Matal of Cameroun JOHN1 Mok uwana Zəzagəla alə̀g maɗàh gudəŋ à vok dadàŋ kà, agà la ahəŋ uwana tazàlalla Gay. Gay uwatà adzà à ahəŋ la Zəzagəla. Gay uwaga kà Zəzagəla la gəl aŋha. 2 Gay uwaga agà la Zəzagəla dagay madzəka. 3 Tatak gesina uwana Zəzagəla aɗahàŋ kà, kà masla; tatak anik la ahəŋ à uwana Zəzagəla aɗahàŋ kokuɗa masla aw. 4 Sifa kà la masla la abà, sifa uwatà kà avà uɗaka à azladza. 5 Uɗaka uwaga aùɗ la mələs la abà, mələs aslalà vok à mamatsiŋ ala aw. 6 Zəzagəla aslə̀l dza anik uwana à waŋ, sləm aŋha Yuhana. 7 Asà à waŋ kà, kà maz sayda aŋa uɗaka. Asà à waŋ kà, kà azladza gesina kà madiŋal gəl à vok, kà madegolay uwana apàh. 8 Masla à Yuhana agà uɗaka la gəl aŋha aw, ama asà à waŋ kà maz sayda lakəl aŋa uɗaka uwaga. 9 Uɗaka uwaga kà agà uɗaka dziriga, asà à waŋ à gudəŋ à vok, uwaga aùɗ à azladza gesina. 10 Gay uwaga agà la gudəŋ la vok. Zəzagəla aɗahà gudəŋ à vok kà la masla, ama azladza uwana la gudəŋ la vok tasə̀l aw. 11 Agà la tataka aŋa azladza aŋha la abà, ama azladza aŋha takweskà. 12 Ama azlauwana takə̀s, la azlauwana tadiŋal gəl à vok, avà à atà maslay kà mapakahay azlabəza aŋa Zəzagəla. 13 Tapàk azlabəza aŋa Zəzagəla la tetəvi aŋa azladza la mayyay aŋa vəɗah, bokuba uwana azladza tatugway aw. Ama Zəzagəla la uwana, avà à atà sifa mawga. 14 Gay uwaga apàk dza la sləɓ vok, adzà à ahəŋ la tataka gami la abà. Ləv aŋha kà tekula la slaka azladza, adahənla la dziriga, kà aŋha kà, apə̀hanula mazləɓay aŋha, uwana la mazləɓay uwana bəzi tekula aɓə̀zal la slaka Baba aŋha. 15 Yuhana azà sayda lakəl aŋha, awiyà: "Lakəl aŋha gəpə̀h à akul à uwana gəgòɗ: 'Masla manəf gi à tsəh à waŋ atsà à waŋ, ama masla la uwana mazləɓayga kà gi, masla kà agà la ahəŋ dagay uwana taləg mayyi gi, aɗuwa gi la maslay', gəgoɗ à akul." 16 Anu gesina məɓəzà à masik la gorobu la abà; məɓəzà à mapis gay à vok kaykay lakəl aŋa mapis gay à vok aya. 17 Zəzagəla avà à anu mapəhay la ahàl aŋa Musa, ama vok mahamay la dziriga kà tasà à waŋ kà la ahàl aŋa Yesu Kristu. 18 Dza adanəŋ Zəzagəla ɗikiɗiki aw, ama Kona aŋha tekula gà, uwana la makəla aŋa Baba lakəl, la uwana apə̀hanula masla. 19 Aganay uwana Yuhana apə̀h à mok uwana azla Yahudiya la Urusalima taslə̀l azlaməna mav tatak à Zəzagəla la azlaməna sləray la məŋ gày Zəzagəla la aku à slaka aŋha kà manaval: "Kak ma, kak uwa?" 20 Akweskà mawulatàla aw, ama adzaɗàŋ ala la paraka la huma aŋatà gesina: "Gi kà, gi Kristu aw." 21 "Kak uwa zlà ma uwa? Kak Eliya, uwana tapàh uwarà ay?" "Awaŋ, gi masla aw", Yuhana agòɗ à atà. "Kak masla mapəhal gay ahàl aŋa Zəzagəla ay?", tagòɗal. "Awaŋ", agòɗ à atà. 22 Kiya uwaga tagòɗal: "Kak uwa zlà ma uwa? Say kapəh à anu gay ŋgaha mədàpəh à azlauwana taslə̀l anu à waŋ. Kak la gəl aŋak ma: 'Gi uwà' kagoɗ lagwa uwa?" 23 Yuhana agòɗ à atà: "Gi kà gi 'Kuda aŋa dza uwana awiyay la kəsaf la abà: Ɗahàw tetəvi tərra à ahəŋ kà aŋa Sufəl!'" (Kiya uwaga à uwana masla mapəhal gay à ahàl Yesayya atsetsèr à wakità Zəzagəla à abà) 24 La tataka azlaməna masləl atà à waŋ uwatà la abà kà, azla Farisəya la abà. 25 Tanavà Yuhana: "Tsa aŋa kak Kristu aw, kak Eliya aw, kak masla mapəhal gay à ahàl kà mapàh à azladza aw, ma kà mana kaɗàh batem zlà ma?" 26 Yuhana agòɗ à atà: "Gi gəɗahakullaŋ batem kà la iyaw; dza anik la ahəŋ la tataka aŋkul la abà, kasəlaw aw, 27 atsa à waŋ la lig gulo la ahəŋ, ama gi bay kà gəsla kà mapəl zuwiɗ kwimik aŋha ala babay aw." 28 Tatak uwaga gesina aɗahà vok la Betaniya, la gay dərəv uda anik aŋa mukwà Urdun, la slaka uwana Yuhana aɗahà batem. 29 La bebəŋ gà, Yuhana anəŋà Yesu atsà à waŋ à slaka aŋha, agòɗ: "Aganay magadzaw aŋa Zəzagəla uwana azəɓ tsakana aŋa gudəŋ à vok gesina. 30 Lakəl aŋha la uwana gəpə̀h à akul, gəgòɗ à akul: 'Dza la ahəŋ atsa à waŋ la lig gulo. Masla la uwana mazləɓayga kà gi, kà uwana masla kà, agà la ahəŋ dagay uwana taləg mayyi gi. 31 Gi kà gəsəl masla aw, ama gəsà à waŋ kà maɗàh batem aŋa iyaw à azlatsəhay Isərayel, kà atà aŋa masəl masla.' " 32 Yuhana agòɗ aya: "Gənəŋà Masasəɗok tsikasla atsà à ahəŋ la zagəla bokuba habakoku, adzà à gəl aŋha. 33 La mok uwatà gəsə̀l masla aw, ama Zəzagəla la uwana aslə̀l gi kà gi aŋa maɗàh batem: 'Masasəɗok adàdza madzay lakəl aŋha, masla kà adàɗah batem la Masasəɗok Zəzagəla', agòɗ à gi. 34 Gədanəŋ uwaga, gəgəɗìŋ à afik, kà masla la uwana Kona aŋa Zəzagəla", Yuhana agòɗ. 35 La bebəŋ gà aya kà, Yuhana adatsizlla à ahəŋ la abatà la azlaməna matapla la slaka aŋha səla. 36 Uwana anəŋà Yesu ada à awtày agòɗ: "Aganay Magadzaw aŋa Zəzagəla!" 37 Azlaməna matapla aŋha səla uwaga kà, tatsənà uwana apə̀h, ŋgaha tanəfà Yesu. 38 Yesu agolà vok, anəŋà à lig, anəŋàŋ kà tanəfà masla, ŋgaha anavà atà: "Mana kayahaw ma?" Tagòɗal: "Rabbi, kadza à ahəŋ ma lala?" (Rabbi asal magoɗay: Məŋga) 39 Agòɗ à atà: "Sàw à waŋ, kadànəŋawwaŋ!" Ŋgaha tahàd, tanəŋà slaka madz à ahəŋ aŋha. (Mok uwaga kà sa ufaɗ aŋa mokokhu) Tadəvà mavakay uwatà à gay atà nna. 40 Tekula la tataka aŋa azladza uwana la abà tatsənà sayda aŋa Yuhana, anəfà Yesu, masla la uwana Andəre, deda aŋa Səmon Piyer. 41 Teraŋa dadàŋ, Andəre agagàm la deda aŋha Səmon, agòɗal: "Kay, mədanəŋ Kristu, bokuba magoɗay: dza uwana Zəzagəla afàl dzakwa à gəl!" 42 Adàla Səmon à slaka Yesu. Yesu anərə̀z masla, agòɗal: "Kak la uwana, kak Səmon kona aŋa Yuhana, la huma la gay sləm aŋak adàgay Kayfas." (Uwana asal magoɗay kà dzəgla) 43 La bebəŋ gà, asà à Yesu kà mad à kutso Galili ŋgaha tagagàm la Filip, agòɗal: "Nəfà à gi!" 44 Filip kà zil Betsayda, gudəŋ aŋatà tekula la Andəre la Piyer. 45 Filip tatagàm la Natanayel, ŋgaha agòɗal: "Mədanəŋ dza uwana Musa apə̀h lakəl aŋha la wakità mapəhay la abà, baməraka azlaməna mapəh à atà gay à ahàl kà mapàh à azladza babay kà, tapəh lakəl aŋha, sləm aŋha kà, Yesu kona aŋa Yusufu uwana la gudəŋ Nazaret." 46 Natanayel agòɗal: "Dziri kà tatak delga aguwa à waŋ la Nazaret ay?" Filip agòɗal: "Sà à waŋ, kadànəŋəŋ!" 47 Mok uwana Yesu anəŋà Natanayel ada à awtày à slaka aŋha kà, apə̀h lakəl aŋha: "Aganay zil Isərayel deŋdeŋga, mawisiga la ahəŋ la masla la abà aw." 48 Natanayel anavàl: "Kakay kasəl gi ma?" Yesu agòɗal: "Gənəŋà ka à mok uwana kak la tsəh gudəv, à mok uwana Filip aləg mazala ka." 49 Kiya uwaga Natanayel agòɗal: "Rabbi, kak la uwana kak Kona aŋa Zəzagəla, kak Sufəl aŋa azla Isərayel!" 50 Yesu awulà ala: "Kadiŋal gəl à vok kà, kà uwana gənəŋà ka la tsəh gudəv, gəgòɗ à ka takay? Kadànəŋ azlatatak uwana tadàɗuw uwanay gesina." 51 Yesu agòɗal aya: "La dziriga gəpəh à akul, kadànəŋaw zagəla mapəzl à ama ala gà. Tsaɗ tsatsaɗ, azlamalika aŋa Zəzagəla tadàda à afik, ŋgaha tatsa à ahəŋ à gəl aŋa Kona aŋa dza." 1 Uwana mahənay səla adada à lig kà mamakərga, kà mazəɓ vok apakà vok la Kana la kutso aŋa Galili. Iyà aŋa Yesu la abatà. 2 Yesu atà la azlaməna matapla la slaka aŋha bay kà tazàla atà à mazəɓ vok uwaga à abà. 3 Mok uwana iyaw matavəruk adadəv à gay. Iyà aŋa Yesu agòɗal: "Tatak masay la ahəŋ aya aw!" 4 Ama Yesu awulà ala: "Mis, kak la uwana kapəh à gi uwana asa à gi maɗehəŋ takay? Kaslà gulo adaslay dadàŋ aw." 5 Ŋgaha iyà aŋha agòɗ à azlaməna sləray: "Ɗahàw tatak uwana adàpəh à akul gesina!" 6 La abatà agà la ahəŋ yuŋ mukwà, uwana azla Yahudiya tataɗani iyaw à abà kà maɗàhlaŋ sləray kà mapalahla azlaasik kà uwana uwaga kà bokuba mafəla fəla aŋatà, kà magay tsiɗaŋa. Kəla yuŋ tekula aɗàh tuguzl zlo, baŋaw mukwa. 7 Yesu agòɗ à atà: "Hànàw iyaw à azlayuŋ uwanay à abà pawasl papawasl." Tahànàŋ ala bokuba uwana apə̀h à atà. 8 Kiya uwaga Yesu agòɗ à atà: "Taɗawni iyaw uwaga ŋuv, kadawla à məŋga aŋa madəvaday." Tatə̀ɗànì, tadàlla. 9 Məŋga aŋa madəvaday atapàŋ, kà apàk iyaw matavəruk. Masla asə̀l slaka uwana aguwà à waŋ à abà aw. (Ama azlaməna matat iyaw kà, tasəl slaka uwana aguwà à waŋ la abà) Azàla masla mazəɓ mis, 10 ŋgaha agòɗal: "Azladza kà tatsə̀vkàh mavàhay kà iyaw matavəruk matsiɗayga dadàŋ, baŋa azlaməna mazalàh atà gesina tasay kà, la lig la ahəŋ kà pəra, tavàh uwana atsiɗ aw. Ama kak kà, kaɓə̀k matsiɗayga à ahəŋ dadàŋ." 11 Uwaga la uwana nadzipo matera uwana Yesu aɗahàŋ la Kana la kutso Galili, apə̀hla mazləɓay aŋha ala, kà uwana à uwana azlaməna matapla la slaka aŋha tadìŋ gəl à masla à vok. 12 La lig aŋa uwaga la ahəŋ, ahàd à gudəŋ Kapernahum la iyà aŋha, la azladeda aŋha, la azlaməna matapla la slaka aŋha, tadzànì à ahəŋ la abatà. 13 Uwana madəvaday aŋa Paska aŋa azla Yahudiya nekwa kà, Yesu ahàd à Urusalima. 14 Aɓə̀z azlaməna matsakalay à gəl, la məŋ gày Zəzagəla la aku. Tadàw sla ala, la azlatuwaŋ, la azlahabakoku, aɓə̀z azlaməna maɓaɗla sili à gəl bay, tadzàh madzay la huma aŋa sili aŋatà, taɓàɗla. 15 Aɗahà kurpi aŋa zuwiɗ, akuɗə̀kàh atà à lag gesina la məŋ gày Zəzagəla la aku, la azlatuwaŋ, la azlasla aŋatà, adakwà table aŋa azlaməna maɓaɗla sili à vəɗah anasà sili aŋatà ala. 16 Ŋgaha agòɗ à azlaməna madaw azlahabakoku ala: "Hə̀làw atà ala la abanay! Kapakàw gày aŋa baba gulo ala kà gày matsakalay aw!" 17 Təh, awùl à azlaməna matapla la slaka aŋha gay uwana tatsetsèr à wakità Zəzagəla à abà à gəl: 'Mawoy gày aŋak gulo kà, bokuba akàl uwana abaɓəhgəla ləv la tsəh.' 18 Ama azlamadzahaga aŋa azla Yahudiya tanavàl: "Tsəhay nadzipo ma uwala kapəhanula kà anu aŋa masəlay kà kak la maslay kà maɗehəŋ kiya uwanay la?" 19 Yesu agòɗ à atà: "Kàlàw məŋ gày Zəzagəla uwanay à ahəŋ, ŋgaha gədàula à afik la mahənay makər." 20 Azla Yahudiya tagòɗal: "Gày uwanay taŋàl kà taɗahà mavay dzik ufaɗ gəl aŋha mukwà, kà pəra masla kadàwula à afik la mahənay makər kagoɗ, aah..?!" 21 Ama məŋ gày Zəzagəla uwana Yesu apə̀h, kà lakəl aŋa vok aŋha. 22 Uwana Yesu adawula à uda la mamətsay kà, təh awùl à azlaməna matapla à gəl la slaka aŋha à gay uwaga, tadìŋ gəl uwana à vok matsetserayga, ŋgaha la gay uwana Yesu apə̀h à atà gesina. 23 Mok uwana Yesu la Urusalima, la kaslà aŋa madəvaday aŋa Paska kà, azladza aŋuvaw tadìŋal gəl à vok, kà azlanadzipo uwana aɗahàtàŋ. 24 Ama Yesu afà à atà gəl aw, kà uwana asə̀l madzugway aŋatà lela. 25 Kà uwana masla kà anəkuɗà dza aŋa mapəhalla madzugway aw, kà uwana masla la gəl aŋha asə̀l uwana la ləv aŋatà la tsəh. 1 Dza anik la ahəŋ sləm aŋha Nikodemus, agà tekula aŋa azlamasiga aŋa azla Yahudiya, masla kà zil Farisəya. 2 La vəɗ la abà vərdi anik asà à waŋ à slaka Yesu la magoɗal: "Rabbi, məsəl kà Zəzagəla aslə̀l ka à waŋ kà matapanula, kà uwana dza la ahəŋ aɗəhəŋ tsəhay nadzipo uwaga kaɗəhəŋ aw, tsa baŋa Zəzagəla la masla aw aw." 3 Yesu agòɗal: "Haɗay, gəgoɗ à ka la dziriga: Dza aslala vok manəŋ makoray Zəzagəla aw, say baŋa adayyi vok mawga dàŋ." 4 Nikodemus anavàl: "Kakay dza adagay magol gà, kà ayyi vok mawga aya ma? Aslala vok aŋa maul à huɗ aŋa iyà aŋha kà mayyay aya ay?" 5 Yesu agòɗal: "La dziriga gəpəh à ka: Dza aslala vok aŋa mad à makoray Zəzagəla aw, say baŋa adayyi vok, la iyaw ŋgaha la Masasəɗok. 6 Uwana tayyà la sləɓ vok, uwaga sləɓ vok; uwana tayyà la Masasəɗok, uwaga Masasəɗok. 7 Ləv avàl à ka à gay kà, kà uwaga gəpə̀h à ka aw: 'Azlawla kà vok, say akul gesina kayyaw vok mawga.' 8 Afaɗ aɗəɗay bokuba uwana asal; katsəna maɗəɗay aŋha, ama kasəl slaka uwana asà à waŋ la abà aw, kasəl slaka uwana ada à abà aw. Kiya uwaga à uwana apaka vok la azladza uwana tayyà vok la Masasəɗok." 9 Kiya uwaga Nikodemus agòɗal: "Kakay uwaga apaka vok ma?" 10 Yesu agòɗal: "Tsa kak masla matapla à azla Isərayel la abà, kà pəra masla kasəl uwaga aw uwà? 11 Gəpəh à ka la dziriga: Məpəhay lakəl aŋa tatak uwana məsəl, ŋgaha lakəl aŋa tatak uwana mənəŋàŋ. Ama asa à akul makəs sayda gami aw. 12 Tsa kadiŋaw gəl à gay aŋa azlatatak uwana apaka vok la vəɗah aw ma, ŋgaha ma, kakay zlà ma kadàkəsaw kaslawwal à vok aŋa madiŋal gəl à vok à baŋa gəpəh à akul gay aŋa azlatatak la zagəla ma? 13 Dza la ahəŋ adada à zagəla aw, tsa baŋa Kona aŋa dza uwana asà à ahəŋ la afik aw aw." 14 "Kiya uwana uwarà Musa adzilà bebi aŋa adà à zagəla la ahàf la gay la fəta la abà, kiya uwaga tadàdzilla Kona aŋa dza à zagəla suwaŋ. 15 Ŋgaha kəla uwabeyuwi uwana adiŋ gəl à masla à vok aɓəz sifa adəv à gay aw. 16 Kà uwana Zəzagəla awoya gudəŋ à vok kà kaykay, à uwana avà Kona aŋha tekula gà uwaga, kà dèwdèw dza uwana tadiŋal gəl à vok kà, tazila aw, ama kà, tadàɓəz sifa adəv gay aw. 17 Zəzagəla aslə̀l Kona aŋha à waŋ kà, kà seriya à gudəŋ à vok à gəl aw, ama kà gudəŋ à vok aŋa maɓəz maɓəlay la masla." 18 "Dza uwana adiŋ gəl à Kona à vok, seriya adàkəsay aw, ama dza uwana adiŋal gəl à vok aw kà, seriya adakəsay, kà uwana adiŋ gəl à Kona tekula gà aŋa Zəzagəla à vok aw. 19 Aganay slaka uwana seriya aguwaŋ la abà: Uɗaka asà à waŋ à gudəŋ à vok, ama azladza tahaya mələs kà uɗaka, kà uwana maɗehəŋ aŋatà kà delgaw. 20 Azladza gesina taɗàh mawisiga kà, tapəsew dziriga aŋa uɗaka, ŋgaha tatsa à waŋ à uɗaka à abà aw, kà uwana asa à atà kà sləray mawisiga uwaga aŋa mapəhla vok ala, la uɗaka la abà aw. 21 Ama dza uwana akəs dziriga kà, aday kà la uɗaka la abà, kà azladza gesina aŋa manəŋəŋ la dazuwaya, kà akəs gay aŋa Zəzagəla la masləkaway." 22 La lig aŋa uwaga la ahəŋ Yesu atsìzlla ala, ahàd à kutso aŋa Yahudiya à abà la azlaməna matapla la slaka aŋha. Tasàfànì la abatà atà nna, taɗahàhà batem. 23 La kaslà uwatà kà Yuhana aɗahàhà batem à azladza la Aynon, uwana nekwa la Salim, kà uwana iyaw la ahəŋ la abatà məŋga. Azladza tasàhà à waŋ à slaka aŋha, ŋgaha aɗahà à atà batem, suwaŋ. 24 (La kaslà uwatà kà, Yuhana kà tadùw à daŋay dadàŋ aw) 25 Kiya uwaga azlaanik la tataka azlaməna matapla aŋa Yuhana la abà tadzəkà mabay vok gay la zil Yahudiya anik, lakəl aŋa tsəhay mapal vok aŋatà aŋa magay tsiɗaŋa. 26 Tahàd à slaka Yuhana ŋgaha tagòɗal: "Rabbi, kadzugway lakəl aŋa dza uwana kagaw akul səla la gay dərəv uda aŋa mukwà Urdun, uwana kaz anu sayda lakəl aŋha takay? Lagwa kà, masla bay kà, aɗàh batem à azladza, azladza takə̀l à slaka aŋha gesina!" 27 Yuhana agòɗ à atà: "Dza la ahəŋ aslala vok aɓəz tatak aw, say baŋa Zəzagəla adavàl. 28 Akul la gəl aŋkul kà, akul azlaməna sayda gulo, gəgòɗ kà: Gi Kristu aw. Ama gi à masləl gi à waŋ gà, la huma aŋha pəra. 29 Masla mazəɓ mis kà masla la uwana zil mis. Ama sləgud aŋa zil misga, adatsizlla à ahəŋ la makəla aŋha, atsəɓal sləm. Baŋa adatsən kuda aŋa zil mis, arabay. Kiya uwaga à marabay gulo babay suwaŋ zlà. Lagwa kà, marabay gulo adahənla pawasla. 30 Kà aŋa uwaga kà, say masla agay mazləɓayga, ŋgaha mazləɓay gulo atatuway." 31 "Dza uwana asa à ahəŋ la zagəla, masla lakəl aŋa azlatatak gesina, ama dza uwana la vəɗah masla dza aŋa vəɗah, apəhay kà gay aŋa vəɗah bay. Uwana asa à ahəŋ la zagəla aga lakəl aŋa tatak gesina. 32 Uwana anəŋàŋ, uwana atsənàŋ la uwana apəhay, ama dza akəs mapəhay aŋha aw. 33 Kəla uwabeyuwi uwana akəs mapəhay aŋha, agəɗaŋ à afik kà Zəzagəla kà dziriga. 34 Dza uwana Zəzagəla aslə̀lla à waŋ apəhay gay aŋa Zəzagəla, kà uwana ahənə̀ŋ ala la Masasəɗok aŋha. 35 Baba awoya Kona aŋha, ŋgaha avàl ndzəɗa lakəl aŋa tatak gesina. 36 Dza uwana adiŋ gəl à Kona à vok, aɓəz sifa adəv à gay aw, ama dza uwana akweska Kona, adàɓəz sifa uwaga tetuwa à aw, ama mapak ləv aŋa Zəzagəla adza à ahəŋ lakəl aŋha." 1 Azla Farisəya tatsənàŋ kà Yesu aɗàh batem, ŋgaha aɓə̀z azlaməna matapla ɗaɗuwa à gay aŋa Yuhana. 2 (Ama Yesu la gəl aŋha kà aɗahà batem à dza amiyaka tekula aw, say azlaməna matapla la slaka aŋha pəra) 3 Mok uwana Yesu atsənà uwaga tapəhay kà, asàk à kutso Yahudiya à ahəŋ, awùl à Galili. 