JOHN

1

1 Kalɔ kesekɔ ƒui ni, Anwu ɔni ndi Katɔti Litemi mmɔ ɔkya. Na Litemi lɛmɛni ku Katɔti nkya. Na Litemi lɛmɛni ɔlati ku Katɔti badi unwi. Na ɔ́si kalɔ kesekɔ ni, 2 Anwu ku Katɔti nli uwi ƒui. 3 Ɔkɛ Anwu ɔmmɔ lɛlɔ na Katɔti ɔ́sia údie lɛla biala. Na lɛla lɛdi liiibo ɔni na ɔɔɔdi nwuna lɛlɔ na Katɔti ɔ́sia údie-ni. 4 Na Litemi lɛmmɔ kemo na ngba geen bɔɔsí. Na ngba bɔmɛni muute bekyuli Katɔti bukeye geen. 5 Bukeye bɔmɛni muukeye na bɔ́ɔyila lɛdisa. Na lɛdisa lítakana na linye bukeye bɔmɛni kenye. 6 Na uwi ɔmmɔ kemo ni, Katɔti ɔ́tala ukyuli ɔdi aani kenye udiene kalɛ, na baalɔ-nwu banii Yohane. 7 Úbo ɔnii ubedie kenye na ukyuli ɔni ndi bukeye bɔmɛni lɛlɔ kalɛ na ukyuli biala unu linyesia lɛmɛni na ɔƒɔ ukyuli ɔni ndi bukeye mmɔ ɔdi. 8 Ɔɔɔdi Yohane ɔmɛni ndi bukeye bɔmmɔ. Mmomu kenye kani na úbo ubedie na bukeye bɔmɛni lɛlɔ. 9 Na uwi ɔmmɔ kemo ni, bukeye geen bɔni muuti bukeye teete ukyuli biala ɔ́si ɔdubo kayawi. 10 Nsu geen ni, ɔkya kayawi. Na ina ka nwuna lɛlɔ na Katɔti ɔ́kɛ asa na údie kayawi ni, bekyuli bátanu-nwu bátati. 11 Úbo anwu badi akɔ, nsu bétegyingya enu bátaƒɔ-nwu. 12 Nsu ɛlɛɛ badi báƒɔ-nwu. Na bani ƒui náƒɔ-nwu mmɔ aani Katɔti Ukyuli Ɔƒunadi ɔmmɔ ni, úte-ma ɔyikun ɔni náya na benwini Katɔti bebi. 13 Na ubi bɔdi bɔmɛni bɔɔɔkɛnku kaba kemo kɔwɔ lɛlɔ. Na bɔɔɔdi ɔnana ku uleku kɔwɔ kemo na bɔ́si. Na bútasi ɔnana ubi bɔwia kasusu kemo lɛnɔ. Mmomu ni, Katɔti ubi bunwini bɔmɛni bɔ́si Katɔti ɔlati kudɔ. 14 Na Katɔti Litemi lɛmɛni líbo aani ukyuli ɔyawine, na úlie kalɔ lɛlɔ mɛni na bula akɔ. Na Katɔti lɛƒɔndia ku litemi geen lɛ́ƒɔ-nwu lɛlɔ kemo ƒui. Na abu bɔ́nu kalɛ na uukeye ka ɔdi Katɔti ubidi unwi pɛ ɔsu. 15 Yohane údie-nwu ɔ́tina bekyuli uwi ɔni na ɔ́kɔ lɛsa úte kasalakɔ ƒui ɔnini, “Ɔmɛni ndi ukyuli ɔni lɛlɔ na ńtaatɛmi taasiku ɔni lɛ́su nnii ukyuli ɔdi ɔkpɛ-mi kama ɔdubo ɔni ntulo-mi ƒui, ɔsika ɔkya kukuuku asa na báwɔ-mi.” 16 Na Katɔti lɛƒɔndia ku litemi geen lɛni náƒɔ-nwu lɛlɔ kemo ƒui ɔsu ni, ɔ́bla bula ƒui lɛƒɔndia ɔ́sia kama. 17 Ɔsika kudeedi ni, Katɔti ɔkɛ Mose lɛlɔ úte-bu nwuna ɔda bubo. Nsu ɔkɛ Yesu Kristo lɛlɔ úte-bu lɛƒɔndia lɛmɛni ku litemi geen. 18 Ukyuli ɔdi útanu Katɔti nwaa dii. Nsu Katɔti ubidi unwi pɛ ɔni mma-nwu lɛlɔ ni, anwu nédie-nwu nwaa ɔ́tina bekyuli. 19 Yohane údie kenye kadi úte Yudaƒuɔ batɔnkune bani nátala bakpane ku bana bebunkune básiku Yerusalem bákya-nwu. Bébo bébeye-nwu banini, “Ɔma geen na aasu anii adi tɔ?” 20 Amu na Yohane údie ala kalɔ úte-ma mmɔ kani ɔnini, “Lɛɛɛdi Katɔti Ukyuli Ɔƒunadi ɔni na básu bése ka webo.” 21 Bakpane bammɔ básɔ béye-nwu banini, “Amu ɔma na adi? Katɔti Kenye Udiene Elia na adi?” Údie kenye ɔnini, “Ɔɔɔdi anwu na ndi.” Béye-nwu banii, “Na awɔ ndi Kenye Udiene ɔni básu bése ka ɔdubo?” Na ɔ́sɔ ɔ́su-ma ɔnini, “Oowo.” 22 Anwuɔsu básu-nwu banini, “Su-bu lɛla lɛdi kalɛ na bɔkana kenye budie bute bekyuli bani nátala-bu! Ɔma na adi? Bi na aasu taasiku ƒula lɛlɔ?” 23 Údie kenye ɔ́su-ma aani kalɛ na Kenye Udiene Yesaia únweni úse ɔnini, “Ami ndi ukyuli ɔni mɔɔva na ketele kemo nnii bɛklibi ulu bise bite Blɔti bubo.” 24 Na bekyuli bani na bátala mɛni ni, bási Yudaƒuɔ lɛkpa lɛni baalɔ banii Ƒarisiƒuɔ kemo. 25 Anwuɔsu béye-nwu banini, “Si aaadi bekyuli bani na Katɔti ɔ́su úse ka badubo akɔ unwi aani Ukyuli Ɔƒunadi, iye Elia, iye Kenye Udiene ɔmmɔ ni, bi ɔsu na aabla ketu kemo ntu bɔkpila ɔdi ɔmɛni?” 26 Yohane ɔ́su-ma ɔnini, “Ntu kani na muuti taabla bɔkpila ɔdi ɔmɛni. Nsu ukyuli ɔdi ɔkya bina akɔ na bɛɛɛgyi-nwu. 27 Anwu ndi ukyuli ɔni nkpɛ-mi kama ɔdubo, na ami ńtedu ka lɛbla kabla kadi lite-nwu muedi.” 28 Lɛla lɛmɛni lɛ́lɛ na ɔma ɔni baalɔ banii Betania na Yordan Ketu ɔvi. Mmɔ na Yohane útaabla ketu kemo ntu bɔkpila ɔdi ɔmɛni. 29 Kadi kégye ni, Yohane ɔ́nu ka Yesu ɔ́si ɔdubo. Amu na ɔ́su bani nnye-nwu kudɔ mmɔ ɔnini, “Bɛnu! Ɔmɛni ndi Katɔti Lɛkpa Koƒonu Ubi ɔni ndubo bayawine ekpidi buni budie-ma lɛlɔ. 30 Anwu ndi ukyuli ɔni lɛlɔ na ńtaatɛmi taasiku uwi ɔni na lɛ́su nnii ukyuli ɔdi ɔkpɛ-mi kama ɔdubo ɔni ntulo-mii ƒui, ɔsika ɔkya kukuuku asa na báwɔ-mi. 31 Ami lɛnɔ lɛɛɛgyi nnii anwu ndi ukyuli ɔmmɔ. Nsu nwuna bubo ɔsu na líbo mɔɔbla bɔkpila ɔdi ɔmɛni kalɛ na lidie-nwu lɛtina bula kadi bekyuli Israelƒuɔ.” 32 Amu na Yohane ɔ́sɔ údie kenye ɔnini, “Lɛ́nu ka Katɔti Kɔyu kɔ́yu kɔ́si katɔ aani kalɛ na abloduma ɔɔyu, na kúbelie-nwu lɛlɔ. 33 Kudeedi ni, ńtati-nwu. Nsu uwi ɔni na Katɔti ɔ́tala-mi ɔnii ntaabla bɔkpila ɔdi ɔmɛni ni, ɔ́su-mi ɔnini, 'Si ánu ka mina Kɔyu kɔ́yu kuulie ukyuli ɔdi lɛlɔ ni, adubɔnu ati ka anwu ndi ukyuli ɔni muuti Katɔti Kɔyu taabla bɔkpila ɔdi ɔmmɔ.' 34 Na lɛ́nu ka ɔ́lɛ lɛni na ukyuli ɔmɛni lɛlɔ. Na mɔɔsu-mii geen ka anwu ndi Katɔti Ubidi ɔmmɔ.” 35 Limeyi lɛni nsɔ nsia ni, ka Yohane ku nwuna basiakune inyɔ benye ni, 36 Yesu úsie úbavi. Amu ka Yohane ɔ́nu-nwu ni, ɔ́su ɔnini, “Bɛnu! Ɔmɛni ndi Katɔti Lɛkpa Koƒonu Ubi!” 37 Ka bénu ɔmɛni ni, Yohane basiakune inyɔ bammɔ bátu bénwini na básiaku-nwu. Yesu únwini ɔ́nu ka basiaku-nwu, na úye-ma ɔnini, “Bi na bɛɛwia?” 38 Mmɔ na bédie kenye banini, “Rabi,” ɔni kalɔ ndi ala ɔtinane, “Buvele, wɛ na eli?” 39 Ɔ́su-ma ɔnini, “Bibo na bibanu.” Anwuɔsu anwu ku-ma bakɛ bétédu kesii kani na ɔ́kya, na bélie-nwu kudɔ useyi uwi ɔmmɔ ƒui ɔ́si lɛdɔ ine. 40 Na bekyuli bamɛni akɔ unwi ɔdi Andrea ɔni ndi Simon Petro ɔnwani. 41 Lɛla lideedi lɛni na Andrea ɔ́bla ndi ka úsie útáwia ɔnwani Simon na ɔ́su-nwu ɔnini, “Abu bɔ́nu Mesia ɔmmɔ!” iye Kristo. Na anyi ammɔ kalɔ budie ndi Ukyuli Ɔƒunadi. 42 Na Andrea ɔ́tɔnku Simon úsienku Yesu kudɔ. Na ka Yesu ɔ́nu Simon ni, ɔ́su-nwu ɔnini, “Awɔ ndi Yohane ubidi Simon, nsu bekyuli badubɔlɔ-ɔ banii Keƒas,” iye Petro. Na anyi ammɔ kalɔ budie ndi lɛtakpɛ. 43 Kadi kégye ni, Yesu ɔ́bla kasusu ka uteesie kalɔ kani baalɔ banii Galilea. Na ka ɔkɛ ulu ni, ɔ́nu ukyuli ɔni baalɔ Ƒilipo, na ɔ́su-nwu ɔnini, “Bo, na abasiaku-mi.” 44 Na Ƒilipo lɛnɔ ɔ́si Betsaida ɔni ndi Andrea ku Simon ɔma. 45 Ɔƒɛni ni, Ƒilipo ɔ́gyu ɔ́tɔlɔ útáwia Natanael. Na ɔ́su-nwu ɔnini, “Abu bɔ́nu ukyuli ɔni geen lɛlɔ na Mose ku kenye bediene bénweni ala básiku-nwu lɛlɔ bése na Bunweni Kedee Ɔku kemo! Anwu ndi Yoseƒ ubidi Yesu ɔni nási Nasaret!” 46 Natanael údie kenye ɔnini, “Dɛ! Bɔsi na lɛla lɛbuni lɛdi lɛdubɔsi Nasaret ntu?” Ƒilipo ɔ́su-nwu ɔnini, “Awɔ bo, na abanu!” 47 Ka bákpɛ beedé na Yesu ɔ́nu ka Natanael ɔdubo ni, ɔ́su-nwu lɛlɔ kɔtɛ ɔnini, “Bɛɛnu ka ukyuli ɔdi ɔdubo na ulatɔlɔ bekyuli. Ɔdi Israelni geen!” 48 Natanael úye-nwu ɔnini, “Dɛ na ábla na agyi ukyuli ɔni udu na ndi?” Yesu údie kenye ɔnini, “Mɔɔnu-ɔ kukuuku na kɔdingyii kɔni kalɔ na eli asa na Ƒilipo úbo úbalɔ-ɔ.” 49 Natanael ɔ́su-nwu ɔnini, “Rabi, awɔ ndi Katɔti Ubidi. Awɔ ndi Israelƒuɔ Ɔga.” 50 Amu na Yesu úye-nwu ɔnini, “Áƒɔ ala amɛni ƒui ádi ɔsika lɛ́su-ɔ nnii lɛ́nu-ɔ na kɔdingyii kɔmmɔ kalɔ ɔsu? Adubɔnu budie bɔtina bunengudi butulo bɔmɛni. 51 Litemi geen na mɔɔsu-ɔ ka ni, adubɔnu ka katɔ kálɛmi na Katɔti batu baakɔ́ teesie katɔ taayu teebo ami Ukyuli Ɔyawine Ubi lɛlɔ.”

2

1 Na limeyi lɛtɛdi lɛni nsia ni, bekyuli badi baawɛɛ uleku ɔdi na ɔma ɔni baalɔ Kana na Galilea kalɔ lɛlɔ. Mmɔ ni, Yesu uni Maria lɛnɔ ɔ́kya bebunkune bammɔ akɔ. 2 Na bálɔ Yesu ku nwuna batɛyane lɛnɔ banii bebo uleku ketikɔ mmɔ. 3 Uwi ɔni na ntɛ bɔni básala bɔ́sa ni, Yesu uni úbo Yesu kudɔ úbasu-nwu lɛla lɛni mɔɔlɛ́ mɛni ɔnini, “Ntɛ bɔmmɔ bútedu.” 4 Amu na Yesu ɔ́su-nwu ɔnini, “Uleku, ɔɔɔdi awɔ masu-mi lɛla lɛni mabla. Uwi ɔni na mete kebunku útedu tɔ.” 5 Mmɔ na Yesu uni ɔ́su kabla bablane bani nnye mmɔ ɔnini, “Binye kagyumana na bɛbla lɛla lɛni na wasu-mii ɔnii bɛbla.” 6 Uwi ɔmmɔ ni, atabi kutubwi bonwu aku alɛ mmɔ. Na kadi biala kadubɔƒɔ aani alɔkumbwi ene iye aku. Aku na Yudaƒuɔ béteeti taabla bana lɛlɔ bɔƒɔ ɔdi. 7 Amu na Yesu ɔ́su kabla bablane bammɔ ɔnii bedu ntu bewi-ku kemo. Anwuɔsu bédu ntu béyile-ku tɛtɛɛtɛ utédu atu. 8 Amu na ɔ́su-ma ɔnini, “Bidu bɔdi bisienku ukyuli ɔni muubo ntɛ ɔda.” Na bédu-mu bésienku-nwu. 9 Ka unengu ɔmɛni útu ntu bɔni nénwini ntɛ mɛni ɔ́nu ni, útati kesii kani na ntɛ bɔmmɔ bɔ́si. Nsu kabla bablane bani nédu ntu bɔmmɔ ama báti. Anwuɔsu unengu ɔmmɔ ɔ́lɔ uleku ɔgya, 10 na ɔ́su-nwu ɔnini, “Bi na ábla mɛni? Ntɛ bɔbuni na bekyuli pii beeti teese kalɔ na si uwi ɔni na báani na búdu-ma ɔkwɛ asa beeti bukpidi teeboku. Nsu awɔ ni, ɔƒɛni édie ntɛ bɔbuni keyi!” 11 Lɛla lɛni nálɛ na Kana na Galilea mɛni ni, ani ndi akɔla budie taatina edeedi ani na Yesu ɔ́bla. Na ka údie nwuna ɔyikun ɔ́tina lɛni ni, nwuna batɛyane báƒɔ-nwu bádi. 12 Na uleku buti kama ni, Yesu ku uni ku Yesu banwani ku batɛyane bammɔ bátɔlɔ bésie ɔma ɔni baalɔ banii Kapernaum. Na bélie mmɔ emeyi alɛɛ adi. 13 Lebo lɛmmɔ ni, uwi ɔdaku budu ka badi Yudaƒuɔ Kukpi Lili Bɔvia Limeyi, na Yesu lɛnɔ úsie Yerusalem. 14 Ka údu Katɔti kakpakɔ ɔtɔ anumi ni, ɔ́nu ka beyedine belie beeyé ɔmantɛ bakɔ ku baƒonu ku babloduma bete lɛkpa. Na egulabi bavumanane lɛnɔ belie bana egulabi kasiakɔ. 15 Anwuɔsu Yesu úlii kɔbuli kɔdi ɔ́sala na ɔ́bɔku-ma ku baƒonu ku ɔmantɛ bakɔ bammɔ ɔ́lɛku mmɔ. Amu na úgyingya egulabi ammɔ úwi kalɔ na únwini bana ala kasiakɔ úbi kalɔ. 16 Amu na úsie bekyuli bani muuyé babloduma kudɔ na ɔ́bɔku-ma ɔnini, “Bɛda ala amɛni bidie mɛni, na biteti mina Ɔti ɔtɔ bitenwini kuye kadikɔ!” 17 Mmɔ ni, nwuna batɛyane bényimo lɛla lɛni nkya Bunweni Kedee Ɔku kemo ka Ukyuli Ɔƒunadi ɔ́su Katɔti ɔnini, “Ƒula ɔtɔ lɛlɔ bɔnu anumi adubo-mi bugyie na ɔya na bekyuli bekpoku-mi.” 18 Na ɔmɛni ɔsu ni, Yudaƒuɔ batɔnkune bádɔnku Yesu banini, “Ɔma nátala-a lɛla lɛmɛni udu bɔbla? Akɔla budie bɔtina bɔmani na adubɔbla na eti atina-bu kenyekɔ kani na ebo ɔsu na aabla lɛni?” 19 Yesu údie kenye ɔnini, “Bɛƒɛ Katɔti ɔtɔ ɔmɛni, na ndubɔtalaku-nwu linyene limeyi lɛtɛdi lɛlɔ!” 20 Amu na báva básu banini, “Bi na aasu? Bábla kabla akwa aavlene-aku sɔɔn asa na bátu ɔtɔ ɔmɛni! Na awɔ aasu anii adubɔtalaku-nwu enyene emeyi atɛ kemo?” 21 Nsu bátati ka Yesu ɔ́tɛmi ɔ́siku nwuna ɔlɔna lɛlɔ aani Katɔti kakpakɔ ɔtɔ ɔmmɔ. 22 Kama ƒui ka Katɔti ɔ́gyila-nwu ɔ́lɛku bekpine akɔ úboku ngba ni, asa na nwuna batɛyane bényimo ka ɔ́su lɛni. Anwuɔsu báƒɔ ala ani na bénweni na Bunweni Kedee Ɔku kemo ku ala ani na Yesu ɔ́su mmɔ bádi. 23 Uwi ɔni na Yesu ɔ́kya Yerusalem na Kukpi Lili Bɔvia uwi kemo ni, bekyuli pii bánu akɔla lidu lidu lɛni na ɔ́bla na báƒɔ-nwu bádi ka ubo Katɔti ɔyikun. 24 Nsu Yesu útanyonu lɛlɔ útete bekyuli bammɔ, ɔsika ɔgyi bekyuli ƒui. 25 Anwuɔsu uláwia ka ukyuli ɔdi ɔtina-nwu lɛla lɛdi na ukyuli lɛlɔ, ɔsika anwu ɔlati ɔgyi ukyuli ɔyawine udu geen.

3

1 Uwi ɔmmɔ kemo ni, Yudaƒuɔ ɔtɔnkune ɔdi ɔkya ɔni nkya lɛkpa lɛni baalɔ Ƒarisiƒuɔ, na baalɔ-nwu banii Nikodemo. 2 Ɔ́bɛ úbo Yesu kudɔ usien na úbeye-nwu ɔnini, “Ala ɔtinane, buvele, bula ƒui bɔgyi ka awɔ nási Katɔti kudɔ ébo abatina-bu ala, ɔsika ukyuli biala ɔdi ulakana akɔla budie bɔtina bɔmɛni udu bɔbla amu ntu Katɔti uliku-nwu.” 3 Amu na Yesu údie kenye ɔnini, “Mɔɔsu-ɔ geen ka ni, si bátasɔku ukyuli bátawɔ ni, Katɔti ulakana lɛga bɔdi na nwuna kayi kemo.” 4 Amu na Nikodemo úye-nwu ɔnini, “Bi na aasu? Dɛ na ukyuli ɔni náabi lɛlɔ wasɔ wetéduo uni kaƒɔ kemo na basɔku-nwu bawɔ?” 5 Amu na Yesu ɔ́su-nwu ɔnini, “Mɔɔsu-ɔ geen ka ni, si bátawɔ ukyuli bátalɛku ntu ku kɔyu kemo ni, ulakana Katɔti lɛga kadikɔ mmɔ buduo. 6 Ɔsika ukyuli ɔni na ɔlɔna kemo na básia báwɔ-nwu ni, ɔdi ɔlɔna kani. Nsu Katɔti Kɔyu kɔdubɔwɔ kɔyu kemo bekyuli. 7 Anwuɔsu utabla-a dɛye dɛye si mɔɔsu nnii ɔlɛka basɔku-mii bawɔ. 8 Ɔƒɛƒɛɛ uukpó teesie kesii kani na ɔɔyɔ́. Nsu alakana bɔti kesii kani ɔɔsí iye kesii kani na úsela ina ka eenú-nwu kɔku. Lɛni kani na aláti kalɛ na Kɔyu kemo kabla keeti ngba bɔwɔdi teete ukyuli.” 9 Amu na Nikodemo úye-nwu ɔnini, “Dɛ na ɔmɛni udu ɔɔlɛ́?” 10 Yesu ɔ́su-nwu ɔnini, “Adi bula kadi Israelƒuɔ ala ɔtinane kemo ɔdi. Bi ɔsu na elenu ala amɛni kalɔ? 11 Mɔɔsu-ɔ geen ka bɔɔtɛmi taasiku ala ani na bɔgyi lɛlɔ, na buudie ani na bɔ́nu kenye teete-mii. Nsu bilaƒɔ ala ani kenye na buudie teete-mii taadi. 12 Na si mɔɔsu-mii ala ani mɔɔlɛ́ bina akɔ na kalɔ lɛlɔ mɛni na bilaƒɔ-mi taadi ni, dɛ na bɛdubɔkana na bɛƒɔ-mi bɛdi si lɛ́su-mii lɛla lɛni mɔɔlɛ́ na katɔ? 13 Ukyuli ɔdi útesie katɔ utáwia ala amɛni udu ntu ami Ukyuli Ɔyawine Ubi kani. Na ami kani nási katɔ líbo kayawi kamɛni lɛlɔ. 14 “Bínu na Mose ɔku kalɛ na ɔ́kana kɔlakpi kɔni bávɔ ku lɛbuala ɔ́mana ugyii lɛlɔ, na ɔ́kɔliku-ku katɔ na ketele kukuuku kalɛ na bekyuli bammɔ bakɛ ngba. Lɛni kani na ɔlɛka bakɔliku ami Ukyuli Ɔyawine Ubi katɔ, 15 kalɛ na ukyuli biala ɔni maƒɔ-mi madi ni, ɔkɛ ngba bɔni nsɔ naaadubo bɔsa kudii. 16 “Ka Katɔti ɔɔyɔ́ bayawine geen ɔsu ni, úti Ubidi unwi pɛ ɔmmɔ úte. Na ukyuli biala ɔni mɔɔƒɔ́-nwu taadi ni, ulayii. Mmomu ɔdubɔkɛ ngba bɔni nsɔ naaadubo bɔsa kudii. 17 Ɔsika Katɔti útatala Ubidi ɔnii ubadu bekyuli bayawine kɔtɔ. Mmomu ɔkɛnku Ubidi ɔmmɔ lɛlɔ ni, ubedie-ma na bakɛ bɔƒɔ. 18 “Bekyuli bani mɔɔƒɔ́-nwu taadi ni, Katɔti uládu-ma kɔtɔ. Nsu bekyuli bani naaadubo-nwu bɔƒɔ bɔdi ni, Katɔti ɔ́ɔtɛku-ma litemi kukuuku na ɔ́ɔdu-ma kɔtɔ ka bátaƒɔ Katɔti Ubidi unwi pɛ bátadi ɔsu. 19 Lɛla lɛni ɔsu na ɔ́du-ma kɔtɔ ndi ka bukeye bɔ́si katɔ búbo kayawi, nsu bekyuli báyɔ lɛdisa bétulo bukeye bɔmmɔ. Ɔsika bana ablala adi likyulikpi ala. 20 Ukyuli biala ɔni mɔɔbla likyulikpi ala ni, ukisi bukeye na ulakpɛ teede-mu. Ɔsika ɔɔyia ka nwuna ablala adubɔlɛ keyi na Katɔti ɔdubɔni-nwu kɔtu. 21 Nsu ukyuli biala ɔni nda nwuna ngba na ulu lɛlɔ geen ni, ɔɔkpɛ́ teede bukeye. Ɔsika ɔɔwia ka bukeye bɔmmɔ budie nwuna Katɔti bɔsiaku ablala atina.” 22 Ɔmɛni kama ni, Yesu ku nwuna batɛyane bátɔlɔ Yerusalem bésie likpo bamba na Yudea kalɛkɛ lɛlɔ bátákya emeyi alɛɛ adi. Na bákya mmɔ baabla ketu kemo ntu bɔkpila ɔdi teete bekyuli. 23 Na uwi ɔmmɔ kemo ni, Yohane lɛnɔ ɔkya ɔɔkpila bekyuli ntu na Ainon na Salim kudɔ, ɔsika ntu bɔkya mmɔ kaduɛ, na bekyuli pii beesié-nwu kudɔ ka ɔkpila-ma ntu. 24 Uwi ɔmɛni kemo ni, útedu tɔ ka kalɔ kammɔ ɔga úƒie Yohane ɔ́kya aban ɔtɔ. 25 Limeyi linwi lɛdi ni, Yohane batɛyane ku Yudani ɔdi bése kalɔ baakya unyeƒi na ntu bɔkpi ɔdi lɛlɔ. 26 Anwuɔsu bébo Yohane kudɔ na béye-nwu banini, “Ala ɔtinane, buvele, ukyuli ɔni na átina-bu na Yordan ketu ɔvi ngye na édie-nwu kenye ni, anwu lɛnɔ ɔɔbla ketu kemo ntu bɔkpila ɔdi ɔmɛni. Ɔdia kalɛ na bula bekyuli ƒui békeli bésela-nwu kudɔ mɛni?” 27 Yohane údie kenye ɔnini, “Ukyuli biala ulakɛ lɛla lɛdi si ɔɔɔdi Katɔti néte-nwu lɛla lɛmmɔ. 28 Amii alati bɛdubudie-mi kenye ka lɛ́su-mii nwaa nnii ɔɔɔdi ami ndi Ukyuli Ɔƒunadi ɔmmɔ. Nsu Katɔti ɔ́tala-mi ka lɛgyu lɛtɔ-nwu. 29 Na ɔƒɛni ni, anwu ɔni ndi uleku ɔgya ɔmmɔ mbo uleku. Na uleku ɔgya ɔkpana ɔni nnye uleku buti kabla kamɛni kenye ni, si uwi ɔni na uleku ɔgya ku uleku ɔmmɔ bása baatɛmi bana lɛlɔyɔ atɛ ni, uunye teenu-nya ku ebiti. Lɛni kani na ami lɛnɔ ebiti aada-mi geen aani uleku ɔgya ɔkpana ɔmmɔ. 30 Nwuna lɛnyi ɔlɛka lɛkɔ katɔ, na mina lɛdi lɛyii lɛkya. 31 “Ukyuli Ɔƒunadi ɔni na katɔ na ɔ́si ni, utulo ukyuli biala. Na ukyuli ɔni nási kalɔ lɛnɔ ni, kalɔ ukyuli kani na ɔdi. Na ɔɔtɛmi ala taasiku kalɔ lɛlɔ. Anwu ɔni nási Katɔ Ɔga Ɔma ni, utulo ukyuli biala. 32 Na anwu muudie ala ani na ɔ́nu ku ani na únu mmɔ kalɔ. Nsu ɛlɛɛ kani mɔɔƒɔ́-nwu taadi. 33 Bani mɔɔƒɔ́-nwu taadi ni, beedie taatina nwaa ka ala ani na Katɔti ɔɔsu ni, anya ndi litemi geen. 34 Ukyuli Ɔƒunadi ɔni na Katɔti ɔ́tala ni, anwu mɔɔsu Katɔti etemila. Ɔsika Katɔti ɔ́tala nwuna Kɔyu ɔnii kubelie ukyuli ɔmɛni lɛlɔ ku kuna ɔyikun ƒui. 35 Katɔti ɔɔyɔ́ Ubidi na úti lɛla biala ɔ́kya nwuna enu kemo. 36 “Na ukyuli biala ɔni mɔɔƒɔ́ Ubidi ɔmɛni taadi ni, ubo ngba bɔni nsɔ naaadubo bɔsa kudii. Na ukyuli ɔni muuní ka ɔdi Ubidi litemi lɛlɔ ni, ulákɛ ngba bɔmmɔ. Mmomu Katɔti kɔnyi kɔdubo butaasiaku-nwu.”

