Marc


1

1 Kibaru Duman min bè Ala Denkè Yesu Krisita ko fò, o daminè filè nin ye. 2 A sèbènnen bè kira Esayi ka kitabu la ko: «A filè, ne bè ne ka ciden ci i ɲè, ka i ka sira labèn. 3 Pèrènkan bè bò kungokolon kònò ko: `A' ye Matigi ka sira labèn, ka a ka sira misènw latilen.' » 4 O cogo la Yuhana y'i jira kungokolon kònò. A tun bè batiseli kè ka mògòw waaju ko u ka nimisa u ka jurumu la ka batise, walisa u ka jurumuw yafa sòrò, 5 Jerusalèmkaw ani Jude jamana mògòw bèè tun bè taa a sègèrè. U tun bè u jò u ka jurumuw la. Yuhana tun bè u batise Jurdèn baji la. 6 Yuhana ka fini tun dilara ni ɲaamè si ye, a cèsirilan tun ye wolo ye. A ka dumuni tun ye ntòn ni wo kònò di ye. 7 A tun bè waajuli kè ko: «Min bè na ne kò, o fanga ka bon ni ne ta ye. Hali ka ne majigin ka a ka sabara juruw foni, ne man kan ni o ye. 8 Ne ye aw batise ji la, nka ale kòni na aw batise Ni Senu de la.» 9 O tuma la Yesu nana ka bò Galile Nazarèti, Yuhana y'a batise Jurdèn baji la. 10 Yesu bòtò ji la, o yòrònin kelen a ye sankolo dayèlèlen ye ka Ni Senu jigintò ye a kan i ko jènèntuban. 11 Kumakan dò bòra sankolo la ko: «I ye ne Denkè kanulen ye, i ko ka di ne ye haali.» 12 O yòrònin bèè Ni Senu ye Yesu ɲòni ka taa kungokolon kònò. 13 A ye tile binaani kè kungokolon kònò. A tun bè kòròbò Sitanè fè yen. A tun bè waraw cèma, mèlèkèw tun bè a mago ɲè. 14 Yuhana bilalen kò kaso la, Yesu taara Galile jamana la. A tun bè Ala ka Kibaru Duman waajuli kè. 15 A tun b'a fò ko: «Waati dafara sa, Ala ka masaya surunyara. A' ye nimisa aw ka jurumuw la ka da Kibaru Duman la.» 16 Yesu taamatò Galile ba kèrè fè, a ye mònnikèla fila ye, olu tun ye Simòn ni a balimakè Andre ye, u tun bè jò filifili la baji la. 17 Yesu y'a fò u ye ko: «A' ye tugu ne la, ne na aw kè mògò ɲininaw ye.» 18 U sinna ka u ka jòw to yen ka tugu Yesu nòfè. 19 A taara ɲèfè dòònin, a ye Zebede denkè fila Yakuba ni Yuhana ye. U tun bè kurun kònò ka u ka jòw kala. 20 O yòrònin bèè Yesu ye u wele. U ye u fa Zebede ni baarakèlaw to kurun kònò yen ka tugu a la. 21 Yesu ni a ka kalandenw taara Kapèrnaum. Yesu donna Alabatoso kònò lafiɲè don na ka mògòw kalan. 22 U kabakoyara a ka mògò kalan cogo la, k'a masòrò a tun tè u kalan i ko sariya karamògòw, nka a tun bè u kalan ni fanga ye. 23 O waati yèrè la cè jinètò dò tun bè Alabatoso kònò. O pèrènna ko: 24 «I bè mun ɲini an fè, Yesu Nazarètika? I nana an halaki wa? I ye min ye, ne bè o dòn, Ala ka senuma!» 25 Yesu ye jinè kòròfò ko: «I makun ka bò nin cè la.» 26 Jinè ye cè yigiyigi kosèbè, ka kulokanba ci ka bò a la. 27 Mògòw bèè kabakoyara fo u ye ɲògòn ɲininka ko: «Nin ye mun ye? Nin ye kalan kura ye dè! A bè kuma jinèw fè ni fanga ye, olu b'a kan minè.» 28 O yòrònin bèè Yesu tògò bòra Galile jamana yòrò bèè la. 29 Yesu bòlen kò Alabatoso kònò, a ni Yakuba ni Yuhana taara Simòn ni Andre ka so. 30 Simòn muso bange ba dalen tun bè farigan bolo. Yesu selen, u ye o ko fò a ye. 31 A y'i madon o la ka a bolo minè k'a lawuli. Farigan y'a bila. A wulila ka u mago ɲè. 32 Wula fè, tile bilen kò, mògòw taara Yesu sègèrè ni banabaatòw bèè ye ani jinètòw. 33 Dugu kònò mògòw bèè lajèlen tun bè so da la. 34 Minnu tòòròlen tun don bana sifa caman fè, Yesu ye olu kènèya, ka jinèw gèn ka bò mògò caman na. A ma sòn jinèw ka kuma, katuguni u y'a dòn. 35 Sògòma da joona fè sani kènè ka tigè, Yesu wulila. A bòra ka taa kungo kònò yòrò dò la ka Ala deli. 36 Simòn ni a tòɲògònw taara a ɲini. 37 U y'a ye tuma min na, u y'a fò a ye ko: «Mògòw bèè b'i ɲini.» 38 Yesu y'a fò u ye ko: «An ka taa yan dafè duguw la, walisa ne ka waajuli kè o yòròw la fana, k'a masòrò o de ye ne nakun ye.» 39 A tun bè waajuli kè u ka Alabatosow kònò Galile jamana yòrò bèè, ka jinèw gèn ka bò mògòw la. 40 Kunatò dò taara Yesu sègèrè k'i ɲòngiri a kòrò k'a deli ko: «Ni i bè sòn, i bè se ka ne saniya.» 41 A hinè donna Yesu la, a y'a bolo mòònòbò ka maga o cè la k'a fò a ye ko: «Ne sònna. I ka saniya.» 42 O yòrònin bèè kuna ye o cè bila, a saniyara. 43 O kò, Yesu y'a bila ka taa, k'a gèlèya a ma kosèbè ko: 44 «A filè, i kana o ko fò mògò si ye, nka taa i yèrè jira sarakalasebaa la. Musa ye saraka min ko fò, i ka o bò i saniyali kosòn. O na kè seereya ye i kènèyali ko la.» 45 Nka o cè taara ka bin o welewele dali la, fo Yesu tun tè se k'a yèrè jira mògòw la dugu si kònò tun, nka a tora kènèma kungo kònò. Mògòw bòra yòrò bèè la ka taa a sègèrè yen.



2

1 Tile dama tèmènnen kò, Yesu taara Kapèrnaum ko kura. Mògòw y'a mèn ko a bè so kònò. 2 Mògò caman y'u lajè fo u ma jò yòrò sòrò, hali so da la. Yesu ye Ala ka kuma fò u ye. 3 O tuma la mògò dòw nana ni cè fanfilasalen dò ye, o tun bè cè naani bolo. 4 U ma se ka gèrè Yesu la jama kosòn minkè, Yesu tun bè bon min kònò, u ye o so sanfèla wòròn ka cè fanfilasalen ni a ka dalan lajigin o wo fè. 5 Yesu ye o mògòw ka dannaya ye minkè, a y'a fò cè fanfilasalen ye ko: «Ne denkè, i ka jurumuw yafara i ma.» 6 Sariya karamògò minnu sigilen tun bè yen, olu tun bè miiri u yèrèw kònòw ko: 7 «Mun na nin cè bè kuma ten? A bè Ala tògò tiɲè. Jòn bè se ka jurumuw yafa Ala kelen kò?» 8 O yòrònin bèè Yesu ye u ka miirili dòn, a ko: «Mun y'a to aw bè o kow miiri aw kònò? 9 Nin kuma fila la, jumèn fòli ka nògòn? K'a fò cè fanfilasalen ye ko: `I ka jurumuw yafara i ma,' wala k'a fò ko: `Wuli ka i ka dalan ta ka taama'? 10 Nka walisa aw k'a dòn ko fanga bè Mògò Denkè fè k'a to dugukolo kan ka jurumuw yafa,» a y'a fò o cè fanfilasalen ye ko: 11 «Ne b'a fò i ye, wuli ka i ka dalan ta ka taa so.» 12 O cè wulila ka a ka dalan ta ka bò yen ka taa u bèè ɲè na. U bèè kabakoyara kosèbè ka Ala bonya k'a fò ko: «An ma nin bòɲògònko ye abada.» 13 Yesu bòra yen ka taa Galile ba da la ko kura. Jamaba taara a sègèrè, a ye u kalan. 14 A tèmèntò, a ye Alifè denkè Levi sigilen ye faama wari minè yòrò la. Yesu y'a fò a ye ko: «Tugu ne la.» Levi wulila ka tugu a nòfè. 15 Ka Yesu to dumuni la Levi ka so, faama wari minèbaa caman ni jurumutò caman fana ye u sigi dumuni la Yesu ni a ka kalandenw fè, sabu u tun ka ca, u tugulen tun bè Yesu nòfè. 16 Farisiènw ka sariya karamògò dòw y'a ye ko Yesu ni faama wari minèbaaw ni jurumutòw bè dumuni kè ɲògòn fè minkè, u y'a fò Yesu ka kalandenw ye ko: «Mun y'a to a ni faama wari minèbaaw ni jurumutòw bè dumuni kè ɲògòn fè?» 17 Yesu ye o kuma mèn minkè, a ko: «Mògò minnu ka kènè, olu mago tè furakèla la, banabaatòw de mago b'a la. Ne ma na mògò tilennenw wele, fò jurumukèlaw.» 18 Yuhana Batiselikèla ka kalandenw ni Farisiènw tun bè sun. Mògò dòw nana ka Yesu ɲininka ko: «Mun na Yuhana ka kalandenw ni Farisiènw ka kalandenw bè sun, k'a sòrò e ka kalandenw tè sun?» 19 Yesu ye u jaabi ko: «Kòɲòcè tòɲògònw bè se ka sun ka u ni kòɲòcè to ɲògòn fè wa? Ka u ni kòɲòcè to ɲògòn fè, u tè se ka sun. 20 Nka donw bè na, kòɲòcè na bòsi u la. Ni o donw sera, u na sun. 21 «Mògò si tè fini kunkurun kura bari fini kòròlen na. Ni o kèra, kunkurun kura bè fini kòrò sama k'a fara. A fara da bè bonya kosèbè. 22 Mògò si tè diwèn kènè kè foroko kòròw kònò. Ni o kèra, diwèn na forokow fara. Diwèn ni forokow fila bèè na tiɲè. Nka diwèn kènè bè kè foroko kuraw de kònò.» 23 Lafiɲè don dò la Yesu tèmènna ɲòforo dòw fè. A ka kalandenw taamatò ye sira da la ɲòtinsan dòw tigè. 24 Farisiènw y'a fò Yesu ye ko: «A filè, ko min dagalen tè lafiɲè don na, mun na i ka kalandenw bè o kè?» 25 Yesu ye u jaabi ko: «Kòngò ye Dawuda ni a nòfè mògòw minè tuma min na, k'a sòrò dumunifèn tun tè u fè, a ye min kè, aw ma o kalan wa? 26 A donna Ala ka so kònò sarakalasebaaw kuntigi Abiyatar tile la ka jirali nbuurukun dòw dun, ka dò di a nòfè mògòw fana ma. O dumuni dagalen tun tè mògò si ye, fò sarakalasebaaw dama.» 27 O kò, Yesu y'a fò u ye ko: «Lafiɲè don kèra mògò de kosòn, mògò ma kè lafiɲè don kosòn. 28 O de kosòn, Mògò Denkè ye lafiɲè don fana Matigi ye.»



