Romans


Romans 1

1 Balwa mowok bongi Paulo, jatich pa Yesu Kristo kendo jamoor ma Were oyero to lwoŋo fuonjo Wach Maber pere, 2 ma Were chango ochiko munyo oro jotuchi wach pere, tiketho i Ndiiko Maleŋ. 3 Me obedo Wach Maber ma mako kwoŋ Wuode, Ruodhiwan Yesu Kristo, monywole paka nyakwar Daudi; 4 to inyutho ji ni go obedo Wuodi Were gi men madwoŋ mapa Chuny ma kelo leŋo, munyo ochierino go kwoŋ jomotho. 5 I go Were omiyan silwany ma bedo jamoor ri Kristo, ŋey atel ji ma nonin jye jowoyeyi odoko jowowinji or. 6 Me bende mako win ma winitye Roma, ma Were olwoŋo bedo ji pa Yesu Kristo. 7 Amomiyo andiko ri wijojye mani Roma ma Were omaro to lwoŋo bedo ji pere won; Weyi Were Bawan kodi Ruoth Yesu Kristo womiyi win ŋono gi syem. 8 Marapena afuoyo Were paran, i Yesu Kristo, ri wijojye; rupiri piny gipi winjo kwoŋ yeyo mewin. 9 Were nyalo ridho ni gima awacho obedo adyeri; Were no ama atiyo ri go gi chunyan jye munyo afuonjo Wach Maber kwoŋ Wuode. Were oŋeyo nike ndir jye apoyo win, i hongo jye ka akwayo. 10 Akwayo nike Were i mito pere, i hongo moro womiyaye thwolo ma limo win. 11 Kole ayenyo swa neno win ŋey anyal poko gi win silwany machuny, ma medo win men. 12 Dwoŋ mere ni win, kodan, wabino nwaŋo kony kiromo, win i yeyo paran aka an i yeyo mewin. 13 Poyi win gime wutimera: ndir mathoth ayiko bino limo win, to hongo jye gimoro geŋan bino. Atyeko yenyo swa ywayo jomegi i yeyo i dyer win bende, paka atyeko timo i dyer Jopath. 14 Kole or omakan matek kwoŋ ji jye, kwoŋ jokite mabeyo kodi jomarecho, kwoŋ jomofuonjere kodi joma kuya gimoro. 15 Amomiyo ayenyo swa fuonjo win bende ma winitye Roma Wach Maber. 16 Kole ageno swa Wach Maber, rupiri obedo men pa Were ma botho ji jye majoyeyo, marapena Joyudaya, aka nyaka Jopath bende. 17 Kole Wach Maber nyutho paka Were ketho ji i tiro gine ma bedo i yeyo, wok i chakirok tundo i gike. Ato randik wacho ni, “Ŋata oketh i tiro gi Were bino kwo gi yeyo.” 18 Were otyeko nyutho ni keme pere bino wok i polo to lwenyo gi recho jye kodi tim pa ji marecho ma royo pajo marecho geŋo adyeri ŋeyirok. 19 Were miyo jo girachula rupiri gima ji jonyalo ŋeyo kwoŋ Were nitye kamaler ri jo. 20 Chuka Were chwey piny, kada go won kinenere i men pere ma chil gi chil kodi i kite ma nyawerewere, gima nyutho ni go nitye nenere i gikipiny ma go ochweyo. Amomiyo dhano ongoye kodi gi goŋirok! 21 Ji joŋeyo Were, to jokimiy go dwoŋ pere, kendo kada temo fuoyo go ni walwa. Kuchiel, paro pajo olokere masisiri aka paro pajo ma kitiy modoŋ mudho otyeko poŋ'iye. 22 Jowacho ni joryek, to kere jomiŋ ayin; 23 kama di jolam Were makitho, jolamo ri gin gima othedhi i chal pa dhano matho, kosa apa winyin, kosa apa ogwange kosa apa thwole ayino. 24 Paka ji jomiŋ ameno, Were ojala jo jowotim gikipiny marecho ma chuny gin yenyo, aka jotimo gikipiny ma kelo wichkwot i del pajo, ŋat man gi nyawote. 25 Jowilo adyeri kwoŋ Were gi twodo; jolamo aka jotiyo ri gima Were ochweyo kapa lamo Jachwech won, miripo pako chil gi chil. Ameno. 26 Paka ji jotimo gime, Were ojala jo to weyo jo ri awanya makelo wichkwot. Kir mon bende jowiro or ma delkwoŋ gin munyo joweyo riwirok i del i yo motire to joriwere wegi kendigin, mobedo yo ma kotire. 27 Ameno, chwo bende joweyo riwirok gi mon paka ndir jye, to joowere g'awanya kwoŋ chwo wadi gin. Chwo jotimo wichkwot gi chwo wadi gin, amomiyo Were miyo jo girachula rundir ru tim pajo marecho no. 28 Paka ji jokwero ketho i paro pajo ryeko maradyeri ma mako kwoŋ Were, go onyo ojala jo ri paro motop, ma miyo jo timo gima oido jokiripi timo. 29 Joasere gi recho ma nger jye, racho, woro, kodi chamo tyendi ji gi piny; joasere gi nyieko, nek, gorok, twodo, paro marecho kwoŋ dhano. Jonyieko nyingi wadi gin, 30 aka joluwo kichar kwoŋ ji; jodak Were, joyetere, jobedo jopakirok, jokwoto; joparo yo momore ma timo recho; aka jokiwinji jonywol pajo; 31 jodakana, jokikur chikirok pajo, jokinyuthi wor odoko jokidew kwoŋ nyatoro. 32 Joŋeyo kir ni chik pa Were wacho ni ji ma kwo pajo chalo ameno joripere gi tho, to jye fuodi nyaka jomedere ameda gi timo gikipiny no won; aka maloyo racho: jofuoyo joman ma bende jotimo ameno.

Romans 2

1 Jowotan, withumo banja ri jowoti wini? Kere onyo wingoye gi kagoŋirok, kada wibedi jokune! Ato ka withumo banja ri jowoti win mato wibende witimo gikipiny marom gi ma jotimo, meno wiwegi withumere banja loyo win. 2 Waŋeyo ni Were otire ka thumo banja ri joma timo gikipiny ma pameno. 3 Nyawotan, iparo nike ka itimo gikipiny no won ma ithum'iye banja ri jowotin, inobothi kwoŋ thumo banja pa Were? 4 Kosa miti ichayo bero pere moasere, ka diyo chunye gi ji aka kudere. Adyeri wiŋeyo ni Were ber rupiri go temo tero win i ŋuto! 5 To initye gi wichtek aka chunyin di chay. Amomiyo iwon imiyo girachula perin lebedo madwoŋ swa i ndelo ma keme pa Were bino nyuther'iye ma thumo banja maradyeri. 6 Kole Were bino miyo dhano jye kemba chungo kwoŋ gima go otimo. 7 Ji megi hongo jye jotimo gimabeyo, aka jorango dwoŋ pa Were gi wor kodi kwo makirum; aka Were bino miyo jo kwo makirum. 8 Ji man joparo kwoŋ bero pajo wegi to jokwero gimotire, aka jotimo gima kotire. Jono Were bino konjo kwoŋ jo keme pere gi jok swa. 9 Chandirok gi litho bino bedo ri ji jye ma jotimo recho, kutho marapena ri Joyudaya, aka nyaka ri Jopath bende. 10 To Were bino miyo dwoŋ kodi wor gi syem ri nyatoro jye ma timo gimabeyo, marapena ri Joyudaya ŋey wotimi ri Jopath bende. 11 Kole Were tero ji jye marom. 12 Jopath, ma jongoye kodi Chik pa Musa, jotimo gimarecho aka jobino rwenyo bende mongoye Chik. Joyudaya ma jo ni gi Chik, jotimo gimarach aka ilethumo ri jo banja chungo kwoŋ Chik no. 13 Ato kobedo nyaka i winjo Chik gi ithi jo ama miyo iketho ji i tiro gi Were, to i timo gima Chik mito ayino. 14 Jopath jongoye gi Chik; to ka hongo jye gi yero pajo jotimo gima Chik mito, meno nyutho ni Chik tiyo i chuny jo, kada oido jongoye gi Chik. 15 Kite pajo nyutho ni gima Chik mito ondik i chuny jo. Paro pajo mani chuny jo bende nyutho ni gime otire, rupiri paro pajo dichieŋ miyo jo ŋeyo ni jonyieko wach kosa be. 16 Onyo, chungo kwoŋ Wach Maber m'afuonjo, me apaka bino bedo i ndelo no munyo Were, i Yesu Kristo, bino thumo banja ri paro ma nyaliŋliŋ jye ma chuny ji. 17 Aka in to? Ilwoŋere ni Jayudaya; ithenere kwoŋ Chik aka iyumere gi Were; 18 K'iŋeyo gima Were mito ni itim, aka ityeko fuonjere kwoŋ Chik yero gimotire; 19 aka k'iridho adyeri ni iripo nyutho joma waŋ gin otho royo paka lero pa joma nitye i mudho, 20 ibedo jatiri jomamiŋ g'adyeri, odoko ibedo jafuonji pa joma fuodi jokotegino. Iridho ni ini gi ryeko moromo, kodi adyeri ma wok i Chik. 21 Onyo in m'ifuonjo joman no, raŋo iwon ikifuonjere? K'ifuonjo nike, “Ikiri ikwal,” iwon odoko ikwalo nedi? 22 In miwacho ni, “Ikiri itim chot,” iwon idoko itimo chot nedi? In midak lamo chal ma kichar, idoko inyaga gikipiny wok i migam milam'iye werin mogo nedi? 23 In miyumere ni ini gi chik pa Were, raŋo midoko ikelo wichkwot ri Were kareno ituro chik pere? 24 Kole ondik ni, “Ru kiti win Joyudaya, amomiyo Jopath joluwo marach kwoŋ nyingi Were.” 25 Kole ka wiwinjo Chik, meno aka nyaka thumirok mewin di kony; to ka wituro Chik, meno kole thumirok mewin onyo chale pa kobedo thumirok. 26 Amomiyo ka Japath ma kothumere timo gima Chik mito, meno onyo Were kiter go paka ŋatothumere? 27 Aka Jopath jobino thumo banja woloyi win Joyudaya, rupiri kada wini gi Chik aka withumere jye fuodi wituro, kuchiel jo ama jowinjo Chik kada jokothumere. 28 Kere ŋa m'onyo obedo Jayudaya maradyer, m'othumere? Ŋata obedo Jayudaya nyaka gi thumirok mawoko meno ki Jayudaya maradyer, odoko thumirok maradyeri kobedo mitimo nyaka gi woko kende. 29 Kuchiel Jayudaya maradyeri meno mobedo Jayudaya i chunye, mothumere i chunye, aka meno tich pa Chuny Maleŋ pa Were, ma kiweno apa Chik mondik. Ŋato limo pak bongi Were, ma kiweno bongi dhano.