4

1 Na uwi ɔmmɔ ni, Ƒarisiƒuɔ bénu ka Yesu útaabla ntu bɔkpila ɔdi teete bekyuli na ɔɔkɛ́ basiakune pii teetulo Yohane 2 ina ka ɔɔɔdi anwu ɔlati nátaabla ntu bɔkpila ɔdi ɔmɛni, mmomu nwuna batɛyane nátaabla-mu. 3 Ka Yesu ɔ́ti ka Ƒarisiƒuɔ bénu ɔmɛni ni, ɔ́tɔlɔ Yudea kalɔ lɛlɔ únwini úsie Galilea. 4 Na nwuna ulu busie kemo ni, ɔlɛka ɔsia Samaria kalɔ lɛlɔ. 5 Amu na ɔ́kpɛ úde ɔma ɔni baalɔ banii Sikar ɔni nde kemo kani na bana Nana Yakob úte ubidi Yoseƒ. 6 Libiɔ lɛdi lɛkya mmɔ lɛni na Yakob úku. Na ka lɛlɔ lítu Yesu ɔƒiiwi ɔmmɔ na ulu busie gyɔlɔɔ kemo ɔsu ni, ɔ́yu úlie kalɔ na libiɔ lɛmɛni kudɔ. 7 - 8 Na uwi klukui kemo ka nwuna basiakune bésie ɔmankemo banii betéye adila adi ni, Samariani uleku ɔdi úbo ɔnii ubedu ntu. Amu na Yesu úvele-nwu ɔnini, “Te-mi ntu lɛni.” 9 Uleku ɔmɛni úye-nwu ɔnini, “Bi ɔsu na awɔ Yudani eevele ami Samariani ntu?” Ɔ́su ɔmɛni ɔsika Yudaƒuɔ balákya Samariaƒuɔ lɛlɔ. 10 Yesu údie kenye ɔnini, “Si bɔti na adubɔti litela lɛni na Katɔti ubo ute-ɔ ku ukyuli ɔni udu muuvele-ɔ ntu ɔnii ɔɔní ni, nka awɔ mmomu ndubuvele-mi ntu bɔni mɔɔgbá na buute ngba, na lite-ɔ ntu bɔmmɔ.” 11 Uleku ɔmmɔ úye-nwu ɔnini, “Ɔbune, na ka eeebo lɛla lɛni na eti edu-mu edie na libiɔ lɛmɛni lɛnɔ lɛ́gyu ni, wɛ na adubo ntu bɔni mɔɔgbá na buute ngba mmɔ bɔkɛ? 12 Munuu butulo na etulo bula Nana Yakob ɔni néku libiɔ lɛmɛni? Ntu bɔmmɔ na anwu ku nwuna bebi ku bebuo ƒui báni.” 13 Amu na Yesu údie kenye ɔnini, “Si bekyuli báni ntu bɔmɛni ni, utukwɛ ɔɔsɔ taada-ma. 14 Nsu ntu bɔni na ndubute ni, utukwɛ ɔsɔ ulada ukyuli ɔni mani-mu. Mmomu bɔdubunwini libiɔ lɛni mɔɔyu na bana lɛlɔ kemo, na ɔdubute-ma ngba bɔni nsɔ naaadubo bɔsa kudii.” 15 Ɔmɛni ɔsu uleku ɔmmɔ ɔ́su-nwu ɔnini, “Ati, muuvele nda-a, te-mi ntu bɔmmɔ bɔdi na utukwɛ ɔsɔ ulada-mi kudii, na nsɔ neeeteebo mɛni limeyi ndi limeyi.” 16 Mmɔ na Yesu ɔ́su-nwu ɔnini. “Teesie na atákpanku ƒ^ɔgyani eboku.” 17 Amu na uleku ɔmmɔ ɔ́su Yesu ɔnini, “Liiibo kɔgya kɔdi.” Yesu ɔ́su-nwu ɔnini, “Sɔsɔ geen na ɔdi ka anii eeebo kɔgya. 18 Ɔsika éelieku banana ɛlɔ. Na ɔni na awɔ ku-nwu bilie ɔƒɛni muedi ni, ɔɔɔdi ƒ^ɔgyani. Ásu ƒula litemi geen.” 19 Mmɔ ni, uleku ɔmɛni údie kenye ɔnini, “Ɔbune, mɔɔtí ka Katɔti kenye udiene na adi! 20 Abu Samariaƒuɔ bɔgyi ka kɔbi kɔmɛni lɛlɔ kani na bula nana bene bábla lɛkpa. Nsu bi náya na amii Yudaƒuɔ bɛɛsu bɛnii Yerusalem kani ndi likpo lɛni na ɔlɛka bɔɔkpá?” 21 Yesu údie kenye ɔnini, “Uleku, ƒɔ-mi litemi lɛni mɔɔsu-ɔ mɛni di ka ni, uwi ɔdubo ɔni na ɔɔɔdi kɔbi kɔmɛni lɛlɔ iye Yerusalem na ɔlɛka bɛkpa Katɔti. 22 Ɔƒɛni amii Samariaƒuɔ ni, bɛɛkpá lɛla lɛni bɛɛɛgyi. Nsu abu Yudaƒuɔ ni, abu bɔgyi ala bɔ́siku-nwu lɛlɔ. Ɔsika bekyuli budie na likpidi kemo ni, Yudaƒuɔ akɔ na bɔ́si bubo. 23 Nsu uwi ɔdubo na úudu lɛnɔ ɔni na bekyuli bani nsiaku Katɔti na ulu geen lɛlɔ ni, badubɔkɔliku-nwu lɛnyi katɔ ku Katɔti Kɔyu ɔyikun na litemi geen kemo. Ɔsika ama ndi basiakune bani na Katɔti ɔɔwia. 24 Ka Katɔti ɔdi Kɔyu ɔsu ni, ɔlɛka bekyuli bani nsiaku-nwu ƒui baakɔliku-nwu lɛnyi katɔ ku nwuna Kɔyu ɔyikun na litemi geen kemo.” 25 Amu na uleku ɔmmɔ ɔ́su Yesu ɔnini, “Ngyi ka Ukyuli Ɔƒunadi ɔni baalɔ Kristo ɔdubo. Na si úbo ni, ɔdubo lɛla biala kalɔ budie bute-bu.” 26 Mmɔ ni, Yesu údie kenye ɔnini, “Ami ɔni mɔɔtɛmiku-ɔ mɛni ndi Anwu ɔmmɔ.” 27 Na uwi ɔmmɔ lɛlɔ ni, nwuna batɛyane bási bébeduo, na ɔ́bla-ma dɛye dɛye ka bánu ka ɔɔtɛmiku uleku ɔmɛni. Nsu ɔdi úteye Yesu ɔnini, “Bi na aawia?” iye “Bi ɔsu na aatɛmiku-nwu?” 28 Uwi ɔmɛni ni, uleku ɔmmɔ ɔ́da nwuna ketubwi úse libiɔ lɛmmɔ kɔtu na únwini úsie ɔmankemo na útásu ukyuli biala ɔnini, 29 “Bibo na bibanu ukyuli ɔni násu-mi ala ani ƒui na lɛ́bla na ngba kemo! Ɔdubɔkana na wadi Katɔti Ukyuli Ɔƒunadi ɔmmɔ?” 30 Anwuɔsu bekyuli bammɔ bási ɔma ɔmmɔ kemo bésie banii batánu-nwu. 31 Uwi ɔmmɔ kemo ni, Yesu batɛyane bévele-nwu banii, “Ala ɔtinane, di lɛla lɛdi.” 32 Nsu Yesu ɔ́su-ma ɔnini, “Ami mbo adila ani na mɔɔdi, na bɛɛɛgyi-nya.” 33 Anwuɔsu béye lɛlɔ banini, “Ukyuli ɔdi néboku-nwu adila?” 34 Yesu ɔ́su-ma ɔnini, “Mina adila ndi ka lɛbla anwu ɔni nátala-mi lɛƒɔyɔ na lɛwɔlɔ kabla kani na úte-mi ka mbabla. 35 Bɔgyi ka baasu banii si ákya edula ni, abuli ene kama asa bɔɔƒɛ-nya. Nsu ndaku-mii bɔsu nnii útalɛka bunye butédu uwi ɔmmɔ. Edula ammɔ áabi! Bɛtalaku anumi na bɛnu ka edula ammɔ éegyie ka baƒɛ. 36 Katɔti ɔɔƒɔ edula ɔƒɛne biala kayu kabuni na edula ani na ɔdaku bɔsala teewi linwu lɛni nnye Katɔti kudɔ kemo ute ngba bɔni nsɔ naaadubo bɔsa kudii ɔsu. Na ɔmɛni ɔsu ni, edula ɔkyane ku edula ɔƒɛne ƒui badubɔkɛ ebiti geen. 37 Anwuɔsu lɛsugba lɛmɛni lɛdi litemi geen ka ni, ukyuli ɔdi ɔɔkya edula, na ukyuli ɔbambadi mɔɔƒɛ-nya. 38 Lɛ́tala-mii nnii bitáƒɛ edula ani na ɔɔɔdi amii nákya-nya. Bekyuli bamba nábla kabla kpakplaa kamɛni na edula amɛni bɔƒɛ kɔsia kani na amii bíbakɛ.” 39 Uwi ɔni na Samariaƒuɔ bénu ka uleku ɔmmɔ ɔ́su ɔnii, “Yesu ɔ́su-mi lɛla lɛni na lɛ́bla na mina ngba kemo” ni, bana akɔ pii bése kalɔ baaƒɔ́ Yesu taadi. 40 Ka bálɛ bébo bábanu Yesu na libiɔ lɛmɛni kudɔ ni, bévele-nwu banii ɔkya-ma kudɔ. 41 Amu na ɔ́tuna na ɔ́kya-ma kudɔ emeyi anyɔ. Na bekyuli babambadi pii lɛnɔ bani nénu ala ani na ɔɔsu ni, báƒɔ-nwu bádi. 42 Kama ni, bekyuli bammɔ básu uleku ɔmmɔ banini, “Ɔƒɛni bɔdaku bɔƒɔ taadi, ɔsika abu alati búnu nwuna etemila, na ɔɔɔdi lɛla lɛni na ásu lɛti pɛ ɔsu. Sɔsɔ na ɔdi, bɔ́ti ka anwu ndi bekyuli bayawine Ɔƒɔne.” 43 Na mmɔ bɔkya emeyi anyɔ kawɔlɔkɔ ni, Yesu úsie Galilea kalɔ lɛlɔ. 44 Na ina ka Yesu ɔ́su dii ɔnii Katɔti kenye udiene ɔdi biala uuubo ɔbu na anwu ɔlati nwuna kalɔ lɛlɔ ni, 45 Galileaƒuɔ bégyingya enu báƒɔ-nwu. Ɔsika bésie Yerusalem uwi ɔni na baadi Kukpi Lili Bɔvia Limeyi, na bánu lɛla biala lɛni na ɔ́bla. 46 - 47 Ɔmmɔ kama ni, Yesu ɔ́sɔ únwini úsie Kana na Galilea kalɔ lɛlɔ mmɔ kesii kani na úti ntu únwini ntɛ. Uwi ɔmmɔ kemo ni, aban unengu ɔdi nási Kapernaum únu ka Yesu ɔ́si Yudea úbo Galilea. Na ka ubidi lɛnɔ uuƒi kpakplaa ɔsu ni, unengu ɔmɛni úsie Kana na útánu Yesu na úvele-nwu ɔnii ɔsiaku-nwu na besie Kapernaum na utábwi ubidi ute-nwu, ɔsika úudu kaƒiɔtɔ kɔtu. 48 Yesu ɔ́su-nwu ɔnini, “Si bítanu ka lɛbla akɔla budie taatina ni, biláƒɔ-mi biladi.” 49 Unengu ɔmɛni úvele-nwu ɔnini, “Ɔbune, muuvele nda-a, bo na abanu mina ubi kalɛ na ulekpi.” 50 Amu na Yesu ɔ́su-nwu ɔnini, “Teesie. Ƒ^ubidi uli ngba.” Unengu ɔmɛni ɔ́ƒɔ lɛla lɛni na Yesu ɔ́su-nwu ɔ́di na ɔ́sɔ únwini úsela ɔma. 51 Ka ɔkɛ ulu ni, nwuna kabla bablane badi bébo bábasiaku-nwu na básu-nwu banii ubidi ɔ́ta. 52 Úye-ma uwi ɔni geen na ubi ɔmmɔ lɛlɔ líse kalɔ lɛɛbla-nwu buɛɛ. Na bédie kenye banini, “Kamaadi ɔƒiiwi aani ɔdɔ unwi kemo na ogya bɔƒɔ bɔmmɔ bɔ́nyonu-nwu.” 53 Amu na ɔ́nu ɔ́ti ka uwi ɔmmɔ lɛlɔ geen na Yesu ɔ́su-nwu ɔnini, “Ƒ^ubidi uli ngba.” Na unengu ɔmɛni ku nwuna kaduli bekyuli ƒui báƒɔ Yesu bádi. 54 Ɔmɛni ndi akɔla budie bɔtina kunyɔdi bɔni na Yesu ɔ́bla na Galilea ka ɔ́si Yudea kalɔ lɛlɔ.

5

1 Ɔmmɔ kama ni, Yesu ɔ́sɔ únwini úsie Yerusalem na Yudaƒuɔ limeyi lɛdi bɔdi ɔsu. 2 Na ɔma ɔmmɔ kemo kesii kani nde likpo lɛni baalɔ Baƒonu Kayakun kudɔ ni, lɛba blii lɛdi lɛ́kya mmɔ lɛni baalɔ Betesda na Hebri butemi kemo. Bábla kɔgbakɛ ɛlɔ báka bamana lɛba lɛmmɔ. 3 Mmɔ na balɛne pii badi bátaatɛ bani ndi banumbwɛne ku bekpulone ku lɛlɔ kakɛ kenwi bekpine. Na béteenye mmɔ taagya ntu bɔmmɔ bɔkunku bɔdi udu. 4 Ɔsika Katɔti ɔtu ɔdi uubo uwi uwi teebebwiile ntu bɔmmɔ. Na ɔlɛne udeedi ɔni néduo ntu bɔmmɔ kemo na muna bubwiile kama ni, ɔlɛ ɔni na uuƒi mmɔ ɔɔba-nwu. 5 Ukyuli ɔdi ɔtɛ mmɔ ɔni náatɛ ɔlɛ akwa aavlatɛ-maane sɔɔn. 6 Na ka Yesu ɔ́nu-nwu ka ɔtɛ mmɔ na ɔ́ti ka úuƒi akwa pii ni, úye-nwu ɔnini, “Aayɔ́ ka ƒula ɔlɛ ɔba-a?” 7 Ɔlɛne ɔmɛni údie kenye ɔnini, “Ati, liiibo ukyuli ɔni mebunku-mi na liduo lɛba lɛmmɔ kemo si uwi ɔni na ntu bɔmmɔ bɔɔkunku. Si uwi ɔni na mɔɔkya ɔkplu ka liduo ni, ukyuli ɔdi ɔ́ɔka bɔgyu bɔtɔ butéduo kukuuku.” 8 Amu na Yesu ɔ́su-nwu ɔnini, “Ta nye! Ti ƒula lɛtala na eteesie.” 9 Mmɔ mmɔ ni, ukyuli ɔmɛni ɔlɛ ɔ́ba-nwu! Na úti nwuna lɛtala na úsie. Na limeyi lɛni na ala amɛni álɛ ni, ɔdi lɛnwunameyi. 10 Anwuɔsu ka Yudaƒuɔ benengu bánu ɔnana ɔmɛni ku nwuna lɛtala ni, básu-nwu banini, “Ɔɔɔdi ulu ka agyu ƒula atɛla eti lɛni na ɔmwi lɛnwunameyi lɛlɔ. Áta énye bula ɔda bubo lɛlɔ!” 11 Nsu ɔnana ɔmɛni údie kenye ɔnini, “Lɛni na ukyuli ɔni nábwi-mi ɔ́su-mi ɔnii, 'Ti ƒula lɛtala na eteesie.' ” 12 Amu na béye-nwu banini, “Ɔma ndi ukyuli ɔni násu-ɔ ɔnii ɔlɛka eti-ni na esie?” 13 Nsu ɔnana ɔmmɔ útati lɛla lɛdi útásu na Yesu lɛlɔ. Na Yesu lɛnɔ ɔ́ɔyii ɔ́kya bekyuli bammɔ akɔ. 14 Ɔmmɔ kama ni, Yesu ɔ́nu-nwu na Katɔti kakpakɔ na ɔ́su-nwu ɔnini, “Nu! Ɔƒɛni lɛlɔ lɛ́sɔ lɛ́yu-ɔ ɔkplu. Na tasɔ telie ataabla likpidi! Si ɔɔɔdi lɛni ni, lɛla lɛni ntulo lɛmɛni lɛdubo-ɔ bɔbla!” 15 Amu na ukyuli ɔmɛni úsie útánu Yudaƒuɔ benengu na ɔ́su-ma ka Yesu ndi ukyuli ɔni nábwi-nwu. 16 Anwuɔsu bése kalɔ ku Yesu bukpoku, ɔsika lɛnwunameyi lɛlɔ na ɔ́bwi-nwu. 17 Nsu Yesu ɔ́su-ma ɔnini, “Mina Ɔti uubunku bekyuli limeyi ndi limeyi, na ɔlɛka ami lɛnɔ lɛbla lɛni kani.” 18 Ɔmɛni bɔsu ɔsu ni, Yudaƒuɔ benengu básɔ báwia ulu bébu ka badu-nwu. Ɔsika na lɛnwunameyi ɔda bubo lɛlɔ tadi kama ni, ɔ́sɔ ɔ́tɛmi ɔ́siku Katɔti lɛlɔ aani Ɔti kalɛ. Na ɔmɛni ɔɔtina ka anwu ku Katɔti bese likeke. 19 Mmɔ na Yesu údie kenye ɔnini, “Mɔɔsu-mii geen nnii ami Katɔti Ubidi naaakana lɛla lɛdi bɔbla na ami ɔlati ɔyikun kemo. Mmomu lɛla lɛni na mɔɔnu ka mina Ɔti ɔɔbla ni, ani kani na ami lɛnɔ mɔɔbla. Anwuɔsu mina Ɔti ablala kama na ami Ubi lɛnɔ nsia. 20 Ɔsika Ati ɔɔyɔ́ ami Ubidi na ɔɔtina-mi lɛla biala lɛni na ɔɔbla. Na ɔdubɔtina-mi ala ani na lɛbla litulo ɔmɛni na ɔdubo-mii bɔbla kalɛ kadi. 21 Ɔsika kalɛ na mina Ɔti ɔɔgyila bekpine na beelie ngba ni, lɛni kani na ami Ubidi lɛnɔ muuti ngba teete bani na mɔɔyɔ́ ka lite ngba. 22 Na lɛnɔ ni, mina Ɔti ɔlati ulatɛku ukyuli ɔdi litemi. Mmomu ɔ́ɔnyonu likpidi biala litemi bɔtɛ úte ami Ubidi, 23 kalɛ na ukyuli biala utaabu Ubidi aani kalɛ kani na baabu Ɔti. Nsu si bíni na bilábu ami Katɔti Ubidi ɔni na ɔ́tala ɔ́kya-mii ni, bilábu Ɔti lɛnɔ. 24 “Na mɔɔsu-mii geen ka ni, ukyuli ɔni muunú-mi litemi na ɔɔƒɔ́ Katɔti ɔni nátala-mi taadi ni, uli ngba bɔni nsɔ naaadubo bɔsa kudii. Na Katɔti uládu-nwu kɔtɔ na nwuna ekpidi ɔsu. Mmomu ɔ́ɔvia kukpi ntu úduo ngba bɔwɔdi kemo. 25 Na mɔɔsu-mii geen ka uwi ɔdubo na úudu lɛnɔ ɔni na bekyuli bani nékpi ni, badubunu Katɔti Ubi lɛdi. Na bekyuli bani ndubunu-ni na baƒɔ litemi lɛmmɔ ni, badubulie ngba geen. 26 Kalɛ na ngba ƒui bɔɔsí mina Ɔti kudɔ ni, lɛni kani na ɔ́ya na ngba ƒui bɔɔsí ami Ubidi lɛnɔ kudɔ. 27 Na úte-mi ɔyikun ɔni na lɛtɛku kayawi ƒui litemi, ɔsika ami ndi Ukyuli Ɔyawine Ubi. 28 “Ɔmɛni utabla-mii kalɛ kadi. Ɔsika uwi ɔdubo ɔni na bekyuli bani nékpi ƒui badubunu-mi lɛdi. 29 Na bana ƒui badubo bɔta balɛ bana kaƒiɔtɔ kemo. Na bani nábla lɛbuni ni, badubɔta bebelie ngba. Na bani nábla likpidi ni, badubɔta bebeduo kɔtɔ bɔdu kemo. 30 “Lɛɛɛdubo lɛla lɛdi bɔkana bɔbla na ami ɔlati ɔyikun kemo. Mmomu ndubɔtɛku bekyuli litemi aani kalɛ na mina Ɔti ɔ́su-mi. Anwuɔsu mina litemi bɔtɛ buse siin, ɔsika naaabla mina lɛƒɔyɔ. Mmomu Katɔti ɔni nátala-mi ni, nwuna lɛƒɔyɔ na mɔɔbla. 31 “Si muudie mina lɛlɔ kenye ni, bɛgyi bɛnii kenye budie bɔmmɔ buuubo ɔkplu. 32 Nsu ukyuli ɔdi lɛnɔ ɔkya ɔni muudie-mi kenye, na ngyi ka lɛla lɛni na ɔɔsu libo ɔkplu. 33 “Bɛ́tala bekyuli bɛnii betéye Yohane ala basiku-mi lɛlɔ, na ɔ́su-ma lɛla lɛni ndi litemi geen lɛmmɔ. 34 Nsu útalɛka ukyuli ɔyawine udie-mi kenye. Mmomu mɔɔsu-mii ɔmɛni kalɛ na bɛƒɔ-mi bɛdi na bɛkɛ ngba bɔƒɔ. 35 Yohane úkeye aani ogya ɔni mɔɔda. Na nwuna bukeye bɔmmɔ bɔ́da-mii ebiti uwi klukui ɔdi kemo. 36 “Nsu kenye kani na mbo na medie ni, ketulo Yohane ɔdi ƒui. Kabla lidu lɛni na Ati úte-mi ka mbawɔlɔ na kana lɛlɔ na nnye ni, aka muudie taatina ka Anwu nátala-mi. 37 Na mina Ɔti ɔni nátala-mi lɛnɔ údie kenye ɔ́tina-mii ɔ́si mina lɛlɔ ina ka bítenu-nwu lɛdi iye útedie lɛlɔ útatina-mii anumi ku anumi. 38 Nsu biláda-nwu litemi kaduɛ, ɔsika bíni na bítaƒɔ bítadi ka ami ndi ukyuli ɔni na ɔ́tala ɔ́kya-mii. 39 Bɛɛtɛya Bunweni Kedee Ɔku kemo ala uwi biala ku kakali ka si bɛ́bla lɛni ni, bɛdubɔkɛ ngba bɔni nsɔ naaadu bɔsa kudii. Na ɔku ɔmmɔ geen muudie kenye taasiku-mi lɛlɔ. 40 Nsu biiní ka bibo-mi kudɔ na lɛya na bɛkɛ ngba bɔmmɔ. 41 “Naaawia bekyuli bayawine bumwi. 42 Ɔsika ngyi-mii kaduɛ ka bilayɔ Katɔti. 43 Ngyi ɔmɛni ɔsika líbo-mii kudɔ nnye na mina Ɔti kenyekɔ, nsu bítegyingya enu bítaƒɔ-mi. Na binye kagyumana ka bɛƒɔ ukyuli ɔni nnye anwu ɔlati kenye mmomu. 44 Dɛ na ɔdubɔbla asa na bɛƒɔ-mi bɛdi ka bilie bɛɛwia bumwi taasiku bina lɛlɔ kudɔ, na biláwia ka Anwu ɔni lɛti pɛ ndi Katɔti umwi-mii? 45 “Nsu bitakali bɛnii ami ndubo-mii kɔtɔ bɔdu na mina Ɔti kudɔ! Mose ɔni ɔda bubo lɛlɔ na bibo katɔ busie lɛnunsia ni, anwu mmomu ndubo-mii kɔtɔ bɔdu! 46 Si bɔƒɔ na bɛ́ƒɔ Mose bɛ́di ni, nka bɛdubɔƒɔ-mi bɛdi! Ɔsika únweni ala ɔ́siku-mi lɛlɔ. 47 Nsu ka bilaƒɔ ala ani na únweni taadi ni, dɛ bɛdubɔkana na bɛƒɔ lɛla lɛni mɔɔsu-mii bɛdi?”

