Jaques

1

1 Ne Yakuba, Ala ni Matigi Yesu Krisita ka jònkè, bè nin sèbèn ci Israèl siya tan ni fila ma minnu jènsènnen bè. Aw ni hèrè. 2 Ne balimaw, kòròbòli sifa caman mana aw sòrò, aw ka o jate ɲagaliba sababu ye, 3 k'a dòn ko muɲuli bè bò aw ka dannaya kòròbòli la. 4 A' y'a to muɲuli ka a ka baara kè k'a dafa, walisa aw ka dafa ka kògò, foyi kana dèsè aw la. 5 Ni hakilitigiya dèsèra aw dò la, o ka a deli Ala fè, a na di o ma, k'a masòrò Ala bè nili kè mògòw bèè la ka kari, a tè kòròfòli kè. 6 Nka a k'a deli ni dannaya ye, a kana sigasiga fewu, k'a masòrò min bè sigasiga, o bòlen bè kògòji kuru fè, fiɲè bè min lamaga ka taa n'a ye fan bèè fè. 7 O mògò sifa kòni kana miiri ko a nafèn dò sòrò Matigi fè. 8 Dusu fila tigi don, a sabatilen tè a ka sira si la. 9 Balima faantan ka ɲagali a kòròtali la. 10 Nafolotigi fana ka ɲagali a majiginni la, k'a masòrò a na tèmèn i ko bin feere. 11 Ni tile bòra ni a funteniba ye, bin bè ja, a feere bè bin, a cèɲè cogo bè tiɲè. Nafolobatigi na fòsònfòsòn k'a to a ka ko kètaw la ten. 12 Kòròbòli bè kun mògò min na, o ye dubaden ye, katuguni ni a tilennen sòròla kòròbòli fè, Ala ye ɲènamaya masafugula min layidu ta a kanubaaw ye, a na o sòrò. 13 Mògò mana nègèn ko jugu nòfè, o kana fò ko Ala y'a nègèn, katuguni Ala tè se ka nègèn ko jugu si nòfè, a tè mògò si nègèn ko jugu nòfè fana. 14 Mògòw bèè kelen-kelen bè nègèn ko jugu nòfè, ni a samana a yèrè nege jugu fè ka malasa. 15 Nege dun mana kònò ta, a bè jurumu bange. Ni jurumu kògòra, a bè saya bange. 16 Ne balima kanulenw, aw kana fili. 17 Fèn ɲuman minnu bè di an ma ani nilifèn dafalenw, olu bèè bè na ka bò san fè. U bè jigin ka bò kènè bòlanw Fa Ala la. Ala tè yèlèma, suma yèlèma cogo t'a la. 18 A ye an bange tiɲè kuma barika la ka kèɲè ni a yèrè sago ye, walisa an ka kè fòlò ta dòw ye a ka dafènw cèma. 19 Aw ka nin dòn, ne balima kanulenw, ko mògòw bèè ka lamènni kè joona, nka u kana kuma joona, u kana dimin joona. 20 Katuguni mògò diminnen tè se ka Ala ka tilennenya ko kè. 21 O de kosòn, a' ye nògòlenya bèè dabila, ani juguya tòw bèè. Kuma min dannen bè aw dusu la, a' ye sòn o ma ni yèrèmajiginlenya ye, o de bè se ka aw kisi. 22 Aw ka kè Ala ka kuma kèbaaw ye, aw kana kè a mènbaaw ye dòròn, ka aw yèrèw lafili. 23 K'a masòrò min bè Ala ka kuma mèn, ni a ma taama ka kèɲè n'o ye, o bè i ko mògò min bè a yèrè ɲèda filè dubalen na. 24 A yèrè mafilèlen kò, a bè taa, a tun bè cogo min na, a bè ɲinè o kò. 25 Nka sariya dafalen, hòrònya sariya kòni, ni mògò ye o filè ni kòlòsili ye ka to a kan, ni a ma ɲinè a ka kuma mènnen kò, nka a bè taama ka kèɲè n'a ye, o tigi ye dubaden ye a ka ko kètaw la. 26 Ni mògò dò bè a yèrè jate Ala sira taamabaa ye, k'a sòrò a tè karafe don a da la, o tigi bè a yèrè lafili, a ka Ala sira taama ye fu de ye. 27 Ala sira taama senuma nògòbali Fa Ala ɲè kòrò, o filè nin ye, ka taa bò falatòw ni muso cè salenw ye u ka tòòrò kow la, ani ka i tanga diɲè ka nògòlenya kow bèè ma.

