JOHN

1

1 Pamuvango kwekwina lukani, nave lukani e na Nguluvi, nave lukani e Nguluvi. 2 Uluhuma pamuvango lukani e ali na Nguluvi. 3 Mbefili fyagafilwe ukukola mwa yuyo; eave si yuyo chekiva kisukuli chechekigawa. 4 Mugati mulumwene mwe mowoli uwumi na uwumi wula we lung'ali lwa avanu. 5 Na ulung'ali lwing'alika mulwisa na ulwisa, lwalemilwe ukusimya. 6 Pepina munu umutume uluhuma kwa Nguluvi ilitawa lyakwe Yohane, 7 uyo aasile mwewolelesi sambi olelele ulwa ulung'ali lula. Neke mbevali sambi vafuuwe ukukola kulumwene. 8 Uyo sie lung'ali lula nda aasile olelele hela ulwa ulung'ali. 9 Ulung'ali lwa nachene ulwing'alikila yeyeavesaga lukusa mung'i. 10 Lukani emwali mung'i, nave ing'i we yagafilwe ukukola kulumwene ing'i siyamukagwi. 11 Aasile ukwawo, neke avanu vakwe sivamwanuchi. 12 Neke vala mbevali avamwanuche neke vamufuuwe avapelye uludali lwa ukuva vana va Nguluvi. 13 Vevegilwe kwa uludali lwa Nguluvi na si kwa uludali lwa munu nambi ing'asi isa uwunu. 14 Nave Lukani ave munu swe akwikala kwa hwehwe amemile uwuwuya na uwanachene, nahwe swe tukuwuwona uwunyandolo wakwe, uwunyandolo ndawe wa Umwana yeiyena yeihuma kwa Dada. 15 Yohane avalonje avanu ing'ani sakwe itigila, “Uyu ye mwene yengalongige ing'ani sakwe penditigila: ‘Pakuva uyu yeeikwali nene pesindilawoneka.’ ” 16 Ukuhuma mumikwilanikile jakwe hwehwe mbetuli twanuche uwufunyilile wa uwuwuya wolofu. 17 Pakuva ululagilo lwasile ukukola mwa Musa, uwuwuya na uwanachene fyasile ukukola mwa Yesu Kilisito. 18 Asukuli umunu yealamuwene Nguluvi ulusika mbeluli. Umwana yeiyena yeategine na Nguluvi, yealipamwi na Dada, uyo yeamuwuyipe Nguluvi akagulanike. 19 Yohane olelelye pa Avatambisi na Avalevi avevatumitwe na Avayudaya ukuhuma ku Yelusalemu vamuwuse ulwa, “Veve wi nani?” 20 Nave alonzile wima hela sahwi akikana ulwa, “Nene sindi Mesiya.” 21 Neke pevemuwuse, “Ino winani? Veve wi Eliya?” Neke atigile, “Nene nda?” Veve ye muvisi yula neke atigile, “Nda!” 22 swe vitigila, “Mbi ino winani? Tukavalongele vala avatutumite veve ukwitigila winani?” 23 Swe itigila, “Nene ndiliswi lya umunu yeikoola mubalali mugololage ing'asi ya Umutwa, ‘Ndawe lwe alonzile umuvisi Yesaya.’ ” 24 Na vala avali vatume vevahumite ku Avafalisayo, 25 neke vamuwuse vakumutigila, “Mbi ino ndawuli wibatisa wone veve si wi Kilisito nambi Eliya nambi umuvisi yula?” 26 Neke Yohane avapitule, “Nene ndibatisa kwa lulenga pagati pa nyenye imile umwene yesimukumukagula nyenye. 27 Ye mwene yula yeakusa mu mbele mwa nene yesinywanite ukuhogosa inzisi sa indatu sakwe.” 28 Iso sapigike ku Betaniya mu mwambu ya umukoga gwa ku Yolodani, kweeikwali Yohane peibatisa. 29 Ikimunyi cha kavili Yohane amuwene Yesu akusa kulumwene, neke atigile, “Uyu ye mwanang'olo va Nguluvi, ihesa inzanangifu sa mung'i! 30 Uyu ye mwene yengalongige ing'ani sakwe ulwa, ‘Yeakusa munu mu mbele mwa nene, yeandutye pakuva eikwali nene pesindilawoneka!’ 31 Nene sindendimuseeli, ino ndasile mukubatisa nu lulenga sambi avanu va Isilaeli vamukagule.” 32 Kangi Yohane neke olelele itigila: “Ndamuwene umuhe akwika nda ngunda uluhuma kuchanya nave swe akwika pachanya palumwene. 33 Nayinene sindendimuseeli neke umunyakusindika kukubatisa na ululenga uyo andonje: ‘Umwene yumuwona Umuhe akwika na ukwima pachanya uyo ye munyakubatisa nu Muhe Mwelu.’ 34 Nane ndafile kangi nzolelelye ulwa uyu ye Mwana va Nguluvi.” 35 Kangi ikimunyi icha kavili, Yohane eimite pamwi na avavili va avanyigendo vakwe. 36 Amulavye Yesu pigenda neke atigile, “Uyu ye mwanang'olo va Nguluvi.” 37 Avanyigendo avavili vala vapulike pilonga nu kumuninila Yesu. 38 Yesu apitwike, nu kuvawona pevakumuninila neke avatigile, “Mwisaka kiki?” Swe avanyigendo vakumulongela, “Labi wakwikala kwi? (Labi-kwe kutigila “Mwigisi”) 39 Neke Yesu avalongele, “ Muse nanye mupawona.” Swe avanyigendo vala vibita nu kupawona peakwikala ndawe vahwesige nave ikimunyi icho. 40 Andeleya, umwanakwave va Simoni Petulo, eyumwi va vala avavili vevamupulike Yohane nu kumuninila Yesu. 41 Uyo amuwene tandi Simoni umame nu kumulongela, “Tumuwene Mesiya.” (kwekutigila Kilisito) 42 Neke peamusindike kwa Yesu. Nave Yesu neke amulavile Simoni atigile, “Veve wi Simoni Mwana va Yohane, nave ukemelwa Kefa.” (Kwekutigila Petulo, apangi, “Liganga”.) 43 Ikimunyi icha kavili Yesu asakige ukuhega abite ku Galilaya, Ndawe amuwonige Filipo. Neke Yesu amutigile, “Ninile.” 44 Nave Filipo e munu va ku Betisaida, munyaboma ya kwa Andeleya na Petulo. 45 Ndawe Filipo amuwonige Nataneli neke amulongele, “Tumuwene umwene yeandikilwe na Musa mundagilo na mu vavisi Yesu va ku Nasaleti Umwana va Yosefu.” 46 Neke Natanaeli amutigile, “Yagu luhwanite, kihume kinu kinofu uluhuma ku Nasaleti?” Filipo amupitule, “Wuse wilavile.” 47 Swe Yesu akumuwona Natanaeli akusa kulumwene ndawe amulongige, “Lavage! mu Isilaeli mugadaga mugati mulumwene mugaya gila nda.” 48 Neke Natanaeli pamupitule, “Mbi veve ung'agwe ndawuli?” Yesu amupitule amutigile, “Wesialakukemela Filipo puke pasi pa musombe ngenguwene.” 49 Nataneli pamutigile, “Labi, veve wi Mwana va Nguluvi. Ye veve ve Umutema va Isilaeli!” 50 Neke Yesu apitule amutigile, “Pakuva ngulonje ulwa ngenguwene pasi pa musombe wifuuwa? Usiwona ing'ani ingomi isilutye mwa isi” 51 Neke Yesu pamulongele, “Nachene nguvalongela muwuwona uwulanga wudindwike na vanyivaha va Nguluvi vakwilila nu kwika muchanya mulu Mwana va Umunu.”

2

1 Ikimunyi cha wudatu kwekwina luwungo ku Kana ya ku Galilaya. Na uyuve va Yesu epwali, 2 Nave Yesu emulaalike kuluwungo pamwinga na vanyigendo vakwe. 3 Pepave na uwukefu wa idifayi uyuve va Yesu amulonje, “Vagaya difayi!” 4 Neke Yesu amupitule, “Yuva, lemwe ukundongela icha kupiga. Ikivalilo changu sikilafika.” 5 Uyuve neke avalongele avakami, “Checheavalongela, mpigage.” 6 Avayudaya vana musimu gwa ukukalava. Wimila ulo vevavisile fisilo fimutanda fya maganga uwukomi wafyo wendige wutegule mateneka gahanu kwa kisilo kimwi. 7 Yesu avalonje avakami, “Mumemye ifisilo ululenga.” swe vimemya mbaka mumugoo, 8 neke avatigile, “Ino munege mumusindikile umuvina va uluwungo.” 9 Nave umuvina va uluwungo ave igesa ulo ululenga kumbi yelwelupitwike ukuva difayi. Umwene salukagwi kwelweluhumite, neke vala avakami avevanesile ululenga vevalukagwe. Umuvina va uluwungo amukemelye umunyaluwungo, 10 neke amulongele, “Avanu mbevali vavigelanisa tandi idifayi inofu, neke avanu peyevanywe hilo, pepene pevavileta inyufu. Veve uvikite idifai inofu mbaka lino!” 11 Iki che kilagilo cha umuvango cheapigite Yesu ku Kana ya ku Galilaya, pala elelwe uwunyandolo wakwe na avanyigendo vakwe vamufuuvitwe. 12 Nape silutye iso Yesu asulunwike ku Kapelenaumu umwene, uyuve, na avanakwave na avanyigendo vakwe nu kwikala uko filo fikefu. 13 Na i Pasaka ya Avayudaya yeyihegelye, nave Yesu agang'amwike mbaka ku Yelusalemu. 14 Swe iwona avanu mu tembeli avagusige isenga na ing'olo na ingunda na avanyakufunza amagobole vateng'eme pa mesa sawo. 15 Ndawe Yesu asaavige umulegesi umunyamifwa nu kuvadaga mbevali pamwi ni ng'olo ni senga, uluhuma mu Tembeli nu kwita amagobole ga avanyakufunza nu kudulika imesa sawo. 16 Neke pavalongele vala avanyakugusa ingunda,“Muhese isi. Mulapitula ikaye ya Dada vangu yive ya wusulusi!” 17 Avanyigendo vakwe swe vakwiwuka ukuta Uwandike Uwelu witigila, “Uwende wa ikaye yako veve Nguluvi wumbulaga.” 18 Swe Avayudaya vakumupitula vitigila, “Utulagila ikilagilo ikindawuli ulwa wimulagile ukupiga isi?” 19 Neke Yesu apitule atigile, “Mudenye i tembeli iyi, nani nzenga kangi mufilo fidatu.” 20 Ndawe Avayudaya vatigilige, “I tembeli iyi yasengitwe musika gwa myaka machumi gatayi na gimutanda. Mbi luhwana ndawuli veve usenge mufilo fidatu?” 21 Kumbi umwene alongige ulwa i tembeli ya umuvili ugwakwe. 22 Lwave peyeasilibwike kuvafwe, avanyigendo vakwe viwike ukuta alalonzile ndahihi, swe vifuuwa Uwandike Uwelu na ulukani lwealonzile Yesu. 23 Nape Yesu ali ku Yelusalemu ku luhekelelo lwa i Pasaka, avanu wolofu vamufuuvitwe umwene pevafiwene ifilagilo fyeapigite. 24 Neke Yesu avabedale, pakuva umwene alavasele avene mbevali. 25 Ino siawendigi munu amulongele ulwa avene, pakuva yumwene alasisele isili mugati mwa avanu.

3

1 Epwali umunu uyumwi umufalisayo ilitawa lyakwe e Nikodemu umulongola va Avayudaya. 2 Uyo amusye Yesu pakilo nu kumutigila, “Labi tukulukagula ulwa wi mwigisi uhumile kwa Nguluvi. Pakuva sikwali umunu yeahwanite ukupiga ifilagilo ifyo fyewipiga veve pesi Nguluvi alipamwi na Umwene.” 3 Neke Yesu amupitule atigile, “Nachene nene ngukulongela: umunu pesiegilwi ulwa kavili sisauhanga ukuwuwona uwutwa wa Nguluvi.” 4 “Neke Nikodemu amutigile lwiima ndawuli ukwegalwa kangi umunu umugogolo? Ahwanite ingile mwileme lya uyuve neke egalwe ulwa kavili?” 5 Yesu pamupitule, “Nachene ngukulongela umunu pesiegilwi kwa lulenga nu Muhe sahwana ukwingila kuwutwa wa Nguluvi. 6 Ichegilwe kwa umuvili, cha muvili, na ichegilwe nu Muhe, cha Muhe. 7 Ulasasavala pakuva ngulonje ulwa luvaje ukwegalwa ulwa kavili. 8 Ing'ala yayipugila kwekweyiwenda; na umubumo gwayo wawipulika neke sulukagula na kwe yibita. Ndahihyo na kwa munu umwegale nu Umuhe.” 9 Neke Nikodemu apitule atigile, “Sivagila ndawuli ing'ani isi?” 10 Yesu amupitule atigile, “Be veve wi Mwigisi va Isilaeli ing'ani isi susiseli? 11 Nachene ngukulongela ukuta lula lwetulusele twatwilonga na lula lwetuluwene twatukolelela na uwolelesi wetu simwakuwidikila. 12 Neke ulwene pendivalonje isa mung'i simwifuuwa nda, mbi neke pendivalonje isa kuchanya mufuuwa? 13 Kangi sikwali umunu yealahele kuchanya pesi Umwana va Umunu, yeasile uluhuma kuchanya. 14 “Ndawe Musa lwe atumbike inzoka ya ichuma mwibiki ku balali, lwindahihyo Umwana va Umunu avaje ukukang'ulwa, 15 sambi umunu yeyeavesaga yeifuuwa ave na uwumi wa mbepali mulumwene. 16 Pakuva Nguluvi ayiyendite ing'i nambi amutawe Umwana yeiyena, sambi yeakumufuuwa alemwe ukuyaga pesi ulwa ave na uwumi wa mbepali. 17 Pakuva Nguluvi samutumiti Umwanakwe mung'i ayihige; atumitwe aipoke ing'i. 18 “Yakumufuuwa umwana sisaahigwa yesiakumufuuwa yahigitwe pakuva sakamufuuvitwi Umwana yeiyena va Nguluvi. 19 Na ulu lwe luhigilo ukuta ulung'ali lwasile mung'i neke avanu vende ulwisa valeke ulung'ali pakuva ifipigo fyawo fyanangifu. 20 Pakuva Umunu yeyeavesaga yeipiga imbi akuluvipila ulung'ali kangi siasa ku lung'ali ifipigo fyakwe filonga fikenyelwe. 21 Neke yeaipiga isa nachene akusa ku lung'ali sambi ifipigo fyakwe fiwoneke pawelu ulwa fipigitwe muchoga pa Nguluvi.” 22 Peye silutye iso, Yesu na avanyigendo vakwe, vahele mbaka ku ing'i ya mu Yudaya na ukwikala nawo kuko pamwi kono ibatisa avanu. 23 Nave Yohane abatisige ku Ainoni, pipi na ku Salimu, pakuva uko kwekwina lulenga lolofu na avanu vamubitye nu kubatisiwa. ( 24 Pakuva Yohane siealadindilwa mundinde.) 25 Swe lwivanga ulubesa lwa musimu gwa ukofuga na avanyigendo va Yohane na Umuyudaya uyumwi. 26 Neke avanyigendo iwo vabite kwa Yohane nu kumulongela, “Labi, umwene yeakelumwi na veve kumwambu ya ku kumukoga gwa ku Yolodani, umwene yukamolelelye lavage lino nave ibatisa na avanu mbevali vakumufwata!” 27 Neke Yohane avapitule atigile, “Sahwaniti munu ukwanukila kinu pesiapelitwi na Nguluvi.” 28 Yinyenye munzolelye ulwa ndalonzile, ‘Nene sindi Kilisito nda, ndimulongola hela!’ 29 Umugosi va umwalule ye munyamudala neke umunyawiyendi va umunya mudala yeakwima nu kumupulikisa ayihekelela hilo pakumupulika umunya mudala peilonga. Lwindahiyo nayinene ndihekelela wuli pe uluhekelelo lwangu lwikwilanikila. 30 Luvaje umwene alutilikile ululumbo, nane ng'epe. 31 “Umwene yeakusa uluhuma kuchanya uyo ye muvina kwa mbevali umwene uva mung'i umwaluko gwakwe gwa mung'i, nave ayilonga ing'ani sa mung'i nachene umwene yakusa uluhuma kuchanya uyo ye muvina kwa mbevali. 32 Sila sasiwene nu kupulika sesene seakolelela na asukuli yeakwidikila uwolelesi wakwe. 33 Umwene yawidiche uwolelesi wakwe ayisigihila wuwo ulwa Nguluvi va nachene. 34 Pakuva umwene yeatumitwe na Nguluvi ailonga ing'ani sa Nguluvi pakuva Nguluvi akumupela umunu uyo Umuhe gwakwe wugaya kigelo? 35 Udade akumwenda Umwana nave amupelye mbefili mumawoko gakwe. 36 Yakumufuuwa umwana ina uwumi wa mbepali, yesiakumufuuwa Umwana sisaahanga uwumi wa mbepali pakuva ililakali lya Nguluvi limusigalila.”

