Yohanu

Yohanu 1

1 Saa yee yellun di Gari wãa. Gari yi wãa ka Gusunɔ. Gari yi, yi maa sãawa Gusunɔ. 2 Yi maa wãa saa yellun di ka Gusunɔ sannu. 3 Saa yin min diya baayere ya taka koora, ba ǹ gãanu ganu taka kue yin biru. 4 Gari yi sɔɔra wãara wãa, wãa teya ta ka tɔmbu yam bururam naawa. 5 Yam bururam mɛ, mu ballimɔ yam wɔ̃ kurɔ. Yam wɔ̃ ku te, ta ǹ maa yam bururam mɛ go. 6 Durɔ goo raa wãa wi ba ra soku Yohanu, wi Gusunɔ u gɔsa u ka tɔmbu yam bururam mɛn areru diiya, kpa ben baawure u ka naanɛ doke saa win min di. 8 N ǹ mɔ wiya yam bururam mɛ, adama ba nùn gɔrimawa u ka yam bururam mɛ areru diiya. 9 Yam bururam mɛ tɔnawa mu sãa yam bururam gem mɛ mu na handuniaɔ mu tɔmbu kpuro yam dɛɛrasiammɛ. 10 Wi u sãa Gari yi, u na u wãa handunia ye sɔɔ. Win min diya handunia ya taka koora. Ka mɛ, handuniagiba kun nùn tuba. 11 U na wigibun mi, ma wigiba kun nùn wure. 12 Adama gaba nùn wura ma ba win yĩsiru naanɛ doke ma u bu dam kã bu ka ko Gusunɔn bibu. 13 N ǹ mɔ ba kua Gusunɔn bibu ka tɔnun marubu ǹ kun mɛ ka tɔnun yɛm ǹ kun mɛ ka wasin kĩru, adama ba marurawa saa Gusunɔn min di. 14 Tɛ̃, Gari yi, yi kua tɔnu wi u durom ka gem yiba, ma u ka sun sina. Sa win yiikon girima mɛɛra, yiiko yèn bweseru Gusunɔ Baaba u win Bii teereru wɛ̃. 15 Yohanu u win areru di u gbãra u nɛɛ, wiya mi, wiǹn gari na raa gerua, wi u sisi nɛn biruɔ, adama u man kere domi u wãa ba sere man mara. 16 Win durom bakam sɔɔn diya bɛsɛn baawure u win baa mwa, ma sa durom wa durom mɛnsim wɔllɔ. 17 Gusunɔ u sun wooda wɛ̃ saa Mɔwisin min di, adama durom ka gem mu nawa saa Yesu Kirisin min di. 18 Goo sari wi u Gusunɔ waare. Adama sa win Bii teereru wa wi u wãa Baaban mi. Tɛ̃ wiya u sun Baaba sɔ̃ɔsi. 19 Yeniwa Yohanu u gerua sanam mɛ Yuu be ba wãa Yerusalɛmuɔ ba yãku kowobu ka Lefiba gɔrima win mi bu ka nùn bikia, wiya were. 20 Yohanu u bu wurari, u ǹ wisibu yinɛ, u gerua batuma sɔɔ u nɛɛ, u ǹ sãa Kirisi wi. 21 Ba nɛɛ, ǹ n mɛn na, wuna were. Wuna Eli? Ma u bu wisa u nɛɛ, aawo. Ba kpam nùn bikia ba nɛɛ, wuna Gusunɔn sɔmɔ wi? Ma u nɛɛ, aawo. 22 Ba maa wure ba bikia ba nɛɛ, wuna were, a sun sɔ̃ɔwɔ kpa su wa ye sa ko bu tusia be ba sun gɔrima. Seeda yerà a tii diisimɔ. 23 Yohanu u nɛɛ, "nɛna nɔɔ ge ga gbãramɔ gbaburɔ ga mɔ̀, i Yinni swaa dɛndasio," nge mɛ Gusunɔn sɔmɔ Esai u raa gerua. 24 N deema gɔro ben gaba sãawa Falisiba. 25 Ba Yohanu bikia ba nɛɛ, mban sɔ̃ na a tɔmbu batɛmu mɔ̀, ma a kun sãa Kirisi wi, ǹ kun mɛ Eli, ǹ kun mɛ sɔmɔ wi. 26 Yohanu u bu wisa u nɛɛ, nɛ na ka nim batɛmu mɔ̀, adama goo u yɔ̃ bɛɛn suunu sɔɔ wi bɛɛ i ǹ yɛ̃. 27 Wiya u sisi nɛn biruɔ, adama u man kere, na ǹ mam tura n yɛ̃ro win baranun wɛ̃ɛ kusia. 28 Yeni kpurowa ya koora Betaniɔ, wuu ge ga wãa Yuudɛnin guruɔ mi Yohanu u batɛmu mɔ̀. 29 Yen sisiru Yohanu u Yesu wa u sisi win mi ma u nɛɛ, i Gusunɔn Yãa kinɛ kpɛndu mɛɛrio te ta handuniagibun durum wuuwa ta ka doonɔ. 30 Win gariya na raa gerua sanam mɛ na nɛɛ, durɔ goo u sisi nɛn biruɔ u man kere, domi u wãa ba sere mam mara. 31 Adama na ǹ daa nùn tuba. N deema nɛ, na nawa n ka tɔmbu batɛmu ko nim sɔɔ, kpa n nùn Isireliba giasia. 32 Yohanu u maa are teni di u nɛɛ, na Hunde wa u saram wee saa Gusunɔ wɔllun di nge kparuko, ma u sina durɔ win wii wɔllɔ. 33 Na ǹ nùn tuba, adama Gusunɔ wi u man gɔra n ka tɔmbu batɛmu ko nim sɔɔ, win tiiwa u man sɔ̃ɔwa ma wiǹn wirɔ na wa wi Gusunɔn Hunde u sarama u sɔ̃, wiya u koo tɔmbu batɛmu ko ka Hunde Dɛɛro. 34 Na maa ye wa, ma na areru di ma durɔ wi, Gusunɔn Biiwa. 35 Yen sisiru Yohanu u kpam wãa mi, u yɔ̃ ka win bwãabu yiru. 36 Sanam mɛ u Yesu wa u sarɔ, u nɛɛ, Gusunɔn Yãa kinɛ kpɛndu wee. 37 Ye bwãabu yiru be, ba gari yi nua yera ba Yesu swĩi. 38 Yesu u sĩira u bu wa ba nùn swĩi, ma u bu bikia u nɛɛ, mba i kasu. Ba nɛɛ, wɔɔru mana a wãa, Rabi. Yĩsi ten tubusiana, keu sɔ̃ɔsio. 39 U bu sɔ̃ɔwa u nɛɛ, i na i wa. Ma ba ka nùn da ba wa mi u wãa, ma ba sɔ̃ɔ sura win mi. Saa ye, ya sãawa yokan kɔba nnɛ. 40 Andere, Simɔɔ Piɛɛn wɔnɔ, u sãa tɔmbu yiru yen turo be ba Yohanun gari yi swaa daki dɔma te, ma ba Yesu swĩi. 41 U gina gbia u da u win mɔɔ Simɔɔ sokuma ma u nùn sɔ̃ɔwa u nɛɛ, sa Mɛsi wa, wi ba sokumɔ Kirisi ka Gɛrɛkim. 42 Ma u ka Simɔɔ da Yesun mi. Yesu nùn mɛɛra ma u nɛɛ, wuna Simɔɔ, Yohanun bii. Sefawa ba ko n da nun soku. Yĩsi te, ka te ba mɔ̀ Piɛɛ, ye kpuron tubusiana, kperu. 43 Yen sisiru Yesu u gɔ̃ ru doke u da Galilen temɔ. Ma u ka Filipu yinna, u nùn sɔ̃ɔwa u nɛɛ, a man swĩima. 44 Filipu u sãawa Bɛsaidagii, wi ka Andere ka Piɛɛ, wuu teugiba. 45 Filipu u da u Nataniɛli kasuma ma u nùn sɔ̃ɔwa u nɛɛ, sa yɛ̃ro wi wa wiǹn gari ba yorua Mɔwisi, ka Gusunɔn sɔmɔbun tirenɔ. Yɛ̃ro wiya, Yesu Nasarɛtigii, Yosɛfun bii. 46 Nataniɛli u nùn bikia u nɛɛ, gãa geenu koo kpĩ nu yari saa Nasarɛtin di? Filipu u nɛɛ, u na u wa. 47 Ye Yesu u Nataniɛli wa u sisi win mi, u wi tusia batuma sɔɔ u nɛɛ, i mɛɛrio, Isirelin biin tii tiiwa u wee mini, wiǹn nukurɔ taki sari. 48 Nataniɛli u nùn bikia u nɛɛ, man diya a man yɛ̃. Ma Yesu u nɛɛ, na nun wa dãrun nuurɔ Filipu u sere nun soka. 49 Nataniɛli u nɛɛ, yinni, wunɛ Gusunɔn Biiwa! Wunɛ Isireliban sina bokowa! 50 Yesu u nùn bikia u nɛɛ, a naanɛ doke yèn sɔ̃ na nɛɛ, na nun wa dãrun nuurɔ? Kaa maa gãanu wa ni nu nini kpãaru kere. 51 Ma u bu sɔ̃ɔwa u nɛɛ, ka geema, na bɛɛ sɔ̃ɔmɔ, i ko wɔllu wa ta wukiara, kpa Gusunɔn gɔradoba ba n yɔ̃ɔmɔ ba n saramamɔ Tɔnun Biin wii wɔllɔ.

Yohanu 2

1 Sɔ̃ɔ itase ba kurɔ kpaaru mɔ̀ Kanaɔ, Galilen temɔ. N deema Yesun mɛro u wãa mi. 2 Ba maa Yesu ka win bwãabu sokusia kurɔ kpaa yeru mi. 3 Ye ben tam mu kɔmia, yera Yesun mɛro u Yesu sɔ̃ɔwa ma ba ǹ maa tam mɔ. 4 Ma Yesu u nɛɛ, na nɛɛ ya? A ku man sɔ̃ ye kon ko, nɛn saa kun tura gina. 5 Ma win mɛro u sɔm kowobu sɔ̃ɔwa u nɛɛ, bu koowo kpuro ye Yesu u gerua. 6 N deema boosu nɔɔba tia su wãa mi, miǹ sɔɔ Yuuba ba ra nim doke wasin sãrasiabun sɔ̃. Gen baagere ga koo ditiri wunɔbun (100) saka mwa. 7 Yesu u sɔm kowo be sɔ̃ɔwa u nɛɛ, bu nim yibio boo si sɔɔ. Ma ba yibia ka nɔɔwɔ. 8 U maa nɛɛ, bu sɔko yande bu ka da kurɔ kpaa ten tɔnweron mi. Ma ba sɔka ba ka da. 9 Ma tɔnwero wi, u tam mɛ denda, mɛ Yesu u gɔsia mi. Adama u ǹ yɛ̃ man diya mu na, sɔm kowo be ba nim mɛ taka beya ba yɛ̃. Yera tɔnwero wi, u kurɔ kpaon durɔ soka 10 u nùn sɔ̃ɔwa u nɛɛ, sii baawure u ra ka tam durom nɛwa gina, yen biru kpa u ka na mɛ mu ǹ mɛɔnɔ dobu tura, sanam mɛ tɔmba durom mɛ nɔra ba tonda. Adama wunɛ a raa tam durom mɛni berua sere ka tɛ̃. 11 Maamaaki yeni ye Yesu u kua Kanaɔ, Galilen temɔ mi, yeya ya sãa gbiikaa win maamaaki be u kua sɔɔ. Miya u win yiiko sɔ̃ɔsi, ma win bwãaba nùn naanɛ doke. 12 Yen biru u sara u da Kapenamuɔ ka win mɛro ka win wɔnɔbu ka win bwãabu adama ba ǹ tɛ mi. 13 Yuuban tɔ̃ɔ bakaru te ba ra soku Gɔɔ sararibu, ta turuku kua. Ma Yesu u da Yerusalɛmuɔ. 14 Ma u yãanu ka nɛɛ ka totobɛrɛ dɔrobu deema sãa yerun yaaraɔ, ka maa be ba sɔ̃ ba gobi kɔsimɔ. 15 Ma u wɛ̃ɛn koromgba kua u bu gira be kpuro sãa yerun yaaran di, ka maa yãanu ka nɛɛ. Ma u be ba gobi kɔsimɔn gobi yari ye u ben tabulu fukamɔ. 16 Ma u totobɛrɛ dɔrobu sɔ̃ɔwa u nɛɛ, i ka yabu ye kpuro yario min di, i ku nɛn Baaban yɛnu gɔsia yaburu. 17 Yera win bwãaba yaaya ye ba yorua Gusunɔn gari sɔɔ ba nɛɛ, "Wunɛn dirun kĩra man mɛnimɔ nge dɔ̃ɔ." 18 Yera Yuuba ba nùn bikia, yĩre terà kaa kpĩ a sun sɔ̃ɔsi su ka gia ma a kookoo sin yiiko mɔ. 19 Yesu u bu wisa u nɛɛ, i sãa yee te suro, sɔ̃ɔ itan baa sɔɔ kon maa tu seesia. 20 Ma Yuuba ba nɛɛ, wɔ̃ɔ weeru ka nɔɔba tia ba kua sãa yee ten bana sɔɔ, amɔna kaa koosina a ka tu seeya sɔ̃ɔ ita sɔɔ. 21 Adama sãa yee tèn gari u mɔ̀, win wasiya. 22 Sanam mɛ Yesu u seewa gɔrin di, win bwãaba gari yini kpuro yaaya yi u raa gerua, ma ba Gusunɔn gari naanɛ doke ka sere maa gari yi Yesun tii u raa bu sɔ̃ɔwa. 23 Sanam mɛ Yesu u wãa Yerusalɛmuɔ Gɔɔ sararibun tɔ̃ɔ bakaru sɔɔ, tɔn dabira nùn naanɛ doke, ye ba win sɔm maamaakiginu wa ni u kua. 24 Adama u ǹ win tii bu wɛ̃ yèn sɔ̃ u be kpuron gɔ̃ rusu yɛ̃. 25 N ǹ maa tilasi goo u ka nùn tɔnun daa tusia, domi u yɛ̃ sãa sãa ye ya wãa tɔnun nukurɔ.

Yohanu 3

1 Durɔ goo wãa Falisiba sɔɔ wi ba ra nɛɛ Nikodɛmu, u sãawa Yuuban tɔnwero. 2 Durɔ wi, u da Yesun mi sɔ̃ɔ teeru wɔ̃ kuru, ma u nɛɛ, yinni, sa yɛ̃ ma Gusunɔwa nun gɔrima a ka sun keu sɔ̃ɔsi, domi goo sari wi u koo kpĩ u sɔm maamaakigii nini ko niǹn bweseru a ra ko, ma n kun mɔ Gusunɔ wãa ka yɛ̃ro. 3 Ma Yesu u nɛɛ, ka geema, na nun sɔ̃ɔmɔ, ma n kun mɔ ba tɔnu mara nɔn mɛɛruse, u ǹ kpɛ̃ u ko ban te Gusunɔ u swĩigii. 4 Nikodɛmu u nùn bikia u nɛɛ, amɔna ba koo tɔnu ma kpam sanam mɛ u bukura. U koo kpĩ u wura win mɛron nukurɔ bu sere nùn ma nɔn mɛɛruse? 5 Yesu u nùn wisa u nɛɛ, geema na nun sɔ̃ɔmɔ, goo sari wi u koo kpĩ u ko ban te Gusunɔ u swĩigii ma n kun mɔ ba nùn mara ka nim ka Gusunɔn Hunde. 6 Tɔnuwa tɔnu u ra ma, Gusunɔn Hunde maa, hundewa u ra ma. 7 A ku biti ko yèn sɔ̃ na nun sɔ̃ɔmɔ ma ba ǹ koo ko ba kun tɔnu mara nɔn mɛɛruse. 8 Woo ga mɔ̀ mi ga kĩ, ma a gen damu nɔɔmɔ, adama a ǹ yɛ̃ miǹn di ga na ka mi ga dɔɔ. Mɛya n sãa ka baawure wi Gusunɔn Hunde u mara. 9 Ma Nikodɛmu nùn bikia u nɛɛ, amɔna yabu ye, ya koo ka koora mɛ. 10 Yesu u nɛɛ, wunɛ wi a keu sɔ̃ɔsimɔ Isireliban mi, ma a kun yabu yeni yɛ̃? 11 Ka geema na nun sɔ̃ɔmɔ, bɛsɛ sa gerumɔwa ye sa yɛ̃, ma sa yen areru dimɔ ye sa wa. Ka mɛ, i ǹ kĩ i bɛsɛn areru wura. 12 I ǹ man naanɛ doke sanam mɛ na bɛɛ handunia yen gari sɔ̃ɔmɔ. Amɔna i ko ka naanɛ doke nà n bɛɛ Gusunɔ wɔllun gari sɔ̃ɔwa. 13 Goo sari wi u yɔɔwa Gusunɔ wɔllɔ ma n kun mɔ Tɔnun Bii, wi u sarama saa Gusunɔ wɔllun di. 14 Nge mɛ Mɔwisi u waa sua wɔllɔ gbaburu sɔɔ, nge mɛya Tɔnun Bii wi, u ǹ koo ko u kun suare tem di, 15 kpa baawure wi u nùn naanɛ doke u n wãaru mɔ te ta ku ra kpe. 16 Domi Gusunɔ u handuniagibun kĩru mɔ, sere u win Bii tɔn durɔ teereru bu wɛ̃, kpa baawure wi u nùn naanɛ doke, u ku kam ko, adama u n wãaru mɔ te ta ku ra kpe. 17 Gusunɔ u ǹ win Bii gɔrimɛ handuniaɔ u ka handunia taarɛ wɛ̃, adama handunia yu ka faaba waarawa saa win min di. 18 Baawure wi u nùn naanɛ doke, ba ǹ nùn taarɛ wɛ̃ɛmɔ, adama wi u kun nùn naanɛ doke ba yɛ̃ro taarɛ wɛ̃ kɔ, yèn sɔ̃ u ǹ Gusunɔn Bii teereru naanɛ doke. 19 N wee miǹn di taarɛ wɛ̃ɛbu na. Yam bururam mu na handuniaɔ, adama tɔmba yam wɔ̃ kuru kĩa n yam bururam kere yèn sɔ̃ ben kookoosu kun wã si ba mɔ̀. 20 Domi baawure wi u daa kɔ̃ sa mɔ̀, u ra n yam bururam tusawa. U ku ra maa nɛ yam bururam sɔɔ, kpa win kookoosu su ku raa sɔ̃ɔsire. 21 Adama wi u gea mɔ̀, wiya ra nɛ yam bururam sɔɔ kpa bu ka wa ma win kookoosu su kooramɔwa Gusunɔn min di. 22 Amɛn biru Yesu ka win bwãabu ba da Yudean temɔ. Miya u ka bu sina, ma u dera ba tɔmbu batɛmu mɔ̀. 23 Yohanun tii u tɔmbu batɛmu mɔ̀ Enɔnuɔ, Salimun bɔkuɔ, yèn sɔ̃ nim yiba mi. Ma tɔmba daamɔ win mi, u bu batɛmu mɔ̀. 24 Saa ye, ba ǹ gina Yohanu pirisɔm diru dokem kpa. 25 Sanam mɛya sikirinɔ ga seewa Yohanun bwãabu ka Yuu goon suunu sɔɔ sãrasiabun garin sɔ̃. 26 Ma ba da Yohanun mi, ba nɛɛ, yinni a durɔ wi yaaye? Wi u raa wãa ka wunɛ sannu Yuudɛnin guruɔ, wiǹn seeda a di? N wee, u maa dera ba tɔmbu batɛmu mɔ̀ ni. Tɔmbu kpuro ba maa daamɔ win mi. 27 Yohanu u bu sɔ̃ɔwa u nɛɛ, goo sari wi u koo gãanu wa ma n kun mɔ ni Gusunɔ u nùn wɛ̃. 28 Bɛɛn tii i sãa nɛn seedagibu ye na gerua ma n ǹ nɛ, Kirisi wi, adama ba man gɔrimawa n ka nùn swaa gbiiya. 29 I ǹ yɛ̃ ma wi u kurɔ kpao mɔ, wiya kurɔ kpaon durɔ? Durɔ win bɔrɔ wi u nùn yɔ̃ re u win nɔɔ nɔɔmɔ, wiya nuku dobu mɔ. Yen sɔ̃ na nɛn tiin nuku dobu yiba. 30 Yesun bɛɛrɛ ya koo sosiwa, kpa nɛgia yu kaara. 31 Wi u na saa wɔllun di u kpuro kere. Wi u wãa handuniaɔ, handuniagiiwa u sãa, handuniagia u ra n gerumɔ. Wi u maa na saa wɔllun di u kpuro kere. 32 Ye u wa ka ye u nua, yen arera u dimɔ. Adama goo sari wi u win areru wura. 33 Baawure wi u win areru wura, u seeda diwa ma Gusunɔ sãa geegii. 34 Wi Gusunɔ u gɔrima, wiya u Gusunɔn gari gerumɔ, domi Gusunɔn Hunde yibawa wi sɔɔ. 35 Baaba u win Bii kĩ, ma u nùn yabu kpuro nɔmu sɔndia. 36 Wi u Bii naanɛ doke u wãaru mɔ te ta ku ra kpe. Wi u kun maa Bii wi mɛm nɔɔwɛ, u ǹ wãa te wasi, adama Gusunɔn mɔru wãa yɛ̃ron wirɔ.

