JOHN

1

1 Saanuŋ kafay woŋ ba therino, wɔ wo dɔma Thampa thaŋ woŋ kiŋ nde. Wundɛ kiŋ nde iŋ Masaala, awa ndɛ wobɛina na nde Masaala. 2 Ndɛ kiŋ ka mathɛrɛŋ maŋ iŋ Masaala. 3 Awa maŋaye kɛnama yehinuwe na Masaala munki fooma, awa Masaala tha yeheni ntha yo ntha mahɛŋ nama. 4 Ka Thampa thaŋ kɛna ŋaye sii ba ntha yo ntha ki hɛmɛ. Awa sii babɛina bɛna see niyɔ waŋ ba biyamɛti. 5 Hiŋ waŋ babɛina ba si bɛndi ka huntuma haŋ kɛrɛ huntuma haŋ sa bɛŋ punku dɔmina. 6 Wɔ wunthe kiŋ nde wo ŋindi Masaala, keŋ nama kuna dɔma Yɔni. 7 Ndɛ see nde ba si niya maseri ba waŋ baŋ baŋ, haliko biya fooma bi be ni Masaala na lanɛya ba hu bindɛ tepo haŋ. 8 Ndɛ Yɔni kutɛ nde waŋ baŋ, kɛrɛ asee ma nde hɔkɔŋ ba si niya maseri ba waŋ baŋ baŋ. 9 Bɛna nde waŋ bagbeeŋ ba nde tɔŋinɔkɔ kafaydo baŋ e bɛŋ kɔ tɔŋina waŋ ka biyamɛti fooma. 10 Wɔ wo dɔma Thampa thaŋ woŋ kiŋ nde kafaydo, awa kafaydo yehinuwo nde maŋaye kɛnama, kɛrɛ halisa biya bi kafaydo beŋ tha niŋ ŋee. 11 Ndɛ see nde ka kuyɛkɛŋ nama koŋ, kɛrɛ biya bikɛnama beŋ tha niŋ yɛrɔkɔ. 12 Kɛrɛ bindɛ fooma bi yɛrɔkɔy niŋ beŋ ka thathukuma namɛŋ thaŋ e bindɛ niŋ piiteke, ndɛ dunkune bindɛ mayoho ba niyɔ mpati bi ka Masaala. 13 Bindɛ tha dunkuno sii baŋ baŋ iŋ wɔmɛti, nɔŋ na wɔmɛti mpaa iŋ fandama kafaydo, kɛrɛ Masaala ka yɛthɛ nama baŋ ndɛ na dunkune bindɛ sii baŋ baŋ. 14 Wɔ wo dɔma Thampa thaŋ woŋ see niyɔ wɔmɛti awa e ndɛ si niya yikiya mateete makɛntuŋ. Wundɛ thimo nde mina wumandiŋ awa e ndɛ mina tepe nɔndi baŋ ba Masaala. Miŋ kute nde yiki ba iŋ wundɛ baŋ, awa yiki ba yɔkɔŋ ndɛ nagbɛti ndɛ na kutɛ bɛŋ maŋaye ka Fandama woŋ. 15 Yɔni wo Babiye biye hu ka Masaala haŋ woŋ ni maseri ba wundɛ kaŋ yɛla thampa ba dɔma, na “Woŋ baŋ na nde yaŋ dɔŋ woŋ, ‘Hali na ndɛ manke saa ba yaŋ na, kɛrɛ ndɛ yameŋ ba yaŋ, baa ndɛ kiŋ nde nda iŋ sii saanuŋ yaŋ ba mpoo.’ ” 16 Maŋaye ka makutiyɛ mamandiŋ ma ka wɔ wo dɔma Thampa thaŋ woŋ, miŋ fooma thiyiyo thaduba ka thinthi ka thaduba lɔkɔiŋ fooma. 17 Masaala dunkuŋ nde Siraŋ nama baŋ ka biyamɛti maŋaye ka Musa. Kɛrɛ makutiyɛ nama maŋ mɛnɛ nɔndi nama baŋ see kafaydo maŋaye ka Yisɔs Kraist. 18 Wɔ yo ka hɛ wo kutɛ Masaala na hali hanthe. Yɔkɔŋ Hati wowunthe woŋ napethi wo nanthe iŋ Masaala woŋ, wo thuriye Fandama na woŋ, ndɛ na toŋine mina Masaala na. 19 BiYusu bibayahɛŋ beŋ ka mɛti ba ka Yɛrusalɛmi baŋ ŋindi baseriŋ ka Yɔni wo Babiye woŋ, bafodeni mɛnɛ lamgbeŋ bi ka bɔnsɔŋ ba ka Libay baŋ ba mase ka banka bamandiŋ ba ka Masaala baŋ. Awa bindɛ thɔnthɔŋɔŋ niŋ ba dɔma, na “Mbɛ yina?” 20 Yɔni ni maseri maŋ maŋ baŋ ba bindɛ niya yaabi. Wundɛ tha baŋaŋ ba niya yaabi awa ndɛ tepe bindɛ nagberekethe e koyinta ba dɔma, na “Yaŋ kutɛ Banikisi wo niyo nde lahiri woŋ.” 21 Huna bindɛ thɔnthɔŋɔŋ hɛlɛŋ niŋ ba dɔma, na “E yina Ilaiya?” Yɔni dome, na “Yaŋ kutɛ.” Bindɛ thɔnthɔŋɔŋ hɛlɛŋ, na “E yina Banabi woŋ?” Yɔni ni hɛlɛŋ yaabi ba dɔma, na “Ade.” 22 Huna thonthiŋine hɛlɛŋ bindɛ niŋ, na “Mbu mbɛ nda yina gbeeŋ? Miŋ kiŋ ba ka tɔŋa kuna ka bi ŋindɛ mina beŋ. Nama yi dɔmɔkɔ ka yɛthɛ bakɛnda?” 23 Huna niye Yɔni bindɛ yaabi maŋaye ka magbali ma ka banabi woŋ Aisaya maŋ, na “Yama ‘Wɔ wunthe wo yɛli thampa ka wula baŋ, na Kɔsinɔkɔŋ gboŋa baŋ ba Mariki woŋ.’ ” 24 Huna thonthiŋine niŋ baseriŋ bi ŋindi kiki ba ka bayahɛŋ bi ka biYusu beŋ bi dɔma na biFaresini beŋ ba dɔma, na 25 “Mbu mbɛ hu yi biiye biya biye hu ka Masaala haŋ mɛnɛ yi kutɛ Banikisi wo niyo nde lahiri woŋ, maa Ilaiya, maa wunthe ka banabiŋ beŋ?” 26 Kɛna ni Yɔni bindɛ yaabi ba dɔma, na “Yaŋ kɔŋ bena biye iŋ mandi. Kɛrɛ ka mateete makendeŋ wɔ wunthe kooyeŋ kɛndɛ wo ba beŋ ŋee. 27 Awa ndɛ na manke saa ba yaŋ, kɛrɛ yaŋ sisandeta ba putɔ ba pɛɛka nkala ki ka dagbalɛŋ nama baŋ kiŋ.” 28 Wuŋ baŋ niyɔy ka mɛti ba ka Bɛthani kuwaŋ kubekede koŋ ka mankɔ ma ka Yɔdaŋ maŋ, ka nde Yɔni biiye biya biye hu ka Masaala haŋ ka. 29 Ka gbɛɛŋ wowuntheŋ woŋ, Yɔni kute Yisɔs si see ka kooye ndɛ ka iŋ bakarandeni nama beŋ. Huna dome ndɛ kɛnamɛŋ, na “Ya taka wohatiyɛ wo fuŋuŋ Masaala woŋ ba niya na biyamɛti bi kafaydo beŋ peniyo hakɛŋ namɛŋ baŋ. 30 Woŋ baŋ na bare nde yaŋ dɔma woŋ, na ‘Hali na manke wɔ wunthe woŋ saa ba yaŋ na, kɛrɛ ndɛ yameŋ ba yaŋ, baa ndɛ kiŋ nde nda iŋ sii saanuŋ yaŋ ba mpoo.’ 31 Yaŋ gbeeŋ ka yɛthɛ bakiyaŋ baŋ yaŋ kɔita niŋ. Kɛrɛ huna koteke nde yaŋ ba si biye biya iŋ mandi haliko na ndɛ si toŋino ka biya bi ka Isirɛli beŋ.” 32 Kɛna ni Yɔni maseri maŋ maŋ ba dɔma, na “Yaŋ kute Yina wo ka Masaala woŋ si thuhu maŋaye ka ariana nɔŋ kurotho, e ndɛ niŋ tutɔ e niyɔ iŋ wundɛ. 33 Kɛrɛ halisa yaŋ tha kɔthɔ ba dɔma na wundɛ na. Kɛrɛ Masaala wo ŋindɛ nde yama woŋ ba si biye biya iŋ mandi, ndɛ na tepe nde yama ba dɔma, na ‘Wɔ wo nɔŋ nthɔŋ yi kutu Yina wokiyaŋ woŋ si thuhu maŋaye ka ariana e ndɛ niŋ tutɔ awa e niyɔ iŋ wundɛ, wɔ bɛina na bena si biye iŋ Yina wokiyaŋ woŋ.’ ” 34 Yɔni tepe, na “Yaŋ kutuyɔkɔy bɛyiniŋ baŋ baŋ nagberekethe, awa huna niye yaŋ maseri ba dɔma na ndɛ na Hati ka Masaala woŋ.” 35 Ka gbɛɛŋ woyemɛ woŋ, Yɔni kooyeŋ nde hɛlɛŋ iŋ lamgbeŋ biye ka bakarandeni nama beŋ. 36 Naa kute wundɛ Yisɔs si kaande, ndɛ dome kɛnamɛŋ, na “Ya taka wohatiyɛ wo fuŋuŋ Masaala woŋ.” 37 Bakarandeni bibiye bi yuyɛ Yɔni si nɛŋ dɔŋ beŋ pɛyi yema Yɔni na haŋ awa bindɛ thɔɔtɔy Yisɔs na. 38 Naa bindɛ key, kɛna dethe Yisɔs mahɛŋ e ndɛ kuta bi si niŋ yeŋ. Huna dome Yisɔs kɛnamɛŋ, na “Mbɛ mu beŋ deethi?” Huna dome bindɛ kɛnama, na “Rabay, kama niye yi yikiya?” ‘Rabay, thalintando ba dɔma na ‘Karimɔkɔ.’ 39 Huna dome Yisɔs kɛnamɛŋ, na “Saaŋ dethi.” Kɛna key bindɛ dethi ka niye ndɛ yikiya ka. Wu kiŋ nde nda bɛrɛ ba ti yɛrɛmɛŋ sesuwe ba tota muhure. Bindɛ key e bindɛ ka niyɔ kɛndɛ iŋ Yisɔs haaŋ kaŋ woŋ thɔɔ. 40 Wunthe ka beŋ beŋ baŋ ndɛ na dɔma Anduru, wɛnda Saimɔŋ Pita woŋ. 41 Ka wuthurɔy wubɛina, Anduru kute wɛndama na Saimɔŋ. Ndɛ tepe niŋ ba dɔma, na “Miŋ kute Banikisi wo niyo nde lahiri woŋ, wo dɔma woŋ na Mɛsaya.” Keŋ ku dɔma koŋ na Mɛsaya, keŋ kunthe kuna iŋ ku dɔma koŋ na Kraist. 42 Kɛna sisi ndɛ Saimɔŋ na ka Yisɔs. Yisɔs dethe Saimɔŋ na natiŋ, e ndɛ dɔma kɛnama, na “Keŋ nda koŋ kuna dɔma Saimɔŋ hati ka Yɔni woŋ. Yina nda dɔma Sifasi.” Ŋakeŋ ŋaŋaye ŋaŋ ŋaŋ baŋ Sifasi mɛnɛ Pita, keŋ kunthe kuna. Awa ŋakeŋ ŋaŋaye ŋaŋ kuthara kuna domo. 43 Ka gbɛɛŋ woyemɛ woŋ, Yisɔs dɛɛnki ba kaa ka kuyɛkɛŋ ku ka Kalili. Naa ndɛ key, ndɛ penke Filipi na. Huna dome ndɛ kɛnama, na “Thɔɔtɔ yama.” 44 Filipi woŋ baŋ ŋaye ka mɛti ba ka Bɛthɛseda ka ŋaye Anduru ka mɛnɛ Pita. 45 Awa Filipi kute Nathaniyɛli na, e ndɛ dɔma kɛnama, na “Miŋ kute niŋ wo ba gbale nde Musa ka buku wo ka Siraŋ baŋ woŋ awa wo ba gbale banabiŋ beŋ ka ŋathagba namɛŋ ŋaŋ woŋ. Ndɛ na dɔma Yisɔs hati ka Yusufu wo ŋaye ka mɛti ba ka Nasarɛthi baŋ woŋ.” 46 Huna dome Nathaniyɛli ka Filipi, na “E bɛy bayɔhɔy ba kɔŋ punku ŋaye ka Nasarɛthi?” Huna dome Filipi kɛnama, na “Saa dethiyɔkɔ.” 47 Naa kute Yisɔs Nathaniyɛli si see ka kooye ndɛ ka, ndɛ tepe ba wundɛ, na “Ya wɔ wunthe wo ŋaye ka bɔnsɔŋ ba ka Isirɛli baŋ wo sisande ba domo woIsirɛli woŋ. Hati wowathe woŋ baŋ sa thiiki womo woma thɔkɔ.” 48 Nathaniyɛli thɔnthɔŋɔŋ Yisɔs na, na “Nama dɔmɛ yi kɔŋ yama kothiye?” Yisɔs mɛyiyɛ niŋ ba dɔma, na “Filipi tha yina niye thiye hu doŋe yi ka niŋ hu ka kuyeŋ ku dɔma koŋ na fiki e yaŋ hɛ nda yina thɔkita kuta.” 49 Kɛna mɛyiyɛ niŋ Nathaniyɛli iŋ kukabanɛ ba dɔma, na “Karimɔkɔ, yina Hati ka Masaala woŋ! Yina Gbaku wo ka Isirɛli woŋ!” 50 Huna mɛyiyɛ niŋ Yisɔs ba dɔma, na “E ba na dome yaŋ yina, na yaŋ thɔkɔti hɛ yina kuta yi doŋe ka niŋ hu ka kuyeŋ koŋ haŋ, huna niye yi lanɛya? Yumba, yi kɔŋ kutu bɛyiniŋ bathakaba ba yamɛ ba baŋ baŋ.” 51 Yisɔs dome hɛlɛŋ kɛnama, na “Yaŋ kɔŋ yina tepe nɔndi baŋ, yi kɔŋ nɔŋ kutu ka ariana pɛthɔ, awa e malekɛŋ bi ka Masaala beŋ kɔ ŋata e bindɛ kɔ thatha ka Hati ka Wɔ woŋ.”

2

1 Naa daŋande wuŋ hura kaye, kuyɛntande ku kiŋ nde ka mɛti ba ka Kena ka kuyɛkɛŋ ku ka Kalili koŋ. Awa nanda ka Yisɔs kiŋ nde kɛndɛ. 2 Yisɔs mɛnɛ bakarandeni nama beŋ nde hɛlɛŋ nɛŋ thiyo ba ka penkitiye ka kuyɛntande koŋ. 3 Naa see biya beŋ thanko mampa, nanda ka Yisɔs tepe Yisɔs na, na “Bindɛ thanko mampa.” 4 Huna dome Yisɔs kɛnama, na “Naanaŋ, mbɛ hu yama yi tepe ba yaŋ ba niya? Lɔkɔ ba yaŋ toŋineke baŋ teŋeta hɛ.” 5 Kɛna dome nandama ka bawaliŋ bigbako beŋ, na “Bɛy yo bɛy ba ndɛ bena tepe ba niya, niyaŋ bɛŋ.” 6 Ka lɔkɔ babɛina thasokoro tha yehinuwo maŋaye ka tharaka thasɔŋ-hunthe tha kiŋ nde kɛndɛ, tha kiye kɛndɛ biYusu beŋ ba thiye mandi baa bindɛ kiŋ iŋ sirani babɔyɛ ba ka mɛthinɔkɔ ka kuwaŋ ku ka dina namɛŋ woŋ. Sokoro yo sokoro hu kɔŋ sɛkɛthi thakalɔni kɔnthɔ kaye maa kɔnthɔ kataati. 7 Kɛna dome Yisɔs ka bawaliŋ beŋ, na “Thiŋinuwaŋ thasokoro thaŋ thaŋ mandi.” Huna thiŋini bindɛ thɛŋ mandi nayerere. 8 Naa nambe wuŋ wuyete, huna dome Yisɔs kɛnamɛŋ, na “Mɛpaŋ manɔndi e beŋ mɛŋ kata ka bayaha ndeŋ wo ka kuyɛntande koŋ woŋ.” Bindɛ mepe mɛŋ e bindɛ mɛŋ kata. 9 Naa miŋ bayaha wo ka kuyɛntande koŋ woŋ mandi ma sikinando mampa maŋ, ndɛ tha kɔthɔ ka ŋaye mampa mayɔhɔy maŋ maŋ baŋ. Kɛrɛ bawaliŋ bi mɛpɛ mɛŋ beŋ bi kɔthɛŋ ka ŋaye mɛŋ. Kɛna thiyi bayaha wo ka kuyɛntande koŋ woŋ bayɛnti woŋ 10 e ndɛ dɔma kɛnama, na “Wuŋ niyɔy yama kɔnthɔhili. Timo tima biya bi bareŋ kɔ yenke dunkuno mampa ma yamɛ yɔhɔ maŋ. Awa naa bindɛ thanki mɛŋ thiiye wubɔyɛ, ndɛ dunkuŋ ntiŋ ma ba thanki yɔhɔ maŋ. Kɛrɛ yi kɔsɔŋ hɛ ma yamɛ yɔhɔ maŋ ba mɛŋ manke thiiyo.” 11 Bɛy bathakaba baŋ baŋ bɛna mayoŋ ba ni Yisɔs ba tɔŋina na ndɛ. Awa ndɛ ni bɛŋ ka mɛti ba ka Kena ba ka Kalili. Ka lɔkɔ baŋ baŋ toŋine ma ntiŋ biya beŋ ba ndɛ niyɔ wɔ sisande ba gbuŋunuwo. Awa bakarandeni nama beŋ ni ntiŋ niŋ lanɛya. 12 Naa daŋande wuŋ kɛndɛ, Yisɔs iŋ nandama, mɛnɛ mbɛndama bibiyɛthɛŋ, mɛnɛ bakarandeni nama beŋ key ka mɛti ba ka Kapaniyɔmi e bindɛ kɛndɛ ka niyɔ ba gbɛɛni bikɔndande. 13 Lɔkɔ baŋ thuriye ba biYusu beŋ siyuwe naa puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti. Huna kaaye Yisɔs ka mɛti ba ka Yɛrusalɛmi. 14 Naa tɛŋ ndɛ kɛndɛ, ndɛ key biyande ka gbada hu ka banka bamandiŋ ba ka Masaala baŋ e pɛnka kɛndɛ bi ni gbɔŋ manani, takɛŋ, mɛnɛ kukuni mu biya beŋ boy ba fuŋuna saraka ka Masaala. Ndɛ hɛlɛŋ pɛnka kɛndɛ bi thikipiyɛ biya kɔbiri woŋ beŋ bi doŋe e bindɛ kɔ niya wali namɛŋ baŋ. 15 Kɛna sekithe ndɛ ŋalansi e ndɛ ŋɛŋ niya kusorigba ba kanthe maamiŋ beŋ fooma, takɛŋ beŋ, mɛnɛ manani beŋ ka gbada hu ka banka ba ka Masaala baŋ haŋ. Ndɛ koŋotoni thebuluiŋ bi ka bathikipiŋ kɔbiri woŋ beŋ, awa e kɔbiri namɛŋ woŋ pankande fooma. 16 Ndɛ dome ka bi ni kukuni beŋ gbɔŋ beŋ, na “Funkutaŋ muŋ muŋ dondo baŋ fooma. Baŋ ni banka ba ka Fandaŋ baŋ banka ba niye gbɔŋ.” 17 Kɛna kɔthɛ ntiŋ bakarandeni nama beŋ ba dɔma na wu ni Yisɔs wuŋ, magbali ma ka Masaala maŋ tepe nde huŋ, ma tɛpɛ maŋ ba dɔma, na “Masaala, kufiyo niŋ koŋ ba niya banka nda baŋ yiki kuŋ abɔy, awa ku kɔŋ yama tɔɔni ka thukuma niŋ haŋ nɔŋ buu.” 18 Kɛna see biYusu bi bohitɛ sɛmbɛ baŋ beŋ ka Yisɔs e bindɛ dɔma kɛnama, na “Mbɛ bɛy bathakaba ba yi ni ba tɔŋɔŋ ba dɔma na yi kiŋ iŋ mayoho ba niya wuŋ baŋ?” 19 Yisɔs mɛyiyɛ bindɛ ba dɔma, na “Teetuwaŋ yikiya ba ka Masaala baŋ baŋ, awa ka gbɛɛŋ wo tɛŋinɛ wotaati woŋ, yaŋ kɔŋ hɛlɛŋ bɛŋ thanki thoya.” 20 BiYusu beŋ thɔnthɔŋɔŋ niŋ, na “E banka ba sɛkithɛ thaninɛŋ kɔnthɔ-kanaŋ iŋ thasɔŋ-hunthe ka thoyo baŋ bɛna yi dɔŋ ba thoya gbɛɛni bitaati?” 21 Bindɛ tha kɔthɔ ba dɔma na Yisɔs kɔŋ nde thɔyintande kɔtɔ nama koŋ iŋ banka bamandiŋ ba ka Masaala baŋ. 22 Yɔkɔŋ naa ŋaye Yisɔs ka tuka haŋ, kɛna siyi ntiŋ bakarandeni nama beŋ ba dɔma na ndɛ tepe nde huŋ. Awa bindɛ yame ntiŋ niya magbali ma ka Masaala maŋ lanɛya iŋ hu tepe nde Yisɔs haŋ. 23 Naa nde hintiŋ Yisɔs ka Yɛrusalɛmi naa nde bindɛ siyi lɔkɔ ba puntuyando nde bindɛ iŋ maleka wo nde katitɔkɔ tuka haŋ woŋ ka Iyipiti maŋ, biya bibɔyɛ ni Yisɔs na lanɛya baa bindɛ kute bɛyiniŋ bathakaba ba ni ndɛ ba tɔŋina na ndɛ. 24 Kɛrɛ Yisɔs tha bindɛ piiteke, baa ndɛ kɔthɛŋ na biyamɛti fooma 25 awa ndɛ kahota ba wɔ niŋ tepe na biyamɛti. Ndɛ gbeeŋ, ka yɛthɛ nama, ndɛ kɔthɛŋ mu kaake ka thukuma hu ka wɔmɛti.

3

1 Wɔ wathe wunthe kiŋ nde kɛndɛ wo dɔma na Nikɔdimɔsi, wo nde wunthe ka bakalani bibayahɛŋ beŋ ka biYusu beŋ. Ndɛ nde hɛlɛŋ nɛŋ niyɔ wunthe ka kiki ba ka biFaresini beŋ baŋ. 2 Hati wowathe woŋ baŋ na kaayɛ nde ka Yisɔs huyɛ e ndɛ ka dɔma kɛnama, na “Karimɔkɔ, miŋ kɔthɛŋ ba dɔma na bathanani na yi wo ŋaye ka Masaala. Awa wɔ sa punku niya bɛyiniŋ bathakaba ba yi ni baŋ yɔkɔŋ Masaala niyɔy iŋ wɔ bɛina.” 3 Huna niye niŋ Yisɔs yaabi ba dɔma, na “Yaŋ kɔŋ yina tepe nɔndi baŋ, wɔ sa punku kuta Hugbakine hu ka Masaala haŋ yɔkɔŋ ndɛ mpoo hɛlɛŋ.” 4 Kɛna thɔnthɔŋɔŋ Nikɔdimɔsi Yisɔs na, na “Nama hɛlɛŋ wɔ thankɛ nda fuŋa kɔ duu ka mpoo hɛlɛŋ? Yaathi, ndɛ sa nda punku duuwa ka thɔɔ ka kotho hu ka nandama haŋ e ndɛ hɛlɛŋ duuwa ka mpoo hukaye.” 5 Kɛna mɛyiyɛ niŋ Yisɔs ba dɔma, na “Yaŋ kɔŋ yina tepe nɔndi baŋ, yɔkɔŋ wɔmɛti mpoo maŋaye ka mandi mɛnɛ maŋaye ka sɛmbɛ ba ka Yina wo ka Masaala woŋ. Mɛnɛ huŋ kutɛ, ndɛ sa punku biyande ka Hugbakine hu ka Masaala haŋ. 6 Wɔmɛti na mpuu wɔmɛti, kɛrɛ Yina wo ka Masaala woŋ na dunkuŋ sii ka yina wo ka wɔmɛti woŋ. 7 Ba ni thakaba ba na tepe yaŋ yina ba dɔma na yɔkɔŋ yi mpoo hɛlɛŋ. 8 Huru haŋ hu kɔŋ hɔŋ e huŋ kaa ka thimo huŋ ba kaa. Yi kɔŋ yuyɛ kutɔŋa kubɛina, kɛrɛ yi kɔita ka ŋaye huŋ maa ka huŋ key. Nɛna wuŋ niyɔ ka wɔ yo wɔ wo mpaa iŋ Yina wo ka Masaala woŋ.” 9 Huna thonthiŋine niŋ Nikɔdimɔsi, na “Nama bɛyiniŋ baŋ baŋ punku niiye?” 10 Kɛna mɛyiyɛ niŋ Yisɔs, na “E yindo bathanani womandiŋ wo ka Isirɛli woŋ, haaŋ hɛ yi kɔita bɛyiniŋ baŋ baŋ? 11 Yaŋ kɔŋ yina tepe nɔndi baŋ, miŋ kɔŋ gbonkoy bɛyiniŋ ba kɔthɛ miŋ, awa e miŋ kɔ niya maseri ba bɛyiniŋ ba thanki miŋ kutuyɔkɔ baŋ. Kɛrɛ wɔ o ka wo yɛrɔkɔ maseri ma thanki miŋ bena tepe maŋ. 12 Beŋ tha yama ni lanɛya ba bɛyiniŋ ba kafaydo ba thanki yaŋ bena tepe baŋ fooma. Nama beŋ niye lanɛya mɛnɛ yaŋ tepe bena bɛyiniŋ fooma ba ka ariana? 13 Wɔ yo ka hɛ wo ŋatɛ ka ariana yɔkɔŋ wo thuhɛ woŋ maŋaye ka ariana, wo dɔma Hati ka Wɔ woŋ.” 14 Awa nɔŋ na ŋataŋ nde nthɔŋ Musa wokɛkɛŋ wodɛwɔi wo kahitinɔy ka kuyeŋ koŋ ka wula baŋ na, nɛna nɔŋ Hati ka Wɔ woŋ ŋatina ka thinthi. 15 Huna, mɛnɛ wɔ yo wɔ niŋ ni lanɛya ndɛ kɔŋ kutu sii ba kɔy yo kɔy. 16 Masaala na thimo kafay woŋ haaŋ e ndɛ dunkuna Hati nama wowunthe woŋ napethi. Huna wɔ yo wɔ wo niŋ ni lanɛya, wɔ bɛina sa tuku, kɛrɛ ndɛ kɔŋ kutu sii ba kɔy yo kɔy. 17 Awa Masaala tha ŋindi Hati nama woŋ kafaydo ba si thonkine biya bi kafaydo. Kɛrɛ ndɛ ŋindi niŋ haliko biya bi kafaydo beŋ bi be niyɔ kisi maŋaye kɛnama. 18 Wɔ yo wɔ wo niyɛ niŋ lanɛya, ndɛ sa thonkino. Kɛrɛ wo tha niŋ ni lanɛya, ndɛ thanki nda thonkino, baa ndɛ tha ni lanɛya ka Hati ka Masaala wowunthe woŋ napethi. 19 Wɔ yo wɔ wo tha ni lanɛya ka Hati ka Masaala woŋ ndɛ kɔŋ thonkino, bɛy bahɛna kutɛ waŋ baŋ see ka faido kɛrɛ biya bi kafaydo beŋ athimo huntuma haŋ e wuŋ yama ba waŋ baŋ, baa bɛyiniŋ ba bindɛ ni baŋ anɛnɔ. 20 Wɔ yo wɔ wo ni banɛnɔy wundɛ thimota waŋ baŋ, awa ndɛ sa see ka waŋ baŋ, baa bɛyiniŋ ba ndɛ ni banɛnɔy baŋ ba kɔŋ tɔŋinɔkɔ ka waŋ baŋ. 21 Kɛrɛ wɔ wo ni bɛyiniŋ ba dome Masaala ba bɛŋ niyɔ bayɔhɔy, ndɛ kɔŋ see ka waŋ baŋ, haliko wali nama baŋ ba be kutɔ nagberekethe ba wuŋ niyɔ na ndɛ ni wali bayɔhɔy baa ndɛ putuyɔy Masaala na. 22 Naa daŋande bɛyiniŋ baŋ baŋ fooma, Yisɔs mɛnɛ bakarandeni nama beŋ key ka kuyɛkɛŋ ku ka Yudiya koŋ. Kɛna niyɔy ndɛ iŋ bindɛ ba hura hukɔndande e ndɛ nde kɛndɛ kɔ biye biya beŋ biye hu ka Masaala haŋ. 23 Yɔni nde hɛlɛŋ nɛŋ gbeeŋ ndɛ kɔŋ nde biye biya beŋ biye hu ka Masaala haŋ ka mankɔ ma thuriye ka mɛti ba ka Enani baŋ, wuthuriye ka Selimi. Kɛna nde mandi mabɔyɛ, awa biya bibɔyɛ bi kɔŋ nde see kɛnama ba biyo. 24 Ka lɔkɔ babɛina, Yɔni tha nde niye thiyo ka yeeli woŋ. 25 Lɔkɔ banthe kugbakali see thɔɔ mateete ma ka bakarandeni bi ka Yɔni beŋ mɛnɛ woYu wunthe saathɛ ba ka mɛthinɔkɔ ka kuwaŋ ku ka dina namɛŋ woŋ. 26 Huna kaaye bakarandeni beŋ ka Yɔni ka e bindɛ ka dɔma kɛnama, na “Karimɔkɔ, wɔ wo nde iŋ miŋ woŋ kuwaŋ kubekede koŋ ka mankɔ ma ka Yɔdaŋ maŋ, wo ba gbonkoy nde yi baŋ, ya niŋ kanka baŋ si biye biya biye hu ka Masaala haŋ. Awa biya muŋ fooma thanki kɔ kaa kɛnama ka.” 27 Yɔni mɛyiyɛ bindɛ ba dɔma, na “Wɔ yo ka wo punku kuta ntha nɔŋ kiŋ kiŋ baŋ mahɛŋ ma ndɛ tha kiŋ dunkuno iŋ Masaala. 28 Beŋ hɛlɛŋ nɛŋ gbeeŋ bena maseri makiyaŋ ba na dome yaŋ, na ‘Yaŋ kutɛ Banikisi wo niyo nde lahiri woŋ, kɛrɛ ayenke na yaŋ ŋindo ba ndɛ.’ 29 Bayɛnti woŋ na biyɛ wɔtɔ nama, awa nyathiki wo ka bayɛnti woŋ na kɔɔ ba niŋ poniyɛ kuiha. Ndɛ kɔŋ yehitɔkɔ wumandiŋ ba thampa tha ka bayɛnti woŋ thaŋ. Bɛna, yaŋ yehitɔkɔy wumandiŋ. 30 Yɔkɔŋ ndɛ be ŋati keŋ e yaŋ thatha keŋ.” 31 Ndɛ wo ŋaye ka ariana woŋ, ndɛ yameŋ niyɔ wɔ mandiŋ ayaŋ ba wɔ yo wɔ kafaydo. Awa ndɛ wo kafaydo woŋ, ndɛ kiŋ ba kafaydo, awa ndɛ kɔŋ gbonkoy ba bɛyiniŋ ba kafaydo baŋ. Kɛrɛ ndɛ wo ŋaye ka ariana woŋ, ndɛ yameŋ ba ntha yo ntha. 32 Ndɛ see ni maseri ba bɛyiniŋ fooma ba thanki ndɛ kutuyɔkɔ iŋ ba thanki ndɛ yuyɔkɔ baŋ ka ariana. Kɛrɛ halisa wɔ tha niyɔ wo yɛrɔkɔy hu tepe ndɛ haŋ. 33 Kɛrɛ wɔ wo yɛrɔkɔ hu ndɛ tɛpi haŋ woŋ, wɔ bɛina ni maseri ba dɔma na Masaala kiŋ banɔndi. 34 Wɔ wo ŋindi Masaala woŋ see tepe biya thampa tha ka Masaala thaŋ, baa Masaala dunkune niŋ Yina nama woŋ wubɔyɛ. 35 Fanda ntuŋ woŋ athimo Hati nama woŋ wumandiŋ, wuna biyɛ ndɛ niŋ dunkune ntha yo ntha. 36 Wɔ wo ni Hati woŋ lanɛya, ndɛ kiŋ iŋ sii ba kɔi o kɔi. Wɔ wo sa putiyɔ Hati ka Masaala woŋ, wɔ bɛina sa kutu sii ba kɔy yo kɔy, awa Masaala sa pɛyi ba gbasiŋita wɔ bɛina.