4

1 Avafalisayo vapulike ulwa Yesu iva na avanyigendo wolofu nukubatisa ukulutila Yohane. ( 2 Neke umwene Yesu siabatisigi pesi avanyigendo vakwe.) 3 Aveipulika iso ahesile ku Yudaya nu kubita kangi mbaka ku Galilaya. 4 Nave lwelumuvaje ukukola bahagati pa Samaliya. 5 Swe ifika mu Samaliya mu boma iyitambulwa Sikali pipi na umugunda gwa Yakobo gwe alamupelye umwanakwe, Yosefu. 6 Na ipo pepina kisima cha Yakobo, neke pakuva Yesu alafuluge nu lugendo lwakwe, ateng'eme palubali pa kisima na ikivalilo che cha mutanda pamunyi. 7 Swe akusa Umung'inetu yumwi Umusamaliya kukunega ululenga. Neke Yesu amutigile, “Mele ululenga nywe.” ( 8 Pakuva avanyigendo vakwe vevahele kuboma mukugula ichakulya.) 9 Ndawe Umung'inetu Umusamaliya amulongelige, “Luve ndawuli veve ve Muyudaya; ukusuka nene nde mung'inetu nde Musamaliya?” (Pakuva Avayudaya sivahangigi ifinu fyawo na Avasamaliya ndawe ifinegelo fya ululenga.) 10 Yesu swe akumulongela, “Nda uke uve ukulukagula ikipelwa cha Nguluvi nave ye nani yakukulongela: ‘Mele ululenga nywe,’ uke ukumusuka umwene na ake akupela ululenga ulunya wumi. 11 Umung'inetu neke amulongele, “Mulugu wimugaya kinu chakunegela na ikisima kitaali, lino uluwona kwi ululenga ulunya wumi? 12 Mbi veve wimuvina ukulutila ukukwetu Yakobo yeatupelye ikisima iki, neke na yumwene anywe ululenga lwa kiki na avanakwe na ifikwamilwa fyakwe?” 13 Yesu amutige, “Yeyeanywesaga ululenga ulu akeluka kangi. 14 Neke yeyeanywesaga ululenga lwe ndimupela nene sisaakeluka kangi nda. Pakuva ululenga lwe ndimupela luva mufwilo gwa lulenga mugati mwakwe ulwileta uwumi wa mbepali.” 15 Umung'inetu yula neke amulongele, “Mulugu, mele ululenga ulo sambi ndemwe ukukeluka kangi ndemwe ukusa ipa kukunega.” 16 Yesu pamupitule, “Bite, ukamukemele uvako wuse nave ipa.” 17 Umung'inetu yula neke amupitule, “Ndimugaya munu.” Neke Yesu amulongele, “Ulonje mumwene wimugaya munu. 18 Pakuva ukave na vagosi vahanu nave ye winave lino simugosi vako, ipo ulonje mumwene.” 19 Umung'inetu yula amulonje, “Mulugu, ndiwona veve wimuvisi. 20 Avakukwetu vifunyige mukidunda iki, na nyenye mwitigilaga ulwa uko ku Yelusalemu pepono pepatuvaje ukwifunya.” 21 Yesu pamulongele, “Yuva ufuuwage ikivalilo kikusa chesisamwifunya kwa Dada mukidunda iki nambi ku Yelusalemu. 22 Nyenye mwikwifunyaga kwa chesimukiseli, hwehwe twakwifunya kwa che tukisele pakuva uwupoki wihuma kwa Avayudaya. 23 Neke ikivalilo kikusa na yilino kifikite kwa avanyakwifunya nachene vifunya kwa Dada mu Muhe na mu wanachene. Pakuva Dada akuvasaka avanu avakumusunyalila ndahihyo. 24 Nguluvi Muhe, na avanyakwifunya kulu mwene luvaje ukwifunya mu Muhe na muwanachene.” 25 Umung'inetu swe akumulongela, “Ngulukagula ulwa akusa Mesiya yeitambulwa Kilisito nave peasile umwene atulagila ing'ani mbesili.” 26 Swe Yesu akumulongela, “Nene yendilongana na veve ye nene.” 27 Ulusika ulo avanyigendo va Yesu vave vipiluka, neke vasasavale ulwa pevawene ulwa Yesu ilongana na umung'inetu. Neke sikwali yeatige kulu mung'inetu: “Wisaka kiki?” Nambi kumuwusa Yesu, “Ulwa mbi ndawuli wilongana na umung'inetu?” 28 Swe umung'inetu yula akukileka ikisilo chakwe nu kubita ku boma kukuvalongela avanu. 29 “Muse mulave umunu yeandonje ing'ani mbesili sengapigite! Nye! Napo uyu ava ye Kilisito Mesiya?” 30 Neke avanu vahume muboma vabite kwa Yesu. 31 Ulusika ulo avanyigendo vamusukite vitigila, “Labi, lye.” 32 Neke avalongele, “Nene ndina ichakulya chesimukiseli nyenye.” 33 Neke avanyigendo vakwe pevilonganze, “Ndawuli kuva kwina munu yeamuletye ichakulya?” 34 Yesu neke pavalongele, “Ichakulya changu che iki mige cheinogelwa yeasindike ngasinde ikipigo chakwe. 35 Nyenye simwamwitigila: ‘Pegike myesi gitayi ukubeta imbeto!’ Lavage nene nguvalongela mukang'ule amiho genyu mulave imigunda ulwa isanga yeyifikite ukubetwa. 36 Nave umunyakubeta akwanukila amahombo nu kukong'asa amaveleko ga uwumi wa mbepali sambi umunyakuvyala na umunyakubeta vahekelele pamwi. 37 Pakuva ululongwa ulo lwalwiva lwa nachene, ‘Uyumwi aivyala neke uyungi abete.’ 38 Nene ngavatumite mukabete imbeto yesimwagudi, avamwi vagudite nayi nyenye muhanzile uwinome wa ulugudo lwawo.” 39 Na mu boma yila Avasamaliya wolofu vamufuuvitwe uluhuma mu lukani lwa umung'inetu yula yeolelye ulwa andonje: “Ng'ani mbesili sengapigite.” 40 Vave Avasamaliya vakumubitila vamusukite ikale ukwawo, swe akwikala uko filo fivili. 41 Avanu wongeleche wolofu ukufuuwa uluhuma mulukani lwakwe. 42 Neke pevamulongele umung'inetu yula, “Ino twifuuwa, si kwa uwimila ulukani lwako nda. Pakuva twipuliche yihwehwe kangi tukulukagula ulwa nachene uyu ye mwene Umupoki va ing'i.” 43 Peikalite ifilo ifivili Yesu ahesile pala nu kubita ku Galilaya. 44 Pakuva yumwene Yesu ilonje ulwa, “Umuvisi mugaya lulumbo mung'i yakwe yumwene.” 45 Ave ifika ku Galilaya, Avagalilaya vamwanuche. Pakuva vasiwene ing'ani mbesili seapigite ku Yelusalemu pa luhekelelo pakuva iwo nawo vevahele kuluhekelelo. 46 Swe ifika kangi ku Kana ya ku Galilaya, kula kweeapitwe ululenga luve difayi. Na pala pepina umunu uyumwi umunzagila yeeina umwanakwe umutamwa uko ku Kapelenaumu. 47 Uyo ave ipulika ulwa Yesu asile uluhuma ku Yudaya mbaka ku Galilaya amubitye nu kumusuka asulunuke kukumuponia umwanakwe, pakuva alatimbite. 48 Swe Yesu akumulongela, “Pesimufiweni ifilagilo nu wuhulo sisamufuuwa nangi.” 49 Umunzagila amulonje, “Mulugu tubite wesialafwa umwanangu.” 50 Neke Yesu amulongele, “Bitage umwanako mumi.” Umunu yula afuuvitwe ulukani lula lwalongilwe na Yesu nave swe ibitaga. 51 Nave peabitige avakami vakwe vamutang'anie vitigila umwanakwe mumi. 52 Swe akuvawusa ikivalilo pavangige ukuva kiba nawo neke vamulongele, “Igolo, pa kivalilo cha mufung'ati pamunyi, imbungo yikamulesile.” 53 Swe udade akwiwuka ulwa chekivalilo pakalongeligwe na Yesu: “Umwanako mumi.” Swe ifuuwa umwene na mbevali avamukaye yakwe. 54 Icho che kilagilo cha kavili cheapigite Yesu peahumite ku Yudaya kufika ku Galilaya.

5

1 Pesilutye iso Yesu ahele ku Yelusalemu ku luhekelelo ulwa Avayudaya. 2 Ku Yelusalemu kuko pipi na mulyango gwa ing'olo, pepina lilamba lya lulenga ilitambulwa kwa kiebulaniya Betisasa, nalyo lina fikolo fihanu. 3 Mumo mwe avanyafitamwa wolofu vevavasise; avabofu, avatevafu, na vadedefu, [Vasindilige ululenga lutiigwe. 4 Pakuva kwekwina lusika avanyivaha pevasige nu kwingila mwilamba lila nu kulutiiga ululenga. Neke yeatasile ukwingila mululenga pelutiigitwe aponige uwutamwa mbewuli weeinawo.] 5 Na pala pepina umunu yeemutamwa myaka machumi gadatu na gimunana. 6 Yesu ave akumuwona uyu yeavasise, nave we akulukagula ukuta mutamwa filo fyolofu amulonje, “Wisaka ukupona?” 7 Umutamwa yula amupitwe, “Mulugu, nene ndimugaya munu uva kunoosa mwilamba ululenga pelwitiigwa, peyendisaka mbite uyungi yeiva atasile.” 8 Ndawe Yesu amulongelige, “Wime witwike ikivasikiso chako bitage.” 9 Lulusika lulo ave munofu swe akwitwika ikivasikiso chakwe nu kubitaga. Nacho ikimunyi icho che cha Sabato. 10 Pa ulo Avayudaya vamulonje yula yeaponesiwe, “Namunyi Sabato, kangi siluvaji kwa veve ukwitwika ikivasikiso.” 11 Neke avapitule, “Umwene yeamonise ye mwene yeandonje: ‘Witwike ikivasikiso chako bitage.’ ” 12 Swe vakumuwusa, “Yula yeakulonje witwike ubitage ye nani?” 13 Ino umunu yula yeaponesiwe salamuseli ye nani, pakuva Yesu ali ikwegite uluhuma pa vanu awolofu. 14 Peyesilutye iso, Yesu amufikite mu Tembeli, swe akumulongela, “Wikomalilage uve wimunofu; ulapiga inzanangifu kangi, longa lukugwile ululutye.” 15 Umunu yula swe akwibitilaga kono we akuvalongela Avayudaya ukuta yeamuponise ye Yesu. 16 Neke Avayudaya vavange ukumufwahisa Yesu, pakuva apigite iso pa Sabato. 17 Swe Yesu akuvalongela, “Dada vangu na yilino ipiga ifipigo nani ndipiga ifipigo.” 18 Ndawe Avayudaya vakalalilige visaka ukumuwulaga pakuva sieananzili yi Sabato hela nda, pamwi na ulo amutambulige Nguluvi Dade, swe iva akwipela ululumbo lutegane na Nguluvi. 19 Neke Yesu pavapitule avalongele, “Nachene nguvalongela, Umwana siahwaniti apige lukani iyena; aipiga lula lweakuluwona udade ipiga, pakuva mbesili seaipiga sesene seaipiga Umwana. 20 Pakuva Udade amwenda Umwana nave akumulagila mbesili seaipiga, na fipigo ifilutye kwa ifyo amulagila nyenye musasavala. 21 Ndawe Dada akuvasilibusa avafwe na ukuvapela uwumi, lwindahihyo na umwana akuvapela uwumi veiwenda. 22 Kangi Dada sihigagi munu. Umwana amupelye Umwana uluhigilo mbeluli, 23 Sambi avanu mbevali vamulumbe Umwana ndawe lwe vakumulumba Dade. Yesiakumulumba Umwana sakumulumba Udade yeandetite. 24 “Nachene nguvalongela umwene umunya kupulika ulukani lwangu na ukumufuuwa umunyakundeta ina uwumi wa mbepali.Na siingila mu luhigilo nda, iva alutye uluhuma kuvafwe nu kwingila ku wumi. 25 Nachene nguvalongela, ikivalilo kikusa na yilino kifikite, avafwe pesavapulika iliswi lya Umwana va Nguluvi, na vala avalipulika vava wumi. 26 Ndawe Dada lwe ina wumi mulumwene, lwindahihyo amupelye na yumwana nave avelage na uwumi mulumwene. 27 Neke amupele na uludali lwa uluhigilo, pakuva Mwana va umunu. 28 Mulasasavala ing'ani iso, pakuva ikivalilo kikusa che avanu mbevali avali mufyanga savapulika iliswi lyakwe, 29 nawo vahuma: vala avapigite inofu ku lusilibulo lwa uwumi, na vala avapigite inzanangifu ku lusilibulo lwa uluhigilo ukuhigwa. 30 “Nene sifulwiki ukupiga lukani muludali lwangu, mwendandipulikila mwendandihigila na uluhigilo lwangu lwa wugolofu nachene. Pakuva sindakwisakila lwendiwenda nene pesi lula lwe iwenda yeandetite. 31 Wone ndiyolelele yinene, uwolelesi wangu wuva si wa nachene. 32 Kwali yungi yeakunzolelela nene, nani ngulukagula ulwa uwolelesi wakwe weakunzolela wa nachene. 33 Nyenye mwatumite avanu kwa Yohane nave olelelye mumwene. 34 Neke nene singuwanukila uwolelesi wa avanu ndilonga isi sambi nyenye mupokwe. 35 Umwene Yohane e lung'ali ulukwaka nu kung'alika, na nyenye kwa ulusika ludodo mwawendige ukukima mu lung'ali lwakwe. 36 Neke uwolelesi wendinawo nene wilutila wula wa Yohane. Pakuva ndipiga ifipigo, fye akamelye Dada ndifipige, ifipigo fyefikunzolelela ulwa Dada anumite. 37 Nave Dada, yeandete akunzolelela. Nyenye simulava mupulika iliswi lyakwe nangi, nambi uwusu wakwe simwe mulawuwona, 38 nambi lukani lwakwe mwihela mugati umwenyu, pakuva nyenye simukumufuuwa umwene yeandetite. 39 Muhele mwihungilila Uwandike pakuva, mwitigila wanda mwina wumi wa mbepali mugati mwayo; kumbi Uwandike uwukunzolelela nene! 40 Muleema ukusa kwa nene sambi muve na uwumi. 41 “Nene singwanukila uwusumilwa wa avanu. 42 Neke nene ndivakagwe, ulwa mwivagaya wende wa Nguluvi mugati umwenyu. 43 Nene nzusile mwitawa lya Dada vangu na nyenye simukunzanukila, manyi ase uyungi mwitawa lyakwe uyo mumumwanukila. 44 Mufuuwa ndawuli nyenye yemukwiyanuka uwusumilwa yinyenye kwa yinyenye, na simwisaka uwusumilwa wula uwihuma kwa Nguluvi yeiyena? 45 Mulatigila ulwa nene ndivatosa kwa Dada. Pwali yeakuvatosa ye Musa ye mukwihuvila. 46 Pakuva muke mumufuuwe Musa ye andike ing'ani sangu, muke mufuuwa na nene. 47 Ino pesimwifuuwa uwandike wakwe mufuuwa ndawuli ing'ani sangu?

