2 Pierre


1

1 Ne Simòn Pierè, Yesu Krista ka jòn ni a ka ciden bè nin sèbèn ci an dannabaaɲògònw ma, olu minnu ye niyòrò sòrò dannaya sèbè la an fè, an ka Ala, an Kisibaa Yesu Krista ka tilennenya barika la. 2 Nèèma ni dususuma ka di aw ma ka caya Ala ni an Matigi Yesu dònniya barika la. 3 Fèn minnu b'a to an bè ɲènamaya ka taama Ala ɲèsiranya la, a ye o bèè di an ma a ka sebaaya Alama barika la, ka kèɲè ni an welebaa dònniya ye, o min ye an wele a yèrè nòòrò ni a ka ɲumaya sòròli kama. 4 A nòòrò ni a ka ɲumaya barika la, a ye layidubaw ta an ye minnu ka fisa fèn bèè ye. A ye o kè walisa aw ka kisi diɲè la nege juguw ka tolilenya ma, ka niyòrò sòrò Alamaya la o layiduw barika la. 5 O de kosòn a' ye aw jija kosèbè ka ɲumaya fara aw ka dannaya kan, ka dònniya fara ɲumaya kan, 6 ka yèrèminèli fara dònniya kan, ka muɲuli fara yèrèminèli kan, ka Ala ɲèsiran fara muɲuli kan, 7 ka balima kanuya fara Ala ɲèsiran kan, ka kanuya fara balima kanuya kan. 8 Ni o fènw bè aw la ka caya, olu n'a to aw kana kè salabaatòw ye wala nafantanw an Matigi Yesu Krisita dònniya la. 9 Nka o fènw tè min kònò, o tigi tè yòrò jan fèn ye, a fiyennen don. A ɲinèna a ka jurumu kòròw saniyali kò. 10 O de kosòn balimaw, a' ye aw jija ka aw weleli ni aw ɲènatòmòli ko sabati ka ta'a fè. Ni aw bè to ka o kè, aw sen tèna talon fewu. 11 O cogo la an Matigi ni an Kisibaa Yesu Krisita ka badaa masaya donni labilalen don aw ye. 12 O de y'a to ne na to ka aw hakili jigin o kow la tuma bèè, hali k'a sòrò aw bè u dòn ka kòrò. Tiɲè kuma min sera aw ma, aw sinsinnen bè o la fana. 13 Nka ne bè miiri ko ka ne ɲènama to, a ka ɲi ne ka aw jija ni ne ka hakili jigin kumaw ye ko aw ka to aw ɲè na. 14 K'a masòrò ne y'a dòn ko ne bèna bò nin farikolo bugu kònò sòòni, i ko an Matigi Yesu Krisita y'a jira ne la cogo min na. 15 O de kosòn ne na cogo bèè kè walisa ne taalen kò, aw ka se ka aw hakili to o kow la tuma bèè. 16 An ye an Matigi Yesu Krisita ka sebaaya ni a nali ko fò aw ye tuma min na, an ma tugu nsiirinw na minnu bòra mògòw hakili la ka kèɲè ni u ka keguya cogo ye, nka an y'a bonyaba ye an yèrèw ɲèw la. 17 A ye bonyaba ni nòòrò sòrò Fa Ala fè tuma min na, o tuma la kan bòra nòòrò ni bonyabatigi yòrò la k'a fò a ye ko: «Nin ye ne Denkè kanulen ye, a ko ka di ne ye haali.» 18 An yèrèw ye o kan mèn ka bò sankolo la k'an to a fè kulu senuma kan. 19 O kow bèè y'a jira an na k'a jèya ko kiraw ka kuma ye tiɲè de ye. Ni aw bè aw janto o la, o na kè ko ɲuman ye, k'a masòrò o kuma bè i ko lanpa min bè yeelen bò dibi la, sani dugu ka jè, fo kènèbòda dolo ka manamana aw dusuw la. 20 Aw ka a dòn fòlò ko mògò si tè se ka Kitabu kiraya kumaw kòrò dòn a yèrèma, 21 katuguni kiraya kuma si ma na mògò sago la abada, nka Ala ye a ka kuma min di mògòw ma, u kumana ka o fò Ni Senu de barika la.


