1 Corinthiens


1

1 Ne Paul, Krisita Yesu ka ciden Ala sago barika la, ka kèɲè ni a ka weleli ye, ani an balimakè Sositènè 2 bè nin sèbèn ci Ala ka egilisi ma min bè Kòrènte, aw minnu welela ka kè senumaw ye ka aw bila aw dan na ka saniya Yesu Krisita la, ani minnu bèè bè an Matigi Yesu Krisita tògò wele yòrò o yòrò. Ale de ye an ni olu bèè Matigi ye. 3 An Fa Ala ni Matigi Yesu Krisita ka nèèma ni dususuma di aw ma. 4 Ne bè barika da ne ka Ala ye aw ko la tuma bèè a ka nèèma kosòn, o min dira aw ma Krisita Yesu la, 5 ko aw jiidira fèn bèè la ale la, fo ka se kuma bèè ni dònniya bèè la, 6 k'a masòrò Krisita seereya sabatira aw cèma. 7 O cogo la, ka aw to an Matigi Yesu Krisita jirali makònòli la, Ala ka nilifèn si tè dèsè aw la. 8 Ale de na aw sabati fana fo a laban, walisa aw jalakibali ka sòrò an Matigi Yesu Krisita ka don na. 9 Ala ye kantigi ye. Ale de ye aw wele ka kè a Denkè an Matigi Yesu Krisita jèɲògònw ye. 10 Balimaw, ne bè aw deli an Matigi Yesu Krisita tògò kosòn: Aw ka aw kan kè kelen ye. Farali kana kè aw cèma. A' ye aw kònò kè kelen ye, o kòrò, èaniya kelen ka kè aw la, ani miirili kelen. 11 Ne balimaw, a fòra ne ye Kloe ka so mògò dòw fè ko sòsòliw bè aw cèma. 12 Ne b'a fè ka min fò, o filè nin ye ko: Aw dòw b'a fò ko: «Ne ye Paul ta ye.» Dòw ko: «Ne ye Apolosi ta ye.» Dòw fana ko: «Ne ye Pierè ta ye.» Dò wèrèw ko: «Ne ye Krisita ta ye.» 13 Krisita tilatilalen don wa? Paul gengenna jiri la aw kosòn wa? Aw batisera Paul tògò la wa? 14 Ne bè barika da Ala ye, k'a masòrò ne ma aw si batise, ni Krisipus ni Gayus tè, 15 walisa mògò si kana a fò ko aw batisera ne tògò la. 16 Tiɲè don, ne ye Sitèfanasi ka so kònò mògòw fana batise. Ni ne ye mògò wèrè batise olu kò, ne hakili tè o la. 17 Krisita ma ne ci ka batiseli kè, a ye ne ci ka Kibaru Duman fò ni mògòw ka hakilitigiya kuma tè, walisa Krisita gengenjiri ko kana kè fu ye. 18 Krisita gengenjiri ko waajuli ye nalonmaya ye halakibaatòw ɲè na, nka an minnu bè kisi, an ɲè na, Ala ka sebaaya de don. 19 A sèbènnen bè ko: «Ne na hakilitigiw ka hakilitigiya tiɲè, ka ko dònnaw ka dònniya kè fu ye.» 20 O la sa, hakilitigi bè min? Sariya karamògò bè min? Nin waati sòsòlikèla bè min? Ala m'a jira ko nin diɲè ka hakilitigiya ye nalonmaya ye wa? 21 Ala ka hakilitigiya min y'i jira diɲè la, diɲè ni a ka hakilitigiya ma se ka Ala dòn o fè. O de kosòn Ala y'a latigè ka dannabaaw kisi gengenjiri waajuli nalonmaya fè. 22 Yahutuw bè taamashyèn kabakomaw ɲini. Grèkiw bè hakilitigiya de ɲini. 23 An kòni bè Krisita gengennen ko waajuli kè. O waajuli ye kunnatiɲèni ye Yahutuw ɲè na. Siya wèrèw ɲè na, nalonmaya don. 24 Nka Ala ye minnu wele, Yahutuw ni siya wèrèw kòni, olu ɲè na, Krisita ye Ala ka sebaaya ani Ala ka hakilitigiya de ye. 25 Katuguni hakilitigiya bè Ala ka nalonmaya la ka tèmèn mògòw ka hakilitigiya kan. Barika bè Ala ka barikantanya la ka tèmèn mògòw barika kan. 26 Balimaw, Ala ye aw minnu wele, a' ye miiri aw yèrèw ko la. Minnu bè jate hakilitigiw ye nin diɲè la, olu man ca aw cèma. Fangatigiw man ca aw la. Mògò tògòbaw man ca. 27 Nka nin diɲè bè fèn minnu jate nalonmaw ye, Ala ye olu ɲènatòmò walisa ka hakilitigiw lamalo. Diɲè bè fèn minnu jate barikantanw ye, Ala ye olu ɲènatòmò walisa ka barikamaw lamalo. 28 Diɲè bè fèn minnu jate fèn gansanw ye, a bè ɲigin fèn minnu na, hali fèn minnu tè foyi ye, Ala ye olu ɲènatòmò, walisa fèn minnu bè jate, olu ka kè fu ye, 29 walisa Hadamaden si kana a yèrè bonya Ala ɲè kòrò. 30 Nka Ala de barika la aw bè Krisita Yesu la. Ala ye Yesu kè an ka hakilitigiya ni an ka tilennenya ye. An bè saniyali ni kunmabòli fana sòrò ale la, 31 walisa «Min b'a yèrè bonya, o k'a yèrè bonya Matigi la,» i ko a sèbènnen bè Kitabu la cogo min na.



2

1 Balimaw, ne taara aw yòrò ka Ala ka kuma fò aw ye tuma min na, ne ma taa ni kumaba wala hakilitigiyaba ye. 2 Ne tun y'a latigè ko ka ne to aw cèma, ko ne tèna foyi dòn Yesu Krisita kò, ani Yesu Krisita gengennen jiri la. 3 O de y'a to ne barikantan sirannen yèrèyèrètò tun bè aw cèma. 4 Ne ka kuma ani ne ka Kibaru Duman waajuli ma kè ni mògòw ka hakilitigiya kuma nugulenw ye, nka a jirala ka jèya ni sebaaya ye Ni Senu barika la, 5 walisa aw ka dannaya ju kana sigi mògòw ka hakilitigiya kan, fò Ala ka sebaaya kan. 6 O bèè n'a ta, an bè hakilitigiya kuma de fò dannabaa mòlenw cèma, nka nin diɲè ka hakilitigiya ko tè, nin diɲè kuntigiw ka hakilitigiya fana ko tè, olu bè tèmèn. 7 Nka Ala ka hakilitigiya gundo min dogolen tun bè, an bè o kuma de fò. Ala tun ye o latigè an nòòrò sòròli kama sani diɲè ka da. 8 Nin diɲè kuntigiw si ma o hakilitigiya dòn. Ni u tun y'a dòn, u tun tèna nòòrò Matigi gengenjiri la. 9 K'a masòrò a sèbènnen bè Kitabu la ko: «Mògò ɲè ma fèn minnu ye, a tulo ma fèn minnu mèn, fèn minnu ma jigin mògò hakili la, Ala ye o fènw dila a kanubaaw ye.» 10 O la, Ala ye o fènw jira an na a Ni Senu barika la, k'a masòrò Ni Senu bè fèn bèè sègèsègè, hali Ala ka ko dunbaw. 11 Hadamadenw cèma, jòni bè mògò ka kow dòn, ni mògò ni yèrè tè? O cogo la, mògò si tè Ala ka kow dòn, fò Ala Ni. 12 An kòni ye Ni min sòrò, o tè diɲè ta ye, fò Ala Ni, walisa Ala ye fèn minnu ni an na, an ka olu dòn. 13 An bè o kow fò ni kuma minnu ye, olu tè sòrò mògòw ka hakilitigiya kalan fè, fò Ni Senu ka kalan de fè. Ni Senu sigilen bè minnu kònò, o kow bè jira olu la Ni Senu ka kuma fè. 14 Hadamaden gansan tè Ala Ni ka kow minè, sabu u ye nalonmaya ye a ɲè na. A tè se ka u dòn fana, k'a masòrò u bè faranfasi Ni Senu de barika la. 15 Ni Senu sira taamabaaw bè fèn bèè faranfasi, nka mògò si tè o tigiw ka kow faranfasi. 16 Kitabu ko: «Jòni bè Matigi ka miiriliw dòn? Jòni bè se ka ale kalan?» Nka anw kòni, Krisita ka miiriliw bè an kònò.