4 Kà awùl à Galili kà, say aguwà à uda la kutso Samariya. 5 La mas à uda la Samariya abə̀z à gudəŋ uwana à abà sləm aŋha Səser, uwana nekwa la guf uwana Yakuba avà à kona aŋha Yusufu. 6 La abatà suwa aŋa Yakuba la ahəŋ, Yesu adày vok la mauguzahay aŋha la abà, adzà madzay la gay suwa. Mok uwaga azlagay tataka afats. 7 Mis Samariya asà à waŋ kà matəɗ iyaw, Yesu agòɗal: "Mis tə̀ɗ à gi iyaw, gəsay!" 8 (La kaslà uwatà kà, azlaməna matapla aŋha tadà à huɗ gudəŋ kà mayàh tatak may) 9 Mis Samariya agòɗ à Yesu: "Kak, kak zil Yahudiya! Kakay kaslala vok kà manav à gi iyaw masay à gi uwana gi mis Samariya ma?" (Apə̀h kiya uwaga kà, kà uwana azla Yahudiya tatsənà vok la azla Samariya aw ma) 10 Yesu awulà ala: "Agayŋa kasəl tatak uwana Zəzagəla avày kà, ŋgaha naka kasəl dza uwana anava à ka iyaw masay kà, naka kak la uwana kanaval iyaw sifa, ŋgaha naka avà kà uwaga." 11 Mis agòɗal: "Məŋga, tsa tatak matəɗla iyaw aga la kak là ahàl aw, suwa bay kà kərkər ma, kakay kaɓəz iyaw sifa ma? 12 Baba gami madzidziga Yakuba avà à anu suwa uwanay; bay kà asàh la azlabəza aŋha la azlaləmana aŋha babay. Kadzugw ma, 'Gəɗuwa Yakuba', kagoɗ, takay?" 13 Yesu awulà ala: "Kəla uwabeyuwi uwana asà iyaw aŋa suwa uwanay, nəlay adàkəsay aya, 14 ama dza uwana adàsay iyaw uwana gədàtəɗallaŋ kà, nəlay adàkəsay aya aw. Kà uwana iyaw uwana gədàtəɗallaŋ kà, adàpakay la huɗ aŋha mukwà aŋa iyaw, uwana akəlay aŋa sifa adəv à gay aw." 15 Mis agòɗal: "Məŋga, təɗəgəŋ iyaw uwaga, kà nəlay aŋa makəs gi aya aw, ŋgaha kà gi aŋa manəkuɗa aŋa mas à waŋ aŋa matəɗ iyaw la abanay aya aw." 16 Yesu agòɗal: "Hàd, kazala zil aŋak, kasawwaŋ à abanay." 17 Mis agòɗal: "Zil gulo la ahəŋ aw." Yesu agòɗal: "Dziriga à uwana kapə̀h: 'Zil gulo la ahəŋ aw', kagòɗ. 18 Haɗay, kadàh à zil zlo, ama uwana kak la mtəga aŋha lagwa kà, zil aŋak aw. Kapə̀h dziriga." 19 Kiya uwaga mis agòɗal: "Məŋga, gəsəl kà kak masla mapəhal gay à ahàl aŋa Zəzagəla. 20 Azlababa gami madzidziga tadavàh kuɗa à Zəzagəla la gudəŋ uwanay la afik, ama akul azla Yahudiya kà, kagoɗaw kà: 'Slaka uwana dza adəv kuɗa à Zəzagəla, kà la Urusalima', kagoɗaw." 21 Yesu agòɗal: "Mis, dìŋ à gi gəl à vok, kaslà adàsa à waŋ à uwana kadàdəvaw kuɗa à Baba Zəzagəla la gudəŋ uwanay la afik aw, amiyaka la Urusalima aw. 22 Akul azla Samariya kasəlaw tatak uwana kadəvawwal kuɗa aw; ama anu, anu azla Yahudiya kà, məsəl tatak uwana mədəval kuɗa, kà uwana maɓəlay kà, asa à uda kà la azla Yahudiya la abà. 23 Ama kaslà adàsa à waŋ, lagwa kà adasa à waŋ lagwa, uwana azlaməna madəv kuɗa tadàdəv kuɗa la Masasəɗok ŋgaha la dziriga, azladza uwana tadəv kuɗa kiya uwaga à ahəŋ, à uwana Baba ayahay. 24 Zəzagəla kà Masasəɗok gà, azlauwla kà vok kà, azlauwana tadəval kuɗa kà la Masasəɗok ŋgaha la dziriga." 25 Mis agòɗal: "Məsəl kà Mesi atsa à waŋ, uwana asal magoɗay kà Kristu. A baŋa adàsa à waŋ, adàpəhanula tatak gesina." 26 Yesu agòɗal: "Gi gà la uwaga gəɓaɗakama lagwa." 27 La kaslà uwatà, azlaməna matapla la slaka aŋha tawùl à waŋ, ŋgaha ləv avàl à atà à gay kà uwana tavàts gay la mis. Ama dza aslàla vok aŋa manaval aw: "Mana asal mi? Baŋaw, kà mana kaɓaɗawma akul səla mi?", la ahəŋ aw. 28 Kiya uwaga mis asàk à tuguzl aŋha à ahəŋ, ahàd à huɗ gudəŋ à abà, la abatà agòɗ à azladza: 29 "Sàw à waŋ, kà nə̀ŋàwwàŋ dza uwana adapəh à gi tatak uwana gəɗahàhàŋ gesina. Zlahaw kà, masla Kristu aw ay?" 30 Azladza tasà à uda la gudəŋ la abà, tahàd à slaka Yesu. 31 La kaslà uwatà azlaməna matapla tadə̀v kuɗa à Yesu kà mazuw tatak may. "Rabbi, kamkam zùw tatak may!", tagòɗal. 32 Ama agòɗ à atà: "Gi la tatak may uwana kasəlaw aw." 33 La abatà azlaməna matapla tanàv vok kà atà kà atà: "Dza anik adasalla tatak may à waŋ kəlay?" 34 Yesu agòɗ à atà: "Tatak may gulo kà, makəs gay aŋa dza uwana aslə̀l gi à waŋ, ŋgaha maɗàh sləray uwana afà à gi à ahàl kà maɗehəŋ. 35 Akul kà, kagoɗaw kà, à lig təla ufaɗ kà matsəɗ tatak, ama gi kà gəgoɗ à akul kà, nərə̀zàw guf lela tsi, hi adahənay, nekwa kà matsəɗay. 36 Masla matsəɗ tatak aɓəz masik aŋha, ŋgaha ahama hi à ahəŋ kà aŋa sifa adəv à gay aw, ŋgaha kà masla masləkay atà la masla matsəɗay tarabay la slaka gà. 37 'Dza anik asləkay, dza anik atsəɗay', uwana gay la gay la abà agoɗ kà, bà dziriga. 38 Gəsləl akul kà matsəɗay la guf uwana la abà kaɗahaw sləray la abà aw; azladza anik taɗahà sləray gà uwana, ŋgaha kà kaɓəzaw à gəl kà sləray aŋatà." 39 Azla Samariya aŋuvaw tadìŋal gəl à vok la gudəŋ uwatà kà gay uwana mis apə̀h à atà: "Apə̀h à gi tatak gesina uwana gəɗahàhàŋ", mis agòɗ à atà. 40 Mok uwana tadasa à waŋ à slaka Yesu, tadə̀val kuɗa kà madzin à ahəŋ atà nna; kiya uwaga Yesu aɗahà mavakay səla atà nna. 41 Gotənaŋ aŋuvaw tadìŋ gəl à Yesu à vok, kà gay aŋha uwana apə̀h à atà. 42 La abatà tagòɗ à mis: "Lagwa kà, mədiŋal gəl à vok kà uwana kapə̀h à anu pəra aw, ama kà uwana anu la gəl gami mədatsənəŋ uwana apə̀h, la dziriga, məsəl kà masla la uwana masla maɓəl gudəŋ à vok." 43 Mok uwana Yesu adadza à ahəŋ la abatà mavakay səla, asàk atà à ahəŋ, ahàd à kutso Galili. 44 Yesu la gəl aŋha agòɗ: "Masla mapəhal gay à ahàl aŋa Zəzagəla maɓəz mazləɓay la gudəŋ aŋha la abà aw." 45 Ama tekeɗik mok uwana adabəzay à gudəŋ aŋha, azladza takə̀s la ahàl səla, kà uwana mok uwana tahàd à madəvaday à Urusalima, tanəŋàŋ, uwana aɗahàŋ la madəvaday uwatà la abà gesina. 46 La kaslà uwatà, masla awùl à Kana, la slaka uwana apakà iyaw ala kà iyaw matavəruk. Kana uwaga agà kà la Galili la abà. Masla sləray aŋa gumna la ahəŋ la abatà, bəzi aŋha la ɗuvats la Kapernahum. 47 Mok uwana masla sləray uwaga atsənàŋ kà Yesu adasa à waŋ à Yahudiya la Galili kà, masla atsìzlla ala, ahàd à slaka Yesu, adə̀val kuɗa kà manəf masla à Kapernahum, kà masla aŋa mawur bəzi aŋha ala. Kà uwana bəzi agà kà la ləv la ləv pəra. 48 Yesu agòɗal: "Akul gesina, kadiŋaw gi gəl à vok aw, say baŋa kadànəŋaw azlanadzipo la uwana kadàdiŋawwal gəl à vok." 49 Masla sləray agòɗal: "Məŋga, sà à waŋ à mtəga gulo dadàŋ, kà mamətsay aŋa bəzi gulo." 50 Yesu agòɗal: "Hàd à mtəga aŋak, bəzi aŋak aga la ahəŋ, adza à ahəŋ la sifa, awkà adàmətsay aw." Zil uwaga adìŋ gəl à uwaga à vok Yesu apə̀hal. 51 Uwana agà la tetəvi la ama, kà mawul à mtəga, tagagàm la azlaməna sləray aŋha, maslà tagòɗal: "Bəzi aŋak adaɓəlay!" 52 Masla anàv à atà la məl, ma uwala aɓəzà à ŋuləm la. Tagòɗal: "Lakuhu la sa tekula, à uwana akàl vok asàlla vok ala." 53 Kiya uwaga awùl à baba à gəl kà kalkal la kaslà uwana Yesu apə̀hal: "Bəzi aŋak adaɓəlay", agòɗal. Kà uwaga à uwana masla la azlaməna huɗ gay aŋha gesina tadìŋ gəl à Yesu à vok. 54 Uwaga kà masəla aŋa nadzipo uwana Yesu aɗahàŋ dagay la mas à uda aŋha la Yahudiya, la kutso Galili. 1 Uwana uwaga adada à lig, azla Yahudiya tadzəkà mahab madəvaday, Yesu bay ahàd à Urusalima. 2 La gudəŋ uwatà la abà nekwa la gamagày aŋa azlatuwaŋ, agà la ahəŋ iyaw matsakayga uwana sləm aŋha la gay ibəranəŋkowen: Betsata. Iyaw uwatà tanuɗa ala à gay à abà la azlatsatsagla zlo. 3 La tsəh aŋa tsatsagala uwatà, azlaməna ɗuvats aŋuvaw tahànàhal à tsəh: azlaguləf, azladeri, azlamagul à afik gà. [Takudàh maɓəlak vok aŋa iyaw uwana aɓəlàkàhà à vok. 4 Kwà à kwà malika aŋa Zəzagəla asàh à ahəŋ aŋa maɓəlakàh iyaw uwaga. Masla ɗuvats uwana atsa à vok à iyaw uwaga à abà aɓəlakay, awur ala la ɗuvats aŋha la abà, baməraka ɗuvats tsəhay gà uwala beyli gesina.] 5 Masla ɗuvats anik la ahəŋ la abatà, adaɗah mavay dzik makər gəl aŋha mtəgis. 6 Uwana Yesu anəŋà dza uwatà la slaka mahən à ahəŋ, asə̀l kà adasafay la ɗuvats aŋha uwaga la abà, Yesu agòɗal: "Asa à ka mawur ala ay?" 7 Masla ɗuvats awulà ala, anə̀ŋal à adi agòɗal: "Məŋga, dza gulo la ahəŋ aŋa madla gi à abà la kaslà uwana iyaw aɓəlak vok aw. Baŋa gəwaɗ vok à uda, gəda à abà zlà, gədàgoɗay kà dza anik atsà à vok à abà kà gi." 8 Yesu agòɗal: "Sà à afik, zə̀ɓ butsi aŋak, ŋgaha dà aŋak!" 9 Hadzak, asà à afik awùr ala, akə̀l butsi aŋha à abà, adzəkà maday. Ama mavakay uwatà kà mavakay maduw ləv tekeɗik. 10 Uwana azlamasiga aŋa azla Yahudiya tanəŋàŋ, tagòɗ à dza uwana awùr ala: "Lakana kà vuɗ maduw ləv, wakità mapəhay gami avà tetəvi kà mazəɓ butsi aŋak aw!" 11 Agòɗ à atà: "Dza uwana awurà gi ala agòɗ à gi: 'Kə̀l butsi aŋak à abà, ŋgaha dà aŋak', agòɗ à gi." 12 Tanavàl la gay ala: "Uwa à dza uwana 'Zə̀ɓ butsi aŋak, dà aŋak', agòɗ à ka uwa?" 13 Ama dza uwana awurà ala kà, asə̀l dza uwana awuràŋ ala aw. Yesu adadiy aŋha la abatà, kà uwana maham à ahəŋ dza aŋuvaw la abatà. 14 Zwek, la huma la gay, Yesu agagàm à məŋ gày Zəzagəla à agu atà səla, ŋgaha agòɗal: "Tsənàŋ lagwa kà kawùr ala. Kaɗahàŋ tsakana aya kà tatak mawisiga uwana aɗuwa uwanay aŋa maɓəza kà aya aw!" 15 Dza uwaga adà aŋha, ŋgaha agòɗ à azla Yahudiya kà Yesu la uwana awuràŋla. 16 Kà uwaga à uwana azla Yahudiya tadzəkà matərəɓ Yesu, à kà uwana awurà dza ala la vuɗ maduw ləv. 17 Ama Yesu agòɗ à atà: "Baba gulo aɗàh sləray koksikoksi, gi bay kà gəɗehəŋ kiya uwaga suwaŋ." 18 Kà gay uwaga à uwana, azla Yahudiya tayàh kaykay kà makəɗay, kà uwana agòɗ kà Zəzagəla kà Baba aŋha, ŋgaha agagazləla gəl aŋha la Zəzagəla. Awkà kà, uwana apəsèw mavakay maduw ləv pəra aw. 19 Kà uwaga, Yesu agòɗ à atà: "Gəgoɗ à akul la dziriga, Kona aslala vok maɗàh tatak la gəl aŋha aw, say anəŋəŋ kà say uwana Baba aɗehəŋ. Uwana Baba aɗehəŋ gesina, uwaga la uwana Kona aɗehəŋ babay. 20 Kà uwana Baba awoya Kona, apəhalla uwana aɗehəŋ gesina. Adàpəhalla à azlatatak uwana aɗuwa uwanay aya, kà Kona aŋa maɗàh uwaga. Ŋgaha uwaga adaval akul ala ləv à gay. 21 Bokuba uwana Baba awùlla azlamazimnekiɗ à uda la mamətsay kà mav à atà sifa kà, kiya uwaga babay Kona av sifa à uwabeyuwi uwana awoyaŋ gesina. 22 Baba kà aɗàh seriya à dza à gəl aw, ama avà maslay maɗàh seriya uwaga à ahàl aŋa Kona aŋha gesina, 23 kà azladza gesina aŋa masləkaway Kona, bokuba uwana tasləkaw Baba. Dza uwana asləkaw Kona aw, masla asləkaw Baba uwana aslə̀l à waŋ babay aw." 24 "Gəpəh à akul la dziriga, dza uwana atsəɓ sləm à gay gulo, ŋgaha adiŋ gəl à dza uwana à vok aslə̀l gi à waŋ kà, masla la sifa adəv à gay aw. Seriya adàkəsay aw, aguwa à uda la mamətsay, adàɓəz sifa adəv à gay aw. 25 Haɗay gəgoɗ à akul la dziriga, kaslà atsa à waŋ, ŋgaha kaslà uwaga aga la tataka gami la abà lagwa, uwana azlamazimnekiɗ tadàtsenəŋ kuda aŋa Kona aŋa Zəzagəla, ŋgaha kà azlauwana tadàkəɗeɗal à ahəŋ tadàdz à ahəŋ la sifa. 26 Iyay, bokuba uwana Baba la maslay kà mavày sifa adəv à gay aw à azladza, kiya uwaga bay avà maslay uwaga à Kona aŋha à ahàl, kà masla aŋa mav sifa à azladza. 27 Avà maslay à Kona aŋha kà maɗàh seriya, kà uwana masla Kona aŋa Zəzagəla. 28 Ləv aval à akul à gay kà uwaga aw, kà uwana kaslà atsa à waŋ, à uwana azlamazimnekiɗ uwana la zəvay la aku gesina tadàtsən kuda aŋha, 29 ŋgaha tadàsa à uda la zəvay aŋatà la aku. Azladza uwana taɗahàŋ delga tadàwula à uda kà maɓəzal masik aŋatà uwana sifa adəv à gay aw, ama azlauwana taɗahàŋ mawisiga tadàwula à uda kà maɗahàtaŋ seriya à gəl." 30 "Gi la gəl gulo kà gəslala vok kà maɗàh tatak aw, gəɗàh seriya kà bokuba uwana 'Ɗahàŋ', Baba agòɗ à gi, seriya gulo kà dziriga, kà uwana gəyàh mawoyəŋ aŋa gəl gulo aw. Ama uwana asa à dza uwana aslə̀l gi à waŋ pəra. 31 Baŋa gəz sayda aŋa gəl gulo kà, sayda gulo kà agay dziriga aw. 32 Ama say dza anik la uwana az sayda lakəl gulo, gəsəl kà sayda uwana aziŋ lakəl gulo kà dziriga. 33 Kasləlaw azlaməna matsəɓ sləm à slaka Yuhana, sayda aŋha uwana azaŋ kà dziriga. 34 Ama gi kà gənəkuɗa aŋa sayda aŋa dza aw, gəula akul à gəl kà, kà akul aŋa maɓəz maɓəlay pəra. 35 Yuhana kà agà kà bokuba fənəs mavatsiŋ à ahəŋ gà pəra, ŋgaha karabaw ŋuv la uɗaka aŋha la abà. 36 Ama sayda gulo uwana gəziŋ kà, aɗuwà aŋa Yuhana uwana azàŋ, azlasləray uwana Baba gulo avà à gi kà mahənəŋla kà, taz sayda gulo. Ŋgaha babay kà apəhla ala kà Baba la uwana aslə̀l gi à waŋ. 37 Baba uwana aslə̀l gi à waŋ apəhay lakəl gulo aya. Akul kà kadàtsənaw kuda aŋha didi aw, ŋgaha kadànəŋaw huɗ adi aŋha babay aw. 38 Akul kafaw gay aŋha à ləv aŋkul à tsəh aw, kà uwana kadiŋawwal gəl à vok à dza uwana aslə̀l à waŋ aw. 39 Kadzeŋaw wakità Zəzagəla la haŋkəli, kadzugwaw kà: 'La abà la uwana mədàɓəz sifa adəv à gay aw', kagoɗaw. Bà dziri haɗay gà, la wakità uwaga la abà la uwana sayda gulo. 40 Ama asa à akul aŋa mas à slaka gulo aŋa maɓəz sifa dziriga aw." 41 "Ama gi kà, gəyàh mazləɓ gi aŋa azladza aw. 42 Ama akul kà, gəsəl kà, kawoyaw Zəzagəla la ləv aŋkul la tsəh aw. 43 Gəsà à ahəŋ kà la sləm aŋa Baba gulo, ama karabaw gi à huma aw. Ama baŋa dza anik atsa à waŋ la maslay aŋa aslasl gəl aŋha kà, kakəsaw. 44 Akul asa à akul mayàh mazləɓay aŋa azladza anik anik, ŋgaha kayahaw mazləɓay uwana asa à ahəŋ la slaka Zəzagəla dziriga aw. Ŋgaha ma kakay kadiŋaw gəl à vok ma? 45 Ama kadzugwaw kà, gədàta akul kaf à gəl la slaka Baba gulo, kagoɗaw aw. Ama Musa la uwana adàta à akul kaf à gəl, à masla uwana kafaw manəwəŋ aŋkul à masla à afik. 46 Agayŋa ndzer, kadiŋaw gəl à Musa à vok kà, naka kadiŋaw gi gəl à vok babay, kà uwana Musa atsetsèr kà lakəl gulo. 47 Ama tsa kadiŋaw gəl à uwana à vok atsetsèr aw ma, kakay kadiŋaw gəl à gay gulo à vok zlà ma?" 1 La lig aŋa uwaga la ahəŋ, Yesu ahàd à gay dərəv à uda anik aŋa dərəv Galili, uwana tazalalla bay dərəv Tiberiya. 2 Maham à ahəŋ dza aŋuvaw tanəfà, kà uwana tanaŋà azlanadzipo uwana aɗahàhàŋ la mawar azladza ala. 3 Yesu ahàd à dadəgwal à afik la abatà, tadzà madzay la azlaməna matapla la slaka aŋha. 4 Paska, madəvaday aŋa azla Yahudiya, nekwa. 5 Uwana Yesu anəŋà maham à ahəŋ dza aŋuvaw tatsà à waŋ à slaka aŋha, Yesu atàp à Filip agòɗal: "Lala mədàɓəz tatak may kà masukway, kà mav à maham à ahəŋ dza uwanay aŋa mazuway zlà?" 6 Apə̀h uwaga kà, kà matap Filip. Awkà, masla kà asə̀l tatak uwana naka aɗehəŋ. 7 Filip agòɗal: "Amiyaka məsukw kaf aŋa gursu dadərmokw səla bay kà, aslay kà kəla uwabeyuwi aŋatà aŋa maɓəzal ŋuv aw." 8 Tekula la tataka azlaməna matapla aŋha la abà Andəre, deda aŋa Səmon Piyer agòɗal: 9 "Bəzi kohna anik la ahəŋ la abanay, kaf gay bərsew zlo la kilfi səla la ahàl, ama uwaga ma, mana akəs à vok aŋa maham à ahəŋ dza kiya uwanay ma?" 10 Kiya uwaga Yesu agòɗ à atà: "Dzàw azladza madzay gesina, slaka uwatà kà delga kà madzàh madzay, kà uwana kəsaf la ahəŋ." Ŋgaha atà tadzàhà madzay gesina aŋatà taslay zil dəbow zlo. 11 Yesu ahə̀l kaf uwaga, "Kikay", agòɗ à Zəzagəla, atsakà kaf ala, ŋgaha avàhà à azladza. Ahə̀l kilfi, aɗahàŋ kalkal kiya uwaga aya. Tazùw tsəràh à uwana aslàh à atà. 12 Mok uwana tahànla gesina, Yesu agòɗ à azlaməna matapla la slaka aŋha: "Hamàw gay à mapətsèh pətsèhga uwaga à vok, atə̀ɗal ala amiyaka tekula aw." 13 Ŋgaha tahamà gay à mapətsèh pətsèhga uwana à vok atàm a atà à ahàl, tahənàŋ ala takosà kulo gəl aŋha səla. 14 Uwana azladza tanəŋàŋ nadzipo uwana Yesu aɗahàŋ, tagòɗ: "Kayyà, dza uwanay ndzer kà masla mapəhal gay à ahàl, uwana naka atsa à waŋ à gudəŋ à vok!" 15 Uwana Yesu asə̀l kà azladza tatsà à waŋ kà mafiya à sufəl à abà la ndzəɗa kà, kà uwaga à uwana adà aŋha à gudəŋ à afik kokuɗa gəl aŋha. 16 Mok uwana mokokhu adasa à waŋ kà, azlaməna matapla la slaka Yesu tadà à ahəŋ à gay dərəv, 17 tahàd à kəslah iyaw à afik, ŋgaha tadzəkà mad à uda la dərəv la abà, kà mabəziya à Kapernahum. La mok uwaga kà, vəɗ adasa à waŋ, Yesu alə̀g mabəz atà à tsəh dadàŋ. 