6

1 Peyesilutye iso, Yesu ahele kumwambu ya ibahali ya ku Galilaya iyitambulwa (Tibeliya.) 2 Na Ililugu ilikomi lyamufwatite, pakuva vevafiwene ifilagilo fye avapije avatamwa. 3 Swe Yesu igang'amuka kukidunda nu kuteng'emala pamwi na avanyigendo vakwe. 4 Na i Pasaka, uluhekelelo lwa Avayudaya lwe lulipipi. 5 Yesu ave ilava, awene ililugu ilikomi lya avanu likusa kulumwene, neke amuwuse Be! Filipo, “Tugule kwiya imikate ija ukulya iva?” ( 6 Na ulo alongige ukumugela hela Filipo; pakuva alalukagwe yumwene lwe apiga.) 7 Filipo amupitwe, “Manyi nagive mikate ja amagobole dinali magana gavili sigikwila, nambi kumegulana hela!” 8 Uyumwi va avanyigendo vakwe, Andeleya, umwanakwave va Simoni Petulo, swe akumulongela, 9 “Ipa pwali umwana umunya mikate gihanu ja ingano na isomba sivili; ino gikwila kiki kuvanu wolofu avi ndawe iva.” 10 Swe Yesu itigila, “Muvakong'ase avanu vateng'emale,” Na apono baho pepina lisoli lyolofu ndawe avanu avagosi vateng'emalige; vevagelaniche mwe mbilima sihanu de. 11 Ndawe inulige imikate gila nu kulumba nu kuvagavila avevateng'eme pala, ndahihyo na sisomba sila mumwevawendelige. 12 Nawo vave vakwiguta avalonje avanyigendo vakwe, “Mukong'ase uwuwuluwulu kilemwe ukuyaga nambi kinu.” 13 Neke vakong'ase uwuwuluwulu wewasige ukuhuma mumikate gihanu neke vamemye ifitangula finyichumi na fivili. 14 Avanu vavevakukiwona ikilagilo che apigite vatige, “Nachene uyu ye Muvisi yeakusa mung'i.” 15 Kono Yesu we akulukagula ulwa visaka vase vamwibate sambi vamutemye ave Mutwa kwa ludali; swe akwikwega nu kubita kukidunda iyena. 16 Chave kiva kimihye, avanyigendo va Yesu vasulunwike mbaka kunyanza, 17 swe vihova mukipugu, nu kuvanga ukulowoka inyanza ukubita ku Kapelenaumu. Kangi ulwisa yelweluvanzile Yesu esalafika. 18 Ndawe inyanza yavangige ukutigangika na ikifulufumbi ikikomi. 19 Neke Avanyigendo pevafugwite ulugendo lwa kilomita sihanu apangi simutanda, vamuwene Yesu igenda muchanya munyanza ihegelela kukipugu chawo swe viva na muhwehwe. 20 Swe akuvalongela, “Yinene, mulogopa!” 21 Nawo vasakige vamwanukile mukipugu, swe ikipugu yekiva kifikite mung'i kweve vadonyite. 22 Ikimunyi icha kavili ililugu lya avanu vevevimile imwambu ya inyanza sivakiwene ikipugu ikingi uko pesi kimwi hela. Kangi ulwa Yesu siinji mukipugu kila pamwi na avanyigendo vakwe vahele viyena. 23 Neke ifipugu ifingi fyasile uluhuma ku Tibeliya, na kula Umutwa kwe amulumbite nguluvi neke imikate give myolofu valye vigute. 24 Lwave amalugu pegawene ulwa Yesu asukuli uko nambi avanyigendo vakwe, viinje mufipugu vavene swe vibita ku Kapelenaumu, kukumwolela Yesu. 25 Na vala avanu vave vakumuwona Yesu imwambu inzayo ya inyanza vamuwusise, “Labi veve ukasile panili ipa?” 26 Yesu avapitwe itigila, “Nachene nguvalongela nyenye: nyenye mukusaka nene si kwa ifilagilo nda mukusaka pakuva mukalye imikate neke mwigute. 27 Mulakipigila kipigo ichakulya ikikwanangika, pesi ulwa mupigilage ichakulya ikinanaga ukwimila uwumi wa mbepali, icho che avapela Umwana va Umunu. Pakuva uyo, ye muteme uluhagi na dada Nguluvi.” 28 Swe vakumulongela, “Tugitage ndawuli sambi tupige ifipigo fya Nguluvi?” 29 Yesu avapitwe, “Iki chekipigo cha Nguluvi mumufuuwage umwene yeatumitwe na umwene.” 30 Ndawe vamulongelige, “Kilagilo kiki che upiga sambi tukiwone tukufuuwe? Ugita ndawuli? 31 Avavaha vetu valye imana mubalali ndawe welwelwandike ‘Avapelye imikate uluhuma kuchanya valye.’ ” 32 Yesu neke peavalongele, “Nachene nguvalongela nyenye. Si Musa nda yeavapelye umukate gula gwa kuchanya, Dada vangu yakuvapela nyenye umukate ugwa nachene ugwihuma kuchanya. 33 Pakuva umukate gwa Nguluvi ye yula yeakusa mung'i uluhuma kuchanya itawula uwumi mung'i.” 34 “Swe vakumulongela, Mulugu apo tupelage mbepali umukate ugu.” 35 “Neke Yesu peavalongele nene yenene nde mukate ugwa uwumi. Yeyeavesaga akusa kwa nene sisaawona nzala nda na yeakufuuwa sisaawona ng'elu nda. 36 Ino, ndivalonje ulwa yemumbwene napo wesimwifuuwa. 37 Mbevali veakumela Dada vasa kwa nene; kangi yeyeasaga kwa nene sisandimutaga kwivala nda. 38 pakuva nene si ndasili uluhuma kuchanya sambi mige sendiwenda nene nda, ndasile mige seiwenda yeandetite. 39 Naseiwenda yeandetite se isi: mwa mbevali veamelye ndilayasa nambi yumwi. 40 Pakuva seiwenda Dada vangu se isi kwa yeyeamulavaga Umwana nu kumufuuwa avelage na uwumi wa mbepali nane sandimusilibula pa ikimunyi cha uwusililo.” 41 Ndawe Avayudaya ving'ulanzige pakuva atige, “Nene yendi mukate ugwasile uluhuma kuchanya.” 42 Swe vamutigile, “Uyu Yesu si ye Umwana va Yosefu? Tumusele Udade na yuyuve. Ino pede ilonga ndawuli ulwa nzusile uluhuma kuchanya?” 43 Swe Yesu akuvapitula na ukuvalongela, “Mutane ukwing'ulanza. 44 Asukuli umunu yeahwanite ase kwa nene pesi mukwege na Dada yeandetite nani sandimusilibula paikimunyi cha uwusililo. 45 Lwandike na Avavisi ulwa: ‘Mbevali savigisiwa na Nguluvi, apo yeyeapulikaga na ukwigila ukuhuma kwa Dada asa kwa nene. 46 Sikwekutigila yeyeavesaga umunu amuwene Dada; pesi yula yeihuma kwa Nguluvi uyo yemwene yeamuwene Dada. 47 Nachene nene nguvalongela nyenye, yula yeafuuwa ina uwumi wa mbepali. 48 Nene ye nene nde mukate ugwa uwumi. 49 Avavaha venyu valye imana mubalali, neke vafwe. 50 Ugu gwe mukate ugukwika uluhuma kuchanya, sambi ahwane ukulya alemwe ukufwa. 51 Nene ye nene nde mukate ugwa uwumi gwegwasile uluhuma kuchanya. Yeyeavesaga munu yealye umukate ugu saanana mbepali; na umukate gwe nawula nene gu muvili gwangu sambi ing'i yinane.” 52 Swe Avayudaya vakwibesa vavene ng'ani vitigila : “Lwa ndawuli umunu uyu atupela hwehwe umuvili gwakwe tulye?” 53 Ndawe Yesu avalongelige, “Nachene nguvalongela nyenye: pesimuli; umuvili gwakwe Umwana va Umunu na ukunywa idanda yakwe, muvagaya wumi mugati umwenyu. 54 Yula yealya umuvili gwangu na ukunywa idanda yangu inawo uwumi wa mbepali, nani sandimusilibula paikimunyi icha uwusililo. 55 Pakuva umuvili gwangu che chakulya cha nachene; na idanda yangu che kinywewa icha na chene. 56 Yula yealya umuvili gwangu na ukunywa idanda yangu uyo akwikala mwanene, na nene ngwikala mulumwene. 57 Ndawe Dada umumi lweanumite nene, nani ndimumi mwa Dada, lwindahihyo kwa yeakundya ava mumi mwa nene. 58 Ugu gwe mukate ugwihuma kuchanya. Sindawe avavaha lwevalisige umukate ugo neke vafwe; yula yeilya umukate ugu saanana mbepali.” 59 Ing'ani iso alonzile peigisige musinagogi ku Kapelenaumu. 60 Avanu wolofu muvanyigendo vakwe vave vipulika vatige, “Ulukani ulu lutalamu! Yenani ye apulikisa?” 61 Nave Yesu alukagwe muwunu wakwe, avanyigendo vakwe pevakwing'ulanza mulukani ulu swe akuvawusa, “Mbi ndawuli ulukani ulu lukuvavifya? 62 “Apo luva ndawuli pemuke mumuwone Umwana va Umunu pe igang'amuka kweekwali pamwandi? 63 Uyu ye Muhe yeitawulaga uwumi. Uludali lwa umuvili hela siluhwana kinu, iso sendivalonje sa Muhe na uwumi. 64 Nambi ndahihyo avamwi mwa nyenye sivalafuuwa.” (Pakuva Yesu alukagulige uluhuma pamuvango vevanani vesive valakufuuwa na yula yesaamupituka.) 65 Swe itigila, “ Nambi palulo ndavalonje ulwa asukuli Umunu yeahwanite ukusa kwa nene pesi mukemele na Dada vangu.” 66 Uwimila ulu wolofu muvanyigendo vakwe vapilwike kumbele valemwe ukumuninila kangi. 67 Neke Yesu avawuse avanyichumi na vavili, “Ndawuli ngali nayinyenye mwisaka muhege?” 68 Ndawe Simoni Petulo amupitulige, “Mutwa tubite kwa nani? Veve ye wina ing'ani isiletaga uwumi wa mbepali. 69 Nahwehwe tufuuvitwe kangi tulukagwe ulwa veve ye veve ve Mwelu va Nguluvi.” 70 Yesu avapitwe, “Ndawuli nene sindavahagwi nyenye vanyichumi na vavili? Na uyumwi vanyenye lisetani!” 71 Yesu ipo amulongige Yuda umwana va Simoni Isikalyote. Pakuva uyu yemwene yeamupitwike nambi we ali yumwi na vala avanyichumi na Vavili.

7

1 Na pelulutye ulu Yesu agendige mu Galilaya. Siawendigi ukugenda mu Yudaya, wimila Avayudaya avasakige ukumuwulaga. 2 Uluhekelelo lwa Avayudaya, uluhekelelo lwa ifitinga yelweluhegelye. 3 Ndawe avanyalukolo vakwe Yesu vamulongelige, “Hege ipa bite ku Yudaya, sambi avanyigendo vako nawo valave ifipigo fyako fyewipiga. 4 Pakuva asukuli umunu yeipigaga lukani mu kinyele kono weisaka akagulanike. Pakuva wipiga isi apo wiyelelulage mung'i.” ( 5 Pakuva na vavanyalukolo vakwe sivamufuuvigwi!) 6 Neke Yesu avalongele, “Ulusika lwangu silulafika nda, neke ulusika lwenyu lulipwali mbepali. 7 Avanu avamung'i sivavavipila nyenye, pesi vakumbipila nene, pakuva nene nguwolelela ulwa ifipigo fyawo ifyanangifu. 8 Mubitage yinyenye ku luhekelelo. Nene sindibita ku luhekelelo ulu, pakuva ulusika lwangu ulukwilaniche silulafika.” 9 Nave ave akuvalongela isi asigee mu Galilaya. 10 Neke avanyalukolo vakwe peyevahele ku luhekelelo, nave Yesu pepene peahele, kinyele kinyata. 11 Ndawe avavina va Avayudaya vamolelige mu luhekelelo: swe vitigila “Alikwi?” 12 Swe kwiva na lwing'ulanzo mumukong'ano. Pepene avamwi vamutige Yesu, “Munu munofu.” neke avangi vatigile “Nda! Uyo ake iyasa avanu.” 13 Nambi ndahihyo alasukuli umunu yealongige pawelu ing'ani sa Yesu, pakuva vawogopige Avayudaya. 14 Mugatinagati mufilyo ifya uluhekelelo, Yesu iinje mutembeli ivanga ukwigisa. 15 Ndawe avavina va Avayudaya vasasavalige wevitigila, “Mbi uyu asikagwe ndawuli isi mbesili nave wesiimbiti?” 16 Ipo Yesu avapitwe itigila, “Inzigiso isi sisangu nene sa umwene yeandetite. 17 Wone umunu iwenda ukupiga seiwenda Nguluvi uyo yealukagula ukuta inzigiso sangu sihumile kwa Nguluvi na wone apangi ngwivangila mululagi lwangu hela. 18 Umunu yeilonga ing'ani sa ukwivangila mululagi lwakwe hela uyo isakaga ululumbo lwakwe yumwene, neke yula yeaisakaga ululumbo lwa yula yeamuletite, uyo yevanachene na mulumwene mugaya ng'ani isa uwubangabanga. 19 Ndawuli Musa siavapelii indagilo? Ino asukuli nambi yumwi mwanyenye yeakwinatila indagilo. Mbino pandawuli mwisaka ukumbulaga?” 20 Neke vamalugu vapitule, “Be! napo wina lisoka! Yenani yeisaka ukukuwulaga?” 21 Swe Yesu akuvapitula nu kuvalongela, “Nene ndapigite kipigo kimwi hela nyenye mbemuli mwasasave. 22 Musa avapelye ukuwoolwa ino sikuta umusimu ugo gwahumile kwa Musa pesi ulwa gwahumile kwa avanyakataali. Lino nyenye mwiwoolaga umunu na mukimunyi cha isabato. 23 Wone umunu aiwoolwa sambi indagilo sa Musa silemwe ukudenywa mbino ndawuli mukumbipila pakuva ndimuponise umunu mukimunyi cha isabato? 24 Lino mulahiga ulukani ukwimila isiwoneka mwivala hela muhigage we mukwinatila uwugolofu.” 25 Avamwi va avanu va mu Yelusalemu vapwepige vitigila, “Uyu si yuyu yevakumulela sambi vamuwulage? 26 Mulavage! lino alibaha akuvakenyela pelu hela na asupali umunu yeakumulonza lukani. Ngali luhwanite avalongola yevamukagwe nachene ulwa uyu, ye Mesiya? 27 Neke Mesiya peakusa asupali yealakukagula kweihuma, neke hwehwe tukukagwe kweahumile umunu uyu!” 28 Ndawe Yesu ihugige pakulonga kono we akwigisa, mu Tembeli itigila, “Nene munzele na kwendihuma mukukukagula nambi ndahihyo sindasili kwa uwunu wangu pesi umunyakunuma nene ye va nachene nanye simumuseli nda. 29 Nene ndimusele pakuva nyumite kulumwene nave ye munyakunuma.” 30 Swe avanu vasakige ukumwibata, nambi ndahihyo siekwali umunu yeigelye ukugolola iliwoko lyakwe kulumwene amwibate, pakuva ikivalilo chakwe sichekilafika. 31 na avanu wolofu mumukong'ano vamufuuvitwe vitigila, “Pesaasile Kilisito saapiga filagilo fyolofu ukulutila fye apigite uyu?” 32 Avafalisayo swe vipulika avanyamukong'ano pevipwepa ing'ani sa Yesu. Swe, avene na avatambisi avavina vatumite avanyigalu vakamwibate Yesu. 33 Ndawe Yesu atigilige, “Ndilipamwi na nyenye lusika ludodo, pambele pe ndibitilaga kwa yeandetite. 34 Mulasaka neke sisamumbona nene, na pala pendipwali nyenye sisamusa.” 35 Ndawe avalongola va Avayudaya vilonganzige vatigilage, “Uyu abita kwi kwesitumuwona? Ngalihosa ukubita ku Vayudaya avayaje ku Vagiliki nu kuvigisa Avagiliki? 36 Lukani luki ulo lweilonga: ‘Musaka neke simumbona na pala pemba ndipwali nyenye simuhwaniti muse?’ ” 37 Na ikimunyi icha uwusililo, ikimunyi ikikomi cha uluhekelelo, ikimunyi ikitambule swe Yesu imite akwihuga iliswi itigila, “Umunu umunyang'elu asage kwa nene anywe. 38 Yeakufuuwa nene, ndawe uwandike wewatige: ‘Imikoga ja ululenga ulunyawumi, ginyilima ukuhuma mulumwene!’ ” ( 39 Na ulukani ulo alongelige ulwa Umuhe, ukutigila vala vevakumufuuwa savamwanukila pambele pakuva Muhe sielasa na Yesu siealingila mundolo sakwe.) 40 Avanu avamwi avapulike ing'ani iso vatige, “Uyu nachene muvisi!” 41 Avamwi vatige, “Uyu ye Kilisito!” Neke avangi swe vatigile, “Mbi luhwanite nachene Kilisito ahume ku Galilaya? 42 Mbi uwandike Uwelu wilonga ndawuli? Witigila, ‘Kilisito ahuma mumbegalo ya Daudi va ku Betelehemu, muboma ya Daudi!’ ” 43 Sweno, piva na ulwilekano muvanu ukwimila umwene Yesu. 44 Avangi vasakige ukumwibata Yesu, neke na baho siepwali umunu yeigelye ukugolola liwoko amwibata. 45 Avanyigalu vapilwike, ku vavina va avatambisi na Avafalisayo vevavatige, “Mbi ndawuli simumuletiti?” 46 Avanyigalu vala vapitwe, “Asukuli umunu umulonga hilo ndawe umunu uyu!” 47 “Neke Avafalisayo vavapitule nayi nyenye ye musanzilwe ndahihyo? 48 Yenani muvavina na avanyalulagi na Avafalisayo yeakumufuuwa? 49 Neke ililugu ili, lyesilikulukagula ululagilo sa Musa likotwike!” 50 Uyumwi va Avafalisayo itambulwa Nikodemu, umunu yeahele akamuwone Yesu pamwandi. Umwene avatige, 51 “Ndawuli ngali ndagilo setu sakumuhiga umunu wesalapulikiswa tandi, nambi ukulukagula lweiva apigite?” 52 Nawo swe vakumupitula vakumutigila, “Ngali nayuveve uhumite ku Galilaya? Apo kasake ulave muwandike uwelu nave wilavila ulwa, “Mu Galilaya sahwaniti ukuhuma umuvisi nangi!” [ 53 Sweno, ndawe mbevali vatagalilige, munu na kwakwe.]

