JOHN

1

1 Ha mwamulizo i yinze lono yali yikali nawumbwa, I Nghani yali yali baho. Nayo I Nghani yali yali hamonga no Mulungu, i Nghani nayo yali Mulungu. 2 Yuyo yali yali hamonga no Mulungu ku wulawa mwamulizo. 3 Ivinhu vyose vyawumbilwa muli mwene, na hasina ciwumbwa cinji co cose cono cawumbwa, hono hasina mwene. 4 U Mwene yali yo mwamulizo wo wumi; no wumi wuwo wali wuzelu we wanhu wose. 5 No wuzelu wuwo wumulikaga mu wutitu, hamba wutitu si wuwusumaga yaye. 6 U Mulungu yakamutuma munhu litagwa lyakwe Yohana. 7 Yuyo yaza kuwalonjela wanhu zo wuzelu wuwo. Na so wuhomelezi wakwe, iwanhu wose ho wehuwile. 8 U mwene Yohana, yo si yali wuwo wuzelu weneco, langa yaza du, ho yawalonjele wanhu zo wuzelu wuwo. 9 Awu wo wuzelu we mbeka, u wuzelu wono wukuza mono yinze, no kuwamulicila wanhu wose. 10 Ale, i Nghani yali mono yinze, ne yinze yawumbilwa muli mwene, ninga i yinze si yamutanga yaye. 11 Yakaza mu yisi yakwe mweneco, ninga i wanhu wakwe si wamubocela yaye. 12 Ninga wose wono wamubocela no kumwihuwila, yawapela i vilungo vyo kunozwa kuwa wana wo Mulungu. 13 Wono si waleleywe mu vilungo vye cimunhu munhu, hamba mu vilungo vyo munhu, hamba mu wuhile wo munhu, langa u Mulungu mweneco yo Sogo yawo. 14 I Nghani nayo yakawa munhu, yakekala mwetu. Nase cikayiwona i nhojo yakwe, i nhojo yakwe mwene mono mwana we ciwene wa Baba; yamemile lihewa ne mbeka. 15 Yohana yakawalonjela wanhu zinghani zakwe, yakawalonjela kwe 'zi yiwaha yakutya, “Ayu yo mwene mono namulonga, lono natya, Yakuza munhu munyuma yangu, mono yo muwaha yanyhizize nene, ku soko mwene yali yali baho na lono ane nali nghali nalelwa.” 16 Hambi mu wukwilanicile wakwe, nase mo cikubocelela lihewa lyakwe cibitilila. 17 Hambi u Mulungu, nha yawulavya Wulajilize mu nzila ya Musa, ninga i lihewa ne mbeka, vyaziza mu nzila ya Yesu Kilisito. 18 Hasina munhu mono yamuwona Mulungu hanji ho hose, u Mwana we ciwene mono wali sawa no Mulungu, mono vilunzize no Sogwe, yuyu yo yacimanyiza zo Mulungu. 19 Awu wo wuhomelezi wa Yohana wono yawulonga, lono wawaha we Wayahudi wa ku Yelusalemi, wamutumila wakohani ne Walawi wamuwuze vyono mwene yo nani. 20 Nayo Yohana si yalema kupitula i liwuzo lilyo, ninga yakalonga calinze, yakatya, “Ane yo si nene Kilisito.” 21 Nawo wakamuwuza wakatya, “Alu gwegwe nani? Yo gwegwe Eliya lo?” Yohana yakatya, “Ng'o yo si nene.” Wakamuwuza, “Yo gwegwe muwizi yulya?” Yohana yakawapitula yakatya, “Ng'o yo si nene.” 22 Nawo wakamuwuza “Alu gwegwe nani? Ukiyitya gwegwe nani? Ucilonjele ho ciwategulile lipitulo wono wacitumile.” 23 Yohana yakatya, “Ane yo nene, mono muwizi Isaya yalonga. ‘Ane nili yizi lyono likuhulikwa ku nyika, Gololenyi nzila yo Muwaha.'" 24 Ne wanhu wawo wali watumigwe ne Wafalisayo. 25 Nawo wakamuwuza Yohana wakamutya, “Alu agwe hono si wuli Kilisito, hamba Eliya, hamba muwizi yulya, nhawule wukubaputiza?” 26 Yohana yakawapitula yakawatya, “Ane nghubaputiza kwe malenga, ninga ho yuli yunji yemile muli nyenye mono mukali namumanya. 27 Yo yuyo mono yakuza munyuma yangu, mono ane sinojeye hamba kuyiwopola imikowa ye malatu gakwe.” 28 Zizi zetumwa kuko ku Betaniya, ku nhumbi nzagwe ye likolongo lya Yoludani, kono Yohana yabaputizaga. 29 I mitondo yaco, Yohana yakamuwona Yesu yakumuziza, yakatya, “Mulanje, ayu Mwana Ngholo wo Mulungu, mono yakuwusa, wubi we yinze! 30 Yo mwene mono namulonga, mono natya, ‘Munyuma yangu yakuza munhu yunji muwaha mono yanyhizize nene, hambi nha yali yali baho lono na ane nali nghali nalelwa!’ 31 Na nene si namumanya, ninga niza mbaputize kwe malenga, wanhu wa Isilayeli ho wasume kumumanya.” 32 Awu wo wuhomelezi wono Yohana yawulavya, “Nawona Muhe yakutima nha nziwa, yakulawa ku wulanga, yakamwikalila mwene. 33 Nane sinamumanya: langa u Mulungu mono yanhuma nghawabaputize wanhu kwe malenga, yali yanonjela yakutya, ‘U munhu yuyo mono komuwona u Muhe yakumutimila, yakumwikalila, yuyo yo yakubaputiza mu Muhe Mono Yelile.’ 34 Nane nghondya kuwona, nane nghumulonjelenyi vyono yuyu yo Mwana wo Mulungu.” 35 I mitondo yaco kanyhi, Yohana yali yemile baho, hamonga na wejete wayagwe ne wejizwa wakwe. 36 Yaza kumuwona Yesu yakukola, yakatya, “Mulanje ayu Mwana Ngholo wo Mulungu!” 37 I wejizwa walya vyono wejete, wakamuhulika Yohana yakulonga zizo, wakamutyatya Yesu. 38 Yesu yakapituka, yakawawona wawo wejizwa wakumutyatya, yakawatya, “Alo mukulondola cici?” Nawo wakamutya, “Labi (nhunizo yayo Mwijizi) kwikalaga hayi?” 39 Yesu yakawatya, “Muze nanye mowona.” Iwejizwa wawo wakamutyatya, wakahawona i hanhu hono yekalaga. Wakaswezana nayo lizuwa lilyo, nayo yali nha saa kumi cinyamihe. 40 Andeleya, u mwanakwawe wa Simoni Petelo, yo yali muyagwe na wawalya iwejizwa wejete, wono wamuhulika Yohana vyono yakulonga, wakamutyatya Yesu. 41 Andeleya yakamula kumulondola u muwahawe Simoni, yakamutya, “Cimuwona Mesiya” (nhunizo yayo Kilisito.) 42 Hanyuma yakamutegula Simoni kuli Yesu. Nayo Yesu yakamulanga Simoni, yakatya, “Yo gwegwe Simoni u mwana wa Yona, alu kocemwa Kefa.” (Cigiliki wo wutya Petelo, hamba, “Yibwe”.) 43 I mitondo yaco, Yesu yakasaka kubita ku Galilaya, na kuko yakamwagana Filipo, Yesu yakamutya, “Wunhyatye.” 44 Nayo Filipo yali munya Betesayida ku kaya ya wa Andeleya na Petelo. 45 Nayo Filipo yakamwagana Nataneli, yakamutya, “Cimuwona ayulya mono Musa yandika i zakwe, mu citabu co Wulajilize, na kanyhi mono wawizi nawo wandika i zakwe, Yesu u mwana wa Yusufu, mulawa ku Nazaleti.” 46 Nataneli yakamutya Filipo, “Hambi ku Nazaleti nako kosuma kulawa cinhu ciswanu?” Filipo yakamutya, “Wuze wulanje.” 47 Yesu yakamuwona Nataneli yakuza kuli mwene, yakalonga zo mwene, “Mulanje! Ayo yo Mwiisilayeli we mbeka, mono yawusina wukonji wo wose muli mwene.” 48 Nayo Nataneli yakamuwuza, yakatya, “Alo kumanya wule?” Yesu yakapitula yakamutya, “Lono wali wikaye he 'sina lyo mukuyu, na lono wali wukali nacemwa na Filipo, ane nali nakondya kukuwona.” 49 Hobaho Nataneli yakamutya, “Mwijizi, yo gwegwe Mwana wo Mulungu, yo gwegwe Mutemi wa Isilayeli.” 50 Yesu yapitula yakamutya, “Alo wukwihuwila vyono nghulonjeye, nakuwona he 'sina lyo mukuyu? Kowona mawaha gono gacizize gaga.” 51 Yesu yakajendelela kulonga, “Mbeka nghumulonjelenyi, molowona u wulanga wukudiguka, ne wamalayika wo Mulungu wakubita kucanyha no kutima, muli Mwana wo Munhu.”

2

1 Lizuwa lye kadatu, kwali na wutozi ku Kana ya ku Galilaya; u nyina wa Yesu nayo yali yali kuko, 2 nayo Yesu ne wejizwa wakwe wakalalikwa ku halusi. 3 Ne divayi yaza malika, u nyina yakamutya Yesu, “Wasina divayi.” 4 Nayo Yesu yakamupitula nyina yakamutya, “Yaya wulece kunonjeleza cono nitume. Cipango cangu cikali nafika.” 5 Hobaho u nyina, yakawalonjela wetumami yakawatya, “Vyono komulonjelenyi, vyo mutende.” 6 Ale, baho hali na manyungu mutandatu ga mabwe, gono gali gakwiliye kwinjila madebe mejete, hamba madatu mwi'nyungu limonga. Gali gawicigwe baho, so wityatye we myoto ye Wayahudi yo kwizuguza. 7 Yesu yakawatya wetumami, “Mugamemyaje malenga manyungu gago.” Nawo wakagamemya twaa. 8 Hanyuma Yesu yakawatya, “Alu muneje mumo mumutegulile u muwaha wa ha wulilo.” 9 Nayo u muwaha wa ha wulilo, yaza kugajeza i malenga gago, kumbe gali gagaluka kuwa divayi. Nayo hamba si yamanya kono yilawile, langa wetumami wono wanega malenga, wo wali wamanyile. Holeka u muwaha wa ha wulilo, yakamucema munya Halusi, 10 yakamutya, “Munhu wo wose kamulaga kulavya divayi swanu, hanyuma hono wanhu weguta, ho yakulavya yono si swanu. Ninga agwe kuyiwika i swanu sunga alu.” 11 Aci co citanjilo cilongozi, Yesu yacinozeza ku Kana ya ku Galilaya, yakalulajila u lukumyo lwakwe, nawo wejizwa wakwe wakamwihuwila. 12 Hanyuma ya zizi, Yesu hamonga no nyina, ne wanduguze, ne wejizwa wakwe, wakabita ku Kapelanawumi, wakekala kuko vilo vicefu. 13 Sikukuu ye Wayahudi yono yicemwaga Pasaka, yikawa yasejelela, holeka Yesu yakabita ku Yelusalemi. 14 Yakawagana mu Nyumba yo Mulungu, iwanhu wono waguzaga zi ng'ombe, ne zingholo, ne zi nziwa, hamonga na wono wakawaga zipesa, wekaye ha zimeza zawo. 15 Yakanoza mukotya wa mulejehe, yakawawinga wose mu Nyumba yo Mulungu, hamonga ne zingholo, ne zing'ombe zawo, yakazimwaga hasi zipesa ze wakawa zipesa, yakazibidusa zimeza zawo. 16 Yakawalonjela wono wagulaga zinziwa, “Viwusenyi vinhu avi bahano, mulece kuyinoza Nyumba ya Baba kuwa nha sokoni.” 17 Iwejizwa wakwe wakakumbucila vyono yandikwa, “Uwendo wangu so Nyumba yako, wukumbulaga.” 18 Baho iwawaha we Wayahudi wakamuwuza Yesu wakutya, “Alo konoza citanjiloci, cono colajila vyono agwe wina ling'ani yo kunoza zizi?” 19 Yesu yakawapitula yakatya, “Muyimwagulaje Nyumba yiyi yo Mulungu, nane noyizenga mu vilo vidatu.” 20 Nawo Wayahudi wakamutya, “Nyumba yiyi yazengwa mu myaka makumi mane na mutandatu, nagwe ho wuyizenje mu vilo vidatu?” 21 Ninga Yesu yalongaga ze Nyumba yo Mulungu u muwili wakwe mweneco. 22 Nayo Yesu yaza kuzuka muli wafu, ho wejizwa wakwe wakakumbucila vyono yalonga zizi, wakagehuwila Mandiko Gono Gelile, ne nghani yono Yesu yali yayilonga. 23 Nayo Yesu, lono yali ku Yelusalemi ku sikukuu ya Pasaka, wanhu wenji wamwihuwila, waza kuviwona ivitanjilo vyono yavinoza kuko. 24 Ninga Yesu si yawehuwila, hambi nha yali yawamanyile wose. 25 Holeka kwali kusina soko ya yunji yamulonjele zono zili muli wene, hambi nha yali yazimanyile mweneco zose zono zili mu zinhumbula zawo.

3

1 Kwali na munhu monga Muyahudi, mulongola we cipuga ce Wafalisayo, litagwa lyakwe Nikodemo. 2 Yuyo yamubitila Yesu mwizuwa linji ne cilo, yakamutya, “Labi, cimanyile vyono wuli mwijizi mono watumwa no Mulungu. Hambi nha hasina munhu, mono kosuma kunoza vitanjilo vinha vivi vyono wukunoza agwe, hono Mulungu yalece kuwa hamonga nayo.” 3 Yesu yapitula yakamutya, “Ane nghukulonjela mbeka, vyono hono munhu yalece kulelwa wupya, si kosuma kuwuwona wutemi wo Mulungu.” 4 Nikodemo yakamuwuza yakatya, “Alu munhu hono yaza munhu mututu, kosuma kulelwa kanyhi? Si kosuma kwinjila mu'nda yo nyina ho yalelwe lwe kejete kanyhi.” 5 Yesu yakamutya, “Mbeka nghukulonjela, munhu hono yalece kulelwa kwe malenga no Muhe, sikokwinjilila lukulu mu wutemi wo Mulungu. 6 U munhu mu muwili, kalelwaga no sogwe no nyina, ninga mu cimuhe kalelwaga no muhe. 7 Wulece kwizina, vyono nghulonjeye, yinojeye kulelwa wupya. 8 I mbeho yiputilaga no kubita kono yendile, ne lizi lyayo wukulihulika, ninga si wumanyile kwihi kono yikulawa, hamba kwihi kono yikubita. Ale, nhavivyo vyo yenha munhu mono yaleligwe ko Muhe.” 9 Nikodemo yakamuwuza, yakatya, “Alu zosuma kuwa wule zizo?” 10 Nayo Yesu yamupitula yakamutya, “Alu, nha yo gwegwe mwijizi wa Isilayeli, hamba si wuzimanyile zizo?” 11 Mbeka nghukulonjela, ase cilongaga zono cizimanyile, no kuhomelela zono caziwona, nanye si mukuwuvumila u wuhomelezi wetu. 12 Ane nimulonjelenyi za kononze, nanye si munyihuwiye, alu ho mokwihuwila nhawule, hono nimulonjelenyi za ku wulanga? 13 “Hasina munhu mono yabita ku wulanga, langa hono si u Mwana wo Munhu, yo yatima kulawa ku wulanga.” 14 “Nha vyono Musa yatumbika lizoka lye shaba ku nyika, ale nhavivyo no Mwana wo Munhu, si koleka kutumbikwa, 15 muli wose mono yakumwihuwila, ho yawe no wumi we cibitilila. 16 Ku soko u Mulungu yayenda yinze nha vivi, sunga yakamulavya Mwanagwe we ciwene, na muli wose mono yakumwihuwila, yalece kwajilila, langa yawe no wumi we cibitilila. 17 Hambi u Mulungu, nha si yamutuma Mwanagwe kononze, ho yayiling'anize iyinze, langa ho yayikomboze. 18 “Mono yamwihuwiye mwana si yakuling'anizwa, mono si yamwihuwiye, yakondya kuling'anizwa, vyono si yamwihuwiye u Mwana we ciwene wo Mulungu. 19 Ne ning'aniza yeneco nha yoyi, uwuzelu waza kononze, ninga wanhu wakenda wutitu si nho wuzelu, vyono metumo gawo mabi. 20 U munhu wo wose mono ketumaga i metumo mabi, yuyo kawusulaga wuzelu, hamba si kazaga kono wuzelu, hambi nha si yendile i metumo gakwe mabi gamanyice. 21 Ninga mono ketumaga ze mbeka, yo kazaga kono wuzelu, ho metumo gakwe gejele vyono getumilwa mu cihuliko co kumuhulika u Mulungu.” 22 Hanyuma ya zizi, Yesu hamonga ne wejizwa wakwe, wakabita ku yisi ya Yudiya, yakekala nawo kuko, yakawa kubaputiza i wanhu. 23 Yohana nayo yabaputizaga mu Ayinoni behi na Salimu, vyono kwali na malenga menji kuko, wanhu wakamubitila, nayo yakawabaputiza. ( 24 Hambi Yohana nha yali yakali si natajilwa mu jela.) 25 Wukejela wiwanganile hagati ya wejizwa wanji wa Yohana, no Muyahudi yunji, kuli ze myoto yo kwizuguza. 26 I wejizwa wawo wakamubitila Yohana, wakamutya, “Mwijizi, yuyulya mono mwali nayo ku nhumbi nzagwe ya Yoludani, mono wamuhomelela zakwe, alu mwene nayo yakubaputiza, ne wanhu wose wakumuziza.” 27 Yohana yakapitula yakatya, “Munhu si kosuma kuwa na cinji, hono yalece kupegwa no Mulungu. 28 Nyenye nyo weneco muli wahomelezi wa vyono nalonga, ‘Ane yo si nene Kilisito, langa natumwa ho nimulongolele u mwene.’ 29 Bibi halusi yo wa bwana halusi, ninga mwendece wa bwana halusi, mono yemile yakuhuliciza, yakuwa na nyemo mbaha muno muno, lono yakumuhulika bwana halusi yakulonga. Ne nyemo yangu vyo yifisilizwe. 30 Yinojeye Mwene yalawilicile, nane ndodomhe.” 31 Mono yakulawa ku wulanga, yalawiliciye muli wose, nayo mono yakulawa mono'nze, yo we yinze, nayo kalongaga zinghani ze ciyinze-yinze. Ninga mono yakuza kulawa ku wulanga, yo yalawiliciye muli wose. 32 Zono yaziwona na zono yazihulika zo yakuzihomelela, ninga hasina mono yakuwubocela wuhomelezi wakwe. 33 Ninga munhu wo wose mono yakuwubocela wuhomelezi wakwe, yakukangaza vyono, Mulungu yo we mbeka. 34 Hambi mono yatumwa no Mulungu, nha yo kalongaga zinghani zo Mulungu, hambi u Mulungu nha yakumupela munhu yuyo Muhe wakwe wusina cipimo. 35 U Sogo yo munhu yamwendile Mwana, Nayo yamupelile vinhu vyose. 36 Mono yamwihuwiye u Mwana wo Mulungu, yena wumi we cibitilila; ninga mono si yakumuhulika u Mwana wo Mulungu, si kowa no wumi, langa wulipicizwe wo Mulungu wo kwikala muli mwene.

