2 Thessalonians


1

1 Ne Paul ni Silvèn ani Timote bè nin sèbèn ci Tesalonike egilisi ma, aw minnu bè an Fa Ala ni Matigi Yesu Krisita la. 2 An Fa Ala ni Matigi Yesu Krisita ka nèèma ni dususuma di aw ma. 3 Balimaw, an ka kan ka barika da Ala ye aw kosòn tuma bèè. O bènnen bè, katuguni aw ka dannaya bè bonya ani aw bèè ka ɲògòn kanuya fana bè caya ka ta'a fè. 4 An bè aw tògò ɲuman fò Ala ka egilisiw cèma, katuguni hali k'a sòrò tugu kèra aw nòfè ka aw tòòrò cogo bèè la, aw ye o muɲu ka dannaya kè. 5 O b'a jira ko Ala ka kiri ko tilennen don. A na jate ko aw ka kan ni Ala ka masaya ye, aw bè tòòrò o min kosòn. 6 A bènnen bè ni Ala ka tilennenya ye ka aw tòòròbaaw tòòrò, 7 ka lafiya di aw ma an fè, aw minnu tòòròlen bè. O na kè ni Matigi Yesu y'i jira ka bò sankolo la ni a ka sebaaya mèlèkèw 8 ani tasuma manaba ye tuma min na, ka hakè bò Ala dònbaliw ni an Matigi Yesu Kibaru Duman kan minèbaliw la. 9 Olu ka tòòrò na kè halakili banbali ye. U na gèn ka bò Matigi ni a ka sebaaya nòòrò kòrò a na tuma la. 10 O don na, Matigi bè na ka bonya a ka mògò senumaw ko la ka kè kabako ye dannabaaw bèè ɲè na. Aw ye olu dòw ye, k'a masòrò aw dara an ka seereya la. 11 O de kosòn an bè delili kè aw ye tuma bèè ko an ka Ala k'a jate ko aw ka kan ni a ka weleli ye. An bè a deli ko a ka a sago ɲuman bèè ni aw ka dannaya ka baara bèè dafa ni a ka sebaaya ye, 12 walisa an Matigi Yesu tògò ka bonya aw ko la, aw fana ka bonya ale ko la ka kèɲè ni an ka Ala ni Matigi Yesu Krisita ka nèèma barika ye.



2

1 Balimaw, an Matigi Yesu Krisita nali ko ta fan fè ani an lajèli ko la ale fè fana, an bè aw deli 2 ko aw kana yèrèyèrè joona ka aw hakili wuli kiraya kuma wala waajuli kuma fè ko Matigi ka don sera ka ban, wala sèbèn, hali ni a fòra ko ne ye o ci. 3 Aw kana sòn mògò si ka aw lafili cogo si la, katuguni o don tèna se ni murutili ma kè Ala sira ma fòlò, ani ni o mògò jugu ma i jira fòlò, o halakiden kòni. 4 Fèn o fèn bè wele Ala, fèn o fèn bè bato, a na o kèlè ka a yèrè bonya o kun na, fo ka i sigi Alabatosoba kònò ka a yèrè jira ko ale de ye Ala ye. 5 Aw hakili t'a la ko, ka ne to aw fè yen, ne ye o fò aw ye wa? 6 Min b'a bali sisan, walisa a kana i jira sani a waati ka se, aw bè o dòn. 7 O tilenbaliya gundo bè baara kè halibi, nka min b'a bali sisan, o na a bali fo o ka ta ka bò yen. 8 O tuma la o mògò jugu na i jira, nka Matigi Yesu na o jeni ni a yèrè dafiɲè ye ka a halaki ni a jirali manamana ye. 9 O mògò jugu bè na ka kèɲè ni Sitanè ka baarakè cogo ye ni kabako sifa bèè kèli ye ani taamashyèn ni koba nkalonmaw, 10 ani tilenbaliya ka lafilili bèè ye fana, mògò halakitòw kosòn, katuguni u ma sòn tiɲè ma k'a kanu, o min tun bèna u kisi. 11 O de kosòn Ala bè lafililiba barikama ci u ma fo u ka da nkalon na, 12 walisa minnu ma da tiɲè la, nka tilenbaliya ko diyara u ye, kiri ka tigè olu bèè kan. 13 Balimaw, Matigi ka kanulenw, an ka kan ka barika da Ala ye tuma bèè aw kosòn, k'a masòrò Ala ye aw ɲènatòmò kisili kama kabini fòlòfòlò, Ni Senu ka saniyali barika la ani aw ka dannaya tiɲè la. 14 Ala ye aw wele o kisili kama an ka Kibaru Duman fè, walisa aw ka an Matigi Yesu Krisita nòòrò sòrò. 15 Ayiwa balimaw, aw sinsinnen ka to. Aw ye laadili minnu sòrò an ka kuma wala an ka sèbèn barika la, a' ye olu minè kosèbè. 16 An Matigi Yesu Krisita yèrè ani an Fa Ala min ye an kanu ka dusu saaloli banbali ni jigi ɲuman di an ma a ka nèèma barika la, 17 o ka aw dusu saalo ka aw barika bonya kèwale ɲumanw bèè ni kuma ɲumanw bèè la.



