Kabyle of Algeria

Yuḥenna

1:1 Di tazwara yella win yellan d Awal n Ṛebbi, yella akk-d Ṛebbi, d nețța i d Ṛebbi. 1:2 Si tazwara, yella akk-d Ṛebbi, 1:3 kullec yețwaxleq seg-s; deg wayen meṛṛa yețwaxelqen, ulac ayen ur d-nekki ara s ɣuṛ-es. 1:4 Deg-s i tella tudert; tudert-agi tella ț-țafat i yemdanen. 1:5 Tafat tețfeǧǧiǧ di ṭṭlam, yerna ṭṭlam ur ț-iqbil ara. 1:6 Yella yiwen wergaz yețwaceggeɛ ed s ɣuṛ Ṛebbi, argaz-agi isem-is Yeḥya; 1:7 yusa-d ad yili d inigi n tafat iwakken imdanen meṛṛa ad amnen s cchada-ines. 1:8 Mačči d nețța i ț-țafat, nețța yusa-d d inigi n tafat. 1:9 Tafat-agi ț-țafat n tideț, tusa-d ɣer ddunit iwakken aț-țecṛeq ɣef yal amdan. 1:10 Win yellan d Awal n Ṛebbi yella yakan si tazwara di ddunit, imi d nețța i ț-ixelqen lameɛna ddunit ur t- teɛqil ara. 1:11 Yusa-d ɣer lumma-s lameɛna nețțat ur t-teqbil ara. 1:12 Ma d wid i t-iqeblen yumnen yis, widak iɛuzz-iten, uɣalen d arraw n Ṛebbi, 1:13 mačči seg wemdan i d-lulen, mačči s lebɣi n tnefsit neɣ s lebɣi n wemdan, lameɛna d Ṛebbi i sen-yefkan tudert tajdiṭ. 1:14 Win akken yellan d Awal, yuɣal-ed d amdan, iɛac gar-aneɣ, yeččuṛ ț-țideț akk-d ṛṛeḥma. Nețweḥḥid di lqeḍra i d-yefka Baba Ṛebbi i Mmi-s awḥid. 1:15 Yeḥya iched-ed fell-as zdat lɣaci yeqqaṛ: D nețța ɣef i wen-d-nniɣ: win ara d-yasen deffir-iw yezwar-iyi-d axaṭer yella uqbel ad iliɣ. 1:16 Yesseṛwa-yaɣ s lxiṛat-is, lbaṛaka ɣef tayeḍ. 1:17 ccariɛa tusa-d s ufus n Sidna Musa, ma d ṛṛeḥma ț-țideț usant-ed s Sidna Ɛisa Lmasiḥ 1:18 Yiwen ur yeẓri Sidi Ṛebbi, Mmi-s awḥid yellan ɣuṛ-es, d nețța i ɣ-t-id isbeggnen. 1:19 Atah wamek i geched Yeḥya asmi i d-ceggɛen ɣuṛes lḥekkam n wudayen si temdint n Lquds. Ceggɛen-d ɣuṛes tajmaɛt n lmu-qedmin akk-d yemṛabḍen n at Lewwi akken a t-steqsin, nnan-as: Anwa-k keččini? 1:20 Yenna-yasen tideț mbla tuffra: Mačči d nekk i d Lmasiḥ! 1:21 Rnan steqsan-t: Anwa-k ihi? D kečč i d nnbi Ilyas? Yeḥya yenna-yasen: Xaṭi mačči d nekk. Nutni rnan nnan-as: D nnbi i telliḍ? Nețța yerra-yasen: Xaṭi! 1:22 Rnan ḥeṛsen-t nnan-as: Anwa-k ihi? Ilaq a nerr lexbaṛ i wid i ɣ-d-iceggɛen. D acu i teqqaṛeḍ ɣef yiman-ik? 1:23 Yeḥya yenna-yasen: Nekk d win akken ɣef i d-yenna nnbi Iceɛya: ț-țaɣect tețɛeggiḍ deg unezṛuf: Heggit abrid i Sidi Ṛebbi! 1:24 Wid i d-yusan ɣuṛ-es i gellan di tejmaɛt n ifariziyen, 1:25 rnan steqsan-t nnan-as: Imi ur telliḍ ara d Lmasiḥ neɣ d nnbi Ilyas neɣ d nnbi nniḍen, iwacu ihi i tesseɣḍaseḍ lɣaci deg waman? 1:26 Yeḥya yerra-yasen: Nekk sseɣḍaseɣ-kkun deg waman; yella gar-awen yiwen ur t-tessinem ara, 1:27 usiɣ-ed uqbel-is, lameɛna ur uklaleɣ ara ad fsiɣ ulamma d lexyuḍ n warkasen-is. 1:28 Annect-agi meṛṛa yedṛa di taddart n Bitanya ɣer tama n cceṛq n wasif n Urdun anda i gesseɣḍas Yeḥya lɣaci. 1:29 Azekka-nni, Yeḥya iwala Sidna Ɛisa iteddu-d ɣuṛ-es, yenṭeq s ṣṣut ɛlayen: Atan Izimer n Ṛebbi, d win ițekksen ddnub n ddunit. 1:30 Fell-as i wen-d-nniɣ: «a d-yas yiwen, zwareɣ-t-id meɛna yella uqbel a d iliɣ.» 1:31 Nekk s yiman-iw ur ẓriɣ ara anwa-t meɛna usiɣ-ed ad sɣeḍseɣ deg waman akken a t-issinen wat Isṛail. 1:32 Atan wayen i d-yenna Yeḥya Aɣeṭṭas fell-as: Walaɣ Ṛṛuḥ iqedsen iṣubb-ed seg igenni s ṣṣifa n tetbirt yers-ed fell-as. 1:33 Nekk ur ẓriɣ ara belli d nețța, meɛna Sidi Ṛebbi i yi-d iceggɛen iwakken ad sɣeḍseɣ deg waman, yenna-yi-d: «Aț-țwaliḍ Ṛṛuḥ iṣubb-ed seg igenni, a d-yers ɣef yiwen wergaz, d nețța ara yesɣeḍsen imdanen s Ṛṛuḥ iqedsen.» 1:34 Ayagi d ayen i ẓrant wallen-iw, daymi i d-cehdeɣ fell-as qqaṛeɣ: «Argaz-agi d Mmi-s n Ṛebbi.» 1:35 Azekka-nni, Yeḥya mazal-it dinna nețța d sin seg inelmaden-is. 1:36 Akken i gwala Sidna Ɛisa iɛedda-d, yenna-yasen: Atan izimer n Ṛebbi! 1:37 Mi slan i imeslayen-agi, inelmaden-nni tebɛen Sidna Ɛisa. 1:38 Sidna Ɛisa mi geẓra tebɛen-t-id, yezzi-d ɣuṛ-sen, yenna-yasen: D acu tebɣam? Nutni nnan-as: Ṛabi (yeɛni: a Sidi ), anda tzedɣeḍ? 1:39 Yenna-yasen: Ddut yid-i aț-țeẓrem. Inelmaden-nni ddan yid-es, ẓran anda yezdeɣ. Aț-țili d ṛebɛa n tmeddit, qqimen yid-es armi yekfa wass. 1:40 Andriyus, gma-s n Semɛun Buṭrus d yiwen seg inelmaden-nni i gtebɛen Sidna Ɛisa m'akken i sen-d-yehdeṛ fell-as Yeḥya; 1:41 iṛuḥ uqbel ɣer gma-s Semɛun, yenna-yas: Nufa Lmasiḥ! Win i gextaṛ Ṛebbi. 1:42 Andriyus yewwi Semɛun ɣer Sidna Ɛisa. Akken i t-iwala Sidna Ɛisa, imuqel-it yenna-yas: Kečč i d Semɛun mmi-s n Yunes. Sya d asawen aț-tețțusemmiḍ Sifas yeɛni: Buṭrus. 1:43 Azekka-nni, Sidna Ɛisa yeqsed ad iṛuḥ ɣer tmurt n Jlili. Deg ubrid yemmuger-ed Filibus, yenna-yas: Ddu-d yid-i! 1:44 Filibus, d yiwen si taddart n Bitsayda, anda akken zedɣen Buṭrus d Andriyus. 1:45 Syenna Filibus yeẓra-d Natanahil, yenna-yas: Nufa win ɣef i d-yehdeṛ Sidna Musa di ccariɛa, win akken i ɣef d-xebbṛen lenbiya. D Ɛisa, mmi-s n Yusef n taddart n Naṣaret. 1:46 Natanahil yerra-yas: Amek, yezmer a d-iffeɣ wayen yelhan si taddart n Naṣaret? Filibus yerra-yas: Eyya-d aț-țwaliḍ s wallen-ik! 1:47 Sidna Ɛisa mi gwala Natanahil iteddu-d ɣuṛ-es, yenna: Atah yiwen n wat Isṛail n tideț, ulac deg-s leɣdeṛ. 1:48 Natanahil yenna i Sidna Ɛisa: Anda i yi-tesneḍ? Sidna Ɛisa yerra-yas: Uqbel a k-d-yessiwel Filibus, mi telliḍ ddaw n tneqleț, walaɣ-k-in! 1:49 Dɣa Natanahil yenna-yas: A Sidi, kečč d Mmi-s n Ṛebbi! D agellid n wat Isṛail! 1:50 Sidna Ɛisa yerra-yas: Tumneḍ imi i k-d-nniɣ walaɣ k-in seddaw n tneqleț; sya ɣer zdat aț-țeẓred ayen yugaren annect-a! 1:51 S tideț qqaṛeɣ-awen: aț-țwalim igenni yeldi, lmalayekkat n Sidi Ṛebbi țțalint țṣubbunt sennig Mmi-s n bunadem.

Yuḥenna 2

2:1 Mi ɛeddan sin wussan, tella-d tmeɣṛa di tmurt n Jlili di taddart Kana, tella dinna yemma-s n Sidna Ɛisa. 2:2 Ula d Sidna Ɛisa yețwaɛṛed nețța d inelmaden-is ɣer tmeɣṛa-nni. 2:3 Imi i ten-ixuṣṣ ccṛab, yemma-s n Sidna Ɛisa tusa-d ɣuṛ-es tenna-yas: Ifuk-asen ccṛab! 2:4 Sidna Ɛisa yerra-yas: D nekk neɣ d kemm i teɛna temsalt-agi a tameṭṭut? Taswiɛt-iw urɛad i d-tusi. 2:5 Dɣa yemma-s tenna i iqeddacen: Xedmet ayen akk ara wen-d yini! 2:6 Llant dinna sețța n tsebbalin (icmuxen ) yețwaxedmen s wedɣaɣ, țțawint si tmanyin ar meyya uɛecrin n litrat, seg-sent i d-țɛemmiṛen wat Isṛail aman i luḍu. 2:7 Sidna Ɛisa yenna i iqeddacen nni: Ččaṛet ticbayliyin-agi d aman. Ččuṛen-tent armi d imi. 2:8 Dɣa yenna-asen: Ɛemmṛet-ed tura kra n waman seg-sent tawim-ten i bab n tmeɣṛa. Kkren xedmen akken i sen-d-yenna. 2:9 Win iḍebbṛen di leqdic n tmeɣṛa yeɛṛeḍ aman-nni i guɣalen d ccṛab. Nețța ur yeẓri ansi i d-yekka ccṛab-agi, ma d iqeddacen-is ẓran axaṭer d nutni i ten-id-yewwin. Iṛuḥ yessawel i yesli, 2:10 yenna-yas: Di tmeɣṛiwin, medden srusun-d uqbel ccṛab yelhan, mi ḥman inebgawen rennun-asen-d win ṛqiqen, kečč teǧǧiḍ ccṛab yelhan armi ț-țura! 2:11 D wagi i d lbeṛhan amezwaru i gexdem Sidna Ɛisa di taddart n Kana di tmurt n Jlili. S wakka i d-ibeggen tamanegt-is i inelmaden-is, dɣa umnen yis. 2:12 Deffir wayagi Sidna Ɛisa iṣubb ɣer temdint n Kafernaḥum. Tedda yid-es yemma-s, atmaten-is akk-d inelmaden-is; qqimen dinna anagar kra n wussan. 2:13 Akken i d-yeqṛeb wass n Tfaska n izimer n leslak yellan d lɛid n wat Isṛail, Sidna Ɛisa yuli ɣer temdint n Lquds. 2:14 Yufa deg wefrag n lǧameɛ iqedsen wid yeznuzun izgaren, ulli d yetbiren, yufa daɣen dinna wid yețbeddilen idrimen; rran lǧameɛ iqedsen d ssuq. 2:15 Ixdem-ed ajelkwaḍ (acelliṭ ) s wemrar, yebda itellif-iten s nutni s wulli-nsen akk-d yezgaren-nsen, iqleb-asen (ițți-yasen ) daɣen ṭṭwabel i wid yețbeddilen idrimen, iḍeggeṛ asen kullec ɣer lqaɛa, issufeɣ-iten meṛṛa seg ufrag n lǧameɛ iqedsen, 2:16 yerna yenna i wid yeznuzun itbiren: Kkset syagi ssuq-nwen! Wagi d axxam n Baba, ur t-țarrat ara d ssuq! 2:17 inelmaden-is mmektan-d ayen yuran di tektabt n Ẓabur: Leḥmala i sɛiɣ ɣef wexxam-ik am tmes itețțen ul-iw! 2:18 Kkren wudayen nnan-as: D acu n lbeṛhan ara ɣ-d-tbeggneḍ akken a neɛqel lḥekma s wayes i txeddmeḍ annect-agi? 2:19 Sidna Ɛisa yerra-yasen: Huddet lǧameɛ-agi iqedsen, a t-id-sbeddeɣ di tlata wussan. 2:20 At Isṛail nnan-as: Wid yebnan lǧameɛ-agi qqimen deg-s sețța uṛebɛin iseggasen, kečč tzemreḍ a s-tɛiwdeḍ lebni di tlata wussan! 2:21 Lameɛna «Lǧameɛ» i ɣef d-yehdeṛ Sidna Ɛisa d lǧețța-s. 2:22 Asmi i d-yeḥya Sidna Ɛisa si lmut ɣer tudert, inelmaden-is mmektan-d awal-agi i d-yenna, dɣa umnen s wayen yuran di tira iqedsen d wayen i d-yenna Sidna Ɛisa. 2:23 Mi gella Sidna Ɛisa di temdint n Lquds di lweqt n lɛid n Tfaska, aṭas i gumnen yis mi ẓran lbeṛhanat i gxeddem. 2:24 Lameɛna Sidna Ɛisa ur yesɛi ara deg-sen laman axaṭer yessen-iten akken ma llan. 2:25 Ur yeḥwaǧ ara a s-d-ḥkun ɣef yemdanen imi yessen ayen yellan deg wulawen-nsen.

Yuḥenna 3

3:1 Yella yiwen wergaz isem-is Nikudem i gellan si tejmaɛt n ifariziyen, d yiwen seg imeqqranen n wat Isṛail. 3:2 Iṛuḥ-ed deg iḍ ɣer Sidna Ɛisa yenna-yas: A Sidi neẓra belli d Sidi Ṛebbi i k-id-iceggɛen iwakken a ɣ-teslemdeḍ, axaṭer yiwen ur izmir ad yexdem lbeṛhanat i txeddmeḍ m'ur yelli ara Ṛebbi yid-es. 3:3 Sidna Ɛisa yerra-yas: S tideț a k-d-iniɣ: yiwen ur izmir ad iẓer tagelda n Ṛebbi m'ur d-iɛawed ara talalit. 3:4 Nikudem yenna-yas: Amek i gezmer yiwen a d iɛiwed talalit ma yella d amɣaṛ? Izmer ad yuɣal ɣer tɛebbuṭ n yemma-s a d iɛiwed talalit? 3:5 Sidna Ɛisa yerra-yas: Nniɣ-ak s tideț: m'ur d-ilul ara yiwen seg waman akk-d Ṛṛuḥ, ur ițțizmir ara ad ikcem tagelda n Ṛebbi. 3:6 Win i d-ilulen seg wemdan ț-țaṛwiḥt n wemdan, win i d-ilulen s Ṛṛuḥ iqedsen d Ṛṛuḥ. 3:7 Ur țțawham ara imi i k-d-nniɣ «ilaq a d-tɛiwdem talalit.» 3:8 Aḍu yețsuḍu ɣer wanda i s-yehwa, tselleḍ i ṣṣut-is lameɛna ur tẓerreḍ ara ansi d-yekka neɣ anda iteddu. Akka daɣen i gella ɣef kra n win i d-ilulen s Ṛṛuḥ iqedsen. 3:9 Nikudem yenna-yas: Amek ara yedṛu wayagi? 3:10 Sidna Ɛisa yerra-yas: Tesselmadeḍ ccariɛa i wat Isṛail ur tessineḍ ara annect-agi? 3:11 A k- iniɣ tideț: neqqaṛ-ed ayen kan i nessen, nețcehhid-ed s wayen i nwala, lameɛna kunwi ur teqbilem ara cchada-nneɣ. 3:12 M'ur tuminem ara mi wen-d-hedṛeɣ ɣef temsalin n ddunit-agi amek ara tamnem s tid n igenwan? 3:13 Yiwen ur yuli ɣer igenwan anagar Mmi-s n bunadem i d-iṣubben seg igenwan. 3:14 Akken i gɛelleq Musa azrem n nnḥas ɣef tgejdit deg unezṛuf, i glaq ad ițțuɛelleq daɣen Mmi-s n bunadem 3:15 iwakken kra n win yumnen yis, ad yesɛu tudert n dayem. 3:16 Sidi Ṛebbi iḥemmel imdanen n ddunit meṛṛa armi i d-yefka Mmi-s awḥid iwakken kra n win yumnen yis ur yețmețțat ara meɛna ad yesɛu tudert n dayem. 3:17 Sidi Ṛebbi ur d-iceggeɛ ara Mmi-s ɣer ddunit iwakken ad iḥaseb imdanen meɛna iwakken a ten-isellek. 3:18 Win yumnen yis ur yețțuḥaseb ara, ma d win ur numin ara atan yețțuḥaseb yakan, imi ur yumin ara s Mmi-s awḥid n Sidi Ṛebbi. 3:19 Atah lḥisab yellan fell-as: «tafat tusa-d ɣer ddunit meɛna imdanen ḥemmlen ṭṭlam axiṛ n tafat, axaṭer lecɣal-nsen diri-ten.» 3:20 Kra n win ixeddmen cceṛ, yekṛeh tafat yerna ur ițqeṛṛib ara ɣuṛ-es, ițțaggad a d-tessedheṛ yir lecɣal-is. 3:21 Ma d win iteddun di tideț yețțas-ed ɣer tafat akken a d-iban belli kra n wayen ixeddem, ixeddem it di lebɣi n Sidi Ṛebbi. 3:22 Syenna Sidna Ɛisa d inelmaden is ṛuḥen ɣer tmurt n Yahuda, qqimen dinna kra n wussan, sseɣḍasen lɣaci deg waman. 3:23 Yeḥya daɣen yella yesseɣḍas lɣaci di Ɛinun ț-țama n Salim imi qwan waman dinna. Aṭas lɣaci i d-ițasen ɣuṛ-es iwakken a ten-isseɣḍes. 3:24 Di lweqt-nni urɛad i skecmen Yeḥya ɣer lḥebs. 3:25 Yiwen wass kra seg inelmaden n Yeḥya hedṛen d yiwen wergaz n wat Isṛail ɣef luḍu. 3:26 Ṛuḥen ɣer Yeḥya, nnan-as: A Sidi, win yellan yid-ek mi telliḍ agemmaḍ i wasif n Urdun, win akken i ɣef d-tcehdeḍ, atan yesseɣḍas ula d nețța, lɣaci meṛṛa țṛuḥun ɣuṛ-es. 3:27 Yeḥya yerra-yasen: Yiwen ur izmir ad ixdem ccɣel nniḍen sennig wayen i s-d-yefka Sidi Ṛebbi. 3:28 Aql-ikkun s yiman-nwen d inigan, acḥal d abrid i wen-d nniɣ: mačči d nekk i d Lmasiḥ, țwaceggɛeɣ d kan uqbel-is. 3:29 Iwumi tewjed teslit? Anaɣ i yesli! Ma d aḥbib n yesli d win yețɣimin ɣer tama-s, ifeṛṛeḥ m'ara isel i ṣṣut n yesli. Ula d nekk tura lfeṛḥ-iw yennekmal. 3:30 Ilaq nețța ad yețțimɣuṛ nekk ad țțim?iyeɣ. 3:31 Win i d-yusan seg igenni yella nnig n wayen yellan meṛṛa, ma d win yellan n ddunit-agi iheddeṛ anagar ɣef wayen yellan di ddunit. Win i d-yusan seg igenni yella sennig-nsen meṛṛa. 3:32 Icehhed-ed ɣef wayen yeẓra d wayen yesla, lameɛna yiwen ur iqbil cchada-ines. 3:33 Win ara iqeblen cchada-ines, yetḥeqqeq belli Sidi Ṛebbi yeqqaṛ tideț. 3:34 S tideț amceggeɛ n Ṛebbi iheddeṛ imeslayen i s-d-yefka Ṛebbi, imi i t-yeččuṛ s Ṛṛuḥ iqedsen. 3:35 Baba Ṛebbi iḥemmel Mmi-s, yerra kullec ger ifassen-is. 3:36 Win yumnen s Mmi-s yesɛa tudert ur nfennu; ma d win ur numin ara s Mmi-s ur yețwali ara tudert, urrif n Ṛebbi yezga fell-as.

