Kono of Sierra Leone

JOHN

1

1 Dunya e na to a kuu sɔ-a, an mbe mɔɛ min chee, an dɔ, Bai, a ni wan gbɛ nɔ. An fea ni Yataa a, a wɛɛ ni Yataa an na. 2 Bai chɛ ni wan gbɛ nɔ, an fea Yataa a, a ka a tima chɛ ma. 3 Bai chɛ an-na fen kɔ fen na dan. Yataa ma a ma ni, fen kɔ fen min na dan-da, a a ni dan a gbaa. 4 A wan mbe fɔɛ chɛndɛ be. An fɔɛ chɛ, an mu manɛ a mɔ gbu ko a. 5 Man chɛ ɛ manɛ be tena wan tun pimbi pimbi ɔ. A sin, pimbi ee che kuɔ fɔ a ma-a, a ni sɛmbɛ man koe a. 6 Kaminɛ ni wan nɔ, min tɔ ni Chɔn. Yataa wandi, an na-a a sɔ. 7 An Chɔn chɛ na-a, a ni man chɛ wakoe ɔ yian mɔɛ n na, min mbe a ma, mɔ ɔ mɔ ni an sakana bai chɛ a min, an sin ni dan a a. 8 A wandi gbu, an nii ma man chɛ a. A na-a dechee, a ni a wakoe fɔ mɔɛ n ye. 9 Mɔɛ min mu tea manɛ a, min mbe manɛ be mɔ ɔ mɔ ma, a ni na tena wan dunya ɔ. 10 Bai chɛ ni wan dunya ɔ, a-a dunya min na dan ka. Chɛ gbɛɛ ɔ, mɔɛ n nii ma a sɔn ni a buɛ chɛ ɔ. 11 A ta-a wan a waa a, chɛɛ a ta mɔɛ chɛ nu, an ma an boo a si ni a kɔɔ. 12 Chɛɛ mɔɛ n-na an boo si wan a kɔɔ, miin-na an kai fa a a. Chɛ ko a, an mɔɛ chɛ nu, a-a gbasaya be wan an ma, ma koe a Yataa 'a denɛ n na. 13 An ma ma ni Yataa 'a denɛ n na mɔgbuya ta chia an na. Yataa wandi an-na a ma, an ma-a a 'a denɛ n na. 14 An ni a wɛn chee, an dɔ, Bai, a na-a ma wan mɔ gbu a, koadia chinchimaya faenɛ ɛ a faa a, a basan danaya a Yataa tena. A ni wan nn tɛ ɔ. Nn na-a a ɔ yen fan, a kamayaen ni buɛ min dɔ, kamaya min ni a ɔ, a wan Fa Yataa 'a Den dɔndɔ gbe. 15 Chɔn na-a bai sa wan gbankon, a si a ma, a ɔ, “Mɔɛ chɛ mu, n-na min na koe fɔ wo ye, n dɔ, ‘Mɔɛ min mbe na tena, n gbaa chia a, a gbasayaen mu a ni ben n ma.’ N dɔ, ‘Koe min na mu, a ni wan fɔɛ ɔ, n nii ma suun nin bɛ tima min na.’ ” 16 Koadia chinchimaya min faen mu a faa ɔ, an mbe a ma tena, ɛ mmɔ gbɛɛ dua tena tima sɛsɛ a. 17 Yataa na-a a 'a sawa n na ben Mosisi an na, chɛɛ koadia chinchimaya tana, a basan danaya a, mmɔ-a an ma sɔn Chisɔsi Chasi an na. 18 Mɔ ɔ mɔ ma Yataa yen nin bɛ. Chɛɛ a 'a Den dɔndɔ gbe, min fandi mu Yataa a, an fea an mbe min na tima ɔ tima, a-a a ma, mɔɛ n-na a Fa sɔn. 19 Mbɛ Chu mɔɛ nu Chuusaɛn duu ɔ, an ya ɔ sɔɛ nu, an-na mɔɛ dɔ n sɔ wan Chɔn tena. An tɛ mɔɛ nu Yataa a, a basan mɔɛ n na, miin bɛɛ bɔ-a Difai 'a dambi ɔ, an-na an sɔ wan. An dɔ, an ni Chɔn dɔ tisa, ni mɔɛ minan sima mu a a. Chɔn na-a chɛ an fɔ an ye. 20 A ma ban ni koɔ koe a an tena, chɛɛ a-a a fɔ wan an ye den, a boo kaenɛ a ma, a ɔ, “N fan ma a a, kunka mansa chɛ.” 21 Mbɛ an-na a ɔ tisa to, an dɔ, “Nyɔn sin mu gbɛ i a?” An dɔ, “Idaicha an bɔ-a ka to?” A ɔ, “N fan ma, Idaicha ma n na.” Mbɛ an dɔ te to, “Mosisi na-a Yataa 'a gbonka chɛ mɔɛ dɔndɔ na koe fɔ wan. A mu i wan na?” A ɔ, “N fan ma.” 22 Mbɛ an dɔ te gbɛ, an dɔ, “Mbɛ a fɔ gbɛ nn ye, mɔɛ min mu i a.” An dɔ, “Ni nn yɛ-a, mɔɛ miin-na nn sɔ, an mbe to-a wan i wakoe ɔ sɔn koe a.” An dɔ, “Fen mbe i da a, a si i wandi ma?” 23 Mbɛ Chɔn dɔ, “Mɔɛ min ni gbonka chɛ tena, fuinɛ ma, n fan mu an mɔɛ chɛ a. N dɔ, wo chia ɔ bɛn chɛndɛ, Yataa Mansa tachɛ koe a, a ni na.” Yataa 'a gbonka chɛ mɔɛ chɛ suun, min tɔ ni Aisaya, a da a kuiɛ an nii nɛ, Chɔn yɛ-a a ɔ. 24 Chu mɔɛ chɛ dɔ nu, an na-a miin sɔ, Fayisii n ni an na. 25 Mbɛ an-na a ɔ tisa to, an dɔ, “Ni kunka mansa chɛ ma i a, Idaicha ma i a, Yataa 'a gbonka chɛ mɔɛ chɛ wɛɛ a ma i a, tisa chɛ yen ko. Fen ko a mu, e yii chɛ mɔɛ n kunɛ ɔ, Yataa chia a?” 26 A ɔ, “N mbe yii an chɛ dechee mɔɛ n kunɛ ɔ, Yataa chia a. Chɛɛ mɔɛ ɛ sɔ ɔ wo tɛ ɔ, wo ma min sɔn, a sɔn buɛ a. 27 An mbe na tena sɔ-a n chen gba ɔ. Chɛɛ a tɔɛ ɛ bɔ-a wan gbeden, a sin gbu, n mbe ee che a 'a kɔɔwa yuu wɛɛ fuin koe a.” 28 Chɛ gbɛɛ na-a chɛ-a a ɔ Bɛtani duu ɔ wan, Chɔdan yii kaka dɔndɔɛ ma, tee bɔ chia a. Chɔn ni nɔ wan, ɛ yii chɛ-a mɔɛ n kunɛ ɔ, Yataa chia a. 29 Mbɛ banda ɔ ka-a kɛn, tee dɔndɔɛ ma, Chɔn-na Chisɔsi yen na-a a tena. Mbɛ a wan Chɔn dɔ, “Yataa 'a sa tɔngbɔɛ yen ko a na-a, mɔɛ n 'na ko yama n gbɛɛ dunya ma, an mbe si ɔ min kun ma. 30 Mɔɛ chɛ mu, n-na min na koe fɔ wo ye, n dɔ, ‘Mɔɛ min mbe na tena, n gbaa chia a, a gbasayaen mu a ni ben n ma.’ N dɔ, ‘Koe min na mu, a ni wan fɔɛ ɔ, n nii ma suun nin bɛ tima min na.’ 31 N fandi gbu wɛɛ, n nii ma an mɔɛ chɛ sɔn, a sɔn buɛ a. Chɛɛ n na-a, n mbe yii chɛ mɔɛ n kunɛ ɔ, Yataa chia a, a ma koe a Isɔɛɛ mɔɛ nu, an ni a sɔn, a sɔn buɛ a.” 32 Chɔn na-a a ɔ yian ka wan, koe min na-a ma. A ɔ, “N nii ma a sɔn, a sɔn buɛ a. Chɛɛ Yataa min-na n sɔ, yii chɛ koe a mɔɛ n kunɛ ɔ, a na-a a fɔ wan n ye, a ɔ, n mbe a Nyina yen-da wan, a ni yii, a ka banda bu ɔ, mbɛ a bea-a mɔɛ fɛ gban. A ɔ, an mɔɛ chɛ, an mbe a ma-a, Yataa Nyina chɛ, ɛ ma-a mɔɛ n fɛ.” Chɔn dɔ, “A sin,” a ɔ, “n-na Yataa Nyina chɛ yen fan, a yii-a fɛɛ yɔ bugbɔɛ, mbɛ a bea-a mɔɛ fɛ.” 34 A ɔ, “N-na chɛ ɔ yen fan, a ma-a,” a ɔ, “n sin mbe a fɔ tena gbɛ, mbɛ mɔɛ chɛ mu Yataa 'a denɛ an na.” 35 Mbɛ banda ɔ ka-a to, tee dɔndɔɛ ma, Chɔn sɔ-a to nɔ, an bɛ a fɛ den fea an na. 36 A-a Chisɔsi yen kɛn ben-da an baima, a ɔ, “Yataa 'a sa tɔngbɔɛ yen ko ben-da.” 37 A fɛ den fea chɛ nu, an-na a da a bai chɛ a min fan, mbɛ an bea-a Chisɔsi fɛ. 38 Mbɛ Chisɔsi-a a ya a mun, a-a an yen, an beaenɛ ɛ a fɛ. Mbɛ a ɔ, “Wo wan, wo e fen yan tena?” Mbɛ an dɔ, “Kan mɔ, i yia tena ɛ mende?” 39 Mbɛ a ɔ, “Wo na, wo ni nɔ yen.” A tima chɛ a, awa naanin bɔɛ ni gbɛ che an na, tee yiienɛ ma. Chɛ-a a ma wan, an ta-a kɛn an-na a waa yen, an bɛ an na tee bea gbɛ nɔ. 40 Mɔ fea chɛ dɔndɔ ni Anduu an na, Saimɔn Pita dɔ kaima. 41 Anduu-a koe min pɛn pɛn ma, a-a a kɔɔɛ Saimɔn yan fan. Mbɛ a-a a fɔ a ye, a ɔ, “Nn-na mɔɛ chɛ yen, min mu kunka mansa a.” (Kiisi mɔɛ n dɔ, Chasi). 42 Mbɛ a ta-a Saimɔn na Chisɔsi tena. Mbɛ Chisɔsi-a Saimɔn ma fɛn kɔdɛɛ, mbɛ a ɔ, “I tɔ mu Saimɔn, i fa sin tɔ mu Chɔn. Chɛɛ i tɔɛ ɛ ma tena Kefasi an na gbɛ.” (Tɔɛ chɛ, ni a a mun-da, a mu Pita an na). 43 A banda ka dɔndɔɛ ma, mbɛ Chisɔsi-a a yii na chii, mbɛ a-a Kadidi chɛnyɛ ɔ chia bia. Mbɛ a-a Fiipi yan, mbɛ a ɔ te a ma, a ɔ, “Na, i ni ma n fɛ denɛ a.” 44 Fiipi chɛ, a na-a ka Besaida wan, duu chɛ, Anduu an fea Pita a, an baa a. 45 Mbɛ Fiipi-a a ya a kan Natanɛɛ a. Mbɛ a-a a fɔ a ye, a ɔ, “Mɔɛ min, Mosisi na-a a wakoe nyɛn, sawa gboo chɛ ɔ, nn-na a yen. A yɛ to, Yataa 'a gbonka chɛ mɔɛ n bɛɛ, an na-a fenɛ nyɛn to, a si an ma. A tɔ mu Chisɔsi, min ka-a Nasaɛti duu ɔ, kai chɛ, Chosɛfi, a 'a denɛ.” 46 Mbɛ Natanɛɛ ɔ, “Nasaɛti chɛ, fen kɔ fen mbe che wan bɔ-a nɔ, min mbe ma tɔnɔnɛ a mɔ gbu tena?” Mbɛ Fiipi ɔ, “Na, i ni a yen.” 47 Chisɔsi-a Natanɛɛ yen kɛn na-a a tena, a-a chɛ an fɔ, a si a ma. A ɔ, “Isɔɛɛ mɔɛ chɛndɛ chɛndɛ a yen ko na-a, tɔɛ chɛ bɛnden mu min kun ma. Mɔɛ mu a a, a ee mɔ ɔ mɔ bun.” 48 Natanɛɛ-a a ɔ tisa, a ɔ, “I ma-a ka ma, i-a n sɔn?” Chisɔsi ɔ, “Fiki kɔn chɛ kɔɔ, n-na i yen nɔ wan, Fiipi e na to i chee-a.” 49 Natanɛɛ ɔ, “Kan mɔ,” a ɔ, “Yataa 'a denɛ chɛndɛ chɛndɛ mu i a,” a ɔ, “Isɔɛɛ mɔɛ n 'na mansa mu i a.” 50 Chisɔsi ɔ, “N-na a fɔ wan i ye, mbɛ n-na i yen fan, i ni tima min na fiki kɔn chɛ kɔɔ. Chɛ an gbu-a a ma ka, i dan-da ka n na? E na tena wan koe sɛsɛ ɔ yen-da ma-a, miin benden mu chɛ ma kaka.” 51 Mbɛ a-a a fɔ an ye, a ɔ, “Ka wɛ n ni chɛ ma din wo tena. Wo e a ɔ yen-da wan, banda bu ɔ da a ni ka, mbɛ Yataa 'a maeka n yii-a. An mbe sɛ-a wan, an mbe yii, n na tindanɛ, n fan, Mɔ Gbu 'a Denɛ.”

2

1 Tee dɔndɔ bendenɛ gbakɔ, a fean bɔɛ ma, Chisɔsi de ni wan daun chɛ bɛnɛ ɔ, Kana duu ɔ, Kadidi chɛnyɛ ɔ. An bɛn chɛ kunɛ ni musu si koe an na. 2 Mbɛ Chisɔsi wɛɛ, an ni a chee sonda an na, an bɛn chɛ ɔ, an bɛ a fɛ denɛ n na. 3 Gbɛ min ni bɛn chɛ ko a, sonda chɛ n ban-da kɛn a min-da, mbɛ Chisɔsi de koɔ-a a tena, a ɔ, “Gbɛ gbɛɛ tɛtɛ ban-da.” 4 Mbɛ Chisɔsi ɔ, “Bɔɔɛ, a to n 'na boo ma dechee. Tima ma che nin bɛ n ko a.” 5 Mbɛ Chisɔsi de-a a fɔ bɔi den chɛ n ye, miin ni gbɛ kun ma, min ban-da ka, a ɔ, “Bai ɔ bai, ɛ min fɔ-a wo ye, wo a ma.” 6 Chu mɔɛ nu, an 'na Yataa fai ɔ, an 'na sawa n kɔkoo, a si an ko buɛ ma. Chɛ an-na a fɔ, yii si fenɛ n ni wan nɔ si ɔ, an ni wɔdɔ, an sin gbɛɛ ni koo wan. An nyanden ni senɛ ɔ wan, a sin, a dɔndɔɛ, a ni yii ya wan, min mbe kadɔn bi fea tɛ bi sawa a. 7 Mbɛ Chisɔsi-a a fɔ an ye, a ɔ, “Yii si fen chɛ nu, wo an na fa yii a.” Mbɛ an-na an gbɛɛ a fa gban. 8 Mbɛ a-a a fɔ an ye to, a ɔ, “Wo a sima bɔ yii si fen chɛ n dɔ, wo ni ta a a kai wandi tena, min mbe wo ya ɔ.” Mbɛ an-na a ma ka. 9 Yii chɛ, min fandenɛ ni gbɛ ka gbɛ a, a-a a ma fɛn. A nii ma a ɔ sɔn, gbɛ chɛ ka-a kaina min. Chɛɛ bɔi den chɛ n tana, miin na-a yii chɛ bɔ, an na-a a ɔ sɔn fan. Mbɛ an ya ɔ sɔɛ chɛ-a kamin chɛ chee, min-na musu si bɛnɛ ni a ɔ, mbɛ an sɔ-a ka wan. 10 Mbɛ a ɔ, “Ni i bɔ n-na mɔɛ n chee bɛn bonda chɛ ɔ, an mbe gbɛ chɛndɛ pɛn be mɔɛ n ma. Ni an-na a ɔ yen, mbɛ gbɛ kun-da an gboo ɔ, mbɛ an-na a kuu sɔ gbɛ tafu tafu be-a. Chɛɛ i tana, i-a gbɛ chɛndɛ si tena ɔ bɛn fan aan, mbɛ i danka-a a a bɔ-a sanche.” 11 Kamaya koe wa saa an nii nɛ, Chisɔsi na-a min ma. A na-a a ma Kana duu ɔ wan, Kadidi chɛnyɛ ɔ. A na-a a ɔ yian nɔ wan, a kamayaen ni buɛ min dɔ, mbɛ a fɛ denɛ n-na an kai fa a a. 12 Chɛ gbakɔ, Chisɔsi yii-a Kapanaun duu ɔ. An fea ni a de a, a basan a suun ma nyɔɛ kaima n na, ni a fɛ denɛ nu. An-na tee kuunden ben fan nɔ. 13 Tima ni gbɛ che koe an na, kun bɔ a ɔ bɛnɛ ko a. Chɛ ko a, Chisɔsi sɛ-a wan Chuusaɛn duu ɔ. 14 A-a a fo kɛn nɔ, a-a mɔɛ n tan fan Yataa 'a kata ɔ, an mbe sɔ fenɛ n ma tachɛ-a. Ninchi nu, an bɛ sa n na, a basan bugbɔɛ n bɛɛ a. Mɔɛ chɛ n bɛɛ, miin ni kɔpɔɛ sinchi, an ni wan nɔ si ɔ. 15 Mbɛ a-a bosa nyan fan yuu ɔ, mbɛ a-a sɔ fen chɛ n gbɛɛ gbain fan kata chɛ ɔ, sa chɛ nu, a basan ninchi chɛ n na. Mɔɛ chɛ n sin, miin ni kɔpɔɛ sinchi ka, a-a an 'na tebu n na bɔn fan, mbɛ a-a an 'na kɔpɔɛ a fasan fasan. 16 Mɔɛ chɛ n sin, miin ni ka bugbɔɛ ma tachɛ-a, a ɔ an ma, “Wo bɔ nɛ wo 'a bugbɔɛ chɛ n na. Wo sɛmbɛ Fa 'a chenɛ ma koe a fee fen ma tachɛ chenɛ a.” 17 Mbɛ a puin-da a fɛ denɛ n yii ma, mbɛ Yataa 'a gboo-a a fɔ wan, a ɔ, “Fa Yataa, i 'a chen chɛ 'a koadia koo n faa ɔ, n mbe fa tena wan a ko a.” 18 Mbɛ Chu mɔɛ nu, an ya ɔ sɔɛ nu, an sɔ-a a kanɛ ɔ. An dɔ, “I-a koe min ma ka, nn ma a ɔ sɔn ni a gbasaya chɛ ɛ wan i boo ɔ, a ma koe a. E kamaya koe minan ma-a, a ɔ yian koe a, mbɛ a gbasaya chɛ ɛ wan i boo ɔ?” 19 Mbɛ Chisɔsi ɔ, “Yataa 'a chen chɛ, wo a te wɛ. Tee sawa tɛ, n mbe a sɔ-a wan to.” 20 Mbɛ an dɔ, “I ta yiima ɔ, i-a a sɔ-a ka ma tee sawa kɔɔ? San bi naanin, kun ma wɔdɔɛ da faenɛ ɛ gban, an-na an ya wɛ, a sɔ koe a.” 21 Chɛɛ Chisɔsi yii nii Yataa 'a chenɛ an ma, a yii ni a wandi gboo an ma. 22 Chɛ an na-a a ma, a na-a a kɔɔ sɔ kɛn, a ka saya ɔ, a puin-da a fɛ den chɛ n yii ma, a ni min fɔ tee. Mbɛ chɛ ko a, an dan-da Yataa 'a gboo a, a basan bai chɛ n na, Chisɔsi ni miin fɔ. 23 Chisɔsi ni tima min na Chuusaɛn duu ɔ, kun bɔ a ɔ bɛn chɛ tima a, mɔɛ sɛsɛ na-a an kai fa wan a a. Koe min na mu, an na-a a ɔ yen fan, a na-a kamaya koe miin ma. 24 Chɛɛ Chisɔsi ma nyina ni a wandi ma an boo ɔ, koe min na mu, a na-a mɔgbuya sɔn fan chɛndɛ chɛ. 25 Chisɔsi ya nii mɔ ɔ mɔ a, a ɔ yian koe a, mɔgbuya ɛ buɛ min dɔ. Koe min na mu, a wandi gbu na-a a ɔ sɔn fan, koe min gbɛɛ ni an faa ɔ.

3

1 Mbɛ kaminɛ ni wan nɔ, min tɔ ni Nikɔdemɔsi. Ya ɔ sɔɛ dɔndɔ ni a a, Chu mɔɛ chɛ n tɛ ɔ, a sin, Fayisii dɔndɔ ni to a a. 2 Yɛɛ dɔndɔ ma, kamin chɛ na-a wan Chisɔsi tena, mbɛ a ɔ, “Kan mɔ, nn-na a ɔ sɔn, mbɛ i ta tichaya, Yataa an-na i a na. Mɔ ɔ mɔ ee che kamaya koe chɛ n ma-a, e miin ma ka, mɔɔ ni Yataa ma-a an mɔɛ chɛ kɔ.” 3 Mbɛ Chisɔsi ɔ, “N ni a ma din i tena, mɔ ɔ mɔ ee don Yataa 'a mansaya kɔɔ, mɔɔ ni a mɔɛ chɛ suun-da to a nama a. 4 Mbɛ kamin chɛ ɔ, “Musu si kai, ɛ kun ka ma to a ni suun, a gba fean bɔɛ ko a? A de ee che kɛn to, a ni a bu ya a nama a, mbɛ a-a a suun, gba fean bɔɛ ko a.” 5 Mbɛ Chisɔsi ɔ, “N ni a ma din to i tena, mbɛ mɔ ɔ mɔ ee che don-da Yataa 'a mansaya kɔɔ, mɔɔ ni a suun-da to yii a, an fea Yataa Nyina a. 6 Mɔ gbu woo mɔɛ nu, an fan mbe a suun dunya chɛ ɔ. Chɛɛ Yataa Nyina, an mbe a ma, mɔ gbu ni ma Yataa 'a denɛ a. 7 Chɛ an-na a fɔ, a ee che ma-a i ma kɔndɔ fii-a, ni n-na a fɔ, n dɔ, mɔɔ ni wo suun-da to a nama a. 8 Fia toen mu a ni bɔ kaina min, ɛ bɔ nɔ wan. Mɔ ɛ a bɔ kuiɛ a min fan, chɛɛ mɔ ee che a ɔ sɔn-da, ɛ ka tena kaka min ma. Chɛ an mbe ma mɔ gbu kan kɔ kan bɛɛ a, Yataa Nyina an mbe a ma, mɔ gbu ni suun to a nama a.” 9 Chɛɛ Nikɔdemɔsi ɔ, “Yataa Nyina ɛ che ka ma a ma-a, mɔ gbu ni suun to a nama a?” 10 Mbɛ Chisɔsi wɛɛ ɔ, “I sin, i ticha wa chɛ Isɔɛɛ mɔɛ n tɛ ɔ, fen mu ee chɛ n dɔ gbɛ? 11 N ni chɛ ma din i tena, mbɛ nn-na koe miin dɔ sɔn, nn mbe koɔ a si an fan ma. A yɛ to, nn-na koe miin dɔ yen, nn mbe siiya bɔ a si an fan ma. Chɛɛ chɛ gbɛɛ ɔ, wo dɔndɔ wɛɛ ma ma bɛn ni dan koe a nn 'na siiya a. 12 Ni n-na dunya ma koe n dɔ yian wo a, wo ma dan ni n na, wo ee che-a wo ni dan n na, ni n-na banda bu ɔ koe n dɔ yian wo a. Chɛ ɛ ma-a wan? 13 A sin ko, mɔ ɔ mɔ ma sɛ nin bɛ banda bu ɔ, mɔɔ dechee n fan, Mɔ Gbu 'a Denɛ. N fan ka-a nɔ, n yii-a nɛ dunya chɛ ɔ. 14 Mosisi ni tima min na suun fuinɛ ma, ka chɛ, min nyandenɛ ni kundu ɔ, a na-a a dɛn fan kɔnɛ a. A chia dɔndɔ gbe chɛ a, n fan, Mɔ Gbu 'a Denɛ wɛɛ, an mbe n dɛn-da ka wan. 15 Chɛ ɛ a ma-a wan, mɔ ɔ mɔ min kai faen mu n na, an ni kuɔ fɔ fɔɛ ma sɔn.” 16 Yataa na-a a 'a Den dɔndɔ gbe be wan, a ɔ yian koe a mɔɛ n na dunya ɔ, koadia min nyɔn sima ɛ a faa ɔ, mɔɛ gbɛɛ ko a. Chɛ an fɛ mu, ni mɔ ɔ mɔ-a a kai fa a 'a Den chɛ a, a ee fa-a, a ni to saya ɔ, chɛɛ ɛ kuɔ fɔ fɔɛ ma sɔn-da wan. 17 Koe min na mu to, Yataa ma a 'a Den chɛ a na ni dunya ɔ, kaa an na tɛ koe a mɔɛ n ma, a ni an tɔɔ. Chɛɛ a-a a a na, a ni ma an kun ka mɔɛ a. 18 Mɔ ɔ mɔ min mbe a kai fa-a a 'a Den chɛ a, Yataa ee kaa a tɛ-a a wakoe ma, a ni tɔɔ. Chɛɛ mɔ ɔ mɔ min ma a kai fa ni a a, kaa a bandenɛ mu tɛ-a a wakoe ma, a tɔɔ koe a, a mu min na, a ma a kai fa ni Yataa 'a Den dɔndɔ gbe a. 19 Yataa ɛ a 'a kaa a tɛ ka wan mɔɛ n ma. Manɛ na-a wan dunya chɛ ɔ, min mu tea a si Yataa ma. Chɛɛ mɔɛ n toen mu ma koe a an 'na ko yama n pimbi ɔ, an mbe e na ma man chɛ ɔ. Koe min na mu, an chɛ chɛ wai nu, an ma nyin. 20 Mɔ ɔ mɔ min mbe ko yama n ma, a ma to ni man chɛ a, a sin, a e na man chɛ ɛ ma kaina min. Koe min na mu, a ma to ni, man chɛ ni a 'a ko yama n na bɔ ya a ma. 21 Chɛɛ mɔ ɔ mɔ min mbe ko chɛndɛ ma, an mbe na man chɛ tena. A ɛ chɛ ma, min mbe a ma, man chɛ ni a ɔ yian, mbɛ ɛ kooya be wan Yataa ma, a chɛ chɛ wai n dɔ. 22 Chɛ gbakɔ, mbɛ Chisɔsi ben-da nɔ ma, an bɛ a fɛ denɛ n na. Mbɛ an ta-a Chudia chɛnyɛ ɔ. An-na tima kundu ɛnden ya wan nɔ, Chisɔsi ɛ ta-a yii chɛ-a mɔɛ n kunɛ ɔ, Yataa chia a. 23 A tima dɔndɔ gbe chɛ kɔɔ, Chɔn bɛɛ, a ni Ainon duu ɔ wan. Ainon chɛ, yii ni nɔ kaka, chɛ an fɛ ni, Chɔn na-a nɔ, ɛ yii chɛ-a mɔɛ n kunɛ ɔ, Yataa chia a, miin ni na an mbe a tan. A sin, Ainon chɛ tɛ ɔ nii ma yansan Sadin duu ɔ a. 24 Chɛ n ma-a pɛn, an mbe e na to Chɔn sa-a pimbi chenɛ a. 25 A tima chɛ a, Chɔn fɛ denɛ dɔ nu, kɔɔsa don-da wan an tɛ, an bɛ Chu mɔ dɔndɔ a. An kɔɔsa chɛ kunɛ ni mɔɛ ɛ a wandi ma ko buɛ min dɔ Yataa ko a. 26 Mbɛ an na-a Chɔn tena, an dɔ, “Kan mɔ, kaminɛ wɛɛ yen ko pan yii chɛ-a mɔɛ n kunɛ ɔ, Yataa chia a. Mɔɛ n mbe nyɔndɔn tena wan gbɛ a tena. A to-a wan i yii ma, wo fea ni kaminɛ min na Chɔdan yii kaka dɔndɔɛ ma, e min chee ka kunka mansa a, an kamin chɛ mu.” 27 Chɔn dɔ, “Ni koe ma-a ka, Yataa an dɔn-da a ma. 28 Wo wandi gbu, n 'na siiya n mu wo a, mbɛ n ni a fɔ wan, n dɔ, n fan ma kunka mansa a. Chɛɛ n dɔ, n 'na naen mu dechee a ya ɔ wan, chia ɔ bɛn koe a. 29 Sɛnama tana, musu fuu kai an ta mu a a. Chɛɛ an kai chɛ bɔɛ tana, min mbe ta a ya ɔ, dɔbɛn chɛ koe a, a too an ma sɔenɛ ɛ ma dechee. A bu ɔ dia-a wan, ni a-a musu fuu kai gbu kuiɛ a min. N ta buɔdia da faen mu ka wan gbɛ. 30 A nyin a wan ni ma mɔ chenama wa a, n sin tana n ni ma mɔ dɔɔma a.” 31 Mɔɛ chɛ, min ka-a banda bu ɔ, a benden mu mɔɛ gbɛɛ ma, tea ko a. Mɔɛ chɛ sin tana min mbe dunya chɛ ɔ, ɛ bai sa a si dunya ma koe n fan ma dechee. 32 Mɔɛ min ka-a banda bu ɔ, a tana, a-a miin dɔ yen nɔ, a-a miin na min, ɛ an fan dɔ yian. Chɛɛ chɛ gbɛɛ ɔ, mɔɛ n mbe ee an boo si a 'a sakana bai kɔɔ. 33 Chɛɛ mɔɛ nu, miin mbe an boo si-a a 'a sakana chɛ kɔɔ, an mbe ma-a ka a ɔ yian fan na, mbɛ Yataa 'a bai mu tea an na. 34 Mɔɛ chɛ, Yataa-a min na na, an mbe a 'a bai sa. Koe min na mu, Yataa-a a Nyina min na yii, a ni ma a fɛ, a da faen gban. 35 Mmɔ Fa Yataa toen mu a 'a Denɛ a, an-na a ma, a-a gbasaya be a ma fen kɔ fen kun ma. 36 Mɔɛ min mbe a kai fa-a Yataa 'a denɛ a, ɛ kuɔ fɔ fɔɛ ma sɔn-da wan. Chɛɛ mɔɛ min mbe ee a kai fa-a a 'a Denɛ a, a ee kuɔ fɔ fɔɛ ma sɔn-da. Koe min na mu, Yataa faa tɛenɛ an mbe ma-a a ma.

