Kinyakyusa of Tanzania

JOHN

1

1 Kubwandilo āliko ịsyu; umwene ịsyu āli na Kyala; kangi ịsyu āli jo Kyala. 2 Umwene kubwandilo alinkuja na Kyala. 3 Fyosa ịtolo fyapelelị̄gwe mụ mmyake, asobe jūjo angali kakapelịgwako nakamo akapelịgwa. 4 Mmyake mo bwalịmo ubūmị, ubwene ubūmị bula bulinkuja lumụlị lwa bāndu. 5 Ulumụlị lụkumụlika mụngị̄sị, lolị ijēne īngị̄sị jikalusịmisyamo sịku. 6 Po papo alinkuboneka umụ̄ndu uju ātumị̄gwe na Kyala, īngamụ jake ali jo Johanị. 7 Umwene ālisịle kulusịsịmikisyo, ukuti alusịsịmikisyege ulumụlị lula, ukuti bōsa bitikilege mụli jūjo. 8 Umwene jūjo akāli jo lumụlị, himma, lolị ālisịle ukuti alusịsịmikisyege ulumụlị lula. 9 Umwene lumụlị gwa nalolị, uju ịkummụlika kukuti mụ̄ndu, ālisịle nkị̄su mụno. 10 Ālịmo nkị̄su, ikị̄su kyapelelịgwe mụli jūjo, lolị ikyene ikị̄su kilinkusịta nukummwaganịa. 11 Umwene ālisịle mụ mmyake jūjo, lolị abēne abāndu bāke balinkusịta nukummwambilila. 12 Lolị bōsa aba balimmwambilịle, aba bājị̄tị̄ke īngamụ jake, bo ābapēle amaka ga kujīla bāna ba Kyala. 13 Aba bakāpāpị̄gwe mwịlopa, pamo mmbwịgane bwa mmbili, pamo mmbwịgane bwa mụ̄ndu, himma abēne ābapāpịle ju Kyala. 14 Po papo Ịsyu alinkwịpela ukuja mmbili, alinkwịtūgala mmyitu; tulinkububona ubukulūmba bwake, ubukulūmba bo ubwa Mwana jumojwene ntiga Ngwịse, uju ị̄swile ilị̄pyana nubwanalolị. 15 Umwene Johanị alinkunsịsịmikisya, alinkukōlela alinkuti: Uju jo uju nanjobaga apa nạ̄tigi, uju ịkwịsa kūnyụma kumyangu, jo nkulūmba kumyangu, namanga umwene āliko bo ngāli nukupāpịgwa. 16 Ukufụma mbukwile bwake, twesa twambilị̄le ilị̄pyana pamwanya pị̄pyana lilị̄ngi; 17 namanga īngomēlesyo syalyendịle mwa Mose, lolị ilị̄pyana nubwanalolị fyo fịsịle mwa Jesụ Kilisịtị. 18 Najumo akammbonamo sịku Kyala; lolị ju Mwana gwa Kyala jumojwene ntiga, uju ali ndupagato lwa Gwịse, jo uju atulingēnịe. 19 Ulu lo lusịsịmikisyo lwa Johanị, bo Abajụ̄ta ba mụ Jelụsalemụ babatumịle abapụ̄tị abakulūmba na banya Lebị kukunndālūsya isya kuti: Kali ugwe gwanị? 20 Umwene alinkwịlāta, alinkusịta nukufị̄nda, alinkwịlāta alinkuti: Une ngaja ne Kilisịtị. 21 Po papo abēne balinkunndālūsya balinkuti: Gwanị lelo? Gwe Elịja? Umwene alinkuti ngaja ne Elịja. Abēne balinkuti: Kali gwe nkụ̄ngụlụka jula? Umwene alinkwamụla alinkuti: Himma. 22 Po papo lelo balinkunndālūsya balinkuti: Kali po gwanị? Ulitubūla ukuti tukabāmụlege aba batutumịle? Kwịjoba ukuja gwanị? 23 Umwene alinkuti: Une ne ịsyu lya nkōlelị uju ịkukōlela ndukubo ịkuti: Amụgolosyege injila ja NTWA, bo mụmo ājobị̄le unkụ̄ngụlụka Jesaja. 24 Aba bātumịgwe bāfụmịle ku Bafalịsaị, 25 bo balinkunndālūsya balinkuti: Po fịkị kōsya lelo, linga ukaja gwe Kilisịtị, pamo gwe Elịja, pamo gwe nkụ̄ngụlụka jula? 26 Umwene Johanị alinkubāmụla alinkuti: Une ngōsya namīsi; Umwene lolị jo īmịle nkāti mmyinụ, uju umwe mụkammanya. 27 Uju ịkūngōnga mụnyụma une, uju une ngabagila ukufụ̄ndula utukoba twa mfịlato fyake. 28 Sịsịsị syabonị̄ke mụ Betanịja, ịsīlya lila lya Jolịtanị, kūko Johanị ōsyaga. 29 Ulwakilabo Johanị alinkummbona Jesụ ịkwịsa kumyake alinkuti: Kēta, ali kala akang'ōsi ka Kyala, aka kịkusōsyapo ubutulanōngwa bwa kị̄su. 30 Uju jo uju nanjobaga apa nạ̄tigi: Ịkwịsa kūnyụma kumyangu umụ̄ndu, uju jo nkulūmba kumyangu, namanga umwene āliko bo ngāli nukupāpịgwa. 31 Nanịne ngālimmēnye; lolị une nịsịle nịkōsya namīsi, ukuti afụmụkege kubany'Ịsịlaelị. 32 Po papo Johanị alinkujoba alinkusịsịmikisya fị̄jo alinkuti: Nummbwene Mbepo bo ịkusololoka ukufụma kumwanya ukuti ngụ̄nde, ịkutūgala pamwanya pamyake. 33 Une ngalimmēnye, lolị uju ālindumịle kukōsya abāndu namīsi jo ālimbūlile ạ̄tile: Umụ̄ndu kwịsakummbonaga bo Mbepo Mwikemo ịkunnsololokela ukufụma kumwanya ịkutūgala pamyake, ujo uju jo uju ịkōkesya mwa Mbepo Mwịkemo. 34 Nanịne nsịbwene, kangi nsịsịmikịsye ukuti uju jo Mwana gwa Kyala. 35 Kangi ulwa kilābo ikīngi, Johanị alinkwima pamopēne na bafụ̄ndịgwa bāke babili, 36 alinkummbona Jesụ bo ịkwenda alinkuti: Kēta, ali kala akang'ōsị ka Kyala. 37 Abene abafụ̄ndịgwa bāke babili bala balinkumpilika bo ịkujoba, po papo balinkwenda nukunkōnga Jesụ. 38 Umwene Jesụ alinkusyụtụka alinkwaga bịkunkōnga, alinkubalālūsya alinkuti: Mụkulōnda fịkị? Balinkwamụla balinkuti: Mmanyịsị, kwịtūgala kūgu? 39 Alinkubāmụla alinkuti: Ịsaga mụkēte. Po papo lelo balinkubūka, balinkwakukēta apa ātūgalaga; balinkulīnda nagwe ilị̄sịku lila. Pāli po pakabalilo ka kalōngo. 40 Andeleja, ugwamyabo gwa Sịmonị Petelị ali jo jumo mụli bala babili aba ba limpilịke Johanị, balinkwenda nukunkōnga Jesụ. 41 Umwene alinkutala ukummwaga Sịmonị unkulu gwake, alinkummbūla alinkuti: Tummwagịle Mesịja (ko kuti Kilisịtị). 42 Alinkuntwala kwa Jesụ. Umwene Jesụ alinkunkēta, alinkummbūla alinkuti: Ugwe gwe Sịmonị unnya Johanị, lolị kwịsakubilikilịgwaga ija Kefa, (ko kuti Petelị, iji kangi ko kuti lwalabwe). 43 Ulwa kilābo Jesụ alinkulōnda ukubūka mụ Galịlaị, po papo alinkwakummwaga Fịlịpụ. Umwene Jesụ alinkummbūla Fịlịpụ alinkuti: Ngōngaga. 44 Umwene Fịlịpụ ali gwa mụ Betịsaịta, bali kāja kamo na Andeleja na Petelị. 45 Po papo Fịlịpụ alinkummwaga Natanaelị, alinkummbūla alinkuti: Tummwagịle uju ājobị̄gwe na Mose, mụngomēlesyo kangi na mbakụ̄ngụlụka, jo Jesụ unnya Josefụ ugwa mụ Nasaletị. 46 Umwene Natanaelị alinkunndālūsya alinkuti: Kali sịbagị̄le ukufụmamo īnụnụ sịmo mụ Nasaletị? Po papo Fịlịpụ alinkummbūla alinkuti: Tubūke ukakēte. 47 Umwene Jesụ alinkummbona Natanaelị ịkwịsa kumyake, alinkujoba alinkuti: Kēta umw'Ịsịlaelị nalolị, uju akaja nulusyobo nalumo mụ̄nda mmyake. 48 Umwene Natanaelị alinkunndālūsya alinkuti: Kali ūmēnye bulebule? Umwene Jesụ alinkummwamụla alinkuti: Bo akāli tāsị nukukubilikila Fịlịpụ, nākubwene bo uli pankuju. 49 Po papo Natanaelị alinkummwamụla alinkuti: Mmanyịsị, ugwe gwe Mwana gwa Kyala, gwe Malafyale gwa Ịsịlaelị. 50 Po papo Jesụ alinkummwamụla alinkuti: Kwịtika papo ngubulile ukuti nākubwene pankuju? Kwịsakusịbonaga īngulūmbapo ukusịkīnda na ịsị. 51 Po papo alinkuti: Nalolị nikukubūla une nikuti: Mwịsakukubonaga kumwanya kwịgwịke, bo nabāndumị ba Kyala bịkuti nukufyuka, bịkuti nukunsololokela Nnyamụ̄ndu.

2

1 Pị̄sịku lya butatu, bulinkujapo ubwegị mụ Kana nkị̄su kya Galịlaị, unna gwa Jesụ alinkujapo. 2 Jope Jesụ nabafụ̄ndịgwa bāke bābilikilị̄gwe kubwegị. 3 Lelo bo ubwalwa bwa māfị̄lu bwagị̄lwe, unna gwa Jesụ alinkummbūla alinkuti: Ubwalwa bwa māfị̄lu bumalị̄ke. 4 Umwene Jesụ alinkummwamụla alinkuti: Gwe nkị̄kulu ugwe, tuli bukị nanịne nanụngwe? Akabalilo kāngu kakāki ukwịsa. 5 Umwene unna alinkubabūla ababōmbị alinkuti: Syosa isị linga ịkubabūla, syo mụbōmbēge. 6 Syabīkị̄gwe papo īndeko sya mabwe isya mīsi ntandatu, ukufwana nulwịho lwa kwịjēlusya Abajụ̄ta, jimo jali pafịgelelo fịbili pamo fịtatu. 7 Po papo Jesụ alinkubabūla alinkuti: Amwịsusye amīsi mụndeko. Balinkwịsusya ukufịka pamwanya. 8 Alinkubabūla alinkuti: Amụnegege lelo, mụntwalilege unjabafị̄ndu; abēne balinkuntwalila. 9 Umwene unjabafị̄ndu bo aganogēlị̄sye amīsi aga gālị̄pelịle ukuja bwalwa bwa māfị̄lu, akagamēnye kuno gafụmịle lolị ababōmbị aba bānegēlelaga bo bāmēnye kuno gāfụmịle, po papo unjabafị̄ndu alinkummbilikila umwegankị̄kulu 10 alinkummbūla alinkuti: Umụ̄ndu gwesa ịkutala ukutegelesya ubwalwa bwa māfị̄lu ubunụnụ, lelo linga abāndu banwịle fị̄jo, po ịkutwala ububị̄bịpo; lolị ugwe gwafịsịle ubwalwa ubunụnụ ukufịka ulu. 11 Bo alinkwanda bunobuno Jesụ ukupela ifị̄swigu fyake, alinkwandila mụ Kana nkị̄su kya Galịlaị, mo alinkwịbonekesya ubukulūmba bwake; bope nabafụ̄ndịgwa bāke balinkwenda nukummwitịka. 12 Pānyụma pali sịsịsị alinkusụlụka ukubūka ku Kapelịnaumụ, jūjo, nunna na banụgụna, nabafụ̄ndịgwa bāke; mo balinkwakugonamo amasịku manāndi. 13 Lelo bo Pasa gwa Bajụ̄ta asegelị̄le, Jesụ alinkufyuka ukubūka mụ Jelụsalemụ. 14 Po papo alinkwakubāga nnyụ̄mba ja kwịpụ̄tilamo abāndu aba būlisyaga īng'ōmbe ning'ōsị ningūnde naba būsanịaga īndalama, bịtūgēsye. 15 Alinkunịenga ulugoje ukuja kikoti, alinkubakagamo bōsa nnyụ̄mba ja kwịpụ̄tilamo, na sị ng'osi syabo na sị ng'ōmbe syabo, alinkōna īndalama sya būsanịa ndalama, alinkukụpụsya nimēsa syabo. 16 Abēne abūlịsyangūnde alinkubabūla alinkuti: Amụsịsōsyepo isị, mụngajipelaga īnyụ̄mba ja Tāta ukuja nyụ̄mba ja sokonị. 17 Abafụ̄ndịgwa bāke balinkukūmbuka ukuti lisị̄mbị̄gwe ili lịkuti: Ulugano lwangu kunyụ̄mba jako lukundya. 18 Po papo lelo Abajụ̄ta balinkummwamụla balinkuti: Kyo kimanyịlo kiliku ikya kutunāngisya ukuti ugwe gwe gwa kubōmba sịsịsị? 19 Umwene Jesụ alinkubāmụla alinkuti: Amụpāngule īnyụ̄mba ja Kwịpụ̄tilamo iji, kumasịku matatu ịtolo nịsakujijēngaga kangi. 20 Po papo Abajụ̄ta balinkuti: Īnyụ̄mba ja Kwịpụ̄tilamo iji jajēngịgwe ifyinja amalōngo mana na ntandatu, lolị ugwe kuti nịsakujisụmụsya kumasịku matatu ịtolo? 21 Umwene lolị ājijobaga īnyụ̄mba ja kwịpụ̄tilamo ija mmbili gwake. 22 Lelo bo asyukịle mbafwe, abafụ̄ndịgwa bāke balinkukūmbuka ukuti asịjobịle sịsịsị, balinkubwịtika ubusị̄mbe bula, niṣyu lila alijobịle Jesụ. 23 Lelo bo ali mụ Jelụsalemụ pakyaka kya Pasa, bā bị̄ngị balinkwenda nukujị̄tika īngamụ jake bo bafịbwene ifị̄ka ifị apelịle. 24 Umwene Jesụ lolị jo alinkusịta nukubị̄tika abēne, papo umwene abamēnye bōsa, 25 namanga akālōndaga ukuti jumo ansịsịmịkisyege isya mụ̄ndu, papo āsịmēnye jūjo isị sịli mmụ̄ndu.

3

1 Lelo ālipo jumo umụ̄ndu Umfalịsaị, uju īngamụ jake āli jo Nịkotemụ, unkulūmba Mbajụ̄ta. 2 Jo alinkwịsa kwa Jesụ pakilo, alinkummbūla alinkuti: Mmanyịsị, tumēnye ukuti uli mmanyịsị, ufụmịle kwa Kyala, namanga najumo akamanya ukupela ifị̄ka ifị kupela ugwe, pēne papo linga Kyala ali nagwe. 3 Umwene Jesụ alinkummwamụla alinkuti: Nalolị nikukubūla une nịkuti, umụ̄ndu akabagila ukububona ubutwa bwa Kyala, lolị pēne apa linga ịkupāpịgwa kangi. 4 Po papo Nịkotemụ alinkujoba nagwe alinkuti: Abagị̄le bulebule umụ̄ndu ukupāpịgwa bo nkāngale? Kali abagị̄le ukwịngila mụnna mụ̄nda ulwa bubili ukuti apāpịgwege? 5 Umwene Jesụ alinkwamụla alinkuti: Nalolị nikukubūla une nikuti: Umụ̄ndu akabagila ukwịngila mbutwa bwa Kyala, lolị pēne apa linga apāpị̄gwe kumīsi na kwa Mbepo. 6 Uju apāpị̄gwe kummbili, mmbili ịtolo, uju apāpị̄gwe kwa Mbepo, īmbepo ịtolo. 7 Syo ungaswịgaga apa ngubulile ukuti, fịkuti mụpāpị̄gwege kangi. 8 Ummbelo gụkukụla kuno gwịganịle, akōgo kāke ko kukapilika, lolị utikugumanya kuno gụkufụma, nakuno gụkubūka; bo ali bunobuno gwesa uju linga apāpị̄gwe kwa Mbepo. 9 Po papo Nịkotemụ alinkunndālūsya alinkuti: Syo sịpelege bulebule sịsịsị? 10 Umwene Jesụ alinkwamụla alinkuti: Ugwe uli mmanyịsị gwa Ịsịlaelị, kangi ugwe syope na sịsịsị ukasịmanya? 11 Nalolị nịkukubūla une nịkuti: Uswe tụkujoba sịsyo tusịmēnye, tụkusịsịmikisya sịsyo tusịbwene; lolị ulusịsịmịkisyo lwitu mụtịkulwambilila. 12 Apēne lelo napapo umwe mbabūlịle isya nkị̄su mụno pope umwe mụtịkwịtika, po mwịsakwịtikaga bulebule linga nikubabūla isya kumwanya? 13 Najumo akafyukako kumwanya. Lolị mwene uju āsụlwịke ukufụma kumwanya ju Nnyamụ̄ndu, uju nalilino ali kumwanya. 14 Bo papo Mose ị̄nulaga īnjoka ndungalāngala, bo fịkuti jope na Nnyamụ̄ndu ịnulịgwege, 15 ukuti gwesa uju ịkummwịtika, ajege nubūmị bwa bwịla na bwịla. 16 Namanga bo ātēndị̄ke bunobuno Kyala ukukigana ikị̄su, ko kwenda nukukinị̄nga Umwanāke jumojwene ntiga, bōsa aba bịkummwịtika ukuti bangapyụtịgwaga, lolị babwagege ubūmị bwa bwịla na bwịla. 17 Namanga Kyala akālintumịle Umwanāke nkị̄su ukuti akilōnge ikị̄su, himma, lolị ukuti akipoke ikị̄su. 18 Uju linga ịkummwịtika Umwana jo atịkulōngịgwaga; lolị uju linga atịkwịtika jo alōngelị̄gwe ngānị, papo akajị̄tika īngamụ ja Mwana gwa Kyala jumojwene ntiga. 19 Ubu bo bulōngị ubwa kuti ulumụlị lwịsịle nkị̄su, lolị abāndu bajiganile īngị̄sị ukukīnda ulumụlị, papo īmbōmbo syabo syali mbị̄bị. 20 Namanga gwesa uju linga ịkubōmba īmbị̄bị, jo ịkulubēnga ulumụlị, kangi atịkwịsako kulumụlị, ukuti īmbōmbo syake sịngịsakujaga pabwelụ. 21 Lolị, uju ịkubōmba isya nalolị, jo ịkwịsa kulumụlị, ukuti isị ịkubōmba sịboneke ịtolo pabwelụ ukuti sịbombelị̄gwe mwa Kyala. 22 Pānyụma pali sịsịsị, po Jesụ nabafụ̄ndịgwa bāke balinkubūka nkị̄su kya Jụtaị; alinkuja mụmo pamopēne nabo, alinkōsya. 23 Loli jope Johanị ōsyaga mụ Enonị kifụkị na mụ Salịmụ, namanga mo amīsi gālimo mịngị; po papo abāndu balinkubūka kumyake balinkōsịgwa. 24 Namanga Johanị ākāli ukwịgalilịgwa nnyụ̄mba ja bannyololo. 25 Po papo lulinkutụpụka ulukānị kubafụ̄ndịgwa ba Johanị nu Njụ̄ta jumo panōngwa ja kwelusịgwa. 26 Abēne balinkwịsa kwa Johanị balinkummbūla balinkuti: Gwe mmanyịsị, umụ̄ndu jula gwali nagwe ịsīlya lila lya Jolịtanị, jula unnjobēge fị̄jo unsịsịmikisyege, kēta jope ịkōsya, abāndu bōsa bịkunkulukila. 27 Umwene Johanị alinkwamụla alinkuti: Umụ̄ndu akabagila ukwambilila fịmo, pēne papo linga apēgị̄gwe ukufụma kumwanya. 28 Umwe jujumwe mụkūsịsịmikisya une ukuti nātịle: Une ngaja ne Kilisịtị, lolị ndumị̄gwe ịtolo nkyenị mmyake. 29 Uju ali nunkị̄kulu uju ịkwegịgwa jo mwegankị̄kulu, lolị ummanyānị, gwa mwegankị̄kulu, uju Ịkwima nukumpilikisya, jo ịkulisekelela fị̄jo ilịsyu lya mwegankị̄kulu. Po papo lelo ulusekelo lwangu lufịkịlepo. 30 Umwene jo fịkuti abālege, une lolị ne ndogotelege. 31 Uju afụmịle kumwanya, jo ali pamwanya pali bōsa; uju afụmịle nkị̄su jo gwa nkị̄su, kangi ịkujoba isya nkị̄su. Lolị umwene uju afụmịle kumwanya, jo ali pamwanya pali bōsa. 32 Isị asịbwene na isị asịpilị̄ke syo isi ịkusịsịmikisya, lolị atịkulwambilila ulusịsịmịkisyo lwake. 33 Lolị umwene uju alwambilịle ulusịsịmịkisyo lwake, jo ịkusịsịmikisya ukuti Kyala jo gwa nalolị. 34 Namanga uju Kyala antumịle, jo ịkugajoba; amasyu ga Kyala: buno Kyala apa ịkupa Mbepo atịkupēla nkigelelo. 35 Ugwịse annganịle Umwana, kangi ampēle fyosa fịli mmaka gāke. 36 Uju linga ịkummwịtika Umwana, jo alinabo ubūmị bwa bwịla; lolị uju linga ịkumfụ̄ja Umwana, jo atịsakububonamo ubūmi, ingalalisị sya Kyala sịkujaga pamyake bwịla.