4

1 BiFaresini beŋ yuye ba dɔma na Yisɔs kɔŋ nde yema iŋ biya bibɔyɛ, awa e wundɛ nde hɛlɛŋ kɔ biye bakarandeni bibɔyɛ wuŋ yama ba Yɔni. 2 Hali na niyɔy nde wuŋ na ndɛ Yisɔs kutɛ nde biye bindɛ. Bakarandeni nama beŋ bina nde biye bindɛ. 3 Naa yuye Yisɔs hu bindɛ gbonkoy ba ndɛ haŋ, ndɛ pɛyɛŋ ka kuyɛkɛŋ ku ka Yudiya ba kaa ka kuyɛkɛŋ ku ka Kalili. 4 Kɛrɛ saanuŋ ndɛ ba tɛŋa ka kuyɛkɛŋ ku ka Kalili, yɔkɔŋ ndɛ be kɛriŋiyande ka kuyɛkɛŋ ku ka Sameriya koŋ. 5 Naa daŋande ndɛ ka Sameriya, ndɛ tɛŋ ka mɛti ba dɔma na Saika, wuthuriye kay hu dunkune nde Yakuba hati nama Yusufu na haŋ. 6 Ka kay hubɛina haŋ haŋ baŋ sobo hu ka Yakuba haŋ hu kiŋ nde kɛndɛ. Naa tɛŋ kɛndɛ Yisɔs, ndɛ thamɔy biyasi haŋ. Awa ndɛ dɔŋɔy kɛndɛ kuwaŋ ka sobo haŋ ba hɛɛmuwa. Wu kiŋ nde nda bɛrɛ ba hatɔ teete. 7 Ka doŋe Yisɔs kuwaŋ ka sobo haŋ kɛ, kɛna penko ndɛ iŋ hati woyɛrɛmɛ woSameriya wo sɛɛ ka muna. Naa kute niŋ Yisɔs, huna dome ndɛ kɛnama, na “Nkaa yama mandi ba thiiye.” 8 Ka lɔkɔ babɛina bakarandeni nama beŋ niye nda kaaye ka mɛti ka ba ka boya muthɔma. 9 Huna thonthiŋine hati woyɛrɛmɛ wo ka Sameriya woŋ Yisɔs na, na “Mbɛ hu yindo woYu yama yawute mandi ba thiiye? Yando wɔ yɛrɛmɛ wo ka Sameriya.” Ndɛ tepe huŋ baa biYusu beŋ thiiyeta ka thakɔɔpu tha biSameriya beŋ thiiye thaŋ. 10 Naa gbanthaŋ ndɛ, huna niye niŋ Yisɔs yaabi ba dɔma, na “Mɛnɛ yi kɔthɛŋ nde munkii mu ka Masaala muŋ iŋ wo yina dɔŋ woŋ, na ‘Nkaa yama mandi ba thiiye,’ yi kɔŋ nde niŋ thɔnthɔŋɔŋ ba mandi. Awa ndɛ kɔŋ nde yina dunkune mandi ma dunkuŋ sii.” 11 Huna dome hati woyɛrɛmɛ woŋ ka Yisɔs, na “Hɛmɔŋ, yi ka iŋ mumune, awa sobo haŋ hɛlɛŋ husuŋɔy. Kama yi punku kute mandi mabɛina ma dunkuŋ sii maŋ? 12 E ba hɔŋ yina yamɛ niyɔ wɔ mandiŋ ba mbemba ntuŋ woŋ Yakuba wo dunkune mina sobo haŋ haŋ ba miŋ fooma ndɛɛ kɔ mune mandi ba thiiye? Ndɛ yo, mpati nama yo, mɛnɛ ndansi nama kiŋ thiiye nde ka sobo haŋ haŋ baŋ.” 13 Kɛna dome Yisɔs kɛnama, na “Wɔ yo wɔ wo thiiye mandi ma ka sobo haŋ haŋ baŋ, ndɛ kɔŋ hɛlɛŋ kaho kumbɛ. 14 Kɛrɛ wɔ yo wɔ wo thiiye mandi ma yaŋ niŋ dunkune maŋ, ndɛ sa nɔŋ nda kaho kumbɛ. Mandi ma yaŋ niŋ dunkune maŋ ma kɔŋ niyɔ nɔŋ sobo kaake kɛnama hu iŋ mandi ma niŋ dunkune sii ba kɔy yo kɔy.” 15 Hati woyɛrɛmɛ woŋ dome kɛnama, na “Hɛmɔŋ, yaandi nkaa yama mandi maŋ maŋ baŋ, haliko yaŋ be tha nda kaho kumbɛ, maa yaŋ be tha nda hɛlɛŋ see dondo baŋ ka muna mandi.” 16 Huna dome Yisɔs kɛnama, na “Kaa e yi ka thiya wanda na e beŋ saa dondo baŋ.” 17 Hati woyɛrɛmɛ woŋ dome kɛnama, na “Yaŋ ka iŋ wathe wo yɛntɛ yama gbeeŋ.” Huna dome Yisɔs kɛnama, na “Yi asisande ba dɔma na yi ka iŋ wathe wo yɛntɛ yina gbeeŋ. 18 Kɛrɛ yi thanki nda yento iŋ biyɛthɛŋ bisɔhi, awa wo nda iŋ yi ka tete woŋ wanda kutɛ gbeeŋ. Yi konde nɔndi baŋ.” 19 Kɛna dome hati woyɛrɛmɛ woŋ kɛnama, na “Hɛmɔŋ, yaŋ kute ba dɔma na banabi na yi. 20 Tepe hɛ yama, mbembɛŋ ntuŋ beŋ bi kɔŋ nde niye Masaala na kubatho ka kusɛri koŋ koŋ baŋ, kɛrɛ bendo biYusu beŋ dome na wo ba niya Masaala na kubatho yɔkɔŋ ndɛ be key ka mɛti ba ka Yɛrusalɛmi; kɛna Masaala ba niyo kubatho. E nɛna huŋ?” 21 Huna dome Yisɔs kɛnama, na “Hati woyɛrɛmɛ, niya lanɛya hu yaŋ yina tepe haŋ. Lɔkɔ baŋ ba kɔŋ see ba sa nda biya niye Fanda ntuŋ woŋ kubatho ka kusɛri koŋ koŋ baŋ maa ka Yɛrusalɛmi. 22 Bendo biSameriya beŋ, bendo ni kubatho mu ba beŋ kɔthɔ. Kɛrɛ mindo biYusu beŋ miŋ kɔthɛŋ Masaala wo miŋ ni kubatho woŋ, baa Masaala ni lahiri ba niya biyamɛti kisi maŋaye ka biYusu beŋ. 23 Lɔkɔ baŋ ba kɔŋ see, awa bɛŋ tɛŋ nda hintiŋ nthɔŋ, ba biya niye Fanda ntuŋ woŋ kubatho ku gbakita iŋ Yina nama woŋ, awa bi kɔŋ kɔthɔ nɔndi baŋ ba wundɛ. Fanda ntuŋ woŋ kɔŋ deethi biya bi niŋ niye kubatho ka gboŋa baŋ baŋ. 24 Masaala yina na. Huna biya bi niŋ ni kubatho beŋ yɔkɔŋ bi be niŋ niye kubatho ku gbakita iŋ Yina nama woŋ, awa bi kiŋ ba kɔthɔ nɔndi baŋ ba wundɛ.” 25 Kɛna dome hati woyɛrɛmɛ woŋ kɛnama, na “Yaŋ kɔthɛŋ ba dɔma na Banikisi wo niyo lahiri woŋ kɔŋ see. Naa ndɛ see, ndɛ kɔŋ mina si toŋinuwe bɛyiniŋ fooma.” Hati woyɛrɛmɛ woŋ dome niŋ Banikisi. Ndɛ na hɛlɛŋ dɔma Kraist woŋ. 26 Huna dome Yisɔs kɛnama, na “Yando yina gbonkitiyande woŋ, yama Banikisi woŋ gbeeŋ.” 27 Ka wuthurɔy wubɛina bakarandeni nama beŋ see maŋaye ka mɛti ka. Naa penke bindɛ Yisɔs si gbonkoy iŋ hati woyɛrɛmɛ woŋ, wuŋ niyɔy bindɛ thɛrɛnaŋ wumandiŋ. Kɛrɛ wɔ tha niyɔ wo thɔnthiŋinɛ hati woyɛrɛmɛ woŋ ba dɔma, na “Mbɛ mu thimo yi?” maa Yisɔs na, na “Mbɛ hu yi gbonkitiyande hati woyɛrɛmɛ woŋ?” 28 Kɛna pɛy hati woyɛrɛmɛ woŋ mumune muŋ, e ndɛ kaa kaŋ thara ka mɛti ka. Ndɛ key tepe biya beŋ, na 29 “Saaŋ ka detha wɔ wathe wo tepe yama bɛyiniŋ fooma ba thanki nde yaŋ niya. E ba hɔŋ woŋ baŋ kutɛ Banikisi woŋ?” 30 Biya beŋ fooma ŋaye ka mɛti ka ba ka detha Yisɔs na. 31 Naa nambe wuŋ wuyete, bakarandeni nama beŋ theteke niŋ, na “Karimɔkɔ, thɔma.” 32 Kɛrɛ huna dome ndɛ kɛnamɛŋ, na “Yaŋ kiŋ iŋ muthɔma ba thɔma mu ba beŋ kɔthɔ.” 33 Kɛna bohe bakarandeni beŋ thɔnthiŋinuwande wunthe iŋ ntɔ nama, na “E ba hɔŋ wɔ na sisiyɛ niŋ muthɔma?” 34 Yisɔs dome kɛnamɛŋ, na “Muthɔma niŋ muŋ muna ba niya mathimo ma ka wo ŋindɛ yama woŋ maŋ, awa iŋ ba thankina wali nama ba ŋindi ndɛ yama ba si niya baŋ. 35 E beŋ tha dɔŋ, na ‘Ŋɔna haŋ pɛyɛ sɛnkɛni binaŋ’? Kɛrɛ yaŋ tepe bena, dethaŋ hɛ dumgbu baŋ. Beŋ kɔŋ kutu na thithi paka baŋ ba ŋono. 36 Wɔ wo ŋɔŋ ka lɔkɔ woŋ, ndɛ kɔŋ kutu kuthunkuŋ, awa wɔ bɛina na kɔsinɔkɔ mutiŋ mu ka sii ba kɔy yo kɔy muŋ. Wuna bapay woŋ mɛnɛ baŋɔŋ woŋ yehitɔkɔ ka nanthe. 37 Wuna hu tepo haŋ niyɔ nɔndi hu tɛpɛ haŋ ba dɔma, na ‘Woŋ paye nthɔŋ, woŋ ŋone.’ 38 Yaŋ kɔŋ ŋindi bena ba ŋɔna dumgbu ba tha beŋ ni wali. Biya bihɛna bina niyɛ kɛndɛ wali. Awa beŋ kɔŋ kutu munahaŋ maŋaye ka wali namɛŋ baŋ.” 39 BiSameriya bibɔyɛ ka mɛti babɛina ni lanɛya ka Yisɔs saathɛ ba magbonkoy ma ka hati woyɛrɛmɛ woŋ maŋ, naa dome ndɛ, na “Ndɛ tepe yama bɛyiniŋ fooma ba thanki nde yaŋ niya.” 40 Naa see biSameriya beŋ ka Yisɔs, bindɛ theteke niŋ ba ndɛ be niyɔ hintiŋ iŋ bindɛ. Awa Yisɔs niyɔy kɛndɛ ba hura kaye. 41 Awa biya bibɔyɛ ni lanɛya ka Yisɔs ba magbonkoy nama maŋ. 42 Huna dome bindɛ ka hati woyɛrɛmɛ woŋ, na “Wuŋ ka nda ba magbonkoy nda maŋ huna niye miŋ lanɛya, baa miŋ nda gbeeŋ ka yɛthɛ bakɛntuŋ miŋ yuyɔkɔy nda. Awa miŋ kɔthɛ nda ba dɔma na ndɛ na wɔ bɛina wo ni biya bi kafaydo beŋ kisi.” 43 Naa daŋande hura kaye woŋ, Yisɔs pɛyɛŋ kɛndɛ e ndɛ kaa ka kuyɛkɛŋ ku ka Kalili. 44 Yisɔs tepe nde, na “Banabi ka iŋ yiki ka kuyɛkɛŋ nama koŋ.” 45 Naa tɛŋ ndɛ ka Kalili, biya bi ka Kalili beŋ yɛritɔy niŋ wuyɔhɔy, baa bindɛ kute nde bɛyiniŋ ba ni ndɛ ka Yɛrusalɛmi baŋ naa ndɛ bindɛ siyi malɔkɔ ma puntuyando nde mbembɛŋ namɛŋ beŋ iŋ maleka woŋ baŋ. Awa bindɛ fooma bi kiŋ nde kɛndɛ. 46 Yisɔs key hɛlɛŋ ka mɛti ba ka Kena ba ka Kalili, ka sikinande nde ndɛ mandi maŋ mampa maŋ ka. Awa bayaha wunthe kiŋ nde kɛndɛ wo thoono hati nama wowathe ka mɛti ba ka Kapaniyɔmi. 47 Naa yuye ndɛ ba dɔma na Yisɔs ŋaye ka Yudiya e ndɛ saa ka Kalili, ndɛ key niŋ theteke ba kaa ba niŋ ka puyiyɛ hati nama woŋ ka Kapaniyɔmi. Hati woŋ baŋ ŋoyeŋ nde nda matuke. 48 Huna dome Yisɔs kɛnama, na “Beŋ sa ni lanɛya yɔkɔŋ beŋ kute bɛyiniŋ bathakaba mɛnɛ babukuyuwɛ.” 49 Kɛna dome bayaha woŋ ka Yisɔs, na “Hɛmɔŋ, yaandi saa, hati niŋ woŋ be tha niye tuke.” 50 Huna dome Yisɔs kɛnama, na “Duwa kɛnda ka, hati nda woŋ kɔŋ pethɔ.” Bayaha woŋ baŋ ni lanɛya hu tepe niŋ Yisɔs haŋ. Ndɛ duu ka mɛti nama ka. 51 Naa bayaha woŋ baŋ duu kɛnama ka, ndɛ pɛnkande iŋ bawaliŋ nama beŋ ka gboŋa bi tepe niŋ ba dɔma, na “Hati nda woŋ sɛsi ba niyɔ hita.” 52 Huna thonthiŋine ndɛ bindɛ wakathi wo sɛsi hati woŋ ba niiye hita woŋ. Bindɛ tepe niŋ, na “Heŋ naa bohe kaŋ woŋ dɛkinɔ sɛsi na niŋ kɔtɔ kutɔɔkɛ koŋ peyene.” 53 Fanda ka hati woŋ kɔthɛ ba dɔma na wakathi wo dome heŋ nthɔŋ niŋ Yisɔs woŋ, na “Hati nda woŋ kɔŋ pethɔ.” Ndɛ na pethiye ndɛ woŋ. Awa bayaha woŋ mɛnɛ kubɔri nama koŋ fooma ni lanɛya ka Yisɔs. 54 Bɛy bathakaba baŋ baŋ bɛna tɛŋinɛ babaye ba ni Yisɔs ba tɔŋina na ndɛ, naa ŋaye ndɛ ka kuyɛkɛŋ ku ka Yudiya e ndɛ kaa ka Kalili.

5

1 Naa daŋande bɛyiniŋ baŋ baŋ fooma, Yisɔs key ka Yɛrusalɛmi ba lɔkɔ banthe ka lɔkɔiŋ bathɔɔkɔ baŋ ka nina haŋ ba biYusu beŋ niye Masaala na kubatho baŋ. 2 Ka mɛti ba ka Yɛrusalɛmi baŋ, tumgbuŋ hu kiŋ nde kɛndɛ kuwaŋ ku ka biyo hunthe hu ka mɛti baŋ hu dɔma haŋ na Biyo hu ka Takɛŋ beŋ haŋ. Awa tumgbuŋ haŋ haŋ baŋ hu kɔŋ nde dɔma na Bɛthɛsetha ka huyuŋ hu ka biYusu beŋ haŋ. Leleni basɔhi ba kiŋ nde kɛndɛ wuthuriye tumgbuŋ haŋ. 3 Ka tumgbuŋ haŋ haŋ baŋ kuwaŋ ka leleni baŋ kaake kɛna nde bathoonani bihakuwande see ka ŋɔɔkɔ ba puyo. Binɔndi bi kiŋ nde kɛndɛ bimankɔy thaaya, bagbɛthɛŋ mɛnɛ bigbɛsinkɔy. [ Bi kɔŋ nde kɛndɛ kɔ yumbu ba mandi maŋ ma be ŋɛna, 4 baa maleka wo ka Mariki woŋ na nde kɔ thuhu maŋaye ka ariana e ndɛ si ŋɛna mandi maŋ ka tumgbuŋ haŋ. Bathoonaŋ wo nthɔŋ yenke gbantɔkɔ ka tumgbuŋ haŋ naa mandi maŋ ŋeno, ndɛ na pethɔ nthoonaŋ ndo nthoonaŋ kiŋ iŋ wundɛ.] 5 Hati lamgba wunthe kiŋ nde kɛndɛ wo thoono bɛrɛ ba thaninɛŋ kɔnthɔ kataati iŋ thasɔŋ-thataati. 6 Naa kute niŋ Yisɔs ndɛ ŋoye, awa e ndɛ kɔthɔ ba dɔma na ndɛ thɔkɔti nɔŋ nda kɛndɛ ŋɔɔ, Yisɔs dome kɛnama, na “E yi thimoŋ ba puyo?” 7 Hati lamgba wothoonɔy woŋ dome ka Yisɔs, na “Hɛmɔŋ, yaŋ ka iŋ wɔ yama thiyi ka tumgbuŋ haŋ naa mandi maŋ ŋeno. Naa yaŋ bathɔy nthɔŋ ba thɔɔ, wɔ hɛna yenke thɔɔ ba yaŋ.” 8 Huna dome Yisɔs kɛnama, na “Ŋaye ka kɔɔ, sɛkitha kuwatha nda koŋ e yi kɔ kaa.” 9 Ka thagbɛmgbɛŋ thabɛina hati lamgba woŋ pethɔy awa ndɛ sekithe kuwatha nama koŋ e ndɛ kɔ kaa. Wuŋ baŋ niyɔy nde ka Malɔkɔ Mahemuwe maŋ. 10 Huna dome biYusu bibayahɛŋ beŋ ka hati lamgba wo puyo woŋ, na “Malɔkɔ Mahemuwe maŋ mɛna hɛ. Awa wu kiŋ ma sɔkinɔkɔ Siraŋ ntuŋ baŋ yi ba sɛkitha hɛ kuwatha kukɛnda koŋ e yi kuŋ kɔ kata.” 11 Kɛrɛ huna niye hati lamgba woŋ yaabi ba dɔma, na “Hati wowathe wo puyɛ yama woŋ na dɔmɛ yama, na ‘Sɛkitha kuwatha nda koŋ e yi kɔ kaa.’ ” 12 Bindɛ thɔnthɔŋɔŋ niŋ, na “Mbɛ hati wowathe wobɛina wo dɔmɛ yina, na sɛkitha kuwatha nda koŋ e yi kɔ kaa?” 13 Kɛrɛ hati lamgba wo puyo woŋ tha kɔthɔ Yisɔs na wo puyɛ niŋ woŋ, baa sɛthɛ baŋ abɔy nde kɛndɛ, awa Yisɔs fuŋ nasɔyi. 14 Naa daŋande wuŋ kɛndɛ, Yisɔs kute hati lamgba wo puyi ndɛ woŋ ka banka bamandiŋ ba ka Masaala baŋ. Huna dome Yisɔs kɛnama, na “E yi kute na thanki yi pethɔ? Awa ba nda ni hakɛ yo wuna sa bɛy ba yamɛ nɛnɔ hɛlɛŋ yina pɛnki.” 15 Hati lamgba woŋ key e ndɛ ka tepe bayahɛŋ bi ka biYusu beŋ ba dɔma na Yisɔs na puyɛ niŋ. 16 Awa ba haŋ haŋ baŋ wuna biyɛ biYusu beŋ bi kɔŋ nde sɛsi ba niya Yisɔs na thɔrɔ, baa ndɛ puy hati lamgba woŋ ka Malɔkɔ Mahemuwe maŋ. 17 Kɛrɛ Yisɔs ni bindɛ yaabi ba dɔma, na “Fandaŋ woŋ wo ni wali timo tima, awa yaŋ hɛlɛŋ nɛŋ gbeeŋ yɔkɔŋ yaŋ be ni wali.” 18 Magbonkoy maŋ maŋ baŋ ni hɛlɛŋ ba bayahɛŋ bi ka biYusu beŋ deethuwa gboŋɛŋ ba niŋ kɔra. Wuŋ ka hɔkɔŋ ba na thinke Yisɔs Siraŋ ba niya wali ka Malɔkɔ Mahemuwe maŋ, kɛrɛ ba na dome ndɛ Masaala na Fandama. Wuŋ thɔyande ba dɔma ndɛ deŋine yɛthɛ nama nanthe iŋ Masaala. 19 Huna gbonkiyiyɔkɔy Yisɔs ka bayahɛŋ bi ka biYusu beŋ e dɔma, na “Yaŋ kɔŋ bena tepe nɔndi baŋ, na Hati woŋ sa punku niya bɛy yo bɛy ka mayoho nama. Yɔkɔŋ bɛyiniŋ ba ndɛ kutu Fandama woŋ si ni, bɛna ndɛ ni. Wali ba Fandama woŋ ni baŋ, bɛna Hati woŋ ni hɛlɛŋ, 20 baa komisa wowathe woŋ athimo Hati woŋ wumandiŋ, wuna biyɛ ndɛ kɔŋ niŋ toŋine bɛyiniŋ fooma ba ndɛ ni baŋ. Awa ndɛ kɔŋ hɛlɛŋ niŋ toŋine bɛyiniŋ bathakaba ba yamɛ ba baŋ baŋ, wuna beŋ ni thakaba wumandiŋ. 21 Nɔŋ na nthɔŋ Fandaŋ woŋ ŋayaŋ biya ka tuka haŋ na e ndɛ bindɛ dunkune sii, nɛna hɛlɛŋ yando Hati nama woŋ dunkuŋ sii ka bi thimo ndɛ beŋ. 22 Fandaŋ woŋ tha kɔnsɔŋɔŋ womo woma, baa ndɛ thanki dunkuna kɔnsiŋina haŋ kiyaŋ yando Hati nama woŋ, 23 wuna biya beŋ fooma dunkune yando Hati woŋ yiki bamandiŋ, nɔŋ na nthɔŋ bindɛ ni Fandaŋ woŋ yiki na. Wɔ yo wɔ wo sa ni Hati woŋ yiki, ndɛ sa ni yiki Fandaŋ wo ŋindɛ Hati woŋ. 24 “Yaŋ kɔŋ bena tepe nɔndi baŋ. Wɔ yo wɔ wo yuyɛ thampa niŋ thaŋ awa e ndɛ niya lanɛya yama, wɔ bɛina kiŋ iŋ sii ba kɔy yo kɔy. Awa ndɛ sa nɔŋ kɔnsiŋina, baa ndɛ buthurɔy nda tuka haŋ e ndɛ nda niyɔ iŋ sii ba kɔy yo kɔy. 25 Yaŋ kɔŋ bena tepe nɔndi baŋ. Malɔkɔ maŋ ma kɔŋ see, awa mɛna hintiŋ nthɔŋ nda maŋ maŋ gbeeŋ, ma bi tukɛ beŋ yuye thampa tha ka Hati ka Masaala woŋ thaŋ, awa bi thɛŋ yuyɛ beŋ bi kɔŋ dunkuno sii hɛlɛŋ ka lɔkɔ babɛina. 26 Nɔŋ na nthɔŋ Fandaŋ woŋ iŋ sɛmbɛ na ba dunkuna sii, nɛna hɛlɛŋ Hati woŋ niyɔ iŋ sɛmbɛ ba dunkune biya sii. 27 Awa ndɛ dunkune Hati woŋ mayoho ba kɔnsiŋina, baa ndɛ na dɔma Hati ka Wɔ woŋ. 28 Baŋ ni thakaba wumandiŋ ba haŋ haŋ baŋ. Malɔkɔ maŋ ma kɔŋ see ma bitukɛ beŋ fooma yuye thampa tha ka Hati woŋ thaŋ, 29 awa e bindɛ fuŋa ka thayoma thaŋ. Bindɛ bi niyɛ nde bɛyiniŋ bayɔhɔy beŋ bi kɔŋ ŋayina maŋaye ka tuka haŋ e bindɛ dunkuno sii hɛlɛŋ. Awa bi niyɛ nde bɛyiniŋ banɛnɔy beŋ bi kɔŋ ŋayina maŋaye ka tuka haŋ e bindɛ thonkino.” 30 Yisɔs key ka kɔtɔkɔy ba tɛpa, na “Yaŋ sa punku niya bɛy yo bɛy ka mayoho makiyaŋ. Yɔkɔŋ ba yama Fandaŋ woŋ tepe ba niya, bɛna yaŋ ni. Awa kukɔnsɔŋɔŋ niŋ koŋ athumbu, baa yaŋ yoleta ba niya mathimo makiyaŋ, kɛrɛ yaŋ kɔŋ ni mathimo ma ka wo ŋindɛ yama woŋ maŋ. 31 “Mɛnɛ yaŋ bɔhɔkɔy maseri ka yɛthɛ bakiyaŋ, magbonkoy niŋ maŋ sa yeroko ba mɛŋ niyɔ nɔndi. 32 Wɔ hɛna kiŋ kɛndɛ wo ni maseri ba yaŋ, awa yaŋ kɔthɛŋ ba dɔma na hu ndɛ gbonkoy ba yaŋ haŋ hu kiŋ nɔndi. 33 Beŋ ŋindi nde baseriŋ ka Yɔni ka, awa ndɛ gbonkoy nde nɔndi baŋ ba yaŋ. 34 Wuŋ ka ba dɔma na yɔkɔŋ yaŋ kute maseri maŋaye ka wɔmɛti. Kɛrɛ atɛpɛ na yaŋ haŋ haŋ baŋ haliko beŋ be niyo kisi. 35 Yɔni athɔyande nde nɔŋ lampu womaye wo iŋ waŋ bamandiŋ. Awa wuŋ yehe nde bena ba detha waŋ babɛina ba wuthurɔy. 36 Kɛrɛ maseri ma kiŋ kɛndɛ ba yaŋ ma yamɛ ba ma ka Yɔni maŋ nde. Wali ba dunkune yama Fandaŋ woŋ ba yaŋ thankina baŋ, bɛna yaŋ ni baŋ haaŋ nɔŋ, awa bɛyiniŋ baŋ baŋ bɛna ni maseri ba dɔma na Fandaŋ woŋ na ŋindɛ yama. 37 Awa Fandaŋ wo ŋindɛ yama woŋ gbeeŋ ndɛ ni maseri ba yaŋ. Beŋ yuyeta hɛ nɔŋ thampa nama thaŋ hali hanthe, awa beŋ kuita hɛ niŋ hali hanthe. 38 Thampa nama thaŋ kahiteta hɛ ka siini bakendeŋ baŋ, baa beŋ niyeta hɛ lanɛya wo ŋindɛ yama woŋ. 39 Beŋ ni magbali ma ka Masaala maŋ karaŋ kuthɛgbɛ, baa beŋ siyi ba dɔma na ka mɛŋ na beŋ kute sii ba kɔi o kɔi. Awa magbali maŋ maŋ gbeeŋ mɛŋ ni maseri ba yaŋ. 40 Kɛrɛ halisa beŋ baŋaŋ ba saa kiyaŋ do haliko beŋ be kutu sii ba kɔy yo kɔy. 41 “Yaŋ yoleta ba niyo yiki iŋ biyamɛti. 42 Yaŋ kɔthɛŋ bena ba wuŋ niyɔ na beŋ ka iŋ mathimo ba Masaala ka thathukuma ndeŋ thaŋ. 43 Yaŋ see kendeŋ do iŋ mayoho ma ŋaye ka Fandaŋ woŋ maŋ. Kɛrɛ beŋ tha yama yɛrɔkɔ. Kɛrɛ mɛnɛ wɔ hɛna see iŋ mayoho nama maŋ, ndɛ na beŋ yɛrɔkɔ. 44 Beŋ thimoŋ ba gbuŋunuwande, kɛrɛ beŋ niyeta na bena Masaala gbuŋunuwe. Huna, nama beŋ yama niye lanɛya? 45 Baŋ siyi ba dɔma na yaŋ see ba beŋ kuta mathonko ka Fandaŋ woŋ. Musa wo kahe nde beŋ thukuma woŋ na bena thonkine. 46 Mɛnɛ beŋ nde nɔŋ niya Musa na lanɛya, beŋ kɔŋ nde yama ni lanɛya, baa ndɛ gbale nde ba yaŋ. 47 Kɛrɛ na tha nde beŋ ni magbali nama maŋ lanɛya na, nama beŋ niye lanɛya hu yaŋ tɛpi haŋ?”

