Galates


1

1 Ne Paul bè nin sèbèn ci, ne min kèra ciden ye, nka mògòw ma ne ci, o cidenya fana ma bò mògò la, fò Yesu Krisita yèrè ani Fa Ala, o min y'a lakunun ka bò suw cèma. 2 Balima minnu bèè bè ne fè yan, ne ni olu bè nin sèbèn ci Galasi jamana egilisiw ma. 3 An Fa Ala ni Matigi Yesu Krisita ka nèèma ni dususuma di aw ma. 4 Krisita y'a yèrè di an ka jurumuw kosòn, walisa ka an tila nin diɲè juguman la, ka kèɲè ni an Fa Ala sago ye. 5 Nòòrò ka da ale kan badaa-badaa! Amiina. 6 Min ye aw wele Krisita ka nèèma barika la, aw ye o bila joona ka aw yèlèma Kibaru Duman sifa wèrè fan fè, o de ye ne kabakoya haali. 7 A tè ko Kibaru Duman wèrè bè yen, nka mògò dòw b'a kan ka aw hakili ɲaami. Olu b'a fè ka Krisita Kibaru Duman yèlèma. 8 Nka ni an yèrèw wala sankolola mèlèkè dò bè Kibaru Duman wèrè fò aw ye, min ni an ka fòlò fòlen tè kelen ye, o tigi ka danga! 9 An y'a fò ka ban cogo min na, ne bè segin o kan sisan tun ko: Ni mògò dò ye Kibaru Duman wèrè fò aw ye, ni o tè aw ka minèlen ye, o tigi ka danga! 10 Ayiwa, ne b'a fè ka ne ko diya mògòw ye wa, wala Ala ye? Yala ne b'a fè ka mògòw diyaɲekow kè wa? Ni ne tun b'a fè ka mògòw diyaɲekow kè halibi, ne tun tèna kè Krisita ka baaraden ye. 11 Balimaw, ne b'a fò aw ye k'a jèya ko ne ye Kibaru Duman min fò aw ye, o ma bò mògòw la. 12 Ne ma o sòrò mògò fè. Mògò si fana ma ne kalan o la, nka a jirala ne la Yesu Krisita de fè. 13 Ne tun bè taama Yahutuw ka diinè sira la cogo min na fòlò, aw y'o mèn. Aw y'a dòn ko ne tun bè tugu Ala ka egilisi nòfè ka a tòòrò fo ka dama tèmèn, walisa ka a tiɲè. 14 Ne tun tèmènna ne filaɲògòn Yahutuw caman kan Yahutuw ka diinè kow la. Ne dusu bèè tun bè an bènbaw ka laada fòlenw na. 15 Nka Ala ye ne ɲènatòmò sani ne ka bange, ka ne wele a ka baara kama a ka nèèma barika la. 16 A diyara a ye ka a Denkè jira ne la walisa ne ka o Kibaru Duman fò siya wèrè mògòw ye tuma min na, o yòrònin bèè ne ma mògò si ɲininka. 17 Minnu kèra cidenw ye ne ɲè, ne ma taa olu sègèrè Jerusalèm, nka ne sinna ka taa Arabi jamana la. O kò, ne kòseginna ka taa Damasi. 18 San saba tèmènnen kò, ne taara Jerusalèm walisa ne ni Pièrè ka ɲògòn dòn. Ne ye tile tan ni duuru kè a fè yen. 19 Nka ne ma ciden tòw si ye, fò Matigi balimakè Yakuba. 20 Ne b'a fò Ala ɲè kòrò ko, ne bè nin ko minnu sèbèn, nkalon tè olu la. 21 O kò, ne taara Siri ni Silisi jamanaw la. 22 O waati bèè la, Krisita ka egilisi minnu bè Jude jamanaw la, olu tun ma ne ye ka ne dòn. 23 U tun b'a mèn dòròn ko min tun tugura u nòfè ka u tòòrò, k'i gèlèya ka dannaya tiɲè, ko o bè o dannaya ko waajuli kè sisan. 24 O tuma la u tun bè Ala tanu ne ko la.