4

1 Chisɔsi na-a a ɔ sɔn fan, min fɔen ni Chu mɔɛ chɛ n ye, miin ni Fayisii n na. A fɔen fan ni an ye, mbɛ mɔɛ miin mbe bea tena a wan Chisɔsi fɛ, ɛ yii chɛ tena miin kunɛ ɔ, Yataa chia a, an da a koo, an ni ben Chɔn ta n ma. 2 Chɛɛ Chisɔsi wandi gbu sin fan nii yii chɛ-a mɔɛ n kunɛ ɔ, Yataa chia a, a fɛ denɛ n fan ni a ma tena. 3 Chisɔsi-a a a min kɛn bai min ni sa tena, a si a ma, a bɔ-a wan Chudia chɛnyɛ ɔ, mbɛ a yɛ-a Kadidi chɛnyɛ ɔ. 4 A ni kɛn ta-a Kadidi chɛnyɛ ɔ, a ben-da Samayia chɛnyɛ ɔ chia an na. 5 Samayia chɛnyɛ chɛ ɔ, a-a duu dɔndɔ tan fan, min tɔ ni Sika. Nɔ tena ɔ nii ma yansan duu gboo chɛ a, kai Chekɔpi na-a min be a 'a denɛ Chosɛfi ma. 6 Yii sonɛ wɛɛ, a wan kai Chekɔpi ta ni min na suun, a ni wan bɛ nɔ. Mbɛ Chisɔsi si-a an yii son chɛ baima, koe min na mu, tachɛ ɔ yansama chɛ na-a a gboo ɔ fa wan. A tima chɛ a, tee cheenɛ ni gbɛ mɔ kun tɛ. 7 A ɔ ma yansan ni, mbɛ Samayia musu dɔndɔ na-a yii bɔ tena son chɛ ɔ. Mbɛ Chisɔsi ɔ a ma, “N kɔ yii ɔ, n mbe n min.” 8 A tima chɛ a, a fɛ denɛ n taenɛ ni duu ɔ, daun fen san tena. 9 Mbɛ musu chɛ ɔ, “Chɛɛ Chu mɔɛ mu i a, n sin mu Samayia mɔɛ a. Mmɔ ma to ni mmɔ nyɔn na ɛnden bɛɛ a. E kun kan ma i ni yii fuin n ma?” 10 Mbɛ Chisɔsi ɔ, “Ni i na-a Yataa 'a wai nyima sɔn fan mɔɛ n tena, a sin, i na-a n sɔn fan, n fɛn mbe ka koɔ-a i tena, i ni tisa dɔ mende an chɛ-a n na. A sin, n ni yii be-a wan i ma, min mbe fɔɛ be mɔ gbu ma.” 11 Mbɛ musu chɛ ɔ, “Kai, yii bɔ chiti ee kɛn i boo ɔ, yii son chɛ sin dɔ yansan. E ka-a gbɛ mende yii chɛ a, min mbe fɔɛ be mɔ gbu ma? 12 Nn bemba n ta bemba kai Chekɔpi, an-na yii son chɛ to nn boo ɔ. An bɛ a 'a denɛ n na, an ni yii son chɛ an min. A 'a sɔ fenɛ n bɛɛ, yii son dɔndɔ gbe chɛ ɔ yii, an ni an min. I toen mu i ni a fɔ n ye, mbɛ i benden mu nn bemba Chekɔpi ma, ae?” 13 Mbɛ Chisɔsi ɔ, “Mɔɛ miin gbɛɛ, an mbe yii son chɛ min, an kanɛ a ɛ gbaa-a wan to. 14 Chɛɛ mɔ ɔ mɔ min mbe yii chɛ min, n mbe min be-a a ma, a kanɛ a ee gbaa-a to kuɔ fɔ. N mbe yii chɛ min be-a a ma, ɛ ma-a wan a faa ɔ. A sin, an yii chɛ ɔ ee tɛ-a, ɛ a ma-a wan, a ni kuɔ fɔ fɔɛ ma sɔn.” 15 Mbɛ musu chɛ ɔ, “Kai, an yii chɛ be n ma, n mbe a min, min mbe a ma-a, n kanɛ a ee gbaa-a to kuɔ fɔ ko a. N mbe ee ma-a to yii chɛ ɔ chia ma, yii bɔɛ a tee ɔ tee a.” 16 Mbɛ Chisɔsi ni a fɔ gbɛ a ye, a ɔ, “Ta wɛ, i ni i chɛɛ chee, mbɛ wo fea na-a a a.” 17 Mbɛ musu chɛ ɔ, “Chɛɛ kai ee kɛn n boo ɔ.” Mbɛ Chisɔsi ɔ, “I-a a fɔɛ min chɛ, i ɔ, kai ee i boo ɔ, tea mu a a.” 18 A ɔ, “Kai duu an fan-na i si ka gbɛ musu a, a sin, wo fea ɛ ka min bɛɛ a sanche, an ma i fuu ni. Chɛ an-na a fɔ, i-a bai min fɔ ka n ye sanche, tea mu.” 19 Mbɛ musu chɛ ɔ gbɛ, “Kai, n-na a ɔ yen gbɛ, mbɛ Yataa 'a gbonka chɛ mɔɛ mu i a. 20 Nn bemba n ta bemba nu, Samayia chɛnyɛ chɛ ɔ, an ni Yataa fai kɔnkɔɛ chɛ an dɔ nɛ. Chɛɛ wo wan Chu mɔɛ nu, wo ɔ, mbɛ Yataa-a a fɔ wan, a ɔ, mɔ ɛ a fai dechee Chuusaɛn duu ɔ wan.” 21 Mbɛ Chisɔsi ɔ, “Bɔɔɛ, dan n da a kuiɛ a. Tima ɛ na tena wan che-a, tima min na, mɔɛ n mbe ee Fa Yataa fai-a kɔnkɔɛ chɛ ma, an mbe ee a fai-a Chuusaɛn duu wɛɛ ɔ. 22 Wo wan Samayia mɔɛ nu, wo ma a ɔ sɔn, wo e min gbu fai tena. Chɛɛ nn fan Chu mɔɛ nu, nn-na a ɔ sɔn fan, nn mbe min fai. Koe min na mu, Yataa-a nn too ɔ dia wan, a ma koe a, mɔɛ n ni a 'a bauncha ma sɔn. 23 Chɛɛ tima ɛ che-a wan, a sin gbu che-a gbɛ, tima min na, mɔɛ miin mbe Fa Yataa fai, a Nyina ni gbasaya be an ma a fai koe a. A Nyina chɛ, ɛ tea ɔ yian-da wan to an na a si a wan Fa Yataa wandi ma. An mɔɛ chɛ n fan mbe Yataa fai tea chia a, a sin mbe an fan yan tena a fai koe a. 24 Yataa ma mɔ gbu a. Chɛ an fɛ mu, mɔɛ miin mbe a fai, a nyin Yataa Nyina wandi ni gbasaya be an ma, a fai koe a. A yɛ to, mbɛ a-a tea ɔ yian an na, a si a wandi ma.” 25 Mbɛ musu chɛ ɔ, “N-na a ɔ sɔn fan, mbɛ Chasi, kunka mansa ɛ na tena wan. A sin mbe na-a kɛn, ɛ ko ɔ ko ɔ yian-da wan mmɔ a.” 26 Mbɛ Chisɔsi ɔ, “N fan gbu mu an mɔɛ chɛ a, n fɛn mbe ka koɔ tena i tena.” 27 Ɛ bai chɛ fɔ-a dechee, mbɛ a fɛ denɛ chɛ n yɛ-a, a ka duu ɔ. A sin, an da ɔ gbaa-a wan, an-na a tan kɛn chia ɔ bɔɛ ɔ, an fea musu chɛ a. Chɛɛ an dɔndɔ wɛɛ ma musu chɛ ɔ tisa ni, a ni a fɔ, a ɔ, “I toen mu fen na?” Dɔndɔ wɛɛ ma Chisɔsi ɔ tisa ni, a ni a fɔ, a ɔ, “Fen mu e koɔ-a musu chɛ tena?” 28 Mbɛ musu chɛ-a a 'a yii chiti to, mbɛ a yɛ-a duu ɔ. Mbɛ a-a koe chɛ ɔ yian nɔ mɔɛ n na. 29 Mbɛ a ɔ, “Wo na, wo ni kaminɛ yen, min-na ko ɔ ko ɔ yian n na, n-na miin gbɛɛ ma wɛ. A e na ma kunka mansa chɛ an na?” 30 Mbɛ mɔɛ n na-a Chisɔsi tena, a ka an duu chɛ ɔ. 31 Chɛ ɛ ma-a tima min na, Chisɔsi fɛ denɛ n ni a ma nande tena wan, an dɔ, “Kan mɔ, daun fenɛ sima daun gbɛ.” 32 Chɛɛ a ɔ, “Daun fenɛ ɛ n boo ɔ, wo dɔndɔ wɛɛ ma min bakoe ɔ sɔn.” 33 Mbɛ a fɛ den chɛ nu, an bun-da an nyɔn dɔ tisa-a, an dɔ, “Mɔɛ an mbe na na daun fenɛ a kai chɛ ye?” 34 Mbɛ Chisɔsi ɔ, “Min 'na dɛya mu n na, ni n-na a faa ma koe ma, n ni a 'a wai a ban, a-a n sɔ min na, an mu n 'na daun fenɛ a. 35 Wo e a fɔ wan, wo ɔ, a ka a fɛn tima ma, wo ɔ, kau naanin fan mbe ben, wo ɔ, a tɛ koe a. Chɛɛ n ni a ma din wo tena, mbɛ wo ni an sɛnɛ gbu ma mɛn, wo e a ɔ yen-da wan, mbɛ fen chɛ n gbu, miin fɛndenɛ ɛ ka, an tɛ tima gbu che-a. 36 A tɛ mɔɛ nu, an mbe wan gbɛ wai-a, an sin mbe wan gbɛ an 'na tɔnɔnɛ ma sɔn-da. An sin mbe an fɛn fen chɛ min na sɔn sɔn-da, an nɛ mɔɛ n na, miin-na kuɔ fɔ fɔɛ ma sɔn. A fɛn mɔɛ nu, an bɛ a tɛ mɔɛ n na, an 'na buɔdia koo. 37 Chɛ fɛ mu, tea mu tai chɛ a, an mbe min tɛ, an dɔ, ‘A fɛn mɔɛ ɛ gba, a tɛ mɔɛ wɛɛ ɛ gba.’ 38 N yen ko, n-na wo sɔ wo bɔɛ n ta tɔɔ gba tɛ-a, wo-a tɔnɔnɛ sɔn an 'na taa sende ɔ.” 39 Samayia mɔɛ chɛ n sɛsɛ nu, an duu chɛ ɔ, an na-a an kai fa wan Chisɔsi a. Chɛ na-a ka musu chɛ da a bai an ma, a na-a a fɔɛ min chɛ, a ɔ, a-a ko ɔ ko ɔ yian a a, a ɔ, a wan musu chɛ, a ɔ, a na-a min ma fɔɛ ɔ. 40 Chɛ an-na a fɔ, an na-a kɛn Chisɔsi tena, an-na a ɔ bia wan disa a, ma koe a nɔ an tena. Mbɛ Chisɔsi-a tee fea ben nɔ an tena. 41 A ka chɛ ma, mɔɛ n sɛsɛ, a-a sakana bai min sa, an-na a ma, an-na an kai fa a a. 42 Mbɛ an dɔ musu chɛ ma, an dɔ, “I da a bai dechee an mbe ee a ma tena to, nn mbe nn kai fa tena a a. Chɛɛ koe min na mu, nn fandi gbu, nn-na a da a bai a min. A sin, nn-na a ɔ sɔn gbɛ, mbɛ a wan gbu mu dunya chɛ baun mɔɛ a.” 43 Chisɔsi-a tee fea chɛ ben kɛn nɔ, mbɛ a ben-da Kadidi chɛnyɛ ɔ. 44 A wandi gbu na-a a fɔ wan, a ɔ, “Baa ee Yataa 'a gbonka chɛ mɔɛ ma, a wandi gbu waa a.” 45 A che-a kɛn Kadidi, nɔ mɔɛ nu, an-na an boo si wan a kɔɔ. Koe min na mu, an bɛɛ na-a ta wan Chuusaɛn duu ɔ, kun bɔ a ɔ bɛnɛ kun ma. A tima chɛ a, an na-a ko ɔ ko yen fan, Chisɔsi na-a miin ma, an bɛn chɛ ɔ. 46 Mbɛ Chisɔsi che-a Kana duu ɔ, Kadidi chɛnyɛ chɛ ɔ, a na-a yii ma fan kaina min gbɛ a. Duu dɔndɔ ɔ, min tɔ ni Kapanaun, kɔmende mɔ dɔndɔ 'a den kaienɛ gbandienɛ ni wan nɔ. 47 Mbɛ kamin chɛ, a-a Chisɔsi na koe a min Kadidi, a ka Chudia chɛnyɛ ɔ. A-a chɛ a min kɛn, mbɛ a na-a a tan. Kamin chɛ-a Chisɔsi ɔ tisa wan, disa ɔ, a ɔ, an ni yii Kapanaun, a ni a 'a denɛ a baun, min ni gbɛ sa ɔ dechee saya ma kɔnɛ a. 48 Mbɛ Chisɔsi ɔ a ma, a ɔ, “Wo wan, ni wo ma kamaya koe n dɔ yen ni ma-a, wo dɔndɔ wɛɛ ee wo kai fa n na.” 49 Mbɛ kɔmende mɔɛ chɛ ɔ, “Kai, na, mɔ ni ta, n 'na denɛ ma na fa.” 50 Chisɔsi ɔ a ma, a ɔ, “Ta dechee, i 'a denɛ ɛ baun tena wan.” Kamin chɛ dan-da wan Chisɔsi da a bai chɛ a, mbɛ a yɛ-a. 51 A to-a yɛ an na a waa a, mbɛ an bɛn-da a 'a bɔi denɛ n na. An dɔ, “I 'a denɛ ee fa tena.” 52 Mbɛ a-a an dɔ tisa, ni tima min na ni a 'a denɛ-a a kuu sɔ fisa-a. Mbɛ an dɔ, “Chima chɛ bɔ-a a ɔ kunun fan, tee ben-da kɛn ɛnden na kun tɛ ma.” 53 Mbɛ a puin-da den chɛ fa yii ma, mbɛ a tima chɛ a ni kunun, Chisɔsi na-a a fɔ a ye, a ɔ, a 'a denɛ ɛ baun-da wan. Mbɛ a wandi ni ma, a basan a 'a chenɛ a mɔɛ n gbɛɛ a, an-na an kai fa Chisɔsi a. 54 A gba fean bɔɛ an nɛ, Chisɔsi ka-a Chudia chɛnyɛ ɔ, a yɛ-a Kadidi, mbɛ a-a kamaya koe ma.

5

1 Chɛ gbakɔ, Chisɔsi sɛ-a wan to Chuusaɛn, Chu n 'na bɛnɛ dɔndɔ ko a to. 2 Nɔ Chuusaɛn duu chɛ ɔ, ben chia ni wan nɔ sa n na, yii pai ɛ a baima. Ku ni bun dɔ duu an pai chɛ a tindanɛ ben-da. Chu mɔɛ n ni an kaina chɛ chee, an dɔ, Betɛsɛda. 3 Gbandi mɔɛ n sɛsɛ ni wan nɔ, an fanka wa, an mbe sa ɔ kuu chɛ n kɔɔ. Fion tɔɛ n ni wan nɔ, namaa n mbe nɔ, a basan chɛ n na, miin chenɛ faen ni an ma. 5 Kamin dɔndɔ ni wan nɔ, a tima chɛ a, min gbandienɛ ni san bi sawa kun ma sɛi ko a. 6 Mbɛ Chisɔsi-a a yen nɔ sa ɔ. A sin-na a ɔ sɔn, mbɛ an kamin chɛ, ɛ ka gbɛ an gbandi chɛ ɔ, tima ɔ yansama an ko a. Chɛ ko a, mbɛ a ɔ, “I toen mu i ni baun gbandi chɛ ɔ?” 7 Mbɛ gbandi mɔɛ chɛ ɔ, “Kai, mɔ ee n boo ɔ nɛ, min mbe dɛ n na yii chɛ ɔ, tima ɔ tima dechee ni a ɔ ma-a. N mbe ma n gbɔ-a, n ni dɛ a ɔ, mɔ dɔ mende ɛ dɛ wan a ɔ n ya ɔ.” 8 Mbɛ Chisɔsi-a a fɔ a ma, a ɔ, “I kɔɔ sɔ, i ni i 'a waa ya, mbɛ i ta-a.” 9 Mbɛ a ya kɔɔɛ a, kamin chɛ gbu baun-da a 'a gbandi chɛ ɔ, a-a a 'a waa ya, mbɛ a bun-da ben ben-da. Koe chɛ na-a chɛ a ɔ Chu n 'na suin tee ma wan. 10 Chɛ-a a ma wan, Chu mɔɛ n ya ɔ sɔɛ nu, an-na a fɔ kamin chɛ ye, an dɔ, “Suin tee mu bi a, a sin, mmɔ 'a sawa ma dɔn ni a ma, i ni ma ka ben ben-da i 'a waa a.” 11 Chɛɛ kamin chɛ ɔ, “Chɛɛ mɔɛ min-na a ma n baun-da, a na-a a fɔ ka wan n ye, a ɔ, n ni n 'na waa ya, a ɔ, n ni ben ben.” 12 Mbɛ an-na a ɔ tisa, an dɔ, “Mɔɛ minan mu, min-na chɛ fɔ i ye?” 13 Chɛɛ kaminɛ chɛ min na-a baun ka, a nii ma a ɔ sɔn, mɔɛ min na-a a ma a baun-da. Koe min na mu, fanka min ni nɔ a da a ni koo. Chɛ na-a a ma wan Chisɔsi chen gba ɔ chɛ-a an mɔɛ n tɛ ɔ. 14 Chɛɛ chɛ gbakɔ, Chisɔsi-a kamin chɛ yen fan Yataa 'a kata ɔ, mbɛ a-a a fɔ a ma, a ɔ, “A yen ko, i baun-da gbɛ sanche. Chɛ an fɛ mu, i ma ko yama ma to. Ni chɛ ma, tɔɔya min mbe i tan-da gbɛ, ɛ yaua-a a saa ma.” 15 Mbɛ kamin chɛ ka-a nɔ, a ta-a, mbɛ a-a Chu mɔɛ n ya ɔ sɔɛ chɛ n tan. A-a a ɔ yian an na, mbɛ Chisɔsi an na-a a baun gbandi chɛ ɔ. 16 Chu mɔɛ chɛ nu, an ya ɔ sɔɛ chɛ n-na chɛɛ ma nyɔncha bun fan Chisɔsi ma, kamin chɛ 'a baun koe a, an 'na suin tee chɛ ma. 17 Mbɛ Chisɔsi ɔ, “Fa Yataa ɛ basan fan mɔɛ n ma, tima ɔ tima ko a. N bɛɛ, a nyin n ni a ma ka.” 18 A 'a bai chɛ, a gbu-a a ma gbɛ, Chu n ya ɔ sɔɛ chɛ n-na an faa a kɔɔ gbɛ chɛndɛ chɛ, a fa koe a. An ma yiinachii chɛ chɛ ni, an 'na sawa chɛ dechee an yɔn koe ko a. Chɛɛ a-a a fɔɛ min chɛ ka, mbɛ a fa an nɛ Yataa a. Mbɛ a chia chɛ a, a-a a wandi ya wan ka, mbɛ an fea Yataa a, an na kanden fan mu. 19 Mbɛ Chisɔsi ɔ an ma, a ɔ, “N ni chɛ ma din wo tena, mbɛ n fan, n fɛn mu ka Yataa 'a denɛ a, n mbe ee che ko ɔ ko ma-a, n kun ma gbasaya a. N mbe koe chɛ n fan ma dechee, n mbe Fa yen miin ma-a. N Fa, ɛ koe miin ma, n bɛɛ, n fɛn mu a 'a denɛ a, n mbe an fan ma. 20 Chɛ ɛ ma wan, koe min na mu, n ko a di Fa ye. A sin, ɛ koe miin gbɛɛ ma, ɛ an dɔ yian fan n na. A sin mbe kamaya koe n dɔ yian-da wan n na, miin benden mu chɛ ma kaka, miin mbe wo gbɛɛ da n dɔ gbaa a. 21 N Fa, ɛ mɔɛ n kɔɔ sɔ wan, a ka saya ɔ, ɛ fɔɛ be an ma. A chia dɔndɔ gbe chɛ a mu, n bɛɛ, n mbe fɔɛ be-a chɛ n ma, n toen mu n ni a be miin ma. 22 A yɛ to, Fa wandi sin, a ee kaa a tɛ mɔ ɔ mɔ wakoe ma. Chɛɛ a-a a nɛnɛ gbasaya gbɛɛ be n fan ma. 23 A-a chɛ ma, min mbe a ma, mɔɛ n gbɛɛ ni basɔmaya be n ma, yɔ an mbe a be buɛ min dɔ Fa ma. Mɔ ɔ mɔ min ma basɔmaya be ni n ma, a mɔɛ chɛ ma a be ni ka Fa an ma, min-na n sɔ. 24 “N mbe chɛ ma din tena wo tena, mbɛ mɔɛ min mbe n da a bai a min-da, a ni a kai fa Fa Yataa a, min-na n sɔ, a mɔɛ chɛ ɛ kuɔ fɔ fɔɛ ma sɔn-da wan. A mɔɛ chɛ, kaa a ee tɛ-a a wakoe ma, a ni tɔɔ. A ban-da saya ɔ tandin-da, a ta kuɔ fɔ fɔɛ ɔ. 25 Ka n mbe chɛ ma din wo tena, mbɛ tima ɛ che tena wan, a gbu sin che-a, tima min na, mɔ faenɛ n mbe n kuiɛ a min-da, n fan, Yataa 'a denɛ. An fɛn sin mbe an too ma sɔ-a a ma, an mbe kuɔ fɔ fɔɛ ma sɔn-da wan. 26 N Fa ɛ a ma wan, mɔɛ n mbe fɔɛ ma sɔn. A chia dɔndɔ gbe chɛ a, n bɛɛ, a 'a denɛ, a-a a ma, n mbe fɔɛ be. 27 A sin-na n si ka wan to a gbasaya chɛ ɔ, kaa a tɛ koe a. Koe min na mu a-a chɛ ma, n fan mu Mɔ Gbu 'a Denɛ a. 28 Bai chɛ ma wo da ɔ gbaa, n mbe na tena min fɔ-a. Tima ɛ che-a wan, mɔɛ miin gbɛɛ faen mu, an ni n kuiɛ a min. 29 Mbɛ an bɔ-a, a ka saya ɔ. Chɛ nu, miin na-a ko chɛndɛ ma, an mbe ma-a wan to fɔɛ ɔ. Chɛ n sin, miin na-a ko yama ma, an mbe yɛ-a wan to fɔɛ ɔ, mbɛ kaa a tɛ-a an bakoe ma, tɔɔya sa-a an ma.” 30 Chisɔsi ɔ, “N mbe ee ko ɔ ko ma n ta gbasaya ɔ. Fa Yataa ɛ a fɔ buɛ min dɔ n ye, n mbe kaa a tɛ ka wan. Chɛ an fɛ mu, n sin mbe tea kaa an na tɛ. Tea mu chɛ a, koe min na mu, n mbe koe miin ma, n fandi faa ma koe n ma. Chɛɛ n mbe koe miin ma dechee, an fan nɛ chɛ n na, min-na n sɔ, a toen mu miin na. 31 “Ni n ma-a siiya a, n fandi ko a, mbɛ n mbe min fɔ-a, fanka ee ma a. 32 Chɛɛ siiya ɛ bai sa tena wan, a si n bakoe ma. N sin-na a ɔ sɔn fan, mbɛ a 'a siiya a si n ma, tea mu a a. 33 Wo na-a mɔɛ n sɔ wan, an ta-a Chɔn tena. A wɛɛ sin-na tea fɔ wan, a si n ma. 34 N mbe ee chɛ ma tena, min mbe a ma, n ni mɔ gbu 'a siiya ma sɔn. N mbe Chɔn 'na siiya wakoe fɔ tena dechee, min mbe a ma, wo ni Yataa 'a bauncha ma sɔn. 35 Chɔn na-a bai min sa, min ni yɔ manɛ wo tena, a na-a a ma wan, wo bu ɔ dia-a. Tima dɔ ko a, wo ma bɛnden fan ni a 'a bai a min koe a, min ni yɔ manɛ, a sin na-a wo bu ɔ dia wan. 36 Chɛɛ siiya ɛ wan nɔ n ko a, n faen mu min na, a ben Chɔn ta siiya ma. N mbe koe miin ma, chɛ chɛ wai chɛ nu, Fa Yataa-a n sɔ miin chɛ koe a, an fan mbe koɔ n ko a. N mbe an chɛ buɛ min dɔ, an fan mbe a ɔ yian, mbɛ Fa an-na n sɔ. 37 A yɛ to, Fa min-na n sɔ, a wɛɛ-a tea ɔ yian fan mɔɛ n na, a si n ma. Chɛɛ wo ma a kuiɛ a min nin bɛ, tee dɔndɔ wɛɛ ko a, wo ma a yen nin bɛ wo ya a. 38 A sin, a 'a sakana bai ma si tena sɔn ni wo faa n dɔ. Koe min na mu, wo ma dan ni n na, a-a n fɛn sɔ. 39 Wo e Yataa 'a gboo kan fan chɛndɛ chɛ, koe min na mu, ɛ wo yii ma, an mbe a ma-a, wo ni kuɔ fɔ fɔɛ ma sɔn. Bai miin gbu sin nyɛnden mu gboo chɛ ɔ, an sien mu n fan ma. 40 Chɛɛ chɛ gbɛɛ ɔ, wo ma to ni wo ni na n tena, min mbe a ma, wo gbu ni an fɔɛ chɛ ma sɔn. 41 “Mɔ gbu 'a tando n ko a, n ma a yen ni fen kɔ fen na. 42 Chɛɛ a ka chɛ ma, n-na a ɔ sɔn fan, mɔɛ min nyɔn sima mu wo a. A sin gbu, n-na a ɔ sɔn fan, mbɛ koadia kan kɔ kan, a ee wo faa n dɔ Yataa ko a. 43 N fan mu mɔɛ a, Fa-a min na na, ma koe a a ya a wo tɛ ɔ. Chɛɛ wo ma wo boo si ni n kɔɔ. Chɛɛ mɔɛ chɛ nu, miin mbe na dechee an fandi kun ye, wo e wo boo si an fan kɔɔ. 44 Wo bu ɔ dia-a wan, wo e ma wo nyɔn bai-a. Chɛɛ wo ee koe n ma, an ma buɛ n na, min mbe a ma, a wɛn mu dechee Yataa a, a ni wo bai. Mbɛ wo e che ka ma, wo ni dan n na? 45 Chɛ wɛɛ ni ma, a ma ma wo yii ma, mbɛ n fan mbe kun yama si-a wo kun ma Fa tena. Chɛɛ Mosisi wandi gbu, wo yii sɔen mu min ma, sɔ koe a wo kɔ, an mbe an kun chɛ si-a wo kun ma. 46 Ni wo na-a dan fan gbu Mosisi a tea tea gbu a, wo ni dan-da wan n na, a mu min na, a-a gboo nyɛn a si n fan ma. 47 Chɛɛ ni wo ma dan ni bai chɛ a, a-a min nyɛn, wo ee kun wo ni dan n da a bai a.”