3

1 Tiɲè la balimaw, ne ma se ka kuma aw fè i ko Ni Senu sira taamabaaw, fò nin diɲè kow sira taamabaaw, i ko denyènin Krisita la. 2 Ne ye nònò di aw ma. Ne ma se ka dumuni gèlènma di aw ma, sabu aw tun tè se o kòrò. Halibi, aw tè se o kòrò, 3 k'a masòrò aw ye nin diɲè kow sira taamabaaw ye fòlò. Keleya ni kèlè ko minnu bè aw cèma, olu t'a jira ko aw ye nin diɲè kow sira taamabaaw ye wa? Aw t'a kan ka taama Hadamadenw cogo la wa? 4 Ni aw dò ko: «Ne ye Paul ta ye,» ni dò wèrè ko: «Ne ye Apolosi ta ye,» o tè Hadamadenw cogo ye wa? 5 O la, Apolosi ye jòn ye? Ne Paul fana ye jòn ye? Anw ye Ala ka baarakèlaw dòròn de ye, minnu ye aw bila dannaya sira kan ka kèɲè ni Matigi ka baara dilen ye an bèè kelen-kelen ma. 6 Ne ye danni kè, Apolosi y'a sòn nka Ala de y'a falen. 7 O cogo la, min bè danni kè ani min b'a sòn, olu tè foyi ye, fò Ala min b'a falen. 8 Min bè danni kè ani min b'a sòn, olu ka kan. Ala na u bèè kelen-kelen sara ka kèɲè ni u ka baara kèlenw ye. 9 Sabu an ni Ala ye baarakèɲògònw ye. Aw ye Ala ka foro ye, ani a ka so jòta. 10 Ne ye so ju sigi ka kèɲè ni Ala ka nèèma dilen ye ne ma, i ko sojòla hakiliman. Sisan, mògò wèrè bè so jò o ju kan. Nka bèè kelen-kelen ka u yèrèw kòlòsi u ka so jò cogo la o kan. 11 Ju min sigira, o ye Yesu Krisita de ye. Mògò si tè se ka dò wèrè sigi o kò. 12 Ni mògò dò ye so jò o ju kan ni sanu ye, wala warijè, wala kabakurun sòngò gèlènw, wala jiri, wala bin jalen, wala ɲòkalaw, 13 u bèè kelen-kelen ye baara sifa min kè, o na jira. O na dòn kiri don na, sabu a na jira tasuma de fè. Mògòw bèè kelen-kelen ka baara na kòròbò tasuma fè k'a sifa jira. 14 Ni mògò dò ka baara kèlen ma jeni, o na baraji sòrò. 15 Nka ni mògò dò ka baara kèlen jenina, o na bònè a ka baraji la. O bèè n'a ta a yèrè na kisi, i n'a fò a ye tasuma cètigè. 16 Aw m'a dòn ko aw ye Alabatosoba de ye, ko Ala Ni sigilen bè aw kònò wa? 17 Ni mògò dò ye Alabatosoba tiɲè, Ala na o tigi tiɲè k'a masòrò Alabatosoba ka senu, o ye aw de ye. 18 Mògò si kana a yèrè lafili. Ni dò bè miiri ko a ye hakilitigi ye aw cèma ka kèɲè ni nin diɲè ka kow ye, o k'a yèrè kè i n'a fò nalonma, walisa a ka kè hakilitigi ye sèbè la. 19 K'a masòrò nin diɲè ka hakilitigiya ye nalonmaya ye Ala ɲè na. A sèbènnen bè Kitabu la ko: «A bè hakilitigiw minè jan na ni u yèrèw ka keguya ye.» 20 A sèbènnen bè fana ko: «Matigi bè hakilitigiw ka miiriliw dòn, ko olu ye fu ye.» 21 O de kosòn mògò si kana a yèrè bonya mògòw ko la, katuguni fèn bèè ye aw ta ye. 22 Paul wo, Apolosi wo, Pierè wo, diɲè wo, ɲènamaya wo, saya wo, sisan fènw wo, fèn nataw wo, fèn bèè ye aw de ta ye. 23 Aw ye Krisita ta ye. Krisita ye Ala ta ye.



4

1 O cogo la mògòw ka an jate ko anw ye Krisita ka baarakèlaw ani Ala ka gundo kow ɲèjirabaaw ye. 2 Baara kalifalen bè minnu ma, a bè ɲini olu fè ko u ka kè dannamògòw ye. 3 Ne kòni ta fan fè, ni aw bè ne sègèsègè, wala ni ne bè sègèsègè mògò wèrèw fè kiri yòrò la, o tè koba ye ne ɲè na. Ne tè ne yèrè sègèsègè fana, 4 k'a masòrò ne dusukun ma ne jalaki foyi la, nka o tè ne josòrò sababu ye. Min bè kiri tigè ne kan, o ye Matigi de ye. 5 O de kosòn, aw kana kiri tigè mògò si kan sani a waati ka se, sani Matigi ka na. Ale de na dibila ko dogolenw bèè bò kènè kan, ka mògòw dusukunw ka miiriliw fana jira. O tuma la bèè kelen-kelen ka kan ni tanuli min ye, u na o sòrò Ala fè. 6 Balimaw, ne ye kuma kòròma minnu fò sisan, ne ye olu fò ne ni Apolosi ta fan fè aw kalanni kosòn, walisa aw k'a faamu an ka ɲèjirali fè, ko fèn minnu sèbènna Kitabu la, mògò kana tèmèn olu kan. O de kosòn aw si kana aw yèrèw bonya ka mògò dò fisaya dò ye. 7 O de la, jòni ye i fisaya ka tèmèn dò wèrè kan? Mun bè i bolo ni o ma di i ma? N'a dira i ma, mun na i b'i yèrè bonya i n'a fò a ma di i ma? 8 Aw ye aw sagona fènw bèè sòrò kelen! Aw fèntigiyara kelen! Aw kèra masakèw ye k'a sòrò an sen tè o la! Ne b'a fè aw ka kè masakèw ye sèbè la, walisa an ni aw ka kè masakèw ye ɲògòn fè! 9 Ne bè miiri ko Ala ye an cidenw kè bèè kòmògòw ye, an kèra i ko mògò minnu jalaki ye saya ye, k'a masòrò an kèra filèli fènw ye diɲè bèè ɲè kòrò, mèlèkèw fara Hadamadenw kan. 10 An ye nalonmaw ye Krisita kosòn, nka aw ye hakilitigiw ye Krisita la! An ye barikantanw ye, nka aw barika ka bon. Aw bè bonyali sòrò, anw bè dògòyali sòrò. 11 Fo ka na se sisan ma, an tòòròlen don kòngò ni minnògò fè. Anw fèèrètò don, an bè bugò. Sigi yòrò kelen tè an na. 12 An bè baara kè ni an yèrè bolow ye fo ka an sègèn. Mògòw bè an neni, an bè duba ta u ye. U bè tugu an nòfè ka an tòòrò, an bè o muɲu. 13 U bè an tògò tiɲè, an bè kuma ɲuman fò u ye. An bè jate diɲè ɲamanɲaman fililenw ye, i ko fèn korokaraw, fo ka na se sisan ma. 14 Ne tè nin kow sèbèn ka aw lamalo, nka ne bè aw lasòmi i ko ne den kanulenw. 15 Hali ni karamògò waa tan tun bè aw fè Krisita la, fa caman kòni tè aw fè, katuguni ne kèra aw fa ye Krisita Yesu la Kibaru Duman waajuli barika la. 16 O de kosòn ne bè aw deli ko aw ka kè ne ladegebaaw ye. 17 O de y'a to ne bè ne denkè kanulen Timote ci aw ma, dannamògò don Matigi la. Ale na aw hakili jigin ne taama cogow la Krisita la, i ko ne bè mògòw kalan cogo min na yòrò bèè egilisiw bèè la. 18 Aw dòw ye kuncèbaya kè ko ne tèna taa aw yòrò tun, 19 nka n'a kèra Matigi sago ye, ne na taa aw fè yen sòòni. Ni ne sera yen, ne tèna o kuncèbaaw ka kumaw jate, fò u ka sebaaya, 20 katuguni Ala ka masaya tè kuma ko ye, sebaaya ko don. 21 Aw bè mun fè sa? Ne ka taa aw yòrò ni gosili berew ye wa? Wala ne ka taa ni kanuya ni sumalenya de ye?



5

1 A mènna fan bèè ko kakalaya bè aw cèma min ɲògòn tè kè hali siya wèrèw cèma, o filè nin ye ko aw dò ye a fa muso ta. 2 Aw dun bè kuncèbaya kè halibi! Aw tun ka kan ka ɲènasisi kosèbè, walisa min ye o ko kè, o ka gèn ka bò aw cèma. 3 Hali ni ne tè aw cèma yen farisogo la, ne ni bè aw cèma yen. Min ye o ko jugu kè, ne ye kiri tigè o kan ka ban, i n'a fò ne tun bè yen. 4 Ka aw lajèlen to Matigi Yesu tògò la ani ne ni fana, an Matigi Yesu ka sebaaya na kè an fè, 5 aw ka o cè don Sitanè bolo, a farikolo ka halaki, walisa a ni ka kisi Matigi Yesu ka don na. 6 Aw ka yèrè bonyali tè bèn! Aw m'a dòn ko funun fèn dòònin bè mugu nòòninen bèè funun wa? 7 A' ye o funun fèn kòrò bò yen, walisa aw ka kè mugu nòòninen kura ye, funun fèn tè min na, sabu aw saniyalen don i ko nbuuru fununbali, k'a masòrò an ka Tèmènkan saraka fagara, o ye Krisita de ye. 8 O de kosòn an ka o seli kè, nka o kana kè ni funun fèn kòrò ye, wala ni kònòna juguya ni sònkolonya funun fèn ye, fò dusukun jèlen ni tiɲè nbuuru fununbali ye. 9 Ne y'a fò aw ye ne ka sèbèn la ko aw ni jatòw kana jè foyi la, 10 nka nin diɲè la jatòw ko tè. Wasabaliw ni binkannikèlaw ni bolisònnaw ko tè. Ni olu ko tun don, a tun na kè wajibi ye aw ka bò diɲè la! 11 Nka sisan ne bè min fò, o filè nin ye ko: Mògò min bè wele balima, ni o ye jatò ye, wala wasabali, wala bolisònna, wala nenilikèla, wala dòlòtò, wala binkannikèla, aw ni o tigi kana jè foyi la. Aw ni o bòɲògònko mògò kana dumuni kè ɲògòn fè yèrè. 12 Kènèma mògòw ka kiri ko ye ne kunko ye wa? Ala de na kiri tigè olu kan. Mògò minnu bè aw cèma, aw man kan ka olu ka kiri ko ɲènabò wa? «A' ye kojugukèla gèn ka bò aw cèma.»



