Actes


1

1 Teofilè, Yesu ye ko minnu ni mògò kalanni minnu kè kabini a ka baara daminè tuma fo ka taa se a kòròta don ma ka taa sankolo kònò, ne ye olu bèè lakali e ye ne ka sèbèn fòlò la. Sani a ka kòròta, a ye ciw fò Ni Senu barika la a ka ciden ɲènatòmòlenw ye. 3 Yesu tòòròlen kò, a ɲènama y'i jira o cidenw la ni taamashyèn jèlen caman ye. A tun bè to k'i jira u la tile binaani kònò, a tun bè Ala ka masaya kow fò u ye. 4 Ka Yesu ni a ka kalandenw lajèlen to ɲògòn fè, a y'a fò k'a gèlèya u ma ko u kana u yòrò janya Jerusalèm la. A ko: «Ne ye ne Fa ka layidu min ko fò aw ye, aw ka o makònò. 5 Yuhana ye mògòw batise ji la, nka bi kò tile dama dò, aw na batise Ni Senu de la.» 6 Ayiwa ka u lajèlen to, u ye Yesu ɲininka ko: «Matigi, a fò, i na masaya segin Israèl ma nin waati de la wa?» 7 A y'u jaabi ko: «Ne Fa ye don ni waati minnu latigè ni a yèrè fanga ye, aw man kan ka kè olu dònbaaw ye. 8 Nka aw na sebaaya sòrò ni Ni Senu jiginna ka na aw kan tuma min na, aw na kè ne seerew ye, Jerusalèm ani Jude jamana bèè la ani Samari jamana, fo ka taa se dugukolo dan bèè ma.» 9 A tilalen kò o kuma la, a kòròtara, u y'a taatò filè, a donna sankaba la, u m'a ye tun. 10 Ka cidenw ɲèw jòlen to san fè k'a taatò filè, cè finijètigi fila y'u jò u kèrè fè. 11 O cèw ko: «Galilekaw, mun y'a to aw jòlen bè yan ka sankolo filè? Nin Yesu min kòròtara ka bò aw cèma ka taa sankolo kònò, ale yèrè bè na ten, i ko aw y'a taatò ye sankolo kònò cogo min na.» 12 O kò, cidenw kòseginna ka taa Jerusalèm ka bò Oliviye kulu kan. O ni Jerusalèm cè man jan, kilomètèrè kelen ɲògòn don. 13 U donnen dugu kònò, u yèlènna ka don sankanso kònò, u tun delila ka jiginyòrò min na. Ninnu tun don: Pierè ni Yuhana, Yakuba ni Andre, Filipe ni Tòma, Bartèlèmi ni Matiyu, Alifè denkè Yakuba ani Simòn Zelote ani Yakuba denkè Jude. 14 Olu bèè tora Ala delili la ni miirili kelen ye. Muso dòw ani Yesu ba Mariyama ani Yesu balimakèw fana tun bè u fè yen. 15 O donw la mògò kèmè ni mugan ɲògòn lajèlen tun bè yen. Pierè wulila k'i jò o balimaw cèma. A ko: 16 «Balimaw, Ni Senu ye min fò Kitabu la ka kòrò Dawuda da la Yesu minèbaaw ɲèminèbaa Juda ko la, wajibi tun don o kuma ka dafa. 17 Ale tun jatera an dò ye, a tun ye niyòrò sòrò nin baara la.» 18 (Ayiwa, nin cè ye foro dò san ni a ka ko jugu sara ye. O kò, a binna a kun kan, a kònò farala ka a nugu yèrèkè. 19 Jerusalèmkaw bèè y'o dòn. U ye o foro tògò da Hakèldama u yèrèw ka kan na, o kòrò Joli Foro.) 20 «A sèbènnen bè Zaburuw kitabu la ko: `A ka so ka kè tomon ye, Mògò si kana sigi a kònò tun.' Ani: `Mògò wèrè ka a nò ta baara la.' 21 «O de kosòn cè minnu tun bè taama an fè ka Matigi Yesu to an cèma, kabini Yuhana ka batiseli tuma la fo ka taa se Yesu kòròta don ma, a kèra wajibi ye ko olu la kelen ka fara an kan, anw ni o ka kè Yesu kununli seerew ye ɲògòn fè.» 23 U ye cè fila jira, Yusufu ni Matiyasi. Yusufu tògò dò tun ye Barsabasi de ye. A tun bè wele fana Jusitus. 24 O kò, u ye Ala deli ko: «E Matigi, mògòw bèè dusukun Dònbaa, i ye min ɲènatòmò nin mògò fila la, i ka o jira, 25 walisa o ka don nin baara ani nin cidenya la Juda nò na, o min bòra a la ka taa a yèrè ka yòrò la.» 26 U ye kalaw da. Matiyasi ka kala tara, o farala ciden tan ni kelen kan.



2

1 Pantekòte don selen, dannabaaw bèè lajèlen tun bè yòrò kelen na. 2 O yòrònin kelen, mankan dò bòra sankolo la i ko fiɲèba mankan. U sigilen tun bè so min kònò, a ye o bèè fa. 3 U ye nènkun dòw ye i ko tasuma manaw, olu tilatilara ka sigi dannabaaw bèè kelen-kelen kun. 4 U bèè fara Ni Senu la, u ye kan wèrèw fòli daminè i ko Ni Senu y'a bila u da la cogo min na. 5 Yahutuw Ala ɲèsiranbaa dòw sigilen tun bè Jerusalèm, u nana ka bò sankolo jukòrò siyaw bèè cèma. 6 O mankanba bòra tuma min na, jama lajèra. U hakili ɲaamina, katuguni u bèè kelen-kelen ye u yèrèw ka kan mèn dannabaaw da la. 7 U kabakoyalen fo ka u kònònafili, u y'a fò ɲògòn ye ko: «Nin mògò minnu bè kuma, olu bèè tè Galilekaw ye wa? 8 An bèè kelen-kelen dun bè an yèrèw bara kan mèn ninnu da la cogo di? 9 Partikaw ni Mèdikaw ni Elamkaw ani minnu bòra Mèsopotami ni Jude ni Kapadose ni Pon ani Asi jamanaw la, 10 ni Friji ni Panfili ni Misira jamanaw ani Libi jamana min bè Sirènè da fè ani Romè siginfèw, 11 Yahutuw ani minnu donna Yahutuya la, Krètèkaw ani Arabuw, an bèè bè Ala ka kobaw fòtò mèn u fè an yèrèw ka kan na.» 12 U kabakoyalen hakili ɲaaminen tora ka ɲògòn ɲininka ko: «Nin kòrò ye mun yè?» 13 Nka dòw ye yèlè bò dannabaaw ma, ko: «U falen bè diwèn duman la.» 14 O tuma la Pierè ni a tò tan ni kelen y'u jò, Pierè y'a kan bonya k'a fò jama ye ko: «Aw Yahutuw ani minnu bèè sigilen bè Jerusalèm, a' ye aw tulow majò ne ka kuma la ka a dòn 15 ko nin cèw ma fa diwèn na i ko aw bè miiri cogo min na, k'a masòrò tile ma gan fòlò. 16 Nka kira Joèl tun kumana ko min na, nin don. A y'a fò ko Ala ko: 17 `Laban donw na, ne na ne Ni dò jigin Hadamadenw bèè kan k'a caya. Aw denkèw ni aw denmusow na kiraya kè. Aw ka kamalenw na jirali fènw ye. Aw ka cèkòròbaw na sugow kè. 18 O donw na, ne na ne Ni dò jigin ne ka jònkèw ni ne ka jònmusow kan k'a caya, u na kiraya kè. 19 Ne na kabakow jira san fè sankolo la, ka taamashyènw kè duguma dugukolo kan, joli ni tasuma ani bugun sisima. 20 Tile na yèlèma ka kè dibi ye. Kalo na bilen i ko joli, sani Matigi ka donba ka se, o donba nòòròma. 21 O tuma la mògò o mògò mana Matigi tògò wele, o na kisi.' 22 «Israèl mògòw, a' ye aw tulow majò nin kumaw la. Ala ye Yesu Nazarètika jira aw la ni kobaw ni kabakow ani taamashyènw ye ko a sònna a ma. Ala ye olu kè a bolo aw cèma, i ko aw yèrèw ye o dòn cogo min na. 23 Ale donnen bolo la ka kèɲè ni Ala ka ko latigèlenw ni a ka ko nata dònniya ye, aw y'a gengen jiri la Ala ɲèsiranbaliw bolo k'a faga. 24 Nka Ala y'a lakunun k'a tila saya tòòrò la, sabu se tun tè saya ye ka a mara, 25 k'a masòrò Dawuda y'a fò a ko la ko: `Ne tun bè Matigi ye ne ɲè kòrò tuma bèè, katuguni a bè ne kinin fè, walisa fèn si kana ne lamaga. 26 O de y'a to ne nisòndiyalen bè ani ne nènkun bè tanuli kuma fò. Hali ni ne ye farisogo ye, ne jigi sigilen na to. 27 Katuguni e Ala tèna ne ni to Hadèsi kònò, i tèna sòn i ka Senuma ka toli. 28 I ye ɲènamaya siraw jira ne la. I na ne fa ɲagali la i ɲè kòrò.' 29 «N'balimaw, ne b'a fò aw ye k'a jèya an bènba Dawuda ko la, ko a sara, a su donna, a kaburu bè an cèma halibi. 30 Dawuda tun ye kira ye, a y'a dòn ko Ala y'i kali a ye ko a na ale bònsòn dò sigi a ka masasigilan kan. 31 O de kosòn Dawuda kumana Krisita kununli ko la, k'a masòrò a ye o ye sani a ka kè, ko a ni tèna to Hadèsi kònò, ko a farisogo tèna toli. 32 Nin Yesu kòni, Ala y'a lakunun, an bèè ye o seerew ye. 33 O de y'a to a kòròtalen kò ka taa Ala kinin fè, a ye Ni Senu sòrò ka kèɲè ni a Fa ka layidu talen ye a ye. Aw bè min ye k'a mèn, o don, a ye o jigin an kan k'a caya. 34 Dawuda yèrè ma yèlèn ka taa sankolo kònò, nka a y'a fò ko: `Matigi y'a fò ne Matigi ye ko: I sigi ne kinin fè, 35 fo ne ka i juguw kè i sen kòrò dalan ye.' 36 «O de y'a to Israèl bèè k'a dòn k'a jèya ko aw ye nin Yesu min gengen jiri la, Ala ye o kè Matigi ni Krisita ye.» 37 O kuma mènnen kò u fè, u dusuw lamagara, u y'a fò Pierè ni ciden tòw ye ko: «An balimaw, an ka kan ka mun kè?» 38 Pierè y'a fò u ye ko: «A' ye nimisa aw ka jurumuw la, aw bèè kelen-kelen ka batise Yesu Krisita tògò la, walisa aw ka jurumuw yafa sòrò. Ala na Ni Senu di aw ma. 39 Katuguni o layidu tara aw ni aw bònsòn ye, ani minnu bèè bè yòrò jan, Matigi an ka Ala na minnu bèè wele ka na a yèrè ma.» 40 Pierè ye u waaju ni kuma caman wèrèw ye k'a jèya ko: «A' ye aw tanga bi mògò juguw ka kètaw ma.» 41 Minnu sònna a ka kuma ma, olu batisera. Mògò waa saba ɲògòn farala u kan o don na. 42 U tora cidenw ka kalan ni u ka balimaya jèɲògònya ni nbuuru karikarili ani Ala delili la. 43 Mògòw bèè tun bè siran. Kabakow ni taamashyèn caman tun bè kè cidenw bolo. 44 Minnu ye dannaya kè, olu bèè tun bè ɲògòn fè ka u ka fènw bèè kè u foroba ye. 45 U tun bè u ka dugukolow ni u bolofènw feere ka o wari tila u cè ka kèɲè ni u bèè kelen-kelen mago ye. 46 U tun bè to ka taa Alabatosoba kònò don o don ni miirili kelen ye, ka nbuuru karikari ka dumuni kè ɲògòn fè u ka sow kònò ni ɲagali ni dusu jèlenw ye, 47 ka to ka Ala tanu. U ko diyara mògòw bèè ye. Minnu tun bè kisi, Matigi ye olu fara u kan don o don.



3

1 Ayiwa Pierè ni Yuhana taara ɲògòn fè Alabatosoba kònò wula da fè Ala deli tuma la. 2 Cè dò tun bè yen. Nabara tun don, a bangera ten. Mògòw tun b'a ta don o don k'a bila Alabatosoba da dò la, walisa a ka saraka deli o so kònò donbaaw fè. O da tògò ko Da Cèɲi. 3 Ale ye Pierè ni Yuhana dontò ye Alabatosoba kònò, a ye saraka deli u fè. 4 Pierè ni Yuhana ye u ɲèw jò a la, Pierè ko: «An filè.» 5 A ye u lajè yala ni u nafèn dò di a ma. 6 Nka Pierè y'a fò a ye ko: «Wari ni sanu tè ne fè, nka min bè ne fè, ne bè o de di i ma. Yesu Krisita Nazarètika tògò la, wuli ka taama.» 7 Pierè ye o cè kininbolo minè k'a lawuli. O yòrònin kelen a senw ni a senkuruw ye barika sòrò. 8 A y'i pan k'i jò ka taama, ka don u fè Alabatosoba kònò. A taamatò tun b'i panpan ka Ala tanu. 9 Mògòw bèè y'a ye ko a bè taama ka Ala tanu. 10 O cè min tun bè sigi ka saraka deli Alabatosoba Da Cèɲi da la, u y'a dòn ko o don. Ko min kèra a la, o ye u kabakoya ka u kònònafili. 11 O cè tolen ka Pierè ni Yuhana minè, mògòw bèè kabakoyalen bolila ka taa u yòrò Solomani ka ga kòrò. 12 Pierè y'o ye tuma min na, a y'a fò jama ye ko: «Israèl mògòw, mun y'a to aw kabakoyalen don nin cè ko la? Mun y'a to aw ɲèw jòlen bè an na, i n'a fò an yèrèw ka sebaaya wala an ka Ala ɲèsiran de y'a to nin cè taamana? 13 Ibrahima ni Isaka ni Yakuba ka Ala, an bènbaw ka Ala kòni, o de ye a ka baaraden Yesu bonya. Aw kòni y'a don bolo la ka aw dalacè a la Pilate ɲè kòrò k'a sòrò Pilate tun y'a latigè k'a bila ka taa. 14 Aw ye aw dalacè o Senuma Tilennen na ka Pilate deli ko mògòfagala ka di aw ma. 15 Aw ye ɲènamaya kuntigi faga, nka Ala y'a lakunun ka bò suw cèma, an ye o seerew de ye. 16 Aw ɲè bè nin cè min na ni aw b'a dòn, o ɲènamaya kuntigi Yesu tògò de ye barika di nin cè ma a ka dannaya kosòn o tògò la. O cè ka dannaya Yesu tògò la, o de ye kènèyali dafalen di a ma aw bèè ɲè na. 17 «Sisan, n'balimaw, ne y'a dòn ko aw ni aw kuntigiw ye o kè dònbaliya kosòn, 18 nka Ala ye ko minnu fò ka kòrò a ka kiraw bèè da la ko a ka Krisita na tòòrò, a ye olu bèè dafa ten. 19 O de y'a to a' ye nimisa aw ka jurumuw la ka segin Ala ma walisa aw ka jurumuw ka jòsi ka bò yen, 20 walisa Matigi ka dususuma waati di aw ma, ani a ka Krisita ci aw ma, o min latigèra aw ye, o ye Yesu de ye. 21 Wajibi don Yesu Krisita ka to sankolo la fo fèn bèè ka dila ko kura tuma min na, Ala tun ye o ko fò ka kòrò a ka kira senumaw da la. 22 Musa ko: `Matigi aw ka Ala na ne bòɲògònko kira lawuli aw ye ka bò aw balimaw cèma. A na kuma minnu fò aw ye, aw ka olu lamèn. 23 Nka mògò o mògò tè sòn ka o kira lamèn, o tigi na halaki ka bò a ka mògòw cèma.' 24 Kira minnu kumana kabini Samuèl tile la ani minnu nana a kò, olu bèè fana ye nin donw ko fò. 25 Aw ye kiraw bònsònw ye, ani Ala ka layidudenw. A ye o layidu ta aw bènbaw ye k'a fò Ibrahima ye ko: `Dugukolo kan denbayaw bèè na duba sòrò i bònsòn na.' 26 Ala ye a ka baaraden lawuli tuma min na, a y'a ci aw fòlò de ma, ka duba ta aw ye. O duba ye min ye, a na aw bèè kelen-kelen yèlèma ka bò aw ka kèwale juguw la.»



4

1 Ka Pierè ni Yuhana to o kuma la mògòw fè, sarakalasebaa dòw ni Alabatosoba kuntigi ani Saduseèn dòw taara u yòrò. 2 Olu diminna sabu o cidenw tun bè Yesu kununli ko fò ka mògòw kalan ko suw na kunun. 3 U ye cidenw minè ka u bila kaso la fo o dugusajè, sabu su tun kora. 4 O bèè n'a ta minnu ye cidenw ka waajuli kumaw mèn, olu caman ye dannaya kè. Dannabaaw bèè lajèlen dama tun bè cè waa duuru ɲògòn bò. 5 O dugusajè, Yahutuw kuntigiw ni u ka cèkòròbaw ani sariya karamògòw ye ɲògòn lajè Jerusalèm. 6 Sarakalasebaaw kuntigi Anè fana tun bè yen, ani Kayifè ni Yuhana ni Alèkisandre ani sarakalasebaaw kuntigi balimaw bèè. 7 U ye Pierè ni Yuhana jò u cèma ka u ɲininka ko: «Sebaaya jumèn wala jòn tògò y'a to aw ye nin kènèyali kè?» 8 O tuma la Pierè falen Ni Senu la, a y'a fò u ye ko: «Israèl kuntigiw ni cèkòròbaw, 9 ni aw bè an ɲininka bi cè nabarama ko ni a kènèya cogo la, 10 aw bèè k'a dòn, Israèl mògòw bèè fana k'a dòn ko o kèra Yesu Krisita Nazarètika tògò barika la, aw ye o min gengen jiri la, ni Ala y'o lakunun ka bò suw cèma. Ale barika la nin cè kènèyalen jòlen bè aw ɲè kòrò yan. 11 `Aw sojòlaw banna kabakurun min na ni o kèra so selekela kabakurun lakika ye,' o ye Yesu de ye. 12 Kisili tè sòrò dò wèrè si la Yesu kò, katuguni an ka kan ka kisi tògò min fè, o dò wèrè ma di mògòw ma sankolo jukòrò ale tògò kò.» 13 Pierè ni Yuhana ka ja gèlèya ye kiritigè jamakulu kabakoya, katuguni u tun y'a dòn ko olu tun ye mògò gansan kalanbaliw ye. O bèè n'a ta u tun y'a faamu ko Pierè ni Yuhana ni Yesu tun bè ɲògòn fè. 14 U ye o cè kènèyalen jòlen ye u ɲè kòrò tuma min na, u ma foyi sòrò ka u jaabi. 15 U ye Pierè ni Yuhana labò kiritigè yòrò la. O kò, u y'a daminè ka ɲògòn ɲininka 16 ko: «An na mun kè nin cèw la? A jèlen don Jerusalèmkaw bèè ɲè na ko kabakoba kèra ninnu fè, an tè se ka sòsòli kè o la. 17 Nka walisa nin kibaru kana jènsèn mògòw cèma ka taa ɲè, an ka kangari gèlèn da u ye ko u kana kuma mògò si fè tun nin tògò la.» 18 O tuma la u ye Pierè ni Yuhana wele ka don kiritigè yòrò la ko kura, k'a fò u ye k'a gèlèya ko u kana kuma wala ka mògòw kalan Yesu tògò la tun fewu. 19 Nka Pierè ni Yuhana y'u jaabi ko: «Jumèn tilennen bè Ala ɲè kòrò, ka aw kan minè wala ka Ala kan minè? Aw yèrèw ka o fò. 20 An kòni, an ye ko minnu ye ka u mèn, an tè se ka to olu fòbali ye.» 21 Kiritigè jamakulu ye kangari da Pierè ni Yuhana ye ko kura ka u bila ka taa. U ma cogo si sòrò ka Pierè ni Yuhana tòòrò mògòw kosòn, k'a masòrò mògòw bèè tun bè Ala bonya o ko kèlen kosòn. 22 Nin kabako kènèyali kèra cè min na, o si san dama tun ka ca binaani ye. 23 Pierè ni Yuhana bilalen kò, u taara dannabaa tòw fè. Sarakalasebaaw kuntigiw ni cèkòròbaw ye kuma minnu fò u ye, u ye olu bèè lakali. 24 O dannabaaw ye Pierè ni Yuhana ka kuma mèn tuma min na, u ye Ala deli ni dusu kelen ye ko: «Matigi, e min ye sankolo ni dugukolo ni kògòji ani u kònò fènw bèè da, 25 e de y'a fò i ka baaraden, an bènba Dawuda da la Ni Senu barika la ko: `Mun y'a to siyaw murutira? Mun na u ye jè siri fu? 26 Dugukolo kan masakèw ye u labèn kèlè kama. U ka kuntigiw ye ɲògòn lajè Matigi ni a ka Krisita kama.' 27 Tiɲè la Hèròde ni Pònse Pilate ni Israèl mògòw ani siya wèrèw ye ɲògòn lajè nin dugu kònò i ka baaraden senuma Yesu i ka Munlen kama, 28 walisa i ye min latigè ka kòrò i ka sebaaya ni i sago barika la, u ka o kè. 29 Ayiwa sisan Matigi, i ka u ka kangaridakan mèn ka ja gèlèya di i ka baaradenw ma ka i ka kuma fò. 30 I ka i bolo mòònòbò, walisa kènèyali ni taamashyènw ni kabakow ka kè i ka baaraden senuma Yesu tògò la.» 31 U tilara Ala delili la tuma min na, u lajèlen tun bè yòrò min na, o yèrèyèrèla, u bèè fara Ni Senu la ka Ala ka kuma fò ni ja gèlèya ye. 32 Dannabaaw jama bèè kèra kelen ye kanuya ni miirili la. Mògò si tun t'a fò ko a bolofènw ye a yèrè kelen ta ye, nka u ka fènw bèè kèra u foroba ye. 33 Cidenw tun bè seereya kè Matigi Yesu kununli ko la ni sebaayaba ye. Nèèmaba tun bè u bèè kan. 34 Bolo lankolon si tun tè u cèma, k'a masòrò forow ni sow tun bè minnu bolo, olu ye u feere ka na ni u sòngò ye 35 k'a don cidenw bolo, walisa a ka tilatila ka kèɲè ni mògòw bèè kelen-kelen mago ye. 36 Siprèka Levite dò tògò ko Yusufu. Cidenw y'a wele fana Barnabasi, o kòrò laadiliden. 37 Foro dò tun bè o fè, a y'a feere ka na ni a sòngò ye k'o bila cidenw sen kòrò.