4

1 Wafalisayo wahulika vyono Yesu yabaputizaga no kuwatuga wejizwa wenji si nha Yohana. ( 2 Ninga i mbeka, Yesu mweneco si yabaputizaga, langa wejizwa wakwe wo wabaputizaga du.) 3 Hobaho Yesu yaza kuhulika zizi, yakawuka ku Yudiya, yakawuya ku Galilaya. 4 Na mu wuwuye wakwe, yakakolela mu Samaliya. 5 Yakafika mwitumbi linji lya Samaliya lyono litezagwa Sukali, behi no mugunda wono Yakobo yali yamupela mwanagwe Yusufu. 6 Hanhu baho, hali ne lisima lya Yakobo. Nayo Yesu vyono yali yakataye muno so muhinzo, yakekala he 'sima. Nayo yali saa sita ne misi. 7 Yakaza mucekulu Musamaliya kunega malenga, Yesu yakamutya, “Wumhele ta malenga ning'we.” 8 (Na mwipango lilyo i wejizwa wakwe wali wabita ku mujini kugula ndigwa.) 9 Ninga u mucekulu yuyo Musamaliya, yakamutya, “Alu kosuma nhawule kunomba malenga, nane nili Musamaliya, nagwe wuli Muyahudi?” (Ku soko Wayahudi wali wasina wumonga ne Wasamaliya, mu vitumamilwa.) 10 Yesu yakamupitula yakamutya, “Mhali wuwe wumanyile i cipegwa ca kuli Mulungu, nayo yo nani mono yakukutya, wumhele malenga ning'we, nagwe wali wumulombe, nayo yali yakupele malenga go wumi.” 11 U mucekulu yuyo, yakamutya, “Muwaha, agwe wusina ciya co kunejela, ne lisima nalyo yitali, alu kogasola hayi gago malenga go wumi? 12 Hamba alu agwe, wukwinoza wuli muwaha si nho Sogo yetu Yakobo? Mwene Yakobo yacipela ase lisima lili, nayo yakang'wa mweneco i malenga ge lisima lili, ne wanagwe, sunga ne zimitugo zakwe?” 13 Yesu yapitula yakamutya, “Muli wose mono yakung'wa malenga gaga, kokaluka kanyhi. 14 Ninga muli wose mono kong'wa malenga gono nomupela, si kokalucila lukulu. Malenga gono nomupela gowa muli mwene nha muvwilo wa malenga, gakuvwila sunga ku wumi we cibitilila.” 15 U mucekulu yuyo yakamutya, “Muwaha, ale wumhele malenga gago ho ndece kukaluka kanyhi, ho ndece kuza baha kanyhi kunega malenga.” 16 Yesu yakamutya, “Wubite wukamuceme u mulume wako wuze nayo bahano.” 17 U mucekulu yapitula yakamutya, “Ane sina mulume.” Nayo Yesu yakamutya, “Kulonga mbeka, vyono wuteye sina mulume. 18 Hambi nha wali na walume wahano, sunga na mono wikaye nayo lulu, si mulume wako, baho langa kulonga mbeka.” 19 Nayo mucekulu yakamutya, “Muwaha, nghuwona vyono agwe wuli muwizi. 20 I wasetu wahembelaga mwitunda lili, ninga anye mutezaga, ku Yelusalemi ho hanojeye kumuhembela Mulungu.” 21 Yesu yakamutya, “Gwe yaya wunyihuwile, icipango cikuza, cono si molomuhemba u Sogo yo munhu, hamba mwi'tunda lili, kuko ku Yelusalemi. 22 Anye Wasamaliya, mumuhembaga ayulya mono imbeka, si mumumanyile yaye. Ninga ase langa co Wayahudi, cimumanyile yuyo mono cimuhembaga. Hambi i mhonelo nha yikulawa kuli Wayahudi. 23 Ninga i cipango cikuza, na lulu caza, lono wahembi we mbeka, womuhemba u Sogo yo munhu mu mbeka, mu vilungo vyo Muhe wo Mulungu. Hambi Sogo yo Munhu nha wo kasakaga i wanhu wono wakumuhemba mu nzila yiyo. 24 U Mulungu wo Muhe, ne wanhu wosuma kumuhemba mu mbeka, kwe vilungo vyo Muhe wakwe.” 25 Nayo u mucekulu yakamutya, “Manyile vyono Kilisito yakuza, na kolo yakuza mwene, kocilonjela zose.” 26 Yesu yakamutya, “Ane mono cikulongana nagwe, yo Nene.” 27 Lulo baho i wejizwa wakwe wakaza, wakezina muno kuwona yakuduwana no mucekulu. Ninga hasina hamba munhu mono yamutya, “Wukusaka cici?” Hamba, “So cici mukuduwana no mucekulu.” 28 Yuyo mucekulu yakayileka njilo yakwe baho, yakabita ku mujini, yakawalonjela wanhu yakutya, 29 “Muze mukamuwone u munhu mono yanonjeye zinghani zose zono nitumaga, alo kowa yo mwene Kilisito?” 30 I wanhu wakalawila mu mujini, wakamubitila Yesu. 31 Na mu cipango cico, i wejizwa wakwe wamunenelezaga Yesu, wakutya, “Mwijizi wulye zindigwa.” 32 Ninga Yesu yakawatya, “Ane nina ndigwa yono si muyimanyile anye.” 33 I wejizwa wakwe wakawa kwiwuza weneco wose wakutya, “Alo munhu kamuletela ndigwa?” 34 Yesu yakawatya, “I ndigwa yangu yoyi, nitume wuhile wa mono yanhuma, no kuwukondeleza u mulimo wakwe. 35 Anye mutezaga, Yikali myezi du, i cipango cen hwanga cowa cafika. Ninga ane nghumulonjelenyi, muyilangaje migunda, vyono yapisa, yakondya ku wududule. 36 Mono yakutwanga, yakubocela u musahala wakwe, nayo yakukonghola i nhwanga, ku soko yo wumi we cibitilila, mono yakuhadika na mono yakutwanga, ho wasangalalane hamonga. 37 Holeka nghani yiyi ya mbeka, ‘Yunji yakuhadika, yunji nayo yakutwanga.’ 38 Ane namutumenyi, mutwanje nhwanga yono si mwayilavizya nhuguti, wanji wetuma, ninga anye mukumota vya munhuguti yawo.” 39 Wasamaliya wenji wa mu citumbi cico, wakamwihuwila Yesu soko ye zinghani zono yalonga yuyo mucekulu, zono yatya, “Kanonjela zinghani zose zono nitumaga.” 40 Wasamaliya wakamubitila Yesu, wakamulomba yekale nawo. Nayo yakekala baho vilo vyejete. 41 Ne wanhu wenji muno wakamwihuwila ku soko ye zinghani zakwe. 42 Wakamutya, yuyulya mucekulu, “Ase si cikwihuwila du ku soko yo wulonje wako, sese co weneco cihulika, na camanya mbeka vyono ayu yo Mukombozi we yinze.” 43 Hanyuma ya vilo vyejete, Yesu yakawuka baho, yakabita ku Galilaya. 44 Hambi Yesu mweneco nha yalonga calinze, vyono, “Muwizi si katugaga lilumbo mu yisi yakwe.” 45 Ale, yaza kufika ku Galilaya, Wagalilaya wenji wakamubocela. Ku soko nawo nhavivilya, wali wali kuko ku sikukuu yiyo ye Pasaka, wakaziwona zinghani zose zono Yesu yetuma kuko ku Yelusalemi, mu cipango ce sikukuu yiyo. 46 Yesu yakabita kanyhi kuko ku Kana ya ku Galilaya, i hanhu hono yagagalusiza malenga gakawa divayi. Kwali ko yuli yunji muwaha we likulu, u mwanagwe we cilume yali yatamigwe ku Kapelanawumi. 47 Hodu, yuyo muwaha we likulu, yaza kuhulika vyono Yesu kalawa ku Yudiya, kafika ku Galilaya, yakamubitila, yakamulomba yamuponye mwanagwe mono yali mutamwa muno muno, yali behi no kufwa. 48 Yesu yakamutya, “Hono mulece kuwona vitanjilo ne mapoto, si mokwihuwila ng'o.” 49 Yuyo u muwaha we likulu yakamutya, “Muwaha, nghukunena cibite lono mwanangu yakali si nafwa.” 50 Yesu yakamutya, “Wubite du, mwanago mumi.” U munhu yuyo yakehuwila zinghani za Yesu, yakawa kubita. 51 Na lono yali yakali mu nzila, wetumami wakwe waketang'anila nayo, wakamulonjela vyono u mwanagwe mumi. 52 Nayo yakawawuza ilipango lyono mwana yamulila kutuga ciba. Wakamutya, “Yigolo saa saba mu misi, mhungo ho yamulecela.” 53 Nayo sogwe yakamanya vyono lyali lye 'pango lilyo lyono Yesu yamulonjela, “U mwanago mumi.” Yakehuwila mwene, na wa mu nyumba yakwe wose. 54 Aci co citanjilo ce kejete, cono yanoza Yesu lono yalawila ku Yudiya yakubita ku Galilaya.

5

1 Hanyuma ya zizi kukawa na sikukuu ya Wayahudi, nayo Yesu yakabita ku Yelusalemi. 2 Kuko ku Yelusalemi, behi no mulango wono wucemwaga, “Mulango we Zingholo.” Hali ho lili yilamba, lyono ku nonga ye Cihebelaniya lyacemwaga “Betisaza.” Lyono lyali lina deha yihano. 3 Mumo mo waswezaga mhuga ye watamwa, wabofu, we citewe, wono wadejepe. [Wakulindila wutilibulwe we malenga, 4 hambi Malayika wo Muwaha, nha yatimaga hanji na hanji mwilamba, yakugatilibula malenga, no munhu wo wose mono yalongolaga kwinjila mu malenga lono gali gatilibuka, yuyo yakapona mu wutamwa wakwe.] 5 Ale, hali na munhu yunji baho, mono yali mutamwa myaka makumi madatu na munana. 6 Yesu yaza kumuwona u munhu yuyo yagonile baho, yakamanya vyono kekalaga mutamwa myaka minji, yakamuwuza, “Wukuhila Wupone?” 7 U mutamwa yakamupitula yakatya, “Muwaha, ane sina munhu wo kunhajila mu malenga, mu cipango cono gakutilibuka. Hambi ane hono nghusaka kwinjila, yunji yakuwa yalongola kwinjila.” 8 Yesu yakamutya, “Winuce, wudinghule muceka wako, wujende.” 9 Lo lulo munhu yakawa yapona, yakadinghula u muceka wakwe yakawa kujenda. I nghani yiyi, yetumwa mwizuwa lye Sabato. 10 Holeka wanji wa muli Wayahudi wakamutya mono yaponywa, “Izuwali nha Sabato, yili mwiko kudinghula u muceka wako.” 11 Ninga mwene yakawatya, “U munhu yuyo mono yamhonizye, yo yanonjeye, wudinghule muceka wako wujende.” 12 Nawo wakamuwuza, “Alo yo nani mwene mono yakulonjeye, wudinghule u muceka wako wujende?” 13 Ninga mwene mono yaponywa, si yali yamumanyile munhu mono yamuponyizye, hambi Yesu nha yali yawuka ihanhu baho, hambi nha hali na yipuga yiwaha lye wanhu. 14 Hanyuma Yesu yakamwagana mu Nyumba yo Mulungu yuyo mono yaponywa, yakamutya, “Wulanje, alu wapona, ale wulece kwituma wubi kanyhi, ho yize yilece kukwagana i yimbi yono yicizize.” 15 U munhu yakabita, yakawalonjela iwalongola we Wayahudi vyono yo Yesu mono yamuponyizye. 16 Ku soko vyono Yesu yetuma nghani yiyi mwizuwa lye Sabato, Iwayahudi wakawa kwamula kumugaza. 17 Ninga Yesu yakawalonjela, “Baba yakwituma milimo cibitilila, holeka nane nghwituma milimo nhavivilya.” 18 Ku soko ye zinghani zizo, iwalongola we Wayahudi wakacila muno kulondola nzila yo kumuwulaga Yesu, si so wuhodanje wo wulajilize we Sabato du, langa na so wulonje wono yateye Mulungu yo Sogwe, na ku soko yiyo yakwinoza sawa no Mulungu. 19 Yesu yakawalonjela, “Mbeka nghumutyenyi, u Mwana si kosuma kwituma cinji yali wene, yadahile kwituma cicilya du cono yakuwona u Sogwe yakwituma, ku soko cicilya cono sogwe ketumaga, no mwana nayo vyo ketumaga nhavivyo. 20 U Sogo yo munhu yamwendile Mwanagwe, kanyhi kamulajilaga zose zono yakwituma mweneco, kanyhi komulajila ne metumo mawaha gono gacizize gaga, nanye mokwizina. 21 Nha vyono u Sogo yo munhu kawazukulaga i wafu no kuwapela wumi, nhavivyo nayo Mwana kawapelaga wumi awalya wono yendile. 22 Sogo yo munhu si yakumuling'aniza munhu wo wose, ninga u mulimo wose wo kuling'aniza, yamupela u Mwanagwe, 23 ho wanhu wose wamogope u Mwana, nha vyono wamogopaga u Sogo yo munhu. Mono siyakumogopa Mwana, si yakumogopa no Sogo yo munhu mono yamutuma. 24 “Mbeka nghumutyenyi, Mono yakuyihulika i nghani yangu, no kumwihuwila mono yanhuma, yena wumi we cibitilila. Hamba si koling'anizwa ng'o, langa yakondya kuwuka mwifwa, yenjila mu wumi. 25 Mbeka nghumutyenyi, i cipango cikuza, na lulu caza, i cipango cono i wafu wolihulika ilizi lyo Mwana wo Mulungu, nawo wono wolihulika wowa womi. 26 Nha vyono u Sogo yo munhu yo mwamulizo wo wumi, ale nhavivyo nayo yamupela Mwanagwe yawe mwamulizo wo wumi. 27 Kanyhi yamupeye no wulajilize wo kuling'aniza, ku soko u mwene, yo Mwana wo Munhu. 28 Mulece kwizina nghani ayi, hambi i cipango nha cikuza, cono wose wono wali mu vitenjelo, wolihulika ilizi lyakwe, 29 nawo wolawila, mu vitenjelo, nawo wono wetumaga viswanu, wozuka no kuwumipa, na awalya wono wetumaga wubi, wozuka no kuling'anizwa. 30 “Ane si nosuma kwitumila cinji mu wulajilize wangu no mweneco, ane nghuling'aniza nha vyono hulikaga kwa Baba, ne ning'aniza yangu ya mbeka, hamba si nyendile kwituma zo wuhile wangu no mweneco, langa vyono yendile mono yanhuma. 31 Hono niyihomelele no mweneco, wuhomelezi wangu si wosuma kuvumilwa vyono wa mbeka. 32 Ninga ho yali yunji mono kahomelelaga, ane manyile vyono, zose zono yakuhomelela muli'ne zo ze mbeka. 33 Anye mwawatuma wanhu kuli Yohana, nayo yakayihomelela yi mbeka. 34 Ane si vyono nghuwitumbila wuhomelezi wa wanhu, langa nghulonga zizi, anye ho mupone. 35 Yohana yali yenha tala yono yikwaka no kumulika, nanye mukawa mwiwikanize kuwusangalalila u wuzelu wuwo kwa cidaha. 36 Ninga ane nina wuhomelezi wangu wuwaha kuciza wa Yohana, hambi i milimo yono nghwituma, yo milimo yono yamhela Baba niyitume, nayo yo yikuhomelela vyono Baba yo yanhuma. 37 Nayo Baba mono yanhuma, yo yakuhomelela. Nanye mukali si nalihulika lizi lyakwe hamba nhavi, hamba kuwuwona wusu wakwe. 38 Hamba ne Nghani yakwe, si yikalaga mugati yenyu, vyono si mumwihuwiye yuyo mono yamutuma. 39 Anye musomaga Mandiko Gono Gelile mukwihwesa vyono, mugati yayo muli gago, motuga wumi we cibitilila, na kumbe gago Mandiko go gakuhomelela nene! 40 Hamba nhavivyo, anye si mwendile kuza kwangu ho mutuje wumi. 41 “U wuhile wangu, si vyono ho nhuje u lukumyo kulawa kuli wanhu. 42 Ninga nimumanyilenyi anye, manyile vyono u wendo wa kuli Mulungu wuli musina mu zinhumbula zenyu. 43 Ane niziza mu wulajilize wa Baba, ninga anye hamba si mukumbocela yaye, munhu yunji hono yazize mu wulajilize wakwe mweneco, nanye momubocela. 44 Mosuma wule kwihuwila, kumbe nanye ho mwendile kubocela lukumyo lono lukulawa muli nyenye nyo weneco, hamba si mukulondola lukumyo lono lukulawa kuli Mulungu mono yali wene? 45 Mulece kwihwesa vyono ane nomusonjezenyi kuli Baba. Yuyo Musa mono mumwitumbiye, yo komusonjezenyi kuli Baba. 46 Mbeka hono mwali mumwihuwile Musa, mwali munyihuwile na nene nhavivilya, hambi Musa nha yandika mu zangu. 47 Ninga hono si mukwihuwila azilya zono Musa yandika, alu mosuma wule kwihuwila i zinghani zangu?”