6

1 Naa daŋande wuŋ, Yisɔs thuhande mankɔ ma ka Kalili ma hɛlɛŋ dɔma maŋ na mankɔ ma ka Taibiriyɔsi maŋ. 2 Kɛna yemo ndɛ iŋ sɛthɛ bamandiŋ baa bindɛ kute nde bɛyiniŋ bathakaba ba ni nde wundɛ baŋ na puy ndɛ bithoonɔy beŋ. 3 Naa kute Yisɔs sɛthɛ baŋ, ndɛ dunkɔy ka kusɛri koŋ ka thinthi iŋ bakarandeni nama beŋ e bindɛ kɛndɛ ka dɔŋɔ. 4 Ka lɔkɔ babɛina malɔkɔ ma biYusu beŋ siyuwe naa puntuyando nde bindɛ iŋ maleka wo nde katitɔkɔ tuka haŋ woŋ ka Iyipiti thuriye. 5 Yisɔs yili thaaya e ndɛ kuta sɛthɛ bamandiŋ ba si see kɛnama. Huna thonthiŋine ndɛ Filipi na, na “Kama miŋ boye muthɔma mu biya beŋ beŋ baŋ thɔŋ e bindɛ thimbɔ?” 6 Yisɔs thɔnthɔŋɔŋ Filipi na haliko ba niŋ gbɛriŋina ba kɔthɔ hu ka thukuma nama, halisa ndɛ Yisɔs gbeeŋ ndɛ kɔthɛŋ ba ndɛ ba niya. 7 Kɛna mɛyiyɛ niŋ Filipi ba dɔma, na “Kuthunkuŋ ku sɛnkɛni bisɔŋ-bitaati ba wɔ wunthe sa tɛŋ ba boya muthɔma mu tɛŋ ba womo woma ka beŋ beŋ ba kuta wuyete-wuyete.” 8 Kɛna dome bakarandeŋ nama wunthe kɛnama, wo dɔma Anduru woŋ wɛnda Saimɔŋ Pita, na 9 “Ya hati wathe dondo baŋ wo iŋ ŋatoŋ ŋasɔhi mɛnɛ muheni muye. Kɛrɛ muŋ sa tɛŋ ba sɛthɛ bamandiŋ baŋ baŋ.” 10 Ka lɔkɔ babɛina hande huyɔhɔy ba biya ba kɛndɛ dɔŋɔ hu kiŋ nde kɛndɛ. Huna dome Yisɔs ka bakarandeni beŋ, na “Niyaŋ ba biya beŋ dɔɔnkɔ.” Kɛna dɔɔnkɔy biya beŋ fooma. Naa kondo bindɛ, bɛrɛ ba biyɛthɛŋ wuluiŋ bisɔhi bina nde kɛndɛ ka sɛthɛ baŋ. 11 Yisɔs sekithe ŋatoŋ ŋaŋ e ndɛ thiya Masaala na maamo, awa e ndɛ niya ba ŋɛŋ hano ka bi dɔɔnkɔy beŋ fooma. Nɛna ni hɛlɛŋ ndɛ muheni muŋ, awa biya muŋ thɔŋ haaŋ e bindɛ thimbuwɔ. 12 Naa thɔŋ bindɛ fooma e bindɛ thimbuwɔ, huna dome Yisɔs ka bakarandeni nama beŋ, na “Kɔminandeŋ magbanthi ma pɛyɛtɔy maŋ ka tha banthe, haliko ntha ki be tha teetuwɔ.” 13 Bindɛ kɔminande muŋ ka tha banthe e magbanthi maŋ tɛŋa thadebe kɔhi iŋ thaye mu pɛyɛtɔy muŋ naa thɔŋ bindɛ ŋatoŋ ŋasɔhi ŋaŋ. 14 Naa kute biya muŋ bɛyi bathakaba ba ni ndɛ baŋ, huŋ tepe mɛŋ ba dɔma, na “Banabi na woŋ baŋ yaathi wo domo nde ba saa kafaydo woŋ.” 15 Naa ŋeete Yisɔs ba dɔma na bi kiŋ ba niŋ si bɔha ka kansuŋ ba niŋ niya gbaku, ndɛ fuŋ kɛndɛ nasɔyi e ndɛ kaa ka ŋasɛri ŋaŋ ka key ndɛ niyɔ ndɛ wuntheŋ. 16 Naa tɛŋ wuŋ mahɔnkɔlɛŋ, bakarandeni bi ka Yisɔs beŋ thathe ka mankɔ ka. 17 Bindɛ key thɔɔ ka gbe ba thuhande mankɔ maŋ ba kaa ka Kapaniyɔmi. Naa thɔɔyɛ kaŋ woŋ, wuŋ nambe haaŋ Yisɔs tha see kɛnamɛŋ. 18 Kɛna see huru humandiŋ hɔŋ ka mandi maŋ ka, awa thamunkulu thaŋ bohe gbantuwande gbe baŋ. 19 Naa ŋɛŋ bindɛ gbe baŋ bɛrɛ ba ŋaragba ŋataati maa ŋanaŋ, bindɛ kute Yisɔs si kaande ka mankɔ maŋ ka thinthi e ndɛ kɔ thuriye gbe baŋ. Kɛna see payɔ humandiŋ bindɛ thɔɔ. 20 Huna dome Yisɔs kɛnamɛŋ, na “Yama. Baŋ payɔ.” 21 Kɛna yehitɔkɔy bindɛ wumandiŋ e bindɛ thiya Yisɔs na ka gbe baŋ. Ka wuthurɔy wubɛina gbe baŋ tɛŋ ka thuhaŋ ka bindɛ key ka. 22 Ka gbɛɛŋ wo yeme woŋ, sɛthɛ bamandiŋ ba pɛyɛ heŋ thuhaŋ mankɔ maŋ kute ba dɔma na gbe banthe napethi bɛna kaayɛ. Awa Yisɔs tha thɔɔ gbe babɛina iŋ bakarandeni nama beŋ. Bakarandeni nama beŋ key bindɛ bithɔ. 23 Gbeni bahɛna see ba ŋaye ka mɛti ba ka Taibiriyɔsi e bɛŋ si kɔɔ wuthuriye ka thome nde bindɛ ŋatoŋ ŋa thiyiyɛ nde Mariki woŋ Masaala na maamo ŋaŋ. 24 Naa kute sɛthɛ baŋ ba dɔma na Yisɔs ka kɛndɛ, awa bakarandeni nama beŋ ka hɛlɛŋ kɛndɛ, bindɛ fooma thɔɔyɛ ka gbeni baŋ baŋ e bindɛ kaa ka mɛti ba ka Kapaniyɔmi kaŋ deethuwa Yisɔs na. 25 Naa kute bindɛ niŋ thuhaŋ mankɔ maŋ, bindɛ dome kɛnama, na “Karimɔkɔ, tima see yi dondo baŋ?” 26 Huna niye Yisɔs bindɛ yaabi ba dɔma, na “Yaŋ kɔŋ bena tepe nɔndi baŋ, beŋ deethuweta yama ba bɛyiniŋ bathakaba ba kute nde beŋ yaŋ si ni baŋ, kɛrɛ beŋ kɔŋ yama deethi ba na thɔŋ nde beŋ ŋatoŋ ŋaŋ e beŋ thimbɔ. 27 Baŋ hɔkɔŋ ni wali ba muthɔma mu daŋande muŋ, kɛrɛ niyaŋ wali ba muthɔma mu bena dunkune sii ba kɔi o kɔi, mu Hati ka Wɔ woŋ bena dunkune muŋ, baa ndɛ na thanki Masaala wo Fanda ntuŋ woŋ yɛtha ba wuŋ niya.” 28 Huna dome biya beŋ kɛnama, na “Nama miŋ siseke niya gbeeŋ ba niya bɛyiniŋ ba yeheŋ Masaala na thukuma?” 29 Yisɔs ni bindɛ yaabi ba dɔma, na “Bɛy ba yeheŋ Masaala na thukuma bɛna baŋ baŋ: piitekeŋ wo ŋindi ndɛ woŋ.” 30 Huna thonthiŋine bindɛ niŋ, na “Mbɛ bɛy bathakaba ba yi ni, ba miŋ kutuyɔkɔ ba ni ba miŋ yina piiteke? Mbɛ wali bamandiŋ ba yi ni? 31 Mbembɛŋ ntuŋ beŋ thɔŋ nde muthɔma mu dɔma muŋ na mana ka wula baŋ, nɔŋ na tepo nde wuŋ na ka magbali ma ka Masaala maŋ ba dɔma, na ‘Ndɛ dunkune nde bindɛ ŋatoŋ ba thɔma ŋa ŋaye ka ariana.’ ” 32 Yisɔs dome kɛnamɛŋ, na “Yaŋ kɔŋ bena tepe nɔndi baŋ ba dɔma, na Nabi Musa tha nde bena dunkune ŋatoŋ ŋagbeeŋ ŋaŋ ŋa ŋaye ka ariana. Fandaŋ woŋ kɔŋ bena dunkune kutoŋ kugbeeŋ koŋ ku ŋaye ka ariana. 33 Kutoŋ ku ka Masaala koŋ kuna ku ŋaye ka ariana koŋ, ku sɛɛ ba dunkuna sii kafaydo.” 34 Huna dome bindɛ kɛnama, na “Hɛmɔŋ, yaandi kɔ mina dunkune kutoŋ koŋ koŋ baŋ timo tima.” 35 Kɛna ni Yisɔs bindɛ yaabi, na “Yama kutoŋ ku dunkuŋ sii baŋ koŋ, awa wɔ yo wɔ wo see kiyaŋ do, ndɛ sa nɔŋ nda kaho kɔnthɔ, awa wɔ yo wɔ wo yama piiteke, ndɛ sa nɔŋ nda kaho kumbɛ. 36 Yaŋ kɔŋ bena tepe ba dɔma na beŋ thanki nda yama kuta kɛrɛ beŋ tha yama piiteke. 37 Bi dunkune yama Fandaŋ woŋ beŋ fooma bi kɔŋ see kiyaŋ do, awa womo woma wo see kiyaŋ do yaŋ sa niŋ kanthi, 38 baa yaŋ see ŋaye ka ariana, wuŋ ka hɔkɔŋ ba niya mathimo makiyaŋ, kɛrɛ ba niya mathimo ma ka wundɛ wo ŋindɛ yama woŋ maŋ. 39 Awa mathimo ma ka wundɛ wo ŋindɛ yama woŋ maŋ mɛna maŋ maŋ baŋ, yaŋ be tha piriŋiŋ wunthe ka bi thanki ndɛ yama dunkune beŋ, kɛrɛ yaŋ be nɔŋ bindɛ ŋayaŋ ka lɔkɔ bamankɛ baŋ ka tuka haŋ ba niyɔ iŋ sii. 40 Mathimo ma ka Fandaŋ woŋ maŋ mɛna maŋ maŋ baŋ, ba wɔ yo wɔ wo kutu Hati woŋ e ndɛ niŋ piiteke wɔ bɛina be kutu sii ba kɔy yo kɔy, awa yaŋ kɔŋ nɔŋ niŋ ŋayaŋ ka tuka haŋ ba niyɔ iŋ sii ka lɔkɔ bamankɛ baŋ.” 41 Naa yuye niŋ biYusu beŋ, bindɛ bohe gbonkiyɔkɔ ba na dome ndɛ, na “Yama kutoŋ ku ŋaye ka ariana koŋ.” 42 Huna bohe bindɛ thɔnthiŋinuwande ba dɔma, na “E Yisɔs kutɛ woŋ baŋ, hati ka Yusufu woŋ? Miŋ kɔthɛŋ fandama iŋ nandama na. Nama dɔmɛ ndɛ kɔŋ tɛpi ba dɔma, na ‘Yaŋ see ŋaye ka ariana’?” 43 Kɛna ni Yisɔs yaabi e ndɛ dɔma kɛnamɛŋ, na “Pɛyaŋ gbonkiyɔkɔ haŋ. 44 Wɔ yo wɔ sa punku saa kiyaŋ do yɔkɔŋ Fandaŋ wo ŋindɛ yama woŋ na niŋ yɔɔsi kiyaŋ do, awa wo nɛnɛ see kiyaŋ do, yaŋ kɔŋ nɔŋ niŋ ŋayaŋ ka tuka haŋ ba niyɔ iŋ sii ka lɔkɔ bamankɛ baŋ. 45 Banabiŋ beŋ gbale nde ba dɔma, na ‘Masaala kɔŋ bindɛ thanani fooma.’ Yaŋ tepe bena, wɔ o wɔ wo yuyɛ Fandaŋ woŋ e ndɛ thanuwa maŋaye kɛnama, wɔ bɛina sɛɛŋ kiyaŋ do. 46 Wuŋ ka ba dɔma na wɔ yo wɔ thanki nde nda kuta Fandaŋ woŋ. Ndɛ wo ŋaye ka Masaala ka woŋ nagbɛti, ndɛ na kutɛ Fandama na. 47 Yaŋ kɔŋ bena tepe nɔndi baŋ, wɔ wo yama piiteke, ndɛ kiŋ iŋ sii ba kɔy yo kɔy. 48 Yama kutoŋ ku dunkuŋ sii baŋ koŋ. 49 Mbembɛŋ ndeŋ beŋ thɔŋ nde muthɔma mu dɔma muŋ na mana ka wula baŋ, kɛrɛ bindɛ thanki hɛ tuukuwa fooma. 50 Kɛrɛ kutoŋ ku ŋaye ka ariana koŋ, kuna wɔ thɔŋ kuŋ koŋ ndɛ sa tuku. 51 Yama kutoŋ ku iŋ sii baŋ koŋ ku ŋaye ka ariana koŋ. Mɛnɛ wɔ thɔŋ kutoŋ koŋ koŋ baŋ, wɔ bɛina kɔŋ niyɔ kɔy yo kɔy, awa kutoŋ ku yaŋ dunkuŋ ba biya bi kafaydo beŋ bi be niyɔ iŋ sii kuna kɔtɔ kukiyaŋ koŋ.” 52 Naa yuye huŋ biYusu beŋ, wuŋ thoŋ bindɛ wumandiŋ, awa bindɛ sɛsi gbakila bindɛ bithɔ kaŋ thɔnthiŋinuwande, na “Nama hati wowathe woŋ baŋ punke dunkune mina kɔtɔ nama koŋ ba miŋ kuŋ thɔma?” 53 Huna dome Yisɔs kɛnamɛŋ, na “Yaŋ kɔŋ bena tepe nɔndi baŋ, yɔkɔŋ beŋ thɔŋ kɔtɔ ku ka Hati ka Wɔ woŋ koŋ awa e beŋ thiiye wasi nama baŋ. Mɛnɛ huŋ kutɛ, beŋ sa niyɔ iŋ sii. 54 Kɛrɛ wɔ wo thɔŋ kɔtɔ niŋ koŋ awa e ndɛ thiiye wasi niŋ baŋ, ndɛ kiŋ iŋ sii ba kɔy yo kɔy, awa yaŋ kɔŋ nɔŋ niŋ ŋayaŋ ka tuka haŋ ba niyɔ iŋ sii ka malɔkɔ mamankɛ maŋ. 55 Kɔtɔ niŋ koŋ kuna muthɔma mugbeeŋ mu wɔmɛti ba thɔma, awa wasi niŋ baŋ bɛna bageeŋ ba wɔmɛti ba thiiye. 56 Wɔ wo thɔŋ kɔtɔ niŋ koŋ e ndɛ thiiye wasi niŋ baŋ, ndɛ iŋ yaŋ, miŋ kɔŋ niyɔ iŋ mabohinande nɔŋ wɔ wunthe na miŋ. 57 Nɔŋ na ŋindi nthɔŋ yama Fandaŋ wo dunkuŋ sii woŋ na, awa e yaŋ niyɔ saathɛ ba ka Fandaŋ woŋ, nɛna wɔ wo yama thɔŋ woŋ niyɔ saathɛ ba kiyaŋ. 58 Kɔtɔ niŋ koŋ kuna kutoŋ ku thuhɛ ŋaye ka ariana koŋ. Awa kuŋ thɔyandeta iŋ kutoŋ ku thɔŋ nde mbembɛŋ ndeŋ beŋ koŋ e bindɛ manke tuukuwa. Wɔ wo thɔŋ kutoŋ koŋ koŋ baŋ ndɛ kɔŋ niyɔ kɔy yo kɔy.” 59 Ka banka bathuŋuyande ba ka biYusu beŋ baŋ ka Kapaniyɔmi kɛna tepe Yisɔs biya beŋ bɛyiniŋ baŋ baŋ naa nde ndɛ bindɛ thanani. 60 Naa yuye bakarandeni nama bibɔyɛ ndɛ si neŋ tɛpi, bindɛ dome, na “Magbonkoy makahɛ mɛna maŋ maŋ baŋ, awa nkaana mɛŋ punku poniyɛ kuiha?” 61 Wɔ tha niyɔ wo tepe Yisɔs na, kɛrɛ Yisɔs kɔthɛ ba dɔma na bi kɔŋ gbonkiyɔkɔ. Huna dome ndɛ kɛnamɛŋ, na “E hu tepe yaŋ haŋ teeti bena thathukuma? 62 Mbu na beŋ kute nɔŋ ntiŋ Hati ka Wɔ woŋ si ŋati ka ariana ka nde ndɛ ka? 63 Yina wo ka Masaala woŋ na dunkuŋ sii, kɛrɛ wɔmɛti sa punku niya bɛy yo bɛy. Yina wo ka Masaala wo bena dunkune sii woŋ wundɛ kɔŋ see ka mathanani ma yaŋ bena thanani maŋ. 64 Kɛrɛ haaŋ hɛ biya bi kiŋ mateete makendeŋ bi ba ni lanɛya mathanani niŋ maŋ.” Kabi ka mathɛrɛŋ maŋ Yisɔs nde kɔthɔ bi sa niŋ ni lanɛya beŋ, awa iŋ wo niŋ si ni gbɔŋ woŋ. 65 Huna dome Yisɔs kɛnamɛŋ, na “Wuna biyɛ nde yaŋ kɔŋ bena tepe ba dɔma na wɔ sa punku saa kiyaŋ do yɔkɔŋ Fandaŋ woŋ na niŋ sisi kiyaŋ do.” 66 Awa ba saabu baŋ baŋ, bakarandeni nama bibɔyɛ duuku kɛnamɛŋ awa bindɛ tha nda niŋ yeŋ hali. 67 Huna thonthiŋine Yisɔs bakarandeni nama bikɔhi iŋ biye beŋ, na “E beŋ hɛlɛŋ beŋ kɔŋ duu?” 68 Saimɔŋ Pita ni niŋ yaabi ba dɔma, na “Mariki, ka nkaana miŋ key? Yɔkɔŋ yi nagbɛti yina iŋ mathanani ma dunkuŋ sii baŋ maŋ, 69 awa miŋ ni yina lanɛya, awa miŋ see kɔthɔ ba dɔma na yina Wɔ Mɛthɛ woŋ, wo ŋaye ka Masaala ka woŋ.” 70 Yisɔs tepe bindɛ ba dɔma, na “Kɔhi iŋ biye bina yɛthi yaŋ, kɛrɛ wunthe ka beŋ wayi wonɛnɔy na ndɛ.” 71 Yisɔs kɔŋ nde gbonkoy ba Yudasi hati ka Saimɔŋ Isakariyɔti woŋ. Hali na niyɔy nde wuŋ ndɛ na nde wunthe ka bakarandeni kɔhi iŋ biye beŋ, wo nde ba niya Yisɔs na gbɔŋ woŋ.

7

1 Naa daŋande bɛyiniŋ baŋ baŋ fooma, Yisɔs kɔŋ nde kaande ka kuyɛkɛŋ ku ka Kalili koŋ kamo kama. Ndɛ tha kaande ka kuyɛkɛŋ ku ka Yudiya koŋ, baa biYusu bibayahɛŋ beŋ kɛndɛ bi kɔŋ nde deethi ba niŋ kɔra. 2 Wiki woŋ thuriye wo biYusu beŋ ni yikiya ka ŋabankaŋ ŋaŋ ba siyuwa nɔŋ na nde mbembɛŋ namɛŋ beŋ ka wula baŋ naa fuŋ bindɛ ka huwaayine haŋ ka Iyipiti. 3 Huna dome mbɛndama bibiyɛthɛŋ beŋ kɛnama, na “Ŋaye dondo baŋ e yi kaa ka kuyɛkɛŋ ku ka Yudiya koŋ, wuna bakarandeni nda beŋ kutu waliŋ bamandiŋ ba yi ni baŋ. 4 Wɔ wo thimo ba wali nama baŋ kuto nagberekethe thimota ba niya wali baŋ ka nunɔkɔy. Yi kɔŋ ni bɛyiniŋ baŋ baŋ, awa tɔŋinɔkɔ kafaydo nagberekethe.” 5 Ka lɔkɔ babɛina hali nde hintiŋ mbɛndama beŋ gbeeŋ bindɛ niyeta nde niŋ lanɛya. 6 Kɛna dome Yisɔs kɛnamɛŋ, na “Lɔkɔ basisande baŋ teŋeta hɛ ba yaŋ, kɛrɛ lɔkɔ o lɔkɔ bɛŋ asisande ba beŋ. 7 Biya bi kafaydo beŋ sa niyɔ iŋ saabu ba bena thambo, kɛrɛ bi kɔŋ yama thambo, baa yando bindɛ tepe banɛnɔy namɛŋ baŋ. 8 Kaaŋ hɔkɔŋ ka mathuŋande mamandiŋ maŋ maŋ baŋ. Lɔkɔ niŋ baŋ teŋeta hɛ.” 9 Naa thanki nthɔŋ nɛŋ Yisɔs gbonkiya, ndɛ pɛyɛ kɛndɛ ka Kalili ka. 10 Kɛrɛ naa key nthɔŋ mbɛndama beŋ ka mathuŋande mathɔɔkɔ maŋ maŋ baŋ ka Yɛrusalɛmi, ndɛ hɛlɛŋ nɛŋ ndɛ key nasɔyi kɛndɛ. 11 Ka lɔkɔ babɛina biYusu bibayahɛŋ beŋ ka Yɛrusalɛmi bi kɔŋ nde niŋ deethi ka mathuŋande maŋ e bindɛ kɔ thɔnthiŋinuwa, na “Thɔɔ ka ndɛ?” 12 Kɛna bohe biya muŋ ŋɔyintande wubɔyɛ ba wundɛ. Binɔndi bi kɔŋ nde dɔŋ, na “Wɔ yɔhɔy na ndɛ,” awa binɔndi nɛnɛ kɔy dɔma, na “Ade, bathɔkɔŋ biya na ndɛ.” 13 Wɔ tha niyɔ wo koyintɛ ka gbonkiya ba Yisɔs, baa biya beŋ payɔy biYusu bibayahɛŋ beŋ wumandiŋ. 14 Naa tɛŋ nthɔŋ bindɛ mathuŋande maŋ mateete, Yisɔs key biyande ka banka bamandiŋ ba ka Masaala baŋ e ndɛ ka dɔŋɔ ka thaninuwa biya beŋ. 15 Naa yuye niŋ biYusu beŋ si thanani, bindɛ ni thakaba wumandiŋ ba mathanani nama maŋ, awa huna bohe bindɛ thɔnthiŋinuwande, na “Nama dɔmɛ hati wowathe woŋ baŋ kɔŋ kute mathanani maŋ maŋ baŋ, mahɛŋ ma ndɛ tha thaninuwa ba niyɔ karimɔkɔ wo ka Siraŋ ntuŋ baŋ?” 16 Kɛna gbonkiyiyɔkɔy Yisɔs ba dɔma, na “Mathanani ma yaŋ bena thanani maŋ yaŋ kutɛ biyɛ mɛŋ, kɛrɛ wo ŋindɛ yama woŋ na biyɛ mɛŋ. 17 Mɛnɛ wɔ yɛrɔkɔy ba niya ba yeheŋ Masaala na thukuma baŋ, wɔ bɛina kɔŋ kɔthɔ mɛnɛ mathanani maŋ maŋ baŋ ŋaye ka Masaala maa yando gbonkoy ka yɛthɛ bakiyaŋ hɔkɔŋ. 18 Hanimaa wɔ wo gbonkoy ka sɛmbɛ bakɛnama baŋ, ndɛ kɔŋ deethiyɔkɔ yiki. Kɛrɛ wɔ wo deethi yiki ba wo ŋindɛ niŋ woŋ, wɔ seŋa na ndɛ, awa wɔ bɛina ka bahothi hali. 19 Musa na dunkune nde bena Siraŋ ba ka Masaala baŋ, kɛrɛ hali wɔ wunthe ka beŋ ndɛ tha bɛŋ kɔsɔŋ. Mbɛ hu beŋ yama deethuwe ba yama kɔra?” 20 Huna niye biya beŋ niŋ yaabi ba dɔma, na “Wayi na bɔhɛ yina! Mbɛ biya na bi yɔli ba yina kɔra?” 21 Yisɔs ni bindɛ yaabi, na “Yaŋ ni nde bɛy banthe bamandiŋ, awa beŋ ni nde thakaba ba bɛŋ. 22 Musa ni nde bena yamari ba thiya mpati ndeŋ bibiyɛthɛŋ beŋ ka bintɔni namɛŋ. Kɛrɛ wuŋ ka ba dɔma na Musa na thɛrinɛ naamu woŋ baŋ. Mbembɛŋ bikɛntuŋ bi kɔtiyɔkɔy Musa na beŋ bina thɛrinɛ wuŋ. Awa beŋ kɔŋ nde thiyi hati malɛɛthɛ wowathe ka bintɔni nama hali wuŋ niyɔŋ ka Malɔkɔ Mahemuwe maŋ. 23 Ka Malɔkɔ Mahemuwe maŋ na nde beŋ thiye malɛɛthɛ maŋ ka bintɔni nama haliko Siraŋ ba ka Musa baŋ ba be tha teetuwa ba tɛpɛ baŋ na wu kiŋ ba niyo ka gbɛɛŋ wosɔŋ-bitaati woŋ. Mbu mbɛ hu beŋ thooye ka mathoŋ ba na puyi yaŋ hati lamgba woŋ natharaŋ ka Malɔkɔ Mahemuwe maŋ? 24 Pɛyaŋ kɛriŋa thasɔkɔiŋ thaŋ ka na beŋ thɛŋ yenke kute na, kɛrɛ konsiŋineŋ thɛŋ ka gboŋa bathumbɛ baŋ.” 25 Kɛna bohe biya binɔndi bi ka Yɛrusalɛmi beŋ thɔnthiŋinuwande, na “E ba hɔŋ hati wowathe woŋ baŋ kutɛ bayahɛŋ beŋ deethi ba kɔra woŋ? 26 Dethaŋ hɛ na ndɛ gbonkoy dondo baŋ ka biya muŋ ka teete, kɛrɛ hali wɔ sɔkinɔkɔy niŋ. E ba hɔŋ akɔthɛ na bayahɛŋ beŋ ba dɔma na ndɛ na Banikisi wo niyo nde lahiri woŋ gbeeŋ? 27 Miŋ, miŋ kɔthɛŋ ka ŋaye hati wowathe woŋ baŋ. Kɛrɛ ti wo domo Banikisi woŋ tɛŋ, wɔ yo wɔ sa kɔthɔ ka wundɛ ŋaye.” 28 Naa Yisɔs bindɛ thanani ka banka bamandiŋ ba ka Masaala baŋ, ndɛ ŋataŋ ka gbonkiye bindɛ e dɔma, na “E beŋ kɔthɛŋ yama, awa e beŋ kɔthɛŋ ka ŋaye yaŋ? Yaŋ tha see kafaydo ka yɛthɛ bakiyaŋ. Wɔ wo ŋindɛ yama woŋ wɔ na woseŋa, awa beŋ kɔita niŋ. 29 Yaŋ kɔthɛŋ niŋ, baa kɛnama kɛna ŋaye yaŋ awa ndɛ na ŋindɛ yama.” 30 Naa gbanthaŋ Yisɔs, kɛna ŋaye bindɛ narɛ ba niŋ bɔha, kɛrɛ wɔ tha niyɔ wo tɔpinɛ niŋ yɔnkɔ, baa lɔkɔ ba ndɛ ba boho baŋ teŋeta hɛ. 31 Kɛrɛ halisa biya binɔndi ka biya beŋ ni niŋ lanɛya e bindɛ dɔma, na “E ba hɔŋ na wo dɔma Banikisi woŋ see ndɛ kɔŋ si ni bɛyiniŋ bathakaba babɔyɛ wuŋ yama ba thanki hati wowathe woŋ niya baŋ?” 32 BiFaresini binɔndi yuye biya beŋ bi si ŋɔyintande wubɔyɛ ba Yisɔs, huna bindɛ mɛnɛ bafodeni bibukuyuwɛ beŋ ŋindi kurugbani namɛŋ beŋ ba ka bɔha Yisɔs na. 33 Naa kute Yisɔs bindɛ, ndɛ dome kɛnamɛŋ, na “Yaŋ kiŋ nda hɔkɔŋ iŋ beŋ ba wuthurɔy, awa yaŋ kɔŋ teŋiteke ka wo ŋindɛ yama woŋ. 34 Beŋ kɔŋ deethi ba yaŋ, kɛrɛ beŋ sa yama kutu, baa ka yaŋ ka niyɔ ka, beŋ sa kɛndɛ punku tɛŋa.” 35 BiYusu beŋ bohe thɔnthiŋinuwande wunthe iŋ ntɔ nama, na “Kama hati wowathe woŋ baŋ dɔŋ ba kaa ka sa miŋ niŋ punku kute? E ba hɔŋ ndɛ kiŋ ba kaa ka mɛtiŋ ba ka ŋakuyɛkɛŋ ŋahɛna ŋaŋ ka biya ntuŋ beŋ ka e thaninuwa biya bi ka siyani bahɛna baŋ beŋ kɛndɛ? 36 Mbɛ mu dɔmɛ ndɛ kɔŋ tɛpi ba dɔma, na ‘Beŋ kɔŋ deethi ba yaŋ, kɛrɛ beŋ sa yama kutu,’ awa ‘ka yaŋ niyɔ, beŋ sa kɛndɛ punku kaa’?” 37 Ka lɔkɔ bamankɛ bamandiŋ baŋ ka mathuŋande maŋ, Yisɔs kɔɔyɛ mateete ka biya beŋ e ndɛ koyiŋa ba dɔma, na “Mɛnɛ wɔ kaho kumbɛ, ndɛ sɛɛŋ kiyaŋ do, ndɛ be si thiiye mandi. 38 Wɔ wo yama ni lanɛya woŋ, nɔŋ na tepe magbali ma ka Masaala maŋ na, na ‘Mandi ma dunkuŋ sii ma kɔŋ buulu ka thukuma nama haŋ.’ ” 39 Yisɔs kɔŋ nde dɔŋ Yina wo ka Masaala woŋ, wo bi niyɛ niŋ lanɛya beŋ kutu woŋ. Ka lɔkɔ babɛina Yina wo ka Masaala woŋ dunkunɔita nde hɛ, baa Yisɔs ŋatinɔita nde hɛ ka thinthi e ndɛ niyo yiki. 40 Naa yuye biya beŋ magbonkoy maŋ maŋ baŋ, biya binɔndi ka biya beŋ tepe ba dɔma, na “Banabi wo niyo nde lahiri woŋ na woŋ baŋ gbeeŋ.” 41 Awa biya binɔndi tepe ba dɔma, na “Banikisi wo niyo nde lahiri woŋ na woŋ baŋ.” Kɛrɛ biya binɔndi tepe ba dɔma, na “Banikisi wo niyo nde lahiri woŋ sa ŋaye ka kuyɛkɛŋ ku ka Kalili koŋ. 42 Magbali ma ka Masaala maŋ tepe ba dɔma, na Banikisi woŋ kɔŋ ŋaye ka bɔnsɔŋ ba ka gbaku woŋ Dauda baŋ, awa na ndɛ kɔŋ ŋaye ka mɛti ba ka Bɛthɛlɛhɛmi baŋ, mɛti ba ka nde gbaku woŋ Dauda baŋ.” 43 Kɛna see mahakuwande niyɔ mateete ma ka biya beŋ saathɛ ba ka Yisɔs. 44 Binɔndi ka biya beŋ thimo nde ba niŋ bɔha, kɛrɛ wɔ tha niyɔ wo tɔpinɛ niŋ yɔnkɔ. 45 Naa duu kurugbani bi ŋindo nde beŋ iŋ bafodeni bibukuyuwɛ beŋ mɛnɛ biFaresini beŋ, bindɛ key tɔŋ kuna. Kɛna thɔnthɔŋɔŋ bi ŋindɛ bindɛ beŋ, na “Mbɛ hu tha beŋ niŋ diŋe ka saa?” 46 Kurugbani bi ŋindo beŋ ni yaabi, na “Miŋ yuyeta hɛ nɔŋ hali hanthe wɔ si gbonkoy nɔŋ na hati wowathe woŋ gbonkiye na.” 47 BiFaresini beŋ thɔnthɔŋɔŋ, na “E beŋ hɛlɛŋ athiika thɔkɔ iŋ hati wowathe woŋ baŋ? 48 E wunthe ka bayahɛŋ beŋ maa ka biFaresini beŋ ni niŋ lanɛya? 49 Kɛrɛ sɛthɛ baŋ baŋ tha kɔthɔ Siraŋ ba ka Musa baŋ, huna Masaala thiyiyɛ bindɛ danka.” 50 Nikɔdimɔsi wo kaayɛ nde ka Yisɔs huyɛ woŋ, wo nde wunthe ka biFaresini beŋ woŋ, thɔnthɔŋɔŋ bindɛ, na 51 “E Siraŋ bakɛntuŋ baŋ ba kɔŋ mɛkɛŋ ba kɔnsiŋina wɔ mahɛŋ ma ndɛ tha hintiŋ yenke poniyo kuiha, awa e wuŋ yenke kothiyo ba ni ndɛ baŋ?” 52 Bindɛ ni niŋ yaabi ba dɔma, na “E ka Kalili kɛna ŋaye yi nɔŋ na ŋaye kɛndɛ Yisɔs wobɛina na?” Kɛna tepe bindɛ niŋ ba dɔma, na “Detha ka magbali ma ka Masaala maŋ awa yi kɔŋ kutu ba dɔma na haaŋ nɔŋ banabi sa fuŋ ka Kalili.” 53 Biya beŋ fooma duuku ka bankɛŋ namɛŋ,