Yuḥenna 4

4:1 Ifariziyen slan s Sidna Ɛisa yesɛa aṭas n inelmaden yerna yesseɣḍas imdanen akteṛ n Yeḥya. 4:2 Lameɛna Sidna Ɛisa mačči d nețța s yiman-is i gesseɣḍasen lɣaci, ccɣel-agi yeǧǧa-t i inelmaden-is. Mi geẓra Sidna Ɛisa belli slan yis, 4:3 yeffeɣ si tmurt n at Yahuda. Iwakken ad yuɣal ɣer tmurt n Jlili, 4:4 ilaq-as ad iɛeddi ɣef tmurt n Samarya. 4:5 Yelḥeq ɣer taddart n Sicar iqeṛben akal i d-yeǧǧa Sidna Yeɛqub i mmi-s Yusef; 4:6 dinna i gella lbir n Sidna Yeɛqub. Sidna Ɛisa yeqqim ɣef yiri n lbir akken ad yesteɛfu. Aț-țili d tnac n wass. 4:7 Yiwet n tmeṭṭut n Samarya tusa-d aț-țagem; Sidna Ɛisa iluɛa-ț, yenna yas: A tameṭṭut, ma ulac aɣilif efk- yi-d ad sweɣ! 4:8 Yuɣ lḥal inelmaden-is ṛuḥen ɣer temdint a d-aɣen ayen ara ččen. 4:9 Tameṭṭut-nni tasamarit tenna-yas: Amek, kečč yellan n wat Isṛail tessutreḍ-iyi-d aț-țesweḍ i nekk yellan ț-țasamarit? (axaṭer at Isṛail ur țemsaɛaden ara yerna ur țemxalaḍen ara d isamariyen). 4:10 Sidna Ɛisa yerra-yas: Lemmer teẓriḍ ayen i gebɣa Ṛebbi a m-t-id yefk akk-d win i m-d-yessutren aman, tili d kemm ara s-yessutren a m-d-yefk aț țesweḍ; nețța, d aman yessidiren ara m-d-yefk. 4:11 Tameṭṭut-nni tenna-yas: A Sidi, ur tesɛiḍ ara s wacu ara d-tessaliḍ aman yerna lbir-agi lqay. Ansi ara k-d-kken waman-agi yessidiren? 4:12 Tebɣiḍ eɛni a d-tiniḍ tɛeddaḍ jeddi-tneɣ Yeɛqub i ɣ-d yeǧǧan lbir-agi, i geswan seg-s nețța d warraw-is akk țqeḍɛiyin-is? 4:13 Sidna Ɛisa yerra-yas: Kra n win ara yeswen seg waman-agi ad yuɣal ad iffad, 4:14 lameɛna win ara yeswen seg waman ara s-d-fkeɣ ur yețțuɣal ara ad iffad. Yerna aman ara s-d-fkeɣ ad uɣalen deg-s ț-țaɛwint ur nețɣaṛ ara, a d-tețfeggiḍ seg-s tudert n dayem. 4:15 Tameṭṭut-nni tenna-yas: A Sidi, efk-iyi-d seg waman-agi iwakken ur țțuɣaleɣ ara ad ffadeɣ neɣ a d-aseɣ ɣer lbir-agi ad agmeɣ. 4:16 Sidna Ɛisa yenna-yas: Ṛuḥ ssiwel-as i wergaz-im tuɣaleḍ-ed ɣer dagi! 4:17 Tameṭṭut-nni terra-yas: Ur sɛiɣ ara argaz! Sidna Ɛisa yenna-yas: Tesɛiḍ lḥeqq imi d-tenniḍ ur sɛiɣ ara argaz. 4:18 Axaṭer xemsa iberdan i tzewǧeḍ, win yellan yid-em tura mačči d argaz-im; deg wannect-agi ț-țideț i d-tenniḍ! 4:19 Nețțat tenna-yas: A Sidi, ɛeqleɣ-k d nnbi i telliḍ. 4:20 Ini-yi-d anwa i gesɛan lḥeqq: lejdud nneɣ isamariyen ɛebbden Ṛebbi ɣef wudrar-agi, ma d kunwi s wat Isṛail teqqaṛem amkan anda i glaq a neɛbed Ṛebbi, d Lquds. 4:21 Sidna Ɛisa yenna-yas: A tameṭṭut, amen s wayen ara m-d-iniɣ! Iteddu-d lweqt anda mačči ɣef wedrar-agi neɣ di Lquds ara yețwaɛbed Baba Ṛebbi. 4:22 Kunwi s isamariyen tɛebbdem ayen ur tessinem ara, ma d nukkni nɛebbed ayen nessen axaṭer leslak ițekk-ed seg wegdud n Isṛail. 4:23 Lameɛna iteddu-d lweqt yerna yewweḍ-ed, anda lmumnin n ṣṣeḥ ad ɛebbden Baba Ṛebbi s Ṛṛuḥ, s tideț, axaṭer d lmumnin-agi n ṣṣeḥ i gebɣa Baba Ṛebbi. 4:24 Imi Ṛebbi d Ṛṛuḥ i gella, ilaq wid ara t-iɛebden a t-ɛebden s Ṛṛuḥ ț-țideț. 4:25 Tameṭṭut-nni tenna-yas: Ẓriɣ a d-yas win i gextaṛ Sidi Ṛebbi, win ițțusemman «Lmasiḥ». Asm'ara d-yas a ɣ-d-yessefhem kra yellan. 4:26 Sidna Ɛisa yerra-yas: Lmasiḥ, d nekk s yiman-iw! 4:27 Imiren kan wwḍen-d inelmaden is. Wehmen imi i t-id-ufan yețmeslay ț-țmeṭṭut; lameɛna yiwen deg-sen ur s-yenni: d acu i tebɣiḍ ɣuṛ-es, neɣ iwacu i tețmeslayeḍ yid-es? 4:28 Dɣa tameṭṭut-nni teǧǧa tacmuxt-is dinna, tuzzel ɣer taddart tenna i lɣaci: 4:29 Eyyaw aț-țe?rem yiwen yenna-yi-d akk ayen xedmeɣ! Ad yili d nețța i d Lmasiḥ! 4:30 Lɣaci ffɣen-d si taddart ṛuḥen ad ẓren Sidna Ɛisa. 4:31 Uqbel a d-yaweḍ lɣaci, inelmaden-is ḥeṛsen-t ad yečč, nnan-as: A Sidi ɛeddi-d aț-țeččeḍ! 4:32 Yenna-yasen: Sɛiɣ lqut ara ččeɣ meɛna kunwi ur teẓrim ara d acu-t. 4:33 Inelmaden qqaṛen wway gar asen: Ahat yella win i s-d-yewwin ad yečč. 4:34 Sidna Ɛisa yenna: Lqut-iw, d m'ara xedmeɣ lebɣi n win i yi-d-iceggɛen akken ad kemmleɣ ccɣel i ɣef i yi-iwekkel. 4:35 Kunwi teqqaṛem mazal ṛebɛa wagguren i tmegra ma d nekk a wen-d-iniɣ: ldit allen-nwen aț-țwalim igran weṛṛaɣ-it, wejden i tmegra! 4:36 Win imeggren yewwi lexlaṣ-is, ijemmeɛ lɣella i tudert n dayem. Akka lfeṛḥ yesdukkel win izerrɛen d win imeggren. 4:37 Axaṭer ț-țideț lemtel-agi i d-yeqqaṛen: «Yiwen izerreɛ wayeḍ imegger»! 4:38 Nekk ceggɛeɣ-kkun aț-țmegrem anda ur tezriɛem ara, anda i nɛețțaben wiyaḍ; nutni nɛețțaben, kunwi tɣelltem lɣella n leɛtab-nsen. 4:39 Aṭas n isamariyen n taddart-nni i gumnen s Sidna Ɛisa mi d-tcehhed fell-as tmeṭṭut-nni s imeslayen-agi: «yenna-yi-d akk ayen i xedmeɣ!» 4:40 Mi wwḍen ɣuṛ-es isamariyen-nni, ḥellelen Sidna Ɛisa ad iqqim yid-sen. Dɣa yeqqim yid-sen sin wussan. 4:41 Aṭas nniḍen i gumnen yis mi slan i imeslayen-is. 4:42 Nnan-as i tmeṭṭut-nni: Tura numen yis mačči kan ɣef wayen i ɣ-d-tenniḍ fell-as, nesla yas s yiman-nneɣ, neẓra belli d nețța i d amcafeɛ n ddunit. 4:43 Mi ɛeddan sin wussan, Sidna Ɛisa iṛuḥ syenna ɣer tmurt n Jlili. 4:44 Yenna-yasen: «Ulac nnbi yesɛan leqdeṛ di tmurt-is.» 4:45 Mi gewweḍ ɣer tmurt n Jlili, lɣaci sṭreḥben yis s lfeṛḥ d ameqqran imi ula d nutni ḥedṛen i lɛid n Tfaska di temdint n Lquds, ẓran akk lbeṛhanat i gexdem dinna. 4:46 Yuɣal iɛedda ɣef taddart n Kana di tmurt n Jlili anda akken i gerra aman d ccṛab. Yella yiwen lḥakem n ddewla n temdint n Kafernaḥum yesɛa mmi-s yuḍen yenṭer. 4:47 Mi gesla s Sidna Ɛisa yuɣal-ed si tmurt n Yahuda ɣer tmurt n Jlili, iṛuḥ-ed ɣuṛ-es, iḥellel-it iwakken a d yas ad yesseḥlu mmi-s yețmețțaten. 4:48 Sidna Ɛisa yenna-yas: M'ur twalam ara licaṛat d lbeṛhanat ur tețțamnem ara? 4:49 Lḥakem n ddewla yenna-yas: A Sidi, di leɛnaya-k ɣiwel uqbel ad yemmet mmi! 4:50 Sidna Ɛisa yerra-yas: Ṛuḥ, atan mmi-k yeḥla! Argaz-nni yumen s wayen i s-d yenna Sidna Ɛisa, dɣa yuɣal 4:51 ɣer wexxam-is. Mi gteddu ɣer wexxam, mmugren-t-id iqeddacen-is nnan-as: Mmi-k yeḥla! 4:52 Yesteqsa-ten anta ssaɛa i deg yeḥla, rran-as-ed: Iḍelli ɣef lweḥda n tmeddit i t-teffeɣ tawla. 4:53 Baba-s n weqcic-nni yewwi-d s lexbaṛ belli di ssaɛa-nni i s-d-yenna Sidna Ɛisa «Mmi-k yeḥla» i geḥla mmi-s, seg imiren yumen nețța d wat wexxam-is meṛṛa. 4:54 D wagi i d lbeṛhan wis sin i gexdem Sidna Ɛisa di tmurt n Jlili mi d-yuɣal si tmurt n Yahuda.

Yuḥenna 5

5:1 Ɛeddan kra n wussan, Sidna Ɛisa yuli ɣer temdint n Lquds akken ad yeḥdeṛ i lɛid n wat Isṛail. 5:2 Di temdint-agi, zdat n tewwurt yețțusemman «tawwurt n wulli,»tella yiwet n temda n waman qqaṛen-as s tɛibṛanit: «Bitesda». Zzin-as-d xemsa ifragen yesɛan ssqef. 5:3 Deg ifragen-agi aṭas n imuḍan i gḍelqen, iderɣalen, iɛibanen d wukrifen țṛaǧun akk ad ḥerrken waman. 5:4 Axaṭer tiswiɛin yețṣubbu-d yiwen n lmelk ɣer temda, yețḥerrik aman-nni; win ara ikecmen d amezwaru ɣer temda m'ara ḥerrken waman ad yeḥlu si lehlak-is akken yebɣu yili. 5:5 Yella dinna yiwen wergaz tmanya utlatin iseggasen nețța di lehlak. 5:6 Sidna Ɛisa mi t-iwala yeḍleq, yeẓra belli aṭas aya segmi yuḍen, yenna-yas: Tebɣiḍ aț-țeḥluḍ? 5:7 Amuḍin-nni yerra-yas-ed: A Sidi, ur sɛiɣ ara win ara yi gren ɣer temda m'ara ḥerken waman; m'ara ɛeṛdeɣ ad kecmeɣ wayeḍ a yi-izwir. 5:8 Sidna Ɛisa yenna-yas: Ekker fell-ak, ddem tagertilt-ik telḥuḍ! 5:9 Imiren kan argaz-nni yeḥla, yeddem tagertilt-is yebda tikli. Ayagi yedṛa deg wass n ssebt yellan d ass n westeɛfu. 5:10 Lecyux n wat Isṛail nnan-as i wergaz-nni yeḥlan: Ass-agi d ass n westeɛfu, d leḥṛam fell-ak aț-țebbibeḍ tagertilt-ik! 5:11 Nețța yerra-yasen: Win i yi-sseḥlan d nețța i yi-d yennan: «Ddem tagertilt-ik telḥuḍ.» 5:12 Steqsan-t nnan-as: Anwa i k-d-yennan akka? 5:13 Lameɛna argaz-nni yeḥlan ur yeẓri ara anwa-t, axaṭer Sidna Ɛisa yekcem ger lɣaci ițemdeḥḥasen dinna. 5:14 Taswiɛt kan, Sidna Ɛisa yemlal-it-id deg wefrag n lǧameɛ iqedsen yenna yas: Aql-ik teḥliḍ, sya d asawen xḍu i ddnub iwakken ur ideṛṛu ara yid-ek akteṛ n wannect-nni! 5:15 Argaz-nni iṛuḥ ad ixebbeṛ lecyux n wat Isṛail belli d Sidna Ɛisa i t-yesseḥlan. 5:16 Lecyux n wat Isṛail bdan accetki ɣef Sidna Ɛisa imi i gexdem ayagi deg wass n westeɛfu. 5:17 Sidna Ɛisa yenna yasen: Baba Ṛebbi ixeddem ar tura, nekk daɣen aql-i xeddmeɣ! 5:18 Ɣef wawal-agi lecyux-nni ufan-as-ed sebba nniḍen, țqelliben amek ara t-nɣen, mačči kan imi ur iqudeṛ ara ass n westeɛfu meɛna imi gerra Ṛebbi d Baba-s yerna yesseɛdel iman-is d Ṛebbi. 5:19 Sidna Ɛisa yerra-yasen: S tideț qqaṛeɣ-awen: Mmi-s n Ṛebbi ur ixeddem acemma s yiman is, ixeddem ala ayen yeẓra ixeddem-it Baba-s. Kra n wayen ixeddem Baba-s ixeddem-it Mmi-s daɣen. 5:20 Axaṭer Baba-s iḥemmel Mmi-s, yesbeggin-as-d lecɣal-is meṛṛa. Ad as-yernu tazmert s wacu ara yexdem ayen yugaren kra n wayen teẓram ar ass-a, aț-țwehmem di lecɣal-is. 5:21 Akken Baba Ṛebbi yeskkaray-ed lmegtin ițțarra-yasen tudert, akken daɣen Mmi-s yețțak tudert i win yebɣa. 5:22 Baba Ṛebbi ur iḥekkem ɣef yiwen, lameɛna yerra lḥekma ger ifassen n Mmi-s 5:23 iwakken imdanen meṛṛa ad qadṛen Mmi-s akken țqadaṛen Baba-s. Win ur nqudeṛ ara Mmi-s ur iqudeṛ ara Baba-s i t-id iceggɛen. 5:24 S tideț nniɣ-awen: «kra n win yesmeḥsisen i wawal-iw, yumnen s win i yi-d-iceggɛen yesɛa tudert n dayem yerna ulac fell-as lḥisab, lameɛna iɛedda yakan si lmut ɣer tudert. 5:25 S tideț nniɣ-awen: «iteddu-d lweqt yerna yewweḍ-ed anda lmegtin ad slen i ṣṣut n Mmi-s n Ṛebbi, yerna wid akk ara s-yeslen ad idiren. 5:26 Akken yesɛa Baba Ṛebbi tudert deg yiman-is i gefka daɣen i Mmi-s ad yesɛu tudert deg yiman-is. 5:27 Yerra ger ifassen-is lḥekma imi d Mmi-s n bunadem i gella. 5:28 Ur țțawhamet ara, axaṭer lweqt iteddu-d, wid akk yellan deg i?ekwan ad slen i ṣṣut n Mmi-s n bunadem, 5:29 imiren a d-kkren; wid ixedmen lxiṛ a d-ḥyun ɣer tudert n dayem ma d wid ixedmen cceṛ a d-ḥyun iwakken ad țțuḥasben. 5:30 Ur xeddmeɣ acemma s lebɣi-w lameɛna ḥekkmeɣ s lebɣi n Baba Ṛebbi. Lḥekma-inu d lḥeqq axaṭer ur țqellibeɣ ara ad xedmeɣ lebɣi-w, lameɛna lebɣi n win i yi-d-iceggɛen.» 5:31 Ma yella d nekk kan i d icehden ɣef yiman-iw cchada-inu ur tețwaqbal ara. 5:32 Lameɛna sɛiɣ inigi nniḍen, yerna cchada-ines tṣeḥḥa. 5:33 Tceggɛem ɣer Yeḥya testeqsam-t, nețța icehhed-ed ɣef tideț. 5:34 Nekk ur țkileɣ ara ɣef cchada n wemdan, nniɣ-awen-d annect-agi akken aț-țețwasellkem. 5:35 Yeḥya yusa-d ț-țaftilt yețfeǧǧiǧen ger yemdanen, ma d kunwi tebɣam aț-țferḥem taswiɛt kan di tafat-is. 5:36 Tella fell-i cchada nniḍen yugaren tin n Yeḥya: d lecɣal i yi d-yefka Baba Ṛebbi a ten-xedmeɣ. Lecɣal-agi țcehhiden-d fell-i belli d Baba Ṛebbi i yi-d-iceggɛen. 5:37 Ula d Baba Ṛebbi i yi d-iceggɛen icehhed-ed fell-i, meɛna kunwi leɛmeṛ ur teslim i ṣṣut-is, ur teẓrim udem-is. 5:38 Awal-is ur yezdiɣ ara deg wulawen nwen imi ur tuminem ara s win i d-iceggeɛ. 5:39 Tețnadim di tektabin iqedsen tɣilem aț-țafem deg-sent tudert n dayem. Tiktabin-agi d nutenti i-d-icehden fell-i. 5:40 Lameɛna kunwi tugim a d-tasem ɣuṛ-i aț-țesɛum tudert. 5:41 Ur țqellibeɣ ara ad sɛuɣ cciɛa ɣer yemdanen, 5:42 Ẓriɣ belli deg wulawen-nwen ur tḥemmlem ara Ṛebbi. 5:43 Nekk usiɣ-ed s yisem n Baba Ṛebbi, kunwi ur iyi-teqbilem ara. Lemmer a d-yas wayeḍ a d-icehhed ɣef yiman-is a t-tqeblem! 5:44 Amek ara tesɛum liman ma yella tețnadim aț-țemyeɛǧabem wway gar awen wala aț-țɛeǧbem kan i Ṛebbi? 5:45 Ḥadret aț-țɣilem d nekk ara iccetkin fell-awen zdat Baba Ṛebbi! D Musa ara iccetkin fell-awen, d Musa-nni ɣef i tețțeklem. 5:46 Lemmer ț-țideț tumnem s Musa tili tumnem yis-i, axaṭer yura-d fell-i di tira iqedsen. 5:47 Ma yella ur tuminem ara s wayen i d-yura, amek ara tamnem s wawal-iw?