3

1 Yesu donna Alabatoso kònò ko kura. Cè bolojalen dò tun bè yen. 2 Minnu tun bè yen, u tun bè Yesu kòlòsi k'a filè ni a na o cè kènèya lafiɲè don na, walisa u k'a sendon sababu sòrò. 3 Yesu y'a fò o cè bolojalen ye ko: «Wuli k'i jò mògòw cèma.» 4 O kò, a y'a fò u ye ko: «A dagalen bè ka ko ɲuman kè lafiɲè don na wa, wala ka ko jugu kè? Ka mògò kisi wa, wala ka mògò faga?» U ye u makun. 5 Yesu diminnen ye a ɲè yaala ka u filè, a ɲènasisilen tun don u ka dusukun gèlèya kosòn. A y'a fò o cè ye ko: «I bolo mòònòbò.» A y'a mòònòbò, a bolo kènèyara. 6 O yòrònin bèè Farisiènw bòra ka taa, u ni Hèròde ka mògòw ye ɲògòn ye ka cogo ɲini Yesu fagali ko la. 7 Yesu ni a ka kalandenw bòra yen ka taa Galile ba da la. Jamaba tugura a nòfè. Dòw bòra Galile jamana ni Jude jamana la, 8 ani Jerusalèm ni Idumè jamana ni Jurdèn ba kòfè jamanaw ani Tir ni Sidòn kèrèfè duguw. O jamaba taara Yesu sègèrè, katuguni u tun ye a ka ko kèlenw kibaru mèn. 9 Yesu y'a fò a ka kalandenw ye ko u ka kurun misèn bila a ye walisa jama kana a ɲòni k'a degun. 10 A ye mògò caman kènèya. O de kosòn banabaatòw bèè tun bè girin a nòfè walisa u ka maga a la. 11 Jinèw y'a ye tuma min na, u tun bè bin a sen kòrò ka pèrèn ko: «I ye Ala Denkè ye!» 12 Nka ale yèrè ye min ye, a y'a gèlèya u ma ko u kana o fò mògò si ye. 13 O kò, Yesu yèlènna kulu kan ka a sagola mògòw wele. U taara a fè. 14 A ye tan ni fila ɲènatòmò ka to a fè ani ka u ci ka taa waajuli kè. 15 A ye fanga di u ma ka jinèw gèn ka bò mògòw la. 16 A ye tan ni fila minnu ɲènatòmò, olu filè ninnu ye: 17 Simòn (Yesu ye o wele Pièrè), ani Zebede denkè fila Yakuba ni Yuhana (Yesu ye olu wele Boanèrjès, o kòrò, u ka fari i ko sanpèrèn), 18 ani Andre, ni Filipe ani Bartèlèmi ni Matiyu ani Tòma ni Alifè denkè Yakuba, ani Tade ni Simòn Zelote 19 ani Juda Isikariòti, o de ye Yesu don bolo la. 20 O kèlen kò, Yesu jiginna so dò kònò. Jamaba y'u lajè ko kura fo a ni a ka kalandenw ma se ka dumuni kè yèrè. 21 A so mògòw ye o kibaru mèn minkè, u ye sira minè ko u bè taa a minè. U ko: «A hakili wulila.» 22 Sariya karamògò minnu nana ka bò Jerusalèm, olu ko: «Bèlzebul b'a la, a bè jinèw gèn ka bò mògòw la jinèw kuntigi de barika la.» 23 O fòlen, Yesu ye u wele ka ntalen da u ye ko: «Sitanè bè se ka Sitanè gèn cogo di? 24 Masaya o masaya, ni a fan kelen wulila a fan dò kama, o masaya bè tiɲè. 25 So o so, ni a ka mògòw wulila ɲògòn kama, o so tèna se ka sigi. 26 Ayiwa, ni Sitanè wulila a yèrè kama, a ka masaya tilalen don, a tè se ka sigi, nka o masaya na ban. 27 «Mògò si tè se ka don cè barikama ka so kònò ka a bolofènw cè, ni a ma o cè barikama siri fòlò. Nka n'a y'a siri tuma min na, a bè se ka so kònò fènw bèè cè. 28 «Tiɲè la ne b'a fò aw ye, mògòw ka jurumuw ani u ka Ala tògò tiɲèni kow bèè bè se ka yafa u ma. 29 Nka mògò min mana Ni Senu tògò tiɲè, o tèna yafa a ma, a ka jurumu bè to a kun badaa-badaa.» 30 Yesu y'o fò katuguni u ko: «Jinè b'a la.» 31 Yesu ba ni a balimakèw nana ka u jò kènèma, ka mògò bila ka Yesu wele. 32 Mògò caman sigilen tun bè Yesu kòrò ka a lamini. Dòw y'a fò a ye ko: «I ba ni i balimakèw filè kènèma. U b'i ɲini.» 33 Yesu y'u jaabi ko: «Jòn ni jòn ye ne ba ni ne balimakèw ye?» 34 O kò, a ye a lamini mògò sigilenw filè, a ko: «Ne ba ni ne balimakèw filè yan. 35 Mògò o mògò bè Ala sago kè, o de ye ne balimakè ni ne balimamuso ani ne ba ye.»



4

1 Yesu ye mògò kalan daminè ko kura Galile ba da la. Jamaba y'u lajè a fè, fo a donna kurun dò kònò k'i sigi. Kurun tun bè ji kan, jama bèè tun bè gele kan ba da la. 2 A tun bè u kalan fèn caman na ni ntalenw ye. A y'a fò u ye a ka kalan na ko: 3 «A' ye lamènni kè. Cè dò bòra ka taa serili kè. 4 Ka a to serili la, a ka kisè dòw binna sira da la, kònòw nana olu sogin. 5 Kisè dòw binna farama yòrò la, bògò mugu bèrè tun tè yen. Olu falenna joona, katuguni bògò tun man ca yen. 6 Tile gannen, u fòsònfòsònna ka ja, k'a masòrò dili bèrè tun tè u la. 7 Kisè dòw binna èòniw cèma. Íòniw wulila ka u degun, u ma den. 8 Kisè dòw binna dugukolo ɲuman la, olu falenna ka bonya ka kisè caman kè. Dò ye a ɲògòn bisaba kè, dò biwòòrò, dò kèmè.» 9 Yesu y'a fò u ye ko: «Tulo bè min fè ka lamènni kè, o ka lamènni kè dè.» 10 Yesu mabòlen jama la, a kèrèfè mògòw ni kalanden tan ni fila y'a ɲininka o ntalen kòrò la. 11 A y'u jaabi ko: «Ala ka masaya gundow dònniya dira aw de ma, nka minnu bè kènèma, fèn bèè bè fò olu ye ntalenw de la, 12 walisa `U filèli kètò k'a filè, nka u kana a ye. U mènni kètò k'a mèn, nka u kana a faamu. N'o tè, u na u cogo yèlèma ka u ɲè sin Ala ma, Ala na yafa u ma.' » 13 O kò, Yesu ye u ɲininka ko: «Aw ma nin ntalen faamu wa? Aw dun na ntalen tòw bèè faamu cogo di? 14 Serilikèla bè Ala ka kuma de seri. 15 Dòw ye sira da yòrò ye, kuma serila yòrò min na. O mògòw ye o kuma mèn minkè, o yòrònin bèè, Sitanè bè na ka o kuma serilen bò u kònò. 16 O cogo la farama yòrò taw ye minnu ye, olu bè o kuma mèn k'a minè joona ni ɲagali ye. 17 Nka dili tè u la, u tè mèn a la. Ni u degunna, wala ni mògòw bè tugu u nòfè ka u tòòrò o kuma kosòn, u bè sin ka kunnatiɲè. 18 Íòniw cèma taw ye minnu ye, olu bè o kuma mèn, 19 nka nin diɲè hami kow ni nafolo lafilibanciya ani fèn wèrèw nege bè o kuma degun, fo a tè den. 20 Dugukolo ɲuman taw ye minnu ye, olu bè o kuma mèn k'a minè ka den. Dò bè a ɲògòn bisaba kè, dò biwòòrò, dò kèmè.» 21 O kò, Yesu y'a fò u ye ko: «Mògò bè lanpa mana ka minèn dò biri a da la wala k'a bila dalan dò jukòrò wa? A t'a sigi fèn dò kan wa? 22 Foyi dogolen tè min tèna bò kènè kan. Gundo si tè ni a tèna dòn. 23 Tulo bè min fè ka lamènni kè, o ka lamènni kè dè.» 24 Yesu y'a fò u ye ko kura ko: «Aw bè ko min mèn, a' ye aw cogo dòn o la. Aw bè tòw ta suma ni minèn min ye, aw ta na suma ni o minèn yèrè de ye, dò na fara aw ta kan. 25 Fèn bè min bolo, dò na di o ma ka fara a ta kan, nka fèn tè min bolo, hali o dòònin min b'a bolo, o na bòsi a la.» 26 Yesu y'a fò tun ko: «Ala ka masaya bòlen bè ko min fè, o filè. Cè dò bè serili kè a ka foro la. 27 Ka a to sunògò la su fè ka wuli tile fè don o don, kisèw bè falen ka bonya k'a sòrò a ma a cogo dòn. 28 Kisè bè falen ka bò duguma ka sun sòrò, tinsan bè bò sun na ka kisè kosèbè. 29 A mana kògò, cè bè a kan ni a ka wòlòsò ye, k'a masòrò suman tigè tuma sera.» 30 Yesu y'a fò tun ko: «An bè se ka Ala ka masaya kèɲè ni mun ye? An na ntalen jumèn da ka a ko jira? 31 A bòlen bè mutarde kisè fè. Ni i bè a seri duguma, a ka dògò ni dugukolo kan kisè serita tòw bèè ye. 32 Nka a serilen kò, a bè falen ka bonya ka tèmèn nakò ɲugu tòw bèè kan. A bolow bè bonya fo kònòw bè se ka u ka ɲaaw da a suma la.» 33 Yesu ye mògòw kalan ni o bòɲògònko ntalen caman ye. A lamènbaaw tun bè se ka min faamu, a tun bè u kalan ka kèɲè ni o ye. 34 A tun tè kuma u fè ni ntalenw tè. Ni a ni a ka kalandenw tun bè u dan na, a tun bè o ntalenw bèè kòrò fò olu ye. 35 O don yèrè wula da fè, Yesu y'a fò a ka kalandenw ye ko: «An ka taa ba kò.» 36 U ye jama labila. Yesu tun bè kurun min kònò, a ka kalandenw taara n'a ye o kònò. Kurun dòw fana taara a fè. 37 Fiɲèba wulila, jikuruw tun bè bin kurun kònò fo kurun tun bè ɲini ka fa ji la. 38 Yesu tun bè sunògò kurun kòfèla la, a kun dalen tun bè kunkòrò dalan kan. A ka kalandenw y'a kunun k'a fò a ye ko: «Karamògò, an tò to filè ji la, i tè o jate fèn ye wa?» 39 Yesu kununna ka fiɲè kòròfò k'a fò baji ye ko: «I mada ka sumaya.» O fòlen, fiɲè jòra, ji madara. 40 O kò, Yesu y'a fò a ka kalandenw ye ko: «Mun na aw siranna? Mun y'a to dannaya tè aw fè?» 41 Nka u siranna kosèbè k'a fò ɲògòn ye ko: «Nin cè ye jòn ye, fo fiɲè ni ji b'a kan minè?»



5

1 O kò, Yesu ni a ka kalandenw sera Galile ba kò, Gadarakaw ka jamana la. 2 Yesu bòlen kò kurun kònò, o yòrònin bèè, cè jinètò dò bòra kaburudo dò la ka na a kunbèn. 3 O cè sigi yòrò tun ye kaburudo de ye. Mògò si tun tè se ka a siri, hali ni nègèjòlòkò ye. 4 A tun bè don nègè la siɲè caman ka siri ni nègèjòlòkòw ye, nka a tun bè o jòlòkòw tigè ka a sennanègèw kari. Mògò si tun ma se k'a kolo. 5 A tun bè yaalayaala kaburudo la ani kuluw kan su fara tile kan. A tun bè pèrèn ka a yèrè jogin ni kabakurunw ye. 6 A ye Yesu ye k'a to yòrò jan minkè, a bolila ka taa i ɲòngiri a kòrò, 7 ka pèrèn kosèbè ko: «I bè mun ɲini ne fè, Yesu, Ala Kòròtalenba Denkè? Ne b'i deli Ala kosòn, i kana ne tòòrò.» 8 A ye o kuma fò katuguni Yesu tun y'a fò ko jinè ka bò o cè la. 9 O tuma la Yesu y'a ɲininka ko: «I tògò bè di?» A y'a jaabi ko: «Ne tògò ko jamaba, sabu an ka ca.» 10 A y'a deli kosèbè ko a kana u gèn ka bò o jamana la. 11 Ayiwa, lèkuluba tun bè dumuni la kulu kèrè la. 12 O tuma la jinèw ye Yesu deli ko: «An bila ka taa don nin lèw la.» 13 Yesu sònna. O yòrònin bèè, jinèw bòra o cè la ka taa don lèw la. Lèkulu bèè girinna ka jigin kulu jiginjigin jugu fè ka don baji la, u sara. O lèw tun bè waa fila ɲògòn bò. 14 O lègènnaw bolila ka taa o kibaru fò dugu kònò ani a dafè bugufyèw la. Mògòw bòra ka taa o ko kèlenw filè. 15 U selen Yesu yòrò, u ye o jinètò sigilen ye, finiw tun b'a kan na, a hakili sigilen tun don. Jinè caman tun bè cè min na, o yèrè tun don. U siranna. 16 Ko min kèra jinètò ni o lèw ko la, o yebaaw ye o lakali o mògòw ye. 17 O tuma la u binna Yesu delili la ko a ka taa ka bò u ka jamana la. 18 Yesu dontò kurun kònò, o jinètò kòrò y'a deli ko a b'a fè ka to a fè. 19 Yesu ma sòn, nka a y'a fò a ye ko: «I ka taa so. Matigi makarila i la ka koba minnu kè i ye, i ka olu bèè lakali i so mògòw ye.» 20 Yesu ye koba minnu kè o cè ye, a taara ka o kow lakali Dekapole kònò. O ko mènbaaw bèè kabakoyara. 21 Yesu kòseginna kurun kònò. K'a to ba da la, jamaba y'u lajè k'a lamini. 22 Alabatoso kuntigi dò nana, o tògò ko Jayirus. A ye Yesu ye tuma min na, a y'i bin a sen kòrò 23 k'a deli kosèbè ko: «Ne denmuso bè ɲini ka sa. Ne b'i deli, i ka na ka i bolo da a kan walisa a ka kènèya ka ɲènamaya.» 24 Yesu taara a fè. Jamaba tugura Yesu nòfè k'a degun. 25 Muso dò tun bè yen, jolibòbana tun b'a la kabini san tan ni fila. 26 A tòòròla kosèbè furakèla caman fè. A bolofènw bèè banna. A ka bana ma nògòya, nka a tun bè juguya ka ta'a fè. 27 A ye Yesu kibaru mèn. A nana jama cèma Yesu kòfè ka maga a ka finiw la. 28 A tun bè miiri ko: «Ni ne bè se ka maga a ka fini la dòròn, ne na kènèya.» 29 O yòrònin bèè a ka jolibò jòra. A y'a dòn a fari la ko a kènèyara. 30 O yòrònin bèè Yesu y'a dòn a yèrèma ko sebaaya dò bòra a la. A y'i yèlèma jama cèma k'a fò ko: «Jòn magara ne ka finiw la?» 31 A ka kalandenw y'a jaabi ko: «I ɲè b'a la ko jama b'i degun, e dun b'a fò cogo di ko jòni magara i la?» 32 Nka Yesu tun bè a lamini mògòw filè, walisa a ka o kèbaa ye. 33 Ko min kèra o muso la, a yèrè ye o dòn. A sirannen yèrèyèrètò nana i bin Yesu sen kòrò ka o ko bèè fò a ye k'a jèya. 34 Yesu y'a fò a ye ko: «Ne denmuso, i ka dannaya ye i kènèya. I ka taa hèrè la, i kènèyalen ka to.» 35 Ka Yesu to o kuma la, mògò dòw nana ka bò Alabatoso kuntigi ka so, u ko: «I denmuso sara. Mun na i bè karamògò sègèn tun?» 36 Nka Yesu ma a tulo majò u ka kumaw la. A y'a fò Jayirus ye ko: «I kana siran, dannaya kè dòròn.» 37 A ma sòn mògò si ka taa a fè fò Pièrè ani Yakuba ni Yakuba balimakè Yuhana. 38 U selen Alabatoso kuntigi ka so, Yesu ye jamaba ye yen, u tun bè mankan ci ka kasi ka kulo. 39 A donna so kònò k'a fò u ye ko: «Mun na aw bè kasi ten ka mankanba ci? Den ma sa, a bè sunògò.» 40 U ye yèlè bò a ma. O tuma la a ye u bèè labò kènèma. Denmuso tun bè bon min kònò, a donna yen ni den fa ni a ba ani a ka kalanden saba ye. 41 A ye dennin ta a bolo ma k'a fò a ye ko: «Talita, kumi,» o kòrò, «Dennin, ne b'a fò i ye, wuli.» 42 O yòrònin bèè, dennin wulila ka taama. A si tun ye san tan ni fila de ye. U kabakoyara kosèbè haali. 43 Nka Yesu y'a fò u ye k'a gèlèya u ma ko mògò si kana o dòn. O kò, a y'a fò u ye ko u ka dumuni di a ma.