8

1 kɛrɛ Yisɔs nɛnɛ ndɛ key ka kusɛri ku dɔma koŋ na Ɔlifisi. 2 Naa puthɔy kaŋ woŋ sanka, Yisɔs key hɛlɛŋ ka banka bamandiŋ ba ka Masaala baŋ, awa biya beŋ fooma key kɛnama ka, awa kɛna dɔŋɔy ndɛ ka thaninuwa bindɛ. 3 Ka nde wundɛ thanani biya beŋ ka, karimɔkɔiŋ binɔndi bi ka Siraŋ baŋ beŋ mɛnɛ biFaresini binɔndi sisi hati yɛrɛmɛ woyɛntɔy kɛnama wo bohitande bindɛ ka niya kubɛy, e bindɛ niŋ si kiya mateete ka biya beŋ. 4 Bindɛ dome ka Yisɔs, na “Karimɔkɔ, hati woyɛrɛmɛ woyɛntɔy woŋ baŋ na bohitande miŋ ka niya kubɛi. 5 Awa Siraŋ ba dunkuno nde miŋ baŋ iŋ Musa ni mina yamari ba dɔma na wɔ yo wɔ wo bohitando ka maniyɔ maŋ maŋ baŋ, yɔkɔŋ wɔ bɛina be lɔɔpuwa tharaka haaŋ ndɛ koro. Mbu yi? Nama tepe yi ba wundɛ?” 6 Bindɛ see tɛpi haŋ haŋ baŋ ka Yisɔs ba niŋ gbɛriŋinuwa haliko ba kuta na bindɛ niŋ bohe ka magbonkoy ba kuta na bindɛ niŋ thonkine. Naa gbanthaŋ bindɛ, Yisɔs putɔy e ndɛ kɔ gbala ka kuyɛkɛŋ koŋ iŋ kuthenke nama koŋ. 7 Kɛrɛ naa bindɛ niŋ thɔnthɔŋɔni thuuŋ, kɛna ŋayinɔkɔy Yisɔs ka pute nde wundɛ kɛ e bindɛ tepe ba dɔma, na “Wɔ wo kɔthɛ woŋ ka beŋ ba dɔma na ndɛ niyeta hɛ hakɛ hali hanthe, wɔ bɛina sɛkithɛŋ hɛ raka e yenke lɔɔpa hati woyɛrɛmɛ woŋ baŋ.” 8 Yisɔs putɔy hɛlɛŋ e ndɛ kɔ gbala ka kuyɛkɛŋ koŋ iŋ kuthenke nama koŋ. 9 Naa yuye bindɛ hu tepe bindɛ Yisɔs haŋ, bindɛ bohe funka ka wunthe-wunthe there ka bi yamɛ niyɔ bakalani beŋ. Kɛna pɛyɛ Yisɔs kɛndɛ ti bindɛ biye iŋ hati woyɛrɛmɛ woŋ. 10 Yisɔs ŋayinɔkɔy e thɔnthiŋina hati woyɛrɛmɛ woŋ, na “Kama kaaye bi sɛɛ yina ka fuŋutiyɛ beŋ? E wɔ wunthe ka bindɛ tha niyɔ wo thonkine yina?” 11 Hati woyɛrɛmɛ woŋ ni niŋ yaabi, na “Ndo hɛmɔŋ, wɔ tha niyɔ wo thonkine yama.” Yisɔs dome kɛnama, na “Yaŋ hɛlɛŋ nɛŋ gbeeŋ, yaŋ sa yina thonkine. Kɛrɛ kaa; ba nda hɛlɛŋ ka ni hakɛ ye.” 12 Yisɔs gbonkitiyande hɛlɛŋ biya beŋ ba dɔma, na “Yama dunkuŋ waŋ kafaydo. Wɔ yo wɔ wo yama yeŋ, ndɛ sa kaande ka huntuma, kɛrɛ ndɛ kɔŋ niyɔ iŋ waŋ ba dunkuŋ sii baŋ.” 13 Huna dome biFaresini beŋ kɛnama, na “Yi kɔŋ bɔhɔkɔ maseri ka yɛthɛ bakɛnda. Bɛna magbonkoy nda maŋ tha tɔŋɔŋ bɛy yo bɛy.” 14 Yisɔs mɛyiyɛ bindɛ ba dɔma, na “Hali yaŋ bɔhɔkɔŋ maseri ka yɛthɛ bakiyaŋ, magbonkoy niŋ maŋ ma kiŋ nɔndi, baa yaŋ kɔthɛŋ ka ŋaye yaŋ iŋ ka yaŋ key. Kɛrɛ beŋ kɔita ka ŋaye yaŋ iŋ ka yaŋ key ka. 15 Beŋ kɔŋ konsiŋine maŋaye ka huwɔmɛtiya haŋ, awa yaŋ, yaŋ konsiŋineta wɔ yo wɔ. 16 Hali yaŋ kɔnsiŋinaŋ hintiŋ wɔ, kukɔnsɔŋɔŋ niŋ koŋ ku kiŋ seŋa, baa yaŋ wuntheŋ kutɛ kɔnsɔŋɔŋ, kɛrɛ yaŋ iŋ wo ŋindɛ yama woŋ mina kɔnsɔŋɔŋ. 17 Wuŋ gbalo nde ka Siraŋ bakendeŋ baŋ ba dɔma na maseriŋ ma ka biya biye ma kɔŋ tɔŋɔŋ nɔndi baŋ. 18 Yaŋ kɔŋ bohɔkɔ maseri ka yɛthɛ bakiyaŋ, awa Fandaŋ wo ŋindɛ yama woŋ kɔŋ hɛlɛŋ ni maseri ba yaŋ.” 19 Huna thonthiŋine bindɛ niŋ ba dɔma, na “Kama fanda wobɛina?” Yisɔs ni bindɛ yaabi ba dɔma, na “Beŋ tha yama kɔthɔ. E Fandaŋ woŋ na beŋ kɔthɔ? Mɛnɛ beŋ kɔthɛ nde yama, beŋ kɔŋ nde kɔthɔ Fandaŋ woŋ.” 20 Yisɔs gbonkoy bɛyiniŋ baŋ baŋ ka doŋe nde wundɛ kuwaŋ ka kumani ba kɔbiri wo kata ka Masaala woŋ thiyo kɛ, ka banka bamandiŋ ba ka Masaala baŋ, naa ndɛ thanani biya beŋ. Kɛrɛ wɔ yo wɔ tha niyɔ wo bɔhɛ niŋ, baa lɔkɔ ba nde ndɛ ba boho baŋ teŋeta hɛ. 21 Yisɔs tepe hɛlɛŋ bindɛ ba dɔma, na “Yaŋ kɔŋ key napoŋ, awa beŋ kɔŋ deethi ba yaŋ haaŋ e beŋ tuka iŋ hakɛ ndeŋ baŋ, baa ka yaŋ key ka, beŋ sa kɛndɛ punku tɛŋa.” 22 Huna dome biYusu beŋ ka wunthe iŋ ntɔ nama, na “Ndɛ dome na miŋ sa punku kaa ka ndɛ key ka. E wuŋ thɔyande ba dɔma na kɔrɔkɔ huna ndɛ ba kɔrɔkɔ?” 23 Yisɔs dome kɛnamɛŋ, na “Biya bi ka pothi kafaydo bina beŋ; kɛrɛ yaŋ, yando ŋa ye ka thinthi ka ariana na yaŋ. Hulasiriya hukendeŋ hu kiŋ kafaydo, kɛrɛ yaŋ, hulasiriya niŋ haŋ ka kafaydo. 24 Wuna biyɛ yaŋ kɔŋ hɛ bena tepe ba dɔma na beŋ kɔŋ tuku iŋ hakɛŋ bakendeŋ baŋ. Awa beŋ kɔŋ tuku iŋ hakɛŋ bakendeŋ baŋ mɛnɛ beŋ tha ni lanɛya ba dɔma na yama wɔ kuhantheŋ woŋ.” 25 Huna thonthiŋine bindɛ niŋ, na “Mbɛ yina?” Yisɔs ni bindɛ yaabi, na “Yama wo tepe hɛ nthɔŋ yaŋ bena mayoŋ woŋ. 26 Yaŋ kiŋ iŋ bɛyiniŋ babɔyɛ ba gbonkiya ba beŋ iŋ ba bena thonkine. Kɛrɛ wo ŋindɛ yama woŋ wɔ seŋa na ndɛ, awa yaŋ see tepe biya bi kafaydo beŋ fooma bɛyiniŋ ba yuye nde yaŋ maŋaye kɛnama baŋ.” 27 Kɛrɛ bindɛ tha metho ba dɔma na ndɛ kɔŋ nde gbonkoy ba Fandama woŋ ka ariana. 28 Huna dome Yisɔs kɛnamɛŋ, na “Ti nɔŋ beŋ ŋataŋ Hati ka Wɔ woŋ ka thinthi, ka lɔkɔ babɛina na beŋ kɔthɔ ba dɔma na yama wɔ kuhantheŋ woŋ. Awa beŋ kɔŋ kɔthɔ ba dɔma na yaŋ sa ni bɛy yo bɛy ka mayoho makiyaŋ, kɛrɛ yaŋ kɔŋ gbonkoy bɛyiniŋ ba thanki nde Fandaŋ woŋ yama thaninuwa baŋ. 29 Ndɛ wo ŋindɛ yama woŋ kiŋ iŋ yaŋ, awa ndɛ tha yama pɛyɛŋ yaŋ wuntheŋ, baa yando ni bɛyiniŋ ba niŋ yeheŋ thukuma baŋ timo tima.” 30 Naa thanki nthɔŋ nɛŋ Yisɔs gbonkiya, biya bibɔyɛ ni niŋ lanɛya. 31 Kɛna dome ntiŋ Yisɔs ka biYusu bi niyɛ niŋ lanɛya beŋ, na “Mɛnɛ beŋ key ka kɔtɔkɔy ba yema mathanani niŋ maŋ, bena bakarandeni niŋ bigbeeŋ beŋ; 32 awa beŋ kɔŋ kɔthɔ nɔndi baŋ ba Masaala, awa nɔndi baŋ ba kɔŋ bena ni kɔɔrɔiŋ.” 33 Kɛrɛ bindɛ dome ka Yisɔs, na “Mindo bɔnsɔŋ ba ka Ebrahim bɛna miŋ, awa miŋ ka ka huwaayine ka wɔ yo wɔ. Nama ka dɔma mina, na ‘Beŋ kɔŋ niyɔ kɔɔrɔiŋ’?” 34 Yisɔs ni bindɛ yaabi, na “Yaŋ kɔŋ bena tepe nɔndi baŋ, wɔ yo wɔ wo ni hakɛ, waayi na nda wundɛ ka niya hakɛ. 35 Beŋ kɔthɛŋ nɛnɛ ba dɔma na waayi woŋ sa niyɔ ka banka ba ka mariki nama woŋ kɔy yo kɔy. Hati o hati mpuu na kɛndɛ niyɔ kɔy yo kɔy. 36 Huna, mɛnɛ Hati wo ka Masaala woŋ pɛyi bena ka yɛthɛ bakendeŋ, beŋ kɔŋ niyɔ kɔɔrɔiŋ bigbeeŋ beŋ. 37 Yaŋ kɔthɛŋ ba dɔma na bɔnsɔŋ ba ka Ebrahim bɛna beŋ, kɛrɛ beŋ kɔ deethuwa ba yama kɔra, baa beŋ tha yɛrɔkɔ mathanani niŋ maŋ. 38 Yaŋ kɔŋ gbonkoy ba thanki nde yaŋ toŋino iŋ Fandaŋ woŋ baŋ, awa beŋ nɛnɛ beŋ kɔŋ ni ba thanki nde beŋ yuyɛ maŋaye ka fanda ndeŋ woŋ baŋ.” 39 Kɛrɛ bindɛ dome kɛnama, na “Ebrahim na fanda ntuŋ.” Huna dome Yisɔs kɛnamɛŋ, na “Mɛnɛ Ebrahim na mbemba wokendeŋ, beŋ kɔŋ nde ni ba thanki nde Ebrahim niya baŋ. 40 Kɛrɛ dethaŋ hɛ na beŋ deethi ba yama kɔra, yando see bena tepe nɔndi ba thanki nde yaŋ yuyɛ ka Masaala baŋ. Ebrahim tha nde ni bɛyi nɔŋ ba beŋ ni baŋ baŋ. 41 Beŋ kɔŋ ni ba thanki nde fanda ndeŋ woŋ niya baŋ.” Bindɛ dome kɛnama, na “Biya kutɛ miŋ bi mpoo namo nama. Miŋ kiŋ iŋ fanda ntuŋ wunthe napethi, ndɛ na Masaala.” 42 Huna dome Yisɔs kɛnamɛŋ, na “Mɛnɛ Masaala na fanda ndeŋ, beŋ kɔŋ nde yama thimo, baa yaŋ see ŋaye ka Masaala, awa ka tete yaŋ kiŋ nda dondo baŋ. Yaŋ tha see ka mayoho makiyaŋ, kɛrɛ ndɛ na ŋindɛ yama. 43 Mbu mbɛ hu ba beŋ metho hu yaŋ tɛpi haŋ? Wu biyɛ saabu na, beŋ punketa ba niya muyuŋ ba poniyɛ kuiha thampa niŋ thaŋ. 44 Beŋ kiŋ mpati bi ka fanda ndeŋ woŋ Sithani, Wayi Womandiŋ woŋ, awa lɔkɔiŋ fooma bendo thimo ba niya ba ndɛ kufiyo baŋ. Bakɔri na ndɛ kabi ka mathɛrɛŋ maŋ, awa hali hanthe ndɛ ka ka kuwaŋ ku ka nɔndi baŋ baa ndɛ gbonkiyeta hɛ nɔndi baŋ hali hanthe. Naa ndɛ kɔ kɛrɛŋ hothi, ndɛ kɔŋ tɔŋɔŋ maniyɔ makɛnama maŋ, baa bahothi na ndɛ, awa fanda ka kɛriŋa hothi na wundɛ. 45 Kɛrɛ saathɛ ba na yaŋ tɛpi nɔndi baŋ, beŋ tha yama ni lanɛya. 46 Mbɛ wɔ wunthe ka beŋ wo kutɛ yaŋ si ni hakɛ? Mɛnɛ yaŋ tepe bena nɔndi baŋ, mbɛ hu tha beŋ yama niye lanɛya? 47 Wɔ yo wɔ wo ka Masaala ndɛ kɔŋ poniyɛ kuiha thampa tha ka Masaala thaŋ. Beŋ ka biya bi ka Masaala. Saabu babɛina bɛna dɔmɛ beŋ tha poniyɛ kuiha thampa tha ka Masaala thaŋ.” 48 BiYusu beŋ mɛyiyɛ niŋ kaŋ thɔnthiŋina, na “E miŋ keriŋe hothi ba na dome miŋ na ka Sameriya kɛna ŋaye yi, awa yi kiŋ hɛlɛŋ iŋ wayi wo yina katitɔkɔ?” 49 Yisɔs ni bindɛ yaabi ba dɔma, na “Yaŋ ka iŋ wayi. Athiyɛ na yaŋ Fandaŋ na yiki, kɛrɛ beŋ, beŋ tha yama thiyi yiki. 50 Yaŋ deethiyɔkɔita yiki ka yɛthɛ bakiyaŋ. Kɛrɛ wɔ kiŋ kɛndɛ wo deethi ba yaŋ niyo yiki awa ndɛ na kɔnsɔŋɔŋ wuthumbɛ ba yaŋ. 51 Yaŋ kɔŋ bena tepe nɔndi baŋ, wɔ yo wɔ wo yɛrɔkɔ thampa niŋ thaŋ, wɔ bɛina sa nɔŋ tuku.” 52 Huna dome biYusu beŋ kɛnama, na “Ka tete kɛna kɔthɛ ntiŋ miŋ ba dɔma na yi kiŋ iŋ wayi. Ebrahim tuku nde, awa banabiŋ beŋ tuuku nde fooma. Kɛrɛ yi duu ka tɛpa, na ‘Mɛnɛ wɔ yo wɔ yɛrɔkɔy thampa niŋ thaŋ, wɔ bɛina sa tuku.’ 53 E ba hɔŋ yi yameŋ ba fanda ntuŋ woŋ Ebrahim, wo tukɛ nde woŋ, mɛnɛ banabiŋ bi tuukɛ nde beŋ? Nama yi dɔmɔkɔ gbeeŋ?” 54 Yisɔs ni bindɛ yaabi ba dɔma, na “Mɛnɛ yaŋ niyɔkɔy yiki ka yɛthɛ bakiyaŋ, yiki ba ba gboŋ bɛna. Fandaŋ woŋ na yama ni yiki, wo dome beŋ woŋ na Fanda ndeŋ na. 55 Haaŋ hɛ beŋ kɔita niŋ, kɛrɛ yaŋ kɔthɛŋ niŋ. Mɛnɛ yaŋ tepe bena ba dɔma na yaŋ kɔita niŋ, yaŋ niyɔy bahothi nɔŋ na beŋ na. Kɛrɛ yaŋ kɔthɛŋ niŋ, awa e yaŋ hɛlɛŋ putuyɔ yamari nama woŋ. 56 Ebrahim wo fanda ndeŋ woŋ yehitɔkɔy nde naa ni niŋ Masaala lahiri ba ndɛ kɔ penkitiye ka lɔkɔ ba ka saa hukiyaŋ haŋ baŋ. Awa ndɛ kute nde bɛŋ, awa ndɛ yehitɔkɔy nde ba lɔkɔ babɛina.” 57 BiYusu beŋ dome kɛnama, na “Yi teŋineta hɛ hintiŋ thaninɛŋ kɔnthɔ kasɔhi. E yina dɔŋ na yi kute nde Ebrahim na?” 58 Kɛna ni Yisɔs bindɛ yaabi, na “Yaŋ kɔŋ bena tepe nɔndi baŋ, saanuŋ Ebrahim ba mpoo, yaŋ kiŋ nde nda kuhantheŋ.” 59 Kɛna sekithe bindɛ tharaka ba niŋ kɔra kaŋ lɔɔpuwa niŋ, kɛrɛ Yisɔs nunɔkɔy bindɛ e ndɛ fuŋa nasɔyi ka banka bamandiŋ ba ka Masaala baŋ.

9

1 Naa nde Yisɔs daŋande, ndɛ kute hati lamgba wunthe doŋe ka gboŋa baŋ kuwaŋ wo mpoo womankɔy thaaya. 2 Kɛna thɔnthɔŋɔŋ niŋ bakarandeni nama beŋ, na “Karimɔkɔ, nkaana niyɛ hakɛ, hati lamgba woŋ baŋ maa biya nama beŋ, na dɔmɛ kɔŋ nde mpaa womankɔy thaaya?” 3 Yisɔs ni bindɛ yaabi ba dɔma, na “Hati lamgba woŋ baŋ tha ni hakɛ maa biya nama beŋ bina niyɛ hakɛ dɔma na ndɛ be mpaa womankɔy thaaya. Kɛrɛ wuŋ baŋ niyɔy haliko wali ba ka Masaala baŋ ba be tɔŋinɔkɔ kɛnama. 4 Miŋ kiŋ ba niya wali ba ka wo ŋindɛ yama woŋ baŋ, naa hintiŋ waŋ baŋ na, baa kaŋ woŋ kɔŋ tete thɔɔ, naa sa nda wɔ punku niye wali. 5 Hanimaa naa hintiŋ yaŋ kafaydo na, yama waŋ baŋ ba biya bi kafaydo beŋ.” 6 Naa thanki nthɔŋ nɛŋ Yisɔs gbonkiya, ndɛ thuthu ka kuyɛkɛŋ koŋ e ndɛ nɔka kupati koŋ iŋ mathɔini ma thuthu ndɛ maŋ ka yɔnkɔ. Ndɛ sekithe kupati kubɛina e ndɛ kuŋ puyina ka thinthi ka thaaya tha ka hati lamgba woŋ thaŋ. 7 Kɛna dome ndɛ ka hati lamgba woŋ, na “Kaa e yi ka lɔkɔkɔ ka tumgbuŋ hu dɔma haŋ na Silowami.” Ka tha ka dome Yisɔs ka na Silowami, kɛndɛ thalintando ba dɔma na “ŋindo.” Hati lamgba woŋ key lɔkɔkɔ e ndɛ kuta nagberekethe. 8 Bi dɔŋitande nɔŋ iŋ hati lamgba woŋ baŋ beŋ mɛnɛ bi bare nde niŋ kuta ndɛ si yawu beŋ dome, na “E hati lamgba woŋ baŋ kutɛ bare nɔŋ dɔŋɔ ka gboŋa baŋ kuwaŋ woŋ ba yawa?” 9 Binɔndi dome, na “Wundɛ na,” kɛrɛ binɔndi dome, na “Ade, athɔyande ma iŋ wundɛ.” Huna dome hati lamgba woŋ kɛnamɛŋ, na “Yama gbeeŋ.” 10 Kɛna thonthiŋine bindɛ niŋ, na “Nama dɔmɛ yi kɔŋ pɛthɔ thaaya?” 11 Ndɛ ni bindɛ yaabi, na “Hati wowathe wo dɔma Yisɔs woŋ na nɔkɛ kupati e ndɛ kuŋ puyina ka thaaya niŋ thaŋ ka thinthi e ndɛ dɔma yama, na ‘Kaa ka tumgbuŋ hu dɔma haŋ na Silowami e yi ka lɔkɔkɔ.’ Naa key yaŋ lɔkɔkɔ, yaŋ kute nagberekethe.” 12 Huna thonthiŋine niŋ biya beŋ, na “Kama ndɛ?” Hati lamgba woŋ ni bindɛ yaabi, na “Yaŋ kɔita ka ndɛ.” 13 Kɛna sisi bindɛ hati lamgba wo mankɔy thaaya woŋ ka biFaresini beŋ. 14 Ka Malɔkɔ Mahemuwe maŋ niye na nde Yisɔs kupati e ndɛ pɛtha thaaya tha ka hati lamgba woŋ thaŋ. 15 BiFaresini beŋ thɔnthɔŋɔŋ hɛlɛŋ hati lamgba woŋ na dɔmɛ ndɛ kɔŋ kutu. Hati lamgba woŋ dome kɛnamɛŋ, na “Kupati kuna puyuŋ ndɛ ka thaaya niŋ thaŋ, e yaŋ ka lɔkɔkɔ. Naa lɔkɔkɔy yaŋ, yaŋ kute nagberekethe.” 16 Huna dome biFaresini binɔndi, na “Hati lamgba woŋ baŋ ka wɔ ka Masaala, baa ndɛ tha kɔsɔŋ siraŋ ba deŋo nde ba Malɔkɔ Mahemuwe maŋ baŋ.” Kɛrɛ binɔndi ka bindɛ dome, na “Nama wɔ bahakɛ punku niye bɛyiniŋ baŋ baŋ?” Kɛna see mahakuwande ka masiyini niyɔ mateete ka biya beŋ beŋ baŋ. 17 Bindɛ thɔnthɔŋɔŋ hɛlɛŋ hati lamgba wo mankɔy thaaya woŋ, na “Nama tepe yi gbeeŋ ba hati lamgba woŋ baŋ, wo pɛthɛ yina thaaya woŋ?” Hati lamgba woŋ ni bindɛ yaabi, na “Banabi na ndɛ.” 18 BiYusu beŋ tha ni lanɛya ba dɔma na hati lamgba woŋ baŋ na wo mankɔy thaaya na nde ndɛ, awa e thɛŋ petho, yɔkɔŋ naa thiyi bindɛ komisɛŋ bi ka hati lamgba wo puyo thaaya thaŋ woŋ. 19 Bindɛ si thɔnthiŋina bindɛ, na “E hati ndeŋ na woŋ baŋ gbeeŋ, wo dome beŋ wo mpoo womankɔy thaaya woŋ? Nama dɔmɛ ndɛ kɔŋ nda kute nagberekethe?” 20 Komisɛŋ beŋ ni bindɛ yaabi ba dɔma, na “Miŋ kɔthɛŋ ba dɔma na hati ntuŋ na gbeeŋ, awa e miŋ niŋ mpaa womankɔy thaaya. 21 Kɛrɛ na dɔmɛ nda wundɛ be kute miŋ kɔita, maa ba hintiŋ nthɔŋ dɔma na miŋ kɔthɛŋ wo pɛthɛ niŋ thaaya woŋ. Thɔnthiŋinaŋ niŋ, bakalaŋ na nda wundɛ, awa ndɛ kɔŋ gbonkiyiyɔkɔ ba yɛthɛ nama.” 22 Biya nama ni nde yaabi baŋ baŋ ka biYusu bibayahɛŋ beŋ iŋ payɔ, baa bayahɛŋ beŋ thanki nde nda niyɔ hunthe ba mɛnɛ wɔ kɔŋ dɔŋ na Yisɔs na Banikisi wo niyo nde lahiri woŋ, wɔ bɛina kɔŋ kiya thɔŋ ba nda thana biyande ka banka namɛŋ bathuŋuyande baŋ. 23 Wuna biyɛ komisɛŋ beŋ bi kɔŋ dɔŋ, na “Bakalaŋ na ndɛ, thɔnthiŋinaŋ niŋ.” 24 Kɛna thiyi hɛlɛŋ bindɛ hati lamgba wo mankɔy thaaya woŋ hukaye e bindɛ dɔma kɛnama, na “Gbiŋa hɛ Masaala na. Miŋ kɔthɛŋ ba dɔma na hati lamgba wo puyɛ yina woŋ baŋ bahakɛ na ndɛ.” 25 Kɛna dome hati lamgba woŋ kɛnamɛŋ, na “Wu niyɔyŋ nthɔŋ ba dɔma na bahakɛ na ndɛ, yaŋ ka ba kɔthɔ. Bɛy banthe napethi bɛna kɔthɛ yaŋ, yando nde wo mankɔy thaaya, ka tete nda yando kutu.” 26 Kɛna thɔnthɔŋɔŋ bindɛ niŋ, na “Nama ni ndɛ yina? Nama pethee ndɛ thaaya nda thaŋ?” 27 Hati lamgba woŋ ni bindɛ yaabi ba dɔma, na “Yaŋ thanki hɛ bena tepe nagberekethe, kɛrɛ beŋ tha yama poniyɛ kuiha. Mbɛ hu thimo hɛlɛŋ beŋ ba huŋ yuyɛ hukaye? E beŋ hɛlɛŋ beŋ thimoŋ ba niyɔ bakarandeni nama?” 28 Kɛna wokitɔkɔy bindɛ hati lamgba woŋ baŋ e bindɛ dɔma, na “Yina nthɔŋ bakarandeŋ wo ka wɔ woŋ baŋ. Miŋ, bakarandeni bi ka Nabi Musa bina miŋ. 29 Miŋ kɔthɛŋ ba dɔma na Masaala gbonkitiyande nde Musa na, kɛrɛ wɔ woŋ baŋ miŋ kɔita ka ŋaye wundɛ.” 30 Hati lamgba woŋ dome kɛnamɛŋ, na “Hu tepe beŋ haŋ niyɔy yama thakaba. Beŋ dome na beŋ kɔita ka ŋaye wundɛ, kɛrɛ haliko ti pɛthi ndɛ yama thaaya. 31 Miŋ kɔthɛŋ ba dɔma na Masaala sa poniyɛ bahakɛ kuiha, kɛrɛ wɔ yo wɔ wo ni Masaala na yiki, awa e ndɛ niya bɛyiniŋ ba thimo Masaala ba bɛŋ niyo baŋ, Masaala kɔŋ niŋ poniyɛ kuiha. 32 Kabi naa thɛrɛŋ nde Masaala kafay woŋ miŋ yuyeta hɛ ba dɔma na wɔ wo mpoo womankɔy thaaya petho thaaya nama thaŋ. 33 Mɛnɛ hati wowathe woŋ baŋ tha nde ŋaye ka Masaala, ndɛ sa nde punku niya bɛy yo bɛy.” 34 Kɛna dome bindɛ ka hati lamgba woŋ baŋ, na “Yindo bahakɛ woŋ there ka mpoo hukɛnda. E yina mina see ka thaninuwa ba Masaala?” Kɛna fuŋutu bindɛ hati lamgba woŋ baŋ e bindɛ niŋ kiya thɔŋ ba wundɛ nda thana biyande ka banka bathuŋuyande baŋ. 35 Naa yuye Yisɔs ba dɔma na bindɛ kanthe hati lamgba woŋ, wundɛ deethi niŋ e ndɛ niŋ thɔnthiŋina, na “E yi ni lanɛya ka Hati ka Wɔ woŋ?” 36 Kɛna ni niŋ hati lamgba woŋ yaabi, na “Hɛmɔŋ, nkaana dɔma Hati ka Wɔ woŋ? Tepe yama haliko yaŋ be niŋ ni lanɛya.” 37 Yisɔs ni niŋ yaabi, na “Yi thanki nda niŋ kuta; ndɛ na gbeeŋ wo yina gbonkitiyande woŋ.” 38 Hati lamgba woŋ dome kɛnama, na “Mariki, yaŋ ni yina lanɛya.” Kɛna kunthuŋe hati lamgba woŋ e ndɛ niŋ niya kubatho. 39 Yisɔs dome kɛnama, na “Ba si kɔnsiŋina see na yaŋ kafaydo, haliko bi mankɔy thaaya beŋ bi be kutu, awa bi kutɛ beŋ bi be mankɔy thaaya.” 40 Naa yuye niŋ biFaresini bi thuriye niŋ beŋ si nɛŋ gbonkoy, bindɛ thɔnthɔŋɔŋ niŋ, na “E siyuweŋ ba dɔma na miŋ hɛlɛŋ nɛŋ bi mankɔy thaaya bina miŋ?” 41 Kɛna ni Yisɔs bindɛ yaabi, na “Mɛnɛ beŋ nde niyɔ bi mankɔy thaaya, beŋ sa nde niyɔ iŋ mathonko hali. Kɛrɛ naa dome beŋ ba wuŋ niyɔ na bendo kutɛ bina beŋ, bɛna beŋ kiŋ iŋ mathonko haaŋ ka wuŋ key.”

10

1 Yisɔs tepe, na “Yaŋ kɔŋ bena tepe nɔndi baŋ, wɔ yo wɔ wo sa biiyande ka biyo hu ka kubinthi ku ka takɛŋ beŋ koŋ, kɛrɛ e ndɛ biiyande gboŋa bahɛna, wɔ bɛina batuwaŋ na wundɛ iŋ bakanati biya munki ka kansuŋ. 2 Kɛrɛ wɔ wo biiyande ka biyo haŋ woŋ, wundɛ na batɔli wogbeeŋ woŋ. 3 Wɔ bɛina na wo dethiteke takɛŋ beŋ woŋ pɛthiyɛ biyo haŋ. Awa takɛŋ beŋ bi kɔŋ niŋ yuyɛ ka thampa, awa ndɛ kɔŋ bindɛ hiini ŋakeŋ fooma e ndɛ bindɛ fuŋuta ka gbada. 4 Naa ndɛ thanki funkuta bikɛnama beŋ fooma ka gbada, ndɛ kɔŋ bindɛ kɔtiyɔkɔ, awa takɛŋ beŋ bi kɔŋ niŋ yeŋ mahɛŋ, baa bindɛ ŋee thampa nama thaŋ. 5 Kɛrɛ bindɛ sa yeŋ thahinɛ, awa naa bindɛ kute niŋ bi kɔŋ niŋ kiti, baa bindɛ sa ŋee thampa tha ka thahinɛ.” 6 Mathɔyande maŋ maŋ baŋ mɛna tɔŋɔŋ Yisɔs ba bindɛ thaninuwa, kɛrɛ bindɛ tha wuŋ metho. 7 Huna dome hɛlɛŋ Yisɔs kɛnamɛŋ, na “Yaŋ kɔŋ bena tepe nɔndi baŋ, yama biyo hu ba biyande ka kubinthi ku ka takɛŋ beŋ koŋ. 8 Bi yenke nde saa ba yaŋ beŋ fooma batuwani bina iŋ bakanatiŋ biya munki ka kansuŋ. Kɛrɛ takɛŋ beŋ tha bindɛ poniyɛ kuiha. 9 Yama biyo hu ba biyande ka kubinthi ku ka takɛŋ beŋ koŋ. Mɛnɛ wɔ yo wɔ biiyande kiyaŋ, ndɛ kɔŋ niyɔ kisi, awa ndɛ kɔŋ key kaake e ndɛ fuŋa ka gbada, awa ndɛ kɔŋ kutu muthɔma mɛnɛ mandi mathiiye. 10 Batuwaŋ woŋ kɔŋ hɔkɔŋ see ba si tuwe, ba kɔra, mɛnɛ ba teetuwa. Kɛrɛ yaŋ see haliko biya bi be kutu sii bagbeeŋ baŋ, awa bi be tha panki ntha yo ntha ki ka sii bagbeeŋ baŋ baŋ. 11 “Yama batɔli takɛŋ wobathɛrɛgbɛŋ woŋ, baa batɔli wobathɛrɛgbɛŋ woŋ kɔŋ dunkuŋ sii nama baŋ ba takɛŋ nama beŋ. 12 Wɔ wo gbako ba dethiteke takɛŋ beŋ woŋ, ndɛ kutɛ biyɛ bindɛ gbeeŋ. Naa ndɛ kute nthɔŋ yaŋa woŋ si seeyɛ takɛŋ beŋ, ndɛ kɔŋ pɛy takɛŋ beŋ e ndɛ kita napoŋ. Awa yaŋa woŋ kɔŋ si thiyɔkɔ takɛŋ beŋ e ndɛ bindɛ pankitinuwande. 13 Badethiteke woŋ kɔŋ kiti, baa wogbako na ndɛ, awa wuŋ ka niŋ bɛy hali apiriŋɛ na takɛŋ beŋ. 14 Yama batɔli wobathɛrɛgbɛŋ woŋ. Nɔŋ na kɔthɛ nthɔŋ yama Fandaŋ woŋ na, e yaŋ kɔthɔ Fandaŋ woŋ; nɛna kɔthɔ yaŋ takɛŋ niŋ beŋ, awa takɛŋ niŋ beŋ yama kɔthɔ. Yaŋ kɔŋ dunkuŋ sii bakiyaŋ baŋ ba takɛŋ niŋ beŋ. 16 Awa yaŋ kiŋ hɛlɛŋ iŋ takɛŋ bihɛna bi ka ka kubinthi koŋ koŋ baŋ. Yɔkɔŋ yaŋ be bindɛ biiti kaake. Bi kɔŋ poniyɛ kuiha thampa niŋ thaŋ e bindɛ niyɔ kubɛri kunthe, awa bi kɔŋ niyɔ iŋ batɔli wunthe. 17 “Fandaŋ woŋ athimo yama baa yaŋ kɔŋ dunkuŋ sii niŋ baŋ, haliko yaŋ be hɛlɛŋ bɛŋ duu ka kuta. 18 Wɔ yo ka wo yama punku kɔra, yɔkɔŋ yama dunkuŋ sii niŋ baŋ ka mathimo makiyaŋ maŋ. Yaŋ kiŋ iŋ sɛmbɛ ba bɛŋ dunkuna iŋ ba bɛŋ hɛlɛŋ duwa ka kuta. Haŋ haŋ baŋ huna ŋinde yama Fandaŋ woŋ ba yaŋ si niya.” 19 Kɛna see hɛlɛŋ biYusu beŋ hakuwande ka masiyini ba magbonkoy maŋ maŋ baŋ. 20 Bibɔyɛ ka bindɛ dome, na “Ndɛ kiŋ iŋ wayi wo thiyɛ niŋ kuso. Mbɛ hu beŋ niŋ poniye kuiha?” 21 Kɛrɛ binɔndi ka bindɛ dome, na “Magbonkoy ma ka wɔ wo iŋ wayi kutɛ maŋ maŋ baŋ. Wayi sa punku puya biya bi mankɔy thaaya.” 22 Ka lɔkɔ babɛina mathuŋande manthe mamandiŋ ma deŋo nde iŋ dina namɛŋ woŋ ma kiŋ nde ka mɛti ba ka Yɛrusalɛmi baŋ. Awa mathuŋande maŋ maŋ baŋ ma kiŋ nde ba siyuwa malɔkɔ ma dunkune nde bindɛ banka bamandiŋ ba ka Masaala baŋ kɛnama. Hiiri pati bɛna nde ka lɔkɔ babɛina, 23 awa Yisɔs kɔŋ nde kaande ka hunkiyɛ hu dɔma haŋ na Hunkiyɛ hu ka Silamani haŋ ka banka bamandiŋ ba ka Masaala baŋ. 24 Kɛna see biYusu beŋ pɛnkiyande niŋ e bindɛ niŋ thɔnthiŋina ba dɔma, na “Tima wuŋ sɛkɛthi saanuŋ yi ba mina tepe nɔndi baŋ? Mɛnɛ yina Banikisi wo niyo nde lahiri woŋ, tepe hɛ mina nagberekethe.” 25 Kɛna ni Yisɔs bindɛ yaabi ba dɔma, na “Yaŋ thanki nde bena tepe, kɛrɛ beŋ tha ni lanɛya. Bɛyiniŋ ba thanki yaŋ niya baŋ ka keŋ ku ka Fandaŋ woŋ koŋ, bɛŋ thanki niya maseri ba yaŋ. 26 Kɛrɛ beŋ sa ni lanɛya, baa beŋ ka ka takɛŋ niŋ beŋ. 27 Takɛŋ niŋ beŋ bi poniyeŋ thampa niŋ thaŋ kuiha; yaŋ kɔthɛŋ bindɛ, awa bi kɔŋ yama yeŋ. 28 Yaŋ kɔŋ bindɛ dunkune sii ba kɔy yo kɔy, awa bindɛ sa piriŋ, awa wɔ sa yama bindɛ punku kanita. 29 Bi dunkune yama Fandaŋ woŋ beŋ bi yameŋ niyɔ waŋ ayaŋ ba ntha yo ntha, awa wɔ yo ka wo punku kanita niŋ ntha. 30 Awa yaŋ iŋ Fandaŋ woŋ wɔ wunthe na miŋ.” 31 Naa yuye huŋ biYusu beŋ, bindɛ sekithe tharaka ba niŋ lɔɔpuwa. 32 Huna thonthiŋine Yisɔs bindɛ, na “E ba na kute beŋ yaŋ si ni bɛyiniŋ bayɔhɔy babɔyɛ ba tepe yama Fandaŋ woŋ ba yaŋ niya baŋ, huna beŋ yama ba loopuwe ba yama kɔra?” 33 Kɛna ni niŋ biYusu beŋ yaabi ba dɔma, na “Miŋ loopuweta yina ba bɛyiniŋ bayɔhɔy ba thanki yi niya baŋ, kɛrɛ miŋ kɔŋ yina lɔɔpi ba na gbonkoy wunɛnɔy ma sɔkinɔkɔ Masaala na, baa yindo wɔmɛti niyɔkɔy Masaala.” 34 Huna thonthiŋine Yisɔs bindɛ, na “E wuŋ tha nde gbala ka Siraŋ ndeŋ baŋ na Masaala tepe nde ba dɔma, na ‘Yaŋ tepe nde bena, na beŋ athɔyande iŋ Masaala’? 35 Beŋ kɔthɛŋ ba dɔma na magbali ma ka Masaala maŋ ma kiŋ nɔndi kɔy yo kɔy, awa Masaala tepe ba wuŋ niyɔ na biya bi dunkuno thampa nama thaŋ beŋ athɔyande iŋ wundɛ. 36 Mɛnɛ ba yaŋ, Fandaŋ woŋ thanki nde nda yama yɛtha e ndɛ yama ŋinda kafaydo. Mbɛ hu beŋ yama dome na yaŋ kɔŋ gbonkoy wunɛnɔy ba Masaala, ba na dome yaŋ, na ‘Yama Hati ka Masaala woŋ’? 37 Mɛnɛ yaŋ niyeta wali ba ka Fandaŋ woŋ baŋ, baŋ yama ni lanɛya. 38 Kɛrɛ mɛnɛ yaŋ niyeŋ bɛŋ, hali beŋ thanaŋ yama niya lanɛya, niyaŋ lanɛya bɛyiniŋ ba thanki yaŋ niya baŋ, wuna beŋ kɔthɔ e beŋ metho ba dɔma na Fandaŋ woŋ iŋ yaŋ athɔyande nɔŋ wɔ wunthe.” 39 Naa gbanthaŋ Yisɔs, kɛna yole hɛlɛŋ bindɛ ba niŋ bɔha, kɛrɛ Yisɔs kanɔkɔy bindɛ. 40 Yisɔs fuŋ kɛndɛ e ndɛ thuhande mankɔ ma ka Yɔdaŋ maŋ ka nde Yɔni biiye biya biye hu ka Masaala haŋ ka, awa kɛna key Yisɔs niyɔ nda haaŋ. 41 Kɛna penke biya bibɔyɛ Yisɔs na e bindɛ dɔma ka wunthe iŋ ntɔ nama, na “Yɔni tha ni bɛyiniŋ bathakaba, kɛrɛ ba tepe ndɛ ba hati wowathe woŋ baŋ fooma ba kiŋ nɔndi.” 42 Awa biya bibɔyɛ ka bindɛ ni lanɛya ka Yisɔs.