6

1 Hanyuma ya zizi, Yesu yakabita ku nhumbi nzagwe ye lilamba lya Galilaya, (lyo lye Tibeliya). 2 Ne mhuga mbaha ye wanhu wakamutyatya kuko, hambi iwanhu wawo nha wali waviwona ivitanjilo vyono yanozaga vyo kuwaponya i watamwa. 3 Yesu yakabita mwi'tunda mucanyha, yakekala ne wejizwa wakwe. 4 I Pasaka, sikukuu ye Wayahudi yali yasejelela. 5 Nayo Yesu yaza kulanga, yakawona mhuga ye wanhu wakumuziza, yakamutya Filipo, “Alo cogula hayi ndigwa wanhu wawa walye?” ( 6 Yalongaga zizo yakumujela Filipo, hambi nha yali yamanyile mwene yono kokwituma.) 7 Filipo yakamupitula yakatya, “Mikate ya dinali magana mejete, si yowakwila wanhu wawa, hamba munhu yasole cidodo munhu cidodo.” 8 Yumonga muyagwe ne wejizwa wakwe, mono yacemwaga Andeleya, u mwanakwawe wa Simoni Petelo, yakamutya. 9 “Yali bahano mudodo yumonga, mono yena mikate mihano ya shayili ne zisomba nyejete; ninga vivi vyokwila cici kuli wanhu wenji nha wawa?” 10 Yesu yakatya, “Muwekazaje wanhu.” Kuko kwali na mahanze menji. Ale, wanhu wakekala hasi, nawo wali waficile liwalo lyawo, wanhu walume Elufu yihano. 11 Baho Yesu yakayisola i mikate yiyilya, yakamulumbo Mulungu, yakawagawila wanhu wono wali wekaye, ne zisomba nhavivyo, na wose wakatuga munhu ha nghango yakwe. 12 I wanhu waza kwiguta, yakawalonjela i Wejizwa wakwe, “Alu mutondoleze ivibegulwa vyono visigaye, cinji cilece kwajilila.” 13 Wakatondoleza ivibegulwa vye mikate mihano ye shayili vyono wasigaza wanhu wono walya, wakamemya nhoto ikumi na nyejete. 14 Iwanhu wawo waza kuciwona citanjilo cono Yesu yanozize, wakatya, “Ayu he yo muwizi mbeka, mono yakuza kononze.” 15 Yesu yaza manya vyono wanhu wasakaga kumusola wamunoze yawe mutemi, yakawuka kanyhi, yakawa kubita kwi'tunda, yali wene. 16 Yaza kuwa cinyamihe, wejizwa wakwe wakatenenhuka sunga kwi'lamba, 17 wakenjila mu ngalawa, wakawa kulowoka lilamba wakubita ku Kapelanawumi. Kukawa kwatukuwala, nayo Yesu yali yakali nawaziza. 18 Imalenga nago gakawa kwamula kutunhuma, so mbeho mbaha yono yaputaga. 19 Iwejizwa lono wali wajenda kotya nha kilometa yihano lunji mutandatu, nhavi, wakamuwona Yesu yakujendela mucanyha ye malenga, yakusejelela ha ngalawa, nawo wakawa kogopa muno. 20 Ninga Yesu yakawatya, “Yo nene, mulece kogopa.” 21 Wakasaka kumudinghula Yesu mu ngalawa, ninga lo lulo lulo, ingalawa yikawa yafika ku yisi nghavu; hanhu hono wabitaga. 22 I mitondo yaco, i mhuga ye wanhu wawalya wono wasigala ku nhumbi nzagwe ye lilamba, wakamanya vyono hali hoyili ngalawa monga du baho, na vyono Yesu si yenjila mu ngalawa hamonga ne wejizwa wakwe, langa i wejizwa wawuka wali wene, 23 zingalawa zinji zikalawa ku Tibeliya, zikafika behi na baho hono wanhu walila mikate mu cipango cono Muwaha yamulumbila Mulungu. 24 Holeka i wanhu wawo waza kumanya vyono Yesu ne wejizwa wakwe wali hasina baho, wakenjila mu ngalawa, wakaza ku Kapelanawumi wakumulondola. 25 Iwanhu wawalya waza kumwagana Yesu ku nhumbi nzagwe ye lilamba, wakamuwuza wakutya, “Mwijizi, alu waza nili baha?” 26 Yesu yakawapitula, yakatya, “Mbeka, nghumulonjelenyi, mukunondola, si vyono mwawona vitanjilo, langa vyono mwalya imikate mukeguta. 27 Mulece kuyipiligalila indigwa yono yihodanjikaga, langa muyipiligalilaje indigwa yono yikalaga sunga ku wumi we cibitilila. U Mwana wo Munhu mono u Sogwe yamuwicila i citanjilo, yo komupelenyi indigwa yiyo.” 28 Nawo wakamuwuza wakutya, “Alu citende wule, ho citume u wuhile wo Mulungu?” 29 Yesu yakawapitula yakawatya, “Awu wo wuhile wono u Mulungu yakuhila muwitume, mumwihuwile mono yatumwa no Mwene.” 30 Baho wakamutya, “Alo konoza citanjilo ci, ciciwone, nase ho cikwihuwile?” 31 I walezi walya i mana ku nyika, nha vyono gakulonga i Mandiko Gono Gelile, “Yawalisa ndigwa kulawa ku wulanga.” 32 Yesu yakawatya, “Ane nghumulonjelenyi mbeka, vyono Musa yo si yamupelenyi nyenye ndigwa yiyilya yono yalawaga ku wulanga, langa Baba yo yakumupelenyi nyenye, indigwa ye mbeka yono yikulawa ku wulanga. 33 Hambi indigwa yo Mulungu, nha yo yulya mono yakutima kulawa ku wulanga, no kuyipela iyinze wumi.” 34 Nawo wakamutya, “Muwaha, wucipelaje ndigwa yiyo nhondo zose.” 35 Yesu yakawatya, “Ane yo nene ndigwa yo wumi. Mono yakuza kwangu, si kodabucila lukulu. Na mono yakwihuwila kuli nene, si kokalucila lukulu.” 36 Ninga namulonjelenyi vyono hamba yiwe mukumbona, si mukunyihuwila. 37 Wose wono yakumhela Baba, wokuza kwangu, nane si nomutaga kunze wo wose mono yakuza kwangu. 38 Hambi nha natima kulawa ku wulanga, si vyono nitume wuhile wangu, langa ho fisilize u wuhile wa mono yanhuma. 39 No wuhile wa mono yanhuma nha wowu, “Ndece kumwajiliza hamba yumonga muli wose wono napegwa nayo, langa niwazukule wose mwizuwa lya ku ndumo.” 40 Hambi cono yakusaka Baba nha coci, muli wose mono yakumuwona Mwana, no kumwihuwila, yawe no wumi we cibitilila, nane nolowazukula Mwi'zuwa lya ku ndumo. 41 Nawo Wayahudi wakawa kwanza kung'ung'ulika ku soko vyono yatya, “Ane yo nene i ndigwa yono yatima kulawa ku wulanga.” 42 Wakatya, “Mwene yuyu si yo Yesu u mwana wa Yusufu? Sunga u sogwe no nyina ciwamanyile! Alu kosuma wule kutya yatima kulawa ku wulanga?” 43 Yesu yapitula yakawatya, “Mulece kwing'ung'ulicila nyenye kwa nyenye. 44 Hasina munhu mono kosuma kuza kwangu hono Baba mono yanhuma yalece kumukwejela kuli'ne, nane nolomuzukula u munhu yuyo mwizuwa lya ku ndumo. 45 Yandikwa ne wawizi, ‘Iwanhu wose wokwijizwa no Mulungu.’ Muli wose mono yakumuhulika Baba, no kwiyijiza muli Mwene, yuyo yo yakuza kwangu. 46 Si vyono lunji hoyuli munhu mono yamuwona Baba, langa yuyo du mono yalawa kuli Mulungu, yo yamuwona Baba. 47 Mbeka nghumulonjelenyi, vyono, mono yakwihuwila, yena u wumi we cibitilila. 48 Ane yo nene indigwa yo wumi. 49 I walezi wenyu walizaga imana ku nyika, ninga wakafwa. 50 Ayi yo ndigwa yono yikutima kulawa ku wulanga, indigwa yono mono yakuyilya si kofwa. 51 Ane yo nene indigwa yo wumi, yono yatima kulawa ku wulanga, munhu wo wose hono yalye indigwa yiyi, kokwikala mumi cibitilila, ne ndigwa yono nomupela, wo muwili wangu wono nghuwulavya so wumi we yinze.” 52 Holeka Wayahudi wakawa kwanza kwiwanganila weneco wose, wakutya, “Kosuma wule yuyu kucipela u muwili wakwe cilye?” 53 Baho Yesu yakawatya, “Mbeka nghumulonjelenyi, Hono mulece kulya u muwili wo Mwana wo Munhu, no kuying'wa isakami yakwe, mowa musina wumi muli nyenye. 54 Mono yakulya u muwili wangu no kuying'wa isakami yangu, yena wumi we cibitilila, nane nolomuzukula Mwizuwa lya ku ndumo. 55 Hambi u muwili wangu nha yo ndigwa ye mbeka, ne sakami yangu co cing'wegwa ce mbeka. 56 Mono yakuwulya u muwili wangu no kuying'wa isakami yangu, yo kekalaga mugati mwangu, nane nghwikala mugati mwakwe. 57 Baba u mumi yo yanhuma, nane nili mumi ku soko yo Mwene, yo nhavivyo nayo mono yakunyilya nene kowa mumi ku soko yangu. 58 Ayi yo ndigwa yono yatima kulawa ku wulanga, si yinhe mana yono walizaga i walezi wenyu, wakafwa. Mono yakulya ndigwa yiyo, kokwikala mumi cibitilila.” 59 Yesu yazilonjela zizo mu nhang'anilo yo wuhembelo, lono yejizaga ku Kapelanawumi. 60 Holeka wenji wa muli wejizwa wakwe, waza kuzihulika zizo wakatya, “He, azi nghani nghamu! Nani'mbi mono kosuma kuzihulika?” 61 Ninga Yesu yakawamanya mweneco, hamba yunji si yamulonjela vyono wejizwa wakwe wakuying'ung'ulicila inghani yiyo, yakawawuza yakutya, “Alo inghani yiyi yikumupelenyi mahwele hongo? 62 Yowa wule alu, hono mumuwone u Mwana wo Munhu yakubita kuko ku wulanga kono yali ha lulongozi? 63 U Muhe yo kaletaga wumi, ninga munhu yali wene, sikosuma cinji. Izinghani zono nimulonjelenyi, wo Muhe wo Mulungu, kanyhi wo wumi. 64 Ninga hamba nhavivyo ho wali wanji wa muli nyenye wono si wehuwiye.” (Yesu yalonga nhavivyo, hambi nha yali yamanyile kulawa mwamulizo, vyono wa nani wono si wehuwiye, na kanyhi nani mono komugaluka.) 65 Hanyuma yakatya, “Yo yilecile nghumulonjelenyi, vyono hasina mono kosuma kuza kwangu hono yalece kupegwa wusume na Baba. 66 Kusoko ya zizo, wenji wa muli wejizwa wakwe Yesu, wakawuya ne nyuma, hamba si wajendanaga nayo kanyhi.” 67 Yesu yakawawuza wawalya we likumi na wejete, “Wulenyi nanye, mukuhila kubita?” 68 Simoni Petelo yakamupitula yakatya, “Muwaha, cobita kuli nani? Nha yo gwegwe mono wina zinghani zo wumi we cibitilila. 69 Nase cihuwiye, kanyhi cimanyile, vyono yo gwegwe Mono Welile wo Mulungu.” 70 Yesu yakawatya, “Alo si namuhagulenyi nyenye mo we likumi na wejete, hamba nha vivyo muyenyu monga muli nyenye yo Setani!” 71 Yesu yamulongaga zizo Yuda u mwana wa Simoni Musikaliyota, ku soko yali yo yuyo mono komugaluka, hamba yawe yali yumonga wa wawalya we likumi na wejete.

7

1 Hanyuma ya zizi, Yesu yajendaga mu Galilaya, hamba si yendaga kujenda mu Yudiya, vyono i walongola we Wayahudi wahilaga kumuwulaga. 2 Sikukuu ye Wayahudi ye vibanda, yali yasejelela. 3 Baho i wanduguze wakamutya, “Wuwuce bahano wubite ku Yudiya, iwejizwa wako ho wayiwone i milimo yono kwitumaga. 4 Hasina munhu mono ketumaga cinji cinyele, hono yakuhila yamanyice ne wanhu. Holeka vyono wukwituma zizi, ale wilajilaje ho wumanyice mu yinze yose.” ( 5 Sunga ne wanduguze, si wamwihuwila ng'o.) 6 Yesu yakawalonjela yakutya, “Cidaha cangu cono cikwiliye cikali nafika. Ninga kuli 'nye cidaha co cose cikwiliye. 7 Sunga ne wanhu wa mononze, si wosuma kumusulenyi anye, langa ane wasulile, ku soko nghuwalonjela, vyono i metumo gawo mabi. 8 Anye mubite ku sikukuu yiyo, ninga ane si nghubita, kusoko i cipango cangu cono cikwiliye, nha cikali nafika.” 9 Yaza kuzilonga zizo, u mwene yakasigala kuko ku Galilaya. 10 Lono wanduguze wali wabita ku sikukuu, Yesu nayo ho yakawa kubita, ninga siyabita ciwonelela, langa yabita cinyele. 11 I Walongola we Wayahudi wamulondolaga mu sikukuu yiyo, wakawuza wakutya, “Alu yali hayi mwene?” 12 Kukawa na lupwepwe muli wanhu ku soko yakwe, wanji watezaga, “Munhu muswanu.” Wanji wakatya, “Aa, ng'o, yakuwakonga wanhu.” 13 Hamba nhavivyo, hasina munhu mono yejelela kumulonga ciwonelela so kuwogopa i walongola we Wayahudi. 14 Lono sikukuu yali yikali yijendeleye, Yesu nayo yakenjila mu Nyumba yo Mulungu, yakawa kwanza kwijiza. 15 I Wayahudi wakezina muno, wakatya, “Munhu yuyu yamanyile nhawule ze mandiko, nayo si yejizwa?” 16 Nayo Yesu yakawapitula, yakawatya, “Imejizo gono nghwijiza, si gangu yaye, langa ga yuyo mono yanhuma. 17 Munhu mono yendile kwituma zono u Mulungu yendile, yo komanya hono mejizo gangu galawa kuli Mulungu, hamba nene nghwilonjela mu wulajilize wangu no mweneco du. 18 Ninga u munhu mono yakwilonjela mu wulajilize wakwe mweneco du, yakulondola u lukumyo lwakwe mweneco, ninga mono yakulondola u lukumyo lwa mono yamutuma, yuyo yaweza mwihuwilwa, na muli mwene musina wavu wo wose. 19 Alu Musa si yamupelenyi Wulajilize? Hamba nhavivyo, hasina yunji muyenyu mono kawibataga u Wulajilize. Alu ku sokoci mukusaka kumbulaga?” 20 Iwanhu wakamupitula wakatya, “Alu mwene wina lukwale! Nani mono yakusaka kukuwulaga?” 21 Yesu yawapitula, yakawatya, “Hoyili nghani monga yono netuma, sunga nanye mukayizina. 22 Musa yakamupelenyi u moto we calamo, ninga si vyono u moto wuwo we calamo walawa kuli Musa, langa walawa kuli walezi wenyu. Nanye, hamba mwizuwa lye Sabato, muwategulaga wanhu ku calamo. 23 Alu hono munhu yadahile kutegulwa ku calamo na mwizuwa lye Sabato, Wulajilize wa Musa si wukusuma kuhodanjika, ku soko yiyo, alu sokoci, anye mukumbonela likuwo, vyono nimuponezye lukulu u munhu mwizuwa lye Sabato? 24 Mulece kuling'aniza so wulanga za munze du, langa mweze kulavya ning'aniza ye mbeka.” 25 Wanji wanya Yelusalemi wakatya, “Wulenyi, u munhu mono wakumulondola wamuwulaje, si yo yuyu? 26 Na kumbe lanje, yakuwalonga ciwonelela, hamba hasina munhu mono yakumutya cinji. Alo yisumice walongola mbeka, wowa wamumanya vyono yo mweneco Kilisito 27 Ninga Kilisito kolo yakuza, hasina munhu mono komanya kono yalawile, ninga munhu ayu ase cimumanyile kono yalawile!” 28 Holeka Yesu lono yejizaga mu Nyumba yo Mulungu, yakenula lizi lyakwe, yakatya, “Ati, mumanyile hongo, sunga na kono ndawile mukumanyile! Hamba yiwe nhavivyo, ane si neyiziza ko wulajilize wangu no mweneco, ninga u mwene mono yanhuma yo we mbeka, nanye si mumumanyile. 29 Ninga ane nimumanyile, hambi nha nalawa kwakwe, nayo yo yanhuma.” 30 Baho wanhu wakasaka kumwibata, ninga hasina hamba munhu mono yejelela kumwibata, vyono cidaha cakwe cali cikali nafika. 31 Wanhu wenji wa mwipuga lililya lye wanhu wakamwihuwila, wakatya, “Wulenyi ti, Kilisito kolo yakuza, konoza vitanjilo vicizize vyono yanozize yuyu?” 32 Iwafalisayo wakahulika iwanhu wakupwepwa zizo za Yesu. Holeka Wafalisayo, hamonga ne wakohani wawaha, wakatuma wasilikale wamwibate Yesu. 33 Yesu yakatya, “Nghali nili hamonga nanye cipango cidodo, hanyuma nobita kuli mwene mono yanhuma. 34 Monondola hamba si mombona, ku soko hono nowa, anye simosuma kuza.” 35 Walongola we Wayahudi wakeyitya weneco wose, “Alo kobita hayi munhu yuyu, ase ho cilece kumuwona?” Alo kobita kuli Wayahudi wono weyagalila ku Wagiliki, no kuwejiza Wagiliki? 36 Alo yena nhunizo ci, hono yakutya, “Monondola ninga si mombona, na hono nowa, anye si mosuma kuza?” 37 Mwi'zuwa lyo mumalilizo we sikukuu yiyo, lyali yizuwa yiwaha. Yesu yakema, yakalonga yenuye lizi, yakutya, “Munhu wo wose, mono yakaluce, yaze kwangu yang'we.” 38 Nha vyono gakutya i Mandiko Gono Gelile, “Mono yakunyihuwila nene, i makolongo ge malenga momi, gohuluma kulawa mu nhumbula yakwe.” 39 (Yalonga zizo, yakulonga zo Muhe Mono wolomubocela wono wamwihuwiye mwene. Mu cipango cico u Muhe yali yakali si naza, vyono Yesu yali yakali si nakumywa.) 40 Wanji wa mwipuga lililya lye wanhu, wamuhulika yakulonga zinghani zizi, wakatya, “Mbeka munhu ayu yo muwizi.” 41 Iwanji wakatya, “Nha yo mwene Kilisito.” Ninga wanji wakatya, “Alu yosumika Kilisito yalawe ku Galilaya?” 42 I Mandiko Gono Gelile gakutya wule? Gakutya, “Kilisito kolawa mu lulelo lwa Dawudi, na kolelelwa ku Betelehemu, mu kaya ya Dawudi.” 43 Baho gakejela matemanuko mu mhuga ye wanhu ku soko ya Yesu. 44 Iwanhu wanji wasakaga kumwibata, ninga hasina mono yakajela kumwibata. 45 Baho iwasilikale, wakawuya kuli wakohani wawaha ne Wafalisayo, nawo wakawawuza wakutya, “Alu nhawule si mumuletile?” 46 Nawo Wasilikale wakawapitula wakatya, “Yakali nejela hamba nhavi, munhu mono yalonga, nha vyono yakulonga yuyu.” 47 Wafalisayo wakawapitula wakutya, “Alu sunga na nyenye wose mwakongwa? 48 Wulenyi, mumuwene hamba yunji wa muli walongola we wanhu, hamba yunji wa mu Wafalisayo mono yamwihuwiye? 49 Ninga ilipuga lili, si liwumanyile u Wulajilize wa Musa, yilijitwe.” 50 Yunji muyawo yali yo Nikodemo yuyulya mono baho halulongozi yamuziza Yesu. U mwene yakawatya, 51 “Wulenyi ta, u Wulajilize wetu wukuwa kumuling'aniza munhu lono yakali nahulicizwa, hamba kumanya cono yetumile?” 52 Nawo wakamupitula wakumutya, “Alu nagwe nhavivilya kulawa ku Galilaya? Ale wulondole, wulanje mu Mandiko Gono Gelile, nagwe kowona vyono, muwizi si kolawa ku Galilaya hamba nhavi.”