6

1 Yesu bòra o yòrò la, a mòna dugu min na, a taara yen. A ka kalandenw taara a fè. 2 A donna Alabatoso kònò lafiɲè don na k'a daminè ka mògòw kalan. Mògò caman y'a lamèn, u kabakoyara. U tun b'a fò ko: «A ye nin kow sòrò min? Nin hakilitigiya min dira a ma, o ye mun ye? Nin kabakow bè kè a fè cogo di? 3 Mariyama denkè jiridèsèla tè nin ye wa? A balimakèw tè Yakuba ni Jose ni Jude ani Simòn ye wa? A balimamusow tè an fè yan wa?» O miirili de y'a to u ma da a la. 4 Nka Yesu y'a fò u ye ko: «Kira bè bonya yòrò bèè, fò a yèrè ka dugu kònò ani a balimaw cèma ani a yèrè ka so.» 5 Yesu ma se ka kabako si kè yen nin kò, a y'a bolow da banabaatò dòw kan ka u kènèya. 6 U ka dannabaliya ye Yesu kabakoya. O kò, Yesu taara mògòw kalan dafè duguw la. 7 A ye a ka kalanden tan ni fila wele ka u ci fila-fila. A ye fanga di u ma jinèw kan. 8 A ye nin ci fò u ye ko: «Aw kana foyi ta fò bere dama. Aw kana sirafana ta, wala dugutaa minèn. Aw kana wari bila aw kun. 9 Aw ka sabara don aw senw na, nka aw kana dulòki fila don.» 10 A y'a fò u ye ko: «Ni aw ye jatigila sòrò yòrò o yòrò, a' ye to yen fo aw taa tuma ka se. 11 Ni yòrò dò mògòw ma sòn ka aw ladon, wala ka aw lamèn, aw bòtò ka aw senna buguri yuguyugu yen. O na kè seereya ye ka u lasòmi.» 12 Kalandenw taara ka waajuli kè ko mògòw ka nimisa u ka jurumuw la. 13 U ye jinè caman gèn ka bò mògòw la, ka tulu mun banabaatò caman la ka u kènèya. 14 Masakè Hèròde ye Yesu ko mèn, katuguni Yesu tògò tun bòra yòrò bèè la. Mògò dòw tun b'a fò ko: «Yuhana Batiselikèla kununna ka bò suw cèma. O de y'a to a bè se ka o kabakow kè.» 15 Dòw tun b'a fò ko Eli don. Dòw fana ko kira dò don, i ko fòlò kiraw la kelen. 16 Hèròde ye o mèn tuma min na, a ko: «Ne ye Yuhana min kunkolo tigè, o don. A kununna ka bò suw cèma.» 17 Hèròde yèrè tun ye ci bila ka Yuhana minè k'a siri k'a bila kaso la, katuguni Yuhana tun ye a kòròfò ko: «A dagalen tè i ye ka i balimakè muso furu.» 18 Yuhana tun y'o fò, katuguni Hèròde ye a yèrè balimakè Filipe muso Hèròdiyas furu. 19 Hèròdiyas diminna Yuhana kòrò kosèbè, a tun b'a fè k'a faga, nka a tun tè se Hèròde kosòn. 20 Hèròde tun bè siran Yuhana ɲè, k'a masòrò a y'a dòn ko mògò ɲuman senuma don. A y'a mara koɲuman. Ka Yuhana to kuma la, Hèròde hakili tun bè ɲaami, nka a tun ka di a ye ka Yuhana lamèn. 21 Nka Hèròdiyas ye don bènnen sòrò. Hèròde bangedon kunbèn na, Hèròde ye dumuniba dila a ka gòfèrènaman mògòw ye, ani a ka sòròdasi kuntigiw ani Galile mògòbaw ye. 22 Hèròdiyas denmuso donna u yòrò ka dòn kè. O diyara Hèròde ni a ka mògò welelenw ye. O kèlen, masakè y'a fò o denmuso ye ko: «I bè fèn o fèn fè, o fò ne ye, ne na o di i ma.» 23 A y'i kali ko: «Ni i ye fèn o fèn ɲini ne fè, ne na o di i ma, hali ne ka masaya tilancè.» 24 Denmuso bòra ka taa a ba ɲininka ko: «Ne ka mun deli?» A y'a jaabi ko: «Yuhana Batiselikèla kunkolo.» 25 O yòrònin bèè denmuso y'i teliya ka kòsegin masakè yòrò k'a fò a ye ko: «Ne b'a fè i ka Yuhana Batiselikèla kunkolo di ne ma minèn dò kònò sisan.» 26 Masakè ɲènasisira kosèbè, nka a ma sòn k'i ban a ma a ka kalilikan kosòn a ka mògò welelenw ɲè na. 27 O yòrònin bèè a ye sòròdasi kelen ci ko a ka na ni Yuhana kunkolo ye. Sòròdasi bòra ka taa kaso la ka Yuhana kunkolo tigè. 28 A nana n'o ye minèn dò kònò k'a di denmuso ma. O taara a di a ba ma. 29 Yuhana ka kalandenw ye o ko mèn minkè, u taara ka a su ta k'a don kaburu kònò. 30 Cidenw ye mògòw kalan ka ko minnu kè, u kòseginna ka o kow bèè lakali Yesu ye. 31 Nabaaw ni taabaaw tun ka ca, fo Yesu ni a ka kalandenw ma waati sòrò ka dumuni kè. O de kosòn a y'a fò u ye ko: «A' ye na an ka taa kungo kònò yòrò dò la an dan na walisa aw ka lafiya dòònin.» 32 U donna kurun dò kònò ka taa kungokolon yòrò dò la u dan na. 33 Nka mògò caman ye u taatò ye ka u dòn. Olu bolila ka taa yen u sen na ka bò duguw bèè la, ka kòn Yesu ni a ka kalandenw ɲè yen. 34 Yesu bòra kurun kònò tuma min na, a ye o jamaba ye. U hinè donna a la, k'a masòrò o mògòw tun bè i ko gènbaa tè saga minnu la. A y'a daminè ka u kalan fèn caman na. 35 Tile jiginnen kò, Yesu ka kalandenw gèrèla a la k'a fò a ye ko: «Tile bè ɲini ka ban. An bè kungokolon la yan. 36 Mògòw labila walisa u ka taa an dafè bugufyèw la ani duguw kònò ka dumunifèn san.» 37 Yesu ye u jaabi ko: «Aw yèrèw ka dumuni di u ma.» U y'a fò a ye ko: «An ka taa nbuuru san ni wari dèɲè kèmè fila ye k'a di u ma wa?» 38 Yesu y'a fò u ye ko: «Nbuurukun joli bè aw fè? A' ye taa a lajè.» U taara a filè minkè, u y'a fò a ye ko: «Nbuurukun duuru ani jègè fila.» 39 O kò, Yesu y'a fò u ye ko u ka jama lasigi kulu-kulu bin kènè kan. 40 U ye u sigi kèmè-kèmè ni biduuru-duuru. 41 O kò, Yesu ye o nbuurukun duuru ni jègè fila ta ka a ɲè kòròta san fè ka barika da Ala ye. O kèlen, a ye o nbuurukunw karikari ka u di a ka kalandenw ma ko u ka u sigi mògòw kòrò. A ye jègè fila fana tila u bèè cè. 42 U bèè ye dumuni kè k'u fa. 43 Nbuuru kunkurunw ni jègè minnu tora, kalandenw ye o cè ka segi tan ni fila fa. 44 O nbuuru dunbaaw tun ye cè waa duuru de ye. 45 O yòrònin bèè, Yesu y'a fò a ka kalandenw ye k'a gèlèya ko u ka don kurun kònò ka ba tigè a ɲè ka taa Bètisayida, sani a yèrè ka jama labila. 46 A ye u labila minkè, a taara ka Ala deli kulu dò kan. 47 Su kolen, kurun tun sera ba cèmancè la, Yesu kelen tun bè gele kan. 48 A y'a ye ko a ka kalandenw tòòròlen tun bè jufa bere fè, katuguni fiɲè tun bè u kunbèn. Donon kasi tuma la, Yesu taamana ji kan ka taa a ka kalandenw yòrò. A tun bèna tèmèn u kan. 49 U y'a taamatò ye ji kan minkè, a tun bè u kònò ko mògò ja dò don. U kulola, 50 k'a masòrò u bèè ɲè tun b'a la, u ja tigèra. O yòrònin kelen Yesu kumana u fè ko: «A' ye aw ja gèlèya, ne don. Aw kana siran.» 51 O kò, a donna kurun kònò u fè, fiɲè jòra. A ka kalandenw kabakoyara kosèbè haali, 52 katuguni kabako min kèra nbuurukunw ko la, u ma o faamu. U hakili gerennen tun don. 53 Yesu ni a ka kalandenw ye ba tigè ka se gele ma Jenèsarèti jamana la ka u ka kurun bèlèn yen. 54 U bòlen kurun kònò, o yòrònin bèè mògòw ye Yesu dòn. 55 U ye o jamana bèè boliboli. Ni u y'a mèn ko a bè yòrò o yòrò, u ye banabaatòw ni u ka dalanw ta ka taa a sègèrè yen. 56 Yesu taara yòrò o yòrò, dugubaw wo, dugu misènw wo, bugufyèw wo, mògòw tun bè na ni banabaatòw ye sugufyèw la, k'a deli ko a k'a to u ka maga a ka fini dawolo dama la. Mògò minnu magara a la, olu bèè kènèyara.