18 Magol kular adzəkà à vok, iyaw dərəv adzəkà magaŋtsay la mavəlay lakəl. 19 Azlaməna matapla kà, taday azlatalka magur mahoyay pəlis səla la tenma baŋaw makər kà zlazlaɗa aŋa afaɗ. Uwana tanə̀ŋ Yesu adà à awtày à slaka aŋatà lakəl dərəv la asik kà, guba akə̀s atà. 20 Ama Yesu agòɗ à atà: "Guba akəs akul aw, gi ŋwà!" 21 Tayàh mazəɓ à tsəh la kəslah iyaw la afik nəma, la katskats tanəŋà kà kəslah iyaw adàdəɓani kutso uwana asà à atà mad à abà. 22 La bebəŋ gà kà, maham à ahəŋ dza uwana tagə̀ɗ à gay dərəv à uda anik, awùl atà à gəl kà la mokokhu lakuhu kà, agà la ahəŋ pəra kà kəslah iyaw tekula, ŋgaha tasə̀l bay kà Yesu ahàd à kəslah iyaw à afik la azlaməna matapla la slaka aŋha aw. Ama azlaməna matapla aŋha tahàd kokuɗa gəl aŋatà pəra. 23 Ama pəra kà, azlakəslah iyaw anik taguwà à waŋ la Tiberiya, tasà à waŋ à slaka uwana Yesu avà kaf, à mok uwana kikay agòɗ à Zəzagəla kà aŋa uwaga. 24 Uwana maham à ahəŋ dza anəŋàŋ kà Yesu la abatà aw, azlaməna matapla la slaka aŋha bay kà atà la abatà aw, tadàh à azlakəslah iyaw uwaga à afik, tada à Kapernahum kà mayahay. 25 La kiya uwaga taɓəzà Yesu à vok la gay dərəv à uda anik aŋa dərəv ŋgaha tagòɗal: "Rabbi, kasà à abanay mbà?" 26 Yesu awulà à atà ala: "Haɗay, gəpəh à akul la dziriga, kayahaw gi kà, kà uwana kazùwàw kaf, kahànàwla, aslahà à akul, awkà kà azlanadzipo la azlasləray gulo uwana gəɗahàŋ aw. 27 Kaɗahaw sləray kà aŋa tatak may uwana awìs ala aw. Ama ɗahàwàŋ kà aŋa tatak may uwana adza à ahəŋ, avà sifa adəv à gay aw. Tatak may uwaga kà, Kona aŋa dza la uwana adàvà à akul la maslay, uwana aɓə̀zal la slaka Baba Zəzagəla." 28 Ŋgaha tanavàl: "Mana məɗehəŋ kà maɗàh sləray uwana asa à Zəzagəla zlà ma?" 29 Yesu awulà à atà ala: "Sləray uwana Zəzagəla akuday la slaka aŋkul kà, say madiŋ gəl à dza uwana à vok, Zəzagəla aslə̀l à waŋ." 30 Tagòɗal: "Nadzipo ma uwala kapəhanula kà anu aŋa madiŋ à ka gəl à vok la? Ŋgaha ma sləray ma uwala kaɗehəŋ la? 31 Azlababa gami madzidziga tazùw manne à uwana asàhà à ahəŋ la zagəla la fəta la abà, bokuba uwana tatsetsèr à wakità Zəzagəla à abà. Masla avà à atà tatak may uwana asàh à ahəŋ la zagəla." 32 Yesu awulà à atà ala: "Haɗay la dziriga, gəpəh à akul, Musa la uwana avà à akul tatak may uwana asà à ahəŋ la zagəla aw. Ama Baba gulo la uwana avà à akul tatak may dziriga, uwana asà à ahəŋ la zagəla. 33 Kà uwana tatak may uwana Zəzagəla avày kà, anik la ahəŋ aw, say masla uwana asà à ahəŋ la zagəla, (Uwaga kà Yesu) ŋgaha ava sifa à azladza gudəŋ à vok gesina." 34 Kiya uwaga tagòɗal: "Kayyà Sufəl, và à anu tatak may uwaga koksikoksi kəla zlà!" 35 Yesu asà à atà ala à uda: "Gi la uwana gi tatak may aŋa sifa. Dza uwana atsa à waŋ à slaka gulo, adiŋ à gi gəl à vok kà, may adàkəs aya aw, nəlay adàkəs bay aw. 36 Ama gəpəh à akul: Kanəŋaw gi, ama bà la uwaga gesina kà, kanəŋaw gi kadiŋaw gi gəl à vok aw. 37 Mana beymi uwana Baba avà à gi, atsà à waŋ à slaka gulo, ŋgaha gədàkweska dza uwana atsa à slaka gulo aw. 38 Kà uwana gəsà à ahəŋ la zagəla kà, kà maɗehəŋ mawoyəŋ aŋa dza uwana aslə̀l gi à waŋ, awkà aŋa gəl gulo aw. 39 Aganay uwana asa à dza uwana aslə̀l gi à waŋ: Kà gəziŋ ala tekula aŋa tatak uwana avà à gi à ahàl aw, ama kà gəula atà à uda la mamətsay la sifa la mavakay makəɗ gəl à ahəŋ gudəŋ à vok. 40 Aganay uwana asa à Baba gulo: Kà dèwdèw dza, uwana tanəŋà Kona aŋa Zəzagəla, ŋgaha tadiŋal gəl à masla à vok kà, taɓəzal sifa adəv à gay aw, ŋgaha gədaula atà à uda la mamətsay la madəv à gay gudəŋ à vok." 41 Azla Yahudiya taŋoŋùz lakəl aŋa Yesu, kà uwana Yesu, 'Gi tatak may uwana asà à ahəŋ la zagəla', agòɗ. 42 "Təga kà, Yesu kona aŋa Yusufu aw takay? Məsəl baba aŋha la iyà aŋha, ŋgaha ma kakay: 'Gəsà à ahəŋ la zagəla', agòɗ zlà ma?", tagòɗ. 43 Yesu awulà atà ala: "Sàkàw à maŋoŋuz à tsəh ala kà akul à akul. 44 Dza aslala vok aŋa mas à waŋ à slaka gulo aw, say Baba uwana aslə̀l gi à waŋ, la uwana abiyəŋ masla à slaka gulo, ŋgaha gi gədàula à uda la mamətsay la vuɗ makəɗ gəl à ahəŋ. 45 Azladza uwana Zəzagəla apə̀h à atà gay à ahàl kà mapàh à azladza, tatsetsèr à wakità à abà: 'Zəzagəla la gəl aŋha adàtapatala tatak gesina.' Kəla dza uwana atsəɓ sləm à Baba, akəs mapəhay aŋha, masla atsa à waŋ à slaka gulo. 46 Asal magoɗay, kà dza adanəŋ Zəzagəla aw. Dza uwana asà à ahəŋ la slaka Zəzagəla la uwana adanəŋ Baba pəra." 47 "La dziriga gəpəh à akul, dza uwana adiŋal gəl à vok kà, adàɓəz sifa adəv à gay aw. 48 Gi tatak may uwana avà sifa adəv gay aw. 49 Azlababa aŋkul madzidziga tazùw manne la fəta la abà. Bà la uwaga bay kà tamə̀ts à gay. 50 Ama uwabeyuwi uwana azuw tatak may uwana asà à ahəŋ la zagəla kà, adàmətsay aw. 51 Gi tatak may aŋa sifa, uwana asà à ahəŋ la zagəla. Baŋa dza azuw tatak may uwatà, adàdza à ahəŋ la sifa aŋa koksikoksi. Tatak may uwana gədàvàl kà vok gulo, gədàvày, ŋgaha gudəŋ à vok aŋa madz à ahəŋ la sifa." 52 Lakəl aŋa gay uwaga azla Yahudiya tabayà vok gay kà atà kà atà, tagòɗ: "Kakay dza uwanay avà à anu sləɓ vok aŋha aŋa mazuway ma?", tanavà vok. 53 Yesu agòɗ à atà: "Haɗay, gəpəh à akul la dziriga: Baŋa kazuwaw sləɓ vok aŋa Kona aŋa dza aw, ŋgaha baŋa kasaw aŋiz aŋha aw kà, kadàɓəzaw à sifa tetuwa aw. 54 Dza uwana azuw sləɓ vok gulo, ŋgaha as aŋiz gulo kà, aɓəz sifa adəv à gay aw, ŋgaha gədàula à uda la mamətsay la vuɗ makəɗ gəl à ahəŋ gudəŋ à vok. 55 Kà uwana sləɓ vok gulo kà tatak may dziriga, ŋgaha aŋiz gulo bay kà tatak masay dziriga aya. 56 Dza uwana azuw sləɓ vok gulo, as aŋiz gulo, adza à ahəŋ la gi la abà, ŋgaha gi babay gədza à ahəŋ la masla la abà. 57 Bokuba uwana Baba uwana la sifa aslə̀l gi à waŋ, ŋgaha gi gədza à ahəŋ la sifa kà masla, kiya uwaga babay dza, uwana azuw gi, adza à ahəŋ la sifa kà gi babay. 58 Aganay tatak may uwana asà à ahəŋ la zagəla: Masla kà bokuba uwana azlababa aŋkul tazawàh, uwana tamàtsàh à gay aw. Ama dza uwana azuw tatak may uwanay, adàdza à ahəŋ la sifa aŋa koksikoksi." 59 Yesu apə̀h à atà gay uwaga kà la mok uwana atapla azladza la gày madəv kuɗa la aku la Kapernahum. 60 Mok uwana tatsə̀n uwana Yesu apə̀h kà, aŋuvaw la tataka azlaməna asik aŋha la abà tagòɗ: "Gay uwanay kà zlazlaɗa, uwa aslala vok aŋa makəs uwaga uwa?", tagòɗ. 61 Yesu asə̀l kà gay uwaga kà adàla maŋoŋuzay à azlaməna asik aŋha à ləv à tsəh, ŋgaha agòɗ à atà: "Uwaga ma atsəɗ akul à asik la tsəh ala takay? 62 Kakay tak à gay kanəŋaw Kona aŋa dza, uwana ada à afik à slaka aŋha uwana à abà adzà à ahəŋ uwarà ma? 63 Masasəɗok Zəzagəla la uwana avà sifa; vok aŋa dza kà asla tatak aw. Azlagay uwaga gəpəh à akul, la uwana Masasəɗok ŋgaha sifa. 64 Ama azladza anik la ahəŋ la tataka aŋkul la abà kà, tadiŋal gəl à vok aw." (Kà uwana dagay madzəka kà, Yesu kà asəl azladza uwana tadàdiŋal gəl à vok aw, ŋgaha la dza uwana adàtal kaf à gəl) 65 Azalàŋ à gəl la magoɗay: "Kà uwaga à uwana gəgoɗ à akul, dza aslala vok aŋa mas à waŋ à slaka gulo aw, tsa baŋa Baba abiyəŋ à waŋ, avàl tetəvi." 66 Dagay la mavakay uwatà aŋuvaw la tataka azlaməna manəfay aŋha la abà, tawùl à lig. 67 Kiya uwaga Yesu agòɗ à azlaməna matapla la slaka aŋha kulo gəl aŋha səla: "Asa à akul madiŋ akul babay suwaŋ ay?" 68 Səmon Piyer agòɗal: "Sufəl, məday ma à slaka ma aŋa uwa? Tsa kak la azlagay uwana tav sifa adəv à gay aw uwa? 69 Lagonay kà, mədiŋal gəl à vok, kak tsikaslaga uwana Zəzagəla aslə̀l ka à waŋ." 70 Yesu agòɗ à atà: "Akul kulo gəl aŋha səla gətsatsàmànì akul aw takay? Ama tsa tekula aŋkul kà seteni!" 71 Apə̀h uwaga kà lakəl aŋa Yudas Iskariyot, kona aŋa Səmon, uwana agà la tataka azlaməna matapla kulo gəl aŋha səla uwaga la abà. Masla la uwana naka ata kaf à Yesu à gəl. 1 Uwana uwaga adada à lig kà, Yesu auguzàh la kutso Galili, asàl kà madz à ahəŋ la kutso Yahudiya aw, kà uwana azla Yahudiya tayàh makəɗay. 2 Mok uwana madəvaday aŋa azla Yahudiya, uwana tazalalla madəvaday tsatsagla adagay nekwa kà, 3 azladeda aŋha tagòɗal: "Zà vok la abanay, hàd à Yahudiya, kà azlaməna asik aŋak kà manəŋ sləray aŋak uwana kaɗehahəŋ. 4 Baŋa dza asal azladza tasəl masla kà, apəhla gəl aŋha ala. Tsa kaɗahàh azlasləray anik anik kiya uwanay kà, ɗahàŋ la paraka azladza aŋa manəŋ ka." 5 (Amiyaka azladeda aŋha tadiŋ gəl à masla à vok bay aw) 6 Yesu agòɗ à atà: "Kaslà gulo uwana asa à gi kà, adasa à waŋ aw. Ama kà akul kà, kəla kaslà gesina kà delga. 7 Gudəŋ à vok aslala vok aŋa mapəsew akul aw, ama gi kà apəsew gi. Kà uwana gəpəh la paraka kà azlasləray aŋha uwana aɗehəŋ kà mawisiga. 8 Dàw aŋkul à madəvaday akul zlà. Məday anina aw, kà uwana kaslà uwana asa à gi adasa à waŋ dadàŋ aw." 9 Uwana adapəh à atà gay uwaga kà, adzà à ahəŋ la Galili. 10 Iyay, la mok uwana azladeda aŋha tad à madəvaday, masla babay ahàd, ama apə̀hla vok ala aw, la səbàh pəra. 11 La abatà la madəvaday la abà azla Yahudiya tayàh masla la maham à ahəŋ dza la abà la madəvaday la abà: "Aŋala?", tagòɗ. 12 Tavàts gay la tsəh ala la gəl à gəl lakəl aŋha, la tataka maham à ahəŋ dza la abà. Azlaanik tagòɗ: "Masla kà, dza delga", azlaanik tagòɗ bay: "Awaŋ, dza delga aw!" Tagòɗ: "Masla mazàh azladza ala." 13 Ama dza aslàla vok aŋa mapəhay gay lakəl aŋha la dazuwaya aw, kà uwana guba akə̀s atà kà azla Yahudiya. 14 Mok uwana madəvaday adada à lig tenma kà, Yesu ahàd à məŋ gày Zəzagəla à agu, adzəkà matapla tatak à azladza. 15 Ləv avàl à azla Yahudiya à gay la magoɗay: "Kakay dza uwanay asəl tatak tsa tapla aw ma?" 16 Yesu awulà à atà ala: "Matapla uwana gəpahla ala kà, asa à waŋ kà la slaka gulo aw, ama asà à ahəŋ kà la slaka Zəzagəla, uwana aslə̀l gi à waŋ. 17 Baŋa dza asal maɗàh masal aŋa Zəzagəla kà, adàsəl tatak uwana gəpəhakulla kà, asa à waŋ kà la slaka Baba Zəzagəla, awkà uwaga kà gay aŋa ndzəɗa aŋa aslasl gəl gulo aw. 18 Dza uwana apəh gay aŋa aslasl gəl aŋha kà, ayàh mazləɓ gəl aŋha. Ama dza uwana aɗàh sləray kà aŋa dza uwana aslə̀l à waŋ kà, masla kà apəhay kà uwana dziriga, ŋgaha mawisiga la ahəŋ la uwana la abà apəhay aw. 19 Musa avà à akul mapəhay aw takay? Ama amiyaka tekula aŋkul kà, akəs gay aŋa mapəhay aw. Kà mana kayahaw makəɗ gi zlà ma?" 20 Maham à ahəŋ dza awulà: "Kak la masasəɗok mawisiga, kak masla zagəla zagəla, uwa ayàh makəɗ kà uwa?" 21 Yesu agòɗ à atà: "Gəɗahàŋ kà sləray tekula pəra, à uwana ləv avàl akul à gay gesina! 22 Musa avà à akul tetəvi kà makadav azlabəza à uda, (Amiyaka Musa la uwana adzəkà makadav azlabəza à uda babay aw, ama azlababa aŋkul madzidziga), kà uwaga à uwana kakadavaw azlabəza aŋkul à uda la vuɗ maduw ləv bay. 23 Kakadavaw dza à uda la vuɗ maduw ləv kà matəm mapəhay aŋa Musa à ahəŋ aw, ŋgaha ma kà mana kapakaw gi ləv à gəl, à kà uwana gəwurà dza ala səɗakaka la vuɗ maduw ləv ma? 24 Sàkàw à maɗàh seriya aŋa tatak uwana kanəŋawwaŋ la uda gà. Ŋgaha ɗahàw seriya la tetəvi aŋha." 25 Azladza anik uwana tadzà à ahəŋ la Urusalima tagòɗ: "Dza gà la uwanay à uwana tayahay aŋa makəɗay aw takay? 26 Nə̀ŋàwwàŋ, aɓaɗma la dazuwaya la tataka azladza la abà, ama uwala gay la ahəŋ tapəhal aw. Ŋgaha azlaməŋga gami ma tasəl kà masla la uwana Kristu ndzer zlà ma uwa? 27 Ama baŋa Kristu adàsa à waŋ, dza la ahəŋ asəl slaka uwana adaguwa à waŋ la abà aw. Ama dza uwanay kà məsəl slaka uwana asà à waŋ la abà." 28 Yesu ataplà la məŋ gày Zəzagəla la aku, azà kuda à zagəla agòɗ à atà: "La dziriga kasəlaw gi, ŋgaha kasəlaw slaka uwana gəsà à waŋ la abà ay? Gi kà, gəsà à waŋ kà la aslasl gəl gulo aw, ama dza uwana aslə̀l gi à waŋ kà, dza dziriga. Akul kà kasəlaw aw! 29 Ama gi kà, gəsəl masla, kà uwana la slaka aŋha la uwana gəsà à waŋ, ŋgaha masla la uwana asləl gi à waŋ bay." 30 Kiya uwaga tayàh makəs masla, ama dza aslà kà matapal ahàl à vok aw, kà uwana kaslà aŋha adaslay dadàŋ aw. 31 Aŋuvaw la tataka maham à ahəŋ dza la abà, tadìŋ gəl à masla à vok, tagòɗ: "Baŋa Kristu adàsa à waŋ kà, adàɗehəŋ azlanadzipo adàɗuwaŋ aŋa kona uwanay ay?", tagòɗ. 32 Azla Farisəya tatsənà uwana maham à ahəŋ dza apə̀h la gəl à gəl lakəl aŋa Yesu, ŋgaha azlamadzahaga aŋa azlaməna mav tatak à Zəzagəla, la azla Farisəya taslə̀l azlakohana kà makəs masla. 33 Yesu apə̀h à atà la paraka: "Gi la ahəŋ la akul aŋa kaslà ŋuv aya, la lig la ahəŋ gədàwula à slaka dza, uwana aslə̀l gi à waŋ. 34 Kadàyahaw gi ama kadàɓəz gi aw, kà uwana kaslaw mad à slaka uwana gədàday aw." 35 Azla Yahudiya tanàv vok kà atà kà atà: "Lagwa ma masla ma adàday ma uwala à uwana: 'Kadànəŋaw gi aya aw', agòɗla? Adàday ma à slaka azla Yahudiya uwana taslə̀h gəl à ahəŋ la tataka azla Gərək la abà, kà matapatàla azlatatak takay? 36 Gay uwaga apə̀h ma mana asal magoɗay ma? 'Kadàyahaw gi, ama kadàɓəza gi aw, kà uwana kaslawwal à vok mad à slaka uwana gədàday aw. La slaka uwana gədàdza à ahəŋ babay aw', agòɗ ma?" 37 La mavakay uwana takə̀ɗ gəl à mavədaday, la uwana aga delga, la vuɗ uwatà Yesu astìzlla ala la huma maham à ahəŋ dza, azà kuda à zagəla, agòɗ: "Uwabeyuwi uwana nəlay azəŋ, asa à waŋ, asa iyaw la slaka gulo. 38 Kəla uwabeyuwi uwana adiŋ gi gəl à vok, dərəv aŋa iyaw sifa adàkəlay la ləv aŋha la tsəh bokuba uwana tatsetsèr à wakità Zəzagəla à abà." 39 Yesu kà apəhay kà lakəl aŋa Masasəɗok Zəzagəla, uwana azlauwana tadiŋal gəl à vok tadàɓəzal, kà uwana taɓəz Masasəɗok dadàŋ aw, kà uwana Yesu adada à afik kà maɓəz mazləɓay la slaka Baba aŋha aw. 40 Azladza anik la tataka maham à ahəŋ dza la abà tatsənàŋ gay uwaga tagòɗ: "Ndzer kà, dza uwanay kà masla mapəhal gay à ahàl aŋa Zəzagəla kà mapàh à azladza." 41 Azlaanik tagòɗ: "Masla kà Kristu!", azlaanik tagòɗ: "Awaŋ, masla aw, Kristu kà aguwa à waŋ la Galili ay? 42 Tatsetsèr à wakità Zəzagəla à abà kà: Kristu kà adàguwa à uda kà la mayyi à tsəh ala aŋa David, ŋgaha adàguwa à waŋ la Betelehem, la gudəŋ uwana David adzà à ahəŋ la abà." 43 Maham à ahəŋ dza atsàk ala kà Yesu. 44 Azlaanik la tataka aŋatà la abà, asà à atà makəs Yesu, ama dza la ahəŋ aslàla vok aŋa matapal ahàl à vok aw. 45 Azlakohana tawùl à slaka azlaməŋga aŋa azlaməna mav tatak à Zəzagəla la azla Farisəya, tanàv atà: "Kà mana kasàwla Yesu à waŋ aw ma?" 46 Azladza uwana taslə̀lla atà, tawulà à atà: "Dza la ahəŋ adapəh gay ku bà aŋa dza uwanay didi didi aw." 47 Azla Farisəya tanàv atà: "Akul babay kà kadànəfaw mapapatay aŋha uwaga ŋwà? 48 Məŋga la ahəŋ la tataka gami la abà, baŋaw la tataka aŋa azla Farisəya la abà, adadiŋal gəl à vok ay? 49 Ama say azladza deyday gà la uwana tadiŋal gəl à vok, kà uwana tasəl mapəhay aŋa Musa aw, atà azlamatsaflaga!" 50 Nikodemus agà la tataka aŋa azla Farisəya la abà. A masla uwana asà à waŋ à slaka Yesu la vəɗ vərdi anik, agòɗ à atà: 51 "Haɗay, ma wakità seriya avà tetəvi kà maɗàh seriya à dza à gəl, la kokuɗa matsən uwana aɗahàŋ takay? Awma məsəl uwana aɗahàŋ aw, takay?" 