4

1 Lelo Untwa bo āsyagēnịe ukuti Abafalịsaị bapilike isya kuti: Jesụ ịkubapela bafụ̄ndịgwa nukubōsya abāndu ba bị̄ngị ukunkịnda Johanị, 2 napapo Jesụ akābōsyaga jūjo, lolị abafụ̄ndịgwa bāke, 3 po papo alinkwenda nukusōkamo mụ Jụtaị, alinkubūka kangi mụ Galịlaị. 4 Umwene lolị injila jake jalyendịle mụ Samalịja. 5 Po papo alinkwenda alinkwakufịka nkāja mụ samalịja aka bạ̄tigi Sịkāli īngamụ, aka kapalamēne nunngūnda ugu Jakobụ ālimpēle umwanāke Josefụ. 6 Mo kyalịmo ikị̄na kya Jakobụ ikya nyị̄buko ja mīsi. Lelo Jesụ bo akatēle injila, alinkutūgala ịtolo pānyị̄buko; pāli po pakabalilo ka ntandatu bo ilị̄suba lili pantu. 7 Po papo alinkwịsa unkị̄kulu Unsamalịja kukunega amīsi. Umwene Jesụ alinkujoba nagwe alinkuti: Mbapo gamo nịne nnwepo. 8 Namanga abafụ̄ndịgwa bāke bābūkịle nkāja nkūla ifị̄ndu. 9 Po papo unkị̄kulu Unsamalịja alinkwamụla alinkuti: Kali kubagị̄le gwe Njụ̄ta ukusūma amīsi kuli ne nkị̄kulu ne Nsamalịja? (Namanga Abajụ̄ta batịkwangala na Basamalịja). 10 Umwene Jesụ alinkummwamụla alinkuti: Linga gwafịmēnye ifyabupe fya Kyala, nukuti jwanị uju ịkukubūla ukuti: Mbapo gamo nịne nnwepo, angali kunsūma jūjo, po umwene angali ịkukupa amīsi amūmị. 11 Po papo unkị̄kulu alinkummwamụla alinkuti: Malafyale ikinegelo ukaja nakyo kangi ikị̄na kisolofụ, lelo po kugāgaga kūgu amīsi amūmị aga kugajoba? 12 Kīngamo ugwe unkīndịle ubukulūmba Tāta gwitu Jakobụ, uju ātupēle ikị̄na kikīki, uju jope anwaga mụli kikīki nabānāke, nimịtị̄mo gyake? 13 Umwene Jesụ alinkummwamụla alinkuti: Gwesa uju linga ịkunwa amīsi gagaga, jo ịkūmilwaga kangi. 14 Lolị uju linga ịkunwaga amīsi aga nịsakumpaga une, jo atịsakūmilwangamo sịku, lolị amīsi aga nịsakumpaga, go gịkwịpelaga mmyake nyị̄buko ja mīsi, iji jịkwịbukila kubūmị bwa bwịla na bwịla. 15 Po papo unkị̄kulu alinkujoba nagwe alinkuti: Malafyale, go ulīmbaga amīsi gagaga, ukuti nangūmilwaga, kangi ukuti nāngị̄saga kuno kukunega. 16 Umwene Jesụ alinkummbūla alinkuti: Būkaga kammbilikile unndumego ukị̄sege nagwe kuno. 17 Po papo unkị̄kulu alinkummwamụla alinkuti: Ngaja nunnyāmbala najumo. Umwene Jesụ alinkummbūla alinkuti: Utalwịsye apa utịle ngaja nunnyāmbala najumo. 18 Namanga gwali nabalumego bahāno, kangi jope uju ulinagwe lilino akaja ndumego. Isị ujobịle sya nalolị. 19 Po papo unkị̄kulu alinkubụsya alinkuti: Malafyale ngubwene ukuti uli nkụ̄ngụlụka. 20 Batāta uswe bịpụ̄tilaga pakyamba kikīki, umwe lolị mwe Bajụ̄ta mụkuti mụ Jelụsalemụ bo bujo ubu abāndu fịkuti bịpụ̄tilengemo. 21 Umwene Jesụ alinkummbūla alinkuti: Gwe nkị̄kulu ugwe unyịtikege une, kịkwịsaga akabalilo apa mụtịsakwịpụ̄taga kwa Tāta pakyamba iki, nalinga mo mụ Jelụsalemụ. 22 Mwe Basamalịja mụkammanya nakamo uju mụkwịpụ̄tako. Lolị uswe twe Bajụ̄ta tummēnye uju tụkwịpụ̄tako. 23 Lolị kịkwịsaga akabalilo, nalilino kalịpo, po aba bịkwịpụ̄ta nalolị bịsakwịpụ̄taga kwa Tāta mụmbepo na mbwanalolị; namanga Tāta bo aba ịkubalōnda aba bịkwịpụ̄ta kumyake, fikuti bịpụ̄tilege mụmbepo na mbwanalolị. 24 Kyala īmbepo, lolị fịkuti aba bịkwịpụ̄ta kumyake, bịpụ̄tilege mụīmbepo. Bo bịkwịpụ̄ta bịpụ̄tege inyịpụ̄to sya nalolị. 25 Umwene unkị̄kulu alinkummwamụla alinkuti: Mmēnye ukuti Mesịja ịkwịsaga (uju jo Kilisịtị); linga ịsịle jūjo, po ịsakutubūlaga syosa. 26 Po papo Jesụ alinkummbūla alinkuti: Jo une ne nịkujoba nanụngwe. 27 Pakabalilo kalakala abafụ̄ndịgwa bāke balinkwịsa, balinkuswịga papo ājobaga nunkị̄kulu. Loli najumo akālinndālusị̄sye ukuti: Kulōnda fịkị? Pamo kujoba nagwe sya fịkị? 28 Po papo unkị̄kulu jula alinkujileka īndeko jake, alinkubūka nkāja, alinkwakubabūla abāndu alinkuti: 29 Tubūke, mụkankēte umụ̄ndu uju āmbūlịle syosa isị nābōmbaga. Kali ajege jo Kilisịtị jujuju? 30 Po papo balinkusōka nkāja balinkubūka apa ālipo. 31 Lelo pakabalilo kalakala, abafụ̄ndịgwa balinkuntēngulila Jesụ balinkuti: Mmanyịsị, lyamo. 32 Loli, umwene alinkubabūla alinkuti: Une ndinafyo ifị̄ndu fyakulya ifị mụkafịmanya umwe. 33 Abēne abafụ̄ndịgwa balinkulālūsanịa balinkuti: Kali umụ̄ndu jumo antwalị̄le fịmo ifyakulya? 34 Umwene Jesụ alinkubabūla alinkuti: Ifyakulya fyangu ko kubōmba ubwịgane bwa uju āndumịle une, nukujimalisya īmbōmbo jake. 35 Bule umwe mụtịkujoba ukuti: Gisyele imyesị mịna ukwịsa untōndolo? Kēta lelo nikubabūla une nịkuti: Amwịnule amāso gīnụ mụkēte imịgūnda, buno gyelukị̄le gifịkịlepo pantōndolo. 36 Untōndoli ali pakwambilila ifịhōmbịgwa fyake, ali pakubūngānịa īseke sya būmị bwa bwịlabwịla; ukuti unsopị nuntondolị basekelege pamopēne. 37 Buno mo mụno lịkubonekela ukuja lya nalolị ilịsyu ili lịkuti: Jumo ịkusopa, ujūngi ịkutōndola. 38 Une nābatumịle umwe nkutōndola ifị mụkālijūlịlepo. Abāngi bo aba bālijūlịle, umwe mwịngị̄lepo ịtolo pakabōmbo kābo. 39 Abasamalịja ba bị̄ngị aba nkāja kala balinkummwịtika, panōngwa ja ịsyu ili unkị̄kulu ālisịsịmikị̄sye ātịle: Āmbūlịle syosa isi nābōmbaga. 40 Lelo bo Abasamalịja bị̄sịle apa ālipo, balinkumpyelesya ukuti agonepo pamyabo. Po papo umwene alinkugona papo amasịku mabili. 41 Po papo balinkummwịtika ba bị̄ngị ukukīndapo, panōngwa ja ịsyu lyake. 42 Balinkummbūla unkị̄kulu balinkuti: Lilino tutịkwịtikila kumasyu gāko gēne aga gwatubūlịle, himma, buno na jujuswe twịbēne tupilị̄ke, kangi tumēnye ukuti uju nalolị jo Mpokị gwa kị̄su. 43 Lelo bo Jesụ ịkummbūmbulusya umwana gwa ịfụmụ, umwene alinkusōkamo, alinkubūka mụ Galịlaị. 44 Namanga Jesụ jūjo āsịsịmikị̄sye ukuti: Unkụ̄ngụlụka atịkwimikịgwa nkị̄su kyake jūjo. 45 Lelo bo afịkịle mụ Galịlaị, Abagalịlajị balinkummwambilila, namanga abēne bāsịbwene isị ābōmbịle mụ Jelụsalemụ pakyaka, namanga bope bābūkịle kukyaka. 46 Po papo Jesụ alinkwandisya kangi alinkubūka mụ Kana nkị̄su kya Galịlaị, mụmo agapelịle amīsi ukuja bwalwa bwa māfị̄lu. Lelo alịmo mụ Kapelịnaumụ ulịfụmụ jumo uju umwanake unndumyana ābịnịle. 47 Jo alinkupilika ukuti Jesụ afụmịle mụ Jụtaị, ịsịle mụ Galịlaị, po papo alinkubūka kumyake alinkumpyelesya ukuti asụlụkege akammbummbulukisyege umwanake, namanga āli pị̄pị nukufwa. 48 Umwene Jesụ alinkummbūla alinkuti: Linga umwe mụtịkufịbona ifya kumanyịlamo nifị̄swigu, po mụtịsakwịtikamo sịku. 49 Umwene ulịfụmụ alinkummbūla alinkuti: Malafyale, ịsaga twịkililege bo umwanāngu akāli ukufwa. 50 Umwene Jesụ alinkummbūla alinkuti: Būkaga, umwanāko mūmị. Po papo umụ̄ndu jula alinkulịtika ilịsyu ili Jesụ ālimmbūlịle, alinkwenda nukubūka. 51 Lelo bo akāli ịkwịkilila, alinkwaganịla na babōmbị bāke, balinkummbūla isya kuti umwanāke mūmị. 52 Po papo alinkubalālūsya akabalilo kāko umwanāke āsịsịpukị̄le; abēne balinkummwamụla balinkuti: Mmajolo pakabalilo ka buhāno na bubili (nndyimo) po apa īsekema jalinndekịle. 53 Po papo ugwịse alinkwenda nukumanya ukuti pali po pakabalilo kāko Jesụ ālimmbūlịle ukuti: Umwanāko mūmị. Po papo alinkwenda nukwịtika jūjo ninyụ̄mba jake jōsa. 54 Iki lelo kyo kị̄ka kya bubili, iki Jesụ, ābōmbịle bo ịsịle mụ Galịlaị, ukufụma mụ Jụtaị.

5

1 Pānyụma pali sịsịsị, kilinkujako ikyaka kya Bajụ̄ta, jope Jesụ, alinkufyuka ukubūka mụ Jelụsalemụ. 2 Lelo mụmo mụ Jelụsalemụ, pakifịgo kya ng'ōsi, kilịpo ikisịba iki īngamụ jake Nkihịbuli bịkuti Betịsaịta, iki kili namatēmbe mahāno. 3 Mo bāgonangamo ababịne ba bị̄ngị, nabafwamāso, naba bịkukwema, naba balalịle ummbili, [aba bāgụ̄lilaga ukusụkānịka kwa mīsi. 4 Namanga ugwandumị āsụlụkaga nkisịba ntubalilo ntubalilo, āgajugānịaga amīsi; lelo uju linga atalịlepo ukwịngila mmīsi bo gafụmịle pakujugānịka, ābūmbulukaga īndamwa jōsa iji linga ali najo.] 5 Lelo ālipo papo umụ̄ndu jumo, uju āgonịle nindamwa ifyinja amalōngo matatu na lwele (38). 6 Umwene Jesụ alinkummbona bo ālāmbalēle pāpo, kangi alinkumanya ukuti agonịle papo akabalilo akatalị fị̄jo, alinkunndālūsya alinkuti: Bule gwịganịle ukubūmbulusịgwa? 7 Po papo ummbịne alinkummwamụla alinkuti: Malafyale, une ngaja numụ̄ndu ugwa kumbīka nkisịba bo amīsi gịkusụkānịka. Apa linga une nịkuti mbūke, ujūngi ịkūndalilapo ukusụlụka. 8 Po papo Jesụ alinkummbūla alinkuti: Sụmụka, pīmbaga ubulili bwako, gwendege. 9 Nakalīnga umụ̄ndu jula alinkubūmbuluka, alinkupīmba ubulili bwake, alinkubūka. Ilị̄sịku lilyo pali po pāsabāti. 10 Po papo lelo Abajụ̄ta balinkumbūla uju ābūmbulusịgwe balinkuti: Po pāsabāti, sịtịkwịtikisịgwa ukuti upīmbēge ubulili bwako. 11 Umwene alinkubāmụla alinkuti: Uju āmbumbulwịsye, jo uju āmbūlịle atịle: Pīmbaga ubulili bwako, gwendege. 12 Abēne balinkunndālūsya balinkuti: Jwanị umụ̄ndu uju akubūlịle ugwe atịle, pīmbaga gwendege? 13 Lolị umụ̄ndu uju ābūmbulusịgwe, akālimmēnye ukuti jwanị, namanga Jesụ āleganị̄ke, papo ikilūndilo kya bāndu kyalịpo palapala. 14 Pānyụma pali sịsịsị, Jesụ alinkummwaga nnyụ̄mba ja Kwịpụ̄tilamo, alinkummbūla alinkuti: Kēta, ubumbulwịke lilino, ungāndisyaga ukutula īnōngwa, ukuti sịngakwịsilaga īmbị̄bịpo ukukīnda. 15 Po papo umụ̄ndu jula alinkwenda nukubụka, alinkwakubabūla Abajụ̄ta alinkuti: Jo Jesụ uju ālimbumbulwịsye. 16 Panōngwa iji, Abajụ̄ta balinkumfwima Jesụ, papo ābōmbịle sịsịsị sabāti. 17 Lolị umwene Jesụ, alinkubāmụla alinkuti: Tāta ịkubōmba ukufịka kulilino kuno, nanịne bo ndēndị̄ke nịkubōmba. 18 Lyo lilyo Abajụ̄ta balinkōngelapo ukulōnda ukuti banngoge, papo bạ̄tigi akatula jēne ji ja kōmola sabāti, lolị papo kangi ạ̄tigi Kyala jo gwịse; ị̄pelaga mwene ukuja bo ju Kyala. 19 Po papo Jesụ alinkubāmụla alinkuti: Nalolị, nikubabūla une nịkuti: Umwana akamanya ukubōmba nakamo akāke jūjo, lolị kēne kāko linga ammbwene ịkubōmba Ugwịse, ko ịkubōmba kāko jope. Buno kōsa aka ịkubōmba jūjo, ko jope Umwana ịkubōmba kāko. 20 Namanga Ugwịse annganịle Umwana, ịkunnāngisya syosa isị ịkubōmba jūjo; kangi ịsakunnāngisyaga īmbōmbo īngulūmba ukukīndapo na pali sịsịsị, ukuti umwe āmụswīgege. 21 Buno bo apa Ugwịse ịkubasyusya abafwe ịkubapa ubūmị, bo atēndị̄ke jope na ju Mwana ịkubapa ubūmị bōsa aba linga ịganịle ukubapa. 22 Ugwịse atịkunndōnga najumo, lolị ubulōngị bōsa ampēle Umwana. 23 Ukuti bōsa bammwimịkege Umwana, bo mụmo bikummwimikila Ugwịse. Uju linga atịkummwimika Umwana, jo atịkummwimika na ju Gwịse uju ālintumịle. 24 Nalolị nikubabūla une nịkuti: Uju linga ịkupilika ilịsyu lyangu, atịle nukummwịtika uju āndumịle une, jo alinabo ubūmị bwa bwịla na bwịla; jo atịkwịsapo pabulōngelo, jo alobwịke ukufụma mbufwe ị̄ngị̄le mbūmị. 25 Nalolị nikubabūla une nịkuti kịkwịsaga akabalilo, nalilino kị̄sịle, apa abafwe bịsakupilikaga ilịsyu lya Mwana gwa Kyala, abēne aba bịkupilika bịsakujaga būmị. 26 Namanga bo apa Ugwịse alinabo ubūmị mmyake jūjo, bo ampēle bunobuno jope numwana ukuja nubūmị mmyake. 27 Kangi ampēle amaka aga kulōngela, papo jo Nnyamụ̄ndu jūjo. 28 Syo mụnganyomokaga sịsịsị, buno kịkwịsaga akabalilo, apa bōsa aba bali mmapūmba bịsakupilikaga ilịsyu lyake. 29 Po bēnde nukusōka; aba bābōmbaga īnụnụ bịsakusyukilaga kubūmị; abēne lolị aba bābōmbaga sị mbị̄bị, bo bịsakusyukilaga kukulōngịgwa. 30 Une ngamanya ukubōmba nakamo akāngu nịmwene, mụno ngupilikila mo mụmo ngulōngela. Ubulōngị bwangu bugolofụ ịtolo, papo ndịkubulōnda ubwịgane bwangu nịmwene, himma lolị ngulōnda ubwịgane bwa uju āndumịle. 31 Linga ngwịsịsịmikisya nịmwene, bo ulusịsịmịkisyo lwangu lukaja lwa nalolị; 32 alịko ujūngi uju ịkūsịsịmikisya une, kangi Mmēnye ukuti ulusịsịmịkisyo lwake, ulu ịkūsịsịmikisya une lwa nalolị. 33 Umwe mwatumịle īndumị kwa Johanị, umwene alinkusịsịmikisya nalolị. 34 Ulusịsịmịkisyo lwangu lutịkufụma kumụ̄ndu, lolị nikubabūla umwe sịsịsị ukuti mụpokịgwege. 35 Umwene āli nyāle iji jịkwaka nukumụlika lolị umwe mwalị̄ganịle ukusekela panāndi ịtolo ndumụlị lwake. 36 Lolị ulusịsịmịkisyo ulu ndinalo une, lukulūmba ukulukīndapo ulwa Johanị. Namanga īmbōmbo isị āmbēle Tāta āndumịle. 37 Kangi jope na ju Tāta uju ālindumịle, ịkūsịsịmikisya une. Umwe mụkapilikamo sịku ilịsyu lyake, nukummbona kōpe mụkammbonamo sịku; 38 lyope ilịsyu lyake mụkaja nalyo mụ̄nda mmyinụ, papo mụtịkummwitika uju atumị̄gwe na jūjo. 39 Mụkulōnda mwa bakalata, papo mụkuti mo tụkubwagaga ubūmị bwa bwịla; kābuno bo bābo bịkusịsịmikisya une. 40 Pope umwe mḳusị̄ta ukwịsa kumyangu ukuti mụjege nubūmị. 41 Une ndịkwambilila ulwimiko ukufụma kubāndu. 42 Lolị une mmbamēnye umwe ukuti mụkaja nalo ulugano lwa Kyala mụ̄nda mmyinụ. 43 Une nịsị̄le mụngamụ ja Tāta, lolị umwe mụtịkunyāmbilila; linga ujūngi ịkwịsila mụngamụ jake jūjo, jo mwịsakummwambililaga. 44 Po mụbagị̄le bulebule ukwịtika, mwe mụkupāna ulwimiko mwe bābo batupu, ngīmba ulwimiko ulu lụkufụma kwa Kyala, uju ali jumojwene ntiga, lo mụtịkululōnda? 45 Mụngịnogonaga ukuti une nịsakubapaga īnōngwa kwa Tāta, himma; uju ịsakubapaga īnōngwa umwe jo Mose, uju mụkunsūbila umwe. 46 Linga mwammwịtikaga Mose, po angali mụkunyị̄tika nanịne, buno umwene āsị̄mbịle isị sịkūnjoba une. 47 Lolị linga mụtịkusị̄tika isị āsị̄mbịle, po mwịsakugịtikaga bulebule amasyu gangu?