8

1 Wose wakeyagala munhu kwakwe munhu kwakwe, ninga Yesu yakabita ku kwitunda lye Mizeyituni. 2 Waza kwela hakali mitondo, yakaza kanyhi mu Nyumba yo Mulungu. Wanhu wose wakamuziza, nayo Yesu yakekala yakawa kuwejiza. 3 Iwejizi wo Wulajilize ne Wafalisayo, wakamuleta mucekulu yunji mono yaganizwa mu wusenyha. Wakamuwika haciligati yawo. 4 Wakamuwuza Yesu wakutya, “Mwijizi! U mucekulu yuyu kaganizwa yakusenyha. 5 Na mu Wulajilize wetu, Musa yacilajiliza vyono ciwatowaje ne mabwe i wacekulu wono wenha yuyu. Alu agwe ma, wukutya wule?” 6 Wazilonga zinghani zizi wakumujela, ho watuje nzila yo kumusonjezeza. Ninga Yesu yakenama hasi, yakandika mu muhangha ne cidole. 7 Waza kucila kumuwuza, Yesu yakenuka yakawatya, “U munhu mono yasina wubi muli nyenye yo yaweze mulongozi kumugumilila libwe.” 8 Kanyhi yakenama yakajendelela kwandika mu muhangha ne cidole. 9 Waza hulika nhavivyo, wakawa kwamula kuwuka yumonga yumonga, wakamula i wakombi. Yesu yakasigala yali wene, nayo mucekulu yuyulya yakekala yemile bahalya du. 10 Yesu yaza kwinuka, yakamuwuza mucekulu yuyo yakutya, “Alu 'gwe yaya, iwanhu walya wali hayi? Alu hasina hamba yumonga mono kakuling'aniza?” 11 Nayo u mucekulu yuyo yakapitula yakatya, “Hasina hamba yumonga Muwaha!” Nayo Yesu yakamutya, “Hamba na nene si nghukuling'aniza. Wubite, ninga vyono kulawa lulu, wulece kwituma kanyhi wubi.”] 12 Yesu lono yaduwaga ne Wafalisayo kanyhi, yakawalonjela, yakutya, “Ane yo nene wuzelu we yinze. Mono yakunhyatya nene, si kojendela lukulu mu wutitu, langa kowa no wuzelu wo wumi.” 13 Holeka Wafalisayo wakamutya, “Agwe wukwihomelela go mweneco, holeka wuhomelezi wako si wa mbeka.” 14 Yesu yapitula yakawatya, “Ninga ane hamba niyihomelele no mweneco, wuhomelezi wangu wa mbeka, hambi nha manyile kono nalawa, na kono nghubita. Ninga anye si mumanyile kono nalawa, hamba kono nghubita. 15 Anye mukuwa kutyatya mahweso ge cimunhu-munhu mu ning'aniza zenyu, ninga ane si nghuwa kumuling'aniza munhu. 16 Hamba niwe nghuling'aniza, ning'aniza yangu nha ya mbeka, hambi ane nha si nili wene, langa cina na Baba mono yanhuma. 17 Na mu Wulajilize wenyu yandikwa vyono, wuhomelezi wa wanhu wejete wo we mbeka. 18 Ane nghwiyihomelela no mweneco, na Baba mono yanhuma nayo yakuhomelela zangu.” 19 Baho nawo wakamutya, “U Sogo yali hayi?” Yesu yakawatya, “Anye vyono si mumanyile ane, yo yikuleka si mumumanyile na Baba. Ninga hono mwali mumanye ane, mwali mumumanye na Baba nhavivyo.” 20 Yesu yazilonga zinghani zizi lono yejizaga mu Nyumba yo Mulungu, lono yali mu cinyumba cono cali wuwiko we cisanduku ce vilavya. Hamba munhu si yamwibata, hambi i cidaha cakwe nha cali cikali si nafika. 21 Yesu yakawalonjela kanyhi yakatya, “Ane nghubita, anye monondola, ninga molofwa no wubi wenyu. Kono ane nghubita, anye si mosuma kuza.” 22 Nawo walongola we Wayahudi wakatya, “Alo kokwiwulaga?” Hambi nha yakutya, “Kono ane nghubita, anye si mosuma kuza?” 23 Yesu yakawatya, “Anye muli wa baha hono hasi, mono yinze yiyi, ninga ane nili wa ku wulanga, anye muli wenze yiyi, ane langa si nili wenze yiyi.” 24 Holeka nimulonjelenyi vyono, molofwa no wubi wenyu. Ku soko hono mulece kwihuwila du vyono “Ane yo nene.” Molofwa no wubi wenyu. 25 Nawo wakamuwuza wakatya, “Alo agwe yo gwegwe nani?” Yesu yakawatya, “Nha nimulonjelenyi kulawa mwamulizo! 26 Nina nghani nyinji zo kulonga, no kulavya ning'aniza muli'nye. Ninga mono yanhuma yo we mbeka, nane nghuwalonjela iwanhu we yinze, zinghani zizo du, zono nazihulika kuli mwene.” 27 Nawo hamba si wasuma kumanya, vyono Yesu yalongaga nawo muli zo Sogwe. 28 Holeka Yesu yakawalonjela, “Kolo mwakondya kumutumbika Mwana wo Munhu, baho ho molomanyila vyono, ‘Ane yo Nene.’ na kanyhi vyono si nghwitumila cinji co cose mu wulajilize wangu, langa nghulonga zizilya du zono nejizwa na Baba. 29 Nayo mono yanhuma, yali hamonga nane. Nayo si yakuwa kundeka nili wene. Hambi ane nha nitumaga nhondo zose zono zikumwendeza.” 30 Nayo yaza kukondya kulonga zinghani zizi, iwanhu wenji wakamwihuwila. 31 Yesu yakawalonjela Wayahudi wawalya wono wamwihuwila, yakatya, “Hono mwibate i mejizo gangu, mbeka mowa wejizwa wangu. 32 Nanye moyimanya i mbeka, nayo i mbeka yomuwicenyi welecele.” 33 Nawo wakamupitula wakatya, “Ase cili we ndelo ya Abulahamu, nase cikali si nawa wawanda wa munhu wo wose.” Alu wina sokoci yo kutya, “Mowa welecele?” 34 Yesu yakawapitula yakuwatya, “Mbeka nghumutyenyi, munhu wo wose mono ketumaga wubi, yo muwanda wo wubi. 35 No muwanda si kekalaga mu nyumba nhondo zose, u mwana langa yo kekalaga mu nyumba nhondo zose. 36 Holeka u Mwana hono yamuwicenyi welecele, ho mowa welecele mbeka. 37 Manyile vyono muli we ndelo ya Abulahamu. Ninga hamba nhavivyo, mukusaka kumbulaga, vyono si mukuyivumila i nghani yangu. 38 Ane nghulonga zono nawona kwa Baba, nanye mukwituma zono mwahulika ko sogo yenyu.” 39 Nawo wakamupitula wakatya, “Abulahamu, yo sogo yetu.” Yesu yakawatya, “Mhali anye mwali muwe muli wana wa Abulahamu, mwali mwitume vyono yetumaga Abulahamu. 40 Ane nghumulonjelenyi imbeka yono nayihulika kuli Mulungu, hamba nhavivyo anye mukusaka kumbulaga. Abulahamu siyetuma nhavivyo. 41 Anye mukwituma i metumo ga galya gono wetumaga wasogo zenyu.” Nawo wakamutya, “Ase si cili wana watumulwa yaye, langa cina sogo yetu yumonga du, Mulungu.” 42 Yesu yakawatya, “Mhali Mulungu yo Sogo yenyu, mwali munyende ane, hambi ane nha nalawa kuli Mulungu nghaza baha. Hamba si neyiziza ko wulajilize wangu no mweneco, langa umwene yo yanhuma. 43 Alu ku sokoci si mukwizuka zono nghulonga? Ku soko vyono si mwendile kuyihuliciza inghani yangu. 44 Anye muli wana wo sogo yenyu Setani, no wusulumizi wa yuyo sogo yenyu, wo mwendile kuwituma. Mwene yali muwulaji kulawa mwamulizo, hamba si kemaga mu mbeka, vyono muli mwene, imbeka yili musina. Hono yakulonga wulambi, kalongaga i zakwe mweneco, nha vyono yenha, hambi nha mulambi, kanyhi yo sogwe yo wulambi. 45 Ninga ane nghulonga imbeka, holeka nanye si mukunyihuwila ng'o. 46 Hambi lu, nani wa muli nyenye mono kosuma kundajila zo wubi wangu? Alu hono nghulonga mbeka, nhawule si mukunyihuwila? 47 Wo Mulungu nha kahulikaga zinghani zo Mulungu. Ninga anye si mukuhulika, vyono anye, si muli wanhu wo Mulungu.” 48 Iwayahudi wakapitula wakamutya, “Alo si cikulonga mbeka vyono wuli Musamaliya, na kanyhi wina macisi?” 49 Yesu yakawatya, “Ane sina macisi, ninga ane, nimogopaga Baba. Ninga anye si mukunyogopa ane ng'o. 50 Ninga ane si niyilondolelaga lukumyo lwangu no mweneco, ko yuli yunji mono kalondolaga lukumyo lulo, nayo yo Muling'anizi. 51 Ane nghumulonjelenyi mbeka, munhu hono yebate inghani yangu, si kolofwila lukulu.” 52 Iwayahudi wakamutya, “Alu nhondo ho camanya mbeka, vyono wina macisi.” Abulahamu yafwa, ne wawizi wafwa, nagwe wukutya vyono, “Munhu hono yebate nghani yangu si kolofwila lukulu!” 53 Alo agwe, wukwinoza wuli muwaha wumucizize u sogo yetu Abulahamu mono yafwa? Sunga ne wawizi nha wafwa. Alo wukwinoza nha wuli nani gwegwe? 54 Yesu yakawapitula, “Hono niyikumye no mweneco, ulukumyo lwangu lowa si cinji. Baba yo yakunghumya, mono nanye mumutezaga Mulungu wenyu. 55 Nanye hamba si mumumanyile ng'o, ane langa nimumanyile. Na hono nitye si nimumanyile, nowa mulambi nha nyenye. Ninga alu nimumanyile, ne nghani yakwe niyibataga. 56 U sogo yenyu Abulahamu yasecelela, vyono koliwona lizuwa lyangu, nayo yakaliwona, yakasangalala.” 57 Nawo Wayahudi wakamutya, “Waco 'gwe, nha wukali naficila hamba myaka makumi mahano bwete, nagwe hongo wamuwona Abulahamu?” 58 Yesu yakawatya, “Ane nghumulonjelenyi mbeka, vyono, lono Abulahamu yali yakali nalelwa, ane nali nili baho.” 59 Holeka wakatondola mabwe wamugumilile, ninga Yesu yakehundika, yakalawila mu Nyumba yo Mulungu yakabita.

9

1 Nayo Yesu lono yapulutaga, yakamuwona munhu yunji, mono yali yali cibofu kuwulawa vyono yalelwa. 2 Iwejizwa wakwe wakamuwuza wakutya, “Ati Mwijizi, alu nani mono yetuma wubi, yuyu mweneco, hamba i walezi wakwe, holeka mwene yakawa kulelwa yali cibofu?” 3 Yesu yapitula yakatya, “Ayu si vyono yetuma wubi, hambe walezi wakwe, holeka yalelwe yali cibofu. Ninga yalelwa yali cibofu, ho vilungo vyo Mulungu vijele vikwituma muli mwene. 4 Yicinojeye ciwitume u mulimo wa mono yanhuma lono hakali misi, hambi i cilo nha cikuza, lono munhu si kosuma kwituma. 5 Lono nghali nili mono yinze, ane nili wuzelu we yinze.” 6 Yaza kukondya kulonga zizi, yakafunya i mate hasi, yakavuwa lilongo ne mate, yakamubaka lilyo lilongo mu meso yuyo mubofu, 7 no kumutya, “Wubite wukezuguze mu cilamba ca Silowami.” (nhunizo ye litagwa lili, wo wutya “Mutumwe.”) Nayo u mubofu yakabita, yakezuguza, yakawuya yakuwona. 8 Holeka iwayagwe, na wono wamuwonaga katali, vyono yali muciwa na mwilombelezi, wakatya, “Si yo yuyu mono yekalaga yakwilombeleza?” 9 Wanji wakatya, “Yo mwene.” Ninga wanji wakatya, “Nye, ng'o. Langa vihwanile nayo.” Ninga u mwene mono yali yali cibofu, yakatya, “Nye, yo nene.” 10 Holeka wakamutya, “Alu meso gako gasuma wule kuwona?” 11 Nayo yakawatya, “U Munhu mono yakucemwa Yesu, yo yavuwile lilongo, kawa kumbaka mu meso, hanyuma kawa kunyitya, ‘Wubite ku Silowami, ukezuguze,’ Nane niwa kubita kwizuguza, niwa kuwona.” 12 Wakamutya, “Alu mwene yali hayi?” Nayo yakawatya, “Magu ta, ane si manyile.” 13 Hanyuma, wakamutegula kuli Wafalisayo yuyo munhu mono yali yali cibofu. 14 Ne lizuwa lilyo lyono Yesu yavuwile lilongo no kumunuguza meso yuyo munhu we cibofu, lyali lizuwa lye Sabato. 15 Nawo Wafalisayo wakamuwuza yuyo munhu wakutya, “Alo kusuma wule kuwona?” Nayo yakawatya, “Kambaka lilongo mu meso, gangu, niwa kwizuguza, nalu nghuwona.” 16 Wanji wa muli Wafalisayo, wakatya, “U munhu mono yanozize zizi, si munhu wo Mulungu yaye, ku soko si yakwibata u wulajilize we Sabato.” Ninga wanji wakatya, “Hambi u munhu mubi kosuma wule kunoza vitanjilo vyono vinha vivi?” Kukawa no witemanuce muli wene. 17 Wakamuwuza kanyhi munhu yuyulya mono yali yali cibofu, wakatya, “Alu agwe wukumutya wule munhu yuyo vyono yakunuguze i meso gako?” Nayo yakawatya, “U Mwene yo Muwizi.” 18 I walongola we Wayahudi si wehuwila vyono munhu yuyu yali yali cibofu kuwulawa wulelwe wakwe, nalu yakuwona, sunga wakawacema i walezi wakwe. 19 Wakawawuza wawo walezi wakwe, wakutya, “Ati, ayu yo mwana wenyu mono anye mukumutya yalelwa yali cibofu?” Alu kasuma wule kuwona? 20 Nawo walezi wakwe wakatya, “Heya, cimumanyile yuyu vyono yo mwana wetu, na kanyhi vyono yalelwa yali cibofu. 21 Ninga vyono yatujile kuwona, magu, ase si cimanyile, hamba na mono yamunuguza meso gakwe, ase si cimumanyile. Holeka mumuwuzaje mweneco nha munhu mututu, mweneco kokwilonjela.” 22 Ninga i walezi wakwe walonga zizi, vyono wawogopaga iwalongola we Wayahudi, hambi iwalongola wawo nha wali walagane vyono, munhu wo wose mono komuvumila vyono Yesu yo Kilisito, yawinjilwe kunze ye nhang'anilo yo wuhembelo. 23 Holeka ku soko yiyo, iwalezi wakwe wakatya, “Mwene nha munhu mututu, mumuwuzaje mweneco.” 24 Hobaho wakawa kumucema lwe kejete, yuyulya mono yali yali cibofu, wakamutya, “Lonje mbeka hali Mulungu! Ase cimanyile vyono munhu yuyu yena wubi.” 25 Nayo yakawapitula yakatya, “Hono yena wubi, ane si manyile. Langa ane manyile nghani monga du, vyono, nali nili cibofu, ninga alu nghuwona.” 26 Kanyhi wakamutya, “Alo kakutendela wule? Kakunuguza wule meso gako? 27 Nayo munhu yuyo, yakawatya, nha nimulonjelenyi lulu baha, nanye hamba si muhulicize, alu nhawule mukusaka muhulice kanyhi? Alo nanye mukusaka kuwa wejizwa wakwe?” 28 Ninga wene wakamutovula wakatya, “Agwe yo gwegwe mwijizwa wakwe, ase langa cili wejizwa wa Musa. 29 Ase cimanyile vyono u Mulungu yalonga na Musa, ninga ase si cimumanyile munhu yuyo kono yalawile.” 30 Munhu yuyo yakapitula yakawatya, “Ayi yo mbuko he, hono anye si mumumanyile kono yalawile, ninga kanuguza imeso gangu! 31 Cimanyile vyono Mulungu si yakuwa kuwahulika wanyo wubi, ninga munhu hono yawe kamogopaga Mulungu no kwituma zo wuhile wakwe, yuyo langa u Mulungu kamuhulikaga. 32 Ku wulawa ku mwamulizo we yinze, yikali si nahulikwa za munhu mono yanuguza meso, ga munhu mono yalelwa yali cibofu. 33 U munhu yuyu mhali si yalawile kuli Mulungu, si yali yasume kwituma cinji.” 34 Nawo wakamupitula wakumutya, “Waco 'gwe, nha walelelwa mu wubi wose, alu ho kosuma nhawule kucijiza ase?” Hodu wakawa kumuwinjila kunze ye nhang'anilo yo Wuhembelo. 35 Yesu yaza kuhulika zizo zono zijeye, yakamwagana u munhu yuyo, yakamutya, “Alu agwe, wumwihuwiye u Mwana wo Munhu?” 36 Nayo u munhu yuyo yakapitula yakatya, “Yo nani Muwaha, ho nimwihuwile?” 37 Yesu yakamutya, “Nha wukumuwona, nayo yo mwene mono yakulongana nagwe lulu baha.” 38 Nayo u munhu yuyo, yakatya, “Nihuwiye Muwaha.” Yakamuhemba. 39 Yesu yakatya, “Ane naza akuno kononze ho ndavye wuling'anize, wono si wakuwona, watuje kuwona, na wono wakuwona, wabofule.” 40 Iwafalisayo wanji wono wali hamonga nayo, wazihulika zinghani zizi, nawo wakamuwuza wakutya, “Hambi nase cili wabofu?” 41 Yesu yakawatya, “Mhali muwe wabofu, si mwali muwe no wusutye, ninga alu anye mukutya, ase cikuwona, na yiyo yo yikulajila vyono mukali mwina wusutye.”

