Colossiens

1

1 Ne Paul, Krisita Yesu ka ciden Ala sago barika la, ani an balimakè Timote, 2 an bè nin sèbèn ci Ala ka mògò senumaw ma Kolose, aw minnu ye balima dannabaaw ye Krisita la. An Fa Ala ka nèèma ni dususuma di aw ma. 3 An bè barika da an Matigi Yesu Krisita Fa Ala ye tuma bèè an ka deliliw la aw ye, 4 k'a masòrò aw ka dannaya Krisita Yesu la, ani aw bè Ala ka mògò senumaw kanu cogo min na, an ye o kibaru mèn. 5 Jigi min maralen bè aw ye sankolo la, Kibaru Duman tiɲè kuma sera aw ma ka kòrò ka aw ladònniya o la. Aw ka dannaya ni aw ka kanuya ju sigira o jigi kan. 6 O Kibaru Duman sera aw ma, i ko a sera diɲè bèè ma ka den ka jiidi. A bè o kè aw cèma fana kabini aw ye Ala ka nèèma ko mèn k'a dòn tiɲè la. 7 An baarakèɲògòn kanulen Epafras ye aw kalan o ko la. Ale ye Krisita ka baarakèla dannamògò ye aw kosòn. 8 Ni Senu ye kanuya min di aw ma, a ye o fò an ye. 9 O de kosòn, kabini an ye aw kibaru mèn, an ma Ala delili dabila aw ye. An bè Ala deli ko a ka aw fa a sago dònniya la, ka Ni Senu ka dònniya ni hakilitigiya di aw ma, 10 walisa aw taama cogo ni Matigi cogo ka bèn, ani aw ka a diyaɲeko kè tuma bèè. Aw ka kèwale ɲuman sifa bèè kè, ka taa ɲè Ala dònniya la. 11 A fanga nòòròma ka aw barika bonya, walisa aw sabatilen ka to muɲuli la. 12 A' ye barika da Fa Ala ye ni ɲagali ye, ale min ye se di aw ma ka aw niyòrò sòrò a ka mògò senumaw ka ciyèn na kènèyeelen na. 13 A ye an tila ka bò dibi fanga la ka an ladon a Denkè kanulen ka masaya la. 14 An ye kunmabòli sòrò ale de la, jurumuw yafa kòni. 15 Krisita ye Ala yebali ja ye. Dafèn bèè la fòlò bangelen don, 16 k'a masòrò ale de la fèn bèè dara, sankolola fènw ani dugukolo kan fènw, fèn yetaw ni fèn yebaliw, masayaw ni matigiyaw ni kuntigiyaw ani fangaw. U bèè dara a fè ani a ye. 17 A bè fèn bèè ɲè, fèn bèè bè ɲògòn minè ale la. 18 A ye farikolo kun ye, egilisi kuntigi kòni. Ale ye daminè ye. Fòlò bangelen don ka bò suw cèma, walisa a ka ɲèfèla ta ko bèè la. 19 Katuguni a diyara Fa Ala ye ko a ka dafalenya bèè ka sigi ale kònò. 20 A ye hèrè don a yèrè ni fèn bèè cè a Denkè joli barika la gengenjiri kan, ka fèn bèè ni a yèrè cè bèn ale la, dugukolo kan fènw ni sankolola fènw. 21 Aw fana tun ye dunanw ni juguw ye fòlò aw ka miiriliw ni aw ka kèwale juguw kosòn, 22 nka sisan a ye aw ni ale cè bèn a Denkè mògòya farikoloma la saya fè, walisa a ka aw senumaw jalakibaliw kòròfòbaliw jò a ɲè kòrò. 23 O bèè n'a ta, aw bamalen sabatilen ka to dannaya la. Aw kana to aw ka jèngè ka mabò Kibaru Duman jigi la, aw ye o min mèn. O Kibaru Duman fòra sankolo jukòrò dafèn bèè ye. Ne Paul kèra o baarakèla ye. 24 Sisan ne bè ɲagali ne ka tòòrò kow la aw kosòn. Min dèsèra Krisita ka tòòrò la, ne bè o dafa ne yèrè farisogo la, ale farikolo kosòn, o ye egilisi de ye. 25 Ne kèra egilisi baarakèla ye ka kèɲè ni o baara ye, Ala ye min kalifa ne ma aw kosòn, walisa ne ka Ala ka kuma fò k'a foori, 26 o kòrò, o gundo min dogolen tun bè mògòw bèè la kabini fòlòfòlò, nka a jirala a ka mògò senumaw la sisan. 27 O gundo nòòrò belebeleba ye min ye siyaw cèma, a diyara Ala ye ka o jira o mògò senumaw la, ko Krisita bè aw kònò, nòòrò jigi don. 28 An bè ale ko fò ka mògòw bèè laadi ka u bèè kalan ni hakilitigiya bèè ye, walisa an ka mògòw bèè kelen-kelen jira Ala la, u dafalen Krisita la. 29 O de kosòn ne bè baara kè ka kèlè kè ka kèɲè ni Krisita ka baarakè cogo ye, o min bè baara kè ne kònò ni sebaayaba ye.

