Tite11 Ne Paul, Ala ka jòn ni Yesu Krisita ka ciden, ne cira ka Ala ka ɲènatòmòlenw lase dannaya ma, ani tiɲè dònniya min bè kèɲè ni Ala ɲèsiran ye, 2 walisa ɲènamaya banbali jigi ka kè u kònò. Ala min tè nkalon tigè, o ye ɲènamaya banbali layidu ta sani diɲè ka da. 3 A ye a ka kuma jira waati bènnen na, ka o waajuli kalifa ne ma ka kèɲè ni an Kisibaa Ala ka ci fòlen ye. 4 Ne bè nin sèbèn ci i ma, Tite, e min ye ne den tigitigi ye an ka jè dannaya sira la. An Fa Ala ni an Kisibaa Krisita Yesu ka nèèma ni dususuma di i ma. 5 Ne ye i to Krete walisa ko minnu ɲènabòbali tora, i ka olu ɲènabò koɲuman. I ka egilisi cèkòròba dòw sigi duguw bèè kelen-kelen kònò, i ko ne y'a fò i ye cogo min na. 6 Cèkòròba ka kè jalakibali ye, muso kelen tigi. A denw ka kè dannabaaw ye, a kana sòrò ko u tògò jugu bè fò u ka kakalaya ni kan bilali kosòn. 7 Egilisi ɲèminèbaa ye Ala ka sokunnasigibaa ye, o de kosòn wajibi don a ka kè jalakibali ye, a kana kè yèrèsagokèla ye, a kana dimin joona, a kana kè dòlòtò ye, wala mògò farinma, wala tònò jugu ɲinina. 8 A ka kè dunan lajiginbaa ye, ko ɲuman kanubaa. A ka kè hakiliman ye, tilennen, Ala ɲèsiranbaa, yèrèminèbaa. 9 A nòròlen ka to kalan sèbè la i ko a kalanna cogo min na, walisa a ka se ka mògòw laadi ka kèɲè ni tiɲè kuma kalan ye, ka sòsòlikèlaw da la kumaw ban. 10 Ayiwa, mògò murutilen caman bè yen minnu bè mògòw lafili ni u ka kuma kunntanw ye. U caman ye Yahutuw ye minnu tuubira. 11 U daw ka kan ka tugu, sabu u bè du dòw mògòw bèè lafili, ka mògòw kalan kuma fòbaliw la wari kosòn. 12 Kreteka dò, u ka kira kelen y'a fò ko: «Kretekaw ye nkalontigèlaw ye tuma bèè, wara juguw, salabaatò nugumaw.» 13 O kuma ye tiɲè de ye. O de y'a to i ka u kòròfò kosèbè, walisa u ka sabati dannaya la, 14 u kana tugu Yahutuw ka nsiirinw ni mògòw ka ci fòlenw la, o mògò minnu ye tiɲè sira bila. 15 Fèn bèè jèlen don mògò senumaw fè, nka foyi jèlen tè mògò nògòlen dannabaliw ɲè na, olu hakili ni u dusukunw nògòlen don. 16 U b'a fò ko u bè Ala dòn, nka u bè u dalacè a la u ka kèwalew fè. U haramulen murutilen don, u tè se ka kèwale ɲuman si kè.21 E kòni, i ka mògòw kalan ka kèɲè ni kalan sèbè ye. 2 I k'a fò ko cèkòròbaw ka kè yèrèminèbaaw, mògò sèbèw, hakilimanw ye. U ka kè sabatilenw ye dannaya ni kanuya ani muɲuli la. 3 I k'a fò ko musokòròbaw fana taama cogo ka bèn senuya ma. U kana kè mògò tògò tiɲènbaaw ye, wala dòlòtòw. U ka kè laadili ɲuman dibaaw ye, 4 walisa u ka muso misènw kalan ko u ka u cèw ni u denw kanu, 5 ko u ka kè muso hakilimanw jèlenw ye, ko u ka kè so kònò baarakèlaw ye, ka kè hinèmaw ye, ka kolo u yèrèw cèw ye, walisa Ala ka kuma tògò kana tiɲè. 6 Kamalenw fana laadi ko u ka kè hakilimanw ye. 7 I yèrè fana ka kè ɲèjirabaa ye kèwale ɲumanw bèè la. I ka mògòw kalan ni jèlenya ni sèbè ye. 8 I ka kuma kènèw fò minnu tè se ka sòsò, walisa i sòsòbaa ka maloya, katuguni a tè se ka ko jugu si sòrò k'a fò an ma. 9 Baaradenw laadi ko u ka u kuntigiw kan minè ka u diyaɲekow kè ko bèè la, ni sòsòli tè. 10 Ko u kana u kuntigiw ka fèn si ta, nka u ka kè dannamògòw ye fèn bèè la, walisa u ka an Kisibaa Ala ka kalan bonya ko bèè la. 11 Ala ka nèèma y'i jira mògòw bèè kisili kosòn. 