2

1 Ne balimaw, aw kana mògò bò mògò la nòòròtigi, an Matigi Yesu Krisita dannaya sira taama ko la. 2 Ni mògò dò donna aw ka Alabatoso kònò, sanu bololanègè b'a bolo la, dulòkiba ɲuman b'a kan na, ni faantan dò fana donna, finikolon b'o kan na, 3 ni aw bè dulòkiba ɲuman tigi bonya k'a fò a ye ko: «I sigi yan nin yòrò ɲuman la,» k'a fò faantan ye ko: «E k'i jò yen fè,» wala «I sigi ne sen kòrò yan,» 4 aw ma mògò bò mògò la ka aw yèrèw kè kiritigèlaw ye ni aw ka miirili juguw ye wa? 5 Ne balima kanulenw, a' ye ne lamèn sa. Ala ye nin diɲè la faantanw ɲènatòmò, walisa u ka kè nafolotigiw ye dannaya ko la, ka don a ka masaya la. A ye o masaya layidu de ta a ka kanulenw ye. 6 Nka aw kòni ye faantanw dògòya! Minnu bè u fanga digi aw la ka taa ni aw ye kiritigèlaw ɲè kòrò, o tè nafolobatigiw ye wa? 7 Tògò ɲuman min dara aw kan, u tè o tiɲè wa? 8 Ni aw bè masaya sariya dafa i ko Kitabu b'a fò cogo min na ko: «I ka i mògò ɲògòn kanu i ko i yèrè,» aw bè ko ɲuman kè, siga t'o la. 9 Nka ni aw bè mògò bò mògò la, aw bè jurumu kè. Sariya bè aw jalaki, katuguni aw ye sariya tiɲènbaaw ye. 10 Mògò o mògò mana sariya kow bèè kè, nka ni a ye sariya ci fòlen kelen tiɲè, a jalakira a bèè la. 11 K'a masòrò min y'a fò ko: «I kana jatòya kè,» o y'a fò fana ko: «I kana mògò faga.» Ayiwa ni i ma jatòya kè, nka ni i ye mògò faga, i kèra sariya tiɲènbaa ye. 12 Kiri bèna tigè aw kan ka kèɲè ni hòrònya sariya ye, o de kosòn aw kuma cogo ni aw taama cogo ka bèn o ma. 13 Min ma makari dòw la, makari tèna kè o ka kiri ko la. Makari bè se sòrò kiri kan. 14 Ne balimaw, ni mògò dò b'a fò ko dannaya b'a fè, k'a sòrò kèwalew t'a fè, o bè mun ɲè sa? O dannaya bè se k'a kisi wa? 15 Ni balimakè wala balimamuso fèèrètò don, ni don o don dumuni t'a fè, 16 ni aw dò y'a fò u ye ko: «A' ye taa hèrè la, ka aw laja k'aw fa,» k'a sòrò a ma u farikolo magoɲè fènw di u ma, o bè mun ɲè sa? 17 O cogo la, dannaya fana, ni kèwalew t'a fè, a salen don, a bè a kelen na. 18 Nka mògò dò n'a fò ko: «Dannaya bè e fè, kèwalew bè ne de fè. I ka i ka dannaya jira ne la ni kèwalew tè, ne na ne ka dannaya jira i la ne ka kèwalew fè.» 19 I dara a la ko Ala ye kelenpe de ye, o ka ɲi. Jinèw fana dara o la, u bè yèrèyèrè. 20 E mògò fu, i b'a fè ka dòn ko dannaya ye fu ye ni kèwalew tè wa? 21 An fa Ibrahima ye a denkè Isaka da saraka bòlan kan tuma min na, a ma jate tilennen ye a ka kèwalew kosòn wa? 22 I y'a ye ko a ka dannaya ni a ka kèwalew taara ɲògòn fè, ko a ka dannaya dafara kèwalew de fè. 23 O cogo la Kitabu kuma dafara ko: «Ibrahima dara Ala ka kuma la, o de jatera a ye tilennenya ye.» A welela Ala terikè. 24 Aw y'a ye sisan ko mògò bè jate tilennen ye a ka kèwalew kosòn, dannaya dama tè. 25 Jatòmuso Rahab fana ma kè ten wa? A jatera tilennen ye a ka kèwalew kosòn, k'a masòrò a ye o cidenw minè koɲuman ka u bila ka taa sira wèrè fè. 26 Farikolo salen don ni ni t'a la cogo min na, o cogo la dannaya salen don ni kèwalew tè.