2

1 Ne bè kèlèba min kè aw kosòn, ani Laodisekaw ni minnu bèè ma ne yèrè ɲèda ye fòlò, ne b'a fè aw ka o dòn, 2 walisa u dusuw ka saalo, u ka kè kelen ye kanuya la, fo ka faamuli jèyalen dafalen caman caman sòrò, walisa u ka Ala ka gundo dòn, o ye Krisita de ye. 3 Hakilitigiya ni dònniya ka nafaba bèè dogolen bè ale de kònò. 4 Ne bè o fò walisa mògò si kana aw lafili ni kuma nugulenw ye. 5 Hali ni ne tè aw fè yen farisogo la, ne ni bè aw fè yen. Ne bè ɲagali k'a ye ko aw bè fèn bèè kècogo bènnen na, ani aw ka dannaya sinsinnen bè Krisita la. 6 Aw sònna Matigi Yesu Krisita ma cogo min na, aw ka taama ale la ten. 7 Aw ka kè Yesu la i ko jiri dili donnen, ka jiidi ale la, ka sabati dannaya la ka kèɲè ni aw ka kalan sòròlen ye. Aw ka barika dali ka caya. 8 A'ye aw yèrèw kòlòsi, walisa mògò si kana aw minè ni mògòw ka hakilitigiya kalan ni lafilili kuma fu ye, ka kèɲè ni mògòw ka laadaw ni nin diɲè kow ye, olu tè kèɲè ni Krisita ta ye. 9 Alaya ka dafalenya farisogoma sigilen bè ale la. 10 Ale bè kuntigiya ni fanga bèè kun na, aw kòni dafalen bè ale de la. 11 Aw bolokora ale la fana. O bolokoli ma kè mògòw bolo fè, nka o ye farisogo kow bilali ye Krisita ka bolokoli fè. 12 Aw suw ni Krisita su donna ɲògòn fè batiseli la, aw ni ale kununna ɲògòn fè batiseli la fana, katuguni aw dara Ala ka sebaaya la, o min y'a lakunun ka bò suw cèma. 13 Aw salen tun bè aw ka hakèw ni aw farisogo bolokobaliya la tuma min na, Ala ye aw ni Krisita ɲènamaya ɲògòn fè, k'a sòrò a ye an ka hakèw bèè yafa an ma. 14 Sèbèn min tun bè an kama an ka sariya tiɲèni kosòn, ni a tun bè an kèlè, Ala ye o bò yen, k'a gengen jiri la. 15 Ala ye fèn bèè bòsi kuntigiw ni fangatigiw la ka u kè mafilèli fènw ye fèn bèè ɲè na, k'a masòrò a ye se sòrò u kan Krisita gengenjiri barika la. 16 O cogo la mògò si kana aw jalaki dumuni ko la, wala minni ko la, wala seli don wala kalo kura ani lafiɲè donw ko la. 17 O kow bèè ye fèn nataw ja ye, nka o fèn yèrè bè sòrò Krisita la. 18 Aw kana to mògò si ka aw bali ka aw ka sesòrò jala sòrò ni a ka yèrèmajiginlenya filankafoma ye wala a ka mèlèkèw batoli. O mògò sifa bè a jigi da a ka yeli fènw kan ka a yèrè bonya fu a ka Hadamadenya miiriliw la. 19 A tè nòrò farikolo kuntigi Krisita la. Farikolo bèè bè balo ka ɲògòn minè kolotugu yòròw ni fasaw fè ale de la. A bè bonya ni Ala ka bonyali ye. 20 Ni aw ni Krisita sara ɲògòn fè nin diɲè kow ta fan fè, mun na aw bè sòn nin ci fòlenw ma, i n'a fò aw ye nin diɲè taw ye? 21 Ko: «I kana nin minè. I kana nin nènè. I kana maga nin na.» 22 O fènw bèè bè ban i mago ɲèli la. Olu ye Hadamadenw ka ci fòlenw ni u ka kalan ye. 23 O ci fòlenw ye hakilitigiya ye mògòw ɲè na, u ka batoli cogo kosòn min bè bò mògò la, ani u ka yèrèmajiginlenya ni u yèrè farikolo tòòrò kow, nka nafa tè u si la. U ka di farisogo ye dòròn

