Matewu


1

1 Ne Paul ani Timote, Krisita Yesu ka jònw, an bè nin sèbèn ci Ala ka mògò senumaw ma Filipe, minnu bè Krisita Yesu la, ani egilisi ɲèminèbaaw ni a baarakèlaw. 2 An Fa Ala ni Matigi Yesu Krisita ka nèèma ni dususuma di aw ma. 3 Ni ne bè miiri aw ko la tuma o tuma, ne bè barika da ne ka Ala ye. 4 Ne nisòndiyalen bè delili kè aw ye ne ka deliliw bèè la, 5 katuguni aw kèra ne jèɲògònw ye Kibaru Duman fòli la, kabini don fòlò fo sisan. 6 Ne y'a dòn k'a jèya ko Ala min ye baara ɲuman daminè aw kònò, o na to a kan k'a dafa fo Krisita Yesu ka don na. 7 A bènnen bè ko ne ka miiri aw bèè ko la ten, katuguni aw ko ka di ne ye kosèbè. Ka ne to kaso la, wala ka ne to Kibaru Duman lafasali ni a sabatili la, aw kèra ne jèɲògònw ye Ala ka nèèma la. 8 Ala ye ne seere ye ko aw nege bè ne la kosèbè ka kèɲè ni Krisita Yesu ka kanuya ye. 9 Ne bè Ala deli ko aw ka kanuya ka bonya ka ta'a fè dònniya sèbè ni hakilitigiya bèè la, 10 walisa aw ka se ka ko ɲumanw faranfasi. O cogo la aw na kè mògò jèlen jalakibaliw ye fo Krisita ka don na, 11 aw falen tilennenya nò la Yesu Krisita barika la. O bè kè Ala tanuli ko ye ka nòòrò da a tògò kan. 12 Ne b'a fè aw ka nin dòn, balimaw, ko ko minnu kèra ne la, olu kèra Kibaru Duman ɲèfè taali sababu ye, u ma a bali. 13 Ayiwa, kube mògòw bèè ani mògò tòw bèè b'a dòn ko ne bè kaso la Krisita kosòn. 14 Balima caman jigi dara Matigi kan ne ka kasola bilali kosòn, u ja gèlèyara kosèbè ka Ala ka kuma fò ni siran tè. 15 Tiɲè la, dòw bè waajuli kè Krisita ko la ni keleya ni sòsòli ye, nka dòw b'a kè ni diyaɲe ye. 16 Olu b'a kè kanuya kosòn, u y'a dòn ko Ala ye Kibaru Duman lafasali baara kalifa ne ma. 17 Nka dòw bè Krisita ko fò ni sòsòli ye, olu t'a kè ni sèbè ye. U bè miiri ko u bè dò fara ne ka tòòrò kan ka ne to kaso la. 18 Baasi tè! Cogo o cogo, n'a kèra sèbè la, wala n'a ma kè sèbè la, Krisita ko bè fò. Ne ɲagalila o la. Ne bè to ka ɲagali, 19 k'a masòrò ne b'a dòn ko o kow bèè na kè ne kisili sababu ye aw ka deliliw ni Yesu Krisita Ni Senu ka dèmèni barika la. 20 Ne kòròtòlen bè ɲènafilèli la, ne jigi b'a kan ko ne tèna maloya fewu, nka ne na ja gèlèyaba sòrò sisan ani tuma bèè, ɲènamaya la wo, saya la wo, ka Krisita ka bonyaba jira ne ko la. 21 Katuguni ne fè, ka ne ɲènama to, o ye Krisita ye, ka sa, o ye tònò ye. 22 Nka ka ne ɲènama to, ni o bè ne ka baara ɲè, ne ka kan ka min ɲènatòmò, ne tè se ka o fò. 23 Ne hakili ɲaaminen bè ko fila la. Ne b'a fè ka taa to Krisita fè yen, o de ka fisa kosèbè, 24 nka wajibi don ne ka to farisogo la aw kosòn. 25 Ne y'a dòn k'a jèya ko ne na to yan, ka sigi aw bèè fè, walisa aw ka taa ɲè ani aw ka ɲagali dannaya la. 26 Aw na yèrèbonya sababu kura sòrò ne ko la Krisita Yesu la ne seginni kosòn aw cèma. 27 Aw taama cogo ka bèn ni Krisita ka Kibaru Duman ye ka tèmèn fèn bèè kan, walisa ni ne taara ka aw ye wo, ni ne ma taa wo, ne ka aw kibaru mèn ko aw sinsinnen bè miirili kelen na, ani aw bè ɲògòn dèmè kèlè la Kibaru Duman dannaya kosòn ni dusu kelen ye. 28 Aw kana a to aw juguw ka aw lasiran foyi la. O na kè olu halakili taamashyèn ye, nka a na kè aw kisili taamashyèn ye, o de bè bò Ala la. 29 Ala ye nin nèèma kè aw ye ko aw ka da Krisita la, o dòròn tè, aw ka tòòrò ale kosòn fana. 30 Aw y'a ye ko ne tun bè kèlè min na, ni aw b'a dòn ko ne b'a la halibi, aw fana bè o bòɲògònko kèlè la.