Romans 3

1 Onyo Joyudaya joloyo joman i yo mene? Kosa kony aŋo ma nitye i thumirok? 2 Nitye bero moromo ma bedo Jayudaya. Kutho marapena, Were ogeno Joyudaya to miyo jo mikwenda pere. 3 Aŋo to, ka jomegi kwoŋ jo jobedo joma kigenere? Onyo ru gino, nyutho ni Were kigenere? 4 Kameno be! Weyi Were wobedi jaradyeri kada dhano jye obedi jatwodo. Paka ondik ni, “Aka ŋey wonyuthere paka gima iluwo otire, aka iloy banja ka i pido kodin.” 5 Onyo wanowachi nedi ka tim mawan makotire konyo ma nyutho kamaler ni apa Were amotire? Wawachi ni Were timo marach ka miyo wan girachula? (Meno onyo aluwo paka dhano.) 6 Kameno be! Ka Were kotire nyalo nedi thumo banja ri piny? 7 To ka komo paran konyo ma nyutho tiro pa Were to kelo ri go dwoŋ, raŋo ma fuodi ithumo ran banja igani ajarecho? 8 To raŋo ma kiwachi ni, “Weyi watim recho ŋey bero wowok'iye?” Adyeri jomegi jotyeko kir yetan munyo jochwoko dhokan ni awacho ameno won! Ibino thumo banja loyo jo paka ripere. 9 Onyo wa Joyudaya wanitye maber i yo mene loyo Joman? Ongoye be! Atyeko nyutho ni Joyudaya kodi Jopath parom jojye jonitye i men pa gimarach, 10 paka ondik ni, “Ongoye dhano kada achiel motire, ongoye ma kada achiel, 11 ongoye moro ma niaŋ, kosa ma rango Were. 12 Ji jye joeye woko bongi Were, jojye jotyeko podho; Ongoye ŋata timo gimaber, ongoye kada achiel. 13 Dhoki jo chalo kalyel mothangere; Jooro lew jo ma twodo, aka wach ma chal kwir ama wok i dhok jo; 14 Dhok jo opoŋ'iye kwoŋ ma kech kodi duro. 15 Joyot gi kidho neko ji. 16 Joweyo gunda kodi rem kama jokidh'iye jye. 17 Fuodi jokoŋeyo yo ma syem, 18 odoko fuodi jokofuonjere lworo Were.” 19 Onyo pama watyeko ŋeyo ni gimoro jye ma Chik wacho, mako kwoŋ joma fuodi joluwo Chik, ŋey wogeŋ woko rendirok pa dhano, aka Were wonyal thumo banja ri piny gipi. 20 Kole ongoye dhano mibino kwano ri go tiro i waŋ Were ru nyaka timo gima Chik yenyo, rupiri Chik miyo dhano nyaka ŋeyo nike gimanyo obedo recho won kende. 21 To pama royo ma Were ketho gine ji i tiro gi go otyeko nyuthere, aka kimaki kwoŋ chik. Chik kodi ndiiko pa jotuchi wach Were jye joridho gima mako kwoŋ royo no. 22 Were ketho ji i tiro kwoŋ yeyo pajo i Yesu Kristo ayino. Were timo gime ri ji jye ma joyeyo Kristo, rupiri pokirok ongoye. 23 Paka ji jye jotyeko timo recho aka jo ni bor gi dwoŋ pa Were, 24 pama onyo ikwanyo woko banja kwoŋ ji jye ru mich ma ŋono pa Were kareno igonyo jo woko kwoŋ recho i Kristo Yesu 25 ma Were oketho paka rachow, ŋey gi tho pere go wolokere royo ma chwako recho pa ji chungo kwoŋ yeyo pa dhano. Were otimo ameno ma nyutho tiro pere, rupiri i ndir mokadho, go odiyo chunye to weyo ma kokwano recho pa ji; 26 to i ndir ma pama go kaŋasa recho pa ji, ma nyutho paka go won otire, aka go ama kwanyo woko banja kwoŋ ŋata ni gi yeyo i Yesu. 27 Onyo aŋo ma wanyalo yumirok gine? Kole ongoye! I royo mene? I royo ma kuro Chik? Be, i royo ma bedo gi yeyo ayino. 28 Ato onyo wachowo wach ni Were kwanyo woko banja kwoŋ dhano chungo kwoŋ yeyo, ma kiweno kwoŋ timo gima Chik mito. 29 Kosa Were obedo Were pa Joyudaya kende? Go kobedo Were pa Jopath bende? Kole go obedo Were pa Jopath bende. 30 Were nitye achiel, aka go bino kwanyo woko banja kwoŋ Joyudaya chungo kwoŋ yeyo pajo, aka bende bino kwanyo woko banja kwoŋ Jopath ru yeyo bende achiel no won. 31 Onyo nyutho ni waboli woko Chik ru yeyo me? Kameno be; kuchiel, waridhi Chik bende.

Romans 4

1 Onyo wanowachi aŋo kwoŋ Ibrayimu, kwari wan i del? 2 Bedi kwany woko banja kwoŋe chungo kwoŋ gikipiny ma go otimo, di go onyalo bedo kodi yumirok, to go kinyal yumere i waŋ Were. 3 To kere randik wacho aŋo? Ni, “Ibrayimu oyeyo Were, aka ru yeyo pere Were okwano go paka ŋatotire.” 4 Dhano ka tiyo ichulo go kemba ma kiter paka mich, to paka gima go otiyo ri go ayin. 5 To ka dhano kikethi geno kwoŋ tich pere, to ketho i yeyo Were ma kwanyo woko banja kwoŋ ji ayino, kiti yeyo no miyo ikwano ri go tiro. 6 Me a dwoŋ gima Daudi owacho munyo luwo kwoŋ kisangala pa ŋata Were jolo paka ŋatotire ma kokwano tich ma go otyeko timo: 7 “Josilwany a joma recho pajo Were otyeko chwako; joma go oumo recho pajo! 8 Jasilwany a ŋata Ruoth kibino kwano kwoŋe recho pere!” 9 Silwany ma Daudi oluwo kwoŋe me bedo apa jomothumere kende? Be. Bedo apa jomakothumere bende, rupiri watyeko nyutho wach wok i randik ni, “Ibrayimu oyeyo Were, aka ru yeyo pere Were okwano go paka ŋatotire.” 10 Gime otimere keraŋo? Otimere ma fuodi, kosa munyo Ibrayimu otyeko thumere? Ma fuodi, ma kiweno rumachien ma thumirok pere. 11 Othum go rumachien paka ranyuth ma ridho ni ru yeyo pere munyo fuodi go kothumere amomiyo Were okwano go paka ŋatotire. Meno amomiyo Ibrayimu obedo baa joma yeyo Were machuny, ma Were jolo jo paka jomotire, kada jokothumere. 12 Go obedo baa jomothumere bende, ki ni rupiri othum jo, to rupiri jonitye i kiti kwo ma yeyo ma Ibrayimu chango obedi'iye munyo fuodi kothum go. 13 Were ochiko Ibrayimu kodi nyikwaye ni piny me bino bedo apa jo. Chikirok me otim, ki ru kwoŋbedo Ibrayimu okuro Chik, to rupiri go oyeyo aka Were okwano go paka ŋatotire. 14 To k'inen joma kuro Chik ayino ama jobino lunjo gimochik, meno kere yeyo pa dhano ongoye kony, aka chikirok pa Were bende ongoye kony. 15 Chik kelo nge pa Were, to kama chik ongoy'iye, meno turo chik bende ongoye. 16 Ri ameno chikirok no chungo kwoŋ yeyo, ŋey wothenere kwoŋ ŋono pa Were aka womiyi nyikway Ibrayimu jye, aka ki nyaka joma jokuro Chik kende, to joma joyeyo paka chango Ibrayimu bende oyeyo. Ato Ibrayimu obedo baa wajojye ma chuny, 17 paka ndiiko wacho ni, “Alokin baa nonin mathoth.” Aka chikirok no otimere bongi Were won ma Ibrayimu oyeyo; Were ma chierino jomotho, ma or pere miyo gimoro ma oido ongoye chako bedo. 18 Ibrayimu oyeyo aka ogeno, munyo geno oido ongoye kir kony, amomiyo go olokere “Baa nonin mathoth,” paka ndiiko wacho ni, “Nyikwayin joletiŋo piny pa kweth michala.” 19 Oro pere oido chiegin romo miya achiel, to yeyo pere komojere munyo go oparo kwoŋ delkwoŋe monwaŋo chal p'otyeko tho, kosa munyo oneno ni Sara oido kinyal limo nyithindho. 20 Yeyo pere korumo, aka go koganagana kwoŋ chikirok pa Were; yeyo pere opoŋo kwoŋ go men, to fuoyo Were, 21 rupiri go oido oridho kichutho ni Were bino timo gima go otyeko chiko. 22 Meno amomiyo, ru yeyo pa Ibrayimu, Were okwano go paka ŋatotire. 23 Wach me ni, “Okwan go,” kondik ri Ibrayimu kende. 24 Ondik ri wan bende ma ibino kwano wan paka jomotire, wan ma wayeyo Ŋata ochierino Yesu Ruodhiwan kwoŋ jomotho. 25 Ojala Yesu ri tho ru gimarecho mawan, aka ochierino go i kwo ŋey wokwan ri wan tiro gi Were.