6

1 Na ɔmmɔ kama ni, Yesu ɔ́via ɛpu ɔni baalɔ banii Galilea Ɛpu na básɔ baalɔ-nwu Tiberia Ɛpu úsie nwuna ɔvi unyɔdi. 2 Na bekyuli pii badi basiaku-nwu, ɔsika bánu akɔla budie bɔtina bɔni na Yesu ɔ́bla na uwi ɔni na ɔ́bwi balɛne ɔsu. 3 Amu na Yesu ku nwuna batɛyane bákɔ bésie abi lɛlɔ na bátáyu bélie kalɔ na mmɔ. 4 Uwi ɔmmɔ ni, Yudaƒuɔ Kukpi Lili Bɔvia Limeyi bɔdi uwi ɔdaku budu. 5 Amu ka Yesu ɔ́tala anumi na ɔ́nu bekyuli lisu lɛni ndubo-nwu kudɔ mmɔ ni, úye Ƒilipo ɔnini, “Wɛ na bɔdubo adila bɔkɛ buye bute bekyuli bamɛni na badi?” 6 Nsu Yesu úye Ƒilipo kenye kammɔ ɔnii uuti ɔkɔku-nwu ɔnu ina ka anwu Yesu ɔgyi lɛla lɛni na anwu ɔlati ɔdubo bɔbla. 7 Amu na Ƒilipo údie kenye ɔnini, “Nkyuli eti ene limeyi lɛyuƒɔla muedi nwuna bodobodo uledu na bekyuli bamɛni ƒui bakɛ badi blii blii!” 8 Amu na Yesu batɛyane akɔ unwi ɔni ndi Andrea na ɔdi Simon Petro ɔnwani ɔ́su-nwu ɔnini, 9 “Okloƒu ɔdi ulie mɛni na ɔda kakpa bodobodo ɛlɔ ku kɔkpaku inyɔ. Nsu bi na ɔmɛni ɔdubɔbla bekyuli pii bamɛni?” 10 Amu na Yesu ɔ́su nwuna batɛyane ɔnini, “Bɛya na bekyuli bammɔ bayu belie kalɔ.” Na livo pii liwi mmɔ, na bana ƒui báyu bélie kalɔ. Na banana lɛti bumomo bɔbla aani mpimu ɛlɔ. 11 Amu na Yesu úti bodobodo ɔmmɔ na ka ɔ́gya Katɔti enu ni, úle-nwu úte bani ƒui nlie kalɔ mmɔ. Lɛni kani na úti kɔkpaku lɛnɔ úle úte-ma kalɛ na baawia na bádi bémo. 12 Ka bádi bémo báwɔlɔ ni, Yesu ɔ́su nwuna batɛyane ɔnini, “Bɛsala kɔkɛ kɔni nébu lisu kalɛ na ɔdi ulebie.” 13 Anwuɔsu básala kakpa bodobodo kɔkɛ kɔmmɔ ƒui na kúyi kɔgyigyɛ leevu-inyɔ. 14 Amu ka bekyuli bammɔ bánu akɔla budie taatina bɔmɛni ni, básu banini, “Sɔsɔ anwu ndi Katɔti Kenye Udiene ɔni mebo kayawi.” 15 Na ka Yesu ɔ́nu ɔ́ti ka báyɔ ka beeƒie-nwu ɔkplu bɔdi besie lɛga ɔsu ni, ɔ́sɔ ɔ́kpɛ ɔ́lɛ-ma akɔ úsie abi lɛlɔ anwu lɛti. 16 Na useyi uwi ɔmmɔ ni, nwuna batɛyane báyu bésie ɛpu kɔtu. 17 Na bákɔ béduo ɔkɔlɔ kemo, na bávia bésela Kapernaum, ɔsika kadi kása na Yesu útebo-ma tɔ kudɔ. 18 Uwi ɔmmɔ ni, ɔƒɛƒɛɛ kpakplaa ɔdi úbo uukpó ɔni náya na ɛpu ɔmmɔ uukpóku lɛlɔ. 19 Uwi ɔni na béesie ɔgyu na ntu bɔmmɔ anumi aani eluku atɛ iye ene ni, bánu ka Yesu úsie ɔdubo ntu anumi na ɔ́kpɛ úde ɔkɔlɔ ɔmmɔ. Ɔmɛni ɔsu ɔtɔtɔ ɔ́gyu-ma! 20 Nsu ɔ́su-ma ɔnini, “Bitayia! Ami na ɔdi.” 21 Amu na lɛlɔ lɛ́yɔ-ma! Na ka Yesu ɔ́kɔ úduo ɔkɔlɔ kemo ni, bánu ka béduo likpo lɛni bésela kɔnakunwi. 22 Ka kadi kégye ni, bekyuli bani náƒɔ lɛlɔ bátɛ ɛpu ɔvi ɔmmɔ ni, bánu ka nka ɔkɔlɔ unwi pɛ ntɛ ɛpu kɔtu mmɔ. Na uwi ɔni na Yesu batɛyane bammɔ béduo ɔkɔlɔ ɔmmɔ kemo na baavia ketu ni, nka Yesu ɔɔɔsiaku-ma. 23 Uwi ɔmmɔ kemo ni, lɛkɔlɔ bamba lɛni nási Tiberia líbo líbedi línye-ma kudɔ na kesii kani na Yesu úti bodobodo úte-ma na bádi mmɔ uwi ɔni na Blɔti ɔ́gya Katɔti enu ɔ́wɔlɔ kemo. 24 Anwuɔsu ka bekyuli bammɔ bánu ka Yesu iye nwuna batɛyane beeenye mmɔ ɔsu ni, ama alati bákɔ béduo lɛkɔlɔ lɛmmɔ kemo na bátɔlɔ bésie Kapernaum batáwia Yesu. 25 Ka bánu Yesu na ɛpu ɔvi ɔmmɔ ni, béye-nwu banini, “Ala ɔtinane, uwi ɔmani na ébo mɛni?” 26 Amu na Yesu údie kenye ɔnini, “Mɔɔsu-mii geen ka ni, bodobodo ɔni na bɛ́kɛ bɛ́di bímo ɔsu na bɛɛwia-mi. Na ɔɔɔdi ɔni na bínu akɔla budie taatina ani na lɛ́bla kalɔ ɔsu. 27 Bitekpoku lɛlɔ bitawia adila ani muubie kama ulu. Mmomu bɛwia adila ani neeebie na ese ésela uwi ƒui. Adila ammɔ udu na ami Ukyuli Ɔyawine Ubi ndubo-mii bute. Ɔsika ami na Katɔti ɔ́sia kɔnu úse.” 28 Mmɔ na bekyuli bammɔ béye Yesu banini, “Bi na ɔlɛka bɔbla si bɔnii bɔɔbla kabla kani na Katɔti ɔɔwia?” 29 Amu na Yesu údie kenye ɔnini, “Lɛla lɛni na Katɔti ɔɔwia ka bɛbla ndi ka bɛƒɔ ukyuli ɔni na ɔ́tala bɛdi.” 30 Amu na básɔ béye-nwu banini, “Akɔla budie taatina bɔmani na adubɔtina-bu kalɛ na bɔƒɔ-ɔ bɔdi? Bi na aakana bɔbla? 31 Bula bati kuuku bádi adila ani baalɔ banii mana na ketele kemo aani kalɛ na ɔkya Bunweni Kedee Ɔku kemo banii, 'Úte-ma adila ɔ́siku katɔ na bádi.' ” 32 Mmɔ na Yesu ɔ́su-ma ɔnini, “Mɔɔsu-mii geen nnii ɔɔɔdi Mose néte-mii adila ani nási katɔ. Mmomu mina Ɔti ni, anwu muute adila geen ani nási katɔ ébo. 33 Ɔsika Katɔti adila geen ani na uute bekyuli ndi ami ɔni mɔɔyá na bekyuli beelie ngba.” 34 Anwuɔsu básu-nwu banini, “Ati, teete-bu adila ɔmɛni uwi biala.” 35 Mmɔ na Yesu ɔ́su-ma ɔnini, “Ami ndi adila ani mɔɔyá na bekyuli beelie ngba. Na ukyuli ɔni muubo-mi kudɔ ni, kɔka kɔsɔ kulada-nwu. Na ukyuli ɔni mɔɔƒɔ́-mi taadi ni, utukwɛ ɔsɔ ulada-nwu kudi kudii. 36 Nsu lɛ́su-mii nnii ina ka bɛ́ɛnu-mi ni, bilaƒɔ-mi taadi. 37 Bekyuli bani ƒui na Ati úte-mi ni, badubo-mi kudɔ. Na bani muubo-mi kudɔ mmɔ ni, lɛɛɛdubo-ma buni. 38 Ɔsika ńtasi katɔ ńtebo nnii mɔɔbla ami ɔlati lɛƒɔyɔ. Mmomu líbo nnii mbabla anwu ɔni nátala-mi lɛƒɔyɔ. 39 Na ukyuli ɔni nátala-mi lɛƒɔyɔ ndi ka bekyuli bani ƒui na úte-mi ni, naaayila bana akɔ ɔdi, mmomu kalɛ na lɛgyila-ma na bana ƒui basɔ bata bebelie ngba na limeyi likplodi lɛlɔ. 40 Ɔsika lɛla lɛni na mina Ɔti ɔɔwia ndi ka ukyuli biala ɔni muuti anu taasia ami Katɔti Ubidi lɛlɔ na ɔ́ƒɔ-mi ɔ́di ni, ɔdubɔkɛ ngba bɔni nsɔ naaadubo bɔsa kudii na lɛgyila-nwu na limeyi likplodi lɛmmɔ lɛlɔ na ɔsɔ ubelie ngba.” 41 Amu na Yudaƒuɔ bammɔ bése kalɔ baatɛmi teewi-nwu, ɔsika ɔ́su ɔnii, “Ami ndi adila ani nási katɔ líbo” ɔsu. 42 Anwuɔsu béye banii, “Ɔɔɔdi Yesu ɔmɛni ndi Yoseƒ ubidi yoo? Bɔgyi ɔti ku uni. Dɛ na ɔ́bla na ɔɔsu ɔnii, 'Katɔ na lɛ́si líbo'?” 43 Amu na Yesu údie kenye ɔnini, “Bɛda bɔdɔ na bina lɛlɔ kemo bɛya. 44 Ukyuli ɔdi ulakana-mi kudɔ bubo si ɔɔɔdi Ati ɔni nátala-mi náya na ɔ́ni úde-mi. Na ndubɔgyila-nwu na limeyi likplodi lɛlɔ. 45 Katɔti kenye udiene ɔdi únweni ɔnii, 'Katɔti ndubɔtina bana ƒui ala.' Anwuɔsu ukyuli biala ɔni nénu na ɔ́tɛya ala ɔ́siku Ati kudɔ ni, anwu muubo-mi kudɔ. 46 Ɔmɛni ulátina ka ukyuli ɔdi ɔ́ɔnu Ati ɔmmɔ. Mmomu ami ɔni lɛti nási Katɔti kudɔ ni, ami lɛti náanu-nwu. 47 Mɔɔsu-mii geen ka ukyuli ɔni mɔɔƒɔ́-mi taadi ni, uulie ngba bɔni nsɔ naaadubo bɔsa kudii. 48 Ami ndi adila ani muute ngba. 49 Bina bati kuuku bádi adila ani baalɔ banii mana na ketele kemo, nsu békpi. 50 Nsu adila ani nási katɔ áyu ébo ni, adi adila ani udu na ukyuli biala ɔni madi-nya ni, ulekpi. 51 Ami ndi adila ani muute ngba. Na lɛ́si katɔ lɛ́yu líbo. Ukyuli biala ɔni mɔɔdi adila amɛni adi ni, ɔdubo ngba bulie uwi ƒui. Na adila ani ndubute bekyuli ni, anya ndi mina ɔlɔna.” 52 Ɔmɛni ɔsu Yudaƒuɔ bammɔ bésie kalɔ baakya unyeƒi kpakplaa na ama alati akɔ banini, “Dɛ na ukyuli ɔmɛni wakana-bu nwuna ɔlɔna buti bute ɔnii bɔdi?” 53 Amu na Yesu ɔ́su-ma ɔnini, “Mɔɔsu-mii geen ka ni, si bítadi ami Ukyuli Ɔyawine Ubi ɔlɔna na bɛni mina ubugya ni, biiibo ngba bɔdi na bina lɛlɔ kemo. 54 Ukyuli ɔni mɔɔdi mina ɔlɔna na ɔɔní mina ubugya ni, anwu muulie ngba bɔni nsɔ naaadubo bɔsa kudii. Na ndubɔgyila-nwu na limeyi likplodi lɛlɔ. 55 Ɔsika mina ɔlɔna ɔdi adila geen na mina ubugya lɛnɔ ɔdi lɛla lɛnidi geen. 56 Ukyuli ɔni mɔɔdi mina ɔlɔna na ɔɔní mina ubugya ni, ɔɔbla ku-mi unwi, na ami lɛnɔ mɔɔbla ku-nwu unwi. 57 Kalɛ na Ati ɔni nli ngba ɔ́tala-mi na ɔkɛnku anwu ɔsu na nli ngba ni, lɛni kani na ukyuli ɔni mɔɔdi mina ɔlɔna lɛnɔ welie ngba ɔkɛnku ami ɔsu. 58 Anwuɔsu ɔmɛni ndi adila ani nási katɔ áyu ébo. Na aaadi ani udu na bina bati kuuku bádi nsu békpi. Ukyuli ɔni madi adila ani mɔɔsu mɛni ni, ɔdubulie ngba uwi ƒui.” 59 Ala amɛni na Yesu ɔ́tina-ma na Yudaƒuɔ kasalakɔ na Kapernaum. 60 Ka nwuna basiakune pii bénu ɔmɛni ni, básu banii, “Litemi lɛmɛni kalɔ bunu bubo ɔkplu geen, énu! Ɔma ndubɔkana na use atu unu lɛmɛni?” 61 Nsu ina ka ukyuli ɔdi útasu Yesu lɛla lɛdi ni, únu ka baadɔ na bana lɛlɔ kemo na úye-ma ɔnini, “Lɛla lɛmɛni lɛtu-mii atu? 62 Amu dɛ na wabla-mii si banii bɛ́nu ka ami Ukyuli Ɔyawine Ubi lɛ́kɔ lísela katɔ kesii kani na nka nli? 63 Katɔti Kɔyu muute ngba. Na ukyuli ɔlɔna ɔɔɔdi lɛla lɛdi. Ala ani ƒui na mɔɔsu-mii ni, ndanku Katɔti Kɔyu kɔni muute ngba úboku-mii. 64 Nsu bina akɔ badi balaƒɔ-mi taadi.” Yesu ɔ́su ɔmɛni ɔsika ɔ́si kalɔ kesekɔ ƒui ni, ɔ́ti bekyuli bani naaadubo-nwu bɔƒɔ bɔdi ku ukyuli ɔni ndububo-nwu kakya bɔkya. 65 Amu na ɔ́su ɔnini, “Ɔmɛni ɔsu na lɛ́su-mii nnii ukyuli ɔdi ulakana-mi kudɔ bubo si ɔɔɔdi Ati náya na ɔ́kɛ ulu ɔmmɔ.” 66 Na ɔmɛni kama ni, nwuna basiakune pii bénwini kama na básɔ bátasiaku-nwu. 67 Amu na Yesu úye nwuna batalane leevu-inyɔ bammɔ ɔnini, “Amii lɛnɔ bɛɛwia ka bɛsɔ binwini yoo?” 68 Amu na Simon Petro údie kenye ɔnini, “Blɔti, ɔma kudɔ na búnwini búsela? Awɔ nda ngba bɔni nsɔ naaadubo bɔsa kudii etemila. 69 Na abu bɔ́ɔƒɔ bɔdi na bɔ́ɔnu bɔ́ti ka awɔ ndi Katɔti Ubidi Kedee ɔmmɔ.” 70 Amu na Yesu údie kenye ɔnini, “Ami náƒuna bina leevu-inyɔ bamɛni ina ka bina akɔ unwi ɔdi ukisine.” 71 Yesu ɔ́su ɔmɛni ɔ́siku Yuda ɔni ndi Simon Iskariot ubidi lɛlɔ. Ɔsika na bana leevu-inyɔ akɔ ni, anwu ndubo-nwu kakya bɔkya.

7

1 Na ɔmɛni kama ni, Yesu útaavi na Galilea kalɔ lɛlɔ na útayɔ ka usie Yudea kalɔ lɛlɔ ka Yudaƒuɔ bakya baawia ulu ɔni lɛlɔ na basia na badu-nwu ɔsu. 2 Na uwi ɔmmɔ kemo ni, Yudaƒuɔ ketele kemo kevo emeyi bɔdi uwi úudu. 3 Anwuɔsu Yesu banwani básu-nwu banini, “Tɔlɔ mɛni teesie Yudea kesii kani na ƒula basiakune badubɔnu ƒula ablala. 4 Ɔsika ukyuli ɔni mɔɔwia ka bati-nwu ni, ulabɛ taabla lɛla lɛdi. Ka aakana ala amɛni udu bɔbla ni, ya na kayawi bekyuli ƒui banu ƒula ablala bati!” 5 Básu-nwu lɛni ɔsika nwuna banwani muedi bátaƒɔ-nwu bátadi. 6 Amu na Yesu ɔ́su-ma ɔnini, “Mina uwi útedu tɔ. Nsu amii ni, uwi biala use ute-mii. 7 Kayawi kalakana amii bukisi. Nsu keekisi ami, ɔsika muudie taasu kede kede ka bayawine ablala adi likpidi. 8 Amii biteesie bina limeyi lɛmmɔ kadikɔ. Ami ńtesela emeyi ammɔ kadikɔ, ɔsika mina uwi útedu tɔ ƒui.” 9 Ka ɔ́su lɛni ɔsu ni, ɔ́ƒɔ lɛlɔ ɔ́kya Galilea mmɔ. 10 Nsu uwi ɔni na nwuna banwani bátɔlɔ bésie emeyi ammɔ kadikɔ kama ƒui ni, anwu lɛnɔ úbesie na bɔbɛ kemo. 11 Na Yudaƒuɔ bákya béteeye-nwu lili banii, “Anwu nɔɔ, anwu nɔɔ?” 12 Na lɛni kani na nwuna lɛlɔ atɛ ada na bana akɔ mmɔ. Badi baasu banii, “Ukyuli ɔbuni na ɔdi.” Na babambadi lɛnɔ banini, “Oowo! Bekyuli na uuƒú taakya!” 13 Nsu Yudaƒuɔ bɔyia ɔsu ni, ukyuli ɔdi útakana na ɔsu lɛla lɛdi ɔlɛku ƒui na nwuna lɛlɔ. 14 Ka emeyi ani baadi mmɔ éle ntɛ ni, Yesu úsie útéduo Yudaƒuɔ kakpakɔ na ɔ́tina ala. 15 Ala bɔtina bɔmɛni bɔ́bla Yudaƒuɔ bammɔ dɛye dɛye, na baasu banii, “Wɛ na kebi kamɛni kásiku lɛlati lɛmɛni udu ka útesie ala katɛyakɔ kadi?” 16 Amu na Yesu údie kenye na ɔ́su-ma ɔnini, “Mina ala bɔtina bɔɔɔdi ami alati bɔdi. Mmomu ukyuli ɔni nátala-mi ala bɔtina na bɔdi. 17 Ukyuli ɔni mɔɔyɔ́ ka ɔbla lɛla lɛni na Katɔti ɔɔwia ni, ɔdubɔti si ala ani na mɔɔtina ási Katɔti kudɔ iye ami ɔlati ɔyikun kemo na muutemi. 18 Na ukyuli ɔni mɔɔtɛmi na anwu ɔlati ɔyikun kemo ni, nwuna lɛlɔ bumwi na ɔɔwia. Nsu ukyuli ɔni mɔɔwia ka umwi ukyuli ɔni nátala-nwu ni, ɔɔbla ala ulu lɛlɔ na ulányi ɔkɔ. 19 Ɔɔɔdi Mose néte-mii ɔda bubo bɔmmɔ yoo? Nsu bina akɔ ɔdi uládi ɔda bubo bɔmmɔ lɛlɔ. Bi ɔsu na bɛɛwia ka bɛdu-mi?” 20 Mmɔ na bekyuli bammɔ bédie kenye básu-nwu banini, “Kɔyu kukpidi kɔsiaku-ɔ! Ɔma mɔɔwia ka ɔdu-ɔ?” 21 Amu na Yesu údie kenye ɔnini, “Lɛla linwi pɛ na lɛ́bla, na ɔ́bla bina ƒui kalɛ kadi. 22 Mose úbo-mii ɔda ɔnii bikulo bina bebi ago. Nsu ɔɔɔdi anwu ɔmmɔ lɛlɔ na ago bukulo búse kalɔ bɔ́si. Mmomu ɔ́si bati kuuku uwi ƒui. Na biikúlo ago na lɛnwunameyi muedi lɛlɔ. 23 Na si bakana bekulo ukyuli lego na lɛnwunameyi lɛlɔ na bátata bétenye ɔda bubo bɔmmɔ lɛlɔ ni, ɔdi bɔƒiɔ si ami lɛ́bwi ukyuli ɔdi na lɛlɔ ƒui lɛ́yu-nwu ɔkplu? 24 Bitatɛ litemi anumi lɛlɔ! Mmomu bɛtɛ litemi na ulu geen lɛlɔ.” 25 Amu na bekyuli badi bási Yerusalem ɔma na béye banii, “Ɔɔɔdi ukyuli ɔmɛni na Yudaƒuɔ batɔnkune baawia badu yoo? 26 Na aanu-nwu! Unye mɛni ɔɔtɛmi na kadi anumi! Na balakana-nwu lɛla lɛdi bɔsu! Munuu bɔti na báti geen ka anwu ndi Ukyuli Ɔƒunadi ɔmmɔ? 27 Si Ukyuli Ɔƒunadi ɔmmɔ úbo ni, ukyuli ɔdi uláti kesii kani na ɔ́si. Nsu ukyuli ɔmɛni anwu ni, bɔgyi kesii kani na ɔ́si.” 28 Na uwi ɔni na Yesu ɔɔtina ala na kakpakɔ mmɔ ni, úye-ma ku lɛdi momoomo ɔnini, “Bɛɛbu bɛnii bɛgyi-mi ku kesii kani na lɛ́si? Ńtebo mɛni na ami ɔlati ɔyikun kemo! Ukyuli ɔni nátala-mi ni, ulányi ɔkɔ. Na amii bɛɛɛgyi-nwu. 29 Nsu ami ngyi-nwu. Ɔsika anwu nátala-mii, na nwuna kudɔ na lɛ́si.” 30 Ɔmɛni ɔsu ni, báwia ka beƒie-nwu. Nsu ukyuli ɔdi útakana-nwu butuku, ɔsika nwuna uwi útedu tɔ. 31 Nsu bana akɔ pii báƒɔ-nwu bádi na béye banii, “Na si Ukyuli Ɔƒunadi ɔmmɔ úbo ni, ɔdubɔbla akɔla budie bɔtina butulo ani na ukyuli ɔmɛni ɔ́ɔbla?” 32 Amu ka Yudaƒuɔ lɛkpa lɛni baalɔ bani Ƒarisiƒuɔ bénu ka nwuna lɛlɔ atɛ ada bekyuli bammɔ akɔ lɛni ɔsu ni, ama ku bakpane benengu bása lili na bátala kakpakɔ bagyumanane badi banii betéƒie Yesu. 33 Amu na Yesu ɔ́su-ma ɔnini, “Ndubɔsɔ lɛkya-mii kudɔ libu uwi klukui ɔdi kani na lɛtɔlɔ nteesie Anwu ɔni nátala-mi kudɔ. 34 Bɛdubo-mi bɔwia na bilanu-mi. Ɔsika kesii kani na ndubɔkya ni, bilakana mmɔ bubo.” 35 Amu na Yudaƒuɔ bammɔ béye lɛlɔ banini, “Wɛ na ukyuli ɔmɛni úsela tɔ ɔsu na bulanu-nwu? Munuu ɔɔkali ka usie Helaƒuɔ lɛma kesii kani na bula kadi bekyuli badi bégyingya bakya na utátina-ma ala na mmɔ? 36 Bi na ɔdanku ɔni na ɔɔsu ɔnii, 'Bɛdubo-mi bɔwia na bilanu-mi,' na 'Kesii kani na ndubɔkya ni, bilakana mmɔ bubo'?” 37 Na limeyi likplodi lɛlɔ na emeyi ammɔ bɔdi kemo ɔni ndi limeyi linengudi ni, Yesu ɔ́ta únye na ɔ́su na lɛdi momoomo ɔnini, “Si utukwɛ ɔɔda ukyuli ɔdi ni, ukyuli ɔmmɔ ɔtɔlɔ ubo-mi kudɔ na ubani ntu. 38 Lɛni na Bunweni Kedee Ɔku ɔ́su ɔ́siku ukyuli ɔni mɔɔƒɔ́-mi taadi lɛlɔ ɔnini, 'Abiɔ ani naaakwi na aayá na ukyuli uulie ngba ntu bɔdubo butaagba taasiku-nwu kayi kemo.' ” 39 Mɛni ni, Kɔyu kɔni ndubɔƒɔ bekyuli bani náƒɔ-nwu bádi lɛlɔ kemo litemi na ɔɔsu. Ɔsika úti úbedu ɔƒɛni ni, Katɔti útatala tɔ Kɔyu kɔmmɔ ɔnii kutáƒɔ-ma lɛlɔ kemo. Ɔsika Yesu úteduo tɔ nwuna lɛga bɔdi bukeye kemo. 40 Ka bénu etemila amɛni ni, bana badi básu banii, “Sɔsɔ ukyuli ɔmɛni ndi Katɔti Kenye Udiene ɔmmɔ.” 41 Na babambadi lɛnɔ banini, “Ɔmɛni ndi Ukyuli Ɔƒunadi.” Nsu badi ama ni, béye banini, “Ukyuli Ɔƒunadi ɔmmɔ ni, Galilea na ɔdubo bɔsi? 42 Ɔɔɔdi bɔsu na Bunweni Kedee Ɔku ɔ́su ka Ukyuli Ɔƒunadi ɔmmɔ wasi Ɔga Dawid kaba kemo na Betlehem ɔma kesii kani na Dawid ɔ́si yoo?” 43 Ɔkɛnku Yesu ɔsu ni, bekyuli bammɔ ƒui béle lɛlɔ. 44 Badi báyɔ ka beƒie-nwu, nsu ɔdi útakana-nwu butuku. 45 Ka kakpakɔ bagyumanane bani na bátala bénwini bésie Ƒarisiƒuɔ ku bakpane benengu bammɔ kudɔ ni, béye-ma banini, “Bi ɔsu na bítakpanku-nwu bíteboku?” 46 Amu na ama bédie kenye banini, “Bútenu ka ukyuli ɔdi ɔtɛmi aani ukyuli ɔmɛni kudii!” 47 Amu na Ƒarisiƒuɔ bammɔ béye-ma banini, “Amii lɛnɔ ukyuli ɔmɛni úƒu-mii kasusu? 48 Bíinu dii si benengu badi iye Ƒarisiƒuɔ badi báƒɔ-nwu bádi? 49 Kudii! Nsu otogyi bekyuli bamɛni ƒui baaagyi ɔda bubo bɔmmɔ. Anwuɔsu na ewida asiaku-ma!” 50 Amu na Nikodemo ɔni ndi benengu bammɔ akɔ unwi na úusie Yesu kudɔ uwi ɔdi ni, úye-ma ɔnini, 51 “Bula ɔda bubo búte-bu ulu ka bɔdu ukyuli kɔtɔ si bútenu-nwu kenye litemi na bɔti lɛla lɛni na ɔdanku iye ɔɔbla?” 52 Nsu bédie kenye béye-nwu banini, “Awɔ lɛnɔ Galilea na ási yoo? Duo lɛku kemo na anu ati ka Katɔti kenye udiene ɔdi ulási Galilea.” 53 Mmɔ ni, ukyuli biala ɔ́tɔlɔ úsie kaduli.