6

1 Pānyụma pali sịsịsị, po alinkubūka kwịsīlya ilīngi ilya nyanja ja Galịlaị, iji bịkuti Tịbelịja. 2 Po papo ikilūndilo ikikulūmba kilinkunkōnga, papo bāfịbwene ifị̄ka ifị āpelịle pababịne. 3 Umwene Jesụ alinkufyuka pakyamba, po alinkwakwịtūgasya nabafụ̄ndịgwa bāke. 4 Lolị ikyaka kya Pasa ikya Bajụ̄ta kyasegelị̄le. 5 Umwene Jesụ bo ịkukibona ikilūndilo ikikulūmba kịkwịsa kumyake, po papo alinkunndālūsya Fịlịpụ alinkuti: Tụkūlaga kūgu ifịsyesye ukuti abāndu bababa balyege? 6 Lolị syo ālālūsyaga sya kunngela ịtolo, namanga umwene āsịmēnye sịsyo ājaga pakusịbōmba. 7 Umwene Fịlịpụ alinkummwamụla alinkuti: Ifịsyesye fya pandalama bāmịa babili (200) fịkabagila ukubafwana, ukuti kukuti mụ̄ndu āmbililege fịnāndi. 8 Po papo jumo mmbafụ̄ndịgwa bāke, Andeleja unnụgụna gwa Sịmonị Petelị, alinkummbūla alinkuti: 9 Kalịpo papapa akalumyana, aka kali nifịsyesye fịhāno ifya nganụ ija luko ulūngi nutuswi tubili; lelo fyo fịbōmbe fịkị kubāndu abị̄ngị bababa? 10 Umwene Jesụ alinkubabūla alinkuti: Amụbatūgasye abāndu pāsi; lyalịpo ilị̄su lị̄ngị papo; po papo balinkutūgasya pāsi, abanyāmbala bālīti bali pa baelufụ bahāno (5,000). 11 Po papo Jesụ alinkwega ifịsyesye, alinkugwa ulupị kwa Kyala, alinkubajabila aba bātūgēsye. Tope nutuswi bububo alinkubapela mụmo bālōndelaga. 12 Lelo bo balị̄le bị̄kwị̄te, po papo Jesụ alinkubabūla abafụ̄ndịgwa bāke alinkuti: Amụbūngānịege utumēnya utu tusyele, ukuti nakamo kangatāgịgwaga. 13 Po papo balinkubūngānịa utumēnya twa fịsyesye fya nganụ ija luko ulūngi tula, utu bāsyesye aba bạ̄lyaga, balinkwịsusya ifị̄bo kalōngo na fịbili. 14 Lelo abāndu bo bakibwene ikị̄ka iki āpelịle, balinkuti: Uju jo nkụ̄ngụlụka nalolị uju ịkwịsaga nkị̄su mụno. 15 Umwene Jesụ bo asyagēnịe ukuti bịkulōnda ukwịsa, kukunkola, ukuti bammwimịkege ukuja Malafyale, po papo alinkwịkwaba kangi, alinkwakwịjēkela kukyamba mwene ịtolo. 16 Lelo bo bwịlịle namajolo, abafụ̄ndịgwa bāke balinkusụlụka ukubūka kunyanja. 17 Balinkwịpaka mwịbōtị, balinkwambuka ukubūka mụ Kapelịnaumụ. Lelo īngị̄sị jagwịle, umwene Jesụ ākāli ukufịka apa bālipo. 18 Po papo inyanja jilinkwenda nukusāmbuka, papo ummbelo unkulūmba gwakụlaga. 19 Bo bafịkịle pantāmbo gwa mailị ịtatu pamo ịna, balinkummbona Jesụ ịkwenda pamwanya panyanja, ịkusegelela kwịbōtị. Po papo abēhe balinkwenda nukutetema. 20 Umwene Jesụ alinkubabūla alinkuti: Jo une, mụngatetemaga. 21 Po papo abēne balinkulōnda ukuti bammwegele mwịbōtị, lolị nakalīnga ịtolo ilịbōtị lilinkufịka kwịsīlya kuno bālabilaga. 22 Nulubūnju ikilūndilo kya bāndu aba bāsyele aba bālyimịle ịsīlya lila ilya nyanja, balinkwaga ukuti likālipo ilịbōtị ilīngi pāpo, lolị lyene lilalila; nukuti Jesụ akālị̄pakịle mwịbōtị pamopēne nabafụ̄ndịgwa bāke, lolị abafụ̄ndịgwa bāke bābūkịle bēne ịtolo. 23 Lolị gālisịle amabōtị agāngi aga gāfụmịle ku Tịbelịja, pabupị̄pị napa bālīlaga ifịsyesye, bo UNTWA agwịle ulupị. 24 Lelo bo ikilūndilo kya bāndu kyagịle ukuti Jesụ akajapo pāpo, bope nabafụ̄ndịgwa bāke bakajapo, po papo abēne balinkwịpaka mwịbōtị, balinkubūka mụ Kapelịnaumụ kukunndōnda Jesụ. 25 Lelo bo bajịlekummwaga ịsīlya lila lya nyanja, balinkunndalūsya balinkuti: Mmanyịsị, gwịsịle ndilị kuno? 26 Umwene Jesụ alinkubāmụla alinkuti: Nalolị nịkubabūla une nịkuti, umwe mụtịkūndōnda pāpo mwafịbwene ifị̄swigu, himma, lolị papo mwalị̄le ifịsyesye, mwalị̄kwịte. 27 Mwe, komma ukwịjūla kufị̄ndu ifị fịkujōnga, lolị mwịjūlege kufị̄ndu ifị fịkujako bwịla ifị fịkupa ubūmị bwa bwịla na bwịla, ifị Nnyamụ̄ndu ịkubapaga; namanga jo uju Kyala Ugwịse ansịsịmikị̄sye. 28 Abēne balinkunndālūsya balinkuti: Tutubulege lelo ukusịbōmba īmbōmbo sya Kyala? 29 Umwene Jesụ alinkubāmụla alinkuti: Ijēne īmbōmbo ja Kyala iji ịkuti mụbōmbēge, jo ja kummwịtika uju antumịle umwene. 30 Po papo balinkunndālūsya balinkuti: Kupelaga kị̄ka kikị lelo ukuti tukibonege tukwịtikege? Kubōmba mbōmba jiliku? 31 Batāta bạ̄lyaga mana ndungalāngala, bo lilyo lisị̄mbị̄gwe ili lịkuti: Ābapēle ikisyesye ikifụma kumwanya, ukuti balyege. 32 Po papo Jesụ alinkubabūla alinkuti: Nalolị nịkubabūla une nịkuti: Akaja jo Mose uju ābapēle ikisyesye ikifụma kumwanya, lolị jo ju Tāta uju ịkubapa ikisyesye kya nalolị ikifụma kumwanya. 33 Namanga ikisyesye kya Kyala, kyo iki Kịkusụlụka ukufụma kumwanya, kyo iki kịkukipa ubūmị ikị̄su. 34 Abēne balinkummbūla balinkuti: Gwe Malafyale, kyo utupege bwịla ikisyesye kikīki. 35 Po papo Jesụ alinkubabūla alinkuti: Jo une ne kisyesye ikipelabūmị jujune; uju linga ịkwịsa kumyangu, jo jitịsakunndumamo sịku īnjala; kangi uju ịkunyịtika une, jo atịsakūmilwamo sịku. 36 Lolị nābabūlịle umwe ukuti, ukūmbona ko mụmbwene, lolị mụtịkūnyị̄tika. 37 Bōsa aba linga ịkūmbaga Tāta, bịkwịsaga kumyangu; kangi gwesa uju linga ịkwịsa kumyangu, jo ndịsakunkagilaga sịku pānja. 38 Buno nsụlwịke mfụmịle kumwanya, lolị ngị̄samo nkubōmba isya bwịgane bwangu, himma, nịsịle nkubōmba ubwịgane bwa jūjo ālindumịle. 39 Ubu bo bwịgane bwa uju ālindumịle une, ukuti ndingansobesyaga najumo mụli aba āmbēle, lolị ukuti nịsembasyusyege bōsa pị̄sịku lya kūsụlo. 40 Namanga ubu bo bwịgane bwa Tāta, ukuti gwesa uju ịkunkēta Umwana nukummwịtika, ajege nubūmị bwa bwịla na bwịla. Lelo po nanịne nịsakunsyusyaga pabusịku bwa kūsụlo. 41 Po papo Abajụ̄ta balikwịbụnēsya kumyake, papo ājobịle ātịle: Une ne kisyesye iki kisụlwịke ukufụma kumwanya. 42 Balinkuti: Akaja jo Jesụ umwana gwa Josefụ jujuju? Uju ugwịse nunna tubamēnye? Po ịkujoba ukuti nsụlwịke ukufụma kumwanya? 43 Umwene Jesụ alinkubāmụla alinkuti: Mụngị̄bụnēsyaga mwịbēne. 44 Najumo akabagila ukwịsa kumyangu, pēne papo linga Tāta, uju ālindumịle une ịkunkwabila kumyangu; lelo jo nanịne nịsakunsyusyaga pị̄sịku lya kūsụlo. 45 Lisịmbị̄gwe mbakụ̄ngụlụka ukuti: Bōsa bịsakumanyịsịgwaga na Kyala. Gwesa uju linga apilị̄ke kangi amanyị̄le kwa Kyala, jo ịkwịsa kumyangu. 46 Mụngāti jumo ammbwenemo Tāta, himma, lolị mwene uju āfụmịle kwa Kyala, jo uju ammbwenemo Tāta. 47 Nalolị nikubabūla une nịkuti, uju linga ịkwịtika, jo ali nubūmị bwa bwịla na bwịla. 48 Jo une ne kisyesye ikipelabūmị. 49 Abị̄sēmwe balinkulya mana ndungalāngala, lolị balinkufwa. 50 Iki kyo kisyesye iki kisụlwịke ukufụma kumwanya, ukuti umụ̄ndu bo alị̄le, angafwaga. 51 Jo une ne kisyesye ikyumị, iki kisụlwịke ukufụma kumwanya; gwesa uju linga ịkulya ikisyesye kikīki, jo ịkujaga mūmị bwịla ịtolo. Kangi ikisyesye iki nịkubapaga ukuja būmị bwa kịsu, go gu mmbili gwangu. 52 Po papo Abajụ̄ta balinkwenda nukukānịkana fị̄jo bābo batupu balinkuti: Kali umụ̄ndu uju ịkutupaga bulebule ummbili gwake ukuti go tulyege? 53 Umwene Jesụ alinkubabūla alinkuti: Nalolị nikubabūlạ une nịkuti, linga mụtịkulya ummbili gwa Nnyamụ̄ndu, kangi mụtịkunwa niịlopa lyake, po bo mụkaja nubūmị mụ̄nda mmyinụ. 54 Uju linga ịkulya ummbili gwangu, ịkunwa niịlopa lyangu, jo alinabo ubūmị bwa bwịla; jo nanịne nịsakunsyusyaga pị̄sịku lya kūsụlo. 55 Namanga ummbili gwangu fyo fị̄ndu fyakulya fya nalolị, lyope niịlopa lyangu fyo fyakunwa fya nalolị. 56 Uju linga ịkulya ummbili gwangu, ịkunwa niịlopa lyangu, jo ịkujaga mụ mmyangu, nanịne nịkujaga mụ mmyake jūjo. 57 Bo apa Tāta umūmị āndumịle une, nanịne ndi mūmị mwa Tāta, po apa uju linga ịkūndyaga une, jope ịkujaga mūmị mụ mmyangu. 58 Iki kyo kisyesye iki kisụlwịke ukufụma kumwanya, kikaja bo iki bạ̄lyaga abị̄sēmwe kangi balinkufwa. Uju linga ịkulya ikisyesye iki, jo ịkujaga mūmị bwịlabwịla. 59 Sịsịsị syo isị ājobịle nnyụ̄mba ja kwịpụ̄tilamo, bo ịkumanyịsya mụ Kapelịnaumụ. 60 Po papo abafụ̄ndịgwa bāke, bo bapilị̄ke sịsịsị, balinkuti: Ilịsyu ili ịpalapala, jwanị abagị̄le ukulipilika? 61 Umwene Jesụ bo asyagēnịe mụ̄nda mmyake, ukuti abafụ̄ndịgwa bāke bịkwịbụnēsya pị̄syu lilīli, po papo alinkubabūla alinkuti: Kali ilịsyu ili lịkubapelela ukwịkịnyamo? 62 Po sịsakujaga bulebule bo Nnyamụ̄ndu ịkufyuka ukubūka kūko āliko ịjolo? 63 Jo ju Mbepo uju ịkupa ubūmị, ummbili go gukaja nimbōmbo najimo. Amasyu aga mbabūlịle, jo ju Mbepo, bo bu būmị. 64 Lolị balịmo bamo mmyinụ aba batịkwịtika; namanga Jesụ amēnye ukufụma mụmmbwandilo ukuti bo bānị aba batịkwịtika, nukuti jwanị uju ịsakummbīkaga mmaboko ga balugu. 65 Kangi alinkuti: Syo sịsyo mbabūlịle ukuti, najumo akabagila ukwịsa kumyangu, pēne papo linga apēgị̄gwe na Tāta. 66 Syo isị sịlinkubapela bị̄ngị mbafụ̄ndịgwa bāke ukugomokela kūnyụma, balinkusịta nukwenda nagwe. 67 Po papo Jesụ alinkubalālūsya kalōngo na babili bala alinkuti: Nanụmwe mụkulōnda ukujōnga? 68 Alinkwamụla Sịmonị Petelị alinkuti: Malafyale tujōngelege kwanị? Ugwe ulinago amasya ga būmị bwa bwịla na bwịla; 69 uswe sịtukolịle kangi tumēnye ukuti gwe Mwịkemo gwa Kyala jujugwe. 70 Po papo Jesụ alinkubāmụla alinkuti: Bule ngaja jo une nābasalịle umwe kalōngo na babili? Lolị jumo mmyinụ jo setano. 71 Ammbalaga ju Jụ̄ta unnya Sịmonị gwa mụ Kalyotị; namanga jo uju ājaga pakummbīka mmaboko ga balugu, āli jo jumo mụli bala kalōngo na babili.

7

1 Pānyụma pali sịsịsị, po Jesụ alinkusyungūtila nkị̄su kya Galịlaị; namanga akāliganịle ukusyungutila mụ Jụtaị, papo Abajụ̄ta bālōndaga ukunngoga. 2 Lelo ikyaka kya Bajụ̄ta ikya matēmbe (fịtēmbe) kyasegelị̄le. 3 Po papo abanụgụna bāke balinkummbūla balinkuti: Sōkapo pabujo ubu ubūkege mụ Jụtaị, ukuti bope abafụ̄ndịgwa bāko bakasịbonege īmbōmbo isị kubōmba. 4 Buno najumo atịkubōmbela nafịmo kubutị̄tu, bo umwene ịkulōnda ukuti ajege pabwelụ; linga syo kubōmba sịsịsị, po gwịnāngisyege kukị̄su. 5 Namanga bope na ba bāmyabo bakammwịtikaga. 6 Umwene Jesụ alinkubabūla alinkuti: Akabalilo kāngu une kakāki, lolị umwe akabalilo kīnụ kalịpo bwịla. 7 Umwe ikị̄su kikabagila ukubabēnga, lolị une kịkūmbēnga, papo nịkukisịsịmikisya ukuti īmbōmbo syake mbị̄bị. 8 Umwe amụfyukege kukyaka, une ndịkufyukako kukyaka kikīki, papo akabalilo kāngu kakāki ukufịka. 9 Bo ababūlịle sịsịsị, po papo alinkusyala mụ mụ Galịlaị. 10 Lelo bo abanụgụna bafyukịle ukubūka kukyaka, po papo jope Jesụ alinkufyuka, lolị akēndaga pabwelụ, alinkwendela mbutị̄tu. 11 Abalōngosị ba Bajụ̄ta balinkunndōnda pakyaka, balinkulālūsya balinkuti: Ali pōkị? 12 Kulinkujapo ukuhēhanịla ku kwịngị mfịlūndilo, bamo balinkuti: Mụ̄ndu nnụnụ, abāngi balinkuti: Himma, buno ịkusofya abāndu. 13 Lolị akālipo umụ̄ndu najumo ugwa kunnjoba pabwelụ, papo bābatị̄laga Abajụ̄ta. 14 Lelo bo ikyaka kifịkịle pakāti, umwene Jesụ alinkufyuka alinkwakwịngila nnyụ̄mba ja Kwịpụ̄tilamo, alinkwanda ukumanyịsya. 15 Po papo Abajụ̄ta balinkuswịga, balinkulālūsanịa balinkuti: Umụ̄ndu uju agāgịle kūgu amahala bo akamanyịlamo? 16 Umwene Jesụ alinkubāmụla alinkuti: Ulumanyịsyo ulu ngumanyịsya lukaja lwangu, lolị lwa jūjo āndumịle. 17 Umụ̄ndu uju linga ịkulōnda ukubōmba isya bwịgane bwa Kyala, jo ịsakulumanyaga ulumanyịsyo lwangu linga lufụmịle kwa Kyala, pamo lwangu nịmwene. 18 Uju linga ịkujoba isyake mwene, jo ịkwịlōndela ulwimiko lwake mwene; lolị uju ịkululōnda ulwimiko lwa uju antumịle, jo gwa nalolị, jo nubunịongafụ nabumo bukajamo nkāti mmyake. 19 Bule Mose akabapēle īndagilo? Pope akajamo najumo mmyinụ uju ịkusịkōnga īndagilo. Po fịkị mụkulōnda ukūngōga? 20 Abāndu bala balinkummwamụla balinkuti: Uli nikigili; jwanị ịkulōnda ukukugoga? 21 Umwene Jesụ alinkubāmụla alinkuti: Kalịpo akabōmbo kamo aka bābōmbịle, mwesa mulinkuswịga. 22 Umwene Mose abapēle ulwịho lula ulwa bubụ̄tịgwa. Kukaja ko kuti ulwịho lula lwafụmịle kwa Mose, lolị lwafụmịle kubị̄sukulu bītu. Lelo umwe mụkummbụ̄tako umụ̄ndu na pị̄sịku lya Sabāti. 23 Lelo linga umụ̄ndu ịkubụ̄tịgwa na pị̄sịku lya Sabāti ukuti ululagilo lwa Mose lingōmolịgwaga, po fị̄kị mụkūngalalila une apa nummbūmbulwịsye umụ̄ndu ummbili gōsa pị̄sịku lya Sabāti. 24 Mụngalōngelaga mụno mụkusibonela umwe mụ̄nyụma, lolị mụlōngege nubulōngị ubugolofụ. 25 Po papo abāndu bamo aba mụ Jelụsalemụ balinkujoba balinkuti: Kali umụ̄ndu jula bịkunndōnda ukuti banngoge akaja jo uju? 26 Kēta lelo ịkujoba pabwelụ ịtolo, lolị abēne bātikujoba nalolị: E, kīngamo abalōngosị bammēnye nalolị ukuti jo ju Kilisịtị? 27 Namanga Mesịja bo ịsịle umụ̄ndu najumo atịsakumanyaga kuno afụmịle. Lolị uswe tumēnye kuno afụmịle umụ̄ndu uju. 28 Lelo bo Jesụ ịkumanyịsya nnyụ̄mba ja Kwịpụ̄tilamo, alinkulāta ilịsyu lyake bo ịkujoba alinkuti: Bạ̄ti mụ̄mēnye une; kōpe nakuno mfụmịle mụkumēnye? Lolị pope une, ngị̄sa namaka gangu nịmwene; lolị, uju āndumịle jo gwa nalolị, uju umwe mụkammanya. 29 Lolị une nummēnye papo une mfụmịle kumyake, kangi jo jūjo ālindumịle. 30 Po papo balinkulōnda ukunkola. Lolị akālipo umụ̄ndu najumo ugwa kumpalamāsya, papo akabalilo kāke kākāli ukufịka. 31 Abāndu ba bị̄ngị nkilūndilo kila balinkummwịtika, balinkujoba balinkuti: Bo ịsịle Kilisịtị, kali ịsakupelaga ifị̄ka ukukīnda ifị ịkupela uju? 32 Abafalịsaị balinkubapilika abāndu bo bịkuhēha isya Jesụ. Po papo abapụ̄tị abakulūmba na Bafalịsaị balinkubatuma abalindililị bābo ukuti bakankole. 33 Umwene Jesụ alinkujoba alinkuti: Nịkujaga nanụmwe kukabalilo akapị̄mba ịtolo, na po nisakubūkaga kuli jūjo ālindumịle. 34 Mwịsakūndōndaga, lolị mụtịsakūnyāgaga, papo kuno nịsakujaga une umwe mụkabagila ukufịkako. 35 Po papo abalōngosị ba Bajụ̄ta balinkulālūsanịa balinkuti: Kali umụ̄ndu jujuju ịkulōnda ukubūka kūgu, kuno uswe tukabagila nukummwaga? Kali ịkuti mbūke ku Bajụ̄ta aba babalanị̄le Mbagịlịkị, nukwakubamanyịsya Abagịlịkị? 36 Ịkujoba ịsyu iki lilīli apa ịkuti: Mwịsakūndōndaga, lolị mụtịsakūnyāgaga, kangi kuno nịsakujaga, ko umwe mụkabagila ukufịkako? 37 Pị̄sịku lya bumalīkisyo ilya kyaka kila lyo ịsịku ilịkulūmba fījo. Pị̄sịku lila Jesụ alinkwima alinkulāta ilịsyu lyake bo ịkujoba alinkuti: Uju linga umị̄lwe, jo ị̄sege kumyangu anwege. 38 Uju linga ịkunyị̄tika une, jo īnyīsi sya mīsi ga būmị sịsakwịbukaga ukufụma mụndụmbụla jake, bo mụmo kalata ịkujobela. 39 Lyo annjobaga ju Mbepo, uju aba bammwịtị̄ke bājaga pakummwambilila, namanga pakabalilo kala Mbepo ākāli ukwịsa, papo Jesụ ākāli ukwimikịgwa. 40 Lelo abāndu bamo aba nkilūndilo kila bo bagapilị̄ke amasyu gagaga, balinkujoba balinkuti: Nalolị umụ̄ndu uju jo nkụ̄ngụlụka utigi: 41 Abāngi balinkujoba balinkuti: Uju jo Kilisịtị; lolị abāngi balinkuti: Kali Kilisịtị abagị̄le ukufụma mụ Galịlaị? 42 Umwene kalata ịkuti fịkị? Ịkuti: Kilisịtị ịsakufụmaga nkikolo kya Ndabitị, nukuti ịsakupāpịgwaga mụ Betelehemụ nkāja aka ātūgalangamo Ndabitị. 43 Po papo lulinkujapo ulutapukano nkilūndilo kya bāndu bala panōngwa jake. 44 Abāndu bamo balinkulōnda ukunkola, lolị akālipo najumo uju āgelịle ukunkola. 45 Po papo abalindililị bala balinkugomoka kubapụ̄tị abakulūmba na ku Bafalịsaị; abēne balinkubalālūsya balinkuti: Fịkị mụkantwala? 46 Abēne abalindililị balinkwamụla balinkuti: Akajako umụ̄ndu najumo uju ajobịlemo sịku bo mụmo ịkujobela umụ̄ndu jujuju. 47 Po papo Abafalịsaị balinkubāmụla balinkuti: O, nanụmwe abasobị̄sye? 48 Bule, mụmmbwenepo jumo unndōngosị gwa bāndu, pamo Umfalịsaị jumo uju ammwịtị̄ke? Himma: 49 Lolị ikilūndilo iki kikasịmanya īndagilo sya Mose; kigụnị̄gwe. 50 Umwịnābo jumo uju āli jo Nịkotemụ, uju lumo ālimmbụkị̄le Jesụ, alinkubalālūsya alinkuti: 51 Kali ululagilo lwitu lụkunndōnga umụ̄ndu kisịtakumpilikisya tāsị nukusyaganịa isị ịkubōmba? 52 Abēne balinkummwamụla balinkuti: E, kīngamo nanụngwe ufụmịle mụ Galịlaị? Ukēnēsye fị̄jo mwa kalata, kwịsakwaga ukuti unkụ̄ngụlụka atịkufụmamo sịku mụ Galịlaị.

