a wãn n maan bõn-bãn a woto? 17 La welgr kẽe bãmb sʋka. B leb n soka zoangã yaa: Fo kaset yaa bõe ne ned ning sẽn puk-a fo ninã? A leokame t'a yaa Wẽnnaam no-rɛɛsa. 18 Sẽn deng b sẽn na n bool daowã ba-rãmba, Zuif-rãmbã ka tẽ tɩ rao wã dag n yɩɩ zoang t'a ninã yaool n puk ye. 19 B soka a ba-rãmbã yaa: Yaa yãmb bi-ribl la woto, tɩ yãmb yet t'a roga ne zondã? Maana a wãn t'a yãtẽ moasã? 20 A ba-rãmbã leokame n yeele: Tõnd miime t'a yaa tõnd bi-ribla, la t'a roga ne zondo. 21 La sẽn yɩ to-to t'a yãt moasã wã, tõnd ka mi ye. Tõnd ka mi ned ning sẽn puk-a a ninã me ye. Sok-y-yã-a t'a yʋʋmã seka a sẽn na gom a mengã yelle. 22 Rao wã ba-rãmbã goma a woto, tɩ bõe, b rag n zoeta Zuif-rãmbã. Bala, Zuif-rãmbã dag n seda ne taab n yeel tɩ ned sã n yeel t'a Zezi yaa Kiristã, bɩ b rig-a n yiis karen-doogẽ wã. 23 Rẽnda n kɩt t'a ba-rãmbã yeel t'a yʋʋmã waoogame la b sok-a wã. 24 Fariisẽ-dãmbã leb n boola rao ning sẽn dag n yaa-a zoangã n yeel-a: Togs sɩd Wẽnnaam waoogr yĩnga. Tõnd yẽ miime tɩ rao-kãngã yaa yel-wẽn maanda. 25 A leokame n yeele: A sã n yaa yel-wẽn maanda, mam ka mi ye. Bũmb a yen la mam mi: yaa tɩ mam dag n yaa zoanga, la tɩ moasã mam neeme. 26 B soka yẽnda yaa: A maana foom bõe? A puka fo ninã wãn-wãna? 27 Sẽn dag n yaa-a zoangã leoka bãmb n yeele: Mam zoe n togsa yãmba, la yãmb ka kelg maam ye. Bõe tɩ yãmb dat tɩ mam leb n togs yãmb yɛs tɩ y kelge? Yãmb me dat n lebga bãmb karen-biis laa? 28 Fariisẽ-dãmbã tʋʋ rao wã n yeel-a yaa: Foo la bãmb karen-biiga. Tõnd yẽ yaa a Moyiis karen-biisi. 29 Tõnd miime tɩ Wẽnnaam goma ne a Moyiis, la yõwã soaba, tõnd ka mi a sẽn yitẽ ye. 30 Rao wã leoka bãmb yaa: Sẽn lingd maam yaa tɩ yãmb ka mi a sẽn yitẽ ye. B puka mam nini. 31 Tõnd miime tɩ Wẽnnaam ka leokd yel-wẽn maandb pʋʋsg ye. La ned sã n waoogd Wẽnnaam la a tũud bãmb daabã, Wẽnnaam leokda yẽnda soaba. 32 Ned nan ka wʋm tɩ ned n puk zoang sẽn dog ne zond nin ye. 33 Dao-kãngã sã n dag n ka yitẽ Wẽnnaam nengẽ, a dag n kõn tõog n maan baa fɩ. 34 B leok-a lame n yeele: Fo yĩngã tõr bee yel-wẽn pʋgẽ, hal f rogem wakat tɩ ta moasã, tɩ fo wa yɛs n na n zãms tõndo? La b rig-a lame n yiis yɩnga.

Sɩɩg zondo

35 A Zezi wʋmame tɩ b riga rao wã n yiis karen-doogẽ wã. A Zezi yãnd-a lame n yeel-a yaa: Dẽ yĩnga, fo tẽeda Ninsaal Bi-riblã? 36 A leokame n yeele: Zu-soaba, bãmb yaa ãnna, tɩ mam na tẽ bãmba? 37 A Zezi yeel-a lame tɩ: Fo yãa-a lame, yaa sẽn gomd-a ne foomã, yaa yẽnda. 38 Dẽ, dao wã yeelame yaa: Zu-soaba, mam tẽedame. La a wõgemdame n waoog bãmba. 39 Dẽ poore, a Zezi yeela rao wã yaa: Mam waa dũni kãngã pʋgẽ bʋʋd yĩnga, tɩ neb nins sẽn ka yãtã na yã, tɩ neb nins sẽn yãtã na lebg zoense. 40 Fariisẽ-dãmb kẽer sẽn dag n be be ne a Zezi, n wʋm gom-kãensã soka bãmb yaa: Dẽ yĩnga, tõnd me yaa zoense? 41 A Zezi leoka bãmb n yeele: Yãmb sã n dag n yaẽ zoense, yãmb yel-wẽnã dag n kõn beẽ yãmb pʋsẽ ye. Moasã, yãmb yetame tɩ y yãtame. Woto, yãmb yel-wẽnã paada ne-yã.

Zã 10

Pe-kɩɩm ne a piisi

1 Mam yeta yãmb sɩd-sɩd tɩ ned ning sẽn ka tũud piisã yãgr noor n kẽedẽ, n gãndgd zĩig a to n kẽedẽ, a yaa wagdr la fãada. 2 La ned ning sẽn tũud-a yãgrã noor n kẽedẽ wã, yẽ soab la piisã pe-kɩɩma. 3 Zag-no-gũudã pakda yãgrã noor n kõ-a, la piisã wʋmda a koɛɛgã. A sẽn so piis ninsã, a boonda ned fãa ne a yʋʋre, n tall-b n yi yɩnga. 4 A sã n yiis piis nins a sẽn so wã zãnga, a lʋɩta b taoore, la piisã pʋgd-a lame, b sẽn mi a koɛɛgã yĩnga. 5 Piisã kõn tol n pʋg sãan ye, la b na n zoe n zãaga ne-a, tɩ bõe, b ka mi sãambã koees ye. 6 A Zezi wẽe yel-bũn kãngã, la b ka wʋm a võor ye.

A Zezi yaa pe-kɩɩm-sõngo

7 A Zezi leb n yeela bãmb yaa: Mam yeta yãmb sɩd-sɩd tɩ yaa maam la piisã zag-noore. 8 Neb nins fãa sẽn deng maam n wa wã yaa wagda la fãadba. La piisã ka kelg-b ye. 9 Maam la zag-noorã. Sẽn tũ-a maam n kẽ na n paama fãagre. A na n kẽedame la yita, la a na n paama yamdo. 10 Wagdr sã n wa n watẽ, yaa tɩ zu, n kʋ, la a sãame. La mam waame tɩ piisã na paam vɩɩm, la tɩ b na paam-a sõama. 11 Maam la pe-kɩɩm-sõngã. Pe-kɩɩm-sõng gẽnegda a yõor a piis yĩnga. 12 La ned ning b sẽn dɩk t'a gũud piisã, n ka pe-kɩɩmã la a ka so piisã, a sã n yã we-baag sẽn wata, a basda piisã n zoe. We-baagã kẽeda piisã n yõg-ba, la a sãeeg-ba. 13 A sẽn zoetã, yaa tɩ yaa yaood yĩng la a gũud piisã, la b yellã ka pak-a ye. Maam la pe-kɩɩm-sõngã. 14 Mam mii m piisã, la m piisã mii maam, 15 wa m ba wã sẽn mi maam tɩ mam me mi m ba wã, la mam kõta m vɩɩmã m piisã yĩnga. 16 Mam tara piis a taab sẽn ket n nan ka be yãg-kãngã pʋgẽ ye. Kal mam tall bãmb me n wa. B na n wʋma mam koɛɛga, na n yɩɩ bãgr a yembre, la pe-kɩɩm yɛnga. 17 M baaba nonga maam, tɩ bõe, mam kɩta m vɩɩma n na n leb n deeg-a. 18 Ned ka yiisd mam vɩɩmã ye, la yaa maam n kɩt-a m toore. Mam tara pãn-tõog tɩ kɩs-a, la m tara pãn-tõog me tɩ leb n deeg-a yɛsa. Noor ning m ba sẽn yeel maamã la woto. 19 Gom-kãens yĩnga, welgr leb n kẽe Zuif-rãmbã sʋka. 20 Wʋsg bãmb sʋkã yeelame yaa: Zĩn n tar a Zezi! A yaa gãeenga! Bõe tɩ yãmb kelgd-a? 21 Neb a taab yeelame yaa: Gom-kãensã ka ned zĩn sẽn tar goam ye. Dẽ yĩnga, zĩn tõe n puka zoens nini?

Zuif-rãmbã zãgsa a Zezi

22 Wakat kãng tɩ b dag n maanda bark ningr kibs Zeruzalɛm. Dag n yaa waood wẽnde. 23 A Zezi dag n bee a Salomo zãndẽ wã n kẽnda. 24 Zuif-rãmbã gũbga bãmba n yeele: Hal tɩ ta dabʋr la yãmb na n bas tõnd tɩ d yamã gõodẽ? Yãmb sã n yaa Kiristã, bɩ y togs tõnd vẽenega. 25 A Zezi leoka bãmb n yeele: Mam togsa yãmba, la yãmb ka tẽed ye. Tʋʋm nins mam sẽn maand ne m ba wã yʋʋrã kɩta mam kaseto. 26 La yãmb ka tẽed ye, tɩ bõe, yãmb ka mam piis ye. 27 Mam piisã wʋmda mam koɛɛga. Mam mi-b lame, la b pʋgda maam. 28 Mam kõt-b-la vɩɩm sẽn kõn sa. B kõn tol n sãam ye, la ned baa a yen kõn yiis-b mam nugẽ ye. 29 Mam ba sẽn kõ-a maam piisã yɩɩda fãa, la ned baa a yen ka tõe n yiis-b m baaba nugẽ ye. 30 Maam ne m ba, tõnd yaa yembre. 31 Zuif-rãmbã leb n wʋka kug n na n lob a Zezi. 32 A Zezi leb n goma ne bãmb n yeele: Mam wilga yãmb tʋʋm sõamy wʋsg sẽn yit m ba nengẽ tɩ y yãnde. Tʋʋm-sõng bʋg poorẽ la yãmb dat n lob maam kugã? 33 Zuif-rãmbã leoka bãmb n yeele: Ka tʋʋm-sõng yĩng la tõnd dat n lob yãmb kug ye, yaa Wẽnnaam tʋʋsg yĩnga. Sẽn paase, yãmb sẽn ya ninsaalã, yãmb geenda y meng wa Wẽnnaam. 34 A Zezi leoka bãmb yaa: B ka gʋls yãmb tõogã sebr pʋgẽ tɩ: "Mam yetame tɩ yãmb yaa wẽnnaam dãmb" sɩda? 35 Sã n yaa tɩ tõogã boola Wẽnnaam sẽn gom ne neb ninsã tɩ wẽnnaam dãmba (tõnd d miime tɩ ned ka tõe n sãam Wẽnnaam gʋls-sõngã ye), 36 yãmb yeta ned ning d ba wã sẽn welg toor la b tʋm-a wã t'a tʋʋsda Wẽnnaam, mam sẽn yeel tɩ m yaa Wẽnnaam bi-riblã yĩnga. 37 Mam sã n ka tʋmd m ba wã tʋʋmd bɩ y ra tẽ maam ye. 38 La mam sã n tʋmdame, baa yãmb sã n ka tẽed maam me, bɩ y tẽ tʋʋm-kãense, tɩ y tõe n bãng la y reeg tɩ d ba wã bee mam pʋgẽ, tɩ mam be bãmb pʋgẽ. 39 Nebã leb n baoome n na n yõk a Zezi, la a Zezi põsg-b lame. 40 A Zezi leb n leba Zʋrdẽ rʋʋndã, zĩig ning a Zã sẽn deng n lis nebã, la b paa be. 41 Neb wʋsg waa bãmb nengẽ n yetẽ: A Zã ka maan bõn-bãnd baa a yembr ye. La bũmb nins fãa a Zã sẽn togs ne rao-kãngã yellã yaa sɩda. 42 Neb wʋsg tẽe bãmb beene.