5

1 Nka cè dò tun bè yen, o tògò ko Ananiyasi. O ni a muso Safira ye dugukolo dò feere. 2 A ye dò bò o sòngò la, k'a sòrò a muso ye o dòn, o kò ka taa a tò bila cidenw sen kòrò. 3 Pierè y'a fò a ye ko: «Ananiyasi, mun y'a to Sitanè ye i kònònasu ka nkalon tigè Ni Senu ye, ka dò bò o dugukolo sòngò la k'a mara? 4 Ni i tun ma a feere, a tun tèna to i taya la wa? A feerelen kò, a sòngò tun tè i sago la wa? Nin miirili jugu donna i kònò cogo di? I ma nkalon tigè mògòw ye mènè, i y'a tigè Ala ye.» 5 Ananiyasi ye o kuma mèn minkè, a binna, a sara. O ko mènbaaw bèè siranna haali. 6 Kamalenw wulila k'a kasanke ka taa n'a ye k'a su don. 7 Lèrè saba ɲògòn tèmènnen kò, Ananiyasi muso nana. Ko min kèra, a tun ma o dòn. 8 Pierè y'a ɲininka ko: «A fò, aw ye dugukolo feere nin sòngò de la wa?» Muso y'a jaabi ko: «Owò, o don.» 9 O tuma la Pierè y'a fò a ye ko: «Aw bènna a la ka Matigi Ni kòròbò ten cogo di? A filè, minnu ye i cè su don, olu selen filè so da la, u na taa ni i yèrè fana ye.» 10 O yòrònin bèè o muso binna Pierè sen kòrò, a sara. Kamalenw donnen y'a salen sòrò yen. U taara n'a ye k'a su don a cè kèrè fè. 11 Egilisi mògòw ani minnu ye o ko mèn, olu siranna kosèbè haali. 12 Cidenw ye taamashyèn ni kabako caman kè mògòw cèma. U bèè lajèlen tun bè Solomani ka ga kòrò ni miirili kelen ye. 13 Mògò tòw kòni ma u ja gèlèya ka taa jè u fè, o bèè n'a ta mògòw bèè ye u bonya haali. 14 Nka hali o, jama tun bè to ka da Matigi la, cèw ni musow, ka fara dannabaa jama kan. 15 Mògòw tun bè taa ni u ka banabaatòw ye kalakaw ni dalanw kan ka u bila nbèdaw kan, walisa Pierè tèmèntò, a ja ka da u dòw kan. 16 Jama fana tun bè bò Jerusalèm dafè duguw la ka na ni u ka banabaatòw ni u ka jinètòw ye, u bèè tun bè kènèya. 17 O la, sarakalasebaaw kuntigi ni a fè mògòw wulila, olu tun ye Saduseènw ye. Cidenw keleya donnen u la, 18 u ye cidenw minè ka u bila kasobonba kònò. 19 Nka su fè, Matigi ka mèlèkè dò ye kasobon daw yèlè ka cidenw labò k'a fò u ye ko: 20 «A' ye taa aw jò Alabatosoba kònò, ka nin ɲènamaya kura kumaw bèè fò mògòw ye.» 21 O kuma mènnen kò u fè, u taara don Alabatosoba kònò sògòma da joona fè ka daminè ka mògòw kalan. Sarakalasebaaw kuntigi ni a fè mògòw ye kiritigè jamakulu ani Israèl siya cèkòròbaw bèè lajè yòrò kelen na. U ye garadi dòw ci ka taa kasobon kònò ko u ka na ni cidenw ye. 22 Garadiw selen kasobon kònò, u ma cidenw sòrò yen. U kòseginna ka taa o kibaru fò. 23 U ko: «An ye kasobon da sògòlen sòrò a cogo la, dakòlòsibaaw jòlen tun bè a da la, nka an ye da yèlè minkè, an ma mògò si sòrò a kònò.» 24 O kuma mènnen kò Alabatosoba kuntigi ni sarakalasebaaw kuntigiw fè, u kònònafilila o ko la, u ye ɲògòn ɲininka ko nin laban na kècogo di? 25 Mògò dò nana k'a fò u ye ko: «A filè, aw ye cè minnu bila kaso la, olu jòlen bè Alabatosoba kònò ka mògòw kalan.» 26 O tuma la Alabatosoba kuntigi ni garadiw taara ka na ni cidenw ye koɲuman, katuguni u siranna ko mògòw kana na u yèrèw bon ni kabakurunw ye. 27 U nana ni cidenw ye ka u jò kiritigè jamakulu ɲè kòrò. Sarakalasebaaw kuntigi y'a fò u ye ko: 28 «An m'a fò aw ye k'a gèlèya ko aw kana mògòw kalan o cè tògò la tun wa? Nka a filè, aw ye Jerusalèm bèè fa aw ka kalan na. Aw kòni b'a fè o cè joli hakè ka bin an kan.» 29 Pierè ni ciden tòw y'a jaabi ko: «Wajibi don an ka Ala kan minè ka tèmèn mògòw ta kan. 30 An bènbaw ka Ala ye Yesu lakunun, aw tun ye o min faga gengenjiri kan. 31 Ala y'a kòròta k'a sigi a kinin fè ka a kè Masakè ni Kisibaa ye, walisa Israèl ka se ka nimisa ka jurumuw yafa sòrò. 32 An kòni ye o kow seerew de ye, an ni Ni Senu fana, Ala ye o min di a kan minèbaaw ma.» 33 U ye o kumaw mèn minkè, u diminna kosèbè fo u tun b'a fè ka cidenw faga. 34 Nka Farisièn dò tun bè yen, o tògò ko Gamalièl. Sariya karamògò dò tun don, mògòw bèè tun b'a bonya. O wulila k'i jò jama cèma k'a fò ko u ka o cèw labò yen fòlò. 35 O kò, a y'a fò u ye ko: «Israèl mògòw, a' ye aw yèrèw kòlòsi aw ka kètaw la nin cèw la. 36 A ma mèn fòlò Tudas wulila ka a yèrè kè mògòba ye. Cè kèmè naani ɲògòn tugura a la. Nka ale fagara, mògò minnu tun tugura a la, olu bèè jènsènna, o murutili banna. 37 Ale kò, Galile Juda wulila mògò tògò sèbènni waati la. A ye mògò caman wele ka tugu a nòfè. Ale fana halakira, a nòfè mògòw bèè jènsènna. 38 Sisan, ne b'a fò aw ye ko aw kana sama nin cèw ka kow nòfè tun, a' ye u bila u ka taa. Ni nin ko wala nin baara bòra mògòw la, a na tiɲè. 39 Nka ni a bòra Ala la, aw tè se k'a tiɲè. A' ye aw yèrèw kòlòsi, a kana na sòrò ko aw bè Ala kèlè!» 40 Kiritigè jama sònna Gamalièl ka kuma ma. U ye cidenw wele k'a fò ko u ka gosi ni berew ye. U y'a gèlèya u ma ko u kana Yesu tògò fò tun. O kò, u ye u bila ka taa. 41 Cidenw bòra kiritigè yòrò la ka taa. U ɲagalila, katuguni ka maloya sòrò Yesu tògò kosòn, u y'o jate bonyali ye. 42 Don o don, ka u to Alabatosoba kònò ani mògòw ka duw kònò, u ma mògòw kalanni ni Krisita Yesu Kibaru Duman fòli dabila.



6

1 O donw na, dannabaaw tun bè caya. Helenisitew ye dajukòrò kuma fò Hèburuw kama, katuguni u ka muso cè salenw tun tè jate don bèè dumuni tilali la. 2 Cidenw tan ni fila ye dannabaaw jama bèè lajè k'a fò u ye ko: «An man kan ka Ala ka kuma fòli dabila ka kè dumuni ko ɲènabòbaaw ye. 3 O de kosòn balimaw, aw ka cè woloèula ɲènatòmò aw la, minnu tògò ɲuman bè fò mògòw bèè fè, ni u falen bè Ni Senu ani hakilitigiya la, an na olu don nin baara la. 4 Anw kòni na to Ala delili ni Ala ka kuma fòli la.» 5 O kuma diyara jama bèè ye. U ye ninnu ɲènatòmò: Etièni, ale falen tun bè dannaya ni Ni Senu la, ani Filipe ni Prokòrè ni Nikanòr, Timòn ni Parmènasi ani Antioseka Nikolasi, ale tun donna Yahutuya la. 6 U ye olu jira cidenw la. Cidenw ye Ala deli, o kò, ka u bolow da u kan. 7 Ala ka kuma tun bè jiidi ka ta'a fè, dannabaaw tun bè caya kosèbè Jerusalèm. Sarakalasebaa caman fana sònna ka dannaya kè. 8 Etièni falen tun bè nèèma ni sebaaya la. A tun bè kabakobaw ni taamashyènw kè mògòw cèma. 9 Mògò dòw wulila ka Etièni sòsò. U dòw bòra Alabatoso jè dò la, o tun bè wele Hòrònyalenw, u dòw tun ye Sirènèkaw ni Alèkisandrikaw ye, dòw bòra Silisi ni Asi jamanaw la. 10 Nka u ma se ka Etièni ka kuma kòkari, sabu a tun bè kuma ni hakilitigiya ye Ni Senu barika la. 11 U ye mògò dòw lasu, walisa olu k'a fò ko: «A bè kuma ka Musa ni Ala tògò tiɲè, an yèrèw y'o mèn a da la.» 12 U ye mògòw ni cèkòròbaw ani sariya karamògòw lasu Etièni kama. Olu taara ka bin Etièni kan k'a sama ka taa n'a ye kiritigè jamakulu ɲè kòrò. 13 U nana ni seere nkalontigèla dòw ye, olu ko: «Nin cè tè kuma jugu fòli dabila nin yòrò senuma ni sariya kama, 14 k'a masòrò an y'a mèn a da la ko Yesu Nazarètika na nin yòrò ci, ko Musa ye laada minnu di an ma, a na olu yèlèma.» 15 Kiritigè jamakulu min sigilen tun bè yen, olu bèè ye u ɲèw jò Etièni la, a ɲèda kèra u ɲè kòrò i ko mèlèkè ɲèda.



7

1 Sarakalasebaaw kuntigi ko: «O kow kèra ten wa?» 2 Etièni ye jaabili kè ko: «Ne balimaw ni ne faw, a' ye ne lamèn. Nòòròtigi Ala y'i jira an bènba Ibrahima la k'a to Mesopotami, sani a ka sigi Karan. Ala y'a fò a ye ko: 3 `I ka bò i ka jamana ni i faso la. Ne bèna jamana min jira i la, i ka taa yen.' 4 O tuma la Ibrahima bòra Kalde jamana la ka taa sigi Karan. A fa salen kò, Ala y'a ɲèminè ka bò yen ka na nin jamana la, aw sigilen bè yòrò min na sisan. 5 Ala ma dugukolo si di a ma nin jamana kònò, hali sen da yòrò kelen. Ala tun ye layidu ta a ye ko a na nin jamana di a ni a bònsòn ma a kò, hali k'a sòrò den tun t'a fè fòlò. 6 Ala y'a fò ko Ibrahima bònsòn na kè siginfèw ye jamana wèrè la, o mògòw na u kè jònw ye ka u tòòrò san kèmè naani kònò. 7 Nka siya min na u kè jònw ye, Ala ko a na kiri tigè o kan, o kò, u na bò yen ka na ale bato nin yòrò la. 8 O kò, Ala ye bolokoli layidu ta Ibrahima ye. O cogo la Ibrahima ye Isaka bange ka a boloko a bange tile seginnan la. Isaka ye Yakuba bange, Yakuba ye an bènba tan ni fila bange. 9 «An bènbaw ye Yusufu keleya k'a feere Misira taalaw ma. 10 Nka Ala tora a fè ka a bò a ka tòòrò kow bèè la. Ala ye hakilitigiya di a ma ka a ko diya Misira masakè Faraon ye. Faraon ye Yusufu sigi Misira jamana ani a yèrè ka so bèè kun na. 11 Ayiwa kòngòba donna Misira jamana ani Kanan jamana bèè kònò. O tòòrò bonyara kosèbè fo an bènbaw ma dumunifèn sòrò. 12 Kabini Yakuba y'a mèn ko suman bè Misira, a ye an bènbaw ci ka taa yen a siɲè fòlò. 13 U taa ko filanan la, Yusufu ye a yèrè jira a balimaw la. O kèlen, Faraon sòròla ka Yusufu siya dòn. 14 O kò, Yusufu ye ci bila ka taa a fa Yakuba ni a ka denbaya bèè wele ka na, olu tun ye mògò biwoloèula ni duuru ye. 15 Yakuba taara Misira, ale ni an bènbaw sara yen. 16 Mògòw ye u suw ta ka taa Sisèm. Ibrahima tun ye sudon yòrò min san wari la Hamòr denkèw fè, u suw donna yen. 17 «Ala tun ye layidu min ta Ibrahima ye, o dafa waati surunyalen, Israèl mògòw cayara ka jiidi Misira kònò, 18 fo masakè kura sigira Misira kun na, o tun ma Yusufu dòn. 19 O masakè ye an siya janfa ka u tòòrò fo ka u wajibiya ka u ka denyènin fili kènèma walisa u ka sa. 20 O tuma la Musa bangera, a cè tun ka ɲi haali. Sin dira a ma k'a to a fa ka so kònò kalo saba kònò. 21 A bilara kènèma tuma min na, Faraon denmuso y'a ta ka a lamò ka a kè a yèrè den ye. 22 Musa kalanna Misirakaw ka hakilitigiya bèè la. Fangaba tun bè a ka kumaw ni a ka kèwalew la. 23 «Musa ye san binaani sòrò tuma min na, a y'i miiri ko a ka taa bò a balima Israèl bònsònw ye. 24 A y'a ye ko Misiraka dò tun bè a balima dò tòɲò, a farala a balima kan ka o mònè bò ka o Misiraka faga. 25 Musa tun bè miiri ko a balimaw n'a faamu ko Ala na u tila ale bolo, nka u m'a faamu. 26 «O dugusajè, a sera a balimaw cèma k'a sòrò u dòw bè ɲògòn kèlè. A tun b'a fè ka u cè labèn, a ko: `Cèw, aw ye balimaw ye. Mun y'a to aw bè ɲògòn kèlè?' 27 Min ye dò tòɲò, o ye Musa ɲòni, a ko: `Jòn ye i kè an kuntigi ni an ka kiritigèla ye? 28 I b'a fè ka ne faga i ko i ye Misiraka faga kunuèo cogo min na wa?' 29 O kuma kosòn Musa bolila ka taa i sigi Madiyan jamana la. A ye denkè fila sòrò yen. 30 «San binaani tèmènnen kò, mèlèkè dò y'i jira Musa la Sinayi kulu kèrè fè kungokolon kònò jirinin jenitò tasuma cèmancè la. 31 Musa ye o jirinin jenitò ye tuma min na, o ye a kabakoya. A tun b'i madon k'o lajè tuma min na, a ye Matigi kumakan mèn ko: 32 `Ne ye i bènbaw ka Ala ye, Ibrahima ni Isaka ni Yakuba ka Ala.' Musa yèrèyèrètò m'a ja gèlèya ka a lajè. 33 Matigi y'a fò a ye ko: `I ka sabara bò i sen na, katuguni i jòlen bè yòrò min na, o ye dugukolo senuma de ye. 34 Ne ka mògò minnu bè Misira, ne ye olu tòòrò ko ye ka u èunankan mèn. Ne jiginna ka na u tila. Na sisan walisa ne ka i ci ka taa Misira.' 35 «O Musa, u tun banna min na k'a fò ko: `Jòni ye i kè an kuntigi ni an ka kiritigèla ye?' Ala ye o yèrè ci k'a kè kuntigi ni tilabaa ye mèlèkè bolo, o min tun y'i jira Musa la jirinin na. 36 O Musa ye u labò yen ni kabakow ni taamashyènw kèli ye Misira jamana kònò ani Kògòji Bilen na ani kungokolon kònò san binaani kònò. 37 O Musa y'a fò Israèl bònsòn ye ko: `Ala na ne bòɲògònko kira dò lawuli aw balimaw cèma.' 38 O Musa tun bè jamakulu cèma kungokolon kònò, ale ni o mèlèkè min kumana a fè Sinayi kulu kan, ani an bènbaw fana. A ye kuma ɲènamaw sòrò ka u di an ma. 39 «Nka an bènbaw ma sòn ka a kan minè. U banna a la, u dusukunw jèngèna Misira fan fè. 40 U y'a fò Aron ye ko: `I ka batofèn dòw dila an ye, walisa olu ka an ɲèminè, k'a masòrò nin Musa min ye an labò Misira jamana la, min kèra o la, an t'o dòn.' 41 O donw la u ye misiden bisigi dila, ka na saraka bò o boli ye, ka ɲagali u bolo baara nò la. 42 O tuma la Ala y'a kò sin u ma ka u to sankolo dolow batoli la, i ko a sèbènnen bè kiraw ka kuma la cogo min na, ko: `Israèl mògòw, aw ye baganw faga ka sarakaw bò ne ye san binaani kònò kungokolon kònò wa? 43 Ayi, aw ye Molòk ka finiso ta ka taa n'a ye, ani batofèn Ranfan ka dolo, aw ye o bisigi minnu dila walisa aw ka olu bato! O de kosòn ne na aw cè ka taa Babilonè kòfè.' 44 «Seereya finiso tun bè an bènbaw bolo ka u to kungokolon kònò. Ala tun kumana Musa fè k'a fò ko o finiso ka dila ka kèɲè ni a ka bisigi yelen ye, u tun y'a dila ten. 45 O finiso sòròlen kò an bènbaw fè, Josue ye u ɲèminè ka don n'o ye nin jamana la, k'a sòrò Ala tun ye siyaw gèn ka bò u ɲè. A tora yen fo Dawuda tile la. 46 Dawuda ko tun ka di Ala ye, a ye Ala deli ko a ka sigi yòrò jò Yakuba ka Ala ye. 47 Nka Solomani de ye o so jò a ye. 48 «O bèè n'a ta Ala Kòròtalenba tè sigi mògò ka so dilalen kònò, i ko kira y'a fò cogo min na, ko: 49 `Sankolo ye ne ka masasigilan ye. Dugukolo ye ne sen kòrò dalan ye. Aw bè se ka mun so jò ne ye? Ne lafiya yòrò bè se ka kè min? Yala ne bolo ma o bèè dila wa? Matigi ko ten.' 51 «Mògò kunkolo gèlènw, dusukun ni tulo bolokobaliw, aw bè Ni Senu sòsò tuma bèè. Aw ni aw bènbaw ka kan. 52 Kiraw la jumèn bè yen ni aw bènbaw ma o tòòrò? Kira minnu ye o Tilennen nali ko fò, aw bènbaw ye olu faga. Sisan kòni, aw kèra o Tilennen janfabaaw ni a fagabaaw ye, 53 aw minnu ye sariya sòrò mèlèkèw bolo, nka aw ma a mara!» 54 Kiritigè jamakulu ye o kuma mèn tuma min na, o ye u sòn jeni, u ye u ɲinw ɲimi Etièni kama. 55 Nka Etièni falen Ni Senu la, a ye a ɲèw jò san fè ka Ala nòòrò ye ka Yesu jòlen ye a kinin fè. 56 A ko: «A filè, ne ɲè bè sankolo dayèlèlen na ka Mògò Denkè jòlen ye Ala kinin fè.» 57 O tuma la u ye kulokanba ci ka u tulow datugu. U bèè girinna ka bin a kan 58 k'a sama ka taa n'a ye dugu kòfè k'a bon ni kabakurunw ye. Seerew ye u ka dulòkiw bila kamalen dò sen kòrò, o tògò ko Saul. 59 U ye Etièni bon ni kabakurunw ye, a ye Ala deli ko: «Matigi Yesu, ne ni minè.» 60 O kò, a y'i ɲòngiri ka pèrènkanba bò ko: «Matigi, i kana nin jurumu jate u kun.» O kumaw fòlen kò, a sara.