6

1 Ni kiri ko dò bè aw dò ni a balima cè, o bè sòn ka taa o ɲènabò tilenbaliw ɲè kòrò cogo di? Yala a tèna a ɲènabò dannabaaw ɲè kòrò wa? 2 Aw m'a dòn ko dannabaaw na kiri tigè diɲè kan wa? Ni aw na kiri tigè diɲè kan, aw man kan ni o ko misènw ɲènabòli ye wa? 3 Aw m'a dòn ko an na kiri tigè mèlèkèw kan wa? Janko nin diɲè kow? 4 Ayiwa ni nin diɲè kiri ko dòw bè aw ni ɲògòn cè, egilisi tè mògò minnu jate, yala aw bè olu kè o kow kiritigèlaw ye wa? 5 Ne bè o fò ka aw lamalo. Mògò hakilitigi si tè aw cèma min bè se ka kiri ko ɲènabò a balimaw ni ɲògòn cè wa? 6 Nka balima dò bè dò wele kiri la dannabaliw yèrè ɲè kòrò! 7 Tiɲè la, kiri ko ka sòrò aw ni ɲògòn cè, o ye aw jalaki de ye. Mun y'a to aw tè o tilenbaliya ko muɲu? Mun y'a to aw tè tòɲòli muɲu? 8 Nka minnu bè tilenbaliya kow kè ka aw tòɲò, o ye aw yèrèw de ye. Aw bè o kè aw balimaɲògònw na! 9 Aw m'a dòn ko kojugukèlaw tèna Ala ka masaya sòrò wa? Aw kana aw yèrèw lafili. Kakalaw wo, bolisònnaw wo, jatòw wo, cèɲògòn ɲininaw wo, 10 sonyalikèlaw wo, wasabaliw wo, dòlòtòw wo, nenilikèlaw wo, bikannikèlaw wo, olu si tèna Ala ka masaya sòrò. 11 Aw dòw tun bè ten dè, nka aw kora, aw bilara aw dan na ka kè Ala ka senumaw ye, aw jatera tilennenw ye Matigi Yesu Krisita tògò la ani an ka Ala Ni barika la. 12 Fèn bèè dagalen bè ne ye, nka nafa tè fèn bèè la. Fèn bèè dagalen bè ne ye, nka ne tèna sòn ka ne yèrè kè fèn si ka jòn ye. 13 Dumuni fènw ye kònòbara ta ye. Kònòbara ye dumuni fènw ta ye, o ye tiɲè ye. O bèè n'a ta, Ala na u fila bèè ban. Nka mògò farikolo ma kè jatòya kama. Farikolo ye Matigi ta ye, Matigi ye farikolo ta ye. 14 Ala ye an Matigi lakunun ka bò suw cèma. Ale na an fana lakunun ka bò suw cèma a ka sebaaya barika la. 15 Aw m'a dòn ko aw farikolow ye Krisita farikolo yòrò dòw ye wa? Ayiwa, ne na Krisita farikolo yòrò dòw ta ka olu kè jatòmuso farikolo yòrò dòw ye wa? Ayi dèrè! 16 Aw m'a dòn ko cè min ni jatòmuso bè jè, a ni o bè kè farisogo kelen ye wa? Katuguni Kitabu ko: «U fila na kè farisogo kelen ye.» 17 Nka min ni Matigi bè jè, o ni ale ye ni kelen de ye. 18 8 A' ye boli jatòya ɲè. Mògò bè ko jugu sifa o sifa wèrè kè, o ye farikolo kènèkan ko ye, nka min bè jatòya kè, o bè a yèrè farikolo hakè ta. 19 Aw farikolow ye Ni Senu ka Alabatosoba de ye. O sigilen bè aw kònò, aw ye o sòrò Ala fè. Aw tè aw yèrèw ta ye dè. Aw ma o dòn wa? 20 Aw sanna sòngòba de la Ala fè. O de y'a to aw ka Ala bonya ni aw farikolow ye.



7

1 Aw ye sèbèn ci ka ne ɲininka ko minnu na, olu ta fan fè, a ka ɲi cè ma ni a ma maga muso la. 2 O bèè n'a ta, walisa jatòya kana kè, cèw bèè kelen-kelen ka muso furu, musow bèè kelen-kelen ka kè a yèrè cè kun. 3 Muso ka kan ni min ye, cè ka o kè a ye. Cè fana ka kan ni min ye, muso ka o kè a ye. 4 Muso tè a yèrè farikolo kuntigi ye, a cè de b'a kun na. O cogo la fana cè tè a yèrè farikolo kuntigi ye, a muso de b'a kun na. 5 Aw kana ban ɲògòn na, fò ni aw fila bènna a la ka waati dòònin bila Ala delili kama. O kò, a' ye segin ɲògòn ma, walisa Sitanè kana aw kòròbò aw ka yèrèminèbaliya kosòn. 6 Ne ye nin fò aw ye ka aw laadi, o tè ci fòlen ye. 7 Ne b'a fè cèw bèè ka kè i ko ne. O bèè n'a ta, Ala bè mògòw bèè ka nilifèn di u ma. Dò ta bè cogo dò la, dò wèrè ta bè cogo wèrè la. 8 Minnu ma furu kè ani muso cè salenw, ne b'a fò ko a ka ɲi olu ma ka to i ko ne. 9 Nka ni u tè se ka u yèrè minè, u ka furu kè katuguni furu ka fisa ni nege tòòrò ye. 10 Dannabaa minnu furulen don, ne b'a fò olu ye k'a gèlèya, ne kan tè, Matigi kan don, ko: Muso kana fara a cè la. 11 Ni a farala a cè la, a furubali ka to, wala a ka kòsegin a cè ma. Cè fana kana a muso bila. 12 Ne bè min fò dannabaa tòw ye, o filè nin ye, ne kan don, Matigi kan tè, ko: Ni muso dannabali bè balima dò kun, ni o sònna ka to a fè, a kana o bila. 13 O cogo la, ni muso dannabaa dò bè cè dannabali kun, ni o cè sònna a ka to a fè, a kana fara o la. 14 Cè dannabali bè saniya a muso dannabaa kosòn. Muso dannabali bè saniya a cè dannabaa kosòn. N'o tè, aw denw tun na kè nògòlenw ye, nka tiɲè la, u ka senu. 15 O bèè n'a ta, ni dannabali b'a fè ka fara dannabaa la, a ka o kè. Ni o kèra, balimacè wala balimamuso sirilen tè. Ala ye an wele ka sigi hèrè la. 16 Muso dannabaa, i b'a dòn yala i na i cè kisi wa? Cè dannabaa, i b'a dòn yala i na i muso kisi wa? 17 O bèè n'a ta, Matigi ye niyòrò min di mògòw bèè kelen-kelen ma, Ala y'u wele fana k'u to cogo min na, u ka taama ka kèɲè ni o ye. Ne bè o ci fò egilisiw bèè la. 18 Ni mògò dò welela k'a sòrò a bolokolen don, a ka to o cogo la. Ni dò welela k'a sòrò a bolokobali don, o fana kana boloko. 19 Bolokoli wo, bolokobaliya wo, u si tè foyi ye. Ala ka ci fòlenw kèli de bè jate. 20 Ala ye mògòw bèè kelen-kelen wele k'u to cogo min na, u ka to ten. 21 Ala y'i wele k'i to jònya la wa? I kana hami o la. O bèè n'a ta, ni i bè se ka hòrònya, i ka o kè, 22 katuguni jòn min welela Matigi la, o ye Matigi ka hòròn ye. O cogo la fana, hòròn min welela, o ye Krisita ka jòn ye. 23 Ala ye aw san sòngò de la. Aw kana kè mògòw ka jònw ye. 24 Balimaw, bèè kelen-kelen welela k'u to cogo min na, u ka to ten Ala ɲè kòrò. 25 Minnu ma furu, ne ma ci sòrò Matigi fè olu ko la, nka Matigi makarila ne la ka ne kè dannamògò ye, o de kosòn ne bè ne ka miiriliw jira. 26 Nin waati gèlèn kosòn, min ka ɲi ne ɲè na, o filè nin ye, ko a ka ɲi mògò ma ka to a cogo la. 27 Muso bè i kun wa? Ayiwa, i kana furu sa cogo ɲini. I ma furu kè wa? Ayiwa, i kana muso furu. 28 O bèè n'a ta, ni i ye furu kè, i ma jurumu kè. Ni npogotigi tara furu la, a ma jurumu kè. Nka a kèbaaw na tòòrò sòrò farisogo la u ka ɲènamaya kònò. Ne b'a fè ka aw tanga o ma. 29 Ayiwa balimaw, ne bè nin de fò ko: Waati surunyara. Kabini sisan muso bè minnu fè, olu ka kè i ko muso tè u fè. 30 Minnu bè kasi, olu ka kè i ko u tè kasi. Minnu ɲagalilen don, olu ka kè i ko u ɲagalilen tè. Minnu bè sanni kè, olu ka kè i ko fèn tè u fè. 31 Minnu bè u mago ɲè ni nin diɲè fènw ye, olu ka kè i ko u tè u sèbè don o la, k'a masòrò nin diɲè cogo na tèmèn. 32 Ne t'a fè aw hakili ka ɲaami. Min ma furu kè, o b'i janto Matigi ka kow la, walisa a ko ka diya Matigi ye. 33 Min ye furu kè, o b'i janto diɲè kow la, walisa a ko ka diya a muso ye. 34 A bè sama o fan fila sago kèli nòfè. O cogo la fana muso min tè cè kun, wala min ma furu fòlò, o b'i janto Matigi ka kow la, walisa a ka saniya a farikolo ni a ni la. Nka min furulen don, o b'i janto diɲè kow la, walisa a ko ka diya a cè ye. 35 Ne bè o fò aw yèrèw nafa kama. Ne tè o fò ka fèn dò wajibiya aw ma. Ne b'a fè aw ka taama cogo bènnen na, walisa aw nòròlen ka to Matigi ka baara la, foyi kana aw hakili ɲaami. 36 Ni cè dò y'a miiri ko a denmuso npogotigilama tèmènna furu waati kan, ko o ma bèn, ko wajibi don a ka furu, a ka a sago kè, o tè jurumu ye, a ka a di furu la. 37 Nka mògò min hakili sigilen don, ni ko wèrè t'a wajibiya o la, ni se b'a ye k'a yèrè sago kè, ni a y'a latigè a yèrè kònò ko a tèna a denmuso npogotigilama di furu la, o tigi bè ko ɲuman kè. 38 O de la, min ye a denmuso npogotigilama di furu la, o bè ko ɲuman kè, nka min m'a di, o ta de ka fisa. 39 Muso min furulen bè, o sirilen bè a cè la ka a cè ɲènama to, nka ni a cè sara, a hòrònyara. Cè min ka di a ye a bè se ka furu o ma, nka o ka kè dannabaaw cèma dòròn. 40 O bèè n'a ta, ne ɲè na, ni a tora ten, o ka fisa a ma furu ye. Ne dara a la fana ko Ala Ni bè ne fè.