2

1 San tan ni naani tèmènnen kò, ne ni Barnabasi kòseginna Jerusalèm. Ne taara ni Tite fana ye. 2 Ne taara ka kèɲè ni Ala ka jirali ye ne la. Ne delila ka Kibaru Duman min waajuli kè siya wèrè mògòw cèma, ne y'o bèè jira u ɲè mògòw la u dan na, walisa ne ye baara min kè ka tèmèn, ani ne bè baara min kè sisan, a kana na sòrò ko ne ye o kè fu. 3 Ayiwa, ne taamaɲògòn Tite min ye Grèki ye, olu ma o wajibiya ka boloko, 4 hali k'a sòrò balima nkalontigèla dòw tun b'a fè k'a wajibiya o la. Olu tun y'u dogo ka don an cèma, walisa an ye hòrònya min sòrò Krisita Yesu la, u ka o tiɲè ka sòrò ka an bila jònya la. 5 An ma u kan minè, an ma kolo u ye hali waati kunkurunnin kònò, walisa Kibaru Duman tiɲè ka to aw fè. 6 Nka minnu jatera ɲè mògòw ye, (tiɲè la u tun ye o min ye, o tè fèn ye ne ɲè na, sabu Ala tè mògò filè a kòkanna fè,) minnu jatera ɲè mògòw ye, olu kòni ma foyi fara ne ka Kibaru Duman fòlen kan. 7 Nka u yèrèw y'a ye ko Ala ye baara kalifa ne ma ko ne ka Kibaru Duman fò siya wèrèw cèma, i ko a y'a di Pièrè ma k'a fò Yahutuw cèma cogo min na. 8 K'a masòrò Ala ye Pièrè labèn ka kè Yahutuw ka ciden ye cogo min na, a ye ne labèn ka kè siya wèrèw ka ciden ye ten. 9 Yakuba ni Pièrè ni Yuhana minnu tun jatera i ko samasenw, olu y'a ye ko o baara kalifara ne ma Ala ka nèèma barika la tuma min na, olu ye u tègè don ne ni Barnabasi tègè k'a jira ko an kèra jèɲògònw ye. U sònna an ka taa baara kè siya wèrè mògòw cèma, ko olu na taa Yahutuw cèma. 10 U y'an deli dòròn ko an ka an hakili to dannabaa faantanw la. Ne fana ye ne jija ka o kè. 11 Pièrè nalen kò Antiose, ne y'a sòsò mògòw bèè ɲè na, katuguni a jalaki tun don. 12 Sani mògò dòw ka se yen ka bò Yakuba yòrò, o y'a sòrò a tun bè dumuni kè siya wèrè balimaw fè. Nka olu sera yen tuma min na, a y'i mabò u la, a ma sòn ka dumuni kè u fè tun, k'a masòrò a siranna bolokolenw ɲè. 13 Balima Yahutu tòw fana ye a ka filankafoya ɲògòn kè, fo Barnabasi yèrè lafilila u ka filankafoya fè. 14 Ne y'a ye ko u tun tè taama ka tilen ka kèɲè ni Kibaru Duman tiɲè ye tuma min na, ne y'a fò Pièrè ye u bèè ɲè na ko: «E min ye Yahutu ye, ni e bè siya wèrè mògòw cogo ta, ka Yahutuw cogo bila, i bè se ka siya wèrè mògòw karaba ka Yahutuw cogo ta cogo di?» 15 An kòni ye Yahutu bangelenw ye, an tè siya wèrè mògòw jurumukèlaw ye. 16 O bèè n'a ta, an y'a dòn ko mògò si tè jo sòrò Ala ɲè kòrò sariya kèwalew barika la, fò Krisita Yesu dannaya barika la. O de kosòn an fana dara Krisita Yesu la walisa an ka jo sòrò Krisita dannaya barika la, o kana kè sariya kèwalew nò ye, k'a masòrò mògò si tè jo sòrò Ala ɲè kòrò sariya kèwalew barika la. 17 Ayiwa, k'an to jo ɲinili la Krisita barika la, ni an yèrèw sòròla jurumukèlaw ye, o kòrò ko Krisita bè baara kè jurumu ye wa? Ayi dèrè! 18 Nka ne tun ye fèn minnu tiɲè, ni ne ye olu dila ko kura, ne bè ne yèrè jira sariya tiɲèbaa ye. 19 Ne kòni salen don sariya ta fan fè, sariya yèrè fè, walisa ne ka ɲènamaya Ala ye. 20 Ne ni Krisita gengenna jiri la ɲògòn fè. Ne ɲènama don, ne yèrè tè mènè, Krisita de bè ɲènamaya ne kònò. Ne bè ɲènamaya min na sisan, ne bè taama o la Ala Denkè dannaya barika la. Ale de ye ne kanu k'a yèrè di ne kosòn. 21 Ne tè ban Ala ka nèèma la, k'a masòrò ni tilennenya bè sòrò sariya barika la, Krisita sara fu.