6

1 Chɛ gbakɔ, mbɛ Chisɔsi-a Kadidi yii wa chɛ tɛ, an bɛ a fɛ denɛ n na. Mɔɛ dɔ n ni an yii chɛ chee, an dɔ, Tibɛyasi. 2 Mbɛ mɔ fanka wa n bea-a a fɛ, koe min na mu, an na-a a ɔ yen fan, a na-a a ma buɛ min dɔ gbandi mɔɛ n baun-da. 3 Mbɛ Chisɔsi sɛ-a kɔnkɔɛ a, mbɛ a si-a nɔ, an bɛ a fɛ denɛ n na. 4 A tima chɛ a, kun bɔ a ɔ bɛnɛ chɛ, a bia tima ma naen fan ni gbɛ. 5 Chisɔsi-a a ya a ta, mbɛ a-a mɔ fanka wa chɛ yen, an mbe na-a a tena. Chɛ ko a, mbɛ a ɔ Fiipi ma, a ɔ, “Mmɔ ɛ daun fenɛ san mende, min mbe kun mɔɛ chɛ n gbɛɛ ko a?” 6 A na-a chɛ fɔ, min mbe a ma dechee, a ni Fiipi yiima sɔn. Tea ni min na, a wan Chisɔsi na-a a ɔ sɔn fan, ɛ koe min ma tena, a e na to tisa chɛ chɛ-a. 7 Mbɛ Fiipi ɔ, “Min mbe a ma mɔ ɔ mɔ ni daun fenɛ sima daun, a kɔpɔɛ chɛ, ɛ ta wan kau sɛi pawa ɔ, daun fen chɛ san koe a.” 8 A fɛ den chɛ n dɔndɔ, min tɔ ni Anduu, Saimɔn Pita dɔɛ, a koɔ-a wan, 9 a ɔ, “Kaienɛ yen ko nɛ, biidi gbugbu duu, ɛ min boo ɔ, a basan nyɛ gbaa fea a. Chɛɛ chɛ gbu, ɛ fen bɔ mɔ bonda chɛ n ko a?” 10 Mbɛ Chisɔsi ɔ a fɛ den chɛ n ma, a ɔ, “Wo a fɔ mɔɛ chɛ n ni si.” An kaina chɛ gbɛɛ yaen fan ni bin gbii a. Chɛ ko a, mɔɛ chɛ n gbɛɛ si-a wan ta-a. Mɔ kaima miin gbɛɛ ni nɔ, an taen fan ni mɔ wu duu ɔ. 11 Mbɛ Chisɔsi-a biidi chɛ ya, a-a Yataa wai bɔ, mbɛ a-a a ma, a du-a mɔɛ chɛ n gbɛɛ ma, miin ni ka nɔ si ɔ. A-a ko dɔndɔ gbe chɛ an ma nyɛ chɛ wɛɛ a, mbɛ a-a a ma, a wɛɛ du-a mɔɛ chɛ n ma. A sin, an gbɛɛ, an-na an bu fa daunɛ chɛ wan, yɔ an toen ni min na. 12 An gbɛɛ bu fa-a kɛn, mbɛ a-a a fɔ a fɛ denɛ n ma, a ɔ, “Wo an da tɔɛ chɛ n na sɔn sɔn, mmɔ ma a pɛɛ ɛndenɛ wɛɛ yayi.” 13 Mbɛ an-na mɔɛ chɛ n da tɔɛ chɛ gbɛɛ a sɔn sɔn. A bɛn-da samba fa tan kun ma fea an ma, biidi gbugbu duu chɛ. 14 Mɔɛ chɛ n-na kamaya koe chɛ ɔ yen kɛn, Chisɔsi-a min ma, mbɛ an dɔ, “Tea ko a, kamin chɛ, Yataa 'a gbonka chɛ mɔɛ chɛ an nɛ. Mosisi na-a chɛ an na koe kɔɔ fɔ dunya ɔ.” 15 Chɛɛ Chisɔsi na-a a ɔ sɔn kɛn, mbɛ an toen ni, an ni a bia gbasaya a, an ni a din a ma, ma koe a mansa a, a bɔ-a wan an tɛ ɔ. Mbɛ a dɔndɔ gbe, a-a a ma sɛ to kɔnkɔɛ ɔ. 16 Yɛɛ ma tee che-a kɛn, Chisɔsi fɛ denɛ n yii-a wan yii wa da a. 17 Fitii che-a ka wan aan, Chisɔsi nii ma na nin bɛ an tena. Mbɛ an sɛ-a dɛndɛ ɔ, an bun-da yii chɛ tɛ-a, an mbe yɛ-a Kapanaun teen na. 18 A tima chɛ a, fia-a a kuu sɔ wan bɔ-a gbasaya a, mbɛ yii wa chɛ yaua-a, a tɛ koe a. 19 Chisɔsi fɛ den chɛ nu, an na-a dɛndɛ chɛ wii wan gbɛ mai sawa nyɔn ko a, chɛ ma, mai naanin, an mbe e na to a yen-da, ɛ na-a tachɛ chɛ-a yii wa chɛ a, dɛndɛ chɛ baima. Mbɛ an gbɛɛ, chiandia-a an gboo fa gban. 20 Mbɛ a ɔ an ma, a ɔ, “Wo ma chian, n fan mu.” 21 Mbɛ an-na an boo si Chisɔsi kɔɔ dɛndɛ chɛ ɔ, buɔdia a. Mbɛ a ya kɔɔɛ a ka, an 'na dɛndɛ chɛ gbu, a che-a an na tindi ma, an ni ta tena kaina min. 22 Banda ɔ ka-a kɛn, mɔ fanka chɛ nu, miin na-a to nɔ yii chɛ kaka dɔndɔɛ chɛ ma, an na-a a ɔ sɔn fan, mbɛ dɛndɛ dɔndɔɛ an ni nɔ. An na-a a ɔ sɔn fan to, mbɛ Chisɔsi fɛ denɛ n ni ta tena tima min na, an bɛ an nii ma ta ni a a. Chɛɛ an na-a a to an gbaa wan. 23 Chɛɛ dɛndɛ dɔ gbɛɛ nu, an na-a wan, a ka Tibɛyasi duu ɔ. An na-a an kaina chɛ baima, Mansa Chisɔsi na-a Yataa wai bɔ kaina min, mbɛ mɔ fanka wa chɛ-a biidi chɛ daun. 24 Mɔ fanka wa chɛ-a a ɔ yen fan, mbɛ Chisɔsi nii nɔ, n mbe ee baa a fɛ denɛ n ma. Mbɛ mɔɛ chɛ n sɛ-a dɛndɛ chɛ n dɔ, nɔ tindi chɛ ma, mbɛ an ta-a Kapanaun, an mbe an ya a kan-da Chisɔsi a. 25 An-na a yen kɛn, yii chɛ kaka dɔndɔɛ ma, an dɔ, “Kan mɔ, i-a a fo nɛ tima minan na?” 26 Chisɔsi ɔ, “N mbe chɛ ma din tena wo tena, koe min na mu, wo e n yan tena. Wo-a biidi miin daun, wo bu fa-a gban, an fɛ mu. Chɛɛ an ma a fɔ ni, mbɛ wo-a kamaya koe chɛ n dɔ gbɛ wan, n-na miin ma. 27 Chɛɛ wo ma butuinɛ chɛ daun fenɛ ko a, min mbe yɔn. Wo e min ma, wo butuinɛ chɛ daun fenɛ ko a, min mbe mɛ, min mu kuɔ fɔ fɔɛ a. Daun fen chɛ mu, n fan, Mɔ Gbu 'a Denɛ, n mbe a be-a wo ma. Koe min na mu, Fa Yataa-a a ɔ yian, mbɛ a boo ɛ wan n kɔɔ.” 28 Mbɛ an dɔ, “Nn mbe fen gbu n ma gbɛ, Yataa toen mu nn ni koe miin ma?” 29 Mbɛ Chisɔsi ɔ, “Yataa toen mu wo ni koe min ma, an nɛ wo dan koe a n na, a-a n fɛn sɔ.” 30 Mbɛ an dɔ, “Mɔɔ ni i-a kamaya koe ma, nn ni a ɔ yen, a ma koe a, nn ni dan i da a bai a. E fen ma-a? 31 Koe tɔmɔsi chɛ yen bɛ, mmɔ bemba n ta bemba nu, an-na daun fenɛ daun fan suun fuinɛ ma, an ni min chee, an dɔ, mana. A na-a ma wan dechee, yɔ a nyɛnden mu buɛ min dɔ Yataa 'a gboo ɔ, mbɛ a-a daun fenɛ be wan an ma, a ka banda bu ɔ, a daun koe a.” 32 Chisɔsi ɔ, “N mbe chɛ ma din tena wo tena, mbɛ Mosisi an nii ma daun fen chɛ be ni wo ma, min ka-a banda bu ɔ. Chɛɛ Fa Yataa, an mbe daun fenɛ chɛndɛ chɛndɛ be wo ma, a ka banda bu ɔ. 33 A mu min na, daun fen chɛ, Yataa-a min be, a mu chɛ an na, min ka-a banda bu ɔ, a yii-a, a-a fɔɛ be dunya ma.” 34 Mbɛ an dɔ, “Kai, an daun fen chɛ be nn ma, tima ɔ tima ko a.” 35 Mbɛ Chisɔsi ɔ, “N fan mu daun fen chɛ a, kuɔ fɔ fɔɛ be koe a. Ni mɔ ɔ mɔ na-a n tena, mbɛ a-a a kai fa n na, kɔnkɔ ee a mɔɛ chɛ bia-a to kuɔ fɔ, a sin, a kanɛ wɛɛ a ee gbaa-a to. 36 Chɛɛ n-na a fɔ wan wo ye, mbɛ wo e n yen tena wɛɛ ka boo ɔ boo, wo ee wo kai fa-a n na. 37 Chɛɛ chɛ gbɛɛ ɔ, Fa Yataa-a miin be n ma, an mbe na-a wan n tena. N sin, n mbe ee mɔ ɔ mɔ a yɛ-a, min mbe na-a n tena. 38 A mu min na, n yii-a dunya ɔ, Fa Yataa faa ma koe an chɛ koe a, a wan-na n sɔ. Chɛɛ n ma na ni n fandi ta faa ma koe an fan chɛ koe a. 39 A sin, a wɛn-na n sɔ, a faa ma koe n fan nɛ. Mbɛ n ma fo a 'a mɔɛ chɛ n dɔndɔ wɛɛ a, mɔɛ chɛ nu, a-a miin be n ma. Chɛɛ tee dankama ma, n ni a ma, an gbɛɛ kɔɔ ni sɔ, a yɛ fɔɛ ɔ. 40 A mu min na, Fa Yataa toen mu min na, an nɛ. Mɔ ɔ mɔ min mbe dɔn-da a ma, mbɛ Yataa 'a denɛ mu n na, mbɛ a-a a kai fa n na, n ni a ma, a ni kuɔ fɔ fɔɛ ma sɔn. A sin, n mbe an kɔɔ sɔ-a wan, a ka saya ɔ tee dankama ma.” 41 Mbɛ mɔɛ chɛ n bun-da gbonyɛ-a an nyɔn tɛ ɔ, a si a ma. An dɔ, fen mu ɛ a fɔ, a ɔ, a wan mu daun fenɛ chɛ a, Yataa na-a min na yii a ka banda bu ɔ. 42 Chɛ-a a ma wan, an dɔ, “Mɔna chɛ an nɛ, Chisɔsi, Chosɛfi 'a den chɛ. An ma chɛ a? Mmɔ-a a fa sɔn fan, an fea a de a. Ɛ ma ka ma gbɛ, a ni a fɔ to mmɔ ye, mbɛ a ka-a banda bu ɔ wan, a yii-a nɛ?” 43 Mbɛ Chisɔsi ɔ, “Wo sɛmbɛ wo kunɛ ma tɔɔ koe a. 44 Mɔ ɔ mɔ ee che na-a n tena, mɔɔ ni Fa-a a ma, a na-a n tena. A sin, n mbe a ma-a wan, a ni a kɔɔ sɔ saya ɔ tee dankama ma. 45 Yataa 'a gbonka chɛ mɔ dɔndɔ-a a nyɛn fan a 'a gboo ɔ, a ɔ, ‘Yataa ɛ mɔ ɔ mɔ kan-da wan.’ A sin, mɔ ɔ mɔ min mbe a too ma sɔ-a Fa kuiɛ ma, a ni a 'a kanɛ sɔn, a mɔɛ chɛ ɛ na wan n tena. 46 Chɛ ma a ɔ yian ni, mbɛ mɔ ɔ mɔ ɛ wan nɔ, min-na Fa Yataa yen bɛ, mɔɔ dechee mɔɛ chɛ, min ka-a a tena, a dechee, an-na a yen bɛ. 47 N mbe chɛ ma din tena wo tena, mbɛ mɔɛ min mbe a kai fa-a n na, an mbe kuɔ fɔ fɔɛ ma sɔn-da. 48 N fan mu daun fen chɛ a, fɔɛ be koe a. 49 Wo bemba n ta bemba nu, an-na daun fen chɛ, an ni min chee, an dɔ, mana, an-na a daun bɛɛ boo ɔ boo fuinɛ ma, an fa-a wan chɛ gbakɔ. 50 Chɛɛ daun fen chɛ yen ko, min ka-a banda bu ɔ, a ee ka, ni mɔ-a a daun. A tana, ɛ a ma wan, mɔɛ ni kuɔ fɔ fɔɛ ma sɔn. 51 N fan mu fɔɛ be daun fen chɛ a, min yii-a a ka banda bu ɔ. Ni mɔ ɔ mɔ-a daun fen chɛ daun, ɛ kuɔ fɔ fɔɛ ma sɔn-da wan. N mbe daun fen chɛ min sin be-a a ma, a mu n gboo an na. N mbe a be-a wan, fɔɛ ko a dunya ɔ.” 52 Chɛ ko a, mbɛ mɔɛ chɛ n bun-da kɔɔsa bia wa chɛ-a an nyɔn tɛ ɔ, an dɔ, “Mɔna chɛ ɛ kun ka ma, a ni a gboo be koe fɔ mmɔ ma, a daun koe a?” 53 Mbɛ Chisɔsi ɔ, “Ka n mbe a ma din to wo tena, mbɛ mɔɔ ni wo-a n gboo daun, n fan Mɔ Gbu 'a Denɛ, wo ni n wii min, wo e na to ma-a fɔɛ ɔ. 54 Chɛɛ mɔ ɔ mɔ min mbe n gboo daun-da, mbɛ a-a n wii min, kuɔ fɔ fɔɛ an mbe a ko a. A sin, n mbe a kɔɔ sɔ-a wan saya ɔ, a yɛ to fɔɛ ɔ, tee dankama ma. 55 Koe min na mu, n gboo an mu daun fenɛ chɛndɛ chɛndɛ a, n wii wɛɛ mu min fenɛ chɛndɛ chɛndɛ a. 56 Mɔ ɔ mɔ min mbe n gboo daun-da, a ni n wii min, nn fea a mɔɛ chɛ a, nn mbe ma-a wan mɔ dɔndɔɛ a. 57 Fa min mbe fɔɛ be, an-na n sɔ dunya chɛ ɔ, a sin fan-na a ma to, n mbe fɔɛ ɔ. A chia dɔndɔ gbe chɛ a, mɔ ɔ mɔ min mbe n gboo daun-da, n bɛɛ, n mbe a ma-a ka wan, an ni ma fɔɛ ɔ. 58 Chɛ an-na a fɔ, daun fen chɛ an yii-a, a ka banda bu ɔ. Wo bemba n ta bemba n-na daun fen chɛ daun fan, an ni min chee, an dɔ, mana, chɛɛ an fa-a wan a gbakɔ. Chɛɛ chɛ tana, a ee ka. Mɔ ɔ mɔ min mbe daun fen chɛ daun-da, ɛ a ma-a wan, a ni kuɔ fɔ fɔɛ ma sɔn.” 59 Chisɔsi na-a chɛ fɔ tima min na, a ni kan chɛ tena Kapanaun duu ɔ wan, Chu n 'na samun chɛ chenɛ a. 60 Chisɔsi fɛ denɛ n sɛsɛ, an fandi gbu na-a a fɔ wan, an dɔ, “Kan chɛ nɛnɛ kɔ gbɛ. Nyɔn mbe che a too ma sɔ-a chɛ ma?” 61 Mɔ ɔ mɔ nii ma a fɔ ni a ye, chɛɛ Chisɔsi na-a a ɔ sɔn fan, mbɛ an ni gbonyɛ tena a 'a kan chɛ an na. Chɛ ko a, a-a a fɔ an ma, a ɔ, “Chɛ-a a kun gbɛ, wo yiima mun koe a, ae?” 62 Mbɛ a ɔ, “Chɛ ɛ wo faa mun-da wan gbɛ yama yama. Ni wo-a a ya gbɛ, mbɛ wo-a n yen, n fan Mɔ Gbu 'a Denɛ, n mbe sɛ-a to kaina chɛ, n ka-a kaina min. 63 Yataa Nyina, an mbe fɔɛ be, chɛɛ mɔ gbu ta gbasaya ma fen kɔ fen na ɛnden bɛɛ a. N-na bai miin fɔ ka wo ye, an fan mbe na Yataa Nyina a, min mbe fɔɛ be. 64 Chɛɛ wo dɔ n ban-da wo kai fa koe a n na.” Chisɔsi na-a chɛ fɔ, koe min na mu, a na-a a ɔ sɔn fan, a ka a fɛ denɛ n chee tima ma, an fɛn mbe ee na-a an kai fa-a a a. A yɛ to, an tɛ ɔ, min bɛɛ ɛ na-a a ma tachɛ-a, a chɛɛ ma nyɔɛ n ma. 65 Mbɛ a yɛ-a to, a ɔ, “Kun chɛ gbu ko a mu, n-na a fɔ wo ye, n dɔ, mɔ ɔ mɔ ee che na-a n tena, mɔɔ ni Fa Yataa-a gbasaya be a ma, a mɔɛ chɛ ma koe a n fɛ denɛ a.” 66 A ka gbɛ a tima chɛ ma, Chisɔsi fɛ denɛ n sɛsɛ yiima mun-da, an ka-a a fɛ. 67 Chɛ ko a, Chisɔsi-a a fɛ den tan kun ma fea n dɔ tisa, a ɔ, “Wo wɛɛ to, wo e to-a wan, wo ni ka n fɛ?” 68 Mbɛ Saimɔn Pita ɔ, “Mansa, nn mbe ta-a gbɛ nyɔn tena? A yen ko, i da a bai, an mbe a ma kɛn, mɔ gbu ni kuɔ fɔ fɔɛ ma sɔn. 69 A sin yen ko gbɛ, nn-na a ɔ sɔn, a sin, nn dan-da a a, mbɛ i wan mu mɔɛ a tenchen Yataa 'a wai chɛ koe a, a-a min sɔ.” 70 Chisɔsi ɔ, “N fan-na n boo sɔ wo mɔ tan kun ma fea n chɛ n ma, ma koe a n fɛ, a ee ka wan? Chɛɛ Sitana faa an mbe wo dɔndɔ bu ɔ.” 71 A da a bai chɛ sien ni ka Chudasi an ma, kai Saimɔn Isikayɔti 'a denɛ. Koe min na mu, Chudasi ni wɛɛ boo ɔ boo Chisɔsi fɛ den tan kun ma fea chɛ n dɔndɔ a, chɛɛ a wan ni danka tena Chisɔsi ma tachɛ-a, chɛɛ ma nyɔɛ n ma.

7

1 Chɛ gbakɔ, mbɛ Chisɔsi ben ben-da Kadidi chɛnyɛ ɔ. A nii ma to ni, a ni gbɛn Chudia chɛnyɛ ɔ ma ɛnden bɛɛ a. A mu min na, Chu n ya ɔ sɔɛ nu nɔ, an ma bɛnden fan ni a fa koe a. 2 Chɛɛ tima gbɛnden fan ni gbɛ, bɛn chɛ ko a, Chu mɔɛ n ni kuu n sɔ tima min na. 3 Chɛ ko a, mbɛ Chisɔsi suun ma nyɔɛ kaima nu, an dɔ a ma, an dɔ, “Bɔ nɛ chɛnyɛ chɛ ɔ, i ni ta Chudia, min mbe a ma, i fɛ mɔɛ n ni a ɔ yen, e kamaya koe miin ma tena. 4 Mɔ ɔ mɔ ee che a chɛ chɛ wai nun-da mɔɛ n ma, ni a toen mu dunya ni a wakoe ɔ sɔn chɛndɛ chɛ. Ni e kamaya ko bonda chɛ n ma wan sanche, a ma to dunya chɛ gbɛɛ ni i wakoe ɔ sɔn.” 5 A suun ma nyɔɛ kaima n gbu wɛɛ, an na-a chɛ fɔ, a mu min na, an nii ma dan ni a a. 6 Mbɛ Chisɔsi ɔ an ma, a ɔ, “Wo tana tima ee wo ko a, tima min kɔ min nyin fan, wo ta koe a. Chɛɛ n tana, tima gbu ma che nin bɛ n ko a, n ta ta koe a. 7 Dunya chɛ ee che chia sɔn-da too koe a wo nan na, chɛɛ n tana, a tooen fan mu n na. Koe min na mu, n ma n da a tɔn ni, a fɔ koe a mɔɛ n ye, mbɛ an chɛ chɛ wai n yau Yataa ya a. 8 Wo e ka wɛ ta-a Chuusaɛn bɛn chɛ ɔ. N mbe ee ta tena wɛ, koe min na mu, n ta tima gbu ma che nin bɛ, ta koe a.” 9 A na-a chɛ fɔ kɛn, mbɛ a to-a wɛ gbaa Kadidi chɛnyɛ ɔ. 10 A suun ma nyɔɛ kaima n taenɛ gbakɔ an bɛnɛ chɛ ɔ, Chisɔsi wɛɛ na-a ta wan. Chɛɛ chɛ wɛɛ ma-a, a nii ma a ya kɔɔɛ a bɔ ni ya a ma, chɛɛ a na-a a ya kɔɔɛ nun fan. 11 Chu mɔɛ n ya ɔ sɔɛ chɛ nu, an ni wan ben-da an ya a kan-da a a, bɛn chɛ ɔ. An dɔ, “An mɔna chɛ ɛ mende?” 12 Mɔ fanka chɛ ni wan bai sɛsɛ sa-a an da kɔɔ, a si Chisɔsi ma. An dɔ n dɔ, “Mɔ chɛndɛ an nɛ mɔna chɛ a.” Dɔ n sin dɔ, “A ee ka. Mɔ bun mɔɛ gbama an nɛ.” 13 Chɛɛ mɔ ɔ mɔ nii a kuiɛ ma sɛ, an ni ma bai sa-a a si Chisɔsi ma. Koe min na mu, an chianden fan ni ya ɔ sɔɛ chɛ n ma. 14 An ni gbɛ bɛnɛ chɛ tɛtɛ ma wan, mbɛ Chisɔsi sɛ-a Yataa 'a kata chɛ ɔ, a bun-da an kan-da. 15 Chu mɔɛ n ya ɔ sɔɛ chɛ nu, an da ɔ gbaa-a wan kaka. Mbɛ an dɔ, “Mɔna chɛ ɛ ma ka ma, a ni koe sɔn buɛ chɛ ɔ, a nii kɛn mɔ kɔɔ kandencha a?” 16 Chɛ ko a, mbɛ Chisɔsi ɔ, “N mbe kanɛ miin chɛ, an mbe ee bɔ n ta yiimatɛ an dɔ. Chɛɛ Fa Yataa, min-na n sɔ, an mbe an be n ma. 17 Mɔ ɔ mɔ min ma bɛnden mu, Yataa faa ma koe ma koe a, an mbe a ɔ sɔn, n mbe kanɛ min chɛ tena. A mɔɛ chɛ, an mbe a ɔ sɔn, ni n mbe Yataa da a bai an na ben tena. Chɛ ma, an mbe a ɔ sɔn, ni n mbe a chɛ tena n fandi kun ma an na. 18 Mɔɛ min mbe kanɛ chɛ, a wandi kun ma a a, a toen mu a ni a wandi an na buu fɛ. Chɛɛ mɔɛ min toen mu, mɔɛ min-na a sɔ, a ni tando ma sɔn, a mɔɛ chɛ tea mɔɛ mu. A ee fania kan kɔ kan fɔ. 19 Wo gbɛɛ dɔnden fan mu a ma, mbɛ Mosisi an-na sawa chɛ n be wo ma. Chɛɛ wo dɔndɔ wɛɛ ee tachɛ tena sawa chɛ n na chɛndɛ. Fen ko a mu, wo toen mu wo ni n fa?” 20 Mbɛ mɔ fanka chɛ ɔ, “Nyina yama an mbe i fɛ. Mɔɛ minan mu, min mbe i fɛ i fa koe a?” 21 Chisɔsi ɔ, “N-na tee dɔndɔ 'a kamaya koe an ma wɛ ka, a sin-na wo gbɛɛ da ɔ gbaa wan. 22 Wo e wo 'a denɛ n na kamincha wan, tima ɔ tima, a ni ma suin tee wɛɛ ma a. Mosisi na-a a fɔ ka wan wo ye, a ma koe a. Chɛɛ Mosisi gbu, an nii ma mɔɛ saa saa a, min na-a chɛ kuu sɔ. Wo bemba n ta bemba nu, an fan gbu na-a a kuu sɔ. 23 Wo ee che tandin-da suin tee wɛɛ ɔ, wo 'a denɛ n 'na kamincha koe a, wo ma na sawa chɛ yɔn, min be-a Mosisi ma. Chɛ an-na a fɔ, wo faa ee che tɛ-a n ma, koe min na mu, n-na a ma, gbandi bɔ-a mɔna chɛ gboo gbɛɛ ɔ, suin tee ma. Fen ko a wo faa ɛ tɛ? 24 Wo sɛmbɛ koe n yen koe a dechee, mbɛ wo-a kaa a tɛ an ma. Chɛɛ wo koe n dɔ gbɛ pɛn, mbɛ tea nu mu, mbɛ wo-a tea kaa n na tɛ an ma.” 25 Mbɛ an mɔɛ chɛ dɔ nu, Chuusaɛn duu ɔ mɔɛ chɛ nu, an bun-da wan a fɔ-a, an dɔ, “Mɔna chɛ chɛndɛ chɛndɛ an nɛ, mmɔ ya ɔ sɔɛ chɛ n mbe min yan tena, a fa koe a. 26 A yen ko, ɛ koɔ-a fanka ɔ den, a sin, an mbe ee che gbukuu wɛɛ tɛ-a a ma, a si a ma. A e na ma wan gbɛ, mbɛ ya ɔ sɔɛ chɛ n yiima bɛn-da kaina dɔndɔ, mbɛ an mu kunka mansa a? 27 Chɛɛ nn-na a ɔ sɔn fan, kamin chɛ ka-a duu min dɔ. Chɛɛ kunka mansa chɛ, ɛ na-a tima min na, mɔ ɔ mɔ ee a ka tena sɔn-da.” 28 Chisɔsi to-a kan chɛ an na, Yataa 'a kata chɛ ɔ, mbɛ a koɔ-a gbankon, a ɔ, “Wo-a n sɔn fan tea gbu ko a? Wo-a n ka tena sɔn fan? N mbe ee nɛ n fandi an ko a. Chɛɛ a nyin wo ni dan a a, min-na n sɔ. Wo ma a sɔn chɛndɛ chɛ. 29 Chɛɛ n tana, n-na a sɔn fan chɛndɛ chɛ. Koe min na mu, a wan-na n sɔ, a sin, n ka-a a tena wan.” 30 Chisɔsi kuiɛ chɛ gbakɔ, mɔɛ chɛ dɔ n toen ni an ni a bia fɔin. Chɛɛ mɔ ɔ mɔ ma a boo tu ni a a. Koe min na mu chɛ ma-a, tima nii ma chɛ a, tima min yianden ni a 'a fɔɛ ɔ, a bia koe a. 31 Chɛɛ mɔ fanka chɛ nu, an sɛsɛ na-a an kai fa wan a a. Mbɛ an dɔ, “Kunka mansa chɛ gbu, a ɛ na-a tima min na, kamaya koe ee to nɔ, a ɛ min ma-a, a ni ben kamin chɛ ma.” 32 Mbɛ Chu mɔɛ chɛ dɔ nu, miin ni Fayisii n na, an-na fanka chɛ wɛwɛɛ kuiɛ a min bai chɛ n na, a si Chisɔsi ma. Chɛ ko a, an fan, an bɛ Chu n tɛ mɔɛ n na Yataa a, an 'na mansa n na, an-na kata chɛ ɔ poesi n sɔ, a bia koe a. 33 Mbɛ Chisɔsi ɔ, “N mbe ma tena wɛ wo tɛ ɔ, tima ɛnden fan ko a dechee. Mbɛ a gbakɔ, n mbe yɛ-a wan a tena, a wɛn-na n sɔ. 34 N yen sɔɛ ɛ ma-a wan wo a, wo ni n yan, chɛɛ wo ee n yen-da. Koe min na mu, n mbe ma-a kaina min, wo ee che-a ta-a nɔ.” 35 Mbɛ Chu mɔɛ chɛ nu, miin ni Chisɔsi chɛɛ ma nyɔɛ n na, an bun-da a da a bai chɛ tɛnsɛ-a an nyɔn tɛ ɔ, an dɔ, “A e na ma ta-a mende, mmɔ ee a yen kaina min? Kɔkɔɛ a ɛ ta tena duu dɔ mende n fan dɔ, mmɔ 'a mɔɛ dɔ n mbe kaina min, mbɛ a-a mɔɛ n kan, miin ma mmɔ 'a mɔɛ n na. 36 A ɔ te to, mbɛ a yen sɔɛ ɛ mmɔ bia wan, mmɔ ni a yan, chɛɛ a ɔ, mmɔ ee na-a a yen-da. A sin, a ɛ ta-a kaina min, mmɔ ee che-a ta-a nɔ. Fen bai nu mu chɛ n na?” 37 An bɛnɛ chɛ tee dankama ma, mɔɛ n 'na buɔdia bɔɛ, a kun tɛ tee ni an na. Mbɛ Chisɔsi-a a kɔɔ sɔ, a koɔ-a gbankon, a ɔ, “Mɔ ɔ mɔ min kanɛ a gbaaen mu, a mɔɛ chɛ ɛ na n fan tena, a ni a min. 38 A sin, mɔ ɔ mɔ min kai faen mu n na, yii min mbe fɔɛ be, a ɔ ee tɛ-a bɔ koe a, a ka an mɔɛ chɛ faa ɔ. Yataa 'a gboo-a a fɔ ka wan.” 39 Chisɔsi na-a chɛ fɔ, a yii ni Yataa Nyina chɛ an ma, min mbe ma-a mɔɛ n fɛ, miin kai faenɛ ɛ ma-a a a. Chɛɛ a tima chɛ a, Yataa Nyina chɛ nii ma yii nin bɛ, a ni ma an mɔɛ chɛ n fɛ. Koe min na mu, Chisɔsi kɔɔ ni ma sɔ nin bɛ, a ka saya ɔ, a ni sɛ manɛ ɔ. 40 Mɔɛ dɔ nu, an mɔ fanka chɛ n tɛ ɔ, an-na a da a bai chɛ n na min kɛn, mbɛ an dɔ, “Tea ko a, kamin chɛ, Yataa 'a gbonka chɛ mɔɛ an nɛ, min na koe fɔen mu.” 41 Mbɛ an dɔ n sin, an dɔ, “Kunka mansa gbu an nɛ.” Chɛɛ dɔ n bɛɛ to, an dɔ, “Kunka mansa ee che bɔ-a Kadidi chɛnyɛ ɔ. 42 Yataa 'a gboo ɔ te, mbɛ kunka mansa ɛ na-a bɔ-a Mansa Defidi 'a dambi ɔ wan. A sin mbe suun-da Chudia chɛnyɛ ɔ wan, Bɛtɛɛn duu ɔ, a wan Mansa Defidi waa a.” 43 Chɛ ko a, kuiɛ a kanɛ sima wɛɛ nii mɔ fanka chɛ n tɛ ɔ, a si Chisɔsi ma. 44 An dɔ nu, an toen fan ni, an ni a bia fɔin, chɛɛ mɔ ɔ mɔ ma a boo tu ni a a. 45 Yataa 'a kata ɔ poesi chɛ n yɛ-a kɛn, Chu n tɛ mɔɛ nu Yataa a, an 'na mansa chɛ n tena, an bɛ Fayisii chɛ n na, an-na tisa chɛ, an dɔ, “Fen mu wo ma na ni an mɔna a?” 46 Mbɛ an dɔ, “Kamin chɛ, a da a kuiɛ, a kaen fan mu mɔ gbu kan kɔ kan ta ma.” 47 Mbɛ Fayisii chɛ n dɔ, “Wo ma a ma nn ni dan a a, mbɛ a-a wo wɛɛ kunɛ ɔ fii fii. 48 Nn mbe ee dan-da a a, mbɛ mmɔ 'a gbakoo dɔndɔ wɛɛ ɛ wan nɔ, chɛ ma, ni Fayisii mɔ kan kɔ kan mbe wan nɔ, min kai faen mu a a. 49 A sin, mɔɛ chɛ n ma sawa chɛ n sɔn, Yataa na-a miin be Mosisi ma. Chɛ ko a, Yataa ɛ a ma-a wan, an ni tɔɔya ɔ yen.” 50 Chɛɛ kamin chɛ ni wan nɔ, min tɔ mu Nikɔdemɔsi. Fayisii chɛ nu, an ya ɔ sɔɛ dɔndɔ ni a a. A sin fan na-a ta tima dɔndɔ a, a-a Chisɔsi tan. Mbɛ a-a a fɔ a bɔɛ chɛ n ma, a ɔ, 51 “Mmɔ 'a sawa n-na a fɔ buɛ min dɔ, mbɛ mmɔ ee kaa a tɛ, a si mɔɛ ma, ni mmɔ ma a kan dɔ kuiɛ a min ni, mmɔ ni a ɔ gbɛ, a-a koe min gbu ma. A ee ka wan?” 52 Mbɛ a bɔɛ chɛ n dɔ, “Aa, i wɛɛ ka-a Kadidi wan? Yataa 'a gboo ɔ fɛn bɛ kan kɔ kan, e ee yiima chɛ yen-da a ɔ. Yiima chɛ, mbɛ Yataa 'a gbonka chɛ mɔ dɔndɔ wɛɛ ɛ ka-a wan Kadidi chɛnyɛ ɔ.” [ 53 Mbɛ an gbɛɛ yɛ-a an 'na chenɛ n na.

