Fali: South of Cameroun

JOHN

1

1 A ɗaarra jày pî yèy tâaye nà, tâanjirre nà ni Fay. Yèy gi tâage Fay. 2 A ɗaarra tâanji ni Fay. 3 Jày pî mbangsi ni erra. Cen jày mbangsi, to naa ni erra gi ba. 4 E hîige gûyrra. Gûyrra maan tâage kayang da nit ây. 5 Kayang yey kayngirre a kulpi, amma kulpi ti ngor ba. 6 Fay tèera nit kana nîir wàa Yuhanna. 7 Ey dàara ngam e seedini, e yèe yèk kayang maan, ha a nit ây pî aw goosu di Fay ngam yèk yey seedini gi. 8 Ey ti tâa kayang gi ba, amma nit seedum ɗi ha e sak yèk kayang maan. 9 Kayang gi tâage kayang takundi, dàaga a kparri, kayngirre da nit ây pî. 10 Yèy gi dii nà a kparri. Fay mbangsi kparri ni erra, amma a nit ây a kparri aw cèngsu ba. 11 E tâage kayang gi, dàarage a gin nit ta wàa, amma a nit ta wàa aw ngor ba. 12 Amma da nit ây pî ngorge gi, goose gi, hîi daw mbinum ha aw tâa hàm ta Fay, 13 kpàarriya naa ni njîim koo ni gayam isi, koo ni yiɗum nirri ba, amma ni kpàarra yey anga a gin Fay. 14 Yèy nà ire isi, tâa nà mgban a tîim worro, mûu ni mbâri ni takundi. Ot rabe 'mita wàa, 'mita yey Hàm kpolo kpàara a gin Tooy gi. 15 Yuhanna seedini yèk wàa de gàa: Ey tâage nit yey yèemi nà a hak wàa gi: Nit yey dàaga a dat mum, tâage tiɗàm kpees mum, ngam ey ɗàagima. 16 A gbaarra mbâr wàa orro pî ot kpàa mbâr ây a mbâri. 17 Ngam Muusa hîinage yèk mgbèngda, amma mbâri ni takundi dàara ni Yeesu Kristu. 18 Koo wuna ti haa rapta Fay ba. Hàm wàa kpolo yey tâanji ni Tooy, ey lònu kày tâa gi. 19 Yey tâage yèk seedamku Yuhanna. Ngam a ni-Yude ây ye tèeran nit daprum ây ni ni-Lewi ây, anga a Yerusalem, aw gunuwa «muy mu wun ɗi ya», 20 de yèe tihàanjum cen de gàa: Miy mi Kristu ɗi ba. 21 De gunuwan: Ɗo muy mu wun ɗi ya? Mu Eliya ɗi yi? De gàa: Oow, mi tâa Eliya ba. De gàawan: Mu nit lònum yey waatina gi ɗi yi? De gàa: Oow. 22 De gàawan: Ɗo muy mu wun ɗi ya? Kà got ir ot sak daw da nit ây tèega dot gi ya? Kà gàamu hak wey ya? 23 Yuhanna de goosi de gàa: Mi gûn bimda a tîim nûri ɗi, mi gàa: Gòynin ot Nitcoorra! Kà yey gàa nà Isaya nit lònum gi. 24 A nit ây tèeran a gin Yuhanna gi, aw ana a gin ni-Farisa ây. 25 De gunuwan de gàan: To muy tâage go Kristu ba, koo Eliya, koo nit lònum nà ba, ngam jâ mu iirre baptisma gi ya? 26 Yuhanna de goosi de gàa daw: Miy mi iirre baptisma ni sòo. Amma nit kana dii a tîim wun, tâa un cèngnu ba. 27 Ey tâage nit yey dàaga a dat mum, mi get ha mi bot naan wàa ba. 28 A jàk ây gi mbire a Betaniya a ɗàm kpees sîirra Yurdun, a gin yey ii Yuhanna baptisma gi. 29 Ni ndamji Yuhanna rabe Yeesu dàararre a gin wàa, de gàa: E rri yey Hàm Fay tâage kà hàm mgbâay, ge wut ha e at jàk maarra nit ây a kparri. 30 Ey tâage nit yey yèemi nà a hak wàa, gàam: Nirri dàa ge dàara a dat mum, tâage tiɗàm kpees mum, ngam ey ɗàagima. 31 Miy mi cèngnu nà ba, amma mi dàara iirra baptisma ni sòo, ngam ha e lòt a gin ni-Israyel ây. 32 Yuhanna seedige ɗa de gàa: Mi rabe Jungci Fay cira a faktiturum kà tigurfi, de tâa a hak wàa. 33 Miy mi cèngnu nà ba, amma Fay tèegima ha mi ii baptisma ni sòo gi, ey gàagim: Di nit yey gum rap Jungci cirarre tâarre a hak wàa gi, ey tâage nit iirra baptisma ni Jungci Delliya. 34 Mi rabe kà yey, mi seedirre ey tâagi Hâm Fay. 35 Ni ndamji Yuhanna tâanjirre ni lor ta wàa cuk a farra. 36 De rabe Yeesu hòmde, de gàa: E rri yey Hàm Fay tâage kà hàm mgbâay! 37 A lor ta Yuhanna nà cuk gi ye ragin yèk wàa, de furruwan di Yeesu. 38 Yeesu de dûre, de rabi daw aw furrufarre, de gun daw: Ji kàmnu ya? De gàawan: Rabbi, kà gàarra Nitkàlnjum, u hâ tâamu ya? 39 De gàa daw: Dàaran un kpàawa! De digin de rabin a gin tâa gi. De gbàksin ni ey unji maan. A ye kpàanjin gi, unji kpèrre unji mbona. 40 Nirri kpolo a tîim lor ây nà cuk raki yèk Yuhanna, futku di Yeesu gi, Andere ɗi kaa wàa di Simon Piyèr. 41 De dige de kpàaw màrra di ɓèl wàa Simon, de gàaw: Ot kpàawe di Messiya, kà gàarra Kristu. 42 De 'maawra a gin Yeesu. Yeesu de rabu de gàa: Muy tâage Simon hàm Yuhanna, sey aw 'naasum Kefas kà gàarra kpata. 43 Ni ndamji Yeesu ye ane e dik a Galile, de kpàaw di Filip. De gàaw: Furrimi! 44 Filip ana a Betsayda, a riiy Andere ni Piyèr. 45 Filip de kpàaw di Natanayel de gàaw: Ot kpàawe di nit yey kère nà Muusa a yèk mgbèngda, nit yey yèen a nit lònum ây gi ɗa, Yeesu hàm Yosef ni-Nasaret. 46 Natanayel de gàaw: Jàk mbâra ge kpàaw anda a Nasaret gi yi? Filip de gàaw: Dàara mu raptuwa! 47 Yeesu ye rabu di Natanayel dàararre a gin wàa, de gàa: E rri yey ni-Israyel takundi, burma cenu ba! 48 Natanayel de gàaw: U hâ cèngnim dim ya? Yeesu de goosi de gàaw: Ɗoko Filip 'naasum gi, mi rabumge ye tâamu nà a fur jâaci gi. 49 Natanayel de gàaw: Nitkàlnjum, muy tâage Hàm Fay, mu wûun ni-Israyel ây ɗi! 50 Yeesu de gàaw: Mu goosi ngam mi gàame, mi rabumge a fur jâaci gi yi? Ra gum rap jàk ây hòmgu 'mita di yey. 51 Yeesu de gàa: Takundi mi gàanurre, ra gun rap faktiturum faarumya, malayka ta Fay aw naarre aw cirarre a gin Hàm nirri.

2

1 A dat unji cuk, siir ata maanji ii a Kaana a dees Galile. Nuu wàa di Yeesu dii a farra. 2 Aw 'naasu ɗa di Yeesu ni lor ta wàa a siir maan. 3 Ye lòo daw mbàl timgbokcum gi, nuu wàa di Yeesu de gàaw: Mbàl timgbokcum lòo dawge. 4 Yeesu de gàaw: Mu kini gi, ji tâagum a hak mum ya? Unji mum ɗà kpèrra ba. 5 Nuu wàa de gàa da nit tèem ây: Koo ji gàanu pî, mbirin hû go! 6 A sin ây yira aw dii a farra, iin ni-Yude ây kà hàar waw, ngam kòlla kàn ni jàk ây. Sin kpolo atɗe jòong ɓèl naan koo kèrèw. 7 Yeesu de gàa daw: Mûunin sin ây ni sòo! De mûungin sin ây kpây kpây. 8 De gàa daw: Ɗugin, un 'maawfa di nit ɓèl siiri! De ɗugin de 'maawfan. 9 Nit ɓèl siiri ye haaw sòo irge mbàl timgbokcum, ti cèngni a gin ana ba. Sey nit tèem ây ɗuka gi, aw cèngni. De 'naasu di nit ata maanji. 10 De gàaw: Koo wuna hû waa e yuuna màrra mbàl timgbokcum woy kâwrriya. Aw ol go, a dat maan e yuuna woy tâa ti kâw dèy ba. Amma muy mu wooye mbàl timgbokcum woy kâwrriya ha kòsòng. 11 Yey tâage ɗaarra kayeefi ây tèe Yeesu a Kaana a dees Galile gi. Hû go lòni ɗa 'mita wàa. A lor ta wàa aw goosuge. 12 A dat maan de digin a Kafernahum ni nuu wàa, ni kaa rra wàa, ni lor ta wàa. De tâan a farra unji càa. 13 Daprum ni-Yude ây, daprum Paska ye hèera, Yeesu de dige a Yerusalem. 14 De kpàa a àay Fay nit ây sàange naay ây, ni mgbâay ây, ni tigurfi ây, ni nit ây bunjiri seede, aw tâarre a farra. 15 De mbangse timbii, de mànfa daw pî a àay Fay ni mgbâay rra waw, ni naay rra waw. De tusfa seede waw da nit bunjum ây, de kuptifa tabul ta waw. 16 De gàa daw da nit sàangum tigurfi ây: Hèenifan jàk ây gi ay gi, ta un ini àay Too mum àay gin sàangum jàk ây ba! 17 A lor ta wàa de ɓaysin yèk yey gàa a defterre Fay: Yiide àay wey aksimde kà ebi. 18 A ni-Yude ây de gàawan: Kayeefi ji gum kàlni dot, ha ot kpàa mu dii ni mbinum mbita kà yey ya? 19 Yeesu de goosi de gàa daw: Aasifan àay Fay gi, unji taan jâa gim jâasi! 20 A ni-Yude ây de gàawan: Yeri ra naan sàm yira jâan àay yey, muy de gàam jâa gum jâasi unji taan yi? 21 Amma a yèk maan Yeesu yèeni yèk is wàa. 22 Ye gûyse a wurra gi, a lor ta wàa de ɓaysin nge yèe nà kà yey, de goosin yèk defterre Fay, ni yèk yey yèe nà Yeesu gi. 23 Yeesu ye tâa a Yerusalem mgbàr daprum Paska, a nit ây dèy aw goosi a nîir wàa ye rabin kayeefi ây tèe gi. 24 Amma Yeesu ti ii dànda tinîir wàa a gin waw ba, ngam ey cèngni daw pî. 25 Gayam cenu ha e rak seedamku a hak nit kana ba, ngam ey cèngni jày tâage a tinîir nirri gi.

3

1 Ni-Farisa kana dii nîir wàa Nikodemus, nit ɓèl ɗi a tîim ni-Yude ây. 2 Ey dàara a gin Yeesu ni tuma, de gàaw: Nitcoorra, ot cèngni mu Nitkàlnjum ɗi anga a gin Fay. Cen nirri ge kpàaw tèerra kayeefi ây tèemu gi ba, sey to Fay tâanjirre go ni ey. 3 Yeesu de goosi de gàaw: Takundi takundi, mi gàamde, nirri to kpàasi go fûuya ba, ge kpàa rapta wûun Fay ba. 4 Nikodemus de gàaw: Kà kà nirri wàrfi go, ge mbin kpàasum bak ya? Mbi ge mbin e leksi a himni nuu wàa, ha e kpàasu cukti yi? 5 Yeesu de goosi de gàaw: Takundi takundi mi gàamde, to nirri kpàasi go cukti ni sòo ni Jungci Delliya ba, ge kpàa lekta a wûun Fay ba. 6 Di nit yey kpàawan ni isi, isi ɗi. Nit yey kpàage ni Jungci, Jungci ɗi. 7 Ta e tâam 'nang ba, ye gàam dum: Sey un kpàasi fûuya gi. 8 Hiski wâarre a gin yiɗi gi, mu rakɗe wâarra wàa, amma mu cèngni a gin ana ba, koo a gin digi ba. Hû go tâa ɗa koo wun kpàage ni Jungci Delliya gi. 9 Nikodemus de gàaw: Kà ge mbir jàk ây gi ya? 10 Yeesu de goosi de gàaw: Muy mu nit kàlnjum ni-Israyel ây ɗi, mu cèngni jàk ây gi ba yi? 11 Takundi takundi, mi gàamde, orro ot yèerre jày cèngnina gi, ot seedirre jày rapna gi. Amma un un ngotɗe seedamku worro ba. 12 Ye yèenim dun ni yèk kparri, un goosi ba. Kà gun goosi, to mi yèenu go yèk faktiturum ya? 13 Cen nirri haage naarra a faktiturum ba, sey Hàm nirri cirga a faktiturum gi. 14 Kà yey naani Muusa jòoy mbangsumya ni titefki a kpiiri a tîim nûri gi, sey hû go ɗa gaw naanu di Hàm nirri a kpiiri, 15 ha koo wun goosuwa, kpàa ge kpàa gûyrra tâam timgbàri. 16 Ngam Fay yiɗi kparri dèy ni ɓèlla, ha de tèera Hàm wàa kpolo, ha koo wun goosuwa ge gbee ba, amma kpàa ge kpàa gûyrra tâam timgbàri. 17 Fay ti tèera Hàm wàa ha e hiiti kparri ba, amma ngam e saani kparri. 18 Nit yey goosu gi, ge kpàa kiita ba. Nit yey tâa ti goosi ba, ey kpàa kiita mgban, ngam ti goosi nîir Hàm Fay kpolo ba. 19 E rri yey kày tâa kiita maan: Kayang dàarage a kparri, amma a nit ây aw hòme yiɗum kulpi di kayang, ngam tèem waw maaye. 20 Koo wun tèege tèem makta ya, yiirre kayang, ge dàara a kayang ba, tolle ta tèem wàa e lòt ba. 21 Amma nit yey tèege tèem takundi gi, dàa ge dàara a kayang, ngam ha tèem wàa e lòt ey tèeye ngam Fay. 22 A dat maan Yeesu diknji ni lor ta wàa a dees Yude. De tâanje ni aw a farra, iirre baptisma. 23 Yuhanna ɗa iirre baptisma a Aynon cewci Salim, ngam sòo dii dèy a farra. A nit ây de dàaran, de ngorin baptisma a gin wàa. 24 Ngam aw ɗà aw leknu di Yuhanna a kultuma ba. 25 Hàanjum yèy de ane a tîim lor ta wàa ni ni-Yude kana a yèk ɓetkunum tinîiri. 26 De dàaran a gin Yuhanna de gàawan: Nitkàlnjum, nit yey tâanji nà ni muy a taga Yurdun, yey seedum nà a hak wàa gi, ey iirre baptisma. A nit ây pî aw dàararre a gin wàa. 27 Yuhanna de goosi de gàa: Nirri ge kpàa ngota koo jâ ba, sey to aw hîiwra go diga faktiturum. 28 Un ni hak wun kpàa gun kpàa seedum a yèk mum ye gàami nà: Miy mi Kristu ɗi ba, amma mi nit tèerra ɗi a ɗàm kpees wàa. 29 Ngam nit yey ûrge maanji gi, ey tâage nit ata maanji. Amma soob wàa di nit ata maanji gòyge e raksu gi, dii ni kâwum tinîiri a ye rage gûn nit ata maanji. Kà yey tâa kâwum mum ɗa, gerre. 30 Ey sey e iisirra 'mita, amma miy sey mi iisirra luurra. 31 Nit yey anga u fay, ey hòmge 'mita pî. Nit yey ange a deesi, nit deesi ɗi, yèk deesi ge yèe. Amma nit yey anga a faktiturum, ey hòmge 'mita pî, 32 seedirre jàk yey rabe gi, rage gi, amma koo wuna ge ngor seedamku wàa ba. 33 Nit yey ngorge seedamku wàa, lòni nge Fay gi Fak takundi ɗi. 34 Nit yey tèewra Fay gi, yèk Fay ge yèe, ngam Fay ti hîirre Jungci wàa ni tigeni ba. 35 Tooy yiɗuge di Hàm, hîiwe jàk ây lang a kàn wàa. 36 Nit yey goosu di Hàm gi, dii ni gûyrra tâam timgbàri. Nit yey tâa ti ragu tuy di Hàm gi ba, ge kpàa gûyrra ba, amma ngòlnji Fay dii a gin wàa.