2

1 Ni dusu saaloli bè Krisita la, ni dususuma bè kanuya la, ni jèɲògònya bè Ni Senu la, ni hinè ani makari bè yen, 2 a' ye aw miiriliw kè kelen ye ka ne ka ɲagali dafa. Kanuya kelen ka kè aw la, aw kònò ka kè kelen ye, aw miirili ka kè kelen ye. 3 Aw kana foyi kè ni farali dusu ye, wala yèrèjiranciya, nka aw bèè ka aw yèrèw majigin, k'a jate ko aw mògòɲògònw ka fisa ni aw yèrèw ye. 4 Aw si kana miiri aw yèrèw ka kow la dòròn, nka aw bèè kelen-kelen ka miiri aw mògòɲògònw ko fana la. 5 Nin miirili min tun bè Krisita Yesu la, o yèrè ka kè aw la: 6 Ale tun bè Ala cogo la, a yèrè ni Ala ka kan, a ma o jate bòsili fèn ye, 7 nka a ye o mabò a yèrè la ka jòn cogo ta, ka kè Hadamaden bòɲògònko ye. A sòròlen mògò bisigi la, 8 a ye a yèrè majigin ka kè kan minèbaa ye, fo ka se saya ma, gengenjiri la saya yèrè. 9 O de kosòn Ala y'a kòròta kosèbè. Tògò min ka bon tògòw bèè ye, Ala y'o di a ma, 10 walisa sankolola fènw ni dugukolo kan fènw ni dugukolo jukòrò fènw bèè ka ɲòngiri Yesu tògò la, 11 ani nènkunw bèè ka jò a la ko Yesu Krisita ye Matigi ye. O na nòòrò da Fa Ala kan. 12 O cogo la ne ka kanulenw, aw ye kan minèli kè tuma bèè ka ne to aw cèma, nka sisan aw ka kè kan minèbaaw ye ka tèmèn o kan, hali k'a sòrò ne tè yen, a' ye aw kisili ko baara kè ni siran ni yèrèyèrè ye, 13 katuguni min bè baara kè aw kònò, ka se di aw ma ka sòn a yèrè diyaɲekow ma ka u kè, o ye Ala de ye. 14 A' ye fèn bèè kè ni dajukòrò kuma ni sòsòli tè, 15 walisa aw ka kè jalakibali jèlenw ye, Ala den jalakibaliw, mògò tulo gèlènw cèma, k'a sòrò aw bè yeelen bò u cèma i ko lanpa bè yeelen bò diɲè la cogo min na. 16 Aw ka taa u yòrò ni ɲènamaya kuma ye. O na kè ne yèrèbonya sababu ye Krisita ka don na, k'a jira ko ne ma boli fu, ne ma baara kè fu. 17 Hali ni ne joli bònna, o kòrò, ni ne ni bòra, ka fara aw ka dannaya saraka ni a baara kan Ala ɲè kòrò, ne bè ɲagali o la, ka ɲagali aw bèè fè. 18 O cogo la aw fana ka ɲagali o la, ka ɲagali ne fè. 19 Ne jigi b'a kan Matigi Yesu la, ko sòòni ne na Timote ci aw ma, walisa ne mana aw kibaru dòn tuma min na, ne ja ka gèlèya. 20 Ale kelen ye ne jèɲògòn ye miirili ni aw hami ko la sèbè la. 21 U tòw bèè bè hami u yèrèw ka kow la, u tè hami Krisita Yesu ka kow la. 22 Nka aw b'a dòn ko Timote ye a ka dannamògòya jira, ko a ye baara kè ne fè Kibaru Duman baara ko la, i ko denkè bè baara kè a fa fè cogo min na. 23 O de kosòn ne mana ne ka koɲè dòn, ne jigi b'a kan k'a ci o yòrònin bèè. 24 Ne dara a la Matigi la ko sòòni ne yèrè bè taa bò aw ye. 25 Ne tun bè miiri ko ne ka kan ka Epafrodite kòsegin aw ma, o ye ne balimakè ni ne baarakèɲògòn ani ne kèlèkèɲògòn ye. Aw tun y'a ci ka na ni ne magoɲè fènw ye. 26 Aw bèè yeli nege tun b'a la kosèbè. A digira a la kosèbè katuguni aw y'a mèn ko a banana. 27 Tiɲè don, a tun man kènè, a tun bè ɲini ka sa yèrè, nka Ala hinèna a la, ale dama tè, a hinèna ne fana la, walisa ɲènasisi wèrè kana fara ne ka ɲènasisi kan. 28 O de kosòn ne ye ne teliya k'a ci, walisa aw mana a ye, aw ka ɲagali ka bonya, ne ka ɲènasisi na dògòya. 29 Ayiwa, aw k'a minè koɲuman Matigi la ni ɲagali sifa bèè ye, ka o bòɲògònko mògòw bonya, 30 katuguni a tun bè ɲini ka sa Krisita ka baara kosòn. Aw tun tè se ka baara min kè ne ye, ale faratira a yèrè ni la ka na o kè.