Yuḥenna 6

6:1 Syenna, Sidna Ɛisa yezger lebḥeṛ n Jlili (iwumi qqaṛen daɣen lebḥeṛ n Tiberyas ). 6:2 Aṭas n yemdanen i geddan yid-es mi walan yesseḥlay imuḍan. 6:3 Daymi Sidna Ɛisa yuli ɣer wedrar ad innejmaɛ d inelmaden-is. 6:4 Lɛid n wat Isṛail iwumi qqaṛen Tafaska n izimer n leslak tqeṛb-ed. 6:5 Akken i gwala lɣaci iteddu-d ɣuṛ-es, Sidna Ɛisa yenṭeq ɣer Filibus yenna-yas: Ansi ara d-naɣ aɣṛum i wannect agi n lɣaci? 6:6 Yesteqsa-t kan iwakken ad i?er d acu ara s-d-yini, axaṭer nețța yeẓra yakan d acu ara yexdem. 6:7 Filibus yerra-yas: A Sidi ur d-keffunt ara mitin alef iwakken mkul yiwen deg-sen a t-id-iṣaḥ ciṭṭuḥ n weɣṛum. 6:8 Andriyus gma-s n Semɛun Buṭrus, yellan seg inelmaden, yenṭeq ɣer Sidna Ɛisa yenna-yas: 6:9 Yella dagi yiwen weqcic yesɛa xemsa n teḥbulin n weɣṛum n tem?in akk-d sin iselman (iḥutiwen), lameɛna d acu ara d-xedmen i wannect-agi n lɣaci? 6:10 Sidna Ɛisa issendeh-iten ad sɣimen lɣaci. Deg wemkan-nni yeqwa leḥcic, lɣaci yeqqim ɣer lqaɛa, ad ilin azal n xemsa alaf n yergazen. 6:11 Sidna Ɛisa yeddem-ed tiḥbulin-nni n weɣṛum, yeḥmed Ṛebbi icekkeṛ-it, ifṛeq-itent i lɣaci yeqqimen ɣef leḥcic, yefreq-asen daɣen iselman nni, ččan akk armi ṛwan. 6:12 Mi ččan ṛwan, Sidna Ɛisa iluɛa inelmaden-is yenna-yasen: Jemɛet-ed ayen i d-yeqqimen akken ur ixețțeṛ ula d acemma. 6:13 Ayen i d-yegran si xemsa n teḥbulin-nni n weɣṛum n temẓin, jemɛen-t-id ččuṛen yis tnac n iḍellaɛen (tiquftin). 6:14 Lɣaci-nni mi walan lbeṛhan-agi n Sidna Ɛisa, țɛeggiḍen qqaṛen: Mbla ccekk argaz-agi d nețța i d nnbi-nni ara d-yasen ɣer ddunit. 6:15 Sidna Ɛisa mi geẓra lɣaci bɣan a t-rren d agellid fell-asen, iḍeṛṛef iman-is, yuli ɣer wedrar. 6:16 Mi geɣli yiṭij, inelmaden-is uɣalen ṣubben ɣer rrif n lebḥeṛ. 6:17 Rekben taflukt ad zegren ɣer ugemmaḍ, ɣer Kafernaḥum. Yeɣli-d yakan ṭṭlam, Sidna Ɛisa urɛad yelḥiq ɣuṛ-sen. 6:18 Yekker-ed yiwen waḍu iǧehden, lebḥeṛ yerwi. 6:19 Inelmaden-is yuɣ-iten lḥal wwḍen ɣer tlemmast n lebḥeṛ. Walan Sidna Ɛisa iteddu-d ɣuṛ-sen, ileḥḥu-d ɣef wuḍar s ufella n waman. Mi d-iqeṛṛeb ɣer teflukt nsen, xelɛen. 6:20 Sidna Ɛisa yenna yasen: Ur țțaggadet ara, d nekk! 6:21 Bɣan a t-srekben yid-sen di tefluk meɛna ufan-d iman-nsen wwḍen ɣer wemkan anda țeddun. 6:22 Azekka-nni, lɣaci yeqqimen agummaḍ i lebḥeṛ wwin-d s lexbaṛ belli anagar yiwet n teflukt i gellan dinna, yerna Sidna Ɛisa ur yeddi ara d inelmaden-is mi ṛuḥen di teflukt. 6:23 Dɣa tiflukin nniḍen i d-yusan si temdint n Tiberyas, wwḍent-ed ɣer wemkan-nni anda akken i sen-yebḍa Sidna Ɛisa aɣṛum mi geḥmed Ṛebbi. 6:24 Mi walan lɣaci ulac dinna Sidna Ɛisa akk-d inelmaden-is, rekben tiflukin, zegren ɣer Kafernaḥum ad qellben fell-as. 6:25 Mi t-ufan dinna, nnan-as: A Sidi, melmi d-tusiḍ ɣer dagi? 6:26 Sidna Ɛisa yerra-yasen: S tideț a wen-d-iniɣ: imi teččam aɣṛum armi teṛwam i tețqellibem fell-i mačči imi tfehmem lbeṛhanat-iw. 6:27 Ur țḥebbiṛet ara ɣef yiɛebbaḍ-nwen, ḥebbṛet ɣef tudert yețdumun i dayem. Tudert-agi, d Mmi-s n bunadem ara wen-ț-id-yefken, Baba Ṛebbi yefka-yas tazmert imi i t-iɛellem s ṭṭabeɛ-ines. 6:28 Nnan-as: D acu ara nexdem ihi, d acu i gețṛaǧu Ṛebbi deg-nneɣ? 6:29 Sidna Ɛisa yenna-yasen: Sidi Ṛebbi yețṛaǧu deg-wen aț-țamnem s win i d-iceggeɛ! 6:30 Nutni nnan-as: Ihi acu n lbeṛhan ara ɣ-d-tessekneḍ akken a namen yis-ek? D acu ara txedmeḍ? 6:31 Lejdud-nneɣ ččan tamanna deg unezṛuf, akken yura di ccariɛa n Musa: Yefka-yasen ččan aɣṛum i d-yekkan seg igenni. 6:32 Dɣa Sidna Ɛisa yenna-yasen: S tideț nniɣ-awen, mačči d Musa i wen-d-yefkan aɣṛum i d-yekkan seg igenni, lameɛna d Baba Ṛebbi! D nețța i wen-d-yețțaken aɣṛum n ṣṣeḥ i d-itekken seg igenni. 6:33 Axaṭer aɣṛum i d-yekkan s ɣuṛ Ṛebbi, d win i d-iṣubben seg igenni, d nețța i d-yețțaken tudert n ṣṣeḥ i yemdanen. 6:34 Nutni nnan-as: A Sidi țțak-aɣ-d mkul ass seg weɣṛum-agi. 6:35 Sidna Ɛisa yenna-yasen: D Nekk i d aɣṛum yețțaken tudert. Win i d-yusan ɣuṛ-i ur yețțuɣal ara ad illaẓ, win yumnen yis-i ur yețțuɣal ara ad iffad. 6:36 Nniɣ-awen-t-id yakan: twalam yerna tugim aț-țamnem! 6:37 Wid akk ara yi-d-yefk Baba Ṛebbi a d-asen ɣuṛ-i; win ara d-yasen ɣuṛ-i ur t-țarraɣ ara ɣef tewwurt. 6:38 Ur d-ṣubbeɣ ara seg igenni akken ad xedmeɣ lebɣi-w, ṣubbeɣ-d ad xedmeɣ lebɣi nwin i yi-d-iceggɛen. 6:39 Win i yi-d iceggɛen ur yebɣi ara ad yeɛṛeq ula d yiwen seg wid i yi-d-yefka, lameɛna a ten-id-sseḥyuɣ si lmut deg wass aneggaru. 6:40 D wagi i d lebɣi n Baba Ṛebbi: «kra n win yețmuqulen ɣer Mmi-s, yumen yis, ad yesɛu tudert n dayem yerna a t-id-sseḥyuɣ si lmut ass aneggaru.» 6:41 Lɣaci bdan smermugen gar-asen ɣef Sidna Ɛisa imi d yenna: «d nekk i d aɣṛum i d yekkan seg igenni.» 6:42 Qqaṛen: «Mačči d Ɛisa mmi-s n Yusef wagi? Nessen baba-s nessen yemma-s, amek i gezmer a d-yini tura: ṣubbeɣ-d seg igenni?» 6:43 Sidna Ɛisa yenna-yasen: Beṛkat asmermeg gar-awen! 6:44 Ulac win i gzemren a d-yas ɣuṛ-i ma yella mačči d Baba Ṛebbi i s-d yessawlen, yerna nekk a t-id-sseḥyuɣ si lmut ass aneggaru. 6:45 Akken yura deg idlisen n lenbiya: «Ad lemden akk s ɣuṛ Ṛebbi.» Kra n win isellen i wawal n Baba Ṛebbi, ilemden s ɣuṛ-es, a d-yas ɣuṛ-i. 6:46 Ulac win yeẓran Baba Ṛebbi ala win i d-yusan s ɣuṛ-es, nețța yeẓra Baba Ṛebbi. 6:47 S tideț nniɣ-awen: kra n win yumnen, yesɛa tudert n dayem, 6:48 axaṭer d nekk i d aɣṛum i d yețțaken tudert. 6:49 Ɣas akken lejdud nwen ččan tamanna deg unezṛuf, mmuten. 6:50 Atan weɣṛum i d-yekkan seg igenni: win ara yeččen seg-s ur yețmețțat ara. 6:51 D nekk i d aɣṛum n tudert i d yekkan seg igenni. Kra n win ara yeččen seg weɣṛum-agi ad yidir i dayem. Aɣṛum ara d-fkeɣ d lǧețța w, yis ara tɛic ddunit. 6:52 Mi slan wat Isṛail i wannect-agi bdan țemjadalen qqaṛen wway gar asen: Amek akka i gezmer a ɣ-d-yefk aksum-is a t-nečč? 6:53 Sidna Ɛisa yenna-yasen daɣen: S tideț a wen-d-iniɣ: m'ur teččim ara si lǧețța n Mmi-s n bunadem, m'ur teswim ara seg idammen-is ur tețțili ara deg-wen tudert. 6:54 Win ara yeččen si lǧețța-w, ara yeswen seg idammen-iw ad yesɛu tudert n dayem, yerna a t-id-sseḥyuɣ si lmut ass aneggaru. 6:55 Axaṭer lǧețța-w d lqut n ṣṣeḥ, idammen-iw ț-țissit n ṣṣeḥ. 6:56 Win ara yeččen si lǧețța-w, ara yeswen seg idammen-iw ad yili deg-i nekk ad iliɣ deg-s. 6:57 Baba Ṛebbi i yi-d-iceggɛen deg-s i tella tudert, d nețța i yi ssidiren. Akken daɣen win ara yeččen seg-i ad yidir yis-i. 6:58 D wagi i d aɣṛum i d-yekkan seg igenni. Mačči am weɣṛum-nni i ččan lejdud-nwen; nutni mmuten, ma d win ara yeččen aɣṛum-agi ad yidir i dayem. 6:59 D imeslayen-agi i d-yenna Sidna Ɛisa asmi i gesselmed di lǧameɛ n wat Isṛail di temdint n Kafernaḥum. 6:60 Mi s-slan inelmaden-is, aṭas deg-sen nnan: Imeslayen-agi weɛṛen, anwa i gzemren a ten-yeqbel? 6:61 Sidna Ɛisa, mi geẓra inelmaden is sgermuden wway gar-asen ɣef wayen i d-yenna, yenna-yasen: Iqṛeḥ-ikkun lḥal? 6:62 D acu ara tinim ihi m'ara teẓrem Mmi-s n bunadem yuɣal ɣer wanda yella di tazwara? 6:63 D Ṛṛuḥ i d-yețțaken tudert amdan ur yețțaweḍ ɣer wacemma ma yețkel ɣef yiman-is. Imeslayen-agi i wen-d-nniɣ, d wigi i d Ṛṛuḥ, d wigi i ț-țudert. 6:64 Lexsaṛa: llan kra gar awen ur numin ara! Si tazwara Sidna Ɛisa yeẓra anwi deg-sen ur numin ara, yeẓra daɣen anwa ara t-ixedɛen. 6:65 Yenna-yasen daɣen: Daymi i wen-d-nniɣ: ulac win i gzemren a d-yas ɣuṛ-i ma yella mačči d Baba Ṛebbi i s-d-issawlen.» 6:66 Seg imiren, aṭas i t-yeǧǧan seg inelmaden-is, rewlen fell-as. 6:67 Sidna Ɛisa yezzi ɣer tnac inelmaden-is, yenna-yasen: Ur tebɣim ara aț-țṛuḥem ula d kunwi? 6:68 Semɛun Buṭrus yerra-yas: A Sidi, anwa i ɣer ara nṛuḥ? Ɣuṛ-ek i gella wawal n tudert. 6:69 Nukni nesɛa laman deg-k, yerna neẓra belli d kečč i d Imqeddes i d-iceggeɛ Sidi Ṛebbi. 6:70 Sidna Ɛisa yenna-yasen: Mačči d nekk i kkun-ixtaṛen di tnac yid-wen? Ɣas akken yiwen gar awen d Cciṭan. 6:71 Yenna-d annect-agi ɣef Yudas, mmi-s n Semɛun n taddart n Qeṛyut, yiwen ger tnac inelmaden-is ara t-ixedɛen.

Yuḥenna 7

7:1 Deffir wayagi, Sidna Ɛisa ikemmel abrid-is iteddu di tmurt n Jlili. Ur yebɣi ara ad iṛuḥ ɣer tmurt n Yahuda, axaṭer imeqqranen n wat Isṛail țqelliben fell-as iwakken a t nɣen. 7:2 Lɛid i deg xeddmen wat Isṛail tiɛecciwin iqeṛṛeb-ed. 7:3 Dɣa atmaten is nnan-as: Kker aț-țṛuḥeḍ ɣer tmurt n Yahuda akken inelmaden-ik yellan dinna ad ẓren ayen i txeddmeḍ. 7:4 Win yebɣan ad yețwassen, ur ilaq ara ad iffer wayen i gxeddem. Imi tzemreḍ i lecɣal imeqqranen, sbeggen-ed iman-ik a k-walin akk yemdanen. 7:5 Atmaten-is s yiman-nsen ur uminen ara yis. 7:6 Sidna Ɛisa yenna-yasen: Ma yella ɣuṛ-wen iwweḍ-ed lweqt, nekk ɣuṛ-i mazal. 7:7 Medden ur sɛin ara sebba s wayes ara kkun keṛhen, keṛhen-iyi nekk imi d-sbeggneɣ yir lecɣal-nsen. 7:8 Kunwi ṛuḥet aț-țɛeggdem, ma d nekk ur tedduɣ ara, imi lweqt-iw urɛad i d-yusi. 7:9 Mi sen-d-yenna ayagi, yeǧǧa-ten ṛuḥen, nețța yeqqim di tmurt n Jlili. 7:10 Mi ṛuḥen watmaten-is ad ɛeggden, iṛuḥ ula d nețța mbla ma yesseɛlem yiwen. 7:11 Deg ussan n lɛid, imeqqranen n wat Isṛail țnadin fell-as, steqsayen anda yella. 7:12 Lɣaci i d-yusan ad ɛeggden, bdan țmeslayen fell-as. Kra deg-sen qqaṛen: D argaz n lxiṛ! Wiyaḍ qqaṛen: Awah! Yețkellix kan ɣef lɣaci! 7:13 Yiwen ur d-yehdiṛ fell-as ɛinani axaṭer uggaden imeqqranen n wat Isṛail. 7:14 Mi gneṣṣef lɛid n iɛecciwen, Sidna Ɛisa yuli ɣer lǧameɛ iqedsen, yebda yesselmad. 7:15 At Isṛail wehmen, qqaṛen: Ur yeɣṛi ara d lɛulama yerna yessen tira iqedsen, ansi i s-d-tekka tmusni-yagi? 7:16 Sidna Ɛisa yenna yasen: Ayen i sselmadeɣ mačči s ɣuṛ-i i d-yekka, yekka-d s ɣuṛ win i yi-d iceggɛen. 7:17 Win iqesden ad yexdem lebɣi n Ṛebbi ad yeɛqel ma yella wayen i sselmadeɣ yekka-d s ɣuṛ Ṛebbi neɣ d imeslayen-iw kan. 7:18 Win iheddṛen s yisem-is yețqellib ad yawi cciɛa i yiman-is. Ma d win yețqelliben a d-yawi cciɛa i win i t-id iceggɛen yeqqaṛ tideț, ulac deg-s lexdeɛ. 7:19 Nnbi Musa yeǧǧa-yawen-d ccariɛa, lameɛna ulac gar-awen win i ț-itebɛen! Acuɣeṛ i tețqellibem a yi tenɣem? 7:20 Lɣaci nnan-as: Anwa akka i gebɣan a k-ineɣ? Waqila ikcem-ik lǧen! 7:21 Sidna Ɛisa yenna-yasen: Ɣef wayen akka xedmeɣ i twehmem? 7:22 Meyzet ɣef wayagi: nnbi Musa yeǧǧa-yawen-d lextana (ṭṭhaṛa), lɛadda-agi mačči s ɣuṛ-es i d-tekka meɛna s ɣuṛ lejdud-is. Atan tqeblem tessextanem deg wass n westeɛfu. 7:23 Ma yella tqeblem aț-țesxetnem i weqcic deg ass n westeɛfu, iwakken ur tețxalafem ara ccariɛa n Musa, acuɣeṛ terfam fell-i imi sseḥlaɣ amdan s lekmal-is deg wass n westeɛfu? 7:24 Beṛkat! Ur ḥekkmet ara s wayen kan i țwalint wallen-nwen, lemdet aț-țḥekmem s lḥeqq. 7:25 Kra n imezdaɣ n temdint n Lquds wehmen, qqaṛen: Mačči d win akken i țqelliben a t-nɣen? 7:26 Atan iheddeṛ ɛinani zdat lɣaci, yiwen ur s-yenni acemma! Ɛeqlen-t lɛulama-nneɣ d nețța i d Lmasiḥ? 7:27 Argaz-agi neẓra ansi-t, lameɛna Lmasiḥ asm'ara d-yas yiwen ur iẓerr ansi ara d-yekk. 7:28 Sidna Ɛisa yenṭeq s ṣṣut ɛlayen, slan-as-d akk deg wefrag n Lǧameɛ iqedsen, yenna: Tessnem-iyi yerna teẓram ansi i d-kkiɣ! Ur d-usiɣ ara s lebɣi-w, lameɛna d Bab n lḥeqq i yi-d iceggɛen; kunwi ur t-tessinem ara. 7:29 Nekkini ssneɣ-t axaṭer s ɣuṛ-es i d-usiɣ yerna d nețța i yi-d-iceggɛen. 7:30 Bɣan a t-ṭṭfen imiren, meɛna yiwen ur yesris afus-is fell-as imi ass-is urɛad d-yewwiḍ. 7:31 Aṭas n lɣaci si terbaɛt-nni i gumnen yis, qqaṛen: M'ara d-yas Lmasiḥ, eɛni ad ixdem lbeṛhanat yugaren wigi? 7:32 Ifariziyen wwin-d s lexbaṛ s wayen heddṛen lɣaci ɣef Sidna Ɛisa, dɣa lmuqedmin imeqqranen akk-d ifariziyen ceggɛen iɛessasen a t-id ṭṭfen. 7:33 Sidna Ɛisa yenna i lɣaci: Mazal-iyi kra n lweqt yid-wen, syin akkin ad uɣaleɣ ɣer win i yi-d iceggɛen. 7:34 Aț-țqellbem fell-i ur iyi-tețțafem ara imi ur tezmirem ara a d-tasem ɣer wanda ara yiliɣ. 7:35 At Isṛail qqaṛen wway gar-asen: Anda akka ara iṛuḥ armi ur nețțizmir ara a t-naf? Eɛni ad iṛuḥ ɣer wat Isṛail ițwazerɛen ger leǧnas? Neɣ ibɣa ad isselmed leǧnas nniḍen? 7:36 D acu i gebɣa a d-yini mi d-iqqaṛ: «aț-țqellbem fell-i, ur iyi-tețțafem ara axaṭer ur tezmirem ara a d-tasem ɣer wanda ara yiliɣ.» 7:37 Ass aneggaru n lɛid, yellan d ass yesɛan aṭas n lqima; Sidna Ɛisa ibedden ger lɣaci iɛeggeḍ, yenna: Win iffuden a d-yas ɣuṛ-i ad isew; win yumnen yis-i a d-yas ad isew. 7:38 Akken yura di lkutub: D isaffen n waman ara d-ițfeggiḍen seg-s. 7:39 Sidna Ɛisa yenna-d ayagi ɣef Ṛṛuḥ iqedsen ara yeččaṛen ulawen n wid yumnen yis. Di lweqt-nni, Ṛṛuḥ iqedsen mazal ur d-ițțunefk ara axaṭer Sidna Ɛisa werɛad yekcim tamanegt-is. 7:40 Ger lɣaci i s-d-yeslan, llan wid yeqqaṛen: Argaz-agi mbla ccekk d nețța i d nnbi-nni ara d-yasen! 7:41 Wiyaḍ qqaṛen: D nețța i d Lmasiḥ! Ma d kra nniḍen qqaṛen: Yezmer Lmasiḥ a d-iffeɣ si tmurt n Jlili? 7:42 Ur yuri ara di tira iqedsen: Lmasiḥ a d-yeffeɣ si dderya n Sidna Dawed, si taddart n Bitlḥem? 7:43 S wakka i gebda yețțimɣuṛ lxilaf ger lɣaci ɣef Sidna Ɛisa. 7:44 Kra deg-sen bɣan a t-ḥebsen lameɛna yiwen ur yesris afus-is fell-as. 7:45 Mi yuɣalen iɛessasen i d-yețwaceggɛen a t-ṭṭfen, lmuqedmin imeqqranen d ifariziyen nnan-asen: Iwacu ur t-id-tewwim ara? 7:46 Nutni rran-asen: Di leɛmeṛ ur nesli i yiwen iheddeṛ am nețța. 7:47 Ifariziyen nnan-asen: Iseḥḥer-ikkun ula d kunwi? 7:48 Teẓram yiwen si lecyux-nneɣ, neɣ seg ifariziyen i gumnen yis? 7:49 Anagar lɣaci-agi ur nessin ara ccariɛa... a ten-inɛel Ṛebbi! 7:50 Nikudem yellan d yiwen seg-sen, win akken i gṛuḥen deg iḍ ɣer Sidna Ɛisa, yenna-yasen: 7:51 Tserreḥ-aɣ ccariɛa-nneɣ a neḥkem ɣef yiwen uqbel a s-nsel neɣ uqbel a nẓer d acu n cceṛ i gexdem? 7:52 Nutni rran-as: Ula d kečč d ajlili? Qelleb mliḥ di tira iqedsen aț-țafeḍ: «Ulac nnbi ara d-yekken si tmurt n Jlili.» 7:53 Imiren, mkul yiwen yuɣal ɣer wexxam-is.