4

1 Yeesu Nitcoorra ye cèngni, nge ni-Farisa ây aw rage ey kpàarre lor ây, iirre baptisma hòmu di Yuhanna gi, 2 amma takundi, Yeesu ti ii baptisma ni hak wàa ba, sey a lor ta wàa, 3 de woofa dees Yude, de dikse bak a dees Galile. 4 Amma ot maan hòmde a dees Samariya. 5 De kpèrre a dees maan a riiy kana înin Sikar, a cewci hèmna yey hîiw nà Yakob di hàm wàa Yosef. 6 Gook sòo Yakob dii a farra. Unji kpèrre a tîim hay, Yeesu looye ni dikri. De tâa ton a cewci gook sòo. 7 Kin ni-Samariya de dàara ɗukta sòo. Yeesu de gàaw: Hîimda sòo mi njoo! 8 A lor ta wàa aw taye nà sàarra tiriici a riiy maan. 9 Kin ni-Samariya de gàaw: Muy mu ni-Yude kà gum waam dim sòo, dim sàni-Samariya gi ya? Gàa kà yey, ngam a ni-Yude ây aw 'mèmsirre ni ni-Samariya ây ba. 10 Yeesu de gàaw: To mu cèngni go ngin hîir Fay, ni nit yey gàagum «hîimda sòo mi njoo» gi, waa gum waaw ngin e hîim sòo gûynum. 11 Kini nà de gàaw: Nitcoorra, tiɗukni cenum ba, gook sòo ɗa yengge. U hâ tâam sòo gûynum gi ya? 12 Koo muy mu hòmu 'mita di wosom worro Yakob yi? Ey hîigina gook sòo yey, njooye nà ɗa a sòo maan, ey ni hàm ta wàa ni tikukri ta wàa ɗa. 13 Yeesu de gàaw: Koo wun njooge sòo yey ya, sòo ɓò ge ɓòysurra bak. 14 Amma koo wun njooge sòo yey gim hîiw gi, sòo ge ɓòysurra ba ha tâam timgbàri. Ngam sòo yey gim hîiw gi, tâa ge tâa nis sòo a gin wàa, e ɗuu gûyrra tâam timgbàri. 15 Kini nà de gàaw: Nitcoorra, hîim sòo maan, ngam ta sòo e ɓòysimda, mi dàasa ɗukta sòo ay ba. 16 Yeesu de gàaw: Dik mu 'naasa maa wey, un dàara. 17 Kin nà de gàaw: Maa cenim ba. Yeesu de gàaw: Mbâra yèemu ye gàam, maa cenum ba gi, 18 ngam mu wàari nà da nihun ây kèrèw. A gin nit yey tâamu kòsòng gi, ey maa wey ɗi ba. Yèk yey yèemu gi, takundi ɗi. 19 Kini nà de gàaw: Nitcoorra, mi cèngni muy mu nit lònum yèk Fay ɗi. 20 A too rra worro aw daprirre a gopri yey. Amma un un gàarre, a Yerusalem gesi gbè aw dapru di Fay. 21 Yeesu de gàaw: Mu kini gi, ngor yèk mum, unji dàa ge dàara un dapri di Tooy naa a gopri yey koo a Yerusalem. 22 Un un daprirre jày tâa un cèngni ba, amma orro ot daprirre jày cèngnina gi, ngam yèk saarra ana a gin ni-Yude ây. 23 Amma unji dàararre, koo kòsòng kpèrre mgban, ha a nit daprum ây takundi aw dapru di Tooy ni Jungci, ni takundi. Ngam Tooy kàmde da nit daprum ây kà yey gi aw dapruwa. 24 Fay ey Jungci ɗi. A nit ây dapru gi, sey aw dapru ni jungci a tinîiri, ni takundi. 25 Kini nà de gàaw: Mi cèngni Messiya înuwan Kristu gi dàa ge dàara. Ye ge dàara gi, sa ge sakna jàk ây pî. 26 Yeesu de gàaw: Miy tâage ey, mi nit yey yèegumda gi. 27 A lor ta wàa ye iran gi, de tâa daw 'nang, ye kpàawan yèenjirre ni nikin. Amma koo wuna ti gunu «ji jiɗuma», koo «ngam jâ yèenjunu ni ey ya» ba. 28 Kini nà de woofa jòong wàa, de ire a riiy, de gàa da nit ây: 29 Dàaran un raptu di nit yey sakim jày tèem nà lang! Mba ey tâage Kristu gi ya? 30 A nit ây de yuuran a riiy maan, de dàaran a gin Yeesu. 31 A lor ta wàa de waawan de gàan: Nitkàlnjum, rii tiriici! 32 De gàa daw: Miy mi dii ni tiriit yey tâa un cèngni ba. 33 Kà yey a lor ta wàa de gunjin: Nit kana 'maawra tiriici yi? 34 Yeesu de gàa daw: Tiriit mum tâage tèerra jày yiɗi Too mum tèegima gi, ni gbèesum tèem wàa ɗa. 35 Un gàa gun gàa, ngase corri naan ha wakli e naa. E rri yey mi gàanurre: Ɓelsin nis wun, un gop hèmna ây. Nîiye, gerre ripta. 36 Nit ripta kpàa ge kpàa bèeb tèem wàa, ye tâa kimjirre jàk nîirra ngam gûyrra tâam timgbàri gi. Hû go nit còkta ni nit ripta ɗa cuk aw dii ni kâwum tinîiri. 37 Ngam kà yey yèk maan takundi ɗi gàage: Nit kana còkɗe, nit kana ngaa ripɗe. 38 Mi tèenu ripta a hèmna yey tâa un loo tèem maan ba. A nit ây kana aw hâre nà a tèem maan, un un lege a loca tèem waw. 39 Ni-Samariya ây dèy a riiy maan aw goosu di Yeesu, a yèk yey sak daw kini nà gàage: Ey sagim jày tèem nà lang gi. 40 Ni-Samariya ây ye dàaran a gin Yeesu, de waawan e tâanji ni aw. De tâa a farra unji cuk. 41 A nit ây dèy aw goosuge ngam yèk wàa. 42 De gàawan di kini nà: Ot goosige, naa ngam yèk wey yèemu gi, amma ngam orro ni hak worro ot rage ot cèngnige, ey takundi Nitsaanum kparri ɗi. 43 A dat unji cuk Yeesu de ane a farra, de dige a dees Galile, 44 ngam ey ni hak wàa gàaye nà, aw coowrre di nit lònum yèk Fay a dees wàa ba. 45 Ye dàara a dees Galile gi, a ni-Galile ây de ngoruwan mbâra, ye tâa aw ɗa aw dige nà a daprum a Yerusalem, aw rabe nà jày pî tèe a farra gi. 46 De ise bak a Kaana a dees Galile, a gin yey ini nà sòo mbàl timgbokcum gi. Nit ɓèl kana dii a Kafernahum. Hàm wàa hàm nihun dii ni àyci. 47 Ye rage Yeesu yuu a dees Yude, dikɗe a dees Galile, de difa a gin wàa de waawa, de dàara e ndòosu di hàm wàa, ngam kèle wucu. 48 Yeesu de gàaw: To un rap go jàk lònum ây ni kayeefi ây ba, gun goosim ba sam. 49 Nit ɓèl nà de gàaw: Nitcoorra, dàara ɗoko hàm mum e wutki! 50 Yeesu de gàaw: Koy, hàm wey dii beengiya. Nirri nà goosi yèk yey yèew Yeesu nà, de koye. 51 Ye koye gi, de kpàanjin ni nit tèem ta wàa de kàluwan: Hàm wey dii beengiya. 52 De gun daw a saa'i hâ ndòorra ya. De gàawan: Ninjaay a dat unji a tîim hay woow mâarra isi gi. 53 Too wàa di hàm cèngsige, ndòoye a ye yèenjin nà ni Yeesu, gàaw «hàm wey dii beengiya» gi. De goosu di Yeesu ey ni nit àay rra wàa pî. 54 Yey tâage kayeefi cukti tèe Yeesu, ye yuu a dees Yude, dige a dees Galile gi.

5

1 A dat maan daprum ni-Yude ây iiye. Yeesu de dige a Yerusalem. 2 A Yerusalem a cewci nin mgbâay, sòo dii a farra înuwan Betsayda ni yèk Hebra. Dangki kèrèw dii a sòo maan. 3 A dangki ây maan a nit àyci ây dèy aw kûurre a farra, nit râay ây, ni nit èskum ây, ni nit gbòkta is ây. (Aw waarre yûurra sòo. 4 Ngam malayka Fay cirarre mgbàri mgbàri, yûusurre di sòo. Nit yey ɗàage lekta a ye yûu sòo gi, kpàa ndòosum koo àyci hâ.) 5 Nit kana dii a farra, àyciya diga yeri ra taan sàm nan nan. 6 Yeesu ye rabu kûurre gi, cèngni nit yey dii àyciya diga mgban, de gunu: Mu yiɗi mu ndòosi yi? 7 Nit àyci de gàaw: Nitcoorra, nirri cen e leknim ye ge yûu sòo gi ba. Mi dàararre go, nit kana ɗàa ge ɗàam lekta. 8 Yeesu de gàaw: An, mu at jingi wey mu digi! 9 Ayci ndòowe di nirri nà yaale, de arre jingi wàa de dige. Mgbàr maan unji wuysum ɗi. 10 A ni-Yude ây de gàawan di nit maan: Ti gesi mu tok jingi wey ba, ngam unji wuysum ɗi. 11 Amma de goosi de gàa daw: Nit yey ndòosim gi ey gàagim: At jingi wey, mu digi! 12 De gunuwan: Wun ɗi nit yey gàagum «at jingi wey, mu diki» ya? 13 Nirri nà ti cèngni nit yey ndòosu gi ba, ngam Yeesu hèesige yèk mûsa nit ây tâage a farra. 14 A dat maan Yeesu de kpàaw a àay Fay, de gàaw: E rri yey àyci wey ndòoye. Ta mu haasirra mbita jàk maarra ba, ngam ta jày hòmgu maarra di yey e kpàam ba. 15 Nirri nà de dige e sak da ni-Yude ây, Yeesu ndòosu. 16 Yèk maan a ni-Yude ây de ɗàawan ɗàari di Yeesu, ngam tèeye tèem yey a unji wuysum. 17 Amma Yeesu de gàa daw: Too mum tèerre ha kòsòng, miy ɗa mi tèerre. 18 Ngam maan a ni-Yude ây de iisurran kàmda aw ɓàruwa, naa ngam yewe yèk unji wuysum gbè, amma ngam gàa ɗa Fay Too wàa ɗi, getnjini hak wàa ni Fay. 19 Yeesu de gàa daw: Takundi takundi, mi gàanurre, Hàm ge kpàaw tèerra koo jâ ni hak wàa ba, sey jày rabe a gin Tooy tèerre gi. Ngam jày tèe Tooy gi, de ge tèe Hàm gi ɗa. 20 Ngam Tooy yiɗu di Hàm wàa, kàlnurre jày pî tèe ey ni hak wàa, kà ge kàlnu di Hàm tèem woy hòmgu 'mita di yey, ha tèem maan e tâanu 'nang. 21 Kà yey gûysi Tooy da nit ây wutke gi, ini daw beengiya, hû go ɗa Hàm i ge ini daw beengiya da nit ây yiɗe e hîi daw jungci gi. 22 Tooy ge hiiti koo di wuna ba, amma hîi mbinum iirra kiita lang di Hàm, 23 ngam ha a nit ây pî aw coow di Hàm kà yey coowan di Tooy gi. Nit yey tâa ti coow di Hàm ba, ge coow ɗa di Tooy tèeguwa ba. 24 Takundi takundi, mi gàanurre, nit yey rake yèk mum, goosu di Tooy tèegima gi ɗa, ey kpàa gûyrra tâam timgbàri. Ge lek a kiita ba, amma hòme diga wurra ha a gûyrra. 25 Takundi takundi, mi gàanurre, unji dàararre, koo kòsòng kpèrrage, ha a nit ây wutke gi ra gaw rak gûn Hàm Fay. A nit ây rake gi, gû gaw gûysi. 26 Kà yey tâa Tooy ni gûyrra a gin wàa gi, hû go hîiw ɗa di Hàm, e tâa ni gûyrra a gin wàa. 27 Tooy hîiwe mbinum e ii kiita, ngam ey Hàm nirri ɗi. 28 Ta jàk yey e tâanu 'nang ba! Ngam unji dàararre, a nit ây wutki nà tâage a gebi gi, ra gaw rak gûn wàa, 29 yuu gaw yuu. A nit ây tèege tèem mbâri gû gaw gûysi aw lek a jungci. A nit ây tèege tèem maarra, gû gaw gûysi aw lek a kiita. 30 Miy gim kpàaw tèerra koo jâ ni hak mum ba. Kà yey rakma a gin Fay gi, hû go gim hiiti. Kiita mum ɗèm ɗi, ngam mi futɗe jày yiɗi miy ba, amma jày yiɗi Too mum tèegima gi. 31 To mi yèerre go yèk seedamku a hak mum, seedamku mum takundi ɗi ba. 32 Nit kana dii, iimde seedamku. Mi cèngni, yèk seedamku iim gi takundi ɗi. 33 Un tèefage nà a gin Yuhanna, ey seedige yèk takundi. 34 Miy gayam cenim ha mi ngor yèk seedamku nirri ba. Amma yèk maan gàami gi, ngam ha un saa. 35 Yuhanna tâage kà pittirla ɓètiya, kayngirre. Un yiɗi nà rakta kâwum càa a kayang wàa. 36 Amma miy mi dii ni yèk seedamku yey hòmgu di Yuhanna. A tèem ây hîim Tooy ha mi gbèesi gi, tèem ây gi mi tèeye, iimde seedamku Tooy tèegima. 37 Tooy tèegima gi, ey iimde seedamku. Un haa rakta gûn wàa ba, un haa rapta nis wàa ɗa ba. 38 Yèk wàa ti tâarre a gin wun ba, ngam un goosu di nit yey tèewra gi ba. 39 Un gatkirre a defterre Fay ngam un dànde, a farra gun kpàa gûyrra tâam timgbàri. Takundi defterre gi iimde seedamku. 40 Amma un yiɗi un dàara a gin mum, ngam ha un kpàa gûyrra ba. 41 Miy gim kàm 'mita a gin nit ây ba. 42 Amma mi cèngnunuge, yiide ngam Fay cennu ba. 43 Mi dàarage ni nîir Too mum, un ngorim ba. Amma to nirri dàara go ni nîir wàa gi, dey gun ngoruwa. 44 Kà gun kpàa goosum di Fay, un nit ây ngotnje 'misunjum a tîim wun, amma un kàmde 'mita yey anga a gin Fay kpolo gi ba ya? 45 Ta un dàn ba, nge 'maa gim 'maa yèk hak wun a ɗàm kpees Tooy gi. Nit 'maarra yèk hak wun Muusa ɗi, a gin nit yey iinu nà dànda wun gi. 46 To un goosu go ngin di Muusa gi, goo gun goosim dim ɗa. Ngam ey kèrge nà yèk hak mum. 47 Amma to un goosi go yèk yey kère nà Muusa gi ba, kà gun goosi yèk mum ya?

