Hebreux


1

1 Ala kumana an bènbaw fè ka kòrò tuma caman na ani cogo caman na kiraw da la, 2 nka a kumana an fè nin laban donw na a Denkè da la. Ala ye o sigi ka kè fèn bèè ciyèntala ye. A ye diɲèw da fana o barika la. 3 O ye Ala nòòrò manamana ye, ani a ka Alaya ja. A b'a to fènw bèè bè ɲògòn minè a ka sebaaya kuma barika la. A tilalen kò jurumuw saniyali la, a y'i sigi bonyabatigi Ala kinin fè sankolo yòrò kòròtalenw la. 4 A ye tògò min sòrò Ala fè, o ka bon mèlèkèw tògòw ye cogo min na, ale yèrè fisayara mèlèkèw ye ten dè. 5 Ala y'a fò a ka mèlèkè jumèn ye fòlò ko: «I ye ne Denkè ye, ne ye i bange bi»? A y'a fò mèlèkè jumèn ko la fana ko: «Ne na kè ale Fa ye, ale na kè ne Denkè ye»? 6 Nka Ala ye a Denkè fòlò bangelen ci diɲè la tuma min na, a ko: «Ala ka mèlèkèw bèè ka o bato.» 7 A ye min fò mèlèkèw ko la, o filè nin ye ko: «A bè a ka mèlèkèw kè fiɲèw ye, ka a ka baarakèlaw kè tasuma manaw ye.» 8 Nka Ala y'a fò a Denkè ko la ko: «E Ala, i ka masasigilan bè to badaa-badaa. I ka masaya bere ye tilennenya bere de ye. 9 Tilennenya ko ka di i ye haali, juguya ko man di i ye fewu. O de kosòn Ala, i ka Ala kòni, o ye ɲagaliba tulu yèlèma i kan, ka jòyòrò di i ma min ka bon i jèɲògònw bèè ta ye.» 10 A ko fana: «E Matigi ye dugukolo ju sigi fòlòfòlò. I yèrè bolow ye sankolow dila. 11 Olu bèna tiɲè ka ban, nka e bè to. U bèè na kòrò i ko dulòkiw. 12 I na u kuru i ko fini. U na yèlèma i ko dulòkiw. Nka e bè to cogo kelen na, i tilew tèna ban.» 13 Ala y'a fò mèlèkè jumèn ye fòlò ko: «I sigi ne kinin fè, fo ne ka i juguw kè i senkòrò dalan ye?» 14 Mèlèkèw ye mun ye? U bèè tè baarakè niw ye wa? Minnu bèna kisili ciyèn ta, mèlèkèw cilen bè ka olu de mago ɲè.



2

1 O de kosòn an ye ko minnu mèn, anw ka kan ka an janto olu la kosèbè, walisa an kana na ɲinè ka u bila. 2 Kuma min tun fòra mèlèkèw fè, o basigilen tun don. Sariya tiɲèni kow ni kan bilali kow bèè sarala tòòrò bènnen na. 3 N'a kèra ten, ni an faratira o kisiliba la, an na kisi o tòòrò ma cogo di? Matigi yèrè y'a daminè ka o kisili ko fò. O kò, minnu y'a lamèn, olu y'a fò an ye k'a jèya. 4 Ala fana ye u ka seereyaw sinsin ni taamashyènw ni kobaw ani kabako sifa caman ye, ani Ni Senu ka nilifènw, a ye olu di ka kèɲè ni a yèrè diyaɲe ye. 5 Ayiwa, an bè kuma diɲè nata min ko la, Ala ma o kuntigiya di mèlèkèw ma. 6 Nka mògò dò y'a seereya bò Kitabu yòrò dò la ko: «Mògò ye mun ye, fo e Ala bè miiri a ko la? Hadamaden ye mun ye, fo i bè i janto a la? 7 I y'a dògòya mèlèkèw ye waati dòònin. I ye nòòrò ni bonya don a kun na masafugula ye. 8 I ye fènw bèè kolo a ye.» Ni a fòra ko Ala ye fènw bèè kolo a ye, o kòrò ko fèn si tè yen min ma kolo a ye. O bèè n'a ta, an ma fèn bèè kololen ye a ye fòlò. 9 Nka min dògòyara mèlèkèw ye waati dòònin, walisa a ka sa mògòw bèè ye Ala ka nèèma barika la, Yesu kòni, an bè o ye sisan. An b'a ye ko nòòrò ni bonya donna a kun na masafugula ye a ka saya muɲuli kosòn. 10 Tiɲè la, min ye fèn bèè da ani fèn bèè dara min kosòn, Ala kòni, a bènna o ma ka Yesu dafa ni tòòrò kow ye, walisa ka den caman ladon a ka nòòrò la, k'a masòrò Yesu de ye u kisili kuntigi ye. 11 Yesu min bè mògòw saniya u ka jurumuw ma ani minnu bè saniya, ale ni olu bèè bè Fa kelen na, o de kosòn a ma maloya ka olu wele a balimaw. 12 A ko: «E Ala, ne na i tògò fò ne balimaw ye, ne na i tanuli dònkili da jama cèma.» 13 A ko fana: «Ne na ne jigi da Ala kan.» A ko fana: «Ala ye den minnu di ne ma, ne ni olu filè.» 14 Denw ye kelen ye farisogo ni joli la cogo min na, Yesu yèrè fana kèra u bòɲògònko ye ka niyòrò ta Hadamadenya la ten. A y'o kè walisa saya fanga bè min bolo, Sitanè kòni, a ka o fanga tiɲè ni a yèrè saya ye, 15 walisa minnu tun bè jònya la u si bèè la saya ɲèsiran kosòn, a ka olu bèè tila. 16 Tiɲè la, a ma na ka mèlèkèw dèmè, nka a nana ka Ibrahima bònsònw dèmè. 17 O de kosòn wajibi tun don a ka kè a balimaw bòɲògònko ye ko bèè la, walisa a ka kè u ka sarakalasebaaw kuntigi hinèma kantigi ye Ala ka baara la, walisa ka a ka mògòw ka jurumuw juru sara. 18 A bè se ka kòròbòlenw dèmè sisan, k'a masòrò a yèrè tòòròla kòròbòli fè.