Romans 5

1 Paka onyo okethi wan i tiro gi Were chungo kwoŋ yeyo, onyo wanitye i syem gi Were kwoŋ Ruodhiwan Yesu Kristo. 2 Go am'okelo wan i ŋono pa Were ma pama wachung'iye. Amomiyo wasangala i geno ma wani gine ma limo dwoŋ pa Were! 3 Maloyo meno, wasangala i chandirok mawan, rupiri waŋeyo ni chandirok kelo chiro, 4 chiro miyo Were fuoyo wan, aka fuoyo pere kelo ri wan geno. 5 Geno me kikwoti wiy wan, rupiri Were otyeko konjo mar pere i chuny wan, munyo omiyo wan Chuny Maleŋ, mobedo mich pa Were ri wan. 6 Munyo fuodi oido wanyap, Kristo otho ri jomarecho i hongo ma Were oyero. Raŋo ameno? 7 Kole tek swa moro tho ri ŋatotire. Kono moro nyalo miyere to tho ri ŋataber. 8 To Were otyeko nyutho wan paka omaro wan, rupiri munyo fuodi wabedo jomarecho, Kristo otho ri wan. 9 Paka tho pere onyo okelo wan i tiro gi Were, ma loyo kenyo, go bino botho wan kwoŋ keme pa Were. 10 Wan oido wabedo jokwor pa Were, to Were odwoko wan i tiyirok gine kwoŋ remo pa Wuode. Aka paka onyo watyeko dwoko i tiyirok gi Were, kwo pa Wuode onyo bino botho wan kichutho. 11 To kimeno kende; wasangala i Were kwoŋ Ruodhiwan Yesu Kristo, ma pama odwoko wan i tiyirok gi Were. 12 Gimarach obino i piny ka luwo kwoŋ ŋatachiel, aka gimarach pere okelo tho. Gim'owok'iye, tho olak kwoŋ dhano jye, rupiri ji jye jo ni gi gimarach. 13 Gimarach oido nitye i piny ma fuodi kowodhi Chik; to kama Chik ongoy'iye kikwan'iye recho ri nyatoro. 14 To wok i ndir pa Adam tundo i ndir pa Musa, tho odhumo ji jye, kada joma oido jokotimo recho paka Adam munyo okwero mako chik pa Were. Adam obedo chal pa ŋata oido kidho bino rumachien. 15 To mich pa Were ma nono no, kichale gi gimarach ma Adam otimo. K'inen ji mathoth jotho ru gimarach pa Adam ŋatachiel no, ameno ŋono pa Were kodi mich ma nono mani ŋono pa ŋatachiel, Yesu Kristo, loyo meno bor swa. 16 Aka pokirok nitye i dyer mich pa Were kodi gimarach pa ŋatachiel. Munyo otyek timo gimarach achiel, gimoluwo a thumo banja ni, “Banja oloyo ŋato; ” to munyo gimarecho olokere madit, mich moido wakiripi gine obino ni, “Okwany woko banja pa ŋato!” 17 K'inen ru gimarach pa ŋatachiel ama omiyo tho ochako dhum kwoŋbedo ŋatachiel no, meno kere adyeri joma jonwaŋo ŋono mathoth kodi mich ma nono ma tiro bende jobino dhumo maloyo i kwo ru ŋatachiel, Yesu Kristo. 18 Amomiyo paka kibenga pa ŋatachiel omiyo banja oloyo ji jye, ameno bende ibino kwanyo woko banja kwoŋ ji mathoth ru winjo pa ŋatachiel. 19 Ato paka kibenga ma nyaturo chik pa ŋatachiel oloko ji kweth jogimarach, apaka bende winjo chik pa ŋatachiel miyo iloko ji kweth jomotire. 20 Munyo Chik obino, kibenga ma nyaturo Chik omedere; to kama recho meder'iye, ŋono pa Were bende medere loyo. 21 Amomiyo, paka gimarach odhumo i royo ma tho, ameno bende ŋono pa Were dhumo i royo ma kwanyo woko banja kwoŋ ji, munyo tero jo i kwo makirum kwoŋ Yesu Kristo Ruodhiwan.

Romans 6

1 Onyo wawachi nedi? Nike wamedere gi timo gimarach aka ŋey ŋono pa Were bende womedere? 2 Kameno be! K'inen watyeko tho ma nyutho kwero gimarach, wanyalo nedi doko medirok gi timo gimarach? 3 Kole adyeri wiŋeyo gime ni: munyo walimo batisimo i riwirok gi Kristo Yesu, walimo batisimo i riwirok gi tho pere bende. 4 Ri ameno, batisimo mawan nyutho ni oyik wan bende gi Yesu kendo wariwere gine i tho pere, ŋey paka Kristo ochierino kwoŋ jomotho ru men pa Bamere Moasere, ameno bende wanyalo bedo i kwo manyien. 5 Ato ka wariwere gi Yesu i tho paka go otho, meno bende apaka wabino riwere gine i chierino ma chalo apere. 6 Aka waŋeyo ni kwo mawan machon otyek neko gi Kristo wi musalaba, ŋey men ma miyo del timo gimarach wonyali reyere woko, aka ŋey wakiri wadoko wabedi ŋechin pa gimarach. 7 Kole ka dhano otho meno otyek gonyo go kwoŋ men pa gimarach. 8 Aka ka watyeko tho gi Kristo, wani gi yeyo nike bende wabino kwo gine. 9 Kole waŋeyo ni Kristo ochierino kwoŋ jomotho aka kibino tho kendo; tho ongoye gi men kwoŋe kende. 10 Tho ma go otho oido obedo tho ma kwero gimarach dichiel ma kichutho; aka kwo ma go onyo ni gine obedo ri Were. 11 I royo achiel wibende wiripo terere paka jomotyeko tho ma nyutho kwero gimarach aka onyo jokwo ri Were i Kristo Yesu. 12 Gimarach odoko wokiri wodhumi i delkwoŋ win ma tho me, kareno witimo gima awanya mere yenyo. 13 Odoko wikiri wimiy gimarach adech ma delkwoŋ win moro woori i timo kidakana, kuchiel miyi win Were kwo mewin, paka ji mokwany jo i tho to ikelo jo i kwo, aka miyi win go kwo mewin gipi woori i atoŋa motire. 14 Gimarach wokiri wodhumi win paka onyo wikibedi i men pa chik, to i ŋono pa Were ayino. 15 Kere onyo aŋo modoŋ? Watim gimarecho ni rupiri wakinitye i men pa chik to i ŋono pa Were ayino? Be! 16 Wikuya nike ka wimiyere paka ŋechin ma winjo nyatoro, meno adyeri wibedo ŋechin pa ruoth ma wiwinjo no, kosa apa gimarach ma kelo tho, kosa apa winjo Were ma kelo ri win tiro i waŋe? 17 To Were wofuoyi ni yado oido wibedo ŋechin pa gimarach, to pama wiwinjo adyeri mifuonjo win gi chuny win jye. 18 Aka paka otyek gonyo win woko kwoŋ gimarach, pama onyo wilokere ŋechin pa tiro. 19 Aoro wach ma nyadhanodhano ru nyapo ma wini gine ma niaŋ. Paka yado oido wimiyere i bedo ŋechin pa kidakana, kodi turo chik pa Were, onyo pama bende wiripo miyirok paka ŋechin pa tiro ri atoŋa ma lonyo. 20 Munyo oido wibedo ŋechin pa gimarach, oido wingoye i tiro. 21 Onyo bero aŋo ma wilimo i timo gikipiny ma kelo ri win wichkwot? Kole gima wok i gikipiny no obedo tho! 22 To paka onyo otyek theko win gi gimarach to wibedo ŋechin pa Were, bero ma wini gine onyo obedo lonyo, ma i gike bino miyo wilimo kwo makirum. 23 Kole kemba pa gimarach obedo tho; to mich ma Were miyo wan obedo kwo makirum i Kristo Yesu Ruoth mawan.