8

1 Saul kòni sònna Etièni fagali ma. O don yèrè la tòòròba wulila Jerusalèm egilisi kama. Dannabaaw bèè jènsènna ka taa Jude ni Samari jamanaw yòròw bèè la, fò cidenw dama. 2 Ala ɲèsiranbaa dòw ye Etièni su don, ka a su kasi kosèbè. 3 Saul kòni tun bè a se ko kè walisa a ka egilisi tiɲè. A donna duw bèè kònò ka dannabaaw, cèw ni musow, sama ka u bila kaso la. 4 O mògò jènsènnenw taara yòrò bèè ka waajuli kè. 5 Filipe sera Samari dugu dò la ka Krisita ko waajuli kè. 6 Jama ye Filipe ka kabako kèlenw ye ka u mèn minkè, u bèè ye a lamèn ni dusukun kelen ye. 7 Jinèw tun bè pèrèn ka bò jinètò caman na. Mògò fan fila salenw ni senkelenw caman fana kènèyara. 8 Ɲagaliba kèra o dugu kònò. 9 Cè dò tun bè o dugu kònò kabini tuma jan, o tògò ko Simòn. A tun bè dònbaaya kow kè ka Samarikaw kabakoya, ka a yèrè kè mògòba ye. 10 Mògòw bèè, mògò dògòmanninw ni mògòbaw tun bè a lamèn kosèbè k'a fò ko: «Nin cè ye Ala ka sebaayaba ye dè.» 11 U tun bè a lamèn, katuguni a ye u kabakoya kabini tuma jan ni a ka dònbaaya kow ye. 12 Nka Filipe ye Ala ka masaya ni Yesu Krisita tògò Kibaru Duman fò. O mògòw dara o la tuma min na, u batisera, cèw ni musow. 13 Simòn yèrè ye dannaya kè ka batise. A tugulen tora Filipe la. A ye o taamashyènbaw ni kabakow kètò ye tuma min na, a kabakoyara. 14 Jerusalèm cidenw y'a mèn tuma min na ko Samarikaw sònna Ala ka kuma ma, u ye Pierè ni Yuhana ci olu ma. 15 Pierè ni Yuhana sera Samari tuma min na, u ye Ala deli dannabaaw ye, walisa olu ka Ni Senu sòrò. 16 Ni Senu tun ma jigin u si kan fòlò, u tun batisera Matigi Yesu tògò la dòròn. 17 O tuma la Pierè ni Yuhana ye u bolow da u kan, u ye Ni Senu sòrò. 18 Simòn y'a ye ko dannabaaw ye Ni Senu sòrò cidenw ka bolo dalen fè u kan tuma min na, a nana ni wari ye k'a fò Pierè ni Yuhana ye 19 ko: «A' ye nin sebaaya di ne fana ma, walisa ne mana ne bolow da mògò min kan, o ka Ni Senu sòrò.» 20 Pierè y'a fò a ye ko: «I ni i ka wari fila bèè ka halaki, k'a masòrò i bè miiri ko Ala ka nilifèn bè se ka san ni wari ye! 21 Niyòrò ni jòyòrò tè i fè nin ko la, katuguni i dusukun ma tilen Ala ɲè kòrò. 22 I ka nimisa i ka juguya la ka Matigi deli ko a ka o miirili jugu yafa i ma, ni o bè se ka kè. 23 Katuguni ne y'a ye ko i dusukun falen bè ɲèngoya la. Jurumu ka jònya juru sirilen bè i kan na.» 24 Simòn y'a fò Pierè ni Yuhana ye ko: «Aw yèrèw ka Matigi deli ne ye, walisa aw ye min fò, o si kana ne sòrò.» 25 Seereya bòlen kò u fè, ka Matigi ka kuma fò, o ciden fila kòseginna Jerusalèm. U taatò ye Kibaru Duman fò dugu caman na. 26 Matigi ka mèlèkè dò y'a fò Filipe ye ko: «Wuli ka taa worodugu yanfan fè. Sira min bè bò Jerusalèm ka taa Gaza, i ka taa o sira fè.» O ye kungokolon sira de ye. 27 Filipe wulila ka taa. K'a to sira kan, a ye cè dò ye. Etiopi masa musoman Kandase ka kuntigiba dò tun don, min tun bè a ka nafolo bèè kun na. O Etiopika tun taara Jerusalèm ka Ala bato. 28 A kòsegintò ka taa a ka so, a sigilen tun bè a ka wotoro kònò. A tun bè kira Esayi ka kitabu kalan. 29 Ni Senu y'a fò Filipe ye ko: «I madon nin wotoro la ka taa a fè.» 30 Filipe bolila ka madon wotoro la, a ye Etiopika kan mèn, o tun bè kira Esayi ka kitabu kalan. Filipe y'a ɲininka ko: «I bè min kalan, i bè o faamu wa?» 31 O cè y'a jaabi ko: «Ne bè se k'a faamu cogo di, ni mògò ma a kòrò fò ne ye?» A ye Filipe deli ko a ka don wotoro kònò ka sigi a kèrè fè. 32 A tun bè Kitabu yòrò min kalan, o filè nin ye ko: «A minèna ka taa i ko saga min bè taa faga yòrò la. I ko sagaden min tè a kan bò a si kanbaaw bolo, a ma a da yèlè. 33 A majiginlen tun don, mògòw ma sòn ka jo di a ma. Jòni na a bònsòn ko fò? Katuguni a si tigèra ka bò dugukolo kan.» 34 Kuntigi y'a fò Filipe ye ko: «Ne b'i deli, a ɲè fò ne ye yala kira bè kuma jòni ko la, a yèrè wa, wala mògò wèrè?» 35 O tuma la Filipe ye kuma ta ka Kibaru Duman fò Yesu ko la ka bò kitabu o yòrò yèrè la. 36 Ka u to sira kan ka taa, u sera yòrò dò la, ji tun bè yen. Kuntigi ko: «Ji filè, mun bè ne bali ka batise?» [ 37 Filipe y'a jaabi ko: «Ni i ye dannaya kè ni i dusukun bèè ye, i bè se ka batise.» O cè ko: «Ne dara a la ko Yesu Krisita ye Ala Denkè ye.»] 38 O kò, kuntigi y'a fò ko wotoro ka jò. U fila jiginna ka don ji la. Filipe y'a batise. 39 U bòlen kò ji la, Matigi Ni ye Filipe ta ka taa. Kuntigi ma a ye tun, nka a ɲagalilen ye sira minè ka taa. 40 Filipe kòni taara a yèrè sòrò Azòt. O kò, a tun bè taa dugu ni dugu ka Kibaru Duman fò o yòròw bèè la fo ka taa se Sesare.



9

1 Ka Saul to kangari dali la Matigi ka kalandenw ye ka u fagali ko fò, a taara sarakalasebaaw kuntigi sègèrè, 2 ka o deli ko a ka sèbènw di a ma, a ka taa n'u ye Damasi ka u di Alabatosow mògòw ma, walisa ni a ye Matigi ka sira taamabaa dòw sòrò yen, cè fara muso kan, a ka olu minè ka taa ni u sirilen ye Jerusalèm. 3 Ka Saul to sira kan ka taa Damasi, a surunyalen o dugu la, o yòrònin bèè kènèyeelen manamanana a fan bèè la ka bò sankolo la. 4 A binna duguma, a ye kumakan dò mèn, o y'a fò a ye ko: «Saul, Saul, mun na i bè ne tòòrò?» 5 Saul y'a ɲininka ko: «I ye jòni ye, Matigi?» Matigi y'a jaabi ko: «Ne ye Yesu ye. I bè min tòòrò, ne don. [A ka gèlèn i ma ka nègè nun bòlen tan.] 6 Nka wuli ka don dugu kònò. I ka kan ka min kè, o na fò i ye yen.» 7 Saul taamaɲògònw ja tigèlen jòlen tora, u ma se ka foyi fò. U ye o kan mèn, nka u ma mògò si ye. 8 Saul wulila ka bò duguma. A ye a ɲè yèlè, nka a ma foyi ye. U ye a bolo minè ka taa n'a ye Damasi. 9 Tile saba kònò a ma foyi ye, a ma dumuni kè, a ma ji min. 10 Dannabaa dò tun bè Damasi, o tògò ko Ananiyasi. Matigi y'i jira o la k'a fò a ye ko: «Ananiyasi.» Ananiyasi y'a jaabi ko: «Naamu, Matigi.» 11 Matigi y'a fò a ye ko: «Wuli joona ka taa. Sira min bè wele Tilennen, i ka taa o fè ka se Juda ka so, ka Tarseka dò ɲini, o tògò ko Saul. A bè Ala deli. 12 K'o to delili la, a ye cè dò ye jiralifèn na, o tògò ko Ananiyasi. O donna Saul yòrò ka a bolow da a ɲèw kan walisa a ka yeli kè ko kura.» 13 Ananiyasi y'a jaabi ko: «Matigi, nin cè ye ko jugu minnu bèè kè i ka mògòw la Jerusalèm, mògò caman ye olu fò ne ye. 14 Yan fana, fanga bè a bolo, a y'o sòrò sarakalasebaaw kuntigiw fè ka i tògò welebaaw bèè minè.» 15 Nka Matigi y'a fò Ananiyasi ye ko: «Taa, katuguni ne y'a ɲènatòmò ka kè ne ka baarakè minèn ye ka ne tògò fò siya wèrèw ni u ka masakèw ani Israèl mògòw ye. 16 A ka kan ka tòòròba minnu muɲu ne tògò kosòn, ne yèrè na olu jira a la.» 17 Ayiwa, Ananiyasi taara ka se o so kònò. A ye a bolow da Saul kan k'a fò a ye ko: «Ne balimakè Saul, Matigi Yesu min y'i jira i la ka i to sira kan ka na yan, o ye ne ci i ma, walisa i ka yeli kè ko kura ka fa Ni Senu la.» 18 O yòrònin kelen fèn dòw binna ka bò Saul ɲèw kan, olu bòlen bè faraw fè, a ye yeli kè ko kura. A wulila ka batise. 19 O kò, a ye dumuni kè, a ye barika sòrò. Ayiwa, Saul tora dannabaaw fè Damasi ka tile dama dò kè. 20 O yòrònin kelen, a y'a daminè ka waajuli kè Alabatosow kònò k'a fò ko Yesu ye Ala Denkè ye. 21 Minnu tun bè a lamèn, olu bèè kabakoyara k'a fò ko: «Mògò min tun bè Yesu tògò welebaaw tòòrò Jerusalèm, o tè nin ye wa? A ma na yan fana walisa ka o mògòw minè ka taa n'u sirilen ye sarakalasebaaw kuntigiw ɲè kòrò wa?» 22 O bèè n'a ta Saul tun bè barika sòrò ka taa ɲè waajuli la, ko Yesu ye Krisita ye, fo Yahutu minnu sigilen tun bè Damasi, olu ma cogo sòrò ka a jaabi. 23 Tile dama dòw tèmènnen kò, Yahutuw ye jè siri ka Saul faga cogo ɲini, 24 nka o ko dònna Saul fè. U ye dugu dondaw kòlòsi fana su fara tile kan walisa ka Saul faga. 25 Nka Saul ka kalandenw y'a ta su fè ka a lajigin saba kònò dugu kogo kòfè. 26 Saul sera Jerusalèm tuma min na, a tun b'a fè ka jè dannabaaw fè, nka u bèè siranna a ɲè, katuguni u ma da a la ko a kèra dannabaa ye sèbè la. 27 O tuma la Barnabasi taara n'a ye cidenw yòrò k'a fò u ye ko Saul ye Matigi ye sira la ani Matigi kumana a fè. Saul tun ye waajuli kè Yesu tògò la Damasi ni ja gèlèya ye cogo min na, Barnabasi ye o fana fò u ye. 28 O kò, Saul tora ka yaala u fè Jerusalèm ka waajuli kè ni ja gèlèya ye Matigi tògò la. 29 A tun bè kuma Helenisitew fè, a ni olu tun bè sòsòli kè, nka olu tun bè cogo ɲini ka a faga. 30 Balimaw ye o dòn tuma min na, u taara ni Saul ye fo Sesare, ka a bila ka taa Tarse. 31 O tuma la egilisi tun bè hèrè la Jude ani Galile ni Samari jamanaw bèè la. A tun bè barika sòrò ka taa ɲè Matigi ɲèsiran na, ka jiidi Ni Senu ka laadili barika la. 32 Ka Pierè to jamana yòrò bèè yaalali la, a sera Lide dannabaaw yòrò fana. 33 A ye cè dò sòrò yen, o tògò ko Ene. A dalen tun bè dalan kan kabini san segin, o fanfilasalen tun don. 34 Pierè y'a fò o ye ko: «Ene, Yesu Krisita bè i kènèya. Wuli ka i ka dalan labèn.» O yòrònin bèè Ene wulila. 35 Lidekaw ni Saròn jamana mògòw bèè y'a ye minkè, u tuubira Matigi ye. 36 Muso dò tun bè Jope, dannabaa tun don, ko Tabita, (grèkikan na, a tògò ko Dòrkasi). A tun bè ko ɲuman kè tuma bèè ka faantanw dèmè. 37 O tuma la a banana, a sara. U y'a su ko ka a da sankanso dò kònò. 38 Lide ni Jope cè tun man jan, Jope dannabaaw y'a mèn ko Pierè bè Lide. U ye cè fila ci a ma k'a fò a ye ko: «An b'i deli i ka na an ka yòrò la sisan, i kana mèn.» 39 O yòrònin bèè Pierè wulila ka taa u fè. A selen, u taara n'a ye o sankanso kònò. Muso cè salenw y'u madon a la, u tun bè kasi. Dòrkasi tun ye dulòki misèn ni dulòkiba minnu kala ka a to u fè yen, u ye olu jira Pierè la. 40 Pierè ye o mògòw bèè labò kènèma, k'i ɲòngiri ka Ala deli. O kò, a y'i yèlèma su fan fè k'a fò ko: «Tabita, wuli.» Muso ye a ɲè yèlè, a ye Pierè ye tuma min na, a wulila k'i sigi. 41 Pierè y'a bolow minè k'a lawuli. O kò, Pierè ye dannabaaw ni muso cè salenw wele ka Dòrkasi ɲènama jira u la. 42 Jopekaw bèè ye o ko dòn, u caman dara Matigi la. 43 Pierè ye waati jan kè Jope, wolodogina Simòn ka so.



10

1 Cè dò tun bè Sesare, o tògò ko Kòrnèye. Sòròdasikulu min tògò ko Italikulu, o jalasabatigi tun don. 2 O cè tun ye Ala ɲèsiranbaa ye, a ni a ka so mògòw bèè tun bè Ala bato ɲògòn fè. A tun bè Yahutu faantan caman dèmè. A tun tè sègèn Ala delili la. 3 Don dò wula fè a ye Ala ka mèlèkè dò ye jiralifèn na, o donna a ka yòrò la k'a fò a ye ko: «Kòrnèye!» 4 Kòrnèye sirantò y'i ɲè jò mèlèkè la k'a fò a ye ko: «Mun don, Matigi?» O y'a fò a ye ko: «I ye delili minnu kè ani i ye faantanw dèmè cogo min na, Ala sònna olu ma ka a hakili to i la. 5 Sisan kòni, i ka mògò dòw ci ka taa Jope ka Simòn wele ka na i yòrò, o bè wele fana Pierè. 6 A jiginnen bè wolodogina Simòn ka so, o bè kògòji da la.» 7 Mèlèkè min kumana a fè, o taalen kò, Kòrnèye ye a ka so kònò jònkè fila wele, ani a kòròsigi sòròdasi kelen, min tun bè siran Ala ɲè. 8 A ye o ko bèè lakali u ye, o kò, ka u ci ka taa Jope. 9 O dugusajè, ka u to sira kan ka surunya o dugu la, Pierè yèlènna so kun na tilegan fè ka Ala deli yen. 10 Kòngò y'a minè, a tun b'a fè ka dumuni kè. Ka u to dumuni labènni la Pierè ye, a ye jiralifèn dò ye. 11 A ye sankolo dayèlèlen ye, ka fèn dò jigintò ye ka bò yen, i n'a fò finiba, o seleke naani sirilen tun bè, a sera duguma. 12 Sen naanima fènw ni fèn fofotaw ani sanfè kònòw, o fènw sifa bèè tun bè o kònò. 13 Kumakan dò y'a fò a ye ko: «Wuli, Pierè, ka fèn dò faga ka dumuni kè.» 14 Nka Pierè y'a jaabi ko: «Ayi Matigi, katuguni ne ma fèn dagabali wala fèn nògòlen si dun abada.» 15 O kumakan y'a fò a ye ko kura ko: «Ala ye min saniya, i kana o jate fèn nògòlen ye.» 16 O ko kèra siɲè saba tuma min na, o yòrònin kelen, o fènw kòseginna ka taa sankolo kònò. 17 Ka Pierè hakili ɲaaminen to o jiralifèn kòrò ko la, Kòrnèye ka cidenw tun bè Simòn ka so ɲininkali kè ka se so da la. 18 U ye foli kè ka ɲininkali kè ko: «Simòn min bè wele Pierè, o jiginnen bè yan wa?» 19 Ka Pierè to miirili la o jiralifèn kòrò ko la, Ni Senu y'a fò a ye ko: «A filè, mògò saba b'i ɲini. 20 Wuli ka jigin ka taa u fè, i kana sigasiga, k'a masòrò ne de ye u ci i ma.» 21 Ayiwa Pierè jiginna ka taa o mògòw yòrò k'a fò u ye ko: «Aw bè min ɲini, ne don. Aw nakun ye mun ye?» 22 U y'a jaabi ko: «Jalasabatigi Kòrnèye ye an ci. Mògò sèbè, Ala ɲèsiranbaa don. Yahutuw bèè bè a tògò ɲuman fò. Ala y'a jira a la mèlèkè fè ko a ka i wele ka taa a ka so, walisa a ka kuma dò mèn i fè.» 23 Pierè ye u lajigin ka si yen. O dugusajè, a wulila ka taa u fè. Jope balima dòw farala u kan ka taa. 24 O dugusajè, u sera Sesare. Kòrnèye tun bè u makònò, a tun ye a ka so mògòw ni a teriw wele. 25 Pierè dontò so kònò, Kòrnèye nana a kunbèn k'i bin a sen kòrò k'a bato. 26 Pierè y'a lawuli, a ko: «Wuli, ne fana ye mògò ye.» 27 Ka u to kuma la ɲògòn fè, u donna so kònò ka mògò caman lajèlen sòrò yen. 28 Pierè y'a fò u ye ko: «Aw y'a dòn ko a dagalen tè Yahutu ye ko a ni siya wèrè mògò ka jè, wala ka don a ka so kònò, nka Ala y'a jira ne la ko ne kana mògò si jate saniyabali wala mògò nògòlen ye. 29 O de kosòn aw ye ne wele tuma min na, ne nana, ne ma sòsòli don a la. Ayiwa aw ye ne wele kun min na, ne b'a fè ka o dòn.» 30 Kòrnèye y'a jaabi ko: «Bi ye a tile naani ye, ne tun bè Ala delili la ne ka so kònò wula fè delili waati la. O yòrònin bèè, cè dò nana i jò ne ɲè kòrò, a ka fini tun bè manamana. 31 O y'a fò ne ye ko: `Kòrnèye, Ala ye i ka delili jaabi. I ye faantanw dèmè cogo min na, o tora a hakili la. 32 I ka mògò dòw ci ka taa Jope ka Simòn wele ka na, o bè wele fana Pierè. A jiginnen bè wolodogina Simòn ka so kògòji da la.' 33 O yòrònin kelen ne ye mògò dòw ci ka taa i wele. I na ko ɲè na. Sisan Ala ye fèn minnu bèè di i ma k'a fò an ye, an bèè lajèlen filè Matigi ɲè kòrò yan ka olu lamèn.» 34 Pierè ye kuma ta ko: «Tiɲè la, ne y'a faamu sisan ko Ala tè mògò bò mògò la, 35 nka siya o siya la, mògò min bè siran a ɲè ka ko tilennen kè, o de ko ka di a ye. 36 Ala ye kuma min ci Israèl bònsòn ma, o filè nin ye: A ye hèrè ko Kibaru Duman fò u ye Yesu Krisita fè, o min ye mògòw bèè Matigi ye. 37 Ko min kèra Jude jamana bèè la k'a daminè Galile, Yuhana ka batiseli waajuli kèlen kò, aw ye o dòn. 38 Ala ye Ni Senu ni sebaaya jigin Yesu Nazarètika kan cogo min na, aw ye o dòn. Aw y'a dòn fana ko Yesu tun bè jamana yaala ka ko ɲuman kè ka Sitanè ka tòòròlenw bèè kènèya, katuguni Ala tun b'a fè. 39 Yesu ye ko minnu kè Yahutuw ka jamana la ani Jerusalèm, an ye o kow bèè seerew ye. U y'a gengen jiri kan k'a faga. 40 Ala y'a lakunun a tile sabanan don k'a to a k'i jira mògò dòw la. 41 A ma i jira mògòw bèè la, fo seere minnu ɲènatòmòlen tun bè Ala fè ka kòrò, anw kòni minnu ye dumuni kè ka minni kè a fè a kununlen kò ka bò suw cèma. 42 Yesu y'a fò an ye ko an ka mògòw waaju k'a jira u la k'a jèya ko Ala ye min sigi ka kè ɲènamaw ni suw kiritigèla ye, o ye ale de ye. 43 Kiraw bèè bè seereya kè Yesu ko la, ko mògò o mògò dara ale la, o na jurumuw yafa sòrò a tògò barika la.» 44 Ka Pierè to kuma la, Ni Senu jiginna o kuma lamènbaaw bèè kan. 45 Yahutu dannabaa minnu tun nana Pierè fè, olu bèè kabakoyara k'a masòrò Ala ye Ni Senu di siya wèrèw mògòw ma nilifèn ye k'a caya, 46 katuguni u y'a mèn ko olu bè kan wèrèw fò ka Ala bonya. Pierè ko: 47 «Minnu ye Ni Senu sòrò i ko an yèrèw, mògò dò bè se ka olu bali ji la, ko u tè batise wa?» 48 O tuma la Pierè y'a fò ko u ka batise Yesu Krisita tògò la. O kò, u ye Pierè deli ko a ka tile dama dò kè u fè yen.