11

1 Hati lamgba wunthe wo dɔma na Lasarɔsi, wo nde ka mɛti ba ka Bɛthani, na thoono nde. Ka Bɛthani kɛna nde Mariyama mɛnɛ wɛndama woyɛrɛmɛ wo dɔma Matha woŋ. 2 Mariyama wobɛina na koŋe nde Mariki woŋ mayɔ ma thimɔy huru ka ŋathaki nama ŋaŋ e ndɛ ŋɛŋ puuthuwa iŋ bɔɔyɛ nama bu ka yaha buŋ. Ndɛ Mariyama wobɛina na nde huwɛndiya iŋ Lasarɔsi wo thoono nde woŋ. 3 Kɛna see yɛrɛmɛŋ bi huwɛndiya beŋ beŋ baŋ ŋindi baseri ka Yisɔs ba dɔma, na “Mariki, wo thimo yi wumandiŋ woŋ kɔŋ thoona wukahɛ.” 4 Naa yuye Yisɔs huseri haŋ haŋ baŋ, ndɛ tepe ba dɔma, na “Nthoonaŋ kiŋ kiŋ baŋ sa niŋ kɔri hali. Kɛrɛ ndɛ thoono haliko Masaala be kutu yiki. Awa wuna hɛlɛŋ Hati ka Masaala woŋ dunkuno yiki maŋaye ka nthoonaŋ kiŋ kiŋ baŋ.” 5 Yisɔs nde nɛnɛ niyɔ wo thimo-thimo Matha na, wɛndama Mariyama, mɛnɛ Lasarɔsi. 6 Naa yuye Yisɔs ba Lasarɔsi kɔ thoono, ndɛ niyɔy hɛlɛŋ ka nde ndɛ ka ba hura kaye. 7 Naa daŋande hura kaye woŋ, ndɛ dome ka bakarandeni beŋ, na “Miŋ teŋitekeŋ ka kuyɛkɛŋ ku ka Yudiya koŋ.” 8 Huna dome bakarandeni beŋ kɛnama, na “Karimɔkɔ, biYusu beŋ bi kɔŋ yina deethi ba yina lɔɔpuwa ba yina kɔra. E kɛna yi dɔŋ ba kaa hɛlɛŋ?” 9 Yisɔs ni bindɛ yaabi ba dɔma, na “Wakathiŋ kɔhi iŋ biye bina ka gbɛɛŋ woŋ. Bɛna mɛnɛ wɔ yo wɔ kaande ka gbɛɛŋ woŋ ndɛ sa thuŋɔ, baa ndɛ kuteŋ waŋ ba kafaydo baŋ nagberekethe. 10 Kɛrɛ mɛnɛ wɔ yo wɔ kaande huyɛ ndɛ kɔŋ thuŋɔ, baa waŋ ka ka wundɛ ka.” 11 Naa thanki nthɔŋ nɛŋ ndɛ gbonkiya ka bakarandeni beŋ, ndɛ dome ntiŋ kɛnamɛŋ, na “Nyathiki ntuŋ Lasarɔsi na ŋɔyɛ ka nine, kɛrɛ yaŋ kɔŋ key yaŋ be niŋ ka thɔhɔŋ ka nine haŋ.” 12 Huna dome bakarandeni beŋ kɛnama, na “Mariki, mɛnɛ ka nine ŋɔyɛ ma, ndɛ kɔŋ hɛlɛŋ pethɔ.” 13 Yisɔs kɔŋ nde tɛpi ba Lasarɔsi tuka, kɛrɛ bindɛ siyi ba dɔma na nine hu biyamɛti nine haŋ huna nde Yisɔs dɔŋ. 14 Kɛna dome ntiŋ Yisɔs kɛnamɛŋ nagberekethe, na “Lasarɔsi tuku. 15 Kɛrɛ yaŋ yehitɔkɔy saathɛ ba kendeŋ, baa na tha yaŋ penkitiye kɛndɛ, wuna beŋ ni yama lanɛya. Awa miŋ kaayɛŋ kɛnama ka.” 16 Huna dome Thɔmɔsi, wo bathema woŋ, ka bintɔni nama beŋ, na “Miŋ fooma kaayɛŋ iŋ wundɛ, wuna miŋ ka tuku ka nanthe iŋ wundɛ.” 17 Naa tɛŋ Yisɔs kɛndɛ, ndɛ penke ba dɔma na Lasarɔsi sekithe nda hura kanaŋ naa mankuwo ndɛ. 18 Awa mɛti ba ka Bɛthani baŋ athuriyande nde iŋ ka Yɛrusalɛmi. Wuŋ teŋeta nde hintiŋ ŋaragba ŋaye ka thɔkiyande. 19 Wuna dɔmɛ nde biYusu bibɔyɛ bi kɔŋ nde key kɛndɛ ba ka thiya Matha na mɛnɛ Mariyama na thɔrɔ ba tuka hu ka wɛndamɛŋ haŋ. 20 Naa yuye Matha ba dɔma na Yisɔs tɛŋ, ndɛ key ba niŋ gbankita, kɛrɛ Mariyama pɛyɔy ka banka ka. 21 Naa penke Matha Yisɔs na, ndɛ dome kɛnama, na “Mariki, mɛnɛ yi kiŋ nde yeheeni dondo baŋ, wɛndaŋ woŋ sa nde yeheeŋ tuku. 22 Kɛrɛ hali ka tete yaŋ kɔthɛŋ ba dɔma na bɛyi o bɛyi ba yi thɔnthɔŋɔŋ Masaala na, ndɛ kɔŋ yina bɛŋ niiyɛ.” 23 Yisɔs dome kɛnama, na “Wɛnda kɔŋ hɛlɛŋ ŋaye ka tuka haŋ.” 24 Huna dome Matha kɛnama, na “Yaŋ kɔthɛŋ ba dɔma na ndɛ kɔŋ nɔŋ ŋayeba niyɔ iŋ sii ti biya ŋayina ka tuka haŋ ka lɔkɔ bamankɛ baŋ.” 25 Yisɔs dome kɛnama, na “Yama ŋayaŋ biya ka tuka haŋ e bindɛ dunkune sii baŋ. Wɔ yo wɔ wo yama ni lanɛya, hali atukɛ ma, ndɛ kɔŋ hɛlɛŋ niyɔ iŋ sii. 26 Awa wɔ yo wɔ wo niyɔ iŋ yaŋ awa e ndɛ niya yama lanɛya, ndɛ sa nɔŋ nda tuku. E niyeŋ huŋ lanɛya?” 27 Matha ni niŋ yaabi, na “Ndo, Mariki. Yaŋ niyeŋ lanɛya ba dɔma na yina Banikisi woŋ, Hati ka Masaala wo niyo nde lahiri ba saa kafaydo woŋ.” 28 Naa thanki nthɔŋ nɛŋ Matha gbonkiya, ndɛ duu ka banka ka e ka sakitɔkɔ wɛndama Mariyama na; e niŋ ŋoyinte, na “Karimɔkɔ woŋ tɛŋ awa ndɛ kɔŋ yina thiyi.” 29 Naa yuye huŋ Mariyama, ndɛ ŋaye nayaali ka doŋe nde ndɛ ka e kaa ba ka pɛnka Yisɔs na. 30 Ka lɔkɔ babɛina Yisɔs teŋeta hɛ ka mɛti ka; ndɛ kiŋ nde hintiŋ ka penke nde niŋ Matha ka. 31 Biya bi nde ka banka ka bi sɛɛ niŋ ka thiya thɔrɔ beŋ kute ndɛ si ŋaye nayaali e fuŋa ka gbada, huna yeme bindɛ niŋ yako. Bindɛ siyi ba dɔma na ka yoma ka na Mariyama key ba kɛndɛ ka boke. 32 Awa Mariyama nɛnɛ, naa tɛŋ ndɛ ka Yisɔs e ndɛ niŋ kuta, ndɛ ŋɔti ka ŋathaki ŋa ka Yisɔs ŋaŋ e ndɛ dɔma, na “Mariki, mɛnɛ yi kiŋ nde yeheeŋ dondo baŋ, wɛndaŋ woŋ sa nde yeheeŋ tuku.” 33 Naa kute Yisɔs ndɛ si bereŋ, e biya bi sɛɛ iŋ wundɛ beŋ hɛlɛŋ kɔ berina, wuŋ niyɔy niŋ nkinikiniŋ wumandiŋ ka thukuma. 34 Huna thonthiŋine ndɛ bindɛ, na “Kama mankuwe beŋ niŋ?” Bindɛ ni niŋ yaabi, na “Mariki, saa, yi be si dethiyɔkɔ.” 35 Yisɔs buluŋ manɛɛni. 36 Naa kute biya bi nde kɛndɛ beŋ ndɛ si buluŋ manɛɛni, bindɛ tepe ba dɔma, na “Hati wowathe woŋ baŋ athimo Lasarɔsi na wumandiŋ.” 37 Kɛrɛ binɔndi bohe thɔnthiŋinuwande, na “E ba hɔŋ woŋ baŋ kutɛ pɛthɛ thaaya tha ka hati lamgba woŋ thaŋ? E ndɛ sa nde punku niya ba Lasarɔsi thana tuka?” 38 Wuŋ niyɔy Yisɔs na nkinikiniŋ wumandiŋ naa ndɛ key ka yoma ka, awa yoma haŋ kuthaŋ kuna nde, e raka humandiŋ ŋatho ka biiyando kɛ ka kuthaŋ koŋ. 39 Kɛna ni Yisɔs biya beŋ yamari, na “Gbɔninaŋ raka haŋ.” Kɛrɛ Matha, wo wɛnda Lasarɔsi wo tukɛ woŋ, dome, na “Mariki, ndɛ kɔŋ nda fuŋ huru tuunuwɛ, baa wuŋ sekithe nda hura kanaŋ naa manki miŋ niŋ.” 40 Yisɔs dome ka Matha, na “E yaŋ tha hɛ yina tepe ba dɔma na mɛnɛ yi kɔŋ ni lanɛya, yi kɔŋ kutu na sɛmbɛ ba ka Masaala baŋ tɔŋinɔkɔ?” 41 Kɛna gbonino raka haŋ ka yoma haŋ. Naa gbonino huŋ, Yisɔs dethe ka thinthi ka Masaala e dɔma, na “Fandaŋ woŋ, yaŋ thiyi yina maamo, baa yi poniyaŋ yama kuiha. 42 Awa yaŋ kɔthɛŋ hɛlɛŋ ba dɔma na yi poniyeŋ yama kuiha timo tima. Kɛrɛ yaŋ tepe haŋ haŋ baŋ saathɛ ba biya bi kooye yama kuwaŋ beŋ, haliko bi be ni lanɛya ba dɔma yina ŋindɛ yama.” 43 Naa thanki nthɔŋ nɛŋ Yisɔs tɛpa, ndɛ yele thampa wuŋatɛ ka thinthi e dɔma, na “Lasarɔsi, fuŋa ka yoma haŋ.” 44 Ka thagbɛmgbɛŋ thabɛina Lasarɔsi wo tukɛ woŋ fuŋ ka yoma haŋ, thɛnkɔ mɛnɛ ŋathaki nama ŋaŋ niyɔ muyukɔi iŋ nnɛkithɛŋ kihuhɛ, awa e yaha nama haŋ niyɔ huhuitɔi iŋ thika bahuhɛ. Huna dome Yisɔs kɛnamɛŋ, na “Pɛɛkaŋ niŋ, ndɛ be key.” 45 Biya bibɔyɛ bi sɛɛ nde iŋ Mariyama beŋ ka yoma haŋ kute ba thankɛ niyɔ baŋ, awa bindɛ ni Yisɔs na lanɛya. 46 Kɛrɛ binɔndi ka bindɛ key ka biFaresini beŋ e bindɛ ka tepe bindɛ ba thanki Yisɔs niya baŋ. 47 Naa yuye huŋ bafodeni bibukuyuwɛ beŋ mɛnɛ biFaresini beŋ, bindɛ dɔŋɔy makutande ma ka Kaama woŋ e bindɛ bɔha thɔnthiŋinuwande, na “Nama miŋ siseke niya gbeeŋ ba hati wowathe woŋ baŋ wo ni bɛyiniŋ bathakaba babɔyɛ woŋ? 48 Mɛnɛ miŋ sarite niŋ e ndɛ kaa ka kɔtɔkɔy kaŋ niya wali baŋ baŋ, biya beŋ fooma bi kɔŋ niŋ ni lanɛya, awa biRomaŋ beŋ bi kɔŋ thɔɔ ka mathoŋ, awa bi kɔŋ si teeti banka ntuŋ bamandiŋ ba ka Masaala baŋ mɛnɛ siya ntuŋ baŋ fooma.” 49 Kɛrɛ wɔ wunthe ka bindɛ wo dɔma woŋ na Keyafasi; wo nde Bafode Womandiŋ woŋ ka nina hubɛina, ndɛ na dɔmɛ kɛnamɛŋ, na “Beŋ kɔita bɛy yo bɛy. 50 E beŋ kɔita ba dɔma na wu kɔŋ niyɔ hita ba wɔ wunthe ba tuka ba biya beŋ fooma, haliko siya babunthu baŋ ba be tha mɔmina fooma?” 51 Ndɛ tha tɛpi haŋ haŋ baŋ ka sɛmbɛ nama, kɛrɛ ba na niyɔy wuŋ ndɛ na nde Bafode Womandiŋ woŋ ka nina hubɛina, wuna biyɛ ndɛ kɔŋ nde ni hunabi ba dɔma na Yisɔs boheŋ ba tuka ba siya baŋ fooma. 52 Wuŋ ka hɔkɔŋ ba siya baŋ baŋ bathɔ, kɛrɛ iŋ ba kɔminande ka tha banthe fooma mpati bi ka Masaala bi thankɛ nde pankande beŋ. 53 Awa there nda ka lɔkɔ babɛina, bayahɛŋ bi ka biYusu beŋ bohe dɔŋɔ makutandeŋ ba dɛɛnka na bindɛ niŋ kore. 54 There nda nɛnɛ ka lɔkɔ babɛina, Yisɔs tha nda tɔŋinɔkɔ nagberekethe ka kuyɛkɛŋ ku ka Yudiya koŋ, awa ndɛ pɛyɛŋ kɛndɛ e ndɛ kaa ka kuyɛkɛŋ ku thuriye wula baŋ koŋ, e ndɛ ka niyɔ ka mɛti ba dɔma baŋ na Ifiremi. Kɛna key ndɛ niyɔ nda iŋ bakarandeni nama beŋ. 55 Ka lɔkɔ babɛina malɔkɔ ma nde biYusu beŋ doŋe ba siyuwa na puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti thuriye. Awa biya bibɔyɛ ŋaye nde ka mɛtiŋ bahɛna baŋ mɛnɛ ka dumgbuiŋ baŋ e bindɛ kɔtɔkɔ ka Yɛrusalɛmi, ba ka yenke mɛthinɔkɔ ka Masaala saanuŋ malɔkɔ maŋ ba tɛŋa. 56 Awa biya beŋ bohe deethuwa Yisɔs na. Naa key bindɛ thiŋ ka banka bamandiŋ ba ka Masaala baŋ, bindɛ bohe thɔnthiŋinuwande wunthe iŋ ntɔ nama, na “Nama siyuwe yi? E yi siyi ba dɔma na ndɛ kɔŋ see ka mathuŋande maŋ?” 57 Kɛna ni bafodeni bibukuyuwɛ beŋ mɛnɛ biFaresini beŋ yamari biya beŋ ba dɔma, na wɔ yo wɔ wo kɔthɛ ka Yisɔs, wundɛ be bindɛ tepe, haliko bi be niŋ bohi.

12

1 Yisɔs key ka mɛti ba ka Bɛthani, mɛti ba ka Lasarɔsi wo ŋayaŋ nde wundɛ ka tuka haŋ woŋ, naa pɛyɛ wuŋ ŋalaŋ ŋasɔŋ-kunthe biYusu beŋ ba dɔŋɔ ba siyuwa malɔkɔ ma puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti. 2 Naa tɛŋ wundɛ kɛndɛ, ndɛ yehiniyo muthɔma muhɔnkɔlɛ e Matha niŋ muŋ katiyɛ. Lasarɔsi wunthe na nde ndɛ ka bi dɔŋɔy ka thɔma haŋ beŋ iŋ Yisɔs. 3 Kɛna sekithe Mariyama yoki hunthe hu thiŋɛ mayɔ ma thimɔy huru awa e mɛŋ nde hɛlɛŋ niyɔ ma kahɛ mɔlɔŋ. Ndɛ see mɛŋ koŋe Yisɔs na ka ŋathaki nama ŋaŋ, e ndɛ ŋɛŋ puuthuwa iŋ bɔɔyɛ nama bu ka yaha buŋ. Awa kɛna see huruthimɔy hu ka mayɔ maŋ maŋ haŋ gbanthande ka banka baŋ fooma. 4 Huna dome wunthe ka bakarandeni nama beŋ wo dɔma Yudasi Isakariyɔti, wo dɛɛnkɛ nde ba niya Yisɔs na gbɔŋ woŋ, na 5 “Mbɛ hu tha mayɔ ma thimɔy huru maŋ maŋ baŋ niyo gbɔŋ? Ma kɔŋ nde tɛŋ bɛrɛ ba kuthunkuŋ ku ka wɔ wunthe ka nina haŋ. Kɔbiri wobɛina kɔŋ nde dunkuna ka bamɔnɛŋ beŋ.” 6 Kɛrɛ atɛpɛ ma hɔkɔŋ nɛŋ, wuŋ ka ba dɔma na ndɛ kiŋ nde iŋ nkinikiniŋ ka thukuma ba bamɔnɛŋ beŋ, kɛrɛ ba na wuŋ ndɛ na kɔsɔŋ kɔbiri wo nde bindɛ kutu woŋ, awa e ndɛ bara ba kɔ tuwe kɔbiri woŋ baŋ. Wuna biyɛ ndɛ kɔŋ nɛŋ tɛpi. 7 Kɛrɛ Yisɔs tepe, na “Penekeŋ hati woyɛrɛmɛ woŋ baŋ. Wundɛ kɔsinɛŋ wu iŋ wundɛ wuŋ ba yama mankuwe. 8 Beŋ kiŋ iŋ bamɔnɛŋ beŋ timo tima, kɛrɛ beŋ sa niyɔ iŋ yaŋ timo tima.” 9 Naa yuye biya bibɔyɛ ba Yisɔs niyɔ ka mɛti ba ka Bɛthani, bindɛ key kɛndɛ. Wuŋ ka hɔkɔŋ ba ka kuta Yisɔs na nagbɛti ye, kɛrɛ iŋ ba hɛlɛŋ ka detha Lasarɔsi na wo ŋayaŋ nde Yisɔs ka tuka haŋ woŋ. 10 Bɛna ka lɔkɔ babɛina sɛsi na bafodeni bibukuyuwɛ beŋ ba dɛɛnka ba kɔra Lasarɔsi na, 11 baa biYusu bibɔyɛ pɛyɛŋ bindɛ e bindɛ niya Yisɔs na lanɛya. 12 Ka gbɛɛŋ wo yemɛ woŋ, sɛthɛ bamandiŋ ba sɛɛ nde ka Yɛrusalɛmi ka penkitiye naa bindɛ siyi malɔkɔ ma puntuyando nde mbembɛŋ namɛŋ beŋ ka Iyipiti yuye ba Yisɔs kɔ saa ka Yɛrusalɛmi. 13 Huna thalinke bindɛ rɔnkɔiŋ e bindɛ gbankita Yisɔs na ka gboŋɛŋ ka e bindɛ kɔ yɛla thampa, na “Miŋ gbuŋunuwɛŋ Masaala na. Thaduba tha kiŋ ka wo see ka keŋ ku ka Mariki woŋ koŋ. Ndɛ na Gbaku wo ka Isirɛli woŋ.” 14 Kɛna kute Yisɔs mbapu wohatiyɛ e ndɛ niŋ tutɔ, nɔŋ na gbalo nde wuŋ na ka magbali ma ka Masaala maŋ na ba dɔma, na 15 “Baŋ payɔ, bendo biya bi ka Yɛrusalɛmi, mɛti ba ka kusɛri ku dɔma koŋ na Saiyɔŋ. Gbaku ndeŋ woŋ na see woŋ wo tutɔy ka mbapu wohatiyɛ.” 16 Kɛrɛ bakarandeni nama beŋ tha wuŋ peŋ hakiyando. Yɔkɔŋ naa see Yisɔs yenthiŋina ka thinthi ka tha ka yiki bamandiŋ, kɛna siyuwe ntiŋ bindɛ thampɛŋ thaŋ thaŋ tha gbalo nde thaŋ ka magbali ma ka Masaala maŋ ba wuŋ nɛŋ kɔ niiye ba wundɛ, awa wuna niyɔy wuŋ gbeeŋ ba wundɛ. 17 Biya bi nde iŋ Yisɔs beŋ ndɛ si thiyi Lasarɔsi na ba fuŋa ka yoma haŋ e ndɛ niŋ ŋayina ka tuka haŋ, bindɛ bina niyiyɛ maseri ba bɛy bathakaba baŋ baŋ ba thankɛ niyɔ baŋ. 18 Sɛthɛ bamandiŋ baŋ key ka gboŋɛŋ ka ba niŋ ka gbankita, baa bindɛ yuye nde ka biya bihɛna ba ndɛ niya bɛy bathakaba baŋ baŋ. 19 Huna dome biFaresini beŋ ka wunthe iŋ ntɔ nama, na “Miŋ sa punku niya bɛy yo bɛy. Dethaŋ hɛ, biya beŋ fooma bi si niŋ yeŋ.” 20 Biya binɔndi bi ka siyani bahɛna baŋ kiŋ nde ka mateete ma ka biya bi kaayɛ ka Yɛrusalɛmi beŋ ka niya kubatho malɔkɔ ma ka mathuŋande mamandiŋ maŋ. 21 Beŋ beŋ baŋ bina kaayɛ nde ka Filipi, wo ŋaye ka mɛti ba ka Bɛthɛseda ba ka kuyɛkɛŋ ku ka Kalili. Bindɛ key dɔŋ kɛnama, na “Yaandi hɛmɔŋ, miŋ thimoŋ ba kutuyɔkɔ Yisɔs na.” 22 Huna kaaye Filipi ka Anduru ka ba niŋ ka tepe. Naa tepe ndɛ niŋ, bindɛ biye key tepe Yisɔs na. 23 Yisɔs dome kɛnamɛŋ, na “Lɔkɔ baŋ tɛŋ ntiŋ ba Hati ka Wɔ woŋ niyo yiki wumandiŋ. 24 Yaŋ kɔŋ bena tepe nɔndi baŋ, yɔkɔŋ thaa hunthe ŋɔti ka kupati koŋ e huŋ tuka e hooya haŋ muka, saanuŋ huŋ ntiŋ kɔ tima. Mɛnɛ huŋ tha tuku, huŋ kɔŋ niyɔ thaa hunthe thuŋ. 25 Wɔ yo wɔ wo thimo tindɛ sii nama baŋ wumandiŋ, ndɛ kɔŋ bɛŋ piriŋiŋ. Awa wɔ yo wɔ wo tha tindɛ thimo sii nama baŋ kafaydo, ndɛ kɔsɔŋ bɛŋ ba ka kɔtɔkɔy nɔŋ. 26 Wɔ yo wɔ wo thimo ba yama niyiyɛ wali, yɔkɔŋ ndɛ be yama yeŋ. Wuna wo yama niyiyɛ wali woŋ nɔŋ niyɔ ka yaŋ niyɔ ka. Awa Fandaŋ woŋ kɔŋ thiyi yiki wo yama niyiyɛ wali woŋ.” 27 Yisɔs key ka kɔtɔkɔy ba tɛpa, na “Ka lɔkɔ baŋ baŋ, thukuma niŋ haŋ hu kɔŋ yama ni thɔrɔ wumandiŋ. Kɛrɛ nama yaŋ ni? E ba hɔŋ yaŋ be dɔŋ na ‘Fandaŋ woŋ, yaandi niya ba wakathi wo ka nambara baŋ woŋ yama buthurɔ?’ Ade, huna see yaŋ kafaydo haliko yaŋ be niyɔ nambara ka lɔkɔ baŋ baŋ. 28 Yaandi, Fandaŋ woŋ, niya keŋ kukɛnda koŋ yiki.” Kɛna fuŋ thampa maŋaye ka ariana tha tɛpɛ ba dɔma, na “Yaŋ thanki nda kuŋ niya yiki wumandiŋ, awa yaŋ kɔŋ ntiŋ hɛlɛŋ kuŋ ni yiki.” 29 Naa yuye sɛthɛ bamandiŋ ba kɔɔyɛ nde kɛndɛ kuwaŋ baŋ thampa thaŋ thaŋ baŋ, binɔndi ka bindɛ dome, na “Nthanka kina hɔrɛ naŋ naŋ baŋ.” Kɛrɛ binɔndi dome, na “Ade, maleka na gbonkiye niŋ.” 30 Kɛrɛ Yisɔs dome kɛnamɛŋ, na “Thampa thaŋ thaŋ baŋ tha fuŋ ba yaŋ; thɛŋ fuŋ saathɛ ba kendeŋ. 31 Ka lɔkɔ baŋ baŋ na Masaala konsiŋine kafay woŋ, awa ka lɔkɔ baŋ baŋ na Masaala kanthi bakɛrɛŋ wo ka faido woŋ. 32 Kɛrɛ naa yaŋ ŋatino ka thinthi kafaydo, yaŋ kɔŋ yoseke biyamɛti fooma ba saa kiyaŋ.” 33 Yisɔs kɔŋ nde tɛpi haŋ haŋ baŋ ba tɔŋina tuka siiya hu bohe ndɛ ba tuka haŋ. 34 Kɛna dome sɛthɛ baŋ kɛnama, na “Kɛrɛ miŋ yuye ka Siraŋ ba ka Musa baŋ ba dɔma na wo dɔma Banikisi woŋ sa tuku hali. Mbu nama hɛlɛŋ yi dɔŋ na Hati ka Wɔ woŋ boheŋ ba ŋatino ka thinthi? Nkaana Hati ka Wɔ woŋ baŋ?” 35 Yisɔs ni bindɛ yaabi ba dɔma, na “Beŋ kiŋ hintiŋ iŋ waŋ baŋ ba wuthurɔy. Bɛna, kaandeŋ ka waŋ babɛina naa hintiŋ beŋ iŋ bɛŋ na, wuna sa huntuma haŋ ni ba beŋ pirinka. Wɔ wo kaande ka huntuma haŋ kɔita ka ndɛ key. 36 Naa hintiŋ beŋ iŋ waŋ baŋ na, niyaŋ bɛŋ lanɛya wuna beŋ niyɔ biya bi ka waŋ baŋ.” Na thanki nthɔŋ nɛŋ Yisɔs gbonkiya nafeu, ndɛ piriŋe biya beŋ nayeŋ. 37 Kɛrɛ hali na thanki nde Yisɔs niya bɛyiniŋ bathakaba ka thaaya namɛŋ na, halisa bindɛ tha niŋ ni lanɛya. 38 Wuna hu tepe nde banabi woŋ Aisaya haŋ niyɔ nɔndi. Aisaya tepe nde ba dɔma, na “Mariki, mbɛ niyɛ lanɛya huseri hu tepe miŋ haŋ? Ka nkaana Mariki woŋ tɔŋɔŋ sɛmbɛ nama baŋ?” 39 Bɛna, bindɛ tha punku niya lanɛya hali, baa Masaala tepe maŋaye ka Aisaya, na 40 “Yaŋ thanki nde bindɛ manka thaaya e bindɛ kahinuwa thathukuma, wuna sa bindɛ kutu e bindɛ hakiyando bɛy yo bɛy ka thathukuma namɛŋ thaŋ e bindɛ saa kiyaŋ do haliko yaŋ be bindɛ puy.” 41 Aisaya tepe haŋ haŋ baŋ baa ndɛ kute nde yiki ba ka Yisɔs baŋ; wuna biyɛ ndɛ kɔŋ nɛŋ tɛpi. 42 Hali na niyɔy nde wuŋ na binɔndi ka bayahɛŋ bi ka biYusu beŋ bi ni nde lanɛya ka Yisɔs. Kɛrɛ bindɛ tha ni na wuŋ kothiyo, baa bi kɔŋ nde payɔ biFaresini beŋ thampo bi kɔŋ nde nɔŋ kantha ka banka bathuŋuyande ba ka dina namɛŋ woŋ baŋ. 43 Bi yameŋ nde thimo ba gbuŋunuwo iŋ biyamɛti ayaŋ ba Masaala bindɛ gbuŋunuwa. 44 Kɛna ŋataŋ Yisɔs ka gbonkiya ba dɔma, na “Wɔ yo wɔ wo yama ni lanɛya, yaŋ kutɛ ni ndɛ lanɛya hɔkɔŋ nagbɛti ye, kɛrɛ ndɛ ni hɛlɛŋ lanɛya wo ŋindɛ yama woŋ. 45 Awa wɔ yo wɔ wo yama kutu, ndɛ kɔŋ kutu wo ŋindɛ yama woŋ. 46 Yaŋ see kafaydo nɔŋ ka mathɔyande ma ka waŋ, huna wɔ yo wɔ wo yama ni lanɛya, ndɛ sa pɛyɔ ka huntuma haŋ. 47 Awa mɛnɛ wɔ yo wɔ yuye thampa niŋ thaŋ e ndɛ thɛŋ thana yɛrɔkɔ, yaŋ sa niŋ kɔnsɔŋɔŋ, baa yaŋ tha see ka kɔnsiŋina biya bi kafaydo, kɛrɛ yaŋ see ka niya bindɛ kisi. 48 Awa wɔ yo wɔ wo tha yama yɛrɔkɔ, e ndɛ hɛlɛŋ thana yɛrɔkɔ thampa niŋ thaŋ, wundɛ kɔŋ kɔnsiŋina. Thampɛŋ tha yaŋ gbonkoy thaŋ thɛna nɔŋ niŋ kɔnsɔŋɔŋ ka malɔkɔ mamankɛ maŋ. 49 Nɔndi bɛna yaŋ gbonkoy baŋ, baa yaŋ gbonkiyeta ka sɛmbɛ bakiyaŋ. Kɛrɛ yaŋ kɔŋ gbonkoy ka sɛmbɛ ba ka Fandaŋ wo ŋindɛ yama woŋ na niyɛ yamari ba yaŋ tɛpa hu yaŋ gbonkoy haŋ. 50 Awa yaŋ kɔthɛŋ ba dɔma na yamari nama woŋ kɔŋ sisi sii ba kɔy yo kɔy ka biyamɛti. Wuna biyɛ, hu nunkunɔkɔi nde yama Fandaŋ woŋ ba yaŋ si tɛpa, huna yaŋ gbonkoy haŋ.”