6

1 A dat maan Yeesu dige a taga kana a sòo ɓèl Galile, înuwan ɗa sòo Tiberiya. 2 Mûsa nit ây dèy de furruwan, ngam aw rabe kayeefi ây tèe daw da nit àyci ây. 3 Yeesu de naa a gopri, de tâa a farra ni lor ta wàa. 4 Paska daprum ni-Yude ây hèerage. 5 Yeesu de aanje nis wàa de rabe, mûsa nit ây dèy aw dàararre a gin wàa. De gàaw di Filip: U hâ got sàara jàk tiriici ha a nit ây aw rii ya? 6 Gàa kà yey ngam e raksu jày ge goosi go Filip gi. Ey cèngni jày ge mbirgi. 7 Filip de gàaw: Koo seede kurra ra cuk ge tèk daw da nit ây, ha koo wuna e kpàa càa ba. 8 Nirri kpolo a tîim lor ta wàa, Andere kaa wàa di Simon Piyèr, de gàaw di Yeesu: 9 Hàm lori dii ay gi ni tàarri kèrèw, ni cîici cuk. Amma ji ge hèefa da nit ây dèy kà yey gi ya? 10 Yeesu de gàa: Tâanin daw da nit ây gi ngam aw rii. A gin maan bàsi dii dèy. De tâan ton ton. Sakri nihun ây kpè ge kpèt ujinè kèrèw. 11 Yeesu de arre tàarri nà kèrèw gi, de gàa mbew di Fay, de mîinji daw da nit ây tâage ton ton. Hû go mîinji daw ɗa cîit ây nà, aw rii kà yey yiɗin gi. 12 A nit ây ye olin, de gàa daw da lor ta wàa: Kimjin ngirra tiriici, ngam ta koo jâ e gbeerra ba. 13 Ye atin yaatum tàarri nà kèrèw riin a nit ây, ngaskirra gi, de mûunin tuuni ra sàm cuk. 14 A nit ây ye rabin kayeefi yey tèe Yeesu gi, de gàan: Takundi, nit yey nit lònum yèk Fay ɗi, ge dàara nà a kparri gi. 15 Yeesu ye cèngsi, a nit ây dàa gaw dàara aw arru ni kpèw kpèw ngam aw iiw wûun, de dikse bak a gopri ey kpolo wàa. 16 Mbona ye ciiye, a lor ta wàa de cirin a cewci sòo ɓèl. 17 De legin a koombowal ngam aw yew a taga kana, aw dik a Kafernahum. Tuma luge, Yeesu ɗà dàara a gin waw ba. 18 Hiski ɓèl wâarre, yûusurre di sòo. 19 Ye kurin jày ge ii kilomèeta kèrèw koo yira, de rabufan di Yeesu nafrarre a fak sòo, hèerarre a koombowal. De tolin. 20 Amma Yeesu de gàa daw: Miy ɗi, ta un tol ba! 21 Ye yiɗin aw arru a koombowal gi, koombowal kpèrre yaale a taga yey digin gi. 22 Ni ndamji mûsa nit ây ngaske a taga kana a sòo ɓèl gi, de rabin sey koombowal kpolo gbè. Aw cèngni ɗa Yeesu ti leknji ni lor ta wàa a farra ba, amma a lor ta wàa aw dike kpolo waw. 23 A koombowal ây kana anga a Tiberiya, aw kpèrrarre gaarra a gin yey riin tàarri nà, a dat ye gàa Nitcoorra mbew di Fay ngam tiriit maan. 24 A nit ây ye rabin, Yeesu koo a lor ta wàa aw cenda a farra ba, de legin a koombowal ây nà, de digin a Kafernahum aw kàmu di Yeesu. 25 Ye kpàawan di Yeesu a taga sòo ɓèl, de gàawan: Nitcoorra, ningàa dàama ay gi ya? 26 Yeesu de goosi de gàa daw: Takundi takundi, mi gàanurre, un kàmimde naa ngam un rabe kayeefi ây, amma ngam un riiye tàarri un ole. 27 Ta un tèe ngam tiriit yey ge raa gi ba, amma tèen ngam tiriit yey ge tâa ha a gûyrra tâam timgbàri, yey ge hîinu Hàm nirri gi. Ey tâage nit yey Fay Tooy iiwrra ticèngsunum a mbinum wàa. 28 De gunuwan: Ji got mbir ha ot tèe tèem yey yiɗi Fay gi ya? 29 Yeesu de goosi de gàa daw: Yey tâage tèem Fay, nge un goosu di nit yey tèewra gi. 30 De gàawan: Kayeefi ji gum kàlnina, ha ot rabi ot goosum gi ya? Tèem jâ gum tèe ya? 31 A wosom ta worro aw rii nà tàat mannu a tîim nûri, kà yey gàa a defterre Fay: Ey hîira daw tàarri diga a faktiturum ngam aw rii. 32 Yeesu de gàa daw: Takundi takundi, mi gàanurre, Muusa ti hîinu tàat yey anga a faktiturum ba, amma Too mum hîigunu tàat takundi anga a faktiturum. 33 Ngam tàat yey hîi Fay gi, cira diga faktiturum, hîirre gûyrra da nit ây a kparri. 34 A nit ây de gàawan: Nitcoorra, hîina tàat yey koo ningàa! 35 Yeesu de gàa daw: Miy tâage tàat gûynum. Nit yey dàaga a gin mum, fey ge haasurra àyrra ba. Nit yey goosim gi, sòo ge haasurra ɓòyrra ba. 36 Mi gàanu nà mgban: Un rabimge, amma un goosi ba. 37 Koo wun pî hîim Tooy gi ge dàara a gin mum. Nit yey dàaga a gin mum, miy gim yuunu ba sam. 38 Mi cira a faktiturum naa ngam mi tèe jày yiɗimi, amma mi tèe jày yiɗi Tooy tèegima gi. 39 Tooy tèegima gi yiɗi, nge a nit ây hîim gi pî ta koo wuna e gbeemda ba, amma mi gûysi daw a unji gbèeni. 40 Too mum yiɗi, nge koo wun rapku di Hàm ya goosu gi, kpàa gûyrra tâam timgbàri. Miy gû gim gûysu a unji gbèeni. 41 A ni-Yude ây de hûungin a hak Yeesu, ngam ey gàaye: Miy tâage tàat yey cirga a faktiturum. 42 De gunin: Ey tâage Yeesu hàm Yosef ba yi? Ot cèngni too wàa ni nuu wàa. Kà gàa «miy mi cira a faktiturum» ya? 43 Yeesu de goosi de gàa daw: Ta un hûungiri a tîim wun ba! 44 Cen nirri ge kpàaw dàarra a gin mum ba, sey to Tooy tèegima gi nàtkuwa go. Miy gû gim gûysu a unji gbèeni. 45 Gàarre a defterre nit lònum ây: A nit ây pî tâa gaw tâa nit ây kàlnji daw Fay gi. Koo wun rake yèk Tooy, èngni a gin wàa ya, dàa ge dàara a gin mum. 46 Cen nirri haagu rapta di Tooy ba, amma sey nit yey anga a gin Fay ey rapku di Tooy. 47 Takundi takundi, mi gàanurre, nit yey goosim gi, kpàa gûyrra tâam timgbàri. 48 Miy tâage tàat gûynum. 49 A wosom ta wun aw rii nà tàat mannu a tîim nûri, aw wurre. 50 Amma nirri riirra go a tàat yey cirga a faktiturum gi, ge wut ba. 51 Miy tâage tàat gûynum cirga a faktiturum. To nirri rii go tàat maan, gû ge gûy ha tâam timgbàri. Tàat yey gim hîi gi, is mum ɗi. Hîi gim hîi ngam ha kparri e kpàa gûyrra. 52 A ni-Yude ây de hàanjin a tîim waw de gunin: Nit yey kà ge kpàaw e hîina is wàa ha ot rii gi ya? 53 Yeesu de gàa daw: Takundi takundi, mi gàanurre, to un rii go is Hàm nirri, un njoo go njîim wàa ba, gun kpàa gûyrra a tinîir wun ba. 54 Amma nit yey riige is mum, njooge njîim mum, kpàa gûyrra tâam timgbàri. Gû gim gûysu a unji gbèeni. 55 Ngam is mum tiriit takundi ɗi, njîim mum ɗa jàk njoor takundi ɗi. 56 Nit yey riige is mum, njooge njîim mum, ey tâarre a gin mum. Miy ɗa mi tâarre a gin wàa. 57 Kà yey gûyi Tooy tèegima gi, miy ɗa mi gûyrre a gin wàa. Hû go ɗa nit yey riigim gi, gû ge gûy ngam mum. 58 Yey tâage tàarri cirga a faktiturum, ti tâa kà yey riin a wosom ta wun tàat mannu, wurrin gi ba. Nirri rii go tàat yey, gû ge gûy ha tâam timgbàri. 59 Yeesu yèe yèk ây gi, ye kàlnje da nit ây a àay gin kimjum a Kafernahum. 60 A nit ây dèy a tîim lor ta wàa ye ragin kà yey, de gàan: Yèk yey ndège. Wun ge kpàaw ngota ya? 61 Yeesu ye cèngsi a tinîir wàa, a lor ta wàa aw hûungi a yèk ây yèe gi, de gàa daw: Yèk yey tâanu timgbòlnji yi? 62 Kà ge tâa ye gun rap Hàm nirri, to naasirre go a gin tàara nà mgban gi ya? 63 Jungci Fay gûynurre di nirri. Isi ge mbir koo jâ ba. Amma yèk ây yèenim dun gi, Jungci ɗi ni gûyrra. 64 Amma a nit ây kana aw dii a tîim wun, aw aw goosim ba. Ngam Yeesu cèngni diga ɗaarra a nit ây tâa gaw goosu ba, ni nit yey ge mòow ni gâra gi. 65 De gàa: Ngam maan mi gàanurre, cen nirri ge kpàaw e dàara a gin mum ba, sonaa to kpàa go orri a gin Tooy. 66 Diga yèk maan a nit ây dèy a tîim lor ta wàa aw ire daarri, aw woofa diknjum ni ey. 67 Yeesu de gun daw da lor ta wàa ra sàm cuk: Un ɗa un yiɗi tayrra yi? 68 Simon Piyèr de goosi de gàaw: Nitcoorra, a gin wun got dik ya? Ngam muy mu dii ni yèk gûyrra tâam timgbàri. 69 Ot goosige ot cèngnige, muy tâage nit delliya anga a gin Fay. 70 Yeesu de gàa daw: Naa miy catkunu dun ra sàm cuk naa? Amma nirri kpolo a tîim wun yòot Seyɗan ɗi. 71 Gàa kà yey a hak Yuda Iskariyo hàm Simon. Ngam ey ge mòow ni gâra, nirri kpolo ɗi a tîim lor ta wàa ra sàm cuk.

7

1 A dat maan Yeesu gîre a Galile. Ti yiɗi e gîsirra bak a dees Yude ba, ngam a ni-Yude ây aw kàmde aw ɓàruwa. 2 Daprum ni-Yude ây, înuwan daprum ndûkci ây, hèerage. 3 A kaa rra wàa di Yeesu de gàawan: Woofa tâam ay gi, mu dik a dees Yude, ngam ha a lor ta wey aw rapti ɗa tèem ta wey gum tèe gi. 4 Koo wuna to yiɗi go aw cèngnu gi, ge tèe jày ni fûucu ba. Ye tâa mu tèerre jàk ây kà yey, lòni hak wey a gin nit ây! 5 Ngam koo a kaa rra wàa aw goosu ba. 6 Yeesu de gàa daw: Unji mum ɗà kpèrra ba, amma unji wun dii koo ningàa. 7 A nit kparri ây gaw kpàanu yiirra ba, amma dim yii gaw yiimi, ngam mi kàl dawrre tèem ta waw tèen gi, tèem maarra ɗi. 8 Digin un a daprum maan! Miy gim dik a farra ba, ngam unji mum ɗà kpèt ba. 9 Ye gàa kà yey, de tâa a Galile. 10 Amma a kaa rra wàa di Yeesu ye digin a daprum gi, ey ɗa dige a farra, ti dik a nis nit ây ba, sey ni fûucu. 11 A ni-Yude ây de kàmuwan a daprum nà de gàan: U hâ tâa ya? 12 A tîim mûsa nit ây aw hûungirre dèy a yèk wàa. A nit ây kana de gàan, nit mbâri ɗi. A nit ây kana ngaa de gàan: Ti tâa hû go ba, ey nit gbeesum nit ây ɗi. 13 Amma cen nirri yèege yèk hak Yeesu ni lòcu ba, ngam aw tolle da ni-Yude ây. 14 Ye tâa mgbàr daprum mîinjige gi, Yeesu de lege a àay Fay e kàlnji da nit ây. 15 De tâa daw 'nang da ni-Yude ây, de gàan: Nit yey u hâ kpàara cèngnum jày dèy ya? Ngam ey ti èngni a gin nit kàlnjum ba. 16 Yeesu de goosi de gàa daw: Yèk yey kàlnjim gi ti ana a gin mum ba, amma yèk Tooy tèegima gi ɗi. 17 Nit yey yiɗi e tèe jày yiɗi Fay gi, ey ge cèngsi kàlnjum jàk maan to ana go a gin Fay, koo mi yèerra go ni hak mum gi. 18 Nit yey yèege ni hak wàa gi, kàmde 'misum hay. Amma nit yey kàmde 'mita Tooy tèeguwa gi, ey dii ni yèk takundi, dey burum cenu ba. 19 Muusa ti hîinu yèk mgbèngda ba yi? Amma koo nirri kpolo a tîim wun ti tèe jày gàa yèk mgbèngda ba. Ngam jâ kàmnu un ɓàrim gi ya? 20 Mûsa nit ây de goosin de gàawan: Muy mu dii ni tindòom. Wun kàmge e ɓàrum ya? 21 Yeesu de gàa daw: Tèem kpolo tèemi, dun pî tâanu 'nang. 22 Muusa hîinu yèk rrèpnum. Ti tâa Muusa ɗaagi ba, amma wosom ta wun. Hû go un rrèpnirre hàm a unji wuysum. 23 To un rrèpnirre go hàm a unji wuysum, ngam ta un yew yèk mgbèngda Muusa ba, kà gun ii ngòlòm a gin mum, ye tâa mi ndòosu isi lang di nit àyci a unji wuysum gi ya? 24 Ta un hiiti di nirri, kà yey rapnu nis wàa ba. Amma hiitin kiita ɗèm. 25 A nit ây kana a tîim ni-Yerusalem ây de gàan: Ti tâa nit yey kàmin ɓàta gi ba yi? 26 E rri yey ey yèerre a nis nit ây pî, koo wuna ti gàaw jày ba. Mba nit ɓèl ây aw cèngni, ey tâage Kristu gi ya? 27 Amma Kristu ye ge dàara gi, koo wuna ge cèngni a gin ana go ba. Di nit yey ot cèngnuge a gin ana gi. 28 Yeesu ye kàlnje a àay Fay, de bime de gàa: Un gàa un cèngnimge yi? Un cèngni ɗa a gin anma gi yi? Miy mi dàara ni hak mum ba, amma Tooy tèegima gi, Tooy takundi ɗi, un un cèngnu ba. 29 Miy mi cèngnuge, ngam a gin wàa anma, ey tèegima ɗa. 30 De kàmin orri aw mòowa. Amma koo wuna ti banggurra kàn ba, ngam unji wàa ɗà kpèrra ba. 31 A nit ây dèy aw goosuge, de gàan: Kristu ye ge dàara gi, tèe ge tèe kayeefi ây e hòmu mûurra di woy yey tèe nit yey gi yi? 32 A ni-Farisa ây de ragin, mûsa nit ây aw hûungirre a hak Yeesu kà yey. Hû go a nit ɓèl ta waw da nit daprum ây, ni ni-Farisa ây de tèefan lor ây aw mòowra. 33 Yeesu de gàa daw: Ngasimda unji càa mi tâanjisirra ni un ɗa. A dat maan di gim dik a gin Tooy tèegima gi. 34 Kà gun kàmimi, amma gun kpàam ba. A gin gim tâa gi, un gun kpàaw kpèta a farra ba. 35 A ni-Yude ây de gunjin: U hâ gàa nit yey e dik, tâa got kpàaw gi ba ya? Mba a gin ni-Yude ây yeski a tîim ni-Girèk ây, e kàlnji daw da ni-Girèk ây ya? 36 Ji yiɗi gàarra yèk yey ya, gàa: Kà gum kàmimi, amma gun kpàam ba. A gin gim tâa gi, un gun kpàaw kpèta a farra ba? 37 A unji gbèeni a daprum, unji ɓèl ɗi, Yeesu de gòye, de bime e gàa: Sòo ɓòyu go di nirri, sey e dàara a gin mum e njoo! 38 Nit yey goosim gi, sîirra sòo gûynum a ge an a gin wàa, kà yey gàa a defterre Fay. 39 Gàa kà yey a yèk Jungci Delliya, yey gaw kpàa a nit ây goosu gi. Fay ɗà hîira Jungci Delliya ba, ngam Yeesu ngaa ɗà kpàa 'mita wàa ba. 40 A nit ây dèy a tîim mûsa nit ây ye ragin yèk yey, de gàan: Takundi, ey tâage nit lònum nà! 41 A nit ây kana de gàan: Nit yey tâage Kristu. Amma a nit ây kana de gàan: Kristu a ge ana a dees Galile gi yi? 42 Ngam defterre Fay gàa nà: Kristu a ge ana a yòot Dawda, a Baytilam a riiy yey tâa Dawda a farra gi. 43 A nit ây aw raknji a tîim waw ba ngam yèk Yeesu. 44 A nit ây kana a tîim waw aw yiɗi aw mòowa, amma koo wuna ti banggurra kàn ba. 45 A lor ây aw koyrage a gin nit ɓèl ta waw da nit daprum ây, ni ni-Farisa ây. Aw de gunin daw: Ngam jâ tâa un 'maawra di nit maan gi ba ya? 46 A lor ây de goosin de gàan: Koo wuna ti haa yèerra kà nit yey ba. 47 A ni-Farisa ây de gàan daw: Dun ɗa rûfnuge yi? 48 Mba nirri kpolo a tîim nit ɓèl ây koo ni-Farisa ây aw goosuge ya? 49 Amma sey mûsa nit ây tâa aw cèngni yèk mgbèngda Muusa ba, aw goosu. Nge aw tâa lètiya! 50 Nikodemus ni-Farisa kana, nit yey dàaga nà a gin Yeesu, de gàa daw: 51 Yèk mgbèngda worro ge hiitu di nirri ba, sonaa aw ragu ɗà, aw cèngni jày mbirge gi. 52 De goosin de gàawan: Mba muy ɗa mu nirri kpolo ɗi a tîim ni-Galile ây ya? Garru mbâra, kpàa gum kpàa, nit lònum ti haa anda a dees Galile ba!( 53 A dat maan koo wuna koye a gbaa wàa.)