3

1 Aw Galasika hakilintanw! Yesu Krisita gengenni jiri la, o ko jirala aw la k'a jèya, jòni ye aw malasa? 2 Ne b'a fè ka nin dòròn de dòn aw fè: Aw ye Ni Senu sòrò sariya kèwalew barika la wa, wala Kibaru Duman lamènni ni a dannaya barika la? 3 Aw dun kèra hakilintanw ye ten cogo di? Aw y'a daminè Ni Senu barika la, sisan aw b'a fè k'a dafa aw yèrèw barika la wa? 4 Aw ye koba minnu sòrò, aw ye olu sòrò fu wa? Nka olu tè se ka kè fu. 5 Ala ye Ni Senu di aw ma ka kabakow kè aw cèma tuma min na, a y'o kè aw ka sariya kèwalew kèli kosòn wa, wala Kibaru Duman lamènni ni a dannaya kosòn? 6 O cogo la Kitabu bè kuma Ibrahima ko la ko: «A dara Ala ka kuma la, o de jatera a ye tilennenya ye.» 7 O de y'a to aw k'a dòn ko minnu bè dannaya sira kan, olu ye Ibrahima bònsòn sèbèw ye. 8 Kitabu kònna k'a ye ko Ala na jo di siya tòw ma dannaya barika la, o de kosòn a kònna k'a Kibaru Duman fò Ibrahima ye ko: «Siyaw bèè na duba sòrò e de la.» 9 O de y'a to minnu bè dannaya sira kan, olu bè duba sòrò i ko dannabaa Ibrahima ye duba sòrò cogo min na. 10 Mògò minnu bèè bè sariya kèwalew sira kan, olu bè danga kòrò, katuguni a sèbènnen bè ko: «Mògò o mògò tè to ka sariya kitabu ko sèbènnenw bèè kè, o dangalen bè.» 11 Ayiwa a jèlen don ko mògò si tè jo sòrò Ala ɲè kòrò sariya barika la, katuguni a sèbènnen bè ko: «Mògò tilennen na ɲènamaya dannaya de barika la.» 12 Sariya kòni tè dannaya ko ye, k'a masòrò a sèbènnen bè ko: «Min bè sariya ci fòlenw kè, o de na ɲènamaya u barika la.» 13 Krisita ye an kunmabò sariya ka danga ma. Ale yèrè kèra danga ye an nò na, k'a masòrò a sèbènnen bè ko: «Mògò o mògò dulonna jiri la, o dangalen bè.» 14 O kèra walisa Ibrahima ye duba min sòrò, o ka lase siyaw bèè ma Yesu Krisita fè, walisa Ni Senu min layidu tara, an ka o sòrò dannaya barika la. 15 Balimaw, ne bèna kuma ka kèɲè ni Hadamadenw ka ko kècogo ye. Ni mògò dò bè layidu ta k'a sigi koɲuman, mògò wèrè tè se ka o tiɲè wala ka fèn wèrè fara o kan. 16 Ayiwa, Ala tun ye layiduw ta Ibrahima ni a bònsòn ye. Kitabu ma kuma a bònsòn caman ko la, ko «bònsònw,» nka a kumana a bònsòn kelen ko la, ko «a bònsòn,» o ye Krisita de ye. 17 Ne b'a fè ka min fò, o filè nin ye ko: Ala ye layidu ta k'a sigi koɲuman. Sariya min sigira san kèmè naani ni bisaba o layidu talen kò, o tè se ka o layidu yèlèma ka a ko fòlen tiɲè. 18 K'a masòrò Ala ye ciyèn min di, ni o tun basigira sariya kan, o tun tèna kè layidu nò ye tun, nka Ala y'a di Ibrahima ma ka kèɲè ni a ka layidu ye. 19 O tuma la sariya sigi kun ye mun ye? A sigira layidu talen kò, sariya tiɲèni kow de kosòn. A tun ka kan ka to yen fo layidu tara Ibrahima bònsòn min ko la, o ka na. O sariya sigira mèlèkèw fè, a tèmènna mògò bolo fè. 20 Min bè tèmèn mògò bolo fè, o tè mògò kelen ka ko ye, k'a sòrò Ala ye kelenpe de ye. 21 Yala sariya bè Ala ka layiduw kama wa? Ayi dèrè! Sariya min bè se ka ɲènamaya di mògòw ma, ni o tun sigira, o tuma la mògòw tun na tilennenya sòrò sariya barika la. 22 Nka Kitabu y'a fò ko Hadamadenw bèè bè jurumu fanga kòrò, walisa layidu nilifèn min bè sòrò Yesu Krisita dannaya fè, o ka di a dannabaaw ma. 23 Sani dannaya waati ka se, an tun bè sariya ka mara la, an bilara yen ka o dannaya nata jirali makònò. 24 O de y'a to sariya kèra an denmisènma bilasirabaa ye ka an lase Krisita ma, walisa an ka jo sòrò Ala ɲè kòrò dannaya barika la. 25 Dannaya waati selen, an tè denmisènma bilasirabaa bolo tun. 26 Aw bèè ye Ala denw ye dannaya de barika la Krisita Yesu la. 27 Aw minnu bèè batisera Krisita la, aw ye Krisita don aw kan na i ko dulòki. 28 O de kosòn faranfasi tè Yahutuw ni siya tòw cè tun, wala jònw ni hòrònw, wala cèw ni musow, k'a masòrò aw bèè ye kelen ye Krisita Yesu la. 29 Ayiwa ni aw ye Krisita taw ye, aw ye Ibrahima bònsònw fana ye, ani ciyèntalaw, ka kèɲè ni Ala ka layidu ye.