3

1 O de kosòn, balima senumaw, aw minnu ye niyòrò sòrò Ala ka weleli la, Ala ye Yesu min kè Ciden ni Sarakalasebaaw Kuntigi ye an ka dannaya ko la, aw ka miiri o la. 2 O tun ye dannamògò ye a sigibaa ka baara la, i ko Musa tun ye dannamògò ye a ka baara la Ala ka so bèè kònò cogo min na. 3 Nka Yesu ka kan ni bonya ye ka tèmèn Musa kan, k'a masòrò so jòbaa bè bonya sòrò ka tèmèn so yèrè kan. 4 Sow bèè bè jò mògò dò fè, nka fèn bèè jòbaa ye Ala de ye. 5 Musa kòni tun ye dannamògò ye Ala ka so bèè kònò i ko baarakèla, walisa Ala bèna min fò, a ka o seereya kè. 6 Nka Krisita kèra dannamògò ye, Ala Denkè don, o sigira Ala ka so kun na. A ka so ye an de ye, ni an sinsinnen bè to an jigi jèlen kan ka ɲagali a ko la ni ja gèlèya ye. 7 O de kosòn, aw kana aw dusuw gèlèya, i ko Ni Senu y'a fò cogo min na ko: «Ni aw bè Ala kumakan mèn bi, 8 aw kana aw dusuw gèlèya, i ko min kèra murutili tuma la, kòròbòli don na kungokolon kònò. 9 Ala ko: Aw bènbaw ye ne kòròbò ka ne tòòrò yen, ka ne ka ko kèlenw ye san binaani kònò. 10 O de y'a to ne diminna o waati mògòw kòrò. Ne ko: U dusu la kow ye filili ye tuma bèè. U ma ne ka siraw dòn. 11 Ne diminnen ye ne kali ko: U tèna don ne ka lafiya la fewu.» 12 Balimaw, a' ye aw yèrèw kòlòsi, dannabaliya dusukun jugu kana sòrò aw si kònò ka Ala ɲènama bila. 13 Nka aw ka ɲògòn laadi don o don, bi bè se ka fò don minnu bèè ma, walisa aw si kana lafili jurumu fè ka aw dusuw gèlèya. 14 K'a masòrò an kèra Krisita jèɲògònw ye, ni a y'a sòrò an sinsinnen bè to an jigi jèlen fòlò kan fo a laban. 15 Kitabu ko: «Ni aw bè Ala kumakan mèn bi, aw kana aw dusuw gèlèya, i ko min kèra murutili tuma la.» 16 Minnu ye Ala dusu bò a ka kuma mènnen kò u fè, olu tun ye jòn ni jòn ye? Musa ye minnu bèè ɲèminè ka bò Misira jamana la, olu tun tè wa? 17 Ala diminnen tun bè jòn ni jòn kòrò san binaani kònò? Minnu ye jurumu kè ni u sara kungokolon kònò, olu tun tè wa? 18 Ala y'i kali jòn ni jòn ko la ko u tèna don a ka lafiya la? Olu tun tè a kan minèbaliw ye wa? 19 O cogo la an y'a ye ko u ma se ka don o lafiya la u ka dannabaliya kosòn.



4

1 Ala ka layidu tolen bè an ye ko an ka don a ka lafiya la, o de kosòn an ka an yèrèw kòlòsi kosèbè, walisa aw si kana dèsè ka don yen. 2 K'a masòrò Kibaru Duman fòra an ye i ko a fòra olu ye cogo min na, nka o kuma mènnen ma foyi ɲè u ye, sabu dannaya ma kolonso a la a mènbaaw kònò. 3 I ko Ala y'a fò cogo min na ko: «Ne diminnen ye ne kali ko: U tèna don ne ka lafiya la fewu,» an minnu bè dannaya kè, an kòni na don o lafiya la. A y'o fò hali k'a sòrò a ka baara dafalen tun don kabini diɲè da tuma. 4 Katuguni a bè fò Kitabu yòrò dò la tile woloèulanan ta fan fè ko: «Ala tilara a ka baara kèlenw bèè la k'i lafiya tile woloèulanan don.» 5 A b'a fò yòrò wèrè la o ko la ko: «U tèna don ne ka lafiya la.» 6 Minnu fòlò ye Kibaru Duman mèn, ni olu ma don o lafiya la u ka dannabaliya kosòn, k'a sòrò dò wèrèw ka kan ka don yen, 7 o de kosòn Ala ye don wèrè sigi, o ye bi ye. Waati jan tèmènnen kò, a y'a fò Dawuda da la i ko min fòra ka ban ko: «Ni aw bè Ala kumakan mèn bi, aw kana aw dusuw gèlèya.» 8 Ayiwa, ni Josue tun ye lafiya di o mògòw ma, Ala tun tèna kuma don wèrè ko la kòfè. 9 O de kosòn Ala y'i lafiya tile woloèulanan don na cogo min na, o lafiya ɲògòn tolen bè Ala ka mògòw ye. 10 K'a masòrò min bè don o lafiya la, o b'i lafiya a ka baara kèlenw la i ko Ala y'i lafiya a taw la cogo min na. 11 O de kosòn an k'an jija ka don o lafiya la, walisa mògò si kana o kan bilali ɲògòn kè ka bin. 12 Ayiwa, Ala ka kuma ɲènama don, a ka teli. A da ka di ka tèmèn npan da fila bèè kan. A bè don fo ka dusukun ni ni fara ka bò ɲògòn na, fo ka se kolotugu yòròw ni sèmèw cèmancè la. A bè don fo ka mògò dusu la miiriliw ni a sagona kow sègèsègè ka u dòn. 13 Dafèn si dogolen tè Ala ma. An ka kan ka an ka koɲèw fò min ye, fèn bèè lankolon don, u dayèlèlen bè o ɲè kòrò. 14 Sarakalasebaaw kuntigiba bè an fè min ye sankolow cètigè, o ye Yesu Ala Denkè de ye. O de kosòn anw sinsinnen ka to an ka dannaya fòlen kan. 15 Sarakalasebaaw kuntigi min tè se ka hinè an na an ka barikantanya kow la, o tè an fè. Nka an ka sarakalasebaa kuntigi kòròbòra fèn bèè la i ko an yèrèw, jurumu kòni sen t'a la. 16 O de y'a to an ja gèlèyalen ka gèrè Ala ka nèèma masasigilan na, walisa ka makari sòrò, ani nèèma min na an dèmè tuma bènnen na.



5

1 Ayiwa, sarakalasebaaw kuntigi minnu ɲènatòmòna ka bò mògòw cèma, olu bèè kelen-kelen bè sigi mògòw kosòn Ala ka baara kama, walisa u ka nilifènw ni jurumu yafa sarakaw lase. 2 A bè se ka hinè ko dònbaliw ni mògò lafililenw na, k'a masòrò barikantanya bè a yèrè fan bèè la. 3 O barikantanya de b'a to a ka kan ka sarakaw lase a yèrè ka jurumuw kosòn, i ko a b'a kè mògò wèrèw ka jurumuw kosòn cogo min na. 4 Ayiwa, mògò si tè don sarakalasebaaw kuntigiya bonya la a yèrèma, fò ni Ala ye min wele ka don o la, i ko Aron welela cogo min na. 5 O cogo la Krisita fana ma a yèrè bonya ka kè sarakalasebaaw kuntigi ye, nka min kumana a fè k'a fò a ye ko: «I ye ne Denkè ye, ne ye i bange bi,» o de y'a bonya ten. 6 A y'a fò yòrò wèrè la fana ko: «I ye sarakalasebaa ye badaa-badaa Mèlkisedèk cogo la.» 7 Ka Yesu to a farisogo tilew la, min tun bè se k'a kisi saya ma, a ye o deli ni delilibaw ni kasikanba ye, ka ɲèji bò. Ala ye a ka deliliw jaabi fana a ka Ala ɲèsiran kosòn. 8 Hali k'a sòrò Ala Denkè don, a ye kan minèli dege a ka tòòrò kow de fè. 9 A dafalen kò, a kèra badaa kisili dabòbaa ye a kan minèbaaw bèè ye. 10 A welela Ala fè ka kè sarakalasebaaw kuntigi ye Mèlkisedèk cogo la. 11 Fèn caman bè an fè k'a fò aw ye o ko la, nka u kòrò jirali ka gèlèn aw la, k'a masòrò aw tulow gèrènna, aw tè faamuli kè. 12 Sisan tun ka kan ka sòrò aw kèra karamògòw ye, nka halibi aw mago bè karamògòw la ka aw kalan Ala ka kuma ko fòlòw la. Aw mago bè nònò la, aw tè se ka dumuni gèlènma kè. 13 Min bè balo nònò la, o ye denyènin ye, a tè se ka tilennenya kow faranfasi. 14 Nka dumuni gèlènma ye mògò mòlenw ta ye, olu minnu hakili sera ka ko ɲuman ni ko jugu faranfasi, k'a masòrò u delila o la.