11

1 Cidenw ni balima minnu tun bè Jude jamana la, olu y'a mèn ko siya wèrè mògò dòw fana sònna Ala ka kuma ma. 2 Pierè kòseginna Jerusalèm tuma min na, Yahutuw dannabaaw y'a kòròfò 3 ko: «I donna mògò bolokobaliw ka so ka dumuni kè u fè dè.» 4 O la Pierè ye o ko lakali ka a bèè tugutugu ɲògòn na, a ko: 5 «Ka ne to delili la Jope dugu kònò, ne ye jiralifèn dò ye. O bòlen tun bè finiba fè. A seleke naani sirilen tun bè. O jiginna ka bò sankolo la ka se ne ma. 6 Ne ye ne ɲè jò a la kosèbè, ne ye sen naanima fènw ni kungo kònò waraw ni fèn fofotaw ani sanfè kònòw ye a kònò. 7 Ne ye kumakan dò mèn, o y'a fò ne ye ko: `Wuli, Pierè, ka fèn dò faga ka dumuni kè.' 8 Nka ne y'a jaabi ko: `Ayi, Matigi, katuguni fèn dagabali wala fèn nògòlen si ma don ne da la fòlò.' 9 Ne ye o kan mèn ka bò sankolo la ko kura ko: `Ala ye min saniya, i kana o jate fèn nògòlen ye.' 10 O ko kèra siɲè saba. O kò, o fèn bèè kòseginna sankolo kònò. 11 O waati yèrè la, ne tun bè so min kònò, cè saba sera yen, u tun cira ne ma ka bò Sesare. 12 Ni Senu ko ne ka taa u fè, ne kana sigasiga. Nin balimakè wòòrò fana taara ne fè Sesare, an bèè donna Kòrnèye ka so kònò. 13 Ale y'a fò an ye ko a ye mèlèkè dò ye a ka so kònò, o y'a fò a ye ko a ka mògò dòw ci Jope ka Simòn wele, o tògò ko Pierè fana. 14 Ko o na kuma dò fò a ye, a ni a ka mògòw bèè na kisi o fè. 15 Ka ne to kuma la u fè, Ni Senu jiginna u kan, i ko a jiginna an kan fòlò cogo min na. 16 Ne hakili jiginna Matigi ka kuma fòlen na ko: `Yuhana ye batiseli kè ji la, nka aw na batise Ni Senu de la.' 17 An minnu dara Matigi Yesu Krisita la, Ala ye nilifèn min di an ma, ni a ye o bòɲògònko di olu fana ma, ne ye jòn ye ka Ala sòsò?» 18 U ye o kuma mèn tuma min na, u dusu sumana, u ye Ala tanu, ko: «Tiɲè la, Ala ye nimisali dusu di siya wèrèw fana ma, walisa u ka ɲènamaya sòrò.» 19 Tòòrò min wulila Etièni faga tuma la, minnu jènsènna o kosòn, olu taara Fenisi ni Siprè ni Antiose. U ma Ala ka kuma fò mògò si ye Yahutuw kò. 20 O bèè n'a ta, Siprè ni Sirènè dannabaa dòw taara Antiose ka Matigi Yesu Kibaru Duman fò Grèkiw fana ye. 21 Matigi ka sebaaya tun bè u kan, fo mògò caman ye dannaya kè ka tuubi Matigi ye. 22 Jerusalèm egilisi mògòw ye o kibaru mèn, u ye Barnabasi ci ka taa Antiose. 23 Barnabasi selen Antiose ka Ala ka nèèma nò ye, a ɲagalila. A ye u bèè laadi ko u nòròlen ka to Matigi la ni hakili sigilen ye. 24 Barnabasi tun ye mògò sèbè ye, a falen tun bè Ni Senu ni dannaya la. Mògò caman sòròla Matigi ye. 25 O kò, Barnabasi taara Tarse ka Saul ɲini. 26 A y'a ye tuma min na, a taara n'a ye Antiose. U fila bèè ye san kelen dafalen kè egilisi mògòw cèma ka mògò caman kalan. Ka dannabaaw wele kretiènw, o daminèna Antiose. 27 O donw la kira dòw bòra Jerusalèm ka se Antiose. 28 U la kelen, o tògò ko Agabus, o wulila k'a fò Ni Senu barika la ko sòòni kòngòba na kè dugukolo yòrò bèè la. (O kèra masakè Klode tile la.) 29 Dannabaaw y'a latigè ko u na dèmèni dò ci Jude jamana balimaw ma ka kèɲè ni u bèè kelen-kelen se ko ye. 30 U ye nilifènw labèn k'u ci Jude cèkòròbaw ma Barnabasi ni Saul bolo.



12

1 O waati la masakè Hèròde ye egilisi mògò dòw minè ka u tòòrò. 2 A ye Yuhana balimakè Yakuba faga ni npan ye. 3 A y'a ye ko o diyara Yahutuw ye tuma min na, a ye Pierè fana minè. O kèra nbuuru fununbali seli waati la. 4 Pierè minèlen kò, Hèròde y'a bila kaso la k'a don sòròdasi naani sigiyòròma naani bolo, ko u ka a kòlòsi. Hèròde tun b'a fè ka taa n'a ye mògòw ɲè kòrò Tèmènkan seli tèmènnen kò. 5 Ayiwa Pierè maralen tun bè kaso la, nka egilisi mògòw jijalen tora Ala delili la a ye. 6 Hèròde tun b'a fè ka taa ni Pierè ye mògòw ɲè kòrò don min na, o don su fè, Pierè sunògòlen tun bè sòròdasi fila furancè la. A sirilen tun bè ni nègè jòlòkò fila ye. Dakòlòsibaaw jòlen tun bè kasobon da la. 7 A filè, Matigi ka mèlèkè dò nana, yeelenba kèra kasobon kònò. Mèlèkè ye Pierè gosi a kèrè la ka a lakunun, a ko: «Wuli joona.» O yòrònin kelen jòlòkòw binna ka bò Pierè bolow la. 8 O kò, mèlèkè y'a fò a ye ko: «I ka finiw ni i ka sabara don k'i cèsiri.» Pierè ye o kè. O kò, mèlèkè y'a fò a ye ko: «I ka dulòkiba don ka tugu ne nòfè.» 9 Pierè bòra ka tugu mèlèkè nòfè. Mèlèkè ye min kè, Pierè tun m'a dòn ko o ye ko sèbè ye, nka a tun bè miiri ko jiralifèn don. 10 U tèmènna dakòlòsibaa fòlò ni filanan la ka se nègè kon ma min bè mògò labò kènèma ka taa dugu kònò. O kon yèlèla u ɲè a yèrèma. U bòra ka taa ɲè sira kan dòònin, o yòrònin kelen mèlèkè taara ka Pierè to yen. 11 Pierè ye hakili sòrò minkè, a ko: «Ne y'a dòn sisan k'a jèya ko Matigi ye a ka mèlèkè ci ka na ne tila Hèròde ka fanga la, ani Yahutuw tun bè ne tòòrò ko minnu ɲènafilè.» 12 A y'i miiri minkè, a taara Mariyama ka so. Yuhana min bè wele Marka, o ba tun don. Mògò caman lajèlen tun bè yen ka Ala deli. 13 Pierè ye du donda kònkòn. Baarakèmuso dò nana da la walisa a k'a yèlè, o tògò ko Rode. 14 O ye Pierè kan dòn tuma min na, a ma se ka da yèlè ɲagali kosòn, nka a bolila ka taa so kònò k'a fò ko Pierè jòlen bè da la kènèma. 15 U y'a fò a ye ko: «Fa b'i la!» Nka a y'a fò u ye k'a jèya ko tiɲè don. U ko: «A mèlèkè don.» 16 O bèè n'a ta Pierè tora ka da kònkòn. U ye da yèlè k'a ye minkè, u kabakoyara kosèbè. 17 A y'a bolo kòròta ko u ka u makun. Matigi y'a labò kaso la cogo min na, a y'o lakali u ye, a ko fana: «Aw ka nin kibaru fò Yakuba ni balima tòw ye.» O kò, a bòra yen ka taa yòrò wèrè la. 18 Dugu jèlen, sòròdasiw ja wulila katuguni Pierè kèra cogo min na, u ma o dòn. 19 Hèròde ye Pierè ɲini, a ma a ye minkè, a ye sòròdasiw sègèsègè o ko la, k'a fò ko olu ka faga. O kò, Hèròde bòra Jude jamana la ka taa Sesare ka waati dò kè yen. 20 Hèròde tun diminna Tirkaw ni Sidònkaw kòrò kosèbè. Olu bènna a la ko u ka taa Hèròde ɲè kòrò. U ye masakè ka sibon kuntigi Blasitus kè u teri ye. O kò, u taara hèrè ɲini Hèròde fè, katuguni u ka jamana balo tun bè bò masakè ka jamana la. 21 Don latigèlen selen, Hèròde ye a ka masakè dulòkiba don k'i sigi a ka masasigilan kan ka kumabaw fò u ye. 22 Mògòw bèè pèrènna ko: «Ala kan don, mògò kan tè!» 23 O yòrònin bèè Matigi ka mèlèkè dò ye Hèròde gosi, katuguni a ma Ala bonya. Ntumuw donna a la, a sara. 24 O bèè n'a ta Ala ka kuma tun bè jènsèn ka ta'a fè. 25 Barnabasi ni Saul nana Jerusalèm ci min kama, o dafalen kò, u kòseginna. U taara ni Yuhana ye u fè, o bè wele fana Marka.



13

1 Kiraw ni karamògòw tun bè Antiose egilisi la. Olu tun ye ninnu ye: Barnabasi ni Simòn min bè wele Nijèr, ani Lusius min bòra Sirènè, ni Manahèn ani Saul. Manahèn ni jamana kuntigi Hèròde mòna so kelen kònò. 2 Don dò, ka u to Matigi batoli la ka sun don, Ni Senu y'a fò u ye ko: «Ne ye Barnabasi ni Saul wele baara min kama, aw ka u bila ne ye, walisa u ka o kè.» 3 U sunnen kò ka Ala deli, u ye u bolow da Barnabasi ni Saul kan ka u bila ka taa. 4 Barnabasi ni Saul cilen Ni Senu fè, u taara Sèlusi. U donna kurun kònò yen ka taa Siprè gun na. 5 U selen Salaminè, u ye Ala ka kuma fò Yahutuw ka Alabatosow kònò. Yuhana tun bè u fè ka u dèmè. 6 U ye o gun cètigè fo ka se Pafòsi. U ye cè dònbaa dò ye yen, Yahutu kira nkalontigèla dò tun don, o tògò ko Barjesu. 7 O tun bè gòfèrènèrè Sèrjius Polus fè yen. O gòfèrènèrè tun ye mògò hakilitigi ye. A ye ci bila ka Barnabasi ni Saul wele, katuguni a tun b'a fè ka Ala ka kuma mèn. 8 Nka dònbaa Elimas, o ye Barjesu tògò ye grèkikan na, o ye Barnabasi ni Saul sòsò. A tun bè cogo ɲini ka gòfèrènèrè bali ka dannaya kè. 9 O tuma la Saul, min bè wele fana Paul, o falen Ni Senu la, o ye a ɲè jò o dònbaa la k'a fò ko: 10 «Mògò falen keguya ni nanbara sifa bèè la, Sitanè den, tilennenya bèè jugu, i tè Matigi ka sira tilennenw yèlèmani dabila wa? 11 Matigi bolo filè i kan sisan, i na kè fiyentò ye, i tèna tile yeelen ye waati dama dò kònò.» O yòrònin kelen Elimas ɲèw lafinna, o kò, a fiyenna. A tun bè munumunu fan bèè la, walisa ka mògò sòrò ka a bolo minè ka taa n'a ye. 12 Gòfèrènèrè ye o ko kèlen ye tuma min na, a ye dannaya kè. Kalan min kèra Matigi ko la, o y'a kabakoya kosèbè. 13 Paul ni a taamaɲògònw donna kurun kònò Pafòsi ka taa Pèrje, o bè Panfili jamana la. Yuhana farala u la yen ka kòsegin ka taa Jerusalèm. 14 U ye u ka sira minè ka bò Pèrje ka taa se Antiose, o bè Pisidi jamana la. U donna Alabatoso kònò lafiɲè don na, k'u sigi. 15 Sariya ni kiraw ka kitabuw kalannen kò, Alabatoso kuntigi ye ci lase u ma ko: «Balimaw, ni waajuli kuma dòw bè aw fè ka jira jama la, aw bè se ka kuma sisan.» 16 Paul wulila ka a bolo kòròta k'a fò ko: «Israèl mògòw, ani aw minnu bè siran Ala ɲè, a' ye aw tulow majò. 17 Israèl mògòw ka Ala ye an bènbaw ɲènatòmò. A ye u siya caya ka u to siginfèya la Misira. O kò, a ye u labò yen ni a ka sebaayaba ye. 18 A ye u ko muɲu kungokolon kònò san binaani kònò. 19 A ye siya woloèula halaki Kanan jamana kònò, o kò, ka olu ka jamana di u ma ka kè u ta ye 20 san kèmè naani ni biduuru ɲògòn kònò. O kò, a ye kiritigèlaw di an bènbaw ma fo ka taa se kira Samuèl tile ma. 21 «O tuma la u ye masakè ɲini Ala fè. A ye Kis denkè Saul di u ma, o bòra Benjamèn bònsòn na. O sigira u kun na san binaani kònò. 22 Ala bannen kò Saul la, a ye Dawuda di u ma ka kè masakè ye. A y'a fò o ko la ko: `Ne ye Isayi denkè Dawuda sòrò. A ko diyara ne ye, a na ne sagola kow bèè kè ka dafa.' 23 Ala ye Dawuda bònsòn dò kè Israèl Kisibaa ye ka kèɲè ni a ka layidu ye, o ye Yesu de ye. 24 Sani o ka na, Yuhana tun bè Israèl mògòw bèè waaju ko u ka nimisa u ka jurumuw la ka batise. 25 Yuhana ka baara dafa tuma surunyalen, a tun b'a fò ko: `Aw bè miiri ko ne ye jòn ye? Aw bè min ɲènafilè, ne t'o ye. A filè, a bè na ne kò, ne man kan ni a ka sabara juru fonili ye.' 26 «Balimaw Ibrahima bònsònw, ani aw minnu bè siran Ala ɲè, nin kisili kuma cira anw ma. 27 Jerusalèmkaw ni u kuntigiw ma Yesu ko faamu. Kiraw ka kuma minnu bè kalan lafiɲè donw la, u ma olu fana faamu, nka u ye o kuma dafa ni u ye Yesu jalaki tuma min na. 28 Hali k'a sòrò u ma saya sababu si ye a la, u ye Pilate deli ko a ka faga. 29 Ko minnu sèbènnen tun bè Kitabu la Yesu ko la, olu bèè dafalen kò u fè, u y'a lajigin ka bò fagalijiri kan k'a don kaburu kònò. 30 Nka Ala y'a lakunun ka bò suw cèma. 31 Yesu ni minnu tun bòra Galile ɲògòn fè ka taa Jerusalèm, a y'i jira olu la tile caman kònò. Sisan olu kèra a seerew ye ka kuma Israèl mògòw fè a ko la. 32 Anw bè nin Kibaru Duman fò aw ye ko Ala tun ye layidu min ta an bènbaw ye, 33 a y'o dafa an ye bi, anw minnu kèra u bònsònw ye. A ye Yesu lakunun i ko a sèbènnen bè Zaburu filanan la ko: `I ye ne Denkè ye, ne ye i bange bi.' 34 Ala tun y'a fò ko a na a lakunun ka bò suw cèma walisa a kana toli. A tun y'a fò ten ko: `Ne ye layidu min ta Dawuda ye, ne na o duba senumaw da aw kan, u tè se ka wuli.' 35 O de y'a to a y'a fò Zaburuw yòrò wèrè la ko: `I tèna sòn i ka Senuma ka toli.' 36 Dawuda kòni ye Ala ka ko latigèlenw dafa a tile la, o kò, a sara. A su donna a bènbaw kèrè fè, a tolila. 37 Nka Ala ye min lakunun ka bò suw cèma, o ma toli. 38 Balimaw, aw k'a dòn ko jurumuw yafa ko bè fò aw ye Yesu la. 39 Ko aw tè se ka jo sòrò ko minnu na Musa ka sariya barika la, mògò minnu bè dannaya kè, olu bèè bè se ka jo sòrò o kow bèè la nin Yesu de barika la. 40 Ayiwa, a' ye aw yèrèw kòlòsi, walisa kiraw ye ko minnu fò, olu kana na aw sòrò. U ko: 41 `A filè aw nparabòlaw, aw ka kabakoya ka halaki, k'a masòrò ne na ko dò kè aw tilew la, ni mògò dò ye o lakali aw ye, aw tèna da o la.' » 42 Paul ni Barnabasi bòtò Alabatoso kònò, mògòw ye u deli ko lafiɲè don natò, u ka kuma u fè o ko la ko kura. 43 Lajèli bannen kò, Yahutuw ni u ka tuubiden Ala batobaa caman tugura Paul ni Barnabasi nòfè. Olu tun bè kuma u fè ka u laadi ko u nòròlen ka to Ala ka nèèma la. 44 O lafiɲè don kunɲògòn, dugu kònò mògòw bèè ye u lajè ko u bè Ala ka kuma lamèn. 45 Yahutuw ye o jamaba ye tuma min na, u dusuw fara keleya la, u tun bè Paul ka kuma sòsò ka a neni. 46 Paul ni Barnabasi kumana u fè ni ja gèlèya ye ko: «Wajibi tun don Ala ka kuma ka fò aw fòlò ye. Nka aw banna a la, ka aw yèrèw jate ko aw man kan ni ɲènamaya banbali ye. Ayiwa an na taa siya wèrèw fan fè. 47 Katuguni Matigi ye min fò anw ye, o filè: `Ne ye i sigi ka kè siya wèrèw ka kènè ye, walisa i ka taa ni kisili kuma ye fo dugukolo yòrò bèè la.' » 48 Siyaw ye o kuma mèn tuma min na, u ɲagalila ka Matigi ka kuma bonya. Ɲènamaya banbali latigèra minnu ye, olu bèè ye dannaya kè. 49 Matigi ka kuma jènsènna o jamana yòrò bèè la. 50 Nka Yahutuw ye muso tògòba Ala ɲèsiranbaa dòw ani dugu kònò mògòba dòw kònònasu Paul ni Barnabasi kama ka u tòòrò ka u gèn ka bò u ka jamana la. 51 Olu ye u senna buguri yuguyugu u kama, o kò, ka taa Ikonè. 52 Dannabaaw kòni fara ɲagali ni Ni Senu la.



14

1 Paul ni Barnabasi selen Ikonè, u donna Yahutuw ka Alabatoso kònò. U kuma cogo de y'a to Yahutu caman ni Grèki caman ye dannaya kè. 2 Nka Yahutu dannabaliw ye siya wèrè mògòw kònònasu ka u bila balimaw la. 3 O bèè n'a ta, Paul ni Barnabasi mènna Ikonè ka kuma ni ja gèlèya ye, u jigi dalen Matigi kan. Ale de tun bè a ka nèèma kuma seereya kè ni taamashyènw ni kabakow kèli ye u bolo. 4 Dugu kònò mògòw kan tilara, u dòw tun bè Yahutuw fè, dòw tun bè cidenw fè. 5 Yahutuw ni siya wèrèw ni u kuntigiw tun bè u labèn ka ko jugu kè Paul ni Barnabasi la ka u bon ni kabakurunw ye ka u faga. 6 Olu y'o dòn tuma min na, u bolila ka taa Likaoni jamana la, ka taa dugu dòw la, Lisitre ni Dèrbè ani u dafè duguw. 7 U ye Kibaru Duman fò o yòròw la. 8 Cè dò tun bè Lisitre. A sigilen tun bè tuma bèè, sabu a nabarama bangera, a ma se ka taama abada. 9 A tun bè Paul ka kuma lamèn. Paul y'a ɲè jò a la k'a ye ko dannaya b'a fè ka kènèya. 10 A y'a fò o cè ye ni kanba ye ko: «Wuli k'i jò i senw kan.» Cè y'i pan k'i jò ka taama. 11 Jama ye Paul ka ko kèlen ye tuma min na, u pèrènna k'a fò Likaonikan na ko: «Batofènw kèra mògòw ye ka jigin an cèma.» 12 U ye Barnabasi tògò da ko Zus, ka Paul tògò da ko Hèrmès, katuguni ale de tun bè kuma. 13 Zus batoso dò tun bè dugu donda la. A ka sarakalasebaa nana ni ntura dòw ye o yòrò la, u masirilen tun bè ni jiri feerew ye. A ni jama tun b'a fè ka saraka bò Barnabasi ni Paul ye. 14 O ciden fila ye o dòn tuma min na, u ye u ka finiw fara ka boli ka taa jama cèma ka pèrèn ko: 15 «Mun na aw bè nin kow kè? An fana ye aw bòɲògònko mògòw de ye. An nana ni Kibaru Duman ye, walisa aw ka fara nin ko fufafuw la ka yèlèma Ala ɲènama fan fè, o min ye sankolo ni dugukolo ni kògòji ani u kònò fènw bèè da. 16 Waati tèmènnenw la Ala ye siyaw to u yèrèw sagona siraw kan. 17 O bèè n'a ta a y'a yèrè cogo jira a ka ko ɲumanw fè. A bè sanji di aw ma ka bò sankolo la, ka suman di a waati la, ka dumunifèn caman di aw ma ka aw dusuw fa ɲagali la.» 18 Hali k'a sòrò cidenw kumana ten, u tun bè ɲini ka dèsè ka jama bali ka saraka faga u ye. jate Zus ka ciden. 19 O kèlen, Yahutu dòw nana ka bò Pisidi Antiose ni Ikonè. U ye jama miirili yèlèma, fo u ye Paul bon ni kabakurunw ye ko u b'a faga. O kò, u y'a sama ka bò dugu kònò. A tun bè u kònò ko a sara. 20 Nka dannabaaw y'a lamini tuma min na, a wulila ka don dugu kònò. O dugusajè, a ni Barnabasi bòra yen ka taa Dèrbè. 21 Paul ni Barnabasi ye Kibaru Duman fò Dèrbè dugu kònò. U ye dannabaa caman sòrò. O kò, u kòseginna Lisitre ni Ikonè ani Antiose. 22 U tun bè dannabaaw ja gèlèya ka u laadi ko u sabatilen ka to dannaya la, u ko: «Wajibi don tòòrò caman ka an sòrò sani an ka don Ala ka masaya la.» 23 U ye ɲèminèbaaw sigi egilisiw bèè kelen-kelen na. U tilalen kò sun ni delili la, u ye u kalifa Matigi ma, u tun dara o min na. 24 O kò, u ye Pisidi jamana cètigè ka se Panfili. 25 U ye Ala ka kuma fò Pèrje, o kò, ka taa Atali. 26 U donna kurun dò kònò yen ka taa Antiose, u tun kalifara Ala ka nèèma ma yòrò min na. O kèra baara min kama, o dafara. 27 U sera Antiose tuma min na, Ala ye ko minnu kè u bolo, ani a ye da yèlè siya wèrèw ye cogo min na, walisa olu fana ka dannaya kè, u ye dannabaaw lajè ka o kow bèè lakali u ye. 28 U tora dannabaaw fè yen ka waati jan kè.



