1 Pierre

1

1 Ne Pierè, Yesu Krisita ka ciden bè nin sèbèn ci Ala ka ɲènatòmòlenw ma, olu minnu jènsènnen bè ka kè siginfèw ye Pon ni Galasi ni Kapadose ni Asi ani Bitini jamanaw la. 2 Aw ɲènatòmòna ka kèɲè ni Fa Ala ka ko latigèlen ye, ka kè saniyalenw ye Ni Senu barika la, walisa aw ka Yesu Krisita kan minè ani a joli ka seriseri aw kan ka aw saniya. Nèèma ni dususuma ka di aw ma ka caya. 3 An Matigi Yesu Krisita Fa Ala ka tanu. A ye an bange ko kura ka kèɲè ni a ka makariba ye, Yesu Krisita kununli barika la ka bò suw cèma, walisa an ka jigi ɲènama sòrò, 4 ka kè ciyèntalaw ye. O ciyèn tolibali nògòbali fòsònfòsònbali don, a maralen bè aw ye sankolo la, 5 aw minnu maralen bè Ala ka sebaaya fè dannaya barika la kisili kama. O kisili labènnen bè ka i jira laban tuma la. 6 Aw ɲagalilen bè o kisili kosòn, hali k'a sòrò a kèra wajibi ye aw ka ɲènasisi sisan waati dòònin kòròbòli sifa caman fè 7 ka aw ka dannaya kòròbò. Sanu ye fèn banta ye, o bèè n'a ta a bè kòròbò tasuma fè. O cogo la aw ka dannaya min ka fisa ni sanu ye kosèbè, o fana bè kòròbò, walisa aw ka se ka tanuli ni nòòrò ani bonyali sòrò o kosòn Yesu Krisita jira tuma la. 8 Aw ma ale ye fòlò, o bèè n'a ta aw b'a kanu. Hali ni aw ɲèw t'a la sisan, aw dalen bè a la. O de kosòn aw bè ɲagali ni ɲagaliba nòòròma ye, o dan tè se ka fò, 9 k'a masòrò aw bè aw ka dannaya nò sòrò, o ye aw niw kisili ye. 10 Nèèma min tun bèna di aw ma, kira minnu ye kiraya kè o ko la, olu ye ɲininkali ni sègèsègèli kè o kisili ko la. 11 Krisita Ni min tun bè u kònò, o tun bè Krisita ka tòòròw suda u la ani nòòrò min na da a kan olu kò. O Ni tun bè ko minnu jira kiraw la, u tun bè u jija ka olu kè waati ni u kècogo dòn. 12 Ala y'a jira u la ko u tun bè kuma ko minnu na ka baara min kè, ko o kow tèna kè u yèrèw ye, fò aw de ye. Kibaru Duman fòbaaw ye o kow fò aw ye sisan Ni Senu barika la, o min cira ka bò sankolo la. Mèlèkèw kòni b'a fè ka o kow ye ka u dòn. 13 O de kosòn, a' ye aw hakili sigi ka to aw ɲè na. Nèèma min na di aw ma Yesu Krisita jira tuma la, a' ye aw jigi bèè da o sòròli kan. 14 Aw ka kè Ala kan minèbaaw ye. Nege minnu tun bè aw la aw ka ko dònbaliya waati la, aw kana aw cogo kèɲè ni olu ye. 15 Nka aw ka kè senumaw ye aw taama cogo bèè la i ko aw welebaa Ala ka senu cogo min na, 16 k'a masòrò a sèbènnen bè Kitabu la ko: «Aw ka kè senumaw ye, katuguni ne ka senu.» 17 Ala, o min bè mògòw bèè kelen-kelen ka kiri tigè ka kèɲè ni u ka kèwalew ye ni a tè mògò bò mògò la, ni aw bè o wele aw Fa, o tuma la a' ye aw ka ko kètaw bèè kè ni Ala ɲèsiran ye aw ka diɲè latigè la. 18 K'a masòrò aw b'a dòn ko aw ma kunmabò ni fèn tolitaw ye, i ko wari ni sanu, ka bò aw taama cogo fufafu la, aw kalanna o min na aw faw fè. 19 Nka aw kunmabòra ni Krisita joli ye, o ka fisa fèn bèè ye. Ale kèra i ko sagaden, nò si t'a la, nògò yòrò t'a la. 20 A ko latigèra Ala fè sani diɲè ka da, a jirala nin waati laban na aw kosòn, 21 aw minnu dara Ala la ale barika la. O de y'a lakunun ka bò suw cèma ka nòòrò da a kan, walisa aw ka da Ala la ka aw jigi da a kan. 22 Aw ye aw dusuw saniya tiɲè kan minèli fè balima kanuya sèbè kama. Ayiwa, a' ye ɲògòn kanu kosèbè ni aw dusukun bèè ye. 23 K'a masòrò aw bangera ko kura, nka o ma kè ni si tolita ye, fò si tolibali, Ala ka kuma ɲènama banbali barika la, 24 i ko Kitabu y'a fò cogo min na ko: «Mògòw bèè bè i ko bin, u nòòrò bèè bè i ko bin feere. Bin bè ja, a feere bè bin, 25 nka Matigi ka kuma bè to badaa-badaa.» Kibaru Duman ye kuma min lase aw ma, o don.