8

1 [Neke Yesu abite kukidunda icha imiseituni. 2 Pamilawu hilo pekuche ahele kangi mu tembeli. Swe avanu mbevali vibita kulumwene, ndawe ivanga ateng'emalige ivanga ukuvigisa. 3 Avigisi va indagilo na Avafalisayo vamuletye umung'inetu yealibatike muwugoni, nu kumuvika pagatinagati pavanu. 4 Neke vamulongele, “Mwigisi! Umung'inetu uyu ibatike pake muwugoni. 5 Ino mundagilo sa Musa atulaje ukuvakinya na maganga avindawe iva. Ino veve witigila ndawuli?” 6 Nawo valongige ulo we vakumugela sambi vave na ululongwa lwa ukumutosekesa. Neke Yesu agondime akwandika pasi na ichala chakwe. 7 Nawo pevagina ukumuwusa imite nu kuvalongela, “Umunu umugaya inzanangifu mwanyenye yeatalage ukumukinya ni liganga. 8 Swe igondama kangi akwandika pasi na ichala chakwe. 9 Nawo pevapulike isi, ndawe vahegige yumwi yumwi ukuvangila avagogolo, mbaka pevisila mbevali swe isigala Yesu na umung'inetu yeeimile pagatinagati iyena. 10 Yesu ave akwima amuwusise atigile, “Ng'inetu valikwi avanu vala? Asukuli yeakuhigite ulwa wimwananzi?” Swe akumulongela asukuli na yumwi Mulugu. 11 Neke Yesu amulongele, “Nayi nene singukuhiga. Wibitilage; neke uluhuma lino ulapiga inzanangifu kangi.”] 12 Ndawe Yesu avalongelige itigila, “Nene ye nene nde lung'ali lwa ing'i. Umwene yeakufwata nene sagenda mulwisa nda ava na ulung'ali lwa uwumi.” 13 Swe Avafalisayo vakumulongela, “Veve ukwiyolelela wiyena uwolelesi wako si wanachene.” 14 Yesu apitwe na kuvalongela, “Nene naluve wengwiyolelela ndiyena uwolelesi wangu we wanachene pakuva ngukukagula kwendahumile na kwendibita. Neke nyenye simukukukagula kwendahumile nambi kwendibita. 15 Nyenye mwamwihiga mukwimila amahosa ga avanu pemwihiga, neke nene sindihigagi munu. 16 Nambi ndihiga, ndihigilaga munachene, pakuva nene sindiyena nda ndilipamwi na Dada yeanumite nene. 17 Kangi nzandike mululagilo lwenyu ulwa uwolelesi wa avanu avavili wawiva wanachene. 18 Nene ye nene yengwiyolelela ndiyena nave Dada yeanumite akunzolelela.” 19 Ndawe vamuwusige, “Umwene Udado alikwi?” Yesu avapitwe, “Nene simunzeli nambi nayi Dada simumuseli muke muve munzele nene muke muva mumusele nayi Dada vangu” 20 Ing'ani iso alonzile peakwigisa mu tembeli, peali pakibogonyela pevavikige amagobole. Na siekwali munu yeamwibete pakuva ikivalilo chakwe sichekilafika. 21 Kangi swe akuvalongela, “Nene ndihega, nanye musaka, nanye samufwa munzanangifu senyu. Nene kwendibita nyenye simuhwaniti muse.” 22 Swe Avayudaya vitigila, “Ndawuli iwulaga? Pe itigila: ‘Nene kwendibita nyenye simuhwaniti muse?’ ” 23 Neke avalongele, “Nyenye mwahumile baha pasi nene ndahumite kuchanya. Nyenye mwiva mung'i iyi nene sindiva mung'i iyi. 24 Nambi ndivalonje ulwa samufwa munzanangifu senyu; pesi mwifuuwa ulwa ‘Nene ye nene’ mufwa munzanangifu senyu.” 25 Swe vakumutigila, “Winani veve?” Neke Yesu atigile, “Lula lwendavalonje uluhuma pamwandi!” 26 Ndinaso nzolofu isa ukuvalongela nu kuvahiga. Neke umwene yeanumite vanachene; nane sendapulike hela kulumwene siso senguyilongela ing'i.” 27 Nawo Sivalukagwi ulwa avalongelige ulwa udade. 28 Swe Yesu akuvalongela, “Mbaka pemumutumbike Umwana va Umunu ipo pesamung'agulila ukuta, ‘Nene ye nene’, na kangi ulwa singwivangila ukupiga nambi lukani muludali lwangu, pesi ulwa ndilonga sisila hela sendimwigise na Dada. 29 Nave yeanumite alipamwi na nene; siakundeka ndiyena nda, pakuva nene ndipigaga mbepali sila isikumunogela.” 30 Nave pealongige iso avanu wolofu vamufuuvitwe. 31 Neke Yesu avalongele Avayudaya avevamufuuvitwe, “Nyenye Wone mwinatile ulukani lwangu muva nachene vanyigendo vangu. 32 Kangi muyikagula inachene, na ulwa nachene iyo yivavika muwutemapenyu.” 33 Neke vamupitule, “Hwehwe twihuma mumbegalo ya Abulahamu, na sitwetulava vanyawingi ulusika lwelweluvesaga. Ino wilonga ndawuli ulwa, ‘Muva mwivatemapenyu.’ ” 34 Yesu avapitwe, “Nachene nguvalongela, yeyeapigaga inzanangifu munyawingi va inzanangifu. 35 Umunyawingi siakwikalagi mukaye mbepali, neke umwana uyo yakwikalaga mukaye mbepali. 36 Ino wone umwana avavike mu wutemapenyu, ipo nachene muva mwivatemapenyu. 37 Ngulukagula ukuta nyenye mwimbegalo ya Abulahamu. Neke ulwene, mwisaka ukumbulaga pakuva simukulwidikila ulukani lwangu. 38 Nene ndilonga sendasiwene kwa Dada, neke nyenye mwipiga sila semwapulike ku Dadenyu.” 39 Swe vakumupitula vitigila, “Hwehwe Udadetu ye Abulahamu!” Ndawe Yesu avalongelige, “Muke muve mwivana va Abulahamu, muke mupiga ifipigo fyeapigige Abulahamu. 40 Ino nene nguvalongela inachene yandayipulike kwa Nguluvi, nambi ndahihyo mwisaka ukumbulaga. Abulahamu sapigiti ndahihyo. 41 Nyenye mwipigaga ifipigo fifila fyapigige udadenyu.” Pepene pevamulonje ulwa, “Hwehwe sitwivasavahele nda, hwehwe twina Dadetu yumwi swe, Nguluvi.” 42 Neke Yesu avalongele, “Wone ake ave Nguluvi ye Dadenyu muke munzenda nene, pakuva nene ndahumite kwa Nguluvi nane swe ngusa baha. Na sindiyusi kwa uludali lwangu, pesi lwa umwene yeandetite. 43 Mbino ndawuli simukusikagula iso sendilonga? Ndita wanda pakuva simwamwiwenda ukulupulikisa ulukani lwangu. 44 Nyenye mwivana va Udadenyu Setani, na uwudobokesi wa udadenyu, Wemuwenda ukupiga. Umwene muwulasi, kangi sakwimagi mu nachene pakuva inachene isumuli mulumwene. Na pealongaga uwudesi; akwilongela isakwe yumwene, ulo lweiwali pakuva mudesi, kangi Dade va uwudesi. 45 Nane pakuva ndilonga ulwa nachene nanye nambi simukufuuwa nda. 46 Ye nani mwa nyenye yeahwana ukundagila ulwa ndi munyanzanangifu? Lino wone ndilonga isa nachene, ndawuli simwifuuwa? 47 Ye va Nguluvi aipulikisa ing'ani sa Nguluvi. Lino nyenye simwipulikisa pakuva nyenye si mwivanu va Nguluvi.” 48 Avayudaya vamupitwe, “ Mbi hwehwe sitwilongela mumwene nda, ulwa veve wi Musamaliya, na kangi wina lisoka?” 49 Neke Yesu avapitulage, “Nene ndimugaya lisoka; nene ndina choga kwa Dada vangu, neke nyenye mwivagaya choga kwa nene. 50 Nene singwisakila indolo yinene; pwali yumwi hela yeaisaka indolo iyo nave ye muhisia pevakwilamula 51 Nachene nene nguvalongela, umunu yeakwinatila ulukani lwangu sisaafwa kitasila!” 52 Swe Avayudaya vakumulongela, “Ino tulukagwe ulwa wina lisoka! Abulahamu afwe, na avavisi vafwe, veve ati witigila ‘umunu yeakwinatila ulukani lwangu sisaafwa kitasila!’ 53 Veve ngali wi muvina ukulutila udadetu Abulahamu yeafwe? Na avavisi vafwe, lino veve ukwivika winani?” 54 Yesu avapitwe, “Wone ndipele yinene indolo iso sisiva kinu nda. Dada vangu ye nyenye mukumutigila ye Dadenyu, ye yuyo yeakumela indolo. 55 Nyenye simulava mumukagula, ali nene yendimukagwe. Na wone, nigile sindimukagwi, ipo ndeta ndawe nyenye. Nene ndimukagwe na ulukani lwakwe nzinatye. 56 Abulahamu, Udadenyu aheyite ulwa ikimunyi changu, nave akiwene nu kuhekelela.” 57 Sweno, Avayudaya vakumutigila, “Veve sulafikila nambi myaka machumi gahanu, nave uve vamuwene Abulahamu?” 58 Neke Yesu avapitulage, “Nachene nene nguvalongela, “Abulahamu wesialavaawoneka, nene nde ndipwali.” 59 Ipo ndawe vasavige amaganga sambi vamukinye, ndawe Yesu ifihige swe ihuma mu tembeli.

9

1 Yesu pealutilige amuwene umunu umubofu uluhuma pakwegalwa. 2 Avanyigendo vakwe vamuwusise, “Labi! Yenani yeapigite inzanangifu sunge uyu egalwe mubofu yumwene apangi avegasi vakwe?” 3 Neke Yesu avapitule, “Nambi uyu siapigiti nzanangifu, nambi avegasi vakwe. Lwave de sambi uludali lwa Nguluvi lwelelulwe lwipiga ikipigo mulumwene. 4 Lutuvaje ukupiga ifipigo fyakwe umwene yeandetite wepe munyi pakuva ikilo kikusa pe umunu sahwaniti ukupiga ikipigo. 5 Ulusika lwengali mung'i, nene ndilung'ali lwa mung'i.” 6 Peyealonzile iso, afunyite amati pasi swe iwuyapa lidope ndawe amubakige umubofu mumiho 7 neke amulongele, “Bite ukakalave kwilamba ilya ku Siloamu.” ilitawa kwekutigila, “Yeatumitwe.”). Ndawe abitige kukukalava, ipiluka we ilava. 8 Swe, avanyafivawo vakwe na vala vevamuwonige mumikaa akwisukilisa vatige, “Mbi uyu si yuyula yeake mumikaa yeakateng'emalige akwisukilisa?” 9 Avamwi vatige, “Yumwene!” Avangi vatige, “Nda, neke ulwene vihwana nave!” Neke umwene yee mubofu atigile, “Yunene!” 10 Swe vakumuwusa, “Mbi luve kinyandawuli sunge amiho gako galave?” 11 Ndawe avapitulige, “Umunu yula yeitambulwa Yesu akawuyepe ilidope, swe akumbaka mumiho na ukunigila: ‘Bite ukakalave kwilamba lya ku Siloamu.’ Swe ndawe ndabitige ukukalava swe ndilava. 12 Avene swe vitigila umwene, “Alikwi?” Ndawe atigilige, “Haha! Manyi nene sindina nzeli!”. 13 Sweno ndawe vamusindikige umunu yula yeemubofu Avafalisayo. 14 Nacho che ikimunyi cha isabato, Yesu peawuyepe ilidope nu kuwuponia uwubofu. 15 Ndawe Avafalisayo vamuwusige kangi umunu uyo ulwa, “Lukave kinyandawuli sunge ulave?” Neke avalongele, “Akambakite ilidope swe nzamwilava.” 16 Avamwi va Avafalisayo vatige, “Umunu uyo sahumiti kwa Nguluvi, pakuva siakwinatila ululagilo lwa isabato.” Avangi vitigile, “Luhwana ndawuli umunu umunyanzanangifu ukupiga ifilagilo ndawe ifi?” Swe visutana vavene ng'ani. 17 Ndawe vamuwusige kangi yula yeemubofu, “Pakuva yakuponise amiho lino veve ukumutigila ndawuli?” Swe umwene akuvatigila uyu, “Muvisi.” 18 Neke avavina va Avayudaya sivafuuvitwi ukuta umunu uyo ali mubofu pamwandi na ulwa ino ilava, mbaka pevavakemelye avegasi vakwe, 19 swe vakuvawusa avegasi iwo, “Ngali uyu ye mwanenyu? Ye nyenye mwitigila egilwe mubofu? Mbino alafile kinyandawuli?” 20 Avegasi vakwe vavapitule ukutigila, “Ena tukulukagula ulwa uyu ye mwanetu, ulwa egilwe mubofu. 21 Neke ulwa alafile kinyandawuli, ulo hwehwe situluseli, kangi na yula yeamuponise alave situmuseli. Mumuwusage yumwene pakuva uyo munu muvina ilongela.” 22 Avegasi vakwe valonzile ndahihyo pakuva vali na muhwehwe vawogopige avavina va Avayudaya ulwa yeveviyidikise ukuta umunu yeamwidikila Yesu ulwa ye Kilisito uyo adagwa ahege mu sinagogi. 23 Nambi lwelwene ulwalesile avegasi vatigile, “Umwene munu muvina mumuwuse!” 24 Swe vakumukemela kangi uyo yeemubofu vakumutigila, “Longele mumwene we ukumogopa Nguluvi! Hwehwe twitigila ukuta umunu uyu munyanzanangifu.” 25 Umunu yula apitwe akuvatigila, “Wone umwene munyanzanangifu nene singulukagula. Neke ulwene kinu kimwi chengukikagula ukuta, “Nge ndimubofu lino ndilava.” 26 Swe vakumuwusa, “Akakupije kiki? Akapigite kinyandawuli sunge ulave?” 27 Umunu uyo avapitwe, “Yendivalonje nanye simwiwenda ukupulika; mbi ndawuli pemumbusaga mupulike kangi? Ngali nanye mukwenda muve vanyigendo vakwe?” 28 Neke avene vaginage ukumuliga vitigila, “Veve ye wimunyigendo vakwe; hwehwe twivanyigendo va Musa. 29 Hwehwe tukulukagula ulwa Nguluvi, alonzile na Musa, neke umunu uyu situkumukagula kweihuma!” 30 Nave ndawe avapitulige, “Ulukani ulu lwa king'ulo! Nyenye simukukagula kweihuma neke ulwene nene amonise amiho ndilava. 31 Tukulukagula ukuta Nguluvi sakuvapulika avanu avanyanzanangifu, akumupulika hela umunu munyachoga na kukwisa isa uwende wakwe. 32 Uluhuma pamuvango silwelulapulisa ulwa umunu amuponise alave umubofu uluhuma pakwegalwa. 33 Wone umunu uyo ake sahumiti kwa Nguluvi, sakeahwana ukupiga kinu!” 34 Neke avene vapitule, “Neke veve, yewegalilwe munzanangifu. Uhwana ndawuli ukutwigisa hwehwe?” Swe ndawe vamudagige ahume mu sinagogi. 35 Yesu peapulike ulwa yevevamudasile mu sinagogi, nave ave akumuwona amutige, “Ngali Veve ukumufuuwa umwana va umunu?” 36 Umunu uyo amutige, “Mulugu ndongele umwene ye nani, sambi ndimufuuwe!” 37 Yesu amulongele umunu uyo, “Ye umuwene, na uyo yeilongana na veve lino ye mwene.” 38 Swe umunu uyo atige, “Ndifuuwa Mutwa!” Swe akumusunyalila Yesu. 39 Yesu swe itigila, “Nene ngasile mung'i umu kwa luhigilo, vesivilava sambi valave na avilava vabofule.” 40 Avamwi va Avafalisayo avepamwi nave swe vapulike iso, vakumuwusa, “Ngali nayi hwehwe nahwe twivabofu?” 41 Nave Yesu avatigile, “Wone muvelage mwivabofu, simuke muva mwivananzi. Neke lino nyenye mwakwitigila: ‘ Hwehwe twilava’, na ulo lwelwene ulwilagila ulwa pemwivananzi na kulino.