8

1 Ayiwa, bolisòn sogow ko ta fan fè, an y'a dòn ko dònniya bè an bèè fè. Dònniya bè mògò kuncè bonya, nka kanuya bè dò fara mògò wèrèw barika kan. 2 Ni mògò dò bè miiri ko a bè ko dòn, a ma foyi dòn fòlò i ko a ka kan ka ko dòn cogo min na. 3 Nka ni mògò dò bè Ala kanu, Ala bè o tigi dòn. 4 Ayiwa, bolisòn sogo dumuni ta fan fè, an y'a dòn ko boli tè foyi ye diɲè la, ko Ala wèrè si tè, Ala kelenpe kò. 5 Hali ni sankolola fèn dòw wala dugukolo kan fèn dòw bè wele batofènw, k'a masòrò batofèn caman ni matigi caman bè yen, 6 o bèè n'a ta an kòni fè, Ala kelenpe bè yen, o ye an Fa ye. Ale ye fèn bèè da, an bè yan ale kosòn. Matigi kelenpe fana bè yen, o ye Yesu Krisita ye. Fèn bèè bè ale barika la, an fana bè a barika la. 7 Nka mògòw bèè tè o dòn. Mògò dòw tun delila boli ko la, halibi u bè o sogo dun ka a jate bolisòn sogo yèrè ye. U dusukun barika ka dògò, o dumuni bè u nògò. 8 Dumuni kòni tè an ko diya Ala ye. Ni an ma dumuni kè, o tè fèn bò an na. Ni an ye dumuni kè fana, o tè fèn fara an kan. 9 O bèè n'a ta, a' ye aw yèrèw kòlòsi walisa aw ka hòrònyali fanga kana kè barikantanw kunnatiɲèni sababu ye. 10 Tiɲè la, dònniya bè e min fè, ni balima barikantan dò ye i ye dumuni la bolibatoso dò kònò, o dusukun tèna gèlèya, fo k'a bila bolisòn sogo dumuni la wa? 11 O cogo la, Krisita sara o balima barikantan min kosòn, o na halaki i ka dònniya fè! 12 Ni aw bè aw balimaw hakè ta ten, ka u dusukun sinsinbaliw jogin, aw bè Krisita de hakè ta. 13 O de kosòn, ni sogo bè ne balima kunnatiɲè, ne tèna sogo dun abada, walisa ne kana kè ne balima kunnatiɲèni sababu ye.



9

1 Ne tè hòròn ye wa? Ne tè ciden ye wa? Ne ma Yesu an Matigi ye wa? Ne ka baara nò tè aw yèrèw ye Matigi la wa? 2 Hali ni dò wèrèw ma ne jate ciden ye, aw kòni ka kan ka ne jate ciden ye, k'a masòrò aw ye ne ka cidenya taamashyèn ye Matigi la. 3 Ne bè ne sègèsègèbaaw jaabi cogo min na, o filè nin ye ko: 4 Jo tè an fè ka dumuni kè ka minni kè wa? 5 Jo tè an fè ka balimamuso dò furu ka taa ni o ye an fè, i ko ciden tòw ni Matigi balimakèw ani Pierè b'a kècogo min na wa? 6 Yala ne ni Barnabasi dama ka kan ka baara kè ka an yèrèw balo wa? 7 Jòni bè taa sòròdasiya la ka tila k'a yèrè doni ta? Jòni bè rezèn nakò sènè ni a tè a mò dun? Jòni fana bè baganw gèn ni a tè u nònò dò min? 8 Aw kana miiri ko ne bè ne ka kuma ju sigi Hadamadenw ka kètaw dama kan. Sariya fana bè o ko kelen fò. 9 A sèbènnen bè Musa ka sariya la ko: «Misi min bè ɲò còngò, i kana jò siri o da la.» Ala ye o fò misiw hami kosòn wa? 10 A ma o fò an dama kosòn wa? Owò, o sèbènna an de kosòn. Sènèkèla jigi sigilen ka kan ka sènè kè. Ɲò gosibaa fana ka ɲò gosi k'a jigi to o dò sòròli kan. 11 Ni anw ye Ala ka nilifènw dan aw cèma, ni an bè aw bolo fèn dòw suman tigè, o ye koba ye wa? 12 Ni jo bè mògò wèrèw fè ka fèn sòrò aw bolo, jo tè an fè ka fèn sòrò aw fè ka tèmèn olu kan wa? O bèè n'a ta anw ma o jo ɲini, nka an bè fèn bèè muɲu walisa an kana foyi kè ka Krisita ka Kibaru Duman bali. 13 Aw m'a dòn ko minnu bè baara kè Alabatosoba kònò, ko olu bè u balo sòrò ka bò Alabatosoba fènw la wa? Aw m'a dòn ko minnu bè sarakaw lase saraka bòlan kan, ko olu bè u niyòrò sòrò ka bò o sarakaw la wa? 14 O cogo la fana, fèn min bè sòrò Kibaru Duman baara la, Matigi y'a latigè ko Kibaru Duman fòbaaw ka balo o la. 15 Nka ne ma tugu o fèn si nòfè. Ne tè nin sèbèn ci aw ma fana walisa aw ka o kè ne ye. Mògò ka ne ka nin yèrèbonya sababu tiɲè, saya ka fisa ne ma ni o ye! 16 Yèrèbonya sababu tè ne fè Kibaru Duman fòli la, katuguni o wajibiyalen bè ne ma. Ni ne ma Kibaru Duman fò, bònè bè ne ye! 17 Ni ne tun b'a kè ne yèrè sago la, ne tun na baraji sòrò. Nka ni o baara kalifara ne ma, wajibi don ne ka o kè. 18 O tuma la ne bè mun baraji sòrò o la? O ye nin ye ko ne ka Kibaru Duman fò ni wari ko tè, ani ne tun bè se ka nafa min ɲini ne yèrè ye Kibaru Duman fòli la, ne ka o to yen. 19 Hali ni ne ye hòròn ye mògòw bèè ta fan fè, ne ye ne yèrè kè bèè ka jòn ye, walisa ne ka mògò caman sòrò. 20 Yahutuw fè, ne kèra Yahutu ye, walisa ne ka Yahutuw sòrò. Minnu bè sariya kòrò, ne kèra olu fè i ko ne bè sariya kòrò, hali k'a sòrò ne yèrè tè o kòrò, walisa ne ka sariya kòrò mògòw sòrò. 21 O cogo la fana, sariya tè minnu kun na, ne kèra olu fè i ko sariya tè ne kun na, walisa sariya tè minnu kun na, ne ka olu sòrò. O bèè n'a ta, a tè i ko Ala ka sariya tè ne kun na, sabu ne bè Krisita ka sariya kòrò. 22 Minnu barika ka dògò dannaya la, ne kèra olu fè i n'a fò ne barika ka dògò, walisa ka barika dògòw sòrò. Ne bè ne yèrè kè fèn bèè ye bèè kosòn, walisa cogo o cogo, ne ka u dòw kisi. 23 Ne bè fèn bèè kè Kibaru Duman kosòn walisa ne ka niyòrò sòrò a nafa la tòw fè. 24 Aw yèrèw y'a dòn ko minnu bè boli ɲògòndan boli yòrò la, olu bèè bè boli, nka kelenpe de bè sara sòrò. A' ye boli walisa aw ka o sara sòrò. 25 Mògò minnu bè don ɲògòndan boli la, olu bè u yèrèw tanga ko sifa caman ma. U bè o kè walisa u ka kunnajala fòsònfòsònta sòrò. Nka an kòni b'a kè walisa ka kunnajala tiɲènbali sòrò. 26 O de y'a to ne bè boli ka ne ɲè sinnen to ne ka boli dan yòrò ma. Ne bè kèlè kè i n'a fò bolokurun tulonkèla, a tè i ko ne bè fiɲè bugò. 27 Ne bè ne yèrè farikolo gosi fo ka a mugu, katuguni ne bè siran ko tòw waajulen kò ne fè, ban kana kè ne yèrè la.