8

1 Po papo balinkubalanila bōsa, kukuti mụ̄ndu alinkubūka kukāja kāke; lolị umwene Jesụ alinkubūka kukyamba kya mịsyunguti. 2 Kilābo kyake nulubūnju fị̄jo alinkubūka kangi nnyụ̄mba ja NTWA. Abāndu bōsa balinkummbūkila; umwene alinkwịtūgasya alinkubamanyịsya. 3 Po papo abamanyịsị ba ndagilo na Bafalịsaị balinkuntwala unkị̄kulu uju bālinkolịle mbulogwe, balinkummbīka pakāti pamyabo. 4 Po papo balinkunndālūsya Jesụ balinkuti: Mmanyịsị, unkị̄kulu uju akolị̄gwe pabulogwe. 5 Ndulagilo lwitu Mose ātulagị̄le ukuti unkị̄kulu bo jujuju atị̄kị̄gwege namabwe. Ugwe lelo kuti fị̄kị̄? 6 Sịsịsị syo bājobaga isya kunngela, ukuti mo basyagilege isya kunsịtaka. Lolị Jesụ alinkwịnama, alinkusị̄mba nulōbe lwake pamfụ. 7 Abēne bo būmīlị̄sye ukunndālūsya, po papo alinkwịnuka alinkubabūla alinkuti: Umụ̄ndu uju akaja nubutulanōngwa nabumo mmyinụ, jo atalege ukuntịka niịbwe. 8 Umwene alinkwịnama kangi, alinkusị̄mba pāsi. 9 Abēne lelo bo basịpilị̄ke sịsịsị, balinkwanda ukusōka pānja jumo jumo, balinkutala abakulūmba. Alinkusyala Jesụ mwene, nu nkị̄kulu uju ālyimịle pala pala. 10 Umwene Jesụ bo ị̄nwịke, alinkunndālūsya unkị̄kulu jula alinkuti: Gwe nkị̄kulu, bali kūgu abāndu bala? Akajapo najumo uju asyele ugwa kukutobesya? 11 Unkị̄kulu alinkwamụla alinkuti: Najumo Malafyale. Po papo Jesụ alinkummbūla alinkuti: Po nanịne ndịkukulōnga. Būkaga, lolị ukwanda lilino ungāndisyaga ukutula īnōngwa kangi.] 12 Umwene Jesụ bo āndị̄sye ukujoba nabo alinkubabūla alinkuti: Une ne lumụlị lwa kị̄su; uju linga ịkūngōnga une, jo atị̄sakwendangamo sịku mụngị̄sị, lolị ịsakujaga nalo ulumụlị lwa būmị. 13 Po papo Abafalịsaị balinkummbūla balinkuti: Ugwe kwịsịsịmikisya gwịmwene, ulusịsịmịkisyo lwako lukaja lwa nalolị. 14 Umwene Jesụ alinkubāmụla alinkuti: Pope napa linga ngwịsịsịmikisya nịmwene, ulusịsịmịkisyo lwangu lwa nalolị papo une mmenye kuno mfụmịle na kuno ngubūka, lolị umwe mụkamanya kuno mfụmịle na kuno ngubūka. 15 Umwe ukulōnga mụkulōnga ukukōnga ulwa bāndu, une ndịkunndōnga najumo. 16 Lolị une linga ngulōnga, ubulōngị bwangu bwa nalolị; papo une ngaja nịmwene, lolị ndi na jūjo ālindumịle. 17 Kangi ndulagilo lwinụ lisị̄mbị̄gwe ili lịkuti: Ubukētị bwa bāndu babili, bo bwa nalolị. 18 Une ngwịsịsịmikisya nịmwene, jope Tāta uju āndumịle ịkūsịsịmikisya une. 19 Po papo balinkunndālūsya balinkuti: Ugūso ali kūgu? Umwene Jesụ alinkwamụla alinkuti: Umwe mụkāmanya une, jope na Tāta mụkammanya; namanga linga mwalīmēnye une, po angali jope na Tāta mụmmēnye. 20 Jesụ ājobịle amasyu gagaga nkyụmba kya ndalama, bo ịkumanyịsya nnyụ̄mba ja NTWA. Lolị najumo alinkusịta nukunkola, namanga akabalilo kāke kākāli ukufịka. 21 Jesụ alinkwandisya kangi ukubabūla alinkuti: Une nsụmwịke umwe mwịsakundōndaga, lolị mụkufwilaga mụmbị̄bị syinụ. Kuno ngubūka umwe mụkabagila ukufịkako. 22 Po papo abalōngosị ba Bajụ̄ta balinkuti: Kali ịkwịgogaga mwene, apa ịkuti, kuno ngubūka mụkabagila ukufịkako? 23 Jesụ alinkubāmụla alinkuti: Umwe mụfụmịle pāsi papapa, une mfụmịle kumwanya; umwe mụli ba nkị̄su iki, une ngaja gwa nkị̄su iki. 24 Fyobene mbabūlịle ukuti mụkufwilaga mụmbị̄bị syinụ. Linga umwe mụtịkwịtika ukuti une jo jujune, mụkufwilaga mụmbị̄bị syinụ. 25 Abēne balinkunndālūsya balinkuti: Ugwe gwanị? Umwene Jesụ alinkubāmụla alinkuti: Mbabūlịle ukufụma mụmmbwandilo. 26 Ndinasyo nyịngị isya kubabūla nukubalōnga umwe; lolị uju āndumịle une jo gwa nalolị, na isị nsịpilị̄ke kumyake syo nịkukibūla ikị̄su. 27 Abēne bakāsyagēnịe ukuti ājobaga nabo isya Gwịse. 28 Po papo Jesụ alinkubabūla alinkuti: Bo mụmmwịnwịle Nnyamụ̄ndu, po apa mwịsakusyaganị̄aga ukuti une jo jujune; kangi nukuti ndịkubōmba nafịmo nịmwene, lolị ngujoba syene sịsyo ālimanyị̄sye Tāta. 29 Uju ālindumịle une, ali nanịne; akāndeka nịmwene, papo ngubōmba bwịla sịsyo sịnkyelị̄le. 30 Bo ajobịle sịsịsị abāndu bị̄ngị balinkummwịtika. 31 Po papo Jesụ alinkubabūla Abajụ̄ta aba bālimmwịtị̄ke alinkuti: Linga mụkusyumīlila īmanyịsyo syangu, bo mụli bafụ̄ndịgwa bāngu nalolị. 32 Na po kangi mwịsakubumanyaga ubwanalolị, ubwene ubwanalolị bwịsakubapaga ubwabuke. 33 Abēne balinkummwamụla balinkuti: Uswe tuli lujụ̄ngụ lwa Abụlahamụ, tukajamo sịku batumwa ba jumo; lyo kujoba bulebule ilya kuti: Mwịsakujaga bābuke? 34 Umwene Jesụ alinkubāmụla alinkuti: Nịkubabūla isya nalolị nịkuti: Kukuti; mụ̄ndu uju ịkubōmba isya butulanōngwa, jo ntumwa gwa butulanōngwa. 35 Untumwa atịkujamo nnyụ̄mba bwịla, lolị umwana jo ịkujamo bwịla. 36 Apēne lelo linga Umwana ịkubābula, po mụkujaga bābuke nalolị. 37 Mmēnye ukuti umwe mụli lujụ̄ngụ lwa Abụlahamụ, lolị pope umwe mụkulōnda ukūngoga papo mụtịkusị̄tika īmanyịsyo syangu. 38 Une ngujoba isị ālīnāngị̄sye Tāta, nanụmwe bububo mụkubōmba isị mwabūlị̄gwe nugwịsēmwe. 39 Abēne balinkummwamụla balinkuti: Uswe Tāta gwitu jo Abụlahamụ. Umwene Jesụ alinkubabūla alinkuti: Linga umwe mwali bāna ba Abụlahamụ, po angali mụkubōmba bo sịsyo ābōmbaga Abụlahamụ. 40 Une mbabūlịle ubwanalolị ubu nābupilị̄ke kwa Kyala; lolị pope umwe mụkulōnda ukūngoga. Abụlahamụ akābōmbịle bo isị. 41 Umwe mụkubōmba sịsyo abammbukūlu bīnụ bābōmbaga. Po papo abēne balinkubabūla balinkuti: Uswe tukaja sịgwana; tuli nagwe Tāta jumojwene, ju Kyala. 42 Umwene Jesụ alinkubabūla alinkuti: Linga Kyala ali Gwịsēmwe, po angali mụnganịle une, papo une nālisịle ukufụma kwa Tāta lilino ndi apa. Namanga ngị̄sa kumaka gangu nịmwene, lolị jūjo ālindumịle une. 43 Mụtịkusyaganịa fịkị isị ngujoba? Papo mụkabagila ukupilika īndumị jangu. 44 Umwe mụli bāna ba ju gwịsēmwe Setano, kangi mwịganịle ukubōmba ifịnyonyo fya gwịsēmwe. Umwene ālinngogabāndu ukufụma mụ mbwandilo; atịkwimamo mmbwanalolị, namanga ubwanalolị bukajamo mmyake. Apa linga ịkujoba isya butūngulu, po ịkujoba ukukōngana nutujīlo twake mụno ajīlị̄le papo umwene jo ntūngulu kangi jo gwịse gwa butūngulu. 45 Une lolị papo ngujoba isya nalolị; po apa mụtịkūnyị̄tika. 46 Kali jwanị mmyinụ uju abagị̄le ukusịsịmịkisya ukuti une ndi ntulanōngwa? Linga ngujoba isya nalolị, po mụtịkūnyị̄tika fịkị? 47 Uju linga gwa Kyala, jo ịkugapilika amasyu ga Kyala. Lolị umwe mụtịkupilika papo mụkaja bāndu ba Kyala. 48 Po papo Abajụ̄ta balinkummwamụla balinkuti: Kali tutịkutalusya apa tụkuti uli Nsamalịja, napa tụkuti uli niīmbepo īnyalị? 49 Umwene Jesụ alinkubāmụla alinkuti: Une ngaja niīmbepo īnyalị; lolị une ngummwịmika Tāta, umwe mụtịkūnyīmika une. 50 Une ndịkwịlōndela ulwimiko lwangu nịmwene; lolị alịko uju ịkululōnda, kangi umwene jo nndōngị. 51 Ngubabūla isya nalolị nịkuti, uju linga ịkulibīka ilịsyu lyangu, jo atịsakububonamo sịku ubufwe. 52 Po papo Abajụ̄ta balinkuti: Lilino po tumēnye ukuti ukīmbị̄le ikigili! Abụlahamụ āfwịle, bope nabakụ̄ngụlụka bāfwịle, lolị ugwe kuti: Uju linga ịkulibīka ilịsyu lyangu, jo atịsakubunogelesyangamo sịku ubufwe. 53 Kali ugwe ulinkulūmbapo kwa Tāta gwitu Abụlahamụ uju āfwịle? Bope nabakụ̄ngụlụka bāfwịle, gwe kwịpela mfịkị ugwe? 54 Umwene Jesụ alinkwamụla alinkuti: Linga nịjīmịkaga nịmwene, po angali ulwimiko lwangu lwa ịtolo. Jo ju Tāta uju ịkūnyīmika une, uju umwe mụkuti jo Kyala gwinụ; 55 umwe mụkāmmanyamo sịku, lolị une nummēnye. Linga nạ̄tigi ngammanya angali ndi ntūngulu bo jujūmwe. Lolị une nummēnye lyope niịsyu lyake ndikolịle. 56 Ugwịsēmwe Abụlahamụ ālikyelị̄le ukuti alibonege ilị̄sịku lyangu; bo alibwene alinkusekela. 57 Po papo Abajụ̄ta balinkummbūla balinkuti: Gwe ukamala nifyinja amalōngo mahāno kuti ummbwene Abụlahamụ? 58 Umwene Jesụ alinkubabūla alinkuti: Ngubabūla isya nalolị nguti: Bo akāli nukupāpịgwa Abụlahamụ une bo ndịko. 59 Po papo balinkusala amabwe ukuti bantịke; lolị umwene Jesụ alinkwịbīlila, alinkusōkamo nnyụ̄mba ja kwịpụ̄tilamo.

9

1 Po papo Jesụ bo ịkukīnda, alinkummbona umụ̄ndu uju āpāpị̄gwe bo mfwamāso. 2 Abēne abafụ̄ndịgwa bāke balinkunndālūsya balinkuti: Mmanyịsị! Jwanị uju atulịle īnōngwa, umụ̄ndu uju, pamo abapāpị bāke; apa āpāpị̄gwe bo mfwamāso? 3 Umwene Jesụ alinkubāmụla alinkuti: Jope na jujuju akatula īnōngwa, na babapāpị bāke bakatula najimo. Loli āpāpị̄gwe umfwamāso, ukuti amaka ga Kyala mo gabonekelege ukubōmba īmbōmbo nkāti mmyake. 4 Uswe fịkuti tubōmbēge īmbōmbo ja uju ālindumịle une, bo mụ̄sị ịtolo; namanga ikilo kịkwịsaga, apa najumo akabagila ukubōmba īmbōmbo. 5 Apa ndịmo nkị̄su, po ne lumụlị lwa kị̄su. 6 Lelo bo ajobịle sịsịsị, po papo alinkuswa amata pāsi, alinkufụga amatope namata, alinkumpaka namatope mmāso, umfwamāso jula, 7 alinkummbūla alinkuti: Būkaga ukasụgụsụle pakisịba Sịloha (ko kuti untumịgwa). Po papo alinkubūka, alinkwakusụgụsụla; umfwamāso jula alinkugomoka bo ịkukēta. 8 Po papo abapalamanị bāke naba bammbonaga bwịla bo ịkusūma balinkuti: Kali uju akaja jo nndōndo jula ātūgalaga nukusūma? 9 Bamo balinkuti: Jo jūjo; abāngi balinkuti: Himma, afwene nagwe ịtolo. Lolị jula āli mfwamāso alinkuti: Jo jujune. 10 Abēne balinkunndālūsya balinkuti: Amāso gāko gịgwịke bulebule? 11 Umwene alinkwamụla alinkuti: Umụ̄ndu uju bịkuti jo Jesụ, afụgịle amatope nukūmbaka mmāso; alinkummbūla alinkuti: Būkaga pakisịba Siloha ukasụgụsụlege. Ndinkubūka, ndinkwakusụgụsụla, po papo ndinkwaga ngukēta. 12 Abēne balinkunndālūsya balinkuti: Umwene ali ko kūgu? Alinkuti: Une ngamanya. 13 Po papo balinkuntwala ku Bafalịsaị uju āfwịle amāso ịjolo. 14 Apēne pali po pị̄sịku lya Sabāti, apa Jesụ āfụgaga amatope nukummwịgula amāso. 15 Po papo Abafalịsaị balinkunndālūsya kangi mụno gị̄gukị̄le amāso gāke. Umwene alinkubabūla alinkuti: Ālimbakịle amatope mmāso, ndinkusụgụsụla, po apa nikukēta. 16 Abafalịsaị bamo balinkuti: Umụ̄ndu uju akafụma kwa Kyala, papo atịkummwimika Sabāti; abāngi balinkuti: Abagị̄le bulebule umụ̄ndu untulanōngwa ukupela ifị̄ka bo fịfịfị? Po papo balinkwenda nukutapukana. 17 Balinkunndālūsya kangi umfwamāso balinkuti: Apa ugwe akwịgwịle amāso, kujoba sya fịkị kumụ̄ndu uju? Umwene alinkubabūla alinkuti: Nkụ̄ngụlụka. 18 Abēne Abajụ̄ta balinkusịta nukwịtika ukuti āli mfwamāso ịjolo lilino ịkukēta, ukufịka papo bababilikilege abapāpị ba uju ālị̄gwịke amāso. 19 Bo balinkubalālūsya balinkuti: Kali uju jo mwanīnụ, uju mụkuti āpāpị̄gwe bo mfwamāso? Lelo lilino ịkukēta bulebule? 20 Po papo abapāpị bāke balinkwamụla balinkuti: Tumēnye ukuti uju jo mwanītu, nukuti āpāpị̄gwe bo mfwamāso, 21 lolị mụno gị̄gukị̄le amāso gāke, syo tukamanya; na uju ammwịgwịle amāso tukammanya. Mụlinndālūsya jūjo, buno nkusị, abagị̄le ukwịjobela mwene. 22 Abapāpị bāke bājobaga isị pāpo bābatị̄laga abalōngosị ba Bajụ̄ta, namanga abalōngosị ba Bajụ̄ta bālitikēne ukuti, umụ̄ndu gwesa uju linga ịkummwịtika Jesụ ịkuti jo Kilisịtị, jo tụkunsosyaga nkipānga. 23 Jo nōngwa iji abapāpị bāke balinkuti: Nkusị, amụnndālūsyege jūjo. 24 Po papo balinkummbilikila ulwa bubili, umụ̄ndu uju āfwịle amāso, balinkuti: Ujobe ubwanalolị nkyenị mwa Kyala; uswe tummēnye umụ̄ndu jula ukuja ntulanōngwa. 25 Umwene alinkwamụla alinkuti: Linga ntulanōngwa une syo ngamanya; lolị une nkamēnye kamokēne ukuti une nāli mfwamāso, lilino ngukēta. 26 Abēne balinkunndālūsya balinkuti: Akubōmbị̄le sya fịkị? Akwịgwịle amāso bulebule? 27 Umwene umụ̄ndu jula alinkubāmụla alinkuti: Une mmbabūlịle liịtāsị, lolị mụlinkusịta nukupilika; po lelo fịkị mụkulōnda ukupilika kangi? Kīngamo nanụmwe mụkulōnda ukuja bafụ̄ndịgwa bāke? 28 Abēne balinkuntuka balinkuti: Uli mfụ̄ndịgwa gwake jujugwe, lolị uswe tuli bafụ̄ndịgwa ba Mose. 29 Uswe tumēnye ukuti Kyala ājobịle na Mose, lolị umụ̄ndu uju tukammanya na kuno afụmịle. 30 Umwene alinkwamụla alinkuti: Isị syo sya kuswịga, ukuti umwe mụkammanya kuno afụmịle umụ̄ndu uju, bo umwene ānyịgwịle amāso. 31 Tumēnye ukuti Kyala atịkubapilika abatulanōngwa, lolị ịkumpilika uju linga ịkuntị̄la Kyala, ịkubōmba isya bwịgane bwake. 32 Ukufụma mụ mmbwandilo bwa kị̄su tukapilikamo sịku ukuti umụ̄ndu jumo ammwịgwịle amāso umụ̄ndu, uju āpāpị̄gwe bo mfwamāso. 33 Linga umụ̄ndu uju akāfụmịle kwa Kyala, akābagị̄le ukuti abōmbe fịmo. 34 Abēne balinkummwamụla balinkuti: Gwe gwapāpị̄gwe mbutulanōngwa ịtolo, gwe gwāti utumanyịsyege? Po papo balinkunnkagila pānja. 35 Umwene Jesụ alinkupilika ukuti bankagị̄le pānja, lelo bo ammwagịle alinkunndālūsya alinkuti: Bule kummwịtika Nnyamụ̄ndu? 36 Umụ̄ndu jula alinkwamụla alinkuti: Mbūla, jo alịku Malafyale ukuti jo nummwịtikege. 37 Jesụ alinkummbūla alinkuti: Ummbwene, jo uju ịkujoba nanụngwe lilino. 38 Po papo umụ̄ndu jula alinkuti: Nịkwịtika Malafyale. Alinkummbụngụlụkila. 39 Umwene Jesụ alinkujoba alinkuti: Nịsịle nkị̄su mụno nkulonga, ukuti aba batịkukēta bakētege, na bala bịkukēta ukuti bajege bafwamāso. 40 Abafalịsaị bamo aba bāli nagwe, bo bapilị̄ke sịsịsị, balinkunndālūsya balinkuti: Kali nanụswe tuli bafwamāso? 41 Umwene Jesụ alinkubāmụla alinkuti: Linga mwali bafwamāso angali mụkaja nimbị̄bị; lolị lilino apa mụkuti: Uswe tụkukēta, po īmbị̄bị syinụ sịkubūmīlilaga.