7

1 Farisiènw ni sariya karamògò dòw nana ka bò Jerusalèm k'u lajè Yesu yòrò. 2 U y'a kòlòsi ko a ka kalanden dòw tun bè dumuni kè ni u tègè nògòlen ye, o kòrò, u ma u tègè ko. 3 Farisiènw ni Yahutu tòw kòni tun tè dumuni kè ni u ma u tègè ko kosèbè ka kèɲè ni u bènbaw ka laadaw ye. 4 Ni u kòseginna ka bò sugu la, u tun tè dumuni kè ni u ma ko fòlò. U tun bè laada ko caman wèrèw kè, i n'a fò jifilen koli ni daga ni nsiranègè minènw ani kalaka koli. 5 Farisiènw ni sariya karamògòw ye Yesu ɲininka ko: «Mun na i ka kalandenw tè sòn an bènbaw ka laadaw ma, nka u bè dumuni kè ni u bolo nògòlen ye?» 6 Yesu y'a fò u ye ko: «Esayi ye kiraya min kè aw filankafow ko la, o bènna kosèbè. A y'a sèbèn ko: `Nin mògòw bè ne bonya u da la dòròn, nka u dusukun ka jan ne la haali. 7 U bè ne bato fu. U ka kalan ye mògòw ka ci fòlenw dama ye.' 8 Aw bè Ala ka ci fòlenw bila ka mògòw ka laadaw kè.» 9 O kò, Yesu y'a fò ko: «Cogo kòni bè aw bolo ka ban Ala ka ci fòlenw ma walisa ka aw faw ka laada kow kè! 10 Musa ko: `I ka i fa ni i ba bonya.' A ko fana: `Min ye kuma jugu fò a fa wala a ba ma, o tigi ka kan ka faga.' 11 Nka aw kòni b'a fò ko ni mògò dò b'a fò a fa wala a ba ye ko a tun bè se ka u dèmè ni a ka nafolo min ye, o ye kòrban ye, (o kòrò, a dira Ala ma), 12 aw t'a to a ka a fa ni a ba dèmè tun. 13 O cogo la aw bè Ala ka kuma kè fu ye ni aw ka laadaw ye. Aw bè o bòɲògònko caman kè.» 14 Yesu ye jama wele ko kura k'a fò u ye ko: «Aw bèè ka ne lamèn ka faamuli kè. 15 Fèn o fèn bè don mògò kònò, o si tè se k'a nògò. Nka min bè bò a dusu la, o de b'a nògò. [ 16 Tulo bè min fè ka lamènni kè, o ka lamènni kè dè.]» 17 Yesu bòra jama kòrò ka don so kònò. A ka kalandenw y'a ɲininka o ntalen kòrò la. 18 A y'a fò u ye ko: «Aw fana, aw ma hakili sòrò wa? Aw m'a faamu ko min bè don mògò kònò, o tè se k'a nògò, 19 k'a masòrò o tè don a dusu la, nka a bè don a kònòbara la, o kò, a bè taa banakò?» O kuma de fè Yesu y'a jira ko dumunifèn bèè jèlen don. 20 A y'a fò fana ko: «Min bè bò mògò kònò, o de b'a nògò. 21 Mògò kònò, o kòrò, a dusukun, miirili juguw bèè bè bò yen, ani kakalaya ni sonyali ni mògòfaga 22 ni jatòya ni wasabaliya ni juguya ni mògò lafilili ni janburuya ni keleya ni tògò tiɲèni ni yèrèjiranciya ani hakilintanya. 23 O fèn juguw bèè bè bò mògò kònò, olu de b'a nògò.» 24 O kò, Yesu wulila ka bò o yòrò la ka taa Tir dugu da fè. A donna so dò kònò. A tun t'a fè mògò si k'a dòn ko a bè yen, nka a ma se ka dogo. 25 Muso dò y'a kibaru mèn, jinè tun bè o denmuso la. O muso nana ka i bin Yesu sen kòrò. 26 O muso tun ye dunan ye, a bangera Sirò-Fenisi jamana la. A ye Yesu deli ko a ka jinè gèn ka bò a denmuso la. 27 Nka Yesu y'a fò a ye ko: «A to denw ka dumuni kè k'u fa fòlò, katuguni a tè bèn ka denw ka dumuni fili wuludenw kòrò.» 28 Muso y'a jaabi ko: «Tiɲè don, Matigi, nka wuluden minnu bè tabali kòrò, olu bè denw ka dumuni murumuru dòw dun.» 29 O la Yesu y'a fò a ye ko: «O kuma kosòn i ka kòsegin so, jinè bòra i denmuso la.» 30 A kòseginna so ka a den dalen ye kalaka kan, jinè tun bòra a la. 31 Yesu bòra Tir da fè ka tèmèn Sidòn fè ka Dekapole jamana cètigè ka se Galile ba da la. 32 Mògò dòw taara Yesu sègèrè ni cè sigisigitò tulogeren dò ye ka a deli ko a ka a bolo da o kan. 33 O tuma la Yesu taara ni o cè ye a dan na ka i mabò jama la. A ye a bolonkòniw don o cè tulow rò ka daji tu ka maga a nènkun na. 34 O kò, Yesu ye a ɲè kòròta san fè ka a ninakili sama k'a fò o cè ye ko: «Efata,» o kòrò ko, «Da yèlè.» 35 O yòrònin bèè, cè tulow da yèlèla, a nènjuru fonina, a kumana k'a jèya. 36 Yesu y'a fò u bèè ye k'a gèlèya ko u kana o ko fò mògò si ye, nka a y'a gèlèya u ma cogo o cogo, u ye dò fara u ka welewele dali kan. 37 Mògòw kabakoyara kosèbè, u tun b'a fò ko: «A ka ko kèlenw bèè ka ɲi haali. A b'a to tulogerenw bè mènni kè, bobow bè kuma.»



8

1 O donw la, jamaba y'u lajè ko kura. Dumunifèn tun tè u fè. Yesu ye a ka kalandenw wele k'a fò u ye ko: 2 «Nin mògòw hinè bè ne la, k'a masòrò bi ye u tile saba ye ne fè yan, dumunifèn si tè u fè tun. 3 Ni ne bè u dumunikèbali labila ka taa, u barika na dèsè sira la, k'a masòrò u dòw bò yòrò ka jan.» 4 A ka kalandenw y'a jaabi ko: «An bè se ka dumuni sòrò yòrò jumèn ka ninnu bèè fa kungokolon kònò yan?» 5 Yesu ye u ɲininka ko: «Nbuurukun joli bè aw fè?» U y'a jaabi ko: «Woloèula.» 6 Ayiwa, a ko jama k'i sigi duguma. A ye o nbuurukun woloèula ta ka barika da Ala ye k'u karikari k'u di a ka kalandenw ma, olu k'u tila jama cè. Kalandenw y'u tila jama cè. 7 Jègè misèn dòw tun bè u fè fana. Yesu ye barika da Ala ye olu kosòn k'a fò a ka kalandenw ye ko u ka olu fana tila u cè. 8 Bèè ye dumuni kè k'u fa. Kalandenw ye segi woloèula fa dumuni kunkurun tò tolenw la. 9 O dumunikèlaw tun ye mògò waa naani ɲògòn ye. O kò, Yesu ye u labila. 10 O yòrònin bèè, a ni a ka kalandenw donna kurun dò kònò ka taa Dalmanuta jamana la. 11 Farisiènw taara ka sòsòli daminè Yesu fè. U ko Yesu ka taamashyèn kabakoma dò jira ka bò sankolo la. U ye o fò walisa u ka a kòròbò. 12 Yesu ye a ninakili sama kosèbè k'a fò ko: «Mun na bi mògòw bè kabako ɲini? Tiɲè la ne b'a fò aw ye, kabako si tèna jira u la.» 13 O kò, a bòra u kòrò ka don kurun kònò ko kura ka taa ba kò. 14 Kalandenw tun ɲinèna, u ma dumunifèn ta. Foyi tun tè u fè kurun kònò fò nbuurukun kelenpe. 15 Yesu y'a fò a ka kalandenw ye k'a gèlèya ko: «A' ye hakili sòrò ka aw yèrèw kòlòsi Farisiènw ka buurufunun fèn ni Hèròde ka buurufunun fèn na.» 16 U y'a fò ɲògòn ye ko: «A y'o fò k'a masòrò nbuuru tè an fè.» 17 U tun bè min fò, Yesu ye o dòn. A ye u ɲininka ko: «Mun y'a to aw bè kuma ɲògòn fè ko nbuuru tè aw fè? Hakili tè aw fè ka faamuli kè fòlò wa? Aw hakili gerennen don wa? 18 Ɲè bè aw fè, aw tè yeli kè wa? Tulo bè aw fè, aw tè mènni kè wa? Aw hakili tè to fèn na wa? 19 Ne ye nbuurukun duuru karikari k'u di mògò waa duuru ma tuma min na, aw ye segi joli fa ni o nbuuru kunkurun tò tolenw ye?» U y'a jaabi ko: «Tan ni fila.» 20 «Ne ye nbuurukun woloèula karikari k'u di mògò waa naani ma tuma min na, aw ye segi joli fa ni o nbuuru kunkurun tò tolenw ye?» U y'a jaabi ko: «Woloèula.» 21 Yesu y'a fò u ye ko: «Aw dun tè faamuli kè halibi wa?» 22 U selen Bètisayida, o yòrò la mògò dòw taara Yesu sègèrè ni fiyentò dò ye k'a deli ko a ka maga o la. 23 Yesu ye fiyentò minè a bolo ma, ka taa n'a ye dugu kòfè. A ye daji kè o cè ɲèw la k'a bolo da a kan k'a ɲininka ko: «I bè fèn ye wa?» 24 Fiyentò ye a ɲè kòròta k'a fò ko: «Ne bè mògòw ye i n'a fò jirisunw taamatò.» 25 Yesu ye a bolow da o cè ɲè kan ko kura, a ye filèli kè kosèbè. A kènèyara, a ye fèn bèè ye ka lasaa. 26 Yesu y'a bila ka taa so k'a fò a ye ko: «I kana don dugu kònò.» 27 Yesu ni a ka kalandenw taara Sesare Filipe dafè dugu la. Ka u to sira kan, Yesu ye a ka kalandenw ɲininka ko: «Mògòw b'a fò ko ne ye jòn ye?» 28 U y'a jaabi ko: «Dòw ko Yuhana Batiselikèla. Dò wèrèw ko Eli. Dò wèrèw fana ko kiraw la kelen.» 29 Yesu ye u ɲininka ko: «Nka aw dun, aw yèrèw ɲè na ne ye jòni ye?» Pièrè y'a jaabi ko: «I ye Krisita de ye.» 30 Yesu y'a gèlèya u ma ko u kana o ko fò mògò si ye. 31 O kò, Yesu y'a daminè ka a ka kalandenw kalan k'a fò u ye ko: «Wajibi don Mògò Denkè ka tòòrò kosèbè. Cèkòròbaw ni sarakalasebaaw kuntigiw ani sariya karamògòw ka ban a la. A na faga, tile saba tèmènnen kò, a na kunun.» 32 A ye o fò u ye k'a jèya. Pièrè taara n'a ye kèrè fè k'a daminè k'a kòròfò. 33 Nka Yesu y'i yèlèma ka a ka kalandenw filè ka Pièrè kòròfò ko: «Taa ka bò ne kòrò, Sitanè, katuguni i ka miiriliw tè Ala ka kow la, fò mògòw ka kow.» 34 O kò, Yesu ye jama ni a ka kalandenw wele k'a fò u ye ko: «Ni mògò dò b'a fè ka ne nò minè, o ka ban a yèrè la ka a gengenjiri ta ka tugu ne la. 35 Mògò min b'a fè ka a yèrè ni kisi, o na bònè a la, nka min bè bònè a ni la ne kosòn ani Kibaru Duman kosòn, o de na a ni kisi. 36 A bè mun ɲè mògò ye ka diɲè bèè sòrò, ni a bè bònè a yèrè ni la? 37 Mògò bè se ka a yèrè ni kunmabò ni mun ye? 38 Ni mògò min ye ne ni ne ka kuma maloya kè a la bi mògò jatòw jurumutòw cèma, Mògò Denkè fana na o tigi maloya kè a la ni a nana a Fa nòòrò la ni a ka mèlèkè senumaw ye.»



9

1 Yesu y'a fò u ye tun ko: «Tiɲè la ne b'a fò aw ye ko mògò minnu bè yan, u dòw tèna sa sani u ka Ala ka masaya natò ye ni sebaaya ye.» 2 O kò tile wòòrò, Yesu taara ni Pièrè ni Yakuba ani Yuhana ye kulu jan dò kan u dan na. A cogo yèlèmana u ɲè na. 3 A ka finiw manamanana ka jèya cogo min na, mògò si tè dugukolo kan min bè se ka fèn jèya ka o bò. 4 Kalandenw ye Eli ni Musa ye, olu tun bè kuma Yesu fè. 5 O la, Pièrè kumana k'a fò Yesu ye ko: «Karamògò, an bè yan, o ka ɲi. An ka bugu saba jò, e ta kelen, Musa ta kelen, Eli ta kelen.» 6 A tun ka kan ka min fò, a ma o dòn, katuguni u tun siranna kosèbè. 7 Sankaba dò nana u datugu. Kumakan dò bòra o sankaba la ko: «Nin ye ne Denkè kanulen ye, a' ye a lamèn.» 8 O yòrònin bèè, kalandenw ye u kèrèfèlaw filè, nka u ma mògò si ye tun Yesu kelen kò. 9 U jigintò ka bò kulu kan, Yesu y'a fò u ye k'a gèlèya ko: «Aw ye ko min ye, aw kana o fò mògò si ye sani Mògò Denkè ka kunun ka bò suw cèma tuma min na.» 10 O kuma tora u kònò, u ye ɲògòn ɲininka ko: «Ka kunun ka bò suw cèma, o kòrò ye mun ye?» 11 Kalandenw ye Yesu ɲininka ko: «Mun y'a to sariya karamògòw b'a fò ko Eli ka kan ka na fòlò?» 12 A ye u jaabi ko: «Tiɲè don, Eli ka kan ka na fòlò ka fèn bèè labèn ko kura. Nka mun na a sèbènnen bè ko Mògò Denkè na tòòrò kosèbè, ko u na ban a la? 13 O bèè n'a ta ne b'a fò aw ye ko Eli nana ka ban, mògòw y'a kè u yèrèw sago ye, i ko a sèbènnen bè a ko la cogo min na.» 14 U nalen kò kalanden tòw kòrò, u ye u lamininen ye jamaba fè. Sariya karamògòw tun b'a la ka sòsòli kè kalandenw fè. 15 Mògòw ye Yesu ye minkè, u kabakoyara, u bolila ka taa a fo. 16 Yesu ye a ka kalandenw ɲininka ko: «Aw ni u bè sòsòli kè mun ko la?» 17 Jama la cè kelen y'a jaabi ko: «Karamògò, ne nana i sègèrè ni ne denkè ye, katuguni jinè bobo b'a la. 18 Jinè mana a minè yòrò o yòrò, a b'a fili duguma, kanga bè bò den da la. A b'a ɲinw ɲimi, a fari bè ja. Ne y'a fò i ka kalandenw ye ko u ka jinè gèn ka bò a la, nka u ma se.» 19 Yesu y'a fò u ye ko: «Aw kòni, siya dannabali, ne na to aw fè yan fo tuma jumèn? Ne na aw ka ko muɲu fo tuma jumèn? Na ni i den ye yan.» 20 U taara n'a ye a yòrò. Jinè ye Yesu ye minkè, a ye den yigiyigi kosèbè. A binna duguma ka kolonkolon, kanga bòra a da la. 21 Yesu ye den fa ɲininka ko: «Nin y'a sòrò kabini tuma jumèn?» Den fa y'a jaabi ko: «Kabini a denmisènma. 22 Ko caman jinè y'a bin tasuma la ani ji la walisa a ka a faga. Ni i bè se fèn na, hinè an na ka an dèmè.» 23 Yesu y'a fò a ye ko: «Ni i bè se. Fèn bèè bè se ka kè dannabaa ye.» 24 O yòrònin bèè, cènin fa pèrènna ko: «Ne bè dannaya kè. Na ne dèmè, ka dannabaliya bò ne kònò.» 25 Yesu y'a ye ko jama girinna ka na u kòrò minkè, a ye jinè kòròfò ko: «Jinè bobo tulogeren, ne b'a fò i ye, bò a la. I kana don a la tun abada.» 26 Jinè ye mankan ci ka cènin yigiyigi kosèbè ka bò a la. Cènin tun bè i n'a fò a salen don, fo mògò caman tun ko: «A sara.» 27 Nka Yesu ye cènin bolo minè k'a lawuli. A wulila ka i jò. 28 Yesu donnen so kònò, ka a ni a ka kalandenw to u dan na, u y'a ɲininka ko: «Mun na anw ma se ka o jinè gèn ka bò den na?» 29 Yesu ye u jaabi ko: «Nin jinè sifa tè se ka bò cogo si ni Ala delili tè.» 30 U wulila ka bò yen ka Galile jamana cètigè. Yesu tun t'a fè a yòrò ka dòn, 31 katuguni a tun bè a ka kalandenw kalan k'a fò u ye ko: «Mògò Denkè na don mògòw bolo, u n'a faga. A fagali tile sabanan don, a na kunun.» 32 Nka kalandenw ma o kuma kòrò dòn, u sirannen ma se k'a ɲininka o ko la. 33 U sera Kapèrnaum. Yesu donnen kò so kònò, a ye a ka kalandenw ɲininka ko: «Aw tun bè mun kuma la sira kan?» 34 Nka u ye u makun, sabu u tun bè ɲògòn ɲininka sira kan ko u la jumèn ka bon tòw bèè ye. 35 O tuma la Yesu y'i sigi ka a ka kalanden tan ni fila wele k'a fò u ye ko: «Ni dò b'a fè ka kè ɲè mògò ye, o ka kan ka kè bèè kòmògò ani bèè ka baaraden ye.» 36 A ye denmisèn dò ta k'a jò u cèma, k'a ta a kònkòn na, k'a fò u ye ko: 37 «Mògò o mògò mana nin ɲògòn denmisèn minè koɲuman ne kosòn, o bè ne minè koɲuman. Min bè ne minè koɲuman, o tè ne minè koɲuman, nka a bè ne cibaa de minè koɲuman.» 38 Yuhana y'a fò Yesu ye ko: «Karamògò, an ye cè dò ye, a bè jinèw gèn ka bò mògòw la i tògò la. An y'a fò a ye ko a kana o kè, katuguni a ma kè an dò ye.» 39 Yesu y'a jaabi ko: «Aw kana a bali, katuguni mògò si tè se ka kabako kè ne tògò la, o kò, ka taa kuma jugu fò ne ma joona. 40 Min tè an jugu ye, o ye an ɲin ye. 41 Tiɲè la ne b'a fò aw ye ko mògò o mògò mana jifilen ɲè kelen ji di aw ma k'a min, katuguni aw ye Krisita ta ye, o tigi tèna dèsè o baraji la. 42 «Nin denmisèn minnu bè da ne la, mògò o mògò bè olu dò kunnatiɲè, a tun ka fisa o ma ni kabakurun belebeleba sirila a kan na, k'a fili kògòji la. 43 Ni i bolo bè kè sababu ye ka jurumu lase i ma, a tigè. I bolo kelen tigi ka don ɲènamaya la, o ka fisa i ma i bolo fila tigi ka taa bila jahanama kònò tasuma dufabali la. [ 44 O yòrò la, `u ntumu tè sa, o tasuma tè dufa.'] 45 Ni i sen bè kè sababu ye ka jurumu lase i ma, a tigè. I senkelen tigi ka don ɲènamaya la, o ka fisa i ma i sen fila tigi fililen ye jahanama kònò. [ 46 O yòrò la, `u ntumu tè sa, o tasuma tè dufa.'] 47 Ni i ɲè bè kè sababu ye ka jurumu lase i ma, a wògòbè. I ɲè kelen tigi ka don Ala ka masaya la, o ka fisa i ma i ɲè fila tigi fililen ye jahanama kònò. 48 O yòrò la, `u ntumu tè sa, o tasuma tè dufa.' 49 Mògòw bèè na kòròbò tasuma fè, i ko kògò bè kè sarakaw bèè la cogo min na. 50 «Kògò ka ɲi, nka ni a timiya bòra a la, i na mun kè ka a timiya tun? Kògò ka kè aw yèrèw la, hèrè ka kè aw ni ɲògòn cè.»