Zã 11

A Lazaar kũum

1 Dao a yembr n lʋɩ bãaga. A yʋʋr la a Lazaar, n be Betani. A Maari ne a ma-bi-poak a Mart dag n vɩɩ tẽn-kãnga. 2 Yaa Maari kãng n dag n kiig tɩdar kaam a Zezi zug la a yẽes bãmb nao ne a zoobdã. Yaa yẽ tão a Lazaar n lʋɩ ka-keemã. 3 Ma-bi-pogs a yiibã tʋmame tɩ b tɩ yeel a Zezi yaa: Zu-soaba, ad ned ning yãmb sẽn nongã bẽedame. 4 A Zezi sẽn wʋm woto, b yeelame tɩ bã-kãngã ka kũum bãag ye, yaa Wẽnnaam waoogr yĩnga, la tɩ Wẽnnaam bi-riblã me na n tũnuga rẽnda n paam waoogre. 5 La a Zezi yaool n dag n nonga a Mart ne a ma-bi-poakã, la a Lazaare. 6 A Zezi sẽn wʋm t'a Lazaar ka laafɩ, b kell n paa zĩig ning b sẽn dag n be wã rasem a yiib yɛsa. 7 Rẽ poore, b yeela b karen-biisã tɩ b wa tɩ b leb Zude. 8 Karen-biisã yeela a Zezi yaa: Karen-saamba, nindaarẽ ka bal la Zuif-rãmbã dag n dat n lob yãmb ne kuga, tɩ yãmb le lebd be? 9 A Zezi leokame n yeele: Yibeoog tɩ ta zaabr ka lɛɛr-dãmb piig la a yiibu? Ned sã n kẽnd wĩndga, a ka lagsd ye, bala, a nee dũni kãngã vẽenemã. 10 La ned sã n kẽnd yʋngo, a lagsdame, bala, vẽenem ka be yẽ pʋgẽ ye. 11 A Zezi sẽn gom a woto n sa, b yeela b karen-biisã yaa: Tõnd zoa a Lazaar gũsame, la mam na n kẽng n tɩ nek-a lame. 12 Karen-biisã yeela bãmb yaa: A sã n gũsame, rẽnda a na n paama a menga. 13 A Zezi dag n gomda a Lazaar kũumã yelle, la b karen-biisã dag n tẽedame tɩ yaa gõeem meng-menga. 14 Dẽ, a Zezi yeel-b-la vẽeneg yaa: A Lazaar maana kaalem. 15 La mam sũur nooma m sẽn ka zĩnd be wã yĩnga, tɩ yãmb tõe n tẽ. Wa-y tɩ d kẽng a nengẽ. 16 Dẽ, a Toma b sẽn boond tɩ Didim yeela karen-biis a taabã yaa: Wa-y tɩ d me tũ bãmb n tɩ naag n ki.

A Zezi yaa vʋʋgr la vɩɩm

17 A Zezi sẽn na n ta wã, rẽ tɩ b sẽn mum a Lazaar yaa tɩ rab-naaslẽ. 18 Betani yaool n dag n pẽe ne Zeruzalɛm sẽn zems kɩlo a tãab bala. 19 Zuif-rãmb wʋsg waa a Maari ne a Mart nengẽ n na n bels-ba, b tão wã kũum yĩnga. 20 A Mart sẽn wʋm t'a Zezi watame, a yiime n seg bãmba, la a Maari paa yir n zĩẽ. 21 A Mart yeela a Zezi yaa: Zu-soaba, yãmb sã n dag n beẽ ka, mam tão wã dag n ka na n ki ye. 22 La baa ne moasã, mam miime tɩ Wẽnnaam na n kõo yãmb bũmb ning fãa yãmb sẽn na kos bãmba. 23 A Zezi yeel-a lame t'a tão wã na n vʋʋgame. 24 A Mart leoka bãmb n yeele: Mam miime t'a na n vʋʋga vʋʋgrã wakate, yaoolem daarã. 25 A Zezi yeel-a lame yaa: Yaa maam la vʋʋgrã soaba, la vɩɩm. Ned ning fãa sẽn tẽed maam na vɩɩmde, baa a sã n zoe n kiime. 26 La ned ning fãa sẽn vɩ n tẽed maam kõn tol n ki ye. Dẽ yĩnga, fo tẽeda yõwã? 27 A Mart yeela a Zezi yaa: N-ye, Zu-soaba, mam tẽedame tɩ yãmb yaa Kirist, Wẽnnaam bi-riblã, soab sẽn tog n wa-a dũni pʋgẽ wã.

A Zezi yãbame

28 A Mart sẽn gom woto n sa, a loogame. La a boola a ma-bi-poak a Maari n soos n yeel-a tɩ Karen-saamb waame la b boond-a lame. 29 A Maari sẽn wʋm a woto, a yika tao-tao n babs a Zezi, 30 bala, a Zezi dag n nan n ka kẽ tẽngã pʋgẽ ye, b rag n ket n bee zĩig ning a Mart sẽn seg bãmbã. 31 Zuif-rãmb nins sẽn dag n be yir n belsd a Maari wã sẽn yã t'a yika tao-tao n yi wã, b pʋg-a lame, n tẽed t'a kẽnda yaoogẽ wã n na n tɩ yãbe. 32 A Maari sẽn ta zĩig ning a Zezi sẽn be wã, n yãnd bãmba, a wõgemda bãmb taoor n yeel bãmba: Zu-soaba, yãmb sã n dag n zĩndẽ ka, mam tão wã dag n ka na n ki ye. 33 A Zezi sẽn yã t'a Maari yãbdame, la tɩ Zuif-rãmb nins sẽn tũ yẽ wã me yãbdame, bãmb yĩngã sidgame, la b sũurã bõdmame. 34 A Zezi sokame ya: Yãmb ning-a-la yɛ? La b leoka a Zezi n yeele: Zu-soaba, wa n ges-y-yã. 35 A Zezi yãbame. 36 Dẽ, Zuif-rãmbã yeelame yaa: Ges-y-yã a sẽn dag n nong-a to-to! 37 Bãmb neb kẽer yeelame yaa: Bãmb sẽn puk zoangã ninã, bãmb dag n ka tõe n maan tɩ rao-kãngã ka ki laa?

A Lazaar vʋʋgre

38 A Zezi yĩngã leb n sidgame, la b kẽnga yaoogẽ wã. Dag n yaa tãn-yokẽ, tɩ b bilim kugr n yẽd a noorã. 39 A Zezi yeelame tɩ b lak kugrã. Kiidã tão a Mart yeela a Zezi yaa: Zu-soaba, a zoe n lebga yũugu, bala, a kũumã rasem a naas la rũnna. 40 A Zezi yeel-a lame yaa: Mam ka yeel foom tɩ fo sã n tẽ, fo na n yãa Wẽnnaam ziir sɩda? 41 Dẽ, nebã laka kugrã, la a Zezi nak n gesa yĩngr n yeele: M ba, mam pʋʋsda yãmb barka, y sẽn leok mam kosgã yĩnga. 42 Mam yẽ miime tɩ yãmb leokda mam kosg wakat fãa, la yaa neb kʋʋngã sẽn be ka wã yĩng la mam gomda, tɩ b na tẽ tɩ yaa yãmb n tʋm maam. 43 A Zezi sẽn gom woto n sɛ, b goma ne pãng n yeele: Lazaar, wa yi ka! 44 La sẽn dag n ki-a wã yiime, la a nao wã ne a nusã vila ne pɛɛla, la a nengã dag n luda ne peende. A Zezi yeela nebã tɩ b lood a pɛɛlã, la b bas-a t'a looge.

Kãsem-dãmbã baooda sor n na n kʋ a Zezi

45 Zuif-rãmb nins sẽn dag n wa a Maari nengẽ, n yã bũmb nins a Zezi sẽn maanã, wʋsg tẽe bãmba. 46 La neb kẽer kẽngame n tɩ yã Fariisẽ-dãmbã n togs-b bũmb ning a Zezi sẽn maanã. 47 Dẽ, maan-kʋʋdbã kãsem-dãmba, la Faariisẽ-dãmbã tigsa kaorengã yɛl bʋ-bʋʋdbã n yeele: Tõnd na n maana a wãna? Rao wã maanda bõn-bãn wʋsgo. 48 Tõnd sã n bas-a t'a ket n maandẽ, nebã fãa na n tẽe-a lame, la Rome dãmbã na n waa n sãama tõnd wẽnd-doogã ne d soolmã. 49 Bãmb ned a yembre, a Kayif, sẽn dag n ya-a maan-kʋʋd kãsem yʋʋm kãngã yeel-b lame yaa: Yãmb ka wʋmd yellã baa fɩ. 50 Yãmb ka ne tɩ ned a yen sã n ki nebã fãa yĩng tɩ soolmã tõr da sãam n são? 51 Mik ka ne a mengã yam la a gom a woto ye. A sẽn dag n ya maan-kʋʋd kãsem yʋʋm kãngã, a togsa bãngr gomd n wilg t'a Zezi tog n kii bãmb soolmã yĩnga. 52 La ka bãmb soolmã yĩng bal ye, la yaa sẽn na yɩlẽ me n tigim Wẽnnaam kambã sẽn sãeegã, tɩ b lebg yĩng a yembre. 53 Sẽn sɩng ne da-kãnga, Zuif-rãmbã yãka yam tɩ kʋ a Zezi. 54 Dẽ, a Zezi da ka leb n pukd b meng n kẽnd Zuif-rãmbã sʋk ye. La bãmb yii be n kẽng zĩig sẽn pẽ ne we-rasempʋɩɩgã, tẽng b sẽn boond tɩ Efrayim pʋgẽ. Bãmb zĩnda be ne b karen-biisã. 55 Zuif-rãmbã zʋʋg-n-bas kibsa dag n kolgame, la tẽngã neb wʋsg kẽnga Zeruzalɛm, sẽn deng kibsã, n na n tɩ yɩlg b mense. 56 B dag n baooda a Zezi la b yet taab wẽnd-doogẽ wã yaa: Yãmb tagsg yaa bõe ne b yellã? B na n kell n paame n ka wa kibsã? 57 Mik maan-kʋʋdbã kãsem-dãmbã ne Fariisẽ-dãmbã dag n yeela nebã tɩ ned sã n bãng a Zezi zĩiga, bɩ a wa n wilg tɩ b tɩ yõk-ba.

Zã 12

A Maari kiiga a Zezi kaam

1 Zʋʋg-n-basã kibs sẽn ket tɩ rasem a yoobe, a Zezi waa Betani, tẽng ning a Lazaar bãmb sẽn vʋʋg-a t'a yi n bas kũumã sẽn be wã. 2 La b segla rɩɩb be bãmb yĩnga. A Mart dag n pʋɩta rɩɩbã, la a Lazaar dag n naaga ne neb nins sẽn zĩ ne a Zezi n dɩtẽ wã. 3 A Maari dɩka tɩdar sẽn maan ne naar halaale, n tat litr pʋɩ-sʋka, t'a ligd ya wʋsgo, n waal a Zezi nao wã, n yẽes-b ne a zoobdo. La doogã fãa lebga tɩdarã yũugu. 4 A Zezi karen-biig a yembre, a Zudas Iskaryo, soab ning sẽn na n zãmb-a bãmbã yeelame yaa: 5 Bõe tɩ b ka koos tɩdarã deniye kobs-tã n kõ naong rãmba? 6 A sẽn gom woto wã, ka t'a kʋmda naong rãmbã ye. Yaa t'a dag n yaa wagdre, la yẽ sẽn zãad ligdã korgã, b sã n ning bũmb be fãa, a vaagd-a lame. 7 La a Zezi yeelame yaa: Bas-y pagã t'a bĩng tɩdar-kãngã mam mumb yĩnga. 8 Naong rãmbã bee ne yãmb wakat fãa, la yãmb kõn paam tɩ mam be ne yãmb wakat fãa ye.