10

1 Yesu avatige, “Nachene nguvalongela nyenye; umwene yesigendela mukikolo peakwingila mwigagala ilya ing'olo igendela apangi uyo muhiisi kangi muposi. 2 Neke yeakwingila mukikolo uyo yemukwamili ing'olo, 3 Umulolesi va ikikolo akumudindulila uyo na ing'olo sakumupulika iliswi lyakwe, nave akusikemala ing'olo amatawa gaso peilalusa yimwi yimwi sihume kwivala. 4 Nave pealalwe, akusilongolela kuwutalo, naso ing'olo sakumufwata, pakuva silisele iliswi lyakwe. 5 Na ing'olo iso, sisihwaniti ukumufwata umugenzi, simukimbila pakuva sisimuseli umugenzi iliswi lyakwe.” 6 Yesu avalonje ikiganiso iki neke avene valemwe ukukikagula icheavalongelige. 7 Nambi Yesu awilye kangi akuvatigila, “Nachene nene nguvalongela nene ye nene ndikikolo cha ing'olo. 8 Na mbevali vevalongwe ukusa, nene lwende ngali sindilasa, iwo ve vahisi na avaposi, nawo na sing'olo sisavapuliki. 9 Nene ye nene ndikikolo, umunu yeakwingila mwa nene, apokwa, ingila nu ukuhumanisa, nave awuwona uwukwamililo. 10 Umuhiisi sakusagi chaka, pesi ulwa akusaga sambi ahiise nu kuwulaga nu kuwulagila ng'ani. Nene ndasile, nyenye muve nu wumi, uwumi uwukwilaniche. 11 Nene ye nene nde mukwamila ing'olo umunofu. Umukwamila ing'olo umunofu akwitawula uwumi wakwe uwimila ing'olo sakwe. 12 Umunu ye ihombwa amagobole, nave si mukwamila ing'olo nda kangi na sing'olo si fikwamilwa fyakwe, pembe awone ingwami yikusa, akusileka ing'olo ikimbila. Nayo ingwami yikwibata nu kusitagalisa. 13 Umunu ye ihombwa amagobole aikimbila pakuva umwene va amahombo na situgagi ulwa ing'olo. 14 Nene ye nene umukwamila ng'olo umunofu. Avangu ndivakagwe, nawo avangu vakung'agula nene, 15 ndawe dada lweakung'agula nene nane lwendimukagwe Dada. Nane nguwutawula uwumi wangu ukwimila ing'olo. 16 Posili ing'olo sangu isingi sesisupali mwigagala ili, lumbaje naso ndisilete; naso simulika liswi lyangu. Kuva na kipinga kimwi na umukwamili ng'olo yumwi. 17 “Nambi Dada anzenda pakuva nditawula uwumi wangu, sambi kangi ndiwutegule. 18 Sikwali umunu yeanzanuka uwumi wangu; pesi ulwa nguwutawula yinene hela. Uludali lwa ukutawula ndinalo, na uludali lwa ukuwutegulila kangi na lulo ndinalo. Na Dada ulo lweandaje mige.” 19 Swe kwave na kusutana kangi mu Vayudaya uwimila ing'ani isi. 20 Awolofu vawo vatige, “Ina lisoka; kangi mugulufu! Mbi veki ukumupulikisa?” 21 Neke avangi vatigilage, “Ing'ani iso sa munu umunya lisoka, “Mbi lisoka lihwanite liponie avanu avabofu valave?” 22 Ino uko ku Yelusalemu kwekwina uluhekelelo ulwa ukuyifunyilila itembeli. Lwe lusika lwa ikitungwi. 23 Nave Yesu agendige mutembeli mu bwalo ya Solomoni. 24 Ndawe Avayudaya vamupilimige neke vamuwuse, “Mbaka panili peutufwahisa? Mwene veve wi Kilisito. Siutulongele wima hela?” 25 Yesu avapitwe ukutigila ndavalonje, “Neke nyenye mulemwe ukufuuwa. Ifipigo ifi fyendipiga mwitawa lya Dada vangu fyefyene ifikunzolelela. 26 Ino nyenye simwifuuwa, pakuva musumuli mukipinga cha ing'olo sangu. 27 Ing'olo sangu sasipulika iliswi lyangu; na ndisikagwe, na sasikuninila. 28 Ndangusipela uwumi wa mbepali, na sisasiyaga nda. Na sikwali umunu yeahwanite asaanuke mwiwoko lyangu. 29 Dada vangu yeamelye iso muvina ukulutila mbevali na sikwali munu yeahwanite ukusaanuka mwiwoko lya Dada. 30 Dada na nene tulilumwi.” 31 Neke kangi Avayudaya vasave amaganga sambi vamukinye. 32 Neke Yesu avatige, “Ifipigo ifinofu fyolofu ndivalaje ifihuma kwa Dada, ino kipigo ikindawuli mwa ifyo ikileka mung'inye na amaganga?” 33 Avayudaya vamupitwe, “Situkukukinya na amaganga wimila ifipigo ifinofu nda, tukukuvala uwulonga fivi! Pakuva veve wimunu hela, ino wawigela wivike wi Nguluvi.” 34 Neke Yesu apitwe, “Si lwandikwi mundagilo senyu ulwa nene nige, ‘Nyenye mwivanguluvi?’ 35 Nguluvi avatige vanguluvi vala avapelitwe ulukani lwakwe, nahwe tukulukagula ulwa Uwandike Uwelu wilongela mumwene. 36 Yula ye Dada amofwige na ukumutuma mung'i, nyenye mukumutigila: ‘Mulonga fivi,’ ngali pakuva lulu lwe nige: ‘ Nene ndimwana va Nguluvi?’ 37 Pe sindipiga fipigo fya Dada vangu apo mutane ukufuuwa. 38 Neke ulwene namuve simukufuuwa apo mufuuwe fifipigo ifyo fyendipiga sambi mulukagule ulwa Dada alimugati mwa nene nani ndilimugati mwa Dada.” 39 Ndawe vagelige kangi ukumwibata swe isupatuka mumawoko gawo! 40 Swe akwibitilaga kangi kumwambu ya umukoga gwa Yolodani mbaka apono peabatisige Yohane ndawe ikalige kuko. 41 Na avanu awolofu vamufwatite, “Nachene Yohane siapigiti nambi kilagilo nda. Neke mbesili sealonzile Yohane isa uyu salisanachene.” 42 Neke uko vamufuuwe vanu wolofu.

11

1 Ino Umunu uyumwi e mutamwa ilitawa lyakwe Lasalo uva ku Betaniya, (munya boma yimwi na Maliya na umame Malita. 2 Ye Maliya yula yamubakite Umutwa amafuta amanofu na ukumupuguha amagulu gakwe na ifwili sakwe, uyo e muhase va Lasalo yeali mutamwa.) 3 Swe avahase vituma umulomo kwa Yesu vitigila, “Mutwa umunyawiyendi vako mutamwa!” 4 Nave Yesu peapulike atige, “Uwutamwa uwu si wafwa nda; luve de sambi wulete indolo sa Nguluvi na indolo sa umwana va Nguluvi siwonekele mumo.” 5 Neke Yesu alamwenda Malita, na umwanakwave na yumwene Lasalo. 6 Ave ipulika ulwa Lasalo mutamwa ave peikala bahala peepwali filo fivili kangi. 7 Neke peavalongele avanyigendo vakwe, “Tubitage kangi ku Yudaya!” 8 Avanyigendo neke vamulongele “Labi! isusi hela, Avayudaya vakasakige ukukukinya na amaganga, nave peusogwe kuko?” 9 Yesu apitwe, “Mbi ifivalilo fya pamunyi sifinyichumi na fivili? Umunu peigenda pamunyi siakwikuvala, iwona uwelu wa ing'i iyi. 10 Neke wone agende pakilo ikuvala, pakuva uwelu wusumuli mulumwene.” 11 Ave pe alonzile iso avalonje, “Umunyawiyendi vetu Lasalo agonelye ino ndibita ngamulamuse.” 12 Neke Avanyigendo vamutigile, “Mutwa wone we agonelye hela, apona.” 13 Avene vahosige ulwa alongelige ulwa ukugonelela itulo, kumbi Yesu alongige ulwa ifwa ya Lasalo. 14 Sweno Yesu pe avalongele wima ukuta, “Lasalo afwe; 15 Nani ndihekelela wimila nyenye ukuta singekuko sambi mufuuwe. Apo tukabitage kulumwene.” 16 Ndawe Tomasi (Yeakemeligwe munyawendani) avalongelige avanyigendo avayagwe, “Tubitage nayihwehwe tukafwilase pamwi na yumwene!” 17 Yesu peyeafikite, afisile yeafwe na mutage filo wita nda fitayi de yefilutye. 18 I Betaniya ye wipi wa kilomita sidatu de ukubita ku Yelusalemu. 19 Na avanu wolofu va Avayudaya vevasile kwa Malita na Maliya kukuhungila ikivembo cha ifwa ya umuhasa vawo. 20 Malita aveipulika ulwa Yesu akusa, ahele ukumutang'anila; na Maliya alasige pakaye. 21 Ndawe Malita amulongelige Yesu itigila, “Mutwa uke uvelage wipwali ipa umuhasa vangu sike afwa nda! 22 Neke nayilino ngulukagula ulwa checheumusuka Nguluvi, Nguluvi akupela.” 23 Swe akumulongela, “Umuhaso asilibuka.” 24 Neke Malita amulongele, “Ngulukagula ukuta saasilibuka palusilibuko ulwa kimunyi cha uwusililo ing'i.” 25 Ndawe Yesu amutigilige, “Nene ye nene lusilibuko na uwumi. Umwene yeakufuuwa nene na afwe ava pe anana 26 na yeinana nu kufuuwa sisaafwa kitasila. Ndawuli wifuuwa ulu?” 27 Swe Malita akumulongela, “Ena Mutwa! Nene fuuvitwe ukuta veve ye Kilisito ve Mwana va Nguluvi, yeakusa mung'i.” 28 Nave ave ilonga iso ahele kukumukemela Maliya palubali neke atigile, “Umwigisi pwali akukukemela.” 29 Nave ave ipulika ahesile kinyaganisa ibita kwa Yesu. 30 Na Yesu siealafika mukijiji, epe alibahala peamutang'anie Malita. 31 Swe vala Avayudaya ave mukaye pamwi na Maliya vakumusikimika pevamuwene imihegele peihuma, vamufwatite kono wevitigila wanda asogwe akavembele pachanga. 32 Maliya ave ifika pala peepwali Yesu, nu kumuwona agwe pamagulu gakwe neke amulongele, “Mutwa, Uke uve wipwali ipa umuhasavangu sike afwa nda!” 33 Yesu pamuwene ivemba, na vala Avayudaya avevamufwatite nawo vivemba; ahuguve hilo na ukukelagila munumbula. 34 Swe itigila, “Mukamutasile kwi?” Ndawe vamulongelige, “Mutwa wuse ulave!” 35 Yesu swe ivemba inzihosi. 36 Ndawe Avayudaya vatigilige, “Mulavage lwealamwendite!” 37 Neke avamwi vatigile, “Ndawuli uyu ye amuponise amiho yula, akalemilwe ukutanila Lasalo alemwe ukufwa?” 38 Neke Yesu kono weahuguve munumbula afikite pachanga. Ichanga nacho che lipalika iligeleke iliganga pamulyango. 39 Neke Yesu atigile, “Muhese iliganga” Malita, umuhase va uyo yealafwe amulonje, “Mutwa ino inung'a pakuva ave mufimba filo fitayi!” 40 Neke Yesu peamulongele, “Singengulonje ukuta wone ufuuwe usiwona indolo sa Nguluvi?” 41 Swe vihesa iliganga lila. Yesu swe ilava kuchanya swe itigila, “Dada ngukulumba pakuva umulike. 42 Nani ndendilusele ulwa veve wakumulika mbepali, ndilonga ulu wimila umukong'ano gwa vanu ugu gwe gusile, vafuuwe ulwa ye veve ye wandetite.” 43 Nave ave ilonga iso ihugite ikemela kwa liswi likomi, “Lasalo! hume kwivala!” 44 Yula yealafwe ahumite kwivala mupilingise isanda mumagulu na mumawoko, na uwusu wugubike ikitema, nave Yesu swe akuvalongela, “Mumupilingule mukamuleke ibitilage.” 45 Avanu wolofu mu Vayudaya avevasile kwa Maliya na kusiwona sila seapigite Yesu vafuuvitwe. 46 Neke avamwi vahele ku Vafalisayo nu kuvalongela seapigite Yesu. 47 Ndawe Avafalisayo na avatambisi avavina vakong'anige vitigila, “Tugitage ndawuli? Pakuva umunu uyu ipiga ifilagilo fyolofu. 48 Wone tumuleke, avanu mbevali vamufuuwa, na Avalumi vasa vatupoka ing'i yetu na ukwananga i tembeli ya Nguluvi!” 49 Neke umunu uyumwi, mwa avene Kayafa yeali mutambisi muvina umwaka gula avalonje, “Nyenye simuluseli nambi lukani! 50 Simwihosa ulwa luvaje umunu uyumwi afwe wimila avanu, sindawe ukuyasa avanu mbevali mung'i?” 51 Na ulukani ulo siilonji hela muluhala lwakwe, alonzile pakuva ali mutambisi muvina umwaka gula, avilige ukuta Yesu afwa wimila avanu va ing'i yawo, 52 kangi si ukwimila avanu va ing'i yawo hela, pesi ulwa peahwana ukuvakong'asa avana va Nguluvi avatagalye sambi vave valilumwi. 53 Na Uluhuma kikimunyi kikila, avavina va Avayudaya vasakige ing'asi yevamuwulagila Yesu. 54 Nambi Yesu siavi peagendela pawelu mu Vayudaya. Nave ahesile kuko ahele mbaka apono ape pipi na ibalali, ulutanana ulwatambuligwe Efulaimu, na kuko ikalite na avanyigendo vakwe. 55 Na uluhekelelo lwa i pasaka ya Avayudaya lweluhegelye, na avanu wolofu vabitige ku Yelusalemu veswe inzanangifu sawo i pasaka pesiyilafika. 56 Swe avene vavanzile ukumolela Yesu, vave vikong'ana mu tembeli viwusise we vavene ng'ani, “Mwiwona ndawuli? Mwitigila siasa lwa i Pasaka?” 57 Avatambisi avavina na Avafalisayo vevalaje ulwa wone munu amuwone apono alongage sambi vamwibate.

12

1 Lwave filo fimutanda wesiyilafika i Pasaka Yesu afikite ku Betaniya kweikalige Lasalo yula yamusilibwise uluhuma mufwa. 2 Ndawe vamugelanikisige kuko ikilyo cha pamihye nave Malita avapigilige; nayi Lasalo e yumwi va vavala avali vateng'eme Ukulya ikilyo. 3 Neke Maliya ategwe isupa iyilipinga ku lita yimwi ya amafuta amanofu ga nalido iyigusiwaga amagobole molofu, swe akumuhululisisa Yesu amagulu na ukumupuguha na ifwili sakwe swe mukaye mwinung'ilila wunofu. 4 Ndawe Yuda Isikalyote uyumwi va avanyigendo vakwe yula yeamupitwike atige, 5 “Mbi ndawuli amafuta agindawe iga sigagusiswi magobole dinali magana gadatu sambi vapelwe avamikaa?” 6 Nave alonzile iso si kwa lusungu ku vamikaa nda, alongelige uwuhiisi weeinawo pakuva yeali mulolesi va ibogolo ya magobole, nave ahiisige ifyemofili. 7 Neke Yesu atigile, “Mulamufwahisa umung'inetu uyu! Mumulekage angelanikise cheinacho, ukwimila ikimunyi cha ukutagwa kwangu muchanga. 8 Pakuva avamikaa mulipamwi nawo mbepali neke nene simbapamwi na nyenye mbepali.” 9 Swe avanu awolofu mu Yudaya vapulike ulwa Yesu ali kuko. Siwita vasakige ukumuwona Yesu hela pesi ukuta vasakige ukumuwona na yi Lasalo, yula ye Yesu alaamusilibwe uluhuma kuvafwe. 10 Ndawe avavina va avatambisi vagahige ukumuwulaga na yi Lasalo, 11 ukwimila uwolelesi wa Lasalo Avayudaya wolofu vavagaluche vavabesise avavina vawo va kumufuuwa Yesu. 12 Pa ikimunyi icha kavili avanu wolofu vevasile ku Pasaka vevapulike ukuta Yesu akusa ku Yelusalemu. 13 Swe vitegula amatagala ga imikosi vihuma kukumutang'anila kono we viheya vitigila, “Hosana! Ye mufunyilile yakusa mwitawa lya Mutwa, mufunyilile Umutema va Isilaeli.” 14 Nave Yesu ave iletelwa ichana cha idogovi swe ihova ndawe we lwe lwandike. 15 “Ulogopa, ve mwanahinza va ku Sayuni! Lavage, Umutema vako akusa ahofile ichana cha idogovi.” 16 Ulusika lulo, avanyigendo vakwe sivasikaguligi ing'ani iso, neke Yesu peinje mundolo sakwe pepene peviwike ulwa andikilwe iso na ulwa vamupije siso. 17 Avanu avepamwi na Yesu peamukemelye Lasalo uluhuma muchanga na ukumusilibula uluhuma kuvafwe wolelelye lwe valuwene. 18 Palulo amalugu ga vanu vahele kukumutang'anila pakuva ve vapulike ukuta Yesu yapigite ikilagilo icho. 19 Neke Avafalisayo vilonganze vavene vitigila, “Nye mukuluwona? Ukuta situhwana ukupiga kinu! Mulavage ing'i mbeyili yikumuninila yumwene!” 20 Pepina Avagiliki avamwi mwilugu lya avanu avevahele mukwifunya pa ikimunyi cha uluhekelelo ulo. 21 Iwo vahele kwa Filipo (munya ku Betisaida ya ku Galilaya) neke vamusuke vitigila, “Mulugu, hwehwe twisaka ukumuwona Yesu.” 22 Filipo swe ibita akumulongela Andeleya, neke avavili iwo Filipo na Andeleya, swe mbevali vibita vakumulongela Yesu. 23 Nave Yesu avapitwe, “Ikivalilo kifikite icha Umwana va Umunu ukwanukila indolo! 24 Nachene nene nguvalongela nyenye, ulupeke lwa ingano pesilugwi paluganga lufwe lwakwikala ndahihyo lwiyena, neke pelufwe lwalwiveleka hilo. 25 Umwene yakuwuwenda uwunu wakwe awuyasa, yakuwuvipila uwunu wakwe mung'i umu awupoka mbaka kuwumi wa mbepali. 26 Umunu yeiwenda ukumigila nene aninilage, sambi na pala pemba ndipwali nene, baho peava pwali umukami vangu. Na yeyeavesaga munu yeakunigila nene, nave Dada vangu amupela ululumbo. 27 “Lino inumbula yangu yihuguve nane nigile ndawuli? Nigile: ‘Dada, umoke mu kivalilo iki?’ Neke ulo lwelwene lwendasye sambi ngendele mu kivalilo iki cha uluteseko. 28 Dada ulipele indolo ilitawa lyako.” Ipo iliswi lyapulise uluhuma kuchanya, “Yendilipelye indolo na kangi ndilipela indolo.” 29 Ndawe vamalugu avevimite pipi vapulikige iliswi ilyo neke avangi vatigile kwina limadadama avamwi vatige, “Munyivaha alonzile nave.” 30 Neke Yesu apitule atigile, “Iliswi ili silyusili kwa nene nda, lyusile kwa nyenye. 31 Ino ikivalilo cha ukuhigwa ing'i iyi kifikite, na umutema va ing'i iyi atoosiwe kwivala. 32 Nane peng'ang'wilwe pachanya ya ing'i ndivakwegela mbevali kwa nene.” ( 33 Pealongige de alagilige ifwa iyindawuli yakusa afwile). 34 Neke vamalugu vamupitule, “Hwehwe twilongelwa mu ndagilo ulwa Kilisito saanana kitasila. Ino lwiva ndawuli pewitigila lumuvaje Umwana va Umunu ukukang'ulwa? Uyu Umwana va Umunu ye nani?” 35 Neke Yesu avalongele, “Ulung'ali pelwipwali na nyenye lusika ludodo. Mugendelage lulo pelwiva lwipwali, sambi ulwisa lulemwe ukuvatindasa, pakuva yeigendela mulwisa saakupakagula peisogola. 36 Sweno, ulusika lwe ulung'ali lwipwali pepene pemufuuwagwe; sambi muve avana va ulung'ali.” Pealonzile iso, Yesu ibitye akwifiha pataali na avene.” 37 Nambi Yesu alapigite ifilagilo ifi mbefili pa avene, avene sivamufuuvitwi. 38 Sambi lukwile ulukani lula ulwealonzile umuvisi Yesaya: “Mutwa, ye nani yeafuuvitwe ulukani lwetu? Na uludali lwa Umutwa yenani umulagile?” 39 Palulo sivahwaniti ukufuuwa. Nambi Yesaya alonzile kangi, 40 “Nguluvi avabofwise amiho gawo, na agubiche uluhala lwawo; sambi valemwe ukulava, na miho gawo valemwe ukulukagula na uluhala lwawo na ukumitukila nene sambi ndivaponie.” 41 Ing'ani iso alonzile Yesaya pakuva awuwene uwunyandolo wa Yesu swe ilonga ing'ani sakwe. 42 Neke ulwene, vemovali na avavina wolofu va Avayudaya avamufuuvigwe ino pakuva vawogopige Avafalisayo vifihige valonga vahakwe musinagogi. 43 Pakuva vawendige ukusumilwa na avanu valeke ukusumilwa na Nguluvi. 44 Swe Yesu akwihuga liswi itigila, “Yeakufuuwa nene sakufuuwa nene hela, ava akumufuuwa yeandetite nene. 45 Umunu yeyeavesaga akumbona nene ava akumuwona yeandetite. 46 Nene nzusile mung'i nda lung'ali, sambi yeyeavesaga akufuuwa nene alemwe ukusigalila mulwisa. 47 Wone umunu apulike ing'ani sangu neke abedale nene sindimuhiga. Pakuva singasili mwe kuhiga ing'i ngasile mukuyipoka. 48 Yeyeakumbihila nene yesiakwidikila ing'ani sangu inave yeamuhiga, ulukani ulo lwendonzile lwelwene lwelumuhiga pa kimunyi cha uwusililo. 49 Ulu lwa nachene, pakuva sindilonga kwa kwiyendela hela nda, ye Dada yeanumile andaje isa ukulonga na wengitage pakulonga. 50 Nane ngulukagula ulwa ululagi lwakwe we wumi wa mbepali. Ino sendilonga iso, sesene seandaje Dada ndongage.”

