2 Corinthiens


1

1 Ne Paul, Krisita Yesu ka ciden Ala sago barika la ani an balimakè Timote bè nin sèbèn ci Ala ka egilisi ma Kòrènte, ani Ala ka mògò senuma minnu bèè bè Akayi jamana yòrò bèè la. 2 An Fa Ala ni Matigi Yesu Krisita ka nèèma ni dususuma di aw ma. 3 An Matigi Yesu Krisita Fa Ala ka tanu, o min ye makari Fa ni dusu saaloli bèè tigi Ala ye. 4 Ale de bè an dusuw saalo an ka tòòròw bèè la, walisa minnu bè tòòrò sifa o sifa la, an yèrèw ye dusu saaloli min sòrò Ala fè, an ka se ka olu dusuw saalo ni o ye. 5 An bè Krisita ka tòòrò bòɲògònko caman sòrò cogo min na, o cogo la fana an bè dusu saaloliba sòrò Krisita fè. 6 Ni an tòòròla, o bè kè aw dusu saaloli ni aw kisili kama. Ni an dusu saalola, o bè kè aw dusu saaloli kama, walisa an bè tòòrò minnu sòrò, aw ka se ka barika sòrò ka o bòɲògònko tòòròw muɲu. 7 An jigi sigilen don aw ta fan fè, k'a masòrò an b'a dòn ko aw bè niyòrò sòrò an ka tòòròw la cogo min na, aw niyòrò na kè dusu saaloli fana la ten. 8 Ayiwa balimaw, an ye tòòrò minnu sòrò k'an to Asi jamana la, an t'a fè aw ka to olu dònbaliw ye. O tòòròw doni girinyara an ma kosèbè fo ka tèmèn an barika dan kan, fo an jigi tun tigèra ko an tèna balo tun. 9 An tun bè miiri ko an saya ko latigèra, walisa an kana an jigi da an yèrèw kan, fò Ala kan, o min bè suw lakunun. 10 Ale de ye an tila o sayaba la, a na an tila, òwò, an jigi b'a kan ko a na an tila ko kura fana. 11 Aw fana bè an dèmè ni aw ka Ala deliliw ye an ye, walisa Ala ye nilifèn min di an ma mògò caman ka deliliw kosòn, o k'a to mògò caman ka barika da Ala ye an kosòn. 12 An bè se ka an yèrèw bonya ko min na, o filè nin ye ko: An dusukun ye an seere ye ko an ye taama cogo min kè diɲè la, janko aw ɲè na, o kèra ni jèlenya ni sèbèya ye ka bò Ala la. O ma kè ni mògò ka hakilitigiya ye, nka o kèra Ala ka nèèma barika la. 13 An fana tè foyi sèbèn ka ci aw ma fò aw bè se ka min kalan k'a faamu. Ne jigi b'a kan fana ko aw na nin faamu ka dafa, 14 i ko aw b'a faamu dòònin sisan ko Matigi Yesu ka don na, anw na kè aw yèrèbonya sababu ye, i ko aw na kè an yèrèbonya sababu ye cogo min na. 15 Ne jigi tun b'a kan kosèbè, o de y'a to ne tun y'a latigè fòlò la ka taa aw yòrò walisa aw ka duba fila sòrò. 16 O kòrò, ne tun y'a latigè ko ne taatò Masedwanè jamana la, ne na tèmèn aw fè. O kò, ne kòsegintò na se aw fè yen, walisa ni ne bè taa Jude jamana la tuma min na, aw ka taa ne bilasira. 17 Ne ye nin ko latigè tuma min na, yala ne hakili sigilen tun tè wa? Ne bè ko minnu latigè, yala ne bè o kè ka kèɲè ni nin diɲè mògòw cogo ye wa? fo ne b'a fò òwò, òwò, ni ayi, ayi, yòrònin kelen na wa? 18 Nka Ala ye kantigi ye cogo min na, an ye kuma min fò aw ye, o tun tè òwò ni ayi ye yòrònin kelen na. 19 K'a masòrò Ala Denkè Yesu Krisita min ko fòra aw ye ne ni Silvèn ni Timote fè, o tun tè òwò ni ayi ye, nka ale ta ye òwò ye tuma bèè. 20 Ala ka layiduw bèè ye òwò ye Krisita la. O de kosòn an bè amiina fò ale barika la fana ka Ala tanu. 21 Min bè anw ni aw sabati ɲògòn fè Krisita la ka an bila an dan na a yèrè ye, o ye Ala ye. 22 Ale yèrè ye a ka taamashyèn da an kan fana ka Ni Senu di an ma ka sigi an dusukunw na ka kè fòlò fèn ye hèrè nata ko la. 23 Ne bèna min fò, Ala ka kè ne seere ye ne ni kama ni ne ma tiɲè fò. O filè nin ye ko aw hinè de y'a to ne ye ne ka Kòrènte taali dabila. 24 O tè ko an ye aw kuntigiw ye dannaya ta fan fè, k'a masòrò aw ka dannaya sabatilen don, nka an bè baara kè aw fè aw ka ɲagali kama.