B baoome tɩ kʋ a Lazaare

9 Zuif-rãmbã wʋsg wʋmame t'a Zezi bee Betani, la neb kʋʋng waa be. B sẽn wa wã, ka a Zezi yĩng bal ye, la yaa tɩ yã a Lazaar a Zezi sẽn vʋʋg t'a yi kũum sʋkã. 10 Maan-kʋʋdbã kãsem-dãmb yẽsa ne taab n na n kell n kʋ a Lazaar me, 11 bala, Zuif-rãmbã wʋsg basda bãmba n tẽed a Zezi, a Lazaar yĩnga.

A Zezi kẽeda Zeruzalɛm ne naam

12 Vẽkembeoogo, neb kʋʋng wʋsgã sẽn wa Zeruzalɛm kibsã yĩngã wʋmame t'a Zezi kẽeda Zeruzalɛm. 13 B kaoo koms vãad n yi n seg bãmba, n kelemdẽ n yetẽ tɩ: Hozaana, bark bee ned ning sẽn wat ne Zu-soabã yʋʋre, Israyɛll Rĩmã zugu. 14 A Zezi yãa bõn-bila, n zomb-a wa b sẽn gʋlsã. B gʋlsame n yeele: 15 Siyõ neba, da maan-y rabeem ye. Ad yãmb Rĩma zomba bõan-bil n watẽ. 16 Bãmb karen-biisã ka wʋm ada võor sɩngrẽ wã ye. La a Zezi sẽn wa n paam waoogrã, karen-biisã yaool n tẽegame tɩ b dag n gʋlsa yel-kãens yell a Zezi wɛɛngẽ, la tɩ nebã pidsa sẽn gʋlsã. 17 Neb kʋʋngã sẽn dag n be ne a Zezi wakat ning bãmb sẽn bool a Lazaar yaoogẽ wã, n vʋʋg-a t'a yi kũumẽ wã kɩsa a Zezi kaseto. 18 Rẽ n kɩt tɩ nebã yi n seg bãmbã, bala, b wʋmame t'a Zezi maana bõn-bãn kãnga. 19 Dẽ, Fariisẽ-dãmbã yeela taab yaa: Yãmb neeme tɩ y ka tõogd baa bilf ye. Nebã fãa pʋgda bãmba.

Gɛrk-rãmb dat n yãa a Zezi

20 Gɛrk-rãmb n dag n be neb nins sẽn wa Zeruzalɛm n na n pʋʋs Wẽnnaam kibsã wakatã sʋka. 21 Bãmb kolga Galile Betsayida ned a Filip n kos-a n yeele: Kãsma, tõnd dat n yãa a Zezi. 22 A Filip kẽngame n tɩ togs a Ãndre, la bãmb b yiibã kẽngame n tɩ togs a Zezi. 23 A Zezi leoka bãmb a woto: Wakat taame tɩ ninsaal Bi-riblã tog n paam waoogre. 24 Mam yeta yãmb sɩd-sɩd tɩ ka-buug sã n ka kẽ tãndẽ n pa be n ki, a paada a yembre. La a sã n ki, a womda biis wʋsgo. 25 Ned ning sẽn nong a vɩɩm menesd-a lame. La ned ning sẽn na kisg a vɩɩm dũni kãngã pʋgẽ, a na n bĩng-a lame wakat sẽn kõn sa wã yĩnga. 26 Ned sã n dat n tʋm mam yĩnga, a tog n tũu maam. La mam sẽn be zĩig ninga, mam tʋmtʋmd me na n bee be. Ned sã n tʋmd mam yĩnga, m ba na n waooga a soaba.

Yaa tɩlɛ tɩ b zẽk Ninsaal Bi-riblã

27 Moas-moasã wã, sũ-bõdem n tar maam. La mam na n yeelame tɩ bõe? Mam na n kosa m ba tɩ b kɩt tɩ m põs to-kãngã? La hal tɩ ta moasã, yaa rẽnda yĩng la mam wa-yã. 28 M ba, waoog-y y yʋʋrã! Dẽ, koɛɛg zĩnda yĩngr n yeele: Mam waooga m yʋʋrã, la m na n le waoog-a lame yɛsa. 29 Neb kʋʋngã sẽn dag n yas be, n wʋm koɛɛgã dag n yetame tɩ yaa sa-tãsga. Neb a taab dag n yetame tɩ malɛk n gom ne a Zezi. 30 A Zezi leb n gomame n yeele: Ka mam yĩng la koɛɛgã sẽn gom tɩ yãmb wʋmã ye, yaa yãmb yĩnga. 31 Moasã yaa dũni kãngã bʋʋd wakate. Moasã, b na n yiisa dũni kãngã naabã n bas yɩnga. 32 La b sã n wa n zẽk maam tɩ m bas tẽn-gãongã, mam na n taka nebã fãa tɩ b wa m nengẽ. 33 A Zezi goma a woto n na n wilg kũum ninga buud bãmb sẽn na n ki wã. 34 Kʋʋngã leoka bãmb n yeele: A Moyiis tõogã wilga tõnd tɩ Kiristã paada wakat sẽn kõn sa. Bõe tɩ yãmb yetẽ tɩ yaa tɩlɛ tɩ b zẽk Ninsaal Bi-ribla? Ninsaal Bi-ribl kãng yaa ãnna? 35 A Zezi yeel-b lame yaa: Vẽenemã ket n bee yãmb sʋk wakat bilf yĩnga. Yãmb sẽn tar vẽenemã wakate, bɩ y kẽne, tɩ lik bida da wa n ling yãmb ye. Sẽn kẽnd-a lik bida pʋgẽ ka mi a sẽn dabdẽ ye. 36 Wakat ning yãmb sẽn tar vẽenemã, bɩ y tẽ-a, tɩ y na lebg vẽenem kamba. A Zezi yeela rẽnda, la b loog n zãag ne nebã n tɩ soonde.

Zuif-rãmbã ka-tẽebo

37 Baa ne a Zezi sẽn maan bõn-bãn wʋsg a woto nebã taoorã, b ka tẽ bãmb ye, 38 tɩ gomd ning Wẽnnaam no-rɛɛs a Ezayi sẽn yeelã pidi. A yeelame yaa: Zu-soaba, ãnna n tẽ koɛɛg ning tõnd sẽn moonã? La Zu-soabã pãng puka ne ãnna? 39 Sẽn paase, b ka tõe n tẽ ye, tɩ bõe, a Ezayi leb n yeela a woto: 40 Wẽnnaam luda b ninã, la b keng b sũyã, tɩ b da wa n yã ne b ninã, tɩ b da tags n wʋm a võore, la tɩ b da wa n tek yam, tɩ mam maag-b ye. 41 Yaa woto la a Ezayi gom wakat ning a sẽn yãnd a Zezi ziirã n gom bãmb yellã. 42 Baoosgo, baa nanamsã sʋka, wʋsg tẽe a Zezi, la Fariisẽ-dãmbã yĩnga, b ka sak n togs tɩ b tẽedame ye, tɩ b da wa n dig-b n yiis karen-doogẽ wã ye. 43 Bala, b dag n nonga ninsaalbã waoogr n yɩɩd Wẽnnaam sẽn na n waoog bãmbã.

A Zezi goamã kaoo nebã bʋʋdo

44 A Zezi zẽka b koɛɛg n yeele: Sẽn tẽed-a maam ka tẽed maam ye, yaa sẽn tʋm-a maamã la a tẽeda, 45 la sẽn yãt-a maam yãta sẽn tʋm-a maamã. 46 Mam sẽn ya vẽenemã, mam waa dũni pʋgẽ, tɩ ned ning fãa sẽn tẽed maam kõn pa lik pʋgẽ ye. 47 Ned sã n wʋm mam goamã n ka reege, ka maam n bʋʋd a soabã bʋʋd ye: Bala, mam sẽn wa wã, ka tɩ bʋ dũni nebã bʋʋd ye, la yaa tɩ fãag-ba. 48 Sẽn tõdg-a maam la a ka reegd mam goamã, a tara a bʋ-kaooda: goam nins mam sẽn goma n na n kao yẽ bʋʋd yaoolem daare. 49 Bala, mam goamã ka yit mam nengẽ ye. La m ba, sẽn tʋm-a maamã, bãmb b toor n wilg maam m sẽn tog n yeel la m gome. 50 La mam miime tɩ bãmb noorã yaa vɩɩm sẽn kõn sa. Woto, bũmb nins mam sẽn gomdã, yaa wa m ba sẽn yeel maamã.

Zã 13

A Zezi waasa b karen-biis nao wã

1 Sẽn deng zʋʋg-n-basã kibsã, a Zezi sẽn mi tɩ bãmb wakat taame tɩ yi dũni kãngã n kẽng b ba nengẽ wã, bãmb nonga b nebã sẽn dag n be dũni pʋgẽ tɩ bãmb nongẽ wã, hal ne nonglem tɛkẽ. 2 Rɩɩbã wakate, rẽ tɩ Sʋtãanã dag n ninga a Sɩmo biig a Zudas sũurẽ t'a zãmb a Zezi n yõk n kõ. 3 A Zezi sẽn mi tɩ b ba wã ninga bũmb fãa bãmb nugẽ, la b mi tɩ bãmb yii Wẽnnaam nengẽ n wa, la tɩ b le lebda beene wã, 4 b yik n basa rɩɩbã, n yees b futã, la b rɩk peend n sẽbg b sɛɛga. 5 Rẽ poore, b pʋdga koom laagẽ, n sɩng n waasd b karen-biisã nao la b yẽesd-b ne peendã sẽn sẽbg bãmb sɛɛgã. 6 Bãmb taa a Sɩmo Pɩyɛɛr, la a yeela bãmb yaa: Zu-soaba, yãmb n na n waas mam nao wã? 7 A Zezi leoka yẽnda n yeele: Fo ka wʋmd mam sẽn maandã võor moasã ye, la sã n yɩ bilfu, f na yaool n wʋme. 8 A Pɩyɛɛr yeela a Zezi yaa: Ayo! Yãmb kõn waas mam nao abada! A Zezi leoka yẽnda n yeele: Mam sã n ka waas foom, fo kõn le paam baa fɩ mam nengẽ ye. 9 A Sɩmo Pɩyɛɛr yeela bãmb yaa: Ka mam nao wã bal la y na n waas ye, yaa ne m nusã la m zugã me. 10 A Zezi yeela a Pɩyɛɛr yaa: Sẽn so-a koom ka le baood soobo, sã n ka nao wã waoosg bal ye. Bala, a yĩngã tõr yaa yolgemde. Yãmb yaa yoalgema, la ka yãmb fãa ye. 11 Sɩd me, bãmb dag n mii ned ning sẽn na n zãmb-a bãmbã. Dẽnda n kɩt tɩ bãmb yeel tɩ ka karen-biisã fãa n ya yoalgem ye. 12 A Zezi sẽn waas b karen-biisã nao n sa, la b lebs n yeelg b futã, b leb n zĩnda rɩɩbẽ wã n yeel b karen-biisã yaa: Yãmb wʋma mam sẽn maan yãmbã võore? 13 Yãmb boonda maam tɩ karen-saamba la Zu-soaba, la yãmb sẽn yetã zemsame, bala, mam sɩd yaa a boto. 14 Dẽ, mam sẽn ya Zu-soab la Karen-saambã sa n waasa yãmb nao wã, yãmb me tog n waasa taab nao wã. 15 Bala, yaa mamsg la mam kõ yãmba, tɩ yãmb me na maan wa mam sẽn maan yãmbã. 16 Mam yeta yãmb sɩd-sɩd tɩ tʋmtʋmd ka yɩɩd a zu-soab ye, la tẽn-tʋmd me ka yɩɩd sẽn tʋm-a yẽ wã ye. 17 Yãmb sã n mi rẽnda, yãmb yaa sũ-noog rãmba, yãmb sã n maand a woto. 18 Ka yãmb fãa yell la mam sẽn gomdã ye. Mam mii neb nins mam sẽn tũusã. La yaa tɩlɛ tɩ bũmb ning sẽn gʋls Wẽnnaam gʋls-sõamyã pʋgẽ wã pidsi. B yeela be tɩ: "Ned ning sẽn wãbd-a bur ne maamã wẽneg n zabda ne maam." 19 Mam pĩnd n togsa yãmb moasã, sẽn deng a pidsgu, t'a sã n wa n pidsi, bɩ yãmb tẽ tɩ mam yaa m sẽn ya. 20 Mam yeta yãmb sɩd-sɩd tɩ ned sã n deeg mam sẽn tʋm a soaba, a reega maam, la sẽn deeg-a maam deega sẽn tʋm-a maamã.