8

1 Chɛɛ Chisɔsi tana, bɛn chɛ fasandenɛ gbakɔ, a sɛ-a kɔnkɔɛ chɛ an dɔ, an ni min chee, an dɔ, Wodifi kɔnkɔɛ. 2 Banda ka dɔndɔɛ ma, sayi ma, mbɛ a yɛ-a to Yataa 'a kata chɛ ɔ. Mbɛ mɔɛ n gbɛɛ na-a a 'a tindanɛ. A sin, a si-a wan, mbɛ a bun-da an kan-da. 3 Chu n 'na sawa kan mɔɛ nu, an bɛ Fayisii mɔɛ dɔ n na, an don-da wan musu dɔndɔ a. An na-a a bia, an dɔ, a-a waa ma basan mɔ kaima a, min ma a fuu kai a. Mbɛ an-na a ma, a sɔ-a den, mɔɛ gbɛɛ ya kɔɔ. 4 Mbɛ an dɔ, “Ticha, musu chɛ, nn-na a bia tɔgbaa, ɛ waa ma basan-da, an fea kai a, min ma a fuu kai a. 5 Mmɔ 'a sawa n dɔ, Mosisi na-a a fɔ wan, mbɛ musu bonda chɛ, mmɔ ɛ a bon fan senɛ a, a ni fa. Mmɔ ɛ fen ma gbɛ a a, sanche?” 6 An-na chɛ fɔ, min mbe a ma, an ni Chisɔsi bia a chen kɔ, a da a bai ɔ, mbɛ an-na kun yama si a kun ma. Chɛɛ a-a a kunɛ a bun fan, a bun-da nyɛnɛ sa-a gbangbanɛ ɔ, a boo denɛ a. 7 An to-a a ɔ tisa chɛ an na tun tun, mbɛ a-a a kɔɔ sɔ. A-a a tɛ ɔ sawan, mbɛ a ɔ, “A ma yau. Chɛɛ wo gbɛɛ tɛ ɔ, mɔ ɔ mɔ min ma ko yama kan kɔ kan ma nin bɛ, an mɔɛ chɛ, an ni senɛ saa saa bondan musu chɛ a fasa.” 8 Mbɛ Chisɔsi-a a ma bun to, mbɛ a bun-da to nyɛnɛ sa-a gbangbanɛ chɛ ɔ. 9 A tima chɛ a gbɛ, mɔɛ chɛ miin gbɛɛ na-a a da a bai chɛ a min, an bun-da an fandi kanka-a dɔndɔ dɔndɔɛ a. Chenanɛ n pɛn tuin-da, mbɛ a tɔɛ n-na a sɔ an fɛ. Chisɔsi ma gbaaenɛ to-a nɔ, an fea an musu chɛ a sɔ ɔ tun. 10 Chisɔsi-a a kɔɔ sɔ to, a-a a tɛ ɔ sawan, mbɛ a ɔ, “Bɔɔɛ, i 'a mɔɛ n gbɛɛ ta-a mende? An dɔndɔ wɛɛ ma bɔ ni nɔ, a ni kaa a tɛ i wakoe ma?” 11 Mbɛ a ɔ, “Kai, an dɔndɔ wɛɛ ma a ma ni e.” Mbɛ Chisɔsi ɔ, “N bɛɛ, n fan mbe ee kaa a tɛ-a, a si i ma. E ka gbɛ ta-a. Chɛɛ a ka bi ma, i boo bɔ ko yama ma ɔ.”] 12 Chisɔsi koɔ-a wan to mɔɛ chɛ n tena, a ɔ, “N fan mu manɛ a dunya chɛ gbɛɛ ko a. Mɔ ɔ mɔ min mbe bea-a n fɛ, ɛ manɛ ma sɔn-da wan, min mbe a ma, mɔɛ ni ma fɔɛ ɔ. A yɛ to, a mɔɛ chɛ ee tachɛ-a kuɔ fɔ ko a pimbi pimbi ɔ.” 13 Mbɛ Fayisii mɔɛ n dɔ, “Sanche gbɛ, e ka i wandi an na siiya bɔ-a. E bai miin gbɛɛ fɔ tena, an ma nn kun bia ni.” 14 Chisɔsi ɔ, “A ee ka. Mmɔ a ya, mbɛ n mbe siiya an bɔ tena n fandi ko a. Chɛɛ n mbe bai miin fɔ tena, tea mu. Koe min na mu, n ka-a kaina min, n-na nɔ sɔn fan. A sin to, n-na n ta tena sɔn fan. Chɛɛ wo tana, wo ma an kaina chɛ n dɔndɔ wɛɛ sɔn. 15 Wo tana, wo e kaa a tɛ mɔɛ n bakoe ma mɔgbuya ta fɛ chia an na. Chɛɛ n tana, n mbe ee kaa a tɛ tena mɔ ɔ mɔ wako ma. 16 Chɛɛ ni n-na a ma wɛɛ ka, n mbe kaa min na tɛ-a, ɛ ma-a tea nɛnɛ an na. Koe min na mu, n dɔndɔ gbe an mbe ee na-a a ma-a n kun ma gbasaya a. Fa min-na n sɔ, nn fea an mbe nn kun puin-da kaina dɔndɔɛ. 17 A nyɛnden fan mu wo 'a sawa gboo ɔ, mbɛ sii fea nu, ni an kuiɛ bɛn-da kaina dɔndɔ an 'na siiya bɔɛ ɔ, mbɛ an da a kuiɛ mu tea an na. 18 N mu siiya, n fandi ko a. Fa wɛɛ, min-na n sɔ, a wɛɛ ɛ siiya bɔ tena wan, a si n ma.” 19 Mbɛ an dɔ, “I fa chɛ gbu ɛ mende?” Mbɛ Chisɔsi ɔ, “Wo ma n sɔn buɛ min dɔ, wo ma Fa wɛɛ sɔn ka wan. Ni wo na-a n sɔn fan, wo ni Fa wɛɛ sɔn-da wan.” 20 Chisɔsi na-a chɛ gbɛɛ fɔ tima min na, a ni Yataa 'a kata ɔ wan, ɛ mɔɛ n kan-da. A ni kaina chɛ baima wan, kakaa chɛ n ni ka si ɔ kaina min, an ni boo fenɛ n be ka Yataa ma, kakaa miin dɔ. Mɔ ɔ mɔ nii ma a bia ni nɔ, a mu min na, a bia tima min yianden ni, a nii ma che nin bɛ. 21 Mbɛ Chisɔsi-a a fɔ to an ye, a ɔ, “N mbe na tena wan ta-a, a sin, n yen sɔɛ ɛ wo bia-a wan, wo ni wo ya a kan n na. Chɛɛ wo e fa-a ka wan aan, Yataa ee a boo bɔ-a wo 'a ko yama n dɔ. Wo ee kun-da wo ni ta kaina chɛ, n mbe ma-a kaina min.” 22 Mbɛ Chu mɔɛ chɛ n dɔ, “Mɔna chɛ yii e na ma ta-a a wandi fa koe an dɔ? A yen ko, a ɛ a fɔ-a, a ɔ, a ɛ ta-a kaina min, mmɔ ee kun-da mmɔ ni ta nɔ.” 23 Chisɔsi ɔ, “Wo tana, dunya chɛ nɛ, a ɔ mɔɛ n mu wo a. Chɛɛ n tana, n ka-a pande wan, banda bu ɔ. Dunya chɛ ɔ mɔɛ mu wo a, chɛɛ a ɔ mɔɛ ma n nan sin na. 24 Chɛ an fɛ mu, n-na a fɔ wo ye, n dɔ, wo e fa-a ka wan, Yataa ee a boo bɔ-a wo 'a ko yama n dɔ. Ni wo ma dan ni a a, mbɛ n fan mu mɔɛ chɛ a, n-na a fɔ, n mu mɔɛ min na. Ni wo ma dan ni chɛ a, wo e fa-a ka wan, Yataa ee a boo bɔ-a wo 'a ko yama n dɔ.” 25 Mbɛ an dɔ, “Nyɔn gbu sin mu i a?” Mbɛ Chisɔsi ɔ, “N-na a fɔ wan wo ye a saa saa, n mu mɔɛ min na. N mu mɔɛ chɛ chɛndɛ chɛndɛ an na, n-na a fɔ wo ye sɛsɛ, n mu mɔɛ min na. 26 Bai kɔkoo n yii ma, a si wo ma, a kɔkoo kaa a tɛ koe a wo wakoe ma. Chɛɛ an sin gbu, n fan yiima ko ma an na. Min-na n sɔ, a wan yii ma koe nu mu, a sin mbe tea an fɔ. Chɛ an-na a fɔ, ɛ min fɔ n ye dechee, n mbe an na ben mɔ ɔ mɔ tena dunya chɛ ɔ.” 27 Chɛɛ an dɔndɔ wɛɛ nii ma a ɔ gbɛ ni, mbɛ Chisɔsi ni koɔ tena a si a Fa Yataa an ma. 28 Mbɛ a ɔ an ma, a ɔ, “Tima min na mu, wo e n na sɛ-a kɔn gbengbandenɛ ma, n fan Mɔ Gbu 'a Denɛ, wo e n sɔn-da a tima an na. Mbɛ n fan mu mɔɛ chɛ a, n fɛn mbe ka koɔ tena wo tena. Mbɛ wo-a a ɔ sɔn to, mbɛ n mbe ee ko ɔ ko chɛ n kun ma a a. Chɛɛ Fa ɛ min fɔ n ye, a fɔ koe a, n mbe an fɔ dechee. 29 A sin, a wɛn-na n sɔ, nn fea an mbe nn kun puin kaina dɔndɔɛ, a ee n dɔndɔ gbe boo ka tee dɔndɔ wɛɛ. Koe min na mu, a faa chima koe nu, n mbe an fan ma tima ɔ tima.” 30 Mɔ sɛsɛ nu, miin-na Chisɔsi da a bai chɛ n na min, an-na an kai fa wan a a. 31 Mɔɛ chɛ nu, miin dan-da ka Chisɔsi a, a koɔ-a an tena, a ɔ, “Ni wo-a wo too ma sɔ n da a kuiɛ ma, wo e ma-a n fɛ mɔɛ chɛndɛ chɛndɛ n fan na. 32 Wo e tea ɔ gbɛ-a wan, a si Yataa ma, a sin fan mbe a ma-a, wo kunɛ ni bɔ yɔncha ɔ.” 33 Chɛɛ an dɔ, “Nn tana, Ebeami dambi ɔ mɔɛ mu nn na. A sin, kɛn gba, nn ma don nin bɛ mɔ 'a yɔncha kɔɔ. E a fɔ-a sanche, i ɔ, nn mbe bɔ-a wan yɔncha ɔ. Fen mbe i yii ma?” 34 Chisɔsi ɔ, “Ka n mbe chɛ ma din wo tena, mbɛ mɔ ɔ mɔ min mbe ko yama ma, yɔnɛ mu a mɔɛ chɛ a, a 'a ko yama n boo ɔ. 35 Yɔnɛ ee to a yɔn fa 'a suunɛ ɔ kuɔ fɔ ko a. Chɛɛ an suun chɛ ɔ denɛ tana, ɛ to wan a ɔ kuɔ fɔ ko a. 36 Chɛ an fɛ mu, ni Yataa 'a denɛ-a i kun bɔ yɔncha ɔ, mbɛ i kun bɔ-a a ɔ chɛndɛ chɛ. 37 N-na a ɔ sɔn fan, mbɛ Ebeami cheeya mu wo a. Chɛɛ chɛ gbɛɛ ɔ, wo toen mu wo ni n fa. Koe min na mu, n mbe wo kan tena bai miin na, wo ma to ni, wo ni wo boo si an kɔɔ. 38 Fa na-a koe miin yian n na, n mbe koɔ tena a si an fan ma. Wo sin, wo fa na-a koe miin fɔ wo ye, wo e an fan ma ka.” 39 Mbɛ an dɔ, “Nn bemba n ta bemba, a mu Ebeami an na.” Mbɛ Chisɔsi ɔ, “Ni Ebeami cheeya chɛndɛ chɛndɛ gbu ni wo a, wo chɛ chɛ wai n ni ma-a ka wan dechee, yɔ a ta ni buɛ min dɔ. 40 Chɛɛ wo tana, wo ma bɛndenɛ min chɛen mu ka, n fa koe a, Ebeami nii ma a ma ni ka. N sɔnɛ gbɛɛ wɛ wo tena, an nɛ tea bai chɛ n na, miin kaen mu Yataa tena, n mbe miin fɔ. 41 Chɛɛ wo sɔnɛ n mbe wan dechee, yɔ wo fa ta ni buɛ min dɔ.” Mbɛ an dɔ, “I ma chɛ fɔ nn ye. Nn tana, nn fa ɛ dɔndɔ gbe, a sin fan nɛ Yataa a. A 'a denɛ chɛndɛ chɛndɛ mu nn na.” 42 Mbɛ Chisɔsi ɔ, “Ni Yataa an ni wo fa a, wo nii too-a n na. Koe min na mu, n ka-a Yataa an tena, n na-a nɛ chɛ. N fandi an ma si ni ka dechee, n ni na n kun ye, n kun ma gbasaya ɔ. Chɛɛ Yataa an-na n sɔ. 43 N-na a ɔ sɔn fan, koe min-na a ma, wo ee n da a bai n dɔ gbɛ. Ko dɔ gbɛɛ ma, wo ma to ni, wo ni wo too ma sɔ n da a bai n ma. 44 Sitana wandi gbu, an mu wo fa a. A sin, wo e bea tena koe chɛ n fan fɛ, wo fa toen mu miin na. Suun gba wɛ, mɔ fa mɔɛ mu a a, a sin tima ee a boo ɔ tea ko a. Koe min na mu, tea ma bɔ nin bɛ a da ɔ tee dɔndɔɛ wɛɛ. Ni a ma-a fania fɔ-a tima ɔ tima, ɛ ma ka dɔn-da a tɔɛ gbu an ma. Koe min na mu, fania fɔ mɔ dechee ma a a, chɛɛ fania fa mu a a. 45 Chɛɛ n tana, n mbe tea gbu an fɔ, a sin fan fɛ mu, wo ma dan ni n da a bai a. 46 Wo dɔndɔ wɛɛ ee nɛ, min mbe kun a ɔ yian-da, mbɛ ko yama ma mɔɛ mu n na. N mbe tea an fɔ, a sin nyin fan wo ni dan n da a kuiɛ a. 47 Mɔ ɔ mɔ min mu Yataa 'a denɛ a, a bu ɔ di wan tima ɔ tima, a too ma sɔ koe a Yataa bai ma. Chɛɛ wo tana, a 'a denɛ ma wo a, an fɛ mu, wo e ban wo too ma sɔ koe a, a da a bai n ma.” 48 Mbɛ Chu mɔɛ chɛ n dɔ Chisɔsi ma, an dɔ, “I-a a ɔ yen gbɛ, mbɛ nn-na min fɔ, nn teaen fan mu. Nn-na a fɔ wan, mbɛ Samayia mɔɛ mu i a, a sin, nyina yama an mbe i fɛ.” 49 Mbɛ Chisɔsi ɔ, “Nyina yama ee n fɛ. N mbe basɔmaya an be Fa ma, chɛɛ wo tana, wo e baa an bɔ n ma. 50 N mbe ee chia an yan tena, min mbe a ma, mɔɛ n ni baa be n ma. Min mbe chia chɛ yan tena, n ko a, ɛ nɔ. A sin, a wan mbe tea kaa a tɛ. 51 N mbe chɛ ma din tena wo tena, mbɛ mɔ ɔ mɔ min mbe ma-a a da a kuiɛ ma, a mɔɛ chɛ ee fa-a.” 52 Mbɛ Chu mɔɛ chɛ n dɔ, “Nn-na a ɔ sɔn gbɛ tea a, mbɛ nyina yama an mbe i fɛ. Ebeami wɛɛ gbu fa-a wan, mbɛ Yataa 'a gbonka chɛ mɔɛ n bɛɛ fa-a. Chɛɛ i tana, i ɔ, mɔ ɔ mɔ-a a boo si kan chɛ kɔɔ, e min chɛ tena, a ee fa-a kuɔ fɔ ko a. 53 Nn bɔ kɔnkɔɛ, Ebeami, a fa-a wɛɛ, chɛɛ i ma i wandi ya, mbɛ i benden fan mu a ma, ɛnden bɛɛ a. A yɛ to, Yataa 'a gbonka chɛ mɔɛ n bɛɛ fa-a wan. I-a i wandi ya fen mɔ a?” 54 Chisɔsi ɔ, “Ni n gbu, n-na basɔmaya be n fandi ma, an basɔmaya chɛ nɛnɛ, fen kɔ fen mbe ee a ɔ. Fa dechee, an mbe a ma tena, n mbe basɔmaya ma sɔn tena. Fa min ka, wo e a fɔ tena, wo ɔ, an mu wo 'a Yataa a. 55 Wo ma a sɔn bɛɛ boo ɔ boo, chɛɛ n tana, n-na a sɔn fan. Ni n-na a fɔ, n dɔ, n ma a sɔn, n mbe ma-a ka fania an fɔ-a, yɔ wo e fania fɔ tena buɛ min dɔ, a sɔn koe a. Chɛɛ n gbu sin-na a sɔn fan, a sin, n mbe wan a da a kuiɛ ma. 56 Wo bɔ kɔnkɔɛ, Ebeami, a bu ɔ ni di wan, a ni tima min na tee chɛ ma kɔn-da, n na koe a. A na-a n yen fan, a sin, a bu ɔ dia-a wan.” 57 Mbɛ an dɔ, “Chɛɛ i gbu suun sanɛ ni san bi duu bɔ pɛn, e na to Ebeami yen koe fɔ-a.” 58 Mbɛ Chisɔsi ɔ, “N mbe chɛ ma din tena wo tena sanche, mbɛ Ebeami e na to ma-a fɔɛ ɔ, n ni wan gbɛ fɔɛ ɔ.” 59 Chɛ ko a, mbɛ an-na senɛ n ya, a bondan koe a Chisɔsi a, an ni a fa. Chɛɛ a bɔ-a wan an tɛ ɔ, Yataa 'a kata chɛ ɔ, kai wɛɛ, a a ma tɛ ni a ma.

9

1 Chisɔsi to-a ta an na, mbɛ a-a kaminɛ yen, min suun-da a fiondenɛ ɛ. 2 Mbɛ Chisɔsi fɛ denɛ n-na a ɔ tisa, an dɔ, “Kan mɔ, mɔ ma a ɔ sɔn, mɔɛ min 'na ko yama maenɛ-a kamin chɛ fion buɛ chɛ ɔ. A e na ma a wandi ta an na ba, kɔ a woo mɔɛ nu?” 3 Mbɛ Chisɔsi ɔ, “A 'a fioncha chɛ ma bɔ ni ko fea chɛ dɔndɔ wɛɛ ɔ, a wandi-a ko yama maenɛ ma, a woo mɔɛ n ta ma. Chɛɛ a suun-da ka buɛ chɛ ɔ, min mbe a ma, mɔɛ n ni a ɔ yen a ta chɛ kun ma, kamaya koe miin mbe ma, Yataa dɔndɔ gbe gbaa chia a. 4 Tee ɛ wɛ nɔ tima min na, fɔ ni mmɔ-a a tun wai chɛ n chɛ koe a, n sɔen mu miin chɛ koe a. Pimbi ɛ bun-da tima min na, mɔ ɔ mɔ ee che-a ko ɔ ko ma-a. 5 N mbe tima min na dunya chɛ ɔ, n fan mu manɛ a dunya ko a.” 6 Chisɔsi-a bai chɛ fɔ kɛn dechee, mbɛ a-a a da yii fu gbangbanɛ ɔ. Mbɛ a-a a ɔ ma ma, mbɛ a-a boobo chɛ sin kamin chɛ ya gbingbii kɔɔ. 7 Mbɛ a-a a fɔ kamin chɛ ma, a ɔ, “Ta yii pai chɛ da a, an mbe min chee Sidowan, i ni i ya a ko” (Sidowan chɛ, a fasai an nɛ, an-na min sɔ). Mbɛ kamin chɛ ta-a, a-a a ya chɛ a ko nɔ. Mbɛ a-a kaina yen kɛn, a yɛ-a a waa a. 8 Mbɛ mɔɛ chɛ nu, an bɛ ɛ miin na fɔn dɔndɔɛ ɔ, an basan mɔɛ chɛ n na, miin ni a yen tee si ɔ fen fuinɛ a, a fiondenɛ ɛ, an na fii-a. An dɔ, “Kou, kamin chɛ an mbe ma nɛ si ɔ fen fuinɛ a, an ya a ka-a ka. An ma chɛ a?” 9 An dɔ nu, an dɔ, “An nɛ ka.” Chɛɛ an dɔ nu, an dɔ, “An ma chɛ a o, a bɔen fan mu dechee a a.” Chɛɛ kamin chɛ wandi koɔ-a, a ɔ, “N fan gbu e nɛ.” 10 Chɛ ko a, an dɔ kamin chɛ ma, an dɔ, “I ma-a ka ma gbɛ, i-a kaina yen?” 11 Mbɛ a ɔ, “Kamin chɛ min tɔ mu ka Chisɔsi, an-na a ma ka n baun-da. A-a boobo an dɔ fa, mbɛ a-a a sin n ya gbingbii kɔɔ. A-a a fɔ n ye, a ɔ, n ni ta n ya a ko yii pai chɛ ɔ, min tɔ mu ka Sidowan. Mbɛ n ta-a, a sin, n-na a ma kɛn dechee, n-na kaina yen.” 12 Mbɛ mɔɛ chɛ n dɔ, “A gbu ɛ mende?” Mbɛ a ɔ, “N bɛɛ n ma a ɔ sɔn.” 13 Mbɛ kamin chɛ, min ya a ka-a ka, mɔɛ chɛ n bɛ ta-a an na Fayisii n chen kɔɔ. 14 Koe min na mu, Chisɔsi na-a boobo chɛ sin ka a ya a tee min ma, mbɛ a ya a ka-a, Chu mɔɛ n 'na suin tee ni. 15 Mbɛ an Fayisii chɛ n bɛɛ, an bun-da kamin chɛ ɔ tisa-a to, an dɔ, a ni a ɔ yian an bɛɛ a, a ya a ka-a buɛ min dɔ. Mbɛ a ɔ, “A-a boobo an sin n ya gbingbii kɔɔ, mbɛ n-na n ya a ko yii ɔ. Chɛ an-na a ma, n mbe kaina yen tena ka gbɛ.” 16 Mbɛ Fayisii chɛ dɔ nu, an dɔ, “Mɔɛ min-na chɛ ma, suin tee sawa yɔn koe a, an mɔɛ chɛ, Yataa an ma a sɔ ni a ma.” Chɛɛ an dɔ n sin, an dɔ, “Mɔ ɔ mɔ min mu ko yama ma mɔɛ a, a ee kamaya ko bonda chɛ sima ma.” Chɛ-a a ɔ yian fan, mbɛ an kuiɛ a nii ma kan ni, a si Chisɔsi ma. 17 Mbɛ a danka a, Fayisii chɛ n yɛ-a to kamin chɛ tena, min ya a ka-a ka. An dɔ, “A-a i wan ya a ka. E che fen fɔ-a, a si a ma?” Mbɛ kamin chɛ ɔ, “N ta yiima ɔ, Yataa 'a gbonka chɛ mɔɛ mu a a.” 18 Chɛɛ chɛ gbɛɛ ɔ, Chu mɔɛ n ya ɔ sɔɛ chɛ nu, an nii ma to ni, an ni dan a a, mbɛ kamin chɛ fionden fan ni tee, chɛɛ a ya a ka-a gbɛ sanche. Mbɛ an-na an da a kuiɛ a ben, min mbe a ma, a woo mɔɛ n ni bɔ ya a ma. 19 Mbɛ an-na a woo mɔɛ n dɔ tisa, an dɔ, “Wo 'a denɛ an nɛ mɔna chɛ a? Wo-a a fɔ kɛn, mbɛ wo-a a fiondenɛ an suun, chɛɛ ɛ kaina yen gbɛ sanche. Chɛ ma-a ka ma a ma-a?” 20 Mbɛ a woo mɔɛ chɛ n dɔ, “Nn 'na denɛ chɛndɛ chɛndɛ an nɛ. A sin gbu, nn-na a suun, a fiondenɛ ni. 21 Chɛɛ nn ma a ɔ sɔn, a ma-a buɛ min dɔ sanche ɛ kaina yen. Nn sin ma a gbu ɔ sɔn to, mɔɛ min-na a ma, a ya a ka-a. Musu si kai mu gbɛ a a, wo a ɔ tisa, ɛ che wan a ɔ yian-da a wandi ko a.” 22 A woo mɔɛ chɛ n na-a chɛ fɔ, ya ɔ sɔɛ chɛ n ma chianɛ an dɔ. Koe min na mu, a ɔ bɛnden fan ni, mbɛ mɔ ɔ mɔ min mbe a fɔ-a den, mbɛ Chisɔsi an mu kunka mansa a, a ma nyin a ko a. A mɔɛ chɛ ka-a mɔɛ tɔɛ n ma fɛsɛ fɛsɛ, na koe a an fan Chu n 'na samun chɛ chenɛ a. 23 Chɛ an-na a ma, a woo mɔɛ chɛ nu, an dɔ, “Musu si kai mu gbɛ a a, wo a wandi ɔ tisa.” 24 Mbɛ an kamin chɛ, min fionden ni ka a kɔma a, an-na a chee to, a gba fean bɔɛ ko a. Mbɛ an dɔ, “Yataa ɛ i yen tena wan i sɔ gba chɛ ɔ, tea fɔ wɛɛ nn ye, a tɔɛ ko a. Nn danden fan mu a a, mbɛ kamin chɛ, mbɛ ko yama ma mɔɛ mu a a.” 25 Mbɛ a ɔ, “A ni ma ko yama ma mɔ a, a ma ma a a, n mbe ee kun n ni a ɔ sɔn. N-na koe min dɔ sɔn dechee, an nɛ chɛ a. N fionden fan ni tee, chɛɛ n mbe kaina yen fan gbɛ.” 26 Mbɛ an yɛ-a to, an dɔ, “A na-a fen ma i a, i baun koe a fioncha chɛ ɔ?” 27 Mbɛ kamin chɛ ɔ, “N ban-da a ɔ yian-da wo a, chɛɛ wo ma to ni, wo ni wo too ma sɔ a ma. Wo e n sɔ-a to yɛ-a n da a kuiɛ ɔ. Fen mu? N mbe ee che dan-da a a, mbɛ wo wɛɛ, wo toen mu wo ni ma a fɛ mɔɛ n na.” 28 Mbɛ an-na a main, an yɛ-a to, an dɔ, “I wan mu mɔna chɛ fɛ mɔɛ a, chɛɛ nn tana, Mosisi fɛ mɔɛ mu nn na. 29 Nn-na a ɔ sɔn fan, mbɛ Yataa wandi gbu, an na-a koɔ Mosisi tena. Chɛɛ mɔna chɛ tana, Chisɔsi chɛ, nn gbu ma a ka tena wɛɛ gbu an sɔn.” 30 Mbɛ kamin chɛ ɔ, “N ma kamaya koe chɛ sima ɔ yen nin bɛ. Wo ma kamin chɛ ka tena sɔn, chɛɛ a yen ko, a-a a ma, n-na kaina yen. 31 Mmɔ-a a ɔ sɔn fan, mbɛ Yataa ee mɔɛ n 'na samunɛ a min, miin mbe ko yama ma. Chɛɛ ɛ mɔɛ chɛ n 'na samunɛ a min fan, miin mbe a tɔɛ fai, an mbe a faa ma koe n ma. 32 A ka dunya a dan tima ma, aan sanche, mɔ ɔ mɔ ma a a min nin bɛ, mbɛ mɔ ɔ mɔ-a a ma wan, mɔɛ-a kaina yen, min suun-da a fiondenɛ ɛ. 33 Ni kamin chɛ nii ma ka ni Yataa tena wan, a nii kun-da a ni n ya chɛ a ka.” 34 Chɛɛ ya ɔ sɔɛ chɛ n dɔ, “I wan, i suun-da ko yama an dɔ. E ee kun i ni nn kan fen kɔ fen na.” Mbɛ an-na a gbain nɔ fɛsɛ fɛsɛ, an 'na samun chɛ chen chɛ a. 35 Mbɛ Chisɔsi-a a a min kɛn, koe min ma-a, a-a a ya a kan kamin chɛ a, an-na min gbain ka. A-a a yen kɛn, a ɔ, “I danden fan mu Mɔ Gbu 'a Denɛ a?” 36 Mbɛ kamin chɛ ɔ, “Kai, a wakoe ɔ yian bɛ n na, min mbe a ma, n ni n kai fa a a.” 37 Mbɛ Chisɔsi ɔ, “Chɛɛ i ban-da gbɛ a yen-da. A sin, n fan gbu mu a a, n fɛn mbe ka koɔ-a i tena.” 38 Mbɛ kamin chɛ ɔ gbɛ, a ɔ, “Mansa, n-na n kai fa i a.” Mbɛ a-a a kumbai gbangban Chisɔsi chen kɔɔ, a-a a fai. 39 Mbɛ Chisɔsi ɔ, “N na-a dunya chɛ ɔ, n ni mɔɛ n 'na ko yama n na bɔ ya a ma. Min mbe a ma, mɔɛ miin fiondenɛ ɛ, an ya ni kaina yen. Miin sin, an ya ɛ kaina yen, an ni ma fion tɔɛ n na.” 40 A ni chɛ fɔ tena tima min na, Fayisii chɛ n dɔ n ni wan nɔ. Mbɛ an dɔ, “I ɔ fen? Nn ma dan ni a a, mbɛ i toen mu i ni a fɔ, mbɛ nn bɛɛ, nn fionden fan mu.” 41 Mbɛ Chisɔsi ɔ, “Ni fion tɔɛ ni wo a, Yataa ni a ya ka-a wan wo 'a ko yama n na. Chɛɛ wo e a fɔɛ min chɛ, wo ɔ, fion tɔ ma wo a, an fɛ mu, a ee a ya ka-a wo 'a ko yama n na.”

10

1 Mbɛ Chisɔsi-a a fɔ, a ɔ, “Ka n mbe chɛ ma din wo tena. Mɔɛ min mbe ee don-da sa kuii ɔ, a da 'a chia a, chɛɛ ɛ sɛ-a chia dɔ mende a, a mɔɛ chɛ mu kanka kona wa an na. 2 Mɔɛ min mbe don a da 'a chia a, an mu sa kun ma fɛn mɔɛ gbu a. 3 Ni a na-a sa kuii chɛ da a, mɔɛ min mbe ma nɔ, a kun ma fɛnɛ a, ɛ a da a ka wan a ye. Ni a sin don-da, a ni bun a 'a sa n chee-a an tɔɛ ma, an mbe a kuiɛ a min fan. Mbɛ a bɔ-a an na kuii gbu ɔ. 4 Ni a ban-da bɔ-a a ta sa chɛ n gbɛɛ a, ɛ sɔ wan an ya ɔ, mbɛ sa chɛ n-na a sɔ a fɛ, a mu min na, an-na a kuiɛ sɔn fan. 5 Sa chɛ n mbe ee bea mɔ dɔ mende fɛ. Chɛɛ an mbe min ma, an mbe ben fan bui a, a ka mɔ dɔ mende baima. Koe min na mu, a mɔɛ chɛ kuiɛ ma bɔ ni an ti kuiɛ a.” 6 Chisɔsi na-a tai chɛ an tɛ, chɛɛ an nii ma a ɔ gbɛ ni, a ni min fɔ tena an ye. 7 Chɛ-a a ma wan, mbɛ Chisɔsi ɔ, “Ka n mbe chɛ ma din wo tena. N mbe wan dechee yɔ sa kuii chɛ da, sa chɛ n mbe don min na, an mbe bɔ. 8 Chɛɛ mɔɛ tɔɛ n gbɛɛ, miin sɔ-a n ya ɔ, miin na-a a ma, yɔ an ni sa chɛ n kun ma fɛn tena wan, kanka kona wa mu an na. Chɛɛ sa chɛ n gbu ma an too wɛɛ ma sɔ ni an ma. 9 N fan mu sa kuii chɛ da a. Ni mɔ ɔ mɔ ben-da n tena chia a, a ni don, a mɔɛ chɛ ɛ kun ka ma sɔn-da wan. Ɛ don-da wan, a ni bɔ, a faa ma a. A sin mbe a daun fenɛ ma sɔn-da wan. 10 Kanka tana, ɛ na dechee kanka chɛ koe an na, fen fa koe a, a basan kasaa chɛ koe a. Chɛɛ n fan, n na-a, min mbe a ma, n 'na sa n ni fɔɛ ma sɔn, kuɔ fɔ fɔɛ. An sin, an fɔɛ chɛ ɔ, an mbe n 'na dua gbɛɛ ma sɔn-da wan. 11 “N mbe wan yɔ sa kun ma fɛn mɔɛ chɛndɛ, min ma bɛnden mu a fɔɛ be koe a, a 'a sa n ko a. 12 Chɛɛ mɔɛ chɛ tana, an mbe min pawa sa chɛ n kun ma fɛn koe a, a ee chɛ ma. Ni a-a kui yen na-a, ɛ sa chɛ n to wan, mbɛ a ben-da bui-a, a mu min na, a wan ta ma an na. Chɛ ɛ a ma wan, kui chɛ ni chɛ dɔndɔ ma, mbɛ a tɔɛ n fasan-da a ɔ. 13 Mɔɛ min yaen mu ka, sa chɛ n kun ma fɛn koe a, ɛ ben fan bui-a, koe min na mu, bɔi den gbama mu a a. A sin, a ma a gbɔsɔɛ ni sa chɛ n ko a. 14 N fan mu sa kun ma fɛn mɔɛ chɛndɛ a. N-na n ta sa n sɔn fan, a sin, n 'na sa n bɛɛ, an-na n sɔn fan. 15 Ɛ ka wan dechee, yɔ Fa-a n sɔn buɛ min dɔ chɛndɛ chɛ, n bɛɛ, n-na a sɔn ka wan. A sin, n ma bɛnden fan mu, n fandi be koe a, n 'na sa n na tɔnɔnɛ ko a. 16 N 'na sa dɔ n mbe wan nɔ, miin mbe ee sa kuii chɛ ɔ. N mbe na tena wan an bɛɛ a. An bɛɛ, an mbe an too ma sɔ-a wan n da a kuiɛ ma, a sin, an gbɛɛ, an mbe ma-a wan sa dɔndɔɛ a, an kun ma fɛn mɔɛ dɔndɔɛ ko a. 17 “Fa Yataa toen fan mu n na, koe min na mu, n ma bɛnden fan mu, n ni n fɔɛ be, min mbe a ma, n ni danka to ma-a fɔɛ ɔ. 18 Mɔ ɔ mɔ ee kun a ni n fɔɛ ya n sun da a. Chɛɛ n fandi gbu, n fan mbe n fɔɛ be-a. Gbasaya been mu n fandi an ma, n fandi fɔɛ be koe a, an ni n fa. A gbasaya chɛ ɛ to n fandi an boo ɔ, a ma koe a to, n ni yɛ fɔɛ ɔ. Fa na-a a fɔ ka wan n ye, a ma koe a.” 19 Chisɔsi 'a bai chɛ n-na a ma wan to, kuiɛ a fasanɛ don-da to Chu mɔɛ chɛ n tɛ ɔ. 20 An sɛsɛ nu, an ni wan a fɔ-a, an dɔ, “Nyina yama min mbe a fɛ, an-na a woo ka. Wo e wo too ma sɔ a ma fen ko a?” 21 Chɛɛ an dɔ nu, an ni wan a fɔ-a, an dɔ, “Nyina yama ɛ ma mɔɛ min fɛ, a ee koɔ ka. Nyina yama ee che a ma-a fion tɔɛ ya a ni ka.” 22 Chima tima dɔndɔ a, Chisɔsi ni wan Chuusaɛn. A sin, a tima chɛ a, Chu n 'na bɛn dɔndɔ ni wan nɔ, an ni min chee, an dɔ, Yataa 'a kata da a ka. An ni buɔdia wa an bɔ a tima chɛ a. 23 A tee chɛ ma, Chisɔsi ni wan Yataa 'a kata ɔ, ɛ sɛ ɛ yii an kaina chɛ, an ni min chee, an dɔ, Mansa Sɔɔmon 'na Pɛsa. 24 Mbɛ Chu mɔɛ n na sɔn sɔn-da a 'a tindanɛ. Mbɛ an dɔ, “I ma a ma nn ni ma kɔndɔfii ɔ tima ɔ tima ko a, a si i wakoe ma. A ma gbu nn ni a ɔ sɔn, tea chɛndɛ chɛndɛ ko a, ni i wan mu kunka mansa chɛ a.” 25 Mbɛ Chisɔsi ɔ, “N banden fan mu gbɛ a fɔ-a wo ye, chɛɛ wo ma to ni wo ni dan n na. Fa 'a gbasaya ɔ, n mbe kamaya koe miin ma, an fan mbe siiya bɔ n ko a. 26 Chɛɛ wo ma dan ni n na, koe min na mu, wo ma ma ni yɔ n 'na sa nu. 27 N 'na sa n mbe an too ma sɔ wan n da a bai ma, n mbe min fɔ. N-na an sɔn, a sin, an mbe bea wan n fɛ. 28 N fɛ mɔɛ nu, n mbe kuɔ fɔ fɔɛ an be-a an ma, min mbe a ma, an mbe ee fa-a, an ni to saya ɔ. Mɔ ɔ mɔ ee che an bɔ-a n boo ɔ. 29 Fa min-na an be n ma, a 'a gbasaya benden mu fen kɔ fen ma. A sin, mɔ ɔ mɔ ee che an bia-a gbasaya a, an ni bɔ Fa boo ɔ. 30 Nn fea Fa a, mɔ dɔndɔɛ mu nn na.” 31 Mbɛ Chu mɔɛ chɛ nu, an-na senɛ ya to, a bon koe a fasa. 32 Chɛɛ Chisɔsi ɔ an ma, a ɔ, “Wo-a wai chɛndɛ sɛsɛ yen fan, n-na miin chɛ. Fa 'a gbasaya ɔ mu, n mbe kun tena wai chɛ n chɛ koe a. N ma a ɔ sɔn, an wai chɛndɛ chɛ nu, ni a minan ko a mu, wo toen mu wo ni n bon, n ni fa.” 33 Mbɛ Chu mɔɛ chɛ n dɔ, “I 'a wai chɛndɛ chɛ nu, an dɔndɔ wɛɛ ko a ma, nn toen mu nn ni i bon, i ni fa. Chɛɛ e baa bɔ tena buɛ min dɔ Yataa ma, an donden mu nn ma. I mɔ gbu gbama gbama, e i wandi ya-a Yataa a.” 34 Chisɔsi ɔ, “A nyɛnden fan mu, wo wandi gbu 'a sawa gboo ɔ, mbɛ Yataa na-a a fɔ wan, a ɔ, ‘Wo mu Yataa dɔma n fan na.’ 35 Wo 'a a ɔ sɔn fan, mbɛ Yataa 'a gboo, ɛ bai miin fɔ, tea bai nu mu kuɔ fɔ ko a. A sin, Yataa wandi gbu, an na-a mɔɛ chɛ n chee yataa dɔma n na. Mɔɛ chɛ nu, a wandi gbu, a ni a 'a sakana bai n na ben mɔɛ miin dɔ. 36 N tana, Fa an-na n ya, a-a n sɔ dunya chɛ ɔ. Chɛ an-na a fɔ, wo ee kun, wo ni kunɛ si n kun ma, baa bɔ koe a a ma. Koe min na mu, n-na a fɔ, n dɔ, a 'a denɛ mu n na. 37 Ni Fa-a n sɔ wai miin chɛ koe a, n mbe ee an fan chɛ tena, wo ma dan n na. 38 Chɛɛ ni n mbe Fa 'a wai an chɛ tena, wo ma dan nin bɛɛ n na boo ɔ boo, a nyin wo ni dan n chɛ chɛ wai n nan gbu n na. Chɛ ɛ a ma-a wan, wo ni a ɔ gbɛ fɛsɛ fɛsɛ, mbɛ nn fea Fa a, mɔ dɔndɔɛ mu nn na.” 39 A tima chɛ a to, Chu mɔɛ chɛ nu, an toen ni to, an ni Chisɔsi bia fɔin. Chɛɛ a bɔ-a wan an boo ɔ yɛdɛn. 40 Mbɛ a yɛ-a a gbaa chia a, a-a Chɔdan yii chɛ tɛ to. A yɛ-a kaina chɛ, Chɔn na-a a kuu sɔ ka yii chɛ-a kaina min mɔɛ n kunɛ ɔ, Yataa chia a. 41 Mɔ sɛsɛ na-a wan, an-na Chisɔsi tan. Mbɛ an nyɔn tɛ ɔ, an dɔ, “Chɔn nii ma kamaya ko kan kɔ kan ma ni. Chɛɛ bai n gbɛɛ, a-a miin fɔ, a si kamin chɛ ma, an ma-a tea a.” 42 Mbɛ mɔ sɛsɛ, miin ni nɔ, an-na an kai fa a a.