2

1 O de kosòn ne y'a latigè ne yèrè kònò ko ne ɲènasisilen tèna segin ka taa aw yòrò. 2 K'a masòrò ni ne bè aw ɲènasisi, jòn na kè ne nisòndiyabaa ye, fò ne ye aw minnu ɲènasisi? 3 Ne ye o sèbèn ci, katuguni ne tun bè siran ko ne mana se aw fè yen, ne ka kan ka nisòndiya minnu kosòn, ne kana ɲènasisi olu kosòn. Ne jigi bè aw bèè kan ko ne nisòndiya ko ye aw fana ta ye. 4 Ne dusu kasilenba ni ne hakili ɲaaminen ni ne ɲèji caman bòtò ye o lètèrè sèbèn. Ne ma o kè ka aw ɲènasisi, nka ne ye o kè walisa ne bè aw kanu kosèbè cogo min na, aw ka o dòn. 5 Ni mògò dò ye ɲènasisi ko kè, o ma ne ɲènasisi. A ye aw bèè ɲènasisi dòònin. Ne bè o fò walisa ne kana gèlèya ka dama tèmèn. 6 Aw caman ye jalaki min bin o cè kan, o b'a bò. 7 Sisan kòni, aw ka kan ka yafa a ma k'a dusu saalo, walisa a jigi kana tigè ɲènasisi dama tèmènnen fè. 8 O de y'a to ne bè aw deli ko aw k'a jira a la ko aw b'a kanu. 9 Ne ka sèbèn ci kun dò fana tun ye nin ye, ka aw kòròbò k'a filè yala ni aw bè ne kan minè ko bèè la. 10 Ni aw bè ko dò yafa mògò dò ma, ne fana bè o yafa a ma. Ni ne ye ko dò yafa dò ma, ne ye o yafa aw de kosòn Krisita ɲè kòrò, 11 walisa Sitanè kana se sòrò an kan, k'a masòrò an bè a ka ko kètaw kala ma. 12 Ne sera Troas Krisita Kibaru Duman fòli kama tuma min na, ne y'a sòrò ko Matigi ye da yèlè ne ɲè yen. 13 Hali o, ne dusukun ma lafiya si sòrò, katuguni ne ma an balimakè Tite sòrò yen. O de y'a to ne ye ne sara u la ka bò yen ka taa Masedwanè jamana la. 14 Barika Ala ye, ale bè an kè se sòròbaaw ye tuma bèè Krisita la, ka an kè Krisita dònniya jirabaaw ye yòrò bèè, i ko tulu suma duman suma bè se yòrò bèè la cogo min na. 15 Katuguni an kèra Krisita suma duman ye Ala ye kisilenw ni halakibaatòw ko la. 16 Mògò dòw ko la, an ye saya suma ye saya kama. Dò wèrèw ko la, an ye ɲènamaya suma ye ɲènamaya kama. Jòni bè se ka o kow kè ka dafa? 17 Mògò caman bè Ala ka kuma kè jago fèn ye. An kòni tè olu dòw ye, nka an cilen don Ala fè, o de kosòn an bè kuma ni jèlenya ye Krisita la Ala ɲè kòrò.


3

1 An b'a daminè ko kura ka an yèrèw tògò ɲuman fò wa? Yala an mago b'a la ka sèbèn dòw di aw ma minnu bè an tògò ɲuman fò i ko dòw b'a kècogo min na wa, wala ka o ɲògòn sèbèn sòrò ka bò aw fè yen? 2 Aw yèrèw ye an tògò ɲuman fò sèbèn ye min sèbènnen bè an dusukunw la. Mògòw bèè bè o kònòna ko dòn k'a kalan. 3 Owò, a jèlen don ko aw ye Krisita ka lètèrè sèbènnen ye an bolo fè. O ma sèbèn ni lankiri ye, fò Ala ɲènama Ni. O ma sèbèn kabakurun walahaw kan, fò mògòw dusukun walahaw kan. 4 An jigi sigilen bè o ko la Krisita barika la Ala ɲè kòrò. 5 O tè ko an bè miiri ko an bè se ka o baara kè an yèrèw barika la, nka an ka se bè bò Ala de la. 6 Ale de ye se di an ma fana ka kè layidu kura baarakèlaw ye. Sariya sèbènnen ta tè, fò Ni Senu ta, k'a masòrò saya bè bò sariya sèbènnen na, nka Ni Senu bè ɲènamaya di. 7 Sariya min ɲègènna kabakurunw kan ni sèbèndenw ye, saya bòra o la. O bèè n'a ta Ala nòòrò y'i jira o waati la. Musa ɲèda tun manamanana fo Israèl mògòw ma se ka u ɲèw jò a la, nka o nòòrò tun ye nòòrò banta ye. Ni sariya ka baara jirala ni Ala nòòrò ye, hali k'a sòrò saya bòra o la, 8 Ni Senu ka baara tèna i jira ni Ala nòòrò ye ka tèmèn o kan wa? 9 Baara min bè jalakili kè, ni nòòrò tun bè o la, baara min bè tilennenya di, o nòòrò na bonya ka tèmèn dò ta kan kosèbè. 10 Ka kèɲè n'o ye, o nòòrò tèmènnen tè foyi ye, sabu nòòrò dò wèrè nana min ka bon ni o ye kosèbè. 11 Ni nòòrò tun bè fèn banta la, fèn banbali nòòrò na bonya o ta ye kosèbè. 12 O jigi ɲuman bè an fè, o de y'a to an bè kuma ni ja gèlèya ye ka a jèya. 13 An t'a kè i ko Musa. Ale ye fini biri a ɲèda la, walisa Israèl mògòw kana a nòòrò banta laban ye, 14 nka u hakiliw gerenna. Halibi, ni u bè Layidu Kòrò Kitabuw kalan tuma min na, o fini birilen bè u hakili la, a ma bò yen, katuguni a bè bò Krisita de barika la. 15 Halibi, ni u bè Musa ka Kitabuw kalan tuma o tuma, o fini birilen bè u hakili la. 16 Nka «Ni mògò dò bè yèlèma Matigi fan fè, o fini birilen bè bò yen.» 17 Ayiwa, Matigi min ko bè fò yan, o ye Ni Senu de ye. Matigi Ni bè yòrò min na, hòrònya fana bè yen. 18 Fini birilen tè an ɲèda la, o de y'a to an bèè bè Matigi nòòrò lajè ka o nòòrò jira i ko mògò bè fèn lajè dubalen na cogo min na. An bè yèlèma o fè ka kè Matigi bòɲògònko ye. An bè bò nòòrò dò la ka se nòòrò dò wèrè ma, o bè kè Matigi Ni barika la.