8

1 Yeesu de dige a gopri korrom. 2 Ni ndamji birit de isa a àay Fay. A nit ây pî aw dàara a gin wàa. De tâa ton e kàlnji daw. 3 A nit còycum ây ni ni-Farisa ây de 'maawran kin, yey mòowran a kûurra ni maa kana. Ye gòynuwan a tîim, 4 de gàawan di Yeesu: Nitkàlnjum, kin yey aw mòowra a kûurra ni maa kana. 5 A yèk mbèngda Muusa gàanage, nirri kà yey sey ot aaw ni gòoy. Amma muy, kà gum gàa ya? 6 Aw gàa kà yey ngam aw rûfuwa, ha aw kpàa yèy a hak wàa, aw 'maaw kiita. Amma Yeesu de ûu e kèri ni mbèerri kàn a deesi. 7 Ye gunguwan gi, de ane de gàa daw: Nit yey tâage a tîim wun jàk maarra cenu ba, sey e ɗàaw còorra ni gòoy! 8 De ûu bak, de kère a deesi. 9 Ye ragin kà yey, de ɗaan yuurra kpolo kpolo aw tayi, diga nit wàrfi ây ɗà ha lor ây. De ngase Yeesu ey kpolo wàa ni kini nà gòyge a tîim gi. 10 Yeesu de ane de gunu: Kinu, u hâ tâan ya? Cen nirri kpolo yaanum a kiita ba yi? 11 Kini nà de gàaw: Cen koo nirri kpolo ba, Nitcoorra. Yeesu de gàaw: Miy ɗa gim yaanum a kiita ba. Tayi, ta mu haasirra mbita jàk maarra ba!) 12 Yeesu de gàa daw da nit ây: Miy tâage kayang a kparri. Nit yey futkim gi, ge dik a kulpi ba, amma kpàa ge kpàa kayang yey ge gûynu gi. 13 A ni-Farisa ây de gàawan: Muy mu seedisi yèk hak wey. Yèk seedamku wey ti tâa takundi ba. 14 Yeesu de goosi de gàa daw: Koo mi seedisi go yèk hak mum, yèk seedamku mum takundi ɗi, ngam mi cèngni a gin anma gi, ni a gin gim diki. Amma un un cèngni a gin anma gi ba, ni a gin gim diki ba. 15 Un un iirre kiita kà yey yiɗunu ni hak wun, amma miy gim hiiti koo di wuna ba. 16 Koo mi hiitirre go, kiita mum takundi ɗi, ngam ti tâa miy kpolo mum hiitim ba, amma miy ni Too mum tèegima gi ɗi. 17 Dii kètiya a yèk mgbèngda wun ɗa, nge yèk seedamku nit ây cuk takundi ɗi. 18 Miy mi seedisi yèk hak mum. Too mum tèegima gi, seedimde ɗa. 19 De gunuwan: U hâ tâa Too wey ya? Yeesu de goosi de gàa daw: Un un cèngnim ba, un cèngnu di Too mum ɗa ba. To un cèngnim go ngin, cè gun cèngnu di Too mum ɗa. 20 Yeesu yèe yèk ây gi, ye kàlnje da nit ây a àay Fay, tâa a cewci gin iirra seede. Koo wuna ti mòow ba, ngam unji wàa ɗà kpèrra ba. 21 Yeesu de gàa daw bak: Ta gim tay, un kà gun kàmimi, amma wu gun wut a jàk maarra wun. A gin dikmi gi, un gun kpàaw dikta ba. 22 A ni-Yude ây de gàan: Hak wàa gàa e ɓàsi yi? Ngam gàa: A gin dikmi gi, un gun kpàaw dikta ba. 23 Yeesu de gàa daw: Un un ane ay a deesi, miy mi ana u fay. Un un nit kparri ây ɗi, amma miy mi nit kparri ɗi ba. 24 Kà yey de gàanim dun, wu gun wut a jàk maarra wun. Ngam to un goosi go miy tâage ey ba, wu gun wut a jàk maarra wun. 25 De gunuwan: Muy mu wun ɗi ya? De goosi de gàa daw: Jàk yey gàanim dun nà diga ɗaarra. 26 Mi dii ni yèy dèy ha mi yèe mi hiiti ni yèk maan a hak wun. Amma Too mum tèegima gi, Tooy takundi ɗi. Jàk yey rakmi a gin wàa, de yèemi da nit ây a kparri. 27 Aw cèngni nge ey yèe dawrre yèk Tooy Fay ba. 28 Yeesu de gàa daw: Ye gun naanu di Hàm nirri a kpiiri gi, mgbàr maan cè gun cèngni miy tâage ey, gim tèe ɗa koo jâ ni hak mum ba, yèe gim yèe gbè jày kàlnjim Tooy gi. 29 Too mum tèegima gi tâanjirre ni miy. Ti woom dim kpolo mum ba, ngam mi tèerre jày delgu gi koo ningàa. 30 Yeesu ye gàa kà yey, a nit ây dèy de goosuwan. 31 Yeesu de gàa da ni-Yude ây goosu gi: To un gòyrre go a yèk mum, takundi un lor ta mum ɗi. 32 Cè gun cèngni yèk takundi, yèk takundi ngaa i ge inunu tiròom. 33 De gàawan: Orro ot yòot Abraham ɗi. Ot haa tâarra sàay nirri koo kpolo ba. Kà gum gàana, tâa got tâa tiròom ya? 34 Yeesu de goosi de gàa daw: Takundi takundi, mi gàanurre, koo wun tèege jàk maarra ya, ey sàay jàk maarra ɗi. 35 Sàay ge tâa a àay unji pî, amma Hàm tâa ge tâa a àay Too wàa koo ningàa. 36 Kà yey to Hàm inunu go tiròom, takundi tâa gun tâa tiròom. 37 Mi cèngni, un yòot Abraham ɗi. Amma un kàmde orri un ɓàrimi, ngam yèk mum ti lek a tinîir wun ba. 38 Miy mi yèerre jàk yey rapma a gin Too mum, un un tèerre jàk yey raknu a gin too wun. 39 De goosin de gàawan: Abraham tâage too worro. Yeesu de gàa daw: To un tâa go ngin hàm ta Abraham, tèe gun tèe ngin tèem Abraham ɗa. 40 Amma kòsòng un kàmde orri un ɓàrimi, mi nit yey sakunu yèk takundi rakma a gin Fay gi. Abraham ti mbir jày kà yey ba. 41 Un un tèerre tèem too wun! De gàawan: Dorro aw kpàana a iirra njeenu ba. Ot dii ni Tooy kpolo, Fay ɗi gbè. 42 Yeesu de gàa daw: To Fay tâa go ngin Too wun, yi gun yiɗim ngin dim. Ngam a gin Fay anma, dàama gi. Mi dàara ni hak mum ba, amma ey tèegima. 43 Ngam jâ tâa un cèngni yèk mum kày yèemi gi ba ya? Ngam gun kpàa raksum yèk mum ba. 44 Seyɗan tâagunu too wun, un yiɗirre tèerra gayam wàa. Ey tiɓàrgum nirri ɗi diga ɗaarra, ti gòyrre a yèk takundi ba, ngam yèk takundi cenu dey ba. Yèerre go yèk rèeng, yèk wàa yèeye, ngam ey tirèengrum rèeng ɗi, tooy rèeng ɗi. 45 Ngam miy mi yèerre yèk takundi, un goosimde ba. 46 Wun ɗi a tîim wun, ge lòni jàk maarra a hak mum ya? To mi yèerre go yèk takundi, ngam jâ tâa un goosimde ba ya? 47 Nit yey tâage nit Fay gi, ra ge rak yèk Fay. Un un tâa nit ta Fay ba. Ngam maan un rak yèk wàa ba. 48 A ni-Yude ây de goosin de gàawan: Ot yèe takundi ba yi ye gàana, muy mu ni-Samariya ɗi, mu dii ni tindòom? 49 Yeesu de gàa daw: Dim tindòom cenim ba, amma mi coowrre di Too mum, un un coomde ba. 50 Miy mi kàmde 'misum hak mum ba. Amma kàmda jàk maan dii, ey ge hiiti. 51 Takundi takundi, mi gàanurre, to nirri fut go yèk mum, ge haa wuta ba sam ha tâam timgbàri. 52 A ni-Yude ây de gàawan: Kà yey ot cèngni, mu dii ni tindòom. Ngam Abraham wurre, a nit ây lòni nà yèk Fay ɗa aw wurre, muy de gàamu: To nirri fut go yèk mum, ge haa wuta ba sam ha tâam timgbàri. 53 Koo muy hò gum hòmu 'mita di too worro Abraham wutke gi yi? A nit ây lòni yèk Fay ɗa aw wutkige. Ji gàamu, mu ii hak wey ya? 54 Yeesu de goosi de gàa daw: To mi 'misirre go hak mum, 'misum mum ɓa hû go ɗi. Too mum ey 'misimi, yey gàanu Fak wun ɗi gi. 55 Un un cèngnu ba, amma miy mi cèngnuge. To mi gàa go, mi cèngnu ba, tâa gim tâa mi nit rèengrum rèeng kà un. Amma mi cèngnuge, mi futɗe yèk wàa ɗa. 56 Abraham wosom wun dii nà ni kâwum tinîiri, ye yiɗi e rap unji mum. Rabe, tinîir wàa kâwuge. 57 A ni-Yude ây de gàawan: Mu kpèt koo yeri ra kèrèw ba, amma mu gàa mu haawrra rapta di Abraham yi? 58 Yeesu de gàa daw: Takundi takundi, mi gàanurre, ɗoko kpàawan di Abraham gi, miy mi dii mi tâaye mgban. 59 De arrin gòok ây ngam aw còow di Yeesu. Amma de fûu a nis waw, de yuu a àay Fay.

9

1 Yeesu hòmde a orri, de rabe nirri tâage râay diga ye kpàawan gi. 2 A lor ta wàa de gunuwan de gàan: Nitkàlnjum, wun mbirge jàk maarra ya, nit yey naa, koo too wàa ni nuu wàa, ye kpàawan râaya gi yi? 3 Yeesu de goosi de gàa daw: Ti tâa râay ngam mbire jàk maarra ba, koo ngam jàk maarra too wàa ni nuu wàa ba. Amma tâa kà yey, ngam ha tèem Fay e lòt a gin wàa. 4 Sey ot tèe tèem Tooy tèegima gi, ye tâa unji ɗi. Tuma dàararre, cen nirri ge kpàaw tèerra tèem ba. 5 Ye tâami a kparri gi, miy tâage kayang kparri. 6 Yeesu ye gàa kà yey, de yime ticèkti a deesi, de làyrre bàanji, de pirrurra di râay a nis wàa. 7 De gàaw: Dik mu bòr a sòo Silowa, înuwan gin tèerriya. Ye dige gi, de bòre de koyra nis wàa ɓelsige. 8 A nit ây tâanje ni ey, ni nit ây rapku nà mgban nge waargirre jày, de gàan: Nit yey tâage nà e waargiri jày ba yi? 9 A nit ây kana de gàan: Ey ɗi. A nit ây kana ngaa de gàan: Oow, nit kana rèenji ni ey. Amma ey de gàa daw: Miy ɗi. 10 De gunuwan: Kà mbire nis wey ɓelsi ya? 11 De goosi de gàa daw: Nit yey înuwan Yeesu, ey làyrre bàanji pitkimda a nis mum, ey gàagim: Dik a sòo Silowa mu bòri. De dikmi mi bòri, de ɓelsimi. 12 De gunuwan bak: U hâ tâa nit maan ya? De gàa: Mi cèngni ba. 13 De 'maawran di nit râay nà a gin ni-Farisa ây. 14 Yeesu ye làyrre bàanji, ɓelsunu nis wàa gi, unji wuysum ɗi. 15 A ni-Farisa ây de gunuwan ɗa, kà mbire nà nis wàa ɓelse ya. De gàa daw: Bàanji iimda a nis mum, de bòrmi de rapmi. 16 A nit ây kana a tîim ni-Farisa ây de gàan: Nit yey ti ana a gin Fay ba, ngam ti fut yèk unji wuysum ba. Amma a nit ây kana ngaa de gàan: Nit mbita jàk maarra kà ge kpàaw tèerra kayeefi ây kà yey ya? A yèk maan aw raknji a tîim waw ba. 17 De gunuwan di nit râay nà bak: Kà gum gàa a hak nit yey ɓelsum nis wey gi ya? De gàa: Nit lònum yèk Fay ɗi. 18 A ni-Yude ây aw goosi yèk wàa ba, nge ey râay ɗi nà amma de ɓelse, ha de 'naasin di too wàa ni nuu wàa. 19 De gunin daw: Ey tâage hàm wun yey gàanu, râaya kpàanu un gi yi? Kà mbire nà, rapni kòsòng gi ya? 20 Too wàa ni nuu wàa de goosin de gàan: Ot cèngni, ey hàm worro ɗi. Ot cèngni ɗa, dey kpàana râaya gi. 21 Amma ot cèngni, kày mbire nà finu kòsòng, malla wun ɓelsu go nis wàa gi ba. Ey 'mirre. Gunuwan, yèe ge yèe ni hak wàa. 22 Too wàa ni nuu wàa aw gàa kà yey, ngam aw tole da ni-Yude ây. A ni-Yude ây aw raknji mgban a tîim waw aw gàa, to nirri lòni go, nge Yeesu tâage Kristu gi, yuu gaw yuunu a gin kimjum waw. 23 Ngam maan too wàa ni nuu wàa de gàan: Ey 'mirre, gunuwan. 24 De 'naasuwan bak di nit râay nà, de gàawan: Coow di Fay! Ot cèngni, nit yey nit jàk maarra ɗi. 25 De goosi de gàa daw: To nit mbita jàk maarra ɗi go, mi cèngni ba. Amma jày kpolo cèngnimi, mi râay ɗi nà, kòsòng mi rapɗe. 26 De gunuwan: Ey ji mbirumda ya? Kà ɓelsum nis wey ya? 27 De gàa daw: Mi gàanu nà mgban, amma un ngor ba. Ngam jâ yiɗunu rakta bak ya? Mba un ɗa un yiɗi ita lor ta wàa ya? 28 De njàmuwan, de gàan: Muy mu lor wàa ɗi. Orro ot lor ta Muusa ɗi. 29 Ot cèngni, Fay yèe nà ni Muusa. Amma nit yey, ot cèngni a gin ana go ba. 30 Nirri nà de gàa daw: Yey tâage jàk tâarra 'nang gi, ngam un cèngni a gin ana ba, amma ɓelsi nis mum. 31 Ot cèngni, Fay ti rak dawrre da nit mbita jàk maarra ây ba, amma nit yey cooge Fay, tèege jày yiɗi ey gi, Fay dey ge ragu. 32 Diga ɗaarra kparri aw haa rakta, nge nirri ɓelsi nis nit yey kpàawan râaya gi ba. 33 To nit yey ti ana go ngin a gin Fay ba, ge kpàaw ngin tèerra kayeefi koo jâ ba. 34 De gàawan: Muy mu dii a mbita jàk maarra, diga ye kpàamin gi, muy gum kàlnjina jày yi? De yuunuwan a gin kimjum waw. 35 Yeesu de rage, aw yuunu di nit râay nà a tîim waw. Ye kpàaw gi, de gàaw: Mu goosu di Hàm nirri yi? 36 De gunu: Nitcoorra, wun tâage ey ha mi goosu ya? 37 Yeesu de gàaw: Mu rabuge mgban. Ey ɗi, nit yey yèegumda gi. 38 De gàa: Nitcoorra, mi goosige. De gbâyge, de coowa. 39 Yeesu de gàa: Ngam iirra kiita dàama a kparri gi, ha a nit ây tâa aw rapɗe ba aw rabi, a nit ây rapke nà aw ir râay. 40 A nit ây kana a tîim ni-Farisa ây tâanjin ni ey, ye ragin kà yey de gàawan: Orro ɗa ot râay ɗi yi? 41 Yeesu de gàa daw: To un tâa go ngin râay gi, ngin jàk maarra cennu ba. Amma ye gàanu un rapɗe gi, hû go un dii ni jàk maarra.

10

1 Yeesu de gàa: Takundi takundi, mi gàanurre, to nirri ti lek go a dòor mgbâay a nin ba, amma lek go a gin kana, ey oori ɗi, nit ngorgum jày ɗi. 2 Amma nit yey leke a nin, ey hàm faat mgbâay ɗi. 3 Dey nit waatum nin faa ge faaruwa. A mgbâay ây ra gaw rak gûn wàa. Ey 'naa ge 'naasi da mgbâay rra wàa nîiri nîiri, e yuuni daw u gbaa. 4 Ye ge yuuni mgbâay rra wàa pî u gbaa, ɗàa ge ɗàa daw kpeesi. A mgbâay ây fu gaw furruwa, ngam aw cèngni gûn wàa. 5 Di ni-wooy gaw furru ba, amma 'nòo gaw 'nòowa, ngam aw cèngni gûn wàa ba. 6 Yeesu yèe daw yèk rèenjum yey, amma aw cèngni jày yèe daw gi ba. 7 Yeesu de gàa daw bak: Takundi takundi, mi gàanurre, miy tâage nin mgbâay ây. 8 A nit ây ɗàagima dàarra lang, aw a oor ây ɗi, a nit ngorgum jàk ây ɗi. Amma a mgbâay ây aw ragi daw ba. 9 Miy tâage nin. Nit yey leke a gin mum, kpàa ge kpàa saarra, le ge legi yuu ge yuu, ge kpàa jàk riirra. 10 Oori ge dàara ba, sonaa ngam e oo, e gûu, e mboysifa. Miy mi dàarage, ha a mgbâay rra mum aw kpàa gûyrra, aw yâayi. 11 Miy tâage hàm faat mbâri. Hàm faat mbâri hîirre jungci wàa ngam mgbâay ây. 12 Nit leksum hàm faaci ɗi ba. Ye tâa a mgbâay ây a woy rra wàa ɗi ba, to ey rap go jàk timòorgum dàararre, woo ge woofa mgbâay ây e 'nòo. Jàk timòorgum mòo ge mòori, ye ge yeskinifa daw. 13 Ngam ey hàm faat tileksum ɗi, ge faa mbâra ba. 14 Miy tâage hàm faat takundi, mi cèngni mgbâay rra mum. A mgbâay rra mum ɗa aw cèngnimge, 15 kà yey Tooy cèngnim gi, miy ɗa mi cèngnuge. Hîi gim hîi jungci mum ngam mgbâay ây. 16 A mgbâay ây kana aw diimi, aw cenda a dòor yey ba. Aw ɗa sey mi kàmra daw. Ra gaw rak gûn mum, tâa gaw tâa dòori kpolo, ni hàm faaci kpolo. 17 Tooy yiɗimge, ngam hîi gim hîi jungci mum, ha mi kpàasi bak. 18 Cen nirri ge arrim jungci mum ba, amma hîi gim hîi ni hak mum. Mi dii ni mbinum ha mi hîi jungci mum, mi dii ni mbinum ha mi asi ɗa. A gin Too mum kpàama yèk maan kà yey. 19 Hàanjum yèy de ane bak a tîim ni-Yude ây a yèk Yeesu. 20 A nit ây kana dèy a tîim waw de gàan: Nit yey dii ni tindòom, tidoogum ɗi! Ngam jâ raksu un ya? 21 A nit ây kana de gàan: Yèk yey yèk nit tindòom ɗi ba. Nit tindòom ge mbin ɓelsum nis nit râay ây yi? 22 Daprum ɓetkunum àay Fay ii mgbàr maan a Yerusalem, a cot iiy. 23 Yeesu gîtɗe a minjum àay Fay înuwan àay Salomon. 24 A ni-Yude ây de mgbaawan de gunuwan: Ha ningàa gum woona a èca cèngnum yèk hak wey ya? To muy mu Kristu ɗi go, ta mu fûunina ba, sakna tolnji cen! 25 Yeesu de goosi de gàa daw: Mi kàlnu nà mgban, amma un goosim ba. Tèem ây tèemi ni nîir Too mum gi, aw gaw seedim. 26 Amma un un goosim ba, ngam un mgbâay rra mum ɗi ba. 27 A mgbâay rra mum aw rakɗe gûn mum, mi cèngni dawge, aw furrimde. 28 Mi hîi dawrre gûyrra tâam timgbàri, gaw gbee ba sam koo ningàa, cen nirri ge ngosi daw a kàn mum ba. 29 Too mum hîigim mgbâay ây gi, hòme 'mita koo di jâ pî. Cen nirri ge ngosi daw a kàn Tooy ba. 30 Miy ni Too mum ot ɗi kpolo. 31 A ni-Yude ây de arrin bak gòok ây ha aw còow di Yeesu. 32 De gàa daw: Tèem mbâra dèy kàlnim dun ni mbinum Tooy. Ngam tèem hâ gàanu un còoma? 33 A ni-Yude ây de gàawan: Ti tâa ngam tèem mbâra gàana ot còom ba, amma ngam mu maasi nîir Fay. Muy mu nirri ɗi, mu gàa ni hak wey mu Fay ɗi. 34 Yeesu de goosi de gàa daw: Ti tâa kètiya a yèk mgbèngda wun ba yi, ye gàa Fay: Un un mâr ây ɗi? 35 Fay 'naasi daw mâri da nit ây tèera daw yèk wàa gi. Yèk wàa a defterre ge kpàaw mboyrra ba. 36 Kà gun gàaw di nit yey iiw Tooy nit della wàa, di nit yey tèewra a kparri gi, ey maasi nîir Fay ngam gàaye «miy tâage Hàm Fay» gi ya? 37 To mi tèerre go ngin tèem Too mum ba, ta un goosim ɗa ba. 38 Amma to tâa go mi tèerre tèem maan, koo gun goosim go dim ba, goosin a tèem ây gi, ngam ha un cèngni mbâra, Tooy 'mèmsi ni miy, miy ɗa mi 'mèmsi ni ey. 39 A nit ây de kàmin bak orri aw mòowa. Amma ey saa a kàn waw. 40 Yeesu de diksi bak a taga Yurdun, a gin ii nà Yuhanna baptisma gi. De tâa a farra. 41 A nit ây dèy de dàaran a gin wàa. De gàan: Yuhanna ti tèe kayeefi koo càa ba. Amma jày gàa pî a hak nit yey, takundi ɗi. 42 A nit ây dèy de goosuwan di Yeesu a farra.