10

1 Yesu yakatya, “Munhu wo wose mono si yakwinjilila mu mulango we libululu lye zingholo, ninga yakukolela ha wukolo wunji, yuyo muhizi, kanyhi muboci. 2 Langa mono yakwinjilila mu mulango, yuyo yo mudimi we zingholo. 3 U mulindiliza mulango we libululu, kamudigulilaga yuyo, ne zingholo zikuwa kumuhulika lizi lyakwe, nayo yakuwa kuzicema kwe matagwa zingholo zakwe, yimonga yimonga, kazitulusaga zilawile kunze. 4 Nayo kolo yazilavya kunze, kazilongolelaga ku mwande, nazo zingholo zimutyatyaga, hambi nha zimumanyile lizi lyakwe. 5 Ne zingholo zizo, si zidahile kumutyatya mujenzi, langa zomutiza, hambi nha si zimumanyile u mujenzi lizi lyakwe.” 6 Yesu yawalonjela i cihwanicizo cici, ninga wene hamba si watanga cono yawalonjelaga. 7 Holeka Yesu yakawatya kanyhi, “Mbeka nghumutyenyi, Ane yo nene mulango we zingholo. 8 Na wose wono walongola kuza, lono ane nali nghali si naza, wawo wo wahizi, kanyhi waboci, nawo hamba ne zingholo si zawahulika. 9 Ane yo nene mulango, munhu hono yenjilile muli nene, kopona, kokwinjila kolawaniza, nayo kowona wudimo. 10 U muhizi si kazaga bwete, langa kazaga ho yahize, ho yawulaje no kongomeza. Ane naza, anye ho muwe no wumi. U wumi wono wukwilaniciye.” 11 Ane yo nene mudimi muswanu. U mudimi muswanu, kawusuzaga u wumi wakwe ku soko ye zingholo zakwe. 12 U munhu mono yakudima ku soko yo kulipwa musahala, yuyo si mudimi, hamba ne zingholo si sawo yakwe, kolo yakuwona liminzi likuza, yakuzileka zingholo, yakutiza. Nalyo liminzi likuzibata no kuziyagaza. 13 U mudimi mono kadimaga so musahala, katizaga no kuzileka i zingholo, vyono u mwene yakuzidima ku soko yo kulipwa musahala. 14 Ane yo nene u mudimi muswanu. Iwangu niwamanyile, nawo iwangu, wamanyile'ne, 15 nha vyono Baba yamanyile, nane vyono nimumanyile Baba. Nane nghuwulavya u wumi wangu, ku soko ye zingholo. 16 Hozili zingholo zangu zinji zono si zili mwi'bululu lili, yinojeye zizo nazo nizilete; Nazo zolihulika ilizi lyangu. Nazo zowa yitewa limonga no mudimi yumonga. 17 “Ku soko yiyo holeka Baba yanyendile, vyono nghuwulavya u wumi wangu, ho niwusole kanyhi. 18 Hasina munhu mono yakumboka u wumi wangu, langa nghuwulavya nene no mweneco. I vilungo vyo kuwulavizya, nina navyo, ne vilungo vyo kuwusolela kanyhi, nina navyo. Na Baba vyo yandajiliza nitume.” 19 Hakawa na witemanuce kanyhi muli Wayahudi so zinghani zizi. 20 Wenji wayawo wakatya, “Yena macisi, kanyhi yena lukwale, alo so cici mukumuhuliciza?” 21 Wanji wakatya, “I milonjele ayi, si ya munhu mono yena lukwale, hambi i licisi lyosuma kunuguza meso ge wabofu?” 22 Kuko ku Yelusalemi, kwali koyili Sikukuu yo Wusiwanule we Nyumba yo Mulungu, mu vilo vye cinyuli. 23 Nayo Yesu lono yajendajendaga mu Nyumba yo Mulungu, mwi'kumbo lya Solomona. 24 Iwayahudi wakamupilima, wakamuwuza wakutya, “Alo kojendelela kucenyhemeka mu zinhumbula zetu sunga nili? Hono yo gwegwe Kilisito, ale wucilonjelaje cimanye.” 25 Yesu yakawapitula, yakawatya, “Nha nimulonjelenyi, ninga si mukwihuwila. I milimo yono nghwitumila mwitagwa lya Baba, yiyo yo yikuhomelela. 26 Ninga anye si mukwihuwila, vyono si muli wayagwe ne zingholo zangu. 27 Izingholo zangu zikuwa kulihulika ilizi lyangu, nane nizimanyile, nazo zinhyatyaga. 28 Nane nghuzipela wumi we cibitilila, nazo si zolokwajilila yaye, hamba hasina yunji mono kosuma kuziboka mu muwoko wangu. 29 Baba mono yamhela, yo Muwaha yacizize wose, na hasina munhu mono kosuma kuziwusa mu miwoko ya Baba. 30 Ane na Baba yo monga.” 31 Iwayahudi wakatondola mabwe ho wamutowanje. 32 Yesu yakawatya, “Nha nimulajilenyi milimo minji yono yikulawa kuli Baba, alu mulimo wa hayi muli yiyo, wono woleka munhowe ne mabwe?” 33 Wayahudi wakamutya, “Ase si cikukutowa ne mabwe ku soko ye milimo miswanu, langa ku soko vyono wukumutovula u Mulungu! Ku soko agwe wukwinoza nha wuli Mulungu, na kumbe agwe ho wuli munhu du.” 34 Yesu yakawatya, “Wule, si yandicigwe mu Wulajilize wenyu vyono u Mulungu yatya, ‘Yo nyenye milungu?’ 35 Hono Mulungu yawatezaga milungu, wawalya wono wapegwa i nghani yakwe, holeka nase cimanyile vyono, Imandiko Gono Gelile, galongaga imbeka nhondo zose. 36 Alu ma, u mwene mono Baba yamuhagula, yakamutuma kononze, mukumutya yakutovula, ati vyono nheye, ‘Ane nili Mwana wo Mulungu?’ 37 Holeka hono niwe si nghwituma i milimo ya Baba, ale mulece kunyihuwila, 38 ninga hono niwe nghwituma na hono si munyihuwiye nene, ale mwali muyihuwile i milimo, ho mumanye no kwizuka vyono Baba yali muli nene, nane nili muli Baba.” 39 Wakajela kanyhi kumwibata Yesu, ninga mwene yakawuka hali wene. 40 Yesu yakabita kanyhi ku nhumbi nzagwe ya Yoludani, hono Yohana yabaputizizaga, yakekala kuko. 41 Ne wanhu wenji wakamubitila, wakatya, “Yohana si yanoza citanjilo co cose. Ninga zose zono Yohana yalonga za muli munhu ayu, za mbeka.” 42 Ne wanhu wenji wa kuko wakamwihuwila.

11

1 Munhu yunji, litagwa lyakwe Lazalo munya Betaniya, yali yatamigwe. (Icitumbi ca Betaniya, ho hanhu hono wekalaga wa Malita no mwanakwawe Malyamu. 2 Nayo Malyamu yo yulya mono yamubaka Muwaha mafuta maswanu, kanyhi yakawa kumupata mu magulu ne zimvili zakwe. U lumbulye Lazalo yo yali yatamigwe.) 3 Ale wawo walumbuze wakatuma munhu kuli Yesu, wakutya, “Muwaha, mwendece wako yatamigwe!” 4 Ninga Yesu yaza hulika, yakatya, “Uwutamwa wuwu si womuwulaga yaye, langa wuli so lukumyo lo Mulungu, katamwa ho u Mwana wo Mulungu nayo yakumizywe muli wuwo.” 5 Yesu yali yawendile wa Malita, no mwanakwawe Malyamu, na Lazalo. 6 Yesu yaza kuhulika vyono Lazalo yatamigwe, yakajendelela kwikala baho hono yali, sunga vikapuluta vilo vyejete. 7 Hanyuma yakawatya iwejizwa wakwe, “Ciwuye kanyhi ku Yudiya.” 8 Iwejizwa wakamutya, “Mwijizi, vilo vivi du baha, lono Iwayahudi wasaka kukuwulaga na mabwe, nagwe wukusaka kuwuya kuko kanyhi?” 9 Yesu yakapitula yakawatya, “I vipango yikumi na vyejete vye misi, alo vili kusina? Munhu hono yajende misi, si kosuma kwikobala, hambi nha yakuwuwona u wuzelu we yinze yiyi. 10 Ninga munhu hono yawe kujenda ne cilo, kokwikobala, vyono wuzelu wuli musina muli mwene.” 11 Yesu yaza kukondya kulonga zizi, yakawatya, “Mwendece wetu Lazalo yagonile, ninga ane nobita nghamusinhuse.” 12 Iwejizwa wakwe wakamutya, “Muwaha, hono yawe yagonile kopona.” 13 Wene wehwesaga vyono lunji yakulonga wugone we zinhongo, kumbe Yesu yalongaga zo wufwe wa Lazalo. 14 Baho Yesu yakawalonjela, yakatya, “Lazalo yafwiza. 15 Ninga nane nghusangalala ku soko yenyu, vyono ane si nali nili kuko, nanye ho mwihuwile. Alenyi le cibite kuli mwene.” 16 Baho Tomaso mono yacemwaga we Matundu, yakawatya iwejizwa wayagwe, “Ale cibitenyi nase hamonga no Mwijizi, cikafwizane hamonga nayo.” 17 Nayo Yesu yaza kufika kuko, yakagana Lazalo yali yakondya kugona vilo vine mu citenjelo. 18 Icitumbi ca Betaniya cali cili behi na Yelusalemi, cihinzo ca kilometa yidatu du. 19 Ne Wayahudi wenji wali wafika kwa wa Malita na Malyamu, ho wawapele pole, so lifwa lyo lumbu lyawo. 20 Nayo Malita yaza kuhulika vyono Yesu yakuza, yakabita kumuhinjiliza, ninga Malyamu yakasigala mu nyumba. 21 Malita yakamutya Yesu, “Muwaha, mhali wali wuwe wuli baha, u lumbu lyangu si yali yafwe ng'o. 22 Ninga sunga na lulu manyile vyono yono kosaka kuli Mulungu, u Mulungu kokupela.” 23 Nayo Yesu yakamutya, “Ulumbulyo kozuka.” 24 Malita yakamutya, “Manyile vyono kolozuka ku wuzuce we lizuwa lya ku ndumo.” 25 Yesu yakamutya, “Ane nha yo nene wuzuce, no wumi. Nayo mono yanyihuwiye nene, hamba yafwe kowa mumi, 26 nayo mono yakali mumi, hono yawe kwikala yanyihuwiye nene, si kolofwila lukulu. Wule, wihuwiye muli zizi?” 27 Malita yakamutya, “Heya Muwaha! Ane nihuwiye vyono yo gwegwe Kilisito, u Mwana wo Mulungu u muza kononze.” 28 Malita yaza kukondya kulonga zizo, yakabita, yakamucema u mwanakwawe Malyamu, yakamulonjela cinyele, yakutya, “U mwijizi yali baha yakukucema.” 29 Nayo yaza kuhulika, yakenuka mbela mbela, yakamubitila Yesu. ( 30 Yesu yali yakali si nafika mu citumbi, ninga yali yakali yali hanhu bahalya hono Malita yamwagana.) 31 Iwayahudi wono wali wali hamonga nayo mu nyumba, wono wamutuzaga, waza kuwona vyono Malyamu yakwinuka musunho, no kulawila kunze, wakamutyatya, watezaga 'mba lunji, yakubita ku citenjelo yakalilile kuko. 32 Nayo Malyamu yaza kufika hono hali ho yuli Yesu, yaza muwona, yakafugama, yakamutya, “Muwaha mhali wali wuwe wuli baha, ulumbu lyangu si yali yafwe ng'o.” 33 Yesu yaza kumuwona Malyamu yakulila, ne Wayahudi wono wazana nayo, nawo wakulila, lusungu lukamukola mu nhumbula, nayo yakatamika muno, yakatya, 34 “Alo mwamuzika hayi.” Wakamutya, “Muwaha wuze wulanje.” 35 Yesu yakalila mahozi gakalawa. 36 Iwayahudi wakatya, “Lanjenyi ta vyono yali yamwendile.” 37 Ninga wanji wakatya, “Munhu ayu yasuma kumunuguza meso u munhu we cibofu, alu si yali yasume kumwimila Lazalo yalece kufwa.” 38 Yesu yakakalala kanyhi mu nhumbula, yakafika ha citenjelo, naco citenjelo cali ca mhango, naco cali cigubicizwe ne libwe. 39 Yesu yakatya, “Wusenyi libwe.” Ninga Malita munghalo lumbulye mono yafwiye, yakamutya, “Muwaha, alu nha yeza kunungha, ku soko yakondya kuwa mu citenjelo vilo vine.” 40 Yesu yakamutya, “Alo si nghulonjela vyono hono wihuwile, kowona lukumyo lo Mulungu?” 41 Hodu, wakawa kuliwusa libwe. Nayo Yesu yakagalamila ku wulanga, yakatya, “Baba nghukulumba vyono agwe wukuhuliciza ane. 42 Nane manyile vyono wukuwa kuhuliciza ane nhondo zose. Ninga ku soko ye wanhu wono wali baha, holeka nonjile, ho nawo wehuwile, vyono yo gwegwe mono wanhuma.” 43 Nayo yaza kukondya kulonga zizo, yakacema kwa yizi iwaha, yakutya, “Lazalo, wulawile kononze!” 44 Nayo mono yali yafwiye, yakalawila kunze, akuno vyo muwopwe ne sanda mu magulu ne mawoko, no wusu wakwe wugubicizwe. Yesu yakawatya, “Mumuwopole, mumulece yabite.” 45 Holeka Wayahudi wenji wono wali wazize kuli Malyamu, waza kuziwona zizo zono Yesu yetumile, wakamwihuwila. 46 Ninga wanji wayawo wakabita kuli Wafalisayo, wakawalonjela zono Yesu yetumile. 47 Holeka i Wakohani wawaha, ne Wafalisayo wakekonghola hamonga, wakatya, “Alu conoza nhawule? Hambi munhu ayu nha yakunoza vitanjilo vinji muno. 48 Na hono cimuleceleze nhavivi, wanhu wose womwihuwila, nawo Walumi wokuza wayihodanje Nyumba yetu yo Mulungu, hamonga ne nghungugo yetu yose!” 49 Ninga yunji muyawo mono yakucemwa Kayafa, mono yali yo Mukohani muwaha mu mwaka wuwo, yakawatya, “Anye si mumanyile cinji hamba hadodo!” 50 Wulenyi, si mukuwona vyono yimunojeye munhu yumonga yafwe, ku soko ye wanhu, si nho kwajiliza likungugo lyose. 51 Mwene si yazilonga zizi mu mahala gakwe mweneco, langa vyono mwene yo yali Mukohani muwaha mu mwaka wuwo, yakawila vyono Yesu kolifwila likungugo lyawo. 52 Kanyhi hamba si likungugo lyawo du, langa ho yasume kuwakongholela hamonga iwana wo Mulungu wono wali weyagaye. 53 Nawo vyono walawa lizuwa lililya, i walongola we Wayahudi wakawa kulondola nzila ho wamuwulaje Yesu. 54 Holeka nayo Yesu si yasuma kujenda ciwonelela hamwande ye Wayahudi. Ninga yakawuka kuko, yakabita sunga ku yisi yono yili behi na ku nyika, kwitumbi lyono lyacemwaga Efalemi. Yakekala kuko hamonga ne wejizwa wakwe. 55 Ale, Isikukuu ye Wayahudi yo ye Pasaka, yali yeza yili behi, na wanhu wenji wakabita ku Yelusalemi, ho weyeze lono sikukuu yiyo yikali. 56 Nawo wakawa wakumulondola Yesu, nawo lono wali wekongholela mu Nyumba yo Mulungu, wakewuza, weneco wose, wakutya, “Alu wulenyi, sikokuza ku sikukuu ye Pasaka?” 57 Iwakohani wawaha hamonga ne Wafalisayo, wali walajilize vyono, hono munhu yawe yamanyile Yesu hono hoyuli, ale yawalonjelaje, ho wamwibate.

12

1 Lono vyali vikali vilo mutandatu, ho yiwe sikukuu ye Pasaka, Yesu yakaza ku Betaniya, kono yekalaga Lazalo, mono Yesu yamuzukula mu wafu. 2 Wakamwitumamila kuko ndigwa za cinyamihe, nayo Malita yakawa kuwetumamila. Ninga Lazalo yali muyagwe na awalya wono wali wekaye ha zindigwa hamonga na Yesu. 3 Nayo Malyamu yakasola supa ye mafuta maswanu, go wuguzi wukamu, yakamubaka Yesu mu magulu gakwe, yakamupata kwe zimvili zakwe. Ne nyumba yose yikamema imhunjile swanu ye mafuta. 4 Ninga Yuda Musikaliyota, muyagwe ne wejizwa wakwe, mono kolomugaluka, yakatya, 5 “Alo so cici mafuta gaga si gaguzigwe pesa dinali magana madatu, ne zipesa zizo wapegwe waciwa?” 6 Yalonga zizi si vyono yawakumbucilaga waciwa, langa ku soko vyono u mwene yo yali mutunza mufuko we zipesa, kanyhi yali muhizi, na kenji na kenji, yahizaga zipesa zono zatajilagwa mumo. 7 Ninga Yesu yakatya, “Mulece kumugaza yuyu Malyamu. Mumulekaje yambikanizize cono yena, so lizuwa lyangu lyo kuzikwa mu citenjelo. 8 Hambi i waciwa nha mowa mwina nawo nhondo zose. Ninga ane si mowa nane nhondo zose.” 9 Iwayahudi wenji, wakamanya vyono Yesu yali kuko ku Betaniya, holeka wakaza kuko, si vyono wasakaga kumuwona Yesu du, langa wasakaga wamuwone na Lazalo nhavivilya, mono Yesu yamuzukula mu wafu. 10 Ninga Wakohani wawaha wali walamuye vyono, wamuwulaje na Lazalo nhavivilya. 11 Ku soko vyono, Iwayahudi wenji, wali wawagaluka walongola wawo, no kumwihuwila Yesu, ku soko ya Lazalo. 12 Imitondo yaco, mhuga mbaha ye wanhu wono wali wazize ku sikukuu ye Pasaka, waza kuhulika vyono Yesu yakuza ku Yelusalemi, 13 ale, wakasola i manhambi ge mitende, wakalawila, wakabita kumuhinjiliza, wakazoza wakutya, “U Mulungu yalumbwe! Mumoti mono yakuziza mwitagwa lyo Muwaha. Mumoti mutemi wa Isilayeli.” 14 Nayo Yesu yaza kuyiwona inyana ye ndogowe, yakapanda mucanyha yayo, nha vyono gakutye Mandiko, 15 “Wulece kogopa go likaya lya Sayuni. Langa ta, u Mutemi wako yakuza. Yapandile mu nyana ye ndogowe.” 16 Na mwipango lilyo iwejizwa wakwe hamba si wasuma kuzitanga zizo. Ninga Yesu yaza kondya kukumywa, baho ho wakumbucilila vyono zizi zali zandikwe zo mwene, na vyo iwanhu wamutendela nhavivyo. 17 Ne mhuga ye wanhu, wono wali wali hamonga nayo mwi'pango lyono yamucemela Lazalo mu citenjelo, yakamuzukula mu wafu, nawo wakazilonga zizo zono zejela. 18 Holeka imhuga yose ye wanhu, yikamuhinjiliza, hambi nha wali wahulika vyono Yesu yali yacinoza i citanjilo cico. 19 Holeka Wafalisayo wakalongana weneco wose, wakutya, “Alu mwawona! Si cosuma kwituma nghani yo yose! Lanje, vyono we yinze wose wakumutyatya.” 20 Kwali na Wagiliki wanji muli wawo wanhu, wano wali wazize ku Yelusalemi ku wuhembi, mwipango lye Sikukuu yiyo. 21 Wawo wakamuziza Filipo, (munya ku Betesayida ya ku Galilaya,) wakamutya, “Muwaha, cikusaka kumuwona Yesu.” 22 Filipo yakabita, yakamulonjela Andeleya. Nayo Andeleya wakabitana hamonga na Filipo, wakamulonjela Yesu. 23 Nayo Yesu yakawatya, “Icidaha co kukumizywa u Mwana wo Munhu, cakondya kufika! 24 Mbeka nghumulonjelenyi, imhece yo wuhemba, hono yilece kugwa mu muhangha yifwe, yosigala yili wene du. Langa hono yifwe, yilelaga mana menji. 25 Mono yawendile wumi wakwe yo yakuwajiliza, nayo mono yawusulile wumi wakwe mono yinze yiyi, yo kolowukamisa sunga ku wumi we cibitilila. 26 Munhu mono yakusaka kunyitumamila, yimunojeye yanhyatye, kanyhi ho hose hono nili honili ane, baho ho kowa no mwitumami wangu. No munhu wo wose mono yakunyitumamila ane, nayo Baba komupela lilumbo. 27 “Alu nhumbula yangu yikugazika, wule, alu noze cici? Hamba nitye, ‘Baba wulece kucikombola icidaha cici cificile?’ Ninga yo soko yono yaleka ane nghaza, ho nicikolele i cipango cici ce magazo. 28 Baba wulikumyaje litagwa lyako.” Baho likaza lizi likulawa ku wulanga, likutya, “Nalikumya, kanyhi nolikumya.” 29 Ne lipuga lye wanhu wono wali wemile behi, nawo wakalihulika 'lizi lilyo, na wanji wayawo wakatya, “Lyali yididimo lya Mvula.” Ninga wenji wa muli wawo, wakatya, “Malayika yalonjile nayo.” 30 Ninga Yesu yakawalonjela yakatya, “Lizi lili, si lizize so nene, langa liza so nyenye. 31 Alu co cipango co kuling'anizwa iyinze yiyi, alu muwaha we yinze yiyi kotagwa kunze. 32 Nane kolo nghwinulwa hacanyha ye yisi, nowakwejela wanhu wose kono kwangu.” 33 (Yazilonga zizi yakulajila wufwe wakwe vyono kofwa.) 34 Holeka lipuga lye wanhu likamupitula, likatya, “Ase cahulika mu Wulajilize, vyono Kilisito kekalaga cibitilila. Alu agwe kosuma nhawule kutya, ati, ‘U Mwana wo Munhu si koleka kwinulwa?’ Alu yuyo u Mwana wo Munhu yo nani.” 35 Yesu yakawatya, “Cikali cidaha cidodo, u wuzelu mwina nawo. Holeka mujende lono mukali mwina wuzelu wuwo, ho citi cilece kumwaganenyi. Ku soko mono yakujenda mu citi, si yamanyile na kono yakubita. 36 Holeka lono mukali mwina wuzelu, muwihuwilaje wuwo wuzelu, ho muwe wana wo wuzelu.” Yesu yaza kukondya kulonga zizi, yakawuka, yakehundika. 37 Ninga hamba yawe yanoza vitanjilo vinji hali wene, si wamwihuwila ng'o. 38 Holeka inghani yono yalongwa no muwizi Isaya, yikafisilizwa, yono yatya: “Gwe, Muwaha, nani'mbi, mono yehuwila zono calonga? Hamba nani 'mbi mono yagubulilwa i vilungo vyo Muwaha?” 39 Ku soko yiyo, si wasuma kwihuwila, hambi Isaya nha yatya kanyhi: 40 “U Mulungu kawabofuza meso gawo, Kawapuvya i mahala gawo Ho walece kuwona ne meso Hamba walece kwizuka mu mahala gawo Hamba kumhitucila ho niwaponye.” 41 Isaya yazilonga zizi, vyono yaluwona ulukumyo lwa Yesu, yakalonga zo mwene. 42 Hamba nhavivyo, iwalongola wenji we Wayahudi, wamwihuwila Yesu. Ninga si wasuma kumuvumila ciwonelela, vyono wawogopaga Iwafalisayo, ho walece kuwawinga mu nhang'anilo yo wuhembelo. 43 Hambi wene nha wali wendile kukumywa ne wanhu si nho kukumywa no Mulungu. 44 Hanyuma, Yesu yakalonga na lizi iwaha, yakatya, “Munhu mono yanyihuwiye nene, si yanyihuwiye nene du, langa yamwihuwiye mono yanhuma.” 45 Nayo mono yakumbona nene, yakumuwona na yuyo mono yanhuma. 46 Ane naza, ho niwe wuzelu kononze, muli wose wono wonyihuwila, walece kwikala mu wutitu. 47 Na munhu hono yazihulice zono nghulonga, nayo ho yalece kuzibata, ane singhumuling'aniza, hambi ane nha si naza ho niwaling'anize wa mononze, langa niwaponye wa mononze. 48 Nayo mono si yakwibata zinghani zangu, yali baho mono yakumuling'aniza, Inghani yiyilya yono nalonga, yo yolomuling'aniza Mwizuwa lya ku Ndumo. 49 Ku soko ane si nonjile ko wulajilize wangu no mweneco, langa Baba mono yanhuma, yo yandajilize zono nolonga na zono notya. 50 Nane manyile vyono ililajilizo lyakwe, liletaga wumi we cibitilila, holeka ane nghulonga zizilya du, zono Baba yanonjela, zo nghulonga.