A Zezi togsame tɩ ned n na n zãmb bãmba

21 A Zezi sẽn gom woto n sa, sũ-sãoong yõka bãmba, la b yeelame yaa: Sɩd-sɩda, mam yeta yãmb tɩ yãmb ned a yembr n na n yõk maam n kõ. 22 Bãmb karen-biisã dag n geta taab n sokd a Zezi sẽn gomd ned ningã yelle. 23 A Zezi karen-biig a yembre, soab ning bãmb sẽn dag n nongã dag n kɩɩ kãntɩɩg rɩɩbã zĩigẽ n yegl a Zezi. 24 A Sɩmo Pɩyɛɛr kamsa yẽnda n yeel-a t'a sok a Zezi tɩ yaa ãnna yell la bãmb sẽn gomdã. 25 Karen-bi-kãng kɩlla a Zezi yãoogẽ n yeel-b yaa: Zu-soaba, yaa ãnna? 26 A Zezi leoka yẽnda n yeele: Yaa ned ning mam sẽn na n suk bur-gɩrg n kõ-a wã. Bãmb suka bur-gɩrgã n kõ Iskaryo Sɩmo biig a Zudas. 27 A Zudas sẽn deeg burã bal la Sʋtãanã sẽn kẽ yẽnda. A Zezi yeel-a lame: Fo sẽn na n maan bũmb ningã, maan-a tao-tao. 28 La neb nins sẽn dag n zĩ be n dɩtẽ wa, baa a yen ka wʋm a Zezi sẽn yeel a Zudas woto wã võor ye. 29 Sɩd me, sẽn dag n ya a Zudas n zãad bãmb ligdã, kẽer tagsame t'a Zezi yet-a lame t'a ra bũmb nins bãmb sẽn tog n paam kibsã yĩnga, wall t'a kõ naong rãmbã bũmbu. 30 A Zudas deega bur-gɩrgã n kell n yik n yi. Dag n yaa yʋngo.

Tõ-paalga

31 A Zudas sẽn yi, a Zezi yeelame yaa: Ninsaal bi-riblã paama waoogr moasã, la Wẽnnaam paama waoogr bãmb pʋgẽ. 32 Wẽnnaam sã n paam waoogr bãmb pʋgẽ, Wẽnnaam me na n waooga bãmb b mengã pʋgẽ, la keta bilf bal tɩ b waoog-ba. 33 M kom-bõonego, mam sẽn ket n be ne yãmbã, yaa wakat bilf bal yĩnga. Yãmb na n baoo maam, la a wa mam sẽn dag n yeel Zuif-rãmbã tɩ bãmb ka na n tõog n wa mam sẽn dabdẽ wã, mam yeta yãmb woto me moasã. 34 Mam kõta yãmb tõ-paalga: Nong-y taaba. Nong-y taab me wa mam sẽn nong yãmbã. 35 Yãmb sã n tall nonglem taab yĩnga, nebã fãa na bãng tɩ yãmb yaa mam karen-biisi.

A Zezi pĩnd n togsa a Pɩyɛɛr kɩɩsgo

36 A Sɩmo Pɩyɛɛr yeela bãmb yaa: Zu-soaba, yãmb dabda yɛ? A Zezi leokame n yeele: Fo ka tõe n pʋgl maam n kẽng m sẽn dabdẽ wã moasã ye, la kaoosg pʋgẽ, fo na pʋgl n wa. 37 A Pɩyɛɛr yeela bãmb yaa: Zu-soaba, bõe yĩng tɩ mam ka tõe n pʋgl yãmb moasã? Mam na n saka kũum yãmb yĩnga. 38 A Zezi leokame n yeele: Fo na n saka kũum mam yĩnga. Sɩd-sɩdã, mam yeta foom tɩ no-raoog kõn kelem tɩ fo ka kɩɩs naoor a tãab tɩ f ka mi maam ye.

Zã 14

A Zezi yaa sore

1 Da sak-y tɩ y sũyã sãam ye. Tẽ-y Wẽnnaam, la y tẽ maam me. 2 Zĩnd-zĩis yaa wʋsg m ba wã yiri, sã kaẽ dẽ, mam dag n na n yeela yãmba. Bala, mam dabdame n na n tɩ segl zĩig yãmb yĩnga. 3 Dẽ, mam sã n kẽng n tɩ segl zĩig yãmb yĩnga, mam na n lebg n waa n peega yãmba, tɩ yãmb na be ne maam zĩig ning mam sẽn na n zĩndã. 4 Yãmb mii mam sẽn dabd zĩig ningã sore. 5 A Toma yeela bãmb yaa: Zu-soaba, tõnd ka mi yãmb sẽn dabdẽ ye. Dẽ, tõnd na n yɩɩ a wãn n bãng a sore? 6 A Zezi yeela yẽ yaa: Maam la sore, la sɩda, la vɩɩm. Ned baa a yen ka tõe n wa m baaba nengẽ tɩ ka tũ ne maam ye. 7 Yãmb sã n dag n miẽ maam, yãmb dag n na miẽ m baaba me. La sẽn sɩng ne moasã, yãmb mii bãmba, la yãmb yãa bãmba. 8 A Filip yeela bãmb yaa: Zu-soaba, wilg-y tõnd y ba wã, la rẽ na sek tõndo. 9 A Zezi yeela yẽ yaa: Filip, mam sẽn be ne yãmb kaoosa wʋsgo, tɩ fo ket n nan ka bãng maam? Sẽn yã-a maam yãnda m baaba. Yɩta a wãn tɩ fo yet maam tɩ m wilg yãmb m baaba? 10 Fo ka tẽed tɩ mam bee m ba wã pʋgẽ, tɩ m ba wã be mam pʋgẽ laa? Goam nins mam sẽn gomd ne yãmbã ka yit mam meng nengẽ ye. M ba sẽn be mam pʋgẽ wã n maand b tʋʋma. 11 Mam sẽn yet tɩ mam bee m ba pʋgẽ, tɩ m ba wã be mam pʋgẽ wã, tẽ-y rẽnda, wall n tẽ maam tʋʋm kãsems kãensã yĩnga. 12 Sɩd-sɩdã, mam yeta yãmb tɩ ned ning sẽn tẽed maam me na n tʋma tʋʋm nins mam sẽn tʋmdã, la a na n tʋma tʋʋm kãsems n yɩɩda, tɩ bõe, mam dabda m ba nengẽ, 13 la bũmb nins fãa yãmb sẽn na kos ne mam yʋʋre, mam na n maan-b lame, tɩ m ba wã paam ziir b biigã pʋgẽ. 14 Yãmb sã n kos maam bũmbu, mam na maane.

A Zezi kãabame tɩ b na n tʋma Sɩɩg-sõngo

15 Yãmb sã n nong maam, y na n saka mam tõodã, 16 la maam, mam na n bõosa m baaba, la b na n kõo yãmb sõangd a to tɩ b pa ne yãmb wakat sẽn kõn sa. 17 Sõangd kãng yaa sɩd Sɩɩg dũni sẽn ka tõe n deege, a sẽn ka ne bãmba la a ka mi-bã yĩnga. La yãmba, yãmb mii bãmba, bala, b bee ne yãmba, la b na n zĩnda yãmb pʋsẽ. 18 Mam ka na n bas yãmb kɩɩbd ye, mam na n waa yãmb nengẽ. 19 Bilf bal sã n paase, dũni kõn leb n yã maam ye. La yãmb yẽ na yã maam. Bala, mam vɩɩme, la yãmb me na n vɩɩme. 20 Badaare, yãmb na bãng tɩ mam bee m ba pʋgẽ, tɩ yãmb be mam pʋgẽ, tɩ mam be yãmb pʋsẽ. 21 Ned ning sẽn talld-a mam tõodã n sakd-ba, yaa yẽ soab n nong maam. M ba na n nonga ned ning sẽn nong-a maam, la mam me na n nong-a lame, la m na n puka m meng ne-a. 22 A Zuud, sẽn ka a Iskaryo yeela bãmb yaa: Zu-soaba, yɩta a wãn tɩ yaa ne tõnd la yãmb tog n puk y menga, la ka ne dũni wã? 23 A Zezi leoka yẽ yaa: Ned sã n nong maam, a na n saka mam gomde, la m baaba na n nonga a soaba. Tõnd na n waa yẽ nengẽ, n zĩnd yẽ pʋgẽ. 24 Ned ning sẽn ka nong-a maam ka sakd mam goam ye. La gomd ning yãmb sẽn wʋmdã ka mam gomd ye, la yaa m ba, sẽn tʋm-a maamã gomde. 25 Mam goma ne yãmb bõn-kãng yelle, mam sẽn ket n be ne yãmb wakate. 26 La sõangdã, Sɩɩg-sõngã m ba sẽn na n tʋm ne mam yʋʋrã, yaa bãmb n na n zãms yãmb bũmb fãa, la b tẽeg yãmb bũmb nins fãa mam sẽn yeel yãmbã. 27 Mam basda laafɩ ne yãmba. Mam kõta yãmb m laafɩ. Mam ka kõt yãmb wa dũni wã sẽn kõtã ye. Bɩ y ra maan yɩɩr wall y yɛɛs ye. 28 Yãmb wʋma mam sẽn yeel yãmb tɩ m na n loogame la m na n lebg n waa yãmb nengẽ wã. Yãmb sã n da nongẽ maam, y dag n na maanẽ sũ-noogo, mam sẽn dabd m ba nengẽ wã yĩnga. Bala, m baaba yɩɩda maam. 29 Mam togsa yãmb bõn-kãens tɩ b nan ka ta ye, tɩ b sã n wa n pidsi, bɩ y tẽ. 30 Mam ka na n tol n leb n gom ne yãmb yɛs ye, bala, dũni naabã watame. A baa fɩ ka be mam pʋgẽ ye. 31 La yaa tɩ dũni na bãng tɩ mam nonga m ba, la tɩ mam maanda wa m ba sẽn yeel maamã. Yik-y tɩ d loog ka.

Zã 15

A Zezi yaa nasaar sib tɩɩg sɛɛg meng-menga

1 Mam yaa nasaar sib tɩɩg sɛɛg meng-menga, la m baaba yaa nasaar sib pʋ-koaada. 2 Will ning fãa sẽn tão mam zug n yaool n ka womd biisi, m baaba kʋrgd-a lame. La b na n yosa will ning fãa sẽn womd biisi, t'a tõe n wom n paase. 3 B zoe n yosa yãmba, gomd ning mam sẽn togs yãmbã yĩnga. 4 Pa-y mam pʋgẽ, wa mam sẽn paad yãmb pʋsẽ wã. A wa nasaar sib tɩɩg will sẽn ka tõe n wom biis a toore, a sã n ka kell n tong ne tɩɩgã sɛɛgã, woto me, yãmb ka tõe n wom biisi, y sã n ka pa mam pʋgẽ ye. 5 Maam la nasaar sib tɩɩgã sɛɛga, tɩ yãmb ya wilã. Ned ning sẽn paad mam pʋgẽ, tɩ mam paad a soab pʋgẽ womda biis wʋsgo. Bala, sã n ka ne maam, yãmb ka tõe n maan baa fɩ ye. 6 Ned sã n ka paad mam pʋgẽ, b na n lob-a-la yɩng wa nasaar sib tɩɩg willã, la a na n kʋɩɩme. La b wʋkda wilã n tugund bugum, la bugmã rɩt-b lame. 7 Yãmb sã n pa mam pʋgẽ, tɩ mam goamã pa yãmb pʋgẽ, bɩ y kos bũmb ning fãa y sẽn data, la b na kõ yãmba. 8 Yãmb sã n wom biis wʋsgo, m baaba na n paama waoogre, la yãmb na n yɩɩ mam karen-biisi. Nasaar sib ne a tɩɩga (15.1) 9 Mam me nonga yãmb wa m ba sẽn nong maamã. Pa-y mam nonglemã pʋgẽ. 10 Yãmb sã n tall mam tõodã, yãmb na n paa mam nonglemã pʋgẽ, wa mam me sẽn tall m baaba tõod n be bãmb nonglem pʋgẽ wã. 11 Mam goma ne yãmb a woto, tɩ mam sũ-noogã na zĩnd yãmb pʋgẽ, la tɩ y sũ-noogã na pidi. 12 Ad mam tõogo: Nong-y taab wa mam sẽn nong yãmbã. 13 Nonglem ka be ninsaal yĩnga, n yɩɩd tɩ kõ f vɩɩm f zo-rãmb yĩng ye. 14 Yãmb sã n maan bũmb nins mam sẽn yet yãmbã, yãmb yaa mam zo-rãmba. 15 Mam ka boond yãmb tɩ tʋmtʋmdb ye, tɩ bõe, tʋmtʋmd ka mi a zu-soab sẽn maand ye. Mam boola yãmb tɩ m zo-rãmba, tɩ bõe, mam kɩtame tɩ yãmb bãng bũmb nins fãa m ba sẽn togs maamã. 16 Ka yãmb n yãk maam ye, yaa maam n yãk yãmba, n ning m tʋʋmd yãmb zutu, tɩ yãmb na kẽng n wom biisi, la tɩ yãmb biisã na pa wakat fãa. Woto, bũmb ning fãa yãmb sẽn na kos m baaba ne mam yʋʋre, b na kõ yãmba. 17 Bũmb ning mam sẽn yet yãmb tɩ y maane, yaa tɩ y nong taaba.