6

1 O de kosòn, an ka Krisita ka kalan daminè kow to yen, ka taa ɲè dafalenya kalan na. Ka nimisa kèwale salenw la, an kana kòsegin o kalan kan, wala dannaya ko Ala la, 2 ni batiseli kow, ni bolodali kow mògòw kan, ani suw kununli ni badaa kiri kow. An kana olu ju sigi ko kura. 3 Ni Ala sònna, an na taa ɲè ten. 4 Minnu ye kènè sòrò siɲè kelen ka ban, ni u ye sankolo nilifèn nènè, ka kè jèɲògònw ye Ni Senu la, 5 ka Ala ka kuma dòn fèn ɲuman ye, ka waatiba nata ka sebaayaw nènè, 6 ni olu bè bin ka bò sira la, u tè se ka kòsegin ka u cogo yèlèma tun, katuguni u bè Ala Denkè gengen jiri la ko kura u yèrèw ye, k'a lamalo mògòw bèè ɲè kòrò. 7 Sanji bè bin dugukolo min na ka caya, ni o bè sumanfènw bò a sènèkèlaw ye, o bè Ala ka duba sòrò. 8 Nka ni a bè èòniw ni bin juguw bò, a tè foyi ɲè, nka a ni dangali cè man jan. A laban na, tasuma b'a jeni. 9 O bèè n'a ta, balima kanulenw, hali ni an bè kuma ten, an jigi sigilen don aw ta fan fè, ko aw cogo ka fisa ni o ye, ko o ye kisili ko de ye. 10 K'a masòrò Ala tè tilenbali ye, a tèna ɲinè aw ka kètaw kò, ani aw ye kanuya min jira a tògò kosòn, katuguni aw ye aw balima senumaw mago ɲè. Aw bè u mago ɲè halibi. 11 Nka an b'a fè kosèbè aw bèè kelen-kelen ka aw jija ten, walisa jigi jèlen dafalen ka sòrò aw kònò fo a laban. 12 An t'a fè aw ka kè salabaatòw ye, nka Ala ye layidu ta ciyèn min ko la, minnu bè o sòrò dannaya ni muɲuli barika la, aw ka kè olu ladegebaaw ye. 13 Ala ye layidu ta Ibrahima ye tuma min na, a y'i kali a yèrè la, katuguni a ma fèn wèrè sòrò ka i kali o la min ka bon ni a yèrè ye. 14 A ko: «Sèbè la ne b'a fò i ye ko ne na duba i ye ka i bònsòn jiidi kosèbè.» 15 O cogo la, Ibrahima ye muɲuli kè, o kò, a ye o layidu fèn sòrò. 16 Mògòw kòni bè u kali fèn min na, o ka bon ni u yèrèw ye. O kalili bè u ka kuma sigi ka sòsòli bèè ban. 17 Ala tun b'a fè k'a jira layidu ciyèntalaw la k'a jèya ko a ka ko latigèlen tèna yèlèma, o de y'a to a y'i kali u ye. 18 O cogo la Ala tè se ka nkalon tigè ko fila yèlèmabali minnu ko la, an bè ja gèlèya sòrò olu kosòn ka an bolo kuru o jigi fòlen na, an minnu ye yèrèkun dogo yòrò sòrò ale la. 19 O jigi bè an dusukun na i ko banamini. A sigilen sinsinnen don. O jigi fana bè tèmèn bon cètigèfini kan, ka don a so ɲè kònòna la. 20 Yesu donna yen an kosòn, an ɲèfè taamabaa don. Ale kèra sarakalasebaaw kuntigi ye badaa-badaa Mèlkisedèk cogo la.