Yohanu 4

1 Falisiba ba nua ma Yinni Yesu u bwãabu waamɔ u batɛmu mɔ̀ n Yohanu kere. 2 N sere deema n ǹ Yesun tii u ra batɛmu ye ko, win bwãaba ba mɔ̀. 3 Sanam mɛ Yesu u nua ye ba gerumɔ, u yara Yudean di ma u gɔsira u da Galile gia. 4 Ye u dɔɔ mi, tilasiwa u ka Samari sara. 5 Ma u tura Samarin wuu gagu sɔɔ ge ba ra nɛɛ Sikari, ge ga wãa tem mɛn bɔkuɔ mɛ Yakɔbu u Yosɛfu win bii kã. 6 Miya Yakɔbun dɔkɔ ya wãa. Yesu u wasira win sanum sɔɔ, ma u sina dɔkɔ yen bɔkuɔ. N deema saa ye, sɔ̃ɔ wii wɔlla. 7 N wee kurɔ Samarigii goo u nim takam na mi, ma Yesu u nùn nim kana u nɔ. 8 Saa ye, win bwãaba kusenu dwem da wuu sɔɔ. 9 Ma kurɔ Samarigii wi, u nùn bikia u nɛɛ, amɔna wunɛ wi a sãa Yuu, a ka man nim kanamɔ a nɔ, nɛ wi na sãa Samarigii. N deema Yuuba ka Samarigibu ba ku ra tɔbirinɛ. 10 Yesu u nùn wisa u nɛɛ, à n daa Gusunɔn kɛ̃ru yɛ̃, ma a maa nùn yɛ̃ wi u nun nim bikiamɔ, kaa raa man bikiawa kpa n nun nim wãarugim kɛ̃. 11 Ma kurɔ wi, u nɛɛ, tɔnwero, ma a kun maa dɔkɔ kaaru mɔ ni, dɔkɔ ye wee ya maa duku, ma giara kaa nim wãarugim mɛ wa. 12 Bɛsɛn sikado Yakɔbu wiya u sun dɔkɔ yeni gbeeya. Wi ka win bibu ka win yaa sabenu kpuro ba maa nɔra mi. Wunɛ a Yakɔbu bɛsɛn sikado wi kerewa? 13 Yesu u nùn wisa u nɛɛ, baawure wi u nim mɛ nɔrumɔ, nim nɔru ga koo maa nùn ko. 14 Adama baawure wi u koo nim nɔ, mɛ kon nùn kɛ̃, nim nɔru ga ǹ maa yɛ̃ro mɔ̀ ka baadommaɔ. Domi nim mɛ na kon nùn kɛ̃ mu koo ko bwia yɛ̃ro sɔɔ, ye ya ko n nim sumɔ, mɛ mu tɔnu wãaru te ta ku ra kpe wɛ̃ɛmɔ. 15 Ma kurɔ wi, u nɛɛ, tɔnwero, a man nim mɛ kɛ̃ɛyɔ kpa nim nɔru gu ku maa man ko n sere nɛɛ, kon nim takam na mini. 16 Yesu u nùn sɔ̃ɔwa u nɛɛ, a doo a wunɛn durɔ sokuma i na mini. 17 Ma kurɔ wi, u nɛɛ, na ǹ durɔ mɔ. Ma Yesu u nɛɛ, gema a gerua ma a kun durɔ mɔ, 18 domi durɔbu nɔɔbuwa a raa mɔ. Wi a maa mɔ tɛ̃, u ǹ sãa wunɛn durɔ. Gema a man sɔ̃ɔwa. 19 Ma kurɔ wi, u nɛɛ, tɔnwero, na wa ma wunɛ Gusunɔn sɔmɔwa. 20 Bɛsɛ Samarigibu, bɛsɛn sikadoba ba ra raa Gusunɔ sãwa guu tenin wɔllɔ, ma bɛɛ Yuuba i nɛɛ, Yerusalɛmuɔra n weenɛ ba n da Gusunɔ sã. 21 Yesu u nùn sɔ̃ɔwa u nɛɛ, kurɔ wunɛ, a nɛn gari naanɛ koowo yi na nun sɔ̃ɔmɔ. Saa ya sisi yè sɔɔ ba ǹ maa Gusunɔ Baaba sãamɔ guu tenin wɔllɔ, ǹ kun mɛ Yerusalɛmuɔ. 22 Bɛɛ Samarigibu, i ǹ yɛ̃ wi i sãamɔ. Bɛsɛ Yuuba sa yɛ̃ wi sa sãamɔ domi faaba ya weewa saa Yuuban min di. 23 Adama saa ya sisi, ya mam tunuma kɔ, yè sɔɔ sãɔ geobu ba ko n Gusunɔ Baaba sãamɔ hunde sɔɔ ka gem sɔɔ. Benin bwesera u kasu bu nùn sã. 24 Gusunɔ u sãawa hunde, be ba maa nùn sãamɔ, ba koo nùn sãwa hunde sɔɔ ka gem sɔɔ. 25 Ma kurɔ wi, u nùn sɔ̃ɔwa u nɛɛ, na yɛ̃ ma Mɛsi wi, wi ba ra maa soku Kirisi, u sisi. Wiya ù n tunuma u koo sun baayere nɔɔsia. 26 Ma Yesu u nɛɛ, nɛna mi, nɛ wi na ka nun gari mɔ̀. 27 Sanam mɛ sɔɔra Yesun bwãaba tunuma. N bu biti kua too too ye ba wa u ka tɔn kurɔ gari mɔ̀. Ka mɛ, ben suunu sɔɔ goo kun kurɔ wi bikie mba u kĩ. Ba ǹ maa Yesu bikie, mba n kua u ka kurɔ wi gari mɔ̀. 28 Sanam mɛya kurɔ wi, u win tooru deri, ma u gɔsira u da wuuɔ. 29 U wuugibu sɔ̃ɔwa u nɛɛ, i na i durɔ goo wa wi u man sɔ̃ɔwa ye na raa kua kpuro. ǹ n man na, n ǹ Kirisi wi mi re? 30 Ba yarima wuun di ma ba da win mi gia. 31 Saa ye sɔɔra win bwãaba nùn suuru kana ba nɛɛ, yinni a den gãanu dio. 32 Adama u nɛɛ, na dĩanu ganu mɔ ni bɛɛ i ǹ yɛ̃. 33 Yen sɔ̃ na bwãa be, ba bikianamɔ nge goo u ko n ka nùn dĩanu naawɛwa u di? 34 Yesu u bu sɔ̃ɔwa u nɛɛ, nɛn dĩana n wi u man gɔriman gɔ̃ ru kĩru ko kpa n win sɔmburu wiru go. 35 Bɛɛ i ra gere i nɛɛ, n tie suru nnɛ gɛ̃ɛbun saa yu ka turi. Adama na bɛɛ sɔ̃ɔmɔ, i gbea mɛɛrio i wa nge mɛ baayeren sɔmbu tura. 36 Wi u gɛ̃ɛmɔ u win kɔsiaru mwaamɔ kɔ, u maa guramɔ ye ya ko n wãa sere ka baadommaɔ, kpa wi ka duuro ba n nuku dobu mɔ sannu. 37 Mɔn teni, ta sãa gem te ta gerumɔ ta nɛɛ, goo u duurumɔ, goo maa gɛ̃ɛmɔ. 38 Na bɛɛ gɔra i ka gɛ̃ mi i ǹ daa duure. Gaba ba duura, wee bɛɛ i yen are dimɔ. 39 Samarigibu dabiru wuu ge sɔɔ, ba Yesu naanɛ doke kurɔ win seedan sɔ̃, ye u gerua ma Yesu u nùn sɔ̃ɔwa yabu ye u raa kua kpuro. 40 Yen sɔ̃ na ye Samarigibu ba da ba nùn deema, ba nùn suuru kana u ka bu sina. Ma u ka bu sina sɔ̃ɔ yiru. 41 Be ba maa nùn naanɛ doke win tiin garin sɔ̃, beya ba dabiru bo. 42 Ma ba kurɔ wi sɔ̃ɔwa ba nɛɛ n ǹ mɔ win gere tɔnan sɔ̃ be, ba Yesu naanɛ doke. Ba maa nùn naanɛ dokewa win tiin gari yi ba nuan sɔ̃, ma ba gia ka gem ma wiya Kirisi, handunian Faaba kowo. 43 Sɔ̃ɔ yiru yen biru Yesu u doona min di, ma u da Galilen temɔ. 44 Domi win tii u gerua u nɛɛ, sɔmɔ ku ra n bɛɛrɛ mɔ win tiin temɔ. 45 Sanam mɛ u tura Galileɔ, ma Galilegibu ba nùn dam koosia ka nuku dobu domi ben tii ba raa tɔ̃ɔ bakaru da Yerusalɛmuɔ, ba maa baayere wa ye u kua tɔ̃ɔ baka te sɔɔ. 46 Ma Yesu u kpam wura Kanaɔ Galilen temɔ, mi u nim gɔsia tam. Durɔ goo maa wãa mi, sunɔn asakpɔbu sɔɔ wiǹn bii u barɔ Kapenamuɔ. 47 Ye asakpɔ wi nua ma Yesu u yara Yudean di u na Galileɔ, yera u da win mi, ma u nùn suuru kana u na Kapenamuɔ u nùn win bii bɛkia, wi u wasikiramɔ. 48 Yera Yesu nùn sɔ̃ɔwa u nɛɛ, ma n kun mɔ bɛɛ i yĩreru wa ka sɔm maamaakiginu, i ǹ naanɛ dokemɔ. 49 Ma asakpɔ wi, u nɛɛ, Yinni a gem mɔ, a na a bii wi wa u sere gbi. 50 Ma Yesu u nùn sɔ̃ɔwa u nɛɛ, u doo, win bii u bɛkura. Ma durɔ wi, u Yesun gari naanɛ doke yi u nùn sɔ̃ɔwa ma u doona. 51 Sanam mɛ u dɔɔ yɛnuɔ, u ka win sɔm kowobu yinna swaaɔ ma ba nùn sɔ̃ɔwa ma win bii u bɛkura. 52 Ma u bu bikia saa yerà u bɛkura. Ba nùn sɔ̃ɔwa ba nɛɛ, gĩa sɔ̃ɔ sɔɔn kɔba tia dee deewa bara te, ta nùn deri. 53 Sanam mɛya bii win baaba u yaaya ma saa yera mam mam Yesu u nùn sɔ̃ɔwa ma win bii u bɛkura. Ma asakpɔ wi ka win yɛnugibu kpuro ba Yesu naanɛ doke. 54 Yeniwa maamaaki yiruse ye Yesu u kua, sanam mɛ u yara saa Yudean di u da Galileɔ.

Yohanu 5

1 Yen biru Yuuban tɔ̃ɔ bakaru gara tura, ma Yesu u da Yerusalɛmuɔ. 2 Yɛru gaga wãa wuu ge sɔɔ, yãanun duu yerun bɔkuɔ, ga kɔnnɔsu nɔɔbu mɔ. Gen yĩsira Bɛtisata ka Heberum. 3 Kɔnnɔ si sɔɔra barɔ dabira ra nɛ ta n kpĩ, wɔ̃ kobu ka yɛmɔbu ka bèn wasin bee tia ya gu. ((Miya ba ra n kpĩ ba nim buriru mara. 4 Domi gasɔ ka gasɔ Yinnin gɔrado u ra saramɛ u du yɛru ge sɔɔ, kpa u nim mɛ buri. Nim mɛ, mù n burira mu kpa, wi u gbia u dua mɛ sɔɔ u ra bɛkurewa baa ǹ n bara teren na yɛ̃ro u mɔ.)) 5 Durɔ goo maa wãa mi, wi u barɔ saa wɔ̃ɔ weeru yiru sarin di. 6 Yesu u nùn wa u kpĩ mi. Ye u maa gia ma u wãa mi n tɛ, u nùn bikia u nɛɛ, a kĩ a bɛkura? 7 Barɔ wi, u nùn wisa u nɛɛ, Yinni, na ǹ goo mɔ wi u koo man sua u kpɛ̃ɛ yɛru ge sɔɔ, sanam mɛ nim mu burira. Nà n tatirimɔ n ka du mi, goo u ra man kãsiwa. 8 Yesu u nùn sɔ̃ɔwa u nɛɛ, a seewo a wunɛn kɔ̃ɔ sua kpa a n sĩimɔ. 9 Mii mii durɔ wi, u bɛkura ma u win kɔ̃ɔ sua u sĩimɔ. N deema tɔ̃ɔ te, ta sãawa tɔ̃ɔ wɛ̃rarugiru. 10 Yen sɔ̃ na Yuuba ba durɔ wi sɔ̃ɔwa wi ba bɛkia mi, ba nɛɛ, tɔ̃ɔ wɛ̃rarugira gisɔ, wooda ya maa yina goo u kɔ̃ɔ sɔbe. 11 Ma u bu sɔ̃ɔwa u nɛɛ, wi u man bɛkia, wiya u nɛɛ n nɛn kɔ̃ɔ suo na n sĩimɔ. 12 Ba nùn bikia ba nɛɛ, wara nun sɔ̃ɔwa a wunɛn kɔ̃ɔ suo a n sĩimɔ. 13 N deema durɔ wi ba bɛkia mi, u ǹ yɛ̃ro yɛ̃, domi Yesu u doona min di, tɔn wɔru ge ga wãa min sɔ̃. 14 Yen biru Yesu u nùn wa sãa yerɔ ma u nɛɛ, n wee a bɛkura, a ku ra maa durum ko, kpa kɔ̃ sa ye ya yeni kere yu ku raa maa nun deema. 15 Ma durɔ wi, u wura Yuu ben mi gia u bu sɔ̃ɔwa ma Yesuwa u nùn bɛkia. 16 Yenin saabuwa Yuuba ba Yesu nɔni sɔ̃ɔru torua yèn sɔ̃ u yabu yen bweseru kua tɔ̃ɔ wɛ̃rarugiru sɔɔ. 17 Adama Yesu u bu sɔ̃ɔwa u nɛɛ, nge mɛ nɛn Baaba u sɔmburu mɔ̀ sere ka tɛ̃, mɛya nɛn tii na maa mɔ̀. 18 Gari yin sɔ̃ na Yuuba ba kpam hania sosi bu ka nùn go, n ǹ mɔ yèn sɔ̃ u tɔ̃ɔ wɛ̃rarugiru sanka tɔna, adama yèn sɔ̃ u maa nɛɛ win Baabawa Gusunɔ. Mɛsuma u ka win tii Gusunɔ nɛrasinamɔ. 19 Yera Yesu u nɛɛ, ka geema na bɛɛ sɔ̃ɔmɔ, nɛ Bii na ǹ kpɛ̃ n gãanu ganu ko ka nɛn tii ma n kun mɔ gãa ni na wa nɛn Baaba u mɔ̀. Baayere ye Baaba u mɔ̀, yera nɛ Bii na maa mɔ̀. 20 Domi Baaba u win Bii kĩ, ma u nùn yabu baayere sɔ̃ɔsimɔ ye u mɔ̀. U koo nùn sɔmburu sɔ̃ɔsi te ta teni kere, kpa bɛɛ kpuro i ka biti ko. 21 Nge mɛ Baaba u ra gɔribu seeye kpa u bu ko wasobu, nge mɛya maa, be Bii u kĩ u wãaru wɛ̃, u bu tu wɛ̃ɛmɔ. 22 Baaban tii u ku ra maa goo siri, adama u siribu kpuro win Bii nɔmu sɔndia, 23 kpa tɔmbu kpuro bu ka Bii bɛɛrɛ wɛ̃ nge mɛ ba Baaba bɛɛrɛ wɛ̃ɛmɔ. Wi u kun Bii bɛɛrɛ wɛ̃, Baabawa u ǹ bɛɛrɛ wɛ̃, wi u nùn gɔrima. 24 Ka geema na bɛɛ sɔ̃ɔmɔ, baawure wi u nɛn gari swaa daki, ma u wi u man gɔrima naanɛ doke, yɛ̃ro wãaru mɔ te ta ku ra kpe. U ǹ maa sisi siri yerɔ, adama u gɔɔ sarari u dua wãaru sɔɔ. 25 Ka geema na bɛɛ sɔ̃ɔmɔ, saa ya sisi ya mam tunuma kɔ, ye gɔribu ba koo Gusunɔn Biin nɔɔ nɔ. Be ba koo maa gu nɔ ba ko n wãaru mɔ. 26 Nge mɛ Baaba win tii u sãa wãarun nuuru, nge mɛya u maa win Bii kua wãarun nuuru. 27 Ma u nùn yiiko wɛ̃ u ka siribu ko yèn sɔ̃ wiya Tɔnun Bii wi. 28 I ku biti ko yenin sɔ̃, domi saa ya sisi yè sɔɔ be ba wãa sikirɔ ba koo win nɔɔ nɔ 29 kpa bu yari. Be ba gea kua ba koo sikura bu ka wãaru di. Be ba maa kɔ̃ sa kua kpa bu sikura bu ka bu siri. 30 Yesu maa nɛɛ, na ǹ kpɛ̃ n gãanu ganu ko ka nɛn tii. Nge mɛ Baaba man sɔ̃ɔsimɔ, nge mɛya na ra ka siri, kpa nɛn siribu bu n ka sãa dee dee, domi n ǹ mɔ nɛn tiin gɔ̃ ru kĩra na kasu, ma n kun mɔ wi u man gɔrimagiru. 31 Nà n nɛn tii areru diiyammɛ, are te, ta ǹ naanɛ mɔ. 32 Adama goo wãa wi u man areru diiyammɛ, na maa yɛ̃ ma ye u man geruammɛ ya sãawa gem. 33 Bɛɛ i bɛɛn sɔmɔbu gɔra Yohanun mi, ma u gem areru di. 34 N ǹ mɔ tilasi tɔnu u man areru diiya, na gesi yeni gerumɔwa kpa i ka faaba waara. 35 Yohanu u sãawa nge fitila ge ga mɛni ga yam bururasie. Bɛɛ i kĩa i n nuku dobu mɔ win yam bururam mɛ sɔɔ saa fiiko. 36 Adama na areru mɔ te ta Yohanugiru kpãaru kere. Yera sɔma ye na mɔ̀, ye Baaba man nɔmu sɔndia. Yeya ya sɔ̃ɔsimɔ ma Baabawa u man gɔrima. 37 Baaba wi u maa man gɔrima win tii u man areru diiya. Bɛɛ i ǹ win nɔɔ nɔɔre baa nɔn teeru, i ǹ maa ka nùn nɔnu waare. 38 I ǹ win gari wure yèn sɔ̃ i ǹ yɛ̃ro naanɛ doke wi u gɔrima. 39 Bɛɛ i ra n mɛɛrimɔ Gusunɔn gari sɔɔ yèn sɔ̃ i tamaa i ko wãaru te ta ku ra kpe wa mi sɔɔ. N deema gari yiya yi man areru diiyammɛ. 40 Ka mɛ, i yina i na nɛn mi kpa i n ka wãaru mɔ. 41 Na ǹ bɛɛrɛ kasu tɔmbun mi. 42 Adama na bɛɛ yɛ̃. Na yɛ̃ ma bɛɛn tii i ǹ Gusunɔn kĩru mɔ bɛɛn nukurɔ. 43 Na nawa ka nɛn Baaban yĩsiru, ma i ǹ man wure. Adama goo ù n na ka win tiin yĩsiru, wiya i ko wura. 44 Bɛɛ i ra kã i bɛɛrɛ kuana, adama i ku ra Gusunɔ turon bɛɛrɛ kasu. ǹ n mɛn na, amɔna i ko ka naanɛ doke. 45 Ka mɛ, i ku bwisiku ma nɛna kon bɛɛ durum mani Baaban mi. Mɔwisiwa koo bɛɛ durum mani, wiǹn gari i naanɛ sãa. 46 Bɛɛ iǹ n daa Mɔwisi naanɛ doke ka gem, i ko raa maa nɛn tii naanɛ doke, domi nɛn gariya Mɔwisi u yorua. 47 Adama i ǹ win gari naanɛ doke. ǹ n mɛn na, amɔna i ko ka nɛn gari naanɛ doke.