13

1 Che kimunyi kimwi ukufika uluhekelelo lwa i Pasaka. Yesu alukagwe ulwa ikivalilo chakwe yekifikite cha ukuhegela mung'i, nu kubita kulu Dade nave ali avendite avanu vakwe va mung'i avendite ulutalamu! 2 Yesu na avanyigendo vakwe vave vikong'ana valye ikilyo cha pamihye. Nave Setani yealamupelye Yuda umwana va Simoni Isikalyote umutima gwa kumupituka Yesu. 3 Yesu alalukagwe ulwa udade amupelye uludali mbeluli mumawoko gakwe, na ulwa ahumite kwa Nguluvi nave ipiluka kwa Nguluvi. 4 Ahesile pawulilo, swe ivika palubali umugolole gwakwe neke ategule ikitema swe akwipinya. 5 Swe isuuka ululenga mufugo neke avange, ukuwofuga avanyigendo amagulu nu kuvapuguha na ikitema kila chaliipinyite. 6 Ave ifika kwa Simoni Petulo uyo amulonje, “Mutwa, veve sunzofuga amagulu nene?” 7 Neke Yesu amupitule, “Lwendipiga nene lino sulukagula, ulukagula pambele.” 8 Swe Petulo akumutigila, “Veve sunzofuga nene amagulu gangu nda!” Ndawe Yesu amulongelige, “Pesingofwigi siulilumwi na nene nda.” 9 Simoni Petulo neke atigile, “Mutwa apo siga magulu hela nda, luvelage na mawoko gangu na gu mutwe.” 10 Yesu amupitwe, “Umwene yeyakalive umuvili aakofuga ga magulu hela, pakuva yeesile umuvili mbeguli. Nyenye mbemuli mwesile neke si mbemuli.” ( 11 Pakuva alamusele umwene yeamupituka nambi alonzile, “Si mbemuli ye mwesile.”) 12 Ave peye awofwige amagulu na ukutegula kangi umugolole gakwe na ukuteng'emala avalonje, “Ndawuli, mulukagwe ulo lwendivapije? 13 Nyenye mukung'emelaga Mwigisi na Mutwa, ipo mwilongelaga mumwene pakuva lwendiwali. 14 Wone nene ye ndi Mutwa na Mwigisi venyu ndiwofwige amagulu nyenye, luvavaje nanye ukwiyofuga amagulu yinyenye kwa yinyenye. 15 Pakuva ndivapelye icholelesi ndawe nene lwendivapije, nayinyenye mupigage ndahihyo. 16 Nachene nguvalongela nyenye, umukami si muvina ukulutila Umutwa vakwe na umwigendo si muvina ukulutila yeamuletite. 17 Pemusikagwe iso na ukupiga muva muvafunyilile. 18 Ing'ani isi sindilonga ukwimila nyenye mbemuli, ndivasele vala ve ndavahagwe. Neke luvaje Uwandike wukwile uwitigila; ‘Umunu yetwalilise ikilyo changu amitwike.’ 19 Uluhuma ino nguvalongela wesilulava, sambi peluwonike mufuuwe ulwa, Nene ye Nene. 20 Nachene nguvalongela, umwene yeakumwanukila umunu yeyendimuletaga ava akunzanukila nene, nave yeakunzanukila nene ava akumwanukila umwene yeandetite.” 21 Nave Yesu ave ilonga iso ahuguve munumbula, neke alonge kimalamangi atigile, “Nachene nguvalongela umuyenyu uyumwi amituka.” 22 Avanyigendo ndawe vilavilige kono wevisina ulwa yenani yakumulonga. 23 Na epwali uyumwi va avanyigendo vakwe yealahegime pamambaga ya Yesu, yeali mwende va Yesu. 24 Swe Simoni Petulo akumusinisa ni liwoko ulwa, “Muwuse yenani yeakumulonga.” 25 Ndawe umunyigendo yealateng'eme pipi na Yesu amuwusige, “Mutwa, ye nani?” 26 Neke Yesu apitule, “Ye yula yendimupela inonge isabise mu kinyandilo,” Ndawe asabisige inonge na ukumupela Yuda umwana va Simoni Isikalyote. 27 Yuda ave anukile inonge, Setani amwinje. Neke Yesu peamulongele, “Sewisaka upige; wangufye upige!” 28 Pepagaya na yumwi mwaavevateng'eme ukulya ikilyo yalukagwe mbi kiki ikilesile amulongele ndahihyo. 29 Neke avanu vahosige ukuta pakuva Yuda yeali mulolesi va ibogolo ya magobole, Yesu amulongelige ulwa gule fyetwisaka ifya uluhelelo, apangi, ulwa avapele avamikaa kinu. 30 Yuda peanuche inonge ahumite kwivala lulusika lulo. Kangi che kilo. 31 Yuda ave ihuma Yesu atige, “Ino Umwana va Umunu apelitwe indolo; nave Nguluvi apelitwe indolo mulumwene. 32 Na wone indolo sa Nguluvi siwoneche mulumwene, sweno, nave Nguluvi asivika pawelu indolo sa Umwana mugati mulumwene, ena apiga ndahihyo na sahaava. 33 “Nye vana nyenye pendilipamwi na nyenye, lusika ludodo. Nanye musaka, neke ndawe lwe ngavalonje avalongosi va Avayudaya, nguvalongela kangi, ‘Kula kwesogwe nyenye simuhwaniti ukusa!’. 34 Ululagilo ulupya nguvapela mwiyendage, ndawe lwe ndavendite nyenye na yinyenye mwiyendage ndahihyo. 35 Wone mwiyende yinyenye kwa yinyenye avanu mbevali pevalukagula mwivanyigendo vangu.” 36 Ndawe Simoni Petulo amuwusige, “Mutwa wibita kwi?” Yesu amupitwe, “Kwendibita veve suhwaniti ukuninila lino neke ukwene uninila pambele.” 37 Petulo neke amulongele, “Mutwa mbi ndawuli ulwalino sinywaniti ukuninila!” Nene nawula uwumi wangu wimila veve. 38 Neke amupitule “Be, veve utawula uwumi wako ukwimila nene? Nachene ngukulongela inzogolo wesiyilavika uva umbihye kadatu!”

14

1 Yesu avalonje, “Mulahuguvala munumbula senyu. Mumufuuwagwe Nguluvi, mufuuwagwe nayi nene. 2 Mukaye ya Dada vangu muna wikalo wolofu; manyi silwindahihyo singe ndivalongela, pakuva ndibita kukuvagelanikisa uwikalo. 3 Nene penyele kukuvagelanikisa wikalo nzusa kangi kukuvanukila mwingile ukwangu sambi pendi pwali nene nayi nyenye muvelage baho. 4 Nani kwesogwe ing'asi muyisele.” 5 Tomasi neke amulongele, “Mutwa, hwehwe tuyikagula ndawuli ing'asi?” 6 Yesu amupitwe, “Nene ye ng'asi, inachene na uwumi, sikwali umunu yeabita kwa Dada pesiakweti kwa nene. 7 Wone muke, “Mukung'agule nene muke mukumukagula nayi dada. Na uluhuma lino mumukagwe, kangi yemumuwene.” 8 Filipo amutige, “Mutwa, tulagile Dada, lutukwila.” 9 Yesu apitwe, “Nene mbe pamwi na nyenye filo mbefili ifi veve sukung'agula Filipo? Yeambwene nene amuwene Dada. Ino veve wilonga ndawuli pewitigila, ‘Tulagile dada?’ 10 Siwifuuwa ulwa ndilimugati mwa dada na Dada alimugati mwa nene? Ing'ani iso senguvalongela nene singwilongela hela nda, Dada yeakwikala mugati mwa nene aipiga ifipigo fyakwe. 11 Mufuuwage ulwa nene ndilimugati mwa dada nayi dada alimugati mwa nene. Pesimwifuuwa ulo apo mufuuwe ukwimila ifyene ifipigo fyendipiga. 12 Nachene nguvalongela, umwene yeakufuuwa nene na ifipigo fyendipiga nene nave apiga, kangi apiga ifipigo ifikomi, ukulutila ifyo, pakuva nene sogwe kwa Dada. 13 Nyenye pemusukite ulweluva mwitawa lyangu, ulo miga sambi Dada ave na indolo mugati mwa Umwana. 14 Wone musuke lulweluva mwitawa lyangu, nene miga. 15 “Wone munzende, mwinatila indagilo sangu. 16 Nani ndimusuka Dada, nave avapela Umutanzi yungi yeikala na nyenye mbepali. 17 Ye Muhe, vanachene yesianukilwa na avanu va ing'i, pakuva sivakumuwona nambi ukumukagula. Neke nyenye mukumukagula, pakuva akwikala kwa nyenye nave ava mugati mwa nyenye. 18 “Sindivaleka nyenye mwivakiva nzusa kwa nyenye. 19 Lusige lusika ludodo avanu va ing'i sivambona kangi, neke nyenye mukumbona pakuva nene ndimumi nayi nyenye muva mwiwumi. 20 Ikimunyi icho, samulukagula ulwa nene ndili mugati mwadada vangu, nyenye mugati mwa nene, nayi nene mugati mwanyenye. 21 Umwene yeakwanukila indagilo sangu na ukusinatila uyo yeava akunzenda, nave yeakunzenda endwa na Bada vangu nayi nene ndimwenda na ukwiyelelula kulumwene!” 22 Yuda (siyula Yuda Isikalyote nda) amulonje, “Mutwa luhwana ndawuli ulwa ukwiyelelula kwa hwehwe nasi kwa avanu va mung'i nda?” 23 Yesu amupitwe ukuta, “Umunu yeanzendite inatila ulukani lwangu na Dada vangu amwenda, nahwe tusa kulumwene neke tuva tuhamye kulumwene. 24 Umunu yesiakunzenda uyo siakwinatila ing'ani sangu. Na ulukani lwemwipulika silwangu nda ulo lwa Dada yeandetite. 25 “Iso sesene sengavalongelige pengikalige kwa nyenye 26 neke uyo Umutanzi, uyo Umuhe Umwelu, ye Dada amuleta mwitawa lyangu, avigisa mbesili na ukuviwusa mbesili sendendivalonje. 27 “Uwikalakunoga wangu nguvalekela; uwikalakunoga wangu nguvapela; sindawe ing'i lweyitawulaga. Mulahuguvala mumitima jenyu kangi mulava na muhwehwe. 28 Mukapulike ulwa nene ngavalonje ukutigila: ‘Ngwibitilaga, kangi nzusa kwa nyenye.’ Ndamuke muve mukunzenda muke muhekelela pakuva ndibita kwa Dada. Pakuva Dada ye muvina ukundutila nene. 29 Nayilino ndivalonje wesilulava, sambi peyelufikite mufuuwe. 30 Nene sindonga na nyenye kangi ing'ani nzolofu, pakuva akusa umuvina va ing'i iyi, neke umwene mugaya ludali kwa nene; 31 Neke ing'i yivaje ukulukagula ukuta nene ndimwenda Dada, na ukuta ndandipiga lweandagise Dada. Muhege, twibitilage!

15

1 Nene yenene nde musabibu gwa nachene, na Dada vangu ye mulimi. 2 Lilyelivesaga litagala mugati mwa nene lyesiliveleka amakowo akulihesa, na lilyelivesaga ilitagala lyeliveleka amakovo aitotekela sambi liveleke amakowo molofu. 3 Nyenye yemuve mwivelu wimila mulukani lula lwendavalonje. 4 Mwikalage mugati mwanene, nane mugati mwanyenye. Ndawe ilitagala lwesilivelekagi liyena pesilili mugati mumusabibu lwindahihyo nayi nyenye pesimukwikala mugati mwa nene. 5 Nene gwe musabibu, nyenye mwimatagala. Yakwikala mugati mwanene nane mugati mulumwene, uyo aiveleka amakowo molofu, pakuva pesi nene nyenye simuhwaniti ukupiga kinu. 6 Umunu yesiakwikala mugati mwa nene aitagwa kwivala ndawe ilitagala nu kukala. Ilitagala ilyo avanu vavikong'asa nu kusopa mumoto lipye. 7 Wone nyenye mwikale mugati mwanene na amaswi gangu pegikalite mugati mwanyenye musukage chechemwisaka nacho mupigilwa. 8 Palulo Dada vangu apelwa indolo wone muveleke amakowo molofu na muva vanyigendo vangu. 9 Ndawe Dada lweanzendite nene, nayinene lwendavendite nyenye mwikalage muwende wangu. 10 Wone mwinatile indagilo sangu munana mu wende wangu ndawe nene lwendinatye indagilo sa Dada vangu na ukunana mu wende wakwe. 11 Ing'ani iso ndivalonje sambi uluhekelelo lwangu lukwilanikile. 12 Ulu lwe lulagilo lwangu: “Mwiyendage, yinyenye kwa yinyenye ndawe nene lwendavendite nyenye.” 13 Asukuli umunyawende wolofu ukulutila uwu, wa umunu ukutawula uwumi wakwe wimila avanyawiyendi vakwe. 14 Nyenye mwivanyawiyendi vangu pe mwipiga senguvalagisa. 15 Sindivakemela nyenye ulwa muvakami nda, pakuva umukami saluseli lweipiga Umutwa vakwe. Ino nyenye ndivatige mwivanyawiyendi vangu, pakuva mbesili sengapulike kwa Dada vangu ndivalonje. 16 Si Nyenye nda yemwanyagwe nene, ali nene yendavahagwe nyenye neke ndivavike muveleke amaveleko, na amaveleko geganana sambi luve chechemusukaga kwa Dada mwitawa lyangu avapele. 17 Ululagilo lwangu lwe ulu, mwiyendage yinyenye kwa yinyenye. 18 “Wone muwone avanyamung'i vakuvavipila, mulukagulage ulwa vali vambipye nene wesivalavavipila nyenye. 19 Muke muvelage mwiva mung'i, ing'i yikeyivenda ndamwivayo. Ino pakuva nyenye si mwivamung'i na nene ndavahagwe uluhuma mung'i nambi avamung'i vakuvavipila. 20 Mwiwukage ulukani lula lwendendivalonje: umukami si muvina ukulutila Umutwa vakwe. Wone vambifise nene, vavavifya na yinyenye, wone vinatye ulukani lwangu vinatila na lulwenyu. 21 Ino isi mbesili vavapigila mwivalwa ilitawa lyangu, pakuva sivamuseli yeandetite. 22 Ngembe singasili na ukulongana nawo, sivakevava na nzanangifu, neke lino vagaya cha ukutyegela mu wananzi wawo. 23 Umwene yeakumbipila nene iva akumuvipila nayi Dada vangu. 24 Ngembe singapigiti pavene ifipigo fyesiealapiga umunu uyungi, sivake vava na inzanangifu. Neke lino vakaluwene swe vakutuvipila nene na Dada vangu. 25 Sila inzandike mundagilo sawo sikwile; ‘Vambipye hela!’ 26 “Peasile uyo umutanzi, yendivaletela uluhuma kwa Dada, uyo Muhe va nachene yeihuma kwa Dada, anzolelela. 27 Nayi nyenye mukolelela pakuva uluhuma pamuvango mukepamwi na nene.