13

1 Isikukuu ye Pasaka, lono yali yikali nafika, Yesu yakamanya vyono cidaha cakwe cafika, co kuwuka mono yinze yiyi, yabite kuli Sogwe. Nayo yakawendela lukulu iwanhu wakwe, wono wali mononze sunga ko ku ndumo. 2 Na ha ndigwa ze cinyamihe, lono Yesu yali yekaye hamonga ne wejizwa wakwe, Setani yali yakondya kumufunda Yuda Musikaliyota u mwana wa Simoni, ho yamugaluce Yesu. 3 Nayo Yesu yali yamanyile vyono Sogwe yamupeye vyose mu mawoko gakwe, na vyono yalawa kuli Mulungu, na kanyhi yakuwuya kuli Mulungu. 4 Hobaho yakalecelela kulya, yakenuka, yakawuwika hamhelo u mwenda wakwe wa mucanyha, yakasola citema yaketunga mu ciwino. 5 Yakawa kutajila i malenga mu ciya, yakawa kwanza kuwazuguza iwejizwa wakwe imigulu, no kuyipata ne citema cono yali yetunjile. 6 Yakafika hali Simoni Petelo: Nayo Petelo yakatya, “Muwaha, alo gwegwe wunzuguze magulu gangu?” 7 Yesu yakamulonjela, yakamutya, “Yono nghunoza alu, agwe si wuyimanyile, ninga koloyimanya hanyuma.” 8 Petelo yakamutya, “Agwe si ko nzuguziza lukulu imigulu yangu.” Yesu nayo yakamutya, “Hono ndece kukuzuguza, hodu, si kosuma kuwa mwijizwa wangu kanyhi.” 9 Simoni Petelo yakamutya, “Muwaha, nzuguzaje, ninga si migulu yangu du, langa sunga ne miwoko yangu no mutwe nhavivilya.” 10 Nayo Yesu yakamutya, “Mono yakondya kwihovuga, si kosaka kanyhi kwihovuga, langa magulu, hambi nha yakondya kwela u muwili wose. Ale, nanye mwelile, ninga si wose.” ( 11 Hambi nha yali yamanyile mono komugaluka, ku soko yiyo, holeka yatya, “Si mwelile wose.”) 12 Nayo yaza kukondya kuwazuguza imigulu, no kuvwala civwalo cakwe, yakekala kanyhi, yakawatya, “Wulenyi mwamanya vyono nimutendelenyi? 13 Anye mukuwa kunyitya, Mwijizi, kanyhi Muwaha, mulongaga mbeka, hambi nha yo nene. 14 Holeka hono ane no Muwaha, kanyhi no Mwijizi, nimuzuguzenyi imigulu yenyu, nanye cinojele muwe kwiyizuguza imigulu munhu na muyagwe. 15 Hambi nha nimupelenyi luzu, nanye ho muwe kunoza nha vyono nimutendelenyi nyenye. 16 Mbeka nghumutyenyi, u mwitumami si yamucizize u muwaha wakwe, hamba mono yatumwa, si yamucizize mono yamutumile. 17 Holeka hono muwe mwayimanya i mbeka yiyi, mowa wamoti hono muyitume. 18 “Zizi si nghumulonjelenyi wose. Niwamanyile wono nawahagula. Ninga yinojeye i Mandiko Gono Gelile gafisilizwe gono gakutya, ‘Yuyulya mono cikuhanga nayo zindigwa zangu, kapituka no kungaluka.’ 19 Ane nghumulonjelenyi zizi, lono zikali si nawa kwijela, na kolo zikuwa, ho mwihuwile vyono Yo Nene. 20 Mbeka nghumutyenyi, Mono yakumubocela mono yanhuma, yakumbocela nene, nayo mono yakumbocela nene, yakumubocela mono yanhuma.” 21 Yesu yaza kukondya kulonga zizi, yakagazika muno mu nhumbula, yakawa kulonga yakatya, “Mbeka nghumutyenyi, muyenyu yumonga, kongaluka.” 22 Iwejizwa wakelangalanga, hamba si wasuma kumanya mono Yesu yakumulonga. 23 Yumonga muyagwe ne wejizwa, mono Yesu yali yamwendile muno, yali yekaye behi na Yesu. 24 Simoni Petelo yakamukonyeza yuyo no muwoko, yakamutya, “Muwuzaje ta, yakulonga nani?” 25 U mwijizwa yuyo, yakasejelela behi muno na Yesu, yakamuwuza yakutya, “Ati Muwaha, alo nani mwene?” 26 Nayo Yesu yakamupitula yakatya, “Mono nomuliliziza nhonje nimupele, yo mwene.” Nayo yaza kulilize nhonje, yakamupela Yuda, mwana wa Simoni Musikaliyota. 27 Nayo Yuda yaza kuyibocela inhonje yiyo, yakenjilwa na Setani. Nayo Yesu yakamutya, “Yono wukwituma, ale, witume mbela.” 28 Hamba hasina yunji mono yali yekaye ha wulilo, mono yamanya ku sokoci, holeka Yesu yamulonjeye zizo. 29 Ninga ku soko vyono Yuda yo yatunzaga u mufuko we zipesa, holeka wanji wakehwesa vyono, kowa Yesu yamulonjelaga yakagule vyono vikusakwa so sikukuu, hamba lunji yamulonjelaga yalavye cinji kuli waciwa. 30 Nayo Yuda yaza kuyibocela nhonje yiyo, hobaho yakalawila kunze, naco cali cilo. 31 Yaza kuwa Yuda yalawila kunze, Yesu yakatya, “Alu u Mwana wo Munhu kakumywa, no Mulungu kakumizywa muli mweneco. 32 Na hono lukumyo lo Mulungu lwanzalicilwa muli mwana. Nayo Mulungu kolwanzalicila u lukumyo lo Mwana muli mweneco, nayo konoza nhavivyo kamonga. 33 “Wanangu, cowezana nanye hadodo vivi du. Monondola, Ninga nalu nghumulonjelenyi nha vyono nawalonjela iwalongola we Wayahudi, ‘Ane kono nghubita, anye si mosuma kuza.’ 34 Nghumupelenyi lilajilizo yipya, mwiyendaje, nha vyono nimwendilenyi anye, nanye vyo mwiyendaje. 35 Hono mwiyende, iwanhu wose womanya vyono yo nyenye wejizwa wangu.” 36 Simoni Petelo yakamutya, “Alu Muwaha, wukubita hayi?” Yesu yakatya, “Kono nghubita alu baha, si kosuma kunhyatya, ninga kolonhyatya hanyuma langa.” 37 Petelo yakamutya, “Muwaha ku sokoci si nosuma kukutyatya lulu baha? Ane niwikanize hamba kufwa ku soko yako.” 38 Yesu yakatya, “Wule, wiwikanize mbeka kufwa ku soko yangu? Mbeka nghukulonjela Petelo, Nzogolo yowa yikali sinalila, nagwe kowa wanghana kali kadatu, wukutya vyono si wumanyile'ne.”

14

1 Yesu yakawalonjela, yakatya, “Mulece kugazika mu zinhumbula zenyu, Mumwihuwiye Mulungu, ale munyihuwile na nene. 2 Ku kaya ya Baba kowuli wikalo winji, mhali si nhavivyo, nali nimulonjelenyi. Alu nghubita kumuwikanizizenyi wikalo. 3 Na hono mbite, nghamuwikanizizenyi wikalo, nolowuya, ho nimucemelenyi kwangu, nanye ho mwikale hono ho nili ane. 4 Nanye muyimanyile nzila yo kubitila kuko kono nghubita.” 5 Tomaso yakamutya, “Muwaha, ase si cimanyile kono wukubita, alu cosuma nhawule kuyimanya yiyo nzila?” 6 Yesu yakamutya, “Ane nha yo nene nzila, ne mbeka, no wumi. Hasina mono kosuma kubita kuli Baba, langa sunga yakolele muli nene. 7 Mhali mumanye ane, ho mwali mumumanye na Baba. Alu na lulu mumumanyile, kanyhi mwakondya kumuwona.” 8 Filipo yakamutya, “Muwaha, wucilajile u Sogo yo munhu, nase cokwiguta.” 9 Yesu yakamutya, “Alo Filipo, i vilo vyose vivi vyono nikalane nanye, hongo wukali sinamanya? Mono yakondya kumbona ane, yamuwona na Baba. Alu kosuma nhawule kutya, ‘Wucilajile u Sogo yo Munhu.’ 10 Alo si wihuwiye vyono ane nili muli Baba, nayo Baba yali muli nene? Zinghani zono nimulonjelenyi, nha singhulonga no mweneco du, langa Baba mono yekaye muli nene, yo ketumaga imetumo gakwe. 11 Yinojeye anye, munyihuwile vyono nghutya ane nili muli Baba, nayo Baba yali muli nene. Hamba lunji, munyihuwile so metumo geneco gono nghugetuma. 12 Mbeka nghumutyenyi: Mono yanyihuwiye, imetumo gono nitumaga, nayo kogetuma, kanyhi kosuma kwituma sunga ne mawaha gono gacizize gaga. Vyono ane nghubita kwa Baba. 13 Na yo yose yono molomba mwitagwa lyangu, nokwituma, ho Sogo yo Munhu yakumizywe muli mwanagwe. 14 Hono mulombe cinji mwitagwa lyangu, vyo nonoza. 15 “Hono munyende, mokwibata i malajilizo gangu. 16 Nane nomulomba Baba, nayo komupelenyi mutazi yunji, yawezane nanye myaka ne cibitilila. 17 U mwene yo Muhe we mbeka, mono we yinze si wosuma kumubocela, hambi nha si wosuma kumuwona, hamba kumumanya kose. Ninga anye mumumanyile, hambi nha mwikalaga nayo, nayo yali muli nyenye. 18 “Si nomulecenyi anye nha muli wana walekwa, ninga nomuzizenyi kanyhi. 19 Hakali hadodo we yinze, si wowa kumbona kanyhi, anye langa mombona, na vyono ane nili mumi, na nyenye nanye mowa womi. 20 Mwizuwa lilyo, anye ho molomanya vyono ane nili muli Baba, nanye muli muli nene, nane nili muli nyenye. 21 Mono yena malajilizo gangu no kugebata, yuyo yo yanyendile, nayo mono yanyendile kokwendwa na Baba, nane nomwenda, kanyhi nokwilajila kuli mwene.” 22 Yuda (yo siyulya mwana wa Musikaliyota ninga yunji) yakamutya, “Muwaha, yowa wule agwe wilajile vyono winha kuli ase, hamba si kuli we yinze?” 23 Yesu yakamupitula, yakamutya, “Munhu hono yanyende, yuyo kokwibata inghani yangu, na Baba komwenda, nase cokuza kuli mwene, no kwikalana nayo. 24 Nayo mono siyanyendile, si yakwibata zinghani zangu. Ne nghani yono mwayihulika, si yangu langa ya Baba mono yanhuma. 25 “Nimulonjelenyi nghani zizi, lono nghali nili hamonga nanye. 26 Ninga u mutazi, Muhe Mono Yelile, mono Baba komutuma mwitagwa lyangu, ko mwijizenyi zose no kumukumbucizenyi zose zono nomulonjelenyi. 27 “Mulamu nghumulecelenyi, mulamu wangu nghumupelenyi, si nghumupelenyi anye kotya nha vyono yinze yilavyaga. Mulece kugazika mu nhumbula, hamba mulece kwihwelela. 28 Mwakondya kuhulika nghumulonjelenyi, vyono, ‘Nghubita, ninga nomuwuyilenyi kanyhi.’ Mhali munyendile, mwali musangalale, vyono nghubita kwa Baba; hambi mwene nha yo Muwaha yanyhizize ane. 29 Na lulu nimulonjelenyi zizi, lono zikali si nawa, ho mwihuwile kolo zikwijela. 30 Si nomulonjelenyi muno kanyhi, hambi u muwaha we yinze yiyi nha yakuza, nayo hamba si kosuma cinji kuli'ne. 31 Ninga we yinze yiwanojeye wamanye vyono ane nimwendile Baba, holeka nghuzituma zose nha vyono Baba yandajiliza nitume. Inucenyi ciwuce baha.

15

1 “Ane yo nene muzabibu we mbeka, na Baba yo mulimi. 2 Mwene kaliwusaga muli'ne ilinhambi lyo lyose lyono si lilelaga mikalo, ne linhambi lyono lilelaga, kalidumulilaga ho licile kulela muno. 3 Alu anye mwakondya kwela, ku so nghani yono nimulonjelenyi. 4 Mwikalaje muli nene, nane nikale muli nyenye. Nhe linhambi vyono si lyosuma kulela mikalo lili wene, hono lilece kwikala mu muzabibu, na nyenye si mosuma kulela mikalo, hono mulece kwikala muli nene. 5 “Ane yo nene muzabibu, anye muli manhambi. Mono kekalaga muli nene, nane niwe muli mwene, yuyo yo kalelaga muno mikalo, hambi hono hasina nene, anye nha si mosuma kwituma cinji. 6 Munhu wo wose hono yalece kwikala muli nene, yakutagwa kunze kotya linhambi vyono walitagaga, nalyo liwa kunyala. Nawo wanhu wakuwa kulikongholeza, wakulitajila mu moto, nalyo liwa kutakamila. 7 Hono mwikale muli nene ne zinghani zangu hono zikale muli nyenye, ale, mulombe co cose cono mukusaka, nanye mopegwa. 8 Nayo Baba kakumywaga, hono mulele muno mikalo minji, nanye mowa wejizwa wangu. 9 Ane nimwendilenyi anye, nha vyono Baba yanyenda ane. Mwikalaje mu wendo wangu. 10 Hono mwibate malajilizo gangu, mokwikala mu wendo wangu, nha vyono nane nibate malajilizo ga Baba, nikaye mu wendo wakwe. 11 Nimulonjelenyi zizi, ho nyemo yangu yiwe muli nyenye, ne nyemo yenyu ho yikwilanicile. 12 Ali lye lajilizo lyangu, mwiyendaje, nha vyono ane nimwendilenyi anye. 13 Hasina wendo wuwaha wono wucizize u wendo wo munhu, mono yakulavya u wumi wakwe, ku soko ye wendece wakwe. 14 Anye muli wendece wangu, hono muzitume zono nghumulajilizenyi. 15 Alu anye, ane si nghumucemenyi wetumami kanyhi, ku soko u mwitumami, si yamanyile zono ketumaga u muwaha wakwe. Ninga ane nimucemenyi anye wendece wangu, ku soko vyono nimulonjelenyi zose zono nazihulika kulawa kuli Baba. 16 Anye si mwanyihaga ane, langa ane yo namwihajenyi nyenye, kanyhi nghawa kumuwagulenyi ho mubite mukalele mikalo, i mikalo yono yikalaga, nayo Baba ho yasume kumupelenyi co cose cono mukumulomba mwitagwa lyangu. 17 Ne lilajilizo lyangu, lyoli, mwiyendaje. 18 “Hono we yinze wamusulenyi, mweze kukumbucila vyono we yinze wamula kusula ane, lono wakali si namusulenyi anye.” 19 Mhali muwe muli wanhu we yinze, mhali we yinze wali wamwendenyi anye mo wanhu wawo. Ninga alu vyono si muli we yinze, nane nimwihajenyi kulawa mu yinze, holeka we yinze wakumusulenyi. 20 Mukumbucile inghani yono namulonjelenyi, yono natya, “U mwitumami si yamucizize u muwaha wakwe.” Hono ane wangaza, womugazenyi na nyenye nhavivyo. Na hono wawe wayibata inghani yangu, woyibata ne nghani yenyu nhavivilya. 21 Womutendelenyi zizi zose ku soko ye litagwa lyangu, vyono si wamumanyile mono yanhuma. 22 Mhali niwe si naza cilongane nawo, mhali wawe si wetumile wubi, ninga alu si wosuma kwikojela ku soko yo wubi wawo. 23 Mono yasulile ane, yamusulile na Baba nhavivyo. 24 Mhali si netuma kwawo imetumo gono yunji wo wose yakali nagetuma, mhali wawe wasina wubi. Ninga alu, waziwona zono nakondya kwituma, na vyono yinha, wakasula nene, kanyhi wakamusula na Baba nhavivilya. 25 Na vyo yinojeye, zizilya zono zandikwa mu Wulajilize wawo zifisilizwe, zono zikutya, “Wasula bwete. 26 “Kolo yakuza yuyo u Mutazi, mono nomutumilenyi kuwulawa kwa Baba, yo Muhe we mbeka, mono yakulawa kuli Baba, yuyo yo kolohomelela izangu. 27 Nanye mukuhomelela izangu, vyono kuwulawa mwamulizo, mwikalaga nane.