Yohanu 6

1 Amɛn biru Yesu u daa bure te tɔbura te ba ra soku Galilen daa bureru, tera ba ra maa soku Tiberia. 2 Miya tɔn wɔru guna ya nùn swĩi yèn sɔ̃ ba win sɔm maamaakiginu wa ni u kua barɔbu sɔɔ. 3 Ye Yuuban tɔ̃ɔ baka te ba ra soku Gɔɔ sararibu ta turuku kua, Yesu u yɔɔwa guuru wɔllɔ u sina ka win bwãabu sannu. 5 Ye u win nɔni sua wɔllɔ ma u tɔn dabiru wa ta sisi win mi, ma u Filipu bikia u nɛɛ, ma gia sa ko dĩanu wa su dwe tɔn beni bu ka di. 6 U yeni geruawa u ka Filipun laakari mɛɛri, domi win tii u yɛ̃ kɔ ye u koo ko. 7 Ma Filipu u nùn wisa u nɛɛ, baa sɔm kowon sɔ̃ɔ goobun (200) gobi kun tura su ka dĩanu dwe tɔn beni bu ka di, baa ǹ n fiiko fiikon na. 8 Win bwãabun turo, wi ba ra soku Andere, Simɔɔ Piɛɛn wɔnɔ, u nùn sɔ̃ɔwa u nɛɛ, 9 bii tɔn durɔ goo wãa mini wi u pɛ̃ɛ nɔɔbu mɔ ka swɛ̃ɛ piiminu yiru. Adama mba yeni ya koo ko tɔn dabi teni sɔɔ. 10 Ma Yesu u nɛɛ, i de tɔn be, bu sina. N deema yaka kpɛnsu yiba mi, ma tɔn be, ba sina si sɔɔ. Tɔn durɔbun geera tura nɔrɔbun suba nɔɔbu (5.000). 11 Ma Yesu u pɛ̃ɛ ye sua u Gusunɔ siara. Ye u kpa u dera ba tɔn be yabua be ba sɔ̃ mi, mɛya maa ka swɛ̃ɛ yi. Ma tɔn be kpuro ba di nge mɛǹn nɔru ba kĩ. 12 Ye ba deba ba kpa u win bwãabu sɔ̃ɔwa bu guro ye n tie kpa n ku raa kam ko. 13 Ma ba pɛ̃ɛ nɔɔbu yen ye ba di n tiara gure birenu wɔkura yiru sɔɔ. 14 Sanam mɛ tɔn be, ba sɔm maamaakigiru wa te Yesu u kua ba gerua ba nɛɛ, ka geema, wiya Gusunɔn sɔmɔ wi u sisi handuniaɔ. 15 Ye Yesu u gia ma ba wesianamɔwa bu ka nùn mwa bu sunɔ ko, yera u gɔsira u da guuru wɔllɔ wi turo. 16 Ye n kua yoka ma win bwãabu ba da Galilen daa burerun goorɔ. 17 Ba dua goo nimkuu sɔɔ ma ba daa bureru tɔburɔ ba dɔɔ Kapenamu gia. Saa ye, yam tĩra kɔ, ma Yesu kun bu deemam kpa. 18 Wee daa bureru ta burinamɔ yèn sɔ̃ woo damguu ga mɔ̀. 19 Ye ba ka sɛsɛru nim mura nge kilo nɔɔba tian saka, ba Yesu wa u sĩimɔ nim wɔllɔ u wee goo nimkuu gia, ma bɛrum bu mwa. 20 Adama Yesu u nɛɛ, nɛna, i ku bɛrum ko. 21 Sanam mɛya ba ka nùn nuku dobu mwa goo nimkuu sɔɔ. Mii mii goo nimkuu ge, ga tura mi ba dɔɔ. 22 Yen sisiru tɔn be ba gina wãa daa bure ten guru mi, ba yaaya ma goo nimkuu teuwa ga raa wãa mi. Ba maa yɛ̃ ma Yesu kun due goo ge sɔɔ ka win bwãabu sannu, be tɔnawa ba doona. 23 Wee, goosu gasu maa na yam min bɔkuɔ mi ba pɛ̃ɛ di saa ye Yinni u Gusunɔ siara u kpa. 24 Yen sɔ̃ na ye ba wa ma Yesu ka win bwãabun goo kun wãa mi, ba goo si dua ba da Kapenamuɔ ba Yesu kasu. 25 Ye tɔn be, ba Yesu wa daa bure ten gooru giɔ, ba nùn bikia ba nɛɛ, yinni, domma a na gee? 26 Yesu u bu wisa u nɛɛ, ka geema na bɛɛ sɔ̃ɔmɔ, bɛɛ i man kasuwa yèn sɔ̃ i pɛ̃ɛ di i deba, n ǹ mɔ yèn sɔ̃ i nɛn sɔm maamaakiginu wa. 27 I ku dĩa ni nu ra kɔ̃ si tɔnan sɔmburu ko, adama i dĩa ni nu wãaru te ta ku ra kpe wɛ̃ɛmɔn sɔmburu koowo. Dĩa niya Tɔnun Bii u koo bɛɛ wɛ̃ yèn sɔ̃ wiya Gusunɔ Baaba u win yiikon yĩreru dokea. 28 Sanam mɛya ba nùn bikia ba nɛɛ, mba sa ko ko su ka sɔma ko ye Gusunɔ u kĩ. 29 Yesu u bu wisa u nɛɛ, sɔmbu te Gusunɔ u kĩ, tera i win gɔro naanɛ doke. 30 Ba nùn bikia ba nɛɛ, yĩre terà kaa sun sɔ̃ɔsi kpa su ka nun naanɛ doke. Nge sɔmbu terà kaa ko. 31 Bɛsɛn sikadoba ba dĩa ni ba ra soku manna di gbaburu sɔɔ, nge mɛ ba yorua ba nɛɛ, "Saa Gusunɔ wɔllun diya u bu dĩanu kã ba di." 32 Yesu nɛɛ, ka geema na bɛɛ sɔ̃ɔmɔ, n ǹ mɔ Mɔwisiwa u bɛɛ dĩanu wɛ̃ saa wɔllun di, adama nɛn tiin Baabawa u bɛɛ dĩa geenu wɛ̃ɛmɔ saa wɔllun di. 33 Domi dĩa ni Gusunɔ u wɛ̃ɛmɔ, niya wi u sarama saa Gusunɔ wɔllun di ma u handuniagibu wãaru wɛ̃ɛmɔ. 34 Ba nùn sɔ̃ɔwa ba nɛɛ, Yinni, a n sun dĩa ni wɛ̃ɛmɔ baadomma. 35 Yesu u bu sɔ̃ɔwa u nɛɛ, nɛna dĩa wãaruginu. Baawure wi u na nɛn mi, gɔ̃ɔra kun maa nùn goomɔ. Wi u maa man naanɛ doke, nim nɔru ga ǹ nùn goomɔ ka baadommaɔ. 36 Adama, nge mɛ na raa bɛɛ sɔ̃ɔwa, i man wa kɔ, i ǹ maa man naanɛ doke. 37 Baawure wi Baaba man wɛ̃ u koo na nɛn mi. Wi u maa na nɛn mi, na ǹ nùn yinamɔ, baa ǹ n kua amɔ. 38 Domi na saramawa saa Gusunɔ wɔllun di n ǹ mɔ n ka nɛn tiin gɔ̃ ru kĩru ko ma n kun mɔ wi u man gɔrimagiru. 39 Wi u man gɔriman gɔ̃ ru kĩi te wee, n ku ra goo kɔ̃ baa tɔn turo be u man wɛ̃ sɔɔ, adama n ka be kpuro seeyawa gɔrin di sanam dãakim sɔɔ. 40 Nɛn Baaban gɔ̃ ru kĩi tera, baawure wi u Bii wa, ma u nùn naanɛ doke, u n wãaru mɔ te ta ku ra kpe. Kon maa yɛ̃ro seeya gɔrin di sanam dãakim sɔɔ. 41 Sanam mɛya Yuuba ba wɔki, yèn sɔ̃ u gerua ma wiya dĩa ni nu sarama saa Gusunɔ wɔllun di. 42 Ma ba bikiana ba nɛɛ, n ǹ Yesu wi mini? N ǹ Yosɛfun bii wiǹn baaba ka mɛro sa yɛ̃? Amɔna u ka gerumɔ ma wiya sarama saa wɔllun di. 43 Yesu u bu wisa u nɛɛ, i ku maa wɔki. 44 Goo sari wi u koo kpĩ u na nɛn mi ma n kun mɔ Baaba wi u man gɔrima u yɛ̃ro gawama. Nɛna kon maa nùn seeya gɔrin di sanam dãakim sɔɔ. 45 Gusunɔn sɔmɔbu ba yorua ba nɛɛ, "Gusunɔn tii u koo baawure keu sɔ̃ɔsi." ǹ n mɛn na, baawure wi u Baaban nɔɔ nua, ma u win sɔ̃ɔsiru mwa, yɛ̃ro u koo na nɛn mi. 46 N ǹ mɔ goo u Baaba waare ma n kun mɔ wi u na saa Gusunɔn min di, wiya u Baaba wa. 47 Ka geema na bɛɛ sɔ̃ɔmɔ, wi u man naanɛ doke, u wãaru mɔ te ta ku ra kpe. 48 Nɛna dĩa wãaruginu. 49 Bɛɛn sikadoba ba manna di gbaburu sɔɔ ma ba gu. 50 Adama nɛ na ka dĩanu yã ni nu sarama saa Gusunɔ wɔllun di, ni tɔnu u koo di u kun ka gu. 51 Nɛna dĩa wãaruginu ni nu sarama Gusunɔ wɔllun di. Baawure wi u nu di u wãaru mɔ sere ka baadommaɔ. Dĩa ni kon yɛ̃ro wɛ̃, nɛn wasiya yi na wɛ̃ɛmɔ handuniagibu ba n ka wãaru mɔ. 52 Gari yi, yi dera sikirinɔ ga dua Yuuba sɔɔ. Ba nɛɛ, amɔna durɔ wi, u koo ka sun win wasi wɛ̃ su tem. 53 Yesu u nɛɛ, ka geema na bɛɛ sɔ̃ɔmɔ, ma n kun mɔ i Tɔnun Biin yaa tema, kpa i win yɛm nɔ, wãaru sari bɛɛ sɔɔ. 54 Domi baawure wi u nɛn yaa tema, ma u nɛn yɛm nɔra, u wãaru mɔ te ta ku ra kpe. Kon maa nùn seeya gɔrin di sanam dãakim sɔɔ. 55 Ka gem nɛn wasi dĩana, nɛn yɛm maa gãa nɔrurana. 56 Domi wi u nɛn yaa tema ma u nɛn yɛm nɔra, u ko n wãawa nɛ sɔɔ, ma nɛn tii ko na n maa wãa yɛ̃ro sɔɔ. 57 Baaba wasowa u man gɔrima, win saabuwa na maa wãa. Mɛya baawure wi u man tema, yɛ̃ro u wãaru mɔ nɛn sɔ̃. 58 Na ka dĩanu yã ni nu sarama saa Gusunɔ wɔllun di. Nu ǹ sãa nge dĩa ni ba sokumɔ manna ni bɛɛn sikadoba ba di, domi ba di, ba maa gu. Adama wi u nini di u ko n wãawa ka baadommaɔ. 59 Yeniwa Yesu u gerua mɛnnɔ yeru mi u bu keu sɔ̃ɔsimɔ Kapenamuɔ. 60 Sanam mɛ win bwãa dabira gari yi nua ba nɛɛ, gari yi, gari sɛ̃sɔgiiya, wara u koo kpĩ u yi nɔ. 61 Yesu u gia win tii sɔɔ ma win bwãabu ba wɔki gari yin sɔ̃. Yen sɔ̃ na u bu bikia u nɛɛ, gari yi, yi bɛɛ torasiamɔwa? 62 Bɛɛ iǹ n maa wa Tɔnun Bii u yɔɔmɔ u wurɔ mi u raa wãa maa ni? 63 Hundewa ya ra tɔnu ko waso, wasi kun are gɛɛ mɔ. Gari yi na bɛɛ sɔ̃ɔwa, hundewa, wãara maa. 64 Ka mɛ, gaba wãa bɛɛ sɔɔ be ba kun naanɛ doke. Domi Yesu u yɛ̃ saa yellun di be ba kun nùn naanɛ doke, ka wi u koo nùn dɔmɛ. 65 U maa nɛɛ, yenin sɔ̃ na na bɛɛ sɔ̃ɔwa ma goo sari wi u koo kpĩ u na nɛn mi, n kun ka Baaban kɛ̃ru. 66 Saa dɔma ten diya win bwãa dabira nùn suuri, ba ǹ maa ka nùn sĩimɔ. 67 Yen sɔ̃ na u win bwãabu wɔkura yiru ye bikia u nɛɛ, bɛɛn tii maa ni? I kĩ i doona? 68 Simɔɔ Piɛɛ u nùn wisa u nɛɛ, Yinni, weren miya sa ko da. Wuna a wãaru te ta ku ra kpen gari mɔ. 69 Tɛ̃ sa naanɛ doke, sa maa yɛ̃ kam kam ma wuna Gusunɔn Bii Dɛɛro. 70 Yesu u bu bikia u nɛɛ, n ǹ nɛna na bɛɛ wɔkura yiru ye gɔsa? Ka mɛ, bɛɛn turo u sãa Setamgii. 71 Yudasiwa u ka yã, Simɔɔ Isikariɔtun bii. Domi baa ù n wãa be wɔkura yiru ye sɔɔ, wiya u koo Yesu dɔmɛ.

Yohanu 7

1 Amɛn biru Yesu u sĩimɔ Galilen tem sɔɔ. U ǹ kĩ u da Yudean tem gia yèn sɔ̃ Yuuba ba swaa kasu bu ka nùn go. 2 Ma Yuuban tɔ̃ɔ bakara turuku kooma te ba ra soku Kunun tɔ̃ɔ bakaru. 3 Yen sɔ̃ na Yesun wɔnɔbu ba nùn sɔ̃ɔwa u doonɔ min di, u da Yudeaɔ, kpa win bwãabu bu ka maa win sɔmburu wa te u mɔ̀. 4 Domi goo ku ra gãanu ko asiri sɔɔ sanam mɛ u kasu bu nùn gia batuma sɔɔ. ù n yabu yen bweseru mɔ̀, u win tii handunia sɔ̃ɔsio. 5 Baa win wɔnɔbun tii, ba ǹ nùn naanɛ doke. 6 Yesu u bu sɔ̃ɔwa u nɛɛ, nɛn saa kun turim kpa, adama bɛɛn saa sɔɔra i wãa mi bɛɛ. 7 Handuniagiba kun kpɛ̃ bu bɛɛ tusi, adama ba man tusa nɛ, yèn sɔ̃ na nɛɛ, ben kookoosu kun wã. 8 Bɛɛ, i tɔ̃ɔ baka te doo. Nɛ na ǹ tu dɔɔ, domi nɛn saa kun tura gina. 9 Ye u bu yeni sɔ̃ɔwa u kpa, ma u sina Galile mi. 10 Adama ye wi, Yesun wɔnɔ be, ba tɔ̃ɔ baka te doona, yera win tii u maa seewa u da mi, asiri sɔɔ. 11 Yuuba ba nùn kasu tɔ̃ɔ baka te sɔɔ, ba bikiamɔ ba mɔ̀, mana u wãa. 12 Dabira tɔn wɔru ge sɔɔ, ba sikirinamɔ tɛɛru tɛɛru win sɔ̃. Gabu ba nɛɛ, wi tɔn geowa. Ma gaba nɛɛ, u tɔmbu nɔni wɔ̃ kumɔwa. 13 Adama goo sari wi u Yesun gari gerua batuma sɔɔ Yuuban bɛrum sɔ̃. 14 Sanam mɛ n kua tɔ̃ɔ baka ten bɔnu, Yesu u da sãa yerɔ ma u bu keu sɔ̃ɔsim wɔri. 15 Ma biti Yuuba kua. Ba bikia ba nɛɛ, amɔna durɔ wi, u ka tireru yɛ̃, wi, wi u kun keu kue. 16 Yesu u bu wisa u nɛɛ, nɛn sɔ̃ɔsira kun sãa nɛn tiigiru. Gusunɔgira, wi u man gɔrima. 17 Goo ù n kĩ u Gusunɔn kĩru ko, u koo gia nge mɛ nɛn sɔ̃ɔsira sãa, ǹ n Gusunɔgirun na, ǹ n maa nɛn tiigirun na. 18 Goo wi u gari gerumɔ ka win tiin yiiko, u win tiin bɛɛrɛ kasuwa. Adama wi u bɛɛrɛ kasu ye ya sãa wi u nùn gɔrimagia, siiwa gemgii, taki sari wi sɔɔ. 19 Mɔwisi kun bɛɛ wooda wɛ̃ ro? Ka mɛ, goo sari bɛɛ sɔɔ wi u wooda ye mɛm nɔɔwɛ. ǹ n mɛn na, mban sɔ̃ na i swaa kasu i ka man go. 20 Tɔn wɔru ga nùn wisa ga nɛɛ, wɛrɛkunu nu nun wãasi. Wara swaa kasu u ka nun go. 21 Yesu u bu wisa u nɛɛ, sɔm maamaakigii teeru tɔnawa na kua, ma bɛɛ kpuro i biti kua. 22 Adama i bwisikuo. Bango ya weewa saa sikadoban min di, n ǹ mɔ Mɔwisin min di, adama yèn sɔ̃ Mɔwisiwa u bɛɛ yen wooda wɛ̃, yen sɔ̃ na i ra bango ko baa tɔ̃ɔ wɛ̃rarugiru sɔɔ. 23 ǹ n mɛn na, iǹ n bii bango mɔ̀ tɔ̃ɔ wɛ̃rarugiru sɔɔ kpa i ku ka Mɔwisin wooda sara, mba n kua i ka man mɔru mɔ̀ sanam mɛ na tɔnun wasi kpuro bɛkia tɔ̃ɔ wɛ̃rarugii te sɔɔ. 24 I ku maa gãanu siri nge mɛ i ka nu waamɔ, adama i siri geebu koowo. 25 Sanam mɛ sɔɔra Yerusalɛmugibu gaba bikia ba nɛɛ, n ǹ wi ba kasu bu go wiya mi? 26 N wee, u gari mɔ̀ batuma sɔɔ, ma goo kun gɛɛ gerua. Nge tɔnweroba tubawa ma wiya Kirisi ka gem de? 27 Wee bɛsɛ kpuro sa yɛ̃ miǹn di durɔ wi, u yari. Adama sanam mɛ Kirisi koo na goo kun ko n yɛ̃ miǹn di u wee. 28 Sanam mɛ Yesu u keu sɔ̃ɔsimɔ sãa yerɔ ma u gbãra u nɛɛ, bɛɛ i man tuba. I maa yɛ̃ miǹn di na yarima. Ka mɛ, na ǹ nɛ ka nɛn tiin yiiko. Gemgiiwa u man gɔrima, wi bɛɛ kun yɛ̃. 29 Nɛ, na nùn yɛ̃ domi saa win min diya na na, wiya maa man gɔrima. 30 Yenin sɔ̃ na ba gɔ̃ ru doke bu ka nùn mwa, adama goo sari wi u nùn nɔmu sɔndi, domi win saa ya ǹ gina turim kpa. 31 Dabiru tɔn wɔru sɔɔ ba maa nùn naanɛ doke. Ma ba nɛɛ, sanam mɛ Kirisi koo na, u koo sɔm maamaakiginu ko n kere ni durɔ wini u kua? 32 Falisiba ba nua ma tɔn dabiru ba yabu yeni gerumɔ gbɛnum, yen sɔ̃ na be ka yãku kowo tɔnwerobu ba sãa yerun kɔ̃ sobu gɔra bu ka Yesu mwa. 33 Ma Yesu u bu sɔ̃ɔwa u nɛɛ, saa fiikowa ya tie ye ko na n ka bɛɛ wãa. Yen biru kon doona wi u man gɔriman mi. 34 Bɛɛ i ko man kasu adama i ǹ man wasi. Mi ko na n wãa bɛɛ i ǹ kpɛ̃ i na mi. 35 Yuuba ba bikianamɔ ba mɔ̀, ma giara durɔ wini u koo da sa kun ka nùn wa. U koo dawa Yuuban mi be ba yarina Gɛrɛkiban suunu sɔɔ, kpa u n Gɛrɛkiba keu sɔ̃ɔsimɔ? 36 Mba gari yinin bweserun tubusianu yi u gerua, sa ko be nùn kasu adama sa ǹ nùn wasi, ma mi u be wãa, sa ǹ kpɛ̃ su da mi. 37 Tɔ̃ɔ baka ten tɔ̃ɔ dãakiru tera ta bɛɛrɛ kera. Tɔ̃ɔ te sɔɔra Yesu u seewa u nɔɔgiru sua wɔllɔ u nɛɛ, baawure wi nim nɔru ga goomɔ u na nɛn mi u nɔ. 38 Nge mɛ ba yorua Gusunɔn gari sɔɔ ba nɛɛ, baawure wi u man naanɛ doke, wãarun bwii yi ko n kokumɔwa saa yɛ̃ron nukurun di. 39 Gusunɔn Hunden gariya Yesu u ka yã mi, wi be ba nùn naanɛ doke ba koo mwa. Domi ba ǹ gina Hunde Dɛɛro wɛ̃ yèn sɔ̃ Yesu kun gina wure win yiiko sɔɔ. 40 Gabu tɔn wɔru ge sɔɔ, be ba gari yi nua ba nɛɛ, durɔ wini sɔmɔ wiya ka gem. 41 Ma gaba maa gerua ma wiya Kirisi wi. Adama gaba nɛɛ, ma gian diya! N ko n koora Kirisi u yarima saa Galilen di? 42 Gusunɔn gari yi ǹ gerumɔ ma Kirisi koo yarimawa saa Dafidin bweserun di? U ǹ koo na saa Bɛtelehɛmu Dafidin wuun di? 43 Win sɔ̃ na sikirinɔ ga dua tɔn wɔru ge sɔɔ. 44 Gabu ba kĩ bu nùn mwa adama goo kun nùn nɔmu sɔndi. 45 Ma sãa yerun kɔ̃ sobu ba gɔsira yãku kowo tɔnwerobu ka Falisiban mi. Ma ba bu bikia ba nɛɛ, mba n kua ba ǹ ka Yesu mwaamɛ? 46 Ma kɔ̃ so be, ba bu wisa ba nɛɛ, goo sari wi u gari gerure nge durɔ wi. 47 Falisiba ba bu bikia ba nɛɛ, to, i dera durɔ wi, u maa bɛɛn tii nɔni wɔ̃ kua ya. 48 I sere nɔɔre wirugii goo ǹ kun mɛ bɛsɛ Falisiban goo u nùn naanɛ doke? 49 I ǹ yɛ̃ ma tɔn wɔru ge, bɔ̃ rigiba? Ba ǹ Mɔwisin wooda yɛ̃. 50 Nikodɛmu, Falisi ben turo, wi u raa gasɔ daare Yesun mi wɔ̃ kuru, u bu bikia u nɛɛ, 51 bɛsɛn wooda ya sun yɔllaa kua su tɔnu siri sa kun win gari nua, kpa sa kun maa gie ye u kua? 52 Ba nùn bikia ba nɛɛ, ase wunɛn tii a maa sãawa Galilegii? A wɛ̃ɛrio sãa sãa Gusunɔn gari sɔɔ, kaa wa ma sɔmɔ goo sari wi u koo yarima saa Galilen di. (( 53 Ma baawure u wa win yɛnuɔ.