4

1 Ala makarila an na ka an bila nin baara la, o de kosòn an tè sègèn. 2 Maloya ko minnu bè kè dogo la, an banna olu bèè ma. An tè taama ni keguya ye. An tè Ala ka kuma yèlèma, nka an bè tiɲè fò k'a jèya, walisa mògòw bèè kelen-kelen dusukun ka an tògò ɲuman fò Ala ɲè kòrò. 3 O bèè n'a ta, ni an ka Kibaru Duman dogolen bè, a dogolen bè halakibaatòw de la. 4 Olu tè dannaya kè katuguni nin diɲè batofèn ye u hakiliw fiyen, walisa Krisita min ye Ala ja ye, ale nòòrò Kibaru Duman kènè kana yeelen bò u ye. 5 An tè an yèrèw ko waajuli kè. An bè Krisita Yesu ko waajuli kè ko ale ye Matigi de ye, ko an ye aw ka baaradenw ye Yesu kosòn. 6 Ala, o min y'a fò ko kènè ka bò dibi la, ale de ye kènè bò an dusukunw na, walisa Ala nòòrò min bè ye Krisita ɲèda la, o dònniya ka di an ma ka kènè bò an ye. 7 An minnu ye bògò minènw ye, o nafoloba bè sòrò an kònò, walisa mògòw k'a ye ko o sebaaya dama dònbali bè bò Ala la, ko o tè bò an na. 8 An bè tòòrò cogo bèè la, nka an ma dèsè. An hakili ɲaaminen don, nka an jigi ma tigè. 9 Tugu kèra an nòfè ka an tòòrò, nka Ala ma an bila. An gosira ka bin duguma, nka an ma sa. 10 An bè Yesu saya ko jira an farikolo la tuma bèè, walisa a ka ɲènamaya ka i jira an farikolo la fana. 11 An ka diɲè latigè la, an bè saya da la tuma bèè Yesu kosòn, walisa Yesu ka ɲènamaya fana ka i jira an farikolo sata la. 12 O cogo la, saya bè baara la an kònò, nka ɲènamaya bè baara la aw kònò. 13 Kitabu b'a fò ko: «Ne ye dannaya kè, o de y'a to ne kumana.» An fana ye dannaya kè ni o dannaya dusu kelen ye, o de kosòn an bè kuma. 14 An y'a dòn ko min ye Matigi Yesu lakunun ka bò suw cèma, o na an fana lakunun Yesu fè ka an ni aw ladon a yèrè ɲè kòrò ɲògòn fè. 15 O kow bèè kèra aw kosòn, walisa Ala ka nèèma bè bonya mògò caman na ka ta'a fè cogo min na, o k'a to mògò caman ka barika da Ala ye ka nòòrò da a kan. 16 O de y'a to an tè sègèn. Hali k'a sòrò an farikolo bè tiɲè, an ni bè kuraya don o don. 17 An ka waatinin tòòrò fiɲèma bè nòòròba dama dònbali labèn an ye, a banbali don. 18 K'a masòrò an ɲèw jòlen tè fèn yetaw la, u jòlen bè fèn yebaliw de la. Fèn yetaw bè waati dòònin dòròn de kè, nka fèn yebaliw ye badaa fènw de ye.


5

1 An sigilen bè bugu min kònò dugukolo kan, an farikolo kòni, ni o binna, Ala ye so di an ma sankolo la, mògò bolo ma min jò. Sigi yòrò banbali don. 2 K'an to nin bugu kònò yan, an bè èunan, k'a masòrò an b'a fè kosèbè ka don o sankoloso kònò, i ko mògò bè fini don a kan na cogo min na. 3 Ni an ye o don an na, an fari lankolon tèna sòrò. 4 Owò, k'an to nin bugu kònò, an bè èunan, an doninen don. A tè ko an b'a fè ka an farikolo dugukoloma bò an na, nka an b'a fè ka sankolo la ta don an na, walisa ɲènamaya ka fèn sata ban. 5 Min ye an dila o ko yèrè kama, o ye Ala de ye. Ale ye Ni Senu di an ma ka kè hèrè nata fèn fòlò ye. 6 O de kosòn an ja gèlèyalen don tuma bèè. An b'a dòn ko k'an to nin farikolo la, an yòrò ka jan Matigi la. 7 An bè taama dannaya barika la, yeli barika tè. 8 An ja gèlèyalen don. An b'a fè ka bò nin farikolo la ka taa sigi Matigi fè, o de ka fisa. 9 Nka fèn bèè ɲè, ni an tora nin farikolo la wo, ni an bòra a la wo, an b'a fè an ko ka diya Matigi ye. 10 Katuguni wajibi don an bèè ka jò Krisita ɲè kòrò a ka kiri tigè yòrò la, walisa mògòw bèè kelen-kelen ye min kè k'a to farikolo la, ko ɲuman wo, ko jugu wo, a ka o sara sòrò. 11 Siranba min ka kan ka kè Matigi ɲè, an bè o dòn, o de kosòn an bè mògòw lasòmi ka u deli. Ala bè an cogo dòn kosèbè. Ne jigi b'a kan ko aw fana bè an cogo dòn aw dusukunw na. 12 An tè an yèrèw tògò ɲuman fò aw ye ko kura, nka an bè cogo di aw ma ka aw yèrèw bonya an ko la, walisa minnu tè u yèrèw bonya dusukun kow la, fò kòkanna kow la, aw ka se ka olu jaabi. 13 Ni a y'a sòrò an hakili wulila, o kèra Ala de kosòn. Nka ni an hakili sigilen don, o kèra aw de kosòn. 14 K'a masòrò Krisita ka kanuya bè an jija. An y'a dòn ko ni mògò kelen sara bèè nò na, mògòw bèè fana sara. 15 Ale sara bèè nò na, walisa minnu ɲènama don, olu kana ɲènamaya u yèrèw ye tun, nka min sara u nò na ka kunun, u ka ɲènamaya o de ye. 16 O de kosòn, an tè mògò si jate ka kèɲè ni mògòya cogo ye tun. Hali ni an tun bè Krisita jate ka kèɲè ni a ka mògòya cogo ye, an t'a jate o cogo la sisan tun. 17 O de y'a to ni mògò dò bè Krisita la, a kèra dafèn kura ye. Fèn kòròw tèmènna. A filè, fèn bèè kèra kura ye. 18 O bèè bòra Ala de la. Ale de ye an ni a yèrè cè bèn Krisita barika la. A ye o cè labènni baara di an ma ale ni mògòw cè. 19 Katuguni Ala tun bè baara kè Krisita la ka mògòw ni a yèrè cè bèn. A ma u ka hakèw jate u kun. A ye o cè labènni waajuli baara kalifa an ma. 20 O de kosòn an ye Krisita ka lasigidenw ye ka kuma a nò na. A bè i ko Ala bè waajuli kè an da la. An bè aw deli Krisita tògò la ko aw ka sòn aw ni Ala cè ka bèn. 21 Krisita min tun ye jurumu dònbali ye, Ala ye o kè jurumu ye an kosòn, walisa an ka kè Ala ka tilennenya ye ale la.