12 O nèèma bè an kalan ko an ka ban Ala ɲèsiranbaliya ni nin diɲè nege juguw ma, ka taama nin waati la ni hakili sigilen ni tilennenya ni Ala ɲèsiran ye, 13 ka an ka Alaba, an Kisibaa Yesu Krisita nòòrò jirali makònò, o min ye an jigi dubama ye. 14 Yesu Krisita ye a yèrè di an kosòn, walisa a ka an kunmabò ko juguw bèè ma, ka mògò dòw saniya ka u kè a yèrè kelenpe taw ye, u jijalen kèwale ɲumanw bèè kèli la. 15 I ka mògòw kalan ten ka u laadi, ka u kòròfò ni kuntigiya fanga bèè ye. Mògò si kana i dògòya.31 I ka u hakili jigin a la ko u ka kolo gòfèrènaman ni kuntigiw ye, ko u ka olu kan minè, ani u labènnen ka sòrò kèwale ɲumanw bèè kèli kama. 2 U kana kuma jugu fò mògò si ma. U kana kè kèlètigèlaw ye, nka u ka sabali ka dusu majiginlen jira mògòw bèè la, 3 katuguni an fana tun ye hakilintanw ye ka kòrò, ani kan bilabaaw, ni mògò lafililenw. An tun ye nege sifa bèè ni ɲènajè sifa bèè ka jònw ye. An tun bè taama juguya ni keleya la. An tun ka kan ni koniya ye, an tun bè ɲògòn koniya fana. 4 Nka an Kisibaa Ala ka ɲumaya ni a ka kanuya minnu bè mògòw ta fan fè, olu y'u jira tuma min na, a ye an kisi. 5 An yèrèw ye kèwale ɲuman minnu kè, olu nò tè dè, a yèrè ka makari nò don, o kèra bange ko kura koli ani Ni Senu ka kurayali fè. 6 A ye o Ni Senu jigin an kan ka caya an Kisibaa Yesu Krisita barika la, 7 walisa jo dilen kò an ma a ka nèèma barika la, an ka ɲènamaya banbali sòrò, an jigi bè o min kan. 8 O kuma jèlen don, ne b'a fè i ka o fò k'a gèlèya, walisa minnu dara Ala la, olu ka u jija kèwale ɲumanw la. O kow ka ɲi, mògòw bè nafa sòrò u la. 9 I yèrè kòlòsi ɲininkali kunntanw ni buruju kow ni kèlèw ani sariya ko sòsòli la, katuguni olu ye ko fufafu nafantanw ye. 10 Min bè farali kè egilisi la, i ka o lasòmi siɲè kelen, siɲè fila, o kò, i ka mabò o tigi la. 11 I b'a dòn ko o mògò sifa filila ka sira bila, a bè to jurumu kèli la k'a yèrè jalaki. 12 Ne mana Artèmas wala Tisike ci i ma, i k'i jija ka na ne yòrò Nikopolis, k'a masòrò ne y'a latigè ko ne bè fonènè kè yen. 13 I jija ka karamògò Zènasi ni Apolosi dèmè u ka dugutaa ko la, walisa foyi kana dèsè u la. 14 An ka mògòw fana ka dege kèwale ɲuman kèli la, walisa u ka se ka dòw mago ɲè, u kana kè mògòw ye, nafa tè minnu na. 15 Minnu bè ne fè yan, olu bèè bè i fo. Minnu bè an kanu dannaya sira la, i ka olu fo. Ala ka nèèma ka kè aw bèè fè. |