Yuḥenna 8

8:1 Sidna Ɛisa yuli s yiɣil uzemmur; 8:2 azekka-nni, ssbeḥ zik yuɣal ɣer lǧameɛ iqedsen. Lɣaci meṛṛa uzzlen-d ɣuṛ-es. Sidna Ɛisa yeqqim gar-asen, yebda yesselmad iten deg ufrag n lǧameɛ. 8:3 Atnaya lɛulama n ccariɛa akk-d ifariziyen wwin-as-d yiwet n tmeṭṭut ṭṭfen-ț txeddem zzna. Sbedden-ț ger lɣaci akken a ț iwali Sidna Ɛisa. 8:4 Nnan-as: A Sidi, neṭṭef tameṭṭut-agi mi txeddem zzna. 8:5 Di ccariɛa, Sidna Musa yumeṛ-aɣ-d a neṛjem s yedɣaɣen tameṭṭut am tagi alamma temmut. I keččini d acu ara d-tiniḍ? 8:6 Steqsan-t iwakken a t-jeṛṛben, țnadin sebba s wacu ara ccetkin fell-as. Sidna Ɛisa yekna, yețțaru s uḍad-is di lqaɛa. 8:7 Imi t-ḥeṛṣen s usteqsi, yekker yenna-yasen: Win deg-wen werǧin yednib a ț-yeṛjem d amezwaru! 8:8 Yekna daɣen yețțaru di lqaɛa. 8:9 Lɣaci-nni, mi slan annect-agi, bdan tixxiṛen yiwen yiwen, seg umɣaṛ armi d ameẓyan. Ǧǧan dinna Sidna Ɛisa weḥd-es di tlemmast n wefrag n lǧameɛ iqedsen, nețța ț-țmeṭṭut-nni. 8:10 Dɣa yerfed allen-is, yenna-yas: A tameṭṭut, anda-ten widak-nni i d-icetkan fell-am? Ulac win iḥekmen fell-am? 8:11 Tenna-yas: Ulac a Sidi! Sidna Ɛisa yenna-yas: Ula d nekk ur ḥekkmeɣ ara fell-am. Ṛuḥ, meɛna sya d asawen xḍu i ddnub. 8:12 Sidna Ɛisa iheddeṛ i lɣaci yenna yasen: D nekk i ț-țafat n ddunit, win ara yi-tebɛen ur iteddu ara di ṭṭlam, lameɛna ad yesɛu tafat n tudert. 8:13 Ifariziyen nnan-as: Tețcehhiḍeḍ ɣef yiman-ik, cchada-inek ur tṣeḥḥa ara. 8:14 Sidna Ɛisa yenna-yasen: Ț-țideț, țcehhideɣ ɣef yiman-iw, lameɛna cchada-inu tṣeḥḥa, axaṭer Ẓriɣ ansi d-kkiɣ, ẓriɣ daɣen ɣer wanda tedduɣ. Ma d kunwi ur te?rim ansi d-kkiɣ ur teẓrim anda tedduɣ. 8:15 Kunwi tḥekkmem ɣef wiyaḍ s lɛeqliya n wemdan, ma d nekk ur ḥekkmeɣ ɣef yiwen. 8:16 Ma yella yewwi-d lḥal ad ḥekmeɣ, ad ḥekkmeɣ s lḥeqq axaṭer ur lliɣ ara weḥd-i, Baba Ṛebbi i yi-d-iceggɛen yella yid-i. 8:17 Yura di ccariɛa-nwen belli ma ddukklen sin inigan ɣef yiwet n cchada, cchada-nsen tețwaqbel. 8:18 Atan nekk cehdeɣ-ed ɣef yiman-iw, Baba i yi-d-iceggɛen d inigi fell-i. 8:19 Nutni nnan-as: Anda yella Baba-k? Yerra-yasen: Ur iyi-tessinem, ur tessinem Baba. Lemmer i yi-tessinem, tili tesnem Baba. 8:20 Sidna Ɛisa yenna-d annect-agi mi gesselmad deg wefrag n lǧameɛ iqedsen, zdat wemkan anda srusun lweɛdat. Ula d yiwen ur yesris afus-is fell-as axaṭer urɛad d-yewwiḍ wass-is. 8:21 Sidna Ɛisa yerna yenna-yasen: Atan ad ṛuḥeɣ, aț-țqellbem fell-i lameɛna aț-țemtem di ddnub-nwen, ur tezmirem ara a d-tasem ɣer wanda ara ṛuḥeɣ. 8:22 At Isṛail qqaṛen wway gar-asen: Ahat yebɣa ad ineɣ iman-is imi ɣ-d-yenna ur tezmirem ara a d-tasem ɣer wanda ara ṛuḥeɣ? 8:23 Sidna Ɛisa yerra-yasen: Kunwi n lqaɛa nekk n igenwan; kunwi n ddunit-agi nekk mačči-yines. 8:24 Daymi i wen-d-nniɣ aț-țemtem di ddnub-nwen. Atan m'ur tuminem ara belli nekk «d Win yellan,» aț-țemtem di ddnub-nwen. 8:25 Nnan-as: Anwa-k keččini? Sidna Ɛisa yerra-yasen: D win akken i wen-d-qqaṛeɣ si tazwara. 8:26 Ɣef wayen i kkun-yeɛnan sɛiɣ aṭas ara d-iniɣ, aṭas ara ḥasbeɣ; win i yi-d-iceggɛen d Bab n tideț, d ayen i sliɣ ɣuṛ-es i d-țɛawadeɣ di ddunit. 8:27 Imi ur fhimen ara belli ɣef Baba Ṛebbi i sen-d-iheddeṛ, 8:28 yenna-yasen daɣen: Asm'ara tessaɛlim Mmi-s n bunadem, imiren aț-țfiqem belli nekk «d Win yellan!» Aț-țɛeqlem belli ur xeddmeɣ acemma s yiman-iw, lameɛna qqaṛeɣ-ed ayen i yi-iselmed Baba Ṛebbi. 8:29 Win i yi-d-iceggɛen yella yid-i, ur yi-țțaǧa ara weḥd-i imi dayem xeddmeɣ lebɣi-s. 8:30 Mi d-yenna imeslayen-agi, aṭas i gumnen yis. 8:31 Sidna Ɛisa yenna i wat Isṛail i gumnen yis: Ma teṭṭfem s tideț deg awal-iw aț-țilim d inelmaden-iw n ṣṣeḥ. 8:32 Aț-țissinem tideț, tideț ara kkun isuffɣen ɣer tlelli. 8:33 Nnan-as: Nukni ț-țarwa n Sidna Ibṛahim. Di leɛmeṛ ur nelli d aklan n walebɛaḍ; amek i tzemreḍ a d-tiniḍ: «Aț-țesɛum tilelli»? 8:34 Sidna Ɛisa yerra-yasen: S tideț qqaṛeɣ-awen: kra n win ixeddmen ddnub d akli n ddnub. 8:35 Aklan ur țwaḥsaben ara n at wexxam ma d mmi-s n wexxam yețwaḥseb dayem n at wexxam. 8:36 Ma yella d Mmi-s i wen-d-yefkan tilelli, aț-țilim s tideț di tlelli. 8:37 Ẓriɣ belli kunwi ț-țarwa n Ibṛahim, lameɛna tețnadim a yi tenɣem axaṭer awal-iw ur ikeččem ara ulawen-nwen. 8:38 Nekk qqaṛeɣ-ed ayen ẓriɣ ɣer Baba, ma d kunwi txeddmem ayen i tlemdem s ɣuṛ Baba-twen! 8:39 At Isṛail rran-as: Baba-tneɣ nukkni, d Sidna Ibṛahim. Sidna Ɛisa yenna-yasen: Lemmer ț-țideț d arraw n Ibṛahim i tellam, tili txeddmem lecɣal i gxeddem Ibṛahim; 8:40 kunwi tețqellibem a yi-tenɣem, acuɣeṛ? Axaṭer qqaṛeɣ-awen-d tideț akken i ț-sliɣ ɣer Baba Ṛebbi. Ibṛahim di leɛmeṛ ur yexdim am kunwi! 8:41 Kunwi txeddmem akken i gxeddem Baba twen! Nutni rran-as: Ur nelli ara d arraw n leḥṛam; nesɛa yiwen n Baba-tneɣ kan: d Ṛebbi! 8:42 Sidna Ɛisa yenna-yasen: Lemmer ț-țideț d Ṛebbi i d Baba twen tili tḥemmlem-iyi axaṭer s ɣuṛ-es i d-kkiɣ, s ɣuṛ-es i d-usiɣ ɣuṛ-wen. Ur d-usiɣ ara s yiman-iw lameɛna d nețța i yi-d-iceggɛen. 8:43 Acuɣeṛ ur tfehhmem ara ayen i wen-d-qqaṛeɣ? Axaṭer ur tezmirem ara aț-țqeblem imeslayen-iw. 8:44 Baba-twen d Cciṭan yerna tebɣam aț-țxedmem lebɣi-s. Nețța d bu-tmegṛaḍ si tazwara, ur yeṭṭif ara di tideț axaṭer ulac deg-s tideț. M'ara yeskiddib, yețmeslay-ed seg ul-is imi d ameskaddab i gella; d nețța i d bab n lekdeb. 8:45 Lameɛna nekk qqaṛeɣ-d tideț, daymi ur iyi-tețțamnem ara. 8:46 Anwa deg-wen ara yi-d-issuksen ula yiwet n lɣelṭa? Ma nniɣ-ed tideț, iwacu ur iyi-tețțamnem ara? 8:47 Win yellan n Ṛebbi yesmeḥsis i wawal n Ṛebbi. Kunwi ur tellim ara n Ṛebbi, daymi ur tesmeḥsisem ara i wawal-is. 8:48 At Isṛail nnan-as: Nesɛa lḥeqq mi d-nenna kečč d asamari, yerna izdeɣ-ik uṛuḥani! 8:49 Sidna Ɛisa yerra-yasen: Ur iyi-izdiɣ ara uṛuḥani. Nekk țɛuzzuɣ Baba Ṛebbi, kunwi tḥeqṛem-iyi. 8:50 Ur țqellibeɣ ara ccan i yiman-iw, yella win yețḥebbiṛen fell-i, d nețța ara yi-d-yefken lḥeqq. 8:51 A wen-iniɣ tideț: win iḥerzen awal-iw ur yețmețțat ara maḍi. 8:52 At Isṛail nnan-as: Atan tura iban izdeɣ-ik uṛuḥani! Sidna Ibṛahim yemmut, lenbiya mmuten, kečč teqqaṛeḍ: win iḥerzen awal-iw ur yețmețțat ara maḍi! 8:53 Tugareḍ baba-tneɣ Ibṛahim neɣ lenbiya meṛṛa i gemmuten? D acu i tḥesbeḍ iman-ik? 8:54 Sidna Ɛisa yerra-yasen: Ma fkiɣ ccan i yiman-iw, ccan-iw ur yesɛi ara azal. Win i yi-d-yețțaken ccan d Baba, win akken i teqqaṛem «d Ṛebbi-nneɣ.» 8:55 Kunwi ur t-tessinem ara, nekkini ssneɣ-t. Ma nniɣ-ed ur t-ssineɣ ara ad uɣaleɣ d akeddab am kunwi. Lameɛna ssneɣ-t yerna xeddmeɣ lebɣi-s. 8:56 Baba-twen Ibṛahim yefṛeḥ mi geẓra iteddu-d wass-iw, tura mi t-yeẓra yefṛeḥ aṭas. 8:57 At Isṛail nnan-as: Amek, urɛad tesɛiḍ xemsin iseggasen teqqaṛeḍ walaɣ Ibṛahim? 8:58 Sidna Ɛisa yenna-yasen: Uqbel a d-ilal Ibṛahim, lliɣ! 8:59 Ɣef wannect-agi i d-ddmen wat Isṛail iblaḍen iwakken a t-ṛeǧmen. Sidna Ɛisa yekcem ger lɣaci, yeffeɣ seg wefrag n lǧameɛ iqedsen.

Yuḥenna 9

9:1 Deg ubrid-is, Sidna Ɛisa iwala yiwen wergaz, d aderɣal seg wasmi i d-ilul. 9:2 Inelmaden-is steqsan-t nnan-as: A Sidi, iwacu i d-ilul wergaz-agi d aderɣal? Anwa i gdenben d nețța neɣ d imawlan-is? 9:3 Sidna Ɛisa yerra-yasen: Tidderɣelt-agi ur d-tekki ara si ddnub-is neɣ si ddnub n imawlan-is, lameɛna iwakken medden meṛṛa ad ẓren ayen i gezmer Ṛebbi a t-ixdem. 9:4 Skud mazal tafat n wass, ilaq-aɣ a nexdem lecɣal n win i yi-d iceggɛen; iteddu-d yiḍ anda yiwen ur yezmir ad ixdem. 9:5 Skud mazal lliɣ di ddunit d nekk i ț-țafat n ddunit. 9:6 Mi d-yenna imeslayen-agi, Sidna Ɛisa yessusef ɣer lqaɛa, yexleḍ akal s tsusaf-is, yeḍla-t ɣef wallen n uderɣal-nni, 9:7 yenna-yas: Ṛuḥ aț-țessirdeḍ di tala n Silwi (Silwi lmeɛna-ines «amceggeɛ»). Aderɣal-nni iṛuḥ a d-issired, mi d-yuɣal, yețwali. 9:8 Lǧiran-is akk-d wid i t-yessnen itețțer, qqaṛen: Argaz-agi mačči d win akken yețɣimin ɣer lqaɛa yezga yessutur tin n Ṛebbi? 9:9 Kra qqaṛen: D nețța. Wiyaḍ qqaṛen: Mačči d nețța, d wayeḍ i gțemcabin ɣuṛ-es. Ma d nețța yeqqaṛ: D nekk s yiman-iw. 9:10 Nnan-as: Ihi amek i d-ldint wallen ik? 9:11 Nețța yerra-yasen: Argaz-nni iwumi qqaṛen Ɛisa yexleḍ akal s tsusaf-is, yeḍla-t i wallen-iw, yenna-yi-d: «Ṛuḥ aț-țessirdeḍ di tala n Silwi.» Mi ṛuḥeɣ ssardeɣ, imiren kan yuɣal iyi-d yeẓri. 9:12 Nutni nnan-as: Anda-t wergaz-agi? Yenna-yasen: Ur ẓriɣ ara anda yerra 9:13 Wwin argaz-nni yellan zik d aderɣal ɣer ifariziyen. 9:14 Yuɣ lḥal deg wass n westeɛfu i gexleḍ Sidna Ɛisa akal s tsusaf-is, i s-d-yerra iẓri i uderɣal-nni. 9:15 Ifariziyen steqsan-t amek armi i t-id-yuɣal yeẓri. Nețța yenna-yasen: Yexleḍ akal s tsusaf-is, yeḍla-t ɣef wallen-iw, ṛuḥeɣ ssardeɣ udem-iw, imiren kan uɣaleɣ țwaliɣ. 9:16 Ɣef wakka i nnan kra seg ifariziyen: Argaz-agi ur yezmir ara a d-yekk s ɣuṛ Ṛebbi, imi ur yețqadaṛ ara lqanun n wass n westeɛfu. Ma d wiyaḍ qqaṛen: Lemmer d amednub i gella amek i gezmer ad ixdem lbeṛhanat am wigi? Yekker lxilaf ger lɣaci-nni, 9:17 ifariziyen rnan steqsan daɣen aderɣal-nni: I kečč d acu ara d-tiniḍ deg wergaz-agi i k-d-yeldin allen? Nețța yenna-yasen: Nekk a d-iniɣ, argaz-agi ț-țideț d nnbi. 9:18 Lameɛna imeqqranen n wat Isṛail ugin ad amnen belli argaz-nni yella si zik d aderɣal, yuɣal yețwali. Uɣalen ceggɛen ɣer imawlan-is, usan-d. 9:19 Steqsan-ten nnan-asen: Argaz-agi, ț-țideț d mmi-twen? D ṣṣeḥ ilul-ed d aderɣal? Amek armi i guɣal yețwali tura? 9:20 Imawlan n uderɣal-nni nnan asen: Ț-țideț, d mmi-tneɣ yerna ilul-ed d aderɣal. 9:21 Meɛna amek i guɣal yețwali tura neɣ anwa i s-d-yerran i?ri... ur neẓri ara! Steqsit-eț nețța, d argaz i gella, izmer a d-yerr s yiman-is. 9:22 Imawlan-is nnan-asen akka, axaṭer uggaden lecyux n wat Isṛail i gqesden ad sṭixṛen si lǧameɛ-nsen kra n win ara icehden belli Ɛisa d Lmasiḥ. 9:23 Daymi i sen-nnan imawlan is: «D argaz i gella, yezmer ad yerr s yiman-is.» 9:24 Ifariziyen ssawlen tikkelt tis snat i wergaz-nni iwumi d-yuɣal yeẓri nnan-as: Ɛuzz Sidi Ṛebbi, ini-d tideț. Nukni neẓra belli argaz-agi d amednub. 9:25 Nețța yerra-yasen: Ur ẓriɣ ara ma d amednub i gella; nekk ẓriɣ yiwet lḥaǧa: «Lliɣ d aderɣal, tura țwaliɣ». 9:26 Nnan-as daɣen: D acu i k-ixdem? Amek i k-d-yeldi allen-ik? 9:27 Yerra-yasen: Nniɣ-awen-t-id yakan meɛna ur iyi-d-semḥessem ara. Iwacu tebɣam a wen-t-id-ɛiwdeɣ? Ula d kunwi tebɣam aț-țuɣalem d inelmaden-is? 9:28 Regmen-t, nnan-as: D kečč i d anelmad-is, nukkni d inelmaden n Sidna Musa. 9:29 Neẓra belli Ṛebbi ihḍeṛ-ed i Sidna Musa, ma d wagi ur neẓri ara ansi i d-yekka. 9:30 Argaz-nni yerra-yasen: D ayen yessewhamen! Argaz yeldi-yi-d allen, kunwi ur te?rim ara ansi i d-yekka! 9:31 Medden akk ẓran belli Ṛebbi ur d-iqebbel ara ddeɛwat n yemcumen, lameɛna iqebbel-ed win i t-iḍuɛen, ixeddmen lbɣi-is. 9:32 Seg wasmi i d-texleq ddunit werǧin nesli s yiwen yeldi-d allen i win i d-ilulen d aderɣal. 9:33 Lemmer argaz-agi mačči s ɣuṛ Ṛebbi i d-yekka tili ur yezmir ad yexdem acemma. 9:34 Rran-as: Amek! Seg wasmi i d-luleḍ kečč di ddnub seg iḍaṛṛen armi d aqeṛṛuy, tura tusiḍ-ed a ɣ tesfehmeḍ? Dɣa qecɛen-t (ḍerqen-t ) ɣer beṛṛa. 9:35 Sidna Ɛisa yesla belli qecɛen argaz-nni ɣer beṛṛa. Iṛuḥ ɣuṛ-es, yenna-yas: Ini-yi-d, tumneḍ s Mmi-s n bunadem? 9:36 Yerra-yas: Anwa-t a Sidi? Ini-yi-t-id iwakken ad amneɣ yis. 9:37 Sidna Ɛisa yenna-yas: Aql-ik tețwaliḍ-t s wallen-ik, d nețța s yiman-is i d-yețmeslayen yid-ek tura. 9:38 Argaz-nni yenna-yas: Umneɣ a Sidi! Dɣa yeɣli ɣef tgecrar zdat-es. 9:39 Sidna Ɛisa yenna: D wagi i d lḥisab ɣef wacu i d-usiɣ ɣer ddunit: wid ur nețwali ara ad walin, wid yețwalin ad uɣalen d iderɣalen. 9:40 Kra n ifariziyen i geslan i imeslayen-is steqsan-t, nnan-as: Ihi ula d nukkni d iderɣalen? 9:41 Sidna Ɛisa yerra-yasen: Lemmer ț-țideț d iderɣalen i tellam tili ulac ddnub fell-awen, lameɛna tura imi teqqaṛem nețwali, ddnub i yirawen-nwen.

Yuḥenna 10

10:1 -- S tideț a wen-d-iniɣ, win ur nkeččem ara si tewwurt ɣer wemṛaḥ (leɛzib ) n wulli, iɛedda si ẓẓeṛb, winna d amakar yerna d aqeṭṭaɛ. 10:2 Ma d win ikeččmen si tewwurt d nețța i d ameksa n wulli. 10:3 Aɛessas n wemṛaḥ ileddi tawwurt i umeksa, ulli sellent i ṣṣut-is, issawal-asent s yismawen-nsent, yessufuɣ-itent ɣer beṛṛa. 10:4 Mi gessufeɣ tid akk yellan-ines, izeggir zdat-sent, ulli ttabaɛent-eț axaṭer ssnent ṣṣut-is. 10:5 D lmuḥal ad tebɛen-t abeṛṛani, ad rewlent fell-as imi ur ssinent ara ṣṣut n ibeṛṛaniyen. 10:6 Sidna Ɛisa yenna-yasen lemtel agi, lameɛna ur fhimen ara ayen yebɣa a sen-yini. 10:7 Yenna yasen daɣen: S tideț qqaṛeɣ-awen, d nekk i ț-țawwurt ansi țɛeddayent wulli. 10:8 Wid meṛṛa i d-yusan uqbel-iw d imakaren d iqeṭṭaɛen. Lameɛna ulli ur sen-ḥessent ara. 10:9 D nekk i ț-țawwurt. Win ara ikecmen yis-i ad yețțusellek: ad ikcem ad yeffeɣ akken i s-ihwa, ad yaf ayen ara yečč. 10:10 Amakar yețțas-ed kan iwakken ad yaker, ad yezlu, ad yessenger. Nekk usiɣ-ed iwakken ad fkeɣ tudert i wulli-inu, tudert s tugeț (ṭaqa). 10:11 D nekk i d ameksa n ṣṣeḥ. Ameksa n ṣṣeḥ yețțsebbil tudert-is ɣef wulli-ines. 10:12 Ma d win ur nelli ara d ameksa n wulli ur nelli ara d bab-nsent, d ameksa kan yețwaxelṣen, ireggel, ițaǧǧa ulli m'ara iwali uccen. Imiren uccen a d-yezḍem ɣef wulli, ad yawi kra seg-sent yerna ad yesserwel akk taqeḍɛit. 10:13 Argaz-agi ixeddem akka imi d ameksa kan yețwaxelṣen, ur as tewqiɛ ara deg wulli. 10:14 Nekk d ameksa n ṣṣeḥ, ssneɣ ulli-inu nutenti ssnent-iyi, 10:15 akken i yi-issen Baba Ṛebbi i t-ssneɣ ula d nekk. Țsebbileɣ tudert-iw ɣef wulli-inu. 10:16 Sɛiɣ daɣen ulli nniḍen ur nelli ara seg wemṛaḥ agi. Tigi daɣen ilaq a tent-id-awiɣ, a d-ḥessent i ṣṣut-iw, s wakka aț-țili anagar yiwet n tqeḍɛit s yiwen umeksa. 10:17 Baba iḥemmel-iyi imi țsebbileɣ tudert-iw meɛna syin akkin a ț-id-rreɣ. 10:18 Yiwen ur izmir a yi-ikkes tudert, țsebbileɣ-ț s lebɣi-inu. Sɛiɣ tazmert a ț-sebbleɣ, sɛiɣ daɣen tazmert a ț-id-rreɣ. D wagi i d lameṛ i yi-d yefka Baba Ṛebbi. 10:19 Mi d-yenna imeslayen-agi, yekker daɣen lxilaf ger lɣaci. 10:20 Aṭas deg-sen qqaṛen: Argaz-agi yezdeɣ-it lǧen, yedderwec, acuɣeṛ i s-tesmeḥsisem? 10:21 Wiyaḍ qqaṛen: Win ițwamelken ur yețmeslay ara akka. Qqaṛen daɣen: Izmer lǧen a d-yerr iẓri i iderɣalen? 10:22 Yewweḍ-ed lweqt anda i țɛeggiden di temdint n Lquds lɛid n weɛzal n Lǧameɛ iqedsen; imiren d ccetwa. 10:23 Sidna Ɛisa yella yețṛuḥu ițțuɣal deg wefrag n Lǧameɛ iqedsen seddaw n wesqif n Sidna Sliman. 10:24 Yezzi-yas-d lɣaci, nnan-as: Ar melmi ara ɣ-teǧǧeḍ di ccekk? Ma d Lmasiḥ i telliḍ ini-aɣ t-id ɛinani! 10:25 Sidna Ɛisa yerra-yasen: Nniɣ-awen-t-id ur tuminem ara, yerna twalam lecɣal i xeddmeɣ s yisem n Baba: d lecɣal-agi i d yețcehhiden fell-i. 10:26 Kunwi ur tețțamnem ara axaṭer ur tellim ara seg ulli-inu. 10:27 Ulli-inu smeḥsisent i ṣṣut-iw, ssneɣ-tent yerna ttabaɛent iyi-d. 10:28 Țțakeɣ-asent tudert n dayem, ur țmețțatent ara maḍi, yiwen ur izmir a tent-yekkes seg ufus-iw. 10:29 Baba i yi-tent-id-yefkan yugar kullec, win yellan ger ifassen is, yiwen ur izmir a s-t-id-yekkes 10:30 axaṭer nekk d Baba, d yiwen. 10:31 Jemɛen-d daɣen idɣaɣen akken a t-nɣen. 10:32 Yekker Sidna Ɛisa yenna-yasen: Xedmeɣ zdat-wen aṭas n lecɣal yelhan yessewhamen, s tezmert n Baba; ɣef wanwa deg-sen i tebɣam a yi-tenɣem s iblaḍen? 10:33 At Isṛail nnan-as: Mačči ɣef ccɣel yelhan i nebɣa a k-neṛjem, lameɛna imi i tkeffreḍ! Axaṭer kečč yellan d amdan terriḍ iman-ik d Ṛebbi. 10:34 Sidna Ɛisa yerra-yasen: Eɛni ur yuri ara di ccariɛa nwen: Nekk, Sidi Ṛebbi nniɣ-awen: Kunwi d iṛebbiten! 10:35 Yiwen ur yezmir ad inkeṛ ayen i d-nnant tira iqedsen. Ma yella ccariɛa-nwen tsemma «iṛebbiten» wid iwumi i d-ițțuceggeɛ wawal n Ṛebbi, 10:36 amek armi teqqaṛem fell-i keffṛeɣ mi d-nniɣ «nekk d Mmi-s n Ṛebbi,» eɛni mačči d Baba i yi-ixtaṛen, i yi-d-iceggɛen ɣer ddunit? 10:37 Lemmer ur xeddmeɣ ara lecɣal n Baba tili ur teḥwaǧem ara aț țamnem yis-i. 10:38 Lameɛna ma xeddmeɣ-ten, ɣas akken ur tebɣim ara aț-țamnem yis-i, amnet s lecɣal-iw akken aț țeẓrem, aț-țfehmem belli Baba yella deg-i nekk lliɣ di Baba. 10:39 Ɣef yimeslayen-agi, lecyux n at Isṛail ɛeṛden a t-ṭṭfen lameɛna yemneɛ si ger ifassen-nsen. 10:40 Syenna Sidna Ɛisa iṛuḥ ɣer tama nniḍen n wasif n Urdun, ɣer wemkan nni anda i gesseɣḍes Yeḥya lɣaci, yeqqim dinna kra n wussan. 10:41 Aṭas i d-yusan ɣuṛ-es, qqaṛen wway gar-asen: Yeḥya ur yexdim ula d yiwen lbeṛhan, lameɛna ayen akk i d-yenna ɣef wergaz-agi ț-țideț. 10:42 Dinna, aṭas n lɣaci i gumnen yis.