11

1 Mbɛ kaminɛ yen ko, min tɔ ni Dasayɔsi, a bea-a gbandi a. A waa tɔ ni Bɛtani. An duu chɛ ɔ, a tensa musu fea nu, an ni wan nɔ, Mɛi an fea Mata a. 2 Mɛi chɛ, an mbe na tena na-a tu kunyɛ a diama fasi fasi-a Chisɔsi chenɛ n ma, mbɛ a-a an ma fian chɛndɛ chɛ, a kundi a. A tensa kai an nii nɛ Dasayɔsi chɛ a, min ni ka sa ɔ gbandi ɔ. 3 Mbɛ tensa musu fea chɛ nu, an-na sakana a ta Mansa Chisɔsi tena, an dɔ, an ni a fɔ a ye, mbɛ a dia nyɔɛ Dasayɔsi gbandi-a. 4 Chisɔsi-a sakana chɛ a min kɛn, a ɔ, “Dasayɔsi 'a gbandi chɛ, a ee che-a a ma-a a ni fa kudai. Chɛ ɛ ma tena, min mbe a ma, mɔɛ n ni Yataa 'a gbasaya ɔ yen. A sin, ɛ ma tena to chia an na, n fan, Yataa 'a denɛ, mɔɛ n mbe n 'na kamaya ɔ yen-da chia min na.” 5 Chisɔsi toen ni suun ma nyɔ n sawa chɛ n na, Mɛi, Mata, a basan an tensa Dasayɔsi a. 6 Chɛɛ chɛ gbɛɛ ɔ, a-a Dasayɔsi gbandi koe chɛ a min kɛn, a nii ma a chen ma bɔ ni nɔ, aan tee fea benden gbakɔ. 7 Mbɛ chɛ gbakɔ, a-a a fɔ gbɛ a fɛ denɛ n ye, a ɔ, “Mmɔ ɛ yɛ tena gbɛ Chudia chɛnyɛ ɔ wan.” 8 Mbɛ an dɔ, “Kan mɔ, mmɔ ka kundu chɛ ɔ nɔ, mɔɛ chɛ n toen ni an ni i ma bon bon senɛ a, i ni fa. I toen mu to, mmɔ ni yɛ nɔ wan ka to?” 9 Mbɛ Chisɔsi ɔ, “Awa tan kun ma fea an mbe tee ɔ, ae? Chɛ an fɛ mu, mɔ ɔ mɔ min mbe tachɛ chɛ-a tee a den, a ee a chenɛ a tu, a ni bea. Koe min na mu, ɛ manɛ yen tena wan. 10 Chɛɛ ni a ma-a tachɛ chɛ-a pimbi pimbi ɔ, ɛ a chenɛ a tu wan, mbɛ a bea-a. Koe min na mu, manɛ ee nɔ, kaina yen koe a.” 11 Chisɔsi-a chɛ fɔ kɛn, mbɛ a yɛ-a to, a ɔ, “Mmɔ dia nyɔɛ Dasayɔsi, chinɔɛ ben-da a a. Chɛɛ n mbe ta tena wan, a sin, n mbe a a kunɛ-a wan.” 12 Mbɛ a fɛ den chɛ n dɔ, “Mansa, ni gbandi mɔɛ chɛ chinɔ-a, mbɛ ɛ baun tena wan.” 13 Chisɔsi ni ka a fɔ an na an ye, mbɛ Dasayɔsi fa-a. Chɛɛ an tana, an-na a ya, mbɛ ɛ chinɔɛ chɛndɛ chɛndɛ an dɔ. 14 Mbɛ Chisɔsi-a bai gbu bu ka an ye, a ɔ, “Dasayɔsi fa-a. 15 Chɛɛ wo ko a, n bu ɔ di, n nii nɔ a fa tima a, min mbe a ma, wo ni wo kai fa n na. Wo na, mmɔ ni ta a su tan.” 16 Mbɛ Tɔmɔsi, an ni min tɔɛ ma si, an dɔ, Fɛn Kai, a koɔ-a a bɔɛ chɛ n tena, a ɔ, “Mmɔ gbɛɛ mmɔ bɛ mmɔ kan mɔ a, mmɔ ta, min mbe a ma, mmɔ ni fa dɔndɔ a.” 17 Mbɛ Chisɔsi-a a fo Bɛtani duu ɔ, an bɛ a fɛ den chɛ n na. A-a a fo kɛn, a fɔ-a a ye, mbɛ tee sawa ben-da gbɛ, kɛn an-na Dasayɔsi sa a kamba ɔ. 18 Bɛtani chɛ, an tɛ ɔ nii ma yansan Chuusaɛn na, a nii ma mai fea bɔ ni. 19 Chɛ na-a a ma wan, mɔ sɛsɛ ka-a Chudia, an na-a Mata sɛbɔ-a, an fea Mɛi a, a si an tensa kai a saya ma. 20 Mata-a a a min kɛn, mbɛ Chisɔsi ɛ chia a, ɛ na tena, mbɛ a ta-a a ya ɔ. Chɛɛ Mɛi tana, a to-a wan chenɛ a. 21 Mata-a Chisɔsi tan kɛn, a ɔ, “Mansa, ni i ni nɛ wan, n tensa chɛ nii fa-a. 22 Chɛɛ n-na a ɔ sɔn fan, mbɛ sanche chɛ wɛɛ ɔ, ni i-a Yataa ɔ tisa fen kɔ fen ko a, ɛ a be-a wan i ma.” 23 Mbɛ Chisɔsi ɔ te a ma, a ɔ, “I tensa ɛ a kɔɔ sɔ tena wan to, a ni yɛ fɔɛ ɔ.” 24 Mbɛ a ɔ, “N-na chɛ ɔ sɔn fan, mbɛ ɛ a kɔɔ sɔ-a wan to saya ɔ, a ni yɛ fɔɛ ɔ. Chɛ ɛ ma-a wan, tee dankama nɛnɛ ma, mɔɛ gbɛɛ ɛ ma-a a kɔɔ sɔ-a, a ka saya ɔ.” 25 Mbɛ Chisɔsi ɔ te to a ma, “N fan mbe a ma, mɔɛ n mbe an kɔɔ sɔ, a ka saya ɔ, mbɛ n-na a ma to, an-na fɔɛ ma sɔn. An ni a fɔ mɔɛ ni fa wɛɛ, ɛ a tun fan ma koe a fɔɛ ɔ, ni a kai faen fan ni n na. 26 A sin, mɔ ɔ mɔ miin mbe fɔɛ chɛ ɔ, an sin kai faen mu n na, an mbe kuɔ fɔ fɔɛ ma sɔn-da wan n na. I danden fan mu chɛ a?” 27 Mbɛ a ɔ, “A ɛ ka wan, mansa. N danden fan mu a a, mbɛ i wan mu kunka mansa a, Yataa 'a denɛ. Yataa na-a i wan na koe fɔ dunya chɛ ɔ.” 28 Bai chɛ n fɔenɛ gbakɔ, mbɛ Mata yɛ-a, a-a a dɔ Mɛi chee. Mbɛ an fea gbe tɛ ɔ, a ɔ, “Mmɔ 'a ticha na-a, a sin, a toen mu a ni i yen.” 29 Mɛi-a bai chɛ a min kɛn dechee, a ma a ɔ si chɛ ni, a ta-a a tan dɔndɔ gbe. 30 Chisɔsi nii ma don nin bɛ konko chɛ gbu ɔ, chɛɛ a ni kaina chɛ wan tun, Mata na-a a tan kaina min. 31 Mɔɛ miin na-a na ka sɛbɔ chɛ tena, an na-a Mɛi yen fan ɛ a kɔɔ sɔ-a bui a. Mbɛ an-na a yen kɛn ta-a, an bea-a wan a fɛ. A ni an yii ma, mbɛ a ni ta tena kamba ma wan, di chɛ koe a. 32 Mbɛ Mɛi-a a fo Chisɔsi ni kaina. A sin-na a yen kɛn dechee, a bea-a dɔndɔ gbe a chenɛ a. A ɔ, “Mansa, ni i ni nɛ wan, n tensa chɛ nii fa-a.” 33 Mbɛ Chisɔsi-a a yen Mɛi puyɛ-a di a. Mɔɛ chɛ n bɛɛ, miin na-a ka a san-da, an bun-da di chɛ-a. Chɛ-a Chisɔsi faa mɔnɛ wan, a ma a to ni ɛnden bɛɛ a. 34 Mbɛ a ɔ, “Wo-a a sa mende kamba ɔ?” Mbɛ an dɔ, “Mansa, na, i ni nɔ yen.” 35 Mbɛ Chisɔsi ya yii yii-a wuu. 36 Mbɛ mɔɛ chɛ n dɔ an nyɔn ma, an dɔ, “Wo a ɔ yen gbɛ, a toen ni buɛ min dɔ Dasayɔsi a.” 37 Chɛɛ an dɔ nu, an dɔ to, “A wan na-a a ma fion tɔɛ chɛ-a kaina yen. A ni a ma wan to Dasayɔsi nii fa.” 38 A fean bɔɛ ɔ to, koe chɛ nii ma Chisɔsi to ni. Mbɛ an-na a fo kamba chɛ tena. Kamba ni a a, fanɛ ni, sen dɛnfɛ bunden ni min da a. 39 Mbɛ Chisɔsi ɔ an ma, a ɔ, “Wo sen chɛ ka a da a.” Chɛɛ Dasayɔsi tensa musu Mata, a ɔ, “Mansa, a tui kunyɛ yama an mbe bɔ-a.” A ɔ, “Tee naaninɛ an nɛ ka gbɛ, kɛn a sa-a a kamba chɛ ɔ.” 40 Chɛɛ Chisɔsi wɛɛ ɔ, “N na-a a fɔ wan i ye, mbɛ ni i-a i kai fa n na, e a ɔ yen-da wan, Yataa ɛ kamaya koe miin ma.” 41 Mbɛ an-na senɛ chɛ bɔ kamba chɛ da a. Chisɔsi-a a ya a si banda a, mbɛ a-a a fɔ, a ɔ, “Fa, n ni i wai bɔ, a mu min na, i-a n 'na samunɛ a min fan. 42 N gbu n-na a ɔ sɔn fan, mbɛ e a a min fan tima ɔ tima. Chɛɛ n-na chɛ fɔ dechee mɔɛ chɛ n fan ko a nɛ, min mbe a ma, an ni dan a a, mbɛ i wan gbu-a n sɔ nɛ dunya chɛ ɔ.” 43 Samunɛ chɛ chɛenɛ gbakɔ Chisɔsi boo ɔ, mbɛ a-a chee chɛ gbankon, a ɔ, “Dasayɔsi, bɔ nɛ.” 44 Mbɛ Dasayɔsi bɔ-a kamba chɛ gbu ɔ. A bɔ-a kamba chɛ ɔ, fen gbɛ mendemendeenɛ ɛ a a. A chenɛ n ni ma e, a boo nu, ni a kunɛ gbɛɛ dondenɛ ni fen gbɛ chɛ ɔ. Mbɛ Chisɔsi ɔ an ma, a ɔ, “Wo kasanche chɛ gbɛɛ bɔ a ma, a ni ben ben.” 45 Mɔɛ chɛ n sɛsɛ, miin na-a na ka Mɛi sɛbɔ-a, an na-a a ɔ yen fan Chisɔsi na-a koe min ma ka, mbɛ an-na an kai fa a a. 46 Chɛɛ an dɔ nu, an yɛ-a wan Fayisii dɔ n tena, mbɛ an-na a ɔ yian an na, Chisɔsi-a koe min ma. 47 Chɛ ko a, Fayisii chɛ nu, an bɛ Chu n tɛ mɔɛ n na Yataa a, an 'na mansa n na, an-na Chu kuti wa si kaina dɔndɔ. Mbɛ an dɔ, “Mmɔ ɛ fen ma tena gbɛ? Mmɔ a ɔ yen gbɛ sanche, kamin chɛ ɛ kamaya koe min gbɛɛ a tachɛ tena. 48 Ni mmɔ-a a to nɔ, a ni ma kamaya koe chɛ n ma-a tun tun, mɔ ɔ mɔ ɛ na-a wan an kai fa a a. A sin, kun ti nu Domi chɛnyɛ ɔ, an mbe ee na-a mmɔ to-a nɔ. An mbe na-a wan, mbɛ an-na Yataa 'a kata chɛ yɔn nɛ, a basan mmɔ 'a mɔɛ n bɛɛ a.” 49 Chɛɛ an dɔndɔ ni wan nɔ, min tɔ ni Kayafasi. An ni tɛ mɔ wa a, Chu n tɛ Yataa a, an san chɛ a. Mbɛ a koɔ-a, a ɔ, “Wo gbɛɛ, wo ma ko ɔ gbɛ nin bɛ. 50 A nyin, wo gbu ni a ɔ sɔn, mbɛ a fisa mɔ dɔndɔ ni fa, mɔɛ gbɛɛ ko a. Chɛ ma che ni mɔɛ gbɛɛ faenɛ ɔ, chɛnyɛ chɛ ɔ.” 51 Tea gbu a, Kayafasi nii ma bai chɛ fɔ ni, a wandi kun ma gbasaya an na. A ni ka a kɔɔ fɔ an na an ye, Yataa ni na tena koe min ma-a. A ni ka a fɔ tena wan, mbɛ Chisɔsi ni na tena wan fa-a Chu mɔɛ n ko a. Chɛ ma-a koe min na mu, a san chɛ a, a wan ni Chu n 'na tɛ mɔ wa Yataa tena. 52 A sin, Chisɔsi nii fa tena an dechee ko a, chɛɛ a ma koe ni to, a ni na Yataa 'a denɛ n na kaina dɔndɔɛ. Yataa 'a denɛ nu, miin gbɛɛ a fasandenɛ ni ben-da, an ni ma mɔ dɔndɔɛ a. 53 A ka a tee chɛ ma, aan a ta gbɛ, Chu n ya ɔ sɔɛ chɛ dɔ nu, an ni wan gbɛ dɔbɛnɛ ɔ, Chisɔsi fa koe a. 54 Chɛ na-a a ma wan, Chisɔsi nii ben ben to fanka ya kɔɔ Chudia chɛnyɛ ɔ. Chɛɛ a-a min ma, a ka-a wan nɔ, mbɛ a ta-a kaina dɔndɔ, min ni fuinɛ baima. Mbɛ a si-a nɔ duu dɔndɔ ɔ, min tɔ ni Ɛfan, an bɛ a fɛ denɛ n na. 55 A tima chɛ a, tee kuunden fan na-a to, Chu n 'na kun bɔ a ɔ bɛnɛ ko a. A sin, mɔ sɛsɛ na-a sɛ wan Chuusaɛn duu ɔ, a ka duu tɔɛ chɛ n dɔ Chudia chɛnyɛ ɔ. An na-a na, min mbe a ma, an ni an ko an 'na manda ɔ, bɛnɛ chɛ e na to che-a. 56 An ni wan an ya a kan-da Chisɔsi a. A sin, an na ni kɛn sɔn-da Yataa 'a kata chɛ ɔ, mbɛ an bun-da an nyɔn dɔ tisa-a, an dɔ, “Wo gbu danden fan mu a a, tea ko a, mbɛ ɛ na-a wan bɛnɛ chɛ ɔ?” 57 Mɔɛ miin ni Chu n tɛ ɔ Yataa a, an 'na mansa nu, an bɛ Fayisii n na, an na-a sawa a ben fan. An na-a a fɔ wan, an dɔ, ni mɔ ɔ mɔ na-a a ɔ sɔn, Chisɔsi ni kaina min, an dɔ, an ni a fɔ an ye, an dɔ, min mbe a ma, an ni a bia.

12

1 Tee wɔdɔ an na-a to, kun bɔ a ɔ bɛn chɛ ko a, mbɛ Chisɔsi ta-a Bɛtani duu ɔ, Dasayɔsi waa a. Dasayɔsi chɛ ni, Chisɔsi na-a a ma, a kɔɔ sɔ-a, a ka saya ɔ. 2 An na-a yɛɛ ma daun fenɛ ɔ bɛn fan Chisɔsi ko a, Mata ni min dɔ du tena. Dasayɔsi ni mɔɛ dɔndɔ an na, miin bɛ ni daunɛ chɛ tena tebu ma Chisɔsi a. 3 Chisɔsi to-a daun chɛ chɛ an na, an bɛ gbɛɛ mɔɛ chɛ n na, mbɛ Mɛi-a tu kunyɛ a diama ya, sani dɔndɔ faa gban. Tu chɛ baa ni gbɛ sai ma, mbɛ a bun-da a fasi fasi-a Chisɔsi chenɛ n ma. Mbɛ tu chɛ kunyɛ, a-a chenɛ gbu gbɛɛ ya. Mɛi yɛ-a wan, a-a Chisɔsi chenɛ n ma fian fian a kundi a. 4 Chisɔsi fɛ den dɔndɔ min tɔ ni Chudasi Isikayɔti, a ni wan nɔ mɔɛ chɛ n tɛ ɔ. A wan ni na tena Chisɔsi ma tachɛ-a, chɛɛ ma nyɔnɛ nu ma. Mbɛ a ɔ, 5 “A ni nyan-da wan, sunkun chɛ ni ma-a tu bonda chɛ ma tachɛ-a, tee chɛmɛ sawa debea pawa a, mbɛ a-a a 'a kɔpɔɛ chɛ be yɔn tɔɛ n ma.” 6 A nii ma chɛ fɔ ni, a ɔ yian koe a, mbɛ yɔn tɔɛ n bakoe ɛ wan a faa ɔ. Chɛɛ a na-a a fɔ, koe min na mu, kanka ni a a. A wan ni an 'na kɔpɔɛ kun ma, a bɔɛ n gbɛɛ ko a. A sin, tima sɛsɛ ko a, a ni kɔpɔɛ chɛ dɔ ya wan, ɛ a don a ta faa ma koe ɔ. 7 Chɛɛ Chisɔsi ɔ, “A to nɔ dechee. A-a min ma ka, a-a n ma bɛn fan ka n tɔn koe a, n fa tima ya ɔ. 8 Yɔn tɔɛ n tana, wo bɛ an mbe ma tena an na tima ɔ tima. Chɛɛ n tana, mmɔ bɛ ee ma tena tima ɔ tima.” 9 Chɛ ɛ ma-a tima min na, mɔ fanka wa n-na Chisɔsi wakoe a min Bɛtani duu ɔ, mbɛ an na-a wan nɔ. An nii ma na ni, an ni Chisɔsi dɔndɔ gbe an yen. Chɛɛ an na-a, min mbe a ma, an ni Dasayɔsi wɛɛ yen, Chisɔsi na-a min kɔɔ sɔ a ka saya ɔ. 10 Mbɛ a tima chɛ a gbɛ, Chu n tɛ mɔɛ nu Yataa a, an 'na mansa nu, an-na dɔbɛnɛ chɛ Dasayɔsi wɛɛ fa koe a. 11 A mu min na, an bakoe a ni to, an bɔ Chu mɔɛ n sɛsɛ, an ni ka tena an fɛ, an mbe an kai fa-a Chisɔsi a. 12 Banda ɔ ka dɔndɔɛ ma, fanka wa chɛ, miin na-a na ka kun bɔ a ɔ bɛn chɛ ɔ, an-na a a min, mbɛ Chisɔsi ɛ na tena Chuusaɛn duu ɔ. 13 Chɛ ko a, mbɛ an-na gbɛ nyanda an bia an boo ɔ, an mbe ta-a buɔdia yee tɛ-a, a ya ɔ chia a. An dɔ, “Mmɔ Yataa tando. Mansa Yataa ni mɔɛ chɛ dua, min na-a a tɔɛ ɔ. Mansa Yataa ni mansa wa chɛ dua, min mbe na tena ma-a Isɔɛɛ chɛnyɛ kun ma.” 14 Mbɛ Chisɔsi-a sofɛ tɔngbɔ dɔndɔ ma sɔn, a sɛ-a min kun ma, a bun-da na-a Chuusaɛn. Yataa 'a gboo na-a a fɔ ka wan dechee, a ɔ, 15 “Chuusaɛn mɔɛ nu, wo ma chian ko ɔ ko ma. Wo 'a mansa yen ko na-a, ɛ si ɔ sofɛ tɔngbɔɛ kun ma.” 16 A tima chɛ a, Chisɔsi fɛ denɛ n nii ma koe chɛ n dɔ gbɛ ni. Chɛɛ kɛn Yataa na-a Chisɔsi kɔɔ sɔ, a sɛ-a banda bu ɔ manɛ ɔ, mbɛ a puin-da an yii ma, Yataa 'a gboo na-a chɛ fɔ wan, a si a ma. A sin, an-na an chɛ ka a ko a. 17 Tima min na Chisɔsi na-a Dasayɔsi chee, mbɛ a bɔ-a kamba chɛ ɔ, a kɔɔ sɔ-a saya ɔ, mɔ fanka miin ni nɔ, an na-a an koe chɛ ɔ yian fan, min na-a ma ka. 18 Chɛ an na-a a ma, mɔ fanka chɛ wɛɛ na-a a ya ɔ, koe min na mu, an na-a a a min fan, mbɛ Chisɔsi an-na kamaya koe wa chɛ ma. 19 Mbɛ Fayisii chɛ nu, an bun-da a fɔ-a an nyɔn tɛ ɔ, an dɔ, “Wo-a a yen, ko ɔ ko ee bɔ tena ɔ mmɔ boo ɔ. Wo ko bonda chɛ yen bɛ, dunya gbɛɛ ɛ a sɔ tena gbɛ a wan fɛ.” 20 Mɔɛ chɛ nu, miin na-a sɛ ka Chuusaɛn bɛn chɛ ɔ, Yataa fai koe a, mɔɛ n ni wan an tɛ ɔ, miin nii ma Chu mɔ a. 21 Mbɛ an mɔɛ chɛ nu, mbɛ an ta-a Fiipi tena, min na-a ka Besaida duu ɔ, Kadidi chɛnyɛ ɔ. Mbɛ an-na a fɔ a ye, an dɔ, “Kai, nn toen mu nn ni Chisɔsi an yen ka.” 22 Mbɛ Fiipi ta-a a ɔ yian Anduu a, mbɛ an fea chɛ ta-a a ɔ yian Chisɔsi a, mɔɛ chɛ n-na min fɔ. 23 Mbɛ Chisɔsi ɔ, “Tima che-a gbɛ sanche, Yataa ni a ɔ yian, n fan, Mɔ Gbu 'a Denɛ, n kamayaen mu buɛ min dɔ. 24 Ka n mbe chɛ ma din wo tena, mbɛ chin fen kuu, a mu chin fen kuu dɔndɔɛ an na, aan a ni chin, mbɛ a tui-a. Ni a tui-a wan, min mbe bɔ gbɛ, mbɛ a-a gbɔɛ be kaka. 25 Mɔɛ miin gbɔsɔen mu an fandi ko a dechee, an mbe fo-a wan an fɔɛ a. Chɛɛ mɔɛ miin mbe an fɔɛ be-a Yataa ma dunya chɛ ɔ, an mbe kuɔ fɔ fɔɛ ma sɔn-da wan. 26 Mɔ ɔ mɔ min toen mu, a ni ma n kɔɔ, mɔɔ ni a bea-a n fɛ. Koe min na mu, n 'na bɔi denɛ ɛ ma kaina chɛ wan, n mbe ma-a kaina min. A sin, Fa Yataa ɛ baa be-a wan mɔ ɔ mɔ ma, min mbe ma-a n kɔɔ. 27 “Sanche chɛ ɔ, n faa ɛ mɔnɛ tena. A sin, n ma a ɔ sɔn ni n mbe fen fɔ. N mbe che wan a fɔ-a, n dɔ, ‘Fa, n kunɛ bɔ koe chɛ ɔ, n ya ɔ.’ Chɛɛ n na-a chɛ gbu an ko a dunya chɛ ɔ, tima chɛ a. 28 Fa, i 'a kamaya ɔ yian dunya chɛ ɔ.” Mbɛ kuiɛ a min-da, a ka banda bu ɔ, a ɔ, “N ban-da a ɔ yian-da mɔɛ n na, n kamayaen mu buɛ min dɔ, a sin, n mbe na-a wan to a ɔ yian-da an na.” 29 Mɔ fanka chɛ miin ni ka nɔ sɔ ɔ, an-na kuiɛ chɛ a min fan. A sin, an dɔ nu, an dɔ, “Banda an na-a koɔ ka.” Mbɛ an dɔ n sin, an dɔ, “Maeka an koɔ-a a tena.” 30 Chɛɛ Chisɔsi ɔ an ma, a ɔ, “Bai chɛ miin na min-da ka, a ka banda bu ɔ, basan koe ma n ma, chɛɛ basan koe mu wo ma. 31 Tima an che-a ka gbɛ sanche, Yataa ni kaa a tɛ dunya chɛ wakoe ma. Sanche chɛ ɔ, nyina yama min 'na mansaya ɛ dunya chɛ ɔ, a a bea tima an nɛ. 32 Chɛɛ n fan, tima min na an mbe n na sɛ-a kɔn gbengbanden chɛ ma, n mbe a ma-a wan, mɔ ɔ mɔ ni na n tena.” 33 A na-a chɛ fɔ tima min na, a ni ka a fɔ an na, a ni na tena fa-a buɛ min dɔ. 34 Mbɛ fanka chɛ koɔ-a, an dɔ, “Mmɔ 'a sawa-a a fɔ wan mmɔ ye, mbɛ kunka mansa ɛ ma-a wan nn tɛ ɔ kuɔ fɔ ko a. Chɛɛ e gbɛ a fɔ-a nn ye, mbɛ an mbe Mɔ Gbu 'a Denɛ a sɛ-a wan kɔn gbengbandenɛ ma, a ni fa. Nyɔn mu an Mɔ Gbu 'a Den chɛ a?” 35 Mbɛ Chisɔsi ɔ an ma, a ɔ, “Manɛ chɛ ɛ ma-a wan bɛ wo tɛ ɔ tima ɛnden ko a. Wo a a tun tachɛ chɛ koe a, manɛ ɛ wɛ nɔ tima min na, min mbe a ma, pimbi ee bun-da wo ma. Ni mɔɛ a ma-a tachɛ chɛ-a pimbi pimbi ɔ, a ee a chen kɔɔ yen, a ta chia sɔn koe a. 36 Chɛ an fɛ mu, wo wo kai fa man chɛ a, tima min na mu wɛ ɛ wo tɛ ɔ. Chɛ ɛ a ma-a wan, wo ni ma mɔɛ n na, miin mbe manɛ ɔ tima ɔ tima ko a.” Bai chɛ fɔenɛ gbakɔ Chisɔsi boo ɔ, mbɛ a ta-a, a-a a wandi ya kɔɔɛ nun an mɔɛ chɛ n ma. 37 Chisɔsi na-a kamaya koe chɛ n gbɛɛ ma boo ɔ boo an ya kɔɔ, chɛ gbɛɛ ɔ, an nii ma an kai fa ni a a. 38 Chɛ ma-a, min mbe a ma, Yataa 'a gbonka chɛ mɔɛ Aisaya na-a bai min fɔ, a ni bɔ a a. A na-a a fɔ wan, a ɔ, “Mansa, mɔ ɔ mɔ ma dan ni nn 'na sakana bai a, nn-na min fɔ. I sin-na a ɔ yian fan, i gbasayaen mu buɛ min dɔ.” 39 An nii ma dan ni sakana bai chɛ a, koe min na mu, Aisaya na-a a fɔ wan to, a ɔ, “Yataa na-a a fɔ wan, a ɔ, 40 “N-na an ya n na pimbi, an ma na kaina yen. N-na an yiima n bɛɛ a fa fa-a, an ma na koe n dɔ gbɛ chɛndɛ chɛ. N-na chɛ ma, min mbe a ma, an ma na an ya a mun n ma, an ni bauncha ma sɔn.” 41 Aisaya na-a chɛ fɔ, koe min na mu, a na-a a yen fan, Chisɔsi ni na tena ma-a kamaya tɔɛ min na. A sin, chɛ an na-a a ma, a na-a a kɔɔ fɔ mɔɛ n ye. 42 Chu n ya ɔ sɔɛ n sɛsɛ nu, a tima chɛ a, an bɛɛ kai faen fan ni Chisɔsi a. Chɛɛ Fayisii n bakoe na-a a ma wan, an nii an 'na danaya chɛ a bɔ ya a ma. Koe min na mu, an nii ma to ni an ni an gbain kuɔ fɔ an 'na samun chɛ chen chɛ a. 43 An na-a chɛ ma, koe min na mu, an toen ni mɔ gbu n ta tando an na, a ni ben Yataa ta ma. 44 Mbɛ Chisɔsi koɔ-a gbankon, a ɔ, “Mɔ ɔ mɔ min mbe a kai fa-a n na, a ma a kai fa ni n dɔndɔ gbe a, chɛɛ a-a a kai fa Fa Yataa wɛɛ an na, min-na n sɔ. 45 Mɔ ɔ mɔ min-na n yen, a-a Fa an yen ka, min-na n sɔ. 46 N na-a dunya chɛ ɔ, a ma koe a, mɔɛ n ni manɛ ma sɔn. Chɛ ɛ a ma-a wan, mɔ ɔ mɔ min mbe a kai fa-a n na, a ee ma-a kaina ɔ pimbienɛ ɔ. 47 Ni mɔ ɔ mɔ-a a a min, n-na bai miin fɔ, a sin, a ma a boo si ni an kɔɔ, n fan mbe ee na-a kaa a tɛ-a a mɔɛ chɛ ma, a ni tɔɔya. N na-a dunya chɛ ɔ, mɔɛ n baun koe an na, chɛɛ an 'na tɔɔya koe ma. 48 Mɔ ɔ mɔ min mbe ban-da n dɔ, a ni a boo bɔ n 'na sakana bai kɔɔ, min mbe kaa a tɛ-a a wakoe ma, ɛ nɔ. N-na bai miin fɔ, an fan mbe kaa a tɛ-a a wakoe ma, a ni tɔɔ. Chɛ ɛ ma-a wan tee dankama ma, mɔɛ n mbe an kɔɔ sɔ-a saya ɔ tee min ma. 49 N mbe ee koɔ n fandi 'a gbasaya an kɔɔ. Chɛɛ Fa min-na n sɔ, ɛ min fɔ n ye a fɔ koe a, n mbe an fɔ. 50 A sin, n-na a ɔ sɔn fan, mbɛ ɛ min sin fɔ n ye, an mbe a ma mɔɛ n ni kuɔ fɔ fɔɛ ma sɔn. Chɛ an fɛ mu, n mbe min fɔ, an nɛ dechee Fa-a min fɔ n ye, a fɔ koe a.”