8

1 Nsu Yesu anwu ɔ́tɔlɔ úsie kɔbi kɔni baalɔ Inɔ Egyii Kɔbi lɛlɔ. 2 Kadi kégye ɔtanta tutuutu ni, ɔ́sɔ únwini úsie Yudaƒuɔ kakpakɔ. Na bekyuli bammɔ ƒui báka bámana-nwu, na anwu úlie-ma ntɛ na úsie kalɔ ɔɔtina-ma ala. 3 Amu na ɔda bubo ala batinane ku Ƒarisiƒuɔ bákpanku uleku ɔdi béƒie kɔnu ku kɔnu na kɔsɔnɔ kadikɔ béboku. Amu na báya na ɔ́sɔ únye bana ƒui anumi. 4 Amu na béye Yesu banini, “Ala ɔtinane, uleku ɔmɛni ni, béƒie-nwu kɔnu ku kɔnu ka ɔɔdi kɔsɔnɔ. 5 Ɔƒɛni na bula ɔda bubo kenye aani kalɛ na Mose ɔ́tina ni, ɔlɛka bubo-nwu atabi bɔdu. Na dɛ na awɔ aasu?” 6 Béye-nwu ɔmɛni banii beti bakywɛ-nwu kakpagyuɛ kalɛ na si ɔ́nu-ka kemo ni, na bakɛ kasiakɔ na beƒie-nwu. Nsu Yesu ɔ́yu ɔ́ƒa na únweni ala na ɔtumu akɔ ku nwuna lɛnimi. 7 Amu ka básɔ benye mmɔ beeye-nwu etemila ni, ɔ́talaku lɛlɔ na ɔ́su-ma ɔnini, “Bina akɔ ɔni nátabla likpidi lɛdi kudii ni, anwu ɔka-nwu lɛtabi bubo.” 8 Amu na anwu ɔ́sɔ ɔ́yu ɔ́ƒa na únweni ala ɔ́sia kalɔ ku lɛnimi. 9 Ka benengu bammɔ bénu lɛni ni, bágyu bátɔlɔ unwi unwi ɔ́si unengudi lɛlɔ. Na báda Yesu ku uleku ɔmmɔ lɛti bényene bekyuli bammɔ ntɛ. 10 Amu na Yesu ɔ́talaku lɛlɔ na úye uleku ɔmmɔ ɔnini, “Uleku, ńtɛlɛ-ma? Ɔdi biala útadu-ɔ kɔtɔ?” 11 Amu na uleku ɔmmɔ ɔnini, “Oowo, Ati.” Anwuɔsu Yesu ɔ́su-nwu ɔnini, “Lɛni kani na ami lɛnɔ naaadu-ɔ kɔtɔ. Anwuɔsu teesie. Mmomu tasɔ telie ataabla likpidi.” 12 Ɔmmɔ kama ni, Yesu ɔ́sɔ ɔ́tɛmiku bekyuli bammɔ na ɔ́su-ma ɔnini, “Ami ndi kayawi kamɛni bukeye. Na ukyuli ɔni nsiaku-mi kama ni, ɔdubɔkɛ bukeye bɔni muute ukyuli ngba geen, na ulese ulávi lɛdisa kemo kudii.” 13 Amu na Ƒarisiƒuɔ básu-nwu banini, “Awɔ ɔlati muudie ƒula lɛlɔ kenye. Anwuɔsu ƒula kenye budie buuubo unu.” 14 Amu na Yesu ɔ́su-ma ɔnini, “Si ina muudie lɛlɔ kenye ni, mina kenye budie bubo unu, ɔsika ngyi kesii kani na lɛ́si, na ngyi kesii kani na lísela. Nsu amii bɛɛɛgyi kesii kani na lɛ́si iye kesii kani na lísela. 15 Kayawi kasusu kemo na bɛɛtɛ litemi. Nsu ami ni, naaatɛku ɔdi litemi. 16 Si banii bɔtɛ na ntɛ litemi muedi ni, nka mina litemi bɔtɛ bɔkɛ ulu lɛlɔ. Ɔsika ɔɔɔdi ami lɛti mɔɔtɛ litemi lɛmmɔ. Mmomu Katɔti ɔni nátala-mii unye-mi kama. 17 Na bina ɔda bubo kemo ni, bénweni banii nkyuli inyɔ lɛla kenye budie bubo unu. 18 Na ami ndi bana akɔ unwi ɔni muudie lɛlɔ kenye. Na Ati ɔni nátala-mi ndi unyɔdi.” 19 Amu na béye-nwu banini, “Ńtɛlɛ ƒ^ɔti ɔmmɔ?” Yesu údie kenye na ɔ́su-ma ɔnini, “Bɛɛɛgyi-mi iye mina Ɔti. Ɔsika si bɔgyi na bɛgyi-mi ni, nka bɛdubɔti mina Ɔti lɛnɔ.” 20 Kenye kamɛni na ɔ́su-ma na kesii kani nde egulabi kesekɔ na kakpakɔ kemo mmɔ. Nsu ukyuli ɔdi útakana-nwu buƒie, ɔsika nwuna uwi ɔmmɔ útedu tɔ. 21 Yesu ɔ́sɔ ɔ́su-ma ɔnini, “Ndubo bɔtɔlɔ na bɛdubo-mi bɔwia na bikpi bɛkya bina ekpidi kemo. Na kesii kani lísela ni, bilakana mmɔ bubo.” 22 Amu na Yudaƒuɔ bammɔ béye lɛlɔ banini, “Bɔdu na ɔdubo lɛlɔ ka ɔ́su ɔnii, 'Kesii kani na lísela ni, bilakana bubo'?” 23 Amu na ɔ́su-ma ɔnini, “Amii ni, kalɔ mɛni na bɛ́si. Na ami ni, lɛ́si katɔ. Kayawi kamɛni ɔdi na bɛdi. Na ami ni, ɔɔɔdi kayawi kamɛni ɔdi na ndi. 24 Lɛ́su-mii ka bɛdubo bukpi bɔkya bina ekpidi kemo. Na si bítaƒɔ bítadi ka ami ndi Anwu ɔmmɔ ni, bɛdubo bukpi bɔkya bina ekpidi kemo sɔsɔ.” 25 Amu na béye-nwu banini, “Awɔ ndi ɔma?” Amu na údie kenye ɔ́su-ma ɔnini, “Lɛla lɛni na lɛ́su-mii ɔ́si kalɔ kesekɔ kani na ndi. 26 Mbo ala pii na lɛsu lɛsiku-mii lɛlɔ na lɛdu-mii kɔtɔ na bina ɔbladu ɔsu. Nsu ukyuli ɔni nátala-mi ni, ulányi ɔkɔ. Na ala ani na línu lɛ́siku-nwu kudɔ ni, anya muuti taasu kayawi bekyuli.” 27 Mmɔ ni, bétenu kalɔ banii Ɔti lɛlɔ na ɔɔtɛmi taasiku. 28 Anwuɔsu Yesu ɔ́su-ma ɔnini, “Si uwi ɔni na bɛ́kɔliku Ukyuli Ɔyawine Ubi katɔ ni, mmɔ na bɛdubɔti ka ami ndi Anwu ɔmmɔ. Na naaabla lɛla lɛdi na ami ɔlati ɔyikun kemo. Mmomu mɔɔtɛmi kalɛ kani na mina Ɔti ɔ́tina-mi. 29 Na anwu ɔni nátala-mi ni, unyeku-mi. Na útada-mi útese, ɔsika mɔɔbla lɛla lɛni mɔɔyɔ́-nwu kaƒɔ uwi biala.” 30 Na ka ɔ́tɛmi lɛni ni, bekyuli pii báƒɔ-nwu bádi. 31 Amu na Yesu ɔ́su Yudaƒuɔ bani náƒɔ-nwu bádi mmɔ ɔnini, “Si bɛɛbla taasiaku mina ala ani na lɛ́tina-mii lɛlɔ ni, na bɛdi mina basiakune sɔsɔ. 32 Na bɛdubɔti litemi geen, na litemi lɛmmɔ lɛya na bɛkɛ bɔnwuna.” 33 Amu na Yudaƒuɔ bammɔ básu-nwu banini, “Abraham kaba bebi na bɔdi, na bɔɔɔkya ukyuli ɔdi kalɔ! Dɛ na ɔ́bla na aasu anii bɔdubɔkɛ bɔnwuna?” 34 Amu na Yesu ɔ́su-ma ɔnini, “Mɔɔsu-mii geen ka ni, ukyuli biala ɔni mɔɔbla likpidi ni, ɔkya likpidi kalɔ. 35 Na ukyuli ɔni mɔɔbla ukyuli bamba kabla ni, ulénwini kaduli kammɔ ala ɔdine geen. Mmomu ubi ɔni na ɔtɔlati ɔ́wɔ na kaduli kammɔ kemo geen ni, anwu mɔɔdi kaduli kammɔ ala uwi ƒui. 36 Anwuɔsu si ami Katɔti Ubidi lɛ́ya na ákɛ bɔnwuna ni, na ebo bɔnwuna geen sɔsɔ. 37 Ngyi ka Abraham kaba bebi na bɛdi. Nsu bɛɛwia ka bɛdu-mi, ɔsika bilaƒɔ mina ala ani na mɔɔtina-mii taadi. 38 Lɛla lɛni na mina Ɔti ɔ́tina-mi ni, ani na mɔɔsu. Na amii lɛnɔ bɛɛbla lɛla lɛni na bínu bɛ́siku bina ɔti kudɔ.” 39 Amu na Yudaƒuɔ bammɔ básu-nwu banini, “Abraham ndi bula ɔti.” Mmɔ na Yesu ɔ́su-ma ɔnini, “Si Abraham bebi na bɛdi geen ni, bɛdubɔbla ala ani na Abraham ɔ́bla. 40 Nsu ami ɔni mɔɔsu-mii litemi geen lɛni na línu lɛ́siku Katɔti kudɔ ni, ami mmomu na bɛɛwia bɛdu. Ɔɔɔdi ɔmɛni udu na Abraham ɔ́bla. 41 Ala ani na ukyuli ɔni ndi bina ɔti ɔ́bla ni, anya na bɛɛbla.” Amu na básu-nwu banini, “Ɔɔɔdi kɔsɔnɔ bebi na bɔdi! Ɔti unwi na bubo, na anwu ndi Katɔti!” 42 Amu na Yesu ɔ́su-ma ɔnini, “Si Katɔti ndi bina ɔti ni, bɛdubɔyɔ-mi. Ɔsika Katɔti ɔmmɔ kudɔ geen na lɛ́si líbo mɛni. Ńtebo na ami ɔlati bɔyɔ kemo. Mmomu anwu ɔmmɔ nátala-mi. 43 Bi ɔsu na bilenu-mi kalɔ? Ngyi ka bilátuna bɛnii biise atu na binu lɛla lɛni na mɔɔsu. 44 Bina ɔti ndi ukisine ɔmmɔ, na bɛwia ka bɛbla nwuna lɛƒɔyɔ. Bekyuli ɔdune kani na ɔdi ɔ́si kalɔ kesekɔ ƒui. Na ulayɔ litemi geen lɛmmɔ, ɔsika ulasu lɛla siin lɛdi kudii. Si ɔ́nyi ɔkɔ ni, nwuna udu na uudie taatina na bɔtɛmi kemo. Ɔsika ɔkɔ ɔnyine na ɔdi, na anwu ndi ɔkɔ bɔnyi ƒui ɔti. 45 Nsu ka mɔɔsu-mii litemi geen lɛmɛni ɔsu ni, bilaƒɔ-mi taadi. 46 Bina akɔ ɔmani na madu-mi likpidi lɛdi kɔtɔ? Si mɔɔsu-mii litemi geen ni, bi ɔsu na bilaƒɔ-mi taadi. 47 Ukyuli ɔni ndi Katɔti ɔdi ni, anwu muunú ala ani na Katɔti ɔɔsu. Na lɛla lɛni ɔsu na bilabla taasiaku mina litemi lɛlɔ ndi ka bɛɛɛdi Katɔti ɔdi.” 48 Mmɔ na Yudaƒuɔ básu Yesu banini, “Ɔdi litemi geen ka bɔ́su-ɔ ka Samariani ukpidi na adi, na kɔyu kukpidi kɔsiaku-ɔ!” 49 Amu na Yesu údie kenye ɔnini, “Kɔyu kukpidi kɔdi kɔɔɔsiaku-mi. Ami mɔɔtalaku mina Ɔti lɛnyi katɔ, nsu amii biibile-mi lɛnyi. 50 Naaawia lɛnyi teete lɛlɔ. Nsu ukyuli ɔni mɔɔwia ka bekyuli bakɔliku-mi lɛnyi katɔ ni, anwu ɔkya. Na anwu mɔɔtɛ litemi ulu lɛlɔ. 51 Mɔɔsu-mii geen nnii ukyuli ɔni madi ala ani na mɔɔtina mɛni lɛlɔ ni, ulekpi kudi kudii!” 52 Mmɔ na Yudaƒuɔ bammɔ básu-nwu banini, “Ɔƒɛni na bɔti nwaa ka kɔyu kukpidi kɔsiaku-ɔ! Abraham úkpi, na Katɔti kenye bediene lɛnɔ békpi, nsu awɔ aasu ka ukyuli biala ɔni madi ƒula ala ani na aatina lɛlɔ ulekpi kudi kudii! 53 Bulaƒɔ taadi ka bɔsu na ada anii etulo bula ɔti Abraham, munuu lɛni na aasu? Anwu úkpi, na Katɔti kenye bediene lɛnɔ békpi. Ɔma na aabu ka adi tɔ?” 54 Amu na Yesu údie kenye ɔnini, “Si banii mina lɛlɔ na muumwi ni, nka bumwi bɔmmɔ bɔɔɔdi lɛla lɛdi. Nsu ukyuli ɔni muumwi-mi ni, anwu ndi mina ɔti. Anwu ndi ɔni na bɛnii anwu ndi bina Katɔti. 55 Amii bɛɛɛgyi-nwu. Nsu ami ngyi-nwu. Na ndubunwini ɔkɔ ɔnyine bina kalɛ si líni ɔmɛni. Ɔsika ngyi-nwu geen, na mɔɔdi nwuna etemila lɛlɔ. 56 Ebiti áda bina ɔti Abraham ka ɔ́ti ka ndubo. Anwuɔsu úti anu ɔ́sia mina bubo ku lɛlɔyɔ.” 57 Mmɔ na Yudaƒuɔ bammɔ básu-nwu banini, “Awɔ átaƒɔ tɔ ina akwa liti, na anii áanu Abraham?” 58 Amu na Yesu ɔ́su-ma ɔnini, “Mɔɔsu-mii geen nnii asa badubɔwɔ Abraham ni, Ami nli.” 59 Mmɔ ka ɔ́su lɛni ni, bála atabi banii beebó-nwu, nsu Yesu ɔ́bala lɛlɔ na ɔ́vi ɔ́lɛ-ma akɔ na kakpakɔ mmɔ.

9

1 Ka Yesu ɔkɛ ɔɔví ni, útánu ɔnana ɔdi na anumi ábwɛ ɔ́si uwi ɔni na báwɔ-nwu ƒui. 2 Mmɔ na nwuna basiakune béye-nwu banini, “Ala ɔtinane, ɔma ekpidi náya na ɔnana ɔmɛni anumi ábwɛ asa na báwɔ-nwu? Anwu ɔlati ekpidi ɔsu, munuu nwuna bawɔne ekpidi ɔsu?” 3 Amu na Yesu údie kenye ɔnini, “Ɔnana ɔmɛni anumi ani nábwɛ-nwu ni, aaadanku nwuna ekpidi iye nwuna bawɔne ekpidi ani na bábla ɔsu. Mmomu anumi ábwɛ-nwu kalɛ na bekyuli banu Katɔti ɔyikun bati na ukyuli ɔmɛni lɛlɔ. 4 Si uwi ɔni na kadi kátasa tɔ ni, ɔdi ka butaabla Katɔti ɔni nátala-mi kabla. Ɔƒɛ ɔdubo bɔsa ɔni na ukyuli biala ɔsɔ ulakana lɛdi biala bɔbla. 5 Na lebo lɛni kemo na nkya bayawine akɔ ni, ami ndi bana bukeye.” 6 Ka Yesu ɔ́su lɛni ɔ́wɔlɔ ni, útuo lisuo úwi kalɔ na úti ɔ́sala ku lɛti, na úti-ni úsusu ɔnana ɔmmɔ anumi. 7 Na ɔ́su-nwu ɔnini, “Teesie na atáƒɔ anumi na lɛba blii lɛni baalɔ bani Siloa kemo.” Na Siloa kalɔ ndi bátala-nwu. Anwuɔsu ɔnana ɔmmɔ úsie na útáƒɔ nwuna anumi. Na nwuna anumi álɛmi na ɔɔnu, na ɔ́sɔ únwini úbo kaduli. 8 Amu na nwuna bakpana ku bekyuli bani ƒui nánu-nwu uwi ɔni na úteevele ala béye lɛlɔ banini, “Ɔɔɔdi ɔnana ɔmɛni néteelie mɛni teevele ala mmɔ, iye?” 9 Badi banii anwu na ɔdi. Nsu babambadi ama banii, “Oowo, ɔɔɔdi anwu na ɔdi. Bɔlɛ kani na ɔ́lɛ-nwu.” Amu na ukyuli ɔmmɔ ɔlati ɔnini, “Ami na ɔdi!” 10 Mmɔ na béye-nwu banini, “Dɛ na ɔ́bla asa na aakana bɔnu?” 11 Amu na údie kenye ɔnini, “Ukyuli ɔni baalɔ Yesu ni, anwu nábla aba úsusu-mi anumi. Na ɔ́su-mi ɔnii ntésie na ntáƒɔ mina anumi na Siloa lɛba kemo. Anwuɔsu lísie. Na ka lɛ́nya lɛ́ƒɔ anumi lɛ́wɔlɔ kani na líse kalɔ mɔɔnu.” 12 Mmɔ ni, béye-nwu banii, “Ńtɛlɛ ukyuli ɔmmɔ?” Amu na údie kenye ɔnini, “Lɛɛɛgyi.” 13 Ɔmmɔ kama ni, bekyuli bammɔ béti ukyuli ɔni na nka anumi ábwɛ-nwu mmɔ bésienku Ƒarisiƒuɔ kudɔ. 14 Na limeyi lɛni lɛlɔ na Yesu úti aba úsusu ɔnana ɔmmɔ anumi na ɔ́bwi-nwu ni, ɔdi lɛnwunameyi. 15 Mmɔ na Ƒarisiƒuɔ bammɔ lɛnɔ básɔ béye-nwu kalɛ na ɔ́bla asa na ɔ́sɔ ɔ́kana na ɔɔnu. Na ɔnana ɔmmɔ ɔ́su-ma ɔnini, “Ukyuli ɔmmɔ úti aba adi úsusu-mi anumi. Na lɛ́ƒɔ mina anumi. Na ɔƒɛni ni, mɔɔkana mɔɔnu.” 16 Amu na Ƒarisiƒuɔ bammɔ badi básu banini, “Ukyuli ɔni nábla lɛla lɛmɛni ni, ɔɔɔdi Katɔti nátala-nwu! Ɔsika uládi lɛnwunameyi ɔda ɔni na Katɔti úbo-bu lɛlɔ.” Na babambadi ama banini, “Dɛ na ukyuli ɔni na ɔdi alaekpidi ɔblane wakana na wabla akɔla budie taatina amɛni udu?” Mmɔ ni, bekyuli bammɔ béle lɛlɔ akpa anyɔ. 17 Amu na Ƒarisiƒuɔ bammɔ básɔ béye ɔnana ɔmmɔ banini, “Ka aasu anii anwu nábwi-ɔ lɛnumbwɛ ni, bi na awɔ ɔlati aasu taasiku ukyuli ɔmmɔ lɛlɔ?” Amu na ɔnana ɔmmɔ údie kenye ɔnini, “Katɔti kenye udiene na ɔdi.” 18 Ina amu ni, Yudaƒuɔ bammɔ bátaƒɔ bátadi ka sɔsɔ na ɔdi ka ɔnana ɔmmɔ anumi ábwɛ-nwu asa na ɔ́sɔ ɔ́kana na ɔɔnu úti útédu uwi ɔni bálɔ nwuna bawɔne. 19 Mmɔ na béye-ma banini, “Bina ubi na ɔdi mɛni? Na ka bɛɛsu bɛnii bɛ́wɔ-nwu na ɔdi ɔnumbwɛne ni, dɛ na ɔ́bla asa na ɔɔkana bɔnu ɔƒɛni?” 20 Amu na nwuna bawɔne bédie kenye banini, “Bɔgyi ka bula ubi na ɔdi. Na bɔgyi lɛnɔ ka ɔni na bɔ́wɔ-nwu ni, ulánu. 21 Nsu kalɛ na ɔ́bla asa na ɔ́kana na ɔɔnu ni, bulákana bɔti. Na bɔɔɔgyi ukyuli ɔni nábwi-nwu lɛnumbwɛ lɛmmɔ lɛnɔ. Biye-nwu na anwu ɔlati ɔdubudie lɛlɔ kenye, ɔsika ɔ́ɔbi lɛlɔ kanaalɛ!” 22 Nwuna bawɔne básu ɔmɛni, ɔsika bátaayia Yudaƒuɔ benengu bammɔ. Ɔsika benengu bammɔ báalɛ ugyii bése ka ukyuli biala ɔni medie kenye ka Yesu ndi Ukyuli Ɔƒunadi ɔmmɔ ni, badubudie-nwu bana akɔ na Yudaƒuɔ kasalakɔ. 23 Ɔmmɔ ɔsu na nwuna bawɔne básu banii, “Ɔ́ɔbi lɛlɔ kanaalɛ, ɔsu biye-nwu!” 24 Benengu bammɔ básɔ bálɔ ɔnana ɔni na nka anumi ábwɛ-nwu mmɔ, na básu-nwu banini, “Yia Katɔti, na asu-bu litemi geen lɛmmɔ! Abu bɔgyi ka ukyuli ɔmmɔ ɔdi alaekpidi ɔblane!” 25 Amu na ɔnana ɔmmɔ údie kenye ɔnini, “Ami lɛɛɛgyi si ɔdi alaekpidi ɔblane iye ɔɔɔdi. Lɛla linwi lɛni kani na ngyi ndi ka anumi ábwɛ-mi dii. Nsu ɔƒɛni ni, mɔɔnu!” 26 Mmɔ na benengu bammɔ béye-nwu banini, “Bi na ɔ́bla-a, na dɛ na ɔ́bwi ƒula lɛnumbwɛ lɛmmɔ?” 27 Amu na ɔnana ɔmmɔ údie kenye ɔnini, “Lɛ́ɛsu-mii ḿbavi, nsu bilayɔ ka binu. Na bi ɔsu na bɛsɔ bɛɛyɔ́ binu ɔƒɛni? Bɛɛwia ka binwini nwuna basiakune lɛnɔ?” 28 Mmɔ na benengu bammɔ bábɔku-nwu banii, “Awɔ ndi ukyuli ɔmmɔ kama ɔsiakune. Abu Mose basiakune na bɔdi. 29 Bɔgyi ka Katɔti ɔ́tɛmiku Mose. Na ukyuli ɔmmɔ anwu ni, bɔɔɔgyi kesii kani na ɔ́si muedi!” 30 Amu na ɔnana ɔmmɔ ɔnini, “Bi litemi lɛdi mɛni? Bɔsu bɛda bɛnii bɛɛɛgyi kesii kani na ɔ́si, nsu anwu nábwi-mi lɛnumbwɛ! 31 Bɔgyi ka Katɔti ulenu alaekpidi bablane katɔ bɔkpali. Na bekyuli babuni bani mɔɔbu-nwu na baabla nwuna lɛƒɔyɔ mmomu katɔ bɔkpali na uunú. 32 Na ɔ́si kayawi kalɔ kesekɔ ƒui ni, ɔma nénu ka ukyuli ɔdi ɔ́ya na ɔnumbwɛne ɔni na báwɔ-nwu lɛni ɔkana bɔnu? 33 Na si ɔɔɔdi Katɔti kudɔ na ukyuli ɔmɛni ɔ́si ni, nka ulakana lɛla lɛdi bɔbla.” 34 Amu na benengu bammɔ banini, “Awɔ ɔni na likpidi kemo na báwɔ-ɔ bákya na lɛni kani na éti ábi lɛlɔ ni, awɔ mɔɔwia ka atina-bu ala?” Mmɔ ni, bábɔku-nwu bédie Yudaƒuɔ kasalakɔ mmɔ. 35 Ka Yesu únu ka bábɔku-nwu bédie mmɔ ni, ɔ́wia ɔnana ɔmmɔ ɔ́nu. Na úye-nwu ɔnini, “Áƒɔ Ukyuli Ɔyawine Ubi ádi?” 36 Mmɔ na ɔnana ɔmmɔ ɔnini, “Ati, tina-mi ukyuli ɔmmɔ na makana-nwu bɔƒɔ bɔdi.” 37 Amu na Yesu ɔ́su-nwu ɔnini, “Áanu ukyuli ɔmmɔ ábavi. Na ami ɔmmɔ ndi ukyuli ɔni mɔɔtɛmiku-ɔ ɔƒɛni.” 38 Mmɔ kani na ɔnana ɔmmɔ ɔ́su ɔnini, “Blɔti, lɛ́ƒɔ lɛ́di!” Na ɔ́lɛ akɔnkɔ na Yesu anumi na úmwi-nwu. 39 Amu na Yesu ɔ́su ɔnini, “Líbo kayawi kamɛni mbatɛku bekyuli litemi kalɛ na banumbwɛne bataanu, na bani mɔɔnu ni, anumi abwɛ-ma.” 40 Ka Ƒarisiƒuɔ bani nkya-ma akɔ bénu lɛla lɛni na Yesu ɔ́su ni, béye-nwu banini, “Bi na aasu? Abu lɛnɔ banumbwɛne na bɔdi?” 41 Mmɔ na Yesu ɔ́su-ma ɔnini, “Si banii anumi nábwɛ-mii ni, nka bítaƒiɔ. Nsu ka amii alati bɛnii bɛɛnu ɔsu ni, ɔmɛni ɔɔtina ka bɛ́ƒiɔ.”

10

1 Yesu ɔ́su-ma ɔnini, “Mɔɔsu-mii geen ka ni, ukyuli ɔni naaadubo kayakun kammɔ kenye bɔsia buduo lɛƒonuyu lɛmmɔ kemo mmomu ɔba kama na ɔdubɔkɔ uduo ni, ɔdi uyune ku ala ubilene. 2 Na ukyuli ɔni mɔɔsia kayakun kammɔ teeduo ɔba kemo ni, anwu ndi baƒonu ɔdane ɔbuni ɔmmɔ. 3 Kayakun kenye ɔgyumanane ɔɔlɛmi kayakun kammɔ teete anwu. Na baƒonu bammɔ beenú-nwu lɛdi si ɔɔkpali-ma kalɛ na ɔ́sia-ma anyi na ɔɔtɔnku-ma taalɛku. 4 Na si ɔ́kpanku-ma ɔ́lɛku ni, ɔɔtɔ-ma lɛtɔtɔ na baƒonu bammɔ baasiaku-nwu kama ɔsika bagyi-nwu lɛdi. 5 Baaadubo ukyuli bamba bɔsiaku. Mmomu badubukeli batɔlɔ ukyuli ɔbambadi kudɔ, ɔsika baaagyi-nwu lɛdi.” 6 Yesu úbo-ma lɛgba lɛmɛni, nsu bétenu lɛla lɛni na ɔ́su-ma kalɔ. 7 Ɔmɛni ɔsu ni, Yesu ɔ́sɔ ɔ́su-ma ɔnini, “Mɔɔsu-mii geen ka ni, ami ndi ɔba kayakun ute baƒonu bammɔ. 8 Bekyuli bani ƒui nágyu bátɔ-mi lɛtɔtɔ na bébo aani si ami na ɔdi ni, badi beyune ku ala bebilene. Nsu baƒonu bammɔ bétenu-ma litemi. 9 Ami ndi kayakun kammɔ. Na ukyuli biala ɔni mɔɔsia-mi lɛlɔ teeduo ɔba ɔmmɔ kemo ni, ndubɔƒɔ-nwu ngba. Ɔdubuduo mmɔ taalɛ na utaakɛ adila abuni taadi. 10 Buyu kani na uyune uubo teebeyu na ɔdu bebuo na ubile ala lɛnɔ. Na ami ni, líbo kalɛ na lɛya na bekyuli belie ngba geen na bakɛ bɔnwuna ƒui. 11 “Ami ndi baƒonu ɔdane ɔbuni ɔni nátuna ka ukpi na baƒonu bammɔ lili. 12 Ukyuli ɔni na kayu kenye na béti-nwu na úbo ɔɔbla kabla ni, uukeli si ɔ́nu ka kegiti kɔdubo. Na ɔda baƒonu bammɔ unyene. Ɔsika ɔɔɔdi baƒonu ɔdane. Na baƒonu bammɔ lɛnɔ baaadi nwuna badi. Anwuɔsu kegiti kɔmmɔ kuuƒie baƒonu bammɔ na kugyingya-ma ƒui. 13 Ukyuli ɔmɛni uukeli, ɔsika kayu kenye na béti-nwu na úbo ɔɔbla kabla. Na ɔɔɔdaku baƒonu bammɔ lɛda. 14 - 15 “Ami ndi baƒonu ɔdane ɔbuni. Na aani kalɛ na Ati ɔgyi-mi na ami lɛnɔ ngyi-nwu ni, lɛni kani na ngyi mina baƒonu, na ama lɛnɔ bagyi-mi. Na lɛ́tuna ka likpi na bana lili. 16 Mbo baƒonu babambadi na beeebo lɛƒonuyu lɛmɛni kemo tɔ. Na ɔlɛka lɛkpanku ama lɛnɔ liboku. Na badubunu-mi lɛdi. Na bana ƒui badubunwini baƒonu lisu linwi na baƒonu ɔdane unwi kalɔ. 17 Na Ati ɔɔyɔ́-mi, ɔsika lɛ́tuna ka likpi na bana lili. Ɔmmɔ kama na lɛsɔ linwini libo mbelie ngba. 18 Ɔɔɔdi ukyuli ɔdi ndubo-mi bɔkana bɔdu. Mmomu ami ɔlati nénu kalɔ ka likpi. Mbo ɔyikun na lɛkana likpi lɛni. Na mbo ɔyikun lɛnɔ na lɛkana na lɛsɔ linwini libo mbelie ngba. Ɔmɛni ndi lɛla lɛni na Ati úbo-mi ɔda ka mbabla.” 19 Na Yesu etemila amɛni ɔsu ni, bule bɔ́sɔ búduo Yudaƒuɔ bammɔ ƒui ntɛ. 20 Na bana akɔ pii básu banini, “Kɔyu kukpidi kɔsiaku ukyuli ɔmɛni, na uukpi libuo! Bi ɔsu na ɔlɛka binye biteenu ala ani na ɔɔsu?” 21 Nsu babambadi lɛnɔ básu banini, “Ukyuli ɔni na kɔyu kukpidi kɔsiaku ni, ulakana na wetemi lɛni! Dɛ na kɔyu kukpidi kɔdubɔya na ɔnumbwɛne ɔsɔ utaanu?” 22 Na uwi ɔmmɔ kemo ni, ɔdi kɔyɔ uwi ɔni na Yudaƒuɔ baadi bana limeyi lɛni baalɔ Kakpakɔ Bɔsɔku Teete Katɔti Limeyi. 23 Na Yesu ɔkɛ uusié taavi na kakpakɔ kaduli mmɔ kesii kani baalɔ Salomo lɛgbanya. 24 Mmɔ na Yudaƒuɔ bammɔ bábaka bámana-nwu, na béye-nwu banini, “Uwi ɛlɛ geen na adubunye etédu asa na asu-bu nwaa si awɔ ndi Ukyuli Ɔƒunadi ɔmmɔ?” 25 Amu na Yesu ɔ́su-ma ɔnini, “Lɛ́ɛsu-mii ɔmɛni ḿbavi, nsu bilaƒɔ-mi taadi. Na ala ani mɔɔbla ɔkɛnku mina Ɔti ɔyikun lɛlɔ muudie-mi kenye. 26 Nsu bilaƒɔ taadi, ɔsika bɛɛɛdi mina baƒonu bammɔ akɔ badi. 27 Mina baƒonu beenú-mi lɛla lɛni mɔɔsu-ma. Na ngyi-ma. Na ama lɛnɔ basiaku-mi. 28 Mɔɔyá na beelie ngba bɔni nsɔ naaadubo bɔsa kudii, na balayii ku udu. Na ukyuli biala ulakana-ma buƒie bɔƒɔ na mina kɔnu kemo. 29 Katɔti ɔni néti-ma úte-mi ni, úbomo útulo lɛla biala na ukyuli biala ulakana-ma buƒie bɔƒɔ na nwuna kɔnu kemo kudii. 30 Ati ku ami ƒui ni, bekyuli benwi na bɔdi.” 31 Mmɔ na Yudaƒuɔ bammɔ básɔ bála atabi banii beebó Yesu. 32 Amu na Yesu úye-ma ɔnini, “Lɛ́bla kabla kabuni pii na bina akɔ, na amii alati bɛ́nu na adi kabla kani na Ati úti ɔ́kya-mi enu kemo ka mbabla. Na ala amɛni akɔ ɔmani lili ɔsu na bɛɛwia ka bibo-mi atabi?” 33 Mmɔ na Yudaƒuɔ bammɔ básu banini, “Ɔɔɔdi ala abuni adi ɔsu na bɔɔwia ka buubó-ɔ atabi. Mmomu ɔni na eedumi Katɔti ɔsu! Ukyuli kani na adi, nsu aawia ka eti lɛlɔ enwini Katɔti!” 34 Amu na Yesu údie kenye ɔnini, “Bénweni na Bunweni Kedee Ɔku kemo ka Katɔti ɔ́su ɔnini, 'Bise aani Katɔti.' 35 Na bɔgyi ka lɛla lɛni na bénweni bákya Bunweni Kedee Ɔku kemo ni, lɛdi litemi geen lɛni nse lísela uwi ƒui. Na mmɔ na Katɔti ɔ́lɔ bekyuli bani na ɔ́ya básu nwuna litemi buni ɔnii, 'Bise aani Katɔti.' 36 Nsu ami ni, bɔƒuna na Ati ɔ́ƒuna-mi ka libo kayawi kamɛni kemo. Na bi ɔsu na bɛɛsu bɛni muudumi Katɔti ka lɛ́su nnii ami ndi Katɔti Ubidi ɔsu? 37 Na si ɔɔɔdi mina Ɔti kabla na mɔɔbla ni, bitaƒɔ-mi bitadi. 38 Nsu si anya na mɔɔbla bɔdi ni, si ina bilaƒɔ ami ɔlati taadi ni, ɔdi ka bɛƒɔ ala ani na mɔɔbla anya bɛdi. Na si bɛ́bla lɛni ni, bɛdubɔnu bɔti kɔnakunwi ka Katɔti uliku-mi na ami lɛnɔ nliku-nwu.” 39 Mɛni lɛnɔ ni, Yudaƒuɔ bammɔ básɔ báyɔ ka beƒie-nwu, nsu ɔ́sɔ ɔ́lɛ-ma enu kemo. 40 Ka Yesu ɔ́tɔlɔ-ma kudɔ ni, ɔ́sɔ ɔ́via Yordan ketu na úsie útélie kesii kani na Yohane ɔ́kya útaakpila bekyuli ntu dii. 41 Na bekyuli pii bébo-nwu kudɔ. Na básu lɛlɔ banini, “Yohane útabla akɔla budie taatina bɔdi. Nsu lɛla biala na Yohane ɔ́su na ukyuli ɔmɛni lɛlɔ ni, líbo-nwu kemo lɛni.” 42 Na bekyuli pii báƒɔ Yesu bádi.