52 Tawulàl ala: "Kak zil Galili ay? Dzèŋ wakità lela, ŋgaha kadàtsenəŋ kà masla mapəhal gay à ahàl aŋa Zəzagəla adàguwa à waŋ la Galili aw!" [ 53 La lig la ahəŋ kəla uwabeyuwi awùl à mtəga aŋha. 1 Mok uwana uwaga adadəv à gay kà, Yesu ahàd à gudəŋ kuvu à afik. 2 La bebəŋ gà la zay la tsəh, awùl à məŋ gày Zəzagəla à agu aya, ŋgaha maham à ahəŋ dza aŋuvaw tahamà à slaka aŋha. Adzà madzay, adzəkà matapatàla azlatatak 3 Azlaməna mapàhla mapəhay ala, la azla Farisəya tadàlla mis uwana à awtày, takə̀s la mazaɓ zil la tsəh. Atà tatsìzllàŋ à huma aŋa maham à ahəŋ dza gesina, 4 ŋgaha tanàv Yesu: "Məŋga, mis uwanay kà, takə̀s kà la mabila la tsəh. 5 La wakità Zəzagəla gami la abà Musa agòɗ à anu kà, azlatsəhay mis uwanay kà, say makaɗ atà la matsàh atà la akur pəra. Kak ma kakay kagoɗ ma?" 6 Tapə̀h uwaga kà, kà makəsal madiŋay à ahəŋ kà aŋa mapuwal gudzi à gəl. Ama la abatà Yesu akəsà gəl à ahəŋ, anə̀h à kutso à abà la gay gəl ahàl aŋha. 7 Uwana bà manaval tanavàl kà, awulà gəl à afik la magoɗ à atà: "Dza uwana la tataka aŋkul la abà adaɗah tsakana didi aw kà, atsa vok ala akur à mis uwaga zlà!" 8 Ŋgaha la lig la ahəŋ, awulà gəl à vəɗah kà manəhay aya. 9 Mok uwana tatsənà gay uwaga kà, tadahà aŋatà la tekula, tekula, azlamagolga dàŋ, ŋgaha azlabəza gà. Yesu agə̀ɗ à ahəŋ kokuɗa aŋha la mis matsizl à ahəŋ gà, uwaga la huma aŋha. 10 Kiya uwaga awulà gəl à afik agòɗal: "Mis, atà la azlaməna mapuwa à ka gudzi à gəl aŋak la? Dza la ahəŋ aɗùkw kà ka seriya à gəl aw uwa?" 11 "Dza la ahəŋ aw, məŋga", mis agòɗal. Yesu agòɗal: "Gi babay kà, gədukw ka seriya à gəl aw, hàd, ama kadàɗaha tsakana aya aw!", Yesu agòɗal.] 12 Bà gotənaŋ Yesu apə̀h gay à maham à ahəŋ dza aya: "Gi la uwana gi uɗaka aŋa gudəŋ à vok. Dza uwana anəf gi kà masla adàɓəz uɗaka aŋa sifa, adàday la mələs la abà aw." 13 Azla Farisəya tagòɗal: "Kak kà kapəhay kà sayda aŋa gəl aŋak, uwana kapəhay kà makəs vok aŋha la ahəŋ aw." 14 Yesu awulà à uda agòɗ à atà: "Baməraka gədaza sayda aŋa gəl gulo babay kà, mapəhay gulo kà dziriga, kà uwana gi kà gəsəl slaka uwana gəsà à waŋ, la slaka uwana gəday babay. Ama akul kà, kasəlaw slaka uwana gəsà à waŋ la slaka uwana gəday babay aw. 15 Akul kà kaɗahaw seriya kà la mahoy yewdi, ama gi kà gəɗàh seriya kà kiya uwaga aw. 16 Bà amiyaka gəɗàh seriya à dza kà seriya gulo kà dziriga, kà uwana gəɗàh seriya kà kokuɗa gəl gulo aw, ama anu la Baba uwana aslə̀l gi à waŋ. 17 Uwaga kà matsetserayga la wakità seriya aŋkul la abà: Sayda aŋa azladza səla uwana tapəhay kalkal kà dziriga. 18 Gəza sayda aŋa gəl gulo ŋgaha Baba uwana aslə̀l gi à waŋ az sayda aŋa gəl gulo babay." 19 Tanàv Yesu: "Uwa à Baba aŋak uwa?" Yesu awulà à atà ala: "Akul kasəlaw gi aw, baməraka Baba gulo babay aw, agayŋa kasəlaw gi kà, naka kasəlaw Baba gulo babay." 20 Yesu apə̀h gay uwaga kà la mok uwana atàpatàla tatak la məŋ gày Zəzagəla la aku. Apə̀h uwaga kà la slaka uwana tafàh sahar aŋa ofərand à ahəŋ, dza aslàla vok aŋa makəsay aw, kà uwana kaslà aŋha adaslay dadàŋ aw. 21 Yesu agòɗ à atà aya: "Gəda aŋulo, kadàyahaw gi, ama akul kadàmatsaw à tsakana aŋkul à abà. Kaslawwal à vok kà mad à slaka uwana gəday aw." 22 Azla Yahudiya tagòɗ vok kà: "Adàkəɗ vok ay à uwana: 'Kaslawwalla vok kà mad à slaka uwana gəday aw', agoɗay?" 23 Yesu awulà à atà ala: "Akul kà akul azladza aŋa vəɗah, ama gi kà gəsà à ahəŋ kà la zagəla. Akul azlaaŋa gudəŋ à vok uwanay, ama gi kà gi aŋa gudəŋ à vok uwanay aw. 24 Kà uwana à uwana gəgoɗ à akul kà kadàmatsaw à tsakana aŋkul à abà, ndzer kà, kadàmatsaw à tsakana aŋkul à abà, à baŋa kadiŋaw gi gəl à vok à gi uwana gi aw." 25 Tanavàl à gay zlà: "Kak uwa?" Yesu agòɗ à atà: "Gi uwana gəpəh à akul dagay madzəka. 26 Lakəl aŋkul gi la azlagay məŋga aŋa mapəh à akul, à gay uwana aɗahakulla seriya à gəl. Ama dza aslə̀l gi à waŋ kà dziriga, gəpəhay à azladza gudəŋ à vok kà uwana gətapla la slaka Baba pəra." 27 Tasə̀l kà Yesu apəhay lakəl aŋa Baba Zəzagəla aw. 28 Kiya uwaga Yesu agòɗ à atà: "Baŋa kadàtsizllaw Kona aŋa dza ala kà, kadàsəlaw kà gi uwana gi la ahəŋ. Kadàsəlaw kà gəɗàh tatak la gəl gulo aw, ama gəpəhay kà lakəl aŋa uwana Baba apahà à gi ala pəra. 29 Dza uwana aslə̀l gi à waŋ kà, anu səla, awkà asàk gi kokuɗa gəl gulo aw, kà uwana koksikoksi gəɗehəŋ uwana ahəɗal à adi." 30 Uwana Yesu adapəhay kiya uwaga, azladza aŋuvaw tadìŋal gəl à masla à vok. 31 Yesu agòɗ à azla Yahudiya uwana tadìŋal gəl à vok: "Baŋa kakəsaw matapla à mapəhay gulo kà, kadàgaw azlaməna matapla la slaka gulo ndzer. 32 Kiya uwaga kà, kadàsəlaw dziriga, ŋgaha dziriga adàdala akul à makor gəl à abà." 33 Tawulà à uda: "Anu kà anu mayyi à tsəh ala aŋa Abəraham, ŋgaha anu azlamayà aŋa azladza ɗikiɗiki aw, ŋgaha ma kakay kagoɗ à anu kà, mədàgay la makor gəl la abà ma?" 34 Yesu agòɗ à atà: "Haɗay, gəpəh à akul la dziriga: Kəla uwabeyuwi uwana aɗàh tsakana kà, masla kà mayà aŋa tsakana. 35 Mayà kà, aslala vok aŋa magay masla gày aw. Ama kona kà, agay masla gày aŋa koksikoksi. 36 Baŋa Kona adàpəlakulla kadàgaw la makor gəl la abà ndzer. 37 Gəsəl kà akul mayyi à tsəh ala aŋa Abəraham. Ama kayahaw makəɗ gi aya, kà uwana kakəsaw matapakulla gulo aw. 38 Gəpəhay lakəl aŋa tatak uwana Baba gulo apə̀h à gi ala, ama akul kà kaɗahaw uwana baba aŋkul tapàhàkulla, suwaŋ." 39 Tawulà à uda: "Baba gami kà Abəraham!" Yesu awulà à atà ala: "Agayŋa kagaw azlabəza aŋa Abəraham kà, naka kaɗahaw sləray aŋa Abəraham uwana aɗahàhàŋ. 40 Gi kà, gəpəh à akul kà dziriga, uwana gətsənàŋ la slaka Zəzagəla, la uwana gəpəh à akul, ama bà la uwaga kà, kayahaw makəɗ gi. Tsəhay gà uwaga kà, Abəraham aɗahàŋ didi aw. 41 Akul kà kaɗahawwaŋ kà sləray aŋa baba aŋkul." Atà tawulà ala: "Anu azlabəza gəl gaw aw, anu Baba gami kà la Zəzagəla, tekula pəra." 42 Yesu agòɗ à atà: "Agayŋa Zəzagəla agay Baba aŋkul ndzer kà, naka kawoyaw gi, kà uwana gəsà à waŋ la slaka aŋha, à uwana gəsà à slaka aŋkul kà masal aŋha. Gəsà à waŋ kà, la aslasl gəl gulo aw, masla la uwana aslə̀l gi à waŋ. 43 Kà mana katsəɓaw sləm à uwana gəpəh à akul aw zlà ma? Kà uwana kaslaw kà aŋa matsən uwana gəpəhay aw. 44 Akul kà, baba aŋkul kà la seteni, asa à akul maɗàh uwana asa à seteni kà uwana masla makaɗ dza dagay la madzəka vok aŋa tatak. Adapəh dziriga didi aw, kà uwana dziriga la ahəŋ la slaka aŋha aw. Baŋa apəh fida, apəh la fəla aŋha, kà uwana masla fida, ŋgaha masla baba aŋa fida. 45 Ama gi kà, gəpəhay kà dziriga, ŋgaha kà uwaga la uwana kadiŋaw gi gəl à vok aw. 46 Uwa la tataka aŋkul la abà aslala vok agoɗay kà, gədaɗehəŋ tsakana uwa? Kà mana, baŋa gəpəh dziriga kà, kadiŋawwal gəl à vok aw zlà ma? 47 Dza aŋa Zəzagəla kà, atsə̀ɓ sləm à gay Zəzagəla. Ama akul azlaaŋa Zəzagəla aw. Gay gà la uwaga katsəɓaw gi sləm aw!" 48 Azla Yahudiya tagòɗal: "Azlayla anu à uwana: Kak zil Samariya, məgoɗ à ka, ŋgaha kak la azlamasasəɗok mawisiga aw uwà?" 49 Yesu agòɗ à atà: "Gi la masasəɗok mawisiga aw, ama gi gəsləkaw Baba gulo, ama akul kà kapəsew gi. 50 Gi kà gəyàh mazləɓay aŋa gəl gulo aw. Dza anik la ahəŋ tekula, uwana ayàh gi mazləɓay, masla la uwana masla seriya bay. 51 La dziriga gəpəh à akul: Dza uwana akəs gay gulo, adàmətsay ɗikiɗiki aw." 52 Azla Yahudiya tagòɗal: "Lagonay kà məsəl ndzer kà, kà kak la masasəɗok mawisiga, Abəraham amə̀ts, azlaməna mapəh à atà gay à ahàl tamàts, ŋgaha kak kagoɗay kà: 'Dza uwana akəs mapəhay gulo kà, adàmətsay aw', kagoɗ ma? 53 Baba gami Abəraham amə̀ts: Kadzugw ma: 'Gəɗuwa masla', kagoɗ takay? Azlaməna mapəh à atà gay à ahàl bay tamàts. Ŋgaha ma kapakà gəl aŋak ala ma kà kak uwi?" 54 Yesu awulà à atà ala, la magoɗay: "Agayŋa gəzləɓ gəl gulo kà, naka mazləɓay gulo, akəs vok aw. Baba gulo la uwana azləɓ gi, à masla à uwana: 'Zəzagəla gami', kagoɗaw. 55 Ama kasəlaw masla ɗikiɗiki aw. Ama gi kà gəsəl masla. Agayŋa gəgoɗay kà, gəsəl masla aw kà, naka gəgay masla fida bokuba akul. Ama gəsəl masla, ŋgaha gəkəs gay aŋha. 56 Abəraham baba aŋkul kà, aràb lakəl mavakay aŋa mas à waŋ gulo, anəŋàŋ ŋgaha aràb kaykay." 57 Azla Yahudiya tagòɗal: "Uwala kaslay mavay dzik zlo, awkà pəra: 'Gənəŋà Abəraham', kagoɗ ay?" 58 Yesu awulà à uda: "Haɗay, gəpəh à akul la dziriga: Mok uwana talə̀g mayyay Abəraham kà, gi la ahəŋ." 59 Ŋgaha tahə̀l akur kà matsàhla. Ama kusàh. Yesu ahaɗà vok à ahəŋ, asà à lag la məŋ gày Zəzagəla la aku. 1 Mok uwana Yesu anəfà tetəvi aŋha, anəŋàŋ dza anik uwana tayyà à ahəŋ guləf gà. 2 Azlaməna matapla la slaka aŋha tanavà: "Məŋga, kà mana dza uwanay kà tayyà à ahəŋ kà guləf gà ma? Kà tsakana aŋa gəl aŋha ay, à uwana kà tsakana aŋa azlababa aŋha ay?" 3 Yesu awulà à atà ala: "Kà tsakana aŋha aw, kà tsakana aŋa azlababa aŋha magay aw. Tayyà guləf kà, kà sləray aŋa Zəzagəla aŋa mapəhla vok ala la masla la abà pəra. 4 La afats kà, say məɗàh sləray aŋa dza uwana aslə̀l gi à waŋ. Vəɗ la uwaga atsa à waŋ, à uwana dza aslala vok aŋa maɗàh sləray aya aw. 5 La mok uwana gi la gudəŋ la vok kà, gi uɗaka aŋa gudəŋ à vok." 6 Uwana Yesu adapəh uwaga la gay ala, atə̀f slesliɓ à vəɗah aləpànì kutso, asəfàh à yewdi aŋa guləf uwaga. 7 Ŋgaha agòɗal: "Hàd, kadàpal yewdi aŋak la mukwà Silowe la abà (Sləm uwaga asal magoɗay masləlay) Guləf ahàd, apàl adi. La mok uwana awùl à waŋ la tetəvi la ama, aslàla vok aŋa manəŋla adagay." 8 Azlaməna magay aŋha la azladza uwana tanàŋ à ahəŋ atsatsàh tatak uwarà, tagòɗ: "Uwanay kà dza uwana adzàhah madzay kà matsatsàh tatak aw, takay?" 9 Azladza anik: "Masla", tagòɗàh. Azlaanik babay: "Masla aw", tagòɗ, "Ama maftsa à vok aŋha pəra", tagòɗ. Zil uwaga agòɗ à atà: "Kà bà, gi!" 10 Tagòɗal: "Kakay yewdi aŋak apakwà vok ma?" 11 Agòɗ à atà: "Dza uwana tazalalla Yesu aləpànì abisl, ŋgaha asàfàh gi à yewdi, ŋgaha agòɗ à gi: 'Hàd, kadàpal adi aŋak la mukwà Silowe la abà', agòɗ à gi. Ŋgaha gəhàd, mok uwana gədapal à adi, gəslàla vok aŋa manəŋla." 12 Tanavàl: "Aŋala dza uwatà la?", tagòɗal, "Gəsəl aw", agòɗ à atà. 13 Kiya uwaga tadàla guləf à slaka azla Farisəya. 14 Kà uwana Yesu aləpànì kutso, asə̀fàhal à yewdi kà dza uwatà la mavakay maduw ləv à uwana awuràŋ ala. 15 Kà uwaga à uwana azla Farisəya babay tanàv dza uwatà, tagòɗal: "Kakay kanəŋla lagonay adagay ma?" Kona uwaga agòɗ à atà: "Asàfàh à gi abisl à yewdi, ŋgaha agòɗ à gi: 'Hàd à mukwà Silowe à abà, kapal adi', ayà gəgòɗ, gəhàd, gəpàl adi, ŋgaha lagwa gədanəŋla." 16 Azlaanik la tataka azla Farisəya la abà tagòɗ: "Dza uwana aɗahà tsəhay gà uwanay kà, asà à waŋ kà la slaka Zəzagəla aw, kà uwana afà gəl à vuɗ maduw ləv aw." Ama azlaanik tagòɗ: "Kakay dza aslala vok aŋa maɗàh nadzipo kiya uwanay, tsa baŋa masla tsakana ma?" Ŋgaha tatsàk ala la tataka aŋatà la abà. 17 Azla Farisəya tanàv à guləf uwana awùr ala aya gotənaŋ: "Kak ma uwa kagoɗ kà dza uwana awurà kà ala uwa?" Agòɗ à atà: "Masla mapəhal gay à ahàl aŋa Zəzagəla, kà mapàh à azladza", agòɗ à atà. 18 Bà gotənaŋ azla Farisəya tadìŋal gəl à vok, kà masla tayyà guləf gà aw, ŋgaha awùr ala tagòɗ aw, kà uwaga à uwana tazàl azlababa aŋha à waŋ aya babay, 19 kà tanav atà gay ala, tagòɗ: "Haɗay ma, uwanay kà kona aŋkul ay? Ndzer ma, kayyàw ma guləf gà ay? Kà kay à uwana apakà vok à uwana anə̀ŋla lagwa adagay ma?" 20 Azlababa aŋha tawulà à uda, tagòɗ: "Məsəl kà masla kona gami, uwana məyyà guləf gà. 21 Ama anu kà, məsəl tatak uwana apakà vok kà manəŋla aŋha lagonay aw, ŋgaha məsəl dza uwana apə̀zllal yewdi babay aw. Nàvàw à masla la gəl aŋha, kà uwana masla asla manaval gay adagay." 22 Uwana tapə̀h kiya uwanay kà, kà uwana guba akə̀s à atà kà azla Yahudiya, kà uwana azla Yahudiya tatsatsə̀l vok gay kà atà aŋa makuɗək azladza uwana à lag la gày madəv kuɗa la aku, uwana: 'Yesu kà Kristu', tagoɗay. 23 Kà uwaga à uwana azlababa aŋha tagòɗ kà: "Masla kà asla maula gay à uda la gəl aŋha, nàvàw à masla", tagòɗ. 24 Bà gotənaŋ azla Farisəya tahàd, tazàla dza uwana awùr ala aya kà masəla, ŋgaha tagòɗal: "Pə̀h la dziriga la huma Zəzagəla, məsəl kà dza uwatà kà masla tsakana." 25 Agòɗ à atà: "Gəsəl aw, adagay masla tsakana, adagay masla tsakana aw kà, gəsəl aw. Ama tatak tekula uwana gəsəl kà: Gi guləf, ama lagwa kà gənəŋla!" 26 Tanavàl aya: "Mana kaɗahàŋ ma? Kakay apə̀zl à ka yewdi ma?" 27 Awulà à atà ala: "Gədapəh à akul təga aw uwa?", agòɗ à atà. "Ama kafàw gi sləm aw. Kà mana asa à akul matsənəŋ aya kà masəla ma mi? Awma akul babay ma asa à akul magay azlaməna matapla la slaka aŋha babay kəla ay?" 28 Tatsə̀kal magoɗahay à gəl la magoɗay: "Kak masla matapla aŋa zil uwaga, ama anu kà anu, anu azlaməna matapla aŋa Musa. 29 Məsəl kà Zəzagəla aɓaɗmà la Musa, ama masla kà, bà slaka uwana asà à waŋ la abà kà, məsəl aw!" 30 Zil uwaga awulà à atà ala: "Lagwa kà tatak uwanay la uwana aval ləv à dza à gay zlà, kasəlaw slaka uwana asà à waŋ la abà aw, ama masla la uwana apə̀zl gi yewdi gulo! 31 Məsəl kà Zəzagəla atsəɓ sləm à azlaməna tsakana aw, ama atsəɓ sləm à dza uwana ahoy yewdi aŋha, ŋgaha akəs mapəhay aŋha. 32 Didi didi gədatsənəŋ tagoɗay kà dza adapəzl yewdi à dza, uwana tayyà guləf gà aw. 33 Agayŋa dza uwaga atsà à waŋ la slaka Zəzagəla aw kà, naka tatak la ahəŋ aɗehəŋ aw." 34 Tagòɗ à guləf: "Tayyà ka à tsakana à abà, ŋgaha ma asa à ka, kà matapanula tatak takay?", takuɗə̀k à lag la gày madəv kuɗa la aku. 35 Mok uwana atsənà à Yesu kà takuɗə̀k à lag la gày madəv kuɗa la aku kà, agagàm atà səla, agòɗal: "Kadiŋ gəl à Kona aŋa dza à vok ay?" 36 "Məŋga, pə̀hgəla, uwa à masla uwa, kà gi aŋa madiŋ gəl à masla à vok uwa?", agòɗal. 37 "Masla gà la uwaga kanəŋaŋ, à uwana aɓaɗakama lagwa", Yesu agòɗal. 38 "Gədiŋal à ka gəl à vok, Sufəl gulo", zil uwaga agòɗal, ŋgaha la makədeɗ à ahəŋ la huma aŋha. 39 Kiya uwaga Yesu agòɗal: "Gəsà à waŋ à gudəŋ uwanay à vok kà seriya aŋa maɗàh vok, kà azlaguləf aŋa manəŋla, ŋgaha azlaməna yewdi aŋa mapakàh guləf." 40 Azlaanik la tataka azla Farisəya la abà, uwana la slaka aŋha la abatà, tatsənà gay uwaga, ŋgaha tanavàl: "Anu ma anu azlaguləf babay suwaŋ ay?" 41 Yesu agòɗ à atà: "Agayŋa kagaw azlaguləf kà, naka kagaw azlaməna tsakana aw, 'Tsa mənəŋla', kagoɗaw kà, tsakana aŋkul aləg." 1 "Gəpəh à akul la dziriga, dza uwana aguw la gay gamagày aŋa gargar aŋa azlatuwaŋ aw, ama aguwa à ahəŋ kà la gəl aŋa zlagam, bi aguway la slaka anik kà, masla kà masla gəl, masla nabəra. 2 Ama dza uwana aguwa à gày la gamagày kà, masla manəŋla azlatuwaŋ. 3 Masla manəŋla gamagày kà apəzlal gamagày, azlatuwaŋ bay tatsən kuda aŋha. Azàllàh azlatuwaŋ aŋha, sləm la sləm, ŋgaha atsala atà à uda. 4 Baŋa adasa à atà à uda gesina kà, masla aguwa atà à huma, azlatuwaŋ tanəfay, kà uwana tasəl kuda aŋha. 5 Ama tanəf məlok dza aw, tahoyal à ahàl, kà uwana tasəl kuda aŋha aw." 6 Yesu apə̀h à atà gay la gay la abà uwaga, ama tasə̀l tatak uwana apə̀h à atà aw. 7 Yesu agòɗ aya: "Gəpəh à akul la dziriga, gi la uwana gi gamagày aŋa gargar aŋa azlatuwaŋ. 8 Azlauwana tatsà à vok à waŋ kà gi kà, gesina kà, azlaməna gəl, azlaməna nabəra. Ama azlatuwaŋ tatsə̀ɓ à atà sləm aw. 9 Gi la uwana gi gamagày. Dza uwana adàda à gày la sləm gulo adàɓelay, aslala vok ada à gày, atsa à uda, aɓəz tatak may. 10 Masla gəl kà, atsa à waŋ kà, kà mad à gəl pəra, makaɗay, la madàdasàh atà ala. Ama gi kà gəsà à waŋ kà azladza aŋa maɓəzal sifa uwana aɗuwa vok kaykay." 11 "Gi masla manəŋla azlatuwaŋ delga. Masla manəŋla azlatuwaŋ delga av sifa aŋha kà azlatuwaŋ aŋha. 12 Dza uwana aɗàh sləray kà aŋa sili pəra, uwala azlatuwaŋ aŋha aw kà, dza aŋa azlatuwaŋ aw. Asakay azlatuwaŋ à ahəŋ, ahoy aŋha à baŋa anəŋa kəda fəta atsa à waŋ à slaka aŋha, ŋgaha kəda fəta akəs atà, adàdasàh atà gesina. 