3

1 Ne balimaw, aw caman kana kè karamògò ye, k'a masòrò aw y'a dòn ko an minnu ye karamògòw ye, kiri na gèlèya an ma. 2 An bèè bè fili cogo caman na. Mògò min tè fili kuma la, o tigi ye mògò dafalen ye. A bè se ka a farikolo bèè minè ni karafe juru ye. 3 An bè karafe don sow da la, walisa u ka an sago kè. An bè se ka u farikolo bèè yèlèma ni o ye ka taa fan bèè la. 4 A' ye ji kan kurun fana filè. A ka bon kosèbè, fiɲèbaw bè a ɲòni, nka a bè yèlèma ni lèmunin fitinin ye ka taa kuruntigi sagona yòrò la. 5 O cogo la mògò nènkun ye farikolo yòrò fitinin ye, nka a bè kobaw fò ka a yèrè bonya. Tasuma fitinin filè, nka a bè tasuma tugu tuba la dè! 6 Nènkun ye tasuma ye, diɲè falen juguya la, o ye nènkun de ye. A sigilen bè an farikolo yòròw cèma, a bè farikolo bèè nògò. A bè tasuma tugu an ka kow bèè la, a manalen bè ka bò jahanama la. 7 Kungo kònò sen naanima fènw bèè, ani kònòw ni fèn fofotaw ani ji la fènw, olu bèè bè kolo, u kolola Hadamadenw fè. 8 Nka nènkun kòni, mògò si tè se ka o kolo. Fèn jugu kolobali ye nènkun de ye. A falen bè mògòfaga baga la. 9 An bè Matigi an Fa tanu ni nènkun ye. Mògò minnu dara Ala bisigi la, an bè olu danga ni nènkun ye fana. 10 Tanuli ni dangali kuma fila bèè bè bò da kelen na. Ne balimaw, o tè bèn dè! 11 Ji duman ni ji kunaman bè se ka woyo ka bò ji boyi da kelen fè wa? 12 Ne balimaw, torosun bè se ka oliveden kè wa? Rezènsun bè se ka toroden kè wa? Kògòji tè se ka ji duman bò fana. 13 Aw la jumèn hakili ka bon, ni a bè ko dòn? O tigi ka a ka kèwalew jira a taama cogo ɲuman fè ni sabali ni hakilitigiya ye. 14 Nka ni keleya kunaman ni farali dusu bè aw kònò, aw kana aw yèrèw bonya ka nkalon tigè k'a sòrò tiɲè t'o ye. 15 Hakilitigiya min bè jigin ka bò sankolo la, o ni nin tè kelen ye. Nin ye dugukolo kan hakilitigiya ye. Hadamaden gansan ta don, a jinèma don. 16 Keleya ni farali dusu bè yòrò min na, ko ɲaaminenw ni ko jugu sifa bèè bè yen. 17 Nka hakilitigiya min bè na ka bò sankolo la, fòlò, o senuma don, o kò, a hèrèma don, a sumalen bè. A bè bèn ɲini, a falen bè hinè ni kèwale ɲumanw la. A tè mògò bò mògò la, filankafoya t'a la. 18 Tilennenya bè den min kè, o bè dan hèrè la kèlè bannaw fè.

4

1 Kèlè ni sòsòli minnu bè aw cèma, olu bè bò min? Negekun gèlèya ko minnu bè kèlè kè aw farikolo yòròw la, u tè bò olu la wa? 2 Fèn caman nege bè aw la, o si tè aw bolo. Aw bè mògò faga, aw ɲè bè bò fèn caman fè, nka aw tè se k'olu sòrò. Kèlè ni sòsòliw bè aw cèma, aw bè min fè, aw tè o sòrò, katuguni aw ma a deli. 3 Aw bè delili kè, aw tè foyi sòrò, katuguni aw ka delili cogo man ɲi, sabu aw b'a deli walisa k'o tiɲè aw negekun gèlèya kow la. 4 Jatòw! Aw m'a dòn ko diɲè teriya ye Ala juguya de ye wa? Min b'a fè ka kè diɲè teri ye, o bè a yèrè kè Ala jugu de ye. 5 Aw bè miiri ko Kitabu bè kuma fu wa? A ko: «Ala ye ni min don an na, keleya b'a la o ni ta fan fè.» 6 Nka a bè nèèma fara nèèma kan, k'a masòrò Kitabu ko: «Ala bè kuncèbaaw kèlè, nka a bè nèèma di mògò majiginlenw ma.» 7 O de kosòn, a' ye kolo Ala ye. A' ye jò Sitanè ɲè ka a kèlè, n'o kèra, a na boli k'i mabò aw la. 8 A' ye gèrè Ala la, ale fana na gèrè aw la. Aw jurumukèlaw, a' ye aw tègèw ko. Aw filankafow, a' ye aw dusuw saniya. 9 Aw dusuw ka kasi, aw ɲènasisilen ka ɲèji bò. Aw ka yèlè ka yèlèma ka kè kasi ye. Aw ka ɲagali ka kè ɲènasisi ye. 10 A' ye aw majigin Matigi ɲè kòrò, n'o kèra, ale na aw kòròta. 11 Balimaw, aw kana ɲògòn tògò jugu fò. Min bè a balima tògò jugu fò, wala ni a bè kiri tigè a balima kan, o bè sariya kòròfò ka kiri tigè sariya kan. Ayiwa ni i bè kiri tigè sariya kan, i tè sariya sira taamabaa ye tun, fò a kiritigèla. 12 Sariya sigibaa ni kiritigèla ye kelenpe de ye, o de bè se ka kisili kè ka halakili kè. Nka e ye jòn ye, ka kiri tigè i mògò ɲògòn kan? 13 A' ye ne lamèn sa, aw minnu b'a fò ko: «Bi wala sini an na taa duguba dò la ka san kelen kè yen, ka jago kè ka wari sòrò,» 14 k'a sòrò aw tè sini ko dòn! Aw bè i ko bugun min bè ye waati dòònin ka tèmèn. 15 O bèè n'a ta aw tun ka kan k'a fò ko: «Ni Matigi sònna, ni an ɲènama tora, an na nin kè wala ka nin kè.» 16 Nka sisan aw bè aw yèrèw bonya ni kuncèbaya ye. O yèrèbonya sifa man ɲi. 17 O de kosòn min bè ko ɲuman kècogo dòn, n'a t'a kè, o ye jurumu ye o tigi ye.