13

1 Tima ni gbɛ che koe an na, kun bɔ a ɔ bɛn chɛ kuu sɔ koe a. Chisɔsi na-a a ɔ sɔn fan, mbɛ tima an ni ka gbɛ che-a, a ni dunya chɛ to, a ni yɛ a fa tena. Mɔɛ miin ni a fɛ dunya chɛ ɔ, a na-a to wan an na tima ɔ tima ko a. A sin, mmɔ ɛ na tena a ɔ yen-da, a to-a buɛ min dɔ an na, a da faenɛ ɔ gban. 2 Chisɔsi ni gbɛ yɛɛ ma daun fenɛ an ma kɔn tena, an bɛ a fɛ denɛ n na. A tima chɛ a, Sitana chɛen fan ni gbɛ Chudasi faa ɔ, Chisɔsi ma tachɛ koe a, chɛɛ ma nyɔnɛ n ma. Chudasi chɛ ni kai Saimɔn Isikayɔti 'a denɛ an na. 3 Chisɔsi na-a a ɔ sɔn fan, mbɛ a fa ban-da gbasaya gbɛɛ be-a a ma, ko ɔ ko ma koe a. A na-a a ɔ sɔn fan to, mbɛ a ka-a Yataa tena wan, a sin mbe yɛ tena to nɔ wan. 4 Mbɛ Chisɔsi-a a kɔɔ sɔ, doma kai min ni ka a ma, a-a a bɔ, mbɛ a-a tawa chii a bu tɛ. 5 Chɛ gbakɔ, mbɛ a-a yii chɛ feanka ɔ, mbɛ a bun-da a fɛ den chɛ n chenɛ n ma ko-a, dɔndɔ dɔndɔɛ a. A sin, ɛ ta-a an chen chɛ n ma fian-da a 'a tawa chɛ a a bu tɛ, aan an ma ɛ ta-a gbaa gbechee. 6 Mbɛ a che-a Saimɔn Pita ma, min-na a fɔ, a ɔ, “Mansa, i wan mbe na tena n chenɛ ma ko-a. I wan to?” 7 Mbɛ Chisɔsi ɔ, “N mbe ka koe min ma tena, e ee che a ɔ gbɛ-a sanche chɛ ɔ. Chɛɛ e a ɔ gbɛ-a wan ya ɔ ma.” 8 Mbɛ Pita ɔ, “N mbe ee dɔn a ma, tima kan kɔ kan ko a, i ni n chenɛ ma ko.” Chɛɛ Chisɔsi ɔ, “Ni i sin ma dɔn ni, n ni i chen chɛ ma ko, mbɛ i ta ka-a n bakoe ma.” 9 Mbɛ Saimɔn Pita ɔ te gbɛ, a ɔ, “Mansa, mbɛ i ma n chen dechee ma ko, chɛɛ n boo n bɛɛ ma ko, mbɛ i-a n kunɛ wɛɛ ɔ ko.” 10 Chɛɛ Chisɔsi ɔ, “Ni mɔɛ-a a ko fion, ɛ a chenɛ an ma ko gbɛ dechee, a mu min na, nɔɛ ee to a gboo tɔɛ gbɛɛ ma. A sin, wo koen fan mu gbɛ, chɛɛ wo dɔndɔ ma ko ni fion.” 11 Chisɔsi na-a a ɔ sɔn fan gbɛ, mɔɛ min ni na tena a ma tachɛ-a, chɛɛ ma nyɔnɛ n ma. Chɛ an-na a ma, a na-a a fɔ, a ɔ, an gbɛɛ koen fan mu gbɛ, chɛɛ an dɔndɔ ma ko ni fion. 12 Chisɔsi ban-da kɛn an chenɛ n ma ko-a, mbɛ a 'a doma kai chɛ, a na-a min bɔ ka, a-a a don, mbɛ a si-a to daun chɛ tena. Mbɛ a ɔ a fɛ den chɛ n ma, a ɔ, “Wo-a koe chɛ ɔ gbɛ wan, n-na min ma ka sanche wo tena?” 13 A ɔ, “Wo e ma koɔ-a n tena, tima dɔ n na, wo e n chee, wo ɔ, kan mɔ, dɔ n na, wo ɔ, mansa. A sin, wo e ma ka tea an fɔ-a, koe min na mu, n fan nɛ. 14 N fan, n fɛn mu wo 'a mansa a, ni wo kan mɔ, n-na wo chenɛ n ma ko ka sanche. Chɛ ni a ma, wo wɛɛ, wo ni wo nyɔn chenɛ n ma ko. 15 N-na tɔmɔsi an yian ka wo a, min mbe a ma, wo ni a ma, yɔ n-na a ma dechee buɛ min dɔ wo ko a. 16 Ka n mbe chɛ ma din wo gbɛɛ tena, yɔnɛ ma ben ni a ti ma, a sin, sɔ mɔ kan kɔ kan ma ben ni mɔɛ ma, min-na a sɔ. 17 Wo-a koe chɛ n dɔ sɔn ka buɛ min dɔ gbɛ, dua ɛ ma-a wan wo ma kaka, ni wo-a an koe chɛ n ma. 18 “N mbe ee bai chɛ fɔ tena wo gbɛɛ an ko a. N-na a ɔ sɔn fan, n-na n boo sɔ mɔɛ miin sima ma, ma koe a n fɛ. Chɛɛ Yataa 'a gboo-a min fɔ, ɛ bɔ-a wan a a. A-a a fɔ wan, a ɔ, ‘Nn fea mɔɛ min na, nn mbe n 'na daun fenɛ ɔ du, a bun-da n chɛɛ-a.’ 19 Koe min mbe na tena ma-a, n mbe an dɔ yian tena wo a sanche, a e na to ma-a. Min mbe a ma, ɛ ma-a tima min na, wo ni dan a a, mbɛ n fan, kunka mansa mu n fan na. 20 N mbe chɛ ma din wo tena, mbɛ mɔ ɔ mɔ min mbe a boo si-a mɔɛ kɔɔ, n-na miin sɔ, a-a a boo si ka n fandi wɛɛ an kɔɔ. A sin, mɔ ɔ mɔ min mbe a boo a si-a n kɔɔ, ɛ ma-a ka a boo a si-a Yataa an kɔɔ, min-na n sɔ.” 21 Bai chɛ fɔenɛ gbakɔ Chisɔsi boo ɔ, a faa ni mɔnɛ tena wan kaka. Mbɛ a-a a fɔ den a fɛ denɛ n ye, a ɔ, “N mbe chɛ ma din-da wan wo tena, mbɛ wo dɔndɔ, ɛ na tena wan n ma tachɛ-a, chɛɛ ma nyɔnɛ n ma.” 22 Bai chɛ-a Chisɔsi fɛ den chɛ n gbɛɛ da a fa wan gban. Mbɛ an bun-da an nyɔn ma fɛn-da, an ma a ɔ sɔn ni a yii ni min ma an tɛ ɔ. 23 Chisɔsi fɛ den chɛ n dɔndɔ, min ko a ni di a ye kaka, a ni wan Chisɔsi tɔnfɛ daun chɛ-a. 24 Mbɛ Saimɔn Pita-a a ya kai an fɛ den chɛ ma, a ɔ, a ni tisa chɛ ni Chisɔsi ɛ bai sa tena, a si nyɔn ma an tɛ ɔ. 25 Mbɛ an fɛ den chɛ, a-a a da ma ta Chisɔsi too tena, mbɛ a ɔ, “Mansa, i yii mbe nyɔn na?” 26 Mbɛ Chisɔsi ɔ, “N mbe biidi sima tɛ-a wan a a, mbɛ n-na a don supu ɔ, mbɛ n-na a be a mɔɛ chɛ ma.” A sin, a-a biidi chɛ don kɛn supu chɛ ɔ, a-a a be wan Chudasi ma, kai Saimɔn Isikayɔti 'a denɛ chɛ. 27 Chudasi ɛ biidi chɛ bia-a dechee, mbɛ Sitana bea-a a fɛ. Mbɛ Chisɔsi ɔ a ma, a ɔ, “I 'a wai i boo ɔ, a chɛ, a a gbandia.” 28 An fɛn gbɛɛ ni daun chɛ-a, an dɔndɔ wɛɛ nii ma a ɔ gbɛ ni, koe min na-a a ma, Chisɔsi-a bai chɛ fɔ Chudasi ye. 29 A ni fɛ den chɛ n dɔ n yii ma, mbɛ Chisɔsi na-a a sɔ wan ka, a ni ta daun fenɛ san, kun bɔ a ɔ bɛn chɛ ko a. Ni chɛ ma, a ni fen den be yɔn tɔɛ n ma. A yen ko, a wan Chudasi, an ni an 'na kɔpɔ sa tena ɔ bɛn mɔɛ a. 30 Chudasi-a biidi kundu chɛ bia kɛn dechee, mbɛ a ya kɔɔɛ a, a bɔ-a baa ma. A tima chɛ a, pimbi bundenɛ ni gbɛ. 31 Chudasi bɔ-a kɛn, a ta-a. Mbɛ Chisɔsi ɔ, “A ɔ ma yansan to, mbɛ mɔɛ n-na a ɔ yen, kamaya mɔɛ min mu n na, n fan, Mɔ Gbu 'a Denɛ. A ɔ ma yansan to, mbɛ n-na a ma, Fa Yataa 'a kamaya ɔ ni yen chɛndɛ chɛ. 32 A sin, ni n-na a ma, mɔɛ n ni Fa Yataa 'a kamaya ɔ yen, mbɛ a wɛɛ, ɛ a ma-a wan, n fan, Mɔ Gbu 'a Denɛ wandi, mɔɛ n ni n 'na kamaya ɔ yen. A sin, ɛ na tena wan chɛ ma-a, a ya kɔɔɛ a. 33 N 'na denɛ nu, n mbe ma tena gbɛ wo tɛ ɔ tima kunduenɛ an ko a. Wo e wo ya a kan-da wan n na. Chɛɛ ka n mbe chɛ fɔ wo ye, n na-a min fɔ Chu ya ɔ sɔɛ n ye, mbɛ n mbe ma-a kaina min, an mbe ee na-a che-a nɔ. A ɛ ma-a ka wan wo wɛɛ a. 34 A sin sanche, n yen ko sawa nama be-a wo ma, n ma min be nin bɛ a kɔma a, mbɛ wo ni to wo nyɔn na. N to-a buɛ min dɔ wo a, wo wɛɛ, wo to wo nyɔn na ka. 35 Ni wo toenɛ ma-a wo nyɔn na, mbɛ mɔ ɔ mɔ-a a ɔ gbɛ, mbɛ n fɛ denɛ n mu wo a.” 36 Mbɛ Saimɔn Pita ɔ, “Mansa, e na tena ta-a mende?” Mbɛ Chisɔsi ɔ, “E ee che-a a sɔ-a n fɛ dɔndɔ a, n mbe ta tena kaina min, chɛɛ ni a ɔ mɛ-a, e a sɔ-a wan n fɛ.” 37 Mbɛ Pita ɔ, “Mansa, n mbe ee a sɔ i fɛ sanche, fen mu? I fa tena, n fa tena.” 38 Chisɔsi ɔ, “Tea ko a, i ma bɛndenɛ mu, i ni fa n ko a, ae? Ka n mbe chɛ ma din i tena, e na tena min ma-a. Tɛ kɔnɛ e na konchee banda ɔ ka da ma, e a fɔ-a wan, gba sawa ko a, mbɛ i ma n sɔn ɛnden bɛɛ a.”

14

1 Mbɛ Chisɔsi ɔ an ma, a ɔ, “Chɛ ma wo faa mɔnɛ. Wo a a tun wo kai fa koe a Yataa a, wo ni a a tun wo kai fa koe a n bɛɛ a. 2 Fa Yataa waa banda bu ɔ, sa tena kɔkoo nɔ kaka. N mbe chɛ fɔ tena wo ye, koe min na mu tea mu. A sin, n mbe ta tena wan kaina ɔ bɛn-da wo ko a. 3 A sin, ni n ta-a, mbɛ n-na kaina chɛ ɔ bɛn wo ko a, n mbe yɛ-a wan to nɛ wo ya ɔ. Mbɛ n-na a ma, mmɔ ta-a, min mbe a ma-a, n mbe ma-a kaina min, wo wɛɛ, wo ni ma nɔ. 4 A sin, wo-a an chia chɛ sɔn fan, a ta an kaina chɛ, n mbe ta tena kaina min.” 5 Mbɛ Tɔmɔsi ɔ, “Mansa, e ta tena kaina min, a yiima kan kɔ kan mbe ee nn ma. Nn mbe ee kun, nn ni chia sɔn ta koe a nɔ. Chɛ ɛ ma wan?” 6 Mbɛ Chisɔsi ɔ, “N fan mu dechee chia a, tea ɔ sɔn koe a mɔɛ n boo ɔ, a si Fa Yataa ma, mbɛ an-na fɔɛ ma sɔn, Fa ɛ min be. Mɔ ɔ mɔ ee che ta-a Fa tena, mɔɔ ni a ben-da n tena chia a. 7 Ni wo na-a a ɔ sɔn fan chɛndɛ chɛ, n mu mɔɛ min sima a, mbɛ wo ni Fa wɛɛ sɔn-da wan. Chɛɛ a ka gbɛ sanche ma, aan a ta, wo-a a sɔn gbɛ, a sin, wo ban-da a yen-da.” 8 Mbɛ Fiipi ɔ, “Mansa, a ma nn ni i fa chɛ yen, mbɛ nn faa chima-a.” 9 Chɛɛ Chisɔsi ɔ, “Fiipi, mmɔ mɛ buɛ chɛ mmɔ bɛ, a ni nyan fan wo gbɛɛ ni n sɔn gbɛ. Mɔ ɔ mɔ min-na n yen, a-a Fa an yen ka. E ee kun to, i ni n dɔ tisa, n ni Fa yian wo a. Chɛ ɛ ma wan? 10 A nyin i ni dan a a, mbɛ nn fea Fa a, mɔ dɔndɔɛ mu nn na. Bai chɛ nu, n-na miin fɔ ka wo ye, an ma ka ni ka dechee n kun ma yiinachii an dɔ. Fa, nn fea mu min na mɔ dɔndɔɛ a, tima ɔ tima ko a, an mbe ma ka wai chɛ-a. 11 N-na a fɔɛ min chɛ, n dɔ, nn fea Fa a, n dɔ, mɔ dɔndɔɛ mu nn na, dan chɛ a. Ni chɛ ma, Fa ɛ a ma, n mbe wai miin bɛɛ chɛ, an mbe che wan a ma-a, wo ni dan n na. 12 N ni chɛ ma din wo tena, mbɛ mɔɛ miin mbe an kai fa-a n na, an mɔɛ chɛ nu, an mbe wai bonda chɛ n chɛ-a wan, n mbe miin chɛ. A sin gbu, an mɔɛ chɛ nu, an chɛ chɛ wai n mbe koa-a wan. Koe min na mu, n mbe yɛ tena Fa tena, nn ni ma kaina dɔndɔɛ ɛ. 13 A sin, n mbe ko ɔ ko chɛ-a wan wo ye, wo e n dɔ tisa-a min chɛ koe a, n tɔɛ ɔ. Chɛ ɛ a ma-a wan, n ni a ma, mɔɛ n ni a ɔ yen, Fa kamayaen mu buɛ min dɔ. 14 Ni wo-a tisa chɛ ko ɔ ko ko a, n tɔɛ ɔ, n mbe a chɛ wan wo ye.” 15 Mbɛ Chisɔsi ɔ a fɛ denɛ n ma, a ɔ, “Wo e koe chɛ n ma-a wan, n-na miin fɔ wo ye an ma koe a, ni wo toen fan mu n na. 16 N mbe fa ɔ tisa-a wan, a ni a ma, wo ni demanɛ dɔ mende ma sɔn. A sin, ɛ a Nyina a na-a wan, a ni ma wo fɛ tima ɔ tima ko a. 17 An Nyina chɛ, an mbe a ma, mɔɛ n ni tea ɔ sɔn a si Yataa ma. Chɛɛ Yataa wakoe ee mɔɛ miin faa ɔ, an mbe ee che an boo si-a a kɔɔ. Koe min na mu, an mbe ee che a yen-da, an sin ma a sɔn. Chɛɛ wo tana, wo-a a sɔn fan, koe min na mu, wo bɛ mu sanche chɛ ɔ, a sin mbe ma-a wan wo fɛ ya ɔ ma. 18 “Ni n ta-a, n mbe ee wo boo ka-a. N mbe yɛ-a wan wo tena. 19 A ɔ ma yansan to, mbɛ Yataa wakoe ee mɔɛ miin faa ɔ dunya chɛ ɔ, an mbe ee n yen-da to. Chɛɛ wo tana, wo e n yen-da wan, koe min na mu, ni n yɛ-a fɔɛ ɔ, wo wɛɛ, wo e ma-a wan fɔɛ ɔ. 20 Ni a tima chɛ che-a, wo e a ɔ gbɛ-a wan, mbɛ nn fea Fa a, mɔ dɔndɔɛ mu nn na. A sin, wo wɛɛ, wo e ma-a wan mɔ dɔndɔya ɔ n na, yɔ n bɛɛ, n mbe ma-a buɛ min dɔ dechee mɔ dɔndɔya ɔ wo a. 21 “Mɔɛ min mbe koe n ma-a, n mbe miin fɔ an ma koe a, an mɔɛ chɛ an toen mu n na. A sin, an mɔɛ chɛ, a toen min chɛ-a ka n na, Fa wɛɛ, a ɛ to-a wan a a. N bɛɛ, n mbe to-a wan a mɔɛ chɛ a, mbɛ n-na a ma, a-a n sɔn chɛndɛ chɛ.” 22 Chisɔsi fɛ denɛ dɔndɔɛ wɛɛ ni wan nɔ, min tɔ ni to Chudasi, Chudasi Isikayɔti nii ma o. Mbɛ an fɛ den chɛ ɔ, “Mansa, e a ma-a nn fan ni i yen dechee, chɛɛ mɔɛ chɛ nu, Yataa wakoe ee miin faa ɔ dunya chɛ ɔ, an mbe ee i yen-da. Fen mu chɛ ɛ ma-a?” 23 Mbɛ Chisɔsi ɔ, “Mɔɛ min toen mu n na, ɛ koe chɛ n ma wan, n-na miin fɔ a ye, an ma koe a. Fa ɛ to-a wan a mɔɛ chɛ a. A sin, Fa ni ma, ni n fan, nn mbe na-a wan a tena, mbɛ nn bɛ gbɛɛ ɛ ma-a kaina dɔndɔ. 24 Mɔɛ min ma to ni n na, a ee che koe chɛ n ma-a, n-na miin fɔ a ye. A sin, n mbe bai chɛ miin gbɛɛ fɔ, n mbe ee an tɛ n fandi gboo an ma, chɛɛ Fa min-na n sɔ, a 'a sakana bai nu mu, n mbe an na ben. 25 “N mbe bai chɛ n gbɛɛ fɔ tena wo ye, tima min na mu wɛ mmɔ bɛ ɛ. 26 Min mbe wo deman-da, Yataa Nyina, Fa ɛ na-a min na na-a n gba ɔ, an mbe wo kan-da ko ɔ ko ma, a si n 'na bai n ma. A sin mbe a ma-a wan, n 'na bai chɛ n ni puin wo yii ma, n ni bai miin fɔ, mmɔ bɛ ni tima min na. 27 “N mbe wo to tena faachima an dɔ. Faachima min nyɔn sima ɛ n dɔ, n mbe an be tena wo ma. N ta faachima, n mbe min be, a ee ka yɔ dunya chɛ ɔ nɛnɛ. Wo ma ma faamɔnɛ ɔ, a sin to, wo ma chian, a si koe chɛ n ma, miin mbe ma-a. 28 Wo-a a a min fan, n-na min fɔ wo ye, mbɛ n mbe na tena wan ta-a, chɛɛ n mbe yɛ-a wan to wo ya ɔ. Ni n ko a di wan wo ye, wo bu ɔ dia-a wan, a si n yɛ koe ma Fa tena. Koe min na mu, a benden mu n ma. 29 N mbe chɛ gbɛɛ fɔ tena wan wo ye sanche, an mbe e na to ma-a. Chɛ ɛ a ma-a wan, an mbe ma-a tima min na, wo e dan-da wan n da a bai n na. 30 Mmɔ ee che to chia ɔ bɔ yansama chɛ-a mmɔ bɛ, a mu min na, nyina yama min 'na gbasaya ɛ dunya chɛ ɔ mɔɛ n kun ma, ɛ chia a. Chɛɛ gbasaya ee a boo ɔ n kun ma. 31 Chɛɛ a nyin dunya chɛ ɔ mɔɛ nu, an ni a ɔ sɔn, mbɛ n toen mu Fa a. Chɛ an fɛ mu, ko ɔ ko ɛ min fɔ, n mbe an ma a buɛ an dɔ. “Wo wo kɔɔ sɔ, mmɔ ni bɔ nɛ.”

15

1 Chisɔsi ɔ, “N fan mu kɔnɛ chɛndɛ chɛndɛ a, min mbe gbɔ chɛndɛ be. A sin, Fa an mu yadi ti a. 2 N bonɛ kan kɔ kan, min mbe ee gbɔ chɛndɛ be, ɛ a ka wan a ma. N bonɛ min sin mbe ee gbɔ a tenden be, ɛ a tɛ-a wan a a, min mbe a ma, a ni nyan chɛndɛ, mbɛ a gbɔ-a wɔsɔkɔɔ. 3 Bai chɛ nu, n-na miin fɔ wo ye, an-na a ma, wo bon chɛ n tɛ-a wo ma, wo ni gbɔɛ be chɛndɛ chɛ. 4 Mmɔ ma mɔ dɔndɔya ɔ, wo ma n boo ka, n bɛɛ, n mbe ee wo boo ka-a. Kɔnɛ bonɛ ee kun a ni gbɔ be, ni a kaenɛ ma-a kɔnɛ kuu ba ma. A chia dɔndɔ gbe chɛ a, wo wɛɛ, wo ee kun wo ni ko ɔ ko ma, mɔɔ ni mmɔ bɛ ma-a mɔ dɔndɔya ɔ. 5 “N fan mu kɔnɛ a, wo sin, n bonɛ n mu wo a. Nn mbe ma-a mɔ dɔndɔya ɔ, mɔɛ min na, a ma n boo ka ni, n bɛɛ, n ma a boo ka ni, a mɔɛ chɛ ɛ gbɔ sɛsɛ be-a wan. Koe min na mu, wo ee che ko ɔ ko ma-a, wo kun ma a a, ni n mbe ee wo kɔ. 6 Nn fea mɔɛ min na, nn mbe ee mɔ dɔndɔya ɔ, a mɔɛ chɛ ɛ ma-a wan yɔ kɔnɛ bonɛ, ɛ tɛ-a wan a a, mbɛ a gbaa-a. Kɔn bonɛ gbaaenɛ bonda chɛ nu, mɔɛ n mbe an na sɔn-da wan, an ni sa ta a, minda koe a sɔɛ a. 7 Ni mmɔ bɛ ma-a mɔ dɔndɔya ɔ, mbɛ wo-a n 'na bai n sa wo yii ma gban, ɛ nyan-da wan. Fen kɔ fen, wo toen mu min na, mbɛ wo-a Fa Yataa ɔ tisa a ko a, ɛ a be-a wan wo ma. 8 Wo e ko chɛndɛ min ma-a, ni an da a koa-a, wo e ma-a ka a ɔ yian fan na, mbɛ n fɛ denɛ mu wo a. An ko chɛndɛ chɛ n sin mbe a ɔ yian-da wan to mɔɛ n na, Fa kamayaen mu buɛ min dɔ. 9 N toen fan mu wo a, yɔ Fa wɛɛ toen mu buɛ min dɔ n na. Wo ma wo kan kɔ sɔ n 'na koadia a. 10 Ni wo e koe chɛ n ma-a, n mbe miin fɔ wo ye an ma koe a, wo ee na-a wo kan kɔ sɔ-a n 'na koadia a. N bɛɛ, n-na koe chɛ n ma wan, Fa ɛ miin fɔ n ye, mbɛ n ma n kan kɔ sɔ ni a 'a koadia a. 11 “N mbe koe chɛ n fɔ tena wo ye, min mbe a ma, buɔdia min mbe n dɔ, a ni ma wo wɛɛ ɔ. An mbe a ma-a wo 'a buɔdia da ni fa gban. 12 N mbe chɛ an fɔ tena wo ye a ma koe a, mbɛ wo ni to wo nyɔn na, yɔ n toen mu buɛ min dɔ wo a. 13 Ni mɔɛ fa-a mɔɛ n ko a, a toen mu miin na, chia dɔ mende ee to nɔ, koadia ɔ yian koe a, a ni ben chɛ ma. 14 A sin, wo e ma-a wan mɔɛ n na, n toenɛ ɛ ma-a miin na tima ɔ tima, ni wo-a koe chɛ n ma, n mbe miin fɔ-a wo ye. 15 N mbe ee wo ya to n 'na bɔi den na, koe min na mu, bɔi den ma a kan mɔ yiima sɔn. N mbe min ma tena, n mbe wo ya tena gbɛ n bɔɛ n fan na. Koe min na mu, ko ɔ ko, Fa-a min fɔ n ye, n-na a gbɛɛ ɔ yian wo a. 16 Wo wan ma n ya ni, ma koe a wo kan mɔ a, chɛɛ n fan-na wo ya, ma koe a n fɛ mɔɛ n na. N fan-na wo ya, mbɛ n-na wai be wo ma, wo ni ta, wo chɛ chɛ wai ni koa. Wo chɛ chɛ wai chɛ n sin, an ni ma kuɔ fɔ wai n na. Ni wo-a chɛ ma, Fa ɛ fen kɔ fen be-a wan wo ma, wo e a ɔ tisa-a min ko a, n tɔɛ ɔ. 17 N mbe chɛ an fɔ tena wo ye, mbɛ wo ni to wo nyɔn na. 18 “Mɔɛ miin ma to ni Yataa a dunya chɛ ɔ, ni an too-a wo a, a ni ma wo yii ma, mbɛ an too-a n pɛn na. 19 Ni wo ni wan an 'na kuiɛ dɔndɔya ɔ dunya chɛ ɔ, an ni wo ya wan an sima a, mbɛ wo ko a dia-a an ye. Chɛɛ n-na wo bɔ wan an 'na dunya ɔ, a sin-na a ma, wo bɛ ma to an na. Chɛ an fɛ mu, an tooenɛ ɛ wo a. 20 N da a bai chɛ ni to wo yii ma, n na-a min fɔ wo ye, mbɛ bɔi den mbe ee nɔ, min benden mu a kan mɔ ma. Ni an-na a ma wan n tɔɔ-a, wo wɛɛ, an mbe a ma-a ka wan wo ni tɔɔ. Chɛɛ ni an dɔ nu, an na-a an too ma sɔ wan n da a kuiɛ ma, mbɛ an mbe an too ma sɔ-a wan wo ta wɛɛ ma. 21 Chɛɛ an mbe a ma-a wan wo ni tɔɔ, n bakoe fɛ. An mbe chɛ ma-a wan, koe min na mu, an ma Fa Yataa sɔn, min-na n sɔ. 22 Ni n nii ma na ni, n ni koɔ an tena, a si Yataa wakoe ma, Yataa nii a tɛɛ si-a an ma, ko yama ma koe a. Chɛɛ ɛ ka gbɛ buɛ min dɔ sanche, an mbe ee che to a fɔ-a an nii ma an 'na ko yama n sɔn. 23 Mɔɛ min mbe too-a n na, ɛ too-a ka Fa an na. 24 Yataa nii a tɛɛ si-a an ma, ko yama ma koe a, ni n nii ma koe n ma ni an tɛ ɔ. Kamaya koe chɛ nu, n-na miin ma, mɔ ɔ mɔ ma miin ma nin bɛ an ya kɔɔɛ. Chɛɛ an ban-da gbɛ kamaya koe chɛ n gbɛɛ yen-da, n-na miin ma. Chɛ gbɛɛ ɔ, an too-a wan n na, a basan Fa wɛɛ a. 25 Chɛ ma-a, min mbe a ma, min nyɛnden ni an 'na sawa n dɔ, a ni bɔ a a. A nyɛnden ni ka wan, ‘An too-a wan n na dechee, n nii ma ko ɔ ko yɔn ni an ma.’ 26 “Chɛɛ min mbe wo deman-da, n mbe a sɔ-a wan, a ka Fa tena. Fa Yataa Nyina chɛ, an mbe tea ɔ yian-da wo a, a si a wandi ma. N mbe a ma-a wan a ni ka Fa tena, a ni na wo tena. A sin, ɛ n bakoe ɔ yian-da wan wo a. 27 A sin gbu, wo wɛɛ, wo e n bakoe ɔ yian-da wan mɔɛ n na. Koe min na mu, kɛn n-na a kuu sɔ kanɛ chɛ-a, mmɔ bɛ an mbe ben ben tena.