11

1 Nit kana dii ni àyci, nîir wàa Lajaru. Ey ana a Betaniya, riiy Mariya ni Marta ɓèl wàa. 2 Mariya yey ge fòogu nak Nitcoorra ni num mgbirgumya, ge pirrufa ni gimsi hak wàa gi. Ey say wàa ɗi di Lajaru, nit àyci gi. 3 A say rra wàa de tèefan a gin Yeesu, de gàan: Nitcoorra, e rri yey nit yey yiɗum gi, dii àyciya. 4 Yeesu ye rage de gàa: Ayci yey ge ɓàru ba, amma tâa ngam 'misum Fay, ha Hàm Fay e 'mit ni erra. 5 Yeesu yiɗu di Marta, ni kaa wàa, ni lop waw Lajaru. 6 Ye rage Lajaru dii àyciya, de tâasirra unji cuk a gin tâa nà gi. 7 A dat maan de gàa da lor ta wàa: Dàan ot isi a dees Yude. 8 A lor ta wàa de gàawan: Nitkàlnjum, ti tâa unji mûsi jày ba, ye gàan a ni-Yude ây aw còom ni gòoy gi ba. A gàam mu diksi bak a farra yi? 9 Yeesu de goosi de gàa: Diga ndamji ha mbona unji ɗi ba yi? To nirri dikɗe go ni unji, ge mgbòl ba, ngam rapɗe kayang kparri gi. 10 Amma to nirri dikɗe go ni tuma, mgbò ge mgbòli, ngam kayang ti cenurra ba. 11 Ye yèe kà yey, de gàa daw: Lajaru soob worro kûurre, amma di gim dik mi mûysuwa. 12 A lor ta wàa de gàawan: Nitcoorra, to kûurre go, àyci wàa ndòo ge ndòowa. 13 Amma Yeesu yèe yèk wurra wàa di Lajaru. Aw aw dànde ey yèe yèk kûurra nistikûum. 14 Yeesu de kàl daw, ti fûuni daw ba: Lajaru wurre. 15 Gàa bak: Ye tâa mi cenda a farra ba, tinîir mum kâwimde ngam wun, ha un goosi kà yey. Amma difan ot dik a gin wàa. 16 Tomas înuwan Tifeebi de gàa da nit ây kana a tîim lor ta Yeesu: Difan orro ɗa ngam ot wutnji ni Nitcoorra! 17 Yeesu ye kpèrra a Betaniya, de kpàa aw siptuge di Lajaru diga mgban, dii a gebi unji naan. 18 Betaniya ti kpâanji ni Yerusalem ba, tâa kilomèeta taan. 19 A ni-Yude ây dèy aw dàarage a gin Marta ni Mariya, aw rûusi daw ngam wurra lop waw. 20 Marta ye rage Yeesu dàararre gi, de dige e kpàanji ni ey. Amma Mariya tâarre a àay. 21 Marta de gàaw di Yeesu: Nitcoorra, to mu tâa go ngin ay gi, lop mum ge wut ngin ba. 22 Amma koo hû go mi cèngni, jày pî gum waaw di Fay, hîi ge hîimu. 23 Yeesu de gàaw: Lop wey gû ge gûysi. 24 Marta de gàaw: Mi cèngnige, gû ge gûysi a mgbàr gûysum nit ây pî a unji gbèeni. 25 Yeesu de gàaw bak: Miy tâage nit gûysum, miy tâage jungci. Nit yey goosim gi, koo wurre, gû ge gûysi. 26 Koo wun tâage beengiya, goosim gi, ge wut ba sam ha tâam timgbàri. Mu goosirre yèk yey yi? 27 Marta de gàaw: Hîiy Nitcoorra, mi goosige muy tâage Kristu Hàm Fay, mu nit yey gese mu dàara a kparri gi. 28 Marta ye yèe kà yey, de dige e 'naasa kaa wàa Mariya. De yèew ni tiyâynjum: Nitkàlnjum dii ay go, 'naasumde. 29 Ey ye rage kà yey, de ane yaale de dige a gin Yeesu. 30 Yeesu ɗà kpètfa a riiy maan ba, dii a gin yey kpàanjin ni Marta gi. 31 A ni-Yude ây tâanjin ni Mariya a àay ngam aw rûusu gi, ye rabin ane yaale e yuu, de furruwan. Aw dàne, ey dikɗe a gebi ngam e um a farra. 32 Mariya ye dàara a gin tâa Yeesu, de rabuwa, de gbâygi a ɗàm kpees wàa, de gàaw: Nitcoorra, to mu tâa go ngin ay gi, lop mum ge wut ngin ba. 33 Yeesu ye rabu umde, ni ni-Yude ây dàanja ni ey ɗa aw umde gi, ngòlnji de 'nunsu tinîir wàa, 34 de guni: U hâ siptu un ya? De gàawan: Nitcoorra, dàara mu raptuwa. 35 Yeesu de ume rîsim. 36 A ni-Yude ây de gàan: Raptuwan, kày yiɗu gi! 37 A nit ây kana a tîim waw de gàan: Nit yey ɓelsi nisi di nit râay, ge kpàaw njangda di nit yey ta e wut ba yi? 38 Ngòlnji de ane bak a tinîir Yeesu. De dige a gebi. Geb yey iiwan gi a kpata ɓèl cèen, aw kuptu ni gòoy. 39 Yeesu de gàa: Hèenifan gòok maan! Marta say wàa di nit yey wutke gi de gàaw: Nitcoorra, dâa ge dâa, ngam tâa unji naan. 40 Yeesu de gàaw: Mi gàam nà mgban, to mu goosi go, ra gum rap 'mita Fay ba yi? 41 De hèenifan gòoy nà. Yeesu de toole u faktiturum de gàa: Tooy, mi gàamde mbew, ngam mu ragimge. 42 Mi cèngni, mu ragimde koo ningàa. Amma mi gàa kà yey, ngam ha mûsa nit ây mgbaagim gi aw goosi muy tèegima. 43 Ye gàa kà yey, de 'naase ni gûn ɓèl: Lajaru, yuura! 44 Nit wutiya nà de yuura, kàn ta wàa ni nak ta wàa kpingtumya ni tikpingtunum wurra, hak wàa ɗa forgumya ni jàk joorra. Yeesu de gàa daw: Patuwan, un woo e digi. 45 A nit ây dèy a tîim ni-Yude ây dàaga a gin Mariya, ye rabin jày tèe Yeesu gi, de goosuwan. 46 Amma a nit ây kana a tîim waw de digin a gin ni-Farisa ây, de sagin daw jày tèe Yeesu gi. 47 A nit ɓèl ta waw da nit daprum ây, ni ni-Farisa ây de kimjin ni nit ɓèl ây kana a gin ti kpolo, ngam aw yèenji. De gàan: Kà got mbir ya? Ngam nit yey tèerre jàk kayeefi ây dèy. 48 To ot woow go kà yey, a nit ây pî goo gaw goosuwa. A ni-Roma ây dàa gaw dàara, aw mboysi riiy yey, ni àay Fay, ni nit ta worro. 49 Amma nirri kpolo a tîim waw, Kayafas, ey tâage nit ɓèl daprum a yer maan, de gàa daw: Un un cèngni koo jâ ba! 50 Un dànde jày ba. Ge hòmnu della to nirri kpolo wut go ngam nit ây, ngam ta a nit ây a dees worro pî aw gbee ba. 51 Ti yèe kà yey ni hak wàa ba, amma ey nit ɓèl waw da nit daprum ây ɗi yer maan, de lòne yèk yey, gesi Yeesu e wut ngam ni-Yude ây, 52 naa ngam ni-Yude ây gbè, amma ngam ha e 'mèmsi daw kpolo da hàm ta Fay yeske gi. 53 Diga unji maan aw yèenji ha aw ɓàru di Yeesu. 54 Ngam maan Yeesu ti gîsirra a nis ni-Yude ây ba. Amma de taye a dees kana a cewci nûri, a riiy yey înuwan Efrayim. De tâan a farra ni lor ta wàa. 55 Daprum Paska ni-Yude ây hèerage. A nit ây dèy anga a dees maan lang, aw dige a Yerusalem diga Paska ɗà ii ba, ngam aw ɓetkini hak waw a ɗàm kpees Fay. 56 De kàmuwan di Yeesu. Ye gòyin a àay Fay, de gunjin de gàan: Kà dànnu ya, dàa ge dàara a daprum gi nà? 57 A nit ɓèl ta waw da nit daprum ây, ni ni-Farisa ây aw was daw nà yèy da nit ây aw gàa, to nirri cèngni go a gin tâa Yeesu gi, e sagi daw ha aw mòowa.

12

1 Unji yira ɗoko Paska e ii, Yeesu de isa a Betaniya a gin tâa Lajaru, nit yey gûysu Yeesu a wurra gi. 2 De kàmurran tiriici a farra. Marta mîinji daw tiriici. Lajaru ey dii a tîim nit ây riinje ni Yeesu gi. 3 Mariya de arre num ngirra kilo kpolo, num mgbirgumya mbâra înuwan narrdi, sàar maan àye dèy. De fòogirra a nak Yeesu, de pirru ni gimsi hak wàa. Aay pî mûu ni mgbirgum num maan. 4 Yuda Iskariyo, nirri kpolo a tîim lor ta Yeesu, nit yey ge mòow ni gâra gi, de gàa: 5 Ngam jâ tâa aw sàani num yey kurra ra taan, aw hîi da nit èca ây ba ya? 6 Ye gàa kà yey, ti tâa ngam ey yiɗi mgbaanjum da nit èca ây ba, amma ngam ey oori ɗi, mòorre kurra seede, atkirre jày iin a farra. 7 Yeesu de gàaw: Woowa, ngam ey mòorre nà num yey, ha e iimda a unji siptum mum. 8 Ngam a nit èca ây aw dii a tîim wun koo ningàa. Amma miy gim tâanji ni un unji pî ba. 9 A ni-Yude ây dèy aw cèngni Yeesu dii a farra. De dàaran naa yèk Yeesu gbè, amma ngam ha aw rabu di Lajaru ɗa, nit yey gûysu Yeesu a wurra gi. 10 A nit ɓèl ta waw da nit daprum ây aw yèenji ha aw ɓàru di Lajaru ɗa, 11 ngam a ni-Yude ây dèy aw woofa dawge, aw digi aw goosu di Yeesu ngam yèk Lajaru. 12 Ni ndamji mûsa nit ây dèy dàaga mgban a daprum gi, ye ragin Yeesu dàararre a Yerusalem, 13 de arrin waas dibinooje ây, de yuun aw kuunjufa di Yeesu, de bimin de gàan: Dàara ɗaga! 'Mita e tâaw di nit yey dàaga ni nîir Tooy Ɓèl, 'mita e tâaw di wûun ni-Israyel ây! 14 Yeesu ye kpàa hàm wamde, de naaye kà yey gàa a defterre Fay: 15 Ta mu tol ba, riiy Siyona! E rri yey wûun wey dàararre, ɗara a hàm wamde. 16 A lor ta wàa aw cèngni jàk ây gi mgbàr maan ba. Amma Yeesu ye lege a 'mita wàa, a lor ta wàa de ɓaysin jàk ây gi dii kètiya a hak wàa, nge aw mbiru nà kà yey. 17 Mûsa nit ây tâanjin nà ni Yeesu, ye 'naasu di Lajaru a gebi, gûysu a wurra gi, de sagin yèk maan. 18 Yòo maan a nit ây de digin aw kpàanji ni Yeesu, ngam aw rage ey tèe kayeefi yey. 19 A ni-Farisa ây de yèenjin a tîim waw de gàan: Raptin, un gun kpàa mbita koo jâ ba! E rri yey a nit ây pî aw furrurre. 20 A ni-Girèk ây kana aw dii a tîim nit ây dike coorra Fay a daprum gi. 21 Aw de digin a gin Filip anga a Betsayda a dees Galile, de gunuwan de gàan: Nit ɓèl, ot yiɗi rapta Yeesu. 22 Filip de dige de sagu di Andere. Andere ni Filip de dàaran aw sagu di Yeesu. 23 Yeesu de goosi de gàa daw: Unji kpèrre, ha Hàm nirri e lek a 'mita wàa. 24 Takundi takundi, mi gàanurre, to yòot tirri ti yaa go a deesi, to wut go e ɓuksa woy fûuya ba, tâa ge tâa kpolo wàa. Amma to yaa go a deesi wut go gi, ɓu ge ɓuksa woy fûu, njò ge njòr yòoci dèy. 25 Nit yey yiɗi jungci wàa gi, gbee ge gbeesi. Amma nit yey yiige jungci wàa a kparri yey, tâa ge tâa ni jungci wàa tâam timgbàri. 26 To nirri yiɗi go e tèemda tèem, sey e furrimi. A gin tâa miy, nit tèem mum ɗa ge tâa a farra. To nirri tèemda go tèem, Tooy 'mi ge 'misuwa. 27 Yeesu de gàa bak: Kòsòng jungci is mum riirre 'màari, kà gim gàa ya? Gim gàa «Tooy, saanim a mgbàr yey» yi? Amma ngam riirra 'màar maan de dàama. 28 Gàa gim gàa: Tooy 'misi nîir wey! Gûn de ana a faktiturum, de gàa: Mi 'misige, 'mi gim 'misisirra bak. 29 Mûsa nit ây gòyge a farra ye ragin gûn maan, de gàan: Jày dûuye. A nit ây kana de gàan: Malayka yèeguwa. 30 Yeesu de goosi de gàa: Naa ngam mum yèera gûn yey, amma ngam wun. 31 Niyey ii kiita kparri. Niyey gaw mànfa wûun kparri gi a gbaa. 32 Fay naanim go a kpiiri, mi woofa deesi, nà gim nàrri nit ây pî a gin mum. 33 Gàa kà yey, ha e lòni wurra yey gàa e wutki. 34 A nit ây de gàawan: Ot rage a defterre yèk mgbèngda, Kristu tâa ge tâa tâam timgbàri. Kà gum gàa, sey aw naanu di Hàm nirri a kpiiri gi ya? Wun tâage Hàm nirri gi ya? 35 Yeesu de gàa daw: Kayang dii tâarre a tîim wun bak càa. Ye tâa kayang dii a tîim wun, furrin a kayang, ngam ta kulpi e mòonu ba. Nit yey dike a kulpi, ti cèngni a gin digi ba. 36 Ye tâa kayang dii a tîim wun, goosin kayang maan, ngam ha un tâa hàm ta kayang. Yeesu ye gbèe yèerra yèk yey, de dige e fûu daw. 37 Koo ye tâa Yeesu tèe nà kayeefi ây dèy a ɗàm kpees waw gi, aw goosu ba, 38 ngam ha yèk Isaya nit lònum e gbèe ye gàa: Tooy Ɓèl, wun goosi yèk worro ya? A gin wun lòrre mbinum Tooy Ɓèl ya? 39 Aw kpàaw goosum ba, ngam Isaya gàa nà ɗa: 40 Fay râasi daw nis waw, ndèksi daw tinîir waw, ngam ta aw rap ni nis waw ba, ta aw cèngni jày ni tinîir waw ba, ngam ta aw ira a gin mum, mi ndòosi daw ba. 41 Kà yey yèe Isaya nit lònum, ngam rabe nà 'mita Yeesu, yèk hak wàa de yèeye. 42 Koo hû go a nit ây dèy a tîim nit ɓèl ây aw goosu di Yeesu. Amma ngam yèk ni-Farisa ây aw lòni goosum waw ba, ngam ta aw yuuni daw a gin kimjum waw ba. 43 Aw aw hòme yiɗum aw kpàa 'misum a gin nit ây, ni 'misum yey anga a gin Fay. 44 Yeesu de bime de gàa: Nit yey goosim gi, dim goosi ba amma di Tooy tèegima gi ɗi. 45 Nit yey rapkim gi, rabe ɗa di Tooy tèegima. 46 Miy mi dàara a kparri kà kayang, ngam koo wun goosima, ta e tâasi bak a kulpi ba. 47 To nirri rak go yèk mum, amma ti mòo ba, ti tâa miy gim hiitu di nit maan ba. Ngam mi dàara hiitum kparri ba, amma ngam mi saani kparri. 48 Jày ge hiitu gi diiw di nit yey hàwgim gi, tâa ti ngor yèk mum ba. Yèk yey yèemi gi, ey ge hiituwa a unji gbèeni. 49 Ngam mi yèe ni hak mum ba, amma Tooy tèegima gi ey kàlgim yèk yey yèemi gi, ni yèk yey kàlnjim gi ɗa. 50 Mi cèngni, yèk yey kàlim gi tâage yèk gûynum tâam timgbàri. Hû go jày yèemi gi, mi yèerre kà yey gàam Tooy.