3

1 Ayiwa, ni aw ni Krisita kununna ɲògòn fè, aw ka to ka sanfè fènw ɲini, Krisita sigilen bè Ala kinin fè yen. 2 A' ye miiri sanfè fènw na, aw kana miiri dugukolo kan fènw na. 3 Aw sara, aw ka ɲènamaya ni Krisita dogolen bè ɲògòn fè Ala fè. 4 Krisita ye aw ka ɲènamaya ye. Ni a y'i jira tuma min na, aw ni ale na jira ɲògòn fè nòòrò la. 5 Ayiwa, a' ye aw dugukolo kan jogow faga, o kòrò, kakalaya ni nògòlenya ni ko jugu nege ni nege sifa bèè ani wasabaliya, o ye boli batoli ye. 6 O kow de b'a to Ala ka diminya bè na kanbilalidenw kan. 7 Aw fana tun bè o kow kè fòlòfòlò, ni aw tun bè taama u la tuma min na. 8 Nka sisan aw ka o kow bèè dabila, diminya ni dusu bò ani kònòna juguya. Nenili wala malobaliya kuma si kana bò aw da la. 9 Aw kana nkalon tigè ɲògòn ye, k'a masòrò aw ye aw jogo kòrò ni o ka kèwalew bò aw la, 10 ka jogo kura don aw la, o ye mògò kura ye min bè to ka kuraya dònniya sèbè la ka kèɲè ni a Dabaa ja ye. 11 O cogo la Grèki ni Yahutu tè yen, bolokolen ni bolokobali fana tè yen, mògò kalanbali ni kungo kònò mògò tè yen, jòn ni hòròn tè yen, nka Krisita ye fèn bèè ye yen, a bè bèè kònò. 12 Aw ye Ala ka ɲènatòmòlenw ye, senumaw, kanulenw. O de y'a to aw ka hinè ni ɲumaya ni yèrèmajiginlenya ni sabali ani muɲuli don aw la. 13 A' ye ɲògòn ka kow muɲu. Ni a bè mògò dò kònò ko dò y'a hakè ta, aw ka yafa ɲògòn ma. Matigi yafara aw ma cogo min na, aw fana ka yafa ɲògòn ma ten dè. 14 Ka fara o bèè kan, a' ye kanuya don aw la, o ye dafalenya sirilan ye. 15 Krisita ka dususuma ka kè kuntigi ye aw dusukunw na. Ala ye aw wele o kama farikolo kelen na. Aw ka kè ɲuman dònbaaw ye. 16 Krisita ka kuma ka sigi aw kònò ka caya. Aw ka ɲògòn kalan ka ɲògòn laadi ni hakilitigiya bèè ni Zaburuw ni tanuli dònkiliw ani Ala sira dònkiliw ye. Aw ka dònkili da Ala ye ni aw dusukunw bèè ye ni barika dali ye. 17 Aw bè fèn o fèn kè, kuma wo, kèwalew wo, a' ye o bèè kè Matigi Yesu tògò la, ka barika da Fa Ala ye ale de barika la. 18 Musow, a' ye kolo aw cèw ye, i ko a bènnen bè Matigi la cogo min na. 19 Cèw, a' ye aw musow kanu, aw kana juguya u ma. 20 Denw, a' ye aw bangebaaw kan minè ko bèè la, katuguni o ka di Matigi ye. 21 Faw, aw kana digi aw denw la, walisa u dusu kana tiɲè. 22 Baaradenw, aw kuntigi minnu bè dugukolo kan, aw ka olu kan minè ko bèè la. Aw kana baara kè u ɲè na dòròn, i n'a fò aw b'a fè ka aw ko diya mògòw ye, nka aw ka baara kè ni dusu jèlen ye Matigi ɲèsiran na. 23 Aw bè fèn o fèn kè, a' ye o kè ni aw dusukunw bèè ye, i n'a fò aw b'a kè Matigi ye, aw t'a kè mògòw ye, 24 k'a dòn ko aw na ciyèn ta Matigi fè aw ka baraji ye. Aw bè baara kè Matigi Krisita ye. 25 Nka min bè tilenbaliya kow kè, o na sara a ka tilenbaliya kow la, katuguni Ala tè mògò bò mògò la.