10

1 Yesu wulila ka bò yen ka taa Jude jamana la ani Jurdèn ba kòfè. Jama nana u lajè a kòrò tun. A ye u kalan i ko a delila ka a kècogo min na. 2 Farisièn dòw gèrèla a la k'a ɲininka walisa u ka a dakòròbò, u ko: «A dagalen bè cè ka a muso furu sa wa?» 3 Yesu ye u jaabi ko: «Musa ye mun ci fò aw ye?» 4 U ko: «Musa sònna an ka furu sa sèbèn kè, o kò ka muso bila.» 5 Yesu y'a fò u ye ko: «Musa ye o ci sèbèn aw ye aw ka dusukun gèlèya de kosòn. 6 Nka kabini diɲè daminè, Ala ye u kè cè ni muso ye, 7 o de kosòn cè na a fa ni a ba bila ka nòrò a muso la. 8 U fila na kè farisogo kelen ye. O cogo la u tè fila ye tun, fò kelen. 9 Ala ye min kè kelen ye, mògò si kana o fara.» 10 U donnen so kònò, kalandenw ye Yesu ɲininka furu sa ko la tun. 11 A y'a fò u ye ko: «Mògò o mògò bè a muso furu sa ka dò wèrè furu, o bè jatòya kè. 12 O cogo la ni muso bè a cè bila ka furu cè wèrè ma, o bè jatòya kè.» 13 Mògòw nana Yesu yòrò ni denmisèn dòw ye walisa a ka maga u la, nka kalandenw ye u kòròfò. 14 Yesu ye o ye minkè, a diminna. A y'a fò a ka kalandenw ye ko: «A' y'a to denmisènw ka na ne ma, aw kana u bali, katuguni Ala ka masaya ye olu bòɲògònkow de ta ye. 15 Tiɲè la ne b'a fò aw ye, mògò min tè Ala ka masaya minè i ko denmisèn, o tèna don a la fewu.» 16 O kò, a ye denmisènw ta a kònkòn na, ka a bolow da u kan ka dubaw kè u ye. 17 Yesu taatò sira fè, cè dò bolila ka i ɲòngiri a kòrò, k'a ɲininka ko: «Karamògò ɲuman, ne ka kan ka mun kè walisa ne ka ɲènamaya banbali sòrò?» 18 Yesu y'a fò a ye ko: «Mun na i bè ne wele ɲuman? Ɲuman si tè, Ala kelen kò. 19 I bè ci fòlenw dòn ko: `I kana mògò faga. I kana jatòya kè. I kana sonyali kè. I kana nkalon da i mògò ɲògòn na. I kana mògò si tòɲò. I ka i fa ni i ba bonya.' » 20 O cè ko: «Karamògò, ne ye o ci fòlenw bèè mara kabini ne denmisènma.» 21 Yesu y'a mafilè ni kanuya ye k'a fò a ye ko: «Fèn kelen b'i jè. Taa i bolofènw bèè feere ka o wari di faantanw ma. O tuma la, i na nafoloba sòrò sankolo la. O kò, na tugu ne la.» 22 O cè ɲè kumuna o kuma kosòn. A ɲènasisilen taara, k'a masòrò nafoloba tun b'a fè. 23 Yesu ye a kèrèw filè, k'a fò a ka kalandenw ye ko: «Nafolobatigi donni ka gèlèn Ala ka masaya la kosèbè.» 24 Kalandenw kabakoyara o kuma kosòn, nka Yesu y'a fò u ye tun ko: «Ne denw, a ka gèlèn kosèbè ka don Ala ka masaya la. 25 Ɲaamè donni ka nògòn miseli wo fè ka tèmèn nafolobatigi donni kan Ala ka masaya la.» 26 Kalandenw kabakoyara fo ka dama tèmèn. U tun b'a fò ɲògòn ye ko: «A. O tuma la jòni dun bè se ka kisi?» 27 Yesu ye u filè k'a fò u ye ko: «O tè se ka kè mògòw fè, nka o bè se ka kè Ala fè, katuguni Ala tè kèɲè foyi la.» 28 Pièrè y'a fò a ye ko: «A filè, an jèna fèn bèè kò ka tugu i la.» 29 Yesu y'a jaabi ko: «Tiɲè la ne b'a fò aw ye ko mògò o mògò jèna a ka so kò, wala a balimakèw, wala a balimamusow, wala a ba, wala a fa, wala a denw, wala a ka forow kò, ne ni Kibaru Duman kosòn, 30 o tigi na olu bèè ɲògòn kèmè-kèmè sòrò nin diɲè la, sow ni balimakèw ni balimamusow ni baw ni denw ani forow, ka tòòrò fana sòrò. A na ɲènamaya banbali sòrò sini. 31 Nka ɲè mògò caman na kè kòmògòw ye, kòmògò caman na kè ɲè mògòw ye.» 32 U tun bè sira kan ka taa Jerusalèm. Yesu tun bè a ka kalandenw ɲèfè, kalandenw hakili ɲaaminen tun don. U nòfè mògòw sirannen tun don. Yesu taara ni a ka tan ni fila ye u dan na ko kura. Ko min bèna kè a la, a y'a daminè ka o fò u ye. 33 A y'a fò u ye ko: «An taatò filè Jerusalèm, Mògò Denkè na don sarakalasebaaw kuntigiw ani sariya karamògòw bolo yen. U na a jalaki ko a ka kan ni saya ye k'a don Ala dònbaliw bolo. 34 Olu na yèlè bò a ma ka daji tu a kan k'a bugò ni gèɲè ye k'a faga. A tile sabanan don, a na kunun.» 35 Zebede denkèw Yakuba ni Yuhana gèrèla Yesu la k'a fò a ye ko: «Karamògò, an bèna fèn min deli i fè, an b'a fè i ka o kè an ye.» 36 Yesu ye u ɲininka ko: «Aw b'a fè ne ka mun kè aw ye?» 37 U y'a jaabi ko: «I ka sòn an kelen ka sigi i kinin fè, kelen ka sigi i numan fè i ka masaya nòòròma la.» 38 Nka Yesu y'a fò u ye ko: «Aw bè fèn min deli, aw tè o dòn. Ne bèna minni kè tòòrò jifilen min na, aw bè se ka minni kè o la wa? Ne bèna batise cogo min na, aw bè se ka batise ten wa?» 39 U y'a jaabi ko: «An bè se.» Yesu y'a fò u ye ko: «Ne na minni kè jifilen min na, tiɲè don, aw na minni kè o la. Ne na batise cogo min na, aw fana na batise ten, 40 nka ka sigi ne kinin ni ne numan fè, ne tè o dibaa ye. Ala ye o yòròw labèn minnu ye, u na di olu de ma.» 41 Kalanden tò tan y'o mèn minkè, olu diminna Yakuba ni Yuhana kòrò. 42 O la, Yesu ye u bèè wele k'a fò u ye ko: «Aw y'a dòn ko minnu bè jate kuntigiw ye siyaw kun na, olu bè u mara ni kuntigiya ye. Mògòbaw bè u fanga jira u la. 43 Nka a tèna kè ten aw cèma. Ni dò b'a fè ka kè mògòba ye aw cèma, o ka kè tòw ka baaraden ye. 44 Ni dò b'a fè ka kè aw cèma ɲè mògò ye, o ka kè tòw ka jòn ye. 45 Katuguni Mògò Denkè ma na mògòw ka baara kè a ye, nka a nana ka baara kè mògòw ye, ka a yèrè ni di ka kè mògò caman kunmabò sara ye.» 46 U sera Jeriko. Yesu ni a ka kalandenw ani jamaba bòtò Jeriko, fiyentò dò sigilen tun bè sira da la ka saraka deli. O tun ye Timè denkè Bartimè ye. 47 A y'a mèn ko Yesu Nazarètika don minkè, a pèrènna k'a fò ko: «Dawuda Bònsòn Yesu, makari ne la.» 48 Mògò caman y'a kòròfò ko a ka i makun, nka a tun bè dò fara a ka pèrènni kan ko: «Dawuda Bònsòn, makari ne la.» 49 Yesu y'i jò ko u ka a wele. U ye fiyentò wele k'a fò a ye ko: «I hakili sigi. Wuli, a b'i wele.» 50 A y'a ka dulòki fili k'i pan ka gèrè Yesu la. 51 Yesu y'a ɲininka ko: «I b'a fè ne ka mun kè i ye?» Fiyentò y'a jaabi ko: «Karamògò, ne ka yeli kè.» 52 Yesu y'a fò a ye ko: «Taa, i ka dannaya ye i kènèya.» O yòrònin bèè a ye yeli kè, a tugura Yesu nòfè sira la.