Yohanu 8

1 Ye ba doona Yesu u da guuru wɔllɔ te ba ra soku Olifi. 2 Yen sisiru buru buru yellu u gɔsira sãa yerɔ. Ma tɔmbu kpuro ba da win mi, ma u sina u bu keu sɔ̃ɔsim wɔri. 3 Ma wooda yɛ̃robu ka Falisiba ba ka kurɔ goo na win mi, wi ba mwaama sakararu sɔɔ, ba nùn yɔ̃ rasia be kpuron wuswaaɔ. 4 Ma ba Yesu sɔ̃ɔwa ba nɛɛ, yinni, sa kurɔ wi mwawa sakararu sɔɔ. 5 N wee, Mɔwisi u sun sɔ̃ɔwa wooda sɔɔ ma ba ra kurɔ winin bweseru kpenu kasukuwa bu go. Wunɛ maa ni? Amɔna a wa. 6 Ba yeni geruawa bu ka win laakari mɛɛri kpa bu fɛɛ wa bu nùn durum mani. Adama Yesu u tuka, ma u ka win niki bia yorumɔ temɔ. 7 Ye ba nùn bikiamɔ ba baasi, ma u tii dɛmia u bu sɔ̃ɔwa u nɛɛ, wi u kun torare bɛɛ sɔɔ, u gbiiyo u kurɔ wi kperu kara. 8 Ma u kpam tuka u yorumɔ temɔ. 9 Ye ba yeni nua ma ba yara tia tia saa bukurobun min di sere ka bibɔ. Ma Yesu tia wi turo ka sere kurɔ wi. 10 Yesu u tii dɛmia ma u nùn bikia u nɛɛ, kurɔ wunɛ, be ba nun taarɛ wɛ̃ɛmɔ mana ba wãa. Ben goo kun maa tie? 11 Kurɔ wi, u nɛɛ, goo sari Yinni. Ma Yesu u nɛɛ, a doonɔ, nɛn tii, na ǹ maa nun taarɛ wɛ̃ɛmɔ, adama a ku maa tora.)) 12 Yen biru Yesu u kpam ka tɔmbu gari kua u nɛɛ, nɛna handunian yam bururam. Wi u man swĩi, u ko n yam bururam mɔ mɛ mu sãa wãaru, u ǹ maa wãa u sĩ yam wɔ̃ kuru sɔɔ. 13 Falisiba ba nùn sɔ̃ɔwa ba nɛɛ, wee tɛ̃, a wunɛn tii areru diiyammɛ. ǹ n mɛn na, wunɛn arera kun sun sɔ̃ɔsimɔ ma gari yi, gema. 14 Ma Yesu u nɛɛ, mɛya, baa nà n nɛn tii areru diiyammɛ, ye na gerumɔ, gema. Na yɛ̃ miǹn di na wee ka mi na dɔɔ. Adama bɛɛ i ǹ yɛ̃ miǹn di na wee ka mi na dɔɔ. 15 Mɛ i tɔnu waamɔ, mɛya i ra ka nùn siri, nɛ na ku ra goo siri. 16 Baa nà n goo siri, nɛn siribu geema, domi n ǹ nɛ turo kon yɛ̃ro siri. Ka nɛn Baaba wi u man gɔrimawa. 17 Ba yorua bɛɛn wooda sɔɔ ma tɔnu yirun areru geema. 18 Na nɛn tii areru diiyammɛ, ma Baaba wi u man gɔrima u maa man areru diiyammɛ. 19 Ba nùn bikia ba nɛɛ, mana wunɛn Baaba wi, u wãa. Ma Yesu u bu wisa u nɛɛ i ǹ man yɛ̃, mɛya i ǹ maa nɛn Baaba yɛ̃. ǹ n sãan na i man yɛ̃, i ko n daa maa nɛn Baaba yɛ̃. 20 Gari yiya Yesu u gerua sanam mɛ u keu sɔ̃ɔsimɔ sãa yerɔ, ten bera mi ba ra arumani bere. Goo sari wi u maa nùn nɔmu sɔndi yèn sɔ̃ win saa kun turim kpa. 21 Yesu kpam bu sɔ̃ɔwa u nɛɛ, na doonɔ. Mi na dɔɔ bɛɛ i ǹ kpɛ̃ i da mi. I ko maa man kasu, adama i ko gbi bɛɛn toranu sɔɔ. 22 Yèn sɔ̃ u nɛɛ, mi u dɔɔ ba ǹ kpɛ̃ bu da mi, yen sɔ̃ na ba bikianamɔ ba mɔ̀, u koo tii gowa? 23 Ma Yesu u bu sɔ̃ɔwa u nɛɛ, bɛɛ i sãawa temkobu, nɛ maa, wɔrukoowa. Bɛɛ handunia migiba, nɛ na kun sãa handunia migii. 24 Yen sɔ̃ na na bɛɛ sɔ̃ɔwa na nɛɛ, i ko gbi bɛɛn toranu sɔɔ. Iǹ kun naanɛ doke ma nɛna yɛ̃ro wi, ka geema i ko gbiwa bɛɛn toranu sɔɔ. 25 Ma ba nùn bikia ba nɛɛ, wuna were. Yesu u nɛɛ, na raa bɛɛ sɔ̃ɔwa kɔ. 26 Na gari dabinu mɔ yi kon kpĩ n gere n wunana bɛɛn sɔ̃. Adama geegiiwa wi u man gɔrima, ye na maa nua saa win min di yeya na handuniagibu sɔ̃ɔmɔ. 27 N ǹ maa bu yeeri ma Baaban gariya u bu sɔ̃ɔmɔ. 28 Yen sɔ̃ na Yesu u nɛɛ, sanam mɛ i Tɔnun Bii sua tem di i bwɛ̃, sanam mɛya i ko gia ma nɛna yɛ̃ro wi. I ko maa gia ma na ǹ maa gãanu ganu mɔ̀ ka nɛn tii. Ye Baaba man sɔ̃ɔsi, yeya na bɛɛ sɔ̃ɔmɔ. 29 Baaba wiya u man gɔrima. U maa wãa ka nɛ. U ǹ man deri nɛ turo yèn sɔ̃ na ra ko ye n da nùn dore. 30 Ma tɔn dabiru be ba Yesun gari yi nua ba nùn naanɛ doke. 31 Yesu u Yuu be ba nùn naanɛ doke sɔ̃ɔwa u nɛɛ, iǹ n nɛn sɔ̃ɔsiru mɛm nɔɔwa, i sãawa nɛn bwãabu ka gem. 32 I ko gem gia. Gem mɛ, mu koo maa bɛɛ yakia yorun di. 33 Ba nùn sɔ̃ɔwa ba nɛɛ, bɛsɛ Aburahamun bwesera, sa ǹ maa koore goon yobu. Amɔna a ka nɛɛ sa ko yakiara yorun di. 34 Yesu u nɛɛ, geema na bɛɛ sɔ̃ɔmɔ, baawure wi u durum mɔ̀, wiya durum yoo. 35 Yoo ku ra n wãa win yinnin yɛnuɔ ka baadomma, adama biiwa ra n wãa mi ka baadommaɔ. 36 Yen sɔ̃ na nɛ Gusunɔn Bii nà n bɛɛ yakia, i kuawa tii mɔwɔbu ka gem. 37 Na yɛ̃ ma Aburahamun bwesera i sãa. Ka mɛ, i swaa kasu i ka man go, yèn sɔ̃ i ǹ nɛn gari wure. 38 Na bɛɛ sɔ̃ɔmɔ ye na wa nɛn Baaban mi, adama bɛɛ i mɔ̀ ye i gia bɛɛn baaban mi. 39 Ba nùn sɔ̃ɔwa ba nɛɛ, Aburahamuwa bɛsɛn baaba. Ma Yesu u bu wisa u nɛɛ, iǹ n daa sãan na Aburahamun bibu, i ko n daa Aburahamun kookoosu mɔ̀. 40 Adama tɛ̃ bɛɛ i swaa kasu i ka man go, nɛ wi na bɛɛ gem sɔ̃ɔmɔ mɛ na nua Gusunɔn min di. Aburahamu kun yenin bweseru koore. 41 Bɛɛ i bɛɛn tundon kookoosu mɔ̀. Ba nùn sɔ̃ɔwa ba nɛɛ, sa ǹ sãa seegeba. Baaba turowa sa mɔ, wiya Gusunɔ. 42 Yesu u bu sɔ̃ɔwa u nɛɛ, Gusunɔ ù n daa sãan na bɛɛn baaba ka gem, i ko n daa man kĩ domi Gusunɔn min diya na yarima na ka wãa mi. Mɛya na ǹ ka nɛn tii nɛ, adama wiya man gɔrima. 43 Mban sɔ̃ na nɛn barum kun ka bɛɛ yeeri. Mu ǹ bɛɛ yeeri yèn sɔ̃ i ǹ kpɛ̃ i nɛn gari nɔ. 44 Setamwa bɛɛn tundo, i maa kĩ i bɛɛn tundon kĩru ko. Tɔn gowowa saa toren di, u ǹ maa gem swĩi, domi gem sari wi sɔɔ. Sanam mɛ u weesu gerumɔ, u ra n gerumɔwa ka win tiin daa, yèn sɔ̃ weesugiiwa ka maa weesu kpuron baaba. 45 Adama gema na ra n gerumɔ. Yen sɔ̃ na i ǹ man naanɛ doke. 46 Wara bɛɛ sɔɔ u koo kpĩ u nɛɛ, na tore. Sari. ǹ n mɛn na, ma gema na gerumɔ, mban sɔ̃ na i ǹ man naanɛ doke. 47 Wi u sãa Gusunɔgii, wiya ra Gusunɔn gari wure. Adama bɛɛ i ǹ sãa Gusunɔgibu. Yen sɔ̃ na i ǹ win gari wuramɔ. 48 Ma Yuuba ba nùn bikia ba nɛɛ, bɛsɛ sa ǹ gem mɔ ye sa nɛɛ wunɛ Samarigiiwa ka maa wɛrɛkunugii? 49 Yesu u bu wisa u nɛɛ, na ǹ wɛrɛkunu mɔ. Nɛn Baabawa na bɛɛrɛ wɛ̃ɛmɔ adama bɛɛ i ǹ man bɛɛrɛ wɛ̃ɛmɔ. 50 Na ǹ nɛn tiin bɛɛrɛ kasu. Goo u wãa wi u man ye kasuammɛ, wiya maa sãa siri kowo. 51 Ka geema na bɛɛ sɔ̃ɔmɔ, baawure wi u nɛn gari mɛm nɔɔwa, yɛ̃ro u ǹ gɔɔ wasi pai. 52 Ma Yuuba ba nùn sɔ̃ɔwa ba nɛɛ, tɛ̃ sa gia ma a wɛrɛkunu mɔwa ka gem. Aburahamu u gu, Gusunɔn sɔmɔbu ba maa gu. Ka mɛ, a gerumɔ a mɔ̀ baawure wi u wunɛn gari mɛm nɔɔwa u ǹ gɔɔ wasi. 53 Bɛsɛn baaba Aburahamu u gu. A nùn kerewa? Sɔmɔbu ba maa gu. Wara a tamaa a sãa. 54 Yesu u nɛɛ, nà n nɛn tii bɛɛrɛ wɛ̃ɛmɔ, nɛn bɛɛrɛ kun gãanu sãa. Nɛn Baabawa u man bɛɛrɛ wɛ̃ɛmɔ, wi bɛɛ i sokumɔ bɛɛn Yinni. 55 Ka mɛ, i ǹ nùn yɛ̃, adama nɛ, na nùn yɛ̃. Nà n nɛɛ, na ǹ nùn yɛ̃, ko na n sãawa weesugii nge bɛɛ. Adama na nùn yɛ̃, na maa win gari mɛm nɔɔwɛ. 56 Bɛsɛn baaba Aburahamu u yɛ̃ɛra ka gɔ̃ ru dobu ye u koo ka nɛn tɔ̃ ru wa. U maa tu wa ma win nukura dora. 57 Yuuba ba nùn sɔ̃ɔwa ba nɛɛ, a ǹ gina wɔ̃ɔ weeraakuru tura. Mana a ka Aburahamu waare. 58 Yesu u nɛɛ, ka geema na bɛɛ sɔ̃ɔmɔ, na gbia na wãa ba sere Aburahamu mara. 59 Ma ba kpenu sua bu ka nùn kasuku, adama u kukura u yara sãa yerun di.

Yohanu 9

1 Nge mɛ Yesu u bɔsu, u durɔ goo wa wi ba mara ka wɔ̃ koru. 2 Win bwãaba nùn bikia ba nɛɛ, yinni, weren torarun sɔ̃ na ba ka durɔ wi wɔ̃ koru mara. Win tiigira? Nge win tundo ka win mɛrogira. 3 Yesu u bu wisa u nɛɛ, n ǹ mɔ durɔ wi, ǹ kun mɛ win tundo ka win mɛro ba tora, adama ba nùn marawa ka wɔ̃ koru kpa Gusunɔn sɔmburu tu ka sɔ̃ɔsira wi sɔɔ. 4 Sa ǹ ko ko sa kun wi u man gɔriman sɔmburu kue sanam mɛ sɔ̃ɔ wãa. Wɔ̃ kura sisi tè sɔɔ goo kun kpɛ̃ u sɔmburu ko. 5 Sanam mɛ na wãa handuniaɔ nɛna na yen yam bururam. 6 Ye u yeni gerua u kpa, u yãatam sia temɔ, ma u ka yãatam mɛ tem kɔka, ma u tem mɛ wɔ̃ ko win nɔni tɛɛni. 7 Ma u nùn sɔ̃ɔwa u nɛɛ, u doo u wubu yɛru ge ba mɔ̀ Siloeɔ. Yĩsi ten tubusiana, gɔra. Ma durɔ wi, u win swaa sua u da u wuba, ma u wurama ka nɔni sannu. 8 Ma win wɔɔ beragibu ka be ba ra raa nùn wa u n bara mɔ̀, ba bikianamɔ, wi u ra raa sinɛ mini u n bara mɔ̀, n ǹ wiya mini? 9 Ma gaba nɛɛ, wiya. Gaba maa nɛɛ, n ǹ wi mi, u ka nùn weenɛwa. Ma win tii u bu sɔ̃ɔwa u nɛɛ, nɛna mi ni. 10 Ba nùn bikia, amɔna n kua wunɛn nɔni ka wukiara. 11 Ma u bu wisa u nɛɛ, durɔ goo wi ba ra soku Yesu, wiya u tem kɔka ma u nɛn nɔni tɛɛni, ma u man sɔ̃ɔwa u nɛɛ, n doo Siloeɔ n wubu. Na da na wuba ma na yam wa. 12 Ba nùn bikia ba nɛɛ, mana durɔ wi, u wãa. Ma u nɛɛ, na ǹ yɛ̃. 13 Ma ba ka durɔ wi da Falisiban mi, wi u raa sãa wɔ̃ ko mi. 14 N deema tɔ̃ɔ wɛ̃rarugiru sɔɔra Yesu u tem kɔka u ka nùn yam waasia. 15 Ma Falisiba ba kpam nùn bikia ba nɛɛ, amɔna u kua u ka yam wa. U bu wisa u nɛɛ, durɔ wiya u nùn tem tɛɛnia win nɔniɔ, ma u wuba ma u yam wa. 16 Gabu Falisiba sɔɔ ba nɛɛ, durɔ wi u yeni kua u ǹ nɛ saa Gusunɔn min di, yèn sɔ̃ u ǹ tɔ̃ɔ wɛ̃rarugiru gara. Gaba maa bikia ba nɛɛ, amɔna durumgii u koo ka kpĩ u sɔm maamaakigii nini ko. Ma sikirinɔ ga dua ben suunu sɔɔ. 17 Ba kpam wɔ̃ ko wi bikia ba nɛɛ, wunɛ maa ni? Wunɛ wi durɔ wi, u yam waasia, amɔna a wi garisi. Ma u nɛɛ, Gusunɔn sɔmɔwa u sãa. 18 Adama Yuuba ba ǹ naanɛ sãa ma durɔ wi, u raa wɔ̃ ko sãa ma u kpam yam wa, sere ye ba win tundo ka win mɛro soka. 19 Ma ba bu bikia ba nɛɛ, bɛɛn biiwa mini? Wi i nɛɛ i mara ka wɔ̃ koru? Amɔna u ka yam waamɔ tɛ̃. 20 Ma win tundo ka win mɛro ba bu wisa ba nɛɛ, sa yɛ̃ kam kam ma bɛsɛn biiwa mi, wi sa mara ka wɔ̃ koru. 21 Adama mɛ u kua u ka yam wa, bɛsɛ sa ǹ yɛ̃, wi u maa nùn yam waasia, sa ǹ yɛ̃ro yɛ̃. U bwisi mɔ win tii, i nùn bikio, u koo bɛɛ sɔ̃. 22 Ba yeni geruawa Yuuban bɛrum sɔ̃. Domi Yuuba ba nɔɔ tia kua kɔ ma baawure wi u wura ma Yesu sãawa Kirisi wi, ba koo yɛ̃ro girawa ben mɛnnɔ yerun di. 23 Yen sɔ̃ na ba gerua ba nɛɛ, u bwisi mɔ win tii, bu nùn bikio. 24 Ma Falisiba ba durɔ wi u raa wɔ̃ ko sãa soka nɔn mɛɛruse, ma ba nùn sɔ̃ɔwa ba nɛɛ, u Gusunɔ bɛɛrɛ wɛ̃ɛyɔ, be, ba yɛ̃ ma Yesu wi, durumgiiwa. 25 U bu wisa u nɛɛ, ù n durumgiin na, nɛ na kun yɛ̃. Gãa teena na yɛ̃, na raa wɔ̃ ko sãa, adama tɛ̃ na yam waamɔ. 26 Ba nùn bikia ba nɛɛ, amɔna u nun kua. Amɔna u koosina wunɛn nɔni ka wukiara. 27 Ma u nɛɛ, na raa bɛɛ sɔ̃ɔwa, i ǹ maa man swaa daki. Mban sɔ̃ na i kĩ i kpam nɔ. Nge bɛɛn tii i kĩ i maa kowa win bwãabu. 28 Ma ba nùn yaakoru wɔri ba nɛɛ, wuna a sãa siin bɔ̃ɔ mi, adama bɛsɛ Mɔwisin bwãaba sa sãa. 29 Bɛsɛ sa yɛ̃ ma Gusunɔ u ka Mɔwisi gari kua, adama wini, sa ǹ mam yɛ̃ miǹn di u na. 30 Ma durɔ wi, u bu sɔ̃ɔwa u nɛɛ, geema, bitin gariya ye i ǹ ka yɛ̃ miǹn di u na. Ka mɛ, sii man yam waasia. 31 Sa yɛ̃ ma Gusunɔ u ku ra toron gari nɔ, adama tɔn be ba nùn nasie, ma ba mɔ̀ ye u kĩ, beya u ra swaa daki. 32 Saa toren di goo kun nɔɔre ba tɔnun nɔni wukia wi ba mara ka wɔ̃ koru. 33 Durɔ wi, ù kun wee saa Gusunɔn min di, u ǹ kpɛ̃ u gãanu ganu ko. 34 Ma ba nùn sɔ̃ɔwa ba nɛɛ, toraru sɔɔra ba nun mara mam mam. Yera a tamaa kaa sun keu koosia? Ma ba nùn gira mɛnnɔ yerun di. 35 Yesu u nua ma ba durɔ wi gira. Ye u nùn wa u nùn bikia u nɛɛ, a Tɔnun Bii naanɛ doke? 36 Durɔ wi, u nɛɛ, tɔnwero, a man sɔ̃ɔwɔ wara Tɔnun Bii wi, kpa n wa n ka nùn naanɛ doke. 37 Yesu u nùn wisa u nɛɛ, a nùn wa kɔ, wiya ka nun gari mɔ̀ mi. 38 Durɔ wi, u nɛɛ, Yinni, na nun naanɛ doke. Ma u yiira Yesu wuswaaɔ. 39 Yesu u nɛɛ, siribun sɔ̃ na na na handuniaɔ, be ba kun yam waamɔ kpa bu ka yam wa, be ba maa yam waamɔ bu ka ko wɔ̃ kobu. 40 Falisi gabu be ba wãa ka wi sannu ba gari yi nua. Ba nùn bikia ba nɛɛ, bɛsɛn tii maa wɔ̃ koba? 41 Ma Yesu u nɛɛ, iǹ n sãan na wɔ̃ kobu, i ǹ ko i n daa toraru mɔ. Adama yèn sɔ̃ i gerumɔ i yam waamɔ, yen sɔ̃ na i wãa toraru sɔɔ ka tɛ̃.

