1 Jean11 Ko min tun bè kabini fòlòfòlò, an ye o min mèn, an ye o min ye an ɲèw la, an ye o min lajè, an bolow magara o min na, an bè o de fò aw ye ɲènamaya kuma ta fan fè.2 O ɲènamaya y'i jira, an y'a ye ka o seereya kè. Ɲènamaya banbali min tun bè Fa Ala da fè ka i jira an na, an bè o ko fò aw ye. 3 An ye min ye ka min mèn, an bè o de fò aw ye, walisa aw fana ka don an ka jè la. An kòni donnen bè Fa Ala ni a Denkè Yesu Krisita ka jè la. 4 An bè nin kow sèbèn ka ci aw ma walisa an ka ɲagali ka dafa. 5 An ye kuma min mèn ale fè k'a fò aw ye, o filè nin ye, ko Ala ye kènè de ye, dibi si t'a la fewu. 6 Ni an ko an bè Ala ka jè la, k'a sòrò an bè taama dibi la, an bè nkalon tigè, an tè tiɲè kan. 7 Nka ni an bè taama kènè la, i ko Ala yèrè bè kènè la cogo min na, an ye jèɲògònw ye, a Denkè Yesu joli bè an saniya jurumuw bèè ma. 8 Ni an ko jurumu tè an na, an bè an yèrèw lafili, tiɲè tè an kònò. 9 Ni an b'an jò an ka jurumuw la, ale ye kantigi ye, a tilennen bè ka an ka jurumuw yafa an ma, ani k'an saniya tilenbaliya bèè ma. 10 Ni an ko an ma jurumu kè, an bè Ala kè nkalontigèla ye, a ka kuma tè an kònò fewu. 21 Ne ka denmisènw, ne bè nin kow sèbèn k'a ci aw ma walisa aw kana jurumu kè. Nka ni dò ye jurumu kè, Dèmèbaa bè an fè an Fa kèrè fè, o ye Yesu Krisita tilennen ye.2 Ale de ye an ka jurumuw juru sara ye, an dama ta tè, fo diɲè bèè ta. 3 Ni an bè a ka ci fòlenw mara, an b'a dòn o de la ko an bè ale dòn. 4 Min b'a fò ko a bè ale dòn, k'a sòrò a tè a ka ci fòlenw mara, o ye nkalontigèla ye, tiɲè t'a kònò. 5 Nka min bè a ka kuma mara, Ala kanuya dafalen bè o kònò sèbè la. An b'a dòn o de la ko an bè ale la. 6 Min b'a fò ko a tolen bè ale la, o ka kan ka taama i ko ale yèrè taamana cogo min na. 7 Kanulenw, ne tè ci kura sèbèn k'a ci aw ma fò ci kòrò, o bè aw bolo kabini fòlòfòlò. Aw ye kuma min mèn ka ban, o de ye o ci kòrò ye. 8 O bèè n'a ta ne bè min sèbèn k'a ci aw ma, o ye ci kura ye. O ye tiɲè ye ale ni aw fè, k'a masòrò dibi tèmèntò don, kènè sèbè bòra ka ban. 9 Min b'a fò ko a bè kènè la k'a sòrò a bè a balima koniya, o bè dibi la halibi. 10 Min bè a balima kanu, o tolen bè kènè la, a tèna kè mògò si ka kunnatiɲèni sababu ye. 11 Nka min bè a balima koniya, o bè dibi la, a bè taama dibi la. A tè a taa yòrò dòn, k'a masòrò dibi y'a ɲè lafin. 12 Ne bè nin sèbèn ci aw ma, denmisènw, k'a masòrò aw ka jurumuw yafara aw ma ale tògò barika la. 13 Ne bè nin sèbèn ci aw ma, ne faw, katuguni min bè kabini fòlòfòlò, aw bè o dòn. Ne bè nin sèbèn ci aw ma, kamalenw, katuguni aw ye se sòrò Sitanè kan. Ne ye nin sèbèn ci aw ma, denmisènw, k'a masòrò aw ye Fa Ala dòn. 14 Ne ye nin sèbèn ci aw ma, ne faw, katuguni min bè kabini fòlòfòlò, aw ye o dòn. Ne ye nin sèbèn ci aw ma, kamalenw, k'a masòrò aw barika ka bon, Ala ka kuma tolen bè aw kònò, aw ye se sòrò Sitanè kan. 15 Aw kana diɲè kanu, aw kana diɲè kònò fènw kanu. Ni mògò dò bè diɲè kanu, Fa Ala kanuya tè o tigi kònò fewu. 16 Katuguni fèn minnu bèè bè diɲè la, farisogo nege, ɲè nege, ani diɲè ka yèrèjiranciya, olu si tè bò Fa Ala la, u bè bò diɲè de la. 17 Diɲè kòni bè tèmèn ani a negew fana, nka min bè Ala sago kè, o bè to badaa-badaa. 