6

1 O de kosòn, an minnu ye Ala baarakèɲògònw ye, an bè aw deli ko aw ye Ala ka nèèma min sòrò, aw kana sòn o ka kè fu ye, 2 katuguni Ala ko: «Ne ye i ka delili lamèn ne diyaɲe waati la. Ne ye i dèmè kisili don na.» A filè, Ala diyaɲe waati ye sisan de ye. A filè, bi ye kisili don de ye. 3 An tè kunnatiɲèni sababu di mògò si ma ko si la, walisa an ka baara kana jalaki. 4 Nka an b'an yèrèw jira ko an ye Ala ka baarakèla ɲumanw ye fèn bèè la. An b'a jira ni muɲuliba ye tòòrò kow ni bònèba ni sègèn kow la. 5 An bè bugò, an bè bila kaso la, balawu bè wuli an kama. An bè baara gèlènw kè, an bè tòòrò sunògòbaliya ni kòngò fè. 6 An b'an yèrèw jira Ala ka baarakèlaw ye ni jèlenya ye, ani dònniya ni sabali ni ɲumaya ye Ni Senu barika la, ni kanuya sèbè ye. 7 An bè o jira ni tiɲè kuma ye, ani Ala ka sebaaya. An bè tilennenya kè an ka kèlèkè minènw ye an kininbolo ni an numanbolo la. 8 An bè bonya, an bè dògòya fana. An tògò jugu bè fò, an tògò ɲuman bè fò fana. An bè jate mògò lafilibaaw ye, k'a sòrò an ye tiɲètigiw de ye, 9 i ko an dònnen tè, k'a sòrò an dònnen bè kosèbè, i ko mògò satòw, k'a sòrò an ɲènama filè, i ko gosilenw, nka an ma faga, 10 i ko ɲènasisilenw, o bèè n'a ta an bè ɲagali tuma bèè, i ko faantanw, k'a sòrò an bè mògò caman fèntigiya, i ko bolo lankolonw, k'a sòrò fèn bèè ye an ta ye. 11 Anw balima Kòrèntekaw, an bè tiɲè de fò aw ye. An dusu dayèlèlen don aw ta fan fè. 12 An ma aw degun, nka aw yèrèw ka kanuya ka dògò. 13 Ayiwa sisan, ne bè kuma aw fè i ko ne denw, aw ka an naamu laminè ka aw ka kanuya bonya an ta fan fè. 14 Aw kana don dannabaliw fè u ka tònnajiri bènbaliw kòrò. Jè jumèn bè tilennenya ni juguya cè? Kènè ni dibi fana bè se ka jè cogo di? 15 Bèn jumèn bè Krisita ni Sitanè cè? Jèɲògònya jumèn bè dannabaa ni dannabali cè? 16 Bèn cogo jumèn bè Alabatosoba ni boliw cè? Anw ye Ala ɲènama batosoba de ye, i ko Ala y'a fò cogo min na ko: «Ne na sigi u cèma ka taama u fè. Ne na kè u ka Ala ye, u na kè ne ka mògòw ye.» 17 O de kosòn Matigi ko: «A' ye bò u cèma ka fara u la. Aw kana maga fèn saniyabali si la. Ni aw ye o kè, ne na sòn aw ma. 18 Ne na kè aw fa ye, aw na kè ne denkèw ni ne denmusow ye. Matigi Sebaayabèètigi ye o fò.»


7

1 O layiduw tara an ye, balima kanulenw. O de y'a to an ka an saniya farisogo nògòlenya ani dusukun nògòlenya bèè ma, ka saniyali dafa ni Ala ɲèsiran ye. 2 A' ye sòn an ma! An ma mògò si tòɲò. An ma mògò si tiɲè. An ma an yèrèw fèntigiya ni mògò si ka fèn ye. 3 Ne tè o fò ka aw jalaki, k'a masòrò ne y'a fò ka ban ko aw kanuya bè an na fo an ni aw bè ɲènamaya ɲògòn fè ka sa ɲògòn fè. 4 Ne dalen bè aw la kosèbè. Ne bè aw tògò ɲuman fò kosèbè. Ne dusu saalola fo ka ne wasa. K'an to an ka tòòròw bèè la, ne ka ɲagali ka bon haali. 5 Tiɲè la, kabini an sera Masedwanè jamana la, an ma lafiya si sòrò, nka an tòòròla an fan bèè la. Kènèma, kèlè kow tun bè yen. An yèrèw dusukunw na, an tun bè siran. 6 Nka Ala, o min bè mògò degunnenw dusuw saalo, o ye an dusu saalo Tite nali fè. 7 Ayiwa a nali ko dama tè, nka aw ye Tite dusu saalo cogo min na, o fana ye an dusu saalo. A y'a fò an ye ko ne ɲènafin bè aw la, ko aw ɲènasisira ani aw timinandiyalen bè ne ko la. O ye dò fara ne ka ɲagali kan. 8 Hali ni ne ka sèbèn ye aw ɲènasisi, ne tè nimisa o la, hali k'a sòrò ne tun nimisara o la fòlò, k'a masòrò ne y'a ye ko o sèbèn ye aw ɲènasisi waati dòònin dòròn de kònò. 9 Nka sisan ne bè ɲagali. Ne tè ɲagali aw ɲènasisili kosòn, nka ne bè ɲagali k'a masòrò o ɲènasisili y'a to aw kòseginna ka aw cogo yèlèma. Aw kòni ka ɲènasisili bènna Ala sago ma, fo an ma juguman si lase aw ma. 10 K'a masòrò ɲènasisi min bè bèn Ala sago ma, o de b'a to mògò bè kòsegin k'a cogo yèlèma ka kisili sòrò, a tè nimisa o la, nka diɲè ka ɲènasisi bè na ni saya ye. 11 Aw ka ɲènasisi min bènna Ala sago ma, o nana ni min ye, o filè: Aw ye aw sèbè don o ko la. Aw ye jo ɲini kosèbè. Aw diminna kosèbè. Aw siranna kosèbè. Aw tun b'a fè kosèbè ka ne ye. Aw dusu bèè tun bè o ko la. Aw ye jalakili kè o ko la kosèbè. Aw y'a jira cogo bèè la ko aw jèlen don o ko la. 12 O de kosòn ne ye o sèbèn ci aw ma. A ma ci o kojugukèla kosòn. O ko jugu kèra min na, a ma ci o fana kosòn. Nka a cira walisa an hami min bè aw kònò, o ka jira aw la Ala ɲè kòrò. 13 O de y'a to an dusu saalola. Ka fara an dusu saaloli kan, an ɲagalila kosèbè Tite ka ɲagali kosòn, katuguni aw y'a nisòndiya. 14 Ne tun ye aw tògò ɲuman fò a ye fèn dò la, ne ma maloya o la tun. An ye fèn bèè fò aw ye tiɲè la cogo min na, o cogo la an tun ye aw tògò ɲuman min fò Tite ye, o fana sòròla tiɲè ye. 15 A ka kanuya bonyara aw ta fan fè k'a masòrò a hakili bè to aw bèè ka kan minèli la, ani aw y'a ladon koɲuman ni siran ni yèrèyèrèli ye cogo min na. 16 Ne bè ɲagali, katuguni ne bè se ka ne jigi da aw kan ko bèè la.