Dũni wã kisa a Zezi ne b karen-biisã

18 Dũni neb sã n kis yãmba, bãng-y tɩ b reng n kisga maam. 19 Yãmb sã n dag n ya dũni rẽnda, dũni neb dag n na nong bũmb nins dũni sẽn so. La yãmb sẽn ka dũni rẽnda, n paas mam sẽn tũus yãmb n yiis dũni neb sʋkã yĩnga, dũni rãmb kisa yãmba. 20 Tẽeg-y gomd ning mam sẽn yeel yãmbã. Mam yeela yãmb tɩ tʋmtʋmd ka yɩɩd a zu-soab ye. B sã n namsa maam, b na n namsa yãmb me. B sã n deega mam goama, b na n deega yãmb goam me. 21 La b na n maana yãmb bõn-kãensã fãa mam yʋʋrã yĩnga, tɩ bõe, b ka mi sẽn tʋm-a maamã ye. 22 Mam sã n dag n ka waẽ, la m dag n ka gomẽ ne-ba, beegr dag n kõn zĩnd b zut ye. La moasã, b ka tar padeng sẽn na n padem b yel-wẽnã yĩng ye. 23 Sẽn kis-a maam kisa m baaba me. 24 Mam sã n dag n ka maanẽ tʋʋm nins ned baa a yen sẽn nan ka maan bãmb sʋkã, beegr dag n kõn zĩnd b zut ye. Moasã, b yãa mam tʋʋmã, la b kisga maam ne m ba wã fãa. 25 La beemã kẽeme, tɩ bũmb ning sẽn gʋls bãmb tõogã pʋgẽ wã pidsi. A yeela be yaa: "Bãmb kisga maam zaalem bala." 26 Sõangdã mam sẽn na n deeg m ba nengẽ n tʋm yãmbã, sɩd Sɩɩgã sẽn yit m ba pʋgẽ wã sã n wa, b na n kɩsa mam kaseto, 27 la yãmb me na n kɩsa mam kaseto, yãmb sẽn be ne maam hal sɩngr wẽndẽ wã yĩnga.

Zã 16

1 Mam goma ne yãmb a woto tɩ bũmb da wa kɩt tɩ yãmb lʋɩ ye. 2 B na n diga yãmb n yiis karen-dotẽ wã, la wakat pʋs n watame tɩ ned ning fãa sẽn na n kʋ-a yãmb na tẽ tɩ yẽ maanda Wẽnnaam tʋʋmde. 3 B na n maana a woto, tɩ bõe, b ka bãng m baaba, wall maam ye. 4 Mam goma ne yãmb a woto, tɩ wakat sã n wa ta, bɩ yãmb tẽeg tɩ mam dag n yeela yãmba. Mam ka yeel yãmb ada hal sɩngrẽ ye, tɩ bõe, mam dag n bee ne yãmba.

Sɩɩg-sõng tʋʋma

5 Moasã, mam lebda sẽn tʋm-a maamã nengẽ, la yãmb ned baa a yen ka sokd maam tɩ mam dabda yɛɛne ye. 6 La mam sẽn gom ne yãmb bõn-kãng yellã yĩnga, sũ-sãoong n pid yãmba. 7 Baoosgo, mam yeta yãmb sɩd tɩ mam loogr n são yãmb yĩnga. Bala, mam sã n ka kẽnge, sõangdã ka na n wa yãmb nengẽ ye. La mam sã n kẽnge, mam na n tʋm-b lame n kõ-yã. 8 La b sã n wa, b na n kɩtame tɩ dũni neb sak n deeg yel-wẽnã yelle, la tɩrlem yelle, la bʋʋd yelle. 9 B na n sak n deega yel-wẽnã yellã, tɩ bõe, b ka tẽed maam ye. 10 B na n deega tɩrlmã yellã, tɩ bõe, mam dabda m baaba nengẽ, la tɩ yãmb ka na n leb n yã maam yɛs ye. 11 B na n deega bʋʋdã yellã, tɩ bõe, dũni-kãngã naabã bʋʋd kaoome. 12 Bũmb wʋsg la mam ket n tar n na n togs yãmba, la yãmb ka tõe n wʋm-b moasã ye. 13 La sɩd Sɩɩgã sã n wa, b na n tɛɛ yãmb sɩdã fãa pʋgẽ. Bala, b ka na n gom b sẽn dat ye, b na n togsa yãmb bũmb nins b sẽn wʋme, la b na n togsa yãmb bũmb sẽn be taoor n watẽ. 14 Bãmb na n waooga maam, tɩ bõe, b na n dɩka bũmb nins sẽn ya mam deng n togs yãmba. 15 M ba sẽn tar fãa yaa maam n so. Dẽ n kɩt tɩ mam yeel tɩ sɩd Sɩɩgã na n dɩka bũmb nins sẽn ya mam dend n togs yãmbã.

Sũ-sãoong na n lebga sũ-noogo

16 Sã n yɩ bilfu, yãmb ka na n leb n yã maam ye, la sã n leb n yɩ bilf n paase, yãmb na n le yãa maam, tɩ bõe, mam dabda m ba nengẽ. 17 Dẽ, bãmb karen-biisã yeela taab yaa: Bãmb sẽn yeel tɩ sã n yɩ bilfu tõnd ka na n leb n yã bãmba, la sã n leb n yɩ bilf n paase tõnd na n leb n yãa bãmbã, n leb n yeel tɩ b dabda b ba nengẽ wã, a võorã yaa bõe? 18 Dẽ, karen-biisã yeelame yaa: Bõe gomd la b sẽn gomdã? "Sã n yɩ bilfu?" Tõnd ka mi b sẽn gomd bũmb ning yell ye. 19 A Zezi sẽn dag n mi tɩ b karen-biisã na n soka bãmbã, b yeel-b lame yaa: Yãmb sogsda taab ne mam sẽn yeel tɩ bilf sã n paase yãmb ka na leb n yã maam ye, la sã n leb n yɩ bilf n paase, yãmb na n leb n yãa maamã. 20 Sɩd-sɩdã, mam yeta yãmb tɩ yãmb na n yãbame n wiisi, la dũni neb sũy na n yɩɩ noogo. Yãmb na n yãa sũ-sãoongo, la yãmb sũ-sãoongã na n tekame n lebg sũ-noogo. 21 Pag rogem sã n ta, sũ-sãams n tar-a, tɩ bõe, a wakatã taame. La a sã n dog biigã n sa, a ka leb n tẽr a toogã ye, a sũur sẽn noom ne ned sẽn dogã yĩngã. 22 Moasã, yãmb tara sũ-sãamse, la mam na n leb n yãa yãmba, y sũyã na n yɩɩ noodo, la ned baa a yen kõn yiis yãmb sũ-noogã ye. 23 Da-kãng daare, yãmb kõn leb n sok maam bũmb baa a yembr yell ye. Sɩd-sɩdã, mam yeta yãmb tɩ bũmb ning yãmb sẽn na n kos m baaba, b na n kõo yãmb mam yʋʋrã yĩnga. 24 Hal tɩ ta moasã, yãmb nan ka kos bũmb ne mam yʋʋr ye. Kos-y tɩ y na n deegame, tɩ y sũ-noogã tõe n pid zãnga.

A Zezi tõoga dũniyã

25 Mam goma ne yãmb a woto ne yel-bũna. Wakat n wat tɩ mam ka na n leb n gom ne yãmb ne yel-bũn ye, la mam na n togsa yãmb m ba wã yell vẽenega. 26 Badaare, yãmb na n kosa ne mam yʋʋre, la mam ka yet tɩ m na n bõosa m ba yãmb yĩng ye. 27 Bala, m ba wã meng nonga yãmba, tɩ bõe, yãmb nonga maam, la y tẽeme tɩ mam yii Wẽnnaam nengẽ. 28 Mam yii Wẽnnaam nengẽ n wa dũni pʋgẽ. Moasã, mam yita dũni wã, la mam dabda m ba nengẽ. 29 Bãmb karen-biisã yeela bãmb yaa: Ges-y-yã, yãmb gomda ne tõnd vẽeneg moasã, n ka leb n gomd baa fɩ yell ne yel-bũn ye. 30 Moasã, tõnd miime tɩ yãmb mii bũmb fãa, la tɩ yãmb ka baood tɩ ned sok yãmb ye. Yaa rẽnda yĩng la tõnd sẽn tẽed tɩ yãmb yii Wẽnnaam nengẽ wã. 31 A Zezi leoka bãmb n yeele: Yãmb tẽeda moasã...? 32 Ad wakat n wate, la a zoe n waame, tɩ b na n sãeeg yãmb fãa yembr-yembre, la yãmb na n basa maam m yembre. La mam ka m yembr ye, bala, m baaba bee ne maam. 33 Mam goma ne yãmb a woto tɩ yãmb tõe n paam sũur laafɩ mam pʋgẽ. Yãmb na n paama namsg dũni pʋgẽ. La bɩ y keng y sũyã, tɩ mam tõoga dũni wã.