Yohanu 10

1 Yen biru Yesu u nɛɛ, ka geema na bɛɛ sɔ̃ɔmɔ, goo wi u kun dumɔ yãa gɔ̃ rɔ saa kɔnnɔn di ma u yɔɔmɔ u suremɔ gam di, wiya sãa gbɛnɔ ka wɔro. 2 Adama wi u kɔnnɔn di dumɔ wiya yãanun kparo. 3 Kɔnnɔ kɔ̃ so u ra nùn kɛniɛ, yãanu ra n maa win nɔɔ nɔɔmɔ. U ra win yãanu soku baatere ka ten yĩsiru kpa u nu yara tɔɔwɔ. 4 Sanam mɛ u nu yara tɔɔwɔ kpuro, u ra nu gbiiye kpa nu n nùn swĩi yèn sɔ̃ nu win nɔɔ yɛ̃. 5 Nu ǹ wuramɔ nu tɔn tuko swĩi, adama nu koo duka suwa n toma saa win min di yèn sɔ̃ nu ǹ win nɔɔ yɛ̃. 6 Yesu u bu mɔn te kua adama ba ǹ tuba ye u ka yã. 7 Yen sɔ̃ na Yesu u kpam nɛɛ, ka geema na bɛɛ sɔ̃ɔmɔ, nɛna na yãa gɔ̃ run kɔnnɔ. 8 Be ba man gbiiye mi kpuro, gbɛnɔbu ka wɔroba ba sãa. Yãanu kun ben gari swaa daki. 9 Nɛn tiiwa kɔnnɔ ge. Baawure wi u dumɔ saa nɛn min di wiya ba koo faaba ko. U koo du, u koo maa yari, u koo maa dii yeru wa. 10 Gbɛnɔ u ra nɛwa u ka gbɛni u go kpa u sanku. Adama nɛ na nawa yãanu nu n ka wãaru mɔ, kpa nu n tu mɔ mam mam. 11 Nɛn tiiwa yãa kparo geo. Yãa kparo geo u ra win wãaru wɛ̃wa win yãanun sɔ̃. 12 Adama sɔm kowo wi u kun sãa kparo ma yãanu kun sãa win tiiginu, ù n dɛmaku waama ga sisi, u koo yãanu deri u yakurawa. Kpa dɛmaku gu yãanu mwa gu ni nu tie yarinasia. 13 Durɔ wi, u koo yakura yèn sɔ̃ gobin sɔmbura u mɔ̀, u ǹ maa yãa nin wɔnwɔndu mɔ. 14 Nɛna yãa kparo geo. Nge mɛ Baaba man yɛ̃ ma na maa Baaba yɛ̃, nge mɛya na nɛn yãanu yɛ̃, nu maa man yɛ̃. Na maa nɛn wãaru wɛ̃ɛmɔ yãa nin sɔ̃. 16 Na maa yãanu ganu mɔ ni nu kun wãa yãa gɔ̃ɔ teni sɔɔ. Niya na ǹ kon ko na kun maa ka nɛ. Nu koo maa nɛn nɔɔ nɔ, kpa nu ko gɔ̃ɔ teeru, kpa nu n kparo turo mɔ. 17 Yen sɔ̃ na Baaba u man kĩ yèn sɔ̃ na nɛn wãaru wɛ̃ɛmɔ kpa n kpam wa n tu mwa. 18 Goo kun kpɛ̃ u tu wɔra nɛn nɔmun di. Na tu wɛ̃ɛmɔ ka nɛn tii. Na yiiko mɔ n ka tu wɛ̃, na maa yiiko mɔ n ka tu mwa. Wooda yera na mwa saa nɛn Baaban min di. 19 Ye Yuuba ba yeni nua, sikirinɔ ga kpam dua ben suunu sɔɔ gari yin sɔ̃. 20 Tɔn dabiru be sɔɔ, ba gerua ba nɛɛ, wiirowa, wɛrɛkunu maa nùn wãasi. Mba n kua ba ka nùn swaa daki. 21 Adama gaba nɛɛ, n ǹ wɛrɛkunugiin gari mi. Wɛrɛkunu koo kpĩ nu wɔ̃ ko yam waasia? 22 Saa ya tura ye ba koo ka tɔ̃ɔ bakaru garu ko Yerusalɛmuɔ te ba ra soku sãa yerun dɛɛrasiabu. Saa ye, ya sãawa woorun sanam. 23 Ma Yesu u maa wãa sãa yerɔ u sĩimɔ ten bee tiaɔ ye ba ra soku Salomɔɔn kɔbɛ. 24 Ma Yuuba ba nùn sikerena ba nùn bikia ba nɛɛ, sere saa yerà kaa n bɛsɛn laakari doke sika sɔɔ. Aǹ n sãan na Kirisi wi, a sun sɔ̃ɔwɔ kpasa kpasa. 25 Ma Yesu u bu wisa u nɛɛ, na raa bɛɛ sɔ̃ɔwa, adama i ǹ man naanɛ doke. Sɔma ye na mɔ̀ ka nɛn Baaban yĩsiru, yeya ya man areru diiyammɛ. 26 Adama i ǹ naanɛ doke yèn sɔ̃ i ǹ sãa nɛn yãanu. 27 Nɛn yãanu nu nɛn nɔɔ nɔɔmɔ, na nu yɛ̃, nu maa man swĩi. 28 Na nu wãaru wɛ̃ɛmɔ te ta ku ra kpe, nu ǹ maa kam mɔ̀ ka baadommaɔ, goo maa sari wi u koo nu mwa nɛn nɔmun di. 29 Nɛn Baaba wi u man nu wɛ̃, u kpã u kpuro kere, goo maa sari wi u koo nu mwa saa nɛn Baaban nɔmun di. 30 Nɛ ka Baaba sa sãawa tia. 31 Ma Yuuba ba kpam kpenu dɔbura bu ka nùn kasuku. 32 Yesu u bu sɔ̃ɔwa u nɛɛ, na sɔm gee dabiru kua bɛɛn wuswaaɔ ka Baaban yiiko. Sɔmbu ni sɔɔ, teren sɔ̃ na i kĩ i man kasuku. 33 Yuuba ba nùn wisa ba nɛɛ, sa ǹ nun kasukumɔ sɔm geerun sɔ̃, adama yèn sɔ̃ a Gusunɔ wɔmmɔ, yen sɔ̃ na. Wunɛ tɔnuwa, ma a kĩ a n tii mɔ̀ Gusunɔ. 34 Yesu u nɛɛ, ba ǹ yorua bɛɛn tiin wooda sɔɔ ma Gusunɔ u nɛɛ, "I sãawa Wɔrukoon bibu?" 35 Sa yɛ̃ ye Gusunɔn gari gerumɔ n sãawa gem ka baadommaɔ. Ma win tii u nɛɛ, ba sãawa Wɔrukoon bibu be ba win gari mwa. 36 Tɛ̃ nɛn tii maa, Baaba u man gɔsa ma u man gɔrima handuniaɔ. Amɔna i ka nɛɛ na Gusunɔ wɔmmɔ yèn sɔ̃ na gerua ma nɛna na win Bii. 37 Nà kun nɛn Baaban sɔmburu mɔ̀, i ku man naanɛ doke. 38 Adama nà n tu mɔ̀, baa iǹ kun man naanɛ doke, i sɔmbu te naanɛ dokeo kpa i n ka yɛ̃ saa tɛ̃n di sere ka baadomma ma Baaba wãa nɛ sɔɔ, nɛ na maa wãa wi sɔɔ. 39 Ma ba kpam swaa kasu bu ka nùn mwa, adama u bu kisirari. 40 Yesu u kpam Yuudɛnin daaru tɔbura u da mi Yohanu u gbia u batɛmu kua, miya u sina. 41 Ma tɔn dabiru ba na win mi, ba nɛɛ, Yohanu u ǹ sɔm maamaakigiru koore, adama ye u gerua durɔ wini sɔɔ, ye kpuro geema. 42 Ma tɔn dabira nùn naanɛ doke mi.

Yohanu 11

1 N wee durɔ goo wi ba ra soku Lasaa wi u wãa Betaniɔ u bara. Betani sãawa Maari ka win mɔɔ Maatan wuu. 2 Maari wiya u gasɔ Yinnin naasu turare wisi, ma u ka win wirun seri su sunka. Win sesu Lasaawa bara. 3 Ma wi ka win mɔɔ Maata ba Yesu nɔɔ mɔrisia ba nɛɛ, Yinni, wunɛn bɔrɔ kĩnasi u barɔ. 4 Ye Yesu u yeni nua u nɛɛ, bara te, ta ǹ gɔɔgiru adama ta koo Gusunɔn yiiko sɔ̃ɔsi, kpa bu ka Gusunɔn Bii bɛɛrɛ wɛ̃. 5 N deema Yesu u sãawa Maata ka win wɔnɔ ka ben sesu Lasaan bɔrɔ kĩnasi. 6 Ye u nua ma Lasaa u barɔ, u gina sina wuu mi u wãa mi sɔ̃ɔ yiru. 7 Yen biru u win bwãabu sɔ̃ɔwa u nɛɛ, su kpam wura Yudeaɔ. 8 Win bwãaba nɛɛ, yinni, sɔ̃ɔ mɛɛ tera Yuuba ba kĩ bu nun kpenu kasuku, ma a kpam kĩ a wura mi? 9 Yesu u bu bikia u nɛɛ, n ǹ saa wɔkura yiruwa sɔ̃ɔ ra n wãa sɔ̃ɔ teeru sɔɔ? Goo ù n sĩimɔ sɔ̃ɔ sɔɔ, u ǹ sokuramɔ yèn sɔ̃ u handunian yam bururam waamɔ. 10 Adama wi u sĩimɔ wɔ̃ kuru sɔɔ u koo sokura domi yam bururam sari yɛ̃ro sɔɔ. 11 Yeniban biru u kpam nɛɛ, Lasaa bɛsɛn bɔrɔ u doǹwa adama na dɔɔ n nùn yamia. 12 Bwãa be, ba nɛɛ, Yinni, ù n doǹn na, u koo bɛkura. 13 Adama Yesu u bu Lasaan gɔɔ sɔ̃ɔmɔwa. Be, ba tamaa dom dirun gariya u bu sɔ̃ɔmɔ. 14 Yen sɔ̃ na Yesu u bu sɔ̃ɔwa kpasasa u nɛɛ, Lasaa u guwa, 15 adama bɛɛn sɔ̃ na nɛn nukura do ye na ǹ ka wãa mi, kpa i ka naanɛ doke. I na su da win mi. 16 Tomaa wi ba ra maa soku Sika, u win bwãasibu sɔ̃ɔwa u nɛɛ, i de su da, kpa su ka yinni gbi sannu. 17 Ye Yesu u tura mi, u deema Lasaa kua sɔ̃ɔ nnɛ sikiru sɔɔ kɔ. 18 Betani ka Yerusalɛmun tondam kun kere kilo ita. 19 Ma Yuu dabiru ba yarima ben wuun di ba na Maata ka Maarin mi bu ka bu nukuru yɛmiasia ben sesun gɔɔn sɔ̃. 20 Sanam mɛ Maata u nua ma Yesu u sisi, ma u nùn sennɔ da. Adama Maari u sɔ̃ yɛnuɔ. 21 Ma Maata u Yesu sɔ̃ɔwa u nɛɛ, Yinni à n daa wãa mini nɛn sesu kun gbimɔ. 22 Adama baa tɛ̃, na yɛ̃ ma yabu baayere ye kaa bikia Gusunɔn nɔmuɔ u koo nun wɛ̃. 23 Ma Yesu u nùn sɔ̃ɔwa u nɛɛ, wunɛn sesu u koo se gɔrin di. 24 Ma Maata u nɛɛ, geema, na yɛ̃ ma u koo kpam se, gɔribu bà n seemɔ sanam dãakim sɔɔ. 25 Ma Yesu u nùn sɔ̃ɔwa u nɛɛ, nɛna na ra gɔribu seeye, nɛna na ra wãaru wɛ̃. Baawure wi u man naanɛ doke u ko n wãawa wãaru sɔɔ baa ù n gu. 26 Baawure wi u maa wasi ma u man naanɛ doke, u ǹ gbimɔ ka baadommaɔ. A naanɛ doke nge mɛ? 27 Maata u Yinni wisa u nɛɛ, mɛya na naanɛ doke ma wuna Kirisi wi, Gusunɔn Bii, wi u sisi handuniaɔ. 28 Sanam mɛ Maata u yeni gerua u kpa, u win wɔnɔ Maari sokum da, ma u nùn sɔ̃ɔwa tɛɛru ma yinni u tunuma u nùn soku. 29 Ye Maari u yeni nua u seewa ka sɛndaru ma u da win mi. 30 N deema Yesu kun gina wuu dum kpa, u wãawa yam mi Maata ka nùn yinna. 31 Yuu be ba Maari nukuru yɛmiasiamɔ dirɔ, ye ba wa u seewa ka sɛndaru u yara tɔɔwɔ, ba nùn swĩi. Ba tamaa u dɔɔwa sikirɔ u swĩ. 32 Sanam mɛ Maari u tura mi Yesu u wãa, ye u nùn wa u yiira u nɛɛ, Yinni à n daa wãa mini nɛn sesu kun gbimɔ. 33 Ye Yesu u wa u sumɔ, ma Yuu be ba ka nùn na, ben tii ba sumɔ, yera u diira ka nuku sankiranu. 34 U bu bikia u nɛɛ, mana i nùn sika. Ma ba nɛɛ, Yinni a na a wa. 35 Ma Yesu u swĩ. 36 Yen sɔ̃ na Yuuba ba nɛɛ, i mɛɛrio i wa nge mɛ u nùn kĩ n nɛ. 37 Adama ben gabu ba nɛɛ, durɔ wini u wɔ̃ ko yam waasia. Mban sɔ̃ na u dera Lasaa u gu. 38 Yesu u kpam diira, ma u da sikirɔ. Siki te, kpee wɔruwa, ma ba gen nɔɔ kɔrua ka kperu. 39 Ma Yesu u wooda wɛ̃ u nɛɛ, bu kpee te bɔrio min di. Ma Maata, wi u gun sesu, u nùn sɔ̃ɔwa u nɛɛ, Yinni, u numia kɔ, yen sɔ̃ɔ nnɛ wee gisɔ ye u ka gu. 40 Ma Yesu u nùn bikia u nɛɛ, na ǹ daa nun sɔ̃ɔwa na nɛɛ, à n naanɛ doke, kaa Gusunɔn yiiko wa? 41 Ma ba kpee te bimia min di. Ma Yesu u win nɔni sua wɔllɔ u nɛɛ, nɛn Baaba, na nun siara yèn sɔ̃ a nɛn gari swaa daki. 42 Na yɛ̃ ma a ra nɛn gari nɔ baadomma, adama na yeni gerumɔwa tɔn benin sɔ̃ be ba yɔ̃ mi, kpa bu ka naanɛ doke ma wuna a man gɔrima. 43 Sanam mɛ u yeni gerua u kpa, ma u gbãra ka dam u nɛɛ, Lasaa, a yarima! 44 Wi u raa gu mi, u yarima sikirun di ka win gorun bekuru te ba win nɔma ka naasu tɛ̃kua ka maa wirɔ. Ma Yesu u bu sɔ̃ɔwa u nɛɛ, bu nùn kusio u sĩ. 45 N wee Yuu dabiru be ba Maari swĩima mi, ma ba wa ye Yesu u kua, ba nùn naanɛ doke. 46 Adama ben gabu ba gɔsira ba da Falisiban mi, ba bu sɔ̃ɔwa ye Yesu u kua. 47 Sanam mɛya yãku kowo tɔnwerobu ka Falisiba ba guro gurobu mɛnna ma ba bikianamɔ ba mɔ̀, amɔna sa ko ko. Durɔ wi wee, u sɔm maamaakigii dabinu mɔ̀. 48 Sà n nùn deri mɛ, tɔmbu kpurowa ba koo nùn naanɛ doke. Romugibu ba koo maa na bu bɛsɛn sãa yeru wɔra kpa bu bɛsɛn bweseru gura. 49 Adama ben turo wi ba ra nɛɛ Kaifa, wi u sãa yãku kowo tɔnwero wɔ̃ɔ ge sɔɔ, u bu sɔ̃ɔwa u nɛɛ, bɛɛ i ǹ gãanu ganu yɛ̃ baa fiiko. 50 Mɛya, n ǹ maa bɛɛ yeeri ma bɛɛn arufaaniwa tɔn turo u ka gbi tɔn dabirun sɔ̃, kpa bɛsɛn bweseru kpuro tu ku ka kam ko. 51 N ǹ mɔ ka win tiin yɛ̃ra u yeni gerua. U ye geruawa yèn sɔ̃ wiya u sãa yãku kowo tɔnwero wɔ̃ɔ ge sɔɔ, yen sɔ̃ na u gerua u nɛɛ, Yesu koo gbi Yuuban bweserun sɔ̃. 52 N ǹ maa mɔ be tɔnan sɔ̃, adama u ka maa Gusunɔn bibu kpuro kowa tɔn teebu be ba wãa baama. 53 Yen sɔ̃ na saa dɔma ten di, ba wesiana bu ka Yesu go. 54 Yenin sɔ̃ na u ǹ maa sĩimɔ batuma sɔɔ Yuuban suunuɔ, adama u doona min di tem gam gia gbaburu sɔɔ, mi u wuu gagu dua ge ba ra soku Efaraimu. Miya u sina ka win bwãabu. 55 Yuuban tɔ̃ɔ bakaru te ba ra soku Gɔɔ sararibu ta turuku kua, ma tɔn dabiru saa baru kpaanun di ba da Yerusalɛmuɔ bu ka tii sãrasia tɔ̃ɔ baka te, tu sere turi. 56 Ma ba Yesu kasu. Ba yɔ̃ sãa yerɔ ba bikianamɔ, ba mɔ̀ amɔna i bwisikumɔ. U ǹ tɔ̃ɔ bakaru sisiwa? 57 Yãku kowo tɔnwerobu ka Falisiba ba raa wooda wɛ̃ ba nɛɛ, goo ù n yɛ̃ mi Yesu u wãa u bu sɔ̃ɔwɔ kpa be, bu nùn mwa.

Yohanu 12

1 Ye n tie sɔ̃ɔ nɔɔba tia tɔ̃ɔ bakaru tu sere turi te ba ra soku Gɔɔ sararibu, yera Yesu u da Betaniɔ mi Lasaa u wãa wi u seeya gɔrin di. 2 Miya ba nùn yaa dibu kua ma Maata u bu nɔɔrimɔ, adama Lasaa u sɔ̃ ka Yesu sɔbun suunu sɔɔ. 3 Wee, Maari u turare gobi bɛkɛgia mɔ litirin bɔnu, ye ba kua ka naadin gum tii tii, ma u ye sua u Yesun naasu wisi, ma u su sunka ka win seri. Yera dii te kpuro ta turaren nuburu yiba. 4 Yesun bɔ̃ɔ turo, wi ba ra nɛɛ Yudasi Isikariɔtu, wi u koo yãku kowo tɔnwerobu ka Falisiba nùn nɔmu sɔndia, u bikia u nɛɛ, 5 mba n kua ba ǹ ka turare ye dɔre sɔm kowon wɔ̃ɔ tian kɔsiarun saka, kpa bu sãarobu bɔnu kua. 6 U ǹ yeni gerumɔ sãarobun wɔnwɔndun sɔ̃, adama yèn sɔ̃ u sãawa gbɛnɔ. Wiya u ra n maa gobin bɔɔru nɛni, kpa u n yi gbɛnimɔ. 7 Adama Yesu u nɛɛ, a kurɔ wi derio. U yeni beruawa u ka nɛn gɔɔ sikuru mara. 8 Baadommawa sãarobu ba wãa bɛɛn suunu sɔɔ adama nɛna na ǹ ko na n wãa ka bɛɛ baadomma. 9 Yuuba dabira ta nua ma Yesu u wãa Betaniɔ ma ba da mi, n ǹ mɔ bu ka Yesu wa tɔna, adama bu maa ka Lasaa wawa wi Yesu u seeya gɔrin di. 10 Yera yãku kowo tɔnweroba wesiana bu maa Lasaa go. 11 Domi win sɔ̃ na Yuuba dabira yarimɔ ben min di ba Yesu naanɛ dokemɔ. 12 Yen sisiru tɔn wɔru ge ga tɔ̃ɔ bakaru da ga nua ma Yesu u sisi Yerusalɛmuɔ. 13 Ma ba bãa kako bekusu sua ba ka nùn sennɔ da. Ba gbãsukumɔ ba mɔ̀, sa Gusunɔ siara! Domarugiiwa wi u sisi ka Gusunɔn yĩsiru! Domarugiiwa Isireliban sunɔ! 14 Ma Yesu u kɛtɛku kpɛmbu gagu wa u sɔni nge mɛ ba yorua Gusunɔn gari sɔɔ ba nɛɛ, 15 "I ku bɛrum ko, Yerusalɛmugibu. N wee bɛɛn sunɔ u sisi. U kɛtɛku kpɛmbu sɔni." 16 Yabu yeni ya ǹ win bwãabu yeeri saa ye sɔɔ, adama ye Yesu u wura win yiiko sɔɔ Gusunɔ wɔllɔ, saa ye sɔɔra ba yaaya ma ba yeni kpuro yorua Gusunɔn gari sɔɔ win sɔ̃, ba maa nùn ye kpuro kua. 17 Tɔn dabiru te ta raa wãa ka Yesu sannu sanam mɛ u Lasaa soka u yara sikirun di, ye u nùn seeya gɔrin di, ta ra n yen areru dimɔ. 18 Ma tɔn wɔru ge, ga nùn sennɔ da yèn sɔ̃ ba nua ma u sɔm maamaakigii te kua. 19 Yen sɔ̃ na Falisiba ba geruna ba nɛɛ, i ǹ wa ma sa nùn kpanawa mam mam. Domi wee handunia kpuro ya nùn swĩi. 20 Gɛrɛki gaba wãa be sɔɔ be ba sãaru da Yerusalɛmuɔ tɔ̃ɔ bakarun sanam. 21 Ba da Filipun mi, Galilen Bɛsaidagii, ma ba nɛɛ, tɔnwero, sa kĩ su Yesu wa. 22 Filipu u da u Andere sɔ̃ɔwa, ma Andere ka Filipu ba da ba Yesu sɔ̃ɔwa. 23 Yesu u bu sɔ̃ɔwa u nɛɛ, saa ya tura ye ba koo ka Tɔnu Bii wɔlle sua. 24 Ka geema na bɛɛ sɔ̃ɔmɔ, dĩa bima yà kun wɔrumɛ tem sɔɔ ya gu, ya wãawa ye tia. Adama yà n gu, ya koo bii dabinu ma. 25 Baawure wi u win wãaru dimɔ ka win tiin gɔ̃ ru kĩru u koo tu bia. Baawure wi u kun maa win wãaru garisi gãanu handunia yeni sɔɔ, u tu beruawa wãaru te ta ku ra kpen sɔ̃. 26 Goo ù n nɛn wãaru wãa, yɛ̃ro u man swĩiyɔ. Mi na wãa kpa u n maa wãa mi. Goo ù n nɛn wãaru wãa, nɛn Baaba koo yɛ̃ro bɛɛrɛ wɛ̃. 27 Yesu maa nɛɛ, tɛ̃ nɛn gɔ̃ ru ga sankira too too. Na ǹ yɛ̃ ye kon gere. Nge kon nɛn Baaba kanawa u man wɔra ye ya man deema mini sɔɔn di? Aawo, domi yenin sɔ̃ na na na. 28 Baaba, a wunɛn yĩsiru wɔlle suo. Yera nɔɔ gagu ga gerua saa wɔllun di ga nɛɛ, na tu wɔlle sua kɔ, kon maa wure n tu wɔlle sua nɔn mɛɛruse. 29 Tɔn wɔru ge ga wãa mi, ba nɔɔ ge nua ma ba nɛɛ, gura ya kukura. Ma gaba nɛɛ, wɔllun gɔradowa ka nùn gari kua. 30 Adama Yesu u bu sɔ̃ɔwa u nɛɛ, n ǹ mɔ nɛn sɔ̃ na i nɔɔ ge nua, bɛɛn sɔ̃ na. 31 Tɛ̃ gera handunia yenin siribu tunuma. Tɛ̃ gera ba koo handunia yen wirugii gira. 32 Sanam mɛ ba koo man sua tem di bu bwɛ̃, sanam mɛya kon tɔmbu kpuro tii gawe. 33 U yeni geruawa u ka sɔ̃ɔsi gɔɔ wiǹn bweseru u koo gbi. 34 Tɔn wɔru ge, ga nùn sɔ̃ɔwa ga nɛɛ, sa nua bɛsɛn woodan tireru sɔɔ ma Kirisi u ko n wãawa sere ka baadommaɔ. Amɔna a ka gerumɔ ma ba ǹ koo ko ba kun Tɔnun Bii sue tem di. Wara Tɔnu Bii wi. 35 Yesu u bu wisa u nɛɛ, saa fiiko sɔɔra yam bururam mu wãa bɛɛn suunu sɔɔ. I n sĩimɔ saa ye i yam bururam mɔ kpa yam mu ku raa bɛɛ tĩre. Domi wi u sĩimɔ yam wɔ̃ kuru sɔɔ u ku ra n yɛ̃ mi u dɔɔ. 36 Yen sɔ̃, i yam bururam mɛ naanɛ dokeo saa ye i mɛ mɔ kpa i ka ko yam bururam bibu. Ye Yesu u yeni gerua u kpa, u doona ben suunu sɔɔn di, u kukua. 37 Baa ye u ka maamaaki dabinu kua ben wuswaaɔ, ka mɛ, ba ǹ nùn naanɛ doke. 38 Kpa gari yi Gusunɔn sɔmɔ Esai u gerua yi ka koora, yi u nɛɛ, "Yinni wara u naanɛ doke ye sa nɔɔsia. Wara Yinni Gusunɔ u win dam sɔ̃ɔsi." 39 Yenin sɔ̃ na ba ǹ kpĩa ba naanɛ doke domi Gusunɔn sɔmɔ Esai u kpam gerua u nɛɛ, 40 "Gusunɔ u bu kua wɔ̃ kobu ma u ben bwisi kawa. Kpa bu ku raa ka ben nɔni yam wa. Kpa bu ku gia ka ben bwisi. Bu ku raa gɔ̃ ru gɔsia, kpa n bu bɛkia." 41 Yeniwa Esai u gerua yèn sɔ̃ u Kirisin yiiko wa ma u win gari gerua. 42 Ka mɛ, Yuuban tɔnwero dabiru ba Yesu naanɛ doke, adama Falisiban sɔ̃ ba ǹ wure batuma sɔɔ bu ku raa ka bu gire mɛnnɔ yerun din sɔ̃. 43 Domi ba tɔnun siarabu kĩ n kere Gusunɔn siarabu. 44 Ma Yesu u gbãra u nɛɛ, baawure wi u man naanɛ doke, n ǹ mɔ nɛna u naanɛ doke, wi u man gɔrimawa u naanɛ doke. 45 Wi u man waamɔ u wi u man gɔrima waamɔwa mi. 46 Nɛ na na handuniaɔ nge yam bururam, kpa baawure wi u man naanɛ doke u kun ka wãa yam wɔ̃ kuru sɔɔ. 47 Baawure wi u nɛn gari nɔɔmɔ, ma u kun yi wure, n ǹ mɔ nɛna kon yɛ̃ro taarɛ wɛ̃. Na nawa n ka handunia faaba ko, n ǹ mɔ n ka handunia taarɛ wɛ̃. 48 Baawure wi u man yina, ma u ǹ nɛn gari wure, yɛ̃ro u mɔ ye n koo nùn taarɛ wɛ̃. Gari yi na gerua yiya yi koo yɛ̃ro taarɛ wɛ̃ sanam dãakim sɔɔ. 49 Domi na ǹ gari gerua ka nɛn tiin yiiko, adama Baaba wi u man gɔrima, wiya u man wooda wɛ̃ ye kon gere ka ye kon sɔ̃ɔsi. 50 Na yɛ̃ ma win woodan kɔkɔrɔwa wãaru te ta ku ra kpe, yen sɔ̃ na ye na gerumɔ, na ye gerumɔwa nge mɛ Baaba u man sɔ̃ɔwa.