2

1 Kira nkalontigèlaw tun bè mògòw cèma ka kòrò cogo min na, karamògò nkalontigèlaw na kè aw fana cèma ten. U na farali kow don aw cèma dogo la minnu bè mògòw bila halakili la. Matigi min ye u kunmabò, u na u dalacè o la ka halaki bin u yèrèw kan joona. 2 Mògò caman na tugu u ka kakalaya ko dama tèmènnenw na, fo tiɲè sira tògò na tiɲè olu kosòn. 3 U na aw kè jago kun ye ni u ka lafilili kumaw ye wasabaliya kosòn, nka u jalakili bè sen na kabini tuma jan, u halakili tè sunògò. 4 Mèlèkè minnu ye jurumu kè, Ala ma hinè olu la, nka a ye u fili jahanama dingè dunba dibimaw kònò, ka u sirilen mara yen kiri don kama. 5 A ma hinè diɲè kòrò fana la, ni a ye ji belebeleba lana o diɲè mògòw Ala ɲèsiranbaliw kan tuma min na, nka a ye mògò segin kisi, Nuhun ni a so mògòw, ale tun bè tilennenya ko waajuli kè. 6 A ye Sodòmè ni Gomòrè duguw jeni ka u halaki ka kè bugurijè ye, ka u kè ɲèjirali ye Ala ɲèsiranbali nataw la. 7 Nka a ye Lòti tilennen kisi, o min tun tòòròla kosèbè o kojugukèlaw ka kakalaya kosòn, 8 k'a sòrò o cè tilennen sigilen tun bè u cèma. A tun bè u ka tilenbaliya ko minnu ye ka u mèn, olu tun b'a dusukun tilennen tòòrò don o don. 9 O bèè b'a jira ko Matigi bè se ka Ala ɲèsiranbaaw tila kòròbòli la, ka kojugukèlaw mara kiri don ɲè tòòrò kama, 10 janko minnu bè tugu u farisogo nòfè ka kèɲè ni u ka nògòlenya negew ye, ka kuntigiya lagosi. O karamògò nkalontigèlaw faratilen bè, yèrèsagokèlaw don. U tè siran ka sankolo fangatigiw neni. 11 Hali mèlèkèw, olu minnu barika ni u fanga ka bon ni o mògòw ta ye, olu tè o fangatigiw jalaki ka u tògò tiɲè Matigi ɲè kòrò. 12 Nka o karamògòw bòlen bè bagan hakilintanw fè, olu minnu bange kun ye u minèli ye ka u faga. O mògòw tè ko minnu dòn, u bè olu lagosi. O de kosòn u na halaki u yèrèw ka tolilenya fè. 13 U ye tilenbaliya ko minnu kè ka mògòw tòòrò, u na sara o bòɲògònko tòòròw de la. Tile fè kakalaya ka di u ye. Ka u to dumuni la aw fè, u bè u yèrèw ɲènajè u ka filili kow la, ka aw ka dumuni kow nògò ni u ka malobaliya kow ye. 14 U ɲèw falen bè jatòya la. U tè wasa ko jugu kèli la. U bè mògò dusu sigibaliw nègèn. U dusukunw tè miiri foyi la ni wari ko tè. U dangalen bè. 15 U ye sira tilennen bila. U filila ka tugu Bosòr denkè Balam ka sira la, a diyara o min ye ka tilenbaliya ko kè sara kosòn, 16 nka a kòròfòra a ka kan bilali kosòn, fo falimuso dantan kumana ni mògòkan ye ka o kira ka hakilintanya lajò. 17 O mògòw ye ji boyi jalenw ye, ani sankaba ɲòninenw fiɲèba fè. Dibi fin maralen bè u ɲè. 18 U bè u yèrèbonya kuma fufafuw de fò. Minnu tilara ka bò filili sira taamabaaw bolo ni a ma mèn fòlò, u bè olu nègèn ni farisogo negew ni kakalaya kow ye. 19 U b'a fò ko u bè olu hòrònya, k'a sòrò u yèrèw ye tolilenya kow ka jònw ye, katuguni fèn o fèn mana se sòrò mògò kan, a ye o de ka jòn ye. 20 Tiɲè la, mògò minnu tilara ka bò diɲè ka ko nògòlenw bolo an Matigi ni an Kisibaa Yesu Krisita dònniya barika la, ni o kow ye u minè tun ka se sòrò u kan, o tigiw laban cogo ka jugu ni u fòlò ta ye. 21 Ci senuma min fòra u ye, o dònnen kò u fè, ni u jèngèna ka o bila, tiɲè sira dònbaliya tun ka fisa u ma ni o ye. 22 Ntalen min dara ko: «Wulu seginna a fòònò kan,» ani «Lèmuso kolen seginna a kolonkolon bòrògò la,» o kèra tiɲè ye u ko la.


