1 Thessalonians


1

1 Ne Paul ni Silvèn ani Timote bè nin sèbèn ci Tesalonike egilisi ma, aw minnu bè Fa Ala ni Matigi Yesu Krisita la. Ala ka nèèma ni dususuma di aw ma. 2 An bè barika da Ala ye aw bèè kosòn tuma bèè, ka aw ko fò an ka deliliw la. 3 Aw ka dannaya y'i jira ni kèwalew ye, ka aw ka kanuya jira ni baaraba ye, ani aw jigi sigilen bè an Matigi Yesu Krisita kan cogo min na, an bè miiri o bèè la an Fa Ala ɲè kòrò tuma bèè. 4 An y'a dòn, balima kanulenw Ala fè, ko Ala ye aw ɲènatòmò ka kè a yèrè taw ye, 5 katuguni an ka Kibaru Duman ma se aw ma ni kuma dòròn ye, nka a sera aw ma ni sebaaya fana ye Ni Senu barika la, an tun bè o dòn k'a jèya. An tun bè taama aw cèma aw nafa kosòn cogo min na, aw yèrèw bè o dòn. 6 Aw kèra an ladegebaaw ye ani Matigi ladegebaaw fana, k'a masòrò aw sònna Ala ka kuma ma tuma min na, aw tòòròla o kosòn kojugu. Hali o, aw nisòndiyara kosèbè Ni Senu barika la. 7 Aw kèra ɲèjirabaaw ye Masedwanè ni Akayi jamanaw dannabaaw bèè la. 8 Matigi ka kuma fòra aw fè k'a jèya, Masedwanè ni Akayi dama tè, nka aw ka dannaya Ala la, o kibaru fòra yòrò bèè la. O de y'a to an yèrèw man kan ka foyi fò o ko la. 9 Aw ye an minè cogo min na, u yèrèw bè o lakali ko aw sònna Ala ma ka fara boliw la ka baara kè Ala sèbè ɲènama ye, 10 ka a Denkè Yesu makònò ka bò sankolo la, Ala ye o lakunun ka bò suw cèma, o ye an tila Ala ka diminya nata la.


2

1 Aw yèrèw y'a dòn, balimaw, ko an ye taali min kè aw fè yen, o ma kè fu. 2 Aw y'a dòn ko an tòòròla ka lagosi Filipe, nka o kò, Ala ye an ja gèlèya ka a ka Kibaru Duman fò aw ye, hali k'a sòrò mògòw tun b'a fè ka an bali. 3 Filili tun tè an ka waajuli kuma la, nògòlenya ni nanbara fana tun t'a la, 4 nka Ala y'a jate ko a bènnen bè ka Kibaru Duman kalifa an ma, o de kosòn an bè kuma. An tè kuma ka an ko diya mògòw ye, fò Ala, o de bè an dusukunw sègèsègè. 5 Aw y'a dòn ko an ma kuma nugulen fò tuma si. Wasabaliya dogolen tun tè an na fana, Ala ye o seere ye. 6 An ma bonyali ɲini mògò si fè, aw fè wala mògò wèrèw fè. O bèè n'a ta, an minnu ye Krisita ka cidenw ye, an tun bè se ka o bonya ɲini aw fè. 7 Nka an sabalilen tun don aw cèma, i ko denbatigi bè a yèrè denw mara cogo min na. 8 O dama tè, an tun bè aw kanu kosèbè, o de kosòn an labènnen tun don ka Ala ka Kibaru Duman di aw ma, hali an niw yèrè, katuguni aw ko diyara an ye kosèbè. 9 Balimaw, aw hakili bè an ka baara ni an sègèn cogo la, ko an ye baara kè su fara tile kan, walisa an kana kè aw si ka doni ye k'an to Ala ka Kibaru Duman fòli la aw ye. 10 Aw ni Ala ye an seerew ye ko an taama cogo jèlen, tilennen, jalakibali tun don aw dannabaaw ta fan fè. 11 Aw y'a dòn fana ko an kèra aw bèè kelen-kelen fè i ko fa bè a denw fè cogo min na. 12 An ye aw waaju ka aw dusuw saalo. An ye aw jija ko aw ka taama cogo bènnen na Ala ɲè kòrò, o min bè aw wele ka don a ka masaya ni a ka nòòrò la. 13 O de y'a to an bè barika da Ala ye tuma bèè nin kosòn, ko an ye Ala ka kuma fò aw ye tuma min na, aw y'a lamèn, k'a minè i ko Ala ka kuma. Aw ma a jate mògò ka kuma ye. Tiɲè la Ala ka kuma yèrè don. A bè baara kè aw dannabaaw kònò. 14 Balimaw, Ala ka egilisi minnu bè Krisita Yesu la Jude jamana la, aw kèra olu ladegebaaw ye, katuguni Yahutuw ye yen dannabaaw tòòrò cogo min na, aw yèrèw siya ye aw tòòrò o cogo de la. 15 O Yahutuw ye Matigi Yesu faga, ka kiraw faga, ka tugu an fana nòfè ka an tòòrò. U ko man di Ala ye, u ye mògòw bèè juguw ye. 16 U bè an bali ka Ala ka kisili kuma fò siya wèrèw ye. U bè to ka dò fara u ka jurumu dama kan tuma bèè, nka Ala ka diminya dafalen binna u kan. 17 Balimaw, an kòni farala aw la waati dòònin ɲèda la, nka an ma fara aw la dusukun na. Aw yeli nege tun bè an na, fo an ye an se ko bèè kè ko an bè taa aw yòrò. 18 An tun b'a fè ka kòsegin aw fè yen, ne Paul yèrè ye a lajè siɲè kelen dama tè, nka Sitanè ye an bali o la. 19 Jòni ye an jigi ni an nisòndiya sababu ani an ka kunnajala ye? O tè aw ye an Matigi Yesu ɲè kòrò a na tuma la wa? 20 Owò, aw de ye an ka kunnajala ni an nisòndiya sababu ye.