Yohanu 13

1 Yesu u ra n wigibu kĩ be ba wãa handuniaɔ, yen sɔ̃, bu sere tɔ̃ɔ baka te ko te ba ra nɛɛ Gɔɔ sararibu, u bu win kĩi bakaru sɔ̃ɔsi. Domi u yɛ̃ ma win saa ya tura u ka doona handunian di u da win Baaban mi. 2 Wi ka win bwãabu ba yaa dibu dimɔ sannu. N deema Setam u raa Yudasi Isikariɔtu, Simɔɔn bii bɔrie u ka Yesu yãku kowo tɔnwerobu ka Falisiba nɔmu sɔndia. 3 Yesun tii u yɛ̃ ma Baaba u nùn gãanu kpuro nɔmu sɔndia, u maa yɛ̃ ma u nawa saa Gusunɔn min di ma u maa wurɔ win mi. 4 Yera u seewa dii yerun di u win yaberu pweta u yi, ma u yasa sua u tii sɛ̃ka. 5 U nim sɔke gbɛ̃ɛru sɔɔ, u ka win bwãabun naasu teamɔ, ma u si sunkumɔ ka yasa ye u sɛ̃ke. 6 Ye u girari Simɔɔ Piɛɛn mi, ma Piɛɛ nùn bikia u nɛɛ, Yinni wuna kaa maa nɛn naasu tea? 7 Yesu u nùn wisa u nɛɛ, a ǹ gina tuba ye na mɔ̀ tɛ̃, adama amɛn biru n ko n nun yeeri. 8 Piɛɛ u nɛɛ, nɛ na kun wuramɔ a nɛn naasu tea fa! Yesu u nùn sɔ̃ɔwa u nɛɛ, nà kun wunɛn naasu tee, a ǹ maa bɔnu gaa wasi nɛn mi. 9 Simɔɔ Piɛɛ u nɛɛ, ǹ n mɛn na Yinni, n ǹ maa mɔ nɛn naasu tɔnawa kaa tea, a maa nɛn nɔma ka nɛn wiru teo. 10 Yesu u nɛɛ, wi u wobura, mba n maa yɛ̃ro tie, ma n kun mɔ u win naasu tea u wa u ka dɛɛra mam mam. Bɛɛ i dɛɛre, adama n ǹ mɔ bɛɛ kpuro. 11 N deema Yesu u win dɔmɛ yɛ̃ kɔ, yen sɔ̃ na u gerua u nɛɛ, n ǹ mɔ be kpurowa ba dɛɛre. 12 Sanam mɛ u ben naasu tea u kpa u win yaberu sua u sebua ma u kpam sina win sin yerɔ u nɛɛ, i yɛ̃ ye na bɛɛ kua mi? 13 Bɛɛ i man sokumɔ keu koosio ka Yinni. Geema i gerumɔ, mɛya na sãa. 14 ǹ n mɛn na, nɛ wi na sãa bɛɛn Yinni ka bɛɛn keu koosio, nà n bɛɛn naasu tea, n weenɛ bɛɛn tii i naasu teana. 15 Wee na bɛɛ kom gem sɔ̃ɔsi kpa i n da maa kuanɛ nge mɛ. 16 Ka geema, na bɛɛ sɔ̃ɔmɔ, yoo ku ra n win yinni kere, mɛya gɔro ku ra n wi u nùn gɔra kere. 17 Tɛ̃ wee, i sɔ̃ɔsi teni gia. Doo nɔɔrugiba bɛɛ, iǹ n tu swĩi. 18 N ǹ mɔ bɛɛ kpuron gariya na mɔ̀. Na yɛ̃ be na gɔsa. Adama Gusunɔn gari yi ǹ koo ko yiǹ kun koore yi yi nɛɛ, "Wi u ka man dimɔ sannu, u gɔsira nɛn yibɛrɛ." 19 Na bɛɛ yabu yeni sɔ̃ɔmɔwa saa tɛ̃n di yu sere koora. Yà n koora kpa i ka naanɛ doke ma nɛna yɛ̃ro wi. 20 Ka geema na bɛɛ sɔ̃ɔmɔ, baawure wi u yɛ̃ro wura wi na gɔra, nɛna u wura. Baawure wi u maa man wura, u wi u man gɔrima wurawa. 21 Ye Yesu u yeni gerua u kpa, win gɔ̃ ru ga sankira too too, ma u bu sɔ̃ɔwa kpasasa u nɛɛ, ka geema na bɛɛ sɔ̃ɔmɔ, goo wãa bɛɛ sɔɔ wi u koo man dɔmɛ. 22 Ma win bwãabu ba nɔni gia mɛɛrina. Ba ǹ yɛ̃ ben wara u ka yã. 23 Yesun bɔ̃ɔ turo, wi u kĩ, u sɔ̃ win nɔm geuɔ. 24 Ma Simɔɔ Piɛɛ u yĩreru kua ka nɔmu durɔ wi, u Yesu bikio u nɛɛ, wara u ka yã. 25 Ma bɔ̃ɔ wi, u Yesu gballi u nùn bikia u nɛɛ, Yinni wara a ka yã. 26 Yesu u nùn wisa u nɛɛ, wi na kon dɔka wɛ̃ ye na ka kpee sɔ̃ ra, wiya mi. Ma u dɔka ka kpee sɔ̃ ra u Yudasi Isikariɔtu, Simɔɔn bii wɛ̃. 27 Ye Yudasi u dɔka ye mwa u kpa, mii mii ma Setam dua win gɔ̃ ruɔ. Yesu u nùn sɔ̃ɔwa u nɛɛ, ye kaa ko, a koowo kpaaka. 28 Adama ben suunu sɔɔ goo sari wi u yɛ̃ yèn sɔ̃ u nùn sɔ̃ɔwa mɛ. 29 Gaba tamaa yèn sɔ̃ Yudasiwa u gobin bɔɔru nɛni, yen sɔ̃ na Yesu u nùn sɔ̃ɔmɔ u gãanu dweeyo niǹn bukata ba mɔ tɔ̃ɔ bakarun sɔ̃, ǹ kun mɛ u nùn sɔ̃ɔmɔ u sãarobu gãanu kɛ̃. 30 Ye Yudasi u dɔka ye mwɛ ma u yara ka sɛndaru. N deema yam tĩra. 31 Sanam mɛ Yudasi u yara u kpa, Yesu u nɛɛ, tɛ̃ra Tɔnun Bii u den wɔlle suara, ma Gusunɔ maa wɔlle suara win min di. 32 Gusunɔ ù n wɔlle suara win min di, Gusunɔn tii u koo maa Tɔnun Bii wi wɔlle sua, n ǹ maa tɛɛmɔ. 33 Nɛn bibu, saa fiiko sɔɔra ko na n wãa ka bɛɛ, yen biru i ko man kasu. Adama na bɛɛ sɔ̃ɔmɔ tɛ̃ nge mɛ na raa Yuuba sɔ̃ɔwa, mi na dɔɔ i ǹ kpɛ̃ i da mi. 34 Wooda kpaa na bɛɛ wɛ̃ɛmɔ, i kĩanɔ. I de i kĩru sɔ̃ɔsina nge mɛ na bɛɛ kĩru sɔ̃ɔsi. 35 Iǹ n kĩanɛ, baawure u ko n yɛ̃ ma i sãawa nɛn bwãabu. 36 Simɔɔ Piɛɛ u nùn bikia u nɛɛ, Yinni, mana a dɔɔ. Yesu u nùn wisa u nɛɛ, mi na dɔɔ a ǹ kpɛ̃ a man swĩima tɛ̃, adama ǹ n sosi kaa man swĩima mi. 37 Piɛɛ u nùn bikia u nɛɛ, Yinni, mban sɔ̃ na na ǹ kpɛ̃ n nun swĩi mi tɛ̃. Domi na sɔɔru sãa n ka nɛn wãaru wɛ̃ wunɛn sɔ̃. 38 Yesu u nùn bikia u nɛɛ, a sɔɔru sãa a ka wunɛn wãaru wɛ̃ nɛn sɔ̃? Ka gem na nun sɔ̃ɔmɔ, goo dɔɔ gu ka sere swĩ kaa man siki nɔn ita.

Yohanu 14

1 Yesu bu sɔ̃ɔwa u nɛɛ, i ku wurura. I Gusunɔ naanɛ dokeo kpa i maa man naanɛ doke. 2 Wãa yee dabina nu wãa nɛn Baaban yɛnuɔ. N wee na dɔɔ mi, n bɛɛ wãa yerun sɔɔru kua. ǹ kun sãa mɛ, na ǹ daa bɛɛ sɔ̃ɔmɔ. 3 Nà n wãa yee ten sɔɔru kua na kpa, kon kpam wurama n bɛɛ sua n ka da nɛn tiin mi. Mi na wãa kpa sa n wãa mi sannu. 4 I ru swaa yɛ̃ kɔ mi na dɔɔ. 5 Tomaa u nùn sɔ̃ɔwa u nɛɛ, Yinni, sa ǹ yɛ̃ mi a dɔɔ. Amɔna sa ko n ka min swaa yɛ̃. 6 Yesu u nùn sɔ̃ɔwa u nɛɛ, nɛna na swaa, nɛna na gem, nɛna na wãaru, goo sari wi u koo da Baaban mi ma n kun mɔ saa nɛn min di. 7 Bɛɛ iǹ n daa man yɛ̃, i ko n maa nɛn Baaba yɛ̃. Saa tɛ̃n di i nùn gia, i maa nùn wa. 8 Filipu u nùn sɔ̃ɔwa u nɛɛ, Yinni a sun Baaba wi sɔ̃ɔsio, n den tura mɛ. 9 Yesu u nɛɛ, miǹn di na ka bɛɛ wãa n tɛ, ka mɛ, a ǹ man gie Filipu? Baawure wi u gesi man wa u maa Baaba wawa. Amɔna a ka gerua a nɛɛ, n bɛɛ Baaba sɔ̃ɔsio. 10 A ǹ naanɛ doke ma na wãa Baaba sɔɔ, Baaba maa wãa nɛ sɔ̃ɔ? Gari yi na bɛɛ sɔ̃ɔmɔ, na ǹ gerumɔ ka nɛn tiin yiiko. Baaba wi u wãa nɛ sɔɔ, wiya u win sɔmburu mɔ̀. 11 I gesi naanɛ dokeo ma na wãa Baaba sɔɔ, ma Baaba maa wãa nɛ sɔɔ. ǹ kun mɛ, i naanɛ dokeo sɔma ye na kuan sɔ̃. 12 Ka geema na bɛɛ sɔ̃ɔmɔ, baawure wi u man naanɛ doke, sɔma ye na mɔ̀, yeya yɛ̃ro koo maa ko. U koo mam sɔma ko ye ya yeni kere domi na dɔɔ nɛn Baaban mi. 13 Na kon maa bɛɛ gãanu baanire kua ni i gesi kana ka nɛn yĩsiru, kpa bu ka Baaba wɔlle sua saa Biin min di. 14 Iǹ n gãanu kana ka nɛn yĩsiru, kon bɛɛ ni kua. 15 Yesu u nɛɛ, iǹ n man kĩ i nɛn wooda mɛm nɔɔwɔ. 16 Kon Baaba kana, u koo bɛɛ Dam Kɛ̃ɔ kpao wɛ̃ wi u ko n ka bɛɛ wãa sere ka baadommaɔ. Wiya sãa Hunde gemgii. 17 Handuniagibu ba ǹ kpɛ̃ bu nùn mwa yèn sɔ̃ ba ǹ nùn waamɔ, mɛya ba ǹ maa nùn yɛ̃. Adama bɛɛ i nùn yɛ̃, domi u wãa ka bɛɛ, u kon maa wãa bɛɛn baawure sɔɔ. 18 Na ǹ bɛɛ derimɔ goberu. Kon kpam wurama bɛɛn mi. 19 N tie fiiko ye handuniagibu ba ǹ maa ka man wasi, adama bɛɛ i ko man wa. Yèn sɔ̃ na wasi, bɛɛ i ko n maa wasi. 20 Dɔma teya i ko n yɛ̃ ma na wãa nɛn Baaba sɔɔ ma bɛɛ i wãa nɛ sɔɔ, ma na maa wãa bɛɛ sɔɔ. 21 Wi u nɛn wooda mwa, ma u ye mɛm nɔɔwa, wiya u man kĩ. Wi u man kĩ, nɛn Baaba koo nùn kĩa. Nɛn tii kon maa yɛ̃ro kĩa, kpa n nùn tii sɔ̃ɔsi. 22 Yudasi, n ǹ mɔ wi ba ra nɛɛ Isikariɔtu, u bikia u nɛɛ, Yinni, amɔna kaa sun wunɛn tii sɔ̃ɔsisina handuniagibu ba kun ka nun wa. 23 Ma Yesu u nùn wisa u nɛɛ, baawure wi u man kĩ u koo nɛn gari mɛm nɔɔwa. Nɛn Baaba u koo nùn kĩa, nɛ ka nɛn Baaba sa ko maa na yɛ̃ron mi kpa su bɛsɛn wãa yeru ko wi sɔɔ. 24 Wi u kun man kĩ, u ǹ maa nɛn gari mɛm nɔɔwammɛ. Gari yi i nua, n ǹ nɛgii, yi sãawa Baabagii wi u man gɔrima. 25 Na bɛɛ yeni kpuro sɔ̃ɔmɔ tɛ̃ ye na ka bɛɛ wãa. 26 Adama Hunde Dɛɛro, Dam kɛ̃ɔ wi, wi Baaba koo gɔrima ka nɛn yĩsiru, wiya u koo bɛɛ baayere keu sɔ̃ɔsi, u koo maa bɛɛ ye kpuro yaayasia ye na bɛɛ sɔ̃ɔwa. 27 Bɔri yɛnda na bɛɛ deria, nɛn bɔri yɛnda na bɛɛ wɛ̃ɛmɔ. Na ǹ bɛɛ tu wɛ̃ɛmɔ nge mɛ handunia ya ra wɛ̃. I ku wurura, i ku maa nanda. 28 Bɛɛ i nua nge mɛ na bɛɛ sɔ̃ɔwa ma na doonɔ, adama kon kpam wurama bɛɛn mi. Iǹ n daa man kĩ i ko n nuku dobu mɔ ye na ka dɔɔ Baaban mi, domi nɛn Baaba u yiiko mɔ u man kere. 29 Na bɛɛ gãa ninin gari sɔ̃ɔmɔ tɛ̃, nu sere koora. Nù n koora kpa i ka man naanɛ doke. 30 Na ǹ maa kpɛ̃ n ka bɛɛ gari dabinu ko domi handunian wirugii u sisi. U ǹ dam mɔ nɛ sɔɔ, 31 adama kpa handuniagibu ba n ka yɛ̃ ma na Baaba kĩ, na maa kpuro mɔ̀ nge mɛ Baaba u man yen wooda wɛ̃. I seewo su doona.

Yohanu 15

1 Yesu u bu sɔ̃ɔwa u nɛɛ, nɛna resɛm dãa mɛro, nɛn Baabawa gbaa yɛ̃ro. 2 Nɛn kãasa baayere ye ya ku ra binu ma, yera u ra bure u kɔ̃. Kãasa baayere ye ya ra binu ma, u ra ye sɔmɛwa kpa yen marum mu ka sosi. 3 Bɛɛ i dɛɛra kɔ gari yin saabu yi na bɛɛ sɔ̃ɔwa. 4 I de i n ka man maninɛ, na kon maa ka bɛɛ manina. Nge mɛ kãasa ya ǹ kpɛ̃ yu ka tii binu ma, ma n kun mɔ ya ka dãa mɛro maninɛ, mɛya maa bɛɛn tii, i ǹ kpɛ̃ i binu ma, iǹ kun ka man maninɛ. 5 Nɛna resɛm dãa mɛro, bɛɛya yen kãasi. Wi u ka man maninɛ ma na ka nùn maninɛ, wiya u koo bii dabinu ma, domi nɛn sariru i ǹ kpɛ̃ i gãanu ganu ko. 6 Baawure wi u kun ka man maninɛ, ba koo nùn wunawa bu kɔ̃ nge kãasi kpa u dɛrura. Yen biru ba koo kãasi yi mɛnna bu dɔ̃ɔ doke, kpa yi dɔ̃ɔ mwa. 7 Bɛɛ iǹ n ka man maninɛ ma nɛn gari yi wãa bɛɛ sɔɔ, i bikio ye i kĩ, na kon bɛɛ kua. 8 Iǹ n bii dabinu mara ya koo nɛn Baaba bɛɛrɛ wɛ̃. Nge mɛya i ko maa sɔ̃ɔsi ma nɛn bwãaba i sãa. 9 Nge mɛ Baaba man kĩ, nge mɛya na maa bɛɛ kĩ. I yɔ̃ ro nɛn kĩru sɔɔ. 10 Nge mɛ na nɛn Baaban wooda mɛm nɔɔwa ma na wãa win kĩru sɔɔ, nge mɛya iǹ n nɛn wooda mɛm nɔɔwa, i ko n wãa nɛn kĩru sɔɔ. 11 Na bɛɛ yeni sɔ̃ɔwa kpa nɛn nuku dobu bu n ka wãa bɛɛ sɔɔ, kpa bɛɛn nuku dobu bu ka yibu. 12 Nɛn wooda wee, i kĩanɔ nge mɛ na bɛɛ kĩ. 13 Goo ù n win wãaru wɛ̃ win bɔrɔban sɔ̃ kĩrun saabu, kĩi te, ta ǹ saara mɔ. 14 Nɛn bɔrɔbara bɛɛ i sãa iǹ n mɔ̀ ye na bɛɛ yiire. 15 Na ǹ maa bɛɛ sokumɔ yobu yèn sɔ̃ yoo ku ra n yɛ̃ ye win yinni u mɔ̀. Adama na bɛɛ sokumɔ bɔrɔba, yèn sɔ̃ gãanu baanire ni na nua nɛn Baaban min di niya na bɛɛ sɔ̃ɔwa. 16 N ǹ mɔ bɛɛya i man gɔsa, nɛna na bɛɛ gɔsa. Na maa bɛɛ wuna nɛnɛm kpa i da i binu ma ni nu koo tɛ. Kpa gãanu baanire ni bɛɛ i kana nɛn Baaban mi ka nɛn yĩsiru, u bɛɛ wɛ̃. 17 Ye na bɛɛ yiiremɔ wee, i kĩanɔ. 18 Yesu maa nɛɛ, handuniagibu bà n bɛɛ tusa, i n yɛ̃ ma nɛna ba gbia ba tusa. 19 Bɛɛ iǹ n daa sãan na handuniagibu, handunia ya ko n bɛɛ kĩwa nge yegibu. Adama na bɛɛ gɔsa handunia ye sɔɔn di, i ǹ maa sãa yegibu, yen sɔ̃ na handuniagiba bɛɛ tusa. 20 I gari yi yaayo yi na raa bɛɛ sɔ̃ɔwa na nɛɛ, yoo ku ra win yinni kere. Bà n man nɔni sɔ̃ɔwa ba koo maa bɛɛ nɔni sɔ̃. Bà n nɛn gari mɛm nɔɔwa ba koo maa bɛɛgii mɛm nɔɔwa. 21 Adama yeni kpurowa ba koo bɛɛ kua nɛn yĩsirun sɔ̃, domi ba ǹ yɛ̃ro yɛ̃ wi u man gɔrima. 22 Nà kun daa nɛ, na ka bu gari kue, ba ǹ daa taarɛ mɔ. Adama tɛ̃ ba ǹ maa gafara mɔ. 23 Wi u man tusa u maa nɛn Baaba tusawa. 24 Nà kun daa sɔma kue ben suunu sɔɔ ye goo kun koore, ba ǹ daa taarɛ mɔ. Adama tɛ̃, ba sɔma ye wa kɔ, ma ba sun tusa nɛ ka nɛn Baaba. 25 Nge mɛya n sãa kpa gari yi ba yorua woodan tirerɔ yi ka koora, yi yi nɛɛ, "Ba man tusa, ba ǹ ten wiru ka naasu yɛ̃." 26 Adama Dam Kɛ̃ɔ, Hunde gemgii wi, u sisi saa nɛn Baaban min di. Kon bɛɛ nùn gɔriama ka Baaba win yĩsiru, kpa u bɛɛ nɛn areru diiya. 27 Bɛɛ i ko maa nɛn areru di, domi i wãa ka nɛ sannu saa toren di.