Yuḥenna 11

11:1 Di taddart n Bitanya, llant snat n tyestmatin, Marṭa d Meryem akk-d gma-tsent Laɛẓar; 11:2 Meryem, ț-țin akken i gdehnen iḍaṛṛen n Sidna Ɛisa s zzit n leɛṭeṛ terna teṣfeḍ-iten s ucebbub-is; tesɛa gma-s Laɛẓar, yehlek yenṭer. 11:3 Yessetma-s ceggɛent ɣer Sidna Ɛisa a s-inin: A Sidi, atan weḥbib-ik yuḍen. 11:4 Mi gesla Sidna Ɛisa s lexbaṛ-agi yenna: Lehlak-agi ur yeṣṣawaḍ ara ɣer lmut, lameɛna a d-yesbeggen tamanegt n Ṛebbi; yis daɣen ara d-tban tmanegt n Mmi-s n Ṛebbi. 11:5 Sidna Ɛisa iḥemmel aṭas Marṭa, Meryem akk-d Laɛẓar. 11:6 Ɣas akken yesla s Laɛẓar yuḍen, yerna sin wussan deg wemkan-nni anda yella. 11:7 Dɣa yenna i inelmaden-is: Eyyaw a nuɣalet ɣer tmurt n Yahuda. 11:8 Nnan-as: A Sidi, mačči aṭas aya segmi țnadin wat Isṛail a k-nɣen s iblaḍen, tura tebɣiḍ aț-țuɣaleḍ ɣer dinna? 11:9 Sidna Ɛisa yerra-yasen: Eɛni ur llint ara tnac n swayeɛ deg wass? Ma ileḥḥu yiwen deg wass ur t-kkaten ara wuguren axaṭer tella tafat, yețwali abrid. 11:10 Lameɛna ma ileḥḥu deg iḍ ad imḍerkal axaṭer ulac tafat. 11:11 Mi d-yenna ayagi, yerna yenna yasen: Aḥbib-nneɣ Laɛẓar tewwi-t tnafa, ad ṛuḥeɣ a t-id-ssakiɣ. 11:12 Ɣef wayagi inelmaden-is nnan as: A Sidi, ma ț-țaguni i geṭṭes ihi a d-yekker. 11:13 Sidna Ɛisa yenna-d ayagi ɣef lmut n Laɛẓar, nutni nwan ɣef tguni i d-yemmeslay. 11:14 Dɣa yenna-yasen ɛinani: Laɛẓar yemmut, 11:15 yerna feṛḥeɣ ɣef ddemma-nwen imi ur lliɣ ara dinna di teswiɛt-nni, axaṭer ayagi d ayen ara yernun di liman-nwen. Eyyaw tura a nṛuḥet ɣuṛ-es. 11:16 Țuma iwumi qqaṛen Akniw, yenna i inelmaden nniḍen: Eyyaw a neddut ula d nukkni iwakken a nemmet yid-es. 11:17 Mi qṛib ad yaweḍ ɣer dinna, Sidna Ɛisa yesla belli ṛebɛa wussan aya segmi i meḍlen Laɛẓar. 11:18 Ad ilin wazal n tlata alaf kilumitrat ger taddart n Bitanya ț-țemdint n Lquds. 11:19 Daymi aṭas n lɣaci i d-yusan ɣer Marṭa d Meryem a tent-ṣebbṛen ɣef lmut n gma-tsent. 11:20 Akken kan i tesla Marṭa belli Sidna Ɛisa iteddu-d ɣer taddart, tuzzel ɣuṛ-es a t-temmager. Ma d Meryem teqqim deg wexxam. 11:21 Marṭa tenna i Sidna Ɛisa: A Sidi, lemmer dagi i telliḍ, tili gma ur yemmut ara. 11:22 Lameɛna ẓriɣ ula ț-țura, ayen akk ara tessutreḍ i Ṛebbi a k-t-id-yeqbel. 11:23 Sidna Ɛisa yenna-yas: Gma-m a d-yuɣal ɣer tudert. 11:24 Marṭa terra-yas: Ẓriɣ a d-yuɣal ɣer tudert ass aneggaru, ass n ḥeggu n lmegtin. 11:25 Sidna Ɛisa yenna-yas: D nekk i d ḥeggu, d nekk i ț-țudert. Win ara yesɛun laman deg-i, ad yidir ɣas ma yemmut. 11:26 Yal amdan yeddren, yumnen yis-i, ur yețmețțat ara maḍi. Tumneḍ s wannect-agi? 11:27 Marṭa tenna-yas: Umneɣ a Sidi, d kečč i d Lmasiḥ, d kečč i d Mmi-s n Ṛebbi, win akken ara d-yasen ɣer ddunit. 11:28 Syenna, Marṭa tṛuḥ tessawel i weltma-s Meryem tenna-yas s tuffra: Sidna Ɛisa yewweḍ-ed, yebɣa a kem-iẓer. 11:29 Mi tesla s lexbaṛ-agi, tekker Meryem tuzzel ɣer Sidna Ɛisa. 11:30 Yuɣ lḥal urɛad i d-yekcim ɣer taddart, mazal-it deg umkan-nni anda akken i t-temmuger Marṭa. 11:31 Wid yellan țṣebbiṛen deg-s deg wexxam, mi ț-walan tekker teffeɣ s tazzla, ḍefṛen-ț, nwan ɣer u?ekka i tṛuḥ iwakken aț-țețru ɣef gma-s. 11:32 Mi tewweḍ Meryem ɣer wemkan anda yella Sidna Ɛisa, akken kan i t-twala, teɣli ɣer iḍaṛṛen-is tenna: A Sidi, lemmer dagi i telliḍ tili gma ur yemmut ara. 11:33 Mi ț-iwala tețru nețțat d wid yellan yid-es, Sidna Ɛisa ijreḥ wul-is, tergagi tasa-s. 11:34 Yenna-yasen: Anda i t-tmeḍlem? Nutni rran-as: Eyya-d aț-țwaliḍ a Sidi. 11:35 Dɣa Sidna Ɛisa yețru. 11:36 Mi t-walan yețru, nnan: Walit acḥal i t-iḥemmel! 11:37 Ma d kra deg-sen qqaṛen: Nețța i d-yerran iẓri i uderɣal, ur yezmir ara ad issemneɛ Laɛẓar si lmut! 11:38 Sidna Ɛisa tejreḥ tasa-s tikkelt tis snat. Mi wwḍen ɣer u?ekka yellan d lɣaṛ imedlen s yiwen wezṛu d ameqqran, 11:39 Sidna Ɛisa yenna: Kkset azṛu-yagi! Marṭa weltma-s n lmegget-nni tenna: A Sidi, ṛebɛa wussan aya segmi yețwamḍel, ad yili yebda yețriḥ! 11:40 Sidna Ɛisa yerra-yas: Ur am-d-nniɣ ara ma tumneḍ aț-țwaliḍ tamanegt n Ṛebbi? 11:41 Kksen azṛu-nni, dɣa Sidna Ɛisa yerfed allen-is ɣer igenni yenna: Tanemmirt-ik a Baba Ṛebbi axaṭer tqebleḍ taẓallit-iw. 11:42 Nekkini ẓriɣ tqebbleḍ-iyi daymen, lameɛna nniɣ-ed akka ɣef ddemma n wid i yi-d-yezzin dagi iwakken ad amnen belli d kečč i yi-d-iceggɛen. 11:43 Imiren kan iɛeggeḍ s lǧehd yenna: A Laɛẓar, effeɣ-ed syenna! 11:44 Ataya lmegget-nni yeffeɣ-ed seg uẓekka, idaṛṛen-is d ifassen-is țțlen, udem-is iɣumm s lekfen. Sidna Ɛisa yenna i wid yellan dinna: Kkset-as lekfen, teǧǧem-t ad iṛuḥ! 11:45 Aṭas seg widak-nni i d-yeddan d Meryem umnen s Sidna Ɛisa mi walan ayen yexdem. 11:46 Kra deg-sen ṛuḥen ɣer ifariziyen ṣṣawḍen-asen lexbaṛ. 11:47 Lmuqedmin imeqqranen d ifariziyen nnejmaɛen deg wexxam n ccṛeɛ, nnan: D acu ara nexdem? Argaz-agi yexdem aṭas n lbeṛhanat, 11:48 ma neǧǧa-t ad ikemmel akka, lɣaci akk ad amnen yis; a d-asen iṛumaniyen a ɣ-hudden lǧameɛ-nneɣ ț-țmurt-nneɣ. 11:49 Kayef yellan aseggas-nni d lmuqeddem ameqqran fell-asen, 11:50 yenṭeq yenna-yasen: Ur teẓrim ara belli ad yemmet axiṛ yiwen ɣef lumma wala ad yenger wegdud-nneɣ? 11:51 Ayagi mačči s ɣuṛ-es i d-yekka meɛna imi i gella d lmuqeddem ameqqran aseggas-nni. Daymi i s-d-iweḥḥa Sidi Ṛebbi belli ilaq ad immet Sidna Ɛisa ɣef wegdud. 11:52 Mačči kan ɣef wegdud-is ara yemmet meɛna akken ad isdukkel arraw n Ṛebbi i gemzerwaɛen di ddunit meṛṛa, a ten-yejmeɛ d yiwen wegdud. 11:53 Ass-nni dɣa i ɛewwlen (qesden ) lmuqedmin imeqqranen ad nɣen Sidna Ɛisa. 11:54 Seg wass-nni, Sidna Ɛisa yejbed iman-is ɣef lɣaci. Iṛuḥ Syenna ɣer taddart n Ifṛahim i d-yezgan ț-țama unezṛuf, yesɛedda dinna kra n wussan nețța d inelmaden is. 11:55 Akken i d-iqeṛṛeb lɛid n Tfaska, aṭas n lɣaci i d-ițasen si mkul tamurt ɣer temdint n Lquds akken ad ssizedegen iman-nsen. 11:56 Lɣaci-nni țqelliben ɣef Sidna Ɛisa, țmesteqsayen deg ufrag n lǧameɛ, qqaṛen: D acu i twalam? A d-yas ad iɛeggeḍ? 11:57 Yuɣ lḥal lmuqedmin imeqqranen d ifariziyen nebhen-d nnan: Win yeẓran anda yella Ɛisa-nni, ilaq a d-yessiweḍ lexbaṛ i yiɛessasen akken a t-ṭṭfen.

Yuḥenna 12

12:1 Sețța wussan uqbel lɛid n Tfaska, Sidna Ɛisa iṛuḥ ɣer Bitani, taddart n Laɛẓar win akken i d-yesseḥya si lmut. 12:2 At wexxam n Laɛẓar heggan-as imensi. Marṭa tqeddec, Laɛẓar yeqqim ɣer imensi akk-d Sidna Ɛisa. 12:3 Meryem teddem-ed azgen n litra n leɛṭeṛ yeṣfan ɣlayen nezzeh, tesmar-it ɣef yiḍaṛṛen n Sidna Ɛisa, tesfeḍ-iten s ucebbub-is; axxam meṛṛa yeččuṛ d rriḥa n leɛṭeṛ-nni. 12:4 Yudas n Qeṛyut, yiwen seg inelmaden-is, win akken ara t-ixedɛen inṭeq-ed yenna: 12:5 Acuɣeṛ ur nezzenz ara leɛṭeṛ agi? Lemmer nezzenz-it tili yewwi-d azal n telt meyya twiztin n lfeṭṭa ara nefṛeq i igellilen. 12:6 Mi d-yenna annect-agi mačči d igellilen i t-iɣaḍen meɛna yebɣa ad yawi idrimen-nni, axaṭer d amakar i gella. D nețța i d amdebbeṛ ɣef yidrimen-nsen, yețțaker-iten. 12:7 Dɣa Sidna Ɛisa yenna-yas: Anfet-as! Leɛṭeṛ-agi thegga-t i wass n temḍelt-iw. 12:8 Igellilen a ten-tesɛum daymen gar-awen! Ma d nekk, ur iyi-tseɛɛum ara daymen yid-wen. 12:9 Yuɣ lḥal lɣaci slan belli Sidna Ɛisa di taddart n Bitanya i gella. Dɣa ț-țirebbaɛ i d-iṛuḥen ɣuṛ-es, mačči kan iwakken a t-ẓren nețța, meɛna bɣan ad ẓren Laɛẓar i d yesseḥya si lmut. 12:10 Ɣef wannect-a, lmuqedmin imeqqranen qesden ad nɣen ula d Laɛẓar. 12:11 Axaṭer ɣef ddemma-ines aṭas n lɣaci i sen iwexxṛen uɣalen umnen s Sidna Ɛisa. 12:12 Azekka-nni, aṭas n lɣaci i d yusan ad ɛeggden di temdint n Lquds. Slan belli Sidna Ɛisa iteddu-d ɣer temdint. 12:13 Kksen-d tiseḍwa (ticiṭwin ) n tezdayt, ṛuḥen a t-mmagren, țeddun țɛeggiḍen: Ḥusana! Yețțubarek win i d-yusan s yisem n Sidi Ṛebbi! Yețțubarek ugellid n wat Isṛail! 12:14 Sidna Ɛisa yufa yiwen weɣyul d amecṭuḥ, yerkeb fell-as akken yura di tira iqedsen: 12:15 Ur țțaggad a tamdint n Siyun, atan ugellid-im yusa-d, irkeb-ed ɣef weɣyul amecṭuḥ. 12:16 Imiren inelmaden is ur fhimen ara ayen ideṛṛun, lameɛna asmi i gekcem Sidna Ɛisa di tamanegt-is, mmektan-d belli ayen akk yuran fell-as yedṛa yerna yețwakemmel. 12:17 Wid akk i gḥedṛen akk-d Sidna Ɛisa asmi i gessawel i Laɛẓar a d-iffeɣ seg u?ekka mi i t-id-yesseḥya si lmut, cehden-d ɣef wayen ẓran; 12:18 ɣef wannect-agi aṭas n lɣaci i d-yusan ɣuṛ-es imi slan s lbeṛhan i gexdem. 12:19 Imi walan akkenni, ifariziyen nnan wway gar-asen: Twalam tura: ur nezmir i wacemma, lɣaci akk ttabaɛen-t! 12:20 Ger widak-nni i d-yusan ad ɛeggden di temdint n Lquds, llan kra n iyunaniyen. 12:21 Iyunaniyen-agi ṛuḥen ɣer Filibus ajlili n taddart n Bitsayda, nnan-as: Nebɣa a nẓer Sidna Ɛisa! 12:22 Filibus ixebbeṛ Andriyus, dɣa ddukklen i sin a s-inin i Sidna Ɛisa. 12:23 Nețța yerra-yasen-d: Yewweḍ-ed lweqt i Mmi-s n bunadem ad ikcem di tmanegt-is. 12:24 S tideț, nniɣ-awen: aɛeqqa n yired yeɣlin deg wakal m'ur yemmut ara ad iqqim weḥd-es, lameɛna ma yemmut ad yefti, a d-yefk aṭas n iɛeqqayen. 12:25 Win yețḥadaren ɣef tudert-is ad as-tṛuḥ, ma d win ur nețḥebbiṛ ara fell-as di ddunit-agi a ț-yaf i tudert n dayem. 12:26 Win yebɣan ad iqdec fell-i, a yi-d-yetbeɛ. Anda bɣuɣ iliɣ, aqeddac-iw ad yili yid-i. Win iqeddcen fell-i, Ṛebbi a t-iɛuzz. 12:27 Atan tura ul-iw yetḥeyyeṛ; d acu ara d-iniɣ? A Baba sellek-iyi si teswiɛt-agi? Nekk ẓriɣ ɣef teswiɛt agi i d-usiɣ iwakken a ț-qableɣ! 12:28 A Baba, sbeggen-ed tamanegt-ik! Dɣa tenṭeq-ed yiwet n taɣect seg igenni, tenna-d: Sbeggneɣ-d yakan tamanegt-iw yerna mazal a ț-id-sbeggneɣ. 12:29 Wid yuɣ lḥal dinna slan i ṣṣut nni, ɣilen d ṛɛud. Wiyaḍ qqaṛen d lmalayekkat i s-d yemmeslayen. 12:30 Sidna Ɛisa yenna-yasen: Mačči ɣuṛ-i i d-tenṭeq taɣect agi, tenṭeq-ed ɣuṛ-wen. 12:31 Tura ara yedṛu lḥisab n ddunit. Tura ara yețwaqceɛ umesbaṭli n ddunit-a. 12:32 Ma d nekk m'ara țwarefdeɣ sennig lqaɛa, a d-awiɣ imdanen meṛṛa ɣuṛ-i. 12:33 S imeslayen-agi, Sidna Ɛisa yebɣa a d-isbeggen amek ara yemmet. 12:34 Lɣaci nnan-as: Ccariɛa tenna-d belli Lmasiḥ ad yidir i dayem. Amek i d-tenniḍ «Mmi-s n bunadem ilaq ad yețwarfed sennig lqaɛa»? Ini-yaɣ-d ihi anwa i d Mmi-s n bunadem? 12:35 Sidna Ɛisa yenna-yasen: Tafat mazal-iț gar-awen i kra n lweqt kan, lḥut skud tella uqbel a kkun-iṭṭef ṭṭlam, axaṭer win ileḥḥun di ṭṭlam ur yeẓri ara anda iteddu. 12:36 Skud tesɛam tafat, amnet yis akken aț-țuɣalem d arraw n tafat. Mi d-yenna imeslayen-agi, Sidna Ɛisa iḍeṛṛef iman-is anda ulac lɣaci. 12:37 Ɣas akken aṭas n lbeṛhanat i gexdem Sidna Ɛisa zdat-sen, nutni ugin ad amnen. 12:38 S wakka i gețwakemmel wayen i d-yenna nnbi Iceɛya: A Ṛebbi, anwa i gumnen s wayen i d-nbecceṛ, iwumi i d-tețwabeggen tezmert-ik? 12:39 Acuɣeṛ ugin ad amnen? D nnbi Iceɛya i d-yennan daɣen: 12:40 Ṛebbi yesderɣel-iten, yesɣeṛ ulawen-nsen, daymi allen-nsen ur țwalint ara, lefhama-nsen teqfel, ugin a d-uɣalen ɣer webrid, a kken a ten-sseḥluɣ. 12:41 Nnbi Iceɛya yenna-d ayagi ɣef Sidna Ɛisa mi gwala tamanegt-is. 12:42 Ula seg imeqqranen n wat Isṛail aṭas i gumnen yis; lameɛna ɣef ddemma n ifariziyen, ur bɣin ara a d-sbeggnen liman-nsen, axaṭer uggaden a ten-sṭixxṛen si lǧameɛ. 12:43 ḥemmlen ad sɛun ccan ɣer yemdanen wala ɣer Ṛebbi. 12:44 Sidna Ɛisa yessaɛli taɣect-is yenna: Win yesɛan laman deg-i mačči yis-i kan i gumen, meɛna yumen ula s win i yi-d-iceggɛen. 12:45 Win i yi iwalan, iwala win i yi-d-iceggɛen. 12:46 Nekk usiɣ-ed ț-țafat ɣer ddunit, kra n win yumnen yis-i, ur yețɣimi ara di ṭṭlam. 12:47 Win yeslan i wawal-iw ur nexdim ara ayen i d-nniɣ mačči d nekk ara t-iḥasben, axaṭer ur d-usiɣ ara akken ad ḥasbeɣ ddunit, meɛna usiɣ-ed a ț-sellkeɣ. 12:48 Kra n win i yi-ḥeqṛen ur neḥsib ara imeslayen-iw, ițțuḥaseb yakan: d awal-agi i d-nniɣ ara t-iḥasben ass aneggaru. 12:49 Imeslayen-agi mačči s ɣuṛ-i i d-kkan: Baba i yi-d-iceggɛen, d nețța i yi-d-yefkan ayen i glaqen a t-id-iniɣ d wayen ara slemdeɣ. 12:50 Daymi nniɣ-awen: aselmed ɣef i yi-d-iweṣṣa Baba ț-țudert n dayem. Nekk sselmadeɣ kan ayen i yi-d-yenna Baba.