7

1 O Mèlkisedèk tun ye Salèm masakè ni Ala Kòròtalenba ka sarakalasebaa ye. Ibrahima kòsegintò ka bò masakèw faga yòrò la, Mèlkisedèk taara a kunbèn ka dubaw kè a ye. 2 Ibrahima ye a ka fènw bèè jaka bò ka di a ma. Mèlkisedèk tun ye «tilennenya masakè» ye fòlò. A tògò kòrò y'o ye. A tun ye Salèm masakè ye fana, o kòrò ko «hèrè masakè». 3 Fa t'a fè, ba t'a fè, buruju t'a la, tilew daminè wala si laban fana t'a la, nka a kèra Ala Denkè bòɲògònko ye, ka kè sarakalasebaa ye badaa-badaa. 4 Yahutuw bènba Ibrahima ye fèn cèlenw jaka bò k'a di min ma, aw ka o tigi bonya filè. 5 Levi bònsòn minnu bè don sarakalasebaaya baara la, ci bè olu bolo ka jaka minè Israèl mògòw fè ka kèɲè ni sariya ye. O kòrò, u b'a minè u yèrèw siyaɲògònw fè, hali k'a sòrò olu fana ye Ibrahima bònsònw ye. 6 Mèlkisedèk tun tè Levi bònsòn ye, nka a ye jaka minè Ibrahima fè. Ala tun ye layidu ta mògò min ye, a ye dubaw kè o ye. 7 Ayiwa, duba dibaa ka bon ni a sòròbaa ye, sòsòli tè o la. 8 Sarakalasebaaw ta fan fè, minnu tun bè jaka minè, olu tun ye mògò sataw ye, nka Mèlkisedèk ta fan fè, Kitabu bè seereya kè min ko la ko a ɲènama don, o de ye jaka minè. 9 An bè se k'a fò fana ko Ibrahima ye jaka bò tuma min na, Levi min bònsòn bè jaka minè, o fana ye jaka bò o tuma la, 10 katuguni Mèlkisedèk taara Ibrahima kunbèn tuma min na, o y'a sòrò Levi tun bè a bènba Ibrahima solo la fòlò. 11 Sariya min dira mògòw ma, Levi ka sarakalasebaaya basigilen bè o kan. Ni dafalenya tun bè sòrò o sarakalasebaaya barika la, kun tun t'a la sarakalasebaa wèrè ka sigi, ko o ka kè Mèlkisedèk cogo la, o kana kè Aron cogo la. 12 K'a masòrò ni sarakalasebaaya bè yèlèma, wajibi don sariya fana ka yèlèma. 13 O kow fòra an Matigi min ta fan fè, o bòra bònsòn wèrè la. O bònsòn si tun tè baara kè saraka bòlan kòrò. 14 A jèlen don ko an Matigi ye Juda bònsòn ye. Musa kumana sarakalasebaaw ko la tuma min na, a ma foyi fò Juda bònsòn ko la. 15 A jèlen don ka tèmèn o kan, ko ni sarakalasebaa dò wèrè bè sigi min bòlen bè Mèlkisedèk fè, 16 o kòrò ko o sarakalasebaa ma sigi ka kèɲè ni mògòw ka sariya ci fòlenw ye, nka a bè sigi a yèrè ka ɲènamaya banbali sebaaya barika la. 17 K'a masòrò seereya kèra a ko la ko: «I ye sarakalasebaa ye badaa-badaa Mèlkisedèk cogo la.» 18 O de kosòn sariya ci fòlen kòròw wulila u ka barikantanya ni u ka nafantanya kosòn, 19 k'a masòrò sariya ma se ka foyi dafa. Nka fan wèrè fè, jigi fisama sigira, an bè gèrè Ala la o de barika la. 20 O ko ɲènabòra ni Ala ka kalili ye fana. Mògò wèrèw kèra sarakalasebaaw ye ni kalili tè. 21 Nka Yesu sigira ka kè sarakalasebaa ye ni kalili ye. Ala y'a fò a ye ko: «Matigi y'i kali, o tèna yèlèma, ko: `I ye sarakalasebaa ye badaa-badaa.' » 22 O de kosòn Yesu kèra layidu min sanga ye, o ka fisa fòlò ta ye. 23 Fan wèrè fè, o sarakalasebaa kòròw tun ka ca, katuguni saya kosòn u tun tè mèn. 24 Nka Yesu ɲènama bè to badaa-badaa, o de kosòn a ka sarakalasebaaya tè yèlèma. 25 O de kosòn fana, minnu bè gèrè Ala la ale bolo, a bè se ka olu kisi fo a laban, k'a masòrò a ɲènama don badaa-badaa ka delili kè u ye. 26 Sarakalasebaaw kuntigi min bè bèn an ma, o ye ale de ye. A senuma don, kònòna juguya wala nògò yòrò t'a la. A faralen bè ka bò jurumukèlaw la. A kòròtara sankolow san fè. 27 A mago t'a la ka saraka bò don o don a yèrè ka jurumuw kosòn fòlò, o kò, ka u bò mògò tòw ka jurumuw kosòn, i ko sarakalasebaaw kuntigiw tun b'a kècogo min na, k'a masòrò a y'a yèrè di ka kè saraka ye tuma min na, a y'o kè siɲè kelenpe. 28 Mògò minnu barika ka dògò, sariya bè olu sigi ka kè sarakalasebaaw kuntigiw ye. Nka Ala ka kalili kuma min nana sariya kò, o ye a Denkè sigi ka kè sarakalasebaaw kuntigi ye, o min dafalen don badaa-badaa.



8

1 An bè kuma min fò, o kolo filè nin ye ko: O sifa sarakalasebaaw kuntigi bè an fè, o sigilen bè nòòròtigi Ala ka masasigilan kinin fè sankolo la. 2 A bè baara kè Alabatosoba min kònò, o ye finiso sèbè ye min jòra Matigi fè, o ma jò mògò fè. 3 Sarakalasebaaw kuntigiw bèè kelen-kelen bè sigi walisa ka nilifènw ni sarakaw lase. O de kosòn wajibi don an ka sarakalasebaaw kuntigi fana ka saraka dò bò. 4 Ni a tun bè dugukolo kan, a tun tèna kè sarakalasebaa ye, k'a masòrò sarakalasebaa wèrèw bè yen minnu bè nilifèn sarakaw lase ka kèɲè ni sariya ye. 5 Olu ka sarakalasebaaya baara ye sankolola kow bisigi ni u ja dama de ye. O cogo la Musa tun bèna finiso jò tuma min na, Ala y'a lasòmi ko: «Bisigi min jirala i la k'i to kulu kan, i yèrè kòlòsi k'a bèè jò ka kèɲè n'o ye.» 6 Nka sisan, Krisita ka baara ka fisa ni olu ta ye, katuguni ale ye layidu fisama sorona donna ye, o basigilen bè ko fòlen fisamaw kan. 7 Ni a tun y'a sòrò ko o layidu fòlò dafalen tun don, kun tun tè filanan ɲinili la. 8 Nka Ala ye a ka mògòw jalaki k'a fò u ye ko: «A filè, donw bè na, Matigi ko ten. Ne na layidu kura ta Israèl ka so ni Juda ka so ye. 9 Ne ye u bènbaw bolo minè ka u labò Misira jamana la don min na, ne ye layidu min ta u ye o tuma la, a tèna kè o layidu bòɲògònko ye, k'a masòrò u ye ne ka layidu tiɲè. O de kosòn ne fana ye u bila. Matigi ye o fò. 10 Ne na layidu min ta Israèl mògòw ye o donw tèmènnen kò, o filè nin ye. Matigi ko: Ne na ne ka sariya kè u hakiliw la, ka u sèbèn u dusukunw na. Ne na kè u ka Ala ye, u na kè ne ka mògòw ye. 11 Mògò si tèna a ka siya ni a balimaw kalan tun ko: `Aw ka Matigi dòn'. K'a masòrò u bèè na ne dòn, k'a daminè u la dògòmanninw na ka taa bila u la mògòbaw la. 12 Ne na u ka tilenbaliya kow yafa u ma. Ne tèna ne hakili to u ka jurumuw la tun.» 13 Ala ye layidu kura ko fò tuma min na, o ye layidu fòlò kè kòròlen ye. Ayiwa layidu fòlò min kòròla ni a tile tèmènna fana, o bè ɲini ka tunun.



