Ephesiens


1

1 Ne Paul, Krisita Yesu ka ciden Ala sago barika la, ne bè nin sèbèn ci Ala ka mògò senumaw ma Efese, olu minnu ye Krisita Yesu dannabaaw ye. 2 An Fa Ala ni Matigi Yesu Krisita ka nèèma ni dususuma di aw ma. 3 An Matigi Yesu Krisita Fa Ala ka tanu. A ye Ni Senu ka dubaw bèè da an kan sankolo yòròw la Krisita la. 4 Ala ye an ɲènatòmò Krisita la sani diɲè ka da, walisa an ka kè senumaw ni jalakibaliw ye ale ɲè kòrò. 5 Ala ka kanuya kosòn a kònna k'a latigè ko an ka kè a denw ye Yesu Krisita barika la ka kèɲè ni a sago diyaɲe ye, 6 walisa a ye a ka nèèma min ni an na a ka Kanulen na, o nòòrò ka tanu. 7 An ye kunmabòli sòrò ale de la a joli bònnen barika la, hakèw yafa kòni, ka kèɲè ni Ala ka nèèma dama dònbali ye. 8 A ye o nèèma caya an ye haali, ni hakilitigiya ni dònniya sifa bèè ye. 9 A ye a sago gundo jira an na ka kèɲè ni a yèrè diyaɲe ye. A y'a latigè Krisita la, 10 ko ni waatiw dafara tuma min na, a na sankolola fènw ni dugukolo kan fènw bèè lajè ka kè kelen ye Krisita la, 11 An kèra ciyèntalaw ye Krisita la fana, k'a masòrò min bè fèn bèè kè ka kèɲè ni a yèrè sago ka ko latigèli ye, o kònna ka an ko latigè ka kèɲè ni a sago ye, 12 walisa an minnu kònna ka an jigi da Krisita kan, an ka kè a nòòrò tanuli sababu ye. 13 Aw fana, kabini aw ye tiɲè kuma mèn, aw kisili Kibaru Duman kòni, aw jigi dara ale kan. Aw dalen kò ale la, taamashyèn dara aw kan. O ye layidu Ni Senu ye. 14 Ni Senu ye an ka ciyèn fòlò fèn ye, k'a jira ko an na don o ciyèn na, ni Ala ye a taw bèè kunmabò tuma min na, walisa a nòòrò ka tanu o la. 15 O de y'a to, dannaya min bè aw fè Matigi Yesu la, ani aw ye Ala ka mògò senumaw bèè kanu cogo min na, kabini ne ye o kibaru mèn, 16 ne tè barika dali dabila Ala ye aw kosòn. Ne bè aw tògò fò ne ka deliliw la fana, 17 ko an Matigi Yesu Krisita ka Ala, nòòrò Fa, o ka Ni Senu di aw ma, ka aw kè hakilitigiw ye ka Ala dònniya jira aw la, walisa aw ka ale dòn. 18 Ne bè a deli ko aw dusukun ɲèw ka yèlè, walisa Ala ye aw wele jigi min na, aw ka o dòn, ani a bèna ciyèn min di aw ma a ka mògò senumaw cèma, aw ka o nòòrò fana dòn, 19 ka a ka sebaaya dama dònbali fana dòn an dannabaaw ta fan fè. O sebaaya bè kèɲè ni a ka fangaba baarakè cogo ye. 20 A ye o fanga jira Krisita kununli fè ka bò suw cèma ka a sigi a yèrè kinin fè sankolo yòròw la. 21 A y'a sigi kuntigiya ni sebaaya ni fanga ni masayaw bèè kun na kosèbè, ani tògòw bèè kun na, nin diɲè la tògòw dama tè, hali diɲè nata la tògòw fana. 22 Ala ye fèn bèè kolo Krisita ye k'a di ka kè egilisi kuntigi ye ko bèè la. 23 Egilisi ye a farikolo ye. Ale min bè fèn bèè fa, egilisi ye o dafalenya ye.