16

1 “N mbe chɛ gbɛɛ ɔ yian tena wo a, min mbe a ma, wo ma na sɛmbɛ wo kai fa koe a n na. 2 An mbe wo gbain-da wan fɛsɛ fɛsɛ, a bɔ an 'na samun chɛ chenɛ a. A sin gbu, tima ɛ che-a wan, mɔ ɔ mɔ min mbe wo dɔndɔ wɛɛ fa-a, ɛ ma-a wan a yii ma, mbɛ a-a Yataa faa ma koe an ma ka. 3 Mɔɛ n mbe koe chɛ n ma-a wan wo a, koe min na mu, an ma Fa Yataa sɔn tee dɔndɔ wɛɛ, chɛ ma, n fandi gbu wɛɛ. 4 Chɛɛ n mbe koe chɛ gbɛɛ ɔ yian tena wo a, a tima an ko a. Min mbe a ma, ni a che-a, an ni koe chɛ n gbɛɛ ma wo a, n na-a min gbɛɛ ɔ yian wo a, ɛ ma-a wan wo yii ma. N nii ma koe chɛ n dɔ yian ni wo a, a ka wo bea tima chɛ gbɛɛ ma n fɛ. N-na chɛ ma koe min na, mmɔ bɛ an ni chɛ gbɛɛ ɔ ben ben-da. 5 “Chɛɛ sanche chɛ ɔ, n mbe ta tena gbɛ Fa tena wan, min-na n sɔ. Chɛ gbɛɛ ɔ, wo dɔndɔ wɛɛ ee n dɔ tisa tena, ni n mbe ta tena mende. 6 A sin, n-na a ɔ yian ka gbɛ buɛ min dɔ wo a sanche, faamɔnɛ koa-a wo ma. 7 Chɛɛ n mbe chɛ ma din tena wo tena, mbɛ a nyin fan wo ko a, n ni ta. Koe min na mu, ni n ma yɛ ni, Yataa Nyina min mbe wo deman-da, a ee na-a wo tena. Chɛɛ ni n yɛ-a, n mbe a ma-a wan, a ni na wo tena. 8 Ni n sin-na a ma a na-a, ɛ a ma-a wan, mɔɛ dɔ nu dunya chɛ ɔ, an ni a ɔ sɔn fen mu ko yama a. A yɛ to, an ni a ɔ sɔn, an mbe ma buɛ min dɔ an ni tan Yataa tena. Mbɛ a yɛ-a to, a-a a ɔ yian an na, Yataa ɛ kaa a tɛ-a buɛ min dɔ. 9 Yiima min mbe an dɔ, a si ko yama ma, tea yiinachii ma, koe min na mu, an ma an kai fa ni n na. 10 An sin ma a ɔ sɔn to, koe min nyin a ma koe a, koe min na mu, n mbe yɛ tena Fa Yataa tena wan. A sin, wo ee a a tun-da to n yen koe a. 11 An sin ma a ɔ sɔn, kaa chɛ a tɛ-a buɛ min dɔ. Koe min na mu, Yataa ban-da kaa a tɛ-a Sitana wakoe ma, min mbe dunya chɛ kun ma. 12 “Bai sɛsɛ ɛ wan n da a, a fɔ koe a wo ye, chɛɛ wo ee na-a kun-da, wo ni an gbɛɛ sa wo yii ma. 13 Chɛɛ ni Yataa Nyina chɛ na-a, min mbe tea ɔ yian a si Yataa ma, ɛ a ma-a wan, wo ni tea gbɛɛ ɔ sɔn. A ee koɔ-a wo tena a kun ma gbasaya n dɔ, chɛɛ ɛ min na min-da Yataa a, ɛ an fɔ-a wo ye. A sin, koe miin mbe na tena ma-a, ɛ an fan dɔ yian-da wo a. 14 Ɛ a ɔ yian-da wan wo a, n kamayaen mu buɛ min dɔ. Koe min na mu, n da a bai nu, ɛ an fan na ben-da wo tena. 15 Fen kɔ fen Fa ta mu min na, n fan ta mu a a. An fɛ mu, n-na a fɔ, n dɔ, Yataa Nyina chɛ ɛ a too ma sɔ-a wan n da a bai ma, mbɛ a-a a ɔ yian wo a.” 16 Mbɛ Chisɔsi ɔ, “A to-a gbɛ fen den, mbɛ wo ee na-a n yen-da to, chɛɛ tima kundu ɛnden tɛ ɔ, wo e n yen-da wan to.” 17 Mbɛ a fɛ den chɛ dɔ nu, an bun-da a tɛnsɛ-a an nyɔn tɛ ɔ, an dɔ, “A yen ko, a ɔ, mmɔ ee na tena to a yen-da, a ɔ, a ɔ ee mɛ tena to. Mbɛ a yɛ-a to, a ɔ, mmɔ ɛ a yen-da wan, a ɔ, a ɔ ee mɛ tena to. A ɔ te to, mbɛ mmɔ ee na-a a yen-da, a ɔ, koe min na mu, a ɔ, ɛ ta tena a fa tena wan. A e na ma ka fen fɔ-a mmɔ ye? 18 Mmɔ gbu an mbe ee che a ɔ gbɛ-a, ɛ bai miin fɔ tena. Chɛ yen bɛ, ‘a ɔ ee mɛ tena to,’ mmɔ ɛ fen dɔ gbɛ chɛ ma?” 19 Chisɔsi na-a a ɔ sɔn fan, mbɛ an toen fan ni ka, an ni a ɔ tisa. Mbɛ a ɔ, “N dɔ, wo ee na tena to n yen-da, n dɔ, a ɔ ee mɛ tena to. Mbɛ n dɔ te to, wo e n yen-da wan, n dɔ, a ɔ ee mɛ tena to. N-na a ɔ sɔn fan, mbɛ chɛ gbu an-na wo kɔndɔ fii ka. 20 Ka n mbe chɛ ma din wo tena, mbɛ wo e di chɛ-a wan gbafi gbafi, wo ya yii ni bɔn, a si koe chɛ n ma, miin mbe na tena n tan-da. Chɛɛ mɔɛ chɛ n tana dunya ɔ, Yataa wakoe ee miin faa ɔ, an mbe ma-a buɔdia an dɔ. Wo e ma-a wan faamɔnɛ ɔ, chɛɛ wo 'a faamɔnɛ chɛ ɛ mun-da buɔdia an na wo ma. 21 Ɛ ma-a wan dechee, yɔ ni musu bu ɔ tɛ-a, faamɔnɛ min mbe ma a ma, koe min na mu, tɔɔya ɔ bia tima che-a a boo ɔ. Chɛɛ ni a-a den chɛ suun gbɛ dechee, kun na dia ɔ, mbɛ a nyina-a a 'a tɔɔya ma. Ɛ ma gbɛ buɔdia an dɔ, koe min na mu, a-a mɔ gbu ma sɔn dunya chɛ ɔ. 22 Wo wɛɛ, an mbe ka ma-a wo a sanche chɛ ɔ. Wo e faayɔnɛ an dɔ, chɛɛ a ee mɛ-a, n mbe wo yen-da wan to. A sin, wo bu ɔ dia-a wan kaka. An buɔdia chɛ nɛnɛ, mɔ ɔ mɔ ee che-a a ma-a to, wo ni fo a a. 23 “Ni an tee chɛ che-a, wo ee n dɔ tisa-a to a si ko ɔ ko ma. Ka n mbe chɛ ma din wo tena, mbɛ ni wo-a Fa ɔ tisa fen kɔ fen ko a, n tɔɛ ɔ, ɛ a be-a wan wo ma. 24 Chɛɛ mmɔ ɛ chɛ gbɛɛ ɔ aan sanche, wo ma tisa chɛ nin bɛ fen kɔ fen ko a, n tɔɛ ɔ. Wo tisa chɛ, mbɛ wo-a fen chɛ ma sɔn, wo e min bakoe ɔ tisa-a. Chɛ an mbe a ma-a, wo 'a buɔdia da ni fa gban. 25 “N mbe ka sanche koe chɛ n gbɛɛ ɔ yian-da wo a, tai n fan dɔ. Chɛɛ tima ɛ che-a wan, mbɛ n-na n boo bɔ tai a bɔɛ ɔ, mbɛ n koɔ-a wo tena a si Fa ma, wo ni a ɔ gbɛ gbadan. 26 Ni a tee chɛ che-a, wo e fa ɔ tisa-a wan, n tɔɛ ɔ. Chɛɛ n mbe ee a fɔ tena, mbɛ fɔ ni, n bɛɛ, n-na a disa wo ko a. 27 Koe min na mu, Fa wandi gbu, a toen fan mu wo a. Wo toenɛ min chɛ-a n na, a wɛɛ, an-na a to wo a. A sin, wo-a wo kai fa to n na, mbɛ wo dan-da a a, mbɛ n ka-a Fa Yataa tena wan. 28 N sin gbu ka-a Fa tena wan, mbɛ n na-a nɛ dunya chɛ ɔ. A sin, sanche chɛ ɔ, n mbe bɔ tena wan dunya chɛ ɔ, mbɛ n yɛ-a Fa tena.” 29 Mbɛ a fɛ den chɛ n dɔ, “Chɛ an nyin, i-a tai tɛ boo ka gbɛ. I bun-da a ma-a gbɛ, nn mbe i da a kuiɛ ɔ gbɛ-a gbadan. 30 Sanche mu gbɛ a boo-a nn ma chɛndɛ chɛ, mbɛ nn yii ma koe gbɛɛ ɛ i boo faa a wan. I gbu an mbe ee mɔ ɔ mɔ ɔ tisa, ni fen mbe a yii ma, koe min na mu, i-a mɔ gbu yii ma koe sɔn fan. Chɛ ko a, nn dan-da gbɛ a a chɛndɛ chɛ, mbɛ i ka-a Yataa tena wan.” 31 Mbɛ Chisɔsi ɔ, “An nɛ, wo dan-da gbɛ n na fo. 32 Chɛɛ tima ɛ che tena, a sin, an tima gbu che-a, wo gbɛɛ, wo e na tena fasan-da n ma tima min na. Dɔndɔ dɔndɔɛ a, wo e na tena ta-a wo ta chia an na, mbɛ wo-a n dɔndɔ gbe ma gbaaenɛ to. Chɛɛ chɛ gbɛɛ ɔ, n dɔndɔ gbe ee ma tena, koe min na mu, Fa ɛ n kɔ gban. 33 N mbe chɛ gbɛɛ fɔ tena wo ye, min mbe a ma, wo ni faachima sɔn. Koe min na mu, mɔ dɔndɔɛ mu mmɔ a, mmɔ gbɛɛ. Ko yawaenɛ n mbe wo tan-da wan dunya chɛ ɔ. Chɛɛ wo wo faa sɔ, n kun-da gbasaya ti ma dunya chɛ ɔ.”

17

1 Chisɔsi ban-da kɛn bai chɛ n fɔ-a a fɛ denɛ n ye, mbɛ a-a a ya a si banda a, a-a samunɛ chɛ, a ɔ, “Fa, tima gbu che-a. A ma mɔɛ n ni a ɔ yen, n kamayaen mu buɛ min dɔ, mbɛ n bɛɛ, n-na a ma, mɔɛ n-na i ta kamaya wɛɛ ɔ yen. 2 Koe min na mu, i-a gbasaya be n ma, mɔ gbu n gbɛɛ kun ma dunya ɔ. Gbasaya min mbe a ma, n ni a ma, chɛ n gbɛɛ ni kuɔ fɔ fɔɛ ma sɔn, i-a miin be n ma, ma koe a n fɛ. 3 Mɔɛ n sin mbe kuɔ fɔ fɔɛ chɛ ma sɔn ka wan. An mbe i wan sɔn, tea Yataa dɔndɔɛ a, mbɛ an-na n bɛɛ sɔn, i 'a denɛ Chisɔsi Chasi, i-a n fɛn sɔ dunya chɛ ɔ. 4 N ban-da a ɔ yian-da dunya ɔ, i kamayaen mu buɛ min dɔ. A yen ko, n-na i 'a wai a ban, i-a min be n ma a chɛ koe a. 5 Fa Yataa, sanche gbɛ, a ma n ni ma basɔmaya chɛ ɔ, i waa a, yɔ n ni min nyɔn sima ɔ, dunya chɛ a e na to dan-da. 6 “I-a mɔɛ dɔ n bɔ wan an bɔɛ n tɛ ɔ, nɛ dunya chɛ ɔ, mbɛ i-a an be n ma, ma koe a n fɛ denɛ n na. A gbu sin, i wan ta ni an na, a sin to, i wan-na an be n ma. N-na i wakoe ɔ yian fan an na, an-na i sɔn. An sin-na an too ma sɔ wan i da a kuiɛ ma, chɛ gbɛɛ ɔ. 7 Sanche chɛ sin dɔ gbɛ, an-na a ɔ sɔn gbɛ chɛndɛ chɛ, mbɛ i na-a fenɛ miin gbɛɛ be n ma, an ka-a i wandi gbu an tena. 8 I 'a sakana chɛ, i-a min be n ma an ko a, n-na a a ben fan an tena. A sin, an-na an too ma sɔ wan a ma. Mbɛ an-na an boo a chii a ma, mbɛ tea mu, mbɛ n ka-a i tena wan. A sin, an danden fan mu to a a, mbɛ i wan-na n sɔ. 9 “I 'a mɔɛ n fan nɛ, i wan-na an be n ma, n mbe samunɛ chɛ tena an ko a. N mbe ee samunɛ chɛ tena chɛ n fan ko a, i wakoe ee miin faa ɔ. 10 Mɔɛ miin gbɛɛ n ko a, i wɛɛ, i 'a mɔɛ nu mu. Mɔɛ miin gbɛɛ, an mbe i ko a, n bɛɛ, n 'na mɔɛ nu mu. A sin, an mbe a ɔ yian tena wan, n kamayaen mu buɛ min dɔ. 11 Sanche chɛ ɔ gbɛ, n mbe chia an na, na koe a i tena. N tana, ɛ gbɛ buɛ min dɔ, n mbe ee ma tena to dunya chɛ ɔ. Chɛɛ an tana, an mbe wɛ nɛ chɛ a ɔ. Fa, i wɛn kan nyɔ ee, an kun ma fɛn, min mbe a ma, an ni ma mɔ dɔndɔɛ a an nyɔn tena, yɔ mɔ ɛ buɛ min dɔ. Chɛ ma i 'a gbasaya ɔ, i na-a gbasaya min sima be n ma. 12 Tima min na nn bɛ ni an na, n na-a an kun ma fɛn fan chɛndɛ chɛ. N na-a chɛ ma i 'a gbasaya ɔ wan, i na-a gbasaya min be n ma. A sin, n ma fo nin bɛ an dɔndɔ wɛɛ a. Chɛɛ an dɔndɔ mu dechee, i na-a min bakoe fɔ, mbɛ a tana ɛ na-a wan a wandi nimisa-a. Chɛ ɛ ma-a wan, min mbe a ma, min nyɛnden mu i 'a gboo ɔ, a ni bɔ a a. 13 A sin, sanche chɛ ɔ, n mbe gbɛ chia an na, na-a i tena. Chɛɛ n mbe wɛ nɛ tima min na dunya chɛ ɔ, n mbe koe chɛ n gbɛɛ ɔ yian tena wan n fɛ den chɛ n na. Chɛ ɛ ma-a wan, buɔdia min nyɔn sima ɛ n dɔ, an ni a buɔdia da faenɛ ma sɔn. 14 I-a sakana min be n ma an ko a, n-na a ben fan an tena. An sin, an bɛ ee mɔɛ chɛ n na ko dɔndɔ ɔ, i wakoe ee miin faa ɔ. Chɛ ko a, an fɛn mbe i faa ma koe ma ka, an ko a ma di chɛ n ye, miin mbe ee i faa ma koe ma ka. 15 N mbe ee samunɛ chɛ tena gbɛ, min mbe a ma, i ni an bɔ dunya chɛ ɔ. Chɛɛ n mbe a chɛ tena, i ni an kun ma fɛn Sitana boo ɔ, nyina yama chɛ. 16 N mbe buɛ min dɔ dechee, nn bɛ mɔɛ chɛ n na, i wakoe ee miin faa ɔ, nn mbe ee ko dɔndɔ ɔ. N fɛ den chɛ n bɛɛ, an mbe dechee ka wan yɔ n fan, an bɛ an mɔɛ chɛ n na, an mbe ee ko dɔndɔ ɔ. 17 I 'a bai an mu tea a. Chɛ an-na a fɔ, a ma i 'a bai chɛ ni an ma, an ni ma i ko a tenchen. 18 I na-a n sɔ buɛ min dɔ dunya chɛ ɔ, n bɛɛ, n mbe ka wan an sɔ-a gbɛɛ ben-da a ɔ. 19 A sin, an fan ko a mu, n mbe n fandi be tena, ma koe a tenchen i ko a. Chɛ ɛ a ma-a wan, an bɛɛ, an ni ma tenchen i ko a. 20 “N mbe samunɛ min chɛ tena, n fɛ den chɛ n dechee an ko a ma. Chɛɛ mɔɛ chɛ n bɛɛ ko a, miin mbe an kai fa-a n na, a mu min na, n fɛ den chɛ n koɔ-a an tena a si n ma. 21 N mbe samunɛ chɛ tena, an gbɛɛ ni ma mɔ dɔndɔya ɔ. Fa, a ma an ni ma mɔ dɔndɔya ɔ mɔ a, yɔ mɔ fea chɛ mɔɛ ɛ buɛ min dɔ mɔ dɔndɔya ɔ. 22 N-na a ma an bɛɛ-a basɔmaya ma sɔn, i na-a basɔmaya min be n ma. N-na chɛ ma, min mbe a ma, an ni ma mɔ dɔndɔya ɔ an nyɔn na, yɔ mɔ fea ɛ buɛ min dɔ. 23 Nn bɛ an na, mɔ dɔndɔɛ mu nn na, yɔ mɔ fea wɛɛ, mɔ ɛ buɛ min dɔ. Chɛ ni a ma, an mbe mɔ dɔndɔya min dɔ an nyɔn na, a da ni fa gban. Chɛ ɛ a ma-a wan, i wakoe ee mɔɛ miin faa ɔ, an ni a ɔ sɔn, mbɛ i wan-na n sɔ. A yɛ to, an mɔɛ chɛ n ni a ɔ gbɛ chɛndɛ chɛ, mbɛ i toen fan mu n fɛ den chɛ n na, yɔ i toen mu n na buɛ min dɔ. 24 “Fa, i ban-da gbɛ an be-a n ma. N toen mu, n mbe ma-a kaina min, nn bɛ ni ma nɔ n fɛ den chɛ n na. Chɛ ɛ a ma-a wan, an ni a ɔ yen n kamayaen mu buɛ min dɔ. A sin, i wan-na an kamaya chɛ be n ma. I na-a a be n ma, koe min na mu, i to-a wan n na pɛn dunya chɛ a ni to dan-da. 25 Fa, i wɛn tanden mu, i wakoe ee mɔɛ miin faa ɔ, kɛn gba an ma i sɔn. Chɛɛ n tana, n-na i sɔn fan tima ɔ tima ko a. A sin, n fɛ den chɛ n bɛɛ gbu, an-na a ɔ sɔn gbɛ, mbɛ i wan-na n sɔ. 26 N-na i wakoe ɔ yian fan an na, an-na i sɔn. A sin, n gboo ɔ ee fa-a a ɔ yian koe a an na. Chɛ ɛ a ma-a wan, n ko a di ka buɛ min dɔ i ye, a nyɔn sima koadia ni ma an faa ɔ. Mbɛ a sin fan mbe a ma-a, nn bɛ an na, nn ni ma mɔ dɔndɔɛ a.”

18

1 Chisɔsi ban-da kɛn samunɛ chɛ chɛ-a, mbɛ a bɔ-a nɔ, an bɛ a fɛ denɛ n na. Mbɛ an-na foo ɔ tandin, min tɔ ni Kidon foo. Foo chɛ kaka chɛ ma, kɔn nangbanɛ ni wan nɔ. Mbɛ Chisɔsi don-da an nangbanɛ chɛ ɔ, an bɛ a fɛ denɛ chɛ n na. 2 Chɛɛ a fɛ denɛ Chudasi, min ni na tena ka a ma tachɛ-a a chɛɛ ma nyɔɛ nu ma, a na-a an kaina chɛ sɔn fan. Koe min na mu, tima sɛsɛ ko a, Chisɔsi na-a bɛn fan nɔ, an bɛ an na. 3 Mbɛ Chudasi na-a an kaina chɛ, ɛ na-a an bɛ Domi chɛnyɛ ɔ soya kuunɛ n na. An bɛ ni poesi n na na-a, miin ni Yataa 'a kata kun ma fɛn. Fayisii mɔɛ dɔ nu, an bɛ Chu n tɛ mɔɛ nu Yataa a, an 'na mansa nu, an fan na-a an sɔ. Chɛɛ chɛ feanka n ni wan an boo ɔ, ni sanku manɛ, a basan dambo n na. 4 Chisɔsi na-a a ɔ sɔn fan chɛndɛ chɛ, an ni na tena koe miin gbɛɛ a ben-da a a. Chɛ ko a, a wɛɛ ta-a wan an ya ɔ, mbɛ a ɔ, “Wo e wo ya a kan tena nyɔn na?” 5 Mbɛ an dɔ, “Nn mbe nn ya a kan tena Chisɔsi an na, min ka-a Nasaɛti duu ɔ.” Mbɛ a ɔ, “N yen ko.” A tima chɛ a, Chudasi, min ni ka a ma tachɛ-a, chɛɛ ma nyɔnɛ n ma, ɛ nɔ sɔ ɔ, an bɛ an mɔɛ chɛ n na. 6 Chisɔsi-a a fɔ kɛn, a ɔ, “N yen ko,” mbɛ an gbɛɛ yɛ-a an kuu kɔ, an bea-a duu ma. 7 Mbɛ Chisɔsi-a an dɔ tisa to, a ɔ, “Nyɔn gbu mu, wo e wo ya a kan tena min na?” Mbɛ an dɔ te to, “Chisɔsi, min ka-a Nasaɛti duu ɔ.” 8 Chɛ nɛnɛ ɔ, a ɔ, “N ban-da a fɔ-a wo ye, mbɛ Chisɔsi mu n fan na. Chɛ an fɛ mu, ni wo e wo ya a kan tena n fan na, mbɛ wo a ma, n fɛ mɔɛ chɛ n ni ta.” 9 A-a chɛ fɔ, min mbe a ma, a na-a min fɔ, a ni bɔ a a. A na-a a fɔ wan, a ɔ, “Fa, n ma fo ni mɔɛ chɛ n dɔndɔ wɛɛ a, i na-a mɔɛ miin be n ma, an kun ma fɛn koe a.” 10 Mbɛ a fɛ den chɛ n dɔndɔ, Saimɔn Pita, a-a chɛɛ chɛ mɛ bɔ a sa ɔ. Mbɛ Chu n 'na tɛ mɔ wa Yataa tena, a 'a yɔnɛ, a-a a too tɛ a a fau, a boo nyima ɔ. An yɔnɛ chɛ, a tɔ ni Makɔsi. 11 Mbɛ Chisɔsi ɔ Pita gbu ma, a ɔ, “I 'a chɛɛ chɛ mɛ a yɛ a sa ɔ. N mbe mɔnɛ chɛ bia wan, Fa-a a fɔ, n ni min dɔ bia. Ɛ i yii ma, n mbe ee a ɔ bia-a?” 12 Mbɛ Domi soya mɔɛ nu, an bɛ an 'na mɔ chenama an na, a basan Yataa 'a kata kun ma fɛn poesi chɛ n na, an gbɛɛ-a Chisɔsi bia. Mbɛ an-na a chii. 13 An ta-a mɔɛ min pɛn tena, an nɛ kai Anasi a. Chu n 'na tɛ mɔ wa Yataa tena, an san chɛ a, a ni Kayafasi an na. Anasi chɛ, a 'a denɛ musuma, an ni a boo ɔ. 14 Kayafasi chɛ ni, min na-a Chu mɔɛ n ya ɔ sɔɛ n na si, mbɛ a fisa mɔ dɔndɔɛ ni fa mɔ gbu tɔɛ n ko a. 15 Saimɔn Pita chɛ, an fea a bɔɛ fɛ den dɔ mende a, an ta-a wan Chisɔsi san-da. A wan Pita bɔɛ chɛ, Chu n 'na tɛ mɔ wa chɛ Yataa tena, a na-a a sɔn fan chɛndɛ chɛ. Chɛ ko a, a tana, a don-da wan an tɛ mɔ wa chɛ 'a kata ɔ. 16 Chɛɛ Pita tana, a to-a kata chɛ kɔ wan, a da tɔnfɛ. Mbɛ a bɔɛ chɛ bɔ-a baa ma, mbɛ a koɔ-a sunkun tɔngbɔɛ tena kata chɛ da a, mbɛ Pita don-da an fea a bɔɛ chɛ a. 17 Sunkun tɔngbɔɛ chɛ, min ni ka kata chɛ da a, a koɔ-a Pita tena. A ɔ, “I wɛɛ, a ma ma, mbɛ i mu kamin chɛ fɛ denɛ dɔndɔ an na.” Chɛɛ Pita ɔ, “A an, a fɛ den ma n na.” 18 Chima an ni na tena a tima chɛ a, min-na a ma, tɛ mɔ wa chɛ 'a bɔi denɛ chɛ n dɔ nu, an bɛ Yataa 'a kata kun ma fɛn poesi chɛ n na, an-na ta chɛ chɛmbu ɔ. A sin, an tindanden fan ni a a, an mbe an gbaa-a. Mbɛ Pita wɛɛ na-a an tena, a sɔ-a, a bun-da a gbaa-a. 19 Mbɛ tɛ mɔ wa chɛ-a Chisɔsi ɔ tisa, a fɛ denɛ n bakoe a, a yɛ to, a si kanɛ ma, ɛ min chɛ. 20 Chɛɛ Chisɔsi ɔ, “N ma bai ɔ bai sa nin bɛ doee ɔ. Tima ɔ tima ko a, mɔɛ miin ni an too ma sɔ n ma, n ni koɔ wan an tena fanka ɔ den. Kanɛ gbɛɛ n ni min chɛ, n ni a chɛ wo 'a samun chɛ chenɛ n na wan, a basan Yataa 'a kata ɔ a, mɔɛ n gbɛɛ bɛn tena nu. 21 Fen ko a gbɛ, e n dɔ tisa tena? Mɔɛ miin ni an too ma sɔ n ma, e an fan dɔ tisa. An dɔ tisa, an ni a ɔ yian i a, n ni min fɔ an ye, an-na a gbɛɛ ɔ sɔn fan.” 22 Chisɔsi-a chɛ fɔ kɛn dechee, poesi chɛ n dɔndɔ nɔ, a-a a too ɔ gbasi. A ɔ, a wan Chisɔsi ee kun, a ɔ, a ni koɔ ka buɛ chɛ ɔ, an 'na tɛ mɔ wa tena. 23 Mbɛ Chisɔsi ɔ, “Fen mu e n gbasi tena? A ɔ yian bɛ mɔɛ chɛ n na nɛ, n-na bai yama min fɔ. Chɛɛ ni n ma bai yama fɔ ni, i nii a ma ka.” 24 Chisɔsi boo ɔ chiienɛ chɛ to-a ka wan, mbɛ Anasi-a a ma, an ben-da a a Kayafasi tena, Chu n 'na tɛ mɔ wa chɛ Yataa tena. 25 Saimɔn Pita ni wan sɔ ɔ tun mɔɛ chɛ n tɛ ɔ, ɛ a gbaa chɛ-a. Mbɛ an-na a ɔ tisa, an dɔ, “I wɛɛ, a ma ma, mbɛ i mu kamin chɛ fɛ denɛ dɔndɔ an na.” Chɛɛ Pita-a kɔɔsa bia chɛ wan to, a ɔ, “A an, a fɛ den ma n na.” 26 Mbɛ tɛ mɔ wa chɛ 'a bɔi dɔndɔ wɛɛ ni wan nɔ. A suun ma nyɔɛ ni mɔna chɛ a, Pita na-a min too tɛ ka a a. Mbɛ bɔi chɛ koɔ-a, a ɔ, “N na-a i yen fan kɔn nangbanɛ chɛ ɔ, wo fea ɛ Chisɔsi a, ae?” 27 Mbɛ a gba sawan bɔɛ chɛ wɛɛ ɔ, Pita ɔ, “A an.” A sin, a ya kɔɔɛ a, tɛ kɔnɛ konchee-a wan. 28 Sau sau ma ni, mbɛ an bɔ-a Chisɔsi a Kayafasi chen kɔɔ, an ta-a a a. Mbɛ an na-a Domi kun ti chen kɔɔ, min ni kɔfana a Chudia chɛnyɛ ɔ. Mɔ fanka min na-a ka Chisɔsi a, an nii ma don ni kata chɛ ɔ, an to-a a baa ma wan. Chu sawa ta fɛ chia a, an toen ni an ni an fandi bia chɛndɛ chɛ. Chɛ an mbe a ma, an ni daunɛ chɛ, kun bɔ a ɔ bɛnɛ chɛ kun ma, aan an ni ban. 29 Chɛ ko a, Kɔfana Padeti bɔ-a a 'a kata ɔ, a na-a a tan. Mbɛ a ɔ, “Kamin chɛ-a fen ko yɔn wo ma?” 30 Mbɛ an-na a yɛman ka wan, an dɔ, “Ni mɔna chɛ ma ko yama kan kɔ kan ma ni, nn mbe ee kun nn ni na a a i chen kɔɔ.” 31 Mbɛ Kɔfana Padeti ɔ, “Mbɛ wo wandi, wo ta a a, wo ni wo 'a sawa a tachɛ a a.” Chɛɛ an dɔ, “Wo wan Domi mɔɛ n ma a gbasaya chɛ be nin bɛ kɛn nn ma, kaa a tɛ koe a mɔɛ fa koe ma.” 32 An-na bai min fɔ ka, a-a a ɔ yian fan, mbɛ Chisɔsi na-a min fɔ, a ɛ bɔ-a wan a a. Chisɔsi na-a a ɔ yian fan, an ni na tena a fa-a buɛ min dɔ. 33 Mbɛ Kɔfana Padeti yɛ-a a 'a kata bu ɔ, mbɛ a-a a ma, an na-a Chisɔsi a a tena. Mbɛ a ɔ, “I wan mu Chu mɔɛ n 'na mansa a?” 34 Chɛɛ Chisɔsi ɔ, “I wandi gbu ta tisa an nɛ, kɔ mɔɛ n fan-na n ma don i tena?” 35 Mbɛ Kɔfana Padeti wɛɛ ɔ, “Chɛɛ a ma ma i yii ma, mbɛ Chu mɔɛ mu n na, i ɔ tisa koe a n kun ma a a. I wandi 'a mɔɛ n gbu, a basan Chu n tɛ mɔɛ nu Yataa a, an 'na mansa n na, an fan na-a i a n chen kɔɔ. I-a fen gbu ma?” 36 Mbɛ Chisɔsi ɔ, “Dunya chɛ ɔ mansa ma n na. Ni a ni n na, mbɛ n fɛ mɔɛ n ni butuinɛ chɛ-a wan n ko a, mɔɛ n nii n be-a ya ɔ sɔɛ chɛ n ma. A an, n 'na mansaya gbasaya ma bɔ ni dunya chɛ an dɔ.” 37 Chɛ-a a ma wan, Kɔfana Padeti ɔ, “E ka a fɔ an na gbɛ n ye, mbɛ mansa mu i a?” Mbɛ Chisɔsi ɔ, “I wan-na a fɔ, i ɔ, mansa mu n na. N na-a dunya chɛ ɔ, mbɛ n suun-da mɔgbuya ɔ. Chɛ ma-a, ko dɔndɔ gbe chɛ an ko a, tea ɔ yian koe a mɔɛ n na. A sin, mɔ ɔ mɔ min toen mu an tea chɛ a, ɛ a too ma sɔ wan n da a kuiɛ ma.” 38 Mbɛ Kɔfana Padeti ɔ a ma, a ɔ, “Tea e na ma fen na?” Mbɛ Kɔfana Padeti bɔ-a to mɔɛ chɛ n tena, a 'a kata baa ma. Mbɛ a ɔ, “N ma chia kan kɔ kan yen ni, kaa a tɛ koe a, mɔna chɛ fa koe ma. 39 Chɛɛ san kɔ san na, manda mu a a, mbɛ kun bɔ a ɔ bɛn chɛ kan kɔ kan kun ma, n mbe n boo ka wan mɔɛ dɔndɔ a wo ye, min mbe sa ɔ pimbi chenɛ a. Chɛ an-na a fɔ gbɛ sanche, wo toen mu n ni n boo ka wo 'a mansa an na, ae?” 40 Chɛɛ chɛ ko a, an-na yee tɛ wan, an dɔ, “A an, an ma. N toen mu i ni i boo ka Baabasi an na.” Baabasi chɛ ni mɔ yama wa an na.