13 Ahoy aŋha kà uwana aɗàh sləray kà aŋa sili, ŋgaha af sləm à azlatuwaŋ aw. 14 Gi masla manəŋla azlatuwaŋ delga. Bokuba uwana Baba asəl gi, gi bay gəsəl masla. Gəsəl azlatuwaŋ gulo, atà babay tasəl gi. Ŋgaha gəv sifa gulo kà aŋa azlatuwaŋ gulo. 16 Azlatuwaŋ gulo anik la ahəŋ à uwana atà la ahəŋ la gargar uwanay la abà aw. Say gəsəlla atà à waŋ babay kà atà aŋa masəl kuda gulo lagwa. Kiya uwaga adagay maham à ahəŋ tuwaŋ tekula, la masla manəŋla atà tekula à ahàl." 17 "Baba awoya gi, kà uwana gəvà sifa gulo, kà gi aŋa maulal à tsəh aya. 18 Dza la ahəŋ azəɓ sifa la slaka gulo la ndzəɗa aw, ama gi la uwana gəvày la mawoyəŋ gulo. Gi la maslay kà mavày, ŋgaha gi la maslay aŋa maulal à tsəh aya. Kiya uwaga la uwana: 'Ɗahàŋ', Baba gulo agòɗ à gi." 19 Kà gay uwaga matsakla ahàd à tataka azla Yahudiya à abà aya. 20 Aŋuvaw la tataka aŋatà la abà tagòɗ: "Masla la masasəɗok mawisiga, bada, kà mana katsəɓawwal sləm ma?" 21 Azlaanik tagòɗ: "Dza uwana la masasəɗok mawisiga aslala vok aŋa maɗehəŋ kiya uwanay aw. Kakay masasəɗok mawisiga aslala vok mawur guləf ala ma?" 22 Madəvaday matsikasl məŋ gày Zəzagəla ala apakà vok la Urusalima la təla awkusa. 23 Yesu auguzàh la məŋ gày Zəzagəla la aku la tsəh tsatsagla aŋa Salomon. 24 Kiya uwaga azla Yahudiya takə̀sal gay à adi, tagòɗal: "Mbà kadàsəlla à anu à uda la madzugway gami la abà ma? Baŋa kak Kristu kà, pə̀h à anu la dazuwaya, lakana!" 25 Yesu agòɗ à atà: "Gədapəh à akul nəma, asa à akul matsəɓ gi sləm aw pəra. Sləray uwanay gəɗehəŋ la ndzəɗa aŋa Baba gulo kà sayda gulo. 26 Ama akul kà, kadiŋawwal gəl à vok aw, kà uwana akul la tataka aŋa azlatuwaŋ gulo la abà aw. 27 Azlatuwaŋ gulo tatsəna kuda gulo, gəsəl atà, ŋgaha tanəfa gi. 28 Gəvà à atà sifa adəv à gay aw, tadàmətsay didi aw, dza aslala vok aŋa mahəl atà la ahàl gulo aw. 29 Tatak uwana Baba gulo aɓə̀k gi atà kà, aɗuwaŋ azlatatak gesina, dza la ahəŋ ahəl atà la ahàl aŋa Baba gulo aw. 30 Anu la Baba kà anu tekula." 31 Azla Yahudiya tahə̀l akur kà matsàhla aya. 32 Ama Yesu agòɗ à atà: "Gəɗahà azlasləray dzəɓa aŋha səla aw gà uwanay, la huma aŋkul gesina la maslay aŋa Baba gulo uwana avà à gi, ŋgaha ma kà sləray ma uwala asa à akul matsàhgəla akur la?" 33 Azla Yahudiya tawulà ala: "Asa à anu kà matsàh kà la akur kà sləray uwana kaɗahàŋ aw, ama kà uwana kapə̀h mawisiga lakəl aŋa Zəzagəla: Tsa kak dza deyday kà pəra, kagagazləla gəl aŋak la Zəzagəla ma, məgoɗ." 34 Yesu awulà à atà ala: "Tatsetsèr à wakità mapəhay akul à abà kà, Zəzagəla agòɗ à akul azlazəzagəla,fb 35 məsəl la paraka kà, kà dza aslala vok aŋa mawisəŋ ala uwana matsetserayga la wakità mapəhay la abà aw. Zəzagəla azal azlazəzagəla azladza uwana takəs gay aŋha. 36 Gi kà, Zəzagəla akə̀sànì, aslə̀l gi à waŋ à gudəŋ uwanay à vok, ŋgaha ma kakay kagoɗaw kà, gəpə̀h mawisiga à Zəzagəla à vok ma? Tsa gəpə̀hla dziriga kà gi Kona aŋa aŋha ma? 37 Tsa baŋa sləray aŋa Baba gulo la uwana gəɗehəŋ, awkà kadiŋaw gi gəl à vok zlà ma aw. 38 Ama baŋa sləray aŋha la uwana gəɗehəŋ kà, dìŋàw gi gəl à vok, kadiŋaw gi gəl à sləray gà uwana à vok tsi, kà akul aŋa masəl la paraka aw kà gi la Baba la abà, ŋgaha Baba babay la gi la abà." 39 Tatàhkà à makəsay gotənaŋ, ama atəf kà atà. 40 Yesu adà aŋha à gay dərəv à uda aŋa mukwà Urdun, la slaka uwana Yuhana aɗahàhà batem uwarà. Ŋgaha adzà à ahəŋ la abatà. 41 Azladza aŋuvaw tasàh à slaka aŋha. Tagòɗ: "Ɗikiɗiki Yuhana kà, adaɗah nadzipo aw, ama uwana apə̀h lakəl aŋa dza uwanay kà agə̀ɗ à afik, ndzer." 42 La abatà azladza aŋuvaw tadìŋ gəl à masla à vok. 1 Dza anik la ahəŋ, sləm aŋha Lazar, agà la ɗuvats, adzà à ahəŋ la Betaniya, la gudəŋ uwana Mariyama atà la deda aŋha Marta tadzà à ahəŋ. 2 (Mariyama uwaga kà mis uwana adzadzàɓ amàl matərsin à Sufəl Yesu à asik à gəl, aslaslaɗà, aŋàlal la aŋidz gəl aŋha) Deda aŋha Lazar la uwana agà la ɗuvats. 3 Azladeda dəgamga səla uwaga taslə̀l gay à Yesu à tsəh, tagòɗal: "Sufəl, slawda aŋak kà la ɗuvats." 4 Uwana Yesu atsənà uwaga, agòɗ: "Ɗuvats aŋa Lazar kà, ɗuvats mamamətsay aw, ama uwaga kà, kà mapəhla maslay aŋa Zəzagəla ala, uwaga la uwana adàpəhla mazləɓay aŋa Kona aŋha ala bay." 5 Yesu awoyà Marta atà la Mariyama la Lazar deda aŋatà. 6 Mok uwana atsənàŋ kà Lazar la ɗuvats kà, adzà à ahəŋ la slaka uwatà mavakay səla aya gotənaŋ. 7 La lig la ahəŋ, agòɗ à azlaməna matapla la slaka aŋha: "Məwùl à kutso Yahudiya!" 8 Azlaməna matapla la slaka aŋha tawulà ala: "Məŋga adasafay aw, bà nekwa nekwa azladza tayàh matsàh ka à gəl la akur, ŋgaha asa à ka mawul à abatà aya ay?" 9 Yesu agòɗ à atà: "Sa kulo gəl aŋha səla la ahəŋ la mavakay la tsəh aw takay? Kà uwana baŋa dza aday la afats, matekwiɗ atsalla aw, kà uwana anəŋa uɗaka aŋa gudəŋ à vok uwanay. 10 Ama baŋa dza aday la vəɗ kà, matekwiɗ atsalla, kà uwana uɗaka la ahəŋ la masla la abà aw." 11 Yesu apə̀h à atà gay uwaga ŋgaha azàtàlàŋ à gəl: "Slawda gami Lazar kà aga la madzehal gà, kà uwaga à uwana gəday aŋa madatsənəŋ ala." 12 Azlaməna matapla tawulà à uda: "Sufəl, baŋa adzehal kà, adàwurla, haɗay!" 13 Ama Yesu kà asàl magoɗay kà Lazar kà adamətsay, ama azlaməna matapla la slaka aŋha tadzùgw lakəl aŋa madzehal deyday pəra. 14 Kiya uwaga Yesu agòɗ à atà la paraka kà: "Lazar adamətsay. 15 Gi la marabay kà aŋkul, à kà uwana gi la abatà aw, ŋgaha kà akul aŋa madiŋ gi gəl à vok. Ama lagwa, məhad à slaka aŋha." 16 Kiya uwaga Tomas uwana tazalalla vəgal, agòɗ à azlaməna matapla anik: "Anu babay kà, məhàd kà mədàmətsay la məŋga gami." 17 Mok uwana Yesu adà à awtày kà, Lazar adaɗah mahənay ufaɗ la zəvay la aku. 18 Betaniya kà nekwa la Urusalima, kərkər aŋha kà bokuba magur mahoyay pəlis tekula. 19 Azla Yahudiya aŋuvaw tasàhà à waŋ à mtəga Marta atà la Mariyama kà mamətsay aŋa deda aŋatà Lazar. 20 Uwana Marta atsənàŋ kà Yesu atsà à waŋ, ahàd kà matsəɗal à ama. Ama Mariyama adzà à ahəŋ à mtəga. 21 Marta agòɗ à Yesu: "Sufəl, agayŋa kagay la abanay kà, naka deda gulo amətsay aw. 22 Ama lagonay babay kà, tatak uwana kadànavay à Zəzagəla gesina kà, adàvà à ka!" 23 Yesu agòɗal: "Deda aŋak adàula à uda la sifa." 24 Marta agòɗal: "Gəsəl adàwula à uda la mamətsay, la kaslà uwana azlamazimnekiɗ tadàula à uda la vuɗ makəɗ gəl à ahəŋ." 25 Yesu agòɗal: "Gi la uwana gi masla maula azladza à uda la mamətsay, ŋgaha la sifa, dza uwana adiŋ gi gəl à vok, adàdza à ahəŋ la sifa, amiyaka kà aməts, 26 ŋgaha dza uwana la sifa, ŋgaha adiŋ gi gəl à vok kà, adàmətsay ɗikiɗiki aw, kadiŋ gəl à uwaga à vok nəmay?" 27 "Iyay Sufəl", agòɗal, "Gədiŋal gəl à vok, kà kak Kristu, Kona aŋa Zəzagəla, uwana naka atsà à waŋ à gudəŋ à vok." 28 Mok uwana Marta adapəh gay uwaga, ahàd, azàla deda aŋha Mariyama, agòɗal la gəl à gəl: "Məŋga gami kà, agà la abanay, ayàh ka, kà mad à awtày." 29 Mok uwana Mariyama adatsən gay uwaga, asà à afik amərà vok kà mad à slaka Yesu. 30 Mok uwatà kà, Yesu kà, adabəz à huɗ gudəŋ à abà dadàŋ aw, alə̀g la slaka uwana tagagàm la Marta. 31 Uwana azla Yahudiya, uwana atà la kay la slaka Mariyama kà matabla gay à ahəŋ, tanəŋàŋ asà à uda la mamər vok kà, tanəfà à uda. Tadzùgw kà, adàla kà matuway à gəl zəvay tagòɗ. 32 Mok uwana Mariyama adabəz à slaka uwana Yesu kà agà la abatà, atə̀ɗ à makəla asik aŋha la makədeɗay, ŋgaha agòɗal: "Sufəl, à magay kagay la abanay kà, naka deda gulo kà amətsay aw." 33 Uwana Yesu anəŋà, atuway la azla Yahudiya uwana tasà à waŋ atà nna bay tataway, huɗ kut, ləv agòɗal kà uwaga. 34 Anàv atà: "Kalàw ma uwala?" Tagòɗal: "Sufəl, sà à waŋ, kanəŋa slaka uwana tallà à abà." 35 Yesu atùw. 36 Kiya uwaga azla Yahudiya tagòɗ: "Nə̀ŋàw mawoy masla aŋha tsi!" 37 Ama azlaanik la tataka aŋatà la abà tagòɗ: "Masla uwana apokwàhà yewdi à azlaguləf tak ma, kà mana asla kà maɗəɗ gay à mamətsay à Lazar la vok ala aw ma?" 38 Bà gotənaŋ kà, Yesu kà ləv aŋha adatəsl ala aw, ahàd à gəl zəvay. Uwaga kà tsakur, matsakal à ama gà la akur mabəlam bəlamga. 39 "Zə̀ɓàwwal abəlam la gay ala!", Yesu agòɗ à atà. Marta, deda aŋa mazimnekiɗ agòɗ: "Sufəl, azinay adagay, kà uwana adaɗah mahənay ufaɗ la aku." 40 Yesu agòɗal: "Gəpə̀h à ka aw takay, kà baŋa kadiŋal gəl à vok kà, kadànəŋəŋ mazləɓay Zəzagəla, gəgòɗ à ka aw ay?" 41 Tazə̀ɓal abəlam la gay ala. Yesu anəŋà à zagəla la magoɗay: "Baba, kikay gəgoɗ à ka, kà uwana katsəɓ gi sləm. 42 Gəsəl kà kadatsəɓ gi sləm koksikoksi, ama uwana gəpəh uwanay kà, kà maham à ahəŋ dza uwanay tatsəɓ gi sləm lagwa, kà atà aŋa madiŋal gəl à vok, kà kak la uwana kaslə̀l gi à waŋ." 43 Mok uwana adapəh gay uwaga, awiyà la ndzəɗa: "Lazar, sà à lag la aku!" 44 Mazimnekiɗ asà à lag, azlaahàl la azlaasik aŋha matsafàɗ à ahəŋ à ahəŋ gà la gabaga, huɗ adi aŋha mafafaɗal nalbət à adi gà. Yesu agòɗ à atà: "Pə̀làwwàŋ ala, ŋgaha sàkàwwal, adà aŋha." 45 Aŋuvaw la tataka azla Yahudiya uwana la abà tasà à waŋ à slaka Mariyama, tanəŋà tatak uwana Yesu aɗahàŋ gesina, tadìŋ gəl à masla à vok. 46 Ama azlaanik la tataka aŋatà la abà, tahàd à slaka azla Farisəya, tatùgw à atà uwana Yesu aɗahàŋ gesina. 47 Kiya uwaga azla Farisəya la azlamadzahaga aŋa azlaməna mav tatak à Zəzagəla la azlaməna makoray tahamà gay à vok kà matstsəzl vok gay, tagòɗ: "Mana məɗehəŋ la dza uwanay aɗàh azlanadzipo aŋuvaw mi? 48 Baŋa məsakal kiya uwanay, azladza gesina tadiŋ gəl à masla à vok, ŋgaha azla Rom bay tadàsa à waŋ, tadàkalah anu məŋ gày Zəzagəla gami à ahəŋ la tsəhay gami." 49 Tekula la tataka aŋatà, uwana sləm aŋha Kayyif, uwana masla agà məŋ madzahaga la mavay uwatà la tsəh, agòɗ à atà: "Kasəlaw tatak aw! 50 Kasəlaw kà ŋuləm dza tekula aməts kà gudəŋ gesina aŋa mazila aw takay?" 51 Apə̀h gay uwaga kà la masal aŋha aw, ama kà masla la uwana məŋ madzahaga la mavay uwatà la tsəh. Apə̀h à ahəŋ kà say Yesu amətsay, kà aŋa azla Yahudiya, 52 Kà aŋa tsəhay aŋatà pəra aw, ama bay kà maham gay azlabəza aŋa Zəzagəla uwana à vok, taslə̀h gəl à ahəŋ la uda gesina. 53 Dagay la vuɗ uwatà, azlaməŋga aŋa azla Yahudiya tatsatsə̀l vok gay, kà makəs Yesu kà makəɗay. 54 Kà uwaga à uwana Yesu auguzàh la dazuwaya, la tataka azla Yahudiya la abà aya aw. Masla ahàd à gudəŋ anik à abà la fəta, uwana sləm aŋha Efərayim, adzà à ahəŋ la abatà la azlaməna matapla la slaka aŋha. 55 Madəvaday aŋa Paska aŋa azla Yahudiya nekwa. Azladza gudəŋ anik anik aŋuvaw tadà à afik à Urusalima, kà uwana asà à atà matsikasl gəl ala ŋurayŋa mavakay madəvaday atsà à waŋ. 56 Tayàh Yesu à mok, uwana atà la məŋ gày Zəzagəla la aku. Tanavà vok kà atà kà atà: "Mana kadzugwaw ma, adàsa à waŋ à madəvaday takay? Awma adàsa à waŋ aw ay?" 57 Uwana tapàh kiya uwaga kà, kà uwana azlamazdahaga aŋa azlaməna mav tatak la azla Farisəya tagòɗ kà: "Baŋa dza asəl slaka aŋha kà, apəhla ala kà maday makəsay", tagòɗ. 1 Mahənay mukwa adà à lig kà, kà mas à waŋ aŋa madəvaday Paska, Yesu ahàd à gudəŋ Betaniya, à slaka uwana Lazar adzà à ahəŋ, à Lazar uwana awulà à uda la mamətsay. 2 La abatà tatà tatak may à Yesu. Lazar kà tekula la tataka azladza uwana la abà, tadzàh à tatak may à adi la Yesu. Marta la uwana atsàk à atà tatak may. 3 Ŋgaha Mariyama azə̀ɓ dərew amàl matərsin bəf la dərew gà matsiɗayga, azlà gay tenma aŋa litre. Tsakalay aŋha kà zlazlaɗa. Adzadzàɓ à Yesu à asik à gəl, ŋgaha aslaslàɗàŋ ala la aŋidz gəl aŋha, kà uwana abàdal à asik à gəl. Uwaga kà taɗahaŋ kà la ahàf mazinayga. Mazinay aŋha azə̀ɓ gày à gəl. 4 Tekula la tataka azlaməna matapla aŋha la abà à Yudas Iskariyot, masla uwana ayah mat à kaf à Yesu à gəl agòɗ: 5 "Kà mana taduw matərsin uwanay ala kà aŋa sili gursu dadərmokw makər, kà mavàh sili gà à azlaməna kuɗa aw ma?" 6 Uwana apə̀h kiya uwaga kà, kà uwana awoyà azlaməna kuɗa magay aw, ama kà uwana masla kà masla gəl: Masla la uwana anə̀ŋla kiwa sili, ŋgaha azaɓàhànì uwana tafàh à agu. 7 Yesu agòɗal: "Sàkal, afà matərsin uwaga à ahəŋ kà aŋa vuɗ mal gi, 8 akul, koksikoksi kadàgaw la azlaməna kuɗa, ama gi kà, mədàday anina koksikoksi aw." 9 Mok uwana maham à ahəŋ dza asə̀l kà Yesu kà aga la Betaniya kà, azla Yahudiya tahàd, ama kà gay aŋa Yesu pəra aw, ama bay kà, kà Lazar uwana Yesu awùlla à uda la mamətsay bay. 10 Azlaməŋga aŋa azlaməna mav tatak à Zəzagəla tatsənà vok gay kà makəɗ Lazar, 11 kà masla à uwana azla Yahudiya aŋuvaw tasàk azlaməŋga aŋatà la tsəh ala kà madiŋal gəl à Yesu à vok. 12 La bebəŋ gà, maham à ahəŋ dza, uwana tasà à waŋ à madəvaday Paska tatsənàŋ, kà Yesu atsà à Urusalima à abà. 13 Kiya uwaga tasà à uda, taslàh baɓasl la azlaslahoy à vəɗah la tetəvi la ama, kà Yesu aŋa maday maguw à ahəŋ la afik, kà magagamay atà nna la mawiyay: "Mazləɓay agay la Zəzagəla, Zəzagəla apisa gay à dza uwana à vok, atsa à waŋ la sləm aŋa Sufəl. Zəzagəla apisa gay à Sufəl aŋa azla Isərayel à vok!" 14 Yesu aɓə̀z à ziwŋŋu, adzà à afik la abatà, bokuba uwana wakità Zəzagəla apəh: 15 'Akul azladza Siyon, guba akəs akul aw, məŋ Sufəl aŋkul kà masla la uwana atsa à waŋ, adadza madzay la bəzi ziwŋŋu à afik.' 16 Azlaməna matapla la slaka aŋha kà, tatsənà godega aŋa tatak uwaga dadàŋ aw, ama mok uwana Yesu adàɓəz à mazləɓay kà, awùl à atà à gəl uwana wakità Zəzagəla apəh lakəl aŋha kà uwaga dziriga, ŋgaha atà bay tagə̀ɗ à uwaga à afik uwana apə̀h gesina lakəl aŋha la sləray aŋatà gesina. 17 Maham à ahəŋ dza, uwana atà la abatà, à mok uwana Yesu awùlla Lazar à uda la mamətsay kà, tapə̀h lakəl aŋa uwana tanəŋàŋ gesina bay. 18 Kà uwaga à uwana, maham à ahəŋ dza asà à waŋ kà magagamay la Yesu, kà uwana tasə̀l kà masla la uwana aɗahà nadzipo uwaga. 19 Kiya uwaga azla Farisəya tagòɗ kà atà kà atà: "Nə̀ŋàwwàŋ zlà, kaslawwal à vok kà aŋa maɗàh tatak aya zlà aw, kà uwana azladza gesina kà tanəfay kà masla adagay." 20 Azla Gərək anik la tataka aŋa azladza uwana la abà tasà à waŋ à Urusalima kà madəv kuɗa à Zəzagəla la madəvaday la abà kà, 21 tazà vok à slaka Filip, uwana asà à waŋ la Betsayda, uwana la Galili, tagòɗal: "Kona, asa à anu manənəŋ Yesu." 22 Filip ahàd, apə̀h à Andəre, ŋgaha tahàd à slaka Yesu, atà səla. 23 Yesu agòɗ à atà: "Lagonay kà, kaslà adaslay adagay, à uwana Kona aŋa dza maɓəz à mazləɓay aŋha. 24 Haɗay, gəgoɗ à akul la dziriga: Fofulo hi tekula adza à ahəŋ bawtawta, à baŋa atəɗ à kutso à abà, baŋa akəl gay aw. Ama baŋa adakəl à gay, adàsa à uda kà, av mayyay aŋuvaw. 25 Dza uwana awoya sifa aŋha kà, adàziŋ ala. Ama dza uwana afa sləm à sifa aŋha la gudəŋ uwanay la vok aw kà, adàɓəl uwaga kà aŋa sifa adəv à gay aw. 26 Baŋa dza asal mazlak gi kà, say anəf à gi, kiya uwaga bay magamza gulo adàgay la slaka uwana gədàgay suwaŋ, Baba gulo adàzləɓ magamza uwana adazlak gi." 27 Yesu agòɗ lagwa kà: "Baŋbabaŋ, ləv agoɗ à gi, kakay gəgoɗay lagwa mi? Baba tə̀f gi kà tatak uwana aɓəz à gi la kaslà uwanay? Ama kà aŋa uwaga la uwana gəsa à waŋ. 28 Baba và mazləɓay à sləm aŋak!" Kuda atsənà à ahəŋ la zagəla la afik agoɗ: "Gədazləɓay, ŋgaha gədàzləɓay aya gotənaŋ." 29 Maham à ahəŋ dza uwana la abatà tatsənà kuda uwatà: "Uwatà kà masləh məl aŋa habaga", tagòɗ. Azlaanik tagòɗ: "Malika aɓaɗalmà." 30 Ama Yesu apə̀h à atà la paraka: "Kuda uwaga atsənà à ahəŋ kà, kà aŋulo aw, ama kà aŋkul. 31 Lagonay kà, kaslà adaslay à uwana seriya aɗàh vok à gudəŋ à vok uwanay à gəl, lagonay la uwana takuɗək sufəl aŋa gudəŋ à vok uwanay adagay kà makələŋ à uda. 32 Gi, baŋa gədàda à afik la vəɗah kà, gədàbiy azladza gesina à slaka gulo." 33 La gay uwaga asàl mapəhla tsəhay mamətsay aŋha uwana ala adàmətsay. 