5

1 Aw nafolobatigiw, a' ye ne lamèn sa. Ɲèni koba minnu bèna se aw ma, a' ye kasi ka kulo olu kosòn. 2 Aw ka nafolo tolila. Aw ka finiw ɲimina ntumuw fè. 3 Nson wulila aw ka sanu ni aw ka wari la. O nson na kè seere ye aw kama ka aw farisogo dun k'a ban i ko tasuma. Aw ye aw ka nafolo lajè nin laban donw na. 4 Baarakèla minnu ye aw ka foro suman tigè, aw ma olu sara, o sara bè pèrèn aw kama. Minnu ye aw ka suman tigè, olu pèrènkan sera Kèlèbolow Matigi tulo ma. 5 Aw ye faama dumuni dama tèmènnenw kè dugukolo kan, ka aw yèrèw bila ɲènajè kow la. Aw ye aw dusuw wasa fagali don na. 6 Aw ye mògò tilennen jalaki k'a faga, a ma aw kèlè. 7 O de kosòn balimaw, a' ye muɲuli kè sani Matigi ka na. A filè, sènèkèla bè dugukolo suman ɲuman makònò, a bè muɲuliba kè fo a ka sanji fòlò ni a kosana sòrò. 8 Aw fana ka muɲuli kè ka aw ja gèlèya, k'a masòrò Matigi nali surunyara. 9 Aw kana dajukòrò kuma fò ɲògòn ma, balimaw, walisa aw kana jalaki. Kiritigèla filè, a jòlen bè da la. 10 Ne balimaw, kira minnu kumana an Matigi tògò la, aw ka olu ladege u ka tòòrò ni u ka muɲuli la. 11 A filè, minnu bè kòròbòli muɲu, an b'a fò ko olu ye dubadenw ye. Aw ye JOB ka muɲuli kibaru mèn. Matigi ye min kè JOB ye a laban na, aw bè o fana dòn, sabu Matigi ka hinè ni a ka ɲumaya ka bon haali. 12 O bèè kò, ne balimaw, aw kana aw kali fewu. Aw kana aw kali sankolo la, wala dugukolo la. Aw kana kalili wèrè si kè. Aw ka òwò ka kè òwò ye, aw ka ayi ka kè ayi ye, walisa kiri kana bin aw kan. 13 Aw ka mògò dò tòòròlen don wa? O ka Ala deli. Aw dò ɲagalilen don wa? O ka tanuli dònkili da. 14 Aw dò bananen don wa? O ka egilisi cèkòròbaw wele, olu ka Ala deli a ye ka tulu mun a la Matigi tògò la. 15 Ala delili min kèra ni dannaya ye, o na banabaatò kènèya, Matigi na a lawuli. Ni a ye jurumuw kè, olu na yafa a ma. 16 O de kosòn, a' ye aw ka jurumuw fò ɲògòn ye, ka Ala deli ɲògòn ye, walisa aw ka kènèya. Mògò tilennen ka Ala deliliba, a jijalen a la, fanga bè o la kosèbè. 17 Eli tun ye an bòɲògònko mògò ye, a ye Ala deli k'i jija o la ko sanji kana na. Sanji ma bin dugukolo kan san saba ni kalo wòòrò kònò. 18 O kò, a ye Ala deli ko kura, sanji nana, dugukolo denna. 19 Ne balimaw, ni aw dò filila ka tiɲè sira bila, ni dò wèrè y'a lasegin, 20 aw k'a dòn ko min ye jurumukèla kelen lasegin ka bò a ka filili sira kan, o na mògò kelen kisi saya ma, ka jurumu caman caman datugu.

AMAZING GRACE BIBLE INSTITUTE