9

1 Ci fòlenw tun bè layidu fòlò la Ala batoli ko la. Batoso dugukoloma fana tun b'a la. 2 Finiso tun jòra. A bon fòlò tun bè wele yòrò senuma. Fitinèba ni tabali ani jirali nbuurukunw, olu tun bè o kònò. 3 Finiso bon filanan tun bè bon cètigèfini kòfè, o tun bè wele yòrò senuma senuma. 4 Wusulan daga min dilara ni sanu ye, o tun bè yen, ani layidu wagande, sanu dalen tun bè a yòrò bèè kan. Manè tun bè sanu daga min kònò, o tun bè o wagande kònò, ani Aron ka bere min nugura, ani layidu kuma sèbènna kabakurun walaha minnu kan. 5 Serubèn nòòròmaw tun bè o wagande san fè. Olu birilen tun bè jurumu kafari yòrò kun na. Nka o kow bèè ɲè fò waati tè sisan ye. 6 Finiso ni a kònò fènw bèè labènnen kò, sarakalasebaaw bè don o bon fòlò kònò tuma bèè ka Ala batoli kow kè. 7 Nka sarakalasebaaw kuntigi kelenpe bè don bon filanan la siɲè kelenpe san o san. A tè don ni bagan joli tè a bolo, ka o lase Ala ma a yèrè kosòn ani mògòw ka fililiw kosòn. 8 Ni Senu b'a jira o cogo la ko ka finiso fòlò to yen, yòrò senuma senuma sira tun ma dayèlè fòlò. 9 O finiso fòlò ye sisan waati kow bisigi ye, o b'a jira ko nilifènw ni saraka minnu bè lase, olu tè se ka u dibaa dafa dusukun ta fan fè. 10 O nilifènw ni sarakaw ni dumuni fènw ni minni fènw ni ji la koli sifa caman tun ye kènèkan kow de ye, olu kèra sariya ye ka sigi u kun na, fo ka se fèn bèè latilen tuma ma. 11 Nka Krisita nana, fèn ɲuman nataw sarakalasebaaw kuntigi don. A ka sarakalasebaaya finiso ka bon, a dafara ka tèmèn dò kan fana. O ma jò mògò bolo fè, o tè nin diɲè ta ye. 12 A ma don yòrò senuma senuma kònò bakòròw ni misidenw joli barika la, nka a donna a yèrè joli barika la siɲè kelenpe, a t'a kè tun, k'a masòrò a ye badaa kunmabòli sòrò. 13 Ayiwa, bakòròw ni nturaw joli ani misi geren jeninen bugurijè seriserilen mògò nògòlenw kan, o bè u kòkannaw saniya, 14 nka Krisita joli bè saniyali kè ka tèmèn o kan kosèbè! A y'a yèrè di Ala ma saraka fiɲèntan ye, badaa Ni barika la. Ale joli na an dusukunw saniya kèwale salenw ma, walisa an ka baara kè Ala ɲènama ye. 15 O de kosòn Krisita ye layidu kura sorona donna ye. Mògòw ye jurumu minnu kè layidu fòlò waati la, ale sara olu kunmabòli kosòn, walisa Ala ye minnu wele, badaa ciyèn min layidu tara olu ye, u ka o sòrò. 16 Ni ciyèntila sèbèn bè yen, a ka jira k'a jèya ko a sèbènbaa salen don, 17 katuguni o sèbèn ka ko fòlenw tè kè fò ni a sèbènbaa sara, u tè kè k'a ɲènama to. 18 O de kosòn layidu fòlò fana ma sigi ni joli tè. 19 Musa ye sariya ci fòlenw bèè kelen-kelen fò mògòw bèè ye tuma min na, a ye misidenw ni bakòròw joli ta, ka ji fana ta, ani sagasi bilenman ni hisopè jiri fura, ka olu kè ka seriserili kè kitabu yèrè ni mògòw bèè kan, 20 k'a fò ko: «Ala ye layidu min ta aw ye, o joli filè nin ye.» 21 O cogo kelen na Musa ye joli seriseri finiso ni Ala ka baarakè minènw bèè kan. 22 Ka kèɲè ni sariya ye, fèn bèè bè saniya ni joli ye, fò fèn kelen-kelen. Ni joli ma bòn, jurumu yafa tè sòrò. 23 O de kosòn wajibi tun don o sankolola fènw bisigiw ka saniya ni o fènw ye, nka wajibi don sankolo fènw yèrèw ka saniya ni saraka fisamaw ye. 24 K'a masòrò yòrò senuma min jòra mògò bolo fè ka kè yòrò senuma sèbè bisigi ye, Krisita ma don o kònò, nka a donna sankolo yèrè kònò, walisa a k'i jira Ala ɲè kòrò sisan an kosòn. 25 A ma don yen walisa ka a yèrè kè saraka ye siɲè caman, i ko sarakalasebaaw kuntigi bè don yòrò senuma senuma kònò san o san ni joli ye cogo min na min tè a yèrè ta ye. 26 Ni a tun bè ten, Krisita tun ka kan ka tòòrò siɲè caman kabini diɲè da tuma. Nka sisan, nin waati laban na, a y'i jira siɲè kelenpe, walisa a ka jurumu ban ni a yèrè sarakali ye. 27 A latigèra ko mògòw ka sa siɲè kelenpe. O kò, kiri na tigè. 28 O cogo la Krisita fana kèra saraka ye siɲè kelenpe, walisa a ka mògò caman ka jurumuw doni ta. A na i jira a makònòbaaw la a siɲè filanan la u kisili kama. Jurumu ko sen t'a la.