2

1 Aw kòni salen tun bè aw ka hakèw ni aw ka jurumuw la. 2 Aw tun bè taama olu la fòlò ka nin diɲè cogo ta ka kèɲè ni fiɲè fanga kuntigi cogo ye, o ni min bè baara kè kan bilali denw kònò sisan. 3 Anw bèè ani olu fana tun ye jèɲògònw ye ka tugu an farisogo negew la, ka farisogo ni miirili sagow kè. An tun ye diminyadenw ye fana i ko tòw, an bangera ten. 4 Nka Ala ka makari ka bon kosèbè! A ye an kanu kanuyaba min na, 5 o de kosòn, k'an salen to an ka hakèw la, a ye an ni Krisita ɲènamaya ɲògòn fè. Aw kisilen bè nèèma de barika la. 6 A ye an lakunun ɲògòn fè fana ka an sigi ɲògòn fè sankolo yòròw la Krisita Yesu la. 7 A ye o kè walisa a ka a ka nèèma dama dònbali jira a ka ɲumaya fè an ta fan fè Krisita Yesu la waati nataw bèè la. 8 Aw kisilen bè nèèma de barika la dannaya fè, o ma bò aw yèrèw la dè, Ala ka nilifèn don. 9 O tè kèwalew nò ye, walisa mògò si kana a yèrè bonya. 10 Ala ka baara nò ye an de ye. A ye an da Krisita Yesu la kèwale ɲumanw kama, a kònna ka olu labèn walisa an ka taama u la. 11 Aw minnu ye siyaw ye farisogo ta fan fè, ni aw welela bolokobaliw bolokolenw fè, o bolokoli min kèra u farisogo la mògò bolo fè, a' ye aw hakili to aw fòlò cogo la, 12 ko o tuma la Krisita tun tè aw fè, aw tun tè Israèl siya dòw ye, aw tun ye dunanw ye Ala ka ko fòlenw layiduw ta fan fè, jigi si tun tè aw fè. Ala tun tè aw fè diɲè la. 13 Nka sisan, k'a sòrò aw bè Krisita Yesu la, aw minnu yòrò tun ka jan, aw surunyalen bè Krisita joli barika la. 14 Ale yèrè ye an ka hèrè ye. Farali kogo min tun bè Yahutuw ni siya tòw cè, o kòrò, juguya min tun bè u cè, a ye o ci ka u fila kè kelen ye. 15 A ye sariya ni a ci fòlenw ni a kow wuli ni a yèrè saya ye, walisa a ka u fila kè mògò kura kelen ye a yèrè la ka hèrè don u cè, 16 ka u fila kè farikolo kelen ye ka u ni Ala cè bèn a saya fè gengenjiri kan, ka o juguya ban a gengenjiri fè. 17 A nana ka welewele da ko: «Aw minnu yòrò tun ka jan ani aw minnu yòrò tun ka surun, juguya banna.» 18 K'a masòrò an fila bèè bè se ka don an Fa fè Ni kelen na Yesu yèrè barika la. 19 Ayiwa, o de kosòn aw tè dunanw ni jamana wèrè mògòw ye tun, nka aw ni Ala ka mògò senumaw ye jamana kelen denw ye, aw ye Ala so mògòw ye. 20 Aw jòlèn bè ju min kan, o ye cidenw ni kiraw ye. Krisita Yesu yèrè ye o selekela kabakurun ye. 21 So bèè bè ɲògòn minè ale la ka jò ka kè Alabatosoba senuma ye Matigi la. 22 Aw fana bè jò ɲògòn fè ale la ka kè Ala sigi yòrò ye Ni Senu barika la.