8

1 Balimaw, Ala ka nèèma min dira mògòw ma Masedwanè jamana egilisiw la, an bè o ko fò aw ye. 2 Ka yen dannabaaw to kòròbòliba la u ka tòòròw bolo, u ka ɲagaliba de y'a to u ye nili kè kosèbè ni tègè labilali ye, hali k'a sòrò u ka faantanya tun ka jugu. 3 Ne ye u seere ye ko u ye nili kè ka kèɲè ni u se ko ye ni èaniya ɲuman ye, fo ka tèmèn u se ko kan yèrè. 4 Dèmèni min bè ci Ala ka mògò senumaw ma, u y'an deli kosèbè ko an ka sòn u ka niyòrò ta o la. 5 An jigi tun b'a kan ko u bèna min kè, u tèmènna o kan. Fòlò, u ye u yèrèw di Matigi ma. O kò, u ye fèn di an ma ka kèɲè ni Ala sago ye. 6 O de kosòn an fana ye Tite deli ko a ye baara ɲuman min daminè nili ko la aw fè yen, a ka taa aw yòrò ka o dafa. 7 Aw kèra fèntigiw ye fèn bèè la, o kòrò, dannaya la, kuma la, dònniya la, ani timinandiya sifa bèè, ani an kanuya min bè aw la. An b'a fè aw ka kè fèntigiw ye nin nili ko fana la. 8 Ne bè min fò aw ye, o tè ci fòlen ye, nka ne bè mògò wèrèw ka jijali ko fò walisa ka aw ka kanuya kòròbò k'a filè yala ni kanuya sèbè don. 9 K'a masòrò aw bè an Matigi Yesu Krisita ka nèèma dòn, ko ale tun ye fèntigi ye, nka a y'a yèrè kè faantan ye aw kosòn, walisa aw ka fèntigiya a ka faantanya fè. 10 Ne bè ne ka miirili jira nin ko la ko aw ye min daminè kabini salon, a bènnen bè aw ka to o kan ka a dafa. Aw fòlò ye o kèli daminè, o dòròn tè, aw fòlò ye o èaniya jira fana. 11 O de kosòn sisan, a' ye taa ɲè o kèli la k'a dafa, walisa aw ye o ko latigè ni èaniya min ye, aw ka o kè k'a dafa ni o èaniya kelen ye, ka kèɲè ni aw se ko ye. 12 K'a masòrò ni nili èaniya bè mògò la, Ala bè sòn a ma ka kèɲè ni a bolo ta ye, nka fèn min t'a bolo, o sen t'a la. 13 O kòrò tè ko mògò wèrèw dèmèni ka aw yèrèw mago sa, nka walisa bèè ka kèɲè. 14 Sisan kòni, aw fèntigiyara. O de kosòn aw bè se ka faantanw dèmè. Ayiwa ni a y'a sòrò faantanya sera aw ma, k'a sòrò olu fèntigiyara, olu na se ka aw dèmè. O cogo la bèè na kèɲè, 15 i ko a sèbènnen bè Kitabu la cogo min na ko: «Min ye caman cè, o ta tò ma to. Min ye dòònin cè, o ta ma dèsè.» 16 Barika Ala ye k'a masòrò a y'a bila Tite dusu la ka timinandiya aw ko la, i ko an b'a kècogo min na. 17 An ye min ɲini a fè, a sònna o ma. A taara ɲè ni timinandiya ye, fo a yèrè y'a latigè ka taa aw yòrò. 18 Egilisiw bèè bè balimakè min tanu a ka baara ɲuman kosòn Kibaru Duman waajuli la, an bè o ci ka taa Tite fè. 19 O dòròn tè, an bè taama min kè o nili ko la, egilisiw ye ale ɲènatòmò ka taa an fè o la. An bè o taama kè walisa ka nòòrò da Matigi kan ani ka èaniya ɲuman jira mògò wèrèw dèmèni ko la. 20 An bè o niliba ko ɲènabò ten, an bè cogo bèè kè walisa mògò kana an jalaki yòrò sòrò o la. 21 An b'a fè ka ko ɲuman kè Matigi ɲè kòrò, o dama tè, an b'a fè ka o kè mògòw fana ɲè na. 22 An bè an balimakè ci ka taa u fè. An y'a kòròbò ko caman k'a sòrò ko a jijalen don tuma bèè. Nka a jijalen don sisan ka tèmèn fòlò kan a ka dannaya kosòn aw la. 23 Tite kòni ta fan fè, ale ye ne taamaɲògòn ni ne baarakèɲògòn ye aw kosòn. Balima tòw ye egilisi ka cidenw ye, u ye Krisita nòòrò ye. 24 O de kosòn aw k'a jira u la ko aw bè u kanu sèbè la, walisa egilisiw ka o ye, k'a dòn ko jo bè an fè ka aw tògò ɲuman fò.


9

1 Tiɲè la, wajibi tè ko ne ka sèbèn ci aw ma Ala ka mògò senumaw dèmèni ko la, 2 k'a masòrò ne bè aw sago dòn ka ban. Ne ye aw tògò ɲuman fò Masedwanè jamana mògòw ye ko: «Akayi jamana balimaw labènnen bè ka dèmèni di kabini salon.» Aw ka timinandiyali ye balima caman jija. 3 O bèè n'a ta, ne bè an balimakèw ci aw ma, walisa an ye aw tògò ɲuman min fò o ko la, o kana sòrò fu ye. Ne b'a fè aw labènnen ka sòrò, i ko ne tun y'a fò cogo min na. 4 N'o tè, ni Masedwanè mògò dòw taara ne fè aw yòrò k'a sòrò aw ma labèn, an na maloya katuguni an dalen tun bè aw la. O fana na kè aw maloya ko ye! 5 O de kosòn, ne y'a miiri ko ne ka kan ka o balimakèw deli ko u ka taa ne ɲè aw yòrò, walisa aw ye nilifèn min ko fò, u ka o ɲènabò sani ne ka se yen. O n'a jira ko a kèra ni diyaɲe ye, ko o ma kè ni diyagoya ye. 6 Aw k'a dòn ko min bè suman dòònin dan, o na suman dòònin tigè. Min bè suman caman dan, o na suman caman tigè fana. 7 Mògòw bèè kelen-kelen ye min latigè u yèrèw kònò, u ka nili kè ka kèɲè n'o ye. O kèli kana gèlèya u ma, a kana kè ni diyagoya ye, k'a masòrò min bè nili kè ni diyaɲe ye, o tigi de ko ka di Ala ye. 8 Se bè Ala ye ka duba sifa bèè kè aw ye k'a caya, walisa aw magoɲè fènw ka sòrò aw bolo tuma bèè, ko bèè la, ka caya, walisa aw ka jiidi kèwale ɲumanw bèè la, 9 i ko a sèbènnen bè Kitabu la ko: «A y'a tègè labila ka nili kè faantanw la, a ka ɲumaya tèna ban abada.» 10 Ala, o min bè danni si di dannikèla ma, ka dumunifèn fana di a ma, o na danni si caman di aw ma ka o bonya walisa aw ka den caman kè ni aw ka ɲumaya ye. 11 A na aw jiidi ko bèè la, walisa aw ka aw tègèw labila tuma bèè, fo mògò caman ka barika da Ala ye an ka baara fè. 12 K'a masòrò aw bè dèmèni min di, o tè dan Ala ka mògò senumaw mago ɲèli dama ma, nka o n'a to mògò caman ka barika da Ala ye ka ta'a fè. 13 U mana o dèmèni sòrò, u na Ala tanu k'a masòrò aw ka kèwalew kèɲèna ni aw ka dannaya fòlen ye Krisita Kibaru Duman la, ani k'a masòrò aw ye aw tègè labila u yèrèw ani mògòw bèè ye. 14 Ala ye nèèmaba min kè aw ye, o n'a to u ka Ala deli aw ye ka aw kanu kosèbè. 15 Barika Ala ye a ka nili fènba kosòn min ɲògòn tè!