34 Maham à ahəŋ dza agòɗal: "Mədzèŋ la wakità mapəhay gami la abà kà, Kristu adàdza à ahəŋ aŋa koksikoksi. Ŋgaha ma, kakay kagoɗay, kà Kona aŋa dza adàday à zagəla ma? Uwa à Kona aŋa dza uwa?" 35 Yesu agòɗ à atà: "Uɗaka kà aga la ahəŋ la tataka aŋkul dadàŋ, aŋa kaslà ŋuv. Nəfàw tetəvi dziriga la mok uwana akul la uɗaka la abà, kà mələs aŋa matsak à akul à ama aw, kà uwana dza uwana aday la mələs la abà kà, asəl slaka uwana ada à abà aw. 36 Kiya uwaga kà, dìŋàwwal gəl à vok à mok uwana akul la uɗaka la abà, kà akul aŋa magay azladza aŋa uɗaka." Uwana Yesu adapəh gay uwaga kà, adà aŋha la abatà, ahàɗ à atà vok à adi. 37 Amiyaka bà la azlanadzipo uwana aɗahàhàŋ, aŋuvaw la huma aŋatà babay kà, tadìŋal gəl à vok aw, 38 kà magəɗ uwana à afik, masla mapəhal gay à ahàl Yesayya uwana agòɗ: 'Sufəl uwa adiŋ gəl à gay gami à vok uwa? A uwa à uwana Sufəl Zəzagəla apəhla maslay aŋha ala uwa?' 39 Taslàla vok aŋa madiŋal gəl à vok aw kà uwana Yesayya agòɗ aya: 40 'Zəzagəla aguləfàh atà ala, adatsakah à atà haŋkəli à ama, kà yewdi aŋatà aŋa manəŋla aw, kà haŋkəli aŋatà aŋa masəl tatak aw. Ŋgaha kà atà aŋa magola vok à slaka gulo, kà gi aŋa mawur atà ala aya aw.' Zəzagəla agòɗ. 41 Yesayya apə̀h uwaga kà, kà uwana anəŋà mazləɓay aŋa Yesu, à uwana apə̀h lakəl aŋha. 42 Aŋuvaw la tataka azlaməna gày zil aŋa azla Yahudiya la abà, tadìŋ gəl à Yesu à vok, ama la dazuwaya aw, kà uwana guba akə̀s atà kà azla Farisəya aŋa makuɗəkàh atà à lag gày madəv kuɗa la aku. 43 Kà uwana asà à atà kà azladza tazlə̀ɓ atà, à kà mazləɓ atà aŋa Zəzagəla. 44 Kiya uwaga Yesu azà kuda à zagəla la magoɗay: "Dza uwana adiŋ gi gəl à vok, adiŋ gəl kà à gi à vok pəra aw, ama à dza uwana à vok aslə̀l gi à waŋ babay. 45 Ŋgaha dza uwana anəŋa gi, anəŋa dza uwana aslə̀l gi à waŋ babay. 46 Gi kà, gəsà à waŋ à gudəŋ à vok kà bokuba gi uɗaka, kəla dza uwana adiŋ gi gəl à vok kà, adz à ahəŋ la mələs la abà aw. 47 Ama baŋa dza atsəna gay gulo, ŋgaha akəs aw kà, gi la uwana gədàɗahla ala seriya à gəl aw, kà uwana gəsà à waŋ kà aŋa maɓəl azladza gudəŋ à vok, awkà aŋa maɗàh seriya à gudəŋ à vok à gəl aw. 48 Dza uwana akweska gi, ŋgaha akəs gay uwana gəpəh aw kà, seriya la ahəŋ lakəl aŋha, gay uwana gəpə̀h la uwana adàɗahla ala seriya à gəl, la vuɗ madəv à gay gudəŋ à vok. 49 Gay uwanay gəpəhay kà la maslay aŋa aslasl gəl gulo aw, ama Baba uwana aslə̀l gi à waŋ kà, la gəl aŋha, la uwana avà à gi maslay kà gi aŋa mapəhay, aŋa matapla azladza. 50 Uwana apə̀h à gi, la uwana atsakakulla sifa adəv à gay aw à waŋ. Uwana gəpəhay kà, gəpəhay kà bokuba uwana Baba avà à gi maslay lakəl aŋha." 1 Uwaga kà vuɗ maɗàh vok aŋa madəvaday Paska. Yesu asə̀l kà kaslà aŋha adaslay, kà maz vok aŋha la gudəŋ uwanay la vok, ŋgaha kà madiy aŋha à slaka Baba aŋha la zagəla. Koksikoksi awoyàhà azlaməna aŋha uwana la gudəŋ la vok, adàwoya atà tsəràh à makəɗ gəl à ahəŋ. 2 Yesu la azlaməna matapla la slaka aŋha tazùw tatak may aŋa mokokhu. La mok uwaga kà, seteni adaguway la ləv aŋa Yudas, kona aŋa Səmon Iskariyot la tsəh, kà mat kaf à Yesu à gəl. 3 Yesu asə̀l kà masla kà asà à waŋ kà la slaka Baba, ŋgaha awulay à abatà aya, kà uwana Zəzagəla Baba avàl maslay à ahàl gesina. 4 Kiya uwaga Yesu atsìzlla ala la tatak may la adi, asərə̀t dawara aŋha la vok ala, azə̀ɓ gabaga aŋha, awàɗ à tsəh. 5 Ŋgaha avə̀d iyaw à daraw à abà adzəkà mapalàhla asik à azlaməna matapla la slaka aŋha, aɗahàh à atà iyaw la asik ala la gabaga, uwana awàɗ à tsəh. 6 Mok uwana adabəz à slaka aŋa Səmon, Səmon Piyer agòɗal: "Sufəl, kak la uwana kapal gi asik, kagoɗ takay?" 7 Yesu awulà ala la magoɗal: "Səmon Piyer, tatak uwana gəɗehəŋ lagonay kà, kasəl dadàŋ aw, ama la huma la gay la uwana kadàsəl godega aŋha." 8 Səmon Piyer agòɗal: "Awaŋ Sufəl, kapal gi asik aw!" Yesu agòɗal: "Baŋa gəpala à asik aw, kadàɓəz à tatak la ahàl gulo aya aw." 9 Səmon Piyer awulà ala: "Sufəl, tsa kità kà, kapal gi azlaasik pəra aw, ama pal gi azlaahàl gulo, la gəl gulo gesina!" 10 Yesu agòɗal: "Dza uwana adapal vok gesina kà, anəkuɗa mapal vok aya aw, say azlaasik gà pəra, kà uwana vok aŋha kà kuzekaka. Akul azlakuzekaka, ama akul gesina nəma aw." 11 Yesu kà asə̀l dza uwana adàtal kaf à gəl, kà uwaga à uwana agòɗ: "Akul azlakuzekaka gesina aw." 12 La lig aŋa uwaga la ahəŋ, à mok uwana adapalàh à atà asik, Yesu awulà dawara aŋha à vok aya, ŋgaha adzà madzay la slaka aŋha la abà, agòɗ à atà: "Katsənaw godega aŋa uwaga gədaɗahakullaŋ takay? 13 Akul kazalawgəla məŋga, ŋgaha Sufəl, azlayla akul nəma, kà uwana gi masla haɗay. 14 Tsa baŋa gi la uwana gi Sufəl, ŋgaha məŋga kà, kà gədapalàh à akul asik lagwa, akul babay kà, azlayla kà vok kà kapalahaw vok asik kà akul kà akul suwaŋ babay zlà. 15 Lagwa kà gədapəhakulla mafətsa à vok aŋha, à uwana kaɗahàwwàŋ bokuba uwana gəɗehə̀ŋ zlà, la slaka aŋkul. 16 Haɗay la dziriga gəpəh à akul: Masla sləray la ahəŋ, aɗuw məŋga aŋha aw, masləlay bay, aɗuw dza uwana asləl aw! 17 Lagonay kà, kasəlaw uwaga, kadàgaw la marabay à baŋa kakəsaw uwaga gesina." 18 "Gəpəhay kà lakəl aŋkul gesina aw, gəsəl azlauwana gətsatsàmànì atà. Ama say gay aŋa matsetseray uwanay agəɗ à afik, dza uwanay məzuw tatak may anu səla, la uwana adàguwgəla à lig à vok. 19 Dagay lagonay gəpə̀h à akul à vok à abà, kokuɗa mapak vok aŋa azlatatak uwaga, ŋgaha kà baŋa azlatatak uwaga adàpaka vok kà, akul aŋa masəlay kà gi uwana gi ndzer. 20 Gəpəh à akul la dziriga: Dza uwana akəs gi, akəs dza uwana aslə̀l gi à waŋ babay." 21 La mok uwana Yesu adapəh gay uwaga, aɓə̀k mazaw la gəl məŋga agòɗ: "Gəpəh à akul la dziriga kà: Tekula aŋkul adàta à gi kaf à gəl!" 22 Azlaməna masla matapla tanəŋà à vok à adi kà atà kà atà, tasə̀l dza uwana apəhay lakəl aŋha aw. 23 Tekula aŋa azlaməna matapla uwana Yesu awoyàŋ kaykay, agà la makəla aŋha. 24 Səmon Piyer anavàl la yewdi, kà masla aŋa manavay à Yesu kà masəl dza uwana apəhay lakəl aŋha. 25 Kiya uwaga, masla matapla ahùɓ à slaka Yesu kà manaval: "Sufəl uwa, uwatà uwa?" 26 Yesu agòɗal: "Aganay gədəɓay alàl à kaf à gəl, dza uwana gədàvàl kà, masla gà la uwaga." Kiya uwaga Yesu atsikànì kaf, adə̀ɓal à alàl à gəl, ŋgaha avà à Yudas, kona aŋa Səmon Iskariyot. 27 Mok uwana Yudas azə̀ɓ kaf uwaga kà, seteni adà à ləv aŋha à tsəh. Yesu agòɗal: "Uwana asa à ka maɗehəŋ kà, ɗahàŋ la katskats!" 28 (Ama bà dza tekula la tataka aŋa azladza uwana la abà, tadzàh à tatak may à adi kà, dza la ahəŋ agòɗ: 'Kà mana Yesu apə̀h kiya uwaga mi', la ahəŋ aw. Kà uwana tatsənàŋ aw. 29 Bokuba uwana: Kà uwana Yudas la uwana kiwa sili la ahàl kà, tadzùgw kà Yesu asal masləlay, kà masukw tatak aŋa madəvaday aya, tagòɗ. Baŋaw: 'Và tatak à azlaməna kuɗa', agoɗal, tagòɗ) 30 Yudas akə̀s kaf uwana atsəkallàŋ à ahàl, asà à uda katskats kà, adagay vəɗ. 31 Mok uwana Yudas adasa à uda kà, Yesu agòɗ: "Lagonay kà, mazləɓay aŋa kona aŋa dza apə̀hla vok ala, ŋgaha mazləɓay aŋa Zəzagəla adapəhla vok ala la masla la abà. 32 Mazləɓay aŋa Zəzagəla apəhla vok ala la kona aŋa dza la abà, Zəzagəla bay adàpəhla mazləɓay uwana ala à Kona aŋa dza akor la gəl aŋha, aɗàh uwaga kà zwek bà lagwa. 33 Azlabəza gulo gi la ahəŋ la akul aŋa kaslà ŋuv pəra. Kadàyahaw gi, ama gəpəh à akul bokuba uwana gəpəh à azla Yahudiya aya: Kaslawwal à vok aŋa mad à slaka uwana gəday aw. 34 Gədàvà à akul mapəhay mawga: Wòyàw vok kà akul à akul, say kawoyaw vok kà akul à akul bokuba uwana gəwoyà akul. 35 Baŋa kawoyaw vok kà akul à akul kà, azladza gesina tadàsəlay kà, akul azlaməna matapla la slaka gulo, haɗay!" 36 Səmon Piyer anavàl à gay la: "Sufəl kaday ma à uwala?" Yesu awulà ala: "Kaslala vok aŋa manəf gi à slaka uwana gəday lagonay aw. Ama bawbaw kà, kadànəf gi." 37 Piyer agòɗal: "Sufəl, kà mana gəslay kà manəf ka lagonay aw ma? Gi, gədàɗah vok, kà mav sifa gulo kà aŋak!" 38 Yesu agòɗal: "Ndzer, kà kak kadàɗah vok aŋa mav sifa aŋak kà aŋulo ay? Gəpəh à ka la dziriga kà, gurayŋa mewgdzagalaŋ awiyay kà asik makər, kadàgoɗay asik makər, kà kasəl gi aw!" 1 "Kazamaw la gəl aw", Yesu agòɗ à atà, "Dìŋàw gəl à Zəzagəla à vok, ŋgaha dìŋàw gi gəl à vok bay. 2 Slaka madz à ahəŋ aŋuvaw la mtəga Baba gulo, gəday gədàɗahakulla slaka à ahəŋ. Agayŋa haɗay awkà, naka gəpəh à akul aw. 3 Ŋgaha baŋa gədaday gədaɗahakulla slaka à ahəŋ, kà gədàwula à waŋ, kà gi aŋa mahəl akul à slaka gulo, kà akul aŋa magay la slaka uwana gi la abà. 4 Akul kà, kasəlaw tetəvi mad à slaka uwana gəday." 5 Tomas agòɗal: "Sufəl, məsəl slaka uwana kaday aw. Kakay məslala vok aŋa masəl tetəvi ma?" 6 Yesu awulà ala: "Gi tetəvi, gi dziriga, gi sifa. Dza aslala vok aŋa mad à slaka Baba la tetəvi anik, kokuɗa maguway la slaka gulo aw. 7 Baŋa kasəlaw gi kà, kasəlaw Baba gulo babay. Dagay lagonay kà, kasəlaw masla, ŋgaha kanəŋawwaŋ babay." 8 Filip agòɗal: "Sufəl, pə̀hanula Baba, uwaga kà diga zlà." 9 Yesu agòɗal: "Mədadza à ahəŋ kà məŋga anina kà, bà pəra kà, kasəl gi aw uwa, Filip? Dza uwana anəŋà gi kà, anəŋà Baba gulo babay, ŋgaha ma kakay kagoɗay pə̀hanula Baba ma? 10 Kadiŋal gəl à vok, kà gi la Baba la abà, Baba la gi la abà aw uwa? Gay uwanay gəpəh à akul gesina kà, atsa à waŋ kà la slaka gulo aw, ama la slaka Baba gulo. Baba uwana adza à ahəŋ la gi la abà la uwana ahən sləray aŋha ala. 11 Dìŋàw gi gəl à vok à uwana gəgoɗ: Gi la Baba la abà, Baba bay la gi la abà. Baŋa kadiŋawwal gəl à gay uwaga à vok aw kà, dìŋàw gəl à abà à sləray gà uwana à vok tsi! 12 La dziriga gəpəh à akul: Dza uwana adiŋ gi gəl à vok, adàɗah azlasləray uwana gədaɗehəŋ suwaŋ. Adàɗah sləray uwana aɗuwa uwanay, kà uwana gi gədaà à slaka Baba gulo. 13 Dèwdèw tatak uwana kadànavaw la sləm gulo kà, gədàvà à akul uwaga gesina, kà Kona aŋa mapəhla mazləɓay aŋa Baba aŋha ala. 14 Baŋa kanavaw tatak la sləm gulo kà, gədàvà à akul uwaga." 15 Yesu agòɗ: "Aŋa kawoyaw gi kà, naka kakəsaw mapəhay gulo. 16 Gədàdəv kuɗa à Baba, kà masla aŋa masləl à akul masla mazlak akul anik à waŋ kà, Masasəɗok dziriga, kà masla aŋa magay la akul koksikoksi. 17 Gudəŋ à vok kà aslala vok aŋa maɓəzal aw, kà uwana aslala vok aŋa manəŋəŋ la masəlay aw. Ama akul kà kasəlaw masla, kà uwana adagay la akul ŋgaha adàdza à ahəŋ la akul la abà." 18 "Gədàsak akul à ahəŋ la matawaŋ la abà aw, gədàwula à waŋ à slaka aŋkul. 19 La kaslà ŋuv la abà, gudəŋ à vok adànəŋ gi aw, ama akul kà, kadànəŋaw gi, kà uwana gi la sifa, akul babay la sifa. 20 Baŋa mavakay uwatà adàsa à waŋ kà, la mok uwatà la uwana kadàsəlaw kà gi la Baba la abà, ŋgaha kà Baba bay la gi la abà, ŋgaha gi bay la akul la abà." 21 "Dza uwana akəs mapəhay gulo, ŋgaha anəŋla uwaga kà, masla mawoya gi zlà. Baba gulo adàwoy dza uwana awoya gi babay, gədàwoya masla, gədàpəhalla vok." 22 Yahuda (awkà Yudas Iskariyot aw), agòɗal: "Sufəl, kakay uwaga aɗàh vok, kà kapəhanula vok kà anu pəra, awkà à gudəŋ à vok aw ma?" 23 Yesu awulàl ala, agòɗal: "Dza uwana awoya gi akəs mapəhay gulo kà, Baba gulo adàwoyəŋ, anu la Baba gulo mədàduw à awtày à slaka aŋha, mədàdza à ahəŋ la mtəga aŋha. 24 Dza uwana awoya gi aw kà, akəs mapəhay gulo aw. Uwana katsənaw gi gəpahay kà, uwaga kà asa à waŋ kà la slaka gulo aw, ama asa à waŋ kà la slaka Baba gulo uwana asləl gi à waŋ." 25 "Gədapəh à akul uwaga dagay uwarà, à mok uwana məga anina. 26 Masla mazlak akul, à Masasəɗok tsikasla uwana Baba adàsləl à akul à waŋ, la sləm gulo kà, masla la uwana adàtapahakulla tatak gesina, ŋgaha adàwula à akul à gəl uwana gədapàha à akul gesina aya." 27 "Gəsak à akul ala lapiya à ahəŋ, gəvà à akul lapiya gulo. Gəvà à akul kà bokuba uwana gudəŋ à vok avà à akul aw. Kazamawla gəl aw, guba akəs akul babay aya aw. 28 Katsənàw uwana gəgòɗ à akul kà, gədiy aŋulo. Ama gədàwula à waŋ à slaka aŋkul. Agayŋa kawoyaw gi kà, naka karabaw à kà uwana gəda à slaka Baba gulo, gəgoɗ à akul, kà uwana Baba la uwana məŋga kà gi. 29 Lagonay kà, gədapəhakulla vok à abà, kokuɗa mapak vok aŋa azlatatak uwaga, kà mok uwana adàzlaŋalay kà, kadàdiŋawwal gəl à vok. 30 Gəslala vok aŋa maɓaɗma məŋga anina aya aw, kà uwana sufəl aŋa gudəŋ à vok uwanay kà nekwa atsa à waŋ. Maslay aŋha la ahəŋ bà ŋuv lakəl gulo aw. 31 Ama say gudəŋ à vok asəlay, kà gəwoya Baba kəla, ŋgaha gədza à ahəŋ kiya uwana asa à Baba. Sàw à afik məda aŋami la abanay lagwa!" 1 Yesu agòɗ aya: "Gi la uwana gi matavəruk dziriga, Baba gulo kà dza aŋa guf matavəruk. 2 Kəla ahàl matavəruk uwana av mayyay aw kà, asləh gi à vok ala. Ŋgaha kəla ahàl uwana av mayyay kà adàdeslay, kà aŋa mav mayyay məŋga aya. 3 Kà matapla uwanay gədatapaakullla kà, kadàgaw madadeslayga. 4 Nə̀ɓàw vok la gi, bokuba uwana gi la manəɓ vok gà la akul. Ahàl matavəruk aslala vok aŋa mav mayyay la aslasl gəl aŋha aw, say agay manəɓ vok gà, à iyà gà à vok. Kiya uwaga babay Yesu agoɗ: Gi matvəruk dziriga kaslawwal à vok aŋa madz à ahəŋ kokuɗa gəl aŋkul aw, say baŋa kanəɓaw gi vok à vok." 5 "Gi la uwana gi matavəruk iyà gà, akul kà akul azlamazləzl vok gà. Dza uwana adza à ahəŋ la gi la abà, iyaw gulo akəlay la masla la abà, masla adàvà mayyay aŋuvaw, kà uwana kaslawwalla vok aŋa maɗàh tatak la kokuɗa gi aw. 6 Dza uwana adza à ahəŋ manəɓ vok gà la gi aw kà, taduw à uda la guf la abà, bokuba ahàl matavəruk makəɗəval à vok ala gà, agula la abatà, tatsatsamay kà maɓəkay à akàl à gay, ŋgaha akàl aɓaɗ à gay leɗɗa. 7 Baŋa kadànəɓaw vok la gi, ŋgaha bay gay gulo adànəɓ vok la akul la abà, nàvàw uwana asa à akul gesina, kadàɓəzawwal. 8 Baŋa kavàw mayyay aŋuvaw, kadàgaw azlaməna matapla la slaka gulo. La uwaga la uwana mazləɓay aŋa Baba gulo adàpəhla vok ala la slaka azladza. 9 Gəwoya akul la ləv tekula, bokuba uwana Baba gulo awoya gi. Dzàw à ahəŋ la masal gulo la abà. 10 Baŋa kakəsaw mapəhay gulo kà, kadàdzaw à ahəŋ la masal gulo la abà, kalkal bokuba uwana gəkəsàŋ mapəhay aŋa Baba gulo, ŋgaha gədzà à ahəŋ la masal aŋha la abà babay." 11 "Gəpəh à akul uwaga kà, kà marabay gulo aŋa magay la akul la abà, ŋgaha marabay aŋkul babay aŋa magay mahənlaga. 12 Aganay mapəhay gulo: Wòyàw vok kà akul à akul, bokuba uwana gəwoya akul bay. 13 Masal la ahəŋ aɗuw aŋa dza, uwana av sifa aŋha kà aŋa azlaslawda aŋha aw. 14 Akul azlaslawda gulo, à baŋa kaɗahaw uwana 'Ɗahàwwàŋ', gəgoɗ à akul gesina. 15 Dagay lakana kà, gədàzala akul ala azlamagamza aya aw, kà uwana magamza kà asəl tatak uwana məŋga aŋha aɗehəŋ aw. Ama gədàzalla akul ala azlaslawda, kà uwana tatak uwana gətàpla la slaka Baba kà, gədatap à akul ala babay suwaŋ. 16 Akul la uwana kakə̀sàwnì gi aw, ama gi la uwana gəkə̀sànì akul, gəɓə̀k akul à ahəŋ kà kadaw aŋa mav mayyay, ŋgaha mayyay uwaga adasafay aŋa koksikoksi. Kiya uwaga Baba adàvà à akul dèwdèw tatak uwana kadànavaw la sləm gulo. 17 Gay uwana gəpəh à akul à vok à abà lagwa, say kawoyaw vok kà akul à akul." 18 "Baŋa gudəŋ à vok azinakulla vok ala kà, sə̀làw kà atsà vok à mazin gi vok ala dadàŋ teraŋa. 19 Agay kagaw azlaaŋa gudəŋ à vok kà, naka gudəŋ à vok awoya akul kà uwana akul azlaaŋha. Ama gətsatsàmànì akul, gəhə̀l akul à uda la abà, lagonay kà, akul azlaaŋa gudəŋ à vok aya aw, kà uwaga à uwana gudəŋ à vok azinakullla vok ala. 20 Awula à akul à gəl, à uwana gəpə̀h à akul uwarà kà, magamza aɗuwa məŋga aŋha aw. Baŋa tatərə̀ɓ gi kà, tadàtərərɓah akul bay, ama baŋa takəs mapəhay gulo kà, tadàkas mapəhay aŋkul babay. 21 Ama tadàɗahakulla uwaga à vok gesina kà, kà ahàl gulo, kà uwaga à uwana tasəl dza uwana asləl gi à waŋ aw. 22 Agayŋa gətsà à waŋ kà aŋa mapəh à atà aw, kà naka tsakana aŋatà atə̀ɗ à atà à gəl aw. Ama lagwa kà haŋay lakəl aŋa tsakana aŋatà la ahəŋ aya aw. 23 Dza uwana azin gi vok ala kà, azina vok à Baba gulo ala bay. 24 Agayŋa gəɗàh azlatatak nadzipo gà uwana dza aɗahəŋ aw aw, kà naka tsakana atəɗ à atà à gəl aw. Ama tsa gədaɗahah azlanadzipo uwaga kà, ŋgaha bà gotənaŋ kà, tazinan vok ala la Baba gulo. 25 Ama uwaga apakà vok kà, kà magəɗ uwana à afik tatsetsèr à wakità mapəhay à abà: 'Tadazingəŋ vok ala kà kiga pəra.'" Yesu agòɗ à atà. 26 Yesu agòɗ à atà aya: "Baŋa masla mazlak akul adàsa à waŋ, masla la uwana Masasəɗok dziriga, uwana adàguwa à waŋ la slaka Baba gulo, gədàsləl à akul à ahəŋ à baŋa gədada à slaka Baba gulo. Masasəɗok uwaga adàza sayda lakəl gulo. 27 Ŋgaha akul bay kadàzaw sayda gulo, kà uwana kagaw la gi dagay la madzəka." 