10

1 Fèn ɲuman nataw ja tun bè sariya la, nka o fènw kolo yèrè tun t'a la. O de kosòn mògò minnu tun bè to ka gèrè Ala la ka saraka sifa kelen lase san o san, sariya ma se ka olu dafa abada. 2 Ni u tun dafara, ni Ala batobaaw tun saniyara u ka jurumuw ma siɲè kelenpe ka ban, u dusukunw tun tèna u jalaki u ka jurumu si ko la tun, u tun na saraka bòli dabila. 3 Nka o sarakaw bè to ka mògòw hakili jigin u ka jurumuw la san o san. 4 K'a masòrò nturaw ni bakòròw joli tè se ka jurumuw bò yen abada. 5 O de kosòn Krisita nalen diɲè la, a y'a fò Ala ye ko: «I tun tè saraka ni nilifèn fè, nka i ye farikolo dò dila ne ye. 6 Saraka jenitaw ni jurumu yafa sarakaw si ko man di i ye. 7 O tuma la ne ko: E Ala, ne nalen filè ka i sago kè, i ko a sèbènnen bè Kitabu la ne ko la cogo min na.» 8 A y'a fò fòlò ko: «I tè sarakaw ni nilifènw ni saraka jenitaw ni jurumu yafa sarakaw fè, ko olu man di i ye.» O bèè n'a ta, u bè saraka ka kèɲè ni sariya ye. 9 O kò, a ko: «Ne nalen filè ka i sago kè.» O cogo la, a bè batoli ko fòlò wuli walisa ka filanan sigi. 10 Yesu Krisita ye Ala sago kè, o kosòn a ye a yèrè farikolo di ka kè saraka min ye, an bè saniya siɲè kelenpe o de barika la. 11 Sarakalasebaaw bèè bè jò don o don ka u ka baara kè. U bè saraka sifa kelen lase ko caman, olu tè se ka jurumuw bò yen abada. 12 Nka Krisita ye badaa saraka kelenpe lase jurumuw kosòn minkè, a y'i sigi Ala kinin fè, 13 ka makònòli kè fo a juguw ka kè a senkòrò dalan ye. 14 Minnu saniyalen don u ka jurumuw ma, a ye olu dafa badaa saraka kelenpe de barika la. 15 Ni Senu fana bè o ko seereya kè an ye. A y'a fò ko: 16 «Matigi ko: Ne na layidu min ta u ye o donw tèmènnen kò, o filè nin ye: Ne na ne ka sariyaw kè u dusukunw na, ka u sèbèn u hakiliw la.» 17 O fòlen kò, a ko: «Ne tèna ne hakili to u ka jurumuw ni u ka tilenbaliya kow la tun.» 18 Ayiwa, ni olu yafara yòrò min na, jurumuw yafa saraka dò wèrè tè bò. 19 O de kosòn balimaw, ja gèlèya bè an fè ka don yòrò senuma senuma kònò Yesu joli bònnen barika la. 20 Yesu ye sira kura ɲènama da yèlè an ye min bè tèmèn so cètigèfini fè, o kòrò, a yèrè farikolo. 21 Sarakalasebaaw kuntigi bè an fè, a sigilen bè Ala ka so kun na. 22 O de y'a to an ka gèrè Ala la ni dusukun sèbè ni dannaya dafalen jèlen ye, an dusukunw saniyalen, fo u tè an jalaki tun, an farikolow kolen ni ji jèlen ye. 23 An ka to an jigi fòlen kan ka nòrò a la kosèbè, k'a masòrò min ye layidu ta, o ye kantigi ye ka a dafa. 24 An ka an janto ɲògòn na walisa ka ɲògòn jija kanuya ni kèwale ɲumanw kèli la. 25 An kana ɲògòn lajèli dabila i ko dòw b'a kècogo min na, nka an ka ɲògòn laadi, janko aw b'a ye ko Matigi ka don surunyara. 26 K'a masòrò ni an b'an tugu ka jurumu kè k'a sòrò an ye tiɲè dòn ka ban, jurumu yafa saraka si tè yen tun, 27 fò kiri ni tasumaba makònòli, o ye siran koba de ye, o tasumaba na Ala juguw jeni ka u ban. 28 Mògò min bè Musa ka sariya tiɲè, o bè faga seere fila wala saba ka kuma kosòn, hinè tèna kè a la. 29 Nka min bè Ala Denkè còngò a sen kòrò, ka Ala ka layidu joli jate fèn nògòlen ye, a tun saniyara o min fè, ka yèlèkolon ci Ala ka nèèma Ni la, aw tè miiri ko o tigi ka kan ni tòòròba ye ka tèmèn o dò ta kan kosèbè wa? 30 K'a masòrò min y'a fò ko: «Hakè bò ko bè ne ma, ne na a sara,» ani «Matigi na kiri tigè a ka mògòw kan,» an bè o fòbaa dòn. 31 Ka don Ala ɲènama bolo, o ye siran koba de ye! 32 Nka a' ye aw hakili jigin aw ka fòlò donw la. O waati la, Ala ka kènè sòròlen kò, aw ye kèlèba kè ka tòòrò muɲu. 33 Fan dò fè, aw kèra filèli fènw ye aw tògò jugu fòli ni aw ka tòòrò kosòn, ani fana, mògò wèrè minnu tòòròla ten, aw kèra olu jèɲògònw ye. 34 Aw hinèna kasolamògòw la. Mògòw ye aw bolofènw minè aw la tuma min na, aw ye o muɲu ni ɲagali ye, k'a masòrò aw y'a dòn ko nafolo banbali fisamaw bè aw fè. 35 O de kosòn aw kana aw jigi jèlen fili, o baraji ka bon kosèbè! 36 Aw mago bè muɲuli la, walisa aw ka Ala sago kè, o kò, ka layidu fèn sòrò. 37 K'a masòrò «Waati dòònin na tèmèn fòlò, a tuma man jan tun, min ka kan ka na, o bè na, a tèna mèn. 38 Ne ka mògò tilennen na ɲènamaya dannaya de barika la. Nka ni a bè segin kò, a ko tèna diya ne dusu ye fewu.» 39 Minnu bè segin kò ka halaki, an kòni tè olu dòw ye, nka minnu bè dannaya kè ka u niw kisi, an ye olu dòw de ye.



11

1 Ayiwa, an jigi bè fèn minnu kan, dannaya ye olu jèyali ye. Dannaya bè fèn yebaliw seereya kè. 2 Seereya ɲuman kèra fòlò mògòw ko la dannaya de kosòn. 3 Dannaya b'a to an b'a dòn ko diɲè dara Ala ka kuma barika la. O de y'a to an ɲè bè fèn minnu na, olu ma dila ni fèn yetaw ye. 4 Dannaya de y'a to Abèl ye saraka bò Ala ye min ka fisa Kaèn ta ye. Seereya kèra a ka dannaya kosòn ko a tilennen don, k'a masòrò Ala yèrè y'a seereya kè ko a sònna a ka nilifènw ma. A salen don, nka a bè kuma halibi a ka dannaya kosòn. 5 Dannaya de y'a to Henòk kòròtara ka taa Ala fè k'a sòrò a ma sa. A ma ye tun k'a masòrò Ala y'a ta. Sani a ka ta, a seereya tun kèra ko a ko diyara Ala ye. 6 Ni dannaya tè, mògò si ko tè se ka diya Ala ye, katuguni min bè gèrè Ala la, wajibi don o ka da a la ko Ala bè yen, ko a ye a ɲinibaaw sarabaa de ye. 7 Dannaya de y'a to fèn minnu tun ma ye fòlò, Nuhun lasòminen Ala fè olu ko la, a siranna Ala ɲè ka kurunba dila walisa a ni a ka so mògòw ka kisi. A ka dannaya de y'a to a ye diɲè jalaki. Tilennenya min bè sòrò dannaya fè, a kèra o ciyèntala ye. 8 Dannaya de y'a to Ala ye Ibrahima wele tuma min na, a ye kan minèli kè. Ala tun bèna jamana min di a ma ciyèn ye, a bòra a yèrè ka jamana la ka o sira minè, k'a sòrò a ma a taa yòrò dòn. 9 Dannaya de y'a to Ala ye layidu ta a ye jamana min ko la, a sigira yen i ko siginfè. A sigira finisow kònò, ale ni Isaka ni Yakuba, Ibrahima ni olu minnu kèra o layidu kelen ciyèntaɲògònw ye. 10 Ibrahima tun bè duguba makònò min ju sigira koɲuman, o dugu ko ɲènabòbaa ni a jòbaa ye Ala de ye. 11 Dannaya de y'a to Saran yèrè ye sebaaya sòrò ka kònò ta, hali k'a sòrò a tun kòròla kosèbè, k'a masòrò min ye layidu ta, a ye o jate kantigi ye. 12 O de y'a to cè kelen min tun kèra i ko a farikolo salen don, o ye bònsòn bange, u cayara i ko sankolola dolow ani kògòji da la cèncèn dama dònbali. 13 Olu bèè sara ka u to dannaya la. U ma o layidu fènw sòrò fòlò, nka u ye u ye yòrò jan ka u fo. U jòra a la ko u ye dunanw ni siginfèw ye k'u to diɲè la. 14 Minnu bè kuma ten, olu b'a jira k'a jèya ko u bè faso dò ɲini. 15 Tiɲè don, u bòra faso min na, ni u tun miirila o ko la, u tun na cogo sòrò ka kòsegin ka taa yen. 16 Nka u tun bè faso fisama de ɲini, o kòrò, a sankoloma. O de kosòn Ala tè maloya u ko la, ni a welela u ka Ala, k'a masòrò a ye dugu dila u ye. 17 Dannaya de y'a to Ibrahima kòròbòra tuma min na, a ye Isaka kè saraka ye. Layiduw tun tara min ye, o ye a denkè kelenpe kè saraka ye, 18 a tun fòra a ye o min ko la ko: «I bònsòn na wele Isaka de la.» 19 Ibrahima y'a jate ko se bè Ala ye ka a lakunun ka bò suw cèma. O de kosòn a y'a denkè sòrò tun, i n'a fò a kununna ka bò suw cèma. 20 Dannaya de y'a to Isaka ye dubaw kè Yakuba ni Esau ye ko nataw ko la. 21 Dannaya de y'a to Yakuba sa tuma la, a ye dubaw kè Yusufu denkèw kelen-kelen ye ka Ala bato k'a sinsinnen to a ka berekun kan. 22 Dannaya de y'a to Yusufu sa tuma la, a kumana Israèl bònsòn taali ko la ka bò Misira jamana la, ka ci fò a yèrè kolow ko la. 23 Dannaya de y'a to Musa bangelen kò, a bangebaaw y'a dogo kalo saba, k'a masòrò u y'a ye ko a cè tun ka ɲi, u ma siran masakè ka ci fòlen ɲè. 24 Dannaya de y'a to Musa mòlen kò, a ma sòn ka wele Faraon denmuso denkè. 25 A y'a ɲènatòmò ko a ni Ala ka mògòw ka tòòrò ɲògòn fè, o ka fisa jurumu ɲènajè ye, o min tè mèn. 26 A tògò ka tiɲè Krisita kosòn, a y'o jate nafoloba ye ka tèmèn Misira jamana bolo fèn caman caman bèè kan, k'a masòrò a ɲè tun bè o sara de la. 27 Dannaya de y'a to Musa bòra Misira jamana la ka taa, a ma siran masakè ka diminya ɲè, k'a masòrò a ye muɲuli kè, i ko a ɲè bè Ala yebali la. 28 Dannaya de y'a to a ye Tèmènkan seli sigi ka joli seriseri, walisa halakilikèla kana maga Israèl mògòw den fòlòw la. 29 Dannaya de y'a to Israèl mògòw ye Kògòji Bilen cètigè i ko dugukolo jalan. Nka Misirakaw tun b'a fè ka tèmèn tuma min na, ji ye u bèè tunun. 30 Dannaya de y'a to Israèl mògòw taamana ka Jeriko lamini tile woloèula kònò tuma min na, a kogow binna. 31 Dannaya de y'a to jatòmuso Rahab ma halaki kan minèbaliw fè, k'a masòrò a tun ye o ko lajèbaaw minè koɲuman. 32 Ne na mun fò tun? Waati tè ne fè ka kuma Jedeòn ni Barak ni Samsòn ni Jèfitè ni Dawuda ni Samuèl ani kiraw ko la. 33 Dannaya de y'a to olu ye se sòrò masayaw kan, ka tilennenya kow kè, ka layidu fènw sòrò, ka warabaw daw tugu, 34 ka tasuma fanga ban, ka kisi npan ma. Banabaatòw kènèyara. U ye u ja gèlèya kèlè la. U ye jamana wèrèw ka kèlèbolow gèn. 35 Muso dòw ka mògòw suw kununna ka di u ma. Mògò dòw tòòròla fo ka u faga. Olu ma sòn ka u yèrèw tila o la, u ko u na su kununli fisama sòrò. 36 Dòw kòròbòra ni yèlèkolon cili ye, u dòw bugòra, u dòw sirila ni nègè jòlòkòw ye, u dòw bilara kaso la. 37 Dòw bònna ni kabakurunw ye ka u faga, dòw kòròbòra, dòw cè cira ni jiritigè si ye, dòw fagara npan fè. U cerinna, sagawolow ni bawolow tun bè u kan na, u kòlibaatò, sègènbaatò, tòòròlen tun don. 38 U jènsènnen tun bè yaala kungokolon kònò ani kuluw kan, ani kuluwow ni dingèw kònò. Diɲè tun man kan ni o mògòw ye! 39 Ala ye olu bèè seereya ɲuman kè u ka dannaya kosòn, nka u ma o layidu fènw sòrò fòlò. 40 K'a masòrò Ala tun ye fèn fisama dò latigè anw ye, a tun t'a fè olu ka dafa an kò.