Romans 7

1 Wikuya, wutimere, ka aluwo gi joma joŋeyo chik, ni chik dhumo dhano ka go fuodi kwo? 2 Paka ranen, Chik tweyo dhako monywomere kwoŋ chwore ka chwore fuodi kwo; to tekin chwore tho, go gonyere woko kwoŋ chik ma mako kwoŋ chwore. 3 Amomiyo, ka go obedo gi jachwo man munyo fuodi chwore nitye, ibino tero go paka jatimi chot; to ka chwore otyeko otho, go nitye i syem i kite ma chik, aka go kitim chot ka go odoko obedo gi jachwo man. 4 Meno apaka nitye kodi win wutimera. Wibende wityeko tho kwoŋ gima mako kwoŋ Chik, rupiri wilokere adech ma delkwoŋ Kristo; aka onyo win apa go mochierino kwoŋ jomotho, ŋey wanyal kwo kareno wakonyo tich pa Were. 5 Munyo oido fuodi watimo gima del yenyo, awanya marecho ma Chik osigila oido tiyo i delkwoŋ wan, aka oido kelo ri wan tho. 6 To pama otyek gonyo wan woko kwoŋ Chik, rupiri watyeko tho ma nyutho ni wakwero gima chango oido otweyo wan. Pama onyo wakibedo jotich i chik machon mondik, to wabedo jotich i kwo manyien ma Chuny ayino. 7 Onyo wawachi nedi? Ni Chik meno won a racho. Kameno be! To ru Chik amomiyan aŋeyo gimarach. Kole d'akiŋeyo gimilwoŋo ni kikobo bedi Chik kowacho ni “Ikiri itim kikobo.” 8 Gimarach onwaŋo hola pere i or pa Were, ma kelo ran kikobo ma nger jye. Ka Chik ongoye, gimarach bende bedo gimotho. 9 An chon oido akwo munyo Chik fuodi ongoye; to munyo or pa Were obino, to gimarecho chako nenirok kamaler, 10 gikenyo t'atho; ameno or monwaŋo omiti ni wokeli kwo odoko olokere ran tho ayino. 11 Ato gimarach onwaŋo hola to wondan munyo luwo kwoŋ or; ameno to nekan. 12 Ri ameno Chik leŋ, aka or pa Were leŋ, otire, kendo ber. 13 Meno onyo nyutho ni gimaber okelo tho? Kameno be! Gimarach am'okelo ran tho munyo oro gimaber, ney kite pere maradyeri paka gimarach wonyuthere kamaler. Amomiyo, chungo kwoŋ or pa Were, gimarach olokere marach ma kichutho. 14 Waŋeyo ni Chik mako kwoŋ chuny, to an abedo dhano ma ni gi del, motana paka ŋecha ri gimarach. 15 Akiniaŋ odocho kwoŋ gikipiny m'atimo, rupiri akitim gima amito timo, kuchiel, atimo gima akimiti mere ayino. 16 Ka atimo gima akimiti timo, meno nyutho nike ayeyo ni Chik otire. 17 To iyadyeri awon, aŋata akitim gime; kuchiel gimarach ma nitye i an ama timo gino. 18 Aŋeyo ni bero ongoye i an, kosa awachi ni i delkwoŋan paka dhano. Anyalo yenyo timo gimaber, to akinyal. 19 Ato akitim gimaber ma amito timo; kuchiel atimo recho moido akimito timo ayino. 20 Ka atimo gima oido akimito timo, nyutho ni aŋata akitim ameno, to gimarach ma nitye i an ama timo ameno. 21 Ameno anwaŋo ni gime chale gi chik; ka amito timo gimaber, ayero gimarach ayino. 22 Kwo ma chunyan sangala i chik pa Were, 23 to anwaŋo ni chik man ama tiyo i delkwoŋan, chik ma lwenyo kodi gima paro paran yenyo. Gino lokan jatwech pa chik ma gimarach ma tiyo i delkwoŋan. 24 Adyer an adhano ma bu kisangala. Ŋata othekan gi del me ma teran i tho! Were wofuoy ma bino timo ameno kwoŋ Yesu Kristo Ruodhiwan! 25 Amomiyo, me apaka anitye: abedo ŋecha ri chik pa Were i paro paran, to i del abedo ŋecha ri chik pa gimarach.

Romans 8

1 Pama onyo kidoki kethi banja kwoŋ joma kwo pajo nitye i Kristo Yesu, 2 rupiri chik ma Chuny ma kelo ri wan kwo i Kristo Yesu, otyeko thekan gi chik mokelo gimarach kodi tho. 3 Gima Chik konyalo timo ru nyapo ma del pa dhano, Were onyalo timo. Othumo banja loyo gimarach ma del, munyo ooro Wuode won, mobino i chal ma del pa dhano ma jagimarach, aka wonyali reyo woko gimarach. 4 Meno aka ŋey gima Chik mito ama wotimere i wan, ma wakiter kwo mawan i timo gima del yenyo, to i timo gima Chuny ama yenyo. 5 Kole joma tero kwo pajo i timo gima del yenyo joketho paro pajo i gikipiny ma nyadel. Aka joma miyo kwo pajo i timo gima Chuny yenyo joketho paro pajo i Chuny. 6 Ketho paro i gikipiny ma nyadel meno tho, to ketho paro i gikipiny ma nyachuny meno limo kwo kodi syem. 7 Meno amomiyo paro mokethi kwoŋ gikipiny ma nyadel lokere jakwor pa Were, rupiri kiwinji chik pa Were, aka iyadyeri go kitim ameno. 8 Aka joma jotero kwo pajo i timo gima del yenyo jokinyal kisangala Were. 9 To kwo mewin kobedo ma nyadel, to obedo ma nyachuny, k'inen Chuny Maleŋ pa Were nitye i win. Ŋata ongoye gi Chuny pa Kristo i kwo pere, meno kobedo apa Kristo. 10 To ka Kristo nitye i in, meno delkwoŋin otyeko tho ma nyutho ni ikwero gimarach, aka chunyin onyo ni gi kwo ru tiro perin gi Were. 11 Ka Chuny Maleŋ pa Were mochierino Yesu kwoŋ jomotho nitye i win, meno ŋata ochierino Kristo kwoŋ jomotho bende bino miyo delkwoŋ win ma tho no kwo ru Chuny Maleŋ ma bedo i win. 12 Amomiyo, wutimera, wanitye gi banja, to ki ri del ni watim gima del yenyo. 13 Kole ka kwo mewin nitye paka del yenyo meno wikidho tho; to ka wineko woko tim marecho gi men pa Chuny, aka wibino kwo. 14 Ato joma Chuny Maleŋ pa Were ama telo jo ama jobedo nyithindho pa Were. 15 Kole wikilimo chuny ma lokirok ŋecha ma kelo ri win lworo; to wityeko limo Chuny ma loko win nyithindho pa Were, aka ka waywak ri Were ni “Baba! Baba!” 16 meno men pa Chuny no ama nyutho wan i chuny wan ni wabedo nyithindho pa Were. 17 Aka ka wabedo nyithindho pa Were, meno bende wabedo jolunji gikipiny pere paka jomisika kanyachiel gi Kristo, aka wabende wabino limo dwoŋ kanyachiel gi Kristo, ka bende wariwere gi go i chandirok pere. 18 Atero ni chandirok ma pama kirom gi dwoŋ ma ibino nyutho wan be. 19 Chwech gi pi kiyo neno gima Were bino nyutho nyithindho pere. 20 Kole omiy piny lokirok gima ongoye kony, ki ru mito pere, to Were won amomito ni wobedi ameno. Kada ameno, geno oido nitye ama: 21 nike ndelo moro ibino gonyo chwech wok kwoŋ topo ma fuodi dhumo go, to limo syem i dwoŋ ma nyithindho pa Were jobino limo. 22 Kole waŋeyo kir gunyo ni chwech gi bee chur gi litho ma chale gi litho ma nywol. 23 Aka kameno kende, to wan ma wanitye gi Chuny paka mich pa Were marapena, wabende wachur gi litho i iyi wan koro munyo wakuro Were woloki wan nyithindho pere aka wokethi wan i syem. 24 Kole geno amomiyo obothi wan; to geno motyeko nenere meno kidoki bedi geno. Ŋa ma geno gima go neno? 25 To ka wageno gima wakinen, meno aka wakuro ginago ma wadiyo chuny wan. 26 I royo achiel no bende, Chuny Maleŋ konyo wan i nyapo mawan; rupiri wakuya paka waripo kwayo; aka Chuny won ama pido ri wan bongi Were gi chur ma wach kinyal tucho. 27 Aka Were ma neno chuny ji, oŋeyo paro pa Chuny, rupiri Chuny pido bongi Were ri ji pere paka Were mito. 28 Kole waŋeyo ni gimoro jye timere kanyachiel ma bero ri joma jomaro Were, jono ma go olwoŋo ru atoŋa pere won. 29 Kole joma Were oŋeyo chon, bende oyiko ri jo kichutho bedo i chal pa Wuode, ŋey Wuode wobedi okayo i dyer wutimin go. 30 Amomiyo joma Were oyiko ri jo kabedo chon kichutho, bende olwoŋo jo; aka joma go olwoŋo, bende okwanyo woko banja kwoŋ jo; aka joma go okwanyo woko banja kwoŋ jo, bende opoko jo dwoŋ pere. 31 Onyo wanyalo wacho aŋo kwoŋ gikipiny me? Ka Were nitye yu thenge mawan, ŋata nyalo lwenyo gi wan? 32 K'inen Were kogwoko kir Wuode won, to omiyo go ri wajojye! Onyo go komiy wan gimoro jye nono kanyachiel gi Wuode? 33 Ŋa ma bino kelo banja kwoŋ ji pa Were moyer? Kole Were won ama kwanyo woko banja kwoŋ jo! 34 To ŋa modoko othumi ri jo banja? Ki Kristo Yesu motho, kendo ma Were ochierino go kwoŋ jomotho, aka onyo obedo yu chingi Were marachuch aka pido ri wan bongi Were! 35 Ŋa mopoki wan gi mar pa Kristo? Teko di tim ameno, kosa aŋedha chuny, kosa achanda, kosa kech, kosa bedo kinyoro, kosa tho, kosa abor? 36 Ato ndiiko wacho ni, “Ru wach perin imito neko wan ndelo jye, itero wan pa rombo mikidho thumo.” 37 I gikipiny me jye, watyeko loyo lweny i go momaro wan! 38 Kole aŋeyo maber ni kada tho, kosa kwo, kosa jomalaika, kosa jodhum ma polo, kosa gima pama, kosa gima bino rumachien, kosa men mogo, 39 kosa ŋawirok pa gimogo, kosa thutho pa gimogo, kosa gimogo jye i chwech, kinyal poko wan gi mar pa Were i Kristo Yesu Ruodhiwan.