3

1 An ma se ka sigi ka o makònò tun, o de y'a to an y'a latigè ko an ka to an dan na Atènè 2 ka Timote ci ka taa aw fè yen. An balimakè ani Ala ka baarakèla ni an baarakèɲògòn don Krisita Kibaru Duman fòli la. An y'a ci walisa a ka aw sabati ka aw ja gèlèya aw ka dannaya la, 3 walisa aw si kana yèrèyèrè sisan tòòròw kosòn. Aw yèrèw y'a dòn ko a latigèra ko an na o tòòrò sòrò. 4 Ka an to aw fè yen, an tun bè to k'a fò aw ye ko an na tòòrò sòrò. A fana kèra ten, aw y'o dòn. 5 O de y'a to ne kòròtòlen tun don fo ne ye ci bila ka taa ka aw ka dannaya cogo dòn. Ne tun bè siran ko a kana na sòrò ko Sitanè ye aw nègèn, ani ko an ka baara kèra fu. 6 Sisan kòni, Timote kòseginna ka bò aw yòrò ka kibaru ɲuman fò an ye aw ka dannaya ni aw ka kanuya ko la. A y'a fò an ye ko aw ka miiriliw b'a jira ko an ko ka di aw ye ani ko aw b'a fè kosèbè ka an ye, i ko an fana b'a fè ka aw ye cogo min na. 7 O cogo la balimaw, k'an to an ka sègèn ni an ka tòòrò kow bèè la, an dusu saalola aw ko la aw ka dannaya kosòn. 8 Sisan, k'a sòrò aw banbalen tora an Matigi la, sèbè la an bè ɲènamaya. 9 An bè se ka barika bènnen da Ala ye aw ko la cogo di, an ka ɲagaliba kosòn aw ko la an ka Ala ɲè kòrò? 10 An bè to ka Ala deli ni misènya ye su fara tile kan, ko an ka aw ye ko kura ɲèda ni ɲèda, ani min dèsèra aw ka dannaya la, an ka o dafa. 11 An Fa Ala yèrè ani an Matigi Yesu ka an ka taama ko ɲènabò ka taa aw fè yen. 12 Matigi ka aw ka kanuya barika bonya ka ta'a fè aw ni ɲògòn cè ani aw ni mògòw bèè cè, i ko an fana bè aw kanu cogo min na, 13 walisa a ka aw dusukunw sabati ka u kè jalakibali saniyalenw ye an Fa Ala ɲè kòrò an Matigi Yesu na tuma la ni a ka mògò senumaw bèè ye.


4

1 Ayiwa balimaw, aw ka kan ka taama cogo min na ka aw ko diya Ala ye, an ye aw kalan o la. Tiɲè don, aw bè taama ten. Nka an bè aw deli ka aw laadi Matigi Yesu tògò la ko aw ka jiidi o la ka taa ɲè. 2 An ye ci minnu fò aw ye Matigi Yesu barika la, aw bè olu dòn. 3 Ala sago ye aw saniyali de ye, ko aw kana jatòya kè. 4 Aw bèè kelen-kelen ka se ka a farikolo minè senuya ni bonyali la. 5 Aw kana aw yèrèw bila kakalaya nege ko la i ko siyaw b'a kècogo min na, olu kòni tè Ala dòn. 6 Mògò si kana a balima tòɲò nin ko si la, katuguni Matigi de ye o kow hakè bòbaa ye, i ko an kònna k'a fò aw ye k'a jèya cogo min na. 7 Ala ma an wele nògòlenya kama, fò saniyali. 8 O de kosòn min banna nin kalan ma, o tè ban mògò la, a bè ban Ala de la, o min ye a Ni Senu di aw ma. 9 Mògò man kan ka sèbèn ci aw ma balima kanuya ko la, katuguni aw yèrèw kalanna Ala fè ko aw ka ɲògòn kanu. 10 Tiɲè don, aw bè taama ten balimaw bèè ta fan fè Masedwanè jamana yòrò bèè la. Nka an bè aw deli balimaw, ko aw ka jiidi o la ka taa ɲè. 11 Aw ka aw jija ka to hèrè la ɲògòn fè ka aw yèrèw ka kow ɲènabò, ka baara kè ni aw yèrèw bolow ye, i ko an tun y'a gèlèya aw ma cogo min na. 12 O cogo la aw taama cogo na bèn dannabaliw ɲè na, aw tèna kè mògò si ka doni ye. 13 Ayiwa, balimaw, minnu sunògòra, an t'a fè aw ka kè ko dònbaliw ye olu ta fan fè, walisa aw kana ɲènasisi i ko jigi tè minnu fè. 14 Ni an bè da a la ko Yesu sara ka kunun, o cogo la fana an bè da a la ko minnu sara ka u to Yesu la, Ala na olu lana a fè. 15 Ayiwa an bè nin fò aw ye ka kèɲè ni Matigi ka kuma ye, ko an minnu ɲènama tora fo Matigi na tuma la, an tèna kòn o mògò salenw ɲè fewu, 16 k'a masòrò Matigi yèrè na jigin ka bò sankolo la ni pèrènkanba ni mèlèkèw kuntigi kanba ani Ala ka burukan ye. Minnu sara Krisita la, olu fòlò na kunun. 17 O kò, an minnu ɲènama tora, an ni olu na tufa ka taa ɲògòn fè sankabaw la Matigi kunbèn yòrò la fiɲè la. O cogo la an na to Matigi fè badaa-badaa! 18 Aw ka ɲògòn dusu saalo ni o kuma ye.