2

1 O de kosòn aw ka juguya bèè dabila, ani nanbara bèè ni filankafoya ni keleya ani tògò jugu fòli bèè. 2 Sin ko bè denyènin kura la cogo min na, o cogo la Ala ka kuma min bè i ko nònò yèrèwolo, o nege ka kè aw la, walisa aw ka bonya o fè ka kisili sòrò, 3 k'a sòrò aw y'a sifilè k'a dòn ko Matigi ka ɲi. 4 A' ye gèrè Matigi la, kabakurun ɲènama don. Mògòw banna a la, nka a ɲènatòmòlen don, a sòngò ka bon Ala ɲè na. 5 Aw fana ka gèrè ale la i ko kabakurun ɲènamaw, walisa aw ka jò ka kè Ni Senu ka so ye, sarakalasebaa senumaw, ka saraka ɲènamaw lase minnu na diya Ala ye Yesu Krisita barika la. 6 K'a masòrò Kitabu y'a fò ko: «A filè, ne bè so seleke kabakurun sigi Sion, a ɲènatòmòlen don, a sòngò ka bon haali. Min dara a la, o tèna maloya fewu.» 7 Aw minnu dara a la, a ka fisa fèn bèè ye aw ɲè na, nka kan minèbaliw ta fan fè, «Sojòlaw banna kabakurun min na, o kèra so seleke jukòrò kabakurun lakika ye. 8 O ye sentalon kabakurun ye, ani mògò labin fara.» U senw bè talon, katuguni u ma sòn ka Ala ka kuma kan minè. U ko latigèra ten fana. 9 Nka aw ye siya ɲènatòmòlen ye, ani sarakalasebaa masamaw ni siya senuma ani Ala ka mògò kunmabòlenw, walisa min ye aw wele ka bò dibi la ka aw don a ka kabako kènè la, aw ka o ka ɲumaya kow fò. 10 Aw tun tè Ala ka mògòw ye fòlò, nka sisan aw ye a ka mògòw ye. Aw tun ma makari sòrò ka kòrò, nka aw y'o sòrò sisan. 11 Balima kanulenw, aw ye dunanw ni siginfèw ye diɲè la, o de kosòn ne bè aw deli ko aw ka farisogo negew to yen, olu bè mògò dusu kèlè dè. 12 Aw ka taama cogo bènnen na Ala dònbaliw cèma. O tuma la, hali ni u bè aw tògò jugu fò ko aw ye kojugukèlaw ye, u na aw ka kèwale ɲumanw ye ka Ala tanu olu kosòn, ni a nana bò u ye don min na. 13 A' ye aw majigin mògòw ka kuntigiya bèè kòrò Matigi kosòn. A' ye kolo masakè ye, o min bè fèn bèè kun na. 14 Aw ka kolo gòfèrènèrèw ye, k'a masòrò u cilen bè masakè fè ka kojugukèlaw ɲègan, ka koɲumankèlaw tanu. 15 Ala sago ye nin de ye ko aw ka hakilintan ko dònbaliw daw tugu ni aw ka kèwale ɲumanw ye. 16 Aw ye hòrònw ye, o bèè n'a ta, aw ka hòrònya kana kè juguya datugulan ye, k'a masòrò aw ye Ala ka jònw ye. 17 A' ye mògòw bèè bonya, ka balimaw kanu. A' ye siran Ala ɲè, ka masakè bonya. 18 Baaradenw, a' ye kolo aw kuntigiw ye ni bonyali bèè ye, kuntigi ɲumanw ni sumalenw dòròn tè, hali jugumanw fana, 19 katuguni mògò man kan ni tòòrò min ye, ni a ye o muɲu Ala ɲèsiran kosòn, o ye tanuli sababu ye. 20 Ayiwa ni i gosira i ka kèwale juguw kosòn, mun tanuli bè o muɲuli la? Nka ni i tòòròla i ka kèwale ɲumanw kosòn, ni i ye o muɲu, o ye tanuli sababu ye Ala ɲè kòrò. 21 Aw welela o de kama, k'a masòrò Krisita yèrè tòòròla aw kosòn, a ye cogo jira aw la, walisa aw ka tugu a sen nò na. 22 A ma ko jugu si kè, nanbara si ma sòrò a da la. 23 A nenina tuma min na, a ma a ta sara. A tòòròla tuma min na, a ma kangari da u ye, nka a y'a ko bèè to Ala bolo, o min bè kiri tigè ni tilennenya ye. 24 Krisita yèrè ye an ka jurumuw ta a farikolo la gengenjiri kan, walisa an ka kè salenw ye jurumu ta fan fè, ka ɲènamaya tilennenya kama. Aw kènèyara a gosili nòw fè. 25 Aw tun bè i ko saga tununnenw, nka sisan aw seginna aw niw Gènna ni u Kòlòsibaa ma.