4

1 Ne ko: Ka ciyèntala denmisènma to, faranfasi si tè a ni jòn cè, hali k'a sòrò a ye fèn bèè kuntigi ye. 2 K'a denmisènma to, a bè kòlòsibaaw ni ko ɲènabòlaw bolo fo ka se a fa ka waati latigèlen ma. 3 An fana bè ten. Ka an to denmisènya la, an tun bè diɲè kow ka jònya la. 4 Nka waati dafalen selen, Ala ye a Denkè ci ka na. A bangera muso fè, a bangera sariya kòrò, 5 walisa a ka sariya kòrò mògòw kunmabò walisa an ka don yòrò sòrò Ala denya la. 6 Aw ye Ala denkèw ye, o de kosòn Ala ye a Denkè Ni ci ka na don an dusukunw na. O Ni bè pèrèn ko: «Aba, an Fa.» 7 O de y'a to i tè jòn ye tun, fò denkè. Ayiwa, ni i ye denkè ye, i ye ciyèntala fana ye Ala barika la. 8 Waati tèmènnen na, aw tun tè Ala dòn. Aw tun bè minnu ka jònya la, olu tè batofèn sèbèw ye. 9 Nka sisan, kabini aw ye Ala dòn, ayi, kabini aw dònna Ala fè, aw bè kòsegin o ko fu barikantanw ma cogo di? Aw b'a fè ka don olu ka jònya la ko kura cogo di? 10 Aw bè donw ni kalow ni waatiw ni sanw bila! 11 Ne bè siran aw ko la ko a kana na sòrò ne ye baara kè aw kosòn fu. 12 Balimaw, ne bè aw deli ko aw ka kè i ko ne, katuguni ne fana bè i ko aw. Aw ma ne tòɲò foyi la. 13 Aw y'a dòn ko ne taa ko fòlò ka Kibaru Duman fò aw ye, o y'a sòrò ne tun man kènè. 14 Aw ye kòròbòli sòrò ne ka bana kosòn, o bèè n'a ta aw ma ne mafiɲèya wala ka ɲigin ne la, nka aw ye ne minè i ko Ala ka mèlèkè dò, wala Krisita Yesu yèrè. 15 Aw nisòndiyalen tun don ne ko la kosèbè. Nka o nisòndiya dun bè min? K'a masòrò ne ye aw seere ye ko ni a tun bè se ka kè, aw tun na aw yèrèw ɲèw bò ka u di ne ma. 16 Ne ye tiɲè fò aw ye, o de kosòn ne kèra aw jugu ye sisan wa? 17 O mògòw jijalen don aw ko la, nka u ka miiriliw man ɲi. U b'a fè ka an ni aw fara ka bò ɲògòn na, walisa aw ka jija u ko la. 18 Jijali kòni ka ɲi ko ɲuman ta fan fè, tuma bèè. O kana kè ka ne to aw cèma dòròn. 19 Ne ka denmisènw, ne bè tin na aw kosòn ko kura, fo Krisita ka kè aw kònò sèbè la. 20 Ne tun b'a fè ka ne yèrè sòrò aw cèma sisan, walisa ne ka se ka ne kuma cogo yèlèma, sabu ne sigalen don aw ko la! 21 A' y'a fò ne ye, aw minnu b'a fè ka kè sariya kòrò, yala aw tè sariya kuma lamèn wa? 22 A sèbènnen bè ko denkè fila tun bè Ibrahima fè. Kelen tun ye a ka jònmuso den ye, a tò kelen tun ye a ka hòrònmuso den ye. 23 Jònmuso denkè bangera farisogo barika la. Hòrònmuso denkè bangera Ala ka layidu barika la. 24 Kòrò wèrè bè o ko la: O muso fila ye layidu fila bisigiw ye. Kelen ye Agar ye, o ye Sinayi kulu bisigi ye. A bè denw bange jònya la. 25 Agar ye Sinayi kulu ye Arabi jamana la. O bè kèɲè ni Jerusalèm sisanlama ye, k'a masòrò a ni a denw bè jònya la. 26 Nka sanfè Jerusalèm ye hòrònmuso ye, o de ye an bèè ba ye. 27 A sèbènnen bè ko: «Muso bangekèbali, i ka ɲagali! Tin ma e min minè, i ɲagalilenba ka kulokanba ci! K'a masòrò muso min tora a dan na, o denw na caya ka tèmèn muso cètigi ta kan.» 28 Aw kòni balimaw, aw ye layidudenw ye i ko Isaka. 29 Waati tèmènnen na, den min bangera farisogo cogo la, o tugura Ala Ni ta den nòfè k'a tòòrò. A bè ten halibi. 30 Nka Kitabu bè mun fò? A ko: «I ka jònmuso ni a denkè gèn, k'a masòrò jònmuso denkè ni hòrònmuso denkè tèna ciyèn ta ɲògòn fè.» 31 O de kosòn balimaw, an tè jònmuso denw ye, fò hòrònmuso denw.