Zã 17

A Zezi pʋʋsda b karen-biisã yĩnga

1 A Zezi sẽn gom woto n sɛ, bãmb nak n gesa yĩngr n yeele: M ba, wakat taame. Waoog-y y bi-riblã, tɩ yẽ me na waoog yãmb 2 wa sẽn zems noor ning yãmb sẽn kõ-a ne Ninsaal buud fãa, t'a tõe n kõ neb nins fãa yãmb sẽn kõ yẽ wã vɩɩm sẽn kõn sa. 3 La vɩɩm sẽn kõn sa wã yaa tɩ nebã na bãng yãmb sẽn ya y yen, n ya sɩd Wẽnnaamã, la b bãng a Zezi Kirist, yãmb sẽn tʋm a soabã. 4 Mam kɩtame tɩ yãmb paam waoogr tẽng zugu. Mam sɛɛsa tʋʋmd ning yãmb sẽn kõ maam tɩ m maanã. 5 Dẽ, moasã, m ba, waoog-y maam y meng nengẽ ne ziir ning mam sẽn dag n tar yãmb nengẽ sẽn deng dũni belmã. 6 Mam puka yãmb yʋʋrã neb nins yãmb sẽn yiis dũni pʋgẽ n kõ maamã sʋka. Yãmb n dag n so-ba, la yãmb kõ-b-la maam, la b reega yãmb goamã. 7 Moasã, b bãngame tɩ bũmb nins fãa yãmb sẽn kõ maamã yita yãmb nengẽ. 8 Bala, mam togs-b-la goam nins yãmb sẽn kõ maamã. B reega goamã, la b bãnga sɩd-sɩd tɩ mam yii yãmb nengẽ, la b tẽeme tɩ yãmb n tʋm maam. 9 Yaa bãmb yĩng la mam sẽn pʋʋsdã. Mam ka pʋʋsd dũni nebã yĩng ye, yaa neb nins yãmb sẽn kõ maamã yĩnga, tɩ bõe, bãmb yaa yãmb neba 10 la tɩ bũmb nins fãa mam sẽn so yaa yãmb n so, la yãmb sẽn so yaa maam n so. La mam paamda waoogr bãmb pʋgẽ. 11 Mam ka leb n be dũni kãngã pʋgẽ ye, la bãmb ket n bee a pʋgẽ, tɩ mam wat yãmb nengẽ. M ba sẽn ya sõmblem soaba, tall-y-b yãmb yʋʋrã yĩnga, yʋʋr ning yãmb sẽn kõ maamã, tɩ bãmb na lebg yembr wa tõnd sẽn ya yembrã. 12 Mam sẽn dag n be ne bãmbã wakate, mam dag n gũuda neb nins yãmb sẽn kõ maamã ne yãmb yʋʋre. Mam kogl-b lame tɩ ned baa a yembr ka menem ye, sã n ka sẽn da tog n sãam-a wã, tɩ yãmb gʋls-sõamyã paam pidsgã. 13 Moasã, mam wata yãmb nengẽ, la mam gomda a woto dũni pʋgẽ, tɩ nebã na paam mam sũ-noog sẽn zems zãngã. 14 Mam kõo bãmb yãmb goamã, la dũni neb kisga bãmba, tɩ bõe, bãmb ka dũni neb wa mam me sẽn ka dũni nedã. 15 Mam ka kot yãmb tɩ y yiis-b dũni ye, la yaa tɩ yãmb na gũ-b ne wẽng soabã. 16 Bãmb ka dũni neb ye, wa mam me sẽn ka dũni nedã. 17 Kɩt-y tɩ yãmb sɩdã kɩt tɩ b welg toor yãmb yĩnga. Yaa yãmb goamã la sɩdã. 18 Mam tʋma bãmb dũni pʋgẽ wa yãmb sẽn tʋm maam dũni pʋgẽ wã me. 19 Mam welga m meng toor bãmb yĩnga, tɩ bãmb me na welg toor sɩdã pʋgẽ. 20 Ka bãmb yĩng bal la mam pʋʋsd ye. Yaa neb nins sẽn na tẽ maam bãmb goam yĩngã yĩng me, 21 tɩ bãmb fãa na lebg yembre, wa yãmba, m ba sẽn be mam pʋgẽ, tɩ mam be yãmb pʋgẽ wã. Bɩ bãmb me lebg yembr tõnd pʋgẽ, tɩ dũni nebã na tẽ tɩ yaa yãmb n tʋm maam. 22 La mam kõo bãmb ziir ning yãmb sẽn kõ maamã, tɩ bãmb na lebg yembr wa tõnd sẽn ya yembrã, 23 tɩ mam be bãmb pʋgẽ, tɩ yãmb be mam pʋgẽ, tɩ b na lebg yembr fasɩ, la tɩ dũni neb na bãng tɩ yaa yãmb n tʋm maam, la tɩ yãmb nonga bãmb wa yãmb sẽn nong maamã. 24 M ba, mam datame tɩ neb nins yãmb sẽn kõ maamã me na zĩnd ne maam zĩig ning mam sẽn be, tɩ b na get mam ziirã, ziir ning yãmb sẽn kõ maam, yãmb sẽn nong maam hal sẽn deng dũni yẽbgrã yĩnga. 25 M ba sẽn ya tɩrga, dũni neb ka bãng yãmb ye, la maam yẽ, mam bãnga yãmba, la nin-bãmba bãngame tɩ yaa yãmb n tʋm maam. 26 Mam kɩtame tɩ b bãng yãmb yʋʋrã, la mam na n kɩtame tɩ b bãng-a, tɩ nonglem ning yãmb sẽn nong maamã na zĩnd bãmb pʋse, la tɩ mam na zĩnd bãmb pʋse.

Zã 18

B yõka a Zezi

1 A Zezi sẽn gom woto n sa, b yii ne b karen-biisã n kẽng Sedrõ kʋɩl-bilã rʋʋnd a to wã. Zẽed zĩig n be be, la a Zezi kẽe be ne b karen-biisã. 2 A Zudas, soab ning sẽn da zãmbd-a bãmb n na n yõk n kõ wã rag n mii zĩ-kãng sõama, tɩ bõe, a Zezi ne b karen-biisã dag n tigma taab be naoor wʋsgo. 3 Dẽ, a Zudas peega sodaas sulli, ne gũudbã maan-kʋʋdbã kãsem-dãmbã ne Fariisẽ-dãmbã sẽn tʋmã, tɩ b zãad bug-vɩlemse, la fɩtɩl-dãmba, la zab-teedo, n kẽng zĩigẽ wã. 4 A Zezi sẽn mi bũmb nins fãa sẽn na n paam bãmbã, b kolga nebã n yeel-b yaa: Yãmb baooda ãnna? 5 La b leoka bãmb tɩ yaa Nazarɛt Zezi wã. La a Zezi yeel-b lame yaa: Yaa maam! A Zudas, soab ning sẽn yõkd bãmb n na n kõ wã dag n bee ne nebã. 6 Wakat ning a Zezi sẽn yeel tɩ: Yaa maamã, nebã tarame n lʋɩ tẽnga. 7 A Zezi leb n sok-b lame yaa: Ãnna la yãmb baooda? La b yeelame tɩ yaa Nazarɛt Zezi wã. 8 A Zezi leokame n yeele: Mam yeela yãmb tɩ yaa maam. Dẽ, sã n yaa maam la yãmb baooda, bɩ y bas nin-kãensã tɩ b looge. 9 Yaa sẽn na yɩl tɩ bãmb sẽn dag n yeelã pidsi: Neb nins yãmb sẽn kõ maamã, ned baa a yen ka menem ye. 10 A Pɩyɛɛr dag n tara zabr sʋʋga, la a wõog-a lame n kɛ maan-kʋʋd kãsmã tʋmtʋmd n fiuug a rɩtg tʋbre. Tʋmtʋmdã yʋʋr la a Malkus. 11 A Zezi yeela a Pɩyɛɛr yaa: Lebs f zabr sʋʋgã a wʋʋgẽ. Mam ka na n yũ bõn-yũudl ning m ba sẽn kõ maamã laa?

B waa ne a Zezi a Ann ne a Kayif taoore

12 Dẽ, sodaasã sull ne b sodaas naabã, la Zuif-rãmbã gũudbã yõka a Zezi n sẽbe. 13 B deng n talla bãmb n kẽng a Ann yiri, bala, yẽ dag n yaa a Kayif sẽn ya maan-kʋʋd kãsem yʋʋm kãngã rɛɛmba. 14 Yaa a Kayif n dag n sagl Zuif-rãmbã tɩ ned a yen tãa sã n ki soolmã nebã yĩng n são wã.

Maan-kʋʋd kãsmã taoore

15 Mik t'a Sɩmo Pɩyɛɛr ne a Zezi karen-biig a to dag n pʋgda a Zezi. Maan-kʋʋd kãsmã dag n mii karen-bi-kãnga, la karen-biiga tũu a Zezi n kẽ maan-kʋʋd kãsmã zakẽ, 16 la a Pɩyɛɛr paa yɩnga, zag-noorã sɛɛga. Karen-biig a to wã maan-kʋʋd kãsmã sẽn mi wã yiime n gom ne pag ning sẽn gũud zakã noorã, n kɩt t'a Pɩyɛɛr kẽ. 17 Dẽ, tʋmtʋmd poakã, zag-no-gũudã yeela a Pɩyɛɛr yaa: Fo ka rao-kãngã karen-biig a yen sɩda? La a Pɩyɛɛr yeelame tɩ yẽ ka bãmb karen-biig ye. 18 Tʋmtʋmdbã ne gũudbã dag n yasa be. La waood yĩnga, b dag n yõgna saal bugum n wootẽ. A Pɩyɛɛr me dag n bee ne bãmb n woot bugmã. 19 Maan-kʋʋd kãsmã soka a Zezi b karen-biisã yelle, la bũmb nins b sẽn zãmsd nebã yelle. 20 A Zezi leoka yẽnda n yeele: Mam goma nebã fãa taoor wakat fãa, mam zãmsa nebã karen-doogẽ la wẽnd-doogẽ wã, zĩig ning Zuif-rãmbã sẽn tigimd taabã, la mam ka soos n gom baa fɩ. 21 Bõe tɩ fo sokd maam? Sok neb nins sẽn wʋm-b maamã bũmb nins mam sẽn gomã. Ad mam mii bũmb nins fãa mam sẽn gomã. 22 A Zezi sẽn gom woto wã, gũud a yen sẽn dag n be be wẽe a Zezi pɛk n yeele: Yaa woto la fo leokd maan-kʋʋd kãsmã? 23 A Zezi leoka yẽnda n yeele: Mam goamã sã n ka yɩ sõama, wilg a sẽn ka sõama zĩig ninga. La mam sã n goma sõama, bõe tɩ f wẽed-ma? 24 Dẽ, a Ann kɩtame tɩ b tall a Zezi b sẽn sẽbã n kẽng maan-kʋʋd a Kayif yiri.

A Pɩyɛɛr kɩɩsame t'a ka mi a Zezi ye

25 A Sɩmo Pɩyɛɛr dag n bee be n woot bugum. Ned n yeel-a yaa: Fo me ka bãmb karen-biiga? A kɩɩsame n yeel yaa: Mam ka bãmb karen-biig ye. 26 Maan-kʋʋd kãsmã tʋmtʋmd a yembre, sẽn ya rogem ne ned ning a Pɩyɛɛr sẽn dag n kɛ a tʋbr n fiuugã yeelame yaa: Mam ka yã foom zẽedã zĩigẽ ne bãmb sɩda? 27 A Pɩyɛɛr leb n kɩɩsame. La wakat kãng bala, no-raoog kelmame.

A Zezi bee a Pilat taoore

28 B yii ne a Zezi a Kayif zakẽ wã n tall-b n kẽng gʋvɛrneerã zakẽ. Dag n yaa yibeoogo. Bãmb mensã ka kẽ zakẽ wã ye, sẽn na yɩl n da rẽgem b mense, n paam n dɩ zʋʋg-n-bas kibsã. 29 Dẽ, a Pilat yiime n wa nebã nengẽ n yeel-ba: Bõe rõadg la yãmb tar ne rao-kãngã? 30 B leokame n yeele: A sã n dag n ka maanẽ wẽnga, tõnd dag n kõn tall-a n wa n kõ yãmb ye. 31 Dẽ, a Pilat yeel-b lame yaa: Bɩ yãmb mensã deeg-a n bʋ a bʋʋdã wa sẽn zems yãmb tõogã. Zuif-rãmbã yeela a Pilat tɩ bãmb ka tar noor tɩ kʋ ned ye. 32 Yaa sẽn na yɩl la gomd ning a Zezi sẽn gom n na n wilg kũum ning buud bãmb sẽn na n ki wã pidsi. 33 A Pilat kẽe a zakẽ wã n bool a Zezi n yeel-ba: Yaa yãmb la Zuif-rãmbã dĩma? 34 A Zezi leokame n yeele: Yãmb meng n tags a woto n sokdẽ bii, bɩ yaa neb a taab n gom mam yell a woto? 35 A Pilat leokame n yeele: Dẽ yĩnga, mam yaa Zuif laa? Fo soolmã neb ne maan-kʋʋdbã kãsem-dãmbã n tall foom n wa n kõ maam. Bõe la f maan-yã? 36 A Zezi leokame n yeele: Mam soolmã ka dũni ka rẽnd ye. Mam soolmã sã n dag n yaẽ dũni ka rẽnda, mam tʋmtʋmdbã dag n na zab n sõng maam, tɩ b ra yõk maam n kõ Zuif-rãmbã ye. La moasã, mam soolmã ka tẽng zug ka rẽnd ye. 37 A Pilat yeelame: Dẽnd fo yaa dĩm wɛ? A Zezi leokame n yeele: Ya wa yãmb sẽn yeelã, mam yaa rĩma. Ad bũmb ning yĩng mam sẽn dogã, la bũmb ning yĩng mam sẽn wa dũni wã: Yaa tɩ kɩs sɩdã kaseto. Ned ning fãa sɩd sẽn so kelgda mam koɛɛga. 38 A Pilat sokame yaa: Sɩd yaa bõe?

