2 Timothee

1

1 Ne Paul, Krisita Yesu ka ciden Ala sago barika la, ka kèɲè ni ɲènamaya layidu ye, o min bè Krisita Yesu la, 2 ne bè nin sèbèn ci i ma, ne denkè kanulen Timote. An Fa Ala ni an Matigi Krisita Yesu ka nèèma ni makari ani dususuma di i ma. 3 Ne bè barika da Ala ye, ne bè baara kè o min ye ni dusukun jèlen ye, i ko ne bènbaw y'a kècogo min na. Ne tè i tògò fòli fana dabila ne ka Ala delili la su fara tile kan. 4 Ne hakili bè i ɲèji la, ne b'a fè kosèbè ka i ye ko kura, walisa ne ka ɲagali kosèbè. 5 Ne hakili bè i ka dannaya sèbè la. O dannaya tun bè i mòmuso Lois la fòlò, ka kè i ba Unise la. Ne jèyalen bè a la ko a bè i yèrè fana la. 6 O de y'a to ne bè i hakili jigin a la ko i ye Ala ka nilifèn min sòrò ne ka bolo dali fè i kan, i ka o tasuma dadon. 7 K'a masòrò Ala ma siran dusu di an ma, fò sebaaya ni kanuya ani dònniya dusu. 8 I kana maloya ka seereya kè an Matigi ko la. I kana maloya ne fana ko la, ne min ye ale ka kasolamògò ye. Nka i ka i niyòrò ta tòòrò kow la Kibaru Duman kosòn ka kèɲè ni Ala ka sebaaya ye. 9 Ale de ye an kisi ka an wele ka kè senumaw ye. O ma kè an ka kèwalew kosòn, fò a yèrè ka ko latigèlen kosòn, ani a ka nèèma, o min dira an ma Krisita Yesu la sani diɲè ka da. 10 An Kisibaa Krisita Yesu ye o nèèma jira sisan, katuguni ale de ye saya barika ban, ka ɲènamaya ni tolibaliya jira kènè kan Kibaru Duman fè. 11 O Kibaru Duman kosòn, ne sigira ka kè waajulikèla ni ciden ani karamògò ye. 12 O de y'a to ne bè tòòrò sòrò o kow la, nka ne tè maloya o la, sabu ne dara min na, ne bè o dòn. Ne ye min kalifa ale ma, ne dara a la ko se bè a ye ka o mara fo laban don na. 13 Ne ye kuma kènè minnu fò i ye, i ka o bòɲògònko kumaw mara dannaya ni kanuya la, olu minnu bè Krisita Yesu la. 14 Fèn ɲuman min kalifara i ma, i ka o mara Ni Senu barika la, o min sigilen bè an kònò. 15 I y'a dòn ko Asi mògòw bèè ye ne bila, u dòw ye Fijèlè ni Hèrmojènè ye. 16 Matigi ka makari Onèsifòrè ka so mògòw la, sabu a ye ne dusu suma ko caman. A ma maloya ne ka kasola bilali ko la, 17 nka a sera Romè tuma min na, a ye ne yòrò ɲini kosèbè fo ka ne ye. 18 Matigi k'a to a ka makari sòrò Matigi fè laban don na. A ye ne mago ɲè fèn caman minnu na k'an to Efese, i bè olu dòn ka tèmèn mògòw bèè kan.