13

1 Ɗoko daprum Paska e ii, Yeesu cèngni unji wàa kpèrre, ha e woofa kparri gi e dik a gin Tooy. Ey yiɗi dawge da nit ta wàa tâage a kparri, yiɗi dawrre ha a gbèeni. 2 Yeesu riirre tiriici ni lor ta wàa. Seyɗan leknurra mgban dànda a tinîir Yuda Iskariyo hàm Simon, ha e mòow di Yeesu ni gâra. 3 Yeesu cèngni, Tooy hîiwe jàk ây lang a kàn wàa, cèngni ɗa ey ana a gin Fay, i ge ir a gin wàa. 4 De ane a riirra tiriici, de borre lurra wàa, de arre gudel de cîi a kpàang wàa. 5 De ii sòo a taasaw, de kòlni daw nay da lor ta wàa, e tiski ni gudel nà cîi gi. 6 Ye dàara a gin Simon Piyèr, Piyèr de gàaw: Nitcoorra, muy gum kòlim dim nay yi? 7 Yeesu de goosi de gàaw: Jày tèemi gi mu cèngni ba, amma mgbàr kana cè gum cèngni. 8 Piyèr de gàaw: Gum kòlim nak mum ba sam koo ningàa! Yeesu de gàaw: To mi kòlum go ba, jày ge 'mèmsina miy ni muy ba. 9 Simon Piyèr de gàaw: Nitcoorra, kòlim naa nay gbè, amma kòlim ni kàn ta mum ni hak mum ɗa! 10 Yeesu de gàaw: Nit yey pooge sòo mgban, cen ni gayam kòlla ba, sey nak ta wàa, ngam ey is wàa lang dii ɓetkumya. Un un dii ɓetkumya, amma ti tâa un pî ba. 11 Ngam Yeesu cèngni nit yey ge mòow ni gâra gi. Yòo jày de gàa: Ti tâa un pî tâage ɓetkumya ba. 12 A dat ye kòl daw nak ta waw, de mgbapse lurra wàa, de tâasi ton de gàa daw: Un cèngni jày mbirmi a hak wun gi yi? 13 Un 'naasimde Nitkàlnjum, ni Nitcoorra. Mbâra gàanu, ngam hû go tâa miy. 14 To miy mi Nitcoorra ɗi go, mi Nitkàlnjum wun mi kòlle nak wun, gesi un ɗa un kòlnji nak ta wun. 15 Mi kàlnunu hûy, ha un mbir kà yey miy mbirim dun gi. 16 Takundi takundi, mi gàanurre, sàay ge hòmu 'mita di nit ɓèl wàa ba. Nit tèeri ɗa ge hòmu 'mita di nit yey tèegu gi ba. 17 Ye tâa un cèngni jàk ây gi, kâwum diinu, to un tèe go kà yey. 18 Mi yèe a hak wun pî ba. Mi cèngni da nit ây catmi gi. Amma sey e gbèe jày gàa a defterre Fay: Nit yey riinji tiriici ni miy, ey ge an ni yèy a gin mum. 19 Diga niyey mi gàanurre, ɗoko jàk maan e kpèrra gi. Ngam ye ge kpèrra gi, goo gun goosi, miy tâage ey. 20 Takundi takundi, mi gàanurre, to nirri ngoru go di nit yey tèemi gi, ngorim dim ɗa. Nit yey ngorgim gi, ngoru di Tooy tèegima gi ɗa. 21 Yeesu ye yèe kà yey, de rage 'màari a jungci is wàa, de lòni yèy de gàa: Takundi takundi, mi gàanurre, nirri kpolo a tîim wun mòo ge mòom ni gâra. 22 A lor ta wàa de gopnjin a tîim waw, tâa daw 'nang, aw cèngni a hak wun yèe go ba. 23 Nirri kpolo dii a tîim lor ta wàa yey yiɗu Yeesu gi, tâarre a cewci wàa. 24 Simon Piyèr de jèmufa ni nisi e cèngnunu, ha e gunu di Yeesu a hak wun yèe go yèk yey. 25 Nit yey tâa a cewci Yeesu gi, de ûura a gin wàa de gunu: Nitcoorra, wun ɗi ya? 26 Yeesu de goosi de gàaw: Di nit yey gim hîiw tàarri atnim nàam gi, ey ɗi. Ye cèe tàarri gi, de atni nàam e hîiw di Yuda Iskariyo hàm Simon. 27 Yuda ye ngore tàarri nà, Seyɗan de lege a tinîir wàa. Yeesu de gàaw: Jày gàa mu tèe gi, tèe yaale! 28 Amma koo wuna a tîim nit ây tâanjin gi, ti cèngni ngam jâ yèewrra kà yey ba. 29 A nit ây kana de dànin, mba ngam Yuda mòoge kurra seede, Yeesu de gàaw «dik mu sàara jày gaygina gi ngam daprum Paska», koo e gàaw e hîi jày da nit èca ây. 30 Hû go Yuda ye ngore tàarri gi, de yuu yaale a gbaa. Tuma luge. 31 Yuda ye yuu gi, Yeesu de gàa: Niyey Hàm nirri lege a 'mita wàa, Fay ɗa kpàa 'misum a gin wàa. 32 To Fay kpàa go 'misum a gin wàa, Fay ɗa 'mi ge 'misuwa, ge 'misu yaale. 33 Hàm ta mum, mi tâanjisirrarre ni un càa. Kà gun kàmimi. Mi gàanurre kòsòng kà yey gàami daw nà da ni-Yude ây: A gin gim diki, un gun kpàaw dikta ba. 34 Yèk mgbèngda fûuya hîinim dun: Yiɗinjin a tîim wun! Kà yey yiɗim dun gi, un ɗa yiɗinjin. 35 To un yiɗinjirre go, a nit ây pî cè gaw cèngni, un un lor ta mum ɗi. 36 Simon Piyèr de gunu di Yeesu: Nitcoorra, u hâ gàa mu diki ya? De goosi de gàaw: A gin gim diki, muy gum kpàam futa kòsòng ba. Amma a dat maan fu gum furrimi. 37 Piyèr de gàaw: Nitcoorra, ngam jâ tâa gim kpàam futa kòsòng ba ya? Mi yiɗi mi wut ngam wey. 38 Yeesu de gàaw: Wu gum wut ngam mum yi? Takundi takundi, mi gàamde: Ɗoko tigòmja e bim gi, hà gum hàlim nak taan.

14

1 Yeesu de gàa daw: Ta tinîir wun e 'nunnu ba! Goosin di Fay, goosimin dim ɗa. 2 Gin titâam ây dii dèy a àay Too mum. To ti tâa go ngin hû go ba, gim gàanu nà, mi dikɗe mi mbangsunu gin titâam yi? 3 Mi dik go mi mbangsunu gin titâam, i gim ira mi atnu a gin mum, ngam ha un tâa ɗa a gin tâa miy gi. 4 Un cèngni orri a gin dikmi gi. 5 Tomas de gàaw: Nitcoorra, ot cèngni a gin dikmu gi ba. Kà got cèngni orri ya? 6 Yeesu de goosi de gàaw: Miy tâage orri, ni takundi, ni gûyrra. Cen nirri ge dàara a gin Tooy ba, sey to hòm go a gin mum. 7 To un cèngnim go ngin, cè gun cèngnu di Too mum ɗa. Diga niyey un cèngnuge, un rabuge. 8 Filip de gàaw: Nitcoorra, kàlnina Tooy, ge ge getna. 9 Yeesu de gàaw: Diga mgban tâanjim ni un, muy mu cèngnim ba yi, Filip? Nit yey rapkim gi, rabe Tooy. Kà gum gàa, kàlnina Tooy gi ya? 10 Mu goosi, mi dii a gin Tooy, Tooy ɗa dii a gin mum ba yi? Yèk ây gi yèenim dun gi, mi yèe ni hak, mum ba. Amma Tooy tâage a gin mum, ey tèege tèem wàa. 11 Goosim, miy mi dii a gin Tooy, Tooy ɗa dii a gin mum. To naa hû go ba, goosin ngam tèem ây gi. 12 Takundi takundi, mi gàanurre, nit yey goosim gi, tèe ge tèe tèem kà yey tèemi gi ɗa, tèe ge tèe e hòmu 'mita di woy yey, ngam mi dikɗe a gin Tooy. 13 Jày gun waa pî ni nîir mum, mbi gim mbiri, ngam ha Hàm e lòni 'mita Tooy. 14 To un waam go jày ni nîir mum, mbi gim mbir jàk maan. 15 To un yiɗim go, fu gun fut yèk mgbèngda mum. 16 Miy waa gim waaw di Tooy, ha e hîinu nit mgbaanjum kana, Jungci takundi, ngam e tâanji ni un ha tâam timgbàri. 17 Jungci maan a nit kparri ây gaw kpàaw ngota ba, ngam gaw rabu ba, gaw cèngnu ba. Amma un un cèngnuge, ngam tâanjirre ni un, tâa ge tâa ni un ɗa. 18 Gim woonu tiɗir ây ba, dàa gim dàara a gin wun. 19 Ngasɗa càa, a nit kparri ây gaw rabim ba. Amma un gun rabimi, ngam mi gûyrre, un ɗa gû gun gûyi. 20 Mgbàr maan cè gun cèngni, miy mi dii a gin Too mum, un un dii a gin mum, miy ɗa a gin wun. 21 Nit yey tâage ni yèk mgbèngda mum, futku gi, ey tâage nit yey yiɗim gi. Nit yey yiɗim gi, Too mum yi ge yiɗuwa, miy ɗa yi gim yiɗuwa, lò gim lòni hak mum a gin wàa. 22 Yuda, naa Iskariyo, de gàaw: Nitcoorra, kà tâa gàa mu lòni hak wey a gin worro gbè, ti tâa a kparri ba ya? 23 Yeesu de goosi de gàaw: To nirri yiɗim go, fu ge fut yèk mum. Too mum yi ge yiɗuwa, dàa got dàara a gin wàa, ot tâanji ni ey. 24 Nit yey tâa ti yiɗim ba, ge fut yèk mum ba. Yèk yey raknu gi, ti tâa yèk mum ba, amma yèk Too mum tèegima gi ɗi. 25 Mi yèenuge yèk ây gi, ye tâanjim ni un. 26 Amma nit mgbaanjum, Jungci Delliya yey ge tèera Tooy ni nîir mum, ey kà ge kàlnjunu jày pî, ɓa ge ɓaysunu jày gàanim dun pî. 27 Tâam mbâri woonim dun, tâam mbâr mum hîinim dun. Mi hîinu kà yey hîi kparri ba. Ta tinîir wun e 'nunnu ba, e tolnu ba. 28 Un rage yèk yey yèenim dun gi: Di gim digi, i gim ira a gin wun. To un yiɗim go ngin, tinîir wun kâ ge kâwnu ngin, ngam mi dikɗe a gin Tooy, ngam Tooy hòmgim 'mita. 29 Niyey mi gàanurre kà yey, ɗoko jàk maan e kpèrra gi, ngam to kpèrra go, un goosim. 30 Gim yèenjisirra dèy ni un ba, ngam wûun kparri gi dàararre. Ey cen ni mbinum a hak mum ba. 31 Amma ngam ha kparri e cèngni, mi yiɗu di Tooy, mi tèerre jày gàam ey, anin ot digi!

15

1 Yeesu de gàa: Miy tâage fur timgbokcum takundi, Too mum tâage nit bata. 2 Koo kàn hâ a gin mum tâa ti repɗe ba, Too mum njaa ge njaafa. Koo kàn yey repke jàk nîirra, kè ge kèluwa, ngam ha e iisirra repta jàk nîirra. 3 Un un dii mgban ɓetkumya, ngam yèk yey yèenim dun gi. 4 Tâan a gin mum, miy ɗa tâa gim tâa a gin wun. Kàn ge kpàaw repta ni hak wàa ba, sey to 'mèmsi go ni fur timgbokcum. Hû go un ɗa gun kpàaw repta jày ba, sey to un 'mèmsi go ni miy. 5 Miy tâage fur timgbokcum, un tâage kàn ây. To nirri tâa go a gin mum, miy ɗa mi tâarre go a gin wàa, ey re ge rep jàk nîirra dèy. Sonaa ni miy ba, un gun kpàaw mbita koo jâ ba. 6 To nirri ti tâarre go a gin mum ba, 'mà gaw 'màktufa kà kàn timgbokcum e kòyrri. Hû waan aw kimji kàn ây maan, aw 'màktifa a ebi, aw agi. 7 To un tâarre go a gin mum, yèk mum ɗa tâarre go a gin wun, waan di Tooy jày yiɗunu gi, mbi ge mbir ngam wun. 8 To un rep go jàk nîirra dèy, kà yey gun lòrri un un lor ta mum ɗi. Hû go 'mi gun 'misu ɗa di Too mum. 9 Mi yiɗunuge kà yey yiɗim Tooy. Tâan a yiide mum! 10 To un fut go yèk mgbèngda mum, tâa gun tâa a yiide mum, kà yey furrimi yèk mgbèngda Too mum, mi tâarre ɗa a yiide wàa. 11 Mi gàanu jàk ây gi, ngam ha kâwum mum e tâa a gin wun, kâwum wun ɗa e mûu mbâra. 12 E rri yey yèk mgbèngda mum: Yiɗinjin kà yey yiɗim dun gi. 13 Nirri cen ni yiide e hòmu di yey ba, ha e wut ngam soob ta wàa gi. 14 Un tâage soob ta mum, to un tèe go jày gàanim dun gi. 15 Diga niyey gim 'naasunu sàay ây ba, ngam sàay ge cèngni jày tèe nit ɓèl wàa ba. Amma mi 'naasunu soob ta mum, ngam mi kàlnjunu jày rakma pî a gin Too mum. 16 Ti tâa un catkim dim ba, amma miy catkunu. Mi iinu ngam un dik un rep jàk nîirra, ngam jàk repta wun e gòy ɗa. Hû go Tooy hîi ge hîinu jày pî waanu ni nîir mum gi. 17 Jày gàanim dun gi, yiɗinjin! 18 To kparri yiinu go, cèngnin dim ɗàa yiicu. 19 To un tâa go ngin nit kparri ây, kparri yi ge yiɗunu, ngam un un jàk ta wàa ɗi. Amma un nit kparri ây ɗi ba, mi catnu mi iinu 'nang a kparri. Hû go kparri de yiinu. 20 Ɓaysin yèk yey yèenim dun gi: Nit tèem ge hòmu di nit ɓèl wàa ba. Ye tâa aw ɗàami ɗàari gi, ɗàa gaw ɗàanu dun ɗa. Ye tâa aw goosi yèk mum gi, goo gaw goosi yèk wun ɗa. 21 Amma jàk ây gi pî mbi gaw mbitnu ngam nîir mum, ngam aw cèngnu di Tooy tèegima gi ba. 22 To mi dàara go ngin ba, mi yèerra daw jày ba, aw cen ngin ni jàk maarra ba. Amma kà yey aw cen ni hàlla yèy ngam jàk maarra waw ba. 23 Nit yey yiigim gi, yii di Too mum ɗa. 24 To mi tèe go ngin tèem ây a tîim waw ba, tâa nirri ti haa tèerra ba, aw cen ngin ni jàk maarra ba. Amma aw rabe, aw yiinage miy ni Too mum ɗa. 25 Jàk yey tâa hû go, ngam ha e gbèe jày gàa a yèk mgbèngda waw: Aw yiime ɓa hû go. 26 Ye ge dàara nit mgbaanjum yey ge ana a gin Tooy, Jungci takundi ɗi, yey gim tèewra diga a gin Tooy e dàara a gin wun gi, see ge seedi yèk hak mum. 27 Un ɗa lò gun lòni yèk seedamku mum, ngam un tâanjirre ni miy diga ɗaarra.