3

1 O bèè kò balimaw, a' ye Ala deli an ye, walisa Matigi ka kuma ka jènsèn ka ta'a fè ka bonya, i ko a bè kè aw cèma cogo min na, 2 ani walisa an ka tila mògò jugu tilenbaliw la, k'a masòrò mògòw bèè tè dannaya kè. 3 Nka Matigi ye kantigi ye, ale na aw sabati ka aw tanga Sitanè ma. 4 An ye aw bila ko min na, an jèyalen bè a la Matigi la ko aw bè o kè, ko aw na to ka o kè fana. 5 Matigi ka aw dusukun sin Ala ka kanuya ni Krisita ka muɲuli ma. 6 Balimaw, an bè nin fò aw ye k'a gèlèya Matigi Yesu Krisita tògò la ko balima minnu bè taama pirikiparaka la, ni u tè taama ka kèɲè ni an ka laadili ye, aw ka aw mabò olu la. 7 Aw ka kan ka an ladege cogo min na, aw yèrèw y'o dòn, katuguni an ma taama pirikiparaka la aw cèma. 8 An ma dumuni kè mògò si ka so gansan, nka an tun bè baara kè ka an sègèn su fara tile kan, walisa an kana kè aw si ka doni ye. 9 O kun tè ko o jo tè an fè, nka an tun b'a fè ka cogo jira aw la walisa aw ka an ladege. 10 K'an to aw fè yen, an ye nin fò aw ye k'a gèlèya ko: «Ni dò tè sòn ka baara kè, o fana kana dumuni kè fewu.» 11 An y'a mèn ko dòw bè aw cèma minnu bè taama pirikiparaka la. U tè baara kè fewu, u bè u da don kow bèè la. 12 Minnu bè o cogo la kòni, an b'a fò olu ye k'a gèlèya u ma Matigi Yesu Krisita tògò kosòn, ko u ka baara kè koɲuman ka u yèrèw balo. 13 Aw kòni balimaw, aw kana sègèn ko ɲuman kèli la. 14 An bè kalan min di aw ma nin sèbèn na, ni mògò dò ma sòn o ma, aw ka o kòlòsi, aw ni o tigi kana jè foyi la, walisa a ka maloya. 15 O bèè n'a ta aw kana a jate aw jugu ye, nka aw k'a laadi i ko balima dò. 16 Hèrètigi Ala yèrè ka hèrè kè aw ye tuma bèè cogo bèè la. Matigi ka to aw bèè fè. 17 Ne Paul yèrè bolo ye aw foli kumaw sèbèn. Ne b'a sèbèn ten, o de ye taamashyèn ye ne ka sèbènw bèè la. 18 An Matigi Yesu Krisita ka nèèma ka kè aw bèè fè.



AMAZING GRACE BIBLE INSTITUTE