10

1 Balimaw, ne t'a fè aw ka to an bènbaw ka kow dònbali ye. U bèè tun bè taama sankaba kòrò. U bèè taamana ka Kògòji Bilen cètigè. 2 U bèè batisera Musa ye sankaba ni kògòji la. 3 Ala yèrè ye dumunifèn min di, u bèè ye o dò dun. 4 Ala yèrè ye minnifèn min di, u bèè ye o dò min, katuguni farakurun min tugura u nòfè Ala ka sebaaya fè, u ye ji min ka bò o la. O farakurun tun ye Krisita de ye. 5 Nka u caman ko tun man di Ala ye, o de kosòn u sara kungokolon kònò. Olu dama tun ka ca u tò tolenw ye. 6 O kow kèra ka ɲè jira an na, walisa an kana ɲè bò fèn juguw fè i ko olu ɲè bòra fèn juguw fè cogo min na. 7 Aw kana boliw bato i ko u dòw y'a kècogo min na, i ko a sèbènnen bè Kitabu la cogo min na ko: «Mògòw bèè y'u sigi ka dumuni kè ka minni kè. O kò, u wulila ka dòn kè.» 8 An kana jatòya kè, i ko u dòw y'a kècogo min na, fo u la mògò waa mugan ni saba sara tile kelen kònò. 9 An kana Matigi kòròbò i ko u dòw y'a kòròbò cogo min na, fo saw ye olu cin ka u faga. 10 Aw fana kana dajukòrò kuma fò, i ko u dòw y'a kècogo min na. Halakilikèla ye u faga. 11 O kow bèè kèra u la ka ɲè jira an na. Diɲè laban sera an minnu ma, u sèbènna ka an lasòmi. 12 O de kosòn, min bè miiri ko a jòlen don, o k'a yèrè kòlòsi a kana bin. 13 Kòròbòli si ma aw sòrò min ma deli ka mògò sòrò. Ala ye kantigi ye. A tèna sòn aw kòròbòli ka tèmèn aw barika dan yòrò kan. Nka kòròbòli mana se, a na bò yòrò jira walisa aw ka se ka o kòròbòli muɲu. 14 O de kosòn ne ka kanulenw, a' ye aw yèrèw kòlòsi bolibatoli ma. 15 Ne bè kuma aw fè i ko hakilitigiw. Aw yèrèw ka ne ka kuma kòròbò. 16 An bè barika da Ala ye jifilen dubama min kosòn, o tè an ka jèɲògònya taamashyèn ye Krisita joli la wa? An bè nbuuru min karikari ka o dun, o tè an ka jèɲògònya taamashyèn ye Krisita farikolo la wa? 17 Nbuurukun kelenpe bè yen. O de kosòn, an minnu ka ca, an ye farikolo kelen ye, katuguni an bèè bè jè nbuurukun kelen de la. 18 A' ye Israèl mògòw cogo filè. Minnu bè saraka fènw dun, olu tè saraka bòlan jèɲògònw ye wa? 19 Ne b'a fè ka mun fò sa? Ko saraka min bòra boli ye, wala boli yèrè, yala olu ye fèn ye wa? 20 Ayi dèrè! Nka Ala dònbaliw bè sònni min kè, u bè jinèw de sòn, u tè Ala sòn. O de kosòn ne t'a fè aw ni jinèw ka jè. 21 Aw tè se ka minni kè Matigi ka jifilen na, ka minni kè jinèw ka jifilen fana la. Aw tè se ka dumuni kè Matigi ka tabali la, ka dumuni kè jinèw ka tabali fana la. 22 Yala an b'a fè ka Matigi laɲini ka keleya don a la wa? Aw bè miiri ko an barika ka bon ale ta ye wa? 23 Fèn bèè dagalen bè an ye. Tiɲè don, nka nafa tè fèn bèè la. Fèn bèè dagalen bè an ye, nka fèn bèè tè dò fara mògò wèrè barika kan. 24 Mògò si kana a yèrè nafa ɲini, fò mògò wèrè nafa. 25 Fèn minnu bè feere sogofeere yòròw la, a' ye olu dun. Aw kana ɲininkali si kè o ko la dusukun kosòn, 26 katuguni «dugukolo ni a kan fèn bèè ye Matigi ta ye.» 27 Ni dannabali dò ye aw wele dumuni la, ni aw b'a fè ka taa, a mana fèn o fèn sigi aw kòrò, aw ka o dun. Aw kana ɲininkali si kè o la dusukun kosòn. 28 Nka ni mògò dò b'a fò aw ye ko: «Nin ye bolisòn sogo ye,» aw kana o dun aw lasòmibaa kosòn ani dusukun fana kosòn. 29 Ne tè kuma i yèrè dusukun ko la, fò mògò wèrè dusukun. O de la, mògò wèrè dusukun ka kiri tigè ne ka hòrònya kan mun kosòn? 30 Ni ne bè barika da Ala ye ne ka dumuni kosòn, mun na mògò wèrè ka ne tògò tiɲè o dumuni ko la, k'a sòrò ne ye barika da Ala ye o kosòn? 31 O de y'a to aw bè dumuni kè wo, aw bè minni kè wo, ni aw bè fèn o fèn kè, a' ye o bèè kè Ala bonyali kosòn. 32 Yahutuw wo, siya wèrè mògòw wo, Ala ka egilisi wo, aw kana kè u si kunnatiɲè sababu ye, 33 i ko ne fana bè ne jija ka mògòw bèè diyaɲekow kè fèn bèè la cogo min na. Ne tè ne yèrè nafa ɲini, fò mògò caman nafa, walisa u ka kisi.



11

1 Aw ka kè ne ladegebaaw ye, i ko ne fana ye Krisita ladegebaa ye cogo min na. 2 Ne bè aw fo katuguni aw bè aw hakili to ne la fèn bèè la, ka ne ka laadili kumaw mara i ko ne y'a jira aw la cogo min na. 3 O bèè n'a ta, ne b'a fè aw ka a dòn ko cèw bèè kuntigi ye Krisita ye, ko muso kuntigi y'a cè ye, ko Krisita kuntigi ye Ala de ye. 4 O de kosòn cè o cè bè Ala deli wala ka kiraya kè ka a kun datugulen to, o bè a kuntigi dògòya. 5 Nka muso o muso bè Ala deli wala ka kiraya kè k'a sòrò a kun ma datugu, o bè a kuntigi dògòya. A bè i ko a kun dilen don. 6 Ni muso kun ma datugu, a ka a kunsigi tigè. Nka ni kunsigi tigè wala kun di ye muso maloya ko ye, a ka kan ka a kun datugu. 7 Cè man kan ka a kun datugu, katuguni a ye Ala ja ni a nòòrò de ye. Muso kòni ye cè nòòrò ye. 8 Tiɲè la, cè dara tuma min na, a ma bò muso la, nka muso bòra cè de la. 9 Cè fana ma da muso kosòn, nka muso dara cè de kosòn. 10 O de y'a to taamashyèn ka sòrò muso kun na mèlèkèw kosòn k'a jira ko a bè fanga kòrò. 11 O bèè n'a ta Matigi la, ni cè tè, muso fana tè. Ni muso tè, cè fana tè. 12 K'a masòrò muso bòra cè la cogo min na, o cogo la cè bè bange muso fè. Fèn bèè bè bò Ala de la. 13 A' ye miiri a la, yala a bènnen bè muso ka Ala deli batoli yòrò la k'a sòrò a kun ma datugu wa? 14 Ni cè dò kunsigi ka jan, a fò, Hadamadenya cogo yèrè tè aw kalan ko o ye a dògòyali ko de ye wa? 15 Nka ni muso kunsigi ka jan, o ye a bonyali ko ye, katuguni kunsigi jan dira muso ma ka kè a kunna birilan ye. 16 Nka ni mògò dò b'a fè ka sòsòli kè, o k'a dòn ko laada wèrè tè an fè o ko la, a tè Ala ka egilisiw fana fè. 17 Ka ne to nin kuma fòli la, ne bè aw lasòmi ko dò la, ne tè se ka aw tanu o la fewu, o filè nin ye ko: Aw tè aw lajè ɲèni kama, fò tiɲèni. 18 O ko fòlò filè nin ye: A fòra ne ye ko aw mana aw lajè egilisi kow la tuma min na, farali kow bè aw cèma. Fan dò fè, ne bè da o la. 19 Wajibi don kan tilali ka kè, walisa minnu ye dannabaa sèbèw ye aw cèma, olu ka dòn. 20 Aw mana aw lajè, o tè Matigi ka tabali ko ye, 21 k'a masòrò ka aw to dumuni la, bèè kelen-kelen bè kòròtò ka a yèrè ka dumuni dun. Kòngò bè dòw la, dò wèrèw falen bè dòlò la. 22 Sow tè aw fè ka dumuni kè ka minni kè yen wa? Walima aw bè Ala ka egilisi mafiɲèya ka bolo lankolonw lamalo wa? Aw bè miiri ne ka mun fò aw ye? Ne ka aw tanu o la wa? Ne tè aw tanu o la dè! 23 Ne ye aw kalan ko min na, ne ye o sòrò Matigi fè ko: Matigi Yesu donna bolo la su min fè, a ye nbuuru ta 24 ka barika da Ala ye, o kò, ka o nbuuru karikari k'a fò ko: «Nin ye ne farikolo ye, a dira aw kosòn. A' ye nin kè ka aw hakili to ne la.» 25 O cogo la, dumuni kèlen kò, a ye jifilen ta, k'a fò ko: «Nin jifilen ye Ala ka layidu kura ye, o layidu tara ne joli la. Ni aw ye minni kè nin jifilen na tuma o tuma, aw ka o kè ka aw hakili to ne la.» 26 Aw mana nin nbuuru dun ka minni kè nin jifilen na tuma o tuma, aw bè Matigi saya ko de fò, fo a ka na. 27 O de y'a to, ni mògò dò ye Matigi ka nbuuru dun ka minni kè a ka jifilen na k'a sòrò a cogo man ɲi, o tigi na jalaki Matigi farikolo ni a joli ta fan fè. 28 O de kosòn, mògòw bèè kelen-kelen ka u yèrèw sègèsègè, o kò, ka o nbuuru dun ka minni kè o jifilen na. 29 Katuguni min bè o nbuuru dun ka minni kè o jifilen na, k'a sòrò a ma Matigi farikolo faranfasi, o bè a jalaki fèn dun ka o min. 30 O de y'a to aw caman kèra banabaatòw ni barikantanw ye, aw caman fana sara. 31 Ni an tun bè kiri tigè an yèrèw kan, Ala tun tèna kiri wèrè tigè an kan. 32 Nka Matigi bè kiri tigè an kan, ka an kolo, walisa kiri kana bin an ni diɲè kan ɲògòn fè. 33 O de kosòn ne balimaw, ni aw bè aw lajè ka dumuni kè Matigi ka tabali la tuma min na, a' ye ɲògòn makònò. 34 Ni kòngò bè mògò dò la, o ka dumuni kè a ka so, walisa aw kana aw lajè ka kiri bin aw yèrèw kan. Ko tòw ta fan fè, ni ne sera aw fè yen tuma min na, ne na olu ɲènabò.