4

1 Kuntigiw, a' ye aw ka baaradenw minè koɲuman ni tilennenya ye, k'a dòn ko Kuntigi bè aw fana kun na sankolo la. 2 A' ye to Ala delili la ka to aw ɲè na o la ni barika dali ye. 3 Aw ka Ala deli an fana ye, walisa a ka cogo di an ma ka a ka kuma fò, ka Krisita ka gundo fò. O gundo kosòn ne bè kaso la sisan. 4 A' ye Ala deli ko ne ka o kuma fò k'a jèya, i ko ne ka kan k'a kècogo min na. 5 Minnu tè dannabaaw ye, aw ka taama ni hakilitigiya ye olu ta fan fè. Aw ka waati kunmabò. 6 Aw ka kuma ka kè ni nèèma ye tuma bèè, kògò ka kè a la, walisa aw ka se ka mògòw bèè jaabi cogo ɲuman dòn. 7 An balimakè kanulen Tisike, Matigi ka baaraden dannamògò, ne baarakèɲògòn Matigi la, o na ne kibaru bèè fò aw ye. 8 Ne bè a ci aw ma nin de kosòn, walisa aw ka an ka ko bèè dòn, ani a ka aw dusuw saalo. 9 Ne bè balima kanulen tilennen Onèsimè ci a fè. Aw ka mògò dò don. U na yan kow bèè fò aw ye. 10 Ne kasola bilaɲògòn Arisitarke bè aw fo. Barnabasi balima denkè Marka fana bè aw fo. Aw ye ciw sòrò ale ko la ka ban. N'a sera aw fè yen, aw k'a minè koɲuman. 11 Jesu min bè wele Jusitus, o fana bè aw fo. Yahutu minnu kèra dannabaaw ye, o mògò saba dama kèra ne baarakèɲògònw ye ka bò olu la Ala ka masaya baara la. Olu ye ne dusu saalo kosèbè. 12 Krisita Yesu ka jòn Epafras, min ye aw ka mògò dò ye, o bè aw fo. A bè jija Ala delili la aw ye. A tè o dabila, walisa aw dafalen, jigi sigilen ka to Ala sago bèè la. 13 Ne ye a seere ye ko aw hami b'a la kosèbè, aw ni Laodise dannabaaw ani Hierapolis dannabaaw fana. 14 Dògòtòrò kanulen Luka ani Demas bè aw fo. 15 Aw ka Laodise balimaw fo, ani Nènfas ni egilisi min bè a ka so. 16 Aw mana nin sèbèn kalan, aw k'a to Laodise egilisi ka a kalan. Sèbèn min bè na ka bò Laodise, aw fana ka o kalan. 17 Aw k'a fò Arsipe ye ko Matigi ka baara min kalifara a ma, a k'i janto o la ka a kè k'a dafa. 18 Ne Paul bè nin foli kuma sèbèn ni ne yèrè bolo ye. Aw hakili kana bò a la ko ne bè kaso la. Ala ka nèèma ka kè aw fè

AMAZING GRACE BIBLE INSTITUTE