18 Ne ka denmisènw, laban tuma surunyara. Aw y'a mèn ko Krisita kèlèbaa ka kan ka na. Ayiwa sisan Krisita kèlèbaa caman y'u jira. O de la an b'a dòn ko laban tuma surunyara. 19 U bòra an ka jè la, nka u tun tè an dòw ye. Ni u tun ye an dòw ye, u tun na to an fè. Nka u bòra k'a jira ko u tun tè an dòw ye. 20 Aw kòni ye tulu munni sòrò Senuma de fè, aw bèè ye dònniya sòrò. 21 Ne ka sèbèn ci kun tè aw ma ko aw tè tiɲè dòn, nka ne y'a ci katuguni aw b'a dòn, ani aw b'a dòn fana ko nkalon si tè bò tiɲè la. 22 Jòni ye nkalontigèla ye, fò min b'a fò ko Yesu tè Krisita ye? O tigi ye Krisita kèlèbaa ye, a bè ban Fa Ala ni a Denkè la. 23 Min bè ban Denkè la, o bè ban a Fa fana la. Min bè sòn Denkè ma, o bè sòn a Fa fana ma. 24 Aw kòni ye kuma min mèn kabini fòlòfòlò, o ka to aw kònò. Aw ye min mèn kabini fòlòfòlò, ni o tolen bè aw kònò, aw fana nòròlen na to Denkè la ani a Fa fana la. 25 Krisita ye layidu ta ko a bè min di an ma, o ye ɲènamaya banbali de ye. 26 Minnu b'a fè ka aw lafili, ne bè nin sèbèn k'a ci aw ma olu ko la. 27 Aw kòni ye Ni Senu sòrò Krisita fè, o tolen bè aw kònò, aw mago tè mògò si la ka aw kalan. Ni Senu bè aw kalan ko bèè la, a ka kalan ye tiɲè ye, nkalon tè. O de y'a to aw ka Ni Senu ka kalan mara ka aw to Krisita la. 28 Ayiwa, denmisènw, aw ka to Krisita la, walisa a mana i jira, an ja gèlèyalen ka sòrò, an kana maloya a ɲè kòrò a na don na. 29 Aw y'a dòn ko Krisita tilennen don, o de kosòn, aw ka kan k'a dòn ko mògò o mògò bè tilennenya kow kè, o bangera ale de fè. 31 Fa Ala ye an kanu haali cogo min na, o filè nin ye, ko an ka wele Ala denw. An kèra ten fana. O de y'a to diɲè tè an dòn, k'a masòrò a ma Ala dòn.2 Kanulenw, sisan an ye Ala denw ye, nka an na kè min ye, o ma jira fòlò. An y'a dòn ko Krisita mana i jira, an na kè a bòɲògònkow ye, k'a masòrò ale bè cogo min na, an n'a ye ten. 3 O jigi bè mògò o mògò fè Krisita kan, o bè a yèrè saniya i ko ale ka senu cogo min na. 4 Mògò o mògò bè to ka jurumu kè, o bè to ka sariya fana tiɲè. Jurumu dun ye sariya tiɲèni de ye. 5 Aw b'a dòn ko Krisita y'i jira walisa ka jurumu bò mògòw la, jurumu si tè ale la. 6 Mògò o mògò tolen bè ale la, o tè to ka jurumu kè nka min bè to ka jurumu kè, o ma ale ye, o ma ale dòn. 7 Denmisènw, mògò si kana aw lafili. Min bè to ka tilennenya kow kè, o tilennen bè i ko Krisita yèrè tilennen bè cogo min na. 8 Min bè to ka jurumu kè, o bòra Sitanè de la, katuguni Sitanè bè jurumu kè kabini fòlòfòlò. Ala Denkè y'i jira nin de kosòn, walisa a ka Sitanè ka kèwalew tiɲè. 9 Mògò o mògò bangera Ala fè, o tè to ka jurumu kè, katuguni Ala ka danni fèn tolen bè a kònò, a tè se ka to ka jurumu kè, k'a masòrò a bangera Ala fè. 10 Ala denw ni Sitanè denw bè dòn ka bò ɲògòn na nin de la: Min tè to ka tilennenya kow kè, o ma bò Ala la, ani min tè a balima kanu fana. 11 Aw ye ci min mèn kabini fòlòfòlò, o filè nin ye, ko an ka ɲògòn kanu. 12 An kana