1 "Gəpəh à akul uwaga kà, kà akul aŋa masak madiŋal gəl à vok aw. 2 Tadàkuɗəkah akul à lag la gày madəv kuɗa aŋa azla Yahudiya la aku. Kaslà adàsa à waŋ à uwana azladza uwana tadàkaɗah akul, tadàgoɗay kà: 'Sləray uwana məɗehəŋ kà, akəs à Zəzagəla à gəl.' 3 Taɗàh uwaga kà, kà uwana tasəl Baba aw, ŋgaha tasəl gi babay aw. 4 Ama gəpəh à akul uwanay kà, kà akul aŋa madzugway lakəl aŋha, kà baŋa adapaka vok kà, kà aŋa mawul à akul à gəl." "Uwana gəpəh à akul uwaga dagay madzəka aw kà, kà uwana gi la tataka akul la abà. 5 Lagonay kà, gəda à slaka dza uwana aslə̀l gi à waŋ, ama dza la ahəŋ 'Kad à uwali', agoɗ à gi la tataka aŋkul la abà, amiyaka tekula aw. 6 Ama mazaw la gəl adakəs akul kà uwana gəpə̀h à akul uwaga. 7 Ama gəpəh à akul la dziriga kà, aŋkul kà ŋuləm gəda aŋulo, kà uwana baŋa gədà aŋulo aw kà, masla mazlak akul atsa à ahəŋ à slaka aŋkul aw. Ama baŋa gi gəda aŋulo kà, gədàsləl à akul à ahəŋ. 8 Masla kà, baŋa adàsa à ahəŋ kà, adàpəhla à azladza gudəŋ à vok madzugway mawisiga aŋatà, lakəl aŋa tsakana, lakəl aŋa dziriga, ŋgaha lakəl aŋa seriya aŋa Zəzagəla. 9 Tadàvavar gəl aŋatà lakəl aŋa tsakana, kà uwana tadiŋ gi gəl à vok aw, 10 tavavar gəl aŋatà lakəl aŋa tatak dziriga, kà uwana gədà à slaka Baba gulo, ŋgaha kà, kadànəŋaw gi aya aw. 11 Lakəl aŋa seriya babay kà, kà uwana sufəl aŋa gudəŋ à vok uwanay kà seriya adàkəsay." 12 "Gi la azlagay aŋuvaw kà mapəh à akul, ama kaslawwalla vok aŋa makəsiŋ dadàŋ aw. 13 Mok uwana Masasəɗok dziriga adàzlaŋalay kà, adàdala akul la dziriga la abà gesina, kà uwana adàpəhay kà lakəl aŋa maslay aŋa gəl aŋha aw, ama adàpəhay kà lakəl aŋa uwana atsənàŋ, ŋgaha lakəl aŋa azlatatak uwana atsa à waŋ la huma la gay. 14 Masla adàpəhla mazləɓay gulo ala, kiya uwana atsənàŋ la slaka gulo, la uwana adàzakulaŋ. 15 Kəla tatak uwana Baba akoray kà uwaga aŋulo, kà uwaga à uwana gəgoɗ à akul kà, Masasəɗok Zəzagəla adàwula à akul tatak uwana aɓə̀zal la slaka gulo." 16 Yesu agòɗ à atà: "Aŋa kaslà ŋuv kadànəŋaw gi aya aw, ama zwek la huma la gay ŋuv kadànəŋaw gi aya." 17 Kiya uwaga azlaanik la tataka azlaməna matapla la slaka aŋha, tanàvàhà à vok kà atà kà atà: "Uwaga ma, mana asal magoɗay ma? Agòɗ à anu kà: 'Aŋa kaslà ŋuv kà mədànəŋəŋ gi aw, ama zwek la huma la gay aya kà mədànəŋəŋ gi aya, ŋgaha babay gəda à slaka Baba', agòɗ aya. 18 Mana asal magoɗay kaslà ŋuv ma? Mətsənà uwana asal mapəhay aw." 19 Yesu asə̀l kà asa à atà manaval. Kiya uwaga agòɗ à atà: "Asafay à uwana gəpəh à akul uwaga aw, zwek la huma la gay kadànəŋaw gi aw, la lig la ahəŋ ŋuv kadànəŋaw gi aya. Lakəl ma aŋa uwaga à uwana kanavahaw vok takay? 20 Gəpəh à akul la dziriga: Katawaw, katsahahaw hulolo, ama gudəŋ à vok adàrabay, kadàzamawla gəl, ama mazaw la gəl aŋkul kà, adàpaka marabay. 21 Baŋa mis azlà asekw à ahəŋ kà, mazaw gəl adal à vok, kà uwana kaslà matərəɓay aŋha adaslay, ama baŋa adasekw à ahəŋ kà, matərəɓay avikaŋ, kà uwana marabay kà uwana adayyi bəzi. 22 Kiya uwaga babay, akul la mazaw la gəl la abà la kaslà uwanay, ama gədànəŋ akul aya, ŋgaha ləv aŋkul adàrabay. Dza la ahəŋ aslala vok kà mazəɓakulla marabay ala tetuwa aw." 23 "Baŋa mavakay uwatà adasa à waŋ kà, kadànavaw gi tatak la sləm gulo aya aw. Gəpəh à akul la dziriga: Kəla tatak uwana kanavaw la sləm gulo kà, Baba adàvà à akul uwaga gesina. 24 Tsəràh à lakana dadàŋ kà, kadanavaw tatak la sləm gulo aw. Nàvàw ŋgaha kaɓəzawwal, ŋgaha kà marabay aŋkul aŋa mahənla." 25 "Gəpəh à akul azlatatak uwaga gesina kà la gay la gay la abà, ama kaslà atsa à waŋ à uwana gədàpəh à akul kà la gay la gay la abà aya aw. Gədàpəh à akul kà la dazuwaya lakəl aŋa Baba gulo. 26 Baŋa mavakay uwaga adaslay kà, gədàdəv kuɗa à Baba kà aŋkul, gəgoɗ magay aw. 27 Kà uwana Baba la gəl aŋha awoya akul. Awoya akul kà, kà uwana kawoyaw gi, kà uwana kadiŋawwal gəl à vok, kà gəsa à waŋ la slaka aŋha. 28 Gəsà à waŋ à gudəŋ à vok kà, gəsà à ahəŋ kà la slaka Baba. Lagwa kà, gəda à slaka Baba, gəsak à gudəŋ à vok à ahəŋ." 29 Azlaməna matapla la slaka aŋha tagòɗal: "Lagonay kà, kapəhay la dazuwaya, kokuɗa la gay la gay la abà zlà. 30 Lagwa kà, mədasəlay kà kasəl tatak gesina, ŋgaha kanəkuɗa kà dza aŋa manav à ka tatak aw. Mədiŋal gəl à vok kà ndzer, kasà à ahəŋ kà la slaka Baba Zəzagəla." 31 Yesu agòɗ à atà: "Kadiŋawwal gəl à vok adagay lagwa ay? 32 Kaslà adàsa à waŋ, lagwa kà adasa à waŋ, uwana kadàsləhaw gəl à ahəŋ uwabeyuwi adàdiŋ aŋha à mtəga aŋha, kadàsakaw gi à ahəŋ kokuɗa gulo. Ama la dziri kà, gi kokuɗa gulo aw, kà uwana anu la Baba gulo. 33 Uwana gəpəh à akul uwaga gesina kà, kà akul aŋa magay la lapiya la maham gay à vok la abà la gi. Akul kà, kadàsaw ŋgərpa la gudəŋ la vok, ama kurit yewdi, agoɗ à akul aw! Kà uwana gədakəɗaslla gudəŋ à vok." 1 Mok uwana Yesu adapəh gay uwaga à gay gesina kà, anəŋà à zagəla, agòɗ: "Baba, kaslà kà adaslay. Pə̀hla mazləɓay aŋa Kona aŋak ala, ŋgaha Kona aŋak apəhla mazləɓay aŋak ala suwaŋ, 2 kà uwana kavàl maslay lakəl aŋa azladza gesina la vəɗah, kà masla aŋa mav sifa adəv à gay aw à azladza uwana kaɓə̀kal atà gesina. 3 Sifa adəv à gay aw kà, kà aŋa azlauwana tasəl ka pəra, à kak Zəzagəla dziriga gà, ŋgaha kà masəlay Yesu Kristu uwana kaslə̀l à ahəŋ. 4 Gədapəhla mazləɓay aŋak ala la vəɗah, gədadəvəŋ à gay sləray uwana kaf à gi à ahàl kà maɗehəŋ. 5 Lagwa zlà kà, Baba kà, và à gi mazləɓay uwana gəgà la masla la huma aŋak mok uwana gudəŋ à vok aləg madzəka dàŋ zlà." 6 "Baba, azladza uwana kaɓə̀k à gi, atà la gudəŋ uwanay la vok kà, gədàpəhatàla kak, kà uwana atà tagay azlaaŋak, ŋgaha kaɓə̀k à gi atà, lagwa kà, atà takə̀s gay aŋak. 7 Lagwa kà dèwdèw tatak uwana kavà à gi kà, tasə̀l kà, atsà à ahəŋ la slaka aŋak. 8 Kà uwana gəpə̀h à atà ala gay uwana kapə̀h à gi à ahàl kà mapəh à atà, takə̀s, tasə̀l ndzer kà gəsà à waŋ la slaka aŋak, ŋgaha kà kak la uwana kaslə̀l gi à waŋ." 9 "Baba gədəv à ka kuɗa kà aŋatà. Awkà gədəv kuɗa kà gudəŋ à vok aw, ama kà aŋa azlauwana kaɓə̀k à gi atà à ahàl, kà uwana azlaaŋak. 10 Dèwdèw tatak uwana aŋak kà aŋulo, dèwdèw tatak uwana aŋulo bay kà, uwaga kà aŋak, kà uwaga à uwana mazləɓay gulo apəhla vok ala la azlatatak uwaga la abà gesina. 11 Gi kà, gi la gudəŋ la vok aya aw, ama atà kà, atà la gudəŋ la vok. Gi kà gəda à slaka aŋak Baba tsikasla, nə̀ŋla atà la ndzəɗa aŋa sləm aŋak uwana kavà à gi, kà atà aŋa magay tekula, bokuba uwana məgaw tekula anu səla. 12 Mok uwana gi la slaka aŋatà gəfà à atà sləm la maslay aŋa sləm aŋak, sləm uwana kavà à gi. Gənə̀ŋla atà, amiyaka tekula aŋatà bay kà, azàla aw. Say dza uwana naka azilà, wakità agòɗ kà magəɗ uwana à afik, wakità agòɗ pəra. 13 Ama lagonay kà, gəda à slaka aŋak, à uwana gəpəh kiya uwanay kà, kà uwana gələg la gudəŋ la vok dadàŋ, kà atà aŋa maɓəzal marabay gulo la huɗ aŋatà, marabay uwana mahənlaga. 14 Gi, gəvà à atà gay aŋak, ŋgaha gudəŋ à vok azin atà vok ala, kà uwana azlaaŋa gudəŋ à vok aw, bokuba gi uwana gi aŋa gudəŋ à vok bay aw. 15 Gədəv à ka kuɗa kà mahəl atà à uda la gudəŋ la vok aw, ama aŋa manəŋla atà kà mawisiga. 16 Atà kà azlaaŋa gudəŋ à vok aw, bokuba gi, uwana gi aŋa gudəŋ à vok aw. 17 Pàk atà ala kà azlaaŋak, gay aŋak kà dziriga pəra. 18 Gi gədasləl atà à gudəŋ à vok, bokuba uwana kaslə̀l gi à ahəŋ à gudəŋ à vok. 19 Gəvà à ka sifa gulo gesina kà aŋatà, kà atà babay aŋa magay azlaaŋak la dziriga." 20 "Gədəv kuɗa kà, kà aŋatà pəra aw, ama kà aŋa azlauwana tadàdiŋ gi gəl à vok, à kapə̀hla ala aŋatà bawbaw bay." 21 "Gədəv kuɗa kà atà gesina aŋa magay tekula. Baba, tagay tekula la anu bokuba kak la gi babay anu tekula pəra, gudəŋ à vok aŋa masəlay kà kak kaslə̀l gi à waŋ. 22 Baba gəvà à atà mazləɓay uwana kavà à gi, kà atà aŋa tagay tekula bokuba anu səla uwana anu tekula. 23 Gəgay la atà la abà, ŋgaha kak babay məgaw anu səla, kà magay tekula la slaka gà. Ŋgaha gudəŋ à vok aŋa masəlay kà kak la uwana kasləl gi à ahəŋ haɗay, ŋgaha kà kak kawoya atà bokuba uwana kawoya gi." 24 "Baba, kak kavà à gi atà, asa à gi kà atà tagay la slaka uwana gədàgay, ŋgaha kà atà aŋa manəŋ mazləɓay gulo, uwana kavà à gi, kà uwana kawoya gi dagay uwana kaləg maɗàh gudəŋ à vok. 25 Baba dziriga, gudəŋ à vok asəl ka aw, ama gi kà gəsəl ka, ŋgaha azlauwana babay kà tasəl ka kà kak la uwana kaslə̀l gi à ahəŋ. 26 Lagwa gəpə̀hatàla kak, ŋgaha gədàpəhatàla kak aya, kà masal aŋak uwana kawoya gi aŋa magay la atà babay, ŋgaha gi babay aŋa magay la atà." 1 Kiya uwaga mok uwana Yesu adadəv madəv kuɗa à gay kà, ahàd la azlaməna matapla la slaka aŋha à gay dərəv à uda anik aŋa mukwà Kidəron. La abatà kà, gày alàl la ahəŋ adà à abà la azlaməna matapla la slaka aŋha. 2 Yudas masla matal kaf à Yesu à gəl babay kà, asəl slaka uwatà, kà uwana Yesu adàha à abatà kwà à kwà la azlaməna matapla la slaka aŋha. 3 Yudas zlà, ahàd à gày alàl à abà la maham à ahəŋ slodzi, la azlaməna manəŋla gày Zəzagəla la tsəh. Azladza uwaga kà azlamadzahaga aŋa mav tatak la azla Farisəya la uwana taɓə̀kal à tsəh, tahə̀l fənəs la matəvani à akàl à ahàl. 4 Kiya uwaga Yesu kà asəl tatak uwana adàɓəzal gesina, azà à vok à awtày à slaka aŋatà, agòɗ à atà: "Uwa, kayahaw uwa?" 5 Tawulà ala, tagòɗ: "Yesu, zil Nazaret." Yesu agòɗ à atà: "Giga la uwanay, à uwana kayahaw!" Yudas uwana atàl kaf à gəl, la abatà atà nna. 6 Mok uwana 'Gəga la uwanay', Yesu agòɗ à atà kà, tawùl à lig, tatàɗ à vəɗah. 7 Yesu anàv à atà aya, agòɗ à atà aya: "Uwa, kayahaw uwa?" Tagòɗal: "Yesu, zil Nazaret." 8 Yesu agòɗ à atà: "Gəga la uwanay, gədagoɗ à akul aw takay? Baŋa gi kayahàw kà, sàkàw azlaanik uwaga tada aŋatà!" 9 Kiya uwaga la uwana gay uwana Yesu apə̀h uwarà, agəɗ à afik: "Baba, azladza uwana kaɓə̀k à gi à ahàl kà, amiyaka tekula aŋatà kà adazila aw." 10 Katsakar la Səmon Piyer la ahàl, aɓə̀ɗ katsakar à lag, aɗə̀ɗla mayà aŋa məŋ madzahaga aŋa azlaməna mav tatak à Zəzagəla, akəɗə̀val sləm ahàl kaf lakəl ala, sləm aŋa mayà uwatà kà Malkus. 11 Yesu agòɗ: "Hay, Piyer, wulà katsakar aŋak à gày aŋha à agu. Kadzugw kà 'Gəsa ŋgərpa à uda la kətsaw uwana la abà Baba avà à gi aw', kagoɗ takay?" 12 Maham à ahəŋ slodzi, la azlaməŋga aŋatà, la azlaməna manəŋla gày Zəzagəla aŋa azla Yahudiya tahamà à Yesu à adi, takàs, tawàɗàŋ. 13 Teraŋa kà, tadàlla à mtəga aŋa Hanas dadàŋ. Hanas kà tsiŋay aŋa Kayyif, uwana masla la uwana məŋ madzahaga aŋa azlaməna mav tatak à Zəzagəla la mavay uwatà la tsəh. 14 Tekeɗik kà, Kayyif la uwana avà sawaray à azla Yahudiya: "Ŋuləm kà dza tekula aməts à kà azladza gesina aŋa maməts à gay", agòɗ tekeɗik. 15 Səmon Piyer atà la masla matapla anik tanəfà Yesu. Masla matapla anik uwatà kà, məŋ madzahaga asə̀l, tahàd à gày à kodal à abà la slaka la Yesu, à kodal aŋa məŋ madzahaga uwaga à abà. 16 Ama Piyer agə̀ɗ à gay gamagày. Kiya uwaga masla matapla anik uwana məŋ madzahaga asə̀l, asà à uda aɓaɗmà la mis uwana anə̀ŋla gamagày kà mav tetəvi à Piyer, kà mad à gày. 17 Mis uwana anə̀ŋla gamagày agòɗ à Piyer: "Kak babay kà kak masla matapla aŋa zil uwanay aw takay?" "Awaŋ, awaŋ, gi la abà aw", Piyer agòɗ. 18 Anasl la ahəŋ, azlaməna sləray, la azlaməna manəŋla tavatsà akàl à ahəŋ, kà madz la ahəŋ la adi. Piyer babay adzà à akàl à adi la slaka aŋatà. 19 Məŋ madzahaga aŋa azlaməna mav tatak uwana anavà Yesu lakəl aŋa azlaməna matapla la slaka aŋha, lakəl aŋa matapla aŋha uwana atàpla à azladza. 20 Yesu agòɗal: "Gəpə̀hàhàh gay à azladza la dazuwaya, gətàpàhàtàla azlatatak la azlagày madəv kuɗa la aku, ŋgaha la məŋ gày Zəzagəla la aku, la slaka uwana azla Yahudiya tahàmàhà gay à vok gesina, gəhaɗà tatak à ahəŋ aw. 21 Kà mana kanav gi tatak aya ma? Nàv à azladza uwana tatsə̀ɓ gi sləm lakəl aŋa azlagay uwana gəpə̀h à atà gesina. Atà tasəl la lela lakəl aŋa uwana gəpə̀h à atà." 22 Uwana Yesu apə̀h gay uwaga kà, masla manəŋla anik uwana la makəla aŋha, akəɗə̀val mamits à ahàl la magoɗal: "Kiya uwaga la uwana kaula à məŋ madzahaga aŋa azlaməna mav tatak à Zəzagəla à adi takay?" 23 Yesu agòɗal: "Baŋa gəpə̀h mawisiga kà pə̀hgəla mawisiga uwatà. Ama baŋa dziriga gəpə̀h ma, kà mana kaɗə̀ɗ à gi kiya uwanay ma?" 24 Hanas aslə̀l masla la mawaɗəŋga à slaka Kayyif məŋ madzahaga. 25 La mok uwatà Səmon Piyer la abatà à vuɗ akàl à vok. Tanavàlla gay ala: "Kak babay, kak tekula aŋa azlaməna matapla aŋa zil uwanay aw takay?" Ama Piyer awulà à uda, agòɗ: "Awaŋ, awaŋ, gi la abà aw!" 26 Tekula la tataka aŋa azlamagamza aŋa məŋ madzahaga aŋa azlaməna mav tatak à Zəzagəla la abà, uwana yaga aŋa dza uwana Piyer akəɗə̀val sləm lakəl ala, agòɗal: "Kak à uwana gənəŋà ka la gày alàl la abà, akul səla aw takay?" 27 "Gi aw!", Piyer agòɗ aya, katskats mewgdzagalaŋ awiyà la kaslà uwatà. 28 La gay bebəŋ bəŋ, tasə̀lla Yesu à uda la mtəga Kayyif, tadàlla à mtəga gumna aŋa azla Rom. Ama azla Yahudiya tadà à gày la mtəga aŋa gumna aw, kà uwana wakità mapəhay aŋatà avà à atà tetəvi aw, kà uwana baŋa tadà à gày kà, adatàla àlàh à vok, taslala vok aŋa mazuw tatak may aŋa madəvaday Paska aw. 29 Kà uwaga à uwana gumna Pilatus asà à uda à slaka aŋatà, anàv à atà lakəl: "Ma aŋa mana kapuwàw gudzi à dza uwanay à gəl ma?" 30 Tagòɗal: "Agayŋa agay dza mawsiga aw kà, naka məslala vok aŋa mav à ka à ahàl aw." 31 Pilatus agòɗ à atà: "Ɗàwla, kadàɗahawla seriya à gəl aŋkul bokuba uwana wakità mapəhay aŋkul apəhay." Azla Yahudiya tagòɗal: "Tetəvi la ahəŋ kà aŋami aŋa maɗàh seriya mamətsay à dza à gəl aw." 32 Uwaga apakà vok aŋa magəɗ gay aŋa Yesu à afik, apə̀h lakəl aŋa mamətsay aŋha. 33 Kiya uwaga Pilatus awùl à gày, azàla Yesu, agòɗal: "Kak, Sufəl aŋa azla Yahudiya ay?" 34 Yesu agòɗal: "Kapəh uwaga ma la gəl aŋak ay? Awma azlaanik tapə̀h à ka magay ay?" 35 Pilatus agòɗal: "Gi zil Yahudiya suwaŋ ay? Azlayaga aŋak dardar gà, la azlamadzahaga aŋa azlaməna mav tatak à Zəzagəla la uwana tavà à gi kak, mana kaɗahàŋ takay ma?" 36 Yesu agòɗ: "Makoray gulo kà aŋa gudəŋ à vok uwanay aw, agayŋa makoray gulo kà aŋa gudəŋ à vok uwanay kà, naka iyay, azlaməna sləray gulo tagoɗay kà mav à gi à ahàl aŋa azla Yahudiya aw. Ama kiya uwaga aw, makoray gulo kà aŋa gudəŋ à vok uwanay aw." 37 Pilatus agòɗal zlà: "Lagwa ma kak Sufəl ay?" Yesu agòɗal: "Bokuba uwana kapə̀h kà, gi Sufəl. Tayyà gi, gəsà à ahəŋ à gudəŋ à vok kà, kà mapəh dziriga. Uwabeyuwi uwana asal dziriga atsəɓ sləm à dziriga uwana gəpəhay." 38 "Mana à dziriga ma?", Pilatus agòɗal. Mok uwana adapəh gay uwaga, Pilatus asà à uda aya, kà mad à slaka azla Yahudiya, adzàɗàtàŋ ala, agòɗ à atà: "Gəɓəz à tatak uwana adukwla zil uwanay à ahəŋ aw. 39 Ama bokuba uwana zagəlà aŋkul kà, gədàwa à akul gəl à masla daŋay tekula kəla madəvaday Paska ma. Lagwa ma asà à akul gəduwa à akul gəl à Sufəl aŋa azla Yahudiya ay?" 40 Kiya uwaga tadzəkà mawiyay: "Awaŋ, masla aw! Barabas la uwana asa à anu!" Tekeɗik Barabas uwatà kà, agà kà masla nabəra. 1 Kiya uwaga Pilatus avà à atà tetəvi kà maslàh Yesu ala la kurpi. 2 Azlaslodzi taslàslàp gabaga aŋa atàk kà mawaɗ à Yesu à gəl, ŋgaha tatsàkwà à deri mativga gà à abà vikuza. 