Yohanu 16

1 Yeni kpurowa na bɛɛ sɔ̃ɔwa kpa i ku ra ka biru wura. 2 Ba koo bɛɛ gira saa mɛnnɔ yerun di. Saa ya mam sisi ye baawure wi u bɛɛ goomɔ u ko n tamaa u Gusunɔ sɔmburu kuammɛwa. 3 Ba koo bɛɛ yabu yeni kua yèn sɔ̃ ba ǹ Baaba gie, ba ǹ maa man gie. 4 Adama na bɛɛ gãa nini sɔ̃ɔmɔwa, dɔma te nin saa ya tura kpa i ka yaaya ma na raa bɛɛ nu sɔ̃ɔre. Yesu maa nɛɛ, na ǹ daa bɛɛ gãa nini sɔ̃ɔwa saa yellun di yèn sɔ̃ na wãa ka bɛɛ sannu. 5 Adama tɛ̃ na dɔɔ wi u man gɔriman mi. Goo maa sari bɛɛ sɔɔ wi u man bikia mi na dɔɔ. 6 Adama yèn sɔ̃ na bɛɛ yeni sɔ̃ɔwa, bɛɛn gɔ̃ ru ga sankira too. 7 Ka mɛ, na bɛɛ gem sɔ̃ɔmɔ, bɛɛn arufaaniwa nà n da, domi nà kun de, Dam Kɛ̃ɔ wi, u ǹ sisi bɛɛn mi. Adama nà n da kon bɛɛ nùn gɔriama. 8 ù n tunuma, wiya u koo de handuniagibu bu tubu ye n sãa toraru ka ye n sãa gem ka maa Gusunɔn siribu. 9 U koo bu taarɛ wɛ̃ yèn sɔ̃ ba ǹ man naanɛ doke. 10 U koo bu sɔ̃ɔsi ma gem wãa nɛ sɔɔ ye na ka dɔɔ Baaban mi, ma ba ǹ maa man wasi. 11 U koo maa de bu siribu tubu yèn sɔ̃ Gusunɔ u handunia yenin wirugii siri kɔ. 12 Na maa gãa dabinu mɔ n ka bɛɛ sɔ̃, adama nu bɛɛ kere gina. 13 Sanam mɛ Hunde gemgii wi, u tunuma wiya u koo bɛɛ kpara i ka gem kpuro gia. U ǹ koo gari gere ka win tiin yiiko. Ye u nua, yeya u koo gere, u koo maa bɛɛ sɔ̃ ye ya sisi. 14 Wiya u koo man bɛɛrɛ wɛ̃, domi u koo nɛgia nɔ, kpa u bɛɛ ye nɔɔsia. 15 Kpuro ye Baaba u mɔ nɛgia. Yen sɔ̃ na na gerua ma Hunde u koo nɛgia nɔ, kpa u bɛɛ ye nɔɔsia. 16 Yesu bu sɔ̃ɔwa u nɛɛ, ǹ n sosi fiiko i ǹ maa man wasi. ǹ n maa kpam sosi fiiko, i ko man wa. 17 Ma win bwãabu gabu ba bikianamɔ, mba yen tubusianu ye u sun sɔ̃ɔmɔ, ǹ n sosi fiiko sa ǹ maa nùn wasi, ǹ n maa kpam sosi fiiko sa ko nùn wa. Mba maa yen tubusianu ye u nɛɛ u dɔɔ win Baaban mi. 18 Ba bikianamɔ mba ǹ n sosi fiikon tubusianu. Ba nɛɛ, sa ǹ yɛ̃ yèn gari u mɔ̀. 19 Yesu u gia ma ba kĩ bu nùn gãanu bikia. Yen sɔ̃ na u bu sɔ̃ɔwa u nɛɛ, na nɛɛ yaa, ǹ n sosi fiiko i ǹ man wasi, ǹ n maa kpam sosi fiiko i ko man wa. Gari yiniwa i bikianamɔ bɛɛn suunu sɔɔ ro? 20 Ka geema na bɛɛ sɔ̃ɔmɔ, i ko swĩ, i ko kpasa wɔri ko, adama handuniagibu ba koo yɛ̃ɛri. Bɛɛn nukura koo sankira, adama bɛɛn nuku sankiranu koo gɔsira nuku dobu. 21 Sanam mɛ tɔn kurɔ u yiire u ra n nɔni swãaru mɔ domi win saa ya tura. Adama sanam mɛ u win bii mara, u ku ra maa nɔni swãa te yaaye nuku dobun sɔ̃ ye u ka tɔnu mara handunia sɔɔ. 22 Mɛya n maa sãa bɛɛn mi. Tɛ̃, bɛɛ i nuku sankiranu mɔ, adama kon kpam bɛɛ wa, ma bɛɛn nukura koo dora. Goo maa sari wi u koo kpĩ u bɛɛ nuku doo bi mwaari. 23 Saa ye, yà n tunuma, i ǹ ko man gãanu ganu bikia. Ka geema na bɛɛ sɔ̃ɔmɔ, baayere ye i Baaba kana ka nɛn yĩsiru, u koo bɛɛ kɛ̃. 24 Sere ka tɛ̃ i ǹ gãanu ganu kanɛ ka nɛn yĩsiru. I bikio, i ko wa, kpa bɛɛn nuku dobu bu ka yibu. 25 Yesu maa bu sɔ̃ɔwa u nɛɛ, yeni kpurowa na bɛɛ sɔ̃ɔwa ka mɔndu. Adama saa ya sisi ye na ǹ maa bɛɛ gari sɔ̃ɔmɔ ka mɔndu, kon bɛɛ Baaban gari sɔ̃ wa kpasasa. 26 Saa ye, yà n tunuma, i ko Baaba kana ka nɛn yĩsiru. Na ǹ maa gerumɔ ma kon nùn kana bɛɛn sɔ̃, 27 domi Baaban tii u bɛɛ kĩ. U bɛɛ kĩ yèn sɔ̃ i man kĩ, i maa naanɛ doke ma na weewa Gusunɔn min di. 28 Na yarimawa saa Baaban min di, na na handuniaɔ. Tɛ̃ na handunia derimɔ na dɔɔ nɛn Baaban mi. 29 Win bwãaba nùn sɔ̃ɔwa ba nɛɛ, tɛ̃ra a re sun gari sɔ̃ɔwa kpasasa, n ǹ ka mɔndu. 30 Tɛ̃ sa gia ma a baayere kpuro yɛ̃, n ǹ maa mɔ goo u nun gãanu bikia. Yenin sɔ̃ na sa naanɛ doke ma Gusunɔn min diya a yarima. 31 Ma Yesu u bu bikia u nɛɛ, tɛ̃ i naanɛ doke? 32 I laakari koowo, saa ya sisi ya mam tunuma kɔ ye ba koo ka bɛɛ kpuro yarinasia, baawure u ka da win yɛnuɔ. I ko man deri nɛ turo, adama na ǹ wãa nɛ turo yèn sɔ̃ Baaba u wãa ka nɛ. 33 Yabu yeniwa na raa bɛɛ sɔ̃ɔwa kpa i n ka bɔri yɛndu mɔ nɛ sɔɔ. Handunia ye sɔɔra i ko nɔni swãaru wa, adama i ku mwia kpana, na handunia kamia kɔ.

Yohanu 17

1 Ye Yesu u gari yi gerua u kpa, u win nɔni seeya wɔllɔ u nɛɛ, Baaba, saa ya tura. A nɛ wunɛn Bii wɔlle suo, kpa n maa nun wɔlle sua. 2 Domi a man yiiko wɛ̃ tɔmbu kpuron wɔllɔ, kpa n ka be a man wɛ̃ kpuro wãaru wɛ̃ te ta ku ra kpe. 3 Wãaru te ta ku ra kpe tera mini, tɔmbu bu ka nun gia, wunɛ Gusunɔ turo, kpa bu maa man gia nɛ Yesu Kirisi wi a gɔrima. 4 Na nun wɔlle sua tem mɛ sɔɔ, na maa sɔmbu te wiru go te a man yiire. 5 Baaba, na nun kanamɔ, a de na n yiiko mɔ tɛ̃ wunɛn bɔkuɔ, nge mɛ na raa mɔ ka wunɛ sannu ba sere handunia taka kua. 6 Na tɔn be wunɛn yĩsiru giasia be a man wɛ̃ handunia ye sɔɔ. Wunɛgiba ba raa sãa, ma a man bu wɛ̃. Ba maa wunɛn gari mɛm nɔɔwa. 7 Tɛ̃ ba yɛ̃ ma gãanu kpuro ni a man wɛ̃, saa wunɛn min diya nu na. 8 Domi na bu gari yi wɛ̃ yi a man sɔ̃ɔwa, ba maa yi mwa. Ma ba gia sãa sãa ma saa wunɛn min diya na yara, ba maa naanɛ doke ma wuna a man gɔrima. 9 Na bu kanaru kuammɛ n ǹ mɔ handuniagibu. Tɔn be a man wɛ̃, beya na kanaru kuammɛ yèn sɔ̃ wunɛgiba ba sãa. 10 Nɛgibu kpuro ba sãawa wunɛgibu ma wunɛgibu kpuro ba maa sãa nɛgibu, nɛn yiiko maa sɔ̃ɔsira be sɔɔ. 11 Tɛ̃ na sisi wunɛn mi. Na ǹ ko na n maa wãa handunia sɔɔ, adama beya ba ko n wãa handunia ye sɔɔ. Baaba Dɛɛro, a bu beruo ka wunɛn yĩsi te a man wɛ̃n dam, kpa ba n ka sãa tia, nge mɛ nɛ ka wunɛ sa sãa tia. 12 Sanam mɛ na wãa ka be, na bu berua ka wunɛn yĩsi te a man wɛ̃n dam. Na bu kɔ̃ su, ma be sɔɔ baa tɔn turo goo kun kam kue ma n kun mɔ kam kooren bii, kpa Gusunɔn gari yi ka koora. 13 Tɛ̃ na sisi wunɛn mi. Yeniwa na gerumɔ handunia ye sɔɔ, kpa ba n ka nuku dobu yiba nɛn sɔ̃. 14 Na bu wunɛn gari wɛ̃, ma handuniagiba bu tusa yèn sɔ̃ ba ǹ sãa handuniagibu, nge mɛ nɛn tii na ǹ sãa handuniagii. 15 Na ǹ nun kanamɔ a ka bu wuna handunia sɔɔn di, adama na nun kanamɔwa a bu kɔ̃ suo tɔn kɔ̃ so win sɔ̃. 16 Ba ǹ sãa handuniagibu nge mɛ nɛn tii na ǹ sãa handuniagii. 17 A tii bu wunɔ nɛnɛm ka wunɛn gem gari. Wunɛn gari gema. 18 Nge mɛ a man gɔrima handuniaɔ, mɛya na maa bu gɔra handunia sɔɔ. 19 Ben sɔ̃ na na nun nɛn tii wɛ̃ kpa ben tii bu maa ka ko wunɛgibu ka gem. 20 N ǹ mɔ beni tɔnawa na kanaru kuammɛ, adama ka maa be ba koo naanɛ doke ben garin saabu. 21 Na kanamɔwa be kpuro ba n ka sãa tia. Nge mɛ wunɛ Baaba a wãa nɛ sɔɔ, ma na maa wãa wunɛ sɔɔ, a de bu ko tia bɛsɛ sɔɔ. Kpa handuniagibu bu ka naanɛ doke ma wuna a man gɔrima. 22 Yiiko ye a man wɛ̃, yeya na maa bu wɛ̃, kpa ba n ka sãa tia nge mɛ nɛ ka wunɛ sa sãa tia. 23 Nɛ na wãa be sɔɔ, wuna a maa wãa nɛ sɔɔ, kpa bu ka ko tia mam mam. Kpa handunia yu ka gia ma wuna a man gɔrima, a maa bu kĩ nge mɛ a man kĩ. 24 Baaba, na kĩ be a man wɛ̃ ba n wãa nɛn mi, mi na wãa, kpa ba n nɛn yiiko mɛɛra ye a man wɛ̃, domi a man kĩ ba sere handunia taka kua. 25 Baaba gemgii, handuniagiba kun nun yɛ̃, adama nɛ na nun yɛ̃, ma beni ba tuba ma wuna a man gɔrima. 26 Na bu wunɛn yĩsiru giasia, mɛya kon kpam bu tu giasiam sosi, kĩi te a man kĩa ta n ka wãa be sɔɔ, kpa na n maa wãa be sɔɔ.

Yohanu 18

1 Sanam mɛ Yesu u kana te kua u kpa, u yara ka win bwãabu sannu ba da daa tora gaan guruɔ ye ba ra soku Sedoroni. Batuma gaa wãa mi, yè sɔɔ u dua ka win bwãabu. 2 Yudasi, win dɔmɛ, u yam mi yɛ̃ domi Yesu ka win bwãabu ba ra raa mɛnnɛ mi nɔn dabiru. 3 Yen sɔ̃ na Yudasi u da mi ka tabu kowobu ka sãa yerun kɔ̃ sobu be yãku kowo tɔnwerobu ka Falisiba ba nùn wɛ̃. Ba ben tabu yãnu nɛni, ka fitilakunu ka wĩi bɔnnun dɔ̃ɔ. 4 N deema Yesu u yɛ̃ kɔ ye n koo nùn ko kpuro, yen sɔ̃ na u susi u bu bikia u nɛɛ, wara i kasu. 5 Ma ba nùn wisa ba nɛɛ, Yesu Nasarɛtigiiwa sa kasu. Yesu u nɛɛ, nɛna mi. Yudasi, win dɔmɛ, u yɔ̃ mi, ka be sannu. 6 Ye Yesu u nɛɛ, nɛna mi, ma ba dɛsira ba wɔruka. 7 Yesu u kpam bu bikia u nɛɛ, wara i kasu. Ma ba nɛɛ, Yesu Nasarɛtigiiwa sa kasu. 8 Yesu u nɛɛ, na raa bɛɛ sɔ̃ɔwa kɔ ma nɛna mini. ǹ n nɛn na i kasu, i de beni bu doona. 9 U yeni gerua kpa gari yi u raa gerua yi ka koora ye u nɛɛ, baa tɔn turo kun kam kue be Baaba u nùn wɛ̃ sɔɔ. 10 Sanam mɛ, Simɔɔ Piɛɛ u win takobi nɛni ma u ye woma u ka yãku kowo tɔnweron yoo sɔ̃ ra u win soo nɔm geuguu bura. Yoo win yĩsira Maliku. 11 Ma Yesu u Piɛɛ sɔ̃ɔwa u nɛɛ, a wunɛn takobi wesio yen kararɔ. Na ǹ kon ka nɔni swãaru tɛmana te nɛn Baaba u man yiire? 12 Sanam mɛya tabu kowobu ka ben wirugii ka Yuuban sãa yerun kɔ̃ sobu ba Yesu mwa ba nùn bɔkua 13 ma ba gbia ba ka nùn da Anin mi. Ani u sãawa Kaifan dokiri, Kaifa wiya u maa sãa yãku kowo tɔnwero wɔ̃ɔ ge sɔɔ. 14 Kaifa wiya u raa Yuuba bwisi kã ma n arufaani mɔ tɔn turo u ka tɔmbu gbiiya. 15 Simɔɔ Piɛɛ ka bɔ̃ɔ goo ba Yesu swĩi. N deema yãku kowo tɔnwero wi, u bɔ̃ɔ wi yɛ̃ sãa sãa, ma bɔ̃ɔ wi, u ka Yesu dua sannu yãku kowo tɔnweron yɛnun yaaraɔ. 16 Adama Piɛɛ u yɔ̃ ra tɔɔwɔ yɛnu kɔnnɔwɔ. Ma bɔ̃ɔ wi yãku kowo tɔnwero u yɛ̃ mi, u yarima u ka wɔndia kɔnnɔ kɔ̃ so geruna, ma u Piɛɛ duusia. 17 Ma wɔndia wi u kɔnnɔ kɔ̃ su mi, u Piɛɛ bikia u nɛɛ, wunɛ, a ǹ maa sãa durɔ win bwãabun turo? Piɛɛ u nɛɛ, aawo. 18 Ma yobu ka sãa yerun kɔ̃ sobu ba yɔ̃ dɔ̃ɔ gɛ̃ɛn bɔkuɔ yi ba sɔ̃ rua woorun sɔ̃ ba wɔ̃ su. Piɛɛ u da u maa yɔ̃ mi, ba wɔ̃ su sannu. 19 Ma yãku kowo tɔnwero u Yesu win bwãabun gari bikia, ka ye u tɔmbu sɔ̃ɔsimɔ. 20 Ma Yesu u nùn wisa u nɛɛ, na ka baawure gari kua batuma sɔɔ. Na nɛn keu sɔ̃ɔsiru kpuro kuawa mɛnnɔ yenu sɔɔ ka maa sãa yerɔ, mi Yuuba kpuro ba ra mɛnnɛ. Na ǹ gãanu ganu gerua asiri sɔɔ. 21 ǹ n mɛn na, mban sɔ̃ na a man gari bikiamɔ. Be ba nɛn gari nua, a ben tii bikio ye na bu sɔ̃ɔwa. Beya ba yɛ̃ ye na gerua. 22 Ye Yesu u yeni gerua u kpa, yera sãa yerun kɔ̃ so turo wi u nùn yɔ̃ re, u Yesu baara so, ma u nɛɛ, yãku kowo tɔnwerowa a kãka a gari wisimɔ mɛ? 23 Ma Yesu u nùn wisa u nɛɛ, ǹ n gari kɔ̃ sin na na gerua, a yi geruo baawure u nɔ. ǹ n maa gem na na gerua, mban sɔ̃ na a man soomɔ. 24 Ma Ani u dera ba nùn bɔkua ba ka da Kaifa, yãku kowo tɔnweron mi. 25 Saa ye sɔɔ, Simɔɔ Piɛɛ u yɔ̃ mi, u dɔ̃ɔ wɔ̃ su. Ma ba nùn bikia ba nɛɛ, wunɛ maa, a ǹ sãa durɔ win bwãabun turo? Adama Piɛɛ u gari yi siki u nɛɛ, aawo fa. 26 Yãku kowo tɔnweron yoo turo, wiǹn soo teu Piɛɛ u buran dusi, u nùn bikia u nɛɛ, na ǹ daa nun wa ka wi batuma ye sɔɔ? 27 Piɛɛ u kpam siki u nɛɛ, aawo. Yera yande goo dɔɔ ga swĩ. 28 Saa Kaifan min di ba ka Yesu da tem yɛ̃ron siri yerɔ. N deema buru buru yam sãrera. Be ba sãa Yuuba ba ǹ wure bu du siri yeru mi, kpa bu ku raa ko disigibu. Domi ba kĩ bu Gɔɔ sararibun tɔ̃ɔ baka ten yaa dibu di. 29 Yen sɔ̃ na Pilati u yarima u bu deema, ma u bu bikia u nɛɛ, tora teren bwesera i durɔ wi waasi. 30 Ba nɛɛ, ù kun kɔ̃ sa kue, sa ǹ daa ka nùn sisi su nun nɔma bɛria. 31 Pilati u bu sɔ̃ɔwa u nɛɛ, bɛɛn tii i nùn mɔɔ, kpa i nùn siri ka bɛɛn tiin wooda. Ma Yuuba ba nɛɛ, sa ǹ yen dam mɔ su ka tɔnu go. 32 Nge mɛya Yesun gari yi koora yiǹ sɔɔ u sɔ̃ɔsi gɔɔ wiǹn bweseru u koo gbi. 33 Pilati u kpam dua siri yerɔ, ma u Yesu soka u nùn bikia u nɛɛ, wuna Yuuban sunɔ? 34 Ma Yesu u nùn bikia u nɛɛ, wuna a ka tii yeni bikiamɔ? Nge gaba nun nɛn gari sɔ̃ɔwawa. 35 Pilati u nɛɛ, nɛ Yuuwa? Wunɛn bweseru ka yãku kowo tɔnweroba ba man nun nɔmu sɔndia. Mba a kua. 36 Yesu u nɛɛ, nɛn bandu ta ǹ sãa handunia migiru. Tà n sãan na handunia migiru, nɛn bwãabu ba koo sanna kpa bu ku Yuuba man nɔmu sɔndia. Adama nɛn banda kun sãa handunia migiru. 37 Ma Pilati nùn bikia u nɛɛ, ǹ n man na, a sãawa sunɔ. Yesu u nùn wisa u nɛɛ, wunɛn tii a mam gerumɔ ma na sãa sunɔ. Na na handunia sɔɔ, ba man marawa n ka gem areru di. Baawure wi u sãa gemgii, wiya nɛn gari nɔɔmɔ. 38 Pilati u nùn bikia u nɛɛ, mba ba ra soku gem. Gari yin biru Pilati u kpam yarima u da Yuuban mi, ma u bu sɔ̃ɔwa u nɛɛ, nɛna kun toraru garu wa durɔ wi sɔɔ. 39 Adama i komaru garu mɔ te kon ka bɛɛ pirisɔm turo kara Gɔɔ sararibun tɔ̃ɔ bakaru sɔɔ. I kĩ n bɛɛ Yuuban sunɔ kara? 40 Ma be kpuro ba gbãsukumɔ ka dam ba mɔ̀, aawo sa ǹ durɔ wi kĩ, Barabawa sa kĩ. N deema gbɛnɔwa Baraba wi, u sãa.