16

1 “Ing'ani iso mbesili ndivalonje sambi mulemwe ukululeka ulufuuwo lwenyu. 2 Vavahesa mumasinagogi. Kangi ikivalilo kikusa pe umunu yeyeavesaga akuvawulaga atigila ngumutambikila Nguluvi. 3 Na iso vavapigila pakuva sivamukagwi Dada na nene. 4 Neke ndivalonje iso, sambi ikivalilo pechusile mwiwukage ulwa nene ndavalonje. “Sindavalonji iso uluhuma pamuvango pakuva ngepamwi na nyenye. 5 Neke lino nene ngwibitilaga kulumwene yeandetite sipwali mwanyenye yeambusa: ‘Wibita kwi?’ 6 Pakuva ndivalonje iso inumbula senyu sihuguve. 7 Neke nene nguvalongela ulwa nachene: lunoje nyenye, nene nyege pakuva nene pesinyesili uyo umutanzi siasa kwa nyenye neke nene penyesile ndimuleta kwa nyenye. 8 Nave peasile ayidadisa ing'i ulwa inzanangifu, uwugolofu na uluhigilo. 9 Ulwa inzanangifu, pakuva sivakufuuwa nene; 10 ulwa uwugolofu pakuva nene gwibitilaga kwa Dada na sisamumbona kangi; 11 ulwa ukuhigwa pakuva yula umuvina va mung'i iyi yeahigitwe. 12 “Napendinaso nzolofu isa ukuvalongela, ino ulwalino simuhwaniti mwikangase. 13 Neke umwene peasile uyo Muhe va nachene avalongosa mu wanachene mbewuli, pakuva sisaalonga isakwe hela nda, saalonga mbesili seapulika na isikusa, saavapavila inzeli yakwe. 14 Umwene amela indolo nene pakuva ategula mung'ani sangu nu kuvapavila inzeli. 15 Na mbesili seinaso Dada sangu nene; nambi nige ategula mung'ani sangu na ukuvapavila inzeli. 16 “Lusige lusika ludodo nayinyenye simumbona, kangi lusige lusika ludodo mumbona!” 17 Swe avanyigendo avamwi vilonganzise vitigila, “Lukani luki ulu lweakutulongela: ‘lusige lusika ludodo nayinyenye simumbona, na kangi lusige lusika ludodo nyenye mumbona’ na ngwibitilaga kwa Dada?’ ” 18 Ndawe vatigilige, “Lukani luki ulo lweilonga: ‘Lusige lusika ludodo?’ Situkulukagula lweilonga.” 19 Yesu alukagwe ulwa visaka vamuwuse, swe akuvalongela, “Ngali lulu lwemukwiwusa ulwa nige: ‘Lusige lusika ludodo nayinyenye simumbona; kangi lusige lusika ludodo nyenye mumbona?’ 20 Nachene nguvalongela, nyenye samuvemba nu kuhuguvala neke ing'i sayihekelela, samuhuguvala, neke uwuhuguvafu wenyu sawupituka wuve luhekelelo. 21 Ulusika lwe umung'inetu akwegala ayiva ahuguve pakuva ikivalilo cha ukwivikula chakiva kifikite, neke peyeeje umwana siakwiwuka kangi uwuvafi uwo ukwimila uluhekelelo ukuta umunu yawonike mung'i. 22 Lino nyenye pede mwina wuhuguvafu. Neke nene ndivawona kangi na luhekelelo lwenyu sipwali yeavapoka. 23 Kangi ikimunyi kila sisamumbusa lukani nda, nachene nguvalongela pemumusukite Dada kichekivesaga avapela mwitawa lyangu. 24 Na yilino simulasuka kinu mwitawa lyangu; Musukage nayinyenye mupelwa sambi uluhekelelo lwenyu lukwilanikile. 25 “Iso ndonzile na nyenye kwa nzivililo. Ikivalilo chusa pesisandonga na nyenye kwa nzivililo, neke ulwa Dada ndivalongela wima hela. 26 Na ikimunyi icho samusuka mwitawa lyangu na singuvalongela ulwa nene ndivasukila kwa Dada; 27 pakuva yumwene Dada avenda wimila nyenye ukunzenda nene, na ukufuuwa ulwa nene ndahumite kwa Nguluvi. 28 Ndahumile kwa Dada nane nzusile mung'i kangi nguyileka ing'i na ukubita kwa Dada.” 29 Neke avanyigendo vakwe vatigile, “Lavage! lino wilonga wima hela sipeulonga kwa nzivililo nda. 30 Lino tulukagwe ulwa veve usisele mbesili na kugaya munu yeakuwusa lukani ino twifuuwa ulwa wahumite kwa Nguluvi.” 31 Yesu avapitwe, “Ino mwifuuwa? 32 Mulavage ikivalilo kikusa, na yilino yechusile pesamutagalila munu na pakwe na ukundeka nene ndiyena. Neke ulwene nene sindiyena nda, pakuva Dada alipamwi na nene. 33 Iso ndivalonje sambi muve na uwikalakunoga mugati mwa nene. Mung'i umu muva na lugudo ino mulogopa! Nene ndiyidwesise ing'i!”

17

1 Yesu peyeasinzile iso, alafile kuchanya neke atigile, “Dada ikivalilo yekifikite! Mupele indolo Umwanako, sambi nave akupele indolo. 2 Ndawe lwewamupelye umwana uludali kuvanu mbevali, sambi avanu mbevali vewamupelye apele uwumi wa mbepali. 3 Na uwumi wa mbepali we uwu vakukagule veve Nguluvi ye wiyena na va nachene, na Yesu Kilisito yewamuletite. 4 Nene ngupelye indolo mung'i; ikipigo kila chewamelye yesinzile. 5 Ino Dada mele indolo pa veve, indolo sila sendendinaso pamwi na veve wesiyilava yigawa ing'i.” 6 Ilitawa lyako ndivelelulye avanu vala vewamelye mung'i, nambi vevako, wamelye nene vave vangu na ulukani lwako vinatyee. 7 Ino valukagwe ulwa mbesili sewamelye sihuma kwa veve. 8 Pakuva ing'ani sewamelye ndivapelye avene neke nawo vanukile we vakulukagula ulwa ndahumite kwa veve, nene vafuuvitwe ukutigila veve ye veve yewandetite. 9 “Nene nguvasukila iwo; singuyisukila ing'i nguvasukila iwo vewamelye pakuva iwo vako. 10 Mbevali ava nene vako na ava veve vangu; melitwe indolo mugati mwa avene. 11 Nene sipemba va mung'i kangi, neke avene pevali mung'i. neke nene ngusa kwa veve. Dada ve Mwelu! Muludali lwa litawa lyako lyewamelye, ngukugongola uvalolelage wunofu sambi vave kinu kimwi ndawe hwehwe lwe twikinu kimwi. 12 Pendepamwi nawo, nene ndavakwamilige mu ludali lwa ilitawa lyako lyewamelye, neke ndivagose na sipwali nambi yumwi yeayasile pesi yula hela umwana va uwuyasi sambi uwandike wukwile. 13 Na ino ngusa kwa veve na ing'ani isi ndilonga mung'i sambi vahange uluhekelelo lwangu. 14 Nene ndivapelye ulukani lwako na ava mung'i vavavipye pakuva avene sivamung'i nda, ndawe nene lwesindiva mung'i nda. 15 Nene sindisuka ukuta uvahese mung'i umu nda, ndisaka uvakwamile kulu mutavangu. 16 Avene sivamung'i ndawe nene lwesindiva mung'i. 17 Uveesage mu uwanachene; ulukani lwako ye nachene. 18 Ndawe lweweunumite nene mung'i na yinene ndahihyo nguvatuma nawo mung'i. 19 Na wimila avene ngwiyesa yinene sambi iwo veesiwe mu nachene. 20 “Singuvasukila iva swe nda, pesi nguvasukila na vavala vevafuuwa wimila ulukani lwawo. 21 Nguvasukila mbevali vave vali lumwi. Dada! Ndawe veve Dada uli mugati mwa nene, nane mugati mwa veve. Iwo nawo vave mugati mwa hwehwe sambi avamung'i vafuuwe ulwa veve ye veve yewandetite. 22 Nane uwunyandolo wula wewamelye ndivapelye avene sambi vave vali lumwi ndawe hwehwe we tuli lumwi. 23 Nene mbe mugati mwawo, veve mugati mwa nene; Ndisuka vakwilanikile ukuvavalilumwi, ava mung'i pevalukagula ulwa ye veve yewandetite nave wavendite ndawe lwewanzendite nene. 24 “Dada! Iwo vewamelye ndisaka vave valilumwi na nene kukwembesaga, sambi vilavile uwunyandolo wangu wewamelye, pakuva wanzendite wesilulavikwa ulutu lwa ing'i. 25 Dada ve Mugolofu! Avamung'i sivevakuseli, neke nene ndengusele na iwo valukagwe ulwa ye veve yewandetite. 26 Nane ngavalonje inzeli ya ilitawa lyako kangi ndivapela inzeli ya ulo sambi uwende wula wewanzendite nene wuve mugati mwawo nane mbe mugati umwawo.”

18

1 Ave pealonzile iso, Yesu ahesile pamwi na vanyigendo vakwe. Alowike mu mwambu gwa akakoga ka Keduloni, uko kwekwina ikinyungu swe akwingila umwene na vanyigendo vakwe. 2 Nave Yuda, yeamupitwike alapasele apono pala, Pakuva Yesu abitige kolofu na vanyigendo vakwe. 3 Swe, Yuda peyeanuche ikilugu cha avanyigalu na avakami avahumige ku vavina va avatambisi na Avafalisayo vahele kuko we vakolye ifyenge na amahomelo. 4 Neke Yesu kono weakulukagula isikumusila iyelelwe na ukuvawusa, “Yenani ye mukumusaka?” 5 Neke vamupitule, “Twisaka Yesu Umunasaleti!” Swe Yesu akuvatigila, “Ye nene.” Nave Yuda yeamupitwike eimile pamwi na avatavangu. 6 Ave akuvalongela, “Ye nene.” Vapilwike kimbele mbele swe vigwa pasi. 7 Neke avawuse kangi, “Mwisaka nani?” Neke vatigile, “Yesu Umunasaleti!” 8 Swe akuvapitula, “Nyenye ndivalonje ulwa ye nene. Apo pemwisaka nene, muvaleke tandi iva vibitilage.” ( 9 Alonzile ulu sambi lukwile ulukani lweealonzile, “Vala veweumelye sindamuyasisi nambi yumwi.”) 10 Ino Simoni Petulo, eina limage muhala, swe isonola nu kumuputa ilisigisa lya kundyo lya umukami va umutambisi umuvina. Na umukami yula ilitawa ali ye Maliko. 11 Swe, Yesu akumulongela Petulo, “Pilule ilimage muhala. Ngali ndemwage ukunywela ikinywelo cha uluteseko cheamelye Dada?” 12 Swe ndawe vala avanyigalu, na umuvina vawo, na vala avalolesi va Avayudaya vamwibete Yesu na ukumupinga 13 neke vamusindike tasi kwa Anasi; pakuva e mukwive va Kayafa, yee mutambisi umuvina umwaka ugo. 14 Nave Kayafa uyu ye yula yeali avalonje Avayudaya ulwa lwinogela umunu uyumwi afwe wimila avanu. 15 Simoni Petulo na umunyigendo uyungi vamufwatite Yesu. Na umunyigendo uyo ali akagulanike na Umutambisi Umuvina, swe akwingila pamwi na Yesu mwipala lya Umutambisi Umuvina. 16 Petulo aliimite kwivala, pamulyango. Ndawe yula umunyigendo uyungi yalakagulanike nu Mutambisi Umuvina ahumige na ukumulongela umwanahinza, umulolesi va umulyango swe akumwingisa Petulo mwipala. 17 Swe yula umwanahinza umulolesi va umulyango amuwusise Petulo, “Veve nave si wimunyigendo va umunu uyu?” Nave swe itigila, Si nene nda!” 18 Navala avakami na avanyigalu veve vimite vakosise umoto gwa amakala vakota, pakuva kwekwina nungwi. nave Petulo alipamwi nawo akota. 19 Neke Umutambisi Umuvina amuwusise Yesu ulwa avanyigendo vakwe na ulwa inzigiso sakwe. 20 Yesu amupitwe, “Nene ngalonzile na ing'i wima hela. Mbepali ngigisige mumasinagogi na mu tembeli mwevakong'anige Avayudaya mbevali na sindendilalonga lukani lwa kinyele. 21 Lweki pukumbusa nene? Vawuse vala vevapulike kiki chendavalonje, avene vakukikagula chendavalonje.” 22 Ave ilonga iso umukami uyumwi yeeimile pipi amuvatwe itigila, “Ukumupitula de Umutambisi Umuvina?” 23 Neke Yesu amupitule, “Wone ndonzile fivi, nzolelele uwubi, neke wone ndonzile wunofu, “Umbatulye kiki?” 24 Ndawe Anasi amusindikige, we mupinge, kwa Kayafa Umutambisi Umuvina. 25 Nave Simoni Petulo eimite kuko akota umoto. Swe vakumuwusa vitigila, “Veve nave si wiyumwi va vanyigendo vakwe?” Nave swe ibihila itigila, “Sinene nda!” 26 Umukami uyumwi va Umutambisi Umuvina, umunyalukolo va yula yealaputitwe ilisigisa na Petulo, amuwusise, “Nene singenguweni mu kiwunga pamwi nave?” 27 Swe Petulo ibihila kangi, ndawe lulusika lulo inzogolo yavikige. 28 Ndawe vamusindikige Yesu uluhuma kwa Kayafa, Vakumusindika Kwivaha, ukwitambulwa Pulaitolyo ye pe milawu hilo; nawo sambi valye i Pasaka sivinji valava vahongawinya. 29 Swe Pilato ihuma kwivala neke atigile, “Mwitosa nongwa ng'iki kulumunu uyu?” 30 Ndawe vamupitulige, “Ake uyu simwananga kinu siketumuleta kwa veve.” 31 Neke Pilato avalongele, “Ale apo mukamutegulage, mukamuhige kwa indagilo senyu.” Neke Avayudaya vamutigile, “Hwehwe twivagaya lulagilo lwa ukuwulaga munu.” ( 32 Valonzile ulo sambi lukwile ulukani lwealonzile Yesu ulwa saafwa ifwa iyindawuli?) 33 Ndawe Pilato ingilige kangi mwivaha swe akumukemela Yesu nu kumuwusa, “Ndawuli, veve wi Mutema va Avayudaya?” 34 Yesu amupitwe, “Veve wilonga de yuveve, ngali apangi avanu vangi vakulonje ing'ani sangu?” 35 Pilato amupitwe, “He! Mbi nene ndi Muyudaya? Sivavanu va ukwenyu na Avatambisi Avavina vevakuletite kwa nene. Mbi wananzile kiki?” 36 Yesu amupitwe, “Uwutwa wangu si wa mung'i iyi nda. Wone Uwutwa wangu wuke wuve wa mung'i iyi, avakami vangu vake vananga ndemwe ukutawulwa mumawoko ga Avayudaya. Lino, uwutwa wangu si wa ipa.” 37 Swe Pilato akumuwusa, “Ino veve wi Mutema?” Yesu amupitwe, “Veve ye wilonga ulwa nene ndi Mutwa. Nene ndawonike wimila isi, na wimila isi nene ndasile mung'i ukolelela avanu ulwa nachene. Yeyeavesaga va nachene aipulika iliswi lyangu.” 38 Pilato swe iwusa, “Nachene che kiki?” Nave Pilato ave ilonga ulukani ulo elelwike kangi ku Vayudaya avali kwivala na ukuvalongela, “Nene singuluwona lweananzile. 39 Ino kwa nyenye kwina misimu jenyu ulwa nywanite ukumudindulila umunu yumwi mukimunyi icha Pasaka. Sweno, mwiwenda ndivadindulile Umutwa va Avayudaya?” 40 Swe kangi viyovela ng'ani vitigila, “Si uyu nda! avelage Balaba!” Nave Balaba alimuposi.

