Jude11 Ne Jude, Yesu Krisita ka jòn, Yakuba balimakè, bè nin sèbèn ci aw ma, aw minnu welela Ala fè, ni aw bè taama Fa Ala ka kanuya la, ni aw maralen bè Yesu Krisita ye. 2 Makari ni dususuma ni kanuya ka di aw ma ka caya. 3 Kanulenw, ne tun bè ne jija ka sèbèn ci aw ma an ka kisili ko la, aw ta ni ne ta. Ka ne to o la, ne y'a ye ko a kèra wajibi ye ne ka nin sèbèn ci aw ma, walisa ne ka aw jija ka kèlè kè dannaya kosòn, Ala ye o dannaya min di a ka mògò senumaw ma siɲè kelenpe. 4 Mògò jugu dòw y'u dogo ka don aw cèma. U ka kiri ko fòra Kitabu la a mènna. Ala ɲèsiranbaliw don. U bè an ka Ala ka nèèma kuma yèlèma k'a kè kakalaya sababu ye. U b'u dalacè an kuntigi kelenpe Matigi Yesu Krisita la. 5 Hali ni aw bè nin kow bèè dòn ka ban, ne b'a fè ka aw hakili jigin a la, ko Matigi ye Israèl mògòw kisi ka bò Misira jamana la, nka o kò, a ye u la dannabaliw halaki. 6 Mèlèkèw fana minnu ma to u ka kuntigiya fòlò la, nka u ye u yèrèw sigi yòròw bila, Ala ye olu siri ni nègè jòlòkò banbaliw ye dibi jukòrò kiri donba kama. 7 Sodòmè ni Gomòrè ani u dafè duguw fana ye o ɲògòn kè, u ye u yèrèw bila kakalaya la ka kè cèɲògòn ɲininaw ye. U tòòròla tasuma banbali fè ka kè lasòmili ye bèè ye. 8 O bèè n'a ta o mògò sugotaw fana bè u yèrèw farisogo nògò, u bè kuntigiya mafiɲèya, u bè sankolola mèlèkè nòòròmaw neni. 9 Hali mèlèkèba Misèl, a ni Sitanè tun bè kèlè kè ka sòsòli kè Musa su ko la tuma min na, a m'a ja gèlèya k'a kiri ko fò ni nenili ye. A y'a fò dòròn ko: «Matigi ka i kòròfò.» 10 Nka o mògòw kòni tè ko minnu faamu, u bè olu lagosi. U bè fèn minnu dòn u yèrèw hakili la i ko dantan fènw, u bè halaki olu fè. 11 Bònè bè u ye! U ye Kaèn ka sira taama. U ye u yèrèw bila filili la wari kosòn i ko Balam. U halakira katuguni u murutira i ko Korè. 12 U bè kè tiɲènnikèlaw ye aw ka balimaya dumuni kè tumaw la. U tè maloya dumuni la, u bè u yèrèw fali ɲini. U bòlen bè sankaba jintanw fè, minnu taara fiɲè fè. Kawule jiri denntanw don, ani jiri salen minnu dili bòra, u bòlen bè olu fè. 13 U bòlen bè kògòji kuru barikamaw fè, u bè u maloya kow kanga bò. Dolo yaalayaalatòw don, yòrò labènnen bè u ye dibiba la badaa-badaa. 14 Hadama bònsòn woloèulanan Henòk fana ye kiraya kè o mògò juguw ko la, a ko: «Matigi nalen filè ni a ka mèlèkè senuma dama dònbaliw ye, 15 ka kiri tigè mògòw bèè kan, ka Ala ɲèsiranbaliw bèè jalaki u ka kèwale juguw kosòn, u ye olu minnu kè Ala ɲèsiranbaliya la, ani Ala ɲèsiranbali jurumutòw ye kuma gèlènma minnu fò a kama.» 16 O mògòw ye dajukòrò kuma fòlaw ye, u bè u yèrèw kuntere kasi. U bè taama u yèrèw negew la. U bè kuncèbaya kumaw fò ka mògò bò mògò la nafa kosòn. 17 Aw kòni kanulenw, an Matigi Yesu Krisita ka cidenw ye kuma minnu fò ka kòrò, aw ka aw hakili to olu la. 18 U y'a fò aw ye ko: «Laban tuma la nparabòla dòw na kè yen, u na taama Ala ɲèsiranbaliya la ka kèɲè ni u negew ye.» 19 Faralikèlaw de don, Hadamaden gansanw, Ni Senu tè u fè. 20 Aw kòni, kanulenw, aw ka to ka taa ɲè aw ka dannaya senuma la ka Ala deli Ni Senu barika la. 21 A' ye to Ala ka kanuya la, ka an Matigi Yesu Krisita ka makari makònò fo ɲènamaya banbali la. 22 A' ye makari sigasigatòw la 23 ka u tufa ka bò tasuma la ka u kisi. A' ye makari dò wèrèw la ni siran ye, hali dulòki min nògòlen bè u farisogo fè, aw ka o koniya. 24 Min bè se ka aw mara walisa aw kana bin, ka aw jalakibali lase a nòòrò ɲè kòrò ni ɲagaliba ye, 25 Ala kelenpe kòni, an Kisibaa Yesu Krisita an Matigi barika la, tanuli ni nòòrò ni barika ani sebaaya ka da o kan kabini fòlòfòlò ani sisan ni badaa-badaa. Amiina. |