11

1 Na ɔma ɔni baalɔ Betania kemo ni, ɔnana ɔdi ɔ́kya na baalɔ-nwu Lasaro. Ɔnana ɔmɛni úbo uuƒi. Na banwani belekubi inyɔ bani ndi Maria ku Marta lɛnɔ bákya ɔma ɔmmɔ. 2 Maria ɔmɛni ndi ɔni nébeti inɔmii bɔni muunwenyi ƒɛƒɛɛ úwi Blɔti Yesu lɛgba na ɔ́da nwuna lili linwini úni-nwu lɛgba. Na ɔnwani ndi Lasaro ɔni nébo uuƒi litemi na bɔɔsu ɔƒaani. 3 Lasaro banwani belekubi bamɛni básia Yesu kenye banini, “Blɔti ƒula ɔkpana ɔyɔne uuƒi.” 4 Ka Yesu únu kenye kamɛni ni, ɔ́su ɔnini, “Ɔlɛ ɔni na Lasaro uuƒi mɛni ni, ɔɔɔdi kukpi ndubɔdi-nwu kawɔlɔkɔ. 5 Mmomu ɔmɛni úbo úte lɛni kalɛ na Katɔti udie nwuna ɔyikun ɔtina. Na ɔkɛnku ɔmmɔ kani lɛlɔ na bekyuli bemwi ami Katɔti Ubidi.” Yesu ɔ́yɔ Lasaro ku Marta ku ɔnwani geen. 6 Nsu ɔni na kenye kamɛni kédu-nwu ni, ɔ́ƒɔ lɛlɔ ɔ́kya mmɔ emeyi anyɔ úbu. 7 Ɔmmɔ kama ni, ɔ́su nwuna batɛyane ɔnini, “Bɛya na bɔsɔ bunwini busie Yudea.” 8 Amu na bédie kenye banini, “Nsu ala ɔtinane, uwi klukui ɔdi kani návi mɛni ka bekyuli bani nkya mmɔ báwia ka bebo-ɔ atabi! Amu na asɔ aakali ka bɔsɔ busie kama?” 9 Mmɔ na Yesu údie kenye ɔnini, “Si kadi kégye ni, limeyi lɛdanku uwi akpa akpa leevu-inyɔ, munuu ɔkɔ mɔɔnyi? Anwuɔsu kadi bukeye bɔmmɔ ɔsu ni, ukyuli ɔni nkɛ ni, uletulo. 10 Nsu si usien na ɔkɛ bɔdi ni, ɔdubo butulo ɔsika bukeye bɔdi buuubo.” 11 Ka Yesu ɔ́su ɔmɛni ni, ɔ́sɔ ɔ́su úbunku ɔnini, “Bula ɔkpana Lasaro ɔ́ɔlɛɛ, nsu muusié ntágyila-nwu.” 12 Ka batɛyane bammɔ bénu lɛni ni, básu Yesu banini, “Blɔti, si bɔlɛɛ na ɔ́nya ɔda ni, ɔlɛ ɔmmɔ ɔdubɔsa-nwu.” 13 Nsu bɔsu na Yesu ɔda ɔnii Lasaro úkpi, nsu nwuna batɛyane bákali ka lɛlɛɛ geen na ɔɔlɛɛ. 14 Anwuɔsu ɔ́su-ma nwaa ɔnini, “Lasaro úkpi. 15 Nsu amii ɔsu ni, ɔdia-mi ka liiibo mmɔ asa na úkpi kalɛ na ɔkɛnku ɔmɛni lɛlɔ ni, na bɛƒɔ-mi bɛdi. Anwuɔsu bɛya na buteesie-nwu kudɔ mmɔ.” 16 Amu na Toma ɔni baalɔ Nta Ubi mmɔ ɔ́su nwuna banwani batɛyane bakladi ɔnini, “Bɛya na bula ƒui bɔsiaku ala ɔtinane kalɛ na abu lɛnɔ bukpi ku-nwu!” 17 Uwi ɔni na Yesu útédu mmɔ ni, únu ka báava Lasaro na limeyi lɛmmɔ ndi limeyi linedi. 18 Ɔƒɛni ɔ́si Yerusalem úsie Betania mmɔ ni, ɔbla eluku anyɔ. 19 Na Yudaƒuɔ pii bésie mmɔ bátásia Maria ku Marta kɔnu ka bana ɔnwani úkpi ɔsu. 20 Ka Marta únu ka Yesu ɔ́si ɔdubo ni, úsie útásiaku-nwu. Na Maria anwu ɔkya ɔtɔ. 21 Mmɔ na Marta ɔ́su Yesu ɔnini, “Blɔti, si bɔkya na akya mɛni ni, nka mina ɔnwani útekpi! 22 Nsu ngyi ka ina ɔƒɛni muedi ni, Katɔti ɔdubɔbla lɛla biala na évele-nwu ute-ɔ.” 23 Amu na Yesu ɔ́su-nwu ɔnini, “Ƒ^ɔnwani ɔdubɔta ulie ngba.” 24 Mmɔ ni, Marta údie kenye ɔnini, “Ngyi ka ɔdubɔta uwi ɔni na bekpine badubɔsɔ bata na limeyi likplodi lɛlɔ.” 25 Amu na Yesu ɔ́su-nwu ɔnini, “Ami mɔɔyá na bekyuli basɔ baata teebelie ngba. Ukyuli biala ɔni mɔɔƒɔ́-mi taadi ɔdubulie ngba si ina úkpi muedi. 26 Na ukyuli ɔni nli ngba si ɔ́ƒɔ-mi ɔ́di ni, ulekpi kudii. Áƒɔ ɔmɛni ádi?” 27 Ka Yesu úye-nwu lɛni ni, Marta údie kenye ɔnini, “Ɛɛn, Blɔti, lɛ́ƒɔ-ɔ lɛ́di ka awɔ ndi Ukyuli Ɔƒunadi ɔni ndi Katɔti Ubidi ɔni na básu bése ka ɔdubo kayawi.” 28 Mmɔ ka Marta ɔ́su lɛni ɔ́wɔlɔ ni, únwini úsie na útálɔ ɔnwani Maria úsienku kɔmadɔ na ɔ́su-nwu ɔnini, “Ala ɔtinane ɔmmɔ úubo mɛni na uuye-ɔ lili.” 29 Ka Maria únu ɔmɛni ni, ɔ́babla ɔlɛ úsie utásiaku-nwu. 30 Uwi ɔmmɔ ni, Yesu úteduo tɔ ɔma ɔmmɔ. Mmomu ɔ́mua unye likpo lɛni na Marta úbasiaku-nwu mmɔ. 31 Na Yudaƒuɔ bani nlie Maria kudɔ baasia-nwu kɔnu ni, ama lɛnɔ báta básiaku Maria kama uwi ɔni na ɔ́babala ɔ́lɛ mmɔ. Ɔsika bábu ka kaƒiɔtɔ kammɔ kudɔ na ɔ́sɔ úsela utéteewulo. 32 Uwi ɔmɛni lɛlɔ ni, Maria úubo úbedu Yesu kudɔ. Na uwi ɔni na ɔ́nu Yesu ni, mmɔ kani na ɔ́yu úwi Yesu lɛgba akɔ na ɔ́su-nwu ɔnini, “Blɔti, si bɔkya na akya mɛni ni, nka mina ɔnwani útekpi.” 33 Yesu ɔ́nu kalɛ na Maria uuwulo na bekyuli bani nsiaku-nwu lɛnɔ beewulo. Nwuna kayi kékpoku-nwu na údumo. Na úye bekyuli bammɔ ɔnini, 34 “Wɛ na bɛ́va-nwu?” Amu na bédie kenye banini, “Blɔti, bo, na abanu.” 35 Mmɔ ni, Yesu úwulo. 36 Amu na bekyuli bammɔ básu lɛlɔ banini, “Bɛnu kalɛ na ɔɔyɔ́-nwu!” 37 Nsu bádi básu lɛlɔ banini, “Ɔ́bwi banumbwɛne na básɔ baanu. Nsu bi ɔsu na waya na Lasaro wekpi?” 38 Yesu ɔ́sɔ údumo geen, na úsie utédu kaƒiɔtɔ kammɔ kudɔ. Kaƒiɔtɔ kammɔ kadi lɛtabi ubu ɔni na béti lɛtabi bamba bábala-nwu kenye. 39 Amu na Yesu ɔ́su bekyuli bammɔ ɔnini, “Biliiku lɛtabi lɛmmɔ bidie ubu ɔmmɔ kenye.” Mmɔ ni, Lasaro ɔmmɔ ɔnwani Marta ɔ́su Yesu ɔnini, “Blɔti, ɔdubo buteenwenyi ɔƒɛni, ɔsika ɔmwi limeyi linedi ka báva-nwu!” 40 Amu na Yesu ɔ́su Marta ɔnini, “Ńtasu-ɔ nnii si áƒɔ-mi ádi ni, adubɔnu ɔyikun ɔni na Katɔti ubo ati?” 41 Amu na Bekyuli bammɔ béliiku lɛtabi lɛmmɔ bédie ubu ɔmmɔ kenye. Na Yesu ɔ́nu katɔ na ɔ́su ɔnini, “Ati, mɔɔgyá-a enu, ɔsika aatuna teete-mi si lɛ́kpali-ɔ. 42 Na ngyi ka aatuna teete-mi uwi biala kemo. Nsu bekyuli bani nnye mɛni ɔsu na nsɔ mɔɔsu ɔmɛni kalɛ na baƒɔ badi ka awɔ nátala-mi.” 43 Ka ɔ́kpali katɔ ɔ́wɔlɔ lɛni ni, ɔ́va ɔ́kpali ɔnini, “Lasaro, lɛ bo mɛni!” 44 Na ukpine ɔmmɔ ɔ́ta úsie úbo-ma kudɔ mmɔ, na ukpine kɔvɔdi kɔmmɔ kúnyimi kɔda-nwu enu ku lɛgba. Na béeti kɔ́di kɔdi bényimi-nwu anumi. Amu na Yesu ɔ́su-ma ɔnini, “Bɛƒɛnimi adi ammɔ ƒui na nwuna lɛlɔ.” 45 Ɔmɛni ɔsu ka Yudaƒuɔ pii bani nébo Maria kudɔ mmɔ bánu lɛla lɛni na Yesu ɔ́bla ni, báƒɔ-nwu bádi. 46 Nsu badi bénwini bésie Ƒarisiƒuɔ kudɔ, na bátásu-ma lɛla lɛni na Yesu ɔ́bla. 47 Anwuɔsu Ƒarisiƒuɔ ku bakpane benengu bása ku Yudaƒuɔ batɔnkune bammɔ na béye lɛlɔ banini, “Bi na ɔlɛka bɔbla? Bɛnu akɔla budie taatina ani udu na ukyuli ɔmɛni ɔdaku bɔbla! 48 Si bunye bɔɔnu-nwu na ɔdaku ɔmɛni lɛni ni, ukyuli biala ɔdubo-nwu bɔƒɔ bɔdi. Na Romaƒuɔ lɛlɔ badine badubɔta na bebebo bula kakpakɔ kamɛni babwɛ na bekpo bula kalɔ ƒui.” 49 Amu na bana akɔ unwi ɔni ndi ɔkpane unengudi na lɛkwa lɛmmɔ kemo na baalɔ-nwu Kaiaƒa ni, ɔ́su-ma ɔnini, “Amii bɛɛɛgyi lɛla lɛni mɔɔlɛ́ mɛni kalɔ! 50 Bɛɛɛgyi bɛnii ɔdia ka ukyuli unwi ukpi na kadi ƒui lili utulo ka kadi ƒui bekyuli bayii ku udu?” 51 Nsu geen ni, ɔɔɔdi anwu ɔlati kasusu nwaa kemo na ɔ́su lɛla lɛmmɔ. Mmomu ni, ka anwu ndi ɔkpane unengudi na lɛkwa lɛmmɔ kemo ɔsu ni, Katɔti ɔkɛ-nwu lɛlɔ na ɔ́ya na ɔɔsu lɛla lɛni ndubo libalɛ use ka ni, Yesu ndubo ubekpi na Yudaƒuɔ ƒui lili. 52 Na ɔɔɔdi ama lɛti. Mmomu ku kalɛ na ɔsala Katɔti bekyuli bani négyingya bakya kayawi ekpo ekpo ƒui lɛlɔ na ɔbla-ma unwi. 53 Amu na ɔ́si limeyi lɛmmɔ lɛlɔ ni, Yudaƒuɔ batɔnkune bammɔ bése kalɔ baawia lilu lɛni lɛlɔ na beƒie Yesu na badu-nwu. 54 Ɔmɛni ɔsu ni, Yesu ɔsɔ ulavi ɔgbami na Yudaƒuɔ akɔ. Mmomu ɔ́tɔlɔ úsie utélie ɔma blii ɔdi nde ketele na baalɔ-nwu banii Eƒraim. Na anwu ku nwuna batɛyane bákya mmɔ. 55 Uwi ɔmmɔ kemo ni, Yudaƒuɔ Kukpi Lili Bɔvia Limeyi bɔdi ɔ́ɔkpɛ úde. Na bekyuli pii bási kalɔ kammɔ ekpo ƒui bésie Yerusalem bátátaabla lɛlɔ bɔƒɔ ɔdi ɔmmɔ batáklibi lɛlɔ bete limeyi lɛmmɔ bɔdi. 56 Na bekyuli bammɔ bákya bátaatɛ Yesu anu kpakplaa na kakpakɔ mmɔ ɔni na bábasa. Na beeye lɛlɔ banini, “Dɛ na awɔ aakali? Ami ngyi ka ulakana limeyi lɛmɛni kalɔ bubo. Munuu dɛ?” 57 Na uwi ɔmmɔ ni, bakpane benengu ku Ƒarisiƒuɔ béte bɔti ka si ɔdi ɔgyi kesii kani na Yesu ɔkya ni, na ubo ubasu-ma kalɛ na besie betéƒie-nwu.

12

1 Ka kébu emeyi aku na badi Kukpi Lili Bɔvia Limeyi ni, Yesu úsie Betania na kesii kani na Lasaro ɔni na ɔ́gyila ɔ́lɛku kekpine ɔkya. 2 Mmɔ ni, bánwa Yesu ebiti bɔkya adila na anwu ku nwuna badi bádi. Na Marta néti adila ammɔ útése-ma. Lasaro lɛnɔ ɔ́kya Yesu ku bani mɔɔdi mmɔ akɔ. 3 Amu na Maria úti inɔmii ƒɛƒɛɛ bɔdi bɔni náƒɔ kuye geen na baalɔ-mu nard úwi Yesu lɛgba, na ɔ́da nwuna lili linwini úni-nwu lɛgba. Na ɔnyi ƒɛƒɛɛ ɔ́ƒɔ ɔtɔ ɔmmɔ ƒui kemo. 4 Mmɔ ni, Yesu batɛyane akɔ unwi ɔni ndi Yuda Iskariot ɔni ndubɔkya Yesu kakya ni, útayɔ-nwu kaƒɔ na úye ɔnini, 5 “Bi ɔsu na nka búteti inɔmii bɔmɛni búteye na bɔkɛ aani nkyuli eti aku limeyi lɛyuƒɔla na buti egulabi ammɔ bute bawabane?” 6 Nsu ɔɔɔdi ɔni na bawaba baakywí-nwu kaƒɔ ɔsu na úye ɔmɛni. Mmomu ka ɔdi uyune na anwu kani mɔɔda bana kavumi, na ɔɔyɔ́ ka nka utaaƒana egulabi ammɔ adi teedie taabla nwuna lɛlɔ ala ɔsu. 7 Amu na Yesu ɔ́su-nwu ɔnini, “Nwuna lɛla biala litekpoku-ɔ. Ya na ɔbla lɛla lɛni na ubo use ute mina kukpi. 8 Bawabane bammɔ bakya-mii kudɔ uwi biala. Nsu ami lɛɛɛdubo-mii kudɔ bɔkya uwi biala.” 9 Ka Yudaƒuɔ pii bénu ka Yesu úsie ɔkya Betania ni, bésie mmɔ. Na ɔɔɔdi Yesu lɛti pɛ ɔsu. Mmomu kalɛ na banu Lasaro ɔni na Yesu ɔ́gyila ɔ́siku kekpine lɛnɔ ɔsu. 10 Anwuɔsu bakpane benengu bábla kasusu ka badu Lasaro lɛnɔ. 11 Ɔsika ɔkɛnku-nwu lɛlɔ ɔsu na Yudaƒuɔ pii baalɛ́ bakpane benengu bammɔ kama na basiaku Yesu ka báƒɔ-nwu bádi ɔsu. 12 Limeyi lɛni nsia ni, bekyuli lisu bonwu lɛni nébo Kukpi Lili Bɔvia Limeyi kadikɔ ni, bénu ka Yesu ɔ́si ɔdubo Yerusalem. 13 Anwuɔsu béti kuke na bálɛ bésie bátásiaku-nwu. Na baava taasu banini, “Hosiana! Bimwi anwu ɔni ndubo na Blɔti lɛnyi kemo! Bimwi Israelƒuɔ Ɔga!” 14 Na Yesu ɔ́nu ebuo ala utine ubi ɔdi na ulie-nwu lɛlɔ aani kalɛ na Bunweni Kedee Ɔku ɔ́su ɔnini, 15 “Amii, Sion bekyuli, bitayia lɛla lɛdi! Bɛɛnu bina Ɔga ka ulie ebuo ala utine ubi lɛlɔ ɔdubo!” 16 Na nka Yesu batɛyane bétenu lɛla lɛmɛni kalɔ kudeedi. Nsu uwi ɔni na Katɔti ɔ́gyila-nwu ɔ́siku kekpine na úte-nwu ɔbu ni, mmɔ na bényimo ka Bunweni Kedee Ɔku ɔ́su ɔmɛni ɔ́siku-nwu lɛlɔ ka bekyuli bábla ala amɛni ƒui béte-nwu. 17 Bekyuli bani nnye baanu uwi ɔni na Yesu ɔ́kpali Lasaro na kaƒiɔtɔ kemo na ɔ́gyila-nwu ɔ́lɛku kekpine ni, bésie bátásu lɛla lɛni nálɛ mmɔ bávi. 18 Ɔmmɔ ɔsu na bekyuli pii bammɔ bésie bátásiaku-nwu, ɔsika bénu akɔla budie taatina bɔni na ɔ́bla. 19 Mmɔ na Ƒarisiƒuɔ bammɔ básu lɛlɔ banini, “Bɛnu ka bekyuli bammɔ bálɛ-bu kama! Kayawi bekyuli ƒui bétiku lɛlɔ bésie basiaku-nwu kama!” 20 Helaƒuɔ badi bakya bekyuli bani nésie Yerusalem batákpa na limeyi lɛmmɔ bɔdi kemo. 21 Amu na bésie Ƒilipo kudɔ ɔni nási Betsaida na Galilea kalɔ lɛlɔ. Na básu-nwu banini, “Ati, bɔɔwia ka bɔnu Yesu.” 22 Mmɔ na Ƒilipo úsie útásu Andrea, na bana inyɔ bakɛ bésie bátásu Yesu. 23 Amu na Yesu údie kenye ɔnini, “Uwi údu ka Katɔti ɔkɔliku ami nwuna Ubidi lɛnyi katɔ na bekyuli anumi. 24 Na mɔɔsu-mii geen ka ni, lɛntabi lilemomo teetulo linwi lɛni kani na lɛdi, amu ntu béti-ni bákya kalɔ na libu. Na si líbu lɛni ni, uwi ɔmmɔ kama asa na liimomo teenwini antabi pii. 25 Ukyuli ɔni na nwuna bɔdia lɛti pɛ na ulie ute na ngba bɔmɛni kemo ni, ɔdubɔyila lɛla biala. Nsu ukyuli ɔni néni anwu ɔlati lɛkɛ na uulie ngba taawia bekyuli bamba bɔdia ni, ɔɔkɛ́ ngba bɔmmɔ uwi ƒui. 26 Ukyuli biala ɔni mɔɔwia ka ɔbla-mi kabla ni, ɔdi ka ɔsiaku-mi. Na kesii kani na nlie ni, mmɔ na mina kabla ɔblane ɔmmɔ lɛnɔ welie. Na ukyuli biala ɔni mɔɔbla-mi kabla ni, mina Ɔti ɔdubute-nwu ɔbu. 27 “Ɔƒɛni ni, kayi keekpóku-mi. Nsu bi na ɔlɛka lɛsu? Bɔsu na lɛsu nnii, 'Ati, taya na lɛbibo lɛmɛni udu lɛsiaku-mi'? Oowo! Ɔmmɔ ɔsu geen na líbo kalɔ kamɛni lɛlɔ kalɛ na libo abi amɛni udu. 28 Anwuɔsu mɔɔsu nnii, 'Ati, ya na bekyuli bakɔliku ƒula lɛnyi katɔ.' ” Mmɔ ni, bénu butemi bɔdi bɔ́siku kayaa ka bɔɔsu bɔnini, “Lɛɛyá na bekyuli bákɔliku mina lɛnyi katɔ. Na nsɔ ndubo bɔya na bakɔliku-mi lɛnyi katɔ bebu.” 29 Ka bekyuli bani nnye mmɔ bénu lɛdi lɛmmɔ ni, básu ka ɔnantu muudu. Na babambadi banini, “Katɔti ɔtu ɔdi násu-nwu lɛla lɛdi.” 30 Amu na Yesu ɔ́su-ma ɔnini, “Ɔɔɔdi ami ɔsu na lɛdi lɛmmɔ lɛɛku, mmomu amii ɔsu. 31 “Ɔƒɛni na uwi údu ka Katɔti ɔdu kayawi kamɛni bekyuli kɔtɔ. Na Katɔti ɔdubɔbɔku kayawi kamɛni lɛlɔ ɔdine ɔlɛku nwuna lɛga kadikɔ. 32 Na si uwi ɔni na bekyuli bákɔliku-mi katɔ ni, ndubɔya na bekyuli ƒui bebo-mi kudɔ.” 33 Ka Yesu ɔ́su ɔmɛni ni, ɔ́tina ka badubo-nwu katɔ bɔkɔliku na ugyii lɛlɔ na ukpi. 34 Amu na bekyuli lisu lɛmmɔ básu banini, “Na Bunweni Kedee Ɔku kemo ni, básu ka Ukyuli Ɔƒunadi ɔmmɔ ɔdubɔsɔ ɔkya ngba uwi ƒui. Na dɛ na ɔ́bla na aasu ka bekyuli badubɔkɔliku Ukyuli Ɔyawine Ubi ɔmmɔ katɔ lɛni? Ɔma ndi Ukyuli Ɔyawine Ubi ɔmmɔ?” 35 Mmɔ ni, Yesu údie kenye ɔnini, “Uwi klukui ɔdi kani na bɛdubɔsɔ bɛnu Katɔti bukeye bɔmmɔ. Anwuɔsu ni, uwi ɔni na kadi kammɔ kamua keekeye ni, bɛkya ɔkplu na bisie anumi kalɛ na kadi kalása kalakya-mii. Ɔsika ukyuli ɔni nkɛ na lɛdisa kemo ni, ɔɔɔgyi kesii kani na úsela. 36 Anwuɔsu ni, biti bina anu ƒui bɛsia bukeye bɔmmɔ lɛlɔ uwi ɔni na bɛ́mua bɛɛnu bukeye. Na ɔmmɔ ndubɔya na binwini bukeye bɔmmɔ bekyuli.” Ka Yesu ɔ́su-ma ɔmɛni ɔ́wɔlɔ ni, ɔ́gyu ɔ́tɔlɔ-ma kudɔ. Na ɔ́bɛla lɛlɔ na básɔ bátanu-nwu. 37 Na ina ka Yesu ɔ́bla akɔla budie taatina amɛni ƒui na bana anumi ni, bátaƒɔ-nwu bátadi. 38 Nsu ɔmɛni ɔ́lɛ lɛni kalɛ na Katɔti Kenye Udiene Yesaia lɛla lɛni na ɔ́su ka lɛdubɔlɛ libo-nwu kemo lɛni ɔnini, “Blɔti, ka búdie ƒula kenye kammɔ ni, ɔma náƒɔ-bu ɔ́di? Na ɔma bene na Blɔti údie nwuna ɔyikun ɔ́tina?” 39 Ɔmmɔ ɔsu na bátakana bɔ́ƒɔ bɔ́di, ɔsika Yesaia ɔ́sɔ ɔ́su ɔnini, 40 “Ami Katɔti lɛ́bala-ma anumi kalɛ na balanu lɛla lɛdi balati. Na lɛ́ya na bádɔlɔ kalɛ na belénu ala kalɔ. Ɔmmɔ ɔsu belénwini belebo-mii kudɔ kalɛ na lɛbwi-ma.” 41 Yesaia ɔ́nu ɔ́ti Yesu kenyekɔ ku ɔbu. Anwuɔsu na ɔ́su lɛla lɛmɛni ɔ́siku-nwu lɛlɔ ka badubuni-nwu. 42 Nsu ina ka use lɛni ni, Yudaƒuɔ batɔnkune pii báƒɔ Yesu bádi. Mmomu ka baayia lɛla lɛni na Ƒarisiƒuɔ badubo-ma bɔbla ɔsu ni, bátakana na basu ɔmɛni nwaa. Ɔsika badubɔgya-ma balɛku bana kasala kemo. 43 Na baayɔ́ ɔbu ɔni nási bekyuli kudɔ teetulo ɔni nási Katɔti kudɔ. 44 Amu na Yesu ɔ́su ku lɛdi momoomo ɔnini, “Ukyuli ɔni mɔɔƒɔ́-mi taadi ni, ɔɔɔdi ami lɛti na ɔ́ƒɔ ɔ́di. Mmomu ɔ́ƒɔ anwu ɔni nátala-mi lɛnɔ ɔ́di. 45 Na ukyuli ɔni mɔɔnu-mi ni, ɔɔnu anwu ɔni nátala-mi. 46 Líbo kayawi kamɛni kemo aani ukyuli ɔni mɔɔyá na bekyuli baanu bukeye kalɛ na ukyuli biala ɔni náƒɔ-mi ɔ́di ni, uláƒɔ lɛlɔ ulakya lɛdisa kemo. 47 “Si ukyuli ɔdi uunú litemi lɛni na mɔɔsu nsu uládi-ni lɛlɔ ni, lɛɛɛdubo-nwu kɔtɔ bɔdu. Ɔsika ńtebo nnii mbadu kayawi bekyuli kɔtɔ. Mmomu líbo nnii mbaƒɔ-ma ngba. 48 Ukyuli biala ɔni muuní-mi ni, na ulaƒɔ mina litemi taadi ni, lɛla lɛni madu-nwu kɔtɔ linye lɛgya-nwu. Na etemila ani na lɛ́su anya ndubo-nwu kɔtɔ bɔdu na limeyi likplodi lɛmmɔ lɛlɔ. 49 Ɔsika ɔɔɔdi ami ɔlati ɔyikun kemo na lɛ́tɛmi. Mmomu mina Ɔti ɔni nátala-mi nátina-mi lɛla lɛni na ɔdi ka lɛsu ku kalɛ na lɛsu-ni. 50 Na ngyi ka lɛla lɛni na ɔ́tala-mi ka mbasu mmɔ ni, ani mɔɔyá na bekyuli beelie ngba bɔni nsɔ naaadubo bɔsa kudii. Anwuɔsu lɛla lɛni na Ati ɔ́su-mi ka masu ni, ani kani na mɔɔsu.”