11

1 U surunyalen Jerusalèm ka se Bètèfajè ni Bètani, Oliviye kulu kèrè fè, Yesu ye a ka kalandenw la fila ci ka taa u ɲè, 2 k'a fò olu ye ko: «A' ye taa aw ɲèfè dugu la. Aw dontò dugu kònò, aw na faliden dò sirilen sòrò yen, mògò si ma yèlèn min kan fòlò. A' ye o foni ka na n'a ye yan. 3 Ni mògò dò ye aw ɲininka ko mun na aw b'a foni, aw k'a fò o ye ko, `Matigi mago b'a la, ko a n'a kòsegin i ma sisan.' » 4 U taara ka faliden sirilen ye bòlòn da la, u y'a foni. 5 Mògò minnu tun bè yen, olu dòw ye u ɲininka ko: «Mun y'a to aw bè nin faliden foni?» 6 Yesu tun ye min fò u ye, u ye olu jaabi ni o ye. O mògòw sònna u ka taa n'a ye. 7 U taara ni faliden ye Yesu yòrò. U ye u ka finiw da a kan, Yesu yèlènna a kan. 8 Mògò caman ye u ka finiw fènsè sira kan. Dòw fana ye fura kènèw tigè ka olu fènsè sira kan. 9 U taatò, Yesu ɲèfè mògòw ani a kòfè mògòw tun bè pèrèn ko: «Ala tanu! Min natò filè Matigi tògò la, o ye dubaden ye! 10 An fa Dawuda ka masaya min natò don, Ala ka duba o ye. Tanuli ka kè Ala ye sanfè yòrò kòròtalenbaw la.» 11 Yesu donna Jerusalèm ka taa Alabatosoba kònò k'a fan bèè filè. O kò, a ni a ka kalandenw bòra ka taa Bètani, katuguni fitiri donda tun sera ka ban. 12 O dugusajè, u bòtò Bètani, kòngò ye Yesu minè. 13 K'a to yòrò jan, a ye torosun dò ye, fura tun b'a la. A taara a filè yala ni a bè den sòrò o la, nka a selen jirisun kòrò, a ma foyi ye o la fura kò, k'a masòrò toro den tuma tun ma se fòlò. 14 O la, Yesu y'a fò torosun ye ko: «Mògò si tèna i den dun tun abada.» A ka kalandenw y'o mèn. 15 U sera Jerusalèm tuma min na, Yesu donna Alabatosoba kònò. Minnu tun bè sannifeere kè yen, a y'a daminè ka olu gèn ka bò yen. A ye wari falennaw ka tabaliw ni ntubanni feerelaw ka sigilanw dabiri. 16 A ma sòn minèntigi si ka tèmèn Alabatosoba kònò. 17 A ye mògòw kalan ko: «A sèbènnen tè wa ko: `Ne ka so na wele siyaw ka Aladeliso'? Nka aw kòni y'a kè binkannikèlaw dogo yòrò ye.» 18 Sarakalasebaaw kuntigiw ani sariya karamògòw ye o mèn, o de kosòn u ye cogo ɲini ka Yesu faga. U siranna a ɲè k'a masòrò a ka kalan tun ye mògòw kun minè kosèbè. 19 Wula selen, Yesu ni a ka kalandenw bòra dugu kònò. 20 O dugusajè sògòma da joona fè, u tèmèntò sira kan, u ye o torosun jalen ye fo ka se a dili ma. 21 Ko min tun kèra, Pièrè hakili jiginna o la, a y'a fò Yesu ye ko: «Karamògò, i ye torosun min danga, o jalen filè.» 22 Yesu y'a fò a ka kalandenw ye ko: «A' ye da Ala la. 23 Tiɲè la, ne b'a fò aw ye ko mògò o mògò mana a fò nin kulu ye ko: `Bò yan ka taa i fili kògòji la', ni a ma sigasiga a dusukun na, ni a dara a la ko a bè min fò, o na kè, o na kè a ye. 24 O de kosòn ne b'a fò aw ye ko aw mana Ala deli fèn o fèn na, a' ye da a la ko aw ye o sòrò, o na kè. 25 Aw mana jò ka Ala deli, k'a sòrò dò ye aw hakè ta, a' ye yafa o ma, walisa aw sankolola Fa ka aw ka hakèw yafa aw ma fana. [ 26 Ni aw ma yafa tòw ma, aw sankolola Fa tèna aw ka hakèw yafa aw ma fana.]» 27 U taara Jerusalèm ko kura. Ka Yesu to yaalayaala la Alabatosoba kònò, sarakalasebaaw kuntigiw ni sariya karamògòw ani cèkòròbaw taara Yesu sègèrè. 28 U y'a ɲininka ko: «Sebaaya jumèn b'a to i bè nin kow kè? Jòni ye o fanga di i ma?» 29 Yesu ye u jaabi ko: «Ne bè aw ɲininka ko kelen na. Ni aw ye ne jaabi, o tuma la sebaaya min b'a to ne bè nin kow kè, ne na o fò aw ye. 30 Jòni de ye Yuhana ci ko a ka batiseli kè, Ala wa, wala mògòw? A' ye ne jaabi.» 31 O tuma la, u kumana ɲògòn fè ko: «Ni an ko Ala y'a ci, a n'a fò ko mun y'a to an ma da a la? 32 Nka ni an ko mògòw y'a ci» U tun bè siran jama ɲè, katuguni mògòw bèè tun bè Yuhana jate kira yèrè de ye. 33 O de kosòn u ye Yesu jaabi ko: «Anw ma o dòn.» Yesu y'a fò u ye ko: «Ayiwa, sebaaya min b'a to ne bè nin kow kè, ne fana tèna o fò aw ye.»



12

1 O kò, Yesu y'a daminè ka ntalen da u ye ko: «Cè dò ye rezèn nakò bin ka sinsan kè ka o lamini. A ye dingè sen ka rezèn ji bò yòrò dila, ka sankanso jan jò kòlòsili kama. O kò, a ye o nakò kalifa rezèn sènèkèla dòw ma ka taa jamana wèrè la. 2 Rezèn mò tuma selen, a ye baaraden dò ci o rezèn sènèkèlaw ma, ko o ka rezèn mò minè u fè. 3 U ye baaraden minè k'a bugò k'a bolo lankolon bila ka taa. 4 Nakòtigi ye baaraden wèrè ci ka taa. U ye o kunkolo jogin k'a minè ko juguya. 5 Nakòtigi ye dò wèrè ci, u y'o faga. O kò, a ye baaraden caman wèrèw ci. U ye dòw bugò ka dòw faga. 6 Denkè kelenpe tun bè nakòtigi fè, a tun bè o kanu kosèbè. A ye o ci u ma olu bèè kò, a ko: `U na ne denkè kòni bonya.' 7 Nka rezèn sènèkèlaw y'a fò ɲògòn ye ko: `A ciyèntala filè nin ye. A' ye na an ka a faga, a ciyèn na kè an ta ye.' 8 U ye a denkè minè k'a faga k'a fili nakò kòfè. 9 «Ayiwa, rezèn nakòtigi na mun de kè sa? A na na ka o rezèn sènèkèlaw bèè faga, ka rezèn nakò kalifa mògò wèrèw ma. 10 Aw ma nin kalan Kitabu la wa, ko: `Sojòlaw banna kabakurun min na, o kèra so selekela kabakurun lakika ye. 11 A filè, Matigi de ye o kè, kabako don an ɲè na.' » 12 Yahutuw kuntigiw ye Yesu minè cogo ɲini, k'a masòrò u y'a dòn ko Yesu ye o ntalen da u yèrèw de kama, nka u siranna jama ɲè. O tuma la u y'a to yen ka taa. 13 U ye Farisièn dòw ni Hèròde ka mògò dòw ci Yesu ma, walisa ka a minè a yèrè da la kuma fè. 14 U nana k'a fò a ye ko: «Karamògò, an y'a dòn ko i ye tiɲètigi ye, ko i tè siran mògò si ɲè, katuguni mògòw bèè ka kan i ɲè na, ko i bè mògòw kalan Ala sira la k'a jèya. A dagalen bè an ka nisòngò sara Romè masakè ye wa, wala o dagalen tè? An ka kan k'a sara wa, wala an man kan k'a sara?» 15 Nka Yesu ye u ka filankafoya dòn, a y'a fò u ye ko: «Mun y'a to aw bè ne dakòròbò? A' ye na ni wari dèɲè kelen ye, ne k'a filè.» 16 U ye kelen jira a la. Yesu ye u ɲininka ko: «Jòni ja ni a ka sèbènni bè nin kan?» U y'a jaabi ko: «Romè masakè.» 17 O tuma la Yesu y'a fò u ye ko: «A' ye masakè ta sara masakè ye, ka Ala ta di Ala ma.» U kabakoyara o la kosèbè. 18 Saduseènw tun b'a fò ko su kununli tèna kè. U dòw taara Yesu sègèrè k'a ɲininka ko: 19 «Karamògò, Musa ye nin ci sèbèn k'a di an ma ko: `Ni cè dò sara k'a sòrò a muso ma den sòrò, a balimakè ka o muso furu ka bònsòn sòrò o cè salen ye.' 20 Ayiwa, balimakè woloèula tun bè yen. Fòlò ye muso furu, o sara k'a sòrò a ma den sòrò. 21 A filanan ye o muso kelen furu, a sara, a ma den to. A sabanan fana kèra ten. 22 U woloèula bèè ye o muso furu, u bèè denntan sara. O kò, o muso fana sara. 23 Ayiwa su kununli don na, o muso na kè u la jumèn kelen ta ye? K'a sòrò u woloèula bèè y'a furu.» 24 Yesu ye u jaabi ko: «Aw ka filili sababu tè nin ye wa, ko aw ma Kitabu kuma faamu, aw ma Ala ka sebaaya fana dòn. 25 Suw mana kunun, cèw tèna musow furu, musow tèna di cèw ma, nka u na kè i ko sankolola mèlèkèw. 26 Su kununli ko ta fan fè, aw ma a kalan Musa ka Kitabu la jirinin ko la wa, ko Ala y'a fò Musa ye ko: `Ne ye Ibrahima ka Ala ye, ani Isaka ka Ala ani Yakuba ka Ala.' 27 Ala tè suw ka Ala ye, ɲènamaw ta don. Aw fililen bè kosèbè.» 28 Sariya karamògò dò ye o sòsòli kuma mèn. A y'a ye ko Yesu ye Saduseènw jaabi koɲuman. A gèrèla a la k'a ɲininka ko: «Ci fòlenw bèè la fòlòfòlò ye jumèn ye?» 29 Yesu y'a jaabi ko: «Ci fòlenw fòlòfòlò filè nin ye ko: `Israèl, lamènni kè. Matigi an ka Ala ye Matigi kelenpe de ye. 30 I ka i Matigi Ala kanu ni i dusukun bèè ye, ani i ni bèè, ni i hakili bèè ni i barika bèè.' 31 A filanan filè nin ye: `I ka i mògò ɲògòn kanu i ko i yèrè.' Ci fòlen si man bon ni olu ye.» 32 O sariya karamògò y'a fò Yesu ye ko: «Tiɲè don, karamògò. I ye min fò, o ye tiɲè ye, katuguni Ala kelenpe bè yen, dò wèrè si tè ale kò. 33 Ka Ala kanu ni i dusukun bèè ye, ni i hakili bèè, ani i barika bèè, ka i mògò ɲògòn kanu i ko i yèrè, o ka bon ni saraka jenitaw ani saraka sifa bèè ye.» 34 Yesu y'a ye ko a ye jaabili kè ni hakilitigiya ye. A y'a fò a ye ko: «I ni Ala ka masaya cè man jan.» O kò, mògò si ma a ja gèlèya k'a ɲininka foyi la tun. 35 Ka Yesu to mògò kalan na Alabatosoba kònò, a ye u ɲininka ko: «Sariya karamògòw b'a fò cogo di ko Krisita ye Dawuda Bònsòn ye? 36 Dawuda yèrè y'a fò Ni Senu barika la ko: `Matigi y'a fò ne Matigi ye: I sigi ne kinin fè, fo ne ka i juguw kè i senkòrò dalan ye.' 37 Dawuda yèrè bè Krisita wele Matigi. Ale dun ye Dawuda Bònsòn ye cogo di?» Yesu ka kuma lamènni diyara jama bèè ye kosèbè. 38 A y'a fò u ye a ka kalan na ko: «A' ye aw yèrèw kòlòsi sariya karamògòw la. Ka dulòki janw don ka yaala ani mògòw ka u mògòba fo fèrèkènèw la, o de ka di u ye. 39 Alabatoso kònò ɲèfè sigiyòròw ani dumunibaw la sigi yòrò ɲumanw fana ka di u ye. 40 U bè muso cè salenw bolofènw bèè minè u la, o kò, ka taa mèn Ala delili la, walisa ka u yèrèw mògò sèbè jira. U jalaki tòòrò na juguya.» 41 Yesu y'i sigi Alabatosoba kònò, nilifènw bila kèsu kuntilenna la. A tun bè mògòw ka wari bila cogo filè. Nafolotigi caman tun bè wari caman bila kèsu kònò. 42 Muso faantan cè salen dò nana ka wari misèn fila bila kèsu kònò. O wari tun tè tèmèn tama kelen ɲògòn kan. 43 O tuma la Yesu ye a ka kalandenw wele k'a fò u ye ko: «Tiɲè la ne b'a fò aw ye ko nin muso faantan cè salen ye min bila kèsu kònò, o ka ca u tòw bèè ta ye, 44 k'a masòrò olu bèè ye dò di ka bò u ka nafolow la. Ale kòni ni a ka faantanya, a ye a balo fèn bèè di. Balo wari si ma to a bolo.»