10

1 Ne Paul bè aw deli, ne min majiginlen don ka ne to aw fè, nka ne ja gèlèyalen don aw ta fan fè ni ne tè yen tuma min na. Ne bè aw deli Krisita ka dusu sumalenya ni a ka sabali kosòn ko 2 aw kana ne wajibiya ka fariya ni ne sera aw yòrò tuma min na, k'a masòrò minnu bè miiri ko an bè taama Hadamadenw cogo la, ne y'a dòn ko ne ja gèlèyalen na fariya olu ma. 3 Tiɲè don, an farisogoma bè taama, nka an tè kèlè kè farisogo cogo la. 4 An ka kèlèkè minènw tè nin diɲè taw ye, nka minèn barikamaw don Ala fè, ka kèlè kunbèn kogow ci. 5 Bisigiw ani fèn o fèn bè wuli Ala dònniya kama k'a kèlè, an bè olu dabiri. An bè miiriliw bèè kolo, u ka Krisita kan minè. 6 An labènnen bè, ni aw ka kan minèli dafara tuma min na, ka kan minèbaliya kow bèè hakè bò. 7 Aw bè fènw kòkanna de filè. Ayiwa, ni mògò dò dara a la ko ale ye Krisita ta ye, o ka miiri a la k'a dòn ko ale ye Krisita ta ye cogo min na, an fana ye Krisita ta ye ten. 8 K'a masòrò Matigi ye fanga min di an ma, o ma di aw tiɲèni kosòn, nka o dira aw nafa sòròli kama. Hali ni ne bè ne yèrè bonya o fanga kosòn ka dama tèmèn dòònin, ne tèna maloya. 9 Ne t'a fè k'a jira ne ka sèbènw fè ko ne bè aw lasiran. 10 Dòw kòni b'a fò ko ne ka sèbènw kònò kuma ka gèlèn, ko u barika ka bon, ko nka ne yèrè ye barikantan ye, ko ne ka kuma tè foyi ɲè. 11 O tigiw k'a dòn ko an ka kuma bè cogo min na an ka sèbènw kònò k'a sòrò an tè yen, an fana na kè ten kèwalew la ni an sera aw fè yen tuma min na. 12 Minnu bè u yèrèw tògò ɲuman fò, an tè an ja gèlèya ka an yèrèw jate olu dòw bòɲògònko ye, wala ka an yèrèw suma ni olu ye. U bè u yèrèw suma ɲògòn ma ka u yèrèw kèɲè ɲògòn ma. O de kosòn u ye hakilintanw ye. 13 An kòni tèna an yèrèw bonya ka dama tèmèn, nka Ala ye dan min sigi an ye, ni aw fana bè o kònò, an na an yèrèw bonya ka kèɲè n'o ye. 14 Ni an tun ma taa aw fè yen, an tun na tèmèn an dan kan, nka an tè tèmèn o kan, katuguni an sera aw yòrò ni Krisita Kibaru Duman ye. 15 O cogo la, dan min sigira an ye, an tè tèmèn o kan. Mògò wèrèw ye baara min kè, an tè an yèrèw bonya o la, nka an jigi b'a kan ko ni dò farala aw ka dannaya kan, an ka baara yòrò na bonya aw cèma kosèbè, 16 walisa an ka se ka Kibaru Duman fò aw kòfè jamanaw la. Baara min kèra mògò wèrèw ka baara yòròw la ka ban, an tèna an yèrèw bonya o la. 17 O bèè n'a ta, «min b'a yèrè bonya, o k'a yèrè bonya Matigi ko la.» 18 Katuguni min b'a yèrè tògò ɲuman fò, o tè tògò sèbè sòrò, fò Matigi bè min tògò ɲuman fò.