13

1 Amu na limeyi lɛni na kadi kégye ndi Kukpi Lili Bɔvia Limeyi lɛmmɔ ni, Yesu ɔ́ti ka uwi údu ka ɔtɔlɔ kayawi kamɛni lɛlɔ uteesie ɔti kudɔ. Na ka ɔɔyɔ́ ama bani náƒɔ-nwu bádi ƒui na kayawi kamɛni lɛlɔ ɔsu ni, ɔɔwia ka ɔtina-ma kalɛ na ɔɔyɔ́-ma geen. 2 Na useyi ɔmmɔ ka Yesu ku nwuna batɛyane bésie belie kadikɔ badaku bɔdi ni, ukisine ɔmmɔ ɔ́ɔya na kasusu kekpidi kéduo Yuda ɔni ndi Simon Iskariot ubidi lili kemo kalɛ na ɔkya Yesu kakya. 3 Yesu ɔgyi nwaa ka Ɔti úti ɔyikun úte-nwu ka ɔdi ala ƒui lɛlɔ. Na ɔgyi ka Katɔti ɔmmɔ kudɔ na ɔ́si, na nwuna kudɔ kani na ɔdubɔsɔ unwini usie. 4 Anwuɔsu ɔ́ta únye na kadikɔ mmɔ, na údie nwuna awu gyɔlɔɔ ɔmmɔ úwi, na úti ɔsa ɔ́sabla kevobi. 5 Na údu ntu bɔdi úwi lɛkpibwi lɛdi kemo, na úse kalɔ ɔɔƒɔ nwuna batɛyane bammɔ lɛgba, na uuni-ma ku ɔsa ɔni ɔ́sabla mmɔ. 6 Ka Yesu úbo úbedu Simon Petro kudɔ ni, Petro úye-nwu ɔnini, “Blɔti, bɔƒɔ na adubo-mi lɛgba?” 7 Amu na Yesu údie kenye na ɔ́su-nwu ɔnini, “Elénu tɔ lɛla lɛni na mɔɔbla ɔƒɛni mɛni kalɔ. Nsu kama ni, adubunu-ni kalɔ.” 8 Mmɔ ni, Petro úni na ɔ́su ɔnini, “Kudii! Lɛɛɛdubo kalɔ bunu na aƒɔ-mi lɛgba uwi ɔdi.” Amu na Yesu ɔ́su-nwu ɔnini, “Si étenu kalɔ na lɛƒɔ-ɔ lɛgba ni, agyi anii bɔsɔ buuubo kɔna kɔdi.” 9 Lɛla lɛmmɔ lɛ́gyu Petro ɔtɔtɔ! Anwuɔsu ɔ́su Yesu ɔnini, “Blɔti, si use lɛni ni, ɔɔɔdi mina lɛgba lɛti! Mmomu adubɔƒɔ mina enu ku lili lɛnɔ!” 10 Amu na Yesu ɔ́su-nwu ɔnini, “Ukyuli ɔni náakpi ntu ni, ɔ́lɛ bɔkpi. Anwuɔsu lɛgba kani na ɔlɛka ɔƒɔ. Bina ƒui bɛ́lɛ bɔkpi, amu ntu ukyuli unwi pɛ kani.” 11 Yesu ɔ́su ɔmɛni ɔsika ɔ́ɔti ukyuli ɔni ndubo-nwu kakya bɔkya. Anwuɔsu na ɔ́su ɔnini, “Bina ƒui bɛ́lɛ bɔkpi, amu ntu ukyuli unwi pɛ kani.” 12 Ka Yesu ɔ́ƒɔ-ma lɛgba ɔ́wɔlɔ ni, ɔ́sɔku nwuna awu ɔmmɔ ɔ́kya, na ɔ́sɔ únwini úsie útélie kalɔ. Amu na úye nwuna basiakune ɔnini, “Bínu lɛla lɛni na lɛ́bla mɛni kalɔ? 13 Bɛɛlɔ-mi bɛnii ala ɔtinane ku Blɔti, na ɔdi lɛni sɔsɔ. Ɔsika ukyuli ɔmmɔ na ndi. 14 Na ami ɔni ndi Blɔti ku ala ɔtinane ni, ami náƒɔ-mii lɛgba ɔƒɛni kani. Amii lɛnɔ lɛni na ɔdi ka bɛƒɔ bina bakpana lɛgba. 15 Lɛla lɛni na bɛnu bɛtɛya na bitaabla lɛnɔ ni, ani na lɛ́bla lɛ́tina-mii mɛni. 16 Mɔɔsu-mii geen ka ni, kabla ɔblane ɔdi biala uletulo nwuna unwoti. Lɛni kani na ukyuli ɔni bátala uletulo ukyuli ɔni nátala-nwu. 17 Ka bɛ́ti litemi geen lɛmɛni ɔƒaani ɔsu ni, lɛlɔ lɛdubɔyɔ-mii si bɛ́bla ala amɛni. 18 “Ɔɔɔdi bina ƒui litemi na ndaku bɔsu ɔƒaani. Ngyi bina akɔ bani na lɛ́ƒuna. Nsu ɔlɛka Bunweni Kedee Ɔku kemo etemila ebo-nwu kemo lɛni kalɛ na bénweni bése banini, 'Ukyuli ɔni nákya ku-mi kɔnu lɛkyami kemo na bɔ́di ni, anwu nénwini únye-mi lɛlɔ.' 19 “Na mɔɔsu-mii ɔmɛni lise asa ubo ubalɛ, kalɛ na si úbo úbalɛ lɛni sɔsɔ ni, na bɛti ka ami ndi Anwu ɔni nkya ɔ́si kalɔ kesekɔ. 20 Mɔɔsu-mii geen nnii ukyuli biala ɔni muugyingya enu taaƒɔ ukyuli ɔni na lɛ́tala ni, ami na ɔ́ƒɔ. Na ukyuli ɔni megyingya enu na waƒɔ-mi ni, anwu ɔni nátala-mi lɛnɔ na ɔ́ƒɔ.” 21 Uwi ɔni na Yesu ɔ́su ɔmɛni ɔ́wɔlɔ ni, kayi kékpoku-nwu geen. Amu na ɔ́su-ma nwaa ɔnini, “Mɔɔsu-mii geen ka bina akɔ unwi ɔdubɔkya-mi kakya.” 22 Mmɔ ni, Yesu basiakune bammɔ bénwini bánu lɛlɔ anumi na béƒu, ɔsika baaagyi ukyuli ɔni na Yesu ɔda. 23 Na batɛyane bammɔ akɔ unwi ɔni na Yesu ɔɔyɔ́ ni, úlie ude Yesu. 24 Ɔmmɔ ɔsu Simon Petro ɔ́su ɔtɛyane ɔmmɔ kabɛsɛ kemo ɔnini, “Ye-nwu ukyuli ɔni na ɔda.” 25 Anwuɔsu anwu lɛnɔ ɔ́bu úsie Yesu kudɔ na úye-nwu ɔnini, “Blɔti, ɔma na ɔdi?” 26 Amu na Yesu údie kenye ɔnini, “Ukyuli ɔni na ndubuti bodobodo ɔdi litu kutu lite ni, anwu na ɔdi.” Anwuɔsu Yesu ɔ́bwɛ bodobodo blii ɔdi útu kutu na úti úte Yuda ɔni ndi Simon Iskariot ubidi. 27 Na ɔni kani na Yuda ɔ́ƒɔ bodobodo ɔmmɔ ni, mmɔ kani na Satan ɔ́ƒɔ-nwu lɛlɔ kemo ƒui. Amu na Yesu ɔ́su-nwu ɔnini, “Babla ku lɛla lɛni na aayɔ́ ka abla.” 28 Nsu bakladi bani nlie kadikɔ mmɔ bétenu kalɔ lɛla lɛni ɔsu na Yesu ɔ́su Yuda lɛni. 29 Na ka Yuda ɔmɛni nda bana kavumi ɔsu ni, batɛyane bammɔ badi bákali ka bɔsu na Yesu ɔ́ɔsu-nwu ɔnii utéye ala ani na badubuti badi limeyi uboku iye utéte bawabane ala adi. 30 Amu ka Yuda ɔ́ƒɔ bodobodo ɔmmɔ ni, ɔ́vi ɔ́lɛ kɔnakunwi. Na kadi káasa uwi ɔmmɔ. 31 Uwi ɔni na Yuda ɔ́tɔlɔ kama ni, Yesu ɔ́su-ma ɔnini, “Ɔƒɛni na Katɔti ɔdubɔkɔliku Ukyuli Ɔyawine Ubi lɛnyi katɔ. Na ɔkɛnku Ubidi ɔmmɔ lɛnɔ lɛlɔ ni, bekyuli badubɔkɔliku Ɔti ɔmmɔ lɛnyi katɔ. 32 Na si ɔkɛnku Ubi lɛlɔ na bekyuli bákɔliku Ɔti lɛnyi katɔ ni, Katɔti lɛnɔ ɔdubɔya na bekyuli bakɔliku Ubi ɔmmɔ katɔ na nwuna anumi. Na ɔdubɔya na babla lɛni kɔnakunwi. 33 “Mina bebi, uwi blii ɔdi kani nébu na lɛkya-mii kudɔ. Bɛdubo-mi bɔwia, nsu mɔɔsu-mii lɛla lɛni na lɛ́su Yudaƒuɔ benengu nnii, 'Kesii kani na lísela ni, bilakana mmɔ bubo.' 34 “Na ɔƒɛni ni, muubó-mii ɔda ɔwɔdi. Bɛyɔ lɛlɔ! Na kalɛ na ami lɛ́yɔ-mii ni, lɛni kani na ɔlɛka amii lɛnɔ bɛyɔ lɛlɔ. 35 Na si bɛɛyɔ́ lɛlɔ lɛni ni, ukyuli biala ɔdubɔnu ɔti ka mina batɛyane na bɛdi.” 36 Mmɔ na Simon Petro úye-nwu ɔnini, “Blɔti, wɛ na ésela?” Amu na Yesu údie kenye ɔnini, “Kesii kani na lísela ni, alakana-mi bɔsiaku ɔƒaani. Nsu nwuna kama ni, adubɔsia-mi kama ebo mmɔ.” 37 Amu na Petro úye-nwu ɔnini, “Blɔti, bi ɔsu na naaakana-a bɔsiaku ɔƒaani? Nnye kagyumana ka likpi na ƒula lili!” 38 Mmɔ ni, Yesu údie kenye ɔnini, “Aaƒɔ́ taadi geen ka enye kagyumana ka ekpi na mina lili? Mɔɔsu-ɔ litemi geen nnii asa na akɔkɔ wete kenye ni, adubɔsu kɔtɛ sɔɔn anii aaagyi-mi.”

14

1 Amu na Yesu ɔ́su-ma ɔnini, “Bɛda kayi kemo bukpoku bɛya. Kalɛ kani na bɛɛƒɔ́ Katɔti taadi ni, bɛƒɔ ami lɛnɔ bɛdi. 2 Kuduokɔ pii kɔkya mina Ɔti kesii. Na lísela ntáklibi kuduokɔ kɔmmɔ lise-mii. Na si buse na uuuse lɛni ni, nka naaasu ɔmɛni. 3 Anwuɔsu si lísie ńtáklibi-ku lɛ́wɔlɔ ni, ndubɔsɔ linwini libo na mbakpanku-mii ntésie mina kudɔ na amii lɛnɔ bilie mmɔ. 4 Bɛgyi ulu ɔni lɛlɔ na baasia teesie kesii kani na lísela.” 5 Amu na Toma ɔ́su-nwu ɔnini, “Blɔti, bɔɔɔgyi kesii kani na ésela. Anwuɔsu bulati ulu ɔni lɛlɔ na bɔdubɔsia asa na bubo-ɔ kudɔ.” 6 Amu na Yesu údie kenye ɔnini, “Ami ndi ulu ɔmmɔ ku litemi geen lɛmmɔ ku ngba bɔmmɔ. Na ɔdi ulakana Katɔti kudɔ buduo, amu ntu mina lɛlɔ na ɔ́sia. 7 Na si bɛgyi-mi sɔsɔ ni, bɛdubɔti mina Ɔti lɛnɔ. Anwuɔsu ɔƒɛni ni, bɛgyi Katɔti ɔmmɔ na bɛ́ɛnu-nwu lɛnɔ.” 8 Amu na Ƒilipo ɔ́su Yesu ɔnini, “Blɔti, lɛla lɛni kani na bɔɔwia ndi ka edie Ƒ^ɔti ɔmmɔ atina-bu.” 9 Mmɔ na Yesu údie kenye na úye-nwu ɔnini, “Ɔ́si uwi gyɔlɔɔ ɔni ƒui na lɛ́ɛkya-mii kudɔ mɛni ni, bɔsu na amua ada anii aaagyi-mi? Ƒilipo, ukyuli ɔni náanu-mi dii ni, ɔ́ɔnu Ati lɛnɔ. Na bi ɔsu na asɔ aasu-mi anii, 'Tina-bu Ati ɔmmɔ'? 10 Átaƒɔ átadi ka ami nliku Katɔti, na anwu lɛnɔ uliku-mi? Ala ani ƒui na lɛ́su-mii ni, aaadi ami ɔlati etemila kani na adi. Mmomu adi Katɔti ɔni nliku-mi na ɔɔbla nwuna kabla ɔdi. 11 Bɛƒɔ-mi bɛdi si lɛ́su-mii nnii ami nliku Katɔti, na anwu lɛnɔ uliku-mi. Si alakana ɔmɛni bɔbla ni, ɔlɛka bɛƒɔ mina ala ani na mɔɔbla lɛti bɛdi. 12 Mɔɔsu-mii geen nnii ukyuli biala ɔni mɔɔƒɔ́-mi taadi ni, ɔdubɔbla ala ani na mɔɔbla. Na ɔdubɔbla-nya utulo kalɛ na lɛ́bla. Ɔsika bɔtɔlɔ nda nteesie mina Ɔti kudɔ. 13 Na lɛla biala na bivele si bɛ́kpali-mi lɛnyi ni, ndubɔbla-ni lite-mii. Ɔmɛni ndubɔya na ɔkɛnku-mi lɛlɔ ni, bekyuli badubɔkɔliku mina Ɔti lɛnyi katɔ. 14 Bɛkpali-mi lɛnyi bivele lɛla biala, na ndubɔbla-ni lite-mii. 15 “Si bɛɛyɔ́-mi ni, bɛdubɔdi mina ɔda bubo lɛlɔ. 16 Na ndubuvele mina Ɔti na ute-mii Ubunkune ɔbambadi ɔni ndubuli-mii kudɔ uwi ƒui. 17 Anwu ndi Kɔyu kɔni muudie litemi geen lɛni ndanku Katɔti lɛlɔ taatina. Nsu kayawi bekyuli balakana enu bugyingya bɔƒɔ-nwu. Ɔsika balanu-nwu balati. Nsu amii ni, Kɔyu kɔmmɔ kuliku-mii na kɔdubɔƒɔ-mii lɛlɔ kemo ƒui. 18 Si lɛ́tɔlɔ-mii kudɔ ni, naaada-mii neeese aani bekpinebi. Mmomu ndubɔsɔ linwini libo-mii kudɔ. 19 Kébu blii na kayawi bekyuli basɔ balanu-mi. Nsu amii bɛdubo-mi bɔnu. Na ka nli ngba ɔsu ni, amii lɛnɔ bɛdubulie ngba. 20 Si limeyi lɛmmɔ lídu ni, bɛdubɔti ka ami nliku mina Ɔti, na amii biliku-mi aani kalɛ na ami lɛnɔ nliku-mii. 21 “Ukyuli biala ɔni mɔɔdi mina ɔda bubo lɛlɔ ni, anwu mɔɔyɔ́-mi. Na mina Ɔti ɔdubɔyɔ ukyuli ɔni mɔɔyɔ́-mi. Na ami lɛnɔ ndubɔyɔ-nwu na lidie lɛlɔ lɛtina-nwu na ɔnu-mi.” 22 Amu na Yuda ɔni naaadi Iskariot ubidi ɔmmɔ úye Yesu ɔnini, “Blɔti, dɛ na ɔdubɔbla na abu kani na adubudie lɛlɔ atina, na bayawine balanu-ɔ?” 23 Mmɔ na Yesu údie kenye ɔnini, “Ukyuli biala ɔni mɔɔyɔ́-mi ni, ɔdubɔdi mina ala ani mɔɔtina lɛlɔ. Na mina Ɔti ɔdubɔyɔ-nwu. Na ami ku mina Ɔti bɔdububo-nwu kudɔ na abu ku-nwu bɔsɔ bulie. 24 Na ukyuli ɔni naaayɔ-mi ni, uladi mina ala ani mɔɔtina lɛlɔ. Na ala ani bínu ka lɛ́su mɛni ni, ɔɔɔdi ami ɔlati kani náta mɔɔsu-nya. Mmomu mina Ɔti ɔni nátala-mi kudɔ na ási. 25 “Ala amɛni ƒui na lɛ́ɛsu-mii uwi ɔni na nkya-mii kudɔ. 26 Katɔti Kɔyu kɔni ndi Ubunkune ɔni na Katɔti ɔdubɔtala ɔkya-mii na mina lɛnyi kemo ni, anwu ndubɔtina-mii lɛla biala. Na ɔdubɔya na binyimo ala ani ƒui na lɛ́su-mii. 27 “Keyi buɛɛ na lɛ́da muusé-mii. Na mina keyi buɛɛ na líti muute-mii. Ɔɔɔdi aani kalɛ na bayawine beete ukyuli keyi buɛɛ kalɛ. Kayi ku kasusu ketekpoku-mii na ala ani ndubo bɔlɛ lɛlɔ. Na bitayia. 28 Bínu ka lɛ́su-mii nnii, 'Bɔtɔlɔ nda bina kudɔ, na ndubɔsɔ linwini libo-mii kudɔ.' Si bɛgyi ka bɛɛyɔ́-mi geen ni, kubiti kɔdubɔda-mii ka lísela Ati kudɔ. Ɔsika anwu utulo-mi. 29 Na lɛ́ɛsu-mii ɔmɛni líse asa na ala ammɔ ebo abalɛ kalɛ na si uwi ɔni na álɛ sɔsɔ ni, na bɛƒɔ bɛdi. 30 Nsɔ naaakana-mii bɔtɛmiku gyɔlɔɔ. Ɔsika ukyuli ɔni mɔɔdi kayawi kamɛni lɛlɔ ni, ɔ́si ɔdubo. Na uuubo ɔyikun ɔdi na mina lɛlɔ. 31 Nsu ɔlɛka bayawine bati ka mɔɔyɔ́ Ati, na mɔɔbla lɛla biala kalɛ kani na úbo-mii ɔda. “Amu bibo, na bɔgyu.”

15

1 Ami ndi kɔdingyii kɔbuni, na mina Ɔti ndi kugyii kɔmɛni lɛlɔ ɔnune. 2 Ɔɔmɛnɛ kagba biala kani naaakana bɔnwu teedie kɔgba kɔkladi akɔ. Na ɔɔƒiala kɔgba kɔni mɔɔnwu lɛnɔ kemo kalɛ na kuna akɔ kɔbla nwaa na kɔkana kutaanwu kaduɛ. 3 Lɛni kani na lɛ́ya na amii lɛnɔ bɛ́bla sɛɛn ɔkɛnku ala ani na lɛ́su-mii ɔsu. 4 Bɛsɔ biliku-mi, na ami lɛnɔ ndubuliku-mii. Kugyii kagba kadi kalatɛ sɛsɛɛ taanwu ebi aka lɛti. Ɔlɛka kada kugyii kɔmmɔ lɛlɔ. Lɛni kani na amii lɛnɔ bilakana ebi adi bɔnwu, amu ntu bɛsɔ biliku-mi. 5 “Ami ndi kɔdingyii kɔmmɔ, na amii ndi kuna kɔgba. Ukyuli ɔni nliku-mi na ami lɛnɔ nliku-nwu ni, ɔɔnwu ebi pii. Ɔsika bilakana lɛla lɛdi bɔbla si liiibo-mii kemo. 6 Ukyuli biala ɔni neeeliku-mi ni, use aani kugyii kagba kani békulo bávaakun na kákwi. Na kɔgba kɔmmɔ udu ni, bɔsala na baasála-ku taakya ogya na kɔkywi. 7 Si biliku-mi na mina etemila ákɛ keliekɔ na bina lɛlɔ kemo ni, bivele lɛla biala na bɛɛwia, na ndubute-mii. 8 Na si bɛ́nwu ebi pii ni, ɔmɛni ɔɔyá na bekyuli baakɔliku mina Ɔti lɛnyi katɔ. Na ɔmmɔ ɔɔtina lɛnɔ ka bɛdi mina batɛyane. 9 Mɔɔyɔ́-mii kalɛ kani na mina Ɔti ɔɔyɔ́-mi. Anwuɔsu bɛsɔ biliku-mii na ntaayɔ-mii uwi biala. 10 Si bɛɛdi mina ɔda bubo lɛlɔ ni, bɛdubulieku-mi na ndubɔyɔ-mii uwi ƒui. Lɛni kani na lɛ́di mina Ɔti ɔda bubo lɛlɔ na nliku-nwu, na ɔɔyɔ́-mi uwi ƒui. 11 “Lɛ́ɛsu-mii ala amɛni ƒui kalɛ na ebiti ani na mɔɔkɛ́ ni, amii lɛnɔ bɛkɛ-nya na edu awɔlɔ. 12 Na ɔda ɔni na líbo-mii ndi ɔmɛni. Bɛyɔ lɛlɔ aani kalɛ kani na ńtaayɔ-mii. 13 Na bɔyɔ bunengudi bɔni kani na ukyuli ɔdubɔkana na ɔyɔ nwuna bakpana ndi ka uti nwuna ngba ute na bana lili. 14 Na amii ndi mina bakpana si bɛɛdi mina ɔda ɔni na líbo-mii lɛlɔ. 15 Nsɔ naaalɔ-mii mina kabla bablane ɔƒɛni, ɔsika ukyuli ɔni mɔɔbla ukyuli bamba kabla ni, ɔɔɔgyi lɛla lɛni na nwuna unwoti ɔɔbla. Mmomu mɔɔlɔ-mii nnii bakpana. Ɔsika lɛla biala na línu lɛ́siku mina Ɔti kudɔ ni, ani na lɛ́su-mii. 16 Ɔɔɔdi amii náƒuna-mi. Mmomu ami náƒuna-mii. Na lɛ́ƒuna-mii lise ka bisie bitátaabla kabla kabuni kani ndi ebi pii ani na bɛdubɔnwu. Na abla ebi ani ndubutu uwi na elebie. Ɔmɛni ɔsu ni, Katɔti ɔdubute-mii lɛla biala na bivele-nwu si bɛ́kpali-mi lɛnyi. 17 Anwuɔsu ɔda ɔni muubo-mi ndi ɔmɛni. Bɛyɔ lɛlɔ. 18 “Si kayawi bekyuli beekisi-mii ni, bɛti kɔnakunwi ka ami na báka bukisi lɛni. 19 Si bɛ́bla unwi ku kayawi bekyuli na bana ablala kemo ni, badubɔyɔ-mii aani bana badi. Nsu ami lɛ́ƒuna-mii lɛ́lɛku kayawi bekyuli bammɔ akɔ, na bɛsɔ bɛɛɛdi bana badi. Ɔmmɔ ɔsu na beekisi-mii. 20 Binyimo ka lɛ́su-mii nnii, 'Ukyuli ɔni mɔɔbla ukyuli bamba kabla ni, uletulo nwuna unwoti.' Si bekyuli békpoku-mi ni, bɛti ka badubo amii lɛnɔ bukpoku. Si bádi ala ani na lɛ́tina-ma lɛlɔ ni, badubɔdi amii adi lɛnɔ lɛlɔ. 21 Nsu kayawi bekyuli badubo-mii bukpoku, ɔsika binye na mina lɛnyi kemo. Na baaagyi anwu ɔni nátala-mi lɛnɔ. 22 Si bubo na ńtebo ńtabasu-ma lɛla lɛdi ni, nka ukyuli ɔdi uládu-ma kɔtɔ ka bábla likpidi lɛdi. Nsu ɔƒɛni ni, basɔ balakana bɔsu banii bátati asa na bábla likpidi. 23 Na ukyuli biala ɔni muukisi-mi ni, uukisi mina Ɔti lɛnɔ. 24 Na si bubo na ńtebo ńtababla ala ani udu na ɔdi útabla kudii na bana akɔ ni, nka ukyuli ɔdi uládu-ma kɔtɔ ka bábla likpidi lɛdi. Nsu ɔƒɛni ni, bánu ala ani na lɛ́bla, nsu beekisi ami ku mina Ɔti. 25 Na ala amɛni ƒui ni, ɔlɛka ebo-nwu kemo lɛni kalɛ kani na bénweni bése na Bunweni Kedee Ɔku kemo banini, 'Beekisi-mi keeke.' 26 “Katɔti Kɔyu kɔni ndi Ubunkune ɔ́si Katɔti kudɔ ɔdubo. Na anwu muudie litemi geen lɛni ndanku Katɔti lɛlɔ taatina. Ami ndubɔtala-nwu lɛsiku Katɔti kudɔ lɛkya-mii. Na ɔdubɔsu-mii ala ɔsiku-mi lɛlɔ. 27 Na amii lɛnɔ bɛsu bekyuli ala bɛsiku-mi lɛlɔ, ɔsika bɛ́ɛsiaku-mi kama ɔ́si kalɔ kesekɔ ƒui.”