12

1 Ayiwa balimaw, ne t'a fè aw ka kè ko dònbaliw ye Ni Senu ka nilifènw ta fan fè. 2 Aw y'a dòn ko aw tun ye Ala dònbaliw ye tuma min na, aw tun bè sama boli bobow nòfè, i ko aw ɲè tun minèna cogo min na. 3 O de kosòn ne b'a fè aw k'a faamu ko mògò o mògò bè kuma Ala Ni barika la, o si tèna a fò ko Yesu dangalen bè. Mògò si tè se k'a fò fana ko Yesu ye Matigi ye, ni o ma kè Ni Senu barika la. 4 Nilifènw sifa ka ca, nka u bè bò Ni Senu kelen de la. 5 Baara sifa ka ca, nka u bèè bè kè Matigi kelen de ye. 6 Baarakè cogow ka ca, nka Ala kelen de bè u bèè kè mògòw bèè kònò. 7 Ala Ni b'i jira ni nilifèn dò dili ye mògòw bèè kelen-kelen ma mògòw bèè nafa sòròli kama. 8 Hakilitigiya kuma dira dò ma Ni Senu fè. O Ni kelen ye dònniya kuma di dò wèrè ma. 9 O Ni kelen ye dannaya di dò ma. Banabaatò kènèyali se dira dò wèrè ma o Ni kelen barika la. 10 Kabakow kèli se dira dò ma. Se dira dò wèrè ma ka kiraya kè. Niw faranfasili dira dò wèrè ma. Kan wèrèw fòli se dira dò ma. Kan wèrèw kòrò fòli se dira dò wèrè ma. 11 Ni Senu kelenpe de bè o kow bèè kè, ka mògòw bèè kelen-kelen ka nilifèn di u ma ka kèɲè ni a yèrè sago ye. 12 Ayiwa, mògò farikolo yòròw ka ca, nka farikolo kelen don. O yòròw ni u caya bèè ye farikolo kelen ye cogo min na, Krisita fana bè ten. 13 An kòni, Yahutuw ni siya tòw, jònw ni hòrònw, an bèè batisera ka kè farikolo kelen ye Ni kelen de la. An bèè minna o Ni kelen de la fana. 14 Farikolo fana tè farikolo yòrò kelen ye, nka a yòròw ka ca. 15 Ni sen b'a fò ko ale tè bolo ye, ko o de kosòn a tè farikolo yòrò dò ye, o b'a to ko a tè farikolo yòrò dò ye wa? 16 Ni tulo fana b'a fò ko ale tè ɲè ye, ko o de kosòn a tè farikolo yòrò dò ye, o b'a to a tè farikolo yòrò dò ye wa? 17 Ni farikolo yòrò bèè tun ye ɲè ye, mògò tun na mènni kècogo di? Ni a bèè tun ye tulo ye, mògò tun nafènw suma mèn cogo di? 18 Nka tiɲè la Ala ye farikolo yòròw bèè kelen-kelen kè farikolo la ka kèɲè ni a yèrè sago ye. 19 Ni farikolo bèè lajèlen tun ye yòrò kelen ye, farikolo tun na kè min? 20 O de kosòn farikolo yòròw ka ca, nka farikolo ye kelenpe de ye. 21 O cogo la ɲè tè se k'a fò bolo ye ko: «Ne mago t'i la!» Kunkolo fana tè se k'a fò senw ye ko: «Ne mago tè aw la!» 22 Nka tiɲè la, farikolo yòrò minnu bè i ko u barika ka dògò, an magoba bè olu la. 23 Farikolo yòrò minnu tè jate bonyataw ye, an bè an janto olu la ka tèmèn yòrò tòw kan. An bè maloya yòrò minnu ko la, an bè olu masiri ka tèmèn dòw kan. 24 An tè yòrò minnu jate maloya yòròw ye, olu mago tè o la. Bonya dèsèra yòrò minnu na, Ala ye farikolo dila ka bonyaba di olu ma, 25 walisa farali kana kè farikolo la, nka a yòròw bèè ka u janto ɲògòn na cogo kelen na. 26 Ni farikolo yòrò kelen tòòròla, o ni farikolo yòrò tòw bèè bè tòòrò ɲògòn fè. Ni yòrò kelen ye bonyali sòrò, o ni farikolo yòrò tòw bèè bè ɲagali ɲògòn fè. 27 Aw ye Krisita farikolo ye, aw bèè kelen-kelen ye a farikolo yòrò dò de ye. 28 O de la, Ala ye mògò dòw sigi egilisiw la: Fòlò, cidenw, a filanan, kiraw, a sabanan, karamògòw, o kò, kabakow kèli, o kò, banabaatòw kènèyali nilifènw, ani dèmèbaaw ni ɲè mògòw ani kan wèrè fòbaaw. 29 Mògòw bèè tè ciden ye. Bèè tè kira ye. Bèè tè karamògò ye. Bèè tè kabako kèbaa ye. 30 Banabaatòw kènèyali se ma di bèè ma. Bèè tè se ka kan wèrèw fò. Bèè tè se ka kan wèrèw kòrò fò. 31 A' ye kè Ala ka nilifèn fisamaw fè kosèbè. O bèè n'a ta, sira min ka fisa ni o bèè ye, ne bèna o jira aw la sisan.



13

1 Hali ni ne bè mògòw kanw ni mèlèkèw kanw fò, k'a sòrò kanuya tè ne kònò, ne kumakan na kè i ko ntanan mankan wala weleninw. 2 Hali ni ne bè se ka kiraya kè, ka gundow bèè ni fèn bèè dòn, hali ni dannaya bèè bè ne fè fo ka kuluw labò u nò na, k'a sòrò kanuya tè ne kònò, ne tè foyi ye. 3 Hali ni ne ye ne bolofènw bèè tilatila ka kè faantanw ka dumuni ye, ka ne farikolo di ko a ka jeni, o tèna foyi ɲè ne ye ni kanuya tè ne kònò. 4 Muɲuli bè kanuya la, a falen bè ɲumaya la, keleya t'a la. Kanuya tè waso, kuncèbaya t'a la. 5 Kanuya tè ko bènbali kè, a t'a yèrè nafa ɲini. A tè dimin joona, a tè ko jugu miiri. 6 A tè ɲagali tilenbaliya ko la, a bè ɲagali tiɲè de la. 7 A bè sabali fèn bèè la, a bè da fèn bèè la, a jigi bè fèn bèè kan, a bè fèn bèè muɲu. 8 Kanuya tè ban abada. Kiraya kèli na ban. Kan wèrèw fòli na dabila. Dònniya na ban. 9 An bè dòònin dòròn de dòn. An bè dòònin dòròn de kè kiraya ko fana la. 10 Nka ko dafalenw mana na, ko dafabaliw na ban. 11 Ka ne to denmisènya la, ne tun bè kuma i ko denmisèn, ne tun bè miiri i ko denmisèn, ne tun bè kow jate minè i ko denmisèn. Kabini ne ɲènatigèra ka kè cè ye, ne ye denmisènya kow dabila. 12 Sisan a bè i ko an bè fènw filè dubalen na, a ma jèya, nka o tuma la an na yeli kè ɲèda ni ɲèda. Sisan ne bè dòònin dòròn de dòn, nka o tuma la ne na ko dòn ka dafa, i ko Ala bè ne dòn cogo min na. 13 Ayiwa sisan nin fèn saba tora, dannaya ni jigi ani kanuya, nka u bèè la belebeleba ye kanuya de ye.