10

1 Jesụ alinkujoba alinkuti: Ngubabūla isya nalolị nguti: Uju linga atị̄kwenda pakifịgo pakwịngila nkibaga kya ng'ōsị, linga ịkwenda pabūngi ịtolo, jo nhījị kangi jo ịnyāmbụta. 2 Lolị uju linga ịkwịngila ịkwenda pakifịgo, jo ntị̄mị gwa ng'ōsị jūjo. 3 Jo nunndindililakifịgo ịkummwịgulila, ning'ōsị sịkulipilika ilịsyu lyake; umwene ịkusịkōlela īngamụ īng'ōsị syake, nukusịsōsya pānja. 4 Umwene bo āsịsōsị̄sye syosa, po ịkusịlōngolela nkyenị; isyene īng'ōsị sịkunkōnga mụ̄nyụma, papo sịlimēnye ilịsyu lyake. 5 Ujūngi ịtolo jo sịtikunkōnga nasịku, lolị sịkummbopa; papo sịkalimanya ilịsyu lya jūngi. 6 Jesụ alinkubabūla ikifwanịkisyo iki, lolị abēne balinkusịta nukusyaganịa isị ābabūlaga. 7 Po papo Jesụ alinkubabūla kangi alinkuti: Ngubabūla isya nalolị nguti, une ne kifịgo kya ng'ōsị. 8 Bōsa aba bātalịle ukwịsa kumyangu, bo bahījị kangi gyo mịnyāmbụta; lolị isyene īng'ōsị sịkābapilikaga. 9 Une ne kifịgo, linga uju ịkwendela mmyangu pakwịngila, jo ịsakupokịgwaga; jo ịsakutigi nukwịngila nukusōka, kangi ịsakujagaga īndeka. 10 Unhījị jo ịkwịsa kukuhīja kwene, kukugoga na kukōnānga. Une nịsịle ukuti mụjege nubūmị, mụjege nabo ubu bukēlịlwe ịtolo. 11 Une ne ntị̄mị ne nnụnụ. Umwene untị̄mị unnụnụ ịkwịtika ukubutāga ubūmị bwake panōngwa ja ng'ōsị syake. 12 Umwene ummbōmbị uju akaja ntị̄mị, uju īng'ōsị sịkaja syake, bo ịkukibona ikinyamāna kịkwịsa, ịkusịleka īng'ōsi ịkwenda nukubopa. Po ikinyamāna kịkusịkola īng'ōsị nukusịbalanịa. 13 Umwene atịkusịpākisya napanāndi īng'ōsị pāpo umwene mụ̄ndu gwa mfwalo. 14 Une ne ntị̄mị ne nnụnụ. Nsịmēnye ing'ōsi isyangu, kangi syope isyangu sịmēnye une, 15 bo apa Tāta amēnye une, nanịne nummēnye Tāta; kangi ubūmị bwangu nịkusịfwila ing'ōsị. 16 Syope ning'ōsị isị̄ngị ndinasyo, isị sịkajamo nkibaga iki, Ngulōndịgwa ukuti syope nsịtwale, po sịsakupilikaga ilịsyu lyangu; po gwịsakujaga ntị̄mo gumogwene, nuntị̄mị jumojwene. 17 Syo sịsyo Tāta ānganịle, papo ngutāga ubūmị bwangu, ukuti nịsemmbwambililege kangi. 18 Akajapo umụ̄ndu najumo uju ịkupoka ubūmi bwangu; lolị une ngubutāga kubwịgane bwangu nịmwene. Ndi namaka ukubutāga, ndi namaka ukubwega kangi. Syo isị āndagị̄le Tāta ukuti syo mbōmbēge. 19 Po papo Abajụ̄ta balinkutapukana kangi, panōngwa ja masyu gagaga. 20 Bamo ba bị̄ngị mụmo bājīlị̄le balinkuti: Ali niīmbepo īnyalị, kangi akị̄mbị̄le ikigili; mụkumpilikisya fịkị? 21 Abāngi balinkuti: Aga gakaja go masyu ga mụ̄ndu uju ali niīmbepo īnyalị; kali īmbepo īnyalị jibagị̄le ukummwịgula amāso umfwamāso? 22 Mụ Jelụsalemụ mụla kyalịmo ikyaka ikya kukumbukila ukwịgula īnyụ̄mba ja kwịpụ̄tilamo mwali mo mmapepo. 23 Umwene Jesụ āsyungūtilaga nnyụ̄mba ja kwịpụ̄tilamo mwịbalasa lya Solomonị. 24 Po papo Abajụ̄ta balinkunsyungūtila Jesụ balinkuti: Kutulabāsyaga īndụmbụla syitu ukufịka ndilị? Linga ugwe gwe Kilisịtị, ulitubūlaga pabwelụ ịtolo. 25 Umwene Jesụ alinkubāmụla alinkuti: Mbabūlịle lolị mụtịkwịtika. Īmbōmbo isị ngubōmbela une mụngamụ ja Tāta, syo sịkūsịsịmikisya une. 26 Lolị umwe mụtịkwịtika papo mụkaja ng'ōsị syangu. 27 Īng'ōsị syangu sịkulipilika ilịsyu lyangu; une nsịmēnye, syope sịkūngōnga. 28 Une ngusịpa ubūmị bwa bwịla, isyene sịtịsakusobamo sịku, kangi najumo atịsakusịpokamo sịku mmaboko gangu. 29 Umwene Tāta uju ālimbēle une, jo nkulūmba ukubakīnda bōsa; najumo akabagila ukusịsōsyamo mmaboko gāke Tāta. 30 Une na Tāta tuli jumojwene. 31 Po papo Abajụ̄ta balinkusala kangi amabwe ukuti bantịke. 32 Umwene Jesụ alinkubabūla alinkuti: Mbanāngị̄sye īmbōmbo sịnyịngị īnụnụ isya Tāta. Jo mbōmbo jiliku ndi isyo iji mụkūndịkila namabwe? 33 Abēne Abajụ̄ta balinkummwamụla balinkuti: Tutịkukutịka namabwe panōngwa ja mbōmbo īnụnụ, lolị panōngwa ja mahēlụ, kangi papo ugwe uli mụ̄ndu ịtolo, kwịpela ukuja gwe Kyala. 34 Umwene Jesụ alinkubāmụla alinkuti: Kali sịkasị̄mbịgwa ndulagilo lwinụ isị sịkuti: Une nājobịle ukuti, umwe mwe gyabakyala? 35 Umwene Kyala alinkubajoba ukuja gyo gyabakyala bala bāpēgị̄gwe ilịsyu lyake, kangi tumēnye ukuti isị sịsị̄mbị̄gwe mwa kalata sya nalolị sịtịkōmokamo sịku. 36 Po fịkị mụkunnjoba uju Ugwịse ampēle ubwịkemo nukuntuma nkị̄su, mụkuti: Kuhēlụla, bạ̄ti pāpo njobịle ndịle: Une ndi Mwana gwa Kyala? 37 Linga une ndịkubōmba īmbōmbo sya Tāta, po mụngānyịtikaga. 38 Loli linga ngusịbōmba, napa linga mụtịkūnyị̄tika une, po mụsị̄tikege īmbōmbo, ukuti mụsyaganịege nukumanya ukuti, Tāta ali nkāti mmyangu, nanịne ndi nkāti mmyake. 39 Abēne balinkulōnda ukunkola kangi, lolị umwene alinkupụlụmụnyụka mmaboko gābo. 40 Po papo Jesụ alinkubūka kangi kwịsīlya ilīngi ilya Jolịtanị, pabujo ubu Johanị ōsyaga ulutasị, ko alinkutūgala kūko. 41 Abāndu bị̄ngị balinkummbūkila balinkuti: Johanị akāpelịlemo ikīswigu nakimo. Lolị syosa isị Johanị annjobaga umụ̄ndu jujuju syali sya nalolị. 42 Abāndu ba bị̄ngị balinkummwịtika palapala.

11

1 Ālịko umụ̄ndu jumo uju āli mmbịne, īngamụ jake āli jo Lasalo ugwa mụ Betanịja, nkāja akanāndi aka bātūgalangamo ba Malịja nunkulu gwake Malịta. 2 Umwene Malịja jo uju ālimpakịle UNTWA īnyēmba īnụ̄nga, uju ampyasilaga mmalūndi ninywịlị syake. Jo uju ulịlūmbu gwake Lasalo āli mmbịne. 3 Po papo abalūmbu bāke balinkutuma īndumị kwa Jesụ balinkuti: Gwe NTWA, ummanyānị gwako mmbịne. 4 Umwene Jesụ bo apilị̄ke, alinkujoba alinkuti: Ububịne ubu bukaja bwa kunngoga, lolị bwa kwịbonekesyamo ubukulūmba Kyala, ukuti umwana gwa Kyala mo abonekelege ubukulūmba. 5 Umwene Jesụ ābaganịle ba Malịta na Malịja ugwamyabo, na ju Lasalo. 6 Bo apilị̄ke ukuti Lasalo ābịnịle, alinkōngelapo ukugona amasịku mabili apa ālipo. 7 Pānyụma Jesụ alinkubabūla abafụ̄ndịgwa bāke alinkuti: Tubūke kangi mụ Jụtaị. 8 Po papo abafụ̄ndịgwa bāke balinkummbūla balinkuti: Mmanyịsị, lulūlu ịtolo Abajụ̄ta balōndaga ukukutịka na mabwe, kangi ko ubūkege kūko? 9 Umwene Jesụ alinkwamụla alinkuti: Kali utubalilo twa pamụ̄si tukaja kalōngo na tubili? Linga umụ̄ndu ịkwenda pamụ̄si, atịkwịkoma ikilūndi; papo ịkulubona ulumụlị lwa kị̄su iki. 10 Lolị linga umụ̄ndu ịkwenda pakilo, ịkwịkoma, papo ulumụlị lukajamo nkāti mmyake. 11 Bo alinkujoba bunobuno Jesụ. Pānyụma pali sịsịsị alinkubabūla alinkuti: Ummanyānị gwitu Lasalo agonịle utulo, lolị ngubūka ukuti nganndēmbusye. 12 Po papo abafụ̄ndịgwa bāke balinkummbūla balinkuti: Gwe NTWA, linga agonịle utulo po ịkuponaga. 13 Umwene Jesụ ājobaga ubufwe bwake, lolị abēne bịnogonaga ukuti ājobaga ukugona tu tulo twene. 14 Po papo Jesụ alinkubabūla pabwelụ ịtolo alinkuti: Lasalo afwịle. 15 Une nịkusekela panōngwa jīnụ, papo une ngāliko kūko, ko kuti umwe mwịtikege. Lelo ịsaga tubūke kumyake. 16 Po papo Tomasị (uju āli jo Mbasa), alinkubabūla abafụ̄ndịgwa abanịne alinkuti: Tubūke nanụswe, ukuti tukafwilege lumo nagwe. 17 Umwene Jesụ bo afịkịle kula alinkwaga Lasalo agonịle amasịku mana mwịpūmba. 18 Akāja ka Betanịja kāli pị̄pị fị̄jo na mụ Jelụsalemụ, kāli pāmaịlị ịbili. 19 Abajụ̄ta ba bị̄ngị bālisịle kukubasūbisya ba Malịta na Malịja panōngwa ja bufwe bwa ịlūmbu gwabo. 20 Umwene Malịta bo apilị̄ke ukuti Jesụ ịkwịsa, po papo alinkubūka kukummwambilila; lolị Malịja jo alinkusyala nnyụ̄mba. 21 Po papo Malịta alinkummbūla Jesụ alinkuti: Gwe NTWA, linga gwalịpo papapa, angali ulịlūmbu gwangu akafwa. 22 Lolị na lilino Mmēnye ukuti, kōsa aka kusūmaga kwa Kyala, Kyala ịsakukupaga. 23 Umwene Jesụ alinkummbūla alinkuti: Ulịlūmbugo ịkusyukaga. 24 Umwene Malịta alinkummwamụla alinkuti: Mmēnye ukuti ịsakusyukaga pakabalilo ka kusyuka, pị̄sịku lya kūsụlo. 25 Po papo Jesụ alinkummbūla alinkuti: Ne kusyuka, ne būmị jujune. Uju linga ịkunyị̄tika, napa linga ịkufwa ịkujaga mūmị ịtolo; 26 kangi gwesa uju linga mūmị, linga ịkunyị̄tika une, jo atịsakufwamo sịku nasịku. Bule kwịtika sịsịsị? 27 Umwene Malịta alinkummwamụla alinkuti: Ena, gwe NTWA, une ngwịtika ukuti ugwe gwe Kilisịtị, Umwana gwa Kyala uju ịkwịsaga nkị̄su. 28 Lelo bo ajobịle sịsịsị, Malịta alinkubūka kukummbilikila Malịja ugwamyabo, alinkummbūla kubutị̄tu alinkuti: Ummanyịsị alịpo apa ịkukubilikila. 29 Umwene bo apilị̄ke, po papo alinkusụmụka mbibimbibi, alinkubūka kwa Jesụ. 30 Umwene Jesụ ākāli ukufịka nkāja, āli papo Malịta ạ̄lyaganị̄le nagwe. 31 Abēne Abajụ̄ta aba bāli nagwe nnyụ̄mba, aba bansūbisyaga, bo bammbwene Malịja ịkusụmụka mbibimbibi ịkusōka pānja, balinkunnkōnga. Balinkwịnogona ukuti kīngamo ịkubūka kwịpūmba kukulila. 32 Po papo lelo Malịta bo afịkịle apa ālipo Jesụ, bo ammbwene, alinkungwila mmalūndi, alinkujoba alinkuti: Gwe NTWA, linga gwalịpo papapa, angali ulịlūmbu gwangu akafwa. 33 Umwene Jesụ bo ammbwene ịkulila, na Bajụ̄ta aba bālisịle nagwe bope bịkulila, alinkulalamụka īndụmbụla, alinkusụlụmanịa; 34 alinkubalālūsya alinkuti: Mummbīkịle kūgu? Abēne balinkwamụla balinkuti: Malafyale, ịsaga ukēte. 35 Umwene Jesụ alinkulila amāsosị. 36 Po papo Abajụ̄ta balinkujoba balinkuti: Kēta mụno ālinganị̄le. 37 Lolị bamo balinkuti: Umụ̄ndu uju ālimmwịgwịle amāso umfwamāso, akabagile ukubōmba fịmo ukuti Lasalo angafwaga? 38 Po papo kangi Jesụ alinkusụlụmanịa mụndụmbụla, alinkufịka pị̄pūmba. Ilyene ilịpūmba jali mbako, lyabikị̄gwepo ilị̄bwe. 39 Po papo alinkujoba alinkuti: Amụsegulepo ilị̄bwe. Umwene Malịta ulịlūmbu gwa uju afwịle alinkumbịla alinkuti: Malafyale, lilino po āndịle ukunụ̄nga, namanga agonịle amasịku mana mwịpūmba. 40 Umwene Jesụ alinkummbūla alinkuti: Kali ngākubūlịle ukuti linga kwịtika kwịsakububonaga ubukulūmba bwa Kyala? 41 Po papo balinkusōsyapo ilị̄bwe. Umwene Jesụ alinkukēta kumwanya alinkuti: Gwe Tāta, nịkugwa ulupị kumyako papo kūmbilika. 42 Une Mmēnye ukuti kūmbilika bwịla lolị njobịle sịsịsị panōngwa ja kilūndilo kya bāndu aba bāsyungūtị̄le; ko kuti bị̄tikege ukuti jo ugwe ūndumịle. 43 Lelo bo ajobịle sịsịsị, po papo alinkukōlela ilịsyu ilịkulūmba alinkuti: Lasalo sōka pānja. 44 Po papo uju āfwịle alinkusōka pānja, ānịembetelelị̄gwe nimyenda mmalūndi na mmaboko, kangi āpịnyị̄gwe nikitambāla kumāso. Umwene Jesụ alinkubabūla alinkuti: Amụmmwabulege, mụ̄nndeke abūkege. 45 Po papo lelo Abajụ̄ta ba bị̄ngị aba bālisịle kwa Malịja, bo basịbwene isị ābōmbịle Jesụ, balinkummwịtika. 46 Lolị bamo balinkubūka ku Bafalịsaị, balinkwakubabūla isị Jesụ ābōmbịle. 47 Po papo abapụ̄tị abakulūmba na Bafalịsaị balinkubilikila ulukomāno, balinkujobana balinkuti: Kali tubōmbe fịkị? Namanga umụ̄ndu uju ịkubōmba ifị̄swigu fị fị̄ngị. 48 Linga tụkunndeka bunobuno, po abāndu bōsa bịsakummwịtikaga; lelo po Abalōma bịsakutwịsilaga, bịsakujōnāngaga īnyụ̄mba jītu īnyị̄kemo nukukipyụta ikikolo kyitu. 49 Po papo umwịnābo jumo uju ali jo Kajafa, uju āli jo mpụ̄tị unkulūmba ikyinja kikyo, alinkujoba alinkuti: Umwe mụkasịmanya nasịmo; 50 mụtịkusyaganịa ukuti kunụnụ umụ̄ndu jumo abafwilege abāndu, ukukīnda ukuti ikikolo kyosa kipyụtịgwege? 51 Lolị sịsịsị akāsịjobaga kubwịgane bwake jūjo, lolị papo āli mpụ̄tị unkulūmba ikyinja kikyo, alinkukụ̄ngụlụka ukuti Jesụ ịkuja pakukifwila ikikolo kyabo; 52 kukaja ko kuti kikyo kyene, lolị kangi nukuti ababūngānị̄ege abāna ba Kyala aba bānyāmbanị̄ke, ukuti bị̄pelege ukuja jumo jwene. 53 Po papo ukufụma pị̄sịku lilyo, abalōngosị ba Bajụ̄ta balinkwịtikana ukuti banngoge Jesụ. 54 Po umwene Jesụ akāsyungūtilaga pabwelụ nkị̄su kya Bajụ̄ta, lolị alinkusōkapo pāpo, alinkubūka kukị̄su iki kipalamēne nulungalāngala; nkāja aka bịkuti Efulaịmụ, mo alinkwakutūgala na bafụ̄ndịgwa bāke. 55 Ikyaka kya Bajụ̄ta ikya Pasa kyasegelị̄le; abāndu bị̄ngị ukufụma nkị̄su kila, balinkufyuka ukubūka ku Jelụsalemụ ukuti bakị̄jēlusyege bo ikyaka kya Pasa kikāli. 56 Po papo balinkunndōnda Jesụ; balinkulālūsanịa bo bīmịle nnyụ̄mba ja kwịpụ̄tilamo balinkuti: Mụkwịnogona fịkị? Sịkunāngisya ukuti atịkwịsako lōsa kukyaka kikīki, pamo bule ịkwịsa? 57 Abēne abapụ̄tị abakulūmba na Bafalịsaị bālagị̄le ukuti, linga jumo amēnye kuno alịko, jo abagị̄le ukubabūla, ukuti bakankole.

12

1 Lelo bo gasyele amasịku ntandatu ukufịka ikyaka kya Pasa, Jesụ alinkwịsa mụ Betanịja, mụno ātūgalaga Lasalo uju Jesụ ālisyusị̄sye mbafwe. 2 Mo balinkumpījila ifị̄ndu fya namajolo mụmo; umwene Malịta alinkubabōmbela, jope Lasalo āli jo jumo mụli bala bali pāmēsa na Jesụ. 3 Po papo Malịja alinkwega īsụpa ja nyēmba īmbala fị̄jo īnụ̄nga, isịtakōngānịa nakamo, alinkumpaka Jesụ mmalūndi, alinkumpyasīla mmalūndi ninywịlị syake; ulūma lwa nyēmba lulinkutụbanịa mōsa nnyụ̄mba. 4 Lolị jumo mmbafụ̄ndịgwa bāke, Jụ̄ta Ịsịkalyotị, uju ājaga pakummbīka Jesụ, mmaboko ga balugu alinkujoba alinkuti: 5 Fịkị īnyēmba isị sịkūlisịgwaga pandalama bāmịa batatu (300) ukuti bapēgịgwege abalōndo? 6 Umwene akāsịjobaga sịsịsị ukubapākisya abalōndo, himma, lolị papo ali nhījị, kangi ājaga ninyāmbi ja ndalama, kabili kabili āhījaga ifị bāsopāngamo. 7 Umwene Jesụ alinkummbūla alinkuti: Nndeke, komma ukuntamya unkị̄kulu uju, namanga ābīkịle ukuti sịjege sya pị̄sịku lya kūsyilila une. 8 Buno abalōndo mụkujaga nabo bwịla, lolị une mụtikujaga nanịne bwịla. 9 Abajụ̄ta ikilūndilo ikikulūmba, balinkupilika ukuti Jesụ alịmo mụ Betanịja, po papo balinkwịsa. Bakālisịle kukunkēta Jesụ mwene, himma, lolị nukuti bakambone na Lasalo, uju ālisyusị̄sye mbafwe. 10 Po papo abapụ̄tị abakulūmba balinkwịtikana ukuti bakanngoge na ju Lasalo, 11 namanga panōngwa jake, Abajụ̄ta bābị̄ngị bābasāmbukị̄le abalōngosị bābo, balinkummwịtika Jesụ. 12 Ulwa kilābo, abāndu ikilūndilo ikikulūmba aba bālisịle kukyaka, balinkupilika ukuti Jesụ ịkwịsa ku Jelụsalemụ. 13 Po papo balinkwega īsāmba sya tugị̄ndwa, balinkusōka ukubuka kukummwambilila; balinkukōlela balinkuti: Hosyana, nsajịgwa uju ịkwịsila mụngamụ ja NTWA, asajịgwege umalafyale gwa Ịsịlaelị. 14 Po papo Jesụ alinkukāga kamo akamwana ka mbụ̄nda, alinkwịtogapo pamwanya bo papo lisị̄mbị̄gwe mwa kalata ili likuti: 15 Ungatetemaga, gwe nndīndwana Syonị (ko kuti gwe kāja ka Syonị), Kēta, Umalafyale gwako ịkukwịsila, Ị̄togịle pāmwana ja mbụ̄nda. 16 Abēne abafụ̄ndịgwa bāke tāsị balinkusịta nukusyaganịa sịsịsị; lolị bo Jesụ ị̄ngị̄le mbukulūmba, po papo balinkukumbuka ukuti sịsịsị syasị̄mbị̄gwe ukunjoba umwene, nukuti bālimmbōmbị̄le sịsịsị. 17 Ikyene ikilūndilo kya bāndu bala bāli nagwe pakabalilo kala ammbilikilege Lasalo ukufụma mwịpūmba, nukunsyusya mbafwe; balinkusịsịmikisya sịsyo. 18 Po apa ikilūndilo kya bāndu bābūkaga kukummwambilila, papo bāpilị̄ke ukuti āpelịle ikị̄ka kikịki. 19 Po papo Abafalịsaị balinkubūlana balinkuti: Mụkukēta? Tukabagila ukubōmba nakamo; kēta ikị̄su kyosa kinkulukị̄le jūjo. 20 Mbandu bala bāfyukị̄le ku Jelụsalemụ kukwịpụ̄ta pakabalilo ka kyaka, bālimo bamo na Bagịlịkị. 21 Bo balinkummbūkila Fịlịpụ ugwa mụ Betịsaịta, nkị̄su kya Galịlaị, balinkusūma balinkuti: Malafyale, tukulōnda ukummbona Jesụ. 22 Umwene Fịlịpụ alinkubūka alinkwakummbūla Andeleja, po papo Fịlịpụ na Andeleja balinkwakummbūla Jesụ. 23 Umwene Jesụ alinkubāmụla alinkuti: Akabalilo ka kupēlịgwa ubukulūmba Nnyamụ̄ndu kafịkịle. 24 Nịkubabūla isya nalolị nịkuti, linga uluseke lwa nganụ lutịkusopịgwa mụnngūnda nukufwa, po lụkuja luseke ịtolo; lolị linga lufwịle, po lụkupa īseke sị nyịngị ịtolo. 25 Uju linga abuganịle ubūmi bwake, jo ịkubutāgaga; uju linga abubēngịle ubūmị bwake nkị̄su iki, jo ịkububīkaga ābụkujaga bwa mmbūmị ubwa bwịla na bwịla. 26 Uju linga ịkulōnda ukūmbōmbela une, jo āngōngege; kangi kūko linga ndịko une, ko kūko jope ummbōmbị gwangu ịsakujaga. Umụ̄ndu gwesa uju ịkumbōmbela une, jo Tāta ịsakummwimikaga. 27 Lilino umōjo gwangu gulalamwịke; kali ndigi fịkị? Kali ndigi: Gwe Tāta, ulimbokaga kukabalilo aka? Himma, buno syo sịsyo nịsị̄le nkabalilo kakakā. 28 Gwe Tāta, ujipege ubukulūmba īngamụ jako. Po papo ilịsyu lilinkufụma kumwanya lilinkuti: Njipēle ubukulūmba, kangi ngwandisyaga ukujipa ubukulūmba. 29 Po papo ikilūndilo kya bāndu aba balyimịle pāpo, balinkupilika, balinkuti: Kulụndụma kwa njasị; abāngi balinkuti: Gwandumị ājobaga nagwe. 30 Umwene Jesụ alinkubabūla alinkuti: Ilịsyu ili likị̄sa panōngwa jangu une, lolị lịsịle panōngwa jīnụ. 31 Lilino ko kabalilo ka kulōngịgwa kwa kị̄su kikiki; lilino unndagilị gwa kị̄su kikiki isakutāgịgwaga pānja. 32 Nanịne bo nịnulị̄gwe ukufụma nkị̄su, po nịsakubakwabilaga kumyangu bōsa. 33 Ājobaga sịsịsị ukunāngisya ubufwe ubu ājaga pakufwa. 34 Po papo ikilūndilo kilinkummwamụla kilinkuti: Uswe tụkubūlịgwa nululagilo lwitu ukuti, Kilisịtị ịsakujangako bwịla ịtolo; lelo po kujoba bulebule ukuti, Nnyamụ̄ndu fịkuti ịnulịgwege? Nnyamụ̄ndu jujuju jo aliku? 35 Umwene Jesụ alinkubabūla alinkuti: Ulumụlị luli nanụmwe kukabalilo akapị̄mba ịtolo. Amwendege bo tāsị mụli nalo ulumụlị, ukuti īngị̄sị jingịsakubambulanịaga; namanga uju linga ịkwenda mụngị̄sị, jo atịkumanya nakuno ịkubūka. 36 Po papo lelo bo mụli nulumụlị, amụlwịtikege ulumụlị, ukuti mụjege bāna ba lumụlị. Umwene Jesụ bo ajobịle amasyu ago, po papo alinkusōkapo, alinkwakwịbīlila ukuti bangammbonaga. 37 Napapo āpelịle ifị̄ka fị fị̄ngị ifị nkyenị mmyabo, pope abēne balinkusịta nukummwịtika, 38 ukuti mo gị̄silege amasyu aga ājobịle unkụngụlụka Jesaja apa ātịle: Gwe NTWA, jwanị asị̄tike isị tufụmwịsye? Kangi amaka ga NTWA, jwanị akị̄ngulilịgwe? 39 Fyobene bakābagị̄le ukwịtika, papo Jesaja ājobịle kangi ātịle: 40 Kyala abapūpēsye amāso gābo, asịpelịle ngafụ īndụmbụla syabo, ukuti bangịsakukētaga namāso gābo, bangịsakusyaganịaga mụndụmbụla syabo, ukuti bāngisakupīndukaga, nangịsakubabūmmbulusyaga. 41 Jesaja ājobaga amasyu gagaga papo ābubwene ubukulūmba bwa Jesụ, alinkujoba īnōngwa syake. 42 Lolị napapo bo syali abalōngosị ba bị̄ngị abā Bajụ̄ta balinkummwịtika Jesụ. Lolị panōngwa ja Bafalịsaị, balinkusịta nukwināngisya pabwelụ, ukuti bāngisakusōsịgwaga nkipānga. 43 Namanga abēne bāluganịle ulwimiko ulwa kwịmikịgwa nabāndu, bakāluganịle ulwimiko ulwa kwịmikịgwa na Kyala. 44 Po papo Jesụ alinkukolela alinkuti: Uju linga ịkunyị̄tika une, jo atịkunyịtika jujune nịmwene, himma, lolị ịkummwịtika jope na jūjo ālindumịle une. 45 Uju ịkūmbona une, ịkummbona jope na jūjo ālindumịle une. 46 Une ndi lumụlị, nịsịle nkịsu ukuti gwesa uju ịkunyị̄tika une, angajaga mụngị̄sị. 47 Uju linga ịkugapilika amasyu gangu lelo atịkugakola, jo ndịsakunndongaga; papo une ngālị̄sịle nkukilonga ikị̄su lolị nkukipoka. 48 Uju linga ịkūsyokela une, jo atịkugambilila amasyu gangu, jo alinagwe ugwa kunndōnga. Ilịsyu ili ndijobịle, lyo lịsakunndongaga pịsịku lya kūsụlo. 49 Namanga une ngajobamo isyangu nịmwene, lolị Tāta uju ālindumịle une, jo jūjo mwene āndagị̄le isị nịsakusịjobaga, namuno nịsakusịjobelaga. 50 Mmenye ukuti ululagilo lwake, bo bu būmị bwa bwịla; po apa isi ngusịjoba, ngusịjoba bo mụmo Tāta ālimbūlịle.