15

1 Mògò dòw nana ka bò Jude jamana la ka balimaw kalan ko: «Ni aw ma boloko ka kèɲè ni Musa ka sariya ye, aw tè se ka kisi.» 2 Wòyò ni sòsòliba donnen kò olu ni Paul ni Barnabasi cè, a latigèra ko Paul ni Barnabasi ni u dòw ka taa Jerusalèm ka kuma cidenw ni cèkòròbaw fè o ko la. 3 Egilisi ye u ci ka taa. U taatò, u ye Fenisi ni Samari cètigè, u tun bè siya wèrèw tuubi ko fò balimaw ye. O kèra ɲagaliba ye u bèè fè. 4 Paul ni Barnabasi selen Jerusalèm, egilisi mògòw ni cidenw ni cèkòròbaw ye u minè koɲuman. Ala ye ko minnu kè Paul ni Barnabasi bolo, u ye olu bèè lakali u ye. 5 Farisièn minnu ye dannaya kè, olu dòw wulila k'a fò ko: «Wajibi don siyaw la dannabaaw ka boloko ka Musa ka sariyaw bèè dafa.» 6 Cidenw ni cèkòròbaw ye ɲògòn lajè ka o ko sègèsègè. 7 O kòròfò kèlen kò, Pierè wulila ka kuma, a ko: «Balimaw, aw y'a dòn ko Ala ye ne ɲènatòmò ka bò aw cèma kabini tuma jan, walisa ne ka Kibaru Duman fò siyaw ye, walisa u ka o mèn ka dannaya kè. 8 Mògòw bèè dusukun dònbaa Ala y'a jira ko a sònna siya wèrèw ma, katuguni a ye Ni Senu di olu ma, i ko a y'a di an fana ma cogo min na. 9 A ma faranfasili si kè an ni u cè. A ye u dusukunw saniya dannaya barika la. 10 Sisan kòni, mun y'a to aw bè Ala kòròbò ka doni girin da dannabaaw kan, an ni an bènbaw tun tè se min kòrò? 11 O bèè n'a ta an dara a la ko an bè kisi Matigi Yesu ka nèèma barika la, i ko olu fana.» 12 O tuma la jama bèè ye u makun ka Barnabasi ni Paul lamèn. Ala ye taamashyèn ni kabako minnu kè u bolo siya wèrè mògòw cèma, u ye olu bèè lakali. 13 U tilalen kò o kuma la, Yakuba ye kuma ta, a ko: «Balimaw, a' ye ne lamèn. 14 Ala y'a janto siya wèrèw la kabini fòlòfòlò ka mògò dòw ɲènatòmò ka bò u la ka u kè a yèrè taw ye cogo min na, Simòn ye o lakali. 15 O ni kiraw ka kuma bènna ɲògòn ma, i ko a sèbènnen bè Kitabu la ko: 16 Matigi ko: `O kò, ne na kòsegin. Dawuda ka so min binna, ne na o jò ko kura. Ne na a tomon jò ka a latilen, 17 walisa mògò tòw ka Matigi ɲini, ani ne ye siya minnu bèè wele ka kè ne taw ye, 18 Matigi min y'a to o kow ka dòn kabini fòlòfòlò, o ko ten.' 19 «O de y'a to ne bè miiri ko, siya wèrè mògò minnu bè sòn Ala ma, an kana ko gèlènma da olu kan. 20 Nka an ka sèbèn ci u ma ko u kana bolisòn sogo dun ka u yèrèw nògò. U ka u yèrèw tanga kakalaya ma. U kana fèn kan còrinnen sogo wala joli dun. 21 Kabini tuma jan waajuli bè kè Musa ka sariya ko la duguw bèè la, a bè kalan Alabatosow kònò lafiɲè donw bèè la.» 22 O tuma la a diyara cidenw ni cèkòròbaw ani egilisi mògòw bèè ye ka mògò dòw ɲènatòmò u cèma, ka u ci ka taa Antiose Paul ni Barnabasi fè. U ye Jude ni Silasi ɲènatòmò. Jude bè wele fana Barsabasi. Balimaw la mògòbaw tun don. 23 U ye sèbèn min di u ma ka taa, o filè: «Aw siya wèrèw la balimaw, aw minnu sigilen bè Antiose ani Siri ni Silisi jamanaw la, cidenw ni cèkòròbaw bè u ka foli lase aw ma. 24 An y'a mèn ko dòw bòra an cèma ka taa aw fè ka aw tòòrò ni u ka kumaw ye ka aw hakili ɲaami, k'a sòrò an ma u ci. 25 O de y'a to an bènna a la k'a latigè ko an ka mògò dòw ɲènatòmò ka u ci aw ma. Olu ni an balima kanulenw Barnabasi ni Paul na taa ɲògòn fè. 26 O mògòw jèna u yèrèw ni kò Matigi Yesu Krisita tògò kosòn. 27 Ayiwa, an bè Jude ni Silasi ci aw ma. An ye ko minnu sèbèn, u yèrèw na olu fò aw ye. 28 A diyara Ni Senu ani an fana ye, ko an kana doni wèrè da aw kan, fò nin ko wajibiyalenw: 29 Aw kana bolisòn sogo dun, wala joli, wala fèn kan còrinnen sogo. Aw ka aw yèrèw tanga kakalaya ma. Ni aw bè aw yèrèw kòlòsi o kow ma, o de ka ɲi. K'an bèn.» 30 Cidenw labilalen kò, u taara Antiose ka jama lajè ka o sèbèn di u ma. 31 Olu y'o kalan tuma min na, u ɲagalila o laadili kuma kosòn. 32 Jude ni Silasi fana tun ye kiraw ye, olu ye balimaw ja gèlèya ka u sabati ni kuma caman ye. 33 U ye waati dama dò kè yen. Balimaw ye foli di u ma ko u ka se hèrè la, o kò, ka u bila ka taa u cibaaw ma. [ 34 O bèè n'a ta, a diyara Silasi ye ka to u fè yen.] 35 Paul ni Barnabasi tora Antiose. U ni mògò caman wèrèw tun bè mògòw kalan ka Matigi ka Kibaru Duman fò u ye. 36 Tile dama tèmènnen kò, Paul y'a fò Barnabasi ye ko: «An tun taara dugu minnu na ka Matigi ka Kibaru Duman fò, an ka kòsegin olu bèè la, k'a filè yala ni balimaw bè cogo min na.» 37 Barnabasi tun b'a fè Yuhana ka taa u fè, o tun bè wele fana Marka. 38 Nka Paul ko a man kan ka taa u fè, sabu a tun farala u la Panfili, a ma sòn ka taa u fè baara la. 39 Sòsòliba donna Paul ni Barnabasi cè, fo u farala ɲògòn na. Barnabasi taara ni Marka ye a fè, u donna kurun dò kònò ka taa Siprè. 40 Nka Paul ye Silasi ɲènatòmò ka taa a fè, u kalifalen kò Matigi ka nèèma ma balimaw fè. 41 A ye Siri ni Silisi jamana bèè yaala ka egilisiw sabati dannaya la.



16

1 O kò, Paul taara Dèrbè ni Lisitre. Dannabaa dò tun bè yen, o tògò ko Timote. A ba tun ye Yahutu dannabaa dò ye, a fa tun ye Grèki ye. 2 Lisitre ni Ikonè balimaw tun bè a tògò ɲuman fò. 3 Paul tun b'a fè Timote ka taa u fè. A ye Timote boloko o jamana Yahutuw kosòn, katuguni u bèè tun y'a dòn ko a fa tun ye Grèki ye. 4 U tèmènna dugu minnu bèè fè, cidenw ni cèkòròbaw ye ko minnu latigè Jerusalèm, u tun bè olu fò dannabaaw ye ko u ka o ciw mara. 5 Egilisiw mògòw tun bè sabati dannaya la. Dòw tun bè fara u kan don o don. 6 U ye Friji ni Galasi jamanaw cètigè, katuguni Ni Senu tun ye u bali ka Ala ka kuma fò Asi jamana la. 7 U sera Misi da fè tuma min na, u tun b'a fè ka taa Bitini jamana la, nka Yesu Ni ma sòn u ka taa yen. 8 U tèmènna Misi kèrè fè ka se Troas. 9 O su fè Paul ye jiralifèn dò ye. A ye Masedwanè cè dò ye, o jòlen tun bè ka a deli ko: «Na Masedwanè jamana la ka an dèmè.» 10 O jiralifèn yelen kò Paul fè, an y'an labèn o yòrònin kelen ka taa Masedwanè. An y'a dòn ko Ala ye an wele ka taa Kibaru Duman fò o jamana mògòw ye. 11 An donna kurun dò kònò Troas ka sin Samotrase ma. O dugusajè an sera Nèapolis. 12 An bòra yen ka taa Filipe, Masedwanè jamana fan kelen duguba dò don. Romèkaw ka dugu tun don. An ye tile dama dò kè o dugu kònò. 13 Lafiɲè don na, an bòra dugu kònò ka taa ba da la, an tun bè miiri ko an na Ala deli yòrò dò sòrò yen. Muso dòw lajèlen tun bè yen, an ye an sigi ka kuma olu fè. 14 Muso dò tun bè yen min bòra Tiyatirè, o tògò ko Lidi. Lomaasa fini feerebaa tun don. A tun bè Ala bato. Ale de ye an ka kuma lamèn. Matigi y'a dusu dayèlè, fo a y'a tulo majò Paul ka kuma la. 15 A ni a so mògòw batiselen kò, a ye an deli, a ko: «Ni aw bè ne jate dannabaa ye Matigi la, a' ye na jigin ne ka so.» A ye an karaba fo an sònna. 16 An taatò Ala deli yòrò la, an ni jònmuso dò bènna. Jinè yelikèla tun b'a la, a makèw tun bè wari caman sòrò a ka filèli la. 17 A tugura an ni Paul nòfè ka to ka pèrèn ko: «Nin cèw ye Ala Kòròtalenba ka jònw ye. U bè kisili cogo fò aw ye.» 18 A tora ka o kè tile caman kònò. Paul sègènnen, a y'i yèlèma k'a fò jinè ye ko: «Ne b'a fò i ye Yesu Krisita tògò la, bò a la.» Jinè bòra o yòrònin kelen. 19 O jònmuso makèw y'a ye ko u tè wari sòrò a ka filèli la minkè, u ye Paul ni Silasi minè ka olu sama ka taa n'u ye kiritigèlaw ɲè kòrò fèrèkènè la. 20 U ye u jò kiritigèlaw ɲè kòrò k'a fò ko: «Nin cèw bè an ka dugu ɲaami haali. 21 Yahutuw don, u bè laada dòw fò, a dagalen tè an Romèkaw ye ka sòn olu ma wala ka u kè.» 22 Jama fana wulila u kama. Kiritigèlaw ye Paul ni Silasi wòròn k'a fò ko u ka gosi ni berew ye. 23 U gosilen kò kosèbè, u ye u bila kaso la k'a fò kasotigi ye ko a ka u kòlòsi kosèbè. 24 Kasotigi y'o mèn minkè, a ye u bila kasobon dogodogo la ka u senw don jirikuru la. 25 Dugutila fè Paul ni Silasi tun bè Ala deli ka Ala tanuli dònkiliw da. Kasolamògò tòw tun bè u lamèn. 26 O yòrònin kelen, dugukolo yèrèyèrèla kosèbè. Kasobon jusigilanw yuguyugura, kasobon daw bèè yèlèla. Kasolamògòw bèè ka jòlòkòw fonina. 27 Kasotigi kununna. A ye kasobon daw yèlèlen ye tuma min na, a ye a ka npan foosi ko a bè a yèrè faga. A tun bè miiri ko kasolamògòw bèè bolila. 28 Nka Paul pèrènna ni kanba ye ko: «I kana foyi kè i yèrè la, an bèè bè yan.» 29 O tuma la kasotigi ko u ka na ni yeelen ye. A bolila ka don kasobon kònò, a sirantò yèrèyèrètò y'i bin Paul ni Silasi sen kòrò. 30 O kò, a ye u labò ka u ɲininka ko: «Cèmògòbaw, ne ka mun kè walisa ne ka kisi?» 31 U y'a jaabi ko: «Da Matigi Yesu la, i na kisi, i ni i ka denbaya.» 32 U ye Matigi ka kuma fò a ni a so mògòw bèè ye. 33 Kasotigi taara n'u ye o su waati yèrè la ka u jogindaw ko. O kò, a batisera, a ni a so mògòw bèè. 34 A taara ni Paul ni Silasi ye a ka so ka dumuni di u ma. O kasotigi ni a ka denbaya bèè ɲagalila, k'a masòrò u dara Ala la. 35 Dugu jèlen kò, kiritigèlaw ye garadiw ci kasotigi ma ko a ka o cèw bila. 36 Kasotigi nana k'a fò Paul ye ko: «Kiritigèlaw ye ci bila k'a fò ko ne ka aw bila. Ayiwa, a' ye bò ka taa hèrè la.» 37 Nka Paul y'a fò u ye ko: «U ye an Romèkaw gosi mògòw bèè ɲè na k'a sòrò kiri ma tigè, o kò, u ye an bila kaso la. Sisan u b'a fè ka an bila dogo la wa? Ayi dèrè! U yèrèw ka na ka an labò.» 38 Garadiw taara ka o kuma fò kiritigèlaw ye. Olu y'a mèn ko Romèkaw don minkè, u siranna. 39 U nana yafa ɲini Paul ni Silasi fè, o kò, ka u labò ka u deli ko u ka bò o dugu kònò. 40 U bòlen kò kaso la, u taara Lidi ka so. U ye balimaw ye ka u laadi, o kò, u taara.



17

1 Paul ni Silasi tèmènna Anfipolis ni Apoloni fè ka se Tesalonike. Yahutuw ka Alabatoso dò tun bè yen. 2 Paul donna o kònò i ko a delila k'a kècogo min na. A ye mògò minnu sòrò yen, a ye lafiɲè don saba kè ka kuma olu fè Kitabu kònò kumaw la. 3 A y'a jira u la k'a jèya ko wajibi tun don Krisita ka tòòrò, o kò, ka kunun ka bò suw cèma. A ko: «Ne bè Yesu min ko fò aw ye, o de ye Krisita ye.» 4 Yahutu dòw ni Grèki Ala batobaa jamaba ani muso tògòba caman dara a la ka nòrò Paul ni Silasi la. 5 Nka keleya donna Yahutuw la. U ye dugu kònò mògò kunntan dòw lajè ɲògòn kan ka golobogalaba ni mankanba wuli dugu kònò. U girinna ka taa Jasòn ka so, ko u bè Paul ni Silasi minè ka taa n'u ye jama lajè yòrò la. 6 U ma u sòrò yen minkè, u ye Jasòn ni balima dòw sama ka taa ni olu ye dugu kiritigèlaw yòrò. U pèrènna ko: «Nin cè minnu ye diɲè bèè ɲaami, olu nana yan fana. 7 Jasòn ye u lajigin a ka so. U bèè bè Romè masakè ka sariya kama, u b'a fò ko masakè wèrè bè yen, ko o ye Yesu ye.» 8 O kuma ye jama ni kiritigèlaw hakili ɲaami. 9 U ye seereya ɲini Jasòn ni tòw fè, o kò ka u bila ka taa. 10 O yòrònin kelen balimaw ye Paul ni Silasi bila su fè ka taa Bere. U sera yen tuma min na, u donna Yahutuw ka Alabatoso kònò. 11 Olu tun ka fisa Tesalonike Yahutuw ye, u sònna Ala ka kuma ma ni diyaɲe ye. U tun bè Kitabuw kalan don o don k'a filè yala ni o kow ye tiɲè ye. 12 U caman ye dannaya kè, ani Grèki faamamuso caman ani cè caman fana. 13 Nka Tesalonike Yahutuw y'a mèn tuma min na ko Paul bè Ala ka kuma fò Bere, u taara yen ka jama kònònasu. 14 O tuma la balimaw ye Paul ci ka taa kògòji fan fè, nka Silasi ni Timote tora Bere. 15 Paul bilasirabaaw taara n'a ye fo Atènè. U kòsegintò, Paul ye ci bila u fè ko Silasi ni Timote ka teliya ka na a yòrò. 16 Ka Paul to Silasi ni Timote makònòni la Atènè, a dusu tòòròla katuguni a y'a ye ko o dugu fara boliw la. 17 A tun bè kuma Yahutuw ni siya wèrèw Ala batobaaw fè Alabatoso kònò. A tun bè minnu kunbèn fèrèkènèw la, a kumana olu fè don o don. 18 Mògò hakiliman minnu bè wele epikuriènw ni sitoisiènw, olu dòw ye kuma daminè Paul fè. Dòw ko: «Nin kuma fu fòla bè mun fò?» Dòw y'a mèn a bè kuma Yesu ni su kununli ko la, u ko: «I n'a fò a bè siya wèrèw ka batofènw ko fò.» 19 U taara n'a ye u ka kiri yòrò la, u ko: «I bè kalan kura min fò, anw bè se ka o dòn wa? 20 Katuguni i bè ko kura minnu ko fò, an b'a fè ka olu kòrò dòn.» ( 21 Atènèkaw bèè ni u ka siginfèw tun bè u ka waati bèè tèmèn kalan kuraw fòli ni u lamènni la.) 22 Paul y'i jò kiritigè yòrò la jama cèma k'a fò ko: «Atènèkaw, ne y'a ye aw timinan ka di batoli kow la kosèbè. 23 Ne ye aw ka dugu yaala minkè, ne ye aw ka batofèn saraka bò yòrò caman ye. Ne ye kelen ye, a sèbènnen bè o kan ko: `Batofèn dònbali ka saraka bòlan'. Ayiwa aw bè min bato k'a sòrò aw ma o dòn, ne bè o de ko fò aw ye. 24 Ala, o min ye diɲè ni a kònò fènw bèè da, sankolo ni dugukolo Matigi, o tè sigi mògòw ka so dilalenw kònò. 25 Mògò bolo tè se ka baara kè a ye i n'a fò a mago bè fèn na, katuguni ale yèrè bè ɲènamaya ni ninakili ani fèn bèè di mògòw bèè ma. 26 A ye siyaw bèè da joli kelen na, ka u sigi dugukolo fan bèè la, ka u ka tumaw ni u sigi yòrò danw latigè. 27 A b'a fè u ka Ala ɲini, ni u mòmòli kètò bè se ka a sòrò, hali k'a sòrò a yòrò man jan an si la. 28 K'a masòrò ale la, an bè ani an bè ɲènamaya ka an lamaga. Aw yèrèw ka dònkili dala dòw y'a fò ko: `An ye a denw ye.' 29 K'a sòrò an ye ale denw ye, an man kan ka miiri ko Alaya bè i ko sanu wala warijè wala kabakurun minnu dilalen bè mògòw bolo fè ka kèɲè ni mògò hakili ni a se ko ye. 30 Ala ma o ko dònbaliya tumaw jate, nka sisan a bè mògòw bèè wele yòròw bèè ko u ka nimisa u ka jurumuw la, 31 k'a masòrò a ye don dò sigi, a na kiri tigè diɲè bèè kan ni tilennenya ye a ka cè ɲènatòmòlen bolo. A ye taamashyèn jèlen kè o la mògòw bèè ye, katuguni a y'a lakunun ka bò suw cèma.» 32 U ye suw kununli ko mèn tuma min na, u dòw ye yèlè bò a ma. Dòw ko: «An na i lamèn don wèrè tun.» 33 Ayiwa Paul bòra u cèma ka taa. 34 O bèè n'a ta, dòw farala a kan ka dannaya kè. U la kelen tògò ko Denisi u ka dugu kiritigè jamakulu mògò dò tun don, ani muso min tògò ko Damaris, ani mògò wèrèw fana.