5

1 Krisita ye an tila hòrònya de kama. O de kosòn aw sinsinnen ka to o hòrònya kan, aw kana aw yèrèw bila jònya tònnajiri kòrò tun. 2 A filè, ne Paul b'a fò aw ye ko: Ni aw bolokora, Krisita tèna foyi ɲè aw ye tun. 3 Ne bè segin a kan tun ko: Mògò o mògò bolokora, ne b'a fò o tigi ye k'a jèya ko sariya kow bèè kèli juru b'a la. 4 Aw minnu bè jo ɲini Ala ɲè kòrò sariya barika la, aw farala ka bò Krisita la, aw binna ka bò Ala ka nèèma la. 5 An kòni jigi b'a kan Ni Senu barika la ko an na tilennenya sòrò Ala fè. An bè o de makònò ni dannaya ye. 6 K'a masòrò Krisita Yesu la, bolokoli wo, bolokobaliya wo, nafa tè o si la. Dannaya min bè baara kè kanuya barika la, nafa bè o de la. 7 Aw tun bè boli koɲuman. Jòni ye aw bali ka boli tiɲè sira kan? 8 O miirili ma bò aw welebaa Ala la fewu. 9 Buurufunun fèn dòònin bè mugu nòòninen bèè funun. 10 O bèè n'a ta, ne jigi dalen bè aw kan Matigi la ko aw tèna sòn ka miiri ko wèrè la, nka mògò o mògò bè aw hakili ɲaami, o tigi na tòòrò dè. 11 Balimaw, ne kòni ta fan fè, ni a y'a sòrò ne bè bolokoli ko waajuli kè tun, mun y'a to tugu bè kè ne nòfè ka ne tòòrò halibi? Ni ne tun y'o kè, Krisita gengenjiri ko tun tèna kè kunnatiɲè ko ye tun. 12 Minnu bè tòòrò lawuli aw cèma, ne tun b'a fè olu ka u yèrèw tigè pewu! 13 Balimaw, aw kòni welela hòrònya de kama, nka aw kana o hòrònya kè farisogo kow kè sababu ye, nka aw ka ɲògòn mago ɲè kanuya la. 14 K'a masòrò sariya bèè bè dafa ni nin kuma kelen ye ko: «I ka i mògò ɲògòn kanu i ko i yèrè.» 15 Nka ni aw bè ɲògòn cin ka ɲògòn ɲimi, a' ye aw yèrèw kòlòsi, aw kana ɲògòn ban dun na. 16 Ayiwa, min bè ne fè k'a fò aw ye, o filè nin ye ko: A' ye taama Ni Senu barika la. Ni o kèra, aw tèna farisogo nege kow kè fewu. 17 K'a masòrò ko minnu man di Ni Senu ye, farisogo ɲè bè bò olu fè. Ko minnu ka di farisogo ye, Ni Senu tè olu fè fewu. U bè ɲògòn kèlè, walisa aw b'a fè ka ko minnu kè, aw kana olu kè. 18 Nka ni Ni Senu ye aw ɲèminèbaa ye, o tuma la aw tè sariya kòrò. 19 Farisogo ka kèwalew jirala, olu filè: jatòya, nògòlenya, kakalaya, 20 boli batoli, subaaya, juguya, sòsòli, kèlè, keleya, diminya, bila ɲògòn na kow, farali, kan tilali, 21 koniya, dòlòtòya ni ko kolonya ani olu bòɲògònkow. Ne bè aw lasòmi i ko ne tun y'a fò aw ye ka ban cogo min na ko minnu bè o kow kè, olu tèna don Ala ka masaya la fewu. 22 Nka Ni Senu den ye kanuya ye, ani ɲagali, hèrè, muɲuli, hinè, ɲumaya, dannamògòya, 23 sabali, yèrèminèli. Sariya si tè o bòɲògònkow kèlè! 24 Minnu ye Krisita Yesu taw ye, olu ye farisogo ni a negela kow ni a sagola kow gengen jiri la ka u faga. 25 An ɲènama don Ni Senu barika la, o de kosòn an ka taama Ni Senu barika la. 26 An kana an yèrèw bonya, ka don ɲògòn dimin kow la, ka ɲògòn keleya.