13

1 Lelo bo ikyaka kya Pasa kikāli ukufịka, po papo Jesụ alinkumanya ukuti akabalilo kāke aka kusōkelamo nkị̄su ukubūka ku Gwịse kafịkịle. Bo papo ābaganịle abāndu bāke nkị̄su; ena, alinkubagana ukufịka kubumalīkisyo. 2 Po papo Jesụ na bafụ̄ndịgwa bāke balinkuja pamēsa pakulya ifị̄ndu fya majolo; bo Setano asịbīkị̄lemo ngānịla mụndụmbụla ja Jụ̄ta unnya Sịmonị ugwa mụ Kalyotị, isya kummbīka mmaboko gabalugu Jesụ. 3 Umwene Jesụ amēnye ukuti Ugwịse ampēle fyosa mmaboko gāke, nukuti āfụmịle kwa Kyala, kangi ịkubūka kwa Kyala. 4 Po papo alinkusụmụka pāmēsa apa bạ̄lyaga ifị̄ndu, alinkubīka pāmbali imyenda gyake, alinkwịnịemba ilịtābulo mụnsana. 5 Po papo alinkukūsya amīsi mwịbēsenị, alinkwanda ukubasụgụsụsya amalūndi abafụ̄ndịgwa bāke, alinkubapyasīla niịtabulo ili ālinịembịle mụnsana. 6 Po papo alinkufịka pa Sịmonị Petelị; umwene Petelị alinkujoba alinkuti: Malafyale, gwe gwāti ūsụgụsụsyege amalūndi gangu ugwe? 7 Po papo Jesụ alinkummwamụla alinkuti: Isị ngubōmba syo ukasịmanya ugwe lilino, lolị kwịsakusyaganiaga pānyụma. 8 Umwene Petelị alinkummbūla alinkuti: Utịsakūsụgụsụsyamo sịku amalūndi gangu. Umwene Jesụ alinkummwamụla alinkuti: Linga Ndịkukusụgụsụsya ugwe, bo tukaja pamopēne. 9 Po papo Sịmonị Petelị alinkwamụla alinkuti: Malafyale, gomma ga malūndi gēne, lolị ūsụgụsụsyege gōpe na ga maboko na guntu. 10 Umwene Jesụ alinkummbūla alinkuti: Uju ōgịle jo atịkulōnda ukōga kangi, lolị mụ mmalūndi mwene, namanga bo mwelụ gwesa ịtolo; nanụmwe mụli bēlụ, lolị mụkaja bēlụ mwesa. 11 Papo ālimmēnye uju ājaga pakumbīka mmaboko ga balugu po apa ạ̄tigi: Mụkaja bēlụ mwesa. 12 Lelo bo abasụgụswịsye amalūndi gābo, bo ēgịle imyenda gyake atūgēle kangi, po papo alinkubalālūsya alinkuti: Kali mụsyagēnịe isị mbabōmbị̄le? 13 Umwe mụkūnjoba une ukuti, Mmanyịsị kangi Malafyale, lelo syo mụkutalusya, namanga bo ndi nalolị. 14 Lelo linga une ne ndi Malafyale kangi ne ndi Mmanyịsị mbasụgụswịsye amalūndi umwe, po mụbagị̄le nanụmwe ukusụgụsụsanịa amalūndi. 15 Papo mbapēle akakuketelamo, ukuti isị mbabōmbị̄le syo mụbōmbēge nanụmwe. 16 Ngubabūla isya nalolị nguti: Untumwa akankīnda ubukulūmba umalafyale gwake, jope na ju ntumịgwa aka kīnda ubukulūmba uju antumịle. 17 Linga mụsịmēnye sịsịsị, po mwịsakujaga basangalufụ linga mụkusịbōmba. 18 Ndịkubajoba mwesa. Une mbamēnye aba mbasalịle; lolị ukuti isị sịsị̄mbị̄gwe mwa kalata mo sị̄silege isya kuti: Uju alị̄le ifị̄ndu fyangu āsanụkị̄le ịkulwa nanịne. 19 Ukwanda lilino mbabūlị̄le ngānị bo sịkāli ukuboneka, ukuti bo sịkuboneka, mwịsemwị̄tikege ukuti une jo jujune. 20 Ngubabūla isya nalolị nguti: Uju linga ịkummwambilila uju nguntuma une, jo ịkunyāmbilila une; na uju linga ịkunyāmbilila une, jo ịkummwambilila uju ālindumịle une. 21 Lelo bo ajobịle sịsịsị, po papo Jesụ alinkulalamụka fị̄jo mụīmbepo syake, alinkusịsịmikisya alinkuti: Ngubabūla isya nalolị nguti: Jumo mmyinụ ịkūmbīkaga mmaboko ga balugu. 22 Po papo abafụ̄ndịgwa bāke balinkukētana, balinkwalāngana balinkuti: Kali ịkummbala jwanị. 23 Lelo ālipo jumo mbafụ̄ndịgwa bāke uju Jesụ ālinnganịle, jo ātūgēle apalamēne na Jesụ. 24 Po papo Sịmonị Petelị alinkunitịnila alinkuti: Ulālūsye, jwanị uju ịkummbala. 25 Umwene umfụ̄ndịgwa jula alinkusegelela fị̄jo kwa Jesụ, alinkunndālūsya alinkuti: Malafyale jo aliku? 26 Po papo Jesụ alinkwamụla alinkuti: Jo uju nịkuja pakumpa akamēnya ka kisyesye bo njụbị̄ke mụmposị. Lelo bo ajụbị̄ke akamēnya, alinkukēga, alinkumpa Jụ̄ta, umwana gwa Sịmonị Ịsịkalyotị. 27 Lelo Jụ̄ta bo āmbilị̄le akamēnya kala, po papo Setano alinkwịngịla mmyake. Umwene Jesụ alinkummbūla alinkuti: Isị kulōnda ukubōmba, bōmbaga mbibimbibi. 28 Mụli bala bātugēle pamēsa akālipo najumo uju āsyagēnịe, ukuti nōngwa ja fị̄kị ammbūlaga bo bububo. 29 Papo Jụ̄ta jo uju akōlelaga īnyāmbi ja ndalama, bamo balinkwịnogona ukuti Jesụ ịkummbūla ukuti, ūlege ifị fịkulōndịgwa pakyaka, pamo ukuti abapege fịmo abalōndo. 30 Lelo bo āmbilị̄le akamēnye, po papo mbibimbibi ịtolo alinkusōka pānja. Kangi pāli po pakilo. 31 Lelo bo Jụ̄ta asōkịle pānja, po papo Jesụ alinkujoba alinkuti: Lilino po Nnyamūndu akabịle ubukulūmba, jope Kyala akabịle ubukulūmba mụ mmyake, 32 jope Kyala ịsakumpelaga nkulūmba nkāti mmyake; nakalīnga ịtolo ịsakumpelaga nkulūmba. 33 Mwe bānịke umwe, kasyele akabalilo kapị̄mba ịtolo ukuja nanụmwe; mwịsakūndōndaga, lolị bo mụmo nābabūlịle abalōngosị ba Bajụ̄ta nātịle; Kuno nịkubūka mụkabagila ukūngōnga. 34 Lilino ngubapa ululagilo ulupya; amụgananege. Bō mụmo une mbaganị̄le umwe, mo mụmo fịkuti nanụmwe bō mụgananege. 35 Linga mụkuganana, po umụ̄ndu gwesa ịsakumanyaga ukuti mụli bafụ̄ndịgwa bāngu. 36 Sịmonị Petelị alalūsịsye ātị̄le: Kutwāku, Malafyale? Jesụ ātị̄le: Kuno ngubūka ukabagila ukūngōnga, lolị kwịsakungongaga linga sịku. 37 Po papo Petelị alinkunndālūsya alinkuti: Malafyale fịkị ngabagila ukūkōnga lilino? Ubūmị bwangu ngukufwilaga ugwe. 38 Umwene Jesụ alinkummwamụla alinkuti: Nalolị ugwe ubagị̄le ukūfwila une? Ngukubūla isya nalolị ukuti, bo īngongobe jikāli ukubilikila akwịkanaga kumyangu katatu.

14

1 Po papo Jesụ alinkubabūla alinkuti: Mụngalalamụkạga mụndụmbụla syinụ; amụmmwịtikege ịtolo Kyala, nanịne mụnyị̄tikege. 2 Nnyụ̄mba ja Tāta bwịngị ubujo; linga bukālị̄mo angali mbabūlịle. Lilino nsụmwịke kukubatendekekesya ubujo umwe. 3 Lelo napa nikubūka kukubatendekekesya ubujo, ngwakwịsa kangi kukubēga umwe, nisakubūkaga nanụmwe kumyangu, ukuti kuno ndịko une ko nanụmwe mụkajege. 4 Kangi mụjimēnye injila iji jịkulabila kuno ngubūka. 5 Po papo Tomasị alinkunndālūsya alinkuti: Malafyale, tukakumanya nakuno kubūka, lelo po twāti tujimanyege bulebule injila? 6 Umwene Jesụ alinkummwamụla alinkuti: Jo une ne njila, ne bwanalōlị kangi ne būmị. Najumo akabagila ukubūka kwa Tāta, pēne papo linga ịkwendela mmyangu. 7 Linga mwalīmēnye une, po angali mụmmēnye jope na ju Tāta. Ukwanda lilino mụmmēnye kangi mụmmbwene. 8 Po papo Fịlịpụ alinkummbūla alinkuti: Malafyale, utunāngisyege Ugūso, bo sịtufwene. 9 Umwene Jesụ alinkummbūla alinkuti: Fịlịpụ, ngonịle nanụmwe akabalilo akatalị naulu ukāli ukāmanya une? Uju linga ambwene une, bo ammbwene na Tāta. Kujoba bulebule ilya kuti: Utunāngisyege Ugūso? 10 Syo utịkwị̄tika ugwe ukuti une ndịmo nkāti mwa Tāta, jope Tāta alịmo nkati mmyangu? Amasyu aga ngubabūla umwe, ndịkwagula nịmwene; lolị Tāta uju ali nkati mmyangu, jo ịkubōmba īmbōmbo syake. 11 Amụ̄nyịtikege apa ngubabūla une nguti ndi mwa Tāta, kangi jope na Tāta ali nkati mmyangu; linga mụtịkūnyị̄tika pali sịsịsị, po mụnyị̄tikilege panōngwa ja mbōmbo syene isị ngubōmba. 12 Ngubabūla isya nalolị nguti, uju linga ịkunyị̄tika une, īmbōmbo isị ngubōmba une, ịsakubōmbaga sịsyo jope; ena, ịsakubōmbaga ningulūmba ukusịkīnda isị, papo ngubūka kwa Tāta. 13 Fyosa ifị linga mụkusūmila mụngamụ jangu, fyo ānikubōmbaga, ukuti Tāta akabilege ubukulūmba mụ Mmwana. 14 Fyosa ifị linga mụkusūmila mụngamụ jangu, fyo nisakubabōmbelaga. 15 Linga mụnganị̄le, po mwịsakusịkolaga īndagilo syangu. 16 Une nisakunsūmaga Tāta, jo ịsakubapaga Unjīlị ujūngi uju ịsakujaga nanụmwe bwịla. 17 Nịkummbala ju Mbepo gwa nalolị, uju ikị̄su kikabagila ukummwambilila, papo kitịkummbona, kangi kitịkummanya. Lolị umwe mụmmēnye, namanga ịkwịtūgasya nanụmwe, kangi ịsakujaga nkati mmyinụ. 18 Ndị̄sakubaleka umwe bapīna, nịsakwịsa kumyinụ kangi. 19 Pasyele panāndi po ikị̄su kitịkūmbonaga kangi, lolị mụkūmbonaga, papo une ndi mūmị, nanụmwe po mụkujaga būmị. 20 Pị̄sịku lilyo, mwịsakumanyaga ukuti une ndi nkāti mwa Tāta, nanụmwe mụli nkati mmyangu, nanịne ndi nkāti mmyinụ. 21 Uju linga alinasyo īndagilo syangu, kangi ịkusịkōnga, jo uju ānganịle une; lelo uju ānganịle une, jo ịsakuganịgwaga na Tāta, nanịne nịsakunnganaga, kangi nịsakwịbonesyaga kumyake. 22 Po papo Jụ̄ta (jomma Ịsịkalyotị) alinkunndālūsya alinkuti: Malafyale, sịli bo bulebule apa kuti kwibonesyaga ku kumyitu, lolị kukị̄su komma? 23 Po papo Jesụ alinkwamụla alinkuti: Uju linga ānganịle une, jo ịkulikolaga ilịsyu lyangu, jope na Tāta ịkunnganaga, jo tụkwịsaga kumyake nukutūgala nagwe, ubujo bwake tụkubupelaga ukuja po pabujo bwitu. 24 Uju linga akāngana une, jo atịkugakola amasyu gangu; ilịsyu ili mụkulipilika likaja lyangu, lolị lya Tāta uju ālindumịle. 25 Sịsịsị syo mbabūlịle umwe bo ngali ndi nanụmwe. 26 Lolị umwene Untūlị, Mbepo Mwịkemo, uju Tāta ịsakuntumaga mụngamụ jangu, jo ịsakubamanyịsyaga syosa, nukubakūmbusya syosa isị mmbabūlịle. 27 Ngubalekela ulutēngāno, ngubapa ulutēngāno lwangu; ndịkubapa bo mụmo ikị̄su kịkubapēla. Mụngalalamụkaga mụndụmbụla syinụ, kangi mụnganyololokaga. 28 Mwapilị̄ke apa nābabūlaga ukuti, ngubūkaga kangi ngwakwịsaga kumyinụ. Linga mwalịnganịle, po angali mụsekị̄le apa nịkubuka kwatata, namanga Tāta āngīndịle ubukulūmba une. 29 Lilino mbabūlị̄le ngānịla bo sịkāli, ukuti bo sịkuboneka mwịsemwị̄tikege. 30 Ndịsakōngelapo ukujoba nyịngị nanụmwe, namanga unndagilị gwa kị̄su ịkwịsa. Umwene lolị akaja namaka kumyangu; 31 lolị ikị̄su kimanyege ukuti une nunnganịle Tāta, fyobene ngubōmba syosa bo mụmo ālindagị̄le Tāta. Amụsụmụke, tusōkēngepo apa.

15

1 Une ne mpịkị gwa māfị̄lu nalolị, umwene Tāta ndimị. 2 Kōsa akasāmba aka kali mmyangu, aka katịkupa īseke, ko ịkukasōsyamo; kangi akasāmba kōsa aka kịkupa īseke, ko ikukapātilila ukuti kōngelēngepo ukupa īseke. 3 Umwe mụpạ̄tilitị̄gwe ngānịla niịsyu ili mbabūlịle. 4 Amụjege mụ nkāti mmyangu, bo papo nanịne ndi nkāti mmyinụ. Bo apa akasāmba kakabagila ukupa īseke kēne ịtolo linga katịkuja mụmpịkị gwa māfị̄lu, bo mụkujaga nanụmwe linga mụtịkuja nkāti mmyangu. 5 Une ne mpịkị gwa māfị̄lu, umwe mụli tusāmba. Uju linga ịkuja nkati mmyangu, nanịne nikujaga nkati mmyake, jo ịkupaga īseke sị nyịngị; namanga kisịtakuja nanịne mụkabagila ukubōmba sịmo. 6 Umụ̄ndu gwesa uju linga atịkuja nkāti mmyangu, jo ịkutāgịgwaga pānja kifwene bo akasāmba, ịkūmaga ịtolo. Utusāmba utūmụ bịkutubūngānịa nukututāga mmōto, tụkupya ịtolo. 7 Linga umwe mụkuja mụ mmyangu, gōpe na masyu gangu gịkuja nkati mmyinụ, fyosa ifị linga mụkulōnda mụsūmege mụkupēlịgwaga. 8 Tāta ịkukaba ubukulūmba apa linga umwe mụkupa īseke sị nyịngị, nukwịpela ukuja bafụ̄ndịgwa bāngu. 9 Bo apa Tāta ālinganile une, mo mụmo nanịne mbaganị̄le umwe; amụjege mụ nndugano lwangu. 10 Linga mụkusịkola īndagilo syangu, po mwịsakujaga mụ ndugano lwangu; bo apa nanịne nsịkolịle īndagilo sya Tāta, kangi ndi ndugano lwake. 11 Sịsịsị syo mbabūlịle ukuti ulusekelo lwangu lujege nkati mmyinụ, nukuti ulusekelo lwinụ lujege lupelelesye ịtolo. 12 Ululagilo lwangu lo ulu: Amụgananege bo papo nanịne mmbaganịle umwe. 13 Akajako najumo ugwa lugano ulu lulukīndịle ulwa mụ̄ndu, uju ịkubutāga ubūmị, bwake panōngwa ja bamanyānị bāke. 14 Umwe mụli bamanyānị bāngu, linga mụkubōmba sịsyo ngubalagila. 15 Lilino ndịkubajobaga kangi ija babōmbị, papo ummbōmbị akasịmanya isị umalafyale gwake ịkubōmba; lolị umwe ngubajoba ukuja bakamụ bāngu, namanga syosa isị mbilị̄ke kwa Tāta syo mbabūlịle umwe. 16 Mụngātigi jo umwe mụ̄salịle une, himma, lolị jo une ne mbasalịle umwe, kangi mbasalịle ukuti mụbūkege mụkapege īseke, īseke isị sịkujako bwịla; ko kuti fyosa ifị linga mụkusūmila mụngamụ jangu kwa Tāta, abapege. 17 Sịsịsị syo ngubalagila umwe nguti: Amụgananege. 18 Linga ikị̄su kibabēngịle, po mụmanyege ukuti kyalimbēngịle une, bo kikāli nukubabēnga umwe. 19 Linga umwe mwali ba nkị̄su mụno ikị̄su angali kibaganịle umwe, mwe bāke. Lolị papo umwe mụkaja ba nkị̄su mụno, fyobēne ikị̄su kibabēngịle. 20 Amụlikumbukege ilịsyu ili nābabūlịle ukuti, untumwa akankīnda ubukulūmba umalafyale gwake. Linga bāfụ̄ndịle une, bịsakubafụ̄ndaga nanụmwe. 21 Lolị syosa sịsịsị bịsakubabōmbelaga umwe panōngwa ja ngamụ jangu, papo bakammanya uju ālindumịle une. 22 Linga ngāliị̄sịle kukubabūla, angali bakaja nubutulanōngwa, lolị lilino bakaja nasyo nasịmo isya kwịnokesya pabutulanōngwa bwabo. 23 Uju linga āmbēngịle une, jo ammbēngịle na ju Tāta. 24 Linga ngāsịbōmbịlemo mmyabo īmbōmbo isị najumo ujūngi akāsịbōmbịlemo, po angali bakaja nubutulanōngwa; lolị lilino basịbwene, isị nsịbōmbịle kangi batubēngịle une na Tāta. 25 Ukuti mo lị̄silege ilịsyu ili lisimbigwe ndulagilo lwabo, ili lịkuti: Bāmbēngịle ịtolo ne nsịtanōngwa. 26 Lolị linga ịsịle untūlị, uju nịsakubatumilaga ịkufụma kwa Tāta, ju Mbepo gwa nalolị umfụma kwa Tāta, jo ịsakūsịsịmikisyaga une. 27 Kangi nanụmwe mụkūsịsịmikisya, namanga mwali nanịne ukufụ̄ma mụ mmbwandilo.