Yuḥenna 13

13:1 Uqbel lɛid n Tfaska n Izimer n leslak, Sidna Ɛisa yeẓra belli tewweḍ-ed teswiɛt i deg ara yeffeɣ si ddunit, akken ad iṛuḥ ɣer Baba-s. Ɣef wannect-agi, isbeggen-ed leḥmala-ines i inelmaden-is yellan di ddunit, yerna yeǧǧa-yasen-d lmeɛna ț-țameqqrant. 13:2 Llan tețțen imensi n Tfaska, Cciṭan yekcem yakan deg wul n Yudas, mmi-s n Semɛun n Qeṛyut, iwelleh-it ad ixdeɛ Sidna Ɛisa, a t-yezzenz. 13:3 Sidna Ɛisa yeẓra belli Baba Ṛebbi yerra kullec ger ifassen-is, yeẓra s ɣuṛ Ṛebbi i d-yusa, ɣuṛ-es ara yuɣal. 13:4 Yekker ɣef yimensi, yekkes abeṛnus-is, yeddem-ed yiwen ubeḥnuq (ucettiḍ) yebges yis. 13:5 Syenna, yesmar-ed aman ɣer yiwet n tbaqit, yebda yessirid iḍaṛṛen n inelmaden-is, yesfeḍ-iten s ubeḥnuq-nni i gcudd ɣef wammas-is. 13:6 Mi gewweḍ ɣer Semɛun Buṭrus yenna-yas-d: A Sidi d kečč ara yi-ssirden iḍaṛṛen? 13:7 Sidna Ɛisa yerra-yas: Ayen xedmeɣ akka ur t-tfehhmeḍ ara tura, ɣer zdat ara t-tfehmeḍ. 13:8 Buṭrus yenna-yas: Ala! D lmuḥal a yi-tessirdeḍ iḍaṛṛen-iw! Sidna Ɛisa yenna-yas: M'ur k-ssardeɣ ara iḍaṛṛen-ik ur d-yeqqim wacemma i ɣ-icerken. 13:9 Semɛun Buṭrus yenna-yas: Ihi ur iyi-issirid ara iḍaṛṛen kan, ssired-iyi ula d ifassen d uqeṛṛuy-iw. 13:10 Sidna Ɛisa yenna-yas: Win yessarden yakan d azedgan, anagar idaṛṛen-is i geḥwaǧ a ten yessired axaṭer zeddig meṛṛa. Kunwi aql-ikkun zeddigit lameɛna mačči akken ma tellam dagi. 13:11 Sidna Ɛisa yeẓra yakan win akken ara t-ixedɛen, daymi i genna i inelmaden-is: «kunwi ur zeddigit ara irkul.» 13:12 Mi sen-issared iḍaṛṛen-nsen, yerra abeṛnus-is, yuɣal ɣer wemkan is yenna-yasen: Tfehmem wayen akka i wen xedmeɣ neɣ ala? 13:13 Tessawalem-iyi «a Sidi»; tesɛam lḥeqq axaṭer ț-țideț! 13:14 Ma yella nekk yellan d Ssid-nwen ssardeɣ-awen iḍaṛṛen-nwen, ilaq awen aț-țețțemsiridem iḍaṛṛen wway gar-awen. 13:15 Fkiɣ-awen-d lemtel iwakken ula d kunwi aț-țxedmem akken i wen-xedmeɣ. 13:16 S tideț nniɣ awen: aqeddac ur yugar ara Ssid-is, amceggeɛ ur yugar ara win i t-id iceggɛen. 13:17 Amarezg-nwen ma tessnem ayagi, awi-d kan a t-txedmem. 13:18 Mačči fell-awen meṛṛa i d-nniɣ ayagi: ssneɣ widak i xtaṛeɣ. Lameɛna ayen yuran ad yețwakemmel: «Win yeččan aɣṛum yid-i, yuɣal-iyi-d d aɛdaw.» 13:19 Nniɣ-awen-t-id si tura uqbel a d-yaweḍ, iwakken asm'ara d-yedṛu aț-țamnem belli nekk «d Win yellan.» 13:20 A wen-iniɣ tideț: win iqeblen win ara d-ceggɛeɣ d nekk i geqbel, win ara yi-qeblen yeqbel win i yi-d-iceggɛen. 13:21 Segmi i d-yenna annect-agi, Sidna Ɛisa yetḥeyyeṛ, dɣa yenna ɛinani: A wen-d-iniɣ s tideț, yiwen deg-wen ad iyi-ixdeɛ. 13:22 Inelmaden-is tḥeyyṛen, qqimen țemyex?aṛen wway gar-asen. Kull yiwen yeqqaṛ deg wul-is: Ɣef anwa i d-yenna imeslayen-agi? 13:23 Yiwen deg-sen, anelmad-nni i gḥemmel Sidna Ɛisa, yeqqim ɣer lmakla ɣer tama-s. 13:24 Semɛun Buṭrus iwehha-yas akken a t-yesteqsi ɣef wanwa i d-ițmeslay. 13:25 Anelmad-nni yekna ɣer Sidna Ɛisa, yenna-yas: A Sidi, ɣef wanwa deg-nneɣ i d-tmeslayeḍ? 13:26 Sidna Ɛisa yerra-yas: Ad ssisneɣ (seyyiɣ ) talqimt n weɣṛum di teṛbut-agi, win iwumi ara ț-fkeɣ, d winna ara yi-ixedɛen. Sidna Ɛisa yessasen talqimt n weɣṛum, dɣa yefka-ț i Yudas mmi-s n Semɛun n Qeṛyut. 13:27 Akken kan i geṭṭef Yudas talqimt-nni, Cciṭan yekcem ul-is. Sidna Ɛisa yenna-yas: Ayen ara txedmeḍ ɣiwel xdem-it! 13:28 Ger wid yellan yid-es, yiwen ur yefhim acuɣeṛ i s-yenna ayagi. 13:29 Imi d Yudas i gțsewwiqen fell-asen, kra seg inelmaden nwan iwekkel-it akken a d-iqḍu i lɛid neɣ ad iseddeq i igellilen. 13:30 Akken kan i geṭṭef talqimt-nni, Yudas yeffeɣ seg wexxam; yuɣ lḥal yeɣli-d yiḍ. 13:31 Mi geffeɣ Yudas, Sidna Ɛisa yenna: Tura ara d-tban tmanegt n Mmi-s n bunadem, yis ara yețwaɛuzz Ṛebbi. 13:32 Imi yis ara yețwaɛuzz, Ṛebbi daɣen ad iɛuzz Mmi-s n bunadem yerna qṛib a d-yedṛu. 13:33 Ay arrac ɛzizen, aql-i mazal-iyi gar-awen meɛna ur țɛeṭṭileɣ ara. Aț-țnadim fell-i, atan ayen i nniɣ i lɣaci tura a wen-t-id-iniɣ daɣen i kunwi: «Ur tezmirem ara aț țeddum ɣer wanda ara ṛuḥeɣ»! 13:34 A wen-d-fkeɣ yiwen n lameṛ d ajdid: «myeḥmalet wway gar awen. Akken i kkun-ḥemmleɣ, myeḥmalet wway gar-awen.» 13:35 Ma temyeḥmalem wway gar awen, lɣaci meṛṛa a kkun-ɛeqlen belli d inelmaden-iw i tellam. 13:36 Semɛun Buṭrus yesteqsa-t yenna-yas: A Sidi, ɣer wanda ara tṛuḥeḍ? Sidna Ɛisa yenna-yas: Anda ara ṛuḥeɣ ur tezmireḍ ara aț-țedduḍ tura, lameɛna ɣer zdat a yi-d-tebɛeḍ. 13:37 Buṭrus yenna-yas: A Sidi, acuɣeṛ ur zmireɣ ara ad dduɣ tura? Aql-iyi wejdeɣ ad sebbleɣ iman-iw fell-ak. 13:38 Sidna Ɛisa yerra-yas: Tqebleḍ aț-țsebbleḍ iman-ik fell-i? Tideț a k-iniɣ: uqbel ad iskkuɛ uyaziḍ a yi-tnekkṛeḍ tlata iberdan.

Yuḥenna 14

14:1 -- Kkset anezgum seg ulawen nwen. Amnet s Ṛebbi, amnet daɣen yis-i. 14:2 Deg wexxam n Baba aṭas n tmezduɣin i gellan, ad ṛuḥeɣ a wen-heggiɣ amkan; lemmer ulac, tili nniɣ-awen-t-id. 14:3 M'ara wen-heggiɣ amkan, a d uɣaleɣ a kkun-awiɣ yid-i akken anda lliɣ aț-țilim ula d kunwi. 14:4 Tessnem abrid yețțawin ɣer wanda i țedduɣ. 14:5 Țuma yenna-yas: A Sidi, ur neẓri ara ɣer wanda ara tṛuḥeḍ, amek i tebɣiḍ a nissin abrid? 14:6 Sidna Ɛisa yenna-yas: D nekk i d abrid axaṭer d nekk i ț-țideț, d nekk i ț-țudert. Yiwen ur yezmir ad iṛuḥ ɣer Baba m'ur yekki ara seg-i. 14:7 Ma tessnem-iyi, aț-țissinem ula d Baba. Atan tura tessnem-t yakan yerna teẓram-t. 14:8 Filibus inṭeq-ed, yenna-yas: A Sidi, sken-aɣ-ed kan Baba Ṛebbi beṛka-yaɣ. 14:9 Sidna Ɛisa yenna-yas: Amek, ayen akk i sɛeddaɣ yid-wen mazal ur iyi-tessineḍ ara a Filibus! Win i yi-iwalan iwala Baba. Amek armi teqqaṛeḍ: «Sken-aɣ-ed kan Baba Ṛebbi» 14:10 Mazal ur tumineḍ ara belli nekk lliɣ di Baba, Baba yella deg-i? Ayen i wen-d qqaṛeɣ ur d-yekki ara s ɣuṛ-i: Baba yella deg-i, d nețța i gxeddmen lecɣal-agi-ines. 14:11 Amnet-iyi, nekk lliɣ di Baba, Baba yella deg-i; neɣ m'ulac, amnet xeṛsum ɣef ddemma n lecɣal i twalam xedmeɣ-ten. 14:12 A wen-iniɣ tideț: win yumnen yis-i, ad ixdem ula d nețța lecɣal i xedmeɣ, yerna ad ixdem akteṛ axaṭer ad ṛuḥeɣ ɣer Baba. 14:13 Ayen akk ara tessutrem s yisem-iw a t-xedmeɣ iwakken tamanegt n Baba Ṛebbi a d-tban s Mmi-s. 14:14 A wen-t-id ɛiwdeɣ: ma tessutrem kra s yisem-iw a t-xedmeɣ. 14:15 Ma tḥemmlem-iyi, ḥerzet lewṣayat-iw. 14:16 Nekk ad ssutreɣ i Baba a wen-d-yefk Amɛiwen nniḍen ara yilin yid-wen i dayem: 14:17 d Ṛṛuḥ n tideț, win akken ur tezmir ddunit a t-teqbel axaṭer ur t-twala ur t-tessin. Kunwi tessnem-t axaṭer yella yid-wen yerna ad yili deg-wen. 14:18 Ur kkun-țțaǧǧaɣ ara d igujilen, a d-uɣaleɣ ɣuṛ-wen. 14:19 Drus i yi-d iqqimen di ddunit; ddunit ur tețɛawad ara a yi-tẓer, ma d kunwi a yi-twalim axaṭer ddreɣ yerna ula d kunwi aț-țidirem. 14:20 Ass-nni aț-țfehmem belli nekk lliɣ di Baba, aț-țeẓrem daɣen belli kunwi tellam deg-i nekk lliɣ deg-wen. 14:21 Win i yi-ḥemmlen s tideț, d win i geṭṭfen lewṣayat-iw yerna iḥrez-itent. Win i yi-ḥemmlen a t-iḥemmel Baba, nekk daɣen a t-ḥemmleɣ yerna a d-sbeggneɣ iman-iw ɣuṛ-es. 14:22 Yuda (mačči Yudas n Qeṛyut), yenna-yas: A Sidi, acuɣeṛ i nukkni kan i tebɣiḍ a d-sbeggneḍ iman-ik, mačči i ddunit meṛṛa? 14:23 Sidna Ɛisa yerra-yas: Win i yi-ḥemmlen ad ixdem ayen i d-nniɣ, ula d Baba a t iḥemmel! A d-nas i sin ɣuṛ-es, a nezdeɣ ɣuṛ-es. 14:24 Ma d win ur iyi-nḥemmel ara ur ixeddem ara ayen i d-nniɣ. Awal-agi i teslam mačči s ɣuṛ-i i d-yekka meɛna d awal n Baba i yi-d-iceggɛen. 14:25 Qqaṛeɣ-awen-d akk annect-agi skud mazal-iyi yid-wen. 14:26 Lameɛna Amɛiwen, Ṛṛuḥ iqedsen ara d-iceggeɛ Baba s yisem-iw, a wen-isselmed kullec yerna a wen-d-ismekti ayen akk i wen-d-nniɣ. 14:27 Ad ṛuḥeɣ meɛna a wen-d ǧǧeɣ lehna, d lehna-w ara wen-d fkeɣ. Lehna ara wen-d-fkeɣ mačči am lehna i d-tețțak ddunit. Daymi i wen-d-qqaṛeɣ ur țțaggadet ara, kkset anezgum seg wulawen-nwen. 14:28 Teslam-d mi wen-d-nniɣ ad ṛuḥeɣ meɛna a d-uɣaleɣ ɣuṛ-wen. Lemmer tḥemmlem-iyi, tili tfeṛḥem imi teẓram ɣer Baba ara ṛuḥeɣ, axaṭer Baba yugar-iyi. 14:29 Xebbṛeɣ-kkun-id ɣef wannect-agi tura uqbel ad yedṛu iwakken m'ara d-yedṛu aț-țamnem. 14:30 Sya d asawen, ur seɛɛuɣ ara lweqt ad meslayeɣ yid-wen imi Amesbaṭli n ddunit-agi atan iteddu-d. Ur yeḥkim ara deg-i, 14:31 meɛna ilaq imdanen n ddunit-a ad ɛeqlen belli ḥemmleɣ Baba yerna xeddmeɣ akken i yi-d-yumeṛ. Ayaw kkret a nṛuḥet syagi.

Yuḥenna 15

15:1 -- D nekk i ț-țara n tideț, yerna d Baba i ț-ixeddmen. 15:2 Yal isegmi yeṭṭfen deg-i ur d-nețțak ara lfakya, ige??em-it, ma d isegman i d-ițakken lfakya, iferres iten akken a d-efken lfakya s waṭas. 15:3 Akka ula d kunwi i teṣfam s uselmed i wen-d-fkiɣ. 15:4 Ilit deg-i, nekk ad iliɣ deg-wen. Isegmi ur yezmir ara a d-yefk lfakya weḥd-es m'ur yeṭṭif ara ɣer tara. Akken daɣen kunwi, m'ur teṭṭifem ara deg-i ur tețțizmirem ara a d-tefkem lfakya. 15:5 Nekk ț-țara, kunwi d isegman-is. Win yellan deg-i nekk lliɣ deg-s, a d-yefk lfakya s waṭas, axaṭer mbla nekk ur tețțizmirem aț-țxedmem acemma. 15:6 Win ur neṭṭif ara deg-i ad yețwaḍeggeṛ ɣer beṛṛa n tfeṛṛant am isegmi yețwagezmen. M'ara qqaṛen isegman, ad țwajemɛen iwakken a sen-ceɛlen times ad ṛɣen. 15:7 Ma teṭṭfem deg-i yerna awal-iw yezdeɣ deg-wen, ssutret ayen i tebɣam a kkun-id-yaweḍ. 15:8 Ma tețțakem-d lfakya s tugeț tesbegginem-d belli ț-țideț d inelmaden-iw i tellam; akka ara d-tban tmanegt n Baba i yemdanen. 15:9 Akken i yi-iḥemmel Baba i kkun ḥemmleɣ ula d nekk; dumet di tayri-inu. 15:10 Ma tḥerzem lumuṛat-iw aț țdumem di tayri-w, akken ḥerzeɣ lumuṛ n Baba yerna dumeɣ di tayri-s. 15:11 Nniɣ-awen-d akk ayagi iwakken lfeṛḥ-iw a kkun-yeččaṛ ula d kunwi, dɣa lfeṛḥ-nwen ad yennekmal. 15:12 Atan ihi lameṛ ara wen-d-fkeɣ: «Myeḥmalet wway gar-awen akken i kkun-ḥemmleɣ nekkini.» 15:13 Ulac tayri yugaren tin n win ara isebblen tudert-is ɣef yeḥbiben-is. 15:14 Aql-ikkun d iḥbiben-iw ma txeddmem ayen i wen d-umṛeɣ. 15:15 Sya ɣer zdat ur kkun-ḥețțbeɣ ara d iqeddacen, axaṭer aqeddac ur yeẓri ara d acu i gxeddem Bab-is. Tura aql-ikkun d iḥbiben-iw axaṭer slemdeɣ-awen ayen akk i d-lemdeɣ ɣer Baba. 15:16 Mačči d kunwi i yi-ixtaṛen meɛna d nekk i kkun ixtaṛen; ceggɛeɣ-kkun iwakken a d-tefkem lfakya, lfakya ara idumen. S wakka, Baba Ṛebbi a wen-yeqbel kra n wayen ara s-tessutrem s yisem-iw. 15:17 Atan ihi lameṛ ara wen-d-fkeɣ: «Myeḥmalet wway gar-awen». 15:18 Ma yella tekṛeh-ikkun ddunit ilaq aț-țeẓrem belli tekṛeh-iyi uqbel-nwen. 15:19 Lemmer n ddunit i tellam tili tḥemmel-ikkun imi d ayla-s. Lameɛna kunwi mačči n ddunit, axaṭer d nekk i kkun-id yextaṛen si tlemmast n ddunit, daymi i kkun-tekṛeh. 15:20 Mmektit-ed ayen i wen-d nniɣ: aqeddac werǧin yugar Bab-is. Ma qehṛen-iyi a kkun-qehṛen ula d kunwi; ma ḥerzen imeslayen-iw ad ḥerzen imeslayen-nwen. 15:21 Ɣef ddemma-w ara xedmen akka, axaṭer ur ssinen ara win i yi-d-iceggɛen. 15:22 Lemmer ur d-usiɣ ara, lemmer ur sen-d-mmeslayeɣ ara tili ulac ddnub fell-asen lameɛna tura ddnub i yirawen-nsen. 15:23 Win i yi-keṛhen yekṛeh daɣen Baba. 15:24 Lemmer ur xdimeɣ ara gar-asen ayen weṛǧin yexdem yiwen, tili ulac ddnub fell-asen. Meɛna tura, ɣas akken ẓran kullec, țkemmilen keṛhen-iyi am nekk am Baba. 15:25 Axaṭer ilaq ad yețwakemmel wayen yuran di ccariɛa: Keṛhen-iyi mbla sebba. 15:26 M'ara d-yas umɛiwen, win akken ara wen-d-ceggɛeɣ s ɣuṛ Baba Ṛebbi, Ṛṛuḥ n tideț ara d-yasen s ɣuṛ-es, nețța s yiman-is ara d-icehden fell-i. 15:27 Kunwi daɣen aț-țuɣalem d inigan-iw imi tellam yid-i si tazwara.