13

1 Wuŋ tɛŋ lɔkɔ ba biYusu beŋ doŋe ba siyuwa malɔkɔ ma puntuyando nde mbembɛŋ namɛŋ beŋ iŋ maleka wo nde katitɔkɔ tuka haŋ woŋ ka Iyipiti. Ka lɔkɔ babɛina Yisɔs kɔthɛŋ nde nda ba lɔkɔ nama baŋ tɛŋa ba wundɛ peyene kafaydo ba duwa ka Fandama ka. Kɛrɛ ndɛ thimoŋ nde wumandiŋ bikɛnama beŋ kafaydo haaŋ ka mapeye ma ka sii nama baŋ kafaydo. 2 Yisɔs iŋ bakarandeni nama beŋ dɔŋɔy ka thɔma mahɔnkɔlɛ. Ka lɔkɔ babɛina Wayi Womandiŋ woŋ thanki nde nda wuŋ thiya ka thukuma hu ka Yudasi haŋ wo fandama wo dɔma Saimɔŋ Isakariyɔti woŋ ba niya Yisɔs na gbɔŋ ka hadeni nama beŋ. 3 Kɛrɛ Yisɔs kɔthɛŋ nagberekethe ba dɔma na Fandama woŋ ka ariana thanki nde nda niŋ thiya ntha yo ntha ka yɔnkɔ. Awa ndɛ kɔthɛŋ ba dɔma na ka Masaala ŋaye na wundɛ, awa kɛna hɛlɛŋ ndɛ duu ka kaa. 4 Kɛna ŋaye Yisɔs ka bindɛ thɔŋ ka e ndɛ ŋuta yaba nama ba ka thinthi baŋ. Wundɛ deŋe bɛŋ kuwaŋ e ndɛ pitha thika bayete. 5 Ndɛ sase mandi ka ntha, e ndɛ bɔha looka ŋathaki ŋa ka bakarandeni nama beŋ ŋaŋ e ŋɛŋ kɔ puuthuwa iŋ thika ba pithe ndɛ baŋ. 6 Naa tɛŋ ndɛ ka Saimɔŋ Pita, ndɛ thɔnthɔŋɔŋ Yisɔs na, na “Mariki, e yi kiŋ ba looka ŋathaki niŋ ŋaŋ?” 7 Yisɔs ni niŋ yaabi ba dɔma, na “Yi sa hɛ metho hu yaŋ wuŋ niye, kɛrɛ yi kɔŋ wuŋ manke nɔŋ metho.” 8 Kɛrɛ Pita dome kɛnama, na “Ba yama looki ŋathaki.” Yisɔs dɔma kɛnama, na “Mɛnɛ yaŋ sa looki ŋathaki nda ŋaŋ, yi sa nda niyɔ bakarandeŋ wokiyaŋ.” 9 Kɛna dome Pita, na “Mariki, ba yama looki ŋathaki ŋɛŋ ŋathɔ, kɛrɛ looka hɛlɛŋ thɛnkɔ niŋ thaŋ mɛnɛ yaha niŋ haŋ.” 10 Huna dome Yisɔs kɛnama, na “Wɔ yo wɔ wo thankɛ biye, ndɛ thimota nda ba biye. Yɔkɔŋ ba nda looka ŋathaki nagbɛti. Bendo mɛthɛ fooma bina beŋ, yɔkɔŋ wɔ wunthe na ba mɛthi ka beŋ.” 11 Yisɔs kɔthɛŋ nda nagberekethe wo ba niŋ niya gbɔŋ woŋ; wuna biyɛ ndɛ kɔŋ tɛpi, na “Beŋ fooma kutɛ bimɛthɛ.” 12 Naa thanki Yisɔs looka ŋathaki namɛŋ ŋaŋ, ndɛ duu hɛlɛŋ ka thɔɔ yaba nama baŋ e ndɛ ka dɔŋɔ ka doŋe hɛ ndɛ ka thebulu woŋ ka. Ndɛ thɔnthɔŋɔŋ bindɛ ba dɔma, na “E beŋ kɔthɛŋ wu ni yaŋ bena wuŋ? 13 Beŋ kɔŋ yama thiyi na karimɔkɔ iŋ Mariki. Hunɔndi huna yaathi, baa nɛna yaŋ gbeeŋ. 14 Mɛnɛ yaŋ, yando Mariki iŋ karimɔkɔ ndeŋ woŋ looki ŋathaki ndeŋ ŋaŋ, kɔthɔŋ ba dɔma na beŋ hɛlɛŋ nɛŋ gbeeŋ beŋ boheŋ ba lookuwande ŋathaki. 15 Mathɔyande ma beŋ ba yema mɛna dunkune yaŋ bena maŋ, ba beŋ niya wu thanki yaŋ bena niya wuŋ. 16 Yaŋ kɔŋ bena tepe nɔndi baŋ: bawali woŋ yameta ba mariki nama woŋ. Awa baseri o ka wo yamɛ ba wo ŋindɛ niŋ woŋ. 17 Ka tete beŋ thanki kɔthɔ bɛyiniŋ baŋ baŋ fooma. Mɛnɛ beŋ ni bɛŋ, beŋ kɔŋ niyɔ iŋ mayehitɔkɔ mamandiŋ. 18 “Yaŋ tepeta haŋ haŋ baŋ ba beŋ fooma yo. Yaŋ kɔthɛŋ bi thanki yaŋ yɛtha beŋ. Kɛrɛ yɔkɔŋ magbali ma ka Masaala maŋ niyɔy nɔndi ma tɛpɛ maŋ ba dɔma, na ‘Wɔ wo thɔŋ yaŋ nthɔŋ ka tha banthe woŋ, wɔ bɛina na ŋaye ba yama dekiya.’ 19 Yaŋ kɔŋ bena yenke tepe haŋ haŋ baŋ saanuŋ wuŋ ba niyɔ. Naa wuŋ niyɔy, beŋ be ni lanɛya ba dɔma na yama wɔ kuhantheŋ woŋ. 20 Yaŋ kɔŋ bena tepe nɔndi baŋ, wɔ wo yɛrɔkɔ wɔ o wɔ wo yaŋ ŋindi woŋ, wɔ bɛina yɛrɔkɔy yama hɛlɛŋ nɛŋ. Awa wɔ yo wɔ wo yɛrɔkɔy yama, wɔ bɛina yɛrɔkɔy wo ŋindɛ yama woŋ.” 21 Naa thanki nthɔŋ nɛŋ Yisɔs gbonkiya nafeu, wuŋ niyɔy niŋ nkinikiniŋ wumandiŋ. Kɛna tepe ndɛ bindɛ nagberekethe ba dɔma, na “Yaŋ kɔŋ bena tepe nɔndi baŋ, wunthe ka beŋ kɔŋ yama ni gbɔŋ ka hadeni niŋ beŋ.” 22 Kɛna bohe bakarandeni beŋ dethande, baa wuŋ niyɔy bindɛ kɔnthɔhili wumandiŋ ba wo Yisɔs siseke dɔma ka bindɛ. 23 Ka lɔkɔ babɛina, bakarandeŋ wo yame nde Yisɔs thimo woŋ doŋeŋ Yisɔs na kuwaŋ e ndɛ niŋ tɔpita wuyɔhɔy. 24 Huna dome Saimɔŋ Pita ka wo tɔpitɛ Yisɔs na woŋ, na “Thɔnthiŋina hɛ niŋ, ba nkaa ma gbonkoy.” 25 Kɛna yame bakarandeŋ woŋ thuriye Yisɔs na wuyɔhɔy e ndɛ niŋ thɔnthiŋina, na “Mariki, nkaana yi dɔŋ?” 26 Yisɔs ni niŋ yaabi, na “Wo nthɔŋ yaŋ dunkune kutoŋ kusakɔy ku yaŋ yɔthɔŋɔti ka buyaŋ buŋ koŋ woŋ, ndɛ na.” Kɛna yothiŋite Yisɔs kutoŋ kusakɔy koŋ ka buyaŋ buŋ e ndɛ kuŋ dunkune Yudasi na, hati ka Saimɔŋ Isakariyɔti woŋ. 27 Naa bohe nthɔŋ Yudasi kutoŋ koŋ koŋ baŋ, ka thagbɛmgbɛŋ thabɛina Sithani thɔɔyɛ ka thukuma nama haŋ. Kɛna dome Yisɔs ka Yudasi, na “Kaa nda ka niya ba yi ba niya baŋ yako-yako.” 28 Wɔ yo wɔ ka bindɛ bi dɔŋɔy iŋ Yisɔs ka thebulu woŋ beŋ tha metho hu tepe Yisɔs ka Yudasi haŋ. 29 Binɔndi ka bakarandeni beŋ siyi ba dɔma na ba na niyɔy wuŋ Yudasi na kɔsɔŋ kɔbiri wo bindɛ kutu woŋ, wuna biyɛ Yisɔs kɔŋ niŋ tepe ba ndɛ be ka boy mu thimo bindɛ ba thɔma humandiŋ haŋ, maa ba ka dunkune bamɔnɛŋ beŋ kɔbiri. 30 Yudasi bohe kutoŋ koŋ e ndɛ kɔ kaa. Huyɛ bɛna nde ka lɔkɔ babɛina. 31 Naa key nthɔŋ Yudasi, Yisɔs dome ka bakarandeni bihɛna beŋ, na “Lɔkɔ baŋ tɛŋ ntiŋ ba yiki ba ka Hati ka Wɔ woŋ toŋineke baŋ. Ka lɔkɔ baŋ baŋ na ntiŋ yiki ba ka Masaala baŋ toŋineke maŋaye ka Hati ka Wɔ woŋ. 32 Awa naa yiki ba ka Masaala baŋ tɔŋinɔkɔy maŋaye ka Hati ka Wɔ woŋ, bɛna Masaala gbeeŋ ndɛ kɔŋ tɔŋɔŋ yiki ba ka Hati ka Wɔ woŋ baŋ. Awa ndɛ kɔŋ wuŋ ni ka wuthurɔy wuŋ baŋ. 33 Mpatiŋ beŋ, wuŋ pɛyɛ wuthurɔy yaŋ ba niyɔ iŋ beŋ. Beŋ kɔŋ dethi ba yaŋ, kɛrɛ yaŋ kɔŋ bena tepe hu tepe nde yaŋ bayahɛŋ bi ka biYusu beŋ haŋ, na ‘Beŋ sa punku kaa ka yaŋ key ka.’ 34 Ka tete yaŋ kɔŋ bena dunkune siraŋ baŋama: Thimiyandeŋ. Nɔŋ na thimo nthɔŋ yaŋ bena na, nɛna beŋ ba thimiyande. 35 Mɛnɛ beŋ thimiyande, wɔ yo wɔ kɔŋ kɔthɔ ba dɔma na bakarandeni niŋ bina beŋ.” 36 Saimɔŋ Pita thɔnthɔŋɔŋ niŋ, na “Mariki, kama yi key?” Yisɔs ni niŋ yaabi, na “Yi sa punku yama yema ka yaŋ key ka. Kɛrɛ yi kɔŋ yama manke yema kɛndɛ.” 37 Huna thonthiŋine niŋ Pita, na “Mariki, mbɛ hu sa yaŋ yina punku yeme tete? Yando kɔsinɔkɔy nda ba tuka ba yi.” 38 Yisɔs ni niŋ yaabi ba dɔma, na “E yi kɔsinɔkɔy hunɔndi yaathi ba ka tuka ba yaŋ? Yaŋ kɔŋ yina tepe nɔndi baŋ: saanuŋ koki woŋ ba kokira, yi kɔŋ tɛpi dɔŋɔ kataati ba dɔma na yi kɔita yama.”

14

1 Yisɔs tepe bakarandeni nama beŋ, na “Baŋ ni ba thathukuma ndeŋ thaŋ niya yaagba. Niyaŋ Masaala na lanɛya, awa e beŋ hɛlɛŋ yama niya lanɛya. 2 Makonkoiŋ mabɔyɛ ma kiŋ ka banka ka Fandaŋ ka. Awa yaŋ kɔŋ key ba ka kɔsinɔkɔ ka tha ba beŋ. Yaŋ sa nde nɛŋ bena tepe mɛnɛ nɛŋ kutɛ huŋ. 3 Naa yaŋ thanki ka kɔsinɔkɔ ka tha ba beŋ, yaŋ kɔŋ hɛlɛŋ bena seeyɛ ba niyɔ iŋ yaŋ. Wuna beŋ niyɔ ka yaŋ niyɔ. 4 Beŋ kɔthɛŋ gboŋa baŋ nagberekethe ba beŋ yeŋ baŋ ba kaa kɛndɛ.” 5 Thɔmɔsi thɔnthɔŋɔŋ niŋ, na “Mariki, miŋ siseketa kɔthɔ ka yi key gbeeŋ; bɛna nama miŋ kothiye gboŋa baŋ ba kɛndɛ kaa?” 6 Yisɔs ni niŋ yaabi ba dɔma, na “Yama gboŋa baŋ, nɔndi baŋ, mɛnɛ sii baŋ. Wɔ sa key ka Fandaŋ ka yɔkɔŋ afuŋe kiyaŋ. 7 Ka tete beŋ thanki yama kɔthɔ, awa beŋ kɔŋ hɛlɛŋ kɔthɔ Fandaŋ na. Maŋaye nda hɛ beŋ kɔthɛ niŋ, awa beŋ thanki nda niŋ kutuyɔkɔ.” 8 Filipi dome kɛnama, na “Mariki, toŋine mina Fanda na wuna miŋ thɛbɛŋ thathukuma.” 9 Yisɔs ni niŋ yaabi e dɔma, na “Filipi, e ti thɔkɔti nɔŋ yaŋ niyɔ iŋ beŋ te haaŋ hɛ beŋ kɔita yama? Wɔ yo wɔ wo kutɛ yama, ndɛ thanki kuta Fandaŋ na. Nama hɛlɛŋ yi tɛpi ba dɔma, na ‘Toŋine mina Fanda na’? 10 Filipi, e yi niyeta lanɛya ba dɔma na Fandaŋ woŋ iŋ yaŋ bɔhande nɔŋ wɔ wunthe? Thampɛŋ tha tepe yaŋ bena thaŋ tha ŋaye kiyaŋ; Fandaŋ wo bɔhande iŋ yaŋ woŋ, ndɛ na niyɛ wali nama baŋ. 11 Niyaŋ yama lanɛya ba na tepe yaŋ ba dɔma na Fandaŋ woŋ iŋ yaŋ bɔhande nɔŋ wɔ wunthe. Mɛnɛ huŋ kutɛ, niyaŋ nda lanɛya baa beŋ kute bɛyiniŋ ba thanki yaŋ niya baŋ. 12 Yaŋ kɔŋ bena tepe nɔndi baŋ: wɔ yo wɔ wo yama ni lanɛya, ndɛ kɔŋ ni bɛyiniŋ ba ni yaŋ baŋ. Awa ndɛ kɔŋ hintiŋ nthɔŋ yaŋ niya bɛyiniŋ bayamɛ, baa yaŋ kɔŋ key ka Fandaŋ ka. 13 Awa yaŋ kɔŋ bena niyiyɛ bɛy yo bɛy ba beŋ thɔnthɔŋɔŋ kaŋ hina yama keŋ, wuna yiki ba ka Fandaŋ woŋ baŋ tɔŋinɔkɔ maŋaye kiyaŋ, Hati nama woŋ. 14 Mɛnɛ beŋ hiŋ keŋ niŋ koŋ ka thɔnthiŋina yama ba bɛy yo bɛy, yaŋ kɔŋ bena bɛŋ niyiyɛ. 15 “Mɛnɛ beŋ athimo yama, beŋ kɔŋ mɛy yamariŋ niŋ baŋ. 16 Yaŋ kɔŋ thɔnthɔŋɔŋ Fandaŋ na, awa ndɛ kɔŋ bena dunkune Bamase wohɛna wo si niyɔ iŋ beŋ kɔy yo kɔy. 17 Bamase wobɛina na Yina wo si tɔŋɔŋ nɔndi baŋ ba Masaala. Biya bi kafaydo beŋ sa kiŋ punku yɛrɔkɔ ka thathukuma namɛŋ thaŋ, baa bindɛ sa niŋ punku kuta maa ba niŋ kɔthɔ. Kɛrɛ beŋ kɔthɛŋ niŋ, baa ndɛ niyɔy iŋ beŋ, awa ndɛ kiŋ kaake kendeŋ. 18 “Bɛna naa yaŋ key, beŋ sa pɛyɔ beŋ bintheŋ; yaŋ kɔŋ hɛlɛŋ duu ka saa kendeŋ do. 19 Wuŋ pɛyɛ wuyetenaŋ biya bi kafaydo beŋ sa nɔŋ nda yama kutu, kɛrɛ beŋ kɔŋ yama kutu. Baa yaŋ kiŋ iŋ sii, beŋ kɔŋ hɛlɛŋ niyɔ iŋ sii. 20 Naa lɔkɔ babɛina tɛŋ, beŋ kɔŋ kɔthɔ ba dɔma na yaŋ abɔhande iŋ Fandaŋ woŋ, awa e beŋ bɔhande iŋ yaŋ, nɔŋ na bɔhande nthɔŋ yaŋ iŋ beŋ na. 21 “Wɔ yo wɔ wo yɛrɔkɔy yamariŋ niŋ baŋ, awa e ndɛ bɛŋ putuyɔ, wɔ bɛina na thimo yama woŋ. Fandaŋ woŋ kɔŋ thimo wɔ yo wɔ wo yama thimo, awa yaŋ hɛlɛŋ nɛnɛ yaŋ kɔŋ niŋ thimo e yaŋ niŋ tɔŋinɔkɔ.” 22 Huna thonthiŋine niŋ Yudasi wohɛna, Yudasi Isakariyɔti kutɛ ye, na “Mariki, nama yi toŋineke mina gbeeŋ, kɛrɛ wuŋ ka ka biya bi kafaydo beŋ?” 23 Yisɔs ni niŋ yaabi, na “Wɔ yo wɔ wo thimo yama, ndɛ kɔŋ yɛrɔkɔ mathanani niŋ maŋ. Fandaŋ woŋ kɔŋ thimo wɔ bɛina, awa Fandaŋ woŋ iŋ yaŋ miŋ kɔŋ see kɛnama e miŋ si niyɔ iŋ wundɛ. 24 Wɔ yo wɔ wo sa yama thimo, ndɛ sa yɛrɔkɔ mathanani niŋ maŋ. Awa mathanani ma thanki beŋ yuyɛ maŋ mathanani makiyaŋ kutɛ. Mɛŋ see maŋaye ka Fandaŋ wo ŋindɛ yama woŋ. 25 “Bɛyiniŋ baŋ baŋ fooma thanki na yaŋ bena tepe naa hintiŋ yaŋ iŋ beŋ. 26 Bamase wo dɔma Yina wo ka Masaala woŋ, wo Fandaŋ woŋ ŋindi ka keŋ kukiyaŋ koŋ woŋ, ndɛ kɔŋ bena si thanani bɛyiniŋ fooma awa e ndɛ niya ba beŋ siyuwa bɛyiniŋ fooma ba thanki yaŋ bena tepe baŋ. 27 “Mathɛbɛ mɛna peye yaŋ bena; mathɛbɛ niŋ maŋ siiya mɛna dunkune yaŋ bena. Yaŋ sa dunkuŋ mathɛbɛ nɔŋ na kafay woŋ dunkune siiya na ye. Baŋ ni thathukuma ndeŋ thaŋ yaagba; baŋ payɔ. 28 Beŋ thanki yuyɛ nagberekethe yaŋ si bena tepe, na ‘Yaŋ kɔŋ key napooŋ, kɛrɛ yaŋ kɔŋ hɛlɛŋ see kendeŋ do.’ Mɛnɛ beŋ athimo nde yama, beŋ kɔŋ nde yehitɔkɔ ba na yaŋ see ka kaa ka Fandaŋ ka; baa ndɛ yameŋ ba yaŋ kaye-kaye. 29 Yaŋ yenke bena tepe bɛyiniŋ baŋ baŋ saanuŋ bɛŋ ba niyɔ. Huna naa bɛŋ niyɔy, beŋ be ni lanɛya. 30 Yaŋ sa nda gbonkoy iŋ beŋ wunambɛ, baa bakɛrɛŋ wo kafaydo woŋ kooyeŋ gboŋa ba saa. Ndɛ sa yama punku tuta sɛmbɛ, 31 kɛrɛ yɔkɔŋ biya bi kafaydo beŋ kɔthɛ ba dɔma na yaŋ athimo Fandaŋ na; awa wuna biyɛ yaŋ niya bɛyiniŋ fooma ba ni Fandaŋ woŋ yama yamari baŋ. “Saaŋ, miŋ beŋ ŋaye dondo baŋ.”

15

1 Yisɔs key ka kɔtɔkɔy ba tɛpa, na “Yama kuyeŋ kugbeeŋ ku tiŋ mutiŋ muyɔhɔy muŋ, awa Fandaŋ woŋ na bathuu woŋ. 2 Ndɛ kɔŋ thalanki bathala yo bathala wo thahi kiyaŋ wo sa tiŋ. Awa ndɛ kɔŋ thɛmɛni kufɛŋ ndo kufɛŋ kunɛnɔy ku ka bathala yo bathala wo tiŋ, wuna ndɛ niyɔ natharaŋ e ndɛ punka tima mutiŋ mubɔyɛ-bɔyɛ. 3 Mathanani ma dunkune yaŋ bena maŋ thanki bena mɛthina natharaŋ. 4 Kaaŋ ka kɔtɔkɔy ka kahita kiyaŋ haŋ, awa yaŋ kɔŋ key ka kɔtɔkɔy ba kahita kendeŋ. Bathala woŋ sa punku tima ka yɛthɛ nama; naa yi kute ndɛ si tiŋ yɔkɔŋ ndɛ kahite ka kuyeŋ koŋ. Nɛna hɛlɛŋ beŋ, beŋ sa punku sisa mutiŋ yɔkɔŋ beŋ kahite kiyaŋ. 5 “Yama kuyeŋ koŋ, awa bena bathalɛŋ beŋ. Wɔ yo wɔ wo key ka kɔtɔkɔy ba kahita kiyaŋ, awa e yaŋ kahita kɛnama, wɔ bɛina kɔŋ tiŋ mutiŋ mubɔyɛ. Beŋ sa punku niya bɛy yo bɛy mahɛŋ ma kiyaŋ. 6 Wɔ wo sa key ka kɔtɔkɔy ba kahita kiyaŋ, ndɛ kɔŋ kathiŋa kiyaŋ nɔŋ na nthɔŋ bathala woŋ thoŋa na e ndɛ thitha; bathalɛŋ beŋ beŋ baŋ si thinkuwo fooma e bindɛ thiyo ka buu, ka bindɛ tooke ka. 7 Kɛrɛ mɛnɛ beŋ key ka kɔtɔkɔy ba kahita kiyaŋ, awa e thampa niŋ thaŋ kaa ka kɔtɔkɔy ba kahita kendeŋ, thɔnthiŋinaŋ ba bɛy yo bɛy ba thimo beŋ, awa beŋ kɔŋ bɛŋ niyiya. 8 Mutiŋ mubɔyɛ mu beŋ tiŋ muŋ mu kɔŋ ni ba Fandaŋ wuŋ kuta yiki; awa ka gboŋa baŋ baŋ na hɛlɛŋ wuŋ kothiyo ba dɔma na beŋ niyɔy bakarandeni bikiyaŋ. 9 Yaŋ athimo bena nɔŋ na thimo nthɔŋ yama Fandaŋ na; bɛna kaaŋ ka kɔtɔkɔy ba kahita kiyaŋ wuna yaŋ bena thimo. 10 Mɛnɛ beŋ putiyɔy yamariŋ niŋ beŋ, yaŋ kɔŋ key ka kɔtɔkɔy ba bena thimo, nɔŋ na putiyɔy nthɔŋ yaŋ yamariŋ bi ka Fandaŋ beŋ na e ndɛ kaa ka kɔtɔkɔy ka thimo yama. 11 “Bɛyiniŋ baŋ baŋ fooma bɛna thanki yaŋ bena tepe haliko mayehitɔkɔ niŋ maŋ ma be niyɔ iŋ beŋ, awa wuna beŋ yehitɔkɔ wumandiŋ. 12 Yamari niŋ woŋ ndɛ na woŋ baŋ: Thimiyandeŋ nɔŋ na thimo nthɔŋ yaŋ bena na. 13 Mathimo yo ka nda ma wɔmɛti tɔŋɔŋ ba ntɔ nama daŋandeŋ ndɛ ba dunkuna sii nama baŋ ba binyathikiŋ nama beŋ. 14 Bena binyathikiŋ bikiyaŋ mɛnɛ beŋ ni ba ni yaŋ bena yamari baŋ ba niya. 15 Yaŋ sa nɔŋ nda bena thiyi bawaliŋ bikiyaŋ, baa bawali woŋ sa kɔthɔ bɛyiniŋ fooma ba mariki nama woŋ ni. Yaŋ kɔŋ nda bena thiyi binyathikiŋ bikiyaŋ, baa yaŋ thanki bena tepe bɛyiniŋ fooma ba yuye yaŋ maŋaye ka Fandaŋ woŋ. 16 Beŋ kutɛ yɛthɛ yama yo; yama yɛthɛ bena thɔɔkɔ e yaŋ bena ŋinda ba beŋ kaa e beŋ ka tima mutiŋ mubɔyɛ mu niyɔ ba wunambɛ. Wuna Fandaŋ woŋ bena dunkune ntha yo ntha ki beŋ thɔnthɔŋɔŋ naa beŋ hiŋ keŋ kukiyaŋ koŋ. 17 Haŋ haŋ baŋ huna yaŋ bena ni yamari: Thimiyandeŋ. 18 “Naa biyamɛti bi kafaydo beŋ thambo bena, kɔthɔŋ ba dɔma na yama yenke bindɛ thambo saanuŋ bindɛ ntiŋ bena kɔ thambo. 19 Mɛnɛ beŋ kiŋ nde biya bi ba kafay woŋ, biyamɛti bi kafay woŋ bi kɔŋ nde bena thimo nɔŋ biya bikɛnamɛŋ. Kɛrɛ yaŋ thanki bena yɛtha maŋaye ka faido, awa beŋ ka nda ba kafay woŋ; wuna biyɛ biya bi ka faido beŋ bi kɔŋ bena thambo. 20 Siyuwaŋ hu tepe nde yaŋ bena haŋ: na ‘Bawali woŋ yameta ba mariki nama woŋ.’ Mɛnɛ bindɛ ni yama thɔrɔ, kɔthɔŋ ba dɔma na bi kɔŋ bena ni thɔrɔ hɛlɛŋ nɛŋ. Mɛnɛ bindɛ nde yɛrɔkɔ mathanani niŋ maŋ, bi kɔŋ yɛrɔkɔ makendeŋ maŋ. 21 Kɛrɛ bi kɔŋ bena ni bɛyiniŋ baŋ baŋ fooma baa bikiyaŋ bina beŋ; bi kɔŋ ni bɛyiniŋ baŋ baŋ baa bindɛ tha kɔthɔ wo ŋindɛ yama woŋ. 22 Mɛnɛ yaŋ tha nde see e yaŋ bindɛ si gbonkiye, bindɛ sa nde niyɔ iŋ mathonko ma ka hakɛŋ namɛŋ baŋ. Kɛrɛ ka tete nda bindɛ sa punku tɛpa ba dɔma, na ‘Wu ni miŋ wuŋ miŋ kɔita ba dɔma na hakɛ bɛna.’ 23 Wɔ yo wɔ wo thambo yama, ndɛ thambo Fandaŋ na. 24 Bindɛ sa nde niyɔ iŋ mathonko ma ka hakɛŋ namɛŋ baŋ mɛnɛ yaŋ tha nde ni bɛyiniŋ ba sa wɔmɛti punku niya ka mateete makɛnamɛŋ; kɛrɛ ka tete bindɛ kutuyɔkɔy bɛyiniŋ ba ni yaŋ baŋ nagberekethe awa bindɛ thambo yama iŋ Fandaŋ woŋ. 25 Wuŋ baŋ niyɔy haliko ba thiŋina magbali ma gbalo ka Siraŋ namɛŋ baŋ ma tɛpɛ maŋ ba dɔma, na ‘Bindɛ thambo yama wu ka iŋ saabu.’ 26 “Bamase woŋ kɔŋ see wo Yina wo ka Masaala woŋ. Ndɛ na tɔŋɔŋ nɔndi baŋ ba Masaala, awa ndɛ kɔŋ see maŋaye ka Fandaŋ woŋ ka. Yaŋ kɔŋ niŋ ŋindi kendeŋ do maŋaye ka Fandaŋ ka, awa ndɛ kɔŋ si gbonkoy ba yaŋ. 27 Awa beŋ hɛlɛŋ nɛŋ gbeeŋ, beŋ kɔŋ gbonkoy ba yaŋ, baa beŋ kiŋ nɔŋ iŋ yaŋ kabi ka mathɛrɛŋ maŋ.

