Philemon11 Ne Paul, Krisita Yesu ka kasolamògò ani balimakè Timote, an bè nin sèbèn ci an ka kanulen ni an baarakèɲògòn Filemon ma, 2 ani balimamuso Afiya ni an dèmèbaa kèlè la Arsipe ani egilisi min bè lajè i ka so. 3 An Fa Ala ni Matigi Yesu Krisita ka nèèma ni dususuma di aw ma. 4 Ne bè barika da ne ka Ala ye tuma bèè, ka Ala deli i ye ne ka deliliw bèè la, 5 k'a masòrò i bè Ala ka mògò senumaw kanu cogo min na, ani i dara Matigi Yesu la cogo min na, ne ye olu kibaru mèn. 6 Ne bè Ala deli ko jèɲògònya min bè an ni i cè dannaya la, o ka taa ɲè ka den, walisa fèn ɲuman o fèn ɲuman ye an ta ye Krisita la, i ka olu dòn ka dafa. 7 Ne balimakè, ne ye ɲagaliba ni dusu saaloliba sòrò i ka kanuya kosòn, katuguni i ye Ala ka mògò senumaw dusuw saalo. 8 O de kosòn, hali k'a sòrò Krisita ye se di ne ma min b'a to ne bè se ka i bila ko bènnen kèli la, 9 o bèè n'a ta ne b'a fè ka fèn dò deli i fè an cè kanuya kosòn. Ne Paul bè i deli, ne min ye cèkòròba ye, o dòròn tè, ne ye Krisita Yesu ka kasolamògò ye sisan. 10 Ne bè i deli ne denkè Onèsimè ta fan fè, ne ye o min bange ka ne to kaso la. 11 A ma mago si ɲè i ye waati tèmènnen na, nka sisan a bè e mago ɲè ani ne fana. 12 Ne b'a kòsegin i ma sisan, ale min bè i ko ne farikolo yòrò dò. 13 Ne tun b'a fè a ka to ne fè ka ne to kaso la yan Kibaru Duman kosòn, walisa a ka baara kè ne ye e nò na. 14 Nka ne tun t'a fè ka foyi kè a ko la ni e ma sòn min ma, walisa i bè ko ɲuman min kè ne ye, o kana kè diyagoya ye, nka o ka kè ni diyaɲe ye. 15 A dòrò nin de y'a to a farala i la ka waati dòònin kè, walisa a ka kè i ta ye tuma bèè. 16 A tèna kè jòn ye tun, nka a ka fisa ni jòn ye. Balima kanulen don Krisita la. A ko ka di ne ye haali, nka a ko ka kan ka diya i ye ka tèmèn ne kan, mògòya la ani Matigi la. 17 O de kosòn ni i bè ne jate i jèɲògòn ye, i ka ale ladon i ko i bè ne ladon cogo min na. 18 Ni a ye i tòɲò fèn dò la, wala ni i ka juru b'a la, i ka o jate ne kun. 19 Ne Paul bè nin sèbèn ni ne yèrè bolo ye, ko ne na o sara. O bèè n'a ta, ne t'a fè k'a fò i ye ko ne ka juru min bè i la, ko o ye i yèrèkun ye. 20 Owò, ne balimakè, ne b'i deli, i ka ne dèmè nin ko la Matigi kosòn. I ka ne dusu suma Krisita la. 21 Ne y'a dòn k'a jèya ko ne bè min ɲini i fè, ko i na o kè. O de kosòn nè ye nin sèbèn k'a ci i ma. Ne y'a dòn ko i n'a kè ka tèmèn ne ka fòlen kan yèrè. 22 I ka so dò labèn ne ye fana, k'a masòrò ne jigi b'a kan ko ne na kòsegin aw fè yen aw ka Ala deliliw barika la. 23 Epafras bè i fo, o ye ne kasola bilaɲògòn ye Krisita Yesu la. 24 Ne baarakèɲògònw Marka ni Arisitarke ni Demas ani Luka fana bè i fo. 25 An Matigi Yesu Krisita ka nèèma ka kè aw fè. |