B kaoo a Zezi bʋʋd n yeel tɩ b tog n kiime

A Pilat sẽn gom woto n sa, a leb n yiime n kẽng Zuif-rãmbã nengẽ n yeel-b yaa: Mam ka yã baa fɩ rao wã nengẽ sẽn sekd tɩ b kao a bʋʋd n yeel t'a zemsa kũum ye. 39 La yãmb tara mining sẽn yaa tɩ mam yiis bi-bɛɛg a yembr y zʋʋg-n-basã kibs wakat n base. Yãmb datame tɩ mam bas Zuif-rãmbã rĩmã y yĩnga? 40 Nebã leb n kaasame n yeele: Ayo! Da bas-y yẽ ye, bas-y-yã a Barabas. A Barabas yaool n dag n yɩɩ fãada.

Zã 19

1 Dẽ, a Pilat kɩtame tɩ b tall a Zezi n tɩ pãb-b ne kalwaase. 2 Sodaasã wʋga maanf ne gõos n fõgen a Zezi zugu, la b yeelg bãmb ne fu-bed miuugu, 3 n yaool n kolg bãmb n yetẽ yaa: Zuif-rãmbã dĩma, tõnd pʋʋsda yãmba. La b dag n laanda bãmb pegse. Gõos maanfo (19.2) 4 A Pilate leb n yiime n yeel Zuif-rãmbã yaa: Ad-y, mam yiisda rao wã yɩnga, tɩ yãmb na bãng tɩ mam ka yã bũmb baa a yembr ne-a sẽn sekd m na yeel t'a toga kʋʋb ye. 5 Dẽ, a Zezi yii yɩng ne gõos maanfã, la fu-bed-miuugã, la a Pilat yeela nebã yaa: Ad daowã! 6 Maan-kʋʋdbã kãsem-dãmbã ne gũudbã sẽn yã a Zezi, b kaasame n yeele: Ka-a da-pɩk zugu! Ka-a da-pɩk zugu. A Pilat yeel-b lame yaa: Deeg-y-yã-a n ka-a y toore, bala, mam ka yã bũmb ne-a sẽn sek m na yeel t'a toga kʋʋb ye. 7 Zuif-rãmbã leoka a Pilat n yeele: Tõnd tara tõogo, la ne tõogã, a segda kʋʋbo, tɩ bõe, a maana a meng Wẽnnaam Bi-ribla. 8 A Pilat sẽn wʋm gom-kãnga, a rabeemã paasame. 9 A leb n kẽe zakẽ wã n sok a Zezi tɩ b yaa yɛ neda? La a Zezi ka leok-a ye. Dẽ, a Pilat yeela bãmb yaa: 10 Maam la fo sĩnd n ka gomd-ne? Fo ka mi tɩ mam tara noor tɩ kɩt tɩ b bas foom, la m tar noor tɩ kɩt tɩ b ka foom da-pɩk zug laa? 11 A Zezi leokame n yeele: Sã n ka noorã sẽn yi yĩngrã, yãmb da ka tarẽ noor tɩ maan maam baa fɩ. Rẽnda n kɩt tɩ ned ning sẽn tall maam n wa n kõ yãmbã yel-wẽnd yɩɩd yãmb dẽndã. 12 Sẽn sɩng ne wakat kãnga, a Pilat baoome n na n bas a Zezi. La Zuif-rãmbã kaasame n yeele: Yãmb sã n bas rao wã, rẽnd yãmb ka Sezaar zoa ye. Ned ning fãa sẽn maand a meng rĩm wilgdame t'a kisa Sezaar. 13 A Pilat sẽn wʋm gom-kãensã, a talla a Zezi n yi yɩnga, n zĩnd bʋʋdã zĩigẽ, b sẽn boond tɩ kug sẽn gãneg zĩiga, la Gabata ne hebre goama. 14 Dag n yaa zʋʋg-n-basã kibs seglg daare, sẽn kolg wĩnto-sʋka. A Pilat yeela Zuif-rãmbã yaa: Ad-y y rĩma! 15 La b kaasame n yeele: Kʋ-y-yã-a! Kʋ-y-yã-a! Ka-y-yã-a da-pɩk zugu! A Pilat yeel-b lame yaa: M ka y dĩmã da-pɩk zugu? Maan-kʋʋdbã kãsem-dãmb leokame n yeele: Tõnd ka tar dĩm a to, tɩ ka Sezaar ye. 16 Dẽ, a Pilat kõ-b-la a Zezi tɩ b tɩ ka da-pɩk zugu. Dẽ, b deega a Zezi n tall n looge.

B kaa a Zezi da-pɩk zugu

17 A Zezi tʋka b ra-pɩkã n yi tẽngã, n tees zĩig sẽn boond tɩ zu-wang zĩiga, la Golgota ne hebre goama. 18 Yaa be la b ka a Zezi ne neb a yiib a taaba, da-pɩgs zutu, a yen goabga la a yen dɩtgo, t'a Zezi be sʋka. 19 A Pilat gʋlsa da-peok zug n tabl da-pɩkã. A gʋlsa be tɩ: Nazarɛt dao a Zezi, Zuif-rãmbã dĩma. 20 Zuif-rãmbã wʋsg karma gʋlsmã, tɩ bõe, zĩig ning b sẽn ka a Zezi da-pɩk zugã pẽe ne tẽngã. B dag n gʋlsa gomdã ne Hebre, la Latẽ, la Gɛrk. 21 Maan-kʋʋdbã kãsem-dãmbã yeela a Pilat yaa: Da gʋls-y tɩ Zuif-rãmbã dĩm ye, gʋls-y t'a yeelame t'a yaa Zuif-rãmbã dĩma. 22 A Pilat leokame n yeele: Bũmb ning mam sẽn gʋlse, mam gʋlsame. 23 Sodaasã sẽn ka a Zezi n sa, b wʋka bãmb futã n pʋɩ zĩis a naase, tɩ sodaag fãa dɩk pʋɩɩr a yembre. B rɩka a Zezi fu-wokã me. A ka tar sẽnesem ye, yaa peen yend bala, yĩngr tɩ ta tẽngre. B goma ne taab n yeele: 24 Wa-y tɩ d da pãrs fuugã ye. D maan bãnde, tɩ bãndã wilg ned ning sẽn na n soog-a fuugã. Yɩɩ woto tɩ Wẽnnaam gʋls-sõngã pidsi. A yeelame: B pʋɩɩ mam futã ne taaba, la b maana bãnd mam fu-wokã yĩnga. Ad bũmb ning sodaasã sẽn maanã. 25 A Zezi ma wã ne a ma-bi-poaka, a Kolopas pag a Maari ne a Maari Madelɛn dag n yɛsa da-pɩkã sɛɛgẽ. 26 A Zezi sẽn yã b ma wã, la karen-biig ning bãmb sẽn nongã, t'a yɛs b ma wã sɛɛgẽ, b yeela b ma yaa: Paga, ad f bi-ribla. 27 La b yeela karen-biigã yaa: Ad f ma. La sẽn sɩng ne wakat kãnga, karen-biigã deega a Zezi ma wã a zakẽ. 28 Rẽ poore, a Zezi sẽn mi tɩ bũmb fãa zoe n maan n saame wã, b yeelame tɩ ko-yũud n tar bãmba, tɩ Wẽnnaam gʋls-sõngã pidsi. 29 Laok n dag n dɩg be n pid ne divẽ miisga. B rɩka neoodg n los divẽ miisgẽ wã, n vil kãnkãre, n zẽk n tees a Zezi noorã. 30 La a Zezi sẽn fõos divẽ miisgã n sa, b yeelame yaa: Bũmb fãa maan n saame. La b sulga b zugu, la b kiime.

B kõsa a Zezi lʋgre

31 Dag n yaa zʋʋg-n-basã kibs seglg daare. La Zuif-rãmbã sẽn ka rat n bas nebã tɩ b pa ra-pɩgsã zut bãmb vʋʋsg daarã yĩnga, "Vʋʋsg da-kãng dag n yaa da-kãsenga," b kosa a Pilat t'a kɩt tɩ b kao b gɛy wã la b sigs-ba. 32 Dẽ, sodaasã waame, n kao pipi ned ning sẽn dag n ka da-pɩk zug a Zezi sɛɛgẽ wã gɛy, la b kao ned a to wã me gɛya. 33 B sẽn ta a Zezi, n mik tɩ b zoe n kiime wã, b ka kao bãmb gɛyã ye. 34 La sodaag a yembr kõsa bãmb lʋgr ne kãnde, la tao-tao bala, koom ne zɩɩm n yi be. 35 Ned ning sẽn yã bõn-kãngã kɩsa a kaseto, la a kasetã yaa sɩda. La a miime t'a togsa sɩda, tɩ yãmb me na tẽ. 36 Yɩɩ woto tɩ Wẽnnaam gʋls-sõngã pidsi. A yeelame yaa: Bãmb kõbr baa a yembr ka na n kaoog ye. 37 Wẽnnaam gʋls-sõngã yeela zĩig a to yaa: Bãmb na n gesa ned ning bãmb sẽn kõsã.

A Zezi mumbu

38 Rẽ poore, Arimate dao a Zozɛf sẽn dag n soos n ya a Zezi karen-biiga, a sẽn zoet Zuif-rãmbã yĩngã kosa a Pilat noor n na n dɩk a Zezi kũumã. La a Pilat kõ-a-la noore. Dẽ, a waa n sika kũumã n tall n looge. 39 A Nikodɛm, sẽn dag n wa-a a Zezi nengẽ ne yʋngã me talla miir ne alowɛs sẽn kalem taaba, sẽn tar yũ-noogo, sẽn tat kɩlo pis-naas la a nu n wa. 40 Dẽ, b dɩka a Zezi kũuma, n ning-a bõn-yũugã, n vil ne pɛɛla, wa sẽn zems Zuif-rãmbã sẽn minim n mumd kũum to-to wã. 41 La tɩɩs zĩig n dag n be zĩig ning b sẽn ka a Zezi da-pɩkã zugã, la zĩigã pʋgẽ, yao-paall n dag n be be b sẽn da nan ka mum ned a pʋgẽ ye. 42 Yɩɩ be la b gãneg a Zezi kũumã, Zuif-rãmbã seglg yĩnga, tɩ bõe, yaoogã dag n pẽeme.

Zã 20

A Zezi vʋʋgre

1 Dimaasã daar yibeoog pĩnda, a Maari Madelɛn kẽnga yaoogẽ wã, rẽ tɩ zĩigã ket n yaa libsgu. La a mikame tɩ b bilga kugrã n bas yaoogã. 2 Yẽ zoeeme n tɩ yãnd a Sɩmo Pɩyɛɛr ne karen-biig a to wã a Zezi sẽn dag n nongã, n yeel-b tɩ yaa: B yiisa Zu-soabã yaoogẽ wã, la tõnd ka mi b sẽn tɩ bĩng-b zĩig ning ye. 3 A Pɩyɛɛr ne karen-biig a to wã yiime n na n kẽng yaoogẽ wã. 4 Bãmb b yiibã ra zoetame, la karen-biig a to wã zoee tao-tao n yɩɩg a Pɩyɛɛr, n deng-a n ta yaoogẽ wã. 5 A sulgame n gese, n yã pɛɛlã sẽn be be wã, la a yaool n ka kẽ ye. 6 A Sɩmo Pɩyɛɛr sẽn dag n pʋgd yẽ wã taame. A kẽe yaoogẽ wã, n mik tɩ pɛɛlã bee be. 7 Peend ning b sẽn dag n lud a Zezi zug ne-wã me dag n bee be, la a ka naag ne a taabã ye, la b gil-a lame n dɩgl toor. 8 Dẽ, karen-biig a to wã, sẽn deng-a n ta wã me kẽe yaoogẽ wã n yã bũmb nins sẽn be be wã, la a tẽeme. 9 Bala, a dag n nan ka wʋm Wẽnnaam gʋls-sõngã sẽn yet t'a Zezi tog n vʋʋgame wã võor ye. 10 La karen-biisã lebg n kuila b yiya.