16

1 “Yaŋ thanki bena tepe bɛyiniŋ baŋ baŋ fooma haliko beŋ be tha teeti lanɛya bakendeŋ baŋ. 2 Bi kɔŋ bena kanthi ka bankɛŋ namɛŋ bathuŋuyande baŋ, awa lɔkɔ baŋ ba kɔŋ see ba wo bena kɔɔri woŋ siyuwe ba dɔma na wali bayɔhɔy bɛna wundɛ ni ba Masaala. 3 Biya bi kɔŋ ni bɛyiniŋ baŋ baŋ baa bindɛ tha kɔthɔ Fandaŋ na maa yaŋ. 4 Kɛrɛ yaŋ thanki bena tepe bɛyiniŋ baŋ baŋ fooma, huna naa lɔkɔ na tɛŋ wo bindɛ bɛŋ niye woŋ, beŋ be siyi hu tepe yaŋ bena haŋ. “Yaŋ tha nde bena tepe bɛyiniŋ baŋ baŋ ka mathɛrɛŋ maŋ baa yaŋ kiŋ nde iŋ beŋ. 5 Ka tete wuŋ bohe thuriye yaŋ ba kaa ka wo ŋindɛ yama woŋ ka. Kɛrɛ hali wɔ wunthe ka beŋ thonthiŋineta hɛ yama ba dɔma, na ‘Kama yi key?’ 6 Ka tete yaŋ thanki bena tepe nafeu, awa wuŋ niyɔy bena nkinikiniŋ wumandiŋ. 7 Kɛrɛ yaŋ kɔŋ bena tepe nɔndi baŋ, wu kɔŋ niyɔ hita ba beŋ yaŋ ba kaa napooŋ, baa mɛnɛ yaŋ tha kay, Bamase woŋ sa see kendeŋ do. 8 Awa naa ndɛ see, ndɛ kɔŋ si toŋine biyamɛti bi ka faido beŋ ba bindɛ thana kɔthɔ nɔndi baŋ ba hakɛ baŋ, ba bindɛ thana kɔthɔ ba mathumbɛ maŋ, awa bindɛ thana kɔthɔ nɔndi baŋ ba kukɔnsɔŋɔŋ ku ka Masaala koŋ. 9 Bindɛ sa kɔthɔ nɔndi baŋ ba hakɛ baŋ, baa bindɛ sa yama ni lanɛya. 10 Bindɛ sa kɔthɔ nɔndi baŋ ba mathumbɛ maŋ, baa yaŋ kɔŋ kay ka Fandaŋ ka, awa beŋ sa nɔŋ nda yama kutiyɔkɔ. 11 Bindɛ sa kɔthɔ nɔndi baŋ ba kukɔnsɔŋɔŋ ku ka Masaala koŋ, baa bakɛrɛŋ wo kafaydo woŋ thanki nda konsiŋino. 12 “Yaŋ kiŋ iŋ bɛyiniŋ babɔyɛ ba yaŋ ba bena tepe, kɛrɛ beŋ sa hɛ bɛŋ punku kɔsina ka thathukuma ndeŋ thaŋ. 13 Kɛrɛ naa Yina wo si tɔŋɔŋ nɔndi baŋ ba Masaala see, ndɛ kɔŋ bena si katitɔkɔ ka nɔndi baŋ fooma. Ndɛ sa si gbonkoy ka mayoho nama, kɛrɛ ndɛ kɔŋ si gbonkoy ba bɛyiniŋ ba thanki ndɛ yuyɛ baŋ fooma, mɛnɛ ba bɛyiniŋ ba nɔŋ niyɔ baŋ. 14 Ndɛ kɔŋ yama si ni yiki, baa ndɛ kɔŋ si methine bena bɛyiniŋ niŋ baŋ fooma. 15 Mu iŋ Fandaŋ muŋ fooma yama biyɛ muŋ. Wuna biyɛ yaŋ kɔŋ dɔŋ na Yina woŋ kɔŋ si methine bena bɛyiniŋ niŋ baŋ fooma. 16 “Wuŋ pɛyɛ wuyetenaŋ beŋ sa nda yama kutiyɔkɔ. Awa wuŋ pɛyɛ hɛlɛŋ wuyetenaŋ beŋ kɔŋ yama kutiyɔkɔ.” 17 Huna thɔnthiŋinuwande binɔndi ka bakarandeni nama beŋ, na “Mbɛ hu ndɛ mina tepe haŋ ba dɔma, na ‘Wuŋ pɛyɛ wuyetenaŋ beŋ sa nda yama kutiyɔkɔ. Awa wuŋ pɛyɛ hɛlɛŋ wuyetenaŋ beŋ kɔŋ yama kutiyɔkɔ.’ Awa ndɛ tepe hɛlɛŋ, na ‘Baa yaŋ kɔŋ key ka Fandaŋ ka’?” 18 Bindɛ thɔnthiŋinuwande hɛlɛŋ, na “Mbɛ mu ndɛ dɔŋ, na ‘Wuŋ pɛyɛ wuyetenaŋ’? Miŋ kɔita mu domo nɛŋ.” 19 Yisɔs nɛnɛ ndɛ kɔthɛŋ hu bindɛ ba niŋ thɔnthiŋina haŋ. Huna dome ndɛ kɛnamɛŋ, na “Yaŋ tepe, na ‘Wuŋ pɛyɛ wuyetenaŋ beŋ sa nda yama kutiyɔkɔ. Awa wuŋ pɛyɛ hɛlɛŋ wuyetenaŋ beŋ kɔŋ yama kutiyɔkɔ.’ E huna biyɛ e beŋ kɔ thɔnthiŋinuwande? 20 Yaŋ kɔŋ bena tepe nɔndi baŋ, beŋ kɔŋ bereŋ e beŋ lemgbiŋina sampɛrɛŋ batɔɔkɛ, kɛrɛ biya bi ka faido beŋ kɔ yehitɔkɔ wumandiŋ. Beŋ kɔŋ teetuwɔ thathukuma kɛrɛ teetuwɔ hukendeŋ thathukuma haŋ hu kɔŋ nɔŋ thanke mayehitɔkɔ. 21 Mɛnɛ wɔ yɛrɛmɛ bathɔy ba mpaa, ndɛ kɔŋ teetuwɔ thukuma baa wakathi nama wo ndɛ mpee woŋ tɛŋ; kɛrɛ naa ndɛ mpuu nda hati woŋ, ndɛ piitɔy wuthoonɛ wu doŋite hɛ ndɛ wuŋ, baa yehitɔkɔ humandiŋ hu kɔŋ nda niyɔ ba hati wo mpoo kafaydo woŋ. 22 Nɛna bena wuŋ niyɔ; ka tete bendo teetuwɔy thathukuma, kɛrɛ yaŋ kɔŋ hɛlɛŋ bena kutiyɔkɔ. Awa thathukuma ndeŋ thaŋ tha kɔŋ yehitɔkɔ wumandiŋ. Mayehitɔkɔ ma sa wɔ bena punku kanita. 23 “Naa lɔkɔ babɛina tɛŋ, yaŋ gbeeŋ yaŋ kutɛ nda beŋ thɔnthɔŋɔŋ ba ntha yo ntha. Yaŋ kɔŋ bena tepe nɔndi baŋ: Fandaŋ woŋ kɔŋ bena dunkune ntha o ntha ki beŋ niŋ thɔnthɔŋɔŋ mɛnɛ beŋ kɔŋ yama hiŋ keŋ ka thɔnthiŋina yama. 24 Kɛrɛ haaŋ hɛ beŋ thonthiŋineta ba ntha yo ntha kaŋ hina yama keŋ; thɔnthiŋinaŋ beŋ kɔŋ kutu, wuna yehitɔkɔ ndeŋ haŋ niyɔ hubɔyɛ. 25 “Yaŋ thanki bena tepe bɛyiniŋ baŋ baŋ fooma ka mbɔrɔiŋ mɛnɛ ka mathɔyandeŋ. Kɛrɛ lɔkɔ baŋ ba kɔŋ see ba sa nda yaŋ bena tepe bɛyiniŋ baŋ baŋ ka mbɔrɔiŋ mɛnɛ ka mathɔyandeŋ. Kɛrɛ yaŋ kɔŋ nɔŋ nda bena tepe nagberekethe ba Fandaŋ woŋ. 26 Naa lɔkɔ babɛina tɛŋ, beŋ kɔŋ niŋ thɔnthɔŋɔŋ kaŋ hina keŋ kukiyaŋ koŋ; yaŋ tha bena tepe ba dɔma na yaŋ kɔŋ bena thɔnthiŋiniyɛ ye, 27 baa ndɛ Fandaŋ woŋ gbeeŋ, ndɛ athimo bena. Ndɛ athimo bena baa beŋ athimo yama, awa e beŋ hɛlɛŋ niya lanɛya ba dɔma na yaŋ see maŋaye kɛnama ka. 28 Yaŋ ŋaye ka Fandaŋ woŋ ka yaathi, e yaŋ saa ka faido. Awa yaŋ kɔŋ see ka pɛyɛna kafay woŋ e yaŋ duwa ka Fandaŋ ka.” 29 Kɛna dome bakarandeni nama beŋ kɛnama, na “Ka tete na ntiŋ mina yi gbonkitiyande nagberekethe, wu ka nda ka mbɔrɔiŋ mɛnɛ ka mathɔyandeŋ. 30 Miŋ kɔthɛ nda ba dɔma na yi kɔthɛŋ bɛyi o bɛyi; awa yi ka nda hɛlɛŋ ba wɔ yina thɔnthiŋina ba kɔthɔ hu ndɛ siyi. Wuŋ baŋ ni ba miŋ kɔthɔ ba dɔma na yi see maŋaye ka Masaala ka.” 31 Yisɔs dome kɛnamɛŋ, na “E beŋ ni lanɛya hunɔndi? 32 Lɔkɔ baŋ ba kɔŋ nɔŋ see, awa bɛŋ thuriye nda ba beŋ fooma pankiyande baŋ e wɔ yo wɔ ka beŋ duwa ka banka nama e yaŋ pɛyɔ yaŋ wuntheŋ. Kɛrɛ yaŋ ka yaŋ wuntheŋ; Fandaŋ woŋ kiŋ iŋ yaŋ. 33 Yaŋ thanki bena tepe haŋ haŋ baŋ wuna beŋ bohinande iŋ yaŋ awa ka gboŋa babɛina, beŋ kɔŋ kutu thɛbina thukuma. Beŋ kɔŋ niya thɔrɔ kafaydo. Kɛrɛ kahaŋ thathukuma! Yaŋ punke banɛnɔy ba kafaydo baŋ.”

17

1 Naa thanki nthɔŋ nɛŋ Yisɔs gbonkiya, ndɛ dethe ka thinthi ka ariana e dɔma, na “Fandaŋ woŋ, lɔkɔ baŋ tɛŋ. Toŋine biya beŋ yiki niŋ baŋ, yando Hati nda woŋ, wuna yaŋ bindɛ toŋine yiki nda baŋ. 2 Yi thanki yama dunkune mayoho ka thinthi ka biyamɛti fooma, haliko yaŋ be dunkuŋ sii ba kɔy yo kɔy ka bindɛ fooma bi thanki yama yi dunkune beŋ. 3 Yi nagbɛti yina Masaala, awa ntha ka kihɛna ki iŋ sɛmbɛ nɔŋ yi, awa yina ŋindɛ yama kafaydo. Mɛnɛ biya kɔthɛ yina, awa e bindɛ yama kɔthɔ, yaŋ Yisɔs Kraist, bi kɔŋ niyɔ iŋ sii ba kɔy yo kɔy. 4 Yaŋ thanki si tɔŋina yiki nda baŋ kafaydo; yaŋ thankaŋ wali ba dunkune yama yi ba si niya baŋ. 5 Ka tete Fandaŋ woŋ, niya yama yiki ka yi ka, yiki ba nde iŋ yaŋ mayoŋ baŋ kɛnda ka saanuŋ kafay woŋ ba therino. 6 “Yaŋ ni ba yi kothiyo iŋ biya bi dunkune yama yi beŋ maŋaye kafaydo. Bikɛnda bina nde bindɛ, kɛrɛ yi thanki yama bindɛ dunkune. Bindɛ mɛyi thampa thakɛnda thaŋ, 7 awa ka tete bindɛ kɔthɛ ba dɔma na bɛy yo bɛy ba yaŋ ni ŋaye kɛnda ka. 8 Yaŋ tepe bindɛ thampa tha dunkune yama yi thaŋ, awa bindɛ yɛrɔkɔy thɛŋ; awa bindɛ kɔthɛ ba dɔma na kɛnda ka ŋaye na yaŋ hunɔndi, awa bindɛ ni lanɛya ba dɔma na yina ŋindɛ yama. 9 “Yaŋ ni kuraminɛ ba lamgbeŋ bi dunkune yama yi beŋ, baa bikɛnda bina nda bindɛ. Yaŋ tha ni kuraminɛ ba biya bi kafaydo beŋ. 10 Bikiyaŋ beŋ fooma yina biyɛ bindɛ, awa bikɛnda beŋ fooma yama biyɛ bindɛ. Biya bikiyaŋ beŋ bi kɔŋ toŋine biya yiki niŋ baŋ. 11 Kaa huna na yaŋ see ka kaa kɛnda ka haŋ; yaŋ sa nda niyɔ kafaydo, kɛrɛ bikiyaŋ beŋ bi kiŋ hintiŋ ka faido. Fandaŋ woŋ, yindo sisande ba niyo kubatho woŋ, niya bindɛ kantha ka sɛmbɛ ba ka keŋ kukɛnda koŋ baŋ, keŋ ku dunkune yama yi koŋ, haliko bi be bɔhande ka tha banthe nɔŋ wɔ wunthe na bindɛ nɔŋ na bɔhande yaŋ iŋ yi na nɔŋ wɔ wunthe na miŋ. 12 Naa nde hintiŋ yaŋ iŋ bindɛ, yaŋ ni bindɛ kantha ka sɛmbɛ ba ka keŋ kukɛnda koŋ, keŋ ku dunkune yama yi koŋ. Yaŋ ni bindɛ kantha, awa wunthe ka bindɛ tha piriŋ, yɔkɔŋ wɔ wunthe wo si teetuwɔ woŋ, haliko ba thiŋina magbali ma ka Masaala maŋ. 13 Ka tete yaŋ kɔŋ key kɛnda ka, awa yaŋ tepe bɛyiniŋ baŋ baŋ naa hintiŋ yaŋ kafaydo haliko bikiyaŋ beŋ bi be yehitɔkɔ wumandiŋ ka thathukuma namɛŋ thaŋ, nɔŋ na yaŋ iŋ mayehitɔkɔ mamandiŋ na. 14 Yaŋ thanki bindɛ dunkune huseri nda haŋ, awa biya bi kafaydo beŋ thambo bindɛ, baa bindɛ bohinandeta nda iŋ biya bi kafaydo beŋ nɔŋ na tha nthɔŋ yaŋ bohinande iŋ biya bi kafaydo beŋ na. 15 Yaŋ niyeta kuraminɛ ba yi be bindɛ gbɔnɔŋ ka faido ye, kɛrɛ yaŋ ni kuraminɛ haliko yi be bindɛ ni kantha ka wo dɔma Wɔ Nɛnɔi woŋ. 16 Nɔŋ na tha nthɔŋ yaŋ bohinande iŋ biya bi ka faido na, nɛna sa bindɛ bohinande iŋ biya bi kafaydo. 17 Niya ba thampa thakɛnda thaŋ bindɛ niya biya bikɛnda; thampa thakɛnda thaŋ tha kɔŋ tɛpi nɔndi baŋ ba yi. 18 Yaŋ ŋindi bindɛ ka mateete ma ka biya bi kafaydo nɔŋ na ŋindi nde yama yi na kafaydo. 19 Awa saathɛ ba kɛnamɛŋ huna dunkuneke yaŋ fooma ba niya ba thimo yi baŋ, haliko bi be nɛnɛ dunkunɔkɔ fooma ba niya ba thimo yi baŋ. 20 “Yaŋ niyeta kuraminɛ ba beŋ beŋ bithɔ ye, kɛrɛ yaŋ ni kuraminɛ ba bi yama ni lanɛya beŋ saathɛ ba huseri namɛŋ haŋ. 21 Yaŋ ni kuraminɛ haliko bindɛ fooma bi be bohinande ka tha banthe nɔŋ wɔ wunthe na bindɛ. Fandaŋ woŋ, haliko bi bɔhande ka tha banthe iŋ miŋ, nɔŋ na bɔhande nthɔŋ yaŋ iŋ yi na ka tha banthe nɔŋ wɔ wunthe na miŋ. Haliko bi niyɔ nɔŋ wɔ wunthe wuna biya bi kafaydo beŋ ni lanɛya ba dɔma na yina ŋindɛ yama. 22 Yaŋ dunkune bindɛ yiki banthe ba dunkune yama yi baŋ, haliko bi be niyɔ nɔŋ wɔ wunthe na bindɛ nɔŋ na nthɔŋ miŋ nɔŋ wɔ wunthe na. 23 Yaŋ kɔŋ bɔhande ka tha banthe iŋ bindɛ, awa e yi bɔhande ka tha banthe iŋ yaŋ, wuna bindɛ niyɔ nɔŋ wɔ wunthe na bindɛ, wuna biya bi kafaydo beŋ kɔthɔ ba dɔma na yi athimo bindɛ nɔŋ na thimo yama yi na. 24 “Fandaŋ woŋ, yi thanki yama bindɛ dunkune, awa yaŋ thimoŋ ba bindɛ niyɔ iŋ yaŋ kamo kama ka yaŋ niyɔ, wuna bindɛ kutu ti peye yiki niŋ baŋ, yiki ba dunkune nde yi yama baŋ, baa yi yenke nde yama thimo saanuŋ kafay woŋ ba therino. 25 Fandaŋ wothumbɛ woŋ, biya bi kafaydo beŋ kɔita yina, kɛrɛ yaŋ kɔthɛŋ yina, awa bikiyaŋ beŋ bi kɔthɛŋ ba dɔma na yina ŋindɛ yama. 26 Awa yaŋ ni ba bindɛ yina kɔthɔ, awa yaŋ kɔŋ key ka kɔtɔkɔy ba wuŋ niya, haliko bi be thimo biya bihɛna nɔŋ na thimo yama yi na, awa e yaŋ hɛlɛŋ bɔhande iŋ bindɛ.”

18

1 Naa thanki Yisɔs niya kuraminɛ koŋ koŋ baŋ, ndɛ daŋande ka kɔtɔkɔy iŋ bakarandeni nama beŋ e bindɛ thuhande mankɔ mayete ma dɔma maŋ na Kidirɔni, ka nde dumgbu ba muthuu. Ndɛ biyande kɛndɛ iŋ bakarandeni nama beŋ. 2 Yudasi wo niyɛ nde niŋ gbɔŋ ka hadeni nama beŋ woŋ kɔthɛŋ kɛndɛ, baa Yisɔs bareŋ nde kɛndɛ kɔ pɛnkiyande iŋ bakarandeni nama beŋ. 3 Huna kaaye Yudasi ka dumgbu baŋ, e ndɛ diŋa kiki ba ka kurugbani biRomaŋ beŋ, mɛnɛ biya binɔndi bi ni banka bamandiŋ ba ka Masaala baŋ kantha bi ŋindi bafodeni bibukuyuwɛ beŋ mɛnɛ biFaresini beŋ; bindɛ diŋe lampuiŋ bimɔɔluwɔy, mumɔɔlini, mɛnɛ mudekiye ka saa. 4 Kɛrɛ Yisɔs kɔthɛŋ fooma ba bɔhɛ ba niŋ pɛnka baŋ. Huna thuriye ndɛ bindɛ e wundɛ thɔnthiŋina bindɛ, na “Nkaana beŋ deethi?” 5 Bindɛ ni niŋ yaabi ba dɔma, na “Yisɔs wo ŋaye ka mɛti ba ka Nasarɛthi baŋ na miŋ deethi.” Huna dome Yisɔs kɛnamɛŋ, na “Yama woŋ baŋ.” Ka lɔkɔ babɛina Yudasi wo niyɛ niŋ gbɔŋ woŋ kiŋ nde mateete makɛnamɛŋ. 6 Ka wuthurɔy wu dome Yisɔs kɛnamɛŋ, na “Yama woŋ baŋ,” bindɛ duuteke mahɛŋ e bindɛ ŋɔɔtuwa kɛkɛŋ nalonthoŋ. 7 Huna dome hɛlɛŋ Yisɔs kɛnamɛŋ, na “Nkaana beŋ deethi?” Bindɛ dome hɛlɛŋ kɛnama, na “Yisɔs wo ŋaye ka mɛti ba ka Nasarɛthi na miŋ dethi.” 8 Kɛna dome Yisɔs kɛnamɛŋ, na “Yaŋ tepe hɛ bena ba dɔma, na yama woŋ baŋ. Mɛnɛ yama beŋ deethi, awa pɛyɛnaŋ beŋ beŋ baŋ.” 9 Wuŋ baŋ wu boheŋ ba niyɔ haliko ba thiŋina hu tepe nde wundɛ mayoŋ haŋ, na “Fandaŋ woŋ, yaŋ tha piriŋiŋ hali wunthe ka bi dunkune yama yi beŋ.” 10 Ka lɔkɔ babɛina Saimɔŋ Pita boheŋ nde silanhi ka yɔnkɔ. Kɛna yose ndɛ bɛŋ ka kurɔmɔ koŋ e ndɛ gbaara kuiha ku ka Malikɔsi koŋ, waayi wo ka Bafode Womandiŋ woŋ. 11 Huna dome Yisɔs ka Pita, na “Thiya silanhi baŋ ka kurɔmɔ nama koŋ. E yi siyuweŋ ba dɔma na yaŋ sa mɛy ba thiiye kɔɔpu hu ka nambara baŋ haŋ hu dunkune yama Fandaŋ woŋ haŋ?” 12 Kɛna ŋaye kurugbani biRomaŋ beŋ beŋ hɛlɛŋ iŋ bayaha namɛŋ woŋ, mɛnɛ bi ni kantha banka bamandiŋ ba ka Masaala baŋ e bindɛ bɔha Yisɔs na e yuka niŋ. 13 Naa bohe bindɛ niŋ, bindɛ yenke niŋ kata ka Anasi ka, wo mpɛɛ nde wɔtɔ wo ka Keyafasi woŋ, wo nde Bafode Womandiŋ woŋ ka nina hubɛina. 14 Ndɛ Keyafasi wobɛina na tɛpɛ nde ka bayahɛŋ bi ka biYusu beŋ ba dɔma na wu kɔŋ niyɔ hita ba wɔ wunthe ba tuka ba biya beŋ fooma. 15 Ka lɔkɔ babɛina Saimɔŋ Pita mɛnɛ bakarandeŋ wunthe wo ka Yisɔs bi yemeŋ nde Yisɔs na mahɛŋ. Bakarandeŋ wobɛina wɔ na nde wo kothiyo wuyɔhɔy iŋ Bafode Womandiŋ woŋ, huna biyande ndɛ iŋ Yisɔs ka gbada hu ka banka ba ka Bafode Womandiŋ woŋ haŋ. 16 Ka lɔkɔ babɛina Pita pɛyɛ kɔɔ ka biyo haŋ kahɛŋ. Huna kaaye bakarandeŋ wo kothiyo woŋ iŋ Bafode Womandiŋ woŋ ka biyo haŋ e ka gbonkitiyande hati wobɛthɔ wo nde ni biyo haŋ kantha woŋ, e biita Pita na kaake. 17 Kɛna dome hati wobɛthɔ wo nde ni biyo haŋ kantha woŋ ka Pita, na “E bakarandeŋ wunthe wo ka hati wowathe wo dɔma Yisɔs woŋ na hɛlɛŋ yi?” Pita ni niŋ yaabi, na “Yaŋ kutɛ ye.” 18 Ka lɔkɔ babɛina bawaliŋ bi ka Bafode Womandiŋ woŋ mɛnɛ bi ni kantha banka bamandiŋ ba ka Masaala baŋ beŋ bohoŋ nde thɛrɛ buu ka gbada ka ba poy, baa lɔkɔ ba ka haka bɛna nde. Awa kɛna kooye biya e bindɛ kɔ poy. Pita key e ka kɔɔ ka mateete makɛnamɛŋ e ndɛ kɔ poy. 19 Bafode Womandiŋ woŋ thɔnthɔŋɔŋ Yisɔs na ba bakarandeni nama beŋ mɛnɛ mathanani nama maŋ. 20 Huna niye niŋ Yisɔs yaabi ba dɔma, na “Yaŋ thanki nde gbonkiya nagberekethe ka biya. Awa yaŋ bareŋ nde kɔ thaninuwa lɔkɔiŋ fooma ka bankɛŋ ntuŋ bathuŋuyande baŋ mɛnɛ ka banka bamandiŋ ba ka Masaala baŋ, ka biya beŋ thuŋuyande ka fooma, awa yaŋ tha gbonkoy bɛy yo bɛy ka gbundu. 21 Mbɛ hu yama yi thonthiŋinuwe ba bɛyiniŋ baŋ baŋ? Thɔnthiŋina biya bi yuyɛ yama beŋ ba bɛyiniŋ ba gbonkoy nde yaŋ baŋ. Bi kɔŋ yina tepe hu tepe nde yaŋ bindɛ haŋ.” 22 Naa thanki nthɔŋ ndɛ nɛŋ tɛpa, wunthe ka bi ni kantha banka bamandiŋ ba ka Masaala baŋ beŋ wo kɔɔyɛ nde kɛndɛ kuwaŋ woŋ thoroŋ Yisɔs na ka kuwaabu koŋ, e ndɛ dɔma, na “E nɛna yi niye Bafode Womandiŋ woŋ yaabi?” 23 Huna niye niŋ Yisɔs yaabi ba dɔma, na “Mɛnɛ yaŋ gbonkoy bɛyi banɛnɔy, tepe hɛ biya bɛy babɛina. Kɛrɛ mɛnɛ yaŋ gbonkoy wuyɔhɔy, mbɛ hu thorine yama yi?” 24 Kɛna toŋite Anasi Yisɔs na, woyukɔy thuŋ, ka Keyafasi ka, Bafode Womandiŋ woŋ. 25 Ka lɔkɔ babɛina Saimɔŋ Pita kooyeŋ nde kɛndɛ thuŋ kɔŋ poyi. Huna thonthiŋine bindɛ niŋ, na “E ba hɔŋ bakarandeŋ nama wunthe kutɛ hɛlɛŋ yi?” Kɛna buuhu Pita e ndɛ dɔma, na “Yaŋ kutɛ.” 26 Wɔ wunthe hɛlɛŋ ka mbaayiŋ bi ka Bafode Womandiŋ woŋ, wo mpɔɔyi iŋ wo gbaari Pita kuiha woŋ, thɔnthɔŋɔŋ hɛlɛŋ Pita na ba dɔma, na “E yi kutɛ kute nde yaŋ iŋ Yisɔs woŋ ka dumgbu ba muthuu muŋ baŋ?” 27 Kɛna buuhu hɛlɛŋ huŋ Pita, awa ka thagbɛmgbɛŋ thabɛina koki woŋ kokori. 28 Saanuŋ kaŋ woŋ ba puthɔ, bindɛ fuŋutu Yisɔs na ka banka ba ka Keyafasi baŋ e bindɛ niŋ kata ka banka ba ka wo ŋindo nde ba niyɔ bakɛrɛŋ woŋ iŋ biRomaŋ beŋ woŋ. Kɛrɛ naa tɛŋ bayahɛŋ bi ka biYusu beŋ kɛndɛ, bindɛ tha biyande kaake, baa bi be tha pothinɔkɔ, haliko na bindɛ punku thome thɔma humandiŋ haŋ hu ka siyuwa naa puntuyando nde mbembɛŋ namɛŋ beŋ ka Iyipiti. 29 Huna fuŋe Pailɛti ka gbada ka bindɛ ka e ndɛ dɔma kɛnamɛŋ, na “Mbɛ kufuŋutu gbeeŋ ku beŋ fuŋutu ma sɔkinɔkɔ hati lamgba woŋ baŋ?” 30 Bindɛ ni niŋ yaabi ba dɔma, na “Mɛnɛ hati lamgba woŋ baŋ tha nde thinki siraŋ baŋ, miŋ sa nde niŋ sisi kɛnda do.” 31 Kɛna dome Pailɛti kɛnamɛŋ, na “Sɛkithiyɔkɔŋ niŋ e beŋ niŋ diŋa ka kaa, awa e beŋ niŋ ka kɔnsiŋina maŋaye ka siraŋ ndeŋ baŋ.” Bindɛ dome kɛnama, na “Miŋ mɛkinɔita ba kɔriyɔkɔ wɔ ka yɛthɛ bakɛntuŋ.” 32 Wuŋ baŋ niyɔy haliko ba thiŋina hu tepe nde Yisɔs haŋ ba tuka siiya hu bohe ndɛ ba tuka haŋ. 33 Pailɛti duu ka banka nama ka e ndɛ niya ba Yisɔs biito kaake, e wundɛ niŋ thɔnthiŋina, na “E yina gbaku wo ka biYusu beŋ woŋ?” 34 Kɛna ni niŋ Yisɔs yaabi ba dɔma, na “E yina siyiyɔkɔy haŋ haŋ baŋ ka yɛthɛ bakɛnda, maa wɔ na tepe yina ba yaŋ?” 35 Pailɛti ni niŋ yaabi ba dɔma, na “E siyuweŋ ba dɔma na woYu na yaŋ? Siya nda baŋ mɛnɛ bafodeni bibukuyuwɛ beŋ bina sisɛ yina kiyaŋ do. Mbɛ ba ni yi?” 36 Yisɔs ni niŋ yaabi ba dɔma, na “Hugbakine niŋ haŋ ka nɔŋ thagbakine tha kafaydo thaŋ. Mɛnɛ hugbakine niŋ haŋ hu kiŋ nde nɔŋ thɛŋ, bawaliŋ niŋ beŋ bi kɔŋ nde dekeyi haliko yaŋ be tha nde dunkuna ka bayahɛŋ bi ka biYusu beŋ. Kɛrɛ hugbakine hukiyaŋ haŋ ka nɔŋ thagbakine tha kafaydo thaŋ.” 37 Huna dome Pailɛti kɛnama, na “Kumaŋ, gbaku na yi. E nɛna huŋ?” Kɛna ni niŋ Yisɔs yaabi ba dɔma, na “Na thanki nda yi tɛpa ba dɔma na gbaku na yaŋ. Yaŋ see kafaydo e yaŋ mpoo haliko ba tepe biya nɔndi baŋ, awa saabu babɛina nagbɛti huna see yaŋ. Wɔ yo wɔ wo niyɔ ka kufɛŋ ku ka nɔndi baŋ, ndɛ kɔŋ poniyɛ kuiha thampa niŋ thaŋ.” 38 Kɛna thɔnthɔŋɔŋ niŋ Pailɛti, na “Mbɛ mu domo nɔndi baŋ?” Naa thanki nthɔŋ Pailɛti nɛŋ tɛpa, ndɛ fuŋ ka gbada ka hɛlɛŋ ka biya beŋ e ndɛ tepe bindɛ ba dɔma, na “Yaŋ tha kutu mathonko ka hati wowathe woŋ baŋ. 39 Kɛrɛ miŋ kiŋ iŋ naamu dondo ba dɔma na beŋ kiŋ ba peniyo wɔ wunthe ka lɔkɔ ba ka siyuwa malɔkɔ ma puntuyando nde mbembɛŋ ndeŋ beŋ iŋ maleka woŋ ka Iyipiti. E beŋ thimoŋ ba yaŋ bena pɛniyɛ wo dɔma gbaku wo ka biYusu beŋ woŋ?” 40 Bindɛ ni niŋ yaabi kaŋ yɛla thampa, na “Woŋ baŋ kutɛ mina yi pɛniyɛ, kɛrɛ Barabasi na yi mina pɛniyɛ.” Barabasi wobɛina wɔ na nde wo be putiyɔ siraŋ baŋ.