16

1 “Zizi nimulonjelenyi, ho mulece kuwuleka wihuwilo wenyu. 2 Wanhu wolowa kumuwinjenyi mu matang'anilo gawo go wuhembelo. Kanyhi icidaha cikuza cono, muli wose mono kolomuwulajenyi anye, kowona nha yakumwitumamila u Mulungu. 3 Wolomunozezenyi nhavivyo, ku soko vyono si wamumanyile Baba, hamba na nene si wamanyile yaye. 4 Ninga nimulonjelenyi zizi, kolo cikuza cidaha cazo, ho mukumbucile zizo, vyono namulonjelenyi. “Si namulonjelenyi zizi ha mwamulizo, vyono nali nikaye nanye. 5 Ninga alu nghumubitila mono yanhuma, hamba hasina muyenyu yunji muli nyenye mono yakumbuza, ‘Alo kono wukubita kwihi?’ 6 Ninga vyono nimulonjelenyi zizi, zinhumbula zenyu zimemile wukalale. 7 Ninga nghumulonjelenyi mbeka, vyono, ho vyowa viswanu kuli nyenye hono mbite, ku soko ane hono ndece kubita, u Mutazi si komuzizenyi yaye. Ninga hono mbite, ale, nomutuma kuli nyenye. 8 Nayo kolo yakuza, kowakangaziza we yinze, vyono wasutizye, kuli zo wubi, na zo wiling'ano, na ze ning'aniza yo Mulungu. 9 Wasutizye kuli zo wubi, ku soko vyono si wanyihuwiye nene, 10 wasutizye kuli zo wiling'ano, ku soko vyono ane nghubita kwa baba, nanye si mowa kumbona kanyhi, 11 wasutizye kuli ze ning'aniza yo Mulungu, ku soko vyono muwaha we yinze yiyi yaling'anizwa yakondya. 12 “Nina nyinji zo kumulonjelenyi kanyhi, ninga si mosuma kuzibocela lulu. 13 Langa kolo yakuza, u Muhe we Mbeka, yo komutonjenyi mu mbeka yose, hambi nha si kolonga zo wulajilize wakwe, langa kolomulonjelenyi zose zono kolohulika, nayo kolonga zono zikuza. 14 U mwene kolonghumya nene, hambi nha kolomulonjelenyi zono kozituga kulawa kwangu. 15 Vyose vyono yena navyo Baba, nha vyangu, na ku soko yiyo holeka nheye, yuyo u Muhe Mono Yelile, kolomulonjelenyi zono kozituga kulawa kwangu. 16 “Mu cipango cidodo, si mombona hamba nhavi, na hanyuma hadodo, ho mombona kanyhi!” 17 Holeka, wanji wa muli wejizwa wakwe, wakanza kwiwuza weneco wose, “Alo co cici, hono yakucilonjela yakutya.” Mu cipango cidodo si mombona hamba nhavi, na hanyuma hadodo ho mombona kanyhi, na kanyhi yono yakutya, “Vyono nghubita kuli Baba.” 18 Wakawa wakwiwuza du, “Alo co cici, lono yakutya, Mu cipango cidodo?” Ase sicimanyile yono yakulonga. 19 Nayo Yesu yakamanya vyono wasakaga kumuwuza, holeka yakawatya, “Alo mukwiwuza ze nghani yiyi vyono nheye, Mu cipango cidodo si mombona hamba nhavi?” Na hanyuma hadodo ho mombona kanyhi? 20 Nghumulonjelenyi mbeka, vyono anye mowa kulila no kukalala, ninga we yinze, wowa kusecelela. Anye mokalala, ninga wukalale wenyu hanyuma wolowa nyemo. 21 U mucekulu, mwipango lyo kusawa, yakuwona wusungu, hambi cidaha cakwe co wusungu nha cafika. Ninga kolo mwana yalelwa, si yakukumbucila kanyhi u wusungu, so nyemo yo kulelwa munhu kononze. 22 Anye nanye mu cidaha cici, mwina wukalale, ninga nolomuwonenyi kanyhi, ne zinhumbula zenyu zolosecelela, ne nyemo yenyu, hasina mono yakumuwusizenyi. 23 Mwi'zuwa lilyo si molosaka cinji kuli'ne. Mbeka nghumutyenyi, hono mumulombe Baba cinji mwi'tagwa lyangu, komupelenyi. 24 Sunga na lulu, mukali si nalombela cinji mwi'tagwa lyangu. Lombenyi, nanye mopegwa, nyemo yenyu ho yikwilanicile. 25 “Zizi nimulonjelenyi mu vihwanicizo. Ninga cidaha cikuza, lono si nomulonjelenyi kanyhi mu vihwanicizo, ninga nomulonjelenyi za Baba ciwonelela. 26 Mwi'zuwa lilyo molombela mwi'tagwa lyangu, nane si nghumutyenyi vyono, nolomulombelenyi kuli Baba, 27 hambi Baba nha yamwendilenyi mweneco, vyono nanye munyendile ane, mukehuwila vyono nalawa kuli Mulungu. 28 Nalawilila kuli Mulungu, nghaza kononze, alu nghuyileka kanyhi yinze, nghubita kuli Baba.” 29 Nawo wejizwa wakwe wakatya, “Alu wukulonga ciwonelela nhondo, hamba si mu vihwanicizo. 30 Alu nhondo camanya he, vyono wuzimanyile zose, hamba si wukusaka munhu yakuwuze cinji, holeka cihuwiye vyono walawa kuli Mulungu.” 31 Yesu yakawapitula yakawatya, “Wulenyi, alu mwehuwila nhondo? 32 Lanjenyi ta, cidaha cikuza, sunga na lulu caza, hono mokwiyagalila munhu kwakwe, munhu kwakwe, na mondeka nene nili wene. Ninga kumbe hamba si nili wene ng'o, hambi nha cina na Baba. 33 Nimulonjelenyi zizi, ho muwe no mulamu, mu wilunze wenyu na nene. Mononze heya, motuga wugaye, ninga mwisindamice! Ane niwasumile we yinze.”

17

1 Yesu yaza kukondya kulonga zizo, yakagalamila kucanyha ku wulanga yakatya, “Baba icidaha cafika! Ale wumukumyaje mwanago, nayo mwanago ho yakukumye.” 2 Hambi nha wamupela wulajilize muli wanhu wose, ho yawapele u wumi we cibitilila wawo wose wono wamupela. 3 Na awuno, nha wo wumi we cibitilila, “Wakumanye gwegwe, u Mulungu we ciwene, we mbeka, no kumumanya Yesu Kilisito mono wamutuma.” 4 Ane nakukumya kono'nze, nakondya kuwumaliliza u mulimo wono wamhela nitume. 5 Alu nhondo Baba, wunghumizyaje hali gwegwe ko lukumyo lululya lono nali nina nalo, lono yinze yali yikali hamba nawumbwa. 6 “Nane nghunoza agwe, wumanyice kuli wanhu wono wamhela kononze. Wali wanhu wako, nagwe wukamhela wawe wangu, nawo wayikamise inghani yako. 7 Alu wamanya vyono, vyose vyono wamhela, vikulawa kwako. 8 Ane nakondya kuwapela inghani yako yono wamhela, nawo wayibocela, nawo wamanya vyono mbeka nalawa kwako, nawo wehuwiye vyono gwegwe wanhuma. 9 “Ane nghuwalombela wawa, si nghuwalombela we yinze, langa wono wamhela, hambi nha wako. 10 Na vyose vyono nina navyo nha vyako, ne vyako nha vyangu. No lukumyo lwangu, lukwijelela muli wawo wono wamhela. 11 Nane nghuza kwako luno, si nili mono yinze kanyhi. Ninga iwene wali mononze. Baba Mono Welile, wuwakamisizaje mwitagwa lyako lyono wamhela, nghukunena wuwakamisaje, ho wawe nha yumonga, nha vyono ase nase cili yumonga. 12 Lono nali nina nawo, nawakamisiza mwitagwa lyako lyono wamhela. Ane nawacitila, hamba yunji muyawo si yajilila, langa u mwana wo wajilile, imandiko ho gafisilizwe. 13 Alu ninga nghuza kwako, na zizi nghulonjela mononze, ho wasume kuhanga mu nyemo yangu, mu wukwilanicile. 14 Ane niwapela inghani yako, nawo we yinze wakawasula, hambi wene nha si we yinze, nha vyono ane nane si nili we yinze. 15 Si nghulomba wuwawuse mononze, langa wuwacitile kuli ayulya u Mubi. 16 Wene si wa mononze, nha vyono nane si nili we yinze. 17 Wuwasiwanulile mu mbeka, inghani yako yo mbeka. 18 Nha vyono agwe wanhuma ane kononze, nhavivyo na nene nane, niwatuma kononze. 19 Na ku soko yawo, nane holeka nghwisiwanula no mweneco, nawo ho wasiwanulilwe mu mbeka. 20 “Hamba si nghuwalombela wawa du, langa nghuwalombela wose wono wonyihuwila ku soko ye zinghani zawo. 21 Nghuwalombela wose ho wawe cinhu cimonga. Baba, nghulomba wawe muli sese, nha vyono cinha nagwe, Baba, agwe wuli muli nene, nane nili muli gwegwe. Nghulomba wawe cinhu cimonga, we yinze ho wehuwile vyono yo gwegwe mono wanhuma. 22 Nane niwapela u lukumyo lono wamhela, ho wawe cinhu cimonga, nha vyono ase cili yumonga, 23 ane niwe muli wene, nagwe wuwe muli nene, nghulomba ho wakwilanicizwe no kuwa cinhu cimonga, we yinze ho wamanye vyono yo gwegwe wanhuma, na vyono wukawenda wene nha vyono wunyendile ane. 24 “Baba, wono wamhela, nghuhila, wawe hono ho nili nene, ho waluwone ulukumyo lwangu lono wamhela, hambi nha wanyenda ane hamba lono yinze yali yikali nawumbwa. 25 Gwe, Baba we ling'ani, we yize si wakumanya, ane langa nakumanya, na wawa, wamanya vyono yo gwegwe mono wanhuma. 26 Nghunoza ho wumanyice kuli wene, nane nojendelela kunoza nhavivyo, ho wendo wono wanyendela ane, wuweze muli wene, na nene niwe muli wene.”

18

1 Yesu yaza kukondya kulonga zizi, yakalawila hamonga ne wejizwa wakwe, wakabita ku nhumbi nzagwe ye cikolongo ca Kediloni. Ne hanhu baho hali ho yili busitani, nayo Yesu yakenjila mumo hamonga ne wejizwa wakwe. 2 Nayo Yuda mono yamugaluka Yesu, yali yahamanyile ihanhu baho, hambi Yesu nha yabitaga kuko kali kenji, yena ne wejizwa wakwe. 3 Baho Yuda yakasola mhuga ye Wasilikale, ne wawaha we Nyumba yo Mulungu, wono walawa kuli Wakohani wawaha ne Wafalisayo, yakabitana nawo kuko ku busitani, wena ne zitala hamonga ne vitwalo. 4 Ninga Yesu vyono yali yamanyile na katali, zose zono sizoleka kumwagana, yakalawila, yakawatya, “Alo mukumulondola nani?” 5 Nawo wakamupitula wakatya, “Cikumulondola Yesu wa Nazaleti.” Nayo Yesu yakawatya, “Ane yo Nene.” Nayo Yuda mono yamugaluka, yali yemile baho hamonga nawo. 6 Baho Yesu yaza kuwatya, “Ane yo Nene.” Wakawuya ne nyuma wakagwa hasi. 7 Yesu yakawawuza kanyhi, yakatya, “Alo mukumulondola nani?” Nawo wakamutya, “Yesu wa Nazaleti.” 8 Yesu yakawatya, “Nha nimulonjelenyi nitya, ‘Ane yo nene.’ Holeka hono mukunondola nene, ale muwalece awa wabite.” ( 9 Yazilonga zinghani zizo, ho yifisilizwe inghani yono yayilonga, yono yatya, “Muli wawa wono wamhela, si najiliza hamba yumonga.”) 10 Simoni Petelo vyono yali yena mumaje, yakawukwega, yakamubuha umwitumami wo Mukohani muwaha, ilikutu lyo kulume likawuka. Ne litagwa lyo mwitumami yuyo, lyali Maliko. 11 Yesu yakamutya Petelo, “Gomole umumaje hanhu hayo. Alo ndece kung'wa i cikombe co wusungu, cono yamheye Baba?” 12 Icipuga cicilya ce Wasilikale, hamonga no muwaha wawo, hamonga ne walongola we Wayahudi, wakamwibata Yesu, wakamuwopa, wakamula kumutegula kuli Anasi. 13 Anasi yali mukwewe wa Kayafa mono yali mukohani muwaha mu mwaka wuwo. 14 Yo Kayafa yuyo mono yawapela ilihweso Iwayahudi, vyono, yinojeye munhu yumonga yafwe ku soko ye wanhu. 15 Simoni Petelo, hamonga no mwijizwa yunji, wakamutyatya Yesu. Na yuyo u mwijizwa yunji, yali yamanyice kuli Mukohani muwaha. Holeka yakasuma kwinjila hamonga na Yesu mwikumbo lyo Mukohani muwaha. 16 Ninga Petelo yali yemile ha mulango hanze. Nayo u mwijizwa yuyo mono yali yamanyice kuli Mukohani muwaha, yakalawila kunze, vikalongana no mwana we cicekulu u mulindiliza mulango, yakamwinjiza Petelo kugati. 17 Nayo u muhinza mulindiliza mulango, yakamuwuza Petelo yakatya, “Wule, nagwe si wuli muyagwe ne wejizwa wo munhu yuyu?” Nayo Petelo yakatya, “Yo si nene.” 18 Iwetumami hamonga ne walongola, ku soko vyono yali mbeho lulo, wakawa wapembile moto wakota. Nayo Petelo yali yemile behi nawo, nayo yakota moto. 19 Nayo Mukohani muwaha yakawa kumuwuza Yesu ze wejizwa wakwe, na ze mejizo gakwe. 20 Nayo Yesu yakamupitula yakutya, “Ane nali walonjelaga wanhu wose nhondo zose cagalanze. Nane nali kwijiza hanji na hanji mu matang'anilo gawo go wuhembelo, sunga na mu Nyumba yo Mulungu, ihanhu hono wekongholelaga Wayahudi wose, hamba nghali si nalonga cinji co cose cinyele. 21 Alu nhawule wukumbuza ane? Wuwawuzaje wawo wono wahulikaga, zono nawalonjelaga. Wene wamanyile zono nalonga.” 22 Nayo yaza kukondya kulonga zizi, hobaho umwitumami yunji mono yali yemile baho, yakamutowa Yesu na kofi, akuno yakutya, “Alu nhavivi vyo wukumupitula u Mukohani muwaha hongo?” 23 Yesu yakamupitula yakamutya, “Alu hono niwe nonga vibi, wulonje i vibi vivyo vyo vya hayi, na hono niwe nonga viswanu, socici wukunhowa?” 24 Baho, Anasi yakamutegula Yesu muwope kuli Kayafa Mukohani muwaha. 25 Simoni Petelo yali yali baho yakota moto. Wakamuwuza wakatya, “Nagwe si wuli muyagwe ne wejizwa wakwe?” Mwene Petelo yakakana yakatya, “Yo si nene.” 26 Muyawo yumonga, u mwitumami wo Mukohani muwaha, u nduguye wa mono yabuhwa ilikutu na Petelo, yakatya, “Ane ma, si nakuwona gwegwe mu busitani wuli hamonga na Yesu?” 27 Petelo yakakana kanyhi, na lulo baho du, nayo nzogolo yikawa kulila. 28 Ale, waza kwela hakali mitondo muno muno, wakamusola Yesu kulawa kwa Kayafa, wakamutegula kwi'kulu. Ninga wene i walongola we Wayahudi, vyono wahilaga kuyilya Pasaka, si wenjila mwi'kulu mugati, ho walece kwavufywa. 29 Holeka Pilato yakawalawila kunze, yakawatya, “Alo mwina nghanici yono mukumusonjezeza u munhu yuyu?” 30 Nawo wakamupitula wakamutya, “Mhali yuyu si mutenda vibi, si cali cimulete kwako.” 31 Pilato yakawatya, “Ale mumusolaje nyenye, mukamuling'anizize mu Wulajilize wenyu.” Nawo Wayahudi wakamutya, “Ase cisina u Wulajilize wo kumuwulaga munhu wo wose.” ( 32 Yikawa nha vivyo, ho yifisilizwe inghani ya Yesu yono yalonga, lono yalajilaga vyono zowa zo wufwe wakwe wono kofwa.) 33 Holeka Pilato yakenjila kanyhi mwi'kulu mugati, yakamucema Yesu yakamuwuza, yakutya, “Ati, yo gwegwe mutemi we Wayahudi?” 34 Yesu yakapitula yakutya, “Mwene nghani zizi zako du gwegwe, hamba wanji wakulonjela zinghani zangu?” 35 Pilato yakapitula yakatya, “Hambi ane nili Muyahudi?” Iwayahudi wayago hamonga ne Wakohani wawaha, wo wakuletile kono kwangu. Alu agwe wanoza cici? 36 Yesu yakamupitula yakatya, “Wutemi wangu si we yinze yiyi. Wutemi wangu mhali wuwe we yinze yiyi, mhali vilewane ne wetumami wangu, ho ndece kulavywa kuli Wayahudi, alu ninga wutemi wangu si wa kononze ng'o.” 37 Baho Pilato yakamutya, “Alu agwe wuli mutemi hongo?” Yesu yakapitula, “Kulonga heya, vyono ane nili mutemi. Ane nha nalelwa ku soko yiyo, na kanyhi ku soko yiyo nghaza kononze, ho niwalonjele wanhu muli ze mbeka. No munhu wo wose mono yali mu mbeka, yuyo kahulikaga.” 38 Pilato yakamutya Yesu, “Alo yiyo imbeka co cici?” 39 Ninga nha vyono muzoweye ane nimuwopolelenyi mufungwa yumonga mu cipango ce Pasaka. Alu mukusaka nimuwopolelenyi u Mutemi we Wayahudi? 40 Baho wakazoza kanyhi wakutya, “Ng'o si yuyo, langa Balaba.” Nayo Balaba yali muhizi na muwulaji.