2

1 O de kosòn, e ne denkè, nèèma min bè Krisita Yesu la, i ka i ja gèlèya o la. 2 I ye ko minnu mèn ne da la seere caman ɲè na, i ka olu kalifa dannamògò dòw ma, olu minnu bè se ka mògò wèrèw kalan fana. 3 I ka i niyòrò ta tòòrò kow la, i ko Krisita Yesu ka sòròdasi ɲuman. 4 Mògò min bè taa sòròdasiya la, o tè hami diɲè kow la, ni a b'a fè a ko ka diya a kuntigi ye. 5 Min bè don ɲògòndan boli la, o tè kunnajala sòrò fò ni a y'a kè a cogo la. 6 Sènèkèla min bè baaraba kè, o fòlò ka kan ka a niyòrò sòrò suman na. 7 Ne bè min fò, i ka miiri o la, katuguni Matigi na hakili di i ma ka o bèè faamu. 8 I ka i hakili to Yesu Krisita la. Dawuda bònsòn don. A kununna ka bò suw cèma ka kèɲè ni ne ka Kibaru Duman fòlen ye. 9 O Kibaru Duman fòli kosòn, ne bè tòòrò la fo ne sirilen bè ni nègè jòlòkò ye i ko kojugukèla. Nka Ala ka kuma sirilen tè. 10 O de y'a to ne bè fèn bèè muɲu Ala ka ɲènatòmòlenw kosòn, walisa kisili min bè Krisita Yesu la, u fana ka o sòrò ani nòòrò banbali. 11 Nin kuma jèlen don ko: «Ni an ni Krisita sara ɲògòn fè, an ni ale na ɲènamaya ɲògòn fè fana. 12 Ni an bè muɲuli kè fo a laban, an na sigi masaya la a fè. Ni an bè an dalacè a la, ale fana na i dalacè an na. 13 Ni an tè kè kantigiw ye, ale bè to kantigiya la, a tè se k'i dalacè a yèrè la.» 14 I ka mògòw hakili jigin o kow la k'a fò u ye k'a gèlèya Ala ɲè na ko u kana sòsòli kè kumaw la. O tè foyi ɲè fò ka u mènbaaw lafili. 15 I ka i jija ka i yèrè jira Ala la i ko baarakèla min ye tògò ɲuman sòrò, ni maloya sababu t'o la. A bè tiɲè kuma faranfasi cogo sèbè la. 16 I yèrè tanga diɲè la kuma gansanw fòli ma, sabu o fòbaaw bè taa ɲè Ala ɲèsiranbaliya la. 17 U ka kumaw bè ɲimini kè i n'a fò sogo su. O mògò dòw ye Himènè ni Filètè ye. 18 Olu jèngèna ka mabò tiɲè la k'a fò ko suw kununli kèra ka ban, u ye mògò dòw ka dannaya tiɲè. 19 O bèè n'a ta Ala ye jusigilan min sigi, o bamalen tora. Nin kumaw sèbènna a kan ko: «Matigi bè a yèrè taw dòn,» ani ko: «Mògò o mògò bè Matigi tògò fò, o ka i mabò tilenbaliya kow la.» 20 Soba kònò minènw dan tè sanu ni warijè ye mènè, jiri minènw ni bògò minènw fana bè yen. Dòw bè kè bonyali kama, dò wèrèw bè kè baara jugu kama. 21 Ni mògò dò bè a yèrè saniya o kow ma, o na kè baara ɲuman kè minèn ye, a bilara Ala ye ka saniya, a na kè magoɲè minèn ye a matigi ye, a labènnen bè baara ɲuman bèè kama. 22 I ka boli kamalenya negew ɲè. Minnu bè Matigi deli ni dusukun jèlen ye, i ni olu ka tilennenya ni dannaya ni kanuya ani hèrè ɲini. 23 Nka i ka ban hakilintanya sòsòli fuuw ma, i y'a dòn ko olu bè kèlè lawuli. 24 Matigi ka baaraden man kan ka kè kèlètigèla ye. A ka kè dusu sumalen ye mògòw bèè ye, ka mògòw kalan cogo dòn, ka muɲuli kè. 25 A sabalilen ka sòsòlikèlaw kalan, yala ni Ala tèna nimisali dusu di u ma, walisa u ka se ka tiɲè dòn, 26 ka hakili sòrò ka bò Sitanè ka jan na. Ale tun ye u minè ka u bila a sago kèli la.

3

1 I k'a dòn ko laban donw na, waati gèlènw na kè. 2 Mògòw na kè u yèrèw fè, nafolo negetòw, tògò ɲininaw, kuncèbaaw, Ala tògò tiɲènbaaw, bangebaa kan bilabaaw, fitiriwalew, Ala ɲèsiranbaliw, 3 mògò gèlènw, hinèntanw, tògò tiɲènbaaw, yèrèminèbaliw, farinmaw, u tè ko ɲuman fè, 4 janfanciw, yèrèsagokèlaw, u falen bè kuncèbaya la, ɲènajè kow ka di u ye ka tèmèn Ala ko kan, 5 Ala sira kòkanna kow taamabaaw, nka u banna a ka sebaaya ma. I ka i jèngè ka mabò o ɲògòn mògòw la. 6 U dòw bè don sow kònò ka muso hakilintan dòw nègèn. O musow kòni doninen bè ni jurumuw ye, u tugulen bè nege sifa caman nòfè. 7 U bè kalan tuma bèè, nka u tè se ka tiɲè faranfasi ka a dòn. 8 Janès ni Janbrès ye Musa sòsò cogo min na, o mògòw bè tiɲè sòsò ten dè. O mògòw hakili dulen don, ban kèra u la dannaya ta fan fè. 9 Nka u tèna taa ɲè, katuguni u ka hakilintanya na jira kènè kan mògòw bèè ɲè na, i ko Janès ni Janbrès ta jirala cogo min na. 10 E koni, i tugura ne la ne ka kalan ni ne taama cogo ni ne ka ko latigèlenw ni ne ka dannaya ni ne ka muɲuli ni ne ka kanuya ni ne ka jijali 11 ani ne ka tòòrò kow bèè la. Tòòrò ni sègèn minnu kèra ne la Antiose ni Ikonè ani Lisitre, i ye olu dòn. Ne ye tòòròbaw muɲu, nka Matigi ye ne tila ka bò u bèè la. 12 Ayiwa, minnu b'a fè ka taama Ala ɲèsiran na Krisita Yesu la, tugu na kè olu bèè la ten ka u tòòrò. 13 Nka mògò juguw ni filankafow na juguya ka taa ɲè. U na dòw lafili, u yèrèw lafililen don. 14 E kòni, i kalanna ko minnu na ka u dòn tiɲè ye, i nòròlen ka to olu la. I ye i kalanbaaw dòn o kow la. 15 I ye Kitabu senumaw dòn kabini i denmisènma. Olu de bè se ka hakilitigiya di i ma, walisa i ka kisi dannaya fè, o min bè Krisita Yesu la. 16 Kitabu kuma bèè kèra a sèbènnikèlaw kònò Ala dafiɲè fè. Nafa b'a la kalanni ni kòròfòli ni latilenni kama, ani kololi, tilennenya ko la, 17 walisa Ala ka mògò ka dafa, a selen kèwale ɲumanw bèè la.