3

1 O de kosòn ne Paul, Krisita Yesu ka kasolamògò aw siya wèrèw kosòn, 2 baara min kalifara ne ma Ala ka nèèma ko la aw kosòn, aw ma o mèn wa? 3 Ala ye a ka gundo dònniya jira ne la, i ko ne y'a sèbèn sisan ni kuma dama dòw ye. 4 Aw mana o kalan, aw na se ka a ye o la ko ne bè Krisita ka gundo faamu. 5 O gundo tun ma dòn waati tèmènnen mògòw fè, nka Ala y'a jira sisan a ka ciden senumaw ni a ka kiraw la Ni Senu fè. 6 O gundo filè nin ye, ko Kibaru Duman barika la, siya wèrèw ni Yahutuw ye ciyèntaɲògònw ni farikolo kelen ye, ani jèɲògònw Ala ka layidu la, a ye o min ta Krisita Yesu la. 7 Ne kèra o Kibaru Duman baarakèla ye ka kèɲè ni Ala ka nèèma nili ye min dira ne ma a ka sebaaya baarakè cogo fè. 8 Ne min ka dògò ka tèmèn Ala ka mògò senuma tòw bèè kan, nin nèèma dira ne ma ka Krisita ka nafolotigiya dama dònbali Kibaru Duman fò siya wèrèw ye. 9 O gundo min dogolen tun bè fèn bèè Dabaa Ala fè kabini fòlòfòlò, a ko ne ka o baarakè cogo bò kènè kan, 10 walisa Ala ka hakilitigiya cogo caman ka jira sisan kuntigiyaw ni sebaayaw la sankolo yòròw la egilisi fè. 11 A ye o kè ka kèɲè ni a ka badaa ko latigèlen ye, a ye o min kè Krisita Yesu an Matigi la. 12 Yesu de la an jigi sigilen bè se ka gèrè Ala la ni ja gèlèya ye Yesu dannaya barika la. 13 O de kosòn, ne bè aw deli ko tòòrò minnu bè se ne ma aw kosòn, olu kana aw jigi tigè, k'a masòrò olu ye aw nòòrò de ye. 14 O de kosòn, ne bè ne ɲòngiri Fa Ala ɲè kòrò, 15 o min tògò dara denbayaw bèè kan, sankolola taw ni dugukolo kan taw. 16 Ne b'a deli ko aw kònòna mògò barika ka bonya ni sebaaya ye Ni Senu fè ka kèɲè ni a nòòrò dama dònbali ye, 17 ko Krisita ka sigi aw dusuw la dannaya barika la, walisa aw dili donnen ni aw bamalen kanuya la, 18 aw ni Ala ka mògò senumaw bèè ka se ka o fèrè ni a janya ni a jò janya ni a dunya dòn ɲògòn fè. 19 Aw ka Krisita ka kanuya fana dòn, o min ka bon ka tèmèn dònniya dama bèè kan, walisa aw ka fa Ala ka dafali bèè la. 20 Ayiwa min bè se ka fèn bèè kè ka tèmèn an ka delili ni an ka miirili bèè kan kosèbè, ka kèɲè ni a ka sebaaya baarakè cogo ye an kònò, 21 nòòrò ka da o de kan egilisi la ani Krisita Yesu la tuma bèè, badaa-badaa. Amiina.