19

1 Hodu, Pilato yakawatya Wasilikale wamusole Yesu, wamukune ne viboko. 2 Nawo Wasilikale wakanoza cipombelo ce mamivya, wakamuvwika Yesu mu mutwe, wakamuvwika ne kanzo ye liwala lyo lugandu. 3 Wakawa kumuziza hamwande yakwe, wakutya, “Lamucenyi, Mutemi we Wayahudi! Wakamutowa makofi.” 4 Pilato yakalawila kanyhi kunze, yakawatya, “Lanjenyi ta, ane nimuleta kunze kono kwenyu, ho mumanye vyono ane singhuwona lisutya muli mwene.” 5 Baho Yesu yakalawila kunze akuno yavwalile cipombelo ce mamivya, hamonga ne kanzo ye liwala lyo lugandu. Pilato yakawatya, “Lanjenyi ta! U munhu mweneco yo ayu.” 6 Nawo Wakohani wawaha, hamonga ne wanyamhala waza kumuwona Yesu, wakawa kuzoza, wakutya “Mumutumbice mu Musalaba, Mumutumbice mu Musalaba si.” Pilato yakawatya, “Ale, mumusolaje nyenye le, mukamutumbice mu Musalaba, ninga ane singhuwona lisutya muli mwene.” 7 Wayahudi wakamupitula wakatya, “Ase cina u Wulajilize, na lono cikuwutyatya wulajilize wuwo, ayu yimunojeye yafwe. Ku soko vyono yenoza Mwana wo Mulungu.” 8 Nayo Pilato yaza kuyihulika inghani yiyi, yakacila kogopa. 9 Yakenjila kanyhi mwikulu mugati, yakamutya Yesu “Alo kulawa hayi? Ninga Yesu si yamupitula cinji.” 10 Baho Pilato yakamutya, “Hongo si wukumhitula? Siwumanyile vyono ane nina wulajilize wo kukuwopolela, no wulajilize wo kukutumbicila?” 11 Yesu yakamupitula yakatya, “Si wali wuwe no wulajilize wo wose kuli nene hamba hadodo, hono wali wulece kupegwa no Mulungu. Ku soko yiyo, yuyo mono yandavizye kuli gwegwe, kacila kuwa no wubi.” 12 Na so nghani yiyo, Pilato yakawa kulondola londola nzila ho yamuwopolele Yesu, ninga Iwayahudi wakazoza wakutya, “Hono wumuwopolele munhu yuyu, agwe si wumwendile Kayisali, muli wose mono kenozaga Mutemi, yo kamubezaga Kayisali!” 13 Pilato yaza hulika nghani zizi, yakamuleta Yesu kunze, yakekala mwigoda lyo wuling'anizi, ihanhu hono hatezagwa “Deha ye mabwe,” (na ku Cihebelaniya, “Gabata.”) 14 Nayo yali nha misi mugati, mwizuwa lyo wuwikanize we Pasaka. Pilato yakawatya Wayahudi, “Lanjenyi, Mutemi wenyu!” 15 Ninga wene wakazoza wakutya, “Muwulagaje, Muwulagaje, wumutumbice mu Musalaba si.” Pilato yakawatya, “Alo nimutumbice Mutemi wenyu?” Nawo Wakohani wawaha wakapitula, “Ase cisina mutemi yunji, langa Kayisali du.” 16 Hodu, hobaho Pilato yakawa kuwakombolela Yesu mu miwoko yawo yatumbikwe. Hobaho wakawa kumusola Yesu. 17 Nayo Yesu yakalawila akuno yedinghuliye u Musalaba wakwe, sunga hanhu hono hatezagwa, “Ha cipala,” (ku Cihebelaniya, hatezagwa, “Goligota.”) 18 Baho ho wamutumbicila yena na wanji wejete, yunji ku muwoko wo kulume, na yunji ku muwoko wo kucekulu, mwene Yesu haciligati. 19 Pilato yakandika mandiko, yakagawicila mu musalaba. Nago gali gandicigwe nhavi, “Yesu wa Nazaleti u Mutemi we Wayahudi.” 20 Ne Wayahudi wenji, wakagasoma Mandiko gago, hambi ihanhu baho hono yatumbicilwa Yesu, nha hali behi ne likaya. Ne mandiko gago gali gandicigwe mu nonga ye Cihebelaniya, na ye Kilatini na ye Cigiliki. 21 Baho iWakohani wawaha wakamutya Pilato, “Wulece kwandika u Mutemi we Wayahudi.” langa mweneco vyono yateye, “Yo nene Mutemi we Wayahudi.” 22 Pilato yakapitula yakatya, “Vyono nakondya kwandika, hodu nandika du.” 23 Iwasilikale, waza kukondya kumutumbika Yesu, wakayisola myenda yakwe, wakayipanga mafungu mane, musilikale ne 'fungu lyakwe. Wakayisola ne kanzo yakwe. Nayo kanzo yiyo, yali nunzizwe lukulu yisina luhono. 24 Holeka wakeyitya, “Cilece kuyidemula, langa ciyitowelaje kula, ho yejele mono koyisola.” Ne nghani yiyo yikanozwa nhavivyo, ho gafisilizwe mandiko gono gakutya, “Wakegawila myenda yangu Ne kanzo yangu wakayitowela kula.” Ale, nhavivyo, vyo wanoza wasilikale wawo. 25 Behi no musalaba wa Yesu, wali wemile u nyina wa Yesu, no mwanakwawe wo nyina, Malyamu u mugolece wa Kileyopa, na Malyamu Magadalena. 26 Holeka Yesu yaza kumuwona u nyina, hamonga no mwijizwa mono yali yamwendile, yemile behi no nyina, baho yakamutya nyina, “Yaya, wulanje ta, yuyo yo Mwanago!” 27 Hanyuma yakamulonjela nayo yuyulya mwijizwa, “Wulanje ta, yuyo yo nyina yako!” Na vyono yalawa lululya, u mwijizwa yakamusola, vikawa kwikalana nayo mu kaya yakwe. 28 Hanyuma Yesu, vyono yali yamanyile vyono zose zamalika, imandiko ho gafisilizwe, yakatya, “Nakaluka.” 29 Baho hali hoyili bakuli yono yali yimemile siki. Wakazabika sifongo mugati ya yiyo siki, wakayidobeceza mu lusito lwa ezobu, wakamung'wesa. 30 Nayo Yesu yaza kukondya kuyibocela yiyo siki, yakatya, “Yimalika” hodu yakenamya mutwe wakwe, yakawa kufwa. 31 Nawo Wayahudi, vyono lyali izuwa lye Ijumaa, lizuwa lyo wuwikanize. Ho miwili yilece kwikala mu musalaba mwi'zuwa lye Sabato, vyono lizuwa lilyo lye Sabato lyali izuwa yiwaha, Iwayahudi wakamulomba Pilato, imigulu ya wawo wono watumbikwa, yibenwe, ne miwili yawo yiwuswe. 32 Iwasilikale wakaza, wakamubena magulu, u mulongozi, na we kejete, wono watumbikanwa na Yesu. 33 Ninga waza kuza hali Yesu, wakawona vyono yakondya kufwa, holeka si wamubena migulu. 34 Ninga musilikale yunji muyawo, yakamucinya Yesu no mugoha ha lubavu, hobaho isakami ne malenga vikalawila. ( 35 Nayo mono yaziwona zizi, yazilonga, nanye ho mwihuwile. Na zizo zono yalonga, za mbeka, nayo yamanyile vyono yakulonga za mbeka.) 36 Ne nghani yiyo yetumwa ho gafisilizwe i Mandiko Gono Gelile. “Hasina yifupa lyakwe hamba limonga lyono lyolobenwa.” 37 Kanyhi na hanji mandiko gakutya, “Wolomulanga mono wamucinya.” 38 Zaza kukondya zizi, Yusufu wa Alimataya, yuyo yakamulomba Pilato, yawusole u muwili wa Yesu. (Nayo Yusufu yali mwijizwa wa Yesu, ninga kwa cinyele, hambi nha yawogopaga i walongola we Wayahudi.) Nayo Pilato yakalumba. Holeka Yusufu yakaza, yakawusola u muwili wa Yesu. 39 Nikodemo nayo yakaza, yo yuyulya mono ha mwamulizo yamuziza Yesu ne cilo. Nayo yakaleta vihanza hanzwe vye manemane na wudi, kotya nha kilo makumi madatu. 40 Wakawusola u muwili wa Yesu, wakawuvunjiliza mu myenda ya bafuta, hamonga na vye mhunjile, nha vyono Wayahudi wazoweye kunoza mu maziko gawo. 41 Baho hanhu hono Yesu yatumbicilwa, hali ho yili busitani, na mu busitani yiyo, mwali na citenjelo cipya, cono hamba munhu yali yakali si nazikwa mumo. 42 Alu, ku soko yo wipiganze we Wayahudi wo wiwikanize so Sabato, na vyono kanyhi icitenjelo cico cali cili behi, wakamuzika Yesu mumo.

20

1 Mwizuwa lye jumapili, hakali mitondo muno muno, lono kwali kukali kutitu titu, Malyamu Magadalena yakabita ku citenjelo, nayo yakawona libwe yiwuse mu mulango we citenjelo. 2 Nayo yakawa kubita lumangho sunga kwa Simoni Petelo, no mwijizwa muyagwe mono yali yendigwe na Yesu, yakawatya, “Wamuwusa Muwaha mu citenjelo, hamba si cimanyile hono wamuwicile.” 3 Petelo hamonga na yuyulya mwijizwa muyagwe, wakalawila, wakabita ku citenjelo. 4 Wabita lumangho wose vyono wejete, ninga u mwijizwa we kejete, yakamutiga Petelo, yakalongola kufika ku citenjelo. 5 Nayo yaza kwinama no kusunjilila mugati ye citenjelo, yakawona sanda du, ninga si yenjila mu citenjelo mugati. 6 Nayo Simoni Petelo yakaza, yakumutyatya mu nyuma, yakenjila mu citenjelo mugati, nayo yakayiwona sanda hamonga, 7 ne citambala cono cali ciwopwe mu mutwe wa Yesu. Ne citambala cico si cali ciwikwe hamonga ne sanda, langa cali cipetye, ciwicigwe hanji cili wene. 8 Nayo u mwijizwa muyagwe mono yalongola kufika, nayo ho yakawa kwinjila, yakawona, yakehuwila. ( 9 Wali wakali si nagezuka i Mandiko Gono Gelile, gono galonga gakutya, “Yali yimunojeye yazuce muli wafu.”) 10 Iwejizwa wawo wakawa kuwuya kwawo kanyhi. 11 Ninga Malyamu yali yemile ha citenjelo hanze yakulila, na lono yalilaga, yakenama, yakasunjilila mu citenjelo, 12 yakawawona wamalayika wejete wavwalile vivwalo vizelu, wekaye bahalya hono muwili wa Yesu wali wuwicigwe, yumonga ku mitwe, no muyagwe ku magulu. 13 Wamalayika wawo, wakamuwuza wakutya, “Alu yaya wukulilila cici?” Mwene yakatya, “Wamuwusa Muwaha wangu, hamba simanyile hono wamuwicile!” 14 Yaza kukondya kulonga zizi, yakelenga ku nyuma, yakamuwona Yesu yemile, hamba si yamanya vyono yo mwene Yesu. 15 Yesu yakamuwuza “Alu yaya wukulilila cici? Wukumulondola nani?” Nayo Malyamu, yatezaga lunji kowa yo mulindiliza busitani, yakamutya, “Muwaha, hono yo gwegwe wumusolile, wunonjele hono wumuwicile, nane nomusola.” 16 Yesu yakamutya, “Malyamu!” Nayo Malyamu yakapituka, yakamutya, “Laboni!” ku nonga ye Cihebelaniya, (nhunizo yayo “Mwijizi.”) 17 Yesu yakamutya, “Wulece kung'ang'anila, hambi nha nghali nabita kucanyha kwa Baba. Langa wubite wukawalonjele wandugu zangu, vyono ane nghubita kuli Baba, mono nanye yo Sogo yenyu, na kuli Mulungu wangu, mono nanye yo Mulungu wenyu.” 18 Nayo Malyamu Magadalena yakabita, yakawalonjela wa walya iwejizwa nha vyono kamuwona Muwaha, na vyono yamulonjeye zizo. 19 Mwizuwa lilyo lye jumapili cinyamihe, iwejizwa wali wehangulize hamonga mu nyumba mugati, ne milango yikawa midinde, ku soko vyono wawogopaga iwalongola we Wayahudi. Nayo Yesu yakaza, yakema haciligati yawo, yakawatya, “Mulamu wuweze muli nyenye.” 20 Nayo yaza kukondya kulonga zizi, yakawalajila imiwoko yakwe, no lubavu lwakwe. Nawo iwejizwa wakasangalala waza kumuwona u Muwaha. 21 Nayo Yesu yakawatya kanyhi, “Mulamu wuweze muli nyenye. Nha vyono ane Baba yanhuma, nane vyo nghumutumenyi nanye nhavivyo.” 22 Yaza kukondya kulonga zizi, yakawahulila, yakawatya, “Mubocele u Muhe Mono Yelile. 23 Hono muwanenele wanhu wubi wawo, wowa wanenelwa, na hono mulece kuwanenela, si wonenelwa.” 24 Ninga Tomaso, muyagwe na walya, yo we likumi na wejete, (mono yacemwaga we Matundu,) si yali yali baho hamonga ne wayagwe lono yaziza Yesu. 25 Holeka iwejizwa wayagwe wakamulonjela wakatya, “Cimuwona Muwaha.” Ninga Tomaso yakawatya, “Hono ndece kuziwona zinghomele ze misumali mu maganza ge miwoko yakwe, no kucitajila icidole cangu mu zinghomele zizo, no kuwutajila umuwoko wangu ha lubavu lwakwe, si nosuma kwihuwila.” 26 Vyaza kupuluta vilo munana, iwejizwa wawo wakawa kanyhi mumulya mugati, hamonga na Tomaso. Ne milango yali midindwe, ninga Yesu yakaza, yakema ha ciligati yawo, yakawatya, “Mulamu wuweze muli nyenye.” 27 Hanyuma yakamutya Tomaso “Lete kuno cidole cako, wulanje maganza ge miwoko yangu, wulete no muwoko wako, winjize mu lubavu lwangu. Ho wulece kuwa na mahwele, langa wihuwile!” 28 Tomaso yakapitula yakamutya, “Muwaha wangu no Mulungu wangu!” 29 Yesu yakamutya, “Alu ho wehuwila vyono wambona? Ninga wamoti wono wehuwiye, lono wakali si nawona.” 30 Yesu yavinoza vitanjilo vinji hali wejizwa wakwe, vyono si vyandikwa mu citabu cicino. 31 Ninga azino zandikwa, ho mwihuwile vyono Yesu yo Kilisito, u Mwana wo Mulungu, na mu wihuwilo wenyu wuwo, ho mutuje wumi muli mwene.

21

1 Hanyuma ya zizo, yakelajila kanyhi kuli wejizwa wakwe ha mwejelele we lilamba lya Tibeliya. Nayo yelajila nhavi kuli wene. 2 Wa Simoni Petelo na Tomaso mono yacemwaga we Matundu, na Nataneli wa ku Kana ya ku Galilaya, hamonga ne wana wejete wa Zebedayo, kanyhi na wanji wejete wa muli wejizwa wakwe, wose wawo wali wali hamonga. 3 Simoni Petelo yakawa kuwatya i wayagwe, “Nye wayangu, ane nahelela ta, ku wunimula zisomba.” Nawo wakamutya, “Nase cobitana nagwe.” Hodu, wakawa kubita, wakenjila mu ngalawa, ninga hamba siwasuma kwibata cinji mu cilo cico. 4 Na lono kwali kweza kuli behi no kwelelecela, Yesu yali yemile kwi'sangha, ninga i wejizwa hamba siwasuma kumumanya vyono yo mweneco Yesu. 5 Baho Yesu yakawawuza, yakutya, “Alu wazelelo, mukali nebata hamba cinji hongo?” Nawo wakatya, “Heya, cikali nebata hamba cinji.” 6 Yesu yakawatya, “Ale, mulutajilaje lwavu ku lubavu lo kulume lwe ngalawa, nanye mozituga zisomba.” Nawo wakalutajila lwavu, hamba si wasuma kanyhi kulukwega, so winji we zisomba. 7 U mwijizwa yuyo mono yali yendigwe na Yesu, yakamutya Petelo, “Yo mwene Muwaha.” Nayo Petelo yaza kuhulika vyono yo mwene Muwaha, yakawa kwitunga mwenda wakwe (hambi nha si yali yetunjile) yakelujila mu malenga. 8 Ninga awalya iwejizwa wanji wakaziza mu cigalawa sunga ko ku nhumbi, akuno wakulukwega lwavu lono lwali lumemile masomba, hambi nha si wali wali kutali ne yisi nghavu, langa yali nha meta yigana limonga du, ku wulawa ku nhumbi. 9 Waza kutima ku nhumbi, wakawona moto wa makala wukolelezwe, na mucanyha yayo, mwali na somba na mukate vikasikwe. 10 Yesu yakawatya, “Letenyi ta, imasomba ganji gono munimuye lulu.” 11 Nayo Simoni Petelo, yakenjila mu ngalawa, yakalukwega lwavu sunga ko kwi'sangha, nalo lwali lumemile somba zi mbaha yigana limonga na makumi mahano na yidatu, hamba ziwe zali nyinji nhavivyo, ninga u lwavu si lwademuka. 12 Yesu yakawatya, “Muze mulye.” Na hasina hamba yumonga mono yejelela kumuwuza yatye, “Gwegwe nani?” Hambi wose nha wakamanya vyono yo mwene Muwaha. 13 Yesu yakaza, yakasola mukate yakawapela, ne zisomba yakanoza nhavivyo. 14 Alu lwali lo lwe kadatu, lwa Yesu kwilajila kuli wejizwa wakwe, lono yali yakondya kuzuka muli wafu. 15 Waza kukondya kulya, Yesu yakamutya Simoni Petelo, “Ati Simoni go mwana wa Yohana, alu wunyendile ane muno muno wuwacizize wawa?” Nayo yakamutya, “Heya Muwaha, agwe wumanyile vyono ane nghwendile.” Yesu yakamutya, “Ale wudime vikolo vyangu.” 16 Lwe kejete kanyhi yakamutya, “Simoni go mwana wa Yohana, wule, wunyendile ane muno muno?” Nayo Petelo yakatya, “Heya Muwaha, wumanyile vyono ane nghwendile.” Yesu yakamutya, “Ale wudime zingholo zangu.” 17 Lwe kadatu kanyhi yakamutya, “Ati Simoni go mwana wa Yohana, wunyendile ane 'mbi?” Nayo Petelo yakakalala vyono Yesu yamuwuzize kadatu yakutya, “Wunyendile?” Yakamutya, “Muwaha, agwe wumanyile zose, wumanyile vyono ane nghwendile.” Yesu yakamutya, “Ale wudime zingholo zangu.” 18 Nghukulonjela mbeka, vyono “Lono wali wukali mudodo, wali wuzoweye kwiwopa musipi no kubita ko kose kono wasakaga. Ninga kolo weza kukombipa, kologolola mawoko gako, na yunji kolokuwopa, yakutegule kono si wendile.” 19 (Yesu yalongaga zizi, yakulajila vyono Petelo kofwa no kumukumya Mulungu). Hanyuma yakamutya, “Wunhyatye.” 20 Baho Petelo yakapituka, nayo yakamuwona yuyulya u mwijizwa mono Yesu yali yamwendile, yakuwatyatya. U mwijizwa yuyu, yo ayulya u mwijizwa mono yali yekaye behi muno na Yesu ha zindigwa ze cinyamihe, mono yamuwuza Yesu yakutya, “Muwaha nani mono kokugaluka.” 21 Holeka Petelo yaza kumuwona yuyo, yakamutya Yesu “Ati Muwaha, ayu nayo ma?” 22 Yesu yakamutya, “Hono nyende yuyu yekale sunga kolo nghuza, agwe wina nghani 'ci? Agwe wunhyatyaje nene.” 23 Ne nghani yiyo yikamanyika muli we zindugu, vyono u mwijizwa yuyo si kolofwa. Ninga Yesu si yamulonjela vyono u mwijizwa yuyo si kolofwa, langa yatya, “Hono nyende yuyu yekale sunga kolo nghuza, agwe wina nghani 'ci?” 24 Ayu yo mwijizwa mono yazihomelela zinghani zizi, no kuzandika. Nase cimanyile vyono wuhomelezi wakwe wa mbeka. 25 Kanyhi kozili zinji nyinji zono yanozaga Yesu, zono mhali zandikwe zose, monga monga, na lunji, sunga ne yinze yeneco si yali yikwile so winji we vitabu vyono vyali vyandikwe.