3

1 Ayiwa sisan, ne balimaw, a' ye ɲagali Matigi la. Ka o kow sèbèn k'a ci aw ma, o man gèlèn ne ma, a bè se ka aw banba. 2 A' ye aw yèrèw kòlòsi wuluw la, ka aw kòlòsi kojugukèlaw la, ka aw kòlòsi bolokoli fu la, 3 k'a masòrò anw ye bolokolen sèbèw ye, an minnu bè Ala bato a Ni Senu barika la, ka an yèrèw bonya Krisita Yesu la, nka an tè an jigi da farisogo kan. 4 O bèè n'a ta jigi da yòrò bè ne fè farisogo kow la. Ni mògò dò bè miiri ko jigi da yòrò b'a fè farisogo kow la, a bè ne fè ka tèmèn o kan. 5 Ne bolokora ne bange tile seginnan la. Ne ye Israèl siya dò ye, Benjamèn bònsòn don. Ne ye Hèburu yèrè ye. 6 Sariya ta fan fè, ne ye Farisièn de ye. Dusu kalaya ta fan fè, ne tun bè egilisi tòòrò. Tilennenya min bè sòrò sariya la, ne jalakibali tun don o ta fan fè. 7 Nka ne tun bè tònò sòrò ko minnu na, ne bè olu jate bònè ye Krisita kosòn. 8 Tiɲè la, ne bè fèn bèè jate bònè ye nin nafaba kosòn, Yesu Krisita ne Matigi dònniya kòni. Ale kosòn ne bònèna fèn bèè la ka u bèè jate ɲamanɲaman ye, walisa ne ka Krisita sòrò, 9 ani ne ka sòrò ale la. Ne yèrè ka tilennenya min bè sòrò sariya la, o nò tè, fò tilennenya min bè sòrò dannaya fè Krisita la. O tilennenya bè bò Ala la, a dannaya barika la. 10 Ne bè min ɲini, o filè nin ye, ka Krisita ni a kununli sebaaya dòn, ka ne niyòrò ta a tòòrò kow la ka kè a bòɲògònko ye a saya la, 11 walisa cogo o cogo ne fana ka se ka kunun ka bò suw cèma. 12 A tè ko ne y'a sòrò ka ban, wala ko ne dafalen bè. Nka ne bè boli a nòfè, walisa ne ka ne jija ka o sòrò, k'a sòrò Krisita Yesu ye ne minè o kama ka ban. 13 Balimaw, ne t'a jate ko ne yèrè y'a sòrò ka ban, nka ne bè nin fèn kelen de kè. Ne bè ne hakili bò ne kòfè fènw la, ka ne yèrè mòònòbò ne ɲèfè fènw nòfè. 14 Ne bè boli ka se o boli dan ma, walisa ne ka o sesòrò jala sòrò, o ye Ala ka sankolola weleli ye Krisita Yesu la. 15 An minnu dafara ni la, an bèè ka miiri ten. Ni miirili wèrè bè aw dòw la, Ala na o fana jira aw la. 16 Cogo o cogo, an sera dan min ma, an ka taama ka kèɲè n'o ye. 17 Balimaw, aw bèè ka kè ne ladegebaaw ye. An ye cogo jira aw la. Minnu bè taama ka kèɲè n'o cogo ye, a' ye olu filè. 18 Ne y'a fò aw ye ko caman, ne kasitò bè segin a kan sisan, ko mògò caman cogo b'a jira ko u ye Krisita gengenjiri juguw ye. 19 U laban ye halakili de ye. U kònòbara ye u ka batofèn ye. U bè u yèrèw bonya u maloya kow la. U bè miiri nin diɲè kow dòròn de la. 20 An kòni, an faso bè sankolo la. An bè Kisibaa Matigi Yesu Krisita makònò ka bò yen. 21 A na an ka majiginlenya farikolo yèlèma ka a kè a yèrè farikolo nòòròma bòɲògònko ye, ka kèɲè ni a ka sebaaya baarakè cogo ye, a bè se ka fèn bèè kolo a yèrè ye o sebaaya min fè.