A Zezi puka b meng ne a Maari Madelɛn

11 A Maari yaool n dag n yasa yɩng yaoogã sɛɛgẽ n yãbda. A yãbdame, la a sulgame n na n ges yaoogã pʋgẽ, 12 la a yãa malegs a yiib sẽn yer fu-peelse, n zĩ zĩig ning b sẽn dag n gãneg a Zezi wã. A yen dag n zĩi zugã zĩigẽ, t'a yen zĩ nao wã zĩigẽ. 13 Malegsã yeela pagã yaa: Paga, yaa wãn tɩ fo yãbda? La a leokame tɩ yaa b sẽn dɩk a Zu-soabã t'a ka mi b sẽn ning-b zĩig ningã yĩnga. 14 Pagã sẽn gomd a woto wã, a wẽnegame n yãnd a Zezi sẽn yɛs yĩngri, la a dag n ka mi tɩ yaa bãmb ye. 15 A Zezi yeel-a lame yaa: Paga, bõe tɩ fo yãbda? Ãnna la fo baooda? La pagã sẽn tẽed tɩ yaa tɩɩsã soab la sẽn gomd ne yẽ wã, a yeelame yaa: M kẽema, sã n yaa yãmb n dɩk-b bɩ y togs maam yãmb sẽn bĩng-b zĩig ning tɩ m na tɩ rɩk-ba. 16 A Zezi yeel-a lame yaa: Maari! A Maari wẽnemdame n yeel ne hebre goam tɩ rabuni, sẽn dat n togs tɩ karen-saamba. 17 A Zezi yeel-a lame yaa: Ra sɩɩs-m ye. Mam nan ka rʋ m ba nengẽ ye. Kẽng m ba-biisã nengẽ n tɩ yeel-b tɩ mam dʋʋda m ba sẽn ya yãmb ba wã nengẽ, mam Wẽnnaam sẽn ya yãmb Wẽnnaamã nengẽ. 18 A Maari Madelɛn waa n togsa karen-biisã t'a yãnda Zu-soabã, la tɩ b yeela yẽnda bõn-kãense.

A Zezi puka b meng ne b karen-biisã

19 Da-kãng sẽn ya dimaas daarã yʋngo, doog ning a Zezi karen-biisã sẽn dag n be wã noy dag n pagame, bãmb sẽn zoet Zuif-rãmbã yĩnga. A Zezi waame n yals bãmb sʋk n yeel-b yaa: Bɩ laafɩ zĩnd ne yãmba! 20 A Zezi sẽn yeel woto, b wilga b karen-biisã b nusã ne b lʋgrã. Karen-biisã sẽn yãnd Zu-soabã, b kɩdmame. 21 A Zezi leb n yeel-b lame yaa: Bɩ laafɩ zĩnd ne yãmba! Mam me tʋmda yãmb wa m ba sẽn tʋm maamã. 22 Gom-kãens zugẽ, a Zezi fʋʋsa bãmb zug n yeel-ba: Reeg-y Sɩɩg-sõngo. 23 Neb nins yãmb sẽn na n kõ sugrã na n paama sugri, la neb nins yãmb sẽn na tõdg sugrã kõn paam sugr ye.

A Toma ka-tẽebo

24 Karen-biisã piig la a yiibã ned a yembre, a Toma b sẽn boond tɩ Didimã dag n ka be ne a taabã wakat ning a Zezi sẽn wa wã ye. 25 Dẽ, karen-biis a taabã yeela yẽnda yaa: Tõnd yãnda Zu-soabã! La a yeela bãmb yaa: Mam sã n ka yãnd kutã bãn b nusẽ wã, mam sã n ka tʋm m nug-bil kutã bogdẽ wã, la m sã n ka tʋm m nug bãmb lʋgrẽ wã, mam kõn tol n tẽ ye. 26 Rasem a nii rẽ zugẽ, a Zezi karen-biisã da leb n tigma taab roogẽ wã, la a Toma dag n bee ne bãmba. Kʋɩlemsã dag n pagame, la a Zezi waa n yalsa bãmb sʋk n yeel-b yaa: Bɩ laafɩ zĩnd ne yãmba! 27 La b yeela a Toma yaa: Tẽeg f nug-bilã ka. Ges mam nusã. Tẽeg f nugã n tʋm mam lʋgrẽ wã me, la f tẽ n da yɩ ka-tẽeb soab ye. 28 A Toma leoka bãmb n yeele: Mam Zu-soaba la mam Wẽnnaam! 29 A Zezi yeela yẽnda yaa: Yaa fo sẽn yã maamã yĩng la fo tẽeda. Bark bee neb nins sẽn ka yã n yaool n tẽedã zutu.

Bũmb ning sẽn kɩt tɩ b gʋls sebrã

30 Bõn-bãn wʋsg a taab la a Zezi maan b karen-biisã taoor tɩ ka gʋls seb-kãngã pʋgẽ ye. 31 La bãmbã sẽn gʋlsã, yaa tɩ yãmb na tẽ t'a Zezi yaa Kirist, Wẽnnaam Bi-ribla, la tɩ yãmb na paam vɩɩm bãmb yʋʋrã yĩnga, yãmb sẽn tẽ wã yĩnga.

Zã 21

A Zezi puka b meng ne b karen-biis a yopoe

1 Rẽ zugẽ, a Zezi puka b meng ne karen-biisã Tiberyaad ko-kãsengã noore. Ad b sẽn puk b meng to-to: 2 A Zezi karen-biisã rag n bee ne taaba: A Sɩmo Pɩyɛɛr ne a Toma b sẽn boond tɩ Didim, la a Natanayɛl sẽn yit Galile Kana wã, la a Zebde kom-dibli wã ne a Zezi karen-biis a taab a yiibu. 3 A Sɩmo Pɩyɛɛr yeelame t'a na n tɩ yõga zĩma, la neb a taabã yeel-a lame tɩ bãmb me na n tũu yẽnda. B yiime n tɩ kẽ koom koglgo. B ka yõk fɩ yʋn-kãng ye. 4 Yibeoog sẽn ta, a Zezi dag n bee kʋɩl-koakẽ wã, la karen-biisã dag n ka mi tɩ yaa a Zezi ye. 5 A Zezi yeel-b lame yaa: M kamba, yãmb ka tar sẽn na rɩ laa? B leoka a Zezi tɩ ayo. 6 A Zezi yeel-b lame yaa: Lob-y zĩm-gãmbrã koglgã rɩtgo, la y na paame. Dẽ, b loba zĩm-gãmbrã, la b dag n ka le tõe n tak-a ye, zĩmã waooglem yĩnga. 7 Dẽ, karen-biig ning a Zezi sẽn dag n nongã yeela a Pɩyɛɛr yaa: Yaa Zu-soabã! A Sɩmo sẽn wʋm tɩ yaa Zu-soaba yee, la a yeelg a fuugu, bala, a dag n yaa beelle, la a yɩk n lʋɩ koomẽ wã. 8 Karen-biis a taabã taee zĩm-gãmbrã sẽn pid ne zĩmã ne koom-koglgã n wa, bala, b ne tẽngã dag n ka yɩɩd nao-yakem koabg la pis-nu ye. 9 Bãmb sẽn yi koomẽ wã n ta tẽnga, bãmb yãa bug-saal sẽn wit tɩ zĩm be a zugu, n paas buri. 10 A Zezi yeel-b lame tɩ b wa ne zĩmã b sẽn yõg paalmã. 11 A Sɩmo Pɩyɛɛr kẽe koom-koglgẽ wã n vuug zĩm-gãmbrã n yiisi, la a dag n pida ne zĩm-bɛd koabg la pis-nu la a tãabo. La baa ne zĩmã sẽn dag n waoog a woto wã, zĩm-gãmbrã ka kẽeg ye. 12 A Zezi yeel-b lame: Wa n dɩ-y-yã. La karen-biisã ned baa a yen ka saag n sok-b bãmb sẽn yaa a soab ye, bala, b dag n miime tɩ yaa Zu-soabã. 13 A Zezi kolgame n dɩk burã n kõ-ba, la b kõ-b zĩmã me. 14 A Zezi sẽn vʋʋg n yi kũum sʋkã tɛka, naoor a tãab moasã la b puk b meng ne b karen-biisã.

A Zezi ne a Pɩyɛɛre

15 Bãmb sẽn dɩ n sa, a Zezi yeela a Sɩmo Pɩyɛɛr yaa: A Zonaas biig a Sɩmo, dẽ yĩnga fo nonga maam n yɩɩd bãmbã sẽn nong maamã? A leoka bãmb yaa: N-ye, Zu-soaba! Yãmb miime tɩ mam nonga yãmba. A Zezi yeel-a lame yaa: Ges mam pe-bi wã yelle. 16 B leb n yeel-a-la naoor a yiib soab yaa: A Zonaas biig a Sɩmo, dẽ yĩnga, fo nonga maam? A Pɩyɛɛr leoka bãmb n yeele: N-ye, Zu-soaba! Yãmb mi tɩ mam nonga yãmba. A Zezi yeel-a lame yaa: Yɩ mam piisã pe-kɩɩma. 17 B yeela yẽnda naoor a tãab soab yaa: A Zonaas biig a Sɩmo, dẽ yĩnga fo nonga maam? A Pɩyɛɛr sũur sãamame, a Zezi sẽn sok yẽnda naoor a tãab moasã tɩ rẽnda yĩnga yẽ nonga bãmbã yĩnga. La a leoka bãmb n yeele: Zu-soaba, yãmb mii bũmb fãa. Yãmb miime tɩ mam nonga yãmba. A Zezi yeel-a lame yaa: Ges m piisã yelle. 18 Sɩd-sɩdã, mam yeta foom tɩ fo sẽn dag n ya bi-bɩɩgã, fo dag n sẽbgda f sɛɛg sẽbdga, n dabd f sẽn datẽ. La fo sã n wa n kʋʋle, fo na n zẽka f bãgdo, tɩ ned a to sẽb foom f sẽbdgã, n tall foom n kẽng f sẽn ka ratẽ ye. 19 A Zezi goma a woto n na n wilg kũum ning buud a Pɩyɛɛr sẽn na n ki n kõ Wẽnnaam waoogrã. A Zezi sẽn gom a woto n sa, b yeel-a lame yaa: Wa n tũ maam!

A Zezi ne b karen-bi-nongre

20 A Pɩyɛɛr wẽnegame n yã karen-biig ning a Zezi sẽn nongã t'a wat bãmb nengẽ. Yaa soab kãng n kɩll a Zezi yãoogẽ dɩɩbã wakat n sok bãmb tɩ: Zu-soaba, yaa ãnna n na n zãmb yãmb n yõk n kõ wã? 21 A Pɩyɛɛr sẽn yã yẽ, a soka a Zezi yaa: Zu-soaba, la bõe n na n paam rao-kãngã? 22 A Zezi yeel-a lame yaa: Mam sã n dat t'a vɩɩmd hal tɩ mam wa, bʋg n pak foom? Fo yẽ ye n wa n tũ maam. 23 Gom-kãng zugẽ, gomd n saag ba-biisã sʋk n yetẽ tɩ karen-bi-kãng ka na n ki ye. A Zezi yaool n ka yeel t'a ka na n ki ye. B yeelame tɩ bãmb sã n dat t'a vɩɩmd hal tɩ bãmb wa, bʋg n pak a Pɩyɛɛre? 24 Yaa karen-bi-kãng n kɩt bõn-kãens kaseto, la a gʋls-ba. La tõnd miime t'a kasetã yaa sɩda. 25 A Zezi maana bũmb wʋsg a taaba. Ned sã n dag n na n gʋlsẽ yɛla fãa yembr-yembre, mam ka tẽed tɩ dũni meng dag n na tõog n deegẽ sɛbã b sẽn na n gʋlsã ye.

AMAZING GRACE BIBLE INSTITUTE