11

1 A! Ni aw tun bè sòn ka ne ka hakilintanya muɲu dòònin, o tun na diya ne ye. Ayiwa, a' ye ne muɲu! 2 Aw keleya bè ne la i ko a bè Ala la cogo min na, k'a masòrò ne ye aw maminècè kelen ye, o ye Krisita de ye, walisa ka aw di a ma i ko npogotigi sèbè. 3 Nka ne bè siran ko aw hakili kana na yèlèma, fò aw ka aw dusukun kelenya bila Krisita ta fan fè, i ko sa ye Hawa nègèn n'a ka keguya ye cogo min na. 4 K'a masòrò ni mògò dò nana ka Yesu dò wèrè ko fò aw ye, ni an ka fòlen kòrò tè, aw bè sòn o ma. Ni aw ye ni dò wèrè sòrò min ni aw ka sòròlen tè kelen ye, wala ka Kibaru Duman wèrè sòrò, aw tun ma min sòrò, aw bè sòn olu fana ma. 5 Ne b'a jate ko ne man dògò ni o ciden fisamaw ye foyi la. 6 Hali ni ne ye ko dònbali ye kuma la, ne tè ko dònbali ye dònniya la. An ye o jira aw la fèn bèè la ani cogo bèè la. 7 Ne ye Ala ka Kibaru Duman fò aw ye gansan tuma min na, ne ye ne yèrè majigin walisa ka aw kòròta. Yala o kèra jurumu ye ne fè wa? 8 Ne ye sara minè egilisi wèrèw la, i n'a fò ne ye u ka nafolo bòsi u la walisa ka aw dèmè. 9 Ka ne to aw fè yen, ne mago tun bè fèn dòw la, nka ne ma ne doni da mògò si kan. Balima minnu nana ka bò Masedwanè jamana la, olu ye ne magoɲè fènw di ne ma. Ne ye ne yèrè kòlòsi walisa ne kana kè aw si ka doni ye foyi la. Ne na ne yèrè kòlòsi o la halibi. 10 Krisita ka tiɲè min bè ne fè, o kosòn ne b'a fò ko mògò si tè se ka ne bali o yèrè bonyali la Akayi jamana yòrò si la. 11 Mun na ne bè o fò? Ne bè o fò katuguni ne tè aw kanu wa? Ala y'a dòn ko ne bè aw kanu dè! 12 Nka ne bè min kè, ne na to o kan, walisa minnu bè sababu ɲini ka u yèrèw bonya ko u ye an bòɲògònkow ye, an ka u bali ka o sòrò. 13 O mògòw ye ciden nkalontigèlaw ye, ani baarakèla lafilibaaw. U bè u yèrèw cogo yèlèma ka kè Krisita ka cidenw ye. 14 O tè kabako ye, katuguni Sitanè bè a yèrè cogo yèlèma ka kè kènè mèlèkè ye. 15 O de kosòn, ni Sitanè ka baarakèlaw ye u cogo yèlèma ka kè tilennenya baarakèlaw ye, o fana tè kabako ye. U laban na kèɲè ni u ka kèwalew ye. 16 Ne bè segin a kan tun ko mògò si kana ne jate hakilintan ye. Nka ni aw bè ne jate ten, a'ye ne minè i ko hakilintan, walisa ne fana ka ne yèrè bonya dòònin. 17 Ne bèna min fò sisan, ne tè o fò Matigi cogo la, nka ne jo don ka ne yèrè bonya. O de la ne na kuma i ko hakilintan. 18 Mògò caman bè u yèrèw bonya nin diɲè kow la, ne fana na ne yèrè bonya. 19 Aw bè sòn ka hakilintanw ka kow muɲu, katuguni aw yèrèw ye hakilitigiw ye! 20 Ni mògòw bè aw kè jònw ye, walima ka aw bolofènw minè aw la, wala ka aw tòɲò, wala ka waso aw la, wala ka u tègè ci aw ɲè kan, aw bè o muɲu. 21 Ne bè min fò, ne bè maloya o la, ko: An ye barikantanya de jira! O bèè n'a ta, ni mògò dò b'a ja gèlèya k'a yèrè bonya ko dò la, ne fana bè ne ja gèlèya ka o kè. Halibi, ne bè kuma i ko hakilintan. 22 Olu ye Hèburuw ye wa? Ne fana y'o ye. Olu ye Israèl siya dòw ye wa? Ne fana ye o dò ye. Olu ye Ibrahima bònsòn dòw ye wa? Ne fana ye o dò ye. 23 Olu ye Krisita ka baarakèlaw ye wa? Ne y'o ye ka tèmèn olu kan. Ne bè kuma i ko hakilintan. Ne ye baara kè ka tèmèn olu kan. Ne bilara kaso la ko caman ka tèmèn olu kan. Ne bugòra kosèbè ka tèmèn olu kan. Ne tun bè saya da la siɲè caman. 24 Yahutuw ye gèɲè ɲè bisaba ni kònòntòn kè ne la siɲè duuru. 25 Ne bugòra ni berew ye Romèkaw fè siɲè saba. Ne bonna ni kabakurunw ye siɲè kelen, walisa ne ka faga. Ji kan kurun tiɲèna ni ne ye siɲè saba. Ne ye tile kelen ni su kelen kè kògòji la. 26 Ne ye dugutaa caman kè. Ne tun bè farati la bajiw kan. Ne tun bè farati la binkannikèlaw cèma. Ne tun bè farati la ne yèrè siya cèma ani siya wèrèw cèma. Ne tun bè farati la dugu kònò, ani kungokolon kònò. Ne tun bè farati la kògòji kan. Ne tun bè farati la balima nkalontigèlaw cèma. 27 Ne tun bè baara gèlèn ni sègèn la. Ne sira ɲè na ko caman. Kòngò ni minnògò ye ne minè. Ne tora kòngò bolo ko caman. Ne tòòròla nènè ni fèèrè fè. 28 Ka fara o kènèkan kow bèè kan, egilisiw bèè hami bè ne la don o don. 29 Ni mògò dò barika ka dògò, ne barika bè dògòya o fè fana. Ni mògò dò kunnatiɲèna, o bè digi ne la fana. 30 Ni ne ka kan ka ne yèrè bonya, ne na ne yèrè bonya ne ka barikantanya kow de la. 31 Matigi Yesu Fa Ala ka tanu badaa-badaa! Ale y'a dòn ko ne tè nkalon tigè. 32 Ka ne to Damasi, masakè Arètasi ka gòfèrènèrè ye dugu dondaw kòlòsi walisa a ka ne minè, 33 nka ne lajiginna saba kònò ni jurukisèw ye finètiri fè dugu lamini kogo kòfè. Ne kisira ka bò a bolo ten.