13

1 Yesu bòtò Alabatosoba kònò, a ka kalandenw la kelen y'a fò a ye ko: «Karamògò, nin kabakurunbaw ni nin sow jò cogo filè dè!» 2 Yesu y'a jaabi ko: «I ɲè bè nin sobaw la wa? Kabakurun si tèna to ɲògòn kan yan, u bèè na bin.» 3 Ka Yesu sigilen to Oliviye kulu kan Alabatosoba kuntilenna la, Pièrè ni Yakuba ni Yuhana ani Andre nana ka a ɲininka u dan na. 4 U ko: «I tè o kow kè tuma fò an ye wa? Ni o kow kè tuma sera, mun taamashyèn na kè fòlò?» 5 O tuma la Yesu ye kuma daminè k'a fò u ye ko: «A' ye aw yèrèw kòlòsi, mògòw si kana aw lafili. 6 Mògò caman bèna na ne tògò la k'a fò ko u yèrèw ye Krisita de ye. U na mògò caman lafili. 7 Ni aw ye kèlè kow kibaru mèn, ka kèlè kow èunuèunukan mèn tuma min na, aw hakili kana ɲaami. Wajibi don o kow ka kè, nka o tè a laban ye fòlò. 8 Siya dò na wuli siya dò wèrè kama. Masaya dò na wuli masaya dò wèrè kama. Dugukolo yèrèyèrèw na kè yòrò caman na. Kòngòbaw na kè. Olu ye tòòrò kow daminè dama ye. 9 «Nka a' ye aw yèrèw kòlòsi, katuguni mògòw na aw don kiritigè jama bolo. U na aw bugò Alabatosow kònò. U na taa ni aw ye gòfèrènèrèw ni masakèw ɲè kòrò ne tògò kosòn. O n'a to aw ka seereya kè u ɲè kòrò. 10 Sani o kow ka kè, wajibi don Kibaru Duman waajuli ka kè siyaw bèè ye. 11 Ni u bè aw minè ka aw don bolo la tuma min na, aw kana kònògan aw ka fòta la, nka kuma min mana jigin aw hakili la o waati yèrè la, aw ka o fò, katuguni aw yèrèw tèna kè kumabaaw ye, fò Ni Senu. 12 Balima na a balima don bolo la walisa a ka faga. Fa na o ɲògòn kè a den na. Denw fana na wuli u bangebaaw kama walisa u ka faga. 13 Mògòw bèè na aw koniya ne tògò kosòn. Nka min bè muɲuli kè fo a laban na, o na kisi. 14 «Fèn haramulen min bè tiɲèni kè, o man kan ka kè yòrò min na, aw na o jòlen ye yen. (Min bè nin kalan, o k'a faamu.) O tuma la, Jude jamana mògòw ka boli ka taa kuluma yòròw la. 15 Min bè a ka so kun na, o kana jigin ka don so kònò ka fèn ta. 16 Min bè foro la, o kana kòsegin ka a ka dulòki ta. 17 Muso kònòmaw ani minnu bè sin di den ma, olu na tòòrò o donw la kosèbè! 18 A' ye Ala deli ko o kow kana kè fonènè tuma la, 19 katuguni tòòrò kow na bonya o donw la, o bòɲògònko tòòrò ma kè kabini Ala ye diɲè da fo ka na se bi ma! O bòɲògònko tòòrò tèna kè tun abada. 20 Ni Matigi tun ma dò bò o donw dama la, mògò si tun tèna kisi, nka a ye dò bò u la a ka mògò ɲènatòmòlenw kosòn. 21 «Ni mògò dò b'a fò aw ye o tuma la ko: `A filè, Krisita bè yan,' wala `a bè yen,' aw kana da o la. 22 Sabu Krisita nkalontigèlaw ni kira nkalontigèlaw na wuli. U na taamashyènw ni kabakow kè walisa ka mògòw lafili. Ni u tun bè se ka Ala ka ɲènatòmòlenw lafili, u tun na o kè. 23 Aw kòni ka aw yèrèw kòlòsi dè. Ne ye o kow bèè suda aw la. 24 «O donw na, o tòòrò tèmènnen kò, tile na dibi, kalo tèna yeelen bò. 25 Dolow na bin ka bò sankolo la, sankolola sebaayaw na yèrèyèrè. 26 O tuma la, u na Mògò Denkè natò ye sankabaw kan ni fangaba ni nòòrò ye. 27 A na mèlèkèw ci ka a ka ɲènatòmòlenw lajè ka bò diɲè fan naani la, k'a daminè dugukolo dan na ka taa bila sankolo dan na. 28 « Ɲèjirali dò filè nin ye torosun ko la: Ni a bolow bè daminè ka nugu, aw b'a dòn ko samiyè surunyara. 29 O cogo la, aw mana o kow kètò ye tuma min na, aw k'a dòn ko a surunyara, a sera da la yèrè. 30 Tiɲè la ne b'a fò aw ye ko mògò minnu ɲènama don sisan, olu bèè tèna sa sani o kow bèè ka dafa. 31 Sankolo ni dugukolo na tèmèn, nka ne ka kumaw tèna tèmèn abada. 32 «Nka mògò si tè o don ni o waati dòn, hali sankolola mèlèkèw t'a dòn. Ala Denkè fana t'a dòn, Fa Ala kelenpe de b'a dòn. 33 A' ye aw yèrèw kòlòsi ka to aw ɲè na, k'a masòrò aw tè o ko se tuma dòn. 34 A na kè i ko cè dò taatò dugu la, o bòtò ye a ka fèn bèè kalifa a ka jònw ma. A ye bèè kelen-kelen ka baara jira u la k'a fò so da kòlòsibaa ye ko a ka to a ɲè na. 35 O de la a' ye to aw ɲè na, k'a masòrò sotigi bè na wula fè wala dugutila fè, wala donon kasi tuma, wala sògòma fè, aw ma o dòn. 36 A kana na bala aw la ka aw sunògòlen sòrò dè. 37 Ne bè min fò aw ye, ne bè o fò mògòw bèè ye: A' ye to aw ɲè na.»



14

1 Tile fila tun bè u ni Tèmènkan ni nbuuru fununbali seli cè. Sarakalasebaaw kuntigiw ni sariya karamògòw tun bè cogo ɲini ka Yesu minè keguya la k'a faga. 2 U ko: «An kana a minè seli la, walisa balawu kana wuli mògòw cèma.» 3 Ka Yesu to dumuni la Simòn kunatò ka so kònò Bètani, muso dò nana ni daganin dò ye, o tun dilara ni kabakurun sòngò gèlèn ye. O falen tun bè tulu suma duman yèrèwolo dò la min tògò ko nar, o sòngò tun ka gèlèn kosèbè. A ye o daga da walon ka a kònò tulu kè Yesu kun na. 4 Mògò minnu tun bè yen, olu dòw diminna k'a fò ɲògòn ye ko: «Nin tulu suma duman tiɲè kun ye mun ye? 5 O tulu suma duman tun bè se ka feere wari dèɲè kèmè saba la ka o di faantanw ma.» U ye o muso kòròfò kosèbè. 6 Nka Yesu ko: «A' y'a to yen. Mun y'a to aw b'a dusu kasi? A ye min kè, o ka ɲi dè. 7 Faantanw bè aw cèma tuma bèè. Tuma min ka di aw ye, aw bè se ka ko ɲuman kè u ye. Nka ne kòni tèna kè aw cèma tuma bèè. 8 A ye a se ko de kè. A ye ne kasanke tulu suma duman kè ne kan sani ne ka sa. 9 Tiɲè la ne b'a fò aw ye ko: Kibaru Duman mana fò diɲè yòrò o yòrò la, nin muso ye min kè, o fana na lakali yen, ka mògòw hakili jigin a ko la.» 10 Juda Isikariòti min tun ye a ka tan ni fila la kelen ye, o taara sarakalasebaaw kuntigiw sègèrè, ko a bè Yesu don u bolo. 11 U ye a ka kuma mèn minkè, o diyara u ye kosèbè. U y'a latigè ko u na wari di a ma. Juda tun bè cogo bènnen ɲini ka Yesu don u bolo. 12 Nbuuru fununbali seli don fòlò, Tèmènkan saraka sagaden bèna faga don min na, Yesu ka kalandenw y'a ɲininka ko: «I b'a fè an ka Tèmènkan seli dumuni labèn i ye yòrò jumèn?» 13 Yesu ye a ka kalandenw la fila ci, k'a fò u ye ko: «A' ye taa dugu kònò. Aw ni cè dò na bèn, daga jima b'a kun. Aw ka tugu o nòfè. 14 A mana don yòrò min na, aw k'a fò o sotigi ye ko Karamògò ko, a ni a ka kalandenw bèna Tèmènkan seli dumuni kè bon min kònò, ko o bè min? 15 A na bonba dò jira aw la sankanso la, minènw b'a kònò, a labènnen bè. Aw ka Tèmènkan seli dumuni labèn an ye yen.» 16 O kalandenw taara ka don dugu kònò, u y'a sòrò i ko a tun y'a fò u ye cogo min na. U ye Tèmènkan seli dumuni labèn yen. 17 Su kolen, Yesu ni a ka kalanden tan ni fila nana. 18 Ka u sigilen to dumuni la, Yesu y'a fò ko: «Tiɲè la ne b'a fò aw ye ko aw la kelen min bè dumuni la ne fè, o na ne don bolo la.» 19 Kalandenw ɲènasisilen, u bèè kelen-kelen y'a ɲininka ko: «Ne don wa?» 20 Yesu ye u jaabi ko: «Aw tan ni fila la kelen don, min bè a bolo don ne fè minèn kònò, o don. 21 Mògò Denkè na sa i ko a sèbènnen bè a ko la cogo min na, nka min bè Mògò Denkè don bolo la, bònè bè o tigi ye. Ni o cè tun ma bange yèrè, o tun ka fisa a ma.» 22 Ka u to dumuni la, Yesu ye nbuuru ta ka barika da Ala ye, ka o karikari k'a di a ka kalandenw ma. A y'a fò u ye ko: «A' ye nin dò ta. Nin ye ne farikolo ye.» 23 O kò, a ye jifilen ta ka barika da Ala ye k'a di u ma, u bèè ye dò min. 24 Yesu y'a fò u ye ko: «Nin ye ne joli ye, Ala ka layidu sigili joli. A bònna mògò caman kosòn. 25 Tiɲè la ne b'a fò aw ye ko ne tèna rezèn ji min tun, fo ne ka a kènè min Ala ka masaya la don min na.» 26 Ala tanuli dònkili dalen kò, u bòra yen ka taa Oliviye kulu la. 27 Yesu y'a fò a ka kalandenw ye ko: «Aw bèè na boli ka ne kelen to, katuguni a sèbènnen bè ko: `Ne na sagagènna faga, sagaw bèè na jènsèn.' 28 Nka ne mana kunun ka bò suw cèma, ne na taa aw ɲè Galile jamana la.» 29 Pièrè y'a fò a ye ko: «Hali ni tòw bèè bolila k'i to, ne tèna i bila abada.» 30 Yesu y'a jaabi ko: «Tiɲè la ne b'a fò i ye ko bi su in na, sani donon ka kasi siɲè fila, i na i dalacè ne la siɲè saba ko i tè ne dòn.» 31 Nka Pièrè y'a fò a ye tun k'a gèlèya kosèbè ko: «Ne bè sa i fè dè, ne tèna ne dalacè i la fewu.» U tòw bèè fana ko ten. 32 O kò, u taara yòrò dò la min tògò ko Jetisèmanè. Yesu y'a fò a ka kalandenw ye ko: «A' ye aw sigi yan, sani ne ka taa Ala deli.» 33 A taara ɲè ni Pièrè ni Yakuba ani Yuhana ye. Hakili ɲaami y'a sòrò, a dusu kasilen tun don kosèbè. 34 A y'a fò u ye ko: «Ne dusu tòòròlen bè, fo ne bè ɲini ka sa. A' ye to yan ka to aw ɲè na.» 35 A taara ɲèfè dòònin ka i bin duguma ka Ala deli ko ni a bè se ka kè, o waati tòòrò ka tèmèn a kan. 36 A y'a fò ko: «Ne Fa, i tè kèɲè foyi la. I ka nin tòòrò jifilen mabò ne la. O bèè n'a ta, ne sago kana kè, fò e sago.» 37 A kòseginna ka na kalandenw yòrò ka u sunògòlen sòrò. A y'a fò Pièrè ye ko: «Simòn, i bè sunògò wa? I ma se ka to i ɲè na, hali ka lèrè kelen kè wa? 38 A' ye to aw ɲè na ka Ala deli walisa aw ka tanga kòròbòli ma. Mògò ni sònnen bè, nka a farisogo barika ka dògò.» 39 A bòra u kòrò tun ka Ala deli ka segin o kuma kelen kan. 40 O kò, a kòseginna a ka kalandenw yòrò ka u sunògòlen sòrò ko kura, sabu sunògò tun bè u la kosèbè. U ma a jaabi cogo dòn. 41 A nana a siɲè sabanan la k'a fò u ye ko: «Aw bè sunògò halisa ka aw lafiya wa? O b'a bò. Waati sera. A filè, Mògò Denkè bèna don jurumukèlaw bolo. 42 A' ye wuli, an ka taa. Min bè ne don bolo la, o selen filè.» 43 Ka Yesu to o kuma la, o yòrònin bèè Juda sera. Kalanden tan ni fila la kelen don. A nana ni jamaba ye. Npanw ni berew tun bè u bolo. Olu cilen tun bè sarakalasebaaw kuntigiw ni sariya karamògòw ani cèkòròbaw fè. 44 Juda min tun bèna Yesu don bolo la, o tun ye taamashyèn jira jama la, ko: «Ne mana cè min da susu, o don. A' ye o minè k'a kòlòsi kosèbè ka taa n'a ye.» 45 Juda selen, a sinna Yesu la k'a fò a ye ko: «Karamògò.» O kò, a ye Yesu da susu. 46 O kèlen, u ye Yesu minè. 47 Yesu fè mògòw la kelen ye a ka npan foosi ka sarakalasebaaw kuntigi ka jònkè tulo caron. 48 Yesu y'a fò u ye ko: «Aw nana ni npan ni berew ye ne minèli kama, i n'a fò ne ye binkannikèla ye wa? 49 Ne tun bè aw fè don o don ka mògòw kalan Alabatosoba kònò. Aw dun ma ne minè. Nka o kèra walisa Kitabuw kuma ka dafa.» 50 A ka kalandenw bèè bolila ka a to yen. 51 Kamalen dò tugulen tun bè Yesu nòfè, birifini dòròn melekelen tun b'a la. Jama la mògò dòw y'a minè. 52 A ye a ka birifini to u bolo, a lankolon bolila ka taa. 53 U taara ni Yesu ye sarakalasebaaw kuntigi ka so. Sarakalasebaaw kuntigiw ni cèkòròbaw ani sariya karamògòw bèè ye u lajè yen. 54 Pièrè y'i to yòrò jan ka tugu Yesu nòfè fo ka don sarakalasebaaw kuntigi ka du kònò. A y'i sigi garadiw kèrè fè ka i laja tasuma la. 55 Sarakalasebaaw kuntigiw ani kiritigè jamakulu tun bè seereya ɲini Yesu kama walisa ka a faga, nka u ma a sòrò. 56 Mògò caman ye nkalon seereya kè Yesu kama, nka u ka kumaw tun bè ɲògòn sòsò. 57 Mògò dòw wulila ka nkalon da Yesu la ko: 58 «A y'a fò an ɲè na ko: `Mògòw ye nin Alabatosoba min jò, ne na o ci ka dò wèrè jò tile saba kònò, mògòw bolo ma min jò.' » 59 O bèè n'a ta u ka seereya kuma ma kè kelen ye. 60 O tuma la sarakalasebaaw kuntigi wulila k'i jò jama cèma ka Yesu ɲininka ko: «Nin mògòw bè seereya min kè i kama, o bè di? I tè o si jaabi wa?» 61 Nka Yesu y'i makun, a ma jaabili si kè. Sarakalasebaaw kuntigi y'a ɲininka ko kura ko: «E de ye Krisita, Dubatigi Ala Denkè ye wa?» 62 Yesu y'a jaabi ko: «Owò, ne ye o ye. Aw na Mògò Denkè sigilen ye Ala Sebaayabèètigi kinin fè. Aw na a natò ye fana sankabaw kan ka bò sankolo la.» 63 O la, sarakalasebaaw kuntigi ye a yèrè ka finiw fara k'a fò ko: «An mago bè mun na seerew fè tun? 64 Aw tulo bè a ka Ala tògò tiɲèni kuma la. Mun bè aw kònò?» U bèè y'a jalaki ko a ka kan ni saya ye. 65 Dòw ye daji tu Yesu kan. U ye a ɲè siri k'a bugò ni u bolokurunw ye k'a fò a ye ko: «I bugòbaa tògò fò an ye.» Garadiw fana ye Yesu bugò ni u bolow ye. 66 Ka Pièrè to sarakalasebaaw kuntigi ka dukènè la duguma, sarakalasebaaw kuntigi ka baarakè muso dò nana. 67 A ye Pièrè ye, a tun b'i laja tasuma la, a y'a mafilè kosèbè k'a fò a ye ko: «E fana tun bè Yesu Nazarètika fè.» 68 Nka a y'i dalacè a la ko: «I bè min fò, ne ma o dòn, ne ma a kòrò dòn.» O kò, a bòra ka taa so da la. Donon kasira. 69 Baarakè muso y'a ye ko kura k'a fò o yòrò mògòw ye ko: «Nin cè in ye u dò ye.» 70 Pièrè y'i dalacè a la ko kura. Waati dòònin tèmènnen kò, mògò minnu tun bè yen, olu y'a fò Pièrè ye fana ko: «Siga t'a la, i ye u dò ye, katuguni e fana ye Galileka ye.» 71 Nka Pièrè y'i kali k'a yèrè danga ko: «Aw bè kuma cè min ko la, ne tè o dòn.» 72 O yòrònin kelen donon kasira a siɲè filanan la. Pièrè hakili jiginna Yesu ka kuma fòlen na ko: «Sani donon ka kasi siɲè fila, i na i dalacè ne la siɲè saba ko i tè ne dòn.» A miirila o la ka kasi.