6

1 Balimaw, ni mògò dò minèna hakèma ko kèli la, aw minnu bè Ni Senu sira kan, aw ka o latilen ni majiginlenya ye, ka i yèrè kòlòsi, walisa i fana kana kòròbò. 2 A' ye ɲògòn dèmè ka ɲògòn ka doniw ta. Aw na Krisita ka sariya dafa ten. 3 Ni mògò dò bè miiri ko ale ye fèn ye, k'a sòrò a tè foyi ye, a b'a yèrè lafili. 4 Mògòw bèè kelen-kelen ka u yèrèw taama cogo sègèsègè. O cogo la, ni yèrèbonya yòrò bè u fè, u na o sòrò u yèrèw la, mògò wèrè sen tèna kè o la. 5 K'a masòrò bèè kelen-kelen na a yèrè ka doni ta. 6 Mògò min bè kalan mògò wèrè fè Ala ka kuma la, o tigi ka a karamògò niyòrò bò a bolofènw bèè la. 7 Aw kana aw yèrèw lafili. Mògò tè yèlè bò Ala ma. Mògò mana fèn o fèn dan, a bè o de suman tigè. 8 Min ye danni kè a farisogo ye, o na tolilenya sòrò ka bò farisogo la. Min ye danni kè Ni Senu ye, o na ɲènamaya banbali suman tigè ka bò Ni Senu fè. 9 An kana sègèn ko ɲuman kè la, katuguni ni an ma sègèn k'a bila, an na suman tigè tuma bènnen na. 10 O de kosòn, ni cogo bè an fè, an ka ko ɲuman kè mògòw bèè ye, janko an balima dannabaaw. 11 A' ye nin sèbènden kunbabaw filè. Ne yèrè bolo de ye u sèbèn ka u ci aw ma. 12 Minnu b'a fè ka u ko diya mògòw ye farikolo ko la, olu b'a fè ka aw wajibiya ka boloko. U bè o kè walisa mògòw kana u tòòrò Krisita gengenjiri kosòn. 13 Minnu bolokora, olu yèrèw tè sariya sira taama. U b'a fè aw ka boloko walisa u ka u yèrèw bonya ko o taamashyèn bè aw fari la. 14 Ne kòni tèna ne yèrè bonya foyi la ni an Matigi Yesu Krisita gengenjiri tè. O gengenjiri barika la, diɲè salen don ne ta fan fè, ne salen don diɲè ta fan fè. 15 Bolokoli ni bolokobaliya, o si tè foyi ye. Ka kè dafèn kura ye, o de bè jate. 16 Minnu bèè bè nin sira taama, ne b'a fò olu ye ko: Ala ka hèrè ni a ka makari ka kè olu ni Ala ka Israèl bèè lajèlen fè. 17 Kabini sisan mògò si kana ne tòòrò tun, k'a masòrò Yesu ka taamashyènw bè ne farikolo la. 18 Balimaw, an Matigi Yesu Krisita ka nèèma ka kè aw fè. Amiina.



AMAZING GRACE BIBLE INSTITUTE