4

1 Ne b'a fò i ye k'a gèlèya Ala ni Krisita Yesu ɲè na, o min bèna kiri tigè mògò ɲènamaw ni suw kan, ani Krisita nali ni a ka masaya kosòn, 2 ko i ka Ala ka kuma fò ka i jija a la tuma bènnen ni tuma bènbali la. I ka u ka koɲèw jira u la ni kòròfòli ye, ka u laadi ka u kalan ni muɲuli bèè ye. 3 Sabu waati dò bè na, mògòw tèna sòn kalan sèbè ma tun, nka ka kèɲè ni u yèrèw negew ye, u na karamògò caman ɲini u yèrèw ye, minnu na u tulow diyaɲekow fò. 4 U na u tulow mabò tiɲè la, ka tugu nsiirinw nòfè. 5 E kòni, i ka kè mògò sèbè ye ko bèè la, ka tòòrò muɲu, ka Kibaru Duman waajuli kè, ka i ka baara bèè kè ka dafa. 6 Ne kòni, ne kèra i ko saraka bònta, ne taa tuma sera. 7 Ne ye kèlè ɲuman kè, ne ye ɲògòndan boli kè ka a ban, ne ye dannaya mara. 8 Kabini sisan, tilennenya masafugula maralen bè ne ye. Matigi, kiritigèla tilennen na o di ne ma o don na. Ne kelen tè, minnu bèè bè a jirali kanu, a na di olu bèè fana ma. 9 I jija ka na ne fè yan joona. 10 Demas farala ne la, k'a masòrò nin diɲè kow diyara a ye. A taara Tesalonike. Krèsan taara Galasi jamana la, Tite taara Dalmasi. 11 Luka kelenpe bè ne fè yan. I natò ka na ni Marka ye i fè, k'a masòrò a bè se ka ne dèmè ne ka baara la. 12 Ne ye Tisike ci ka taa Efese. 13 Ne ye dulòkiba min to Karpus bolo Troas, ni i bè na tuma min na, i ka na n'o ye, ani kitabuw. Ne bè kitabu wolomaw fè ka tèmèn tòw kan. 14 Dèɲèfaga numu Alèkisandre ye ko jugu caman kè ne la. Matigi na a sara ka kèɲè ni a ka ko kèlenw ye. 15 I fana ka i yèrè kòlòsi a la, katuguni a ye an ka kumaw sòsò kosèbè. 16 Ne ye ne yèrè lafasa fòlòfòlò tuma min na, mògò si ma ne dèmè o la. U bèè ye ne bila. Ala kana o jate u kun. 17 Nka Matigi ye ne dèmè ka ne barika bonya walisa ne ka waajuli kè k'a dafa, ani Ala dònbaliw bèè k'a mèn. Ne tilara ka bò waraba da la. 18 Matigi na ne tila ko juguw bèè la ka ne kisi, ka ne ladon a ka sankolo masaya la. Nòòrò ka da ale kan badaa-badaa. Amiina. 19 I ka Prisiye ni Akilas fo, ani Onèsifòrè ka so mògòw. 20 Erasite tora Kòrènte. Ne ye Trofimè to Mile, sabu a tun man kènè. 21 I jija ka na sani fonènè ka se. Ubulus bè i fo, ani Pudans ni Linus ni Klodiya ani balima tòw bèè. 22 Matigi ka to i fè. Ala ka nèèma ka kè aw fè.

AMAZING GRACE BIBLE INSTITUTE