Romans 9

1 Aluwo giradyeri i Kristo aka akitwodi; paro ma chunyan ridho gino gi men pa Chuny Maleŋ. 2 Ani gi rem kodi litho mathoth i chunyan. 3 Aparo ni di Were wokwoŋan ayin aka wopokan kodi Kristo ma bero pa ji paran, wade paran won ma del! 4 Jobedo Joisrael, ma Were oloko nyithindho pere to poko jo dwoŋ pere. Otimo chikirok pere kodi jo, to miyo jo Chik. Jonitye gi royo ma lamo Were maradyeri. Jotyeko jolo chikirok pa Were; 5 jowok kwoŋ kwarere wan machon, aka Kristo, paka dhano, onywolere wok i dyer jo. Weyi Were ma dhumo gimoro jye, wopak chil gi chil. Ameno. 6 Akiwachi ni chikirok pa Were othogaya ongoye kony; rupiri kobedo ni Joisrael jye ji pa Were; 7 odoko kobedo ni nyikway Ibrayimu jye nyithidho pa Were. Kole Were owacho ri Ibrayimu ni, “Nyikway Isaka kende ama ibino kwano paka aperin.” 8 Ma nyutho ni nyithindho monywol i yo ma kis ndelo ma nyadel jokobedo nyithindho pa Were; kuchiel, nyithindho monywol chungo kwoŋ chikirok pa Were ama ikwano paka nyikway go maradyeri. 9 Kole chikirok pa Were otim i wach me: “I hongo ma rom gi ma pama yu wa��e, abino dwoko aka Sara bino limo nyathi ma nyiyach.” 10 Aka ki meno kende; nger gino bende otimere ri Rebeka munyo ogamo iye to limo nyithindho ma rut, go kodi kwari wan Isaka. 11 Kada munyo fuodi konywol jo aka onwaŋo fuodi jokotimo kir gimoro maber kosa marach, (ma miyo yero pa Were wotimere, 12 kareno kichungi kwoŋ tim pa nyithindho no, to kwoŋ lwoŋo pa Were), Were owacho ri Rebeka ni, “Wuodin makayo bino tiyo ri mathin.” 13 Meno obedo paka ondik ni, “Amaro Yakobo, to adak Esau.” 14 Onyo wawachi nedi? Nike Were kotire? Kameno be. 15 Kole go owacho ri Musa ni, “Abino mako wor gi ŋata ayero timo ri go wor, abino ramere ri ŋata ayero ramirok ri go.” 16 Amomiyo, kichungi kwoŋ yero kosa men pa dhano, to chungo kwoŋ Were ma nyutho wor. 17 Kole ondik kwoŋ Farawo ni, “Alokin kere ri atoŋa ma aleorin iye ma nyutho men paran, gi miyo nyingan woŋeyere i piny gipi.” 18 Amomiyo Were mako wor gi ŋata go oyero, aka miyo dhano bedo jachay paka won oyero. 19 Moro kwoŋ win bino wacho ran ni. “K'inen obedo ameno, Were nyalo nedi ketho banja kwoŋ dhano? To ŋa, ma nyalo geŋo paro pa Were?” 20 To jawodhan in iŋa, dhano adhana, m'inyalo dwoko Were? Ayiga dak bende nyalo penjo ŋata ochweyo go ni, “Raŋo m'ichweyan ama?” 21 Kole jachwech ni gi syem ma oro lowo nyamasiga paka won oyero, gi chweyo degi aryo wok i lowo achiel modwany: dak achiel maraora i kabedo mawelo kodi man maraora i kabedo ma kis ndelo. 22 Iŋeyo nedi, kole ka Were otimo ameno ma mito nyutho keme pere gi miyo men pere woŋeyere! Amomiyo go odiyo chunye swa munyo chiro joma keme pere d'otiyo kwoŋ jo, moido ikidho reyo woko jo. 23 Aka iŋeyo nedi, kole ka Were otimo ameno ma mito nyutho dwoŋ pere moŋaŋ ri joma go kidho nyutho jo wor pere, ma go oyiko jolo i dwoŋ pere. 24 Kole meno mako kwoŋ wan ma go olwoŋo, ki nyaka wok kwoŋ Joyudaya kende, to kwoŋ Jopath bende. 25 Kole me a gima go wacho i kitawo pa Hoseya: “Ji me moido jokobedo aparan, abino lwoŋo jo ni, ‘Ji paran.’ Nono monwaŋo akimaro, abino lwoŋo ni, ‘Migos paran.’ 26 Aka i kabedo monwaŋo owach'iye ri jo ni, ‘Wikibedo ji paran,’ kenyo ama ibino lwoŋ'iye jo ni nyithindho pa Were makwo.” 27 Aka Isaya luwo kwoŋ Israel ni, “Kada nyithindho pa Israel jothoth pa kwoyo ma nam, nyaka manok kwoŋ jo ama ibino botho. 28 Kole Ruoth bino chowo thumo banja pere i yoto ri piny.” 29 Aka gime nitye paka Isaya chango owacho ni, “Bedi Ruoth Majameni jye koweyo ri waye nyikway wan mogo, di wabedo paka Sodom, di walokere paka Gomora.” 30 To wanowachi nedi? Jopath monwaŋo jokitem bedo i tiro gi Were, onyo oketh jo i tiro gine ru yeyo pajo; 31 kareno Joisrael monwaŋo jorango tiro chungo kwoŋ Chik, jokonyalo kuro Chik nago. 32 To raŋo? Rupiri gima jotimo onwaŋo kochungo kwoŋ yeyo to kwoŋ tich mabeyo ayino. Jochier wi “tele ma redho jo,” 33 ma ndiiko luwo kwoŋe ni, “Neni, aketho i Zayun tele ma bino miyo ji chier, Tele ma bino miyo jo podho. To ŋata oyey go, kowey wiye wokwoti.”

Romans 10

1 Wutimera, ayenyo gi chunyan jye ni ji paran jye jowobothi! Neni paka akwayo Were ri jo! 2 Kole anyalo ridho ni chuny jo omaro Were, to maro pajo kichungi kwoŋ niaŋ motire. 3 Fuodi jokoniaŋ royo ma Were keth'iye gi go ji i tiro gine, aka wegi jotyeko temo chwogo royo pajo; amomiyo jokojolo royo ma Were keth'iye gine ji i tiro. 4 Kole Kristo amobedo kama Chik gik'iye, ŋey nyaka dhano jye mayeyo woketh i tiro gi Were. 5 Musa ondiko kwoŋ wach ma bedo i tiro gi Were i winjo Chik ni, “Ŋata timo gima Chik wacho, bino kwo gi Chik.” 6 To me a gima ndiiko wacho kwoŋ ketho dhano i tiro gi Were ru yeyo: “Ikiri iwachi i chunyin ni, ‘Ŋata oidhi i polo?’ ” (dwoŋ mere ni dwoko Kristo i piny ka). 7 “Kosa ni, ‘Ŋata olori piny i bur maluth?’ ” (dwoŋ mere ni kidho chierino Kristo kwoŋ jomotho.) 8 Me a gima Ndiiko wacho: “Kole wach nitye chiegin kodin, i dhokin kodi i chunyin” (dwoŋ mere ni wach ma yeyo ma wafuonjo); 9 rupiri ka itucho gi dhokin ni, “Yesu meno Ruoth,” aka iyeyo i chunyin nike Were ochierino go kwoŋ jomotho, ibino both. 10 Ato dhano yeyo gi i chunye to ikwanyo woko banja kwoŋe; aka tucho gi dhoke to limo both. 11 Kole ndiiko wacho ni, “Moro jye ma yeyo go konwaŋ wichkwot.” 12 Me mako kwoŋ dhano jye, rupiri pokirok ongoye i dyer Joyudaya kodi Jopath; Were achiel ama obedo Ruoth pa ji jye, aka go miyo dhano jye ma lwoŋo go silwany. 13 Kole ndiiko wacho ni, “Nyatoro jye m'olwoŋ nyingi Ruoth bino both”. 14 To jolwoŋ nedi ŋata fuodi jokoyeyo kwoŋe? Odoko joyey nedi ŋata fuodi jokowinjo wach ma mako kwoŋe? Odoko jowinji nedi mongoye ŋata otito ri jo mikwenda? 15 Aka jotiti nedi mikwenda, ka koor jo? Kole ondik ni, “Bino pa joma kelo Wach Maber obedo gimaber manedi!” 16 To ki Joisrael jye ma jojolo Wach Maber. Isaya won owacho ni, “Ruoth, ŋata oyeyo mikwenda mawan?” 17 Amomiyo yeyo wok i winjo mikwenda, aka mikwenda wok i fuonji kwoŋ Kristo. 18 To apenjo, obedo adyeri ni jokowinjo mikwenda? Kole jowinjo paka ndiiko wacho ni, “Derino ma dwondi jo olak i piny gipi, Wach pajo otundo i tum jye ma piny.” 19 Odoko apenjo, kosa Joisrael chango jokoniaŋ? Kole Musa won gipi a marapena dwoko ni, “Abino miyo witimi nyieko gi ji ma jokobedo nono motire. Abino miyo win nge gi ji mamiŋ.” 20 Aka Isaya ni gi miseni madwoŋ ka wacho ni, “Jomonwaŋo jokirangan ama jonwaŋan; Amenyere ri jomonwaŋo jokipenjan kada.” 21 To ma mako kwoŋ Israel go wacho ni, “Atiŋo chingan malo ndelo gipi ri ji ma jochay kendo ma jopyem.”

