3 Jean11 Ne, egilisi cèkòròba bè nin sèbèn ci ne ka kanulen Gayus ma, ne bè i kanu tiɲè la. 2 Kanulen, ne b'a fè i ka jija fèn bèè la ani i kènèma ka to ka kèɲè ni i dusu ka jiidili ye. 3 Ne ɲagalila kosèbè, k'a masòrò balima dòw sera ne fè ka seereya kè ko i bè tiɲè sira kan, ani i bè taama tiɲè la. 4 Foyi tè ne nisòndiya ka tèmèn nin kan, k'a mèn ko ne denw bè taama tiɲè sira kan. 5 Kanulen, i bè fèn o fèn kè balimaw ye, hali balima dunanw, i bè o sèbè kè. 6 Olu ye i ka kanuya seereya kè egilisi ɲè kòrò. Ne b'i deli i ka u dèmè u ka taama ko la ni dèmèni ye min bè bèn Ala sago ma. 7 K'a masòrò u bè taama la Matigi tògò kosòn, u ma sòn ka dèmèni minè Ala dònbaliw fè. 8 An kòni ka kan ka o ɲògòn mògòw minè koɲuman, walisa an ka kè u jèɲògònw ye o tiɲè baara la. 9 Ne ye sèbèn fitinin dò ci egilisi ma, nka Diotrèfè tun b'a fè ka kè u ɲè mògò ye, ale tè an minè koɲuman fewu. 10 O de kosòn ni ne taa ko bòra aw fè yen, a bè kèwale minnu kè, ka kuma cè jugu nkalonma caman minnu fò an ko la, ne na ne hakili to olu la. O si m'a wasa, nka a yèrè tè sòn ka balimaw ladon. Minnu b'a fè ka u ladon, a bè olu fana bali, ka u gèn ka bò egilisi la. 11 Kanulen, i kana juguya dege, nka i ka ɲumaya dege. Min bè ko ɲuman kè, o bòra Ala la. Min bè ko jugu kè, o ma Ala ye. 12 Mògò bèè bè Dèmètrius tògò ɲuman fò. Tiɲè yèrè bè a tògò ɲuman fò. An fana bè a tògò ɲuman fò, i y'a dòn ko an ka seereya ye tiɲè de ye. 13 Fèn caman tun bè ne fè k'a fò i ye, nka ne t'a fè ka u sèbèn ni lankiri ni sèbènni kala ye. 14 Ne b'a fè ka i ye sòòni, an na kuma da ni da. 15 Dususuma ka kè i ye. I teriw bè i fo. I ka an teriw bèè kelen-kelen fo u tògò la. |