16

1 Mi yèenu yèk yey, ngam ta un mgbòl ba. 2 Yuu gaw yuununu a gin kimjum waw. Unji dàa ge dàara, to nirri ɓàtnu go, dà ge dàni ii daprum mbâra a ɗàm kpees Fay. 3 Mbi gaw mbir kà yey, ngam aw cèngnu di Tooy ba, aw cèngnim dim ɗa ba. 4 Mi yèenu yèk yey, ngam unji waw kpèrra go ɓa gun ɓaysi, mi saknu nà kà yey. Mi saknu jàk ây gi diga ɗaarra ba, ngam mi tâanjirre ni un. 5 Amma kòsòng mi dikɗe a gin Tooy tèegima gi. Cen nirri kpolo a tîim wun gungim «u hâ dikmu ya» ba. 6 Amma ye yèenim dun kà yey, àyrra tinîiri mûu a gin wun. 7 Koo hû go mi gàanurre takundi, ndika mi digi, hò ge hòm della ngam wun. Ngam to mi dik go ba, nit mgbaanjum ge dàara a gin wun ba. Amma to mi dik go, tèe gim tèewra a gin wun. 8 Ye ge dàara gi, kà ge kàlni da nit ây a kparri jày tâage jàk maarra, ni yèk gòyrra ɗèm, ni yèk kiita. 9 Yèk jàk maarra, ngam aw goosim ba. 10 Yèk gòyrra ɗèm, ngam mi dikɗe a gin Tooy, a dat maan gun rapsimda ba. 11 Yèk kiita, ngam wûun kparri gi dii hiitumya. 12 Mi dii bak ni yèk ây dèy, amma mi saknu ba, ngam gun kpàaw mòorra kòsòng ba. 13 Amma ye ge dàara Jungci takundi, nà ge nàtnu a takundi pî. Ngam ge yèe ni hak wàa ba, amma jày rage pî, de ge yèe. Kà ge kàlnu jày ge dàara a ɗàm kpeesi gi ɗa. 14 Jungci takundi gi 'mi ge 'misimi, ngam a ge at a jàk mum, e kàlnu jàk maan. 15 Jày pî tâagu di Tooy, jàk mum ɗi. Ngam maan de gàami, a ge at a jàk mum, e kàlnu jàk maan. 16 Ngasɗa càa, gun rabim ba. Ɗo a dat maan càa, ra gun rapsimda. 17 A nit ây kana a tîim lor ta wàa de gunjin de gàan: Ji gàa ya ye gàana «ngasɗa càa gun rabim ba, ɗo a dat maan càa ra gun rapsimda», ye gàana ɗa «mi dikɗe a gin Tooy gi» ya? 18 De gàan ɗa: Ji gàa ya, ye gàana «ngasɗa càa gi» ya? Ot cèngni jày gàa gi ba. 19 Yeesu cèngnige, aw yiɗi aw gunuwa. De gàa daw: Un gunjirre a tîim wun a jày gàami gi: Ngasɗa càa gun rabim ba, ɗo a dat maan càa ra gun rapsimda. 20 Takundi takundi, mi gàanurre, un u gun umi taa gun taasi, amma a nit kparri ây ra gaw rak kâwum tinîiri. Un tinîiri à ge àynu, amma àyrra tinîir wun i ge ir kâwum. 21 Cot kpàarra hàm to kpèrrurra go di kin himni, dii ni àyrra tinîiri, ngam kpàarra wàa hèerage. Amma to kpàa go hàm, ge ɓaysi 'màar wàa ba, ngam kâwurre kpàa nirri a kparri. 22 Hû go un ɗa àyrra tinîiri diinu kòsòng. Amma ra gim rapnu bak, tinîir wun kâ ge kâwi, cen nirri ge ngosunu kâwum wun ba. 23 Mgbàr maan gun gunsimda koo jâ ba. Takundi takundi, mi gàanurre, koo ji waanu di Tooy, hîi ge hîinu ngam nîir mum. 24 Ha niyey un waa koo jâ ni nîir mum ba. Waan, kpàa gun kpàa, ngam ha kâwum tinîir wun e mûu. 25 Mi yèenu jàk ây gi ni rèenjum yèy. Amma unji kana dàa ge dàara, woo gim woofa yèerra ni rèenjum yèy. kà gim kàlnu yèk Tooy tolnji cen. 26 Mgbàr maan waa gun waa ni nîir mum. Gim gàanu, miy gim waaw di Tooy ngam wun ba. 27 Tooy ni hak wàa yiɗunurre, ngam un yiɗimge, un goosige mi ana a gin Fay. 28 Mi ana a gin Tooy, mi dàarage a kparri. Woo gim woofa kparri, mi dik a gin Tooy. 29 A lor ta wàa de gàawan: E rri yey mu lònirre yèy mbâra, ti tâa ni rèenjum yèy ba. 30 Niyey ot cèngni, mu cèngni jày pî mbâra, gayam cenum ha nirri e lòni jàk yey yiɗi e gunum ba. Ngam maan ot goosige, muy mu ana a gin Fay. 31 Yeesu de gun daw: Un goosige yi? 32 E rri yey unji dàararre, kpèrrage mgban, ye gun yeski koo wuna a gbaa wàa, woo gun woomfa dim kpolo. Amma mi tâa miy kpolo mum ba, ngam Tooy tâanjirre ni miy. 33 Mi yèenu jàk ây gi, ngam ha un kpàa tâam mbâri a gin mum. A kparri un dii ni 'màari. Amma mòon tinîiri, ngam mi sune kparri.

17

1 Yeesu ye yèe yèk ây gi, de toole u faktiturum de gàa: Tooy, unji dàarage. 'Misu di Hàm wey, ngam ha Hàm e 'misumu. 2 Mu hîiwe mbinum a hak nit ây pî, ngam ha e hîi daw gûyrra tâam timgbàri da nit ây pî hîimu gi. 3 To aw cèngnum go mu Fay kpolo takundi ɗi, ni Yeesu Kristu nit yey tèema gi, yey tâage gûyrra tâam timgbàri. 4 Mi 'misumge a kparri, mi gbèesige tèerra tèem yey hîim dim mi tèe gi. 5 Hû go Tooy, 'misim a ɗàm kpees wey ni 'mita yey tâagim nà a gin wey ɗoko mbangsum kparri gi. 6 Mi lòni daw nîir wey da nit ây catmu a kparri, hîim dim gi, tâage nit ta wey diga mgban, mu hîime. Aw aw furre yèk wey. 7 Niyey aw cèngni, jày pî hîim dim gi, a gin wey ana, 8 ngam mi hîi daw yèk ta wey hîim dim gi. Aw ngore aw cèngni takundi, mi ana a gin wey. Aw goosige, muy tèegima. 9 Mi waarre ngam waw. Ti tâa ngam nit kparri ây waam dum ba, amma ngam nit ây hîim dim gi, ngam aw a nit ta wey ɗi. 10 Jàk mum pî jàk wey ɗi, jàk wey ɗa jàk mum ɗi. Aw aw 'misimge. 11 Diga niyey miy gim tâasirra a kparri ba, aw aw dii tâarre a kparri, miy mi difarre a gin wey. Tooy della, faa daw ni nîir wey hîim dim gi, ngam ha aw tâa kpolo kà orro. 12 A ye tâanjim ni aw, mi faa daw ni nîir wey hîim dim gi. Mi faa dawge, cen nirri gbeegirra a tîim waw ba, sey hàm tigbeerra, ngam ha jày gàa a defterre Fay e gbèe. 13 Amma kòsòng mi difarre a gin wey. Mi yèerre yèk yey a kparri gi, ngam ha kâwum mum e mûu a gin waw. 14 Mi hîi dawge yèk wey. A nit ây a kparri aw yii dawge, ngam aw tâa nit kparri ây ba, kà yey tâa miy mi tâa nit kparri ba. 15 Mi waam nge mu arri daw a kparri gi ba, amma ngam mu faa daw, ta aw lek a kàn Tooy mamji ba. 16 Aw aw tâa nit kparri ây ba, kà yey tâa miy mi tâa nit kparri ba. 17 Ɓetkini daw ni yèk takundi! Yèk wey tâage takundi. 18 Kà yey tèemra dim a kparri gi, miy ɗa mi tèe dawrre. 19 Mi hîi hak mum ngam waw, ngam ha aw tâa nit della ta wey takundi. 20 Mi waam ngam waw gbè ba, amma mi waamde ngam nit ây gaw goosim gi ɗa a rakta yèk waw, 21 ngam ha aw pî aw tâa kpolo, kà yey muy mu Tooy mu 'mèmsi ni miy, miy ɗa mi 'mèmsi ni muy, ha aw ɗa aw tâa kpolo ni orro, ha kparri e goosi muy tèegima. 22 'Mita yey hîim dim gi, mi hîi dawge, ngam ha aw tâa kpolo kà yey tâana orro kpolo gi, 23 miy mi 'mèmsi ni aw, muy ɗa mu 'mèmsi ni miy, ngam ha 'mèmsum waw e tâa kpolo, ha kparri e cèngni muy tèegima, mu yiɗi daw ɗa kà yey yiɗim dim gi. 24 Tooy mi yiɗi, ha a nit ây hîim dim gi, aw tâa a gin gim tâa miy gi, ngam ha aw rabi 'mita mum yey hîim dim gi. Ngam mu yiɗimge diga kparri ɗà ti ɗaa ba. 25 Tooy ɗèm, a nit kparri ây aw cèngnum ba, amma miy mi cèngnumge. Aw ɗa aw cèngni, muy tèegima. 26 Mi cèngnini dawge jày a nîir wey, cè gim cèngnini daw bak, ngam ha yiide yey yiɗim dim nà gi, e tâa a tîim waw, ha miy ɗa mi tâa a tîim waw.

18

1 Yeesu ye gbèese yèerra yèy, de dige ni lor ta wàa, de yewin a taga sîirra Kederon a gin tâa hèmna, de legin a farra. 2 Yuda nit mòorra Yeesu ni gâra cèngni gin maan ɗa, ngam Yeesu dikɗe nà mgbàr kana 'nang 'nang a farra ni lor ta wàa. 3 Yuda ye kpàa mûsa sooje ây, ni lor ta waw da nit ɓèl daprum ây, ni ni-Farisa ây, de diknjin a hèmna maan. Aw mòorre jàk bàpri, ni pittirla ây, ni eb bengda. 4 Ye tâa Yeesu cèngni jày ge mbiru gi pî, de dàara a gin waw, de gun daw: Wun kàmnu ya? 5 De goosuwan: Yeesu ni-Nasaret. De gàa daw: Miy tâage ey. Yuda nit yey mòogu ni gâra gi, gòynjirre ni aw. 6 Yeesu ye gàa daw «miy tâage ey» gi, de irin u daarri, de yaan a deesi. 7 De gunsi daw bak: Wun kàmnu ya? De gàan: Yeesu ni-Nasaret. 8 Yeesu de goosi de gàa daw: Mi gàanu, miy tâage ey ba yi? To dim kàmnu go, woon daw da nit ây gi aw tayi! 9 Gàa kà yey, ngam ha yèk yey yèe nà gi e gbèe: Koo nirri kpolo ti gbeemda a tîim nit ây hîim dim gi ba. 10 Simon Piyèr dii ni ɓet ɓèl. De nduu de njaa tuk riina di nit tèem wàa di nit ɓèl daprum. Nîir wàa di nit tèem maan Malkus ɗi. 11 Yeesu de gàaw di Piyèr: Leknisi ɓet ɓèl a gin tâam wàa! 'Màar yey hîim Tooy mi rii gi, gesi mi rii ba yi? 12 Mûsa sooje ây ni nit ɓèl waw, ni lor ta waw da ni-Yude ây, de mòowan di Yeesu de 'mèmuwan. 13 De 'maawan màrra a gin Hannas, ngam ey too wàa di kin wàa di Kayafas ɗi. Kayafas tâage nit ɓèl daprum yer maan. 14 Kayafas ey gàagi daw nà da ni-Yude ây, nge hòme della to nirri kpolo wut go ngam nit ây pî. 15 Simon Piyèr ni lor kana de furruwan di Yeesu. Lori nà aw cèngjige ni nit ɓèl daprum, de leknjin ni Yeesu a àay nit ɓèl daprum nà. 16 Amma Piyèr gòyrre a nin gbaa. Lor yey cèngjin ni nit ɓèl daprum gi, de yuu e yèewra di nit waatum nin, nikin ɗi. De leknufa di Piyèr. 17 Kin yey waate nin nà de gàaw di Piyèr: Muy mu tâa nirri kpolo a tîim lor ta wàa di nit maan ba yi? De gàa: Miy ɗi ba. 18 A sàay ây ni lor ây gòyge a farra, de yeen ebi aw awi, ngam ngisim suurre. Piyèr gòyrre ni aw ɗa, awrre ebi. 19 Nit ɓèl daprum de gunu di Yeesu a yèk lor ta wàa, ni yèk ây kàlnje gi. 20 Yeesu de goosi de gàaw: Mi yèe da nit ây tolnji cen. Koo ningàa mi kàlnjirre a àay gin kimjum ây, ni a àay Fay a gin kimjum ni-Yude ây pî. Mi yèe koo jâ ni fûucu ba. 21 Ngam jâ gunim dim ya? Gun daw da nit ây rake jày gàami daw gi! Aw aw cèngni jày gàami gi. 22 Yeesu ye yèe kà yey, nirri kpolo a tîim lor ây gòyge a farra de lòsu a kpalnga de gàaw: Kà yey gum goosi yèy di nit ɓèl daprum gi yi? 23 Yeesu de gàaw: To mi yèe go yèk makta, kàlim yèk makta maan. Amma to mi yèe go yèk mbâra, ngam jâ lòsim dim ya? 24 Hannas de tèeni Yeesu 'mèmdiya a gin Kayafas, nit ɓèl daprum. 25 Simon Piyèr gòyrre e aw ebi. De gàawan: Muy ɗa mu nirri kpolo ɗi a tîim lor ta wàa di nirri gi ba yi? De hàle de gàa: Miy ɗi ba. 26 Nirri kpolo a tîim sàay rra wàa di nit ɓèl daprum, kor wàa di nit yey njaaw nà Piyèr tuy gi, de gàaw: Mi rabum nà a hèmna Gecemane ni ey ɗa ba yi? 27 Piyèr de hàle bak. Tigòmja de bime yaale. 28 Ndam ndamji birit de anan a gin Kayafas, de digin a àay ngomna. A ni-Yude ây aw lek a àay maan ba, ngam ta aw 'miskini hak waw ba, ha aw kpàa riirra tiriit Paska. 29 Pilatu ngomna de yuura a gin waw de gun daw: Yèk ji 'maara un a hak nit yey ya? 30 De goosin de gàawan: To nit yey ti tâa go ngin nit tèerra jàk makta ba, got 'maawra ngin kiita a gin wey ba. 31 Pilatu de gàa daw: Arruwan, un dik un hiitu kà yey gàa yèk mgbèngda wun! A ni-Yude ây de gàawan: Orro orri cenna ha ot ɓàr nirri ba. 32 Tâa kà yey, ngam ha yèk yey yèe nà Yeesu e gbèe, ye sage nà wurra yey gàa ge wut gi. 33 Pilatu de lege bak a àay, de 'naasu di Yeesu de gunu: Muy mu wûun ni-Yude ây ɗi yi? 34 Yeesu de gàaw: Muy yèege yèk yey ni hak wey yi, koo a nit ây kana gàagum kà yey a hak mum yi? 35 Pilatu de gunu: Miy mi ni-Yude ɗi yi? A nit ta wey ni nit ɓèl ta waw da nit daprum ây aw 'maaguma a gin mum. Ji mbirmu ya? 36 Yeesu de goosi de gàaw: Wûun mum wûun kparri ɗi ba. To wûun mum tâa go ngin wûun kparri gi, a nit ta mum haa gaw haa ngin gbàaci, ngam ta mi tâa hîirriya a kàn ni-Yude ây ba. Amma wûun mum ti tâa kà yey ba. 37 Pilatu de gunu: Ɗo muy mu wûun ɗi yi? Yeesu de goosi de gàaw: Kà yey gàamu gi, mi wûun ɗi. Aw kpàame, mi dàara a deesi, ngam ha mi sak yèk takundi. Koo wun tâage nit takundi ya, ra ge rak yèk mum. 38 Pilatu de gàaw: Ji tâage takundi gi ya? Ye gàa kà yey, de yuusa bak a gin ni-Yude ây, de gàa daw: Mi kpàarra yèk makta koo kpolo a gin nit yey ba. 39 Amma un un dii ni hàari, nge mi yuununu nit kultuma kpolo mgbàr daprum Paska. Un yiɗi mi yuunu di wûun ni-Yude ây yi? 40 Aw pî de bimin de gàan: Ta mu yuunu di nit yey ba, amma Barabba! Barabba nit ngorgum jày ɗi.