19

1 Kɛna ni Pailɛti ba Yisɔs gbusuŋo, 2 e kurugbani beŋ yehinuwa nɛmu wo bathalɛŋ bibasoy e bindɛ niŋ tuta Yisɔs na ka yaha, e bindɛ niŋ thiya kuhɔli ku niyɛ maŋ pothita. 3 Bindɛ putiyɔy niŋ e dɔma, na “Maande, yindo gbaku wo ka biYusu beŋ woŋ. Haliko yi thɔɔkuwa sii.” Kɛna thoroni bindɛ niŋ ka ŋawaabu ŋaŋ. 4 Pailɛti fuŋ hɛlɛŋ ka gbada ka bindɛ ka e ndɛ dɔma kɛnamɛŋ, na “Ya niŋ; yaŋ sisiyɛ bena niŋ haliko beŋ be kɔthɔ ba dɔma na yaŋ tha kutu mathonko mamɛɛsɛ kɛnama.” 5 Kɛna fuŋ Yisɔs ka gbada, e ndɛ tutɔkɔ nɛmu wo bathalɛŋ bibasoy woŋ e ndɛ thɔɔ kuhɔli ku niyɛ maŋ pothita koŋ. Pailɛti dome kɛnamɛŋ, na “Dethaŋ hɛ hati wowathe woŋ baŋ.” 6 Naa kute niŋ bafodeni bibukuyuwɛ beŋ mɛnɛ bi ni kantha banka bamandiŋ ba ka Masaala baŋ beŋ, bindɛ lemgbeŋeŋ wumandiŋ e bindɛ dɔma, na “Ndɛ koroiŋ ka kuyeŋ kubariŋande koŋ! Ndɛ koroiŋ ka kuyeŋ kubariŋande koŋ!” Huna dome Pailɛti kɛnamɛŋ, na “Sɛkithaŋ niŋ e beŋ niŋ kɔriyɔkɔ baa yaŋ tha kutu mathonko kɛnama.” 7 BiYusu beŋ dome, na “Miŋ kiŋ iŋ siraŋ bakɛntuŋ, awa ka siraŋ babɛina ndɛ asisande ba tuke, baa ndɛ dɔmɔkɔy ba ndɛ niyɔ Hati ka Masaala.” 8 Naa yuye Pailɛti thampɛŋ thaŋ thaŋ baŋ, ndɛ yame thooyo payɔ humandiŋ. 9 Ndɛ key hɛlɛŋ ka banka nama ka e ndɛ thɔnthiŋina Yisɔs na, na “Kama ŋaye yi?” Kɛrɛ Yisɔs tha niŋ tɔtiyɔkɔ. 10 Huna thonthiŋine niŋ Pailɛti, na “E yi sa yama tɔtiyɔkɔ? E yi kɔita ba dɔma na yaŋ kiŋ iŋ sɛmbɛ ba yina pɛya ka yɛthɛ bakɛnda, maa ba niya ba yi koro ka kuyeŋ kubariŋande koŋ?” 11 Huna niye niŋ Yisɔs yaabi ba dɔma, na “Yi sa punku niyɔ iŋ sɛmbɛ kiyaŋ yɔkɔŋ yi dunkuno bɛŋ maŋaye ka Masaala. Huna, wo dunkunɛ yama kɛnda woŋ yameŋ niyɔ iŋ hakɛ ayaŋ ba yi.” 12 Kɛna ni Pailɛti ŋakɔɔthani ŋabɔyɛ haliko ba pɛya Yisɔs na ka yɛthɛ nama. Kɛrɛ biYusu beŋ lemgbeŋeŋ e bindɛ dɔma, na “Mɛnɛ yi pɛy hati wowathe woŋ baŋ ka yɛthɛ nama, yi sa nda niyɔ nyathiki wo ka gbaku wo ka Romaŋ woŋ. Awa wɔ yo wɔ nɛnɛ wo niyɔkɔ gbaku ka yɛthɛ nama, ndɛ kiŋ ma sɔkinɔkɔ gbaku wo ka Romaŋ woŋ.” 13 Naa yuye huŋ Pailɛti, ndɛ fuŋutu Yisɔs na kɛnamɛŋ ka e ndɛ dɔŋɔ ka yensi haŋ ka ndɛ konsiŋine kɛ, ka dɔma kɛ, na “Gbada hu thɛnkiyɔy tharaka.” Awa ka huyuŋ hu ka biYusu beŋ haŋ ka kɔŋ dɔma, na “Kabatha.” 14 Ka lɔkɔ babɛina malɔkɔ makosineke maŋ mɛna nde ba siyuwa malɔkɔ ma puntuyando nde mbembɛŋ bi ka biYusu beŋ iŋ maleka wo ka tuka haŋ woŋ ka Iyipiti. Wu kiŋ nde nda bɛrɛ ba hatɔ teete. Kɛna dome Pailɛti ka biYusu beŋ, na “Ya gbaku ndeŋ woŋ.” 15 Kɛna lemgbeŋeŋ bindɛ e bindɛ dɔma, na “Yantaŋ niŋ, yantaŋ niŋ! Ndɛ koroiŋ ka kuyeŋ kubariŋande koŋ!” Pailɛti thɔnthɔŋɔŋ bindɛ, na “E yaŋ ayanti gbaku ndeŋ woŋ?” Bafodeni bibukuyuwɛ beŋ ni niŋ yaabi, na “Miŋ ka iŋ gbaku wohɛna yɔkɔŋ gbaku wo ka Romaŋ woŋ nagbɛti.” 16 Kɛna dunkuŋ ndɛ Yisɔs na kɛnamɛŋ ba ndɛ yanto ka kuyeŋ kubariŋande koŋ. Kɛna kati kurugbani bi ka Romaŋ beŋ Yisɔs na 17 e bindɛ niŋ dunkune kuyeŋ kubariŋande ku bohe wundɛ ba ka yanto koŋ ba kuŋ kata ka tha ka dɔma, na “Ka tha ka kugbomgbokoro ku ka yaha,” wu thalintando ka huyuŋ hu ka biYusu beŋ haŋ, na “Kɔlɔkɔtha.” 18 Kɛna lɔŋ bindɛ Yisɔs na ka kuyeŋ kubariŋande koŋ e bindɛ niŋ kɛndɛ yanta ba ndɛ kɛndɛ tuke mɛnɛ biya biye hɛlɛŋ nde nɛŋ yantɔ ka ŋayeŋ ŋabariŋande, wunthe ka yɔnkɔ huthome hu ka Yisɔs, woŋ ka yɔnkɔ hupɔkɔdɔ haŋ, e Yisɔs bindɛ ŋathɔ mateete. 19 Kɛna ni Pailɛti yamari ba wuŋ gbalo e magbali mabɛina kahitino ka kuyeŋ kubariŋande koŋ. Magbali mabɛina ma kɔŋ niya karaŋ, na “Yisɔs na woŋ baŋ, wo ŋaye ka mɛti ba ka Nasarɛthi, gbaku wo ka biYusu beŋ woŋ.” 20 BiYusu bibɔyɛ bi kɔŋ nde punku niya magbali maŋ maŋ baŋ karaŋ, baa ka yanto nde Yisɔs kɛ athuriye mɛti baŋ. Awa mɛŋ gbalo nde hɛlɛŋ ka huyuŋ hu ka biYusu beŋ haŋ, ka huLatiŋ haŋ, mɛnɛ huKiriki haŋ. 21 Huna dome bafodeni bibukuyuwɛ bi ka biYusu beŋ ka Pailɛti, na “Ba gbali ba dɔma, na ‘Gbaku wo ka biYusu beŋ woŋ,’ kɛrɛ, na ‘Hati wowathe woŋ baŋ dɔmɔkɔy, na yama gbaku wo ka biYusu beŋ woŋ.’ ” 22 Pailɛti ni bindɛ yaabi ba dɔma, na “Wu thanki yaŋ niya yamari ba wuŋ gbalo wuŋ, wuŋ sa thikipa hali.” 23 Naa thanki kurugbani beŋ yanta Yisɔs na ka kuyeŋ kubariŋande koŋ, bindɛ sekithe yabɛŋ nama baŋ e bindɛ bɛŋ hana madɔŋɔyŋ manaŋ, kurugba yo kurugba kufɛŋ kunthe. Awa e bindɛ hɛlɛŋ sɛkitha yaba nama babantheŋ ba ka iŋ ka putunuyando bɛŋ, kɛrɛ athero na bɛŋ hɔkɔŋ ŋaye ka thinthi haaŋ athuhu ka pothi. 24 Huna dome bindɛ ka wunthe iŋ ntɔ nama, na “Miŋ bɛiŋ bɛŋ sainuwande, kɛrɛ miŋ yɛlɛŋ makoro ba bɛŋ miŋ be kutu wo biyɔ bɛŋ.” Wuŋ baŋ niyɔy haliko ba thiŋina magbali ma ka Masaala ma tɛpɛ maŋ ba dɔma, na “Bindɛ hanande yabɛŋ niŋ baŋ bindɛ bithɔ, awa e bindɛ yɛla makoro ba babantheŋ baŋ.” Nɛna ni kurugbani beŋ. 25 Awa biya bi kɔɔyɛ nde kɛndɛ kuwaŋ ka kuyeŋ kubariŋande koŋ ka yanto Yisɔs ka bindɛ bina beŋ beŋ baŋ: nanda ka Yisɔs, wɛnda ka nanda ka Yisɔs woyɛrɛmɛ, Mariyama wɔtɔ ka Kopasi woŋ, mɛnɛ Mariyama wo ŋaye ka mɛti ba ka Makadala. 26 Yisɔs kute nandama na, mɛnɛ bakarandeŋ wo thimo wundɛ woŋ kooye kɛndɛ wuthuriye. Huna dome ndɛ ka nandama, na “Naanaŋ, ya hɛ hati nda wowathe.” 27 Kɛna dome Yisɔs ka bakarandeŋ woŋ, na “Yi nɛnɛ, ya hɛ nanda na.” Awa there nda ka lɔkɔ babɛina bakarandeŋ woŋ diŋe nandama na ka banka nama ka. 28 Yisɔs kɔthɛ ba dɔma na ndɛ thankaŋ bɛy yo bɛy ba see ndɛ ka niya baŋ, huna dome ndɛ, na “Kumbɛ kuna yama.” Ndɛ tepe haŋ haŋ haliko ba thiŋina magbali ma ka Masaala maŋ. 29 Ka lɔkɔ babɛina sokoro hu kooyeŋ nde kɛndɛ hu thiŋɛ iŋ mampa ma be thanki yɔhɔ ka kuyeŋ kubariŋande koŋ ka pothi. Bindɛ simbili ntha ka kuyeŋ ku dɔma koŋ na hisɔpi e bindɛ kiŋ yɔthiŋita ka mampa maŋ, e bindɛ yekiniyɛ Yisɔs na ba sɔɔsuwa. 30 Naa sɔɔsi nthɔŋ Yisɔs mampa maŋ maŋ baŋ, ndɛ dome, na “Wuŋ thanki.” Kɛna sinkiŋ ndɛ yaha nama haŋ e ndɛ thathina. 31 Kɛna thɔnthɔŋɔŋ bayahɛŋ bi ka biYusu beŋ Pailɛti na ba ndɛ be ni yamari ba ŋathaki ŋa ka lamgbeŋ bi ka ŋayeŋ ŋabariŋande ŋaŋ beŋ ŋa be thinkinuwando, awa wuna ŋabeli namɛŋ ŋaŋ thathina naa bindɛ tuuku. Bindɛ thɔnthɔŋɔŋ haŋ haŋ baŋ baa lɔkɔ bahemuwe baŋ ba kɔŋ sɛsi naa kaŋ woŋ bohe thɔɔ, awa bindɛ thimota ba ŋabeli ŋaŋ pɛyɔ yantɔ ka ŋayeŋ ŋabariŋande ŋaŋ ka lɔkɔ bahemuwe baŋ, baa lɔkɔ bahemuwe ba see baŋ lɔkɔ bathɔɔkɔ ba niya Masaala na kubatho. 32 Kurugbani beŋ key e bindɛ ka thinkinuwande ŋathaki ŋa ka womayoŋ woŋ awa bindɛ thinkinuwande hɛlɛŋ ŋa ka wo wuntheŋ woŋ ŋaŋ wo yanto ka tha banthe iŋ Yisɔs woŋ. 33 Kɛrɛ naa tɛŋ bindɛ ka Yisɔs, bindɛ penke ba wuŋ niyɔ na ndɛ thɔkɔti hɛ nda tuka, huna bindɛ tha thinkinuwande ŋathaki nama ŋaŋ. 34 Kɛrɛ wunthe ka kurugbani beŋ thare e ndɛ ka yikira Yisɔs na kusuŋɔ koŋ ka yithɛ haŋ. Ka thagbɛmgbɛŋ thabɛina, wasi mɛnɛ mandi fuŋ ka yithɛ haŋ. 35 Ndɛ wo kutɛ woŋ ni maseri ba huŋ, awa magbonkoy nama maŋ ma kiŋ nɔndi, baa ndɛ kɔthɛŋ ba wuŋ niyɔ na nɔndi ma kɔndi baŋ. Ndɛ ni maseri ba huŋ haliko beŋ be ni lanɛya. 36 Bɛyiniŋ baŋ baŋ niyɔy haliko magbali ma ka Masaala maŋ ma be thiŋ, ma tɛpɛ maŋ ba dɔma, na “Hali kuthoy kunthe ndɛ sa kuŋ thinkinando.” 37 Awa magbali ma ka Masaala maŋ tepe hɛlɛŋ ka tha ka nɔndi ba dɔma, na “Bi kɔŋ dethi niŋ wo yikire bindɛ kusuŋɔ woŋ.” 38 Naa daŋande wuŋ nafeu, Yusufu wo ŋaye ka mɛti ba ka Arimathiya, wo nde wunthe ka bakarandeni bi ka Yisɔs beŋ kɛrɛ ka gbundu, baa wo nde payɔ bayahɛŋ bi ka biYusu beŋ ba tɔŋinɔkɔ nagberekethe, ndɛ thɔnthɔŋɔŋ Pailɛti na ba ndɛ be niŋ dunkune kubeli ku ka Yisɔs koŋ huna ndɛ kuŋ ka manki. Pailɛti yɛrɔkɔy ba ndɛ kuŋ ka sɛkitha. Kɛna key Yusufu ba kaayiyɛ kubeli koŋ. 39 Nikɔdimɔsi, wo kaayɛ nde lɔkɔ banthe ka Yisɔs huyɛ woŋ, wundɛ na kaayɛ iŋ Yusufu. Bi si key, Nikɔdimɔsi diŋe mayɔ mathimɔy huru manɔyiŋɛ bɛrɛ ba paani kɛmɛ wunthe. Mayɔ maŋ maŋ tɛɛni ba dɔma na mari mɛnɛ munki mu dɔma na alos muna tikitinuwando nde. 40 Kɛna sekithe bindɛ kubeli ku ka Yisɔs koŋ, e bindɛ kuŋ huitutuwa ka thika bahuhɛ e bindɛ kuŋ konke mayɔ mathimɔy huru nɔŋ na nde wuŋ ka naamu wo ka biYusu beŋ ba mankuwe wɔ na. 41 Ka yanto nde Yisɔs ka kuyeŋ kubariŋande koŋ kɛ, dumgbu ba muthuu ba kiŋ nde kɛndɛ wuthuriye, awa ka dumgbu babɛina, yoma huŋama hu gbuso ka kuthara koŋ nɔŋ makonko, ka ba hɛ wɔ mankuwo, hu kiŋ nde kɛndɛ. 42 Awa na niyɔy nde wuŋ Malɔkɔ Mahemuwe maŋ ma kɔŋ sɛsi naa kaŋ woŋ bohe thɔɔ, e yoma haŋ nde nɛnɛ niyɔ wuthuriye kɛndɛ, bindɛ key manki Yisɔs na.

20

1 Ka Sɔnde woŋ sanka, Mariyama wo ŋaye ka mɛti ba ka Makadala see ka yoma hu ka Yisɔs haŋ kuputhɔ ku kaŋ naa niyɔy wuŋ nahuukutu. Awa ndɛ see pɛnki ba dɔma na raka haŋ gbonino maŋaye ka yoma haŋ. 2 Huna thare ndɛ nagberere ba ka tepe Saimɔŋ Pita na mɛnɛ bakarandeŋ wowuntheŋ wo thimo nde Yisɔs woŋ. Naa penke ndɛ bindɛ, ndɛ tepe bindɛ ba dɔma, na “Bindɛ fuŋuŋ Mariki woŋ ka yoma haŋ, awa miŋ tha kɔthɔ ka deŋe bindɛ kubeli nama koŋ.” 3 Kɛna ŋaye Pita nayaali iŋ bakarandeŋ wowuntheŋ woŋ, e bindɛ kaa ka yoma haŋ. 4 Biya bibiye beŋ beŋ baŋ thare ka nanthe, kɛrɛ bakarandeŋ wowuntheŋ woŋ daŋande Pita na e ndɛ yenke tɛŋa ka yoma haŋ. 5 Naa tɛŋ ndɛ ka yoma haŋ, ndɛ putɔy ba detha ka yoma haŋ kaake. Kɛna kute ndɛ kasanke wo huitutuwo Yisɔs woŋ ŋoye kuwaŋ, kɛrɛ ndɛ tha biyande kaake ka yoma haŋ. 6 Kɛrɛ naa tɛŋ Pita, wo pɛyɛ hɛ mahɛŋ woŋ, ndɛ biyande kaake ka yoma haŋ. Kɛna kute ndɛ kasanke woŋ ŋoye kuwaŋ, 7 mɛnɛ thika ba huitutuwo Yisɔs ka yaha baŋ. Bɛŋ ka ka ŋoye kasanke woŋ ka, kɛrɛ ba huitutuwɔy e bɛŋ ŋɔɔ kuwaŋ thɔɔkɔ. 8 Kɛna manke ntiŋ bakarandeŋ wo yenke hɛ tɛŋa ka yoma haŋ woŋ biyande kaake ka yoma haŋ e kuta nafeu ba thankɛ niyɔ baŋ, awa ndɛ ni lanɛya ba Yisɔs ŋaye ka tuka haŋ. 9 Kɛrɛ halisa bindɛ methota magbali ma ka Masaala ma tɛpɛ maŋ ba dɔma na yɔkɔŋ Yisɔs ŋaye ka tuka haŋ. 10 Kɛna teŋiteke bakarandeni beŋ ka yikiyani bakɛnamɛŋ baŋ. 11 Mariyama kɔɔyɛ ka gbada ka yoma haŋ kuwaŋ e ndɛ kɔ berina. Naa ndɛ bereŋ thuŋ, wundɛ putɔy e detha ka yoma haŋ kaake. 12 Kɛna kute ndɛ malekɛŋ biye bi thɔɔyɛ muhuhɛ e bindɛ dɔŋɔ ka tayo kubeli ku ka Yisɔs koŋ kɛ, wunthe ka kate yaha ka, awa wunthe ka ŋathaki ka. 13 Bindɛ thɔnthɔŋɔŋ Mariyama na, na “Hati woyɛrɛmɛ, mbɛ hu yi berine?” Mariyama ni bindɛ yaabi, na “Yaŋ kɔŋ bereŋ baa bindɛ sekithe kubeli ku ka Mariki niŋ woŋ koŋ, awa yaŋ kɔita ka taye bindɛ kuŋ.” 14 Naa thanki nthɔŋ nɛŋ ndɛ tɛpa, ndɛ huitutuwɔy mahɛŋ e ndɛ kuta Yisɔs kooye, kɛrɛ ndɛ tha kɔthɔ ba dɔma na Yisɔs na. 15 Yisɔs thɔnthɔŋɔŋ niŋ, na “Hati woyɛrɛmɛ, mbɛ hu yi berine? Nkaana yi deethi?” Kɛrɛ Mariyama siyi ba dɔma na wo dethiteke dumgbu baŋ woŋ na, huna dome Mariyama kɛnama, na “Hɛmɔŋ, mɛnɛ yina sɛkithɛ kubeli koŋ e yi kuŋ kate napooŋ, yaandi tepe yama ka taye yi kuŋ, awa yaŋ kɔŋ kuŋ kaayiyɛ kɛndɛ.” 16 Kɛna dome Yisɔs kɛnama, na “Mariyama.” Ka wuthurɔy wubɛina Mariyama huitutuwɔy e ndɛ detha Yisɔs na e ndɛ dɔma ka huyuŋ hu ka biYusu beŋ haŋ, na “Rabonay,” wu thalintando ba dɔma, na “Karimɔkɔ.” 17 Kɛna dome Yisɔs kɛnama, na “Ba hɛ yama boheke, baa yaŋ ŋateta hɛ ka Fandaŋ woŋ ka. Kɛrɛ kaa ka mbɛndaŋ ka e yi bindɛ ka tepe, na yaŋ kɔŋ hintiŋ ŋati ka Fandaŋ ka, wo hɛlɛŋ Fandamɛŋ woŋ, ka Masaala wo yaŋ ni kubatho woŋ, mɛnɛ wo bindɛ ni kubatho woŋ.” 18 Huna key Mariyama wo ka Makadala e ndɛ ka tepe bakarandeni beŋ ba dɔma, na “Yaŋ kute Mariki woŋ.” Awa ndɛ tepe bindɛ ba dɔma na Mariki woŋ na tepe niŋ ba bindɛ si tepe bɛyiniŋ baŋ baŋ. 19 Ka Sɔnde wobɛina ka thamamiŋa, thabiyo tha ka makonko ma ka nde bakarandeni beŋ fooma tha lɔnkɔy, baa bi kɔŋ nde payɔ bayahɛŋ bi ka biYusu beŋ. Kɛna see Yisɔs e ndɛ si kɔɔ mateete makɛnamɛŋ e ndɛ dɔma, na “Haliko mathɛbɛ ma niyɔ iŋ beŋ.” 20 Naa thanki nthɔŋ ndɛ nɛŋ tɛpa, ndɛ toŋine bindɛ thɛnkɔ nama thaŋ mɛnɛ yithɛ nama haŋ ka yikiro ndɛ kusuŋɔ koŋ kɛ. Kɛna yehitɔkɔy bakarandeni beŋ baa bindɛ ŋee Mariki woŋ. 21 Kɛna dome hɛlɛŋ Yisɔs kɛnamɛŋ, na “Haliko mathɛbɛ ma niyɔ iŋ beŋ. Nɔŋ na ŋindi nthɔŋ yama Fandaŋ woŋ kafaydo na, nɛnɛ ŋindi yaŋ bena ka mateete ma ka biya bi kafaydo.” 22 Awa naa thanki nthɔŋ ndɛ nɛŋ gbonkiya, ndɛ heme bindɛ e ndɛ dɔma kɛnamɛŋ, na “Yɛrɔkɔŋ Yina wo ka Masaala woŋ. 23 Mɛnɛ beŋ pɛniyɛ womo woma hakɛŋ nama baŋ, ndɛ thanki bɛŋ peniyo iŋ Masaala. Kɛrɛ mɛnɛ beŋ tha pɛniyɛ womo woma hakɛŋ nama baŋ, ndɛ sa bɛŋ pɛniya iŋ Masaala.” 24 Thɔmɔsi, wo dɔma Bathema woŋ, wunthe ka bakarandeni beŋ, ndɛ ka nde kɛndɛ naa Yisɔs tɔŋinɔkɔ bakarandeni bihɛna beŋ. 25 Huna tepe niŋ bakarandeni bibintheŋ beŋ ba dɔma, na “Miŋ kute Mariki woŋ.” Kɛrɛ ndɛ dome kɛnamɛŋ, na “Yɔkɔŋ yaŋ kute thɛnkɔ nama thaŋ ka loŋo marɔntima maŋ kɛ, awa e yaŋ thiya kuthenke niŋ koŋ kɛndɛ, awa e yaŋ tɔpina yɔnkɔ niŋ haŋ ka yithɛ nama haŋ ka yikiro kusuŋɔ koŋ kɛ. Mɛnɛ huŋ kutɛ, yaŋ sa ni lanɛya ba ndɛ ŋaye ka tuka haŋ.” 26 Naa daŋande wuŋ wiki wunthe, bakarandeni nama beŋ thuŋande hɛlɛŋ ka tha banthe kaake ka banka banthe, awa ka lɔkɔ babɛina Thɔmɔsi kiŋ nde iŋ bindɛ. Bindɛ lɔɔnki fooma thabiyo tha ka banka baŋ thaŋ, kɛrɛ Yisɔs biyande kɛndɛ e ndɛ ka kɔɔ mateete makɛnamɛŋ e ndɛ dɔma, na “Haliko mathɛbɛ ma niyɔ iŋ beŋ.” 27 Kɛna dome Yisɔs ka Thɔmɔsi, na “Saa thiyi kuthenke nda koŋ dondo baŋ e yi boheke, awa detha thɛnkɔ niŋ thaŋ, awa boheke yithɛ niŋ haŋ. Ba niyɔ wɔ ka iŋ lanɛya, kɛrɛ niyɔ wɔ iŋ lanɛya.” 28 Thɔmɔsi dome kɛnama, na “Yina Mariki niŋ woŋ, mɛnɛ Masaala wo yaŋ ni kubatho woŋ.” 29 Yisɔs thɔnthɔŋɔŋ niŋ e dɔma, na “E yi ni lanɛya ba na kute yama yi? Mayehitɔkɔ ma kiŋ ka bi sa yama kutu beŋ kɛrɛ bindɛ niya lanɛya ba yaŋ ŋaye ka tuka haŋ.” 30 Yisɔs ni bɛyiniŋ bathakaba bahɛna ka kupɛnkintiyande ku ka bakarandeni nama beŋ, ba tha thanki gbalo ka buku woŋ baŋ, ba tɔŋinɛ ba dɔma na ndɛ ŋindo iŋ Masaala. 31 Kɛrɛ baŋ baŋ bɛŋ gbalo haliko beŋ be ni lanɛya ba wuŋ niyɔ na Yisɔs na Banikisi wo niyo nde lahiri woŋ, Hati ka Masaala woŋ, awa beŋ be kutu sii ba kɔy yo kɔy baa beŋ ni niŋ lanɛya.

21

1 Naa daŋande wuŋ kɛndɛ, Yisɔs tɔŋinɔkɔy hɛlɛŋ ka bakarandeni beŋ ka mankɔ ma dɔma maŋ na Taibiriyasi. Awa nanaŋ baŋ nɛna toŋineke ndɛ bindɛ. 2 Saimɔŋ Pita, Thɔmɔsi wo dɔma Bathema woŋ, Nathaniyɛli wo ka Kena ba ka Kalili, mpati bi ka Sɛbɛdi beŋ, mɛnɛ bakarandeni nama bihɛna biye bi kiŋ nde ka tha banthe fooma. 3 Saimɔŋ Pita dome kɛnamɛŋ, na “Yaŋ kɔŋ key ka thithuwa.” Huna dome bindɛ kɛnama, na “Mina key iŋ yi.” Kɛna key bindɛ e bindɛ ka thɔɔ ka gbe baŋ. Ka lɔkɔ babɛina bindɛ hure thithuwa napiri-piri kɛrɛ bindɛ tha bohi he yo he. 4 Naa bohe kaŋ woŋ ba puthɔ, Yisɔs see kɔɔ ka gbaraŋ ba ka mankɔ maŋ. Kɛrɛ bakarandeni beŋ tha ŋee ba dɔma na Yisɔs na kɔɔyɛ woŋ. 5 Huna thonthiŋine Yisɔs bindɛ, na “Lamgbeŋ, e beŋ bohe heni?” Bindɛ ni niŋ yaabi ba dɔma, na “Ade, miŋ boheta hɛ hali he wunthe.” 6 Kɛna dome Yisɔs kɛnamɛŋ, na “Yɛlaŋ kupɛli koŋ ka yɔnkɔ huthome hu ka gbe baŋ haŋ, awa beŋ kɔŋ bohi heni binɔndi.” Huna yele bindɛ kupɛli koŋ, awa bindɛ bohe heni bibɔyɛ-bɔyɛ haaŋ bindɛ tha punku nda ba yɔsa kupɛli koŋ ba kuŋ thiya ka gbe baŋ baa heni beŋ abɔy. 7 Kɛna dome bakarandeŋ wo thimo nde Yisɔs woŋ ka Pita, na “Mariki woŋ na.” Naa yuye Saimɔŋ Pita ba dɔma na Mariki woŋ na, ndɛ thɔɔyɛ yaba nama baŋ e wundɛ bɛŋ karikarina e yuka, baa ndɛ ŋutu nde nda yaba ba niya wali. Kɛna gbantɔkɔy ndɛ ka mankɔ maŋ ba kaa ka Yisɔs ka. 8 Kɛrɛ bakarandeni bibintheŋ beŋ ka gbe baŋ yose kupɛli ku thiŋo heni beŋ koŋ ka thithɛ, baa bindɛ thokiyeta nde nda ka thithɛ ka. Wu kiŋ nde nda bɛrɛ ba bɔha kɔnthɔ kasɔhi ka thɔkiyande. 9 Naa dunkɔy bindɛ ka thithɛ ka, bindɛ penke nda kɛndɛ thɛrɛ tha buu nayɔŋɔrɔɔ, e heni bithuruwɔy niyɔ ka buu buŋ e ŋatoŋ ŋaŋ ŋɔɔ kuwaŋ. 10 Kɛna dome Yisɔs kɛnamɛŋ, na “Sisaŋ hɛ heni binɔndi bi beŋ dɔy bɔha beŋ.” 11 Kɛna thɔɔyɛ Saimɔŋ Pita ka gbe baŋ e ndɛ yɔsa kupɛli ku thiŋo heni bibukuyuwɛ beŋ koŋ ka thithɛ. Awa naa kondo bindɛ, bi kiŋ nde heni kɛmɛ wunthe e kɔnthɔ kasɔhi iŋ bitaati ka fooma nama. Kɛrɛ hali na nde bindɛ bibɔyɛ na, kupɛli koŋ tha thenkande. 12 Yisɔs dome kɛnamɛŋ, na “Saaŋ dondo baŋ, beŋ be si ni dɛɛba.” Ka lɔkɔ babɛina hali wɔ wunthe ka bakarandeni beŋ tha dɔinɔkɔ ba niŋ thɔnthiŋina ba dɔma, na “Mbɛ yina?” baa bi kɔthɛŋ ba dɔma na Mariki woŋ na. 13 Kɛna thuriye Yisɔs bindɛ e sɛkitha kutoŋ koŋ mɛnɛ heni beŋ e ndɛ bindɛ hana. 14 Tɔŋinɔkɔ haŋ haŋ baŋ huna tɛŋinɛ dɔŋɔ kataati Yisɔs ba tɔŋinɔkɔ bakarandeni nama beŋ naa ŋaye ndɛ ka tuka haŋ. 15 Naa thanki bindɛ niya dɛɛba, Yisɔs thɔnthɔŋɔŋ Saimɔŋ Pita na, na “Saimɔŋ, yindo hati ka Yɔni woŋ, e yi athimo yama wuŋ yama nɔŋ na thimo yama beŋ beŋ na?” Saimɔŋ ni niŋ yaabi, na “Ndo, Mariki, yi kɔthɛŋ ba dɔma na yaŋ athimo yina.” Yisɔs dome kɛnama, na “Dethiteke takɛŋ niŋ biyete beŋ.” 16 Yisɔs thɔnthɔŋɔŋ hɛlɛŋ Saimɔŋ na hu tɛŋinɛ dɔŋɔ kaaye, na “Saimɔŋ, yindo hati ka Yɔni woŋ, e yi athimo yama?” Saimɔŋ ni niŋ yaabi, na “Ndo, Mariki, yi kɔthɛŋ nagberekethe ba dɔma na yaŋ athimo yina.” Yisɔs dome kɛnama, na “Niya kantha takɛŋ niŋ beŋ.” 17 Yisɔs thɔnthɔŋɔŋ hɛlɛŋ niŋ sɔkɔ huhunthe hubɛina hu tɛŋinɛ dɔŋɔ kataati, na “Saimɔŋ, yindo hati ka Yɔni woŋ, e yi athimo yama?” Ka lɔkɔ baŋ baŋ nda wuŋ thoŋ Pita na baa ndɛ thɔnthɔŋɔŋ niŋ sɔkɔ huhunthe haŋ haŋ baŋ dɔŋɔ kataati ba dɔma, na “E yi athimo yama?” Huna dome Pita kɛnama, na “Mariki, yi kɔthɛŋ bɛy yo bɛy. Awa yi kɔthɛŋ ba dɔma na yaŋ athimo yina.” Kɛna dome Yisɔs kɛnama, na “Dethiteke takɛŋ niŋ beŋ. 18 Yaŋ kɔŋ yina tepe nɔndi baŋ. Naa nde yi hati lamgba, yi kɔŋ nde yukutɔkɔ mbumbusa kikɛnda e yi kaande kamo kama ka thimo yi ba kaa. Kɛrɛ naa yi thanthe, yi kɔŋ thumbuŋ thɛnkɔ thakɛnda thaŋ, awa e wɔ hɛna yina yuka e ndɛ yina katitɔkɔ ka be yi thimo ba kaa.” 19 Yisɔs tepe haŋ haŋ baŋ ba tɔŋina tuka hu bohe ndɛ ba tuka haŋ siiya ba niye Masaala na yiki. Awa naa thanki nɛŋ ndɛ tɛpa, ndɛ dome kɛnama, na “Yema yama.” 20 Pita dethe mahɛŋ e ndɛ kuta bakarandeŋ wo thimo Yisɔs woŋ si bindɛ yeŋ mahɛŋ, bakarandeŋ wo doŋe nde Yisɔs na kuwaŋ woŋ e ndɛ niŋ tɔpita wuyɔhɔy naa bindɛ thɔŋ thɔma humankɛ haŋ mahɔnkɔlɛŋ. Ndɛ bakarandeŋ wobɛina na thɔnthiŋinɛ Yisɔs na naa bindɛ thɔŋ, na “Mariki, mbɛ wo yina siseke niya gbɔŋ woŋ ndee?” 21 Naa kute Pita bakarandeŋ woŋ baŋ si see mahɛŋ namɛŋ, ndɛ thɔnthɔŋɔŋ Yisɔs na, na “Mariki, nama wuŋ siseke niyɔ gbeeŋ ba hati wowathe woŋ baŋ?” 22 Yisɔs ni Pita na yaabi, na “Mɛnɛ mathimo makiyaŋ mɛna ba ndɛ niyɔ hintiŋ kafaydo haaŋ e yaŋ nɔŋ duwa ka saa, e sɔkɔ nda huna? Yi yema hɔkɔŋ yama.” 23 Kuna ku ka magbonkoy maŋ maŋ gbanthande fooma ka bindɛ bi niyɛ lanɛya ka Yisɔs beŋ ba dɔma na bakarandeŋ woŋ baŋ sa nɔŋ tuku hali. Kɛrɛ Yisɔs tha dɔŋ na bakarandeŋ woŋ baŋ sa nɔŋ tuku. Adɔmɛ na Yisɔs, na “Mɛnɛ mathimo makiyaŋ mɛna ba ndɛ niyɔ hintiŋ kafaydo haaŋ e yaŋ nɔŋ duwa ka saa, e sɔkɔ nda huna?” 24 Bakarandeŋ woŋ baŋ na niyɛ maseri ba bɛyiniŋ baŋ baŋ, awa ndɛ na gbalɛ bɛŋ. Awa miŋ kɔthɛ ba dɔma na magbonkoy nama maŋ ma kiŋ nɔndi. 25 Bɛyiniŋ bahɛna babɔyɛ ba kiŋ hɛlɛŋ ba ni nde Yisɔs. Mɛnɛ bɛŋ nde thanka gbalo fooma, yaŋ kɔthɛŋ ba dɔma na kafay woŋ sa nde punku kɔsina bukuiŋ bibɛina.