Romans 11

1 Onyo apenjo ni, Were otyeko bolo woko ji pere? Kameno be! An won bende abedo Jaisrael, nyakwar Ibrayimu, achiel kwoŋ jonono pa Benjamin. 2 Were kobolo woko ji pere ma go won oyero chako chon. Wikuya gima ndiiko wacho i adech ma Eliya pid'iye gi Were ka lwenyo gi Israel? 3 Owacho ni, “Ruoth, joneko jotuchi wach perin aka jonyieko woko alitar perin; aŋata adoŋ kendan, aka jorango kir nekan bende.” 4 Were omiyo go radwok aŋo? Odwoko go ni, “Atyeko ketho gichien ji gana abiryo ma fuodi jokolamo were Baal.” 5 Amomiyo bende kir gunyo fuodi nitye jomodoŋ, ma Were oyero ru ŋono pere. 6 Ka obedo ru ŋono pere, meno yero pa Were kichungi kwoŋ tim mabeyo ma dhano timo, rupiri d'onyo ŋono no kidoki bedi ŋono motire. 7 Onyo aŋo to? Gima Joisrael jorango tektek jokonwaŋo; jomoyer ama jonwaŋo, to jomodoŋ jobedo gi chuny jo matek. 8 Otimere paka ondik ni, “Were omiyo jo chuny ma miŋo, gi waŋ gin ma konyalo neno, kodi ithi gin ma konyalo winjo, kir konon.” 9 Aka Daudi wacho ni, “Mada kalima pajo wolokere ri jo bwo ma chiko jo, kodi gima redho jo; jowolimi girachula! 10 Mada waŋ gin chule woko ma jokinyal neno, miyi jowogwomere i chandirok pajo ndir jye.” 11 Amomiyo apenjo ni: Munyo Joyudaya jochier, jopodho to joreyere woko? Kameno be! Rupiri jotimo gimarach, both obino ri Jopath, ŋey womiyi Joyudaya jowotimi nyieko gi jo. 12 K'inen gimarach pa Joyudaya okelo silwany mathoth ri piny, aka podho pajo okelo ŋaŋo ri Jopath, onyo ka orwaki jo, silwany no bino thoth marom nedi? 13 Pama onyo aluwo gi win Jopath: ka fuodi abedo jamoor pa Jopath abino pakere gi tich paran. 14 Miti anyalo miyo ji ma nono paran won nyieko, ŋey anyal botho jomegi kwoŋ jo. 15 K'inen munyo obol jo woko, odwok piny gipi i tiyirok gi Were, onyo aŋo man m'obedi ka ojol jo, loyo nwaŋo kwo wok i tho! 16 Kole ka adech ma chiemo momiy Were paka gimanyak marapena leŋ, meno chiemo no gipi bende leŋ; aka k'inen tyendi yath leŋ, meno kir jange bende leŋ. 17 To k'inen otyek toŋo woko megi kwoŋ jangi yath vini mopidhi, aka win ma wibedo jangi vini mogo madudi onyo oriw win maber i kabedo pa motoŋ woko cha munyo ipoko win ye kwo moŋaŋ mani tyendi yath mopidhi no, 18 onyo wikiri wipakere ri jangi yen moŋwer woko cha, rupiri wibedo nyaka jangi yen, aka wiŋat wikithyel tyendi yath to tyendi yath ama thyelo win. 19 To wibino wacho ni, “Ey, kole oŋwer woko jangi yen cha ma leŋo ran hongo.” 20 Meno otire, oŋwer woko jo rupiri jokoyeyo, to wikiri wibedi gi paro ma pakirok kwoŋ gime; kuchiel, bedi win gi lworo ayino. 21 Ato k'inen Were koworo Joyudaya ma jobedo paka jangi yen motire mere, wiparo nike go bino woro win ayino? 22 Onyo neni win paka Were chunye ber aka odoko nyutho gero bende. Go ger kodi joma jopodho, to nyutho win bero tekin wichwire i bero pere; to ka wikitimo ameno, wibende ibino ŋwero win woko. 23 Aka ka Joyudaya joweyo bedo ma bu yeyo, ibino dwoko jo i kabedo pajo monwaŋo jo ni iye, rupiri Were nyalo dwoko jo kendo. 24 K'inen win Jopath oŋadi win paka jangi yath vini madudi to iriwo win kwoŋ vini mopidhi pecho, gima oido kinyalere, onyo Joyudaya ma jobedo jangi yath kwoŋ yath vini mopidhi, jobino bedo mayot nedi riwo jo kendo i kor yath mere won! 25 Amito ni winiaŋ nyaliŋliŋ me, wutimera, ŋey wikiri wipar ni wiryek swa: wichtek pa ji ma Israel kobedo ma kiwire, to bino bedo chuka welo kwan pa Jopath mamitere jowobin bongi Were woromi. 26 Aka me apaka Israel gipi bino limo both, paka ondik ni, “Jaboth bino wok Zayun, Go bino kwanyo woko recho pa nyikway Yakobo jye. 27 Abino timo chikirok me gi jo, munyo akwanyo woko gimarecho pajo.” 28 Rupiri jokwero Wach Maber, Joyudaya jolokere jokwor pa Were ma bero mewin, win Jopath. To i yero pa Were, jobedo mere pere ma bero pa kwarere pajo. 29 Kole Were kiwir paro pere kwoŋ mich kodi lwoŋo pere ri nyatoro. 30 Gime rom kodi gima otimere ri win Jopath; chon oido wichayo Were, to kole pama onyo wilimo wor pa Were rupiri Joyudaya jotimo chay. 31 Ameno bende, Joyudaya pama jokiwinji Were, ŋey gi wor ma wilimo, jo bende jowolimi wor pa Were. 32 Kole Were otyeko loko ji jye jotwech pa chay, ŋey wonyuthi wor ri ji jye. 33 Thutho ma ŋaŋo pa Were kodi ryeko kodi niaŋ pere rom nedi! Ŋa ma nyalo tito paro ma go ochano? Ŋa ma nyalo niaŋ kwoŋ royo pere? 34 Kole ndiiko wacho ni, “Ŋa moŋeyo paro pa Ruoth? Odoko ŋa ma nyalo miyo go ryeko? 35 Ŋa motyeko miyoye go gimoro ma ripo wonwaŋi chul?” 36 Kole go amochweyo gimoro jye, aka gimoro jye nitye kwoŋbedo go kodi ri go. Dwoŋ wobedi ri Were chil gi chil! Ameno.