3

1 Musow, a' ye kolo aw cèw ye, walisa ni u dòw ma Ala ka kuma kan minè, olu ka sòn ka dannaya kè aw taama cogo kosòn ni kuma tè, 2 k'a masòrò aw taama cogo senuma ni bonyali ye, u bè o filè. 3 Aw ka masirili kana kè kòkanna masirili ye, i n'a fò kun digili wala sanu masiriw ni fini saramaw donni, 4 nka aw ka masirili ka kè kònòna masirili dogolen ye, o ye dusu sumalen sabalilen ye, o ye masiri fèn tiɲènbali de ye. A sòngò ka bon Ala ɲè na haali. 5 Fòlòfòlò muso senuma minnu tun bè u jigi da Ala kan, olu tun bè u masiri ten. U kololen tun bè u cèw ye, 6 i ko Saran ye Ibrahima kan minè cogo min na k'a wele «matigi.» Aw ye a denmusow ye, ni aw bè ko ɲuman kè k'a sòrò aw hakili tè ɲaami siran ko si fè. 7 O cogo la fana, cèw, aw ka aw musow minè ni hakilitigiya ye. Musoya cogo bè i n'a fò minèn min barika ka dògò aw ta ye. Aw ka u bonya, k'a masòrò aw ye ɲènamaya nilifèn ciyèntaɲògònw ye ka bò Ala fè, walisa aw ka Ala deliliw kana tigè. 8 O bèè kò, aw bèè miirili ka kè kelen ye. Aw ka hinè ɲògòn na, ka ɲògòn kanu i ko balimaw, ka makari mògò tòòròlenw na, ka aw yèrèw majigin ɲògòn ye. 9 Aw kana ko jugu sara ni ko jugu ye, wala ka nenili sara ni nenili ye, nka aw ka duba ta, katuguni aw welela nin de kama, ko aw ka duba sòrò ciyèn ye. 10 Kitabu b'a fò ko: « Ɲènamaya ko ka di min ye, ni o b'a fè ka don ɲumanw ye, o ka a nènkun kòlòsi ko jugu fòli ma, ka a da kòlòsi nanbara kuma ma. 11 O ka a kò sin juguya ma, ka ko ɲuman kè, ka hèrè ɲini ka tugu a nòfè. 12 Katuguni Matigi ɲè bè mògò tilennenw kan, a tulo bè u ka deliliw la, nka Matigi bè a ɲèda yèlèma kojugukèlaw kama.» 13 Ni aw timinandiyara koɲuman kè la, jòni na ko jugu kè aw la? 14 Hali ni aw bè tòòrò tilennenya kosòn, aw ye dubadenw ye. Aw kana siran u ka siran fènw ɲè, aw hakili kana ɲaami, 15 nka aw ka Krisita bonya aw dusukunw na ka kèɲè ni a ka Matigiya ye. Jigi min bè aw kònò, mògò o mògò bè aw ɲininka o sababu la, aw labènnen ka sòrò tuma bèè ka o jaabi, nka o ka kè ni majiginlenya ni bonyali ye. 16 Dusukun ɲuman ka to aw fè, walisa ni u bè aw tògò jugu fò tuma min na, ko aw ye kojugukèlaw ye, aw taama cogo ɲuman Krisita la, o k'a to aw tògò tiɲènbaaw ka maloya. 17 Ni Ala sago don aw ka tòòrò ko ɲuman kè kosòn, o ka fisa ko jugu kosòn tòòrò ye. 18 Krisita sara siɲè kelenpe jurumuw kosòn, tilennen tòòròla tilenbaliw nò na, walisa a ka an lase Ala ma. A fagara farisogo ta fan fè, nka a ɲènamayara Ni ta fan fè. 19 A taara kasola niw waaju o Ni de la. 20 Olu tun ye Ala kan bilabaaw ye fòlò la, Ala tun bè makònòli kè ni muɲuli ye Nuhun ka kurun dila waati la. Mògò dòònin, o kòrò, mògò segin ye ji cètigè ka kisi. 21 O ji kèra batiseli bisigi ye, o min bè aw kisi sisan. O tè farisogo nògòw koli ye, nka o ye Ala jaabili ye ka bò dusukun ɲuman la, Yesu Krisita kununli barika la ka bò suw cèma. 22 Ale yèlènna ka taa sankolo kònò, a sigilen bè Ala kinin fè. Mèlèkèw ni kuntigiw ani sebaayaw kololen bè a ye.