16

1 “Lɛ́ɛsu-mii ɔmɛni kalɛ na enu alaƒɛ-mii na bina bɔƒɔtaadi kemo. 2 Badubo-mii bɔgya bɔlɛku Yudaƒuɔ kasalakɔ. Na uwi ɔdi lɛnɔ ɔdubo ubedu ɔni na bekyuli badubɔdu-mii. Na bani ndubɔbla lɛni ni, badubɔkali banii Katɔti kabla na baabla. 3 Bekyuli badubo-mii ɔmɛni bɔbla, ɔsika baaagyi ami iye Katɔti. 4 Mmomu lɛ́su-mii ɔmɛni kalɛ na si uwi ɔni na bábla ala amɛni údu ni, na binyimo lɛla lɛni na lɛ́su-mii. “Ńtasu-mii ala amɛni ńtasiku kalɔ kesekɔ, ɔsika nkya-mii kudɔ uwi ɔmmɔ. 5 Nsu ɔƒaani ni, bɔtɔlɔ na nda. Lísela mina Ɔti ɔni nátala-mi kudɔ. Nsu bina ɔdi úteye-mi ɔnii, 'Wɛ na ésela?' 6 Na ka lɛ́ɛya na bɛ́ti ɔmɛni ɔsu ni, bina lɛlɔ lɛ́bla-mii kɔnyana. 7 Nsu mɔɔsu-mii geen ka ni, si lɛ́tɔlɔ-mii kudɔ ni, ɔdia-mii utulo. Ɔsika si ńtatɔlɔ ni, Ubunkune ɔmmɔ ulebo-mii kudɔ. Nsu si lɛ́tɔlɔ ni, ndubɔtala-nwu lɛkya-mii. 8 Na si úbo ni, ɔdubo ubedie ɔtina kayawi bekyuli ƒui nwaa ka baabla likpidi, na baaasiaku ulu siin ɔmmɔ lɛlɔ, na benye Katɔti anumi kalɛ na ɔtɛku-ma litemi. 9 Na badubɔnu ka baabla likpidi, ɔsika bátaƒɔ-mi bátadi. 10 Na badubɔnu ka baaasiaku ulu siin ɔmmɔ lɛlɔ, ɔsika lísela mina Ɔti kudɔ na bɛsɔ bɛɛɛdubo-mi bɔnu. 11 Na badubɔnu ka Katɔti ɔɔtɛku bekyuli litemi, ɔsika Katɔti ɔ́ɔtɛku ukyuli ɔni mɔɔdi kayawi kamɛni lɛlɔ litemi kukuuku na ɔ́ɔdu-nwu kɔtɔ. 12 “Mbo ala pii na lɛsu-mii. Nsu adubo bumomo butulo-mii ɔƒɛni. 13 Nsu si uwi ɔni na Katɔti Kɔyu kɔni muudie litemi geen lɛni ndanku Katɔti lɛlɔ mmɔ úbo ni, ɔdubo-mii bɔtɔnku kalɛ na bɛnu litemi geen lɛmmɔ ƒui bɛti. Na ulatɛmi na anwu ɔlati ɔyikun kemo. Mmomu lɛla lɛni na únu ni, ɔdubo-mii bɔsu na ɔsu-mii ala ani ndubo bɔlɛ. 14 Ɔdubɔya na bekyuli bakɔliku-mi lɛnyi katɔ, ɔsika lɛla lɛni na masu-nwu ni, ani na ɔdubuti ubasu-mii. 15 Ala ani ƒui nse Katɔti ni, adi ami adi. Anwuɔsu na lɛ́su nnii ala ani nse-mi ni, Katɔti Kɔyu kɔdubuti-nya ɔtina-mii. 16 “Kébu uwi blii ɔdi na bɛsɔ bilanu-mi. Na ɔmmɔ kama blii lɛnɔ ni, bɛdubɔsɔ bɛnu-mi.” 17 Amu na nwuna batɛyane badi béye lɛlɔ banini, “Lɛla lɛni na ɔɔsu kalɔ ndi bi? Ɔnii kébu uwi blii ɔdi na bɔsɔ bulanu-nwu. Na ɔmani kama blii lɛnɔ bɔdubɔsɔ bɔnu-nwu? Na ɔ́sɔ ɔ́su-bu lɛnɔ ɔnii, 'Ɔsika lísela mina Ɔti kudɔ.' 18 Lɛla lɛni na ɔ́su ɔnii kébu uwi blii kalɔ ndi bi? Bɔɔɔgyi lɛla lɛni lɛlɔ na ɔɔtɛmi taasiku!” 19 Yesu ɔ́ti ka nwuna batɛyane bammɔ baayɔ́ beye-nwu lɛla lɛdi basiaku ɔmɛni lɛlɔ. Anwuɔsu na úye-ma ɔnini, “Lɛ́su nnii kébu uwi blii ɔdi na bɛsɔ bilanu-mi. Na ɔmmɔ kama blii lɛnɔ na bɛdubɔsɔ bɛnu-mi. Ɔmɛni lɛlɔ litemi na biiye lɛlɔ teenu? 20 Mɔɔsu-mii geen nnii bɛdubo kɔnyana buwulo na biwulo keku. Nsu kayawi bekyuli badubo ebiti bɔkɛ mmomu. Na amii ni, bɛdubɔbla kɔnyana, nsu bina kɔnyana kɔdubunwini lɛlɔyɔ. 21 Si uleku ɔɔyɔ́ ɔwɔ ni, ubo kɔnyana, ɔsika uwi ɔni na uubo abi údu. Nsu si uwi ɔni na ɔ́wɔ ubi ɔmmɔ ɔ́wɔlɔ ni, ɔɔyiƒla abi ani na úbo. Ɔsika ɔɔkɛ́ ebiti ka ɔ́wɔ ubi ɔ́kya kayawi. 22 Lɛni geen na use ute amii lɛnɔ. Ɔƒaani ni, bina lɛlɔ libo kɔnyana. Nsu ndubɔsɔ mbanu-mii. Na mmɔ ni, lɛlɔyɔ lɛdubɔƒɔ-mii kayi kemo ƒui. Lɛlɔyɔ lɛmɛni udu na ukyuli ɔdi biala ulakana bɔƒɔ bɔsiku-mii kudɔ kudii! 23 “Si uwi ɔni na limeyi lɛmmɔ líbo líbedu ni, bileye-mi lɛla lɛdi. Ɔsika mɔɔsu-mii geen ka lɛla biala na bɛdubɔkpali-mi lɛnyi bivele mina Ɔti ni, ɔdubute-mii. 24 Úti úbedu uwi ɔmɛni kemo ni, bítakpali-mi lɛnyi bítevele tɔ Katɔti lɛla lɛdi. Bivele-nwu na ɔdubute-mii, na bina ebiti adubudu awɔlɔ. 25 “Agba kemo sɔɔn na lɛ́su-mii ala amɛni ƒui. Nsu uwi ɔdubo ɔni na nsɔ lɛɛɛdubo agba bubo. Mmomu ndubo-mii bɔtɛmiku nwaa bɔsiku mina Ɔti lɛlɔ. 26 Na si limeyi lɛmmɔ lídu ni, bɛdubo-mi lɛnyi bɔkpali bivele-nwu ala. Naaasu nnii ami ndubo-nwu ala buvele bute-mii. 27 Ɔsika Ati ɔlati ɔɔyɔ́-mii. Ɔɔyɔ́-mii ɔsika amii lɛnɔ bɛɛyɔ́-mi, na bɛ́ƒɔ bɛ́di ka Katɔti kudɔ na lɛ́si líbo. 28 Sɔsɔ na ɔdi ka Ati kudɔ na lɛ́si líbo kayawi. Na ɔƒɛni mɔɔtɔlɔ kayawi kamɛni kemo nteesie Ati kudɔ.” 29 Mmɔ na Yesu batɛyane bammɔ básu-nwu banini, “Ɔƒɛni na aatɛmi nwaa, na asɔ elebo lɛgba. 30 Na ɔƒɛni na bɔ́ti ka agyi lɛla biala, na ɔ́sɔ útalɛka ukyuli ɔdi uye-ɔ litemi lɛdi. Ɔmɛni lɛti pɛ ɔ́ya na bɔ́ti ka Katɔti kudɔ na ási ébo.” 31 Amu na Yesu úye-ma ɔnini, “Bɛ́ƒɔ bɛ́di ɔƒɛni kani? 32 Uwi ɔdubo, na úudu lɛnɔ ɔni na bɛdubo bugyingya bɛtɔlɔ-mi kudɔ, na ɔdi biala uteesie nwuna kaduli na bɛda ami lɛti binyene. Nsu geen ni, ɔɔɔdi ami lɛti nnye. Ɔsika mina Ɔti unye-mi kudɔ. 33 Ala amɛni na lɛ́su-mii kalɛ na kayi kasɔ kelékpoku-mii si biliku-mi. Kayawi bekyuli badubo bɔya na bibo abi. Nsu binye kpakplaa! Ɔsika lɛ́ɛdi kayawi kamɛni lɛbibo biala lɛlɔ.”

17

1 Ka Yesu ɔ́su-ma ala amɛni ɔ́wɔlɔ ni, ɔ́kɔliku anumi ɔ́nu katɔ na ɔ́su ɔnini, “Ati, uwi ɔmmɔ údu. Kɔliku ami ƒ^ubidi katɔ kalɛ na ami lɛnɔ lɛ́kɔliku ƒula lɛnyi katɔ. 2 Ɔsika éti ɔyikun unengudi éte-mi na kayawi bekyuli ƒui akɔ kalɛ na lɛya na bani ƒui na éti éte-mi ni, belie ngba bɔni nsɔ naaadubo bɔsa kudii. 3 Na ngba bɔni nsɔ naaadubo bɔsa kudii mɛni kalɔ ndi ka bekyuli bamɛni bati awɔ, na bati ka awɔ lɛti pɛ ndi Katɔti geen ɔmmɔ, na bati ami Yesu Kristo ɔni na átala. 4 Lɛ́kɔliku ƒula lɛnyi katɔ na bekyuli akɔ na kalɔ lɛlɔ. Na lɛ́wɔlɔ kabla kani na éte-mi ka mbabla. 5 Ɔƒɛni ni, Ati, sɔ kɔliku mina lɛnyi katɔ na ƒula anumi aani kalɛ na nse ɔni na lɛ́kya-a kudɔ asa na édie kayawi. 6 “Lɛ́ɛya na bekyuli bani na áƒuna álɛku kayawi bekyuli akɔ éte-mi báti-ɔ. Awɔ ɔdi na badi, na éti-ma éte-mi. Bádi ƒula etemila ƒui lɛlɔ. 7 Na bagyi ɔƒɛni ka lɛla biala na éte-mi ni, ƒula kudɔ na lɛ́si. 8 Kenye kani na ásu-mi ka mabasu-ma ni, bégyingya enu báƒɔ-ka. Na bagyi ka sɔsɔ na ɔdi ka ƒula kudɔ na lɛ́si, na awɔ nátala-mi. 9 Mɔɔkpali katɔ na bana lili, na ɔɔɔdi kayawi bekyuli ƒui lili. Mmomu ɔdi bani na éti éte-mi lili, ɔsika awɔ ɔdi na badi. 10 “Bani ƒui na mbo ni, awɔ badi na badi. Na bani ƒui na ebo ni, ami badi na badi. Na bekyuli baakɔliku-mi lɛnyi katɔ ɔkɛnku ama ɔsu. 11 Na ɔƒɛni ni, lɛ́tɔlɔ ndubo-ɔ kudɔ. Na nsɔ lɛɛɛkya kayawi kamɛni kemo. Nsu ama bamua bakya kayawi. Ati Kedee, gyumana-ma ɔkɛnku ɔyikun ala ani mɔɔlɛ́ si bákpali-ɔ lɛnyi. Na lɛnyi lɛmmɔ kani na éti éte-mi. Ɔmɛni ndubɔya na babla unwi aani kalɛ na ami ku awɔ bɔdi benwi. 12 Uwi ɔni na nkya-ma kudɔ ni, lɛ́da-ma kɔkɔɔkɔ na lɛgyumana-ma ɔkɛnku ɔyikun ɔni nkya lɛnyi lɛni na éte-mi kemo. Ńtayila bana akɔ ɔdi, amu ntu anwu ɔni muusié na ayila-nwu udu. Ɔmɛni ndubɔya na Bunweni Kedee Ɔku kemo etemila ebo-nwu kemo kalɛ na básu. 13 “Na ɔƒaani ni, lɛ́tɔlɔ ndubo-ɔ kudɔ na muuvele-ɔ ɔmɛni lite-ma na kayawi kalɛ na mina ebiti aƒɔ-ma kayi kemo ƒui na edu awɔlɔ. 14 Líboku-ma ƒula linyesia na kayawi bekyuli békisi-ma, ɔsika ɔɔɔdi kayawi kamɛni ɔdi na badi kalɛ kani na ami lɛnɔ lɛɛɛdi kayawi kamɛni ɔdi. 15 “Na ɔɔɔdi buvele na nda-a nnii da-ma die kayawi kamɛni kemo. Mmomu buvele na nda-a ka agyumana-ma alɛku ukisine ɔmmɔ enu kemo. 16 Kalɛ kani na lɛɛɛdi kayawi kamɛni ɔdi ni, lɛni kani na ama lɛnɔ baaadi kayawi kamɛni badi. 17 Bla-ma kedee te ƒula lɛlɔ ɔkɛnku ƒula etemila geen ani na bénu lɛlɔ. Ɔsika ƒula litemi lɛdi litemi geen. 18 Lɛ́tala-ma mɔɔkya kayawi bekyuli aani kalɛ kani na átala-mi ákya kayawi bekyuli. 19 Na ama ɔsu ni, lɛ́bla lɛlɔ kedee lite-ɔ kalɛ na akana abla ama lɛnɔ kedee. 20 “Ɔɔɔdi ama lɛti lili na mɔɔkpali-ɔ teevele lɛla lɛdi. Mmomu ku bekyuli bani ƒui ndubɔƒɔ-mi badi ɔkɛnku ƒula litemi buni lɛni badubɔsu-ma kemo lili lɛnɔ na muuvele. 21 Ati, muuvele ka aya na bana ƒui babla unwi aani kalɛ kani na awɔ eliku-mi na ami lɛnɔ nliku-ɔ. Ya na belieku-bu kalɛ na kayawi bekyuli baƒɔ badi ka awɔ nátala-mi. 22 “Líte-ma lɛnyi buni lɛni na éte-mi kalɛ na bana ƒui babla unwi kalɛ kani na ami ku-ɔ bɔdi unwi. 23 Ami nliku-ma, na awɔ eliku-mi. Ya na babla unwi bawɔlɔ kalɛ na kayawi bekyuli banu bati ka awɔ nátala-mi, na aayɔ́-ma kalɛ kani na aayɔ́-mi. 24 “Ati, awɔ néti-ma éte-mi. Na mɔɔwia ka belie-mi kudɔ na kesii kani na nkya kalɛ na banu kalɛ na ákɔliku-mi lɛnyi katɔ. Ɔmɛni ndi lɛnyi lɛni na éte-mi. Ɔsika aayɔ́-mii kukuuku asa na édie kayawi ku kana lɛla biala. 25 “Ati, ese siin. Na kayawi bekyuli baaagyi-ɔ, nsu ami ngyi-ɔ. Na ƒula badi lɛnɔ bagyi ka awɔ nátala-mi. 26 Lídie-ɔ lɛ́tina-ma. Na ndubo butaabla lɛni kalɛ na bagyi ka aayɔ́-ma aani kalɛ na aayɔ́-mi, na bagyi ka nliku-ma.”

18

1 Ka Yesu ɔ́kpali katɔ lɛni ɔ́wɔlɔ ni, anwu ku nwuna batɛyane bátɔlɔ mmɔ. Na bávia Kedron Obonka bétédu inɔ egyii kemo kadi. Na Yesu ku nwuna batɛyane béduo kemo kammɔ kemo. 2 Na uwi ɔmmɔ kemo ni, kakya ɔkyane Yuda Iskariot ɔgyi likpo lɛmmɔ. Ɔsika mmɔ na Yesu ku nwuna batɛyane bátaayɔ bɔsa bɔsa. 3 Anwuɔsu Yuda lɛnɔ útiku Romaƒuɔ bekpone ku kakpakɔ bagyumanane bani na bakpane benengu ku Ƒarisiƒuɔ bátala. Bekyuli bamɛni bada lɛlɔ ku ekpola ku lɛsogya ku likpo. 4 Na ka Yesu ɔ́ti ala ani ndubo-nwu bɔlɛku ɔsu ni, ɔ́lɛ úbo anumi na úye-ma ɔnini, “Ɔma na bɛɛwia?” 5 Amu na bédie kenye banini, “Yesu Nasareni bɔɔwia.” Mmɔ ni, Yesu údie kenye ɔnini, “Bɛɛnu-mi mɛni.” Na kakya ɔkyane Yuda lɛnɔ unye-ma akɔ. 6 Na uwi ɔni na Yesu údie kenye ɔnini, “Bɛɛnu-mi mɛni” ni, bédi bésie kama na bébuli. 7 Amu na Yesu ɔ́sɔ úye-ma kunyɔdi ɔnini, “Ɔma na bɛɛwia?” Na ama lɛnɔ básɔ bédie kenye banini, “Yesu Nasareni.” 8 Amu na Yesu ɔ́su-ma ɔnini, “Lɛ́ɛsu-mii nnii bɛɛnu-mi mɛni.” Na Yesu ɔ́sɔ ɔ́su-ma ɔnini, “Si ami na bɛɛwia bɔdi ni, bɛya na bekyuli bakladi bamɛni batɔlɔ.” 9 Na Yesu ɔ́su ɔmɛni kalɛ na ala ani na ɔ́su úbavi ebo ete lɛni uwi ɔni na ɔ́su ɔnii, “Ati, bekyuli bani ƒui na éte-mi ni, ńtayila bana akɔ ɔdi.” 10 Na mmɔ ni, Simon Petro ɔda kewii kadi. Amu na ɔ́ni-ka ɔ́kpa livuo kemo, na ɔ́nwi ɔkpane unengudi kabla ɔblane kɔdianu kɔtu úkulo. Na kabla ɔblane ɔmmɔ baalɔ Malkus. 11 Nsu Yesu ɔ́su Petro ɔnini, “Sɔku ƒula kewii kya livuo kemo! Aakali anii lɛbibo ɔɔƒɛɛ ɔni na mina Ɔti úte-mi ɔnii nni ni, naaani-nwu?” 12 Ɔmmɔ kama ni, Romaƒuɔ bekpone ku bana ɔtɔnkune ku Yudaƒuɔ bagyumanane badi béƒie Yesu, na bényimi-nwu. 13 Na báka-nwu buti busienku Hana kudɔ. Na Hana ɔmɛni ɔdi Kaiaƒa ulekudi ɔti. Na Kaiaƒa ɔmɛni mɔɔbla ɔkpane unengudi kabla na lɛkwa lɛmmɔ kemo. 14 Na Kaiaƒa ndi anwu ɔni násu Yudaƒuɔ batɔnkune bammɔ ka ɔdia ka ukyuli unwi ukpi na kadi ƒui lili. 15 Simon Petro ku ɔtɛyane ɔbambadi básiaku Yesu kama. Na ɔtɛyane ɔbambadi ɔmmɔ ni, ɔkpane unengudi ɔmmɔ ɔgyi-nwu, anwuɔsu na ɔ́siaku Yesu na bétéduo ɔkpane unengudi ɔmmɔ kaduli. 16 Nsu uwi ɔmmɔ ni, Petro anwu ɔsɔ unye kayakun. Amu na ɔtɛyane ɔmmɔ ɔ́sɔ únwini úbo úbatɛmiku ulekubi ɔni nnye ɔba kenye mmɔ, na ɔ́ya na Petro lɛnɔ uduo kaduli kammɔ. 17 Mmɔ na ulekubi ɔmmɔ úye Petro ɔnini, “Ɔɔɔdi ɔnana ɔmmɔ batɛyane akɔ unwi na adi?” Amu na Petro údie kenye ɔnini, “Oowo, lɛɛɛdi bana akɔ ɔdi.” 18 Ɔƒɛni ni, ka kɔyɔ kɔɔda-ma ɔsu ni, kabla bablane bammɔ ku bagyumanane bammɔ básala ogya ɔdi na benye baawaa. Na Petro lɛnɔ ɔ́gyu úsie unye-ma kudɔ mmɔ ɔɔwaa ogya ɔmmɔ. 19 Uwi ɔmmɔ ni, ɔkpane unengudi ɔkya uuye Yesu ala taasiku nwuna basiakune ku ala ani na ɔɔtina lɛlɔ. 20 Amu na Yesu údie kenye ɔnini, “Lɛ́tina ukyuli biala ala na kadi ƒui anumi uwi biala kemo. Na ala ani na lɛ́tina mmɔ lɛnɔ ni, Yudaƒuɔ kɔsakɔ na lɛ́tina-nya na Yudaƒuɔ kakpakɔ uwi ɔni na bana ƒui bábasa. Na ńtasu lɛla lɛdi na bɔbɛ kemo. 21 Na bi ɔsu na eeye-mi lɛla lɛdi na ɔmɛni lɛlɔ? Ye bekyuli bani nénu-mi. Ama ngyi ala ani na lɛ́su-ma.” 22 Ka Yesu ɔ́su-nwu lɛla lɛmɛni ɔ́wɔlɔ ni, bagyumanane bammɔ akɔ unwi úbo-nwu kɔnu ɔtugya na úye Yesu ɔnini, “Ɔkpane Unengudi na eedie kenye lɛni?” 23 Amu na Yesu úye-nwu ɔnini, “Si lɛ́su lɛla lɛni naaadia ni, su ukyuli biala na mɛni lɛla lɛmmɔ. Na si ńtasu lɛla likpidi lɛdi bɔdi ni, bi ɔsu na ébo-mi kɔnu ɔtugya?” 24 Mmɔ na Hana úti Yesu ɔni na bámua bényimi bada úmene Ɔkpane Unengudi Kaiaƒa. 25 Uwi ɔmmɔ ni, Simon Petro ɔmua unye ogya kudɔ mmɔ ɔɔwaa ogya. Mmɔ na bekyuli bammɔ béye-nwu banini, “Ɔɔɔdi awɔ ndi ɔnana ɔmmɔ kama basiakune akɔ unwi iye?” Mmɔ ni, Petro ɔ́tuala ɔnini, “Oowo, lɛɛɛdi bana akɔ ɔdi!” 26 Amu na ɔkpane unengudi nwuna kabla ɔblane ɔdi ɔni na ɔnwani ndi okloƒu ɔni kɔtu na Petro ɔ́nwi ɔ́mami ni, úye Petro ɔnini, “Ɔɔɔdi awɔ na lɛ́nu na inɔ egyii kemo mmɔ ka enye-nwu kudɔ iye?” 27 Mɛni lɛnɔ ni, Petro ɔ́sɔ ɔtuala ɔnini, “Oowo!” Na mmɔ mmɔ ni, akɔkɔ úte kenye. 28 Amu na ɔtanta tutuutu ni, bákpanku Yesu básiku Kaiaƒa kudɔ mmɔ, na béti-nwu bésienku Romaƒuɔ aban unengudi kaduli. Nsu Yudaƒuɔ bammɔ béteduo mmɔ, ɔsika na bana ɔda bubo kenye ni, bátayɔ ka beduo mmɔ na ɔya bana lɛlɔ lise lɛlɔ ka badubo Kukpi Lili Bɔvia Limeyi bɔdi ɔsu. 29 Ɔmmɔ ɔsu Pilato ɔ́lɛ úbo-ma kudɔ na ɔba kenye mmɔ, na úye-ma ɔnini, “Likpidi lɛmani na ɔ́bla?” 30 Amu na bédie kenye banini, “Si ɔɔɔdi likpidi bonwu lɛdi na ɔ́bla ni, nka bulakpanku-nwu buleboku ƒula kudɔ.” 31 Anwuɔsu Pilato ɔ́su-ma ɔnini, “Amu na amii alati bitiku-nwu na bitátɛku-nwu litemi ɔkɛnku bina ɔda bubo lɛlɔ.” Mmɔ na Yudaƒuɔ bammɔ bédie kenye banini, “Roma aban útete-bu kuƒi ka abu alati bɔdu ukyuli kukpi kɔtɔ.” 32 Na ala amɛni álɛ lɛni kalɛ na litemi lɛni na Yesu ɔ́su ɔ́siku kukpi kɔni udu na ɔdubo bukpi lɛlɔ ubo ute lɛni sɔsɔ. 33 Amu na Pilato únwini útéduo kaduli mmɔ, na ɔ́lɔ Yesu na úye-nwu ɔnini, “Awɔ ndi Yudaƒuɔ Ɔga?” 34 Mmɔ ni, Yesu únwini na úye-nwu ɔnini, “Awɔ ɔlati muuye-mi kenye kamɛni, munuu bekyuli bamba násu-ɔ banii ye-mi nu?” 35 Amu na Pilato údie kenye ɔnini, “Aabu anii Yudani na ndi? Awɔ ɔlati ƒula kadi bekyuli ku bakpane benengu néti-ɔ abakya-mi kɔnu. Bi na ábla?” 36 Mmɔ na Yesu ɔ́su-nwu ɔnini, “Mina lɛga bɔdi bútasi kalɔ kamɛni lɛlɔ. Si banii kalɔ kamɛni lɛlɔ lɛga bɔdi na lɛdi ni, nka mina basiakune badubukpo bete-mi kalɛ na neeeduo Yudaƒuɔ benengu enu kemo. Nsu ni, ɔɔɔdi lɛni na use. Mina lɛga bɔdi lɛ́si kesii bamba.” 37 Ka ɔ́su-nwu lɛni ni, Pilato úye-nwu ɔnini, “Anwuɔsu ɔga na adi?” Amu na Yesu ɔ́su-nwu ɔnini, “Awɔ mɔɔsu ka ɔga na ndi. Na ɔmɛni ɔsu geen na báwɔ-mi. Na líbo kalɔ kamɛni lɛlɔ kalɛ na mbedie litemi geen lɛtina. Na ukyuli biala ɔni nkɛnku litemi geen lɛmmɔ ni, uunú lɛla lɛni na mɔɔsu.” 38 Mmɔ ni, Pilato úye-nwu ɔnini, “Bi ndi litemi geen?” Mmɔ kani na Pilato ɔ́sɔ únwini úsie keyi na Yudaƒuɔ bammɔ kudɔ na útásu-ma ɔnini, “Naaanu likpidi lɛni ɔsu na lɛdu ukyuli ɔmɛni kɔtɔ. 39 Nsu na bina ɔda bubo bɔni na bibo kenye ni, si údu Kukpi Lili Bɔvia Limeyi bɔdi uwi ni, uwi biala mɔɔnyonu batɔntɛne akɔ unwi. Anwuɔsu ni, bɛɛwia ka lɛnyonu Yudaƒuɔ Ɔga?” 40 Amu na bana ƒui báva básu banini, “Oowo! Ɔɔɔdi anwu, mmomu Baraba!” Na Baraba ɔmɛni ɔdi bekyuli ɔdune.