16

1 Syo mbabūlịle sịsịsị ukuti mụngịsakululekaga ulwịtiko lwinụ. 2 Bịsakubasōsyaga nkipānga kyabo. Kangi kịkwịsaga akabalilo apa gwesa uju ịkubagoga umwe, ịsakwịnogonaga ukuti ịkummbōmbela akabōmbo Kyala. 3 Syo bịsakubabōmbelaga sịsịsị, papo bakammanya Tāta, nanịne bakamanya. 4 Mbabūlịle sịsịsị ukuti bo kị̄sịle akabalilo kala, mwịsemụkūmbukege ukuti nābabūlịle une. Lolị pabwandilo ngābabūlịle sịsịsị, papo nāli nanụmwe. 5 Lilino ngubūka kuli uju ālindumịle; kangi najumo mmyinụ uju ịkūndālūsya ukuti: Kubūka kūgu? 6 Lolị papo mbabūlịle sịsịsị, po papo īndụmbụla syinụ sị̄swile ubusụlụmanịe. 7 Lolị nikubabūla isya nalolị une nịkuti: Sịkujaga nụnụ kumyinụ linga une ngubūka; namanga linga ndịkubūka, Untūlị atịsakwịsa kumyinụ, lolị linga ngubūka, nịsakuntumaga kumyinụ. 8 Lelo umwene bo ịsịle, ịsakubatobesyaga abāndu ba nkị̄su ukuti basobịle panōngwa ja mbị̄bị, ubugolofụ nubulōngị bwa Kyala. 9 Basobịle panōngwa ja mbị̄bị papo bakānyịtika une; 10 ịsakubatobesyaga panōngwa ja bugolofụ papo nsụmwịke kwa Tāta, kangi mụtịsakūmbonamo; 11 panōngwa ja bulōngị, ịsakubatobesyaga papo unndagilị gwa kị̄su kikīki alōngị̄gwe. 12 Ngali ndi nasyo nyịngị isya kubabūla umwe, lolị mụkabagila ukusịkola lilino. 13 Lolị bo ịsịle jūjo, ju Mbepo gwa nalolị, jo ịsakubalōngosyaga mbwanalōlị bōsa; buno atịsakujobaga isyake mwene, lolị syosa isị ịkusịpilika, syo ịsakusịjobaga; kangi ịsakubafụmụkisyaga isị sịkwịsaga. 14 Umwene ịsakūmbaga ubukulūmba une, namanga ịsakubafụmụkisyaga isị ịsakwegaga ukufụma kumyangu. 15 Fyosa ifị ali nafyo Tāta, fyangu une; po apa njobịle ndị̄le Mbepo Mwịkemo ujo, ịsakubabūlaga isị ịsakwegaga ukufụma kumyangu. 16 Pasyele panāndi po mụtịkūmbonaga, kangi pasyele panāndi po mụkūmbonaga. 17 Po papo abafụ̄ndịgwa bāke bamo balinkulālūsanịa balinkuti: Ko kuti fịkị apa ịkutubūla ịkuti pasyele panāndi mụtịkūmbonaga, kangi pasyele panāndi po mụkūmbonaga? Kangi napa ịkuti nsụmwịke kwa Tāta. 18 Abēne balinkulālūsanịa balinkuti: Ko kuti fịkị apa ịkujoba ịkuti, pasyele panāndi? Tukasyaganịa uswe isị ịkujoba. 19 Umwene Jesụ alinkusịmanya isị bālōndaga ukunndālūsya, po papo alinkubabūla alinkuti: Syo mụkulālūsanịa apa njobịle ukuti pasyele panāndi mụtịkūmbonaga, kangi pasyele panāndi po mụkūmbonaga? 20 Ngubabūla isya nalolị une nguti, umwe mwịsakulilaga, kangi mwịsakukụ̄taga, ikyene lolị ikị̄su kyo kịsakusekelaga; umwe mwịsakusụlụmanịaga, lolị ubusụlụmanịe bwinụ bwịsakwịpelaga ukuja lusekelo. 21 Apa linga unkị̄kulu ali pakupapa umwana, po ịkuja nubusụlụmanị̄e, papo akabalilo kāke kafịkịle; lolị linga umwana apāpị̄gwe, po ātikukumbuka ubutolwe ubu ātamịgwaga panōngwa ja lusekelo lwa kuti, umụ̄ndu apāpị̄gwe nkị̄su. 22 Nanụmwe mụli nubusụlụmanị̄e, lolị nịsakubabonaga kangi po īndụmbụla syinụ sịsakusekelaga, kangi ulusekelo lwinụ najumo atịsakulusōsyangako kumyinụ. 23 Pị̄sịku lilyo po mụtịsakusūmaga kumyangu nafịmo. Ngubabūla isya nalolị une nguti, fyosa ifị linga mụkusūma kwa Tāta, ịsakubapēlaga mụngamụ jangu. 24 Ukwịsakufịka kulilino kuno, mụkasūmilamo nafịmo mụngamụ jangu; amụsūmege po mụkwambililaga, ukuti ulusekelo lwinụ lwịpelege lupelelesye. 25 Sịsịsị syo mbabūlị̄le mbupīngamụ, kịkwịsaga akabalilo apa ndịsakujobelaga nanụmwe kangi mbupīngamụ, lolị nịsakusịjobelaga pabwelụ ịtolo īnōngwa sya Tāta. 26 Pịsịku lilyo mwịsakusūmilaga mụngamụ jangu, lolị ndịkubabūla une ukuti nịsakubasūmilaga kwa Tāta. 27 Namanga umwene Tāta abaganịle umwe, papo umwe mụnganịle une, kangi mwịtị̄ke ukuti une mfụmịle kwa Kyala. 28 Une nāfụmịle kwa Tāta, nịsịle nkị̄su mụno, kangi ngukileka ikị̄su, ngubūka kwa Tāta. 29 Po papo abafụ̄ndịgwa bāke balinkuti: Keta, lilino po kujoba ịtolo pabwelụ, utịkujobela mbupīngamụ. 30 Lilino po tusyagēnịe ukuti, ugwe usịmēnye syosa, kangi utịkulōnda ukuti jumo akulālūsyege sịmo; mụli sịsịsị tụkwịtika ukuti ufụmịle kwa Kyala. 31 Po papo Jesụ alinkubāmụla alinkuti: Mụkwịtika lilino? 32 Kēta kịkwịsaga akabalilo, ena nalilino kị̄sịle, apa umwe mwesa mwịsakubalanịlaga uju kumyake uju kumyake, nukundeka nịmwene. Ngīmba lolị ngaja nịmwene, namanga ndi na Tāta, ali nanịne. 33 Sịsịsị syo mbabūlịle ukuti mụjege nulutēngāno nkāti mmyangu., Nkị̄su mụno mụkukubilwaga; lolị amụkịbēge ịtolo, une nkitolịle ikị̄su.

17

1 Jesụ bo ajobịle sịsịsị, po papo alinkwiụnula amāso gāke, alinkukēta kumwanya alinkuti: Gwe Tāta akabalilo kafịkịle; mpepo ubukulūmba Umwanāko, ukuti jope Umwanāko akupege ubukulūmba. 2 Namanga gwalimpēle Umwanāko amaka pamwanya pabāndu bōsa, ukuti abapege ubūmị bwa bwịla bōsa aba umpēle. 3 Ubūmị bwa bwịla bo ubu, apa linga bakumēnye ugwe ukuja gwe Kyala gwa nalolị gwịmwene, batịle nukummanya Jesụ Kilisịtị uju untumịle. 4 Une ngupēle ubukulūmba nkị̄su mụno, īmbōmbo iji gwalimbēle ukuti njibōmbe, jo mbōmbịle njimalịle. 5 Lilino gwe Tāta, ūmbēge ubukulūmba kumyako kukuko, ubukulūmba ubu nāli nabo kumyako bo ikị̄su kikāli ukupelịgwa. 6 Mbakị̄ngulị̄le īngamụ jako abāndu bōsa, aba gwalimbēle ukufụma nkị̄su mụno; bāli bāko lelo gwalimbēle une ukuti bajege bāngu; abēne balịkolịle ilịsyu lyako. 7 Lilino bāmēnye ukuti fyosa ifị gūmbēle fịfumịle kumyako. 8 Namanga amasyu aga gwalimbēle une, go mbapēle abēne, bagāmbilịle, bāmēnye nalolị ukuti une mfụmịle kumyako; kangi bị̄tị̄ke nalolị ukuti gwalindumịle jujugwe. 9 Une bo aba ngubị̄pụ̄tila, ndịkukị̄pụ̄tila ikị̄su, lolị bābo ūmbēle ugwe, buno bako jujugwe. 10 Buno fyosa ifị ndi nafyo fyako jujugwe, kangi fyope ifyako fyangu jujune; lelo une ngabịle ubukulūmba mụ mmyabo aba gwalimbēle. 11 Une lilino ngwịsa kumyako; ngajamo nkị̄su mụno kangi, lolị abēne balịmo nkị̄su mụno. Gwe Tāta gwe Mwịkemo, ubalindilege mụngamụ jako iji ūmbēle, ukuti bị̄pelege ukuja jumojwene, bo apa nanụswe tuli jumojwene. 12 Apa nāli nabo, ndinkubalindilila mụngamụ jako iji gwalimbēle, ndịkubūbātila, alinkusịta nukusobapo najumo, lolị mwene ju nnya lonāngiko, ukuti mo sị̄silege isị sịsị̄mbị̄gwe mwa kalata. 13 Lilino ngwịsa kumyako, ngusịjoba sịsịsị bo ngāli ndi nkị̄su, ukuti ulusekelo lwangu, lujege lupelelesye nkāti mmyabo. 14 Une mbapēle ilịsyu lyako, lolị ikị̄su kibabēngịle, papo bakaja ba nkị̄su, bo apa nanịne ngaja gwa nkị̄su. 15 Ndịkubasūmila ukuti ubasōsyemo nkị̄su, himma, lolị ngubasūmila ukuti ubūbātilege kumbị̄bị. 16 Abēne bakaja ba nkị̄su mụno, bo apa nanịne ngaja gwa nkị̄su mụno. 17 Ubapelege bị̄kemo mbwanalolị; ilịsyu lyako bo bu bwanalōlị. 18 Bo papo ūndumịle une nkị̄su, mo mụmo nanịne mbatumịle nkị̄su. 19 Une ngwịkemēsya panōngwa jabo, ukuti bope bị̄pelege bị̄kemo mbwanalolị. 20 Lelo ndịkubị̄pụ̄tila bēne bababa, lolị ngubị̄pụ̄tila bope naba bịsakunyịtikilaga mwịsyu lyabo, 21 ukuti bōsa bị̄pelege jumojwene, bo papo ugwe gwe Tāta uli nkāti mmyangu, nanịne nndi nkāti mmyako. Ngusūma ukuti bope bajege nkāti mmyitu, ko kuti ikị̄su kị̄tịkege ukuti jo ugwe ūndumịle. 22 Ubukulūmba ubu gwalimbēle une, bo mbapēle bābo, ukuti bope bị̄pelege ukuja jumojwene, bo apa nanụswe tuli jumojwene. 23 Une njege nkāti mmyabo, nanụngwe ujege nkāti mmyangu, ngusūma ukuti bajege bapelelesye ịtolo bị̄pelege ukuja jumojwene, ko kuti ikị̄su kimanyege ukuti ugwe ūndumịle une, nukuti ubaganịle bo papo ūnganịle une. 24 Gwe Tāta, bōsa aba ūmbēle une, nịganịle ukuti kuno ndịko ko bajege bope, ukuti babukētege ubukulūmba bwangu ubu ūmbēle une, namanga gwalinganịle bo kikāli nukupelịgwa ikị̄su. 25 Gwe Tāta gwe nngolofụ, ikị̄su kikākumēnye, lolị une nākumēnye, bope na bababa bāmēnye ukuti ugwe ūndumịle une. 26 Une mbafụmụkị̄sye īngamụ jako, kangi nịsakujifụmụsyaga, ukuti ulugano ulu ūnganịle une lujege nkāti mmyabo, nanịne njege nkāti mmyabo.

18

1 Lelo Jesụ bo ajobịle sịsịsị, po papo alinkusōka nabafụ̄ndịgwa bāke alinkubūka ịsīlya lila lya kīsi ka Ketịlonị, ko gwalịko unngūnda; mo alinkwakwịngila jūjo na bafụ̄ndịgwa bāke. 2 Lolị Jụ̄ta uju ammbīkaga mmaboko ga balugu ābumēnye ubujo ubu, namanga kabili kabili mo mụmo Jesụ ābūngānaga na bafụ̄ndịgwa bāke. 3 Umwene Jụ̄ta ākyegịle ikilūndilo kya basịkali na balindililị ba bapụ̄tị abakulūmba na Bafalịsaị balinkubūka kūko, bo bali ninyāle, ningōka, nifịlwilo. 4 Umwene Jesụ bo asịmēnye isị syajaga pakummwịsila, po papo alinkubūka alinkubalālūsya alinkuti: Mụkūnndōnda jwanị? 5 Abēne balinkummwamụla balinkuti: Jesụ gwa mụ Nasaletị. Umwene Jesụ alinkubabūla alinkuti: Jo une. Jope Jụ̄ta uju ammbīkaga mmaboko ga balugu ālyimịle pamopēne nabo. 6 Lelo Jesụ bo ababūlịle ukuti: Jo une, po papo balinkubụjila kyanyụmanyụma, balinkugwa pāsi. 7 Umwene Jesụ alinkubalālūsya kangi alinkuti: Mụkūnndōnda jwanị? Balinkummwamụla balinkuti: Jesụ ugwa mụ Nasaletị. 8 Po papo Jesụ alinkwamụla alinkuti: Mbabūlịle ukuti jo une. Lelo linga mụkūndōnda une, amụbalekege aba babūkege. 9 Ājobaga bo bububo ukuti mo lị̄silege ilịsyu ilị ajobịle ukuti: Mụli aba gwalimbēle, akasobapo najumo. 10 Umwene Sịmonị Petelị āli nulūbo jo alinkulukwaba, alinkunsēnga ummbōmbị gwa mpụ̄tị unkulūmba, alinkummwangula īmbulukutu jake ija kukị̄līlo. Ummbōmbị jujuju āli jo Malịko īngamụ. 11 Po papo Jesụ alinkummbūla Petelị alinkuti: Fyika ulūbo ulo mụnyāmabi jake; ikikōmbe iki āmbēle Tāta, kyo nạ̄ti ndeke ukukinwa? 12 Po papo ikilūndilo kya basịkali, nunndōngosị, na balindililị ba Bajụ̄ta balinkunkola Jesụ balinkumpịnya; 13 abēne balinkutala ukuntwala kwa Hanasị, namanga āli jo nko gwa Kajafa uju āli jo mpụ̄tị unkulūmba ikyinja kikyo. 14 Āli jo Kajafa julajula uju ābabūlaga Abajụ̄ta ukuti: Kwali kunụnụ ukuti umụ̄ndu jumo abafwilege abāndu. 15 Umwene Sịmonị Petelị numfụ̄ndịgwa ujūngi balinkunkōnga Jesụ. Lolị umfụ̄ndịgwa jula, uju umpụ̄tị unkulūmba ālimmēnye, jo alinkwịngila na Jesụ ndupaso lwa mpụ̄tị unkulūmba. 16 Lolị Petelị alinkwima pānja pakifịgo. Po papo umfụ̄ndịgwa ujūngi uju umpụ̄tị unkulūmba ālimmēnye, alinkusōka, alinkwakujoba nunndindililakifịgo alinkunndālūsya Petelị. 17 Po papo unndīndwana unndindililakifịgo alinkunndālūsya Petelị alinkuti: Kali nanụngwe ukaja gwe jumo mbafụ̄ndịgwa ba mụ̄ndu uju? Umwene Petelị alinkuti: Ngaja jo une. 18 Ababōmbị na balindililị balyimịle pāpo, bākosịsye umōto gwa mababu, namanga jalịko īmbepo, bōtaga umōto; jope Petelị ālyimịle nabo, ōtaga umōto. 19 Po papo umpụ̄tị unkulūmba alinkunndālūsya Jesụ isya bafụ̄ndịgwa bāke, nisya lumanyịsyo lwake. 20 Umwene Jesụ alinkummwamụla alinkuti: Une njobịle kukị̄su pabwelụ ịtolo; bwịla nāmanyịsyaga nnyụ̄mba sya kwịpụ̄tilamo na nnyụ̄mba īnyị̄kemo ja NTWA, mụno Abajụ̄ta bōsa bịkubūngāna ngajobamo nasịmo kubutị̄tu. 21 Po kūndālūsya fịkị une? Ubalālūsyege aba bāsịpilikaga sịsyo nābabūlaga, namanga basịmēnye isị nāsịjobịle. 22 Lelo bo ajobịle gagago, po papo unndindililị jumo uju ālyimịle papo, alinkunkoma niịpi Jesụ, alinkummbūla alinkuti: Bo kummwamụla umpụ̄tị unkulūmba bunobuno? 23 Umwene Jesụ alinkummwamụla alinkuti: Linga njobịle kabị̄bị, po ulibusịsịmikisyaga ububị̄bị bwangu; lolị linga njobịle kanụnụ, po kungoma fịkị? 24 Po papo Hanasị alinkumpịnya Jesụ, alinkuntuma kumpụ̄tị unkulūmba Kajafa. 25 Petelị akāli ālyịmịle palapala bo ịkōta umōto. Po papo balinkunndālūsya bālinkutị: Bule nụngwe ukaja gwe jumo mbafụ̄ndịgwa ba mụ̄ndu jula? Petelị ākānịle atịle: Ha, mma! 26 Ummbōmbị jumo gwa mpụ̄tị unkulūmba, unkamụ gwa mụ̄ndu uju Petelị alinsēngile īmbulukutu alalūsịsye atịle: Ngākubwēne ugwe bo uli nagwe mụnngūnda? 27 Kangị Petelị ākānịle; po papo nakalīnga ịtolo īngongobe jilinkukōlela. 28 Po papo balinkusōka nagwe Jesụ ukufụma kwa Kajafa, balinkubūka nagwe nnyụ̄mba ja ndindilila kị̄su; kwali ko kubukye. Lolị abēne balinkusịta nukwịngila nnyụ̄mba ja ndindililakị̄su, ukuti bāngịnyasyaga, lolị ukuti balyege Pasa. 29 Po papo Pịlāti alinkubasōkela pānja, alinkubalālūsya alinkuti: Mụkunndōnga sya fịkị umụ̄ndu jujuju? 30 Abēne balinkummwamụla balinkuti: Linga umụ̄ndu jujuju akāli mbōmbambị̄bị, po angali tukantwala kumyako. 31 Umwene Pịlāti alinkubāmụla alinkuti: Amụmmwegege jujumwe, mụkanndōngege ukukōngana nululagilo lwinụ. Abēne Abajụ̄ta balinkummbūla balinkuti: Uswe tutịkwịtikisịgwa ukunngoga jumo umụ̄ndu. 32 Isị syali syo sya kuti mo lị̄silege ilịsyu ili ālijobịle Jesụ, ukunāngisya ubufwe ubu ājaga pakufwa. 33 Po papo Pịlāti alinkwịngila kangi nnyụ̄mba ja ndindililakị̄su, alinkummbilikila Jesụ, alinkunndālūsya alinkuti: Bạ̄ti ugwe uli Malafyale gwa Bajụ̄ta? 34 Umwene Jesụ alinkummwamụla alinkuti: Isị kujoba masyu gāko jujugwe, pamo bāngi ịtolo bakubūlịle isyangu? 35 Po papo Pịlāti alinkummwamụla alinkuti: Ndi Njụ̄ta une? Abā kikolo kyako, na bapụ̄tị abakulūmba, bo aba bakutwele kumyangu, utulịle fịkị? 36 Umwene Jesụ alinkummwamụla alinkuti Ubutwa bwangu bukaja bwa nkị̄su iki. Linga ubutwa bwangu bwali bwa nkị̄su iki, angali ababōmbị bāngu bịkūndwila, ukuti nangabīkịgwaga mmaboko ga Bajụ̄ta. Lolị lilino ubutwa bwangu bukaja bwa mụnomụno. 37 Po papo Pịlāti alinkunndālūsya alinkuti: Ngīmba uli Malafyale? Umwene Jesụ alinkummwamụla alinkuti: Bo lilyo kujoba; une ndi Malafyale. Namanga syo sịsyo mbāpilị̄gwe, kangi syo sịsyo nịsị̄le nkị̄su, ukuti mbusịsịmikisyege ubwanalolị kubāndu. Umụ̄ndu gwesa uju ali pabwanalolị, jo ịkupilika ilịsyu lyangu. 38 Umwene Pịlāti alinkulālūsya alinkuti: Ubwanalolị fyo fịkị? Lelo bo ajobịle sịsịsị, po papo alinkusōka kangi alinkubabūkila abajụ̄ta, alinkubabūla alinkuti: Une ndịkujagamo īnōngwa najimo mmyake. 39 Lolị umwe, mụli nulwịho ulwa kuti mbābulilege umụ̄ndu jumo pa Pasa. Bule lelo mụkulōnda ukuti mbābulilege Umalafyale gwa Bajụ̄ta? 40 Abēne lolị balinkujwega kangi balinkuti: Jomma jujuju, lolị Balaba. Umwene Balaba lyali ịnyāmbụta.