12

1 O seere jamaba bè an lamini, o de kosòn, fèn o fèn bè an bali ani jurumu min bè an fereke, an ka o bèè to yen. Ɲògòndan boli min dara an ɲè, an ka o boli ni jijali ye. 2 An k'an ɲèw jòlen to an ka dannaya dabòbaa ni a dafabaa Yesu la. Ale de ye gengenjiri saya muɲu, a ma o maloya jate fèn ye, k'a masòrò ɲagali min dara a ɲè, a y'a ɲè to o la. O kò, a y'i sigi Ala ka masasigilan kinin fè. 3 Min ye jurumukèlaw ka sòsòliba muɲu ten, a' ye miiri o ko la, walisa aw dusuw barika kana ban, aw kana sègèn. 4 Aw ma jurumu kunbèn k'a kèlè fo ka se saya ma fòlò. 5 Min ye aw laadi i ko a denkèw, o ka kuma bòra aw kònò wa? A ko: «Ne denkè, i kana Matigi ka kololi gosili jate fèn fitinin ye. I dusu barika kana ban ni a bè i kòròfò tuma min na. 6 Katuguni Matigi bè min kanu, a bè o gosi k'a kolo. A bè sòn denkè minnu ma, a bè olu bèè gosi ni gèɲè ye.» 7 A' ye kololi gosili muɲu, k'a masòrò Ala bè aw minè i ko a denw. Denkè min fa t'a gosi k'a kolo, o bè min? 8 Denw bèè bè gosi ka u kolo. Ni o ma kè aw la, aw tè yèrèwolow ye, aw tè den sèbèw ye. 9 An ka an hakili jigin an dugukolo kan faw ko la. U ye an gosi ka an kolo, an fana ye u bonya. An tèna kolo an sankolola Fa ye ka tèmèn olu kan kosèbè walisa an ka ɲènamaya wa? 10 An dugukolo kan faw ye an gosi ka an kolo waati dòònin la u yèrèw sago la, nka Ala bè an kolo an nafa kama, walisa an ka niyòrò sòrò a ka senumaya la. 11 Gosili si tè ɲagali ko ye a kè tuma la, fò ɲènasisi. Nka o kò, minnu kalanna a fè, a bè tilennenya ko hèrèma kè olu ye. 12 O de kosòn, a' ye aw bolo barikantanw gèlèya, ka aw kunbere yèrèyèrètòw sinsin, 13 ka aw senw to sira tilennenw kan, walisa senkelenw kana sira bila, nka u ka kènèya. 14 Aw ka hèrè ɲini aw ni mògòw bèè cè, ka tugu senumaya nòfè k'a masòrò mògò si tèna Matigi ye ni saniyali tè. 15 A' ye aw kòlòsi, mògò si kana dèsè Ala ka nèèma sòròli la, ka aw kòlòsi, mògò si kana kè i ko jiri dili kunaman min bè nugu ka mògò caman tòòrò ni a baga ye ka u nògò. 16 A' ye aw kòlòsi, mògò si kana kè jatò ye aw cèma, ka fèn senumaw lagosi i ko Esau, o min ye a ka kòròya tònò feere tileròfana kelen na. 17 Aw y'a dòn ko o kò, a tun b'a fè ka dubaw sòrò tuma min na, ban kèra a la, k'a masòrò a ma cogo si sòrò ka o ko yèlèma, hali k'a sòrò a ɲèji bòtò tun b'a ɲini. 18 Mògò bè se ka maga kulu min na, ni tasuma tugulen tun bè a fan bèè la, aw ma gèrè o la, i ko o mògòw. Aw ma gèrè sanfinba ni dibi ni fiɲè mankanba 19 ni burufyèkan ani kumakan na. O mògòw ye o kumakan mèn minkè, u y'a deli ko kuma wèrè kana fara o kan tun, 20 k'a masòrò ci min tun fòra u ye ko: «Mògò o mògò magara o kulu la, hali bagan, o ka bon ni kabakurunw ye,» u ma se o kòrò. 21 U ye min ye, o tun ye siran fènba ye kosèbè, fo Musa yèrè ko: «Ne sirannenba bè yèrèyèrè kosèbè!» 22 Nka aw gèrèla Sion kulu de la, ani Ala ɲènama ka duguba, o min ye sankolola Jerusalèm ye, ani mèlèkè jamaba dama dònbali. 23 Ala ka mògò bangelen fòlò minnu tògòw sèbènnen bè sankolo la, aw gèrèla o jamakulu lajèlen na. Aw gèrèla Ala la, o min ye mògòw bèè kiritigèla ye, ka gèrè mògò tilennenw niw la, olu minnu dafalen don. 24 Aw gèrèla Yesu la, o min ye layidu kura sorona donna ye, ka gèrè ale joli seriserilen na, o min ka kuma ɲuman ka fisa Abèl ta ye. 25 A' ye aw yèrèw kòlòsi! Min bè kuma aw fè, aw kana ban ka o lamèn. Min kumana mògòw fè dugukolo kan, minnu banna ka o lamèn, olu ma kisi jalaki tòòrò ma. Min bè kuma an fè ka bò sankolo la ka an lasòmi, ni an ma sòn o ma, an ta na juguya ka tèmèn olu ta kan. 26 A kumakan ye dugukolo yèrèyèrè o waati la, nka sisan a ye layidu ta an ye ko: «Ne na dugukolo yèrèyèrè tun siɲè kelenpe, o dama tè, ne na sankolo fana yèrèyèrè.» 27 O kuma «siɲè kelenpe» b'a jira ko fèn yèrèyèrèlenw na tunun, k'a masòrò fèn danenw don, walisa fèn yèrèyèrèbaliw ka to yen. 28 Masaya min tè se ka yèrèyèrè, an bè don o la. O de kosòn an ka barika da Ala ye, ka baara kè a ye ka a diyaɲekow kè ni Ala bonyali ni a ɲèsiran ye, 29 k'a masòrò an ka Ala ye tasuma jenili kètò de ye.