19

1 Mbɛ Kɔfana Padeti-a a ma, an-na Chisɔsi boan chɛndɛ chɛ. 2 Mbɛ soya chɛ nu, an-na mansa banfua nyan wai a sen sendenɛ ɔ, mbɛ an-na a si Chisɔsi kunɛ a. Mbɛ doma kai kɔ yawaenɛ, an-na a don a ma mansa doma a. 3 Mbɛ an-na an yuu sɔ na koe a a tena, an mbe ta-a ma yɛn ma bun-da a ma, an dɔ, “Chu mɔɛ n 'na mansa chɛ ni mɛ.” Mbɛ dɔndɔ dɔndɔɛ a, an-na a gbasi. 4 Mbɛ Kɔfana Padeti bɔ-a to baa ma, mbɛ a-a a fɔ mɔ fanka chɛ ye, a ɔ, “Wo wo too ma sɔ, n mbe a ma-a wan, an ni bɔ a a nɛ wo wandi tena. An mbe a ma-a, wo ni a ɔ yen, mbɛ n ma chia kan kɔ kan yen ni, kaa a tɛ koe a a fa koe ma.” 5 Mbɛ an bɔ-a Chisɔsi a, wai mansa banfua chɛ, a sienɛ ɛ a kun na, doma kai kɔ yawaen chɛ wɛɛ dondenɛ ɛ a ma. Mbɛ Kɔfana Padeti ɔ, “Wo 'a mɔna gbu yen ko.” 6 Mɔɛ miin mbe Chu n tɛ Yataa a, an 'na mansa chɛ nu, an bɛ Yataa 'a kata kun ma fɛn poesi chɛ n na, an gbɛɛ-a Chisɔsi yen kɛn sɔ ɔ an ya kɔɔ, an-na yee tɛ wan gba fea, an dɔ, “A ni gbangban kɔnɛ ma, a ni fa. A ni gbangban kɔnɛ ma, a ni fa.” Chɛɛ Kɔfana Padeti ɔ, “Wo wandi wo a bia, mbɛ wo-a a fa a buɛ ɔ. N tana, n ma chia kan kɔ kan yen ni, kaa a tɛ koe a a fa koe ma.” 7 Chɛɛ mɔ fanka chɛ ɔ, “Nn 'na sawa ɛ wan nɔ, min-na a fɔ, mbɛ mɔna chɛ ɛ fa wan. Koe min na mu, a ɔ, Yataa 'a denɛ mu a a.” 8 Kɔfana Padeti-a chɛ a min kɛn, a 'a chiandia gbu kun ma chɛ-a kaa a tɛ koe a Chisɔsi fa koe ma. 9 Mbɛ a yɛ-a to Chisɔsi a kata chɛ ɔ, mbɛ a-a a ɔ tisa, a ɔ, “I ta bɔ tena gbu mu mende a?” Chɛɛ Chisɔsi ma a tɛ ni a ma gbukuu wɛɛ. 10 Mbɛ Kɔfana Padeti ɔ a ma, a ɔ, “E yen ko ban-da koɔ koe a n tena. A ni ma i yii ma, mbɛ gbasaya ɛ wan n boo ɔ, i kun bɔ koe a saya chɛ ɔ. Gbasaya ɛ wan to n boo ɔ, a ma koe a, an ni i fa kɔn gbengbandenɛ ma.” 11 Chɛɛ Chisɔsi ɔ, “Gbasaya ee che ma-a i boo ɔ n kun ma, ni Yataa an ma a be ni i ma. Chɛ an fɛ mu, mɔɛ min-na a ma, an na-a nɛ chɛ n na i chen kɔɔ, a ta ko yama benden mu i ta ma.” 12 Kɔfana Padeti-a chɛ a min kɛn, a-a chia yan fan Chisɔsi boo ka koe a, a bɔ koe chɛ ɔ. Chɛɛ fanka chɛ-a yee tɛ to, an dɔ, “Ni i-a mɔna chɛ boo ka, mbɛ i ma to ni Domi kun ti wa a. Mɔɛ min mbe a wandi ya mansa a, ɛ ma-a ka a kaa sa-a Domi kun ti wa chɛ an na.” 13 Kɔfana Padeti-a an da a bai chɛ n na min kɛn, mbɛ a-a a ma an bɔ-a Chisɔsi a. Mbɛ a si-a a 'a kaa tɛ sea a. Sea chɛ ni kaina min, a tɔ ni kaina min nyanden mu senɛ a. Chu mɔɛ n ni nɔ chee, an dɔ, Kabata. 14 Tee min ma, Chu n ni an ma bɛn suin tee ko a, tee che-a a kun tɛ. An wichi chɛ ni kun bɔ a ɔ bɛnɛ an ko a. Mbɛ Kɔfana Padeti ɔ an ma, a ɔ, “Wo 'a mansa gbu yen ko.” 15 Mbɛ an-na yee tɛ to, an dɔ, “A ni ka ka, a ni ka ka. A ma a ni fa kɔn gbengbandenɛ ma.” Chɛɛ Kɔfana Padeti ɔ, “Wo 'a mansa, wo toen mu n ni a ma, an ni a fa kɔn gbengbandenɛ ma, ae?” Chu n tɛ mɔɛ nu Yataa a, an 'na mansa n dɔ, “Nn 'na mansa mu Domi kun ti wa an na dechee.” 16 Mbɛ a danka a, Kɔfana Padeti-a Chisɔsi be soya chɛ n ma nɔ, an ni a fa kɔn gbengbandenɛ ma. Mbɛ Chisɔsi ni gbɛ an fan ko a, an ta-a a a. 17 Chisɔsi wandi an to-a a 'a kɔn gbengbandenɛ chɛ suun-da aan an bɔ-a an duu chɛ ɔ. Mbɛ a-a a fo kaina, an ni min chee, an dɔ, Kun Konkonɛ Ma. Chu mɔɛ n ni nɔ chee, an dɔ, Kɔkɔta. 18 An kaina chɛ ni, an-na Chisɔsi gbangban kɔn gbengbandenɛ ma, a basan kamin fea dɔ mende n bɛɛ a. Chisɔsi an ni dɛn dɔ an kamin fea chɛ n tɛtɛ ma. 19 Mbɛ Kɔfana Padeti-a a ma, bai kundu nyɛn-da gbembe kundu ma, min gbangban-da kɔn gbengbandenɛ chɛ ma. An bai kundu chɛ ɔ, “Chisɔsi an nɛ, min ka-a Nasaɛti, Chu n 'na mansa.” 20 Chu mɔ sɛsɛ na-a a kan fan, koe min na mu, Chisɔsi gbangban-da ka kaina min, a ɔ nii ma yansan duu a. An bai kundu chɛ nyɛn-da gba sawa. A nyɛn-da Chu mɔɛ n da a kuiɛ pɛn dɔ, mbɛ a a mun-da Domi mɔɛ n ta ɔ, a danka a, a nyɛn-da Kiisi mɔɛ n ta ɔ. 21 Mbɛ Chu n tɛ mɔɛ nu Yataa a, an 'na mansa n dɔ Kɔfana Padeti ma, an dɔ, “I nii a fɔ, i ɔ, Chu n 'na mansa, chɛɛ i ni a fɔ wan, i ɔ, mɔna chɛ, an-na a fɔ, a ɔ, Chu n 'na mansa mu a a.” 22 Chɛɛ Kɔfana Padeti ɔ, “N-na a ma ka, an-na min nyɛn, an mbe to tena nɔ.” 23 Soya chɛ n-na Chisɔsi gbangban kɛn kɔn gbengbanden chɛ ma, mbɛ an-na a ma koa n ya, mbɛ an-na a ɔ du si tena naanin. A si tena dɔndɔ, soya mɔ dɔndɔ. A 'a gbansan doma an na-a to gbɛ, mbɛ an-na a wɛɛ ya. 24 A nɛnɛ wakoe, an nyɔn tɛ ɔ, an dɔ, “Mmɔ ma a a panda. Mmɔ chɛ fenɛ chɛ a ko a, mmɔ ni a ɔ yen mɔɛ min mbe a ma sɔn-da.” An sin na-a a ma ka wan. Chɛ ma-a, min mbe a ma, Yataa 'a gboo na-a bai min fɔ, a si Chisɔsi ma, a ni bɔ a a. Yataa 'a gboo-a a fɔ wan, a ɔ, “An-na n 'na koa n du wan an nyɔn tɛ ɔ, mbɛ an-na chɛ fenɛ chɛ n 'na gbansanɛ sin ko a.” 25 Chɛ gbɛɛ ɛ chɛ a ɔ tima min kɔɔ, Chisɔsi de ni wan nɔ sɔ ɔ a 'a kɔn gbengbandenɛ chɛ baima. A de dɔ musuma wɛɛ ni wan nɔ. Kai Kopasi 'a musu Mɛi wɛɛ ni wan nɔ, a basan Mɛi dɔndɔɛ chɛ wɛɛ a, min ka-a Makadaa duu ɔ. 26 Chisɔsi fɛ den chɛ, min ko a ni di a ye gbeden, a wɛɛ ni wan nɔ sɔ ɔ Chisɔsi de baima. Chisɔsi-a an fea chɛ yen kɛn sɔ ɔ, mbɛ a ɔ, “N de, i 'a denɛ an nɛ gbɛ.” 27 Mbɛ a ɔ an fɛ den chɛ wɛɛ ma, a ɔ, “N bɔ, i de an nɛ gbɛ.” A sin, a ka gbɛ a tima chɛ ma, aan a ta, an fɛ den chɛ ta-a bɔɔɛ chɛ a a waa a, a-a a bia yɔ a de. 28 Chisɔsi na-a a ɔ sɔn fan, mbɛ tima chɛ a gbɛ, a ban-da a 'a wai gbɛɛ chɛ-a, a ni min chɛ. A sin, min mbe a ma Yataa 'a gboo-a bai min fɔ, a ni bɔ a a, mbɛ a ɔ, “N kanɛ a gbaa-a.” 29 A tima chɛ a, gbɛ konama wa ni wan nɔ si ɔ da ɔ. Mbɛ soya chɛ n-na fen yɔfu yɔfu don a ɔ, a chima-a dɔgbɔ. Mbɛ an-na fen chɛ bɔ gbɛ chɛ ɔ kɔnɛ bonɛ a, mbɛ an-na a a sɛ Chisɔsi da tena. 30 Mbɛ Chisɔsi-a gbɛ chɛ susu fen yɔfu yɔfu chɛ ɔ, mbɛ a ɔ, “N ban-da n 'na wai chɛ-a.” Mbɛ a-a a kunɛ a bun, a fa-a. 31 Tee chɛ ni Anyima tee an na. Chu n ni an ma bɛn tee chɛ an ma suin tee ko a. Chɛ ko a, an nii ma to ni, su chɛ n ni ma dɛn dɔ kɔn gbengbandenɛ ma an tee chɛ ma. A bɛbɛɛ suin tee min nɛnɛ ni na tena ka, min ni tee wa a. Chɛ na-a a ma wan, Chu n ya ɔ sɔɛ n-na Kɔfana Padeti ɔ tisa, a ni a ma, an ni mɔɛ chɛ n chenɛ n dɔ kai kai, an ni fua fa-a, mbɛ an-na an su bɔ dɛn dɔ kɔn gbengbandenɛ chɛ n ma. 32 Mbɛ soya chɛ n ta-a, mbɛ an-na kaminɛ saa chenɛ n dɔ kai. Mbɛ an yɛ-a, an-na kaminɛ dɔndɔɛ wɛɛ chenɛ n dɔ kai kai, an na-a miin gbangban ka kɔn gbengbandenɛ ma, an bɛ Chisɔsi a. 33 Chɛɛ an che-a kɛn Chisɔsi ma, an nii ma a chenɛ n dɔ kai ni. Koe min na mu, an na-a a ɔ yen fan, mbɛ a faenɛ ni gbɛ. 34 Chɛɛ chɛ gbɛɛ ɔ, soya chɛ n dɔndɔ, a-a tamba a sendenɛ ya wan, a-a Chisɔsi kaa fɛ sɔɔ a a. A sin, a ya kɔɔɛ a, wii bɔ-a wan nɔ, a basan yii a. 35 N fɛn na-a koe chɛ ɔ yen ma-a, n fan mbe ka a ɔ yian-da. N-na min dɔ yian, tea mu a a, a sin, n-na a ɔ sɔn fan, mbɛ n mbe tea an fɔ. Chɛ ɛ a ma wan, wo ni a a tun wo kai fa koe a Chisɔsi a. 36 Chɛ na-a ma, min mbe a ma, Yataa 'a gboo-a min fɔ, a ni bɔ a a. A-a a fɔ wan, a ɔ, “An mbe ee a kuu dɔndɔ wɛɛ ɔ kai-a.” 37 Yataa da a bai dɔndɔ to a 'a gboo ɔ, a ɔ, “Mɔɛ n mbe mɔɛ chɛ ma fɛn-da wan, an-na min sɔɔ tamba a.” 38 Koe chɛ n gbɛɛ maenɛ gbakɔ, Chosɛfi, min ka-a Ayimatia duu ɔ, a-a Kɔfana Padeti ɔ tisa wan Chisɔsi su ko a. Chosɛfi chɛ ni Chisɔsi fɛ denɛ an na, chɛɛ nun dɔ ni. A nii ma bɔ ni ya a ma, a mu min na, a chianden ni Chu gbakoo n fan ma. Kɔfana Padeti dɔn-da kɛn su chɛ be koe a, a ni tɔn, mbɛ Chosɛfi-a su chɛ a yii, a ta-a a a. 39 Nikɔdemɔsi wɛɛ na-a a sɔ wan Chosɛfi fɛ. Nikɔdemɔsi chɛ, an na-a ta a saa a Chisɔsi tena su ɔ. A ta-a wan buii a a boo ɔ, min kunyɛ a ni di kaka, su chɛ ko a. An buii chɛ nyandenɛ ni fen fea an na, an ni fenɛ miin chee, an dɔ, maa, ni adosi. Ni mɔ na-a an buii chɛ sa sechee a, a dɛnɛ ni paun bi wɔnfea kun ma duu ya wan. 40 Mbɛ mɔ kaima fea chɛ n-na Chisɔsi su ya. Mbɛ an-na fen gbɛ mendemende su chɛ a, an mbe ta-a buii kunyɛ a diama chɛ yuyu-a pien a ma. Chu mɔɛ n ni su ma bɛn ka wan, an mbe e na to a sa-a kamba ɔ. 41 An na-a Chisɔsi gbangban ka kaina min kɔn gbengbandenɛ ma, a fa-a, yadi ni wan nɔ baima. An yadi chɛ ɔ, fanɛ nama ni wan nɔ, an nii ma mɔ su sa nin bɛ min dɔ a kɔma a. 42 Mɔ fea chɛ n na-a Chisɔsi su sa an dɔ, a tɔn kamba a, a mu min na, an ni an baima. A sin to, an tee chɛ bea ma, a ni Chu n 'na suin tee kuu sɔɛ an na.

20

1 Sau sau ma, Tɛnɛ kan kɔ dɔɛ ma, kaina a findenɛ ni wɛ tima min na, Mɛi min ka-a Makadaa duu ɔ, a ta-a Chisɔsi kamba chɛ tena. Mbɛ a-a a ɔ yen, mbɛ senɛ min bundenɛ ni an fan chɛ da a, a su chɛ sa-a ka kaina, mbɛ an senɛ chɛ ee to nɔ bun dɔ. 2 Mbɛ a-a bui sa a a Saimɔn Pita tena, an fea a bɔɛ fɛ denɛ dɔndɔɛ chɛ a, min ko a ni di ka gbeden Chisɔsi ye. Mbɛ an Mɛi chɛ-a a fɔ an ye, a ɔ, “Mɔɛ n-na mmɔ 'a mansa su bɔ kamba ɔ, a sin, nn ma a ɔ sɔn an taen mu a a kaina min.” 3 Mbɛ Pita an fea a bɔɛ chɛ a, an ta-a a kamba chɛ tena. 4 An fea chɛ ni ta tena bui chɛ an na. Chɛɛ Pita bɔɛ chɛ na-a a bui wan a kɔ gbɛaen ba a, min-na a ma, a pɛn-na a fo nɔ. 5 Mbɛ a-a a ma bun, a-a a ya ma sa fan chɛ a, mbɛ a-a fen gbɛ chɛ yen nɔ sa ɔ. Chɛɛ a nii ma don ni nɔ su sa fan chɛ a. 6 Mbɛ Saimɔn Pita wɛɛ na-a gbɛ a gbaa chia a. Chɛɛ a tana, a don-da wan dɔndɔ gbe an fanɛ gbu a. Mbɛ a wɛɛ-a fen gbɛ chɛ yen nɔ sa ɔ. 7 A sin-na koa chɛ wɛɛ yen fan to, min na-a mɔndɔ mɔndɔ Chisɔsi kunɛ a. A nɛnɛ sin, a ɔ nii ma basan ni fen gbɛ tɔɛ chɛ a, chɛɛ a ni sa ɔ dɔi a ta kun ma a a. 8 Mbɛ fɛ denɛ dɔndɔɛ chɛ, min pɛn na-a che ka kamba chɛ ma, a wɛɛ don-da nɔ. A don-da kɛn nɔ, a-a koa chɛ n yen nɔ sa ɔ, mbɛ a dan-da a a, mbɛ Chisɔsi-a a kɔɔ sɔ a ka saya ɔ. 9 Chɛɛ a tima chɛ gbɛɛ ɔ, Yataa 'a gboo na-a a fɔɛ min chɛ, mbɛ ɛ a kɔɔ sɔ-a wan a ka saya ɔ, an nii ma a ɔ gbɛ nin bɛ. 10 Mbɛ a fɛ den fea chɛ n yɛ-a an baa chenɛ a. 11 Chɛɛ Mɛi tana, a sɔ-a wan nɔ kamba chɛ baima, ɛ di chɛ-a. Mbɛ a-a a ma bun, a-a a ya ma sa kamba chɛ a. 12 Mbɛ a-a maeka fea an yen nɔ, an ma bɛndenɛ ɛ koa gbɛ ɔ, an mbe si ɔ kaina chɛ, Chisɔsi su chɛ ni sa ɔ kaina min. Dɔndɔɛ ni si ɔ a sa tena chɛ kun kandɔɛ wan, dɔndɔɛ sin ni a chen den kɔɔɛ tena wan. 13 Mbɛ an-na tisa chɛ, an dɔ, “Bɔɔɛ, fen mu e di chɛ-a?” Mbɛ a ɔ, “An-na n 'na mansa su ya, an ta-a a a. A sin, n ma a ɔ sɔn, an-na a sa kaina min.” 14 Mbɛ a-a a ya a mun, mbɛ a-a kaminɛ yen sɔ ɔ nɔ. Chisɔsi an nii nɛ, chɛɛ Mɛi nii ma a ɔ sɔn ni, mbɛ an nɛ. 15 Mbɛ Chisɔsi gbu ɔ, “Bɔɔɛ, fen mu e di chɛ-a? A yɛ to, e i ya a kan tena nyɔn na?” A ni Mɛi yii ma, mbɛ yadi gbu kun ma fɛn mɔɛ an nɛ. Chɛ-a a ma wan, a ɔ, “Kai, ni i wan ta-a a su a, a ɔ yian n na, i-a a sa kaina min. Chɛ ɛ a ma-a wan, n ni ta a bi, mbɛ n yɛ-a a a nɛ.” 16 Mbɛ Chisɔsi-a a chee a tɔɛ ma, a ɔ, “Mɛi.” Mbɛ Mɛi-a a kunɛ kɔɔ sɔ a tena, mbɛ a ɔ, “Ticha.” 17 Mbɛ Chisɔsi ɔ, “Sɛmbɛ n bia koe a, a mu min na, n ma sɛ nin bɛ banda bu ɔ Fa tena. Chɛɛ ta n fɛ denɛ n tena, mbɛ i-a a ɔ yian an na, mbɛ n mbe yɛ tena Fa tena, min mu wo wɛɛ fa a. A yɛ to, n 'na Yataa mu a a, wo wɛɛ 'a Yataa mu a a.” 18 Mbɛ Mɛi, min ka-a Makadaa duu ɔ, a yɛ-a Chisɔsi fɛ den chɛ n tena. A-a a ɔ yian an na, mbɛ a-a Mansa Chisɔsi yen. A yɛ-a to, Chisɔsi na-a min gbɛɛ fɔ a ye, a-a a ɔ yian an na gbae. 19 A Tɛnɛ kan kɔ dɔɛ chɛ ma, tee bea ma ni gbɛ nyɔ dɛɛ. A sin, Chisɔsi fɛ den chɛ n na-a an nyɔn na kan fan chenɛ a, mbɛ an-na a da a tɔn, an chiandenɛ ɛ Chu n ya ɔ sɔɛ n ma. Mbɛ Chisɔsi bɔ-a a a, a sɔ-a an tɛtɛ ma. Mbɛ a ɔ, “Yataa ni faachima be wo ma.” 20 Chɛ fɔenɛ gbakɔ a boo ɔ, mbɛ Chisɔsi-a a boo n yian an na, a basan a kaa a fɛ chɛ a. An na-a an 'na mansa yenɛ min chɛ ka, a na-a a fɛ den chɛ n bu ɔ dia-a wan gbeden. 21 Mbɛ a ɔ to an ma, a ɔ, “Yataa ni faachima be wo ma. Fa-a n na na buɛ min dɔ dunya chɛ ɔ, n bɛɛ, a chia dɔndɔ gbe chɛ a mu, n mbe wo a ta tena a ɔ.” 22 Mbɛ a-a a fia fu an ma fuu, mbɛ a-a a fɔ an ye, a ɔ, “Yataa Nyina ni ma wo fɛ. 23 Ni wo-a wo boo bɔ mɔɛ n 'na ko yama n dɔ, an bɔ-a an dɔ. Chɛɛ ni wo ma wo boo bɔ ni an dɔ, an mbe ee bɔ-a an ko yama chɛ n dɔ.” 24 Tɔmɔsi, an ni min chee, an dɔ, Fɛn Kai, fɛ den tan kun ma fea chɛ n dɔndɔ ni a a. Chɛɛ a nii a bɔɛ chɛ n tɛ ɔ, Chisɔsi na-a a wandi yian ka tima min na. 25 Chɛ ko a, Tɔmɔsi bɔɛ chɛ n-na a ɔ yian fan a a, an dɔ, “Nn-na mmɔ 'a mansa yen.” Chɛɛ a ɔ te an ma, a ɔ, “N mbe ee dan chɛ a. Mɔɔ ni n-na a yen, n ni dɔntima paa chɛ n yen a boo kana n ma, n boo denɛ gbu ni tu an na, mbɛ n tu-a a kaa a fɛ a.” 26 Wichi dɔndɔ bendenɛ gbakɔ, an na sɔn-da wan to kaina dɔndɔ chenɛ a, mbɛ an-na a da a tɔn. Tɔmɔsi chɛ wɛɛ ni wan nɔ an tɛ ɔ a tima chɛ nɛnɛ kɔɔ. Chen chɛ a tɔndenɛ ni wɛɛ ka, chɛɛ Chisɔsi bɔ-a wan to, a sɔ-a an tɛtɛ ma. Mbɛ a yɛ-a to, a ɔ, “Yataa ni faachima be wo ma.” 27 Mbɛ a-a a fɔ Tɔmɔsi gbu ma, a ɔ, “N boo kana n ma fɛn, i ni i boo din nɛ paa chɛ n dɔ. A yɛ to, i boo a na, i ni a din nɛ n kaa fɛ chɛ. Kɔɔsa bia chɛ gbɛɛ ni ban gbɛ i boo ɔ, i kai fa gbɛ n na.” 28 Mbɛ a wan Tɔmɔsi ɔ gbɛ, a ɔ, “I wan mu n 'na mansa a, i wan mu n 'na Yataa a.” 29 Mbɛ Chisɔsi ɔ a ma, a ɔ, “I-a n yenɛ min chɛ, an-na a ma dechee, i-a i kai fa n na. Dua ni ma mɔɛ chɛ n ma, miin ma n yen ni, chɛɛ an-na an kai fa-a n na.” 30 Chisɔsi na-a kamaya koe dɔ mende ma wan sɛsɛ, a fɛ den chɛ n ya kɔɔɛ ma. Chɛɛ an koe chɛ nɛnɛ nu, an ma nyɛn ni gboo chɛ ɔ. 31 Chɛɛ miin nyɛndenɛ ɛ ka gboo chɛ ɔ, an nyɛn-da, min mbe a ma, wo ni wo kai fa Chisɔsi a, mbɛ a wan mu kunka mansa a. A yɛ to, mbɛ Yataa 'a denɛ mu a a, a sin, ni wo-a wo kai fa a a, wo e kuɔ fɔ fɔɛ ma sɔn-da wan.

21

1 Chɛ gbakɔ, Chisɔsi-a a wandi yian fan to a fɛ denɛ n na, Tibɛyasi yii wa fɛ. A sin na-a chɛ ka wan a ɔ. 2 A fɛ den chɛ n fan ni nɔ. Saimɔn Pita, ni Tɔmɔsi, an ni min chee, Fɛn Kai, ni Natanɛɛ, min na-a ka Kana, Kadidi chɛnyɛ ɔ, a basan kai Sɛbɛdi 'a denɛ kaima n na. Chisɔsi fɛ denɛ fea dɔ mende n ni wan to nɔ. 3 Mbɛ Saimɔn Pita koɔ-a a bɔɛ n tena, a ɔ, “N mbe ta-a nyɛ gbain tena.” Mbɛ a bɔɛ chɛ n bɛɛ ɔ, “Mmɔ bɛ an mbe ta tena, nyɛ gbain tena chɛ.” Mbɛ an gbɛɛ chɛ-a dɛndɛ dɔndɔɛ ɔ, an ta-a. Chɛɛ a su chɛ gbɛɛ ɔ, an ma nyɛ dɔndɔ wɛɛ bia ni. 4 Banda ɔ ka-a chinɛn, mbɛ Chisɔsi sɔ-a an yii chɛ tindi ma. Chɛɛ a fɛ den chɛ n nii ma a ɔ sɔn, mbɛ a wan mu. 5 Mbɛ a-a an dɔ tisa, a ɔ, “N bɔ nu, wo ma fen kɔ fen bia nin bɛ?” Mbɛ an dɔ, “Nn ma nyɛ dɔndɔ gbe bia nin bɛ.” 6 Mbɛ a ɔ an ma, a ɔ, “Wo wo 'a nyɛ gbain yaa a dɛ wo boo nyima ɔ, dɛndɛ chɛ ɔ, wo e nyɛ dɔ bia-a wan.” Mbɛ an-na an 'na yaa a dɛ nɔ, a sin, nyɛ n chɛ-a wan a ɔ. An nii ma che ni a sawan-da, a sɛ dɛndɛ gbu ɔ, koe min na mu, nyɛ n faen fan ni a a gban. 7 Mbɛ Chisɔsi fɛ denɛ dɔndɔɛ chɛ, min ko a ni di ka a ye gbeden, a-a a fɔ Pita ye, a ɔ, “Mansa Chisɔsi an mbe ka sɔ ɔ tindi ma.” Pita-a chɛ a min kɛn, mbɛ an 'na mansa an nɛ, mbɛ a na-a a 'a doma min bɔ ka, ɛ nyɛ gbain chɛ-a, mbɛ a-a a chii fɔin a bu tɛ, mbɛ a dɛ-a yii chɛ ɔ. 8 A bɔɛ fɛ denɛ tɔɛ chɛ n to-a wan dɛndɛ gbu ɔ, aan an na-a tindi ma, an mbe yaa chɛ sawan-da, min na faenɛ ni ka nyɛ n na. Tindi chɛ ma ɔ nii ma yansan an na. An tɛɛ ni ma wan yadi chɛmɛ dɔndɔ nyɔn na. 9 An che-a kɛn tindi ma, an bɔ-a dɛndɛ chɛ ɔ, mbɛ an-na ta a dɛndenɛ tan nɔ, nyɛ kua ɛ gbaa sa ɔ ta chɛ a. An na-a biidi wɛɛ yen fan nɔ si ɔ. 10 Mbɛ Chisɔsi a ɔ an ma, a ɔ, “Wo na nyɛ dɔ a, wo-a miin bia ka sanche.” 11 Mbɛ Saimɔn Pita sɛ-a, mbɛ an-na yaa gbu sawan, an na-a a a tindi ma, nyɛ gboso gboso n faenɛ a. An taen fan ni nyɛ chɛmɛ dɔndɔ, nyɛ bi duu n kun ma sawa. Nyɛ chɛ n kɔ ni koo wɛɛ ka boo ɔ boo, chɛɛ yaa chɛ a nii ma panda ni ɛnden bɛɛ a. 12 Mbɛ Chisɔsi a ɔ an ma, a ɔ, “Wo na, wo ni daunɛ chɛ.” A fɛ den chɛ n dɔndɔ wɛɛ ma a faa sɔ ni tisa chɛ koe a, a ni a fɔ Chisɔsi ma, a ɔ, “Nyɔn mu i a?” An na-a a ɔ sɔn fan chɛndɛ chɛ, mbɛ Mansa Chisɔsi an nii nɛ. 13 Mbɛ Chisɔsi-a a boo a ta, a-a biidi chɛ ya, mbɛ a-a a be an ma. A-a chɛ an ma nyɛ chɛ wɛɛ a, min ni ta chɛ a. 14 Chisɔsi kɔɔ sɔenɛ gbakɔ a ka saya ɔ, a gba sawan bɔɛ an nii nɛ, ɛ a wandi yian-da a fɛ denɛ n na. 15 An ban-da kɛn daunɛ chɛ-a, mbɛ Chisɔsi koɔ-a Saimɔn Pita tena, a ɔ, “Kai Chɔn 'na denɛ Saimɔn, n ko a di wan i ye, i ni ben i bɔɛ chɛ n gbɛɛ ma?” Mbɛ Saimɔn dɔ, “Aa mansa, i-a a ɔ sɔn fan, i ko a di buɛ min dɔ n ye.” Mbɛ Chisɔsi ɔ a ma, a ɔ, “Mbɛ n fɛ mɔɛ n kun ma fɛn, yɔ an mbe sa denɛ n kun ma fɛn buɛ min dɔ.” 16 Mbɛ Chisɔsi-a Saimɔn Pita ɔ tisa to, a gba fean bɔɛ ɔ, a ɔ, “Kai Chɔn 'na denɛ Saimɔn, n ko a di wan i ye?” Mbɛ Saimɔn dɔ te to, a ɔ, “Aa mansa, i-a a ɔ sɔn fan, i ko a di buɛ min dɔ n ye.” Mbɛ Chisɔsi ɔ a ma, a ɔ, “N fɛ mɔɛ n kun ma fɛn, yɔ an mbe sa n kun ma fɛn buɛ min dɔ.” 17 A gba sawan bɔɛ ɔ, a ɔ, “Kai Chɔn 'na denɛ Saimɔn, n ko a di wan i ye?” Chɛ nɛnɛ ɔ, Pita faa yɔn-da wan, Chisɔsi ni sɔ ɔ tisa min chɛ-a a a, ni a ko a di wan a ye. Chɛ ko a, mbɛ a ɔ, “Mansa, i-a ko ɔ ko ɔ sɔn fan. I-a a ɔ sɔn fan, i ko a di buɛ min dɔ n ye.” Mbɛ Chisɔsi ɔ, “N fɛ mɔɛ n kun ma fɛn, yɔ an mbe sa n kun ma fɛn buɛ min dɔ.” 18 A ɔ te to, “Ka n mbe chɛ ma din i tena, mbɛ i ni tima min na i tɔngbɔ tɔɛ a, i ni i ma bɛn fan, mbɛ i ta-a i faa ma kaina nu, mbɛ i-a i faa ma koe n ma. Chɛɛ tima min na e chenancha-a, e i boo ɔ sawan-da wan, mbɛ an-na i chii fɔin. Mbɛ an ta-a i a kaina, i ma to ni i ni ta kaina min.” 19 Chisɔsi da a bai chɛ, a ni ka a ɔ yian fan na, mbɛ Pita ni na tena fa-a ka wan. A sin, a 'a saya chɛ ɛ na-a wan a ma-a mɔɛ n ni Yataa 'a kamaya ɔ yen. Mbɛ Chisɔsi ɔ gbɛ a ma, a ɔ, “A a tun ma koe n fɛ denɛ a.” 20 Mbɛ Pita-a a ya a mun, mbɛ a-a a bɔɛ chɛ yen na-a gbaa a, a bɔɛ min ko a di ka an 'na mansa ye gbeden. A bɔɛ chɛ, an ni min dɔ daun chɛ tena yɛɛ ma tee a, an na-a a da a ta Chisɔsi too baima, mbɛ a-a a ɔ tisa, a ɔ, “Mansa, nyɔn gbu sin mbe na tena i ma tachɛ-a, i chɛɛ ma nyɔnɛ n ma?” 21 Mbɛ Pita-a a yen kɛn, mbɛ a-a Chisɔsi ɔ tisa, a ɔ, “Mansa, an mbe n bɔɛ chɛ nan sin bia ka ma?” 22 Mbɛ Chisɔsi ɔ, “Pita, i ta kuu? A ya mbɛ n gbu n-na a fɔ, n dɔ, a fɔɛ ni to a sun da a, aan n ni yɛ to dunya chɛ ɔ. A a tun dechee ma koe a n fɛ denɛ a.” 23 Chɛ-a a ma wan, bai fasan-da a ɔ Chisɔsi fɛ mɔɛ n tɛ ɔ, mbɛ a fɛ den chɛ nɛnɛ ee fa-a to. Chɛɛ Chisɔsi nii ma a fɔ ni, mbɛ a gbu ee fa-a. A na-a a fɔ wan dechee, a ɔ, “Pita, i ta kuu? A ya mbɛ n gbu n-na a fɔ, n dɔ, a fɔɛ ɛ to-a wan a sun da a, aan n ni yɛ to dunya chɛ ɔ.” 24 N fan mu an fɛ den chɛ a, n fan-na koe chɛ n gbɛɛ ɔ yen, mbɛ n-na an nyɛn nɛ n 'na gboo chɛ ɔ. A sin, mmɔ-a a ɔ sɔn fan, mbɛ n-na miin gbɛɛ fɔ, mbɛ tea bai nu mu an na. 25 Chisɔsi na-a ko sɛsɛ dɔ mende n ma wan. Chɛɛ an koe chɛ n gbɛɛ nii ma nyɛn ni dɔndɔ dɔndɔɛ a. Ni an na-a an gbɛɛ nyɛn, n mbe a ya tena, mbɛ dunya chɛ gbɛɛ ɔ kaina nii a kun-da an gboo chɛ n gbɛɛ sa tena ko a.


AMAZING GRACE BIBLE INSTITUTE