Romans 12

1 Amomiyo, wutimera, ru wor pa Were moasere ri wan, agoyo ri win koko me: Miyi win delkwoŋ win ri Were paka rachow makwo, maleŋ ma sangala go. Meno a lamo machuny ma wiripo chwayo ri go. 2 Wikiri wiluw kula ma piny me, to bedi win ma wiwire i paro mewin, aka nyaka wibino ŋeyo mito pa Were: gimaber ma sangala go, odoko molony kichutho. 3 Aka gi mich ma Were omiyan awacho gime ri wijojye: Wikiri wipar ni wini malo loyo kama di wipar'iye. Kuchiel, bedi win milengela i paro mewin, kis dhano kwoŋ win, ma ripo gi yeyo ma Were omiyo go. 4 Wanitye g'adeche madit i del achiel, aka adeche me jye nitye gi tich mere. 5 Ameno kada wathoth, jye fuodi wabedo del achiel i Kristo, aka wamakere kanyachiel paka adeche mopokere opokere ma del achiel. 6 Amomiyo paka wanitye gi mich mopokere opokere chungo kwoŋ ŋono ma Were omiyo wan, weyi waor ama: K'obedo mich ma tucho mikwenda mawok bongi Were, timi ameno i chungo kwoŋ yeyo mini gine. 7 K'obedo mich ma chwayo, tiyi ri jowotin; k'obedo mich ma fuonji, fuonji wadin. 8 K'obedo mich ma medo wadin miseni, timi ameno; ŋata poko ri joman gima go nigine, wopoki gi chunye maber; jatel, wotiyi gi men; jawor, wonyuthi wadi wor gi kisangala. 9 Mar ripo bedo maradyeri. Kweri gimarach, chwire kwoŋ gimaber. 10 Marere win gi owirok ma chuny paka wutimere i Kristo, odoko bedi win mayil i miyo jowoti win dwoŋ. 11 Tiyi win matek, aka wikiri wibedi manyap. Chwayi win ri Ruoth gi chuny win jye. 12 Weyi geno mewin womiyi win kisangala, diyi win chuny win i teko mewin, aka kwayi win Were hongo jye. 13 Poki win ye lim mewin gi wutimin win ma jochando, odoko weyi win pechin mewin thwolo ri wendo. 14 Kwayi win Were womiyi jomalwenyo kodi win silwany; ey, kwayi wi go womiyi jo silwany ma kiweno kwoŋ. 15 Sangala win gi jomasangala, ywaki win gi jomaywak. 16 Nyuthi win dhano jye chuny maber marom. Wikiri wibedi jokwoto, to joli win tich kada mapiny. Wikiri wibedi gi paro ni wiryek. 17 Ka nyatoro otimo ri win marach, wikiri wichul kwor. Temi win timo gima ji jye tero ni ber. 18 Temi win paka nyalere neno ni wibedo i syem gi ji jye. 19 Wikiri wichul kwor wiwegi, jowotan; kuchiel weyi win keme pa Were ama wochuli. Kole ndiiko wacho ni, “Ruoth wacho ni, ‘Chulo kwor obedo aparan; abino chulo.’ ” 20 Kuchiel ndiiko wacho ni, “Ka jakwor perin kech neko, pidhi go; ka riyo neko, miyi go giramadha; kole k'itimo ameno, meno chal pa onyo itoko chuk mach ma lyeth i wiye.” 21 Ikiri iyey recho wodhumin; kuchiel loyi recho gi bero.

Romans 13

1 Dhano jye ripo winjo or pa ruodhe ma piny; ato ongoye men maradhum ma Were ama koyeyo, aka jodhum ma jonitye Were ama oketho jo. 2 Nyatoro jye ma pyemo kodi men pa jodhum manitye, meno pyemo kodi gima Were ochano; aka moro jye ma timo ameno bino kelo wach kwoŋe won. 3 Kole joma timo gimaber jokilwor jodhum, to jomatimo recho ayino ama jolworo. Imito bedo ma bu lworo kwoŋ jadhum? Ere timi gimaber, aka go bino pakin. 4 Kole go jatich pa Were ma tiyo ri bero perin. To k'itimo recho, lwori go, rupiri jadhum kibedi gi gilweny nono. Go obedo jatich pa Were aka go nyutho joma timo recho keme pa Were. 5 Ru wach me dhano jye ripo winjo or pa ruodhe, ki nyaka ru keme pajo kende, to ru gima paro ma chunyin nyuthin bende. 6 Meno bende amomiyo wiripo goyo misolo, rupiri ruodhe jotiyo ri Were ka jotimo tich pajo no. 7 Amomiyo, chuli win gima wiripo chulo dhano; chuli misolo perin bongi ŋata iripo chulo, kodi lim perin bende ameno; aka wori win ŋata ripere awora, odoko miy dhano jye dwoŋ, ma ripere amiya dwoŋ. 8 Wikiri wibedi gi banja pa dhano moro jye. Nyaka banja ma wiripo bedo gine meno a marok i dyer win. Nyatoro jye momaro nyawote meno otyeko winjo Chik. 9 Or ma wacho ni, “Ikiri itim chot, ikiri ineki, ikiri ikwal, ikiri ibedi g'awanya,” jye kodi man oriw kanyachiel i or achiel ni, “Mari nyawotin paka iwon imarere.” 10 Nyatoro jye momaro nyawote kibino timo ri nyawote recho. Amomiyo, marok meno winjo Chik gi bee. 11 Medo kwoŋ meno, wiŋeyo ndir ma pama ni ndir otundo ri win ma chiew. Kole ndir ma both mawan onyo ochore chiegin loyo munyo nyaka wachako yeyo. 12 Wor chiegin rumo, aka piny chiegin yawirok. Ri ameno wawey win timo gikipiny mamudho to wakwanyo win gilweny ma lero. 13 Wabedi win i kwo motire paka ji ma jonitye i lero modyechieŋ, mongoye woro kosa mero, chot kosa kidakana, gorok kosa nyieko. 14 Kuchiel ruki win Ruoth Yesu Kristo, aka wikiri wiwey hola ri del, ma timo awanya mere.

Romans 14

1 Joli win i dyer win ŋatanyap i yeyo; to wikiri wipyem gine kwoŋ paro pere. 2 Yeyo pa ŋatachiel yeyo go chamo gimoro jye, to ŋatanyap i yeyo chamo fufa aŋweta kende. 3 Ŋata chamo gimoro jye wokiri wochay dhano ma kitim ameno; aka ŋata chamo fufa kende wokiri wothum banja ri ŋata chamo gimoro jye, kole Were otyeko jolo go. 4 In iŋa m'ithumo banja ri jatich pa ŋat man? Ruoth pere won ama nyalo ridho paka go tiyo maber kosa makiber odocho. Aka bino konyo go wochungi, rupiri Ruoth nyalo miyo go chungo matek. 5 Ŋatachiel paro ni ndelo achiel loyo ndelo man jye, kareno ŋat man paro ni ndelo jye rom. Dhano jye ripo bedo gi paro pere m'oridho matek. 6 Ŋata paro kwoŋ ndelo moro ni loyo nyawote timo ameno ka miyo Ruoth dwoŋ, ŋata chamo gimoro bende timo ameno ka miyo Ruoth dwoŋ, rupiri go fuoyo Were ru chiemo no. Onyo ŋata kwero chamo gikipiny mogo bende timo ameno ma miyo Ruoth dwoŋ, aka fuoyo Were. 7 Ongoye moro kwoŋ wan ma won kwo ri wach pere kende; odoko ongoye ma tho ri go won kende. 8 Ka wakwo, meno wakwo ri Ruoth odoko ka watho, meno bende watho ri Ruoth. Amomiyo, kada wakwo kosa watho, jye wabedo apa Ruoth. 9 Kole Kristo otho to chierino ŋey wobedi Ruoth pa jomakwo kodi jomotho jye. 10 Onyo raŋo m'ithumo banja ri omerin? Aka in! Raŋo m'ichayo omerin? Kole wajojye wabino chungo i nyim Were, go wothumi ri wan banja. 11 Kole ndiiko wacho ni, “ ‘Paka akwo,’ Ruoth wacho, ‘dhano jye bino guro chonge i nyiman, Aka dhano jye bino tucho ni abedo Were.’ ” 12 Amomiyo, dhano jye kwoŋ wan bino tito gima mako kwoŋ kwo pere ri Were. 13 Amomiyo wawey win thumo banja ri jowoti wan. Kuchiel, me a gima wiripo ridho: wikiri witim gimoro jye ma miyo nyawoti win chier, kosa podho i gimarach. 14 Riwirok paran kanyachiel gi Ruoth Yesu miyan aŋeyo adyeri ni ongoye gimakoch; kwanyo woko ka dhano oyeyo nike gimoro koch aka gino lokere makoch ri go. 15 K'imiyo nyawotin ramirok ru gima ichamo, meno kere ikitim gino gi mar. Ikiri imiy chiemo m'ichamo wokel ri nyawotin ma Kristo otho ri go podho. 16 Ikiri imiy gimitero paka ber wolim nyinge marach. 17 Kole Ker pa Were kobedo nyaka chiemo gi oro giramadha, to obedo tiro kodi syem kodi kisangala i Chuny Maleŋ. 18 Aka ŋata tiyo ri Kristo i royo me Were jolo, odoko ji bende fuoyo go. 19 Amomiyo, ndir jye wakidhi win ri gikipiny ma kelo syem aka konyo wawegi i miyirok men ayin. 20 Ikiri inyieki tich pa Were ru wach chiemo. Chiemo jye nyalo bedo ni olony achama, to kibedi gimotire chamo gimoro ma bino miyo dhano man podho i gimarach. 21 Gimotire a weyo chamo riŋo, madho vini, kosa timo gimoro man jye ma miyo omerin podho, kosa chunye ŋedhere, kosa lokere manyap i yeyo. 22 Ini gi yeyo? Ere maki yeyo perin no paka gima iwon iridho ruwaŋ Were. Jasilwany a ŋata kiwinji banja i chunye ka timo gima go ofuoyo! 23 To ka nyatoro ganagana kwoŋ gima go chamo, Were thumo banja loyo go ka ochamo gino, rupiri tim pere kochungo kwoŋ yeyo. Aka gimoro jye ma kochungo kwoŋ yeyo meno recho.