12

1 Yèrèbonyali ye wajibi ye, nka nafa t'a la. O bèè n'a ta ne ye jiralifèn minnu ye ka dònniya min sòrò ka bò Matigi fè, ne da bèna se olu ma sisan. 2 Ne bè Krisita dannabaa dò dòn, o tufara ka taa sankolo sabanan la, a san tan ni naani filè nin ye. Ni a yèrè taara yen, wala ni a ye jiralifèn dò ye, ne ma o dòn, Ala de bè o dòn. 3 Owò, ne y'a dòn ko o mògò tufara ka taa alijènè la. Halibi ne m'a dòn yala ni a yèrè taara yen, wala ni a ye jiralifèn dò ye, Ala de bè o dòn. 4 A ye kumaw mèn, mògò tè se ka segin u kan. A ma daga mògò ye ka u fò fana. 5 Ne na ne yèrè bonya o ɲògòn mògò ko la, nka ne tèna ne yèrè bonya ne ko la, fò ka ne ka barikantanya kow fò. 6 Hali ni ne b'a fè ka ne yèrè bonya, ne tèna kè hakilintan ye, sabu ne na tiɲè fò. Nka ne na ne yèrè bonyali ko to yen, walisa mògò bè ne ye cogo min na, ka min mèn ne ko la, a kana ne jate ka tèmèn o kan. 7 O bèè n'a ta, walisa ne kana na kuncèbaya kè o jiralifènw kosòn, èòni dò donna ne farikolo la, o kèra Sitanè ka ciden ye ka ne tòòrò walisa ne kana na kuncèbaya kè. 8 Ne ye Matigi deli o ko la siɲè saba ko a ka o mabò ne la. 9 Nka a ye ne jaabi ko a ka nèèma na ne bò, k'a masòrò a ka sebaaya bè jira k'a jèya barikantanya de la. Ayiwa ne bè sòn kosèbè ka ne yèrè bonya ne ka barikantanya kow la ka tèmèn fènw bèè kan, walisa Krisita ka sebaaya ka to ne kan. 10 O de kosòn barikantanya kow ni neniliw ni mago fènntanya ni tòòrò ani sègèn Krisita kosòn, olu bèè ka di ne ye, k'a masòrò ne ye barikantan ye tuma min na, o b'a sòrò ne ye barikama de ye. 11 Ne tun bè kuma i ko hakilintan, nka aw ye ne wajibiya o la, k'a sòrò ne tògò ɲuman fòbaaw tun ka kan ka kè aw de ye. Hali ni ne tè foyi ye, ne man dògò ni o ciden fisamaw ye cogo si la. 12 Tiɲè la, kèwale minnu b'a jira ko ne ye ciden ye, olu jirala aw la ni muɲuli bèè ye. Olu kèra taamashyènw ni kabakow ni kèwale barikamaw ye. 13 Egilisi wèrèw dun fisayara ni aw ye mun ko la, fò nin ko kelen, ko ne ma sòn aw ka ne doni ta? Aw ka o ko yafa ne ma. 14 A filè, ne labènnen don sisan ka ne taa ko sabanan kè aw yòrò. Ne tèna kè aw ka doni ye nin sen in na fana, katuguni ne tè aw bolofènw ɲini, fò aw yèrèw. Denw man kan ka nafolo lajè u bangebaaw ye, bangebaaw de ka kan ka nafolo lajè u denw ye. 15 A ka di ne ye ka ne bolofènw bèè di aw kosòn ani ne yèrè fana. Ni ne bè aw kanu ka ta'a fè, ne kanuya bè dogoya aw la wa? 16 Aw n'a fò ko ne ma kè aw si ka doni ye, sòsòli tè o la, nka aw dòw n'a fò ko ne tun ka kegun, ko ne ye aw minè ni keguya ye. 17 Ne ye minnu ci ka taa aw fè yen, yala ne ye tònò sòrò aw la olu dò fè wa? 18 Ne ye Tite deli ko a ka taa aw yòrò. Ne ye an balimakè bila ka taa a fè. Yala Tite ye tònò sòrò aw la wa? Ne ni ale ka kètaw ma kè ni miirili kelen ye wa? An taama cogo ma kè kelen ye wa? 19 Kabini tuma jan aw bè miiri ko an bè jo di an yèrèw ma aw ɲè kòrò, nka o tè. An bè kuma Ala ɲè kòrò Krisita la. Balima kanulenw, an bè o bèè fò aw ka nafa sòròli kama. 20 Ne bè siran ko, ni ne sera aw fè yen, ne t'a fè ka aw sòrò cogo min na, ko ne na aw sòrò ten, ani aw fana t'a fè ka ne sòrò cogo min na, ko aw na ne sòrò ten. Ne bè siran ko ne n'a sòrò ko kèlè bè aw cèma, ani keleya ni dusu bò ni bila ɲògòn na kow, ani tògò tiɲèni ni dajukòrò kumaw, ni kuncèbaya ani wòyò kow. 21 Ne bè siran ko ne selen aw fè yen, Ala kana na ne majigin aw ɲè kòrò, ko mògò caman minnu ye jurumu kè ka ban, ni u ma nimisa u ka nògòlenya ni u ka kakalaya ani u ka ko jugu dama tèmènnenw na, ne kana na kasi olu kosòn.


13

1 Nin na kè ne taa ko sabanan ye aw fè yen. «Ko bèè na ɲènabò ka kèɲè ni seere fila wala seere saba dala kuma ye.» 2 Minnu ye jurumu kè ka ban ani mògò tòw bèè, ne bè olu lasòmi hali k'a sòrò ne tè yen, i ko ne tun y'a fò olu ye ne taa ko filanan la cogo min na, ko: Ne bè kòsegin tuma min na, ne tèna mògò si malasa. 3 O tuma la aw bè taamashyèn min ɲini ko Krisita bè kuma ne da la, aw na o ye. Krisita barika man dògò aw ta fan fè, nka a bè a ka sebaaya jira aw cèma. 4 Tiɲè don, a gengenna jiri la a ka barikantanya la, nka a ɲènama don sisan Ala ka sebaaya barika la. An fana ye barikantanw ye ale la, nka an na ɲènamaya ale fè aw ta fan fè, Ala ka sebaaya barika la. 5 A' ye aw yèrèw sègèsègè ka aw yèrèw kòròbò k'a filè yala ni aw bè dannaya sira kan. Aw m'a dòn aw yèrèw ta fan fè ko Yesu Krisita bè aw kònò wa? fò ni a y'a sòrò ko ban kèra aw la. 6 Nka an jigi b'a kan ko aw n'a dòn ko ban ma kè an na. 7 O bèè n'a ta, an bè Ala deli ko aw kana ko jugu kè. O kun tè ko an tògò ɲuman ka fò, nka walisa aw ka ko ɲuman kè, hali ni an kèra i ko ban kèra an na. 8 K'a masòrò se si tè an ye ka tiɲè kèlè, fò ka tiɲè dèmè. 9 Ni an kèra barikantanw ye k'a sòrò aw barika ka bon tuma min na, an bè ɲagali o la. An bè min deli Ala fè fana, o filè nin ye, ko aw ka dafa. 10 O de kosòn ne bè nin sèbèn ci k'a sòrò ne tè aw fè yen, walisa ne mana se yen tuma min na, ne kana ko ɲènabò ni gèlèya ye, ka kèɲè ni Matigi ka fanga dilen ye ne ma. O fanga di kun ye aw nafa sòròli ye, o ma di tiɲèni kama. 11 Ayiwa sisan, balimaw, ka aw ni hèrè bèn. Aw ka dafa, ka ɲògòn jija, ka miirili kelen kè, ka to hèrè la ɲògòn fè. N'o kèra, kanuyatigi ni hèrètigi Ala na to aw fè. 12 A' ye ɲògòn fo ni da susuli senuma ye. Ala ka mògò senumaw bèè bè aw fo. 13 Matigi Yesu Krisita ka nèèma ni Ala ka kanuya ani Ni Senu ka jèɲògònya ka kè aw bèè fè.



AMAZING GRACE BIBLE INSTITUTE