14

1 A' ye tugu kanuya nòfè. A' ye Ala ka nilifènw fana ɲini kosèbè. A' ye kè kiraya nilifèn fè ka tèmèn tòw kan. 2 Min bè kan wèrè fò, o tè kuma mògòw fè, o bè kuma Ala fè, k'a masòrò mògò si tè o kòrò dòn. A bè gundow fò a dusukun na. 3 Nka min bè kiraya kè, o bè kuma mògòw fè ka u nafa, ka u waaju, ani ka u dusuw saalo. 4 Min bè kan wèrè fò, o nafa bè a yèrè kan, k'a sòrò min bè kiraya kè, o nafa bè egilisi kan. 5 Ne b'a fè aw bèè ka kan wèrèw fò, nka ne b'a fè aw ka kiraya kè ka tèmèn o kan. Tiɲè la, min bè kiraya kè, o ka bon ni kan wèrè fòbaa ye, fò ni a yèrè bè o kan wèrè kòrò fò, walisa egilisi ka nafa sòrò. 6 Ayiwa balimaw, ni ne taara aw fè yen ka kan wèrèw fò, k'a sòrò ne ma Ala ka ko jirata dò fò aw ye, wala dònniya ko, wala kiraya, wala ka aw kalan, ne na nafa jumèn lase aw ma? 7 Fòlifènw ta fan fè, i ko file wala nkòni, ni u kan tè faranfasi, u bè min fò, o na faamu cogo di? 8 Ni buru fyèta tè kan faranfasilen bò, jòni na i labèn kèlè kama? 9 O cogo la aw fana, ni aw ka kuma ma jèya, aw ka fòta na faamu cogo di? K'a masòrò a bè i ko aw bè kuma fiɲè fè. 10 Kan caman bè diɲè la, nka kan si tè ni kòrò tè min na. 11 O cogo la kan wèrè fòbaa bè min fò, ni ne tè o mèn, o tigi na kè jamana wèrè mògò ye ne ɲè na, ne fana na kè jamana wèrè mògò ye ale ɲè na. 12 O de y'a to, ka aw to Ni Senu ka nilifènw ɲinili la, minnu bè egilisi nafa, aw ka olu caman ɲini. 13 O de kosòn, min bè kan wèrè fò, o ka Ala deli walisa a ka se ka o kan wèrè kòrò fò. 14 Ni ne bè Ala deli kan wèrè la, ne bè delili kè ni ne ni ye, nka ne hakili sen t'a la. 15 Ne na mun kè sa? Ne na Ala deli ni ne ni ye, ne na a deli ni ne hakili fana ye. Ne na tanuli dònkili da ni ne ni ye, ne na o da ni ne hakili fana ye. 16 Ni i bè barika da Ala ye ni i ni dòròn de ye, mògò wèrè minnu sigilen bè jama cèma, olu na amiina fò i ka barika dali kèlen kò cogo di? K'a sòrò i bè min fò, olu tè o dòn. 17 Tiɲè don, i ka barika dali ɲè na kosèbè, nka olu ma nafa si sòrò a la. 18 Ne bè barika da Ala ye k'a masòrò ne bè kan wèrèw fò ka tèmèn aw bèè kan. 19 Nka egilisi kònò, a ka di ne ye ka kuma duuru fò ni ne hakili ye walisa ka mògò wèrèw kalan, ka tèmèn kan wèrè kuma waa tan fòli kan. 20 Balimaw, aw kana kè denmisènw ye hakili ta fan fè. Juguya ta fan fè kòni, aw ka kè denmisènw ye, nka hakili ta fan fè, aw ka kè mògò ɲènatigèlenw ye. 21 A sèbènnen bè sariya kitabu la ko: «Ne na kuma nin mògòw fè kan wèrè fòbaaw da la ani siya wèrè mògòw da la. Hali o, u tèna ne lamèn, Matigi ko ten.» 22 O de kosòn, kan wèrèw fòli tè taamashyèn ye dannabaaw ɲè na, nka taamashyèn don dannabaliw ɲè na. Fan wèrè fè, kiraya tè taamashyèn ye dannabaliw ɲè na, nka taamashyèn don dannabaaw ɲè na. 23 Ayiwa ni egilisi jama bèè y'u lajè batoli la tuma min na, k'a sòrò mògòw bèè bè kan wèrèw fò, ni dannabaa wèrèw wala dannabali dòw donna aw cèma, u tèna a fò ko aw hakili wulilen don wa? 24 Nka ni dannabaa wèrè wala dannabali dò donna aw cèma, k'a sòrò bèè bè kiraya kè, a bè min mèn aw bèè da la, o na a kòròfò ka kiri tigè a kan. 25 A ka miirili dogolenw na bò kènè kan. O tuma la a na i bin k'a ɲèda biri duguma ka Ala bato k'a fò ko: «Tiɲè la, Ala bè aw cèma!» 26 Balimaw, an ka mun de kè? Ni aw bè aw lajè batoli la tuma min na, dò ta ye tanuli dònkili dali ye, dò ta ye kalan ye, dò ta ye jirali ye, dò ta ye kan wèrè fòli ye, dò fana ta ye o kan wèrè kòrò fòli ye. O kètaw bèè ka kè walisa ka egilisi nafa. 27 Ni dòw bè kan wèrèw fò, olu kana tèmèn mògò fila wala saba kan, u k'a bò ɲògòn kòrò. Mògò dò fana ka o kan wèrèw kòrò fò. 28 Ni mògò tè yen min bè kan wèrè kòrò fò, a ka i makun egilisi kònò. A ka kuma a yèrè ni Ala cè. 29 Minnu bè kiraya kè, olu la mògò fila wala saba ka kuma, mògò tòw ka o kumaw sègèsègè. 30 Ni Ala ye ko dò jira mògò sigilen dò la, fòlò ka i makun. 31 Aw bèè bè se ka kiraya kè kelen-kelen walisa bèè ka kalan ka jijali sòrò. 32 Kiraw niw kololen bè u yèrèw ye, 33 sabu Ala tè ko ferekelenw ka Ala ye, fò hèrè ta. A bè kè Ala ka mògò senumaw ka egilisiw bèè la cogo min na, 34 o cogo la musow kana kuma egilisi kònò, k'a masòrò a dagalen tè u ka kuma. U ka kan ka kolo i ko Ala ka sariya b'a fò cogo min na. 35 Ni u b'a fè ka ko dò faamu, u ka u yèrèw cèw ɲininka u ka so, katuguni a tè bèn muso ka kuma egilisi kònò. 36 Yala Ala ka kuma bòra aw fè yen wa? Wala a sera aw dama ma? 37 Ni mògò dò bè miiri ko ale ye kira ye, ko Ala ka nilifèn dò b'a fè, o k'a dòn ko ne ye min sèbèn ka ci aw ma, o ye Matigi ka ci fòlen de ye. 38 Nka ni mògò dò ye ko dònbali ye o ko la, o tigi ka to o ko dònbaliya la. 39 O de y'a to balimaw, aw ka kè kiraya kèli fè, aw kana mògò bali ka kan wèrèw fò fana. 40 Nka fèn bèè ka kècogo bènnen na, a ko ɲènabòlen koɲuman.