19

1 Anwuɔsu ni, Pilato ɔ́ya na bagyumanane béti kɔbuli kɔni na bélii básala na bébo Yesu kaduɛ. 2 Na bekpone bammɔ béti liyu kagba bédi kabwa na béti bébi-nwu lili. Na béti awu ugyiedi gyɔlɔɔ ɔdi aani ɔga kalɛ bákya-nwu. 3 Na beesié teebo-nwu kudɔ taabasu-nwu banini, “Yiidu! Yudaƒuɔ Ɔga ɔ́si ɔdubo o-o!” Na si básu-nwu lɛni ni, na bébo-nwu kɔnu ɔtugya. 4 Ɔmmɔ kama ni, Pilato ɔ́sɔ ɔ́lɛ úbo bekyuli lisu lɛmmɔ kudɔ úbasu-ma ɔnini, “Bɛnu! Ndubo-nwu bɔkpanku buboku bina anumi na mbatina-mi ka ńtanu likpidi lɛdi na nwuna lɛlɔ kalɛ na lɛdu-nwu kukpi kɔtɔ.” 5 Anwuɔsu Yesu ɔ́lɛ úbo keyi mmɔ, na liyu kabwa kammɔ kebi-nwu lili na ɔkya awu ugyiedi gyɔlɔɔ ɔmmɔ. Mmɔ ni, Pilato ɔ́su ɔnini, “Bɛnu! Ukyuli ɔmmɔ na ɔdi mɛni!” 6 Amu na uwi ɔni na bakpane benengu ku Yudaƒuɔ benengu bammɔ bánu-nwu ni, báva básu banini, “Kana-nwu mana ugyii lɛlɔ! Kana-nwu mana ugyii lɛlɔ!” Mmɔ ni, Pilato ɔ́su-ma ɔnini, “Amii biti-nwu na bitákana-nwu bɛmana ugyii lɛlɔ. Ami ńtanu likpidi lɛdi na nwuna lɛlɔ kalɛ na lɛdu-nwu kɔtɔ.” 7 Amu na bekyuli lisu lɛmmɔ básu banini, “Bubo ɔda bubo bɔni mɔɔtina ka ɔlɛka ukpi. Ɔsika ɔ́su ɔnii ɔdi Katɔti Ubidi.” 8 Uwi ɔni na Pilato únu-ma kenye kamɛni ni, liƒu lɛ́sɔ lɛ́da-nwu libu. 9 Ɔmmɔ ɔsu ni, ɔ́sɔ únwini útéduo kaduli mmɔ na úye Yesu ɔnini, “Wɛ na ási?” Nsu Yesu útedie kenye kadi. 10 Amu na Pilato úye-nwu ɔnini, “Eledie lɛla lɛdi kenye alasu-mi? Aaagyi ka mbo kenyekɔ na lɛnyonu-ɔ, na mbo kenyekɔ na lɛya na bakana-a bamana ugyii lɛlɔ?” 11 Mmɔ ni, Yesu údie kenye ɔnini, “Nka alákɛ ɔyikun ɔdi na mina lɛlɔ si ɔɔɔdi Katɔti néte-ɔ kuƒi kɔmmɔ. Anwuɔsu ukyuli ɔni néti-mi ɔ́kya-a kɔnu kemo ni, ɔ́bla likpidi útulo-ɔ.” 12 Ka Pilato únu lɛla lɛmɛni ni, ɔ́wia ulu ɔni lɛlɔ na ɔsia na ɔnyonu Yesu. Nsu bekyuli bammɔ bakya baava taasu banini, “Si ányonu-nwu ni, asɔ aaadi Ɔga Unengudi Kaesare kabla ɔblane! Na ukyuli biala ɔni meti lɛlɔ mabla ɔga ni, ɔ́ta únye Kaesare ɔmmɔ lɛlɔ!” 13 Ɔmmɔ ɔsu ka Pilato únu etemila amɛni ni, ɔ́kpanku Yesu ɔ́lɛku na útélie litemi bɔtɛ liboku lɛlɔ kesii kani baalɔ banii Atabi Kasalakɔ. Na Hebri lɛdi kemo banii Gabata. 14 Uwi ɔmmɔ ɔbla aani ɔƒiiwi. Na lɛdi limeyi lɛni kadi kegye ndi Kukpi Lili Bɔvia Limeyi lɛmmɔ. Na Pilato ɔ́su bekyuli bammɔ ɔnini, “Bɛɛnu bina Ɔga!” 15 Amu na báva básu banini, “Gyunku-nwu! Gyunku-nwu! Kana-nwu mana ugyii lɛlɔ!” Mmɔ na Pilato úye-ma ɔnini, “Bɔkana na nkana bina Ɔga mmana ugyii lɛlɔ?” Amu na bakpane benengu bammɔ básu-nwu banini, “Buuubo ɔga ɔdi buuutulo Romaƒuɔ Ɔga Unengudi Kaesare!” 16 Ka básu lɛni ni, Pilato úti Yesu úte-ma ɔnii batákana-nwu bamana ugyii lɛlɔ. 17 Anwuɔsu bekpone bammɔ bákpanku Yesu bátɔlɔku. Na báya na anwu ɔlati uti ugyii ɔni lɛlɔ na badubo-nwu bɔkana bɔmana mmɔ. Na báyu ulu bésie kesii kani baalɔ banii Opokuo kalɔ. Na Hebri lɛdi kemo ndi Golgota. 18 Mmɔ na bákana-nwu bámana ugyii lɛlɔ. Na mmɔ lɛnɔ ni, bákana nkyuli inyɔ bamba badi bámana ligyii lɛlɔ na Yesu kɔmii ku kɔdianu. 19 Pilato ɔ́ya na bénweni ala adi básia kalɛkɛ kadi lɛlɔ na úti-ka ɔ́mana Yesu ugyii ɔmmɔ lɛlɔ. Na etemila ammɔ ndi amɛni. Yesu Nasareni, Yudaƒuɔ Ɔga. 20 Yudaƒuɔ pii báka ala amɛni, ɔsika kesii kani na bákana Yesu bámana ugyii lɛlɔ mmɔ ude ɔma unengudi ɔmmɔ. Na Pilato únweni ala ammɔ lɛnɔ na Hebri ku Roma ku Griki lɛdi kemo. 21 Lɛla lɛmɛni lítayɔ Yudaƒuɔ bakpane benengu bammɔ kaƒɔ. Anwuɔsu bátásu Pilato banini, “Útalɛka enweni anii Yudaƒuɔ Ɔga, mmomu ukyuli ɔmɛni ɔ́su ɔnii ɔdi Yudaƒuɔ Ɔga.” 22 Amu na Pilato údie kenye ɔnini, “Lɛla lɛni na línweni ni, líinweni lɛ́wɔlɔ.” 23 Uwi ɔni na bekpone bammɔ bákana Yesu bámana ugyii lɛlɔ báwɔlɔ ni, béti nwuna adala na béle-nya akpa ene. Na ɔdi biala úti lɛkpa linwi. Na Yesu awu gyɔlɔɔ ɔmmɔ ni, bétele-nwu. Na awu ɔmmɔ ni, bátaka-nwu kesii kadi, mmomu budi sɔɔn na bédi-nwu ɔ́si limɔ útédu lɛgba. 24 Na bekpone bammɔ básu lɛlɔ banini, “Buláni awu ɔmɛni bulabwɛ. Mmomu bɛya na bɔtu egulabi bɔnu bula akɔ ɔni menwini mewi na buti awu ɔmmɔ bute-nwu.” Na ɔkɛnku ɔmɛni ɔsu ni, Bunweni Kedee Ɔku kemo etemila ébo éte lɛni sɔsɔ uwi ɔni na básu bése banii, “Béle-mi lɛlɔ ala béte lɛlɔ. Na bátu egulabi na mina awu lɛlɔ.” Na lɛni geen lɛnɔ na bekpone bammɔ bábla. 25 Na Yesu ugyii ɔmmɔ kalɔ ni, Yesu uni ku uni ɔnwani ulekubi ku Klopa ulekudi Maria ku Maria Magdalene benye. 26 Yesu ɔ́nu uni ku nwuna ɔtɛyane ɔni na ɔɔyɔ́ geen ka benye. Anwuɔsu ɔ́su uni ɔnini, “Nna, aanu ƒ^ubidi.” 27 Amu na ɔ́su ɔtɛyane ɔmmɔ lɛnɔ ɔnini, “Aanu ƒ^ini.” Anwuɔsu ɔ́si uwi ɔmmɔ ni, ɔtɛyane ɔmmɔ ɔ́ƒɔ-nwu úsienku kaduli na ɔɔnu-nwu lɛlɔ. 28 Yesu ɔ́ti ka ɔƒaani ni, ɔ́ɔwɔlɔ lɛla biala na ɔlɛka ɔbla. Na kalɛ na Bunweni Kedee Ɔku kemo ala ani bénweni bése ebo ete lɛni ɔsu ni, Yesu ɔ́su ɔnini, “Utukwɛ ɔɔda-mi.” 29 Amu na kesii kani na ala amɛni aalɛ́ mmɔ ni, kalaku bonwu kadi kese na ntɛ bɔni nányi buwi. Anwuɔsu béti unwo bátu ugyii ɔdi baalɔ banii hisope lɛlɔ na bánwu bákya ntɛ bɔmmɔ kemo, na bákɔliku bátu-nwu kenye. 30 Ka Yesu ɔ́ni ntɛ bɔmmɔ ɔ́wɔlɔ ni, ɔ́su ɔnini, “Ɔƒɛni kani ɔ́sa!” Ka ɔ́su lɛni ɔ́wɔlɔ ni, ɔ́kya lili kalɔ na ɔ́yula. 31 Amu na Yudaƒuɔ benengu bammɔ básu Pilato banii ute-ma kuƒi na bekyuli bani na bákana bámana ugyii lɛlɔ mmɔ ni, na bebo-ma lɛgba ekubi baƒɛ na baƒami-ma na ugyii lɛlɔ mmɔ. Yudaƒuɔ bammɔ báwia ka babla ɔmɛni ɔsika limeyi lɛmmɔ lɛdi Ƒida. Na bátayɔ ka bekyuli bammɔ ɔlɔna ɔƒa ligyii lɛlɔ mmɔ utédu kadi kégye kani ndi bana lɛnwunameyi. Na lɛnwunameyi lɛni ndubo mmɔ lɛnɔ lɛdi limeyi linengudi geen lɛni nse kedee ƒui lite-ma. 32 Ɔmmɔ ɔsu bekpone bammɔ bésie na nkyuli inyɔ bani na bákana bámana ugyii lɛlɔ bébunku Yesu mmɔ ni, bébo-ma lɛgba báƒɛ. 33 Nsu ka bébedu Yesu kudɔ ni, bánu ka úukpi. Anwuɔsu anwu ni, bátaƒɛ-nwu lɛgba. 34 Mmomu ukpone unwi ɔ́tu-nwu ɔƒɛnyi ɔ́ƒuala ku nwuna lɛtula. Na mmɔ mmɔ ni, ubugya ku ntu bɔ́lɛ. 35 Ukyuli ɔni nánu ala amɛni ni, anwu muunweni-nya kalɛ na amii lɛnɔ bɛƒɔ bɛdi. Na lɛla lɛni na ɔ́su lɛnɔ ni, sɔsɔ na ɔdi. Na ɔgyi nwaa ka litemi geen na ɔɔsu. 36 Bábla ala amɛni ƒui kalɛ na Bunweni Kedee Ɔku kemo etemila ebo ete lɛni ɔni na bénweni banini, “Nwuna likubi linwi muedi balaƒɛ-ni.” 37 Na bénweni lɛla bamba lɛnɔ banini, “Bekyuli badubɔnu anwu ɔni na bátu-nwu lɛtula ɔƒɛnyi mmɔ.” 38 Ɔmmɔ kama ni, Yoseƒ ɔni nási ɔma ɔni baalɔ banii Arimatea ni, úvele Pilato ɔnii ɔnyonu Yesu ukpine ute-nwu. Na Yoseƒ ɔmɛni ɔdi Yesu kama basiakune akɔ unwi. Nsu útabla na bekyuli bati, ɔsika ɔɔyia Yudaƒuɔ benengu bammɔ ɔsu. Na ka Pilato ɔ́tuna ni, úbo úbaƒɔ ukpine ɔmmɔ ɔ́tɔlɔku. 39 Na Nikodemo ɔni nábɛ útánu Yesu usien ɔdi ni, anwu lɛnɔ ɔsiaku Yoseƒ ɔmɛni. Na evogyii ani na beeti taaklibi ukpine ni, Nikodemo ɔ́ya na béti-nya pii geen basiaku-ma. 40 Amu na nkyuli inyɔ bamɛni béti Yesu ukpine ɔmmɔ na bátáwɛɛ-nwu evogyii ammɔ ƒui na béti adi aƒualadi abuni bényimi bada-nwu lɛlɔ ƒui aani kalɛ na Yudaƒuɔ baaklibi ukpine asa na baavá-nwu. 41 Na kesii kani na bádu Yesu mmɔ ni, likpo blii lɛdi lɛkya mmɔ. Na mmɔ ni, béku kaƒiɔtɔ kawɔdi kadi bése na bátava tɔ ukyuli kana kemo kudii. 42 Ɔƒɛni ka kadi kegye kani ndi lɛnwunameyi na kaƒiɔtɔ kammɔ lɛnɔ kede mmɔ ɔsu ni, béti Yesu bátáva mmɔ.

20

1 Na Kwasida ɔtanta tutuutu uwi ɔni kemo na kadi kátabla tɔ nwaa ni, Maria Magdalene úsie kaƒiɔtɔ kammɔ kudɔ na útánu ka lɛtabi lɛni na béti bébi ubu ɔmmɔ kenye lɛsɔ liiibi. 2 Anwuɔsu úkeli úsie Simon Petro ku ɔtɛyane ɔni na Yesu ɔɔyɔ́ mmɔ kudɔ. Na útásu-ma ɔnini, “Bekyuli badi bétédie Blɔti na kaƒiɔtɔ kammɔ kemo bátɔlɔku. Na bɔɔɔgyi kesii kani na béti-nwu bétése!” 3 Amu na Petro ku ɔtɛyane ɔbambadi ɔmmɔ bátɔlɔ bésie kaƒiɔtɔ mmɔ. 4 Bana inyɔ ƒui bakɛ beekeli usi, nsu ɔtɛyane ɔbambadi ɔmmɔ ɔ́vi Petro na ɔ́ka-nwu kaƒiɔtɔ kudɔ mmɔ budu. 5 Úbo kalɔ na ɔ́nu adi aƒualadi abuni ammɔ, nsu úteduo kaƒiɔtɔ ɔtɔ ɔmmɔ kemo. 6 Simon Petro ɔni nkpɛ kama lɛnɔ úubo úbeduo, na anwu ɔ́vi úduo kaƒiɔtɔ kammɔ kemo na ɔ́nu adi aƒualadi ammɔ ka ewi. 7 Na kɔdi kɔni na béti bamana Yesu lili lɛnɔ kɔtɛ mmɔ. Nsu kɔɔɔtɛ adi aƒualadi ammɔ kudɔ. Mmomu báƒɛ aku lɛti báva kɔmadɔ. 8 Mmɔ ni, ɔtɛyane ɔbambadi ɔni náka bukeli butédu kaƒiɔtɔ kammɔ kɔtu lɛnɔ úduo ɔtɔ ɔmmɔ kemo. Na útánu ala ammɔ lɛni kani, na ɔ́ƒɔ ɔ́di. 9 Nsu úti úbeduku uwi ɔmmɔ lɛlɔ ni, bétenu tɔ kalɔ ka Yesu ɔdubɔta bɔlɛ kekpine aani kalɛ na bénweni na Bunweni Kedee Ɔku kemo. 10 Amu na batɛyane bammɔ bénwini bésie kaduli. 11 Nsu Maria úbo unye kaƒiɔtɔ kammɔ anumi na uuwulo. Nsu uwi ɔni na unye uuwulo ni, ɔ́sɔ úbo kalɔ ɔ́nu kaƒiɔtɔ kammɔ kemo. 12 Mmɔ ni, ɔ́nu Katɔti batu inyɔ badi ka bakya lɛwu lɛƒualadi belie mmɔ. Unwi ulie kesii kani na Yesu ɔ́tɛ lili kakɛ, na ɔkladi lɛnɔ ulie úsie lɛgba kakɛ. 13 Amu na béye-nwu banini, “Uleku, bi ɔsu na eewulo?” Mmɔ ni, Maria lɛnɔ údie kenye ɔnini, “Bekyuli badi bébeti mina Ati bátɔlɔku. Na lɛɛɛgyi kesii kani na béti-nwu bésienku!” 14 Amu ka ɔ́tu únwini ni, ɔ́nu ka Yesu unye. Nsu Maria útati ɔnii Yesu na ɔdi. 15 Amu na Yesu lɛnɔ úye-nwu ɔnini, “Uleku, bi ɔsu na eewulo? Ɔma na aawia?” Nsu Maria ɔ́kali ɔnii anwu mɔɔnu kaƒiɔtɔ kammɔ lɛlɔ. Anwuɔsu na ɔ́su-nwu ɔnini, “Ati, buvele, si awɔ nédie-nwu átɔlɔku mɛni ni, na atina-mi kesii kani na éti-nwu étése, na lisie ntéti-nwu mmɔ.” 16 Amu na Yesu ɔ́kpali-nwu ɔnini, “Maria!” Mmɔ ni, Maria únwini ɔ́nu-nwu, na ɔ́su na Hebri lɛdi kemo ɔnini, “Rabuni!” Na nwuna kalɔ ndi Ala Ɔtinane. 17 Mmɔ ni, Yesu ɔ́su-nwu ɔnini, “Tatu tada-mi, ɔsika ńtenwini tɔ ńtesie Katɔti kudɔ. Mmomu teesie mina banwani kudɔ na atásu-ma anii línwini lísela mina Ɔti ɔni ndi Katɔti kudɔ. Na anwu ndi amii lɛnɔ Ɔti ku bina Katɔti.” 18 Anwuɔsu ni, Maria Magdalene úsie na útásu batɛyane bammɔ ka anwu ɔ́nu Blɔti. Na lɛla lɛni na Yesu ɔ́su-nwu ni, ɔ́sɔku-ni ɔ́su batɛyane bammɔ. 19 Na Kwasida kadi kammɔ useyi ni, batɛyane bammɔ básala na bákalɛ lɛlɔ bákya ɔtɔ kemo ka baayia Yudaƒuɔ benengu bammɔ ɔsu. Amu na Yesu úbo úbenye-ma ntɛ, na ɔ́su-ma ɔnini, “Keyi buɛɛ kasiaku-mii.” 20 Ka ɔ́su-ma ɔmɛni ɔ́wɔlɔ ni, Yesu úti nwuna enu ku ɔƒɛnyi ɔ́tina-ma. Na lɛlɔ lɛ́yɔ batɛyane bammɔ ka bánu Blɔti ɔsu. 21 Ɔmmɔ kama ni, Yesu ɔ́sɔ ɔ́su-ma ɔnini, “Keyi buɛɛ kasiaku-mii. Kalɛ na Ati ɔ́tala-mi ni, lɛni kani na ami lɛnɔ mɔɔtala-mii.” 22 Mmɔ ni, ɔ́nwuna úwi-ma na ɔ́su-ma ɔnini, “Bɛƒɔ Katɔti Kɔyu. 23 Na si bíti bekyuli ekpidi bɛ́kyiɛ-ma ni, ɔɔtina ka Katɔti lɛnɔ úti ɔ́kyiɛ-ma. Nsu si bíteti bítakyiɛ-ma ni, ɔɔtina ka Katɔti lɛnɔ úteti útakyiɛ-ma.” 24 Uwi ɔni na Yesu úbo-ma kudɔ mmɔ ni, batɛyane leevu-inyɔ bammɔ akɔ unwi ɔni baalɔ Toma na basɔ baalɔ-nwu Nta Ubi ni, uuubo-ma akɔ. 25 Anwuɔsu ka úbebo ni, batɛyane bakladi bammɔ básu-nwu banini, “Abu bɔ́ɔnu Blɔti!” Amu na Toma ɔ́su-ma ɔnini, “Si ńtanu kɔbwɛlɛ eƒi lɛtaala na nwuna enu na liti mina lɛnimi lɛkya-nya kemo na liti mina kɔnu lɛkya-nwu ɔƒɛnyi ni, lɛɛɛdubo bɔƒɔ bɔdi.” 26 Amu na Kwasida unwi kama ni, batɛyane bammɔ básɔ bása belie ɔtɔ kemo, na Toma lɛnɔ ɔkya-ma akɔ. Básɔ bákalɛ ɔtɔ ɔmmɔ lɛni kani. Nsu Yesu úbo na úbenye-ma ntɛ, na ɔ́su-ma ɔnini, “Keyi buɛɛ kasiaku-mii.” 27 Amu na ɔ́su Toma ɔnini, “Bo, na ebeti ƒula lɛnimi akya mɛni. Na anu mina enu. Na eti ƒula kɔnu akya-mi ɔƒɛnyi. Na ada ƒula taƒɔ tadi aya. Na aƒɔ adi ɔƒɛni kani!” 28 Ka Yesu ɔ́su-nwu lɛni ni, Toma údie kenye ɔnini, “Mina Ati ku Katɔti!” 29 Amu na Yesu ɔ́su-nwu ɔnini, “Áƒɔ ádi ka ánu-mi ɔsu. Bekyuli bani náƒɔ bádi asa na bánu-mi ni, badubɔkɛ lɛlɔyɔ teetulo!” 30 Yesu ɔ́bla akɔla budie taatina pii na nwuna batɛyane anumi. Nsu ńtenweni-nya ńtakya ɔku ɔmɛni kemo. 31 Na amɛni kani na línweni líse kalɛ na bɛƒɔ bɛdi ka Yesu ndi Ukyuli Ɔƒunadi ɔmmɔ. Na anwu ndi Katɔti Ubidi ɔni na si bɛ́ƒɔ-nwu bɛ́di ni, na ɔya na bilie ngba na nwuna ɔyikun kemo.

21

1 Ɔmmɔ kama ni, Yesu ɔ́sɔ údie lɛlɔ ɔ́tina nwuna batɛyane kunwi na Tiberia Ɛpu kudɔ. Na kalɛ na úbalɛ na ndubo bɔsu mɛni. 2 Limeyi lɛdi ni, Simon Petro ku Toma ɔni baalɔ Nta Ubi ku Natanael ɔni nási Kana na Galilea kalɔ lɛlɔ ku Sebedeo bebi ku Yesu batɛyane inyɔ babambadi badi benye. 3 Amu na Simon Petro ɔ́su-ma ɔnini, “Lísela ntédie kɔbɛ.” Mmɔ kani na ama lɛnɔ básu-nwu banini, “Abu lɛnɔ bɔdubo-ɔ bɔsiaku.” Anwuɔsu bana ƒui béduo ɔkɔlɔ kemo na bátɔlɔ. Nsu usien umodi ɔmmɔ ni, bétedie kɔbɛ kɔdi. 4 Amu uwi ɔni na ɔƒɛ ɔ́tu ɔdubo ni, batɛyane bammɔ bánu ukyuli ɔdi ka unye ɛpu kɔtu. Nsu bátati banii Yesu na ɔdi. 5 Amu na ɔ́kpali-ma ɔnini, “Bakloƒu, bítedie kɔbɛ kɔdi?” Mmɔ na ama bédie kenye banii, “Oowo!” 6 Amu na ɔ́su-ma ɔnini, “Biwi bina asawu ɔmmɔ na ɔkɔlɔ ɔmmɔ kɔdianu kakɛ. Na bɛdubɔkɛ lɛla lɛdi.” Anwuɔsu béwi asawu ɔmmɔ. Na bátakana-nwu bɔni bɔlɛku, ɔsika bédie kɔbɛ pii. 7 Amu na ɔtɛyane ɔni na Yesu ɔɔyɔ́ mmɔ ɔ́su Petro ɔnini, “Blɔti na ɔdi!” Ka Simon Petro únu ka ɔtɛyane ɔmmɔ ɔ́su ɔnii Blɔti na ɔdi ni, Petro úti nwuna awu gyɔlɔɔ ɔ́bala lɛlɔ, ɔsika ɔ́da-nwu údie. Na ɔ́ƒulu úduo ntu bɔmmɔ kemo, na úti úsela Blɔti kudɔ. 8 Na batɛyane bakladi béti ɔkɔlɔ ɔmmɔ na básia ntu lɛlɔ bébedu ɛpu kɔtu. Na báni asawu ku kɔbɛ kɔmmɔ béboku. Na ɔ́si kesii kani na bédie kɔbɛ kɔmmɔ útédu ɛpu kɔtu ni, útagyu. Ɔ́bla aani lɛgba budie eti anyɔ. 9 Ka báyu ɔkɔlɔ kemo bébo kalɔ ni, bánu aƒɛ ogya ɔdi na ɔdaku bɔda. Na kɔbɛ kɔdi kɔsia ogya ɔmmɔ lɛlɔ, na bodobodo ɔdi lɛnɔ use mmɔ. 10 Amu na Yesu ɔ́su-ma ɔnini, “Biti bina kɔbɛ kɔni na bídie ɔƒaani mmɔ kɔdi biboku.” 11 Amu na Simon Petro ɔ́kɔ úduo ɔkɔlɔ ɔmmɔ kemo, na ɔ́da asawu ɔmmɔ na ɔ́ni úbewi ɛpu kɔtu. Na kɔbɛ kubendi kúyi-nwu kemo tɛtɛɛtɛ. Na kɔbɛ kɔmmɔ ƒui bumomo bɔbla eti atɛ ku ɛtɛ. Nsu ina ka kɔbɛ kɔmmɔ kúmomo lɛni ni, asawu ɔmmɔ útabwɛ. 12 Ɔmmɔ kama ni, Yesu ɔ́su-ma ɔnini, “Bibo bibadi.” Nsu ɔni na ala amɛni ƒui aalɛ́ ni, ɔdi útakana kayi buse na uye-nwu ɔnii, “Ɔma na adi?” Ɔsika báti ka Blɔti na ɔdi. 13 Na ka Yesu ɔ́lɔ-ma ɔnii babadi ni, ɔ́kpɛ úde adila ammɔ na úti bodobodo ɔmmɔ na úti úte-ma. Lɛni kani na ɔ́bla kabɛ kammɔ lɛnɔ. 14 Na ɔmɛni ndi kɔtɛdi kɔni na Yesu údie lɛlɔ ɔ́tina nwuna batɛyane ɔni na ɔ́ta ɔ́lɛ kekpine. 15 Uwi ɔni na bádi báwɔlɔ ni, Yesu úye Simon Petro ɔnini, “Simon, Yohane ubi, aayɔ́-mi geen teetulo batɛyane bakladi bamɛni?” Amu na údie kenye ɔnini, “Blɔti, ɛɛn! Awɔ ɔlati agyi ka mɔɔyɔ́-ɔ.” Amu na Yesu ɔ́su-nwu ɔnini, “Taanu mina baƒonubi lɛlɔ.” 16 Ɔmmɔ kama ni, Yesu ɔ́sɔ úye-nwu ɔnini, “Simon, Yohane ubidi, aayɔ́-mi geen?” Na Petro lɛnɔ ɔ́sɔ údie kenye ɔnini, “Blɔti, agyi ka mɔɔyɔ́-ɔ.” Mmɔ ni, Yesu ɔ́sɔ ɔ́su-nwu ɔnini, “Taanu mina baƒonu lɛlɔ.” 17 Kɔtɛdi ni, Yesu ɔ́sɔ úye Petro ɔnini, “Simon, Yohane ubidi, aayɔ́-mi?” Amu ka Yesu ɔ́sɔ úye-nwu kɔtɛdi ɔnii, “Aayɔ́-mi?” ɔsu ni, Petro lɛlɔ lɛ́bla anwu ɔlati kɔnyana, na ɔ́su Yesu ɔnini, “Blɔti, agyi lɛla biala. Na agyi lɛnɔ ka mɔɔyɔ́-ɔ!” Amu na Yesu ɔ́su-nwu ɔnini, “Taanu mina baƒonu lɛlɔ. 18 Mɔɔsu-ɔ litemi geen ka ni, uwi ɔni kemo na adi ɔnamu ni, aata na aklibi lɛlɔ na esie kesii biala na aayɔ́. Nsu si uwi ɔni na ábi lɛlɔ ni, adubo enu bunene na ukyuli bamba maklibi-ɔ na ɔkpanku-ɔ usienku kesii kani na alawia ka esie.” 19 Lɛla lɛni na Yesu ɔ́su-nwu mɛni ni, bɔtina na ɔda Petro kukpi kɔni udu na ɔdubo bukpi na uti ɔkɔliku Katɔti lɛnyi katɔ. Amu na Yesu ɔ́su-nwu ɔnini, “Taasiaku-mi.” 20 Amu ka Petro ɔ́tu únwini ni, ɔ́nu ɔtɛyane ɔni na Yesu ɔɔyɔ́ mmɔ. Anwu ndi ɔtɛyane ɔni nábu úsie Yesu kudɔ uwi ɔdi návi ɔni na baadiku-nwu adila ekplodi na úye Yesu ɔnini, “Blɔti, ɔma ndubo-ɔ kakya bɔkya?” 21 Anwuɔsu uwi ɔni na Petro ɔ́nu-nwu ni, úye Yesu ɔnini, “Blɔti, na bi ndubo ƒula ɔtɛyane ɔmɛni anwu bɔlɛku?” 22 Amu na Yesu údie kenye na úye-nwu ɔnini, “Si mɔɔyɔ́ nnii anwu ɔsɔ ɔkya ngba wetédu uwi ɔni na masɔ mebo ni, bi nkɛ-ɔ? Awɔ ni, taasiaku-mi.” 23 Ɔmmɔ ɔsu ni, litemi lɛmɛni lígyingya lɛ́vi Yesu basiakune ƒui akɔ ka ɔnii ɔtɛyane ɔmɛni anwu ulekpi. Nsu ɔɔɔdi bɔsu na Yesu ɔ́su ɔnii ulekpi. Mmomu bɔsu na ɔ́su ɔnini, “Si mɔɔyɔ́ nnii anwu ɔsɔ ɔkya ngba wetédu uwi ɔni na masɔ mebo ni, bi nkɛ-ɔ?” 24 Ɔtɛyane ɔni lɛlɔ litemi na bɔɔsu mɛni ndi ami ɔni násu ala amɛni. Na línweni-nya líse lɛnɔ. Na baƒɔtaadine ƒui bagyi ka ala ani kenye na muudie mɛni adi litemi geen. 25 Na ala pii abambadi akya ani na Yesu ɔ́bla. Na si banii bénweni ala ani ƒui na ɔ́bla bése unwi unwi ni, nka kayawi bekyuli balákɛ lɛku lɛmmɔ kesekɔ.