4

1 O de y'a to ne min ye kasolamògò ye Matigi la, ne bè aw deli ko aw welela weleli min na, aw taama cogo ka bèn o ma, 2 ni yèrèmajiginlenya ni sabali ani muɲuli bèè ye. Aw ka ɲògòn ka kow muɲu ni kanuya ye. 3 A' ye aw jija ka Ni Senu ka kelenya mara hèrè sirilan na. 4 Farikolo kelen bè yen, ani Ni Senu kelen, i ko Ala ye aw wele jigi kelen kama cogo min na. 5 Matigi kelen bè yen, ani dannaya kelen, ni batiseli kelen. 6 Ala kelen bè yen, an bèè Fa don, a bè bèè kun na, bèè cèma, bèè kònò. 7 Nèèma dira an bèè kelen-kelen ma ka kèɲè ni Krisita ka nili sumani dama ye. 8 O de y'a to a fòra ko: «A yèlènna san fè minkè, a taara ni mògò minèlen caman ye. A ye nilifènw di mògòw ma.» 9 K'a fò ko a yèlènna san fè, o ye mun ye ni nin tè, ko a tun jiginna ka don dugukolo jukòrò yòròw la? 10 Min jiginna ani min yèlènna sankolo yòròw bèè san fè, walisa a ka fèn bèè fa, o ye kelen de ye. 11 Ale ye mògò dòw di, dòw ka kè cidenw ye, dòw ka kè kiraw ye, dòw ka kè Kibaru Duman fòbaaw ye, dòw ka kè saga gènnaw ni karamògòw ye, 12 walisa Ala ka mògò senumaw ka labèn Ala ka kuma baara kama, ka to ka dò fara Krisita farikolo kan, 13 fo an bèè ka kè kelen ye dannaya ni Ala Denkè dònniya la, ka kè mògò mòlenw ye, fo ka se Krisita ka dafalenya jò kun dama ma, 14 walisa an kana to denmisènya la tun. An kana yigiyigi ka ɲòni ka taa yan fè ani yen fè kalan sifa bèè fiɲè fè mògòw ka nanbara ni u ka mògò lafilili keguya cogo dulenw la. 15 Nka an ka tiɲè fò ni kanuya ye, ka mò fèn bèè la Krisita la, o ye farikolo kun ye. 16 Farikolo bèè labènnen bè ale de la, a yòròw bèè bè ɲògòn minè kolotugu yòròw barika la ka kèɲè ni u bèè kelen-kelen ka baarakè cogo ye. O cogo la a bè jiidi ka dò fara a yèrè barika kan kanuya la. 17 Ayiwa ne bè min fò aw ye Matigi la k'a jèya, o filè nin ye, ko aw kana taama tun i ko Ala dònbaliw bè taama u ka miirili fufafuw la cogo min na. 18 U hakili dibilen bè. U ye dunanw ye Ala ka ɲènamaya ta fan fè u ka ko dònbaliya kosòn, o min ye u dusukun gèlèya. 19 U dusukun tè se ka bò fèn si seere ma tun. U ye u yèrèw di kakalaya ma ka ko nògòlen sifa bèè kè ka girin u kan. 20 Nka aw kòni ma Krisita ko kalan ten dè, 21 ni a y'a sòrò ko aw y'a mèn ka kalan a la ka kèɲè ni tiɲè ye min bè Yesu la, 22 ko aw ka aw jogo kòrò bila, o min bè a yèrè toli ka kèɲè ni lafilili negew ye. 23 Aw ka kuraya aw ni ani aw hakili la, 24 ka jogo kura don aw la, o min dara Ala bisigi la, tiɲè ka tilennenya ni a ka senumaya la. 25 O de kosòn, aw ka nkalon dabila, aw bèè kelen-kelen ka tiɲè fò ɲògòn ye, katuguni an ye ɲògòn farikolo yòròw de ye. 26 Ni aw diminna, aw kana jurumu kè. Tile kana bin ka aw diminnen to. 27 Aw kana yòrò si di Sitanè ma. 28 Min tun bè sonyali kè, o kana sonyali kè tun, nka a ka jija ka baara bènnen kè ni a yèrè bolow ye, walisa min mago bè fèn na, a ka se ka fèn dò di o ma. 29 Kuma jugu si kana bò aw da la, fò kuma bènnen min bè se ka dò fara mògò wèrèw barika kan, ka nèèma di a lamènbaaw ma. 30 Aw kana Ala Ni Senu dusu kasi, o min kèra Ala ka taamashyèn dalen ye aw kan kunmabòli don ɲè. 31 Aw ka kunaya ni dusu bò ni diminya ni wòyò ni nenili ani kònòna juguya sifa bèè dabila. 32 Nka aw ka ko ɲuman kè ɲògòn ye, ka hinè ka yafa ɲògòn ma, i ko Ala yafara aw ma Krisita la cogo min na.