4

1 Krisita tòòròla a farisogo la, o de kosòn a' ye o miirili kè aw ka kèlèkè minèn ye, k'a masòrò min tòòròla farisogo la, o farala jurumu la. 2 O de y'a to kabini sisan, aw kana aw ka diɲè latigè tò kè mògòw negela kow la, nka aw ka o kè Ala sago la. 3 Aw ye waati min kè Ala dònbaliw sagona kow la ka kòrò, ka taama kakalaya la, ani ko jugu negew ni dòlòtòya ni dumuni ni minni dama tèmènnenw ani boli batoli haramulenw na, o b'a bò. 4 Olu bè kabakoya ko aw tè jè u fè o kakalaya ko dama tèmènnenw na tun. U bè aw tògò tiɲè. 5 Nka min labènnen bè ka kiri tigè ɲènamaw ni suw kan, u na u dan tigè o ye. 6 O de y'a to Kibaru Duman fòra mògò salenw fana ye, kiri tun tigèra olu minnu kan i ko Hadamadenw, ka u to diɲè la, walisa o kèlen kò, u niw ka ɲènamaya Ala ta fan fè. 7 Fèn bèè laban waati surunyara. A' ye aw hakili sigi ka to aw ɲè na Ala delili la. 8 Ka tèmèn fèn bèè kan, aw ka ɲògòn kanu kosèbè, k'a masòrò kanuya bè jurumu caman caman datugu. 9 Aw ka ɲògòn lajigin ni dajukòrò kuma tè. 10 Aw bèè kelen-kelen ye nilifèn min sòrò, aw ka ɲògòn mago ɲè ni o ye, ka kè Ala ka nèèma nilifèn sifa caman marabaa ɲumanw ye. 11 Min bè waajuli kè, o k'a kè i ko Ala ka kuma fòbaa. Min bè baara kè, o k'a kè ka kèɲè ni Ala ka barika dilen ye a ma, walisa nòòrò ka da Ala kan ko bèè la Yesu Krisita barika la. Nòòrò ni sebaaya ye o de ta ye badaa-badaa! Amiina. 12 Ne balima kanulenw, kòròbòli gèlènma min bè aw cèma, i n'a fò aw bè tasuma cètigè, aw kana kabakoya o la, i n'a fò kabako fèn ye aw sòrò, 13 nka aw ka ɲagali k'a masòrò aw ye niyòrò sòrò Krisita ka tòòròw la, walisa ni ale nòòrò fana y'i jira tuma min na, aw ka nisòndiya ka ɲagali kosèbè. 14 Ni aw nenina Krisita tògò kosòn, aw ye dubadenw ye, katuguni nòòrò Ni min ye Ala Ni ye, o sigilen bè aw kan. 15 Aw si kana tòòrò k'a masòrò aw ye mògòfagala ye, wala nson, wala kojugukèla, wala min bè a da don walikow la. 16 Nka ni mògò dò bè tòòrò k'a masòrò a ye kretièn ye, a kana maloya o la, nka a ka Ala bonya ni o tògò ye. 17 Kiri daminè waati sera Ala ka mògòw ma. Ayiwa, ni anw fòlò ka kiri bè tigè, Ala ka Kibaru Duman kan minèbaliw laban na kè di? 18 I ko Kitabu b'a fò ko: «Ni mògò tilennenw kisili ka gèlèn, Ala ɲèsiranbaliw ni jurumukèlaw ta na kè di?» 19 O de kosòn, minnu bè tòòrò ka kèɲè ni Ala sago ye, olu ka u niw kalifa Dabaa Ala kantigi ma, ka to ko ɲuman kèli la.