Yohanu 19

1 Sanam mɛya Pilati u Yesu mwa, ma u dera ba nùn so ka som kpaka. 2 Ma tabu kowobu ba sãki tundu bɔkana ba ka nùn sina furɔ kua ba doke win wirɔ. Ba maa nùn gurumusu swãabu sebusia. 3 Kiri kiri kpa bu nùn susi bu nɛɛ, Yuuban sunɔ, fɔɔ baasira. Ma ba nùn baari soomɔ. 4 Ma Pilati u kpam maa yarima u tɔn wɔru ge sɔ̃ɔwa u nɛɛ, i swaa dakio. Wee, kon bɛɛ durɔ wi yarama kpa i ka gia ma na ǹ toraru garu wa wi sɔɔ. 5 Yesu u yarima u sãkin furɔ, ka maa gurumusu swãabu ge doke. Pilati u bu sɔ̃ɔwa u nɛɛ, durɔ wi wee. 6 Sanam mɛ yãku kowo tɔnwerobu ka sãa yerun kɔ̃ sobu ba nùn wa, ma ba gbãsukum wɔri ba nɛɛ, a nùn kpareo, a nùn kpareo dãa bunanaru sɔɔ. Pilati u bu sɔ̃ɔwa u nɛɛ, bɛɛn tii i nùn mɔɔ kpa i nùn kpare dãa bunanaru wɔllɔ ka bɛɛn tii. Domi nɛ na kun toraru garu wa wi sɔɔ. 7 Ma Yuuba ba nùn sɔ̃ɔwa ba nɛɛ, sa wooda gaa mɔ ye ya gerumɔ bu nùn go yèn sɔ̃ u win tii nɛɛ Gusunɔn Bii. 8 Ye Pilati u gari yi nua, win bɛrum sosi. 9 Ma u kpam ka Yesu wura siri yerɔ, u nùn bikia u nɛɛ, man diya a na. Adama Yesu kun nùn wisa baa nɔn teeru. 10 Ma Pilati u nùn bikia u nɛɛ, nɛna a ǹ ka sere gari mɔ̀? A ǹ yɛ̃ ma na dam mɔ n ka nun kara, na maa dam mɔ n ka nun kpare dãa bunanaru sɔɔ? 11 Ma Yesu u nùn wisa u nɛɛ, a ǹ dam gam mɔ nɛ sɔɔ bà kun nun mɛ wɛ̃ wɔllun di. Yen sɔ̃ na wi u man nun nɔmu sɔndia, win taarɛ ya wunɛgia kere. 12 Ye Pilati u yeni nua yera u hania sosi u ka Yesu kara. Adama Yuuba ba gbãsukunu bɔbia ba nɛɛ, à n durɔ wi kara, a ǹ maa tem yɛ̃ro kĩ. Domi baawure wi u win tii kua sunɔ u sãawa tem yɛ̃ron yibɛrɛ. 13 Ye Pilati u gari yi nua, u ka Yesu yarima, ma u sina siri kowon sin yerɔ te ta wãa yam mɛ sɔɔ, mɛ ba sokumɔ Kpee turaru. Miya ba maa sokumɔ Gabata ka Heberum. 14 N tie sɔ̃ɔ teeru bu sere Gɔɔ sararibun tɔ̃ɔ bakaru ko, nge sɔ̃ɔ wii wɔllun saka. Ma Pilati u Yuuba sɔ̃ɔwa u nɛɛ, bɛɛn sunɔ wee. 15 Ma Yuuba ba gbãsuka wɔllɔ, i ka nùn doo, i ka nùn doo, i nùn kpareo dãa bunanaru wɔllɔ. Ma Pilati u bu bikia u nɛɛ, amɔ ro! I kĩ n bɛɛn sunɔ kpare dãa bunanaru wɔllɔ? Ma yãku kowo tɔnweroba nùn wisa ba nɛɛ, bɛsɛ sa ǹ sunɔ goo mɔ ma n kun mɔ tem yɛ̃ro. 16 Sanam mɛya Pilati u bu Yesu nɔmu sɔndia bu ka nùn kpare dãa bunanaru wɔllɔ. Ma ba Yesu mwa ba ka doona. 17 Ma Yesu u win tiin dãa bunanaru sua u ka da sere aye ten mi, te ta ka wii koko weenɛ, adama ka Heberum ba ra yam mi sokuwa Gɔɔgɔta. 18 Miya ba nùn kpare dãa bunanaru wɔllɔ. Ba maa tɔn durɔbu yiru gabu kpare turo nɔm dwarɔ, turo nɔm geuɔ, ma Yesu wãa ben suunu sɔɔ. 19 Ma Pilati u yorua u mani dãa bunana ten wɔllɔ. Yora ye, ya nɛɛ, Yesu Nasarɛtigii, Yuuban sunɔ. 20 Yuuba dabira ba yora ye gara domi mi ba Yesu kpare n ǹ ka wuu toma. Ma ba ye yorua ka Heberum, ka Gɛrɛkim, ka maa Latɛm. 21 Ma Yuuban yãku kowo tɔnwerobu ba Pilati sɔ̃ɔwa ba nɛɛ, a ku yore Yuuban sunɔ, adama a yoruo, u nɛɛ wiya Yuuban sunɔ. 22 Ma Pilati u nɛɛ, ye na yorua na yoruawa. 23 Sanam mɛ tabu kowobu ba Yesu kpare ba kpa, ba win yãnu bɔnu kua suba nnɛ, tabu kowo ben baawure sube teeru, ba maa win yabe bakaru sua. Yabe te, ta ǹ yina mɔ, ba tu wesawa yaberu. 24 Ma tabu kowo be, ba geruna ba nɛɛ, bu ku raa te gĩa, adama bu de bu tu tɛtɛ toosi kpa bu wa wigiru ta koo ko. Nge mɛya Gusunɔn gari yi koora yi yi nɛɛ, "Ba nɛn yãnu bɔnu kua ben tii tiinɛ sɔɔ. Ma ba nɛn yaberu tɛtɛ toosi." Nge mɛya tabu kowo be, ba kua. 25 N wee, Yesun mɛro, ka win mɛron wɔnɔ, ka Maari Kopan kurɔ, ka sere Maari Madalagii, ba yɔ̃ Yesun dãa bunanarun bɔkuɔ. 26 Yesu u win mɛro wa mi, ka bɔ̃ɔ wi u kĩ ba yɔ̃ ba karinɛ, ma u win mɛro sɔ̃ɔwa u nɛɛ, kurɔ wunɛ, wunɛn bii wee mi. 27 U maa bɔ̃ɔ wi sɔ̃ɔwa u nɛɛ, wunɛn mɛro wee mi. Saa dɔma ten diya bɔ̃ɔ wi, u ka nùn wa win tiin yɛnuɔ. 28 Yen biru, sanam mɛ Yesu u gia ma gari yi kpuro yi wiru goora yi kpa, Gusunɔn gari yi ka koora, u nɛɛ, nim nɔru ga man mɔ̀. 29 Wekeru gara wãa mi, te ta tam mɔmmɔm yiba. Ma ba swɛɛsu wasa tam mɔmmɔm mɛ sɔɔ, ba bɛri isɔpun dɛkaɔ ba ka susi win nɔɔwɔ. 30 Sanam mɛ Yesu u tam mɔmmɔm mɛ denda u nɛɛ, n kpa. Yera u tuka, u win tii yɔ̃ su, ma u sariru kua. 31 Dɔma teya Yuuba ba Pilati bikia u de bu durɔ ben kɔ̃ ri bɔɔku be ba go mi, kpa bu goo ni sarasia dãa bunanarun di. Ba yeni bikia yèn sɔ̃ n tie sɔ̃ɔ teeru bu ka ben tɔ̃ɔ wɛ̃rarugiru di, ba ǹ maa kĩ goo ni, nu n wãa dãa bunanaru wɔllɔ tɔ̃ɔ wɛ̃rarugii te sɔɔ, domi tɔ̃ɔ bakarun tii tiiwa. 32 Yen sɔ̃ na tabu kowobu ba da ba gbiikoon kɔ̃ ri bɔɔka ka maa yirusegii be ba kpare ka Yesu sannu. 33 Adama sanam mɛ ba tura Yesun mi, ba deema u gu kɔ, ba ǹ maa win kɔ̃ ri bɔɔka. 34 Adama tabu kowobun turo u Yesu yaasa sɔka win yɛ̃saɔ, ma yande yɛm ka nim mu yara. 35 Wi u ye wa, u yen seeda di, win seeda ye, gema. U yɛ̃ kam kam ma geeya u gerumɔ, kpa bɛɛ i maa ka naanɛ doke. 36 Yeniwa ya kua kpa Gusunɔn gari yi ka koora yi yi nɛɛ, "Baa win kuku teeru, ta ǹ kɔsiramɔ." 37 Gusunɔn gari maa nɛɛ, "Ba koo nùn mɛɛri wi ba sɔka." 38 Yen biru Yosɛfu Arimategii u Pilati Yesun goru kana. Yosɛfu wi, u sãawa Yesun bɔ̃ɔ, adama asiri sɔɔwa yèn sɔ̃ u Yuuban bɛrum mɔ. Ma Pilati u wura. Yen sɔ̃ na Yosɛfu u da u Yesun goru sua u ka doona. 39 Nikodɛmu wi u raa da Yesun mi wɔ̃ kuru u Yosɛfu yɔ̃ siri. Ma u turare bwesenu yiru, miru ka aloɛsi nɛni ye ya tura kilo tɛnan saka. 40 Durɔ be yiru ba Yesun goru sua ma ba tu bekuru wukiri ka turare sannu. Domi nge mɛya Yuuba ba ra ka ben goru sike. 41 N deema batuma gaa ya wãa mi ba Yesu kparen bɔkuɔ. Siki wɔru kperuguu gaga wãa mi, batuma ye sɔɔ, gè sɔɔ ba ǹ goo sikure. 42 Miya ba Yesu kpĩ domi yen sisira sãawa tɔ̃ɔ wɛ̃rarugiru. Siki te, ta maa wãa turuku mi.

Yohanu 20

1 Alusuma buu sɔ̃ nu buru buru yellu, sanam mɛ yam kun sãram kpa, Maari Madalagii u da sikiru mi. Ma u wa ba kpee te sua saa siki ten kɔnnɔn di. 2 Ma u duka da Simɔɔ Piɛɛn mi, ka bɔ̃ɔ win mi, wi Yesu u kĩ, u bu sɔ̃ɔwa ma ba Yinni sua saa sikiru min di, u ǹ maa yɛ̃ mi ba nùn kpĩ. 3 Sanam mɛya Piɛɛ ka bɔ̃ɔ wi, ba yara ba da sikiru mi. 4 Ma be yiru ba duki da sannu, adama bɔ̃ɔ wi, u duka u Piɛɛ gbiiri, ma u gbia u tura sikiru mi. 5 U yãara u tende siki te sɔɔ, ma u bekuru wa ta yii, adama u ǹ due. 6 Yera Simɔɔ Piɛɛ wi u sisi biruɔ u tura mi ma u dua siki te sɔɔ. U maa beku te wa ta yii, 7 ka yasa ye ba raa ka win wiru bɔkua. Adama yasa ye, ya ǹ yii ka beku te sannu, ya kuruawa bee tia. 8 Sanam mɛya bɔ̃ɔ wi u raa gbia u tura sikiru mi, u maa dua. U wa, ma u naanɛ doke. 9 Gusunɔn gari kun daa bu yeeri gina yi yi gerua ma u koo se gɔrin di. 10 Ma bwãa be, ba gɔsira ba da ben yɛnuɔ. 11 Adama Maari u yɔ̃ tɔɔwɔ siki ten bɔkuɔ u sumɔ. Sanam mɛ u sumɔ u yãara u tende siki ten sɔɔwɔ. 12 Ma u wɔllun gɔradoba yiru wa ba yãa kpikinu doke ba sɔ̃ mi Yesun goru ta raa kpĩ, ben turo wiru gia, turo maa naasu gia. 13 Ma ba nùn bikia ba nɛɛ, kurɔ wunɛ, mba n kua a ka sumɔ. Ma u bu wisa u nɛɛ, ba nɛn Yinni suawa saa minin di, na ǹ maa yɛ̃ mi ba nùn kpĩ. 14 Sanam mɛ u yeni gerua u kpa, u sĩira ma u Yesu wa u yɔ̃ mi. Adama u ǹ gie ma Yesuwa. 15 Yesu u nùn bikia u nɛɛ, kurɔ wunɛ, mba n kua a ka sumɔ. Wara a kasu. Kurɔ wi, u tamaa yam min kɔ̃ sowa. Yera u nɛɛ, tɔnwero, ǹ n wunɛn na a nùn sua, a man sɔ̃ɔwɔ mi a nùn kpĩi, kpa n da n nùn sua min di. 16 Ma Yesu u nɛɛ, Maari. Yera u sĩira, ma u gerua ka Heberum u nɛɛ, Raboni. Yen tubusiana, keu sɔ̃ɔsio. 17 Ma Yesu u nùn sɔ̃ɔwa u nɛɛ, a ku man baba, domi na ǹ gina de nɛn Baaban mi wɔllɔ. Adama a doo nɛn bwãabun mi, a bu sɔ̃ ma na dɔɔ Gusunɔn mi, wi u sãa nɛ ka bɛɛn Baaba, u maa sãa nɛ ka bɛɛn Yinni. 18 Ma Maari Madalagii u da u bwãa be sɔ̃ɔwa ma u Yinni wa, sere Yinni u nùn gari yini sɔ̃ɔwa. 19 Alusuma buu gen yoka, bwãa be, ba mɛnna ma ba gamboba bɛri Yuuban bɛrum sɔ̃. Miya Yesu u da u bu yɔ̃ re ben suunu sɔɔ. Ma u bu sɔ̃ɔwa u nɛɛ, alafia ya n wãa ka bɛɛ. 20 Ye u yeni gerua u kpa, u bu win nɔma ka win yɛ̃sa sɔ̃ɔsi. Bwãa ben nukura dora ye ba Yinni wa. 21 Ma Yesu u kpam bu sɔ̃ɔwa u nɛɛ, alafia ya n wãa ka bɛɛ. Nge mɛ Baaba u man gɔrima nge mɛya nɛ na maa bɛɛ gɔra. 22 Ye u yeni gerua u kpa, yera u bu wɛ̃sie ma u nɛɛ, i Hunde Dɛɛro mɔɔ. 23 Iǹ n goo nùn win toraru suuru kua u koo ten suuru wa. Iǹ n maa goon toraru suuru kobu yina ta ko n yɛ̃ro wãasiwa. 24 Tomaa, bwãabu wɔkura yiru yen turo, wi ba ra maa nɛɛ Sika, u ǹ daa wãa ka be sanam mɛ Yesu u na ben mi. 25 Bwãa be ba tie ba nùn sɔ̃ɔwa ma ba Yinni wa. Tomaa u bu wisa u nɛɛ, ma n kun mɔ u kurum bora wa Yinnin nɔma sɔɔ, ma u kun win niki bia doke mi kurum daa wãa, kpa u win nɔmu doke Yinnin yɛ̃saɔ, u ǹ naanɛ dokemɔ. 26 Sɔ̃ɔ nɔɔba itan biru bwãa be, ba maa mɛnnɛ sannu dirɔ. Tomaa wãa be sɔɔ. Ba gamboba bɛri adama Yesu u na u bu yɔ̃ re ben suunu sɔɔ ma u nɛɛ, alafia ya n wãa ka bɛɛ. 27 Sanam mɛya u Tomaa sɔ̃ɔwa u nɛɛ, a nɛn nɔma mɛɛrio kpa a wunɛn niki bia doke ye sɔɔ. A wunɛn nɔmu dɛmiama a doke nɛn yɛ̃saɔ. A naanɛ dokeo a ku maa ko gɔ̃ rusu yirugii. 28 Tomaa u nùn sɔ̃ɔwa u nɛɛ, Gusunɔ nɛn Yinni. 29 Yesu u nùn bikia u nɛɛ, a naanɛ doke yèn sɔ̃ a man waamɔ? Doo nɔɔrugiba be ba kun man wa, ba ka naanɛ doke. 30 Sɔm maamaakigii dabina Yesu maa kua win bwãabun nɔni biru ni ba kun yorua tire teni sɔɔ. 31 Adama gari yiniwa ba yorua kpa i ka naanɛ doke ma Yesuwa Kirisi wi, Gusunɔn Bii, kpa naanɛ doke binin saabu i n wãaru mɔ te ta ku ra kpe win yĩsirun sɔ̃.

Yohanu 21

1 Yen biru Yesu u kpam win bwãabu tii sɔ̃ɔsi Tiberian daa burerun bɔkuɔ. Wee nge mɛ u tii sɔ̃ɔsi. 2 Simɔɔ Piɛɛ ka Tomaa wi ba ra nɛɛ Sika, ka Nataniɛli Galilen Kanagii, ka Sebeden bibu, ka win bwãabu gabu yiru, be kpurowa ba wãa sannu. 3 Simɔɔ Piɛɛ u be ba tie sɔ̃ɔwa u nɛɛ, u susure dɔɔ. Ma ba nɛɛ, ben tii ba koo ka nùn da. Ma ba yara yande ba goo dua ba doona. Adama ba ǹ gãanu ganu mwɛ wɔ̃ ku te sɔɔ. 4 Ye yam sãrɔ Yesu u yɔ̃ daarun goorɔ, adama bwãa be, ba ǹ yɛ̃ Yesuwa. 5 Ma Yesu u bu bikia u nɛɛ, aluwaasi bɛɛ, i ǹ gãanu mwɛ baa fiiko? Ma ba nɛɛ, aawo. 6 Ma u bu sɔ̃ɔwa u nɛɛ, i bɛɛn yãakororu kɔ̃ɔwɔ goo gen nɔm geuɔ, i ko gãanu wa mi. Ba kua mɛ, ma ba kpana bu tu gawa swɛ̃ɛ dabirun sɔ̃. 7 Ma bɔ̃ɔ wi Yesu u kĩ, u Piɛɛ sɔ̃ɔwa u nɛɛ, Yinniwa. Ye Simɔɔ Piɛɛ u nua ma Yinniwa, yera u win yaberu pɔra sie domi basiwa u raa wãa mi. Ma u sure nim sɔɔ goon di. 8 Adama bwãa be ba tie ba ka goo na daarun bɔ̃ɔwɔ ba ben yãakororu gawe, ta swɛ̃ɛ yiba. Be ka daarun bɔ̃ɔn tondam kun kere gɔm soonu goobu (200). 9 Ye ba sara temɔ ma ba dɔ̃ɔ gɛ̃ɛ wa, swɛ̃ɛ wãa yin wɔllɔ, ka maa pɛ̃ɛ. 10 Ma Yesu u bu sɔ̃ɔwa u nɛɛ, bu swɛ̃ɛ gɛɛ tama yi ba go tɛ̃ ge. 11 Simɔɔ Piɛɛ u goo dua ma u yãakoro te gawa temɔ te ta swɛ̃ɛ bɛkɛ yiba. Yin geera sãa wunaa weeru ka wɔkura ita. Baa mɛ yi ka dabi mɛ, yãakoro te, ta ǹ gɛ̃ɛre. 12 Yesu u bu sɔ̃ɔwa u nɛɛ, i na i sɔndu wuna. Baa bwãa ben turo kun kãka u nùn bikie wara u sãa, domi ba yɛ̃ ma Yinniwa. 13 Yesu u da u pɛ̃ɛ sua ma u bu wɛ̃. Mɛya u maa kua ka swɛ̃ɛ yi. 14 Yeniwa nɔn itase ye Yesu u tii win bwãabu sɔ̃ɔsi saa miǹn di u seewa gɔrin di. 15 Ye ba sɔndu wuna ba kpa, Yesu u Simɔɔ Piɛɛ bikia u nɛɛ, Simɔɔ, Yohanun bii, a man kĩ n beni kpurogiru kere? Ma u nɛɛ, Yinni, a yɛ̃ ma na nun kĩ. Ma Yesu u nùn sɔ̃ɔwa u nɛɛ, a nɛn yãa binu nɔɔrio. 16 Yesu u kpam nùn bikia nɔn mɛɛruse, Simɔɔ, Yohanun bii, a man kĩ? Ma u nɛɛ, Yinni, a yɛ̃ ma na nun kĩ. Ma Yesu u nùn sɔ̃ɔwa u nɛɛ, a nɛn yãanu kparo. 17 Yesu kpam wure u nùn bikia nɔn itase, Simɔɔ, Yohanun bii, a man kĩ? Ma Piɛɛn nukura sankira yèn sɔ̃ u nùn bikia nɔn itase u nùn kĩ. Ma u nùn sɔ̃ɔwa u nɛɛ, Yinni, a baayere yɛ̃, a yɛ̃ kam kam ma na nun kĩ. Ma Yesu u nùn sɔ̃ɔwa u nɛɛ, a nɛn yãanu nɔɔrio. 18 Geema na nun sɔ̃ɔmɔ, sanam mɛ a sãa aluwaasi, a ra raa ka wunɛn tii kpaka sɛ̃ke, kpa a da mi a kĩ. Adama sanam mɛ a tɔkɔ kua kaa wunɛn nɔma dɛmiawa kpa goo u nun wunɛn kpaka sɛ̃ka u ka nun da mi a ǹ kĩ. 19 Ka gari yiya Yesu u sɔ̃ɔsi gɔɔ wiǹn bweseru Piɛɛ u koo ka Gusunɔ bɛɛrɛ wɛ̃. Ye u yeni gerua u kpa ma u nɛɛ, a man swĩiyɔ. 20 Yen biru Piɛɛ u sĩira ma u wa ben biruɔ bɔ̃ɔ wi Yesu u kĩ, u wee. Bɔ̃ɔ wiya, u raa Yinni gballi yaa dibun sanam ma u nùn bikia wara koo nùn dɔmɛ. 21 Sanam mɛ Piɛɛ u bɔ̃ɔ wi wa u Yesu bikia u nɛɛ, Yinni, durɔ wini maa ni? 22 Yesu u nùn wisa u nɛɛ, nà n kĩ n de u n wãa sere n kpam ka wurama, mba n nun wa. Wunɛ, a gesi man swĩiyɔ. 23 Yen sɔ̃ na gari yi, yi nɔɔra naanɛ dokeobu sɔɔ ma bɔ̃ɔ wi, u ǹ gbimɔ. Adama Yesu u ǹ gerua ma u ǹ gbimɔ, u gesi geruawa ù n kĩ u de u n wãa sere u kpam ka wurama, mba n nùn wa. 24 Bɔ̃ɔ wiya u yenin areru dimɔ, wiya u maa tire teni yorua, sa maa yɛ̃ ma win areru geema. 25 Gãa dabinu ganu maa wãa ni Yesu u kua. Bà n ni kpuro yorua tia tia, na ǹ tamaa handunia kpuro sɔɔ bu yen ayeru wa mi ba koo tire ni kpuro doke ni ba koo ra yore.