Romans 15

1 Wan ma wategino i yeyo waripo konyo jomanyap gi tiŋo byeto pajo. Kiripi ka wawegi wamiyere kisangala. 2 Kuchiel, ŋatachielechiele kwoŋ wan ripo miyo jager pere kisangala ma konyo go, ŋey wodongi ŋato i yeyo. 3 Kole Kristo won komiyere kisangala. Kuchiel, obedo paka ondik ni, “Yet ma jono joyetin gine omakan ayino.” 4 Kole gimoro jye mondik i kitawo maleŋ ondik ma fuonjo wan, ŋey walim geno i diyo chuny kodi i men ma Ndiiko Maleŋ miyo wan. 5 Weyi Were ma jadiy chuny ji kendo jadwoki men, womiyi winyal bedo kanyachiel i syem, munyo wiluwo ranen pa Yesu Kristo, 6 aka nyaka wijojye kanyachiel, gi dwondi win achiel, winyal pako Were kodi Baa Yesu Kristo Ruodhiwan. 7 Amomiyo jolere win paka Kristo ojolo wan, ma miyo Were dwoŋ. 8 Kole awacho ri win ni Kristo olokere jatich pa jomothumere (Joyudaya) ma nyutho nike Were genere, ma miyo chikirok pa Were m'otimo gi kwarere wan wotundi i kare, 9 bende gi miyo Jopath pako Were ru wor pere, paka ndiiko wacho ni, “Amomiyo abino kethin walwa i dyer Jopath, Abino wero munyo apako nyingin.” 10 Odoko wacho ni, “Sangala win, wi Jopath, kanyachiel gi ji pa Were moyer.” 11 Odoko wacho ni, “Paki win Ruoth, win Jopath jye!” aka weyi nonin jye jowopaki go. 12 Odoko Isaya wacho ni, “Nyakwar Yese lebino; Ibino tiŋo go malo wodhumi Jopath, Aka Jopath jobino ketho geno pajo i go.” 13 Were ma geno wok bonge wonyali poŋo win gi kisangala jye kodi syem chungo kwoŋ yeyo mewin, ŋey geno mewin womedere dongo gi men pa Chuny Maleŋ. 14 Wutimera, awon ani gi geno kwoŋ win, nike withoth gi bero, nike wipoŋ gi ryeko, aka wiwegi winyalo fuonjo jowoti win. 15 To kada ameno, i balwa ma atyeko ndiko ri win, abedo gi miseni kwoŋ gikipiny mogo ma apoyo win, ru ŋono ma Were opokan 16 ma bedo jatich pa Kristo Yesu ma tiyo ri Jopath. Atiyo paka jachwayi ri Were wi alitar kareno atito Wach Maber ma wok bongi Were, ŋeyi Jopath jowobedi mich ma Were jolo, ma Chuny Maleŋ olonyo ri go. 17 Amomiyo, i Kristo Yesu, anyalo bedo g'atoŋa ma yumirok gi tich paran ri Were. 18 Aka akibino yumirok gi giman ma kiweno gima Kristo otyeko timo munyo oran i miyo Jopath winjo Were, i yo ma wach kodi tim, 19 gi men ma wok'iye ranyuth kodi giraura, gi men pa Chuny Maleŋ pa Were. Gino omiyo kama awoth'iye jye, chako Yerusalem tundo Ilirikam, atyeko tito Wach Maber kwoŋ Kristo kichutho. 20 Amomiyo gima aasa yenyo timo obedo tito Wach Maber kama fuodi kowinj'iye kwoŋ Kristo, ŋey akir alwowere kwoŋ tich ma ŋat man otyeko chako. 21 Ato ndiiko wacho ni, “Joma fuodi kowachi ri jo kwoŋ go jobino neno, aka joma fuodi jokowinjo jobino niaŋ.” 22 Meno a gima onwaŋo omonan ndir madit bino bongi win. 23 To paka achowo tich paran i adech me, odoko paka atyeko yenyo bino neno win oro mathoth, 24 onyo ageno timo ameno pama. Amito neno win ka amako royo makidho yu Spain, winyal konyan i nger ma kidho koro, ka atyekoye kisangala i lyewo win hongo moromo. 25 Gunyoni, akidho Yerusalem tiyo ri ji pa Were koro. 26 Kole kitipa pa jomoyeyo ma Masedonia kodi Yunani joridho paro ma miyo mich ma konyo jochandi i dyer ji pa Were ma Yerusalem. 27 Jo wegi joridho timo ameno; aka i adyeri joripo konyo jo; kole Joyudaya jopoko silwany pajo kodi Jopath, amomiyo Jopath bende joripo konyo Joyudaya gi silwany pajo ma gikipiny ma piny. 28 Ka achowo tich me, kareno atyeko tero ri jo pesa mochoki ri jo, nyaka abino mako yo ma kidho Spain, to alyewo win ka akidho yu korago. 29 Ka abino bongi win, aŋeyo ni alebino gi silwany pa Kristo mopoŋ. 30 Wutimera, agoyo ri win koko, i Ruoth Yesu Kristo kodi kwoŋ mar pa Chuny Maleŋ; riwere win kodan i kwayo mochwiny bongi Were, 31 nike go wokuran i bero kwoŋ jomakoyeyo i Yudeya, ŋey ji pa Were jowojoli tich paran i Yerusalem. 32 Amomiyo alebino bongi win gi kisangala mopoŋ, ka obedo mito pa Were, kareno awinjo syem i wendo paran bongi win. 33 Were ma kelo ri wan syem wobedi kodi wijojye. Ameno.

Romans 16

1 Afuoyo ri win nyamin wan Febe, ma tiyo paka jakony i kitipa pa jomoyeyo i Kenkereya. 2 Joli win go i nyingi Ruoth, paka ripere ri ji pa Were, aka miyi win go kony jye ma go omiti bongi win; kole go otyeko bedo jakony ri ji mathoth ma kir ran bende. 3 Mothi ran Prisila kodi Akwila, jotich jowotan i Kristo Yesu, 4 ma jojala kwo pajo ran. Aketho jo walwa, aka ki an kendan, to kitipa pa jomoyeyo pa Jopath jye bende. 5 Mothi ran kitipa pa jomoyeyo ma romo i ot pajo. Mothi ran mere paran ma kachunyan Epeneto, mobedo ŋat marapena i adech ma Asya i yeyo Kristo. 6 Mothi ran Marya, motyeko tich tektek ri win. 7 Mothi ran Androniko kodi Yuniya, Joyudaya jowotan ma jobedo i twech kodan; jojye joŋeyere maber i dyer jomoor, aka jolokere jokristo ma fuodi an. 8 Mothi ran Ampulyato, mere paran i Ruoth. 9 Mothi ran Urubano, jatich nyawotan i Kristo, kodi Sitako, mere paran swa. 10 Mothi ran Apele, ma chwirok pere kwoŋ Kristo oŋeyere maber. Mothi ran jopecho pa Aristobulo. 11 Mothi ran Herodyon, Jayudaya nyawotan kodi jokristo wutimin wan i pecho pa Narukiso. 12 Teri moth paran ri Turifena kodi Turifosa, mon ma jotiyo tektek i Ruoth. Mothi ran jawodhan swa, Pasis, motyeko timo kweth tich ri Ruoth. 13 Adhiro moth ri Rufo, jatich moŋeyere i tich pa Ruoth, kodi ri min, ma hongo jye oteran paka wuode. 14 Teri moth paran ri Asinkurito, Fulegon, Herume, Paturoba, Heruma, kodi wutimere i Kristo jye ma jo ni kanyachiel gi jo. 15 Mothi ran Filologo kodi Julya, Nereyo kodi nyamin, Olimpa kodi ji pa Were jye ma jonitye bongi jo. 16 Mothere win akor i leŋo. Kitipa pa jomoyeyo Kristo jye jodhiro ri win moth pajo. 17 Wutimera, agoyo ri win koko ni kure win kwoŋ joma kelo pokirok aka jogeŋo ri win royo gi gima opokere kodi fuonji ma wityeko jolo; eye win kwoŋ jo. 18 Kole joma timo gikipiny ma kite no jokitiy ri Kristo Ruodhiwan, to jotiyo ri iyi gin wegi gi wach pajo mamit kodi luwo ma dwoŋo paro pa joma onwaŋo jongoye gi racho. 19 Dhano jye otyeko winjo chwirok mewin kwoŋ Wach Maber, aka ru wach me josangala swa gi win. Amito wibedi maryek kwoŋ gimaber, aka ma wikitim recho. 20 Aka Were ma miyo wan syem, bino ŋinyo woko Sitan i par tyendi win i yoto. Ŋono pa Ruodhiwan Yesu Kristo wobedi gi win. 21 Timotheyo, jatich nyawotan, bende dhiro ri win moth; kanyachiel gi Lusyo, Jason kodi Sosipate, Joyudaya jowotan. 22 An Terutiyo, jandiiko gi kalamu i balwa me, abende adhiro ri win moth paran ma nyakristo. 23 Gayo, won pecho ma an kodi jomoyeyo waromo i ot pere ka, dhiro ri win moth pere; Erasto, jatel ma tich ma tindi, kodi omin wan Kwaruto jye jodhiro ri win moth. 24 [Ŋono pa Ruodhiwan Yesu Kristo wobedi kodi win. Ameno] 25 Weyi wamiy Were dwoŋ ma nyalo miyo wichungo matek i yeyo, i Wach Maber m'afuonjo win, mikwenda kwoŋ Yesu Kristo, kodi kwoŋ nyutho adyeri ma nyaliŋliŋ monwaŋo opan oro kweth mokadho. 26 To pama adyeri no otyek wodho kamaler i ndiiko pa jotuchi wach Were; kodi i or pa Were ma chil gi chil, ma onyo imiyo nonin jye ŋeyo, aka ji jye jowoŋeyi odoko jowowinji. 27 Ri Were ma nitye achiel kende maryek, dwoŋ wobedi kwoŋ Yesu Kristo Ruodhiwan chil gi chil. Ameno.



AMAZING GRACE BIBLE INSTITUTE