18

1 O kò, Paul bòra Atènè ka taa Kòrènte. 2 A ye Yahutu dò ye yen, o tògò ko Akilas, Ponka don. A ni a muso Prisiye nalen kura tun don ka bò Itali, k'a masòrò masakè Klode tun y'a fò ko Yahutuw bèè ka wuli ka bò Romè. Paul taara olu ɲini 3 ka sigi u fè ka baara kè u fè, katuguni u bèè tun bè baara sifa kelen kè, finiso dilabaaw tun don. 4 Paul tun bè waajuli kè Alabatoso kònò lafiɲè donw bèè la. A tun b'a fè ka faamuli di Yahutuw ni Grèkiw fila bèè ma ka u kun yèlèma. 5 Silasi ni Timote sera yen ka bò Masedwanè jamana la tuma min na, Paul ye a ka waati bèè ta ka waajuli kè ka seereya kè Yahutuw ye ko Yesu ye Krisita de ye. 6 Nka Yahutuw ye Paul sòsò ni lagosili kumaw ye. O de kosòn Paul ye a ka finiw yuguyugu u kama k'a fò ko: «Aw joli hakè ka bin aw yèrèw kan, jalaki tè ne kan tun. Kabini sisan, ne na taa siya wèrèw fan fè.» 7 Paul bòra yen ka taa Ala batobaa dò ka so, o tògò ko Tite Jusitus. A ka so gunnen tun bè Alabatoso la. 8 Alabatoso kuntigi Krisipus ni a ka denbaya bèè dara Matigi la. Kòrènteka minnu ye Paul ka kuma lamèn, olu caman fana ye dannaya kè ka batise. 9 Matigi y'a fò Paul ye jiralifèn na su fè ko: «I kana siran. I ka to ka kuma, i kana i makun, 10 katuguni ne bè i fè. Mògò si tèna se ka bin i kan ka ko jugu kè i la, k'a masòrò ne ka mògò caman bè nin dugu kònò.» 11 Paul tora Kòrènte ka san kelen ni kalo wòòrò kè ka mògòw kalan Ala ka kuma la. 12 Galiòn tun ye Romè gòfèrènèrè ye Akayi jamana kun na tuma min na, Yahutuw ye ɲògòn lajè Paul kama. U taara n'a ye kiritigèlaw ɲè kòrò. 13 U ko: «Nin cè bè mògòw kun yèlèma ka Ala bato cogo min na, o bè an ka sariya tiɲè.» 14 Paul tun b'a fè ka kuma tuma min na, Galiòn y'a fò Yahutuw ye ko: «Aw Yuhutuw, ni tilenbaliya wala kojuguba ko tun don, siga t'a la ne tun na aw lamèn, 15 nka ni a kèra kumaw wala tògòw wala aw yèrèw ka sariya kow ye, o ɲènabòli bè aw yèrèw ma. Ne tè sòn ka o kow kiri tigè.» 16 A ye u gèn ka bò kiritigè yòrò la. 17 O tuma la u bèè ye Alabatoso kuntigi Sositènè minè ka a gosi kiritigè yòrò da la, nka Galiòn ma o jate. 18 Paul tora Kòrènte ka waati jan kè. O kò, a bòra balimaw yòrò, a ni Prisiye ni Akilas donna kurun dò kònò ɲògòn fè ko u bè taa Siri jamana la. A ye a kun di Sankrè, k'a masòrò a tun y'i dafale Ala la. 19 U selen Efese, Paul ye Prisiye ni Akilas to yen. A yèrè donna Alabatoso kònò ka kuma Yahutuw fè. 20 Olu y'a deli ko a ka waati dò kè u fè, nka a ma sòn. 21 A y'i sara u la ko: «Ne na kòsegin aw fè yan, ni Ala sònna.» O kò, a donna kurun kònò Efese ka taa. 22 A sera Sesare tuma min na, a taara Jerusalèm ka egilisi fo, o kò, a taara Antiose. 23 A ye waati dò kè yen, o kò, a taara ka Galasi ni Friji jamanaw yaala ka dannabaaw bèè sabati. 24 Yahutu dò sera Efese, Alèkisandrika don, o tògò ko Apolosi. A tun bè se kuma la kosèbè, a kalannen tun don Kitabuw la. 25 O cè kalannen tun bè Matigi ka sira ko la, a dusu bèè tun b'a la ka Yesu ko fò ka mògòw kalan o la k'a jèya. Nka a ka dònniya danna Yuhana ka batiseli la. 26 A ye kuma daminè ni ja gèlèya ye Alabatoso kònò. Prisiye ni Akilas y'a mèn tuma min na, u taara n'a ye u ka so ka Ala sira jira a la k'a jèya. 27 O kò, Apolosi tun b'a fè ka taa Akayi jamana la. Balimaw ye a ja gèlèya o la ka sèbèn ci yen dannabaaw ma ko u k'a minè koɲuman. A selen yen, minnu kèra dannabaaw ye Ala ka nèèma barika la, a ye olu dèmè kosèbè, 28 katuguni a ka kuma ye se sòrò Yahutuw ka kuma kan mògòw bèè ɲè na. A y'a jira ka bò Kitabuw la ko Yesu ye Krisita de ye.



19

1 Ka Apolosi to Kòrènte, Paul ye Asi kulu jamana cètigè ka se Efese. A ye dannabaa dòw sòrò yen, 2 a y'a fò olu ye ko: «Aw ye dannaya kè tuma min na, aw ye Ni Senu sòrò wa?» U y'a jaabi ko: «An ma a mèn yèrè ko Ni Senu bè yen.» 3 Paul ko: «Aw dun batisera batiseli jumèn la?» U y'a jaabi ko: «Yuhana Batiselikèla ta.» 4 Paul ko: «Yuhana tun bè batiseli min kè, o tun b'a jira ko mògòw nimisara u ka jurumuw la. A tun b'a fò ko min bè na ale kò, mògòw ka da o la, o ye Yesu de ye.» 5 U ye o kuma mèn tuma min na, u batisera Matigi Yesu tògò la. 6 Paul ye a bolow da u kan, o kèlen, Ni Senu jiginna u kan, u ye kan wèrèw fò ka kiraya kè. 7 Cè tan ni fila ɲògòn tun don. 8 Paul donna Alabatoso kònò ka kuma ni ja gèlèya ye kalo saba kònò. A tun bè u waaju ka u kalan Ala ka masaya ko la. A tun b'a fè ka u kun yèlèma. 9 Nka kunkolo gèlèn dòw ma sòn ka dannaya kè, u tun bè Matigi ka sira lagosi jama ɲè na. O tuma la, Paul ye u to yen ka taa ni dannabaaw ye u dan na ka u kalan don o don Tiranus ka kalan yòrò la. 10 A ye o kè san fila kònò fo Asikaw bèè, Yahutuw ani Grèkiw ye Matigi ka kuma mèn. 11 Ala tun bè kabakobaw kè Paul bolo, 12 fo fini wala musòrò minnu tun magara Paul farikolo la, mògòw tun bè taa ni olu ye ka u bila banabaatòw kan, olu tun bè kènèya. Jinèw tun bè bò jinètòw la. 13 Yahutu minnu tun bè yaalayaala ka jinèw gèn ka bò mògòw la, olu dòw y'a kòròbò k'a filè ni u bè se ka jinèw gèn Matigi Yesu tògò la. U y'a fò jinèw ye ko: «Paul bè waajuli kè Yesu min ko la, an b'a fò o tògò kosòn: A' ye bò a la.» 14 Minnu tun bè o kè, olu tun ye Yahutuw ka sarakalasebaaw kuntigi Seva denkè woloèula ye. 15 Nka jinè y'u jaabi ko: «Ne bè Yesu dòn, ne bè Paul fana dòn, nka aw ye jònw ye?» 16 O jinètò binna u kan ka se u la fo u farilankolon joginnenw bolila ka bò so kònò. 17 O ko dònna Efesekaw bèè fè, Yahutuw ni Grèkiw, u bèè siranna, u ye Matigi Yesu tògò bonya. 18 Minnu kèra dannabaaw ye, olu caman tun bè na ka jò u ka ko kèlenw la jama ɲè na. 19 Dònbaayakèla caman nana ni u ka sèbènw ye ka u jeni mògòw bèè ɲè na. O kitabuw sòngò jatelen tun bè warijè waa biduuru bò. 20 O cogo la Matigi ka kuma jènsènna ni fanga ye ka a ka sebaaya jira. 21 O kow kèlen kò, Paul y'a latigè ko a na Masedwanè ni Akayi cètigè ka taa Jerusalèm. A ko: «Ni ne sera yen, wajibi don ne ka Romè fana ye.» 22 A ye a dèmèbaa fila, Timote ni Erasite ci ka taa Masedwanè jamana la, nka a yèrè tora Asi jamana la fòlò ka waati dò kè. 23 O waati la golobogalaba kèra Matigi ka sira kosòn. 24 Sanu faga numu min tògò ko Dèmètrius, o tun bè u ka batofèn musoman Artemis batoso bisigiw dila ni warijè ye ka tònò caman sòrò o baarakèlaw ye. 25 A ye olu ni o ɲògòn baarakèlaw lajè ɲògòn fè k'a fò ko: «Cèw, aw y'a dòn ko an bè nafaba sòrò nin baara de la. 26 Nin Paul ye min kè, aw y'o ye k'a mèn. A ko batofèn minnu dilara mògò bolo fè, ko olu tè batofèn sèbèw ye. A sera ka mògò caman kun yèlèma, yan Efese dama tè, nka a bè ɲini k'a kè Asi jamana yòrò bèè la. 27 An bè siran an ka baara kana na tiɲè. O dama tè, an ka batofèn musoman Artemis batoso na jate fu ye. Asikaw bèè ani diɲè mògòw bèè bè o batofèn musoman min bato, tanga na bò o kan.» 28 O mògòw ye o kuma mèn minkè, u diminna ka pèrèn ni kanba ye ko: «Efesekaw ka Artemis de ka bon!» 29 Dugu fan bèè ɲaamina. Mògòw bèè girinna ka taa u ka ɲògònlajè yòrò la. Olu ye Paul taamaɲògòn fila Masedwanèkaw Gayus ni Arisitarke sama ka taa n'u ye yen. 30 Paul tun b'a fè ka taa o yòrò la, nka dannabaaw y'a bali. 31 Asi jamana kuntigi minnu tun ye Paul teriw ye, olu ye ci bila a ma ka a deli ko a kana taa o ɲògònlajè yòrò la. 32 Mògòw bèè tun bè u ta fò, katuguni u ɲèmajòlen tun tè, u caman ma u lajè kun yèrè dòn. 33 O la Yahutuw ye Alèkisandre ɲòni ka taa jama ɲèfè. Ale ye a bolo kòròta ko a bè kuma fò jama ye. 34 Nka u y'a dòn ko Yahutu don tuma min na, u bèè pèrènna ni kan kelen ye lèrè fila kònò ko: «Efesekaw ka Artemis de ka bon!» 35 Dugu sèbènnikèla ye jama lamakun k'a fò u ye ko: «Efesekaw, mògòw bèè y'a dòn ko Efese dugu ye Artemisba ka batoso marabaa ye, ani a bisigi min binna ka bò sankolo la. 36 Mògò si tè se ka o sòsò. O de kosòn aw ka aw mada, aw kana foyi kè sani aw ka aw miiri. 37 Aw nana ni nin cèw ye, k'a sòrò u ma foyi tiɲè batosow kònò, u ma an ka batofèn musoman tògò jugu fò. 38 Ayiwa ni Dèmètrius ni a fè baarakèlaw b'a fè ka mògò dòw sendon ko dò la, kiritigè donw sigira, kiritigèlaw bè yen, u ka u sendon olu ɲè kòrò. 39 Nka ni ko ɲènabòta wèrèw bè yen, o ka ɲènabò kiritigè jama fè. 40 An bè se ka sendon ko an ye murutili kè nin golobogalaba kosòn, k'a masòrò lajè kun si tè nin jama la.» 41 A tilalen kò o kuma la, a ye jama labila.



20

1 Golobogalaba madalen kò, Paul ye dannabaaw lajè ka u laadi ka foli di u ma. O kò, a bòra yen ka taa Masedwanè. 2 A ye o jamana yaala ka dannabaaw ja gèlèya ni waajuli kuma caman ye. O kò, a sera Grèsè jamana la. 3 A ye kalo saba kè yen. A tun b'a fè ka don kurun kònò ka taa Siri jamana la. Nka a y'a dòn ko Yahutuw ye jè siri a kama tuma min na, a ko a bè kòsegin Masedwanè fè. 4 Ninnu taara a fè: Bereka Pirus denkè Sopatèr, ani Tesalonikeka dòw Artisitarke ni Segòn ni Dèrbèka Gayus ani Timote ni Tisikè ni Trofimè, minnu bòra Asi jamana la. 5 Olu taara an ɲè ka an makònò Troas. 6 Nbuuru fununbali seli tèmènnen kò, anw kòni donna kurun dò kònò Filipe ka taa. An ye tile duuru taama kè kògòji kan ka u sòrò Troas ka tile woloèula kè yen. 7 Dògòkun don fòlò, an lajèlen tun bè jèɲògònya nbuuru karikarili la tuma min na, Paul ye dannabaaw waaju. A tun b'a fè ka taa o dugusajè, o de y'a to a mènna waajuli la fo ka dugu tila. 8 An lajèlen tun bè sankanso min kònò, lanpa caman tun bè yen. 9 Kamalen dò sigilen tun bè finètiri la, o tògò ko Utikus. A sunògòra k'a masòrò Paul tun mènna waajuli la. O kamalen tun tè foyi seere ma, a binna duguma ka bò o sankanso sabanan la. U y'a ta minkè, u y'a sòrò a sara. 10 Paul jiginna k'i biri k'i poron a la, a ko: «Aw hakili kana ɲaami, a ɲènama don.» 11 A yèlènna tun ka nbuuru kari ka a dun, ka kuma u fè fo ka dugu jè. O kò, a taara. 12 U dusu sumalenba taara ni o kamalen ɲènama ye. 13 An donna kurun dò kònò ka taa Paul ɲè fo Asos, ko an bè ale ta yen. A yèrè y'a fò ko a bè taa yen a sen na. 14 A ye an kunbèn yen tuma min na, a donna an fè kurun kònò ka taa Mitilènè. 15 An bòra yen, o dugusajè an sera Kios kuntilenna la. O dugusajè filanan, an sera Samos, o tile sabanan an sera Mile. 16 Paul tun y'a latigè ko an ka tèmèn Efese kèrè fè, walisa a ka waati kana tèmèn k'a to Asi jamana la. A kòròtòlen tun don. A tun b'a fè Pantekòte don ka a sòrò Jerusalèm, ni o tun bè se ka kè. 17 O bèè n'a ta ka Paul to Mile, a ye ci bila ko Efese egilisi cèkòròbaw ka na a yòrò. 18 U sera a yòrò tuma min na, a y'a fò u ye ko: «Ne nana Asi jamana la tuma min na, kabini o don fòlò, ne tun bè cogo min na aw fè o waatiw bèè la, aw ye o dòn. 19 Ne ye baara kè Matigi ye ni yèrèmajiginlenya ni ɲèji ye. Tòòròw ye ne sòrò Yahutuw ka jè sirili kosòn. 20 Fèn min bè se ka aw nafa, ne ma o si dogo aw la. Ne ma siran ka aw waaju ka aw kalan mògòw bèè ɲè na ani sow bèè kelen-kelen kònò, 21 k'a fò Yahutuw ni Grèkiw fila bèè ye ko u ka nimisa u ka jurumuw la ka da an Matigi Yesu la. 22 Sisan ne bè taa Jerusalèm, katuguni Ni Senu bè ne ɲòni ka taa, k'a sòrò min bèna kè ne la yen, ne tè o dòn. 23 Ne bè nin dòròn de dòn, ko ne bè se dugu o dugu la, Ni Senu bè ne lasòmi ko kaso ni tòòrò bè ne ɲè. 24 O bèè n'a ta ne tè ne ni jate fèn ye, a bè i n'a fò foyi tè, ni ne bè se ka ne ka ɲògòndan boli kè ka dafa. Matigi Yesu ye baara min kalifa ne ma ko ne ka Ala ka nèèma Kibaru Duman fò, o ko don. 25 «Ne tèmènna aw minnu cèma ka Ala ka masaya Kibaru Duman ko fò, ne y'a dòn sisan ko aw si tèna ne ɲèda ye tun. 26 O de y'a to ne b'a fò k'a jèya bi, ko mògò si joli hakè tè ne kan, 27 k'a masòrò ne ye Ala sago bèè fò aw ye, ne ma foyi dogo aw la. 28 A' ye aw yèrèw kòlòsi ka sagakulu bèè fana kòlòsi, Ni Senu ye aw kè olu minnu kòlòsibaaw ye. Aw ka Ala ka egilisi mara, a ye o min san ni a yèrè joli ye. 29 Ne y'a dòn ko ne taalen kò, wara farinmaw na don aw cèma, u na bin sagaw kan. 30 Mògò dòw fana na wuli aw cèma ka kalan dulenw fò, walisa u ka mògòw yèlèma ka u kè u yèrèw ka kalandenw ye. 31 O de kosòn a' ye aw yèrèw kòlòsi ka aw hakili to a la ko san saba kònò, su fara tile kan, ne ɲèji bòtò, ne ma aw bèè kelen-kelen laadili dabila. 32 «Ayiwa sisan ne bè aw kalifa Ala ni a ka nèèma kuma ma. O de bè se ka aw sabati ka ciyèn di aw ma Ala ka mògò senumaw bèè cèma. 33 Ne ɲè ma bò mògò si ka wari ni sanu ni finiw fè. 34 Aw yèrèw b'a dòn ko ne ye baara kè ni ne yèrè bolow ye ka ne ni ne taamaɲògònw mago ɲè. 35 Ne ye cogo jira aw la ko bèè la, ko an ka kan ka baara kè walisa ka barikantanw dèmè, ka an hakili to Matigi Yesu yèrè ka kuma fòlen na ko: `Duba bè nili la ka tèmèn sòròli kan.' » 36 O kuma fòlen kò, Paul ni olu bèè ye u ɲòngiri ka Ala deli. 37 U bèè kasitò ye u meleke Paul la ka a da susu. 38 U ɲènasisi kun tun ye nin ye, ko Paul ko u tèna a ɲèda ye tun. O kò, u taara Paul bilasira kurun da la.



21

1 An ni u faralen kò ɲògòn na, an donna kurun dò kònò ka sin ka taa Kos. O dugusajè an sera Rode. An bòra yen ka taa Patara. 2 An ye kurun dò sòrò yen min tun bè taa Fenisi, an donna o kònò ka taa. 3 An sera Siprè da fè ka tèmèn o gun ni worodugu cè ka taa ɲè Siri fan fè. Kurun jòra Tir dankan na, katuguni kurun kònò doni tun bè labò yen. 4 An ye dannabaa dòw sòrò yen ka dògòkun kelen kè olu fè. U tora k'a fò Paul ye Ni Senu barika la ko a kana taa Jerusalèm. 5 O dògòkun dafalen kò u fè yen, an ye an ka taama sira minè ka taa. U ni u musow ni u denw bèè taara an bilasira fo dugu kòfè. An ye an ɲòngiri kògòji da la ka Ala deli. 6 An ye foli di ɲògòn ma tuma min na, anw donna kurun kònò, olu seginna u ka so. 7 An bòra Tir ka taa Potolomais, an ka kògòji kan taama danna yen. An ye foli di yen balimaw ma ka tile kelen kè u fè. 8 O dugusajè an bòra yen ka taa Sesare. An donna Kibaru Duman fòbaa Filipe ka so ka jigin yen. Ale tun ye o mògò woloèula ɲènatòmòlenw la kelen ye. 9 Denmuso npogotigi naani tun bè o fè yen, olu tun bè kiraya kè. 10 An ye tile dama dò kè u fè. K'an to yen, kira dò nana ka bò Jude jamana la, o tògò ko Agabus. 11 O ye an sòrò yen. A ye Paul ka cèsirilan ta ka a yèrè senw ni a bolow siri n'o ye. A ko: «Ni Senu ye min jira, o filè nin ye: Nin cèsirilan ye cè min ta ye, Yahutuw na o siri nin cogo la Jerusalèm, o kò, ka a don siya wèrè mògòw bolo.» 12 An ye o kuma mèn tuma min na, an ni yen mògòw ye Paul deli ko a kana taa Jerusalèm. 13 Paul y'an jaabi ko: «Mun y'a to aw bè kasi ka ne dusu tiɲè? Ne labènnen bè saya kama Jerusalèm Matigi Yesu tògò kosòn, janko sirili.» 14 An ma se ka a bali minkè, an y'a to yen k'a fò ko: «Matigi sago ka kè.» 15 O donw tèmènnen kò, an ye an ka minènw labèn ka sira minè ka taa Jerusalèm. 16 Sesare dannabaa dòw ye an bilasira ka taa ni an ye Siprèka Mnason ka so, ko an na jigin o fè. Dannabaa kòrò tun don. 17 An selen Jerusalèm, an na ko diyara balimaw ye. U ye an minè koɲuman. 18 O dugusajè Paul taara ni an ye Yakuba ka so. Egilisi cèkòròbaw bèè fana taara yen. 19 Paul ye foli di u ma. O kò, Ala ye ko minnu bèè kè a bolo siya wèrèw cèma a ka baara waatiw bèè la, a ye olu bèè kelen-kelen lakali u ye. 20 U y'o mèn minkè, u ye Ala tanu. O kò, u y'a fò Paul ye ko: «An balimakè, i ɲè b'a la ko Yahutu caman-caman kèra dannabaaw ye, u bèè dusu bè sariya ko la. 21 A fòra olu ye ko Yahutu minnu bè sigi siya wèrèw cèma, ko i bè olu kalan ko u ka fara Musa ka sariya la, ko i b'a fò u ye ko u kana u denw boloko, ko u kana tugu Yahutuw ka laadaw la. 22 An ka kan ka mun kè sa? Katuguni siga t'a la, u bèè n'a dòn ko i sera yan. 23 O de y'a to an bèna min fò i ye, i ka o kè. Cè naani bè an fè yan minnu ye u dafale Ala la. 24 I ka taa ni olu ye ka aw saniya ɲògòn fè. I ka u kun di wari bò. O cogo la mògòw bèè n'a dòn ko u ye ko minnu mèn i ko la, ko olu si tè tiɲè ye, ko i yèrè bè taama ka kèɲè ni sariya ye. 25 Siya wèrèw dannabaaw kòni, an bènna a la ka sèbèn ci olu ma ko u kana bolisòn sogo dun wala joli wala fèn kan còrinnen, ko u ka u tanga kakalaya ma.» 26 Ayiwa Paul taara ni o cè naani ye. O dugusajè u saniyalen kò, u donna Alabatosoba kònò ka saniyali donw dafali ko fò, ani u bèè kelen-kelen ka saraka ka kan ka bò don min na. 27 O tile woloèula tun bè ɲini ka dafa tuma min na, Asi jamana Yahutuw ye Paul ye Alabatosoba kònò, u ye mògòw kònònasu ko u k'a minè. 28 U pèrènna ko: «Israèl mògòw, a' ye na an dèmè. Cè min bè kuma yòrò bèè mògòw bèè fè Israèl mògòw ni sariya ani nin Alabatosoba kama, o filè. Ka fara o kan, a ye Grèki mògò dòw ladon Alabatosoba kònò ka nin yòrò senuma nògò.» 29 Trofimè min bòra Efese, u tun ye o ni Paul ye ɲògòn fè dugu kònò. U tun bè miiri ko Paul ye o ladon Alabatosoba kònò. 30 Mankanba kèra dugu kònò, mògòw girinna ka bò fan bèè la ka taa yen. U ye Paul minè k'a sama ka bò Alabatosoba kònò ka so daw tugu. 31 U tun b'a fè ka Paul faga tuma min na, o kibaru sera sòròdasikulu jaladuurutigi ma ko Jerusalèm yòrò bèè girinna. 32 O yòrònin bèè a ye sòròdasi dòw ni jalasabatigi dòw ɲèminè ka boli ka taa mògòw yòrò. Olu ye jaladuurutigi ni sòròdasiw ye minkè, u ye Paul gosili dabila. 33 Jaladuurutigi gèrèla Paul la k'a minè k'a fò ko a ka siri ni nègè jòlòkò fila ye. A ye ɲininkali kè ko: «Jòni don? A ye mun kè?» 34 Jama la mògò dòw tun bè pèrèn ka ko dò fò, dò wèrèw ye ko wèrè fò. Jaladuurutigi ma se ka ko jèlen si sòrò u ka kuma ɲaaminenw cèma tuma min na, a ko u ka taa ni Paul ye sòròdasiw ka kube kònò. 35 U sera yèlènyèlènnan ma tuma min na, sòròdasiw ye Paul ta u bolo, jama ka fariya kosòn, 36 k'a masòrò u bèè tun bè tugu a nòfè ka pèrèn ko a ka faga. 37 Sòròdasiw tun bè Paul ladon u ka kube kònò tuma min na, a y'a fò jaladuurutigi ye ko: «I bè sòn ne ka kuma dò fò i ye wa?» Jaladuurutigi y'a ɲininka ko: «I bè grèkikan dòn wa? 38 Misiraka min murutira kosa in na ka taa ni mògòfagala waa naani ye kungokolon kònò, i tè o ye wa?» 39 Paul y'a jaabi ko: «Ne ye Yahutu ye. Tarse min bè Silisi jamana la, ne ye o duguba dugulen dò ye. Ne b'i deli i k'a to ne ka kuma jama fè.» 40 Jaladuurutigi sònna. Ka Paul jòlen to yèlènyèlènnan kan, a y'a bolo kòròta mògòw ye. U bèè y'u makun. Paul kumana u fè hèburukan na, a ko:



22

1 «Ne faw ni ne balimaw, ne bèna ne yèrè lafasa cogo min na sisan, a' ye o kuma lamèn.» 2 U y'a mèn ko a bè kuma u fè hèburukan na tuma min na, u ye dò fara u makunni kan. A ko: 3 «Ne ye Yahutu ye. Tarse min bè Silisi jamana la, ne bangera yen. Ne mòna Jerusalèm yan. Ne kalanna Gamalièl sen kòrò an bènbaw ka sariya kow bèè la. Ne dusu bèè tun bè Ala ko la i ko aw yèrèw dusu b'a la cogo min na bi. 4 Ne tugura nin sira taamabaaw la ka u tòòrò fo ka se saya ma. Ne ye cèw ni musow siri ka u bila kaso la. 5 Sarakalasebaaw kuntigi ni cèkòròbaw jamakulu bèè ye ne seerew ye o kow la. Ne ye sèbènw sòrò olu fè ka di Damasi dugu balima Yahutuw ma. Ne tun bè taa yen ka yen dannabaaw minè ka na n'u sirilen ye Jerusalèm yan ka u tòòrò. 6 «Ka ne to sira kan ka surunya Damasi la, yòrònin kelen tilegan fè, kènèyeelenba bòra sankolo la ka manamana ne lamini na. 7 Ne binna duguma, ne ye kan dò mèn. O y'a fò ne ye ko: `Saul, Saul, mun y'a to i bè ne tòòrò?' 8 Ne ko: `I ye jòni ye, Matigi?' A y'a fò ne ye ko: `Ne ye Yesu Nazarètika ye. I bè min tòòrò, ne don.' 9 Ne taamaɲògònw ye o kènèyeelen ye, nka min kumana ne fè, u ma o kan mèn. O tuma la ne ye ɲininkali kè ko: `Matigi, ne ka mun kè?' 10 Matigi y'a fò ne ye ko: `Wuli ka taa Damasi. Ala b'a fè i ka min kè, o na fò i ye yen.' 11 O kènèyeelenba ye ne ɲè lafin fo ne ma se ka yeli kè. Ne taamaɲògònw ye ne bolo minè ka taa ni ne ye Damasi. 12 «Cè dò tun bè yen, o tògò ko Ananiyasi, a tun bè siran Ala ɲè ka sariya sira taama. Damasi Yahutuw bèè tun b'a tògò ɲuman fò. 13 O nana ne yòrò ɲini k'a ye k'i jò ne kèrè fè k'a fò ne ye ko: `Ne balimakè Saul, i ɲèw ka yèlè.' O yòrònin kelen ne ɲèw yèlèla, ne ye Ananiyasi ye. 14 A ko: `An bènbaw ka Ala ye i ɲènatòmò, walisa i ka a sago dòn, ka Ala ka Tilennen ye, ka kuma dòw mèn o da la. 15 Katuguni i ye ko minnu ye ka u mèn, i na kè a seere ye o kow la mògòw bèè ɲè na. 16 Sisan i bè mun makònò tun? Wuli ka Matigi tògò wele ka batise ka i ka jurumuw ko ka bò i la.' 17 «Ne kòseginnen kò Jerusalèm, ka ne to Ala delili la Alabatosoba kònò, ne ye jiralifèn dò ye. 18 Ne ye Matigi ye, a ko: `I teliya ka bò Jerusalèm joona, k'a masòrò i bè seereya min bò ne ko la, u tèna sòn o ma.' 19 Ne y'a jaabi ko: `Matigi u yèrèw b'a dòn ko ne donna Alabatosow kònò ka i dannabaaw minè walisa u ka bila kaso la ka u gosi. 20 U ye i seere Etièni faga tuma min na, ne yèrè tun bè yen. Ne sònna u ka kètaw ma, ne ye a fagabaaw ka dulòkiw kòlòsi.' 21 O tuma la Matigi y'a fò ne ye ko: `Taa, katuguni ne na i ci ka taa yòrò jan siya wèrèw ma.' » 22 Jama ye Paul ka kuma lamèn fo ka se o kuma ma. O tuma la u pèrènna k'a fò ko: «A' ye nin cè bò yen, a ka faga, a ɲènama man kan ka to.» 23 U kulola ka u ka dulòkiw bò u la ka u fili, ka buguri cè ka a seri san fè. 24 Jaladuurutigi ye ci fò ko Paul ka ladon sòròdasiw ka kube kònò, ka bugò ni gèɲè ye walisa kun min y'a to jama bè kulo a nòfè, a ka o dòn. 25 U tun b'a la ka Paul siri bugòli kama tuma min na, jalasabatigi dò tun bè yen, Paul y'a fò o ye ko: «A dagalen bè ka Romèka hòròn bugò k'a sòrò kiri ma tigè a kan wa?» 26 Jalasabatigi ye o kuma mèn tuma na, a taara o fò jaladuurutigi ye ko: «I bèna mun kè ten? Nin cè ye Romèka hòròn ye dè.» 27 Jaladuurutigi taara Paul yòrò k'a ɲininka ko: «A fò ne ye, i ye Romèka hòròn ye wa?» Paul y'a jaabi ko: «Owò.» 28 Jaladuurutigi ko: «Ne ye o hòrònya sòrò ni wari caman ye.» Paul ko: «Ne kòni y'a sòrò bange fè.» 29 O yòrònin kelen, minnu tun bèna Paul bugò, olu ye u mabò a la. Jaladuurutigi y'a dòn ko Paul ye Romèka hòròn ye tuma min na, a siranna, katuguni a tun y'a siri. 30 Yahutuw tun bè Paul sendon kun min na, jaladuurutigi tun b'a fè ka o dòn k'a jèya. O de kosòn o dugusajè, a ye Paul foni ka ci fò ko sarakalasebaaw kuntigiw ni kiritigè jamakulu bèè ka ɲògòn lajè. O kò, a taara ni Paul ye k'a jò u ɲè kòrò.



23

1 Paul ye a ɲè jò kiritigè jamakulu la k'a fò ko: «Balimaw, ne dusu ma ne jalaki ne ka kèta si la Ala ɲè kòrò fo ka na se bi ma.» 2 Sarakalasebaaw kuntigi Ananiyasi y'a fò a kèrèfè mògòw ye ko u ka Paul gosi a da la. 3 O tuma la Paul y'a fò a ye ko: «Ala na i gosi, e min bòlen bè kogo kòkanna jèyalen fè. I sigilen bè yan ka kiri tigè ne kan ka kèɲè ni sariya ye, nka i b'a fò ko ne ka gosi, o ye sariya tiɲèni de ye.» 4 A kèrèfè mògòw ko: «I bè Ala ka sarakalasebaaw kuntigi dògòya dè!» 5 Paul y'a jaabi ko: «Balimaw, ne tun m'a dòn ko sarakalasebaaw kuntigi don. Tiɲè don, a sèbènnen bè Kitabu la ko: `I kana kuma jugu fò i ka mògòw kuntigi ma.' » 6 Paul tun b'a dòn ko kiritigè jamakulu tila kelen tun ye Saduseènw ye, ko a tòw ye Farisiènw ye. O la, a pèrènna u cèma ko: «Balimaw, ne bangebaaw tun ye Farisiènw ye, ne fana ye Farisièn ye. An jigi b'a kan ko suw bè kunun, o jigi de ye ne don nin kiri la.» 7 A ye o kumaw fò tuma min na, sòsòli donna Saduseènw ni Farisiènw cè fo jamakan tilara. ( 8 Saduseènw b'a fò ko suw tèna kunun, ko mèlèkè si tè yen, ko ni si tè yen, k'a sòrò Farisiènw dara o kow bèè la.) 9 A kèra wòyòba ye. Farisiènw ka sariya karamògò dòw wulila ka kuma ta ni fariya ye ko: «An ma ko jugu si sòrò nin cè la. A dòrò ni wala mèlèkè dò kumana a fè.» 10 Sòsòli bonyara kosèbè, fo jaladuurutigi siranna ko Paul kana na farafara u fè. A ye sòròdasiw bila ka jigin ka taa Paul bòsi u bolo ka taa n'a ye sòròdasiw ka kube kònò. 11 O don su fè Matigi y'i jira Paul la k'a fò a ye ko: «I ja gèlèya, i ye ne seereya kè Jerusalèm cogo min na, wajibi don i ka o ɲògòn seereya kè Romè fana.» 12 O dugusajè sògòma, Yahutu dòw ye jè siri ka u kali ka u yèrèw danga ko u tèna dumuni kè wala ka minni kè sani u ka Paul faga. 13 O jè siribaaw tun ka ca ni mògò binaani ye. 14 U taara sarakalasebaaw kuntigiw ni cèkòròbaw sègèrè k'a fò olu ye ko: «An ye an kali ka an yèrèw danga ko an tèna dumuni kè sani an ka Paul faga. 15 Aw kòni, ani kiritigè jamakulu bèè k'a fò jaladuurutigi ye ko a ka na ni Paul ye aw yòrò, i n'a fò aw b'a fè ka a ka koɲèw dòn ka a jèya. An kòni labènnen bè ka a faga sani a ka se aw ma.» 16 Nka Paul balimamuso denkè ye u ka jè sirili ko mèn. Ale taara sòròdasiw ka kube la ka o ko fò Paul ye. 17 Paul ye jalasabatigi dò wele k'a fò o ye ko: «Taa ni nin kamalen ye jaladuurutigi yòrò, katuguni kuma dò b'a fè ka fò o ye.» 18 Jalasabatigi taara ni o kamalen ye jaladuurutigi yòrò, a ko: «Kasolamògò Paul ye ne wele ka ne deli ko ne ka na ni nin kamalen ye i yòrò, ko kuma dò b'a fè ka fò i ye.» 19 Jaladuurutigi ye kamalen bolo minè ka taa n'a ye u dan na, k'a ɲininka ko: «I b'a fè ka mun fò ne ye?» 20 A y'a jaabi ko: «Yahutuw kanbènna ko u bè Paul ɲini i fè ka taa kiritigè jamakulu ɲè kòrò sini, ka a kè i n'a fò u b'a fè ka a ka koɲè dòn k'a jèya. 21 Nka i kana sòn, katuguni minnu bèna u dogo k'a faga, olu ka ca ni mògò binaani ye. U ye u kali ka u yèrèw danga, ko u tèna dumuni kè wala ka minni kè sani u ka Paul faga. U labènnen bè sisan, u tè foyi makònò fo i ka jaabili.» 22 Jaladuurutigi y'a fò o kamalen ye ko: «I kana fò mògò si ye ko i ye o ko fò ne ye.» O kò, a y'a bila ka taa. 23 O tuma la jaladuurutigi ye jalasabatigi fila wele k'a fò u ye ko: «A' ye sòròdasi kèmè fila ni so kan yèlènbaa biwoloèula ani taamatigi kèmè fila lajè ka u labèn ka taa Sesare. Aw ka taa suròfana dun waati tèmènnen kò. 24 Aw ka sow labèn, walisa Paul fana ka yèlèn dò kan ka taa se gòfèrènèrè Feliksi yòrò hèrè la.» 25 A ye nin kuma sèbèn ka ci u fè: 26 «Klode Lisiyas bè nin sèbèn ci gòfèrènèrè Feliksi ma. I ni hèrè. 27 Yahutuw ye nin cè minè, u tun bè ɲini ka a faga. Ne ni sòròdasiw taara a minè u la, sabu ne y'a mèn ko Romèka hòròn don. 28 Yahutuw tun bè nin cè sendon ko min na, ne tun b'a fè ka o dòn. Ne taara n'a ye u ka kiritigè jamakulu ɲè kòrò. 29 Ne y'a sòrò ko u y'a sendon u yèrèw ka sariya kow la, nka a ma foyi kè min ka kan ni saya wala kaso ye. 30 A fòra ne ye tuma min na ko u dòw ye jè siri a kama, o yòrònin kelen ne y'a ci i ma k'a fò a sendonbaaw ye ko u ka taa a sendon i yèrè ɲè kòrò. K'an bèn.» 31 Sòròdasiw taara ni Paul ye su fè fo Antipatris, i ko a fòra u ye cogo min na. 32 O dugusajè, u ye sotigiw bila ka taa ni Paul ye, u yèrèw kòseginna u ka kube la. 33 Sotigiw selen Sesare, u ye o sèbèn di gòfèrènèrè ma ka Paul jira a la. 34 Gòfèrènèrè ye o sèbèn kalan minkè, a ye Paul ɲininka ko a bòra jamana jumèn la? A y'a mèn tuma min na ko a bòra Silisi, 35 a y'a fò a ye ko: «Ni i sendonbaaw sera yan tuma min na, ne na i ka ko ɲènabò.» A y'a fò ko u ka Paul mara Hèròde ka kube kònò.



24

1 Tile duuru tèmènnen kò, sarakalasebaaw kuntigi Ananiyasi sera Sesare, a ni cèkòròba dòw ani kuma dònna dò, o tògò ko Tèritule. U ye Paul sendon gòfèrènèrè ɲè kòrò. 2 Paul welelen ka na, Tèritule y'a sendonni kuma daminè tan ko: «Gòfèrènèrè Feliksi, an bè hèrèba min na, o bè bò e de la. I ka ko ɲènabòli ye ko ɲuman caman kè nin siya ye. 3 O diyara an bèè ye. An bè barika da i ye o kow la tuma bèè, yòrò bèè. 4 Nka walisa ne kana i sègèn, ne b'i deli i ka ɲumaya kosòn, i ka an lamèn dòònin. 5 An y'a sòrò ko nin cè bè an tòòrò i n'a fò fiɲèbana bè an cèma. A bè Yahutuw bèè lamuruti diɲè yòrò bèè la. Nazarètikaw ka jè kuntigi don. 6 A tun b'a fè ka Alabatosoba nògò fana. O tuma la an y'a minè. [An tun b'a fè ka kiri tigè a kan ka kèɲè ni an ka sariya ye. 7 Nka jaladuurutigi Lisiyas nana k'a bòsi ka bò an bolo ni fanga ye. 8 O kò, Lisiyas y'a fò a sendonbaaw ye ko u ka na i ɲè kòrò.] Ni i bè nin cè sègèsègè, an bè a sendon ko minnu na, i na o kow dòn tiɲè ye.» 9 Yahutuw sònna a sendonni kow ma, ko o kow bèè kèra ten. 10 Gòfèrènèrè ye kuma di Paul ma. Paul ye kuma ta, a ko: «Ne y'a dòn ko i ye nin siya ka kiritigèla ye kabini san caman. O de kosòn ne jigi sigilen bè ne yèrè lafasa i ɲè kòrò. 11 I yèrè bè se k'a sègèsègè k'a dòn ko ne seli ma tèmèn tile tan ni fila kan Jerusalèm ka Ala bato. 12 U ma ne sòrò sòsòli la mògò si fè, wala jama lamurutili la Alabatosoba kònò, wala Alabatoso dòw, wala dugu kònò. 13 U bè ne sendon ko minnu na sisan, u tè se ka olu fò k'a jèya. 14 O bèè n'a ta, ne bè jò nin de la i ɲè kòrò, ko u b'a fò ko sira min tè tiɲè ye, ne bè baara kè an bènbaw ka Ala ye ka kèɲè ni o sira ye. Ko minnu sèbènna sariya ni kiraw ka kitabuw la, ne dara olu bèè la. 15 Ne jigi dalen bè Ala kan, i ko u fana jigi b'a kan cogo min na, ko mògòw bèè suw na kunun, mògò tilennenw ni mògò tilenbaliw bèè. 16 O de y'a to ne bè ne jija tuma bèè ko ne dusukun jalakibali ka sòrò Ala ni mògòw bèè ɲè kòrò. 17 «San dama dò tèmènna. Sisan ne nana ni dèmèni wari ye ka di ne ka siya mògòw ma, ani ka Ala bato. 18 U ye ne saniyalen sòrò Alabatosoba kònò o kèli la, jama tun tè yen, wòyò ma wuli. 19 Nka Asi Yahutu dòw tun bè yen, olu tun ka kan ka kè i ɲè kòrò yan ka ne sendon, ni a y'a sòrò u ye ko jugu ye ne la. 20 Walima minnu bè yan, u bè ne jalaki kun min na, u ka o fò, ni a ma kè nin ko kelen ye, ka ne to kiritigè jamakulu ɲè kòrò, ne pèrènna u cèma ko: `Ne dara suw kununli ko la, o de y'a to ne bè kiri la aw ɲè kòrò bi.' » 22 Feliksi ye o sira ko dòn kosèbè, a ye u labila fo waati wèrè, a ko: «Jaladuurutigi Lisiyas mana na, ne na aw ka ko ɲènabò.» 23 A y'a fò jalasabatigi ye ko a ka Paul bila kaso la ka a kòlòsi, nka a kana a degun, a k'a to Paul teriw ka na a mago ɲè. 24 Tile dama tèmènnen kò, Feliksi ni a muso Drusiye nana, o muso tun ye Yahutu ye. Feliksi ye ci bila ka taa Paul wele ka na. Paul ye kuma minnu fò Yesu Krisita dannaya ko la, a ye olu lamèn. 25 Paul tun bè kuma tilennenya ni yèrè minèli ni kiri nata ko la tuma min na, Feliksi siranna haali, a ko: «I bè se ka taa sisan. Ni ne ye waati wèrè sòrò, ne na i wele tun.» 26 A jigi tun b'a kan fana ko Paul na wari dò di a ma. O de y'a to a y'a wele ko caman ka na ka baro kè a fè. 27 San fila tèmènnen kò, Pòrsius Fèsitus sigira Feliksi nò na. Feliksi tun b'a fè ka Yahutuw diyaɲeko kè, a ye Paul to kaso la.