5

1 O de y'a to aw ka kè Ala ladegebaaw ye i ko den kanulenw, 2 ka taama kanuya la, i ko Krisita fana ye an kanu ka a yèrè di an kosòn ka kè sònni fèn ni saraka ye Ala ye, suma diyalan ɲuman. 3 Jatòya ni nògòlenya sifa bèè ani wasabaliya, olu tògò yèrè kana fò aw cèma, o tè bèn Ala ka mògò senumaw ma. 4 Malobaliya kuma ni kuma kunntan ani tulon kumaw fana bènnen tè dè, fò barika dali. 5 Aw ka nin dòn k'a jèya ko jatò ni mògò nògòlen ni wasabali, o kòrò, bolisònna, olu si niyòrò tè Krisita ni Ala ka masaya la fewu. 6 Aw kana to mògòw ka aw lafili ni kuma fu ye, k'a masòrò o kow de b'a to Ala ka diminya bè se kan bilali denw ma. 7 O de kosòn aw kana don u ka jè la. 8 Aw tun ye dibi ye ka kòrò, nka sisan, aw ye kènè ye Matigi la. A' ye taama i ko kènèdenw. 9 Kènè nò ye ɲumaya ni tilennenya ani tiɲè bèè ye. 10 A' ye Matigi diyaɲekow faranfasi. 11 Aw ni dibi la kèwale nafantanw kana jè, nka aw ka u kòròfò yèrè. 12 O mògòw bè ko minnu kè dogo la, olu fòli yèrè ye maloya ko ye. 13 Ko minnu bèè kòròfòra, olu jirala kènè fè, katuguni minnu jirala kènè kan, olu bèè ye kènè de ye. 14 O de kosòn a fòra ko: «Kunun, sunògòbaatò, ka wuli ka bò suw cèma, Krisita na kènè bò i ye.» 15 A' ye aw kòlòsi ka aw taama cogo dòn. Aw kana taama i ko hakilintanw, nka i ko hakilitigiw, 16 ka waati kunmabò; k'a masòrò nin donw ka jugu. 17 O de kosòn aw kana kè hakilintanw ye, nka aw ka Matigi sago dòn. 18 Aw kana aw ɲènamini ni diwèn ye, kakalaya bè o la dè, nka aw ka fa Ni Senu la. 19 Aw ka kuma ɲògòn fè ni Zaburuw ni tanuli dònkiliw ani Ala sira dònkiliw ye. Aw ka dònkili da ka Matigi tanu ni aw dusukunw bèè ye. 20 Aw ka barika da Fa Ala ye tuma bèè fèn bèè kosòn, an Matigi Yesu Krisita tògò la. 21 Aw ka kolo ɲògòn ye Krisita ɲèsiran na. 22 Musow, a' ye kolo aw yèrèw cèw ye, i ko aw bè kolo Matigi ye cogo min na, 23 k'a masòrò cè ye muso kuntigi ye, i ko Krisita ye egilisi kuntigi ye cogo min na. Ale yèrè ye farikolo Kisibaa ye. 24 Egilisi kololen bè Krisita ye cogo min na, o cogo la musow ka kolo u yèrèw cèw ye fèn bèè la. 25 Cèw, a' ye aw musow kanu, i ko Krisita ye egilisi kanu ka a yèrè di a kosòn cogo min na, 26 walisa a k'a saniya ji la koli fè ni Ala ka kuma ye, ka a kè a yèrè ta ye, 27 walisa ka egilisi jò a yèrè ɲè kòrò, a nòòròma, nògò yòrò wala fòsònfòsòn yòrò wala o bòɲògònko fèn si t'a la, nka a ka kè senuma ni jalakibali ye. 28 O cogo la cèw fana ka kan ka u musow kanu i ko u yèrèw farikolow. Min bè a muso kanu, o bè a yèrèkun kanu. 29 Mògò si ma a yèrè farisogo koniya abada, nka a b'a balo k'i janto a la, i ko Krisita fana b'a kè egilisi ye cogo min na, 30 sabu an ye a farikolo yòròw de ye. 31 «O de kosòn, cè na a fa ni a ba bila ka nòrò a muso la, u fila na kè farisogo kelen ye.» 32 O gundo ka bon dè, nka ne bè kuma Krisita ni egilisi de ko la. 33 O bèè n'a ta, aw bèè kelen-kelen ka aw musow kanu i ko aw yèrè kunw. Muso fana ka a cè bonya.