Yuḥenna 16

16:1 Nniɣ-awen-d akk annect-agi iwakken ur tɣellim ara. 16:2 Axaṭer, a kkun-stixṛen si lǧwameɛ, yerna a d-yas lweqt anda wid ara kkun-inɣen ad ɣilen d asfel i fkan i Ṛebbi. 16:3 Ad ssiwḍen ɣer wannect-agi imi ur iyi-ssinen nekk, ur ssinen Baba. 16:4 Nniɣ-awen-d akk ayagi tura iwakken asm'ara ssiwḍen ɣer wannect-agi, a d-mektim belli nniɣ-awen-t-id uqbel a d-yedṛu. Ur a wen-t-id-nniɣ ara si tazwara axaṭer mazal-iyi lliɣ yid-wen. 16:5 Tura ad ṛuḥeɣ ɣer win i yi-d iceggɛen; atan yiwen deg-wen ur iyi-d-isteqsa ɣer wanda ara ṛuḥeɣ. 16:6 Imi i wen-d-nniɣ akka, leḥzen yeččuṛ ulawen-nwen. 16:7 A wen-iniɣ tideț, yelha-yawen ma ṛuḥeɣ axaṭer m'ur ṛuḥeɣ ara, amɛiwen ur d-yețțas ara ɣuṛ-wen, meɛna ma ṛuḥeɣ a wen t-id-ceggɛeɣ. 16:8 M'ara d-yas, a d-isbeggen i yemdanen belli ɣelṭen ɣef wayen yeɛnan ddnub, lḥeqq, d lḥisab n Ṛebbi. 16:9 Ɣelṭen ɣef wayen yeɛnan ddnub, imi ugin ad amnen yis-i; 16:10 ɣef wayen yellan d lḥeqq imi tedduɣ ɣer Baba yerna ur tețțuɣalem ara a yi-twalim; 16:11 ɣelṭen ɣef wayen yeɛnan lḥisab n Ṛebbi, imi amesbaṭli n ddunit-agi yețțuḥaseb yakan. 16:12 Aṭas n lewṣayat i mazal a wen tent-id-iniɣ, lameɛna di teswiɛt-agi ur sent-tezmirem ara. 16:13 Asm'ara d-yas Ṛṛuḥ n tideț, a kkun-iseddu di tideț akken tella, ayen ara wen-d-yini mačči s ɣuṛ-es i d-yekka meɛna a d-immeslay ɣef wayen akk i gesla yerna a kkun id-ixebbeṛ ɣef wayen akk ara yedṛun ɣer zdat. 16:14 A d-isbeggen tamanegt-iw axaṭer s ɣuṛ-i ara d-yawi wayen akk ara wen-d-yini. 16:15 Ayla n Baba d ayla-w ula d nekk. Daymi i wen-d-nniɣ s ɣuṛ-i ara d-yawi wayen akk ara wen-d-yini. 16:16 Di kra n lweqt ur iyi-tețwalim ara, kra n lweqt daɣen aț-țuɣalem a yi-twalim. 16:17 Dɣa kra seg inelmaden-is țmesteqsayen, qqaṛen: D acu i gebɣa a ɣ-d-yini mi i d-yeqqaṛ: «Kra n lweqt ur iyi tețwalim ara, kra n lweqt daɣen aț-țuɣalem a yi-twalim», neɣ mi ɣ-d yenna: «Ad ṛuḥeɣ ɣer Baba»? 16:18 Nnan daɣen: D acu i d lmeɛna n «Kra n tallit kan» i ɣef i ɣ-d-yemmeslay? Ur nefhim ara d acu i gebɣa a d-yini! 16:19 Sidna Ɛisa yefhem belli bɣan a t-steqsin, dɣa yenna-yasen: Tețmesteqsayem ɣef wayen i bɣiɣ a d-iniɣ s imeslayen-agi: «Tallit kan i mazal ur yi-tețwalim ara, tallit daɣen a yi-twalim»; 16:20 nniɣ-awen s tideț: kunwi aț-țețrum, aț-țmeǧdem, ma d imdanen n ddunit-a ad feṛḥen aṭas. Kunwi aț-țeṛwum lqeṛḥ meɛna lqeṛḥ-nwen ad yuɣal d lfeṛḥ. 16:21 M'ara d-tarew tmeṭṭut tețțenɛețțab aṭas di teswiɛt-nni, lameɛna akken kan ara twali llufan-is ilul-ed tețțu lqeṛḥ-is imi lfeṛḥ-is d ameqqran. 16:22 Kunwi daɣen aql-ikkun tețwaqeṛḥem tura meɛna a d-uɣaleɣ a kkun-zṛeɣ, imiren ulawen-nwen ad ččaṛen d lfeṛḥ; lfeṛḥ-agi yiwen ur izmir a wen t-yekkes. 16:23 M'ara d-yas wass-nni ur tețțuɣalem ara a yi-testeqsim. A wen iniɣ s tideț: ayen akk ara tessutrem i Baba s yisem-iw a wen-t-id-yeqbel. 16:24 Ar tura ur tessutrem acemma s yisem-iw. Ssutret a wen-d-yețțunefk akken lfeṛḥ-nwen ad yețwakemmel. 16:25 Ayen akk i wen-d-nniɣ, nniɣ awen-t-id s lemtul. A d-yas lweqt ur a wen-d-țmeslayeɣ ara akka, a wend hedṛeɣ ɛinani ɣef wayen yeɛnan Baba. 16:26 Ass-nni aț-țdeɛɛum ɣer Baba s yisem-iw, yerna ur wen-d-qqaṛeɣ ara belli ad dɛuɣ ɣer Baba fell-awen. 16:27 Axaṭer Baba iḥemmel-ikkun imi iyi-tḥemmlem, yerna tumnem belli s ɣuṛ-es i d-kkiɣ. 16:28 Ț-țideț usiɣ-ed s ɣuṛ Baba, usiɣ-ed ɣer ddunit, ma ț-țura ad ǧǧeɣ ddunit ad uɣaleɣ ɣer Baba. 16:29 Inelmaden-is nnan-as: Atan tura tețmeslayeḍ-aɣ-d ɛinani mačči s lemtul. 16:30 Tura neẓra belli tessneḍ kullec imi uqbel a d-nehdeṛ teẓriḍ ɣef wacu i nebɣa a k-nesteqsi. Ɣef wayagi i numen belli s ɣuṛ Ṛebbi i d-tusiḍ. 16:31 Sidna Ɛisa yerra-yasen: Tura tumnem! 16:32 Atan iteddu-d lweqt yerna yewweḍ-ed, aț țemfaṛaqem ɣer mkul tama a yi teǧǧem iman-iw. Lameɛna ur lliɣ ara weḥd-i axaṭer Baba yella yid-i. 16:33 Ilaq-iyi a wen-d-iniɣ daɣen annect-agi akken aț-țafem deg-i talwit. Aț-țɛeddim si teswiɛin n ddiq di ddunit, aț-țneɛtabem meɛna ṣebṛet! Nekk ɣelbeɣ ddunit.

Yuḥenna 17

17:1 Mi d-yenna imeslayen-agi, Sidna Ɛisa yerfed allen-is ɣer igenni, yenna: -- A Baba, yewweḍ-ed lweqt! Sbeggen-ed tamanegt n Mmi-k iwakken ula d nețța a d-isbeggen tamanegt-ik! 17:2 Tefkiḍ-as tazmert ɣef yemdanen n ddunit meṛṛa akken ad yefk tudert n dayem i wid akk i s-d-tefkiḍ. 17:3 Tudert n dayem: d asm'ara issinen yemdanen belli d kečč i d Ṛebbi awḥid, Illu n tideț, ad issinen daɣen Ɛisa Lmasiḥ, win akken i d-tceggɛeḍ. 17:4 Sbeggneɣ-ed tamanegt-ik di ddunit mi kfiɣ ccɣel-nni i ɣef iyi-twekkleḍ. 17:5 Tura a Baba, ɛuzz-iyi s tmanegt-ik, tin akken i sɛiɣ asmi lliɣ ɣuṛ-ek uqbel a d-texleq ddunit! 17:6 Sbeggneɣ-d isem-ik i yemdanen akk i yi-d-tefkiḍ si ddunit. Llan d ayla-k, tuɣaleḍ tefkiḍ-iyi-ten-id; nutni ḥerzen awal-ik. 17:7 Tura ẓran belli ayen akk i yi-d-tefkiḍ s ɣuṛ-ek i d-yekka; 17:8 axaṭeṛ ṣṣawḍeɣ-asen-d awal-ik akken yella, yerna qeblen-t. Ẓran ț-țideț s ɣuṛ-ek i d-kkiɣ yerna umnen d kečč i yi-d-iceggɛen. 17:9 Deɛɛuɣ ɣuṛ-ek fell-asen. Ur deɛɛuɣ ara ɣef yemdanen nniḍen lameɛna ɣef wid i yi-d-tefkiḍ, axaṭer nutni d ayla-k. 17:10 Ayen yellan d ayla-w inek, ayen yellan d ayla-k inu. Tamanegt-iw tețfeǧǧiǧ deg-sen. 17:11 Qṛib tura ad ffɣeɣ si ddunit, a n-ṛuḥeɣ ɣuṛ-ek meɛna nutni ad qqimen di ddunit. A Baba, ay Imqeddes! Ḥerz-iten s tezmert n yisem-ik, isem-nni i yi-d-tefkiḍ iwakken ad uɣalen d yiwen, akken nella nekk yid-ek d yiwen. 17:12 Seg wasmi lliɣ gar-asen, ḥerzeɣ-ten s tezmert n yisem-ik, isem-agi i yi-d-tefkiḍ. Ḥerzeɣ-ten, yiwen deg-sen ur yeɛṛiq anagar win i glaqen ad yeɛṛeq, iwakken tira iqedsen ad nnekmalent. 17:13 Tura a n-uɣaleɣ ɣuṛ-ek, qqaṛeɣ-ed akk annect-agi skud mazal-iyi di ddunit, akken ad ččaṛen wulawen-nsen d lfeṛḥ am lfeṛḥ-iw ikemlen. 17:14 Fkiɣ-asen awal-ik meɛna at ddunit keṛhen-ten axaṭer am nekk am inelmaden-iw ur nelli ara n at ddunit. 17:15 Ur k-d-ssutreɣ ara akken a ten tekkseḍ si ddunit, meɛna a ten tmenɛeḍ si Cciṭan. 17:16 Nutni mačči n ddunit, akken ula d nekk ur lliɣ ara n ddunit. 17:17 Ḥerz-iten di tideț; d awal-ik i ț-țideț. 17:18 Akken i yi-d-tceggɛeḍ ɣer ddunit, nekk daɣen a ten-ceggɛeɣ. 17:19 Ɣef yisem-ik ad sebbleɣ iman-iw fell-asen, iwakken ula d nutni ad sebblen iman-nsen ɣef tideț. 17:20 Mačči fell-asen kan i deɛɛuɣ, deɛɛuɣ daɣen ɣef wid akk ara yamnen yis-i s cchada n inelmaden-iw. 17:21 A k-ssutreɣ a Baba ad uɣalen akk d yiwen. Akken telliḍ deg-i a Baba nekk daɣen lliɣ deg-k, ad uɣalen d yiwen iwakken at ddunit ad amnen belli d kečč i yi-d-iceggɛen. 17:22 Fkiɣ-asen tamanegt i yi-d-tefkiḍ iwakken ad uɣalen d yiwen, akken nella nekk yid-ek d yiwen: 17:23 nekk deg-sen, kečč deg-i. Ad uɣalen akk d yiwen, iwakken at ddunit meṛṛa ad setɛeṛfen belli d kečč i yi-d-iceggɛen, yerna tḥemmleḍ-ten akken i yi tḥemmleḍ! 17:24 A Baba bɣiɣ wid meṛṛa i yi-d tefkiḍ ad ilin yid-i anda ara yiliɣ, ad walin tamanegt i yi-d-tefkiḍ axaṭer tḥemmleḍ-iyi uqbel a d-texleq ddunit. 17:25 A Baba, Kečč yellan d aḥeqqi at ddunit ur k-ssinen ara ma d nekk ssneɣ-k, wigi ẓran belli d kečč i yi-d-iceggɛen. 17:26 Sbeggneɣ-k-id ɣuṛ-sen yerna mazal a k-id-sbeggneɣ, iwakken tayri akk i yi-d-tefkiḍ aț-țili deg-sen, nekk daɣen ad iliɣ deg-sen.

Yuḥenna 18

18:1 Mi gfukk ta?allit, Sidna Ɛisa yekker iṛuḥ nețța d inelmaden is, zegren iɣzer n Sidṛun. Dinna tella yiwet n tmazirt kecmen ɣuṛ-es. 18:2 Yudas ara t-ixedɛen yessen mliḥ amkan-nni, axaṭer Sidna Ɛisa yennum ițṛuḥu ɣer dinna nețța d inelmaden-is. 18:3 Yudas yewwi-d yid-es tarbaɛt n lɛeskeṛ akk-d iɛessasen n lǧameɛ; ceggɛen-ten-id lmuqedmin imeqqranen d ifariziyen, wwḍen-d ɣer tmazirt-nni. Wwin-d yid-sen tiftilin, isufa akk-d leslaḥ. 18:4 Sidna Ɛisa yeẓran akk ayen ara yedṛun yid-es, iqeṛṛeb ɣuṛ-sen yenna yasen: Ɣef wanwa i tețnadim? 18:5 Nutni rran-as: Nețnadi ɣef Ɛisa anaṣari! Sidna Ɛisa yenna-yasen: D nekkini. Yudas, win akken ara t-ixedɛen yuɣ-it lḥal gar-asen. 18:6 Imi i sen-yenna Sidna Ɛisa «d nekkini», uɣalen akk ɣer deffir, ɣlin ɣer lqaɛa. 18:7 Sidna Ɛisa yesteqsa-ten daɣen yenna: Ɣef wanwa i tețnadim? Nutni rran-as: Ɣef Ɛisa anaṣari! 18:8 Sidna Ɛisa yerna yenna-yasen: Nniɣ-awen-d d nekk! Ma d nekk i ɣef tețnadim, ǧǧet widak-agi ad ṛuḥen. 18:9 Akka i gedṛa wawal-nni i d yenna yakan: «Ur sruḥeɣ ula d yiwen seg widak i yi-d-tefkiḍ.» 18:10 Semɛun Buṭrus yejbed-ed ajenwi, yewwet yis aqeddac n lmuqeddem ameqqran, igzem-as ame??uɣ ayeffus. Aqeddac-agi isem-is Maṛxus. 18:11 Sidna Ɛisa yenna i Buṭrus: Err ajenwi-inek ɣer titar-is (teɣlaft-is). Eɛni ur ilaq ara ad sweɣ taqbuct n leɛtab i yi-d-yefka Baba? 18:12 Lɛeskeṛ akk-d iɛessasen n lǧameɛ ṭṭfen Sidna Ɛisa, 18:13 wwin-t yețwarez ɣer wexxam n Ḥanna aḍeggal n Kayef yellan d lmuqeddem ameqqran aseggas-nni. 18:14 Kayef d win akken i sen-yennan i wat Isṛail: «Axiṛ ad immet yiwen kan ɣef lumma.» 18:15 Semɛun Buṭrus, nețța d yiwen unelmad nniḍen tebɛen Sidna Ɛisa. Anelmad-agi yessen lmuqeddem ameqqran s yiman-is; itbeɛ Sidna Ɛisa mi t-wwin ɣer wefrag n wexxam n lmuqeddem ameqqran, 18:16 ma d Buṭrus yeqqim di beṛṛa ɣer tama n tewwurt. Anelmad-nni yessnen lmuqeddem ameqqran yuɣal yeffeɣ ed, yehdeṛ-as i tɛessast n tewwurt, dɣa tessekcem Buṭrus. 18:17 Taqeddact-nni yețɛassan tawwurt, tenna i Buṭrus: Ur telliḍ ara ula d kečč seg inelmaden n wergaz-agi? Buṭrus yerra-yas: Xaṭi, ur lliɣ ara seg-sen! 18:18 Iqeddacen akk-d iɛessasen ceɛlen times di lkanun, zzin-as iwakken ad sseḥmun axaṭer d asemmiḍ. Buṭrus iqeṛṛeb ɣuṛ-sen ad yeẓẓiẓen (ad isseḥmu ) ula d nețța. 18:19 Lmuqeddem ameqqran yebda yesteqsay Sidna Ɛisa ɣef wayen yeɛnan inelmaden-is d uselmed-ines. 18:20 Sidna Ɛisa yenna-yas: Hedṛeɣ ɛinani zdat lɣaci, slemdeɣ di leǧwameɛ n wat Isṛail, slemdeɣ daɣen deg wefrag n lǧameɛ iqedsen anda i gețnejmaɛ lɣaci, ur hdiṛeɣ ara s tuffra. 18:21 Iwacu i yi testeqsayeḍ? Steqsi widak i yi-slan amek i sen-hedṛeɣ, nutni ẓran akk ayen i d-nniɣ. 18:22 Mi d-yenna ayagi, yiwen uɛessas yellan zdat-es, yewwet it s useṛfiq, yenna-yas: Akka ara d-thedṛeḍ i lmuqeddem ameqqran? 18:23 Sidna Ɛisa yenna-yas: Ma nniɣ-ed ayen ixesṛen, ini yi-d d acu-t; ma yella ț-țideț i d nniɣ, acuɣeṛ i yi-tewteḍ? 18:24 Imiren Ḥanna iceggeɛ Sidna Ɛisa yețwarez ɣer Kayef, lmuqeddem ameqqran. 18:25 Semɛun Buṭrus mazal-it yeqqim yeẓẓiẓin deg wemkan-nni, iluɛa-t-id yiwen yenna-yas: I kečč, ur telliḍ ara d yiwen seg inelmaden n wergaz-agi? Buṭrus inkeṛ yenna-yas: Xaṭi, ur lliɣ ara seg-sen! 18:26 Yiwen seg iqeddacen n lmuqeddem ameqqran, yețțilin i win akken iwumi yegzem Semɛun Buṭrus ame??uɣ, iwehha-d ɣuṛ-es yenna-yas: Ur k-ẓriɣ ara yid-es di tmazirt? 18:27 Lameɛna Buṭrus yenkeṛ daɣen. Imiren kan iskkuɛ uyaziḍ. 18:28 Mi d-ffɣen s ɣuṛ Kayef, lecyux n wat Isṛail wwin Sidna Ɛisa ɣer lḥakem Bilaṭus; yuɣ lḥal d lefjer. Wid i t-yewwin ur kcimen ara ɣer daxel n lbeṛj (sṛaya) n Bilaṭus, iwakken ad qqimen d izedganen m'ara ččen imensi n lɛid n Tfaska. 18:29 Daymi i d-iffeɣ ɣuṛ-sen Bilaṭus, yesteqsa-ten yenna: D acu i gexdem wergaz-agi? 18:30 Rran-as: Lemmer ur yexdim ara ayen n diri, tili ur k-t-id-nețțawi ara. 18:31 Bilaṭus yenna-yasen: Atan ɣuṛ-wen, ḥekmet fell-as s ccariɛa-nwen! Nutni nnan-as: Nukni ur nezmir ara a neḥkem ɣef yiwen s lmut! 18:32 Ayagi, iwakken ad yedṛu wayen i d-yenna Sidna Ɛisa ɣef lmut i t-yețṛaǧun. 18:33 Bilaṭus yekcem ɣer wexxam n ccṛeɛ akken ad icaṛeɛ Sidna Ɛisa; yesteqsa-t, yenna-yas: D kečč i d agellid n wat Isṛail? 18:34 Sidna Ɛisa yerra-yas: Yella win i k-t-id-yennan neɣ d kečč i t-id-yennan s yiman-ik? 18:35 Bilaṭus yerra-yas: Tḥesbeḍ-iyi n wat Isṛail nekkini? D lmuqedmin imeqqranen d wat n tmurt-ik i k-id-yewwin ɣuṛ-i! D acu i txedmeḍ? 18:36 Sidna Ɛisa yerra-yas: Tagelda-w mačči n ddunit-agi. Lemmer tagelda-w n ddunit-agi tili iqeddacen-iw nnuɣen akken ur d-ɣelliɣ ara ger ifassen n imeqqranen n wat Isṛail. S tideț tagelda-w mačči n dagi. 18:37 Bilaṭus yenna-yas: Ihi d agellid i telliḍ? Sidna Ɛisa yerra-yas: Tenniḍ-t-id s yiman-ik, d agellid i lliɣ! Luleɣ-d yerna usiɣ-ed ɣer ddunit-agi akken a d-cehdeɣ ɣef tideț. Win iḥemmlen tideț, yesmeḥsis i wayen i d-qqaṛeɣ. 18:38 Bilaṭus yenna-yas: D acu i ț-țideț? Mi s-d-yenna ayagi, Bilaṭus yuɣal ɣer wat Isṛail yenna-yasen: Nekk, ur ufiɣ ara sebba s wayes ara ḥekmeɣ ɣef wergaz-agi. 18:39 Meɛna akken i tella lɛadda, di mkul lɛid n Tfaska țserriḥeɣ-awen-d i yiwen umeḥbus; tebɣam ihi a d-serrḥeɣ i ugellid n wat Isṛail? 18:40 Dɣa nutni bdan țɛeggiḍen, qqaṛen: Ala! Ur as-d-țserriḥ ara i nețța! Serreḥ-ed i Baṛabas! Baṛabas-agi, d argaz bu tmegṛaḍ.