3 Tazà à vok à slaka aŋha, ŋgaha tagòɗal: "Ayyi, Sufəl aŋa azla Yahudiya!" Ŋgaha tazlàɓ la maməts à ahàl. 4 Kiya uwaga Pilatus asà à uda aya, agoɗ à maham à ahəŋ dza, agòɗ à atà: "Gətsakulla à uda à abanay. Kà akul aŋa masəlay kà tatak la ahəŋ à uwana azlayla kà madukwla seriya à gəl aw." 5 Yesu asà à uda la gabaga aŋa atàk lakəl, la deri mativga la vok vikuza. Ŋgaha Pilatus agòɗ à atà: "Aganay dza zlà!" 6 Ama uwana azlamadzhaga aŋa azlaməna mav tatak à Zəzagəla, la azlaməna manəŋla gày Zəzagəla tanəŋàŋ kà, tadzəkà mawiyay: "Zlə̀l masla à ahàf à adi, zlə̀l masla à ahàf à adi!" Pilatus agòɗ à atà: "Zlə̀làw masla à ahàf à adi la gəl aŋkul, kà uwana gəɓəzà à tatak uwana gəɗahalla seriya à gəl aw." 7 Azla Yahudiya tagòɗal: "La wakità mapəhay gami la abà kà, mapəhay gami agòɗ kà: Azlayla à vok amətsay kà uwana: 'Gi la gəl gulo kà, gi Kona aŋa Zəzagəla', agoɗ." 8 Mok uwana Pilatus atsənà gay uwatà, guba akə̀s kaykay aya. 9 Awùl à gày, ŋgaha anàv à Yesu: "Kasà à waŋ ma la ala tak la?" Ama Yesu kà awulà gay à uda aw. 10 Kiya uwaga Pilatus agòɗal: "Asà à ka maɓaɗgəma aw ay? Kasəl kà gi la maslay aŋa maduwa ka gəl, ŋgaha bay kà, gi la maslay aŋa mazləl ka à ahàf à adi aw takay?" 11 Yesu agòɗal: "Kak la maslay lakəl gulo aw, say baŋa uwana Zəzagəla avà à ka dagay la afik pəra. Kà uwaga à uwana dza uwana avà à ka gi à ahàl la uwana aɗuwa ka la tsakana gesina." 12 Dagay la mok uwatà Pilatus ayàh tetəvi kà maduw gəl à Yesu. Ama azla Yahudiya tadzəkà mawiyay: "Baŋa kasak à dza uwaga kà, kak slawda aŋa məŋ sufəl aya aw! Kəla dza uwana 'Gi sufəl', agòɗ kà, masla məzam aŋa məŋ sufəl!" 13 Mok uwana Pilatus atsənà gay uwaga kà, awùlla Yesu à uda aya, adzà à kursi aŋa seriya à afik, la slaka uwana tazalalla Pave (Uwaga asal magoɗay: slaka akur madəlay gay gà, la gay Ibəranəŋkowen Gabbatha, tagoɗal) 14 Uwaga kà, agà vuɗ maɗàh vok aŋa vuɗ madəvaday Paska, la tataka afats. Pilatus agòɗ à azla Yahudiya: "Masla la uwaga à Sufəl aŋkul!" 15 Ama tadzəkà mawiyay: "Kə̀ɗ masla, kə̀ɗ masla, zlə̀l à ahàf à adi!" Azlaməŋ madzahaga aŋa azlaməna mav tatak à Zəzagəla tagòɗ: "Sufəl gami anik la ahəŋ aw, say məŋ sufəl aŋa azla Rom pəra." 16 Kiya uwaga Pilatus avà à atà Yesu à ahàl, kà atà aŋa mazləl à ahàf à adi. Kiya uwaga tadàla Yesu. 17 Yesu asà à uda la gudəŋ la abà, ahàf uwana tadàzləllal à adi lakəl aŋha, kà mad slaka uwana tazalalla slaka aslasl takas à gəl. (Tazalalla Golgota la gay Ibəranəŋkowen) 18 La abatà la uwana, azlaslodzi tazlə̀l Yesu à ahàf à adi. La kaslà uwatà la uwana tazlə̀l azladza səla à ahàf à adi atà nna, tekula la ahàl kaf, tekula la ahàl gudzay aŋha. Yesu la tataka la abà. 19 Pilatus avà à atà tetəvi kà matsetser wakità kà maf à ahàf à adi lakəl aŋha. Aganay matsetseray gà uwana tatsetsèr: YESU ZIL NAZARET, SUFƏL AŊA AZLA YAHUDIYA. 20 Azla Yahudiya aŋuvaw tadzèŋàh matsetseray uwatà, kà uwana slaka uwana tazlə̀l Yesu à ahàf à adi, kà nekwa la mad à huɗ gudəŋ à abà, matsetseray gà uwana tatsetsèr kà la gay Ibəranəŋkowen, la gay latin, ŋgaha la gay gərək. 21 Kiya uwaga azlamadzahaga aŋa azlaməna mav tatak à Zəzagəla uwana la tataka azla Yahudiya la abà, tagòɗ à Pilatus: "Matsetseray uwanay: Gi Sufəl aŋa azla Yahudiya, kagoɗ kà kità aw, ama tsetsèr kà: Dza uwanay la uwana agòɗ kà: 'Gi Sufəl aŋa azla Yahudiya', agòɗ, kagoɗay." 22 Pilatus agòɗ: "Uwana gədatsetseray kà, adza à ahəŋ kiya uwaga pəra." 23 Mok uwana azlaslodzi tazlə̀l Yesu à ahàf à adi kà, tahə̀l lukut aŋha, tavàhàŋ ala slaslaka ufaɗ, kəla slodzi aɓə̀zal slaka tekula, tekula. Tahə̀l deri aŋha uwana madzəɓayga vok aw, tsəràh à afik, tsəràh à vəɗah. 24 Azlaslodzi tagòɗ à vok kà atà kà atà: "Məkwaha deri uwanay ala aw, ama mətsà tsatsa lakəl kà anu aŋa masəl dza uwana agəɗal." Uwanay apakà vok kà magəɗ gay uwana à afik wakità Zəzagəla apəh: 'Tavàhà lukut gulo la tataka aŋatà la abà, tatsà tsatsa la lukut gulo lakəl.' Kiya uwanay la uwana azlaslodzi taɗahàŋ zlà. 25 Nekwa la ahàf uwana tazlə̀llal Yesu à adi kà, iyà aŋha atsìzl à abatà, atà la deda aŋha duguga, mis aŋa Kəlopas, ŋgaha Mariyama dəg zla Magdala. 26 Yesu anəŋà iyà aŋha, la makəla aŋha masla matapla uwana awoyàŋ kaykay. Yesu agòɗ à iyà aŋha: "Mis uwanay kà kona aŋak la uwaga." 27 Ŋgaha agòɗ à masla matapla uwaga: "Iyà aŋak la uwaga." Dagay vuɗ uwatà, masla matapla azə̀ɓ à mtəga aŋha. 28 Uwana uwaga adada à lig gesina, Yesu asə̀l tatak gesina kà adadəv à gay, apə̀h uwaga kà mahən gay uwana ala matsetseray agoɗ: "Nəlay aza à gi." 29 Iyaw hamhamga la ahəŋ la abatà la daraw gà dəŋəra. Azlaslodzi tadùw sawsaw à iyaw hamhamga uwaga à abà, tafà à kavak à gay kà madziyla à afik aŋa makokuzay. 30 Mok, uwana adakokuz iyaw uwaga, Yesu agòɗ: "Lagwa kà adagay diga!" Akəsà gəl à ahəŋ, amə̀ts. 31 Uwaga kà mavakay maɗàh vok aŋa maduw ləv, asà à azla Yahudiya kà, azlavok adza à ahəŋ la ahàf à adi tsəràh à mavakay maduw ləv aw, kà uwana mavakay uwatà kà mavakay mapis ala gay à vok gà, tanàv à Pilatus kà, takàlàhà à atà asik ala, kà mahəl vok à ahəŋ la ahàf la adi. 32 Kiya uwaga azlaslodzi tasà à waŋ takàlàhà asik à matera ala, la aŋa masəla, uwana la makəla aŋa Yesu lakəl la slaka gà. 33 Uwana tabə̀z à Yesu à vok kà, tanəŋàŋ kà adamətsay. Kà uwaga à uwana takàlla ala asik ala aw. 34 Ama tekula aŋa azlaslodzi azlə̀l ala makəlla la atsəkaɗ, batsàrà aŋiz la iyaw asà à uda. 35 Dza uwana azàŋ lakəl aŋa tatak uwaga apakà vok gesina kà, azàŋ lakəl aŋha kà dziriga, masla bay kà asə̀l kà uwana anəŋà, akul babay kà kaslaw aŋa madiŋal gəl à vok. 36 Uwanay apakà vok kà gay aŋa matsetseray aŋa magəɗ à afik ndzer: 'Tadàkəlah aslasl aŋha ala aw.' 37 La azlaslaka anik la wakità la abà agoɗ aya kà: 'Tadànəŋ dza uwana tazlə̀làŋ ala la ahàf la adi.' 38 Uwana uwaga adada à lig, Yusufu zil gudəŋ Arimate, anàv tetəvi la slaka Pilatus kà mazəɓ vok aŋa Yesu. (Yusufu kà masla matapla la slaka Yesu la gəl à gəl, kà uwana guba azəŋ kà azla Yahudiya) Pilatus avàl tetəvi. Kiya uwaga Yusufu asà à waŋ, azə̀ɓ vok aŋa Yesu à ahàf à adi ala. 39 Nikodemus, zil uwana ahàd à slaka Yesu la vəɗ, asà à waŋ à slaka aŋha bay, matərsin, la azlaahàf kidzidzi uwana mahamala gay à vok gà la ahàl, mahanay aŋha kà kilo dzik makər (Bokuba tasà kulo gəl aŋha zlo) 40 Tazə̀ɓ vok aŋa Yesu atà səla, tafàɗal bafta à adi, taɗahàhal azlatatak mazinay gà à vok, uwana zagəlà aŋa azla Yahudiya, kà mazəɓ dza à uda, à baŋa adamətsay. 41 La slaka uwana tazlə̀l Yesu à ahàf à adi kà, gày alàl la ahəŋ la abatà. La gày alàl uwatà la abà kà, zəvay mawga la ahəŋ, taf dza à agu didi aw. 42 Bokuba uwana vuɗ maɗàh vok aŋa vuɗ maduw ləv aŋa azla Yahudiya kà, tafà Yesu à agu la abatà, kà uwana zəvay kà nekwa. 1 Bəŋ la zay la tsəh vuɗ maduw ləv aŋa azla Yahudiya, Mariyama dəg zla Magdala, ahàd à gəl zəvay. Masla anəŋàŋ kà akur uwana la zəvay la gay kà, matakoslal à ama ala gà. 2 Adà aŋha la mahoyay, abə̀z à Səmon Piyer à vok, atà la masla matapla anik uwana Yesu awoyàŋ kaykay, agòɗ à atà: "Sufəl kà, tazə̀ɓ à lag la zəvay la aku, məsə̀l slaka uwana tadàlla à abà aw." 3 Piyer atà la masla matapla anik uwanay tahàd à gəl zəvay. 4 Tahàd la mahoyay, tahòy, ama masla matapla anik uwanay aɗuwà Piyer la mahoyay, atsà vok à gəl zəvay. 5 Atsòŋ gəl à agu, anəŋà bafta la vəɗah la aku, ama adà à agu aw. 6 Səmon Piyer, uwana asà à waŋ la lig la ahəŋ, adà à agu. Masla anəŋà bəfta la vəɗah, 7 la nalbət uwana tafafàɗ à Yesu à gəl, masla kà, adəɓanì vok la bafta aw, mafafaɗ à abà gà la slaka anik kokuɗa gəl aŋha. 8 La lig la ahəŋ, masla matapla uwana atsà vok à gəl zəvay, adà à agu suwaŋ. Anəŋàŋ, ŋgaha adìŋal gəl à vok. 9 (Tekeɗika la kaslà uwatà kà, azlaməna matapla tatsənà godega aŋa wakità, uwana Yesu adàwula à uda la mamətsay agoɗ, dadàŋ aw) 10 Ŋgaha azlaməna matapla səla uwatà tawùl aŋatà. 11 Mariyama atsìzlla ahəŋ la gay zəvay la matuway. Uwana atuway kà, atsòŋ gəl à zəvay à agu kà manərəzay, 12 ŋgaha anəŋà azlamalika səla la lukut meɗekuga la vok təlla, tadzàh madzay la slaka uwana hənà Yesu à ahəŋ. Tekula adzà madzay lakəl gà, anik adzà madzay la godega gà. 13 Azlamalika uwaga tanàvalla gay: "Mis, kà mana katuway ma?" Mis agòɗ à atà: "Tazə̀ɓ vok aŋa Sufəl gulo, gəsəl slaka uwana tadàlla à abà aw." 14 La mapəh gay uwaga la gay la, agolà vok, ŋgaha anəŋà Yesu. 15 Yesu anàvalla gay ala: "Mis, kà mana katuway ma? Uwa kayahay uwa?" Mis adzùgw kà masla sləray guf, agòɗ, à uwana apəhal kiya uwanay: "Baŋa kak kazə̀ɓ kà, pə̀hgəla slaka uwana kafà à abà, kà gəday, gədàzəɓay." 16 Yesu agòɗal: "Mariyama!" Fə̀tsal, Mariyama agolà vok à slaka aŋha, ŋgaha agòɗal la gay Ibəranəŋkowen: "Rabbuni!" (Uwana asal magoɗay: Məŋga gulo) 17 Yesu agòɗal: "Kakəs gi à ahəŋ aw, kà uwana gədàda à afik à slaka Baba gulo aw. Ama hàd, kadàgoɗ à azladeda gulo kà gədàda à afik à slaka Baba gulo, uwana Baba aŋkul babay, à slaka Zəzagəla gulo uwana Zəzagəla aŋkul babay." 18 Kiya uwaga Mariyama dəg zla Magdala azà gay uwaga à azlaməna matapla: "Gədanəŋ Sufəl!" Ŋgaha atùgw a àtà tatak uwana apəhal gesina. 19 La gay mokokhu aŋa vuɗ maduw ləv aŋa azla Yahudiya uwatà, azlaməna matapla tahamà gay à vok la gày anik la aku, tatsàkà à gamagày à ama la tsəkurum, kà uwana guba azà à atà kà azla Yahudiya. Yesu asà à waŋ, atsìzl à tataka aŋatà à abà, agòɗ à atà: "Lapiya aga la akul!" 20 Uwana adapəh à atà uwaga, apə̀hatàla ahàl aŋha la makəla aŋha. Azlaməna matapla tahə̀n ala la marabay à kà uwana tanəŋà Sufəl. 21 Yesu agòɗ à atà aya: "Lapiya aga la akul, bokuba uwana Baba aslə̀l gi à waŋ kà, gi babay kà gəsləl akul suwaŋ." 22 La lig aŋa uwaga la ahəŋ, afətà à atà afaɗ à gəl, agòɗ à atà: "Ɓə̀zàw Masasəɗok Zəzagəla! 23 Uwabeyuwi uwana kamatsawwalla tsakana ala kà, adàɓəz mamatsila. Azlauwana kamatsaw à atà tsakana ala aw kà, tadàɓəz mamtsila babay aw." 24 Mok uwana Yesu asà à waŋ kà, Tomas, tekula aŋa azlaməna matapla kulo gəl aŋha səla, (Uwana tazalal vəgal), la uwana agà la tataka aŋatà la abà, à mok uwana Yesu asà à waŋ aw pəra. 25 Azlaməna matapla anik tagòɗal: "Mənəŋà Sufəl!" Ama Tomas agòɗ à atà: "Baŋa gədànəŋəŋ azlamokfak aŋa mamasamasa uwana la ahàl aŋha aw kà, gədiŋal gəl à vok aw, say baŋa gədàtap gay gəl ahàl gulo à amik, aŋa mamasamasa uwatà à abà dadàŋ, ŋgaha gətàp ahàl gulo à amik uwana à abà la makəla aŋha aw kà, gədiŋal gəl à vok aw!" 26 Bà la mad à abà aŋa kasukwa uwatà aya kà, azlaməna matapla tahamà gay à vok la kay aya. Vuɗ uwatà kà, Tomas la tataka aŋatà la abà. Gamagày matsakahay gà la tsəkurum, ama Yesu asà à waŋ, atsìzl à tataka aŋatà à abà, la magoɗay: "Lapiya aga la akul!" 27 Ŋgaha agòɗ à Tomas: "Tomas, tàp gay gəl ahàl aŋak à abà la abanay, ŋgaha nərə̀z makəla gulo, sàk à matsigay, dìŋal gəl à vok pəra." 28 Tomas agòɗal: "Sufəl gulo, Zəzagəla gulo!" 29 Yesu agòɗal: "Kà uwana kadanəŋ gi pəra, à uwana kadiŋal gəl à vok ay? Marabay la azlauwana tadiŋal gəl à vok la kokuɗa manəŋ gi!" 30 Yesu aɗahà azlanadzipo anik la huma aŋa azlaməna matapla aŋha aŋuvaw, uwana tatsetsèr à wakità uwanay à abà aw. 31 Ama uwana agà la abà kà tatsetser kà, kà akul aŋa madiŋal gəl à vok kà Yesu kà Kristu, ŋgaha Kona aŋa Zəzagəla. La madiŋal gəl à vok uwaga kà akul kaɓəzaw sifa adəv à gay aw, la masla la abà. 1 La lig aŋa uwaga la ahəŋ aya, Yesu apə̀hla vok à azlaməna matapla la slaka aŋha, la gay dərəv Tiberiya, la kuba uwanay uwana apəhatàla vok: 2 Səmon Piyer, la Tomas (Uwana tazalalla vəgal), Natanayel, uwana la Kana aŋa Galili, azlabəza aŋa Zebede, la azlaməna matapla səla anik aŋa Yesu, tahamà gay à vok. 3 Səmon Piyer agòɗ à atà: "Gəday, gədàkas kilfi." Atà tagòɗal: "Anu babay kà, mənəfa ka", ŋgaha tahàd à kəslah iyaw à afik. Ama la huɗ vəɗ uwatà kà, takə̀s tatak aw. 4 Mok uwana məl azlà awulà, Yesu apə̀hatàla vok la gay dərəv, ama azlaməna matapla tasə̀l kà uwaga kà Yesu aw. 5 Kiya uwaga Yesu agòɗ à atà: "Azlakohana, kakàsàw kilfi ay?", agòɗ à atà. "Awaŋ", tagòɗal. 6 Masla agòɗ à atà: "Dùwàw dzarawa aŋkul à makəla à ahàl kaf aŋa kəslah iyaw, ŋgaha kaɓəzaw à kilfi!" Kiya uwaga tadùw à abà ŋgaha taɓə̀z kilfi tsəràh à uwana taslàla vok aŋa mabiyəŋ à uda aya aw, kà uwana adahənla la kilfi. 7 Masla matapla uwana Yesu awoyàŋ kaykay agòɗ à Piyer: "Uwaga kà Sufəl gami!" Kà uwaga, mok uwana Səmon Piyer atsənà uwaga: 'Sufəl' tagòɗ kà, adùw lukut aŋha à vok, avàl à iyaw à abà. 8 Azlaməna matapla anik tasà à waŋ la kəslah iyaw, la mabiy dzarawa uwana kilfi adahən à abà. Kərkər la gay dərəv aw, bokuba zuwiɗ tekula. 9 Mok uwana tasà à vəɗah kà, tanəŋà akàl, kilfi la afik la Pain. 10 Yesu agòɗ à atà: "Kilfi uwaga kakàsàw, kasawla azlaanik à waŋ à abanay." 11 Səmon Piyer ahàd à kəslah iyaw à afik, abiyà dzarawa à vəɗah la kilfi məŋga gà dzim bəzi aŋha dzik zlo gəl aŋha makər gesina aŋha. Ama la magol kilfi uwaga babay kà dzarawa akwahala aw. 12 Yesu agòɗ à atà: "Sàw à waŋ, kazuwaw!" Amiyaka bà tekula la tataka azlaməna matapla aŋha la abà kà, dza aslàla vok aŋa manaval: "Kak uwa" aw, kà uwana tasə̀l kà masla Sufəl aŋatà. 13 Yesu azà vok à slaka Pain, ahə̀l, ŋgaha avàhà à atà, ŋgaha akàl à atà kilfi babay, bokuba uwana avàhà à atà Pain. 14 Uwaga kà, kà mamakər à uwana Yesu apə̀hla vok à azlaməna matapla la slaka aŋha, la lig aŋa mawul à uda aŋha la mamətsay. 15 Uwana tazùw tatak may à gay kà, Yesu agòɗ à Səmon Piyer: "Səmon, Kona aŋa Yuhana, kaɗuwà azlauwanay la mawoy gi takay?" "Iyay, Sufəl, kasəl kà gəwoya ka" Yesu agòɗal: "Nə̀ŋla azlabəza tuwaŋ gulo." 16 Ŋgaha agòɗal kà masəla aya: "Səmon, Kona aŋa Yuhana, kawoya gi ay?" "Iyay, Sufəl, kasəl kà gəwoya ka." Yesu agòɗal: "Fà sləm à azlabəza tuwaŋ gulo!" 17 Ŋgaha Yesu agòɗal kà mamakər aya: "Səmon, Kona aŋa Yuhana, kawoya gi ay?" Piyer agòɗal la mazaw la gəl gà, kà uwana Yesu apə̀hal kà mamakər: 'Kawoya gi ay?' Ŋgaha agòɗal: "Sufəl, kasəl tatak gesina, kasəl bay kà, gəwoya ka." Yesu agòɗal: "Nə̀ŋla azlatuwaŋ gulo! 18 La haɗay gəgoɗ à ka: La mok uwana kaləg meɗega, kafàh parapara aŋak à tsəh la gəl aŋak, kadàhah à slaka uwana asà à ka. Ama aŋa kadàgay makoz kà, tadàbay à ahàl aŋak ala, kà dza anik aŋa maf à ka parapara à tsəh, ŋgaha dza anik adàdala ka à slaka uwana asà à ka maday aw." 19 (La gay uwaga kà Yesu asal mapəhla ala tsəhay mamətsayga uwana Piyer adàmətsay kà mavày mazləɓay à Zəzagəla) La lig la ahəŋ Yesu agòɗal: "Nəfà gi!" 20 Piyer anəŋà à lig kà, anəŋà masla matapla uwana Yesu awoyàŋ kaykay, atsà à waŋ la lig aŋatà. Masla uwana ahùɓ à Yesu à makəla, la mok uwana atà la tatak may lakəl uwarà, à uwana anàv à Yesu: 'Sufəl, uwa à dza uwana adàta à kaf à gəl uwa?' 21 Piyer anəŋà, ŋgaha agòɗ à Yesu: "Dza uwanay, takay Sufəl, masla ma mana à uwana adàɓəzal tak ma?" 22 Yesu agòɗal: "Baŋa asa à gi adz à ahəŋ la sifa tsəràh à uwana gədàwula à waŋ ma, mana aŋak la abà ma? Kak kà, nəfà gi pəra." 23 Azlaməna maham à ahəŋ gay Zəzagəla tatsənà gay uwaga: 'Masla matapla uwanay, adàmətsay aw', tagòɗ. Ama, 'Adàmətsay aw', Yesu agòɗ à Piyer aw, ama agòɗ pəra kà: 'Baŋa asa à gi adza à ahəŋ la sifa tsəràh à kaslà uwana gədàwula à waŋ ma, mana aŋak la abà mi?', agòɗal pəra. 24 Uwaga masla matapla gà la uwanay à uwana atsetsèr gay uwanay kà, ŋgaha məsəl kà uwana atsetsèr kà dziriga. 25 Yesu aɗahà azlasləray anik aŋuvaw. Agay tatsetseray la tekula, tekula gesina kà, naka gudəŋ gesina aslala vok aŋa makəsiŋ azlawakità uwanay tatsetser aw.
|