kè i ko Kaèn, o bòra Sitanè la, ka a yèrè dògòkè faga. Mun na a y'a faga? Katuguni ale ka kèwalew tun ka jugu, k'a sòrò a dògòkè taw tilennen tun don. 13 Balimaw, ni diɲè bè aw koniya, aw kana kabakoya o la. 14 An y'a dòn ko an bòra saya la ka don ɲènamaya la, katuguni an bè balimaw kanu. Min tè a balima kanu, o tolen bè saya la. 15 Mògò o mògò bè a balima koniya, o ye mògòfagala de ye. Aw y'a dòn ko ɲènamaya banbali tolen tè mògòfagala si kònò abada. 16 An bè kanuya dòn nin de la, katuguni Krisita ye a ni di an kosòn. An fana ka kan ka an ni di balimaw kosòn. 17 Nin diɲè nafolo bè min fè, ni o ye a balima kòlilen ye, k'a sòrò a ma sòn ka hinè a la, Ala kanuya bè o tigi kònò cogo di? 18 Denmisènw, an ka kanuya kana kè da la kuma dama ye nènkun na, fò kèwalew ni tiɲè la. 19 O de la an n'a dòn ko an ye tiɲè ta ye. An bè se ka an hakili sigi ale ɲè kòrò. 20 Ni an dusukun bè an jalaki, Ala ka bon ni an dusukun ye, ale bè fèn bèè dòn. 21 Kanulenw, ni an dusukun ma an jalaki, an ja bè gèlèya Ala ɲè kòrò, 22 an mana fèn o fèn deli fana, an bè o sòrò ale fè, katuguni an bè a ka ci fòlenw mara ka a diyaɲekow kè sòn. 23 A ka ci fòlen filè nin ye, ko an ka da a Denkè Yesu Krisita tògò la, ka ɲògòn kanu ka kèɲè ni o ka ci dilen ye an ma. 24 Min bè ale ka ci fòlenw mara, o tigi tolen bè Ala la, Ala tolen bè o tigi la. An b'a dòn ko Ala tolen bè an na nin de la, a ye a Ni Senu di an ma. 41 Kanulenw, aw kana da niw bèè la, nka aw ka u kòròbò yala ni u bòra Ala de la, katuguni kira nkalontigèla caman nana diɲè la.2 Aw na Ala Ni dòn nin de la, ni o ni b'a fò ko Yesu Krisita farisogoma nana, o bòra Ala la. 3 Ni o ni m'a fò ko Yesu Krisita farisogoma nana, o ma bò Ala la, o ye Krisita kèlèbaa ni de ye. Aw y'a mèn ko o bè na, a bè diɲè la sisan yèrè. 4 Aw kòni, denmisènw, aw bòra Ala la, aw ye se sòrò o kira nkalontigèlaw kan, katuguni min bè aw kònò, o ka bon ni diɲè kònò ta ye. 5 Olu ye diɲè taw de ye, o de y'a to u bè kuma diɲè cogo la, diɲè bè u lamèn. 6 Anw kòni bòra Ala la. Min bè Ala dòn, o bè an lamèn. Min ma bò Ala la, o tè an lamèn. An bè tiɲè ni ani nkalon ni dòn o de fè. 7 Kanulenw, an ka ɲògòn kanu, katuguni kanuya bòra Ala de la. Kanuya sèbè bè min kònò, o bangera Ala fè, a bè Ala dòn. 8 Kanuya sèbè tè min kònò, o tè Ala dòn, k'a masòrò Ala ye kanuya de ye. 9 A filè, Ala ye a ka kanuya jira an ta fan fè nin de fè, a ye a Denkè kelenpe ci ka na diɲè la, walisa an ka ɲènamaya o de barika la. 10 Kanuya bè nin de la: A tè ko an ye Ala kanu mènè, nka ale de ye an kanu ka a Denkè ci ka na, a ka kè an ka jurumu juru sara ye. 11 Kanulenw, k'a sòrò Ala ye an kanu ten, an fana ka kan ka ɲògòn kanu dè! 12 Mògò si ma Ala ye abada. Ni an bè ɲògòn kanu, Ala tolen bè an na, a ka kanuya dafalen bè an na. 13 Nin de y'a to an b'a dòn ko an tolen bè ale la ani ale tolen bè an na, katuguni a ye a Ni dò di an ma. 14 An kòni y'a ye ka seereya kè ko Fa Ala ye a Denkè ci ka na, a ka kè diɲè Kisibaa de ye. 15 Mògò o mògò b'a fò ko Yesu ye Ala Denkè ye, Ala tolen bè o la, o fana