13

1 Aw ka to ka taa ɲè balima kanuya la. 2 Aw kana ɲinè dunan lajiginni kò, k'a masòrò mògò dòw ye mèlèkèw lajigin ten, k'a sòrò u ma o dòn. 3 A' ye aw hakili to kasolamògòw la, i ko aw yèrèw tun ye u ɲògòn kasolamògòw ye, ka aw hakili to mògò tòòròlenw la, k'a masòrò aw fana bè farikolo la. 4 Furu ka bonya mògòw bèè fè, a dalan kana nògò, k'a masòrò Ala na kiri tigè mògò nògòlenw ni jatòyakèlaw kan. 5 Aw kana tugu wari nòfè aw ka ko kètaw la, nka min bè aw bolo, o ka aw wasa, katuguni Ala yèrè y'a fò ko: «Ne tèna i to yen fewu, ne tèna i bila abada.» 6 O de kosòn an ja gèlèyalen bè se k'a fò ko: «Ne dèmèbaa ye Matigi de ye, ne tèna siran. Mògò bè se ka mun kè ne la?» 7 A' ye aw hakili to aw ɲèminèbaaw la, olu minnu fòlò ye Ala ka kuma fò aw ye. Aw ka miiri u taama cogo ni u saya ko la, ka u ka dannaya ladege. 8 Yesu Krisita bè cogo kelen na, kunuèo ani bi ani badaa-badaa. 9 Aw kana aw yèrèw lafili kalan kura sifa caman fè, k'a masòrò a bènnen bè mògò dusukun ka sabati Ala ka nèèma de fè, a kana sabati dumuni fènw fè, sabu minnu tugura olu nòfè, olu ma nafa si sòrò u la. 10 Saraka bòlan bè an fè, sarakalasebaa minnu bè baara kè finiso kònò, a ma daga olu ye ka balo sòrò o sarakaw la. 11 U ka sarakalasebaaw kuntigi bè don ni baganw joli ye yòrò senuma senuma kònò, ka o kè saraka ye jurumuw kosòn, nka o baganw suw bè jeni dugu kòfè. 12 O de kosòn Yesu fana tòòròla ka sa dugu kòfè, walisa a ka mògòw saniya ni a yèrè joli ye. 13 O cogo la an ka taa ale fè dugu kòfè, a mafiɲèyali ka bin an fana kan. 14 K'a masòrò dugu min bè to badaa-badaa, o tè an fè yan, nka an bè dugu nata de ɲini. 15 O de kosòn an ka tanuli sarakaw bò Ala ye Yesu barika la, an kana o dabila, o kòrò, an ka a tògò tanu an da la tuma bèè. 16 Nka ka ko ɲuman kè, ka dò bò aw bolofènw na ka o di, aw kana ɲinè o kò, katuguni o bòɲògònko sarakaw ka di Ala ye. 17 A' ye aw ɲèminèbaaw kan minè ka kolo u ye, k'a masòrò u bè aw niw kòlòsi, sabu Ala na u ɲininka aw niw ko la. Aw k'a to u ka o dantigèli kè ni ɲagali ye, u kana o kè ni ɲènasisi ye. Ni o kèra, aw tèna nafa sòrò o la. 18 A' ye to ka Ala deli an ye. An kòni dalen b'a la ko dusukun ɲuman bè an fè, an b'a fè ka taama cogo bènnen na ko bèè la. 19 Ne b'a gèlèya aw ma ko aw ka Ala deli ko ne ka kòsegin aw ma sòòni. 20 Hèrètigi Ala, o min ye Sagagènnaba ani Matigi Yesu lasegin ka bò suw cèma, layidu banbali joli barika la, 21 o ka aw dafa kèwale ɲumanw bèè la, walisa aw ka a sago kè. A ka a diyaɲeko kè aw kònò Yesu Krisita barika la. Nòòrò ka da o de kan badaa-badaa! Amiina. 22 Ne bè aw deli balimaw, ko aw ka nin laadili kumaw muɲu, k'a masòrò ne ye nin sèbèn min ci aw ma, o man jan. 23 Aw k'a dòn ko an balimakè Timote bòra kaso la. Ni a sera yan sòòni, ne ni ale na taa bò aw ye ɲògòn fè. 24 A' ye aw ɲèminèbaaw bèè fo, ani Ala ka mògò senumaw bèè. Balima minnu bè Itali jamana la, olu bè aw fo. 25 Ala ka nèèma ka kè aw bèè fè.



AMAZING GRACE BIBLE INSTITUTE