Yuḥenna 19

19:1 Bilaṭus yefka lameṛ ad awin Sidna Ɛisa a t-wten s ujelkkaḍ. 19:2 Lɛeskeṛ zḍan taɛeṣṣabt s isennanen, ssersen-as-ț ɣef wuqeṛṛuy, selsen-as daɣen abeṛnus azeggaɣ, 19:3 imiren țqeṛṛiben ɣer zdat-es qqaṛen: Azul fell-ak ay agellid n wat Isṛail! Rnan kkaten-t s iṣeṛfiqen (ibeqqayen ). 19:4 Bilaṭus yeffeɣ-ed daɣen ɣer imeqqranen n wat Isṛail yenna-yasen: Atan a wen-t-id-awiɣ ɣer dagi akken aț-țeẓrem belli ur ufiɣ ara deg-s sebba s wayes ara ḥekmeɣ fell-as. 19:5 Ssufɣen-d Sidna Ɛisa ɣer beṛṛa s tɛeṣṣabt-nni n isennanen akk-d ibidi (abeṛnus ) azeggaɣ. Bilaṭus yenna-yasen: Atan ɣuṛ-wen! 19:6 Mi t-walan imeqqranen n wat Isṛail d iɛessasen, bdan țɛeggiḍen: Semmeṛ-it ɣef wumidag! Semmeṛ-it ɣef lluḥ! Bilaṭus yenna yasen: Ma tebɣam a t-tsemmṛem ɣef wumidag, atan ɣuṛ-wen! Ma d nekk, ur ufiɣ ara sebba s wayes ara ḥekmeɣ fell-as. 19:7 Lecyux n wat Isṛail rran-as: Nukni nesɛa ccariɛa; ccariɛa nneɣ teqqaṛ-ed: Argaz am agi ilaq ad yemmet axaṭer yenna-d: «Nekk d Mmi-s n Ṛebbi.» 19:8 Imeslayen-agi sxelɛen Bilaṭus. 19:9 Yuɣal yekcem ɣer wexxam n ccṛeɛ yesteqsa daɣen Sidna Ɛisa, yenna-yas: Ansi i d-tekkiḍ? Sidna Ɛisa ur s-d-yerri ara awal. 19:10 Bilaṭus yenna-yas: Amek! Ur iyi-d-țarraḍ ara awal? Ur teẓriḍ ara belli zemreɣ a k-serḥeɣ, zemreɣ daɣen ad fkeɣ lameṛ a k-semmṛeɣ ɣef wumidag? 19:11 Sidna Ɛisa yenna-yas: Ur tezmireḍ i wacemma fell-i anagar ayen i k-d-yețțunefken seg igenni. Daymi win i yi-d-yewwin ger ifassen-ik yewwi ddnub akteṛ-ik. 19:12 Seg imiren Bilaṭus yețqellib amek ara d-iserreḥ i Sidna Ɛisa lameɛna lecyux n wat Isṛail sekkren leɛyaḍ, qqaṛen-as: Ma tserrḥeḍ-as i wergaz-agi ur telliḍ ara d aḥbib n Qayṣer, axaṭer win yerran iman-is d agellid, d aɛdaw n Qayṣer. 19:13 Mi gesla i imeslayen-agi, Bilaṭus yessufeɣ-ed Sidna Ɛisa ɣer beṛṛa, yeqqim ɣef wukursi n ccṛeɛ deg umkan iwumi qqaṛen s tɛibṛanit «Gabbaṭa» yeɛni «afrag yessan s yeblaḍen». 19:14 Ass-nni, d ass uqbel lɛid n Tfaska; aț-țili d leǧwahi n tnac, Bilaṭus yenna i lecyux n at Isṛail: Atan ugellid-nwen! 19:15 Meɛna nutni rnan ɛeggḍen: Enɣ-it! Enɣ-it! Semmeṛ-it ɣef wumidag! Bilaṭus yenna-yasen: Amek! Ad semmṛeɣ agellid nwen? Lecyux n wat Isṛail rran-as: D Qayṣer i d agellid-nneɣ, ur nesɛi ara agellid nniḍen. 19:16 Dɣa Bilaṭus yefka-yasen-t akken a t-semmṛen ɣef wumidag. Țṭfen-d Sidna Ɛisa 19:17 sbubben-as amidag, ffɣen si temdint, ulin ɣer wemkan yețțusemman «tiɣilt n uqeṛṛuy» (iwumi qqaṛen s tɛibṛanit «Gulguṭa»). 19:18 Dinna i t-semmṛen ɣef lluḥ nețța akk-d sin nniḍen. Sbedden imidagen yiwen sya wayeḍ sya, Sidna Ɛisa di tlemmast. 19:19 Bilaṭus yumeṛ ad semmṛen yiwet n telwiḥt sennig uqeṛṛuy n Sidna Ɛisa, yura deg-s: «Ɛisa anaṣari, agellid n wat Isṛail.» 19:20 Imi amkan-nni anda i t-semmṛen ur yebɛid ara ɣef temdint, aṭas n wat Isṛail i geɣṛan talwiḥt-nni yuran s tɛibṛanit, s tlatinit ț-țyunanit. 19:21 Lecyux n wat Isṛail ccetkan ɣer Bilaṭus, nnan-as: Ur ilaq ara aț-țaruḍ ɣef telwiḥt nni «Agellid n wat Isṛail,» lameɛna ilaq aț-țaruḍ «Argaz-agi yenna d: nekk d agellid n wat Isṛail.» 19:22 Bilaṭus yerra-yasen: Ayen uriɣ ad yeqqim akken i t-uriɣ. 19:23 Mi semmṛen Sidna Ɛisa ɣef wumidag, lɛeskeṛ ddmen-d lqecc-is bḍan-ten ɣef ṛebɛa, yal yiwen yewwi amur-is; yeqqim-ed ujellab-is ur nefṣil ur nxaḍ, mazal-it akken yezḍa seg yixef ɣer wayeḍ. 19:24 Heddṛen wway gar-asen, nnan: Acuɣeṛ ara t-ncerreg, eyyaw axiṛ a nger tasɣaṛt fell-as a nẓer anwa ara t-yawin. S wakka i gennekmal wayen yuran di tira iqedsen: Feṛqen lqecc-iw, gren tasɣaṛt ɣef wubeṛnus-iw.» Akka i xedmen iɛsekṛiyen-nni. 19:25 Zdat umidag, tbedd yemma-s n Sidna Ɛisa, weltma-s n yemma-s, Meryem tameṭṭut n Klufas akk-d Meryem tamagdalit. 19:26 Mi gwala Sidna Ɛisa yemma-s tbedd ɣer tama n unelmad-nni i gḥemmel, yenna-yas: A tameṭṭut, atan mmi-m. 19:27 Yenna daɣen i unelmad-nni: Ațan yemma-k. Seg imiren anelmad-nni yewwi-ț ɣer wexxam-is. 19:28 Mi geẓra Sidna Ɛisa dayen kullec ifuk, yenna iwakken ad nnekmalent tira iqedsen: Ffudeɣ! 19:29 Yella dinna ubuqal yeččuṛen d lxell. Dmen-d ameččim n taḍuṭ cudden-t ɣer yixef n uɣanim, sbezgen t-id s lxell-nni, ssawḍen-as-t ɣer yimi-s. 19:30 Akken kan i geɛṛeḍ lxell-nni, Sidna Ɛisa yenna: Kullec yețwakemmel! Yessekna aqeṛṛuy-is, yessufeɣ ṛṛuḥ. 19:31 Tafaska n izimer n leslak yeɣli-d deg wass n westeɛfu. Tameddit n wass uqbel ass n westeɛfu, lecyux n wat Isṛail ur bɣin ara ad ǧǧen lǧețțat-nni ɣef yimidagen di leɛwaceṛ. Ṛuḥen ad ssutren i Bilaṭus a sen-ṛẓen iḍaṛṛen i widak-nni yețwasemmṛen; iwakken ad kksen lǧețțat-nsen. 19:32 Lɛeskeṛ ṛuḥen, ṛẓan iḍaṛṛen i yiwen seg widak-nni yețwasemmṛen ț-țama n Sidna Ɛisa, syenna uɣalen ɣer wayeḍ. 19:33 Mi wwḍen ɣer Sidna Ɛisa, ufan-t yemmut yakan, daymi ur s-ṛzin ara iḍaṛṛen-is. 19:34 Yiwen uɛeskṛi yessenta yas isekkin deg idis, imiren ffɣen-d waman akk-d idammen seg-s. 19:35 Win i d-yeḥkan ɣef wannect-agi d inigi n ṣṣeḥ, axaṭer d ayen i geẓra s wallen-is. Yezṛa ț-țideț i d-yenna, yenna-t-id akken aț-țamnem ula d kunwi. 19:36 Ayagi meṛṛa yedṛa iwakken ad yețțukemmel wayen yuran di tira iqedsen: Ula d yiwen seg yeɣsan-is ur yețṛuz. 19:37 Yura daɣen: Ad ssersen tamuɣli ɣef win i fetken. 19:38 Deffir wannect-agi meṛṛa, Yusef n taddart n Arimati iṛuḥ yessuter i Bilaṭus a t-yeǧǧ ad yawi lǧețța n Sidna Ɛisa. Nețța daɣen yella d anelmad-is, lameɛna yeffer iman-is axaṭer ițțaggad lecyux n wat Isṛail. Bilaṭus yeqbel wayen i s-d yessuter; dɣa Yusef iṛuḥ a d-yawi lǧețța n Sidna Ɛisa nețța d Nikudem, 19:39 win akken i gṛuḥen deg yiḍ ɣer Sidna Ɛisa. Nikudem yewwi-d yid-es azal n tlatin litrat n leɛṭeṛ ixeddmen i lmegtin. 19:40 Di sin yid-sen, wwin-d lǧețța n Sidna Ɛisa xedmen-as leɛṭeṛ akken i tella lɛadda n wat Isṛail, imiren țțlen-t s lekfen. 19:41 Zdat wemkan anda semmṛen Sidna Ɛisa, tella deg yiwet n tmazirt yiwen n yefri yețwaheggan d aẓekka, ulac win i gmeḍlen deg-s. 19:42 Imi i geqṛeb yefri-nni, rran lǧețța n Sidna Ɛisa ɣer daxel, axaṭer ass i d-iteddun d ass n westeɛfu n wat Isṛail.

Yuḥenna 20

20:1 Ass n lḥedd, ṣṣbeḥ zik qbel ad yali wass, Meryem tamagdalit tṛuḥ ɣer u?ekka. Twala azṛu-nni iqeflen imi n u?ekka yețwakkes. 20:2 Imiren kan tuzzel aț-țessiweḍ lexbaṛ i Semɛun Buṭrus akk-d unelmad-nni i gḥemmel Sidna Ɛisa. Tenna-yasen: Kksen-d Ssid-nneɣ seg u?ekka, ur neẓri ara anda i t-rran. 20:3 Buṭrus d unelmad-nni ddukklen, ṛuḥen ɣer u?ekka. 20:4 Uzzlen i sin, lameɛna anelmad-nni yeǧǧa Buṭrus ɣer deffir, yewweḍ d amezwaru. 20:5 Imuqel ɣer daxel n u?ekka, iwala lekfen di lqaɛa, lameɛna ur yekcim ara. 20:6 Semɛun Buṭrus i t-id-itebɛen ilḥeq-ed. Yekcem ɣer daxel u?ekka, iwala lekfen di lqaɛa, 20:7 ma d aceṭṭiḍ s wayes yețțel uqeṛṛuy n Sidna Ɛisa ur yelli ara akk-d lekfen-nni, meɛna yers ɣer rrif, mazal-it deg wemkan-is akken yețțel. 20:8 Anelmad-nni i gewwḍen d amezwaru, yekcem ula d nețța ɣer uẓekka. Mi gwala, yumen. 20:9 Axaṭer armi d imiren, urɛad fhimen belli Sidna Ɛisa ilaq a d yeḥyu si ger lmegtin akken yura di tira iqedsen. 20:10 Sin inelmaden-nni uɣalen ɣer yexxamen-nsen. 20:11 Yuɣ lḥal Meryem tella di beṛṛa, tețru tama n u?ekka. Mi tella tețru, tmuqel ɣer daxel, 20:12 twala snat lmalayekkat s llebsa tamellalt, qqimen deg wemkan-nni anda akken i ssersen lǧețța n Sidna Ɛisa, yiwen ɣer uqeṛṛuy wayeḍ ɣer iḍaṛṛen, 20:13 nnan-as: Acuɣeṛ i tețruḍ? Meryem tenna-yasen: Wwin Ssid-iw, yerna ur ẓriɣ ara anda i t-rran! 20:14 Urɛad d-tfuk ameslay tmuqel ɣer deffir, twala Sidna Ɛisa ibedd-ed, lameɛna ur teɛqil ara belli d nețța. 20:15 Sidna Ɛisa yenna-yas: Acuɣeṛ i tețruḍ? Ɣef wanwa i tețqellibeḍ? Meryem tɣil d aɛessas n tmazirt, tenna-yas: Ma yella d kečč i t-iddmen, ini-yi-d ɣer wanda i t-tewwiḍ akken ad ṛuḥeɣ a t-id-awiɣ. 20:16 Sidna Ɛisa iluɛa-ț-id yenna-yas: Meryem! Tezzi ɣuṛ-es, dɣa tenna-yas s tɛibṛanit: Rabuni! (yeɛni: a Sidi! ) 20:17 Sidna Ɛisa yenna-yas: Ur yi-d-țmassa ara, axaṭer urɛad uliɣ ɣer Baba. Lameɛna ṛuḥ ini-yasen i watmaten-iw: aql-iyi ad aliɣ ɣer Baba yellan d Baba-twen, ɣer Yillu-yiw yellan d Illu-nwen. 20:18 Meryem tamagdalit tṛuḥ aț țessiweḍ lexbaṛ i inelmaden. Tenna yasen: Ẓriɣ Ssid-nneɣ, atah wayen i yi-d-yenna... 20:19 Ass n lḥedd tameddit, inelmaden llan deg yiwen wexxam ɣelqen tiwwura axaṭer uggaden at Isṛail. Ataya Sidna Ɛisa ibedd-ed gar-asen, yenna-yasen: Sslam fell-awen! 20:20 Akken i gsellem fell-asen isken asen-d ifassen-is akk-d yidis-is. Inelmaden feṛḥen aṭas imi walan Ssid-nsen. 20:21 Sidna Ɛisa yenna-yasen daɣen: Sslam fell-awen. Akken i yi-d iceggeɛ Baba, nekk daɣen a kkun ceggɛeɣ. 20:22 Mi d-yenna annect-agi, isuḍ ɣef yinelmaden-is, yerna yenna-yasen: Stṛeḥbet s Ṛṛuḥ iqedsen. 20:23 Wid iwumi ara tsemḥem ddnubat a sen țwasemḥen, ma d wid iwumi ur tețsemmiḥem ara ddnubat-nsen ad qqimen i yirawen-nsen. 20:24 Țuma, iwumi qqaṛen Akniw, yellan d yiwen si tnac-nni, ur yelli ara yid-sen mi d-yusa Sidna Ɛisa. 20:25 Inelmaden nniḍen nnan-as: Neẓra Sidna Ɛisa! Meɛna nețța yerra-yasen: Ma yella ur walaɣ ara ccwami n imesmaṛen deg ifassen-is, ma yella ur sriseɣ ara aḍad-iw anda ntan imesmaṛen, ma yella ur sriseɣ ara afus-iw ɣef yidis-is, ur țamneɣ ara. 20:26 Mi ɛeddan tmanya n wussan, inelmaden nnejmaɛen daɣen deg wexxam. Tikkelt-agi Țuma yella yid-sen. Ataya Sidna Ɛisa yekcem-ed ɣuṛ-sen ɣas akken ɣelqent tewwura. Ibedd gar-asen, yenna-yasen: Sslam fell-awen! 20:27 Sidna Ɛisa yenna i Țuma: Awi-d aḍad-ik atnan ifassen-iw, qeṛṛeb-ed afus-ik tserseḍ-t ɣef yidis-iw. Ur jehhel ara, amen! 20:28 Țuma yerra-yas: A Ssid-iw! Ay Illu-yiw! 20:29 Sidna Ɛisa yenna-yas: Armi i yi-twalaḍ i tumneḍ! Amarezg n win ara yamnen mbla ma iwala. 20:30 Aṭas n lbeṛhanat i gexdem daɣen Sidna Ɛisa zdat inelmaden-is, ur d-temmeslay ara fell-asen tektabt-agi. 20:31 Lameɛna ayen akk i d-yețwajemɛen deg-s yura-d iwakken aț-țamnem belli d Ɛisa i d Lmasiḥ, d Mmi-s n Ṛebbi yerna ma tumnem yis aț-țesɛum tudert s yisem-is.

Yuḥenna 21

21:1 Syin akkin, Sidna Ɛisa isbeggen-ed iman-is daɣen i inelmaden-is ɣef rrif n lebḥeṛ n Tiberyas. Atah wamek i tedṛa: 21:2 Semɛun Buṭrus, Țuma iwumi qqaṛen Akniw, Natanahil n taddart n Kana yellan di tmurt n Jlili, arraw n Zabadi akk-d sin inelmaden nniḍen ddukklen akken. 21:3 Semɛun Buṭrus yenna-yasen: Ad ṛuḥeɣ a d-ṣeggḍeɣ iselman. Nutni nnan-as: Ula d nukkni a neddu yid-ek. Dɣa ṛuḥen rekben taflukt, ṣeggden iḍ kamel ur d-ṭṭifen ula d yiwen uḥewtiw. 21:4 Akken yebda yețțali wass, ataya Sidna Ɛisa ibedd-ed ɣef rrif n lebḥeṛ; inelmaden ur t-eɛqilen ara d nețța. 21:5 Sidna Ɛisa yessawel-asen: Ay arrac, teṭṭfem-d kra n lḥut neɣ ala? Nutni rran-as: Ur d-neṭṭif ula d yiwen! 21:6 Sidna Ɛisa yenna-yasen: Ḍeggṛet acebbak ɣer tama tayeffust n teflukt a d-teṭṭfem. Deggṛen acebbak ɣer wanda i sen-d-yenna, mi t-id-ssulin yeččuṛ ed d lḥut armi ur zmiren ara a t-id refden. 21:7 Anelmad-nni i gḥemmel Sidna Ɛisa, yenna i Buṭrus: D Sidna Ɛisa!ɣ Mi gesla belli d Sidna Ɛisa, Semɛun Buṭrus yekksen aqenduṛ-is mi gella yețṣeggid, yelsa-t, dɣa iḍeggeṛ iman-is ɣer waman. 21:8 Inelmaden nniḍen uɣalen-d s teflukt ɣer rrif, zzuɣṛen-d yid-sen acebbak nni yeččuṛen d iselman. Llan beɛden ɣef rrif azal n meyya n lmitrat. 21:9 Mi d-rsen ɣer lqaɛa, ufan-d aɣṛum akk-d lḥut s ufella n yirrij n tmes. 21:10 Sidna Ɛisa yenna-yasen: Awit-ed kra n iselman seg wid i d-teṭṭfem. 21:11 Semɛun Buṭrus yuli ɣer teflukt, ijebd-ed acebbak-nni, yeẓẓuɣer-it-id ɣer lqaɛa. Ufan deg-s meyya utlata uxemsin iselman imeqqranen; ɣas akken yeččuṛ ucebbak-nni ur iqqeṛs ara. 21:12 Sidna Ɛisa yenna-yasen: Qeṛṛbet-ed aț-țeččem. Ula d yiwen seg inelmaden-nni ur yezmir a s-yini «anwa-k?» Ẓran akk belli d Sidna Ɛisa. 21:13 Sidna Ɛisa iqeṛṛeb ɣuṛ-sen, ifṛeq-asen aɣṛum-nni d iselman-nni. 21:14 Ț-țikkelt tis tlata i d-yesken iman-is Sidna Ɛisa i inelmaden-is seg wasmi i d-yeḥya si lmut. Sidna Ɛisa akk-d Buṭrus 21:15 Mi kfan učči, Sidna Ɛisa yenna i Semɛun Buṭrus: A Semɛun mmi-s n Yunes, tḥemmleḍ-iyi akteṛ n wigi? Semɛun Buṭrus yenna-yas: Ih a Sidi, teẓriḍ ḥemmleɣ-k. Sidna Ɛisa yenna-yas: Țḥadar izamaren-iw. 21:16 Sidna Ɛisa yenna-yas tikkelt tis snat: A Semɛun mmi-s n Yunes, tḥemmleḍ-iyi? Yerra-yas: Ih teẓriḍ ḥemmleɣ-k a Sidi! Sidna Ɛisa yenna-yas: Kess ulli-inu. 21:17 Sidna Ɛisa yesteqsa-t tikkelt tis tlata, yenna-yas: A Semɛun mmi-s n Yunes, tḥemmleḍ-iyi? Semɛun Buṭrus iɣaḍ-it lḥal, axaṭer ț-țikkelt tis tlata i t-id-yesteqsa: «Ma tḥemmleḍ-iyi?». Dɣa yenna-yas: A Sidi, teẓriḍ kullec, teẓriḍ belli ḥemmleɣ-k! Sidna Ɛisa yenna-yas: Țḥadar ulli-inu. 21:18 Qqaṛeɣ-ak s tideț: asmi me??iyeḍ, tețbeggiseḍ i yiman-ik weḥd-ek, tețṛuḥuḍ anda tebɣiḍ. Lameɛna asm'ara tuɣaleḍ d amɣaṛ, aț-țḍelqeḍ iɣallen-ik i wayeḍ akken a k-yebges yerna a k yawi ɣer wanda ur tebɣiḍ ara aț-țṛuḥeḍ. 21:19 S imeslayen-agi, issemɛen-ed amek ara yemmet Semɛun Buṭrus ɣef ddemma n tmanegt n Sidi Ṛebbi. Mi d-yenna ayagi, yenna-yas daɣen: Ddu-d yid-i! 21:20 Buṭrus yezzi ɣer deffir, iwala anelmad-nni i gḥemmel Sidna Ɛisa iteddu-d deffir-nsen. Anelmad-agi d win akken i geknan ɣer Sidna Ɛisa asmi llan tețțen imensi, i s yennan: «A Sidi, anwa ara k ixedɛen?» 21:21 Mi t-iwala, Buṭrus yesteqsa Sidna Ɛisa yenna-yas: I nețța a Sidi, d acu ara yedṛun yid-es? 21:22 Sidna Ɛisa yenna-yas: Ma bɣiɣ ad yidir alamma d asm'ara d-uɣaleɣ, d acu i k yecqan? Kečč tbeɛ-iyi-d! 21:23 Ɣef wannect-agi i geffeɣ lexbaṛ ger watmaten, qqaṛen: «Anelmad-agi ur yețmețțat ara». S tideț, Sidna Ɛisa ur d-yenni ara belli anelmad-agi ur yețmețțat ara lameɛna yenna-d kan: «Ma bɣiɣ ad yidir alamma asm'ara d uɣaleɣ, d acu i k yecqan?» 21:24 D anelmad-agi i d-ixebbṛen ɣef wannect-agi yerna yura-t-id. Neẓra belli cchada-ines tṣeḥḥa. 21:25 Sidna Ɛisa yexdem daɣen aṭas n lecɣal nniḍen. Lemmer a ten-id neḥku yiwen yiwen, ur cukkeɣ ara ddunit meṛṛa aț-țawi tiktabin ara naru.

AMAZING GRACE BIBLE INSTITUTE