25

1 Fèsitus selen o jamana la, o tile sabanan, a bòra Sesare ka taa Jerusalèm. 2 Sarakalasebaaw kuntigiw ni Yahutuw ka faama dòw ye Paul sendon a ɲè kòrò. 3 U ye Fèsitus deli ko a ka Paul lana Jerusalèm. U tun ye jè siri ko u b'a faga sira la. 4 Fèsitus y'u jaabi ko Paul bè kaso la Sesare, ko ale bèna kòsegin yen sòòni. 5 A ko: «Aw ka ɲè mògò dòw ka taa ne fè yen. Ni o cè ye ko jugu kè, u ka a sendon.» 6 Fèsitus ma tèmèn tile segin wala tan kan u fè yen, o kò, a kòseginna ka taa Sesare. O dugusajè a y'i sigi kiritigè yòrò la ka ci bila ko Paul ka na. 7 Paul selen kò, Yahutu minnu nana ka bò Jerusalèm, olu ye Paul lamini ka a sendon ni kuma jugu caman ye, nka u ma se ka o si jèya. 8 Paul kumana a yèrè ko la, a ko: «Ne ma ko jugu si kè Yahutuw ka sariya kama, wala Alabatosoba kama, wala Romè masakè kama.» 9 Nka Fèsitus tun b'a fè ka Yahutuw diyaɲeko kè, a y'a fò Paul ye ko: «I bè sòn ka taa Jerusalèm, walisa i ka kiri ka tigè ne ɲè kòrò yen nin ko la wa?» 10 Paul y'a jaabi ko: «Ne bè taa Romè masakè ka kiri yòrò la, ne ka kiri ka kan ka ɲènabò yòrò min na. Ne ma ko jugu si kè Yahutuw la, i yèrè b'o dòn k'a jèya. 11 Ni ne jalaki don, ni ne ye ko jugu kè min ka kan ni saya ye, ne tè ban fagali ma. Nka ni u ka sendonni ko si tè tiɲè ye, mògò si tè se ka ne don u bolo. Ne bè ne ka koɲè to Romè masakè bolo.» 12 Fèsitus kumana a kòrò sigibaaw fè, o kò, a ko: «I ye i ka koɲè to Romè masakè bolo, i na taa Romè masakè ɲè kòrò.» 13 Tile dama o kò, masakè Agripa ni Berenise sera Sesare ka Fèsitus fo. 14 U ye tile dama dò kè yen minkè, Fèsitus ye Paul ko fò masakè ye. A ko: «Feliksi ye cè dò to kaso la yan. 15 Ne taara Jerusalèm tuma min na, sarakalasebaaw kuntigiw ni Yahutuw cèkòròbaw ye o cè sendon k'a fò ko ne ka a jalaki. 16 Ne ye u jaabi ko: `Romèkaw ma deli ka mògò don bolo la sani a ni a sendonbaaw ka kè yòrò kelen na, a ka a yèrè lafasa o sendonni ko la.' 17 O tuma la u nana yan. Ne m'a bila ka mèn, o dugusajè ne ye ne sigi kiri yòrò la ka ci bila ka o cè wele. 18 A sendonbaaw selen, ne tun bè miiri ko u na a sendon ko jugu minnu na, ne ma o si sòrò a la. 19 Fèn wèrè tun tè, fò u tun bè ɲògòn sòsò u yèrèw ka diinè sira ko la, ani cè dò ko la, o tògò ko Yesu. O sara, nka Paul ko a ɲènama don. 20 Ne tun ma o ɲènabò cogo dòn, o de y'a to ne ye Paul ɲininka yala ni a bè sòn ka taa Jerusalèm, a ka kiri ka ɲènabò yen. 21 Nka Paul ye a ka koɲè to Romè masakè bolo. O tuma la ne ko a ka to kaso la sani ne ka a bila ka taa masakè yòrò.» 22 Agripa y'a fò Fèsitus ye ko: «Ne yèrè b'a fè ka o cè ka kuma lamèn.» Fèsitus y'a jaabi ko: «Sini i n'a lamèn.» 23 O dugusajè, Agripa ni Berenise mògòbalama nana ka don ɲògònlajè yòrò la, u ni jaladuurutigiw ni dugu mògòbaw. Fèsitus ye ci bila ka Paul wele ka na. 24 O tuma la Fèsitus ko: «Masakè Agripa ani aw minnu bèè bè an fè yan, aw ɲè bè nin cè min na, Yahutuw jama bèè ye o sendon ne ɲè kòrò Jerusalèm, ani yan fana u bè pèrèn ko a ɲènama kana to. 25 Ne kòni y'a sòrò ko a ma ko jugu si kè min ka kan ni fagali ye. A yèrè ye a ka koɲè to Romè masakè bolo, o de kosòn ne y'a latigè ko a ka taa yen. 26 Ne ma ko jèlen si sòrò k'a sèbèn ka ci masakè ma a ko la. O de y'a to ne nana n'a ye aw ɲè kòrò, janko e yèrè ɲè kòrò, masakè Agripa, walisa a sègèsègèlen kò, ne k'a fèn dò sòrò ka sèbèn. 27 Ne ɲè na, ka kasolamògò ci, ni fèn jèlen ma sòrò ka sèbèn a ko la, o tè ko bènnen ye.»



26

1 Agripa y'a fò Paul ye ko: «I bè se ka i yèrè ka koɲè fò.» Paul ye a bolo kòròta ka a fè taw fò ko: 2 «Masakè Agripa, Yahutuw bè ne sendon ko minnu bèè la, a diyara ne ye ka ne yèrè sòrò i ɲè kòrò ka ne yèrè lafasa o kow la, 3 k'a masòrò i bè Yahutuw ka laadaw ni u ka sòsòli kow dòn kosèbè. O de kosòn, ne b'i deli ko i ka i muɲu ka ne lamèn. 4 «Ne tun bè Jerusalèm ne yèrè siya cèma cogo min na kabini ne denmisènma, Yahutuw bèè bè o dòn. 5 U bè ne dòn kabini tuma jan, ni u bè sòn ka seereya kè, ko ne tun bè an ka diinè sira bèè la gèlènma taama, Farisiènya kòni. 6 Ala ye layidu min ta an bènbaw ye, ne jigi bè o kan, o de y'a to ne bè kiri yòrò la sisan. 7 An siya tan ni fila jigi b'a kan ko o layidu na dafa. U jijalen bè Ala batoli la ka baara kè a ye su fara tile kan. Masakè, o jigi kosòn Yahutuw bè ne sendon. 8 Mun y'a to aw bè miiri ko mògò tè se ka da a la ko Ala bè mògòw suw lakunun? 9 «Ne kòni tun bè miiri ko ne tun ka kan ka ne se ko kè ka Yesu Nazarètika tògò fòli bali. 10 Ne ye o de kè Jerusalèm. Sarakalasebaaw kuntigiw ye fanga di ne ma, ne ye dannabaa caman bila kaso la. Ni u jalaki kèra saya ye, ne sònna o ma. 11 Tuma caman na, ne tun bè u tòòrò Alabatosow bèè kònò, ne tun b'a fè ka u karaba ka Yesu tògò tiɲè. Ne dusu diminnen kojugu u kòrò, ne tun bè tugu u nòfè ka u tòòrò fo jamana wèrè duguw la. 12 «O cogo la sarakalasebaaw kuntigiw ye fanga ni ci di ne ma tuma min na, ne taara Damasi. 13 Ayiwa o tuma la, masakè, ka ne to sira la tilegan fè kènèyeelenba bòra sankolo la ka tèmèn tile yèrè kènèyeelen kan, o manamanana ka ne ni ne taamaɲògònw lamini. 14 An bèè binna duguma. O kèlen, ne ye kumakan dò mèn, o y'a fò ne ye hèburukan na ko: `Saul, Saul, mun y'a to i bè ne tòòrò? A ka gèlèn i ma ka nègè nun bòlen tan!' 15 Ne y'a ɲininka ko: `Matigi, i ye jòni ye?' Matigi y'a fò ko a ye Yesu ye, ko ne bè min tòòrò, ale don. 16 Ko ne ka wuli ka jò, katuguni a y'i jira ne la nin de kosòn. Ko ne ye ko minnu ye, ani a na i jira ne la ko minnu na, ko a ye ne kè o kow baarakèla ni u seere ye. 17 Ko a na ne tila Yahutuw la ani ko a na ne ci siya wèrè minnu ma, 18 ko a na ne ci olu ma walisa u ɲèw ka yèlè ka bò dibi la ka na kènèyeelen na. U ka bò Sitanè bolo ka na Ala ma, walisa u ka jurumuw yafa sòrò ka sigi yòrò sòrò dannabaaw cèma, olu minnu saniyara u ka dannaya fè ale la. 19 «Ayiwa masakè Agripa, fèn min jirala ne la ka bò sankolo la, ne ma ban o ma. 20 Ne tun bè waajuli kè Damasi fòlò, o kò, Jerusalèm ni Jude jamana yòrò bèè la ani siya wèrèw cèma, ko u ka nimisa u ka jurumuw la ka tuubi Ala ye. Kèwale minnu b'a jira ko u nimisara, u ka olu kè. 21 O de kosòn Yahutu dòw ye ne minè Alabatosoba kònò, u tun b'a fè ka ne faga. 22 Nka Ala ka dèmèni kosòn ne bè yan halibi, ka ne seereya bò mògòw bèè ye, mògò dògòmanninw ni mògòbaw. Ne ma fèn fò ka tèmèn kiraw ni Musa ka ko nata fòlenw kan, 23 ko Krisita ka kan ka tòòrò, ko ale fòlò bèna kunun ka bò suw cèma ka kènèyeelen ko fò an siya ni siya wèrèw ye.» 24 Ka Paul to a yèrè lafasali la, Fèsitus pèrènna ni kanba ye ko: «Paul, fa b'i la! I ka kalanba ye fa bila i la!» 25 Paul y'a jaabi ko: «Fa tè ne la, Fèsitus. Ne bè tiɲè kuma hakiliman de fò. 26 Masakè yèrè bè nin kow bèè dòn. Ne bè se ka kuma ni ja gèlèya ye a ɲè kòrò. Ne dalen bè a la ko ale bè nin kow bèè dòn, sabu u ma kè dogo la. 27 Masakè Agripa, i dara kiraw ka kumaw la wa? Ne y'a dòn ko i dara u la.» 28 Agripa y'a fò Paul ye ko: «Sòòni i na ne yèlèma ka kè kretièn ye!» 29 Paul ko: «Ala m'a kèra e kelen dama tè, nka mògò minnu bè ne ka kuma mèn bi, cogo o cogo aw bèè ka kè ne bòɲògònko ye, ni nin sirilanw sen t'a la.» 30 O tuma la masakè wulila, ani gòfèrènèrè ni Berenise ani mògò minnu bèè tun bè u fè yen. 31 U bòlen kò, u y'a fò ɲògòn ye ko: «Nin cè ma ko jugu si kè min ka kan ni fagali wala kaso ye.» 32 Agripa y'a fò Fèsitus ye ko: «Nin cè tun bè se ka bila ka taa, ni a tun ma a ka koɲè to Romè masakè bolo.»



27

1 A latigèra ko an ka don kurun kònò ka taa Itali. U ye Paul ni kasolamògò dòw don jalasabatigi Julius bolo, o tun ye Romè masakè ka sòròdasikulu kuntigi ye. 2 Kurun dò tun bèna bò Adramite ka taa Asi dankanw la. An donna o kònò ka taa. Masedwanèka dò taara an fè, o tògò ko Arisitarke, Tesalonike dugu mògò dò don. 3 O dugusajè an sera Sidòn. Julius ye ko ɲuman kè Paul ye, a sònna Paul ka taa a teriw fè walisa olu ka a mago ɲè. 4 An bòlen kò yen, an taara Siprè gun kèrè fè, katuguni fiɲè tun bè an kunbèn. 5 An ye kògòji cètigè ka tèmèn Silisi ni Panfili kèrè fè ka se Mira, Lisi jamana la. 6 Jalasabatigi ye kurun dò sòrò yen, o tun bòra Alèkisandri, a tun bè taa Itali. A ye an ladon o kònò. 7 An taamana ji kan nèmènèmè tile caman kònò, an seli gèlèyara Kinide dugu da fè. Fiɲè ye an bali ka taa ɲè o fan fè tuma min na, an taara Salmone ka Krete gun to an ni fiɲè cè. 8 Krete gun kèrèfè tèmènni gèlèyara an ma. An sera yòrò dò la, o tògò ko Dankan Ɲumanw, olu ni Lase dugu cè man jan. 9 Waati caman tun tèmènna, ji kan taama kèra farati ye, katuguni Sundon seli tun tèmènna ka ban. O de y'a to Paul ye u lasòmi, 10 a ko: «Cèmògòw, ne ɲè b'a la ko nin taama na kè farati ye, kurun ni a doni dòròn tè, nka an niw fana bè se ka tunun.» 11 Nka jalasabatigi dara kurun ko ɲènabòla ni kuruntigi ka kuma la ka tèmèn Paul ta kan. 12 Yen kurun dankan man ɲi fonènè tuma la, u caman ko u ka bò yen ka u jija ka se Fenikis, ka fonènè kè yen. O ye Krete dankan dò ye, a sinnen bè worodugu ni tilebin seleke ani saheli ni tilebin seleke ma. 13 Fiɲè dòònin cira ka bò worodugu fan fè tuma min na, u tun bè miiri ko u ye min latigè, ko o na se ka kè. U ye banamini ta ka tèmèn Krete kèrè fè. 14 Nka sòòni fiɲèba cira ka bò gun fan fè, o fiɲè tògò ko Urakilon. 15 O ye kurun sama. An ma se k'an bò a bolo. O ye an bali ka taa ɲè, fo an ye an yèrèw bila fiɲè bolo. 16 An tèmènna gun misèn dò kòrò, o tògò ko Kloda. An ye kurun misèn bila kurunba kònò, o bilali gèlèyara. 17 U ye o ladon kurunba kònò, o kò, u ye kurun cèmancè siri ni jurukisèw ye walisa a kana ci. U tun bè siran ko kurun na yèlèn Sirtè cèncènma yòrò kan tuma min na, u ye kurun fini lajigin ka u yèrèw bila fiɲè bolo. 18 K'a sòrò fiɲèba tun bè an tòòrò kosèbè, o dugusajè u ye kurun kònò doni dòw fili kògòji la. 19 Tile sabanan don, u yèrèw bolow ye kurun kònò minènw ta ka u fili. 20 Tile dama dò kèra, tile ma bò, dolow fana ma bò, fiɲè sèbèkòrò cira kosèbè, fo an jigi tun tigèra ko an tèna se ka kisi. 21 An mènna an ma dumuni kè. O tuma la Paul wulila k'i jò u cèma k'a fò u ye ko: «Cèmògòw, ne tun ye lasòmili kuma min fò k'an to Krete, aw tun ka kan ka o lamèn. An tun tèna bò yen, nin tòòrò ni nin tiɲèni ko tun tèna an sòrò. 22 Nka sisan ne bè aw laadi. Aw ka aw ja gèlèya, katuguni aw si tèna tunun, fò kurun dòròn. 23 Ne ye min ta ye, ani ne bè baara kè min ye, Ala kòni, o ka mèlèkè dò y'i jira ne la surò. 24 A y'a fò ne ye ko: `Paul, i kana siran.' Ko wajibi don ne ka jò Romè masakè ɲè kòrò. Ko Ala ye ne taamaɲògònw bèè di ne ma. 25 O de y'a to cèw, a' ye aw ja gèlèya, k'a masòrò ne dara Ala ka kuma la ko a ye min fò, o na kè. 26 Nka wajibi don an ka fili gun dò kan.» 27 An su tan ni naaninan la, k'an to fiɲè bolo taa ka segin la Adriyatike kògòji kan, dugutila fè, kurun kònò baarakèlaw tun bè miiri ko an surunyara gele dò la. 28 U ye ji suma, u y'a sòrò ko o yòrò dunya tun ye mètèrè bisaba ni woloèula ye. U taara ɲè dòònin k'a suma ko kura, u y'a sòrò ko o yòrò dunya tun ye mètèrè mugan ni segin ye. 29 U siranna ko an ka kurun kana gosi kabakurun dòw la, u ye kurun kòfèla banamini naani bila ji la. U kòròtòlen tun bè dugu jèli la. 30 Kurun kònò baarakèlaw tun b'a fè ka boli, u ye kurun misèn lajigin i n'a fò u bè taa kurun ɲèfèla banaminiw bila. 31 Nka Paul y'a fò jalasabatigi ni sòròdasiw ye ko: «Ni nin cèw ma to kurun kònò, aw tè se ka kisi.» 32 O tuma la, sòròdasiw ye kurun misèn juruw tigè ka a bila. 33 Ka mògòw to dugujè makònòni la, Paul ye u bèè deli ko u ka dumuni kè. A ko: «Bi ye aw tile tan ni naani ye, aw bè kòlòsili la, aw ma dumuni kè. 34 O de kosòn ne bè aw deli ko aw ka dumuni kè, katuguni aw mago b'a la walisa aw ka kisi. Hali aw si kunsigi kelen tèna tunun.» 35 O kuma fòlen kò, Paul ye nbuuru dò ta ka barika da Ala ye u bèè ɲè na, o kò, a y'a karikari ka dumuni daminè. 36 O tuma la, u bèè ja gèlèyara, u fana ye dumuni kè. 37 An mògò kèmè fila ni biwoloèula ni wòòrò de tun bè o kurun kònò. 38 U falen dumuni la, u ye alikama fili ji la walisa kurun ka fiɲèya. 39 Dugu jèlen, kurun kònò mògòw ma o yòrò dòn, nka u ye ji bolo fara yòrò ye, cèncèn bè a da la. U ko u na kurun ladon o yòrò la, ni o bè se ka kè. 40 U ye banaminiw la juruw foni ka u to ji la. U ye lèmu siri juruw fana foni. O kò, u ye kurun ɲèfèla fini walaèalan fiɲè la ka sin cèncèn ma ka taa. 41 Nka u sera jikuruw ɲògòn kunbèn yòrò la ka balan yen cèncèn na. Kurun ɲèfèla coronna fo a ma se ka lamaga, k'a sòrò a kòfèla tun bè karikari jikuruw barika fè. 42 Sòròdasiw tun b'a fè ka kasolamògòw bèè faga walisa u kana nònni kè ka boli. 43 Nka jalasabatigi tun b'a fè ka Paul kisi, a ye u bali ka o kè. A ko minnu bè se nònni la, olu ka u bin ji kan fòlò ka nònni kè ka taa gele kan. 44 U tòw ka yèlèn kurun jiri fèrènw wala kurun karilen kunkurunw kan ka taa. O cogo la u bèè kènèma sera gele kan hèrè la.



28

1 An kisilen kò, an y'a sòrò o gun tògò ko Malte. 2 Yen mògòw ye ko ɲuman min kè an ye, o bòɲògònko sòrò man di. U ye tasumaba mana ka an bèè wele ka na o kòrò, katuguni sanji tun nana ka nènèba kè. 3 Paul taara dògò dò cè ko a b'a bila tasuma la, fònfònnin bòra o la funteni kosòn ka Paul cin ka balan a bolo la. 4 O gun mògòw ye sa dulonnen ye Paul bolo la minkè, u y'a fò ɲògòn ye ko: «Nin cè ye mògòfagala ye, siga t'a la, hali k'a sòrò a kisira ka bò kògòji la. Tiɲè ma sòn a ka balo.» 5 Nka Paul ye a bolo seri, o sa binna tasuma la, foyi ma kè Paul la. 6 O mògòw tun b'a filè yala ni Paul na funun wala ka bin ka sa o yòrònin kelen. U y'a ye ko a mènna, foyi ma kè a la, u ka miiriliw yèlèmana, u y'a fò ko batofèn dò don. 7 O gun na mògòba min tògò ko Publius, o ka forow tun ka surun yen na. A ye an minè i ko a teriw. A ye an lajigin a ka so tile saba kònò. 8 An y'a sòrò Publius fa dalen tun bè farigan ni tògòtògònin bolo. Paul donna o yòrò ka Ala deli k'i bolow da a kan, a kènèyara. 9 O kèlen kò, o gun na banabaatò tòw fana nana, u kènèyara. 10 Olu fana ye an bonya kosèbè. An taa tuma selen, an mago tun bè fèn o fèn na, u ye o bèè di an ma. 11 Kalo saba tèmènnen kò, an donna Alèkisandri kurun dò kònò ka taa, o taamashyèn tun ye Filaninw ye, o tun ye fonènè kè yen. 12 An selen Sirakuse, an ye tile saba kè yen. 13 An bòlen kò yen, an munumununa ka se Rejio. O dugusajè fiɲè cira ka bò worodugu yanfan fè, an sera Puzole tile fila kònò. 14 An ye balima dòw ye yen, u ye an deli ko an ka dògòkun kelen kè u fè yen. O cogo la an taara Romè. 15 Romè balimaw ye an kibaru mèn ka na an kunbèn Apius Fòrum la ani Dunanjiginso Saba la. Paul ye u ye tuma min na, a ye barika da Ala ye ka a ja gèlèya. 16 An selen Romè, u sònna Paul ka to a dan na, ani sòròdasi kelen min tun b'a kòlòsi. 17 Tile saba tèmènnen kò, Paul ye Romè Yahutu mògòbaw wele ka na a yòrò. U ye u lajè tuma min na, a y'a fò u ye ko: «Balimaw, ne ma ko jugu si kè an siya la, ne ma an bènbaw ka laadaw fana tiɲè, hali o, ne minèna Jerusalèm ka don Romèkaw bolo. 18 Olu ye ne ɲininka minkè, u tun b'a fè ka ne bila, sabu u ma foyi sòrò ne la min b'a to ne ka kan ka faga. 19 Nka Yahutuw ma sòn o ma, o de y'a to a tun kèra wajibi ye ne ka ne ka koɲè to Romè masakè bolo, o tè ko ne b'a fè ka ne siya sendon mènè. 20 O de kosòn ne ye aw wele ka na ne yòrò walisa ne ka aw ye ka kuma aw fè, katuguni Israèl jigi bè min kan, ne sirilen bè ni nin jòlòkò ye o kosòn.» 21 U y'a fò a ye ko: «An ma sèbèn si sòrò ka bò Jude jamana la i ko la. Balima si fana ma bò yen ka kibaru jugu si fò i ko la yan. 22 Nka an b'a fè ka i ka miirili dòn nin jè ko la, katuguni an y'a dòn ko sòsòli bè kè a la yòrò bèè.» 23 U ni Paul ye don dò sigi. O don na mògò caman nana a yòrò la. Paul ye kunnafoni di u ma kabini sògòma fo wula fè. A ye Ala ka masaya ko fò u ye. A tun bè Yesu ko fò u ye k'a jèya ka bò Musa ka sariya ni kiraw ka kitabuw la. 24 Dòw sònna Paul ka kuma ma, nka dòw ma sòn ka da a la. 25 U ka kuma ma bèn ɲògòn ma minkè, u tun bè daminè ka taa. Sani u ka taa, Paul ye nin kuma fò u ye ko: «Ni Senu ye min fò aw bènbaw ye kira Esayi da la, o ye tiɲè ye ko: 26 `Taa k'a fò nin siya ye ko: Aw tulow majòlen na mènni kè, nka aw tèna faamuli kè. Aw ɲèw jòlen na filèli kè, nka aw tèna yeli kè. 27 K'a masòrò nin mògòw hakili goyara. U ye u tulow tugu, u ye u ɲèw tugu, walisa u ɲèw kana na yeli kè, u tulow kana na mènni kè, u hakili kana na faamuli kè, u kana na u yèlèma ne fan fè, walisa ne ka u kènèya.' 28 Aw k'a dòn ko Ala ka kisili cira siya wèrèw ma, olu kòni na o lamèn.» [ 29 Paul ye o kuma fò tuma min na, Yahutuw taatò tun bè ɲògòn sòsò kosèbè.] 30 Paul ye san fila dafalen kè a yèrè ka so luwanselen kònò. Mògò o mògò taara bò a ye, a ye olu bèè ladon. 31 A tun bè waajuli kè Ala ka masaya ko la, ka mògòw kalan Matigi Yesu Krisita ko la ni ja gèlèya ye, mògò si ma a bali.



AMAZING GRACE BIBLE INSTITUTE