5

1 Balimaw, aw mago t'a la mògò ka sèbèn ci aw ma o tumaw ni o waatiw ko la, 2 k'a masòrò aw yèrèw y'a dòn ka jèya ko Matigi ka don bè na i ko nson bè na su fè cogo min na. 3 Mògòw mana a fò ko: «Hèrè, tòòrò tè,» o tuma la halakili na cun u kan teliya la, i ko tin bè muso kònòma minè cogo min na, u tèna kisi o ma fewu. 4 Nka balimaw, aw tè dibi la fò o don ka na bala aw la i ko nson. 5 Aw bèè kòni ye kènèdenw ye, tiledenw. An tè su ni dibi taw ye. 6 O de kosòn an kana sunògò i ko dòw b'a kècogo min na, nka an ka to an ɲè na, an hakili kana ɲènamini i ko dòlòtòw. 7 Minnu bè sunògò, olu bè sunògò su fè. Minnu bè u hakili ɲènamini dòlò la, olu bè o kè su fè. 8 An kòni ye tile taw ye, an hakili kana ɲènamini. An ka dannaya ni kanuya kè an ka nègèdulòki ye. Kisili jigi ka kè an ka nègèfugula ye. 9 Ala ma a latigè ko an ka diminya sòrò, fò kisili, an Matigi Yesu Krisita barika la. 10 O de sara an kosòn, walisa ni an ɲènama don, wala ni an salen don, an ni ale ka ɲènamaya ɲògòn fè. 11 O de kosòn aw ka ɲògòn jija ka dò fara ɲògòn barika kan, i ko aw b'a kècogo min na ka ban. 12 Balimaw, minnu bè baara kè aw cèma ka kè aw kun na Matigi la ka aw laadi, an bè aw deli ko aw ka olu jate. 13 A' ye u bonya kosèbè ka u kanu u ka baara kosòn. Hèrè ka kè aw ni ɲògòn cè. 14 Minnu bè pirikiparaka kow kè, an bè aw deli balimaw, ko aw ka olu laadi. Minnu jigi tigèra, a' ye olu ja gèlèya, ka barikantanw dèmè, ka muɲuli kè mògòw bèè ta fan fè. 15 A' ye aw yèrèw kòlòsi, mògò si kana ko jugu sara ni ko jugu ye, nka aw ka tugu ko ɲuman kèli la aw ni ɲògòn cè, ani aw ni mògòw bèè cè tuma bèè. 16 A' ye ɲagali tuma bèè. 17 Aw kana Ala delili dabila. 18 Aw ka barika da Ala ye ko bèè la, katuguni o ye Ala sago ye aw ko la Krisita Yesu la. 19 Aw kana Ni Senu dufa. 20 Aw kana kiraya mafiɲèya. 21 A' ye ko bèè sègèsègè. Min ka ɲi, aw ka o minè kosèbè. 22 A' ye aw yèrèw kòlòsi ko jugu sifa bèè kèli ma. 23 Hèrètigi Ala yèrè ka aw yòrò bèè saniya ka kè a yèrè ta ye. Aw ni, ani aw dusu ni aw farikolo, u bèè lajèlen jalakibali ka mara fo an Matigi Yesu Krisita na tuma la. 24 Aw welebaa ye kantigi ye, ale de na o kè fana. 25 Balimaw, a' ye Ala deli an ye. 26 A' ye ɲògòn fo ni da susuli senuma ye. 27 Ne bè aw deli kosèbè Matigi kosòn, ko nin sèbèn ka kalan balimaw bèè ɲè na. 28 An Matigi Yesu Krisita ka nèèma ka kè aw fè.



AMAZING GRACE BIBLE INSTITUTE