19

1 Pepene pe Pilato alaje Yesu vamutegulage, atowe ni ngoda. 2 Nawo Avanyigalu vasaavite ilihalama lya imifwa nu kumufwika ku mutwe neke vamufwike na gumwenda gunya livala ilinyakilesi. 3 Swe vivanga ukumwelanga vitigila, “Kamwene ve Mutema va Avayudaya!” vakumuvatulanga ni fipi. 4 Swe Pilato ihuma kangi kwivala neke avalongele, “Umunu uyu yengumuleta kwa nyenye sambi mulukagule ulwa nene singuluwona lweananzile.” 5 Pepene Yesu peahumite kwivala nave weafwite ilihalama lya imifwa na umwenda gunya livala ilinyakilesi. Neke Pilato peavalongele, “Mulavage! Umunu umwene ye uyu!” 6 Neke vala avavina va avatambisi na avalolesi vawo vave vakumuwona, vayofile vitigila, “Mutumbike! Mutumbike!” Pilato neke avatigile, “Apo mumutegulage yinyenye mukamutumbike, pakuva nene singukiwona ikinu cheananzile.” 7 Avayudaya vapitwe, “Hwehwe twinalo ululagilo, na kwa ululagilo ulo anoje ukufwa pakuva akwivika Mwana va Nguluvi.” 8 Pilato ave ipulika ulukani ulu ogwipe hilo. 9 Swe akwingila kangi mwivaha, ndawe amuwusige Yesu, “Veve wihuma kwi?” Yesu samupitwi kinu. 10 Swe Pilato akumutigila, “Siwilonga kwa nene? Siukulukagula ulwa nene ndina uludali lwa ukukulekesa na uludali lwa ukukutumbika?.” 11 Yesu apitwe, “Veve suke uva na ludali nda kwa nene uke uve sukapelitwi uluhuma kuchanya, ino yeanawe mumawoko gako ina nzanangifu ngomi wuhulo.” 12 Uluhuma baho Pilato asakige ukumudindulila neke Avayudaya vayove vitigila, “Peumudindulye uyu veve siwiva munyawiyendi vakwe Kaisali! Pakuva yeyeakwivika ave Mutwa aiva asutine na Kaisali!” 13 Pilato ave ipulika ing'ani iso, amuhumise Yesu kwivala, swe iteng'emala mukigoda icha ukuhigila apono apitambulwa: “Pa luhiga lwa maganga” (ku Kiebulaniya Gabata.) 14 Na chekivalilo cha mutanda pamunyi ikimunyi cha ukugelanisa i Pasaka neke Pilato avatigile Avayudaya, “Mulavage Umutema venyu!” 15 Swe vala viyova vitigila, “Muhese! Muhese! Mutumbike! Pilato neke avatigile, “Ndawuli ndimutumbike Umutema venyu?” Avavina va Avatambisi vamupitwe, “Hwehwe twivagaya Mutema, pesi yi Kaisali swe!” 16 Pepene Pilato peamutawe Yesu vakamutumbike. Swe vakumutegula Yesu. 17 Ndawe ahumige kono weategwe umusalaba gakwe, mbaka apono apitambulwa, “Pa kibang'a.” (mu Kiebulaniya vitigila Goligota). 18 Swe kuko vakumutumbika pamwi na avangi avavili uyumwi ulubali lwa kundyo na uyungi ulubali lwa kung'igi, nave Yesu pagatinagati. 19 Nave Pilato swe akwandika ikilagilo, nu kuvika pachanya pa musalaba. Nacho chandikwe de: “Yesu Umunasaleti Umutema va Avayudaya.” 20 Ino ikilagilo icho vimbige avanu wolofu mu Uyudaya. Kangi apono pala peeatumbikwe Yesu pepipi na iboma, nacho chechandikwe mu Kiebulaniya, Kilumi na Kigiliki. 21 Sweno, avavina va avatambisi vamulonje Pilato, “Tane ukwandika: ‘Umutema va Avayudaya’ tigile, ‘yula yeakatigilige, nene ndi Mutema va Avayudaya.’ ” 22 Pilato apitwe, “Chenzandike ye nzandike!” 23 Na avanyigalu peyevamutumbike Yesu vategwe imyenda jakwe neke vagavase mufilundo fitayi yeyeavesaga munyigalu ategulige kilundo kimwi na yisopeka yakwe; isopeka iyo yenive mbeyili, ngaya luhono. 24 Ndawe Avanyigalu valonganige ulwa, “Tulademulasa tuyitovele isimbi sambi yive ya nani.” Ulu lwapigike sambi wukwile uwandike Uwelu uwitigila: “Vagavine imyenda jangu, na yisopeka yangu vatovye isimbi.” Na ulu lwelwene lwevapigite avanyigalu. 25 Na pala pipi nu musalaba gwa Yesu vevimile uyuve na umame va uyuve, Maliya umukina Kileopa na Maliya Magadalena. 26 Yesu ave akumuwona uyuve na yula umunyigendo yealamwenda imile pipi, amulonje uyuve, “Yuva, lavage umwana!” 27 Neke peamulongele umunyigendo yula, “Lavage uyuwo.” Na uluhuma ikivalilo kikila umunyigendo yula amutegwe kukaye yakwe. 28 Yesu alukagwe ulwa mbesili yesikwilye; na sambi Uwandike Uwelu wukwilye atige, “Ng'elwike.” 29 Ipo pepina ikinyandilo ichekimemile idifayi inzasamufu. Swe visabika ilidodoki mu difayi inzasamufu nu kupingilisa mu ludete ulwa umubiki gwa hisopo vamupelanise mumulomo gwakwe. 30 Yesu ave akwanukila idifayi inzasamufu yila atige, “Lusisile!” Swe igondamya umutwe na umutima gwidumuka. 31 Umusika gugo peafwilye che kimunyi cha ukugelanisa isabato, sweno, sambi imifimba gilemwe ukwikala mu misalaba pa kimunyi cha isabato, “Na isabato iyo che kimunyi ikikomi.” Avayudaya vamusukite Pilato iwo avali vatumbikwe vadenywe amagulu na imifimba jawo gihesewe. 32 Swe avanyigalu vibita nu kudenya amagulu ga umunyakutala, na uyungi yealatumbikwe pipi na Yesu. 33 Vave vakusa kwa Yesu swe vifika yeafwe neke valemwe ukumudenya amagulu. 34 Neke uyumwi va avanyigalu amuhomite nu mugoha mulubafu, swe yihuma idanda nu lulenga. ( 35 Nave yeilavye yeolelye, na uwolelesi wakwe wa nachene, nave akulukagula ulwa ilongela mumwene, sambi nyenye nanye mufuuwe.) 36 Pakuva iso save ndahihyo sambi Uwandike wukwile “Sipokili ikisege chakwe chesakidenywa.” 37 Kangi Uwandike uwungi witigila, “Savamulava umwene yevamutumbwe.” 38 Pesilutye iso, Yosefu uva ku Alimataya, amusukite Pilato sambi akagutegule umufimba gwa Yesu. ( Yosefu ali munyigendo va Yesu, ulwene lwe lwa kinyele, pakuva awogopige avavina va Avayudaya). Pilato ndawe amutawulilige umufimba, swe Yosefu ndawe abitige ukuguhesa. 39 Nave Nikodemu yula pakutala yealamubitye Yesu pakilo, ahele akaleta ifihanzwa fya amafuta na migoda fikwenda fikwile kilo machumi gadatu. 40 Ndawe vategulige umufimba gwa Yesu vagufwike isanda inofu pamwi na ifya ukunung'ilila fila, ndawe wegiwali imigendele ja Avayudaya mu kutaga. 41 Na pala peemutumbike pepina kinyungu na mukinyungu mwemuna wuvi wesiwewulatagwa munu. 42 Pakuva che kimunyi cha ukwigelanisa Avayudaya ikimunyi ikilekela i sabato na ulwa uwuvi uwo we pipi na baho, swe ndawe vagutagige umufimba gwa Yesu mumo.

20

1 Pamilawu peyekwindaluka pa Jumapili, Maliya Magadalena ahele kuchanga swe ifika iliganga lyevevadinye uwuvi lihesiswe. 2 Ndawe abitige luvilo ifika kwa Simoni Petulo na kwa umunyigendo uyungi yealimwende va Yesu akuvalongela ukuta, “Vamuhesise Umutwa muchanga, na situkukukagula kwe vamuvikite.” 3 Swe Petulo ihuma na yula umunyigendo uyungi vibita kuchanga. 4 Ndawe vabitige luvilo we vavili, na umunyigendo uyungi amulutye akumutalila Petulo ukufika kuchanga. 5 Ndawe agondamige na ukuhungilila swe akuyiwona isanda, neke umwene siinji. 6 Swe ndawe Simoni Petulo, nave afikige na ukwingila muwuvi ilava isanda. 7 Na kikitema ichekipilingise Mumutwe gwa Yesu, sichekilipamwi na iyo isanda, chepalubali kipilingise kiyena. 8 Neke peingile, na yula umunyigendo uyungi yealatasile ukufika kuchanga swe ilava, na ukufuuwa. ( 9 Sivevalawukagula Uwandike uwewulonzile ukutigila, lumuvaje ukusilibuka.) 10 Ndawe avanyigendo vala vapilukige ukwawo. 11 Maliya eimite pivala pipi na uwuvi ivemba. Wepeavemba agondime ilava muwuvi, 12 swe akuvawona Vanyivaha va Nguluvi vavili vafwite imyenda imyelu vateng'ime pegwepogoli umufimba gwa Yesu uyumwi kumutwe uyungi kumagulu. 13 Swe vakumuwusa, “Yuva, mbi wivembela kiki?” Neke apitule, “Vamuhesise Umutwa vangu na singukukagula kwe vamuvisile!” 14 Nave ave ilonga iso apitwike swe akumuwona Yesu imile neke alemwe ukumukagula ulwa ye Yesu. 15 Yesu amuwusise, “Yuva, mbi wivembela kiki? wisaka nani?” Maliya atigilige wanda ye mulolesi va ikinyungu, swe akumutigila, “Mulugu wone umuhesise veve ndagile pumuvikite, nane ndimutegula.” 16 Swe Yesu akumukemela, “Maliya!” nave Maliya apitwike, swe akumulongela kwa Kiebulaniya, “Laboni.” Kwekutigila, “Mwigisi.” 17 Yesu amulonje, “Ulandibata, pakuva sindilapiluka kwa Dada. Ino bitage ku vanyalukolo vangu ukavalongele ulwa ndipiluka kwa Dada vangu nave Dadenyu kwa Nguluvi vangu nave Nguluvi venyu.” 18 Maliya Magadalena swe ibita kukuvalongela avanyigendo ulwa ndimuwene Umutwa na ulwa amulonje iso. 19 Pamihye kikimunyi kicho pa Jumapili avanyigendo vevakong'ine pamwi kono imilyango we midinde, pakuva wogopige avavina va Avayudaya. Ndawe Yesu aasige na ukwima pagati apawo neke avatigile, “Uwikalakunoga wuvelage na nyenye!” 20 Na peyealonzile ulu swe akuvalagila amawoko gakwe na palubafu lwakwe. Ndawe avanyigendo vahekelelige pevamuwene. 21 Swe Yesu avalongele kangi, “Uwikalakunoga wuvelage na nyenye! Ndawe Dada lweanumite nane nguvatuma nyenye.” 22 Neke avaputile itigila, “Mwanukile Umuhe Umwelu. 23 Wone muvadegepele avanu inzanangifu, vava vadegepilwe, wone mutane ukuvadegepela, vava sivadegepelwi.” 24 Ino Tomasi umunyigendo uyumwi va avanyichumi na vavili yeitambulwa munyawendani alasupali, Yesu peakuvelelukila. 25 Swe avanyigendo vayagwe vakumulongela, “Tumuwene Umutwa.” Ndawe Tomasi avatigilige, “Nene pesindigaweni amavamba ga imisumali mumawoko gakwe na ukwambala ni chala changu mumavamba, na liwoko lyangu palubafu lwakwe nene sisafuuwa.” 26 Peyefilutye ifilo fimunana avanyigendo vakwe vevali mukaye na Tomasi epamwinga nawo. Swe Yesu akusa imilyango we midinde akwima pagati nagati akuvatigila, “Uwikalakunoga wuvelage na nyenye!” 27 Neke peamutigile Tomasi, “Aliogo kaletage ipa ichala chako ulave, lete iliwoko lyako wambale palubafu lwangu. Ulava ndawe yesiifuuwa, velage ndawe yeifuuwa!” 28 Neke Tomasi pamupitule na ukutigila, “Mutwa vangu na Nguluvi vangu!” 29 Yesu amutige, “Veve ufuuvitwe pakuva umbwene, vafunyilile avifuuwa wesivalawona!” 30 Ino kwekwina ifilagilo fyolofu fyapigite Yesu pa avanyigendo vakwe fyesifyandikwi mukitabu iki. 31 Neke ifi fyandikwe sambi mufuuwe ulwa Yesu ye Kilisito Umwana va Nguluvi na kwa ukumufuuwa muve na wumi mwitawa lyakwe.

21

1 Peyelulutye ulu, Yesu iyelelwe kangi kwa avanyigendo vakwe pa nyanza ya ku Tibeliya. Nave iyelelwe de: 2 Simoni Petulo na Tomasi (yatambuligwe munyawendani), na Nataneli (yula umunya ku Kana iya ku Galilaya) na avana va Sebedayo na avavili va avanyigendo vakwe vepamwi. 3 Simoni Petulo neke avalongele itigila, “Ndibita kukulova isomba.” Neke vamutigile, “Tubitasa.” Swe vihega vihova ikipugu neke ikilo mbekili sivambulii kinu. 4 Na pesambi kwidandaluka, Yesu imite pamugekela gwa inyanza, neke avanyigendo sivamukaguligi ulwa ye Yesu. 5 Swe Yesu akuvawusa, “Vanangu mwina mboga?” Swe vitigila, “Twihela.” 6 Ndawe avalongelige, “Mutoose ikilovelo ulubali lwa kundyo, lwa ikipugu, nanye mulova.” Vave vitoosa ikilovelo neke pe valemwe ukukwega, pakuva chekimemite. 7 Umunyigendo yealimwende va Yesu amulonje Petulo ukuta, “Ye Mutwa.” Simoni Petulo peapulike ukuta ye Mutwa ipinyite ikitema (pakuva ewufuula) swe akwitoosa munyanza. 8 Avanyigendo avangi vaasile kumwani mukipugu kono wevikuluna ikilovelo ikimemile isomba; pakuva sivevali pataali na imwani se nda nzwambo ligana de. 9 Vave vifika pa mwani vaguwene umoto gwa makala na pachanya pepina somba na umukate. 10 Yesu avatige, “Mulete ipa isomba isimwi se mulofile.” 11 Neke Simoni Petulo ingile mukipugu na ukukwegela ikilovelo pamwani kimemite isomba ingomi ligana na machumi gahanu na sidatu; nambi we nzolofu ndahihyo ikilovelo sichademwiki. 12 Neke Yesu avalongele, “Muse twiswawule.” Asukuli yeigelye ukumuwusa ulwa: “Winani veve?” Pakuva valukagulige ukuta ye Mutwa. 13 Yesu swe ibita akwegula umukate na ukuvapela na sisomba ndahihyo. 14 Ulu lwa kadatu Yesu ukwiyelelula ku vanyigendo vakwe peyeasilibwike uluhuma kuvafwe. 15 Peyevalye, Yesu atige kwa Simoni Petulo, “Simoni ve mwana va Yohane! Veve unzenda ukulutila iva?” Neke amutigile, “Ena, Mutwa; ukulukagula veve. Ulwa ngwenda” Yesu amulongele, “Pelelelage ifyana fya ing'olo sangu.” 16 Yesu amuwuse kangi ulwa kavili, “Simoni va Yohane! Unzenda?” Petulo amupitule, “Ena, Mutwa veve ukulukagula ulwa nene ngwenda veve.” Sweakumupitula, “Kwamilage Ing'olo sangu.” 17 Yesu kangi amuwuse ulwa wudatu, “Simoni va Yohane! unzenda?” Petulo ahuguve pakuva amuwusise ulwa wudatu, “Unzenda?” Petulo akumupitula itigila, “Mutwa veve usisele mbesili, ino veve ulukagwe ulwa ngwenda.” Yesu amutigile, “Pelelelage ing'olo sangu! 18 Nachene ngukulongela, pewe wimunyakilambo weusovye ukwipinya, nu kubita kukwekuvesaga kwewiwenda. Neke pewiva ugogwe, ugolola amawoko gako na umunu uyungi akupinga na ukukusogosa kwe siwiwenda.” ( 19 Pakulonga isi Yesu alagilige ifwa iyindawuli yesafwila Petulo na ukumupela indolo Nguluvi.) Neke Yesu amutigile, “Ninile!” 20 Baho Petulo apitwike, ndawe amuwonige yula umunyigendo yeemwende va Yesu, akuvaninila. Umunyigendo uyu, ye yuyula yeali ikalite pipi na Yesu pa ikilyo cha pamihye, yeamuwusise Yesu itigila, “Mutwa ngali ye nani yeakupituka.” 21 Neke Petulo peamuwene uyo swe akumulongela Yesu, “Mutwa na uyu nave ndawuli?” 22 Yesu amupitwe, “Wone ndiwenda uyu ikale mbaka pendipiluka kikuvava kiki veve? Veve ninile nene.” 23 Swe ulukani ulo lwipulisa na kwa vanyalukolo ukuta umunyigendo yula sisaafwa. Neke ulwene Yesu salongigi ulwa munyigendo yula ukuta sisaafwa, alongige ulwa, “Wone ndiwenda ikale mbaka pendipiluka kikuvava kiki veve.” 24 Uyu ye yula umunyigendo yeakolelela ing'ani isi, na ye andike. Nahwe tukulukagula ukuta uwolelesi wakwe wa nachene. 25 Ino, kosili na isingi nzolofu seapigite Yesu wone sikesandikwe lumwi, lumwi, nditigila ing'i mbeyili siyike yikwila ifitabu fyefike fyandikwa.