19

1 Po papo Pịlāti alinkummwega Jesụ, alinkunkoma nifịkotị. 2 Abēne abasịkali balinkuluka īngiga ja mị̄fwa, balinkummbīka pantu, balinkumfwika unselekesye umfụbīfụ ubutị̄tu (umwịlāngalị). 3 Balinkwịsa nkyenị mmyake balinkuti: Tukukuponịa gwe Malafyale gwa Bajụ̄ta! Kangi balinkunkoma namapị. 4 Pịlāti alinkusōka pānja kangi, alinkubabūla alinkuti: Kēta, nguntwala kumyinụ, ko kuti mụmanyege ukuti ndịkujagamo īnōngwa najimo mmyake. 5 Po papo Jesụ alinkusōka pānja, bo afwele īngiga ja mị̄fwa nunselekesye umfụbīfụ ubutị̄tu (umwịlāngalị). Umwene Pịlāti alinkubabūla alinkuti: Amụnkēte umụ̄ndu uju. 6 Lelo bo abapụ̄tị abakulūmba na balindililị bammbwene, po papo balinkujwega balinkuti: Nkomele pakikohekano, nkomele pakikohekano. Umwene Pịlāti alinkubāmụla alinkuti: Mụmmwege jujumwe mụkankomele pakikohekano; buno une ndịkujagamo īnōngwa najimo mmyake. 7 Abēne Abajụ̄ta balinkwamụla balinkuti: Uswe tuli nululagilo, ndulagilo lulūlu kummbagị̄le ukufwa, papo ịpelịle mwene ukuja mwana gwa Kyala. 8 Lelo bo Pịlāti apilị̄ke ilịsyu lilīli, alinkukindilila ukutetema. 9 Alinkwịngila kangi nnyụ̄mba ja ndindililakị̄su, alinkunndālūsya Jesụ alinkuti: Ufụmịle kūgu? Lolị Jesụ alinkusịta nukummwamụla nalịmo. 10 Po papo Pịlāti alinkummbūla alinkuti: Utịkujoba nanịne? Ukamanya ukuti ndi namaka aga kukwabula ugwe, kangi ndi namaka aga kukukomela pakikohekano? 11 Umwene Jesụ alinkummwamụla alinkuti: Angali ukaja namaka pamyangu, linga ukāpēgị̄gwe ukufụma kumwanya; panōngwa iji, uju ambīkịle mmaboko gāko jo ali ninōngwa īngulūmba ukukīndapo. 12 Ukufụma papo Pịlāti alinkulōnda ukummwabula, lolị Abajụ̄ta balinkujwega balinkuti: Linga kummwabula umụ̄ndu jujuju, bo ukaja mmanyānị gwa Kesalị; umụ̄ndu gwesa uju ịkwịpela mwene ukuja Malafyale, bo akīndēne na Kesalị. 13 Lelo Pịlati bo agapilị̄ke amasyu gagaga, po papo alinkusōka nagwe Jesụ panja, alinkutūgasya pakikota kya bulōngelo, pabujo ubu bạ̄tigi lwalo lwa mabwe, apa Nkihịbuli bịkuti Gabata. 14 Apēne pali po pị̄sịku lya kutendekesya Pasa, pakabalilo ka Ntandatu (ko kuti bo lili pantu), alinkubabūla Abajụ̄ta alinkuti: Kēta Umalafyale gwinụ! 15 Abēne lolị balinkujwega balinkuti: Nsōsyepo, nsōsyepo, nkomele pakikohekano. Umwene Pịlati alinkubalālūsya alinkuti. Nunkomele pakikohekano Umalafyale gwinụ? Abēne abapụ̄tị abakulūmba balinkwamụla balinkuti: Tukaja nagwe Umalafyale ujūngi, lolị mwene ju Kesalị. 16 Po papo alinkummbīka mmaboko gābo, ukuti akomelịgwege pakikohekano. Po papo abēne balinkummwega Jesụ. 17 Alinkusōka bo apīmbịle ikikohekano kyake, alinkubūka pabujo ubu bịkuti po palupaja, uju Nkihịbuli bịkuti Golịgota. 18 Po balinkwakunkomela pakikohekano; kangi balinkukomelịgwa lumo nagwe abāngi babili, jumo kuno jumo kuno, umwene Jesụ alinkuja pakāti. 19 Umwene Pịlati alinkusị̄mba ubusị̄mbe, alinkubīka pamwanya pakikohekano; ubu bwasị̄mbị̄gwe bwatịle: Jesụ gwa mụ Nasaletị, Umalafyale gwa Bajụ̄ta. 20 Ubusị̄mbe bububu Abajụ̄ta bị̄ngị balinkububala, namanga ubujo ubu Jesụ ākomelị̄gwepo pakikohekano, bwali pabupị̄pị nakāja. Kangi bwasị̄mbị̄gwe Nkihịbuli, Nkiloma, na Nkigịlịkị. 21 Abēne abapụ̄tị abakulūmba ba Bajụ̄ta, balinkummbūla Pịlati balinkuti: Ungasị̄mbaga ilya kuti: Umalafyale gwa Bajụ̄ta, lolị utigi: Ātigi une ndi Malafyale gwa Bajụ̄ta. 22 Umwene Pịlati alinkwamụla alinkuti: Isị nsị̄mbịle syo nsị̄mbịle po papo. 23 Abēne abasịkali bo bankomị̄le Jesụ pakikohekano, po balinkwega imyenda gyake balinkugijabanịa pana, kukuti nsịkali alinkuja nikijabo kyake, gōpe nunselekesye gwake balinkwega. Ugwene unselekesye ugu gukāli nubusone nabumo, gwali nnduke gōsa ịtolo ukufụma ku kuntu. 24 Po papo balinkujobana balinkuti: Go tunganyafụlanịaga, lolị tubīkege ubulagusị, ukuti gụkujaga gwanị; ko kuti sị̄silege isị sịsị̄mbị̄gwe mwa kalata ukuti; Bajabēne imyenda gyangu, unselekesye gwangu babīkịle ubulagusị. Bo balinkubōmba bunobuno abasịkali. 25 Pabupị̄pị nikikohekano kya Jesụ, po bālyimịle unna, nugwamyabo gwa nna, na Malịja nka Kilyopa, na Malịja gwa mụ Magatala. 26 Umwene Jesụ bo ambwene unna, numfụ̄ndịgwa uju ālinnganịle īmịle pabupị̄pị, po papo alinkummbūla unna alinkuti: Gwe nkị̄kulu kēta umwanāko! 27 Kangi alinkujoba nagwe umfụ̄ndịgwa gwake, alinkuti: Kēta unyoko. Ukufụma pakabalilo kāko, umfụ̄ndịgwa alinkummwega, alinkubūka nagwe kumyake. 28 Pānyụma pali sịsịsị, bo Jesụ amēnye ukuti sịmalị̄ke syosa, ukuti mo sị̄silege isị sịsị̄mbị̄gwe mwa kalata, alinkuti: Nūmị̄lwe. 29 Lelo lwalịpo ulwangabya papo ulu lwalị̄swile āsịkị. Abēne balinkufyika kulutete akēnda aka bājụbị̄ke mwa āsịkị, balinkummbīka kukanwa. 30 Lelo bo Jesụ anwịle āsịkị, alinkujoba alinkuti: Sịmalị̄ke. Po papo alinkugoboka untu, alinkusịlīlika. 31 Papo lyali ịsịku lya kwịtēndekesya (lya pakihāno), Abajụ̄ta bakālōndaga ukuti imịfị̄mba gijege pafịkohekano pị̄sịku lya Sabāti, namanga ilị̄sịku lila lya Sabāti, lyali ịsịku ịkulūmba, po papo balinkusūma Pịlāti ukuti amalūndi gābo gakonyolịgwege, nukuti basōsịgwengepo pafịkohekano. 32 Po papo abasịkali balinkwịsa, balinkunkonyola amalūndi ga ntasị, nunnịne ujūngi uju ākomelị̄gwe nagwe. 33 Lelo bo bị̄sịle pa Jesụ, balinkwaga afwịle liịtāsị. Po lelo bakālinkonywịle amalūndi. 34 Lolị unsịkali jumo alinkunndasa ningwego palubafụ, nakalīnga ịtolo ilịlopa namīsi fịlinkusōka. 35 Umwene uju āsịbwene jo āsịsịmikị̄sye, ulwene ulusịsịmịkisyo lwake lo lwanalōlị; umwene amēnye ukuti ịkujoba isyanalōlị ko kuti nanụmwe mwịtikege. 36 Namanga sịsịsị syabonị̄ke ukuti mo sị̄silege isị sịsị̄mbị̄gwe mwa kalata ukuti: Nakimo ikifụpa kyake kitịsakukonyolịgwaga. 37 Kangi ubusị̄mbe ubūngị bụkuti: Bịsakunkētaga jūjo bālinndasịle. 38 Pānyụma pali sịsịsị, po Josefụ ugwa mụ Alimateja uju ali mfụ̄ndịgwa gwa Jesụ kubutị̄tu papo ābatị̄laga Abajụ̄ta, alinkunsūma Pịlati ukuti agusōsyepo ummbili gwa Jesụ. Umwene Pịlāti alinkummwịtikisya. Po papo alinkubūka, alinkwakugusōsyapo ummbili gwake. 39 Alinkwịsa jope Nịkotemụ, uju ulutasị ābūkịle kwa Jesụ pakilo, jo alinkutwala unkota ugu bịkuti jo mịla, ugu gwalyongēne nunkota ugu bịkuti jo aloị, gwali ikilo amalōngo matatu. 40 Po papo balinkugwega ummbili gwa Jesụ, balinkugunị̄embetēlela mmyenda, pamopēne nimị̄kota imịnụ̄nga, ukukōngana nulwịho lwa Bajụ̄ta ulwa kusyila. 41 Lelo pabujo ubu balinkomīlepo pakikohekano, gwalịpo unngūnda, mo lyalịmo ilịpūmba ilị̄pya ili najumo akābikị̄gwemo sịku. 42 Lolị papo lyali lyo ịsịku lya kwịtendekesya Abajụ̄ta panōngwa ja Sabāti, kangi papo ilịpūmba lyali pabupị̄pị, mo balinkummbīka Jesụ.

20

1 Lelo pị̄sịku lya kwanda lya nndūngu, Malịja ugwa mụ Magatala alinkulābila ukubūka kwịpūmba bo bukāli nukukya, alinkwakwaga ilị̄bwe lisegulị̄gwepo pị̄pūmba. 2 Po papo alinkubopa ukubūka kwa Sịmonị Petelị, na kumfụ̄ndịgwa ujūngi uju Jesụ ālinnganịle, alinkwakubabūla alinkuti: Bansōsịsyemo UNTWA mwịpūmba, lelo tukamanya nakuno bammbīkịle. 3 Po papo Petelị alinkusōka pamopēne numfụ̄ndịgwa ujūngi jula, balinkubūka kwịpūmba. 4 Balinkubopa bo babīli, lolị umfụ̄ndịgwa ujūngi jula alinkubopa alinkunndekēlela Petelị, alinkutala ukufịka kwịpūmba. 5 Bo ị̄nēme nukwịnāngila, alinkugibona imyenda, lolị akalị̄ngị̄le nkāti. 6 Po papo jope Sịmonị Petelị uju ankōngaga alinkufịka, alinkwịngila mwịpūmba; alinkugibona imyenda mụmo, 7 nikitambāla iki anịembị̄gwe kuntu Jesụ. Ikitambāla kila kikāli pamopēne nimyenda, lolị kyapị̄ndị̄gwe nukubīkịgwa pasịma ịtolo. 8 Po papo jope umfụ̄ndịgwa ujūngi, uju ātalịle ukufịka kwịpūmba alinkwịngila, alinkukēta, alinkwịtika. 9 Namanga bakāli bakāsyagēnịe isị sịsị̄mbị̄gwe mwa kalata ukuti: Fịkuti asyukege mbafwe. 10 Po papo abafụ̄ndịgwa bala balinkugomoka nukubūka kumyabo. 11 Umwene Malịja ālyimịle pānja pị̄pūmba ālilaga, Lelo bo akāli ịkulila, alinkwịnama alinkukēta mwịpūmba; 12 alinkubabona abāndumị babili aba bāfwele imyenda imyelụ, batūgēsye jumo kuntu jumo kumalūndi, apa gwalambalēle ummbili gwa Jesụ. 13 Abēne balinkunndālūsya balinkuti: Gwe nkị̄kulu, kulila fịkị? Umwene alinkuti: Papo bansōsị̄syepo UNTWA gwangu, kangi ngamanya nakuno bammbīkịle. 14 Lelo bo ajobịle sịsịsị, alinkusanukila kūnyụma, alinkummbona Jesụ īmịle, lolị alinkusịta nukummanya ukuti jo Jesụ. 15 Umwene alinkunndālūsya alinkuti: Gwe nkị̄kulu, kulila fịkị? Kunndōnda jwanị? Umwene papo ạ̄tigi jo nndindililanngūnda, alinkummbūla alinkuti: Malafyale, linga jo ugwe umpīmbịle, po ulīmbūlaga kuno ummbīkịle ukuti nummwege. 16 Umwene Jesụ alinkukolela alinkuti: Malịja! Umwene Malịja alinkusanụka, alinkujobela Nkihịbuli alinkuti: Labuni (ko kuti Mmanyịsị). 17 Po papo Jesụ alinkummbūla alinkuti: Ungambalamāsyaga, namanga ngāli ukufyuka kwa Tāta; lolị būkaga kubāmyitu ukababūlege ukātigi: Nsụmwịke kwa Tāta; Ugwịsēmwe; kwa Kyala gwangu, kangi Kyala gwinụ. 18 Po papo Malịja ugwa mụ Magatala alinkubūka, alinkwakubapangila abafụ̄ndịgwa alinkuti: Nummbwene UNTWA, nukuti āmbūlịle syosa sịsịsị. 19 Lelo namajolo, pị̄sịku lilyo ilya kwanda ilya nndūngu, bo īnyị̄gị sị̄galị̄gwe mụno bālimo abafụ̄ndịgwa, panōngwa ja kubatị̄la abalōngosị ba Bajụ̄ta. Po papo Jesụ alinkwịsa, alinkwima pakāti, alinkubabūla alinkuti: Ulutēngāno lujege nanụmwe. 20 Lelo bo ajobịle lilīli, alinkubanāngisya amaboko gāke, na palubafụ. Po papo abafụ̄ndịgwa balinkwenda nukusekela bo bambwene UNTWA. 21 Umwene Jesụ alinkwandisya kangi alinkuti: Ulutēngāno lujege nanụmwe! Bo mụmo Tāta ālindumị̄le une, nanịne mo mụmo ngubatuma umwe. 22 Lelo bo ajobịle lilīli, alinkubapụ̄tila umūjị alinkuti: Amwambililege Mbepo Mwịkemo. 23 Aba linga mụkubaswa īnōngwa, bo baswegịgwe; aba linga mụtịkubaswa bo bakaswegịgwa. 24 Lolị Tomasị, jumo mụli bala kalōngo na babili, uju bạ̄tigi jo Mbasa, akāli nabo apa Jesụ ịsaga. 25 Po papo abafụ̄ndịgwa abanịne balinkummbūla balinkuti: Tummbwene UNTWA; lolị umwene alinkubabūla alinkuti: Linga une ngagakēta amakoko ga mịsụmalị mmaboko gāke, linga ngabīkamo ulōbe mụno gyalịmo imịsụmalị, nukubīka ikiboko kyangu palubafụ lwake, ndịsakwịtikamo sịku. 26 Lelo bo gakīndịle amasịku lwele, po papo abafụ̄ndịgwa bāke balinkuja mụmo kangi, jope Tomasị alinkuja nabo. Alinkwịsa Jesụ bo īnyị̄gị sị̄galị̄gwe, alinkwima pakāti alinkuti: Ulutēngāno lujege nanụmwe 27 Po papo alinkummbūla Tomasị alinkuti: Twala ulōbe lwako kuno, ukēte amaboko gangu, twala nikiboko kyako ubīke palubafụ lwangu; ungajaga nsịtakwịtika, lolị gwịtikege ịtolo. 28 Umwene Tomasị alinkwamụla alinkuti: Gwe NTWA gwangu! Gwe Kyala gwangu! 29 Umwene Jesụ alinkummbūla alinkuti: Gwịtị̄ke papo umbwene une? Basangalufụ aba bị̄tị̄ke bo bakakēta. 30 Umwene Jesụ alinkupela ifị̄ka fị fị̄ngị nkyenị mbafụ̄ndịgwa bāke, ifị fịkasị̄mbịgwamo mwa kalata uju. 31 Lolị ifị fyo fịsị̄mbị̄gwe ukuti mwịtikege, ukuti Jesụ jo Kilisịtị Umwana gwa Kyala; kangi ukuti bo mwịtị̄ke, mụjege nubūmị mmaka ga ngamụ jake.

21

1 Pānyụma pali sịsịsị, po Jesụ alinkubasetukila kangi abafụ̄ndịgwa panyanja ja Tịbelịja; alinkubasetukila bunobuno. 2 Sịmonị Petelị, na Tomasị uju bạ̄tigi Mbasa, na Natanaelị ugwa mụ Kana nkị̄su kya Galịlaị, na banya Sebetaị, na bafụ̄ndịgwa bāke abāngi babili, bāli pamopēne. 3 Po papo Sịmonị Petelị alinkubabūla alinkuti: Nsụmwịke kukuloba ị̄swi; abēne balinkummwamụla balinkuti: Nanụswe tụkubūkaga nanụngwe. Po papo balinkusụmụka, balinkwịpaka mwịbōtị, lolị ikilo kikyo bakākolịle nasịmo. 4 Lelo bo bukị̄le nulubūnju, Jesụ alinkwima pị̄sīlya; lolị abafụ̄ndịgwa bāke bakāmēnye ukuti jo Jesụ. 5 Umwene Jesụ alinkubalālūsya alinkuti: Mwe bānị̄ke umwe, mụli nị̄swi sịmo? Abēne balinkwamụla balinkuti: Himma. 6 Umwene alinkubabūla alinkuti: Amụsopege ulwelo kulubafụ lwa kukị̄līlo lwa ịbōtị, ko mụkusyaga. Po papo balinkusopa; lolị kunōngwa ja bwịngị bwa nswi, balinkutolịgwa ukulukwaba. 7 Po papo umfụ̄ndịgwa uju āganị̄gwe na Jesụ, alimkumbūla Petelị alinkuti: Jo ju NTWA. Umwene Sịmonị Petelị bo apilị̄ke ukuti jo ju NTWA, alinkwịnịemba ikilūndo kyake mụnsana, papo akākifwele, alinkwịtāga mụnyanja. 8 Lolị abafụ̄ndịgwa abāngi balinkwịsa mwịbōtị, namanga bakāli patalị na pị̄sīlya, ubutalị pali īmịta jimo, balinkukwaba ulwelo lwa nswi. 9 Lelo bo bafyukịle pị̄sīlya, balinkugubona umōto gwa mababu, pamwanya jalịpo īswi nikisyesye. 10 Po papo Jesụ alinkubabūla alinkuti: Amụtwale sịmo īswi isị mụkolịle lulūlu. 11 Umwene Sịmonị Petelị alinkwịngila mwịbōtị, alinkulukwabila ulwelo pị̄sīlya, alinkwaga lwịswịle iswị īnywamụ imịa jimo na malōngo mahāno na ịtatu; pope napa syali nyịngị ulwelo lukālatwịke. 12 Po papo Jesụ alinkubabūla alinkuti: Ịsaga mụlyege ifya lubūnju. Lolị mbafụ̄ndịgwa bāke akālipo ugwa kukịba ukunndālūsya ukuti: Gwanị ugwe? Namanga bāmēnye ukuti jo ju NTWA. 13 Po papo Jesụ alinkwịsa, alinkwega ikisyesye, alinkubapa, jope nị̄swi bububo. 14 Ulu lo lwa butatu Jesụ ukubasetukila abafụ̄ndịgwa bāke, bo asyukịle mbafwe. 15 Lelo bo balịle ifya lubūnju, po papo Jesụ alinkunndālūsya Sịmonị Petelị alinkuti: Sịmonị gwe nnya Johanị, kali ūnganịle ukubakīnda aba? Umwene alinkwamụla alinkuti: Ena gwe NTWA, umēnye ukuti nguganịle. Umwene Jesụ alinkummbūla alinkuti: Tị̄maga utung'ōsị twangu. 16 Alinkunndālūsya kangi ulwa bubili alinkuti: Sịmonị gwe nnya Johanị, kali unnganịle? Umwene Petelị alinkuti: Ena gwe NTWA, umēnye ukuti nguganịle. Umwene Jesụ alinkummbūla alinkuti: Tị̄maga ing'osi syangu. 17 Alinkunndālūsya kangi ulwa butatu alinkuti: Sịmonị gwe nnya Johanị, kali ūnganịle? Po papo Petelị alinkusụlụmanịa, papo ālinndālūsị̄sye ulwa butatu ukuti: Kali ūnganịle? Po papo alinkummbūla alinkuti: Gwe NTWA, ugwe usịmēnye syosa; usyagēnịe ukuti nguganịle. Po papo Jesụ alinkummbūla alinkuti: Tīmaga īng'ōsi syangu. 18 Ngukubūla isya nalolị une nguti: Bo uli ntụbwa gwịpịnyaga umpāngo gwịmwene, ulinkubūka kūko gwịganịle; lolị bo ukāngēle, kwịsakugolosyaga ịtolo amaboko gāko, po ujūngi ịsakukupịnyaga umpāngo nukukutwala kuno ukị̄gana. 19 Lolị lilili lyo ājobaga ukunāngisya ubufwe ubu isakufwaga nukuntụkifyamo Kyala. Lelo bo ajobịle lilīli, po papo alinkuti: Ngōngaga. 20 Umwene Petelị alinkusanụka, alinkummbona umfụ̄ndịgwa uju Jesụ ālinnganịle, ịkukōnga, (umfụ̄ndịgwa jujuju jo jula pakabalilo ka findu fya majolo, ātūgēle kifụkị fị̄jo na Jesụ, uju ālālūsyaga ạ̄tigi: Gwe Malafyale jwanị uju ịkukubīkaga mmaboko ga balugu?) 21 Bo Petelị ammbwene jujuju, po papo alinkunndālūsya Jesụ alinkuti: Gwe NTWA, bule isya uju? 22 Umwene Jesụ alinkummwamụla alinkuti: Linga nị̄ganịle ukuti ajege papapa ukufịka papo nịsakwịsilaga syo syako ndilị? Ugwe ngōngaga ịtolo. 23 Po papo ilịsyu lilīli lilinkubalanịla mbị̄nābo, ukuti umfụ̄ndịgwa jula atịsakufwamo. Lolị umwene Jesụ akālimmbūlịle ukuti umfụ̄ndịgwa jula atịsakufwamo, lolị ātịle: Linga nịganịle ukuti ajege papo ukufịka pāpo nịsakwịsilaga, syo syako ndilị? 24 Jujuju jo mfụ̄ndịgwa uju ịkusịsịmikisya sịsịsị, jo uju āsịsị̄mbịle sịsịsị, kangi tumēnye ukuti ulusịsịmịkisyo lwake lo lwa nalolị. 25 Lolị sịlịko isị̄ngị sị nyịngị isị Jesụ ābōmbịle, isị linga syasị̄mbịgwaga kamo kamo, nịkwịnogona ukuti ikị̄su kikābagị̄le ukufwana ukubīkamo ba kalata aba basị̄mbị̄gwaga.


AMAZING GRACE BIBLE INSTITUTE