5

1 Egilisi cèkòròba minnu bè aw cèma, ne bè ne kan lase olu ma sisan. Ne ye u bòɲògònko cèkòròba ye, ani Krisita ka tòòròw seere. Nòòrò min bèna jira, ne ye niyòrò sòrò o la fana. Ne bè olu jija ko: 2 Ala ka sagakulu min kalifalen bè aw ma, a' ye aw janto o la. Aw kana o kè ni diyagoya ye, nka aw ka o kè ni diyaɲe ye ka kèɲè ni Ala sago ye. Aw kana o kè tònò jugu kosòn, nka aw ka o kè ni èaniya ɲuman ye. 3 Minnu kalifara aw ma, aw kana fanga digi olu la, nka aw ka kè ɲèjirabaaw ye sagakulu la. 4 O tuma la Sagagènnaw Kuntigi mana i jira, aw na masafugula nòòròma tiɲènbali sòrò. 5 O cogo la kamalenw, aw ka kolo cèkòròbaw ye. Aw bèè ka ɲògòn mago ɲè ni yèrèmajiginlenya ye, katuguni Kitabu ko: «Ala bè kuncèbaaw kèlè, nka a bè nèèma di yèrèmajiginlenw ma.» 6 O de kosòn a' ye aw yèrèw majigin Ala bolo barikama kòrò, walisa a ka aw kòròta tuma bènnen na. 7 A' ye aw hami kow bèè da ale kan, katuguni a bè a janto aw la. 8 A' ye aw hakili sigi ka to aw ɲè na! K'a masòrò aw jugu Sitanè bè yaalayaala i ko waraba konbotò. A bè se ka min sòrò k'a dun, a bè o de ɲini. 9 Aw ka a kèlè ka aw sinsinnen to dannaya la, k'a dòn ko aw balima minnu bè diɲè la, o bòɲògònko tòòròw bè olu fana sòrò. 10 Aw tòòròlen kò waati dòònin, nèèmabèètigi Ala min ye aw wele a nòòrò banbali kama Krisita la, o yèrè na aw dafa, ka aw sabati, ka aw barika bonya, ka aw sinsin. 11 Se bè ale ye badaa-badaa! Amiina. 12 Ne ye nin sèbèn fitinin kè k'a ci aw ma Silvèn fè, ne bè ale jate an balimakè dannamògò ye. Ne ye o sèbèn ka aw jija k'a jira aw la k'a jèya ko o nèèma ye Ala ka nèèma sèbè ye. Aw nòròlen ka to a la. 13 Egilisi min bè Babilonè, o bè aw fo, a ɲènatòmòlen don i ko aw. Ne denkè Marka fana bè aw fo. 14 A' ye ɲògòn fo ni kanuya da susuli ye. Aw minnu bèè ye Krisita taw ye, dususuma ka kè aw ye.

AMAZING GRACE BIBLE INSTITUTE