15

1 Sògòma da joona fè, sarakalasebaaw kuntigiw ni cèkòròbaw ni sariya karamògòw ani kiritigè jamakulu y'u lajè ka ɲògòn ye. U ye Yesu siri ka taa n'a ye k'a don gòfèrènèrè Pilate bolo. 2 Pilate y'a ɲininka ko: «I ye Yahutuw ka masakè ye wa?» Yesu y'a jaabi ko: «Owò, ne ye o ye.» 3 Sarakalasebaaw kuntigiw y'a sendon ni kuma caman ye. 4 Pilate y'a ɲininka ko kura ko: «I tè jaabili si kè wa? U bè i sendon ko minnu na, i tulo tè olu la wa?» 5 Nka Yesu ma jaabili si kè tun, o ye Pilate kabakoya. 6 Tèmènkan seli o seli, Yahutuw mana kasolamògò min ɲini Pilate fè, a tun bè o bila. 7 Cè min tògò ko Barabasi, o ni a murutiɲògònw tun bè kaso la o waati la. Olu tun ye mògò faga u ka murutili sen fè. 8 Jama taara Pilate yòrò k'a deli ko a delila ka ko min kè u ye, a ka o kè. 9 Pilate ye u jaabi ko: «Aw b'a fè ne ka Yahutuw ka masakè bila wa?» 10 Pilate tun y'a dòn ko Yesu keleya de y'a to sarakalasebaaw kuntigiw y'a don bolo la. 11 Nka sarakalasebaaw kuntigiw ye jama kònònasu, ko u ka Pilate deli ko a ka Barabasi bila. 12 Pilate kumana jama fè ko kura k'a fò ko: «Aw bè min wele Yahutuw ka masakè, ne ka mun kè o la?» 13 U pèrènna ko kura ko: «A gengen jiri la!» 14 Pilate ye u ɲininka ko: «A ye mun ko jugu kè?» Nka u pèrènna kosèbè ka tèmèn fòlò kan ko: «A gengen jiri la!» 15 Pilate tun b'a fè ka jama sago kè. O de kosòn a ye Barabasi bila ka Yesu bugò ni gèɲè ye, ka a don sòròdasiw bolo, a ka gengen jiri la. 16 Sòròdasiw taara ni Yesu ye gòfèrènèrè ka du kònò ka u ka kulu mògòw bèè lajè yen. 17 U ye lomaasa fini don Yesu kan na ka èòni dèfè k'o kè jalamugu ye k'a don Yesu kun na. 18 U ye foli di a ma ko: «I ni se, Yahutuw ka masakè!» 19 U tun bè a bugò a kun na ni bere ye, ka daji tu a kan, k'u biri a kòrò i n'a fò u b'a bonya. 20 Yèlè bòlen kò a ma, u ye o lomaasa fini bò a kan na, ka a yèrè ka finiw don a la. U bòra ka taa n'a ye, a ka gengen jiri la. 21 Sirènèka dò bòtò a ka foro la, sòròdasiw y'o karaba ka Yesu gengenjiri ta. O cè tògò ko Simòn, Alèkisandre ni Rufus fa don. 22 U taara ni Yesu ye yòrò dò la min tògò ko Golgota, o kòrò, kunkolo yòrò. 23 U ye diwèn ni mirè kolonsolen di a ma ko a k'o min, nka Yesu ma sòn k'a min. 24 O kò, u y'a gengen jiri la, ka kala da, ka a ka finiw tilatila u cè ka kèɲè n'o ye, walisa u bèè kelen-kelen ka u ka sòròta dòn. 25 U y'a gengen jiri la tuma min na, o kèra sani tile ka gan kosèbè. 26 U y'a jalaki kun min na, u ye o sèbèn ko: «Yahutuw ka masakè.» 27 U ye binkannikèla fila gengen jiri la Yesu kèrè fè. Kelen tun bè a kinin fè, dò tun bè a numan fè. [ 28 O cogo la Kitabu ye min fò, ko a jatera kojugukèlaw dò ye, o dafara.] 29 Tèmènbaaw tun bè u kun kòmi ka Yesu neni, k'a fò ko: «Onhòn, e min ko i bè Alabatosoba ci ka a jò ko kura tile saba kònò, 30 i yèrè kisi sa. Jigin ka bò jiri la!» 31 O cogo la, sarakalasebaaw kuntigiw ni sariya karamògòw fana tun bè yèlè bò Yesu ma k'a fò ɲògòn ye ko: «A ye mògò wèrèw kisi, nka a tè se ka a yèrè kisi. 32 Krisita, Israèl ka masakè ka jigin ka bò jiri la, walisa an k'a ye ka da a la.» Cè fila minnu gengenna jiri la a kèrè fè, olu fana tun b'a neni. 33 Tile selen kuncè, dibi donna jamana yòrò bèè la ka lèrè saba kè. 34 O lèrè saba dafara tuma min na, Yesu pèrènna ni kanba ye ko: «Eloi, Eloi, lama sabakatani?» O kòrò, «Ne ka Ala, ne ka Ala, mun na i ye ne bila?» 35 Minnu jòlen tun bè yen, olu dòw ye o pèrènkan mèn minkè, u ko: «A filè, a bè Eli wele.» 36 U la kelen bolila ka fukuru ta ka o su diwèn kumu la ka a don bere jan dò kun na, ka o di Yesu ma a k'a susu. O cè ko: «A' y'a jò, an k'a filè yala ni Eli bè na a lajigin.» 37 Nka Yesu ye kulokanba ci ka sa. 38 Alabatosoba cètigèfini farala fila ye k'a daminè san fè fo duguma. 39 Jalasabatigi min jòlen tun bè Yesu kuntilenna la, o y'a ye minkè ko a pèrènna ka sa ten, o ko: «Tiɲè la, nin cè tun ye Ala Denkè yèrè de ye.» 40 Muso dòw fana jòlen tun bè yòrò jan ka o kow filè. U dòw tun ye ninnu ye: Magadala Mariyama, Yakuba dògòmannin ni Jose ba Mariyama, ani Salomè. 41 Ka Yesu to Galile jamana la, o musow tun tugura a nòfè ka a dèmè. U ni muso caman wèrèw fana tun bè yen minnu taara a fè Jerusalèm. 42 Wula da sera. O don tun ye ɲèsigi don ye, o kòrò, o dugusajè tun ye lafiɲè don de ye. 43 Arimate Yusufu nana, kiritigè jamakulu la mògòba dò tun don. Ale yèrè fana tun bè Ala ka masaya makònò. A y'i ja gèlèya ka taa Pilate sègèrè ka Yesu su deli a fè. 44 Pilate kabakoyara k'a mèn ko Yesu sara joona ten. A ye jalasabatigi wele k'a ɲininka yala ni Yesu sa tuma mènna. 45 A ye jaabili sòrò ka bò jalasabatigi fè minkè, a sònna Yusufu ka Yesu su ta. 46 Yusufu ye lenfu fini dò san, ka Yesu su lajigin ka o fini meleke a la k'a don kaburu dò kònò, o sennen tun bè fara la. O kò, a ye kabakurunba dò kolonkolon ka kaburu da tugu n'o ye. 47 Magadala Mariyama ani Jose ba Mariyama tun bè yen ka Yesu su don yòrò filè.



16

1 Lafiɲè don tèmènnen, Magadala Mariyama ni Yakuba ba Mariyama ani Salomè ye suma diyalanw san ko u bè taa Yesu su mun ni olu ye. 2 U taara kaburu la dògòkun don fòlò sògòma da joona fè, tile bò tuma la. 3 U tun b'a fò ɲògòn ye ko: «Jòn na kabakurun kolonkolon an ye ka bò kaburu da la?» 4 U ye u ɲèw kòròta k'a ye ko o kabakurun belebeleba tun kolonkolonna ka bò kaburu da la. 5 U donna kaburu kònò, u ye kamalen dò ye yen, a sigilen tun bè kinin yanfan fè, dulòki jamanjan jèman tun bè a kan na. U sirannen kabakoyara kosèbè. 6 Nka a y'a fò u ye ko: «Aw kana siran. Yesu Nazarètika min gengenna jiri la, aw bè o de ɲini. A tè yan, a kununna. U y'a da yòrò min na, a' ye o filè. 7 Aw ka taa a fò a ka kalandenw ye ani Pièrè fana ko a bè taa aw ɲè Galile. Aw na a ye yen i ko a tun y'a fò aw ye cogo min na.» 8 U sirantò yèrèyèrètò bòra kaburu kònò ka boli. U ma foyi fò mògò si ye, k'a masòrò u tun siranna. [ 9 Yesu kununlen kò ka bò suw cèma, dògòkun don fòlò sògòma da joona fè, a y'i jira Magadala Mariyama fòlò la. A tun ye jinè woloèula gèn ka bò o de la. 10 Mariyama taara o kibaru fò Yesu taamaɲògòn kòròw ye. Olu ɲènasisilen tun bè kosèbè, u tun bè kasi. 11 U y'a mèn minkè ko Yesu ɲènama don, ko Mariyama y'a ye, u ma da a la fewu. 12 O kò, u la mògò fila dugu taatò, Yesu cogo yèlèmalen y'i jira u la. 13 U kòseginna ka o fò kalanden tòw ye, olu fana ma da a la. 14 O kò, Yesu y'i jira a ka kalanden tan ni kelen na, u dumuni kètò. A ye u kòròfò u ka dannabaliya ni u dusukun gèlèya kosòn, k'a masòrò minnu y'a ye a kununlen kò, u ma da olu la. 15 A y'a fò u ye ko: «A' ye taa diɲè yòrò bèè ka Kibaru Duman waajuli kè mògòw bèè ye. 16 Ni mògò min dara a la ka batise, o na kisi, nka ni min ma da a la, o na jalaki. 17 Minnu bè dannaya kè, olu na nin taamashyènw kè: U na jinèw gèn ka bò mògòw la ne tògò la. U na kan wèrèw fò. 18 U na saw minè u bolow la. Ni u ye mògòfagafèn min, o tèna foyi kè u la. U na u bolow da banabaatòw kan, olu na kènèya.» 19 Matigi Yesu tilalen kò kuma la u fè, a kòròtara ka taa sankolo kònò k'i sigi Ala kinin fè. 20 Olu kòni taara ka waajuli kè yòrò bèè. Matigi tun bè u fè u ka baara bèè la ka taamashyènw kè minnu y'a jira ko u ka waajuli kumaw ye tiɲè ye.]



AMAZING GRACE BIBLE INSTITUTE