4

1 O de y'a to ne balima kanulenw, aw sinsinnen ka to Matigi la. Aw yeli nege bè ne la kosèbè. Kanulenw, aw ye ne nisòndiya sababu ni ne ka kunnajala ye. 2 Ne bè Evodi deli ka Sèntisè fana deli ko u kònò ka kè kelen ye Matigi la. 3 E fana, ne baarakèɲògòn kantigi, ne b'i deli ko i ka o musow dèmè. Olu tun ye ne dèmèbaaw ye Kibaru Duman fòli la, u ni Kleman ani ne baarakèɲògòn tòw fana. U bèè tògòw sèbènnen bè ɲènamaya kitabu la. 4 A' ye ɲagali Matigi la tuma bèè. Ne bè segin a kan tun, a' ye ɲagali. 5 Aw ka dusu sumalenya ka dòn mògòw bèè fè. Matigi bè an kèrè fè. 6 Aw hakili kana ɲaami foyi la, nka fèn o fèn ko bè aw la, aw ka o ɲini Ala fè ni deliliw ni delilibaw ni barika dali ye. 7 N'o kèra, Ala ka hèrè min bè tèmèn mògòw ka miiriliw bèè kan, o na aw dusukunw ni aw ka miiriliw mara Krisita Yesu la. 8 O bèè kò, balimaw, ko minnu ye tiɲè ye, ko minnu bè bèn bonyali ma, ko minnu tilennen bè, ko minnu jèlen don, ko minnu ka di, ko minnu tògò ɲumanw bòra, ko minnu ka ɲi, ko minnu ka kan ni tanuli ye, aw ka miiri o kow bèè la. 9 Aw ye ko minnu kalan ka u sòrò, ka u mèn ka u ye ne fè, a' ye olu kè. N'o kèra, hèrètigi Ala na kè aw fè. 10 Ne ɲagalila Matigi la kosèbè k'a ye sisan ko aw bè aw janto ne la ko kura. O bèè n'a ta, aw tun bè aw janto ne la, nka aw ma cogo sòrò a la. 11 O fò kun tè ne fè ne ka faantanya ye, katuguni ne kèra cogo o cogo, ne degena o la ka wasa. 12 Ni faantanya bè ne la, ne bè o cogo dòn. Ni ne fèntigiyara, ne bè o fana cogo dòn. Fèn o fèn na, cogo o cogo, ka fa wo, ka to kòngò la wo, ka fèntigiya wo, ka koli wo, ne degena o bèè la. 13 Ne bè se ka fèn bèè kè Krisita barika la, ale de bè ne barika bonya. 14 O bèè n'a ta, aw ye ko ɲuman kè ka ne dèmè ne ka tòòròw la. 15 Aw Filipekaw yèrèw b'a dòn ko ne bòra Masedwanè jamana la tuma min na, Kibaru Duman fòli daminè tuma la, egilisi min kèra ne jèɲògòn ye nili ni sòròli la, o ye aw dòròn de ye. 16 Hali ka ne to Tesalonike, aw ye ne magoɲè fèn dò ci ne ma siɲè fila. 17 A tè ko ne bè nilifèn dò ɲini, nka ne bè aw ka dannayaden de ɲini, o ka caya ka jate aw ye. 18 Ne ye ne mago fèn bèè sòrò, o ka ca ka tèmèn ne mago kan. Ne fara, sabu aw ye fèn min ci ne ma Epafrodite bolo, ne ye o bèè sòrò. O kèra saraka suma duman minèlen ye Ala fè, a ka di a ye. 19 Ne ka Ala na aw mago bèè ɲè ka kèɲè ni a yèrè ka fèntigiya ye nòòrò la Krisita Yesu la. 20 An Fa Ala ka tanu badaa-badaa. Amiina. 21 A' ye Ala ka mògò senumaw bèè kelen-kelen fo Krisita Yesu la. Balima minnu bè ne fè yan, olu bèè bè aw fo. 22 Ala ka mògò senumaw bèè bè aw fo, janko minnu bè Romè masakè ka so. 23 Matigi Yesu Krisita ka nèèma ka kè aw bèè fè.



AMAZING GRACE BIBLE INSTITUTE