3

1 Ne balima kanulenw, nin ye ne ka sèbèn filanan ye ka ci aw ma. Ne bè aw hakili jigin ko dòw la o sèbèn fila bèè kònò, walisa aw ka miirili sèbè kè. 2 Kuma minnu fòra ka kòrò kira senumaw fè, ani an Matigi ni an Kisibaa ka ci min fòra aw ye a ka cidenw fè, aw ka aw hakili to olu la. 3 Aw k'a dòn fòlò ko: Nparabòlaw bè na laban donw na ni u ka npara bòliw ye. U na taama ka kèɲè ni u yèrèw nege juguw ye. 4 U n'a fò ko: «A nali layidu bè min? Kabini an bènbaw sara, fèn bèè bè a cogo la i ko a tun bè cogo min na kabini diɲè da tuma.» 5 U t'a fè k'a to u kònò ko sankolow ni dugukolo minnu tun bè yen ka kòrò, ko olu dara Ala ka kuma barika la, ko o dugukolo bòra ji la ka dila ni ji ye, 6 ko o diɲè kòrò halakira ji fè, tufane ji kòni. 7 Nka sankolo ni dugukolo sisanlama maralen bè halakili kama ni tasuma ye Ala ka o kuma kelen barika la. Kiri na tigè Ala ɲèsiranbaliw kan ka u halaki don min na, u maralen bè o don kama. 8 Nka aw kana ɲinè nin ko kelen kò, ne balima kanulenw, ko: Tile kelen bè Matigi ɲè na i ko san waa kelen. San waa kelen fana bè a ɲè na i ko tile kelen. 9 Matigi ye layidu min ta, a tèna mèn ni a ma o dafa, i ko dòw bè miiri cogo min na, nka a bè muɲuli kè aw kosòn. A t'a fè mògò si ka halaki, a b'a fè bèè ka nimisa u ka jurumuw la. 10 O bèè n'a ta, Matigi ka don bè na i ko nson. O don na, sankolow na tèmèn ka ban ni mankanba ye. Tasumaba na u kònò fènw minè ka u yeele. Dugukolo fana ni a kan fènw bèè na jeni ka u ban. 11 Ni o fènw bèè na yeele ten, aw ka kan ka kè mun sifa mògò ye taama senuma ni Ala ɲèsiran na? 12 Aw ka Ala ka don ɲènafilè kosèbè, ka aw se ko bèè kè walisa a ka na joona. O don na, tasuma na sankolo minè ka a jeni, ka a kònò fènw fana yeele. 13 Nka an bè sankolo kura ni dugukolo kura makònò ka kèɲè ni Ala ka layidu ye, tilennenya na sigi olu kònò. 14 O de kosòn, ne balima kanulenw, ka aw to o kow makònòli la, a' ye aw jija walisa aw jèlen jalakibaliw ka sòrò ale ɲè kòrò hèrè la. 15 A' ye aw hakili to a la ko an Matigi ka muɲuli ye aw kisili ye, i ko an balimakè kanulen Paul y'a fò aw ye a ka sèbèn la cogo min na, ka kèɲè ni hakilitigiya dilen ye a ma Ala fè. 16 A bè o ko fò a ka sèbènw bèè kònò yòrò minnu na, a b'a fò o cogo kelen na. A ka sèbèn kònò kuma dòw faamuli ka gèlèn, fo mògò ko dònbali dusu sigibaliw bè u kòrò tònòmi, i ko u b'a kè Kitabu kuma tòw la cogo min na, ka u yèrèw halaki. 17 Aw kòni, balima kanulenw, aw lasòmilen don. O de kosòn, a' ye aw yèrèw kòlòsi, mògò juguw ka fililiw kana aw sama fo ka aw senw bò u yòrò ɲuman la. 18 Nka a' ye to ka taa ɲè an Matigi ni an Kisibaa Yesu Krisita ka nèèma ni a dònniya la. Nòòrò ka da ale kan sisan ni badaa-badaa. Amiina.



AMAZING GRACE BIBLE INSTITUTE