15

1 Balimaw, ne ye Kibaru Duman min fò aw ye, aw sònna min ma ni aw sabatira o la fana, ne bè aw hakili jigin o de la. 2 Aw kisira o barika la, ni a y'a sòrò aw bè to a kan i ko ne y'a fò aw ye cogo min na. N'o tè, aw ka dannaya na kè fu ye. 3 Ne ye kalan min sòrò k'a lase aw ma, o koba fòlò filè nin ye ko: Krisita sara an ka jurumuw kosòn, ka kèɲè ni Kitabuw ye. 4 A su donna, a kununna a tile sabanan don, ka kèɲè ni Kitabuw ye. 5 A y'i jira Pierè la. O kò, a y'i jira ciden tan ni fila la. 6 O kò, a y'i jira balima dòw la waati kelen na, olu ka ca ni mògò kèmè duuru ye. U caman bè yen halibi, nka u dòw sara. 7 O kò, a y'i jira Yakuba la. O kò, a y'i jira cidenw bèè la. 8 O bèè kò, a y'i jira ne yèrè fana la, a bè i ko a yera den kònò sebali fè, 9 katuguni ne ye cidenw bèè la dògòmannin de ye, ne man kan ka wele ciden yèrè, k'a masòrò ne tugura Ala ka egilisi nòfè k'a tòòrò. 10 Nka ne ye min ye, ne kèra o ye Ala ka nèèma barika la. A ye nèèma min jira ne la, o ma kè fu, katuguni ne ye baara kè ka tèmèn u tòw bèè kan. O bèè n'a ta ne yèrè ma o kè, nka Ala ka nèèma min bè ne la, o de ye baara kè ne fè. 11 O de kosòn, a kèra ne bolo wo, a kèra olu bolo wo, an bè min waajuli kè ani aw dara min na, o ko don. 12 Ayiwa, an bè waajuli kè ko Krisita kununna ka bò suw cèma. O tuma la, aw dòw bè se k'a fò cogo di ko suw tè kunun? 13 Ni suw tè kunun, Krisita fana ma kunun. 14 Ni Krisita ma kunun ka bò suw cèma, an ka waajuli kèra fu, aw ka dannaya fana ye fu ye. 15 Ka tèmèn o kan, an bè sòrò seere nkalontigèlaw ye Ala ko la, katuguni an ye seereya kè a ko la ko a ye Krisita lakunun ka bò suw cèma. Ni suw tè kunun, Ala ma a lakunun. 16 K'a masòrò ni suw tè kunun, Krisita fana ma kunun fewu. 17 Ni Krisita ma kunun, aw ka dannaya kèra fu, aw bè aw ka jurumuw la halibi. 18 Minnu sara Krisita la, olu fana halakira. 19 Ni an jigi bè Krisita kan ka an to nin diɲè so kònò dama, an ye ɲènibaatòw ye ka tèmèn mògòw bèè kan. 20 Nka tiɲè la, Krisita kununna ka bò suw cèma. Minnu sara, ale ye olu la kununlen fòlò de ye. 21 Saya donna diɲè la mògò kelen sababu la cogo min na, o cogo la fana su kununli nana mògò kelen sababu la. 22 Mògòw bèè bè sa Hadama la cogo min na, o cogo la fana, mògòw bèè na ɲènamaya Krisita la, 23 nka bèè ni a ka waati don. Krisita ye fòlò ye, o kò, minnu ye Krisita taw ye a na tuma la. 24 O tèmènnen kò, laban na se. Krisita na kuntigiya ni sebaaya ni fangatigiya bèè ban, o kò, ka masaya don Fa Ala bolo. 25 K'a masòrò wajibi don Krisita ka sigi masaya kun na fo Ala ka a juguw bèè kolo a ye. 26 An jugu min na ban fèn bèè kò, o ye saya de ye. 27 O de kosòn Kitabu ko: «Ala ye fèn bèè kolo a ye.» Nka ni a y'a fò ko fèn bèè kolola a ye, a jèlen don ko Ala min ye fèn bèè kolo a ye, o sen t'a la. 28 Ni Ala ye fèn bèè kolo Krisita ye tuma min na, o kò, Ala, o min ye fèn bèè kolo a Denkè ye, a Denkè na kolo a ye, walisa Ala ka kè fèn bèè ye, bèè kònò. 29 N'o tè, minnu bè batise mògò salenw kosòn, olu ta tun na kè di? Ni a y'a sòrò tiɲè la ko suw tè kunun, mun y'a to mògòw bè batise u kosòn? 30 An yèrèw dun? Mun y'a to an bè don farati la tuma bèè? 31 Balimaw, ne bè saya da fè don o don. Sababu min y'a to ne ye o fò, o filè nin ye, ko aw ye ne bonyali sababu ye an Matigi Yesu Krisita la. 32 N'a y'a sòrò ne ye waraw kèlè Efese ka kèɲè ni Hadamadenw cogo dòròn ye, ne bèna mun nafa sòrò o la sa? Ni suw tè kunun, «an ka dumuni kè ka minni kè, katuguni sini an na sa.» 33 Aw kana aw yèrèw lafili. Jèɲògòn juguw bè sòn ɲuman tiɲè. 34 A' ye hakili sòrò ka ko bènnenw kè ka jurumu dabila, katuguni aw la mògò dòw ye Ala dònbaliw ye. Ne bè o fò ka aw lamalo. 35 Mògò dò na ɲininkali kè ko: «Suw bè kunun cogo di? Farikolo sifa jumèn na kè u la?» 36 Hakilintanw! I bè si min dan, o tèna falen ni a ma sa. 37 I bè si min dan, o ye kisè gansan dòròn de ye, a dòrò ɲòkisè wala kisè sifa wèrè, nka a na falen ka kè sun min ye, o sun ni o kisè tè cogo kelen na. 38 Ala b'a fè ka o kisè kè fèn min ye, a b'a kè o ye. Fèn min bè bèn kisè bèè kelen-kelen ma, a bè o kè u la. 39 Fèn ɲènamaw farisogo bèè tè sifa kelen ye. Mògò ta ye sifa dò ye, baganw ta ye sifa wèrè ye, kònòw ta ye sifa dò ye, jègèw ta ye sifa wèrè ye. 40 Sanfè fènw ni duguma fènw fana bè yen, nka sanfè fènw nòòrò ye dò ye, duguma fènw nòòrò ye dò wèrè ye. 41 Tile nòòrò ye dò ye, kalo nòòrò ye dò wèrè ye, dolow nòòrò ye dò wèrè ye. Hali dolow bèè nòòrò tè kelen ye. 42 Suw kununli ko fana bè ten. Farikolo tolita bè don, a tolibali bè kunun. 43 A cè jugu bè don, a nòòròma bè kunun. A barikantan bè don, a barikama bè kunun. 44 A farikoloma bè don, a nima bè kunun. Ni farikoloma bè yen, a jèlen don ko nima fana bè yen. 45 O de kosòn a sèbènnen bè ko: «Mògò fòlò Hadama kèra mògò ɲènama ye.» Hadama kosana kèra ni ye min bè ɲènamaya di. 46 O bèè n'a ta, fòlò ta tè nima ye, fò farikoloma. Nima de bè na kòfè. 47 Mògò fòlò bòra dugukolo buguri la, dugukoloma don. Mògò filanan bòra sankolo la. 48 O mògò dugukoloma bè cogo min na, dugukolomaw fana bè ten. O sankolo mògò bè cogo min na, sankolola taw fana bè ten. 49 O mògò dugukoloma ja bè an na cogo min na, o sankolo mògò fana ja na kè an na ten. 50 Balimaw, ne bè nin fò ko: Farisogo ni joli tè se ka Ala ka masaya sòrò fewu. Fèn tolita fana tè se ka tolibaliya sòrò. 51 A filè, ne bè gundo fò aw ye, ko an bèè tèna sa, nka an bèè na yèlèma 52 yòrònin kelen, ɲèkòmi ko kelen na, buru kosana fyè tuma la. Buru na fyè, suw na kunun ka kè tolibaliw ye, an na yèlèma. 53 Wajibi don nin farikolo tolita ka tolibaliya don a kan na, nin farikolo sata ka sabaliya don a kan na. 54 Nin farikolo tolita mana tolibaliya don a kan na, nin sata mana sabaliya don a kan na, o tuma la Kitabu kuma sèbènnen na dafa ko: «Se sòròla saya kan ka a tunun ka a ban.» 55 «E, saya i ka se bè min? E, saya, i baga bè min?» 56 Saya baga ye jurumu ye. Jurumu ka sebaaya bè bò Ala ka sariya de la. 57 Nka barika Ala ye, a bè se di an ma an Matigi Yesu Krisita barika la! 58 O de kosòn ne balima kanulenw, a' ye aw sabati ka kè sigasigabaliw ye. A' ye taa ɲè Matigi ka baara la tuma bèè, k'a dòn ko aw ka baara tèna kè fu Matigi la.



16

1 Wari min bè lajè ka ci Ala ka mògò senumaw ma u dèmèni kosòn, ne ye ci min fò o ko la Galasi jamana egilisiw ye, aw fana k'a kè ka kèɲè n'o ye. 2 Ko, kari don o kari don, aw bèè kelen-kelen ka wari dò bila a dan na aw ka so, ka kèɲè ni aw ka sòròta ye, walisa ne mana na, lajèliw kana kè wari ko la o tuma la. 3 Ni ne sera yen tuma min na, aw ye mògò minnu ɲènatòmò, ne na sèbènw di olu ma ka u ci ka taa Jerusalèm ni aw ka nilifènw ye. 4 Ni kun b'a la ne fana ka taa, u na taa ne fè. 5 Ni ne ye Masedwanè jamana cètigè tuma min na, ne na se aw fè yen, k'a masòrò ne na tèmèn Masedwanè jamana fè. 6 Ne bè miiri ka waati dòònin kè aw cèma. A dòrò ne na fonènè yèrè kè yen, walisa aw ka ne bilasira ne taa yòrò la. 7 Ne t'a fè ka aw ye nin sen in ka tèmèn dòròn, nka ne jigi b'a kan ka waati dò kè aw fè yen, ni Matigi sònna. 8 O bèè n'a ta, ne na to Efese fo Pantekòte ka se, 9 k'a masòrò daba yèlèla ne ɲè ka baara caman kè, an juguw fana ka ca. 10 Ni a y'a sòrò Timote sera yen, aw kana to a ka siran fèn si ɲè aw cèma, katuguni a bè Matigi ka baara kè i ko ne yèrè. 11 Mògò si kana a dògòya, nka a' y'a dèmè k'a bilasira hèrè la, walisa a ka na ne yòrò. Ne bè ale ni balimaw makònò. 12 An balimakè Apolosi ta fan fè, ne y'a deli ko caman ko ale ni balimaw ka taa bò aw ye, nka a sago tun tè ka taa sisan fewu. O bèè n'a ta, ni a ye waati bènnen sòrò, a na taa. 13 A' ye to aw ɲè na. Aw sinsinnen ka to dannaya la. A' ye aw ja gèlèya ka aw barika bonya. 14 A' ye fèn bèè kè aw cèma ni kanuya ye. 15 Balimaw, aw bè Sitèfanasi ni a ka so mògòw dòn, ko olu fòlò ye dannaya kè Akayi jamana la, ko u ye u yèrèw di Ala ka mògòw dèmèni kama. Ne bè aw deli 16 ko aw ka kolo o bòɲògònko mògòw ye, ani minnu bèè bè u dèmè baara la. 17 Sitèfanasi ni Fòrtunatus ani Akayikus nali diyara ne ye haali. Fèn min dèsèra ne la k'a sòrò aw tè yan, olu ye ne dèmè n'o ye. 18 U ye ne dusu suma, ka aw fana dusuw suma. Aw ka o bòɲògònko mògòw bonya. 19 Asi jamana egilisiw bè aw fo. Akilas ni Prisiye bè aw fo kosèbè Matigi la, ani egilisi min bè lajè u ka so. 20 Balimaw bèè bè aw fo. A' ye ɲògòn fo ni da susuli senuma ye. 21 Ne Paul yèrè ye nin foli sèbèn. 22 Ni mògò dò tè Matigi kanu, o ka danga. Maranata, o kòrò, an Matigi, i ka na! 23 Matigi Yesu ka nèèma ka kè aw fè. 24 Ne bè aw bèè kanu Krisita Yesu la.



AMAZING GRACE BIBLE INSTITUTE