19

1 A dat maan Pilatu de gàa daw aw at Yeesu aw lèfu ni timbii. 2 A sooje ây de arrin cikci aw yuu tikangni hay, de iiwrran a hak wàa. De mgbapsuwan lurra cal. 3 De hèewrran de gàawan: Soko, wûun ni-Yude ây! De lòsuwan a kpalnga. 4 Pilatu de yuusa bak de gàa daw da nit ây: E rri yey yuu gim yuunuwa di nit yey a gin wun, ngam ha un cèngni, mi kpàarra yèk makta koo kpolo a gin wàa ba. 5 Yeesu de yuura ni tikangni hay ni lurra caliya nà. Pilatu de gàa daw: Raptuwan di nirri gi! 6 A nit ɓèl ta waw da nit daprum ây, ni nit ây waati àay Fay ye rabuwan, de bimin de gàan: Gbalu a minjum kpiiri, gbalu a minjum kpiiri! Pilatu de gàa daw: Arruwan un, un gbaluwa. Ngam miy mi kpàarra yèk makta a gin wàa ba. 7 A ni-Yude ây de goosin de gàawan: Orro ot dii ni yèk mgbèngda yey gàage, sey e wurri, ngam gàa ni hak wàa ey Hàm Fay ɗi. 8 Pilatu ye rage kà yey, de iisirra tolla. 9 De lege bak a àay, de gunu di Yeesu: U hâ anma ya? Amma Yeesu ti ɓoo koo jâ ba. 10 Pilatu de gàaw: Gum goosim koo jâ ba yi? Mu cèngni mi dii ni mbinum mi yuunum, koo mi gbalum a minjum kpiiri ba yi? 11 Yeesu de goosi de gàaw: Mu cen ni mbinum a hak mum ba, sey mbinum yey hîim Fay gi. Ngam maan jàk maarra nit yey hîigim a kàn wey, hòmu di jàk maarra wey. 12 A yèk maan Pilatu yiɗi e woowa. Amma a ni-Yude ây de bimin de gàan: To mu woow go di nit yey, mu soob wàa di Kaysara wûun ɓèl ɗi ba. Koo wun iige hak wàa wûun ya, ire nit yiir Kaysara. 13 Pilatu ye rage yèk yey, de yuunuwa di Yeesu a gbaa. De tâa a gbaat kiita a gin înuwan kukta gòoy, ni yèk Hebra aw gàawrre Gabbata. 14 Jàk yey mbire a unji mbangsum yèk daprum Paska, unji kèle kpècu a tîim hay. Pilatu de gàa da ni-Yude ây: E rri yey wûun wun! 15 De bimin de gàan: Hèenuwa, hèenuwa! Gbalu a minjum kpiiri! Pilatu de gàa daw: Mi gbalu di wûun wun yi? A nit ɓèl ta waw da nit daprum ây de goosin de gàan: Orro wûun kana cenna ba, sey Kaysara. 16 De hîi daw Yeesu ngam aw gbalu a minjum kpiiri. De arruwan di Yeesu. 17 Yeesu de yuu, de toge minjum kpiir wàa, de dige a gin înuwan sek hay, ni yèk Hebra aw gàawrre Golgata. 18 A farra gbaluwan di Yeesu a minjum kpiiri. Aw gbale nit ây kana cuk ɗa, kpolo a cewci yey, kpolo a cewci kana, Yeesu a tîim. 19 Pilatu de kère yèk hak Yeesu, de ii a fak minjum kpiiri. Yèk kèta maan gàarre kà yey: Yeesu ni-Nasaret wûun ni-Yude ây. 20 A ni-Yude ây dèy aw janggi yèk yey, ngam a gin gbaluwan di Yeesu dii gaarra a àay ây. Yèk maan kère ni yèk Hebra, ni yèk ni-Roma ây, ni yèk Girèk. 21 A nit ɓèl ta waw da nit daprum ây a tîim ni-Yude ây de gàawan di Pilatu: Ta mu kèr «wûun ni-Yude ây» gi ba, amma kèri: Ey gàage, miy mi wûun ni-Yude ây ɗi. 22 Pilatu de gàa: Jày kèrmi gi, mi kère mgban. 23 A sooje ây ye gbaluwan di Yeesu a minjum kpiiri, de arrin lurra ta wàa, de mîinjin 'nang 'nang naan, ha koo wuna a tîim waw e kpàa woy wàa. De arrin ɗa lurra wàa woy ɓèl yey tâa yuurriya kpolo, jimni cen diga u fay ha u furi. 24 De yèenjin a tîim waw de gàan: Ta ot ngarru di lurra yey ba, amma dàan ot haa saasa, ha ot cèngni wun ge kpàa go. Mbire kà yey, ngam ha e gbèe jày gàa a defterre Fay: Aw mîinji lurra ta mum a tîim waw, aw haa saasa a lurra mum woy ɓèl. Kà yey tèen a sooje ây. 25 Nuu wàa di Yeesu gòyrre a cewci minjum kpiiri, ni kaa wàa, ni Mariya kin Kolopas, ni Mariya sani-Magdala. 26 Yeesu ye rabe nuu wàa, ni lor wàa yey yiɗu gi gòyrre a farra, de gàaw di nuu wàa: Mu kini gi, e rri yey hàm wey! 27 De gàaw di lori nà: E rri yey nuu wey! Diga mgbàr maan lor wàa nà de koynu a àay wàa. 28 A dat maan Yeesu ye cèngni jày pî gbèeye gi, de gàa: Sòo ɓòyimde. Gàa kà yey, ngam ha yèy tâage kètiya a defterre Fay e gbèe. 29 Jòong dii a farra mûunumya ni sòo ɗalliya. De buuran ndàksi jày a sòo ɗalliya nà, de 'mèmin a samsi, de iiwrran a mgbelyèk Yeesu. 30 Yeesu ye haaw di sòo maan, de gàa: Jày pî gbèeye. De ûuni hak wàa, de woo jungci is wàa, de wurre. 31 Mgbàr mbangsum unji wuysum ɗi. A ni-Yude ây aw yiɗi, is nit ây aw tâa a fak minjum kpiiri ha ni ndamji a unji wuysum ba, ngam unji wuysum maan mgbàr Paska ɗi, unji ɓèl. De gunuwan di Pilatu ngam aw hòysi kòpti nak nit ây gi, aw cinifa daw a fak minjum kpiiri. 32 A sooje ây de digin de hòysifan nak nit màrra, ni nak nit cukti, gbalnjin daw ni Yeesu gi. 33 Ye dàaran a gin Yeesu, de kpàawan wurre mgban. Aw hòysi nak wàa ba. 34 Amma nirri a tîim sooje ây de baaw a ɓuurra ni ɓaal. Kòsòng njîim ni sòo de yuura a is Yeesu. 35 Nit yey rapke jàk yey, seedi yèk maan. Yèk seedamku wàa takundi ɗi. Ey cèngnige, yèerre takundi, ngam ha un ɗa un goosi. 36 Jàk yey tâa hû go, ngam ha e gbèe jày gàa nà a defterre Fay: Gaw hòysi kòpti wàa ba. 37 Gàa a gin kana ɗa: Ra gaw rabu di nit yey baawan gi. 38 A dat maan Yosef ni-Arimatiya, lor Yeesu ɗi amma ni fûucu ngam tolle da ni-Yude ây, de waaw di Pilatu, ha e at is Yeesu. Pilatu de hîiw orri. De dige de cini is Yeesu a fak minjum kpiiri. 39 Nikodemus nit yey dike nà a gin Yeesu ni tuma gi, ey ɗa de dàara, de 'maara ni num mgbirgumya înuwan Mirra, jamjumya ni num Aloye, jày ge ii kilo ra kèrèw. 40 De arrin is Yeesu, de forgin ni jàk joorra, aw iinirra ni jàk mgbirgumya nà kà hàar ni-Yude ây a siptunum wurra. 41 Hèmna dii gaarra a gin gbaluwan di Yeesu a minjum kpiiri gi. A hèmna maan geb fûuya dii a farra, yey tâa aw haa iirra nirri ba. 42 De siptin is Yeesu a farra, ngam mgbàr mbangsum unji wuysum ni-Yude ây ɗi, ngam geb maan ɗa dii gaarra.

20

1 Ndam ndamji birit a dat unji wuysum, mgbàr màrra a asaweerre, Mariya sàni-Magdala dige a gebi, de rabe gòok ɓèl nà kuptirran a gebi gi, kiwrige. 2 De ira ni 'nòocu a gin Simon Piyèr ni lor kana yey yiɗu Yeesu, de gàa daw: Aw arre is Nitcoorra a gebi, ot cèngni a gin iiwfan go ba. 3 Piyèr ni lor yey nà de digin a gebi. 4 Aw ɗa cuk de 'nòon. Lori nà hòmu 'nòorra di Piyèr, de ɗàaw kpèta a gebi. 5 De ûu e gobi a gebi, de rabe jàk joorra kpu. Amma ey ti lek ba. 6 Simon Piyèr futkufa u daarri, de lege a gebi. De rabe jàk joorra kpu, 7 ni jàk joorra yey kpingtin a hay gi, dii 'nang katiya a gin kana ni jàk joorra ây kana. 8 Lor yey nà ɗàage kpècu a gebi gi de lekfa ɗa, de rabe kà yey, de goose. 9 Ngam aw ɗà aw cèngni yèk defterre Fay ba, gàa, sey Yeesu e gûysi a tîim nit ây wutke gi. 10 A lor ta Yeesu nà cuk gi de koyin a àay waw. 11 Amma Mariya ey gòyrre a nin gebi, umde. De ûu e gop a gebi. 12 De rabe malayka ây cuk aw mgbapɗe lurra burriya, aw tâarre a gin kûu nà is Yeesu gi, kpolo u hay, kpolo u nay. 13 De gàawan: Mu kini gi, ngam jâ ummu ya? De gàa daw: Aw arre Nitcoorra mum, mi cèngni a gin iiwfan ba. 14 Ye gàa kà yey, de dûri de rabu di Yeesu gòyrre a dat wàa. Ey ti cèngsu di Yeesu gi ba. 15 Yeesu de gunu: Mu kini gi, ngam jâ ummu ya? Wun kàmmu ya? Mariya dànde ey nit waatum hèmna ɗi, de gàaw: Nit ɓèl, to muy atku go, kàlim a gin iimufa gi, ha mi asuwa. 16 Yeesu de 'naasu: Mariya! Mariya de dûri de gàaw ni yèk Hebra: Rabbuni, kà gàarra Nitkàlnjum! 17 Yeesu de gàaw: Ta mu banggimda ba, ngam mi ɗà mi naasi a gin Tooy ba. Amma dik a gin kor ta mum, mu kàl daw, naa gim naasi a gin Too mum tâage Too wun, a gin Fak mum tâage Fak wun. 18 Mariya sàni-Magdala de koyrra de kàl daw da lor ây: Mi rabu di Nitcoorra! De sagi daw jày gàawra gi. 19 Ni mbona a dat unji wuysum nà, a lor ta Yeesu aw kimji a àay, aw fanti nin ây, ngam aw tole da ni-Yude ây. Yeesu de dàara de gòye a tîim waw, de gàa daw: Tâam mbâri e tâanji ni un! 20 Ye gàa kà yey, de kàlni daw kàn ta wàa ni ɓuurra wàa. Tinîir lor ta wàa de kâwi daw, ngam aw rabu di Nitcoorra. 21 Yeesu de gàa daw bak: Tâam mbâri e tâanji ni un! Kà yey tèema Tooy, miy ɗa mi tèenurre hû go. 22 Ye gàa kà yey, de urfirra daw, de gàa: Ngorin Jungci Delliya! 23 Da nit ây gun yaafi daw jàk maarra waw, kpàa gaw kpàa jàk yaafum. Da nit ây mòonu jàk maarra waw, gaw kpàa jàk yaafum ba. 24 Tomas nirri kpolo a tîim lor ta Yeesu ra sàm cuk, înuwan Tifeebi, ey ti cenda a tîim waw ye dàara gi ba. 25 A lor ây kana de gàawan di Tomas: Orro ot rabu di Nitcoorra. Amma ey de gàa daw: To mi rap go fetki ponti ây a kàn ta wàa ba, mi bangda go mbèerri kàn mum a gin gbaluwan ni ponti ây, mi bangda kàn mum a ɓuurra wàa ba, gim goosi ba. 26 A dat unji jòròs, a lor ta Yeesu aw kimjisi bak a àay. Tomas tâanji ni aw. A nin ây aw dii fantumya. Yeesu de dàara de gòye a tîim waw, de gàa daw: Tâam mbâri e tâanji ni un! 27 De gàaw di Tomas: Parra mbèerri kàn wey a gin mum, raptu kàn ta mum! Parra kàn wey, mu bangda a ɓuurra mum! Ta mu tâa nit èca goosum ba, amma goosi! 28 Tomas de gàaw: Nitcoorra mum, Fak mum! 29 Yeesu de gàaw: Ngam mu rabim gi, mu goosige yi? Kâwum dii daw da nit ây tâa aw rabim ba, amma goose gi. 30 Yeesu tèe kayeefi ây kana dèy a nis lor ta wàa, amma ti tâa kètiya a defterre yey ba. 31 Amma a jàk ây gi aw dii kètiya ngam ha un goosi, Yeesu tâage Kristu Hàm Fay, ngam ha a goosum wun un kpàa gûyrra a gin wàa.

21

1 A dat maan Yeesu lòtɗa daw bak da lor ta wàa a sòo ɓel Tiberiya. E rri yey kày lòtɗa daw gi: 2 Simon Piyèr ni Tomas nit yey înuwan Tifeebi, ni Natanayel ni-Kaana a dees Galile, ni hàm ta Jebede, ni nit ây kana cuk a tîim lor ta wàa aw kimjige: 3 Simon Piyèr de gàa daw: Ta gim tay depta cîici. De gàawan: Orro ɗa ta got taynji ni muy. De digin aw lek a koombowal. Ni tuma maan aw mòo koo jâ ba. 4 Ye kayge ndamji, Yeesu de gòye a cewci sòo. Amma a lor ta wàa aw cèngsu, nge Yeesu ɗi ba. 5 Yeesu de gàa daw: Hàm ta mum, un dii ni cîici yi? De goosin de gàawan: Tiriici cenda dot ba. 6 De gàa daw: 'Màktin tidepni cîici a riina koombowal, kpàa gun kpàa. De 'màktin tidepni de mòon cîit ây, ha aw kpàaw nàta ba ngam gbaarra cîit ây. 7 Lor yey yiɗu Yeesu de gàaw di Piyèr: Yey Nitcoorra ɗi. Simon Piyèr ye rage nge Nitcoorra ɗi gi, de mgbapsi lurra, ngam isi kpong tâaye, de lame a sòo. 8 Amma a lor ây kana aw dàara ni koombowal, de nàrran ni tidepni cîici, ngam aw kpâa a cewci sòo ba, sey jày ge ii mèeta temèrre kpolo. 9 Ye naan a deesi, de rabin ebi ni cîici jumdiya, ni tàarri. 10 Yeesu de gàa daw: 'Maaran càa a cîit ây mòora un gi. 11 Simon Piyèr de dige e nàrra tidepni a deesi, mûurriya ni cîit ɓèl ây temèrre kpolo ni ra kèrèw sàm taan. Koo ye tâa a cîit ây aw mûu kà yey, tidepni ti ngat ba. 12 Yeesu de gàa daw: Dàaran un rii tiriici! Koo nirri kpolo a tîim lor ta wàa haaw e gunu «muy mu wun ɗi ya» ba. Ngam aw cèngsuge, Nitcoorra ɗi. 13 Yeesu de hèera de arre tàarri nà, de hîi daw, ni cîici nà ɗa. 14 Kà yey Yeesu lòtɗa daw nak taanti da lor ta wàa, a dat gûysum wàa a tîim nit ây wutke gi. 15 A dat riirra tiriici, Yeesu de gunu di Simon Piyèr: Simon hàm Yuhanna, mu yiɗim dim, hòme da nit ây gi yi? De goosi de gàaw: Eeye, Nitcoorra, mu cèngni mi yiɗumge. Yeesu de gàaw: Ɗir a hàm mgbâay rra mum. 16 De gunsurra nak cukti: Simon hàm Yuhanna, mu yiɗimge yi? De gàaw: Eeye, Nitcoorra, mu cèngni mi yiɗumge. Yeesu de gàaw: Faa a mgbâay rra mum. 17 De gunsurra nak taanti: Simon hàm Yuhanna, mu yiɗimge yi? De àyu tinîiri di Piyèr, ngam gunuge nak taanti «mu yiɗimge yi», de gàaw: Nitcoorra, mu cèngni jày pî, mu cèngni, mi yiɗumge. Yeesu de gàaw: Ɗir a mgbâay rra mum. 18 Takundi takundi, mi gàamde: Ye tâamu nà lori, mu cîirre ɓerri, mu dik a gin yiɗum gi. Amma mu wàrfi go, pa gum pat kàn wey, nit kana e cîimda ɓerri, 'maa ge 'maam a gin tâa mu yiɗi ba. 19 Gàa kà yey, ngam ha e lòni wurra yey ge wut Piyèr, ngam e 'misini Fay. Ye yèe kà yey, de gàaw di Piyèr: Furrimi! 20 Piyèr de dûri, de rabe lor yey yiɗu Yeesu furrarre u daarri, nit yey tâage nà a cewci Yeesu ye riin tiriici ni mbona gi, gungu nà: Nitcoorra, wun ge hîim a kàn nit yiir ta wey ya? 21 Piyèr ye rabu gi, de gàaw di Yeesu: Nitcoorra, ji ge mbiru di nit yey ya? 22 Yeesu de gàaw: To mi yiɗi go e tâa ha mi ira, ji tâagumda dum ya? Muy, furrimi! 23 Ngam maan yèk yey yeski a tîim kor ây, nge lor maan ge wut ba. Amma Yeesu ti gàaw, nge ge wut ba ba, sey: To mi yiɗi go e tâa ha mi ira, ji tâagumda dum ya? 24 Lor yey ey seedi jàk ây gi, kèrge gi. Ot cèngni, yèk seedamku wàa takundi ɗi. 25 A jàk ây kana tèe Yeesu gi dii dèy. To aw kèr go ngin kpolo kpolo pî, mi dànde, kparri ge kpàaw mòorra defterre ây gi, to kètiya ɗi go ngin ba.


AMAZING GRACE BIBLE INSTITUTE