tolen bè Ala la. 16 Ala bè an kanu kanuya min na, an ye o dòn, an dara o la fana. Ala ye kanuya de ye. Min tolen bè kanuya la, o tolen bè Ala la, ani Ala tolen bè o la. 17 Kanuya bè dafa an fè nin de la, walisa an ja ka gèlèya kiri tigè don na, katuguni ale bè cogo min na, an fana bè diɲè la o cogo de la. 18 Siran tè kanuya la, nka kanuya dafalen bè siran gèn ka bò yen, k'a masòrò tòòrò bè siran fè. Min bè siran, o ma dafa kanuya la. 19 An kòni bè Ala kanu, katuguni ale fòlò de ye an kanu. 20 Ni mògò dò y'a fò ko a bè Ala kanu, k'a sòrò a bè a balima koniya, o ye nkalontigèla ye. Katuguni a ɲè bè a balima min na, ni a tè o kanu, a ɲè tè Ala min na, a bè se ka o kanu cogo di? 21 An ye nin ci sòrò a fè, ko min bè Ala kanu, o ka a balima fana kanu. 51 Mògò o mògò dara a la ko Yesu ye Krisita ye, o bangera Ala fè. Min bè fa kanu, o bè a den fana kanu.2 Ni an bè Ala kanu ka a ka ci fòlenw mara, an b'a dòn o de fè ko an bè Ala denw kanu. 3 Ka Ala kanu, o ye nin de ye, ka a ka ci fòlenw mara. A ka ci fòlenw man gèlèn. 4 K'a masòrò min bangera Ala fè, o bè se sòrò diɲè kan. Se min bè sòrò diɲè kan, o ye nin de ye, an ka dannaya. 5 Jòn bè se sòrò diɲè kan? Fò min dara a la ko Yesu ye Ala Denkè ye. 6 Min nana ji ni joli barika la, Yesu Krisita don. A ma na ni ji dama ye mènè, a nana ni ji ni joli ye. Ni Senu de bè o seereya kè, katuguni Ni Senu ye tiɲè de ye. 7 Seere saba bè yen, 8 Ni Senu ni ji ani joli, o saba ka seereya bènnen bè ɲògòn ma. 9 Ni an bè mògòw ka seereya minè, Ala ka seereya ka bon n'o ye, k'a masòrò Ala ka seereya ye nin de ye, ko a ye a Denkè seereya kè. 10 Min bè da Ala Denkè la, seereya bè o fè a yèrè kònò. Min ma da Ala ka kuma la, o ye Ala kè nkalontigèla ye, katuguni Ala ye a Denkè seereya min kè, a ma da o la. 11 O seereya filè nin ye, ko Ala ye ɲènamaya banbali di an ma, o ɲènamaya bè sòrò a Denkè la. 12 O Denkè bè min fè, ɲènamaya bè o fè. Ala Denkè tè min fè, ɲènamaya tè o fè fewu. 13 Aw minnu dara Ala Denkè tògò la, ne bè nin kow sèbèn ka ci aw ma, walisa aw k'a dòn ko ɲènamaya banbali bè aw fè. 14 Ja gèlèya min bè an fè Ala ɲè kòrò, o filè nin ye, ko ni an ye fèn dò deli a fè ka kèɲè ni a sago ye, a bè an lamèn. 15 Ni an y'a dòn ko a bè an lamèn, an y'a dòn ko an bè fèn o fèn deli a fè, an ye o sòrò ka ban. 16 Jurumu min tè mògò bila saya la, ni mògò dò y'a ye ko a balima bè o jurumu kè, a ka Ala deli, Ala na ɲènamaya di o ma. Jurumu min tè mògò bila saya la, o ko don. Jurumu dò bè mògò bila saya la, ne t'a fò ko delili ka kè o ko la. 17 Tilenbaliya bèè ye jurumu ye. Jurumu dò bè yen min tè mògò bila saya la. 18 An y'a dòn ko mògò o mògò bangera Ala fè, o si tè to ka jurumu kè, katuguni Ala Denkè bè o mara, Sitanè tè maga a la. 19 An y'a dòn ko an ye Ala ta ye, ko diɲè bèè bè Sitanè fanga kòrò. 20 An y'a dòn fana ko Ala Denkè nana, ko a ye hakili di an ma, walisa an ka o Sèbèma dòn. An bè o Sèbèma yèrè la, a Denkè Yesu Krisita kòni. O de ye Ala sèbè yèrè ye, ani ɲènamaya banbali. 21 Denmisènw, a' ye aw yèrèw kòlòsi boli batoli la. |