6

1 Denmisènw, a'ye aw bangebaaw kan minè Matigi la, katuguni o bènnen bè. 2 Layidu tara ci fòlen minnu fè, o ye u la fòlò de ye, «I ka i fa ni i ba bonya.» ‹197 3 «walisa i ka to hèrè la ani i ka si jan sòrò dugukolo kan.» 4 Faw fana, aw kana aw denw dusu tiɲè nka aw ka u lamò ni Matigi ka kololi ni a ka laadili ye. 5 Baaradenw, aw kuntigi minnu bè dugukolo kan, aw ka olu kan minè ni siran ni yèrèyèrè ni dusu kelen ye, i n'a fò aw bè Krisita kan minè. 6 Aw kana baara kè u ɲè na dama, i n'a fò aw b'a fè ka aw ko diya mògòw ye, nka aw ka baara kè i ko Krisita ka jònw, ka Ala sago kè ni aw dusukun bèè ye. 7 Aw ka baara kè ni diyaɲe ye, i n'a fò aw bè baara kè Matigi ye, aw t'a kè mògòw ye. 8 Aw k'a dòn ko mògòw bèè, jònw wo, hòrònw wo, u bèè kelen-kelen na u ka ko ɲuman kèlenw sara sòrò Matigi fè. 9 Kuntigiw, aw fana ka o bòɲògònko kè aw ka baaradenw ye, aw kana kangari da u ye. Aw k'a dòn ko u Kuntigi ni aw Kuntigi bè sankolo la, o tè mògò bò mògò la. 10 O bèè kò, a' ye aw barika bonya Matigi ni a ka sebaaya fangama la. 11 A' ye Ala ka kèlèkè minènw bèè don aw la, walisa aw ka se ka jò ka Sitanè ka nanbaraw kunbèn. 12 Katuguni an ni minnu bè kèlè kè, o tè Hadamadenw ye, nka o ye kuntigibaw ni fangatigiw ni nin diɲè dibima kunna sigibaaw ye, ani sankolo yòròw la jinèw. 13 O de kosòn a' ye Ala ka kèlèkè minènw bèè ta, walisa aw ka se ka kèlè kè don jugu la, ani aw selen kò u bèè la, aw jòlen ka se ka to. 14 A' ye aw jò, aw cèsirilen ni tiɲè ye, ka tilennenya nègèdulòki dòn aw kan na. 15 Hèrè Kibaru Duman bè labènni min di, o ka kè aw ka sabara ye. 16 Ka fara o bèè kan, aw ka dannaya nègèbènnan ta. Aw na se ka Sitanè ka biɲè tasumamaw bèè faga n'o ye. 17 Aw ka kisili nègèfugula ta ani Ni Senu ka npan, o ye Ala ka kuma de ye. 18 Aw ka Ala deli tuma bèè Ni Senu barika la ni deliliw ni deliliba sifa bèè ye. A' ye to aw ɲè na ka aw jija o la. A' ye Ala deli a ka mògò senumaw bèè ye, 19 k'a deli ne fana ye, walisa ni ne bè kuma tuma min na, Ala ka kuma cogo di ne ma ka Kibaru Duman gundo fò k'a jèya ni ja gèlèya ye. 20 O Kibaru Duman kosòn ne ye lasigiden ye kaso la. A' ye Ala deli ko ne ka kuma ni ja gèlèya ye, i ko ne ka kan k'a kècogo min na. 21 Nka balimakè kanulen, Matigi ka baarakèla dannamògò Tisike na ne kibaru bèè fò aw ye ani ne ka koɲèw. 22 Ne y'a ci ka taa aw yòrò o de kosòn, walisa aw ka an ka kow dòn, ani a ka aw dusuw saalo. 23 An Fa Ala ni an Matigi Yesu Krisita ka dususuma ni kanuya ani dannaya di balimaw bèè ma. 24 Minnu bè an Matigi Yesu Krisita kanu ni kanuya banbali ye, nèèma ka kè olu bèè fè.



AMAZING GRACE BIBLE INSTITUTE